\id GAL 
\ide UTF-8
\ide UTF-8
\rem Copyright Information: Creative Commons Attribution-Share Alike 4. 0 License
\h पौलदी गलतीकरांसकी पत्र
\toc1 गलतीकारास मंडळीक पौल राशीनेद पत्र
\toc2 गलती
\toc3 गलती
\mt गलतीकारास मंडळीक पौल राशीनेद पत्र
\is लेखक
\ip प्रेषित पौल इदी पत्ररद लेखक उंडाळ, इदी पहिला मंडळीद सर्वसमावेशक दृष्टीकोन उंड्या. आशिया मायनरला मनाद पहिला मिशनरी प्रवासला मद्दत शेषेकनापहिला, पौलाळ दक्षीण गलतीकरालोंदी मंडळीक पत्र लीवाशा. गलती इदी रोम किंवा करिंथलेका शहर, तर रोमन प्रांत यादीनटल्या बक्कम शहरलु इंगा भक्कम मंडळील उंड्या. गलतीकरांस यवारचंग इदी पत्र शेपीगास उंड्या, आय्यी पौलानदि रुपांतर उंड्या.
\is तारीख इंगा राशिनेद जागा
\ip साधारण इ.स. 48.
\ip पौलाळ कदाचित अंत्युखियातील गलतिकरोर कि पत्र राशीगास उंड्या, येनटीक की इदी वार इल्लूद मूळ आधार उंड्या.
\is प्राप्तकर्ता
\ip गलतीकरोर कि पत्र गलतीदीनटल्या मंडळीद सदेस्योरकि रायदेंग ओची न्या (गलती. 1: 1 - 2).
\is हेतू
\ip इदी पत्रद उद्देश यहुदी मंदीद खोटा सुवार्ता नाकाराशेद, इदी इ सुवार्तेद खऱ्याम अर्थ उंड्या यादीनटल्या इ यहुदी ख्रिस्ती मंदीक इल्ला वाटाश्या कि सुंता इदी उध्दारचंग आवश्यक उंडाद इंगा गलतीकरोर कि वार्दी उध्दारदि वास्तविक आधारदि आठवन शेशी इयाला. स्पष्टपणता वाळ येशुन बारा अनुयायापैकि अधिकारदि स्थापना शेशी इंगा दानद्वारे वाळ सुवार्ता शेपिण्याय सुवार्ताद पूर्तता शेशी प्रतिसाद इच्या. फक्त विश्वासता कृपेताणे मंदी न्यायी उंडार इंगा आत्मविश्वासता वारी कोताद आयुष्य जगाशेद इदी ओकाटे विश्वासद्वारे उंडाद.
\is विषय
\ip ख्रिस्तादीनटल्या स्वातंत्र्य.
\iot रूपरेषा
\io1 1. ओळख — 1: 1-10
\io1 2. मंची बातमी प्रमाणिकरण — 1: 11-2: 21
\io1 3. विश्वासद्वारे समर्थन — 3: 1 - 4: 31
\io1 4. विश्वासदि जगाशेद इंगा स्वातंत्र्य — 5: 1 - 6: 18
\c 1
\s दंडाम
\p
\v 1-2 गलती शहर लोन मंडळीक; मनसला तीकेल किंवा मनसला द्वारा लेद, तर येशु ख्रिस्ततीकेल इंगा यवार वान सचीनेका जिवंत शेशा वाळ परमेश्वर आब्बळ, इन तीकेल आईनेर प्रेशीद पौल, इंतीकेल इंगा ना सोबतील आन्नी बंधूला तीकेल, 
\v 3 द्यावर जो मना आब्बळ इंगा मना प्रभू येशु खिस्त इंतीकेल मिक कृपा इंगा शांती उन्डाला 
\v 4 मना द्यावर आब्बन इच्छातीकेल, इ इपुळी दुष्ट काळकेल मनालनी इळपीदेंग, प्रभू येशु ख्रिस्तळ मना पापलाबद्दल, स्वताक इच्या. 
\v 5 द्यावर आब्बन की युगानयुग गौरव उन्डाला. आमेन.
\s गलतीकरोळ पौलूसदि शेशिंद हिरमोड
\p
\v 6 नाक आश्चर्य वाटास्ताद की, यवार मिक ख्रिस्तान कृपाला निवडा शीर वानतिकेल, इंता लगान, मीर दुसरा मंची बातमी तीकुड फोईणार. 
\v 7 दुसरा इंगोगाय मंची बातमील लेव; पण मिंलान घोटाळाला येशेळी इंगा ख्रीस्ताय मंची बातमी अलग शेशेळडी इच्छा उंडीनेय इल्ला यन्ता जन उंडार. 
\v 8 तर याय मंची बातमी मिम मिक शपतीम दाणकना वेगळा मंची बातमी जर मिम शपतीम किंवा स्वर्ग नुस वचीनेय द्यावर दूत पण शप्या, तरी वाड शापित उन्डाला. 
\v 9 मिम पहिला शपिनाम आल्ले नीन इंगा शेप्ताम की, यवार मिक, येम मीर स्वीकार शेस्तीर दानकना, वेगळा मंची बातमी यवार मिक शेपिंयार वार शापित उन्डाला.
\p
\v 10 नीन इप्पूळ मनस्लाद किंवा नीन द्यावार्दी मन तीपेळदी सुस्तुनान? नीन मन्सलान संतुष्ट शेयदेंद सुस्तुनान येम? नीन इप्पूळ नंतक मनसलान खुश शेस्तुंटान, तर नीन ख्रिस्तान दास लेकुंन तूनटीन.
\s मनशी तीकेल लेद तर येशु ख्रिस्त तीकेल मनाक शिंगार बातमी शिक्कीनाद इल्ला पौल दि शेपकाम
\p
\v 11 येनटीक की, बंधू, नीन मिक शेप्तान की, नीन या मंची बातमीद घोषणा शेस्तीन आदी मनसलु शेप्पीने लेका लेद. 
\v 12 येनटीक की आदि नाक मनसूला तीकेल शिक्काल्या आल्ले आदी नाक यवार शिका पण मत्तालेद; पण येशु ख्रीस्तद प्रगटीकरनता आदी नाक शिक्क्या. 
\v 13 मीर ना, यहुदी धर्मालोन्केल, पहिला वागणूक लेका ऐकाशिनान कि, नीन यला द्यावार मंडळीद संगेम त्रास इच्ची दांदी नाश शेसका उंटीन. 
\v 14 इंगा नीन ना पुर्वजल्दी रीतील बद्दल संगेम जास्त उत्साह उंड्या मा मंदीला ना वय टोर संगेम मंदी कना यहुदी धर्मला नीन मुंदार फोइंटीन.
\p
\v 15 पण या द्यावर नन्नु आम्मा कळपुकेल वेगळा शेश्या इंगा स्वत कृपा ता नन्नु विलचा, वांकी येपूळ शिंगार वाटाश्या की, 
\v 16 स्वता कोळकून ना तीकेल प्रकाट शेईयाला, म्हणजे इंगोगो राष्ट्रला नीन वांदी मंची बातमी घोषणा शेयाला आपुळ नीन यवार पण मंसलाद तीस्कनाले, 
\v 17 इंगा ना पहिला आईनेय प्रेशित्ला तीकुड येरुशलेमकि मिन्दिक फोले, पण नीन लगनाणे अरबस्तान देशुक यल्ली फोतीन इंगा आन्केल दिमिष्कास कि डब्बल वस्तीन.
\p
\v 18 मुंदार, मूळ याडाद नंतर, नीन केफनि भेटादेंग मिन्दिक येरुशलेमकि फोतीन इंगा पंधरा दिवस नीन वान देगारा निलस्तीन ; 
\v 19 गान प्रभू तम्मुड याकोब इंशिवाय नीन इंगोगो प्रेशित्ला लोन्केल दुसरा यवर पण नाक कम्पियाले. 
\v 20 नीन जो मिक लीवास का उंडान, आय्यी सूळना, द्यावर मुंदार, नीन खोटा माटलान. 
\v 21 दान नंतर नीन सिरीया इंगा किलीकीया शहरला वस्तीन 
\v 22 इंगा ख्रिस्तला उंडीनेर, यहुदिया शहरटोर मंडळीक नीन अनोळखी उंटीन. 
\v 23 वारकी येकादेंग इंतेने, वचाका उंडी की, 'पहिला माद त्रास इचेतोळ या विश्वास येनकाक नाश शेयदू वांदी वाळ इप्पुळ सुवारता शपतुणाळ.' 
\v 24 इंगा वार ना बद्दल द्यावार्दी गौरव शेदेंग आंटीर.
\c 2
\s पौलइ फणील यरुशलेमवालेर्की स्वीकार उंड्या
\p
\v 1 नंतर, चौदा वर्षकेल नीन इंगा, बर्णबाबरोबर, येरुशलेम शहरला मिन्दिक फोतीन, नीन नाबरोबर तीतालान पण एका फोतीन. 
\v 2 नाक प्रकटी करण आईन्या लेका नीन फोतीन इंगा याद मंचीद बातमी नीन इंगोगो राष्ट्रला शेप तुंटान, आदी नीन वान मुंदार फेटत्तीन; पण जो विशेष मानास्नेयद उंड्या वारकी ओकोरला मांडास्तीन; लेद तर, नीन विनाकारण फारतान किंवा फारतीन, इल्ला शायद आतुण्या. 
\v 3 पण नाबरोबर उंडीनेळ तीत इड ग्रीक उंड्या आंका, वांकी पण सुंता शेशी तीस्कूनदेंग भाग शेयदेंग दाल्या. 
\v 4 इंगा गुप्तता नोनिक एकोचीनेय खोटा बंधूल कसरोम पण भाग केळपीदेंग दाल्या; वार मंलान गुलाम गिरीला येदेंग, ख्रिस्त येशु न दीतटला याद मोकळीक पना मनाक उंडाद आदी हेराशांदाणक, दोनगा शेशी नोनिक वचीनीर. 
\v 5 मंची बातमीद खरेंम मी तीकुड उन्डाला दानचांग मिम वारणी रवा भी वेळ वार शेतला एयाक होतीम. 
\v 6 तरीपण, यवार विशेष मानास्नेर यवारना उंडीर वार तीकेल (वार येल्लापन उंडदूर दांदी नाक येमी लेद; द्यावर या मंशीद बी पक्षपात शयाड.) येनटीक की यवार विशेष मानासनेर उंडीर वार नाक एमी जास्त इयालेद. 
\v 7 तर उलटा सुंता आईनेर येहुदिलकी मंची बातमी शप्काम यला पत्रस मिंदा इळशिन्या आल्ले सुंता कालेर इंगोगो राष्ट्र मंदीक मंची बातमी शपकाम नामिंदा सोपाशिनेद उंडाद, इदी वार सुशीर. 
\v 8 येनटीक की यवार पत्रस देगारकेल सुंता आईनेर मंदी प्रेशीद पना चाला मत्तीदेंग ताकत पुरामत्या वाळ नाक पण इंगोगो राष्ट्रला वाळ नळपिदेंग ताकत पुरामत्या. 
\v 9 इंगा वाळ नाक इचीनेय कृपाद दान ओळखाशी, याकोब, केफा इंगा योहान इर जो आधर इचेटोर उंडीर वार नाक इंगा बर्णबान मंची शेईता संगती शेश्या, इदी दिनकस्रोम की, मनाम द्यावार फनीला सहभागी उन्डाम इदी सुपियाला इंगा मिम इंगोगो राष्ट्र तीकुड इंगा वार सुंता आईनेर तीकुद फोवाला. 
\v 10 मिम फक्त गरीबोर दी आठवण फेटाला, इल्ला वारदी इच्छा उंड्या; नीन तर आइ माटाल्लाचंग उत्साहित उंटीन.
\s केफाद (पेत्राद) निषेध
\p
\v 11 इंगा दान बाद, केफा अनत्युखीयास वची नेन्का, नीन वान मुंदार वांकी आडाम वस्तीन, येनटीक की वाळ दोषी उंड्या. 
\v 12 येनटीक की याकोबदेगार नुस यंता मंदी वचेळ पहिला वाळ इंगोगो मंदी बरोबर तिनु पण वाळ वचीनेका वाळ सुंता आईनेर मंदीक आद्री वाळ यंकाक आय्यी वेगळा नीलदू. 
\v 13 आपुळ आल्ले दुसरा येहुदील विश्वास फेटेतोर पण वान सोबत ढोंग शेशीर; दानचांग बर्नबापण वार ढोंगता प्रभावित आय्या. 
\v 14 पण नीन येपूळ इदी सुस्तीन की, मंची बातमी खरेंम लेका आदी बरोबर नळाद, आप्पुड नीन आंदार मुंदार नीन केफान आनटीन, “नु स्व:ता यहुदी उंडी नु जर इंगोगो राष्ट्र लेका उंटाव इंगा येहुदील लेका निलवाव, तर यवार इंगोगो राष्ट्र टोर येहुदील लेका वागायला आंका नु वार मिंदा अत्याचार शेस्ताव येम?”
\s नियम शास्त्रद पूर्ण लेनेद
\p
\v 15 मिम जन्म केले यहुदी उंडाम, पापी इंगोगो राष्ट्रटोर लेर. 
\v 16 तरी मनशिल नियमशास्त्रालोणी फनिलता नीतिमान ठहरार तर येशु ख्रिस्तमिंदा विश्वास द्वारा ठहरास्तार, इदी ओळखाशी मिम पण येशुन मिंदा विश्वास फेटतीम; दिनकस्रोम की, विश्वासता मनशी नीतिमान ठहरादेंग वस्ताद, दानचंग मिम येशु ख्रिस्तानमिंदा विश्वास फेटतिम; आंटे मिम ख्रिस्तामिंदा विश्वास्टोर नीतिमान ठरस्ताड, नियमशास्त्रलोणी फनिल शेया रोद, येनटीक की नियम शास्त्रालोणी फनिलता मनशीजातीपैकी यवार पण नीतिमान ठहरार. 
\v 17 पण ख्रिस्तला नीतिमान ठेहरा मत्तीदेंग सुस्तार जर मनामपण पापी काम्पिस्तिं तर ख्रिस्त पापदि सेवक उंडाळ येम? येपुळूच लेद. 
\v 18 येनटीक की नीन जे केढपितान मातीनान नान आदी इंगा बना मत्तुतीन तर नीन स्व:ताण नियमशास्त्र मोडाशेटोळ ठेहेराशान. 
\v 19 येनटीक की नीन नियमशास्त्र तीकेल नियम शास्त्रकोलोनकेल सची फोईनान, दिनकस्रोम की, नीन द्यावर कसरोम जगायाला. 
\v 20 ख्रिस्ताबरोबर क्रूसमिंदा खिळाशिणेळ उंडान इंगा दिन मुंदरा नीन जगास्तान इल्ला लेदत तर ख्रिस्त ना-ना दिन्टला जगास्ताळ इंगा इपूळ ह्रदला जो नाद जगास्काम उंडाद आदी द्यावार कोळकूद विश्वासद्वारे उंडाद. वाळ नामिंदा प्रेम शेश्या इंगा स्वतान ना कसरोम इच्या. 
\v 21 नीन द्यावार्दी कृपा व्यर्थ शेयान येनटीक की जर नीतीमत्व नियमशास्त्रतीकेल उंटे त ख्रीस्तानदी सचकाम विनाकारण आय्या.
\c 3
\s मानशिलाद स्वीकार द्यावार विश्वास मिंदा सेशी, नियामशास्त्रमिंदा लेद
\p
\v 1 अरे बुद्धी लेनेर गलती ओर, क्रूस मिन्दा खिळासणेल येशु ख्रिस्त यवार कनला मुंदार वर्णन शेशी फेटीन्या, आय्यी मिमलान यवार भुला मत्तीर? 
\v 2 नाक नि देगार नुस इंताने समजाशी तीस्कुनेद उंडाद की, मिक जो पवित्र आत्मा शिक्या आदी नियमशास्त्रलोन्केल फनिलता शिक्या की, सुवार्ता ऐकाशी विश्वास फेटीनाम आंका शिक्या? 
\v 3 मीर इंताने कमी बुद्धी टोर उंडार येम? मीर द्यावार आत्माता चालू शेशी नेन्का इप्पूळ शरीरस्वभावता पूर्ण येस्केन देंग सुस्तुणार येम? 
\v 4 मीर इंता दुख सहन शेस्तीर इदी व्यर्थ येम? दिन व्यर्थ आंदाम येम! 
\v 5 दानचांग यवार मिक द्यावार आत्मा पुरामत्तुत्ताळ इंगा मी मधातला चमत्कार शेस्ताल वाळ जो इ आंता शेस्ताळ आय्यी नियमशास्त्रली फनिकेल शेस्तार की, सुवार्ता एकाशी विश्वास फेटतींम आंका आदी वाळ शेस्ताळ?
\p
\v 6 येल्ला अब्राहम द्यावार मिंदा विश्वास फेटीनाळ इंगा आदी नितीमत्व इल्ला मोजास्कामला वच्या. आला इदी आय्या. 
\v 7 दिन मिन्दुकेल मीर समजास्कोंडा की, यवार विश्वास फेटतार वारे अब्राहम गंगोदटोर का. 
\v 8 इंगा द्यावार इंगोगो राष्ट्रटोरनी विश्वास्ता नीतिमान ठेहेरामतुताल इ पहिला ज्ञानकोळोन्ग शास्त्रलेखकोळ, अब्राहम की पहिलाने मंचीबातमी शेप्या की, 'नितीकेल आन्नी राष्ट्रल की आशीर्वाद शिक्की.' 
\v 9 तर नंतर यवार विश्वास फेटतार वारकी विश्वासु अब्राहम संगा आशीर्वाद इच्चीनाड.
\p
\v 10 येनटीक की नियमशास्त्रलोनि फनील मिंदा येण्ता जन अवलंबून उन्डार आंता जन शापला उंडार येनटीक की पवित्र शास्र्ला इल्ला लीवाशी उंडाद की, 'नियमशास्रद पुस्तक ला जो लीवाशी उंडाद आय्यी आन्नी पाळादेंग जो टीकाशी उंडार वाळ शापित उंडाळ.' 
\v 11 नियमशास्त्राटोर यवार पण द्यावार मुंदरा नीतिमान ठेहेरार, इदी उघडासी उंडाद; येनटीक की 'नीतिमान विश्वास ता जगास्ताळ.' 
\v 12 इंगा नियमशास्त्रा तर विश्वासदी लेद पण 'यवार दान फनील लेका शेस्तार वाळ वार लेका जगश्यार.' 
\v 13 मना बद्दल ख्रिस्त शाप आय्या इंगा वाळ मनालनी नियमशास्त्र शापकेल कोंकोनी तीस्कोन्या; इल्ला शास्त्रलेख आटाद 'यवार पण शेटूमिंदा टानगाशिणार वाळ शापित उंडाळ', इल्ला शास्रलेख उंडाद. 
\v 14 दिं-दि उद्देश इल्ला की, अब्राहम कि इचीनेद आशीर्वाद ख्रिस्त येशुन द्वारा इंगोगो राष्ट्रक शिक्काला, म्हणजे मना विश्वास लेका आत्माविषयाला अभिवचन शिक्काला.
\p
\v 15 ताम्मुल इंगा शेल्यालु, नीन इदी व्यवहारीत नजरता माटलाळतान. ओकाटआळदम मनशीद करार सुद्धा वाळ स्थापित शेशी नेका यवार मिटा मत्तार किंवा दान्तल्या भारी निम्पार. 
\v 16 इप्पूळ, यादि वचनलु अब्राहाम इंगा वान बीळलाक इच्चीन्या. वाळ 'बीळलाक' इल्ला जास्त जन बद्दल आनाळ, पण 'नि बीळलाक' इल्ला ओकोन विषयला आंटाळ इंगा वाळ ओकोळे ख्रिस्त उंडाळ. 
\v 17 इंगा, नीन इदी आणटान की, द्यावार आदी करार पहिलाने स्थापासनेका चारशेतीस वर्ष नंतर आईने नियमशास्त्र कोळोन्ग संपुष्टाला वची दानकोळोन्ग अभिवचन रद्द काद. 
\v 18 येनटीक की वतन जर नियमशास्त्रता शिकतात, तर आदी दिन मुन्दार अभिवचन ता काक फोई; पण अब्राहमकी द्यावार आदी कृपाता अभिवचन द्वारा इच्या.
\s नियमशास्त्रद हेतू
\p
\v 19 मग इदी नियम शास्त्र येनटीक? येनटीक की, या वंश क वचन इच्चीन्या वानदी वचकाम आय्यी पर्यंत आय्यी मोळाशेळ कोळोन्ग नियमशास्त्र इच्चीनार; वार मधातलोनटोर शेतला द्यावार दुतलातीकेल नेमाशी वच्या. 
\v 20 मधातलोनटोळ इळ ओगारकना जास्त जन कोळोन्ग उंटाळ; तरीपण द्यावार ओकोळे उंदाड.
\p
\v 21 'तर येम नियमशास्त्र इदी द्यावार वचनाविरुद्ध उंडाद? येपुळूच लेद येनटीक की जेम इद्देंग समर्थ उंडीनेद नियमशास्त्र इदेंग ओचका उंटोन्या तर, नितीमत्व खरेमे नियमशास्त्रता शिकतुन्या. 
\v 22 तरी दान कना, नियमशास्त्रता आंदार पापला कोंडाशी फेट्या, इ उद्देशचंग की, विश्वास फेटेतोरकी येशु ख्रिस्त तोंन विश्वासता याद अभिवचन उंडाद आदी इयाला.
\p
\v 23 पण ख्रीस्तला विश्वास वच्या दान पहिला, इदी जो विश्वास प्रकट आयेळदी उंड्या, वाड वचेकना पहिला मनाम कब्जाला उंनिमटीम मनालनी नियमशास्त्र किंदा इल्ला रखवालीला फेटीनीर. 
\v 24 दिन मिंदीकेल मनाम विश्वास ता नीतिमान ठहराला दानचांग नियमशास्त्र मनालनी ख्रिस्त तीकुळ पोहोचा मत्तेळदी बीळा रक्षक उंड्या. 
\v 25 गान इपूळ, विश्वासता वचकाम आयनाद उंडाद दानचांग मनाम दिन मुंदार बीळारक्षक भरोसाला नीला लेम.
\s विश्वासदि परिणाम.
\p
\v 26 पण मीर आंदार ख्रिस्त येशुन मिंदा विश्वासद्वारा द्यावार कोडकु उंडार. 
\v 27 येनटिक्की ख्रीस्तला मीदीनटल्या येंतामंदीद बाप्तीस्मा आयनाद आंता जन ख्रीस्तन परिधान शेस्तीनार. 
\v 28 येहुदील किंवा ग्रीक, दास किंवा मोकळा लेद, मनशी किंवा आंडी इदी भेदे लेद येनटीक की ख्रिस्त येशुला मीर आंदार ओकोरे उंडार. 
\v 29 इंगा मीर जर ख्रिस्ताटोर उंडार; तर अब्राहाम बीळा इंगा अभिवचन लेका वारीस उंडार.
\c 4
\s ख्रीस्तमिंदा विश्वासद्वारे द्यावर कोळकु शिक्या
\p
\v 1 इप्पूळ नीन आणटान की, वारीस शिंना बीळा उंडाद, आपुळ नंताक वाळ आंदार कना वेदवाड उन्डीगाद पण वारदीनटल्या इंगा दासला एमी फरक लेकुंटाद. 
\v 2 जर आब्बळ ठहरामतीने लेका मुदत लेका वाळ शिक्षकलाद इंगा कारभारी वशला उंटाळ. 
\v 3 इल्ला प्रकार ता मनाम पण बीळलु उंडीनाप्पुड, मनाम जगाला पहिला शिक्षण दासला उंटाम. 
\v 4 गान काळद पूर्णता आय्या आपुळ द्यावार स्वता कोळकून आंपळीच्या; वाळ आंडीदान देगारकेल जन्माश्या, नियमशास्त्र आधीन इल्ला जन्माश्या, 
\v 5 दीनटल्या उद्देश इल्ला उंड्या की, नियमशास्त्र किंदा उंडीनेर नी मोल इच्ची इळपियाला; म्हणजे मनाक कोळकु आयेळदी हक्क शिक्काला. 
\v 6 इंगा मीर कोळकुल उंडार आंका, द्यावार आब्बा-आब्बाड, इल्ला आवाज इच्छा वार, स्वता कोडकु आत्माद मिर नाद अंतकरणला आंपळीची नार; 
\v 7 दानचांग नु इपूळ नुस दास लेव तर कोडकु उंडाव; इंगा कोडकु उंडाव, तर द्यावार द्वारा वारीस पण उंडाव.
\s ख्रिस्तान तीकुडकेल शिकीनेद मोकळीक्ता गमामत्ता रोद
\p
\v 8 इंगा पहिला मीर द्यावार नी ओळखा कुंदुर, आपुळ, यवार स्वभाव ता द्यावार लेद वार दास उंनिंटी; 
\v 9 पण इप्पूळ मीर द्यावार नि ओळखास्ताना किंवा द्यावर मिम्लान ओळखास्ताना मीर आ कमीबळ इंगा बिन इमफानिक लेद प्राथमिक शिक्षणतीकुड इंगा यल्ला वापस फोतार? इंगा वान दासला उणेद इच्छा शेस्तार? 
\v 10 मीर दिनमूल, महिनाल, ऋतू इंगा वर्षल पण पाळास्तार. 
\v 11 मीचंग शेशिनेय कस्टल कदाचित व्यर्थ फोइन्याला, इल्ला नाक मिबद्दल आदर वाटास्ताद.
\p
\v 12 तामुलू इंगा शेल्यालु, नीन मिक विनंती शेस्तान की, मीर ना लेका कांडा, येनटिक्की नीन पण मी लेका उंटीन. मीर नाद एमी वाईट शेयाले. 
\v 13 पहिला मीक मंची बातमी शेपेळदी पहिला घटना नाक ना शारीरिक त्रासलाता शिक्क्या इदी मिक यरका उंडाद. 
\v 14 इंगा ना फईद कमजोरिद मिद परीक्षा आऊताना, मीर तिरस्कार शेइयाले पण ना द्यावार दूतलेका, ख्रिस्त येशु लेका स्वीकार शेश्स्तीर. 
\v 15 तर आपुळदी मिद आशीर्वाद यंदू उंडाद? येनटीक की, नीन मि विषयला साक्ष इस्तान की, शक्य उंटे तर मीर नाक मिय स्वताय कनलु तिशी इस्तुंटीन. 
\v 16 इंगा नीन मिक खरें शपतान दानचांग नीन मी वैरी आतीन येम? 
\v 17 आ मंदी मी विषयाला बेक आंका तरी शिंगार प्रकार ता लेद पण मीर वार विषयला बेक आंका दानचांग वार मिंलान देगारकेल दुराम शेयदेंग सुस्तार. 
\v 18 तर शिंगार शेशे इचांग हमेशा तयार उंडेद इदी शिंगार इंगा नीन मी देगारा प्रत्यक्ष उंडान आपुळे तयार उन्डला इल्ला लेद. 
\v 19 ना मंची बीळलु, मिदीनटल्या ख्रीस्तानदि रूप निर्माण आय्यी पर्यंत नाक मी कोळोन्ग इंगा गर्भवती त्रास आतुनाद. 
\v 20 इ वेळ ला नीन मी संगा उन्टे इंगा आवाज चढा मत्ती माटलाळा वस्ते तर नाक शिंगार वाटास्तुन्या येनटीक की मिविषयला नीन चिंता ला उंडान.
\s रोंड करारलु
\p
\v 21 याय मीर नियमशास्त्र. लेका आदेंग सुस्तार आदी मीर नियमशास्त्र ऐकार येम? इदी नाक शपना. 
\v 22 येनटीक की पवित्र शास्त्रला इल्ला लीवाशिणार की, अब्राहम की इद्दार कोळकुल उंडीर: ओगाळ दासी दान कोडकु इंगा ओगाळ मोकळा आंदी दान तीकेल आयनाद. 
\v 23 गान दासी दान देगारकेल आईनेळ शरीरस्वभाव लेका जन्माशिन्या; तर मोकळा आंडीदान देगार नुस आईनेळ वचनता जन्माश्या. 
\v 24 इ माटळू उदाहरण रुपता समजामत्तू शकास्ताम. आ आंडेर रोंड करारला लेका उंडार ओगाट सीनाय पर्वत मिन्दकेल शेशिनेद इंगा दासीला कोळोन्ग बीळलाक जन्म इचेतोळ करार म्हणजे हागार का. 
\v 25 येनटीक की इदी हागार अरबस्तान लोंदी सिनय पर्वत उंडाद इंगा आदी इप्पूळदी येरुशलेम जोडीद उंडाद. स्वता बीळलासंगा दासला उंडाद. 
\v 26 कोता मिन्दुळ दी यरुशलेम मोकळा उंडाद; इदि मना आंदर आम्मा उंडाद. 
\v 27 पवित्र शास्त्राला इल्ला लीवाशिणार की, “हे गोडूदान, निक बीळलु का कुंडा पण, नु खुश उंड याय निक गर्भ त्रास काव, आय्यी नु खुशी ता जयघोष शे! खुशीता कीरली आन! येनटीक की यवार की मोगुळ उंडाळ वार बीळला पेक्षा, आशा ईडशिनेर बीळलु संगेम उंडार.”
\s जुना करार लोंदी ओकाट उदाहरण
\p
\v 28 इप्पूळ बंधूल, इसहाकलेका मीर अभिवाचान टोर संतती उंडार. 
\v 29 पण आ वेळ ला फईस्वभाव लेका यवार जन्माशिन्या, वाळ जो आत्मा लेका जन्मासने कोळकु लेका त्रास इच्या, आला इप्पूळ पण आतुनाद. 
\v 30 पण शास्त्र लेख येम शप्ताद? 'नु आ दासी दानकी इंगा दान कोळकुक तीसुडू, येनटीक की दासी, दान कोडकु मोकळा आंडीदान कोडकु संगा वारीस काडच.' 
\v 31 तर इंगा, तामुलू इंगा शेल्यालु, मनाम दासिदान बीळलु लेद, पण मोकळा आन्डीदान बीळलू उंडाम.
\c 5
\p
\v 1 इ स्वतंत्र कोळोन्ग ख्रिस्ता मनालनी मोकळा शेश्या दानचांग दानटल्या मीर टीकाशी उंडा इंगा दास पण लेका जुवा किंदा इंगा शिकाक कंडा.
\s मंची बातमी इंगा नियमशास्त्र लोन्केल याद निवडास्तार?
\p
\v 2 सुंडा, नीन पौल मिक इदी शेप्तान की, मीर जर सुंता शेसकोन्तीर आंटे तर मिक ख्रीस्तनदी उपयोग लेद. 
\v 3 येनटीक की सुंता आईने हर वगा-वगा, मंशिक नीन इंगा दटाशी शप्तान की, वाळ पूर्ण नियम शास्त्र पाळादेंग कटीनेळ उंडाळ. 
\v 4 नीयमशास्त्र: गों नीतिमान ठहराशेळ दी इच्छा फेटतार आदी मीर ख्रीस्तान अंतराशी उंडार; मीर कृपा अंतराशी उंडार, 
\v 5 येनटीक की मनाम द्यावार आत्माता, विश्वासता, नितीमत्वद आशा फेटकोन उंडाम. 
\v 6 ख्रिस्त येशूनदीनटला सुंता एमी फनीद लेद इंगा सुंता नकानेद एमी सामर्थ्य उंडाद इल्ला लेद; त प्रेमलेका फनी शेशेळदी विश्वास दानटल्या सामर्थ्य उंदाद. 
\v 7 मीर शिंगार फारका उंटीर ; मीर खरेंम पणाक मान्य का रोद आंका मिक यवाराना अडचण शेशीर? 
\v 8 मिंलान यवार माटलाळ तुणार आ परमेश्वर इदी शिकवन काद, 
\v 9 'रवा ने खमीर आंता फिन्डीदगोळा फुगा मत्तुताद.' 
\v 10 नाक मी बद्दल प्रभूला खात्री उंडाद की, मीर दुसरा विचार शेयार पण मींलान घोटाला एकोचेतोळ मग वाळ येवार पण उंडानीवाळ दंड भोगाश्यार. 
\v 11 इंगा तमुलू इंगा शेल्यालु, नीन जर इंगा सुंताद उपदेस शेस्ते, तर इंगा नाद छळ येनटीक आतुनाद? इंगा आल्ले उंटे तर क्रूसदी अडखन लेकुंतुन्या च. 
\v 12 मी लोंदी ठायी अस्थिरता उत्पन्न शेषेटोर स्वताण फई कोसी वारते बागा आय्यी.
\s स्वातंत्र्यद नियमन प्रेम द्वारा का बेक
\p
\v 13 येनटीक की बंधूल, मिक स्वातंत्र्य कोळोन्ग कुतेशिनार. तरी आ स्वातंत्र्य ला शरीर आकाल टोरकी संधी इया कुंडा. पण प्रेमता एकमेकोरदी सेवा शेईना. 
\v 14 येनटीक की, 'यला स्वतामिंदा आल्ले शेजारील मिंदा प्रेम शेईना.' इदी ओकाटे वचन पाळास्ते पूर्ण नियमशास्त्र पाळा देंग वचीनाद. 
\v 15 पण मीर जर एकमेकोरनी कोरकुतार अन तीनेस काळतार, तर मीर एकमेकोरदी नाश शेइया रोद आंका जपायणडा.
\s पवित्र आत्माद मार्गदर्शन.
\p
\v 16 दानचांग नीन आणतान, आत्मा दावाता नळना, म्हणजे मीर शरिरदि लालच पूर्ण शेयाके फोयार. 
\v 17 येनटीक की शरीरदि लालच द्यावार आत्माविरुद्ध उंडाद इंगा आत्मा शरीर लालचविरुद्ध उंडाद ; इदी परस्पर विरुद्ध उंडाद, दिनकस्रोम येम पण मिद इच्छा उंटाद आदी मीर शेइयारोद. 
\v 18 मीर द्यावार आत्मा प्रेरनाता नळशिनेर उंडार तर मीर नियमशास्त्र अधीन लेर. 
\v 19 इपूळ शरीर फनील उघडा उंडाय इंगा आय्यी इ: व्यभिचार, अमंगलपना, कमजोरी, 
\v 20 मूर्तीपूजा, करणी, वैर, झगडम, इर्शाम कोफाम, दुश्मन, फुट, गट, 
\v 21 जलास्ता, धुंदी, दंगल इंगा इटला लेका इंगा; इटला विषयला नीन यला पहिला शप्पीनिटीन आल्ला इपूळ पहिला शप्तान की, इ माटलू शेशेटोरकि द्यावार राज्यद वतन शिक्का फोई. 
\v 22 पवित्र आत्माद्वारे निष्पन आयेटी फळलु पण उंडाय प्रेम, खुशी, शांती, सहनशीलता, ममता, मंचीलेका, विश्वास पना, 
\v 23 नम्रता संयम इ उंडाय; इटलाविरुद्ध नियम शास्त्र लेद. 
\v 24 यवार ख्रिस्त येशुला उंडार वार शरीर दी भावना इंगा लालचला संगा शरीरस्वभावता क्रूस मिंदा खिळासनेर उंडार.
\p
\v 25 मनाम, जर द्यावार आत्माद सामर्थता जागास्ताम तर मनाम आत्मा प्रेरणाताने नळाला. 
\v 26 मनाम खाली अभिमान फेत्तेटोर, एकमेकोरणी चीड येकाचेटोर इंगा एकमेकोरदी हिरश्या शेशेटोर इल्ला उंडा; रोद.
\c 6
\s व्यवहारकि फनिफडेळदि बोध
\p
\v 1 तमुलू इंगा शेल्यालु, यवरना मनशी ओको गुन्हाला शिक्या, तर मीर जे आत्मिक उंडार आदी वान सौमेताद आत्माता इंगा स्थापित एक्का दांडा; नु स्वता पण परीक्षाला फडारोद आंका स्वता तीकुड लक्ष इ. 
\v 2 मीर एकमेकरदी बोरू, येतना म्हणजे इल्ला ख्रीस्तद नियम पूर्ण शेश्यार. 
\v 3 येनटिक्की मनाम यवार लेकुंटे यवार तरी उंडार इल्ला मानास्ताम, वार स्वतान फसामत्तुतार. 
\v 4 पण आंदार स्वता फनीद परीक्षा शेयाला इंगा, वांकी दुसरोंदी संबंध लेद, पण फक्त मनाला अभिमानला जागा शिक्की. 
\v 5 येनटीक की, प्रत्येकजन स्वताद बोरू येत्ताने बेक.
\p
\v 6 यवार की वचन दी शिक्षण शिक्ताद वाळ शिक्षण इचेटोरकी आन्नी प्रकारी शिंगार पदार्थद भाग इयाला.
\p
\v 7 फसाया कानडा, द्यावार्दी उपहास काक फोई येनटिक्की मनशी येम पण पेरास्ताळ आद्दे पिक वानकी शिक्ताद. 
\v 8 येनटीक की यवार मना शरीर कोळोन्ग पेरास्ताळ वांकी शरीर तीकेल नाशदी पीक शिक्ताद, पण यवार द्यावार आत्मा कोळोन्ग पेरास्तार वानकी आत्मातीकेल सर्वकाळदी जीवनदी पिक शिक्ताद. 
\v 9 इंगा मंचीद शेशेळदी मनाम कंटाळ शेयारोद; येनटिक्की मनाम निराश का रोद, तर ठहरासने वेळेला कोयाला. 
\v 10 येनटिक्की मनाक संधी उंटे आले मनाम आंदारदी शिंगार शेयाला इंगा विशेषतः विश्वासता वगा इलुटोर ओकातळा वचीनेर विश्वास फेटेतोरदी शिंगर शेयाला.
\s संपास्काम
\p
\v 11 सूडना, यंता फेदाद अक्षरला, नीन मिक स्वता: शेईतोंन लीवास्तुनान. 
\v 12 यंता शारीरिक माटालदी शहाणपणा मीरवादेंग सुस्तार आंता वारदी ख्रीस्तद क्रूस कोळोन्ग वारदी छळ का रोद दानचांग मींलान सुंता शेयदेंग भाग केळपुतार; 
\v 13 येनटीक की यवार्दी सुंता आयनाद वार स्वत: त नियमशास्त्र पाळायार पण मी शरीर दा गर्व शयला, दानचांग, मिद सुंता काला इल्ला वारदी इच्छा फेटतार. 
\v 14 मना प्रभू येशु ख्रिस्त इनदी क्रूस अभिमानशिवाय याद पण अभिमान शेस्काम ना देगारकेल दुराम उंडाला पण यवार द्वारा दुन्याम नाक शिक्या इंगा नीन जगनी क्रूस मिंदा खिळाशीनान. 
\v 15 येनटिक्की सुंता आईदेंग किंवा सुंता का कुंटे एमी लेद, तर कोत्ताद शुरुवात इदे येम आदी का. 
\v 16 इंगा यवार इ नियमता नळस्तार इल्ला आंदार मींदा इंगा द्यावार इस्राइल मिंदा शांती इंगा मया उंडाला.
\p
\v 17 इपूड नुस यवार नाक त्रास इया रोद, एनटिक्की नीन स्वता शरीर मिंदा येशुन निशानलू धारण शेशिना.
\p
\v 18 'तामुल इंगा शाल्यालू, मना प्रभू येशु ख्रीस्तद कृपा मी बरोबर उंडाला. आमेन.