\id 1JN  
\h 1 John 
\toc1 1 JOHN Lat Inan Nil John.angan Ump 
\toc2 1 John 
\mt1 1 JOHN  
\mt2 Lat Inan Nil John.angan Ump  
\c 1  
\s1 Nil Jesus.ana Keꞌ Wik Anman Ngampar  
\p
\v 1 Ngay in John.ang lat inan umpang niiyant, kan in ngeeyān a! Nil Jesus Christ.an-a, nathpalman man-yetham anman wun-wunana, aak inan keꞌan yippakan wuna. Nilan puth woyanan meen-meenathan ngampar, ngamp yipam ngulakam wun-wunāmp nungantang God.antangana. Ngananiy puth-a, meeꞌ nganttamangan thathan nunang, putha ngan man awal nunangan ngeeyana. Eeꞌ, an kan-kanam paththam a! Aꞌ ngan puth maꞌ nganttamangan-a, maman nunanga. Nil pam inman Jesus.ana keꞌ WIK anman ngampara, puth nil wik God.antaman waaꞌ-waaꞌ ngampara.  
\v 2 Niliya, aak iikanakan uk, aꞌ ngan meeꞌ nganttamangan thathan nunanga; ngan inan keꞌ-paal wik waaꞌ-waaꞌanan nunang niiyanta, Christ.ana. Nil nathpalman man-yetham anman wun-wunana, piip nungantamantang angman karpam wunpula, aꞌ pal ngul uk ngampar, aak iikanakana ngamp yipam thiichāmp nunanga.   
\p
\v 3 Ngan niiyant waaꞌāna nganan want-wanttakan thathan meeꞌ nganttamangana, aꞌ want-wanttakan ngeeyan kon nganttamangan ngurp ngamp karpam yipam iiyāmp nungantang piip God.antangana, putha nhengk nungantamantang Jesus Christ.antangana.  
\v 4 Ngan puth lat inan umpan niiyanta ngamp yipam karpam ngangk minangam ngul iiyāmpa.   
\s1 Nil God.an Keꞌ Ngantha Piꞌana  
\p
\v 5 Yaa, kan inan ngeeyān a! Ngan Jesus Christ.antam wik waaꞌanan niiyant ngula. Ngan ngeeyan nunang Jesus.ana wik inangan thaw-thaw, aꞌ niiyant ngul waaꞌān: nil God.an-a, keꞌ nganth anman wunana, ngaaꞌ keꞌana! Nil anman nganth wun-wunan.  
\v 6 Ngampwey Christians waaꞌwimp-a, puth way yump-yumpimp-a, an ngamp wik kan-kanam keꞌam thawanamp, yaꞌa, ngamp wik uuyamanampa. Ngampana keꞌ ngaaꞌang anman wunanampa.  
\v 7 Ngampwey nganth God.antang iiy-iiyimpwey-a, keꞌ Christ.an nganthangan iiy-iiyan-a, yaa, ngampana ngurp-ngamp iiyanamp ngurp min ngul iiyanamp ngamparakamana. Nil puth Jesus.an utham ngampara, chaapar nungantaman theetath ngampar, chaapar ilangan puth pachathan ngampanga way yot ngampan yump-yumpampa.   
\p
\v 8 Ngampwey thawimpa ngamp way keꞌ yumpanaman-a, an ngamp muukamathanamp ngamparakamana, ngamp wik kan-kanam God.antaman ngangkangan puth keꞌam piꞌ-piꞌanampa, yaꞌa.  
\v 9 Ngamp wayan yumpimp-a, yaa, waaꞌimp nungant way ngampan yumpampa, — yaa, an nil ngangkan pachathiy ngampanga, kan-kanam thawow puth ngampara, “Yaa, kana, ngay keꞌ-ngul ngaantam-ngeeyāng way nungkaramana.” An nil kan-kanam keꞌ-ngul ngaantam-ngeeyowa, nil keꞌ muukamathiy ngampanga yaꞌa. Nil puth min anman iiy-iiyana.  
\v 10 Puth ngampwey waaꞌimpa keꞌ ngamp way keꞌ yumpanaman-a, an ngamp God.an keꞌ wik-uuy yimanangan waaꞌanamp nunanga, wik nungantam ngangkangan keꞌ anman piꞌanamp, yaꞌa.   
\c 2  
\s1 Nil Jesus.angan Kan-Kanam Maꞌ-Aath-Aathan Ngampanga  
\p
\v 1 Ngurp ngatharam-ang, niiy keꞌ puk ngatharama! Ngay wik inangan umpang niiyanta, niiy yipam wayan keꞌ-ngul yumpāna. Puth ngamp weeꞌ-weeꞌanangana way nathan yumpimp-a, nil pam thonam nanman Jesus Christ.an thaaꞌ-pant ngul thawow ngampar God.antana. Nil Jesus Christ alangan-a, min anman yump-yumpana, meeꞌ God.antangan.  
\v 2 Puth nil God.an-a, ngangk way iiy-iiyan ngamparama, wayan yump-yumpanampa, nil kaangk kuchow ngampangana, nil puth Jesus.aniy-a, uthama ngul way ngamparam aakanakan nil God.angana yipam way ngamparaman keꞌ-ngul ngaantam-ngeeyowa, way ngamparaman thonakam yaꞌa, puth pam wanch yotantamana.   
\p
\v 3 Ngamp puth want-wanttakan thiichāmp ngamp kan-kanam God.an meeꞌmiy nunang a? Inana, ngamp wik nungantaman ngeey-ngeeyimp-a, yaa, an ep ngamp meeꞌmiy nunang, God.ana.  
\v 4 Thonamwey thawiya, “Ngay in ep God.ana meeꞌmiy nunanga,” nil yaꞌa, nil puth wik nungantamana keꞌam ngeeyana — an nil yaan wik uuyaman thonakama, kan-kanama keꞌaman thaw-thawan, yaꞌa.  
\v 5 Puth ngamp weeꞌ-weeꞌanangan wik nungantaman ngeey-ngeeyanamp-a, yaa, ngamp anman ngangk minangaman iiy-iiyanamp nungant God.antaniya, kan-kanam paththam kaangk wunanamp nungant. Ngamp puth nanpalan meeꞌmiy wunamp ngampa God.antang kanam nenchanamp.  
\v 6 Ngamp weeꞌ-weeꞌanangan waaꞌwimpa, “Ngay ep nenchanang God.antanga,” yaa.wey, ngamp puth keꞌ Jesus Christ yimanangan iiyāmpa.   
\s1 Ngay Wik Thayan Thawāng Niiyanta  
\p
\v 7 Niiyalang, ngurp ngatharam-ang, ngay inan wik thayan umpang niiyanta, niiy ngeeyāna! Ngampaniy-a, ngurp ngamp iiyāmpa, ngangk min iiyāmp ngamparakama! Wik inan putha wik nyiingkanam yaꞌa, in wik keenkanama niiy nathpalman ngeey-ngeeyana.  
\v 8 Puth nungkway wik inan keenkanaman-a, ngamp nyiingk inan min-minam ngul ngaantam-ngeeyanamp, in keꞌ wik nyiingkanam ngul ngaantam-ngeeyanampa. Nil puth Jesus.aniy-a, keꞌ nganth piꞌan park-parkana. Nil kan-kanam kaangk wunan ngampar, aꞌ meenathan ngampar want-wanttakan kaangk wunāmp ngamparakama. An keꞌ ngaaꞌan kan yaꞌ-yaꞌaman, puth nganthan pach-pachamana.   
\p
\v 9 Nil weeꞌwey thawiya, “Ngay nganthang iiy-iiyanga,” nil yaꞌa, puth ngangk kulangam kal-kalan Christians wiy anangan-a, an yaan muukamana, an keꞌ nil aak ngaaꞌang yimanangan yippak iiy-iiyana.  
\v 10 Nil weeꞌwey kaangk wunan Christians wiyantan-a, an nil keꞌ nganthang iiy-iiyan yimanangan, keꞌ woyan meeꞌ minang thathan, keꞌ keekiya.  
\v 11 Puth nil weeꞌangwey Christians wiy anangan ngangk-wayangam kal-kaliy thanang-a, an nil keꞌ aak ngaaꞌ nyimang yimanangan woyan pal-puy iiy-iiyan, nil woyan keꞌ thathiy wanttinakan iiyowa, puth aak ngaaꞌ nyimangana, nanpalan keꞌ thathiy, an puth nil woyan minana keꞌ-ngul thathiy, yaꞌa.   
\p
\v 12 Ngurp ngatharam-ang, ngay lat inan ump-umpang niiyanta, puth nil God.angan keꞌ-ngul ngaantam-ngeeyow niiy wayan yump-yumpana, nil puth Jesus.angan theetath nungamang way ngamparamakana.  
\v 13-14 Ngay puth wik inangan thaw-thawang niiyanta, pam wuut manth-thayananta, puth niiy ep thiichaniy nunang, Christ.ana, nilan man-yetham nathpalman wun-wunan, aak inan keꞌan yippak wuna. Puth niiy pam komp inangana, ngay niiyant thaw-thawanga, niiy kaangk keꞌ-ngul wik ngeeyān nunang oony way piꞌanan, nil moom niiyantam keꞌ-ngul iiyowa, yaꞌ-ngula, niiy maꞌaman pentān nungantam, oony way piꞌan alantamana. Niiy puth thayanam iiy-iiyaniy ngul, wik God.antaman ngangkangan piꞌ-piꞌaniya. Aꞌ ngay niiyant thamp thawanga, puk manyiyant, niiy puth thiichaniy nunang God.an, piip ngamparamana.   
\p
\v 15 Ngay wik inangan thaw-thawang niiyant, maꞌmangkamanta: aak inana, keꞌ ngaantam-ngeey-ngeeyāna! Woyan wayana wiy al-alangan ep anman wak-wakantana; puth ngampaniya woyan way inana keꞌ ngaantam-ngeeyāmpa, yaꞌ anman, God thonakam ngaantam-ngeey-ngeeyāmpan! Niiy natha aak inan thonakam kaangk wunin-a, niiyan God.antamana kaangk keꞌ-ngula!  
\v 16 Yotam aak ingan umyompanamangan-a, way anman iiy-iiyantana; than kaangk wuntan maarich keeꞌanakana, putha way min al-alangan ngangk mungkantan thananga, an puth than ulp-ulpanang iiy-iiyantana, keꞌ pam piꞌan ngaantam-ngeey-ngeeyantan thanttakama. Puth way yotam inangan thanan yump-yumpantan-a, inpal keny yaꞌa, piip ngamparamantam yaꞌa, an aak imanamana epa.  
\v 17 Puth aak inana, yaam keꞌ wunowa, aak kan-kanang wampan aak inan minchowa; way anangan pam wanch al-alangan yumpantan-a, an yimanangan minchayna. Puth ngamp weeꞌ-weeꞌanangan wik God.antaman ngeey-ngeeyāmp-a, an ngamp God.antangan anman wun-wunāmp ngulakama.   
\s1 Pam Way Paththam Puy-Palan Wampana  
\p
\v 18 Niiyalang, aak kan-kanang wampan aak inan minchowana. Niiy putha kan ngeeyanweya, pam puy-palan wampana, pam iniy-a, ngangk kul tham iiy-iiyan Jesus.ant, thaamp-thaampan nunanga. Wiy anangan thama kan wampin, pam yota, yimanangan ngangk kul tham iiy-iiyantan Jesus.antana, thaampantan nunanga. Ngamp puth nanpalan meeꞌmiy ngula aakan kan-ngul thinth wampan aak inan minchowana.  
\v 19 Pam inangana, kaꞌathaman ep yaan iiy-iiyin ngamparanga, yaan thaw-thawin keꞌ ngurp God.antaman, nil yaꞌa; than puth ngurp God.antam iiy-iiyiythanwey-a, an kan-kanam yaam iiy-iiyiythan ngamparangana — an puth yaꞌa, too wantin ngampang. Ngamp nanpalan meeꞌmiy ngul thanang kaꞌathaman yaan iiy-iiyin ngamparanga, an puth kan-kanam yaꞌa.   
\p
\v 20 Puth niiy an ep yimanangan yaꞌa, nil puth God.angana, Ngeen-Wiy nungantaman kuch niiyanta, ngangk niiyantamangan wunow, nil wik kan-kanam anangan thaaꞌ-aath-aathan niiyanga, keꞌam wik uuyaman, yaꞌa, an niiyan puth-a, kan-kanam meeꞌmiy ngul wik God.antamana.  
\v 21 Ngay puth lat inangan umpang niiyanta, niiy puth wik God.antamana meeꞌmiy ngul, niiy puth ngoongk-ngoongkam yaꞌa. Nil pam wik uuyamanan-a, an wik God.antam keꞌam waaꞌan yaꞌa. Niiy meeꞌmiy God.an kan-kanam thaw-thawan, nil keꞌ wik uuy-uuyaman, yaꞌ anman.   
\p
\v 22 Than weeꞌ-weeꞌanangwey Jesus.an waaꞌiythan nunangweya nil God.angan keꞌam kuch nunang yaꞌa, than yaan wik uuy-uuyamantana, pam than anangana Jesus.an thaampantan nunanga, ngangk kulan ngangkangan piꞌ-piꞌantan nungantana, an than man-mangkam theeꞌantan pulanta, piip God.anta, putha nhengk nungantamakan Jesus Christ.antana.  
\v 23 Than weeꞌ-weeꞌanangan thawiythanweya nil God.angana Jesus.an keꞌaman kuch nunang-a, nil God.an ngangk thanttamangana keꞌ wunana, yaꞌa; puth than weeꞌ-weeꞌanangan thawiythanweya nil God.angana Jesus.an kuch nunang-a, an nil piip God.an ep ngangk thanttamangan wun-wunana, an puth pul Jesus.anganiy-a, keꞌ thonam yimanangan iiy-iiyanpul, karpama.   
\p
\v 24 Yaa, wik God.antaman niiy nathpalman ngeey-ngeeyana, niiy murkanim anman ngangkangan piꞌ-piꞌāna! Niiy wik God.antam anangana ngangkangaman piꞌ-piꞌinwey-a, pul piip God.angan anman wuniypul ngangk niiyantamangana, pul nhengk nungantamangana.  
\v 25 Nil puth Christ.angan nathpalman kaaꞌngak ngampang ngampan ngulakaman wunāmp God.antangana.   
\p
\v 26 Ngay pam anangan nyiingkan waaꞌ-waaꞌang niiyanta, than kaangk meeꞌ-wichayn niiyanga woyan wayakana.  
\v 27 Puth niiyantan-a, nil God.angan Ngeen-Wiy nungantamana kan kucha, ngangk niiyantamang nanman piꞌ-piꞌaniy nunanga. Yaa, an puth wiyangana keꞌ-ngul thaaꞌ-aathiythan niiyangan puth nil Ngeen-Wiy Min God.antam alangan kana, yot thaaꞌ-aath-aathan niiyang, meenathan niiyanta. Nil wik kan-kanama waaꞌ-waaꞌan niiyanta, nil keꞌam wik uuy-uuyaman niiyanta. Niiy putha wik nungantaman ngeeyāna, aꞌ nangman ngangkangan piꞌ-piꞌān nunang, Jesus.ana.   
\p
\v 28 Ngurp ngatharam-ang, puth inan ngeeyiya, niiyan kan Jesus.an ngangkangan piꞌ-piꞌāna! Nil palaman wampow-a, niiyana ngangk thayanam yipam iiyān nunganta, aꞌ winynyang keꞌ moꞌin nungantama, ngul-nyaaꞌ keꞌ iiyin nungantama, yaꞌa.  
\v 29 Ngamp puth kan thiichampa God.an nil min-minam paththama, min anman iiy-iiyana, yaa, ngamp meeꞌmiy ngula pam wanch weeꞌ-weeꞌanangan min-minam iiy-iiyantanan-a, an puth thanana puk nungantam iiy-iiyantana.   
\c 3  
\s1 Nil God.ang Waaꞌan Ngampang Puk Nungantamana  
\p
\v 1 Inan ngeeyāna! Nil piip God.an kan-kanam nil kaangk wunan ngampara, puth nil kaangk waaꞌow ngampanga puk nungantama, an puth ngamp kan-kanama puk nungantama ngul iiy-iiyanampa. Puth pam wanch yotangan-a, keꞌam thiichin nunang, God.ana, keꞌ-paal thanana kan-kanama keꞌam thiichantan ngampanganiya puk nungantam inangan ngampa God.antama.  
\v 2 Eeꞌ kan-kanama, ngurp ngatharam-ang, ngamp inangan kan-ngul puk nungantam God.antama, in puth engkanang keꞌam yippak wunan ngampara, ngamp want-wanttak ngul-ngulan iiyāmpa. Ngamp inan ep meeꞌmiy nil Christ wampow ngulan-a, ngamp inangan keꞌ nil anman ngul iiy-iiyāmpa, ngeenam putha, ngampan puth ngul thathāmp nilan want-wanttakan iiy-iiyowa.  
\v 3 Than weeꞌ-weeꞌanangan wik inangan kan-kanam ngaantam-ngeeyayn-a, than ngangk min-minangam anman iiy-iiyantana, keꞌ Jesus Christ yimanangan iiy-iiyantana.   
\p
\v 4 Than weeꞌ-weeꞌanangan way yump-yumpiythanwey-a, thanan-a, thaampantan nunang, God.ana; thaniy puth-a, wik God.antaman-a, pip-pipantana.  
\v 5 Ngamp puth meeꞌmiy nil Jesus.an aak iikanakan uk, nil yipam way ngamparam anpalan-a, pachathow ngampanga. Niliy puth-a, way thonam keꞌ anman yumpanam yaꞌa.  
\v 6 Than weeꞌ-weeꞌanangana Jesus Christ.an kan-kanaman ngangkangan piꞌ-piꞌayn nunang-a, an than way keꞌ yump-yumpantan yaꞌa, puth than pam wanch al-alangan wayan yump-yumpantan-a, thanan keꞌam ngaantam-ngeeyantan nunanga, keꞌam thiichantan nunang, keꞌ-ngoongkam anman iiy-iiyantana.   
\p
\v 7 Ayyang, ngurp ngatharam niiyalang, than wiy al-alangana keꞌ meeꞌ-wichayn niiyang wayakana! Than weeꞌ-weeꞌanangan min anman yump-yumpayn-a, yaa, an puth than min anman iiy-iiyantana, ngangk pach anman wun-wunow thanta, keꞌ Jesus.ana ngangk pach iiy-iiyana, than yimanangan iiy-iiyayna.  
\v 8 Nil puth weeꞌangan wayan yump-yumpiy-a, an nil oony way piꞌan ngangkangana piꞌ-piꞌan nunang, nil puth oony piꞌan Satan.an-a, nathpalman keenkanam anpalman way anman yump-yumpana. Nil puth nhengk God.antaman aak iikanakan uk, yipam wayathow work nungantaman oony way piꞌan alantamana.   
\p
\v 9 Nil weeꞌan puk God.antaman iiy-iiyiw-a, an nil wayan-a, keꞌ-ngul yump-yumpowa, nil puth God.angana Ngangk nungantaman kan theeꞌ nungant aꞌ Ngeen-Wiy Min nungantaman pam alantangan kan ngooncha. Nil wayan keꞌ yump-yumpiy, an yaꞌa, an puth piip God.ana piip nungantamana, aꞌ nil maꞌ thayanang piꞌ-piꞌan nunanga way keꞌ yumpowa.  
\v 10 Puk God.antamana an than-thana; puk oony way piꞌan Satan alantamana an than-thana. Than puth weeꞌ-weeꞌanangana kaangk way anman yump-yumpayn-a, puth Christians wiyantan kaangk keꞌ wunayn-a, an puth kan meenathan ngampara than puk God.antaman keꞌ iiyantan, an yaꞌa.   
\s1 Niiy Kaangk Wunān Niiyantakama  
\p
\v 11 Niiy puth wik keenkanaman nathpalman ngeeyan, wik inaniya; ngamp ngamparakaman-a, kaangk wunāmpa, ngangk chaapar ngampar karpam ngula!  
\v 12 Ngamp keꞌ Cain yimanangan keꞌ weenimpa, nilana oony way piꞌan ngangkangan piꞌ-piꞌ nunanga puth nilana pont-kunchan mulathan. An puth nil ngeenam mulath nunang e? Puth nil nathpalman way yump-yump, nil pont-kunch Abel.an ep minam anman iiy-iiya, anpalman mulath nunanga.   
\p
\v 13 Ngurp ngatharam-ang, than pam wanch way al-alangan nath ngangk way-wayangamana kal-kaliythan niiyang-a, niiy ngangk keꞌ ikāna.  
\v 14 Puth ngampaniy-a, Christians wiyantan ngangk minangam iiy-iiyanamp thanta, ngamp nanpalan meeꞌmiy ngampan woyan anman wak-wakāmpa ngangk aak umpuyaman wunanakan God.antangana; woyan thon anan-a, mul wunanakan-a, anan too ngul wantampa. Nil weeꞌ-nathan Christians wiyantan kaangk keꞌ wuniw-a, an nil God.antangana keꞌ wuniy, yaꞌa, aak wayakan iiyow angman wunowa.  
\v 15 Than weeꞌ-weeꞌanangana Christians wiy anangana ngangk-wayangaman kalayn thanang-a, an than pam way-wayaman iiy-iiyantana, keꞌ pam yot-piikan yimanangana, an puth niiy kan thiichana pam nilan monkanan piikow-a, an nil keꞌ wunow God.antangana, yaꞌa!   
\p
\v 16 Nil Jesus Christ.angana theetath nungamang uthamow ngamparana, inan puth meenath ngampar nil kaangk paththam wunan ngampara; ngampiya yimanangan kaangk wunāmp ngamparakama, nathweya theetathāmp ngamparakam mulakana.  
\v 17 Nil pam maꞌmangkiy nath iiy-iiyiywey-a, wukal yot piꞌ-piꞌiywey-a, aꞌ Christian thonan thathiy nunang, may keꞌanangan wun-wunana. Nil pam maꞌmangkiy alangana keꞌ maꞌ-aathiy nunanganwey-a, an nil nungamangana keꞌ waaꞌow keꞌ nil kaangk God.antana, yaꞌa!  
\v 18 Ngurp ngatharam-ang, ngampiya thaaꞌam thonakam keꞌ thawāmp ngamparakama, “Ngay kaangk nungkara,” ngamp kan-kanam ngangk pal pekkuw anpalmana kaangk wunāmp ngamparakama, minam iiy-iiyāmp ngamparakama.   
\s1 Ngamp Ngangk Thayanam Iiyāmp God.antana  
\p
\v 19 Ngamp nath kan-kanam paththam kaangk wunimp ngamparakaman-a, an ngamp kan-kanama meeꞌmiy ngul wunimp ngamparakama ngamp puk God.antaman, aꞌ ngamp ngangk thayanam ngul iiyāmp God.antana, winynyang keꞌ-ngul moꞌāmp nungantam.  
\v 20 Ngamp nath ngangk akangamwey iiyimpa puth ngaantam-ngeeyimp wayan yump-yumpampa. Puth ngampaniy-a, ngaantam-ngeeyimpa nil God.an piꞌan paththama, keꞌ ngamp yimanangan yaꞌa, nila yota meeꞌmiya ngampan yumpanamp-a, way thak min thakan-a, an engkanang wunan meeꞌ God.antangana.  
\v 21 Ngurp ngatharam niiyalang, ngamp nath ngangk minangam iiy-iiyimp-a, puth way keꞌim yumpimp-a, yaa, ngamp ngangk thayanam iiyāmp God.antan, winynyang keꞌ moꞌāmp nungantama.  
\v 22 Ngamp puth wik nunangan ngeeyanampa, puth min yumpanampa meeꞌ nungantangan — keꞌ-paal ngamp puth ngeenak nathan thawimp nungantan-a, ngampana ngul uwāmp nungantama.  
\v 23 Nil wik thayan inangan want ngampara; ngamp nhengk God.antaman ngaantam-ngeey-ngeeyāmp nunanga Jesus Christ.ana! Aꞌ ngamp ngamparakamaniy-a, kaangk wunāmpa! Nil puth Christ.an wik thayan anangan thaw ngampara.  
\v 24 Ngamp weeꞌ-weeꞌanangan wik nunangan ngeeyāmp-a, puth ana ep ngamp God.antang wunāmp, nil God.an puth-a, ngangk ngamparang angman wun-wunana. Ngamp kan-kanama meeꞌmiy ngul nil God.an angman wun-wunan ngangk ngamparanga, puth Ngeen-Wiy Min nungantaman kuch ngampara, ngangk ngamparangan wun-wunowa.   
\c 4  
\s1 Ngamp Pam Wiy Anangana Erkam Keꞌ Ngeeyāmp Thananga  
\p
\v 1 Ngurp ngatharam niiyalang, niiy wik erkaman-a, keꞌ ngeeyān thanang pam wiy anangana, niiy kan thathān thananga, aꞌ ngaantam-ngeeyān thanang nath yaakaꞌ kan-kanam wik waaꞌ-waaꞌantan Ngeen-Wiy Min God.antamana, nath yaꞌ yaakaꞌ, nath wik oony way piꞌan alantaman waaꞌ-waaꞌantana; puth pam yot anangan nath-nathan kan iiy-iiyantan aꞌ waaꞌ-waaꞌantan thanttakama keꞌ wik God.antaman waaꞌ-waaꞌantan, puth an yaꞌa, yaan wik uuy-uuyamantana, than wik oony way alantaman waaꞌ-waaꞌantana.  
\v 2 Ngamp want-wanttak meeꞌmiy wik God.antam kan-kanaman waaꞌ-waaꞌantan a? Ngamp inpalan ep meeꞌmiy wunāmpa: than weeꞌ-weeꞌanangana Jesus Christ.an waaꞌayn nunanga nilan kan-kanam keꞌ pam ngurp ngamp yimanangan wamp aak iikanakan-a, an than kan-kanama wik God.antaman waaꞌ-waaꞌantan ngampara.  
\v 3 Than weeꞌ-weeꞌanangana nath Jesus.an waaꞌayn nunang nilan keꞌ pam ngurp ngamp yimanangan keꞌaman wamp aak iikanakan-a, an than Ngeen-Wiy Min God.antaman ngangkangan keꞌam piꞌ-piꞌantan, yaꞌa, an than oony wayan ep ngangkangan piꞌ-piꞌantana. Nil oony way alangan Jesus.an um thaamp-thaampan nunanga. Niiy puth kan ngeey-ngeeyana, than puy-palan wampantan, um thaampayn nunang Jesus.ana, — yaa, than wiy al-alangan kan-ngul um thaamp-thaampantan nunanga.   
\p
\v 4 Ngurp ngatharam niiyalang, niiyaniy puth-a, puk God.antam iiy-iiyaniya, niiy puth wik keꞌam ngeey-ngeeyaniy thanang yaꞌa pam wanch wiy anangan than Jesus Christ.an um thaampantan nunanga; puth nil Ngeen-Wiy Min God.antamana ngangk niiyantamangan wun-wunana, an nil piꞌan aꞌ thayan paththam iiy-iiyana; nil oony way piꞌanana, nilan ngangk pam wanch nungantamangan wun-wunan-a, an nil ep micha.  
\v 5 Than pam ananganiya Jesus.an um thaamp-thaampantan nunangana, than aak inman ngaantam-ngeey-ngeeyantana aak in kenyan yaꞌa. Than wik God.antaman keꞌ waaꞌantan, yaꞌa, than aak inam pekan waaꞌ-waaꞌantana; than pam wanch maꞌ oony way alantangan iiy-iiyantan-a, than ngeey-ngeeyantan thananga, puth aak thant inam pek, aak in kenyan, yaꞌa.  
\v 6 Puth ngamp inanganiy-a, an ep puk God.antam iiy-iiyanampa. Ngamp want-wanttak meeꞌmiy pam wanch nath puk nungantam God.antam iiy-iiyantan, nath yaꞌan yaakaꞌa, puk nungantam oony way alantaman nath iiy-iiyantana? Ngamp inpalan ep meeꞌmiy wunāmpa: than weeꞌ-weeꞌanang piip God.ana kan-kanaman ngaantam-ngeeyantan nunang-a, an than ep wik ngeeyantan ngampangan. Aꞌ weeꞌ-weeꞌanang piip God.an keꞌaman ngaantam-ngeeyantan nunang-a, an than wik keꞌ ngeeyantan ngampang thamangan, yaꞌa.   
\s1 Nil God.an Kan-Kanam Kaangk Wun Ngampara  
\p
\v 7 Ngurp ngatharam niiyalang, ngamp ngangk minangam iiy-iiyāmp ngamparakama; nil puth God.an nathpalman kaangk wun ngampara. Than weeꞌ-weeꞌanangana pam wanch wiyantan ngangk minangaman iiy-iiyayn-a, an than puk God.antam iiy-iiyantan, aꞌ thanan-a, meeꞌmiy nunang ngula.  
\v 8 Than weeꞌ-weeꞌanangana ngangk minangaman keꞌaman iiy-iiyantan wiyantan-a, yaa, an than God.an keꞌam thiichantan nunang, yaꞌa. Aꞌ nil God.an-a, kan-kanam kaangk paththam wunan pam wanchantana.  
\v 9 Nil keꞌ-paal nhengk nungantaman kaaꞌ-thonaman kuch nunang aak iikanakana, ngamp yipam aak umpuyangaman wunāmp nungantanga. Nilan puth yimanangan meenath ngampara nilan kaangk wunan ngampar paththam.  
\v 10 Nil God.an kan-kanam kaangk wunan ngampara, ngamp kaangk wunanamp nungant many-manya, nil ngampangan-a, ep kaangkiyathan ngampanga, nil nhengk nungantaman keꞌ-paal kuch ngampar, uthamow way ngamparamakana, nil yipam piip God.angana keꞌ-ngul ngaantam-ngeeyow way ngamparamana, yaꞌa.   
\p
\v 11 Ngurp ngatharam niiyalang, nil inan God.an kaangk anman wunan ngampara, ngamp puth-a, yimanangan kaangk wunāmp ngamparakamana!  
\v 12 Ngamp pam wanchang keꞌ anman thathanamp nunang God.ana ngurpa, puth ngampwey ngangk minangam iiy-iiyimpwey pam wanchantan-a, yaa, nil ngangk ngamparangan wun-wunowa, maꞌ-aath-aathow ngampang, yipam kan-kanam paththam kaangk wunanamp thant wiyantana.   
\p
\v 13 Niliy God.angan-a, Ngeen-Wiy Min nungantaman kan kuch ngampar, ngangk ngamparangan wun-wunowa, ngamp keꞌ-paal meeꞌmiy ngul ngamp God.antangan wunanampa, aꞌ puth God.aniy-a, ngangk ngamparangan wun-wunana.  
\v 14 Ngan puth nhengk God.antaman meeꞌ nganttamangan thathan nunang, aꞌ ngan wiyantana waaꞌan nil God.angan nhengk nungantaman kuch ngampar uthamow way ngamparam yotamantakamana.  
\v 15 Nil weeꞌangan Jesus kan-kanaman waaꞌiy nunang puk nhengk God.antaman-a, nil God.an ngangk nungantamangan wun-wunana. Nil pam alantangan nil God.an anman iiy-iiyan nungantang.   
\p
\v 16 Ngamp kan-ngul meeꞌmiy, aꞌ ngaantam-ngeeyanamp nil God.an kan-kanam kaangk wunan ngampara. Nil paththam kan-kanam kaangkiyathan ngampang God.anganiya. Than weeꞌ-weeꞌanangan ngangk minangaman iiy-iiyantan pam wanch wiyantan-a, an nil God.an iiy-iiyan nungantang anman, aꞌ ngangk nungantangan wun-wunana.  
\v 17 Nil puth God.an ngangk ngamparangan wun-wunan aꞌ nil maꞌ-aath-aathan ngampang kan-kanam kaangkan wunanamp pam wanch wiyantana. Ngul-ngulan-a, aak anan wampow nil Jesus.angana umangan than-thanathow ngampanga. Ngamp nath kan-kanam kaangk wun-wunanamp pam wanch wiyantan-a, ngamp aak an-aniyangan winynyang keꞌ moꞌāmpa, ngamp ngangk thayanam iiyāmpa, ngeenama, ngamp puth aak inganiya God.antangan iiy-iiyanampa keꞌ Christ yimanangan iiy-iiyan nungantangana.   
\p
\v 18 Nil God.an kan-kanam paththam kaangk wunan ngampara, ngampan keꞌ-paal keꞌ-ngul winynyang moꞌāmp nungantam, yaꞌ-ngula. Ngamp nath kaangk wunanamp nungant God.antan-a, ngampaniya keꞌ-ngul winynyang moꞌimpantama, aꞌ keꞌ-ngul ngaantam-ngeeyimp keꞌ nil ngampang kuchowa aak wayakana. Puth ngamp kan-kanam paththam kaangk wunimp nungant-a, nil keꞌ kuchiy ngampang, yaꞌa.  
\v 19 Nil kaꞌathamaniy-a, kaangk wun ngampara, ngamp puth-puthangkan-a, kaangk wunāmp nunganta.  
\v 20 Weeꞌ-nathwey thawiya, “Ngay kaangk wunang God.anta,” puth nilana ngangk-wayangam kal-kaliy thanang Christians wiy anangan-a, an nil yaan thaaꞌam thonakam thaw-thawana, wik uuy-uuyamana. Nil Christians wiy anangan thath-thathan thananga, puth nil ngangk kulangam kal-kalan thanang. Puth nungkway nil God.an ngurp keꞌam anman thathanam nunang-a, nilan yaan thonakam thawan keꞌ nil kaangk wunan nunganta. An yaꞌa! Ngamp pam wanchantan nath kaangk keꞌan wunanamp thant-a, an ngamp God.antan kaangk keꞌam wunanamp nungant puth-puthangk yaꞌ anman.  
\v 21 In puth kan-kanam wik thayan nil Jesus.an thaw ngampara: than weeꞌ-weeꞌanangana kaangk wunayn God.antan-a, an than Christians wiy al-alantan kaangk wunayn thant thampanga.   
\c 5  
\s1 Ngamp Oony Wayan Thaamp-Thaampāmp Nunang Anmana  
\p
\v 1 Than weeꞌ-weeꞌanangana Jesus.an ngaantam-ngeeyiythan nunanga nil pam anmana nil God.angan keenkanaman kaaꞌngak nunang kuchowan ngampar-a, nil God.angana puk nungantam waaꞌow thananga. Aꞌ than weeꞌ-weeꞌanangan kaangk wuntan piip God.antan-a, yimanang than pam wanch nungantam al-alantan thamana kaangk wunayn thanta.  
\v 2 Ngamp nathwey God.antan kaangk paththam wunimp-a, puth wik nungantaman keꞌ-ngoongkam ngeey-ngeeyimp-a, yaa, an ngamp meeꞌmiy ngamparakam ngampan kan-kanam pam wanch nungantam al-alantan kaangk wun-wunanamp thanta.  
\v 3 Ngamp puth God.antan kaangk wunimp-a, yaa, ngampaniya wik nungantaman keꞌ-ngoongkam anman ngeey-ngeeyāmpa! Wik nungantam anangan thayan keꞌam wunan ngampar yaꞌa, wik min paththam anman wunan ngampar.  
\v 4 Puth ngamp weeꞌ-weeꞌanangan puk God.antaman iiy-iiyanamp-a, ngamp oony way piꞌanan thaamp-thaampanamp nunanga, wik keꞌ ngeey-ngeeyanamp nunang, yaꞌa. Ngamp puth Jesus Christ.an ngangkangan piꞌ-piꞌanamp nunanga, nilaniy-a, maꞌ-aath-aathan ngampanga yipam oony way piꞌanan thaamp-thaampāmp nunanga, wik keꞌ yipam ngeeyāmp nungantamana.  
\v 5 Nil puth weeꞌangam nath um thaampowan oony way piꞌanan e? Yaꞌa! Ngamp-ngampaman keꞌ thaampimpana! Puth ngamp weeꞌ-weeꞌanangan Jesus.an ngaantam-ngeeyāmp nunang nilan nhengk God.antaman-a, an ngamp ep um thaamp-thaampāmp nunang, oony way piꞌananiya.   
\s1 Nil Jesus.an Kan-Kanam Nhengk God.antaman Uk Ngampar  
\p
\v 6 Nil Jesus Christ.ana aak iikanakan uk, aꞌ nil John.angana kuchek ngakangan kuungk nunanga, puth inan thonakam yaꞌa, anpalan-a, than mulathin nunanga aꞌ nil chaapar nungantaman theetath way ngamparamakana. Nil Ngeen-Wiy Min God.antamangana waaꞌ-waaꞌan ngampar wik anangan Jesus.antamana kan-kanamana. Nil Ngeen-Wiy anana wik keꞌam uuy-uuyamana, yaꞌa, nil kan-kanam anman thaw-thawana.  
\v 7-8 Koꞌalam il-ilangan-a, Ngeen-Wiy God.antamangan-a, puth ngakangan kootra kuungkan-a, puth chaaparan-a, al-alangan kan-kanam meen-meenathantan ngampara Jesus.an nhengk nungantam God.antamana.  
\v 9 Ngamp wik ngeey-ngeeyanamp thananga, pam wanchangan waaꞌ-waaꞌantan ngampara, puth wik nil God.angan waaꞌ-waaꞌan ngampar-a, an min-minam ngeeyāmp paththama, nil puth pam piꞌan paththam, nilaniy-a, kan-kanam waaꞌan ngampar nhengk nungantam alantamana.  
\v 10 Than weeꞌ-weeꞌanangan nhengk God.antaman ngaantam-ngeeyayn nunang-a, an than Christ.ana ngangkangan kan-kanam piꞌ-piꞌantan nunang nilan nhengk God.antaman. Than weeꞌ-weeꞌanangan God.an keꞌaman ngaantam-ngeey-ngeeyantan nunang-a, an than yaan thaw-thawantan thanttakamana keꞌ Jesus.an nhengk God.antaman keꞌ yaꞌana, nil God.ana keꞌ wik yimanangan uuy-uuyaman, puth yaꞌa, than pam anangaman yaan wik uuy-uuyamantan than-thanttakama puth thanan kan-kanam keꞌam ngaantam-ngeey-ngeeyantan wik nil God.angan waaꞌ kan-kanam nhengk nungantam alantamana.   
\p
\v 11 Nil God.angana wik inangan waaꞌa: nil ngangk ngulakam ngul theeꞌow ngampar, nil Jesus.angan maꞌ nungantangan piꞌ-piꞌow ngampang, ngampaniy-a, nungantangan ngulakam wunāmpa, aak umpuyangama, puth nil kanam kaaꞌ-piichanath ngampanga.  
\v 12 Ngamp weeꞌ-weeꞌanangan nhengk God.antaman ngangkangaman piꞌ-piꞌanamp nunang-a, an ngamp aak umpuyangam ngul wunāmp God.antangana, puth ngamp weeꞌ-weeꞌanangan keꞌaman nhengk God.antaman ngangkangan piꞌ-piꞌanamp-a, an ngamp aak umpuyangam keꞌ wunāmp God.antangan, yaꞌa.   
\s1 Ngamp Maꞌ God.antang Ngulakam Wunāmpa  
\p
\v 13 Ngay lat inan umpang niiyanta niiy yipam meeꞌmiy iiyān niiy maꞌ God.antangan ngul wunān ngulakamana, niiyan puth nhengk God.antaman ngangkangana piꞌ-piꞌaniy nunanga.  
\v 14 Ngamp nathwey puk God.antam-a, ngamp meeꞌmiy nil kan ngeey-ngeeyan ngampanga, ngamp keꞌ-paal ngangk thay-thayanam thawanamp nunganta. Nil kan-kanam ngeeyan ngampang ngamp ngeenak nathwey thawanamp nunganta, ngampaniya puth wik minakan thawāmpant, keꞌ nil anana wik minan waaꞌ-waaꞌan ngampara.  
\v 15 Ngamp kan-ngul meeꞌmiya, ngamp ngeenak nathan thawāmp nungantwey-a, nilan-a, ngul ngeeyow ngampanga. Ngamp inan thampan meeꞌmiy ngula, ngamp ngeenak nathan thawāmp nungant-a, nilan-a, ngul theeꞌow ngampara.   
\p
\v 16 Niiy nath Christian thonan thathin nunanga wayan yump-yumpan-a, niiyana meeꞌ-wuthanamān nunganta. Anpalan-a, nil God.angan ngul kaaꞌ-piichanathowa aꞌ thayanathowana. Puth pam wanch wiy al-alangan puy-puyam paththam way yump-yumpantana, keꞌ-ngoongkam anmana. Than keꞌ-paal way-wayam iiy-iiyantana, than thanttakama woyan mulakan wak-wakantan, aak way aakanakana. Ngay keꞌ thawing niiyanta meeꞌ-wuthanamān thantana.  
\v 17 Way yotam anangan yump-yumpanamp-a, an way meeꞌ God.antangana! Puth ngamp way anangan wantāmp-a, aꞌ God.ant wampāmp-a, nil keꞌ ngaantam-ngeeyow way ngamparam anpalana.   
\p
\v 18 Ngamp puth meeꞌmiy ngula ngamp weeꞌ-weeꞌanangan puk God.antaman iiy-iiyanamp-a, an ngamp wayan keꞌ yump-yumpāmp, yaꞌa; puth nil nhengk God.antam alangana ep maꞌ-keeꞌ-wunpan ngampara, nil oony way piꞌan alangan keꞌ yipam wayathow ngampang.  
\v 19 Ngamp puth meeꞌmiy ngul ngampaniy-a, puk God.antamana, puth wiy anangan yaꞌa, nil oony way piꞌan alangana maꞌ nungantangan piꞌ-piꞌan thanang, yot anangana.  
\v 20 Ngamp meeꞌmiy ngul nil nhengk God.antamana inpal kenyan uk ngampara, ngamp yipam God.an min-minam ngaantam-ngeey-ngeeyāmp nunanga, puth kan-kanam thiichāmp nunanga, nil thonam anman God kan-kanam paththam, wiy yaꞌa. Yaa, ngamp iniy ngul-a, maꞌ pulantang iiy-iiyanamp, God.antang-a, putha Jesus Christ.antang, nhengk nungantamantanga. Nil inana kan-kanam God paththama. Nilam thonamangan ngangk ngulakaman piꞌ-piꞌow ngampanga.   
\p
\v 21 Puk ngatharam-ang, niiyiya yuk ngeen-wiy keꞌ thaaꞌ-kuumpān thanang, yaꞌa, yuk wayanang al-alantaman niiy kecham iiyāna, keꞌ-ngoongkam anmana! Niiy God thonakam anman ngaantam-ngeey-ngeeyāna! wiy anangan yaꞌa!  
\p Anman kan.  
\p John