\id 2TI  
\h 2 Timothy 
\toc1 2 TIMOTHY Lat Thonangan Inan Paul.angan Ump Timothy Alantan 
\toc2 2 Timothy 
\mt1 2 TIMOTHY  
\mt2 Lat Thonangan Inan Paul.angan Ump Timothy Alantan  
\c 1  
\p
\v 1 Ayyang, nhengk ngatharam Timothy-ang, ngay Paul.ang lat inan umpang nungkar. Ngayang God.ang pul Jesus Christ.ang kuchpul wik min thampa. Pulan kuchpul ngayanga wik waaꞌ-waaꞌāng woyan Christ Jesus.antamana, yipam pam wanch al-alangan thana ngangkangan piꞌ-piꞌantan nunangan-a, an thana aak nungantang wun-wunayn aak umpuyama puth nilam God.ang inan kaaꞌngaka.   
\p
\v 2 Nintiya, Timothya, keꞌ nhengk ngatharam yimananganweya. Ngay kaangk pul piip God.angan putha Lord Jesus Christ.angan ngangk minangam iiy-iiyowpul nungkar, maꞌ-aath-aathowpul nintang, aꞌ puth ngangk min yump-yumpowpul nintang.   
\s1 Ngay Thankyou Thawang God.ant Nintan Puth Ngaantam-Ngeey-Ngeeyangan Nunang  
\p
\v 3 Ngay thankyou thawang God.anta nungkaramana. Ngayiya ngangk punch-aakam theeꞌang nungant, ngaya monkan-wak-wakang nunangan, work iiy-iiyang nungant thakana, keꞌ wuut mangk ngatharam anangan workan iiy-iiyin nungant. Ngay ngaantam-ngeey-ngeeyang nintang aꞌ meeꞌ-wuth-wuthanamang nungka maꞌ-yotama, kinchang-a, ngutang, aꞌ thankyou thaw-thawang thamp nungkaraman God.antan.  
\v 4 Ngay konangam piꞌ-piꞌanga ngay wantang nintangan-a, nint peey-peeyana, aꞌ putha ngay iingk wunang nungkarama, ngay kaangk paththam thathāng nintangweya, ngay yipam ngangk minangam iiyāngweya.  
\v 5 Aꞌ putha ngay nintang inman konangam piꞌ-piꞌanga nintana kan-kanam paththam min-minam ngaantam-ngeey-ngeeyan nunang Christ.ana. Kaꞌathamana kemwayyow nungkaramangana Lois.anga putha kaath nungkaramang Eunice alangana kan-kanam ngangkangam piꞌ-piꞌpul nunang Christ.ana, yaa, ngay kan-ngul meeꞌmiya nint thampan ngangkangam piꞌ-piꞌangan nunang Christ.ana.  
\v 6 Puth nanpalana ngay putham thawāng nungka nint work minam iiy-iiyān God.antan. Kaꞌathangamana ngan maꞌan wunpan kuchek nungkaramangan-a, nil God.angan an-aniyangan ngangk thayanath nintang work nungantan iiy-iiyāna, wik nungantaman waaꞌ-waaꞌān thakana, yaa, nintaniy-a, keꞌ-ngoongkam iiy-iiyān work nungantamaniya.  
\v 7 Nil God.angan Ngeen-Wiy Min nungantaman kuchan ngamparan-a, nilan keꞌ winynyathiy ngampanga yaꞌa, nil thayanathow ngampang, aꞌ maꞌ-aath-aathow ngampanga kaangk wun-wunāmp ngamparakamana, putha kuchek min anman iiy-iiyāmp.   
\s1 Ngul-Nyaaꞌan Keꞌ Wunow Nungk, Ngangk Thayanam Iiy-Iiyāna  
\p
\v 8 Puth nint ngangk thayanam than-thanān, ngul-nyaaꞌana keꞌ wun-wunān, nint wikan waaꞌ-waaꞌān wiyantan woyan min Jesus.antamana, aꞌ putha nint ngul-nyaaꞌana keꞌ wun-wunān ngatharamana, puth ngay in jailang wun-wunanga puth anpalman ngay Jesus.an monkan-wak-wakang nunang. Puungk wiyangana way yump-yumpayn nungkar thampa puth nintan wik min Jesus.antaman waaꞌ-waaꞌangan thant. Puth nintana keꞌ wantāna, than mak way thakan yump-yumpayn nungka, nintana keꞌ-ngoongkam monkan-wak-wakān God.an. Nil ngul thayanathow nintang aak wayan wampow nungka.  
\v 9 Nilam God.ang thonakama kaaꞌ-piichanath ngampang way ngamparam anpalana, aꞌ umpa ngampang pam wanch nungantam iiy-iiyāmp. Than pam wanch wiyangan nath ngaantam-ngeeyiythan than minam nathwey iiy-iiyaynan-a, yaa, nil God.angan puthangkan pam wanch nungantaman waaꞌ-waaꞌow thanang. Puth aak God.antan yimanangan keꞌam wun, yaꞌa. Nilan kaangk wunan ngampara, aꞌ umpan ngampang nilan puth min anman iiy-iiyan ngampar. Nilana ngangk minangam iiy-iiyan ngampar puth aak keenkanamana nil ngaantam-ngeey Jesus Christ.an kuchow ngampara.  
\v 10 Aꞌ putha nil kanam uk aak iikanakana, yipam pam wanch puk kaaꞌ-piichanathowa, nilana anan meenathan ngampar nil God.an kan-kanam paththam min iiy-iiyan ngampara. Putha Christ Jesus.ana mulaman ek aꞌ nil inan meenathan ngampar ngamp mulan aak umpuyamana keꞌ wun-wunimp, yaꞌa. Ngampaniya keꞌ-ngul winynyang moꞌāmp uthamāmpana, puth nil kan meenath ngampar than weeꞌ-weeꞌanangana ngangkangan piꞌ-piꞌantana wik min nungantaman-a, an than ngangk aak umpuyam wun-wunayn nungantangana.   
\p
\v 11 Nil God.angan ngayang miꞌa wik min nungantam Christ.antaman waaꞌ-waaꞌāng wiyantana. Nilan kuchanya ngayan yipam maꞌ-aath-aathāng thanang wiy anangana woyan min nungantaman wak-wakayn.  
\v 12 Puth anpalmana than wiy al-alangana wayan yumpin ngathara, aꞌ puth ngay in jailang ngula. Puth ngayana keꞌ ngul-nyaaꞌan wun-wunang yaꞌa, puth ngay meeꞌmiy nil Christ.an min-minam paththam putha piꞌana, puth ngayan nunangam anman ngangkangan piꞌ-piꞌang. An nilam theeꞌ maꞌ ngatharang work inan wik min nungantaman waaꞌ-waaꞌāng wiyantana. An puth ngay meeꞌmiy an kan-kanam nil ngul maꞌ-aath-aathow ngayang wik kan-kanam waaꞌ-waaꞌāng wik min nungantaman wiyantana, aak-aakanakaman nil Christ.an palaman ngulan wampowa.  
\v 13 Nint paththam ngaantam-ngeey-ngeeyān wik min God.antam anangan ngayan thaaꞌ-aath-aathang nintang. Wik anangana, an keꞌ nil meen-meenathan nungkar nint woyan want-wanttinan wak-wakāna. Nint puy-puyam ngaantam-ngeey-ngeeyān wik min anangana aꞌ ngangkang ngul piꞌ-piꞌān thanang, putha nint kaangk wun-wunān thant Christians wiy al-alantan, ngamp puth karpam keꞌ thonam yimanangan ngul iiy-iiyanamp Christ Jesus.antanga.  
\v 14 Nint wik God.antamana min-minam waaꞌ-waaꞌān aꞌ piꞌ-piꞌān thamp, nil puth God.angan work inan maꞌ nungkarang ngul wanta. Than wiyangan wik God.antaman keꞌ way-wayathiythana, yaꞌa. Nil Ngeen-Wiy piip God.antamana thayan paththama aꞌ nilana maꞌ-aath-aathow ngampang, nilan putha ngangk ngamparang wun-wunan.   
\p
\v 15 Nint meeꞌmiya pam wanch yot Christians aak Asia amanaman ngul-nyaaꞌ wun-wunin ngatharamana, thanana keꞌam maꞌ-aath-aathin ngayang, yaꞌa, Phygelus-a, aꞌ Hermogenesa putha wiy anangan thampa, keꞌam wampin ngathar, yaꞌa.  
\v 16 Puth nil Onesiphorus.an ep-paththam wamp ngathara. Ngay kaangk nil God.an min iiy-iiyow nunganta putha wanch nungantamakana, puth puk nungantamakana, aꞌ putha kampan nungantamakana, puth nilana maꞌ-yotam ngangk min yump-yumpanya. Nil keꞌam ngul-nyaaꞌan wun ngatharama, ngay jailang inan wun-wunanga.  
\v 17 Aꞌ nil wamp ngulan aak Rome angan-a, nil wenk-wenk ngul ngathar aꞌ kan-ngul uw ngayang, aꞌ nil wamp ngul ngathar.  
\v 18 Aak an-aniyangana, nil God.angan pam wanch pukan thanathow um nungantangan-a, ngay kaangk niliya min iiy-iiyow nungant Onesiphorus alantan. Nint meeꞌmiy thampa nil maꞌ-yotam maꞌ-aath-aath pam wanch anangan churchangan aak Ephesus angan.   
\c 2  
\s1 Nintiya Keꞌ Pam Soldier Min Yimanangan Iiy-Iiyān Nungant Jesus Christ.antan  
\p
\v 1 Nhengk ngatharam-ang, ngay inan thawang nungkara: nint anman iiy-iiyān ngangk thayanama, nil Christ Jesus.angan ngul maꞌ-yotaman maꞌ-aath-aathow nintang nint puth karpam nungantangan iiy-iiyangan.  
\v 2 Nint wik ngatharam kaꞌathaman ngeey-ngeeyana, ngayan thaaꞌ-aath-aathangan niiyang pam wanch yotaman wik min Christ.antamana, yaa, nintana yimanang thaaꞌ-aath-aathān thanang pam wiy anangana, wik anangaman waaꞌān thant pam al-alantan than ngangk minangaman iiy-iiyantan, erkam paththaman work God.antaman iiy-iiyantan, than thampang yipam wik min anangaman ngul waaꞌ-waaꞌayn thant.   
\p
\v 3 Aꞌ putha ngay inan thamp thawang nungka: pam wanch wiyangana way ngul yumpayn nungkara puth anpalan nintan wik min Christ.antaman waaꞌ-waaꞌangan thanta. Puth nintana keꞌ wantān nunang, Jesus Christ.an, nint keꞌ pam soldier min yimanangan iiy-iiyān, keꞌ-ngoongkam anman monkan-wak-wakān nunang, puth nilana moom ngamparama, ngampaniy keꞌa soldiers nungantam yimanang iiy-iiyanamp.  
\v 4 Nil pam soldier workan iiy-iiyan-a, nilan kaangk moom nungantaman ngangk min yumpow nunanga, puth nil work anman iiy-iiyan, nil work thon-thonan keꞌam iiy-iiyan yaꞌa.  
\v 5 Aꞌ putha wik inan ngeeyān thampa: nil pam kamp race anan moꞌ-moꞌan-a, nil pam alangana moom nungantam alantaman wik ngeey-ngeeyow. Nil keꞌwey wik ngeeyow nunangan-a, an puth nil way min keꞌ uw-uwiya yaꞌa. Aak inan yimanangan wunow ngampar: ngampan thampa aak woyan God.antam anman wak-wakāmp, ngamp thamp yipam nungantang God.antangan wun-wunāmp.  
\v 6 Aꞌ puth inan thampanga, pam anangan ngaantam-ngeeyāmp thanang mayan kaamp-kaampantan thampa. Than nathwey work keꞌ-ngoongkaman iiy-iiyiythan-a, keꞌan nyiin-nyiiniythan-a, yaa, than al-alangan kaꞌathaman mungkiythan may menchan ngulan wunayn. Aakan yimanangan wunan ngampara: ngamp nath work anman keꞌ-ngoongkaman iiy-iiyimp God.antan-a, niliya min anman iiy-iiyow ngampar.  
\v 7 Nint ngaantam-ngeey-ngeeyān wik anangan ngayan thaw-thawanga, puth nil Lord.ang ngul maꞌ-aath-aathow nintang kuchek minan yumpow nintang minam yipam ngaantam-ngeey-ngeeyāna.   
\p
\v 8 Nintiya Jesus Christ anman keꞌ-ngoongkam ngaantam-ngeey-ngeeyān nunang. Nil mulaman ek, aꞌ niliya wuut mangk David alantaman wampa. Ngay maꞌ-yotaman waaꞌ-waaꞌang nunangana niiyantanweya, aꞌ putha pam wanch wiy al-alantan.  
\v 9 Puth than wiy al-alangan way yump-yumpantan ngath puth anpalan ngay wik min Christ.antaman waaꞌ-waaꞌang thant. Aꞌ thananiya jailang thenchin ngayang ngay keꞌ pam way yimanangana, putha chains piꞌanang thamp kathin ngayanga. Puth nil weeꞌangam wik min God.antaman kathiy chain piꞌanangana! An yaꞌa, keꞌ kathiythan chainangan wik min God.antamana, an yaꞌa.  
\v 10 Puth anpalana ngayan aak thaamp-thaampang way yot anangan wamp-wampantan ngatharana, ngay yipam maꞌ-aath-aathāng pam wanch nil God.angan miꞌ thanang nungantakaman woyan min nungantaman wak-wakayn. Ngay kaangk Christ Jesus.angan kaaꞌ-piichanathow thanang, aꞌ putha kalow thanang thamp aak nungantamang yipam wun-wunayn ngangk aak umpuyam.  
\v 11 Inana wik kan-kanama:  
\q1 “Nungkway than wiyangan nath mulathayn ngampangana puth ngamp Christ.an monkan-wak-wakanamp nunang-a,  
\q1 an kana, puth ngampaniy ngangk aak umpuyam wun-wunāmp aak nungantangana.   
\q1
\v 12 Ngamp nath keꞌ-ngoongkaman aak thaamp-thaampimpwey-a, aak way anangan wampantan ngamparan-a,  
\q1 aak ngul-ngulana ngampana nyiin-nyiināmp nungantang ngul keꞌ moom yimanangan.  
\q1 Puth ngampwey thaw-thawimp kon yotantangan-a, ngan kaangk keꞌ nunang Christ.an-a, ngan keꞌ meeꞌmiy nunangana yaꞌ-a,  
\q1 aak ngul-ngulana nil Christ.an thawow God.antan nil keꞌ meeꞌmiy ngampangana, yaꞌa.   
\q1
\v 13 Puth ngamp nath keꞌan min-minan ngangkangan piꞌ-piꞌimp nunang God.an-a, putha keꞌan wik ngeey-ngeeyimp nunanganwey-a,  
\q1 yaa, niliy putha keꞌ kon-ngathow nunang wik nilan thaw puth anpalan than pam wanchangan keꞌaman ngangkangan piꞌ-piꞌantan nunang,  
\q1 nil kan-kanaman aak wayakan kuchow ngampang, nil yimanangan thaw.”   
\s1 Keꞌ-Ngoongkam Work Minam Iiy-Iiyān God.antan  
\p
\v 14 Nint kon-aathān thanang Christians nanangan aak nanan wun-wuntan wik amanamana ngay nyiingkan umpangan nungkar; aꞌ nint thawān thanta meeꞌ God.antang than wik aak-yaꞌangan keꞌ mep-mepwayn thanttakamana, an puth min yaꞌa, puth than pam wanchangan ngeeyantan thanangan-a, an than keꞌ-ngul minaman ngaantam-ngeey-ngeeyayn nunang God.an.  
\v 15 Keꞌ-ngoongkam work minam iiy-iiyān God.antan nil yipam ngangk min wun-wunowa. Work minam iiy-iiyān nint yipam keꞌ ngul-nyaaꞌan wun-wunān work nungkaram namanamana. Wik God.antaman minam thaaꞌ-aath-aathāna, putha wik nungantam anman thaaꞌ-aath-aathān, wik wiyantamana, yaꞌa.  
\v 16 Nint keꞌ ngotan ngoonchān pam al-alantangan wik aak-yaꞌangan mep-mepwuntan thanttakamana. Puth than pam al-alangan yimanang anman mep-mepwiythanan-a, an thananiya God.an keꞌ-ngul ngaantam-ngeey-ngeeyiythan nunang, yaꞌa, nath waank ngul puy-puyam iiy-iiyiythan God.antamana.  
\v 17 Thananiya way-way ngul thaaꞌ-aath-aathiythan, aꞌ putha wayathiythan pam wanchana, wik thanttaman ngeey-ngeeyantan, anpalana wik wayanang thanttamana puy-puyam ngul weꞌaramiy keꞌ wench kempangan puy-puyam weꞌaraman yimanangan. Pam kucham il-ilangan namp Hymenaeausa aꞌ Philetus.angan, pulana way-way thamp thaaꞌ-aath-aathanpula.  
\v 18 Pul il-ilangana wik God.antaman kan-kanaman keꞌ thaaꞌ-aath-aathanpul yaꞌa, pul wik uuy-uuyamanpul, pul wik inangan thakan waaꞌanpul keꞌ ngamp kanam mulaman ekampa an puth yaꞌa, ngamp keꞌam ekamp mulaman. An puth pulana pam wanch puungk wiy anangan way-wayathanpula, thanan yipam keꞌ-ngul min-minan ngaantam-ngeey-ngeeyayn nunanga God.an.  
\v 19 Puth wik God.antamana an wik thayan paththam keꞌ kunttow wuut piꞌan yimanangana, wiyangan keꞌ wayathiythana! Aꞌ puth keꞌ kunttowangan wik inangan umpin, “Nil Lord.angan meeꞌmiy thanang pam wanch anangan than kan-kanaman monkan-wak-wakantan nunangana,” aꞌ putha wik inangan thampa, “Nil weeꞌan thawowa nil Lord.an meeꞌmiy nunang-a, nilana weentow way anpalan nilan yump-yumpan.”   
\p
\v 20 Kan ngamp inan ngaantam-ngeey-ngeeyāmpa aawuch wuut piꞌanan nungant pam maꞌmangkiy alantana. Aawuch anganiy way min yot wun-wunin, wiyiya goldam yump-yumpin, wiyiya silveram yump-yumpin, aꞌ wiyiya yukam yump-yumpin, puth wiyiya pipam yump-yumpin. Than pam wanch wiy aak nungantamakan wampiythan may mungkanakan-a, nil pam alangan table.an ach-umpanam yumpiy. Yuk way min goldam aꞌ silveraman wunpiy thanang table.angan, puth nil pokkapangan maꞌ wanch puk nungantamangan mayan mungkiy-a, an ep nil yuk way min anangan table.angan wunp-wunpiy, yukam-a, aꞌ pipam thakan yumpin thananga.  
\v 21 Yaa, kan in ngeeyāna: nil pam alangan yuk min-miniyan wunp-wunpiy table.angan, yuk table.an yipam min wun-wunow pam wanch wiy anangan wampayn. Aak inan yimanangan wun-wunan ngampar. Nint nath kaangka nil Christ.angan miꞌow nintang work min paththaman iiy-iiyān nungantan-a, nintiya woyan wayana keꞌ wak-wakāna, putha nint keꞌ ngotan ngoonchān teachers wayanang al-alantangan, puth nintiya min anman iiy-iiyāna. Nint yimanangwey iiy-iiyinan-a, yaa, nintaniy keꞌa yuk ik goldaman yumpin yimanangan iiy-iiyāna, an puth nil God.angana work min-minam paththaman theeꞌow nungkara. Aꞌ puth nintaniya work minam iiy-iiyān nungant. Nil nath work ngeenan theeꞌow nungkaran-a, yaa, nint ngangk minangam work iiy-iiyān nungant.  
\v 22 Nint pam komp wayanang al-alantaman woyan wayan keꞌ wak-wakān thanttamana, than puth maarich-weenth iiy-iiyantana, puth nintiya pam min aꞌ koyꞌ anman iiy-iiyān, aꞌ putha nint God.ana ngangkangam piꞌ-piꞌān nunang putha ngangk minangam iiy-iiyān pam wanch wiyantana, thaaꞌ kulan keꞌ thaw-thawān thant. Nint min yimanangan iiy-iiyāna, nint-a, putha wiy nanangan thampa than Lord.an ngangkaman thaaꞌ-kuump-kuumpantan nunang.  
\v 23 Nint keꞌ ngotan ngoonchān pam al-alantangan than maꞌ-yotaman wik aak-yaꞌangan mep-mepwuntan thanttakamana, than kuchek waap keꞌanang yimanangan thaw-thawantan, aꞌ than thaaꞌ-thay-thayanamantan ngula.  
\v 24 Than pam wanch weeꞌ-weeꞌanangan God.antan work iiy-iiyantan-a, than kulakana keꞌ wenk-wenkayn thant, wiy al-alantan, than min iiy-iiyayn yotamantan. Thananiya teacher min iiy-iiyayn thant wiyantana, putha man kulan erkam keꞌ wamp-wampow thant.  
\v 25 Than wik itangam thaw-thawayn thant woyan min God.antaman waaꞌ-waaꞌayn thant, pam wanch al-alantan than thaamp-thaampantan thanangana, nil puth God.angan natha ngul maꞌ-aath-aathow thanang koyaman weentayn woyan way amanaman woyan min nungantamakana, than yipam wik nungantam inangan ngangkangam piꞌ-piꞌayn ngul.  
\v 26 Aꞌ than ngulana kuchek min ngul weenayn, aꞌ putha oony way alantaman maꞌam pentayn ngul nilan kaꞌathaman piꞌ-piꞌ thanang maꞌ nungantangan than putha wik nungantaman ngeey-ngeeyin, puth yaꞌ-ngula, wik min ngul ngeey-ngeeyayna.   
\c 3  
\s1 Aak Wayan Kan-Kanang Wampan  
\p
\v 1 Niiy inan kan-kanam paththam ngaantam-ngeey-ngeeyāna: aak an-aniyangan aak keꞌ kan-ngulan minchow aak world inana, aak ananiy-a, way thayan paththam wun-wunowa aꞌ putha way-wayam paththam ngul aak inan wun-wunow.  
\v 2 Puth than pam wanch yotam anangana, way paththam ngul iiy-iiyayn, aꞌ thanttakam anman ngaantam-ngeey-ngeeyayn puth thananiya wukal-weenth thamp iiy-iiyayna, aꞌ puth ulp-ulpanang iiy-iiyayn, aꞌ than keꞌ meek ngul iiy-iiyayn, keꞌ piꞌan ngaantam-ngeey-ngeeyayn thanttakam. Aꞌ putha thananiya wiy thak waaꞌ-waaꞌayn wik wayanang thak thaw-thawayn pam wanch wiyantan, aꞌ than wik kaath piip thanttamantam kaangk keꞌ ngeey-ngeeyayna. Thananiy keꞌa ngaantam-ngeeyiythan pam wanch anangan minan iiy-iiyayn thantana, puth thanana keꞌ-ngoongkam way anman yump-yumpayn ngul, an puth thananiya keꞌa ngaantam-ngeey-ngeeyiythan God.an nil wuut piꞌan paththaman, yaꞌa,  
\v 3 aꞌ thanana ngangk minangam keꞌ iiy-iiyiythan pam wanch wiy al-alantan, yaꞌa, aꞌ putha keꞌ ngangk mam-mamiythan wiy anangan. Puth thanana pam wanch wiy anangan aak-yaꞌang thak wik wayanang waaꞌ-waaꞌiythan pal-puya. Than anman kuchekangam piꞌ-piꞌayn way yumpanakana, aꞌ puth way kulliy ngul ween-weenayn, wiy anangana thaaꞌ-thengk-thengkathayn thanang, aꞌ putha than ngangk-wayangam kal-kalayn thanang pam wanch min anangan thampa.  
\v 4 Aꞌ putha ngurp min thanttam thakan waaꞌ-waaꞌayn thanang, aꞌ puth than ngaantam-ngeey-ngeeyayn way yumpanakan-a, an than erkam paththam iiy-iiyayn way yumpanakana, aꞌ puth thanan ngul ngaantam-ngeey-ngeeyayn thanttakaman thanan keꞌa wuut piꞌana. Thanan kaangk paththam thanttakam anman ngaantam-ngeey-ngeeyayn puth than God.an keꞌ ngaantam-ngeey-ngeeyayn nunang, yaꞌa.  
\v 5 An than yaan muukamayn, than wik thonakam thaaꞌaman yaan thaw-thawayna, puth than God.an keꞌ ngangkang piꞌ-piꞌayn nunang nil yipam thayanathow thanangana. Niiy kech-kech iiy-iiyān thanttam pam yim-yimananganwey thath-thathān thananga.  
\v 6 Than pam wiy al-alangan wanch aawuch thanttamangan uwantan thananga, aꞌ wik way-way thamp thaaꞌ-mich-micham waaꞌ-waaꞌantan thant — wanch law-law al-alantan, puth thananiya wik wayanang anangan ngeey-ngeeyantan. Than wanch inangaman yaan ngul-nyaaꞌ wun-wuntan, puth thanan way anman kaangk yump-yumpayn.  
\v 7 Thanan maꞌ-yotam thaw-thawantan pam wanch wiyantan thaaꞌ-aath-aathayn thanang puth thanana wik min God.antam anangana kan-kanaman keꞌ ngaantam-ngeeyiythan, yaꞌa.  
\v 8 Puth than pam al-alangana wikan thaamp-thaampantan, wik min God.antamana, keꞌ Jannes.anga puth Jambres.ang pul Moses.an thaamp-thaamppul nunang. Puth than al-alangana way anman piꞌ-piꞌantan kuchek thanttamangan aꞌ putha than God.an nunang kan-kanaman keꞌam ngangkang min-minan piꞌ-piꞌantan, yaꞌa, puth thanan yaan muukamantan.  
\v 9 Puth pam wanch wiyangana keꞌ-ngul ngaantam-ngeeyayn thanang thanan keꞌ min yimanangana. Ngul-ngulana, maꞌmangkamangana ngul thath-thathayn thanang pam wayanangan iiy-iiyantan keꞌ aak keenkanamana pam wanchangan ngaantam-ngeey-ngeeyin pulang Jannes-a, putha Jambres.angana wayanangan iiy-iiypul.   
\s1 Nintan Wik Min Anangaman Ngaantam-Ngeey-Ngeeyāna  
\p
\v 10 Puth nintan ep-paththam woyan ngatharam anman kan wak-wakangan. Nintana kan wik ngeey-ngeeyangan ngayan thaaꞌ-aath-aathangan nintang. Puth nintan kaangk God.an ngangk min yump-yumpān nunang keꞌ ngay anmana. Nint meeꞌmiy ngay murkanim anman ngangkangam piꞌ-piꞌang nunang Christ.ana, ngayan keꞌ eench-eenchang nungantamana, yaꞌa.  
\v 11 Puth ngay kaangk wun-wunang pam wanchantan thamp aꞌ putha ngay way anangan thaamp-thaampang thampa. Nint puth meeꞌmiy thampa wiy al-alangan wayan yump-yumpin ngathara, aꞌ putha aak way thakan wamp-wamp ngathar. Aꞌ puth nint meeꞌmiya wiyangan way-wayaman yump-yumpin ngathar aak Antioch angana aꞌ Iconium angan aꞌ putha Lystra angan thamp, puth nil Lord.angan kaaꞌ-piichanath ngayang way yot amanamana.  
\v 12 Puth than weeꞌ-weeꞌanangan kaangk minam monkan-wak-wakayn Jesus Christ.an-a, aꞌ karpam iiy-iiyayn nungantangan-a, wiyangana way thant thampang yump-yumpayna.  
\v 13 Puth pam wanch way anangan-a, aꞌ puth pam anangan than way-way thampan thaaꞌ-aath-aathantan thanang-a, than anangamana puy-puyam way paththam ngul weenayna. Than wiy anangan ngul muukamathayn thanangweya, puth oony way alangan thanang thamp pam wanch wayanang anangan muuk-muukamathow thanang.  
\v 14 Puth nintaniya, wik min anangan nganan thaaꞌ-aath-aathan nintang-a, keꞌ-ngoongkam anman ngaantam-ngeey-ngeeyāna, an puth nintan ep kan-kanam wik minan ngangkangam piꞌ-piꞌangan. Nint kan meeꞌmiy nganang, ngan weeꞌ-weeꞌanangan thaaꞌ-aath-aathan nintang.  
\v 15 Aꞌ putha nintan kan meeꞌmiy thamp puk manyam anpalman nintiy wik ngeey-ngeeyan lat ngench thayan amanaman. Ngamp wik min inangan ngeey-ngeeyāmp-a, yaa, ngampaniya ngaantam-ngeeyāmpa nil God.ang ngul kaaꞌ-piichanathow ngampang ngampaniy Christ Jesus.an ngangkangam piꞌ-piꞌanamp nunang.  
\v 16 Lat ngench thayan maꞌmangkamana nil piip God.angan theeꞌ ngampar, wik nungantam anangan-a, min paththam ngampar yipam ngampana pam wanch wiy anangan thaaꞌ-aath-aathāmp thanang, aꞌ ngamp yipam ngaantam-ngeey-ngeeyāmp ngamp wayan yump-yumpanampa ngamp koyam yipam iiyāmp woyan min aakanakan. Aꞌ putha wik nungantam anangan min ngampar thampa ngampan yipam ngaantam-ngeey-ngeeyāmp ngamp want-wanttakan minan iiy-iiyāmp meeꞌ God.antangana.  
\v 17 Ngamp lat God.antam anman thath-thathāmp, aꞌ wik anangan ngangkangam piꞌ-piꞌāmpa, nil yimanamana, an ep-paththama wikana min-min ngul thiichāmp, ngamp yipam wik waaꞌ-waaꞌāmp pam wanch wiyantan, aꞌ putha ngamp work wiy thakan minam yump-yumpāmp nungant God.antan ngula, aꞌ putha ngamp yipam ngaantam-ngeey-ngeeyāmpa min anman yump-yumpāmpa.   
\c 4  
\p
\v 1-2 Ngay wik thayan inan thawāng nungk nint wik God.antaman murkanim anman waaꞌ-waaꞌān. Ngay inan thaw-thawang nungk puth anpalan nil Jesus.an palam ngulan wampowan-a, nilana pam wanch yotaman maꞌ nungantang ngul piꞌ-piꞌow thanang. God.ang pul Christ Jesus.angana thath-thathanpul ngayang ngay inan wikan thaw-thawang nungkana. Nil Jesus alangaman ngul thanathow ngampang pam wanch maꞌmangkaman um nungantangana, than anangan kanaman uth-uthamina aꞌ putha ngamp inangan man-yethaman yippak iiy-iiyanamp. Ngay keꞌ-paal thaw-thawang nungk nintan murkanim anman waaꞌ-waaꞌān wik God.antamana, nath aak min wun-wunow nungk-a, nath yaꞌ yaakaꞌa, puth an kana, nint wik anman waaꞌ-waaꞌān thantana. Nint kan-kanam thaaꞌ-aath-aathān pam wanch anangan than yipam ngaantam-ngeey-ngeeyayn wik God.antam anangana an puth kan-kanam wik mina. Nint wak-wakān thanang anangan wayan yump-yumpantan, aꞌ nint ngangk thay-thayanathān thanang pam wanch anangan thanan yipam puy-puyam woyan min God.antaman wak-wakayna. Nint keꞌ eenchāna, min-min murkanim anman thaaꞌ-aath-aathān thanangwey.  
\v 3 Puth aakan kan-kanang wampan thant pam wanch al-alantan than wik min God.antaman kaangk keꞌ-ngulan wik ngeey-ngeeyayn. Than wik wiy anangan ep kaangk ngeey-ngeeyayna, aꞌ thananiya teachers thanttakam ngul uw-uwayn thanan yipam thaaꞌ-aath-aathayn thanang wik anangan thanan kaangk wik ngeey-ngeeyayna.  
\v 4 Aꞌ thananiya kaangk keꞌ-ngul wik God.antaman ngeey-ngeeyayn puth wik anangan ep kaangk ngeeyayn wik kath keenkanaman pam al-alangan kuchek thanttamangan ngaantam-ngeey-ngeeyina.  
\v 5 Puth nintan epa, kuchek minang anman iiy-iiyāna. Pam wanch wiyangan wayan yump-yumpayn nungkaran-a, nint thayanam anman aak thaamp-thaampān. Keꞌ-ngoongkam anman wik waaꞌ-waaꞌān Christ.antaman than wiyangan yipam ngangk ngul theeꞌayn nungant, aꞌ nintana work iiy-iiyān God.antan nilan work theeꞌ nungkara.   
\p
\v 6 Nint wik ngatharaman ngeey-ngeeyāna, puth ngayana yaam keꞌ man-yethaman iiy-iiyāng, ngul-ngulaman ngay uthamāng, puth anpalan ngay God.an monkan-wak-wakang nunang. Aakan thinth kan-ngul wamp-wampan ngay uthamāngana aꞌ iiyāng ngul aak God.antang ngul wun-wunāng.  
\v 7 Ngay keꞌ-ngoongkam anman God.an monkan-wak-wakanga aꞌ work iiy-iiyang nungant nilaman theeꞌ ngathar. Ngaywey work ngatharaman maꞌ-wak-wakang. Ngay keꞌ pam anangan aak kechaman kampan moꞌ-moꞌantan tape aakanakamana.  
\v 8 Puth nanpalana nil Christ.angan yuk min paththama in kenyan piꞌ-piꞌan ngathar. Nil ngulan theeꞌowar aak an-aniyangan nil pam wanch um nungantangan than-thanathow, puth anpalan ngay minaman iiy-iiyang meeꞌ nungantangana. Nil min-min mep-mepow ngampang pam wanch yotamana, aꞌ min iiy-iiyow ngampar yotamant ngamp aakan thath-thathanamp nungantan nil palaman wampowa, an ngatharakam thonakam yaꞌa, puth pam wanch nungantam yotamantana.   
\s1 Than Wiy Al-Alangan Wantin Ngayang, Puth Nil God.angan Keꞌ Wantiy Ngayang, Yaꞌa  
\p
\v 9 Ayyang, nint yaam keꞌ wun-wunāna, pal erkam wampān ngathara.  
\v 10 Nil puth Demas alangan kanam wantanya, nil an-ngul iiy aak Thessalonica.aka puth nil yuk way min aak inpal thonakam ngaantam-ngeey-ngeeyan. Nil Crescens.ana an-ngul iiy aak Galatia.aka, putha Titus.ana an-ngul iiy aak Dalmatia.aka.  
\v 11 Nilam thonakam Luke inman ngatharangana. Puth nint Mark.an-a, pal karpam wampathān nunang ngathara, ngay kaangk nil ngayang maꞌ-aath-aathow work inana.  
\v 12 Nil Tychicus.ana in yaꞌ thampa, ngay an-ngul kuchang nunang aak Ephesus.aka.  
\v 13 Nint palan wampān-a, nint coatana pal kalān ngathar ngayan wantang nungantang Carpus.antangan aak Troas.angana, aꞌ putha lat wiy nanman wantangan thanang aꞌ puth keꞌ kon-ngathow nintang lat manyiy anangan ngayan wik ump-umpangan-a, pal kalān thamp.   
\p
\v 14 Pam nil Alexander.ana, nilan yuk way min yump-yumpan yuk copper amanaman-a, nil way paththam yump-yump ngathara. Nil piip God.angan ngul wayathow nunang puthangkan anpalman nil wayan yump-yump ngatharana.  
\v 15 Nint thath-thathān nunang thamp nil puth kaangk keꞌ wik ngeeyow ngampang wik min anangan waaꞌ-waaꞌanampa, aꞌ puth thanang wiy anangan way-wayathan yipam wik min anangan keꞌ ngeey-ngeeyayn.   
\p
\v 16 Kaꞌathamana ngay courtak iiyang-a, ngayam thonakam iiyang, wiy anangan ngatharang keꞌ iiyin. Than yotamangana wantin ngayanga. Ngay puth kaangk keꞌa God.angan ngaantam-ngeey-ngeeyow thanang than keꞌ wayanangana!  
\v 17 Than al-alangan wantin ngayangana, puth nil God.angan keꞌ wantiy ngayang, yaꞌa. Nil ngatharanga anman iiy-iiyan, aꞌ thay-thayanathana, ngay yipam wik maꞌmangkam waaꞌ-waaꞌāng wik God.antaman thant al-alantan pam wanch than Jews yaꞌana. Than pam wayanang al-alangan keꞌ lions al-alantan theeꞌiythan ngayangan-a, yipam mulathayn ngayang-a, an puth yaꞌa, nil God.angan wayath thanang.  
\v 18 Nil ngul kaaꞌ-piichanathow ngayang Lord.anga way yot anpalan aꞌ kalow ngayang minam aak nungantamakan in kenyana, nilan aak wun-wunan moom piꞌan paththamana. Puth ngampaniya keꞌ-ngoongkam anman thaaꞌ-kuump-kuumpāmp nunang, puth nilaniya min aꞌ wuut piꞌan paththama.   
\s1 Nint Wiyantan Waaꞌ-Waaꞌān Ngan Ngaantam-Ngeey-Ngeeyanan Thanang  
\p
\v 19 Nint waaꞌān pulant Priscilla-a, puth-a, Aquila.antan ngay ngaantam-ngeey-ngeeyang pulanganweya, aꞌ putha yot anangan wun-wuntan aawuch Onesiphorus.antangana.  
\v 20 Nil Erastus.ana aak Corinth.ang wun-wunana, aꞌ ngayan puth Trophimus.an angman wantangan aak Miletus.angan puth weech-weechan nunangweya.  
\v 21 Ayyang, nint kan pal wampān aak um onchanakana. Nil Eubulus.an thawar ngay wik waaꞌāng nungk nil ngaantam-ngeey-ngeeyan niiyang, aꞌ putha Pudens.anga, aꞌ Linus.anga, puth-a, Claudia.anga, aꞌ putha than pam wanch yot Christians wiy il-ilangan thampang ngaantam-ngeey-ngeeyantan niiyanganweya.  
\v 22 Ngay kaangk nil Jesus.an ngangk niiyantamang wun-wunow, aꞌ putha nil God.an puy-puyam min anman iiy-iiyow niiyant.  
\p Inman kan umpang niiyanta,  
\p Paul.