\id 1TH - WolioNT
\ide UTF-8
\ide 65001 - Unicode (UTF-8)
\h 1 TESALONIKA
\toc3 1Tes.
\toc2 1 Tesalonika
\toc1 Surana Paul Mobhaa-bhaana To Jamaʼa I Tesalonika
\mt2 SURANA PAUL
\mt2 MOBHAA-BHAANA
\mt2 TO JAMAʼA I
\mt1 TESALONIKA
\is POGAU BHAA-BHAANA
\im \bk Surana Paul Mobhaa-bhaana To Jamaʼa i Tesalonika\bk* atoburi to apekaogeaka tee apekatangkaaka incana manga mia moparacaeana tee Isa i kota Tesalonika.Tesalonika sii o ibu kotana Poropinsi Makedonia, saangu poropinsi i pamarintana Roma. Jamaʼa i Tesalonika apakaroa Paul sapadhana abholi kota Filipi. Kera-kera i tao 51 M, Paul, Silas tee uka Timotius apakawaaka Lele Malape i kota Tesalonika. Iwe sumai abhari o mia momembalina moparacaeana tee Isa, maka dhaangia tee karobho wakutuuna Paul tee Silas atoraeaka abhali pamarintana Kaisar. Miana Yahudi apogau, "Bhari-bharia manga incia aewangi manga katotapuna Kaisar tee apogau ande dhaangia samia raja mosagaanana, siitumo Isa Al Masi." (Kamata \xt Tul. 17:1-9)\xt* Wakutuuna o kajadia incia sumai, manga miana Yahudi mogigibuluna tee Paul apepuumo abhali usahana Paul to apakoleleaka kaadharina Karasiteni to manga mia inda motolentuna miana Yahudi, siitumo i manga mia mopakamataakana kapeeluna tee agama Yahudi. Sabutuna o Paul tee Silas saidhepo amate tee tabeana apalaiaka karona minaaka i Tesalonika kasiimpo alingka i kota Berea.
\ip Sapadhana incia sumai, Paul ameri ancosala o mia moparacaeana tee Isa i Tesalonika bheamurutadi roonamo o kanarakaa inamisina manga incia, jadi incia alamboko Timotius to apekaoge incana manga incia. Kasiimpo sakawana i kota Korintus, Paul atarima sura minaaka i sabhangkana siitumo Timotius to soʼalina kadhaangiana jamaʼa i Tesalonika. I nuncana sura incia sumai dhaangia o lele iundeakana incana Paul, siitumo mia moparacaeana tee Isa i Tesalonika sadhaadhaa ataʼati i nuncana iimanina, sabutuna o Paul aburi sura pendua to manga incia roonamo amasanaa mpuu incana tee abangga tee manga incia.
\ip Jadi, i nuncana sura incia sii, Paul asukuruaka lele itarimana pokaiana tee iimani tee kaasina manga incia, tee audhaniakea pokaiana tee dhadhina karona wakutuuna incia dhaangiapo i tanga-tangana manga incia. Sapadhana apogauaka bhari-bharia giu incia sumai, Paul alawani bhari-bharia kaabhakina manga incia pokaiana tee umbaana pendua o Al Masi. Manga incia aabha, "Ande dhaangia o miana Karasiteni amate i wakutuuna o Al Masi indapo aumba pendua, amembali buaka o mia incia sumai atarima dhadhi mobakaa saʼumurua minaaka i Al Masi?" Paul apajelasiakea manga mia moparacaeana tee Al Masi bheapadhadhia pendua moomini amatemo. Manga miana Tesalonika uka aabha, "Naepia o Al Masi bheaumba pendua?" Paul apajelasiakea ande o Isa bheaumba sakijamata tee i wakutuu inda imatau. Rampaakanamo sumai, incia audhaniaka jamaʼana Tesalonika to adhadhi mangkilo mamudhaakana inda amaea wakutuuna apokawa tee Isa. I saangua sura incia sii, Paul apekaoge incana jamaʼana Tesalonika mamudhaakana inda aunto-unto tee atorotorosu apewau malape!
\iot Antona
\io1 Porikanaana pogau \ior 1:1 \ior*
\io1 Kasukuru tee kapujia \ior 1:2--3:13 \ior*
\io1 Naasehati pokaiana tuaapa tabeana o pemingkuina mia moparacaeana tee Isa \ior 4:1-12 \ior*
\io1 Kaadhari pokaiana tee umbaana pendua Al Masi \ior 4:13--5:11 \ior*
\io1 Naasehati kapadhaa \ior 5:12-22 \ior*
\io1 Katutubhi \ior 5:23-28 \ior*
\c 1
\s1 Salamu
\sr 1:1
\p
\v 1 \x - \xo 1:1 \xo*\xt Tul. 17:1. \xt*\x*Minaaka i Paul, Silwanus,\f + \fr 1:1 \fr*\fq Silwanus: \fq*\ft Kagoraakana "Silas" i nuncana pogau Yunani; kananeana sabhangkana Paul sii atogoraaka Silas i nuncana Tulatulana Manga Rasulu tee sura mosagaanana minaaka i Paul.\ft*\f* tee Timotius.
\p To jamaʼa i Tesalonika momembalina uumatina Aulataʼala o Amata i nuncana sarona Isa Al Masi Oputa Momalanga. Rahumati tee dhadhi malape apoose tee ingkomiu.
\s Hasilina Kaadhari Ipakoleleakana Paul
\sr 1:2-10
\p
\v 2 Ingkami sadia tasukuru i Aulataʼala rampaakanamo ingkomiu, tee ingkami inda taunto-unto tasarongi saromiu i nuncana doʼamami. 
\v 3 Ingkami taudhania torotorosu tuaapa o pemingkuimiu apokana tee iimanimiu i wakutuuna ingkami tadoʼa i aroana Aulataʼala o Amata. Ingkami taudhania uka o usahamiu apokana tee kaasimiu, tee o kapoolimiu to utarai kanarakaa rampaakana opea iharapumiu tee Isa Al Masi Oputa Momalanga. 
\v 4 E manga witinai imaasiakana Aulataʼala, ingkami tamataua ande o Aulataʼala padhamo apilikomiu, 
\v 5 roonamo Lele Malape ipakoleleakamami sumai atopakawaaka to ingkomiu mencuana tangkanamo soo pogaumea, maka tee kuasa tee Rohina Aulataʼala tee kayaakini mompuu-mpuu. Ingkomiu umataua tuaapa ingkami tadhadhi to kalapemiu wakutuuna tadhaangia i tanga-tangamiu. 
\v 6 \x - \xo 1:6 \xo*\xt Tul. 17:5-9.\xt*\x*Sumaimo ingkomiu uose pemingkuimami tee uose pemingkuina Oputa Momalanga. Moomini unamisi abhari o kanarakaa, ingkomiu utarima firimani incia sumai tee inca mokaunde-unde moumbana minaaka i Rohina Aulataʼala, 
\v 7 sabutuna ingkomiu umembali sandarana karo to bhari-bharia mia moparacaeana tee Isa modhaangiana i Poropinsi Makedonia tee i Poropinsi Akhaya. 
\v 8 Roonamo minaaka i ingkomiu o firimanina Kawasana Opu sumai atoresa mencuana tangkanamo soo i Makedonia tee i Akhaya, maka i bhari-bharia tampa uka o lelena kaparacaeamiu tee Aulataʼala sumai atoresamo. Sumaimo ingkami indamo tafaraluu tapogauaka opeopea uka, 
\v 9 roonamo karona manga incia mopetulatulaakana tuaapa ingkomiu umangatarima wakutuuna taumba tapokawaakakomiu i piamo itu, tee tuaapa ingkomiu ubholi barahalamiu tee umbuli uose Aulataʼala modhadhi tee mobanara sumai to ulaiania. 
\v 10 Manga incia uka apogauaka tuaapa ingkomiu uharapuaka umbaana Anana Aulataʼala minaaka i sorogaa, siitumo Isa Al Masi, mopadhana ipadhadhina Aulataʼala pendua minaaka i mate, tee Incia bheamangapasalaamati minaaka i pamuruna Aulataʼala bhemoumbana naile itu.
\c 2
\s1 Karajaana Paul i Tesalonika
\sr 2:1-12
\p
\v 1 E manga witinai! Ingkomiu umataua ande o umbaamami i tanga-tangamiu inda asia-sia. 
\v 2 \x - \xo 2:2 \xo*\xt Tul. 16:19-24; 17:1.\xt*\x*Ingkomiu umataua wakutuuna ingkami indapo takawakomiu i Tesalonika, ingkami mangasikisaa tee mangapekaea i kota Filipi. Tee moomini abhari o mia mangabhalina maka o Aulataʼala padhamo mangapabarani to tapakoleleakakomiu Lele Malape mominaakana i Aulataʼala. 
\v 3 Sumaimo ingkami takembakomiu mamudhaakana uparacaea tee Lele Malape, tee ingkami inda tee haejatimami momadhaki to tatipukomiu. 
\v 4 Maka roonamo Aulataʼala mangaabhi talaenga mangadhawuaka tugasina to tapakoleleaka Lele Malape. Sumaimo ingkami tabarani tapakawaaka kasamea incia sii, mencuana to tapasanaa ngangarandana mia, maka mamudhaakana tapasanaa ngangarandana Aulataʼala moujina ngangarandata. 
\v 5 Ingkami inda tabhoasaka pogau momameko tee o haejatimami inda amasoʼo, tee o giu incia sumai umataua ande o Aulataʼala satotuuna o sakusiimami. 
\v 6 Tee inda taʼusaha to tapeelo kapujia minaaka incemapo uka, malape minaaka i ingkomiu atawa o mia mosagaanana, moomini ingkami o rasuluna Al Masi tee takohaku to taemani opeapo uka minaaka i ingkomiu. 
\v 7 Maka amalulu o pemingkuimami wakutuuna tadhaangia i tanga-tangamiu mboomo samia bhawine mopaduduna tee modhambaakana anana karona. 
\v 8 Rampaakana tamaasiakakomiu mpuu, ingkami inda soo tadhawuakakomiu Lele Malape mominaakana i Aulataʼala, maka tadhawuakakomiu uka o dhadhimami roonamo kaasimami tee ingkomiu.
\p
\v 9 E manga witinai, atantumo ingkomiu dhaangiapo uudhania tuaapa o kangulemami takarajaa eo tee malo to opea ifaraluuna dhadhimami mamudhaakana ingkami inda tapanarakaakomiu. Mboomo sumai ingkami tapakawaakakomiu Lele Malape mominaakana i Aulataʼala sumai. 
\v 10 Ingkomiu tee Aulataʼala momembalina sakusii, ande ingkami tadhadhi mangkilo, tabanara tee inda tee kasalahamami tee ingkomiu moparacaeana tee Al Masi. 
\v 11 Ingkomiu umataua tuaapa tanaasehatikomiu, apokana mboomo samia ama tee anana karona, 
\v 12 ngangarandamiu samia-samia tapekatangkea tee tahiburukomiu, tee ingkami taemani mpuu mamudhaakana o pemingkuimiu apokana tee kapeeluana Aulataʼala mopadhana mokembakomiu to upesua i nuncana pamarintana tee kamuliangina.
\s1 Kaunde-unde to Jamaʼa
\sr 2:13-20
\p
\v 13 Rampaakanamo sumai ingkami inda taunto-unto taemani sukuru i Aulataʼala, roonamo ingkomiu padhamo utarima firimanina Aulataʼala mopadhana ipakoleleakamami sumai, tee uperangoia tee utarimaia o lele incia sumai mencuana mboomo saangu lele mominaakana i maanusia, maka o lele sumai uperangoia tee utarimaia atotuu-totuu roonamo aminaaka i Aulataʼala. Firimanimo incia sumai mokarajaana i nuncana karomiu moparacaeana tee Al Masi. 
\v 14 \x - \xo 2:14 \xo*\xt Tul. 17:5. \xt*\x*E manga witinai, ingkomiu uosemo sandarana karona bhari-bharia jamaʼana Aulataʼala i Yudea momembalina pewauana Isa Al Masi, siitumo kanarakaa inamisimiu aumba minaaka i mia mominaakana i lipumiu karomiu, apokana mboomo inamisina manga jamaʼana Aulataʼala i Yudea sumai aminaaka i manga miana Yahudi uka, 
\v 15 \x - \xo 2:15 \xo*\xt Tul. 9:23; 9:29; 13:45; 13:50; 14:2; 14:5; 14:19; 17:5; 17:13; 18:12. \xt*\x*tee manga incia sumai mopadhana mopekamatena Isa Oputa Momalanga tee manga nabii, kasiimpo asikisaa tee mangapadhencu minaaka i Yudea. Manga incia inda apewau ipeeluna Aulataʼala tee amusuhi bhari-bharia mia, 
\v 16 tee mangajoli-joli to tapakoleleaka firimanina Aulataʼala i manga lipu inda motolentuna miana Yahudi mamudhaakana manga lipu mosagaanana sumai inda atosalaamati \add alaloi Lele Malape\add*. Tee mboo sumai manga miana Yahudi padhamo apajulu torosu dosana sakawana i batasina \add kasabarana Aulataʼala\add*, sabutuna Incia apalimba pamuruna to manga incia.
\p
\v 17 E manga witinaiku, inciamo o pogaata mosabantarana sumai mangapamembali tapomaridho, maka ingkita taposaangu ngangaranda, tee gaumami mpuu tapokawa pendua tee ingkomiu roonamo tapemeliliakakomiu! 
\v 18 Rampaakanamo ingkami taneati to talingka tasolokomiu, hususuna iaku o Paul, padhamo kuʼusaha pia mpearo, maka ingkami sadia mangajoli Ibilisi. 
\v 19 E manga witinai, bholi umente ande ingkami tapemeliliakakomiu, sabutuna ingkami gaumami tasolokomiu. Ingkomiumo mangapaunde-undena tee momembalina mahakotamami i aroana Isa Oputa Momalanga wakutuuna umbaana naile itu. 
\v 20 Ingkomiumo momembalina kamuliangimami tee mangapaunde-undena.
\c 3
\s1 Lele Malape Ibhawana Timotius
\sr 3:1-13
\p
\v 1 \x - \xo 3:1 \xo*\xt Tul. 17:15. \xt*\x*Rampaakanamo sumai o pemelilimami indamo tataraia, sumaimo ingkami tafikiria salabhina tamboore samia-miamami i kota Atena, 
\v 2 sumaimo tatumpu Timotius witinaita saʼiimani tee mopobhawa-bhawana mokarajaana tee ingkita i nuncana tapakawaaka Lele Malapena Al Masi, mamudhaakana apekatangka tee apekaoge incamiu i nuncana iimanimiu, 
\v 3 mamudhaakana i tanga-tangamiu bholi dhaangia o mia inda momatangkana iimanina roonamo kanarakaa incia sii, tee ingkomiu karomiu umataua ande manga kanarakaa incia sii o haejatina Aulataʼala to ingkita. 
\v 4 Inciamo, wakutuuna ingkami tapobhawa tee ingkomiu, padhamo tapaumbaakakomiu porikana ande ingkita bhetanamisi kanarakaa. Garaaka o giu incia sumai unamisimea mboomo imataumiu sii-sii. 
\v 5 Sarangoku lelemiu, iaku indamo kusabara, sabutuna kulambokomo Timotius to aumbaaka i Tesalonika to amatauaka kadhaangiamiu ara dhaangiapo utorotorosu uparacaea tee Al Masi, roonamo kumeri ancosala tee cara tuaapapo uka o \add Ibilisi\add* pande pekawuju sumai apadhamo awujukomiu, sabutuna asia-siamo bhari-bharia kanguleamami.
\p
\v 6 \x - \xo 3:6 \xo*\xt Tul. 18:5. \xt*\x*Maka sii-sii, Timotius ambulimo minaaka i tampamiu tee padhamo apokawa tee ingkami. Incia mangapakawaaka lele ikaunde-undeaka pokaiana tee iimani tee kaasimiu, tee apetulatulaaka ande ingkomiu sadia mangaudhani tee mangapemeliliaka mpuu tee gaumiu upokawa tee ingkami, mboomo ingkami uka gaumami tapokawa tee ingkomiu. 
\v 7 E manga witinai, rampaakanamo sumai, i tanga-tangana sagala giuna kanarakaa tee kasukaramami, ingkami tatohiburu roonamo ingkomiu tee iimanimiu. 
\v 8 Sabutuna sii-sii o namisimami mboomo tadhadhi pendua, somanamo ingkomiu umatangka ukakaro tee uposaangu tee Kawasana Opu. 
\v 9 Ingkami tabeana tapewau opea to tasukuruaka i Aulataʼala to bhari-bharia kasanaa ipotibhaakamami minaaka i Aulataʼala rampaakanamo ingkomiu? 
\v 10 Eo tee malo ingkami tampuu-mpuu tadoʼa mamudhakaana ingkami amembali tapokawa tee ingkomiu tee mamudhakaana ingkami tamembali tapamondo bhari-bharia kakuranga i nuncana iimanimiu.
\p
\v 11 Maasangia Aulataʼala Amata tee Isa Oputa Momalanga mangabungkaleaka dhala mamudhaakana o haejatimami to tapokawa tee ingkomiu atobungkale. 
\v 12 Maasangia o Kawasana Opu apamembalikomiu uhanda upomaamaasiaka podho-podho ingkomiu tee uhanda umaasiaka mia mosagaanana, apokana mboomo kaasimami tee ingkomiu. 
\v 13 Tee mboo sumai, Kawasana Opu bheapekatangka incamiu, sabutuna ingkomiu umangkilo tee inda dhaangia ibalaciakamiu i aroana Aulataʼala o Amata, i wakutuuna Isa Oputa Momalanga aumba apobhawa-bhawa tee bhari-bharia mia mosaalihi.\f + \fr 3:13 \fr*\fq mia mosaalihi: \fq*\ft Atawa "bhari-bharia malaaʼekatina." \ft*\f*
\c 4
\s1 Naasehati mamudhaakana Tadhadhi Mangkilo
\sr 4:1-12
\p
\v 1 E manga witinaiku, aahirina ingkami taemani tee tanaasehatiakakomiu i nuncana sarona Isa Oputa Momalanga mboomo mopadhana ipengkaadhariakamiu tuaapa o carana tabeana udhadhi mamudhaakana umembali upasanaa incana Aulataʼala. Maka sii-sii tee kuasana Isa Oputa Momalanga ingkami tajungkurikomiu mamudhaakana uhanda mpuu upewau giu incia sumai, 
\v 2 roonamo umataua o kasamea mopadhana idhawuakamami to ingkomiu minaaka i Isa Oputa Momalanga. 
\v 3 Giumo incia sii o kapeeluana Aulataʼala: Dhadhi mangkilomo, siitumo upekaridhoa o karomiu minaaka i pewau pebula, 
\v 4 mamudhaakana bhari-bharikomiu umataua tuaapa o carana ukuasai karomiu,\f + \fr 4:4 \fr*\fq ukuasai karomiu: \fq*\ft Pogau mokomaʼanana 'karo' amembali uka akomaʼana 'bhawinena,' sabutuna aeati incia sii amembali atomaʼanai, "Aulataʼala gauna uka samia-samia umane mokobhawine tabeana amataua tuaapa adhadhi aposaangu tee bhawinena tee cara momangkilo tee motohoromati i aroana bhari-bharia mia." \ft*\f* tee mboo sumai ingkomiu udhadhi mangkilo tee ahoromatikomiu maanusia rangamiu, 
\v 5 bholi uose nawusuumiu, mboomo manga mia inda momatauna Aulataʼala. 
\v 6 I nuncana giu incia sii, bholi dhaangia mopekarugina tee moʼakalaina witinaina saʼiimani. Maʼanana ancosala dhaangia mopewauna zinaa tee bhawinena witinaina mosaʼiimani. Minaaka i piamo itu ingkami padhamo taudhaniakakomiu, ande o Kawasana Opu dhaanamo bheahukumu manga mia mopewauna kasalaha mboo sumai. 
\v 7 Aulataʼala mangakemba mencuana to tapewau manga giu marombu, maka to tapewauaka giu mangkilo. 
\v 8 Rampaakanamo sumai, ande dhaangia o mia momendeuna kaadhari incia sii, sumaimo mencuana amendeu aose maanusia, maka amendeu aose Aulataʼala mopadhana modhawuakakomiu Rohina Momangkilo. 
\v 9 Ingkami indamo afaraluu to taburiakakomiu carana tuaapa umaasiaka manga witinaimiu saʼiimani, roonamo carana upomaamaasiaka podho-podho ingkomiu padhamo upengkaadhariakea minaaka i Aulataʼala. 
\v 10 E manga witinai, giu incia sumai padhamo upewaua to bhari-bharia witinaita saʼiimani i Makedonia, maka ingkami taudhaniakakomiu mpuu mamudhaakana uhanda upomaamaasiaka. 
\v 11 Giu molaengana to ropeamiu satotuuna udhadhi utanangi tee inda uʼurusu masaʼalana mia mosagaanana, tee upeelomo karajaa to upadhadhiaka karomiu, mboomo mopadhana iparintaakamami to ingkomiu i piamo itu. 
\v 12 Tee udhadhi mboo sumai, ingkomiu inda uposaronaka i incemapo uka, tee manga mia inda moparacaeana tee Al Masi bheahoromatikomiu.
\s1 Umbaana Kawasana Opu
\sr 4:13-18
\p
\v 13 E manga witinai, ingkami gaumami umataua o kadhaangiana mia mate, mamudhaakana inda amapii incamiu mboomo mia inda tee iharapuna. 
\v 14 Ingkita taparacaea ande o Isa amatemo tee adhadhimo pendua. Rampaakanamo sumai ingkita uka taparacaea ande o Aulataʼala bheapadhadhi pendua bhari-bharia mia moparacaeana tee Al Masi tee bheadhadhi apobhawa tee Isa. 
\v 15 \x - \xo 4:15-17 \xo*\xt 1Kor. 15:51-52. \xt*\x*Pogau ibhoasakamami to ingkomiu sii alaloi firimanina Kawasana Opu, siitumo: Wakutuuna umbaana Isa Al Masi, ingkita modhadhina sii inda bhetaporikanaaka manga mia moporikanana momate. 
\v 16 Naile itu o Isa Oputa Momalanga bheasapo minaaka i sorogaa apoose adhawuaka parinta tee suara momakaa, apoose tee suarana kapalana malaaʼekati tee uka onina sangkakalana Aulataʼala. Manga mia mate moposaanguna tee Al Masi siitumo bhemobhaa-bhaana bheipadhadhi pendua, 
\v 17 kasiimpo o bhilaana manga mia modhadhina i wakutuu incia sumai bheapobhawa-bhawa atoangka i bhawona taʼina ngalu tee manga mia moparacaeana tee Al Masi mopadhana ipadhadhi pendua minaaka i mate to apokawa tee Kawasana Opu i laiana. Mboomo sumai ingkita bhetapobhawa-bhawa tee Kawasana Opu saʼumurua. 
\v 18 Rampaakanamo sumai, ingkomiu tabeana upopekaoge inca podho-podho ingkomiu tee bhoasaka incia sii.
\c 5
\s1 Kojagamo to Umbaana Kawasana Opu
\sr 5:1-11
\p
\v 1 E manga witinaiku, maka to wakutuuna tee naepia o kajadia incia sumai, indamo afaraluu kuburiakakomiu. 
\v 2 \x - \xo 5:2 \xo*\xt Mat. 24:43; Luk. 12:39; 2Ptr. 3:10. \xt*\x*Roonamo ingkomiu umataua totuu ande o eona umbaana Kawasana Opu bheaumba mboomo samia mia manako i wakutuuna pontanga malo. 
\v 3 Wakutuuna dhaangia manga mia mopogauna, "Bhari-bharia kadhaangiata atanangi tee aʼamani," garaaka i wakutuumo incia sumai manga incia uka bheabinasa sakijamata, apokana mboomo kapii mokakawaa inamisina bhawine bhemopalaahirina anana, tee inda dhaangia samia uka o mia momembalina mopalaiakana karona. 
\v 4 E manga witinai, ingkomiu mencuana mia modhadhina i nuncana kalalanda, sabutuna o eo incia sumai inda bheapatokidhakomiu mboomo mia ipesuaikina mia manako, 
\v 5 roonamo bhari-bharikomiu o anana kainawa tee anana eo. Ingkita mencuana miana malo atawa o miana kalalanda, 
\v 6 rampaakanamo sumai, bholi takole mboomo manga mia inda mosadara, maka tabeana takojaga tee amainawa o fikirita. 
\v 7 Roonamo mia mokole, akole i wakutuuna malo, tee o mia mosumpu apoose amalango i wakutuuna malo uka. 
\v 8 \x - \xo 5:8 \xo*\xt Yes. 59:17; Ef. 6:13-17. \xt*\x*Maka ingkita sii, tatolentu manga miana kainawa, sumaimo ingkita tabeana takuasai karota. Ingkita tapobhali tee Ibilisi sabutuna tapake katangkesina iimani tee kaasi, tee tapake topi ase mominaakana i kaharapu tee kasalaamati. 
\v 9 Roonamo Aulataʼala mangapili mencuana to tatarima kahukumuna pamuruna, maka to tatarimaaka kasalaamati alaloi Isa Al Masi Oputa Momalanga. 
\v 10 Incia amate to ingkita mamudhaakana wakutuuna umbaana naile itu, malape dhaangiapo takojaga atawa dhaangiapo takole, ingkita tadhadhi tapoose tee Incia. 
\v 11 Rampaakanamo sumai, upopekaoge inca tee upopekatangkamo podho-podho ingkomiu mboomo motangasaana ipewaumiu sii-sii.
\s1 Manga Naasehati
\sr 5:12-22
\p
\v 12 E manga witinai, ingkami taemani mpuu mamudhaakana uhoromati manga mia momanguleakakomiu modhaangiana i tanga-tangamiu, siitumo manga mia mopadhana ipilina Kawasana Opu to mokapalaikomiu tee monaasehatikomiu. 
\v 13 Horomatia mpuu manga incia tee kaasi i nuncana ngangarandamiu roonamo opea mopadhana ikarajaana manga incia. Sadiamo udhadhi upomalape podho-podho ingkomiu.
\p
\v 14 E manga witinai, ingkami taemani uka mamudhaakana unaasehati manga mia mangare, upekaoge incana manga mia momatena akalana, utulungi manga mia momalute, tee usabara tee bhari-bharia mia. 
\v 15 Udhania pekalape, bholi dhaangia o mia mobalasina kadhaki tee giu madhaki, maka sadia uʼusahaakea to upewau giu malape podho-podho ingkomiu tee bhari-bharia mia.
\p
\v 16 Sadiamo ukaunde-unde, 
\v 17 tee bholi umabhotu udoʼa. 
\v 18 I nuncana kadhaangia opeapo uka ingkomiu tabeana sadia usukuru, roonamo giumo incia sumai ipeeluna Aulataʼala i nuncana sarona Isa Al Masi to ingkomiu.
\p
\v 19 Bholi ujoli-joli karajaana Rohina Aulataʼala, 
\v 20 tee bholi upandaʼente opea mopadhana ipakawaakana manga nabii. 
\v 21 Giu opeapo uka tabeana aporikanapo atouji, tee tabeana momalapena ioseta. 
\v 22 Pekaridhoa o karomiu minaaka i sagala giuna kadhaki.
\s1 Salamu
\sr 5:23-28
\p
\v 23 Maasangia o Aulataʼala momangadhawuakana dhadhi malape, apamembalikomiu o mia mototuu-totuuna modhadhina momangkilo to Aulataʼala. Maasangia saangua karomiu ajagania Aulataʼala: rohimiu, inyawamiu, tee badamiu, sabutuna inda tee kabalacina wakutuuna Isa Al Masi Oputa Momalanga aumba pendua. 
\v 24 Aulataʼala mokembakomiu sumai amembali atoparacaea, tee Incia atantumo bheapewaua o giu incia sumai.
\p
\v 25 E manga witinai, mangadoʼaaka!
\p
\v 26 Pakawaakamea o salamumami momangkilo to bhari-bharia witinaita.
\p
\v 27 Tee sarona Kawasana Opu, iaku uka kuposamea tee mpuu-mpuu mamudhaakana o sura incia sii ubacaakea to bhari-bharia witinaita saʼiimani.
\p
\v 28 Maasangia rahumatina Isa Al Masi Oputa Momalanga apoose tee ingkomiu.