\id 1TH - Kombio-Yanimoi 
\h 1 Tesalonaika 
\toc1 1 Tesalonaika 
\toc2 1 Tesalonaika 
\toc3 1 Tesalonaika 
\mt1 1 Tesalonaika  
\c 1  
\p
\v 1 Antarko wuyelikeknel, apm Pol antempel Sailas nti Timoti, ant apul wupm epieel ka apulp yipm mamuntomp antilel mentitmaken Wulapm Weinkel pe ar yemp suknel Tesalonaikael, yipm ka ar nta Waiek Keipmelel antempel Sepmel antilel Jisas Krais. Ant ka aiyimp Wulapm Weink nako kil yeyupulp yipm mi ko kil yek yipm yapmunemp niuluknunelel.   
\s1 Pol Nak Tukuaremp Wulapm Weink Apulp Nti Tesalonaika  
\p
\v 2-3 Aninkanink ant antemp Wulapm Weink nak sankel, ka ant nak tukuarempil apulp yipm ka ar nkis sankwunamp sepmelel apulpaser yipm ka akei Wulapm Weink nkael, pe yapmunemp aiyipmel ka mpuaimpuai apulpil suwaink. Pe yipmarko ka akei nta niupuknel nkramomp ntiarko, eti yipm pe ntinkiliemp ampul niokn Wulapm Weinkelel. Yapmunemp aiyipmel ka mintenk ampulp Krais, ka yipm niampepm tneipil nako kil yupul yipm sepmel. Ka weink apulp yipm ka ar nkis niumumpuel apulp wankepm simisimi ka ninkem yipmel.   
\p
\v 4 Yipm ka mentitmaken Wulapm Weinkel ka kil puikn apulp yipm yatip. Pe ant ka aser ntinkirai apulp ka kil ankil yuwak yipmel, apulpaser  
\v 5 ampueikel ant nakimp yipm apulp sank sepmel Kraiselel, ant'arokn nakimp yipm sank kuserel. Sank epie ka ninink antemp mpunkol niawurpm Wulapm Weinkel. Ka Pirpm Sepmel Wulapm Weinkel apul yipm na ser aipopelel, sank epie ka nak likeknel. Ant ka antemp yipm arel, yipm ka aser ntinkirai wunamp antilel ka ant ar nkis mi ant apulp yipmel.  
\v 6 Eti sankwunamp aiyipmel ka yipm apul soplikekn sop ka ant apulel. Yipm ka ar nkis nuarep ka Sepmel antilel Krais ntremp ant mi ka ant ar kisel. Nti moule ka ak yipm wankepm mitinkel silep sank sepmel epe ka yipm eipm apul sopel, aser yipm ka mpuaimpuai nkamp sank epie i aim apmuei yapmunemp aiyipmel. Yapmunemp mpuaimpuaiel ntakilelel ka Pirpm Wulapm Weinkel ankil ak yipm.  
\v 7 Pe yipm ka ar ntaka muati ka ntremp nti ntitmaken Wulapm Weinkelel, ka ar kitapm Mesadoniael antempel Akaiaelel. Kona ntiarko ser sankwunamp sepmel aiyipmelel i ko nti yupul misop yipm.  
\v 8 Pe karokn nti likekn eipm aser sankwunamp aiyipmel ka yipm ar nkiselel. Karokn. Ka nuarep wutu ka tiknin suknel sepmel naikul mi nakimp nti wantoel, eti nti wampwamp mitinkel ka eipm sank ampulp yapmunemp mintenkel aiyipmel epe. Pe ant mpi aser ntiel, ant karokn ampu na nikimp nti sank setel yupulp yipm. Karep nti eipm miniat.  
\v 9 Nti ankil ka sukueimp ant apulp yapmunemp aiyipmel. Nti nak na yipm ka nimisep niawurpm kitapmel wantosukurel, pe yipm ka nimimpilemp yapmunemp aiyipmel na sop Wulapm Weink ka ar yeklikeknelel, ka likeknelim pe yipm ko yupulpil niokn.  
\v 10 Aser nti ampu ka nak na yipm ka ar yukueim Jisas, Ninkilapm Wulapm Weinkel. Kil ka ampueik wuntuim aser Wulapm Weink ampu aiki kil i kil awomp yemp muanel apmuei pe kil ampu nkarpmop. Yipm yukueimil kona yek yemp keipmel Wulapm Weinkel yoel i ko kil ampu sumumpop ant. Kil arai nantip mua yirkomp ant i ko ant wamiyimp yapmunemp ntinkiliempel Wulapm Weinkel arai nininkel.   
\c 2  
\s1 Pol Nak Apulp Niokn Ka Kil Apul Ar Tesalonaikael  
\p
\v 1 Mamuntomp antilel nti, ampueik ant aser yipmel, niokn Wulapm Weinkel ka ant apulp yipmel karokn ar kuserel. Karokn. Ka yipm nkamp ntinkirai ampulp, niepm sepmel ka nanker.  
\v 2 Pe yipm'arokn wunempiskel ant apulp ka ant ar yemp aiyipmelel, nti moule mpurel karokn mpuaimpuai apulp Wulapm Weink eti nti ak ant wankepm suknel mitinkel apulp na ntunkorp niokn Wulapm Weinkelel. Ampueikel nti mpurel apulp ant soplikekn ar Filipai. Nti ka mpuliep ant, apul ant kuret. Aser Wulapm Weink ka ak ant yarkup mintenkel i kil ampu apul ant ar nkis niumumpuelim. Ant awomp nti arel i, ant mpi aser yipm nankimp yipm sank sepmel ankilel soplikekn. Ant karokn nkinkiekn apulp nti kana ntunkorp antel.   
\p
\v 3-6 Ant aiyimp kuap yipm na sop yayapel Wulapm Weinkelel, ka ant arokn sinkiael i ko ant ninkai yipmel na nikimp yipm sank puakrenkelel. Karokn. Yipm ka ntinkirai na yapmunemp antilel karokn kuret nako ant wunempyilep yipm wuntokn irpm mpuampua aiyipmel mi ko ant sompel. Pe ant arokn nar wulienk mperar mi ant nkamp marknimp ntri na wananklelel kuap yipm na ser ant akosepm nako yipm mpuaimpuai yupulp antel. Karokn. Wulapm Weink ankil ka aser yapmunemp pmiempniumpuaipm antilel, pe kako kil ankil nipikimp yipm na, ka ant 'arokn ampu apul setel kuretel nkuwepm ar yapmunemp antilel. Karokn. Ant arokn wat sank Wulapm Weinkel apulp na nia somp ant yer niampepm aiyipmel wantosukurelel nako yipm niremp antel. Karokn. Ant apulp na nia ko somp ant yer niampepm Wulapm Weinkel likekn, nako kil likekn mpuaimpuai yupulp antel. Kil ankil ka aser ant akosepm i kil mper niokn antempel sank sepmel ankilel ant ka nakel apmuei nta antilel.   
\p
\v 7 Ant ka aposel, ka Krais ankil wankes ant atel. Pe kona ant puiknel, ant oko yikei mpunti ka sil antel nako nikimp yipm na yek ant mpuampua irpm na yuwulmp antel. Aser karokn. Ant ka akei yapmunemp sepmel niuluknunel waiyimp yipm ntaka mantiek tniokn ka niumua akei nti ninkilapm ankilel akei aripelel, mi kil ak nti niumuapm alel.  
\v 8-9 Yipm ka memprien antilel, pe puikn antilel ka apulp yipmel ka suknelip. Pe ant ka mpuaimpuai yatip ka an nakimp yipm sank sepmel Wulapm Weinkel. Aser ant 'arokn akei sank nakimp yipm 'userel. Karokn. Ant antel ka ak yipm kitie likeknelim. Ant arokn wunempaserp wule antilel, apulpaser yipm ka memprien antilel. Arep ka ant mpi antemp yipm arel ka yipm apiser ant pe, aninkanink ant arokn na yikei yipm nkael yupulp na yipm'a yuwulmp antel. Ant karokn ak yipm niokn ntinkiliempel ntaka ntokwankepm suknel na yipm'a sanel. Karokn. Nomp awun, rien niunkurikn ant ka mamamp akei nta antilel apul niokn ntinkiliempel, i akei nkamump wuntokn antilel apulp niepm irpm antilelel yupulp na ant wat sank sepmel Wulapm Weinkel nikimp yipm yikei watelel.   
\p
\v 10 Ant antemp yipm arel, ant karokn ampu apul setel kuretel. Sankwunamp antilel ka ant ar nkisel ka akolikekn yatip, Wulapm Weink antemp yipmarko ntitmaken ankilel aser ant soplikekn. Pe ant ka moule yatewelelip, ant ka aim yapmunemp sepmel suwaink. Mewel kakorokn somp sank kuretel mperp ant.  
\v 11-12 Pe yipm likekn likekn ka ntinkirai apulp sankwunamp antilel ka ant apulp yipmel. Ant ka nuarep waiek ka apulp nti ninkilapm ankilelel. Yipm awup ntinkiliempel, ant ka mintenkitneip yipm, ampu apulp yipm yapmunemp mpililim i ant aikiwat yipm, nako sankwunamp aiyipmel ko akosepm yer niampepm Wulapm Weinkelel. Pe kil ankil ka aiyimp kuap yipm nako yipm yer nta ankilel nako yipm yintempil yupul niokn ankilelel mi ko yipm yintempil somp nia suknelel.   
\s1 Nti Moule Ka Ar Nta Wulapm Weinkel, Nti Ka Ar Nkis Niumumpuel i Arnkos Wankepm  
\p
\v 13 Ant ampu nak naremp Wulapm Weink aninkanink apulp yapmunemp yatel aiyipmel. Ampueik ant la aser yipm mi ka ant nakimp yipm sank Wulapm Weinkelel, ka yipm arokn akei eipmel nuarep sank moule kitapmelel. Karokn. Ka yipm eipm akei aripel i aim apmuei yapmunemp i ka ar mintenk apmuei yipm yapmunemp apulp na ka yipm aser sank niupukn aipopelel ka sank suknel Wulapm Weinkelelip. Kapepe sank Wulapm Weinkel ntakilelel ka apul niokn ar yapmunemp aiyipmel likeknlikekn nako nimpilemp sankwunamp irpm aiyipmel nako yipm yer nkis nternterel.  
\v 14 Pe wankepm irpm ampueik ka ninkem nti ntitmaken Wulapm Weinkel ar nta antuel Judael ar kitapm antuelel, ka pe ninkem yipm soplikekn. Nti moule ntieyarkup antuelel ka apul kuret ak nti ntitmaken opo ka aiki nia Jisasel wankepm. Pe yipm ka soplikekn, nti moule ntieyarkup aiyipmel pe ar kitapm aiyipmelel ka ak yipm wankepm soplikekn apulpaser yapmunemp aiyipmel ka ar mintenk antemp Jisas.  
\v 15-16 Ampueikel nti moule ka nak aworp yapmunemp Wulapm Weinkel, nti Juda ka ar nti wuntu. Pe nti ka ar Sepmel antilel Jisas wuntu soplikekn. Pe ekeielel nti ka apul ant soplikekn, nti ka naker ant, nkiyir ant naikul awomp yemp aiyipmel antempel i ant nkarpmok. Nti apul ntalepe aninkanink i Wulapm Weink aser ntiel, ka nti antemp nti moule wanto nkisemp wurokn. Yayapel antilel ka ant'a yet na nikimp nti moule kurieknel sank Wulapm Weinkelel, ka nti Juda ntumunkorp. Nti apulp na ant korokn nikimp nti moule kurieknel sank sepmel epe nako nti nimpilemp yapmunemp na yer nta Wulapm Weinkelel. Nti apul ntakilelel, ka ntiremp ant na yapmunemp'uretel antuel ka nkarp suknelim, pe yapmunemp ntinkiliempel Wulapm Weinkel ka antemp nti apmuei. Eti wankepm kuretel ka niminkem nti misilep.   
\s1 Puikn Polel Ka Nkirnkerip, Kil Kana Mpi Ser Nti Tesalonaikael  
\p
\v 17 Mamuntomp antilel nti, ant ka saiyip yipm yatip. Nti Juda ka nkiyir ant mi pie ant ar la peikel. Wuyen karokn antun ant, pe yapmunemp antilel ka nimisork apulp yipmel. Puikn antilel apulp na ant ampu na ser yipmel ka sukn nkirnkerip. Pe ant ntinkiliemp awup yayapel nako ant ampu mpi ser yipmel.  
\v 18 Apm Pol, apm ankil ka awup yayapel ntentenk, na mpi ser yipmel, aser karokn. Satan ka ntunkorp apm yatip.  
\v 19-20 Ant apulp na ant ampu na mpi ser yipmel, ka apulpaser yipm ankil ka weink apulp yapmunemp mpuaimpuaiel antilel. Ant kapuko natip yipm yatip kona antarko yet niampepm Jisaselel. Jisas kona ampu yoel, kil arai ser akosepm wunamp aiyipmel nako ampu yupulp ant sepm waperel yupulp yipmel, nako kil nikimp ant na “Nti Tesalonaika ka nuarep niepm sepmel ka tnei ar niokn aiyipmelel.” Yapmunemp antilel ka ar mintenk apulp epieel, eti ant ka mpuaimpuai ampulp yipm.   
\c 3  
\s1 Pol Wankes Timoti Mpi Tesalonaikael Ka Apulp Na Mintenkitneip Ntiel  
\p
\v 1-3 Yipm ka ntinkirai apulp sank Wulapm Weinkel ka nak apulp wankepm kana ninkem ant moule ka sopilel. Aser ant numpul apulp yipm, ka yipm ninkem wankepm nkamp yakop apulp nia Jisasel. Ant nak na wankepm irpm epeel oko yupul yapmunemp aiyipmel na yer mitimitink, mi rokn. I kapepe ant kitip sank a likekn apulp na antwuye Silvanus nti Pol oko yer Atens, pe ant wankes Timoti mpi amiser yipm. Timoti kil ka mamuntomp Kristenel antilel, pe kil ka moule nioknel Wulapm Weinkel ka nak apulp sank sepmel Kraiselel. Antwuye wankesil mpi apulp na kil yet yipm pmomp na mintenkitneip yapmunemp aiyipmel na yer mintenk yintemp Wulapm Weinkel.  
\v 4 Ampueik ant antemp yipm arel, ant ka nakimp yipm na wankepm mitinkel irpm arai ninkem ant Kristen. Eti ka yipm aser amorel, mpuampua kuretel epe ka niminink.  
\v 5 Apm ka wunempwaiyimp na Satan ko waker yipm yapmunemp ninkaiel kuap yipm, waker yipm yapmunemp mintenkel tikikn. Kona ntakilelel, niokn antilel kapuko nkupmus kitapm. Eti apm arokn na nkuainkuai yikei yer warpmel, apm wankes Timoti mpi aser yipm, apulp nako apm somp ntinkirai yupulp yipm, ka yipm ar nkis niumumpuel, mi rokn? Yapmunemp yipm ka ar mintenk apulp Krais, mi rokn?   
\s1 Pol Aiyimp Wulapm Weink Na Sikninepil Yayapel Na Mpi Ser Ntiel  
\p
\v 6 Aser Timoti ampu nanketel i kil sukueimp ant ampulp yipm, yapmunemp aiyipmel ka ar mintenk apulp Wulapm Weink, pe nti moule wanto ka yipm akei ntaniupuknel nkrawomp nti akei aripel. Pe kil nakimp ant na aninkanink yipm ka akei yapmunemp niumuaipmel wunempwaiyimp ant, pe yipm ka mpuaimpuai apulp ant, eti puikn aiyipmel ka apulp na ser antel ka suknelip, ka soplikekn nuarep ka ant apulp na ant apulp na ser yipmel. Ant eipm ntakilelel, yapmunemp antilel ka mpuaimpuai yatip apulp yipmel,  
\v 7 pe yipm ka akei Krais nkael. Eti sank keielel ka mintenkitneip ant na yet mintenk yirkos wankepm irpm ka ant ninkemel.  
\v 8 Ant eipm na yipm ka ar nkis niumumpuelim i pie apul yapmunemp ant mpililim.  
\v 9 Ant ka nak naremp Wulapm Weink apulp yipm yatip. Ant kona yet niampepm Wulapm Weinkel yintemp mpuaimpuai suknel yupulp yipm.   
\p
\v 10-11 Nomp awun ant aiyimp Wulapm Weink mintenk apulp nako kil krak yayapel nako ant'a mpi ser yipmel, pe yapmunemp mpurel ka yipm antemwunempel, arai ant ampu nikimp yipm yiki yapmunemp nako yapmunemp aiyipmel korokn wankel.  
\v 12 Ant aiyimp Sepmel antilel apulp na yapmunemp aiyipmel kana serp sukn nako yipm yikei nta niupuknel nkrawomp yipm aiyipm yintempel nti moule wantoel. I kapepe yipm arai yupul soplikekn nuarep yapmunemp antilel apulp yipmel.  
\v 13 Ant aiyimp Sepmel Antilel nako kil mintenkitneip yipm yapmunemp nako yipm yer ntinkirai yer niampepm Wulapm Weinkel, ka Waiek antilelel. Kona Sepmel antilel Jisas ampu na yo yintemp nti moule ntinkiraiel akeiwanto ka ankilelel, yipm'o yer yatewel nako Waiek antilel Wulapm Weink serel.   
\c 4  
\s1 Ant'orokn Yupul Tniompreimp  
\p
\v 1-2 Yipmarko mamuntomp, ampueik ant akei niawurpm Jisasel nakimp yuwap yipm apulp sank sepmel ankilelel, ka ntremp yipm apulp sankwunamp ka Wulapm Weink aser sepmel. Yipm ka ntinkirai apulp mi ka yipm apul sopel. Aser ekeielel ant ampu na yiki maipilem yikei niawurpm Jisasel ampu na yimp kuap yipm yupulp sankwunamp sepmel pe ko yipm yupul nako sikir mpi kurieknel.   
\p
\v 3 Puikn Wulapm Weinkel ka ntalekil. Kil nkamp yipm mper yatel nako yipm yer nkis sankwunamp sepmelel suwaink, pe yipm ko yep wule aiyipmel korokn yupul tniompreimp.  
\v 4-5 Yipm kapukorokn yupul sop nti moule kurieknelel, wunemp antuel karokn akorp apulp Wulapm Weink. Nti ka waker wule antuel apul misop puikn antuel. Aser yipm arokn. Sankwunamp aiyipmel ko yer sepmel suwaink yer niampepm antuel wantoel.  
\v 6 Mamuntomp Kristenel aiyiknel, ko yikn yepil yikei yiripel. Yipmwuye korokn yel niepm tinam sampolel. Ampueik ant sankamintemp yipm nankimp yipm na Wulapm Weink arai yupul yipm milminel yep sankwunamp'uretel ntalepe kona yipm yupulel.  
\v 7 Apulpaser Wulapm Weink karokn kuap yipm nako yipm yapmunemp nirkutupel na yipm waker wule aiyipmelel. Karokn. Ka kil kuap yipm na yer nkis musukorel sop sankwunamp sepmel suwaink.  
\v 8 Pe kona mouleel na niek nkiyir sank ekeielel, kil karokn nak nkiyir ant moule kitapmel likekn. Karokn. Ka kil nak nkiyir Wulapm Weink ankil, apulpaser ka Wulapm Weink ankil apulp ant i Pirpm Sepmel Ntinkiraiel Ankilel ka antemp ant apmuei.   
\s1 Ant Yiki Niuwul Sankwunamp Sepmel Nako Serp Suknel  
\p
\v 9-10 Wunamp sepmel aiyipmel ka yipm antemp nti mamuntomp Kristenel aiyipmel apulel, ka yipm akei ntaniupuknel nkramomp nti. Apulpaser ka Wulapm Weink ankil ntremp yuwap yipm i yipm apul akosepmim. Yipm apulp nti mamuntomp Kristenel aiyipmel ar yemp wampwampel ar kitapm Masedonia. Eti ka ant'o nikimp yipm sank niawurpmel yupulpi? Aser ant puikn apulp na yipm ko yupul sumpop sankwunamp sepmel epe yupul sikir mpim kuriekn.   
\p
\v 11-12 Yapmunemp yapelel aiyipmel ko ntalekil. Yipm yer nkis sepmel, nta wat yo pmin likekn, nako nti weinkyanker yuntun nia sepmel yimp yipmel. Ko yipm yikei nta aiyipmel yupul nioknelmp nako yipm niumuapm yuwa nti maken ninkilapm aiyipmel ntaka sank ampueik ant nakimp yipmel. Kona yipm yupul ntakilelel, yipm korokn yer nta wantoel yikei nti nkael.   
\s1 Sepmel Antilel Arai Ampu Yo Somp Ant  
\p
\v 13 Pe sank nonkel ant'a nikimp yipmarkoel ka ntalekil. Ant apulp na yipm'o eipm yukorp yupulp simi oko arai ninkem nti moule aiyipmel ampueik awurawurel. Ka yipm'orokn yikei saiyip muan warpmel numpul yupulp nti ntaka nti mentitmaken kurieknel apulel. Nti karokn yapmunemp mintenk apulp Wulapm Weink nako nti niampepm tneipilel, eti nti ka ar antemp yapmunemp wankepmel suwaink.  
\v 14 Aser ant ka ntinkirai apulp Jisas ka ampueik awur mi Wulapm Weink ampu aiki kil nkarpel. I kapepe ant kako ntinkirai yupulp Wulapm Weink arai yikei niawurpm ankilel ampu yupulp nti moule ankilel ampu ko serpel soplikekn. Kil ko somp nti moule ka akei kil nkaelel i ko ntiarko yintemp Jisas yer sepmel yupmueiel.   
\p
\v 15 Sank epie ant'a nikimp yipmel ka sank Sepmel Antilel Jisas ankil nakimp yuwap antel. Ka ntalekil. Kona Jisas ampu na yoel, ant ntitmaken Wulapm Weinkel peyar nkis keipmelel, ant kapukorokn yuwornulkn nti ntitmaken ampueik awurawurel i ant no niorknel. Karokn. Nti epe ka awur niorknelel kapuko serp no niorknel i ant ka nkis keipmelel arai sop nti no nkien.  
\v 16 Kako ntalekil. Ensel ka mpunti sil mi ka ar niorknelel, kil oko yikei mampel niek sank niawurpmel yupulp Jisas kana yek yemp keipmel yoel, pe nti ko yuwor ma yiki yilump i pmiemp Wulapm Weinkel ko nti yumop. Mpuampua irpm epe kapuko ninink krikel. Pe nti moule Wulapm Weinkel ampueik awurel, nti oko serp no miniorkn.  
\v 17 Niatel i ko ant ntitmaken peyar nkis keipm mi karokn awurel, kil ko yuweip somp ant yupul no i yintemp nti mentitmaken Wulapm Weinkel opo nomp mporkeipm, i ko antarko miser Jisas i yintempil yer sepmel yupmueiel. Kapepe. Sank ka mintapepe.  
\v 18 Yipm mpi nikimp yuwap yipm aiyipm sank epie nako yapmunemp yipm mpililel, mi ko yipm yer nkis mintenkel.   
\c 5  
\s1 Ant Ko Yer Niampepm Ntankuel Yupulp Jisas Na Yoel  
\p
\v 1 Pe sank ekeielel ka sank yerk, ant okorokn nikimp yipm sank nuworpel yupulp atikel kona Jisas na yoel.  
\v 2 Apulpaser yipm ankil ka ntinkirai ampulp, arai kil yo yikei nintipmel nuarep nti mewurkite ka at nompel.  
\v 3 Ekilelel nti mentitmaken arai niek na, “Yemp pie rienelim, ant pie apmuei sepmel.” Nti na niek ntakilelel i, wankepm oko ninink yikei nimintipmel ntaka yakop ka nti maken nkamp apulp ninkilapm ka nti na rael. Aser yakop epe arai nti somp yer nta Wulapm Weinkelel kako soplikekn, nti kapukorokn sirkemp.   
\p
\v 4 Aser yipm ntitmaken Wulapm Weinkel, yipm ka yatel.  
\v 5 Yapmunemp yipm karokn nimpiemp mi ko yipm nkis kukoel nako yipm serk prierprur yupulp Jisas kona kil yo yikei nintipmelel ntaka mewurkiteel. Karokn. Yapmunemp aiyipmel ka mpilil, ka ntinkirai ampulp.  
\v 6-7 Eti yipm kakorokn nkis wunamp'uretel nako nkuwepm yer yemp nimpiempel ntaka nti moule yapmunemp antuel karokn akorp nako nti nikerpm Wulapm Weinkel. Nti moule ntakilelel, yapmunemp antuel karokn mpilil apulp sankwunamp sepmel, ka nuarep nti ka at yemp nimpiempel. Nti moule ka akei nimpiemp nkuwur mi al mpep'uret ka apul mamp kukoel, nti ka nuarep moule ka ar niumpu wuntuel.   
\p
\v 8-10 Eti yipm kako nkis niampepm ntankuel yet wunempel yep wule aiyipmel.  
\p Wulapm Weink karokn yuwak yipm na somp yakop yer nta ankilel yupulp sankwunamp'uretel. Karokn. Krais Jisas Sepmel antilel ka nkamp yemp antilel wuntu aikol lonkuntonkel apulp yapmunemp'uretel antilel. Kil ka nantip mua arkomp ant, apul ant na yer nta ankilel yet yemp yapelel yintemp yapmunemp mpililel. I kapepe wunamp sepmel ant'o sopel ka ntalekil. Ant'o yupulp Wulapm Weink suwaink, yikei kil nkael pe ant'o yikei yapmunemp mintenkel niampepm tneipil nako kil simpop antel. Pe ant'o yikei nta niupuknel nkrawomp nti wantosukurel. Kona ant yupul ntakilelel, kako nuarep ant ka ntankamp lontumpua nimimpiepm mi ka tunkorp ant aipopelel i ko ant wamiyimp yapmunemp ntinkiliempel Wulapm Weinkel epe i yintempil yer sepmel yupmueiel. Kona yipm yuwur mi yipm nkis keipmel, yipm oko yintempil yer sepmel soplikekn.  
\v 11 Kona ntakilelel, yipm mentitmaken wanto Wulapm Weinkel kapuko yikei sank epe ant nakimp yipmel mintenkitneip yipm aiyipm nta karep yipm apulapulel.   
\s1 Wulapm Weink Arai Yikiwat Nti Kristen  
\p
\v 12 Nti moule ka Wulapm Weink yuwak nti na yuwulmp yipmel, ko yipm yep nti yikei yiripel eipm sank antuel. Nti ka awor sank ntintomp ntremp yipm yayapel Wulapm Weinkel nako yipm nikerpmel.  
\v 13 Niokn nti apulel ka ntinkiliemp, ko yipm yiki nia antuel yumpulp. Yapmunemp yapel aiyipmel ko yer yintemp nti. Pe yipm kapuko nkis niyepm yer yapmunemp likekn yintemp yipm aiyipm.   
\p
\v 14 Ant'a yiki yipm yapmunemp nako yipm sankintemp nti moule likipelel ka nkarkemp nioknelmpel. Pe nti moule ka nkarkemp muatiel, ko yipm mintenkitneip nti, ko nti ampu yer niuluknun. Pe nti minititep ka awup ntinkiliempel ko yipm yikiwat nti. Kona yipm yupul ntakilelel, yipm oko yikei niumuaipmel yupulp nti wantosukurel.  
\v 15 Kona mewel na yupul yipm kuretel, yipm'orokn ampu yupul kil kuret waperel. Karokn. Aninkanink ko yipm yikei yapmunemp sepmel waiyimp yipm aiyipm yintempel nti ntitmaken kurieknel wantosukurel soplikekn.   
\p
\v 16 Aninkanink yapmunemp aiyipmel ko yer yintemp mpuaimpuai suwaink,  
\v 17 pe yipm'o yimp Wulapm Weink nikimpil sank ntentenkel.  
\v 18 Pe yipmarko mentitmaken ka Krais Jisas ar pmiempniumpuaipm aiyipmelel, eti kona mpuampua sepm'uret ninkem yipmel, ka puikn Wulapm Weinkel ko yipm nirempil niek tukuarempil yupulp.  
\v 19 Kona Pirpm Wulapm Weinkel na yupul niokn ntaka yite ka kakirp nael, yipm'orokn yukur.  
\v 20 Ntakilelel, kona mewel na niek yuworp yapmunemp Wulapm Weinkel yipm'orokn yikei eipmel mi yimpil pmomp yer kil.  
\v 21 Aser yipm'o eipm ser yuworel weink ankilel kona sepm mi kuretel. Sank kona sepm ka wat a ntunkel, ko yipm yum yer yapmunemp yupul misop.  
\v 22 Oroknel, (add? kona yapmunemp simisimi ka kuret yer niampepm Wulapm Weinkelel) ko yipm nta yikei nisepel.   
\p
\v 23 Yapmunemp musukorel ka nkarp ar Wulapm Weink likekn, i kapepe (apm aiyimpil nako kil yupul) ka niokn ankilel kil ko yupul yapmunemp pmiempniumpuaipm aiyipmel sukurel ko (na) yer nta ankilel likekn. Ntakilelel, Jisas Krais kona yoel, Wulapm Weink ko yuwulmp yipm nako moule aiyipmel pmin'uriekn ko yer mporel suwaink.  
\v 24 Wulapm Weink ankil ka aiyimp kuap ant na sop yayapel ankilel. Sank ka Wulapm Weink nak nuwarel, kil karokn ninkaielel. Ka kil akei mintenk ankilel apulp yipm.   
\p
\v 25 Mamuntomp antilel nti, yipmarko yimp Wulapm Weink yupulp nako kil nuworp antel.  
\v 26 Yipm kona ninkem nti mamuntomp Kristenel aiyipmelel, ko yipm niremp nti, ntayiremp nti.  
\v 27 Ant akei nia Sepmel Antilel Jisasel nakimp yipm, pe wupm epie ko yipm yet yapel yimp, nikimp nti ntitmaken Wulapm Weinkel yikeiwanto.  
\v 28 Ant aiyimp Sepmel Antilel Jisas Krais, kil ko yeyupulp yipm yupmueiel. Kapepe. Sank ka mintapepe, karep miniat.