\id 1JN NT0143 - Clark - May, 1995 
\h 1 Yoane 
\toc1 Pepa Yoane iŋgere muŋga panzi kalo-tawana tamâta 
\toc2 1 Yoane 
\toc3 1Yn 
\mt1 1 YOANE  
\mt2 Pepa Yoane iŋgere muŋga panzi kalo-tawana tamâta  
\ib  
\ip \it Yesu Kirisi ne pâri-tamâta Yoane iŋgere pâri ara marumbu lâ, ŋineŋga muli iŋgere ŋgua ŋine panzi kalo-tawana tamâta ŋgu pinde. I nde koŋa lâ, aku i ilo ndo keno panzi kalo-tawana tamâta ŋinde, kala ipatu ŋanzi tu i natu wukale. Tamâta pinde silaŋenzi ŋgu siporo tu Yesu ipâŋga tamâta mao tia, aku siporo tu nenda kiesaka nde kelekele ŋalae tia. Yoane ileleanzi laŋeŋa tamâta ŋinde, ku itula ŋgua pwataki ŋana tini-mwasa ne vetâŋa kâ. Iporo tu Maro Kindeni ilo ndo keno pa kinda, kala isupwa Yesu imâ, aku Yesu ilo keno mine nâ kala imâte ŋana kinda kâ. Mine nde ara ŋana kinda taitu-taitu ma tininda mwasa panzi tamâta rârâni.\it*  
\c 1  
\s1 Ŋgua Via ipâŋga nia yo  
\p
\v 1 Maka uru katula ŋgua pwataki ŋana Ŋgua Via kâ, i ŋa toŋge tu Yesu. Lâ zo ŋinde Maro Kindeni ipulia samba wa tâno tia yo, ande Ŋgua ŋinde imo muŋgani lâ, kala ŋine i imo mine nâ. Maka kaloŋo i ku matama kamora i lâ. Maka kalea sondo nâ pa i, aku kataŋo i tini lâ.  
\v 2 Via ŋinde nde ipâŋga nia yo lâ. Maka kamora i, aku uru katula ŋgua pwataki ŋana ŋinde kâ. Kala ŋine maka kaporo pwataki pa miki tu Ŋgua Via ŋinde imo via mine ku imo nâ. Muŋgani i imo kuku Tama, ŋineŋga ipâŋga nia yo, aku maka kamora lâ.  
\v 3 Maka kamora wa kaloŋo ŋinde marumbu lâ, ande kala maka uru katula ŋgua pwataki pami ŋana ŋinde kâ. Maka kaveta mine ŋana duvi ŋine kâ; maka iloma tu miki ma kamo ilomi taitu kuku maka. Aku kinda tao ilonda ilâ taitu kunzi Tama kuku Natu Yesu Kirisi rua.  
\v 4 Maka kaŋgere ŋgua lâ pepa ŋine tini imâ pami ŋana ma iveta nenda ndekâŋa ipipi ndo lâ ilonda kalonda.   
\s1 Ara ŋana kinda ma toka sinâla ilo nâ  
\p
\v 5 Yesu Kirisi itula ŋgua pwataki pa maka kaloŋo lâ, ande kala maka katula ŋguani ndaina pwataki pa miki. Ŋgua ŋinde nde mine: Maro Kindeni i nde sinâla, aku kondoma toŋge ikeno pa i, ande tia ndo kanaŋo.  
\v 6 Ambo kinda ma taporo tu, “Naŋa ao iloŋgu ilâ taitu kuku Maro Kindeni”, andeta nenda yokâŋa ikeno lâ kondoma ilo, ande nenda ŋgua ŋinde nde mao tia. Ŋgua ŋinde nde laŋeŋa nâ, ŋana tu kinda ŋandai tapono muli pa vetâŋa mao ŋga.  
\v 7 Taitu miki kaloŋo ŋga; ambo kinda toka lâ sinâla ilo, itogo Maro Kindeni uru imo sinâla ilo mine, ande kinda tamo ilonda taitu kunzi Maro Kindeni ne tamâta. Aku Maro Kindeni Natu Yesu see izavaru nenda kiesaka rârâni piti lâ tininda, aku iveta kinda tamo tava ilonda mbâra-mbâra nâ.   
\p
\v 8 Ambo kinda ma taporo tu, “Naneŋgu kiesaka toŋge ikeno tia”, ande kinda taporo laŋeŋa pa warakânda, aku ŋgua mao ikeno ilonda kalonda tia ndo.  
\v 9 Andeta miki kaloŋo ŋga; ambo kinda ma tapatula nenda kiesaka pa Maro Kindeni, ande i ma iveta ikura ne ŋgua pâŋa mine. I ma iveta kie ara ndo pa kinda mine; i ma izavaru kiesaka piti lâ tininda, aku ma izavarunzi vetâŋa soki-soki ndia rârâni uru taveta ŋinde piti tona. Aku i ne vetâŋa ŋinde ma iveta kinda tamo tava ilonda mbâra-mbâra ndo.  
\v 10 Ambo kinda ma taporo tu, “Naŋa muŋga aveta kiesaka toŋge tia”, ande ŋinde itogo kinda taporo ŋgua tu Maro Kindeni nde laŋeŋa tamwata. Ambo mine, ande Maro Kindeni kawa ŋgua ikeno ilonda kalonda, ande tia.   
\c 2  
\s1 Yesu Kirisi nde kinda nenda Pavilâŋa Tamwata  
\p
\v 1 Naŋa aŋgere ŋgua ŋine imâ pa miki, naŋa natuŋgu wukale, ŋana isukami tu kapu mulimi pa kiesaka rârâni. Andeta miki kaloŋo ŋga; ambo tamâta toŋge iveta kiesaka, ande nenda Pavilâŋa Tamwata imo kuku Tamânda, aku i uru ino papa i ŋana kinda kâ. Inani Yesu Kirisi, i zuzuli tamwata.  
\v 2 I tamwata ipile ne via ku imâte ŋana izavaru nenda kiesaka piti kâ. Andeta i ŋandai iveta mine ŋana ivila kinda simbonda nâ. Iveta mine ŋana ivilanzi tamâta rârâni simo tâno ndoni.   
\s1 Ambo tamâta toŋge isama Maro Kindeni kilala, ande i ma ipaveta kuku Maro Kindeni kawa ŋgua  
\p
\v 3 Ambo kinda ma tapaveta kuku Maro Kindeni ne tukuŋa, ande vetâŋa ŋinde ma itula pwataki pa warakânda tu kinda tasama i kilala sondo ndo.  
\v 4 Ambo tamâta toŋge ma iporo tu, “Naŋa asama Maro Kindeni kilala sondo ndo”, andeta i ŋandai ipaveta kuku Maro Kindeni ne tukuŋa ŋga, ande tamâta ŋinde nde laŋeŋa tamwata, aku ŋgua mao ikeno i ilo kalo, ande tia.  
\v 5 Ambo tamâta toŋge ipaveta kuku Maro Kindeni kawa ŋgua, ande i ne vetâŋa ŋinde itula pwataki tu i ilo ndo ikeno mao nâ pa Maro Kindeni. Mâsi taituni ŋinde uru itula pwataki tu kinda tapaipa kuku Maro Kindeni lâ.  
\v 6 Ambo tamâta toŋge ma iporo tu, “Naŋa apaipa kuku Maro Kindeni lâ”, ande i ne ŋgua ŋinde ma ipâŋga kanaŋo mine; i ma iveta vetâŋa ara, itogo Yesu muŋga iveta mine.   
\p
\v 7 Niŋgu-nambwe wukale, naŋa ma aŋgere ŋgua tukuŋa wasaseki toŋge imâ pami, ande tia. Ŋine nde tukuŋa siŋga, aku miki kakai muŋgani lâ. Miki kaloŋo ŋgua ŋana tukuŋa ŋine kâ marumbu lâ.  
\v 8 Andeta tukuŋa kala ŋine naŋa ma aŋgere pami, ande tukuŋa wasaseki tona. Miki nemi vetâŋa ara tava Yesu ne vetâŋa ara, ande ŋinde itula tukuŋa ŋinde kilala pwataki tu ŋinde nde ŋgua mao. Ŋana tu kondoma ŋga laiti ŋana marumbu kâ, aku sinâla mao ŋinde nde imâ ipâŋga lâ, kala imo isinala nia lâ.   
\p
\v 9 Ambo tamâta toŋge ma iporo tu, “Naŋa amo lâ sinâla ilo”, andeta i uru wisi nâna pa ninambwe kalo-tawana tamâta toŋge, ande i imo lâ kondoma ilo yo.  
\v 10 Tamâta ea uru tini mwasa nâ panzi ninambwe kalo-tawana tamâta, ande i imo lâ sinâla ilo, aku kelekele toŋge ŋana iveta i pata ndue kâ, ande tia.  
\v 11 Aŋga tamâta ea uru wisi nâna pa ninambwe kalo-tawana tamâta, ande i imo kondoma ilo ku iyoka lâ kondoma ilo. Aku izizâla tu i ilâ pa nia ndia, ŋana tu kondoma nde ipono i mata ndo lâ.   
\p
\v 12 Naŋa natuŋgu wukale, miki kalomi tawana Yesu Kirisi, aku ŋana duvi ŋinde kâ Maro Kindeni izavaru nemi kiesaka piti lâ. Mine kala naŋa aŋgere ŋgua ŋine imâ pami.   
\p
\v 13 Aŋga miki tamâta kokoŋa, miki kasama i kilala sondo ndo, inani imo muŋgani lâ, kala ŋine imo mine nâ. Mine kala naŋa aŋgere ŋgua ŋine imâ pami.  
\p Aŋga miki tamâta limoa, miki kapole Sadana lâ. Mine kala naŋa aŋgere ŋgua ŋine imâ pami. Naŋa natuŋgu wukale, miki kasama Tamânda Maro Kindeni kilala sondo ndo. Mine kala naŋa aŋgere ŋgua ŋine imâ pami.   
\p
\v 14 Miki tamâta kokoŋa, miki kasama i kilala sondo ndo, inani imo muŋgani lâ, kala ŋine imo mine nâ. Mine kala naŋa aŋgere ŋgua ŋine imâ pami. Aku miki tamâta limoa, miki tinimi walo, aku Maro Kindeni kawa ŋgua ikeno kaika lâ ilomi kalomi. Aku miki kapole Sadana lâ. Mine kala naŋa aŋgere ŋgua ŋine imâ pami.   
\s1 Kinda ma ilonda pa tâno ne kelekele ndimo  
\p
\v 15 Miki ma ilomi pa tâno ne vetâŋa ndimo, aku ilomi pa kelekele toŋge ikeno tâno kulu, mine ndimo. Ambo tamâta toŋge ilo keno pa tâno ne vetâŋa, ande i ilo keno pa kinda Tamânda, ande tia.  
\v 16 Kinda tasama tu tâno ne vetâŋa rârâni nde vetâŋa ŋana iveta wisinda kâki wa ilonda yosi wa tapasuka tininda wa. Vetâŋa ŋinde rârâni ŋandai iyoka pa Tamânda imâ pa kinda ŋga. Ŋinde nde tâno ne vetâŋa nâ.  
\v 17 Tâno ŋine ma muli marumbu, aku tâno ne vetâŋa wa kelekele mona-mona ŋine rârâni ma marumbu tona. Aŋga tamâta ea ipaveta kuku Maro Kindeni kawa ŋgua, ande i ma imo via ku imo nâ.   
\s1 Yesu Kirisi ne kazâŋa tamâta nde imâ ipâŋga lâ  
\p
\v 18 Naŋa natuŋgu wukale, zo ŋana tâno ne zo marumbu kâ nde imâ ipâŋga laiti lâ. Muŋga, miki kaloŋo pâri tu Yesu Kirisi ne kazâŋa tamâta sakamao ma muli imâ ipâŋga. Kala ŋine Yesu Kirisi ne kazâŋa tamâta rârâ ŋinde nde simâ sipâŋga lâ. Mine kala kinda tasama tu zo ŋana tâno ne zo marumbu kâ nde imâ ipâŋga laiti lâ.  
\v 19 Nia ndoyo, kazâŋa tamâta ŋinde simo kuku kinda kalo-tawana tamâta, andeta ŋineŋga sipile kinda ku silâ lâ. Taitu kinzi muŋga simo ninda-nambwe mao, ande tia. Ambo kinzi simo ninda-nambwe mao, ande kinzi ma simo kuku kinda yo. Andeta sipile kinda, aku silâ lâ. Mine kala kinda tasama tu tamâta ŋinde rârâni ŋandai simo ninda-nambwe mao ŋga.   
\p
\v 20 Aŋga nenda Maro Ŋalae, ina Sapâŋa Tamwata, muŋgani isupwa Koroani Sapâŋa imâ pami, ŋana itula pwataki tu ipatea miki ŋana kakai i ne walo ŋalae. Mine kala miki rârâni kasama ŋgua mao marumbu lâ.  
\v 21 Tiambo miki kazizâla ŋana ŋgua mao kâ, aku ŋana duvi ŋinde kâ naŋa aŋgere ŋgua ŋine imâ pami, a? Mine tia. Miki kasama ŋgua mao marumbu lâ, aku kasama tu ŋgua mao ikura ŋana ipagugua ŋgua laŋeŋa toŋge tia ndo. Mine kala naŋa aŋgere ŋgua ŋine imâ pami.  
\v 22 Ayo, laŋeŋa tamwata nde ea. Ambo tamâta toŋge ma iporo tu, “Yesu ŋandai Maro Kindeni ne Pateâŋa Tamâta Kirisi ŋga”, ande tamâta ŋinde nde laŋeŋa tamwata. Tamâta ea iporo ŋgua kaŋa mine, ande i ipu muli panzi Tama ku Natu rua. Mine kala i imo Yesu Kirisi ne kazâŋa tamâta.  
\v 23 Tamâta ea ipu muli pa Yesu Kirisi, ande ipu muli pa i Tama tona mine nâ. Aŋga tamâta ea ipatula tu i kalo tawana Maro Kindeni Natu, ande i kalo tawana Maro Kindeni tona mine nâ.   
\s1 Koroani Sapâŋa uru ipanana kinda ŋana ŋgua mao kâ  
\p
\v 24 Ara ŋana miki ma kasaŋa ŋgua muŋga kaloŋo ŋinde kaika. Ambo miki ma kasaŋa ŋgua ŋinde kaika ndindi nâ, ande miki kala ma kapaipa kunzi Tama kuku Natu rua.  
\v 25 Muŋgani Yesu Kirisi ipa ŋgua tu ma via mao ilua kinda, ŋana ma tamo viânda mine ku tamo nâ.   
\p
\v 26 Naŋa aŋgere ŋgua ŋine imâ pami, aku atu apananami ŋananzi laŋeŋa tamwatanzi, kinzi ŋinde situ sikai laŋeŋa pami ŋana ma kapile nemi kalo tawana kâ.  
\v 27 Andeta Yesu muŋgani itu nzâmbe pami kala isupwa Koroani Sapâŋa imâ pami lâ, aku Koroani Sapâŋa tamwata ipaipa kumi. Mine kala tamâta toŋge ne wurâta ikeno ŋana ipanana miki kâ, ande tia. Koroani Sapâŋa tamwata uru ipananami ŋana vetâŋa rârâni kâ, aku i ne ŋgua ŋinde nde mao kanaŋo. Ŋinde nde ŋgua laŋeŋa tia ndo. Mine nde ara ŋana miki ma kapaipa kuku Yesu Kirisi, ikura Koroani Sapâŋa muŋga ipananami mine.   
\s1 Mine nde kinda tamo Maro Kindeni natu wukale  
\p
\v 28 Ayo, naŋa natuŋgu wukale, ara ŋana miki ma kapaipa sondo kuku Yesu Kirisi. Ambo miki ma kaveta mine, ŋineŋga lâ i ne zo ŋana imâ ipâŋga nia yo, ande kinda ma taruru tia. Kinda ma tamandi i nao, aku ma mainda tia.  
\v 29 Miki kasama tu Yesu Kirisi nde Zuzuli Tamwata. Mine kala miki kasama mine nâ tu tamâta ea kinzi uru siveta vetâŋa ara, ande kinzi ŋinde simo Maro Kindeni natu wukale.   
\c 3  
\p
\v 1 Mao nâ, kinda Tamânda tini mwasa ndo pa kinda, aku i ilo ndo keno pa kinda! Mine kala i io ŋoa lâ tininda tu, “Maro Kindeni natu wukale”. Aŋga kinzi tâno tamâta ŋandai sisama Maro Kindeni kilala ŋga. Mine kala kinzi sisama kinda kilalânda tia.  
\v 2 Niŋgu-nambwe wukale, kala ŋine kinda tamo Maro Kindeni natu wukale. Aŋga lâ zo muli, ande kinda ma tamo mâsi mana. Ŋinde kilalani ŋandai ipâŋga nia yo ŋga. Taitu kinda tasama tu lâ Yesu Kirisi ne zo ŋana imâ ipâŋga lâ nia yo, ande kinda ma tamora i kilala mao kanaŋo, aku i ma ilele kinda tapâŋga tatogo i tamwata mine.  
\v 3 Tamâta ea kinzi uru sio tininzi ŋana i kâ, kinzi ŋinde sipaveta warakanzi sondo ndo, ŋana ma simo ilonzi mbâra-mbâra lâ Maro Kindeni nao, itogo Yesu Kirisi imo mine.   
\p
\v 4 Tamâta ea uru iveta kiesaka, ande tamâta ŋinde ilaŋa ipole Maro Kindeni ne tukuŋa. Mao nâ, kiesaka uru ikai kazâŋa pa ŋgua tukuŋa.  
\v 5 Andeta miki kasama tu Yesu Kirisi imâ ipâŋga ŋana izavaru kiesaka piti kâ, aku kiesaka toŋge ikeno pa i tia ndo kanaŋo.  
\v 6 Ambo tamâta toŋge ipaipa kuku Yesu Kirisi, ande i ma ipaveta kuku kiesaka ne vetâŋa tia ndo. Ambo tamâta toŋge ipaveta kuku kiesaka ne vetâŋa, ande kinda tasama tu tamâta ŋinde ŋandai imora Yesu Kirisi ku isama i kilala ŋga.   
\p
\v 7 Naŋa natuŋgu wukale, miki kapakatona sondo ŋga. Tia ma tamâta toŋge ilaŋemi. Tamâta ea uru iveta vetâŋa ara, ande i imo tamâta sondo lâ Maro Kindeni nao, itogo Yesu Kirisi uru imo mine.  
\v 8 Muŋgani, lâ nia ndoyo, aku imâ lee ipâŋga lâ zo ŋine, ande Sadana iveta kiesaka ku imo nâ. Mine kala tamâta ea uru iveta kiesaka, ande i imo Sadana natu. Taitu Maro Kindeni Natu muŋgani imâ ipâŋga nia yo ŋana izavaru Sadana ne wurâta kâ.  
\v 9 Ambo Maro Kindeni iveta tamâta toŋge ipâŋga itogo i natu mine, ande tamâta ŋinde ma ipaveta kuku kiesaka ne vetâŋa tia ndo, ŋana tu Maro Kindeni kilala imo kuku i. Tamâta ŋinde ikura tu ipaveta kuku kiesaka ne vetâŋa tia ndo kanaŋo, ŋana tu i imo itogo Maro Kindeni natu mine.  
\v 10 Ayo, tamâta ea kinzi simo Maro Kindeni natu wukale, a? Aŋga tamâta ea kinzi simo Sadana natu wukale, a? Ŋinde kinda takura tu tasama, ŋana tu tamâta ea tininzi pwâka tu sipaveta kuku vetâŋa ara, ande tamâta ŋinde simo Maro Kindeni natu wukale tia. Aku mine nâ, tamâta ea ŋandai tininzi mwasa panzi kalo-tawana tamâta, ande kinzi kala simo Maro Kindeni natu wukale, ande tia.   
\s1 Yesu itula tini-mwasa ne mâsi kilala pwataki lâ  
\p
\v 11 Muŋgani, aku imâ lee ipâŋga lâ zo ŋine, ande miki uru kaloŋo ŋgua mine: kinda taitu-taitu ma tininda mwasa panzi tininda pinde.  
\v 12 Miki ma kamo katogo timbunda Adam natu Kein, mine ndimo. Kein nde imo Sadana ne tamâta, aku ipu tai Abel pâta imâte. Aku i ne vetâŋa ŋinde nde duvi mine; i tamwata uru iveta vetâŋa sakamao, aŋga tai nde uru iveta vetâŋa ara.   
\p
\v 13 Niŋgu-nambwe wukale, ambo kinzi tâno tamâta ma sikai kazâŋa pami, ande miki ma wisimi motu ŋana ŋinde kâ ndimo.  
\v 14 Kinda uru tao ilonda ndo ilâ panzi ninda-nambwe kalo-tawana tamâta. Aku vetâŋa ŋinde itula pwataki tu kinda tapile mateŋa ne vetâŋa marumbu lâ, aku tapaveta kuku via nâ ne vetâŋa. Tamâta ea ŋandai ilo ndo keno panzi i tini pinde, ande tamâta ŋinde ipaveta kuku mateŋa ne vetâŋa yo.  
\v 15 Tamâta ea uru ikai kazâŋa pa ninambwe, aku wisi nâna ndo papa, ande tamâta ŋinde irerege kuku tamâta ŋana ipunzi tamâta pâta simâte kâ. Aku miki kasama tu ambo tamâta toŋge ipu i tini pinde pâta imâte, ande via mao ikeno pa i, ande tia. Tamâta mine ŋandai tamâta ŋana imo via ku imo nâ.   
\p
\v 16 Yesu Kirisi ipile tamwata ne via ku imâte ŋana ivila kinda kâ. Aku i ne vetâŋa ŋinde itula tini-mwasa ne mâsi kilala pwataki pa kinda. Aku ara ŋana kinda kala mine nâ ma tapile nenda via ŋana tavilanzi ninda-nambwe kalo-tawana tamâta kâ.  
\v 17 Ambo tâno ŋine ne mbaliŋa ikeno pa tamâta toŋge, aku imora ninambwe toŋge imo sugorai ŋana kelekele pinde kâ, andeta i kalo sukâŋa ŋana ninambwe ŋinde tia, ande ŋinde itula pwataki tu tamâta ŋinde ŋandai ipaveta kuku Maro Kindeni ne mâsi ŋana tini mwasa ndo panzi tamâta kâ.  
\v 18 Naŋa natuŋgu wukale, ambo kinda kawânda nâ taporo tu kinda tininda mwasa panzi tininda pinde, ande ŋinde nde ara tia. Ara ŋana kinda ma tao ilonda ilâ mao nâ panzi, aku taveta kenda ara nâ panzi.   
\s1 Kinzi kalo-tawana tamâta ma siruru lâ Maro Kindeni nao, ande tia  
\p
\v 19-20 Ambo kinda tininda mwasa ndo panzi tininda pinde, ande ŋinde itula pwataki tu kinda tapono muli sondo ndo pa ŋgua mao. Mine kala, ambo ilonda itu ikai kazâŋa pa warakânda ŋana vetâŋa toŋge kinda muŋga taveta, ande kinda ma kalonda loko tia. Kinda wisinda ma puu ndue lâ Maro Kindeni nao, ŋana tu i isama vetâŋa rârâni, aku i ne ilo-kalo ipole nenda ilo-kalo ndo lâ.   
\p
\v 21 Niŋgu-nambwe wukale, ambo ilonda ikai kazâŋa pa warakânda tia, ande kinda tasama tu kinda ma taruru ŋana tamandi lâ Maro Kindeni nao, ande ma tia.  
\v 22 Ŋineŋga lâ zo ndia kinda tano pa i tu iveta vetâŋa toŋge, ande i ma ipaloŋo pa nenda noŋa, ŋana tu kinda uru tapaveta kuku i ne tukuŋa, aku tapaveta kuku vetâŋa rârâni i ilo papa ŋinde tona.  
\v 23 Aku i ne tukuŋa nde ikeno mine: kinda ma kalonda tawana i natu Yesu Kirisi, aku kinda taitu-taitu ma tininda mwasa ndo panzi tininda pinde, ikura tukuŋa ŋinde i muŋga itula pa kinda mine.  
\v 24 Tamâta ea uru ipono muli pa Maro Kindeni ne tukuŋa, ande tamâta ŋinde ipaipa kuku Maro Kindeni, aku Maro Kindeni kala ipaipa kuku i mine nâ. Maro Kindeni ne Koroani Sapâŋa ilua kinda lâ, aku Koroani Sapâŋa ŋinde uru itula pwataki pa kinda mine tu Maro Kindeni ipaipa kuku kinda.   
\c 4  
\s1 Ara ŋana kinda ma takai samâŋa panzi koroani  
\p
\v 1 Niŋgu-nambwe wukale, ŋgua-tulâŋa tamâta laŋeŋa rârâ uru soka tâno kulu silâ wa simâ wa. Mine kala, ambo tamâta toŋge imâ pami ku iporo tu, “Maro Kindeni ne Koroani uru itula ŋgua pa naŋa”, ande miki ma kalomi tawana i walele ndimo. Ara ŋana miki ma kakai samâŋa panzi koroani, ŋana ma kasama kilalanzi kâ. Ŋineŋga miki ma kasama tu koroani ŋinde uru imo kuku Maro Kindeni tâku tia tâku.  
\v 2 Aku vetâŋa ŋana itula Maro Kindeni ne Koroani kilala pwataki pami, ande mine: ambo koroani toŋge itula ŋgua lâ tamâta toŋge kawa tu, “Yesu Kirisi muŋga imo kuku Maro Kindeni, ŋineŋga ipâŋga tamâta mao”, ande ŋinde nde Maro Kindeni ne Koroani.  
\v 3 Ambo koroani toŋge ŋandai itula ŋgua kaŋa mine ŋana Yesu kâ, ande ŋinde nde Maro Kindeni ne Koroani, ande tia. Ŋinde nde koroani toŋge, aku koroani ŋinde nde koroani ŋana ikai kazâŋa ŋalae tina pa Yesu Kirisi kâ. Muŋga miki kaloŋo koroani ŋinde parina tu i ma muli imâ, kala ŋine imâ ipâŋga lâ, kala imo tâno kulu.   
\p
\v 4 Naŋa natuŋgu wukale, miki nde Maro Kindeni ne tamâta, aku miki kapolenzi ŋgua-tulâŋa tamâta laŋeŋa ŋinde marumbu lâ, ŋana tu Koroani Sapâŋa imo ilomi, aku i ne walo ipole Sadana ne walo, ina kala uru imo lâ tâno tamâta ilonzi.  
\v 5 Kinzi tamâta ŋinde nde tâno tamâta nâ. Mine kala nenzi ŋgua nde tâno ne ŋgua nâ, aku kinzi tâno tamâta uru sipono muli pa nenzi ŋgua ŋinde.  
\v 6 Aŋga kinda nde Maro Kindeni ne tamâta, aku tamâta ea isama Maro Kindeni kilala sondo, ande i uru ipono muli pa nenda ŋgua. Ambo tamâta toŋge imo Maro Kindeni ne tamâta tia, ande i ma ipono muli pa nenda ŋgua, ande tia. Ŋana mâsi mine kâ, ande kinda takura tu tasama koroani mao kilala, aku kinda takura tu tasama koroani laŋeŋa kilala mine nâ.   
\s1 Tamâta ea tini mwasa pa Maro Kindeni, ande i ma tini mwasa panzi i tini pinde mine nâ  
\p
\v 7 Niŋgu-nambwe wukale, ara ŋana kinda taitu-taitu ma tininda mwasa nâ panzi tininda pinde, ŋana tu Maro Kindeni nde tini-mwasa warika. Ambo tamâta toŋge tini mwasa ndo panzi i tini pinde, ande tamâta ŋinde imo itogo Maro Kindeni natu mine, aku isama Maro Kindeni kilala marumbu lâ.  
\v 8 Maro Kindeni nde tini-mwasa warika. Mine kala, ambo tamâta toŋge ŋandai tini mwasa panzi i tini pinde, ande i isama Maro Kindeni kilala nde tia.  
\v 9 Maro Kindeni isupwa i Natu taituni indue imâ tâno kulu ŋana i ma via mao ilua kinda. Aku Maro Kindeni ne vetâŋa ŋinde itula pwataki tu i ilo ndo keno pa kinda.  
\v 10 Maro Kindeni itula tini-mwasa ne vetâŋa pwataki mine; muŋga, kinda ilonda ikeno pa Maro Kindeni, ande tia. Andeta nia ndoyo i ilo ndo keno pa kinda, kala isupwa Natu indue imâ tâno kulu ku imâte ŋana izavaru nenda kiesaka piti lâ tininda.   
\p
\v 11 Niŋgu-nambwe wukale, Maro Kindeni ne vetâŋa ŋinde itula pwataki tu i ilo ndo keno pa kinda. Mine nde ara ŋana kinda taitu-taitu ma tininda mwasa ndo panzi tininda pinde mine nâ.  
\v 12 Tamâta toŋge muŋga imora Maro Kindeni, ande tia. Andeta miki kaloŋo ŋga; ambo kinda ilonda ndo keno panzi tininda pinde, ande ŋinde itula pwataki tu Maro Kindeni imo kinda ilonda. Aku i ne tini-mwasa ŋinde ma ipâŋga ŋalae ndo lâ nenda vetâŋa.   
\p
\v 13 Maro Kindeni i tamwata ne Koroani Sapâŋa ilua kinda lâ. Mine kala kinda tasama tu kinda tapaipa kuku i lâ, aku i kala ipaipa ku kinda mine nâ.  
\v 14 Kinda Tamânda io Natu indue imâ ŋana iyaute kinda tâno tamâta rârâni piti lâ kondoma ilo. Ŋinde kinda tamora lâ, aku uru tatula ŋgua pwataki ŋana vetâŋa ŋinde kâ.  
\v 15 Tamâta ea ipatula ne kalo-tawana pwataki mine tu, “Yesu nde Maro Kindeni Natu”, ande Maro Kindeni ipaipa kuku tamâta ŋinde, aku i kala ipaipa kuku Maro Kindeni mine nâ.  
\v 16 Mine nde kinda tasama ku kalonda tawana mine tu Maro Kindeni ilo ndo keno pa kinda.  
\p Maro Kindeni nde tini-mwasa warika, aku tamâta ea uru tini mwasa ndo panzi i tini pinde, ande ipaipa kuku Maro Kindeni, aku Maro Kindeni kala ipaipa kuku i.  
\v 17 Ambo kinda ma tamo mine, ande mâsi ŋana tini-mwasa kâ ma ipâŋga ŋalae ndo lâ nenda vetâŋa. Aku kinda ma taruru ŋana zo muli ŋinde Maro Kindeni ma ipare nia panzi tamâta kâ, ande ma tia. Kinda ma taruru tia, ŋana tu lâ zo ŋana kinda tamo tâno ŋine kulu, ande kinda tamo togo Yesu Kirisi tamwata imo mine.  
\v 18 Mine nde kinda ma taruru tia. Ambo tamâta toŋge tini mwasa panzi i tini pinde, ande i ma iruru tia. Ambo tini-mwasa ne mâsi ma ipâŋga ŋalae ndo lâ tamâta toŋge ne vetâŋa, ande mâsi ŋinde ma isoki mâsi ŋana ilo-ruruŋa kâ piti. Mâsi ŋana ilo-ruruŋa kâ ŋinde nde duvi mine; ambo tamâta toŋge isama tu i ma muli ikai kulu ŋana ne vetâŋa sakamao kâ, ande i ma iruru. Ambo tamâta toŋge iruru, ande kinda tasama tu tini-mwasa ne mâsi ŋandai ikeno kaika lâ i ne vetâŋa ŋga.   
\p
\v 19 Nanayoni, Maro Kindeni ne tini-mwasa nde ikeno pa kinda lâ. Mine kala kinda uru tapono muli pa mâsi ŋana tini-mwasa kâ.  
\v 20 Ambo tamâta toŋge ma iporo tu, “Naŋa iloŋgu ndo keno pa Maro Kindeni”, andeta i uru wisi nâna papa ninambwe kalo-tawana tamâta toŋge, ande tamâta ŋinde i nde laŋeŋa tamwata. Kinda tamo kunzi ninda-nambwe kalo-tawana tamâta, aku uru tapamorai. Andeta tamâta toŋge muŋga imora Maro Kindeni, ande tia. Mine kala ambo tamâta toŋge ŋandai tini mwasa pa i ninambwe kalo-tawana tamâta toŋge, ande i ma ikura tu tini mwasa pa Maro Kindeni, ande tia.  
\v 21 Muŋga Yesu Kirisi itula tukuŋa ŋine pa kinda; ambo tamâta toŋge ilo ndo keno pa Maro Kindeni, ande i ma ilo ndo keno panzi ninambwe kalo-tawana tamâta mine nâ.   
\c 5  
\s1 Kinzi kalo-tawana tamâta sipole tâno ne walo marumbu lâ  
\p
\v 1 Tamâta ea kalonzi tawana tu Yesu nde Maro Kindeni ne Pateâŋa Tamâta Kirisi, ande kinzi ŋinde rârâni simo Maro Kindeni natu wukale. Ambo tamâta toŋge ilo ndo keno pa tamâta toŋge, ande i ma ilo ndo keno panzi tamâta ŋinde natu wukale tona.  
\v 2 Ambo kinda ma tao ilonda ndo ilâ pa Maro Kindeni ku tapono muli pa i ne tukuŋa, ande mâsi ŋinde ma itula pwataki tu ilonda ndo keno panzi Maro Kindeni natu wukale tona.  
\v 3 Ambo kinda tao ilonda ndo ilâ pa Maro Kindeni, ande kinda ma tapono muli pa i ne tukuŋa rârâni. Aku i ne tukuŋa ŋinde uru iveta malia pa kinda, ande tia.  
\v 4 Tamâta ea kinzi simo Maro Kindeni natu wukale, ande kinzi ŋinde sikura tu sipole tâno ŋine ne walo. Kinda nenda kalo-tawana isuka kinda ŋana tamandi kaika tapole kazâŋa ku tatawa tâno ŋine ne walo ndue.   
\s1 Maro Kindeni itula i Natu kilala pwataki  
\p
\v 5 Ea ikura tu ipole tâno ŋine ne walo ku itawa walo ŋinde ndue, a? Tamâta ea kalonzi tawana tu Yesu nde Maro Kindeni Natu, kinzi tamâta ŋinde simbonzi nâ sikura tu sipole tâno ŋine ne walo.  
\v 6 Yesu Kirisi indue imâ lâ, aku vetâŋa rua situla i kilala pwataki. I ne lââ-liliŋa itula i kilala pwataki, aku i see ŋinde ipaliŋi lâ kâi popole tini, ande ŋinde kala itula i kilala pwataki tona. Lââ simbo nâ itula i kilala pwataki, ande tia. I see ŋinde itula i kilala pwataki tona. Koroani Sapâŋa nde ŋgua mao warika, aku ŋana duvi ŋinde kâ i uru itula ŋgua mine ŋana Yesu Kirisi kâ.  
\v 7-8 Koroani Sapâŋa, aŋga lââ, aŋga see, kinzi ŋato ŋinde silâ taitu sipasuka ku situla ŋgua pwataki ŋana Yesu Kirisi kilala kâ. Aku kinzi ŋato siporo ŋgua kaŋa taitu nâ.   
\p
\v 9 Kinda uru kalonda tawana tamâta kawanzi ŋgua. Andeta Maro Kindeni itula ŋgua ŋana i Natu kâ, aku i ne ŋgua ŋinde nde kelekele ŋalae tina, ipole tamâta nenzi ŋgua ndo, ŋana tu ŋinde nde Maro Kindeni tamwata kawa ŋgua.  
\v 10 Tamâta ea kalo tawana Maro Kindeni Natu, ande ipakâe kuku Maro Kindeni kawa ŋgua ŋinde marumbu lâ. Ambo tamâta toŋge tini pwâka tu kalo tawana Maro Kindeni kawa ŋgua ŋinde, ande ŋinde itogo iporo tu Maro Kindeni nde laŋeŋa tamwata, ŋana tu i ŋandai kalo tawana ŋgua ŋinde Maro Kindeni itula ŋana i Natu kâ.  
\v 11 Maro Kindeni itula ŋgua mine; i via mao ilua kinda lâ, ŋana ma tamo viânda ku tamo nâ, aku via mao ŋinde nde ikeno papa i Natu.  
\v 12 Tamâta ea ipaipa ndo kuku Maro Kindeni Natu, ande tamâta ŋinde ikai via mao ŋinde marumbu lâ. Aŋga tamâta ea ŋandai ipaipa kuku Maro Kindeni Natu, ande tamâta ŋinde ikai via mao ŋinde, ande tia.   
\s1 Kinda tasama ŋine; kinda ma tamo viânda ku tamo nâ  
\p
\v 13 Naŋa aŋgere ŋgua ŋine imâ pa miki tamâta ŋinde uru kalomi tawana Maro Kindeni Natu, ŋana miki ma kakura tu kasama sondo tu miki kakai via mao ŋinde marumbu lâ, kala ma kamo viami ku kamo nâ.  
\v 14 Lâ zo ndia kinda tano pa Maro Kindeni tu ma iveta vetâŋa toŋge, ande kinda ma taruru ŋana tamandi i nao, ande tia. Ŋinde nde duvi mine; ambo kinda tano pa i tu ma iveta pa kinda ikura i tamwata nâ ne pateâŋa mine, ande i ma ipaloŋo pa nenda noŋa.  
\v 15 Kinda tasama tu i ipaloŋo pa nenda noŋa. Mine kala tasama tu i iveta pa kinda ikura nenda noŋa rârâni mine.   
\p
\v 16 Kiesaka toŋge ikura tu isae via ne nzâla ŋananzi tamâta kâ, andeta kiesaka pinde sikura tu siveta mine tia. \f + \fr 5:16 \ft 16 Ambo tamâta toŋge ipu muli pa Yesu Kirisi, ande kiesaka ŋinde isae via ne nzâla ŋana i kâ.\f* Ambo tamâta toŋge imora ninambwe kalo-tawana tamâta toŋge iveta kiesaka, andeta kiesaka ŋinde ŋandai ŋana isae via ne nzâla ŋga, ande ara ŋana tamâta ŋinde ma ikai noŋa pa Maro Kindeni ŋana ninambwe ŋinde kâ, ŋana i ma ikai via mao. Naŋa ŋandai aporo tu miki ma kakai noŋa mine ŋana tamâta toŋge iveta kiesaka ŋinde ikura tu isae via ne nzâla kâ.  
\v 17 Vetâŋa sakamao kie-kie rârâni nde kiesaka nâ, andeta kiesaka pinde sikura tu sisae via ne nzâla ŋananzi tamâta kâ, ande tia.   
\p
\v 18 Kinda tasama tu tamâta ea simo Maro Kindeni natu wukale, kinzi ŋinde sipu mulinzi pa kiesaka ne vetâŋa. Maro Kindeni Natu, i tamwata uru ikea sondo ndo ŋananzi kalo-tawana tamâta ŋinde. Mine kala Sadana ikura tu iveta vetâŋa sakamao toŋge panzi, ande tia.  
\v 19 Kinda tasama tu kinda tamo Maro Kindeni natu wukale. Andeta Sadana uru ikai poe kaika panzi tâno tamâta rârâni.  
\v 20 Aku mine nâ, kinda tasama tu Maro Kindeni Natu nde imâ ipâŋga lâ, aku itula ilo-kalo ara nâ pa kinda marumbu lâ. Mine kala kinda takura tu tasama Maro Kindeni kilala sondo, inani kala vetâŋa mao warika. Maro Kindeni nde vetâŋa mao warika, aku kinda tapaipa kuku i ŋga i Natu Yesu Kirisi rua. I nde Maro mao kanaŋo, aku i nde via mao warika.   
\p
\v 21 Naŋa natuŋgu wukale, miki ma kapakatona sondo, aku tinimi piti ndo ŋananzi maro laŋeŋa kâ.