\id 2TI 2ti.sfm Waris 2 Timothy 
\h 2 Timoti 
\toc1 2 Timoti  Polva Timotimba Omnana, Kamba Doa Murapeta Dahalm Vev, Hona Andrava Si Kava Yena Englisra Holothovav. 
\toc2 2 Timoti 
\mt1 2 Timoti  
\mt2 Polva Timotimba Omnana, Kamba Doa Murapeta Dahalm Vev, Hona Andrava Si Kava Yena Englisra Holothovav.  
\c 1  
\p
\v 1-2 Kava Pol, kava hona tombaimomba novol vipipramnav yem Timotim, kava yemba mindnam und vev, kavna ombolnonoamsna. Sesoa kamba hev pusvundthoana Yesus Kristusna moalamangnindrinielm. Sesoava kamba pusvundthoanamba, wo himba kamba omnana, yeoa moaoa wulluhungu vinvm hindm hindm, nemelwevsanam alm. Wo nonamba himba si Yesus Kristusna nemeltindilmba avrava, himba si nemelundna Yesus Kristusnana avav. Sesoava ovlahinv hemba os. Sesoa ara, eva Yesus Kristus yemba undalm evevra, eva beswonam wavra evevhomnavra, wo yimba beswonam undwonam noinda avav.   
\s1 Polva Suwenamendna Ovrevna Timotim.  
\p
\v 3 Kava kavna sembayangdava yemba putpialohvmoa owaimomolva sia okomba. Wo kav vev, omnav Sesoam, yimba lehra venav hemba, hona sembayangdava. Himba Sesoa kana simbehumunna eindhumunna sembayang vinivna hemba. Wo eva osoa kava hem andra venavta, kav nom nonglavm, os ov, memba lehra.  
\v 4 Kava os nengawov, yimba wenamba kainda avna. Wo kava nengv mindnam hevm os i, yemba nonglalmba, wo osva kava indk vethavav.  
\v 5 Kava yena undmba tanam nengmanav. Nomba sna undva, seilva yena ongapevna Loisna lohna, eva pevna avapevna Yunisna. Wo os kava nengv, yimba nona sna undnamba lohv.   
\p
\v 6 Memba honamba kava hengava yenamba nengavnangmba owiliha-phovpa, nonam andra velm, andra noi ten Sesoa pevm vraohnam. Sesoa yemba vraohna nomba andrava, nonamba kava englava kavnamba holowohavnamba yeindava. Doa taiha vevra, os ora, suwemda tavrakilihavongo vev.  
\v 7 Sesoava pimba hevsongolkoklava daswolnamoa, osmba noinda pem vivra. Himba pimba daswolna hevsongolnana, wo pimba noinda nonapopolva av keknamba, wo pimba indhanamba monglamba und vewol viv, wo pimba pivmba eukho vevra.   
\p
\v 8 Wo noinda osva manam yimba lousva vevra, ishunilmba indhanamba pivna mendekli Yesus Kristusmomba. Wo eva manam yimba kanapenamba lousva vevra. Tanam kava buinindrini mendeklina. Heva os hona kinmba kava vrav, hena besal nemelmonana. Wo noinda osva yeoa kam pethamno, honam kinm vralm, manara, Sesoava pimba suwenanovnamangas loihanga towandmangas wolana, honamba velmba.  
\v 9 Sesoava pimba lopshanamba, hevtindilm kekaiv vena. Memba noindava owai, manimani memba pimba pivpa vivpa, heva os noinda nom, hev ten nengvm, eva noinda hev ten pim undalm vewol vena. Nomba hevna undva pimba temba nonamba daswolnamba Yesus Kristusnanamba, nonamba manimani suvevnamoa mendah.  
\v 10 Wo sismba pivna mendekli Kristus Yesus prunna, wo noinda osva, mani eva pimba shaluhunna, novnamba nonglalmba Sesoana undmba. Yesus Kristusva suwemsna muengna pina dalalmba. Manara noinda, pimba si dalvrava, henga phosohvra. Wo besal nemelmonana himba pimba novpa wuleihinv monamba, no undnam alm, osm owai, es eva mueisowa vevav.   
\p
\v 11 Kamba doa kikih vrena, ishomana vinilm nomba besal nemelmomba, eva moalamangnindrinielm guruwolm.  
\v 12 Wo doa daipotava kava kinwondava ilohv, noinda kava ishunvm besal nemelmom. Heva os kava lou vevmoa. Kava louhui, manara, kava wiyera lohmanav Yesusmba, hemba kava keknamba undnahonamba lohmanavpa. Wo vei, os kava nengv, himba si kekalvho vewol vevra nomba manimani, himba temba kaindava slowothonamba, heva verava, no nambai phora.   
\p
\v 13 Keknam wohengvm moanonoam, pev ten hellevnam kanamini. Engvm, osm ovra, os avm, pioa undnahonam keknam hemoa amnavra, indhanam monglam nesmos vewol vivra, men piv avm Yesus Kristusinda.  
\v 14 Yeoa dandana vrevm moanonoam, nomoa temba kava yemba ishomnanamba. Dandana vrevm Sesoasongolnapopol, henoi ten eungu vinvm pivinda.   
\p
\v 15 Yimba nonora lohv, osva doa doara kamba dasvo buona Asiapethanindva, eva hona tendorinisambla Pikelusi Hermokenesi.  
\v 16 Kava sembayang vev, osm mendekliva si wavra vrowol vevra Onesiporus tatanamba. Himba elsus kamba kolvralohvna, himba louva velohvnamoa, osva kamba omnavna, buimera av, owai.  
\v 17 Himba nonamba provnamba Romba, himba kamba keknam silelvna, venamba, kamba nonglana.  
\v 18 Kava sembayang vev, osm mendekliva si wolaihavav Onesiporusmba hevna wavrarava, no nambainamba wetatmorava eksuwulvrava. Yimba nonora lohv, kamba lunit luthuwulana Onesiporusva diva Evesusrava.   
\c 2  
\s1 Timoti, Yeoa Besal Valgonindrinimsna Loho Yesus Kristusna.  
\p
\v 1 Yimba kana ombolnihilnonoamsna lohv. Elsus yeoa wohlohvm Yesus Kristusna wavrakolana.  
\v 2 Vena, pev eva annind annind doa yimba hillina, nonamba kava numhowol vevnamba. Wo eva yeoa no moana numhowol vevm monglamoa indhanamoa, pev ovra, memba lehra himba honamba lohv. Wo himba eva osva vivrava, owalmba nona eishoraohvra.   
\p
\v 3 Yeoa keknam monglaoa dawoho hona andraoa, kinmoa gualmoa kamongooa. Wohvevm, os ovra, Yesus Kristusna valgonindrininonoa.  
\v 4 Valgonindva viv, osm indk vethara kana kuwuloa honinda, wo noinda osva himba hevna nambaiva pilpiavmoa ombamba, osva temba monglava indhanamba vivpa.  
\v 5 Wo eva osta, nomba windetatanonoanindriniva dandwonam alahmana vev, himba temura wohengvra moamba, osmba ka kuvhoawol vera. Owai vellava, si himba owolakohavav, hevna topi moainalmba vralmba.  
\v 6 Wo eva osta, osondranindriniva himba nomba lotholohollava osondrarava, henoisna miva si nevra nomba innemba, temba hevpa wolanamba.  
\v 7 Honamoa keknam nengvm, memba honamba kava ishovpa. Mendekliva si yemba pueuvelavav, keknamba nengalmba, osmba manam manam temuramba levrapivongolmba.   
\p
\v 8 Elsus nengaomanavm Yesus Kristusmoa. Himba lohv Devittindirini. Yesusmba dahanamba boasna, wo himba henga phona pokamariniva. Honamba memba besal nemelmoa honana kava numhowol vev,  
\v 9 wo kava kinm alhv, noinda no besal nemelmora. Eva osva kamba ningivna wenamba kelsombovhonindrinimsnamba. Wo heva os Sesoana moamba wenamba ningilvmoa.   
\p
\v 10 Wo ambo heva kava kavmba piapahavra otollinimsna, vralmba kinmba. Kava wohvev honamba, osra nomba Sesoava temba kikih vewol venamba hevtindilm, heoa beswonam ara, nona Yesus Kristusindaoa. Wo himba si avra hemongova beswonamangas yunalm yunalm.   
\li1
\v 11 Moamba memba tanamolnam,  
\li1 Pimba dalvrava hemongova, wo pivva si osoa henga hemongo aevulvrata mongawulm.   
\li1
\v 12 Heva os pimba sambla undnamba amnatava, omnalmba hemba, eva himba si os sambla und verombwolvrata, pimba unilmba.   
\li1
\v 13 Pimba keknamba undnahonamba amba owai vetava, himba hevpa si yunalm wohengvra hevna moamba, manara noinda himba hevmba es eva dasalmba weihaloh vrevra.   
\m  
\s1 Timoti Yeoa Andraoa Keknam Vevm, Sesoana Andranindrinielm Loholm.  
\p
\v 14 Hona moaoa yunalm osangas wohlotholohvra, wo ongawolvm indhanamoa Sesoana novra, ata alhuvm ombamora homeis. Sna moarava alhollava, nomba moamba owaimomolmba mongomba kolvravavmoa, nomba ambo indkokla vewol vev, nom henoi ten hillivm.  
\v 15 Yeoa hevm besal andranindrinielm lohvm, wo nomba Sesoava vravra, eva pevmoa wohwiraohvm nihnahonam Sesoam. Andranindrini ehlapuvral loho, snal os owai, louva hemba eilh vrevra hevna andrarava. Sna andranindrini loho, noi himba vevrav moanonoava besalmonamangas.   
\p
\v 16 Indanam ehalla vinvm nonapenamoa, himba temba ningewol pawolmomba sislia vrivpa. Nomba sna moamba si indhanamba wonsihavra esvema Sesoanaminiva.  
\v 17 Nomba moangakalamomba si pomsna selelevhoangavav, os maim ora, uvavul nihmerini. Himeneusiva Piletusiva sna indhanarinisambla elohv.  
\v 18 Himba moanonoava doa doara pelmai evethana. Himba os ohona, indkumbiva indhanamba doa phosohna pokamariniva, hengava sismba si phosohvavmoa. Wo no sambla indhanamba indkumbina undnahonam keknam almba paslasal vewol ohovunvna.  
\v 19 Wo heva os Sesoana bolvol boalgalva osangas wohlotholohv keknam, wo moamba honamba di noinda novol velohv boalgalsra,  
\q1 Wo mendekliva nongalv, osva ov, himba nomba memba kana. \rq Namba 16:5\rq*  
\m Wo eva osoa novol velohvta, indkumbiva nomba temba osva uvpa, kava keknam amnav mendeklimba, doa heoa wuleihivra sahoklamoa.   
\p
\v 20 Di mongo deuvmendeklira wo manimani nomba nalohvpa, hevm nonangas vewol vina golna, silvana. Wo eva monglava nona vewol vina, vena, tina, eva sembpethana. Wo nomba dumbvpa monglava, heva mana vema mendekli andraramangas, ombandraramba noi mongla dumbv, honi dumbv tina, sembpethana.  
\v 21 Himba nomba hevmba posvetava nemelalmba no monakoklariniva, hemba nomba si osva moainal mendekli andrarava waisaivvav. Wo himba si dendalva ora lohvra, wo mendekliva si osva hemba ovovravra andraramba. Wo himba si ambo plasra lohvra, besal andramangasm velm.   
\p
\v 22 Wo noinda osva yeoa ehalla vevm, no nengavnangkoklanapenamoa, temba vrivpa tendotowondva. Keknam lehvm, honana loholm, beswonam alm, keknam undnahonam loholm, nesmos vewol velm, eva windewonam alm. Honana loho, mongawulm moakot velm hindmongom, nom ten noi he sembayang vinivm mendeklim, mana vema hem sahoklal kethawolhui.  
\v 23 Wo manam yimba hillinvra no ningewol pawolmomba. Manara, yimba nonora av, osva sna moakoklarava os ovona, si verava, mendekli vera daosmolm.  
\v 24 Mendeklina andranindrini, manam yimba velanongla vewol ovovav. Yeoa luhunvra besal indhanariniangas indkumbimoa. Yeoa lohvra besal guruwolmangas. Yeoa indhanarini windelalm wohlohvm.   
\p
\v 25 Mendeklina andranindrinioa ambo taivwonam numhowol vevra hemnomoa, temba himba yemongova hona moarava ahnamba lovahwolvpa. Sesoainda ambo temba lohv, heva hev verava, ora weihaloh vewol vinv indm, osm saivra moanonoaram.  
\v 26 Setan doa engla sheinna hemba, wo newond vewol vena, nom velm manam manam, hev ten nengvm. Wo heva os himba hengava moanonoamba nengvhoallava, himba osva hevmba kilumbshuapravav Setanna newondriniva.   
\c 3  
\s1 Ovi Pethai Imhara Evhowolvram.  
\p
\v 1 Honam nengo os, si indkokla ongolohvav, nonamba ovi pethaiva imhara evhowolvrava.  
\v 2 Wo nonamba indhanamba si hevmangas nesmos avramana vevra, eva dimangas und vivra. Himba si os vivra, vevra, hevmba uvra, kangasta, eva helvatatohluhul avramana vevra netesnalm. Himba si eishunvra monglamba wankenlusmona owalmba. Himba si hilwilvramoa hevna araravalmba. Himba si onengvhunvavmoa hengava nomba indhanamba, temba hemba enesmos vewol vivpa. Wo nomba indhanamba si snamba avramoa, Sesoava hevpa temba nengvpa.  
\v 3 Himba si owai, avramoa, nesmos vewolalmba monglamba. Himba si sambla und vruwulvra, maisasa vewolalmba owalna indkoklamba, wo si eishovra moakoklana. Himba hevmba si beswonamba naengho vewol vivramoa. Himba si und wohvivra osmangas, eva si ovunvra nomba manam manam besalmba.   
\p
\v 4 Wo oviva pethaiva imhara evhowolvrava, indhanamba si nonam emusk vovhoawolvra owalmongova hevmba. Ningvramoa manimani, himba nonamba si os wulluhkaka vevra. Himba si kuvhoawolalmangas vivra, eva netesnalm helvatatohluhulm. Himba si undva vrivra nomangas, ovra, honinda ata kava beswonamba undva lothopravav lehrava. Himba owaimomolva si Sesoamba undva vivramoa.  
\v 5 Himba si os wohvivra, ovra, kava andra viniv Sesoam, heva os owai, himba si tanamba andra vinivramoa Sesoamba. Wo yeoa indiasvho vinvm no indhanaindaoa.   
\p
\v 6 Gurukoklava monglava viv, deuvra evongokiluwihinv, wo ungevlim weihaloh vewol viv, osm heoa kamangas patvunvra, honam men ka vivm. Nomba ungevliva nowolkoklana av, wo himba mendah sikulmonam sahonam av.  
\v 7 Wo heva os nomba ungevliva himba elsus lehalvohv, nemelmomba hellelmba, wo heva os owai, beswonamba temurava levrapivolvmoa moanonoamba mindnamba.  
\v 8 Hona gurukoklava ovuv moanonoamba, memba honamba os ten Yanesi Yambresi evemnanam Mosesm. Himba temba sna indhana, hena nengavnangva sambla lohulinv. Hemba doa nihnahonam wohplel vena, engalmba moanonoamba  
\v 9 Wo heva os si nomba gurukoklamba nonamba kanandhawol vevavmoa, temba hevpa vilangavpa. Wo Kristusnindva indkumbiva si nungeilvav hemba, osva ora, nengavnangva henamba indanam puvleinv. Os vinna honamba Yanesimba Yambresimba, Israelnindna novra.   
\s1 Keknam Wohkek Vetho Sesoana Moamoa.  
\p
\v 10 Yimba kamba temura wohlihav, kava sna undnamba. Yimba hellevna, nomba kava numhowol vevnamba, wo eva kava kavpa os avna. Yimba nonora lohv, kava keknam lohmanavna Sesoamba, wo kava kavmba piapahavna, indhanam monglam und vewol vevna. Yimba nonora lohv, kava duuswonamba vevnamoa, nonamba kava kinmba lopsho vrevnamba, wo eva kava kivrawuliha vrevnamoa.  
\v 11 Yimba nonora lohv, osva kamba vendawuvmona vevna, wo kinmba sna kamba ovongomnavna i. Yimba nonora lohv, honamba kamba di vungamnanam Antiokra, Aikoniamra, eva di Listrara. Yimba nonora, no kembellava kava kinmba sna dombgavna i. Wo heva os mendekli kamba lopslahaomana vevna no kindava.  
\v 12 Tanam, indkumbiva Yesus Kristusindava almba vevrava, osva temba Sesoava nengvpa, hemba si nomba indkokla vewol vivra.  
\v 13 Indhanakokla noi kelsombovhol, eva indhana mongla sahoklal, si hemba wohindkokla vilovav. Himba si wonsaivra monglamba, wo heva os himba si vivra hevnahonam.   
\p
\v 14 Heva os yeoa wohkevro keknam moam, nom pev ten numhowol venam. Yimba nonora, honamba moamba memba tanam. Manara, noinda yimba lihawol vev kamba, temba kava yemba numhowol vivnamba.  
\v 15 Yimba doa levrapivongona Sesoana doaramini tombaimomba, eusil doara, venamba, daipota. Honamba Sesoana doaramini tombaimomba yemba wulalm vev, osm verava, ambo nongapala vevra nowolla. Wo nomba besal nowolva mona vuenghav, osm Sesoava yemba lopshav monakoklariniva Yesus Kristusnana.   
\p
\v 16 Memba honamba tombaimomba doaraminiva, Sesoasongol hev daswolvna, wo hevm mendekli, eva hehuiva es vivav. Vev, nonam numhowolalm moanonoanam, eva ishunilm indhanam, osm ovra, noi indkokla vewol viv yimba. Sesoamomba mendekli, osm oi, wulgupuv vrei sahonamba, nona sishona vriv, wo eva numhowol vivra, osm ora, os ao beswonamoa Sesoana novraoa.  
\v 17 Vivm doaramini tombaimonana, indhanariniva mongova andra venatava Sesoamba, himba si plasra avra, wo si sahvavmoa mana vemamba, nonamba velmba besalandramba.   
\c 4  
\s1 Yeoa Wohhoanavho Vrungao Sesoana Andramoa.  
\p
\v 1 Vei, Sesoa, eva Yesus Kristus, hena novra, kava hona moamba yemba vraohv. Yesus Kristus he si helmhola vewol vevav indhanamba, nomba vei, mendah men avm, eva ten sihavnam. Himba henga si provav homba, wo king kuwulalm wohloholm yunalm. Wo kava honi men moamba yemba vraohv.  
\v 2 Wo noinda osva yeoa keknam wohloho, ishomana vinilmoa besalnemelmomoa. Yimba ambo osangas plasra aka vevra elsusva. Osva ovra, himba nomba hellemba owai viv, eva osva ovra, himba nomba hellelm viv. Novnavhora numhowol vevm, heva os taivwonam ambo. Ishunvm indhanamoa, nom hev ten ningvm velm, ishunvm, nonamba himba indkokla vivnamba, wo suwenamandna vewol ovovm hemoa.   
\p
\v 3 Manara, nambaiva si provav, nonamba indhanamba si aongpup vivra, Sesoana moanonoamba hellelmba. Himba si etapewolvra esvema sowotalm gurumba, os heni hena und noinda beswonam lovhoaprinvm, guruva nomba os eishov, manam manam kava hellelm viv.  
\v 4 Himba si wuleihivav, hellelmba moanonoamba. Doa himba si vivra osoa, doa wohengivra moangakalamom.  
\v 5 Wo heva os yeoa pevmoa temura vrevm nonam. Nonam nonam kinmba ovra provram, ambo dombongas vevm. Besal nemelmondra vevm. Manimani vevm, nooa Sesoana andranindrini.   
\p
\v 6 Kava kavmba ambo engla wulihawolvna, nihnahonam wuraholmba Sesoamba. Doa nambaiva promnav, kamba murapeta englam wuleihawolalm, vevand velav, pholmangas. Kamba doa murapeta dahalmba vev. Kanamba tovolva si gavav, os ora, Sesoam wainpolna sembayang viniv sengra.  
\v 7 Kava daosna laus vrena besalmba. Kava doa vipiana dandwonamba. Kava keknam wohlohv undnahonamba mendah.  
\v 8 Doa mana vema besal kamba diva kokolma velohmanav. Memba osm, Sesoava kamba si omnavav, yimba lehra indhanarini windel. Sesoa helmholva vewol vev, hengas beswonamba helmhola vewol vev, wo himba si nonam manimani kamba novoa venavav. Himba si kamangasva dombraohvavmoa, no hindnahonam, henoi hem ten und vivm, wo nengviluwuv, hem prolm hengam.   
\s1 Timoti Yem Pevm.  
\p
\v 9 Yeva nungi lelnam kaindamoa pro.  
\v 10 Manara, Demasva mindnam und vevna hona pethamba. Wo himba doa kam bumb velahangana honaminiva Tesalonaikaram. Kresensva gana Galesia provinsram, eva Titusva Dalmesia provinsram gana.   
\p
\v 11 Memba huiva kava Lukm mongasalm waiav. Omnarava Makm, waipro, yimba provrava. Himba si kam kolvravav hona kavna andrara men hui.  
\v 12 Tikikusmba kava doa wolaihangana Evesusram.  
\v 13 Kava temba Troasva anamba, kava di moan velahaphona kavna bayu tokolva Karpusna deuvra. Wo yimba provrava, nonamba kana moan vilpro hom. Kana veo, tombai dombo, ata ye mai vevav nom tombaim, ten tatatovna vinam, temura ipro.   
\p
\v 14 Aleksanda himba manam manam besina vewol vevna, himba kamba mindnam wohindkokla vrena. Sesoa si hemba nengpong vrevav, noindava memba vewol vevpa himba.  
\v 15 Eva yeoa ambo novkalana vevm, ata homeis yem eva indkokla vrevm. Hemba mindnam oholvohv, pelekopala vewol ovolmba moamba pinamba.   
\p
\v 16 Kava seilmangas Sisa duangna moamba opla vremnana, kavmba dandana vrelmba, mongova kamba okolvranamoa. Indkumbiva kamba ambo bumb velaha angana wondakolamsna. Wo kava sembayang venavna Sesoamba, os homeis, yeoa hena indkoklamoa maivethinu, nomba temba himba kamba vinivpa.  
\v 17 Wo heva os mendekli kamba waiav. Himba kamba pundind vihana, osm kava osva beswonam ishomana vinvra besalnemelmomba Yutanindna meisungundmba. Mendekliva ninginv Yutanindna meisungundmba, osm hillira heoa evata. Wo noinda osva kava laionna mengmerinimsna nongovhoana.  
\v 18 Mendekli si kamba lopslahavav, nonamba indkumbiva kamba sahonamba vinivrava. Mendekliva si kamba beswonam waingavav hevna senakembellam, hev ten vaohotho wulavm. Pioa hena nihilmoa elsus wulovoluvmona velohmanara osangas yunalm.   
\s1 Eunillam Sehmoa.  
\p
\v 19 Kana sehmoa dombtreihunu Prisilaim Akwilaim, eva Onesiporustatanam.  
\v 20 Erastusva mendah av di Korinda. Wo kava velahaprona uvavulmungil Tropimusva di Miletus kotara.   
\p
\v 21 Wo noinda osva yeva nungi lelnam pro kaindamoa, namvuvinamba tepepenamba dandm posvev yenamba. Vena, Yupulus hev, Putens, Linus, Klotia, wo eva indkumbi Kristusnind, himba yemba sehmoa piambmanav.  
\v 22 Mendeklioa yemoa waiavra, wo eva heoa yemoa wavra vewol vevra elsusoa. Doata.