\id COL Karrwa (Garawa) 1983, 1991 Colossians. Cleaned up after publishing, 970409. 
\h Colossians 
\toc1 MANJIJBA NGAYU NAYINDA JANGKURR NARRINDURRI JALILI JUNGKU YAJINA KULUSAYI 
\toc2 Colossians 
\mt1 MANJIJBA NGAYU NAYINDA JANGKURR NARRINDURRI JALILI JUNGKU YAJINA KULUSAYI  
\c 1  
\p
\v 1-2 Nayinda ngayu Bul, manjijba jali ngana Jisus Krayiswanyi. Yarrijba ngani Kudwanyi, baki manjijba ngani Jisus Krayiswanyi. Ngaliya manjijbangka nayinda jangkurr narrindurri, ngayu, marda Dimudiwanyi. Nyulu barrinani kanyiya ngambalangi. Ngaliya manjijbangka nayinda jangkurr narrindurri Krisjinmukuyngkurri jala narri jungku nananyina yajina Kulusayi. Wabula barri narri kuyuyi nangangi jangkurr Jisus Krayiskanyi, baki bababanyamba nyulu narrinya. Bababanyamba nyulu ngambalanya bukambiju Krisjinmuku wandijiyana. Ngaliya ngajakangka Kud narringi, nyulu yabimbiji kunyba yaji narringi. Ngaliya ngajakangka Kud narringi, narri jungunkanyi mardumardu muwa.   
\p
\v 3 Ngaliya yanybaka mududu nangangi Kudkanyi narringi barri. Yurrngumba ngaliya yanybaka mududu nangangi, Buwakaya. Nyulu Buwakanya ngamanginkanyi mambukanyi Jisus Krayiskanyi. Ngaliya mirnarrijba muwa nangangi, narringingangi.  
\v 4 Yingkamukunyi yali karu ngalinya narringi, narri kuyunkanyi nangangi jangkurr Jisus Krayiskanyi, narri durriykanyi nangangi jangkurr yurrngumba barri. Ngalinya karuyi, narringka marukankanyi muwa marda. Baki nanankardi barri ngaliya mirnarrijba muwa narringi marda.  
\v 5 Narri mankuyi nanda kunyba jangkurr nangangi Jisus Krayiskanyi. Nanangini duja jangkurrwanyi karungka narrinya nangangi Kudkanyi, janyulu marrimba yalunya mardarda, janyulu mili wankamba yalunya jalija yalungka janyba. Nani barri yabimbaja yaji Kudwanyi yalungi jala yalu kuyu nangangi jangkurr Jisus Krayiskanyi. Jalannga barri jali narri manku nanda kunyba jangkurr, baki narri kuyu nanda jangkurr, baki narri maruka muwa yalungi yingkamukuyngka marda. Nani barri narri durrijbayi nanda kunyba jangkurr nangangi Jisus Krayiskanyi barri.  
\v 6 Nanda jangkurr nangangi Jisus Krayiskanyi, nanda kunyba jangkurr. Nanangini jangkurrwanyi karungka ngambalanya nangangi Kudkanyi. Yabimbayi ngiruka yaji ngambalangi Kudwanyi. Manjijba nyuli Jisus Krayis nanginkurri wayka jambarri, janybikanyi nangka ngambalanginkanyi balkinyi yajinyi. Baki mili wankambayi Jisus Krayis Kudwanyi. Nani nyuli yabimba nanda ngiruka yaji ngambalangi. Jalannga barri jali narri manku nanda jangkurr, baki ngawamba kujajarrawanyi narri kuyuyi nanda jangkurr. Ngala baku barri, mili yali kuyu nanda jangkurr, baki mili baku barri. Baki nanijba barri narri jala jungku Kulusayi, kajamukunyi narri kuyuyi nanda nangangi jangkurr. Marda wandijiyana barri, kajamukunyi yalu kuyuyi nanda nangangi jangkurr, wirdikudukudumukunyi wandijiyana.  
\v 7 Nanangini Yibabraswanyi nyuli karu narrinya nanankanyi kunybanyi jangkurranyi. Nyuli karu narrinya nanankanyi ngirukanyi yajinyi jali yabimba Kudwanyi ngambalangi. Yi, nanda Yibabras, nyuli wakiwarr nangangi Jisus Krayiskanyi. Waki nyuli kudanyu nangangi, baki karu nyuli narrinya nanankanyi kunybanyi jangkurranyi. Nyulu kunyba nganinyi. Nyulu kunyba wakiwarr nangangi Jisus Krayiskanyi. Maruka ngaliya muwa nangangi kudanyu barri.  
\v 8 Nyuli karu ngalinya narringi, narri marukangka muwa nangangi Kudkanyi. Jungkuka nanda Kunyba Ngarndu Kudkanyi narrindu, baki nanankardi barri narri marukangka muwa nangangi Kudkanyi baki yalungi yingkamukuyngka marda.   
\p
\v 9 Mankuyi ngaliya nangangi jangkurr narringi, baki yanybaka ngaliya mududu Kudkanyi narringi. Ngaliya ngajakangka Kud narringi, janyulu yabimba narrinya jingkiykanyi Kud. Baki janarri jingkijba nanda jala nulijba narringi Kud yabimbikanyi yaji. Nanda Kunyba Ngarndu Kudkanyi nyulu jungkuka narrindu, baki janyulu wajba narrinya kunybanyi kulajinyi, baki janarri jingkijba nanda jala nulijba narringi Kud yabimbikanyi yaji.  
\v 10 Baki nanankardi barri janarri jungku yurlurrmba nangangi Kudkanyi. Yurrngumba barri janarri ngayangayijba nangangi Jisus Krayiskanyi. Janarri yabimba nanda jala nyulu nulijba narringi yabimbikanyi yaji. Janarri yabimba kunyba yaji yalung  
\v 11-12 Baki ngaliya ngajakangka Kud nayi marda narringi. Janyulu yabimba narrinya ngiruka. Janarri jungku ngiruka nangangi yurrngumba barri. Jaliyi yingkamukunyi yalu yabimba kiji narringi, baki yuwajiwa janarri jungku ngiruka nangangi Kudkanyi. Janarri mirnarrijba muwa, jingkijbangangi narri Kud, janyulu yabimba narrinya ngiruka nangangi. Janarri jungku ngiruka yabimbikanyi nanda jala nulijba Kud narringi yabimbikanyi yaji. Baki janarri mirnarrijba muwa nangangi, ngambalanginkanyi Buwakaya Kudkanyi. Nani ngaliya ngajakangka Kud narringi. Nyulu barri ngambalangi Buwakanya, yarrijbangangi nyuli ngambalanya nanganginmuku jandanyimuku. Ngambalaja malumba jungku. Bukambiju Krisjinmuku wandijiyana, ngambala nanganginmuku jandanyimuku, baki janyulu mili wankamba ngambalanya, jungunkanyi nangandu kingkarri nanganginyina yajina yurrngumba barri. Mikuyaji balkinyi nananyina nanganginyina yajina.  
\v 13-14 Nyulu marrimbaka ngambalanya mardarda Kudwanyi. Wabula barri ngambalili durrijba nanda balki yuwa nangangi Sayidinkanyi. Nyulili Sayidin ngambalangi mambuka, bakili ngambala jungku balkina yuwana Kudkanyi. Ngala jali ngambala kuyu nanda jangkurr nangangi Jisus Krayiskanyi, baki ngambala kuyuyi Kud ngambalangi mambuka. Nyuli manjmanjamba ngambalangi balki yaji Kudwanyi. Manjamanjamba nyuli ngambalangi balki yaji, janybangangi nangki Jisus Krayis nanankanyi balkinyi yajinyi. Baki nanijba barri ngambala jandanyimuku nangangi Kudkanyi, baki nyulu lalanbaka ngambalanya yurrngumba barri. Baki nanankardi barri marda ngambalimi karu Kud, ngambala mirnarrijbangka muwa nangangi barri. Barriwa.   
\p
\v 15-16 Mikukimi nganinyiwanyi najba Kud. Mikukimi najba. Ngala Jisus Krayis barri, nyuluwannga barrinani Kud, baki kajamukunyi yali najba Jisus Krayis jali nyulu jungku nayiba wayka jambana. Nyuluwannga barrinani Kud. Wabula kamambarra karuyi Jisus Krayis yabimbikanyi yaji Kudwanyi, baki yabimbayi bukamba nanda yaji Jisus Krayiswanyi. Yabimba nyuli bukamba yaji wandijiyana, jambana baki lalijina. Yabimba nyuli kamba baki yakarl baki warrawiji. Yabimba nyuli ngiruka yaji, baki mambukamuku. Karuyi Jisus Krayis yabimbikanyi yaji Kudwanyi, baki yabimba nyuli yaji wandijiyana Jisus Krayiswanyi. Yabimba nyuli bukamba yaji nangangi Kudkanyi. Baki nyuli yarrijba Jisus Krayis mambuka bukambijuyngka marda Kudwanyi.   
\p
\v 17 Yurrngumba wabula kamambarra jungkukili Jisus Krayis kingkarri nangandu Kudnyina, baki baku barri nyuli yabimba yaji. Baki nanijba barri yurrngumba nyulili jungku, lalanbakili bukamba nanda jalili nyulu yabimba. Nyuli ngiruka lalanbikanyi bukamba yaji nanijba barri. Barriwa.  
\v 18 Nyulu barrinani kulaji mankankanyi. Nanda mankanyi kaja yaji nangangi, ngala nanda kulaji mambuka nanankanyi mankankanyi. Karungka mankanyi yabimbikanyi yaji kulajiwanyi, baki yabimbaka nanda yaji mankanyiwanyi. Ngambala Krisjinmuku, ngambala barrinani nanda mankanyi, baki Jisus Krayis, nyulu barrinani nanda kulaji. Nyulu mambuka ngambalangi Krisjinmukuyngka. Nyulu ngambalangi mambuka. Baki nyulu jandanyi nangangi Kudkanyi. Nyulu lirrka, jali wankamba mili Kudwanyi. Nyuluwarri lirrka jungunkanyi mili wanka yurrngumba kingkarri nangandu Kudnyina. Baki nyulu wirimalaru bukambijuyngka yajinyi.  
\v 19 Jisus Krayis, nyulu jandanyi nangangi Kudkanyi. Ngawamba nyulu barrinani Kud. Mankumanku bulangka nanamannga jangkurr, yanyba bula nanamannga jangkurr. Baki yarrijba nyuli nangangi jandanyi wirimalaru Kudwanyi.  
\v 20 Manjijba nyuli nangangi jandanyi nanginkurri wayka, baki janyba nangki nangangi jandanyi kurndana. Jungku nyuli kunyba yurrngumba barri ngala janyba nangki ngambalanginkanyi balkinyi yajinyi. Baki nanijba barri, jaliyi ngambala kuyu nangangi jangkurr, baki durrijba nangangi jangkurr, baki janyulu manjamanjamba ngambalangi balki yaji Kudwanyi. Janyulu manjamanjamba ngambalangi balki yaji, janybangangi nangki Jisus Krayis ngambalanginkanyi balkinyi yajinyi. Baki nanankardi barri ngambalaja malumba jungku marda Kud. Wabula barri marda ngambala marda Kud, jungku ngambalili yinini yinini, ngala nanijba barri ngambala jungkuka malumba nangandu Kudnyina. Wabula kamambarra yabimbayi bukamba yaji Kudwanyi. Yabimba nyuli bukamba yaji kunyba, ngala baku barri barimbayi yaji nganinyiwanyi. Barimba yali nanda jali yabimba Kudwanyi kunyba. Ngala janyulu mili kunymamba yaji Kudwanyi. Janyulu mili kunymamba bukamba yaji, janybangangi nangki nangangi jandanyi bukambijuyngka balkinyi yajinyi. Barriwa.   
\p
\v 21 Wabula barri miku narriyanyi jingkijba Kud. Narri mudumbanyi nangangi. Narri jungkuyi barrinani juju nanganbunanyi. Miku narriyanyi barrinani mungkijimuku nangangi, yabimbangangi narrili kaja balki yaji. Mankumanku narringkili balkinyi yajinyi, baki yabimba narrili kaja balki yaji.  
\v 22 Ngala nanijba barri, janyba nangki Jisus Krayis kurndana, baki nanankardi barri manjamanjambayi narringi balki yaji Kudwanyi. Nanijba narri jungkuka yurlurrmba nangangi, baki nanankardi barri yarrijbayi narrinya nanganginmuku kandimuku Kudwanyi. Baki baku barri janarri jungku kingkarri nangandu, janarri kunyba jungku yurrngumba, mikuyaji balkinyi narrindu. Janarri jungku barrinani kudukudu, barrinani malaba nangangi.  
\v 23 Bukamba nayinda janyulu yabimba narringi Kudwanyi. Janyulu yabimba nayinda narringi, jaliyi narri yuwajiwa kuyu nanda duja jangkurr nangangi Jisus Krayiskanyi, jaliyi narri jungku ngiruka nangangi yurrngumba barri. Marda narrimi miku manku yalungi jangkurr balkimukuyngka milidimbawarrayngka. Miku yalimi milidimba duja jangkurr nangangi Jisus Krayiskanyi. Marda narrimi miku manku yalungi balki jangkurr. Ngala marda narrimi mankuwa ngawamba nanda duja jangkurr nangangi Jisus Krayiskanyi. Marda narrimi mankuwa nangangi kunyba jangkurr, jali milidimba narrinya yingkawanyi. Ngayu Bul, ngayu wakiwarr nangangi Jisus Krayiskanyi, nyulingangi yarrijba ngana milidimbikanyi nanda kunyba jangkurr. Baki yingkamukunyi baki ngayu, nurru milidimbaka nanankanyi kunybanyi jangkurranyi. Nurru milidimbaka yalunya nanganginkanyi jangkurranyi wandijiyana. Marda narrimi miku mamanumba nanda duja jangkurr. Marda narrimi mankumankuwa nanda jangkurr yurrngumba, baki janarri jingkijba, janarri jungku mili wanka bayngkani jalija narringka janyba. Barriwa.   
\p
\v 24 Yingkamukunyi yali yabimba kiji ngaki. Ngananjali linjumba mankanyi, ngala miku ngayimi balkijba muwa. Ngayu mirnarrijbangka muwa nanankanyi. Karuyi ngambalanya Jisus Krayiswanyi. Karu nyuli ngambalanya, jayalu linjumba ngambalanya mankanyi Krisjinmuku. Jaliyi ngambala waki kudanyu nangangi, jaliyi ngambala milidimba yalunya nanganginkanyi jangkurranyi, baki nanamukunyi jala yalu ngirra Jisus Krayis, jayalu linjumba ngambalanya mankanyi. Nani nyuli karu ngambalanya Jisus Krayiswanyi. Mirnarrijbangka ngayu muwa wakinkanyi nangangi, baki ngayu jingkijbangka, janganjalu linjumba, kuyungangi ngayi yingkamuku nangandurri Jisus Krayisyurri. Waluwa nangki janyba Jisus Krayis, baki linjumba yali nangangi mankanyi. Kudanyu yali linjumba nangangi mankanyi, baki nani barri jayalu linjumba ngambalanya Krisjinmuku marda. Jisus Krayis nyulu barrinani kulaji, baki ngambala Krisjinmuku ngambala barrinani nanda mankanyi. Ngayu barrinani nanda yingamali nananyina mankanyina, malumba bukambijuyngka Krisjinmukuyngka. Ngananjali linjumba mankanyi narringingangi, baki ngayu mirnarrijbangka muwa narringi.  
\v 25 Ngana yarrijbayi Kudwanyi, ngana nyuli yarrijba wakiwarr yalungi Krisjinmukuyngka. Baki ngana nyuli manjijba karunki yingkamuku nanganginkanyi jangkurranyi. Jala narri manku nangangi jangkurr, baki nanda kunyba.  
\v 26 Wabula barri nyulili ngadijba nangangi jangkurr Kudwanyi. Miku nyuliyanyi karu nanankanyi jalija nyulu yabimba. Nyulili ngadijba nangangi jangkurr yurrngumba wabula barri. Ngala nanijba barri nyuli karu ngambalanya nanganginkanyi jangkurranyi. Nyuli minimba ngambalanya nanankanyi jalija nyulu yabimba.  
\v 27 Nyuli minimba ngambalanya nanankanyi jalili wabula nyulu ngadijba. Nyuli minimba ngambalanya nayi barri. Janyulu yabimba kunyba yaji ngambalangi. Kunybamirra barri. Ngiruka yaji janyulu yabimba yalungi bukambijuyngka. Nanda jangkurr jalili nyulu wabula ngadijba, nanijba barri nyuli karu ngambalanya Kudwanyi. Karu nyuli ngambalanya nanganginkanyi jandayngkanyi Jisus Krayiskanyi, janyulu jungku ngambalandu kurduluna, baki janyulu bababanyamba ngambalanya jaliyi ngambala durrijba nangangi jangkurr. Janyulu jungku ngambalandu kurduluna, baki baku barri jangambala jungku kingkarri nangandu Kudnyina. Nani barri nyuli karu ngambalanya nanijba barri.   
\p
\v 28 Baki nanankardi barri ngambala karungka yalunya bukambiju nanankanyi jangkurranyi. Wajbayi ngambalanya kunybanyi kulajinyi Kudwanyi. Wajba nyuli ngambalanya kunybanyi kulajinyi jingkiykanyi Kud, baki milidimbikanyi yingkamuku nangangi. Ngambala milidimbaka yalunya nangangi Jisus Krayiskanyi. Ngambala milidimbaka yalunya nayi barri, janyba nangki Jisus Krayis ngambalanginkanyi balkinyi yajinyi, baki jaliyi ngambala kuyu nangangi jangkurr, baki janyulu mili wankamba ngambalanya Kudwanyi. Nani barri ngambala milidimbaka yalunya, nulijbangkangangi ngambala yalungi durriykanyi Jisus Krayis, baki jungunkanyi barrinani nyulu. Ngambala nulijbangka yalungi jungunkanyi mili barrinani nyulu, baki mili baki mili barrinani nyulu yurrngumba barri. Nani barri ngambala milidimba yalunya, nulijbangangi ngambala yalungi, jungunkanyi kingkarri nangandu Kudnyina. Jaliyi yalu kuyu nangangi jangkurr Jisus Krayiskanyi, jandanyi nangangi Kudkanyi, baki bababanyamba nyulu yalunya Jisus Krayiswanyi, baki jayalu jungku kingkarri nangandu Kudnyina yurrngumba barri.  
\v 29 Nani ngayu wakingka kudanyu barri, karunkanyi yalunya nangangi Jisus Krayiskanyi. Baki nyulu yabimbaka ngana ngiruka Jisus Krayiswanyi. Ngana yabimbaka ngiruka milidimbikanyi yalunya nangangi. Nanankardi barri yuku ngayu waki kudanyu nangangi yurrngumba barri.   
\c 2  
\p
\v 1 Janga karu narrinya. Wakingka ngayu narringi. Kudanyu ngayu wakingka narringi, baki yalungi barri jala jungku nananyina yajina Layudisiya. Wakingka ngayu kudanyu yalungi baki yingkamukuyngka, jala ngananjalimi miku jingkijba. Jungku yalu kajana yajina, nanamuku jala ngananjalimi miku jingkijba. Wakingka ngayu kudanyu yalungi marda.  
\v 2 Miku ngayimi nulijba narringi, narri birrirrangka muwa yalungi jala yalu ngirra Jisus Krayis. Miku ngayimi nulijba narringi, narri birrirrankanyi muwa yalungi, ngala ngayu nulijba narringi jungunkanyi ngiruka yalungi, baki nanankardi ngayu wakingka kudanyu narringi. Wakingka ngayu narringi yurrngumba barri, nulijbangangi ngayu narringi, narringka marukankanyi muwa. Janarri malumba jungku, marukangangi narringka muwa. Wakingka ngayu narringi, nulijbangangi ngayu narringi jingkiykanyi Jisus Krayis. Janarri jingkijba Jisus Krayis, baki nanankardi janarri jingkijba Kud marda.  
\v 3 Baki Jisus Krayiswanyi, janyulu minimba narrinya nangangi Kudkanyi. Janyulu minimba narrinya nangangi. Baki janarri jingkijba Kud, nyulu jungkuka kunyba kulaji bukambijuyngka yajinyi. Nyulu jingkijbangka bukamba yaji, baki nyulu kunybamirra kulaji. Nani janyulu minimba narrinya, ngawamba jaliyi narri kuyu nangangi jangkurr Jisus Krayiskanyi. Baki nani barri janarri jingkijba Kud. Ngala jaliyi narri miku kuyu nangangi jangkurr Jisus Krayiskanyi, baki mikuwali Jisus Krayiswanyi minimba narrinya nangangi Kudkanyi. Miku narriyi jingkijba Kud, nyulu kunyba kulaji, nyulu jingkijbangka bukamba yaji. Miku narriyi jingkijba Kud nani barri, jaliyi narri miku kuyu nangangi jangkurr Jisus Krayiskanyi.   
\p
\v 4 Ngayu karungka narrinya nayi. Miku janarri manku yalungi jangkurr balkimukuyngka milidimbawarrayngka. Miku yalimi milidimba nanda duja jangkurr nangangi Jisus Krayiskanyi. Miku narriyi munyajba yingka jujambikanyi narrinya nanankanyi balkinyi jangkurranyi. Yalu nulijbangka narringi, narringka mankumankunkanyi nanda yalungi jangkurr, nanda kunyba barri. Miku narriyi kuyu yalungi jangkurr. Miku nanda duja jangkurr. Miku.  
\v 5 Jungkuka ngayu nayiba brisinyina, ngala narri jungkuka nananyina yajina niji Kulusayi. Ngala mankumanku ngaka narringi yurrngumba barri. Mankumanku ngaka narringi kudanyu barri. Nanda barrinani muningka ngayu jungkuka narrindu barndana, barrinani muningka ngaki ngarndu jungkuka narrindu. Mirnarrijbangka ngayu muwa narringi, jingkijbangangi ngayu narrinya, narri jungkuka yurlurrmba nangangi Jisus Krayiskanyi, narri jungkuka ngiruka nangangi. Narri kuyuyi nangangi jangkurr, baki nanankardi narri jungkuka yurlurrmba nangangi yurrngumba barri.   
\p
\v 6 Narri kuyuyi nanda jangkurr nangangi Jisus Krayiskanyi, baki nanankardi barri marda narrimi yurrngumba jungku barrinani bababanyamba nyulu narrinya Jisus Krayiswanyi.  
\v 7 Jungku janarri ngiruka nangangi. Janarri yabimba ngawamba nanda jala nyulu nulijbangka narringi yabimbikanyi yaji. Baki janarri jungku mili ngiruka nangangi. Janarri jungku mili ngiruka, baki mili ngiruka nangangi, kuyungangi narri nangangi jangkurr yurrngumba barri. Narri kuyuyi nanda jangkurr jali nyulu milidimba narrinya Yibabraswanyi. Marda narrimi mirnarrijba muwa nangangi Kudkanyi, yabimbangangi nyuli ngiruka yaji narringi.   
\p
\v 8 Janarri najbawa yalunya, nanamuku balkimuku milidimbawarrmuku. Miku yalimi milidimba narrinya nangangi Jisus Krayiskanyi. Waluwa narri manku jangkurr nangangi Jisus Krayiskanyi, nanamanji barri narri yabimbayi ngawamba nanda jali karu narrinya yijanwanyi yabimbikanyi yaji. Nanamuku yijanmuku jujambawarr, wabula yali narringi walkurramuku mambukamuku. Narri wakiwarr yalungi. Ngala narri yingijbayi yalunya. Ngala nanijba barri, jaliyi narri kuyu yalungi jangkurr balkimukuyngka milidimbawarrayngka, baki mili janarri jungku wakiwarr yalungi yijankanyi. Nanankardi barri, marda narrimi najbawa yalunya balkimuku milidimbawarrmuku.  
\v 9-10 Jisus Krayis barri, nyulu jandanyi nangangi Kudkanyi. Nyulu nanamannga barrinani Kud. Yurrngumba wabulinyi yuwajiwa nyulu nanamannga barrinani Kud. Baki jali nangka birnandaba Jisus Krayiskanyi, jali nyulu jungku mankanyiyudi, nanamanji marda nyuli nanamannga barrinani Kud. Nyulu mambuka bukambijuyngka. Nyulu mambuka yijankanyi, marda ngirukanyi yajinyi lalijina. Nyulu wirimalaru bukambijuyngka yajinyi. Baki narri Krisjinmuku, nyulu jungkuka Jisus Krayis narrindu kurduluna. Bababanyamba nyulu narrinya, baki narri jungkuka ngiruka nangangingangi. Mikuwali yingkawanyi narrinya yabimba ngiruka, ngawamba nyulu. Narri jungkuka ngiruka nangangingangi.   
\p
\v 11 Jali narri kuyu nangangi jangkurr Jisus Krayiskanyi, jali narri durrijba nangangi jangkurr, baki nyuli yarrijba narrinya Jisus Krayiswanyi, bababanyamba nyulu narrinya kuyu. Miku narringkimi yarrijba bababanyamba nyulu narrinya. Ngala ngawamba Jisus Krayiswanyi yuku nyulu yarrijbangka narrinya nani barri. Baki nyulu narringi mambuka marda Jisus Krayis. Nanamuku balkimuku yijanmuku, marda ngiruka yaji lalijina, wabula yali narringi mambuka, ngala dulaba nyuli narrinya nanamunanyi Jisus Krayiswanyi. Baki miku yalimi mili narringi mambuka, ngala nyulu Jisus Krayis, nyulu narringi mambuka nanijba barri. Nanankardi barri yuku narringka kurrkunba yabimbikanyi balki yaji. Yuku narri jungku kunyba nangangi Kudkanyi.  
\v 12 Jali narri kuyu nangangi jangkurr Kudkanyi, baki narrinya ngurrunbayi wabudana yingkawanyi, baki nanda barrinani narringki janyba. Narri jungkuka barrinani nganinyiyurru narringinkanyi wabuliyngkanyi mambukamukuyngka. Narri jungkuka barrinani nganinyiyurru yalungi. Ngala jali narri mili walajba wabudananyi, baki nanda barrinani narri walajba barrinani buyingkinyi nganinyimuku. Mili wankambayi Jisus Krayis Kudwanyi, baki nani barri jali yalu kingkarrumba narrinya wabudananyi, baki nanda barrinani nyuli mili wankamba narrinya Kudwanyi. Mili wankambayi narrinya, narri jungunkanyi buyingkinyi nganinyimuku nangangi Jisus Krayiskanyi.  
\v 13 Wabula barri narri barrinani nganinyiyurru nangangi Kudkanyi, mikungangi narriyanyi jingkijba Kud, mikungangi narriyanyi durrijba nangangi yuwa. Jungkuyi narri balki nangangi. Narri ngurranyimuku nangangi baki nanganginkanyi yuwanyi. Nani narri jungkuyi barrinani nganinyiyurru nangangi. Ngala jali narri kuyu nanda jangkurr nangangi Jisus Krayiskanyi, baki nyuli manjamanjamba narringi balki yaji Kudwanyi. Baki nanijba barri narri jungku barrinani mili wankan nangangi, barrinani buyingkinyi nganinyimuku nangangi Jisus Krayiskanyi.  
\v 14 Jali nangka janyba Jisus Krayis wabangkarra kurndana ngamanginkanyi balkinyi yajinyi, baki nanda barrinani nyuli kijijba ngambalangi balki yaji nananyina kurndana. Barrinani yalungki janyba nanda balki yaji ngambalangi. Janyba yalungki, baki barriwa barri bukamba nanda balki ngambalangi. Barriwa barri bukamba.  
\v 15 Jali nangka janyba Jisus Krayis kurndana, baki nanda Sayidin marda nanganginmuku mungkijimuku, nanamuku balkimuku lalijina, ngamu daba yali wakara Jisus Krayis. Ngamu yali ngirukamirra, yali daba wakara Jisus Krayis. Ngala miku barri. Miku. Mili wankijbayi Jisus Krayis, baki nani barri nyulu minimbaka ngambalanya, nyulu barri ngirukamirra ngambalangi. Nyulu barri mili ngiruka yalungi, Sayidinkanyi marda nanganginmukuyngka mungkijimukuyngka. Nyuli daba yalunya wakara, nyulungangi mili ngiruka yalungi. Baki nani nyuli manyirrumba yalunya Jisus Krayiswanyi. Nani nyuli yalunya manyirrumba. Barriwa.   
\p
\v 16 Kudiyamuku yalu balkimuku milidimbawarrmuku. Yalu milidimbaka balkinyi jangkurranyi. Yalu karungka narrinya, narri yabimbikanyi kaja wangarr. Yalu yanybaka, marda narrimi yabimba nanamuku wangarr jalili yalu yabimba Jumukunyi. Marda narrimi yabimba yalungi wangarr. Ngala yalu balkimuku milidimbawarrmuku. Marda narrimi miku kuyu yalungi jangkurr. Marda narrimi yurlwa yalunginkanyi jangkurranyi jala yalu yanyba. Yalu milidimba nayi barri, kudiya mama yuku kunyba jarrkanyi, ngala kudiya mama balki jarrkanyi, baki kudiya kambana kudukudu barri yabimbikanyi yinini yinini wangarr. Marda narrimi yurlwa yalunginkanyi jangkurranyi. Nanda yuwa nangangi Musiskanyi, nanda yuwa yanybaka wangarranyi marda jarrkanyi yaji, ngala barriwa barri bukamba nanda yuwa narringi. Marda narrimi miku durrijba nanda yuwa, ngala marda narrimi durrijba nanda buyingkinyi yuwa nangangi Jisus Krayiskanyi.  
\v 17 Nanda yuwa jali wajba Musis Kudwanyi, nanda yuwa yuku yalungi nanamanji wabula. Wajba nyuli Musis nanankanyi yuwanyi waluwa nyuli manjijba Jisus Krayis nanginkurri wayka. Ngala jali badajba Jisus Krayis, baki nyuli wajba ngambalanya buyingkiyngkanyi yuwanyi. Nyuli wajba ngambalanya buyingkiyngkanyi yuwanyi. Baki nanijba barri, barriwa barri bukamba nanda waluwinyi yuwa. Jala ngambala durrijba Jisus Krayis, baki ngambala durrijba nangangi buyingkinyi yuwa.  
\v 18 Miku janarri kuyu yalungi jangkurr. Yalu balkimuku milidimbawarrmuku. Kudiyamuku muningka yalungka mankumanku, yalu walkurra mambuka. Muningka yalu yanyba, yalu buwarrajimbaka ngiruka yaji. Kudiyamuku yalu yanyba, marda narrimi wajba Yanjil kunybanyi jangkurranyi narringinkanyi. Marda narrimi wajba Yanjilmuku kunybanyi jangkurranyi, Kudngangi nyulu walkurramirra, baki miku narriyi yanyba nangangi. Miku narrimi wajba Kud kunybanyi jangkurranyi, ngala marda narrimi wajba Yanjilmuku kunybanyi jangkurranyi. Nani yalu milidimbaka narrinya balkinyi jangkurranyi. Yalu nulijbangka narringi, narringka mankumankunkanyi yalu walkurra mambuka nangangi Kudkanyi, ngala miku. Jala yalungka mankumanku nani, baki miku yalungkimi mankumanku nangangi Kudkanyi. Ngawamba yalungka mankumankuka, ngala miku nangangi Kudkanyi.  
\v 19 Baki miku yalimi durrijba Jisus Krayis. Miku yalimi yarrijba Jisus Krayis yalungi mambuka. Miku yalimi barrinani mankanyi nangangi Jisus Krayiskanyi. Ngambala Krisjinmuku ngambala barrinani mankanyi nangangi, baki nyulu barrinani kulaji nanankanyi mankankanyi. Ngambala kajamuku, ngala ngambala malumba jungku barrinani yingamali mankanyi, baki nyulu barrinani kulaji ngambalangi. Barriwa. Jala jarrbangka kunyba mama jukawanyi, baki jardijbangka nyulu walkurra mankanyi, ngiruka barri. Nani barri jala ngambala durrijba Jisus Krayis kudanyu barri, baki ngambala jardijbangka ngiruka kurdulu nangangi. Ngambala jardijbangka walkurra nangangi Jisus Krayiskanyi. Jisus Krayis barri nyulu ngambalangi mambuka, nyulu milidimbaka ngambalanya nangangi Kudkanyi. Ngambala mili jingkijbangka Kud, milidimbakangangi nyulu ngambalanya mili yurrngumba Jisus Krayiswanyi. Barriwa.   
\p
\v 20 Wabula barri narrili ngayangayijba yalunginkanyi jangkurranyi yijanmukuyngka. Ngala nanijba barri, narri barrinani nganinyiyurru nanamukuyngka yijanmukuyngka. Miku narrimi mili ngayangayijba yalungi. Narri barrinani nganinyiyurru yalungi, ngala narri jungku wanka nangangi Jisus Krayiskanyi. Ngala wanyingkanyi narri nulijba jungunkanyi yingkana yuwana jali yalu milidimba narrinya nanamukunyi balkimukunyi. Wanyingkanyi narri nulijba durriykanyi yalungi yuwa.  
\v 21 Nanda yalungi yuwa yanybaka, miku marrimbikanyi yingka yaji, miku jarrkanyi yingka mama. Nani barri nanda yuwa yanybaka. Wanyingkanyi narri nulijba ngayangayiykanyi nanankanyi yuwanyi. Wanyingkanyi barri.  
\v 22 Ngala nanda yuwa, miku marrimbikanyi kudiya yaji, miku jarrkanyi kudiya mama, miku nanda jirrinyi yuwa narringi. Miku. Yanybayi nanda jangkurr ngawamba nganinyimuku. Miku nanda jirrinyi yuwa. Mikukimi nanangini yuwawanyi karu ngambalanya, ngambala jungunkanyi yurlurrmba nangangi Kudkanyi.  
\v 23 Nanamukunyi jala yalu karu narrinya ngayangayiykanyi nanankanyi yuwanyi, yalu milidimbaka balki jangkurr. Yalu nulijbangka narringi narringka mankumankunkanyi yalungi nayi barri, “Nanamuku milidimbawarrmuku, yalu walkurramuku mambukamuku. Yalu kunyba kulaji. Marda ngambalimi durrijba yalungi jangkurr jarrkanyi mama, marda yabimbikanyi wangarr, marda waykanyi Yanjilmuku kunybanyi jangkurranyi, marda miku lalanbikanyi ngambalaka ngambalangi mankanyi. Marda ngambalimi durrijba nanda yalungi jangkurr.” Nani barri yalu nulijbangka narringi, narringka yanybikanyi yalungi. Ngala jaliyi narri durrijba yalungi jangkurr, baki miku narrimi jungku yurlurrmba nangangi Kudkanyi. Yuwajiwa narri jungku balki nangangi. Mikukimi nanangini yuwawanyi karu narrinya, narri jungunkanyi yurlurrmba nangangi Kudkanyi. Miku. Barriwa.   
\c 3  
\p
\v 1 Wabula barri narri jungkuyi barrinani nganinyiyurru nangangi Kudkanyi. Miku narriyanyi manku nangangi jangkurr. Ngala nanijba barri narri jungku barrinani wanka nangangi Jisus Krayiskanyi. Narri barrinani buyingkinyi nganinyi nangangi. Baki nanankardi barri marda narringkimi mankumanku kingkarriyngka yajinyi nanganginkanyi yurrngumba barri. Marda narringkimi mankumanku bulangi kingkarri lalijina, Kudkanyi baki Jisus Krayiskanyi. Marda narrimi ngawamba yabimba nanda jala kunyba bulangi. Marda narrimi jungku kunyba bulangi yurrngumba barri.  
\v 2 Nani barri marda narringkimi mankumanku kingkarriyngka yajinyi. Marda narringkimi miku mankumanku yajinyi nayiba wayka jambana yurrngumba barri. Marda narringkimi miku kudanyu mankumanku yajinyi barrinani mamanyi baki dungalanyi baki yingkanyi yajinyi nayiba jambana wayka. Ngala marda narringkimi mankumanku kingkarriyngka yajinyi.  
\v 3 Narri jungku barrinani nganinyiyurru nanankanyi wabuliyngka yuwanyi nuliykanyi kajanyi yajinyi baki yabimbikanyi balki yaji. Ngala narri jungku wankan nangangi Jisus Krayiskanyi. Miku narriyi najba bulanya, Kud marda Jisus Krayis, ngala narri jingkijbangka bulanya, bula marrimbaka narrinya mardarda yurrngumba barri Kudwanyi baki Jisus Krayiswanyi.  
\v 4 Nyulu lalanbaka narrinya yurrngumba Jisus Krayiswanyi, baki jalija narringka janyba, baki mili janarri wanka jungku yurrngumba. Janarri jungku mili wanka nangandu kingkarri. Baku barri jalija nangka mili minimba yalungi bukambijuyngka, baki narri marda, janarri jungku nangandu. Nanamanji barri janyulu walkurra mambuka bukambijuyngka yajinyi, baki janarri jungku malumba nangandu. Janarri mirnarrijba muwa nangangi kudanyu barri.   
\p
\v 5 Nanankardi barri marda narrimi jungku barrinani nganinyiyurru bukamba balkinyi yajinyi. Marda narrimi yingijba nanda balki yaji wambu. Marda ninjimi miku kuluka yingkana, miku nganyinyina kayikayina. Marda narrimi miku kuliwijba kajanyi yajinyi baki dungalanyi. Jaliyi narri kuliwijba yajinyi, baki narri yurlwa nangangi Kudkanyi. Narri nulijba nanankanyi yajinyi, ngala miku narrimi nulijba nangangi Kudkanyi. Miku narrimi nulijba nanganginkanyi yajinyi.  
\v 6 Jaliyi narringka miku kurrkunba jungunkanyi balki nani barri, baki janyulu ngarrangarra muwa narringi Kud. Janyulu kijiwijba narringi. Janyulu yabimba balki yaji narringi baku barri. Jalija nyulu karrinjarrijba narrinya walu nangandu, baki janyulu yanyba yabimbikanyi balki yaji narringi. Nani barri janyulu yabimba narringi, jaliyi narri miku ngayangayijba nanganginkanyi jangkurranyi, jaliyi narringka miku kurrkunba jungunkanyi balki nani barri.  
\v 7 Wabula barri narrili jungku nani, waluwa narri kuyu nangangi jangkurr Jisus Krayiskanyi. Nanamanji barri narringkili mankumanku nanankanyi balkinyi yajinyi, narrili yabimba nanda balki yaji. Nanda balki yaji, nanda ngiruka narringi. Nani barri narrili jungku wabula.   
\p
\v 8 Ngala nanijba barri, marda narrimi barriwa yingijba nanda balki yaji. Marda narrimi miku ngarrangarra muwa yingkanyi. Marda narrimi miku ngirra yingka. Marda narrimi miku yanyba balki jangkurr yingkamukuyngka. Marda narrimi miku mijba yingka.  
\v 9-10 Marda narrimi miku jujijba yingkamukuyngka. Marda narrimi miku jujijba yalungi, jungkukangangi narri barrinani buyingkinyi nganinyi. Barriwa barri bukamba nanda waluwinyi yuwa narringi, ngala narri durrijbangka nanda buyingkinyi yuwa nangangi Jisus Krayiskanyi. Yabimbayi bukamba yaji Kudwanyi, baki narrinya nyuli yabimba. Marda narrinya yabimbaka jungunkanyi kunyba nangangi yurrngumba barri. Narrinya yabimbaka jardiykanyi barrinani nyulu. Marda narrimi jardijba mili barrinani nyulu, baki mili yurrngumba barri, baki janarri jingkijba mili Kud. Janarri jingkijba mili Kud yurrngumba barri.  
\v 11 Bukambiju ngambala Krisjinmuku, ngambala malumba jungku barrinani mungkijimuku. Miku ngambalimi Krisjinmuku jungku yinini yinini. Jumuku baki ngurranyimuku, ngambala malumba jungkuka. Kaburrwaburr baki nanamuku jala miku kaburrwaburr ngambala malumba jungkuka. Mambukamuku baki wakiwarrmuku ngambala malumba jungkuka. Miku ngambalimi Krisjinmuku jungku yinini yinini, ngala ngambala malumba jungkuka barrinani mungkijimuku, baki Jisus Krayis barri, nyulu ngambalangi buwanya, nyulu jungkuka ngamandu kurduluna. Barriwa.   
\p
\v 12 Narri barri nganinyimuku baki jibarrimuku nangangi Kudkanyi. Nyuli maruka muwa narringi, baki nyuli yarrijba narrinya, nanganginmirra. Nanankardi barri, marda narrimi jungku kunyba yalungi yingkamukuyngka. Marda narrimi kandimba yalunya yingkamuku. Marda narrimi yabimba kunyba yaji yalungi. Marda narringkimi miku yarrijba mili walkurra yingkamukuyngka. Ngala marda narrimi jungka kardarda yalungi.  
\v 13 Jaliyi yingkawanyi yabimba balki yaji narringi, baki marda narrimi miku kijiwijba nangangi. Ngala marda narrimi manjamanjamba nanda balki yaji nangangi. Manjamanjambayi narringi balki yaji Kudwanyi, baki nanankardi barri marda narrimi manjamanjamba nanda balki yaji jala yingkawanyi yabimbayi narringi.  
\v 14 Baki marda narringkimi maruka muwa. Jaliyi narringka maruka muwa, baki janarri malumba jungku mikuyaji kijinyi narrindu. Janarringka mardumardujba muwa, jaliyi narringka maruka muwa.   
\p
\v 15 Jaliyi narri jungku nani barri, baki janyulu wajba narrinya mardumardu muwanyi Jisus Krayiswanyi. Janarri miku ngarrangarra muwa, janarri miku balkijba muwa, wajbangangi narrinya mardumardu muwanyi Jisus Krayiswanyi. Yarrijbayi narrinya Kudwanyi, narri malumba jungunkanyi nanganginmuku jandanyimuku. Baki nanankardi barri marda narrimi mirnarrijba muwa nangangi Kudkanyi. Marda narrimi mirnarrijba muwa nangangi, wajbangangi narrinya mardumardu muwanyi.  
\v 16 Nanda kunyba jangkurr nangangi Jisus Krayiskanyi, marda narrimi marrimba nanda jangkurr narringinyina kurduluna. Marda narringkimi milidimba nanganginkanyi jangkurranyi. Marda narrimi jungku kunyba kulaji milidimbikanyi narringka. Marda narrimi brijba wangarr nangangi Kudkanyi. Marda narrimi wajba Kud kunybanyi jangkurranyi. Marda narrimi mirnarrijba muwa nangangi yurrngumba barri.  
\v 17 Marda narrimi jungku kunyba nangangi Jisus Krayiskanyi. Marda narringkimi mankumanku kunybanyi jangkurranyi nangangi. Marda narrimi yabimba ngawamba nanda jala nulijba Jisus Krayis narringi yabimbikanyi. Baki marda narrimi yanyba ngawamba nanda jala nyulu nulijba narringi yanybikanyi. Baki marda narrimi wajba Buwakanya Kud kunybanyi jangkurranyi yurrngumba barri. Barriwa.   
\p
\v 18 Narri Krisjinmuku jibarrimuku nawinganjayudi, marda ninjimi ngayangayijba nganyingkanyi nawinganjanyi. Marda ninjimi ngayangayijba nanganginkanyi jangkurranyi yurrngumba barri. Nani barri narri jungku yurlurrmba nangangi Kudkanyi. Barriwa.   
\p
\v 19 Baki narri nganinyimuku maninganjayudi, marda ninjimi maruka muwa nganyingkanyi maninganjanyi. Marda ninjimi kudanyu maruka muwa nangangi. Marda ninjimi miku ngirrwa nangangi, miku ninjiyi daba. Marda ninjimi kudanyu lalanba nganyi maninganja yurrngumba barri.   
\p
\v 20 Baki narri bayamuku, marda narrimi ngayangayijba bulangi, nganyingkanyi yarrijiyngkanyi baki nijanganjiyngkanyi. Marda narrimi ngayangayijba bulanginkanyi jangkurranyi, baki janyulu mirnarrijba muwa narringi Kud.   
\p
\v 21 Baki narri nijanganjinyimuku baki yarrijinyimuku, marda narrimi miku kudanyu ngirrwa yalungi narringinmukuyngka bayamukuyngka. Marda narrimi miku yabimba yalunya, yalu jungunkanyi ngarrangarra muwa narringi. Ngala marda narrimi kardarda ngirrwa yalungi, baki jayalu mirnarrijba muwa narringi. Jayalu mirnarrijba muwa ngayangayiykanyi narringinkanyi jangkurranyi.   
\p
\v 22 Baki narri wakiwarrmuku, marda narrimi ngayangayijba narringinkanyi mambukanyi. Marda narrimi waki kudanyu nangangi ngala nyulu karrinja narrindu lalanbijina wakinkurri, baki ngala nyuluja barlba, ngala narrija waki dadijba. Marda narrimi miku muningka ngayangayijba nangangi, nulijbangangi narri nangangi nyulu yanybikanyi narringi, narri jungkuja kunyba wakiwarr. Marda narrimi miku muningka ngayangayijba nangangi nanankardi, ngala marda narrimi ngayangayijba nangangi, marukangangi narri muwa nangangi Jisus Krayiskanyi. Narri nulijbangka ngayangayiykanyi ngambalanginkanyi mambukanyi Jisus Krayiskanyi, baki nani barri marda narrimi nulijba ngayangayiykanyi narringinkanyi mambukanyi wayka jambana.  
\v 23-24 Jala narri waki nangangi Jisus Krayiskanyi, baki narri waki kudanyu nangangi. Baki nani barri marda narrimi kudanyu waki nangangi narringinkanyi mambukanyi nayiba wayka jambana. Jala narri waki narringinkanyi mambukanyi, baki nanda barrinani narri wakingka nangangi Jisus Krayiskanyi. Marda narrimi waki kudanyu nangangi barri, narringinkanyi mambukanyi nayiba wayka. Yiningki janyulu yabimba kunyba yaji narringi, yiningki miku. Ngala baku barri janyulu yabimba kunyba yaji narringi Jisus Krayiswanyi. Janyulu yabimba kunyba yaji narringi, nyulungangi narringi walkurra mambuka. Narri wakingka nangangi jala narri waki yingkanyi mambukanyi.  
\v 25 Baku barri janyulu karrinjarrijba ngambalanya walu nangandu Kudwanyi. Janyulu karrinjarrijba ngambalanya, baki janyulu yanyba ngambalanginkanyi balkinyi yajinyi, jali ngambala yabimba. Ngala miku nyuliyi yanyba nayi barri, “Nimbala, mambuka baki wakiwarr, nimbala yabimbayi balki yaji. Nanamannga balki yaji nimbala yabimbayi. Baki nanankardi ninji wakiwarr, jangayu yabimba balki yaji nganyi. Ngala ninji mambuka, jangayu yabimba ngawamba bijal balki yaji nganyi, mambukangangi ninji.” Miku nyuliyi yanyba Kud nani. Miku. Bukambiju Krisjinmuku ngambala jandanyimuku nangangi Kudkanyi. Miku mili yingka yingkanyi walkurra. Miku. Janyulu yabimba nanamannga kunyba yaji bukambijuyngka yalungi, jala waki kudanyu nangangi. Baki janyulu yabimba nanamannga balki yaji yalungi, jala yabimba balki yaji nangangi, mambukanyi baki wakiwarrayngka. Nanamannga yaji janyulu yabimba yalungi. Barriwa.   
\c 4  
\p
\v 1 Baki narri mambukamuku, marda narrimi lalanba narringinmuku wakiwarrmuku. Marda narrimi jungku kunyba mambuka yalungi. Mankumankuwa narri Jisus Krayis barri, nyulu narringi mambuka jala jungku lalijina. Narri wakiwarrmuku nangangi. Nyulu barri lalanbaka narrinya, baki nani barri marda narrimi lalanba yalunya narringinmuku wakiwarrmuku. Barriwa.   
\p
\v 2 Lalanbawa narringka barri. Nanda wuwarr Sayidin, nyulu nulijbangka narringi jujambikanyi narrinya. Nyulu nulijbangka narringi, yabimbikanyi narrinya jungunkanyi balki nangangi Kudkanyi. Baki nanankardi barri, marda narringkimi lalanbawa nanankanyi Sayidinkanyi. Marda narrimi yanyba mududu nangangi Kudkanyi yurrngumba barri. Jaliyi narri yanyba mududu nangangi nani barri, baki janarringka lalanbawa nangangi Sayidinkanyi. Baki marda narrimi karu Kud, narri mirnarrijbangka muwa bukamba nanankanyi kunybanyi yajinyi jala nyulu yabimba narringi Kudwanyi. Marda narrimi yanyba mududu nangangi yurrngumba nani barri.  
\v 3 Ngayu ngajaka narrinya, janarri yanyba mududu Kudkanyi nurrungi marda. Janarri ngajaka Kud, janyulu munyajba nurrunya milidimbiji yingkamuku nanganginkanyi jangkurranyi. Janurru karu yalunya nanankanyi jangkurranyi jali ngadijba Kudwanyi wabula. Janurru karu yalunya nangangi Jisus Krayiskanyi. Janarri ngajaka Kud nurrungi, janurru milidimba yalunya Jisus Krayiskanyi. Jungku ngayu nayiba brisinyina, milidimbangangi ngayi yalunya nangangi,  
\v 4 baki mili jangayu milidimba yalunya nangangi. Janarri ngajaka Kud ngaki, jangayu kudanyu milidimba yalunya nanganginkanyi jangkurranyi, baki jayalu jingkijba nanda jangkurr. Jalija yalu manku ngaki jangkurr nangangi baki jayalu jingkijba ngaki jangkurr nangangi marda. Barriwa.   
\p
\v 5 Marda narrimi jungku kunyba kulaji nangangi Kudkanyi. Jala narri jungku yalundu jala miku yalimi Krisjinmuku, baki marda narrimi karu yalunya nangangi Jisus Krayiskanyi. Marda narrimi karu yalunya nangangi. Baki mankumankuwa narri nayi. Yalu najbawa narrinya Krisjinmuku. Jalija yalu najba narrinya jungunkurri kunyba yurrngumba barri, baki jayalu jingkijba narrinya, narri durrijba nanda jangkurr jala narri milidimba yalunya.  
\v 6 Marda narrimi miku yanyba balki jangkurr kudiyana, ngala marda narrimi yanyba kunyba jangkurr yurrngumba barri. Jaliyi yalu yilikajba narrinya, wanyingkanyi narri durrijba Jisus Krayis, baki marda narrimi karu yalunya nangangi. Marda narrimi kardarda karu yalunya, yanka jayalu marda jungku yurlurrmba nangangi Kudkanyi jala yalu kuyu jangkurr nangangi Jisus Krayiskanyi. Barriwa.   
\p
\v 7-8 Nanda nganinyi Dikikus, nyulu barrinani bababanyamba ngambala. Nyulu wakiwarr nangangi, ngambalanginkanyi mambukanyi Jisus Krayiskanyi. Wakingka nyulu kudanyu nangangi. Janyulu yidamba narrinya, baki janyulu karu narrinya ngaki, yanka ngayu jungkuka. Ngayu manjijbangka nanda Dikikus narrindurri, baki janyulu karu narrinya ngaki baki yalungi Krisjinmukuyngka nayiba ngakindu. Jalija narri manku jangkurr nurrungi, baki janarri jungku mirnarrijba muwa. Janarri jungku ngiruka nangangi Kudkanyi marda.  
\v 9 Nanda nganinyi Yunisimus, nyulu barrinani bababanyamba ngambala marda, jala ngambala maruka muwa nangangi kudanyu barri. Wabula nyulili jungku narrindu jurjina. Nanijba barri janyulu wijba narrindurri. Jabula Dikikus baki Yunisimus, jabula karu narrinya nanginyina yajina nayiba.   
\p
\v 10 Baki nanda Yarisdarkus, nyulu jungkuka nayiba ngakindu brisinyina. Nyulu manjijbangka jangkurr narrindurri. Baki yingkawanyi marda, nyulu manjijbangka jangkurr narrindurri. Nangangi niji Mak, marruwarra nyulu nangangi Barnabaskanyi. Wabula barri ngayi manjijba jangkurr narrindurri nangangi Makanyi. Ngajakayi narrinya lalanbiji nanda Mak jaliyi yidamba narrinya. Nyulu marda manjijbangka jangkurr narrindurri Makwanyi.  
\v 11 Baki nanda Jujuwa, yingka niji nangangi Jusdus. Nyulu manjijbangka jangkurr narrindurri marda. Nanginmuku, Yarisdarkus, baki Mak, baki Jujuwa, yalu Jumuku, ngala yalu Krisjinmuku marda. Yalu wakingka nangangi Kudkanyi nayiba ngakindu. Mikuyaji yingkanyi yalungi Jumukuyngka jala yalu waki nayiba ngakindu, ngawamba nanamuku kujarra yingamali. Yalunjalili karu nangangi Kudkanyi, nyulu lalanbawarr. Yalili waki nayiba ngakindu, baki nanankardi ngayu jungku ngiruka wakinkanyi nangangi Kudkanyi.   
\p
\v 12 Baki nanda Yibabras jalili jungku ngakindu, nyulu marda manjijbangka jangkurr narrindurri nanganginmukuyngkurri mungkijimukuyngkurri. Nyulu marda wakiwarr nangangi Kudkanyi. Nyulili yanyba mududu nangangi Kudkanyi narringi. Kudanyu nyulu ngajakangka Kud narringi, janyulu yabimba narrinya jungunkanyi ngiruka nangangi. Janyulu yabimba narrinya kuyunkanyi nangangi jangkurr, durriykanyi nangangi jangkurr yurrngumba barri. Nyulu marda ngajakangka Kud narringi, janarri ngayangayijba nangangi Kudkanyi yurrngumba barri.  
\v 13 Ngayu karungka narrinya nangangi Yibabraskanyi, nyulu wakiwarr nangangi Kudkanyi. Nyulu wakingka kudanyu narringi baki yalungi jalili jungku nananyina yajina Layudisiya, baki nananyina yajina Yirabulis. Kudanyu nyulu wakingka bukambijuyngka narringi. Barriwa.  
\v 14 Baki kujarranyi bula mili manjijbangka jangkurr narrindurri. Nanda maralnguji ngambalangi mankankanyi niji nangangi Luk jala ngambala maruka muwa nangangi kudanyu barri, baki yingka Dimas. Bula marda manjijbangka jangkurr narrindurri.   
\p
\v 15 Nurru manjijbangka jangkurr yalundurri, bukambijuyngkurri Krisjinmukuyngkurri jala jungku nanaba Layudisiya. Nurru marda, nurru manjijbangka jangkurr nangandurri jibarriyurri, niji nangangi Nimba, baki yalundurri Krisjinmukuyngkurri jalili malumba jungku nanganginyina barndana. Malumba yalili jungku briykanyi yaji baki yanybikanyi mududu nangangi Kudkanyi.  
\v 16 Ngayu karungka narrinya, marda narrimi yanyba nayinda jangkurr najana, jalija narri malumba jungku jurjina. Waluku barri janarri manku nayinda jangkurr, baki janarri manjijba nayinda naja yalundurri Krisjinmukuyngkurri jalili jungku nanaba Layudisiya. Jayalu yalu marda manku nayinda jangkurr. Baki yingka jangkurr najana ngayu manjijbangka yalundurri. Jayalu manku nanda jangkurr baki jayalu marda manjijba nanda naja narrindurri. Janarri manku nanda jangkurr yalunginyina najana marda.  
\v 17 Ngayu ngajakangka narrinya, narri karunki Yarrkabus nanginkanyi jangkurranyi. Janarri yanyba nangangi nayi barri, “Marda ninjimi waki kudanyu nangangi Kudkanyi. Marda ninjimi yabimba bukamba nanda jali ninya karu Kudwanyi.” Nani barri marda narrimi karu nanda Yarrkabus.   
\p
\v 18 Nayi jadunyi jangkurr ngayu yarrijbangka jangkurr ngakinyina marnina. Ngayu manjijbangka nayinda ngaki jangkurr narrindurri. Ngayu ngajakangka narrinya, miku nganarrimi mamanumba. Mankumankuwa nganarri ngala ngayu jungku nayiba brisinyina. Baki ngayu ngajakangka Kud narringi, nyulu yabimbiji kaja kunyba yaji narringi. Barriwa barriwa bukamba nayinda jangkurr.