\id JON - Kaninuwa 
\h Yona 
\toc1 Yona 
\toc2 Yona 
\toc3 Yona 
\mt1 Yona  
\is1 Givimayeta  
\ip Nofe nufunufunama kana matakawa o vitana Guyau namoḡa matatafusi i nuwagabubuwisiya, muka naki fiyao Isineniḡa. Guyau Yona i weniya tanake yana tomatakawa be ina niya Asainiya fafani nenei ebe aviyaonana Ninive menana nakasinei si fakwafakwa ina iyavisiya yasi fufuna goyosi sina tenisiya atu Guyau sina vifotuwiya. Taki nofemaise sina fufuniya, muka ina vimatadawaneisi atu ina sawanuwagabubuwisiya.  
\io1 Yona kana bwau keta yana adibudibutoyoḡa. (1:1-17)  
\io1 Yona yana ugevina keta kana ketoyau. (2:1-10)  
\io1 Yona Guyau yana matakawa i numamaniya Ninive nenei. (3:1-10)  
\io1 Guyau yana sineganigani Ninive nenei. (4:1-11)  
\c 1  
\s1 Yona Yave Nenei I Dibwana  
\m
\v 1  \x - \xo 1:1 \xt 2 Tufomu 14:25\x*Tova tamokaḡa Yave Yona Amitai natuna i iyaviya i bwaduwa,  
\v 2 “Ku misini ku nai Ninive menana nakasina na kana wava nenei ebe kuna matakawisiya kuna bwaduwa, ‘Kwa go'yona nakatamokena,’ uḡuna namoḡasima yasi fufunagoyo o kana sanamana nenekuwai.”   
\p
\v 3 Atu Yona i misiniya keta Yave i dibwaniya, muka ita nai Ninive. I niya Yofa nokomai waka i nisaiya i niniya Tasisi. Waka i fatiya keta i toḡa ebe Yave ina dibwaniya ina niya Tasisi kedawanauwai.   
\p
\v 4 Eatu Yave fonimana fifiwanina i gikikinomaniya gibowai, keta wanifeto i nakatamoka waka tova kabesona be ina nuyavayavaniya.  
\v 5 Toviwakasefusefu si matuta keta tamokatamokaḡa yasi guyau nenesiyai si bwedi-kawavitata kasi ovivita fasinei. Eyo waka kana nogonogo si tewesobusobuwina be waka ina kanakasiya.  
\p Atu noko tovanama nenei Yona waniya i sobuwa waka sinenei i kenofana keta i kenonuwataunuwa.  
\v 6 Tonimunikuta nokomai i nisaiya keta i iyaviya i bwaduwa, “Ava uḡuna ku banubanukaokaoḡo! Ku misini be ya guyau nenei ku kawanunuku kata ovivita fasinei. Kamo ina kitasineganiganiita keta yawasita ina ofafafiya.”   
\p
\v 7 Toviwakasefusefu tututausi si vikatonitoniya si bwaduwa, “Aitevana tana vinoiya? Yamasi daisi nenei ta vikaneeneiya be ta kitai aitevana o dauna nofe nenei i teneita.” Tovanama daisi nenei si vikaneeneiya, Yona kana wava i kikinomana.  
\v 8 Eketa si iyaviya si bwaduwa, “Yo ku iyaveiki. Dauna nofe fasinei aitevana tana vinoiya? Avamasi ya mudadava? Kwaḡa avi fafani? Kwaḡa avi kunuma?”   
\p
\v 9 Yona i iyavisiya i bwaduwa, “Iyau tene Ibeniu. Yave nenei a kodukoduwa. Tanake abama kana Guyau, fwayafwaya keta gibo i fufunisiya.”   
\p
\v 10 Yona i iyavisiya vitana tanake o Yave nenei i dibwadibwana. Toviwakasefusefu si matutamoka keta si iyaviya si bwaduwa, “Ava o nofe ku fufuniya?”  
\v 11 Wanifeto i nakatadewadewa keta toviwakasefusefu si vikokoniya si bwaduwa, “Avamasi kata fufuniya neneweu be wanifeto ita katanai?”   
\p
\v 12 Yona i iyavisiya i bwaduwa, “Kwa uniku be kwa tewesobuweiku gibowai ebe ina numanowa. A sanamaniya iyau yaku goyonai wanifeto nofe i givikavinita.”   
\p
\v 13 Eatu toviwakasefusefu si oimanimaniniya be waka sita sobuwiya kafakainei, atu muka kasi fata uḡuna wanifeto i nakatamataina.  
\v 14 Eketa Yave nenei si bwedi-kawavitata si bwaduwa, “Yave yo, muka kuta vimatadawaneiki mate nenei namoḡa nofe yawasina kana kidaba fasinei. Muka kuta vinoiki namoḡakaoḡona kana nuvimate fasinei. Yave yo, iba matatafuna nofe o tauḡu ya nuwanuwai ku gikikinomaniya.”   
\p
\v 15 Eyo Yona si uniya keta si tewesobuwiya gibowai. Muka mwanenena gibo i numanowa.  
\v 16 Nofe nenei toviwakasefusefu Yave si matutiya venemokena keta si vibwanaoseya nenei keta yota si bwadudabadaba vitana fasinei sina bunanigeya.   
\p
\v 17  \x - \xo 1:17 \xt Madiu 12:40\x*Yave yana visime nenei, iyana nakasina Yona i tononiya eketa iyana manawanei Yona i fakwafakwa kuyadayada tonusi keta nuwabuna tonusi.   
\c 2  
\s1 Yona Yana Kawanunuku  
\m
\v 1 Iyana manawanei Yona i kawanunukuwa yana Guyau Yave nenei i bwaduwa,   
\b  
\q1
\v 2 “Yave yo, kaku dauna nakasina sinenei a bwauwa neneweu  
\q2 eketa ku vinowanikuwa.  
\q1 Matematesi yasi kabaḡa sinenemokenei ovivita fasinei a bwediya  
\q2 keta ku nowanikuwa.   
\q1
\v 3 Katudomu nenei ku tewesobuwikuwa  
\q2 eketa a gavivina ogodibuwai.  
\q1 Nokomai gibo i toḡafifinikuwa  
\q2 keta ka yoyo kitagoyosi matatafusi si nutautaunikuwa.   
\q1
\v 4 Eyo a bwaduwa, ‘Kwaḡa ku kitateweikuwa,  
\q2 eatu ya Numa Kodukodu tafutafuna ana kita-savaviniya.’   
\b  
\q1
\v 5 Gibo i nutautaunikuwa keta i visubanikuwa,  
\q2 ogodibu i tewefifinikuwa,  
\q2 keta debabouku dodomu nenei i sumiya.   
\q1
\v 6 Koya kikwanakwanamisi venemokena nenesiyai a kenogamomona,  
\q2 fwayafwaya kasi kawa dawadawanafota-vaḡasisi nenesiyai.  
\q1 Atu kwaḡa o Yave yaku Guyau,  
\q2 ogodibu sinenei ku sinanakasikuwa na yawasiku.   
\q1
\v 7 Tovanama a kamukonikuwa yawasiku i kakakaviya,  
\q2 Yave a tukuwa.  
\q1 A kawanunukuwa keta  
\q2 ya Numa Kodukodu tafutafuna nenei ku nowanikuwa.   
\q1
\v 8 Aviyaonana kifukifufuna nenesiyai si kodukoduwa,  
\q2 kasi nuwagabubu fakwafakwa-vaḡasina neneweu si vikwauteweiya.   
\q1
\v 9 Atu iyau o ana osedavadava yota ana vibwanaoseya neneweu.  
\q2 Eketa yaku bwadudabadaba ana fufuniya neneweu.  
\q2 Gifafafana o kwaḡa Yaveḡa neneweu!”   
\b  
\p
\v 10 Eketa Yave iyana i visimeiya keta Yona i kanasiwaiya numagamai.   
\c 3  
\s1 Yona I Niya Ninive  
\m
\v 1 Yave yota Yona i iyave-savaviniya i bwaduwa,  
\v 2 “Ku misini ku nai Ninive menana nakasina na kana wava nenei ebe yaku matakawa a veniwa ku numamanei namoḡa nenesiyai.”   
\p
\v 3 Yona Yave fonana i muniiya keta i niya Ninive. Menananama o nakatamokena eketa taki tamo aitevana menaninama ina vaonosiya, nao kuyadayada tonusi muniyai yo ina nusafuya.  
\v 4  \x - \xo 3:4 \xt Madiu 12:41, Nuke 11:32\x*Yona i kanasuna menana nakasina sinenei keta na kuyadayadanama i vavaonota nenei atu i numamana i bwaduwa, “Kuyadayada 40 muninei Guyau Ninive ina nuyakweyakweniya.”  
\v 5 Ninive namoisi Guyau fonana si vitumaḡaniya. Na fasinei si vinuwadadana keta matatafusi si vikokowana, na kasi wava keta muka na kasi wava. Keta yota nuya yomuyomu utuutusiyai kikifufunisi si kotonisiya be ina visawavenena vitana yasi fufunagoyo nenesiyai naki si ugevinisiya.   
\p
\v 6 Tovanama Ninive tufomu i biganowana, kana kwabudoga i teweiya keta tufomu kanibubuna i visaniniisiya atu nuya yomuyomu utuutusiyai kikifufunisi i kotoniya eketa kausibiyai i nuvitoiya.  
\v 7 Yana visime si otamatamaniya Ninive namoḡa kana matatafu nenesiyai. I bwaduwa,  
\b  
\mi “Visime nofe o iyau yami tufomu keta yaku tovisime nukusi nenekiyai.  
\mi Namoḡa matatafumi eketa yami yomuyomu nakanakasisi be musumususi nukusi muka tamo aviyavana kwana kaniya o kwana yumiya.  
\v 8 Atu namoḡa matatafumi nuya yomuyomu utuutusiyai kikifufunisi kwana kikotonina. Naki maise yota nuyasima yomuyomu matatafusi etasiyai kwana kitewekabwanina. Matatafumi kwana kawanunuku-manimaniniya Guyau nenei eketa kwana ugevinimiya yami fufunagoyo be yami givikuvakuvavana namoḡa nenesiyai.  
\v 9 Muka tata sanamanei kamo Guyau yana nuwanuwa ina kaviniya keta yana kayokuḡa ina kakaviya be muka tana mate.”   
\b  
\p
\v 10 Tovanama Guyau i kitisiya ibasima si fufunisiya keta yasi fufunagoyo nenesiyai si ugevinisiya, yana nuwanuwa i kaviniya eketa muka nuyakweyakwena ita nemiyei nenesiyai avana i bwaduwiya ita fufuniya maise.   
\c 4  
\s1 Yona Yana Kayokuḡa Yave Yana Sineganigani Fasinei  
\m
\v 1 Atu Yona o nuwatana i dauna nakasina yota i kayokuḡa nofe ibanama fasinei.  
\v 2  \x - \xo 4:2 \xt Yauna 34:6\x*Eketa i kawanunukuwa i bwaduwa, “Yave yo, tovanama a fakwafakwa yaku fafaniyai a bwaduwa vitana nofemaise ina kikinomana, na fasinei a anuvanuva be ata dibwana ata niya Tasisi. Uḡuna a sanamaniya kwaḡa o Guyau toomukumukutana keta tosineganigani, ya nuwagoyo muka ita vevenudibwana eatu ya nuwagabubu fakwafakwa-vaḡasina nenei namoḡa muka kuna vimatadawaneisi.  
\v 3  \x - \xo 4:3 \xt 1 Tufomu 19:4\x*Nofe yaku uḡunanama fasinei muka nuwanuwaku ana fakwa. Yave yo, naki mate dewadewamokena nenekuwai yo ana fakwa na yawasiku. Na fasinei yawasiku o ku viteweyei.”   
\p
\v 4 Atu Yave i nufata i bwaduwa, “Ava uḡuna yo nofe ibanama fasinei kuna nuwagoyo!”   
\p
\v 5 Yona menana nakasinei i kikinomana keta i niya gagasa kuweyaina kweta i yoniya tauna fasinei eketa sifunei i nuvitoiya, eatu i kitakitanufota be ina kitiya avamasi ina kikinomana Ninive nenei.  
\v 6 Eyo Yave Guyau kisisiku na dadana nokomai i givitafwiya. I tafwa i vaneya keta kikwakunei Yona i vikikwakuya ebe muka inaina nakasina ina nutoḡoniya. Eketa Yona i sebobowa nakasina kisisikunama fasinei.   
\p
\v 7 Atu kuyadayada venuwanei nuwabunimokeyai, Guyau mwatamwata i visimeiya keta kisisikunama tofwana i kutiya eketa i wenonuya.  
\v 8 Tovanama vanavana i vaneya, Guyau fonimana inainana gagasei i gikikinomaniya keta i siveya. Vanavana Yona debabouna i guwaniya eketa kabegomokena ita sasana. I yawikosiya nuwanuwana be ita mateya eketa i bwaduwa, “Naki mate dewadewamokena nenekuwai yo ana fakwa na yawasiku.”   
\p
\v 9 Atu Guyau Yona i iyaviya i bwaduwa, “O namaise kwaḡa ka nufota kisisikunama yana wenono fasinei kuna nuwagoyo!”  
\p I nufata i bwaduwa, “Ika, a kayokuḡamataiya kaku nufota be ana mateya!”   
\p
\v 10 Atu Yave i bwaduwa, “I tafwa keta kuyadayada kana vinuwa nenei i mateya. Atu kwaḡa muka kuta kitavikaviniya o kuta givitafwai ebe yo kuna sineganiganiyei.  
\v 11 Atu Ninive menana nakasina nenei namoḡa kasi yagwana 120,000 na kana tufo aviyaonana nokomai si fakwafakwa muka fufuna dewadewana keta goyona sita kitanisaḡai, maise yota yomuyomu yagwanisi. Na fasinei kaku nufota be menananama nakatamokena ana sineganiganiiya!”