\id 2TH  
\h 2 Thessalonians 
\toc1 2 THESSALONIANS Lat Thonangan Inan Paul.angan Ump Pam Wanch Aak Thessalonica Punchan Al-Alantana 
\toc2 2 Thessalonians 
\mt1 2 THESSALONIANS  
\mt2 Lat Thonangan Inan Paul.angan Ump Pam Wanch Aak Thessalonica Punchan Al-Alantana  
\c 1  
\p
\v 1 Ngan pam koꞌalam inangan Paula, aꞌ Silasa aꞌ putha Timothy.ang lat inan umpanan niiyanta pam wanch Christians aak Thessalonica punchan nal-nalantan, puth niiy weeꞌ-weeꞌanangan ngangkangan piꞌ-piꞌaniy nunang piip ngamparam God.an aꞌ puth moom ngamparam Jesus Christ.an.   
\p
\v 2 Ngan meeꞌ-wuthanamanan pulant piip God.angan aꞌ Lord Jesus Christ.angan minam paththam piꞌowpul niiyangan aꞌ ngangk min yumpowpul niiyang.   
\s1 Nil Jesus.an Palam Wampow Ngampar Aꞌ Umang Thanathow Ngampang  
\p
\v 3 Ngurp nganttam niiyala, ngan anman mak thaaꞌ-kuump-kuumpān nunang God.an niiyantam yotamantamana. Aꞌ an ngant mina thankyou thawanan God.antan niiyantam puth niiy min-min anman ngangkangan piꞌ-piꞌaniy nunanga aꞌ puth niiy kaangk paththam anman wunaniy niiy-niiyantakaman.  
\v 4 Than pam wanchangan thaaꞌ-thengkathantan niiyangan, way yumpantan niiyanta, puth anpalman niiy monkanan-wakaniy nunang piip God.an. Puth aak way niiyant maꞌ-yotam wamp-wampana. Nganan puth wik min waaꞌan niiyantam pam wanch churches wiy al-alantan, ngan waaꞌan thant niiy aak wayan thaampaniy aꞌ anman ngangkangaman piꞌ-piꞌaniy nunang God.an, niiy keꞌaman koyam weentaniy God.antaman.   
\p
\v 5 Inan meenathan ngampar nil God.an anman min paththam iiy-iiyana. Niiyan anman monkan-wakaniy nunang God.ana, keꞌ-paal than pam wanchang thaaꞌ-thengkathantan niiyang aꞌ kulakan wenkantan niiyant. Puth nil God.an kan-kanam min paththama aꞌ nil ngul thathow niiyang pam wanch min paththaman aꞌ nil kalow niiyang aak nungantangan wunān aak umpuyamana. Nil maꞌ nungantangan ngul piꞌ-piꞌow niiyanga.  
\v 6 Nil God.ana minam anman iiy-iiyan. Than weeꞌ-weeꞌanangan thaaꞌ-thengkathantan niiyang-a, aꞌ kulan uwantan niiyant-a, an nil ep wayathiy thanang.  
\v 7 Aꞌ ngul-ngulana nil Jesus.ana, nil moom piꞌan ngamparamana, nil inpal kenyan ukow aak iikanakana. Aak an-aniyangan nil palaman ukow-a, nil kulaman ngangk maalam ngul piꞌ-piꞌow ngampang, niiyang aꞌ puth nganang thamp. Nil ngul palam wampow ngampar keꞌ thum nganth yimanangan aꞌ ngaantiyongk nungantam thayan anangan than karpam palan ukayn nungantangana.  
\v 8 Aak an-aniyangana nil kan-kanam ngul wayathow thanang pam wanch anangan kaangk keꞌan nunang God.ana aꞌ kaangk keꞌan wik ngeeyayn wik min nungantam Jesus.antamana.  
\v 9 Nil ngul kuchow thanang nath aak umpuyama. Aak way anman ngul wampow thant aak umpuyamana. Than il-ilangana kaaꞌwal nungantam God.antaman keꞌ thathayna park-parkow keꞌ nganth yimanangan, than puth keꞌ wunayn nungantang, nil pam piꞌan aꞌ thayan paththam, alantangan keꞌ wunayn.  
\v 10 Aak piꞌanan wampowan-a, nil Jesus.an palam ngulan ukow aak iikanakan-a, aak an-aniyangan-a, nil God.angan pam wanch wayanang anangan ngul kuchow thanang. Than pam wanch weeꞌ-weeꞌanangana than monkanan-wakantan nunang Jesus.an-a, than ngul thathayn nunang nil min-minam paththaman aꞌ putha wuut piꞌanan thampa. Nganth nungantam parkow ngamparang Christians al-alantangan, ngamp ngulan parkāmp nganth nungantam alantaman aꞌ ngamp yotamangana puth thaaꞌ-kuumpāmpana. Niiy thampan ngul thaaꞌ-kuumpān nunangana, puth anpalman niiy wik nganttam ngangkangan piꞌ-piꞌaniy.   
\p
\v 11 Nganan paal ngaantam-ngeeyanan niiyang aꞌ meeꞌ-wuthanamanan niiyanta. Ngan thawanan God.antan nil niiyang thayanam yumpow niiy yipmam minam iiyān keꞌ nilan kaangk niiy iiyān. Puth niiy God.an ngangkang piꞌ-piꞌaniy nunang puth anpalana niiyan kaangk min anman iiy-iiyāna, nganan puth nanpalan thawanan nungant God.antan nil thayanam paththam yumpow niiyanga niiy yipmam min anman iiy-iiyāna.  
\v 12 Ngan meeꞌ anman wuthanamanan niiyant than wiy al-alangan yipmam pam wanch min thathayn niiyang, aꞌ anpalana thanan-a, Lord Jesus nunang min waaꞌayna aꞌ thaaꞌ-kuumpayn nunang niiyantam anpalan. Aꞌ puth ngan meeꞌ-wuthanamanan nil Lord Jesus.angan ngul maꞌ-aathow niiyang than pam wanchangan yipam thathayn niiyang min paththama. Aꞌ piip God.angan pul Lord Jesus Christ.angan pul kaangk ngangk min yumpowpul niiyanga.   
\c 2  
\s1 Pam Way-Wayam Paththam Ngul Wampow  
\p
\v 1 Ngan kaangk waaꞌān niiyant nil Lord Jesus Christ.an palam ngul ukow aak iikanakana, aꞌ nil yotam yalmathow ngampanga, pam wanch nungantamana, karpam nungantang ngul wunāmp.  
\v 2 Than pam wanch wiy anangan thawantan keꞌ nil Lord.an kanam wampa, puth yaꞌa, than yaan wik uuy-uuyamantana. Aꞌ than pam wanch wiyangan ngaantam-ngeeyantan keꞌ ngan waaꞌan thant keꞌ nil Jesus puthaman kan wamp aak inganiya, nil yaꞌa, ngan keꞌam waaꞌan thant. Than wiyangan ngaantam-ngeeyantan keꞌ ngan wik anan latang umpan niiyanta, puth yaꞌa, ngan wikan keꞌam umpan niiyant yaꞌa. Than wiyang ngaantam-ngeeyantan keꞌ nil God.ang wik anan meenath ngant, puth yaꞌa, nil keꞌam wikan meenath nganta. Ngurp ngatharam niiyalang, ngay thaaꞌ-mamanang thaw-thawang niiyanta, puth ngangk niiyantaman aꞌ kuchek niiyantaman way keꞌ wunow wik alantaman.  
\v 3 Than pam wanchangan keꞌ muukamathayn niiyang. Inan kan-kanam ep nil Jesus.an palam ngulan ukow aak iikanakana. Puth kaꞌathamana than pam wanchangan man-mangkaman theeꞌayn God.antan aꞌ thaampayn nunangan. An-aniyangana nil pam way-wayam paththam ngul wampowa. Pam nil inmanan-a, nil God.angan ngul wayathow nunang aak angan aak wayangana. Puth kaꞌathamana nil pam wuut piꞌan paththam iiyow aꞌ nil thaampow nunang God.an puth wik ngench thayan nungantam anangana thaampow.  
\v 4 Aꞌ yuk ngeen-wiy anangana pam wanchangan thaaꞌ-kuump-kuumpantan-a, an nil thaampow thanang. Nil nungamangan keꞌ wuut piꞌan yimanangan waaꞌow, nil God-a, aꞌ puth-a, oony way anangan-a, keꞌ yaꞌa. Aꞌ nil pek ngoonchow aawuch God.antamangan aꞌ angman nyiinow aꞌ nil thaaꞌ-kuumpow nungantakaman aꞌ nil keꞌ God waaꞌow nungantakam.   
\p
\v 5 Ngay niiyantangan wun-wunang-a, ngay anman murkanam waaꞌ-waaꞌang niiyant aak ngeen nathan wampow nil Jesus.an palam ngulan wampow. Ngamp ngaantam-ngeeyāmp wik inangana aꞌ puth keꞌ kon-ngathow ngampanga.  
\v 6 Niiy puth meeꞌmiy nil thonamanga koyaman ak-wichan nunang pam way paththamana, nil kaangk keꞌ yippak kuchowana. Puth ngulan ep nil God.angan aak miꞌ-a, than pam wanchangan kaaꞌwal ngurp paththam thathayn nunang pam way paththam anana.  
\v 7 Than pam wanch wiyangan God.an nunang kaangk keꞌ paththama, than puth pam wanch anangan way iiy-iiyantan. Puth nil thonam ilangan-a, ak-wich-wichan thanangan than keꞌ yipam way-wayam paththaman iiy-iiyayn. Ngulaniy-a, an nil keꞌ-ngul ak-wichow thanangana, puth lam-lam ngul yaꞌamowa.  
\v 8 Anpalaniy-a, than pam wanchangan ngul thathayn nunang pam way paththamana pam nil ngangk kulangaman kal-kalan nunang God.ana. Nil Jesus thonakam moom piꞌan ngampar yotamantana. Aꞌ nil Jesus.an ngul wampow aꞌ mulakam wuuꞌow nunang puth pam alangan nganth nungantam thampan thathow an nil mul ngul wunow, pam way ananiya.   
\p
\v 9 Puth kaꞌathaman nil pam way inmanan wampow-a, nil oony way Satan.an moom piꞌan iiyow nunganta. Nil oony way alangan ngul maꞌ-kunch yumpow nunangan work piꞌan wiy-wiyam meen-meenathow, puth min yaꞌa, an work way paththam, than pam wanchangan min-min keꞌ thiichayn, aꞌ than winynyang moꞌ-moꞌayna.  
\v 10 Nil work piꞌan way paththam anangan meenathow thant nil yipam muukamathow thanang pam wanch way anangan keꞌ nil pam piꞌan, maꞌ-kunch yimanangan. Pam wanch way anangaman-a, aak wayakan iiyayn, than puth wik God.antaman kaangk keꞌ ngeey-ngeeyayn, keꞌam ngangkangan piꞌ-piꞌantan, yaꞌa. Nil God.angan nanpalan keꞌ kaaꞌ-piichanathiy thanang, yaꞌa.  
\v 11 Aꞌ anpalaniya, nil God.an thawow ngul, “Yaa, an kana, than mak ngaantam-ngeeyayn nil pam way paththaman keꞌ mina.”  
\v 12 Than pam wanch al-alangan wik min nungantam kaangk keꞌan ngeeyayn. Than puth ngangk minangam way anangan yump-yumpayna. Aꞌ puth anpalan-a, nil God.an ngul thawow thant, “Niiy way paththam iiy-iiyaniya. Ngay wayathāng niiyang ngula.”   
\s1 Nil God.angan Miꞌ Niiyang Aꞌ Kaaꞌ-Piichanath Niiyang  
\p
\v 13 Ngurp nganttam niiyalang, ngan anman mak thankyou thaw-thawān nungant God.antan niiyantamana. Nil Lord.an moom ngamparam yotamantamana, nilaman kaangk wunan niiyanta. Nil keenkam anman miꞌ niiyang nilan kaaꞌ-piichanathow niiyang. Nil puth Ngeen-Wiy Min nungantaman kuch min yipam yumpow niiyanga niiyan puth wik kan-kanam God.antam anangan ngangkangaman piꞌ-piꞌaniy.  
\v 14 Ngan kaꞌathaman wik min God.antaman niiyant waaꞌ-waaꞌan-a, nil ump niiyang wampān nungantana, niiy yipmam woyan min nungantamana wak-wakāna, aꞌ niiyaniya keꞌ pam wanch nyiingkanam ngul iiyāna. Nil kaangk nganth nungantaman Lord Jesus Christ.antam parkow niiyantanga.  
\v 15 Ngurp nganttam niiyalang, niiyan nanpalana anman ngangkangam piꞌ-piꞌān nunang God.an aꞌ niiyan woyan way keꞌ wak-wakān. Niiy keꞌ-ngoongkam ngangkangam piꞌ-piꞌān wik yotam anangan nganan thaaꞌ-aath-aathan niiyangan. Ngan wik anangan waaꞌ-waaꞌan niiyantana aꞌ puth latang anangan ump-umpan niiyanta.   
\p
\v 16 Nil Lord Jesus Christ.ana pul piip God.angan kaangk wunanpul ngampar yotamantana. Pul ngangk minangam iiy-iiyanpul ngampar, keꞌ-paal pul ngangk thayanam piꞌ-piꞌanpul ngampang, puth ngampana anman yipmam ngangk thayanam iiyāmpa, ngamp puth kan meeꞌmiy an pul kan-kanam paththam min iiyanpul ngamparaniya.  
\v 17 Ngan meeꞌ-wuthanamanan pul God.angan aꞌ Jesus Christ.angan ngangk thayanathowpul niiyang aꞌ puth thayanam anman yumpowpul niiyang puth niiyaniya yipmam min anman yump-yumpān aꞌ puth wik min anman thaw-thawān.   
\c 3  
\s1 Niiy Meeꞌ-Wuthanamān Piip God.antan Ngantak  
\p
\v 1 Ngurp nganttam niiyalang, niiy meeꞌ-wuthanamān ngantaniya God.anta. Aꞌ putha niiy thant thamp meeꞌ-wuthanamān pam wanch aak nath-nathan wuntana wik God.antaman yipam ngeeyayn, aꞌ monkan-wakayn nunang God.ana, keꞌ niiy kaꞌathaman wik minan ngeeyan-a, monkan ngul wakaniy nunang.  
\v 2 Than pam way al-alangan kaangk wayathayn nganang niiyan puth meeꞌ-wuthanamān nganta, nil God.angan yipam minam piꞌow nganang thanttaman, puth than God.an keꞌam ngangkangan piꞌ-piꞌantan nunang, yaꞌa.   
\p
\v 3 Nil Lord.an moom ngamparam yotamantama nil anman iiy-iiyan niiyantangan. Nil ngul thayanaman piꞌow niiyang, aꞌ nil ngul minaman piꞌow niiyang, niiy oony way alantaman yipam wik keꞌ ngeeyāna.  
\v 4 Ngan kan-kanam meeꞌmiy niiyang niiyan wik kan-ngul ngeeyaniy nganttamana aꞌ niiy ngul keꞌ-ngoongkam anman wik nganttaman ngeey-ngeeyān, niiyan puth pam wanch Christ.antam ngula.   
\p
\v 5 Ngay kan meeꞌ-wuth-wuthanamang Lord.antan niiyanta, niiy kan-kanam paththam yipam ngaantam-ngeeyān nil God.ang kaangk niiyant paththam, aꞌ puth niiy yipam ngaantam-ngeeyān thamp nil Christ.an thayan paththam, nil ngulan maꞌ-aathow niiyang yipam niiy anman monkan-wak-wakān nunang God.an, aꞌ keꞌ wantān nunang.   
\s1 Niiy Kemp Woopanam Keꞌ Iiy-Iiyān Workaka  
\p
\v 6 Ngurp nganttam niiyalang, nil Jesus Christ.an moom piꞌan ngamparama, nil thawan niiyant niiy waank iiyān thanttam Christians wiy al-alantaman kemp woopanan iiy-iiyantan workaka puth wik nganttaman keꞌam ngeey-ngeeyantana nganan thawan niiyant niiy wanttakan wunāna.  
\v 7 Niiy meeꞌmiy niiyan minam anman iiy-iiyin keꞌ nganaman woyan minan meenathan niiyanta. Ngan niiyantangan wun-wunan-a, ngan workak kemp woopanaman keꞌam iiy-iiyan, yaꞌa.  
\v 8 Aꞌ puth ngan may niiyantangan mungkan-a, ngan puth wukal theeꞌan niiyant mayak. Ngan work piꞌan paththam iiy-iiyan kinchang aꞌ ngutang anman workan iiy-iiyan ngan yipmam wukal uwān may piiyanakan.  
\v 9 Puth niiyan nganang minam anman piꞌ-piꞌina, ngan puth wik God.antaman waaꞌ-waaꞌan niiyant, puth nganan keꞌam thawan niiyant way minakana, mayak thakana. Puth nganana work anman iiy-iiyan niiy yipmam woyan min nganttaman wakāna.  
\v 10 Ngan niiyantangan wun-wunan-a, ngan kan waaꞌan niiyanta, “Nil weeꞌ-nathan kaangk keꞌan work iiyow-a, yaa, niiy may keꞌ theeꞌān nungant, nil keꞌ mungkow.”   
\p
\v 11 Than pam wanch wiyangan waaꞌantan nganta puth niiy wiy anangan woopan paththam iiyaniy workaka. Niiy wiy anangan work keꞌ iiy-iiyaniya, puth niiy kulakan kaaꞌ-ngoonch-ngoonchaniy.  
\v 12 Ngan inan waaꞌan niiyanta nil Jesus Christ.an wik inangan thawan niiyant, “Niiy keꞌ pal-puyan iiy-iiyāna. Niiy minam anman work iiy-iiyāna, aꞌ niiy may anangan wukal niiyantamangan piiyān.”   
\p
\v 13 Ngurp nganttam niiyalang, ngay niiyant yotamant thawāng: niiy min keꞌ-ngoongkam anman iiy-iiyāna, niiy woyan min anpalan keꞌ mel enchāna.  
\v 14 Nil weeꞌangan nath kaangk keꞌan wik min nganttaman ngeeyowa ngan latangan umpanan-a, niiy maꞌ-yotaman nungantangan keꞌ nyiin-nyiināna, nil yipam ngul-nyaaꞌ iiyow puth nil wik nganttaman kaangk keꞌ ngeeyow.  
\v 15 Niiy keꞌ ngangk kulangaman kalān nunanga, niiy wik thawān nungant keꞌ ngamp kuunch ngamparamakan thawanamp. Niiy thaaꞌ mich-micham thawān nungant nil yipam wik nganttaman ngeeyowa.   
\s1 Ngay Kaangk Nil Piip God.angan Minam Piꞌ-Piꞌow Niiyang  
\p
\v 16 Nil Lord.ang thonakam ngangk ngamparaman min yumpana. Ngeen nath wampow niiyant-a, aak min nathwey-a, nathwey aak way wampiy-a, ngan kaangk nil Lord.angan ngangk min yumpow niiyang, aꞌ angman iiyow niiyantang.   
\p
\v 17 Ngay Paul.ang wik inangan umpang niiyanta, ngay maꞌ-yotam ngaantam-ngeey-ngeeyang niiyang, niiyana yipmam kan-kanam ngul meeꞌmiy lat ngatharamana.   
\p
\v 18 Aꞌ ngay ngul meeꞌ-wuthanamāng nungant Lord Jesus Christ.antan nil ngul thath-thathow niiyang aꞌ min iiyow niiyanta.  
\p Anman kan,  
\p Paul