\id 2PE  
\h 2 FITA 
\toc1 FITA yana leta anavelu 
\toc2 2 FITA 
\mt1 FITA yana leta anavelu  
\ip Hida Fita yana leta anavelu tovetumagana fafali tulina tulina agaidiya himiyami-ma adi agoꞋabi faꞋina giꞋetoladina. ToveꞋalololo yadi vehawala veꞋalololona againe hivebutu hinuwaꞋabiyedi ada vehawalai-nadi guwana dewa udoꞋudona. Kadu higahe vaita Yesu keke velemoꞋena ginayewaꞋela.  
\ip Tu Fita tovetumagana gigahevagadonedi be higa Yesu ana halamana velemoꞋena againe hinaluluveꞋavina, ada Bana yana yewaꞋela yana vekwalu inubana ma Yaubada todibutoyoga giꞋatuvefaꞋiledi be yadi nuwavilana faꞋina gibodaboda. Leta dobona hidede amine.  
\io1 Lusiule. 1:1-2  
\io1 Yaubada yana lauwafa yo yada hawahega Bana againe ma. 1:3-15  
\io1 Afositolo falofita yadi awatalatalaina Yesu faꞋine velemoꞋena ma. 1:16-21  
\io1 Tovehawala veꞋalololodiyao faꞋidiya givenuwaꞋatadi. 2:1-22  
\io1 Yesu yana yewaꞋela faꞋina. 3:1-18  
\c 1  
\p
\v 1 Yo siule omi Yesu Keliso againe wavetumagana-ma kalivai-mina, BanaꞋe yada Yaubada kadu ada Tokibababala. Iya Saimoni-Fita Yesu againe gaveꞋagetoga kadu yana kabu gavaina be gaveꞋafositolo-ma yami leta gaꞋetoladina be wanaꞋitana. Bana Yesu Keliso yada Yaubada kadu ada Tokibababala kaliva tunutunugina faꞋina yada vetumagana giveleda omiꞋiyao be meda imeꞋeyao ada leleleya Bana matane.   
\p
\v 2 Nuwadoga kadu aseniwalova Yaubada kadu yada Kaiwabu Yesu Keliso adi halamana againe hiveꞋinuba. Nuwanuwaku Badi wanahalamanedi-yo yadi nuwadoga kadu yadi aseniwalova ana ayauna againe wanatutuveguvegulami. \x - \xo 1:2 \xt Kl 1:9-10, Fl 3:10\x*   
\s1 Yaubada giluwafada tu ide yana nuwanuwa agaidiya  
\s1 adafaiweya kadahawahegeda.  
\p
\v 3 Keke gavana faꞋina tu Yesu Keliso yana kova faꞋina ganaluꞋageyemi be higa yana nuwanuwa amine wanahuluhuluva. Yesu BanaꞋe gikovada-ma ana halamana againe faiwala kavaina be yana nuwanuwa amine adafaiweya kanadewadewa. E, yana kaiwabu kadu yana nuwanuwa hagihagina agaideya giꞋivemogatalini-yo BanaꞋe nuwada giꞋabina, ada gifaiwalaveleveleda-yo gavadi gavadi gilubodada be yana nuwanuwa amine kanamiyami, medema giveleda.  
\v 4 Kadu mena yana nuwadoga againe yana veluga agaideya giwonadabedabena be higa nuwanuwa itaꞋitaluvadigadi adafaiweya kanavekwaulaugedi, nuwanuwai-dina faꞋidiya gaitoma moyaꞋaina babiya hikoyokoyo. E, yana wonadabadaba faꞋidiya nuwanuwa koyodi amifaiweya waꞋosedi be Tauna yana nuwanuwa givelemi-yo ami itaꞋita au vaita Bana ana itaꞋita amine wavaina. Mena yana wonadabadaba fifiwala-moꞋedi agaideya keke kanawona!   
\p
\v 5 Tu Yaubada medemi gikivetoyogida kadu yana wonadabadaba ada veluga faꞋina giveleda faꞋina, wanavegavegala yami waꞋidibumuhiga. Yesu Keliso againe ahe wavetumagana. Au huluva yamumu-moꞋena yami vetumagana buye wanaveꞋatutamoꞋaina. Kadu Yaubada yana nuwanuwa ana halamana yami huluva yamumuna buye wanaveꞋatutamoꞋaina.  
\v 6 Kadu taumiyao yami nuwanuwa ana hawata Yaubada yana nuwanuwa ana halamana buye wanaveꞋatutamoꞋaina. Kadu atuvefaꞋila taumiyao yami nuwanuwa ana hawata buye wanaveꞋatutamoꞋaina. Kadu Yaubada ana veꞋamohimohina atuvefaꞋila buye wanaveꞋatutamoꞋaina.  
\v 7 Kadu Yaubada ana veꞋamohimohina tobohiyamiyao adi nuwakabubu buye wanaveꞋatutamoꞋaina. Kadu tobohiyamiyao adi nuwakabubu againe wanatutuveguvegulami-yo badi faꞋidiya wanahawahege-moꞋemi.  
\v 8 KaꞋi mena dewa tulina tulina againe wanatutuveguvegulami, au yada Kaiwabu Yesu Keliso ana halamana againe wanafifaiwala. E, yami vetumagana ana ita keke vaita guwana keke. Au waguwami wanamiyami.  
\v 9 Tu gava kaliva mena dewai-dina keke gidaseyemaunedi, medema Yaubada yana nuwanuwa faꞋina matana lowolowogina be nuwana giꞋuyuyuna, kadu yana koyona moyaꞋaina boi gifaisewadi tu Yesu Keliso gikolahegedi ma nuwana giulu.   
\p
\v 10-11 Tu tobohiyakweyao, ahe wahalamanena Yaubada giluwafami kadu gikovami be yana yoꞋogaga wanamiyami. Hidedemi gikovaluwafami faꞋina, gilubodami be yami vegala moyaꞋaina agaidiya yana lauwafa au velemoꞋena ma wanaseyemaunena. KaꞋi hidedemi wanahuluhuluva, au keke-moꞋa wananuwayewa kadu Yaubada ginahawahegemi be abaluku kikaiwabuna ginayauni-yo Yesu Keliso yana abavehimeya miyamiya-vagahina againe wanaluku, BanaꞋe yada Kaiwabu kadu ada Tokibababala amanadi. \x - \xo 1:10-11 \xt Ef 3:16-19 \xt 2Ko 3:18, Ef 4:24\x* \x - \xo 1:10-11 \xt Ga 5:22-23 \xt 1Yn 2:11\x*   
\s1 Afositolo yadi hawavemogatala Yesu Keliso faꞋine  
\s1 au velemoꞋena.  
\p
\v 12 Tu omi nuwanuwai-dina galukahihiyedi-ma ahe wahalamanena kadu nuwanuwa velemoꞋena agaimiya giꞋela-ma wakidonena. Omi halamanimiyao nonogana tova moyaꞋaina nuwami ganatalafolefolena.  
\v 13-14 Iya gahalamanena tova kabisona hida babi ganahegena yada Kaiwabu Yesu Keliso agaikuya gihawavemogatalena amine. Gilubodaku be aimo babi ana wowoya vaita vada amine gamimiyami ana toveya, mena nuwanuwai-dina faꞋidiya nuwami gadatalafolefolena.  
\v 15 Medema faꞋina yaku waꞋidibumuhiga eda ganakidewedewena be aimo ahe gananuyabuyabumi-yo nuwanuwai-dina faꞋidiya tova moyaꞋaina anafaiweya nuwami ginaꞋaꞋafolefolena.   
\p
\v 16 Tu boi ime afositolo yada Kaiwabu Yesu Keliso yana faiwala kadu yana yewaꞋela faꞋina agaimiya alumamala ana toveya, keke adagahe-kawowo vaita mali kaliva yadi kahikahihi veꞋalololo faꞋina hilukahihiyena-ma adayakahini. Au ime taumeyao matameya Yesu yana kaiwabu aꞋita-moꞋena.  
\v 17-18 Boi ime Yesu buye oya mahamahalina againe alaka ada buye amiyami tu auheꞋama-nadi Yaubada Tamada Yesu gikivekaiwabuna kadu ana egana gikivelakahina. Mahalina veꞋakinamanamalina gihobu-yo Bana Tokaiwabu-moꞋa agona Yesu againe gilakayemu gigayo, “Hida NatuꞋaseꞋaseku. BanaꞋe nuwaku gikiveyamumu-moꞋena.” Mena agonai-nadi lobameya gilakayemu-ma ime taumeyao anogalina. \x - \xo 1:17-18 \xt 2Ko 5:1, Yo 21:18-19 \xt Md 17:1-5\x*   
\s1 Falofita yadi awatalatalaina Yesu Keliso faꞋine  
\s1 au velemoꞋena.  
\p
\v 19 Boi tuwai-moꞋena Yaubada bonana ana toꞋawatalatalaina Keliso faꞋine higaheye-vagahina. Ime taumeyao Yesu Keliso aꞋitana faꞋina, ahalamanena toꞋawatalatalaina yadi gahe au velemoꞋena. Au gilubodami be yadi venuwaꞋata wanavenogalena faꞋina medema vaita mahalina uyuyu againe gimahamahala. E, tova moyaꞋaina yadi venuwaꞋata againe nuwami ginanauna be wananunauwena tu mala ginawedala be malatutulova ginalaka amine, Keliso yana yewaꞋela ana toveya nuwamiya ginavemalatutulova.  
\v 20-21 Tu nuwanuwa saꞋeyana wanahalamane-hagihagiyena, higa Yaubada bonana ana toꞋawatalatalaina yadi venuwaꞋata keke taudiyao nuwadiya gidaveꞋinuba. Au AluꞋaluwa Mahalina giyuvetunetunedi amine Yaubada bonana hiꞋawatalatalainena. Medema faꞋina keke tamo hakwadi falofita yana venuwaꞋata Veyao Tuwaina ana bukiya gidadauda-ma tauna anafaiweya gihawavetuvetununi, tu AluꞋaluwa Mahalina yana kivetuvetunu againe anafaiweya gihalamanena. \x - \xo 1:20-21 \xt Lu 1:76-79 \xt 2Ti 3:16, Af 3:21\x*   
\c 2  
\s1 Fita tovehawala fwayafwayadiyao faꞋidiya givenuwaꞋatada.  
\r Yuda 1:4-16  
\p
\v 1 Wona velemona Yaubada bonana ana toꞋawatalatalaina agaidiya halamana kavaina, tu kadu boi tuwaina toꞋawatalatalaina fwayafwayadiyao Yaubada yana yoꞋo hinafadiya hitowamidi be kaliva hinuwaꞋabiyedi. Meda anafaiweya tovehawala fwayafwayadiyao omi hinafamiya hinalakayemu. Nuwanuwa veꞋalololona hinavehawalekauyemi be medema againe yami vetumagana hinakivekoyona. Yada Kaiwabu gitutuvehobudi nonogana hinavekekeyena. Au adi agolaufofola taudiyao agena hinamaduvagataina.  
\v 2 Tufoidi moyaꞋaidi yadi dewa udoꞋudona keke maꞋita hidawowomumuyeni-ma hinamuliyena, ada mali kaliva yadi dewa koyona hinaꞋita-yo nuwanuwa velemoꞋena ana eda hinahawatagona.  
\v 3 Badi tovehawalai-dina matadi giꞋalalaka ada yadi vehawala taudiyao hiveꞋinubena-ma againe hinanuwaꞋabiyemi-yo yami mani wanaveleveledi. Tuwai-moꞋena Yaubada badi adi matahiwadi gikidewedewena. E, Bana adi Tolauyawela matana keke gidatuvedamani, au giꞋita-vagahidi. \x - \xo 2:3 \xt 2Veh 13:1-5, Md 24:24 \xt Lo 2:24, 16:18\x*   
\s1 Yaubada yana matahiwadi ana abaꞋita giyakahina.  
\p
\v 4 WaꞋita, gilubodadi be adi matahiwadi hinanuhagana faꞋina boi tuwai-lokalokana Yaubada yana tovenuwaꞋata tufoidi hikoyo againe Yaubada keke gidaꞋita-moꞋedi, au abaga koyone giwavidi kahu tunugi-vadavadaꞋaina agaidiya giyogodi. Umalovana-kahukahu againe adi matahiwadi vedewayauga ana toveya hinanuhagana-ma hibodabodana.  
\v 5 Meda anafaiweya tuwai-lokalokana Nowa yana toveya tova moyaꞋaina tomiyababi moyaꞋaidi koyona hififaisewadi againe Yaubada keke gidahinekalikaliyedi, au mala gituwa be givekayodi-yo hiꞋalika-Ꞌowoga. Tu Nowa dewa yegayegana ana tolaumamala faꞋina, Yaubada gikibababalena kadu ana yoꞋo kalivai-dina seveni buyeꞋi.  
\v 6 Meda muliya Yaubada kaliva koyodiyao moyaꞋaidi melala adi egana Sodoma Gomola agaidiya giꞋitadi-yo givematahiwadiyedi. AiꞋalaꞋalata againe gikabudi be wauyodiga. Mena melalai-dina abaꞋita higa kaꞋi kaliva Yaubada hinavekwaulaugena digo, makewaꞋe yadi dewa koyona ana laufata hinanuhagana.  
\v 7-8 Tu Sodoma Gomola agaidiya Lota anakaibe yana dewa yegayegana faꞋina Yaubada gimidilugolegoleni-yo melala luhei giluyawelidi. Tova be tova Lota badi kalivai-dina hinafadiya gimiyami tu yadi dewa bwanebwanenena giꞋitaꞋitana kadu yadi wonakoyokoyo ginoganogalina. Keke nuwanuwadi Yaubada yana vehimeya hinaꞋidibumuhigedi, au udo tulina tulina agaidiya hihawahawahegedi. Bana Lota kaliva yegayegana ma yadi dewa koyo-moꞋena giꞋita-yo ginuwanuwavita ana ayauna keke maꞋi yamumuna.  
\v 9 Wona velemona Yaubada badi Nowa kadu Lota gikibababaledi faꞋina kahalamanena Bana anafaiweya ide kaveꞋamohimohinena-ma vita agaidiya ginakibababaleda. Atu kaliva koyodiyao matahiwadi againe anafaiweya ginakiveꞋavidi ginanunauwena tu vedewayauga ana tova.  
\v 10 Au hidedemi kaliva koyodiyao moyaꞋaidi hinanuhagana tu badi dibudi koyona ana nuwanuwa ayaꞋayafanina agaidiya hihawahawahegedi kadu abavehimeya moyaꞋaina hihawaveꞋiyohoyohoyena-ma kalivai-dina makewaꞋe adi matahiwadi au hidede amine hinanuhagana. \x - \xo 2:10 \xt Md 25:41 \xt Hi 11:7, Aba 6:13,18\x* \x - \xo 2:10 \xt Aba 19:12-13,24 \xt 1Ko 10:13\x*  
\s1 Tovehawala fwaya fwayadiyao yadi dewa  
\s1 koyo-moꞋena faꞋina.  
\p Tu waꞋitadi, tovehawala fwayafwayadiyao badi toꞋihawadamana kadu toselakalaka. Lobama ana kaliva kikaiwabudiyao adi hawatagona faꞋina keke maꞋita hidamatauta.  
\v 11 Tu lobama ana tovenuwaꞋata badi tovehawalai-dina hifaiwalahegedi kadu hikaiwabuhegedi nonogana keke-moꞋa yadi waꞋihawadamana Yaubada matane hidahawavekoyoyedi.  
\v 12 Tu wama kalivai-dina gaitoma tulina tulina keke hidahalamanedi-ma hihawavelaigedi. WaꞋitadi, badi vaita kevakeva walawalaꞋa amine keke wanuwadiyao higa-kawokawowo. Hitubutubuga be kaliva hikikiveꞋavidi-yo hiluluyaweyawelidi. Meda anafaiweya badi tovehawalai-dina hinabwavi.   
\p
\v 13 Tova moyaꞋaina mali kaliva vita hiveleveledi tu ana laufata ma taudiyao vita hinanuhagana. Keke bogi au uyadeyadeya yadi nuwanuwa ayaꞋayafanidi agaidiya hihawahawahegedi, ada medema abavemwamwala lakahina badi matadiya. Yami anuwaꞋuduꞋudu Yesu faꞋine ana toveya hiꞋelaꞋela be buye waꞋauꞋa tu yamiꞋa againe yadi nuwanuwa ayaꞋayafanina hiseusena faꞋina adi bwanene hivedamami be yamiꞋa hikivekoyona.  
\v 14 Tova moyaꞋaina vevine agaidiya matadi giludigaga-vagata, keke maꞋita agodi gidakibo. Yadi veꞋalololo vaita mwau amine tovetumagana kowakowadiyao hiveꞋalahidi. Nuwanuwa itaꞋitaluvadigana hisikuluye-Ꞌowona. Au Yaubada yana alatabutabu dibune himimiyami.  
\v 15-16 Eda tunutunugina hihegena be hinu-kawokawowo ada Belami Beyo natuna yana eda hiꞋitavaina. Bana Belami nuwanuwana lakahina mani faꞋina gikoyo. (Tovehimeya saꞋeyana gilaufata Belami againe be higa miIsileli ginaꞋalatabutabuyedi ada yana alatabutabu againe ginaꞋivebwavidi). Tu doniki kwaune ginauna tu doniki Belami yana koyona faꞋina gidakeyena. Doniki gahe keke anafata nonogana kaliva agona amine gigahe be yana dewa kwavakwavana gihawatana. Wona velemona wama tovehawala koyodiyao vaita Belami amine, matadi giꞋalalaka.   
\p
\v 17 KaduꞋe waꞋitadi, badi vaita guya gihayahaya amine, keke tamo aluꞋaluwami ana gufa yadi vehawala againe wananuhagani. Kadu badi vaita howahowa mala lakahina giꞋaluꞋalugena amine, yadi nuwanuwa keke anafaiweya gahe ginaꞋabini. Yaubada yadi abaga ahe gikidewedewena, au aimo umalovana kahu tunugi-vadavadaꞋaina againe hinamiyami.  
\v 18 Yadi waselakalaka vaita nuwanuwahuyadiyao hilulumamala tu yadi gahe au kwavakwavana. Kadu kaliva dibumi koyona ana nuwanuwa itaꞋitaluvadigana hihawaveyamumuyena vaita hidedemi wanadewadewa. Au hidedemi hivehavehawala faꞋina, badi hivebutu Yesu againe hivetumagana be kaliva koyodiyao adi yoꞋo hiꞋotayabuyabudi-ma yadi mwau higa yadi vehawala againe hiveꞋalahidi.  
\v 19 Higahedi higayo, “KaꞋi yama vehawala wanamuliyena, au keke mali vehimeya againe wanaveꞋagetoga, taumiyaogaga amine wanahuluva.” Au hidedemi higahegahe tu taudiyao dewa balana againe hiveꞋagetoga. FaꞋina gavadi kaliva givehivehimeyena, medema againe giveꞋagetoga.  
\v 20 KaꞋi Yesu Keliso yada Kaiwabu kadu ada Tokibababala ana halamana hiꞋayaunena be babi ana nuwanuwa koyodi hiꞋotayabuyabudi tu muliya nuwanuwai-dina agaidiya hiyewadi-yo koyona gifafadi be giveꞋawawadi, kaꞋi hidedemi hinahuluva, au nagona yadi miya koyona tu muliya yadi miya gikoyo-moꞋa.  
\v 21 Hoiyoi tovehawala fwayafwayadiyao! KaꞋi Yesu yana eda tunutunugina keke hidahalamaneni digo, yadi koyona faꞋina vita hidanuhagana. Atu ahe hihalamanena tu Yaubada yana vehimeya mahamahalina hinogalina-ma hidibutoyogena faꞋina vita keke kabiꞋona hinanuhagana.  
\v 22 Au yada gahegahe luhei amine hihuluva. Kagayo, “KaꞋi galuꞋeta ginaꞋovala, au ginana ginayewana tauna ovalina ginaꞋana.” Kadu saꞋeyana ma kagayo, “KaꞋi kwamayoku bawe hinavetowana be hinasena, au ginayewana tofula ginatowana.” \x - \xo 2:22 \xt Yu 1:9-13 \xt Ail 22 \xt Yo 8:34, Lo 6:16-17\x* \x - \xo 2:22 \xt Md 12:43-45, Hi 6:4-6, Md 26:24 \xt Gah 26:11\x*   
\c 3  
\s1 Kaiwabu Yesu yana yewaꞋela ana tova faꞋina.  
\p
\v 1 TobohiyaꞋaseꞋasekweyao, hida fefe gaꞋetoꞋetoladina-ma yaku leta anavelu agaimiya. Mena yami leta luhei agaidiya nuwami gatalafolena be higa nuwanuwa yegayegana nuwami ginavai-moꞋena.  
\v 2 Boi tuwai-moꞋena falofita mahamahalidiyao Yaubada yana nuwanuwa hiꞋawatalatalainena, kadu yada Kaiwabu ada Tokibababala yana venuwaꞋata ime yana afositolo avelemi. Nuwanuwaku mena venuwaꞋatai-dina agaidiya nuwami ginanunauyena.   
\p
\v 3 Tobohiyakweyao, nagona nuwanuwaku wanahalamanena tova ana abalauyabu againe tohawavelaiga hinalakayemu. Taudiyao yadi nuwanuwa itaꞋitaluvadigana hinahuluvina kadu hinahawavelaigemi.  
\v 4 Hinagahe hinagayo, “Boi Yesu giwonadabadaba vaita ginayewaꞋela be kaliva ada laufata ginaveleda. Hai Yesu Tauna? Keke-moꞋa ginayewaꞋela. Tuwai-lokalokana Yaubada babi gimidibubuna ana toveya be ginunauwena tova adamoya gaitoma moyaꞋaina tuwaina hidauda amine meda adamoya hidadauda. Tuwai-moꞋena bwanenedeyao alika againe hiꞋenonuwaulu be tova adamoya kanunauwena yada miyami babiya au leleleya. Au babi ginaduva-vagata.” Au hidedemi higahe.  
\v 5-6 Tu badi kalivai-dina keke nuwanuwadi gavadi tuwai-lokalokana Yaubada yana vehimeya againe gilakayemu-ma hinanuwa-nunauyeni. Malatuwa nuwadi giulu. Gilakayemu ma hidede amine. Tuwai-lokalokana Yaubada gigahe-yo lobama gilakayemu. Ma gufagaga gidauda tu Yaubada gigahe-yo gufa hinafane babi gifuꞋu ada wagufana gidauda. Tu kadu gufa againe babi-nadi medema tovai-nadi gidauda-ma ana matahiwadi ginuhagana. Malatuwa againe Yaubada tomiyababi moyaꞋaidi giluyaweyawelidi.  
\v 7 Kadu meda Yaubada yana gahe againe lobama be babi adamoya hidadauda-ma adi matahiwadi hinanuhagana. Yaubada ahe givehimeya be aimo vedewayauga ana toveya aiꞋalaꞋalata againe ginakabudi be kaliva koyodiyao ginaveꞋalayaweyawelidi. \x - \xo 3:7 \xt 1Ti 4:1, Yu 1:17-18 \xt Aba 1:2,6-9, 7:11,17,23 \xt 1Ko 3:13\x*   
\p  
\p
\v 8-9 Tu tobohiyaꞋaseꞋasekweyao, nuwanuwa saꞋeyana keke nuwami ginaulu. Kaliva tufoidi hinuwanuwa higayo, “Boi Kaiwabu Yesu giwonadabadaba vaita ginayewaꞋela tu gavadi-yo givekwalu lakahina, keke gidamaduꞋela?” Hidemi higahe tu keke gidavekwalu faꞋina malamala wani tausani (1,000) vaita lauva tunugina ide matadeya tu Yaubada matane vaita aiyeta saꞋeyanaga amine. Meda aiyeta saꞋeyana ide matadeya ma vaita malamala wani tausani amine Bana matane. Yesu yana yewaꞋela faꞋina giwonadabadaba ada gahe-nadi yana yemu againe keke gidavekwalu. Tu giꞋatuvefaꞋilemi, keke nuwanuwana tamo hakwadi aiꞋalaꞋalata againe ginabwavi. Au nuwanuwana kaliva moyaꞋaidi Bana againe hinahagaviladi be yadi dewa koyona hinahegena.   
\p
\v 10 Tu Kaiwabu Yesu yana tova vaita tokaiꞋafu amine ginavefutaꞋami. E, Bana ginayewaꞋela ana toveya lobama wabutuna ginalunununuga be ginayawowola. Kauwana vaikohi ibadibadi babi ana gaitoma moyaꞋaina ginaꞋalahi-Ꞌowodi.  
\v 11-12 Wona velemona gaitoma moyaꞋaina ginaꞋalahi-Ꞌowodi tu omi gavaiyami? Yaubada yana Tova walulubodena tu gilubodami be Bana againe wadahawahawahegemi-yo yana nuwanuwa amine wadahuluhuluva. KaꞋi Yaubada yana nuwanuwa wanaꞋidibumuhigena digo yana Tova wanakiveꞋedaꞋufona. Medema Tovai-nadi aiꞋalaꞋalata lobama ginaꞋalayaweyawelina kadu ana lukalalava againe kauwana vaikohi ibadibadi babi ana gaitoma moyaꞋaina ginaꞋulafuwadi be hinayawowola.  
\v 13 Tu Yaubada ahe giwonadabadaba higa lobama be babi ivagudi ginabubudi, ada medema agaidiya dewa hagihaginaga ginaduva-vagata. Ada mena lobama be babi ivagudi faꞋina kalulauboda. \x - \xo 3:13 \xt Sam 90:4, Isi 18:23, 1Ti 2:4 \xt Md 24:43-44\x* \x - \xo 3:13 \xt Ais 65:17, Ha 21:1,27\x*   
\p  
\p
\v 14 Siule tobohiyaꞋaseꞋasekweyao, au hidedemi babi ivaguna ana dewa hagihaginaga walulubodena faꞋina, yami waꞋidibumuhiga wanavegavegala be yami dewa yegayegana keke ami wavita Yaubada matane wanamiyami kadu yami waꞋaseniwalova wanamiyami.  
\v 15 Yada Kaiwabu yana vekwalu ana nuwanuwa hidede amine. GiꞋatuvefaꞋilemi be higa moyaꞋaimi yana kibababala wananuhagana. Meda anafaiweya tobohiyanuwada Folo agaimiya giꞋetoladina, ada Yaubada ginuwahuyavelena.  
\v 16 Tova moyaꞋaina Kaiwabu Yesu yana yewaꞋela kadu ide yada dewa faꞋina yana leta moyaꞋaina agaidiya au hidedemi giꞋetoꞋetoladina, yama nuwanuwa leleleya. Tu yana leta agaidiya yana nuwanuwa tufona ana halamana vitana. Kaliva fanifanidiyao yadi vetumagana walamina keke ma nuwanuwai-dina hikivilaviladi be hikivekoyodi. E, Folo yana etoladi kadu mali gahe Yaubada yana kaliva Veyao Tuwaina ana bukiya hiꞋetoladina-ma hikivilaviladi-yo taudiyao adi agolaufofola hifaisewana.   
\p
\v 17 Tu omi tobohiyaꞋaseꞋasekweyao mena tovehawala fwayafwayadiyao Yaubada yana gahe hikivekoyona ma ahe wahalamanena. Medema faꞋina taumiyao wanaꞋitaveꞋavimi be mena kalivai-dina Yaubada yana vehimeya hivenikohiyena-ma yadi veꞋalololo againe keke hinanuwaꞋabiyemi. Adamoya yami vetumagana wakidonena tu wanaꞋitaveꞋavimi be badi keke agolaufofoleya hinavebeꞋumi.  
\v 18 Tu omiꞋiyao ma nuwanuwaku Yesu Keliso yada Kaiwabu be ada Tokibababala ana halamana kadu yana nuwadoga ana ayauna agaimiya ginatubutubuga. Bana ana egana kanakilakahina be yana kaiwabu ginaduva-vagata tova adamoya kadu tova inaga inaga keke ana abalauyabu. Ehe hidedemi.   
\qr (Iya Saimoni-Fita bonaku.) \x - \xo 3:18 \xt Lo 2:4 \xt Hi 2:1 \xt 2Fi 1:2, Ef 1:17\x*