\id 2TH  
\h 2 TESALONAIKA 
\toc1 Folo yana leta anavelu TESALONAIKA tovetumagana agaidiya 
\toc2 2 TESALONAIKA 
\mt1 Folo yana leta anavelu TESALONAIKA tovetumagana agaidiya  
\ip Hida Tesalonaika tovetumagana yadi leta anavelu Folo aimo Kolinita againe gimiyami tu giꞋetoladina. Vaikohi tufona hihegedi tu valeyadi ginogalina, higa Yesu Keliso yana yewaꞋela faꞋina miTesalonaika tufoidi nuwadi gifani. Hivaitana tovai-nadi ahe gidalakayemu ada hivebutu himiya-kawokawowo.  
\ip Hida leta againe Folo gikivetuvetunudi higa nagona Setani yana kaliva koyo-moꞋena ginafaiwala be kaliva moyaꞋaidi ginanuwaꞋabiyedi-yo dewa koyona ginatubuga-moꞋa, tu muliya Kaiwabu Yesu Keliso ginayewaꞋela be koyodiyao adi agolaufofola hinanuhagana. Kadu Folo gigahevagadonedi be miya-kawowo hinasena tu igibagiba againe hinahawahegedi.  
\io1 Lusiule. 1:1-2  
\io1 Vesiule yadi atuvefaꞋila faꞋina kadu adi tokivekoyo adi agolaufofola faꞋina. 1:3-12  
\io1 Kivetuvetunu Setani yana kaliva koyo-moꞋena yana yemu kadu Yesu yana yewaꞋela faꞋina. 2:1-17  
\io1 LauꞋage igibagiba ana itaveꞋavina faꞋina. 3:1-15  
\io1 Lukafoi. 3:16-18  
\c 1  
\p
\v 1 Yo siule tobohiyameyao Yaubada yana yoꞋogaga Tesalonaika againe kalivai-mina. Ime Folo Sailosi Timoti yami leta aꞋetoladina be wanaꞋitana. Omi higa Yaubada Tamada kadu Kaiwabu Yesu Keliso yadi kaliva yadi vevine.  
\v 2 Yaubada Tamada kadu Kaiwabu Yesu Keliso hinanuwadogemi kadu aseꞋasemi hinakiveniwalovina.   
\s1 MiTesalonaika yadi atuvefaꞋila faꞋina toꞋetoladi hivesiule.  
\p
\v 3 Keke gavana faꞋina tu gilubodana be tova moyaꞋaina Yaubada againe omi faꞋimiya anavesivesiule. E, giluboda-moꞋena be omi tobohiyameyao Yaubada yana yoꞋogaga agaidiya ma faꞋimiya anavesivesiule, faꞋina yami vetumagana gitubutubuga gitubutubuga kadu moyaꞋaimi saꞋeyana saꞋeyana veꞋahawahawahega againe watutuveguvegulami.  
\v 4 Medede amine wahuluhuluva faꞋina, Yaubada yana yoꞋogaga melala tulina tulina agaidiya omi faꞋimiya agagakahikahi agayo, “Badi tovetumagana Tesalonaika againe aulolo tagiya moyaꞋaina kaliva nimadiya hinuhagana tu au aiꞋadi yadi wavetumagana hiꞋatuꞋatuvefaꞋiledi.” Hidedemi agahe. \x - \xo 1:4 \xt 1Te 1:2-3 \xt 1Te 2:19-20\x*   
\s1 Yaubada yana laufata faꞋina.  
\p
\v 5 Tova adamoya aulolo tagiya kaliva nimadiya wanunuhagana. WaꞋita, Yaubada yana laufata au tunutunugina ma yami atuvefaꞋila mena vita tulina tulina agaidiya giseyemaunena. FaꞋina aimo tova mulina Yaubada ginagahemi ginagayo, “Omi yaku yoꞋogaga kalivai-mina faꞋina aulolo kaliva nimadiya wanuhagana. WaꞋatuvefaꞋiledi faꞋina amifata gilubodami be yaku itaveꞋavina againe wanamiyamiya-vagata.”  
\v 6 Yaubada kaliva tunutunugina faꞋina, badi aulolo tagiya hivelemi-ma agaidiya ginalaufata. Badi kadu aulolo tagiya hinanuhagana.  
\v 7 Ada yami aulolo yami tagiya ginavaihegeni-yo ginahavaina tu omiꞋiyao kadu imeꞋeyao buye kanavemwamwala. Aimo yada Kaiwabu Yesu ana ivemogatala ana toveya Yaubada medede amine ginalaufata. Medema tovai-nadi yada Kaiwabu Yesu lobama amine ginahobuꞋela yana tovenuwaꞋata fifiwaladiyao buyeꞋi.  
\v 8 AiꞋalaꞋalata toyogina ginalufifidi tu hinahobuꞋela, ada badi Yaubada hivekwaulaugena kadu VenuwaꞋata Yamumuna Kaiwabu Yesu faꞋine keke hidavenogaleni-ma ginavematahiwadiyedi.  
\v 9 Adi matahiwadi hidede amine. Agolaufofola ana abageya hinamiyamiya-vagata, higa yadi abaluku Yaubada againe falifali-vagahina be keke-moꞋa Kaiwabu matane hinayemu, keke-moꞋa Kaiwabu yana faiwala kikaiwabuna hinaꞋitani.  
\v 10 Kaiwabu ginayewaꞋela ana toveya adi matahiwadi au hidede amine hinanuhagana. Medema tovai-nadi Kaiwabu ginayewaꞋela be higa yana kikaiwabu kadu ana itaꞋita yauyaulowogina yana yoꞋo mahamahalidiyao agaidiya kabuꞋavane ginayemu. E, badi gaveyao moyaꞋaidi Bana againe hivetumagana-ma agaidiya kabuꞋavane ginayemu be moyaꞋaidi matadiya ginakaiwabu-moꞋa. Kadu omi yoꞋoi-mina buyeꞋi, faꞋina venuwaꞋata Keliso faꞋine avelemi-ma wavetumaganena. \x - \xo 1:10 \xt Fl 1:29 \xt Lo 12:19 \xt Md 25:31 \xt Md 25:41, Lo 2:8\x* \x - \xo 1:10 \xt Md 25:41,46, 2Fi 3:7 \xt Kl 3:4\x*   
\s1 ToꞋetoladi yadi veꞋoꞋola miTesalonaika faꞋidiya.  
\p
\v 11 Mena gaitomai-dina Kaiwabu yana yewaꞋela ana toveya hinalakayemu faꞋina, tova moyaꞋaina omi faꞋimiya aveꞋoveꞋoꞋola. Yaubada gikovami be dewa hagihagina againe wanamiyami. AveꞋoveꞋoꞋola be yana veluga againe mena dewa hagihagina gilubodami amine wanahuluhuluva. Ada ginafaiwalavelemi be yami nuwanuwa yamumuna tulina tulina mena havivila yamumuna tulina tulina agaidiya wanaseseyemaunena ada gava dewa gava dewa yami vetumagana againe giveꞋinuba, medema yana faiwala againe wanaluyabuna.  
\v 12 Au hidede amine aveꞋoꞋola be higa yami dewa againe yada Kaiwabu Yesu Keliso ana egana wanakilakahina. Yada Yaubada kadu Kaiwabu Yesu Keliso ginuwadogemi faꞋina, yami dewa againe Kaiwabu Yesu Keliso ana egana wanakilakahina ada BanaꞋe ami egana ginakilakahina. \x - \xo 1:12 \xt Kl 1:10 \xt 1Ko 10:31\x*   
\c 2  
\s1 Setani yana kaliva koyo-moꞋena yana lakayemu  
\s1 faꞋina givenuwaꞋatadi.  
\p
\v 1 Siule tobohiyameyao, yada Kaiwabu Yesu Keliso yana yewaꞋela yo ide yada vagaꞋauta Bana againe ana tova faꞋina anagahe.  
\v 2 Wanogali! KaꞋi valeya saꞋeyana wananogalina higa vaita Kaiwabu yana yewaꞋela ana tova ahe gilakayemu, nuwami keke ginamadufanifani kadu aseꞋasemi keke ginamaduꞋakolukoluni. Hakwadi againe mena valeya wanogalini? KaꞋi mene kaliva saꞋeyana gigahe vaita AluꞋaluwa Mahalina gidahawavemogataleni? O kaꞋi tamo hakwadi givenuwaꞋatami vaita ime adagahe o leta againe adaꞋetoladini higa vaita Kaiwabu ahe gidayewaꞋela? Ime keke-moꞋa hidede amine adagahe.  
\v 3 Badi hiveꞋalololo. Keke-moꞋa wanavenogaledi. FaꞋina Kaiwabu yana yewaꞋela ana tova keke ginamaduyemu tu nagona kaliva moyaꞋaidi hinanuwayewa be Yaubada hinavekwaulaugena, ada kaliva koyo-moꞋena vehimeya moyaꞋaina keke-moꞋa gidanuwenuweni-ma kabuꞋavane ginayemu. Bana Setani yana kaliva ma kalivai-nadi agolaufofola ginanuhagana.  
\v 4 Kaliva yadi viviluwa o kaꞋi yadi abahawadavadava tulina tulina ginahawaveꞋiyoyohoyedi. Au tauna ginakivekaiwabuna ginana Yaubada yana manuwa-tafalolo againe ginavetogana ginagayo, “Iya Yaubada akukaibeꞋu-moꞋa.” Hidedemi ginahuluva tu muliya Kaiwabu yana yewaꞋela ana tova ginayemu.  
\v 5 Boi iya omi buye kamiyami ana toveya gavadi aimo ginalakayemu-ma faꞋina gagahegahemi. Gavaita makewaꞋe hida gaitomai-dina faꞋidiya nuwami gidaꞋafolefoleni.   
\p
\v 6 Tu tova adamoya tamo gavadi bana kaliva koyo-moꞋena yana eda gisebodana, ada gava faiwala gisesebodana-ma omi wahalamanena. Atu aimo tova ginalubodana againe ginalakayemu.  
\v 7 Bana kaliva koyo-moꞋena tauna keke kabuꞋavane gidalakayemu tu kaliva moyaꞋaidi ahe hivebutu vehimeya tulina tulina keke-moꞋa hidanuwenuweni, ada yadi dewa againe kaliva koyo-moꞋena yana faiwala sevasevauyana kaꞋitana. Ada hidede amine sevasevauyana ginafifaisewa ginanunauwena tu Yaubada yana vehimeya againe bana yana eda ana toseboda ginavagalowoga.  
\v 8 Au toseboda ginavagalowoga tu bana kaliva koyo-moꞋena vehimeya moyaꞋaina keke-moꞋa gidanuwenuweni-ma kabuꞋavane ginalakayemu, atu Kaiwabu Yesu ginayewaꞋela be Tauna ginaꞋivemogatalina ana toveya, Bana awane kalivai-nadi ginayuvekweꞋuna, e yana mahalina veꞋakinamanamalina ginaluyawelina.   
\p
\v 9 Tu bana kaliva koyo-moꞋena yana lakayemu faꞋina kadu ganagahe. Setani ginafaiwalavelena be yana waveꞋalololo aituha fifiwalana kadu iyaꞋiyaya kadu abaveyaulowoga tulina tulina ginafifaisewadi.  
\v 10 Meda veꞋalololo againe koyona tulina tulina agaidiya badi adi egana bwavibwavina-ma ginanuwaꞋabiyedi. Badi kalivai-dina hidibutoyoga be keke nuwanuwa velemoꞋena againe hidahawahegedi-yo adi kibababala hidavaini faꞋina, adi egana bwavibwavina.  
\v 11 Keke nuwanuwa velemoꞋena againe hidahawahegedi faꞋina, Yaubada givehimeya be fwaya lakahina badi agaidiya giyemuyemu ada nuwadiya gififaiwala toyogina be higa nuwanuwa veꞋalololona faꞋina badi hinagayo, “Hida hima wona velemona.”  
\v 12 Ada au hidede amine gaveyao moyaꞋaidi nuwanuwa velemoꞋena keke hidavetumaganeni tu dewa koyona againe hikasikasisi, medema matahiwadi hinanuhagana. \x - \xo 2:12 \xt 1Te 4:13-17 \xt 2Te 2:8 \xt Md 24:5, Dan 11:36\x* \x - \xo 2:12 \xt Md 24:24, Ha 13:13\x*   
\s1 Yaubada givenuwadadanemi be kibababala wananuhagana.  
\p
\v 13 Tu tobohiyameyao, gilubodama be Yaubada againe omi faꞋimiya anavesivesiule, omi kalivai-mina agaimiya Kaiwabu nuwana gisena. Tuwai-lokalokana Yaubada aimo keke babi gidabubuni ana toveya, Tauna faꞋine giluwafami be higa ami kibababala wananuhagana. E, AluꞋaluwa Mahalina yana faiwala againe gisevehailemi be yana kaliva mahamahalimiyao wanamiyami, ada nuwanuwa velemoꞋena wavetumaganeni-yo ami kibababala wanunuhagana.  
\v 14 Kibababala ana VenuwaꞋata Yamumuna agaimiya alumamalena againe, mena yana lauwafa amine gikovami be higa omi yada Kaiwabu Yesu Keliso buye wanakaiwabu.  
\v 15 Tobohiyameyao, medema faꞋina wanamidi toyogina ada vehawala tulina tulina laumamala againe o leta againe ahawavelevelemi-ma agaidiya wanaluluveꞋavina.   
\p
\v 16-17 Tu aveꞋoꞋola be yada Kaiwabu Yesu Keliso Tauna kadu Yaubada Tamada aseꞋasemi hinakivevatuna, ada hinafaiwalavelemi be tova moyaꞋaina wanahuluhuluva yamumuna kadu wanagahegahe yamumuna. Bana Tamada nuwana agaideya gisena ada yana nuwadoga againe asevatu miyamiya-vagahina kadu abaluveꞋavina toyogina giveleda. \x - \xo 2:16-17 \xt 1Te 1:4, Ef 1:4-5, 1Fi 1:2 \xt 1Ko 16:13, Lo 8:30\x* \x - \xo 2:16-17 \xt Hi 13:21, 2Ko 1:3\x*   
\c 3  
\s1 Ime faꞋimeya Yaubada againe wanaveꞋoꞋola.  
\p
\v 1 Siule tobohiyameyao, kadu yama gahe saꞋeya-moꞋena. Ime faꞋimeya wanaveꞋoꞋola be venuwaꞋata Kaiwabu faꞋine omi agaimiya ginauna be wahawavekaiwabuyena amine, meda fafali moyaꞋaina agaidiya ginanauna be kaliva moyaꞋaidi hinahawavekaiwabuyena.  
\v 2 Tu badi kaliva koyodiyao kadu nuwadi nubalabalana ma nuwanuwadi hinakivekoyoma. WanaveꞋoꞋola be higa Yaubada badi agaidiya ime ginalugolegolema. FaꞋina keke kaliva moyaꞋaidi yama laumamala hidavetumaganeni.  
\v 3 Atu Kaiwabu giwonadabadaba amine ginagugaiyena faꞋina ide adafaiweya Bana kanavetumaganena, ada BanaꞋe ginakivetoyogimi ada kaliva koyona Setani againe ginalugolegolemi.  
\v 4 Ada Kaiwabu omi faꞋimiya yama nuwaveꞋavina givelema higa gavaimi avehimeyemi, mededemi tova adamoya wadewadewa kadu aimo wananunauwena yami dewa.  
\v 5 Ada au Kaiwabu againe aveꞋoꞋola be nuwami ginakifolefolena be Yaubada yana nuwanuwa hawahawahegana agaimiya aseꞋasemiya wanaꞋayaunena, kadu Keliso vita tulina tulina giꞋatuvefaꞋilena amine, meda omi wanaꞋatuvefaꞋilena. \x - \xo 3:5 \xt Lo 15:30-31, Ef 6:19 \xt Yo 17:15 \xt Hi 12:2\x*   
\s1 Keke wanamiya-kawowo au wanadibumuhiga.  
\p
\v 6 Tu tobohiyameyao, Kaiwabu Yesu Keliso ana eganeya avehimeyemi be badi tovetumagana dibudi gitoyoga ada keke vehawala ahawavelevelemi-ma hidamuliyeni, medema wanamiyavehailedi.  
\v 7 FaꞋina omi taumiyao wahalamanena gilubodami be yama huluva wanaveꞋuꞋulena. Ime omi buye kamiyami ana toveya, keke adamiya-kawowo.  
\v 8 Keke tamo hakwadi yana aꞋa adaꞋaꞋa-kawowoni, higa vaita fata keke adaseni. Au yama wavediwe afifaisewa. Uyadayada be bogi afifaisewa toyogina be higa keke ama veꞋa faꞋina omi vita wananuhagani.  
\v 9 Gilubodana be amaga ama kevakeva faꞋina adaveꞋoꞋolemi be wadavele-kawowoma. Tu keke medede amine adahuluva, faꞋina nuwanuwama yama huluva againe abaꞋita anavelemi be wanaveꞋuꞋulema.  
\v 10 Boi aimo buye kamiyami ana toveya vehimeya avelemi agayo, “Hai kaliva faisewa hinadibutoyogena medema keke aꞋa wanaveledi.”  
\v 11 Au hidede amine agahe faꞋina tufoimi valeyami anogalina higa wamiyamiya-kawowo. E, tufoimi keke wadafifaisewa tu mali kaliva adi mataꞋatuboda wasesebodabodana.  
\v 12 Adamoya yada Kaiwabu Yesu ana eganeya avehimeyemi kadu agahevagadonemi vaita yami waꞋaseniwalova yami faisewa wanaꞋitaveꞋavina be taumiyao yami faisewa guwana wanaꞋauꞋana.   
\p
\v 13 Tu tobohiyameyao moyaꞋaimi agaimiya anagahe. Tova moyaꞋaina igibagiba hagihagina againe keke-moꞋa dibumi ginatoyoga.  
\v 14 KaꞋi tamo hakwadi agaimiya kivetuvetunu hida yami leta againe aꞋetoladina-ma keke ginaꞋabini, bana kalivai-nadi wanaꞋita-hagihagiyena. Au wanamiyavehailena be higa wowomumu ginaꞋayaunena.  
\v 15 Atu keke vaita bana nibaimi amine wanahuluvini. Au bana vaita tobohiyami amine wanadakeyena. \x - \xo 3:15 \xt 1Te 5:14 \xt 1Te 2:9 \xt 1Te 4:11 \xt Ga 6:9, 1Ko 15:58\x*   
\s1 ToꞋetoladi yadi lukafoi.  
\p
\v 16 Kafoi tobohiyakweyao, Bana Kaiwabu aseniwalova inubana ma Tauna aseꞋasemi ginakiveniwalovina. Tova hagihagina kadu tova koyona, gavadi gavadi ginalakayemu-ma Kaiwabu Tauna yami aseniwalova ginavelemi. E, Kaiwabu moyaꞋaimi agaimiya ginamiyami.   
\p
\v 17 Kaliva saꞋeyana hida leta againe yaku nuwanuwa giꞋetoladina, tu adamoya iya Folo yaku lukafoi agaimiya tauku nimakuya gaꞋetoladina. Au hidede amine yaku leta moyaꞋaina gavesainina Iya Folo nimaku.  
\v 18 Yada Kaiwabu Yesu Keliso yana nuwadogeya moyaꞋaimi wanamiyami.   
\qr (Ime Folo Sailosi Timoti bonama.) \x - \xo 3:18 \xt Yo 14:27 \xt 1Ko 16:21\x*