\id 2JN - Kamula NT (Genesis, Exodus, Jonah) [xla] -Papua New Guinea 2005 (web 2014) 
\h 2 Yon 
\toc1 Yonta matle yu ilimale 
\toc2 2 Yon 
\toc3 2Yon 
\mt2 Yonta matle yu ilimale  
\mt1 2 Yon  
\imt1 2 Yon buka ya꞉ dulu koko  
\ip Ka꞉yapa God yu hamsiyamama opa imsiyamalalo sotapo mo hale tle ma mo hale dla ta demsiyamama God yu hamsiyamaiyo. Epalati mo dulu dla mikadepe dle sota yia꞉ye woloma ka꞉pi gagademdiyo. Amasiyama God yu hamsiyamalalo so dulu dla biskapa koko imalalo so alumale mape me-siyamaiyo. Epalati Taiya dle oplami hale Yonta koko i natipame mikadepe dle sotapo biskapa koko imalalo soye gadlala depame yu iye ilimaiyo.  
\c 1  
\p
\v 1-2 Wua꞉ mama pato na꞉tapo Godta sale wai mate ya꞉ yimlala mate dla yu ilimale iye hamima. Na꞉ wua꞉ye sikemte malahalema. Hatlo na꞉ta wua꞉ye sikemte pomalahalasema, amasiyama ikadepe koko malamale so opi mape wua꞉ye sikemte malaha꞉ha꞉po. Adipalati, ikadepe koko di dupa dulu dla ela itapo dia꞉ dla kokó elepo ellepe.   
\p
\v 3 A Godtapo Yami Yesu Keliso mate di watle bokotiyapo malamale mate polowamale mate epame sadle mate hapilipe. Adipalati, ditapo ikadepe koko dla mikadepe depame yimkaduloye bokotiyapo malamale mate ha꞉ha꞉po.   
\p
\v 4 Wa꞉ yimlala opitapo Ata molo atlale yu dla ikadepe depame dolumtauwo dla dalepame na꞉ sikemte siyeuwa.  
\v 5 Epedeme wai namkale, yu ilimale iye wa꞉ dla po-amko desema. Amasiyama dita ka꞉yapa daluwa bokotiyapo malamale kokoye e atlemama amma. Epedeme ka꞉dena, dita hapulomata asiyama bokotiyapo malama asiyama bokotiyapo malama demha꞉ha꞉loweye.  
\v 6 Epapedeme bokotiyapo malamale ya꞉ dulu kokoye ipo. Ditapo Godta molo atlale yuye woloma dolumha꞉ha꞉loweye. Adipalati, ka꞉dena, wua꞉tapo God sikemte malamale mate ha꞉ha꞉mama ya꞉mkale asiyama bokotiyapo malama ya꞉mkale asiyama bokotiyapo malama demha꞉ha꞉loweye. Epedeme wua꞉ ka꞉yapa koko iye ma-daluwapo.   
\p
\v 7 Epedeme biskapa koko imalalo so hapulomatapo wata ta꞉lamo pato hema me-siyamapo. Ipapele opatapo Yesu Kelisota ikadepe oplami moto hapame ta꞉lamo hema sela꞉uwaye po-imasemde. Oplami antapo ipapele koko imsela꞉lepiye, ya꞉ye elemala natilalo oplamipo, epame ya꞉ye Yesu dla humatlalo oplamipo.  
\v 8 Epedeme wua꞉ wolomape, biskapa koko imale dla tulumama wua꞉ God tle asiyama pohalalo wekelala depame. Epapedeme wua꞉ asiyama halowedeme wuskamu woloma omha꞉ha꞉mama kokalepo ha꞉ha꞉iya.  
\v 9 Amasiyama oplami antapo Kelisota imale dulu dla pohallalo ma imale hale dla hallepiye, ya꞉ye God mate pohalasema. Amasiyama oplami antapo Kelisota imale dulu dla halema꞉, ya꞉ye A God mate Yami mate hatlope depo halapo.  
\v 10 Epapedeme oplami antapo Kelisota imale koko pohampulalo ma imale hale hampulupiye, wua꞉ ya꞉ye namkale depame wua꞉ aya dla semhetamiya.  
\v 11 Adipalati, oplami antapo ipapele oplami mate namkale dlepiye, ya꞉tapo ya꞉ mate batalimale oko ipiye hapo.   
\p
\v 12 Eso namkadulo, na꞉ wua꞉ dla atlamolowe koko opi ma me-hutiyema. Amasiyama na꞉ posolotamasema, yu ilimale tle wua꞉ dla atlamoloweye. Adipalati, na꞉ solotama, monolo puame wua꞉ mate yukamolowedeme. Epedeme na꞉ta edla pulupiye, eta dita yimkata siyele ta꞉dlowepo.   
\p
\v 13 Eso namkale, wa꞉ nana Godta sale ya꞉ yimlalatapo yia꞉ta namkale dle yu wa꞉ dla atlema.