\id 1JN  
\h 1 YONI 
\toc1 YONI yana leta nagona 
\toc2 1 YONI 
\mt1 YONI yana leta nagona  
\ip Hida Yoni yana leta nagona badi tovetumagana melala tulina tulina Esiya ana fafaliya himiyami-ma agaidiya giꞋetoladina. Yoni givesilakai ada Efeso againe gimiyami tu giꞋetoladi.  
\ip Bana Yoni yana inuba luhei. SaꞋeyana ma tovetumagana giluꞋageyedi be Yaubada Tauna kadu Natuna Yesu Keliso agaidiya hinamiyaveꞋavina. Yaubada againe hinuwanuwa lakahina amine, meda gilubodadi be tobohiyadiyao agaidiya hidanuwanuwa lakahina. Kadu yana inuba anavelu ma vehawala veꞋalololona faꞋina giꞋagoꞋabiyedi. Badi toveꞋalololo higahe vaita wowoda gaitoma koyona. Kaliva wowoda koyona yana abaga faꞋina Keliso keke velemona ada nuya gidaꞋoseni be gidavekaliva. Yana miyami vaita kaliva amine tu keke velemona wawowona kadu keke velemona Yaubada Natuna. Kadu higahe vaita nuwahuya nuwanuwa hawahawahegena gitubutagona ada dewa yegayegana keke hidanuwenuweni. Au hidedemi badi Keliso nibaineyao hivehawala faꞋina, Yoni nuwanuwana yadi fwaya nuwanuwa velemoꞋena againe ginayawelina, ada Yesu yana vekaliva kadu veꞋahawahawahega faꞋina gigahevagadona. Leta dobona hidede amine.  
\io1 Leta ana nuwanuwa nafona. 1:1-4  
\io1 Mahalina ana dewa tulina, uyuyu ana dewa tulina ma. 1:5-2:17  
\io1 Keliso nibaineyao yadi fwaya faꞋina giꞋagoꞋabiyedi. 2:18-29  
\io1 Yaubada natuneyao kadu Setani natuneyao adi nuwaveꞋuveꞋu faꞋina. 3:1-4:6  
\io1 Yaubada yana nuwanuwa hawahawahegana faꞋina veꞋahawahawahega natuneyao adi lauboda. 4:7-5:5  
\io1 Yesu Keliso inubana ana tohawavemogatala kadu yawai-vagata faꞋina. 5:6-21  
\c 1  
\s1 Tomiya-vagata ana egana Bona, higa Yesu Keliso faꞋina  
\s1 Yoni gilukahihi.  
\p
\v 1 Keke gavana faꞋina tu Bana Bona yawai-vagata velemoꞋena inubana ma faꞋine ime afositolo avenuwaꞋata. Boi tuwai-moꞋena babi ana abaveꞋinuba ana toveya, Bana Bonai-nadi gimiyamiya-vagata, ada muliya kaliva-moꞋena yana gahe ime anogalina, kadu taumeyao matameya aꞋitana, kadu taumeyao nimameya aꞋabina.  
\v 2 E, kaliva ana egana Yawai-vagata velemoꞋena Tauna giꞋivemogatalina be ime aꞋitana. Ada gavaimi aꞋitana amine aꞋawatalatalainemi kadu avenuwaꞋatami. Ada Bana Yawai-vagata amanadi boi tuwai-moꞋena Tamada buye himiyamiya-vagata, ada muliya ime agaimeya Tauna giꞋivemogatalina.  
\v 3 Ada ime Bana Yawai-vagata velemoꞋena aꞋitana kadu yana gahe anogalina, ada Bana faꞋine avenuwaꞋatami. Au hidedemi avenuwaꞋatami be higa imeꞋeyao Badi Tamada kadu Natuna Yesu Keliso buye avevido avedayaga amine, meda kadu omiꞋiyao mena vevido-nadi wanaꞋayaꞋayaunena.  
\v 4 Ada keke gavana faꞋina tu omi agaimiya gaꞋetoladi be higa moyaꞋaida kanavevido kanavedayaga yo kanavemwamwala-moꞋa. \x - \xo 1:4 \xt Yo 1:1-2,4 \xt Yo 1:14\x*   
\s1 Mahalina againe kananunudadana.  
\p
\v 5 Tu hida gahe Yaubada Natuna againe anogalina ada omi avenuwaꞋatami, higa Yaubada Bana mahamahalinaga. Uyuyu keke tamo Bana againe gidamiyami, keke.  
\v 6 KaꞋi kanagahe kanagayo, “Iya BanaꞋe buye avevido,” kaꞋi hidede amine kanagahe tu nuwanuwa uyuꞋuyuyuna againe kanunudadana, au kafwaya kadu keke nuwanuwa velemoꞋena amine kadahuluhuluva.  
\v 7 Tu Yaubada mahalina againe gimiyamiya-vagata. KaꞋi ide tovetumagana Bana amine mahalina againe kanunudadana, au imeꞋeyao kadu omiꞋiyao moyaꞋaida ada ayauna kadu yada nuwanuwa saꞋeyana kamimiyami, ada Yaubada Natuna Yesu dayagina gimadu-ma againe aseꞋaseda gikolakolana be yada nuwanuwa koyona moyaꞋaina givaihegena.   
\p
\v 8 KaꞋi ide kanagahe kanagayo, “Keke nuwanuwa koyona aseꞋasekuya gidadauda,” au taudeyao agaideya kaveꞋalololo kadu Yaubada yana nuwanuwa velemoꞋena keke nuwahinagedeya gidadauda.  
\v 9 KaꞋi yada dewa koyona Yaubada matane kanayauyauna, au Bana giwonadabadaba amine ginafaisewa kadu yana nuwanuwa tunutunugina amine ginahuluva, higa yada dewa koyona ginayawelina kadu aseꞋaseda ana nuwanuwa koyona moyaꞋaina ginakolahegehegena.  
\v 10 KaꞋi ide kanagahe kanagayo, “Keke tamo dewa koyona gadafaisewani,” au vaita kadagahe kadagayo, “Bana Yaubada tofwaya,” faꞋina BanaꞋe kaliva faꞋideya ahe gigahe vaita moyaꞋaida tokoyona. E, kaꞋi yada dewa koyona kanahawavekemena digo, Bana bonana keke aseꞋasedeya gidadauda. \x - \xo 1:10 \xt 1Ti 6:16, Ye 1:17 \xt 1Yn 2:4 \xt Hi 9:14, Ha 7:14\x*   
\c 2  
\s1 Yesu Keliso ada Toveluga.  
\p
\v 1 Ho natukweyao, hida yaku nuwanuwa agaimiya gaꞋetoladina be keke dewa koyona wanafaisewani faꞋina. Tu kaꞋi tamo hakwadi agaideya unakoyo digo, ada Toveluga gimimiyami, Bana Yesu Keliso Toyegayegana-moꞋa, ada tova moyaꞋaina yana gahe againe Tamada matane gilulugolegoleda.  
\v 2 E, Bana Tauna giꞋalika higa yada koyona ana laufata Bana giyawelina be Yaubada yana ilaꞋa ginahavaina faꞋina, tu keke ideꞋeyaogaga yada koyona ana laufata au tomiyababi moyaꞋaida yada koyona ana laufata faꞋina giꞋalika.   
\p
\v 3 Atu kaꞋi Yaubada yana vehimeya kaꞋitaꞋitaveꞋavina o, ide adafaiweya kanagahe kanagayo, “Wona velemona Yaubada gahalamanena.”  
\v 4 Hai kaliva hidedemi ugahe, vaita o Yaubada uhalamanena tu yana vehimeya udibudibutoyogena, au oꞋeni tofwaya, nuwanuwa velemoꞋena keke aseꞋaseniya gidadauda.  
\v 5 Tu hai kaliva Yaubada bonana uꞋabiꞋabina, medema ya nuwanuwa Yaubada againe use-Ꞌowona. Ide Yaubada buye kaveꞋatutamoꞋaida ma gavaiyaꞋamine kanahalamaneni velemoꞋena? KaꞋi Bana bonana kaꞋabiꞋabina o, ide Yaubada againe kamiyaveꞋavina.  
\v 6 E, hai kaliva gigahe gigayo, “Iya Yaubada buye aveꞋatutamoꞋaima,” medema gilubodana be Yesu Keliso gihuluva amine, kadu gidahuluhuluva. \x - \xo 2:6 \xt Hi 9:24 \xt Lo 3:25, Yo 1:29, 11:52 \xt 1Yn 1:6,8\x* \x - \xo 2:6 \xt Yo 14:21,23, 1Yn 4:12, 5:3 \xt Yo 13:15\x*   
\s1 Vehimeya ivaguna higa hawahega tobohiyadeyao faꞋidiya.  
\p
\v 7 Tobohiyakweyao, keke vehimeya ivaguna faꞋina gadaꞋetoladi, keke. Au vehimeya tuwaina faꞋina gaꞋetoladi, medema boi tuwaina wavebutu wavetumagana ana toveya wavaina. E, vehimeya tuwaina mena bana higa venuwaꞋata tuwaina ahe wanogalina.  
\v 8 Tu hida vehimeyai-nadi ma vaita ivaguna, faꞋina mahalina velemoꞋena gilakalakata be gitutuvemahalida againe uyuyu ana tova gihavahavaina. Ada vehimeya ivaguna bana au velemoꞋena ma Keliso giseyemaunena, kadu omi yami huluva againe waseyemaunena.   
\p
\v 9 Hai kaliva gigayo, “Iya mahalina againe gamimiyami,” tu tobohiyana saꞋeyana againe ginuwanuwakoyo, au medema aimo uyuyu againe gimimiyami.  
\v 10 Hai kaliva tobohiyana faꞋina ginuwanuwa lakahina medema mahalina againe gimimiyami, ada keke tamo gavadi aseꞋasene gidadauda-yo ginatutumadumadu-yo koyona againe ginabeꞋu, faꞋina mahalina bana yana eda gitutuvemahalina.  
\v 11 Tu hai kaliva tobohiyana againe ginuwanuwakoyo, medema uyuyu againe gimimiyami kadu uyuyu againe ginunudadana, ada eda tunutunugina ginufaniyena faꞋina matana giꞋuyuyuna.   
\p
\v 12 Natukweyao, omi tovetumagana ma agaimiya gaꞋetoladi, faꞋina Yesu Keliso yana alika againe Yaubada yami koyona giyawelina.  
\v 13 Kadu kamakweyao, omi agaimiya gaꞋetoladi faꞋina BanaꞋe boi tuwai-moꞋena babi ana abaveꞋinuba againe gimiyamiya-vagata ma wahalamanena. Kadu kaikweyao, omi agaimiya gaꞋetoladi faꞋina kaliva koyona Setani againe walugaviya be wafaiwalahegehegena.  
\v 14 Kadu natukweyao, omi agaimiya ahe gaꞋetoladi faꞋina Tamada wahalamanena. Kadu kamakweyao, omi agaimiya a gaꞋetoladi faꞋina BanaꞋe boi tuwai-moꞋena babi ana abaveꞋinuba againe gimiyamiya-vagata amanadi wahalamanena. Kadu kaikweyao, omi agaimiya a gaꞋetoladi faꞋina aseꞋasemiya wafifaiwala, ada Yaubada bonana aseꞋasemiya gidadauda, ada Setani againe walugaviya be wafaiwalahegehegena. \x - \xo 2:14 \xt 2Yn 1:5-6 \xt Yo 1:9, Lo 13:12 \xt 1Yn 3:10,15, 4:20\x* \x - \xo 2:14 \xt Lo 14:13 \xt Yo 12:35 \xt Ef 6:13\x*   
\s1 Babi ana dewa keke nuwami ginavaini.  
\p
\v 15 Tu keke wanahawahegemi be hida babi ana nuwanuwa againe nuwami wanaseni. Kadu keke babi ana kikaiwabu againe nuwami wanaseni. KaꞋi babi ana nuwanuwa nuwami givaina digo, keke yami nuwanuwa Tamada againe wadaseni.  
\v 16 WaꞋita, gavadi gavadi moyaꞋaina babi againe hiveꞋinuba, medema inubadi keke Tamada againe, higa kaliva dibudi koyona ana nuwanuwa itaꞋitaluvadigana, kadu gavadi gavadi faꞋidiya matadi itadawadawanina kadu gavadi moyaꞋaina faꞋina taudiyao adi egana hikikilakahina. Mena gaitomai-dina inubadi ma keke Tamada againe, au hida babi againe hiveꞋinuba.  
\v 17 Kadu hida babi ana nuwanuwa gihavahavaina, kadu gaitoma moyaꞋaina tomiyababi hiꞋitaꞋitaluvadigena-ma gihavahavaina tu hai kaliva Yaubada yana nuwanuwa gidibudibumuhigena, medema ginamiyamiya-vagata. \x - \xo 2:17 \xt Lo 8:7, Ye 4:4 \xt 2Ko 4:18\x*   
\s1 Keliso Nibaina Lakahina faꞋina.  
\p
\v 18 Natukweyao, hida tova ana lauyabu giluvedaꞋufo-moꞋa. Hidema tovai-nadi Keliso Nibaina Lakahina ginalakayemu ma ahe wanogalina, ada au Keliso nibaineyao higa kelisofwayafwaya moyaꞋaidi ahe hilakayemu. Badi nibaineyao ahe hilakayemu faꞋina, hida tova ana lauyabu giluvedaꞋufo ma kahalamanena.  
\v 19 Hida kalivai-dina keke velemoꞋena ide tovetumagana yada yoꞋo kalivadi, ada hidema faꞋina himaduvehaileda. KaꞋi badi velemoꞋena yada yoꞋo kalivadi digo, badi ide buye aimo kadamiyami. Tu badi a hina, faꞋina ide kahalamane-hagihagiyena badi moyaꞋaidi keke yada yoꞋo kalivadi.   
\p
\v 20 Tu Kaliva Mahamahalina higa Keliso Bana AluꞋaluwa Mahalina omi agaimiya gihawahegena be givemagami, ada hidema faꞋina omi moyaꞋaimi nuwanuwa velemoꞋena wahalamanena.  
\v 21 Tu hida leta ma keke vaita nuwanuwa velemoꞋena wadafaniyeni faꞋina gadaꞋetoladini, keke. GaꞋetoladi faꞋina makewa omi nuwanuwa velemoꞋena wahalamanena, kadu keke tamo fwaya Yaubada yana nuwanuwa velemoꞋena againe gidaveꞋinuba ma wahalamanena.  
\v 22 Tu hakwaꞋadi ma tofwaya? Hai kaliva saꞋeyana yoꞋo hinafadiya Yesu faꞋine ginagahe ginagayo, “Yesu keke Keliso Yaubada yana Tovegida amanadi,” medema kalivai-nadi tofwaya, ada bana hidevama ana egana Keliso Nibaina Lakahina. E, Tamada kadu Natuna buye inubadi gikilowena higa vaita Yesu Keliso Tamana mali kaliva, keke Yaubada.  
\v 23 Gaveyao Yaubada Natuna inubana hikilowena, medema agaidiya keke Tamada gidamiyami. Tu gaveyao hinagahe hinagayo, “Yesu Bana Yaubada Natuna,” medema agaidiya Tamada gimimiyami. \x - \xo 2:23 \xt Md 24:5,24, 2Yn 1:7 \xt Af 20:30 \xt 1Yn 4:3, 2Yn 1:7\x* \x - \xo 2:23 \xt Md 10:32-33, Yo 5:23, 2Yn 1:9\x*   
\s1 Yaubada bonana kadu AluꞋaluwa Mahalina  
\s1 ami toꞋitaveꞋavina.  
\p
\v 24 Tu omiꞋiyao ma wanaꞋitaveꞋavimi be bona boi tuwaina wavebutu wavetumagana againe wanogalina amanadi nuwahinagemiya ginaduva-vagata. KaꞋi mena bonai-nadi boi tuwaina wanogalina-ma aseꞋasemiya ginadauda, au Tamada againe kadu Natuna againe wanamiyamiyaveꞋavina tova moyaꞋaina.  
\v 25 Ada Keliso Tauna ide agaideya giwonadabadaba gigayo, “Yawai-vagahimi ganavelemi.”   
\p
\v 26 Au hida Keliso nibaineyao yadi vehawala faꞋina gaꞋetoladi be badi nuwanuwadi yadi fwaya againe hinanuwaꞋabiyemi amanadi yadi dewa faꞋina ganavenuwaꞋatami.  
\v 27 Tu omiꞋiyao ma Keliso AluꞋaluwa Mahalina agaimiya gihawahegena be givemagami, ada Tauna nuwahinagemiya gimimiyami tova moyaꞋaina. Au ami vehawala faꞋina keke mali kaliva gidalubodami. Bana anakaibe ami tovehawala velemoꞋena, nuwanuwa moyaꞋaina givehavehawalemi, ada yana vehawala keke fwaya, au velemoꞋena. Ada au AluꞋaluwa Mahalina givehawalemi amine, Keliso againe wanamiyaveꞋavina.   
\p
\v 28 E, natukweyao, Bana againe wanamiyaveꞋavina be higa ginayewaꞋela ana toveya keke kanamatauta faꞋina, kadu keke yada wawowomumu kanaveuyeni.  
\v 29 Au Keliso Bana yegayega-moꞋena ma wahalamanena. Kadu anafaiweya gaveyao yadi dewa yegayegana, medema Yaubada natuneyao. Au hidedemi amifaiweya wanahalamanena. \x - \xo 2:29 \xt Yo 3:15, 6:40 \xt Yo 14:26 \xt 1Yn 4:17 \xt 1Yn 3:10\x*   
\c 3  
\s1 Omi Yaubada natuneyao amine wanahuluva.  
\p
\v 1 Iyoi! Tamada yana hawahega ide agaideya gavatubuga! E, nuwanuwana lakahina ideꞋeyao faꞋina gihawavenatuneda, higa ada egana Yaubada natuneyao. Ada makewaꞋe ide Yaubada natuneyao. Hidema faꞋina tomiyababi keke Yaubada hidahalamaneni-ma ide hifaniyeda, faꞋina Bana Tamada keke hidahalamaneni.  
\v 2 Ho tobohiyaꞋaseꞋasekweyao, tova adamoya ide Yaubada natuneyao, tu tova mulina ide vaita gaveyao kikaiwabudiyao amine kanamiyami medema keke kadahalamane-hagihagiyeni. Tu gaitoma saꞋeyana kahalamanena higa Keliso ginayewaꞋela ana toveya, ide ada itaꞋita Keliso ana itaꞋita amine ginalakayemu, faꞋina kaliva-moꞋena ide kanaꞋitana.  
\v 3 Ada gaveyao moyaꞋaimi nuwanuwami Keliso ana itaꞋita amine ami itaꞋita ginalakayemu ma faꞋina walulauboda, medema aseꞋasemi waꞋitaꞋitaveꞋavina be Keliso yegayega-moꞋena gimimiyami amine, meda omi yegayegamiyao wanamiyami.   
\p
\v 4 Tu hai kaliva koyona gifaisewana, medema Yaubada yana vehimeya giyawelina. E, dewa koyona ana egana vehimeya ana aiyawela.  
\v 5 Omi wahalamanena Keliso gihobuꞋela be kaliva yada koyona ginavaihegena faꞋina. Kadu wahalamanena keke tamo gavadi koyona Bana againe gidadauda.  
\v 6 Gaveyao Keliso againe himiyamiyaveꞋavina, medema keke hidahuluhuluva koyona, tu gaveyao tova moyaꞋaina hihuluhuluva koyona, medema Keliso inubana keke hidahalamaneni kadu Keliso Tauna keke hidahalamaneni.   
\p
\v 7 Natukweyao, wanaꞋitaveꞋavimi be keke tamo hakwadi yana fwaya againe ginanuwaꞋabiyemi. Hai kaliva yana dewa yegayegana tova moyaꞋaina, medema aseꞋasena yegayegana. Bana Keliso yegayegana amine, kadu bana kalivai-nadi yegayegana.  
\v 8 Hai kaliva tova moyaꞋaina gihuluhuluva koyona, medema Setani yana kaliva, faꞋina huluva koyona medema Setani yana huluva. Boi tuwai-moꞋena babi ana abaveꞋinuba againe huluva koyona givebutuna tu ginunauwena tova adamoya. Ada hidema ana inuba Yaubada Natuna gihobuꞋela, higa Setani yana gugai ginayawelina faꞋina.  
\v 9 Hai kaliva Yaubada natuna, medema keke gidahuluhuluva koyona, faꞋina Yaubada yana nuwanuwa bana nuwane gidadauda. E, bana kaliva aluꞋaluwana Yaubada yawaine gitubuga-havagi faꞋina keke anafaiweya ginahuluhuluva koyona.  
\v 10 GavaiyaꞋamine kanahalamaneni gaveyao Yaubada natuneyao kadu gaveyao Setani natuneyao? Hai kaliva yana dewa keke tunutunugina, medema keke Yaubada natuna. Meda anafaiweya hai kaliva tobohiyana againe keke gidanuwanuwa, medema keke Yaubada natuna. Au hidede amine kahalamanena. \x - \xo 3:10 \xt Yo 1:12-13 \xt 2Ko 3:18, Fl 3:21 \xt 2Ko 5:21, 1Fi 2:22-24\x* \x - \xo 3:10 \xt 1Yn 2:29 \xt Yo 8:44 \xt 1Yn 5:18\x*   
\s1 Taumiyao agaimiya wanaveꞋahawahawahega.  
\p
\v 11 Tu venuwaꞋata boi tuwaina wavebutu wavetumagana againe wanogalina amanadi hidede amine. Taudeyao agaideya kanaveꞋahawahawahega.  
\v 12 Ada keke Keni Adama natuna amine kanahuluva. Bana Setani yana kaliva ada taina velemoꞋena giluveꞋalikana. Gavana faꞋina-yo giluveꞋalikani? Me Keni yana huluva koyona tu taina yana huluva tunutunugina, au hidema faꞋina giluveꞋalikana.  
\v 13 Tobohiyakweyao, kaꞋi tomiyababi Yaubada keke hidahalamaneni-ma omi agaimiya hinavenibaina amine, keke wanayaulowoga, faꞋina Keni Setani yana nuwanuwa koyona gihuluvina amine, kadu badi omi hinahuluvimi.  
\v 14 Tobohiyadeyao faꞋidiya kahawahawahegeda faꞋina, ide kahalamanena alika-vagata ana eda kahege tu yawai-vagahida ana edeya kadamana be kananauna. Hai kaliva badi tobohiyamomo faꞋidiya keke unahawahawahege, medema aimo alika ana eda againe unanauna.  
\v 15 HakwaꞋadi tobohiyana againe ginuwanuwakoyo, medema toluveꞋalika, ada omi wahalamanena toluveꞋalika keke yawai-vagahina ana eda againe gidanauna.   
\p
\v 16 Au gavaiyaꞋamine hawahega ana dewa kanahalamaneni? Me Keliso ide faꞋideya yawaina gihawahegena. Meda gilubodada be tobohiyadeyao faꞋidiya yawaida kadahawahegena.  
\v 17 KaꞋi kaliva saꞋeyana wakalivana tu tobohiyana ginaꞋitana, anaga keke yana lokoloko keke ada keke gidahinekalikaliyeni yo gidavelugani, au hawahega Yaubada againe keke-moꞋa bana nuwahinagene gidadauda.  
\v 18 Natukweyao, keke kebuladeya o kaꞋi meyadeya tobohiyadeyao faꞋidiya kanahawahegeda, au kanahawahegeda velemoꞋena be nimadeya o kaꞋi agedeya kanavelugadi. \x - \xo 3:18 \xt Yo 13:34-35 \xt Aba 4:8 \xt Yo 15:18-19 \xt Yo 5:24 \x* \x - \xo 3:18 \xt Md 5:21-22 \xt Yo 10:11, 1Te 2:8 \xt Ye 2:15-16\x*   
\s1 Yaubada natuneyao keke Bana matane hinamatauta.  
\p
\v 19 KaꞋi tobohiyadeyao faꞋidiya kanahawahegeda velemoꞋena, au Yaubada yana nuwanuwa velemoꞋena againe kamimiyami ma kanahalamanena. KaduꞋe, kaꞋi kanahawahegeda velemoꞋena, au Yaubada matane adafaiweya kanamiyami keke yada wamatauta.  
\v 20 E, kaꞋi yada koyona faꞋina vita aseꞋasedeya kanaꞋayaunena, au yada wanuwayamumu Yaubada matane adafaiweya kanamiyami, faꞋina Yaubada yana halamana ide yada halamana gitubuhegena, au Bana yada nuwanuwa moyaꞋaina inubana gihalamane-Ꞌowona, ada Bana againe kahawahegeda faꞋina yada koyona ginayawelina.   
\p
\v 21 Tu tobohiyakweyao, kaꞋi kahalamanena koyona keke kadafaisewani ada hidema faꞋina keke vita aseꞋasedeya kadaꞋayauneni, au yada waꞋatuvefaꞋila Yaubada matane adafaiweya kanamiyami.  
\v 22 Kadu gavadi gavadi faꞋina kanaveꞋoꞋola, medema ginaveleda, faꞋina yana vehimeya kaꞋitaꞋitaveꞋavina ada yana nuwanuwa amine kahuluhuluva.  
\v 23 Ada yana vehimeya faꞋina ganakivetuvetunumi, higa Natuna Yesu Keliso ana egana kanavetumaganena, ada Keliso givehimeyeda amine taudeyao agaideya kanaveꞋahawahawahega.  
\v 24 Omi gaveyao Yaubada yana vehimeya waꞋitaꞋitaveꞋavina, medema Yaubada againe wamiyamiyaveꞋavina ada BanaꞋe omi agaimiya meda anafaiweya gimiyamiyaveꞋavina. Ada Yaubada ide agaideya gimiyamiyaveꞋavina ma gavaiyaꞋamine kahalamaneni? Me Bana AluꞋaluwana giveleda be Tauna nuwahinagedeya gimimiyami faꞋina kahalamanena. \x - \xo 3:24 \xt Yo 15:7 \xt Yo 6:29, 13:34 \xt Lo 8:9\x*   
\c 4  
\s1 AluꞋaluwa Mahalina gaveyao agaidiya gimimiyami ma  
\s1 wananuwenuwena.  
\p
\v 1 TobohiyaꞋaseꞋasekweyao, keke kaliva moyaꞋaidi yadi laumamala wanavetumaganeni vaita hidagahe velemoꞋena. Au inubadi wananuwaveꞋuveꞋuna be wanahalamane-hagihagiyena kaꞋi AluꞋaluwa Mahalina yana nuwanuwa amine hilukahihi o kaꞋi keke. E, tolaumamala wananuwaveꞋuveꞋudi faꞋina toveꞋalololo moyaꞋaidi higa vaita Yaubada bonana ana toꞋawatalatalaina amine amanadi fafali tulina tulina agaidiya hilakayemu be hififaisewa.  
\v 2 GavaiyaꞋamine wanahalamaneni Yaubada AluꞋaluwana tolaumamala awane gilukahihi? Me hai kaliva yana laumamala againe ginagahe ginagayo, “Yesu Keliso babiya gihobuꞋela be givekaliva,” medema againe Yaubada AluꞋaluwana gimimiyami.  
\v 3 Atu hai kaliva ginagahe ginagayo, “Yesu Keliso keke babiya gidahobuꞋela gidavekaliva,” medema againe Yaubada AluꞋaluwana keke gidamiyami. Au hida gahe inubana amanadi bana Keliso Nibaina Lakahina aluꞋaluwana againe gilakayemu. Bana aimo ginaꞋela ma valeyana ahe wanogalina, ada au a giꞋela babiya gimimiyami.   
\p
\v 4 Tu natukweyao, omi Yaubada yana kaliva, ada badi fwayafwayadiyao wafaiwalahegehegedi, faꞋina AluꞋaluwa Mahalina omi agaimiya gimimiyami-ma babi ana kaliva adi tovehimeya gifaiwalahegena.  
\v 5 Badi toveꞋalololo ma babi ana kaliva keke Yaubada yana kaliva, ada au babi ana nuwanuwa faꞋina hilulumamala ada tomiyababi Yaubada keke hidahalamaneni-ma bonadi hivenogalena.  
\v 6 Tu ideꞋeyao ma Yaubada yana kaliva. Gaveyao Yaubada hihalamanena, medema bonada hivenogalena, ada gaveyao keke Yaubada yana kaliva, medema keke bonada hidavenogaleni. Au hidede amine aluꞋaluwa adiꞋiselu inubadi kanuwaveꞋuveꞋuna, higa AluꞋaluwa Mahalina nuwanuwa velemoꞋena inubana tu aluꞋaluwa uyuꞋuyuyuna veꞋalololo inubana. \x - \xo 4:6 \xt Md 24:11 \xt 1Ko 12:3 \xt 2Yn 1:7 \xt Yo 15:19 \xt Yo 8:47\x*   
\s1 Yaubada yana nuwanuwa hawahawahegana faꞋina.  
\p
\v 7 Tobohiyakweyao, taudeyao agaideya kanaveꞋahawahawahega, faꞋina Yaubada mena nuwanuwa hawahawahegana inubana. Ada gaveyao tobohiyadiyao faꞋidiya hihawahawahegedi, medema Yaubada natuneyao ada Yaubada hihalamanena.  
\v 8 WaꞋita, Yaubada yana nuwanuwa matatabuna hawahawahegana. Hai kaliva keke tobohiyaneyao faꞋidiya gidahawahegeni, medema keke Yaubada gidahalamaneni, faꞋina keke nuwanuwa hawahawahegana amine tobohiyaneyao gidahuluvidi.  
\v 9 GavaiyaꞋamine Yaubada yana hawahega ide agaideya giseyemauneni? Me Bana Natuna anakaibeꞋu-moꞋa giꞋiveninisena ada babiya gihobuꞋela be yawaida velemoꞋena Bana Natuna againe kanavaina.  
\v 10 Ada mena hawahega inubana ma keke ide Yaubada againe yada nuwanuwa kadaseni, au BanaꞋe ide agaideya yana nuwanuwa gisena, ada Natuna giꞋiveninisena be Bana ginaꞋalika, higa yada koyona ana laufata Bana ginawahina be Yaubada yana ilaꞋa ginahavaina faꞋina.   
\p
\v 11 TobohiyaꞋaseꞋasekweyao, kaꞋi Yaubada hidede amine Tauna ide faꞋideya gihawahegena, au gilubodada be ide taudeyao agaideya kadaveꞋahawahawahega.  
\v 12 Keke tamo hakwadi Yaubada gidaꞋitani. Tu kaꞋi taudeyao agaideya kanaveꞋahawahawahega amine, Yaubada agaideya gimiyamiyaveꞋavina ada yana nuwanuwa hawahawahegana aseꞋasedeya gitubutubuga-moꞋa. \x - \xo 4:12 \xt Yo 3:16 \xt Lo 5:8-10 \xt Yo 15:12 \xt Yo 1:18\x*   
\p  
\p
\v 13 KaduꞋe, ide Yaubada againe kamiyamiyaveꞋavina ada BanaꞋe ide agaideya gimiyamiyaveꞋavina ma hidede amine kahalamanena, higa Bana AluꞋaluwana giveleda be Tauna nuwahinagedeya gimimiyami.  
\v 14 Ada Tamada Natuna giꞋiveninisena be tomiyababi ginakibababaleda ma ime aꞋitana kadu aꞋawatalatalainena.  
\v 15 Gava kaliva yoꞋo hinafadiya ginagahe ginagayo, “Yesu velemoꞋena Yaubada Natuna,” kaꞋi hidede amine ginagahe, au Yaubada bana againe gimiyamiyaveꞋavina, ada bana kaliva Yaubada againe gimiyamiyaveꞋavina.  
\v 16 Ada au ide taudeyao kahalamanena kadu kanuwaveꞋavina Yaubada yana nuwanuwa ide agaideya giseusena.  
\p E, Yaubada yana nuwanuwa matatabuna hawahawahegana, ada gava kaliva mena Yaubada yana nuwanuwai-nadi amine gihuluhuluva, bana Yaubada againe gimiyamiyaveꞋavina ada Yaubada bana kaliva againe gimiyamiyaveꞋavina.  
\v 17 Yaubada yana nuwanuwa hawahawahegana aseꞋasedeya giseusena be gitubutubuga-moꞋa, higa vaita adafaiweya kanaꞋasevatu vedewayauga ana toveya. Ada au medema tovai-nadi adafaiweya kanaꞋasevatu, faꞋina Keliso yana waꞋasevatu Yaubada matane gimimiyami amine, meda ide hidei babiya kamimiyami yada waꞋasevatu Yaubada matane.  
\v 18 Hai kaliva Yaubada yana nuwanuwa bana againe giꞋayaꞋayaunena, medema matauta keke anafaiweya aseꞋasena ginaꞋonani. E, Yaubada yana nuwanuwa hawahawahegana agaideya gitubuga-moꞋa faꞋina, matauta giwavina. KaꞋi kamatamatauta, au yada matauta inubana vaita Yaubada ginavematahiwadiyeda. Ada gaveyao tomatauta, medema agaidiya Yaubada yana nuwanuwa hawahawahegana ana halamana aimo keke gidatubuga-moꞋa.   
\p
\v 19 KaduꞋe, Yaubada yana nuwanuwa hawahawahegana ide agaideya gimidisena faꞋina ide kadu yada nuwanuwa hawahawahegana kaseusena.  
\v 20 KaꞋi tamo hakwadi ginagahe ginagayo, “Iya nuwanuwaku Yaubada,” tu tobohiyana againe ginuwanuwakoyo, bana kalivai-nadi tofwaya, keke velemoꞋena nuwanuwana Yaubada. WaꞋita, kaꞋi keke nuwanuwana tobohiyana ahe giꞋitaꞋitana amanadi, kadu keke nuwanuwana Yaubada, BanaꞋe keke gidaꞋitani amanadi.  
\v 21 Ada au Keliso hida vehimeya giveleda, higa gava kaliva yana nuwanuwa Yaubada againe giseusena, gilubodana be kadu tobohiyana againe yana nuwanuwa gidaseusena. \x - \xo 4:21 \xt 2Ko 1:21-22 \xt Yo 3:17 \xt Yo 6:69 \xt 1Yn 4:10\x*   
\c 5  
\s1 Tovetumagana adifaiweya be babi ana nuwanuwa  
\s1 hinafaiwalahegehegena.  
\p
\v 1 KaduꞋe, gaveyao hivetumagana higayo, “Yesu au Keliso Yaubada yana Tovegida amanadi,” medema Yaubada natuneyao. Ada gaveyao nuwanuwadi Tamada, medema kadu nuwanuwana natuneyao.  
\v 2 GavaiyaꞋamine kahalamaneni Yaubada natuneyao agaidiya yada nuwanuwa kaseuseni? Me Tamada Yaubada againe yada nuwanuwa kaseusena ada yana vehimeya kaꞋitaꞋitaveꞋavina.  
\v 3 KaꞋi velemoꞋena Yaubada againe yada nuwanuwa kasena, au yana vehimeya kaꞋitaꞋitaveꞋavina. Ada yana vehimeya keke vitana, au ihayana.  
\v 4 Ada au adafaiweya kanaꞋitaꞋitaveꞋavina, faꞋina gaveyao Yaubada natuneyao, medema adifaiweya babi ana nuwanuwa hinafifaiwalahegehegedi. Ada gavaiyaꞋamine babi ana nuwanuwa kanafaiwalahegehegedi? Me yada vetumagana againe adafaiweya wai kananagona be babi ana nuwanuwa ginayewa.  
\v 5 E, hakwaꞋadi anafaiweya babi ana nuwanuwa ginafaiwalahegehegedi? Bana givetuvetumagana amanadi hida Yesu au Yaubada Natuna, au bana anakaibe anafaiweya wai ginanagona be babi ana nuwanuwa ginayewa. \x - \xo 5:5 \xt Yo 14:15,23-24, Md 11:30 \xt Yo 16:33 \xt Lo 8:37\x*   
\s1 Yaubada Yesu Keliso inubana faꞋina gihawavemogatala.  
\p
\v 6 Ada Bana Yesu Keliso ma babiya gihobuꞋela, ada giꞋela yana waꞋiyaꞋiyaya luhei, higa gufa againe gibafitaiso kadu dayagina gimadu. Gufa againe gibafitaiso tu keke mededemagaga, au kadu dayagina gimadu, higa yana iyaꞋiyaya luhei, gufa dayaga.  
\v 7 Ada Yesu yana ela au hidede amine ma AluꞋaluwa Mahalina giꞋalakakilina, ada Bana yana hawavemogatala keke fwaya, au velemoꞋena.  
\v 8 E, gaitoma tohiye Bana Yesu Keliso faꞋine hihawahawavemogatala, saꞋeyana ma AluꞋaluwa Mahalina, anavelu gufa, kadu anaveto dayaga. Ada hida tohawavemogatala tohiye yadi gahe leleleya, higa Yesu au Yaubada Natuna.  
\v 9 Tomiyababi yadi awatalatalaina kavetumaganena ada medema gaitoma lakahina, tu Yaubada yana awatalatalaina gaitoma lakahi-moꞋena, faꞋina yana awatalatalaina kanavetumagane-moꞋena. Ada au Bana Yaubada gavaimi gihawavemogatala? Me Natuna faꞋine gihawavemogatala.  
\v 10 Gava kaliva Yaubada Natuna givetuvetumaganena, medema Yaubada yana hawavemogatala Natuna faꞋine bana aseꞋasene gidadauda. Tu gava kaliva Yaubada yana gahe Natuna faꞋine keke gidavetumaganeni, medema vaita gidagayo, “Yaubada tofwaya,” faꞋina Yaubada yana hawavemogatala Natuna faꞋine keke gidavetumaganeni.  
\v 11 Ada hawavemogatalai-nadi hidede amine. Yaubada yawai-vagahida giveleda ada mena yawai-vagata Natuna againe giveꞋinuba.  
\v 12 Gaveyao nuwahinagemiya Yaubada Natuna Tauna gimimiyami, medema yawai-vagahimi ahe wanuhagana, tu gaveyao nuwahinagemiya Yaubada Natuna Tauna keke gidamiyami, medema yawai-vagahimi keke wadanuhagani. \x - \xo 5:12 \xt Yo 1:29-34 \xt Yo 15:26 \xt Yo 5:32-37, 8:18 \xt Yo 3:36\x*   
\s1 Yawai-vagahida ana nuwanuwa faꞋina.  
\p
\v 13 Tu omi Yaubada Natuna ana eganeya wavetuvetumagana amanadi yami leta au hidede amine gaꞋetoladina be wanahalamanena yawai-vagahimi ahe wanuhagana.  
\v 14 KaꞋi Yaubada yana nuwanuwa amine kanaveꞋoꞋola, au gavadi gavadi faꞋina kanaveꞋoꞋola, medema ginavenogaleda. Ada hidedemi ginavenogaleda faꞋina, ide Yaubada matane adafaiweya kanaꞋasevatu.  
\v 15 E, tova moyaꞋaina yada veꞋoꞋola givenovenogalena. Ada givenogaleda velemoꞋena ma kahalamanena faꞋina, kadu yada veꞋoꞋola guwana ahe kanuhagana ma kahalamanena.   
\p
\v 16 Tu kaꞋi tamo hakwadi tobohiyana tovetumagana agaimiya koyona saꞋeyana gifaisewana-ma ginaꞋitana, ada dewai-nadi faꞋina keke alika-vagata ginanuhagani, kaꞋi yana koyona hidede amine ginaꞋitana digo, gilubodana be Yaubada againe tobohiyana faꞋine gidaveꞋoꞋola be yawaina ivaguna ginavelena. Au tamo gava koyona fatana keke alika-vagata ma faꞋine hidede amine gagahe. Tu tamo koyona saꞋeyana ma kaꞋi kaliva ginakiveꞋavi-vagahina be ginanunauwena tu fatana alika-vagata ginanuhagana, au keke vaita ganagahe medema koyonai-nadi faꞋina Yaubada againe wanaveꞋoꞋola.  
\v 17 Huluva koyona tulina tulina ana egana au koyona, tu tamo koyona saꞋeyanaga faꞋina alika-vagata kananuhagana.   
\p
\v 18 Ada ide kahalamanena keke tamo hakwadi Yaubada natuneyao agaidiya koyona gidafifaisewani be gidanunauweni lauva tunugina, faꞋina Yaubada Natuna gilulugolegolena be bana kaliva koyona Setani keke anafaiweya ginakivekoyoni.  
\v 19 Kadu kahalamanena ide Yaubada natuneyao, ada tomiyababi moyaꞋaidi Yaubada keke hidahalamaneni-ma kaliva koyona Setani nimane himimiyami.  
\v 20 Kadu kahalamanena Yaubada Natuna ahe gihobuꞋela, ada halamana giveleda be higa Yaubada Bana anakaibe velemoꞋena ma kanahalamanena. Ada ide Yaubada Bana velemoꞋena amanadi buye kaveꞋatutamoꞋaida, higa Natuna Yesu Keliso buye kaveꞋatutamoꞋaida. BanaꞋe au Yaubada velemoꞋena ada BanaꞋe yawai-vagahida inubana.   
\p
\v 21 Natukweyao, wanaꞋitaveꞋavimi be toveꞋalololo yadi nuwanuwa fwayafwayana keke Yaubada yana abaga aseꞋasemiya hinalemani.   
\qr (Iya Yoni bonaku.) \x - \xo 5:21 \xt Yo 20:31 \xt Yo 14:13, 1Yo 3:21-22 \xt Md 12:31\x* \x - \xo 5:21 \xt Yo 17:15 \xt Yo 17:3 \xt 1Ko 10:14\x*