\id JON jon.sfm Waris Jonah \h Yona \toc1 Yona \toc2 Yona \toc3 Yona \mt1 Yona \c 1 \s1 Mongo Sesoana Moashulnindrini Sesoanamini Wohgalm Vevna, Wo Sesoava Henga Hemba Nembavra Pethana. \s1 Yonava Sesoana Moamba Wuleihalahangana. \p \v 1 Yawe Sesoana moashulnindrini mongo doara lohna, nihilva henamba Yona, Amitaina ombol. \v 2 Hev omnana, phorava, honaminioa dom gao Nineva kembellam, wo di kana moam ishomana vinvm, no kembelva mendekli lohv. Os ishunu, Sesoava doa yenamba nunglinna, yimba ambo sahonam av. \p \v 3 Wo heva os owai, Yonava osva venamoa, himba Yawemba ona nombolvhoa lahangana, wo himba Ninevaramba ganamoa, himba indanam gana Yopa kembellam wandam. Wo diva mongova botva vohalm vevna Yopariniva, Tasis kotaram wanda mongnahalm. Doa Yonava no botna aralm di dembrahona, vongo botra. Os nengvna, kava Yawenaminiva wohgalm vev. \p \v 4 Doa botva nomba Yopariniva vohavna wanplombmonam, doa botva mendah monamba hovrahovra ona gana, Yawe vuvi mendeklim deuhpho. Deuhphonamba, vuviva wanplombrava mendekli vevna, ombokva mendekli vevnamba, wo botva indkokla vevna. \v 5 Wo no botna andranindva pemba esvema vivna, nokovhoawolnapenam os i. Wo himba vivnamba, hevna tihm indakonda wewusa unvna, no tihmba himba doara sembayang velvohinvnam. Wo no andranindva mendah wewusa unvnamba, wohva himba botriniva deimbvnamba, wanmera dembrapuv vevna, os ningvna, ata kava vikokowonam beswonam angavav, kinmba doa kava dembhapuv vipiei. Heva os owai, eva vikokolva, botva mendah powalwolalm wohvevna. \p Nomba andranindva diva vivnamba nonamba, Yonava himba bot endallam pihanamba, di ninpol wohkovopena. \s1 Botna Andranindva Yonana Indkoklava Levra Opieina. \p \v 6 Yonava ninpol doara wohkovopena, wo botna aralva ganamba, Yonam dandwonam velanongla ovravna, pai, yimba ambo ninm proima? Pho, wo pevna tihm sahmana, nom ten pev sembayang velvohmanavm. Os sahmano, kam wavra vovhueinu. Wo pimba ata osva nokovhoawol vilovavmoa. \p \v 7 Botna aralva os Yonamba omnanamba, doa andranindva nomba os hevm eishovna, piv hona vuvina plalm aslalvai, manara pimba indkokla vilolmba vev? Anna indkoklava dihi lohv? Doa aslalanamba, wo osva himba nunglina, Yonana indkoklava lohvna. \v 8 Doa hev alalkohona Yonam, doa kava aslali, yena indkoklava dihi lohv, wo noinda pimba indkokla vilolmba vevna, ata pimba nepola vilota. Es hevpa yena indkoklava tanam lohvmi? Wo hev os sah ovrivna, yimba esalm prona? Snal yenamba moamba? Andini yimba? \p \v 9-10 Doa Yona unna, kava Hiprunindrini, wo Yawem kava sembayang velohmanav, ten Sesoa mendekli sena avm, hev ten doara vewolna wanim pethaim. Henaminiva kava wohgalm vevna, wo noinda hona yena botrava kava siheinna. \p Wo no botna andranindva pemba esvema vivna Sesoanapenamba, os umnina, pai, indkoklava yenamba nomba mendekli lohv, yimba Sesoana moamba nombolvhoa lahaprona. \p \v 11 Doa nonamba vuviva esvemava daihavna, ombokva mindnam vevnata, wo no andranindva henga Yonamba umnina, ata yemba kava es vinivav, wo noinda wanmba ata beswonam lithavav hevnavhora, pimba beswonam ata aevulvav? \p \v 12 Wo Yona unna, ambo kam wanplombra pilpipovo, wo noinda wanmba ata beswonam lithavav. Noinda viu, kava indkokla vena, Sesoana moamba kava nombolvhoa lahaprona, wo hona vuviva pimba noinda indkokla vewolalmba vev. \s1 Botna Andranindva Yonamba Wanplombra Pilpipovna. \p \v 13 Doa andranindva henga botm wulangalm vevna engalpethallam. Heva os owai, botva ombokra saha vrevna, hengava galmba engalpethallamba. \v 14 Doa no botna andranindva Yawem mindnam ishumnivna os, kava ata hona tendoriniva Yonamba pilpipovvav wanplombra, wo manam yimba kamba hengava esesmba indkokla vewol vevav henilmba. Manara, yimba Yawe, pev vuviva honamba deuhphoi. Wo manam yimba kamba osva ishunvra, temba pevpa ishunvpa no pevna indhanamba, temba helvakomo vewol vivpa owalmba. \v 15 Doa Yonamba os kevrinamba, botriniva wanplombra pilpipovna, wo wanmba lilnam henga hevnavhora beswonam lithavna. \p \v 16 Wo osva botna andranindva mindnam pem vivna, Yawenapenam, wo Yawem sembayang vinivna, tatamba wesang vinivna, wohweisumbul owolovna hemba. Os uvna, si kava Yawemba sembayang velvohmana venavav. \p \v 17 Doa Yaweva wanmerinim tambkom mendeklim wolaihangana, Yonam wunukhoalm. Wo Yonamba tambkona emerava diva os ana, okomba samblamong si samblamong. \c 2 \s1 Yonava Tambkona Emera Yawem Sembayangmona Osahowomanana, Lehra Kava Beswonam Av. \p \v 1 Yonava tambkona emerava livnamba, Sesoam himba sembayang vaomnavna os, \v 2 Yawe, yem kava ishomnav, hona indkoklava mendekliva kamba nonglaphoiva, wo noinda yem kava sahmanai. Kamba nepola velm vei, di indhanana sumbhol avm, wo yimba kamba hellei. \v 3 Doa pev men kam wanplombmera holopipahai, wo os kava wan endallam pihai. Wan kamba wohehlithi, wo ombokva mendekli kasra sena vevna, no ombokva pev ten doara deuhphoim. \p \v 4 Wo kava os omni, yimba doa kamba wohwolaihangai pevnaminiva. Heva os owai, os kava nengv, hengava kava si pevindava phovavta, diva mendekli temepelduvrava. \p \v 5 Tanam, wanplombva kamba wohehlithi, wo wan ilva kamba ningei kura, wo kamba wusprovna, \v 6 wo kava os nengvna, ata kava wan endalm nonglaphovav, di olona plalva lohv, kava di si yunalmba wohavav sahonamba. Heva os owai, yimba kana Sesoa lohv, wo pev kamba henga beswonam waivongai, wo henga mekava beswonam av. \p \v 7 Kava os nengvna, kamba dahav, novpa kanamba velawosa vevna, wo noinda yemba kava sahmanalm vongai, wo yimba kamba hellei. Di pevinda mendekli tempelduvra yimba kamba hellapra vev, wo kamba deuhphoi. \p \v 8 Monglava indhanamba yemba meis haravhueimniv, hevna tihsongomangas okolowol viv, heva os no tihva indhanamba kekalvho vewol vinvmoa. \v 9 Heva os kavpa owai, kava si yemba sembayang vemnavav tatasowanahonam, wo yemba okolavra sangalna. Memba yemba kava wohishomniva, si kava vevav, manara, doa kava yemba lihai, yengas indhanamba lopshawol vev, noinda beswonam av. \p \v 10 Wo doa nonamba Yaweva tambkom omnana, Yonam nongollahalm gao wan engallam beswonam. \c 3 \s1 Yonava Yawena Moamba Hellena. \p \v 1 Doa Yaweva henga Yonam omnana, \v 2 phorava, honaminioa dom gao Nineva mendekli kembellam, wo ishungu vinu no kana mendeklimom, ten seilm pevm kav ishomnanam. \v 3 Wo Yonava no Sesoana moamba hellenamba, Ninevaram ga. Nineva kembelva nomba mendeklinonoa wohlohvna, wo kembelhovmonamba indhanamba angavnamba, simba samblamong vewol velvohvna. \v 4 Wo Yonava no kembelhovmonam mongawa okombanam ganamba, doa kembelnindm os ishunna, doa mongova weisva khuarava, wo eunumbulwusnam nonam, Sesoava si yemba indkokla vewol vevav, wo yemba si os mueisowa vevav. \p \v 5 Doa Ninevanindva os no Sesoana moamba hillina. Indkumbi himba hillinamba, kuwul eva ombandhana, wo hevm eishovna, lehra oita, pimba indhanakokla, wo doa pioa sahoklaoa maivethalvohra. Os pimba si innemba lovahavra, wo kayenmba kolol pimba vewol vivra, wo osva Sesoava si pimba nongalvra, doa himba wenumbsna av. \p \v 6 Doa Ninevanindnamba king kuwulva no Sesoana moamba hellenamba, hevna kursiva besalva wuleihalahaphonamba, kayenmba besalva selvvrana, kayen kolol vethavna. Vethanamba, doa smovsram holvape, di avna, osm vevna, Sesoana novra kava indhanakokla. \p \v 7 Doa king kuwul kembelnindm moa ishonga vinna os, kava yena kuwul luhunv, ka mongla mendekli yena, os yemba kava ishunv, manam yimba innemba hlavav, aembu. Pevna deuvtatava manam yimba innemba pomba dahwol vivra. \v 8 Kayenoa kolol vewol viu, pevm eva pevna deuvtatam, wo Sesoam pepthanam sahvungo vinivm. Daipota pevna indkoklaoa yeoa wuleihu, notongom, notongom, \v 9 Sesoava dihi no lomomomba maivethalm vev, wo si pimba osva indkokla vewol vevavmoa. \p \v 10 Doa Sesoa nongalna Ninevanindmba, ona, hevna indkoklava doa wuleihina. Wo himba wavra vovhueinnamba, noinda hevna undmba weihaloh vrevna, indkokla vewol venamoa, beswonam. \c 4 \s1 Yaweva Ninevanindmba Und Vewol Vevna, Heva Os Yonamba Wuspromanavna Yawem. \p \v 1 Doa Yonava os nonglavna, Yaweva Ninevanindm indkokla vewolalmba vevmoa, wo noinda hemba wusprovna, \v 2 Yawem ishomnavna os. Kava seilva diva kavna petharava avnamba, kava yena wevsava nengvna, yimba indhanamba wavra vewol vinv, yemba lelnamba wusprowol vevmoa indhanana indkoklarava. Yimba indhanamba nongalvpa, himba hevna indkoklava wuleihiv, wo yimba si os pevna undmba weihaloh vrevav, indkokla vewol vevavmoa hemba. Os kava yemba nonora lohmanav, wo noinda kava lelnam wohgana yenaminiva mongona petharam, yena moamba nombolvhoa lahangana. \p \v 3 Ninevanindmba kana ungundmba yimba indkokla vewol venamoa, wo kamba noinda wusprov, wo kamoa dahara, kava lohvavmoa. \v 4 Doa Yawe Yonam henga omnana, yena nengavnangva yunam besalma, ah? \s1 Yonava Ninevanindm Nongalga Vawovna. \p \v 5 Doa Yonava Nineva kotariniva venamba, dom ga, okomba ten pholohvm, wo thindruvpeta venamba, di avhoa. Nineva kotanindmba nongalga vawovna, osm vevna, Yawe manavema vintami no kembelnindm? \p \v 6 Doa Yawe Sesoava Yonamba nengmanana, ona, ka numhavav. Doa hev ona, wo noinda mongo weselva di polanamba, Yonana thindruvm ehlathavna, ata humeis vuvrevm, wusproa. Wo nonamba Yonava indk vethavna no wesellava. \p \v 7 Doa simolnam venamba, simba bumbuthovnamba, Sesoava henga mongom simbetohom wolaihaprana, nomba weselva kovokusethavna, wo nomba weselva henga os wohsoulana. \v 8 Doa okombava hovrahovra vevnamba, Sesoava vuvim suwepavalm wolaihapramnavna, no vuviva nomini prona, ten okomba pholohvm. Wo nomba vuviva okombahulva vevnamba suwepaval, wo Yonamba vuvrenamba, wo noinda hemba novluwul vovhoana. Wo Yonava mindnam duus vevna, os nengvna, kamoa dahara, kava lohvavmoa \p \v 9 Wo henga Sesoa omnana, yemba yunam wusprovma hona weselkoklarava, ah? Wo Yona ophona, lehrata kamba wusprov. \v 10 Wo henga Yawe omnana, weselva nomba mongnasiva polanamba, mongnasiva henga soulavna. Yimba pevpa endhanamoa honamba, yimba piara vrenamoa, wo es hevpa yemba wusprov noindava? Memba yemba wusprovpa hona weselkolarava, \v 11 wo eva kava wavra vovhueinvavta Nineva kembelnindmba. Manara, kota mendekli lohv, himba indhanamba eva indpetamma, 120,000pelara av, wo otolva mindnam diva wulaevv, nomba otolva tit viv araravalna indkoklava. Wo eva deuvtatava mindnam diva wulaevv. Doata Yonana moa.