\id EPH - Kamula NT (Genesis, Exodus, Jonah) [xla] -Papua New Guinea 2005 (web 2014) 
\h Epeses 
\toc1 Polota Epeses sos dla yu ilimale hamili 
\toc2 Epeses 
\toc3 Epe 
\mt2 Polota Epeses sos dla yu ilimale hamili  
\mt1 Epeses  
\imt1 Epeses buka ya꞉ dulu koko  
\ip Polotapo amtuwale aya dulu dla halemama yu ilimale iye Epeses sos dla hamiyo. Epedeme ya꞉ta yu ilimale dulu hema ipo atlaiyo, “Mikadepe dle so hapulomaye Keliso dulu dla hatlope depo ha꞉ha꞉po.” Epame ya꞉ ma epo atlaiyo, “Sostapo Keliso moto hallati Kelisotapo dokopala depo halapo. Epame mikadepe dle so hapulomatapo yimkata aya some hallati asiyama Kelisotapo dulu edla molopa kestale some halapo. Epame sostapo Keliso ya꞉llu some halapo.”  
\c 1  
\p
\v 1 Na꞉ye Polopo. Godta na꞉ye sauwapo, na꞉tapo Yesu Keliso ya꞉ Taiya dle oko halepo depame. Epedeme na꞉tapo yu ilimale iye Epeses mo dulu dla ha꞉ha꞉lalo Yesu Keliso dla mikadepe dle so wua꞉ dla hamima. Adipalati, wua꞉ye God ya꞉ opapo.  
\v 2 Di A God mate epo Lod Yesu Keliso mate yia꞉ta bokotiyapo malamale mate epo sadle mateta wua꞉ dulu dla ellepe.   
\s1 Kelisota koko halë tle dia꞉ye God ya꞉ akimlala duwapo  
\p
\v 3 Epedeme ka꞉dena, ditapo Lod Yesu Keliso ya꞉ A God dla siyele ta꞉dloweye. Adipalati, dita Keliso dulu dla ha꞉ha꞉lati ya꞉tapo ya꞉ Soko tle ka꞉ka꞉dle koko hapulomaye Pepele dimo tle dia꞉ watle ma-hapiwapo.  
\v 4 Ta꞉lamo ala pohallalo hallati ya꞉tapo dia꞉ye mo-hohomuwapo, ditapo Keliso dulu dla ha꞉ha꞉mama ya꞉ mila꞉pi tle batalimale pa꞉po aiyalma depo ha꞉ha꞉lepo depame.  
\v 5 Ya꞉ta bokotiyapo malamale tle Godtapo Yesu Keliso tle dia꞉ye ya꞉ akimlala dlowedeme mo-powataliya solotamale me-himiwapo. Adipalati, eye ya꞉ta sikemte solotamale kokopo.  
\v 6 Epedeme ka꞉dena, ditapo Godta dia꞉ bokotiyapo malamale koko dla sisiyelowe ka꞉pi. Adipalati, ya꞉ta di bokotiyapo malamale botomastamama ya꞉ Maseyemala hatlo ya꞉ta dupa ellaloye dia꞉ watle hamiwapo.  
\v 7 Epapedeme Kelisota ya꞉ omali asiyama mate dia꞉ye elepame di bobtalimaleye me-hihiyotipo weliwapo. Koko iye Godta di bokotiyapo malamale tle apuwapo.  
\v 8 Adipalati, Godtapo bokotiyapo malamale patoye di watle hamimama malamale ka꞉dle pasatale mape di watle hamiwapo.  
\v 9-10 Epame Godtapo ya꞉ta hemele dinapopo himili kokoye di watle mo-botomastauwapo. Epapedeme ya꞉ta hemele dinapopo himili koko eye ipo. Ya꞉ta sale alila dla tame umulupiye, ya꞉tapo koko hapuloma Pepele dimo dla hutiye mate epo ta꞉lamo dla hutiye mate hatlo alupame Kelisota dokopala depo hala isili dla puame ipila꞉lepe.   
\p
\v 11 Epedeme koko hapulomaye Godta solotamale koko tle wowoyamhalapo. Epapedeme Kelisota koko halë tle Godtapo dia꞉ye ya꞉ opa dlepo depame mo-hohomuwapo. Epedeme koko iye ya꞉tapo mo-powataliya solotapame dinapuwapo.  
\v 12 Epapedeme ya꞉tapo solotamuwapo, Yu so di tatle Keliso dla mikadepe dlalo sotapo di A God ya꞉ dla siyele ta꞉dlepo depame.  
\v 13 Epame po-Yu so wua꞉ mape, wua꞉ta ka꞉yapa ka꞉dle yuye dalepame Keliso dla mikadepe duwa koko tle wua꞉ye mo-God ya꞉ opa duwapo. Epame epapele koko tle ya꞉tapo meyelo ya꞉ yu himili dolumama wua꞉ watle ya꞉ ulu himimama ya꞉ Hela꞉dle Sokoye ma-hapiwapo, wua꞉ta ikadepe God ya꞉ opa depo ha꞉ha꞉ kokoye nati-imama.  
\v 14 Adipalati, dita Yesuta puame di elemolowe dla omta koko hema Hela꞉dle Sokota di watle itiyamale hamilipe, ditapo Godta ya꞉ opa yilo dinapopo himili koko hapulomaye halomelepo depame. Epedeme di ka꞉dena, God dla sisiyeloweye.   
\s1 Polota inoma sumale koko  
\p
\v 15 Epapedeme na꞉ta wua꞉ta Lod Yesu dla mikadepe dle koko mate epo wua꞉ta God ya꞉ opaye sikemte bokotiyapo malamha꞉ha꞉ koko mateye me-daluwa.  
\v 16 Epedeme na꞉ wua꞉ yilo siyemama God dla inoma sumhalloweye pomelesemde.  
\v 17 Epame na꞉ta wua꞉ yilo di Lod Yesu ya꞉ A God dla inoma sumhalemde, ya꞉tapo Soko tle wua꞉ watle malamale ka꞉ka꞉dle hapilati wua꞉tapo God kokoye sikemte malastepo ha꞉ha꞉lepo depame.   
\p
\v 18 Epame na꞉ matle inoma sumale yu hale ipo himima, wua꞉tapo wua꞉ soko inomaye totowatimalati wua꞉tapo wua꞉ta dalemha꞉ha꞉mama omha꞉ha꞉ ya꞉ dulu kokoye woloma natilipo depame. Epame Godta ya꞉ta sesalemale so dla dinapopo himili koko patoye malastlepo depame. Adipalati, ya꞉tapo wua꞉ta koko hapuloma eye halomelepo depame ma-sisilamuwapo.   
\p
\v 19-20 Epame na꞉ matle inoma sumale yu hale himima, wua꞉tapo ya꞉ta itiyamale kokoye sikemte malastlepo depame. Adipalati, itiyamale etapo mikadepe dle so dia꞉ mate halemama di gademhalapo. Epame itiyamale hatlo metapo Godta Yesu Kelisoye powale tle ma pasakalo depame Pepele dimo dla ya꞉ dowala tiyama dla pamoluwapo.  
\v 21 Epedeme Godtapo Kelisoye hampame dokopala so hapuloma mate epo itiyamale soko hapuloma mate yia꞉ dokopala oplami depo hallepo depame pamoluwapo. Epapedeme hatlo ya꞉tapo wata oloma hema yia꞉ dokopala oplami halapo. Epame alotle Godta ta꞉lamo amko mita꞉plati ma hatlo ya꞉tapo yia꞉ dokopala oplami depo hallepe.  
\v 22 Epedeme Godtapo koko hapulomaye Keliso hete sitali dla hatitipame ma ya꞉ye sos dokopala oplami duwapo, ya꞉tapo koko hapuloma omhallalo hallepo depame.  
\v 23 Epapedeme sosye Keliso ya꞉ motopo. Epedeme sostapo Keliso tle pasakalo hapulomaye halomhalapo. Epalati Kelisotapo mo hapuloma dulu dla koko hapuloma dla pasakalo hapilalo halapo.   
\c 2  
\s1 Powale tle ma pasakalo dlowe koko  
\p
\v 1 Wua꞉ ka꞉yapa wua꞉ bobtalimale koko tle mo-palipo ha꞉ha꞉uwapo.  
\v 2 Adipalati, oloma edla wua꞉tapo ta꞉lamo koko hapuloma dolumale koko tle Saitenye mo-dolumuwapo. Ya꞉tapo ta꞉lamo pato iye omhalemama God dla poheodlalo wekele soye omhalapo.  
\v 3 Epedeme ka꞉yapa dita hapulomatapo epapele so some ha꞉ha꞉mama mota solotamale koko halomolowe kokota dia꞉ye dokopala depo haluwapo. Epapele koko tle batalimale sotapo Godta kasilamale umula tamaluwa api edla di ma medla tamaluwapo.   
\p
\v 4-5 Amasiyama God dla ya꞉mkale polowamale kokoye pato elapo. Epapedeme ya꞉tapo dia꞉ye bokotiyapo malamama dita di batalimale dulu dla palipo ha꞉ha꞉lati natipame Keliso mate palli tle ma pasakalo duwapo. Epedeme Godta bokotiyapo malamaletapo wua꞉ pasakaloye gaduwapo.  
\v 6 Epame Godta dia꞉ye Keliso mate pasakalo depame ma Pepele dimo dla dia꞉ye Keliso mate ipila꞉uwapo.  
\v 7 Epedeme ya꞉tapo opa alotle ha꞉ha꞉lowe sota Godta bokotiyapo malamale mate epo namkale dle pato mate malamelepo depame ya꞉tapo Yesu Kelisoye di watle hamiwapo.  
\v 8 Epapedeme wua꞉ta God dla mikadepe dlati asiyama ya꞉ta bokotiyapo malamale tle wua꞉ pasakaloye gaduwapo. Epedeme wua꞉ta muwolo itiyamale tle po-apena. Amasiyama Godta isikimi ya꞉ta namkale dle koko tle apuwapo.  
\v 9 Epapedeme wua꞉ta ka꞉ka꞉dle koko halomha꞉ha꞉la natipame Godta wua꞉ dla pasakalo pohamina. Epedeme koko hema oplami haletapo ya꞉skamu di dla hamhetloweye po-ala꞉na.  
\v 10 Epapedeme dia꞉ye Godtapo ka꞉depo dinapele so depo ha꞉ha꞉po. Epame dita Keliso dulu dla ha꞉ha꞉mama ka꞉ka꞉dle koko siyapo tlo halomha꞉ha꞉lepo depame dia꞉ye ka꞉depo dinapuwapo. Ka꞉ka꞉dle koko iye Godtapo mo-powataliya dita halomelepo depame dinapuwapo.   
\s1 Keliso dulu dla hatlope depo hallowe koko  
\p
\v 11 Epedeme wua꞉ye Yu so mate pohatlope. Adipalati, wua꞉ye po-Yu sopo. Epapedeme Yu sotapo wua꞉ watle atlemama, kapala pokotimalalo wekele so, demdepo. Epame asiyama yiskamu yia꞉ tlo kapala kotimale so demdepo. Amasiyama kapala kotimale koko iye isikimi dlopi opatapo yia꞉ moto dla hamdepo.  
\v 12 Epapedeme wua꞉ malamaiya, wua꞉ta ka꞉yapa ha꞉ha꞉uwa dulu dla wua꞉ye Keliso dimi ha꞉ha꞉uwapo. Epame wua꞉ mape ikadepe Isalael mo so depo poha꞉ha꞉na. Epapele koko tle Godtapo Isalael so mate yu itiyapo hatitimale koko hapulomaye wua꞉ hi mate pohutiyena. Epame oloma edla wua꞉tapo koko pa꞉le ta꞉lamo hema God dimi siyamuwapo.  
\v 13 Epedeme wua꞉ ka꞉yapa God tle pateka꞉mu dla ha꞉ha꞉uwapo. Amasiyama wata oloma hema Kelisota ya꞉ omali tle wua꞉ye God mateka꞉pi dla me-eleme puwapo.   
\p
\v 14-15 Ka꞉yapa Yu so mate epo po-Yu so mate yimkadulo asiyama ele asiyama ele dle dulu dla ha꞉ha꞉uwapo. Adipalati, Yu so aiyalma kokotapo yia꞉ mate epo po-Yu so mate dulu dla duka gladle eluwapo. Amasiyama Kelisota powale koko tle Yu so aiyalma koko hapulomaye mo-dokostamama ya꞉mkale ellewe kokota komale some haluwa ma mo-dokostauwapo. Epedeme Yu so mate epo po-Yu so mateye Kelisotapo ma-yimkata ma-hatlope depame mo-opa amko duwapo. Epame sadle kokoye yia꞉ dla hampuwapo. Adipalati, Kelisoye di sadlepo.  
\v 16 Epedeme Kelisota powale koko tle Yu so mate epo po-Yu so mateye ma hatlope demama Godta kasilamale kokota yia꞉ hi mate eluwaye alikili dla ma-hamastauwapo. Epame ma yia꞉ye God hala dla eleme puwapo.  
\v 17 Kelisotapo puame God tle pateka꞉mu dla ha꞉ha꞉uwa po-Yu so wua꞉ dla epo God mateka꞉pi dla ha꞉ha꞉le Yu so dia꞉ dla sadle kokoye atlampuwapo.  
\v 18 Epapedeme Kelisota koko halë tle Yu so dia꞉ mate epo po-Yu so wua꞉ mateta Hela꞉dle Soko hatlo itle A God hala dla puluweye ala꞉na.   
\p
\v 19 Epedeme po-Yu so wua꞉ye wata po-alikili so depo ha꞉ha꞉sema. Amasiyama wua꞉ye watapo yimkata God ya꞉ opa mate God ya꞉ mo so depo ha꞉ha꞉mama God ya꞉ akimlala depo ha꞉ha꞉po.  
\v 20 Epedeme wua꞉ye Godta aya halë some halapo. Epapedeme aya hema Taiya dle so mate epo God tle yu hapame molo atlamalalo so opa matetapo saka some ha꞉ha꞉po. Epalati asiyama Yesu Keliso meyelo molopa kestale alumiti some halapo.  
\v 21 Epapele dulu dla hatlo Kelisota aya eye hamame hallalo hallati ayata ta꞉mtapo. Epalati asiyama aya etapo ma Lod ya꞉ aiyalma aya depo halapo.  
\v 22 Epedeme po-Yu so wua꞉ye Keliso tle aya dulu hema aya halë dali opi epapele some ha꞉ha꞉po. Epalati Godta ya꞉ Hela꞉dle Soko tle aya dulu hema hallalo halapo.   
\c 3  
\s1 Polota po-Yu so dla ka꞉dle yu hamtale  
\p
\v 1 Na꞉ Polopo. Na꞉tapo Yesu Keliso oko oplami halemama po-Yu so wua꞉ dla Keliso koko atlamsela꞉uwa tle na꞉tapo amtuwale aya dulu dla halapo.  
\v 2 Epapele dulu dla koko iye mo-wua꞉malamana, Godtapo na꞉ watle po-Yu so wua꞉ dla ka꞉dle yu Godta bokotiyapo malamale kokoye atlamsela꞉lepo depame oko hamiwaye.  
\v 3 Epedeme Godtapo ya꞉ta dinapele koko hemele hatiyomeleme eluwaye meyelo na꞉ watle ma haliyamale dla botomastauwapo. Epalati na꞉tapo koko iye wua꞉ta malamelepo depame me-ilipo hamiwapo.  
\v 4 Epedeme wua꞉ na꞉ta ilimale i sesa꞉mama na꞉ta ya꞉ta hemele dinapopo himili koko sikemte malastepo halaye natilipe. Godta hemele dinapele koko eye Keliso kokopo.  
\v 5 Epedeme koko iye ka꞉yapa ha꞉ha꞉uwa opata pomalaha꞉ha꞉na. Amasiyama watapo Hela꞉dle Soko tle Taiya dle so dla epo God tle yu hapame molo atlamalalo so dla mo-botomastauwapo.  
\v 6 Epapedeme Godta hemele dinapopo himili ya꞉ dulu kokoye ipo elapo. Po-Yu so wua꞉tapo ka꞉dle yu dla mikadepe depame Keliso dulu dla ha꞉ha꞉ kokotapo Yu so mate yimkata God ya꞉ akimlala depo ha꞉ha꞉po. Epame ka꞉yapa Godtapo Yu so dla yu itiyapo hatitimuwa koko hapulomaye wua꞉ ma e halomelepe.   
\p
\v 7 Godtapo na꞉ bokotiyapo malamama ya꞉ta itiyamale tle na꞉ watle ya꞉ yu ka꞉dle atlamsela꞉lowe oko hamiwapo.  
\v 8 Epedeme God ya꞉ opa hapuloma dulu dla na꞉ye alo ikadepe dla hallalo halapo. Epapele tlope Godtapo na꞉ye ma-sauwapo, na꞉tapo Keliso dulu dla sukulu pa꞉le ka꞉ka꞉dle koko hapuloma hutiyeye po-Yu so dla haliyamale dla atlamsela꞉lepo depame.  
\v 9 Epedeme koko hapuloma mimita꞉plalo Godtapo mo-powataliya hemele dinapopo hatiyomeleme haluwa kokoye na꞉tapo botomastlepo depame na꞉ye ma-sauwapo.  
\v 10 Epalati itiyamale soko hapulomata God ya꞉ sos tle Godta malamale patota ela kokoye woloma malamelepe.  
\v 11 Yu so mate epo po-Yu so mate hatlope dlowe koko iye Godtapo ka꞉yapa malapame dinapuwa kokopo. Epapeleye ya꞉tapo Yesu Keliso di pasakalo gadlalo tle koko iye ma-hauwapo.  
\v 12 Epapedeme Kelisota koko halë tle epame dita ya꞉ dla mikadepe dle tle ditapo itiyamale mate wowota꞉le pa꞉po God hala dla puluwe ka꞉pi.  
\v 13 Epedeme na꞉ta wua꞉ dla atlema, na꞉ta amtuwale aya dulu hema wua꞉ yilo wotiyalle hamhala koko hema ase sikemte momalamha꞉ha꞉miya. Adipalati, na꞉ta wua꞉ yilo wotiyalle ha koko itapo alotle wua꞉ dla siyele hampulupe.   
\s1 Godtapo mikadepe dle so dla itiyamale hamilipo depame Polota inoma sumale himili  
\p
\v 14 Epapele koko tle na꞉tapo alumata ta꞉la dla akukulume polomama A God dla inoma suma.  
\v 15 Ta꞉lamo mate epo Pepele dimo mate dulu dla ha꞉ha꞉ opa hapulomatapo ya꞉ tle yia꞉ hi halomha꞉ha꞉po. Adipalati, God hatlo ya꞉tapo di A halapo.  
\v 16 Epame God dla ka꞉ka꞉dle koko hapulomata pasatepo elapo. Epedeme na꞉ inoma sumama ya꞉ dla atlema, ya꞉tapo ya꞉ Soko tle wua꞉ dupata kokallowe koko itiyamaleye hamilipo depame.  
\v 17 Epame na꞉ ma inoma sumale yu hale himima, wua꞉ta mikadepe dle tle Kelisotapo wua꞉ dupa dulu dla hallepo depame. Epame wua꞉tapo ya꞉ta bokotiyapo malamale koko dulu dla kokalalipo ha꞉ha꞉lepo depame.  
\v 18 Epame na꞉ ma ya꞉ dla atlema, wua꞉tapo yimkata God ya꞉ opa mate ha꞉ha꞉mama ya꞉ta bokotiyapo malamale kokota ga꞉tulli mate epo popolalle mate epo selemalli mate epo didle mateye malastlepo depame.  
\v 19 Kelisota bokotiyapo malamale kokoye pta sikemte pato epame opata malamaleye tla꞉mtana. Amasiyama epapele tlope na꞉ inoma sumale yu himima, wua꞉ta ya꞉ta bokotiyapo malamale eye malastlepo depame. Wua꞉ta epapelepiye, koko hapuloma dulu dla wua꞉tapo God some ha꞉ha꞉lowe ala꞉le oloma dla ha꞉ha꞉lepe.   
\p
\v 20 Epedeme Godta itiyamaleta dia꞉ dulu dla oko hamhallepiye, Godta dia꞉ tle koko patoto hapuloma halomoloweye ala꞉na. Adipalati, ya꞉ dla koko patoto halomolowe itiyamaleye elapo. Itiyamale eye dita ya꞉ dla atlamde koko mate epo dita malamale mateye tla꞉mtana.  
\v 21 Epedeme ka꞉dena, ditapo sos dulu dla Yesu Keliso tle God dla siyele hamilowe kokotapo kokó elloweye. Koko eye ikadepepo.   
\c 4  
\s1 Keliso moto dulu dla hatlope dlowe koko  
\p
\v 1 Epedeme na꞉ Lod yilo amtuwale aya dulu dla halema. Epedeme na꞉ solotama, wua꞉tapo Godta wua꞉ sisilamuwa pasakalo mate ala꞉po ha꞉ha꞉lepo depame.  
\v 2 Epame wua꞉ amkadulo mate woloma ka꞉depo sadle mate ha꞉ha꞉mama hapele siyalade demha꞉ha꞉miya. Amasiyama wua꞉ ya꞉mkale asiyama bokotiyapo malama asiyama bokotiyapo malama demha꞉ha꞉iya.  
\v 3 Epele dulu dla wua꞉ alila hapuloma dulu dla wua꞉tapo Soko tle hatlope depo ha꞉ha꞉lowedeme wua꞉ amkadulo mate woloma sadepo ha꞉ha꞉iya.  
\v 4 Adipalati, dita hapulomaye moto hatlope dulu dla ha꞉ha꞉po. Epame Soko ma hatlopepo. Epame Godtapo dita hapulomata koko hatlo dla dalemha꞉ha꞉mama omha꞉ha꞉lepo depame sisilamuwapo.  
\v 5 Epame di Lod ma hatlopepo. Epame dita mikadepe dle ma hatlopepo. Epame yú tulluwe koko ma hatlopepo.  
\v 6 Epame di A God ma hatlopepo. Epedeme ya꞉tapo dita hapulomaye omhallalo halemama dia꞉ tle oko hamhalapo. Epame dia꞉ dulu dla halapo.   
\p
\v 7 Epapedeme Kelisotapo dita hapuloma dla isikimi namkale dle tle malamale meyelope meyelope dleye ma-halopiwapo, ditapo God ya꞉ oko halepo depame.  
\v 8 Epapedeme God yu bukata epo atlapo,  
\q1 “Ya꞉tapo di ikadepe dla hetamama  
\q2 ya꞉ dla opahale dlalo soye hohopame dea mate yulupo eleme hetauwapo.  
\q2 Epame ma ya꞉tapo opa dla namkale dle alisisi halopiwapo,” depo.   
\m
\v 9 Epedeme wua꞉ ka꞉yapa, “ya꞉tapo di ikadepe dla hetaiyo,” dle kokoye malamaiya. Adipalati, “ya꞉ta di ikadepe dla hetale” ya꞉ dulu kokoye ipo elapo. Kelisoye ka꞉yapa Pepele dimo tle ma ta꞉lamo isili ikadepe hema maluwapo.  
\v 10 Epapedeme Pepele di ikadepe tle ma ta꞉lamo isili ikadepe hema maluwa oplami hatlo eta matle Pepele dimo di ikadepe dla hetauwapo, ya꞉tapo koko hapuloma dulu dla pasatepo hallowedeme.   
\p
\v 11 Epedeme Kelisotapo isikimi namkale dle tle ya꞉ sos dulu dla oko meyelope meyelope dle hapimama opa opi dla Taiya dle okoye hapiwapo, epame opi dla God tle yu hapame molo atlamolowe oko hapiwapo, epame opi dla God yu hame mo opi dla siyamolowe oko hapiwapo, epame opi dla sos omhallowe oko hapiwapo, epame opi dla God yu imalalo oko hapiwapo.  
\v 12 Kelisotapo koko i hauwapo, mikadepe dle sotapo God oko halowe dla ma-dinapopo ha꞉ha꞉lepo depame. Epame Keliso ya꞉ motota ta꞉lepo depame.  
\v 13 Epapelepiye, eta ditapo mikadepe dle tle hatlope depo ha꞉ha꞉mama God Yami kokoye sikemte malastepo ha꞉ha꞉mama apelepe. Epame dita mikadepe dle tle ikadepe opa depo ha꞉ha꞉mama ikadepe Keliso some ha꞉ha꞉lepe.   
\p
\v 14 Epapele dulu dla di matle dita mikadepe dle dulu dla yimlala yimka꞉sikili some poha꞉ha꞉lowa. Epame biskapa amko koko imale dalepame malamale potatlalimha꞉ha꞉lowa. Epame biskapa amko koko imalalo sota api meyelope meyelope dle tle dia꞉ye eleme tlowedeme apelepiye, di epalati yia꞉ podolumolowa.  
\v 15 Amasiyama di ikadepe koko tlo kikitilata hampame bokotiyapo malamale mate ha꞉ha꞉mama koko hapuloma dulu dla di dokopala oplami Keliso dla kese tutula꞉po ha꞉ha꞉lowepo.  
\v 16 Adipalati, Kelisotapo moto dla u-ulalimale hapuloma hohopo halapo. Epalati moto hapuloma meyelope meyelope dletapo moto pato dla gugoudepame oko hamhalemama bokotiyapo malamale kokota pasatepo halapo. Epalati motota ta꞉mtapo.   
\s1 Keliso dulu dla amko depo hallowe koko  
\p
\v 17 Epedeme na꞉tapo Lod hi tle wua꞉ye atlema, wua꞉ ase ta꞉lamo sota ha꞉ha꞉lalo epapele some ha꞉ha꞉miya. Adipalati, yia꞉ta malamale hapulomaye poka꞉ka꞉dle koko dla hatitipo siyamapo.  
\v 18 Epame yia꞉ta momalamale hapulomaye ma-amtuwalemana. Epame yia꞉ dla ikadepe koko malamoloweye po-ala꞉na. Yia꞉ta epo dupa kokalalimale koko tle yia꞉ye Godta hamili pasakalo tle pateka꞉mu dla ha꞉ha꞉po.  
\v 19 Epame yia꞉ dla ka꞉dle koko mate epo batalimale koko mate malanatiloweye poyia꞉malamana. Epapedeme yia꞉tapo isikimi yia꞉ mota solotamale koko tlo dolumha꞉ha꞉mama batalimale koko hapuloma halomha꞉ha꞉mama gudlowe pa꞉po ha꞉ha꞉po.   
\p
\v 20 Amasiyama wua꞉ye epapele api tle Keliso kokoye pomalamana.  
\v 21 Epapedeme wua꞉tapo ya꞉ kokoye ma dalepame ikadepe koko Yesu dulu dla elaye mo-malamuwapo.  
\v 22 Epapedeme wua꞉ta ka꞉yapa ha꞉ha꞉uwa pasakalo batalimale eye alikili a꞉ma pololiya. Adipalati, pasakalo batalimale epapeletapo wua꞉ye batalimolowedeme eleme tamdepo.  
\v 23 Epapedeme Godtapo wua꞉ta malamaleye meyelope de diya.  
\v 24 Epame wua꞉ pasakalo takalaye tluka takala some uptipame ma pasakalo amkoye tluka amko some halopo didiyeiya. Pasakalo amko eye Godtapo dinapuwapo, ditapo ya꞉ some aiyalma dle mate ullu pa꞉po ha꞉ha꞉lepo depame.   
\p
\v 25 Epapedeme ka꞉dena, wua꞉ta hapulomatapo ya꞉mkale mala-atlowe koko tle memelepame ma ikadepe koko tlo atlamsiyamaiya. Adipalati, dita hapulomata Keliso moto dulu dla hatlope depo ha꞉ha꞉po.   
\p
\v 26 Epame wa꞉ta siyaladle koko dulu dla siyaladle koko eta wa꞉ye batalimale dla semta demiya. Epame wa꞉ta siyaladle koko eta wa꞉ dla ala me-elemama sali tulu demiya.  
\v 27 Adipalati, siyaladle kokotapo di pasakalo batalimelepo depame Saiten dla kokoloma dokostamdepo.   
\p
\v 28 Epedeme wa꞉ uhalalo oplami depo halayo. Wa꞉ uhamhalaye memelepame ma wa꞉ do mate oko halowe kotiyamane. Wa꞉ta epapelepiye, eta wa꞉tapo ma yimkadulo atali so gadloweye ala꞉lepe.   
\p
\v 29 Epame wua꞉ta batalimale yu atlamsiyamde kokoye medla gudiya. Epame wua꞉ matle yu ka꞉dle, ya꞉mkale gadlowe yu siyapo tlo atlamha꞉ha꞉iya.   
\p
\v 30 Epammama wua꞉ta ha꞉ha꞉le koko tle God ya꞉ Hela꞉dle Soko dla dupa kolle hamimiya. Adipalati, ya꞉tapo wua꞉ dulu dla God ya꞉ ulu halapo. Epedeme Yesuta puame ya꞉ opa hohomolowe alila dla omtamama wua꞉ta ikadepe God ya꞉ opa depo ha꞉ha꞉ kokoye ya꞉ta imhalapo.   
\p
\v 31 Epedeme wua꞉ dulu dla ipapele koko hapuloma hutiyeye alikili dla pololiya. Eye ya꞉mkale elle mate hallowe koko, epame siyaladle koko, epame ya꞉mkale dla itiyamale yu mate sisikayuluwe koko, epame yimkadulo dla putlopo atlowe koko, epame ya꞉mkale polowamale pa꞉le koko.  
\v 32 Amasiyama wua꞉ namkale dle mate epo ya꞉mkale bokotiyapo malamale mate ha꞉ha꞉iya. Epame Godta Yesu Keliso tle wua꞉ bobtalimale howahapo weliwaye, epammama wua꞉ ma wua꞉ amkadulo bobtalimale kokoye wowelimha꞉ha꞉iya.   
\c 5  
\s1 Hela꞉dle dulu dla hallowe koko  
\p
\v 1 Wua꞉ye God ya꞉ akimlala depo ha꞉ha꞉po. Epame Godtapo wua꞉ye bokotiyapo malamhalapo. Epapedeme wua꞉ God koko natipame ya꞉ta hala epo ha꞉ha꞉iya.  
\v 2 Epame yimkadulo bokotiyapo malamolowe mate ha꞉ha꞉iya. Adipalati, Kelisotapo di bokotiyapo malapame dia꞉ yilo mo-pouwapo. Epame Yu so opata ullu ka꞉dle alisisi God watle namkale dle hapimduwaye, epammama ya꞉tapo ya꞉ motoye God watle hamiwapo.   
\p
\v 3 Epedeme God ya꞉ opa wua꞉ dulu dla batalimale koko ipapeleta hutiyeloweye poka꞉dena. Eye opa mate epo wola꞉ mate uhalomolowe koko, epame ullu walle koko hapuloma meyelope meyelope dle halomolowe, epame mani mate alisisi mate sikemte solotamolowe koko.  
\v 4 Epame matle poka꞉dena, wua꞉tapo batalimale koko esemsiyamoloweye epame ullu walle yu yuhamsiyamoloweye epame batalimale koko dla sikemte asupumsiyamoloweye. Amasiyama wua꞉ epapele koko tle memelepame ma God dla siyele yu mate atlamha꞉ha꞉iya.  
\v 5 Ame adipalati, wua꞉ malamaiya, wola꞉ mate epo opa mate uhalomalalo so mate epo ullu walle koko halomalalo so mateye Keliso mate God mate yia꞉ mo koko dla pe-elemtuluwa. Epame mani mate alisisi mate sikemte solotamalalo so mape pe-elemtuluwa. Adipalati, yia꞉ye biskapa god dla sisiyelalo sopo.  
\v 6 Epapedeme ipapele koko dla oplami haleta wua꞉ye mala-atla demha꞉ha꞉miya. Adipalati, batalimale koko hapuloma ipapele tle Godta kasilamale kokotapo ya꞉ yu dla posalladlalo wekele so dla puapo.  
\v 7 Epapedeme wua꞉ye ipapele so opa mate hatlope demha꞉ha꞉miya.   
\p
\v 8 Adipalati, wua꞉ ka꞉yapa amtuwale dulu dla siyamuwapo. Amasiyama wua꞉ye wata Lod dulu dla hela꞉dle mate ha꞉ha꞉po. Epedeme wua꞉ hela꞉dle dulu dla ha꞉ha꞉lalo sota koko halomde, epapele some ha꞉ha꞉iya.  
\v 9 Adipalati, hela꞉dle ya꞉ dlomokoye ipo. Eye namkale dle koko epame God mila꞉pi tle ka꞉depo hallowe koko epame ikadepe koko.  
\v 10 Epedeme wua꞉ ipapele koko dulu dla ha꞉ha꞉mama Lod dla siyele hamilowe koko siyapo tlo totamha꞉ha꞉iya.  
\v 11 Epammama wua꞉ amtuwale dulu dla ha꞉ha꞉lalo sota koko halomde kokoye halomha꞉ha꞉miya. Amasiyama wua꞉tapo koko eye haliyamale dla botomastepo atlamsiyamaiya.  
\v 12 Adipalati, yia꞉ta koko hemele halomdiye pta batalimana.  
\v 13 Amasiyama batalimale koko eye hela꞉dletapo haliyamale dla botomastlati opatapo natimdepo.  
\v 14 Adipalati, hela꞉dletapo koko hapulomaye haliyamale dla halopo pumdepo. Epapedeme God yuta epo atlapo,  
\q1 “Ellalo oplami, wa꞉ sila꞉tine,  
\q2 Wa꞉ powale dulu tle sila꞉tine.  
\q1 Epalati Kelisota wa꞉ye hela꞉depo mellepe,” depo.   
\p
\v 15 Epedeme wua꞉ta ha꞉ha꞉ kokoye woloma natiya. Epammama koko yeitamale so some ha꞉ha꞉miya. Amasiyama wua꞉ woloma ka꞉depo malamale mate ha꞉ha꞉iya.  
\v 16 Epame wua꞉ta koko halomha꞉ha꞉ dulu dla alila ka꞉dle iye isikimi dosomiya. Adipalati, wata alila oloma iye batalimale alilapo.  
\v 17 Epapedeme wua꞉ koko yeitamale so some ha꞉ha꞉miya. Amasiyama wua꞉ woloma Lodta solotamale koko tlo momalamha꞉ha꞉iya.  
\v 18 Epame wua꞉ kawata yú dlopame yiyilamale mate ha꞉ha꞉miya. Adipalati, epapele kokotapo wua꞉ye batalimale dla elemtamdepo. Amasiyama Sokota wua꞉ dulu dla pasatepo hala diya.  
\v 19 Epame wua꞉ta yimkata alumale dulu dla siyele sala dolumha꞉ha꞉mama wua꞉ dupa dulu tle Lod dla siyele ta꞉demha꞉ha꞉iya.  
\v 20 Epame wua꞉ alila hapuloma dulu dla koko hapuloma dla di Lod Yesu Keliso hi tle A God dla siyele yu atlamha꞉ha꞉iya.   
\s1 Opa mate epo yia꞉ alludulo mate  
\p
\v 21 Epedeme wua꞉ Keliso tlo wowota꞉mama wuskamu isili dla halopo tulupame yimkadulo yu dla asiyama sallade epo asiyama sallade demsiyamaiya.   
\p
\v 22 Epame wola꞉, wua꞉ta Keliso yu dla salladepo siyamaye, epammama wua꞉ ma wua꞉wolalidulo yu dla mepo salladepo siyamaiya.  
\v 23 Adipalati, Kelisota ya꞉ sos dokopala halaye, epammama oplamitapo ya꞉ a꞉yaye dokopala halapo. Sos eye Keliso ya꞉ motopo. Epedeme Keliso meyelo ya꞉ sosye pasakalo gadlalo halapo.  
\v 24 Epedeme sosta ya꞉skamu isili dla hamtulupame Keliso yu dla salladepo sela꞉mdiye, epammama wola꞉, wua꞉ mape wuskamu isili dla halopo tutula꞉pame wua꞉wolalidulo yu dla salladepo siyamaiya.   
\p
\v 25 Epame opa, Kelisotapo ya꞉ sos bokotiyapo malamuwaye, epammama wua꞉ mape wua꞉ alluduloye sikemte bokotiyapo malamha꞉ha꞉iya. Adipalati, Kelisotapo ya꞉ sos yilo ya꞉ pasakaloye polowe dla himiwapo.  
\v 26 Epame ya꞉tapo ya꞉ sosye yú tutula꞉lowe koko mate epo God yu mate howahauwapo, sostapo ma God ya꞉ole depo hallepo depame.  
\v 27 Kelisotapo koko iye hauwapo, ya꞉ sostapo hela꞉dle mate halemama ullu pa꞉po aiyalma depo hallepo depame.  
\v 28 Epapele koko tle ka꞉dena, opatapo yiskamu yia꞉ moto sikemte malamdiye, epammama yia꞉ alludulo ma sikemte bokotiyapo malamolowe ka꞉pi. Adipalati, ya꞉llu sikemte bokotiyapo malamalalo oplamitapo ya꞉skamu ya꞉ moto ma woloma ka꞉pi omhalemdepo.  
\v 29 Epedeme wua꞉ malamaiya, oplamitapo ya꞉ motoye alimama batalipo po-omhalasemde. Amasiyama ya꞉tapo ya꞉ motoye sikemte malamama ya꞉ motota itiyamale mate hallepo depame daya demhalemdepo. Epedeme Kelisotapo ya꞉ moto sos dla epamhalapo.  
\v 30 Adipalati, dia꞉ye ya꞉ motopo.  
\v 31 Epapedeme God yu bukata epo atlapo,  
\q1 “Epedeme oplamitapo ya꞉ a mate epo ya꞉ wai mate melepame ma ya꞉llu mate hatlope depo hallepe.  
\q2 Epame yia꞉ta madipatatapo moto hatlope depo ha꞉ha꞉lepe.”   
\p
\v 32 Epedeme oplamita a꞉ya hapame ya꞉ mate hallowe ya꞉ dulu kokoye pta pato. Epedeme koko itapo Kelisota sos mate moto hatlope depo hala kokoye botomastapo.  
\v 33 Epapedeme na꞉ ma opa dla atlema, wua꞉tapo wuskamu sikemte malamdiye, epammama wua꞉ alludulo mape sikemte bokotiyapo malamha꞉ha꞉iya. Epalati ka꞉dena, wua꞉ alludulo mape wua꞉ yu dla salladepo siyamoloweye.   
\c 6  
\s1 Adulo mate waidulo mate epo yimlala mate  
\p
\v 1 Yimlala, wua꞉ Lod dulu dla ha꞉ha꞉mama wua꞉ adulo yu dla epo wua꞉ waidulo yu dla salladepo siyamaiya. Adipalati, iye ka꞉dle kokopo.  
\v 2-3 Epapedeme aiyalma hatitimale dulu dla aiyalma haleta epo atlapo,  
\q1 “Wua꞉ adulo yu dla epo wua꞉ waidulo yu dla salladepo siyamaiya.”  
\m Epedeme wua꞉ta epapelepiye, eta  
\q1 “ta꞉lamo hema wua꞉tapo woloma ka꞉depo kokó ha꞉ha꞉lepe.”   
\p
\v 4 Epedeme adulo wua꞉ta wua꞉ yimlala batalipo omha꞉ha꞉le tle yia꞉ dla siyaladle hami demha꞉ha꞉miya. Amasiyama wua꞉ yimlalata woloma ka꞉depo ha꞉ha꞉lepo depame woloma ka꞉dle api tle yia꞉ye gademha꞉ha꞉mama Keliso dulu dla ha꞉ha꞉lowe kokoye imha꞉ha꞉iya.   
\s1 Asiyama pa꞉le dla oko halalo so mate epo yia꞉ dokopala so mate  
\p
\v 5 Epame asiyama pa꞉le dla oko halalo so, wua꞉ta Keliso yu dla salladepo siyamaye, epammama ma wua꞉ ta꞉lamo dokopala soye wowota꞉mama yia꞉ yu dla hutulli mate salladepo siyamaiya.  
\v 6 Epele dulu dla wua꞉ isikimi yia꞉ inoma dali dla oko ka꞉pi halowa demiya. Adipalati, oko halowe dla sasalalimale soye isikimi yia꞉ dokopala so inoma dali dla oko ka꞉pi halomdepo. Amasiyama wua꞉ Keliso ya꞉ oko so some wua꞉ dupa dulu tle woloma Godta solotamale dla salladepo siyamaiya.  
\v 7 Epedeme wua꞉ta hutulli mate yia꞉ oko hamama wua꞉ dupa dulu tle isikimi Lod yilo oko hama depo malamaiya.  
\v 8 Adipalati, wua꞉malamana, Lodta opa hapuloma, asiyama pa꞉le dla oko halomalalo so mate epo yia꞉ dokopala so mate dla yia꞉ta ka꞉ka꞉dle koko halomha꞉ha꞉le yia꞉ asiyama mate ala꞉leye halopilipe.   
\p
\v 9 Epame dokopala so wua꞉ mape wua꞉ oko soye woloma ka꞉pi omha꞉ha꞉iya. Epame yia꞉ dla itiyamale yu mate wowota꞉le hapimha꞉ha꞉miya. Adipalati, wua꞉malamana, wua꞉ mate epo yia꞉ mate wua꞉ Lod hatlopeye Pepele dimo dla halapo. Epedeme ya꞉tapo opa hapuloma kokoye woloma ka꞉pi gladlepe, epammama ya꞉tapo seme tiyape tlo pogadlowa.   
\s1 Wua꞉ opahale koko dla dinapiya  
\p
\v 10 Epedeme na꞉ yu mosukulu dla na꞉tapo wua꞉ watle koko iye atlema. Wua꞉ Lod dulu dla ha꞉ha꞉mama ya꞉ta itiyamale pato mate ha꞉ha꞉iya.  
\v 11 Epame opahale dla tamama didiyepo tlalo alisisi hapulomaye God tle halopame didiyeiya, wua꞉tapo Saitenta elemala natili koko hapuloma dulu medla kokalalipo ha꞉ha꞉lowedeme.  
\v 12 Adipalati, dita opahale de iye isikimi opa ikadepe mate po-opahale desema. Amasiyama ditapo bataliya yimlala hapuloma mate epo yia꞉ dokopala so mate epame ta꞉lamo amtuwale omha꞉ha꞉lalo yia꞉ dokopala so mate opahale depo.  
\v 13 Epapedeme wua꞉tapo batalimale alila dla kokalalipo ha꞉ha꞉lowedeme God tle opahale alisisi hapulomaye halopo didiyeiya. Wua꞉ta epapelepiye, eta opahale dele alilata mogudlati wua꞉tapo ala me-kokalalipo ha꞉ha꞉lepe.   
\p
\v 14 Epapedeme wua꞉ kokalalipo ha꞉ha꞉lowedeme ikadepe kokoye nosowe some didiyeiya. Epame God mila꞉pi tle ullu pa꞉po hallowe kokoye kapulu some pitako dla didiyeiya.  
\v 15 Epame ka꞉dle yuta hapili sadle mate epo dinapopo hallowe koko mateye wua꞉ hete dla hete alisisi some didiyeiya.  
\v 16 Epame alila hapuloma dulu dla mikadepe dle kokoye ilokili some hamsiyamama wuskamu wua꞉ye kukomsiyamaiya, Saiten ya꞉ opahale kosele teleka꞉leta puame wua꞉ye sumalala depame.  
\v 17 Epame pasakalo gadlowe kokoye etimi some didiyeiya. Epame Hela꞉dle Sokota wua꞉ dla hapili aipa꞉yaye wua꞉ do mate halopo ha꞉ha꞉iya. Adipalati, aipa꞉ya iye God yupo.  
\v 18 Koko hapuloma iye inoma sumale tle halomha꞉ha꞉iya. Epame alila hapuloma dulu dla Sokota itiyamale tle inoma sumha꞉ha꞉iya. Epammama wua꞉ta solotamale koko hapulomaye inoma sumale tle God dla otele himme ha꞉ha꞉iya. Epame wua꞉ dinapopo ha꞉ha꞉mama God ya꞉ opa hapuloma yilo inoma sumale yu himme ha꞉ha꞉iya.   
\p
\v 19 Epame wua꞉ mape na꞉ yilo inoma sumale yu himme ha꞉ha꞉iya, Godtapo na꞉ta atlamolowe yu hapulomaye na꞉ watle hapilipo depame. Epame na꞉tapo powota꞉lalo itiyamale mate ka꞉dle yu ya꞉ dulu kokoye haliyamale dla botomastlepo depame.  
\v 20 Adipalati, na꞉tapo ka꞉dle yu yilo oko halalo halapo. Amasiyama epapele tlope na꞉tapo oko eye wata oloma hema amtuwale aya dulu dla halemama oko hamhalapo. Epapedeme wua꞉ na꞉ yilo inoma sumha꞉ha꞉iya, na꞉tapo God yuye wota꞉le pa꞉po atlamhallepo depame.   
\s1 Mosukulu dla namkale dle yu atlale  
\p
\v 21-22 Epedeme na꞉tapo na꞉ ei, Lod dulu dla oko halalo oplami Tikikusye wua꞉ hala dla tane dema, ya꞉tapo di koko hapulomaye wua꞉ dla atlepo depame. Epame gadle yu mate wua꞉ye itiyamale hamilipo depame.   
\p
\v 23 A Godtapo Lod Yesu Keliso mate yia꞉ta sadle koko mate epo bokotiyapo malamale koko mate epo mikadepe dle koko mateye mikadepe dle so hapuloma dulu dla ellepe.  
\v 24 Epedeme di Lod Yesu Keliso sikemte malamalalo so opa dla Godta bokotiyapo malamaleta yia꞉ mate hallepe.