\id EPH - Usan March 2001 
\h Epesus 
\toc1 EPESUS 
\toc2 Epesus 
\mt1 EPESUS  
\c 1  
\s1 1:1,2  
\p
\v 1 Ye Pol, Qenu wo Munon inubersiau tari eng Yisas wonou misiguor eng ye bo imusi eb qamb yemaribigorei. End an Qenu wonou munon yurau Epesus igoumon end namanimun e gumotoroum. Munon inubersiau tari Yisas wot igub ne toat igoumon.  
\v 2 End Qenu ininou Tain eng nob Yisas Munon inubersiau tari ininou munon baraitari nob wurinou uyes anubersiari oau mein igoarar.   
\s1 1:3-14 Qenu Munon inubersiau im gab ininou igomurur nonogursi igo  
\p
\v 3 In gugum Qenu, ininou munon barai Yisas wonou ur eng, wot uberet igorun. Munon inubersiau tari wo gab-gab Qenu ininou misir nonogursi wonou ginamt mi uber-uber inimbiga qoyamet igoun.  
\v 4 Qenu wo mi gugum me barsiau qen end Munon inubersiau tari wo gab-gab in wonou yurau igoarar qamb inmaribigorei. Inmaribigine Qenu magqurt in munon qau igo qomon boru gitab igoarar qamb.  
\v 5 Yisas ag e darab inqubeieminer end Qenu qoan inqenungar inmaribig ne in wonou wau init qamar end wo darab inqubeiamorei. Eng Qenu wonou misir end uyes ebeterei.  
\v 6 Qenu sig-sig mom inqenungar ne wonou wau oau uri eng ar init imuriamor end wagari in gugum wo unum bemeni igorun.   
\p
\v 7-8 Munon inubersiau tari wo sig-sig mom inqenungar ne umb qeru init igeramor end ininou qomon boru birueter end ne see in uber igoun. Ebet ne qoyam uber misir uber inimbigorei.  
\v 9 Qoan Qenu Yisas imurimb misir igor eng wonou qi igoai. End see wonou misir qi igoar eng Yisas ag e darab Qenu wonou misir qi igoar eng aba dibentar eng.  
\v 10 Qenu wo misir igoar eng ete: Mi gugum Qenu wonou ginamt ne ag e barsier eng mom musub qoat igama is-is yarab wonou qen maribigor eng gab mi gugum eng Yisas wot waga wo wurinou gigit igo oroar igoriba.   
\p
\v 11 Wonou qenungau eng igoar end in qoan ir inmaribigorei. Qenu wonou inmaribig ne Yisast in ba qiumuniamorei. Qenu wo mi ebeib qamb qanambig qamar eng ebet qas wager eng.  
\v 12 End in munon yurau qamar Yisast oabig taut igoun. End Qenu wonomi wes ebeter end unum bemeni igorun.   
\p
\v 13 An gor qob apand eng igari Qenu wonou an yonou munon yurau qamb anmaribigorei. Qob uber eng an ba qiumuniamorei. An Yisast oabigari gab Qenu anuruar igo Igomurur Qau qoan init imurimb qamar eng imuriamor eng anboopurima ten igoumon.  
\v 14 Igomurur eng Qenu wonou munon yurau wurit imurimine ete imbigar qamb: Igomurur set inopurima ten igoun eng igoi qen geret mi gugum init iyeter eng irimanima guboun. Qen end Qenu wonou yurau mi ger wuriqororub me ebeinerei, sarog uber igorubour. End in wonomi qiribi ten ebeter end mismisir igorun.   
\s1 1:15-23 Pol Epesus wurit igub Qenu qebi qamb igoai  
\p
\v 15 Qanam end ye igoum eng an mom Yisas ininou Munon Aib end mom oabig ne Qenu wonou munon yurau eng mom wuriqenungar igoumon.  
\v 16 End ye anit igub Qenut taurab me qamb igoum, qenen annonogursi igoar qamb qebi qamb igoum.  
\v 17 Yisas munon inubersiau tari wonou Ur eng Qenu, wonou ginamt qiribiten igo eng qebi nob qemerine Igomurur imurima anit isub oau anmenima misir uber igub wonou qob qanam eng imbig ne Qenu wonou git gor imbigar qamb.  
\v 18 Ye qebimine aninou misir eng aba wonou begen eng gab imbigar qamb. Ende aba an wonomi mom tenen igub igoarar qamb, anit iyeter eng igub qoat igoarar qamb. End an imbigar, in Qenut igub igumune wonomi init maribigor eng sig uber ar.  
\v 19 An eng imbigar, in Qenut oabigun eng wo mom tenen ete igo innonogursi igo. Gagam eng qiribiten mom innonogursi igo, in maigas me imbigunei.  
\v 20 Wonou gagam qiribiten end gari qoan ebeter eng, Yisas menima der bugamor eng. Bogoma mot irab wonou ginamt end uberegent wes end bugamsier end see wonou unum diban igo.  
\v 21 End ne see Munon inubersiau tari wo munon baraitari Qenu ginamt igour eng, ne munon aib gigit igo eng ne munon qer gagam aib eng ne munon aib-aib eng ne munon unum nob see igour eng, a qen geret igorunor eng gugum wuritanami wo wurinou gigit igo. Ne qen geret eng gor wonou mom ende igoriba.  
\v 22 Qenu sios mi eng gugum mom Yisas goten qanamt end bigorei igama wo wonou tari mom igo qoat igo.  
\v 23 Sios eng Munon inubersiau tari eng wonou git goan igeragart eng. Mi gugum Yisas wo igo, ne sios erobon eng wo yab di iua igo.   
\c 2  
\s1 2:1-10 In umb wogub bo der buguminei  
\p
\v 1 Qoan an Qenu qob me toat, qomon boru ebet igoumon end aninomi dui wogub umau gas ende abatamanei.  
\v 2 Qen end an ai e wonou qomon boru eng toat qib igumanei. Ai bigau wurinou baraitari eng toat igumanei. Ai bigau see munon oau wurimenima toat igour eng Qenu qob omboarir igour.  
\v 3 Qoan in gugum munon yurau eng wurinob garisi igoun end qomon qoan eng toat igunei. Qomon qoan eng in misirt et igo inbumima toat igunei. Ininou ende igo ende qi eng munon boru eng wurinob garisi taui qamb uru iraminei qi.   
\p
\v 4 Ego Qenu inqenungar igoar eng sig-sig mom aib end intoubarerei.  
\v 5 Git apand ininou qomon boru eng mom iningarama umuminei. Ego Qenu init igub igoar eng sig aib mom end Yisas munon inubersiau tari wo nob garisi bo inmenima igomot der bugaminei. End Qenu wonou qenungau end bo anmusia uber igoumon.  
\v 6 End Yisas munon inubersiau tari wo nob garisi inmenub ne Qenu wonou ginamt end wo nob garisi in unum irarei. End wo Qenu ii igama ne in bo Yisas ii igoruboun.  
\v 7 Wo eng ebeter eng munon gugum see ne qen geret wuriqenungar igoriner eng inimbig ebeterei. Wo inqenungarer eng ete: Yisas wonou sarau uber ebeter end inimbiga.  
\v 8 An Yisast oabigari ne Qenu anqenungar ne anqubeiamorei. Mi eng aninou maigas me ubunanei. Qenu wonou uyes mi eng anit ebeterei.  
\v 9 Ne gor, an sarau uber abari gab taui qamb me abau, ue. Eng gab munon ger wonou qen big yegaiar qamb me ebeiner.  
\v 10 Yisas ag e dara Qenu bo in munon bubun inbarsiarei. End in qomon bubun uber eng toat igoarar qamb. Wonou qoan mi eng abar qamb arsitarer end ereteri ebet igoun.   
\s1 2:11-18 Munon inubersiau tari wot in munon yurau gari bureminei  
\p
\v 11 An mom imbig igoumon, Yuda wurinou ubent uyes git goan suab maribig wogub anit: “munon yurau ar” qamb igour. End an musub imbigar, qoan apand aninou git goan end an munon yurau ar igumanei.  
\v 12 Qen end an Yisas pi me igamau. Ne gor Qenu qob nausi munon yurau wurimaribigor yurau end me igamau, an ai e munon yurau eng wurinob ag igumanei. Ende igo ne mi uber see gaumon eng an qoan qoyam ue. Ne Qenu gor me imbig igamau.  
\v 13 Ego see Munon inubersiau tari Yisas umor end anamar yar Qenu tenori igoarar qamb an wager end igoumon.  
\v 14 Munon inubersiau tari wonou oau inmeinsi ne Yuda yurau eng nob yurau ar eng nob yurau gari inmaribigorei. Qoan Yuda munon yurau ar eng nob yogub igour eng youn gas ende igoai. Igama Yisas umor end ne youn eng bapami wogub yurau ombur igour eng aba soriamirei.  
\v 15 Yisas wo qomon qoan igoar eng ne qob tau ne ingong tau igoar eng gugum biisiteterei. Ende ebine munon yurau ombur eng bo yurau gari burab munon yurau bubun igoarar qamb. End ne qibanamsi igoun.  
\v 16 Munon yurau ombur eng gab Munon inubersiau tari dara nam erer uri waramir end yogorau qomon eng bumaiamorei. Bumai wogub ne yurau ombur eng wuriba qiumunima git goan gari burari wuriqubei Qenu qani isuor end ten igour.  
\v 17 Munon inubersiau tari wo derer eng qob uber mein eng an munon yurau ar Qenu me imbig igoumon eng. Ne Yuda munon wo qani igour eng soro qob uber eng dibes aninob qamarei.  
\v 18 Igomurur werei inimbigor end in Tain wot irub qamb eng Yisas werei qo inimbigorei ereteri igo.   
\s1 2:19-22 In Yisas yurau buremin end in Qenu wonou munai apand  
\p
\v 19 End ne see an bo munon yogur isau gas ende ue, Qenu wonou munon yurau eng wurinob qiumuniaman end an Qenu wonou yurau apand.  
\v 20 In munon Yisas inimuriamor eng nob munon qob gigit qamb igour eng nob in munai qoren. Ne an munai git Qenu qoren erer end mindaterei. Ne qoren unatari eng Yisas Munon inubersiau tari eng wonou.  
\v 21 Mon magari qamb eng Yisas tenori big waramir end mom nautarei igo. End ne Qenu mon eng bo imusi-imusi mindat bisa mon eng aib burab ne Munon Aib wonou mon qau igoriba.  
\v 22 An gor Yisas tenori igoumon end Qenu munon Yisas yurau igour eng nob an qiumuniamorei. End an gugum Qenu wonou mon apand. Wonou Igomurur end anit isub igoriba.   
\c 3  
\s1 3:1-13 Pol qob uber munon yurau ar wurinob qamb igoai  
\p
\v 1 Qanam end ne ye anit igub Qenu nob qamb igoum ye Pol, ye Munon inubersiau tari Yisas wonou sarau betet an munon yurau ar qob uber aninob qamb igimine uyort yebigari ten igoum.  
\v 2 An mom imbig igoumon eng, Qenu yemusuor end ye bo an anmusierin qamb sarau ebet igoum.  
\v 3 Qenu qob qoan waber igoar eng ye yiimbiga qoyametoroum. End qoan qob pitent gumat aninob qamam eng.  
\v 4 An wanunger gab igo eng. Ye qob eng aninob qamam end ye Munon inubersiau tari wonou qob wabermau eng mom imbig ugaum.  
\v 5 Qoan qen gugum Qenu qob waberamau eng qanam musub me wuriimbig igamau. See Qenu wonou Igomurur Qau eng in munon wonou imbigau yurau qau eng nob qob gigit qamarau munon eng nob init isub inseara dibes qamb ugaun.  
\v 6 Qob qi igoar eng ete: qob uber eng igari oau anmenima an end wot oabig an munon yurau ar Yuda nob sori bo Qenu wonou yurau gari boromanei. End an in nob erogori Qenu wonomi uber Munon inubersiau tari wot qob nausi qamar eng qerei imbig igoumon.  
\v 7 Ye Qenu wonou wau unebi yeba yemamin baab wonou qob uber e qem qamb yiimbigor end qamb igoum. Ne ye musub wogub wonou qiribiten eng yet isub yenonogursier end sarau e baab igoum.  
\v 8 Ye Qenu wonou munon yurau qei eng igamari ye wuri ii ete igoum. Ego wonou yetoubet ne wonou qob uber eng munon yurau qei wurinob qem qamb qamara qamb igoum. Qob uber eng Yisas munon inubersiau tari wonou qomon ne wonou sarau ne qoyam eng in munangit maigas me qerei imbigunei, misue ar.  
\v 9 Qenu wo mi gugum barsier eng ne mi see ebeiner misir eng wabiamorei igoai. Misir eng qoan waber igoai. End ne see qob eng ye dibes qem qamb yemaribigorei.  
\v 10 Sios munon yurau wuri der Qenu wonou misir ne qoyam uber end wonou mi wes-wes aba dariamor eng mom imbig gab musub obounor. Ende abari munon baraitari erer qite igour eng wuri der Qenu wonou qoyam ne misir aib uber eng gab imbig qoagurui ete qomorunor: Qenu wonou qoyam eng sig aib.  
\v 11 Munon inubersiau tari Yisas, ininou Munon Aib wo der sarau ebeiner eng Qenu qoan ir arsiarei.  
\v 12 In Yisast oabig nob igo ne me yarimunei. In mom qoyam eng, Qenut iroau ai werei eng Munon inubersiau tari eng gari. Wo umb wogub erer qite irer end in bo iroau werei ereteri igo.  
\v 13 End ne ye ete aninob qemerine igar: ye anit sarau baab qibei uminei gab an qer uriomunon. Ue, ye ende ebine an unum dibeneriba.   
\s1 3:14-21 Munon inubersiau tari inqenungar igo eng sig aib  
\p
\v 14 Qanam end ne ye Tain menmant gamaur wat bugamei.  
\v 15 Munon Qenu ginamt igour eng ne in ag e igoun eng nob garisi Qenu qoan in unum bigorei igo.  
\v 16 End Qenu wonou qiribiten mi uber-uber ui ar igo eng gab ye anit igub wonob qemerine wonou Igomurur anit imurima isub annonogursia nonoguretoruboumon.  
\v 17 An Yisas anamar igoar qamb nob qemerine an wot oabigari anamar igoriba. Ende aba Qenu sig-sig mom anmusia an nam durun ai qoronob bea nam qen gagam naget igo gas ende qi qenunget igoruboumon.  
\v 18 Ende aba an gugum Qenu wonou munon yurau eng nob gari qas igoruboumon. Igo Munon inubersiau tari inqenungar igo eng sig aib ne sig qit-qite ne sig qum-qumo ne sig wauimau aib eng imbiguboumon.  
\v 19 Ne gor Munon inubersiau tari wo initoubar igo eng qoyam gugum wuritanamima. Mi uber-uber Qenut yab di iua igo eng anit iger der igoriba.   
\p
\v 20 Wonou qiribiten eng in opuri ten igo. End ne in wot igub qamb qiyo a misir maigas insi qamb igub igoun eng wotanami mi ui ar indab igo.  
\v 21 End ne in Qenu imbig igoun yurau eng Munon inubersiau tari Yisas unumut qenen-qenen Qenu unum bemeni isub igorun. Apand.   
\c 4  
\s1 4:1-16 In Yisas wot oabigumin end in wonou gitgoan igeragart  
\p
\v 1 See, ye Munon Aib wonou sarau eng ye musub qib igimine uyort yebigumirei. End ye ete misir igoum: Qenu wonou anit igub wonou yurau end igoarar qamb anmaribigor end ye ete an irun wab qemerine an wonou menmant end qoregen qib igoarar.  
\v 2 Igo munon qei igamari an wuri ii igo qi wurinob igoarar. Ansumungasiari gab eng me tauimar. Munon gugum wuriqenungar ne qei quguragetarari ibag wurimusiarar.  
\v 3 Igomurur Qau an garisi qungai ne anseara an qibanamsi erogori igamau werei end qib igoarar.  
\v 4 In git goan gari ne Igomurur gari. End misir eng gor garisi big Qenu anmusierib qamar eng qoat igoarar.  
\v 5 Munon Aib gor gari qas ne oau apand eng gor gari, ne yat inmaragansiau eng gor gari.  
\v 6 Ne Qenu gor gari qas ininou Tain eng. Wo munon gugum wuritanami igo ne munon gugum wuri opuri ten igama wonou sarau ebet igour.   
\p
\v 7 Munon inubersiau tari mi ui ar indarer end Qenu in munon gari-gari sig-sig mom inmusub igo.  
\v 8 End Qenu qob ete qamara gumatemirei igo:  
\q1 Munon eng wo erer qite irab munon uyort igour eng irou oramar irarei. Irab mi ui ar munon eng wuriserei.   
\p
\v 9 Ne qob qanam eng, maigas? “Oramar erer qite irarei” eng maigas? Wo se qamart erer qite me iroau, qamart wo ai sig qum-qumo igo end isorei.  
\v 10 Munon ag e derer eng gari bo erer qite irarei. Erer qite irab Qenu ginam gugum isub mi gugum erer qite igo eng wonosi wurimusiarei.  
\v 11 Ete at wurimusiarei: Qei munon wuriimbigar qamb wuriimuriamorei, ne qei Qenu qob gigit qamarar qamb, a qei Qenu qob wuriimbigar qamb, qei munon oroar igoarar qamb, a qei imbigau munon igoarar qamb.  
\v 12 Wo eng ebeter eng Qenu wonou munon yurau eng wuri ende qereima ne Munon inubersiau tari mom imbig ne wonou sarau eng qoregen abari Munon inubersiau tari wonou qob unum nob dibent uburiner qamb.  
\v 13 Sarau eng mom ende is-isi yarab in gugum mom qibanamsi oau apand buruboun. Burab Qenu wonou wau end qoyam gari igoriba. Ende ebet Qenu wonou wau qomon inimbigor eng in mom toat ugoun eng Munon inubersiau tari iitari igoruboun.  
\v 14 See in sabar bo waii igamau ue. Munon qei ber qob qamb igour eng wuri qob qei qetopur qamb igour. Qob eng at qamb igour eng in me inba biiges-biigesieminer. Ne gor moon namanimun gusit ba qoa gas ende me ebeiner.  
\v 15 Ue, in munon gugum wuriqenungar qob apand qas qomorun. In munon apand Munon inubersiau tari nob tenori igorun, wo ininou munon gigit.  
\v 16 Wonou inoar igo end git goan wes-wes eng aba gari qas igo. End in qoyam wes-wes inimbigor end sarau wes-wes baab igorun. Git goan gari-gari musub igoun eng git goan aib end gari iyet igo. Ende aba ne git goan aib burab igo, ende ebet gugum der git goan gari qas igo unum diban ba ereri igour.   
\s1 4:17-32 In Yisas yurau end qomon bubun toat igorun  
\p
\v 17 End ye ininou Munon Aib unumut qob gagam ger aninob qemeribam eng. An bo sabar munon qomon boru ebet igour eng me tauar. Wuri misir song-song eng qas toat igour.  
\v 18 Wuri qoyam eng itum gas ende. Wuri qoyam ger ue, end Qenu nob igo igomot igamau werei eng siningot wogub werei susu toat qib igour.  
\v 19 Wuri qomon boru end me qinining igour. Wuri qomon boru end mom tari mor isub wogub misir eng qomon boru song-song oboub qas igub igour.   
\p
\v 20 Qomon eng an qanambig Yisas yurau igorub qamb qomon qiyo qob ger ende igub Yisas yurau me burau.  
\v 21 An mai, se qamart Yisas qob apand musub me igau qiyo?  
\v 22 Qob apand eng ete: qoan an qomon boru end qib igumanei. Qomon boru qanam eng, munon ger wonou mi ger gab oau naget baib qamb mirimot me qem. Qi mirimot qiyo, a mi gab oau naget abau eng anmuaserembar eng gab mugenderi igoarar.  
\v 23 Ende at aninou misir qoyam nob wagari bubun bo igoriner.  
\v 24 An munon yurau bubun bo darimar. Qenu munon bubun barsia ne Qenu wonou gas end dariamorei. Munon bubun eng wonou qomon eng qoregen ne qau.   
\p
\v 25 End munon qei wurimurimarau qomon eng wagar. Qob apand qas aninou munon oabig igour eng wurinob qamarar. Eng in Yisas nob igorub qamb unum iramin end in gugum Yisas wonou git goan garisi end.  
\v 26 An munon geret misiringet gab eng, misiringet ten ende igamari qen dirigor me isiner. Ende igo eng qomon boru obouboumon.  
\v 27 Ende igorunon eng Satan mondir weimatau gas ende abari diab anit isiba.  
\v 28 Munon ger mi urim baub igo gab eng weginer. Wogub sarau qanam big baab mi git gab ba munon mi ue eng wurisiner.  
\v 29 Qob isi ger qabarit end me qamarar, munon qei wurimusiau qob eng qas qamarar. Ende obounon eng munon qob wurinob qomorunon eng igunor eng uber igubour.  
\v 30 Ne an qob qamb Qenu Igomurur Qau me quguragsiarar. Igomurur wo anmaribigib qamb imurima anit isuor eng anopurima ten igoumon. Igoi qen geret Qenu wonou anmaribigor end animbig anmusia sarog big bebereg igoruboumon.  
\v 31 Ende gab ne an misir boru igub misiringetarau eng ne qob omboarir qamarau eng ne quyai qob, ne qomon boru qei-qei eng me abar.  
\v 32 Munon wuriqenungar ne qomon mein eng qas abar. Qenu aninou qomon boru Yisas unumut biriotar ariramor gas ende, an gor munon qei qomon boru anit abari gab an bo me tauimar.   
\c 5  
\s1 5:1-20 Begent qib igorun  
\p
\v 1 Qenu sig-sig mom anmusuor end an wonou wau iitari igoarar.  
\v 2 Munon inubersiau tari at qib inimbigor gas ende at qi qenungau qomon end qas qib igoarar. Wo ende at ne umb wogub inmusuor eng mian yamari qogom sig uber iroa Qenut igub mismisiroau gas ende ebeterei.   
\p
\v 3 An Qenu wonou munon yurau qau. End an bo maigas yamangar song-song nob qib qiyo, qarig ir qiyo, a qomon boru oau naget qiyo, a mi eng gagar an bo wobon end bais me abar.  
\v 4 Qob isi ne qob soagen ne qob boru gag-gag gor me qamarar. Qomon eng Qenu magqurt misue ar. End an Qenut qenen mismisir uber qamb igoarar.  
\v 5 An mom ete musub imbigar, munon yamangar song-song wurinob qib qiyo, a misir soagen igub qiyo, a oau naget igo eng, wo aibigau song-song eng toat igo ebet igo. Munon yurau eng wuri Qenu ne Munon inubersiau tari wurinou bibis end me igorunorei.   
\p
\v 6 Munon qei abari anmurimar qob soagen me aninob qomorunor. Ende obounor eng Qenu wonou qob omboariramau gas eng gab wo misiringeteriba.  
\v 7 End ne an munon boru qomon eng nob igour eng an bo me wuri magermar.  
\v 8 Qoan aninou itum end igumanei. Ego see an Munon Aib wonou yurau anqubei ne anamar yar begen end anwagerei. End an begent qib igoun gas ende at qib igoarar.  
\v 9 Begent qib igamau mi git eng, qomon uber ne qomon qoregen ne qob apand qas qamarau eng.  
\v 10 Munon Aib wonou qomon uber end qib igoarar qamb animbigar end wariges qib igamari Qenu animbag anitreminer.  
\v 11 Munon qomon boru ebet igour eng me wuri magermar. Qomon eng itum gas ende. An qomon qoregen end qib igamari qomon boru eng dibenteriner.  
\v 12 (Wuri qomon boru waber qi ebet igour eng ye dibes me qemerinei qabari qubig wogoum).  
\v 13 Ego meimi qomon ger munon ebet igour eng begen eng wot begenara diban gab ne uber boru nob qereimboun.  
\v 14 Qenu wonou begen eng gari mi gugum begesia begent uburiba. Qob eng igo end ne munon yurau end wurit ete qura:  
\q1 An munon inab igoumon eng an umau mumun gas ende. End qand der bugab qob igar. Igari Munon inubersiau tari anqubeima ne wonou begen eng anit begeneriner.   
\p
\v 15 An qoyamet qib igoarar. Munon misir ue qib igamau gas ende at me qib igoarar. Munon qoyam imbi-imbi misir qoregen igub qib igamau gas ende at qib igoarar.  
\v 16 Qen see igoun eng qen borut igoun. End Qenu wonou qomon ne wonou misir eng toat igamau eng. Ar igumune qen eng isi isiner qamb.  
\v 17 An me qangangetarar, Munon Aib wonou qomon abar qamb qenunget igo eng qoot abar.   
\p
\v 18 Wain ya eng aib nub me qangangetarar. Qomon eng an ba sumungasi igo. Wagari Qenu Igomurur eng anmuaserama ten igoarar.  
\v 19 Ende aba an qiumuni munon qei wurinob qamb gab eng buk Sam qob eng qiyo, uru wab qiyo, ende at ne Munon Aib wot oau uber burab uru wab igoarar.  
\v 20 Ininou Munon Aib Yisas Munon inubersiau tari wo gab-gab Qenu ininou Tain mi gugum indab igo end uberet unum bemeni igoarar.   
\s1 5:21-33 Munon yamangar qibaub musub igorunor  
\p
\v 21 An Yisas ininou Munon aib unum bemeni ne an gari gari der Qenu wonou yurau wuri ii igoarar.   
\p
\v 22 Yamangar an, Munon Aib qob qamara igetet igoumon gas ende aninou munon gor igatar igoarar.  
\v 23 Aninou munon eng wuri aninou baraitari igo anoar igour. Munon inubersiau tari sios munon yurau qeretutnob oroar igo gas ende. Ne Sios yurau eng Munon inubersiau tari wonou musuor end Sios eng Munon inubersiau tari wonou git goan.  
\v 24 End Sios wonou Munon inubersiau tari igama ii igo gas ende an yamangar aninou munon wuri ii igoarar.   
\p
\v 25 An munon, aninou yamangar wuriqenungarar. Munon inubersi igo eng Sios qenunget ne wonomi dui umb Sios musuor gas ende.  
\v 26 Wo ende at ne Sios ya qob nob ba Sios birogonimau gas ende aba oan bura ne Sios eng wonosiarei.  
\v 27 Ende ebet Sios git goan eng gar eng sig maieng, unun ger ue, ninir ger ue, maieng ar. Sios mindigar qob ue, qau igoar qamb.  
\v 28 Eng gas ende an munon aninou yamangar wuritoubar wuriqenungarar. Aninou git goant igub igoumon gas ende abar. Munon wonou ubenit igub musub igo eng wonou git goan musub igo gas ende.  
\v 29 In gugum at imbig igoum eng, munon ger wonou git goan siningot me nob yogub igo. Wo mi uta nia musub qoat igo. Eng gas ende gari Munon inubersi igo eng Sios ende at musub igo.  
\v 30 End in Yisast unum iramin end wonou git goan igeragart eng in sios igoun.  
\v 31 End ne Qenu qob ete igo: munon ger yamangar baub eng ur unor mom wuriwogub wes opur isub ombur bo git goan gari qas burab igour.  
\v 32 Qob eng qanam aib waber igo end munon maigas me imbigunerei. Ego yonou misir igoum eng Yisas Sios wonou sieriner end qamarei.  
\v 33 Ne qob eng anit gor qamarei igo. An munon gari-gari, aninou git goant igub musub igoumon gas ende aninou yamangar wurimusiarar. Ne yamangar, an aninou munon im ibag igoarar.   
\c 6  
\s1 6:1-4 Pol wau ur unor wagrari wuri irun wab qamarei  
\p
\v 1 An wau qamaaman, tain nanib qob qamarari igatarar. Qenu wonou tain nanib wurimaribigor end igour end qob qamarari igatar igoarar.  
\v 2-3 Qenu wonou qomon qob irou in toat igoarar qamb nausier eng igo. Ego qomon qob qamart in toat igoarar qamb nausier eng ete: aninou nani taineb qob qamarari igub toat igoarar. Ende at qen dirigor ag et igoruboumon.   
\p
\v 4 An wau ur unor gor qob e igar. Aninou wau abari me misiringetorunor. An musub oroar igo ne Yisas wonou qomon eng wuriimbigari qoyametorunor.   
\s1 6:5-9 Munon baraitari ne munon soro ar end Pol wurit qamarei  
\p
\v 5 An munon boru qei der munon mind nob eng ar wurit sarau baab igoumon eng an igar: an aninou munon baraitari eng im ibag ne qob qamarari toat igoarar. Misir ombur igub sarau me batarar, Yisast igub igoumon gas ende aninou munon eng gor ende wurisiarar.  
\v 6 Wuri magqurt qas sarau bune qen inimbagaiar qamb ende me abar. An Munon inubersiau tari eng wot igub Qenu an sarau abar qamb animbigar eng qas oau apand big abar.  
\v 7 An wurit mismisir sarau batarar. Sarau eng oboumon eng munangit wurit sarau me ebet igoumon. Munon aibt ebet igoumon.  
\v 8 End an igar, munon gugum sarau ar batar igorunor eng ne munon uber wurinou sarau uber ebet igorunor eng Munon Aib wurinou qomon uber end wuriqereimba. Ende at ne wurinou qomon uber qo boru ebet igorunor end mi qeemben ende werisiba.   
\p
\v 9 Munon barai an gor, aninou wau unebi ba nob igamari ar sarau batar igour eng gor musub oroar igoarar. An wuri ba sumungasiari me anit yariomunor. An ete igar: an aninou wau unebi nob aninou Baraitari gari erer qite igo eng aninou qomon qeemben qereimba.   
\s1 6:10-20 Yogorau munon git baab igour end mit big qamarei  
\s1 Yogorau munon wonou git baiau eng.  
\p
\v 10 End ye qob sasam ete aninob qemeribam: An Munon aibt mom igub erogori igoarar. Igo wonou qiribiten anopurima ten igoarar.  
\v 11 Qenu wonou burig gagam indab igo eng bisub nagasi end qubor igoarar. Qubor igo ne Satan wonou qomon boru gag qi-qi ebet inwariges igo eng nob yogub toat arir igoruboumon.  
\v 12 In munangit gari wurinob yogorau ue, aibigau boru erer qite igour eng wurinob yogub ne aibigau baraitari wurinob yogub ne aibigau wurinou gigit igour eng ne, aibigau uter aib ai e qoat igama itum igo qomon boru ebet igoun eng nob yogub ende ebet igorun.  
\v 13 End see qas Qenu wonou burig tabi nob indab igo eng ba end qubor igoarar. Ende at igamari aibigau yurau aninob yogurub yarari ibag end nonoguretoruboumon. Ende at an wuritanami eng an qeretutnob igoruboumon.   
\p
\v 14 An ete at ar tug igoarar: qob apand eng ba numungoan gurum bigau gas ende at ne tuen ba uiebig mom nausi tourimar. Ne qomon qoregen eng ba tabi aninou togum qer agi qumurimau gas ende abar.  
\v 15 Ende at Qenu qob uber munon wurinob qomorub tug igo eng goten yau naget igo qamarau gas ende abar. Ebet qob uber wurinob qomorunon eng Qenu wuriseara oau mein burubour.  
\v 16 Mi eng gagar ba ne oau apand eng aninou yomi qaigau gas ende abar. Yomi end Satan wonou wagar mut ten yariner eng omboariramboumon.  
\v 17 Qenu an qubeiamor misir eng aninou mebir gagam tarit bugamsiau gas ende igoriner. A Qenu wonou qob animbigor eng bui qauri gas ende ba igoarar. Eng Igomurur Qau eng andarerei.  
\v 18 Mi eng gagar gugum quraun eng at ne Igomurur an oau menima Qenut qenen qebi qamb wot nonoguret igoarar. Qenen mi end igub imbig igoarar, me umimar. Qenen Qenu wonou munon yurau wot igub igour end gor qebi qamarari wuri nonoguret igorunor.  
\v 19 Ende at ne yet gor igub Qenu nob qamarari yenonogursieriner. Ende aba ne Qenu wonou qob qi igo eng ye dibes qemerib me qubigin, ar qabari sarog big qemeribam.  
\v 20 Ye uyort igoum eng qanam eng qob uber eng qamb qib wogub uyort igoum. End bo qemerib qubigin qamb an Qenu nob qamarari yenonogursia ye mom du qamb naget qemerini.   
\s1 6:21-24 Qob sasam  
\p
\v 21 Tikikus wo ininou munon banam ten, ne wo Munon Aib wonou sarau munon uber. End wo ye meimi sarau ebet igoum qi eng aninob qamara imbiguboumon.  
\v 22 Ye wo imurimine isar eng, isub in e maigas ebet igoun qi eng qob sua igub an nonoguretoruboumon.   
\p
\v 23 Ininou Tain Qenu nob Munon inubersiau tari Yisas ininou Munon Aib an yonou munon banam oau anmeinsia igoarar. Igo an seara oau apand burab qibanamsi igamau qomon end igoarar.  
\v 24 Munon gugum ininou Munon Aib Yisas wonou qomon eng mom toat igour eng Qenu anmusia igoarar.