\id 2TH \h 2 TESALONAIKA \toc1 Pas Polda Tesalonaika Nana Aminde Masan Matayamukut San \toc2 2 TESALONAIKA \mt1 Pas Polda Tesalonaika Nana Aminde \mt1 Masan Matayamukut San \c 1 \p \v 1 Na Pol siwan naat notna Silveneskat gatu Timotiat ngangga unekan gatake yuke pas asanu ginu Buyambam tapaninu Jesu Kraiskat nana Anututane kekeknga aknganae gepbiatang yuya aminu Tesalonaika yot gapmane yuaing aminde matandamukamang. \p \v 2 Sike Nanin Anutuat gatu Buyambam tapaninu Jesu Kraiskatda musip kwikwiu ginde natandamat ginda waapaatdane kaine wikake yutningge take nataamang. \s1 Polda Anutu inimbakngakut. \p \v 3 Mate notnabam. Ginu Jesue natapa kekeknga singgak kakngaat gatu ginu inandek inandek musip gwaangu aminbamu notza Jesuat nana kundue natayamukaing kakngaatda mateknga mateknga sitake sitake kuku buyambam singgak kakngae wam natake ninda asinggan Anutu inimbakngakamang. Unzing dua inimbakngakamang gamu noman dua siwan. Siwan Anututa nindupan take dua siwan. \v 4 Siwan ginda unzing tasike yuaing kakngae wam natake ninda yotna yotna kuna sandewan Anututane aminabamde banakan koke umanza yapangenakamang. Sike notza kunduta Jesue semna nataaing aminu iwanza dakngake gupza baknga dua pasiwa maikaing. Gupza pasiwa maiwa ginda meya buyak yuke ngana akekekake ginu Jesue kuke yuaing kakngasa gitna take yuaing kakngae wam yanisukuke umanza yapangenakamang. \s1 Anututa aminu kuupbam usanziwik. \p \v 5 Siwan iwanzata meya waaknga ginde damuwawa ngana ginda akekekake yuaing kakngata sanga takngatu anzing yeutniman kaamang. Anututa kepi noman gan tawake tasike aminbamu usanziwikgen. Usanziwan ginda kepi aminbamu Anututane kekeknga aknganae gepbiatang koke yutnanga aknga tangenake meya waaknga pake yuwawa ita usanzike ginu dandupan aminu noman takwak siwik. Danduke yawan kekekawan ginda masande kekeknga waakngae gepbiatang koyutning. \v 6 Ita unzing usanzike tasike toknga yake aminu ginda meya damukaingge ayamunangge natapan noman singgak. \v 7 Siwan unzingu toknga yake yamuke ita ginu meya apmanu wa pakaing kakngaat gatu meya ninda pakamang kakngaat sandetnimunangge natapan noman singgak. Siwan ita tapduknga Buyambam tapaninu Jesuat gatu inane angela kekeknga akwakatda enandang teke katap mumuyangga isike pakubasiwawan anggaman epuwawa aminbamda akagwautning. \v 8 Unzingu apuke tapduu waomunekan ita toknga yake aminu Anutue semna natake gatu Buyambam tapaninu Jesutane kekeknga aknganae gepbiatang yutningge wamu take akngae masa imukaing aminde yake toknga yamik. \v 9 Toknga yake yamuke ita pasiwan maiwa yanikwasipewan kuke waaminda Buyambam tapatane nomnane maa siknga asinggan asinggan yutning. Ita yanikwasipewan kuke itane kekeknga aknganae gepbiatangu kakaa aknganae yutnanga dua siwik. Aho. Asinggan asinggan wai siknga yutning. \v 10 Siwan tapduu wa apik gwenzimunekan aminu Anututa papan itane aminabam dakngake noman yuaingga kepi tawake tasikaing kakngata tasiwan Jesutane umana buyambam siwik. Siwan ina unzakan ginda wamu tupa ninda danikapbumang kakngae natapa siakan singgak kakngata tasiwan itane umana buyambam siwik. Sanga waakngata aawikge natake Jesuta ie epik. \p \v 11 Unzingge ninda ginde tumuk wamu asinggan yakamang. Yake Anututa gin yandawamban ginda ie kuke yuaing aminu dandupan take siwikge yakamang. Gatu ginda Jesue natapa kekeknga sikut takngata musipza pangenawan ginda sanga takekan tasinangge natake tasikaing kaknga kuupbamu Anututa inane kekeknga aknganata tasiwan puyuwikge tumuk wamu asinggan yakamang. \v 12 Tumuk wamu wa yakamang kaknga buyana asawanu Anutunikat gatu Buyambam tapa Jesu Anututa tapan Krais akgatanimuyaapa dakngake apbut tapaatdane banip kwikwik kaknganane yuke gin gatandaman ginda kepi noman gan tawake tasining. Kepi nomanu unzing tawake tasiwawa umana Buyambam tapaninu Jesutane umana aknganata enane siknga kopik. Kopan gisane umanza akngasa kuut buyambam siwik. \c 2 \s1 Wai aminda masande apuke tasiwik. \p \v 1 Siwan mate notnabam. Ninda wamu takngatuat Buyambam tapaninu Jesu Kraisda gatuna epu ninu yaniwamban ninda ie kuke iat unekan gatake yutnimde wam danina natapnong. \v 2 Ginda tapduknga Buyambam tapaninda gatuna epik gwenu gwa singgakge wam natake zetgaman ma satnatamaba kuwan. Aminu tapatuta ba enake Waungga wamu waaknga atnaniwan natapbum ngang gin daniwan natapbing. Ba aminu kunduta enake Polda wamu waaknga tupa niniwan natapbumang ngang daniwa natapbing. Ba Polda pas sandu unzingu ninde matakut ngang daniking. Ba sanga dasingga siwan wamu waakngae natake nangaakan natayuaing kaknga tenong. \v 3 Aminu tapatuta tanzike wamu waaknga ba kem wamu dasing kakngae natake gin daniwanu ginda siakan ngangu ma natapam. Dasingge? Buyambam tapata moo dua apik. Wena. Tupanu aminu Anututane daman gwekatang yuaing aminu kwaapzangga yamandet sike Anutue masa imuning. Masa ima aminu wai aminu tapatu masande Anututa gatukande tasiwan maiwan wai asinggan asinggan yuwik kapata enake anggaman apik. Apuke sanga kuupbamu aminda yanidatakaing kaknga anutu pupuknga ba Anutu siknga yuak kapae iwana dakngawik. \v 4 Iwana dakngake sanga wa kuupbam yapbitnangge waakwakgane umana natake yaipapaakusike Anututane yot takwan gwene kopik. You wagwene koke pukwike nata nina siknga Anutu ngang yawan kekekawik. Siwan sanga waakngata aawana Buyambam tapaninda une apik. \p \v 5 Tupa na gikat yuke nata ie gwa danikum. Asikaya ginu gwa ba botaking ba dasing? \v 6 Siwan ginda sanga aminu wai waapata tapduknga Anututa yawan yukut gwenekan asapikge kekekngana kayaapata apmanu waapatane kepi umukgak kakngae atnataaing. \v 7 Siwan apmanu sanga gutonga waakngata akusopuke pasiyuak. Ita akusopuke pasiyuwawan aminu wa itane kepina umukgak kapata asisakuwana \v 8 aminu wa waiapata anggaman siwik. Anggaman siwana Buyambam tapaninu Jesuta wamu takngatu genaneta yawan wamu waakngata aminu waapa tanguwan akupik. Sike Jesuta apuke inane umana enane siknga yuak kakngane kakaa buyambam takngana buyak apuke aminu waapa yapbike asiknga tasiwan maiwan wena siwik. \v 9 Siwan ngana tupanu tapduknga aminu wai waapa anggaman apiu kekeknga Setendane akngane apik. Kekeknga siknga akngane apuke ita aminu kuupbam panzitnangge duya takngatu takngatu pasiwik. \v 10 Pasiwawan aminu Jesuta waiaknganinu asandetnimikge pasiwawan ngana asiknga bitakaing aminda kepi apmainanga akngane aminu wa apanzikgak kapata sanga wai siknga kemu takngatu takngatu waaminde pasiyaman kaning. \v 11 Pasiyamuke yuwawan siakan wamde apbitakaing kakngae natake Anututa waaminu kem takngae gepbiatang yutningge pasiyaman kemu aminu wa panzikgak kapata yaniwik kakngae natapa siakan siwik. \v 12 Siwan kem wamu waakngae natapa siakan singgak kakngae natake Anututa aminu wa siakan wamde baniu dua sike sanga waiakngakan tasinangge apbaknganing amin usanzike yawan toknga pananga aknga waaminde yuyamik. \s1 Waiakngasae gepbiatang dua yutning. \p \v 13 Siwan ngana mate notnabam. Buyambam tapaninu Jesuta ginde musip gwaang natandamunggak. Siwan ninda ginde natake asinggan Anutue dua inimbakngakamang gamu noman dua siwan. Unzingge ninda asinggan inimbakngakamang. Siwan Anututa ginu tupa waiakngasae gepbiatang tupa yuking kaknga sandetdamunangge natapbut. Natapan Waung Kapata ginde musipatang pukuke pasiwan ginda siakan wamu Jesue danikumang kakngae natapa siakan sikut. Ginda natapa siakan siwan aminu dudumna amin daknganingge natake Anututa tupa siknga tapduknga kepat yekapat dua tasike tekut gwene ita yawan yuaing. Ita unzing yakut takngae natake ninda asinggan Anutue inimbakngakamang. \v 14 Siwan Anututa ginde natake ginda aminu dudumna amin dakngake Buyambam tapaninu Jesu Kraiskat unekan gatake asinggan asinggan yutningge natake gindane umanza yake yandawanggut. Ginde yandawake tasiwan ninda wamu takeaknga yanisukuke gikat kuut danikapbumang. \v 15 Unzingge mate notna. Ginda kekekake Anututane wamu kuupbam ninda gentangan ba pas tangan ngang danidamukumangu ginda gitna pake yutnong. \p \v 16-17 Siwan Nanin Anututa ninde butaya natake take siknga gatanimuke ninu musipmin pangenake papan kekekawan ninda iat unekan gatake asinggan asinggan yutnim takngae kayuamang. Siwan Buyambam tapaninu Jesu Kraiskat Nanin Anutuatda musipza pangenake gin gatandamat puya takekan tasike ba wamu noman gan yake yutnangge dua bitaningge nataamang. \c 3 \s1 Tumuk wam iniwa nin gatanimuyok. \p \v 1 Siwan mate notnabam. Ninu wamu takngatuat ayuakge wamu waaknga danina natapnong. Wamu waaknga anzing. Ginda ninde natake Anutue tumuk wam ininong. Iniwa ita nin gataniman puyana tasina wam takngana kepna kepna yatakuwawa wamdane kepi umukaing kaknga kuupbam yapbike keu kuupbam tawamban sandewan aminbamda natake apbaknganong. Unzing ginda tupa natake bakngaking binga. \v 2 Siwan ginda Anutue tumuk wam iniwa ita ninu wai aminde katakngine sandewikge wam ininong. Ginu atnataaing. Aminu kwaapzangga Anutue masa imuke aminu wai amin dakngake pasikainggen. \p \v 3 Siwan ngana aminu kem wamu dua yake siakan gan asinggan tasinggak kapa Buyambam tapaninu Jesu unin. Sike ita gin papan kekekawan gin toiban Setenda ginu dua kaipakuwik. \v 4 Siwan Buyambam tapaninu Jesuta nindane banipmin pangenawan ninda ginde natake ginda aminu semna semna amin dakngake dua yuke wamu apman matandamukamangu akgwaamukaing ngang natapna siakan singgak. Siwan ginde genu asinggan gwaamuke yutning ngang banipmikatang natapna kekeknga singgak. \v 5 Siwan ninda ginde natake Buyambam tapaninu Jesuta gindane natdetdetza papan nomatawan Anututa ginde musip gwaang natandamunggak kakngaat gatu Kraisda meya takngatu takngatu kake ngana akekekake yuke undang dua pimakut takngaat ngangge ginda natanggamataningge nataamang. \p \v 6 Siwan mate notnabam. Ninda wamu takngatu umana Buyambam tapaninu Jesu Kraisdane akngae ginde danina natapnong. Notza tapatu aminu Jesuat nana amin dakngake ngana wamu wa ninda gwa damukumang kaknga dua gwaamuke kamun dakngake moo siknga yuwan kakengu ginda aminu waapae akagwauke iat ma gatake sukuwam. \v 7 Ginu atnataaing. Tupa ninu gikat unekan gatake yuke ninda kamun dua dakngake yukumang kaknga tawake tasinanga akngaen. Ngana aminu gikat nana kunduta unzingu dua tawake tasikaing ngang natake iat ma gatake sukuwam ngang danikamang. \v 8 Ginu atnataaing. Ninda nanamu kundu gindane moo dua pakumang. Aho. Ninda asusikumang. Ninda gupminde puya kwatan siknga kwakngaom gatu zikaane ngang pasike nanamu manita usike ginda gatanimuningge dua danikumang. \v 9 Unzing ninda gin danina ginda gatanimuningge take gwa sikut ngana ninda kepi takeaknga yeutdamuna kake tawake tasiningge natake unzingu dua danikumang. \v 10 Sike ninu gikat gatake yukumang gwene ninda kepi waaknga yeutdamuyuk mama wamu takngatu anzing danikumang. Aminu tapatuta puya pasinangge apbitakengu nanamu dua napan ngang danina gwa kekekakut. \p \v 11 Siwan wamu takngatu ninde asinggan apuwawan nataamang kaknga anzing. Aminu kundu gikat nana aminda kamunde yuke sanga yapiina wena aknga asinggan tasike puya takngatusimu dua tasikaing ngang niniwawa nataamang. Natake ginu aminu unzing tasikaing aminde akagwautningge wam pas asane gwa matandamumang. \v 12 Sike aminu kamunde yuke tasikaing aminda wikake yuke puyana pasiwa buya aawa nanamna naningge natake mama wamu Buyambam tapaninu Jesu Kraisdane umana akngae yakamang. \p \v 13 Siwan ngana mate notnabam. Ginu kepi noman taknga tawake tasinangge semna ma natapam. \v 14 Sike aminu tapatuta wamu kuupbam ninda pas asakatang matakamang kaknga tawanangge apbitawanu ginda aminu waapata waiaknganae maakawikge tasike wai amin tapa ngang kake iat ma gatake sukuwam. \v 15 Dua gatake sukuke ngana ie natapa iwanza ma dakngawan. Aho. Ginda ie natapa notza dakngawan ginda gwaut wam ininong. \s1 Wamu wenga aknga anin. \p \v 16 Siwan musip kwikwikgane yapii Buyambam tapaninu Jesu unin. Sike ginu sanga kuupbam ginde apning kaknga kawa ngana ita musip kwikwiu ginde tapdukbamu asinggan tendamikge nataamang. Siwan Buyambam tapaninu Jesuta ginu kuupbapat gatake yuke gatandamuyok. \p \v 17 Siwan na Pol. Nata nina siknga gaak wamu aaknga ginde katakngata matandamunggat. Sike nata unzingu wa matanggat taknga natake pas kuupbamdane tuwangu unin. Nata ina unzakan asinggan matanggaunin. \p \v 18 Banip kwikwiu Buyambam tapaninu Jesu Kraisdane aknga ginu kuupbamde gatake yutdamuyok. Unukan.