\id 1TH  
\h 1 TESALONAIKA 
\toc1 Pas Polda Tesalonaika Nana Aminde  Tupan Matayamukut San 
\toc2 1 TESALONAIKA 
\mt1 Pas Polda Tesalonaika Nana Aminde  
\mt1 Tupan Matayamukut San  
\c 1  
\p
\v 1 Mate notnabam! Ginu Tesalonaika yot gapmane nana aminu Nanin Anututane aminabam dakngake yuaing aminde nata pas asanu ginde matandamunggat.  
\p Siwan na Pol gatu notna Silvenes gatu Timoti ngangga unekan gatake yuke pas asanu ginu Jesu Buyambam tapaninu Anututa tapan Krais akgatanimuya apanin dakngake yuak kapatane aminabamde matandamukamang.  
\p Matandamuke Anututa ginu asinggan gatandamunggak kakngaat gatu musia kwikwiknga natandamunggak kakngaatda gikat gatake yutningge take nataamang.   
\s1 Jesue natapa kekeknga siknga siwan nomana yuking.  
\p
\v 2 Tapduk bamu ninda ginde natake Anutu asinimbakngakamang. Siwan ninda gindane umanza tumuk wam yakamang gwekatangu ayakamang.  
\v 3 Yake ginda Jesue natapa siakan siwan puyana take aknga tangenakaing kakngae natake asinimbaknganangge semna dua nataamang. Siwan gatu ginda musip gwaang natake puya tasikaing kakngaat gatu ginu musipza tapa kekekawan Buyambam tapaninu Jesu Kraisda gatuna epikge natayuaing kakngaat natake Nanin Anutu asinimbakngakamang.   
\p
\v 4 Siwan mate notna. Anututa ginde musip gwaang natake ginu papan itane aminabam dakngake yuaing kakngae natake asinimbakngakamang.  
\v 5 Sike wamu take aknga ninda danikapmake tasiwatna Anututane Waung Kapata kekeknga siknga tasindaman ginda natake wamban mooi ngangu dua natapbing. Aho. Ginda musipzaatang natapa siakan sikut. Siwan ninda siakande siknga atnatapbumang. Waung Kapata kekeknga siknga tasindamukutden. Sike ninda unzingu gin banakan yuke gin gatandamunangge tasikumang kakngae atnataaing.   
\p
\v 6 Siwan ginda nin ninduyuwawa ninda unzing tasikumang kaknga kake ginda ina unzakan tawayuk Buyambam tapaninda asinggan tasikut taknga tawake tasiking. Sike ginda Anutue wam natake banipzaatang gitna take yuwawa aminu banip dua siking aminda meyambamu ginde damukaing. Unzing damuwawa ngana Anututane Waung Kapata gatandaman ginu meya buyak yuke ngana apbakngakaing.  
\v 7 Unzingge ginda kepi waaknga yeuyamuking. Yeuyama aminu Jesue natapa kekeknga singgak aminu keu komaya Masedonia gatu Akaia ngang yanikamang komaune nana kuupbamda tawake tasikaing.  
\v 8 Sanga Buyambam tapaninda tasinimukutde wam natake ginda tuwanguke yanikapa yatakuwawa aminu keu wa komaune nana amindakan dua natapbing. Aho! Yotna yotna nana kuupbamda atnatapbing. Ginda Jesue natapa kekeknga singgakgen. Siwan ginda unzingu wa natake yuaing kakngae aminu kuupbamda atnataaing ge ninda yaninanga dua. Aho!  
\v 9 Aminu waakwakga asinggan nin ninike ninda ginde kuke kundopna ninu yotzaatang pakoke katak siknga ninu toiking kakngae natake asinggan ninikaing. Ninike ginda musipza tapa tekwamban anutu pupukngae masa yamuke Anutu siakan siknga yuak kapae kuke asinggan asinggan kayuu wa yuak kapatane puyana tasinangge natake ie kuking kakngae ninikaing.  
\v 10 Siwan ginda kuke Jesu itane waaknga apata enandang teke gatuna epikge kayuaing kakngae ninikaing. Siwan aminu waapa akupan Anututa akumbut katangga gatuna tangenakut. Tangenawan ita gatanimuke Anututa toknga waiaknganinde nimunangge nataak kaknga sandetnimik kapae natayuaing.   
\c 2  
\s1 Polda Tesalonaika yot gapmane tasikut.  
\p
\v 1 Mate notna! Gisa atnataaing. Tupa ninda yanisukuke ginde kundoke wamu takeaknga danikapna buya asaakutden.  
\v 2 Sike tupanu Filipai yot gapmane ninda yanisukuke tasiwatna nin ninisapduke nindane gupminu apasiwa maiking kakngae ginu atnataaing. Siwan ngana Anutuninda nindane musipmin papan kekekawa ninda iwaninu dua kagwaukumang. Wena. Ninda akekekake Anututane wamu takeaknga ginde atdanikapbumang.  
\v 3 Sike ginda siakan ngang natapningge natake kemu dua panzikamang. Sike gawaknga aknga buyak dua yuke gwaut wamu ginde danikamang.  
\v 4 Aho. Anututa nindupan take siwan puya ninda wamu takeaknga aminbamde yanikapnim taknga atnimukut. Unzing nimukutde ninda tasike aminda ninde puyae take natapningge dua natake yanikapmakamang. Aho. Anututa ina ninde musipatangu nataamang kaknga usanzikgak kapata take natapikge wamna yakapmakamang.  
\v 5 Siwan ginu atnataaing. Ninda ginu dua danidatdaukumang. Wena siknga. Sike Anututa atnataak. Ninda puya waaknga tasikumangu sanga akgeengutnanga aknga dua takusopuke tasikumang.  
\v 6 Ninda puya tasina ginda ba aminu kunduta umanin yapangenatningge dua natake tasikumang. Wena siknga.  
\p Siwan aminu Anututa tapan Krais akgatanimunggak kapaninda nin papan itane kwiiknga aposel aminu umaninu kaya akwak dakngakumangu nin ninipewan kuke yanisukukamang kakngae natake ninda ginu umanin yapangenake sangasa nimuke gatanimunong ngang danikumang gamu noman siwan.  
\v 7 Ngana tapduknga ninu gikat yukumang gwene ninu dua daninggamatake sanga wepda siknga tasikumang. Unzing mingata waatdakana katak siknga toikgak binga.  
\v 8 Ninda ginde take siknga natake Anututane wamu take aknga ginde damunangge take siknga unzing natapbumang. Sike wamu waaknga ginde damuke gin gatandamuke akumnimde dua bitakumang. Aho. Ninda ginde musip gwaang natandamuke gin gatandamunangge tasikumang.   
\p
\v 9 Mate notna! Ginu puya kwatan bamu ninda tasikumang kakngae atnataaing. Ninda puya kekeknga tasike Anututane wamu takeaknga ginde daniyuk gindane nanam gatu sangasa ngangu dua kaitnangge natake ninu kwakngaom gatu zikaane ngangu kuut gupminde puya pasike yukumang.   
\p
\v 10 Ginu atnataaing. Siwan Anutu kuut atnataak. Sanga ninda ginu Jesue natapa kekeknga sikut aminde tasikumangu noman siknga tasikumanggen. Gutonga takngatu wena.  
\v 11 Ginu atnataaing! Sanga nanata waakngae tasinggak kaknga tuwanguke  
\v 12 ginu inandek inandek tasikumanggen. Ninda unzing tasike gin danidamuke gwaut wamu asinggan danike ginda kepi Anututa take nataak kaknga tawake tasiningge take siknga natake danidamukumang. Siwan Anutu wa nin yaniwamban ninda itane kekeknga aknga gepbiatang koyutnimde yaniwanggak kapa unin.   
\s1 Yanisapduke meya yamuking.  
\p
\v 13 Siwan tupa ninda Anututane wam taknga gin danikapna ginda natake Anututa unzing siknga nininggak ngang natake musipzaatang gitna pake yuaing. Aminde wamban ngang natake undang dua teking. Aho. Wamu wa danina natapbingu Anututane wamu siakande siknga yuak. Siwan ginu wamu waaknga natake siakan ngang natake yuaing amindane natdetdetza Anututa pangenakgak. Ge ginda unzing natake yuaing kakngae natake ninda asinggan Anutue inimbakngakamang.   
\p
\v 14-16 Siwan mate notna! Tupa siknga aminu Judia nana aminda Anutue wam yanikapsa aminu atzipa kumbing. Siwan aminu wa zipa kumbing amindane zakngita yawa kekekawan Jesu Buyambam tapaninu tanguwa kumbut. Siwan aminu Anututa tapan Krais akgatanimuya apanin dakngake yuak kapa Jesu unin. Siwan aminu Judia kep komune yuaingga enake dongu takngaaya dakngake dongu takngatuta iwana dakngake Jesutane aminabamdane gupna pasiwa maiking. Unzing pasiwa maiwa ninu atninikwasipewa kukumang. Unzingge Anututa natapan take dua singgak. Siwan aminu waakwakga Jesue semna siknga natake ninda kepna kepna nana amin gatayamunangge wa aminda inane waiaknganae toknga dua paningge wamu takeaknga yanikapmake tasisukuwatna kepininu asumutnimunangge natake asinggan tasikaing. Unzing tasike aminu kuupbamdane iwana dakngake tasiwawa waiakngana buyambam siknga singgak. Siwan Anututa bania toknga siknga natayamuke waiaknganae toknga yamik kakngata undang yuyamunggak.  
\p Siwan ngana ninda atnataamang. Meya wa atnimuking kakngata ginde gwa apbutden. Notza une nanatakan Jesue banip sikaing kakngae semna natake gindane gupza pasiwa maikaing ngangu atnataamang.   
\s1 Aminu gatuna kanangge natapbut.  
\p
\v 17-18 Mate notna! Ninda gin dapmake zetzet kunimde natake you gapmandune kukumang. Kuke ginde gwangat siknga natdamuke toitoitda minga nanae gwangat siknga nataaing binga natandamuke yuamang. Siakan. Ninda ginde nomu dua danduamang ngana ninde musipmikatangu ginde atnatanggamatake ginde gatunin kunangge toknga siknga natapbumang. Ninde musipatangu gin dandupnangge toknga siknga natake ninu puya kekeknga siknga kepi kake ginde kunangge tasikumang. Siwan na Pol. Nata tapdukbamu ginde kunangge tasiwa ngana Setenda naat notnaatdane kepininu asumutnimunggak ngana  
\v 19 gin dandupnangge asiknga bakngakamang. Dasingge? Masande nindane Buyambam tapa Jesuta gatuna apana ninda ie nomune yutnim. Sike tapduu waomune sanga tapatuekan natayuamang kaknga kakengu apbaknganim. Siwan sanga unzingu ninda musip gwaangu minae natapnim? Ginu unin.  
\v 20 Ngan! Ninda ginde danikumangu ginda akgwaamukaing kakngae natake asiknga bakngake yutnim. Siwan unzingge gatunin ginde kunangge musipminu toknga siknga nataamang.   
\c 3  
\s1 Polda Timoti initewan kukut.  
\p
\v 1 Unzingge naat gikat unekan dua gatake yuwatna tapduu mamaya siwan nata ginu dasingga yuaing ngang natake nangaakan natapbum. Natake kundusipat yutnangge asiknga bitakum ngana ginde akuwitde natapa kepi wena sikut. Siwan natakan Atens yot gapmane yuwawa  
\v 2 Timotita napmake ginde kuwikge wam yakumak. Unzing yata takawan nata notna Timoti initewa ginde kukuu waapata naat unekan gatake yuke Anututane puya tasike wamu takeaknga aminu Anututa tapan Krais akgatanimunggak kapae natake asinggan yanikapmanggak kapa unin. Siwan nata initewa ginde kuke gin kekekandamuke ginda Jesue aminabam dakngake yuaing kaknga kekeknga siwikge natake kukut.  
\v 3 Kuke aminu Jesue masa imukaing aminda meya atdamukaing kakngaatang pimanang ngang natake nata initewa ginde kukut. Siwan gisa atnataaing. Ninda meya wa atnimukaing kaknga dua kanimde kepi wena singgakgen.  
\v 4 Siwan meya wa pakamang kakngae natake tupa ninu gikat gatake yukumang gwene ninda anzing danikumang. Iwanzata enake meya takngatu takngatu atdanining ngang danikumang kaknga buyana gwa aawan kaaing.  
\v 5 Meya waaknga ginde gwa apbut ngang natake ginu dasingga yuaing ngang natake nangaakan natapbum. Asikaya Setenda asinggan ninu pasiwan singgak. Siwan ita ginu gwa danidatdaukut. Danidatdauwan pimanang ngang natake nata puya ninda gatandamunangge pasikumang kakngata apba maiwik ngang natake akgwaukum. Nata akgwauke ginda Jesue natapa kekeknga singgak kakngae wam natapnangge nata Timoti initewa ginde kukut.   
\s1 Timotita wamu take takapbut.  
\p
\v 6 Siwan Timoti wa initewa kukuu gatuna gin dapmake apmaatzim siknga gatuna apuke wamu take siknga aknga na gwa nanik. Ita ginu Jesue natapa kekeknga singgak kakngae wamu gwa nanik. Nanike ginu nae musip gwaang natangamuke apbakngakaing kakngae wamu kuut gwa nanik. Gatu ginda na nadupnangge gwangat nataaing kakngae wamu kuut gwa nanik. Unzing nata gin dandupnangge nataat binga.  
\v 7 O mate notnabam! Ita wamu wa nanikut takngata musipma tapan kekekanggak. Ginu Jesue natapa kekeknga sikut taknga gitna take yuaing ngang natake ninda meya buyak ane yuamang ngana apmanu musipmikatang tatanga natake yuamang.  
\v 8 Sike ginda Buyambam tapaninde kekeknga yuaing kakngae wam natake ginde nangaakan natapbum taknga wena gwa singgak.  
\v 9 Wena siwan kake ninda Anutue asiknga inimbakngakamang. Inimbakngake ninda ginde natake Anututa musipmin pangenawan banipmikatang iaknga siknga natake Anutue asiknga inimbakngake yuamang.  
\v 10 Inimbakngake yuke kwepapman tendeknga wena tumuk wamu asinggan ninda gindane nomza dandupnangge musipmikatangu toknga siknga natake yakamang. Yake ginda Jesue atnataaing kaknga dapaknga ba siwanu gindane natdetdetza pana nomatawan gatu take siwikge natake yakamang.   
\s1 Anututa wa aminde initakuwikge.  
\p
\v 11 Sike ninu Nanin Anutuat gatu Buyambam tapaninu Jesuatda ninu ginde kunimde kepi Setenda umutnimukut taknga zipmandakngawat kunimde nataamang.  
\v 12 Siwan ngana ninu Jesu Buyambam tapaninda musipza pangenawan ginda notza Jesuat nana amikat aminu kuupbapatde musip gwaang natayamukaing kaknga buyambam siwikge nataamang. Unzing ninda ginde musip gwaang natandamukamang binga.  
\v 13 Sike Anututa unzing tasike gindane musipza tapan kekekawan masande Buyambam tapaninu Jesuat gatu inane amin takwakat gatuna kepdakane epning gwene ginda noman yuke gutongasa takngatu Anutu Naninde kaine wenata yutning.   
\c 4  
\s1 Kepi Anututa take nataak kaknga.  
\p
\v 1 Siwan mate notnabam! Buyambam tapaninu Jesuta nin pakutde ninda ginde kekeknga wamu takngatuat danina natapnong. Tupa ninda danidamuke ginda kepi anzing tawake tasiwawa Anututa dandupan take siwik ngang danidamukumang kakngakan ginda tawake atasikaing. Siwan kepi wa tawake tasining kakngata buyambam siknga siyok.  
\v 2 Siwan ginu wamu kuupbam Jesu Buyambam tapaninda nin niniwan natake ninda ginde tupa gwa danidamukumang kaknga atnataaing.   
\p
\v 3 Wamu waaknga danike Anutue banip takngae natake anzing danidamukumang. Ginda Anutuekan natanggamatake aminu noman siknga amin daknganong. Dakngake sanga yasewa tasikaing kaknga gatukande bitake tenong.  
\v 4 Teke yuke kepi maya papsa aknga ginu kuupbamda inandek inandek katak siknga natdeke Anutue banip taknga noman gan tawake maya panong.  
\v 5 Aminu kepman nana Anutue dua natake yuaing aminda mayae geenguke yumdekan pakaing ngana ginda unzingu ma siknga tasiwam.  
\v 6 Ginda sanga wai waaknga teke notza Jesuat nana amindane maatnae ma geenguwam. Sanga waakngae tupa ninda danidamuke Buyambam tapaninda aminu kuupbam unzing geengusukukaing aminde meya yake ayamikge gwautnong ngang gwa danikumang kakngae natake ginda noman gan yutnong.  
\v 7 Siwan Anututa nin papan ninda aminabam dakngake sanga noman gan tawake tasinimde pakut. Ninda sanga wai waaknga tawake tasinimde dua. Wena siknga. Unzingge ginda sanga takeakngakan tawake tasinong.  
\v 8 Siwan aminu tapatuta wamu waakngae masa imanu ita masa amindekan dua imik. Aho. Ita Anutu inane Waunga dudumna yuak kapana atnimunggak kapaatde kuut masa imik.   
\p
\v 9 Siwan ninda wamu kundu ginde dua danidamuke matanim. Sanga notza Jesuat nana aminde musip gwaang natayamukaing kakngaen. Dasingge? Anututa sanga waakngae ginu gwa danidamukut.  
\v 10 Siwan ginda aminu Jesuat nana Masedonia kep komune gikat gatake yuaing aminu kuupbamde musip gwaangu atnatayamukaing. Ngana mate notna. Ninda ginde kekeknga wamu takngatuat danina tasinong. Ginda sanga waaknga tasiwa buyambam siknga siyok.   
\p
\v 11 Ginda wepda yutnangge musipza iaknga siknga natayutnong. Wepda yuke ginu gisane sangakan kayuke ginu sangae dua dapningge natake gisane puya pasinong. Unzing ninda tupa ginu gwa danidamukumang binga.  
\v 12 Unzing tasike ginda kepi noman gan tawake tasike sanga tapatue dua dapmake notza dua yaninggakaning kaknga kake aminu kepman nana aminda natapa take siknga siwik.   
\s1 Buyambam tapata gatuna apik.  
\p
\v 13 Siwan mate notnabam! Ninu ginda notza Jesuat nana aminu gwa kumbing aminde dua botaningge nataamang. Aminu kepman nana aminda notna gwa kumbing aminde apbotake akumbing katangga gatuna enatningge dua nataaing. Sanga waakngae dua natake aminu gwa kupsa aminde butaya siknga natake kwanam sikaing. Siwan gikaya unzakan dua botake kwanamu dua sitningge natake ninda danidamutna natapnong.  
\v 14 Ninda natake Jesuta akungwake gatuna enakutde natapna siakan singgak. Unzingge ninu atnataamang. Anututa aminu Jesue aminabamu atdakngake yusika kumbingu gatu pangenake Jesuat unekan gatake yutningge yanipakopikgen. Jesuta gatuna asepik gwene ita yanipakopik.  
\v 15 Siwan Jesu Buyambam tapaninda wamu atninidamukut takngakan danina natapnong. Masande ninda yuwatna Buyambam tapata gatuna epik gwekatangu kayuk yukengu ninda Anutue aminu gwa kumbing aminu dua yapbike kopnim. Wena.  
\v 16 Sike aminu wa enandangga asepik kapa Jesu Buyambam tapaninu unin. Ita epuke wamu kekeknga aminbamde yayawamban angela tupan tapata Anututane pum puyapan kepdakane gatuna epik. Epuwawan aminu Jesutane aminabam dakngake yusika akumbingu gatuna enatning.  
\v 17 Akumbing katangga enawana Anututa ninu dua kungwake kayuk yuamangu Buyambam tapaninu minga musane koke kanimde nikat wa amikat pakopik. Enane pakopan nikat Buyambam tapanikat unekan gatake asinggan asinggan yutnim.  
\v 18 Siwan ginda notza wamu waaknga yanike notna gwa kumbingge butaya siknga nataaing kaknga sandeyamunong.   
\c 5  
\s1 Ninda Buyambam Tapata gatuna apikge tandakngake yutnim.  
\p
\v 1 Siwan mate notnabam. Buyambam Tapaninda gatuna epikge tapduk gwenu dua matanim.  
\v 2 Ninda apmanu ita dua apik ngang natapnim gwekatang apik. Kuka aminda zikaane apikge dua natake kayuamang gwekatang apunggak binga apikge gisa atnataaing.  
\v 3 Tapduknga aminda yake, “Apmanu tapduu take siknga singgak. Sanga gwauya aknga dua kanim,” ngang yakaing gwekatangu tapduu waomunekan sanga wa amin pasiwan mainanga zetgaman wa aminde apan asatnake sanga wa yapbitnanga dua. Wena siknga. Unzing mayata engang tangaiwikge katak dua tandakngake yuak gwekatang toknga natapan engangu asaakgak binga.   
\p
\v 4 Siakan notnabam. Siwan ngana ginu zikaa akngane unzing dua yuke dua satnaning. Tapduknga wagwenu asapik gwenden.  
\p Kuka aminda zikaane apan satnakaing binga ginda tapduu wagwene dua satnaning. Wena siknga.  
\v 5 Siwan ninu kuupbam gikat nikatda kakaa akngane yuamang. Ninda zikaa akngane dua yuwatna tapduu wagwenda apanu dua satnanim.  
\v 6 Unzingge ninda aminu dapuna pepbotakaing binga katum aminda tasike yuaing kaknga dua tawake botanim. Dua botake yuwatna natdetdetninu anggaman siwik.  
\v 7 Siwan ninu atnataamang. Aminu dapuna petnangge natakengu zikaane pekainggen. Gatu aminu yangga toknga aknga tangoke datdaptakaingu wa zikaane datdaptakaing.  
\v 8 Unzing tasikaing ngana ninda tapduu wagwenu asapikge akayuamang. Unzingge ninu kaininu akekekawan anggaman natake yutnim. Unzing yuke aminu amakge tandakngake taukgwen mapan pukuwan kupna kekeknga siknga gwapuke yuaing binga tasinim. Tasike ninda Jesue natapna kekeknga siyok. Siwan aminde musip gwaang natayamunim. Sike Jesuta gatuna epuke ninu akgatanimuke waiaknganinde toknga apanim taknga sandetniman ninda iat gatake asinggan asinggan yutnimde natanggamatake kayutnim.   
\p
\v 9-10 Dasingge? Anututa ninu toknga waiaknganinde yake nimunangge dua yaniwanggut. Wena. Ita Jesu tapan Buyambam tapa Krais akgatanimuya apanin dakngake apu ninde tangge kungwanimukut. Siwan Anututa nin papan Jesuta ninde natake tapduknga ita enandang koke gatuna epik gwekatangu ninda kayuk yutnim ba apba kungwakengu ninda iat gatake yutnimde kungwanimukut. Ita unzing kungwaniman toknga wa waiaknganinde panim taknga sandetnimunangge natake Anututa nin papan itane aminabam dakngake yuamang.  
\v 11 Unzingge ginda wamu wa takeaknga notza Jesuat nana aminde yamuke ginda inandek inandek musia papa kekekakaing kakngakan tawake asinggan tasinong. Tasiwawa Jesue natapa siakan singgak kakngata buyambam siyok.   
\s1 Polda gaak wam yanikut.  
\p
\v 12 Siwan mate notnabam. Ginda aminu gikat nana Anututane puya pasike gin danduyuke gindane natdetdetza panomanukaing aminde gepbiatang yutnong. Buyambam tapaninda wa aminu gindane tupan takwakza pekutde natake wa aminde gepbiatang yutnong.  
\v 13 Yuke wa amindane puyanae natake musip gwaang siknga natayamuke umana asiknga yapangenatnong. Unzing tasiyuk ginda notzaat takekan yutnong.   
\p
\v 14 Gatu wamu kunduat danina natapnong. Ginda aminu semna natasukukaing aminde gwaut wam yamunong. Yamuke aminu baniaatang meya natayuaing amin gatayamuke meya akngana sandeyamunong. Sandeyamuke aminu Anututane aminabam dakngake yuaing ngana wa aminu Anutue natapa kekeknga dua singgak kakngae gatayamuke papa kekekanong. Papa kekekawa aminbamde wikake pasiyamunong.  
\v 15 Ginda waiaknga aminda ginde tasindamukaing kakngae yake yake ma pasiyamam. Yake dua pasiyamuke tapdukbamu asinggan ginda sanga takeaknga notza Jesuat nana amikat gatu aminu kuupbapatde pasiyamunangge banip gwaang natake pasinong.   
\p
\v 16 Siwan ginda asinggan baknganong.  
\v 17 Ginu tumuk wamu asinggan asinggan yanong.  
\v 18 Ginda sanga kuupbam meya ba take ba ginde apanu Anutu inimbaknganong. Ina unzakan aminu Anututa tapan Krais akgatanimuya apanin dakngake yuak kapa Jesuta kepi waakngakan tawake tasike yeutnimukut. Kepi wa yeutnimukut taknga Anututa ginda tawake tasiningge take nataak.   
\p
\v 19 Ginda sanga Anututane Waung Kapata amindane musia pangenawan pasikaing kaknga ma yandakngawam.  
\v 20 Ginda Anututane Waung Kapata amindane musia pangenawan Anututane wamu ginde danikapmakaing kakngae masa ma imam.  
\v 21 Siwan ngana ginda sanga kuupbam usanzike sanga take siknga aknga kakengu atanggaganutnong.  
\v 22 Tanggaganuke sanga wai kuupbamu undang peke masa yamunong.   
\p
\v 23 Anutu musip kwikwikge yapii ita ina ginu pasiwan aminu noman siknga amin daknganingge take nataamang. Dakngake yuwawa ita gindane natdetdetzaat gatu musipzaat gatu gupzaat ngangu take siknga kayuwawan gutongasa wena siknga siwik. Siwan tapduknga Buyambam tapaninu Jesu Kraisda gatuna apik gwene ita dandupan ginu takekan siwik.  
\v 24 Anutu gin yandawanggak kapa noman siknga. Ita sanga wa daninggat taknga take tasindamik.   
\p
\v 25 Mate notna. Ginda Anutue tumuk wam inike ita nin gatanimikge yanong.  
\v 26 Sike ginda nae tangge yuke notza Jesutane amina kuupbamde gaak wam yanike wa aminu kuupbam kataknga ipmake yanimbaknganong.  
\v 27 Nata wamu kekeknga Jesue umande daniwa natapnong. Ginda pas asanu notza Jesuat nana kuupbamde kendeyamunong.   
\p
\v 28 Siwan bania kwikwiknga nindane Buyambam tapaninu Jesu Kraisda atnatanimunggak kaknga wa gikat gatake yutningge natake tumuk wamu ininggat. Unukan.