\id 1JN - Wiru [NT0075 1Y 1YONE1 KERR] 
\h 1 Yone 
\toc1 1 YONE  Yoneyo Namolo Takoa Wia Wetekane Pipia 
\toc2 1 Yone 
\mt1 1 YONE  
\mt1 Yoneyo Namolo Takoa Wia Wetekane Pipia  
\c 1  
\s1 Ali Atoa Meemoa Poatiki Peku  
\p
\v 1 I pipia wia mekoa meketepa Akolaline agale wa ibini akene ago Yesu ko oko. Nipa ali atoa mea kama pomotoko ago ko oko. Tibu itonota wete latia piameneyake einagopa pa mea kama nekeneya. Einagopa one oka agale tone kaleme yakoa one toma yakale tone leneme enoa tokoo. Tone leneme-pala nepikoa pia tone yoname mitikoa tokoo.  
\v 2 Toto mea kama pomotoko ago taatekoa nokale tone leneme enekoo. Tone leneme enekoole i wa kipala to̱awea oko. Einago pa mea kama nikilepa Atai Akolali-pala odenekata-kama opia meemoa nekeneya. Ni agopa toto mekoota taatekoa noka.  
\v 3 Eni nokapa tone enoa yakoa tokooya i i wa kipala oa meteko-ye. Nipa toto Aposelo ali-kiti-pala odene wene pianeya meatoa ni oko-ye. Nipa toto Aposelo ali-kiti Atai Akolali mana Yesu Keraisuta-pala odene wene piitikoa meko toa nitatoa oko-ye.  
\v 4 Kipala i i wa wia mekoa wetekakilepa toto wedia meateko kotu kakoa meadete toko-ye.   
\s1 Akolali Onepa Pa̱ Pine Ago  
\p
\v 5 Kipala i oa metekomopa einago nokome toto-pala okana i i wa kiwike oa wetekakona-ye. Eya wa oka. Akolali one pa̱ pine ago tokome yomiyomu dedeyaka toameneya meko.  
\v 6 Akolali one-pala odene wene pianeya meku wa oake wa yomiyomu kenekedo yawa meketepa nipa kapene agale eni oa niminileka toamoa toko.  
\v 7 Nitameketepa Akolali pa̱ke-kama yako toa totoka yawa meketepa nipa odene weneta piitakutukoa meko. Nika mana Yesu Keraisuno kamateme tone tokoo poanele peya moa koikatapeko.   
\p
\v 8 Poanele tikileka toamuku wa eketepa tone wa oa yotokakete toko. Nitiketepa Akolaline agale one nimini peku tone tepene luameneya pa meko.  
\v 9 Nitameneya tone toko poanele Akolali-pala i i wa to̱awea okolopa nipa ki̱yo akenele-kama toko ago tokome eya toko. Tou wa okale-kama tokome tone toko poanele oi moa po letu mekakana keetapea wawa ni tone eni poanele peya kogatapekala toko.  
\v 10 Poanele padeleka toamuku wado eketepa nipa Akolali kapene ago tetepo takoa one oka agaleka tone tepene moa luameneya pa meko.   
\c 2  
\s1 Toto Auapeko Ago Keraisuke Akenemo  
\p
\v 1 Anu mati deya-kiti i agale wiane wini wetekakilepa kime padele poanele takaya tokolo ni tuku. Panagome-kiti poanele tokolopa toto kei piko ago Yesu Keraisu ki̱yo akenele-kama toko agome tone kowitikako. Nipa toneketai Akolaliyo yakakoa kowitikako.   
\p
\v 2 Keraisu einagome Akolaline wene kekakademepa tone toko poaneleke tuaneya. Nipa one tigini Akolalike mea lodo you toa tuaneya. Nitoa tone toko poaneleke odene tuaneya mena. Ta piko peya pitikoi-kitame tokoi poaneleke tuaneya.  
\v 3 Akolaliyo tamene wa akene toa totome litia toma peketepa nipa e̱e nimini Akolali wene taneya meku wa amele toko.  
\v 4 Panagome-kiti Akolali wene taneya meku wa oake oneme tamene wa akene toa tetekoa litia toamokopa nipa kapene ago eni. Akolaline peku noamokoya tokome ni toko.  
\v 5 Panagome-kiti Akolaliyo tamene wa akene toa litia toma pokomepa Akolalike wene mekoa togateko kotu kakoa eni toko. One agale-kama yakoa teketepa nipa e̱e nimini Akolali patu kautakoane kama puku wa totome wene toko.  
\v 6 Panagome-kiti Akolali patu kautakoane kama puku wa okomepa nipa Yesu Keraisu itonoke mekana toa oneka meamedeko.   
\s1 Yoneyo Weneya Totono Yametanemo  
\p
\v 7 Anu kolotini yene kini toatikimo kiwike wini wiane wetekakupa weneya totono titiane yameamuku. Kini Yesunole titia takakete yatekoina totono i lokoane uku-ye. Eina namolo totonopa kime namolo takoa yatekoinakamo uku.  
\v 8 Enipa namolo yatekoina totono wane ukuyake weneya totono keneya yameteku. Yesu itonoke nome mekome titia toka toa kiwika pa dikoa toomoa pekete tikimoke uku. Nipa yomiyomupa ete toa toma pokome kamotoa eni nimini pa̱ wete toa kakolo ni uku.   
\p
\v 9 Panagome-kiti eni pa̱ke weneya totono litiane tuku wa oake one oya ago-pala kotimi yoa mekomepa opika yomiyomu keneke pa yawa meko.  
\v 10 Panago-kiti one oya agoke wene mekoa mekomepa pa̱ke eni yawa meko. Dikako ago one tepene poane wene piameneya tokome ogo witikolo ka̱iapitakaya wa piti moamoko.  
\v 11 One oya agopa-pala kotimi yoa meko agopa yomiyomu keneke yawa meko. Nitoa pameneka agopa tootokaneya yakilepa eni yomiyomume leneta likatapeneya tokome one poatekoka tatanu po yatekakolo yawa meko.   
\p
\v 12 Anu de mati-kiti i agale tigini kiwike wini wiane wetekakilepa Akolaliyo kini tokoi poanele oi moa po letu mekakana keetapea wakilepa Keraisuno ibinike tokolo ni wiane wetekaku.  
\v 13 Etene-mikiti kimepa itono tibuta wete latia piameneyake pa mea kama nekene ago wene taneya mekili tekene i agale ni oane wetekaku. Tuali-kiti kime poane peku pine ago wete moa kawikaneya tokolo i agale oane wetekaku. Mati yatene i agale kiwike wini wiane wetekakilepa Atai Akolali wete wene taneya mekili ni tuku.   
\p
\v 14 Etene-mikiti kiwike i agale wini oane wetekakilepa padeya padeya wete latiameneyake pa meemoa nekene agopa kime wene taneya mekili ni tuku. Tuali-kiti kiwike i agale wini oane wetekakilepa kini eya tikileke ni tuku. Kiwi tele tootapeneya mea ni Akolaline peku noa toa ni poane ago Setanu moa kawikaneya mea tikili ni tuku.   
\p
\v 15 Itonokeka ni itono patu pia kawa tokaya-kitikeka wene piitikaneya meameamene. Enika eniyakedo wene piitikaneya meketepa nipa Akolali wene toamiki.  
\v 16 Poane yename ele kule poanele toadiya wa wene pia mea ni leneme eya kuya moadiya wa tepi moa ni eya kuya kamoya i motuku toa kimeka moati wa mate agale oa ni ele kule itonole toa tikilepa Atai Akolaline peku noameneya itono peku-kama nakete ni tiki.  
\v 17 Itonopa takoa poatekoyake tiki. Nika ali atoa itonoke mekete eya kuya moadiya wa wene pia motikiya-kitika takoa pootapeoo. Nitatekoyake Akolaline wene pikole litia toko agopa pa mea kama poademe toko.   
\s1 Keraisu-pala Pine Wia Poi Teigo Ago  
\p
\v 18 Anu mati-kiti wipitia ta patateko tigotoma noko. Keraisu-pala poi te̱ia meko ago noademe toko wa oa pianemo kime yatekoina. Eina oa piane toa Keraisu-pala poi teigi yene kainya mati wete taatekoa nokala taneya. Nitaneyano, wipitia ta patateko tigotoma nekedeko wa totome wene toko.  
\v 19 Eni yene toto pakeke meake tewitikoa wakilepa toto yatene toameneya tokome ni tokoi. Nitane yenepa toto yatene too tokapa nipa toto-pala odeneya pa mea kawei tokake e yenepa toto yatene toameadeko wa wene tomotoa tekete ni wawa pokoi.   
\p
\v 20 Anu oya-lawe kime pade edikoa meamiki. Epetane Yomini kiwike awia tagatapemotoa wetekaneya tokome kiwi peyame Akolaline nimini peku wene toa naki.  
\v 21 I agale wiane wetekakilepa kime one nimini peku wene toameneya meki wane wetekakuya mena. Kime wene taneya mekino, i agale oyake yakoa moi wane wene tekene wetekaku. Kapene agalepa nimini pekuke titia noamoko waka wene taneya meki.   
\p
\v 22 Kapene wakako ago te-pe. Yesu onepa Akolaliyo kakapiane ago Keraisu mena wa oko agopa kapene ago eni. Dikane agopa Keraisu-pala poi te̱ia meko ago. Atai Akolali-pala mana Keraisuta einagome wakome wako.  
\v 23 Mana Keraisu wako agomepa etene Akolali-pala dekoa wakome wako. Keraisu onepa Akolaline mana wa oko agopa Atai Akolaline yatene ago eni.   
\p
\v 24 Yesunole titia takama pekete yatekoina agalepa kini tepene pa luaneya meamene. Nitiketepa mana Keraisu Atai Akolalita-pala lipua mekete toi.  
\v 25 Keraisuyo kiwi auapekene dikou wa oa pikilepa toto mea kama poatekomo eni oa pika.   
\p
\v 26 Kipala i agale ikilepa kiwi oa yotokoa enoai tiki yeneke uku.  
\v 27 Keraisuyo Epetane Yomini kiwike awia tagamotoa moa wetekaneya. Opika kiwike pa awia mekolokakono, padameka ipa poanele ipa epetanele wa kiwi wene takatiki toa mena. One Epetane Yominiyo-kama pademo pademo wene taka taka tokolo ni uku. Wene taka taka tikilepa niminimo-kama wene takakoya. Kapene agaleka wene takamoko. Keraisu-pala pa lipua meato wa one eni wene takaka toa litia toma pamene.   
\p
\v 28 Opi anu mati deya-kiti kipala eya waneka ukuno, yakamene. One-pala lipua-kala meamene-ye. Nitoa meketepa one wakapea noka-pete one kakaya liti pamene ya toameneya atiki toa meoi.  
\v 29 Akolali onepa ki̱yo akenele-kama toko ago wa wene teketepa nipa ki̱yo akenele toma yaki peyapa one mana kono-mikiti waka wene toi.   
\c 3  
\s1 Akolaline Mana Kono-mikiti  
\p
\v 1 Atai Akolaliyo totopa one peku mati-kiti wa moa latikakano, totoke etene wedoa wene mekoa mea tadeko-loo. E̱e nimini, totopa one mana kono-mikiti. Itonole toma yaki-kitame totopa dikane ali atoa tadeko wa agopa tokolo pa meki. Nipa Akolali wene toamekete tekete toto-kitika wene toamiki.  
\v 2 Anu kolotini yene totopa Akolaline peku mati-kiti wa wene tokoyake naniko mekete toatekole i wa agopa tokolo meko. Eni agopa tokoloka one wakapea nokalepa one keneya latitapeneya meoo wa totome wene toko. Tone lene pogakoa enekete tekete nitaneya meoo.  
\v 3 Keraisu nokale edikaneya meouno, ke wa nepia meki peya poane wene takoa koikatapeneya meada wa Keraisu meko toa wene ki̱yo akeneya meki.   
\p
\v 4 Poanele toko agomepa nipa Akolaline totono tetekoa toamoko. Padele padele tokoi poanele peyapa Akolaline totono tetekanele.  
\v 5 Keraisu taatekoa nikilepa tone tokoo poanele kogatapeademe ni nekeneya. Nitane agome poanele padeleka toameneya wa kime wene tiki.  
\v 6 One patu kautakoa meki-kitame poanele tekete-kala meamikiya. Poanele pa tou wa wene pia toma yako agomepa nipa Keraisu enamoa onepa Akolaline mana wa wene toamoa toko.   
\p  
\p
\v 7 Anu mati deya-kiti pade-kitame kiwi oa yotokakayano, eya wa wene taneya meamene. Ki̱yo akenele toma poko agopa wene ki̱yo akene ago eni. Keraisuyo ki̱yo akenele toma poko toa onemeka toko.  
\v 8 Poanele pa toma yako agopa Setanuno yatene ago eni. Setanu einagome namolo namolo titimoa poanele-kama toma nekeneya. Akolaline mana taatekoa nikilepa nipa Setanuyo poanele-kala tanele wia agopa takatapeademe ni nekeneya.   
\p
\v 9 Akolaline mati-kitame poanele pa toma yawamikiya. Akolaline peku nakeneya tokome poane totono litia tamele toamoko. Akolaline peku mati-kiti tokome poanele toma yamele toamoko.  
\v 10 Akolaline peku mati i, Setanuno peku mati i wa totome takoa enekilepa eya wa wene taneya mekete toko. Ki̱yo akenele toma yawamoa one oya-laweke wene mekamoa toko agopa Akolaline peku mati mena.   
\s1 Ete Oto Wa Wene Mekanali Yoma Pamene  
\p
\v 11 Tone tone wene mekanali yoma poatekomopa i i wa Yesunomo tititikakete olaukane toa kime yatekoinano, nitatoane uku.  
\v 12 Eya ago Adamene mana Keineyo tane toa toamato. Keine einago poane agono peku nakene ago tokome wamene ago Ebele wia tukaneya. Dekale wia tukaneya-pe. Poanele toma yakome tokome epetanele toma yakene ago wamene ago Ebele-pala wene poaneya mekome ni taneya.   
\p
\v 13 Nitane toa itonole toma yaki-kitame kipala kotimi yoa mekolipa wene kainya piameamene.  
\v 14 Totopa tuatekoo peku lawetekagoke lukoa mekoota tewitikoapa meemoa poateko peku lawetekagoke lukoa menadeko wa totome wene toko. Tone oya-laweke wene mekoa mekete tamele toko wa wene toko. One oya-laweke wene mekamoko agopa one tuateko peku lawetekagoke pa lukoa meko.  
\v 15 One oya ago-pala kotimi wene luko agopa ali wia tukaka ago tetepo taneya meko. Ali wia tukakagomepa meemoa poateko peku noamoko.   
\p
\v 16 Yesu Keraisu totoke tuaneya. Nipa ete ali atoake wene mekakete toateko adeka pia tuaneyano, tone oya ali atoa wateaneya kamotoa totoka edikoa tuamedeko.  
\v 17 Kamo agome-kiti one oya ago ponopene ago padeya-kiti toamokolo enekomeke ela moamoa padeyaka meamokomepa nipa Akolalike wene mekoane meateku peku naku wa edoa omotoa-pe.  
\v 18 Anu kolotini mati-kiti pa kabunume i ago i atoa neeke wene mekoane meku wa wamato. Neeke wene mekoane meku wa yete pade ali atoa mama moa auapeato.   
\s1 Akolaline Leneke Atiki Toa Meatekomo  
\p
\v 19 Edikama yaketepa nipa nimini peku laweteko agono mati mekene ni tuku wa totome amele toko. Nika Akolaline leneke tepe kolotini kilikoa pimotoa meamele toko.  
\v 20 Nipa tone tepeme toto kikoa akakoloka Akolaline leneke atiki toa meamele toko. Tone tepeme tone tokole ki̱yoke-kama takoa enoa akakile toamokoyake Akolaliyo ki̱yoke-kama takoa enekala toko. Padele padele peyapa oneme wene tootapekome tokome toto pa puputua akamoo.  
\v 21 Anu kolotini yene tone tepeme toto kikoa akamokolopa Akolaline leneke atiki toa meamele toko.  
\v 22 Nitoa mea i i wa one kowitikolo oneme yakoa tootapekala toko. Oneme tamene wa oko toa litia toa ni one wedikatekole toa tokolo tokome tone kowitikole yakoa toko.  
\v 23 Eya tamene wa oneme oko. Mana Yesu Keraisuno ibini wedekoa oneke wene tugoa mea ni Keraisuyo oka toa ete oto wa wene mekanali yoma pamene wa oko.  
\v 24 Akolaliyo tamene wa oko toa litia toko agopa Akolali-pala lipua meko. Akolalika einago-pala lipua meko. Akolali toto-pala lipua meko wa totome wene tokopa one Epetane Yomini wetekakale awinome mekome wene taka taka tokolo ni wene toko.   
\c 4  
\s1 Epetane Yominike Akenemo  
\p
\v 1 Anu kolotini yene kipala eya wane pubu uku. Ali kainya matiyamepa Epetane Yominiyo wene takaka toane uku wa eketeke kapene agale oa pupitikama yaki. Nipa Epetane Yomini awitaneya mekene uku wa iki-kitipa e̱e nimini iki wa mekamotekete pitakete wameamene. Kiwike awitane yominipa Epetane Yomini patu, pa yomini patu wa takoa enekala tamene.  
\v 2 Yesu Keraisu itonoke nikilepa ali latitapea nekeneya wa oko agopa Akolaline Epetane Yomini oneke awinome mekale tokome ni oko wa totome wene toko.  
\v 3 Yesu Keraisu ali latitapeneya nekeneya wa wamademe wako agopa einagoke kapene yomini awinome mekale ni wakome toko wa totome wene toko. Eni kapene yominipa Keraisu-pala pine wia poi te̱ia meko agonono yomini. Einago noono, nepiamene wa pubu akenemo yatekoina toa eni taatekoa nekedeko.   
\p
\v 4 Anu mati deya-kiti kipa Akolaline peku mati-kiti tekete Akolalinemo koigoa kapene yokoa okoi yene wete moa kautakoi. Nipa itonole tiki yeneke awitane yomini moa patukako Epetane Yomini kiwike awinome mekale ni tokoi.  
\v 5 E kapene yokoa iki yename itono peku noai tekete itonomo-kama okala tiki. Nimo-kama ikili tekete itonole tiki yenamepa yakato wa yakoa motiki.  
\v 6 Totopa Akolaline peku mati-kiti. Akolali wene tiki yename tone okomo yakoa motiki. Akolaline peku noamiki yename tone okomo yakoa moamiki. Tone okomo yateki yenepa nimini peku lawetekagono Yomini kiwike awinome mekale ni yateki wa totome wene toko. Yakamiki yenepa kapene peku laweteko agono yomini kiwike awinome mekale ni yakamiki wa totome wene toko.   
\s1 Akolaliyo Wene Mekanele-kama Tokomo  
\p
\v 7 Anu kolotini yene tone tone wene mekanali yoma patoane uku-ye. Panago one oya-laweke wene mekoa mekilepa nipa Akolaliyo titia tanele eni toko. Nitoa meko agopa Akolaline mati. Einagomepa Akolali wene toko.  
\v 8 Akolali one tanele tokome ali atoake wene mekoa-kama mekono, one oya-laweke wene mekoa meamoko agomepa Akolali wene toamoko.  
\v 9 Akolaliyo toto meemoa pomotoa tokome mana odene ago itonoke moa wetekaneyano, totoke wene wedoa mekaka matiyame tadeko-lo.  
\v 10 Nilepa ali atoa toto oneke wene mekakole mena. Totoke wene wedoa mekoa mekome eya taneya. Tone toko poanele takoa mitikademe pinali one tigini lodo you toa tumotoa one mana moa wetekaneya.  
\v 11 Anu kolotini yene Akolali totoke wene wedoa mekoa mekome enile taneyano, ke wa tone tone wene mekanali yoma pamedeko.  
\v 12 Padameka Akolaline lene timini enekilepa toameneya. Padameka enamikilika tone tone wene mekanali yoma pokolopa Akolali toto-pala lipua meko. Lipua mekomepa totoke wene mekoa meateko kotu kakoa wene mekoa meko.   
\p  
\p
\v 13 Akolaliyo one Epetane Yomini totoke moa wetekaneya tokolo eya wa wene toko. Totopa one-pala lipua meko. Onepa toto-pala lipua meko.  
\v 14 Nika tone leneme enekoona eya wa to̱awea oko. Atai Akolaliyopa itonoke meki yene toa motokoano pa wa mana Keraisu itonoke moa wetekaka.  
\v 15 Yesu onepa Akolaline mana wa to̱awea oko ago einago-pala Akolali lipua meko. Einago Akolali-pala lipua meko.  
\v 16 Akolali totoke edikoa wene wedoa mekoa meadeko wa wene tekete one patu kautakoa kako.  
\p  
\p Akolali one tanele tokome ali atoake wene mekoa-kama meko. Eko ali atoake wene mekoa meki yenepa Akolali-pala lipua meki. Nitiki yene-pala Akolali lipua meko.  
\v 17 Akolaliyo tone tone wene mekanali yoa tagateko wene toopikana toa eni tomotokopa nipa ali atoa takoa enoa akateka ta pataka-pete kibu moamene piti moameneya atiki toa memotoa ni toko. Totopa itonoke Keraisu keneya mekono, kibu motokaya wa piti moateko toa mena.  
\v 18 Eko ali atoake wene mekoa meketepa nipa kibu motokaya wa piti moateko toa mena. Eko ali atoake wene mekateko kotu kakoa wene mekaketepa nipa piti takaketikoa wawa kilikoa meko. Panagome-kiti piti moa mekilepa nipa one poanele tokake kibu motokaya wa piti moa meko. Piti moa meko agopa nipa eko ali atoake wene mekateko kotu kakoa wene mekamoko.   
\p  
\p
\v 19 Akolali totoke wene mekoa mekilepa one weneme titia taneya. Nitaneya tokome toto oneke ete wene mekoa meko.  
\v 20 Panagome-kiti Akolalike wene mekoane meku wa oake one oya ago-pala kotimi wene luaneya mekopa nipa kapene ago eni. One leneme eneko ago-pala kotimi wene luaneya mekomepa nipa one leneme enamoko ago Akolalike etene oyake wene mekamele toamoko.  
\v 21 Keraisuyo tone litia toateko totono yametekome eya wa oka. Akolalike wene mekoa meki yenepa kini oya-lawekeka wene mekoa meamediki wa oka.   
\c 5  
\s1 Yesuke Wene Tugoa Meketepa Itono Peku  
\s1 Naki-kiti Moa Kautamele Tokomo  
\p
\v 1 Yesu onepa eina Keraisu wa papete ibini oa piane ago tadeko wa wene tiki yenepa Akolaline mana kono-mikiti eni. Nika eteneke wene mekoa meki yenepa one manakeka wene mekoa meki.  
\v 2 Akolalike wene mekoa mea ni oneme tamene wa oka toa litia teketepa nipa Akolaline mati-kitikeka wene mekoa meadeko wa totome wene toko.  
\v 3 Akolaliyo tamene wa oka toa litia tikilepa nipa oneke wene mekoa mekete tekete ni toko. Oneme tamene wa okalemepa tone wene moa keda takamoko.  
\v 4 Ni edoa-mo. Itonoke ele kuleme ali atoa likoa enekakole-kiti Akolaline mana kono-mikiti peyame ete pedekamele toko. Nipa tone Akolalike wene tugoa mekete tekete nitamele toko.  
\v 5 Itonoke ele kuleme ali atoa likoa enekakole-kiti teyo ete pedekamele toko. Yesu einagopa Akolaline mana wa wene toko agome odene ete pedekamele toko.   
\p
\v 6 Yesu Keraisu itonoke nome mekomepa ue moa ni kamate pomotoa tuka. Einagome ue odene motoka mena. Ue moa ni yomo lekaneyake wia dekakoli kamate ponomotoa tuka. Enile tokagopa Akolaline mana wa Epetane Yominiyo toto wene takako. Epetane Yominiyo niminimo-kama oko ago tokome ni toko.  
\v 7 Yesu onepa Keraisu wa papete ibini oa piane ago tadeko wa totome wene tomotoapa eya tebolome tiki.  
\v 8 One Epetane Yomini one motoka ueta one penane kamate toa eniya-mename odenele tane tetepo tokolo onepa Akolaline mana wa toto wene takakala tiki.  
\v 9 Ete yename-kiti kini leneme enekoimo i i wa to̱awea ikimopa totome yakoa motoko. Nitikono, Akolaliyo akenemopa totome etene tobou kakoa yakoa moamedeko. Einago Akolaliyo Yesu einagopa one mana wa akeneya.  
\v 10 Akolaline manake wene tugoa meko agomepa Akolaliyo mana Yesuke akenemo nimini akedeko wa onekemo pikoa kako. Akolaline agale yakoa moamoko agomepa Akolali kapene wakako ago tetepo takoa meko. Akolaliyo manake akenemo yakoa moamokome tokome ni toko.  
\v 11 Akolaliyo toto-pala mana ko ikilepa kiwi mea kama pomotoane tuku wa okome taneya. Eni akene toa mana Yesu patu kautakoa kaketepa mea kama poko.  
\v 12 Mana Yesu makutukoa motokagopa mea kama poko. Mana makutukoa moamokagopa mea kama pikilepa toamoko.   
\s1 Toto Mea Kama Poatekomo  
\p
\v 13 Kipala i i wane wiane wetekakilepa mana Yesuno ibini wedekoa oneke wene tugoa meki yene kipa etene mea kama poko wa wene tomotoane tekene ni tuku.  
\v 14 Akolali kakakoa kowitikilepa atiki toa mekete kowitiko. Nipa one wene pikole litia kowitikolopa tone kowitikole-kama yakoa too wa atiki toa mekete kowitiko.  
\v 15 Tone kowitikoya-kama Akolaliyo yakoa too wa totome wene teketepa nipa eni kowitikoyapa Akolaliyo papete wete yakoa toopianeya waka wene toko.  
\v 16 Kini oyagome-kiti padele poanele one yomini moa atukamatekole tokolo eneketepa einagono kowitikamene. One mea kama pomotono, nitamene. Pinali one yomini moa atukamateko poanele toko agoke uku. Wa padele poanele tokoleme pinali one yomini moa atukatekoyano, eni poanele toko agono kowitikamene wane wamuku.  
\v 17 Ali atoame ele kule poanele tikilepa Akolaline totono-kama tetekakete tikili uku. Nimo ukuyake ali atoame tiki poanele-kiti padekame kini yomini moa atukamokoya.   
\p
\v 18 Akolaline mana kono-mikitame poanele toma yawamiki wa totome wene toko. Akolaline mana Yesuyo eni yene pawe toa talo toko. Nitikono, poane peku laweteko ago Setanuyo Akolaline eni yene mitikoa ete moamele toamoko.   
\p
\v 19 Toto peyapa Akolaline mana kono-mikiti wa totome wene tokoyake eya waka wene toko. Ete yene ta piko peyake poane ago Setanuke-kama lukoa meki.   
\p
\v 20 Totome eya waka wene toko. Akolaline mana taatekoa nome mekome pademo pademo i i wa toto wene taka taka tikilepa nimini Gode Akolali wene tomotoa toka. Totopa nimini Gode Akolali-pala lipua mekilepa mana Yesu Keraisu-pala lipua mekete tekete ni toko. Yesu einagopa oneka nimini Akolali. One patu kautakoa kakete mea kama poko.   
\p
\v 21 Anu mati-kiti kapene gode-kiti titi toma yamene-ye.  
\p Opa anu agale eni.