\id 1JN  
\h 1 JON 
\toc1 Pas Jonda Tupan Matakut San 
\toc2 1 JON 
\mt1 Pas Jonda Tupan Matakut San  
\c 1  
\s1 Wamu kayuk yutnanga akngae yapii.  
\p
\v 1 Na gatu notna naat gatake yuamang aminda pas asanu ginde matandamuke wamu kayuk yutnanga akngae yapii danina natapnong. Wamu wa tapduknga kepat yekapat dua tasike tekut gwene yukut taknga ninda maaknginda natapbumang. Natayuk ninda kaininda kake kataknginda takumangge ginde danikapmakamang.  
\v 2 Wa kayuk asinggan yutnanga akngae yapii aknganata anggaman apan kakumang. Siwan wa kakumang kakngata tupa Nanin Anutuat gatake yukumayak. Sike ita anggaman apan kakumang.  
\v 3 Sike wa kayuk yutnanga akngae yapii ninda kake wamna natapbumang kakngae ginde danikapmakamang. Ninda Nanin Anutuat gatu itane waaknga Jesu Kraiskat musipminu takngatukan natake unekan binga yuamang. Sike ninda unekan yuamang binga ginu ina unzakan dakngawa musipminu takngatukan natake unekan binga yutnimde natake ginde danikapmakamang.  
\v 4 Siwan wamu waaknga ginde matandamukamangu ninda apbakngakamang kakngata buyambam siwikge natake matandamukamang.   
\s1 Ninda kakaa akngane sukunim.  
\p
\v 5 Siwan wamu wa ninda ie natake gatu ginde danikapnangge nataamang kaknga anzing. Anutu kakaa akngatane yapii. Siwan zikaa takngatusimu iat gatake dua yuamayak.  
\v 6 Sike ninda zikaa akngane sukuyuk ninu Anutuat musipminu takngatukan natake unekan binga yuamang ngang yananu kem siwik. Siwan ninda sanga siakan takngae gepbiatang dua yuke wamu waaknga yananu kem siwik.  
\v 7 Siwan Anutu kakaa akngatane yapii. Siwan ninda kakaa akngane sukukengu ninda musipminu takngatukan natake ninu kuupbamda notna notna dakngake yutnim. Dakngake yuwatna Anututane waaknga Jesuta ninde tangge kungwanimuke daknga tukngwakut takngata nindane waiaknganinu kuupbam sandetnimunggak. Sandetniman kepi nomana akngane sukunim.   
\p
\v 8 Sike ninda musipmikatang kem natake ninu waiaknganinu wena ngang yananu Jesutane siakan wamu takngatu musipmikatangu dua yuak ngangu anggaman siwik.  
\v 9 Siwan ngana ninda waiaknganin yakapnanu Anututa wamu tupa yawan yukut takngae ita natanggamatawik. Natanggamatake kepi nomana aknga tawake tasike waiaknganinu kuupbam sandetnimik.  
\v 10 Sike ngana ninda ninu waiaknganinu wena ngang yake Anututane wam sapduknganunanu Anutu kem amintapa binga dakngawik. Siwan itane wamde gepbiatang dua yuamang ngangu anggaman siwik.   
\c 2  
\s1 Jesue gepbiatang yuke sukunim.  
\p
\v 1 O ginu natane pandetnabam. Wamu aaknga ginde matandamuke ginu waiakngasa dua tasiningge natake matandamunggat. Sike ngana aminu tapatuta wai takngatu tasiwanu aminu waiaknganinde wamu Nanin Anutuat yatapat takawik kapata akgatangamik. Wa akgatanimik kapa aminu nomana siknga apa Jesu Krais ngang inikamang kapa unin.  
\v 2 Ita ninu itane aminabamdane waiaknganikat gatu aminu kuupbamdane waiaknganaatde wam yatapan takanggak kapa dakngake yuak.   
\p
\v 3 Sike ninda Anututane mama wamu kuupbam tawake tasikengu ninda Jesuat musipminu takngatukan natake unekan binga yuamang ngang natapna siakan siwik.  
\v 4 Siwan ngana aminu tapatuta Anututane mama wam sandeke ngana na Jesuat musipmiu takngatukan nataamak ngang yanggau ita kem yanggak kapanin. Siwan siakan wam taknga itane musiaatangu wena.  
\v 5-6 Sike aminu tapatuta Anututane wamu katak gwaamukgau ita Anutue musip gwaangu kumzang siknga natangamunggak kapanin. Sike aminu tapatuta na Anutuat musipmiu takngatukan natake sukukamak ngang yakengu ita kepi Kraisda sukukut taknganekan sukuyok. Sike ninda kepi waakngane sukukengu ninda Anutuat gatake sukukamang ngang natapna siakan siwik.   
\s1 Notnae musip gwaang natayamuning.  
\p
\v 7 Ngan notnabam. Nata musip gwaangu ginde natandamunggat. Sike wamu nata ginde wa matanggat taknga wa kayuk kaknga dua. Aho. Wamu wa tupa siknga tapduknga Jesutane wam takngata ginde apbut kopatangu ginda gwa natapbing kaknganin.  
\v 8 Siwan ngana nata mama wamu apmanu ginde matanggat taknga mama wamu kayuk kaknga. Sike zikaa akngata wena sinangge siwawan kakaa akngata apnangge siwan ginda kepi kayuu Jesuta tawake yeutnimukut taknga ginda tawake tasikaing.   
\p
\v 9 Sike aminu tapatuta notnae semna natangamuyuk na kakaa akngane yuat ngang yanggau ita zikaa akngane asinggan yuak.  
\v 10 Sike ngana aminu tapatuta notnae musip gwaang natangamunggau ita kakaa akngatane gepbiatang asinggan yuak kapanin. Sike kakaa akngane yusika ita waiakngaatang dua pimapik.  
\v 11 Sike ngana aminu tapatuta notnae semna natangamunggau ita zikaa akngane yuak kapanin. Ita zikaa akngane sukuke zikaa akngata kaina tasiwan maiwan kepie botasukuke wasiyawatakuwik.   
\q1
\v 12 Ngan waatdakana. Nata ginde natapa  
\q2 sanga Jesuta tasinimukut takngae natake Anututa waiakngasa gwa sandetdamukut ngang natake pas asanu ginde matandamunggat.   
\q1
\v 13 Sike nata ginu wawi aminuake gwa siya aminde natapa  
\q2 ginda aminu kepat yekapat dua tasike tekut gwene yukut tapae atnataaing ngang natake ginde matandamunggat.  
\q1 Siwan gatu ginu wawi kekeknga yuaing aminde natapa  
\q2 ginda Setenu gwa yapbike yuaing ngang natake gikat kuutde matandamunggat.  
\q1 Ngan waatdakana.  
\q2 Ginda Nanin Anutue atnataaing ngang natake ginde matandamunggat.   
\q1
\v 14 Sike ginu aminuake gwa siya aminda  
\q2 aminu kepat yekapat dua tasike tekut komune yukut tapae atnataaing ngang natake ginde matandamunggat.  
\q1 Siwan gatu ginu wawi kekeknga yuaing aminda Anututane wam takngae musipzaatang natapa kekekawan ginda akekekake  
\q2 Setenu gwa yapbike yuaing ngang natake  
\q2 gikat kuutde matandamunggat.   
\s1 Musia enawa tasikaing kaknga.  
\p
\v 15 Ginda sangabamu aminu Anutue masa imuke pasikaing kakngae musip gwaangu ma natapam. Kepi wa aminda sukukaing kaknga apbitatenong. Ginda sanga wai waakngae musip gwaang natayamukengu ginu musip gwaangu Nanin Anutue dua natapning. Wena.  
\v 16 Aminda musia enawan ina banipda siwan sanga waiaknga tasikaing. Ba kainata kawa musia enawa sanga waiaknga pasikaing. Ba sangaapana buyambam pake notnae sapduyamuke pasikaing. Sanga wa tasikaing kakngae yapii Nanin Anutu dua. Aho. Aminu Anutue masa imukaing aminu yapii unin.  
\v 17 Sike sanga wa aminda tasinangge ba tanangge natanggamatakaing kakngata pimanangge singgak. Siwan ngana aminu tapatuta Anutue banip tawake tasiwiu ita kayuu asinggan asinggan yuwik.   
\s1 Jesue iwana dakngake apbut.  
\p
\v 18 Siakan waatdakana. Tapduu wenga gwenu gwa sinanggenggak. Tupa ginda wamu takngatu Kraisde iwanata apme apik ngang yawa natapbing kaknga buyana gwa aakgak. Iwana kwaapzangga gwa apukaing. Apa kake tapduu wenga gwenu gwa sinanggenggak ngang natapna siakan singgak.  
\v 19 Wa Kraisde iwana dakngake yuaing aminda nikat gatake yukumang ngana gwa nipmake kuking. Wa aminda nikat musipminu takngatukan natake yukumang gamu dua nipmake kuwam. Ngana unzingu dua natake nipmake kuwawa wa aminu kuupbamda nikat musipminu takngatukan dua nataamang kakngata anggaman siwan kaamang.   
\p
\v 20 Siwan ngana Anututane dudumnaapa Jesuta Waunga ginde daman Waungu waapata musipza pangenawan ginu kuupbamda siakan wam takngae atnataaing.  
\v 21 Nata ginde natapa ginu siakan wam takngae dua nataaing ngang dua natake ginde matandamunggat. Aho. Ginda siakan wamde atnataaing. Aminu siakan wamde gepbiatang yukengu ita kem wamu dua yanggakgen ngang natake ginde matandamunggat.   
\p
\v 22 Siwan kem wamdane yapii mamin? Aminu tapatuta Jesue natake ita Anutuat dua gatake yuke aminu kepdakane nana amindane donguneta aakumang binga aakut ngang yanggak kapanin. Aminu wamu waaknga yanggau ita Kraisde iwana dakngake Nanin Anutuat gatu itane waakngaatde masa yamunggak kapanin.  
\v 23 Dasingge? Aminu masa Anututane waakngae imiu ita masa Nanaatde kuut imunggak kapanin. Siwan ngana aminu tapatuta Jesue natake ita Anututane waaknga siknga ngang yakapmanggau waapata Nanin Anutuat musia takngatukan natake unekan binga yuamayak kapanin.   
\s1 Kem wam takngata dua tasiwan pimanim.  
\p
\v 24 Siwan wamu tupa Jesue wam takngata ginde apbut kopatangu ginda gwan natapbingu wa ginda gitna pake yutnong. Gitna pake yukengu ginda Nanin Anutuat gatu itane waakngaat gatake unekan binga asinggan yutning.  
\v 25 Jesuta unzing yutnimde natake ita wa kayuk asinggan asinggan yutnanga aknga ninde nimunangge gwa yawan kekekakut.   
\p
\v 26 Ngan. Nata aminu gin panzike kem wam danindamukaing aminde natake wamu aaknga ginde matandamunggat.  
\v 27 Sike ngana nata ginde natapa Jesuta ginde Waunga gwa damukut ngang nataat. Siwan Waungu waapata gikat gatake yuwawan ginda natdetdetde dua dapning. Wena. Waungu waapata ginde sanga kuupbamu atdanindamukgak. Danindamuwawan ginda wamu kuupbam usanzike kem ba. Ba siakan ba ngang takngaana kaya dua natapning. Noman gan natapning. Dasingge? Waungga kem wam taknga teke siakan wamban danindamukgak. Siwan ginda wamu wa danindamukgak kaknga gwaamuke ginda Jesuat musipza takngatukan natake yutnong.   
\p
\v 28 Ngan waatdakana. Ginda Jesuat gatake yutnong. Iat gatake yuwawa tapduknga ita gatu apik gwene ninda natake ita waiaknganinu gwa sandetnimukut ngang natake apbakngake nomnane kunim.   
\p
\v 29 Ginda atnataaing. Jesuta nomana sikngaapa yuakgen. Ita unzing yuak ngang natakengu aminu kepi nomana akngane sukukaing aminda Anututane waaknga yapana dakngake sukukaing ngang ginda natapa siakan siyok.   
\c 3  
\s1 Anututane waaknga yapana dakngakumang.  
\p
\v 1 Siwan Nanin Anututa ninde butaya siknga natanimunggak kakngae natake asiknga bakngakamang. Ita ninde natake waaknga yapana ngang nininangge natake ita nindane musipmin pangenawan ninda tana tekwamban Anututane waaknga yapana dakngake yuamang. Dakngake yuwatna aminu Anutue masa imukaing aminda ninde dua nataaing. Dasingge? Wa aminda Anutue kuut dua nataaing.  
\v 2 Ngan waatdakana. Ninda Anututane waaknga yapana dakngake yuamang. Sike tapduknga Jesuta gatu apik gwene ninda sanga akanim takngae ita dua apuwawan ninda botake yuamang. Ngana atnataamang. Ninda itane nomna kana ita yuak kakngakan dakngake unzing yutnim ngang natapna siakan singgak. Siwan ngana ita ninda unzing dakngake yutnim takngae dua yeutniman kakumang.  
\v 3 Siwan aminu Jesuta yuak kakngakan dakngake yutnangge nataaing aminda inane musia tapa nomatawan Jesuta aminu nomana sikngaapa yuak binga dakngake yutning.   
\p
\v 4 Siwan sanga wai aminda tasikaing kakngata Anututane mama wamu asandekgak. Unzingge aminu tapatuta waiaknga tasikengu ita Anututane mama wam sandekgak kapa dakngake yuwik.  
\v 5 Siwan ginda atnataaing. Jesutane waiakngana wena siknga siwan nindane waiaknganin sandetnimunangge natake ita kepdakane apbutden.  
\v 6 Siwan aminu tapatuta Jesuat musia takngatukan natake unekan binga gatake yuwiu aminu waapata waiakngane dua sukuwik. Sike aminu waiakngane sukuwiu aminu waapata Jesue natake aminu nomana sikngaapa yuak ngang dua nataak kapanin.   
\p
\v 7 Siakan waatdakana. Ginu katak tagwautnong. Aminu tapatuta enake ginu kem wam danike tasiyak. Aminu kepi nomana akngane sukuwiu waapa aminu nomana amin. Unzing nomanaapa Jesu binga.  
\v 8 Siwan tupa siknganeta apu apmanu Setenda sanga waiakngana asinggan pasinggak. Pasinggakge aminda wai waaknga tawake tasiningu wa aminda Setendane dongune yuaing amin. Siwan Setendane kekeknga waaknga tanguwan pimapikge natake Anutue waakngaapata kepdakane epbut.   
\p
\v 9 Siwan aminu Anututane Waungga kekeknga akngata aminde pasiyaman tapa tekwamban Anututane waaknga yapana dakngake yuaing aminda waiakngane dua sukukaing. Dasingge? Anutue banip tawake tasinangge asiknga bakngake sukukaing. Unzing Anututa ina banipda siwan tasinggak binga. Sike Anutue waaknga yapana dakngake yukengu wa aminda waiakngane sukunanga dua.  
\v 10 Sike aminu sanga nomana aknga dua tasinggau ita Setendane dongune yuak kapanin. Gatu aminu notnae musip gwaangu dua natayamunggak kapata Anututane waaknga dua dakngake yuak kapanin. Ngangu wamu waaknga natake amin usanzike wa Setendane ba aminu wa Anututane ngang nomana siknga natapnim.   
\s1 Musip gwaang natayamunanga.  
\p
\v 11 Ginu atnataaing. Tupa Jesue wam takngata ginde apbut gwene ninda notninde musip gwaang natayamunimde wam natapbinggen.  
\v 12 Unzingge ninda kepi Kenda tawake tasikut takngane sukunanu take dua siwik. Kenu waapata Setendane dongune yuke ita uyapna tanguwan kumbut. Sike ita dasingge tanguwan kumbut? Ita sanga waiaknga tasiwawan ngana uyapnata sanga nomana tasiwan kake atemna natangamuke tanguwan kumbut.   
\p
\v 13 Ngan notnabam. Aminu Anutue masa imukaing aminda ginde atemna natandama kakengu ginda nangaakan ma natapam.  
\v 14 Ninu atnataamang. Ninda sanga kumnanga aknga teke kayuk yutnanga akngane yuamanggen. Ninda banip gwaangu notninu Jesuat nana aminde natayamukamang kakngae natake ninda kayuk yutnanga akngane yuamang ngang natapna siakan singgak. Siwan aminu notnae musip gwaang dua natayamunggau waapata sanga kumnanga aknga gitna take yuak kapanin.  
\v 15 Aminu notnae atemna natayamunggau waapata amin tanguwan kupik kapa binga dakngake yuak kapanin. Sike aminu wa bingata kayuk yutnanga akngane dua yuak.   
\p
\v 16 Siwan sanga Jesuta ninde tangge kungwanimukut takngata yeutniman ninu sanga notninde musip gwaang natayamunanga akngatane yapii unin kaamang. Kake ninda ina unzakan notninde tangge kungwayamunimde semna natapnanga dua.  
\v 17 Siwan aminu sangana babanu kaya tapatuta kaawan itane notna tapatuta sangae dapmake yuwan kake ngana akotnake dua gatangamik. Kotnake dua gatangamuke ngana na Anutue banip gwaang natangamunggat ngang yawanu siakan dua siwik.  
\v 18 Siakan waatdakana. Ninda notninde banip gwaang natayamukamang kaknga genin tangan gan dua yanim. Puyana atasinim.   
\s1 Anutue nomune yutnangge dua gwautnim.  
\p
\v 19-20 Siwan ngana ninda musipmikatang natagwaanguke asikaya ninu Anutue nomune taketa dua ba yuamang ngang natapnim. Unzing natakengu ninda dasing kaknga natapna kusiwan Anutue nomune gitna yutnim? Ninda notninde banip gwaang natayamukamang kakngae natapna kusiwan Anutue nomune gitna yutnim. Ninda banip gwaangu unzingu wa natayamukamang kakngata yeutniman ninu siakan wamde gepbiatang yuamang kakngata anggaman siwan kanim. Kake itane nomune take yutnim ngang natapna kekekawik. Dasingge? Anututa sanga kuupbamde atnataak. Sike ita sanga ninda musipmikatang natagwaanguke nangaakan unzing nataamang kakngae anggaman atnatake ngana musia kwikwikngata yuak.  
\v 21 Ngan notnabam. Ninu musipmikatangu Anutue nomune take yutnim ngang natapna kekekawanu itane nomune yutnangge dua gwautnim.  
\v 22 Dua gwauke ninda itane banip tawake tasike itane mama wamna tawayuk sanga tapatue tumuk wam ininanu ita ninde atnimunggak.  
\v 23 Sike wamu ninda tawake tasinimde wamu ita kekeknga yakut taknga anzing. Ninda Jesue natake Anututane waaknga ngang natapnim. Anututa tapan ita akgatanimuya apanin dakngake apan umana Krais ngang inikamang kakngae natapna kekekawik. Natapna kekekawan ninda wamu tupa Jesuta ninikut taknga tawake notninde banip gwaang natayamunim.  
\v 24 Sike aminu Anututane mama wam tawake tasiwiu waapata Anutuat musia takngatukan natake unekan binga gatake yuamayak. Siwan Waungu Anututa ninde nimukut tapata musipmin pangenakgak. Pangenawan ninu Anututane mama wamna gwaamukamang kakngata yeutniman Anututa nikat gatake yuamang kakngata anggaman siwan kaamang.   
\c 4  
\s1 Wamu katak natdeke usanzitnim.  
\p
\v 1 Ngan notnabam. Aminu kunduta enake Anututa musipmin pangenawan itane wamu takngatu natapbumang ngang kem yake tasikaing aminu kwaapzangga yanisukukaing. Sike wa amikat nana tapatuta yawanu ginda siakan ngangu zet ma natapam. Aho. Wamu wa aminda yakaing kaknga usanzitnong. Usanzike wamu wa Anututane ba Setendane ba ngang natapa siyok.   
\p
\v 2-3 Siwan aminu kunduta apuke Jesue natake danindamuke Anututa tapan Krais akgatanimuyaapa dakngake kepdakane epuke nisae gup dakngake aakut ngang danining. Aminu wamu waaknga danining aminda Anututane wamu siakande siknga yakaing aminu unin. Siwan ngana aminu tapatuta Jesue natake wamu waaknga dua yawiu waapatane musia Anututa dua tangenawan yanggak. Aho. Waapata Jesue iwana dakngake yuak kapanin. Tupa ginda wamu takngatu natawawa Kraisde iwanata apme apik ngang yawa natapbing kaknga buyana unin aawan kaaing.   
\p
\v 4 Siakan waatdakana. Ginda Anutue gepbiatang yuaing. Yuwawa Anutu gikat gatake yuak kapata kekeknga siknga. Sike ita aminu ie masa imukaing aminu ayaipapaakusinggakge ginda aminu wa kem yakaing aminu gwa yaipapaakusiwa yuaing.  
\v 5 Siwan aminu waakwau Anutue masa imukaikat nana. Unzingge wa aminda wamu masa imunanga aknga yawawa aminu masa imukaing notnata wa aminde wamu atnataaing.  
\v 6 Siwan ngana ninda Anutue gepbiatang yuamang. Yuke itane wamna yana aminu Anutue atnataaing aminda nindane wamu atnataaing. Ngana aminu Anututane amina dua dakngake yuaingga ninde wamu dua nataaing. Sike tuwangu waakngae ninda siakan amin ba kem amin ngang usanzike kanim.   
\s1 Notnae musip gwaang natayamuya.  
\p
\v 7 Ngan notnabam. Nata ginde musip gwaang natandamunggat. Ina unzakan ninu kuutda nikat nana aminde musip gwaang natayamunim. Dasingge? Anututa nindane musipmin pangenawanu ninda notninde musip gwaang natayamunim. Sike aminu notnae musip gwaang nataau waapata Anututane waaknga dakngake yuak kapanin. Sike ita Anutue asiknga nataak kapanin.  
\v 8 Siwan ngana aminu notnae musip gwaang dua natayamunggau waapata Anutue dua nataak kapanin. Dasingge? Anutu wa sanga aminde musip gwaang natayamuya akngae toiknga siknga.  
\v 9 Sike ita ninde butaya siknga natanimunggak kaknga yeutnimunangge natapbut. Yeutnimunangge natake ita waaknga awia tapatukan ngana dua kotnakut. Dua kotnake initewan waaknga waapata kepdakane epbut. Epuke ita sanga ninde tasinimik kakngata gataniman kayuk yutnanga aknga take ninda kayuk asinggan yutnimde natake initewan apbut.  
\v 10 Sanga wa Anututa ninde butaya natanimunggak kaknga sanga ninda ie musip gwaang natangamukamang kakngata dua yeutniman kaamang. Aho. Anututa inane waaknga initewan apuke ita tasinimukut takngata nindane waiaknganinde wamu yatapan takawikge initewan apbut takngata yeutniman Anututa ninde butaya siknga natanimunggak kakngata anggaman siwan kaamang.   
\p
\v 11 Ngan notnabam. Anututa ninde butaya natanimuke unzing gataniman kakengu ninda nikat nana aminde musip gwaang natayamunim.  
\v 12 Aminu tapatuta Anutu kainata dua kakut ngana ninda nikat nana aminde musip gwaang natayamukengu Anututa nikat gatake yuamang ngang natapnim. Ita nikat gatake yuke ninde butaya natanimunggak kakngata buya aawan ninda notninde musip gwaang natayamukamang kakngata buyambam siwik.   
\p
\v 13 Siwan Anututa inane Waunga niman Waungu waapata nindane musipmin pangenawan ninda natake ninu Anutuat musipminu takngatukan natake unekan binga gatake yuamang ngang natapna kekekanggak.  
\v 14 Sike Nanin Anututa inane waaknga tapan ita akgatanimuya apanin dakngake yuak. Dakngake yuwan Nanata initewan kepdakane epuke ninu kuupbamdane waiaknganin sandetnimukut. Ita kepdakane apan ninda kaininda kakumang. Sike sanga wa kakumang kakngae aminbamde yanikapmakamang.  
\v 15 Sike aminu tapatuta Jesue natake ita Anututane waakngaapa ngang aminbamde yaninggau waapata Anutuat musia takngatukan natake unekan binga gatake yuamayak kapanin.  
\v 16 Siwan ninu Anututa ninde butaya natanimunggak kakngae natapna kekekanggak.  
\p Sike Anutu wa sanga aminde musip gwaang natayamuya akngae toiknga. Siwan aminu inane notnae musip gwaang natayamuya akngae gepbiatang yuaing aminda Anutuat musia takngatukan natake unekan binga gatake yuaing aminu unin. Siwan Anututa wa amikat gatake unekan yuaing.  
\v 17 Siwan notninde musip gwaang natayamukengu ninu sanga Jesuta kepdakane yuke tasikut takngakan tawake tasinim. Tawake tasiwatna ninda musip gwaangu notninde natayamukamang kakngata buyambam siwik. Siwan masande Anututa aminu kuupbam usanziwik gwene ninda itane nomune yutnangge dua gwautnim.  
\v 18 Aho. Aminu Anutue nomune yutnangge akwaukgau waapata natake asikaya Anututa toknga waiaknganae apba namik ngang natake gwaukgak kapanin. Sike aminu Anutue wa gwauke yuau waapata Anutue musip gwaang siknga dua nataak. Sike ita Anutue musip gwaang siknga nataak gamu ie nomune yutnangge dua gwauban. Aho. Anutue musip gwaangu siakande siknga natangamukenga aminu waapata Anutue nomune gitna yuwik.   
\p
\v 19 Siwan Anututa ita gamok ninde butaya natanimukutde ninda yake ie musip gwaang natangamukamang.  
\v 20 Sike aminu tapatuta na Anutue musip gwaang natangamunggat ngang yawik. Yake ngana notnae atemna natangamukengu ita kem amintapa dakngawik. Dasingge? Ita notna asinggan kaak kapae musip gwaang dua natakengu ita Anutu kainata dua kaak kapae musip gwaang natangamunanga dua.  
\v 21 Unzingge Jesuta mama wamu anzing nimukut. Aminu Anutue musip gwaang natangamunggak kapata inane notnae kuut musip gwaang natangamuyok ngang nimukut.   
\c 5  
\s1 Anutue masa imukaing aminde gepbiatang dua yutnim.  
\p
\v 1 Aminu tapatuta Jesue natake Anututa i tapan Krais akgatanimuya apanin dakngake yuak ngang yanggau waapata Anututane waaknga dakngake yuak kapanin. Dasingge? Aminu kunduta aminu tapatue musip gwaang natangamukaing aminda aminu waapatane waakngae kuut musip gwaang natangamuning.  
\v 2 Sike ninda Anutue musip gwaang natangamukengu itane mama wamu atawake tasinim. Mama wamna tawake tasikengu ninda aminu Anututane waaknga yapana dakngake yuaing aminde musip gwaang natayamukamang kakngata anggaman siwan kanim.  
\v 3-4 Dasingge? Aminu Anutue mama wam tawake tasining aminda Anutue musip gwaang atnatapning. Siwan aminu Waungga musia tangenawan tapan tekwamban Anututane waaknga dakngake yuwiu waapata sangaaknga kuupbam Anutue iwana dakngake tasikaing kaknga ayaipapaakusiwik kapanin. Sike aminu waapata Anututane mama wam tawake Anututa kwatan siknga niniwawan tasikamang ngangu ita dua yawik. Wena. Ninda Jesuta akgatanimik ngang natapna kekekawanu ninda sanga aknga kuupbam Anutue iwana dakngake tasikaing kaknga ayaipapaakusinim.  
\v 5 Siwan maminda sanga waaknga yaipapaakusiwik? Aminu tapatuta Jesu Anutue waakngaapa unin ngang natapan kekekawiu waapata Anutue iwana ayaipapaakusiwik kapanin.   
\s1 Anututa inane waakngae yakapbut.  
\p
\v 6 Siwan sanga takngaata yeutnimat Jesu kepdakane nana tapatu ngangu dua natapnim. Aho. Anututa initewan Krais akgatanimuyaapa dakngake kepdakane epbut tapa Jesu unin ngang natapnim. Sanga waakngaaya anzing. Jonda Jesu saukngamukut takngaat gatu Jesuta kungwake daknga tukngwakut takngaatda yeutnimat Jesuta Anutuat yusika apbut tapa unin ngang nataamang. Sike yangga saukngamukut takngaekan natake Jesu Anutuat nanaapa ngangu natapnanga dua. Ngana yangga saukngamukut takngaat gatu ita daknga tukngwakut takngaatde natapna Jesu Anutuat yusika epbut ngang anggaman siwan kaamang. Siwan sanga tapatuatda Jesue yakapan ita Krais Anutuat yusika apbut tapa unin ngang siakan singgak. Sanga waapa Anututane Waung Kapa unin. Sike Waungu waapata siakan wamdane yapii.  
\v 7-8 Siwan yangga saukngamukut takngaat gatu daknga tukngwakut takngaat gatu Waungkat ngangga sanga takngatukan yeutnimukaing. Sike sanga wa takngaat takngatuatda yeutnima kana siakan singgak.  
\v 9 Siwan wamu aminda ninikaing kakngae natapna siakan singgak ngana wamu Anututa nininggak kakngae natapna siakan siknga siwik. Siwan wamu wa Anututa inane waakngae nininggak kaknga anzing.  
\v 10 Aminu tapatuta Jesu Anututane waaknga sikngaapa ngang natapan siakan siwiu waapata wamu wa Anututa nininggak kakngae musiaatang natapan kekekanggak. Siwan ngana aminu tapatuta wamu Anututa inane waakngae nininggak kakngae natapan kem siwiu ita Anutu kem amintapa ngang natapik.  
\v 11 Siwan wamu wa Anututa ninde nininggak kaknga anzing. Anututa ninde sanga kayuk asinggan asinggan yutnanga aknga gwa nimukut. Sike kayuk yutnanga waakngatane toiknga Anututane waaknga unin.  
\v 12 Siwan aminda Anututane waakngaat musia takngatukan natake unekan binga gatake yuamayau waapata kayuk yutnanga aknga take yuak kapa unin. Siwan ngana aminu Anututane waakngaat dua gatake yuamayau waapata kayuk yutnanga akngana wena.   
\s1 Kayuk asinggan yutnanga aknga.  
\p
\v 13 Siwan nata wamu waakngae natake ginu Jesu Anututane waaknga sikngaapa ngang natapa kekekanggak aminde matandamunggat. Ginda natake ninu kayuk asinggan yutnanga aknga gitna gwa take yuamang ngang natapa kekeknga siwikge natake wamu waaknga ginde matandamunggat.  
\v 14 Sike atnataamang. Ninda sanga tapatu Anututa tasinangge take nataak kakngae inindatapnanu ita nindane tumuk waminu atnatapikgen.  
\v 15 Sike ita nindane tumuk wamu kuupbam atnataak ngang natapna kekekanggak. Natapna kekekawanu ninda sanga tapatue inindatakamangu ita atniman takamang ngang natapna kekeknga siwik.   
\p
\v 16 Sike aminu tapatuta kawawan notna tapatuta wai takngatu tasiwan kawik. Kawawan wai waaknga tasiwan Anututa dua inikwasiwan kumnanga akngane dua kuwik ngang natakengu ita notna waapa gatangamunangge Anutue inindatapsok. Inindatapanu Anututa waiakngana asandekngaman kayuk asinggan yutnanga aknga take yuwik. Siwan ngana sanga wai takngatu undang yuak. Aminu wai waaknga tasikengu ita akumnanga akngae gepbiatang koke yuwik. Sandekngamunanga dua. Sike notza wai waaknga tasiwik kapae dua ginda tumuk wam yaningge daninggat. Aho.  
\v 17 Ninda atnataamang. Sanga waiaknga aminda pasikaing kaknga kuupbamu Anututa kawan take dua singgakgen. Siwan ngana waiaknga kundu pasiwa kake Anututa dua yanikwasipewan kuke kumnanga akngane dua yutning. Aho. Ginda wa aminde tumuk wam inindatapa Anututa sandeyamuyok.   
\p
\v 18 Siwan ninu atnataamang. Aminu Anutue waaknga yapana dakngake yuaing aminda sanga waiakngae gepbiatang dua yuainggen. Wena. Anututane waaknga Jesu waapata aminu Anutue waaknga yapana dakngake yuaing aminu katak siknga kayuak. Kayuke Setendane katakngane wa aminu sandewan waiakngae kepi dua tawakaing. Wena.   
\p
\v 19 Sike ninu atnataamang. Ninu Anututane waaknga yapana dakngake yuwatna ngana aminu kuupbamda Setendane kekeknga akngae gepbiatang yuainggen.   
\p
\v 20 Siwan gatu ninu atnataamang. Anututane waakngata apuke natdetdeu ninde nimukut. Niman ninda Anutu siakan tapae atnataamang. Natake ninda Anutu siknga apaat gatu inane waaknga sikngaapa Jesu Kraiskat musipminu takngatukan natake unekan binga gatake yuamang. Siwan Anutu waapa Anutu siknga. Siwan kayuk asinggan yutnanga akngae toiknga unin.   
\p
\v 21 Siakan waatdakana. Ginda Anutu pupuknga kuupbamde masa yamunong. Unukan.