\id EPH  
\h EFESO 
\toc1 Folo yana leta EFESO tovetumagana agaidiya 
\toc2 EFESO 
\mt1 Folo yana leta EFESO tovetumagana agaidiya  
\ip Folo Loma deliya gimiyami tu leta fowa giꞋetoladidi, higa tovetumagana adi yoꞋo Efeso Filifai Kolosi agaidiya kadu saꞋeyana bana Filimoni againe. Hida miEfeso yadi leta giꞋetoladina be higa nagona miEfeso hinahawana tu muliya ekelesiya melala tulina tulina agaidiya leta ginanuwaliliuga.  
\ip Efeso melala kikaiwabuna Esiya ana fafaliya. MoyaꞋaidi lukimokimone againe hihawahege-moꞋedi, ada yadi viviluwa kwamayoku Atemisa, ana egana velugana Daiyana, yadi manuwa-tafalolo lakahi-moꞋena gavavewaga Efeso againe gidauda. (Afositolo 19:27)  
\ip Folo yana lumamala-waliliuga anavelu againe Efeso againe sabati saꞋeyana miYuda gilumamaledi. (Afositolo 18:18-21) Tu yana lumamala-waliliuga anaveto againe Efeso againe gimiyami givehavehawala malamala tohiye. (Afositolo 19)  
\ip MiEfeso yoꞋo tulidiyao kalivai-dina tu kadu miYuda tufoidi medede againe himiyami. Ada hida leta ana nuwanuwa lakahina ma Keliso miYuda kadu yoꞋo tulidiyao giꞋivesaꞋeyadi, higa tova adamoya ide gaveyao Keliso buye kaveꞋatutamoꞋaida medema ada yoꞋo saꞋeyana. Folo ekelesiya gaitoma tohiye agaidiya giluvefosedi, higa ide Keliso wowona tu Bana uꞋuda, kadu ide yana manuwa-moꞋena tu Bana manuwai-nadi ana holiliꞋabi, kadu ide vaita vavinena amine tu Bana moganeda. Leta dobona hidede amine.  
\io1 Lusiule. 1:1-2  
\io1 Yaubada yana nuwadoga kadu Keliso be ana tovetumagana yadi veꞋatutamoꞋaina faꞋina. 1:3-3:21  
\io1 Tovetumagana yadi nuwanuwa saꞋeyana hinamiyami. 4:1-16  
\io1 Dewa uyuꞋuyuyuna hinavenikohiyena. 4:17-5:20  
\io1 BonaꞋabi veꞋahawahawahega adi yoꞋo hinagediya gilubodadi. Kaliva wavavinena 5:21-23 WeꞋoweꞋo 6:1-14 Agetoga 6:5-10  
\io1 Keliso yana faiwaleya Setani ahenao hinalugaviyadi. 6:11-20  
\io1 Lukafoi. 6:21-24  
\c 1  
\p
\v 1 Yo siule tobohiyakweyao moyaꞋaimi Efeso againe. Iya Folo Yaubada givegideku be Yesu Keliso yana kabu gavaina, higa yana afositolo adi maka giveleku. Omi Yaubada yana yoꞋo mahamahalimiyao Efeso againe yami leta gaꞋetoladina be wanaꞋitana. Omi higa Yaubada yana kaliva yana vevine mahamahalimiyao kadu Yesu Keliso againe wahawahegemi be wamiyamiyaveꞋavina.  
\v 2 Yaubada Tamada kadu Kaiwabu Yesu Keliso hinanuwadogemi kadu aseꞋasemi hinakiveniwalovina. \x - \xo 1:2 \xt Af 18:19-21, 19:1-40, 20:17-38\x*   
\s1 Yaubada yana vevai ide Keliso buye kaveꞋatutamoꞋaida-ma  
\s1 faꞋideya.  
\p
\v 3 BanaꞋe yada Kaiwabu Yesu Keliso yana Yaubada kadu Tamana amanadi kanahawadavadavana. FaꞋina lobama ana lokolokofou moyaꞋaina aluꞋaluwada yana miya hagihagina faꞋina gihawahegena be ide Keliso buye kaveꞋatutamoꞋaida-ma ginuwadogeda. Yaubada hidede amine ginuwadogeda faꞋina kanadavadavana.  
\v 4-5 Boi tuwai-lokalokana aimo babi keke gidabubuni ana toveya, Yaubada ide gaveyao Keliso buye kaveꞋatutamoꞋaida-ma ahe giluwafada be higa mahamahalideyao kadu keke ada wavita Bana matane kanamiyami. Ada nuwakabubu faꞋina tuwai-moꞋena givegide-vagahida be Yesu Keliso yana ihagihagi againe ide Bana natuneyao amine ginafayayeda. Bana Tauna yana inuba hagihagina faꞋina, au hidede amine givegide-vagahida be higa ginahawavenatuneda.  
\v 6 Mena yana nuwadoga lakahi-moꞋena againe ide Bana NatuꞋaseꞋasena buye kaveꞋatutamoꞋaida-ma ginuwadogeda be higa Bana ana egana kanakilakahina kanagayo, “Ho Yaubada, ya nuwadoga keke kanawona!”   
\p
\v 7-8 Tu ide Keliso buye kaveꞋatutamoꞋaida-ma ada aiyauga kanuhagana. Yada dewa koyona faꞋina yogoyogonideyao kamiyami tu Keliso dayagine gitutuvehobuda, higa yada koyona ana laufata Bana giseni tu Yaubada yada koyonai-dina giyawelidi. Mena ada tutuvehobu ma yana nuwadoga lakahina ana iyaꞋiyaya, ada au yana nuwadoga ide agaideya givetalaiyena-ma gavatubuga! Hidede amine ginuwadoge-moꞋeda be nuwahuya tulina tulina kadu Yaubada ana halamana againe kawahivemavemauga.  
\v 9 Boi tuwai-lokalokana Yaubada Tauna nuwahinagene ginuwanuwa be givevai, ada mena yana nuwahinage boi sevasevauyana ma ide agaideya gihawavemogatalena. Bana Tauna yana inuba hagihagina againe Keliso faꞋina givevai.  
\v 10 Ada yana vevai hidede amine. Yana aibubuna matatabuna tomiyalobama kadu tomiyababi ginavagaꞋauhida-yo kanavesaꞋeya be uꞋuda saꞋeyana, higa Keliso. Ada gaitoma moyaꞋaina adi aituha hinaluyabuna be tova gilubodana-ma ginalakayemu amine, Yaubada gaitoma moyaꞋaina ana vesaꞋeya Keliso dibune faꞋina gavaimi givehimeya, mededemi ginafaisewa. \x - \xo 1:10 \xt Yo 15:16, 2Te 2:13, Ef 5:27 \xt Ef 2:7\x*   
\s1 Yaubada AluꞋaluwa Mahalina againe gisetagoda.  
\p
\v 11 KaduꞋe, Yaubada ime Keliso buye aveꞋatutamoꞋaima-ma yana lokolokofou higa yana yoꞋo faꞋina giluwafama. E, boi tuwai-moꞋena yana vevai amine ime yana lokolokofou faꞋina givegide-vagahima. BanaꞋe gaitoma moyaꞋaina givehimeyedi, ada Tauna yana inuba kadu yana vevai amine hilakayemu.  
\v 12 Ada au yana inuba kadu yana vevai amine givegide-vagahima be Yaubada yana kikaiwabu yama dewa hagihagina againe anayemaunena be kaliva hinaꞋitadavadavana, ime Yaubada yana Tovegida Keliso yana hobuꞋela faꞋina yama wavetumagana amaduvebutu alulauboda kalivai-mana.  
\v 13 Kadu omiꞋiyao meda anafaiweya laumamala Yaubada yana nuwanuwa velemoꞋena faꞋina, higa ami kibababala ana VenuwaꞋata Yamumuna wanogalini-yo Keliso wavetumaganena. Keliso againe wavetumagana be Yaubada AluꞋaluwa Mahalina againe gikibwami higa AluꞋaluwana giꞋiveninisena be givemagami, boi tuwaina giwonadabadaba vaita yana yoꞋogaga agaidiya ginahawahegena amine.  
\v 14 Bana AluꞋaluwa Mahalina ma vaita Yaubada yana kibwa ide agaideya amine, kadu kaliva kwamayoku gisetagona amine Yaubada AluꞋaluwa Mahalina nuwahinagedeya gisena be gisetagoda, higa vaita gavaimi yana lokolokofou moyaꞋaina ada duꞋu faꞋina giwonadabadaba, mededemi aimo ide agaideya ginasevefofona. AluꞋaluwa Mahalina againe gisetagoda be higa aimo ide Tauna yana yoꞋogaga ada tutuvehobu ginaluyabuni-yo ada aiyauga-vagata kanavai-Ꞌowona. Hidede amine Yaubada AluꞋaluwa Mahalina againe gikibwada, kadu aimo ada tutuvehobu faꞋina gisetagoda be higa yana kikaiwabu kaliva hinaꞋitadavadavana. \x - \xo 1:14 \xt Ef 4:30 \xt 2Ko 1:22\x*   
\s1 Folo giveꞋoꞋola be Keliso yana kikaiwabu  
\s1 hinahalamane-hagihagiyena.  
\p
\v 15-16 Tu mena Yaubada yana nuwadoga lakahina yana yoꞋogaga agaideya faꞋina, tova moyaꞋaina Yaubada againe gavesiule omi faꞋimiya. Boi nagona yami vetumagana Kaiwabu Yesu againe kadu yami nuwanuwa hawahawahegana tovetumagana moyaꞋaidi faꞋidiya mena valeyami gamidinogalina againe, gavebutu omi faꞋimiya gavesivesiule kadu keke gadaꞋilova, au yaku veꞋoꞋola againe tova moyaꞋaina ami egana gayakayakahina.  
\v 17 Tova moyaꞋaina gaveꞋoveꞋoꞋola be yada Kaiwabu Yesu Keliso yana Yaubada, higa Tamada Tokaiwabu-moꞋa, tagami ginakifolefolena. GaveꞋoveꞋoꞋola be AluꞋaluwa Mahalina againe tagami ginakifolefolena kadu nuwami ginakiyauna be Yaubada ana halamana agaimiya ginakabu-faꞋila.  
\v 18-19 Kadu gaveꞋoꞋola be matami ginakivemahalina be higa Yaubada yana nuwanuwa omi faꞋimiya wanahalamane-hagihagiyena. Yana nuwanuwa hidede amine. SaꞋeyana wanahalamanena ma Yaubada givegidemi be aimo omi faꞋimiya gavaimi yamuyamumu-Ꞌowogina ginaga-ma faꞋina walulauboda. Kadu saꞋeyana ma Yaubada gaveyao moyaꞋaida yana kaliva mahamahalideyao, medema agaideya yana lokolokofou moyaꞋaina ada duꞋu faꞋina giwonadabadaba, ada mena duꞋu-nadi ana kikaiwabu gavatubuga! Kadu Yaubada yana faiwala lakahina ide tovetumagana agaideya keke tamo gavadi againe kanahawaluveluveni. Mena yana faiwala lakahi-moꞋena, Keliso yana mididi-havagi againe giyemaunena ana tubuga amine, meda ide tovetumagana agaideya giyemayemaunena.   
\p
\v 20 E, Yaubada gifaiwala-moꞋa be Keliso alikeya gisivemididina, Tauna iꞋatagine lobameya givehiyotona.  
\v 21 Wese lobama getane-moꞋane givetoga be gikaiwabu-moꞋa. E, tokikaiwabu kadu tovehimeya kadu tofaiwala kadu kauveya tulina tulina gikaiwabuhege-moꞋedi. Kadu Bana ana egana lakahi-moꞋena, ada gaveyao moyaꞋaidi adi egana kaliva hikikilakahina, medema Yesu gikaiwabuhegedi, ada keke vaita hida tovagaga againe gidakaiwabuhegedi, au kadu aimo tova mulina buyeꞋi.  
\v 22-23 Kadu Yaubada gaitoma moyaꞋaina Keliso agevavane gisedi, ada Bana gaitoma moyaꞋaina adi tovehimeya ma ide tovetumagana ada yoꞋo Bana anakaibe ada toꞋitaveꞋavina faꞋina gisena, higa ide tovetumagana vaita Keliso wowona amine ada BanaꞋe Tauna ma uꞋuda. Ada ide vaita wowona amine ma uꞋuda Keliso kaluyabuna, tu BanaꞋe Tauna gaitoma moyaꞋaina givemagadi, au lobama be babi be ide buye givemaga-moꞋeda be giluyabuda. \x - \xo 1:22-23 \xt Kl 1:4-11 \xt Hi 1:3,13 \xt Kl 2:15, Fl 2:9-10\x* \x - \xo 1:22-23 \xt Kl 1:18\x*   
\c 2  
\s1 Keliso buye kaveꞋatutamoꞋaida-yo wayawaida ivaguna  
\s1 kamimiyami.  
\p
\v 1 Tu omiꞋiyao ma tuwaina omi vaita toꞋalika amine. Yaubada yana vehimeya wadibutoyogena ada dewa koyona againe wahawahegemi faꞋina, aluꞋaluwami vaita aliꞋalikana.  
\v 2 Mena dibutoyoga kadu dewa koyona ana eda againe tuwaina wanunudadana, hida babi ana nuwanuwa koyona amine wadewadewa, kadu Setani badi yafune lobama hinafane hinunudadana-ma adi tovehimeya yana abavehimeya againe wamiyami. Tova adamoya bana kalivai-nadi yana nuwanuwa koyona todibutoyoga aseꞋasediya gifahafahana.  
\v 3 Boi tuwaina ide moyaꞋaida badi todibutoyoga adi yoꞋo kalivadi. Dibuda koyona ana ayafana amine kadewadewa, ada gavaimi gavaimi wowoda o nuwada giludigadigaga, mededemi taudeyao yada nuwanuwa koyona againe kahawahawahegeda. Todibutoyoga moyaꞋaidi yadi koyona faꞋina Yaubada yana ilaꞋa guwana hinanuhagana. Ada tuwaina kadu ide dibuda koyona katubuga-ma kamiyami, ada vaita todibutoyoga moyaꞋaidi amine Yaubada yana ilaꞋa guwana kadanuhagana.   
\p
\v 4-5 Atu Yaubada ma ana egana tohinekalikali. Yana nuwakabubu ide agaideya keke kabiꞋona faꞋina, Keliso alikeya gisivemididina amine ide aluꞋaluwada aliꞋalikana gikiveyawayawana be Keliso buye wayawaida ivaguna kamimiyami. E, yada dewa koyona faꞋina aluꞋaluwada vaita aliꞋalikana amine kamiyami nonogana Yaubada yawaida ivaguna giveleda. Yaubada yana nuwadoga keke kanawona! WaꞋita, yana nuwadoga againe kibababala wanuhagana.  
\v 6 Ada ide Yesu Keliso buye kaveꞋatutamoꞋaida-ma BanaꞋe buye gisivemididida, higa yawaida ivaguna giveleda be Yesu Keliso buye lobameya givehiyotoda.  
\v 7 Au hidede amine Yaubada ide Yesu Keliso buye gisivemididida ada givehiyotoda be higa aimo mulina tova keke ginahavaini yana nuwadoga lakahi-moꞋena ana iyaꞋiyaya ide agaideya ginayemaunena. Ide giꞋitanuwakabubuyeda be Yesu Keliso faꞋideya gihawahegena faꞋina, yana nuwadoga gavatubuga! Au keke adafaiweya kanalagani.  
\v 8 Wanogali! Yaubada Tauna ginuwadogemi be omi wavetumaganeni-yo ami kibababala wanuhagana. Tu keke taumiyao nuwamiya vetumagana gidayemu, au Yaubada yami vetumagana givelemi-yo wavetumaganena.  
\v 9 KaduꞋe keke taumiyao yami vediwe faꞋina ami kibababala wadanuhagani. Au Yaubada givetumaganavelemi-yo ami kibababala wanuhagana be keke tamo hakwadi afaiweya tauni a egana unakilakahini unagayo, “Yaku vediwe faꞋina kibababala ganuhagana.” Keke amifaiweya hidede amine wanagahe.  
\v 10 Atu ideꞋeyao Bana Yaubada nimana ana iyaꞋiyaya. Ide gavana anaga? Yaubada Yesu Keliso againe gibubuveꞋivaguda be higa igibagiba kanaseseyemaunedi. Mena igibagiba ma boi tuwai-lokalokana Yaubada givevaiye-vagahina be higa igibagiba amine kananauna. \x - \xo 2:10 \xt Kl 2:13 \xt Ef 6:12 \xt Ta 3:3 \xt Lo 6:8 \xt Lo 2:4\x* \x - \xo 2:10 \xt Lo 3:24, 2Ti 1:9 \xt Ta 3:5 \xt Ta 2:14\x*   
\s1 MiYuda kadu yoꞋo tulidiyao Keliso againe hivesaꞋeya.  
\p
\v 11 Tu omi keke miYuda tu yoꞋo tulidiyao agaidiya watubuyemu-ma yami miyami tuwaina wananuwa-nunauyena. MiYuda avewagami keke Yaubada yana yoꞋo, yana iyaꞋiyaya keke wowodiya hidatomogolohini-ma kalivai-dina tu taumeyao avewagama ide Yaubada yana iyaꞋiyaya wowodeya katomogolohina-ma kalivai-dana, higa iyaꞋiyayai-nadi kaliva wowodiyagaga gidadauda.  
\v 12 Yami miyami tuwaina keke nuwami ginaulu. Tuwaina keke Keliso againe wadamiyaveꞋavina, au wamiyavehaila. Kadu omi keke Yaubada yana yoꞋo miIsileli kalivai-dina, au omi tulimiyao. Boi tuwai-moꞋena Yaubada ime miIsileli yama yoꞋo givenuwadadanema be yana veyao agaimeya giseusedi, higa ama kibababala faꞋina giwonadabedabema. Tu omi tulimiyao faꞋina, Yaubada keke hidede amine gidaveyaoyemi ada au hidei babiya wamiyami koyona, aseꞋasemi ana abaluveꞋavina keke, yami Yaubada keke.  
\v 13 Boi tuwai-moꞋena omi tulimiyao vaita lauveya wadamiyavehaila amine. Keke Yaubada wadahalamaneni o kaꞋi yana yoꞋo agaidiya wadamiyaveꞋavina. Atu tova adamoya Keliso dayagina gimadu faꞋina, Yaubada gitaimi be omi Bana liline kadu ime Bana yana yoꞋo lilimeya wayemu-yo Yesu Keliso buye waveꞋatutamoꞋaimi.   
\p
\v 14-15 Keliso dayagina gimadu faꞋina Bana Tauna ada tokukuya, ada au ime miYuda kadu omi tulimiyao giꞋivesaꞋeyada. Tuwaina omi tulimiyao ala hawahawatana wakwaune wamiyami, ada ama vehimeya ama hawata Mosese ime miYuda givelema-ma keke wadaꞋitaveꞋavini faꞋina kavenivenibaina. Au hidede amine kavenibaina tu Keliso yana alika againe mena abavenibaina ana ala giyawelina. Bana wowona gihawahegeni-yo mena Mosese yana vehimeya gisevehaileda-ma gidabana be higa ime miYuda kadu omi yoꞋo tulimiyao kanaveyoꞋo saꞋeyana. E, Keliso yana faisewa againe ide yoꞋo luhei ma yoꞋo saꞋeyana ivaguna katubuyemu, ada au hidede amine yada veyao gifaisewana.  
\v 16 Tuwaina imeꞋeyao be omiꞋiyao ma Yaubada nibaineyao tu Keliso kelose againe giꞋalika be higa ide vaita yoꞋo saꞋeyana amine giꞋivesaꞋeyada-yo Yaubada buye kanaveyao. Ada au ana kelose againe venibaina matatabuna giluveꞋalikana.  
\v 17 KaduꞋe Keliso giꞋela be mena veyao gifaisewana-ma moyaꞋaideyao agaideya gilumamalena. E, omi yoꞋo tulimiyao lauveya keke Yaubada liline wadamiyami-ma agaimiya veyao gilumamalena, kadu ime miYuda Yaubada liline amiyami-ma agaimeya veyao gilumamalena.  
\v 18 Bana Keliso yada eda gifaisewana be ada yoꞋo luhei adafaiweya Tamada matane kayemuyemu. ImeꞋeyao kadu omiꞋiyao Yaubada AluꞋaluwana saꞋeyanaga Tauna nuwahinagedeya gimimiyami-yo Tamada matane kayemuyemu.  
\v 19 Au hidede amine Keliso giꞋivesaꞋeyada faꞋina, omi keke tulimiyao vaita aimo hawahawala amine. Au Yaubada yana yoꞋogaga agaidiya waluku be omiꞋiyao kadu imeꞋeyao yana kaliva mahamahalideyao buye kamimiyami. \x - \xo 2:19 \xt Lo 9:4, 1Te 4:13 \xt Kl 1:20, 1Ko 12:13\x* \x - \xo 2:19 \xt Kl 1:20,22 \xt Ef 3:12\x*   
\s1 Tovetumagana moyaꞋaida vaita Yaubada yana manuwa  
\s1 amine.  
\p
\v 20 Ide Yaubada yana yoꞋo ma kadu vaita Yaubada yana manuwa amine. Bana Yesu Keliso Tauna manuwa ana holiliꞋabi. Ime afositolo kadu Yaubada bonana ana toꞋawatalatalaina ma manuwai-nadi ana ogola. Ada gaveyao moyaꞋaimi Yaubada yana yoꞋogaga kalivai-dina, medema yana manuwa ana huyavila againe giyogomi.  
\v 21 Kadu Yaubada Bana Keliso holiliꞋabi-nadi againe ide huyavila giveꞋetovefoseda be manuwa gilakalaka gilakalaka tu ide gaveyao Kaiwabu buye kaveꞋatutamoꞋaida, medema vaita yana manuwa-tafalolo mahamahalina amine kayemu.  
\v 22 Ada kadu omi yoꞋo tulimiyao Kaiwabu buye waveꞋatutamoꞋaimi-ma Yaubada yana manuwa againe giveꞋetohavihavimi be ide moyaꞋaideyao vaita manuwa-moꞋena amine agaideya givemanuwa. E, Yaubada AluꞋaluwana Tauna nuwahinagedeya gimimiyami faꞋina, Yaubada agaideya givemanuwa. \x - \xo 2:22 \xt Md 16:18, 1Ko 3:11 \xt 1Ko 3:16, Kl 2:19 \xt 2Ko 6:16\x*   
\c 3  
\s1 Yaubada yana vevai sevasevauyana Folo againe  
\s1 gihawavemogatalena.  
\p
\v 1 Tu omi tulimiyao kadu ime miYuda Yaubada yana manuwa againe seꞋeyaine giveꞋetohavihavida faꞋina, iya Folo Yaubada againe gaveꞋoꞋola. Omi yoꞋo tulimiyao faꞋimiya gahawahegeku faꞋina, deliya hiseku be iya Keliso yana kaliva yogoyogoniku gamimiyami.  
\v 2 KaꞋi valeyaku saꞋeyana ahe wanogalina, higa Yaubada ginuwadogeku-yo givegideku be aku vehimeya omi yoꞋo tulimiyao ami kivetuvetunu faꞋina giveleku.  
\v 3-4 Yaubada yana vevai sevasevauyana keke tauku yaku nuwahuya againe gadahalamaneni, au Yaubada iya agaikuya gihawavemogatalena be gahalamanena, yami leta againe kabiꞋona ahe galukahihiyena amine. KaꞋi bonaku wanahawana amine o, yaku nuwahuya mena vevai sevasevauyana Keliso faꞋina wanahalamanena.  
\v 5 Yaubada mena yana vevai sevasevauyana badi kaliva boi tuwai-moꞋena aituha tulina tulina agaidiya himiyami-ma keke gidavehawaledi, tu tova adamoya ime yana afositolo kadu toꞋawatalatalaina higa yana kaliva mahamahalimeyao agaimeya gihawavemogatalena.  
\v 6 Mena yana vevai sevasevauyana hidede amine. Yesu Keliso kibababala ana VenuwaꞋata Yamumuna giyemaunena faꞋina, keke ime miYuda gagana ama duꞋu Yaubada yana lokolokofou moyaꞋaina agaidiya anavaini, au kadu omi yoꞋo tulimiyao ami duꞋu ime ama duꞋu buye kanavaina. Kadu omiꞋiyao be imeꞋeyao yada yoꞋo au saꞋeyana. Kadu gavaimi gavaimi hagihagina Yaubada giwonadabadaba, mededemi omiꞋiyao be imeꞋeyao Yesu Keliso buye kaveꞋatutamoꞋaida-ma ami duꞋu ama duꞋu buye kananuhagana. \x - \xo 3:6 \xt Ef 4:1, Fl 1:13 \xt Ef 1:9, Kl 1:26 \xt Ef 2:13,19\x*   
\s1 Folo ana vehimeya yoꞋo tulidiyao adi kivetuvetunu faꞋina.  
\p
\v 7 Tu Yaubada givegideku be kibababala ana VenuwaꞋata Yamumuna ana laumamala againe gavetofaisewa. E, Yaubada ginuwadogeku be gifaiwalaveleku faꞋina, mena vehimeyai-nadi gaꞋabiꞋabina.  
\v 8 IyaꞋeku ma iya vaita kwamana kabiso-moꞋeku amine Yaubada yana yoꞋo agaidiya. Iya kabiso-moꞋeku nonogana Yaubada ginuwadogeku-yo aku vehimeya giveleku be yana lokolokofou Keliso againe giyemaunena-ma omi keke miYuda tu yoꞋo tulimiyao agaimiya ganalulumamalena. Mena lokolokofou inubane be gina analauyabu ide keke adafaiweya kanahalamane-Ꞌowoni.\x - \xo 3:8 \xt 1Ko 15:9-10\x*  
\v 9 Yaubada aku vehimeya giveleku be kadu tomiyababi moyaꞋaidi nuwadi ganakivemahalina be Yaubada yana vevai sevasevauyana ana faisewa faꞋina gavaimi gavaimi givevai ma hinahalamanena. Tuwai-lokalokana aituha a gavaiyehi kahegedi-ma agaidiya mena vevai sevasevauyana, Yaubada gaitoma moyaꞋaina adi ToꞋaibubuna ma Tauna nuwahinagene giduvaꞋimaꞋima.\x - \xo 3:9 \xt Kl 1:29\x*  
\v 10 Tuwai-moꞋena yana vevai sevasevauyana Yaubada nuwahinagene giduvaꞋimaꞋima be higa tova adamoya yana nuwahuya tulina tulina lobama ana tokikaiwabu kadu ana tofaiwala agaidiya ginaꞋivemogatalina. HadeꞋagaine mena yana nuwahuya hinaꞋitahalamaneni? Ide tovetumagana ada yoꞋo agaideya hinaꞋitahalamanena.  
\v 11 Ada yana nuwahuya ana ivemogatala au hidede amine gilakayemu be gavaimi givevai babi ana abavebutu aimo keke ana toveya, mededemi gigugai. Ada yana vevai Yesu Keliso yada Kaiwabu againe gilakayemu velemoꞋena.  
\v 12 Yesu Keliso buye kaveꞋatutamoꞋaida kadu Bana againe kavetumagana faꞋina, Yaubada matane yada waꞋasevatu kadu yada wavetumagana adafaiweya kanayemuyemu.\x - \xo 3:12 \xt Ef 2:18, Hi 4:16\x*  
\v 13 Au gaveꞋoꞋola agaimiya be omi faꞋimiya aulolo tagiya ganuhagana faꞋina, nuwami keke ginavita. Au mena yaku aseꞋuꞋaulolo faꞋina, omi kaiwabu wanuhagana.\x - \xo 3:13 \xt 2Ti 2:10\x*   
\s1 Folo miEfeso faꞋidiya giveꞋoꞋola be Keliso yana nuwanuwa  
\s1 hawahawahegana hinaꞋayaunena.  
\p
\v 14-15 Tu Yaubada au hidede amine yana wanuwahuya givevai-ma ganuwa-nunauyena againe, Tamada matane gaꞋiboꞋula-moꞋa. BanaꞋe yana yoꞋo kalivai-dina gaveyao lobameya himimiyami kadu gaveyao babiya kamimiyami amanadi, au matatabuda BanaꞋe Tamadai-nadi ana egana kawahina.  
\v 16-18 GaveꞋoveꞋoꞋola be Bana Tokaiwabu-moꞋa nuwana nuwanuwadogana amine nuwahinagemiya ginafaiwalavelemi. E, AluꞋaluwa Mahalina nuwahinagemi ginakivetoyogina, kadu Keliso againe wanavetuvetumagana-yo aseꞋasemiya ginaveꞋabaga. Kadu gaveꞋoꞋola be ai walamina gava giꞋetodona kadu ogola gava gihobu-moꞋa amine, omi nuwanuwa hawahawahegana againe wanafaiwala be higa omi kadu Yaubada yana yoꞋo moyaꞋaidi buye Keliso yana nuwanuwa hawahawahegana gavalalafa gavatunuga, e gavatubuga ma wanahalamane-hagihagiyena.  
\v 19 E, gaveꞋoꞋola be mena Keliso yana nuwanuwa hawahawahegana inubane be gina ana abalauyabu ide keke adafaiweya kanahalamane-Ꞌowoni-ma ana halamana agaimiya ginatubuga, ada au hidedemi Yaubada yana dodobodaboda againe ginavemaga-moꞋemi.   
\p
\v 20 Tu Yaubada ana egana kanakilakahina. Yana faiwala nuwahinagedeya gififaisewa faꞋina, gavaimi gavaimi Bana againe kanaveꞋoꞋola o kaꞋi kananuwadadana wavemwamwalina, medema Bana anafaiweya ide faꞋideya ginagugaiyena, tu yana gugai yada veꞋoꞋola o kaꞋi yada nuwadadana wavemwamwalina gitubuhegena, gitubuhege-moꞋena.  
\v 21 KaduꞋe Yaubada ana egana kanakilakahina. Au hidede amine yana kikaiwabu ginalakalaka. E, ide tovetumagana higa yana yoꞋo agaideya kadu Bana Yesu Keliso againe ginalakalaka be ginanunauwena tu ginaduva-vagata, tova inaga inaga keke ana abalauyabu. Ehe hidedemi. \x - \xo 3:21 \xt Kl 2:7, Yo 14:23 \xt Kl 1:29\x*   
\c 4  
\s1 AluꞋaluwa Mahalina ide Keliso wowona giꞋivesaꞋeyada.  
\p
\v 1 Tu omi Yaubada gikovami-ma ganagahevagadonemi. Iya deliya hiseku be Kaiwabu faꞋina yogoyogoniku gamimiyami-ma gagahegahevagadonemi be gava dewa Yaubada yana kaliva gilubodadi medede amine wanadewadewa.  
\v 2 Tova moyaꞋaina wananuwanuwahobu be kadu kaliva umaumadiyao amine wanahuluhuluva. WanaꞋatuvefaꞋila, e yami wanuwakabubu tobohiyamiyao wanaꞋatuvefaꞋiledi.  
\v 3 WanaꞋitaveꞋavimi be AluꞋaluwa Mahalina giꞋivesaꞋeyami amine, yami nuwanuwa saꞋeyana againe wanamiyami be niwalova ana ala hinagene wanamiyami.  
\v 4 Ide Kaiwabu wowona au saꞋeyanaga kadu AluꞋaluwana saꞋeyanaga. Meda anafaiweya gavadi aimo omi faꞋimiya ginaga-ma faꞋina gikovami be walulauboda, medema abalulauboda saꞋeyanaga.  
\v 5 Kadu yada Kaiwabu saꞋeyanaga, yada abavetumagana saꞋeyanaga, yada bafitaiso saꞋeyanaga.  
\v 6 Kadu moyaꞋaida yada Yaubada saꞋeyanaga ada Tamada saꞋeyanaga, BanaꞋe moyaꞋaida givehimeyeda, yana faiwala moyaꞋaida agaideya gififaisewa, Tauna moyaꞋaida nuwahinagedeya gimimiyami. \x - \xo 4:6 \xt Kl 1:10 \xt Kl 3:12-13 \xt Lo 12:16-18, 1Fi 3:8 \xt 1Ko 12:12-13\x*   
\s1 Keliso yana abavetala gifolakena be ide wowona kanaveꞋasevatu.  
\p
\v 7 MoyaꞋaida kavesaꞋeya tu Yaubada ide saꞋeyana saꞋeyana ginuwadogeda-yo ada vehimeya tulina tulina giveleda, ada medema Keliso yana abavetala Tauna gifolakena amine.  
\v 8 Meda Keliso yana folaka faꞋina Veyao Tuwaina ana buki gigahe gigayo,  
\q1 Wese getane-moꞋane gilaka ana toveya  
\q1 nibaineyao agaidiya wai ginagona  
\q1 be yogoyogonidiyao ginauwedi,  
\q1 ada yana hawahega yana kaliva agaidiya gifolakena.  
\m Hidede amine Yaubada buki-nadi againe gigahe.  
\v 9 Yana gahe saꞋeyana “gilaka” ma, gavaimi ana nuwanuwa? Ana nuwanuwa hidede amine. Nagona babi gava dibune gihobuꞋela.  
\v 10 Ada Bana gihobuꞋela Kalivai-nadi wese lobama getane-moꞋane gilaka be higa lobama be babi matatabudi Tauna againe ginavemaga-Ꞌowodi.  
\v 11 Ada yana abavetala yana yoꞋo agaidiya gifolakena-ma hidede amine. Tufoidi adi vehimeya ma afositolo yadi faisewa, tufoidi Yaubada yana venuwaꞋata gitunevehabalutugidi-ma hinaꞋawatalatalainena, tufoidi kibababala ana venuwaꞋata hinalumamale-dadanena. Ada tufoidi adi vehimeya ma Yaubada yana sifi adi toꞋitaveꞋavina kadu adi tovehawala.  
\v 12 Keliso vehimeya medede amine gifolakena be higa mena kalivai-dina yadi faisewa againe Yaubada yana yoꞋogaga hinaꞋihagihagiyeda-yo tovetumagana moyaꞋaida Keliso yana faisewa againe kanaꞋidibumuhiga, ada au Keliso wowona ginatubutubuga.  
\v 13 Au hidedemi Keliso wowona ginatubutubuga tu ide yana kaliva yana vevine moyaꞋaida yada vetumagana againe kadu Yaubada Natuna ana halamana againe kananuwanuwa saꞋeyana be kanaveꞋasevatu. E, Bana Keliso nuwanuwa yamumunaga againe gimaga-moꞋa be giveꞋasevatu amine, ide yana nuwanuwa yamumunaga againe kanamaga-moꞋa be kanaveꞋasevatu.   
\p
\v 14 KaꞋi mededemi kanaveꞋasevatu amine, aimo keke vaita weꞋoweꞋo yadi nuwanuwa tulina tulina amine kanamiyami. Lefo lakahina waka giluluvilavilana waꞋamine waꞋamine o kaꞋi bolimana ai lukumina gitafitafivilavilana amine, keke vehawala tulina tulina waꞋamine waꞋamine kanamulimuliyeni be kaliva aikaunuwanuwadiyao yadi bonayafayafa againe hinanuwaꞋabiyeda be higa eda tunutunugina kanahegeni.  
\v 15 Keke medede amine kanaꞋabinuwanuwa, au yada wanuwanuwa hawahawahegana nuwanuwa velemoꞋena kanagahegaheyeni-yo au yada dewa moyaꞋaina againe Keliso ana itaꞋita amine kanalakalakata, higa Bana uꞋuda.  
\v 16 Ada Bana uꞋuda faꞋina, ide saꞋeyana saꞋeyana vaita waloga amine Keliso wowona againe kaveꞋetohavihavida, ada ide waloga saꞋeyana saꞋeyana yada faiwala Keliso uꞋuda againe giꞋelaꞋela be moyaꞋaida buye kaveꞋaveluveluga. Kadu kaꞋi saꞋeyana saꞋeyana yada faisewa tulina tulina kaꞋitaꞋitaveꞋavina amine, wowona matatabuna gitubutubuga gitubutubuga tu ide wowonai-nadi buye kaveꞋahawahawahega-yo taudeyao kakivetubugida be kaveꞋasevatu. \x - \xo 4:16 \xt Lo 12:3,6 \xt Sam 68:18 \xt 1Ko 12:28 \xt 1Ko 14:12\x* \x - \xo 4:16 \xt Kl 1:28 \xt 1Ko 14:20 \xt Ef 4:25 \xt Kl 2:19\x*   
\s1 Keke tomiya-kawokawowo amine wanahuluhuluva, au Keliso  
\s1 yana kaliva mahamahalimiyao amine wanadewadewa.  
\p
\v 17-18 Tu omi Keliso wowona faꞋina, iya Kaiwabu yana kaliva omi agaimiya Bana matane ganagahe. Badi Yaubada keke hidahalamaneni-ma amine omi keke wanahuluhuluva. Badi gaitoma-kawowo faꞋina tova moyaꞋaina hinuwanuwa, ada tagadi hiꞋivekuluna faꞋina Yaubada hifaniyeni-yo yawai-vagata Bana givetalaiyena-ma keke hidahalamaneni. Au tulidiyao himiyamiyavehaila, ada nuwadi giꞋuyuyu-moꞋa.  
\v 19 Nuwadi givewaba be wowomumu ana ayauna keke hidahalamaneni faꞋina, nuwanuwa ayaꞋayafanina againe hivetalaiyedi be yamadada tulina tulina hihuluvidi, keke maꞋita hidaꞋilova.   
\p
\v 20 Tu omiꞋiyao ma Keliso againe wasikulu tu ana halamana keke mena dewai-nadi koyo-moꞋena amine wadavaini.  
\v 21 Omi velemodi Keliso waꞋitahalamanena ada Bana yana yoꞋo agaidiya waluku-yo vehawala nuwanuwa velemoꞋena Yesu giyemaunena-ma amine wanogalina.  
\v 22-24 Ada vehawala hidede amine wanogalina. Tuwaina aimo keke Keliso againe wadavetumagana ana toveya, taumiyao nuwami ana nuwanuwa koyona dibune wamiyami. Yami nuwalauvadiga gilolomi be wanuwadigadigaga tu gikikivekoyomi. Atu kuvi tubuna giꞋafuwana be bavagu againe gina amine, omi tubumi wanahegena be nuwami ivaguna wanavelakavina. E, wanahawahegemi be Yaubada aseꞋasemi kadu nuwami matatabuna ginakiveꞋivaguna. Ada mena nuwami ivaguna Yaubada Tauna ana itaꞋita yegayegana kadu mahamahalina velemoꞋena amine gibubuna be Bana amine wanahuluhuluva.   
\p
\v 25 Tu nuwami ivaguna Keliso amine wanahuluhuluva faꞋina, veꞋalololo matatabuna wanavenikohiyena. MoyaꞋaida yoꞋo saꞋeyana kalivai-dina faꞋina, omi saꞋeyana saꞋeyana tobohiyamiyao agaidiya wanagahe velemoꞋena.  
\v 26 Dewa koyona faꞋina wananuwakoyo tu keke wananunauweni be taumiyao wanakoyo. Yami nuwakoyo keke wananunauweni mala ginabogi, au ginamaduhavaina.  
\v 27 FaꞋina keke taumiyao ami wanafali wanayauni be Setani ginaluku.  
\v 28 Hai kaliva gikikaiꞋafu, medema kaiꞋafu ginaꞋilovena, au ginavebutu ginafifaisewa. E, tauna nimane ginafaisewa hagihagina be higa badi koyokoyo tamo gavadi againe anafaiweya ginanuwakabubuyedi.   
\p
\v 29 Kadu wonakoyokoyo keke-moꞋa awamiya ginayemu. Au gahe yamumunaga wanayakayakahina, ada gavadi gavadi tobohiyamiyao gilubodadi, medema wanagahegaheyena be wanakivetoyogidi kadu wanaꞋihagihagiyedi.  
\v 30 Ada keke Yaubada AluꞋaluwana Mahamahalina aseꞋuꞋaulolo wanaveleni. Yaubada AluꞋaluwa Mahalina againe gikibwami be higa aimo tova mulina tutuvehobu ana toveya, ami aiyauga-vagata wanavai-Ꞌowona.  
\v 31 NuwakoyoveꞋine agodadaga ilaꞋa wanavenikohiyena. Auwe veꞋafaifaina kadu veyaina. Tobohiyamiyao adi kivekoyo ana nuwanuwa matatabuna wanavekwaulaugena.  
\v 32 Au buye wanaveꞋanuwakabubu kadu buye wanaveꞋahinekalikali. Ada Yaubada Keliso faꞋine yami koyona givenuwauluyena amine, meda omi tobohiyamiyao yadi koyona wanavenuwauluyena. \x - \xo 4:32 \xt Kl 3:9-10, Lo 12:2 \xt Ef 4:15 \xt Af 20:35\x* \x - \xo 4:32 \xt Ef 5:4, Kl 4:6 \xt Ef 1:13-14 \xt Kl 3:8 \xt Kl 3:12-13\x*   
\c 5  
\s1 Dewa uyuꞋuyuyuna wanavekwaulaugena be mahalina againe  
\s1 wanamiyami.  
\p
\v 1 Tu Yaubada yami dewa koyona givenuwauluyena amine omi BanaꞋe natuꞋaseꞋaseneyao faꞋina, au Tamami wanaveꞋuveꞋuꞋulena.  
\v 2 Bana Keliso yana nuwanuwa ide agaideya gisena be ide faꞋideya yawaina gihawahegena amine, meda tova moyaꞋaina tobohiyamiyao faꞋidiya wanahawahawahegemi. Kevakeva hikabuna be magana yamumuna gilakalaka-yo Yaubada giyauna-ma amine, mena Keliso yana hawahega ide faꞋideya au abaveyao hagihagina Yaubada nuwana gikiveyamumuna amanadi.   
\p
\v 3 Tu omiꞋiyao ma Yaubada yana kaliva mahamahalimiyao faꞋina, udo tulina tulina o kaꞋi nuwanuwa bwanebwanenena o kaꞋi italuvadiga keke-moꞋa wanahuluveni, tu kadu keke maꞋita wanalukahihiyeni. Omi kaliva mahamahalimiyao faꞋina, dewai-dina keke-moꞋa gidalubodami.  
\v 4 Kadu keke luhabohabola o kaꞋi gahe kabakabaleyana o kaꞋi wonakoyokoyo wanayakayakahini. Medema tovetumagana keke gidalubodami. Au yami gahe ma Yaubada againe wanavesivesiule.  
\v 5 Gaitoma saꞋeyana wahalamane-hagihagiyena, higa hai kaliva toꞋudo o kaꞋi yamayamadadana o kaꞋi itaꞋitaluvadigana, ame bana hidevama italuvadiga vaita nuwanuwa tulina tulina Yaubada yana abaga aseꞋasemiya gidalemani. E, hai kaliva mededemi gihuluhuluva, medema keke-moꞋa ana duꞋu Keliso be Yaubada yadi abavehimeya againe ginavaini.  
\v 6 WanaꞋitaveꞋavimi be keke tamo hakwadi gahe-kawowo againe ginabonayafeyafemi, higa vaita mena dewai-dina au keke koyona. Mena dewai-dina faꞋina Yaubada yana vehimeya ana todibutoyoga yana ilaꞋa guwana hinanuhagana.  
\v 7 Hidema faꞋina keke badi todibutoyoga wanavetobohiyanedi.   
\p
\v 8-9 Boi tuwaina omi uyuyu ana kaliva, tu tova adamoya Kaiwabu buye waveꞋatutamoꞋaimi faꞋina omi mahalina ana kaliva. Au mahalina ana kaliva amine wanadewadewa. FaꞋina mahalina guwana au dewa hagihagina, huluva yegayegana, kadu nuwanuwa velemoꞋena.  
\v 10 Ada au wanalele be gavadi gavadi yamumuna Kaiwabu matane ma wanahalamanena.  
\v 11 Uyuyu ana dewa wanavenikohiyena. Mena dewai-dina guwana keke, au yami mahalina againe wanakivemogatalina be moyaꞋaidi hinahalamanena mena dewai-dina adi ita koyona.  
\v 12 Gavadi gavadi isevasevauya againe hidewedewena medema koyo-moꞋena, ada kaꞋi tamo hakwadi gidalukahihiyena, au kadawowomumu lakahina.  
\v 13-14 Atu kaꞋi yadi dewa Kaiwabu yana mahalina againe wanakivemogatalina amine o, mena dewai-dina au adi ita koyo-moꞋena ma kabuꞋavane ginayemu. FaꞋina kaꞋi Kaiwabu yana mahalina kaliva yada dewa ginatuvemahalina, au dewa inubana kaꞋi koyona o yamumuna kabuꞋavane ginayemu. Medema faꞋina kweli saꞋeyana gigahe gigayo,  
\q1 O uꞋenonuwaulu-ma umidi,  
\q1 au alikeya unamididi-havagi  
\q1 be Keliso ginatuvemahali. \x - \xo 5:13-14 \xt Ga 2:20 \xt Ef 4:29 \xt 1Ko 6:9-10 \xt Lo 1:18\x* \x - \xo 5:13-14 \xt Kl 1:13, 1Fi 2:9 \xt Lo 12:2 \xt Ef 2:1\x*   
\s1 Mahalina ana kaliva hidemi hidemi wanadewadewa.  
\p
\v 15 Tu omi mahalina ana kaliva yami dewa wanaꞋitaveꞋavina, wanaꞋitaveꞋavi-moꞋena. Keke fanifanidiyao amine wanadewadewa, au kaliva nuwanuwahuyamiyao amine wanahuluhuluva.  
\v 16 Hida tova au tova koyona faꞋina, keke wanamiya-kawowo. Au gavadi gavadi hagihagina amifaiweya wanagugaiyena, medema againe wanahawahegemi.  
\v 17 FaꞋina keke wanavekwavakwava, au tova tova wanalele be gavaimi gavaimi Kaiwabu nuwanuwana omi wanadewadewa, medemi wanadewa.  
\v 18 Gufa laulaugina keke wanayu-faꞋila be uꞋumi ginakoyo, faꞋina mena gufa ana yu-faꞋila againe yami miya matatabuna wanakivekoyona. Au AluꞋaluwa Mahalina wanayuyuyena be ginavemagami.  
\v 19 AluꞋaluwa Mahalina ginavemagami-yo yami veꞋagahegahe againe kweli tulina tulina wanayakayakahina, higa same Veyao Tuwaina ana bukiya gidadauda amanadi, kadu kweli Yaubada ana hawadavadava faꞋina kaliva hiꞋetoladina-ma, kadu kweli AluꞋaluwa Mahalina ginaꞋalavelevelemi-ma wanakwelikweliyena be yami wavemwamwala aluꞋaluwamiya Kaiwabu wanakwelidavadavana.  
\v 20 Kadu gaitoma saꞋeyana saꞋeyana faꞋina Yaubada Tamada againe yada Kaiwabu Yesu Keliso ana eganeya wanavesivesiule tova moyaꞋaina. \x - \xo 5:20 \xt Kl 4:5 \xt Kl 1:9 \xt Lo 13:13, 8:6\x* \x - \xo 5:20 \xt Kl 3:16 \xt Kl 3:17, 1Te 5:18\x*   
\s1 Kaliva vevine naginagidiyao adi vehimeya faꞋina.  
\p
\v 21 Tu Keliso waveꞋamohimohinena faꞋina, taumiyao buye wanaveꞋabonaꞋabiꞋabi.  
\v 22 Omi vevine naginagimiyao moganemiyao wanawowomumuyedi be bonadi wanaꞋabiꞋabina, higa vaita Kaiwabu wadawowomumuyeni be bonana wadaꞋabiꞋabini.  
\v 23 Ide tovetumagana yada yoꞋo au Keliso wowona ada BanaꞋe uꞋuda. Bana Keliso ide yana yoꞋo uꞋuda amine, bana kaliva vavinena uꞋudi. Atu Keliso kadu wowona ada tolugolagola.  
\v 24 Ada au ide Keliso yana yoꞋo BanaꞋe kawowomumuyena be bonana kaꞋabiꞋabina amine, omi vevine moganemiyao agaidiya wanawowomumu be gavaimi gavaimi hinavehimeyemi, medemi bonadi wanaꞋabiꞋabina.   
\p
\v 25 Tu omi kaliva naginagimiyao ma vavinemiyao wanagidi be badi faꞋidiya wahawahegemi. Meda anafaiweya Bana Keliso yana yoꞋo ginagida be ide faꞋideya gihawahegena. Au Bana Keliso yana nuwanuwa yana yoꞋo agaideya gisena be yawaina faꞋideya gihawahegena amine, omi yami nuwanuwa vavinemiyao agaidiya wanaseusena be badi faꞋidiya wanahawahawahegemi.  
\v 26 E, Keliso yana yoꞋo faꞋideya yawaina gihawahegena be higa bonana ana gufa againe aseꞋaseda ginakolani-yo ginakiveyeveyegada be mahamahalideyao Yaubada matane kanamiyami.  
\v 27 Kaliva nuwanuwana vavinena adi ita yamumunaga keke tamo wowodi ana sili o ana atavatava o ana bwaya amine ginaluwafadi, meda anafaiweya Keliso nuwanuwana ide tovetumagana ada yoꞋo, higa vaita vavinena amine, ada ita mahamahalina kadu yamumunaga Tauna faꞋine ginaluwafada.  
\v 28 Meda anafaiweya omi kaliva yami nuwanuwa hawahawahegana vavinemiyao agaidiya wanaseusena. Taumiyao wowomi wanuwenuwena be waꞋitaꞋitaveꞋavina amine, vavinemiyao adi itaveꞋavina faꞋina wananuwanuwa-hagihagi. Hai kaliva vavinena ginuwenuwedi be giꞋitaꞋitaveꞋavidi, medema tauna wowona ginuwenuwena be giꞋitaꞋitaveꞋavina, faꞋina vavinena au bana wowona.  
\v 29-30 WaꞋita, keke tamo kaliva tauna wowona gidavenikohiyeni. Au wowona giveꞋaveꞋana kadu giꞋitaꞋitaveꞋavina. Meda anafaiweya Keliso Tauna wowona higa ide yana yoꞋo giveꞋaveꞋada kadu giꞋitaꞋitaveꞋavida, faꞋina ide Bana wowona talaina tulina tulina.  
\v 31 Mena kaliva wowona higa vavinena adi itaveꞋavina ana nuwanuwa faꞋina, Yaubada Veyao Tuwaina ana bukiya gigahe gigayo,  
\q1 Kwamayoku kaliva lulune gabubuna faꞋina,  
\q1 bana kaliva ma hinana tamana ginahegedi tu  
\q1 ginavemanuwa-damana be vavinena againe  
\q1 ginamiyaveꞋavina, ada hinavewowotamoꞋai.  
\m Hidede amine Yaubada yana gahe.  
\v 32 Au nuwanuwa lakahi-moꞋena mena gahe-nadi hinagene sevasevauyana gidadauda, hida iya ganuwanuwa vaita Bana Keliso kadu ide tovetumagana yana yoꞋo yada vewowotamoꞋai ana abaluvefota.  
\v 33 Ada au omi kaliva moyaꞋaimi saꞋeyana saꞋeyana tauni unuwenuwe be uꞋitaꞋitaveꞋavi amine, meda vavine unanuwenuwedi be unaꞋitaꞋitaveꞋavidi. Kadu omi vevine saꞋeyana saꞋeyana moganemi wanaveꞋamohimohinena. \x - \xo 5:33 \xt 1Fi 3:1 \xt 1Ko 11:3 \xt Kl 3:19 \xt Hi 10:10, Yo 15:3\x* \x - \xo 5:33 \xt 2Ko 11:2 \xt 1Ko 12:27 \xt Aba 2:23-24\x*   
\c 6  
\s1 Natumeyao be tamameyao ada vehimeya.  
\p
\v 1 Omi weꞋoweꞋo Kaiwabu yana yoꞋo unumai-nadi, tamamiyao hinamiyao bonadi wanaꞋabina, faꞋina mena vehimeya gilubodami.  
\v 2-3 Yaubada givehimeya gigayo,  
\q1 Tama be hina unaveꞋamohimohinedi,  
\q1 ada au unamiyami hagihagina  
\q1 kadu babiya unamiya yawaini tunugina.  
\m Au vehimeya teni agaidiya medema vehimeya nagona waguwana.   
\p
\v 4 Omi tamadiyao, keke natumiyao wanamiyagahedi be agodadaga againe aimo wanaꞋiveꞋagoꞋugadi. Au yadi miya hagihagina faꞋina yami wahinekalikali wanadakeyedi be wanakivetunudi Kaiwabu yana gahe amine. \x - \xo 6:4 \xt Kl 3:20 \xt Yem 20:12 \xt Kl 3:21, Gah 22:6\x*   
\s1 Agetogamomo kadu tovehimeyamomo adi vehimeya.  
\p
\v 5 Omi toveꞋagetoga, badi babi ana tovehimeya agaidiya waveꞋagetoga-ma wanaꞋidibumuhigedi. Yami wamatauta kadu yami waꞋasehawahega wanaveꞋamohimohinedi higa vaita Keliso wadaꞋidibumuhigeni.  
\v 6 WanaꞋidibumuhigedi keke vaita matadiyagaga be higa hinahawaveyamumuyemi, au vaita Keliso ana veꞋagetoga amine tova moyaꞋaina yami waꞋasehawahega wanafifaisewa, higa vaita Yaubada yana nuwanuwa wadaꞋitaꞋitaveꞋavini.  
\v 7 Yami wavemwamwala wanafifaisewa keke vaita kalivagaga faꞋidiya wadafifaisewa, au Tovehimeya getane buyeꞋi faꞋina.  
\v 8 E, wananuwanuwa vaita Tovehimeya getane faꞋine wadafifaisewa, faꞋina BanaꞋe kaliva saꞋeyana saꞋeyana gavadi gavadi faisewa yamumuna gigana, medema fatana hagihagina ginavelena. KaꞋi agetoga o kaꞋi keke agetoga, au laufata ginavaina.   
\p
\v 9 Tu omi tovehimeya ma meda anafaiweya ami agetoga agaidiya wanaꞋihagihagi. Keke wanakivematauhidi, faꞋina adi Tovehimeya kadu ami Tovehimeya lobameya au saꞋeyanaga, ada kaꞋi tovehimeya o kaꞋi agetoga digo ami ihagihagi leleleya. \x - \xo 6:9 \xt Kl 3:22-23, Ta 2:9 \xt Kl 3:24-25 \xt Kl 4:1\x*   
\s1 Setani yana yoꞋo buyeꞋi agaidiya kalulugaviya.  
\p
\v 10 Tu tobohiyakweyao, yaku gahe saꞋeya-moꞋena. Kaiwabu buye waveꞋatutamoꞋaimi-yo Tauna yana faiwala lakahina againe wanafifaiwala.  
\v 11 Gaviya ana vaigau matatabuna Yaubada givelemi-ma wanaꞋosena be higa Setani yana alaveyaveyafa amifaiweya wanamidihegena.  
\v 12 FaꞋina keke tomiyababi agaidiya kadaveꞋalaliyaliya. Au Setani yana yoꞋo higa aluꞋaluwa bwanebwanenediyao tulidi tulidi lobama hinafane himimiyami-ma agaidiya kaveꞋalaliyaliya. E, uyuyu ana tokikaiwabu agaidiya kadu ana tovehimeya ana tofaiwala agaidiya kaveꞋalaliyaliya, badi yafuyafunediyao hida babi uyuꞋuyuyuna againe himimiyami unumai-dina.  
\v 13 Setani yana yoꞋo buye kalulugaviya faꞋina, gaviya ana vaigau matatabuna Yaubada givelemi-ma wanaꞋosena be higa tova koyona ginayemu-yo au amifaiweya Setani wanaluveyewana, ada wanamunumununa wanamunumununa tu keke wanavihila, au wanamididi-moꞋa.   
\p
\v 14 Au wanamididi-vagata. Nuwanuwa velemoꞋena vaita gaiyona amine dobomiya wanahifodonena. Dewa yegayegana medema vaita manawami ana abaseboda amine wanasebodami.  
\v 15 Kadu veyao ana VenuwaꞋata Yamumuna againe wanaꞋihagihagiyemi vaita ami ageyafayafa wanaꞋoseni-yo agemi faꞋafaꞋana wanalulugaviya.  
\v 16 Mena vaigau moyaꞋaina wanaꞋosena kadu vetumagana vaita yami veve amine wanaꞋabina. Yami vetumagana ana veve againe giyo waꞋiꞋalaꞋalahina moyaꞋaina kaliva koyona omi agaimiya ginatugagena-ma amifaiweya wanaluvekweꞋuna.  
\v 17 Ami kibababala Keliso givelemi-ma wanavaina be vaita gaviya ana kedukedu amine wanaꞋosena. Kadu AluꞋaluwa Mahalina yana feto higa Yaubada bonana wanavaina.  
\v 18 AluꞋaluwa Mahalina yana faiwaleya tova moyaꞋaina wanaveꞋoveꞋoꞋola. E, yami awalulauꞋu be tagivedadaga tulina tulina Yaubada againe wanaseusena. Mena inuba faꞋina wanavanevanenega kadu wanaꞋatuꞋatuvefaꞋila be Yaubada yana yoꞋo moyaꞋaidi faꞋidiya wanaveꞋoveꞋoꞋola tova moyaꞋaina.   
\p
\v 19 KaduꞋe, iya faꞋikuya wanaveꞋoꞋola be ganamidi ganalulumamala ana toveya, Yaubada yana gahe ginaveleku be yaku waꞋasevatu ganalukahihi, kibababala ana VenuwaꞋata Yamumuna ana nuwanuwa sevasevauyana ganahawavemogatalena.  
\v 20 Yaubada loseyanina iya giꞋiveniniseku be yana VenuwaꞋata Yamumuna ganalulumamalena atu adamoya yogoyogoniku gamimiyami. FaꞋikuya wanaveꞋoꞋola be gavaimi gilubodaku, mededemi yaku waꞋasevatu ganahawavemogatalena. \x - \xo 6:20 \xt Ye 4:7, 1Fi 5:8-9 \xt 2Ko 10:4 \xt 1Te 5:8 \xt Ais 40:9\x* \x - \xo 6:20 \xt Hi 4:12 \xt Lu 18:1 \xt Kl 4:3-4\x*   
\s1 Folo yana lukafoi.  
\p
\v 21 Kafoi tobohiyakweyao, nuwanuwaku valeyaku o gavaimi aku ayauna wanahalamanena. Tobohiyanuwaku Tikiko aku valeya matatabuna ginavenuwaꞋatami. BanaꞋe Kaiwabu yana faisewa againe kaliva dibudibumuhigina.  
\v 22 Hidema ana inuba iya bana gaꞋiveninisena be gavaimi ama valeya ginavenuwaꞋatami, kadu aseꞋasemi ginakivevatuna.   
\p
\v 23 Yaubada Tamada kadu Kaiwabu Yesu Keliso omi tobohiyameyao moyaꞋaimi aseꞋasemi ginakiveniwalovina, kadu yami vetumagana nuwakabubu buye ginavelemi.  
\v 24 Gaveyao moyaꞋaidi Kaiwabu Yesu Keliso againe yadi nuwanuwa hise-vagahina keke yawaidi hinaꞋani, medema Yaubada yana nuwadoga hinanuhagana.   
\qr (Iya Folo bonaku.) \x - \xo 6:24 \xt Kl 4:7 \xt 1Fi 1:8\x*