\id HEB Karrwa (Garawa) 1983, 1991 Hebrews. Cleaned up after publishing, 970409. 
\h Hebrews 
\toc1 MANJIJBA NGAYU NAYINDA JANGKURR NARRINDURRI JUMUKUYNGKURRI 
\toc2 Hebrews 
\mt1 MANJIJBA NGAYU NAYINDA JANGKURR NARRINDURRI JUMUKUYNGKURRI  
\c 1  
\p
\v 1 Narri barri. Wabula barri wankalana yanybayi Kud yalungi ngamanginkanyi wankalanyi mungkijimukuyngka, Jumukuyngka. Yanybayi Kud yalungi yanybawarrayngka nanganginkanyi jangkurranyi Kudkanyi. Nyuli wajba yalunya nanganginkanyi jangkurranyi, baki yalu barri karuyi yingkamuku nanankanyi jangkurranyi. Waluka barri yanybayi Kud yingkanyi, baki baku barri bayngkani nyuli yanyba yingkanyi, baki mili baku nyuli yanyba yingkanyi. Nani barri yalunjalili karu nanganginkanyi jangkurranyi Kudkanyi, yingkawanyi baki yingkawanyi baki yingkawanyi. Yalunjalili karu nanankanyi jangkurranyi jali wajba yalunya Kudwanyi, kananangka jangkurranyi. Nani barri waluku yanybayi Kud yalungi, yalunjalu karunki nanganginkanyi jangkurranyi.  
\v 2 Ngala nanijba barri manjijbayi nangangi jandanyi Kudwanyi, nyulu karunki ngambalanya nanganginkanyi jangkurranyi. Yi. Nyulu manjijbayi nanganginmirra jandanyi Jisus Krayis, karunki ngambalanya nanganginkanyi jangkurranyi. Wabula barri, kamambarra, jali mikuyaji yajinyi, baki karuyi nangangi jandanyi Kudwanyi, nyulu yabimbiji bukamba yaji, nyulu yabimbiji laliji baki jamba, baki wabuda, marda yaji bukamba. Karu nyuli nangangi jandanyi yabimbiji bukamba yaji, baki yabimbayi yaji nanganginyi jandanyiwanyi. Baki baku barri juju manjijbayi nangangi jandanyi wayka jambarri, nyulu karunki ngambalanya nanganginkanyi jangkurranyi. Baki mili barri baku juju janyulu yarrijba nangangi jandanyi wirimalaru bukambijuyngka yajinyi.  
\v 3 Nangangi jandanyi Jisus Krayis, nyulu nanamannga, barrinani Kud. Nyulu wirimalaru, barrinani Kud nyulu wirimalaru. Nyulu walkurramirra, nyulu ngirukamirra, barrinani Kud. Nyulu yanybaka jangkurr, baki nani barri nyulu lalanbaka bukamba yaji lalijina baki jambana, baki wabudana. Bukamba yaji nyulu lalanbaka yurrngumba barri, nanganginyi jandanyiwanyi. Baki mili yaji nyuli yabimba jandanyiwanyi. Janyba nangki kurndana. Janyba nangki ngamanginkanyi balkinyi yajinyi, baki nanankardi barri nyulu manjamanjambaka ngambalangi balki yaji Kudwanyi. Nani barri janyba nangki nangangi jandanyi, ngala mili nyuli wankijba. Kirrijba nyuli kingkarri lalijiyurri. Kirrijba nyuli kingkarri, baki nanijba nyulu jungkuka kingkarri nangandu Kudnyina, nanda jala wirimalaru bukambijuyngka yajinyi. Barriwa.   
\p
\v 4 Nanamuku Yanjilmuku, jalili yalu wakiwarrmuku nangangi Kudkanyi, yalu walkurra nangangi Kudkanyi. Ngala nangangi jandanyi Jisus Krayis, nyulu mili walkurra yalungi Yanjilmukuyngka. Nyulu mili walkurra yalungi barri.  
\v 5 Yanybayi Kud kunyba jangkurr nanganginkanyi jandayngkanyi. Yanyba nyuli nayi barri, “Ninji barri, ninji ngaki jandanyi. Baki ngayu nganyi nijanganjinyi yurrngumba barri.” Barriwa. Baki yingka jangkurr yanybayi Kud nanganginkanyi jandayngkanyi. Yanyba nyuli nayi barri, “Yurrngumba barri jangayu nangangi nijanganjinyi. Yurrngumba barri janyulu ngakinmirra jandanyi.” Barriwa. Nani barri yanybayi Kud nanganginkanyi jandayngkanyi. Ngala miku nyuliyanyi yanyba nani barri yalungi Yanjilmukuyngka. Miku nyuliyanyi yanyba yalungi nani barri, mikungangi yalu walkurra barrinani nangangi jandanyi.  
\v 6 Baki mili yanybayi Kud nayi barri, “Bukambijunyi ngakinmukunyi Yanjilmukunyi, marda yalimi wajba ngaki jandanyi yalunginkanyi kunybanyi jangkurranyi. Marda yalimi yanyba mududu nangangi. Marda yalimi brijba nangangi.” Barriwa. Nani barri yanybayi Kud. Jalija mili manjijba nanganginmirra jandanyi Kudwanyi, jalija nyulu mili jungku wayka jambana, baki nani barri marda yalimi yabimba yaji nangangi Yanjilmukunyi. Nani barri marda yalimi yabimba yaji nangangi.  
\v 7 Ngala miku yaliyanyi Yanjilmuku barrinani nangangi jandanyi. Miku yaliyanyi. Jali yanyba Kud yalungi nanganginmukuyngka Yanjilmukuyngka, baki yanyba nyuli yingka jangkurr yalungi. Nayi nyuli yanyba jangkurr, “Nanginmuku Yanjilmuku, yalu wakiwarrmuku ngaki. Yalu walkurramuku Yanjilmuku, ngala yalu wakiwarrmuku ngaki. Yalu barrinani yunkurr. Yalu barrinani jangu. Yuku yalu yabimba ngiruka yaji Yanjilmukunyi. Yuku yalu yabimba ngiruka yaji barrinani yabimbaka ngiruka yaji yunkurrwanyi baki janguwanyi. Nani barri yuku yalu yabimba ngiruka yaji, ngala yalu wakiwarrmuku ngaki.” Barriwa. Nani barri yanybayi Kud yalungi Yanjilmukuyngka.   
\p
\v 8 Ngala yanybayi Kud yingka jangkurr nanganginkanyi jandayngkanyi. “Ninji barri Kud, barrinani ngayu. Ninji barri wirimalaru yurrngumba barri. Wabula, baki nanijba, baki baku barri, yurrngumba ninji wirimalaru bukambijuyngka yajinyi wandijiyana. Ninji jungkuka yurlurrmba yurrngumba barri. Ninji barri yurlurrmba mambuka yalungi. Ninji wajbayi yalunya kunybanyi yuwanyi.  
\v 9 Ninji barri mirnarrijbangka muwa, jala yalu yabimbaka ngawamba kunyba yaji, ngala ninji nginduka muwa, jala yalu yabimbaka balki yaji. Ninji ngirrangka nanda balki yaji jala yalu yabimbaka. Nani barri ninji yurlurrmba mambuka yalungi. Baki nanankardi barri wabula waluwa ninya yarrijbayi wirimalaru yalungi bukambijuyngka. Miku ngayiyanyi yarrijba yingka wirimalaru, waluwa nganyi. Ngawamba ninya yarrijbayi wirimalaru. Ninya yarrijbayi mambuka bukambijuyngka yalungi, nganinyimukuyngka, jibarrimukuyngka baki Yanjilmukuyngka. Baki ninji barri mili walkurra bukambijuyngka yalungi.” Barriwa. Nani barri yanybayi Kud.   
\p
\v 10 Jabarri yingka jangkurr yanybayi Kud nanganginkanyi jandayngkanyi, “Ninji barri walkurra mambuka. Wabula kamambarra, ninji yabimbayi bukamba yaji. Yabimba ninji laliji baki jamba. Bukamba yaji ninji yabimbayi wandijiyana.  
\v 11-12 Nanda yaji jali ninji yabimba, jayalu baku bukamba yaji. Ngala miku ninjiyi bukamba. Janinji yuwajiwa jungku wanka yurrngumba barri. Nanda jumbala yalungi, waluku barri nanda nyuli kunyba jumbala, ngala baku barri balkijbayi nanda jumbala, baki janyba yali. Ngala yali wudumba yingka jumbala buyingkinyi barri. Baki nani barri marda jayalu laliji baki jamba baki bukamba yaji jambana, jayalu marda balkijba barri. Jayalu marda balkijba, baki jangayu bukamba yalunya. Jangayu bukamba yalunya. Ngala jangayu yabimba buyingkinyi yaji, marda laliji marda jamba barri. Ngala ninji barri, miku ninjiyi bukamba. Janinji nanamannga mambuka yalungi yurrngumba barri.” Barriwa. Nani barri yanybayi Kud nanganginkanyi jandayngkanyi.   
\p
\v 13 Yanybayi Kud nayinda jangkurr nangangi, nanganginkanyi jandayngkanyi, “Jungku ninji nayiba ngakinduwa. Kajamuku, jala miku yalimi maruka muwa nganyi, janinya yalu daba, ngala jangayu ngayu yalunya daba wakara barri. Jangayu wakaramba yalunya, jalija ngayu daba yalunya. Baki jayalu ninya jingkijba, ninji barri mambuka yalungi.” Nani barri yanybayi Kud. Ngala miku nyuliyanyi yanyba nanda jangkurr yalungi Yanjilmukuyngka. Miku. Ngala nyuli yanyba nanda jangkurr nangangi, nanganginkanyi jandayngkanyi Jisus Krayiskanyi.  
\v 14 Nanamuku Yanjilmuku, yalu kunybamuku wuwarrmuku jala yalu wakiwarrmuku nangangi Kudkanyi. Manjijbangka yalunya Kudwanyi. Nyulu manjijbangka yalunya yalundurri nganinyimukuyngkurri. Nyulu manjijbangka yalunya yalundurri, yalu wakinki yalundu nganinyimukunyina. Yalunjalu kandimbaka Yanjilmukunyi. Yalunjalu kandimbaka nanamuku jala marrimbaka mardarda Kudwanyi. Nanankardi barri jayalu jungku yurlurrmba nangangi Kudkanyi, nganinyimuku, jala yalunya kandimbaka Yanjilmukunyi. Barriwa.   
\c 2  
\p
\v 1 Nanankardi barri marda ngambalimi marrimba nanda jangkurr nangangi Jisus Krayiskanyi. Marda ngambalimi kudanyu marrimba nangangi jangkurr ngamanginyina kurduluna. Marda ngambalimi miku mamanumba nanda jangkurr nangangi. Ngambala mankuyi nanda jangkurr nangangi Jisus Krayiskanyi jali milidimba ngambalanya yingkamukunyi. Ngambala mankuyi nanda duja jangkurr, baki marda ngambalimi miku mamanumba nanda jangkurr. Ngala marda ngambalimi kudanyu durrijba nanda jangkurr yurrngumba barri, baki jangambala jungku yurlurrmba nangangi yurrngumba barri.  
\v 2-3 Wankala barri nanamukunyi Yanjilmukunyi yali karu Musis baki yingkamuku yajinyi. Yalunjalu karuyi nanankanyi wankalanyi yuwanyi nanganginkanyi Kudkanyi. Baki nanda barri duja jangkurr. Nanamukunyi barri miku yaliyanyi durrijba nanda jangkurr, miku yaliyanyi ngayangayijba nanankanyi jangkurranyi, baki nanda balki. Nyuli daba yalunya Kudwanyi. Jali yalu miku ngayangayijba nanganginkanyi waluwiyngkanyi jangkurranyi, baki yabimbayi yurlurrmba yaji yalungi Kudwanyi. Nyuli daba yalunya. Ngala nayimanji barri ngambalanya karuyi buyingkiyngkanyi yuwanyi Jisus Krayiswanyi. Ngambalangi mambuka Jisus Krayis, nyuli yanyba nanda buyingkinyi yuwa, baki bayngkani barri yingkamuku jali yalu manku nangangi jangkurr, yalu barri karuyi ngambalanya nanankanyi jangkurranyi. Yalu barri jingkijbayi nanda duja jangkurr, baki yalu barri karuyi ngambalanya nanankanyi jangkurranyi, nanankanyi buyingkiyngkanyi yuwanyi nanganginkanyi Kudkanyi. Nanda waluwinyi yuwa, karuyi yalunya nanankanyi yuwanyi Yanjilmukunyi. Jali yalu miku ngayangayijba nanankanyi yuwanyi, baki dabayi yalunya Kudwanyi. Ngala nanda buyingkinyi yuwa, karuyi ngambalanya nanankanyi yuwanyi ngamanginyi mambukawanyi Jisus Krayiswanyi. Nanda buyingkinyi yuwa mili walkurra nanankanyi waluwiyngkanyi yuwanyi. Nanangini buyingkinyiwanyi yuwawanyi karungka ngambalanya nangangi Kudkanyi, nyulu marrimbaka ngambalanya mardarda yurrngumba barri. Jaliyi ngambala miku ngayangayijba nanankanyi buyingkiyngkanyi yuwanyi, jala ngamanya karu Jisus Krayiswanyi, baki nanda balki, balkimirra. Janyulu nyulu marda daba ngambalanya Kudwanyi. Nanamuku jali manjijba Jisus Krayiswanyi, yali karu ngambalanya nanankanyi buyingkiyngkanyi yuwanyi nanganginkanyi Jisus Krayiskanyi.  
\v 4 Jali yalu milidimba ngambalanya, baki yabimbayi ngiruka yaji yalungi Kudwanyi. Manjijbayi nangangi Kunyba Ngarndu yalundurri Kudwanyi, baki nyuli yabimba yalunya ngiruka Ngarnduwanyi, yalu yabimbikanyi ngiruka yaji. Nanankardi barri yali yabimba nanda yaji jali nulijba Kud yalungi yabimbikanyi yaji. Nani barri minimbayi ngambalanya Kudwanyi, nanda jangkurr jali yalu milidimba, nanda buyingkinyi yuwa, duja barri nanda jangkurr. Barriwa.   
\p
\v 5 Baku barri jalija yabimba buyingkinyi yaji Kudwanyi, jalija nyulu yabimba buyingkinyi laliji baki jamba, baki janyulu yarrijba yingka mambuka bukambijuyngka nanankanyi yajinyi. Ngala miku janyulu yarrijba Yanjilmuku mambukamuku nanankanyi yajinyi. Miku. Ngala janyulu yarrijba nanganginmirra jandanyi Jisus Krayis. Janyulu yarrijba nanganginmirra jandanyi wirimalaru bukambijuyngka yajinyi wandijiyana. Miku jayalu mambukamuku yajinyi Yanjilmuku, ngala janyulu nyulu mambuka yajinyi Jisus Krayis barri.  
\v 6 Nanda jangkurr najana Kudkanyi yanybaka nayi barri, “Ninji Kud, ngala ngawamba yalu nganinyimuku. Ninji barri ngiruka. Ninji yabimbayi laliji baki yakarl baki warrawiji. Ngala nganinyimuku barri miku yalimi ngiruka. Ngawamba yalu bayakarda. Wanyingkanyi nganyingka mankumanku yalungi. Wanyingkanyi ninji lalanba yalunya. Ngawamba yalu bayakarda.  
\v 7-8 Ngala Ninji walkurrambayi yalunya. Ninji yabimbayi yalunya mambukamuku bayngkani yalundu Yanjilmukunyina. Ninji yabimbayi yalunya mambukamuku bukambijuyngka yajinyi jambana. Marda ninji yabimbayi kunyba yaji yalungi.” Barriwa. Nani barri yanybaka jangkurr najana Kudkanyi. Nanangini jangkurrwanyi karungka ngambalanya nangangi Kudkanyi, nyuli yarrijba nganinyimuku mambukamuku bukambijuyngka yajinyi jambana. Ngala jilijbawa nganinyimuku mambukamuku bukambijuyngka yajinyi jambana. Jilijbawa.  
\v 9 Ngala Jisus Krayis barri, jungku nyuli nayiba jambana. Badajba nyuli kingkarrinya, baki jungku nyuli nayiba jambana. Jungku nyuli nganinyi barrinani ngambala. Miku nangkiyanyi yarrijba Jisus Krayis walkurra barrinani Yanjilmuku. Jali nyulu jungku jambana, baki bayakarda nyuli. Nanamanji barri nanamuku Yanjilmuku, yali mili walkurra nangangi. Nyuli barri bayakarda, baki yali linjumba. Kudanyu yali linjumba nangangi mankanyi, baki nangki janyba. Nangki janyba ngamanginkanyi balkinyi yajinyi. Baki nanankardi barri mili wankambayi Jisus Krayis Kudwanyi. Walkurramba nyuli Jisus Krayis. Yabimba nyuli Jisus Krayis walkurra mambuka bukambijuyngka yajinyi jambana. Nyuli wirimalaru bukambijuyngka yalungi nganinyimukuyngka, jibarrimukuyngka, baki Yanjilmukuyngka. Barriwa.  
\v 10-11 Kud, nyulu ngirukamirra, baki nyulu lalanbaka bukamba yaji, marda nganinyimuku, marda jibarrimuku. Ngala nyuli munyajba yalunya yabimbikurri balki yaji nangangi Jisus Krayiskanyi. Nyuli munyajba yalunya, yalu linjumbikurri nangangi mankanyi. Nyuli munyajba yalunya yalu yabimbikurri balki yaji nangangi, ngala jungkuyi Jisus Krayis yurlurrmba nangangi Kudkanyi yurrngumba barri. Baki nanankardi barri nyulu jingkijbangka ngambalanya, baki nyulu ngiruka ngambalangi, marrimbikanyi ngambalanya mardarda. Nyulu barri lirrka jali nyulu kudanyu durrijba nangangi jangkurr Kudkanyi. Kajamukunyi yalu kuyungka nangangi jangkurr, yalu durrijbangka nangangi jangkurr, baki nyulu marrimbaka yalunya mardarda Jisus Krayiswanyi. Jala yalu kuyu nangangi jangkurr Jisus Krayiskanyi, baki nyulu manjamanjambaka yalungi balki yaji Kudwanyi, baki nyulu yarrijbangka yalunya barrinani malaba nangangi Kudkanyi. Baki nyulu yarrijbangka yalunya nanganginmuku jandanyimuku Kudwanyi. Yalu nanganginmuku jandanyimuku, barrinani Jisus Krayis, nyulu nangangi jandanyi Kudkanyi. Baki Kud nyulu nijanganjinyi yalungi bukambijuyngka jala yalu durrijba nangangi jangkurr, baki Jisus Krayis barri, nyulu mirnarrijba muwa kuyunkanyi yalunya nanganginmuku bababanyamba nyulu yalunya.  
\v 12 Nyulu yanybaka nayi barri, “Jangayu karu yalunya ngakinmuku kanyiyamuku. Jangayu karu yalunya nganyi, ninji barri kunybamirra, ninji barri ngiruka, ninji yabimbaka kaja ngiruka yaji. Jalija ngayu jungku yalundu, baki jangayu wajba ninya ngakinkanyi kunybanyi jangkurranyi.” Barriwa. Nani barri karungka ngambalanya nangangi Jisus Krayiskanyi jangkurrwanyi najana Kudkanyi.  
\v 13 Baki yingka jangkurr yanybaka Jisus Krayis, “Ngayu jingkijbangka Kud, janyulu yabimba nanda jali nyulu yanyba. Janyulu lalanba ngana.” Barriwa. Baki nyulu yanybaka nayinda jangkurr, marda, “Jangayu jungku nanaba yalundu, nanamukunyina jala yalu jandanyimuku nangangi Kudkanyi. Yarrijba ngani Kudwanyi, ngayuja lalanbiji yalunya. Yurrngumba barri jangayu lalanba yalunya nangangi Kudkanyi.” Barriwa. Nani barri karungka ngambalanya jangkurrwanyi najana Kudkanyi. Barriwa.   
\p
\v 14-16 Nanangini Sayidinwanyi nyulu balanjaka yalunya. Nganinyimuku, baki jibarrimuku, bukambiju nyulu balanjaka yalunya. Nulijbangka Sayidin yalungi, yalu yabimbikanyi balki yaji. Jalija yalu yabimba balki yaji, baki nanankardi barri jayalungka janyba. Nanankardi barri balanjaka yalunya Sayidinwanyi, nulijbangangi nyulu yalungi, yalungka janybikanyi. Jaliyi yalu durrijba Sayidin, baki janyulu yalungi mambuka. Jayalungka janyba, baki jayalu jungku kurdan yurrngumba barri. Barriwa. Ngala nanamuku durrijbawarrmuku nangangi Kudkanyi, nyulu yarrijbangka yalunya nanganginmuku jandanyimuku Kudwanyi. Yalu nanganginmuku jandanyimuku, ngala yalu nganinyimuku baki jibarrimuku. Miku yalimi barrinani Yanjilmuku jala miku yalungkiyi janyba, Yanjilmuku. Miku yalimi barrinani Yanjilmuku, ngala yalu nganinyimuku. Ngala karralayi Jisus Krayis kingkarrinya wayka. Karrala nyuli wayka jambarri, baki jungku nyuli nganinyi ngarnduyudi barrinani ngambala, baki baku barri nangki janyba. Miku nyuliyanyi yabimba balki yaji, ngala nangki janyba ngamanginkanyi balkinyi yajinyi. Baki nanankardi barri ngambala, jandanyimuku nangangi Kudkanyi, miku ngambaliyi marrala janybikanyi ngambalaka. Miku ngambaliyi marrala janybikanyi ngambalaka, janybangangi nangki Jisus Krayis ngambalangi. Daba nyuli wakara nanda Sayidin, baki nanijba barri nanda Sayidin, miku nyuliyi mili ngambalangi mambuka. Miku nyuliyi mili ngambalangi mambuka. Jalija ngambalaka janyba, baki miku jangambala jungku kurdan yurrngumba barri, ngala jangambala jungku mili wanka barri, janybangangi nangki Jisus Krayis ngambalangi. Baki nani barri miku ngambaliyi marrala, janybikanyi ngambalaka. Nani barri nyulu kandimbaka ngambalanya, nanganginmuku jandanyimuku Kudwanyi. Baki ngambala jingkijba, duja barri nanda jangkurr. Ngambalanya nyulu kandimbaka Kudwanyi. Miku nyuliyi kandimba yalunya Yanjilmuku nani barri, ngala ngambalanya nyulu kandimbaka. Nanda jangkurr najana Kudkanyi yanybayi nayi barri, “Nyulu kandimbaka nanamuku jala yalu durrijba nangangi jangkurr Kudkanyi. Nanangini wankalanyi Yabrayamwanyi nyulu durrijbayi nangangi jangkurr Kudkanyi, baki kandimbayi Yabrayam Kudwanyi.” Barriwa. Baki nani barri janyulu kandimba ngambalanya marda, jala ngambala durrijba nangangi jangkurr.   
\p
\v 17 Jali jungku Jisus Krayis jambana, baki miku nyuliyi jungku yinini yinini ngambalangi, ngala nyuli jungku malumba ngambalandu. Nyuli jungku barrinani nanamuku nanganginmuku kanyiyamuku, jali yalu kuyu nangangi jangkurr. Barriwa. Nyuli jungku barrinani nanda walkurra mambuka jurjkanyi. Nyuli jungku barrinani nanda walkurra mambuka yalunginkanyi wankalanyi jurjkanyi Jumukuyngka. Nanda walkurra mambuka jurjkanyi, nayi barri nyulili yabimba yaji. Nyulili waki nangangi Kudkanyi. Nyulili yanyba mududu nangangi Kudkanyi yalungi Jumukuyngka. Yingkamuku Jumuku yalili jilajba nangandurri, yalili kuyu yaji nangandurri, barrinani jib, baki buluki. Yalili kuyu nanda yaji nangandurri, bakili nyulu kurdanba, bakili nyulu dikarrijba nanda barnyi. Nyulili dikarrijba nanda barnyi nangangi Kudkanyi, ngala nyulili yanyba mududu nangangi Kudkanyi yalungi Jumukuyngka. Nyulili ngajaka Kud, nyulu manjamanjambiji nanda balki yaji, jali yalu yabimba. Nani barri nyulili yabimba yaji, nanangini walkurranyi mambukawanyi yalunginkanyi wankalanyi jurjkanyi Jumukuyngka. Baki nani barri marda Jisus Krayis, nyulu barrinani nanda walkurra mambuka yalunginkanyi jurjkanyi. Nyulu jungkuyi nganinyi jambana, baki waki nyuli nangangi Kudkanyi. Yabimba nyuli kunyba yaji ngambalangi. Baki nanijba barri nyulu jungkuka kingkarri nangandu Kudnyina. Nyulu yanybaka mududu nangangi Kudkanyi ngambalangi, baki nyulu ngajakangka Kud, nyulu manjamanjambiji ngambalangi balki yaji. Nani barri yuwajiwa nyulu yabimbaka kunyba yaji ngambalangi. Barriwa.   
\p
\v 18 Ngala jungkuyi Jisus Krayis nayiba wayka jambana, baki balanjayi Jisus Krayis Sayidinwanyi. Balanja nyuli Jisus Krayis. Nulijba nyuli Jisus Krayiskanyi, nyulu yanybikanyi balki jangkurr, nyulu yabimbikanyi balki yaji nangangi Kudkanyi. Baki nanankardi barri jingkijbangka ngambalanya Jisus Krayiswanyi. Nyulu jingkijbangka ngambalanya, jala balanjaka ngambalanya Sayidinwanyi nanamannga nanijba barri. Nyulu jingkijbangka ngambalanya nani barri, baki nyulu kandimbaka ngambalanya, jala balanjaka ngambalanya Sayidinwanyi. Nyulu kandimbaka ngambalanya nani barri. Yingkamukunyi yali wajba Jisus Krayis kijinyi, yali linjumba Jisus Krayis, baki nanankardi barri nyulu jingkijbangka ngambalanya jala ngamanjalu wajba kijinyi. Nyulu jingkijbangka ngambalanya jala balanjaka ngambalanya Sayidinwanyi, jala ngamanjalu wajba kijinyi, baki nyulu kandimba ngambalanya. Barriwa.   
\c 3  
\p
\v 1 Narri barri Krisjinmuku, jala narri bababanyamba ngambalaka, narri barri, jala narrinya marda yarrijba nanganginmuku jandanyimuku Kudwanyi, mankumanku narringka nangangi Jisus Krayiskanyi. Yarrijbayi Jisus Krayis Kudwanyi. Yarrijba nyuli Jisus Krayis barrinani nanda walkurra mambuka jurjkanyi. Nyulu walkurra mambuka ngambalangi barri Krisjinmukuyngka.  
\v 2 Nanda barri wankalanyi, niji Musis, nyulu ngayangayijbayi nangangi Kudkanyi. Nyulu ngayangayijbayi nangangi. Waki nyuli nangangi Kudkanyi, baki nyuli lalanba yalunya nanganginmuku mungkijimuku. Baki nani marda Jisus Krayis. Ngayangayijba nyuli nangangi Kudkanyi, nanankardi jali yarrijba Jisus Krayis wakinkanyi nangangi. Ngayangayijba nyuli nanganginkanyi jangkurranyi. Barriwa.   
\p
\v 3 Mankumanku narringka nanginkanyi jala ngayu muningka yanyba. Yabimbayi barrawu nganinyiwanyi. Wudumba nyuli kaja kurnda, baki yabimba nyuli kunyba barrawu yingkanyi nganiyngkanyi. Baki mungkijiwanyi nanankanyi barrawunyi, wajba nyuli nanda nganinyi nanganginkanyi kunybanyi jangkurranyi, yabimbangangi nyuli kunyba barrawu nangangi. Miku nyuliyanyi wajba nanda barrawu nanganginkanyi kunybanyi jangkurranyi. Miku. Ngala nyuli wajba nanda nganinyi jali yabimba barrawu nangangi. Barriwa. Bukambiju ngambala jala kuyu nangangi jangkurr Kudkanyi, jala ngambala jandanyimuku nangangi Kudkanyi, ngambala barrinani nanda barrawu. Ngambala barrinani nanda barrawu, kuyungangi ngambali nangangi jangkurr Jisus Krayiskanyi. Ngambala kuyuyi nangangi jangkurr, baki nanankardi barri Jisus Krayis nyulu barrinani nanda jali nyulu yabimba nanda barrawu. Ngambala barrinani nanda kurndamuku nananyina barrawuna. Baki ngambalangi buwakanya Kud, nyulu barrinani nanda nganinyi, jala nyulu mungkiji nanankanyi barrawunyi. Nanda barri wankalanyi Musis, nyuli walkurra nganinyi nangangi Kudkanyi, nyuli wakiwarr nangangi Kudkanyi, ngala nyuli barrinani yingamali kurnda nananyina barrawuna jala yabimba nganinyiwanyi. Ngala Jisus Krayis barri, miku nyulimi barrinani kurnda barrawuna, ngala nyulu barrinani nanda nganinyi jali yabimba nanda barrawu nangangi Kudkanyi. Baki nani marda, nanda Musis, nyuli bijal walkurra nganinyi nangangi Kudkanyi, ngala Jisus Krayis barri, nyulu walkurramirra nangangi Kudkanyi. Jisus Krayis, nyulu mili walkurra nangangi Musiskanyi.  
\v 4 Jala ngambala najba barrawu, baki ngambala jingkijba, yabimbayi nanda barrawu yingkawanyi. Baki jala ngambala najba laliji baki kanja baki jamba, baki jingkijba ngambala, yabimbayi bukamba nanda yaji yingkawanyi. Nyulu barri yabimbayi nanda yaji Kudwanyi.  
\v 5 Nanangini Musiswanyi, kudanyu nyuli durrijba nangangi jangkurr Kudkanyi. Kudanyu nyuli ngayangayijba nangangi Kudkanyi, wakiwarrngangi nyuli nangangi Kudkanyi. Yanybayi Kud jangkurr nangangi Musiskanyi, baki karuyi yalunya nanankanyi jangkurranyi Musiswanyi. Nyulu karuyi yalunya nanganginmuku mungkijimuku nanankanyi jangkurranyi Kudkanyi. Karu nyuli yalunya, nanankanyi jalija yabimba Kudwanyi baku barri.   
\p
\v 6 Durrijbayi jangkurr Kudkanyi Musiswanyi, baki wakiwarr nyuli nangangi Kudkanyi. Baki nani barri marda, durrijbayi jangkurr Kudkanyi Jisus Krayiswanyi. Kudanyu nyuli durrijba jangkurr Kudkanyi, ngala miku nyuliyanyi wakiwarr nangangi Kudkanyi barrinani Musis. Ngala nyuli jandanyi nangangi Kudkanyi. Nyulu wirimalaru bukambijuyngka yalungi nganinyimukuyngka jibarrimukuyngka, jala yalu kuyu nangangi jangkurr. Nyulu wirimalaru yalungi, barrinani Kud nyulu wirimalaru. Jaliyi ngambala ngayangayijba nanganginkanyi jangkurranyi Jisus Krayiskanyi, baki jangambala mirnarrijba muwa. Jaliyi ngambala jungku ngiruka, baki ngambala jingkijba Jisus Krayis, janyulu yabimba kunyba yaji ngambalangi. Janyulu mili wankamba ngambalanya, jalija ngambalaka janyba. Jangambala jungku mili wanka nangandu yurrngumba barri. Ngambala kanyiyamuku nangangi Jisus Krayiskanyi jala ngambalaja jungku ngiruka nangangi yurrngumba barri. Barriwa.   
\p
\v 7-8 Yanybayi Kunyba Ngarndu Kudkanyi yalungi wankalamukuyngka. Karu nyuli yalunya nanginkanyi jangkurranyi, jalija yalu yarrijba najana Kudkanyi. Nayi barri nyuli yanyba, “Jala narri manku nanda jangkurr nangangi Kudkanyi, baki marda narrimi miku jardibirringujba muwa nanankanyi jangkurranyi. Marda narrimi miku jardibirringujba muwa, ngala marda narrimi kuyu nanda jangkurr. Nanamuku wankalamuku mungkijimuku narringi, jali yalu manku nangangi jangkurr Kudkanyi, baki yali jardibirringujba muwa nangangi. Yalungki kurrkunba nanankanyi jangkurranyi. Dulabayi yalunya Yijibnanyi Kudwanyi. Nyuli lalanba yalunya, jalili yalu jilalajba mangkurruna yajina yurrngumba barri. Kudanyu nyulili lalanba yalunya, ngala yali jardibirringujba muwa nangangi. Yalili ngirrwa nangangi Kudkanyi. Baki nani barri yalili balanja Kud, jalili yalu ngirrwa nangangi Kudkanyi yurrngumba barri. Marda narrimi miku jungku barrinani yalili jungku nanamuku wankalamuku mungkijimuku. Marda narrimi miku jardibirringujba muwa nangangi Kudkanyi.  
\v 9 Yanybayi Kud, ‘Nanamuku Jumuku, jalili yalu jungku mangkurruna yajina, bakili yalu najba nanda kaja ngiruka yaji jalili ngayu yabimba yalungi. Yurrngumba barri jalili yalu jungku nananyina mangkurruna yajina, 40 kindilkurrinyina yajina, bakili yalu najba nanda ngiruka yaji jalili ngayu yabimba yalungi. Ngala miku yaliyanyi ngayangayijba ngakinkanyi jangkurranyi. Yurrngumba barri yalili ngirrwa ngaki. Kudanyu yalili ngirrwa ngaki yurrngumba barri.  
\v 10 Baki nanankardi ngayi ngarrangarra muwa yalungi. Ngarrangarra ngayi muwa yalungi, baki yanyba ngayi nangangi Musiskanyi, “Nanginmuku Jumuku, yalungka yangkalambaka ngakinbunanyi. Yabimba ngayili kaja ngiruka yaji yalungi, ngala miku yalimi ngayangayijba ngakinkanyi jangkurranyi, ngala yalungka yangkalambaka ngakinbunanyi.” Barriwa.  
\v 11 Yi. Ngayi ngarrangarra muwa yalungi, baki karu ngayi Musis jangkurranyi miku nangkiyi yangkalamba. Yanyba ngayi nayi barri nangangi. “Nanginmuku Jumuku, yalu jardibirringujba muwa. Jardibirringujba yalu muwa yurrngumba barri. Miku yalimi ngayangayijba ngakinkanyi jangkurranyi. Baki nanankardi barri miku ngayiyi yalilijba yalunya nanankurri kunybarri yajiyurri langku. Miku ngayiyi munyajba yalunya ngankiykurri nananyina yajina langku. Miku yaliyi wuyalijba nanaba, ngala jayalu muningka jilalajba lukuluku nanginyina mangkurruna yajina. Jayalu muningka jilalajba lukuluku mangkurruna yajina nanankurri jalija yalungka janyba. Yi. Miku yaliyi wuyalijba nanaba kunybana yajina.” ’ ” Barriwa. Nani barri nanda Kunyba Ngarndu Kudkanyi yanybayi jangkurr jali yalu yarrijba najana Kudkanyi. Barriwa.   
\p
\v 12 Narri barri Krisjinmuku, jala narri bababanyamba ngambalaka, marda narringkimi najbawa. Marda narrimi miku jungku balki kurdulu nangangi Kudkanyi. Marda narrimi miku yurlwa nanganginkanyi jangkurranyi. Marda narringkimi miku yangkalamba nanganbunanyi Kudnanyi, nanda jala jungkuka wanka yurrngumba. Marda narringkimi miku yangkalamba nanganbunanyi.  
\v 13 Marda narrimi miku munyajba Sayidin jujambikurri narrinya. Marda narrimi miku munyajba Sayidin, nyulu yabimbikurri narrinya, narri yabimbikanyi balki yaji. Ngala marda narringkimi yanyba kunyba jangkurr yurrngumba barri. Marda narringkimi yabimba kunyba yaji. Marda narringkimi lalanba yurrngumba barri nanankurri jalija wijba Jisus Krayis nanginkurri wayka jambarri. Nani barri marda narrimi jungku, bakiyi narrinya jujamba Sayidinwanyi. Barriwa.  
\v 14 Ngambala barri kanyiyamuku nangangi Jisus Krayiskanyi, nyulu ngambalangi buwanganja. Yurrngumba barri jangambala jungku nani barri, jaliyi ngambala kuyu nangangi jangkurr, jaliyi ngambala kudanyu durrijba nangangi jangkurr Jisus Krayiskanyi. Jalannga barri, jali ngambala kuyu nangangi jangkurr, baki ngambala jingkijbayi Jisus Krayis, janyulu marrimba ngambalanya mardarda. Marda ngambalimi miku mamanumba nanda yaji. Marda ngambalimi yurrngumba mankuwa Jisus Krayis, nyulu nanda marrimbawarr mardarda. Barriwa.  
\v 15 Nayi barri yanybaka jangkurr najana Kudkanyi. “Jala narri manku nanda jangkurr nangangi Kudkanyi, baki marda narrimi miku jardibirringujba muwa nanankanyi jangkurranyi. Marda narrimi miku jardibirringujba muwa, ngala marda narrimi kuyu nanda jangkurr. Nanamuku wankalamuku mungkijimuku narringi, jali yalu manku nangangi jangkurr Kudkanyi, baki yali jardibirringujba muwa nangangi Kudkanyi. Yalungki kurrkunba nanganginkanyi jangkurranyi.” Nani barri yanybayi jangkurr najana Kudkanyi.  
\v 16 Wanyinmuku yalu, jali yalungka kurrkunba ngayangayiykanyi nangangi Kudkanyi. Wanyinmuku yalu. Yalu nanamuku Jumuku jali lalanba yalunya Kudwanyi. Kuyuyi yalunya bayunguna Musiswanyi. Jali yalunya dulaba Musiswanyi nanamunanyi Yijibnanyi, baki lalanbayi yalunya Kudwanyi. Jali yalunya malijba ngarrkadabawarrmukunyi, wiykunumbikanyi yalunya nanankurri Yijibyurri, baki lalanbayi yalunya Kudwanyi kingkarrinya. Kurrkunba nyuli yalunya, nanamuku ngarrkadabawarrmuku Kudwanyi. Ngurrunba nyuli yalunya wabudana. Nani barri nyuli marrimba yalunya Jumuku mardarda. Ngala yalu barri, yalungki yangkalamba nanganbunanyi Kudnanyi. Yalungki kurrkunba ngayangayiykanyi nangangi Kudkanyi. Yurlwa yali nanganginkanyi jangkurranyi. Barriwa.  
\v 17 Wanyinmuku yalu jali ngarrangarra muwa Kud yalungi. Wanyinmuku yalu, jali nyulu ngarrangarra muwa yalungi yurrngumba 40 kindilkurrinyina yajina. Ngarrangarrayi Kud muwa yalungi jali yalungka yangkalamba nanganbunanyi, jali yalu yurlwa nanganginkanyi jangkurranyi, jali yalu yabimba balki yaji nangangi Kudkanyi. Baki nanankardi barri muningka yalili jilalajba lukuluku nananyina mangkurruna yajina 40 kindilkurrinyina yajina. Nanankardi barri yalili muningka jilalajba, bakili yalungka janyba, yingka baki yingka baki yingka. Bukambiju yalungki janyba nanaba mangkurruna yajina.  
\v 18 Yanybayi Kud nayinda jangkurr miku nangkiyi yangkalamba. Nayinda barri nyuli yanyba, “Nanamuku barri, miku yaliyi ngankijba nananyina yajina langku. Miku yaliyi ngankijba nananyina kunybana yajina. Miku ngayiyanyi munyajba yalunya wuyaliykurri nanaba. Miku yaliyi ngankijba nananyina kunybana yajina. Miku yaliyi wuyalijba nanaba.” Nani barri yanybayi Kud. Ngala wanyinmuku yalu, jali mikukiyanyi munyajba yalunya wuyaliykurri nanaba Kudwanyi. Wanyinmuku. Yalu nanamuku Jumuku, jali yalu miku ngayangayijba nangangi Kudkanyi, jali yalungka yangkalamba nanganbunanyi Kudnanyi, jali yalu yurlwa nangangi.  
\v 19 Ngambala jingkijbangka barri nayinda duja jangkurr. Miku yaliyi ngankijba nananyina kunybana yajina langku, kurrkunbayingangi yalunya Kudwanyi. Nyuli kurrkunba yalunya ngankiykanyi kalawuyngkurru, mikungangi yaliyanyi kuyu nangangi jangkurr Kudkanyi. Nanankardi barri yalili muningka jilalajba nananyina mangkurruna yajina 40 kindilkurrinyina, bakili yalungka bukamba janyba nanaba. Barriwa.   
\c 4  
\p
\v 1 Wankalana barri yanybayi Kud jangkurr miku nangkiyi yangkalamba. Yanybayi Kud yalungi, jala yalu ngayangayijba nangangi, baki jayalu ngankijba kunybana yajina, baki jayalu wuyalijba nanaba. Nani barri yanybayi Kud wankalana. Baki yuwajiwa nanda jangkurr duja nanijba barri. Baki ngambala jingkijba Kud, janyulu munyajba ngambalanya ngankiykurri nananyina kunybana yajina kingkarri, baki nanaba jangambala wuyalijba barri. Ngala marda ngambalakimi najbawa. Marda ngambalimi yurrngumba ngayangayijba nanganginkanyi jangkurranyi Kudkanyi, bakiyi nyulu miku munyajba ngambalanya ngankiykurri nananyina yajina kingkarri, bakiyi nyulu miku munyajba ngambalanya wuyaliykurri nanaba. Yi. Marda ngambalakimi najbawa. Marda ngambalimi ngayangayijba nangangi Kudkanyi yurrngumba barri.  
\v 2 Ngambala mankuyi nanda kunyba jangkurr nangangi Kudkanyi, barrinani nanamukunyi wankalamukunyi, jali manku nangangi kunyba jangkurr wankalana barri. Ngala nanda jangkurr nangangi Kudkanyi, yalu wuyaliykanyi, miku nanda jangkurr yalungi wankalamukuyngka. Miku nanda jangkurr yalungi, mikungangi yaliyanyi kuyu nanda jangkurr, ngala yali yurlwa nanankanyi jangkurranyi. Miku yaliyanyi yanyba, “Nayinda jangkurr nangangi Kudkanyi duja barri. Ngambala jingkijbangka Kud, janyulu yabimba nanda jali nyulu yanyba, janyulu yabimba.” Miku yaliyanyi yanyba nani. Miku yaliyanyi nani kuyu nanda jangkurr nangangi, ngala yali yurlwa nanganginkanyi jangkurranyi. Baki nanankardi barri ngambala jingkijbangka barri, nanda jangkurr Kudkanyi yalu wuyaliykanyi, mikukiyanyi yanyba Kud nanda jangkurr yalungi barri.  
\v 3 Ngala ngambala barri, ngambala marda mankuyi nanda kunyba jangkurr nangangi Kudkanyi. Karuyi ngambalanya nanankanyi jangkurranyi Jisus Krayiswanyi. Baki ngambala barri, jala kuyu nangangi jangkurr, jangambala ngankijba nananyina kunybana yajina kingkarri, baki jangambala ngambala wuyalijba nanaba kingkarri. Nanda jangkurr Kudkanyi wuyaliykanyi, nanda duja jangkurr. Yanybayi Kud, “Nanginmuku Jumuku, yalu jardibirringujba muwa. Baki nanankardi barri ngayu ngarrangarrangka muwa yalungi. Miku yalimi ngayangayijba ngakinkanyi jangkurranyi. Baki nanankardi barri miku ngayiyi yalilijba yalunya nanankurri kunybarri yajiyurri langku. Miku ngayiyi munyajba yalunya ngankiykurri nanaba langku. Miku yaliyi wuyalijba nanaba kunybana yajina.” Barriwa. Wabula kamambarra yabimbayi bukamba yaji Kudwanyi. Yabimba nyuli laliji baki jamba baki wabuda, baki bukamba yaji. Yabimba nyuli bukamba yaji kajana kambana, 6 kambana. Yabimbayi bukamba yaji Kudwanyi, 6 kambana, baki munganawa nyuli wuyalijba. Wuyalijba nyuli munganawa barri.  
\v 4 Nanda jangkurr najana Kudkanyi yanybaka, nayi barri, “Yabimbayi bukamba yaji 6 kambana Kudwanyi, baki munganawa nyuli wuyalijba. Miku nyuliyanyi mili waki, ngala wuyalijba nyuli.” Barriwa.  
\v 5-6 Baki mili nanda jangkurr najana Kudkanyi yanybaka nayi barri. “Miku ngayiyi yalilijba yalunya nanankurri kunybarri yajiyurri langku. Miku ngayiyi munyajba yalunya ngankiykurri nanaba langku. Miku yaliyi wuyalijba nanaba.” Barriwa. Yanybayi Kud nanda jangkurr yalungi, narringinkanyi wankalanyi mungkijimukuyngka. Yanybayi Kud nanda kunyba jangkurr, yalu wuyaliykanyi nananyina kunybana yajina, ngala miku yaliyanyi kuyu nanda kunyba jangkurr. Miku yaliyanyi ngayangayijba nanganginkanyi jangkurranyi Kudkanyi. Baki nanankardi barri mikukiyanyi munyajba yalunya Kudwanyi, yalu ngankiykurri nanaba langku. Miku nyuliyanyi munyajba yalunya wuyaliykurri nanaba. Ngala yuwajiwa duja barri nanda jangkurr nangangi Kudkanyi, yalu wuyaliykanyi kunybana yajina. Miku yaliyanyi wuyalijba kunybana jambana, nanamuku wankalamuku, ngala yingkamuku jayalu wuyalijba kunybana jambana. Yingkamukunyi jayalu kuyu nangangi jangkurr Jisus Krayiskanyi, jayalu durrijba nangangi jangkurr, baki jayalu yalu wuyalijba kunybana yajina kingkarri barri.  
\v 7-8 Nanda wankalanyi mambuka yalungi Jumukuyngka, niji Musis, jali barri nangka janyba, baki yarrijbayi yingka mambuka yalungi bayngkani nangandu Kudwanyi. Yarrijba nyuli yingka mambuka yalungi, niji nangangi Jujuwa. Jandanyimuku baki kulunganjamuku yalungi, jali yalungka janyba mangkurruna yajina kularra, nyuli kuyu yalunya nanankurri kunybarri yajiyurri langku Jujuwawanyi. Yalu barri ngankijbayi nananyina kunybana yajina, jali wajba yalunya Kudwanyi. Ngankijba yali, ngala miku yaliyanyi wuyalijba nanaba. Miku. Jayijba yalili nanamuku mungkijimuku nanankanyi yajinyi. Miku yaliyanyi wuyalijba, ngala yurrngumba yalunjalili jayijba, wudumbikanyi nanda yaji yalunginmirra yaji. Baki mili baku barri juju, yingka wankalanyi mambuka, nangangi niji Dayibid. Yanybayi Kud nangangi, nayi barri, “Jala narri manku nanda jangkurr nangangi Kudkanyi, baki marda narrimi miku jardibirringujba muwa nanankanyi jangkurranyi. Marda narrimi miku jardibirringujba muwa, ngala marda narrimi kuyu nanda jangkurr.” Barriwa. Nani barri yanybayi Kud nangangi Dayibidkanyi, baki yarrijbayi nanda jangkurr najana Kudkanyi Dayibidwanyi.  
\v 9 Nanda barri duja jangkurr. Baki nanankardi barri ngambala jingkijbangka barri, nanamuku jala yalu kuyu nangangi jangkurr Kudkanyi, jala yalu jungku yurlurrmba nangangi, janyulu munyajba yalunya, ngankiykurri nanaba kunybana yajina. Janyulu munyajba yalunya, wuyaliykurri nanaba. Wuyalijbayi Kud, jali bukamba nyulu yabimbikanyi yaji, baki nani barri jayalu wuyalijba nanaba kingkarri nangandu Kudnyina.  
\v 10 Nanda jala munyajba wuyaliykurri Kudwanyi, janyulu wuyalijba barrinani nyulu wuyalijbayi Kud. Wakiyi barri Kud 6 kambana, baki jali nyulu bukamba yabimbikanyi yaji, baki wuyalijba nyuli. Baki nani barri nanda jalija wuyalijba kingkarri nangandu Kudnyina. Jalija nyulu bukamba wakinkanyi nangangi Kudkanyi, baki janyulu wuyalijba nanaba kingkarri nangandu yurrngumba barri.  
\v 11 Nanankardi barri, marda ngambalimi jungku yurlurrmba nangangi Kudkanyi yurrngumba barri. Marda ngambalimi kuyu nangangi jangkurr, marda ngambalimi durrijba nangangi jangkurr, baki marda ngambalakimi miku yangkalamba nanganbunanyi Kudnanyi. Jaliyi ngambala nani jungku yurlurrmba nangangi yurrngumba barri, baki munyajbaja ngambalanya Kudwanyi, ngambala wuyaliykurri nanganginyina yajina kingkarri. Ngala jaliyi ngambala miku jungku yurlurrmba nangangi Kudkanyi, baki miku nyuliyi munyajba ngambalanya wuyaliykurri nanaba kingkarri. Barriwa.   
\p
\v 12 Nanda jangkurr nangangi Kudkanyi duja barri. Nanda jangkurr ngiruka marda. Nanda jangkurr barrinani jankunbijinyi jala wadankurru langkiya wilina baki kulaya. Jala ngarrkadaba yingka nganinyiwanyi nananjudinyi jankunbijinyiyudinyi, baki ngankijbangka jankunbijinyi juju kalawuyngkurru nangandu mankanyina. Baki nani barri nanda jangkurr nangangi Kudkanyi, barrinani nanda wadankurru jankunbijinyi. Jala ngambala manku nangangi jangkurr, baki miku ngambaliyi yurlwa nanankanyi jangkurranyi. Nangangi jangkurr ngankijbangka ngambalandu kalawuyngkurru kurduluna. Nangangi jangkurr ngiruka yabimbikanyi ngambalanya jungunkanyi yurlurrmba nangangi Kudkanyi. Nangangi jangkurr ngiruka yabimbikanyi ngambalanya, ngambalaka yanybikanyi muwa. Nangangi jangkurr ngiruka yabimbikanyi ngambalanya, ngambalaka mankumankunkanyi nanankanyi, jala ngambala nulijba yabimbikanyi yaji. Ngambalaka mankumankunkanyi, jaliyi nanda kunyba yaji, jaliyi nanda balki yaji. Nani barri nanda jangkurr nangangi Kudkanyi barrinani nanda jankunbijinyi jala wadankurru langkiya wilina baki kulaya.  
\v 13 Miku nangkiyi ngadijba nganinyi nanganbunanyi Kudnanyi. Baki miku nyuliyi ngadijba nangangi yaji nanganbunanyi. Najbangka bukamba yaji Kudwanyi. Jingkijbangka nyulu bukamba yaji. Nyulu jingkijbangka nanda jala ngambala yabimba. Nyulu jingkijbangka nanda jala ngambalaka mankumanku marda. Baki baku barri jalija nyulu bukamba yaji, baki janyulu karrinjarrijba bukambiju ngambalanya walu nangandu Kudwanyi. Barriwa.   
\p
\v 14 Nanamukunyi Jumukunyi yalili yarrijba walkurra mambuka yalunginkanyi jurjkanyi. Ngala Jisus Krayis nyulu walkurra mambuka ngambalangi Krisjinmukuyngka. Nyulu walkurra mambuka jurjkanyi ngambalangi barri. Nyulu barrinani nanda walkurra mambuka jurjkanyi yalungi Jumukuyngka, ngala miku nyulimi jungku nayiba wayka jambana. Miku nyulimi walkurra mambuka jurjkanyi nayiba jambana. Miku barri. Ngala nyulu jungkuka kingkarri barri. Nyulu jungkuka kingkarri nangandu Kudnyina. Nanda mambuka jurjkanyi, nyulu walkurra nganinyi, ngala Jisus Krayis barri, nyulu mili walkurra nangangi. Nyulu mili walkurra nangangi, nyulungangi jandanyi nangangi Kudkanyi, baki nyulu jungkuka kingkarri nangandu barri. Baki nanankardi barri marda ngambalimi miku mamanumba nanda jangkurr nangangi Jisus Krayiskanyi. Marda ngambalimi kudanyu marrimba nangangi jangkurr yurrngumba barri. Ngambalaka nijarrijbangka Krisjinmuku, baki nanankardi barri marda ngambalimi kudanyu durrijba nangangi jangkurr. Marda ngambalimi yabimba nanda kunyba yaji, jali milidimba ngambalanya Jisus Krayiswanyi.  
\v 15 Wabula barri jali jungku Jisus Krayis wayka jambana, baki balanjayi Jisus Krayis Sayidinwanyi. Balanja nyuli Jisus Krayis, barrinani nyulu balanjaka ngambalanya nanijba barri. Balanja nyuli Jisus Krayis. Nulijba nyuli nangangi Jisus Krayiskanyi, nyulu yabimbikanyi balki yaji, ngala miku nyuliyanyi yabimba balki yaji Jisus Krayiswanyi. Miku nyuliyanyi durrijba jangkurr nangangi Sayidinkanyi, ngala nyuli jungku kunyba nangangi Kudkanyi yurrngumba barri. Baki nanankardi barri nyulu jingkijbangka ngambalanya, balanjaka ngambalanya marda Sayidinwanyi. Nyulu jingkijbangka ngambalanya, nulijbangka Sayidin ngambalangi, ngambala yabimbikanyi balki yaji. Nani barri nyulu jingkijbangka ngambalanya Jisus Krayiswanyi, miku ngambaliyi jungku ngiruka nangangi yurrngumba barri, baki ngindu nangka muwa ngambalangi. Baki nani barri nyulu nanda walkurra mambuka jurjkanyi ngambalangi. Nanda walkurra mambuka yalunginkanyi jurjkanyi Jumukuyngka, nyulu kandimbayi yalunya jali yalu kuyu barnyi nangandurri, nangangi Kudkanyi. Baki nani barri nyulu kandimbaka ngambalanya Jisus Krayiswanyi. Nyulu kandimbaka ngambalanya, jala ngambalanya balanjaka Sayidinwanyi. Ngala nyulu mili walkurra nanankanyi mambukanyi yalunginkanyi jurjkanyi Jumukuyngka. Jungkuyi nanda walkurra mambuka jurjkanyi wayka jambana, ngala nyulu jungkuka kingkarri nangandu Kudnyina nanda walkurra mambuka jurjkanyi ngambalangi barri.  
\v 16 Nanankardi barri marda ngambalimi miku marrala yanybikanyi mududu nangangi Kudkanyi. Ngala marda ngambalimi yanyba mududu nangangi. Marda ngambalimi ngajaka Kud, nyulu yabimbikanyi ngambalanya ngiruka, jala balanjaka ngambalanya Sayidinwanyi. Marda ngambalimi ngajaka Kud, nyulu yabimbikanyi ngambalanya ngiruka, mikungangi ngambaliyi ngiruka, barrinani nyulu jungkuka ngiruka Jisus Krayis. Miku ngambalimi ngiruka yabimbikanyi ngawamba kunyba yaji yurrngumba, barrinani nyulu yabimbayi kunyba yaji yurrngumba Jisus Krayiswanyi. Nani barri marda ngambalimi miku marrala yanybikanyi mududu nangangi Kudkanyi. Nyulu barri kunyba ngambalangi. Jaliyi ngambala ngajaka Kud, baki janyulu yabimba kunyba yaji ngambalangi, janyulu kandimba ngambalanya, jungunkanyi mili ngiruka baki mili ngiruka nangangi yurrngumba barri. Barriwa.   
\c 5  
\p
\v 1 Jalili yarrijba buyingkinyi walkurra mambuka Kudwanyi, jalili nyulu yarrijba buyingkinyi walkurra mambuka yalunginkanyi jurjkanyi Jumukuyngka, bakili nyulu wudumba yingamali nganinyi yalungi. Nyulili yarrijba nanda nganinyi buyingkinyi walkurra mambuka jurjkanyi. Nanda walkurra mambuka jurjkanyi, janyulu waki nangangi Kudkanyi. Janyulu dikarrijba barnyi yalungi nangangi Kudkanyi, baki janyulu yanyba mududu nangangi Kudkanyi yalungi. Janyulu yanyba mududu nangangi Kudkanyi, jala yalu ngindu muwa yalunginkanyi balkinyi yajinyi. Nanamanji barri wabula wankalana jalili yalu ngindu muwa yalunginkanyi balkinyi yajinyi, baki miku yaliyanyi yanyba mududu nangangi Kudkanyi yaluman. Miku yaliyanyi ngajaka Kud, nyulu manjamanjambiji yalungi balki yaji. Miku. Ngala yalili jilajba nangandurri mambukarri jurjkanyi. Yalili kuyu barnyi nangandurri, bakili yalu ngajaka nanda walkurra mambuka, nyulu yanybiji mududu nangangi Kudkanyi yalungi, nyulu ngajakanyi Kud manjamanjambiji yalungi balki yaji. Nani barri yalili yabimba yaji nangangi Kudkanyi nanamanji barri, waluwa jungkuyi Jisus Krayis jambana, waluwa nangki janyba balkinyi yajinyi.  
\v 2 Bukambijunyi ngambala yabimbaka balki yaji, ngambala yabimbaka balki yaji kudiyana barri. Miku ngambaliyi jungku kunybana yuwana Kudkanyi yurrngumba barri. Baki nanda walkurra mambuka yalunginkanyi jurjkanyi, nyulu marda jungkuyi nani. Nyulu marda yabimbayi balki yaji kudiyana barri. Baki nanankardi barri nyulu jingkijbayi yalunya yingkamuku, miku yaliyanyi ngiruka yabimbikanyi ngawamba kunyba yaji yurrngumba barri, barrinani miku marda nyuliyanyi ngiruka yabimbikanyi ngawamba kunyba yaji yurrngumba barri. Kudiyana yalu yabimbayi balki yaji, barrinani kudiyana nyulu yabimbayi balki yaji. Baki nyuli kandimba yalunya, jali yalu kuyu barnyi nangandurri, nyulu waykanyi Kud. Miku nyuliyanyi ngirrwa yalungi, nanda walkurra mambuka jurjkanyi, ngala nyuli kandimba yalunya barri.  
\v 3 Nyuli wajba Kud yalunginkanyi barnyinyi. Nyuli dikarrijba nanda barnyi, ngala nyuli yanyba mududu nangangi Kudkanyi yalunginkanyi balkinyi yajinyi. Ngala kudiyana nyuli wajba Kud nanganginkanyi barnyinyi. Nyuli dikarrijba nanganginmirra barnyi, ngala nyuli yanyba mududu nangangi Kudkanyi nanganginkanyi balkinyi yajinyi. Nyuli nganinyi, barrinani yalu, baki nyuli wajba Kud barnyinyi nanganginkanyi balkinyi yajinyi marda. Barriwa.   
\p
\v 4 Jalili yalu wudumba buyingkinyi walkurra mambuka yalunginkanyi jurjkanyi, baki miku nangkiyanyi yingamali walkurramba. Miku nangkiyanyi yarrijba walkurra mambuka jurjkanyi. Karukili yalunya Kudwanyi, bakili yalu yarrijba nanda nganinyi buyingkinyi walkurra mambuka yalungi. Miku nangkiyanyi nganinyi yarrijba walkurra mambuka, ngala karukili yalunya Kudwanyi. Barriwa. Nani barri nyuli yarrijba yaji wankalana Kudwanyi. Karu nyuli Musis, nanganginkanyi buwanganjanyi, niji Yaran. Karu nyuli Musis, nyuluja yarrijba nangangi buwanganja walkurra mambuka jurjkanyi. Barriwa.  
\v 5-6 Yanybayi Kud jangkurr yalungi nangangi Jisus Krayiskanyi, baki yali yarrijba nanda jangkurr najana Kudkanyi. Nayi barri yanybaka nanda jangkurr, “Ninji barri ngaki jandanyi. Ngayu nganyi nijanganjinyi.” Barriwa. Baki yingka jangkurr yanybayi Kud nanganginkanyi jandayngkanyi, “Jangayu yarrijba ninya walkurra mambuka yalungi, barrinani nanda wankalanyi walkurra mambuka jurjkanyi, niji nangangi Malkisadik, jali nyulu wankalanyi mungkiji nganyi. Jangayu yarrijba ninya walkurra mambuka jurjkanyi barrinani nyulu.” Barriwa. Nani barri yanybaka jangkurr najana Kudkanyi. Yarrijbayi nangangi jandanyi walkurra mambuka jurjkanyi Kudwanyi. Miku nangkiyanyi walkurramba Jisus Krayis. Miku nangkiyanyi yarrijba walkurra mambuka, ngala yarrijbayi Kudwanyi. Nanda wankalanyi walkurra mambuka jurjkanyi, niji Malkisadik, nyuli jirrinyi mambuka jurjkanyi nanamanji wankalana, jali jungku Yabrayam wanka jambana. Nyulu nanda walkurra mambuka jurjkanyi nanamanji barri. Baki yarrijbayi Jisus Krayis walkurra mambuka jurjkanyi Kudwanyi, barrinani nanda wankalanyi walkurra mambuka jurjkanyi niji Malkisadik. Nyulu yarrijbayi Jisus Krayis walkurra mambuka jurjkanyi barrinani nanda Malkisadik. Barriwa.  
\v 7 Jali jungku Jisus Krayis wayka jambana, baki miku nangkiyanyi walkurramba Jisus Krayis, nyulu jungunkanyi jirrinyi. Miku nangkiyanyi walkurramba, ngala nangki bayakardamba. Nyulu marukayi muwa nangangi Kudkanyi. Nani barri nyulu jungkuyi kunyba nangangi yurrngumba barri. Baki nyulu yanybayi mududu nangangi Kudkanyi yurrngumba barri. Mungana barri, jalija yalu munganawa kurdanba Jisus Krayis, baki jingkijbayi yalunya Jisus Krayiswanyi. Nyuli jingkijba yalunya, nulijba yali wudumbikanyi baki kurdanbikanyi. Ngala miku nyuliyanyi nulijba, nangka janybikanyi. Baki nyuli yanyba mududu nangangi Kudkanyi kudanyu barri. Ngajaka nyuli Kud, nyulu marrimbiji mardarda. Baki ngindu nangki muwa baki jirdi mirlarr, jali nyulu yanyba mududu nangangi Kudkanyi. Jingkijba nyuli Kud, nyulu ngiruka marrimbikanyi mardarda. Jaliyanyi nulijba Kud marrimbikanyi mardarda yalunbunanyi, baki yuku nyuliyanyi marrimba mardarda. Nanankardi barri ngajaka nyuli Kud, nyulu marrimbiji mardarda. Baki mankuyi nangangi jangkurr Kudwanyi, jungkungangi nyuli kunyba nangangi Kudkanyi. Nyuli manku nanda jangkurr jali ngajaka Jisus Krayiswanyi.  
\v 8 Jisus Krayis nyuli jandanyi nangangi Kudkanyi, ngala yingkamukunyi yali wajba kijinyi. Kudanyu yali linjumba Jisus Krayis. Ngala miku nyuliyanyi yurlwa nangangi Kudkanyi nanankanyi kijinyi, ngala yuwajiwa nyuli kuyu nangangi jangkurr Kudkanyi. Baki nanankardi barri ngambala jingkijba Jisus Krayis, yuwajiwa nyuli ngayangayijba nangangi Kudkanyi.  
\v 9 Ngala yali kurdanba Jisus Krayis. Munyajbayi yalunya kurdanbikurri Jisus Krayis Kudwanyi, janybangangi nangki Jisus Krayis ngamanginkanyi balkinyi yajinyi. Bukambijunyi ngambala barri, ngambala yabimbaka balki yaji, baki nanankardi barri marda ngambalakimi janyba. Ngala miku. Janyba nangki Jisus Krayis ngamanginkanyi balkinyi yajinyi, ngala mili wankambayi Jisus Krayis Kudwanyi. Mili wankijbayi Jisus Krayis, baki baku nyuli jungku kingkarri nangandu Kudnyina, nananyina jala jungku wirimalaru. Yi. Janyba nangki Jisus Krayis ngamanginkanyi balkinyi yajinyi, baki nanankardi barri nyulu marrimbaka ngambalanya mardarda Kudwanyi. Nyulu marrimbaka ngambalanya mardarda, jaliyi ngambala kuyu nangangi jangkurr, jaliyi ngambala ngayangayijba nanganginkanyi jangkurranyi. Janyulu marrimba ngambalanya mardarda, baki jangambala jungku mili wanka kingkarri nangandu, jalija ngambalaka janyba.  
\v 10 Karuyi Jisus Krayis Kudwanyi, nyuli yarrijba Jisus Krayis, walkurra mambuka jurjkanyi ngambalangi. Nyuli yarrijba Jisus Krayis, walkurra mambuka jurjkanyi, barrinani nanda wankalanyi walkurra mambuka jurjkanyi, niji Malkisadik. Barriwa.   
\p
\v 11 Mili jangayu karu narrinya nangangi Jisus Krayiskanyi. Kajanyi jangkurranyi jangayu karu narrinya, ngala jayalu bijal jardibirri jangkurr narri jingkiykanyi. Jayalu bijal jardibirri jangkurr narri jingkiykanyi, mikungangi narrimi kunyba kulaji jingkiykanyi ngiruka yaji nangangi.  
\v 12-14 Narri mankuyi nanda kunyba jangkurr nangangi Jisus Krayiskanyi, ngala miku narrimi kudanyu jingkijba nanda jangkurr. Jingkijba narri ngawamba bijal jangkurr. Marda narrimi milidimbawarr nanankanyi jangkurranyi, ngala yuwajiwa narrinya milidimbaka yingkamukunyi. Ngawamba bijal narri jingkijbangka, baki nanankardi barri miku yaliyi milidimba narrinya ngirukanyi yajinyi nangangi Kudkanyi. Ngawamba narri jingkijbangka nanda waluwinyi jangkurr nangangi Jisus Krayiskanyi. Narri barrinani buyingkinyi bardarda jala ngaraba ngawamba ngamulu yurrngumba barri. Baki nanda waluwinyi jangkurr jala narri jingkijba, nanda barrinani nanda ngamulu jala ngaraba bardardawanyi. Ngala jalija nyulu ngaraba ngamulu yurrngumba bardardawanyi, baki janyulu jardijba mili ngiruka. Baki baku barri janyulu jardijba walkurra barri, baki janyulu jarrba barnyi. Narri barrinani nanda buyingkinyi bardarda, jala ngaraba ngawamba ngamulu. Narri jingkijbangka ngawamba nanda waluwinyi jangkurr nangangi Jisus Krayiskanyi. Miku narrimi jingkijba kudanyu yaji nangangi, ngawamba bijal yaji narri jingkijbangka nangangi. Nanda jala jingkijbangka ngawamba bijal yaji, miku nyulimi jingkijba wanyi yaji balki, baki wanyi yaji kunyba, nyulu yabimbikanyi. Baki miku nyulimi jingkijba jungunkanyi yurlurrmba nangangi Kudkanyi. Ngala jala nanda bardarda jardijba walkurra, baki nyulu jarrbangka barnyi marda. Baki nani marda nanda nganinyi jala nyulu jingkijbangka ngawamba nanda waluwinyi yaji nangangi Jisus Krayiskanyi. Jaliyi milidimba nanda nganinyi mili yajinyi yingkawanyi, jaliyi nyulu milidimba ngirukanyi yajinyi nangangi, baki janyulu jingkijba mili yaji nanangini nganinyiwanyi. Janyulu jingkijba mili ngiruka yaji nangangi Kudkanyi. Nanda ngiruka yaji nangangi Kudkanyi, nanda barrinani nanda barnyi jala jarrba nganinyiwanyi. Jingkijbangka ngiruka yaji nganinyiwanyi, baki nyulu jardijbangka barrinani walkurra nangangi Kudkanyi. Nyulu jungkuka ngiruka nangangi barri. Baki nyulu jingkijbangka, wanyi yaji balki, baki wanyi yaji kunyba, nyulu yabimbikanyi. Baki nyulu jingkijbangka jungunkanyi yurlurrmba nangangi Kudkanyi. Ngala narri barri barrinani nanda bardarda. Miku narrimi jingkijba ngiruka jangkurr nangangi Kudkanyi. Ngawamba nanda waluwinyi jangkurr narri jingkijba, baki nanankardi barri nayinda jangkurr bijal jardibirri narri jingkiykanyi. Barriwa.   
\c 6  
\p
\v 1 Jali narri jalannga kuyu nanda jangkurr nangangi Jisus Krayiskanyi, baki nanda kunyba. Ngala marda narrimi jingkijba mili yaji nangangi. Marda narrimi jingkijba mili yaji, baki mili yaji nangangi yurrngumba barri. Marda narrimi manku mili jangkurr nangangi Jisus Krayiskanyi. Marda narrimi manku mili jangkurr yalungi milidimbawarrayngka, baki janarri jardijba mili ngiruka nangangi Jisus Krayiskanyi. Narri jingkijbangka, marda narringkimi miku mili yangkalamba nanankurri balkiyurri yajiyurri, jalili narri yabimba wabula.  
\v 2 Narri jingkijbangka nanda yaji jali yalu ngurrunba narrinya wabudana. Baki narri jingkijbangka jali yalungka yarrijba marni narrindu kulajina, minimbikanyi narrinya, jungkuka nanda Kunyba Ngarndu Kudkanyi narrindu kurduluna. Baki narri jingkijbangka, ngambala Krisjinmuku, jangambala mili wanka jungku kingkarri nangandu, jalija ngambalaka janyba. Baki mili narri jingkijbangka, jalija wijba Jisus Krayis wayka jambarri, baki janyulu karrinjarrijba yalunya bukambiju walu nangandu Kudwanyi, baki janyulu yanyba manjiykanyi yalunya. Janyulu yanyba manjiykanyi yalunya, kudiyanymuku kingkarri nangandurri Kudyurri, ngala kudiyanymuku wayka jangurri Yilyurri.  
\v 3 Narri jingkijbangka nanda yaji, ngala marda narrimi jingkijba mili yaji nangangi. Marda narrimi jingkijba mili yaji nangangi Kudkanyi. Jangayu milidimba narrinya mili yajinyi nangangi Kudkanyi, marda nangangi Jisus Krayiskanyi, marda nangangi Kunybanyi Ngarndunyi Kudkanyi. Ngayu ngajakangka Kud, jangana nyulu munyajba, ngayuja milidimba narrinya. Jangana munyajba milidimbikurri narrinya mili yajinyi yalungi.   
\p
\v 4-6 Ngambala Krisjinmuku, ngambala yingijbayi nanda yuwa, jalili ngambala durrijba wabula. Ngambala yingijbayi nanda waluwinyi yuwa, ngala ngambala durrijbangka nanda buyingkinyi yuwa, jali minimba ngambalanya Kudwanyi. Nginduyi ngambala muwa ngamanginkanyi balkinyi yajinyi, baki manjamanjambayi nanda balki yaji Kudwanyi. Manjijba nyuli nangangi Kunyba Ngarndu ngamandurri, nyulu jungunkanyi ngamandu kurduluna. Nani barri ngambala Krisjinmuku jungku nanijba barri. Barriwa. Ngala kudiyanymuku barri, yabimbayi bukamba nanda yaji yalungi Kudwanyi, baki yalu durrijbayi nangangi jangkurr, ngala mili yalungki yangkalamba nanganbunanyi Kudnanyi. Yingijba yali nangangi yuwa, baki mili yalu durrijbangka nanda yalungi yuwa. Mili yalu durrijbangka nanda waluwinyi yuwa yalungi barri. Waluwa barri yali Krisjinmuku, yalu jingkijbayi nanda buyingkinyi jangkurr nangangi Jisus Krayiskanyi, yalu jingkijbayi nanda kunyba jangkurr, nanda duja jangkurr. Waluwa barri yalu jingkijbayi Kud, nyuli yabimba yalunya ngiruka, yalu yabimbikanyi kaja kunyba yaji. Yalu jingkijbayi Kud, nyulu yabimbayi bukamba nanda yaji yalungi, ngala yalungki mili yangkalamba nanganbunanyi. Yalungki mili yangkalamba nanganbunanyi Kudnanyi, marda nanganbunanyi Jisus Krayisnanyi, marda nanganbunanyi Kunybananyi Ngarndunanyi Kudkanyi. Nanda jala nangka mili yangkalamba nanganbunanyi Kudnanyi, baki mili nyulu durrijbangka Sayidin, baki nanda balkimirra nangangi. Nanda barrinani mili janyulu kurdanba jandanyi nangangi Kudkanyi nanangini barri. Barrinani janyulu mili ngarrkadaba Jisus Krayis kurndana, barrinani janyulu mili langandaba Jisus Krayis kurndana, baki jayalu ngirrikimba Jisus Krayis, jayalu kakalijba nangangi. Nanda jala mili nangka yangkalamba nanganbunanyi Kudnanyi nani barri, mikuwali yingkawanyi mili yangkalamba nanda nganinyi nangandurri Kudyurri. Mikuwali yingkawanyi yabimba nanda nganinyi, nyulu mili durriykanyi jangkurr nangangi Kudkanyi. Barriwa.   
\p
\v 7-8 Mankumanku narringka nanginkanyi jangkurranyi. Yarrijbayi yami kunybana jambana nganinyiwanyi, baki manjijbayi janja Kudwanyi. Yirrbayi janja, baki jardijbayi nanda yami. Waluku jardijbayi wujurr bayakarda waykalinya, baki baku barri jardijbayi walkurra wanjirr mamayudi. Kunyba nanda mama yalu jarrkanyi barri. Manjijbayi janja Kudwanyi. Nyulu barri yabimbayi nanda yami jardiykanyi nyulu waykalinya walkurra. Nyulu yabimbayi yami jardiykanyi walkurra wanjirr mamayudi. Ngala yingka yaji nanda balki jamba. Manjijbayi janja Kudwanyi, ngala jardijbayi ngawamba nanda balki karnba nanaba, jala mikuyaji mamanyi nangandu. Baki yiningki jayalu bakarrijba nanda balki karnba. Yiningki yajbaja nanda karnba janguwanyi. Barriwa. Kudiyanymuku yalu barrinani nanda kunyba jamba, jala jardijba kunyba mama nangandu. Manjijbayi janja nanankurri Kudwanyi, baki jardijbayi kaja kunyba mama wanjirrina. Baki nani barri nyuli wajba yalunya nanganginkanyi kunybanyi jangkurranyi Kudwanyi. Nyuli wajba yalunya kunybanyi jangkurranyi, baki yali kuyu nanda jangkurr, baki yali yabimba kunyba yaji nangangi. Baki mirnarrijbayi Kud muwa yalungi, jali yalu yabimba kunyba yaji nangangi. Ngala kudiyanymuku, yalu barrinani nanda balki jamba, jali jardijba ngawamba balki karnba nanaba, mikuyaji mamanyi. Wajbayi yalunya nanganginkanyi kunybanyi jangkurranyi Kudwanyi, ngala yali yurlwa nanankanyi jangkurranyi. Miku yaliyanyi yabimba kunyba yaji nangangi Kudkanyi. Nani barri yalu barrinani nanda balki karnba jala mikuyaji mamanyi nangandu. Yali yabimba balki yaji yalungi yingkamukuyngka, baki nanankardi barri nyuli ngarrangarra muwa yalungi Kud. Yiningki jayalunya manjijba wayka jangurri Yilyurri. Barriwa.   
\p
\v 9 Ngala narri barri ngakinmuku mungkijimuku, nurru jingkijbangka narrinya, miku narrimi barrinani nanda balki karnba, ngala narri barrinani nanda kunyba wanjirr jirdi kajanyi mamanyi. Baki nurru jingkijbangka Kud, janyulu yabimba kunyba yaji narringi, janyulu marrimba narrinya mardarda.  
\v 10 Kud, nyulu kunyba barri. Jaliyi narri jungku yurlurrmba nangangi, baki janyulu yabimba kunyba yaji narringi. Miku nyuliyi mamanumba narrinya nanankanyi jali narri yabimba. Narri marukayi muwa nangangi Kudkanyi, baki nanankardi barri narri marukayi muwa yalungi yingkamukuyngka, baki narri yabimbayi kunyba yaji yalungi barri. Miku nyuliyi mamanumba nanda kunyba yaji, jali narri yabimba yalungi, yingkamukuyngka Krisjinmukuyngka. Yuwajiwa narri yabimbaka kunyba yaji yalungi yurrngumba barri, baki yuwajiwa janyulu yabimba kunyba yaji narringi barri.  
\v 11 Nurru nulijbangka narringi, miku narringkiyi kurrkunba, jala narri yabimba kunyba yaji. Nurru nulijbangka narringi, yuwajiwa narri yabimbikanyi kunyba yaji. Kudanyu nurru nulijbangka narringi, narri yabimbikanyi mili kunyba yaji yurrngumba barri. Baki jaliyi narri jungku kunyba nangangi Kudkanyi nani barri, baki narri jingkijba yaji, janarri jungku nangandu Jisus Krayisnyina, jalija nyulu wijba.  
\v 12 Miku nurrimi nulijba narringi, narri bunmaliykanyi kurdulu nangangi Kudkanyi. Ngala nurru nulijbangka narringi, narri jungunkanyi mili yurlurrmba nangangi Kudkanyi. Nurru nulijbangka narringi, narri mili marukankanyi muwa yalungi, narri yabimbikanyi mili kunyba yaji yalungi barri. Marda narrimi barrinani nanamuku wankalamuku jalili yalu kuyu nangangi jangkurr yalunginyina kurduluna. Kudanyu yalili yabimba kunyba yaji yalungi yingkamukuyngka, ngala yalili yukumba nangangi Kudkanyi. Yalili yukumba nangangi Kudkanyi, nyulu yabimbikanyi nanda jali nyulu yanyba, janyulu yabimba. Baki nani barri, marda narrimi miku bunmalijba kurdulu, ngala marda narrimi kudanyu marrimba nangangi jangkurr narringinyina kurduluna. Jaliyi narri jungku nani barri, baki janarri baku jungku kingkarri nangandu Kudnyina. Barriwa.   
\p
\v 13-17 Kud, nyulu wirimalaru bukambijuyngka wandijiyana. Mikuyaji yingkanyi walkurra barrinani nyulu. Mikuyaji yingkanyi jirrinyi barrinani nyulu. Jala yanybaka Kud jangkurr miku nangkiyi yangkalambikanyi, baki ngambala jingkijba Kud, janyulu yabimba nanda jali nyulu yanyba, janyulu yabimba. Yanybayi Kud nangangi, nanankanyi wankalanyi niji Yabrayam. Yanyba nyuli nayinda jangkurr nangangi, miku nangkiyi yangkalambikanyi. Yanybayi Kud, “Ngayu karungka ninya nanginkanyi jangkurranyi, miku yangkalambikanyi ngaka. Jangayu yabimba kunyba yaji nganyi. Janinji wudumba murimurimba ninji. Jayalu kudukudumuku juju barri bayngkani nganyindu.” Barriwa. Nani barri yanybayi Kud nangangi Yabrayamkanyi. Baki kuyuyi nanda jangkurr Yabrayamwanyi. Jingkijba nyuli Kud, janyulu yabimba nanda jali nyulu yanyba. Nanda Yabrayam, mikuyaji nyuli jandayngkanyi nanamanji barri, baki yukumba nyuli yurrngumba barri nanganginkanyi jandayngkanyi. Ngala miku nyuliyanyi balkijba muwa, jingkijbangangi nyuli Kud, janyulu yabimba nanda jala nyulu yanyba, janyulu yabimba. Jingkijbayi Yabrayamwanyi, baku barri janyulu wudumba jandanyi, baki janyulu wudumba murimurimba nyulu juju barri bayngkani nangandu. Baki wakara barri. Wudumbayi jandanyi Yabrayamwanyi juju barri baku. Jalili yanyba nganinyi jangkurr, miku nangkiyi yangkalambikanyi, baki yiningki nyulu yanybaka nayi barri, “Jangayu yabimba nayinda yaji nganyi. Ngayu yanybaka nayinda jangkurr nganyi, baki ngayu ngajakangka ngaki mambuka, nyulu mankunki nayinda ngaki jangkurr. Jangayu yabimba nayinda yaji nganyi.” Barriwa. Nani barri jalili yingka yanyba jangkurr yingkanyi, miku nangki yangkalambikanyi, baki nyulu ngajaka yingka mankunkanyi nanda jangkurr. Nyulili ngajaka yingka, jala mili walkurra bulangi, nyulu mankunkanyi nanda jangkurr bulangi, baki miku bulangkiyi baku jakakajba nanankanyi jangkurranyi. Mankuyi nanda jangkurr mambukawanyi, baki miku nyuliyi barlba nanankardi. Janyulu yabimba nanda yaji nanankanyi nganiyngkanyi. Ngala Kud, nyulu walkurra, wirimalaru, mikuyaji yingkanyi mili walkurra nangandu. Baki nanankardi barri miku nyuliyi ngajaka yingka mankunkanyi nangangi jangkurr, jala nyulu yanyba jangkurr, miku nangkiyi yangkalambikanyi. Miku nyuliyi ngajaka yingka mankunkanyi nangangi jangkurr, mikungangi yingka mili walkurra nangandu. Ngala jali nyulu yanyba jangkurr ngambalangi, baki nyuli nulijba ngambalangi jingkiykanyi Kud. Nyuli nulijba ngambalangi jingkiykanyi Kud, janyulu yabimba nanda jali nyulu yanyba janyulu yabimba, baki yanybayi Kud nayi barri, “Kudanyu ninga karungka nanginkanyi jangkurranyi, jangayu yabimba nanda yaji nganyi.” Nani barri yanybayi Kud, baki ngambala jingkijba, yuku ngambala kuyu nanda jangkurr jali yanyba Kud, dujangangi nanda jangkurr nangangi Kudkanyi. Mikuwali jujamba yaji Kudwanyi. Janyulu yabimba nanda jali nyulu yanyba, janyulu yabimba.  
\v 18 Baki nanankardi barri ngambala jingkijbangka nayi. Mikuwali jujamba yaji Kudwanyi. Yurrngumba nangangi jangkurr duja barri. Baki mili barri ngambala jingkijbangka Kud, duja barri nangangi jangkurr, mikuwalingangi yangkalamba nanda jangkurr Kudwanyi. Barriwa. Yanybayi Kud jangkurr miku nangkiyi yangkalambikanyi, janyulu marrimba ngambalanya mardarda. Janyulu marrimba ngambalanya mardarda, jaliyi ngambala jungku yurlurrmba nangangi. Baki ngambala jingkijbangka, duja nanda jangkurr, yanybangangi Kud duja jangkurr yurrngumba barri. Baki nanankardi barri ngambala mirnarrijbangka muwa, jingkijbangkangangi ngambala Kud, janyulu marrimba ngambalanya mardarda, baki baku jangambala jungku kingkarri nangandu yurrngumba barri. Barriwa.  
\v 19 Mankumanku narringka muwardanyi kanjana. Kijijba yalu dungala ngirukana kurulina, baki janyba yalu dungala wayka wabudarri. Jungkuka nanda dungala wayka jambana kalawuyngkurru wabudana, baki miku nangkiyi ngirringirrimba nanda muwarda. Marrimbaka nanda muwarda mardarda dungalawanyi kurulyudinyi. Kud, nyulu barrinani nanda dungala jala marrimbaka muwarda mardarda, baki nangangi jangkurr barrinani nanda kurul. Baki ngambala Krisjinmuku jala kudanyu durrijba nangangi jangkurr, ngambala barrinani nanda muwarda. Jala ngambala kudanyu marrimba nangangi jangkurr, jala ngambala kudanyu ngayangayijba nanganginkanyi jangkurranyi, baki nyulu marrimbaka ngambalanya mardarda Kudwanyi, barrinani marrimbaka muwarda mardarda dungalawanyi kurulyudinyi. Baki ngambala jingkijbangka Kud, nyulu marrimbaka ngambalanya mardarda, baki miku ngambalakiyi ngirringirrimba nanganbunanyi. Baki baku barri jangambala jungku kingkarri nangandu yurrngumba barri.  
\v 20 Janyba nangki Jisus Krayis kurndana, baki mili wankijba nyuli. Kirrijba nyuli kingkarri nangandurri Kudyurri waluwa ngambalangi. Nyulu jungkuka nangandu Kudnyina, baki nyulu yanybaka mududu Kudkanyi ngambalangi barri. Nyulu yarrijbayi Jisus Krayis walkurra mambuka jurjkanyi ngambalangi Kudwanyi. Yurrngumba nyulu walkurra mambuka jurjkanyi ngambalangi. Nyulu barrinani nanda wankalanyi walkurra mambuka jurjkanyi, niji Malkisadik, jali nyulu yanyba mududu nangangi Kudkanyi yalungi wankalamukuyngka. Nyulu yabimbaka nanamannga yaji Jisus Krayiswanyi, barrinani yabimbayi Malkisadikwanyi. Nanda Malkisadik nyuli barrinani wankalanyi mungkiji nangangi Jisus Krayiskanyi. Jisus Krayis nyulu nanda walkurra mambuka jurjkanyi ngambalangi. Nyulu jungkuka kingkarri nangandu Kudnyina, baki nyulu yanybaka mududu nangangi Kudkanyi ngambalangi barri. Barriwa.   
\c 7  
\p
\v 1 Wankalana barri nanda malbu Yabrayam jungku nyuli nananyina walkurranyina yajina niji Kayinan. Ngala ngurranyimuku yalili jungku lukuluku nangandu. Kujarra baki kujarra mambukamuku yalungi baki yalunginmuku ngarrkadabawarrmuku, yali badajba nanankurri yajiyurri Kayinanyurri. Badajba yali, dabanki yalunya mungkijimuku nanankanyi yajinyi. Ngala badajbayi Yabrayam, baki nanganginmuku ngarrkadabawarrmuku baki yalunjali daba. Yalunjali daba wakara barri, baki wakarambayi yalunya Yabrayamwanyi. Baki wudumba nyuli kaja yaji yalunbunanyi. Jali wijba Yabrayam, baki jilajbayi nanda walkurra mambuka Malkisadik nangandurri. Nanda Malkisadik nyuli mambuka nanankanyi yajinyi niji Salim, baki nyuli walkurra mambuka nanganginkanyi jurjkanyi Kudkanyi, nanankanyi jali nyulu wirimalaru. Jilajbayi nanda mambuka nangandurri Yabrayamyurri, baki nyuli yanyba mududu nangangi Kudkanyi nangangi Yabrayamkanyi. Nyuli ngajaka Kud, nyulu yabimbiji kunyba yaji nangangi Yabrayamkanyi.  
\v 2 Baki Yabrayamwanyi nyuli wajba nanda walkurra mambuka yajinyi. Wajba nyuli nanda mambuka kudiyayngka nanankanyi yajinyi, jali nyulu dulaba yalunbunanyi, jali nyulu daba yalunya wakara. Nanda niji Malkisadik, nanda Ju yanyi, barrinani “Mambuka jungunkanyi yurlurrmba nangangi Kudkanyi.” Baki nanda Malkisadik, nyuli mambuka nanankanyi yajinyi niji Salim. Baki nanda niji Salim, nanda Ju yanyi barrinani “Jungunkanyi nyulu mardumardu muwa.” Nanankardi barri ngambala jingkijba nanda Malkisadik, nyulu mambuka jungunkanyi yurlurrmba nangangi Kudkanyi, baki nyulu mambuka jungunkanyi mardumardu muwa nangangi Kudkanyi. Barriwa.   
\p
\v 3 Ngala wanyi nanda wankalanyi walkurra mambuka jurjkanyi, nanda Malkisadik. Wanyi nyuli. Mikukimi karu ngambalanya jangkurrwanyi najana Kudkanyi. Mikukimi karu ngambalanya kajanyi yajinyi nangangi. Mikukimi karu ngambalanya nanganginkanyi nijanganjiyngka, baki nanganginkanyi yarrijiyngkanyi. Baki mikukimi karu ngambalanya nanganginkanyi murimuringanjanyi baki nanganginkanyi miminganjanyi. Baki mikukimi karu ngambalanya nanangini jangkurrwanyi nangka janybikanyi. Ngawamba ngambala jingkijba yaji nangangi, nyulu jungunkanyi walkurra mambuka jurjkanyi nanamanji wankalana. Miku ngambalimi jingkijba, nangka janybikanyi. Baki nanda barrinani nyulu walkurra mambuka jurjkanyi yurrngumba barri. Baki nani barri nyulu barrinani Jisus Krayis, nanda jandanyi nangangi Kudkanyi, jala nyulu walkurra mambuka jurjkanyi ngambalangi yurrngumba barri.  
\v 4 Nayi barri narri jingkijbangka, nanda Malkisadik, nyuli walkurramirra mambuka. Nanangini Yabrayamwanyi, nyuli wajba Malkisadik kudiyayngka nanankanyi yajinyi jali nyulu wudumba nanda yaji yalunbunanyi ngurranyimukunanyi. Nyuli wajba Malkisadik kudiyayngka nanankanyi yajinyi, nyulungangi Malkisadik mili walkurra nangangi Yabrayamkanyi. Barriwa.   
\p
\v 5 Juju barri bayngkani nangandu yarrijbayi Kudwanyi mambukamuku jurjkanyi yalungi Jumukuyngka. Yalunjalili nijarrijba nanamuku mambukamuku jurjkanyi “Libayimuku”, nyulungangi Libayi yalungi wankalanyi murimuringanja. Ngawamba yalu Libayimuku mambukamuku yalunginkanyi jurjkanyi yurrngumba barri nanginkurri nanijba barri. Nanamuku mungkijimuku, jali Libayi yalungi wankalanyi murimuringanja, ngawamba yali mambukamuku jurjkanyi yalungi Jumukuyngka. Barriwa.  
\p Nanamukunyi Jumukunyi yalili durrijba nanda waluwinyi yuwa jali wajba yalunya Musiswanyi. Nanda waluwinyi yuwa yanybayi, yalu waykanyi mambukamuku jurjkanyi yajinyi. Jayalu wajba mambukamuku jurjkanyi kudiyayngka yalunginkanyi yajinyi. Jalili yalu wudumba 10 dula, bakili yalu wajba mambukamuku jurjkanyi yingamali dula. Jalili yalu wudumba 10 jib, bakili yalu wajba mambukamuku jurjkanyi yingamali jib. Nani barri yalunjalili wajba mambukamuku jurjkanyi yajinyi. Bukamba nanamuku mambukamuku jurjkanyi, yalu barrinani murimurimba nyulu yalunya Yabrayamwanyi juju barri bayngkani nangandu. Nyulu nanda wankalanyi murimuringanja bukambijuyngka yalungi.  
\v 6 Yingkamukunyi yalunjalili wajba mambukamuku jurjkanyi kudiyayngka yajinyi barrinani wajbayi Malkisadik kudiyayngka yajinyi Yabrayamwanyi. Nanda Malkisadik, miku nyuli Libayi, ngala wajbayi Malkisadik yajinyi Yabrayamwanyi, nanankanyi yajinyi jali nyulu wudumba yalunbunanyi ngurranyimukunanyi. Wajbayi Malkisadik yajinyi Yabrayamwanyi, baki yanybayi Malkisadik mududu nangangi Kudkanyi nangangi Yabrayamkanyi. Ngajaka nyuli Kud, nyulu yabimbiji kunyba yaji nangangi Yabrayamkanyi. Yabrayam, nyuli walkurra nganinyi nangangi Kudkanyi, jali yanyba Kud jangkurr nangangi miku nangkiyi yangkalamba. Nani barri Yabrayam nyuli walkurra nganinyi nangangi Kudkanyi, ngala yanybayi Malkisadik mududu nangangi Kudkanyi nangangi Yabrayamkanyi.  
\v 7 Baki ngambala jingkijba, nanda jala yanybaka mududu nangangi Kudkanyi yingkanyi, nanda jala ngajakangka Kud, nyulu yabimbiji kunyba yaji nanankanyi yingkanyi, nyulu mili walkurra nanankanyi yingkanyi. Nyulu mili walkurra nanankanyi yingkanyi. Yanybayi Malkisadik mududu nangangi Kudkanyi nangangi Yabrayamkanyi. Ngajaka nyuli Kud, nyulu yabimbiji kunyba yaji nangangi Yabrayamkanyi, baki nani barri Malkisadik nyulu mili walkurra nangangi Yabrayamkanyi. Nyulu mili walkurra nangangi.  
\v 8-10 Nanamuku jalili yalu yurrngumba mambukamuku yalunginkanyi jurjkanyi Jumukuyngka, yali mungkijimuku, baki yali murimurimba nyulu yalunya Libayiwanyi bayngkani nangandu, nanda jali waluwinyi walkurra mambuka jurjkanyi yalungi Jumukuyngka. Ngala Libayi nyuli murimurimba nyulu Yabrayamwanyi. Nani barri Yabrayam nyuli wankalanyi murimuringanja bukambiju yalungi jalili yalu mambukamuku yalunginkanyi jurjkanyi Jumukuyngka, jalili yalu juju barri bayngkani nangandu Yabrayamnyina. Yingkamukunyi yalunjalili wajba mambuku jurjkanyi kudiyayngka yalunginkanyi yajinyi, barrinani wajbayi Malkisadik kudiyayngka yajinyi Yabrayamwanyi. Ngala nanda barrinani nanamuku mambukamuku jurjkanyi, barrinani yalu wajbayi Malkisadik yajinyi nanamanji barri, ngala yali jilijbawa yajinyi. Mikuyaji yalungi nanamanji jali wajba Malkisadik yajinyi Yabrayamwanyi, ngala nanda barrinani yalu marda wajbayi Malkisadik yajinyi, nyulungangi Yabrayam wankalanyi murimuringanja yalungi. Barriwa. Yalunjalili wajba mambukamuku jurjkanyi yajinyi, ngala nanda mambuka jurjkanyi ngawamba nyuli mambuka jurjkanyi murrkananyi, baki nangki janyba, baki yingka yali yarrijba mambuka jurjkanyi bayngkani nangandu. Nani barri nanamuku mambukamuku jurjkanyi, niji yalungi Libayimuku, yali nganinyimuku barrinani ngambala. Jalili yalu malbungujba mankanyi, bakili yalungka janyba. Ngala nanda Malkisadik, jali wajba yajinyi Yabrayamwanyi, mikukimi ngambalanya karu nangka janybikanyi jangkurrwanyi. Mikukimi ngambalanya karu nangangi Malkisadikanyi nangka janybikanyi jangkurrwanyi najana nangangi Kudkanyi. Barriwa.   
\p
\v 11-14 Nanda yuwa jali wajba Musis Kudwanyi, nanda yuwa yarriykanyi mambukamuku jurjkanyi, nanda jirrinyi yuwa. Baki nanda Yarun nyuli waluwinyi walkurra mambuka yalunginkanyi jurjkanyi Jumukuyngka. Nanda Yarun nyuli murimurimba nyuli Libayiwanyi juju barri bayngkani nangandu. Nanda Yarun nyuli waluwinyi walkurra mambuka yalunginkanyi jurjkanyi, baki yingkamuku nanganginmuku murimurimba nyulu yalunya, yalu mambukamuku bayngkani nangandu. Nyulu Yarun wankalanyi murimuringanja yalungi. Yalu wakiyi nangangi Kudkanyi. Yalu yabimbayi nanda jala yalunya karu nanangini yuwawanyi Musiskanyi, ngala miku yalunjaliyi marrimba mardarda. Miku yalunjaliyi marrimba mardarda nanamuku Jumuku, mambukamukunyi jurjkanyi. Jalili yalu durrijba nanda yuwa nangangi Musiskanyi, baki mikuwali nanangini yuwawanyi kuyu yalunya kingkarri nangandu Kudyurri. Yi. Mikuwali marrimba yalunya mardarda mambukamukunyi jurjkanyi. Baki nanankardi barri manjijbayi yingka walkurra mambuka jurjkanyi Kudwanyi. Ngala miku nyulu walkurra mambuka jurjkanyi barrinani nanda Yarun, nanda waluwinyi walkurra mambuka yalunginkanyi jurjkanyi Jumukuyngka, jala durrijba yuwa nangangi Musiskanyi. Miku nyulu walkurra mambuka jurjkanyi barrinani nyulu, ngala nyulu walkurra mambuka jurjkanyi barrinani nanda wankalanyi walkurra mambuka jurjkanyi. Nyulu walkurra mambuka jurjkanyi barrinani nanda Malkisadik. Manjijbayi nangangi jandanyi Jisus Krayis Kudwanyi, baki yarrijba nyuli Jisus Krayis walkurra mambuka jurjkanyi ngambalangi, barrinani Malkisadik. Baki ngambala jingkijba barri, ngambalangi mambuka Jisus Krayis, miku nyulu mungkiji yalungi Libayimukuyngka. Mikukiyanyi Libayi wankalanyi murimuringanja nangangi Jisus Krayiskanyi. Ngala nanda yingka wankalanyi niji nangangi Juda, jali kanyiya nangangi Libayikanyi, nyuli wankalanyi murimuringanja nangangi Jisus Krayiskanyi. Nyuli mungkiji yalungi Judamukuyngka. Ngala miku yalimi Judamuku mambukamuku jurjkanyi. Miku nanda yalungi yaji. Ngawamba yalu Libayimuku, ngawamba yalu mambukamuku jurjkanyi. Jali wajba yalunya yuwanyi Musiswanyi, baki miku nyuliyanyi yanyba yalungi Judamukuyngka, yalu mambukamuku jurjkanyi. Ngawamba nyuli yanyba yalungi Libayimukuyngka, yalu mambukamuku jurjkanyi. Ngala miku nyuliyi Jisus Krayis mambuka jurjkanyi barrinani nanamuku Libayimuku. Yinini mambuka jurjkanyi nyulu. Nani barri wajbayi ngambalanya yinini walkurrayngka mambukanyi jurjkanyi Kudwanyi, baki nani barri nyuli wajba ngambalanya yinini yinini yuwanyi marda Kudwanyi. Wajbayi ngambalanya yinini yinini yuwanyi, jali nyulu yarrijba Jisus Krayis walkurra mambuka jurjkanyi ngambalangi. Barriwa.   
\p
\v 15 Ngambala jingkijbangka barri, manjijbayi Jisus Krayis Kudwanyi. Yarrijba nyuli Jisus Krayis walkurra mambuka jurjkanyi, barrinani nanda wankalanyi walkurra mambuka jurjkanyi Malkisadik.  
\v 16 Nanda yingka waluwinyi mambuka yalunginkanyi jurjkanyi Jumukuyngka, nangangi niji Yarun. Baki nanganginmuku jandanyimuku, marda murimurimba nyulu yalunya, yalu marda mambukamuku jurjkanyi. Yali Libayimuku. Ngala yalungki janyba, yingka, baki baku yingka, baki baku yingka. Ngala bukambayi nanda yuwa Kudwanyi, yarriykanyi mambukamuku jurjkanyi. Bukamba nyuli nanda yuwa, baki yarrijba nyuli Jisus Krayis. Yarrijba nyuli Jisus Krayis walkurra mambuka jurjkanyi ngambalangi Kudwanyi. Baki nyulu jungkuka wanka yurrngumba barri nangandu Kudnyina. Miku nangkiyi janyba, ngala yurrngumba nyuluja wanka jungku.  
\v 17 Nanda jangkurr najana Kudkanyi yanybaka nangangi Jisus Krayiskanyi. Nayinda barri yanybaka jangkurr, “Janinji walkurra mambuka jurjkanyi barrinani nanda yingka walkurra mambuka jurjkanyi, niji Malkisadik. Nyulu barrinani wankalanyi mungkiji nganyi. Janinji walkurra mambuka jurjkanyi yurrngumba barri.” Duja barri nanda jangkurr najana Kudkanyi. Barriwa.   
\p
\v 18-19 Wajbayi Musis nanankanyi yuwanyi Kudwanyi, ngala miku nanda yuwa ngiruka marrimbikanyi yalunya mardarda. Miku nanda yuwa ngiruka yabimbikanyi yalunya jungunkanyi mili wanka nangandu Kudnyina. Baki nanankardi barri manjijbayi nangangi jandanyi Kudwanyi, baki nyuli wajba ngambalanya buyingkiyngkanyi yuwanyi. Jaliyi ngambala kuyu nanda buyingkinyi yuwa, baki ngambala jingkijba Kud. Ngambala jingkijba Kud, jangambala jungku kandi nangangi Kudkanyi, janyulu marrimba ngambalanya mardarda, baki jangambala jungku mili wanka nangandu yurrngumba barri.  
\v 20-22 Baki yanybayi Kud yingka jangkurr, miku nangkiyi yangkalamba, baki nanda jangkurr najana Kudkanyi. Nayi barri nanda jangkurr najana Kudkanyi, “Yanybaka Kud jangkurr, miku nangkiyi yangkalamba. Yanybaka Kud nanganginkanyi jandayngkanyi Jisus Krayiskanyi, ‘Janinji walkurra mambuka jurjkanyi yalungi yurrngumba barri. Mikuyaji yingkanyi janyulu walkurra mambuka jurjkanyi bayngkani nganyindu. Ngawamba ninji walkurra mambuka jurjkanyi yurrngumba barri.’” Nanda jangkurr jali yanyba Kud nangangi Jisus Krayiskanyi, nanda kunybamirra jangkurr. Nanda jangkurr mili kunyba nanankanyi waluwiyngkanyi jangkurranyi. Nanda jangkurr mili kunyba nanankanyi waluwiyngkanyi jangkurranyi, yarriykanyi mambukamuku jurjkanyi. Barriwa. Yanybayi Kud nanda jangkurr nangangi Jisus Krayiskanyi. Baki nanankardi barri ngambala jingkijbangka Jisus Krayis, nyulu mili walkurra nanamukuyngka wankalamukuyngka mambukamukuyngka jurjkanyi. Nyulu mili walkurra yalungi. Barriwa.   
\p
\v 23 Nanamuku wankalamuku mambukamuku jurjkanyi, nanamuku Libayimuku, kaja barri yalu. Miku yaliyanyi waki nangangi Kudkanyi yurrngumba, janybangangi yalungkili. Jalili yalungka janyba, baki yingkamuku bayngkani yalundu, yalili barri mambukamuku jurjkanyi, yalili waki nangangi Kudkanyi jurjina. Nani barri kajamuku yalili mambukamuku yalunginkanyi jurjkanyi Jumukuyngka.  
\v 24 Ngala Jisus Krayis barri, miku nangkiyi mili janyba. Nyulu jungkuka wanka yurrngumba barri, baki nyulu walkurra mambuka jurjkanyi ngambalangi yurrngumba barri. Mikuyaji yingkanyi walkurra mambuka jurjkanyi bayngkani nangandu. Baki nyulu wakingka nangangi Kudkanyi yurrngumba barri, mikungangi nangkiyi mili janyba.  
\v 25 Baki nanankardi barri, jala nganinyi kudanyu nulijbangka durriykanyi jangkurranyi nangangi Kudkanyi yurrngumba barri, baki yanybaka Jisus Krayis mududu nangangi Kudkanyi nanankanyi nganiyngkanyi. Nyulu ngajakangka Kud, nyulu manjamanjambiji nangangi balki yaji. Nani barri nyulu ngajakangka Kud nangangi, jungkungangi nyulu wanka yurrngumba nangandu Kudnyina. Nyulu jungkuka wanka nangandu Kudnyina yurrngumba, baki nyulu ngajakangka Kud yajinyi ngambalangi barri. Barriwa.   
\p
\v 26 Ngambala jingkijbangka Jisus Krayis, nyulu walkurra mambuka jurjkanyi ngambalangi. Nyulu lalanbaka ngambalanya. Nyulu ngajakangka Kud ngambalangi, nyulu manjamanjambiji ngambalangi balki yaji Kudwanyi. Baki jangambala baku jungku mili wanka nangandu, nyulungangi walkurra mambuka jurjkanyi ngambalangi. Nyulu kudukudu nangangi Kudkanyi. Jali nyulu jungku wayka jambana, baki miku nyuliyanyi yabimba balki yaji. Miku yingamali balki yaji nyuliyanyi yabimba. Nanankardi barri nyulu kudukudu nangangi Kudkanyi, baki nyulu jungkuka nangandu Kudnyina yurrngumba barri.  
\v 27 Nanamuku walkurramuku mambukamuku yalunginkanyi jurjkanyi Jumukuyngka, yali nganinyimuku barrinani ngambala. Baki yali yabimba balki yaji barrinani ngambala yabimbaka balki yaji. Nanankardi barri nanda walkurra mambuka yalunginkanyi jurjkanyi, waluku nyuli wajba Kud barnyinyi nanganginkanyi balkinyi yajinyi, baki bayngkani nyuli wajba Kud barnyinyi yalunginkanyi balkinyi yajinyi, nanganginmukuyngka mungkijimukuyngka. Nani barri nyulili yabimba yaji yingkana kambana baki yingkana kambana. Yurrngumba barri nyulili waluku wajba Kud barnyinyi nanganginkanyi balkinyi yajinyi, baki bayngkani barri nyulili wajba Kud barnyinyi yalunginkanyi balkinyi yajinyi. Nyulili wajba Kud barnyinyi. Nyulili kurdanba nanda yaji, bakili nyulu dikarrijba nanda yaji nangangi Kudkanyi. Ngala mikukiyanyi yabimba balki yaji Jisus Krayiswanyi. Miku nyuliyanyi wajba Kud yajinyi nanganginkanyi balkinyi yajinyi, ngala nyuli wajba Kud yajinyi ngamanginkanyi balkinyi yajinyi. Ngala miku nyuliyanyi wajba Kud barnyinyi, ngala wajbayi Kud nanganginkanyi mankankanyi. Nyulu barrinani nanda barnyi jalili yalu wajba Kud. Nanamukunyi yingkamukunyi mambukamukunyi jurjkanyi, yalili wajba Kud barnyinyi balkinyi yajinyi, yingkana kambana baki yingkana kambana yurrngumba barri. Ngala wajbayi Kud nanganginkanyi mankankanyi Jisus Krayiswanyi, ngawamba barndaykamba. Janyba nangki Jisus Krayis barndaykamba bukambijuyngka yalunginkanyi balkinyi yajinyi wandijiyana. Janyba nangki yalungi, nanamukuyngka jalili yalu jungku wanka wabula barri, baki nanamukuyngka jala yalu jungku wanka nanijba barri, baki nanamukuyngka jalija yalu jungku wanka baku barri. Miku nangkiyi mili janyba Jisus Krayis yalunginkanyi balkinyi yajinyi. Ngawamba barndaykamba.  
\v 28 Nanda yuwa nangangi Musiskanyi yanybayi yarriykanyi yalunya mambukamuku jurjkanyi, baki yabimba yali nanda yaji. Yarrijba yalili nganinyimuku, mambukamuku yalunginkanyi jurjkanyi Jumukuyngka. Ngala nanijba barri nyulu yarrijbayi nangangi jandanyi walkurra mambuka jurjkanyi Kudwanyi. Yanybayi Kud ngiruka jangkurr, miku nangkiyi yangkalamba. Yanybayi Kud, janyulu yarrijba nangangi jandanyi, walkurra mambuka jurjkanyi. Baki yarrijba nyuli nangangi jandanyi walkurra mambuka jurjkanyi. Yalili yarrijba nganinyimuku, walkurra mambuka jurjkanyi ngala miku yaliyi jungku kunyba nangangi Kudkanyi yurrngumba barri. Kudiyana yalili barimba yaji nangangi Kudkanyi nanamukunyi mambukamukunyi jurjkanyi. Ngala miku nyuliyanyi barimba yaji nangangi Kudkanyi Jisus Krayiswanyi. Jungku nyuli kunyba nangangi Kudkanyi yurrngumba barri. Nyulu kunybamirra walkurra mambuka jurjkanyi ngambalangi yurrngumba barri. Barriwa.   
\c 8  
\p
\v 1-2 Nurru karungka narrinya nanginkanyi duja jangkurranyi. Jisus Krayis, nyulu nanda walkurra mambuka jurjkanyi ngambalangi. Nyulu jungkuka kingkarri nangandu Kudnyina, ngamanginyina Buwakayu. Nyulu wirimalaru bayngkani nangandu Kudnyina. Nyulu jungkuka kingkarri nananyina malabana yajina lalijina. Nyulu walkurra mambuka jurjkanyi, ngala miku nyulimi jungku jurjina, nayiba wayka jambana. Miku nyulimi waki nangangi Kudkanyi nayiba jurjina, jali yabimba nganinyiwanyi. Ngala nyulu jungkuka kingkarri nangandu Kudnyina. Nyulu wakingka nangangi Kudkanyi nananyina malabana yajina kingkarri jali yabimba Kudwanyi.  
\v 3 Nanda walkurra mambuka yalunginkanyi jurjkanyi Jumukuyngka, nyulu jungkuka nayiba wayka jambana. Yarrijba yali nanda nganinyi walkurra mambuka jurjkanyi, nyulu waykanyi Kud barnyinyi, nyulu dikarriykanyi nanda barnyi nangangi Kudkanyi. Baki nani barri marda ngambalangi walkurra mambuka jurjkanyi Jisus Krayis. Nyulu wajbayi Kud yajinyi. Wajba nyuli Kud nanganginkanyi mankankanyi, jali nangka janyba kurndana ngambalangi.  
\v 4 Jalimi yuwajiwa jungku Jisus Krayis wayka jambana, baki miku nyuliyi walkurra mambuka jurjkanyi ngambalangi. Miku nyuliyi waki nangangi Kudkanyi jurjina barrinani yalu mambukamuku jurjkanyi, barrinani yalu waki nangangi Kudkanyi jurjina. Miku nyuliyi wajba Kud barnyinyi yalunginkanyi. Miku nyuliyi dikarrijba yalungi barnyi nangangi Kudkanyi. Miku nyuliyi yabimba nanda yaji ngambalangi barri, jalimi yuwajiwa nyulu jungku wayka jambana. Yalili yabimba nanda yaji yingkamukunyi mambukamukunyi jurjkanyi. Yalili yabimba nanda yaji jala yanybaka yuwa Musiskanyi, yalu yabimbikanyi yaji jurjina mambukamukunyi jurjkanyi. Nanankardi barri, jalimi yuwajiwa jungku Jisus Krayis wayka jambana, baki miku nyuliyi walkurra mambuka jurjkanyi ngambalangi.  
\v 5 Wankalana barri yanybayi Kud nangangi Musiskanyi, jali jungku Musis juju barri kingkarri kulawirana. Karu nyuli Musis, janyulu baku yabimba jurj Musiswanyi. Janyulu yabimba jurj, barrinani wardara. Ngala jayalu dabulimba, jayalu kijijba nanda yaji, baki jayalu kuyu yingkayurri yajiyurri. Jayalu nanaba yarrijba nanda jurj yalungi. Nani barri janyulu yabimba jurj nangangi Kudkanyi Musiswanyi. Baki baku barri mili yanybayi Kud nangangi Musiskanyi nayi barri, “Nanijba barri janinji yabimba nanda jurj jali ninga karu wabula, ngala ninji kulawirana. Jalija ninji yabimba nanda jurj, baki janinji yabimba bukamba nanda yaji jali ninya karu yabimbikanyi. Mikujiyi yabimba yingka yaji, ngawamba nanda jali ninga karu.” Barriwa. Baki yabimbayi nanda jurj nani barri Musiswanyi. Yabimba nyuli nanda barrawu, ngala jungkuyi barrawu barrinani nanda ngarndu. Nanda jurj barrinani nanda ngarndu nanankanyi dujanyi yajinyi nangangi Kudkanyi kingkarri lalijina. Nanda jurj barrinani kudukudu yaji nangangi Kudkanyi. Ngala nanda dujanya kudukudu yaji nangangi Kudkanyi kingkarri lalijina, jala jungkuka Kud nanaba yajina. Nanaba barri dujanya nanda kudukudu yaji nangangi Kudkanyi. Baki nanamuku mambukamuku jurjkanyi, yalu wakingka nangangi Kudkanyi nayiba wayka jambana, ngala nanda dujanya walkurra mambuka jurjkanyi, nyulu jungkuka kingkarri lalijina. Nyulu wakingka Jisus Krayis nanaba kudukuduna yajina nangangi Kudkanyi. Ngawamba nyulu nanda dujanya walkurra mambuka jurjkanyi.   
\p
\v 6-7 Wankalana barri yanybayi Kud nangangi Musiskanyi. Yanyba nyuli jangkurr, miku nangkiyi yangkalamba. Nayi nyuli yanyba, “Jangayu ngayu narringi Kud, baki janarri narri ngakinmirra.” Nani barri yanybayi Kud. Baki baku barri nyuli wajba Musis yuwanyi. Nanda yuwa yanybayi yarriykanyi mambukamuku yalunginkanyi jurjkanyi Jumukuyngka. Nanamuku mambukamuku jurjkanyi, jayalu waki nangangi Kudkanyi jurjina. Nani barri nanda yuwa yanybayi. Ngala mikuwali yalunya nanangini yuwawanyi marrimba mardarda. Mikuwali. Ngala baku barri juju, yanybayi Kud yingka jangkurr, miku nangkiyi yangkalamba. Yanybayi Kud, janyulu manjijba nangangi jandanyi, baki janyulu marrimba yalunya mardarda, nanganginmuku nganinyimuku jandanyiwanyi. Nanda bayngkani jangkurr nangangi Kudkanyi, miku nangkiyi yangkalamba, nanda mili walkurra nanankanyi waluwiyngkanyi jangkurranyi nanganginkanyi Kudkanyi, miku nangkiyi yangkalamba. Nanda bayngkani jangkurr mili walkurra nanankanyi waluwiyngkanyi jangkurranyi. Jisus Krayis, nyulu walkurra mambuka jurjkanyi ngambalangi, baki nanijba barri nyulu jungkuka kingkarri nangandu Kudnyina, baki nyulu wakingka nangangi Kudkanyi. Nyulu yanybaka mududu nangangi Kudkanyi ngambalangi. Nyulu ngajakangka Kud, nyulu manjamanjambiji ngambalangi balki yaji. Nani barri nyulu wakingka nangangi Kudkanyi. Baki nanda yaji jala nyulu yabimbaka ngambalangi, nanda mili walkurra nanankanyi yajinyi jali yalu yabimba nanamukunyi wankalamukunyi mambukamukunyi jurjkanyi. Nanda jala nyulu yabimbaka mili walkurra nanankanyi yajinyi jali yalu yabimba mambukamukunyi jurjkanyi. Baki nanda bayngkani jangkurr jali yanyba Kud miku nangkiyi yangkalamba, nanda mili walkurra nanankanyi waluwiyngkanyi jangkurranyi, yanybakangangi nanda bayngkani jangkurr nanankanyi ngirukanyi yajinyi, jalija yabimba Kudwanyi ngambalangi.   
\p
\v 8-9 Nanangini jangkurrwanyi najana Kudkanyi karungka ngambalanya nangangi Kudkanyi. Karungka ngambalanya nanankanyi jangkurranyi, jali yanyba Kud yalungi Jumukuyngka. Nayi nyuli yanyba yalungi, “Wabula wankalana ngayu dulabayi yalunya Jumuku nanamunanyi yajinanyi Yijibnanyi. Ngayu dulabayi yalunya nanamunanyi yajinanyi bayangarri, baki ngayu marrimbayi yalunya mardarda yalunbunanyi mungkijimukunanyi nanankanyi yajinyi. Ngayu karuyi yalunya, jangayu lalanba yalunya, jaliyi yalu kuyu ngaki jangkurr. Ngala miku yaliyanyi kuyu ngaki jangkurr. Miku yaliyanyi ngayangayijba ngakinkanyi jangkurranyi. Baki nanankardi barri miku ngayiyi marrimba yalunya mardarda, ngala ngayi yingijba yalunya yurrngumba barri. Ngala marndakaja barri jangayu yarrijba yinini jangkurr miku ngakiyi yangkalamba. Jangayu yarrijba yinini jangkurr yalungi nanamukuyngka Jumukuyngka, jalili yalu jungku nananyina yaji niji Yisrayil baki Juda.  
\v 10 Nayinda barri nanda yinini jangkurr jalija ngayu yarrijba bakunyi. Baku barri jangayu yarrijba ngaki yuwa yalundu kulajina. Jayalu manku ngaki jangkurr, baki jayalu marrimba nanda jangkurr yalunginyina kurduluna, baki jayalu durrijba nanda ngaki jangkurr. Jangayu ngayu yalungi Kud, baki jayalu yalu ngakinmirra. Jayalu durrijba ngaki jangkurr yurrngumba barri.  
\v 11 Nanamanji barri mikuwali yingka yanyba yingkanyi, marda nyulimi jingkijba Kud. Mikuwali yingka yanyba yingkanyi nani barri, janganangangi yalu jingkijba bukambijunyi. Jangana yalu jingkijba bukambijunyi walkurramukunyi baki bayakardamukunyi. Jangayu ngayu yalungi Kud bukambijuyngka.  
\v 12 Miku ngayiyi ngirrwa yalungi yalunginkanyi balkinyi yajinyi, ngala jangayu manjamanjamba nanda balki yaji jali yalu yabimba. Miku ngayiyi mili mankuwa nanda yalungi balki yaji.” Barriwa.  
\v 13 Nani barri yanybayi Kud, janyulu yarrijba buyingkinyi jangkurr, miku nangkiyi yangkalamba nanamunanyi. Baki nyulu karuyi ngambalanya nanankanyi buyingkiyngkanyi jangkurranyi Jisus Krayiswanyi. Nanda buyingkinyi jangkurr yanybaka nangangi Kudkanyi, janyulu marrimba ngambalanya mardarda, jaliyi ngambala kuyu nangangi jangkurr Kudkanyi. Yarrijbayi Kudwanyi nanda buyingkinyi jangkurr, miku nangki yangkalamba, bukambayingangi nanda waluwinyi jangkurr nangangi, miku nangkiyi yangkalamba. Marda yalimi miku durrijba nanda waluwinyi jangkurr, ngala marda yalimi durrijba nanda buyingkinyi jangkurr nangangi Kudkanyi, miku nangkiyi yangkalamba. Barriwa.   
\c 9  
\p
\v 1 Nanda waluwinyi jangkurr nangangi Kudkanyi, miku nangkiyi yangkalamba, nanda jangkurr yanybayi nanankanyi wankalanyi walkurrayngka jurjkanyi yalungi Jumukuyngka. Karuyi yalunya Jumuku jangkurranyi Kudwanyi. Nanda jangkurr yanybayi, yalu yabimbikanyi yaji nangangi Kudkanyi, yalu yabimbikanyi walkurra jurj barrinani nanda wardara. Nanda jangkurr yanybayi nanankanyi yuwanyi jurjkanyi, nanankanyi yajinyi jala marda yalimi yabimba nanaba jurjina.  
\v 2-3 Baki yabimba yali nanda yaji nangangi Kudkanyi. Yabimba yali nanda jurj barrinani wardara, ngala langandaba yali yaji barrinani blanki lukuluku barri langkiya, bayinga, karriya, baki kulaya. Marda yingka blanki yalu langandabayi burrandi, yabimbikanyi kujarra yaji kalawuyngkurru, yingka karriya, baki yingka bayinga. Nani barri yalu yabimbayi nanda jurj nangangi Kudkanyi. Yalili nijarrijba nanda yaji karriya kalawuyngkurru “Malaba Yaji Nangangi Kudkanyi.” Nani barri yalili nijarrijba nanda yaji karriya. Marda yalili yarrijba yaji kalawuyngkurru nanaba yajina karriya. Yarrijba yalili mirnbi nanaba. Karrinjarrijba yalili nanda mirnbi yundu malankarrina yajina. Barriwa. Baki yarrijba yalili darladarla nanaba yajina kalawuyngkurru yarriykanyi damba yundu darladarlana. Yalili wajba Kud nanankanyi dambanyi, bakili yalu yarrijba yundu nananyina darladarlana. Barriwa.  
\p Ngala nanda yaji kalawuyngkurru bayinga barri, yalili nijarrijba nanda yaji “Kudanyu Malaba Yaji Nangangi Kudkanyi.” Nani barri yalili nijarrijba nanda yaji bayinga barri.  
\v 4 Marda yarrijba yalili yaji kalawuyngkurru nanaba yajina bayinga. Yarrijba yalili nanda yaji niji yalda nanaba kalawuyngkurru. Nayi barri yali yabimba nanda yalda. Wudumba yali kurnda, baki yabimba yali yaji barrinani darladarla. Makaba yali nanda kurnda dankurrdankurryudinyi malankarriyudinyi. Nani barri yali yabimba nanda yalda, baki yali yarrijba kalawuyngkurru bayinga yajina. Yalili yarrijba yukururu yundu nanaba darladarlana, bakili yalu bakarrijba yaji barrinani jirrki kalawuyngkurru nananyina yukururuna. Jalili yajba nanda jirrki, bakili banjawa kunyba kurdu. Barriwa barri. Baki yali yarrijba darladarla marda nanaba bayinga yajina. Nanda malaba darladarla nangangi Kudkanyi. Yalili nijarrijba nanda darladarla, “Darladarla Yarriykanyi Jangkurr Nangangi Kudkanyi, Miku Nangkiyi Yangkalamba.” Baki makaba yali nanda darladarla danbina dankurrdankurryudinyi malankarriyudinyi marda.  
\p Marda murrku yaji nananyina malabana darladarlana. Kujarra dungala nanaba kalawuyngkurru barri. Wajbayi Musis yuwanyi Kudwanyi. Wajba nyuli Musis jirriyngkanyi yuwanyi 10kanyi, yalu ngayangayiykanyi nanankanyi yuwanyi. Yarrijbayi nanda 10 yuwa dungalana Kudwanyi. Kurrijba nyuli nanda dungala, baki yarrijba nyuli nanda jangkurr kujarranyina dungalana. Kilimbayi nanankujarra dungalawuya Musiswanyi. Yarrijba nyuli nanaba malabana darladarlana. Barriwa.  
\p Marda yingka yaji nanaba kalawuyngkurru darladarlana, ridiridi barri. Nanda nangangi ridiridi Yarunkanyi, ngala nanda ridiridi nyulu wujurryudi. Nyulu yabimbayi nanda ridiridi jardiykanyi wujurr Kudwanyi. Nani barri nyuli milidimba yalunya Jumuku yajinyi Kudwanyi. Nani barri nyuli minimba yalunya nangangi Yarunkanyi, nyuli yarrijba Yarun walkurra mambuka jurjkanyi yalungi Kudwanyi. Nanda barri ridiridi nanaba kalawuyngkurru darladarlana. Barriwa.  
\p Marda yingka yaji nanaba barri, lingkanyma jirdi mamanyi kalawuyngkurru. Jalili yalu jilalajba lukuluku mangkurruna yajina Jumuku, bakili wawajba yalunya mamanyi Kudwanyi. Nyulili wawajba yalunya mamanyi, niji mana. Kudiyanymuku nanamannga mama nananyina lingkanymana jala kalawuyngkurru darladarlana. Nani barri nanda murrku yaji kalawuyngkurru nananyina malabana darladarlana nangangi Kudkanyi. Barriwa.   
\p
\v 5 Marda yundu nananyina darladarlana yingka barri yaji. Yabimba yali kujarra yaji barrinani Yanjilwuya, bulangi jalu, jabula baba. Yingka jungkuyi langkiya wilina baki yingka kulaya wilina. Marda marrimba bulangki jalu, yingka karriya baki yingka bayinga. Nani barri yali yabimba kujarra yaji barrinani Yanjilwuya, jali bula jungku nanaba yundu darladarlana yurrngumba barri. Barriwa.  
\p Baki nanamukunyi Jumukunyi jayalu mankumankuwa Kud, baki jayalu mankumankuwa nanda yaji yundu darladarlana, nanda kudanyu malaba yaji nangangi Kudkanyi. Jayalu mankumankuwa Kud, nyulu jungkuka yalundu yurrngumba barri. Baki nanangini walkurrawanyi mambukawanyi jurjkanyi, janyulu bunyanyarrijba ngulya yundu nanaba malabana darladarlana. Nayi barri yalili yabimba yaji. Yalili kurdanba barnyi nangangi Kudkanyi, bakili nyulu kuyu nanda ngulya kalawuyngkurru jurjina, mambukawanyi jurjkanyi. Bakili nyulu bunyanyarrijba nanda ngulya yundu darladarlana. Jalili nyulu yabimba nanda yaji nani barri, baki mikuwali Kudwanyi mili mankuwa nanda balki yaji, jalili yalu yabimba Jumukunyi. Miku nyulili mili mankuwa nanda balki yaji yalungi. Barriwa. Ngala mili yaji nanaba nananyina jurjina Jumukuyngka, ngala miku ngayiyi karu narrinya mili nanankanyi yajinyi nanijba barri. Miku.   
\p
\v 6 Nanamuku mambukamuku jurjkanyi nayinda barri yalungi yaji. Yalili ngankijba nanaba karriya yajina jurjina yurrngumba barri, wakinki nangangi Kudkanyi nanaba. Yingkana kambana baki yingkana kambana, yurrngumba yalili ngankijba nanaba yajina karriya, nananyina malabana yajina nangangi Kudkanyi. Ngala miku yaliyanyi ngankijba nanaba yajina bayinga barri. Miku yaliyanyi ngankijba nanaba kudanyu malabana yajina bayinga barri. Miku.  
\v 7 Ngala ngawamba nanda walkurra mambuka jurjkanyi, ngawamba nyuli ngankijba nanaba yajina bayinga nananyina kudanyu malabana yajina. Ngala miku nyuliyanyi ngankijba yurrngumba yingkana kambana baki yingkana kambana. Ngawamba nyuli ngankijba barndaykamba, ngala nangki bukamba janja. Ngala buyingka barri mikukiyanyi ngankijba. Ngala baku barri ngala nangki bukamba janja, baki mili nyuli ngankijba barndaykamba barri. Nani barri nyulili ngankijba nanda walkurra mambuka jurjkanyi bayinga yajina, ngawamba barndaykamba ngala nangki bukamba janja, baki mili barndaykamba ngala nangkaja bukamba janja baku barri. Nani barri nyulili yabimba yaji. Barriwa.  
\p Jalili nyulu ngankijba, bakili nyulu kuyu ngulya nangandu. Kurdanba nyulili barnyi nangangi Kudkanyi. Karlba nyulili duka. Wudumba nyulili ngulya yukururuyudinyi, bakili nyulu kuyu nanda ngulya nangandu jalili nyulu ngankijba nanaba kudanyu malabana yajina bayinga barri. Bunyanyarrijba nyulili nanda ngulya yundu nananyina malabana darladarlana nanaba. Nani barri nyulili yabimba yaji, baki nanankardi barri miku nyuliyanyi mili mankuwa nangangi balki yaji Kudwanyi. Miku nyuliyanyi mili mankuwa nanda balki yaji jali yalu yabimba Jumukunyi. Barriwa.   
\p
\v 8 Milidimba ngambalanya yajinyi Kunybawanyi Ngarnduwanyi Kudkanyi. Nyulu milidimbaka ngambalanya nanankanyi waluwiyngkanyi yuwanyi, yalu yabimbikanyi yaji yalunginyina jurjina. Ngawamba nanda walkurra mambuka jurjkanyi, ngawamba nyuli ngankijba nanaba kudanyu malabana yajina bayinga barri. Miku yalili ngankijba yingkamuku. Miku. Baki nanda barrinani miku yaliyi jilajba nangandurri Kudyurri. Miku. Jalimi yuwajiwa nanda waluwinyi yuwa jungku nanijba barri, jalimi marda ngambalimi marda durrijba nanda waluwinyi yuwa, baki miku ngambalimi jilajba nangandurri Kudyurri. Ngala miku ngambalimi durrijba nanda waluwinyi yuwa. Bukamba nanda yuwa ngambalangi barri.  
\v 9 Nani barri milidimbaka ngambalanya Kunybawanyi Ngarnduwanyi Kudkanyi nanankanyi yajinyi jalili yalu yabimba yalunginyina jurjina. Baki ngambala jingkijbangka marda, jalili yalu wajba Kud barnyinyi, jalili nanangini walkurrawanyi mambukawanyi jurjkanyi, nyulu bunyanyarrijba nanda ngulya darladarlana nangangi Kudkanyi, baki yuwajiwa jingkijbayi yalunya Kudwanyi. Nyulu jingkijbayi yalunya, miku yaliyi jungku yurlurrmba nangangi Kudkanyi. Mikuwali nanangini barnyiwanyi, baki mikuwali nanangini ngulyawanyi yabimba yalunya, yalu jungunkanyi yurlurrmba nangangi Kudkanyi. Miku. Barriwa.   
\p
\v 10 Wajbayi Musis yuwanyi Kudwanyi. Nanda yuwa yanybaka, nangka wakardaykanyi mankanyi. Marda yanybaka, miku yaliyi jarrba yingka barnyi, ngala yuku yalu jarrba yingka barnyi. Jaliyi yalu jungku kunyba nananyina yuwana, baki jayalu likalika mankanyi, jayalu jungku ngiruka mankanyi. Ngala yuwajiwa jayalu balki kurdulu nangangi Kudkanyi. Waluka barri wajbayi yalunya nanankanyi yuwanyi Kudwanyi. Jayalu ngayangayijba nanankanyi yuwanyi ngawamba nanankurri jalija wajba yalunya buyingkiyngkanyi yuwanyi Kudwanyi. Manjijbayi Jisus Krayis Kudwanyi, baki nyuli wajba ngambalanya nanankanyi buyingkiyngkanyi yuwanyi Jisus Krayiswanyi.   
\p
\v 11 Badajbayi Jisus Krayis wayka jambarri. Nyuli wajba ngambalanya nanankanyi buyingkiyngkanyi yuwanyi. Baku barri nyuli kirrijba kingkarri, baki nanijba barri nyulu jungkuka kingkarri nangandu Kudnyina. Nyulu walkurra mambuka jurjkanyi ngambalangi nanijba barri. Nyulu wakingka nangangi Kudkanyi. Ngala miku nyulimi jungku nayiba wayka jambana. Miku nyulimi waki jurjina, jali yalu yabimba nganinyimukunyi. Miku. Ngala nyulu wakingka kingkarri lalijina nangandu Kudnyina. Nyulu mili jirrinyi walkurra mambuka yalungi mambukamukuyngka jurjkanyi, jala yalu jungku wayka jambana. Nyuli mili jirrinyi yalungi barri. Nyulu yabimbaka mili ngiruka yaji yalungi barri.   
\p
\v 12 Janyba nangki Jisus Krayis kurndana ngambalangi. Ngarrkadaba yali mankanyi wilina. Baki jurrwayi ngulya nanganbunanyi mawarlnanyi wilina ngala nyuli langa kingkarri kurndana. Baku barri jali nyulu mili wankijba, baki kirrijba nyuli kingkarri nangandurri Kudyurri. Nanda barrinani nyuli ngankijba kalawuyngkurru nanaba walkurranyina jurjina, barrinani nyuli ngankijba kalawuyngkurru nanaba kudanyu malabana yajina bayinga barri. Ngala miku nyuliyanyi kuyu ngulya barnyinyi nangandu. Miku nyuliyanyi bunyanyarrijba ngulya barnyinyi yundu nananyina malabana darladarlana. Miku. Ngala jurrwayi nanganginmirra ngulya, baki nanda barrinani bunyanyarrijba nangangi ngulya nananyina darladarlana Jisus Krayiswanyi. Baki nanankardi barri ngambala jala kuyu nangangi jangkurr, jangambala jungku mili wanka nangandu barri. Janyulu marrimba ngambalanya mardarda yurrngumba barri.   
\p
\v 13 Nanda wankalanyi yuwa jali wajba Musis Kudwanyi, nanda yuwa yanybayi nayi barri. Jali yalu yabimba balki yaji nangangi Kudkanyi, jali yalu jungku balki nangangi, jali yalu miku ngayangayijba nanganginkanyi yuwanyi, baki marda yalimi yabimba nayinda yaji nangangi Kudkanyi. Marda yalimi kuyu yaji walkurrayngkurri jurjyurri. Marda yalimi kuyu yiningki buluki, yiningki yukularri. Jayalu wajba nanda mambuka jurjkanyi nanankanyi yajinyi, baki nanangini mambukawanyi jurjkanyi, janyulu karlba nangangi duka. Janyulu wudumba ngulya, baki janyulu bunyanyarrijba nanda ngulya yundu yalundu barri, jali yalu kuyu yaji nangandurri. Barriwa. Baki nanangini mambukawanyi jurjkanyi janyulu wudumba bulungu buluki, baki janyulu dikarrijba nanda barnyi janguna. Baku barri janyulu wudumba julurr nanankanyi barnyinyi. Janyulu wudumba, baki janyulu bunyanyarrijba nanda julurr yalundu barri, jala yalu yabimba balki yaji nangangi Kudkanyi. Nani barri nanda yuwa yanybayi, yalu yabimbikanyi yaji, baki jayalu jungku barrinani likalika nangangi Kudkanyi.   
\p
\v 14 Ngala yabimbayi mili jirrinyi yaji ngambalangi Jisus Krayiswanyi. Nyuli yabimba mili jirrinyi yaji ngambalangi. Jungku nyuli kunyba nangangi Kudkanyi yurrngumba barri. Miku nyuliyanyi yabimba balki yaji. Miku yingamali balki yaji nyuli yabimba. Ngala wajba nangki Jisus Krayis nangandurri Kudyurri. Janyba nangki ngamanginkanyi balkinyi yajinyi. Nani barri nyulu likalikambaka ngambalanya kurdulu jala ngambala kuyu nangangi jangkurr. Nanamuku buluki baki yukularri jalili yalu kurdanba nangangi Kudkanyi, miku yalungkiyanyi wajba nangandurri Kudyurri. Ngala nangka wajbayi Jisus Krayis nangandurri. Nanda barrinani wajbayi Kud nanganginkanyi mankankanyi nanganginyi ngarnduwanyi Jisus Krayiskanyi. Wajbayi Kud nanganginkanyi mankankanyi nanganginyi ngarnduwanyi bukambijuyngka ngamanginkanyi balkinyi yajinyi. Miku nangkiyanyi janyba nangangi ngarndu, jungkuyi wanka yurrngumba barri. Nanankardi barri jali nangka janyba Jisus Krayis kurndana, baki nangki janyba bukambijuyngka yalungi. Janyba nangki bukambijuyngka yalunginkanyi balkinyi yajinyi. Nanankardi barri ngambala mirnarrijba muwa nangangi Jisus Krayiskanyi, ngamanginkanyi walkurrayngka mambukanyi jurjkanyi. Ngambala mirnarrijba muwa nangangi, jingkijbangangi ngambala Kud, janyulu manjamanjamba ngambalangi balki yaji. Miku ngambalimi durrijba nanda wankalanyi yuwa wakardaykanyi ngambalaka, marda waykanyi Kud barnyinyi. Miku ngambalimi durrijba nanda wankalanyi yuwa, jingkijbangangi ngambala Jisus Krayis, nangki janyba ngambalanginkanyi balkinyi yajinyi. Barriwa.   
\p
\v 15 Yanybayi Kud buyingkinyi jangkurr, miku nangkiyi yangkalamba barri. Yanyba nyuli nanda buyingkinyi jangkurr, janyulu marrimba ngambalanya mardarda Kudwanyi. Janyulu marrimba ngambalanya mardarda yurrngumba barri, janybangangi nangki Jisus Krayis ngamanginkanyi balkinyi yajinyi. Yanybayi Kud nanda buyingkinyi jangkurr ngambalangi, baki yalungi marda, nanamukuyngka jalili yalu jungku juju wabula. Yali jungku wanka waluwa nanankanyi buyingkiyngkanyi jangkurranyi Kudkanyi. Baki kujanya yalungi nanda nangangi waluwinyi jangkurr. Ngala yanybayi Kud nayinda buyingkinyi jangkurr yalungi marda. Yalunya marda marrimbaja mardarda. Baki nayinda buyingkinyi jangkurr duja ngambalangi nanijba marda, janybangangi nangki Jisus Krayis ngambalangi marda. Barriwa.   
\p
\v 16-17 Manku narri nayinda jangkurr. Yarrijbayi jangkurr najana malbuwanyi. Nanda jangkurr yanybayi, jalija nangka janyba nanda malbu, baki yingkawanyi jali nangangi niji nananyina najana, janyulu nyulu wudumba nanda yaji malbunyi. Baki jali nangka janyba nanda malbu, baki nanganginyi mungkijimukunyi yali wajba nanda yingka nanganginkanyi yajinyi barrinani yanybayi jangkurr. Ngala miku yaliyanyi wajba yajinyi, jali yuwajiwa wanka nanda malbu. Yanybayi nanda jangkurr najana, janyulu wudumba nanda yaji, ngawamba jali nangka janyba nanda malbu. Barriwa.  
\v 18-19 Baki nani barri marda, nanda waluwinyi yuwa nangangi Kudkanyi miku nangkiyi yangkalamba. Wajbayi Musis nanankanyi waluwiyngkanyi yuwanyi Kudwanyi. Nanangini yuwawanyi karuyi yalunya yanka marda yalimi jungku yurlurrmba nangangi Kudkanyi. Wajbayi Musis nanankanyi waluwiyngkanyi yuwanyi Kudwanyi, baki karuyi bukambiju Jumuku nanankanyi yuwanyi Musiswanyi. Nyuli karu yalunya nanankanyi yuwanyi, ngala yali karrinja walu nangandu. Yali manku nanda yuwa, baki yali yanyba, jayalu durrijba nanda yuwa nangangi Kudkanyi, jayalu ngayangayijba nanankanyi yuwanyi, jayalu jungku kunyba nanankanyi yuwanyi. Nani barri yali yanyba bukambiju Jumuku, jayalu kuyu nanda waluwinyi yuwa nangangi Kudkanyi. Yarrijbayi bukamba nanda yuwa najana Musiswanyi, baki jirrinyba nyuli kudiyanymuku yalu kurdanbikanyi buluki marda yukularri, yalu karlkanyi duka. Wudumbayi nanda ngulya Musiswanyi. Bunyarrijba nyuli wabuda ngulyana, baki jidimba nyuli. Wudumba nyuli wanjirr, baki kijijba nyuli nanda wanjirr nganmarranjudinyi nyungkayudinyi jibkanyi. Yawumba nyuli wanjirr ngulyana baki bunyanyarrijba nyuli ngulya nananyina najana jangkurryudinyina. Baki bunyanyarrijba nyuli ngulya yalundu marda, bukambijunyina Jumukunyina.  
\v 20 Baki yanybayi Musis yalungi, “Najba narri nayinda ngulya. Karuyi ngana Kudwanyi, ngayu bunyanyarriykanyi nayinda ngulya narrindu nani barri. Baki nani barri jingkijbangka narrinya Kudwanyi. Nyulu jingkijba narrinya, narri kuyungka nayinda nangangi jangkurr, miku nangkiyi yangkalamba. Narri kuyungka nayinda jangkurr, jala jirrinyba narrinya ngayangayiykanyi Kudkanyi.” Barriwa.   
\p
\v 21 Jabarri bunyanyarrijbayi ngulya yingkana yajina marda Musiswanyi. Bunyanyarrijba nyuli ngulya nananyina jurjina barrinani wardara. Baki bukambijunyina yajina kalawuyngkurru jurjina nyuli bunyanyarrijba ngulya nananyina yajina marda.  
\v 22 Nanda yuwa nangangi Kudkanyi yanybaka yalungi mambukamukuyngka jurjkanyi. Nanda yuwa yanybaka yalungi, marda yalimi bunyanyarrijba ngulya yalundu Jumukunyina baki nananyina jurjina, baki yajina kalawuyngkurru. Marda yalimi bunyanyarrijba ngulya yalundu, baki jayalu barrinani likalika nangangi Kudkanyi. Nani barri marda yalimi yabimba yaji, minimbiji yalungka yalu ngayangayijbangka nanganginkanyi yuwanyi Jumuku. Baki jali yingka jungku balki nangangi Kudkanyi, baki mamanumbayi nangangi balki yaji Kudwanyi, ngawamba jali nyulu kuyu barnyi nangandurri Kudyurri. Karlbayi duka yingkawanyi, kurdanbayi, baki jurrwayi ngulya. Mamanumbayi nangangi balki yaji Kudwanyi, ngawamba jali nyulu yabimba yaji nani barri. Barriwa.   
\p
\v 23-26 Nani barri yalili bunyanyarrijba nanda ngulya nanganginyina yajina Kudkanyi, baki nani barri yalili jungku barrinani likalika nangangi Kudkanyi. Nanda walkurra jurj, baki nanda yaji kalawuyngkurru, nanda malaba yaji nangangi Kudkanyi, ngala nanda dujanya malaba yaji nangangi Kudkanyi, nanda dujanya malaba yaji nangangi kingkarri barri nangandu lalijina. Ngala janyba nangki Jisus Krayis ngambalangi. Janyba nangki ngamanginkanyi balkinyi yajinyi. Baki nanankardi barri jaliyi ngambala kuyu nangangi jangkurr, baki janyulu likalikamba ngambalanya kurdulu Kudwanyi. Jangambala jungku likalika kurdulu nangangi, baki jangambala jungku kingkarri nangandu yurrngumba barri. Barriwa.  
\p Nanda walkurra mambuka yalunginkanyi jurjkanyi Jumukuyngka, nyulili ngankijba kalawuyngkurru nanaba kudanyu malabana yajina jurjkanyi. Ngala miku nyuliyanyi ngankijba kudanyu malabana yajina jurjkanyi yurrngumba barri. Ngawamba barndaykamba ngala nangki bukamba janja, baki mili barndaykamba juju baku barri ngala nangki bukamba janja. Mikukiyanyi munyajba mambuka ngankiykurri yurrngumba Kudwanyi. Jalili ngankijba nanda walkurra mambuka jurjkanyi, bakili nyulu kuyu ngulya bulukinyi nangandu. Nyulili wajba Kud nanankanyi ngulyanyi, minimbiji Kud, nyulu nginduyi muwa nanganginkanyi balkinyi yajinyi, baki yalu Jumuku, yalu nginduyi muwa yalunginkanyi balkinyi yajinyi. Ngala Jisus Krayis barri, miku nyuliyanyi ngankijba nananyina kudanyu malabana yajina nayiba wayka jambana. Miku nyuliyanyi ngankijba kudanyu malabana yajina jali yabimba nganinyiwanyi. Nanda dujanya kudanyu malaba yaji kingkarri barri nangandu Kudnyina. Ngankijbayi Jisus Krayis nananyina dujanya kudanyu malabana yajina, jali nyulu kirrijba kingkarri nangandurri Kudyurri. Baki nyulu yanybaka nangangi Kudkanyi ngambalangi barri. Nyulu ngajakangka Kud, nyulu manjamanjambiji ngambalangi balki yaji. Barriwa.  
\p Jali ngankijba Jisus Krayis nanaba kingkarri, baki nanda barrinani wajba nangki mankanyi nangandurri Kudyurri. Ngala miku nangkiyanyi wajba mankanyi yurrngumba barri mili baki mili, baki mili. Ngawamba barndaykamba nangki wajba mankanyi nangandurri Kudyurri. Jalimi nangka wajba mankanyi nangandurri, mili baki mili baki mili, baki yalimi yabimba kiji nangangi yurrngumba, mili baki mili baki mili, yalimi linjumba mankanyi, yalimi kurdanba mankanyi mili baki mili baki mili. Ngala miku barri, miku. Ngawamba barndaykamba nangki wajba mankanyi nangandurri Kudyurri. Barndaykamba nangki wajba mankanyi nangandurri Kudyurri bukambijuyngka yalunginkanyi balkinyi yajinyi. Nanamukuyngka jali yalu jungku wankalana baki wabula barri, nanamukuyngka jala yalu jungku nanijba barri, baki nanamukuyngka jalija yalu jungku baku barri, barndaykamba nangki wajba mankanyi nangandurri Kudyurri yalunginkanyi balkinyi yajinyi. Barriwa.   
\p
\v 27 Bukambiju ngambala wandijiyana, jangambalaka janyba barndaykamba barri. Jangambalaka janyba, baki janyulu karrinjarrijba ngambalanya walu nangandu Kudwanyi. Baki janyulu yanyba nanankanyi yajinyi jali ngambala yabimba wabula barri. Baki janyulu yanyba manjiykanyi ngambalanya, kudiya kingkarri nangandurri, baki kudiya wayka jangurri. Yi. Jangambalaka janyba barndaykamba barri.  
\v 28 Baki nani barri nangki janyba Jisus Krayis barndaykamba barri. Wajba nangki mankanyi nangandurri Kudyurri ngamanginkanyi balkinyi yajinyi, bukambijuyngka barri. Yabimbaka ngambala kaja balki yaji, baki nanankardi barri marda ngambalakimi janyba. Ngala miku barri. Janyba nangki Jisus Krayis ngambalanyi barri. Ngala baku barri janyulu mili wijba Jisus Krayis wayka jambarri. Janyulu mili wijba, ngala miku yaliyi mili kurdanba. Miku. Ngala janyulu mili wijba, marrimbiji ngambalanya mardarda barri. Ngambalanya jala nanganginmirra bababanyamba nyulu, ngambalanya jala ngambala yukumbaka nangangi, janyulu marrimba ngambalanya mardarda, jalija nyulu wijba kingkarrinya. Barriwa.   
\c 10  
\p
\v 1 Nanangini yuwawanyi jali wajba Musis Kudwanyi, nanangini yuwawanyi minimbayi yalunya ngawamba bijalanyi yajinyi nanganginkanyi Kudkanyi. Mikukiyanyi minimba yalunya bukambijuyngka yajinyi, jalija yabimba Kudwanyi baku barri. Nayinda barri yaji yabimbayi baku barri Kudwanyi. Nyuli manjijba nangangi jandanyi Jisus Krayis wayka jambarri, janybikanyi nangka ngambalangi. Mikukiyanyi minimba yalunya nanangini waluwinyiwanyi yuwawanyi bukambijuyngka yajinyi nanganginkanyi Kudkanyi. Ngawamba bijalanyi nanganginkanyi yajinyi. Nanamuku Jumuku yalili jilajba yalunginkurri walkurrayngkurri jurjyurri yurrngumba barri, jali nangka bukamba janja yingkana murrkana, baki baku mili yingkana murrkana, baki baku mili yingkana murrkana. Yalili jilajba yurrngumba nani barri, waykanyi Kud barnyinyi. Yalu jingkijbayi, yali jungku balki nangangi Kudkanyi, yali yabimba balki yaji nangangi, baki nanankardi barri yali wajba Kud barnyinyi. Ngala mikuwali nanangini barnyiwanyi yabimba yalunya jungunkanyi yurlurrmba nangangi Kudkanyi. Miku.  
\v 2 Yali wajba Kud barnyinyi yalunginkanyi balkinyi yajinyi, ngala mikukiyanyi manjamanjamba yalungi balki yaji Kudwanyi. Ngawamba nyuli mamanumba nanda balki yaji. Yali wajba Kud barnyinyi yalunginkanyi balkinyi yajinyi, ngala yali jingkijba Kud, miku nyuliyanyi najba yalunya, yalu jungunkurri yurlurrmba nangangi Kudkanyi. Baki nanankardi barri yuwajiwa yalungki yanyba muwa nanankanyi yalunginkanyi balkinyi yajinyi. Baki nanankardi barri miku yaliyanyi kurrkunba waykanyi Kud barnyinyi. Jaliyanyi najba yalunya Kudwanyi, yalu jungunkurri yurlurrmba nangangi, baki miku yaliyanyi mili wajba Kud barnyinyi yalunginkanyi balkinyi yajinyi.  
\v 3 Ngala miku nyuliyanyi najba yalunya jungunkurri yurlurrmba nangangi. Baki yuwajiwa barri yalili wajba Kud barnyinyi, baki yuwajiwa barri yalili mankumankuwa yalungi balki yaji. Yurrngumba yalili wajba Kud barnyinyi jali nangka bukamba janja, yingkana murrkana, baki baku mili yingkana murrkana, baki baku mili yingkana murrkana.  
\v 4 Yalili kurdanba barnyi, baki yalu bunyanyarrijba nanda ngulya yalungi mambukamukunyi. Ngala mikuwali manjamanjamba yalungi balki yaji nanangini ngulyawanyi. Mikuwali ngulyawanyi yabimba yalunya, duja yalu jungunkanyi kunyba nangangi Kudkanyi. Miku.   
\p
\v 5 Baki nanankardi barri jali birrirrinja nangka Jisus Krayis karralankanyi wayka jambarri, jali barringa barri nyulu jungkuja bardarda wayka jambarri, baki yanyba nyuli nangangi Kudkanyi. Nayi yanybayi Jisus Krayis nangangi Kudkanyi nanamanji barri, “Miku ninjimi nulijba yalungi, yalu waykanyi ninya barnyinyi. Miku ninjimi nulijba yalungi, yalu kurdanbikanyi nanda barnyi nganyi. Ngala janganinji manjijba wayka yalundurri. Jangayu ngayu jungku yalundu mankanyiyudi.  
\v 6 Miku ninjimi mirnarrijba muwa yalungi jala yalu dikarrijba barnyi nanaba walkurranyina jurjina. Miku ninjiyi mirnarrijba muwa yalungi, jala yalu kurdanba barnyi nganyi, ninji mamanumbikanyi yalungi balki yaji. Miku ninjiyi mirnarrijba muwa yalungi, jala yalu yabimba nani barri.  
\v 7 Ngala ngayu yanybayi nayi nganyi, ‘Ninji Kud, ngayu jungkuka nayiba. Jangayu yabimba nanda jala ninji nulijba ngaki yabimbikanyi yaji. Jangayu yabimba nanda jala nganyi jangkurr najana yanybaka, jangayu yabimba yaji.’” Barriwa. Nani barri yanybayi Jisus Krayis nangangi Kudkanyi.   
\p
\v 8 Waluku yanybayi Jisus Krayis, “Miku ninjimi nulijba yalungi, yalu waykanyi ninya barnyinyi. Miku ninjimi nulijba yalungi, yalu kurdanbikanyi nanda barnyi nganyi. Miku ninjiyi nulijba yalungi, yalu dikarriykanyi barnyi. Miku ninjiyi nulijba yalungi, yalu dikarriykanyi barnyi, ninji mamanumbikanyi yalungi balki yaji. Miku ninjiyi nulijba yalungi, yalu yabimbikanyi yaji nani barri.” Nani barri yanybayi Jisus Krayis nangangi Kudkanyi, ngala nyuli jingkijba, karuyi yalunya yabimbikanyi nanda yaji nanangini waluwinyiwanyi yuwawanyi.  
\v 9 Baki mili yanybayi Jisus Krayis nangangi Kudkanyi, “Ninji Kud, ngayu jungkuka nayiba. Jangayu yabimba nanda jala ninji nulijba ngaki yabimbikanyi yaji.” Nani barri nyuli yanyba. Baki nanankardi barri manjijbayi nangangi jandanyi Kudwanyi. Manjijba nyuli nangangi jandanyi, janybikanyi nangka kurndana ngamanginkanyi balkinyi yajinyi. Nani barri bukambayi nanda waluwinyi yuwa Kudwanyi. Nani nyuli bukamba nanda waluwinyi yuwa jali wajba Musis Kudwanyi. Janyba nangki Jisus Krayis, baki nanankardi barri marda yalimi miku mili wajba Kud barnyinyi. Marda yalimi miku mili kurdanba barnyi nangangi Kudkanyi, janybangangi nangki Jisus Krayis yalungi barri. Nani barri bukambayi nanda yaji waykanyi Kud barnyinyi, dikarriykanyi barnyi nangangi Kudkanyi. Bukambayi nanda yaji barri.  
\v 10 Yabimbayi Jisus Krayiswanyi nanda jali nulijba Kud nangangi yabimbikanyi yaji. Wajba nangki mankanyi nangandurri Kudyurri. Kurdanba yali Jisus Krayis, baki nanankardi barri manjamanjambaka ngambalangi balki yaji Kudwanyi. Baki ngambala jungkuka likalika kurdulu nangangi Kudkanyi. Janyba nangki Jisus Krayis ngawamba barndaykamba ngamanginkanyi balkinyi yajinyi. Miku nangkiyi mili janyba ngamanginkanyi balkinyi yajinyi. Miku. Barriwa.   
\p
\v 11 Nanamuku mambukamuku yalunginkanyi walkurrayngka jurjkanyi, yalili waki nananyina jurjina yurrngumba barri, yingkana kambana, baki yingkana kambana, baki yingkana kambana. Yurrngumba yalili kurdanba nanda barnyi, jalili yalunjalu wajba yingkamukunyi. Yurrngumba yalili kurdanba nanda barnyi nangangi Kudkanyi. Ngala jalili yalu kurdanba nanda barnyi, baki mikukiyanyi manjamanjamba yalungi balki yaji Kudwanyi. Miku nyuliyanyi manjamanjamba yalungi balki yaji. Ngawamba nyuli mamanumba yalungi balki yaji. Yi. Nanamukunyi mambukamukunyi jurjkanyi yalili wajba Kud barnyinyi yurrngumba barri.  
\v 12 Ngala Jisus Krayis barri, ngawamba barndaykamba nangki wajba mankanyi, yalu kurdanbikanyi. Ngawamba barndaykamba barri. Baki nanankardi barri manjamanjambaka ngambalangi balki yaji Kudwanyi. Nyulu manjamanjambaka bukambijuyngka ngambalangi balki yaji, nanda balki jala ngambala yabimba nanijba, baki baku barri. Nyulu manjamanjambaka ngambalangi balki yaji yurrngumba barri, janybangangi nangki Jisus Krayis barndaykamba ngambalangi barri. Nanijba barri nyulu jungkuka kingkarri nangandu Kudnyina.  
\v 13 Kajamuku barri, miku yalimi maruka muwa nangangi Jisus Krayiskanyi, ngala janyulu daba yalunya Kudwanyi. Janyulu daba yalunya wakara barri. Janyulu wakaramba yalunya, jalija nyulu daba yalunya. Baki jayalu jingkijba Jisus Krayis, nyulu yalungi mambuka. Jungkuka Jisus Krayis kingkarri nangandu Kudnyina. Nyulu yukumbaka nangangi Kudkanyi nanankurri barri jalija nyulu daba yalunya wakara barri.  
\v 14 Kurdanba yali Jisus Krayis. Wajba nangki Jisus Krayis mankanyi nangandurri Kudyurri, baki yali kurdanba. Baki nanankardi barri yuku ngambala jungku yurlurrmba nangangi Kudkanyi. Ngambala jungkuka likalika kurdulu nangangi Kudkanyi, janybangangi nangki Jisus Krayis ngamanginkanyi balkinyi yajinyi. Nanijba barri nyulu manjamanjambaka nanda balki yaji ngambalangi, jala ngambala durrijba nangangi jangkurr Jisus Krayiskanyi, baki jangambala jungku yurlurrmba nangangi Kudkanyi yurrngumba barri.   
\p
\v 15 Karungka ngambalanya jangkurranyi nanangini Kunybawanyi Ngarnduwanyi Kudkanyi. Nyulu karungka ngambalanya nanganginkanyi jangkurranyi Kudkanyi. Waluku barri yanybayi Kud nayinda jangkurr miku nangkiyi yangkalamba.  
\v 16 “Nayinda barri yinini jangkurr, jalija ngayu yarrijba bakunyi. Baku barri jangayu yarrijba ngaki yuwa yalundu kulajina. Jayalu manku ngaki jangkurr, baki jayalu marrimba nanda jangkurr yalunginyina kurduluna, baki jayalu durrijba nanda ngaki jangkurr.” Barriwa.  
\v 17 Baki mili jangkurr yanybayi Kud nayi barri. “Jangayu manjamanjamba nanda balki yaji jali yalu yabimba. Miku ngayiyi mili mankuwa nanda yalungi balki yaji.” Barriwa.  
\v 18 Nani barri yanybayi Kud. Janyulu manjamanjamba ngambalangi balki yaji, janybangangi nangki Jisus Krayis ngambalangi. Nanankardi barri marda yalimi miku mili wajba Kud barnyinyi. Marda yalimi miku mili kurdanba barnyi nangangi Kudkanyi. Janyba nangki Jisus Krayis yalungi marda. Yuku nyulu manjamanjambaka yalungi balki yaji marda. Barriwa barri bukamba nanda yuwa, yalu waykanyi Kud barnyinyi yalunginkanyi balkinyi yajinyi. Barriwa barri, bukamba nanda yuwa nanijba barri. Barriwa.   
\p
\v 19-20 Janyba nangki Jisus Krayis ngamanginkanyi balkinyi yajinyi, baki nanankardi barri yuku ngambalaja jilajba kingkarri nangandu. Yuku ngambalaja jungku kingkarri bulandu Kudnyina baki Jisus Krayisnyina. Yuku ngambalaja jungku kingkarri bulandu, yukungangi ngambala dujanya jungku yurlurrmba nangangi Kudkanyi. Janyba nangki Jisus Krayis ngambalangi, baki nanankardi barri yuku ngambalaja kirrijba kingkarri nangandurri Kudyurri, jungunki nangandu mardarda kingkarri. Wabula barri, miku ngambaliyi kirrijba kingkarri nangandurri, barrinani miku yaliyi ngankijba Jumuku nananyina kudanyu malabana yajina bayinga. Miku yaliyi ngankijba nananyina kudanyu malabana yajina bayinga yalunginyina jurjina. Langayi nanda blanki murumbikanyi nanda yaji bayinga. Nani barri wabula miku ngambaliyi kirrijba kingkarri nangandurri Kudyurri, ngala nanijba barri yuku ngambalaja kirrijba nangandurri. Nanda barrinani bakarrawijbayi nanda blanki Jisus Krayiswanyi, jali nangka janyba ngambalangi. Barrinani bakarrawijba nyuli nanda blanki, ngambala ngankiykanyi nananyina kudanyu malabana yajina, jali nyulu wajba Kud nanganginkanyi mankankanyi Jisus Krayiswanyi. Yuku ngambala nanijba kirrijba kingkarri nangandurri Kudyurri. Nanda barrinani yuku ngambalaja ngankijba nananyina kudanyu malabana yajina nanganginkanyi Kudkanyi.  
\v 21 Baki nanda Jisus Krayis, nyulu nanda walkurra mambuka jurjkanyi ngambalangi kingkarri lalijina. Nyulu wakingka nangangi Kudkanyi nananyina kudanyu malabana yajina nanaba kingkarri.  
\v 22 Nanankardi barri marda ngambalimi miku manyirru jilaykanyi nangandurri Kudyurri, ngala marda ngambalimi jilajba yurlurrmba nangandurri. Ngambala jingkijbangka, nangangi jangkurr duja barri. Ngambala jungkuka likalika kurdulu nangangi Kudkanyi. Miku ngambalakimi yanyba muwa ngamanginkanyi balkinyi yajinyi, jingkijbangangi ngambala, ngambala jungunkanyi yurlurrmba nangangi Kudkanyi, jala ngambala kuyu nangangi duja jangkurr. Nanankardi barri yuku ngambala jilajba yurlurrmba nangandurri. Baki ngambala jungkuka likalika kurdulu nangangi Kudkanyi. Jali ngambala wakardaba mankanyi likalika wabudana, baki ngambala jungkuka likalika mankanyi. Baki nani barri ngambala jungkuka likalika kurdulu nangangi Kudkanyi. Barriwa.   
\p
\v 23 Ngambala jingkijbangka nanda jangkurr nangangi Kudkanyi, duja barri nanda nangangi jangkurr. Miku nyuliyi jujamba yaji Kudwanyi. Miku. Jali wajba ngambalanya Kudwanyi nanankanyi buyingkiyngkanyi jangkurranyi, miku nangkiyi yangkalambikanyi, jali ngambalanya wajba nanankanyi buyingkiyngkanyi jangkurranyi, baki yanybayi Kud, janyulu yabimba yaji ngambalangi. Ngambala jingkijbangka Kud, janyulu yabimba nanda jali nyulu yanyba, janyulu yabimba. Marda ngambalimi mankuwa nangangi jangkurr yurrngumba barri. Marda ngambalimi marrimba nangangi jangkurr ngamanginyina kurduluna yurrngumba barri.  
\v 24 Nanankardi barri marda ngambalakimi kandimba. Marda ngambalakimi karu, yanka ngambalaja jungku nangangi Kudkanyi. Marda ngambalakimi maruka muwa. Marda ngambalimi yabimba ngawamba kunyba yaji yalungi yingkamukuyngka. Marda ngambalimi kandimba yalunya yurrngumba barri.  
\v 25 Jalannga barri jalili narri jungku Krisjinmuku, bakili narri jilajba jungunki malumba. Narrili malumba jungku yanybikanyi narringka nangangi Kudkanyi. Nani barri kudiyanymuku yuwajiwa narri jungku nanaba yajina, ngala kudiyanymuku, miku narrimi mili malumba jungku nani barri, yanybikanyi narringka nangangi. Marda ngambalimi malumba jungku yurrngumba barri. Marda ngambalikimi kandimba nangangi Kudkanyi, baki yuku ngambalaja jungku yurlurrmba nangangi Kudkanyi. Nani barri marda ngambalimi malumba jungku yurrngumba barri, jingkijbangangi ngambala Jisus Krayis, janyulu wijba wayka jambarri baku barri. Barriwa.   
\p
\v 26 Ngambala durrijbangka nanda jangkurr bulangi Kudkanyi baki Jisus Krayiskanyi. Baki ngambala jingkijbangka nanda jangkurr duja barri. Nanankardi barri marda ngambalakimi kurrkunba yabimbikanyi balki yaji. Jaliyi ngambalaka miku kurrkunba, jaliyi ngambala yuwajiwa mili yabimba balki yaji, baki muningka nangki janyba Jisus Krayis ngambalangi barri. Muningka nangki janyba ngambalangi barri. Miku nyuliyi manjamanjamba ngambalangi balki yaji Kudwanyi, jaliyi ngambala jingkijba, nanda balki yaji yabimbikanyi, ngala yuwajiwa ngambala yabimba nanda balki yaji. Miku nyuliyi manjamanjamba ngambalangi balki yaji, jaliyi ngambala miku kuyu nangangi jangkurr Jisus Krayiskanyi.  
\v 27 Jaliyi yingka jungku balki nangangi Kudkanyi nani barri, baki ngambala jingkijba Kud, miku nyuliyi manjamanjamba nangangi balki yaji Kudwanyi. Jaliyi nyulu jungku balki nangangi Kudkanyi nani barri, baki marda nyulimi marrala yajinyi. Marda nyulimi kudanyu marrala yajinyi, jingkijbangangi ngambala Jisus Krayis, baku barri janyulu wijba nanginkurri, baki janyulu yanyba nanankanyi nangangi, baki janyulu manjijba nanda nganinyi wayka jangurri Yilyurri. Yajbaja yalunya janguwanyi, jala yalu miku ngayangayijba nanganginkanyi jangkurranyi Kudkanyi. Yajbaja yalunya janguwanyi. Nani barri janyulu yabimba yaji ngambalangi, jaliyi ngambalaka miku kurrkunba yabimbikanyi balki yaji, jaliyi ngambala yuwajiwa mili yabimba balki yaji.   
\p
\v 28 Nanda yuwa nangangi Musiskanyi yanybayi, yalu kurdanbikanyi nanda nganinyi jali nyulu jungku balki nanankanyi yuwanyi Musiskanyi. Waluku barri jayalu wudumba kujarra nganinyiwuya yanybikanyi nanankanyi balkinyi yajinyi. Jayalu wudumba kujarra jali bula najba nanda nganinyi yabimbikurri balki yaji nanankanyi yuwanyi. Jabula karu nanganginkanyi balkinyi yajinyi. Jali manku bulangi jangkurr malbuwanyi, baki janyulu yanyba kurdanbikanyi nanda nganinyi. Jayalu kuyu, baki jayalu kurdanba barri. Nani barri yanybayi nanda yuwa nangangi Musiskanyi, jali yingka jungku balki nanankanyi yuwanyi. Yanybayi nanda yuwa, yalu kurdanbiji nanda. Barriwa.   
\p
\v 29 Jaliyi yalu kurdanba nanda nganinyi, jali nyulu jungku balki nanankanyi yuwanyi Musiskanyi, ngala wanyi yaji mardakimi yabimba Kudwanyi nangangi, jala nyulu kudanyu yurlwa nangangi Jisus Krayiskanyi, nanankanyi jala jandanyi nangangi Kudkanyi. Jisus Krayis, nyulu mili walkurra nanankanyi yuwanyi Musiskanyi. Wanyimbaja Kud nanankanyi nganiyngkanyi jala nyulu kudanyu yurlwa nanankanyi buyingkiyngkanyi jangkurranyi Kudkanyi, jala nyulu kudanyu yurlwa buyingkiyngkanyi jangkurranyi, miku nangkiyi yangkalamba. Nanda buyingkinyi jangkurr yanybaka nangangi Jisus Krayiskanyi, nangka janybikanyi ngambalanginkanyi balkinyi yajinyi. Ngala miku nanda jirrinyi yaji nangangi, nanankanyi jala nyulu yurlwa nanankanyi yajinyi. Wanyimbaja Kud nangangi, jala nyulu yurlwa nanankanyi Kunybanyi Ngarndunyi Kudkanyi, jala nyulu yanybaka balki jangkurr nangangi. Mankumanku narringka nanankanyi nganiyngkanyi. Nanda yuwa nangangi Musiskanyi yanybayi yalu kurdanbikanyi nanda nganinyi jala nyulu jungku balki nanankanyi yuwanyi. Ngala wanyimbaja Kud nanankanyi jala nyulu kudanyu yurlwa yalungi, nangangi Kudkanyi, baki nangangi Jisus Krayiskanyi, baki nangangi Kunybanyi Ngarndunyi Kudkanyi. Wanyimbaja Kud nangangi barri. Janyulu yabimba mili balki yaji nangangi. Mili balki yaji janyulu yabimba nangangi barri.  
\v 30 Ngambala jingkijbangka nanda jangkurr najana Kudkanyi. Ngambala jingkijbangka barri, yanybayi Kud, “Ngayu barri mambuka yanybikanyi yalungi barrinani kurdusnyina. Jangayu karrinjarrijba yalunya walu ngakindu, baki nanamuku jali yalu miku ngayangayijba ngakinkanyi jangkurranyi, jangayu daba yalunya. Jangayu daba yalunya kudanyu barri.” Barriwa. Jabarri mili nyuli yanyba, “Ngayu mambuka Kud, jangayu karrinjarrijba yalunya bukambiju walu ngakindu, baki jangayu yanyba yalungi. Jangayu yanyba nanankanyi jalija ngayu yabimba yaji yalungi.” Barriwa.   
\p
\v 31 Nanankardi barri jaliyi ngambala yurlwa nanganginkanyi jangkurranyi, baki marda ngambalimi marrala nangangi Kudkanyi. Marda ngambalimi kudanyu marrala nangangi, jaliyi ngambala miku kuyu nangangi jangkurr, jaliyi ngambala miku balanja jungunkanyi yurlurrmba nangangi. Nyulu walkurramirra Kud, nyulu ngirukamirra. Jaliyi ngambala yurlwa nanganginkanyi jangkurranyi, baki ngambala jingkijba Kud, janyulu daba ngambalanya kudanyu barri.   
\p
\v 32 Marda narrimi mankumankuwa yanka narrili jungku waluka barri. Jalannga barri jalili narri kuyu nangangi jangkurr Jisus Krayiskanyi, baki yingkamukunyi narrinjalili wajba kijinyi. Narrinjalili wajba kijinyi, ngala miku narringkiyanyi yangkalamba nanganbunanyi Kudnanyi. Miku narringkiyanyi yangkalamba nanganbunanyi, nanankardi kijinyi.  
\v 33 Kudiyana yalili yanyba balki jangkurr narringi barri. Kudiyana yalili ngirrwa narringi walu yalundu yingkamukunyina, yalili wajba narrinya kijinyi. Yalili linjumba narrinya mankanyi. Baki kudiyana barri, narrili najba yalunya waykurri yalunya yingkamuku Krisjinmuku kijinyi. Narrili najba yalunya, yalunjalu waykurri kijinyi, bakili narri nulijba jungunkanyi malumba yalundu nanamukunyina Krisjinmukunyina. Mirnarrijba narrili muwa jungunkanyi narri yalundu, kandimbikanyi yalunya nanankanyi kijinyi.  
\v 34 Jalili yalu yarrijba yingkamuku Krisjinmuku brisinyina, bakili narri kandimba yalunya. Narrili kandimba yalunya, jalili yalu jungku brisinyina. Kudiyana barri yalili jarimba narringi yaji. Bakili yalu yingkijba narrinya kudiyana mikuyaji mamanyi, mikuyaji dungalanyi. Ngala yuwajiwa narrili mirnarrijba muwa yajinyi, jingkijbangangi narrili Jisus Krayis, nyulu lalanbaka narrinya yurrngumba barri. Baki baku barri janyulu marrimba narrinya mardarda yurrngumba barri kingkarri nangandu.  
\v 35 Miku narriyi marrala yajinyi, jingkijbangangi narri Kud, nangangi jangkurr duja barri. Jaliyi narri kudanyu durrijba nangangi jangkurr, baki janyulu yabimba kunyba yaji narringi barri. Baku barri janyulu kuyu narrinya kingkarri, jungunkanyi nangandu yurrngumba barri.  
\v 36 Miku narriyi balkijba muwa, jalija narrinjalu wajba nanankanyi kijinyi. Narri jingkijbangka Kud, baku barri janyulu yabimba nanda kunyba yaji narringi. Nyulu nulijbangka narringi, miku narriyi balkijba muwa. Ngala nyulu nulijbangka narringi, narri yukumbikanyi nangangi, narri jungunkanyi ngiruka nangangi, baki janyulu yabimba nanda jali nyulu yanyba, janyulu yabimba yaji narringi barri.  
\v 37 Nanda jangkurr najana Kudkanyi yanybaka nangangi Jisus Krayiskanyi. Nayinda barri nanda jangkurr. “Bijal barri baku janyulu badajba. Miku nyuliyi yukumba yurrngumba barri. Janyulu wijba marndakaja.  
\v 38 Baki nanamuku jala yalu jungku yurlurrmba ngaki, jala yalu kuyu ngaki jangkurr, jayalu jungku wanka yurrngumba barri. Ngala nanda jala nangka yangkalamba ngakinbunanyi, miku ngayiyi mirnarrijba muwa nangangi, ngala jangayu yurlwa muwa nangangi.” Barriwa.  
\v 39 Nani barri yanybayi Kud. Jaliyi ngambalaka yangkalamba nanganbunanyi Kudnanyi, baki miku nyuliyi marrimba ngambalanya mardarda. Miku nyuliyi kuyu ngambalanya kingkarri nangandurri, jalija ngambalaka janyba. Ngala miku ngambalakiyi yangkalamba nanganbunanyi. Miku. Ngambala kuyungka nangangi jangkurr Kudkanyi. Ngambala durrijbangka nangangi jangkurr yurrngumba barri. Baki nanankardi barri ngambala jingkijbangka Kud, janyulu marrimba ngambalanya mardarda yurrngumba barri. Barriwa.   
\c 11  
\p
\v 1 Jala ngambala kuyungka nangangi jangkurr Kudkanyi, baki ngambala jingkijbangka Kud, janyulu yabimba kunyba yaji ngambalangi, janyulu marrimba ngambalanya mardarda kingkarri barri nangandu. Miku ngambaliyi najba Kud. Baki miku ngambaliyi najba nanda kunyba yaji kingkarri, ngala ngambala jingkijbangka barri, nanda jangkurr nangangi duja. Baki nanankardi barri ngambala kuyungka nangangi jangkurr. Baki ngambala jingkijbangka Kud, janyulu yabimba nanda jali nyulu yanyba janyulu yabimba yaji.  
\v 2 Kudiyanymukunyi wankalamukunyi yali kuyu nangangi jangkurr Kudkanyi, baki mirnarrijbayi Kud muwa yalungi barri. Nyuli mirnarrijba muwa yalungi. Yanybayi Kud yalungi, janyulu yabimba yaji yalungi juju barri baku yalungi murrkana. Ngala miku yaliyanyi najba Kud yabimbikurri nanda yaji. Jilijbawa. Ngala jingkijba yali Kud, dujamba janyulu yabimba nanda yaji baku barri. Yali kuyu nangangi jangkurr, yali ngayangayijba nanganginkanyi jangkurranyi, baki nanankardi barri mirnarrijbayi Kud muwa yalungi barri. Barriwa.   
\p
\v 3 Miku ngambaliyanyi najba Kud yabimbikurri yaji wabula kamambarra. Miku ngambaliyanyi najba Kud yabimbikurri jamba baki kanja baki bukamba yaji junu. Ngala ngambala jingkijbangka Kud, nyuli yabimba bukamba nanda yaji. Jali mikuyaji yajinyi, baki yanybayi Kud jangkurr, baki walajbayi bukamba yaji. Barriwa.   
\p
\v 4 Mankumankuwa narri nanamuku wankalamuku jalili yalu kuyu nangangi jangkurr Kudkanyi. Nyulu karungka ngambalanya yalungi Kudwanyi nanganginyina najana. Karungka ngambalanya yalungi, yingkanyi baki yingkanyi baki yingkanyi. Karungka ngambalanya yalungi, jali yalu kuyu jangkurr nangangi Kudkanyi, jali yalu jingkijba Kud, janyulu yabimba nanda yaji jali nyulu yanyba janyulu yabimba. Jangayu karu narrinya yalungi wankalamukuyngka. Nanda lirrka nganinyi jali yabimba Kudwanyi, kujarra jandanyi nangangi. Nanda lirrka jandanyi nangangi, nangangi niji Kayin, baki nanda burrandinyi jandanyi nangangi, nangangi niji Yabil. Nyuli kuyu nangangi jangkurr Kudkanyi burrandiwanyi, Yabilwanyi. Kuyu nyuli jangkurr nangangi Kudkanyi, baki wajba nyuli Kud yajinyi. Jingkijba nyuli Kud, nyuli dujanya, baki kuyu nyuli nangangi jangkurr Kudkanyi. Baki nanankardi barri nyuli wajba Kud kunybanyi yajinyi. Ngala nanangini lirrkawanyi Kayinwanyi, miku nyuliyanyi wajba Kud kunybanyi yajinyi. Ngawamba nyuli wajba Kud bijal kunybanyi yajinyi, ngala nanangini burrandiwanyi Yabilwanyi, nyuli wajba Kud kudanyu kunybanyi yajinyi. Baki nanankanyi barri mirnarrijbayi Kud muwa nangangi barri burrandiyngkanyi. Mirnarrijba nyuli muwa nangangi Yabilkanyi, wajbangangi nyuli kudanyu kunybanyi yajinyi. Barriwa. Nanda jangkurr najana nangangi Kudkanyi yanybaka nangangi Yabilkanyi, baki nani barri ngambala jingkijbangka Yabil, nyuli kuyu jangkurr nangangi Kudkanyi, nyuli jungku yurlurrmba kudanyu nangangi barri. Marda ngambalimi mankumankuwa Yabil baki marda ngambalimi jungku nani nangangi Kudkanyi marda. Barriwa.   
\p
\v 5 Baki yingka wankala barri, jali nyulu jungka bijal juju bayngkani nangandu Yabilnyina, nangangi niji Yinuk. Nyuli jingkijba Kud, nyuli dujanya, baki nyuli kuyu nangangi jangkurr yurrngumba barri. Nanankardi barri mirnarrijbayi Kud muwa nangangi Yinukanyi, baki nyuli kandimba Yinuk. Baki nanankardi barri mikukiyanyi munyajba Yinuk janybikurri nangka Kudwanyi. Miku. Ngala kuyu nyuli Yinuk kingkarri jungunki nangandu lalijina. Miku nangkiyanyi janyba nanda Yinuk, ngala kuyuyi kingkarri nangandu Kudwanyi. Nanganginmuku, kujba yalungki nangangi, ngala miku yaliyi wakaramba nangangi mankanyi. Barriwa.  
\v 6 Mikukimi mirnarrijba muwa Kud nangangi jala mikukimi kuyu nangangi jangkurr. Ngala nyulu mirnarrijbangka muwa nangangi, jala nyulu jingkijbangka Kud, nyulu barri dujanya Kud, baki nyulu kuyungka nangangi jangkurr Kudkanyi. Jaliyi ngambala nulijba Kud, nyulu mirnarriykanyi muwa ngambalangi barri, baki marda ngambalimi jingkijba Kud, nyulu dujanya Kud. Marda ngambalimi jingkijba Kud, janyulu yabimba kunyba yaji ngambalangi, jala ngambala kudanyu kuyu nangangi jangkurr yurrngumba barri. Barriwa.   
\p
\v 7 Jabarri yingka wankala, nangangi niji Nuwa. Yanybayi Kud nangangi Nuwanyi. Karu nyuli Nuwa, baku barri juju janyulu manjijba walkurra mali ngurrunbikanyi yalunya. Baki jirrinyba nyuli Nuwa, nyulu yabimbiji walkurra muwarda. Jingkijbayi Kud Nuwawanyi, nyuli dujanya, baki yabimbayi muwarda Nuwawanyi. Yuwajiwa duku yaji, mikuyaji janjanyi, ngala kuyuyi nangangi jangkurr Kudkanyi Nuwawanyi, baki yabimba nyuli nanda walkurra muwarda. Yabimba nyuli nanda muwarda dukuna yajina, karuyingangi Nuwa Kudwanyi nyulu yabimbikanyi muwarda. Nanankardi barri jali wirlku nanda walkurra mali, baki marrimbayi Nuwa mardarda muwardana Kudwanyi. Nuwa baki nangangi maninganja, baki nanganginmuku murrku jandanyimuku, baki yalungi maninganjamuku, marrimbayi yalunya mardarda muwardana Kudwanyi. Ngala yingkamukunyi, miku yaliyanyi kuyu nangangi jangkurr Kudkanyi, baki yali ngurrulijba wabudana bukambiju. Yi. Marrimbayi Nuwa mardarda Kudwanyi, jungkungangi nyuli yurlurrmba nangangi Kudkanyi, jali nyulu kuyu nangangi jangkurr Kudkanyi. Barriwa.   
\p
\v 8 Jabarri yingka wankala, nangangi niji Yabrayam. Yanybayi Kud nangangi Yabrayamkanyi. Karu nyuli Yabrayam, janyulu yingijba nanda yaji jali nyulu jardijba nanaba yajina, baki janyulu jilajba bayungu barri. Yanybayi Kud nangangi, janyulu wajba Yabrayam yingkanyi yajinyi juju barri bayungu. Baki kuyuyi nanda jangkurr nangangi Kudkanyi Yabrayamwanyi. Jingkijba nyuli Kud, janyulu yabimba nanda jali nyulu yanyba, janyulu yabimba yaji. Baki yingijbayi nangangi yaji Yabrayamwanyi, baki barlba nyuli bayungu. Ngala miku nyuliyanyi jingkijba nanda yaji bayungu, baki miku nyuliyanyi jingkijba yaji wanjawa nyulu jilajbangka.  
\v 9 Ngala ngayangayijba nyuli nanankanyi jangkurranyi Kudkanyi, baki barlba nyuli juju bayungu. Barlba nyuli juju barri bayungu yingkarri yajiyurri, baki jungku nyuli nanaba. Miku nyuliyanyi wijba nanganginkurri yajiyurri. Yuwajiwa nyuli jungku nananyina yajina bayungu, ngala nyuli ngurranyi nananyina yajina yurrngumba barri. Miku nyuliyanyi yabimba barrawu nananyina yajina, ngala nyulili jungku wardarana, bakili nyulu jilalajba nananyina yajina yurrngumba barri. Baki nangangi jandanyi niji Yayisak, baki nangangi murimurimba nyulu, niji Jakib, bulili marda jilalajba nananyina yajina bayngkani barri nangandu. Buli marda ngurranyiwuya nanankanyi yajinyi. Ngala yanybayi Kud nangangi Yabrayamkanyi, nanankanyi yajinyi. Karu nyuli Yabrayam, janyulu wajba yalunya nanankanyi yajinyi, janyulu wajba yalunya nanankanyi yajinyi, nanganginmuku murimurimba nyulu yalunya juju barri bayngkani nangandu. Jayalu mungkijimuku nanankanyi yajinyi. Janyulu yalunginmirra yaji barri.  
\v 10 Ngala mirnarrijbayi Yabrayam muwa, ngala nyuli jungku ngurranyi nananyina yajina. Mirnarrijba nyuli muwa, kuyungangi nyuli jangkurr nangangi Kudkanyi. Jingkijba nyuli Kud, baku barri janyulu wajba Yabrayam yajinyi Kudwanyi. Janyulu kuyu Yabrayam kingkarri lalijiyurri, nanganginkurri yajiyurri Kudkanyi. Janyulu mungkiji nanankanyi yajinyi kingkarri jala nangangi yaji Kudkanyi. Barriwa.   
\p
\v 11-12 Nanda Yabrayam nyuli malbu, baki nangangi maninganja niji Sara, nyuli bardibardi. Mikuyaji jandayngkanyi bulangi. Ngala karuyi Yabrayam Kudwanyi, janyulu wudumba kajamuku murimurimba nyulu yalunya juju barri bayngkani nangandu. Kuyuyi nanda jangkurr Yabrayamwanyi. Jingkijba nyuli Kud, nangangi jangkurr duja barri. Kuyuyi jangkurr Kudkanyi Yabrayamwanyi, baki nanankardi barri yabimbayi yaji nangangi Kudwanyi. Nanda Yabrayam kudanyu nyuli malbungujba mankanyi, baki nangangi maninganja Sara nyuli bardibardingujba mankanyi. Ngala yabimbayi ngiruka yaji bulangi Kudwanyi, kuyungangi buli jangkurr nangangi Kudkanyi, Yabrayamwanyi baki Sarawanyi. Yabimbayi ngiruka yaji bulangi Kudwanyi, baki ngawakuku nyuli nanda bardibardi, baki birnandaba nangki jukanyi bardardanyi. Jali nyulu jardijba walkurra nanda juka, baki nyuli wudumba maninganja nangangi, baki jandanyiwuya. Nani barri baku barri juju, yali kajamuku barri jali yalu barrinani murimurimba nyulu yalunya Yabrayamwanyi juju barri bayngkani nangandu. Yali wirdikudukudumuku, barrinani nanamuku wirdikudukudumuku warrawiji kingkarri lalijina. Yali wirdikudukudumuku barrinani nanamuku wirdikudukudumuku mundarrmuku. Barriwa.   
\p
\v 13 Nanamukunyi wankalamukunyi Yabrayamwanyi, Sarawanyi, Yayisawanyi, baki Jakibwanyi, yali kuyu nanda jangkurr nangangi Kudkanyi. Yali jingkijba Kud, janyulu yabimba nanda jali nyulu yanyba, janyulu yabimba yaji. Yanybayi Kud, janyulu wajba yalunya nanankanyi yajinyi bayungu, baki juju barri baku nyuli wajba yalunya nanankanyi yajinyi. Nyuli wajba yalunya nanankanyi yajinyi, nanamuku kajamuku jali yalu jungku juju barri bayngkani yalundu. Yalu jungkuyi mungkijimuku nanankanyi yajinyi. Ngala nanamukunyi lirrkamukunyi, miku yalunjaliyanyi najba jungunkurri mungkijimuku nanankanyi yajinyi. Ngala yali jingkijba Kud, baku barri janyulu wajba yalunya nanankanyi yajinyi. Yalili jilalajba nananyina yajina, ngala baku janyulu yalunginmirra yaji. Yalunjalili karu yingkamuku, yali ngurranyimuku nanankanyi yajinyi, muningka yalili jilalajba nananyina yajina.  
\v 14 Nani barri yalunjalili minimba, yalu nulijbangka yingkanyi yajinyi. Yalu nulijbangka yingkanyi yajinyi, janyulu yalunginmirra yaji kingkarri nangandu Kudnyina.  
\v 15 Miku yaliyanyi ngurungurujba nanankanyi yajinyi karru, jali yalu yingijba wabula. Miku yaliyanyi nulijba wiykanyi nanankurri. Jaliyanyi yali nulijba wiykanyi, baki yuku yaliyanyi wijba karri. Ngala miku yaliyanyi nulijba wiykanyi.  
\v 16 Ngala yali ngurungurujba yingkanyi yajinyi kingkarri barri, jala mili kunyba yaji, jala nangangi yaji Kudkanyi. Yali nulijba jungunkanyi kingkarri nangandu Kudnyina. Baki nanankardi barri mikukiyanyi Kud manyirru yalungi, ngala nyuli mirnarrijba muwa yalungi kudanyu barri. Nyuli mirnarrijba muwa yalungi, jali yalu yanyba nangangi, nyuli yalungi Kud. Nyuli mirnarrijba muwa yalungi, baki janyulu kuyu yalunya kingkarri nanganginkurri yajiyurri. Nanda yaji kingkarri janyulu yalunginmirra yaji, baki jayalu jungku nanaba nangandu yurrngumba barri. Barriwa.   
\p
\v 17-19 Baki mili barri, jangayu karu narrinya nangangi Yabrayamkanyi. Birnandaba nangki jukanyi nangangi maninganja Sara, baki nijarrijba buli nanda bardarda Yayisak. Baki karuyi Yabrayam nanankanyi jukanyi Kudwanyi. Jalija nyulu jardijba walkurra, baki janyulu wudumba jandanyiwuya Yayisakwanyi, baki janyulu wudumba murimurimba nyulu yalunya. Barriwa. Nani barri janyulu wudumba kajamuku murimurimba nyulu yalunya Yabrayamwanyi juju barri bayngkani nangandu. Nani barri janyulu wudumba kajamuku yalunya, barrinani karuyi Yabrayam wabula Kudwanyi. Barriwa. Jali jardijba nangangi jandanyi Yayisak walkurra juka, baki mili yanybayi Kud nangangi Yabrayamkanyi. Karu nyuli Yabrayam, janyulu wajba Kud nanganginkanyi jandayngkanyi, janyulu kurdanba nanda juka dungalana yajina, niji Yalda. Nani barri janyulu yabimba yaji, barrinani jalili yalu wajba Kud barnyinyi. Kuyuyi nangangi jangkurr Yabrayamwanyi. Ngayangayijba nyuli nanankanyi jangkurranyi Kudkanyi. Wudumba nyuli nangangi jandanyi, kijijba nyuli, baki yarrijba nyuli dungalana yajina kurdanbikanyi nanda juka. Nani barri yabimbayi yaji Yabrayamwanyi, jingkijbangangi nyuli Kud, nyuli ngirukamirra. Jaliyi nyulu kurdanba nangangi jandanyi Yabrayamwanyi, baki yuku janyulu mili wankamba juka Kudwanyi. Nanankardi barri nyuli kuyu nangangi jangkurr Kudkanyi. Nyuli yabimba nanda jali karu Kudwanyi. Kijijba nyuli nanda juka dungalana, baki marrimba nyuli nanda majaja karlbiji nangangi jandanyi. Ngala kurrkunbayi Yabrayam Kudwanyi, baki miku nyuliyanyi karlba. Barriwa. Miyakijbayi Kud Yabrayamkanyi, jaliyi nyulu kudanyu maruka muwa nangangi Kudkanyi, jaliyi nyulu maruka muwa nangangi Kudkanyi mili kudanyu nanganginkanyi jandayngkanyi. Baki nanankardi nyuli karu Yabrayam nyulu kurdanbiji nangangi jandanyi. Barringa barri nyuliyanyi kurdanba, ngala kurrkunbayi Kudwanyi. Baki nanda barrinani mili wankambayi nanda juka Kudwanyi. Barriwa.   
\p
\v 20 Jali nanda Yayisak malbungujba mankanyi, baki wudumba nyuli jandanyiwuya. Niji bulangi Yisu baki Jakib. Baki yanyba nyuli mududu nangangi Kudkanyi bulangi barri. Ngajaka nyuli Kud, nyulu yabimbiji kunyba yaji bulangi. Kuyu nyuli nanda jangkurr nangangi Kudkanyi Yayisakwanyi, baki nanankardi barri nyuli jingkijba Kud, janyulu yabimba kunyba yaji bulangi, baki yalungi marda, nanganginmukuyngka murimurimba nyulu yalunya juju barri bayngkani nangandu. Barriwa.   
\p
\v 21 Baki nanda barri Jakib, kajamuku nanganginmuku jandanyimuku. Jali nyulu malbungujba mankanyi, baki wudumba nyuli kujarra murimurimba nyuli bulanya. Bulangi nijanganjinyi, nangangi niji Jusib, jala nyuli jandanyi nangangi Jakibkanyi. Nanda Jakib nyuli malbumirra. Jilajba nyuli ridiridiyudi. Nyuli darrangka nanaba ridiridina, ngala nyuli yanyba mududu nangangi Kudkanyi. Yanyba nyuli mududu nangangi Kudkanyi bulangi barri murimurimba nyuli bulanya. Ngajaka nyuli Kud, nyulu yabimbiji kunyba yaji bulangi. Kuyu nyuli jangkurr nangangi Kudkanyi. Baki nanankanyi barri nyuli jingkijba Kud, janyulu yabimba kunyba yaji bulangi, janyulu lalanba bulanya yurrngumba barri. Barriwa.   
\p
\v 22 Baki nanda yingka Jusib, jali nyulu malbungujba mankanyi, baki nyuli jungku nanaba yajina mili bayungu, niji Yijib. Nyulu marda kuyuyi nanda jangkurr nangangi Kudkanyi. Nyulu jingkijbayi Kud, nangangi jangkurr duja barri. Juju barri wabula yanybayi Kud nangangi Yabrayamkanyi, janyulu wajba yalunya nanankanyi yajinyi bayinga Kudwanyi. Janyulu wajba nanankanyi yajinyi yalunya murimurimba nyulu yalunya juju barri bayngkani nangandu Yabrayamnyina. Nani barri yanybayi Kud nangangi Yabrayamkanyi wabula barri. Kuyuyi nanda jangkurr Jusibwanyi. Jingkijba nyuli Kud, baku barri janyulu wajba yalunya nanankanyi yajinyi bayinga. Baki nanankardi barri jali nyulu malbungujba mankanyi, baki nyuli yanyba nanankanyi yajinyi bayinga. Yanyba nyuli, baku barri jayalu yingijba nanda yaji Yijib, jayalu jilajba nanankurri yajiyurri. Baki nyuli karu yalunya, jalija yalu barlba, baki jayalu wiykunumba nanda nguli nangangi yalundu. Barriwa.   
\p
\v 23 Baku barri juju yuwajiwa yali jungku nananyina yajina mili bayungu Yijib. Yali kajamuku barri wirdikudukudumuku, ngala yuwajiwa yalu ngurranyimuku nananyina yajina. Niji yalungi nanamanji barri Jumuku. Ngala nanda mambuka nanankanyi yajinyi nyuli marrala yalungi. Yiningki jayalunjalu daba wakara nanganginmuku mungkijimuku. Nanankardi barri nyuli jirrinyba yalunya, yalu kurdanbiji bukambiju buyingkinyi bardardamuku, jala yalu jukamuku. Maykarrawuyanyi barri, wudumba buli buyingkinyi juka bardarda, niji nangangi Musis. Baki najba buli, nyuli kunyba bardarda, kunybamirra. Ngala miku buliyanyi ngayangayijba nanankanyi jangkurranyi mambukanyi. Miku buliyanyi kurdanba nanda bardarda, ngala ngadijba buli nanda bardarda. Ngadijba buli bardarda bulanginyina barndana murrkunyina yakarlina. Kuyu buli jangkurr nangangi Kudkanyi. Jingkijba buli Kud, janyulu lalanba bulangi bardarda. Nanankardi barri miku buliyanyi marrala yurlwankanyi nanankanyi jangkurranyi kurdanbikanyi nanda bardarda. Barriwa.   
\p
\v 24-26 Ngala wakarambayi nanda bardarda Musis jibarriwanyi. Nyuli jandanyi nangangi, nanankanyi mambukanyi jali nyulu jirrinyba yalunya kurdanbikanyi bardarda. Wakarambayi nanda bardarda nanangini jibarriwanyi, baki maruka nyuli muwa nangangi. Kuyu nyulu bardarda, baki jardiykunumba nyuli nanda juka barrinani nanda nanganginmirra kulunganja. Ngala jali nyulu jardijba walkurra nganinyi, baki najbayi nanganginmuku mungkijimuku Jumuku Musiswanyi. Najbayi yalunya wakiwarrmuku, ngala yalunginmuku mambukamuku yali balkimuku. Wajuba yalunjalili, baki daba yalunjalili. Yalili yabimba balki yaji yalungi barri, nanganginmukuyngka mungkijimukuyngka Musiskanyi. Miku nyuliyanyi jungku yalundu Jumukunyina, ngala nyuli jingkijba nanamuku Jumuku, yali nanganginmuku mungkijimuku. Nyuli marda Ju. Nyulu marda kuyuyi nanda jangkurr nangangi Kudkanyi Musiswanyi. Nyulu durrijbayi nanda nangangi jangkurr. Nanda jibarri jali nyulu jardijba Musis, nyuli yanyba nangangi Musiskanyi, nyuli nanganginmirra jandanyi, nyuli mungkiji yalungi Yijibmukuyngka. Ngala mikukiyanyi nulijba Musis jungunkanyi mungkiji yalungi Yijibmukuyngka. Ngala nyuli nulijba yalungi, yalu jingkiykanyi nangangi, nyuli mungkiji yalungi Jumukuyngka. Jingkijbayi Kud Musiswanyi, marukayi muwa Kud yalungi Jumukuyngka. Baki marukayi muwa Musis nangangi Kudkanyi. Kuyu nyuli nangangi jangkurr Kudkanyi Musiswanyi. Nulijba nyuli jungunkanyi yurlurrmba nangangi Kudkanyi. Nulijba nyuli kandimbikanyi yalunya nanganginmuku mungkijimuku Jumuku. Baki jingkijba nyuli, jaliyi nyulu yurlwa yalungi, nanganginmukuyngka mungkijimukuyngka, jaliyi nyulu mili jungku yalundu Yijibmukunyina, barrinani nyuli mungkiji yalungi, baki jayalu yabimba kunyba yaji nangangi Yijibmukunyi. Jayalu wajba kajanyi yajinyi, jayalu yarrijba Musis walkurra mambuka yalungi. Marda jingkijba nyuli, jaliyi nyulu kandimba yalunya Jumuku, baki jayalu wajba kijinyi mambukamukunyi Yijibkanyi. Jayalu kudanyu kakalijba nangangi. Jayalu linjumba nangangi mankanyi, barrinani yalunjalili linjumba Jumuku. Nani barri jayalu yabimba yaji nangangi, barrinani baku yali yabimba yaji nangangi Jisus Krayiskanyi. Ngala jaliyi nyulu miku kandimba yalunya, nanganginmuku mungkijimuku, baki janyulu jungku balki nangangi Kudkanyi. Janyulu jungku balki nangangi. Ngala miku nyuliyi mili jungku barrinani mungkiji yalungi Yijibmukuyngka. Miku nyuliyi mili yurlwa yalungi Jumukuyngka. Janyulu kandimba yalunya nanganginmuku mungkijimuku Jumuku. Yuku jayalu wajba kijinyi. Yuku jayalu kudanyu kakalijba nangangi, ngala janyulu jungku kunyba nangangi Kudkanyi. Janyulu kandimba yalunya Jumuku. Baki nani barri nyuli yabimba, jingkijbangangi nyuli Kud, janyulu yabimba kunyba yaji nangangi baku barri Kudwanyi. Janyulu yabimba kunyba yaji nangangi, jaliyi nyulu kandimba yalunya Jumuku Musiswanyi. Barriwa.   
\p
\v 27 Ngala nanda walkurra mambuka Yijibkanyi, nyuli ngarrangarra muwa nangangi Musiskanyi. Kudanyu nyuli ngarrangarra muwa nangangi, baki barlbayi Musis nanamunanyi yajinanyi. Barlba nyuli karri. Kuyu nyuli nanda jangkurr nangangi Kudkanyi, baki miku nyuliyanyi marrala nangangi nanankanyi mambukanyi Yijibkanyi. Miku nyuliyanyi marrala nangangi, jingkijbangangi nyuli Kud, janyulu lalanba yurrngumba Kudwanyi. Durrijba nyuli Kud, barrinani nyuli najba Kud jilaykurri walu nangandu barri. Miku nangkiyanyi yangkalamba nanganbunanyi Kudnanyi. Kudanyu nyuli durrijba Kud yurrngumba barri.  
\v 28 Baku barri juju wijbayi Musis bayungu Yijibyurri. Manjijbayi Musis bayungu Kudwanyi. Janyulu nyulu Musis mambuka yalungi Jumukuyngka. Wijbayi Musis, baki mili yanybayi Kud nangangi. Karu nyuli Musis, janyulu yabimba ngiruka yaji nanaba Yijib Kudwanyi. Janyulu kurdanba yalunya bukambiju lirrkamuku jandanyimuku jukamuku yalundu nanaba Yijib. Nanda walkurra mambuka Yijibkanyi, miku nyuliyanyi kuyu jangkurr nangangi Kudkanyi. Miku nyuliyala munyajba yalunya Jumuku, yalu jilaykurri nanganbunanyi yajinanyi. Miku nyuliyala munyajba yalunya jilaykurri, ngala kurrkunba nyuli yalunya. Baki nanankardi barri janyulu kurdanba yalunya lirrkamuku jukamuku Kudwanyi. Janyulu manjijba yingamali Yanjil kurdanbiji yalunya bukambiju yingamalina mungana. Janyulu ngankijba yingkana barndana, baki yingkana barndana, baki yingkana barndana, baki janyulu kurdanba bukambiju lirrkamuku jukamuku Yanjilwanyi. Niji nangangi “Yanjil Kurdanbawarr.” Ngala karuyi Musis Kudwanyi, janyulu jirrinyba nangangimuku mungkijimuku Jumuku Musiswanyi. Janyulu jirrinyba yalunya, jayalu wudumba bulungu jib. Jayalu kurdanba, baki jayalu namba lukuluku nanaba bardawana nananyina nanganginyina ngulyana. Jayalu namba kujarranyina wilina baki yundu barri bardawana yalunginyina barrawuna. Jalija najba ngulya bardawana nanangini Yanjilwanyi, baki miku nyuliyi ngankijba kalawuyngkurru, miku nyuliyi kurdanba lirrka juka nanaba kalawuyngkurru. Janyulu kangandijba nanaba barrawuna, ngulyangangi. Nani barri karuyi Musis jirrinybikanyi yalunya Kudwanyi. Kuyuyi nanda jangkurr nangangi Kudkanyi Musiswanyi. Baki jirrinyba nyuli yalunya Jumuku, yalu nambiji lukuluku yalunginyina bardawana ngulyayudinyi. Nani barri yali yabimba yaji Jumukunyi, baki kangandijbayi nanda Yanjil Kurdanbawarr yalunginyina barndana. Kangandijbayi Yanjil nananyina mungana barri. Baki yali nijarrijba nanda mungana “Kangandijbayi Barrawuna Yajinyi”, kangandijbayingangi nanda Yanjil yalunginyina barndana. Nani barri kuyuyi jangkurr nangangi Kudkanyi Musiswanyi, baki yabimba nyuli nanda jali karu nyulu yabimbikanyi Kudwanyi. Barriwa.   
\p
\v 29 Nanamunanyi munganawunyi yajiwunyi jali kangandijba Yanjil, baki barlba yali Jumuku nanamunanyi yajinanyi Yijibnanyi. Kuyuyi yalunya karri Musiswanyi. Wanbiya yali kanjana muluna wabudana. Niji nangangi “Nganmarra Kanja.” Jirrinybayi Musis Kudwanyi, janyulu kuyu yalunya Jumuku wayka kanjarri, jayalu burrijba nanda wabuda. Yali kuyu nanda jangkurr nangangi Kudkanyi nanamukunyi Jumukunyi. Yali kuyu nangangi jangkurr, baki yali durrijba Musis wayka kanjarri. Yandarrambayi nanda kanja Kudwanyi, baki yali burrijba dukana yajina, baki mili yali walajba karrurrinybana bukambiju. Ngala malijbayi yalunjalu ngarrkadabawarrmukunyi Yijibkanyi. Karrala yali wayka burriykanyi dukana yajina, ngala wiykunumbayi wabuda Kudwanyi, baki ngurrulijba yali wabudana bukambiju.   
\p
\v 30 Jabarri baku barri juju, janyba nangki Musis, baki yingka barri, nangangi niji Jujuwa, nyuli buyingkinyi mambuka yalungi barri. Nyuli kuyu yalunya Jumuku nanankurri yajiyurri jali yanyba Kud yalungi, janyulu yalunginmirra yaji. Ngala mungkijimuku nanankanyi yajinyi, yali jungku kajana barrawuyabarrawuyana. Yabimba yali walkurra ngiruka barriki lukuluku barri dungalayudinyi. Juju barri kingkarri nanda barriki, baki mikuwali ngankijba yingkamuku daji yalunya. Jungku yali Jumuku bundu yingkana barrawuyabarrawuyana niji Jiriku. Yanybayi Kud nangangi Jujuwakanyi. Karu nyuli Jujuwa, nyuluja kuyu yalunya Jumuku lukuluku nananyina barrikina. Jayalu jilalajba lukuluku, baki jayalu wijba yalunginkurri barndarri. Jabarri munganawa barri mili jayalu jilalajba lukuluku, baki jayalu wijba barndarri. Nani barri jayalu yabimba yaji. Barriwa. Baki kuyu yali nanda jangkurr nangangi Kudkanyi Jumukunyi, baki yabimba yali nanda jali karu yalunya yabimbikanyi yaji Kudwanyi. Jilalajba yali lukuluku nananyina barrikina yurrngumba 7 kambana, baki dalyambayi nanda walkurra barriki Kudwanyi. Ngankijba yali Jumuku, baki daba yalunjali mungkijimuku nanankanyi yajinyi. Daba yalunjali wakara barri. Nani barri yalunjali wakaramba. Kuyu yali nanda jangkurr nangangi Kudkanyi Jumukunyi, baki nanankardi barri dalyambayi nanda barriki yalungi Kudwanyi. Barriwa.   
\p
\v 31 Wujina barri waluwa yali jilalajba lukuluku nananyina barrikina, baki manjijbayi kujarra nganinyiwuya Jujuwawanyi. Manjijba nyuli bulanya, ningkiji nanda barrawuyabarrawuya. Nulijbayi Jujuwa jingkiykanyi nanda yaji marda yalunya nanaba kalawuyngkurru. Jabula najba nanda yaji, baki jabula karu Jujuwa nanankanyi yajinyi. Kardarda buli ngankijba bardawana, baki binanyba buli naji yaji. Ngala najbayi bulanya yingkawanyi, baki kujbayi bulangi ngarrkadabawarrmuku kurdanbiji bulanya. Ngala kandimbayi bulanya jibarriwanyi. Ngadijbayi bulanya nanganginyina barndana. Nyuli balki jibarri. Waluwa nyuli kuluka yingkana nganinyina, baki yingkana nganinyina. Ngala nyuli jingkijba Kud, janyulu wajba yalunya Jumuku nanankanyi yajinyi. Nanankardi barri nyuli marrimba bulanya mardarda yalunbunanyi. Baki nanankardi barri jali dalyamba nanda barriki Kudwanyi, baki nyuli marrimba nanda jibarri mardarda, baki miku yaliyanyi kurdanba nanda jibarri. Marrimbayi jibarri mardarda Kudwanyi, jingkijbangangi nyuli Kud, nyulu dujanya Kud, baki nyulu ngiruka barri. Barriwa.   
\p
\v 32-33 Jabarri baku barri kajamukunyi yali kuyu nangangi jangkurr Kudkanyi, yingkawanyi baki yingkawanyi, baki yingkawanyi. Kuyu yali nangangi jangkurr, durrijba yali nangangi yuwa, baki nanankardi barri yalu marda yabimbayi ngiruka yaji nangangi Kudkanyi. Nayinda kudiya yalungi niji, Kidiyun baki Barak, Samsun baki Jibida, Dayibid baki Samiyul. Baki nanamukunyi jali yalu yanyba jangkurr nangangi Kudkanyi, yalu marda yabimbayi ngiruka yaji nangangi barri. Bukambijunyi yali kuyu jangkurr nangangi Kudkanyi, yali ngayangayijba nanganginkanyi jangkurranyi, baki nanankardi barri yabimbayi kunybingkawanyi, baki yingkawanyi. Kuyu yali nangangi jangkurr, durrijba yali nangangi yuwa, baki nanankardi barri yalu marda yabim yali nanda jangkurr nangangi Kudkanyi, ngayangayijba yali nanganginkanyi jangkurranyi, baki nanankardi barri wajbayi yalunya yajinyi jambanyi Kudwanyi, yalu jungunkanyi nananyina yajina. Nyuli wajba yalunya nanankanyi nanamannga yajinyi jali wabula nyulu yanyba, janyulu wajba yalunya yajinyi. Yingkamukunyi barri yali kurrkunba nanamuku yanimal jarrbawarr, niji layin. Yali kurrkunba nanamuku yanimalmuku jarrkanyi yalunya.  
\v 34 Yingkamukunyi yali mungamba walkurra jangu. Yingkamuku barri marrimbayi yalunya mardarda Kudwanyi jali balanja kurdanbikanyi yalunya ngurranyimukunyi. Yingkamuku yali majabujba mankanyi, ngala ngirukamba yalunya mankanyi Kudwanyi, baki yalunjali daba wakara barri. Kajamuku ngurranyimuku ngarrkadabawarrmuku yalunjali daba wakara barri.  
\v 35 Yingkawuyanyi jibarriwuyanyi bula marda kuyuyi jangkurr nangangi Kudkanyi. Bula jingkijbayi Kud, nyulu ngiruka yabimbikanyi ngiruka yaji. Janyba bulangki, kulunganjawuya bulangi, yingka waluwa, baki baku yingka bayngkani barri. Jali bulangka janyba kulunganjawuya bulangi, baki buli ngajaka Kud, nyulu wankambiji bulanya. Nani barri buli ngajaka Kud, kuyungangi buli nangangi jangkurr Kudkanyi. Baki wankambayi bulanya kulunganjawuya Kudwanyi, waluwa yingka, baki baku yingka bayngkani. Barriwa.  
\p Ngala yingkamukunyi barri, kuyu yali jangkurr nangangi Kudkanyi. Durrijba yali nangangi jangkurr, baki ngala yali jungku kijiyudi. Nanamukunyi jali yalu ngirra Kud, yali wudumba kudiya yalunya jali yalu kuyu jangkurr nangangi Kudkanyi. Yalunjali wudumba. Yalunjali karu, jaliyi yalungki yangkalamba nanganbunanyi Kudnanyi, baki yuku jayalunya muningka manjijba yalunginkurri barndarri. Ngala miku yalungkiyanyi yangkalamba nanganbunanyi, ngala yali yanyba, jayalu kudanyu durrijba Kud yurrngumba barri. Baki nanankardi barri nanamukunyi ngirrawarrmukunyi, yalunjali wudumba, nanamuku jali yalu maruka muwa nangangi Kudkanyi, jali yalu kuyu nangangi jangkurr. Yalunjali linjumba mankanyi kudanyu barri. Yalunjali kurdanba. Ngala yali mirnarrijba muwa, janybikanyi yalungka nani barri, jingkijbangangi yali Kud, janyulu mili wankamba yalunya, jayalu jungku mili wanka nangandu kingkarri yurrngumba barri.  
\v 36 Jabarri nanamukunyi jali yalu ngirra Kud, yalunjali wudumba nanamuku, jali yalu kuyu nangangi jangkurr Kudkanyi. Yingkamuku yalunjali ngirrkimba, yalunjali wajuba, yalunjali kijijba kijbakijbayudinyi, yalunjali janyba brisinyina.  
\v 37-38 Ngala yingkamuku barri yalunjali daba dungalayudinyi, yalunjali kurdanba dungalayudinyi. Yingkamuku barri yalunjali jaralyarlmba. Yingkamuku barri yalunjali karlba wunanybalanjudinyi jankunbijinyiyudinyi. Yalunjali karlba, baki yalunjali kurdanba barri. Ngala nanamukunyi jali yalu ngirra Kud, yalunjali ngirra yingkamuku marda. Yalunjali ngirra nanamuku jali yalu kuyu jangkurr nangangi Kudkanyi. Yalunjali wajba kijinyi. Yalunjali malijba yalunbunanyi barndananyi. Ngala mirnarrijbayi muwa Kud yalungi, jali yalu kuyu nangangi jangkurr. Nyuli mirnarrijba muwa yalungi barri. Ngala miku nyuliyanyi mirnarrijba muwa yalungi, jali yalu ngirra Kud, jali yalunjalu wajba kijinyi. Yalunjali malijba yalunbunanyi barndananyi, bakili yalu muningka jilalajba mangkurruna yajina, baki dungalana yajina. Yalili jungku bardawana jambana marda, baki kumayanguna. Ngawamba waba jumbala yalungi. Mikuyaji dungalanyi yalundu, bakili yalu wudumba waba jibkanyi baki yukularrinyi yalungi jumbala. Yalili birrkalanyi jungku yurrngumba barri. Mikuyaji dungalanyi, mikuyaji mamanyi yalundu. Barriwa.   
\p
\v 39 Ngala mirnarrijbayi muwa Kud yalungi barri nanamukuyngka wankalamukuyngka. Kudanyu nyuli mirnarrijba muwa yalungi, kuyungangi yalili nangangi jangkurr yurrngumba barri. Miku yalungkiyanyi yangkalamba nanganbunanyi. Miku. Ngurungurujba yali nanankanyi kunybanyi yajinyi kingkarri barri, ngala miku yaliyanyi jungku nanaba. Jilijbawa janyulu kuyu yalunya nanankurri yajiyurri Kudwanyi.  
\v 40 Ngala jingkijbangka Kudwanyi nanda yaji jalija nyulu yabimba yalungi, baki ngambalangi marda. Baku barri janyulu wudumba yalunya Jisus Krayiswanyi. Janyulu wudumba yalunya, nanamuku kunybamuku jalili yalu maruka muwa nangangi Kudkanyi, jalili yalu ngayangayijba nangangi. Baki janyulu wudumba ngambalanya marda. Janyulu dalburrijba bukambiju ngambalanya, baki janyulu kuyu ngambalanya kingkarri lalijiyurri. Baki yurrngumba jangambala jungku nangandu barri kingkarri. Barriwa.   
\c 12  
\p
\v 1 Ngambala barri, marda ngambalimi mankumankuwa yalunya, nanamuku wankalamuku jali yalu kuyu nangangi jangkurr Kudkanyi. Marda ngambalimi mankumankuwa yalunya. Yali ngayangayijba nanganginkanyi jangkurranyi Kudkanyi, jingkijbangangi yali Kud, janyulu yabimba nanda jali nyulu yanyba, janyulu yabimba yaji. Nanankardi barri marda ngambalimi barriwa yingijba nanda balki yaji jala ngambala yabimba. Marda ngambalimi barriwa janyba bukamba nanda balki yaji ngamanbunanyi kurdulunanyi. Nanangini balkiwanyi ngambalanya ngirukamba kurdulu, baki miku ngambalimi kudanyu durrijba nangangi jangkurr Kudkanyi. Marda ngambalimi barriwa janyba nanda balki ngamanbunanyi, baki marda ngambalimi jungku yurlurrmba nangangi Kudkanyi. Marda ngambalimi yabimba kunyba yaji nangangi. Baki marda ngambalimi yurrngumba jungku ngiruka nangangi Kudkanyi, barrinani nanamuku wankalamuku yalu barri jungkuyi ngiruka nangangi.  
\v 2 Marda ngambalimi mankumankuwa ngambalangi mambuka Jisus Krayis. Marda ngambalimi kudanyu durrijba nangangi jangkurr yurrngumba barri. Nyulu barri lirrka minimbikanyi ngambalanya nangangi Kudkanyi. Nyulu lirrka minimbikanyi ngambalanya nangangi Kudkanyi, nyulu nanda marrimbawarr mardarda. Jaliyi ngambala kuyu nangangi jangkurr, jaliyi ngambala durrijba nangangi jangkurr yurrngumba barri, baki janyulu yabimba ngambalanya jardiykanyi mili ngiruka nangangi Kudkanyi yurrngumba barri. Nani barri jangambala jardijba mili ngiruka nangangi barri. Baki jangambala jingkijba marda, baku barri jangambala jungku mili wanka nangandu barri, baki janyulu marrimba ngambalanya mardarda nangandu Kudwanyi. Jali jungku Jisus Krayis wayka jambana, baki marrimba yali, baki kuyu yali kurdanbiji barri. Ngala jaliyanyi jujamba yaji Jisus Krayiswanyi, jaliyanyi nyulu yanyba, miku nyulu nanda marrimbawarr mardarda jali manjijba Kudwanyi, baki miku yaliyanyi kurdanbikanyi. Miku. Ngala miku nyuliyanyi jujamba yaji, baki nanankardi barri yalu wajbayi Jisus Krayis kijinyi. Yalu ngirrikimbayi, yalu kakalijbayi nangangi, baki yalu kurdanbayi barri. Nani barri nyuli yalunya munyajba Jisus Krayiswanyi. Munyajbayi yalunya yabimbikurri nanda yaji nangangi, mankumankungangi nangki Jisus Krayis ngambalangi barri. Mankumanku nangki ngambalangi, nyulu marrimbikanyi ngambalanya mardarda baku barri. Nanankardi barri mirnarrijbayi Jisus Krayis muwa, mankumankunkanyi nangki baku yajinyi, baki nyuli munyajba yalunya kurdanbikurri. Baki nanankardi barri nanijba nyulu jungkuka kingkarri nangandu Kudnyina. Nyulu walkurra mambuka bayngkani nangandu barri. Barriwa.   
\p
\v 3 Mankumanku narringka nangangi Jisus Krayiskanyi. Ngirra yali Jisus Krayis nanamukunyi Jumukunyi. Yali jungku balki nangangi Kudkanyi, baki yali ngirra Jisus Krayis. Mankumankuwa narringka nangangi Jisus Krayiskanyi. Yuwajiwa yali ngirra Jisus Krayis, baki jayalu kurdanba, ngala jungkuyi Jisus Krayis ngiruka nangangi Kudkanyi yurrngumba barri. Baki nani barri yalu ngirra ngambalanya marda kajamukunyi. Yalu yabimbaka balki yaji ngambalangi barri. Ngala marda ngambalakimi miku yangkalamba nanganbunanyi Kudnanyi. Ngala marda ngambalimi jungku ngiruka nangangi, barrinani jungkuyi Jisus Krayis ngiruka nangangi Kudkanyi yurrngumba barri.  
\v 4 Yalu ngirra narrinya kajamukunyi, barrinani yali ngirra Jisus Krayis waluwa barri, baki jayalu kurdanba. Yalu ngirra narrinya, ngala jilijbawa yalu nulijbangka kurdanbikanyi narrinya. Yalu wajbangka narrinya kijinyi, ngala kudanyu narri balanjaka jungunkanyi ngiruka nangangi Kudkanyi.  
\v 5 Marda narrimi mankumankuwa nanda jangkurr najana Kudkanyi. Yanybaka Kud nayinda jangkurr narringi barri, nanganginmukuyngka jandanyimukuyngka, “Narri ngakinmuku jandanyimuku. Marda narrimi marrimba nayinda ngaki jangkurr narringinyina kurduluna. Ngayu barri Kud. Jaliyi narri jungku balki ngaki, baki miku ngayiyi yabimba kunyba yaji narringi, ngala jangayu daba narrinya. Ngala marda narrimi miku balkijba muwa, jalija ngayu daba narrinya. Jangayu daba narrinya, ngawamba jalija narri jungku balki ngaki.  
\v 6 Nani barri jangayu yabimba yaji narringi, marukangangi ngayu muwa narringi. Narri ngakinmuku jandanyimuku. Jangayu daba narrinya baki janarri janyba nanda balki narrindunanyi, baki janarri jungku yurlurrmba ngaki yurrngumba barri.” Barriwa. Marda narrimi mankumankuwa nanda nangangi jangkurr Kudkanyi.   
\p
\v 7-8 Nanangini barri jala nyulu kunyba nijanganjinyi, nyulu dabangka yalunya nanganginmuku jandanyimuku. Nyulu yalunya dabangka, jala yalu jungku balki nangangi, jala yalu miku ngayangayijba nanganginkanyi jangkurranyi. Nyulu dabangka yalunya, marukangangi nyulu muwa yalungi barri. Nyulu dabangka yalunya, nulijbangangi nyulu yalungi, yalu jungunkanyi kunyba nangangi, yalu jungunkanyi yurlurrmba nanankanyi yuwanyi. Ngala jaliyi nyulu miku daba yalunya, jala yalu jungku balki, baki miku nyulimi maruka muwa yalungi, baki miku nyulimi nulijba yalungi yalu jungunkanyi kunyba, yalu jungunkanyi yurlurrmba yuwanyi barri. Baki nani barri narrinya dabangka Kudwanyi. Nyulu munyajbangka yalunya, waykurri narrinya kijinyi. Nani barri narrinya dabangka Kudwanyi, nulijbangangi nyulu narringi, narri jungunkanyi kunyba, narri jungunkanyi yurlurrmba nangangi Kudkanyi. Marukangka Kud muwa narringi kudanyu barri, narringangi nanganginmuku jandanyimuku. Jala yalu wajba narrinya kijinyi, baki marda narrimi kurrkunba nanda kiji. Marda narrimi kurrkunba nanda kiji. Marda narrimi mardumardu muwa nanankanyi kijinyi, jingkijbangangi narri Buwakanya Kingkarri, janyulu yabimba narrinya ngiruka nangangi barri. Miku narrinyimi daba Kudwanyi, ngarrangarrangangi nyulu muwa narringi, ngirrangangi nyulu narrinya. Miku. Dabangka narrinya, yabimbiji narrinyaja jungunkanyi kunyba nanganginyina yuwanyi, jungunkanyi yurlurrmba nangangi. Dabangka narrinya, yabimbiji narrinyaja jungunkanyi mili ngiruka nangangi barri Buwakaya Kingkarri. Jaliyi nyulu miku daba narrinya Kudwanyi, baki narri jingkijba, miku narrimi dujanya nanganginmuku jandanyimuku Kudkanyi.  
\v 9 Wabula barri jali ninji juka, baki dabayi ninya nganyinyi nijanganjinyiwanyi. Ninya nyuli daba yabimbikanyi ninya jungunkanyi yurlurrmba yuwanyi. Baki nanankardi barri ninjija ngayangayijba nganyingkanyi nijanganjiyngkanyi. Ngala Kud mili nyulu walkurra nangangi nganyingkanyi nijanganjiyngkanyi. Nyulu mili walkurra nangangi barri. Marda ngambalimi kudanyu ngayangayijba nangangi barri Kudkanyi. Ngambala jingkijbangka Kud, nyulu ngambalangi Buwakanya Kingkarri. Baki marda ngambalimi ngayangayijba nangangi, jingkijbangangi ngambala Kud, baku barri janyulu mili wankamba ngambalanya barri.  
\v 10-11 Dabayi ninya nganyinyi nijanganjinyiwanyi, ngala ninji juka. Baki miku ninjiyanyi mirnarrijba muwa jali ninya daba. Miku. Ngala miku ninjiyanyi juka yurrngumba barri. Jardijba ninji walkurra nganinyi, baki miku nyuliyanyi mili daba ninya nganyinyi nijanganjinyiwanyi. Nani barri miku ninyiyanyi daba yurrngumba barri nijanganjinyiwanyi. Ngawamba ngala nyulu kujajarra janjawala ninyi daba ngala ninji juka. Baki nani barri nyulu ngambalanya dabangka Kudwanyi. Nyulu munyajbangka yalunya, yalu waykurri ngambalanya kijinyi. Yalu wajbayi ngambalanya wabulinyi kijinyi, baki nanankardi barri ngambala jardijbangka mili ngiruka baki mili ngiruka nangangi. Nanankardi barri ngambala jungkuka mili yurlurrmba nangangi barri. Baki nanankardi barri ngambala jungkuka mardumardu muwa nangangi barri Kudkanyi. Ngala miku jangambalanya daba yurrngumba Kudwanyi. Baku barri jangambala jungku mikuyaji kijinyi ngambalangi. Jangambala jungku kingkarri nangandu Kudnyina. Yurrngumba barri jangambala mirnarrijba muwa, jungunkanyi kingkarri nangandu barri. Barriwa.   
\p
\v 12 Ngayu karungka narrinya nanginkanyi jangkurranyi. Jala badajba kiji narrindurri, baki marda narrimi miku balkijba muwa nanankanyi kijinyi. Ngala marda narrimi jungku ngiruka, nanankanyi kijinyi. Marda narrimi jungku mili ngiruka baki mili ngiruka nangangi Kudkanyi yurrngumba barri nanankanyi kijinyi.  
\v 13 Marda narrimi mankumankuwa Jisus Krayis. Marda narrimi durrijba nangangi yuwa yurrngumba barri. Marda narrimi mamanumba nanda waluwinyi yuwa narringi. Barriwa barri bukamba nanda waluwinyi yuwa narringi barri. Marda narrimi yurlurrmba durrijba nanda buyingkinyi yuwa nangangi Jisus Krayiskanyi. Kudiyanymuku yalu majabujba kurdulu nangangi Kudkanyi. Ngawamba yalu jungkuka bijal ngiruka nangangi Jisus Krayiskanyi. Bijal yali durrijba nangangi yuwa Jisus Krayiskanyi, ngala banganumba yali, baki mili yalu durrijba nanda waluwinyi yuwa yalungi barri. Ngala baku barri mili jayalu banganumba nangandurri Jisus Krayisyurri, mili jayalu durrijba nangangi yuwa. Nani barri yalu majabujba kurdulu, yalu durrijbangka waluku yingka yuwa, baki bayngkani yingka yuwa. Ngala jaliyi narri jungku ngiruka nangangi Jisus Krayiskanyi, jaliyi narri kudanyu durrijba nangangi yuwa yurrngumba barri, baki janarri ngirukamba yalunya kurdulu. Janarri ngirukamba yalunya kurdulu, yalu durriykanyi nangangi yuwa Jisus Krayiskanyi yurrngumba barri. Jayalu najba narrinya jungunkanyi kunyba nanganginyina yuwana, baki jayalu jingkijba, yuku jayalu yalu marda jungku kunyba nanganginyina yuwana. Barriwa.   
\p
\v 14 Marda narrimi dadijba jungku ngiruka nangangi Kudkanyi. Marda narri miku wajba yingka Krisjin kijinyi, ngala marda narrimi jungku mardumardu muwa yalungi bukambijuyngka Krisjinmukuyngka. Jaliyi narri miku jungku mardumardu muwa, baki dula barri janarringka wajba kijinyi. Baki nanamuku jala yalu majabujba kurdulu nangangi Kudkanyi, yiningki jayalungka yangkalamba nanganbunanyi Kudnanyi, jaliyi narri jungku kijiyudi. Marda narrimi jungku yurlurrmba nangangi Kudkanyi, barrinani narri malaba nangangi barri. Jaliyi narri jungku nani barri, baki narri jingkijba Kud, janyulu kandimba narrinya yurrngumba barri.  
\v 15 Marda narringkimi najbawa. Narri jingkijbangka Kud, nyulu kandimbaka narrinya, baki nanankardi barri marda narringkimi miku yangkalamba nanganbunanyi Kudnanyi. Jala ngambala yarrijba lamurra mamana baki balkimbaka bukamba nanda mama lamurrawanyi. Baki nani barri jaliyi balki nganinyi jungkuka narrindu, baki nyulu balkimbaka yingkamuku marda. Baki nani barri jaliyi yangkalamba nangka yingka nanganbunanyi Kudnanyi, baki wajba janarrinya kijinyi marda nanangini barri. Yiningki janyulu yabimba yingka nangka mankumankunkanyi balkinyi yajinyi. Yiningki janyulu yabimba nanda yingka nangka yangkalambikanyi nanganbunanyi Kudnanyi.   
\p
\v 16 Yingka wankalanyi, nangangi niji Yisu. Kujba nyuli barnyinyi munjimunji. Jali nyulu wijba barndarri, baki birrkalijba nyuli kudanyu barri. Najba nyuli nangangi kanyiya jirdi kunyunyunyi mamanyi, baki ngajaka nyuli, “Janganinji wajba mamanyi. Janganinji wajba, baki jangayu munyajba ninya wudumbikurri kunyba yaji nanganbunanyi Kudnanyi. Marda ngayimi wudumba nanda kunyba yaji nanganbunanyi, ngala janinya munyajba wudumbikurri, jaliyi nganinji wajba nanginkanyi mamanyi.” Barriwa. Nanamanji barri wankalana yalili ngajaka Kud yajinyi nijanganjimukunyi. Yalili ngajaka Kud, nyulu yabimbiji kunyba yaji yalunginkanyi lirrkanyi jandayngkanyi. Nanda Yisu nyuli lirrka jandanyi nangangi Jakibkanyi, ngala miku nanda jirrinyi yaji nangangi, wudumbikanyi kunyba yaji nanganbunanyi Kudnanyi. Miku nanda jirrinyi yaji nangangi. Ngala ngawamba mamanyi nanganginkanyi mankankanyi, ngawamba nanankanyi jirrinyi yaji nangangi. Baki nanankardi barri nyuli karu nangangi kanyiya, yuku barri janyulu kanyiyawanyi wudumba nanda yaji nanganbunanyi Kudnanyi. Marda narrimi miku jungku barrinani nanda wankalanyi Yisu. Marda narrimi miku kudanyu nulijba yajinyi narringinkanyi mankankanyi barrinani mamanyi baki dungalanyi. Ngala marda narrimi kudanyu nulijba nanankanyi kunybanyi yajinyi nanganbunanyi Kudnanyi.  
\v 17 Baku barri nanda nijanganjinyi nangangi Yisukanyi, nyuli yanyba mududu nangangi Kudkanyi. Nyuli ngajaka Kud, nyulu yabimbiji kunyba yaji nanganginkanyi jandayngkanyi, ngala miku nanganginkanyi lirrkanyi jandayngkanyi, ngala nanganginkanyi burrandiyngkanyi jandayngkanyi. Ngala nanda lirrka jandanyi Yisu, balkijba nyuli muwa. Kudanyu nyuli balkijba muwa mirlarryudi, nulijbangangi nyuli wudumbikanyi kunyba yaji nanganbunanyi Kudnanyi, ngala yurlwayi Kud nangangi. Mikukiyanyi yabimba kunyba yaji nangangi Kudwanyi. Wabula barri nyuli yurlwa wudumbikanyi yaji nanganbunanyi Kudnanyi, baki yurlwayi Kud nangangi barri. Barriwa.   
\p
\v 18-21 Wankalana barri, jali kuyu yalunya Jumuku bayunguna Musiswanyi, baki wanbiya yali kulawirana niji Sinayi. Karrinja yali wayka wilina nanaba kulawirana, baki minimba nangki Kud yalundurri. Murumbayi bukamba yaji kukurduwanyi ngaluwanyi, baki jungku yali barrinani mungana yajina. Miku yaliyi najba yaji. Baki manjijbayi walkurra jangu kulawirarri Kudwanyi. Baki manjijba nyuli walkurra yunkurr, marda ngajarr. Baki manku yali walkurra nyiri, barrinani jala yalu janyba kingkarrinya rabunya, jala yalu balunba kudanyu barri. Baki manku yali Kud yanybikurri. Manku yali Kud yanybikurri yalungi, baki marrala yali. Kudanyu yali marrala jali yalu manku Kud yanybikurri yalungi. Yanybayi Kud nayi barri yalungi. “Miku narriyi karrinja nayiba kulawirrana. Miku narriyi marrimba marniyudinyi. Miku yaliyi karrinja kulawirana yanimal junu, bajangu baki buluki baki jib. Miku yaliyi karrinja kulawirana. Jaliyi yingka karrinja kulawirana, baki janarri daba. Janarri kurdanba nanda yanimal dungalayudinyi.” Barriwa. Nani barri yanybayi Kud, baki marrala yali kudanyu barri. Baki karu yali Musis, “Jaliyi nurru mili manku Kud yanybikurri nurrungi, baki janurrungka janyba bukambiju. Marrala nurru nangangi. Janinji ngajaka Kud nurrungi, nyuluja yanybiji ngawamba nganyi, miku nurrungi barri.” Nani barri yali yanyba nangangi Musiskanyi. Baki nyulu marda marralayi Musis, baki yanyba nyuli, “Marrala ngayu kudanyu barri. Birrirra ngayu mankanyi.” Nani nyuli yanyba. Ngala ngambala Krisjinmuku, miku ngambalimi barrinani nanamuku wankalamuku Jumuku, jali yalu marrala nangangi Kudkanyi. Miku ngambaliyi marrala nangangi Kudkanyi.   
\p
\v 22 Ngala ngambala mirnarrijbangka muwa nangangi, jingkijbangangi ngambala Kud, baku barri jangambala najba Kud. Jangambala jungku mili wanka kingkarri nangandu. Jangambala jungku mili wanka nananyina yajina lalijina, jalili yalu jungku kajamuku Yanjilmuku. Yalili nijarrijba nanda yaji nangangi Kudkanyi lalijina, “Jirusalim Kingkarri.” Baki yingka niji nanankanyi yajinyi lalijina, “Siyun.”  
\v 23 Ngambala Krisjinmuku, ngambala mirnarrijbangka muwa, kirrijbangangi jangambala kingkarri, jungunkanyi ngambala nangandu Kudnyina. Yarrijbayi ngambalanya nanganginmuku jandanyimuku Kudwanyi. Baki nyuli yarrijba ngambalangi niji najana, jungkungangi ngambala yurlurrmba nangangi barri. Jingkijbangka ngambalanya Kudwanyi, ngambala kuyungka nangangi jangkurr Jisus Krayiskanyi. Baku barri janyulu karrinjarrijba ngambalanya walu nangandu Kudwanyi, baki janyulu yanyba manjiykanyi ngambalanya. Baki ngambala jingkijbangka Kud, janyulu manjijba ngambalanya kingkarri jungunkanyi nangandu barri. Jangambala jungku kingkarri malumba yalundu barri, nanamukunyina jali yalu kuyu nangangi jangkurr Kudkanyi, ngala yalungki janyba waluwa barri. Yali kirrijba kingkarri nangandurri Kudyurri waluwa ngambalangi. Jangambala jungku kingkarri malumba yalundu barri. Barriwa.  
\v 24 Narri jingkijbangka nanda jangkurr bulangi wankalawuyayngka buwakulayngka. Nanda lirrka nangangi niji Kayin, baki nanda yingka nangangi niji Yabil. Ngala yabimbayi balki yaji nanganginkanyi kanyiyanyi buwanganjawanyi. Daba nyuli, baki kurdanbayi, baki jurrwayi nangangi ngulya jambana. Nanda barrinani jali najba nanda ngulya yingkawanyi, baki kayayi ngulya nangandurri. Kayayi ngulya, “Kurdanbayi ngana ngakinyi buwanganjawanyi. Kurdanbayi barri. Ngala kurdanbakiyi ngaki buwanganja. Kurdanbakiyi, nyulungangi kurdanbayi ngana.” Barriwa. Baki nani barri marda kurdanba yali Jisus Krayis Jumukunyi, baki jurrwayi nangangi ngulya. Ngala mikukiyanyi kaya nangangi ngulya yingkanyi, nyulu kurdanbiji yalunya, jali yalu kurdanba. Mikukiyanyi kaya nangangi ngulya nani barri. Ngala janyba nangki Jisus Krayis ngambalangi barri, baki nanankardi barri nyulu wajbayi ngambalanya nanganginkanyi buyingkiyngkanyi yuwanyi Kudwanyi. Jaliyi ngambala ngindu muwa ngambalangi balkinyi yajinyi, jaliyi ngambala kuyu nangangi jangkurr Jisus Krayiskanyi, baki janyulu manjamanjamba ngambalangi balki yaji Kudwanyi, baki jangambala jandanyimuku nanganginmuku Kudkanyi. Barriwa.   
\p
\v 25 Narri barri, najbawa narringka, bakiyi narri yurlwa nanganginkanyi jangkurranyi Kudkanyi. Marda narrimi miku yurlwa nanganginkanyi jangkurranyi. Wabula barri wankalana, kudiyanymuku nanamuku Jumuku, yali yurlwa nanankanyi jangkurranyi Kudkanyi, jali karu yalunya Musiswanyi. Miku yaliyanyi ngayangayijba nanankanyi jangkurranyi, baki nanankardi barri dabayi yalunya Kudwanyi. Miku yalungkiyi ngadijba nanganbunanyi. Miku yaliyi wirlku nanganbunanyi. Nyuli daba yalunya, yurlwangangi yali nanganginkanyi jangkurranyi. Baki ngambala barri, ngambala marda mankuyi nangangi jangkurr. Dabayi yalunya wankalamuku Kudwanyi, jali yalu yurlwa nanankanyi jangkurranyi jali yalunya karu Musiswanyi. Ngala jaliyi ngambala yurlwa nanankanyi jangkurranyi jali ngamanya karu Jisus Krayiswanyi, baki janyulu daba ngambalanya kudanyu barri. Miku ngambalakiyi ngadijba nanganbunanyi. Miku ngambaliyi wirlku nanganbunanyi. Janyulu ngambalanya daba kudanyu barri, jaliyi ngambala yurlwa nanganginkanyi jangkurranyi.  
\v 26 Jali yanyba Kud yalungi wankalamukuyngka Jumukuyngka, ngala yalu karrinja wilina nanaba kulawirrana niji Sinayi, jali yanyba Kud yalungi, baki kulbayi jamba. Kulbayi jamba kudanyu barri, jali yanyba Kud yalungi. Ngala nanijba barri yanybaka Kud nayinda barri jangkurr, miku nangkiyi yangkalamba. Yanybaka Kud nayi barri, “Mili barndaykamba jangayu wayawayamba jamba barri wandijiyana. Mili barndaykamba jangayu wayawayamba jamba, baki laliji marda.” Nani barri yanybaka Kud.  
\v 27 Nanda jangkurr nangangi Kudkanyi duja barri. Mili barndaykamba kulbaja jamba wandijiyana. Baki nanamanji barri janyulu bukamba yaji Kudwanyi. Janyulu bukamba jamba marda laliji, marda bukamba yaji marda nanamanji barri, jalija nyulu wayawayamba jamba baki laliji Kudwanyi. Ngala nanamuku barri jala yalu kuyu nangangi jangkurr, miku yalunyiyi bukamba, ngala janyulu marrimba yalunya mardarda Kudwanyi. Janyulu marrimba yalunya mardarda kingkarri nangandu barri. Barriwa.   
\p
\v 28 Marda ngambalimi mirnarrijba muwa, jingkijbangangi ngambala Kud, janyulu marrimba ngambalanya mardarda. Marda ngambalimi yanyba mududu nangangi. Marda ngambalimi wajba Kud ngambalanginkanyi kunybanyi jangkurranyi. Marda ngambalimi mankumankuwa Kud, nyulu kudukudu, nyulu walkurramirra, nyulu ngirukamirra, nyulu wirimalaru ngambalangi. Marda ngambalimi mankumankuwa Kud nani barri, jala ngambala yanyba mududu nangangi, jala ngambala wajba Kud ngamanginkanyi kunybanyi jangkurranyi. Baki janyulu mirnarrijba muwa Kud ngambalangi barri.  
\v 29 Ngala jaliyi ngambala miku ngayangayijba nangangi Kudkanyi, jaliyi ngambala miku jungku yurlurrmba nangangi, baki janyulu bukamba ngambalanya Kudwanyi. Jala nyulu yajba janguwanyi kurnda, baki nyulu bukambaka nanda kurnda. Mikuyaji kurndanyi. Baki nani barri janyulu bukamba ngambalanya Kudwanyi, jaliyi ngambala yurlwa nanganginkanyi jangkurranyi. Barriwa.   
\c 13  
\p
\v 1 Marda narringkimi yuwajiwa maruka muwa. Bukambiju ngambala Krisjinmuku, ngambala kanyiyamuku nangangi Jisus Krayiskanyi, nyulu ngambalangi buwakanya. Baki nanankardi barri marda narringkimi maruka muwa.  
\v 2 Marda narrimi kandimba yalunya ngurranyimuku jala yalu yidamba narrinya. Marda narrimi kuyu yalunya narringinkurri barndarri. Barndaykamba barri jali jungku nanda wankalanyi Yabrayam nanganginyina barndana, baki yidamba yali Yabrayam ngurranyimukunyi. Kandimbayi yalunya Yabrayamwanyi. Yakanajba nyuli yalunya, ngamu nganinyimuku, ngala baku barri nyuli jingkijba yalunya, yalu Yanjilmuku. Jabarri nani barri baku yingkawanyi najbayi Yanjil, jabarri baku barri yingkawanyi. Baki nani barri marda narrimi kandimba yalunya ngurranyimuku. Barriwa.  
\v 3 Marda narrimi mankumankuwa yalunya jala yalu jungku brisinyina. Baki marda narrimi mankumankuwa yalunya, jala yalu jungku jirdi walkurrayngka kijinyi barri. Jalimi narri jungku brisinyina, jalimi narri jungku jirdi walkurrayngka kijinyi, baki narrimi nulijba yalungi yingkamukuyngka Krisjinmukuyngka, yalu kandimbikanyi narrinya barri. Baki nani barri marda narrimi kandimba yalunya barri. Marda narrimi yabimba kunyba yaji yalungi, jala yalu jungku brisinyina. Barriwa.   
\p
\v 4 Nimbala maykarra, marda nimbalimi yabimba yurlurrmba yaji. Ninji barri, nangangi maninganja, marda ninjimi yurlwa yingkanyi nganiyngkanyi, marda ninjimi jungku yurlurrmba nangandu nganyinyina nawinganjana yurrngumba barri. Baki ninji barri nangangi nawinganja, marda ninjimi yurlwa yingkanyi jibarrinyi, ngala marda ninjimi jungku yurlurrmba nangandu nganyinyina maninganjana yurrngumba barri. Nani barri marda nimbalimi yabimba yurlurrmba yaji, jingkijbangangi nimbala Kud, janyulu karrinjarrijba bukambiju ngambalanya walu nangandu Kudwanyi. Baki nanamuku jala yalu miku yurlwa yingkanyi, jala yalu kuluka yingkana, janyulu karrinjarrijba yalunya marda walu nangandu, baki janyulu daba yalunya Kudwanyi. Janyulu daba yalunya kudanyu barri, yurlwangangi yalu nanganginkanyi jangkurranyi maykarrayngka. Barriwa.   
\p
\v 5 Marda narringkimi miku yurrngumba mankumanku dungalanyi. Marda narrimi miku kuliwijba dungalanyi. Jaliyi ngawamba bijal dungala nganyindu, baki marda ninjimi mirnarrijba muwa. Marda ninjimi mirnarrijba muwa nanankanyi bijalanyi dungalanyi, yanybakangangi jangkurr najana Kudkanyi nayi barri, “Miku ngayiyi yingijba narrinya. Jangayu jungku narrindu yurrngumba barri, baki jangayu lalanba narrinya.” Nani barri yanybayi Kud. Marda narrimi mankumankuwa nanda nangangi jangkurr, jala ngawamba bijal dungala narrindu.  
\v 6 Wankalana barri yarrijbayi jangkurr najana Kudkanyi nganinyiwanyi. Nayinda nangangi jangkurr. “Ngana kandimbaka Kudwanyi. Nyulu lalanbawarr ngaki. Nyulu ngana lalanbaka. Baki nanankardi barri miku ngayiyi marrala yajinyi. Mikuwali yingkawanyi yabimba balki yaji ngaki, nganangangi lalanbaka Kudwanyi. Jala ngana lalanbaka Kudwanyi, baki mikuwali yabimba balki yaji ngaki yingkawanyi.” Barriwa. Nani barri yanybayi nanda wankala. Baki nani barri, marda ngambalimi mankumankuwa Kud, nyulu lalanbaka ngambalanya yurrngumba barri, baki marda ngambalimi miku marrala yalungi yingkamukuyngka.   
\p
\v 7 Marda narrimi mankumankuwa yalunya, jali yalu narringi mambukamuku waluwa barri. Yali karu narrinya nanankanyi jangkurranyi nanganginkanyi Kudkanyi. Marda narrimi mankumankuwa yalunya, yanka yalili jungku yurlurrmba nangangi Jisus Krayiskanyi. Yurrngumba barri yalili jungku yurlurrmba nangangi nanankurri jali yalungka janyba. Miku yalungkiyanyi yangkalamba nanganbunanyi Jisus Krayisnanyi jali yalu jungku kijiyudi. Yalili jingkijba Jisus Krayis, janyulu marrimba yalunya mardarda yurrngumba kingkarri nangandu barri. Marda narrimi mankumankuwa nanamuku narringinmuku mambukamuku, yanka yalili jungku. Baki marda narrimi jungku yurlurrmba nangangi Kudkanyi yurrngumba barri.  
\v 8 Janyba yalungki nanamuku mambukamuku, ngala Jisus Krayis barri nyulu jungkuka wanka yurrngumba barri. Yurrngumba nyulu jungkuka wanka kingkarri nangandu Kudnyina. Miku nangkiyi mili janyba. Baki nyulu nanamannga wabula, baki nanijba, baki baku barri juju. Nanamannga nyulu jungkuka yurrngumba barri. Yurrngumba nyulu jungkuka bukambijuyngka. Baki nangangi jangkurr jungkuka duja yurrngumba barri. Yurrngumba nangangi jangkurr nanamannga yalungi barri bukambijuyngka.  
\v 9 Marda narrimi mankumankuwa nanda jangkurr jali yalu milidimba narrinya. Jaliyi narri durrijba nanda yalungi jangkurr nangangi Jisus Krayiskanyi, baki janarri jungku yurlurrmba nangangi Kudkanyi, baki janyulu yabimba narrinya ngiruka nangangi. Marda narrimi miku kuyu yinini jangkurr. Jaliyi narri durrijba yinini jangkurr, baki miku narriyi jungku yurlurrmba nangangi Kudkanyi. Nanda wankalanyi yuwa yanybayi wakardaykanyi narringka mankanyi, baki jarrkanyi yingka mama, ngala miku jarrkanyi yingka mama. Ngala barriwa barri bukamba nanda yuwa narringi. Mikukimi nanangini yuwawanyi marrimba narrinya mardarda. Miku. Ngala jaliyi narri durrijba nanda buyingkinyi yuwa nangangi Jisus Krayiskanyi, baki janyulu marrimba narrinya mardarda barri.   
\p
\v 10-12 Wankala barri wajbayi Musis yuwanyi Kudwanyi. Nyuli wajba Musis nanankanyi yuwanyi, yalu dikarriykanyi barnyi nangangi Kudkanyi. Baki yali yabimba nanda yuwa yurrngumba barri barndaykamba jali nangka bukamba janja, baki mili baku barri barndaykamba jali nangka bukamba janja. Nyulili wudumba barnyi nanangini walkurrawanyi mambukawanyi jurjkanyi. Nyulili wudumba barnyi, bakili nyulu kurdanba nangangi Kudkanyi. Nyulili wudumba ngulya, bakili nyulu kuyu nanda ngulya kalawuyngkurru nanaba kudanyu malabana yajina jurjina. Nyulili bunyanyarrijba ngulya yajina nanaba barri. Jalili nyulu yabimba yaji nani barri, baki mikukiyanyi mili mankuwa yalungi balki yaji Kudwanyi. Miku nyuliyanyi mili mankuwa nanda balki yaji, jali yalu yabimba Jumukunyi. Nani barri janyba nangki nanda barnyi yalunginkanyi balkinyi yajinyi. Barriwa. Nyulili kuyu nanda ngulya kalawuyngkurru jurjina mambukawanyi jurjkanyi, ngala nanda mankanyi barri, yalili kuyu danbiyurri. Yalili kuyu nanda mankanyi danbiyurri barrikina lukuluku nananyina barrawuyabarrawuyana, bakili yalu dikarrijba nanda mankanyi. Yalili munyurrmba mankanyi. Miku yaliyanyi jarrba nanda barnyi mambukamukunyi jurjkanyi. Miku yaliyanyi jarrba, malabangangi nanda barnyi nangangi Kudkanyi. Mikukiyanyi munyajba yalunya jarrkurri barnyi Kudwanyi. Nani barri jirrinybayi Musis Kudwanyi, yalu yabimbiji yaji yurrngumba barri jali nangka bukamba janja, baki mili baku jali nangka bukamba janja. Ngala jingkijbayi Kudwanyi nanda jalija nyulu yabimba baku barri. Janyulu manjijba nangangi jandanyi Jisus Krayis wayka jambarri. Baki janangka janyba Jisus Krayis ngamanginkanyi balkinyi yajinyi barrinani janyba nangki nanda barnyi yalunginkanyi balkinyi yajinyi. Yalili kuyu nanda mankanyi danbiyurri barrikina lukuluku nananyina yajina munyurrmbikanyi, baki nani barri marda yali kuyu Jisus Krayis danbiyurri barrikina lukuluku nananyina barrawuyabarrawuyana kurdanbikanyi barri. Janyba nangki Jisus Krayis danbina barrikina. Jali nangka janyba, baki jurrwayi nangangi ngulya, baki nani barri nyuli bukamba nanda yuwa kurdanbikanyi barnyi nangangi Kudkanyi. Bukamba nyuli nanda yuwa. Baki marda yalimi miku kurdanba barnyi nangangi Kudkanyi. Marda yalimi miku kurdanba barnyi nangangi, janybangangi nangki Jisus Krayis ngamanginkanyi balkinyi yajinyi, bukambijuyngka wandijiyana. Barriwa.   
\p
\v 13 Nanda walkurra jurj yalungi Jumukuyngka, nanda kalawuyngkurru nananyina barrikina, baki yalili yabimba waluwinyi yuwa nanaba jurjina. Ngala yali kurdanba Jisus Krayis danbina barrikina. Marda ngambalimi barriwa yingijba nanda yuwa kurdanbikanyi barnyi nangangi Kudkanyi. Jaliyi ngambala barriwa yingijba nanda yuwa, baki nanda barrinani ngambala yingijbangka nanda walkurra jurj, barrinani ngambala jilajbangka danbiyurri nangandurri Jisus Krayisyurri jungunkanyi nangandu. Yali ngirrikimba Jisus Krayis. Yali kakalijba nangangi. Yali daba, baki yali linjumba kudanyu barri. Baki yuku barri jayalu yabimba nanamannga yaji ngambalangi barri. Marda ngambalimi munyajba yalunya kakaliykurri ngamanjalu, daykurri ngamanjalu, linjumbikurri ngamanjalu. Yuku jayalu yabimba nanamannga yaji ngambalangi barrinani yali yabimba yaji nangangi Jisus Krayiskanyi waluwa barri.  
\v 14 Marda ngambalimi miku balkijba muwa, jaliyi ngamanjalu linjumba nani barri. Jaliyi yalu yabimba nanda balki yaji ngambalangi barri, baki marda ngambalimi miku balkijba muwa, jingkijbangangi ngambala, miku ngambaliyi jungku wanka nayiba wayka jambana yurrngumba. Miku. Ngala ngambala ngurungurujbangka nanankanyi yingkanyi yajinyi lalijina. Ngambala ngurungurujbangka nanankanyi yingkanyi yajinyi jalija ngambala jungku baku barri kingkarri nangandu Kudnyina.  
\v 15 Miku ngambalimi wajba Kud barnyinyi nanijba barri, ngala ngambala wajbangka Kud ngamanginkanyi kunybanyi jangkurranyi. Ngambala yanybaka mududu nangangi Kudkanyi. Ngambala karungka Kud, ngambala mirnarrijba muwa nangangi, janybangangi nangki Jisus Krayis ngamanginkanyi balkinyi yajinyi. Baki nanankardi barri ngambala likalika kurdulu nangangi Kudkanyi nanijba barri. Baki ngambala karungka yalunya yingkamuku nangangi Jisus Krayiskanyi, nyulu ngambalangi mambuka, nyulu ngambalangi wirimalaru.  
\v 16 Marda narrimi miku mamanumba yabimbikanyi kunyba yaji yalungi yingkamukuyngka. Marda narrimi kandimba yalunya yurrngumba barri. Jalija narrinya najba Kudwanyi, kandimbikurri yalunya, yabimbikurri kunyba yaji yalungi, baki janyulu nyulu mirnarrijba muwa narringi barri. Wabula barri, waluwa nangki janyba Jisus Krayis, baki nanamuku Jumukunyi, yalu wajbayi Kud barnyinyi, baki nyuli mirnarrijba muwa yalungi. Ngala nanijba barri nyulu mirnarrijba muwa ngambalangi jala ngambala kandimba yalunya yingkamuku, jala ngambala yabimba kunyba yaji yalungi. Baki nanda barrinani ngambala yabimbaka nanda yaji nangangi Kudkanyi, jala ngambala yabimba kunyba yaji yalungi barri. Barriwa.   
\p
\v 17 Marda narrimi ngayangayijba yalungi barri, mambukamukuyngka narringinkanyi jurjkanyi. Yalu lalanbaka narrinya. Yalu najbawa narrinya yurrngumba barri. Nani barri yalu kandimbaka narrinya, yalu milidimbaka narrinya, narri jungunkanyi yurlurrmba nangangi Kudkanyi. Nani barri yalu lalanbaka narrinya, jingkijbangangi yalu, baku barri jayalu karrinja walu nangandu Kudnyina, baki jayalu karu Kud, yanka narri jungku jali yalu narringi mambukamuku. Jaliyi narri ngayangayijba yalungi, baki jayalu mirnarrijba muwa, ngala yalu lalanba narrinya mambukamukunyi jurjkanyi. Ngala jaliyi narri miku ngayangayijba yalungi, baki yuwajiwa jayalu lalanba narrinya, ngala miku narriyi jardijba mili ngiruka nangangi Kudkanyi. Jayalu balkijba muwa narringi, ngala yaluja lalanbawa narrinya. Ngala miku yaliyi kudanyu kandimba narrinya, jaliyi narri miku ngayangayijba yalungi barri. Baki miku narriyi jardijba mili ngiruka nangangi Kudkanyi. Barriwa.   
\p
\v 18 Marda narrimi yanyba mududu nangangi Kudkanyi ngaki yurrngumba barri. Ngayu jingkijbangka yaji, ngayu jungkuka ngiruka nangangi Kudkanyi, yanybangangi ngaka muwa, ngayu jungkuka yurlurrmba nangangi Kudkanyi. Baki nanginmuku ngakindu, yalu marda jungkuka barrinani ngayu. Marda narrimi yanyba mududu nangangi Kudkanyi yalungi marda. Nurru nulijbangka yabimbikanyi ngawamba nanda jala nulijbangka Kud nurrungi yabimbikanyi yaji. Yurrngumba nurru nulijbangka, yabimbikanyi ngawamba nanda kunyba yaji jala nyulu nulijba.  
\v 19 Kudanyu ngayu ngajakangka narrinya, narri yanybiji mududu nangangi Kudkanyi ngaki barri. Janarri ngajaka Kud ngaki, jangana nyulu mili manjijba narrindurri marndakaja barri. Jangayu mili yidamba narrinya. Barriwa.   
\p
\v 20-21 Mili wankambayi ngambalangi mambuka Kudwanyi. Jali nangka Jisus Krayis, baki mili wankambayi Kudwanyi. Jisus Krayis, nyulu nanda walkurra lalanbawarr ngambalangi. Nanangini nganinyiwanyi, nyulu lalanbaka nanganginmuku jibmuku, baki nani barri nyulu lalanbaka ngambalanya Krisjinmuku Jisus Krayiswanyi. Janyba nangki ngambalangi, baki nanankardi barri ngambala jingkijba Jisus Krayis, baku barri janyulu marrimba ngambalanya mardarda yurrngumba barri kingkarri nangandu. Ngambala yanybaka mududu nangangi Kudkanyi, jala nyulu yabimbaka ngambalanya jungunkanyi mardumardu muwa nangangi. Ngambala ngajakangka bulanya, Kud baki Jisus Krayis, jabula bula yabimba narrinya jungunkanyi ngiruka bulangi. Jabula yabimba narrinya jungunkanyi ngiruka, baki janarri yabimba bukamba nanda jala bula nulijba narringi yabimbikanyi yaji. Ngambala wajbangka Jisus Krayis ngamanginkanyi kunybanyi jangkurranyi, nyulungangi wirimalaru bukambijuyngka yalungi Krisjinmukuyngka wandijiyana yurrngumba barri. Barriwa.   
\p
\v 22 Ngakinmuku bababanyamba ngambalaka, kudanyu ngayu ngajakangka narrinya, narri mankunki nayinda jangkurr, narringka mankumankunki nanginkanyi jangkurranyi. Yarrijba ngayi nayinda jangkurr najana narringi, baki janarri mirnarrijba muwa nanginkanyi jangkurranyi. Jaliyi narringka kudanyu mankumanku nanginkanyi jangkurranyi, baki janarri jungku mili ngiruka nangangi Kudkanyi. Miku nayinda kaja jangkurr ngayu yarrijba najana narringi barri. Ngawamba kujajarra.  
\v 23 Ngambalangi bababanyamba ngambalaka, Dimudi, nyulu jungkuyi brisinyina, ngala yali muningka manjijba barri. Jaliyi nyulu wanbiya ngakindu marndakaja barri, baki jangayu kuyu ngakindu, jalija ngayu yidamba narrinya barri.  
\v 24 Nurru manjijbangka jangkurr yalundurri, mambukamukuyngkurri narringinkanyi jurjkanyi, baki bukambijuyngkurri Krisjinmukuyngkurri narrindu. Baki yalu marda manjijbangka jangkurr narrindurri bukambijunyi Krisjinmukunyi jalili yalu jungku nananyina yajina niji Yidali. Yalu marda manjijbangka jangkurr narrindurri.   
\p
\v 25 Nurru ngajakangka Kud, nyulu yabimbiji kunyba yaji narringi barri. Yurrngumba janyulu yabimba kunyba yaji narringi. Barriwa barri. Bukamba nayinda jangkurr.