\id GAL Karrwa (Garawa) 1983, 1991 Galatians. Cleaned up after publishing, 970409. 
\h Galatians 
\toc1 MANJIJBA NGAYU JANGKURR NARRINDURRI YAJINA KALAJIYA 
\toc2 Galatians 
\mt1 MANJIJBA NGAYU JANGKURR NARRINDURRI YAJINA KALAJIYA  
\c 1  
\p
\v 1-2 Ngayu, ngaki niji Bul. Ngayu manjijba nayinda jangkurr najana narrindurri. Ngayu manjijba nayinda jangkurr narrindurri Krisjinmukuyngkurri nananyina walkurranyina yajina niji Kalajiya.  
\p Bula ngani manjijba, Jisus Krayiswanyi baki Buwakayu Kudwanyi. Bula ngani manjijba, milidimbiji yingkamuku bulangi. Mikukiyanyi manjijba ngana nganinyiwanyi, ngala bula ngani manjijba, Jisus Krayiswanyi baki Buwakayu, nanda jali wankamba Jisus Krayis mili.  
\p Nurru manjijbangka nayinda jangkurr narrindurri. Ngayu marda ngakinmukunyi kandimukunyi nayiba ngakindu, nurru manjijbangka jangkurr narrindurri.  
\v 3-5 Yanyba nurri mududu bulangi Kudkanyi marda Jisus Krayiskanyi. Ngajaka nurru bulanya, jabula yabimbiji kunyba yaji narringi, baki janarri jungku mardumardu muwa. Janyba nangki Jisus Krayis. Janyba nangki ngamanginkanyi balkinyi yajinyi. Nganinyimukunyi yalu yabimbaka balki yaji, kudukudu balki yaji yurrngumba. Ngala Jisus Krayiswanyi, nyuli yabimba kunyba yaji yurrngumba. Nyuli yabimba nanda jali nulijba Kud nangangi yabimbikanyi. Jungku nyuli kunyba nangangi Kudkanyi yurrngumba, baki janyba nangki ngamanginkanyi balkinyi yajinyi. Manjijbayi Jisus Krayis Kudwanyi janybikanyi nangka ngambalangi, baki nanankardi ngambala jungkuka yurlurrmba nangangi Kudkanyi nanijba barri. Baki nanankardi barri, baku jalija ngambalaka janyba, jangambala jungku wanka nangandu yurrngumba. Ngambala mirnarrijba muwa nangangi Kudkanyi. Nyulu walkurramirra mambuka. Baki baku yurrngumba janyulu walkurramirra mambuka ngambalangi. Mikuwali yingka walkurra barrinani nyulu. Barriwa.   
\p
\v 6 Ngala manmala ngayu narringi. Wabula ngayi milidimba narrinya nanankanyi jangkurranyi nanganginkanyi Jisus Krayiskanyi, baki narri kuyuyi nanda jangkurr. Narri durrijbayi nangangi jangkurr Jisus Krayiskanyi, nanda jali yarrijba narrinya nanganginmuku durrijbawarrmuku. Nanda jangkurr nangangi duja, yurlurrmba. Waluku narri durrijbayi nangangi jangkurr. Ngala baku mardunguji narri yingkijbayi nanda nangangi jangkurr, narringki yangkalamba nanamunanyi jangkurrnanyi, baki nanijba narri durrijbangka yinini jangkurr.  
\v 7 Yingkamukunyi yali karu narrinya nanankanyi yingkanyi jangkurranyi, yingkamukunyi jala miku yalimi kuyu yurlurrmba jangkurr nangangi Jisus Krayiskanyi. Yalu balkimuku milidimbawarrmuku. Yangkalamba narringki nanankardi dujananyi jangkurrnanyi. Yangkalamba narringki nanankurri yingkayurri jangkurryurri, ngala miku nanda duja jangkurr.  
\v 8-9 Nurri milidimba narrinya nanankanyi duja jangkurranyi nangangi Jisus Krayiskanyi. Ngawamba nanda nangangi jangkurr duja, ngala yinini nanda jangkurr, miku nanda duja jangkurr. Jalimi nurru karu narrinya yinini jangkurranyi, baki miku nanda duja. Jaliyi yingkawanyi karu narrinya yinini jangkurranyi, baki miku nanda duja marda. Jaliyi Yanjilwanyi karu narrinya yinini jangkurranyi, baki miku nanda duja marda. Ngawamba nanda jangkurr, milidimba jala nurru narrinya wabula, ngawamba nanda jangkurr duja. Jaliyi yingkawanyi milidimba narrinya yinini jangkurranyi, baki mikujiyi manku nangangi jangkurr. Jaliyi yingkawanyi milidimba yinini jangkurranyi, baki baku barri, manjijbaja nanda Kudwanyi wayka jangurri Yilyurri. Kudanyu nurru karungka narrinya nanankanyi jangkurranyi. Jirrinyi nanda jangkurr. Barriwa.   
\p
\v 10 Jala ngayu yanyba nani barri, baki yanka narringka mankumanku ngaki. Mankumanku kuna narringka ngaki, ngayu nulijba yalungi yingkamukuyngka, yalu barrarrakiykanyi ngana. Ngala miku. Miku ngayimi nulijba yalungi, yalu barrarrakiykanyi ngana. Ngala ngayu nulijba nangangi Kudkanyi, nyulu barrarrakiykanyi ngaki. Milidimba ngayimi yalunya, ngawamba nanankanyi jangkurranyi yurlurrmba yurrngumba. Jalimi ngayu nulijba yalungi, yalu barrarrakiykanyi ngana, baki miku ngayimi jungku wakiwarr nangangi Jisus Krayiskanyi, baki miku ngayimi milidimba yalunya nanganginkanyi duja jangkurranyi. Barriwa.   
\p
\v 11-12 Narri, ngakinmuku bababanyamba ngambalaka. Nanda jangkurr, milidimba jala ngayu narrinya, mikukiyanyi wajba ngana jangkurranyi nganinyiwanyi. Miku. Ngala nyuli wajba ngana nanankanyi jangkurranyi Jisus Krayiswanyi. Ngawamba nanganginkanyi jangkurranyi ngayu milidimba. Miku ngayimi milidimba yingkanyi nganiyngkanyi jangkurranyi. Ngawamba nanganginkanyi jangkurranyi Jisus Krayiskanyi. Barriwa.  
\v 13-14 Jingkijba nganarri wabula, waluwa jali ngayu Krisjin. Jingkijba narri ngaki yuwa nanamanji, ngayili yabimba kiji yalungi, kuyu jali jangkurr nangangi Jisus Krayiskanyi. Ngayiyala kurrkunba yalunya kuyunkanyi nangangi jangkurr. Yabimba ngayili kudukudu balki yaji yalungi, jandanyimukuyngka Kudkanyi. Miku ngayiyanyi durrijba nanda yuwa Jisus Krayiskanyi, ngala ngayi durrijba nanda nurrungi wankalanyi yuwa, Jukanyi. Kudanyu ngayili durrijba nanda yuwa. Jungku ngayili kunybamirra nanankanyi yuwanyi. Yingkamuku yalili jungku bijal kunyba nanankanyi yuwanyi, ngala ngayili jungku kunymamba nanankanyi yuwanyi. Ngala miku ngayiyanyi kuyu jangkurr nangangi Jisus Krayiskanyi. Miku ngayiyanyi kuyu nangangi jangkurr nanamanji. Barriwa.   
\p
\v 15-17 Ngala ngana nyuli yarrijba Kudwanyi. Ngala ngayu mikuyaji nanamanji bardardanyi, ngana nyuli yarrijba wakinki nangangi baku. Baku barri, ngana minimbayi nanganginkanyi jandayngkanyi Kudwanyi. Najba ngayi nangangi jandanyi, Jisus Krayis, baki yanyba nyuli ngaki. Karuyi ngana, ngayu milidimbiji yalunya ngurranyimuku nangangi, ngayu milidimbiji yalunya jala yalu miku Jumuku. Baki miku ngayiyanyi jila kula Jirusalimyurri. Miku ngayiyanyi jila yalundurri manjijba jali Jisuswanyi, yanybiji yalungi. Miku ngayiyanyi ngajaka yingka nanankanyi jalija ngayu yabimba. Ngala ngayi jilajba karri yingkayurri yajiyurri, niji Yarabiya. Baki baku ngayi wijba langki nanankurri yajiyurri Damaskusyurri.  
\v 18 Nanaba ngayi jungku kujarrana yingamalinyina kindilkurrinyina, baki jilajba ngayi kula. Jilajba ngayi nanankurri Jirusalimyurri yidambiji Bida. Jungku ngayi nangandu, nanaba nanganginyina barndana kujarra wik.  
\v 19 Nanamanji barri, jali ngayu jungku nanaba, ngawamba ngayi najba Jayims, jala kanyiya ngambalangi mambukanyi Jisus Krayiskanyi. Miku ngayiyanyi najba nanamuku yingkamuku, manjijba jali Jisus Krayiswanyi. Ngawamba ngayi najba Jayims nanamanji jali ngayu yidamba Bida. Barriwa.   
\p
\v 20 Nayinda jangkurr jala ngayu yarrijba, nayinda duja jangkurr. Jingkijba ngana Kudwanyi, miku ngayimi jujijba.  
\v 21 Baki jilalajba ngayi langki yingkayurri yajiyurri, niji Siriya, baki mili langki nanankurri yajiyurri niji Silisiya.  
\v 22 Nanamanji barri nanamuku Krisjinmuku jurjina kularra Judiya, miku nganjaliya jingkijba. Miku nganjaliya jingkijba, ngayu kuyunkanyi jangkurr nangangi Jisus Krayiskanyi.  
\v 23 Ngala yali manku jangkurr jali yalu yingkamuku yanyba ngaki. Yanyba yali, “Nanda Bul, wabula nyulili yabimba kiji yalungi Krisjinmukuyngka, ngala nanijba nyulu karungka yingkamuku jangkurranyi Jisus Krayiskanyi. Wabula nyuliyala jakajba nanda yuwa Jisus Krayiskanyi, ngala nanijba nyulu milidimbaka yalunya durriykanyi nanda yuwa nangangi.” Barriwa. Nani yali yanyba ngaki.  
\v 24 Baki nanankardi nanamuku Krisjinmuku yali mirnarrijba muwa ngaki. Yali wajba Kud kunybanyi jangkurranyi ngaki.   
\c 2  
\p
\v 1 Baku barri juju, 14 kindilkurrinyi baku, mili ngayi wijba kula Jirusalimyurri. Nanda Barnabas, nyuli jila ngakindu, baki kuyu ngali yingka marda ngalindu, niji Didus.  
\v 2 Jilajba ngayi kularriji Jirusalimyurri, karungangi ngani Kudwanyi, ngayuja jilajba nanankurri. Jali ngayu wanbiya, baki jilajba ngayi yalundurri malbumalbuyurri jurjkanyi. Karu ngayi yalunya nanankanyi jangkurranyi, milidimba jali ngayu yalunya ngurranyimuku nangangi Jisus Krayiskanyi. Nulijba ngayi yalungi malbumalbunyi, yalu jingkiykanyi nanda jangkurr jali ngayu milidimba yalunya. Nulijba ngayi yalungi, yalu jingkiykanyi nanda jangkurr yanyba jali ngayu, yurlurrmba nanda jangkurr. Miku ngayiyanyi nulijba yalungi, yalu yanybikanyi ngaki, barimba ngayi milidimba yalunya. Barriwa.  
\v 3-4 Nanda kandi ngaki Didus, miku nyuli Ju, nyuli ngurranyi, nyuli Krik, baki nanamukunyi Krikmukunyi, miku yalili kaburrmba mankanyi. Miku yalili kaburrmba mankanyi, ngala nanda yuwa Jukanyi, wajba jali Musiswanyi, yanybaka nanda yuwa kaburrmbikanyi mankanyi. Ngaki kandi Didus, nyuli Krisjin, ngala miku nyuli kaburr. Baki nanamukunyi malbumalbumukunyi jurjkanyi, miku yaliyanyi yanyba, marda nyulimi jungku kaburr. Miku yaliyanyi yanyba nani. Yuku nyuluja jungku miku kaburr. Ngala yingkamuku barri yali jujijbawarrmuku, yanyba yalungki ngamu yali krisjinmuku, ngala miku. Jujijba yali. Ngala yuwajiwa yali jungku yalundu Krisjinmukunyina. Yali nulijba jingkiykanyi nurrunya, jaliyi nurru ngayangayijba nanginkanyi yuwanyi Musiskanyi. Nulijba yali bukambijuyngka, ngayangayiykanyi yuwanyi Musiskanyi, kaburrmbikanyi mankanyi. Yanyba yalungki nangangi Diduskanyi, mardakimi jungku kaburr, barrinani yalu Jumuku bukambiju kaburrwaburrmuku. Ngala nurri barri yanyba, “Miku barri, miku. Nayinda Didus, miku nyulu Ju. Nyulu Krik, baki miku yalili kaburrmba mankanyi Krikmukunyi. Mardakimi ngawamba Jumuku ngayangayijba yuwanyi Musiskanyi. Miku ngurranyimuku.” Barriwa.  
\v 5 Miku nurriyanyi kuyu yalungi jangkurr nani, kaburrmbikanyi mankanyi. Miku nyuliyanyi yanyba nani Jisus Krayis, kaburrmbikanyi yalunya mankanyi, baki miku nurriyanyi yangkalamba nanda nangangi jangkurr. Nurrili marrimba nangangi jangkurr mardarda. Nurrili yanyba ngawamba nanda yurlurrmba jangkurr nangangi Jisus Krayiskanyi. Barriwa.   
\p
\v 6 Nanamuku malbumalbu jurjkanyi Jirusalim, yingkamuku yalungkili yanyba nanamukuyngka, yalu mambukamuku jurjkanyi. Ngala miku ngayimi jingkijba yalunya, yiningki yalu jungku mambukamuku jurjkanyi. Miku ngayimi jingkijba yalunya, ngala nayinda ngayu jingkijba, bukambiju ngambala Krisjinmuku, ngambala nanamannga jungkuka nangangi Kudkanyi. Mikukimi yanyba Kud, “Nayinda nyulu walkurra mambuka, ngala nayinda yingka ngawamba bayakarda nyulu.” Mikukimi yanyba Kud nani, nyulungangi marukangka muwa bukambijuyngka nanamannga. Miku yingka kudanyu, ngala yingka bijal. Marukangka nyulu muwa bukambijuyngka nanamannga. Ngala nanamukunyi malbumalbunyi, miku ngana yaliyanyi ngajaka yanybiji yingka mili jangkurr. Miku. Yuku barri bukamba duja nanda jangkurr jali ngayu milidimba yalunya.  
\v 7-8 Yali jingkijba nayi. Yarrijbayi ngalinya Kudwanyi, ngana baki Bida. Yarrijba nyuli ngalinya baki yabimba nyuli ngalinya ngiruka milidimbikanyi nanankanyi kunybanyi jangkurranyi nanganginkanyi Jisus Krayiskanyi. Nani yabimbayi ngalinya ngiruka Kudwanyi. Baki manjijbayi Bida Jisus Krayiswanyi milidimbiji yalunya, Jumuku, baki nanamannga barri, ngani manjijba Jisus Krayiswanyi milidimbiji yalunya ngurranyimuku nangangi.  
\v 9 Nanamuku nganinymuku, Jayims, baki Bida, baki Jun, yingkamuku yali yanyba yalungi, yali malbumalbu jurjkanyi. Nanamukunyi yali jingkijba Kud, ngana nyuli yarrijba milidimbiji yalunya ngurranyimuku. Baki marrimba yali ngalinya marni, ngakindu baki Barnabasnyina. Marrimba yali ngalinya marni, baki nanankardi jingkijba nurrungkili yuwanyi milidimbikanyi yalunya. Baki yanyba nurrungki, yuku barri jangali milidimba yalunya ngurranyimuku, ngala jayalu milidimba yalunya Jumuku. Nani nurrungki yanyba. Barriwa.  
\v 10 Ngala yali ngajaka ngalinya nayi, ngali marda narri ngurranyimukunyi, marda ngambalimi mankuwa nanamuku Krisjinmuku kularra Jirusalim, marda ngambalimi mankuwa yalunya jala jungku mikuyaji dungalanyi wudumbikanyi mama marda jumbala. Marda ngambalimi mankuwa yalunya, baki wajba yalunya dungalanyi. Nani yali ngajaka ngalinya, baki mirnarrijba ngayu muwa yabimbikanyi nani. Ngayili nulijba waykanyi yalunya dungalanyi. Barriwa.   
\p
\v 11-12 Baku barri nanda Bida, nyuli jilajba langki nanankurri Yandiyukyurri. Jilajba nyuli langki yidambiji yalunya Krisjinmuku ngurranyimuku nanaba. Wanbiya nyuli, bakili nyulu jungku yalundu, yalunginyina barndana. Jarrba nyulili mama yalundu marda. Ngala baku barri, nanangini Jayimswanyi, nyuli manjijba yalunya yingkamuku langki nanankurri. Jali yalu wanbiya nanaba langku, baki nanda Bida nangki yangkalamba yalunbunanyi ngurranyimukunanyi. Miku nyuliyanyi mili jarrba mama yalundu. Marrala nyuli yalungi jali yanyba “Nanamuku Krisjinmuku jala ngurranyimuku, mardakimi yingkawanyi kaburrmba yalunya.” Marralayi Bida yalungi baki nanankardi nangki yangkalamba Bida yalunbunanyi ngurranyinanyi.  
\v 13 Marda yingkamuku Krisjinmuku jali yalu Jumuku, yali marda marralayi yalungi barrinani Bida marralayi yalungi. Yali balki yami. Baki Barnabas marda, nyuli balki yami marda. Miku yaliyanyi mili jungku yalundu ngurranyimukunyina. Miku yaliyanyi mili jarrba mama yalundu. Barriwa.   
\p
\v 14 Jali ngayu jingkijba yalunya, yangkalamba yalungki yalundunanyi ngurranyinanyi, baki jingkijba ngayi, nanda balki. Miku yaliyanyi jungku yurlurrmba yuwana nanganginkanyi Jisus Krayiskanyi. Miku yaliyanyi jungku yurlurrmba nangangi. Bukambiju Krisjinmuku, marda Jumuku marda ngurranyimuku, bukambiju yalu jandanyimuku nangangi Kudkanyi. Nanankardi ngayi ngirrwa nangangi Bidanyi. Ngirrwa ngayi nangangi, baki yingkamukunyi ngana yali manku ngirrwankurri. Ngirrwa ngayi nangangi, “Ninji barri Ju. Waluku jali ninji wanbiya, baki yuku ninji jungku yalundu ngurranyimukunyina. Ninji jungkuyi barrinani mungkiji yalungi. Waluku ninji yabijba muwa jungunkanyi yalundu, ngala nanijba balkijba ninji muwa. Nanijba ninji yanyba, mardakimi yingkawanyi kaburrmba yalunya. Jalija yalu jungku kaburrwaburr barrinani Jumuku, baki yuku janinji mili jungku yalundu. Wanyingkanyi ninji yanyba yalungi, marda yalimi durrijba nanda wankalanyi yuwa Musiskanyi. Wanyingkanyi ninji yanyba nani. Wanyingkanyi.” Nani ngayi ngirrwa nangangi. Barriwa.   
\p
\v 15 Nurru barri, nurrungi miminganja marda kukulinganja, nurrungi nijanganjinyi marda ngardanganja, bukamba yalu Jumuku, baki nanankardi nurru marda Jumuku. Miku nurru ngurranyimuku, nanamuku jala mikukimi jingkijba Kud. Nurru Jumuku, nurrungkili yanyba yalungi ngurranyimukuyngka, yalu balkimuku, jala mikukimi jingkijba Kud. Nani nurrungkili yanyba yalungi.  
\v 16 Ngala nurru jingkijba, nurru jungkuka yurlurrmba nangangi Kudkanyi, kuyungangi nurru jangkurr nangangi Jisus Krayiskanyi. Miku nurrimi jungku yurlurrmba Kudkanyi, ngayangayijbangangi nurru nanankanyi yuwanyi Jukanyi jala wajba nurrunya Musiswanyi. Miku nurrimi jungku yurlurrmba, yabimbikanyi nanda Ju yuwa. Miku. Nurru Krisjinmuku barri jala Jumuku, nurri kuyu jangkurr nangangi Jisus Krayiskanyi baki nanankardi nurru jungkuka yurlurrmba nangangi Kudkanyi. Miku nurrimi jungku yurlurrmba nangangi, ngayangayijbangangi nurru yuwanyi nanganginkanyi Musiskanyi. Mikukimi nganinyi jungku yurlurrmba Kudkanyi nani. Marda nyulimi kuyu jangkurr nangangi Jisus Krayiskanyi, marda nyulimi durrijba nangangi jangkurr, baki janyulu jungku yurlurrmba nangangi Kudkanyi.   
\p
\v 17 Jala nurru Jumuku nulijba jungunkanyi yurlurrmba nangangi Kudkanyi, baki marda nurrimi kuyu nangangi jangkurr Jisus Krayiskanyi. Nurru jala kuyu nangangi jangkurr, jaliyi nurrimi miku durrijba bukamba yuwa nangangi Musiskanyi, baki nurru jungkuka barrinani ngurranyimuku, miku jala ngayangayijba yuwanyi Musiskanyi. Yanyba yalungka Jumuku yalungi ngurranyimukuyngka, “Nanamuku ngurranyimuku yalu balki. Miku yalimi durrijba nanda yuwa nangangi Musiskanyi.” Ngala nurru Jumuku jala nurru Krisjinmuku, jaliyi nurru miku durrijba bukamba nanda yuwa nangangi Musiskanyi, baki yingkamuku Jumuku, yalu yanybaka nurrungi, nurru marda balki. Miku nurrimi durrijba yuwa nangangi Musiskanyi, barrinani ngurranyimukunyi miku yalimi durrijba yuwa nangangi Musiskanyi. Jaliyi nurru Krisjinmukunyi durrijba yuwa nangangi Jisus Krayiskanyi, ngala miku nurrimi durrijba yuwa nangangi Musiskanyi baki wanyi barri. Nanda barrinani nayi kuna, barrinani, milidimbaka nurrunya Jisus Krayiswanyi jungunkanyi balki nangangi Kudkanyi. Nani kuna. Ngala miku. Miku nanda duja. Miku nyulimi milidimba nurrunya jungunkanyi balki. Miku nyulimi milidimba nurrunya nani Jisus Krayiswanyi. Ngala nanda yuwa Jisus Krayiskanyi, nanda buyingkinyi yuwa. Barriwa barri bukamba nanda wabula yuwa Musiskanyi. Nanda yuwa Jisus Krayiskanyi mili walkurra yingkanyi yuwanyi Musiskanyi.  
\v 18 Wabula ngayi karu narrinya nangangi Jisus Krayiskanyi, nyuli wajba ngambalanya nanganginkanyi buyingkiyngkanyi yuwanyi. Marda ngambalimi miku durrijba nanda yuwa nangangi Musiskanyi, ngala marda ngambalimi durrijba nanda buyingkinyi yuwa. Nani barri ngayi karu narrinya wabula. Ngala nanijba barri, jalimi ngayu yanyba nayi, “Marda ngambalimi yuwajiwa durrijba nanda yuwa nangangi Musiskanyi.” Jalimi ngayu nanijba yanyba nani, baki wabula jali ngayu karu narrinya miku durriykanyi nanda yuwa Musiskanyi, nanamanji barri ngayu jungkuyi balkina yuwana Musiskanyi. Ngala miku ngayimi yanyba nani.   
\p
\v 19 Miku ngayimi durrijba bukamba yuwa nangangi Musiskanyi. Yangkalamba ngaki nanamunanyi wankalananyi yuwananyi, baki nanijba ngayu durrijbangka nanda buyingkinyi yuwa nangangi Jisus Krayiskanyi. Ngayu yurlwangka nanankanyi yuwanyi Musiskanyi. Ngayu barrinani nanda nganinyiyurru, jala yurlwangka yuwanyi. Nani barri ngayu yurlwangka yuwanyi nanganginkanyi Musiskanyi, ngala ngayu jungkuka yurlurrmba nangangi Kudkanyi, durrijbangangi ngayu nangangi jandanyi Jisus Krayis.  
\v 20 Yanyba ngaka, ngayu barrinani nganinyiyurru nanankanyi wabuliyngka yuwanyi jala ngayi yurlwa. Ngala ngayu jungkuka buyingkinyi nganinyi nanijba, jungkukangangi Jisus Krayis ngakinyina kurdulana. Janyba nangki Jisus Krayis kurndana ngakinkanyi balkinyi yajinyi. Maruka nyuli muwa ngaki, baki janyba nangki ngaki. Baki nanijba ngayu marukangka muwa nangangi, ngayu durrijbangka Jisus Krayis, nanda jandanyi nangangi Kudkanyi.  
\v 21 Marukangka Kud muwa ngambalangi, baki manjijba nyuli Jisus Krayis janybikanyi nangka ngambalangi. Janyba nangki Jisus Krayis kurndana ngambalangi jala kuyu nangangi jangkurr, marda durrijba nangangi yuwa. Nanankardi barri ngambala jingkijba, jangambala jungku yurlurrmba nangangi Kudkanyi, jangambala jungku mili wanka nangandu, jalija ngambalaka janyba. Ngala nanamuku Jumuku, ngamu jayalu jungku mili wanka nangandu baku, durrijbangangi yalu nanda yuwa nangangi Musiskanyi. Ngala miku. Miku nanda duja jangkurr. Jalimi yalu mili jungku wanka, durrijbangangi yalu nanda yuwa Musiskanyi, baki muningka nangki janyba Jisus Krayis. Ngala miku nanda duja. Janyba nangki Jisus Krayis ngambalangi, baki nanankardi ngambalaja jungku mili wanka nangandu yurrngumba. Barriwa.   
\c 3  
\p
\v 1 Narri jala jungku nananyina yajina Kalajiya, narri mudu. Wanyingkanyi miku narringkimi mankumanku yurlurrmba. Yiningki yingkawanyi brijba narrinya. Narri mudu. Milidimba ngayi narrinya yurlurrmba jangkurranyi nanganginkanyi Jisus Krayiskanyi. Milidimbayi narrinya nangangi, janyba nangki kurndana ngambalangi.  
\v 2 Ngayu ngajakangka narrinya nayi. Ngayangayijba kuna narri nanankanyi yuwanyi Musiskanyi, baki nanankardi ngankijbayi narrindu mankanyina nanda Kunyba Ngarndu Kudkanyi. Nani kuna. Mikukiyanyi ngankijba Ngarndu Kudkanyi narrindu, ngayangayijbangangi narri yuwanyi Musiskanyi. Ngala ngankijbayi Kunyba Ngarndu Kudkanyi narrindu, kuyungangi narri nanda duja jangkurr nangangi Jisus Krayiskanyi. Manku narri nangangi jangkurr, kuyu narri nanda jangkurr, baki nanankardi nanda Kunyba Ngarndu Kudkanyi, nyuli ngankijba narrindu. Ngala miku nyuliyanyi ngankijba narrindu, ngayangayijbangangi narri yuwanyi Musiskanyi. Miku.  
\v 3 Jali nanda Kunyba Ngarndu Kudkanyi ngankijbayi narrindu, baki narri jungkuyi barrinani buyingkinyi nganinyimuku. Ngala nanijba yanyba kuna narri, miku narrimi mili nulijba nanganginkanyi Kunybanyi Ngarndunyi. Nanijba kuna narri yanyba, narri ngiruka durriykanyi nangangi yuwa Kudkanyi, baki miku narrimi mili nulijba nanganginkanyi Kunybanyi Ngarndunyi. Nani kuna narri yanyba.  
\v 4 Jala narri jalannga jungku Krisjinmuku, baki yingkamukunyi yali yabimba kaja kunyba yaji narringi, baki narri mirnarrijba muwa nanankanyi yajinyi. Miku narrimi mankuwa kuna yanka narri jungku mirnarrijba muwa nanamanji.  
\v 5 Wanyingkanyi nyuli yawumba nangangi Kunyba Ngarndu narrindu Kudwanyi. Wanyingkanyi nyuli yabimba ngiruka yaji narringi. Ngayangayijbangangi kuna narri nanankanyi yuwanyi Musiskanyi. Miku nanankanyi. Ngala nyuli wajba narrinya nanganginkanyi Kunybanyi Ngarndunyi, nyuli yabimba ngiruka yaji narringi, kuyungangi narri nanda jangkurr nangangi Jisus Krayiskanyi. Barriwa.   
\p
\v 6 Mankuwa narri nanda wankalanyi Yabrayam. Nanangini najawanyi Kudkanyi karungka ngambalanya nangangi. Nanda naja yanybaka nayi, “Nanangini Yabrayamwanyi nyuli kuyu jangkurr nangangi Kudkanyi, baki nanankardi yanybayi Kud nangangi Yabrayamkanyi, nyuli jungku yurlurrmba nangangi Kudkanyi.” Barriwa.  
\v 7 Baki nani barri narri marda. Jala narri kuyu nanda jangkurr nangangi Jisus Krayiskanyi, baki narri jungku yurlurrmba nangangi Kudkanyi, barrinani Yabrayamwanyi nyuli kuyu jangkurr Kudkanyi, baki jungkuyi yurlurrmba nangangi. Nanda Yabrayam nyuli barrinani wankalanyi nijanganjinyi bukambijuyngka jala kuyu jangkurr nangangi Jisus Krayiskanyi.  
\v 8 Nanda naja Kudkanyi yanybaka yingka jangkurr marda, nayi jangkurr “Nganinymuku baki jibarrimuku jala yalu miku Jumuku, jayalu marda kuyu jangkurr nangangi Kudkanyi, baki jayalu marda jungku yurlurrmba nangangi.” Barriwa. Baki mili yanybayi nanda naja nangangi Yabrayamkanyi, “Janyulu yabimba kunyba yaji bukambijuyngka Kudwanyi. Janyulu yabimba kunyba yaji yalungi, ninjingangi Yabrayam, kuyungangi ninji nangangi jangkurr.” Barriwa.  
\v 9 Kuyu nyuli jangkurr Kudkanyi Yabrayamwanyi, baki yabimbayi kunyba yaji nangangi Kudwanyi. Nani barri nanamannga ngambalangi. Yabimbaja Kudwanyi kunyba yaji bukambijuyngka, jala ngambala kuyu nangangi jangkurr. Barriwa.   
\p
\v 10 Kajamuku, mankumanku yalungki, yalu jungku yurlurrmba nangangi Kudkanyi, ngayangayijbangangi yalu nanda yuwa nangangi Musiskanyi. Jala yalungka mankumanku nani, ngala miku yalimi ngayangayijba bukambijuyngka nanankanyi yuwanyi yurrngumba, baki jayalungka janyba. Yanybaka nanda naja Kudkanyi nayi, “Nanda jala miku yurrngumba ngayangayijba bukambijuyngka yuwanyi, yarrijba jala Musiswanyi, janangka janyba nanda.” Nani yanybaka naja Kudkanyi. Ngala miku ngambalimi yurrngumba jungku yurlurrmba nanankanyi yuwanyi. Kudiyana ngambala barimba nanda yuwa. Baki nanankardi yanybaka Kud, jangambalaka janyba.  
\v 11 Kudiyana ngambala barimba nanda yuwa, baki jangambalaka janyba, mikungangi ngambalimi yurrngumba jungku yurlurrmba nangangi Kudkanyi. Baki yingka mili nayi jangkurr yanybaka nanda naja Kudkanyi, “Nanda jala kuyungka nangangi jangkurr Kudkanyi, janyulu mili wanka jungku.” Jaliyi ngambala kuyu nanda jangkurr Kudkanyi, baki ngambala jungku yurlurrmba nangangi, baki nanankardi jangambala mili wanka jungku nangandu.  
\v 12 Nanda yuwa Musiskanyi, miku nanda yuwa yanybaka, kuyunkanyi nanda jangkurr nangangi Kudkanyi. Miku. Ngala nanda naja Kudkanyi yanybaka nayi, “Nanda jala yurrngumba ngayangayijba bukambijuyngka yuwanyi Musiskanyi, janyulu mili jungku wanka. Ngala jaliyi nyulu bijal barimba nanda yuwa, baki miku nyuliyi mili jungka wanka.”   
\p
\v 13 Mili barri nayinda jangkurr najana Kudkanyi yanyba, “Jala narri najba nganinyi langankurri kurndana, baki narri jingkijba nanda nganinyi, nyulu balkimirra. Jungku nyuli balkina yuwana Kudkanyi, baki nanankardi marda nangkimi janyba.” Nani yanybayi Kud nanganginyina najana. Janyba nangki Jisus Krayis kurndana nani, ngala miku nyuliyanyi jungku balkina yuwana Kudkanyi. Miku. Jungku nyuli kunyba yurrngumba. Ngala ngambala barri, jala kudiyana ngambala jungku balki, baki marda ngambalakimi janyba nani barri. Marda ngambalakimi janyba, jungkungangi ngambala balki, ngala miku. Janyba nangki Jisus Krayis ngambalangi. Baki nanijba barri, jala ngambala kuyu nangangi jangkurr, jala ngambala durrijba Jisus Krayis, baki miku jangambalaka janyba nani, janybangangi nangki Jisus Krayis ngambalanginkanyi balkinyi yajinyi.  
\v 14 Wabula wankalana, karuyi Yabrayam Kudwanyi, janyulu yabimba kunyba yaji yalungi, jalija jungku juju bayngkani nangandu Yabrayamnyina. Nanijba barri nyulu wajbangka ngambalanya nanankanyi kunybanyi yajinyi. Bukambiju Jumuku, marda ngurranyimuku, nyulu wajbangka ngambalanya nanankanyi kunybanyi yajinyi. Nayinda nanda kunyba yaji. Nyulu manjamanjambaka ngambalangi balki yaji, janybangangi nangki Jisus Krayis ngamanginkanyi balkinyi yajinyi. Baki mili kunyba yaji nyulu yabimbaka ngambalangi, nyulu wajbangka ngambalanya nanganginkanyi Kunybanyi Ngarndunyi Kudwanyi, jala ngambala kuyu nanda jangkurr nangangi Jisus Krayiskanyi. Janyulu wajba nanganginkanyi Kunybanyi Ngarndunyi, yalunya bukambiju jala kuyu nangangi jangkurr, jala yalu ngindu muwa yalunginkanyi balkinyi yajinyi. Barriwa.   
\p
\v 15 Narri, ngakinmuku bababanyamba ngambalaka. Yingka jangkurr jangayu karu narrinya. Kudiyana kujarra nganinyiwuya yanyba bulangki jangkurranyi, miku bulangki yangkalamba. Yurrngumba jungkuja nanda jangkurr. Miku nangkimi yingamali yangkalamba nanamunanyi jangkurrnanyi. Miku bulimi yurlwa nanankanyi jangkurranyi, baki mikuwali yingkawanyi barimba nanda jangkurr bulangi. Duja nanda jangkurr yurrngumba.  
\v 16 Nani barri yanybayi Kud jangkurr nangangi Yabrayamkanyi. Nanda jangkurr miku yangkalambikanyi. Nanda jangkurr nangangi Yabrayamkanyi, baki nanankanyi jalija jungku juju bayngkani nangandu. Nanda jangkurr yanyba jali Kud, nanda jangkurr yingamaliyngka nganiyngkanyi jalija jungku juju bayngkani nangandu. Miku nanda jangkurr kajamukuyngka juju bayngkani nangandu, Yabrayamnyina. Miku. Ngawamba yingamaliyngka. Nanda yingamali nganinyi jali yanyba Kud nangangi, nanda nyulu Jisus Krayis. Yanybayi Kud nanda jangkurr miku yangkalambikanyi bulangi, Yabrayamkanyi, marda nangangi Jisus Krayiskanyi.  
\v 17 Waluku yanybayi Kud nanda jangkurr, miku yangkalambikanyi, baki baku barri juju 430 kindilkurrinyi baku barri, nanamanji wajbayi Musis nanganginkanyi yuwanyi Kudwanyi. Ngala miku nyuliyanyi mamanumba nangangi jangkurr Yabrayamkanyi. Nanda yuwa jala wajba Musis Kudwanyi, mikukiyanyi nanangini yuwawanyi yangkalamba nanda jangkurr jali yanyba Kud Yabrayamkanyi waluwa. Mikukiyanyi yangkalamba nanda waluwinyi jangkurr.  
\v 18 Nanda yuwa Musiskanyi, nanda yingka jangkurr, ngala mikukimi nanangini yuwawanyi barimba nanda waluwinyi jangkurr jala yanyba Kud Yabrayamkanyi.   
\p
\v 19 Ngala wanyingkanyi wajbayi Musis nanankanyi yuwanyi Kudwanyi. Wanyingkanyi. Jangayu karu narrinya. Nanda yuwa Musiskanyi, nanda yuwa karunkanyi ngambalanya nanankanyi yajinyi jala balki. Wajbayi ngambalanya nanankanyi yuwanyi Kudwanyi nanankurri jali badajba Jisus Krayis. Karuyi Yabrayam Kudwanyi, janyulu yabimba kunyba yaji bukambijuyngka jalija badajba nanda juju bayngkani nangandu Yabrayamnyina. Nanda barri badajbayi. Nyulu Jisus Krayis, baki nyulu marrimbaka ngambalanya Krisjinmuku. Nyulu marrimbaka ngambalanya mardarda yurrngumba. Wajbayi Kudwanyi nanganginkanyi yuwanyi yalunya Yanjilmuku, yalu waykanyi Musis nanankanyi yuwanyi. Baki nyuli milidimba yalunya nanankanyi yuwanyi Musiswanyi. Nyuli milidimba yalunya Jumuku nanankanyi yuwanyi Kudkanyi.  
\v 20 Jala wajbayi Jumuku nanganginkanyi yuwanyi Kudwanyi, karu nyuli Musis nanankanyi yuwanyi, nyulu milidimbikanyi yalunya nanankanyi. Ngala jali yanyba Kud Yabrayamkanyi, janyulu yabimba kunyba yaji nangangi, miku nyuliyanyi karu yingka yanybiji jangkurr nanankanyi Yabrayamkanyi. Miku. Miku nyuliyanyi karu yingka, janyulu yabimba kunyba yaji Yabrayamkanyi. Miku. Ngawamba Yabrayam nyuli karu nanankanyi kunybanyi jangkurranyi. Barriwa.   
\p
\v 21 Waluku barri karuyi Yabrayam Kudwanyi nanankanyi kunybanyi jangkurranyi, baki baku barri nyuli wajba Musis nanankanyi yingkanyi jangkurranyi, baku barri nyuli wajba Musis nanganginkanyi yuwanyi. Nanangini yuwawanyi Musiskanyi mikukimi barimba nanda waluwa jangkurr jali karu Yabrayam Kudwanyi. Jaliyi nganinyi jungku kunybana yuwana Musiskanyi, jaliyi nyulu miku bijal jungku balki nananyina yuwana, baki janyulu jungku yurlurrmba nangangi Kudkanyi.  
\v 22 Ngala yanybaka nanda naja Kudkanyi, mikuwali jungku nganinyi kunybanyi nanankanyi yuwanyi yurrngumba. Bukambiju yalu balkimuku. Nani barri yanybaka nanda naja Kudkanyi, baki ngambala jingkijba nanda jangkurr najana, duja barri. Ngala manjijbayi Jisus Krayis Kudwanyi. Manjijba nyuli Jisus Krayis, janybiji nangka ngamanginkanyi balkinyi yajinyi. Nanankardi barri, jaliyi ngambala kuyu jangkurr nangangi Jisus Krayiskanyi, baki jangambala mili wanka jungku baku barri.   
\p
\v 23-25 Wabula kamambarra wajbayi Musis nanankanyi yuwanyi Kudwanyi, baki nanda yuwa kujanya ngambalangi yurrngumba wabulinyi. Ngala mikukiyanyi ngambalaka yabimba jungunkanyi kunyba nanankanyi yuwanyi yurrngumba. Miku. Ngala badajbayi Jisus Krayis, baki minimba nyuli ngambalanya buyingkiyngkanyi yuwanyi. Kuyu ngambali nanda buyingkinyi yuwa, baki nanijba barri, barriwa barri bukamba nanda yuwa Musiskanyi ngambalangi. Janyba nangki nanda yuwa. Mikukimi mili nanda yuwa kujanya ngambalangi, janybangangi nangki Jisus Krayis ngambalangi. Jala ngambala kuyu nangangi jangkurr, jala ngambala durrijba nangangi yuwa, baki yanybaka Kud ngambalangi, ngambala jungku yurlurrmba, janybangangi nangki Jisus Krayis ngambalanginkanyi balkinyi yajinyi. Barriwa.   
\p
\v 26 Narri, Krisjinmuku jala jungku Kalajiya, narri kuyuyi nanda jangkurr nangangi Jisus Krayiskanyi, baki nanankardi bukamba narri jandanyimuku nangangi Kudkanyi. Narri jandanyimuku Kudkanyi, baki Jisus Krayis, nyulu narringi Buwanya, nyulungangi Buwanya bukambiju jala kuyu nangangi jangkurr.  
\v 27 Kuyu narri nangangi jangkurr, baki yingkawanyi ngurrunbayi narrinya, baki nyulu bababanyamba narrinya Jisus Krayiswanyi. Nyulu jungkuka yurlurrmba, baki nani barri narri jungkuka yurlurrmba marda.  
\v 28 Baki nanijba barri narri bukambiju Krisjinmuku, kudiya narri Jumuku, kudiya ngurranyimuku, kudiya wakiwarrmuku, kudiya mambukamuku, kudiya nganinyimuku, kudiya jibarrimuku. Ngala narri jungkuka bukambiju malumba nayinda barri, nyulungangi bababanyamba narrinya Jisus Krayiswanyi.  
\v 29 Nanda wankalanyi Yabrayam, nyuli barrinani wankalanyi nijanganjinyi nangangi Jisus Krayiskanyi. Baki nyulu barrinani wankalanyi nijanganjinyi narringi marda, Jisus Krayisngangi. Nyulu narringi Buwanya, baki nanankardi nanda wankalanyi Yabrayam, nyulu barrinani wankalanyi nijanganjinyi narringi marda. Nanda jangkurr jali yanyba Kud Yabrayamkanyi, miku yangkalambikanyi, nanda jangkurr manjamanjambikanyi balki yaji, marda waykanyi Kunybanyi Ngarndunyi Kudkanyi, nanda jangkurr narringi. Nanijba nanda jangkurr narringi marda, nyulungangi bababanyamba narrinya marda Jisus Krayiswanyi. Barriwa.   
\c 4  
\p
\v 1 Muningka ngayu karungka narrinya nanginkanyi jangkurranyi. Nanda yuwa Rumankanyi yanybaka nayi, “Nanda malbu jirdi kajanyi jambanyi, jirdi kajanyi yajinyi, yuku nyulu yanyba, ‘Jangayu wajba ngaki jandanyi bukamba ngakinkanyi jambanyi marda yajinyi. Jangayu wajba ngaki jandanyi bukamba ngakinkanyi yajinyi, ngala yuwajiwa nyulu juka. Nanankardi jangayu yarrijba nganinyi lalanbikanyi nayinda jamba baki yaji ngakinkanyi jukanyi. Baku jalija ngaki jandanyi jardijba walkurra nganinyi, yuku nanamanja janyulu lalanba yaji nyuluma, ngala jilijbawa, nyulu juka.’ Nani barri yuku nyulu yanyba malbu jirdi kajanyi yajinyi.” Jala nanda jandanyi yuwajiwa juka, baki nanda yingka nganinyi, nanda lalanbawarr yajinyi, nyulu mambuka nanankanyi jukanyi. Mikukimi jukawanyi wudumba buluki dungalana, lalanbawarrngangi nyulu mambuka nanankanyi jukanyi marda nanganginkanyi dungalanyi. Nanda juka, nyulu barrinani wakiwarr nanankanyi lalanbawarrayngka.  
\v 2 Ngala nyulu yuwajiwa juka, baki yarrijbangka yingka malbuwanyi lalanbikanyi nanda juka, marda nangangi yaji, ngala baku barri, jala nyulu jardijba walkurra nganinyi baki mikukimi yingkawanyi lalanba nangangi yaji. Nyulu barri mambuka nanganginkanyi yajinyi, jali wajba nijanganjinyiwanyi ngala yuwajiwa wanka jungkuka nanda malbu. Barriwa.  
\v 3 Baki ngambala barri, wabula waluwa ngambala jungkuyi jandanyimuku nangangi Kudkanyi, nanamanji barri ngambali barrinani nanda juka jali yingka mambuka nangangi. Nanamuku yijanmuku, jujijbawarr, wabula yali walkurra mambuka ngambalangi. Yabimbayi ngambala ngawamba nanda yaji jali karu ngambalanya yijanwanyi. Miku ngambaliyi yabimba yaji, jali yalu miku nulijba ngambalangi yabimbikanyi yaji. Yalu ngambalangi mambuka nanamuku yijanmuku. Ngambala wakiwarr yalungi.  
\v 4 Ngala yanybayi Kud, “Yuku barri. Barriwa jangayu manjijba ngaki jandanyi wayka jambarri.” Baki manjijba nyuli nangangi jandanyi. Yarrijbayi Kudwanyi wurrumbarra, niji Mari. Manjijba nyuli nangangi Kunyba Ngarndu nangandurri, baki baku barri birnandaba nangki bardardanyi jukanyi, niji nangangi Jisus. Nyuli jandanyi nangangi Kudkanyi. Ngala nyuli juka, baki kujanya nangangi nanda yuwa nangangi Musiskanyi. Kujanya Jisuskanyi ngala nyuli juka.  
\v 5 Nani barri manjijbayi Jisus Kudwanyi marrimbiji ngambalanya Krisjinmuku mardarda. Baki nyulu bababanyamba ngambalanya kuyu Jisus Krayiswanyi. Nanankardi ngambala jandanyimuku nangangi Kudkanyi baki nani barri, mikukimi nanda yuwa Musiskanyi mili kujanya ngambalangi. Miku.   
\p
\v 6 Jala ngambala jandanyimuku nangangi Kudkanyi, baki Kud nyulu ngambalangi Buwakanya. Nyuli yawumba nangangi Kunyba Ngarndu ngambalandu kurduluna, baki nanankardi, jala ngambala yanyba nangangi Kudkanyi, ngambala yanybaka nangangi, “Ninji nurrungi Buwakanya. Buwakanya ninji nurrungi.” Nani ngambala yanyba. Nanangini Kunybawanyi Ngarnduwanyi Kudkanyi, nyulu karungka ngambalanya Kudkanyi, nyulu ngambalangi Buwakanya.  
\v 7 Baki nanankardi barri, mikukimi nanda yuwa Musiskanyi mili kujanya ngambalangi. Miku. Ngambala jandanyimuku nangangi Kudkanyi. Karu ngayi narrinya nanankanyi malbunyi, jali wajba nangangi jandanyi nanganginkanyi jambanyi marda yajinyi, baki nani barri nanamannga nyulu wajbangka ngambalanya kajanyi kunybanyi yajinyi Kudwanyi. Nyulu wajbangka ngambalanya kunybanyi yajinyi, ngambalangangi nanganginmuku jandanyimuku.   
\p
\v 8 Wabula barri, waluwa narri kuyu nangangi jangkurr Jisus Krayiskanyi, nanamanji barri, miku narriyanyi jingkijba Kud, ngala nanamuku yijanmuku, yalu narringi mambukamuku. Nanamuku yijanmuku, miku yalu duja Kud, ngala yali narringi mambukamuku.  
\v 9 Ngala nanijba barri, narri jingkijbangka Kud, nyulu marda narringi Kud. Ngala miku. Marda ngayiyanyi yanyba nayi. Nyulu jingkijbangka narrinya Kudwanyi, nyulu yabimbaka narrinya jungunkanyi yurlurrmba nangangi. Nyulu yarrijbangka narrinya nanganginmirra jandanyimuku. Ngala wanyingkanyi narri nulijbangka narringka yangkalambikanyi nanganbunanyi Kudnanyi. Wanyingkanyi narri nulijbangka durriykanyi nanda wankalanyi yuwa Musiskanyi. Miku narriyanyi jungku yurlurrmba nangangi Kudkanyi wabula, jali narri durrijba narringi wankalanyi yuwa yijankanyi, baki miku narrimi jungku yurlurrmba nangangi nanijba jala narri durrijba nanda yuwa nangangi Musiskanyi. Wabula narri wakiwarr nanankanyi yuwanyi yijankanyi, ngala nanijba narri nulijba wakiwarrayngka nanankanyi yuwanyi Musiskanyi. Mikukimi yuwawanyi yijankanyi yabimba narrinya jungunkanyi yurlurrmba nangangi Kudkanyi, baki mikukimi yuwawanyi Musiskanyi yabimba narrinya jungunkanyi yurlurrmba nangangi Kudkanyi. Miku. Ngawamba narri jungkuka yurlurrmba nangangi Kudkanyi, jala narri durrijba nanda buyingkinyi yuwa nangangi Jisus Krayiskanyi.  
\v 10 Narringka yangkalamba nanamunanyi buyingkinyinanyi yuwanyi, baki narri durrijba nanda yuwa nangangi Musiskanyi. Nanijba narrili yabimba wangarr nanankanyi yuwanyi. Ngamu narri jungkuka yurlurrmba nangangi Kudkanyi jala narri yabimba nanda kaja wangarr yalungi Jumukuyngka, ngala miku. Miku narrimi jungku yurlurrmba nangangi nani.  
\v 11 Ngindu ngayu muwa narringi. Kudanyu barri ngayi waki, jali ngayu milidimba narrinya nangangi Jisus Krayiskanyi. Nanamanji barri narri kuyu ngaki jangkurr, ngala janarri kuna miku mankuwa nanda jangkurr yurrngumba. Muningka kuna ngayi milidimba narrinya. Nanijba kuna narri yurlwa ngakinkanyi jangkurranyi. Barriwa.   
\p
\v 12 Kudanyu ngayu yililikajba narrinya, janarri jungku barrinani ngayu. Ngayu Ju, baki wabula, ngayi nulijba jungunkanyi yurlurrmba Kudkanyi. Ngala nanda yuwa Musiskanyi kujanya ngaki. Wajbayi ngana kujayu durriykanyi nanda yuwa. Waluwa barri, nanda yuwa kujayu ngakinyi, ngala nanijba barri, barriwa bukamba nanda yuwa ngaki, janyba nangki bukamba. Ngala ngayi kuyu nanda jangkurr nangangi Jisus Krayiskanyi, baki nanijba barri, ngayu jungkuka kunybana yuwana nanganginyina. Nanda kujayu, bukamba ngayi. Narri barrinani ngayu. Wabula, narringki yangkalamba narringinanyi wankalananyi yuwananyi, baki ngayu marda yangkalamba ngaki nurrunginanyi wankalananyi yuwananyi Jukanyi. Barriwa. Miku narriya yabimba balki yaji ngaki, ngala jungkuyi narri kunyba ngaki yurrngumba, ngala ngayi jungku narrindu.  
\v 13 Mankuwa kuna narri, jali ngayu jalannga karu narrinya nanganginkanyi jangkurranyi Jisus Krayiskanyi. Nanamanji ngayu lunji barri. Jungku ngayi narrindu, lunjingangi ngayi, baki milidimba ngayi narrinya, jali ngayu jungku narringinyina barndana. Miku narriyanyi yabimba balki yaji ngaki, ngala nganarri kandimba.  
\v 14 Kudanyu ngayi lunji, ngala miku nganarriyanyi jakajba narringinbunanyi yajinanyi. Kudanyu nganarri lalanba, jali ngayu lunji narrindu. Ngayu jingkijbangka narrinya. Jalimi badajba yanjil Kudkanyi kingkarrinya narrindurri, baki kudanyu narrimi kandimba nanda yanjil. Jalimi badajba Jisus Krayis kingkarrinya narrindurri, baki kudanyu narrimi kandimba nanda. Nani barri nganarri kandimba. Nganarri lalanba jali ngayu lunji narrindu kudanyu.  
\v 15 Nanamanji narri mirnarrijba muwa ngaki. Kudanyu narri mirnarrijba muwa ngaki. Jaliyanyi ngayu jungku balkiyudi yamiyudi, baki narriyanyi dulaba narringi yami baki yawumbayi ngakinyina kulajina, baki mili ngayu naykurri, baki mili ngayu milidimbikanyi narrinya. Nani narriyanyi yabimba kunyba yaji ngaki nanamanji. Ngala wanyingkanyi narri miku mirnarrijba muwa ngaki nanijba barri. Wanyingkanyi barri.  
\v 16 Milidimba ngayi narrinya duja jangkurranyi, ngala nanijba barri yiningki narri miku nulijba kuyunkanyi nanda duja jangkurr. Yiningki narringki yangkalamba ngakinbunanyi marda, nanankanyingangi duja jangkurranyi jali ngayu milidimba narrinya. Yiningki miku narrimi kandimuku ngaki mili. Barriwa.   
\p
\v 17 Nanamuku jala milidimba narrinya jungunkanyi yuwana Musiskanyi, yalu balki milidimbawarrmuku. Nulijba yalu narringi kandimbikanyi yalunya, ngala miku yalimi nulijba yabimbikanyi kunyba yaji narringi. Miku. Nulijba yalu narringi mamanumbikanyi ngana. Jalija nganarri mamanumba, baki janarri mamanumba nanda jangkurr jali ngayu milidimba narrinya. Janarri mankuwa ngawamba yalungi jangkurr, baki janarri mirnarrijba muwa ngawamba yalungi. Janarri kandimba yalunya balkimuku milidimbawarrmuku.  
\v 18 Jaliyi narri nulijba kandimbikanyi yingka nganinyi, baki nanda kunyba. Ngala marda narrimi kandimba ngawamba nanda jala nulijba yabimbikanyi kunyba yaji narringi. Nayi jangkurr jungkuja duja yurrngumba. Jala ngayu jungku narrindu, baki jala ngayu miku narrindu, yurrngumba nayi jungkuja duja jangkurr narringi.  
\v 19 Ngakinmuku kandimuku. Maruka ngayu muwa narringi kudanyu. Maruka ngayu muwa narringi, barrinani marukangka muwa jibarri nanganginkanyi bardardanyi. Nulijba ngayu narringi jungunkanyi ngiruka nangangi Jisus Krayiskanyi, jungunkanyi mili ngiruka, baki mili ngiruka nangangi yurrngumba. Nulijba ngayu narringi jungunkanyi ngirukamirra nangangi Jisus Krayiskanyi, durriykanyi nangangi jangkurr yurlurrmba.  
\v 20 Nulijba ngayu jilaykanyi narrindurri. Kudanyu ngayu nulijba yidambikanyi narrinya, jungunkanyi narrindu barndana. Nulijba ngayu yanybikanyi narringi, jingkiykanyi narrinya yanka narri jungku nangangi Jisus Krayiskanyi. Ngirukijba ngayu muwa narringi. Wanyimba jangayu narrinya, wanyingkanyi narri kuyu nanda balki jangkurr. Barriwa.   
\p
\v 21 Kudiya narri nulijba, durriykanyi nanda yuwa nangangi Musiskanyi. Marda narringkimi waluku mankumanku nanankanyi yuwanyi. Marda narrimi kudanyu jingkijba nanda yuwa. Mankukiyi ngaki jangkurr, ngala ngayu muningka karu narrinya nanankanyi yuwanyi.  
\v 22-23 Nanda wankalanyi niji Yabrayam, kujarra nangangi jandanyiwuya jukawuya. Nanda lirrka jandanyi nangangi, ngardanganja nangangi, miku nyuliyanyi maninganja nangangi Yabrayamkanyi, ngala nyuli wakiwarr jibarri nangangi Yabrayamkanyi. Niji nangangi Yakarr. Kulukayi Yabrayam nangandu wakiwarranyina, baki baku barri birnandaba nangki jibarri jukanyi. Nanda nangangi juka, nyuli lirrka jandanyi nangangi Yabrayamkanyi. Ngala baku barri juju, nanda maninganja nangangi Yabrayamkanyi, niji Sara, birnandaba nangki bardardanyi marda. Birnandaba nangki jukanyi, yabimbayingangi ngiruka yaji nangangi Kudwanyi. Nanda Yabrayam, ngala nyuli malbumirra, baki nangangi maninganja nyuli bardibardimirra, ngala yabimbayi ngiruka yaji bulangi Kudwanyi, baki birnandaba nangki Sara bardardanyi. Waluwa yanybayi Kud jangkurr miku yangkalambikanyi, janangka birnandaba Sara bardardanyi, baki duja nangangi jangkurr. Juju bayngkani nangki birnandaba bardardanyi. Nanda juka nyuli burrandinyi jandanyi nangangi Yabrayamkanyi. Barriwa.  
\v 24 Muningka jangayu karu narrinya yingkanyi jangkurranyi. Nanankujarra jibarriwuya, bula barrinani kujarra jangkurr nangangi Kudkanyi, miku yangkalambikanyi. Nanda jibarri wakiwarr, nyuli barrinani nanda yuwa jali yanyba Kud nangangi Musiskanyi. Nyuli barrinani nanda yuwa jali yanyba Kud yundu kulawirana niji Sinayi, nananyina walkurranyina yajina Yarabiya. Nanda jibarri Yakarr, nyuli wakiwarr, baki nanankardi nangangi kulunganja, nyuli wakiwarr marda.  
\v 25 Nanda jibarri Yakarr, baki nanganginmuku kulunganjamuku, juju bayngkani nangandu, yalu barrinani Jumuku, jala jungku nananyina yajina Jirusalim. Nanamuku Jumuku yali jungku wakiwarrmuku nanankanyi yuwanyi Musiskanyi. Yali wakiwarrmuku nanankanyi yuwanyi wajba jali Musis Kudwanyi, ngala jungkuyi Musis yundu kulawirana niji Sinayi. Nanda jibarri Yakarr, nyuli wakiwarr nangangi Yabrayamkanyi, baki nani barri nanamuku Jumuku yalu wakiwarrmuku nanankanyi yuwanyi Musiskanyi.  
\v 26 Ngala yingka yaji, nanamannga niji Jirusalim, nanaba kingkarri lalijina. Nanda nangangi yaji Kudkanyi. Nanda yingka yaji lalijina, barrinani nanda maninganja nangangi Yabrayamkanyi niji Sara. Nanda bardibardi Sara, miku nyuliyanyi wakiwarr, nyuli maninganja nangangi Yabrayamkanyi. Baki ngambala Krisjinmuku, ngambala barrinani nanganginmuku kukulimba nyulu, juju bayngkani nangandu. Miku nyuliyanyi wakiwarr, nanda bardibardi, baki nangangi kulunganja, miku nyuliyanyi wakiwarr marda. Baki ngambala marda, miku ngambalimi wakiwarrmuku nanankanyi yuwanyi Musiskanyi.  
\v 27 Nanda jangkurr najana Kudkanyi yanybaka nayi, “Nanda jibarri jali yurrngumba jungku nawinganjayudi, mikuyaji kulunganjanyi nangangi, baki nanankardi nyuli mirnarrijba muwa. Ngala yingka jibarri, nyuli kulunganjayudi, ngala manjijbayi nanda jibarri nanganginyi nawinganjawanyi. Baku barri janyulu wudumba kajamuku kulunganjamuku juju barri bayngkani nangandu. Nanankardi barri nanda jibarri nawinganjayudi marda nyulimi kudanyu mirnarrijba muwa. Barriwa.   
\p
\v 28 Manku narri ngaki jangkurr, narri ngaki bababanyamba ngayu narrinya. Nanda juka Yayisak, nyuli kulunganja nangangi Saranyi. Birnandaba nangki Sara bardardanyi, yanybayingangi Kud Yabrayamkanyi. Yanyba nyuli nanda jangkurr miku nangkiyi yangkalamba. Baki nani barri bukambiju ngambala Krisjinmuku, ngambala jandanyimuku nangangi Kudkanyi. Ngambala nanganginmuku jandanyimuku, nanankardi barri nanamannga jangkurranyi yanyba jali Kud Yabrayamkanyi, nanda jangkurr miku nangki yangkalamba. Barriwa.  
\v 29 Nanda bardibardi Sara, nangki birnandaba bardardanyi, nanankardingangi nyuli Kunyba Ngarndu Kudkanyi. Ngala nanangini kulunganjawanyi wakiwarrayngka, nyuli yabimba kiji nangangi, kulunganjanyi Sarakanyi. Yabimba nyuli kaja kiji nanganginkanyi bababanyamba nyulu. Baki nani barri nanamukunyi jala miku jandanyimuku nangangi Kudkanyi, yalu yabimbaka kiji ngambalangi Krisjinmukuyngka jala jandanyimuku nangangi Kudkanyi. Kaja kiji yalu yabimbaka ngambalangi.  
\v 30 Ngala ngambala jingkijba nanda jangkurr Kudkanyi nanganginyina najana. Nanda jangkurr yanybaka, “Manjijbakiyi nanda jibarri wakiwarr, marda nangangi kulunganja. Manjijbakiyi bulanya, mikungangi nyuliyi wudumba kaja yaji nangangi jukawanyi nijanganjiyngkanyi. Jalija nangka janyba nangangi nijanganjinyi, baki miku nyuliyi wudumba nangangi yaji, nanganginkanyi ngabayidiyngka yajinyi, jukawanyi. Nanankardi manjijbakiyi bulanya. Ngala nanangini kulunganjawanyi Sarakanyi, ngala janyulu nyulu wudumba nijanganjiyngkanyi yaji, nanganginkanyi ngabayidiyngka yajinyi.” Barriwa. Nani barri yanybaka jangkurr najana Kudkanyi.  
\v 31 Miku ngambalimi barrinani kulunganja nanankanyi jibarrinyi wakiwarrayngka. Miku ngambalimi wakiwarr nanankanyi yuwanyi Musiskanyi. Miku ngambalimi wakiwarr yingkanyi Kudkanyi, jala miku duja Kud. Ngala ngambala barrinani kulunganjamuku nanankanyi duja maninganjanyi. Ngambala nanganginmuku jandanyimuku nanankanyi jala duja Kud. Barriwa.   
\c 5  
\p
\v 1 Wabula barri ngambali wakiwarr, wakiwarrmuku ngambali. Baki nanda yingka balki yuwa, nanda ngambalangi mambuka, ngala miku nanijba barri. Miku ngambaliyi wakiwarr nanankanyi yuwanyi nanijba. Dulabayi ngambalanya Jisus Krayiswanyi. Dulaba nyuli ngambalanya nanankardi yingkananyi yuwananyi, ngambala durriykanyi Jisus Krayis. Baki ngayu karungka narrinya kudanyu, jungkukiyi yurlurrmba nangangi Jisus Krayiskanyi. Mikujiyi durrijba yingka yuwa. Mikujiyi mili jungku wakiwarr yingkanyi yuwanyi, ngala jungkukiyi yurlurrmba nangangi.  
\v 2 Manku narri nayinda ngaki jangkurr. Ngayu Bul, ngayu karungka narrinya nanginkanyi jangkurranyi. Mardakimi miku yingkawanyi kaburrmba narrinya. Jaliyi munyajba narri yingka kaburrmbikurri, baki narringka yangkalamba nanganbunanyi Jisus Krayisnanyi. Miku narrimi kuyu nangangi jangkurr Jisus Krayiskanyi.  
\v 3 Mili ngayu karu narrinya kudanyu. Jaliyi narri munyajba yingka kaburrmbikurri narrinya, baki narri durrijbangka nanda yuwa Musiskanyi, nanda yuwa nangangi kaburrmbikanyi yaji. Jaliyi narri durrijba bijal nanda yuwa Musiskanyi, baki marda narrimi durrijba bukamba nanda yuwa. Jaliyi yingkawanyi kaburrmba narrinya, baki marda narrimi jungku yurlurrmba bukamba nanankanyi yuwanyi Musiskanyi. Marda narrimi yabimba bukamba nanda yuwa.  
\v 4 Kudiya narri, ngamu narri jungku yurlurrmba nangangi Kudkanyi, ngamu narri yurlurrmba jungku jala narri ngayangayijba nanankanyi yuwanyi Musiskanyi, ngala miku. Jaliyi narringka mankumanku nani, baki miku nyuliyi narringi Buwanya Jisus Krayis. Jaliyi narringka mankumanku nani, baki miku narriyi jandanyimuku nangangi Kudkanyi, baki miku nyuliyi yabimba kunyba yaji narringi Kudwanyi.  
\v 5 Ngala nurru barri, nurru jingkijba Kud, janyulu yabimba nurrunya jungunkanyi yurlurrmba nangangi. Nurru jingkijba Kud, janyulu yabimba nanda nurrungi, kuyungangi nurru nangangi jangkurr Jisus Krayiskanyi, baki wajbangangi nurrunya nanganginkanyi Kunybanyi Ngarndunyi Kudwanyi. Nanankardi nurru jingkijba Kud, janyulu yabimba nurrunya jungunkanyi yurlurrmba nangangi.  
\v 6 Bukamba ngambala, Jumuku marda nanamuku jala miku Jumuku, bukamba ngambala, nyulu bababanyamba ngambalanya Jisus Krayiswanyi, jaliyi ngambala kuyu nangangi jangkurr. Yuku barri yingkamuku ngambala kaburrwaburr, ngala kudiyamuku ngambala miku yalimi kaburrwaburr. Yuku nanda. Ngala miku ngambalimi jungku yinini yinini nangangi Jisus Krayiskanyi. Miku. Bukamba ngambala nyulu bababanyamba ngambalanya, kudiya jala kaburrwaburr, baki kudiya jala miku kaburrwaburr. Bukamba ngambala nyulu bababanyamba ngambalanya jaliyi ngambala kuyu nangangi duja jangkurr. Nanankardi barri ngambala maruka muwa nangangi, baki ngambala maruka muwa yalungi yingkamukuyngka, marukangangi nyulu muwa ngambalangi. Barriwa.   
\p
\v 7 Wabula narri kuyuyi nangangi jangkurr Jisus Krayiskanyi. Narri durrijbayi nangangi buyingkinyi yuwa. Ngala wanyingini karuyi narrinya, marda narrimi miku durrijba nanda duja jangkurr nangangi. Wanyingini narrinya kurrkunba ngayangayiykanyi nanganginkanyi duja jangkurranyi.  
\v 8 Ngayu jingkijbangka Kud jali yarrijba narrinya nanganginmuku jandanyimuku. Ngayu jingkijbangka Kud, miku nyuliyanyi kurrkunba narrinya ngayangayiykanyi nanganginkanyi duja jangkurranyi. Miku nyuliyanyi kurrkunba narrinya durriykanyi nangangi jangkurr.  
\v 9 Nayinda jangkurr yalili muningka yanyba, “Jala nyulu yabimbaka damba, baki ngawamba bijal bululu nyulu yarrijbangka, baki kamu barri bukamba nanda damba bululujbangka.” Nani barri yalili muningka yanyba. Baki nani barri nanda nanamannga bijalwanyi balkiwanyi yabimbaka walkurra kiji yalungi kajanyi. Barriwa.  
\v 10 Jalija narri yanyba nayinda jangkurr jala ngayu yarrijba narringi, jalija narringka kudanyu mankumanku nanginkanyi jangkurranyi, baki ngayu jingkijba narrinya, janarri kuyu nayi jangkurr. Nani ngayu jingkijba narrinya, ngambalangangi bukambiju bababanyamba nyulu ngambalanya Jisus Krayiswanyi. Baki ngayu jingkijba nanda balki milidimbawarr marda. Janyulu karrinjarrijba nanda balki milidimbawarr walu nangandu Kudwanyi. Janyulu karrinjarrijba nanda walu nangandu, baki janyulu yanyba nanganginkanyi balkinyi yajinyi. Janyulu yabimba balki yaji nangangi Kudwanyi, milidimbangangi nyuli balki jangkurr narringi. Barriwa.   
\p
\v 11 Ngala ngayu barri, jaliyi ngayili milidimba yingkamuku, marda yalimi jungku kaburrwaburr barrinani yanybaka yuwa Musiskanyi, jaliyi ngayili milidimba yalunya nani, baki wanyingkanyi yalu yabimba kiji ngaki nanamukunyi Jumukunyi. Ngala miku ngayimi milidimba nanankanyi jangkurranyi. Baki yalu yabimba kiji ngaki Jumukunyi, yanybangangi ngayu nanankanyi yuwanyi kaburrmbikanyi mankanyi miku nanda jirrinyi yuwa durriykanyi. Marda narrimi ngawamba durrijba nanda buyingkinyi yuwa nangangi Jisus Krayiskanyi.  
\v 12 Nanamuku jala nulijba narringi jungunkanyi barrinani kaburrwaburr, nayi ngayu yanyba yalungi. Marda yalungkimi kaburrmba yalungi mankanyi yalungi, barriwa barri bukamba, barrinani bulukimuku. Jaliyi yalungka yabimba nani, baki jayalu yingijba narrinya, jayalu barlba narrinbunanyi, jayalu miku mili milidimba narrinya balkinyi jangkurranyi. Barriwa.   
\p
\v 13 Ngala narri barri, narri barrinani bababanyamba ngayu narrinya, durrijbangangi narri Jisus Krayis, baki nyulu bababanyamba narrinya marda Jisus Krayiswanyi. Wabula barri narringi wankalanyi yuwa kujaya narringi, ngala dulabayi narrinya nanamunanyi yuwananyi Jisus Krayiswanyi. Dulaba nyuli narrinya. Mikuwali nanda yuwa kujaya narringi nanijba barri. Ngala mikujiyi yarrijba yingka yuwa narringi kujaya, baki miku narringkiyi mankumanku nayi, “Yuku ngayu yabimbaka bukamba yaji nanijba barri. Yuku ngayu yabimba nanda jala ngaki mankanyi nulijba yabimbikanyi nayi.” Mikujiyi mankumanku nanda nani. Ngala marda narringkimi maruka muwa, marda narringkimi kudanyu maruka muwa, baki janarringka yabimba kunyba yaji narringi.  
\v 14 Jaliyi narri nulijba durriykanyi nanda yuwa nangangi Musiskanyi, baki marda narrimi mankuwa nanda jirrinyi yuwa. Yanybaka nanda jirrinyi yuwa nayi, “Marda narringkimi maruka muwa, barrinani nganyingka marukangka muwa.” Jaliyi narri nulijba durriykanyi nanda yuwa Musiskanyi, baki marda narrimi yabimba yaji nani. Ngala mikuwali nganinymuku yurrngumba ngayangayijba nanankanyi yuwanyi marukankanyi muwa yalungka. Ngala nanijba barri, nyulu marda jirrinybaka ngambalanya nanamannga yuwanyi Jisus Krayiswanyi. Nyulu marda jirrinybaka ngambalanya marukankanyi muwa yingkamukuyngka. Ngala, jala ngambala durrijbangka Jisus Krayis, baki yuku ngambala ngayangayijba nanganginkanyi yuwanyi, wajbangangi ngambalanya nanganginkanyi Kunybanyi Ngarndunyi Kudwanyi. Kandimbaka ngambalanya Kunybawanyi Ngarnduwanyi, baki nanankardi, yuku ngambala ngayangayijba nanankanyi yuwanyi.  
\v 15 Ngala miku narringkimi maruka muwa. Kudiya narri, jala nulijba durriykanyi nanda jangkurr yalungi balkimukuyngka milidimbawarrayngka, narri jakakajbangka nanankanyi jangkurranyi marukankanyi muwa ngambalaka. Narringka yabimbaka kijinyi. Miku narringkimi maruka muwa. Kudanyu narringka yabimbaka kijinyi. Narri barrinani bajangumuku, jala yalungka bijba. Wijbakiyi yabimba kiji, bakiyi narringka linjumba mankanyi kudanyu barri. Barriwa.   
\p
\v 16 Nanginkanyi ngayu karungka narrinya marda. Marda narrimi yabimba ngawamba nanda jala karu narrinya yabimbikanyi Kunybawanyi Ngarnduwanyi Kudkanyi. Marda narrimi jungku kunyba nangangi yurrngumba. Marda narrimi miku yabimba nanda jala narri nulijba yabimbikanyi mankankanyi. Miku. Ngala marda narrimi yabimba ngawamba nanda jala nulijba Kunyba Ngarndu Kudkanyi narringi yabimbikanyi.  
\v 17 Ngambala nulijbangka yabimbikanyi kaja yaji, ngala nanda Kunyba Ngarndu Kudkanyi, nyulu nulijbangka ngambalangi yabimbikanyi yinini yaji, jala kunyba ngambalangi. Nani ngambala baki nanda Kunyba Ngarndu Kudkanyi, ngambalaka jakakajba, wanyi jangambala yabimba. Ngala marda ngambalimi yabimba ngawamba nanda jala nulijba Kunyba Ngarndu Kudkanyi ngambalangi yabimbikanyi yaji. Marda ngambalimi yabimba nanda jala nyulu karu ngambalanya.  
\v 18 Jaliyi narri yabimba nani, baki mikuwali nanda yuwa Musiskanyi kujaya narringi. Ngala narri ngayangayijbangka nanankanyi Kunybanyi Ngarndunyi Kudkanyi, miku narriyi ngayangayijba nanankanyi yuwanyi Musiskanyi. Barriwa.   
\p
\v 19 Jaliyi ngambala miku ngayangayijba Kunybanyi Ngarndunyi Kudkanyi, baki ngambala yabimba kaja balki yaji. Ngambalaka mankumanku yabimbikanyi balki yaji, barrinani bajangumuku, barrinani kulukankanyi yingkana baki yingkana yurrngumba. Ngambala yabimbaka ngawamba nanda yaji jala ngambala nulijba yabimbikanyi.  
\v 20 Ngambalaka mankumanku yanybikanyi nanankanyi barrinani Kudkanyi, marda waykanyi nanda ngambalanginkanyi jangkurranyi, ngala nanda barri, miku nyulu duja Kud. Ngambalaka mankumankuka daykanyi yingka, marda briykanyi yingka, kurdanbikanyi nanda yingka nganinyi. Ngambalaka mankumanku ngurrunaykanyi yingka nganinyi, marda jungunkanyi ngarrangarra muwa yingkanyi, marda jungunkanyi walkurra mambuka yingkamukuyngka. Ngambalaka daba mungkijimuku.  
\v 21 Ngambalaka mankumanku wudumbikanyi yingkanyi nangangi yaji, marda ngaraykanyi kamukamu, marda jarrkanyi kaja barnyi baki mama. Nani ngambalaka mankumanku yurrngumba, jaliyi ngambala miku ngayangayijba Kunybanyi Ngarndunyi Kudkanyi. Ngayi karu narrinya waluwa, baki mili ngayu karungka narrinya, jaliyi ngambalaka mankumanku nani, jaliyi ngambala yabimba balki yaji nani, baki miku ngambaliyi jungku yalundu, nanamukunyina jala lalanba yalunya yurrngumba Kudwanyi. Miku nyuliyi lalanbawarr ngambalangi, jaliyi ngambala yabimba balki yaji nani. Barriwa.   
\p
\v 22 Ngala jaliyi ngambala ngayangayijba nanankanyi Kunybanyi Ngarndunyi Kudkanyi, jungku jala ngamandu kurduluna, jaliyi ngambala ngayangayijba Ngarndunyi Kudkanyi, baki jangambalaka maruka muwa. Jangambalaka mirnarrijba muwa, jangambala marda jungku mardumardu muwa marda. Baki kurrkunba jangambalaka ngaranbikanyi ngambalaka. Jangambala yabimba kunyba yaji yalungi yingkamukuyngka marda, baki yingkamukuyngka, jala yalu jingkijba ngambalanya, jangambala yabimba ngawamba kunyba yaji yalungi.  
\v 23 Nani barri jangambala jungku, jaliyi Kunyba Ngarndu Kudkanyi jungkuka ngamandu. Baki jangambala mili jungku nayi barri. Jangambala miku nulijba jungunkanyi mambuka yingkamukuyngka. Jangambala mirnarrijba muwa nanankanyi jala ngambalangi mambuka. Jangambala mirnarrijba muwa yingkamukuyngka jala yalu wudumba yaji. Jangambala miku yabimba nanda jala ngambalangi mankanyi nulijba yabimbikanyi yaji. Nani ngambala jungku, jaliyi Kunyba Ngarndu Kudkanyi jungkuka ngamandu kurduluna. Baki mikukimi yingkawanyi yuwawanyi kurrkunba ngambalanya jungunkanyi kunyba nani. Jalija ngambala jungku kunyba nani yurrngumba, baki jangambala jungku kunyba bukambijuyngka yuwanyi.  
\v 24 Jaliyi ngambala durrijba Jisus Krayis yurrngumba, baki miku jangambala nulijba yabimbikanyi balki yaji, ngala jangambala nulijba yabimbikanyi ngawamba nanda jala kunyba nanankanyi yuwanyi nanganginkanyi Jisus Krayiskanyi.  
\v 25 Jaliyi Kunyba Ngarndu Kudkanyi jungkuka ngamandu kurduluna, baki duja ngambala jungku wankan barrinani nanda buyingkinyi nganinyi. Baki marda ngambalimi yabimba ngawamba nanda jala nyulu karu ngambalanya yabimbikanyi Kunybawanyi Ngarnduwanyi Kudkanyi. Marda ngambalimi yabimba ngawamba nanda jala nyulu karu ngambalanya.  
\v 26 Marda ngambalimi miku barrakijarra mankanyi. Marda ngambalimi miku wajba yingka kijinyi. Marda ngambalimi miku ngurrunajba yingka nganinyi. Marda ngambalimi miku jungku nani, jaliyi Kunyba Ngarndu Kudkanyi jungkuka ngamandu kurduluna. Barriwa.   
\c 6  
\p
\v 1 Narri, ngakinmuku bababanyamba ngambalaka, yingka jangkurr jangayu karu narrinya. Jaliyi ninji najba yingka barimbikurri yaji, jaliyi nyulu yabimba balki yaji Kudkanyi, baki marda ninjimi ngirrwa nangangi. Ninji jala jungku jirdi Kunybanyi Ngarndunyi Kudkanyi nganyindu, marda ninjimi karu nanda, mili jungunki yurlurrmba nangangi Kudkanyi. Mikujiyi ngarrangarra muwa nangangi, ngala kardardakiyi ngirrwa nangangi. Minimbakiyi nanda, yanka nyulu jungkuka balki. Baki najbawa nganyingkiyi, bakiyi ninji marda nulijba yabimbikanyi balki yaji. Najbawa nganyingkiyi marda.  
\v 2 Marda narringkimi yabimba yajinyi. Jaliyi yingamali narringi, jaliyi nyulu jungku kijiyudi, baki marda narrimi mankumankuwa nanda kiji nangangi. Marda narrimi kandimba nanda kijiyudi. Jaliyi narri kandimba yingka nani, baki janarri ngayangayijba nanankanyi yuwanyi Jisus Krayiskanyi.  
\v 3 Jaliyi nangka mankumanku nganinyi nayi, “Ngayu walkurra mambuka. Jirrinyi ngayu mambuka yalungi ngakinmukuyngka mungkijinyi.” Jaliyi nangka mankumanku nani, ngala miku nyulimi walkurra mambuka, baki nangka jujamba. Jujamba nangka, nyulu walkurra mambuka yalungi barri.  
\v 4 Ngala mardakimi nangka nganinyi mankumanku, marda nangkimi kudanyu mankumanku nanankanyi jala nyulu yabimba, yinini kunyba yaji, yinini balki yaji. Jaliyi nyulu jingkijba, nyuli yabimba kunyba yaji, baki marda nyulimi mirnarrijba muwa nanankanyi yajinyi. Ngala marda nangkimi miku barrarrakijba nanganginkanyi yajinyi. Marda nangkimi miku mankumanku nanganginkanyi kunybanyi yajinyi, baki yanyba, “Nanangini yingkawanyi, yiningki nyuli yabimba kunyba yaji, ngala ngayu barri, ngayu yabimbayi kunybamirra yaji.” Marda nangkimi miku barrarrakijba nani, ngala marda nyulimi mirnarrijba muwa nanankanyi kunybanyi yajinyi jali nyulu yabimba. Barriwa.  
\v 5 Marda ngambalakimi kudanyu mankumanku nanankanyi jala ngambala yabimba jaliyi nanda kunyba yaji, jingkijbangkangangi Kudwanyi bukamba yaji. Jingkijbangka nyulu nanda jala ngambala yabimba. Baki yurrngumba janyulu mankuwa ngambalangi yaji. Barriwa.   
\p
\v 6 Jala milidimbawarr jungkuka narrindu yurrngumba, jala nyulu milidimba narrinya bulangi Kudkanyi baki Jisus Krayiskanyi, baki marda narrimi lalanba nanda milidimbawarr. Marda narrimi wajba nanda nganinyi mamanyi baki jumbalanyi. Marda narrimi kudanyu lalanba nanda nganinyi jala nyulu milidimba narrinya.  
\v 7 Marda narringkimi mankumanku yurrngumba, jaliyi narri jungku yurlurrmba nangangi Kudkanyi, jaliyi narringka jujamba nangangi Kudkanyi, bakiyi nyulu jingkijbangka narrinya Kudwanyi, narri jujijbawarr. Miku narriyi jujamba Kud. Miku. Jaliyi narri yabimba balki yaji, baki janyulu mankuwa nanda balki yaji narringi Kudwanyi. Janyulu mankuwa nanda balki yaji baku, jalija nyulu karrinjarrijba narrinya walu nangandu. Baki jaliyi narri yabimba kunyba yaji, baki janyulu mankuwa nanda kunyba yaji nanamanji marda.  
\v 8 Jaliyi narri yabimba ngawamba nanda balki yaji, jala narri nulijba narringinkanyi mankankanyi, baki janarringka janyba. Miku narriyi wankijba mili, ngala janarri kurdan yurrngumba. Ngala jaliyi narri ngayangayijba nanankanyi Kunybanyi Ngarndunyi Kudkanyi, jaliyi narri yabimba nanda jala nyulu karu narrinya, baki janarri wankijba mili. Janarri mili wanka jungku bayngkani jalija narringka janyba.  
\v 9 Narri yabimbaka kunyba yaji yalungi yingkamukuyngka, ngala mikujiyi balkijba yabimbikanyi kunyba yaji yalungi. Milikiyi yabimba kunyba yaji yalungi yurrngumba. Jaliyi narri yabimba kunyba nani yurrngumba, baki baku barri janyulu yabimba kunyba yaji narringi marda Kudwanyi.  
\v 10 Nanankardi barri, marda ngambalimi yabimba kunyba yaji yalungi bukambijuyngka. Baki marda ngambalimi yabimba kaja kunyba yaji yalungi Krisjinmukuyngka. Barriwa.   
\p
\v 11 Nayinda waluwa jangkurr, ngayu karuyi yingka baki nyuli yarrijba nanda jangkurr najana narringi, ngala nayinda jangkurr barri, ngayu Bul, ngayu yarrijbangka nayinda jangkurr najana ngakinyina marnina.  
\v 12 Nanamuku balkimuku milidimbawarrmuku, yalu nulijba narringi jungunkanyi kaburrwaburr. Yalu nulijbangka yingkamukuyngka, yalungka mankumankunkanyi yalungi milidimbawarrayngka, yalu jirrinyimuku nganinyimuku barrinani mambukamuku. Nanamuku balkimuku milidimbawarrmuku, yalu yanyba barrinani jirrinyi nganinyimuku, ngala miku. Ngawamba yalungka mankumanku yalunginkanyi mankankanyi. Miku yalimi milidimba bukamba nanda duja jangkurr nangangi Jisus Krayiskanyi. Miku yalimi milidimba bukamba duja jangkurr nangangi. Janyba nangki Jisus Krayis kurndana, baki wankambayi mili Kudwanyi. Miku yalimi milidimba bukamba nangangi jangkurr. Ngala marralangka yalu nanamukuyngka Jumukuyngka jala yalu durrijba bukamba nanda yuwa Musiskanyi. Marralangka yalungi kudanyu. Yiningki jayalu Jumukunyi yabimba kiji yalungi, jaliyi yalu milidimba duja jangkurr nangangi Jisus Krayiskanyi. Mankumanku yalungka, jaliyi yalu milidimba jangkurranyi yarriykanyi kaburrwaburr, baki yiningki Jumukunyi, miku yaliyi yabimba kiji yalungi, miku yaliyi linjumba yalunya. Marralangka yalu kijinyi, baki nanankardi yalu milidimba jangkurranyi yarriykanyi kaburrwaburr.  
\v 13 Nanamuku Jumuku jala yabimba kaburrwaburr, miku yalimi ngayangayijba bukamba nanankanyi yuwanyi Musiskanyi. Miku. Ngala yalu nulijba narringi jungunkanyi kaburrwaburr, baki jayalunjalu karu narringi, narri kaburrwaburr, yalungingangi, yabimba narri nanda jala yalu jirrinybayi narrinya yabimbikanyi.   
\p
\v 14 Ngala ngayu barri Bul, miku ngayimi karu yalunya nanankanyi jali ngayu yabimba. Miku. Ngala ngayu nulijba karunkanyi yalunya nangangi, ngambalanginkanyi mambukanyi Jisus Krayiskanyi. Jangayu karu yalunya bukambiju nangangi. Janyba nangki Jisus Krayis wabangkarra kurndana, baki nanankardi barri janyulu wankamba ngambalanya mili Kudwanyi, jungunkanyi nangandu yurrngumba. Nani barri jangayu karu yalunya. Ngawamba nanankanyi yajinyi jirriyngkanyi ngaki, mikuyaji yingkanyi. Baki ngayu nulijbangka yabimbikanyi ngawamba nanda jala nyulu jirrinyba. Miku yingkanyi yajinyi ngayimi nulijba.  
\v 15 Miku barri nayinda jirrinyi yaji ngaki, yingkamuku yalu kaburrwaburr, ngala yingkamuku miku yalimi kaburrwaburr. Miku nanda jirrinyi yaji ngaki. Ngala nayinda barri jirrinyi yaji ngaki, kuyunkanyi nanda jangkurr nangangi Jisus Krayiskanyi. Jaliyi narri kuyu nangangi jangkurr, baki narri jungku barrinani nanda buyingkinyi nganinyi.  
\v 16 Jala narri jungku nani, jala narri durrijba nangangi yurlurrmba yuwa yurrngumba, baki janarri jungku mardumardu muwa yurrngumba. Janarri jungku mardumardu muwa, baki janyulu yabimba kunyba yaji narringi marda Kudwanyi. Janyulu manjamanjamba narringi balki yaji. Janyulu yabimba nayinda yaji narringi baki yalungi, bukambijuyngka nanganginmukuyngka jandanyimukuyngka Kudkanyi. Barriwa.   
\p
\v 17 Baki mili yingka nayi jadunyi jangkurr ngayu jirrinybaka narrinya, mikujiyi yabimba mili kiji ngaki. Jungkuka ngayu wakiwarr nangangi Jisus Krayiskanyi, baki nanankardi yingkamukunyi nganjali linjumba. Kaja mawarl ngakinyina mankanyina jali nganjalu linjumba mankanyi. Ngala narri barri mikujiyi yabimba mili kiji ngaki. Barriwa.  
\v 18 Ngayu yanybaka mududu nangangi, ngambalanginkanyi mambukanyi Jisus Krayiskanyi. Ngayu ngajakangka Jisus Krayis, janyulu jungku narrindu, janyulu yabimba kunyba yaji narringi yurrngumba. Barriwa barri bukamba nayinda jangkurr narringi.