\id ROM -WAGHRI
\ide UTF-8
\h ರೋಮಾಪುರವಾಳನ
\toc3 ರೋಮ
\toc2 ರೋಮ
\toc1 ಪೌಲನೆ ರೋಮಾಪುರವಾಳನ ಲೀಖ್ಯೋತೆ ಚಿಟ್ಟಿ
\mt2 ಪೌಲನು ರೋಮಾಪುರದವರಿಗೆ ಬರೆದ ಪತ್ರಿಕೆ
\mt1 ಪೌಲನೆ ರೋಮಾಪುರವಾಳನ ಲೀಖ್ಯೋತೆ ಚಿಟ್ಟಿ
\imt ಮಾಲುಮ್ ಕರಾನು
\ip ರೋಮಾಪುರವಾಳನ ಅಪೊಸ್ತಲ ಪೌಲನೆ ಲೀಖ್ಯೋತೆ ಚಿಟ್ಟಿನ ಘಣೇಥಿಘಣು ಕ್ರಿಸ್ತನ ಪೈದಾಖ್ಹ್‌ನ ವಾರ್ 54 ಥು 58 ವರಖ್ಹ್‌ನಿ ಬೀಚ್ಮ ಲೀಖಿರಾಖ್ಯೊಸ್. ಪೌಲನೆ ಬಿಜೂ಼ಬಿ ರೋಮ್‍ನ ಭೇಟಿ ದೀರಾಖ್ಯೊಥೊ ಕೊಯ್ನಿ. ಇನಖ್ಹಾಜೆ ಯೋ ರೋಮ್ಮಛಾ಼ತೆ ವಿಶ್ವಾಸಿವೋನ ಮಾರಗ್ ದೇಖಡಾನಖ್ಹಾಜೆ ಆ ಚಿಟ್ಟಿನ ಲೀಖ್ಯೊ. ತದೆ ಯೆಹೂದ್ಯ ಅಜು಼ ಯೆಹೂದ್ಯಕಾಹೇತೆ ವಿಶ್ವಾಸಿಖ್ಹಾರುಜಿನು ಹಿಜ್ಜಾ಼ ಥೂ. ಆ ಚಿಟ್ಟಿನ ಕೊರಿಂಥ ಖ್ಹಯೇರ್‌ಥು ಲೀಖ್ಯೊ. ಯೋ ವಖ್ಹತ್‌ಮ ಯೋ ಹಿಜ್ಜಾ಼ಸ್ ಥೊ. ಪೌಲನೆ ಖ್ಹಾರು ದೇಖ್ಹ್‌ ಯೇಸುಕ್ರಿಸ್ತನ ವಿಶ್ವಾಸ್ ಕರ್ನುಕರಿ ಅಜು಼ ವಿಧೇಯ ಹೋಣುಕರಿ ಬೋಲಾನಖ್ಹಾಜೆ ಲೀಖ್ಯೊ \xt 16:26.\xt*
\ip ರೋಮಾಪುರವಾಳನ ಲೀಖ್ಯೋತೆ ಚಿಟ್ಟಿ ವಿಶ್ವಾಸಿಖ್ಹಾರನ ಖ್ಹಾರಿಬಾಜೂ಼ಬಿ ಅಜು಼ ಖ್ಹಾರೀಸ್‍ ವಖ್ಹತ್‍ಮಾಬಿ ಆ ಏಕ್‍ ಮಹಾನ್‍ ಪುಸ್ತಕ್ ಹುಯಿರ‍್ಹುಸ್. ಶನಕತೊ ಅನಾಮ ಪೌಲನೆ ಯೇಸುಕ್ರಿಸ್ತಥಿ ಮಳಾತೆ ರಕ್ಷಣೆನಿ ಬಾರೇಮ ಛೋ಼ಡಿನ್ ಅಜು಼ ಬರೋಬರ್‌ಥಿ ಬೋಲಿರಾಖ್ಯೊಸ್. ಪೌಲಬಿ ಯೇಸುಕ್ರಿಸ್ತನಿ ಸುವಾರ್ತೆನ ಜೂ಼ನಿ ಒಪಂದಾನನಿ ಜೋ಼ಡ್ಮ ಮಳೈನ್‌ ಬೋಲಸ್. ಕೈಏಕ್ ಪೊಂಡಿತ್‍ಖ್ಹಾರು ಆ ಪುಸ್ತಕ್‌ಮ \xt 1:16\xt* ವಚನ್‍ ಘಣಿ ಮುಖ್ಯಹುಯಿರ‍್ಹುಸ್‍ಕರಿ ಬೋಲಸ್. ಯೋ “ಸುವಾರ್ತೆನಿ ಬಾರೇಮ ಮೇ ಖ್ಹರ್‌ಮಾವ್‍ಕೊಯ್ನಿ ಶನಕತೊ ವಿಶ್ವಾಸ್‍ಕರವಾಳ ಹರೇಕ್ ಜ಼ಣಾನ ರಕ್ಷಣೆನ ಲ್ಯಾವಾನಿ ದೇವ್ನಿ ಶಕತ್ ಹುಯಿರ‍್ಹಿಸ್. ಪಹಿಲೆ ಯೆಹೂದ್ಯರ್‌ನ ಇನಕೇಡೆಥು ಯೆಹೂದ್ಯರ್‌ಕಾಹೆತೆ ಇವ್ಣುನ” ಆ ಚಿಟ್ಟಿನು ಭಾಗ್‍ಹುಯಿರ‍್ಹುತೆ \xt 1—1\xt* ಖ್ಹಾರು ಘಣು ಗಧಾರ್‌ನು ದೇವ್ನು ವಚನ್‍ ಹುಯಿರ‍್ಹುಸ್. ಬೇನು ಭಾಗ್‌ ಹುಯಿರ‍್ಹುತೆ \xt 13—15\xt* ಖ್ಹಾರು ವಿಶ್ವಾಸಿನ ಜಿವ್ಣನ ಹೋಣುತೆ ಕೈಏಕ್ ಕಾಮ್ ಕರಾನು ಮಾರಗ್ ವತಾಳಸ್.
\iot ಕಾಡಿದೇಖೊ
\io1 1. ಪೌಲ ಮಾಮೂಲಿಥಿ ಇನಿ ಬಾರೇಮ ಬೋಲ್ತೊಹುಯಿನ್ ಅಜು಼ ಮೇ ಕಿನ ಲೀಖುಕರುಸ್‌ಕರಿ ಬೋಲಾನಿವಾತೆ ಬೋಲ್ತೊಹುಯಿನ್ ಆ ಚಿಟ್ಟಿನ ಶುರುಕರಸ್. \ior 1:1-15\ior*
\io1 2. ಇನಕೇಡೆಥು ಯೊ ಅದಮ್‍ಜ಼ಮಾನನಿ ಹಾಲತ್ ಅಜು಼ ಯೇಸುಕ್ರಿಸ್ತಥಿ ಮಳಾನು ರಕ್ಷಣೇನಿ ಬಾರೇಮ ಲೀಖಸ್ \ior 1:16—11:36\ior*
\io1 3. ಅನಕೇಡೆಥು ಪೌಲ ಕೈಏಕ್ ವಿಶ್ವಾಸಿನ ಜಿವ್ಣನ ಹೋಣುತೆ ವಾಟ್‌ ಒತಾಳಸ್. \ior 12:1—15:13\ior*
\io1 4. ಯೋ ಆಚಿಟ್ಟಿನ ರೋಮ್ಮಛಾ಼ತೆ ಸಬೆನ ಅದ್ಮಿವೋನ ಕೈಏಕ್ ಪರಕ್ಮ ಖ್ಹಲಾಮ್ ಕರ್ತೊಹುಯಿನ್ ಆ ಚಿಟ್ಟಿನ ಖ್ಹರ್ತಿ ಕರಸ್ \ior 16:1-27\ior*
\c 1
\p
\v 1 ಯೇಸು ಕ್ರಿಸ್ತನೊ ದಾಸಬಿ ಅಪೊಸ್ತಲ ಹುವಾನಖ್ಹಾಜೆ ಬುಲಾಯೊಹುಯೋಬಿ ದೇವ್ನು ಸುವಾರ್ತೆನ ಬೋಲಾನಖ್ಹಾಜೆ ಚೂ಼ಣಾಯೊಹುಯೊ ಪೌಲ, 
\v 2 ದೇವ್ನೆ ಘಣ ಹಗಾಮ್ನಪಾರ್‌ ಪವಿತ್ರ ದಪ್ತರ್‌ಮ ಇನ ಪ್ರವಾದಿಖ್ಹಾರಾಥಿ ವಾಗ್ದಾನ್ ಕರ‍್ಯೊತೆ, 
\v 3 ದೇವ್‌ನೊ ಛಿಯ್ಯೊಹುಯಿರೊತೆ ಅಪ್ಣೊ ಪ್ರಭು ಯೇಸುಕ್ರಿಸ್ತನಿ ಬಾರೇಮ ಬೋಲಾನು ಹುಯಿರ‍್ಹುಸ್. ಅದಮ್‍ಜ಼ಮಾನನಿ ರೂಪ್‌ಮ ಯೋ ದಾವೀದನು ಖೂಮ್ಮ ಪೈದಹುಯೊ. 
\v 4 ದೇವ್ನೆ ಪಹಿಲೆ ಪವಿತ್ರ ದಪ್ತರ್‌ಮ ಇನ ಪ್ರವಾದಿಥಿ ಬೋಲೈರ‍್ಹೀತೆ ಆ ವಾಗ್ದಾನ್‌ಕರ‍್ಯೊತೆ ಸುವಾರ್ತೆ ಮರ‍್ಯಾಹುಯಾಮಾಥು ಪಾಛು಼ ಜಿವ್ತುಹುಯೋತೆ ಇನಿ ಶಕಥ್ಥಿ ದೇವ್‌ನೊ ಛಿಯ್ಯೊಕರಿ ವತಾಳೈಲಿದೊ. ಯೋಸ್ ಅಪ್ಣೊ ಪ್ರಭು ಯೇಸುಕ್ರಿಸ್ತ ಹುಯಿರೊಸ್. 
\v 5 ಇನು ನಾಮ್ನಿ ಮಹಿಮೆನಖ್ಹಾಜೇಸ್ ಅಖ್ಖಾಸ್ ದೇಖ್ಹ್‌ನು ಅದ್ಮಿಖ್ಹಾರು ಅನ ವಿಶ್ವಾಸ್‍ಕರಿನ್, ವಿಧೇಯಹುಯಿನ್ ಚಾ಼ಲನಿತರ ಕರಾನ ಅಪೊಸ್ತಲಹುವಾನಿ ಮೋಕಾನ ಯೇಸುಕ್ರಿಸ್ತಥಿಸ್ ದೇವ್ನೆ ಮನ ದೀರಾಖ್ಯೊಸ್. 
\v 6 ರೋಮಾಪುರಮ ರ‍್ಹವಾಳ ತುಮೂನಾಬಿ ಮಳೈಲೀನ್ ಕ್ರಿಸ್ತವಾಳ ಹುವಾನಖ್ಹಾಜೆ ತುಮೂನ ಬುಲಾಯೊ. 
\v 7 ಅಜು಼ ಇಮ್ಮಸ್ ದೇವ್ ಪ್ಯಾರ್‌ಕರಾತೆ ಅಜು಼ ಇನು ಶೊಂತ್ ಅದ್ಮಿವೊ ಕರಿ ಹುಯಿರ‍್ಹುತೆ ರೋಮ್‌ವಾಳ ತುಮುನ ಲೀಖುಕರುತೆ‍ ಶಾತ್‌ಕತೊ: ಬಾ ಹುಯಿರ‍್ಹೋತೆ ದೇವ್‍ಥೀಬಿ ಪ್ರಭು ಯೇಸುಕ್ರಿಸ್ತಥೀಬಿ ತುಮೂನ ವಾರ್‌ಖ್ಹೊಬಿ ಶಾಂತಿಬಿ ಮಳಾದೆ.
\s ಧನ್ಯವಾದ್‍ನಿ ಪ್ರಾರ್ಥನೆ
\p
\v 8 ಖ್ಹಾರೇಥಿ ಪಹಿಲೆ ತುಮಾರಿ ವಿಶ್ವಾಸ್‌ನಿ ಬಾರೇಮ ಜಗತ್ನ ಅಖ್ಖಿಬಾಜು಼ ಪೂಚ್‍ತಾಚ಼್ ಹೂಕರಸ್. ಇನಖ್ಹಾಜೆ ಮೇ ತುಮಾರಭಣೀಥು ಯೇಸುಕ್ರಿಸ್ತನ ನಾಮ್‌ಥಿ ದೇವ್ನ ಧನ್ಯವಾದ್ ಕರುಸ್. 
\v 9 ದೇವ್ನ ಛಿಯ್ಯಾನಿ ಸುವಾರ್ತೆನ ಮನ್‍ಲಗಾಡಿನ್ ಬೋಲ್ತೊಹುಯಿನ್ ಇನಾಸ್ ಮಾರ ದಿಲ್‌ಥಿ ಸೇವೆ ಕರಾವಾಳೊಹುಯಿನ್ ಭೈಕೂಸ್ ಕೊಂತೆ, ತುಮಾರಖ್ಹಾಜೆ ಬಿಂತಿ ಕರುಕರಸ್. ಅನ ದೇವಸ್ ಸಾಕ್ಷಿ. 
\v 10 ಮೇ ಹರೇಕ್ ಪ್ರಾರ್ಥನೆಮ ದೇವ್, ಇನಿಖ್ಹೂಜ಼್‍ನಿಘೊಣಿ ಹಮ್ಕೆತೋಬಿ ತುಮಾರಕನ ಆವಾನ ಮೋಕ ಮಳಾದೆಕರಿ ದೇವ್‌ಮ ಗಿಂಗೈಲೆವುಸ್. 
\v 11 ತುಮೂನ ಮಳಿನ್ ಥೋಡಿ ಆತ್ಮೀಕ ಆಶೀರ್ವಾದ್‌ ತುಮಾರಿ ಜೋ಼ಡ್ಮ ವಾಟಪಾಡಿನ್ ದೀನ್ ತುಮೆ ಅನೇಥಿ ಶಕತ್‍ ಲೇವ್ಣುಕರಿ ಮಾರಿ ಶಂತೋಖ್ಹ್‌ಹುಯಿರ‍್ಹಿಸ್. 
\v 12 ಮಾರಿ ವಿಶ್ವಾಸ್‌ಮ ತುಮೇಬಿ ತುಮಾರಿ ವಿಶ್ವಾಸ್‍ಥಿ ಮೇಬಿ ಏಕ್‍ಥಿಏಕ್‍ಜ಼ಣು ಮದತ್ನ ಲೀಲೆವ್ಣುಕರಿ ಮಾರಿ ಆಖ್ಹ್. 
\v 13 ಭೈಯೇ ಭೇನೆವೊ, ಪರೈಆದ್ಮಿಯೇವ್‍ಮ ಜುತ್ಯೋತೆತಿಮ್‍ ತುಮಾರಮಬಿ ಜೂತಿಶ್‌ಕರಿ, ಮೇ ಕೈಯೆಕ್‍ಹಲ್ಲ ತುಮುನ ಮಳಾನಖ್ಹಾಜೆ ದಿಲ್‍ಕರ‍್ಯೊತೋಬಿ, ಹಮ್ಕೆಲಗು ಶಾತ್ಕಿ ಏಕ್‍ ಆಡು ಹೂಕರ್ತುಥು ಕರಿ ತುಮೇಬಿ ಮಾಲುಮ್‌ಕರಿರಾಕೊ ಕರಿ ಮಾರಿ ಆಖ್ಹ್‌. 
\v 14 ಮೇ ಗ್ರೀಕ್‍ವಾಳನಾಬಿ ಅಜು಼ ಅಲಕ್‌ಅದ್ಮಿವೊನಾಬಿ ಅಕ್ಲಿನಾಬಿ, ಬಿಣ್‌ಖ್ಹೈಲಿನಾಬಿ ಫೇಡ್ನುತೆ ಏಕ್‌ ಕರ್ನಿ ಮಾರಪರ್ ಛಾ಼. 
\v 15 ಅಮ್‍ಛಾ಼ತೆ ಇನಾಖ್ಹಾಜೆ ರೋಮ್ ಖ್ಹಯೇರ್‌ಮ ಛಾ಼ತೆ ತುಮೂನಾಬಿ ಸುವಾರ್ತೆ ಬೋಲಾನ ಮೇ ಹುಮ್ಮಖ್ಹ್‌ಥಿ ತಯಾರ್ ಹುಯಿರ‍್ಹೋಸ್.
\s ಸುವಾರ್ತೆನಿ ಶಕತ್
\p
\v 16 ಮಾರಿ ಸುವಾರ್ತೆನಿ ಬಾರೇಮ ಮನ ಪೂರ ಆತ್ಮ ವಿಶ್ವಾಸ್ ಛಾ಼. ಶನಕತೊ ಯೋ ಪಹಿಲೆ ಯೆಹೂದ್ಯರ್‌ನ ಇನಕೇಡೆಥು ಯೆಹೂದ್ಯಕಾಹೇತೆ ಇವ್ಣುನಾಸ್ ಕಾಹೆತೆ ವಿಶ್ವಾಸ್‌ಕರವಾಳ ಹರೇಕ್‌ನಬಿ ಆ ಸುವಾರ್ತೆ ರಕ್ಷಣೆನ ಉಬ್‍ಜಾ಼ವನಿ ದೇವ್ನಿ ಶಕತ್‍ಹುಯಿರ‍್ಹೀಸ್. 
\v 17 ಕಿಮ್‌ಕತೊ ದೇವ್ ಸುವಾರ್ತೆಥಿ ಅದ್ಮಿವೋನ ಇನಭಣಿ ಅಛ಼್ಛುಹುವಾನಿಘೊಣಿ ಕರಸ್. ಅಥ್ರಾನು ಸಂಬಂದ ಶುರುವಾತ್‍ಥು ಖ್ಹರ್ತಿಲಗೂಬಿ ವಿಶ್ವಾಸ್‌ನಪರ್‌ ಭೀರೆಸ್. “ಅಮ್‌ ನೀತಿವಾಳೊ ವಿಶ್ವಾಸ್‌ಥೀಸ್ ಜಿವ್‌ಶೆ” ಕರಿ ಪವಿತ್ರಪುಸ್ತಕ್ಮ ಲಿಖೈರ‍್ಹುಸ್.
\s ಅದಮ್‍ಜ಼ಮಾನಾನಿ ಗಲತ್‌
\p
\v 18 ಖರಾಬ್ ಚಾ಼ಲ್‌ಥಿ ಖ್ಹಾಚ಼ನ ಲಪಾಡವಾಳು ಹುಯಿರ‍್ಹುತೆ ಅದ್ಮಿವೋನು ಅಖ್ಖಿಥರಾನು ಭಕ್ತಿಕೊಂತೆ ಅಜು಼ ಪಾಪ್ನುಚಾ಼ಲ್ನ ಉಪ್ಪರ್ ದೇವ್ನು ಇರಾದೊ ಪರ್‌ಲೋಕ್‌ಥು ಉತ್ರಿನ್‍ ಆವಸ್. 
\v 19 ಶನಖ್ಹಾಜೆಕತೊ ದೇವ್ನಿಬಾರೇಮ ಇವ್ಣುನ ಬರೋಬರ್‌ಥಿ ಮಾಲುಮ್ ಹುಯಿರ‍್ಹುಸ್, ಯೊ ಇವ್ಣುನ ದೇವ್ನೆಸ್ ವತಾಳ್ಯೊ. 
\v 20 ಕಿಮ್‌ಕತೊ ಡೋಳಾಮ ದೆಖಾವಕೊಂತೆ ಇನಿ ಚಾ಼ಲ್‍ಚ಼ಲಣ್‍ಅಖ್ಖು ಕತೊ ಇನಿ ಕದೇಬಿ ರ‍್ಹವಾನಿ ಶಕತ್‌ಬಿ, ದೇವ್ನಿಸ್ವಭಾವ್‍ಬಿ, ಜಗತ್‌ ಉಬ್‌ಜಾ಼ಯೋತೆ ಧರೀನ್ ಇನೆ ಕರ‍್ಯೊತೆ ಉಬ್‍ಜಾ಼ವ್ಣಿಥಿ ಯೋ ಮಾಲುಮ್‍ಪಡಸ್. ಅಮ್‍ ರ‍್ಹವಾಪರ್ ಇವ್ಣೆ ಖಿವು ಭಾಣುಬಿ ಬೋಲಾನ ಕೊಉಷೇನಿ. 
\v 21 ಶನಕತೊ ಇವ್ಣೆ ದೇವ್ನ ಮಾಲುಮ್ ಕರಿರಾಖ್ಯುತೋಬಿ ಇನ ದೇವ್‌ಕರಿ ಖ್ಹರಾಯುಕೊಯ್ನಿ ಇನಿ ಮದತ್‍ನ ಯಾದ್‌ಕರಿನ್ ಧನ್ಯವಾದ್ ಕರ‍್ಯುಕೊಯ್ನಿ. ಇನ ಬದಲ್ ಇವ್ಣ ಕೊಂತೆಕಾಮ್ಮ ಮಘನ್ ಹುಯಿಗು. ಅಕ್ಕಲ್‌ಕೊಂತೆ ಇವ್ಣೊ ದಿಲ್‌ ಅಂಧಾರೇಥಿ ಭರೈರ‍್ಹುಸ್. 
\v 22 ಇವ್ಣೆಸ್ ಗ್ಯಾನಿಕರಿ ಬೋಲಿಲಿನ್ ಇವ್ಣೆ ಬಿಣ್‍ಅಕ್ಲಿನು ಹುಯಿರ‍್ಹುಸ್. 
\v 23 ಮಟಾಕೊಂತೆ ದೇವ್ನಿ ಮಹಿಮೆನ ಇವ್ಣೆ ನಾಶ್ ಹುಯಿಜಾ಼ಯಿತೆ ಅದ್ಮಿ, ಜಾನ್ವರ್‌, ಜಿನಾವರ್‌, ಖ್ಹವ್‍ಳಾತೆ ಕೀಡ್‌ಕಮ್ಟಾನ ಮೂರತ್ನ ಪೂಜ಼ಕರಲಗ್ಯು. 
\v 24 ಇನಖ್ಹಾಜೆ ಅದ್ಮಿವೋನ ದಿಲ್ನಿ ಲಾಲಚ್‌ನಿಘೊಣಿ ಚಾ಼ಲಿಲಿನ್ ಇವ್ಣ ಇವ್ಣ ಶರೀರ್‌ನ ಇವ್ಣಮಹಿ ಖ್ಹರಮ್‌ ಕಡೈಲ್ಯವಾದೆಕರಿ ದೇವ್ನೆ ಇವ್ಣುನ ಕಚಿಂಡ್‌ ಚಾ಼ಲ್‌ಮ ಮ್ಹೇಲಿದಿದೊ. 
\v 25 ಇವ್ಣೆ ದೇವ್ನು ಖ್ಹಾಚ಼ನ ಝೂ಼ಟುಕರಿ ಬದಲೈಲೀನ್, ಉಬ್‌ಜಾ಼ಯೋತೆ ದೇವ್ನ ಆರಾದನೆ ಕರ‍್ಯುಕೊಂತೆ ಉಬ್‍ಜ್ಯುಹುಯ ರಾಛಾ಼ನಸ್ ಆರಾದನೆ ಕರ‍್ಯು. ಅಖ್ಖ ಹಗಾಮ್ಮ ಉಬ್‍ಜಾ಼ಯೊತೆ ದೇವ್ನಾಸ್ ಹಮೇಶ ಸ್ತುತಿ ಹುವಾದೆ, ಆಮೆನ್. 
\v 26 ಇವ್ಣೆ ಅಥ್ರಾನು ಕರ‍್ಯುತೆ ಇನಖ್ಹಾಜೆ ದೇವ್ ಇವ್ಣುನ ರ‍್ಹೇವ್ಣುತೆ ಶರೀರ್‌ನು ಪರಕ್ನು ಸುಖಭೋಗ್‍ನ ಮ್ಹೆಂದಿನ್ ನಾಕರ‍್ನುತೆ ಶರೀರ್‌ನು ಪರಕ್ನು ಸುಖಭೋಗ್‍ನ ಕರಾನ ಮ್ಹೇಲ್ಯೊ. 
\v 27 ಇಮ್ಮಸ್ ಪರ್ಖ್ಹೊ ಮ್ಹಾಮುಲಿನು ತಯೇಡಾನಿ ಶರೀರಿಕ್‍ ಭೋಗ್‌ನ ಮ್ಹೇಲಿನ್ ಇವ್ಣ ಇವ್ಣಾಮಸ್ ಖ್ಹರಮ್‌ಕೊಂತೆ ಕಾಮ್ ಕರಾಥಿ ಇವ್ಣುನ ಮಳ್‌ಣುತೆ ನಿಶತ್‍ನ ಲೀಲಿದು. 
\v 28 ಶನಖ್ಹಾಜೆಕತೊ ಯೊ ಅದ್ಮಿಖ್ಹಾರು ದೇವ್ನಿ ಗ್ಯಾನ್ನ ಝಿಟ್ಕಾರ‍್ಯುತೆ ಇನಖ್ಹಾಜೆ ಇವ್ಣುನ ಪಾಪ್ನುಕಾಮ್‍ ಕರಾನ ಮ್ಹೆಲಿದಿದೊ. 
\v 29 ಇವ್ಣೆ ಅಖ್ಖಿಥರಾನು ಖರಾಬ್‍ಫನೈಮ ಭರೈರ‍್ಹವಾಳು ಹುಯಿರ‍್ಹುಸ್, ಶೈತಾನ್ನಿಬುದ್ಧಿ, ಪೈಶಾನಿಲಾಲಚ್, ಪೇಟ್ನೊಬಳಾಪೊ, ಭೋಕಾನು, ಝ಼ಗ್‍ಡೊ, ಠಗಾವನು, ಕೇಡ್‍ಕರಾನು, ಅಜು಼ ಚಾ಼ಡಿಬೋಲವಾಳು, 
\v 30 ಏಕ್ನಪರ್‌ ಏಕ್‍ ಖರಾಬ್ ಬೋಲವಾಳು ದೇವ್ನವಹೇರ್ ಕರವಾಳುಬಿ, ಖ್ಹರಮ್‍ಕಡಾವಾಳೂಬಿ ಹಂಕಾರ್‌ವಾಳೂಬಿ, ಗಬ್ಬರ್‌ಕರವಾಳು ಅಜು಼ ಬಡೈಮಾರವಾಳೂಬಿ, ಇವ್ಣೆ ಕದೇಬಿ ಖರಾಬ್ ಕಾಮ್ ಕರಾನಸ್‍ ಸೋಚವಾಳು, ಆಯಾಬಾನಿ ವಾತೆನ ನಾ ಖ್ಹಮ್‍ಜಾ಼ವಾಳೂಬಿ, 
\v 31 ಬಿಣ್‍ಸೋಚ್‍ವಾಳೂಬಿ, ವಾತ್ನ ಛು಼ಕಿಜಾ಼ಯಿತೆ, ಇವ್ಣೆ ಬಿಜೇಕ್ನ, ಗೋರ್‌ನಾರ‍್ಹವಾಳುಬಿ ಹುಯು. 
\v 32 ಅಥ್ರಾನುಖ್ಹಾರು ಚ಼ಲಾವವಾಳು ಮರಣ್‍ಮ ಭಾಗ್‌ಲ್ಯಾವಾಳು ಕರಿ ಬೋಲಾನು ದೇವ್ನಿ ನಿಯಮ್‌ ಹುಯಿರ‍್ಹಿಶೆಕರಿ ಮಾಲುಮ್ ಥೂ. ಕತೋಬಿ ಖ್ಹಮ್‍ಜೀನ್‍ಬಿ ಇವ್ಣು ಇವ್ಣೇಸ್ ಯೋ ಅಖ್ಖಾ ಕಾಮ್ನ ಕರವಾಳು ನಾ ಹುಯಿನ್, ಇಮ್‌ ಕರವಾಳನ ಭಾಲ್ ದ್ಯವಾಳು ಹುಯಿರ‍್ಹೂಸ್.
\c 2
\s ದೇವ್ನಿ ನ್ಯಾವ್ನುತೀರ್ಪ್‌
\p
\v 1 ಇನಖ್ಹಾಜೆ ‘ಬಿಜ಼ ಅದ್ಮಿನಿ ಬಾರೇಮ ತೀರ್ಪ್‌ ಕರಾವಾಳೊ ಮಾರೊ ದೋಸ್ತಿ, ತೂ ಕೋಣ್‌ರ‍್ಹಿಯೋತೊಬಿ ತುನ ಇನೇಥಿ ಕ್ಷಮಾಕೊಯ್ನಿ. ಶನಕತೊ ಬಿಜೇಕ್‍ಜ಼ಣಾನು ಗಲತ್ನ ಢೂಂಡಾವಾಳೊ ಹುಯಿರೋತೆ ತೂ, ಇವ್ಣೆ ಕರಾತೆ ಇನಾಸ್ ತೂಬಿ ಕರಸ್. ಇನಖ್ಹಾಜೆ ತಾರುತೂಸ್ ಅಪರಾದಿ ಕರಿ ಸಾಬಿತ್ ಕರಿಲೇಸ್. 
\v 2 ಅಪರಾದ್ನ ಕರಾವಾಳಾನಿ ಬಾರೇಮ ದೇವ್ ಕರಾನು ತೀರ್ಪ್ ಖ್ಹಾಚನ ಲೀನಸ್ ರ‍್ಹೇಸ್‍ಕರಿ ಅಪ್ಣುನ ಮಾಲುಮ್ ಛಾ಼. 
\v 3 ಕತೋಬಿ ಅಲಾ ಮಾರೊ ದೋಸ್ತಿ, ಎಥ್ರಾನುಖ್ಹಾರು ಚ಼ಲಾವವಾಳಾನ ಉಪ್ಪರ್ ನ್ಯಾವ್ನುತೀರ್ಪ್‌ ಕರಾತೆ ತೂ ದೇವ್ನ ತೀರ್ಪ್‌ಥಿ ಬಚಿಗಯೊಕರಿ ಸೋಚಸ್ಕಿ ಶು? 
\v 4 ಇನಿ ಘಣಿ ದಯಾಬಿ, ಖ್ಹಮಾಳಿಲ್ಯವಾನು ಅಜು಼ ಹಮೇಶಾನಿ ಶಾಂತಿ ಅನಖ್ಹಾರು ತೂ ಝಿಟ್ಕಾರಸ್ಕಿ ಶು? ದೇವ್ನಿ ಅಛ್ಛಿಗುಣ್‍ ತುನ ದಿಲ್‌ ಫರೈಲ್ಯಾವಭಣಿ ಚ಼ಲಾವ್‍ಶೆಕರಿ ಬೋಲಾನು ತುನ ಮಾಲುಮ್ ಕೊಯ್ನಿಕಿ ಶು? 
\v 5 ಕತೋಬಿ ತಾರೊ ದಿಲ್‌ ಮೊಂಡ್‍ಬಿ ಕಠಣ್ ಹುಯಿರುಸ್. ಇನಖ್ಹಾಜೆ ತುಮೆ ದೇವ್ನೊ ಇರಾದೊ ಅಜು಼ ನೀತಿಥಿರ‍್ಹವಾನು ನ್ಯಾವ್ನುತೀರ್ಪ್‌ನ ದನ್ಮ ತುಮೂನ ಉಷೇತೆ ನಿಶತ್ನ ಅಜೂ಼ಬಿ ಜ಼ಮಕರ್ತೊಹುಯಿನ್ ವಳೇಜಾ಼ಸ್. 
\v 6 ಶನಕತೊ ದೇವ್ ಹರೇಕ್ ಜ಼ಣಾನಾಬಿ ಇವ್ಣ ಇವ್ಣ ಕಾಮ್ನ ದೇವ್ಣುತೆ ಇನಾಮ್ ದಿಶೆ. 
\v 7 ಥೋಡುಜ಼ಣು ಅಛ್ಛಾ಼ನ ಕರ್ತುಹುಯಿನ್. ಮಹಿಮೆ, ಇಜ಼್ಜತ್‌, ಹಮೇಶನಜಾನ್ನ ಜಿವ್ಣನ ಢೂಂಡಸ್. ಇವ್ಣುನ ದೇವ್ ಹರ್‌ಹಮೇಶಾನಿ ಜಿ಼ಂದ್‌ಗಿ ದಿಶೆ. 
\v 8 ಕತೋಬಿ ಉಭ್‌ರ‍್ಯುತೆ ಅದ್ಮಿಖ್ಹಾರು ಶೊಂತ್‍ ಅಖ್ಹ್‌ಕರವಾಳು ಖ್ಹಾಚ಼ನಲೀನ್ ಚಾ಼ಲಾನು ಮ್ಹೇಲಿನ್ ಠಗಾವ್ಣಿನ ಲೀನ್ ಚಾ಼ಲಸ್ಕಿ ಇವ್ಣಪರ್ ದೇವ್‌ನೊ ಇರಾದೋಬಿ ಚ಼ಂಢಾಳ್‍ಬಿ ರಂಚ಼್‌ಶೆ. 
\v 9 ಪಹಿಲೆ ಯೆಹೂದ್ಯರ್‌ನ ಇನಪಾಛಾ಼ಳ್ ಯೆಹೂದ್ಯಕಾಹೇತೆ ಇವ್ಣುನ ಖರಾಬ್‌ಥಿ ಚಾ಼ಲವಾಳ ಹರೇಕ್‌ಜ಼ಣಾನ ಉಪ್ಪರ್‌ ವದೇಖ್ಹ್‌ಬಿ, ಲತಾಡಾಬಿ ಆವ್‌ಶೆ. 
\v 10 ಕತೋಬಿ ಅಛ್ಛಿ ವಾಟ್‌ಪರ್ ಚಾ಼ಲವಾಳ ಅಖ್ಖಾಮ ಪಹಿಲೆ ಯೆಹೂದ್ಯರ್‌ನ ಇನಕೇಡೆಥು ಯೆಹೂದ್ಯಕಾಹೇತೆ ಇವ್ಣುನ ದೇವ್ ಮಹಿಮೆ ಮರ್ಯಾದಿ ಅಜು಼ ಸಮಾಧಾನ್ನ ದಿಶೆ. 
\v 11 ಶನಕತೊ ದೇವ್, ಬೇದ್‌ಭಾವ್‌ ಕರಾಕೊಯ್ನಿ. ದೇವ್ ಹರೇಕ್‍ಜ಼ಣಾನ ಎಕ್ಕಸ್ ಆಳ್ತಿಮ ತೀರ್ಪ್ ದೇಸ್. 
\v 12 ಯೆಹೂದ್ಯರ್‌ಕಾಹೆತೆ ಇವ್ಣೆ ಮೋಶೇನು ಧರ್ಮಶಾಸ್ತ್ರ ನಾರ‍್ಹೀನ್ ಪಾಪ್‍ಕರ‍್ಯುತೊ ಧರ್ಮಶಾಸ್ತ್ರ ನಾರ‍್ಹೀನಸ್ ನಾಶ್ ಹುಯಿಜಾ಼ಶೆ; ಅಜು಼ ಯೆಹೂದ್ಯರ್‌ನ ಧರ್ಮಶಾಸ್ತ್ರ ಛಾ಼, ಇವ್ಣೆ ಇನ ಮಹಿರ‍್ಹೀನ್ ಪಾಪ್‍ಕರ‍್ಯುತೊ ಧರ್ಮಶಾಸ್ತ್ರಥಿ ತೀರ್ಮಾನ್ ಲಿಶೆ. 
\v 13 ಕೋಣ್‌ಬಿ ಖಲಿ ಧರ್ಮಶಾಸ್ತ್ರ ಖ್ಹಮ್‌ಜ್ಯುತೊ ದೇವ್ನಖ್ಹಾಮ್ಣೆ ನೀತಿವಾಳು ಉಶೆಕೊಯ್ನಿ. ಕತೋಬಿ ಧರ್ಮಶಾಸ್ತ್ರ ಬೋಲಾತೆ ಹರೇಕ್ನ ಪಾಡಿಚಾ಼ಲವಾಳುಸ್ ನೀತಿವಾಳುಕರಿ ಚೂ಼ಣೈಜಾ಼ಶೆ. 
\v 14 ಯೆಹೂದ್ಯರ್‌ಕಾಹೆತೆ ಇವ್ಣುನ ಧರ್ಮಶಾಸ್ತ್ರ ಕೊಯ್ನಿ ಕತೋಬಿ ಇವ್ಣೆ ಶಾತ್‌ ಕರಸ್ಕಿ ಯೋಅಖ್ಖು ಧರ್ಮಶಾಸ್ತ್ರನಿಮತ್ ರ‍್ಹೇಸ್. ಇವ್ಣುನ ಧರ್ಮಶಾಸ್ತ್ರ ನಾ ರ‍್ಹಯುತೋಬಿ ಇವ್ಣುನ ಇವ್ಣೇಸ್ ಧರ್ಮಶಾಸ್ತ್ರ ಹುಯಿರ‍್ಹೂಸ್. 
\v 15 ಇವ್ಣಿ ಚಾ಼ಲ್‍ಚ಼ಲಣಸ್ ಇವ್ಣ ದಿಲ್ಮ ಧರ್ಮಶಾಸ್ತ್ರನಿ ಹುಕಮ್‍ಅಖ್ಖು ಲೀಖೈರ‍್ಹುಸ್‍ಕರಿ ವತಾಳಿದೇಸ್. ಇವ್ಣಿ ದಿಲ್ನಿಸಾಕ್ಷಿಬಿ ಆಹೈರುತೆ ಖ್ಹಾಚು಼ಕರಿ ವತಾಳಿದೇಸ್. ಶನಖ್ಹಾಜೆಕತೊ ಏಕೇಕ್‍ಹಲ್ಲ ಇವ್ಣಿ ಸೋಚ್‍ಅಖ್ಖು ಇವ್ಣೇಸ್ ಗಲ್ತಿವಾಳಕರಿ ವತಾಳಿದೇಸ್. ಅಜು಼ ಏಕೇಕ್‍ಹಲ್ಲ ಇವ್ಣುನ ಬರೋಬರ್‌ಬಿ ಕರಸ್. 
\v 16 ಇನಖ್ಹಾಜೆ ಮೇ ಬೋಲುತೆ ಸುವಾರ್ತೆನಿಘೋಣಿ ಯೋ ದನ್ಮ ಅಮ್ಮಸ್ ದೇವ್ ಯೇಸುಕ್ರಿಸ್ತಥಿ ಅಖ್ಖಾಮ ಗಪ್ಲಥ್ಥಿ ರ‍್ಹೇಯ್ತೆ ಸೋಚ್ನ ತೀರ್ಪ್‌ ಕರ್ಶೆ.
\s ಯೆಹೂದ್ಯರ್ ಅಜು಼ ಧರ್ಮಶಾಸ್ತ್ರ
\p
\v 17 ಕತೋಬಿ ತೂ ಯೆಹೂದ್ಯಕರಿ ಬೋಲೈಲ್ಯಾವಾಳ ಧರ್ಮಶಾಸ್ತ್ರನಸ್ ಆಧಾರ್ ಕರಿರಾಖ್ಯೊಸ್, ತೂ ದೇವ್ನಿಬಾರೇಮ ಬಡೈಮಾರಿಲೇಸ್. 
\v 18 ಧರ್ಮಶಾಸ್ತ್ರಥಿ ಉಪದೇಶ್‌ನ ಲೀನ್‌, ಇನಿ ಖ್ಹೂಜ್‌ನ ಕರಿರಾಖವಾಳೊಬಿ, ಆಹೈರುತೆ ಬರೋಬರ್‌ನು ಯೋ ಬರೋಬರ್‌ನು ಕಾಹೆಕರಿಬಿ ತರೀಪ್‌ಶ ಕರಾವಾಳೊ ಹುಯಿರೊಸ್. 
\v 19 ಕಾಣಾನ ತೂ ಏಕ್‍ ಮಾರಗ್ ವತಾಳವಾಳೊ ಹುಯಿರೊಸ್‍ ಅಜು಼ ಅಂಧಾರಮ ರ‍್ಹವಾಳನ ಉಜಾ಼ಳು ಹುಯಿರೊಸ್ ಕರಿ ತುನ ಮಾಲುಮಸ್ ಛಾ಼. 
\v 20 ಶಾತ್ಬಿ ಮಾಲುಮ್‍ಕೊಂತೆ ಇವ್ಣುನ ಗುರುಹುಯಿನ್‍ಬಿ, ಧರ್ಮಶಾಸ್ತ್ರನಿ ಬಾರೇಮ ರ‍್ಹೇಸ್ತೆ ಅಖ್ಖಿ ಗ್ಯಾನ್ ಅಜು಼ ಖ್ಹಾಚು಼ ತುನ ಮಾಲುಮ್ ಛಾ಼. 
\v 21 ಅಲಕ್‍ ಅದ್ಮಿವೋನ ಉಪದೇಶ್ ಕರಾವಾಳೊ ತೂ, ತಾರುತೂಸ್ ಶನ ಕೊ ಶಿಕಾನಿ? ಚೋ಼ರ್ ನಾಕರ‍್ನುಕರಿ ಬೋಧನೆ ಕರಾವಾಳೊ ತೂಸ್ ಚೋ಼ರ್ ಕರಸ್‍ಕಿಶು? 
\v 22 ತೂ ವ್ಯಬಿಚಾರ್ ನಾಕರ‍್ನುಕರಿ ಬೋಲವಾಳೊ ತೂಸ್ ವ್ಯಬಿಚಾರ್ ಕರಸ್‍ಕಿಶು? ಮೂರತ್‍ಅಖ್ಖಾನ ವಿರೋದ್ ಕರಾವಾಳೊ ತೂ ಮಂದಿರ್‌ನಾಸ್ ಲೂಟಿ ಕರಾಸ್ಕಿಶು? 
\v 23 ಧರ್ಮಶಾಸ್ತ್ರನಿ ಬಾರೇಮ ಬಡೈಮಾರಿಲ್ಯವಾಳೊ ತೂ ಯೋ ನಿಯಮ್ನ ತೋಡಿನ್ ದೇವ್ನ ಖ್ಹರಮ್‌ ಕಾಡಸ್‍ಕಿಶು? 
\v 24 “ಯೆಹೂದ್ಯವಾಳ ತುಮಾರ ಖ್ಹಾಜೆ ಯೆಹೂದ್ಯರ್‌ಕಾಹೆತೆ ಅದ್ಮಿಯೇವ್‍ನ ಬೀಚ್ಮ ದೇವ್ನು ನಾಮ್ ದೂಷಣೆ ಹೂಕರಸ್” ಕರಿ ಪವಿತ್ರದಪ್ತರ್‌ಮ ಲೀಖೈರ‍್ಹುಸ್. 
\v 25 ತೂ ಧರ್ಮಶಾಸ್ತ್ರನ ವಿಧೇಯ ಹುಯಿನ್ ಚಾ಼ಲ್ಯೊತೊ ತುನೆ ಕರೈರಾಖ್ಯೊತೆ ಖ್ಹತ್ನನ ಫಾಯಿದೊ ಹುಯಿರ‍್ಹಿಶೆ; ಕತೋಬಿ ತೂ ಧರ್ಮಶಾಸ್ತ್ರ ಮೀರಿನ್ ಚಾ಼ಲವಾಳೊ ರ‍್ಹಯೋತೊ, ತುನ ಖ್ಹತ್ನ ಹುಯಿರ‍್ಹುತೋಬಿ ಹುಯುಕೊಂತೆ ತಿಮ್ ಹುವಾಸ್. 
\v 26 ಖ್ಹತ್ನ ನಾಕರೈರಾಖವಾಳೊ ಧರ್ಮಶಾಸ್ತ್ರನಿ ನಿಯಮ್‌ನಿ ಪರಕ್ಮ ಚಾ಼ಲ್ಯೊತೊ ಖ್ಹತ್ನವಾಳೊ ನಾರ‍್ಹಯೊತೋಬಿ, ಖ್ಹತ್ನ ರ‍್ಹಾವಾಳನಿತರ ಗಣ್ತಿಮ ರ‍್ಹೀಶ್‍ಕೊಯ್ನಿಕಿಶು? 
\v 27 ತುಮೆ ಖ್ಹತ್ನಕರೈರಾಖ್ಯಸ್; ಲೀಖೈಹುಯು ಧರ್ಮಶಾಸ್ತ್ರನಬಿ ರಾಖಿಮ್ಹೇಲ್ಯಸ್ ತೋಬಿ ಇನ ಮೀರಿನ್ ಚಾ಼ಲಸ್. ಅಮ್‌ರ‍್ಹೀನ್, ಶರೀರ್‌ಥಿ ಖ್ಹತ್ನ ನಾಕರಾಯುತೋಬಿ ಮ್ಹಾಮೂಲಿಥಿ ಧರ್ಮಶಾಸ್ತ್ರನ ಪಾಡಿಚಾ಼ಲವಾಳು ಖ್ಹತ್ನಕರೈರಾಖ್ಯತೆ ತುಮೂನ ತೀರ್ಪ್‌ ದಿಶೆ. 
\v 28 ಭಾರ್‌ ಖಲಿ ಯೆಹೂದ್ಯಹುಯಿರ‍್ಹವಾಳೊ ಯೆಹೂದ್ಯಕಾಹೆ; ಅಜು಼ ಭಾರ್‌ ಶರೀರ್‌ಮ ಖಲಿ ಕರಿರಾಖ್ಯುತೆ ಖ್ಹತ್ನ ಖ್ಹಾಚು಼ ಖ್ಹತ್ನಕಾಹೆ. 
\v 29 ಕತೋಬಿ ದಿಲ್ನಮಹಿ ಯೆಹೂದ್ಯ ಹುಯಿರ‍್ಹಾವಾಳೋಸ್ ಖ್ಹಾಚೊ಼ ಯೆಹೂದ್ಯ; ಇಮ್ಮಸ್ ದೇವ್ನಆತ್ಮನ ಕಾಮ್‍ಥಿಹುವಾನು ಖ್ಹತ್ನ ದಿಲ್ಮ ಹುವಾಸ್. ಯೋ ಖಲಿ ನಿಯಮ್‌ನಿ ಲೀಖಾಪಟ್ ಹುಯಿರ‍್ಹುಕೊಯ್ನಿ. ದೇವ್‍ಥೀಸ್‍ ಆವಾನು ಹುಯಿರ‍್ಹುಸ್ ಪಣ್ಕಿ ಎಥ್ರಾನವಾಳನ ಖ್ಹರಾವ್ಣಿ, ಅದ್ಮಿಥಿ ಆವಾನು ಕಾಹೆ.
\c 3
\p
\v 1 ಇಮ್‌ರ‍್ಹಯುತೊ ಯೆಹೂದ್ಯರ್‌ಹುಯಿನ್ ಯೆಹೂದ್ಯರ್‌ಕಾಹೆತೆ ಅವ್ಣೇಥಿ ವಿಶೇಷ್ ಶಾತ್? ನತರ್ ಖ್ಹತ್ನ ಕರೈಲ್ಯವಾಥಿ ಹುಯುತೆ ಫಾಯಿದೊ ಶಾತ್? 
\v 2 ಖ್ಹಾರಿ ಬಾರೇಮ ಬೋಲಾನುಬಿ ಘಣು ಫಾಯಿದೊ ಛಾ಼. ಪಹಿಲೆಥು ದೇವ್ನಿ ವಚನ್‍ ಯೆಹೂದ್ಯರ್‌ನ ದೆವೈರ‍್ಹೀಸ್. 
\v 3 ಕತೋಬಿ ಇವ್ಣಾಮ ಥೋಡಜ಼ಣಾನೆ ವಿಶ್ವಾಸ್‌ ಕರ‍್ಯುನಾಕರ‍್ಯುತೋಬಿ ಶಾತ್? ದೇವ್ ಬಿಣ್‌ ವಿಶ್ವಾಸ್‌ವಾಳೊಕಿ ಶು? 
\v 4 \x - \xo 3:4 \xo*\xt ಕೀರ್ತನೆ 51:4\xt* \x*ಕದೇಬಿ ಕೊಯ್ನಿ. ಅದ್ಮಿಖ್ಹಾರು ಝೂ಼ಟು ರ‍್ಹಯುತೋಬಿ, ದೇವ್ ಎಕ್ಕಸ್ ಜ಼ಣೊ ಖ್ಹಾಚೊ಼. ಪವಿತ್ರ ದಪ್ತರ್‌ಮ ಅಮ್‍ ಲೀಖೈರುಸ್ಕಿ, “ತೂ ತಾರಿ ವಾತೇವ್‍ಮಾಸ್ ನೀತಿವಾಳೊಕರಿ ತೀರ್ಮಾನ್‌ ಹೋಣು. ಹೊಜ಼್ಜತ್‌ ಭಿಡಾನಿವಖ್ಹ್‌ತೆ ತೂ ಜೂತ್‌ನು” ಕರಿ ಲೀಖೈರ‍್ಹುಸ್. 
\v 5 ಕತೋಬಿ ಅಪ್ಣಿ ಅನೀತಿಥಿ ದೇವ್ನು ಕಾಮ್‍ಅಖ್ಖು ನೀತಿಪರ್ ಭಿಯುಸ್‍ಕರಿ ದೆಖಾವಸ್ ಕರಿ ಬೋಲಿಲಿಯೇಕಿ ಶು? ದೇವ್ ಅಪ್ಣುನ ನಿಶತ್ ದಿದೊತೊ ಇನೆ ಅಪ್ಣುನ ಠಗಾಯೊ ಕರಿ ಬೋಲೆಜಾ಼ಯ್‍ಕಿ ಶು? ಅನ ಮೇ ಅದ್ಮಿನಿ ಪರಕ್ಮ ಬೋಲು ಕರುಸ್ತೆ. 
\v 6 ದೇವ್ ನ್ಯಾವ್‍ಕರಾವಾಳೊ ನಾ ರ‍್ಹಯೊಹೋತ್ತೊ ಯೋ ಜಗತ್ನ ತೀರ್ಪ್‌ಕರಾನು ತೋಬಿ ಕಿಮ್‍ ಉಶೆ? 
\v 7 ಮಾರಿ ಝೂ಼ಟಿಥಿ ದೇವ್ನು ಖ್ಹಾಚಿನ ಉಪ್ಪರ್ ಪಾಡೀನ್ ಇನಿ ಮಹಿಮೆನ ವತಾಳನು ಉಶೇತೊ ಮನ ಪಾಪಿಕರಿ ಕಿಮ್ ತೀರ್ಪ್‌ಹುಯಿಶ್? 
\v 8 ಅಮ್ ರ‍್ಹವಾಪರ್ ಅಛ಼್ಛುಕರಿ ದೆಖಾವನು ರ‍್ಹಿಯುತೊ ಅಪ್ಣೆ ಖರಾಬ್‍ನಾ ಕರೇಜಾ಼ಯ್‍ಕರಿ ಶನ ನಾಬೋಲ್ನು. ಇನಖ್ಹಾಜೆ ಥೋಡುಜ಼ಣು ಮನ ದೂಷಣೆ ಕರೀನ್ ಮಾರಪರ್ ಕೈಏಕ್ ವಾತೆ ಬೋಲ್ತುಹುಯಿನ್ ಝಿಟ್ಕಾರುಕರಾಸ್. ಎಥ್ರಾನವಾಳನ ನಿಶತ್‌ ಹುವಾನು ನ್ಯಾವಸ್‌.
\s ಕೋಣ್‌ಬಿ ನೀತಿವಾಳು ಕಾಹೆ
\p
\v 9 ಇಮ್‍ಕತೊ ಶಾತ್? ಅಪ್ಣೆ ಯೆಹೂದ್ಯಕಾಹೇತೆ ಇವ್ಣೆಥಿಬಿ ಊಚಾ಼ಕಿ ಶು? ಕದೇಬಿ ಕೊಯ್ನಿನಿ! ಮೇ ತದೇಸ್‌ ಯೆಹೂದ್ಯರ್‌ರ‍್ಹವೊ ಯೆಹೂದ್ಯಕಾಹೆತೆ ರ‍್ಹವೊ ಖ್ಹಾರೂಸ್ ಪಾಪ್ನ ಮಹಿರ‍್ಹಾವಳು ಕರಿ ಮೇ ಪಹಿಲೇಸ್ ದೆಖಾಡಿರಾಖ್ಯೋಸ್. 
\v 10 “ಪವಿತ್ರ ದಪ್ತರ್‌ಮ ಲೀಖೈರ‍್ಹೂತೆ ತಿಮ್; ಕೋಣ್‌ಬಿ ನೀತಿವಾಳು ಕೊಯ್ನಿ, ಏಕ್‍ ಜ಼ಣೂಬಿ ಕೊಯ್ನಿ. 
\v 11 ಅಕ್ಲಿ ಏಕ್‍ ಜ಼ಣೂಬಿ ಕೊಯ್ನಿ. ದೇವ್ನ ಢೂಂಡಾವಾಳೊ ಏಕ್‌ಬಿ ಕೊಯ್ನಿ. 
\v 12 ಖ್ಹಾರುಸ್ಜ಼ಣು ದೇವ್‍ಥಿ ದೂರ್ ಜೈ಼ರ‍್ಹೂಸ್‍, ಖ್ಹಾರೂಸ್ ಫಾಯಿದೊಕೊಂತೆ ಹುಯಿರ‍್ಹೂಸ್. ಅಛ್ಛು಼ ಕರಾವಾಳೊ ಕೋಣ್‌ಬಿ ಕೊಯ್ನಿ, ಏಕ್‍ ಜ಼ಣೂಬಿ ಕೊಯ್ನಿ, 
\v 13 ಇವ್ಣೊ ನ್ಹೇಟೊಸ್ ನಿಕ್‍ಳಿರ‍್ಹುತೆ ಮಖ್ಹಾಣ್ಯು ಹುಯಿರ‍್ಹುಸ್. ಇವ್ಣೆ ಝೂ಼ಟು ಜಿಭಾನ್‌ವಾಳು ಹುಯಿರ‍್ಹುಸ್. ಇವ್ಣ ಹೋಟ್‌ನ ಪೀಠೆ ಖ್ಹಾಪ್‍ನೊ ಝಾರ್‌ ಛಾ಼ 
\v 14 “ಇವ್ಣ ಮ್ಹೋಡಾಮ ಶಾಪ್ನ ಶಬರ್‌, ಭರೈರ‍್ಹುಸ್. 
\v 15 “ಇವ್ಣ ಗೋಡ ಲ್ಹೋಯಿನ ಕಾಡಾನ ಖದ್‍ಬದುಕರಸ್. 
\v 16 ಇವ್ಣೆ ಜಾ಼ಸ್ತೆ ಹಿಜ್ಜಾ಼, ಖ್ಹತಾಪ್ಣಿಬಿ ನಾಶ್‍ಬಿ ರ‍್ಹಿಶೆ. 
\v 17 ಇವ್ಣೆ ಶಾಂತಿನೊ ಮಾರಗ್‌ನಸ್ ಮಾಲುಮ್ ಕರ‍್ಯುಕೊಯ್ನಿ, 
\v 18 ಇವ್ಣ ದಿಲ್‌ಮ ದೇವ್‌ನೊ ಧಡುಕೊಸ್ ಕೊಯ್ನಿ.” 
\v 19 ಧರ್ಮಶಾಸ್ತ್ರ ಶಾತಸ್ ಬೋಲ್ಯುತೋಬಿ ಧರ್ಮಶಾಸ್ತ್ರನ ಮಹಿರ‍್ಹಾವಾಳನಸ್ ಸಂಬಂದ್‍ಪಡಸ್‍ಕರಿ ಅಪ್ಣುನ ಮಾಲುಮ್‌ಛಾ಼. ಅಮ್ ಖ್ಹಾರಾಸ್‍ನು ಮ್ಹೋಡು ಖ್ಹೊಪೊ ಹುಯಿಜಾ಼ಶೆ. ಅಜು಼ ಜಗತ್‍ಖ್ಹಾರು ದೇವ್ನ ನ್ಯಾವ್‍ನತೀರ್ಪ್‌ನ ದನ್ಮ ಗಣ್ತಿದೆವ್ಣು ಪಡ್‌ಶೆ. 
\v 20 ಶನಕತೊ ಖಿವು ಅದ್ಮಿ ರ‍್ಹಿಯೊತೋಬಿ ದೇವ್ನಿ ನಿಯಮ್ಮ ಧರ್ಮಶಾಸ್ತ್ರನ ಪಾಡಿಚ಼ಲಾಥಿ ನೀತಿವಾಳೊಕರಿ ಹುವಾನ ಕಿನೇಥೀಬಿ ಉಶೆಕೊಯ್ನಿ. ಧರ್ಮಶಾಸ್ತ್ರ ಅಪ್ಣಿ ಪಾಪ್ನಖಲಿ ವತಾಳಸ್‍ ಎತ್ರೇಸ್.
\s ದೇವ್ನಿ ಜೋ಼ಡ್ಮ ಅಪ್ಣುನ ನೀತಿವಾಳೊ ಕರಾನು ಕಿಮ್
\p
\v 21 ಕತೋಬಿ ಹಮ್ಕೆ ದೇವ್ ಧರ್ಮಶಾಸ್ತ್ರನಿ ಮದತ್‌ಕೊಂತೇಸ್ ಅದ್ಮಿವ್‍ನ ನೀತಿವಾಳೊ ಕರಿಬಣಾವನ ಮಾರಗ್‌ನ ವತಾಳಿರಾಖ್ಯೊಸ್. ಕತೋಬಿ ಆಹೈರುತೆ ಧರ್ಮಶಾಸ್ತ್ರ ಅಜು಼ ಪ್ರವಾದಿ ಖ್ಹಾರು ಆ ನವಮಾರಗ್‍ನಿ ಬಾರೇಮ ಅಪ್ಣುನ ಬೋಲಿರಾಖ್ಯೊಸ್. 
\v 22 ಯೇಸುಕ್ರಿಸ್ತಮ ವಿಶ್ವಾಸ್‍ಕರಾವಾಳಥಿಸ್‌ ವಿಶ್ವಾಸಿಖ್ಹಾರವ್ನ ದೇವ್ನಿ ನೀತಿ ಆವ್‌ಶೆ. ಅನಾಮ ಖೆವುಬಿ ಅಶಿಲ್ ಕಮ್‌ಶಿಲ್ ಕೊಯ್ನಿ. 
\v 23 ಶನಕತೊ ಖ್ಹಾರುಸ್‌ಜ಼ಣು ಪಾಪ್‍ಕರೀನ್ ದೇವ್ನಿ ಮಹಿಮೆಥಿ ದೂರ್‌ಹುಯಿಗು. 
\v 24 ಕತೋಬಿ ದೇವ್ನು ಫುಗಟ್ ವಾರ್‌ಖ್ಹೇಥಿ ಇವ್ಣುನ ಛುಟ್ಕಾರ್ ದ್ಯವಾವಾಳೊ ಯೇಸುಕ್ರಿಸ್ತಥಿ ನೀತಿವಾಳುಕರಿ ತೀರ್ಪ್‍ಹುವಸ್. 
\v 25 ಇನೆ ರಂಚ್ಯೊತೆ ಇನ ಲ್ಹೋಯಿಥಿ ಇನ ಉಪ್ಪರ್ ಭರೋಖ್ಹೊ ರಾಖವಾಳ ಹರೇಕ್ನ ಪಾಪ್‌ ಪರಿಹಾರ್ ಹೋಣುಕರಿ ಇನಾಸ್ ಸಮರ್ಪಣ್‌ ಕರಿಲಿದೊ. ಪಾಛ಼್‌ಲ್ಯ ಹಗಾಮ್ಮ ಅದ್ಮಿವೋನೆ ಕರ‍್ಯುತೆ ಪಾಪ್ನ ಬರೋಬರ್‌ನಿ ನಿಶತ್‍ ದಿದೊಕೊಂತೆ ದೇವ್ನೆ ಖ್ಹಮಾಳಿಲಿನ್ ಚಾ಼ಲ್ಯೊ. 
\v 26 ಅಮ್ನಿಪರಕ್ಮ ದೇವ್ ಮೇ ನೀತಿವಾಳೊಕರಿ ವತಾಳಿಲೇಸ್.ಅಜು಼ ಯೋ ಯೇಸುನ ವಿಶ್ವಾಸ್‍ಕರಾವಾಳ ಹರೇಕ್ನ ನೀತಿವಾಳಕರಿ ಬಣಾವಸ್. 
\v 27 ಅಮ್‌ರ‍್ಹಾವಪರ್‌ ಅಪ್ಣಿ ಬಾರೇಮ ಬಡೈಮಾರಿಲ್ಯವಾನ ಶನುಬಿ ಮೋಕ ಛಾ಼ಕಿಶು? ಕೊಯ್ನಿ. ಅಪ್ಣೆ ಧರ್ಮಶಾಸ್ತ್ರನ ಪಾಡಿ ಚಾ಼ಲಿಯೇಸ್‍ಕಿ ಶು! ಶನ? ಅಪ್ಣೆ ಶನ ವಿಶ್ವಾಸ್‌ ಕರ್‌ಯೇಸ್‌ಕಿ ಯೊ ಅಪ್ಣುನ ಊಚು಼ ಕರಾನಖ್ಹಾಜೆ ಮೋಕ ದೇಸ್. 
\v 28 ಧರ್ಮಶಾಸ್ತ್ರ ಬೋಲಾತೆ ಕಾಮ್‍ಥಿ ಕಾಹೆ ಪಣ್ಕಿ, ಖಲಿ ವಿಶ್ವಾಸ್‍ಥಿಸ್ ಖಿವೂಬಿ ಅದ್ಮಿ ನೀತಿವಾಳೊಕರಿ ಗಣ್ತಿಮ ಆವಸ್. 
\v 29 ದೇವ್ ಯೆಹೂದ್ಯರ್‌ನ ಖಲಿ ದೇವ್‍ಕಿಶು? ಯೋ ಯೆಹೂದ್ಯರ್‌ಕಾಹೆತೆ ಇವ್ಣುನಾಬಿ ದೇವ್‍ಹುಯಿರ‍್ಹೇಸ್‍ ಕೊಯ್ನಿಕಿಶು? ಒಹೊ, ಯೆಹೂದ್ಯರ್‌ಕಾಹೆತೆ ಇವ್ಣುನಾಬಿ ದೇವ್ ಹುಯಿರ‍್ಹೋಸ್. 
\v 30 ದೇವ್ನೆ ಖ್ಹತ್ನವಾಳಾನ ನೀತಿವಾಳುಕರಿ ತೀರ್ಪ್‌ಕರಾನ ಇವ್ಣಿ ವಿಶ್ವಾಸಸ್ ಆಧಾರ್. ಇಮ್ಮಸ್ ಖ್ಹತ್ನಕೊಂತೆ ಇವ್ಣುನ ತೀರ್ಪ್‌ಕರಾನಾಬಿ ವಿಶ್ವಾಸಸ್ ಕಾರಣ್ ಹುಯಿರುಸ್. 
\v 31 ಇಮ್‍ಕತೊ, ಅಪ್ಣೆ ವಿಶ್ವಾಸ್‍ಥಿ ಧರ್ಮಶಾಸ್ತ್ರನ ಬಿಣ್‍ ಮತ್ಲಬ್‌ನು ಬಣೈನಾಖೆಸ್‍ಕಿಶು? ಕದೇಬಿ ಕೊಯ್ನಿ. ಅಪ್ಣೆ ಧರ್ಮಶಾಸ್ತ್ರನ ಖಲಿ ಪಾಡಿಧರಿಯೇಸ್.
\c 4
\s ಅಬ್ರಹಾಮ್‌ನಿ ಉದಾಹರಣೆ
\p
\v 1 ಇಮ್‍ಕತೊ ಅಗ್ಲಿ ಪಿಳ್‌ಗಿವಾಳಾನ ಅಪ್ಣುನ ಗುರುಗುರಬ್‌ಲ್ಯೊ ಅಬ್ರಹಾಮ್‌ನೆ ಅನಿ ಬಾರೇಮ ಶಾತ್‍ಲೀಲಿದೊಕರಿ ಅಪ್ಣೆ ಬೋಲಿಯೆ? 
\v 2 ಅಬ್ರಹಾಮ್ ಇನ ಅಛ಼್ಛಕಾಮ್‌ಥಿ ನೀತಿವಾಳೊಕರಿ ತೀರ್ಪ್‌ಲ್ಯವಾಳೊ ಹುಯಿರೊಹೊತ್ತೊ ಖ್ಹರಾವ್ಣಿ ಕರೈಲ್ಯಾವಾನ ಇನ ಮೋಕ ರ‍್ಹಿಯುಹೊತ್. ಕತೋಬಿ ದೇವ್ನ ಖ್ಹಾಮ್ಣೆ ಕಾಹೆ, 
\v 3 “ಧರ್ಮಶಾಸ್ತ್ರ ಅಮ್‍ಬೋಲಾಸ್, ಅಬ್ರಹಾಮ್‌ನೆ ದೇವ್ನ ವಿಶ್ವಾಸ್‍ ಕರ‍್ಯೊ; ಯೋ ವಿಶ್ವಾಸ್‌ ಇನಿ ಗಣ್ತಿಮ ನೀತಿಕರಿ ಗಣ್ತಿ ಹುಯೊ”. 
\v 4 ಕಾಮ್‍ಕರಾವಾಳನ ಮಳಾತೆ ಮಜ಼್‌ದೂರಿ ಕೃಪೆಥಿ ಕಾಹೆ. ಯೋ ಇನ ಮಳ್ನುಥೂತೇಸ್ ಕರಿ ಗಣ್ತಿ ಹುವಾಸ್. 
\v 5 ಕತೋಬಿ ಏಕ್‌ ಜ಼ಣೊ ಇನು ಶೊಂತ್ ಕಾಮ್ನ ಉಪ್ಪರ್ ವಿಶ್ವಾಸ್ ಕರಾನು ಮ್ಹೇಲಿನ್, ಗಲ್ತಿವಾಳಾನ ನೀತಿವಾಳೊಕರಿ ಕರಾವಾಳ ದೇವ್ನ ಉಪ್ಪರ್ ಇನಿ ವಿಶ್ವಾಸ್ ಕರಾನುರ‍್ಹಿಯುತೊ ಆ ಇನೊ ಭರೋಖ್ಹೊ ಇನ ನೀತಿವಾಳೊಕರಿ ಗಣ್ತಿಕರಸ್‍. 
\v 6 ದೇವ್ ಕಿನು ಅಛ್ಛು಼ ಕಾಮ್ನ ದೇಖಸ್ ಕೊಯ್ನಿತೆ ನೀತಿವಾಳೊ ಕರಿ ಗಣ್ತಿ ಕರಸ್ಕಿ ಯೋಸ್ ಧನ್ಯಕರಿ, ದಾವೀದಜಿನು ಅಮ್‍ ಬೋಲಸ್. ಕಿಮ್‌ಕತೊ, 
\v 7 \x - \xo 4:7 \xo*\xt ಕೀರ್ತನೆ 32:1-2\xt*\x*“ಕಿನು ಗಲತ್‍ಖ್ಹಾರು ಪರಿಹಾರ್ ಹುಯಿರ‍್ಹುಸ್ಕಿ, ಕಿನು ಪಾಪ್‌ಖ್ಹಾರು ಕ್ಷಮಾಪಣ್ ಹುಯಿರ‍್ಹುಸ್ಕಿ ಯೋಸ್ ಧನ್ಯ ಹುಯಿರ‍್ಹೋಸ್. 
\v 8 ಪ್ರಭು ಕಿನ ಪಾಪ್‍ನ ಗಣ್ತಿಮ ಲೇಯ್‍ಕೊಯ್ನಿಕಿ ಯೋ ಅದ್ಮಿ ಖ್ಹಾಚ಼ಮಸ್ ಧನ್ಯ!” 
\v 9 ಯೋ ಆಶೀರ್ವಾದ್‍ನಿ ವಚನ್‍ ಖಲಿ ಖ್ಹತ್ನ ಹುಯಿರ‍್ಹವಾಳನಕೀ ನತರ್ ಖ್ಹತ್ನ ಕರೈರಾಖಕೊಂತೆ ಇವ್ಣುನಾಬಿ ಛಾ಼ಕಿ ಶು? ಶನಖ್ಹಾಜೆಕತೊ ಪವಿತ್ರ ದಪ್ತರ್‌ಮ ಅಮ್‍ ಬೋಲೈರ‍್ಹುಸ್, “ಅಬ್ರಹಾಮ್‌ ಇನಿ ವಿಶ್ವಾಸ್‌ಥೀಸ್ ನೀತಿವಾಳೊಕರಿ ಗಣ್ತಿ ಹುಯೊ”. 
\v 10 ಯೋ ಕದೆ ಹುಯುತೆ? ಇನ ಖ್ಹತ್ನ ಹುಯಿಗುತೆ ತದೇಕಿ ಖ್ಹತ್ನಹುವಾನ ಪಹಿಲೆ? ಯೋ ಖ್ಹತ್ನ ಹುಯುತೆ ತದೆಕಾಹೆ, ಖ್ಹತ್ನಹುವಾನ ಅಗಾಡಿಸ್. 
\v 11 ಒಹೊ, ಖ್ಹತ್ನಹುವಾನ ಪಹಿಲೇಸ್ ಇನಥೂತೆ ವಿಶ್ವಾಸ್‍ನು ಖ್ಹಣೇದ್ ಹುಯಿನ್, ನೀತಿನು ಮುದ್ರಾನ ಲೀಲಿದೊ. ಅಮ್‍ರ‍್ಹವಾಪರ್ ಯೊ ವಿಶ್ವಾಸ್‍ಕರವಾಳ ಅಖ್ಖಾನಾಬಿ, ಇವ್ಣುನ ಖ್ಹತ್ನ ನಾ ಹುಯುತೋಬಿ ಅಬ್ರಹಾಮ್ ಅಖ್ಖಾಸ್ನ ಆತ್ಮೀಕ ಬಾಹುಯೊ. ಇನಖ್ಹಾಜೆ ಇವ್ಣೆ ನೀತಿವಾಳಕರಿ ಗಣ್ತಿಮಹುಯು. 
\v 12 ಎತ್ರೇಸ್ ಕಾಹೆ ಖ್ಹತ್ನ ಹುಯಿರ‍್ಹವಾಳನಾಬಿ ಯೊ ಬಾ ಹುಯಿರೊಸ್, ಇವ್ಣುನಖಲಿ ಖ್ಹತ್ನ ಹುಯಿರ‍್ಹಿತೆ ಇನಖ್ಹಾಜೆ ಕಾಹೆ ಕತೋಬಿ ಅಪ್ಣೊ ಗುರುಗುರಬ್‌ಲ್ಯೊ ಹುಯಿರ‍್ಹೋತೆ ಅಬ್ರಹಾಮ್‌ನ ಖ್ಹತ್ನಹುವಾನ ಪಹಿಲೆ ಥೂತೆ ವಿಶ್ವಾಸ್‌ನ ಮಾರಗ್‌ಪರ್ ಇವ್ಣೇಬಿ ಚಾ಼ಲಸ್ ಇನಖ್ಹಾಜೆ ಇವ್ಣುನ ಯೊ ಬಾ ಹುಯಿರೊಸ್.
\s ವಿಶ್ವಾಸ್‍ಥಿ ದೇವ್ನಿವಾಗ್ದಾನ್ ಲಿದೋತೆ
\p
\v 13 ಜಗತ್‍ನಾಸ್ ಹಕ್‍ದಾರ್ ಉಷೆಕರಿ ಬೋಲಾನು ವಾಗ್ದಾನ್ ಅಬ್ರಹಾಮ್ ಧರ್ಮಶಾಸ್ತ್ರನ ಪಾಡಿ ಚಾ಼ಲುಕರ್ತೊಥೋತೆ ಇನಖ್ಹಾಜೆ ಕಾಹೆ. ವಿಶ್ವಾಸ್‍ಥಿ ಆವಾತೆ ನೀತಿಹುಯಿರ‍್ಹಿಸ್. 
\v 14 ಶನಕತೊ ಧರ್ಮಶಾಸ್ತ್ರಥಿ ಜಿವವಾಳೂಸ್ ಹಕ್‌ದಾರ್‌ ರ‍್ಹಯೂತೊ, ವಿಶ್ವಾಸ್‌ನ ಮತ್‌ಲಬ್ ಕೊಂನ್ತೆ ಹುಯಿಜಾ಼ಶೆ. ವಾಗ್ದಾನ್ ಬಿಣ್‌ಫಾಯಿದಾನು ಹುಯಿಗು 
\v 15 ಶನಕತೊ ಧರ್ಮಶಾಸ್ತ್ರ ಅದ್ಮಿವೋನ ದೇವ್ನ ಇರಾದಮ ನಾಖಸ್‍, ಕತೋಬಿ ಧರ್ಮಶಾಸ್ತ್ರ ನಾ ರ‍್ಹಿಯುಹೊತ್ತೊ ಇನ ವಿಧೇಯ ದ್ಯವಾನುಬಿ ಕೋ ರ‍್ಹಿಯುಹೊತ್ನಿ. 
\v 16 ಇನಖ್ಹಾಜೆ ಯೋ ವಾಗ್ದಾನ ವಾರ್‌ಖ್ಹೇಥಿಸ್ ಮಳಸ್. ಆ ವಾಗ್ದಾನ್ ಧರ್ಮಶಾಸ್ತ್ರನ ಆಧಾರ್ ಹುಯಿರ‍್ಹುತೆ ಇವ್ಣುನಾಸ್ ಕಾಹೆತೆ, ಅಬ್ರಹಾಮ್‌ನಬಿ ಇನಿ ಪಿಳ್ಗಿವಾಳಾನ ಫುಗಟ್‍ಥಿ ಮಳಾಸ್ತೆ ವಾಗ್ದಾನಸ್ ಇನಾಮ್ ಹುಯಿರ‍್ಹುಸ್. ಅಮ್‌ ಅವ್ಣೆ ಅಬ್ರಹಾಮ್‌ನಿ ಘೋಣಿ ಭರೋಖ್ಹೊ ಕರ್ಶೆ ಶನಕತೊ ಯೋ ಅಪ್ಣಖ್ಹಾರಸ್‍ನ ಬಾ ಹುಯಿರ‍್ಹೋಸ್. 
\v 17 “ಮೇ ತುನ ಕೈಏಕ್‌ ಜ಼ಗ್‌ಜಾ಼ತ್‌ನ ಅದ್ಮಿವೋನ ಬಾಕರಿ ದೀರಾಖ್ಯೊಸ್!” ಕರಿ ಪವಿತ್ರ ದಪ್ತರ್‌ಮ ಲಿಖೈರ‍್ಹುಸ್. ದೇವ್ ಮರಾವಾಳನ ಜಾನ್‌ ದ್ಯವಾಳೋಬಿ, ಕೋರ‍್ಹೆಂತೆ ಇನ ರ‍್ಹವಾನಿತರ ಕರವಾಳೋಬಿ ಹುಯಿರೋತೆ ದೇವ್‌ಮ ಅಬ್ರಹಾಮ್‌ನೆ ವಿಶ್ವಾಸ್‍ಕರ‍್ಯೊ. ಇನಖ್ಹಾಜೆ ಆ ವಾಗ್ದಾನ್ನ ದೇವ್‍ಥೀಸ್‍ ಇನೆ ಲಿದೊ. 
\v 18 ಭರೋಖ್ಹೊ ರಾಖಾನ ಶನು ಆಧಾರ್ ನಾರ‍್ಹುಯುತೋಬಿ ಅಬ್ರಹಾಮನೆ ನಂಬ್ಯೊ ಅಜು಼ ಭರೋಖ್ಹೊ ಕರ‍್ಯೊ ಅಮ್ಮಸ್ ಕೈಯೇಕ್‌ ದೇಖ್ಹ್‌ನ ಆತ್ಮೀಕ ಬಾಹುಯೊ. ಪವಿತ್ರ ದಪ್ತರ್‌ಮ ತಾರಿ ಪಿಳ್ಗಿ ಆಬ್‌ನ ಶುಕ್ಕರ್‌ನಿತರ ರ‍್ಹಿಶೆ. ಕರಿ ಪವಿತ್ರ ದಪ್ತರ್‌ಮ ಬೋಲ್ಯುತೆ ತಿಮ್. 
\v 19 ಯೋ ತದೇಸ್‌ ಖ್ಹುಮಾರ್ ಖ್ಹೋ ವರಖ್ಹ್‌ನೊ ಹುಯಿರ‍್ಹಿನ್ ಇನು ಶರೀರ್ ತದೇಸ್‌ ಕಮ್ಲಯಿಗೈಥಿ, ಇನಿ ಬಾವಣ್‍ ಸಾರನ ಲಡ್ಕಹುವಾನ ದನ್ ಖ್ಹತಮ್ ಹುಯಿಗುತೋಬಿ, ಯೋ ವಿಶ್ವಾಸ್‌ಮ ಕಮ್‍ಜೋ಼ರಿ ಹುಯೊಕೊಯ್ನಿ. 
\v 20 ಇನೆ ದೇವ್ನಿ ವಾಗ್ದಾನ್ ಕರ‍್ಯೊತೆ ಬಾರೇಮ. ಯೋ ಅವಿಶ್ವಾಸ್‌ಥಿ ಗುಮಾನಿ ಕರ‍್ಯೊಕೊಯ್ನಿ. ಯೋ ಹಿಮ್ಮಥ್ಥಿ ಭರೈನ್. ಇನೆ ದೇವ್ನ ಮಹಿಮೆ ಕರ‍್ಯೊ. 
\v 21 ಯೋ ವಾಗ್ದಾನ್ನ ಚ಼ಲಾವನ ದೇವ್ ಶಕತ್‌ವಾಳೊ ಹುಯಿರ‍್ಹೋಸ್‍ಕರಿ ಪೂರ ಘಟ್‍ಥಿ ಭೀರವಾಳೊ ಹುಯೊ. 
\v 22 ಇನಖ್ಹಾಜೆ ಅಬ್ರಹಾಮ್ ಇನಿ ವಿಶ್ವಾಸ್‌ಥೀಸ್ “ನೀತಿಕರಿ ಗಣ್ತಿ ಹುಯೊ”. 
\v 23 ಯೋ ನೀತಿವಾಳೊ ಗಣ್ತಿಹುಯು, ಕರಿ ಬೋಲಾನಿ ವಾತೆಖಲಿ ಇನ ಏಕ್‍ಜ಼ಣಾನ ಖ್ಹಾಜೆಸ್ ಕಾಹೆ. 
\v 24 ಹೈರುತೆ ಅಪ್ಣಖ್ಹಾಜೇಬಿ ಕತೊ, ಅಪ್ಣೊ ಪ್ರಭು ಯೇಸುಕ್ರಿಸ್ತನ ಮರ‍್ಯಹುಯಮಾಥು ಉಠಾಡ್ಯೋತೆ ದೇವ್ನ ವಿಶ್ವಾಸ್ ಕರಾವಾಳು ಅಜು಼ ನೀತಿವಾಳ ಕರಿ ಬೋಲೈರ‍್ಹಾತೆ ಅಪ್ಣುನಾಬಿ ಲಿಖೈರ‍್ಹುಸ್. 
\v 25 ದೇವ್ ಯೇಸುನ ಅಪ್ಣ ಪಾಪ್ನಖ್ಹಾಜೆ ಮರಣ್ಣ ದೀನಾಖಿನ್ ಅಜು಼ ಅಪ್ಣುನ ನೀತಿವಾಳ ಕರಿ ತಿರ್ಮಾನ್‌ ಹುವಾನಖ್ಹಾಜೆಸ್‌ ಜಾನ್‌ಥಿ ಉಠಾಡೈಗಯೊ.
\c 5
\s ದೇವ್ನಿ ಜೋ಼ಡ್ಮ ನೀತಿ
\p
\v 1 ಅಮ್‌ರ‍್ಹವಾಪರ್ ವಿಶ್ವಾಸ್‍ಥಿ ನೀತಿವಾಳುಕರಿ ತೀರ್ಪ್ ಲೀಲಿದಾತೆ ಅಪ್ಣುನ ಅಪ್ಣೊ ಪ್ರಭು ಯೇಸುಕ್ರಿಸ್ತಥಿ ದೇವ್ನಿ ಜೋ಼ಡ್ಮ ಸಮಾಧಾನ್‍ ರ‍್ಹೇಸ್. 
\v 2 ಇನೆ ಅಪ್ಣುನ ವಿಶ್ವಾಸ್‍ಥಿ ದೇವ್ನಿ ಕೃಪೆನ ಆಖ್ಹ್‌ರಾಮ ಲಾಯೊ. ಹಮ್ಕೆ ಅಪ್ಣೆ ಇನಮಹಿ ಜಿವುಕರಿಯೇಸ್. ಇನಖ್ಹಾಜೆ ದೇವ್ನಿ ಮಹಿಮೆಮ ಅಪ್ಣೆ ಭಾಗ್‍ಹುಯಿರ‍್ಹಾಸ್‍ಕರಿ ನಂಬಿನ್ ಇನಮಹಿ ಅಪ್ಣೆ ಹುಮ್ಮಖ್ಹ್‌ ಲಿಯೇಸ್. 
\v 3 ಎತ್ರೇಸ್ ಖಲಿಕಾಹೆ, ಅಪ್ಣುನ ಆವಸ್ತೆ ಖ್ಹತಾಪ್ಣಿಮಾಬಿ ಖುಷಿಥಿ ಛಿಯೆ. ಕತೋಬಿ ಖ್ಹತಾಪ್ಣಿ ಖ್ಹಮಾಳಿ ರ‍್ಹವಾನ ಶಿಕಾಡಸ್‌ಕರಿ ಅಪ್ಣುನ ಮಾಲುಮ್‌ ಛಾ಼. 
\v 4 ಖ್ಹಮಾಳಿಲ್ಯವಾನು ಹುಯಿರ‍್ಹುತೆ ಅಪ್ಣುನ ದೇವ್‌ಮ ಘಟ್‍ಥಿ ರ‍್ಹವಾಖ್ಹರ್‌ಕು ಕರಸ್, ಅಜು಼ ದೇವ್‌ಮ ಘಟ್‍ಥಿ ರ‍್ಹಿಯಾತೊ ಅಪ್ಣಾಮ ಭರೋಖ್ಹಾನ ಉಬ್‌ಜಾ಼ವಸ್. 
\v 5 ಆ ಭರೋಖ್ಹೊ ಕದೇಬಿ ನಿರಾಶ್‍ ಕೋಕರ್‌ಶೇನಿ, ಶನಕತೊ ದೇವ್ನಿ ಪ್ಯಾರ್‌ ಅಪ್ಣುನ ಇನಿ ವರಹುಯಿರ‍್ಹಿತೆ ಪವಿತ್ರಾತ್ಮಥಿ ಅಪ್ಣ ದಿಲ್ಮ ರಂಚಿರಾಖ್ಯೊಸ್. 
\v 6 ಅಪ್ಣೆ ಪಾಪ್‌ಥಿ ಬಿಣ್‍ ಶಕತ್‌ವಾಳ ಹುಯಿರಾತೆ ತದೇಸ್‌ ದೇವ್ನೆ ಚೂ಼ಣಿಲಿದೊತೆ ವೇಳ್ಮ ಕ್ರಿಸ್ತನೆ ಖರಾಬ್ ಅದ್ಮಿವೋನಖ್ಹಾಜೆ ಮರ‍್ಯೊ. 
\v 7 ಏಕ್‍ ನೀತಿವಾಳನಖ್ಹಾಜೆ ಜಾನ್‍ದ್ಯವಾನು ಘಣು ಮುಶ್ಕಿಲ್. ಅಛ಼್ಛೊ ಏಕ್‍ಜ಼ಣಾನಖ್ಹಾಜೆ ಜಾನ್‍ದ್ಯವಾನು ಹಿಮ್ಮತ್‍ ಕರ‍್ಯುತೋಬಿ ಕರೆಜಾ಼ಯ್. 
\v 8 ಕತೋಬಿ ಅಪ್ಣೆ ಪಾಪಿ ಹುಯಿರ‍್ಹವಾನಿ ವಖ್ಹ್‌ತೇಸ್ ಕ್ರಿಸ್ತನೆ ಅಪ್ಣಖ್ಹಾಜೆ ಮರೀನ್ ದೇವ್ನೆ ಅಪ್ಣಪರ್ ಇನಛಾ಼ತೆ ಪ್ಯಾರ್‌ನ ವತಾಳಿರಾಖ್ಯೊಸ್. 
\v 9 ಕ್ರಿಸ್ತನ ಲ್ಹೋಯಿಥಿ ಅಪ್ಣೆ ಹಮ್ಕೆ ದೇವ್ನಿಜೋ಼ಡ್ಮ ನೀತಿವಾಳಕರಿ ಚೂ಼ಣೈರ‍್ಹಾಸ್. ದೇವ್ನ ಚ಼ಂಢಾಳ್‌ಥಿ ಇನಭಣಿಥು ಅಜೂ಼ಬಿ ಕೆತ್ರೆ ಘಣೇಥಿ ಬಚಿಜಾವಾಳ ಹುಯಿರ‍್ಹಿಶು? 
\v 10 ಅಪ್ಣೆ ದೇವ್ನ ವಹೇರ‍್ಯ ಹುಯಿರ‍್ಹವಾನಿ ವಖ್ಹ್‌ತೇಸ್. ಅಪ್ಣುನ ಇನ ಛಿಯ್ಯಾನಿ ಮರಣ್‍ಥಿ ಅಪ್ಣುನ ಇನ ದೋಸ್ತಿಖ್ಹಾರ ಕರಿ ಬಣೈರಾಖ್ಯೊಸ್. ಹಮ್ಕೆ ಅಪ್ಣೆ ದೇವ್ನ ದೋಸ್ತಿಹುಯಿರಾತೆ ಇನಖ್ಹಾಜೆ ದೇವ್ ಇನ ಛಿಯ್ಯಾನ ಜಾನ್‌ಥಿ ಅಪ್ಣುನ ಕೆತ್ರೆ ಜಾ಼ಖ್ಹತ್ ರಕ್ಷಣೆ ನಾಮಳ್‍ನು? 
\v 11 ಕತೋಬಿ ಅಪ್ಣುನ ದೇವ್ನ ದೋಸ್ತಿ ಹುವಾಖ್ಹರ್ಕು ಕರ‍್ಯೊತೆ ಅಪ್ಣೊ ಪ್ರಭು ಯೇಸುಕ್ರಿಸ್ತಥಿ ದೇವ್ ಕರ‍್ಯೊತೆ ಕಾಮ್ನಖ್ಹಾಜೆ ಅಪ್ಣೆ ಖುಷಿ ಕರ್ಯೆಸ್.
\s ಆದಾಮ್ ಅಜು಼ ಕ್ರಿಸ್ತ
\p
\v 12 ಇನಖ್ಹಾಜೆ, ಏಕ್‍ಜ಼ಣೇಥಿ ಜಗತ್‌ಮ ಪಾಪ್‍ಆಯು ಅಜು಼ ಯೋಪಾಪ್ ಇನಿಜೋ಼ಡ್ಮ ಮರಣ್ಣಾಬಿ ಲಾಯು. ಅನಖ್ಹಾಜೇಥಿ ಮರಣ್ ಅಖ್ಖಾ ಅದ್ಮಿವೋನ ಉಪ್ಪರ್ ಫೈಲಾಯು ಶನಖ್ಹಾಜೆಕತೊ ಅಖ್ಖುಜ಼ಣು ಪಾಪ್‍ಕರ‍್ಯು. 
\v 13 ಧರ್ಮಶಾಸ್ತ್ರ ದೆವವಾನ ಅಗಾಡಿಸ್ ಪಾಪ್ ಜಗತ್‌ಮಾ ಥು. ಕತೋಬಿ ಧರ್ಮಶಾಸ್ತ್ರ ಕೊಯ್ನಿತೆ ತದೆ ಪಾಪ್ ಗಣ್ತಿಮ ಕೋ ಆಯುಹೋತ್ನಿ. 
\v 14 ಕತೋಬಿ ಮರಣ್ ಅದಾಮ್‍ಥಿ ಮೋಶೆಲಗು ರಾಜ಼್ ಚ಼ಲವ್‍಼ಕರ್ತುಥು. ಆದಾಮನೆ ಕರ‍್ಯೊತೆ ಅಪರಾದ್‌ನಖ್ಹಾಜೆ ಪಾಪ್‍ಕೊಕರಾಂತೆ ಇವ್ಣ ಉಪ್ಪರ್‌ಬಿ ಯೋ ರಾಜ಼್ ಚ಼ಲವ್‍಼ಕರ್ತುಥು. ಯೊ ಆದಾಮ್ ಅಗಾಡಿ ಆವಾಳೊಥೋತೆ ಏಕ್‍ಜ಼ಣಾನ ಖ್ಹಣೇದ್ ಹುಯಿರ‍್ಹೋಸ್. 
\v 15 ಕತೋಬಿ ಬೇಜ಼ಣಾಮ ಫರಕ್ ಛಾ಼. ಶನಕತೊ ದೇವ್ನಿ ಫುಗಟ್ ಇನಾಮ್ ಆದಾಮ್‍ನಿ ಪಾಪ್‍ನಿಘೊಣಿ ಕಾಹೆ. ಆ ಏಕ್‍ಜ಼ಣಾನಿ ಪಾಪ್ನಖ್ಹಾಜೆ ಕೈಯೇಕ್‌ಜ಼ಣು ಮರ‍್ಯುತೆ ಖ್ಹಾಚಿಸ್, ಕತೋಬಿ ದೇವ್ನಿ ವಾರ್‌ಖ್ಹೇಥಿ ಮಳಾತೆ ವರ ಯೇಸುಕ್ರಿಸ್ತ ಕರಿ ಆ ಏಕ್‌ ಜ಼ಣಾನ ಗೋರ್‌ಥಿ ಕೈಏಕ್ ಜ಼ಣಾನ ಮಳಾನುಬಿ ಖ್ಹಾಚಿಸ್. 
\v 16 ದೇವ್ನಿ ಇನಾಮ್ ಅಜು಼ ಏಕ್‍ ಅದ್ಮಿನ ಪಾಪ್‌ಮ ಪರಕ್ ಛಾ಼. ಏಕ್‍ಜ಼ಣಾನ ಪಾಪ್ನ ನ್ಯಾವ್‌ನು ತೀರ್ಪ್‌ಹುಯಿನ್ ನಿಶತ್ ಮಳ್ಯು. ಕತೋಬಿ ಕೈಯೇಕ್ ಜ಼ಣಾನ ಪಾಪ್ನಪೀಠೆ ಗಲ್ತಿವಾಳೊ ಕಾಹೆಕರಿ ಬೋಲಾನು ಊಚು಼ ಇನಾಮ್ ಆಯು. 
\v 17 ಏಕ್‍ಅದ್ಮಿನೆ ಕರ‍್ಯುತೆ ಅಪರಾದ್‍ಥಿ ಮರಣ್ ರಾಜ಼್ ಚ಼ಲಾಯುಕರಿ ಬೋಲಾನು ಖ್ಹಾಚು಼ಹುಯು. ಕತೋಬಿ ಕಾಮ್ನು ಪ್ರತಿಫಲ್ ಕೆತ್ರೆ ಮಹಾನ್ ಹುಯಿರ‍್ಹುಸ್ ಯೋಸ್‍ಯೇಸು ಕ್ರಿಸ್ತಹುಯಿರ‍್ಹೊಸ್. ದೇವ್ನಿ ಚೆಹೆಳ್ ವಾರ್‌ಖ್ಹಾನಾಬಿ ನೀತಿನಿ ವರನಾಬಿ ಲೀಲ್ಯಾವಾಳ ಖ್ಹಾರಸ್ ಅಜು಼ ಫುಗಟ್‍ಥಿ ನೀತಿವಾಳಕರಿ ಬೋಲೈಲ್ಯವಾಳುಬಿ ಹುಯಿನ್ ಯೇಸುಕ್ರಿಸ್ತಕರಿ ಆ ಏಕ್‍ಜ಼ಣಾನಿ ಜೋ಼ಡ್ಮ ಜಾನ್‌ಭರೈನ್ ರಾಜ಼್‌ಭಾರ್‌ ಕರಾನು ಹುಯು. 
\v 18 ಅಮ್‌ರ‍್ಹವಾಪರ್ ಆದಾಮ್‍ನಿ ಏಕ್‌ ಅಪರಾದ್‍ಥಿ ಖ್ಹಾರಾಸ್ ಅದ್ಮಿಪರ್ ಮರಣ್‌ಕರಿ ಅಪರಾದ್ನಿ ತೀರ್ಪ್ ಕಿಮ್‌ನಾಖ್ಯುಕಿ ಇಮ್ಮಸ್ ಕ್ರಿಸ್ತನಿ ಎಕ್ಕಸ್‌ನೀತಿನ ಕಾಮ್‍ಥಿ ಖ್ಹಾರಾಸ್ ಅದ್ಮಿನ ನೀತಿವಾಳುಕರಿ ಛುಟ್ಕಾರ್‌ಹುಯು ಅಜು಼ ಜಾನ್‌ ದೆವಾಯು. 
\v 19 ಕಿಮ್ ಏಕ್‌ ಅದ್ಮಿನಿ ಅವಿಧೇಯತೆಥಿ ಕೈಯೇಕ್‌ಜ಼ಣು ಪಾಪಿಕರಿ ಗಣ್ತಿ ಹುಯುಕಿ ತಿಮ್ಮಸ್, ಏಕ್‌ ಅದ್ಮಿನಿ ವಿಧೇಯಾಥಿ ಕೈಯೇಕ್‌ಜ಼ಣು ನೀತಿವಾಳುಕರಿ ಗಣ್ತಿಉಶೆ. 
\v 20 ಗಲತ್‌ ಅಖ್ಖು ಜಾ಼ಖ್ಹತ್ ಹೋತುಆಯು ಕಿಮ್ಕಿ ಧರ್ಮಶಾಸ್ತ್ರಬಿ ಇನಜೋ಼ಡೆಸ್‌ ಆಯು. ಕತೋಬಿ ಪಾಪ್ ಜಾ಼ಖ್ಹತ್ ಕಿಮ್‍ಹುಯುಕಿ, ವಾರ್‌ಖ್ಹೊಬಿ ಬಿಜೂ಼ಬಿ ಜಾ಼ಖ್ಹತ್ ಹುಯು. 
\v 21 ಕಿಮ್ ಪಾಪ್ ಮರಣ್‍ಥಿ ರಾಜ಼್ ಚ಼ಲಾಯುಕಿ ಇಮ್ಮಸ್ ದೇವ್ನಿ ವಾರ್‌ಖ್ಹೊ ಅಪ್ಣೊ ಪ್ರಭು ಯೇಸುಕ್ರಿಸ್ತಥಿ ಹರ್‌ಹಮೇಶಾನಿ ಜಿ಼ಂದ್‌ಗಿ ದ್ಯವಾನ ನೀತಿಥಿ ರಾಜ಼್ ಚ಼ಲಾವಸ್.
\c 6
\s ಪಾಪ್‌ಮ ಮರಾನುರ‍್ಹಿಯುತೊ ಕ್ರಿಸ್ತನಿ ಗಳ್‌ಜೋ಼ಡ್ಮ ಜಿವ್ತು ಹುಯಿರ‍್ಹವಾನು
\p
\v 1 ಇಮ್‍ಕತೊ ಅಪ್ಣೆಶಾತ್ ಬೋಲ್‍ಯೇ? ದೇವ್ನೊ ವಾರ್‌ಖ್ಹೊ ಜಾ಼ಖ್ಹತ್ ಹುವಾದೆಕರಿ ಅಪ್ಣೆ ಪಾಪ್‍ಮಸ್ ಭಡ್‌ಯೆಕಿ ಶು? 
\v 2 ಇಮ್‌ ಕದೇಬಿ ನಾ ಹೋಣು. ಅಪ್ಣೆ ಪಾಪ್ನ ಭಾಗ್ನ ಮರಿಗಯ, ಅಪ್ಣೆ ಬಿಜೂ಼ಬಿ ಪಾಪ್‌ಮ ಬಚಾ಼ನು ಕಿಮ್? 
\v 3 ನತರ್ ಕ್ರಿಸ್ತಯೇಸುನಿ ಗಳ್‌ಜೋ಼ಡ್ಮ ಭಾಗ್‌ ಲೀರಾಖವಾಳ ಹುಯಿನ್ ಬ್ಯಾಪ್ತಿಸ್ಮ ಕರೈಲಿದಾತೆ ಅಪ್ಣೆ ಇನ ಮರಣ್‍ಮ ಬ್ಯಾಪ್ತಿಸ್ಮ ಕರೈರಾಖ್ಯಸ್‍ಕರಿ ತುಮೂನ ಮಾಲುಮ್ ಕೊಯ್ನಿಕಿ ಶು? 
\v 4 ಇನಖ್ಹಾಜೆ ಅಪ್ಣಿ ಬ್ಯಾಪ್ತಿಸ್ಮಥಿ ಅಪ್ಣೆ ಇನಿಮರಣ್‍ಮ ಭಾಗ್‌ಲ್ಯವಾಳಹುಯಿರ‍್ಹೀನ್, ಇನಿ ಜೋ಼ಡ್ಮ ಗಡೈಗಯ.ಅಮ್‍ರ‍್ಹವಾಪರ್ ಬಾನಿ ಮಹಿಮೆನಿ ಶಕಥ್ಥಿ ಕ್ರಿಸ್ತ ಮರ‍ಣ್‍ಮಾಥು ಉಠಾಡೈಗಯೋತೆ ತಿಮ್ಮಸ್ ಅಪ್ಣೇಬಿ ಏಕ್‌ ನವ ಜಾನ್‌ಮ ಜಿವವಾಳ ಹುಯಿರ‍್ಹಾಸ್. 
\v 5 ಅಜು಼ ಇನಿಮರಣ್‍ಮ ಭಾಗ್‌ಲ್ಯವಾಳಹುಯಿರ‍್ಹಾಸ್. ಇಮ್ನೀಸ್‍ಪರಕ್‍ಮ ಇನಿಜೋ಼ಡ್ಮ ಏಕ್‍ಹುಯಿನ್‍ ಯೋ ಪಾಛು಼ ಜಿವ್ತುಹುಯಿನ್ ಆಯೋತೆ ಇನಮಾಬಿ ಅಪ್ಣೆ ಭಾಗ್‌ಲ್ಯವಾಳ ಹುಯಿರಾಸ್. 
\v 6 ಅಪ್ಣು ಜೂ಼ನು ಚಾ಼ಲ್‍ಚ಼ಲಣ್‍ ನಾಶ್ ಹುಯಿಜೈ಼ನ್‌ ಬಿಜು಼ ಅಗಾಡಿ ಅಪ್ಣೆ ಕದೇಬಿ ಪಾಪ್ನ ಗುಲಾಮ್ ನಾ ಹೋಣುಕರಿ ಅಪ್ಣು ಪಾಪ್‌ಥಿ ಮರಿಹುಯು ಶರೀರ್ ಇನಜೋ಼ಡ್ಮ ಶಿಲ್‌ಬೆಪರ್ ಮರೈಗಯುಕರಿ ಅಪ್ಣುನ ಮಾಲುಮ್ ಛಾ಼. 
\v 7 ಶನಕತೊ ಕೋಣ್ ಮರಿರ‍್ಹುಸ್ಕಿ ಇವ್ಣೆ ಪಾಪ್‌ಥಿ ಛುಟ್ಕಾರ್‌ ಹುಯಿರೇಸ್. 
\v 8 ಅಪ್ಣೆ ಹಮ್ಕೆ ಕ್ರಿಸ್ತನಿ ಜೋ಼ಡ್ಮ ಮರಿರ‍್ಹಾತೊ, ಇನಿ ಜೋ಼ಡ್ಮ ಜಿವ್‍ಶುಕರಿ ವಿಶ್ವಾಸ್ ಕರ್ಯೆಸ್. 
\v 9 ಶನಖ್ಹಾಜೆಕತೊ ಕ್ರಿಸ್ತ ಮರಣ್‍ಥಿ ಉಠಾಡೈಗಯೋತೆ ಇನಖ್ಹಾಜೆ ಯೋ ಬಿಜೊ಼ಪಾಛೊ ಮರ್‌ಶೆಕೊಯ್ನಿಕರಿ ಮಾಲುಮ್ ಕರಿರಾಖ್ಯಸ್. ಅನಪಾರ್ ಇನ ಉಪ್ಪರ್ ಮರಣ್ಣ ಶನೂಬಿ ಹಕ್‍ಕೊಯ್ನಿ. 
\v 10 ಯೋ ಪಾಪ್ನ ಭಾಗ್ನ ಮರ‍್ಯೋತೆ ಎಕ್ಕಸ್‍ಹಲ್ಲ. ಕತೋಬಿ ಯೋ ಮರ‍್ಯೋತೆ ಖ್ಹಾರಸ್ನ ಖ್ಹಾಜೆ. ಯೋ ದೇವ್ನಿ ಜೋ಼ಡ್ಮ ಏಕ್‍ ಹುಯಿನ್ ಜಿವ್‌ಕರಸ್. 
\v 11 ಯೋಸ್‍ಪರಕ್ಮ ತುಮೂಬಿ ಪಾಪ್ನಭಾಗ್‍ನ ಮರ‍್ಯಹುಯಕರಿಬಿ ಕ್ರಿಸ್ತಯೇಸುಥಿ ದೇವ್ನಖ್ಹಾಜೆ ಬಚಾ಼ವಾಳುಕರಿ ಗಣ್ತಿಕರಿಲೆವೊ. 
\v 12 ಇನಖ್ಹಾಜೆ ತುಮೆ ಶರೀರ್‌ನ ಖರಾಬ್ ಆಖ್ಹ್‌ಮ ನಾ ಪಡ್‍ನೂತೆ ತುಮಾರ ಮಟಿಜಾ಼ವಾಳ ಶರೀರ‍್ಮ ಪಾಪ್ ಹುಕುಮ್‌ ಚ಼ಲಾವನ ನಕೊಮ್ಹೇಲಿದೆವೊ. 
\v 13 ತುಮಾರ ಶರೀರ್‌ನು ಭಾಗ್ನ ನೀಚ್ ಕಾಮ್ನ ಚ಼ಲಾವವಾಳು ಕಫ್ಫನ್ನಿತರ ಪಾಪ್ನ ದಿನಾಖೊನಕೊ, ಕತೋಬಿ ಇನ ಬದಲ್ ಮರಣ್‌ಥು ಜಿವ್ತುಹುಯಿನ್ ತುಮೂನ ದೇವ್ನ ಸಮರ್ಪಣ್‌ ಕರಿನಾಖೊ. ತುಮಾರ ಶರೀರ್‌ನ ಭಾಗ್ನ ನೀತಿನು ಕಫ್ಫನ್ ಹುಯಿರ‍್ಹವಾನಖ್ಹಾಜೆ ದೇವ್ನ ಸಮರ್ಪಣ್‌ ಕರೊ. 
\v 14 ಪಾಪ್ ತುಮಾರಪರ್ ಯಜಮಾನ್ ನಾ ಹುಯಿರ‍್ಹೇಣು, ಶನಕತೊ ತುಮೆ ಧರ್ಮಶಾಸ್ತ್ರನಿ ಅಧೀನ್‍ಮ ಕೊಯ್ನಿ, ದೇವ್ನಿ ವಾರ್‌ಖ್ಹಾನಿ ಅಧೀನ್‍ಮ ಹುಯಿರ‍್ಹಾಸ್.
\s ನೀತಿನು ಗುಲಾಮ್‌ಖ್ಹಾರು
\p
\v 15 ಇಮ್‍ಕತೊ ಶಾತ್? ಅಪ್ಣೆ ಧರ್ಮಶಾಸ್ತ್ರನಿ ಅಧೀನ್‍ ನಾ ರ‍್ಹೇವ್ಣುತೆ ವಾರ್‌ಖ್ಹಾನಿ ಅಧೀನ್ ಹುಯಿರ‍್ಹಿಯೇಸ್‍ಕರಿ ಪಾಪ್ ಕರೇಜಾ಼ಯ್ಕಿ ಶು? ಕೊಯ್ನಿಕತೊ, 
\v 16 ತುಮೆ ತುಮುನಾಸ್ ಗುಲಾಮ್‌ಹುಯಿನ್ ಕಿನಾತೋಬಿ ದೆವೈಜಾ಼ವಾನಿ ವಖ್ಹತ್‌ಮ ತುಮೆ ಯಜಮಾನ್ನ ವಿಧೇಯ ಹುಯಿರ‍್ಹವಾಳ ಸೇವಕ್ ಹುಯಿರ‍್ಹೆಸ್‍ಕರಿ ತುಮೂನ ಮಾಲುಮ್‌ ಛಾ಼. ಪಾಪ್‌ಮ ಪಡ್ಯುತೊ ಮರಣಸ್ ಫಲ್,ದೇವ್ನ ಭರೋಖ್ಹಾನ ದಾಸಹುಯಾತೊ ನೀತಿ ಮಳ್‍ಶೆ. 
\v 17 ಕತೋಬಿ ದೇವ್ನ ಧನ್ಯವಾದ್‌ಹುವಾದೆ! ಶನಕತೊ ತುಮೆ ಏಕ್‌ ವಖ್ಹತ್‌ಮ ಪಾಪ್ನ ಗುಲಾಮ್ ಹುಯಿರ‍್ಹತೋಬಿ, ತುಮೆ ಶಿಕಿಲಿದಾತೆ ಖ್ಹಾಚಿ ಬೋಧನೆಮ ಭರ್‌ಪೂರ್‌ ಮನ್‌ಥಿ ವಿಧೇಯ ಹುಯಿರ‍್ಹಾಸ್. 
\v 18 ತುಮೆ ಪಾಪ್‌ಥಿ ಛುಟ್ಕಾರ್ ಲ್ಯವಾಳಹುಯಿನ್ ನೀತಿನ ಗುಲಾಮ್‌ ಹುಯಿರ‍್ಹಾಸ್. 
\v 19 ತುಮೆ ಶರೀರ‍್ನಿ ಖ್ಹಯಾಲ್ಮ ಕಮ್‍ಜೋ಼ರ್ ಹುಯಿರಾತೆ ಇನಖ್ಹಾಜೆ ಮೇ ದನ್‌ಪರೋಜ಼್‌ನಿ ವಾತ್ನಿತರಸ್‍ ಬೋಲುಕರುಸ್. ತುಮಾರ ಶರೀರ್‌ನು ತನ್‍ಬದನ್ನ ಮೈಲಾನಾಬಿ, ಖರಾಬ್‌ನಾಬಿ ಗುಲಾಮ್‍ಕರೀನ್ ದಿನಾಖಿದಿದಾಥಾಕಿ. ಇಮ್ನಿಸ್ ಪರಕ್ಮ ಹಮ್ಕೆ ತುಮೆ ತುಮಾರ ಶರೀರ್‌ನು ತನ್‍ಬದನ್ನ ಪರಿಶುದ್‌ರ‍್ಹವಾನಿ ನೀತಿನ ಗುಲಾಮ್‌ ಬಣೈನ್ ದಿನಾಖಿದೆವೊ. 
\v 20 ತುಮೆ ಪಾಪ್ನ ಗುಲಾಮ್ ಹುಯಿರ‍್ಹಾಥಾತೆ ತದೆ ನೀತಿನ ಅಧೀನ್‍ಮ ಕೋಥಾನಿ. 
\v 21 ತುಮೆ ಖರಾಬ್ ಕಾಮ್‍ಕರ‍್ಯ, ಹಮ್ಕೆ ತುಮೆ ಯೋ ಕಾಮ್ನಿಬಾರೇಮ ಖ್ಹರ್‌ಮಾವಸ್ನಿ? ಯೋ ಕಾಮ್‍ಥಿ ತುಮೂನ ಮರಣಸ್ ಹುಯಿರ‍್ಹುಸ್. 
\v 22 ಕತೋಬಿ ಹಮ್ಕೆ ತುಮೆ ಪಾಪ್‌ಥಿ ಛುಟ್ಕಾರ್ ಲ್ಯವಾಳಹುಯಿನ್, ದೇವ್ನ ಗುಲಾಮ್‌ ಹುಯಿರಾಸ್. ತುಮೂನ ಮಳಾನು ಫಾಯಿದೊ ಪರಿಶುದ್ ಭಣಿ ಲೀಜಾ಼ಸ್ ಇನು ಫಲ್ ಹಮೇಶಾನಿ ಜಿ಼ಂದ್‌ಗಿ ಹುಯಿರ‍್ಹುಸ್. 
\v 23 ಶನಕತೊ ಪಾಪ್ ದೇಯಿತೆ ಮಜ಼್‌ದೂರಿ ಮರಣ್ ಹುಯಿರುಸ್. ಕತೋಬಿ ದೇವ್ನು ಫುಗಟ್ ಇನಾಮ್ ಅಪ್ಣೊ ಪ್ರಭು ಕ್ರಿಸ್ತಯೇಸುನ ಗಳ್‌ಜೋ಼ಡ್ಮ ಅಪ್ಣುನ ದಿಶೇತೆ ಹಮೇಶಾನಿ ಜಿ಼ಂದ್‌ಗೀಸ್.
\c 7
\s ವ್ಯಹಾನಿ ಬಾರೇಮ ವಿಚಾರ್
\p
\v 1 ಭೈಯೇ ಭೇನೇವೊ, ಧರ್ಮಶಾಸ್ತ್ರನ ಮಾಲುಮ್ ಕರಿರಾಖವಾಳನ ಮೇ ಶಾತ್ ಬೋಲಸ್‍ಕತೊ, ಏಕ್‍ಅದ್ಮಿ ಬಚಿರ‍್ಹಾವಲಗು ಖಲಿ ಧರ್ಮಶಾಸ್ತ್ರ ಇನ ಉಪ್ಪರ್ ಅದಿಕಾರ್ ಕರಸ್‍ಕರಿ ತುಮೂನ ಮಾಲುಮ್ ಛಾ಼. 
\v 2 ಉದಾಹರಣೆ ಏಕ್‌ ವ್ಹೆತ್ತಿ ತಯೇಡ ಇನೊ ಬಾವ್ರಿ ಜಿವ್ತೊರ‍್ಹವಾನಿ ವಖ್ಹ್‌ತೆ ಧರ್ಮಶಾಸ್ತ್ರನಿ ಪರಕ್ಮ ಇನ ಜೋ಼ಡ್ಮ ಬಂಧಣ್‍ಮರ‍್ಹೇಸ್. ಕತೋಬಿ ಬಾವ್ರಿ ಮರಿಗೋತೊ ಇನ ಜೋ಼ಡೆ ಭಂದೈರ‍್ಹೀತೆ ಧರ್ಮಶಾಸ್ತ್ರನಿ ಬಂಧಣ್‍ಥಿ ಛುಟ್ಕಾರ್ ಲೀರಾಖವಾಳಿ ಹುಯಿರ‍್ಹೇಸ್. 
\v 3 ಅಮ್‍ರ‍್ಹವಾಪರ್, ಇನೊ ಬಾವ್ರಿ ಜಿವ್ತೊರ‍್ಹವಾನಿ ವಖ್ಹತ್‌ಮ ಯೋ ತಯೇಡ ಬಿಜೇಕ್ ಜ಼ಣಾನಿ ಜೋ಼ಡ್ಮ ಸಂಬಂದ್ ರ‍್ಹಯೂತೊ ವ್ಯಬಿಚಾರಿಣಿಕರಿ ಬೋಲೈಜಾ಼ಸ್. ಕತೋಬಿ ಬಾವ್ರಿ ಮರಿಗಯುತೊ ಯೋ ತಯೇಡ ಯೊ ನಿಯಮ್‌ಥಿ ಛುಟ್ಕಾರ್ ಹುಯಿತೆ ಇನಖ್ಹಾಜೆ, ಯೋ ಬಿಜೇಕ್ ಜ಼ಣಾನಿ ಜೋ಼ಡೆ ವ್ಯಹಾಕರಿ ಲಿದಿತೋಬಿ ವ್ಯಬಿಚಾರಿಣಿಕರಿ ಗಣ್ತಿ ಹುವಾಕೊಯ್ನಿ. 
\v 4 ಇನಖ್ಹಾಜೆ ಮಾರ ಭೈಯೇ ಭೇನೇವೊ,ಧರ್ಮಶಾಸ್ತ್ರನಿ ಬಾರೇಮ ಬೋಲ್ನುಕತೊ ತುಮೇಬಿ ಕ್ರಿಸ್ತಾನು ಶರೀರ್‌ಮ ಭಾಗ್‌ ಹುಯಿರ‍್ಹಾಸ್ತೆಖ್ಹಾಜೆ ತುಮೇಬಿ ಮರಿರ‍್ಹಾಸ್ ಅಜು಼ ಹಮ್ಕೆ ಮರ‍್ಯಹುಯಮಾಥು ಜಿವ್ತೊಹುಯಿನ್ ಉಠ್ಯೊತೆ ಇನ ಮಳ್ಯಹುಯ ಹುಯಿರಾಸ್. ಅಮ್ ಅಪ್ಣೆ ದೇವ್ನಿ ಸೇವೆಮ ಫಾಯಿದೊ ಹುಯೆಜಾ಼ಯ್‌. 
\v 5 ಅಪ್ಣೆ ಅದ್ಮಿನಿ ಖೂಜ಼್‌ಮ ಜಿವ್‍ಕರ್ತಥಾತೆ ತದೆ, ಪಾಪ್‌ಥಿ ಭರೈಹುಯು ಖರಾಬ್ ಆಖ್ಹ್‌ಖ್ಹಾರು ಅಪ್ಣ ಶರೀರ್‌ಮ ಕಾಮ್ ಕರುಕರ್ತುಥು. ಯೊ ಧರ್ಮಶಾಸ್ತ್ರನ ಖ್ಹೂಜ಼್‌ಥೀಸ್ ಹೋತುಥು. ಇನಖ್ಹಾಜೆ ಅಪ್ಣೆ ಕರಾನು ಫಲ್ ಮರಣ್ ಹುಯಿರ‍್ಹುಸ್. 
\v 6 ಹಮ್ಕೆತೋಬಿ ಅಪ್ಣುನ ಬಂಧೈರುಥುತೆ ಧರ್ಮಶಾಸ್ತ್ರನ ಭಾಗ್‌ಮ ಮರ‍್ಯಹುಯ ಹುಯಿನ್, ಯೊ ಧರ್ಮಶಾಸ್ತ್ರಥಿ ಛುಟ್ಕಾರ್ ಲೀರಾಖ್ಯಸ್. ಅಮ್ ಲೀಖೈರ‍್ಹೂತೆ ಫಾಚ಼್‌ಲಿ ನಿಯಮ್‌ನಿ ಪರಕ್ಮ ಅಪ್ಣೆ ದೇವ್ನ ಸೇವೆ ಕರ‍್ಯಕೊಂತೆ, ಪವಿತ್ರಾತ್ಮಥಿ ನವಿ ಪರಕ್ಮ ಚಾ಼ಲವಾಳ ಹುಯಿರ‍್ಹಾಸ್.
\s ಧರ್ಮಶಾಸ್ತ್ರ ಅಜು಼ ಪಾಪ್
\p
\v 7 ಇಮ್‍ಕತೊ ಅಪ್ಣೆಶಾತ್ ಬೋಲಿಯೆ ಪಾಪ್ ಧರ್ಮಶಾಸ್ತ್ರಸ್ ಹುಯಿರ‍್ಹೂಸ್ಕಿಶು? ಕದೇಬಿ ಕೊಯ್ನಿ. ಕತೋಬಿ ಧರ್ಮಶಾಸ್ತ್ರನ ಮ್ಹೇಲಿನ್ ಬಿಜ಼ ಖೆವೆಥೀಬಿ ಪಾಪ್‍ಕತೊ ಶಾತ್‌ಕರಿ ಮನ ಖ್ಹಮ್‍ಜಿಲ್ಯವಾನ ಹುಯುಹೋತ್ ಕೊಯ್ನಿ. “ಬಿಜೇಕ್ ಜ಼ಣಾನ ರಾಛ಼ನ ತುಮೆ ಆಖ್ಹ್‌ನಾಕರ‍್ನು.” ಕರಿ ಧರ್ಮಶಾಸ್ತ್ರ ಬೋಲ್ಯುತೆ ಇನಖ್ಹಾಜೇಸ್ ಯೋ ಮನ ಮಾಲುಮ್‌ಪಡ್ಯು. 
\v 8 ಕತೋಬಿ ಪಾಪ್ ಆ ಹುಕುಮ್‍ನಾಸ್‍ ಪಾಡಿಲೀನ್ ಮಾರಾಮ ಖ್ಹಾರಿಸ್ ಥರಾನು ಆಖ್ಹ್‌ನ ಲಾಯು. ಶನಕತೊ ಧರ್ಮಶಾಸ್ತ್ರ ಕೊಂತೆ ಪಾಪ್ ಮರ‍್ಯುಹುಯು ಹುಯಿರ‍್ಹೇಸ್. 
\v 9 ಏಕ್‍ ವಖ್ಹತ್ ಮೇ ಧರ್ಮಶಾಸ್ತ್ರ ಕೊಂತೆ ಜಿವ್‌ಕರ್ತೊಥೊ. ಕತೋಬಿ ಕೆದೆ ನಿಯಮ್‌ ಕರಿ ಬೋಲಾನು ಆಯುಕಿತದೆ ಪಾಪ್ ಜೂತುಹುಯು. 
\v 10 ಅಜು಼ ಮೇ ಮರಿಗಯೊ. ಜಾನ್‌ಲೀನ್ ಆವಾನ ದೆವೈಗೈತೆ ಹುಕುಮಸ್ ಮಾರಿ ಬಾರೇಮ ಮರಣ್ಣ ಲೀನ್ ಆಯು. 
\v 11 ಪಾಪ್ನ ಅವಕಾಶ್ ಮಳ್ಯು ಅಜು಼ ಯೊ ಹುಕುಮ್‌ನ ಪಾಡಿಲೀನ್ ಮನ ಠಗೈನ್, ಅಜು಼ ಮನ ಮರ್‌ನಾಖ್ಯು. 
\v 12 ಅಮ್‍ರ‍್ಹವಾಪರ್, ಧರ್ಮಶಾಸ್ತ್ರ ಪರಿಶುದ್ ಹುಯಿರ‍್ಹೂಸ್, ಹುಕುಮ್‌ಬಿ, ಪರಿಶುದ್‌ಬಿ, ನ್ಯಾವ್‍ಬಿ, ಅಛ಼್ಛುಬಿ ಹುಯಿರ‍್ಹೂಸ್. 
\v 13 ಇಮ್‍ಕತೊ ಅಛ಼್ಛುಸ್ ಮನ ಮರಣ್‌ಲಾಯುಕಿಶು? ಇಮ್ ನಾರ‍್ಹಯುತೊ! ಪಾಪಸ್ ಯೊ ಕರ‍್ಯು ಅಛ಼್ಛಥೀಸ್ ಮನ ಉಪಯೋಗ್ ಕರೀನ್ ಪಾಪ್ನೆ ಮರಣ್ ಆವಾನಿತರ ಕರ‍್ಯು. ಅನೇಥಿ ಪಾಪ್ ಇನು ಖ್ಹಾಚು಼ ಸ್ವಭಾವ್‌ನ ವತಾಳ್ಯು ಇನಖ್ಹಾಜೆ ಹುಕುಮ್‌ಥಿ ಪಾಪ್ ಯೋ ಕೆತ್ರೆ ಕಠೋರ್‌ಕರಿ ಮಾಲುಮ್‌ ಪಡಾಸ್‌.
\s ಅಪ್ಣಾಮ ಛಾ಼ತೆ ಕಲಾವ್ಣಿ
\p
\v 14 ಧರ್ಮಶಾಸ್ತ್ರ ಆತ್ಮೀಕ್ ಹುಯಿರ‍್ಹುಸ್‌ಕರಿ ಮಾಲುಮ್ ಛಾ಼. ಕತೋಬಿ ಅದಮ್‍ಜ಼ಮಾನೊ ಹುಯಿರೋತೆ ಮೇ ಪಾಪ್ನ ಗುಲಾಮ್ನಿತರ ವೇಚೈ಼ಜಾ಼ವಾಳೊ ಹುಯಿರ‍್ಹೋಸ್. 
\v 15 ಮೇ ಶಾತ್‍ಕರೂಸ್‍ ಕರಿ ಬೋಲಾನು ಮಾಲುಮ್‌ಕೊಂತೆ ಹುಯಿರ‍್ಹೋಸ್. ಶನಕತೊ ಮೇ ಶಾತ್ ಕರ್ನುಕರಿ ಆಖ್ಹ್‌ಕರೂಸ್ಕಿ ಇನ ಕರುಕೊಯ್ನಿ, ಕೆವ್ಹಾನ ವಹೇರ್‌ಕರುಸ್ಕಿ ಇನಾಸ್ ಕರಾವಾಳೊ ಹುಯಿರ‍್ಹೋಸ್. 
\v 16 ಮೇ ಕರಾನ ಆಖ್ಹ್ ಕರುಕೊಂತೆ ತಿನ ಕರಾವಾಳೊರ‍್ಹಯೋತೊ, ಧರ್ಮಶಾಸ್ತ್ರ ಅಛ್ಛು಼ಕರಿ ವತಾಳಸ್‍. 
\v 17 ಅಮ್‍ರ‍್ಹವಾಪರ್ ಮೇ ಆಖ್ಹ್ ಕರುಕೊಂತೆ ತಿನ ಕರಾವಾಳೊ ಬಿಜು಼ ಮೇಕಾಹೆ, ಮಾರಾಮ ರ‍್ಹೇಸ್ತೆ ಪಾಪಸ್ ಇನ ಕರಸ್. 
\v 18 ಮಾರಾಮ, ಕತೊ ಶರೀರ್‌ನ ಅಧೀನ್ ಸ್ವಭಾವ್‍ಥಿ ಅಛ್ಛು಼ಶಾತ್‍ಬಿ ಜಿವ್‍ಕರಾಕೊಯ್ನಿ ಕರಿ ಮಾಲುಮ್‌ಛಾ಼. ಶನಕತೊ ಅಛ಼್ಛು ಕರ್ನುಕರಿ ಬೋಲಾನು ದಿಲ್‍ ಮಾರಾಮ ರ‍್ಹಯುತೋಬಿ ಇನ ಕರಾನ ಮನ ಕೊಹೋಯ್ನಿ. 
\v 19 ಶನಕತೊ ಮೇ ಅಛ್ಛು಼ ಕರ್ನುಕರಿ ಆಖ್ಹ್ ಕರುಸ್ತೆ ಇನ ಯೊ ಅಛ್ಛಾ಼ನ ಕರುಕೊಂತೆ ಖರಾಬ್‌ನ ಕರನಾಸ್ ಆಖ್ಹ್ ಕರುಕರೂಸ್. 
\v 20 ನಾ ಕರ್ನುಕರಿ ಬೋಲಾತೆ ಕಾಮ್ನ ಮೇ ಕರುಕರುಸ್‍ಕತೊ ಇನ ಕರ‍್ಯೊತೆ ಮೇ ಕಾಹೆ ಮಾರಮ ಜಿವ್‌ಕರಾತೆ ಪಾಪಸ್ ಇನ ಕರುಕರಸ್. 
\v 21 ಇನಖ್ಹಾಜೆ ಖಿವು ಅಛ್ಛುಛಾ಼ಕಿ ಇನ ಮೇ ಕರ್ನುಕರಿ ಛೂ಼ ಕತೋಬಿ ಖರಾಬಸ್ ಮಾರಾಮ ಠಿಕಾಣಿ ಹುಯಿರ‍್ಹುಸ್‌ಕರಿ ನಿಯಮ್‌ಥಿ ಮಾಲುಮ್‌ಹುವಸ್. 
\v 22 ಶನಕತೊ ಮೇ ಪೂರದಿಲ್‍ಥಿ ದೇವ್ನು ಧರ್ಮಶಾಸ್ತ್ರಮ ಖುಷಿಕರವಾಳೊ ಹುಯಿರ‍್ಹೋಸ್. 
\v 23 ಕತೋಬಿ ಮಾರದಿಲ್ಮ ಬಿಜೇಕ್ ನಿಯಮ್ ಮೇ ದೇಖುಕರುಸ್ ಮಾರ ಶರೀರ್‌ಮ ಛಾ಼ತೆ ಪಾಪ್ನ ನಿಯಮ್ಮ ಕೊಂಡೈರ‍್ಹೋಸ್. 
\v 24 ಮೇ ಕೆಥ್ರಾನು ಖರಾಬ್ ಹಾಲತ್ನು ಅದ್ಮಿ! ಮನ ಆ ಮರಣ್ಣು ಶರೀರ್‌ಥಿ ಕೋಣ್ ಛೋ಼ಡಾವವಾಳು? 
\v 25 ಅಪ್ಣೊ ಪ್ರಭು ಯೇಸುಕ್ರಿಸ್ತಥಿ ಮನ ಬಚಾ಼ಡವಾಳ ದೇವ್ನ ಧನ್ಯವಾದ್ ಕರುಸ್. ಅಮ್‌ರ‍್ಹವಾಪರ್ ಮೇ ದೇವ್ನಿ ನಿಯಮ್ನ ಅಕ್ಕಲ್‌ಥಿ ಸೇವೆ ಕರಾವಾಳೊ ಹುಯಿರ‍್ಹೋಸ್, ಕತೋಬಿ ಶರೀರ್‌ನ ಪಾಪ್ನ ನಿಯಮ್‌ಥಿ ಆಳ್‌ ಹುಯಿನ್‌ಬಿ ಚಾ಼ಲುಕರುಸ್.
\c 8
\s ಪವಿತ್ರಾತ್ಮನಿ ಜಿ಼ಂದ್‌ಗಿ
\p
\v 1 ಇನಖ್ಹಾಜೆ ಹಮ್ಕೆ ಯೇಸುಕ್ರಿಸ್ತಮ ಗಳ್‍ಜೋ಼ಡ್ ರ‍್ಹವವಾಳಾನ ಖಿವಿ ಅಪರಾದ್ನಿ ತೀರ್ಮಾನ್‍ಬಿ ಕೊಯ್ನಿ. 
\v 2 ಶನಕತೊ ಕ್ರಿಸ್ತಯೇಸುಮ ಛಿಯ್ಯೇ಼ತೆ ಅಪ್ಣುನ ಜಾನ್ನ ಲ್ಯಾವವಾಳು ಪವಿತ್ರಾತ್ಮನು ನಿಯಮ್ ಮನ ಪಾಪ್ ನಿಯಮ್‌ಥಿಬಿ ಅಜು಼ ಮರಣ್‌ಥಿ ಛುಟ್ಕಾರ್ ಕರಿರಾಖ್ಯುಸ್. 
\v 3 ಶನಕತೊ ಧರ್ಮಶಾಸ್ತ್ರ ಅದ್ಮಿನು ಸ್ವಭಾವ್‍ಥಿ ಕಮ್‍ಜೋ಼ರ್ ಹುಯಿನ್ ಖಿವು ಕಾಮ್ ಕರ್ನುನಾಕರಿ ಥೂಕಿ, ಇನ ದೇವ್ನೆಸ್ ಕರ‍್ಯೊ. ಕಿಮ್‌ಕತೊ ಇನೆ ಪಾಪ್ನ ಕಾಡಾನಖ್ಹಾಜೆ ಇನ ಛಿಯ್ಯಾನಸ್ ಪಾಪ್ನ ಕಬ್‌ಜಾ಼ಮಥೂತೆ ಶರೀರ್‌ನ ರೂಪ್‌ಮ ಮೋಕ್ಲಿನ್ ಯೋ ಶರೀರ್‌ಮಾಸ್ ಪಾಪ್ನ ಮಾರಿನಾಖಿದಿದೊ. ಅಮ್‍ರ‍್ಹವಾಪರ್, ಧರ್ಮಶಾಸ್ತ್ರ ಕರಾಕೊಂತೆ ತಿನ ದೇವ್ನೆ ಕರ‍್ಯೊ. ದೇವ್ ಇನ ಶೊಂತ್ ಛಿಯ್ಯಾನಸ್ ಪಾಪ್‌ಮಾನಿ ಅದ್ಮಿನಿ ಖ್ಹಯಾಲ್ಮ ಪಾಪ್ನ ಕಾಡಿನಾಖಾನ ಮೋಕ್‌ಲ್ಯೊ. ಇನಖ್ಹಾಜೆ ದೇವ್ ಪಾಪ್ನ ಮರಣ್ಣಿ ನಿಶತ್‌ ದ್ಯವಾನ ಅದ್ಮಿನಿ ಖ್ಹಯಾಲ್ನಾಸ್ ಲೀಲಿದೊ. 
\v 4 ಅಪ್ಣೆ ಅದ್ಮಿನಿ ಸ್ವಭಾವ್‌ವಾಳ ಹುಯಿನ್ ನಾ ಚಾ಼ಲ್ನುತೆ ಪವಿತ್ರಾತ್ಮನಿ ಪರಕ್ಮ ಚಾ಼ಲವಾಳ ಹುಯಿನ್ ಧರ್ಮಶಾಸ್ತ್ರನಿ ನಿಯಮ್‌ನಿ ಘೋಣಿ ಚಾ಼ಲನುಸ್ ಆ ವಾತೆನ ಭರ್‌ಪೂರ್‌ ಹುವಾನಿತರ ಕರ‍್ಯು. 
\v 5 ಶರೀರ್‌ನಿ ಖ್ಹಯಾಲ್‍ವಾಳ ಹುಯಿನ್ ಚಾ಼ಲವಾಳು ಶರೀರ್‌ನ ಸಂಬಂದ್ ರ‍್ಹೆಯಿತೆ ವಾತೆವ್ಮ ಮಘನ್‌ ರ‍್ಹೇಸ್. ಕತೋಬಿ ಪವಿತ್ರಾತ್ಮನ ಪೀಛೆ ಚಾ಼ಲಿಲ್ಯಾವಾಳನು ದಿಲ್‌ ಪವಿತ್ರಾತ್ಮನ ಸಂಬಂಧ ಹುವಾತೆ ತಿನಪರ್‌ ರ‍್ಹೇಸ್. 
\v 6 ಶರೀರ್‌ನು ಸ್ವಭಾವ್‌ನುದಿಲ್ ಮರಣ್ಣು ಹುಯಿರ‍್ಹುಸ್. ಕತೋಬಿ ಪವಿತ್ರಾತ್ಮನ ಮಹಿರ‍್ಹಿಯೋತೊ ಇನಪರ್ ದಿಲ್‍ರಾಖನು ಜಾನ್‌ಬಿ ಸಮಾಧಾನ್‍ಬಿ ಹುಯಿರ‍್ಹೇಸ್. 
\v 7 ಶರೀರ್‌ನಿ ಸ್ವಭಾವ್‌ಪರ್‌ ದಿಲ್‌ರಾಖನು ದೇವ್ನ ವಿರೋದ್‌ ಹುಯಿರ‍್ಹೇಸ್. ‍ಶನಕತೊ ಯೊ ದೇವ್ನಿ ನಿಯಮ್ನ ವಿಧೇಯ ಹುವಾಕೊಯ್ನಿ. ಅಜು಼ ಯೊ ಶಾತ್ಬಿ ಕರಾನ ಕೊಹೊಯ್ನಿ. 
\v 8 ಶರೀರ್‌ನ ಖ್ಹಯಾಲ್ನಿ ಸ್ವಭಾವ್‌ಮರ‍್ಹವಾಳು ದೇವ್ನ ಲ್ಹಾಯಕ್ ಕರಾವನಕೊಹೊಯ್ನಿ. 
\v 9 ಕತೋಬಿ ದೇವ್ನು ಆತ್ಮ ತುಮಾರಮ ರ‍್ಹವಾನು ಖ್ಹಾಚಸ್ ಉಶೇತೊ ತುಮೆ ಶರೀರ್‌ನ ಖ್ಹಯಾಲ್ನ ಮಹಿ ರ‍್ಹವಾಳಕಾಹೆ, ದೇವ್ನ ಆತ್ಮಾನ ಮಹಿರ‍್ಹೇಸ್. ಕ್ರಿಸ್ತನು ಆತ್ಮ ಕೋರ‍್ಹೆಯಿನಿತೆ ಯೊ ಕ್ರಿಸ್ತಮ ಮಳ್ಯೊಹುಯೊ ಕಾಹೆ. 
\v 10 ಕತೋಬಿ ಕ್ರಿಸ್ತ ತಾರಮ ರ‍್ಹವಾಳೊ ಉಶೇತೊ, ಆತ್ಮ ತುಮುನ ಜಾನ್‌ ಹುಯಿರ‍್ಹೊಸ್. ತುಮಾರು ಶರೀರ್ ಪಾಪ್ನಖ್ಹಾಜೆ ಮರಿರ‍್ಹುತೋಬಿ ತುಮೆ ದೇವ್ನಿ ಜೋ಼ಡ್ಮ ನೀತಿವಾಳಕರಿ ಜಿವ್‌ಶು. 
\v 11 ಯೇಸುನ ಮರ‍್ಯಹುಯಮಾಥು ಜಿವಾಡವಾಳನು ಆತ್ಮ ತುಮಾರಮ ಜಿವ್‍ಕರ‍್ಯುತೊ, ಕ್ರಿಸ್ತಯೇಸುನ ಮರಣ್‍ಥಿ ಉಠಾಡ್ಯೊಹುಯೊ ದೇವ್ನು ಆತ್ಮ ತುಮಾರಮ ರ‍್ಹಿಯುತೊ ನಾಶಹುವಾಳು ಶರೀರ್‌ನಾಬಿ ತುಮಾರಮ ಜಿವವಾಳ ಆತ್ಮಥೀಸ್ ಜಾನ್ನ ದಿಶೆ. 
\v 12 ಇನಖ್ಹಾಜೆ ಭೇನೆ ಭೈಯೇವೊ ಅಪ್ಣೆ ಶರೀರ್‌ನ ಸ್ವಭಾವ್‌ನ ಚ಼ಪ್ಪಣ್‌ಮ ಕೊಯ್ನಿ. ಇನು ಆಖ್ಹ್‌ದಾಖ್ಹ್‌ಮ ಜಿವ್ಣುಕರಾನು ಚ಼ಪ್ಪಣ್‌ಮಬಿ ಕೊಯ್ನಿ. 
\v 13 ಶನಕತೊ ತುಮೆ ಶರೀರ್‌ನ ಆಖ್ಹ್‌ನ ಖ್ಹಯಾಲ್‍ವಾಳಹುಯಿನ್ ಜಿವ್ಯಾತೊ ಮರ್‌ಶು. ಕತೋಬಿ ಆತ್ಮಥಿ ಶರೀರ್‌ನ ಪಾಪ್ನಕಾಮ್ನ ಮಾರ‍್ಯುತೊ, ತುಮೆ ಜಿವ್‌ಶು. 
\v 14 ಕೋಣ್ ದೇವ್ನ ಆತ್ಮಥಿ ಚ಼ಲೈಲೇಸ್ಕಿ ಇವ್ಣೆ ದೇವ್ನ ಲಡ್ಕಾ ಹುಯಿರ‍್ಹಿಶೆ. 
\v 15 ಶನಕತೊ ದೇವ್ನೆ ದೀರಾಖ್ಯೋತೆ ಆತ್ಮ ತುಮೂನ ಗುಲಾಮ್ ಕೊ ಕರ್‌ಶೇನಿ ಅಜು಼ ತುಮಾರ ಡರ್‌ಥಿ ಕೊಹುಯಿರಿಶೇನಿ ಅನಬದಲ್ ಪವಿತ್ರಾತ್ಮ ದೇವ್ನ ಲಡ್ಕಕರೀನ್ ಬಣಾವಸ್ ಅಜು಼ ಯೊ ಆತ್ಮಾನಿ ಶಕಥ್ಥಿ ಭರಾವವಾಳೊ ಹುಯಿನ್ ಅಪ್ಣೆ ದೇವ್ನ “ಬಾ, ಪಿತಾ!” ಕರಿ ಚಿಕ್ರಿಯೆಸ್. 
\v 16 ಅಪ್ಣೆ ದೇವ್ನ ಛಿಯ್ಯಾ ಹುಯಿರ‍್ಹಾಸ್, ಕರಿ ಬೋಲಾನ ಪವಿತ್ರಾತ್ಮಸ್ ಅಪ್ಣ ಆತ್ಮನಿಜೋ಼ಡ್ಮ ಸಾಕ್ಷಿ ದೇಸ್. 
\v 17 ಹಮ್ಕೆ ಅಪ್ಣೆ ಲಡ್ಕಾ ಹುಯಿರ‍್ಹಾತೊ, ಹಕ್‍ದಾರ್ ಹುಯಿರ‍್ಹಯೇಸ್; ದೇವ್ನ ಹಕ್‍ದಾರ್ ಅಜು಼ ಕ್ರಿಸ್ತನಿ ಜೋ಼ಡ್ಮ ಹಕ್‍ದಾರ್ ಹುಯಿರ‍್ಹಾಸ್. ಅಪ್ಣೆ ಕ್ರಿಸ್ತನು ಖ್ಹತಾಪ್ಣಿಮ ಖ್ಹಾಚಮಾಸ್ ಭಾಗ್‍ಲ್ಯಾವವಾಳ ರ‍್ಹಯಾತೊ, ಇನಿ ಮಹಿಮೆಮಾಬಿ ಭಾಗ್‌ಲ್ಯವಾಳ ಹುಯಿರ‍್ಹಿಶು.
\s ಭವಿಶ್ಯತ್‍ಮ ಅಪ್ಣುನ ಮಳಾನು ಮಹಿಮೆ
\p
\v 18 ಅಪ್ಣುನ ಖ್ಹಾಮ್ಣೆ ಮಾಲುಮ್ ಪಡ್‌ಶೇತೆ ಮಹಿಮೆನಿ ಜೋ಼ಡ್ಮ ಏಕ್‍ಕರಿ ದೆಖಾನಿವಖ್ಹ್‌ತೆ ಹಮ್ಕೇನಿ ಖ್ಹತಾಪ್ಣಿಖ್ಹಾರು ಯೊ ಶಾತ್ಬಿಕೊಯ್ನಿ. 
\v 19 ದೇವ್ನ ಲಡ್ಕಾವ್‌ನಿ ಮಹಿಮೆ ಕದೆ ದೆಖಾವ್‍ಶೇಕರಿ ಉಬ್‍ಜಾ಼ವ್ಣಿ ಘಣು ಜ಼ರೂರ್‌ಥಿ ಖ್ಹಾಮ್ಣೆ ದೇಖುಕರಸ್. 
\v 20 ಶನಕತೊ ಉಬ್‍ಜಾ಼ವ್ಣಿ ಇನು ಉದ್ದೇಶ್‌ನ ಗುಮೈಲೀನ್ ಯೊ ಗುರ್‌ಕಾವ್ಣಿಮ ಪಡಿಗಯು, ಯೊ ಇನ ಶೊಂತ್ ಖ್ಹೂಜ಼್‌ಥಿ ಕಾಹೆ ಕತೋಬಿ ದೇವ್ನಿ ಖ್ಹೂಜ಼್‌ಥೀಸ್ ಹುಯು ಯೋ ಅಜೂ಼ಬಿ ಭರೋಖ್ಹಾಮಸ್ ಛಾ಼, 
\v 21 ಯೋ ಏಕ್‌ ದನ್ ನಾಶನನು ಗುಲಾಮ್‌ನ ಕಾಮ್‍ಥಿ ಛುಟ್ಕಾರ್ ಉಷೆ ಅಜು಼ ದೇವ್ನ ಲಡ್ಕಾನ ಮಹಿಮೆಥಿ ಭರಿಹುಯು ಛುಟ್ಕಾರ್‌ಮ ಭಾಗ್ಉಷೇಕರಿ ಬೋಲಿನ್. 
\v 22 ಜಗತ್ನಿ ಉಬ್‍ಜಾ಼ವ್ಣಿ ಹಮ್ಕೆಲಗು ಜ಼ಣತ್‌ನಿ ಖ್ಹತಾಪ್ಣಿನಿಘೋಣಿನಿ ದರದ್ ಲೆವ್‌ಕರಾಸ್‌ಕರಿ ಅಪ್ಣುನ ಮಾಲುಮ್. 
\v 23 ಖಲಿ ಉಬ್‌ಜಾ಼ವ್ಣಿಸ್ ಕಾಹೆತೆ ಪಹಿಲು ಫಲ್‌ಹುಯಿರಾತೆ ಅಜು಼ ಪವಿತ್ರಾತ್ಮನಿ ವರಾನ ಲೀರಾಖ್ಯಾತೆ ಅಪ್ಣೇಬಿ ದೇವ್ನಲಡ್ಕಾನು ಇನಾಮ್‌ನಾಬಿ ಕತೊ ಶರೀರ್‌ನ ಆವ್ಣುತೆ ಛುಟ್ಕಾರ್‌ನ ಆವಾನು ದೇಕ್ತಹುಯಿನ್ ಅಪ್ಣಾಮಸ್‌ ಕುರ್ಲವ್‌ಕರೆಯೇಸ್. 
\v 24 ಆ ಭರೋಖ್ಹಾಥಿಸ್ ಅಪ್ಣೆ ರಕ್ಷಣೆ ಲೀರಾಖವಾಳ ಹುಯಿರ‍್ಹಿಯೇಸ್. ಕತೋಬಿ ಡೋಳೆಖ್ಹು ದೆಖಾವತೆ ಭರೋಖ್ಹೊ, ಭರೋಖ್ಹೊಸ್ ಕಾಹೆ, ದೆಖವ್‍ಕರಾತೆ ತಿನ ಕೋಣ್‌ತೋಬಿ ಭರೋಖ್ಹೊ ಕರ್ಶೆಕಿ ಶು? 
\v 25 ಕತೋಬಿ ಅಪ್ಣೆ ಬಿಜೂ಼ಬಿ ದೆಖವ್‍ಕರಾಕೊಂತೆ ಇನಖ್ಹಾಜೆ ಭರೋಖ್ಹೊ ರ‍್ಹವಾನು ರ‍್ಹಯೂತೊ ಅಪ್ಣೆ ಇನಖ್ಹಾಜೆ ಖ್ಹಮಾಳಿನ್ ಟಿವೈರ‍್ಹಿಶು. 
\v 26 ಇಮ್ಮಸ್‌ ಪವಿತ್ರಾತ್ಮಬಿ ಅಪ್ಣಿ ಕಮ್‍ಜೋ಼ರ‍್ಮ ಅಪ್ಣುನ ಮದತ್‍ಕರಸ್. ಕಿಮ್‌ಕತೊ ಅಪ್ಣೆ ಕದೆ ಶಾತ್‌ ಮಾಂಗಿಲೇವ್ಣುಕರಿ ಅಪ್ಣುನ ಮಾಲುಮ್‌ಕೊಂತೆ ಇನಖ್ಹಾಜೆ ಪವಿತ್ರಾತ್ಮಸ್ ವಾತ್‍ಕೊಂತೆ ಥರ್‌ಪಡೀನ್ ಅಪ್ಣಖ್ಹಾಜೆ ಗಿಂಗೈಲೇಸ್. 
\v 27 ಕತೋಬಿ ಖ್ಹಾರದಿಲ್‍ನ ಪರ್ಖಿ ರಾಖವಾಳನ ಪವಿತ್ರಾತ್ಮನು ದಿಲ್ನಿ ಖ್ಹಯಾಲ್ ಶಾತ್‌ಕರಿ ಮಾಲುಮ್ ಛಾ಼; ಯೋ ಆತ್ಮ ದೇವ್ನು ಖ್ಹಯಾಲ್ನಿ ಘೋಣಿಸ್ ದೇವ್‌ಮ ಅದ್ಮಿನಖ್ಹಾಜೆ ಗಿಂಗೈಲೇಸ್. 
\v 28 ಕೋಣ್ ಇನ ಪ್ಯಾರ್ ಕರಾಸ್ಕಿ ಅಜು಼ ಕಿನ ದೇವ್ನಿ ಖ್ಹೂಜ಼್‌ನಿ ಪರಕ್‍ಥಿ ಬುಲಾಯಹುಯಾತೆ ಇವ್ಣಾಮ ಖ್ಹಾರಿಬಾರೇಮ ಅಛ್ಛಾ಼ ಕಾಮ್ನಸ್ ಕರಸ್‍ಕರಿ ಅಪ್ಣುನ ಮಾಲುಮ್ ಛಾ಼. 
\v 29 ಕಿನ ದೇವ್ನೆ ತದೇಸ್‌ ಚೂ಼ಣಿಲಿದೊಕಿ. ಇನೆ ಇವ್ಣುನ ಇನ ಛಿಯ್ಯಾನಿಘೋಣಿ ಹುವಾನ ಎಕ್ಟು ಕರಿರಾಖ್ಯೋಸ್.ಅಮ್ ಇನೊಛಿಯ್ಯೊ ಕೈಏಕ್ ಭೈಯೇ ಭೇನೆವ್‌ನ ಬೀಚ್ಮ ಫೈಲೊಟೊ ಛಿಯ್ಯೊಕರಿ ಬೋಲಾವನಿತರ ಕರಿರಾಖ್ಯೊಸ್. 
\v 30 ಕತೋಬಿ ಯೋ ಪಹಿಲೆ ಕಿನ ಚೂ಼ಣ್ಯೊಕಿ ಇವ್ಣುನ ಬುಲಾಯೊ; ಕಿನ ಬುಲಾಯೋಕಿ ಇವ್ಣುನ ನೀತಿವಾಳಕರಿ ಬಣಾಯೊ; ಕಿನ ನೀತಿವಾಳುಕರಿ ಬಣಾಯೋಕಿ ಇವ್ಣುನ ಮಹಿಮೆಮ ಭಾಗ್‌ ದಿದೊ.
\s ಕ್ರಿಸ್ತ ಯೇಸುಮ ದೇವ್ನಿ ಪ್ಯಾರ್
\p
\v 31 ಇಮ್‍ಕತೊ ಅನ ಅಪ್ಣೆ ಕಿಮ್ ಜ಼ವಾಬ್‍ದಿಯೆ, ದೇವ್ ಅಪ್ಣ ಭಣಿರ‍್ಹಯೋತೊ ಕೋಣ್ ಅಪ್ಣುನ ವಿರೋದ್ ಕರ್ಶೆ. 
\v 32 ಇನ ಶೊಂತ್ ಛಿಯ್ಯಾನಸ್ ಬಚಾ಼ಯೊಕೊಂತೆ ಅಪ್ಣಖ್ಹಾರಾನಖ್ಹಾಜೆ ಇನ ದಿದೊಹುಯೊ, ಅಮ್‌ರ‍್ಹವಾಪರ್ ಖ್ಹಾರುಸ್‌ಬಿ ಇನಜೋ಼ಡ್ಮ ದಿಶೆಕೊಂತೆ ರ‍್ಹಿಶೇಕಿ ಶು? 
\v 33 ದೇವಸ್ ಚೂ಼ಣಿಲಿದ ಹುಯಾನ ಉಪ್ಪರ್ ಕೋಣ್ ಗಲತ್‌ ಬೋಲ್‌ಶೆ? ದೇವಸ್ ಗಲ್ತಿಕರಾವಾಳು ಕಾಹೆಕರಿ ಛುಟ್ಕಾರ್‌ ಕರಾವಾಳೊ ಹುಯಿರ‍್ಹೋಸ್. 
\v 34 ಅಪರಾದಿಕರಿ ನಿಶತ್‌ ಕರಾವವಾಳು ಕೋಣ್? ಕ್ರಿಸ್ತಯೇಸು ಮರಣ್‍ಲಿದೊ. ಅಜು಼ ಎತ್ರೇಸ್ ಕಾಹೆತೆ ಮರ‍್ಯಹುಯಮಾಥು ಉಠಿನ್ ದೇವ್ನ ಖಾವಿಬಾಜು಼ಮ ಬೇಶಿನ್. ಯೋಸ್ ಅಪ್ಣಖ್ಹಾಜೆ ಬಿಂತೀನಿವ್ಹಾರ್ ಕರಾವಾಳೊ ಹುಯಿರೋಸ್. 
\v 35 ಅಮ್ ರ‍್ಹವಾಪರ್ ಕ್ರಿಸ್ತನಿ ಪ್ಯಾರ್‌ಥಿ ಅಪ್ಣುನ ಅಲಕ್ ಕರವಾಳು ಕೋಣ್? ವದೇಖ್ಹ್‌ಕಿ, ವಾಖ್ಯೋಕಿ, ಖ್ಹತಾಪ್ಣಿಕಿ, ಭುಕ್ಯೋಕಿ, ಪೆರ‍್ಹಾನ ಕೊಯ್ನಿತೇಕಿ, ನಘಾಡೋಮ್‌ಕಿ, ನತರ್ ಮರಣ್‌ಕಿ? 
\v 36 ಆ ಖ್ಹಾರು ಪರಿಶುದ್ ದಪ್ತರ್‌ಮ ಲೀಖೈರುತೆ ಇಮ್ಮಸ್ ಛಾ಼, “ತಾರಾಖ್ಹಾಜೆ ಹಮೆ ಅಖ್ಖೋದನ್ ಮರಣ್‍ಮ ಛಿಯ್ಯೆ಼; ರ‍್ಹೇಖ್ಹಾವನ ಆಯೂತೆ ಮೇಂಢವ್‌ನಿ ತರ ಹಮೆ ರ‍್ಹೇಖ್ಹಾವನಿತರಾಬಿ ಹುಯಿರ‍್ಹಿಯೇಸ್. 
\v 37 ಕೊಯ್ನಿ ಆ ಖ್ಹಾರಮಾಬಿ ಹಮೆ ಹಮೂನ ಪ್ಯಾರ್ ಕರವಾಳಾಥಿ ಜೈಕಾರ್ ಲೀರಾಖವಾಳಥಿಬಿ ಘಣ ಮೋಟಹುಯಿರಾಸ್. 
\v 38 ಶನಕತೊ ಮರಣ್ಣರ‍್ಹವೊ, ಜಾನ್ನರ‍್ಹವೊ, ದೇವ್‌ದೂತರ್‌ ರ‍್ಹವೊ, ದುರಾತ್ಮರ‍್ಹವೊ, ಸೊರ್ಗನೊ ಅದಿಕಾರಿ ಕೊಯಿನ್ತೊ ಶಕಥ್ಥಿರ‍್ಹವೊ. ಹಮ್ಕೇನಿ ಬಾರೇಮರ‍್ಹವೊ, ಖ್ಹಾಮ್ಣೇನಿ ಬಾರೇಮರ‍್ಹವೊ, 
\v 39 ಊಚು಼ರ‍್ಹವೊ, ಗಧಾರ್‌ಮರ‍್ಹವೊ, ನತರ್ ಉಬ್‌ಜಾ಼ವ್ಣಿಮ ಛಾ಼ತೆ ಬಿಜು಼ ಖೆವೂಸ್‍ರ‍್ಹವೊ ಅಪ್ಣೊ ಪ್ರಭು ಹುಯಿರ‍್ಹೋತೆ ಕ್ರಿಸ್ತಯೇಸುಮ ಛಾ಼ತೆ ದೇವ್ನಿ ಪ್ಯಾರ್‌ಥಿ ಅಪ್ಣುನ ಅಲಕ್ ಕರ್ಶೆಕೊಯ್ನಿ.
\c 9
\s ದೇವ್ ಅಜು಼ ಇನು ಅದ್ಮಿ
\p
\v 1 ಮೇ ಕ್ರಿಸ್ತಮ ಖ್ಹಾಚ ಬೋಲುಸ್, ಮೇ ಜ್ಹೂ಼ಟು ಬೋಲುಕರುಕೊಯ್ನಿ. ಮಾರ ದಿಲ್ನಿಸಾಕ್ಷಿ ಅನ ಪವಿತ್ರಾತ್ಮಥಿ ಘಟ್ ಬಣಾವಸ್. 
\v 2 ಮಾರ ದಿಲ್ಮ ಪುರ್‌ಶತಸ್ ಕೊಯ್ನಿತೆ ತಲಖ್ಣೀಬಿ ಘಣಿ ದುಖ್‍ಬಿ ಛಾ಼. 
\v 3 ಮಾರ ಭೈಯೇನಖ್ಹಾಜೆ ಮಾರಶೊಂತ್ ಅದ್ಮಿವೋನಖ್ಹಾಜೆ ಕ್ರಿಸ್ತಥಿ ದೂರ್‌ಹುಯಿನ್ ಶಾಪ್‌ಮ ಪಡಾಮಬಿ ತಯಾರ್ ಛು಼. 
\v 4 ಇಸ್ರಾಯೇಲ್‌ವಾಳು ಹುಯಿರ‍್ಹುತೆ ಇವ್ಣುನ ಇನಿ ಲಡ್ಕಾವ್‌ನಿ ಘೋಣಿಬಿ ಮಹಿಮೆನ ವತಾಳಿರಾಖ್ಯುಸ್, ಒಪ್ಪಂದಾನ ಅಖ್ಖೂಬಿ, ಧರ್ಮಶಾಸ್ತ್ರ ದೇವವಾನುಬಿ, ಮಂದಿರ್‌ನಿ ಸೇವೆಬಿ ಅಜು಼ ವಾಗ್ದಾನ್‌ಬಿ ಲೀರಾಖ್ಯುಸ್. 
\v 5 ಗುರುಗುರಬ್‍ಲ್ಯೊಬಿ ಇವ್ಣುನ ಮಳ್ಯಹುಯ. ಕ್ರಿಸ್ತ ಅದ್ಮಿಹುಯಿನ್ ಇವ್ಣಿ ಖೂಮ್ಮ ಪೈದಹುಯೊ. ಆ ಖ್ಹಾರಸ್ನ ಉಪ್ಪರ್ ಛಾ಼ತೆ ದೇವ್ ಕದೆಕದೇಬಿ ಸ್ತುತಿ ಹುವಾದೆ ಆಮೆನ್. 
\v 6 ಹೈರೂತೆ ದೇವ್ನಿ ವಾತೆ ಗಲತ್‌ ಹುಯ್ಗುಕರಿ ಅಪ್ಣೆ ನಾ ಲಾಜ಼್‌ಣು. ಶನಕತೊ ಇಸ್ರಾಯೇಲ್‌ನು ಖ್ಹಾರುಸ್ ಅದ್ಮಿಬಿ ಇಸ್ರಾಯೇಲ್ವಾಳು ಕಾಹೆ. 
\v 7 ಇಮ್ಮಸ್ ಅಬ್ರಹಾಮ್‌ನು ಪಿಳ್ಗಿವಾಳು ಖ್ಹಾರುಸ್ ಇನ ಲಡ್ಕಕಾಹೆ. ದೇವ್ ಅಬ್ರಹಾಮ್‌ನ ಬೋಲ್ಯೊ, ಮೆ ವಾಗ್ದಾನ್ ಕರುಸ್, “ಇಸಾಕಥಿ ಪೈದಹುವವಾಳುಸ್ ತಾರು ಪಿಳ್ಗಿಕರಿ ಬೋಲೈಲಿಶೆ.” 
\v 8 ಅನಿ ಮತಲಬ್, ಶಾತ್‍ಕತೊ ಶರೀರ್‌ನಿ ಸಂಬಂಧ್‌ಥಿ ಪೈದಾಹುವವಾಳು ಖ್ಹಾರುಸ್ ದೇವ್ನ ಲಡ್ಕಕಾಹೆ, ವಾಗ್ದಾನ್ನ ಲಡ್ಕಾಸ್ ಅಬ್ರಹಾಮ್‌ನ ಪಿಳ್ಗಿವಾಳು ಕರಿ ಗಣ್ತಿ ಹುವಾಸ್. 
\v 9 ಶನಕತೊ, “ಬರೊಬರ್‌ನ ಹಗಾಮ್ಮ ಮೇ ಐಶ್ತೆ, ತದೆ ಸಾರನ ಏಕ್‍ಛಿಯ್ಯೊ ರ‍್ಹಿಶೆ” ಕರಿ ಬೋಲಾನಿ ವಾಗ್ದಾನ್ ಹುಯಿರ‍್ಹೂಸ್ ಎತ್ರೇಸ್.\x - \xo 9:9 \xo*\xt ಆದಿಕಾಂಡ 18:10—21:2\xt*\x* 
\v 10 ಅತ್ರೇಸ್ ಕಾಹೆತೆ ರೆಬೆಕ್ಕಬಿ ಅಪ್ಣೊ ಗುರುಗುರಬ್‌ಲ್ಯೊ ಹುಯಿರೋತೆ ಇಸಾಕಥಿ ಅವ್‌ಳಿಜವ್‌ಳಿ ಪರ್ಖ್ಹಾ ಲಡ್ಕಾನ ಜ಼ಣಿ. 
\v 11 ಅಮ್ ಯೋ ಲಡ್ಕಾ ಪೈದಹುವಾನ ಅಗಾಡಿ, ಅಛ಼್ಛು ನತರ್ ಗಲತ್‌ ಕರಾನ ಅಗಾಡಿಸ್, ಮೋಟೊ ನ್ಹಾನನ ಚಾ಼ಕ್ರಿಕರ್ಶೆ ಕರಿ ರೆಬೆಕ್ಕನ ಬೋಲೈರ‍್ಹೂಥು.ಅನೇಥಿ ದೇವ್ ದಿಲ್‍ರ‍್ಹೇಸ್ತೆ ಇನ ಚೂ಼ಣಿಲೇಸ್‍ಕರಿ ಬೋಲಾನು ಖ್ಹೂಜ಼್ ಘಟ್‍ರ‍್ಹೇಣುಕರಿ ವತಾಳಿಲಿದೊ.\x - \xo 9:11 \xo*\xt ಆದಿಕಾಂಡ 25:23\xt*\x* 
\v 12 ಆ ಕಾಮ್ನ ಉಪ್ಪರ್ ಆಧಾರ್‌ಕಾಹೇತೆ, ಬುಲಾವವಾಳನ ಖ್ಹೂಜ಼್‌ನ ಉಪ್ಪರಸ್ ಆಧಾರ್ ಹುಯಿರ‍್ಹೂಸ್. ಇನಖ್ಹಾಜೇಸ್ ರೆಬೆಕ್ಕನ ಬೋಲಾಯು ಮೋಟೊ ನ್ಹಾನನಿ ಚಾ಼ಕ್ರಿ ಕರ್ಶೆ. 
\v 13 ಅನಿನಿತರಸ್, “ಯಾಕೋಬ್‍ನ ಮೇ ಪ್ಯಾರ್‌ಕರ‍್ಯೊ. ಕತೋಬಿ ಏಸಾವನ ವಹೇರ್‌ ಕರ‍್ಯೊಕರಿ ಪವಿತ್ರ ದಪ್ತರ್‌ಮ ಲಿಖೈರ‍್ಹುಸ್.” \x - \xo 9:13 \xo*\xt ಮಲಾಕಿ 1:2,3\xt*\x* 
\v 14 ಇಮ್‍ಕತೊ ಅಪ್ಣೆ ಶಾತ್ ಬೋಲಿಯೆ? ದೇವ್ ಠಗಾವಾಳೊಕೀ ಶು? ಕದೇಬಿ ಕೊಯ್ನಿ. 
\v 15 ದೇವ್ ಮೋಶೆನ, “ಕಿನಾಪರ್ ಮಾರಿ ಗೋರ್‌ಛಾ಼ಕಿ ಇನ ಗೋರ್‌ಕರೀನ್, ಕಿನಾಪರ್ ಮಾರಿ ಆರ್‌ಗೋರ್‌ಛಾ಼ಕಿ ಇನ ದಯಾ ವತಾಳೀಶ್” ಕರಿ ಬೋಲಿರಾಖ್ಯೊಸ್.\x - \xo 9:15 \xo*\xt ವಿಮೋಚನ 33:19\xt*\x* 
\v 16 ಅನಖ್ಹಾಜೆ ಆ ಅದ್ಮಿನ ಆಖ್ಹ್ ಮ್ಹಿನಥ್ಥಿ ಹುಯುಕೊಂತೆ, ದೇವ್ನ ಗೋರ್‌ಥೀಸ್ ಹುಯಿರ‍್ಹೂಸ್. 
\v 17 ಶನಕತೊ, “ಮೇ ತಾರಾಮ, ಮಾರಿ ಶಕತ್ನ ವತಾಳಿನ್ ಮಾರ ನಾಮ್ನ ಜ಼ಮೀನ್‌ಪರ್ ಮೋಟು ಭಡಾವ್‍ಣುಕರಿ ಖ್ಹಯಾಲ್‍ಥೀಸ್ ತುನ ಊಚಿ ಝ಼ಗೋಪರ್ ಉಠಾಡಿಭೀರಾಖ್ಯೊ” ಕರಿ ಧರ್ಮಶಾಸ್ತ್ರಮ ದೇವ್ ಫರೋಹನ ಬೋಲಸ್.\x - \xo 9:17 \xo*\xt ವಿಮೋಚನ 9:14\xt*\x* 
\v 18 ಇನಖ್ಹಾಜೆ ದೇವ್ ಕಿನ ಗೋರ್‌ಕರ‍್ನುಕರಿ ಖ್ಹೂಜ಼್‌ಕರಸ್ಕಿ ಇನ ಗೋರೆಲುಕರಸ್. ಕಿನ ಕಠಣ್ ಕರ್ನುಕರಿ ಖ್ಹೂಜ಼್‌ಕರಸ್ಕಿ ಇವ್ಣುನ ಕಠಣ್ ಬಣಾವಸ್.
\s ದೇವ್ನಿ ಚ಼ಂಢಾಳ್ ಅಜು಼ ದಯಾ
\p
\v 19 ಇಮ್‍ಕತೊ, “ದೇವ್ ಬಿಜೂ಼ಬಿ ಗಲತ್‌ ಢೂಂಡಸ್ ಶನ? ಇನಿ ಮರ್ಜಿನ ಖ್ಹಾಮ್ಣೆ ಭೀರ‍್ಹವಾಳು ಕೋಣ್?” ಕರಿ ಮನ ಬೋಲಸ್. 
\v 20 ಅಲ ಅದ್ಮಿ, ದೇವ್ನ ಆಡ್‌ಫೇಡ್ ವಾತೆ ಬೋಲವಾಳೊ ತು ಕೋಣ್? ಉಬ್ಜಿಹುಯು ಉಬ್‌ಜಾ಼ವವಾಳನ “ಶನ ಮನ ಅಮ್ ಉಬ್ಜಾ಼ಯೊಕರಿ ಬೋಲೆಜಾ಼ಯ್? 
\v 21 ಕುಂಭಾರ‍್ನ ಎಕ್ಕಸ್ ಮಾಟಿನ ಮುದ್ದಾಥಿ ಅಛ್ಛು಼ರಾಛು಼ ಕರನಾಬಿ, ಬಿಜೇಕ್ನ ಖರಾಬ್ ಕಾಮ್ನಖ್ಹಾಜೆ ಉಪಯೋಗ್ ಕರಾನ ಮ್ಹಾಮೂಲಿ ರಾಛ಼ನ ಬಣಾವನಾಬಿ ಹಕ್‌ ಕೊಯ್ನಿಕಿ ಶು? 
\v 22 ಕತೋಬಿ ದೇವ್ ಇನ ಇರಾದನ ದೆಖಾಡಿನ್ ಇನಿ ಶಕತ್ನ ವತಾಳಿನ್ ಭಡಾವ್‍ಣುಕರಿ ರ‍್ಹಯೊತೋಬಿ, ಇಮ್‌ ಕರ‍್ಯೊಕೊಂತೆ ಇನ ಇರಾದಮ ನಾಶಹುವಾಳನ ಘಣು ಠಂಡೊ ಹುಯಿನ್ ಖ್ಹಮಾಳಿಲ್ಯವಾನ ಆಖ್ಹ್‌ಕರ‍್ಯೊತೊ, ಕೋಣ್ ಶಾತ್‌ ಕರಾನ ಉಶೆ. 
\v 23 ಅಜು಼ ಮಹಿಮೆ ಲಿಲ್ಯಾವನಖ್ಹಾಜೆ ಅಗಾಡಿಸ್ ತಯಾರ್‌ಕರೀನ್, ದೇವ್ನೆ ಇನಿ ಗೋರ್‌ ಲೀಲ್ಯಾವಾಳನ ಇನಿ ಮಹಾನ್ ಮಹಿಮೆನ ದೆಖಾಡ್ಯೊ. 
\v 24 ಇನಖ್ಹಾಜೇಸ್ ಯೋ ಖಲಿ ಯೆಹೂದ್ಯನ ಬುಲಾಯೊ ಕಾಹೆತೆ, ಯೆಹೂದ್ಯರ್‌ಕಾಹೆತೆ ಇವ್ಣುನ ಜಿನುಬಿ ಬುಲೈರಾಖ್ಯೋಸ್ನಿ? 
\v 25 ಹೋಶೇಯನ ಪುಸ್ತಕ್‌ಮ ದೇವ್ನೆ, “ಮಾರು ಅದ್ಮಿಕಾಹೆತೆ ಇವ್ಣುನ ‘ಮಾರು ಅದ್ಮಿ’ ಕರಿ ಬುಲೈಶ್. ಮೇ ಪ್ಯಾರ್‌ಕರಾವಾಳನ ಮಾರು ಪ್ಯಾರ್‌ವಾಳುಕರೀಬಿ ಬೋಲಿಶ್.”\x - \xo 9:25 \xo*\xt ಹೋಶೇಯ 2:23\xt*\x* 
\v 26 “ಖಿವಿ ಝ಼ಗೋಮ ‘ತುಮೆ ಮಾರು ಅದ್ಮಿಕಾಹೆಕರಿ’ ಇವ್ಣುನ ಬೋಲಾಯುಕಿ ಯೋ ಝ಼ಗೋಮಸ್‌, ‘ಇವ್ಣೆ ಜಾನ್ನಸ್ವರೂಪ್ ಹುಯಿರೋತೆ ದೇವ್ನ ಲಡ್ಕಾ ಕರಿ ಬೋಲೈಲಿಶೆ”.\x - \xo 9:26 \xo*\xt ಹೋಶೇಯ 1:10\xt*\x* 
\v 27 ಆ ನಾಹುಯಿನ್ ಯೆಶಾಯ ಇಸ್ರಾಯೇಲವಾಳನ ಬಾರೇಮ ಚಿಕ್ರಿಬೋಲಸ್ ಶಾತ್‍ಕತೊ” ಇಸ್ರಾಯೇಲ್‍ವಾಳನಿ ಗಣ್ತಿ ದರ‍್ಯಾವ್‍ನಿ ರೇತ್ನಿತರ ರ‍್ಹಯುತೋಬಿ ಇವ್ಣಾಮ ಥೋಡುಜ಼ಣು ಬಚಿರ‍್ಹಿಶೆ. 
\v 28 ಶನಕತೊ ಪ್ರಭು ಇನಿವಚನ್ನ ಜ಼ಮೀನ್‌ಪರ್ ಖ್ಹರ್ತಿನು ಕರೀನ್‍ಬಿ, ಗಣ್ತೀಥಿ ಒಗ್ಗಿಸ್‌ಮ ಚ಼ಲೈನ್ ಖ್ಹತಮ್ ಕರ್ಶೆ!”\x - \xo 9:28 \xo*\xt ಯೆಶಾಯ 10:22,23\xt*\x* 
\v 29 ಯೆಶಾಯನೆ ಅನೇಥಿ ಪಾಛ಼ಳ್, “ಪ್ರಭು ಹುಯಿರೋತೆ ದೇವ್ ಹಮೂನ ಪಿಳ್ಗಿ ಬಚೈ಼ನ್ ದಿದೊ ನಾಹೊತ್ತೊ, ಹಮೆ ಸೊದೋಮ್‍ನಿ ಹಾಲತಸ್ ಹಮುನ ಹುಯಿಗಯಹೊತ್‍, ಗೊಮೋರನಿ ಖರಾಬ್‌ ಹಾಲಸ್ ಚಾ಼ಲಿಗುಹೊತ್!” ಕರಿ ಬೋಲಿರಾಖ್ಯೊಸ್.\x - \xo 9:29 \xo*\xt ಯೆಶಾಯ 1:9\xt*\x*
\s ಇಸ್ರಾಯೇಲ್‍ವಾಳನಖ್ಹಾಜೆ ಪೌಲನಿ ಪ್ರಾರ್ಥನೆ
\p
\v 30 ಯೆಹೂದ್ಯರ್‌ಕಾಹೆತೆ ಇವ್ಣೇಥಿ ಇವ್ಣೆಸ್ ಇವ್ಣ ಶಕಥ್ಥಿ ನಾ ಕರ‍್ಯುತೋಬಿ ದೇವ್ನಿ ವಿಶ್ವಾಸ್‍ಥಿ ಹುಯುತೆ ನೀತಿವಾಳುಕರಿ ಗಣ್ತಿ ಹುಯಿಜಾ಼ಶೆ. 
\v 31 ಯೋಸ್ ವಖ್ಹತ್‌ಮ ದೇವ್ನಿ ಜೋ಼ಡ್ಮ ನೀತಿ ಪಾಡಿ ಚಾ಼ಲ್ಯುತೆ ಇಸ್ರಾಯೇಲ್‌ವಾಳು ನಿಯಮ್ನ ಢೂಂಡುಕರ್ತುಥು ಕತೋಬಿ ಲೀಲಿದುಕೊಯ್ನಿ. 
\v 32 ಶನಕತೊ, ಇವ್ಣೆ ವಿಶ್ವಾಸ್‌ನ ಪಾಡಿಚಾ಼ಲ್ಯುಕೊಂತೆ ಅಛ್ಛಾ಼ಕಾಮ್‍ನಾಸ್‌ ಅಖ್ಖು ಪಾಡಿ ಚಾ಼ಲ್ಯುತೆ ಇನಖ್ಹಾಜೇಸ್. ಇವ್ಣೆ ಠೋಕರ್‌ಖಾವನ ಬಂಡಾಪರ್ ಠೋಕರ್‌ಖಾದು. 
\v 33 ಧರ್ಮಶಾಸ್ತ್ರಮ ಅಮ್‌ಲೀಖೈರುಸ್ಕಿ, “ಹಂದೇಕ್, ಚೀಯೋನ್‌ಮ ಮೇ ಅದ್ಮಿವ್ ಧೊಕ್‌ಡಾವನ ಬಂಡನಾಬಿ ಠೊಕ್ರವಾನ ಬಂಡಾನಾಬಿ ಮ್ಹೇಲುಸ್. ಇನ ವಿಶ್ವಾಸ್‍ಕರವಾಳನ ನಿರಾಶ್‍ ಕೊಉಷೇನಿ”\x - \xo 9:33 \xo*\xt ಯೆಶಾಯ 28:16\xt*\x*
\c 10
\p
\v 1 ಭೇನೆ ಭೈಯೇವೊ, ಇಸ್ರಾಯೇಲ್‌ವಾಳು ರಕ್ಷಣೆ ಲೇವ್ಣುಕರಿ ಬೋಲನುಸ್ ಮಾರಿ ದಿಲ್ನಿ ಮೋಟಿಆಖ್ಹ್‌. ಮೇ ದೇವ್ನ ಇನಖ್ಹಾಜೆ ಪ್ರಾರ್ಥನೆಕರುಕರುಸ್. 
\v 2 ಇವ್ಣೆ ದೇವ್ನ ಪೀಠೆಜಾ಼ವಾನ ಖ್ಹಾಚಮಾಸ್ ಕೋಶಿಶ್‍ಕರಸ್. ಮೇ ಯೆಹೂದ್ಯರ್‌ನಿ ಬಾರೇಮ ಅಮ್ ಬೋಲುಸ್. ಕತೋಬಿ ಇವ್ಣಿ ಭಕ್ತಿ ಊಚಿಛಾ಼ತೆ ಅಕ್ಕಲ್‍ನ ಉಪ್ಪರ್ ಭಿಯುಕೊಯ್ನಿ. 
\v 3 ಇವ್ಣೆ ದೇವ್‌ಥಿ ಮಳಾತೆ ನೀತಿನ ನಾಮಾಲುಮ್‌ ಕರ್ಲಿನ್ ಶೊಂತ್‌ ನೀತಿನಾಸ್ ರಾಖಾನ ಕೋಶಿಶ್‌ ಕರುಕರಾಸ್ತೆಖ್ಹಾಜೆ ದೇವ್ನಿ ನೀತಿನ ಹೇಟುಕೊಹುಯುನಿ. 
\v 4 ಇನಾಮ ವಿಶ್ವಾಸ್ ಕರವಾಳು ಹರೇಕ್ ಜ಼ಣು ನೀತಿನು ತೀರ್ಪ್‌ಲೀಲೆವ್ಣುಕರಿ ಕ್ರಿಸ್ತನೆ ಧರ್ಮಶಾಸ್ತ್ರನ ಖ್ಹತಮ್ ಕರ‍್ಯೊ.
\s ರಕ್ಷಣೆ ಛಾ಼ತೆ ಅಖ್ಖಾಸ್ನಖ್ಹಾಜೆ
\p
\v 5 ಧರ್ಮಶಾಸ್ತ್ರಥಿ ಮಳಾಸ್ತೆ ನೀತಿನ ಬಾರೇಮ, “ಧರ್ಮಶಾಸ್ತ್ರನ ಪಾಡಿಚಾ಼ಲವಾಳೊ ಇನೇಥಿಸ್ ಜಿವ್‌ಶೆ” ಕರಿ ಮೋಶೆನೆ ಲೀಖಿರಾಖ್ಯೊಸ್, 
\v 6 ಕತೋಬಿ ವಿಶ್ವಾಸ್‍ಥಿ ಆಧಾರ್ ಹುಯಿರ‍್ಹೇಯ್ತೆ ನೀತಿನು ಪವಿತ್ರ ದಪ್ತರ್ ಶಾತ್ ಬೋಲಸ್‍ಕತೊ, ಕ್ರಿಸ್ತನ ಜ಼ಮೀನ್‌ಪರ್ ಲೀನ್ಆವಾನ “ಪರ್‌ಲೋಕ್ನ ಕೋಣ್ ಉಡೀನ್‍ಜಾ಼ಶೆ?” 
\v 7 ನಿತರ್ ಕ್ರಿಸ್ತನ ಮರ‍್ಯಾಹುಯಾಮಾಥು ಉಠಾಡಿಲೀನ್ ಆವಾನ ಕೋಣ್ ಪಾತಾಳ್ಮ ಉತ್ರಿನ್ ಜಾ಼ಶೆ?” ಕರಿ ಬೋಲಿಲ್ಯವಾನು ನಕೊ. 
\v 8 ಯೊ ಶಾತ್ ಬೋಲಾಸ್‍ಕತೊ, “ವಚನ್ ತಾರಕನ ಛಾ಼ ಯೋ ತಾರ ಮ್ಹೋಡಮಾಬಿ ದಿಲ್‌ಮಾಬಿ ಛಾ಼” ಯೋಸ್ ಅಪ್ಣೆ ಬೋಲಿವತಾಳಾನು ವಿಶ್ವಾಸ್‍ನು ವಚನ್. 
\v 9 ತೂ, “ಯೇಸುಸ್ ಪ್ರಭು” ಕರಿ ಮ್ಹೋಡೇಥಿ ಬೋಲ್‌ನು ದೇವ್ ಯೇಸುನ ಮರ‍್ಯಹುಯಮಾಥು ಉಠಾಡ್ಯೊಕರಿ ದಿಲ್ಮ ವಿಶ್ವಾಸ್‍ಕರ‍್ಯೊತೊ, ತೂ ರಕ್ಷಣೆಲೀಶ್. 
\v 10 ಶನಕತೊ ತುಮೆ ತುಮಾರ ದಿಲ್‌ಥಿ ವಿಶ್ವಾಸ್‍ಕರಿನ್ ನೀತಿವಾಳುಕರಿ ಗಣ್ತಿಉಶು. ಅಜು಼ ತಾರ ಮ್ಹೋಡೇಥಿ ಬೊಲಾನಿ ವಖ್ಹ್‌ತೆ ರಕ್ಷಣೆ ಲೀರಾಖ್ಯಾಸ್. 
\v 11 ಪವಿತ್ರ ದಪ್ತರ್‌ಮ ಬೋಲೈರ‍್ಹುತೆ ತಿಮ್, “ಇನಪರ್ ವಿಶ್ವಾಸ್ ಕರಾವಾಳೊ ಕದೇಬಿ ಖ್ಹರಮಾವ್‌ಶೆ ಕೊಯ್ನಿ” 
\v 12 ಶನಕತೊ ಯೆಹೂದ್ಯರ್ ಅಜು಼ ಯೆಹೂದ್ಯರ್‌ಕಾಹೇತೆ ಇವ್ಣುನಾಬಿ ಕಮ್ ಜಾ಼ಖ್ಹತ್ ಕರ‍್ಯೊಕೊಯ್ನಿ, ದೇವ್ ಖ್ಹಾರಾನ ಪ್ರಭುಹುಯಿರ‍್ಹೇಸ್. ಇನ ಸ್ವೀಕಾರ್ ಕರವಾಳನ ಖ್ಹಾರಸ್ನ ಪ್ರಭು ಘಣು ಆಶೀರ್ವಾದ್‌ ಕರಸ್. 
\v 13 ಶನಕತೊ, ಪವಿತ್ರ ದಪ್ತರ್ ಅಮ್ ಬೋಲಸ್, “ಕೋಣ್‌ ಪ್ರಭುನು ನಾಮ್ನ ಬೋಲಸ್ಕಿ ಯೊ ಹರೇಕ್‍ನಾಬಿ ರಕ್ಷಣೆ ಉಶೆ!” 
\v 14 ಕತೋಬಿ ಪ್ರಭುಮ ವಿಶ್ವಾಸ್ ನಾರ‍್ಹಯುತೊ ಇನ ನಾಮ್ನ ಬೋಲಿಲ್ಯವಾನುಬಿ ಕಿಮ್? ಇವ್ಣೆ ಸಂದೇಶ್ ಖ್ಹಮ್‍ಜ್ಯುನಾತೊ ಇನಾಪರ್ ವಿಶ್ವಾಸ್ ಕರಾನುಬಿ ಕಿಮ್? ಬೋಲವಾಳೊ ನಾರ‍್ಹಯೊತೊ ಇವ್ಣೆ ಖ್ಹಮ್‍ಜಾ಼ನು ಕಿಮ್? ಸುವಾರ್ತೆನ ಫೈಲಾವಾಳೊ ನಾಮೋಕ್‌ಲಾಯೊತೊ ಬೋಲಾನುಬಿ ಕಿಮ್? 
\v 15 ಬೋಧನೆ ಕರವಾಳನ ಮೋಕ್‍ಲ್ಯೊನಾತೊ ಬೋಲ್‌ಶೆ ಕಿಮ್? ಇನಖ್ಹಾಜೇಸ್, “ಅಛ್ಛಿ ಸುವಾರ್ತೆ ಬೋಲವಾಳನು ಪಗ್ ಕೆತ್ರೇಕ್ಕಿ ಶನ್‌ಗಾರ್” ಕರಿ ಪವಿತ್ರದಪ್ತರ್‌ಮ ಲೀಖೈರ‍್ಹುಸ್. 
\v 16 ಕತೋಬಿ ಖ್ಹಾರುಸ್ ಸುವಾರ್ತೆನ ಸ್ವೀಕಾರ್ ಕರ‍್ಯುಕೊಯ್ನಿ. ಆ ಬಾರೇಮ ಯೆಶಾಯ ಪ್ರವಾದಿ “ಪ್ರಭು, ಹಮೆ ಬೋಲ್ಯಾತೆ ಸುವಾರ್ತೆನ ಕೋಣ್ ವಿಶ್ವಾಸ್ ಕರ‍್ಯು”? ಕರಿ ಬೋಲಸ್. 
\v 17 ಇನಖ್ಹಾಜೆ, ಬೋಲಾತೆ ಸುವಾರ್ತೆನ ಖ್ಹಮ್‍ಜಾ಼ಥಿ ವಿಶ್ವಾಸ್ ಆವಸ್, ಯೋ ಖಿವುಕತೊ ಕ್ರಿಸ್ತನಿ ಬಾರೇನಿ ವಚನ್‍ ಹುಯಿರ‍್ಹಿಸ್. 
\v 18 ಕತೋಬಿ ಇವ್ಣೆ ಕದೇಬಿ ಇನಖ್ಹಮ್‍ಜ್ಯು ಕೊಯ್ನಿಕಿಶು? ಕರಿ ಮೇ ಪುಛಾ಼ವ್‍ಸ್, ಇವ್ಣೆ ಖ್ಹಾಚಮಾಸ್ ಖ್ಹಮ್‍ಜಿರಾಖ್ಯುಸ್. ಪವಿತ್ರದಪ್ತರ್‌ಮ ಅಮ್ ಬೋಲಿರಾಖ್ಯುಸ್‍ಕಿ, “ಬೋಲಾವಾಳಾನಿ ಅವಾಜ಼್ ಜಗತ್ನ ಖ್ಹಾರೀಸ್‍ ಬಾಜು಼ ಜೈ಼ರ‍್ಹೂಸ್‍, ಇವ್ಣಿವಾತೆಖ್ಹಾರಿ ಜಗತ್ನ ಕಡೇಶಿಲಗೂಬಿ ಫೈಲೈರ‍್ಹುಸ್” \x - \xo 10:18 \xo*\xt ಕೀರ್ತನೆ 19:4\xt*\x* 
\v 19 ಕತೋಬಿ ಇಸ್ರಾಯೇಲ್‌ವಾಳನೆ ಸುವಾರ್ತೆ ಮಾಲುಮ್ ಕರ‍್ಯಕೊಯ್ನಿಕಿ ಶು? ಕರಿ ಮೇ ಪುಛಾ಼ವ್‍ಸ್. ಪಹಿಲೆ ಮೋಶೆನೆ, “ಮೇ ಖೂಮ್‌ವಾಳೊ ಕಾಹೆತೆ ಇವ್ಣೇಥಿ ತುಮೆ ಬಳಾಪೊಕರಾನಿತರ ಕರೀಶ್. ಅಕ್ಕಲ್‌ಕೊಂತೆ ಖೂಮ್‍ವಾಳಥಿ ಮಾರು ಅದ್ಮಿ ಇರಾದೊ ಆವನಿತರ ಕರೀಶ್” ಕರಿ ಬೋಲುಸ್. 
\v 20 ಕತೋಬಿ ಯೆಶಾಯನೆ ಘಣು ಧಿಲ್‍ಪಥ್ಥಿ ದೇವ್ನಿ ಆ ವಾತೆನ ಬೋಲ್ಯೊ “ಮನ ಕೊ ಢೂಂಢಾನಿತೆ ಇವ್ಣುನ ಮೇ ಮಳ್ಯೊ. ಮಾರಿ ಬಾರೇಮ ನಾ ಪುಛಾ಼ವವಾಳನ ಖ್ಹಾಮ್ಣೆ ದೇಖಾಯೊ” 
\v 21 ಕತೋಬಿ ಯೊ ಇಸ್ರಾಯೇಲ್‍ವಾಳನಿ ಬಾರೇಮ ಮಾರಿ ವಾತ್ನ ನಾಮಾನಿನ್‌ ಆಡ್‌ಫೇಡ್‌ ಬೋಲವಾಳ ಅದ್ಮಿವೋನ ಮೇ ಖ್ಹಾರದನ್‌ಬಿ ಮ್ಹೆಲ್ಯೊಕೊಂತೆ ಹಾತ್‌ ಪಖ್ಹಾರಿ ಬುಲಾಯೊಕರಿ, ಯೋ ಬೋಲಸ್.\x - \xo 10:21 \xo*\xt ಯೆಶಾಯ 65:1-2\xt*\x*
\c 11
\s ಇಸ್ರಾಯೇಲ್‌ವಾಳಪರ್ ದೇವ್ನಿ ಗೋರ್‌
\p
\v 1 ಇಮ್‍ಕತೊ, ದೇವ್ ಇನ ಅದ್ಮೆವ್‍ನ ಝಿಟ್ಕಾರ್‌ದಿದೊಕಿ ಶು? ಕರಿ ಮೇ ಬೋಲುಸ್. ಕದೇಬಿ ಕೊಯ್ನಿ, ಮೇ ಏಕ್‌ ಇಸ್ರಾಯೇಲ್‌ವಾಳೊ ಹುಯಿರ‍್ಹೋಸ್. ಅಬ್ರಹಾಮ್‌ನಿ ಖಾನ್‌ದಾನ್‌ವಾಳೊ, ಬೆನ್ಯಾಮೀನ್ನ ಖೂಮ್‍ವಾಳೋಬಿ ಹುಯಿರ‍್ಹೋಸ್. 
\v 2 ದೇವ್, ಯೋ ಅಗಾಡಿಸ್ ಮಾಲುಮ್ ಕರಿರಾಖ್ಯೊತೆ ಇಸ್ರಾಯೇಲ್‌ ಅದ್ಮೆವ್‌ನ ಝಿಟ್ಕಾರ್‌ ದಿದೊಕೊಯ್ನಿ. ದೇವ್ನಿ ವಚನ್ ಎಲೀಯನಿ ಬಾರೇಮ ಶಾತ್ ಬೋಲಸ್‍ಕರಿ ತುಮೂನ ಮಾಲುಮ್ ಕೊಯ್ನಿಕಿಶು? 
\v 3 “ಪ್ರಭು, ಇವ್ಣೆ ತಾರ ಪ್ರವಾದಿಖ್ಹಾರನ ಮಾರಿನಾಖ್ಯು. ಅಜು಼ ತಾರಿ ಚಾ಼ಚ಼ರ್‌ನ ಫೋಡಿನಾಖ್ಯು. ಮೇ ಎಕ್ಕಸ್‍ಜ಼ಣೊ ಬಚಿರ‍್ಹೋಸ್. ಇವ್ಣೆ ಮಾರ ಜಾನ್‌ ಕಾಡಿನಾಖಿದ್ಯವಾನ ಕೋಶಿಶ್ ಕರುಕರಸ್” 
\v 4 ದೇವ್ನಿ ಜ಼ವಾಬ್ ಶಾತ್‍ಕತೊ, “ಬಾಳನ ಮೂರತ್ನ ಅಡ್‍ಪಡ್ಯುಕೊಂತೆ ಖ್ಹಾತ್‍ಹಜಾ಼ರ್‌ ಪರ್ಖ್ಹಾನ ಮಾರಖ್ಹಾಜೆ ಬಚಾ಼ಡಿರಾಖ್ಯೊಸ್. 
\v 5 ಯೋಸ್ ಪರಕ್ಮ ಆ ಹಗಾಮ್ಮಾಬಿ ವಾರ್‌ಖ್ಹೇಥಿ ಚೂ಼ಣೈರ‍್ಹುತೆ ಇಸ್ರಾಯೇಲ್‍ವಾಳನು ಜಾನ್ನ ದೇವ್ ಬಚಾ಼ಡ್‌ಶೆ. 
\v 6 ಯೋ ಚು಼ನಾವ್ಣಿ ಕಾಮ್ನಿ ಅದಾರ್‌ಪರ್ ಕಾಹೆ, ವಾರ್‌ಖ್ಹೇಥಿಸ್ ಹುಯಿರ‍್ಹೇಸ್. ಕಾಮ್‍ಥಿ ಯೋ ಹುಯಿರ‍್ಹಯುತೊ ಅಜು಼ ಕದೇಬಿ ದೇವ್ನಿ ಕೃಪಾವರ ಕೃಪೆ ಹುಯಿರ‍್ಹಿಶೆಕೊಯ್ನಿ. 
\v 7 ಇಮ್‍ಕತೊ ಶಾತ್? ಇನಖ್ಹಾಜೆ ಇಸ್ರಾಯೇಲ್‍ನೆ ಢೂಂಡ್ಯಹುಯಾನ ಲೀಲಿದುಕೊಯ್ನಿ. ಕತೋಬಿ ಇವ್ಣಾಮ ಚೂ಼ಣೈಗಯಹುಯಾನೆ ಲೀಲಿದು; ಉಬ್ರಿಹುಯುಖ್ಹಾರು ಕಠಣ್ ದಿಲ್‍ವಾಳುಹುಯು. 
\v 8 ಪವಿತ್ರ ದಪ್ತರ್‌ಮ ಲೀಖೈರ‍್ಹಯುತೆ ತಿಮ್ “ದೇವ್ನೆ ಇವ್ಣುನ ಮಂಕ್ ಆತ್ಮಾನ ದೇಖಾಕೊಯ್ನಿತೆ ಡೋಳಾನಬಿ ಅಜು಼ ಖ್ಹಮ್‌ಜಾ಼ಕೊಯ್ನಿತೆ ಕಾನ್ನ ದಿದೊ. ಆ ಹಮ್ಕೆಲಗೂಬಿ ಇಮ್ಮಸ್ ಛಾ಼.” 
\v 9 ದಾವೀದನೆ, “ಇವ್ಣು ಮಿಝ಼್‌ವನಸ್ ಇವ್ಣುನ ಫಾಖ್ಹೊಬಿ, ಜಾ಼ಳೂಬಿ, ಇನಾಮ ಖ್ಹಪ್ಡಿ ಪಟ್ಕಿನ್ ನಿಶತ್‌ಲ್ಯವಾದೆ! 
\v 10 ಇವ್ಣ ಡೋಳ ಭುಂಬ್‌ಳಹುಯಿನ್ ನಕೊ ದೆಖಾವದೆ, ಅಜು಼ ಕದೆಕದೇಬಿ ಇವ್ಣೆ ಖ್ಹತಾಪ್ಣಿಮ ಪಡಿಜಾ಼ವಾದೆ” ಕರಿ ಬೋಲಸ್.\x - \xo 11:10 \xo*\xt ಕೀರ್ತನೆ 69:23\xt*\x* 
\v 11 ಇಮ್‍ಕತೊ ಉಟ್ನುನಾತೆ ಪರಕ್ಮ ಯೆಹೂದ್ಯರ್ ಠೋಕರ್‌ಲಾಗಿನ್ ಇವ್ಣೆ ರಡ್ಕಿಗುಕಿಶು? ಕಾಹೆ ಇಮ್‌ ಕಾಹೆ! ಶನಕತೊ ಇವ್ಣಿ ಗಲತ್‌ನಖ್ಹಾಜೆ ಯೆಹೂದ್ಯರ್‌ನ ಪೇಟ್ನ ಬಳಾಪೊ ಹುವಾನಖ್ಹಾಜೆ ರಕ್ಷಣೆ ಯೆಹೂದ್ಯರ್‌ಕಾಹೆತೆ ಅದ್ಮಿಪರ್ ಆಯು. 
\v 12 ಕತೋಬಿ ಇವ್ಣಿ ಗಲತ್‌ಥಿ ಜಗತ್ನ ಘಣು ಆಶೀರ್ವಾದ್‌ ಆಯಿನ್, ಇವ್ಣಿ ಹಾರ್‌ಥಿ ಯೆಹೂದ್ಯರ್‌ಕಾಹೆತೆ ಅದ್ಮೆವ್‍ನ ಘಣು ಆಶೀರ್ವಾದ್‌ ಮಳಿರ‍್ಹಯು ಉಷೇತೊ ಯೋಖ್ಹಾರುಸ್ ಯೆಹೂದ್ಯರ್ ಅಯಿನ್ ಎಕ್ಟುಹುಯೂತೊ ಕೆತ್ರೆ ಮಹಾನ್‍ರ‍್ಹಿಶೆ.
\s1 ಯೆಹೂದ್ಯರ್ ಕಾಹೆತೆ ಇವ್ಣುನ ರಕ್ಷಣೆ
\p
\v 13 ಯೆಹೂದ್ಯರ್‌ಕಾಹೆತೆ ತುಮಾರಿಜೋ಼ಡ್ಮ ವಾತೆಬೋಲುಕರುಸ್; ಮೇ ಯೆಹೂದ್ಯ ಕಾಹೆತೆ ಅದ್ಮೆವ್‍ನ ಅಪೊಸ್ತಲ ಹುಯಿರ‍್ಹವಾನಿ ಪರಕ್ಮ ಮಾರಿ ಸೇವೆನಿ ಬಾರೇಮ ಖ್ಹರವ್‌ಕರುಸ್. 
\v 14 ಕಿಮ್‌ಕತೊ ಮೆ ಮಾರಶೊಂತ್ ಅದ್ಮಿಯೆವ್‌ಮ ಬಳಾಪನ ಜಾ಼ಖ್ಹತ್ ಕರೀನ್ ಇವ್ಣಮ ಥೋಡಜ಼ಣಾನ ತೋಬಿ ರಕ್ಷಣೆಮ ಲ್ಯಾವ್ಣು. 
\v 15 ಶನಕತೊ ಇವ್ಣುನ ಝಿಟ್ಕಾರಾಥಿ ಜಗತ್‌ ದೇವ್ನಿಜೋ಼ಡ್ಮ ಮಳೈದ್ಯಾವ ಖ್ಹರ್ಕು ರ‍್ಹಯುತೊ, ಇವ್ಣು ಸ್ವೀಕಾರ್, ಮರ‍್ಯುಹುಯು ಜಿವ್ತುಹುಯಿನ್ ಉಠೀನ್ ಆವಾನಿತರ ರ‍್ಹಿಶೆಕೊಯ್ನಿಕಿ ಶು? 
\v 16 ರೋಟಾನು ಫೈಲ ಟುಕ್ಡಾನ ದೇವ್ನ ದಿದೋತೊ, ಯೊ ಅಖ್ಖೋ ಏಕ್‍ರೋಟೊಸ್ ಇನುಸ್ ಹುಯಿಗು. ಝಾ಼ಡ್‌ನಿ ಜ಼ಡ್‌ ಪವಿತ್ರ ಹುಯಿರ‍್ಹುತೊ ಝಾ಼ಡ್‌ನಿ ಡಾಳಿಯೇಬಿ ಇನೀಸ್‍ ಹುಯು. 
\v 17 ಖ್ಹಾಚಮಾಬಿ ಫುಟಿರ‍್ಹುತೆ ಆಲಿವ್ ಝಾ಼ಡ್‌ನಿ ಡಾಳಿಯೆ ಟುಟಿಗಯು, ಅಜು಼ ಝಾ಼ಡಿನು ಆಲಿವ್ ಝಾ಼ಡ್‌ನಿ ಡಾಳೀನಿಘೊಣಿ ಹುಯಿರೋತೆ ತುನ ಇನಿ ಝ಼ಗೋಮ ಖಶಿ ಭಾಂದಿರಾಖಾತೆ ಯೋ ಖ್ಹಾಚ ಆಲಿವ್ ರಖ್ಹ್‌ನಿ ಜ಼ಡ್‌ಮ ಯೋ ಭಾಗ್‌ಲೀರಾಖ್ಯುತೊಬಿ ಯೋ ಡಾಳಿಯೇವ್‌ನ ಮ್ಹೇಲಿನ್ ತುನ ಚಿಕಾವನ ಉಪ್ಪರ್ ತೂ ಡಾಳಿನಿಬಾರೇಮ ಭಡೈಲೆನಕೊ. 
\v 18 ಭಡೈಲಿದೋತೊ, ತೂ ಯೋ ಜ಼ಡ್ನ ಆಧಾರ್‌ಕಾಹೆ. ಯೋ ಜ಼ಡ್‌ ತುನ ಆಧಾರ್ ಹುಯಿರ‍್ಹಿಶೆ ಎತ್ರೇಸ್. 
\v 19 ಇಮ್‍ಕತೊ ತೂ, “ಖಶಿ ಭಂದಾವನಿತರ ಥೋಡು ಡಾಳಿಯೆ ಟುಟಿಗೈಯೇ.” ಕರಿ ಬೋಲಿಶ್. 
\v 20 ಯೊ ಬರೋಬರ್, ಕತೋಬಿ ಇವ್ಣೆ ವಿಶ್ವಾಸ್‌ಕೊಂತೆ ಟುಟಿಗಯು. ತೂತೋಬಿ ವಿಶ್ವಾಸ್‍ಥಿ ಭಿಯೋಸ್. ಹಂಕಾರ್ ನಕೊಕರ್ತೆ ಡರ್‌ರ‍್ಹವಾದೆ. 
\v 21 ಶನಕತೊ ದೇವ್ ಪೈದಾಖ್ಹ್‌ನಿ ಡಾಳಿಯೇನಸ್ ಬಚಾ಼ಡ್ಯೊ ಕೊಯ್ನಿಕತೊ ತುನಾಬಿ ಬಚಾ಼ಡ್‌ಶೆ ಕೊಯ್ನಿ. 
\v 22 ಇನಖ್ಹಾಜೆ ದೇವ್ನಿ ಗೋರ್‌ನಾಬಿ, ನಿಶತ್ನಾಬಿ ದೇಕ್. ಪಟ್ಕಿಜಾ಼ವಳಾನ ಇನಿ ನಿಶತ್‌ ಮಳ್‍ಶೆ. ತೂ ಇನಿ ಗೋರ್‌ಮ ಭಡವಾಳೊ ಉಷೇತೊ, ತಾರಪರ್ ದೇವ್ನಿ ಗೋರ್‌ ವತಾಳ್‌ಶೆ. ನಾಹುಯುತೊ, ತೂ ಜಿನುಬಿ ಟುಟಿಜೈಶ್. 
\v 23 ಇವ್ಣೆಜಿನೂಬಿ ಬಿಜೂ಼ಬಿ ಅವಿಶ್ವಾಸ್‌ಮ ಭಡ್ಯುನಾತೊ ಖಶಿ ಭಂದೈಜಾ಼ಶೆ. ಶನಕತೊ ಇವ್ಣುನ ಬಿಜು಼ಪಾಚು಼ ಖಶಿಭಂದಾವನ ದೇವ್ ತಾಖತ್‌ವಾಳೊ ಹುಯಿರ‍್ಹೋಸ್. 
\v 24 ಕಿಮ್ ರ‍್ಹಯುತೋಬಿ ಝಾ಼ಡಿನು ಆಲಿವ್ ಝಾ಼ಡ್‌ಥಿ ಅಛ್ಛು಼ ಝಾ಼ಡ್‌ನು ಡಾಳಿಯೇಹುವಾನು ಮಾಮುಲಿ ಕಾಹೆ. ಕತೋಬಿ ಯೆಹೂದ್ಯ ಕಾಹೆತೆ ತುಮೆ ಝಾ಼ಡಿನು ಆಲಿವ್‌ಝಾಡ್‍ಥಿ ಕತ್‍ರೈಹುಯು ಡಾಳಿಯೇರ‍್ಹೀನ್ ಅಛ್ಛು಼ ಆಲಿವ್ ಝಾ಼ಡ್‌ಣ ಖಶಿ ಭಂದೈರ‍್ಹಾಸ್. ಯೆಹೂದ್ಯರ್‌ತೊಬಿ ಅಛ್ಛು಼ ಆಲಿವ್ ಝಾ಼ಡ್ಮ ಫುಟಿಹುಯಿ ಡಾಳಿಯೆ. ಇನಖ್ಹಾಜೆ ಇವ್ಣೆ ಇವ್ಣ ಶೊಂತ್ ಝೂ಼ಂಡ್‌ನ ಪಾಛು಼ ಮಳಿಜಾ಼ವಾನು ಘಣು ಶುಲ್ಬ ಹುಯಿರ‍್ಹಿಶೆ.
\s ಅಖ್ಖಾಸ್‌ಪರ್ ದೇವ್ನಿ ದಯ
\p
\v 25 ಭೇನೆ ಭೈಯೇವೊ, ಏಕ್‌ ಗಪ್ಲತ್‌ನಿ ವಾತೆ ಖ್ಹಾಚು಼ಛಾ಼ ಇನ ತುಮೇಬಿ ಖ್ಹಮಜ಼್‌ಣುಕರಿ ಆಖ್ಹ್‌ಕರುಸ್. ಶನಕತೊ ತುಮೆ ಕೆತ್ರೆ ಅಕ್ಲಿ ಹುಯಿರಾಸ್‍ಕರಿ ಮಾಲುಮ್ ಹುವಾಸ್. ಯೋ ಶಾತ್‍ಕತೊ, ಯೆಹೂದ್ಯರ್‌ಕಾಹೆತೆ ಅದ್ಮಿಯೇವ್‍ ದೇವ್‌ಕನ ಆವಾಲಗು ಖಲಿ ಇಸ್ರಾಯೇಲ್‌ವಾಳ ಅದ್ಮಿ ಇವ್ಣ ದಿಲ್ನ ಕಠಣ್ ಕರಿರಾಖಸ್. 
\v 26 ಅಮ್ ಧರ್ಮಶಾಸ್ತ್ರಮ ಲೀಖೈರ‍್ಹುತೆ ಪರಕ್, ಇಸ್ರಾಯೇಲ್‌ವಾಳು ಖ್ಹಾರು ರಕ್ಷಣೆ ಲಿಶೆ, “ಛುಟ್ಕಾರ್ ದ್ಯವಾಳೊ ಚೀಯೋನ್‍ಥಿ ಆವ್‌ಶೆ, ಯೋ ಯಾಕೋಬವಾಳಾನ ಖೂಮ್‍ಥಿ ದುಷ್ಟಬುದ್ದಿನ ಕಾಡಿನಾಕ್‌ಶೆ.\x - \xo 11:26 \xo*\xt ಯೆಶಾಯ 27:9—43:25\xt*\x* 
\v 27 “ಮೇ ಇವ್ಣಿ ಜೋ಼ಡ್ಮ ಕರ‍್ಯೊತೆ ಒಪ್ಪಂದ ಇವ್ಣ ಪಾಪ್ನ ಮೆ ಕಾಡಿನಾಖನಿ ವಖ್ಹ್‌ತೆ ಪೂರಉಷೆ” 
\v 28 ಶನಖ್ಹಾಜೆಕತೊ ಇವ್ಣೆ ಸುವಾರ್ತೆನ ಝಿಟ್ಕಾರ‍್ಯು, ಅಜು಼ ಯೆಹೂದ್ಯರ್ ಕೊಂತೆ ಇವ್ಣೆ ತುಮಾರೇಥಿ ದೇವ್ನ ವಿರೋದಿಹುಯು. ಕತೋಬಿ ದೇವ್ನಿ ಚು಼ನಾವ್ಣಿನಿ ಕಾರಣ್‍ಥಿ ಇವ್ಣೆ ಇನ ಪ್ಯಾರ್‌ವಾಳ ಹುಯಿರಾಸ್,ಇನ ಪಿಳ್ಗಿವಾಳು ಕಾರಣ್‍ಹುಯಿರ‍್ಹುಸ್. 
\v 29 ಶನಕತೊ ದೇವ್ ವರಾನ ದಿದೋತೆ ಇನಖ್ಹಾಜೇಬಿ, ಅದ್ಮೆವ್‍ನ ಬುಲಾಯೋತೆ ಇನಖ್ಹಾಜೇಬಿ ದಿಲ್‌ಬದ್ಲಾವವಾಳೊ ಕಾಹೆ. 
\v 30 ಏಕ್‌ ಹಗಾಮ್ಮ ತುಮೆ ಇನ ವಿಧೇಯ ಕೋಹುಯಿರಾಥಾನಿ. ಇವ್ಣು ಅವಿಧೇಯತೆಥಿ ತುಮೆ ಹಮ್ಕೆ ದೇವ್ನಿ ದಯಾ ಲೀರಾಖ್ಯಾಸ್, 
\v 31 ಇಮ್ನಿಸ್ ಪರಕ್ಮ ಇವ್ಣೆ ಹಮ್ಕೆ ಅವಿಧೇಯ ಹುಯುತೋಬಿ ತುಮೂನ ಕಿಮ್ ಗೋರ್‌ ವತಾಳ್ಯೊಕಿ ತಿಮ್ಮಸ್ ಹಮ್ಕೆ ಇವ್ಣುನ ಗೋರ್‌ ವತಾಳವಾಳೊ ಹುಯಿರ‍್ಹೋಸ್. 
\v 32 ದೇವ್ ಯೋಖ್ಹಾರಾನ ದಯ ವತಾಳನಖ್ಹಾಜೆ ಖ್ಹಾರಾನ ಅವಿಧೇಯತೆಮ ಭಾಂದಿರಾಖ್ಯೋಸ್.
\s ದೇವ್ನ ಧನ್ಯವಾದ್ ಹುವಾದೆ
\p
\v 33 ಆಹಾ! ದೇವ್ನಿ ಗ್ಯಾನ್, ಅಕ್ಕಲ್‌ನು ಧನ್‍ದೌಲತ್ ಕೆತ್ರೆ ಗಧಾರ್‌ನು! ದೇವ್ನು ನ್ಯಾಯತೀರ್ಪ್‌ನ ಕೋಣ್‌ಬಿ ಛೋ಼ಡಿವತಾಳನ ಹುವಾಕೊಯ್ನಿ. ಇನ ಮಾರಗ್‌ನ ಢೂಂಡಿಕಾಡನ ಕಿನೇಥೀಬಿ ಹೋಯಿಕೊಯ್ನಿ! 
\v 34 ಪವಿತ್ರ ದಪ್ತರ್‌ಮ ಲೀಖೈರುತೆ ತಿಮ್ ಪ್ರಭುನ ದಿಲ್ನ ಮಾಲುಮ್ ಕರಾವಾಳೊ ಕೋಣ್? ನತರ್ ದೇವ್ನ ಅಮ್ಮಸ್ ಕರ್ನುಕರಿ ಬೋಲಿವತಾಳವಾಳು ಕೋಣ್? 
\v 35 ದೇವ್‍ಥಿ ಪಾಛು಼ ಮಾಂಗಿಲ್ಯವಾನ ಇನ ದಿರಾಖವಾಳೊ ಕೋಣ್? 
\v 36 ಶನಕತೊ ದೇವ್‍ಥಿ ತಮಾಮ್‍ನಾಸ್ ಉಬ್ಜಿರ‍್ಹುಸ್.ಖ್ಹಾರುಸ್ ಇನೇಥಿಸ್ ಇನಖ್ಹಾಜೇಸ್ ರ‍್ಹೇಸ್. ದೇವ್ನ ಜ಼ಗ್‌ಜ಼ಮಾನಮಾಬಿ ಮಹಿಮೆಹುವಾದೆ! ಆಮೆನ್.
\c 12
\s ದೇವ್ನಿ ಸೇವೆಮ ಜಿವ್ಣು
\p
\v 1 ಇನಖ್ಹಾಜೆ ಭೇನೆ, ಭೈಯೇವೊ, ದೇವ್ನಿ ಗೋರ್‌ಥಿ ಗಿಂಗೈಲ್ಯವಾನು ಶಾತ್‍ಕತೊ, ತುಮಾರು ತುಮೇಸ್ ಶರೀರ್‌ನ ದೇವ್ನ ಪರಿಶುದ್‌ಬಿ ಖ್ಹರಾವ್ಣಿತರಾಬಿ ಹುಯಿರ‍್ಹವಾನು ಜಿವ್‌ತಜಾನ್ನ ಬಲಿದೀನ್ ಸಮರ್ಪಣ್‌ಕರೊ. ಆಸ್‌ತುಮೆ ದೇವ್ನಕರಾನಿ ಖ್ಹಾಚಿ ಆರಾದನೆ, 
\v 2 ಆ ಜಗತ್‌ವಾಳು ಚಾ಼ಲ್ ಚ಼ಲಣ್ಣಾ ನಾ ಪಾಡಿಚಾ಼ಲ್ನುತೆ ನವ ದಿಲ್‌ಥಿ ಬದ್ಲಿನ್ ಪರಲೋಕ್‌ನ ಖ್ಹಯಾಲ್‌ವಾಳ ಹುಯಿ‍ರ‍್ಹೆವೊ. ಅಮ್ ರ‍್ಹಿಯಾತೊ ದೇವ್ನ ಪರ್ಖಿನ್‌ ಅಛ್ಛಾ಼ನಾಬಿ, ಇಷ್ಟರ‍್ಹವಾನುಬಿ ಕಳಂಕ್‌ ಕೊಂತೇಬಿ ಖಿವುಕರಿ ಮಾಲುಮ್‌ ಕರ‍್ಲಿಶು. 
\v 3 ದೇವ್ನೆ ಮನ ಕೃಪಾಥಿ ದೀರಾಖ್ಯೋತೆ ಸೇವೆನಖ್ಹಾಜೆ ತುಮಾರಮ ಹರೇಕ್ ಜ಼ಣಾನ ಮೇ ಬೋಲಾನು ಶಾತ್‍ಕತೊ, ತುಮಾರಿ ಲ್ಹಾಯೇಕ್‌ನ ಮೀರಿನ್ ತುಮೆ ಸೋಚ್ನುನಾತೆ ದೇವ್ ಏಕೇಕ್‌ ಜ಼ಣಾನ ಕಿಮ್‌ಕಿಮ್‌ನು ವಿಶ್ವಾಸ್‌ನಿ ತಾಖತ್ನ ದೀರಾಖ್ಯೊಸ್ಕಿ ಇವ್ಣಿ ಬಾರೇಮ ಬರೋಬರ್‌ಥಿ ಮಾಲುಮ್‌ಕರಿರಾಖದೆ. 
\v 4 ತುಮಾರಮ ಹರೇಕ್ ಜ಼ಣಾನಾಬಿ ಕೈಏಕ್ ಭಾಗ್‍ಥಿ ಏಕ್‌ ಶರೀರ್ ಮಳ್ಯುಹುಯು ಹುಯಿರ‍್ಹಾಸ್. ಅಜು಼ ಕಿಮ್ ಆ ಆಖ್ಖಾ ಭಾಗ್ನಾಬಿ ಎಕ್ಕಸ್‍ಕಾಮ್ ಕೊ ರ‍್ಹೆಯ್ನಿಕಿ, 
\v 5 ಯೋಸ್ ಪರಕ್ಮ ಕೈಯೇಕ್‍ಜ಼ಣ ಹುಯಿರಾತೆ ಅಪ್ಣೆ ಕ್ರಿಸ್ತಮ ಎಕ್ಕಸ್ ಶರೀರ್ ಹುಯಿರ‍್ಹಿಯೇಸ್. ಅಜು಼ ಅಪ್ಣೆ ಅಖ್ಖಾ ಎಕ್ಕಸ್ ಶರೀರ್‌ನ ಭಾಗ್‍ಹುಯಿರ‍್ಹೆಯೇಸ್. 
\v 6 ದೇವ್ ಅಪ್ಣುನ ಕೃಪೆ ಕರ‍್ಯೊತೆ ಇಮ್‌ ಅಪ್ಣೆ ಅಲಕ್ ಅಲಕ್ ವರಾನ ಲೀರಾಖ್ಯಸ್. ಏಕ್‍ಜ಼ಣಾನ ಪ್ರವಾದನೇನು ಪರಕ್‌ ಹುಯಿರ‍್ಹುತೊ, ಇನ ಇನು ವಿಶ್ವಾಸ್‍ನಿಮತ್‌ ಬೋಲಾದೆ. 
\v 7 ಯೊ, ಸೇವೆಕರವಾಳೊ ಉಶೇತೊ, ಸೇವೆ ಕರ‍್ವಾದೆ. ಇನ ಶಿಕಾಡನು ವರ ಉಶೇತೊ ಯೊ ಶಿಕಾಡಿದ್ಯವಾದೆ. 
\v 8 ಯೊ ಹುಮ್ಮಖ್ಹ್‌ ದೆವಾಳೊ ಉಷೇತೆ, ಹುಮ್ಮಖ್ಹ್‌ ದ್ಯವಾದೆ. ಧರಮ್ ದ್ಯವಾನು ವರ ಉಷೇತೊ ಯೋ ಛು಼ಟಾದಿಲ್‍ಥಿ ದ್ಯವಾದೆ. ಅದಿಕಾರಿ ಉಶೇತೊ, ಯೋ ನಿಯ್ಯಥ್ಥಿ ಚಾ಼ಲದೆ, ಗೋರ್‌ ವತಾಳವಾಳೊ, ಇನ ಖುಷಿಥಿಬಿ ಕರಾದೆ. 
\v 9 ತುಮಾರಿ ಪ್ಯಾರ್ ಪಾಕ್‌ ದಿಲ್‌ಥಿ ರ‍್ಹವಾದೆ. ಖರಾಬ್‍ಕಾಮ್ನ ವಹೇರ್‌ಕರೀನ್, ಅಛ್ಛಾ಼ನ ಧರಿರಾಖೊ. 
\v 10 ವಿಶ್ವಾಸಿ ಭೇನ್ ಭೈಯೇನ ಏಕ್‌ಥಿಏಕ್ ಪ್ಯಾರ್ ಕರೊ, ಮರ್ಯಾದಿ ದ್ಯವಾಮ, ಏಕ್‌ಥಿಏಕ್‌ ಖ್ಹಾಮೆರ‍್ಹೇವೊ. 
\v 11 ಮ್ಹಿನತ್ ಕರೀನ್ ರಾಬೊ ವಳ್‍ಶಿ ನಕೊಖಾವೊ. ತುಮಾರ ಹುಮ್ಮಖ್ಹ್‌ನ ಮನ್‌ಥಿ ಪ್ರಭುನಿ ಸೇವೆಕರೊ. 
\v 12 ಕ್ರಿಸ್ತವಾಳು ಭರೋಖ್ಹಾನಿ ಮಹಾ ಇನಾಮ್ನ ಖ್ಹಯಾಲ್ ಕರೀನ್ ಖುಷಿಥಿರ‍್ಹವಾಳಾಬಿ, ಖ್ಹತಾಪ್ಣಿಮ ಖ್ಹಮಾಳಿಲ್ಯಾವಾಳಾಬಿ, ಅಖ್ಖಿ ವೇಳ್ಮ ಘಟ್‍ದಿಲ್‌ಥಿ ಪ್ರಾರ್ಥನೆ ಕರ್ತರ‍್ಹೇವೊ. 
\v 13 ಜ಼ರೂರತ್ ರ‍್ಹವಾಳ ದೇವ್ನ ಅದ್ಮಿನಿ ಜೋ಼ಡ್ಮ ತುಮಾರಕನ ಛಾ಼ತೆ ಇನಾಮ ಮದತ್ ಕರೊ, ಮ್ಹೇಮಾನ್ನ ಘರ್‌ಮ ಬುಲೈನ್ ಉಪಚಾರ್ ಕರೊ, 
\v 14 ತುಮೂನ ಖ್ಹತಾವವಾಳನ,ದೇವ್‌ಕನ ಆಶೀರ್ವಾದ್‌ ಕರೊ ಶಾಪ್ ನಕೊದೆವೊ. 
\v 15 ಖುಷಿಕರವಾಳನಿ ಜೋ಼ಡ್ಮ ಖುಷಿಕರೊ. ರೋವವಾಳಾನಿ ಜೋ಼ಡ್ಮ ರೋವೊ. 
\v 16 ಏಕ್‌ಥಿಏಕ್ ಎಕ್ಕಸ್ ದಿಲ್‌ವಾಳ ಹುಯಿರ‍್ಹೇವೊ. ತುಮೆ ದಿಲ್ಮ ಹಂಕಾರಿ ನಾ ರ‍್ಹೇವ್ಣುತೆ, ಅಖ್ಖಾನಿ ಜೋ಼ಡ್ಮ ಮಳಿನ್ ರ‍್ಹವೊ. ತುಮೇಸ್ ಅಕ್ಲಿಕರಿ ನಕೊಲ್ಹಾವೊ. 
\v 17 ಏಕ್‌ ಹಲ್ಲ ಕೋಣ್ ತೋಬಿ ತುಮಾರ ಜೋ಼ಡೆ ಖರಾಬ್ ಚಾ಼ಲ್‌ಥಿ ಚಾ಼ಲಿಲಿದುತೊ ಬದಲ್ ಖರಾಬ್ ನಕೊಕರೊ. ಖ್ಹಾರಾನಿ ನಜ಼ರ್‌ಮಾಬಿ ಮರ್ಯಾದಿಥಿ ಶಾತ್‌ ಛಾ಼ಕಿ ಇನಾಸ್ ಕರೊ. 
\v 18 ತುಮೂನ ಹುವಾಯೆತ್ರೆ ಖ್ಹಾರಾಸ್‍ನಿ ಜೋ಼ಡ್ಮ ಸಮಾಧಾನ್‌ಥಿ ರ‍್ಹವೊ. 
\v 19 ಮಾರ ಪ್ಯಾರ್‌ನ ದೋಸ್ತಿವೊ, ಬದಲ್‌ನ ಬದಲ್ ನಾಕಾಡ್ನುತೆ, ಇನ ದೇವ್ನ ಇರಾದಕನ ಮ್ಹೇಲಿದೆವೊ. ಶನಕತೊ, “ಫೇಡವಾನು ಮಾರು ಕಾಮ್. ಮೇಸ್ ಪ್ರತಿಫಲ್‌ ದಿಶ್ ಕರಿ ಪ್ರಭು ಬೋಲಿರಾಖ್ಯಸ್‌ಕರಿ ಪವಿತ್ರ ಪುಸ್ತಕ್‌ಮ ಲಿಖೈರ‍್ಹುಸ್. 
\v 20 ಕತೋಬಿ,ಪವಿತ್ರ ಪುಸ್ತಕ್ ಅಮ್ ಬೋಲಸ್ಕಿ, “ತುಮಾರು ವಹೇರ‍್ಯು ಭುಕ್ಯು ಆಯೂತೊ ಇನ ಖಾಣುದೆ. ಯೋ ತರಖ್ಹಿಗಯೊ ಉಶೇತೊ ಪಿಯಾನ ದೇ. ಅಮ್‍ಕರಾಥಿ ಇನ ಖ್ಹರಮ್‍ಥಿ ಇಂಗಾಠೊ ಪಡಾಖ್ಹರ್ಕು ಉಷೆ.” 
\v 21 ಖರಾಬ್‍ಫನೈಥಿ ನಕೊ ಹರಿಜಾ಼ವೊ. ಖರಾಬ್ ಫನೈನ ಅಛ್ಛಾ಼ಥಿ ಜೂತಿಲೇವೊ.
\c 13
\s ಅಧಿಕಾರಿನ ಬಾರೇಮ ಅಪ್ಣು ಕಾಮ್
\p
\v 1 ಹರೇಕ್‍ಜ಼ಣುಬಿ ಇನ ಉಪ್ಪರ್‌ಲ್ಯ ಅಧಿಕಾರಿಯೇನ ಅಧೀನ್ ಹುಯಿರ‍್ಹೇಣು; ಶನಕತೊ ದೇವ್‍ಥಿ ಪಣ್ಕಿ ಏಕ್‍ಜ಼ಣಾನಬಿ ಅದಿಕಾರ್ ರ‍್ಹೇಯಿಕೊಯ್ನಿ; ಛಾ಼ತೆ ಅದಿಕಾರ್ ದೇವ್‍ಥೀಸ್‍ ಆಯಿರ‍್ಹುಸ್. 
\v 2 ಇನಖ್ಹಾಜೆ ಅದಿಕಾರ್‌ನ ವಿರೋದ್ ಹುವವಾಳು ಅದ್ಮಿ ಖ್ಹಾಚಮಾಸ್ ದೇವ್ನಿ ನಿಯಮ್ನಾಸ್ ವಿರೋದ್ ಹುಯಿರ‍್ಹುಸ್. ಖ್ಹರ್ಕಾರ್‌ನ ಖ್ಹಾಮ್ಣೆ ಹುವವಾಳು ಇನುಯೋಸ್ ನ್ಯಾಯತೀರ್ಪ್‌ ಲೀಲೇಸ್. 
\v 3 ಶನಕತೊ ಖರಾಬ್‌ನ ಕರಾವಾಳನ ಅದಿಕಾರಿಯೇವ್‍ನು ಡರ್‌ರ‍್ಹೇಸ್ ಪಣ್ಕಿ, ಅಛ಼್ಛು ಕರವಾಳನ ಕಾಹೆ. ಅದಿಕಾರಿಯೇಥಿ ತೂ ಡರ್‌ಕೊಂತೆ ರ‍್ಹವಾನು ಆಖ್ಹ್‌ಕರಸ್‍ಕಿ ಶು? ಅಛ಼್ಛನಕರ್. ತದೆ ಇವ್ಣೇಥಿ ತುನ ಖ್ಹರಾವ್ಣಿ ಮಳ್‍ಶೆ. 
\v 4 ಶನಕತೊ ಯೋ ತುನ ಅಛ಼್ಛು ಕರಾನಖ್ಹಾಜೆ ಛಾ಼ತೆ ದೇವ್‌ನೊ ಸೇವಕ್ ಹುಯಿರ‍್ಹೋಸ್. ಕತೋಬಿ ತೂ ಖರಾಬ್ನ ಕರಾವಾಳೊ ಹುಯಿರ‍್ಹೋತೆ ಡರಿನ್ ರ‍್ಹೇಣು. ಕತೋಬಿ ಯೋ ಚುಪ್ಕೆ ಅದಿಕಾರ್ ಅದಿಕಾರ್‌ನೊ ಡಂಡೊ ಧರಿರಾಖ್ಯೊಕೊಯ್ನಿ. ಯೋ ದೇವ್‌ನೊ ಸೇವಕ್ ಹುಯಿರ‍್ಹಿನ್ ಖರಾಬ್‌ನ ಕರವಾಳಾನ ದೇವ್ನಿನಿಶತ್‍ ದೇಸ್. 
\v 5 ಇನಖ್ಹಾಜೆ ಖಲಿ ದೇವ್ನಿ ನಿಶತ್ನಖ್ಹಾಜೆಕರಿ ಕಾಹೆ, ದಿಲ್ನಿಸಾಕ್ಷಿನಖ್ಹಾಜೇಬಿ ಅಧಿಕಾರಿಯೇನ ಅಧೀನ್‍ ಹುಯಿರ‍್ಹವಾನು ಜ಼ರೂರತ್ ರ‍್ಹೇಸ್, 
\v 6 ಅನಖ್ಹಾಜೆಥೀಸ್ ತುಮೆ ಶುಂಕ ದೆವ್‌ಕರಾಸ್. ಶನಕತೊ ಅಧಿಕಾರಿಖ್ಹಾರು ದೇವ್ನ ಸೇವಕ್ ಹುಯಿರ‍್ಹಿನ್ ಯೋ ಕಾಮಸ್‌ ಕರಾವಾಳ ಹುಯಿರೇಸ್. 
\v 7 ತುಮೆ ಕಿನಶಾತ್‍ ದೇವ್ಣುಕಿ ಯೋ ದೇವೊ, ಕಿನ ಕಂದಾಯಕಿ ಇನ ಕಂದಾಯ ದೇವೊ, ಕಿನ ಶುಂಕಕಿ ಇವ್ಣುನ ಶುಂಕದೆವೊ. ಅಜು಼ ಕಿನ ಡರ‍್ನುಕಿ ಇನ ಡರೊ, ಕಿನ ಅಧೀನ್‌ಕಿ ಇನ ಅಧೀನ್ ರ‍್ಹವೊ, ಕಿನ ಮರ್ಯಾದಿಕಿ ತಿನ ಮರ್ಯಾದಿ ದೆವೊ.
\s ಅಪ್ಣಿ ಜೋ಼ಡ್ಮ ಏಕ್‌ಥಿಏಕ್ ಜಿಮ್ಮೇದಾರ್
\p
\v 8 ಏಕ್‌ಥಿಏಕ್ ಪ್ಯಾರ್‌ಕರ‍್ನುಕರಿ ಬೋಲಾನು ಕರಜ಼ಸ್ ಪಣ್ಕಿ ತುಮೂನ ಬಿಜು಼ ಖೆವು ಕರಜ಼್ ನಾರ‍್ಹೇವ್ಣು. ಶನಕತೊ ಬಿಜೇಕ್‍ಜ಼ಣಾನ ಪ್ಯಾರ್ ಕರಾವಾಳೊ ಧರ್ಮಶಾಸ್ತ್ರನಸ್ ಚ಼ಲೈರಾಖ್ಯೊಸ್. 
\v 9 ಶನಕತೊ “ವ್ಯಬಿಚಾರ್‌ನಾಕರ‍್ನು, ಖೂನ್‌ನಾಕರ‍್ನು, ಚೋ಼ರ್‌ನಾಕರ‍್ನು, ಬಿಜೇಕ್‌ಜ಼ಣಾನಿ ಶೊತ್ನ ಆಖ್ಹ್‌ನಾಕರ‍್ನು” ಆ ಅಖ್ಖಿ ಹುಕುಮ್ ಅಖ್ಖು, “ತಾರ ಭೀಡೆವಾಳಾನ ತಾರಿನಿತರಸ್‍ ಪ್ಯಾರ್ ಕರ‍್ನು!” ಕರಿ ಬೋಲಾನಿ ಎಕ್ಕಸ್ ಹುಕುಮ್ಮ ಲಪಿರ‍್ಹೂಸ್. 
\v 10 ಪ್ಯಾರ್ ಇನ ಭೀಡೆವಾಳನ ಖಿವು ಕೇಡ್ ಕರಾಕೊಯ್ನಿ. ಇನಖ್ಹಾಜೆ ಪ್ಯಾರ್ ಧರ್ಮಶಾಸ್ತ್ರನ ಭರ್‌ಪೂರ್‌ ಹುಯಿರ‍್ಹುಸ್. 
\v 11 ಹಮ್ಕೇನ ಹಗಾಮ್ನ ಖ್ಹಮ್‌ಜಿನ್‌ ಆ ಅಖ್ಖು ಕರ‍್ನು. ತುಮೆ ನಿಂದರ್‌ಥಿ ಹೊಷಾರ್‌ಹುವಾನಿ ಘಡಿಹುಯಿರ‍್ಹೀಸ್. ಶನಕತೊ ಅಪ್ಣಿ ರಕ್ಷಣೆ, ಅಪ್ಣೆ ಪಹಿಲೆ ಕ್ರಿಸ್ತನ ವಿಶ್ವಾಸ್‍ಕರ್‌ಥಾತೆ ಇಂಥೀಬಿ ಹಮ್ಕೆ ಛುಟ್ಕಾರ್‌ನ ಹಗಾಮ್‌ ಖನ್ನೆ ಹುಯಿರ‍್ಹೀಸ್. 
\v 12 ಘಣೇಥಿ ರಾತ್ ನಿಕ್ಳಿಜೈ಼ನ್ ವ್ಹಾಣು ಖನ್ನೆ ಅಯಿಗು. ಇನಖ್ಹಾಜೆ ಅಪ್ಣೆ ಅಂಧಾರನು ಖ್ಹಾರು ಕಾಮ್ನ ಫೇಕಿನ್ ಉಜಾ಼ಳಾಮ ಜಂಗ್ ಭೀಡಾನು ಕಫ್ಫನ್ನ ಫೆರ‍್ಹಿಲಿಯೆ. 
\v 13 ಫಾಯಿದೊಕೊಂತೆ ಮಿಝ಼್‌ವಾನ್, ಪೀನ್ ನಿಶಾಚ಼ಡೈಲ್ಯವಾನು ಅಪ್ಣ ಶರೀರ್ ಸಂಬದ್‌ಥಿ ಕರಾನು ಪಾಪ್, ಲಡೈಝ಼ಗ್‍ಡೊ, ಪೇಟ್ನೊ ಬಳಾಪೊ ಆ ಖ್ಹಾರೇಥಿ ದೂರ್‌ಹುಯಿನ್ ಉಜಾ಼ಳಮ ರ‍್ಹಾವಾಳನಿತರ ಚಾ಼ಲಿಲಿಯೆ. 
\v 14 ಶರೀರ್‌ನ ಆಖ್ಹ್‌ನ ಚ಼ಲಾವನಖ್ಹಾಜೆ ನಕೊಸೋಚೊತೆ. ಪ್ರಭು ಕ್ರಿಸ್ತ ಯೇಸುನ ಕಫ್ಪನ್ನ ಫೆರಿಲೆವೊ.
\c 14
\s ಬಿಜೇಕ್‍ಜ಼ಣಾನ ತೀರ್ಪ್‌ನಕೊ ಕರೊ.
\p
\v 1 ವಿಶ್ವಾಸ್‌ಮ ಕಮ್‍ಜೋ಼ರಿ ರ‍್ಹವಳಾನ ತುಮಾರಿ ಝೂ಼ಂಡ್‌ಮ ಮಳೈಲೇವೊ. ಕತೋಬಿ ಇವ್ಣಿ ಶೊಂತ್‍ ಖ್ಹೂಜ಼್‌ನಿ ಬಾರೇಮ ಅಬ್ಬಾಜ಼ಬ್ಬಿ ನಕೊ ಕರೊ. 
\v 2 ಅಜು಼ ಏಕ್‍ಜ಼ಣಾನಿ ವಿಶ್ವಾಸ್ ಖ್ಹಾರುಸ್ ಥರಾನು ಖಾಣುಖಾವಾನಿತರ ಕರಸ್. ಕತೋಬಿ ವಿಶ್ವಾಸ್‌ಮ ಕಮ್‍ಜೋ಼ರಿ ರ‍್ಹವಾಳು ಭಾಜಿಪಾಲೊ ಖಾವಾಳೋಸ್ ಹುಯಿರ‍್ಹೇಸ್. 
\v 3 ಇನಖ್ಹಾಜೆ ಬೋಟಿ ಖಾವವಾಳೊ ಖಾಯಿಕೊಂತೆ ಇನ ನಕ್ಲೆ ನಕೊ ಕರಾದೆ. ಭಾಜಿಪಾಲೊ ಖಾವಾಳೊ ಬೋಟಿ ಖಾವವಾಳನ ತೀರ್ಪ್‌ನಕೊಕರಾದೆ. ಶನಕತೊ ದೇವ್ ಇವ್ಣ ಭೇಜ಼ಣಾನ ಮಳೈರಾಖ್ಯೊಸ್. 
\v 4 ಬಿಜೇಕ್‍ಜ಼ಣ ಸೇವಕ್‌ನ ತೀರ್ಪ್‌ಕರಾನ ತೂ ಕೋಣ್? ಯೋ ಘಟ್‍ಥಿ ಭಿಯೋತೋಬಿ ರಡ್‍ಕ್ಯೊತೋಬಿ ಯೋ ಇನ ಯಜಮಾನ್ನ ಶೇರಾಸ್. ಶನಕತೊ ಇನ ಘಟ್ ಭೀರಾವಾನಿತರ ಕರಾನ ಪ್ರಭು ಶಕತ್‌ವಾಳೊ ಹುಯಿರೋಸ್. 
\v 5 ಏಕ್‍ಜ಼ಣೊ ಏಕ್‍ದನ್ನ ಬಿಜೇಕ್ ದನ್‍ಥಿ ವಿಶೇಷ್‍ಕರಿ ಗಣ್ತಿ ಕರಸ್. ಬಿಜೇಕ್‍ಜ಼ಣೊ ಖ್ಹಾರಾಸ್‍ದನ್ನ ಎಕ್ಕಸ್‍ಕರಿ ಖ್ಹೂಜ಼್‌ ಕರಸ್. ಹರೇಕ್ ಜ಼ಣುಬಿ ಇನಶೊಂತ್ ದಿಲ್ಮ ಕಲಾವ್ಣಿನಾ ಕರ್ನುತೆ ತಿಮ್ ರ‍್ಹವಾದೆ. 
\v 6 ಏಕ್‍ದನ್ನ ವಿಶೇಷ್‍ಕರಿ ಸೋಚವಾಳು ಯೋ ಪ್ರಭುನ ಮರ್ಯಾದಿನಖ್ಹಾಜೆ ಕರಿ ಲಾಝ಼ದೆ. ಅಖ್ಖೂಸ್ ಖಾವವಾಳೊ ದೇವ್ನ ಧನ್ಯವಾದ್‍ಕರೀನ್ ಪ್ರಭುನ ಮರ್ಯಾದಿನ ಖ್ಹಾಜೆಸ್ ಖಾಸ್‌. ಅಖ್ಖೂಸ್ ನಾ ಖಾವವಾಳೊಬಿ ದೇವ್ನ ಧನ್ಯವಾದ್ ಕರಸ್. 
\v 7 ಅಪ್ಣಾಮ ಕೋಣ್‌ಬಿ ಇನಖ್ಹಾಜೆ ಬಚಾ಼ಕೊಯ್ನಿ. ಅಜು಼ ಇನಖ್ಹಾಜೆ ಮರಾಬಿಕೊಯ್ನಿ. 
\v 8 ಏಕ್‌ ವೇಳ್ ಬಚಿರ‍್ಹಾತೊ ಪ್ರಭುನಖ್ಹಾಜೆ ಅಪ್ಣೆ ಜಿವಿಯೇಸ್. ಮರ‍್ಯಾತೊ ಪ್ರಭುನಖ್ಹಾಜೆ ಮರ್‌ಯೇಸ್. ಅಮ್ ಅಪ್ಣೆ ಮರ‍್ಯಾತೊಬಿ ಜಿವ್‍ಯತ್ಯೊಬಿ ಪ್ರಭುನ ಮಳ್ಯಹುಯ ಹುಯಿರ‍್ಹಿಯೇಸ್. 
\v 9 ಶನಖ್ಹಾಜೆ ಕತೊ, ಜಿವ್ತು ರ‍್ಹವಳಾನಾಬಿ, ಮರಾವಳನಾಬಿ ಪ್ರಭು ಹುಯಿರ‍್ಹೇವ್ಣುಕರಿ ಕ್ರಿಸ್ತ ಮರೀನ್ ಜಿವಿಉಠ್ಯೊ. 
\v 10 ಅಮ್‍ರ‍್ಹವಾಪರ್, ನಾಖಾವಳೊ ತೂ ಶನ ತಾರ ಭೈನ ತೀರ್ಪ್‌ಕರಸ್? ಅಖ್ಖಾಸ್ನ ಖಾವಾಳೊ ತು ತಾರ ಜೋ಼ಡ್ಮ ರ‍್ಹವಾಳ ವಿಶ್ವಾಸಿನ ಶನ ಚಾ಼ವ್‌ಣ್ಯ ಕಾಡಸ್‌? ಅಪ್ಣೆ ಖ್ಹಾರುಸ್ ದೇವ್ನು ನ್ಯಾವ್‍ನಿ ಝ಼ಗೋನಖ್ಹಾಮ್ಣೆ ಭೀರಿಶು. 
\v 11 ಶನಕತೊ ಪವಿತ್ರ ದಪ್ತರ್‌ಮ ಅಮ್‍ ಬೋಲಾವಸ್, “ಮೇ ಖ್ಹಾಚಮಾಬಿ ಜಿವಿರ‍್ಹೋಸ್ತೆ ದೇವ್ ಹುಯಿರ‍್ಹೋಸ್ ಇನಖ್ಹಾಜೆ ಹರೇಕ್ ಜ಼ಣುಬಿ ಮಾರಖ್ಹಾಮ್ಣೆ ಢುಕ್‍ಣ್ಯಮಾಂಡ್‍ಶೆ. ಅಜು಼ ಹರೇಕ್ ಮ್ಹೋಡು ಮನ ದೇವ್‌ಕರಿ ಸ್ತುತಿಕರಿನ್ ಕಬೂಲ್‍ಶೆ. ಕರಿ ಪ್ರಭು ಬೋಲಸ್”.\x - \xo 14:11 \xo*\xt ಯೆಶಾಯ 45:23—49:18\xt*\x* 
\v 12 ಅಮ್‍ರ‍್ಹವಾಪರ್ ಅಪ್ಣಾಮ ಹರೇಕ್ ಜ಼ಣುಬಿ ಇವ್ಣಿ ಬಾರೇಮ ದೇವ್ನ ಗಣ್ತಿ ದೇವ್ಣು ಪಡಸ್.
\s ಏಕ್‍ಜ಼ಣು ಬಿಜೇಕ್‍ಜ಼ಣಾನ ರಡ್ಕಾನ ಕಾರಣ್ ನಕೊಹುವೊ
\p
\v 13 ಇನಖ್ಹಾಜೆ ಅಪ್ಣೆ ಏಕ್‌ನ ಉಪ್ಪರ್ ಏಕ್‌ ತೀರ್ಪ್‌ನಕೊ ಕರಿಯೆ. ಇನ ಬದಲ್ ಬಿಜೇಕ್ ಭೈನ ಖ್ಹಾಮೆ ಅಡ್ಡಿ ಹುವಾನು ಅಜು಼ ಪಾಪ್ನ ಕಾಮ್ಮ ನಾ ರಡ್ಕಾವ್ಣುತೆ ತಿಮ್ ಹುಯಿರಿಯೇ. 
\v 14 ಅಜು಼ ಖಿವೂಬಿ ರಾಛು಼ ಇನುಯೋಸ್ ಅಶುದ್ಧ ಕಾಹೆಕರಿ ಪ್ರಭು ಯೇಸುಮ ರ‍್ಹೀನ್ ಖ್ಹಚ್ಚೆಂಬಿ ಬೋಲುಸ್. ಕತೋಬಿ ಕೋಣ್‌ತೋಬಿ ಅಶುದ್ದಕರಿ ದಿಲ್ಮ ಕರ‍್ಯೊತೊ ಯೋ ಇನ ಅಶುದ್ಧ ಹುಯಿರ‍್ಹೂಸ್. 
\v 15 ತೂ ಖಾಣೇಥಿ ತಾರ ಭೈ ಭೇನ್ನ ಕಚಿಂಡ್ ಕರಾಯೋತೆ ತೂ ಪ್ಯಾರ್‌ಥಿ ಚಾ಼ಲಿಲೇಶ್‍ಕೊಯ್ನಿ. ತೂ ಖಾವಾಥಿ, ಕ್ರಿಸ್ತ ಕಿನಖ್ಹಾಜೆ ಮರ‍್ಯೋಕಿ ಇನ, ತೂ ಖಾವಾನ ಖಾಣಾನಖ್ಹಾಜೆ ಧೋಕ ನಾದೇವ್ಣು. 
\v 16 ಅಮ್ ತಾರ ಅಛ್ಛಾ಼ನಖ್ಹಾಜೆ ಕಾಹೆತೆ ಬಿಜೇಕ್‍ಜ಼ಣಾಥಿ ಖರಾಬ್ ಕರಿ ಬೋಲೈಲಿನ್ ಚಿಂಘಾವ್ಣಿ ನಕೊ ಕಡೈಲಿಶ್. 
\v 17 ಶನಕತೊ ಖಾವಪೀಯಾನು ದೇವ್ನು ರಾಜ್ಯ ಕಾಹೆ. ನೀತಿ, ಸಮಾಧಾನ್, ಪವಿತ್ರಾತ್ಮಮ ಛಾ಼ತೆ ಖ್ಹುಶಿಸ್ ಹುಯಿರ‍್ಹಿಸ್. 
\v 18 ಶನಕತೊ ಅಮ್ನಿ ಪರಕ್ಮ ಕ್ರಿಸ್ತನ ಸೇವೆಕರವಾಳೊ ದೇವ್‍ಥಿ ಪಸಂದ್‌ ಕರೈಲ್ಯವಾಳೋಬಿ, ಅದ್ಮೆವ್‍ನ ಅಛ್ಛು಼ ಕರವಾಳೊಬಿ ಹುಯಿರ‍್ಹವಾದೆ. 
\v 19 ಇನಖ್ಹಾಜೆ ಖೆವು ಅಪ್ಣುನ ಸಮಾಧಾನ್ನಾಬಿ ಏಕ್‌ಥಿಏಕ್ ಭಾಲ್ ದೆವಾಮ ಭಡಾವಮಾಬಿ ಅಗಾಡಿ ಚ಼ಲಾವಸ್ಕಿ ಇನಾಸ್ ಕರಿಯೆ. 
\v 20 ಇನಖ್ಹಾಜೆ ಖಾಣಾನಖ್ಹಾಜೆ ದೇವ್ನ ಕಾಮ್ನ ನಾಶ್ ನಕೊಕರೊ. ಖ್ಹಾರು ಜಿನಖ್ಹ್‌ಬಿ ಶುದ್ಧಾಸ್ ಹುಯಿರ‍್ಹೂಸ್. ಕತೋಬಿ ಏಕ್‍ಜ಼ಣೊ ಖೈನ್ ಬಿಜೇಕ್‍ಜ಼ಣಾನ ಪಾಪ್‌ಮ ರಡ್ಕಾವನು ಗಲ್ತಿ. 
\v 21 ಬೋಟಿ ಖಾವಾನುರ‍್ಹವೊ, ದ್ರಾಕ್ಷಿನೊ ರಖ್ಹ್‌ನ ಪೀಯಾನು ರ‍್ಹವೊ ನತರ್ ಬಿಜು಼ ಖೆವೂಬಿರ‍್ಹವೊ ತಾರ ಭೈ ಭೇನ್ನ ಪಾಪ್‌ಮ ರಡ್ಕವಾನು ರ‍್ಹಯೂತೊ ಇನ ಮ್ಹೇಲಿದ್ಯವಾನುಸ್ ಅಛ್ಛು಼. 
\v 22 ಅನಿಬಾರೇಮ ತುನಛಾ಼ತೆ ವಿಶ್ವಾಸ್‌ ದೇವ್ನಖಲಿ ದೆಖೈನ್, ಯೊ ತಾರಲಗುಸ್ ಮಾಲುಮ್‌ರ‍್ಹವಾದೆ. ಇನು ಯೊ ಮಾನಿಲೇಯ್ತೆ ಇನಿ ಬಾರೇಮ ಗುಮಾನಿ ಕರಾಕೊಂತೆ ಯೋ ಧನ್ಯ. 
\v 23 ಕತೋಬಿ ಏಕ್‌ ವಖ್ಹ್‌ತೆ ಗುಮಾನಿ ರ‍್ಹೀನ್ ಖಾವವಾಳೊ ಹುಯಿರ‍್ಹೋತೆ ದೇವ್ನ ಖ್ಹಾಮ್ಣೆ ಅಪರಾದಿ ಹುಯಿರ‍್ಹೇಸ್, ಯೋ ವಿಶ್ವಾಸ್‌ಪರ್ ಆಧಾರ್ ಕೊಯ್ನಿ ಇನಖ್ಹಾಜೆ ಯೋ ದೋಷಿ ಹುಯಿರ‍್ಹೇಸ್. ಅಜು಼ ವಿಶ್ವಾಸ್‍ನು ಆಧಾರ್ ನಾರ‍್ಹಯಾತೊ ಯೋ ಪಾಪಸ್.
\c 15
\s ಬಿಜಾ಼ನ ಲ್ಹಾಯಕ್‌ ಕರಾವೊ ತುಮುನ ಕಾಹೆ
\p
\v 1 ವಿಶ್ವಾಸ್ಮ ಘಟ್‌ಹುಯಿರ‍್ಹಾತೆ ಅಪ್ಣೆ ಕಮ್‍ಜೋ಼ರಿವಾಳನು ಭೋಜ಼್‌ನ ಖ್ಹಮಾಳಿರ‍್ಹವಾಳ ಹುಯಿರ‍್ಹಿನ್ ಇನಾಮ ಅಪ್ಣು ಅಪ್ಣೆಸ್ ಕಮ್‍ಠೋಕಿಲ್ಯವಾಳ ನಾಹುಯಿರ‍್ಹೇವ್ಣು. 
\v 2 ಅಪ್ಣಾಮ ಹರೇಕ್‍ಜ಼ಣು ಇನ ಭೀಡೆವಾಳನು ಭಕ್ತಿನ ಭಡಾವಾನಖ್ಹಾಜೆ, ಆಖ್ಹ್‌ಕರಿನ್ ಅಪ್ಣ ಭೈಯೇ ಭೇನೇನ ಅಛ್ಛಾ಼ನಖ್ಹಾಜೆ ಕಮ್‍ಠೋಕವಾಳ ಹುಯಿರ‍್ಹೇಣು. 
\v 3 ಶನಕತೊ ಪವಿತ್ರ ದಪ್ತರ್‌ಮ ಬೋಲಾತೆ ತಿಮ್ ತುನ ಚಿಂಗಾವವಾಳನಿ ಚಿಂಘಾವ್ಣಿ ಮಾರಪರ್ ಆಯು ಕರಿ ಕ್ರಿಸ್ತ ಜಿನುಬಿ ಇನು ಯೊ ಖ್ಹರೈಲಿದೊಕೊಯ್ನಿ. 
\v 4 ಪವಿತ್ರದಪ್ತರ್‌ಮ ಅಗಾಡಿಸ್ ಲೀಖೈರ‍್ಹೂತೆ ಅಪ್ಣುನ ಬೋಧನೆ ಕರಾನಖ್ಹಾಜೇಸ್ ಲೀಖೈರ‍್ಹೂಥು. ಅಪ್ಣೆ ಫಡೀನ್ ಘಟ್‌ದಿಲ್‌ಥೀಬಿ ಭಾಲಿಲೀನ್ ಭರೋಖ್ಹಾಥಿ ರ‍್ಹವಾಳ ಹುಯಿರ‍್ಹೇವ್ಣುಕರಿ ದಪ್ತರ್‌ಮ ಲೀಖಾಯು 
\v 5 ಖ್ಹಮಾಳಾನು ಅಜು಼ ಭಾಲಿ ದೆವಾಳೊ ದೇವ್, ತುಮೆ ಕ್ರಿಸ್ತಯೇಸುನ ಪೀಛೆಜಾ಼ವಾನೊ ಎಕ್ಕಸ್ ದಿಲ್‌ದ್ಯವಾದೆ. 
\v 6 ಅಮ್ ತುಮೆ ಎಕ್ಕಸ್ ದಿಲ್‌ ಅಜು಼ ಎಕ್ಕಸ್ ಗಳೇಥಿ ಅಪ್ಣೊ ಪ್ರಭು ಹುಯಿರ‍್ಹೋತೆ ಯೇಸುಕ್ರಿಸ್ತನೊ ಬಾ ಹುಯಿರೋತೆ ದೇವ್ನ ಖ್ಹರಾವ್‌ಶು.
\s ಯೆಹೂದ್ಯರ್ ಕಾಹೆತೆ ಇವ್ಣಖ್ಹಾಜೆ ಸುವಾರ್ತೆ
\p
\v 7 ದೇವ್ನ ಮಹಿಮೆ ಹುವಾನಖ್ಹಾಜೆ, ಕ್ರಿಸ್ತ ತುಮೂನ ಮಳೈಲಿದೊತೆ ತಿಮ್ಮಸ್ ತುಮೇಬಿ ಏಕ್‌ಥಿ ಏಕ್‌ ಮಳೈಲೆವೊ. 
\v 8 ಶನಕತೊ ಕ್ರಿಸ್ತಾನು ಸೇವೆನು ಜಿವ್ಣು ಯೆಹೂದ್ಯರ್‌ನ ಸಾಕ್ಷಿ ಹುಯಿರ‍್ಹುಸ್‌ಕರಿ ಮೇ ಬೋಲುಸ್, ಕತೋಬಿ ದೇವ್ನೆ ಗುರುಗುರಬ್‍ಲ್ಯನ ಕರ‍್ಯೊತೆ ವಾಗ್ದಾನ್‍ಖ್ಹಾರು ಖ್ಹಾಚ಼ನ ಒತಾಳನಖ್ಹಾಜೆ ಖ್ಹತ್ನಕರಿ ಪದತ್ತಿನ ಖ್ಹಾಜೇಥಿಬಿ ಕ್ರಿಸ್ತ ಯೆಹೂದ್ಯರ್‌ನೊ ಚಾ಼ಕ್ರಿವಾಳೊ ಬಣ್ಯೊ. 
\v 9 ದೇವ್ ಇವ್ಣುನ ವತಾಳನು ಗೋರ್‌ನಖ್ಹಾಜೆ ಯೆಹೂದ್ಯರ್‌ಕಾಹೆತೆ ಇವ್ಣೆ ದೇವ್ನ ಮಹಿಮೆ ಕರಾದೆಕರಿ ಕ್ರಿಸ್ತಾನೆ ಅಮ್‌ಕರ‍್ಯೊ ಕರಿ ಮೆ ಬೋಲುಕರುಸ್. ಆ ಧರ್ಮಶಾಸ್ತ್ರಮ ಅಮ್ ಬೋಲಾಸ್, “ಇನಖ್ಹಾಜೆ ಯೆಹೂದ್ಯರ್ ಕಾಹೆತೆ ಇವ್ಣ ಬೀಚ್ಮ ಮೇ ತುನ ಸ್ತುತಿಕರುಸ್; ಮೇ ತಾರ ನಾಮ್ನ ಸ್ತುತಿನು ಗೀದ್‌ ಬೋಲುಸ್.” ಕರಿ ಬೋಲೈರ‍್ಹುಸ್.\x - \xo 15:9 \xo*\xt 2. ಸಮುವೇಲ 22:50\xt* \x* 
\v 10 ಬಿಜೇಕ್‍ಹಲ್ಲ ಅಮ್‍ಬೋಲಾಸ್, “ಯೆಹೂದ್ಯರ್‌ಕಾಹೆತೆ ಅದ್ಮಿವೊ ದೇವ್ನ ಅದ್ಮಿನ ಜೋ಼ಡ್ಮ ಖುಷಿಥಿ ಏಕ್‌ ಹುವೊ, 
\v 11 ಅಜು಼ ಪಾಛು಼ ಯೆಹೂದ್ಯರ್‌ಕಾಹೆತೆ ಅಖ್ಖಾಸ್ ಅದ್ಮಿವೊ ಪ್ರಭುನ ಸ್ತುತಿಕರೊ, ತಮಾಮಸ್ ಅದ್ಮಿಖ್ಹಾರು ಇನ ಧನ್ಯವಾದ್‌ಕರೊ” ಕರೀಬಿ ಲೀಖೈರ‍್ಹುಸ್. 
\v 12 ಪಾಛೊ಼ ಯೆಶಾಯ ಶಾತ್ ಬೋಲಸ್‍ಕತೊ, “ಇಷಯನ ಪಿಳ್ಗಿವಾಳೊ ಏಕ್‍ಜ಼ಣೊ ದೆಖೈಲೇಸ್. ಯೊ ಯೆಹೂದ್ಯರ್‌ಕಾಹೆತೆ ಅದ್ಮಿಖ್ಹಾರಾನ ಚ಼ಲಾವನ ಆವ್‌ಶೆ. ಅಜು಼ ಯೊ ಅದ್ಮಿಖ್ಹಾರು ಇನಖ್ಹಾಜೆ ಭರೋಖ್ಹೊ ಕರ್ಶೆ.\x - \xo 15:12 \xo*\xt ಯೆಶಾಯ 11:11\xt*\x* 
\v 13 ಭರೋಖ್ಹಾನ ದ್ಯವಾಳೊ ದೇವ್ ಪವಿತ್ರಾತ್ಮನಿ ಶಕಥ್ಥಿ ಘಣು ಭರೋಖ್ಹಾಥಿ ನಂಬಾವಾಳನ ಖ್ಹುಶಿ ಅಜು಼ ಸಮಾಧಾನ್‌ಥಿ ಭರಾದೆ, ಅನಖ್ಹಾಜೇಥಿ ಶಕಥ್ಥಿ ಆಖ್ಹ್‌ಮ ಭಡ್ತಾ ಜಾ಼ವ್ಣುತೆ ತಿಮ್ ತುಮೂನ ವಿಶ್ವಾಸ್‍ಥಿ ಮಳಾತೆ ಹರೇಕ್ ಖುಷಿ ಸಮಾಧಾನ್ ದ್ಯವಾದೆ.
\s ಪೌಲ ಶನುಸ್ ಡರ್‌ಕೊಂತೆ ಲಿಖಾನ ಕಾರಣ್
\p
\v 14 ಮಾರ ಭೇನ್ ಭೈಯೇವೊ, ತುಮೆ ಅಛ್ಛಿ ಗುಣಥೀಬಿ ಹರೇಕ್ ಅಕ್ಕಲ್‍ಥೀಬಿ ಭರೈರ‍್ಹವಾಳ ಹುಯಿರ‍್ಹಿನ್, ಏಕ್‌ಥಿಏಕ್ ಬುದ್ಧಿ ಬೋಲಾನ ಶಕತ್‌ವಾಳ ಹುಯಿರ‍್ಹಾಸ್ ಕರೀಬಿ ತುಮಾರಿ ಬಾರೇಮ ಮನ ಭರೋಖ್ಹೊ ಛಾ಼. 
\v 15 ಕತೋಬಿ ಮೇ ತುಮೂನ ಥೋಡಿ ವಾತೆಖ್ಹಾರಿ ಯಾದ್ ಕರಾವನಖ್ಹಾಜೆ ಘಣಿ ವಿಶ್ವಾಸ್‍ಥಿ ಅಮ್ ಲೀಖಿರಾಖ್ಯೊಸ್. 
\v 16 ಅಮ್ಮಸ್ ಯೆಹೂದ್ಯರ್‌ಕಾಹೆತೆ ಅದ್ಮಿವೊನಖ್ಹಾಜೆ ಯೇಸುಕ್ರಿಸ್ತನಿ ಸೇವಕ್‌ಹುವಾನಖ್ಹಾಜೆ ಮನ ದೇವ್ನಿ ಆಶೀರ್ವಾದ್‌ ಹುಯು. ಮೇ ದೇವ್ನಿ ಸುವಾರ್ತೆನಿ ಸೇವೆನ ಏಕ್‌ ಯಾಜಕ್‍ನಿತರ ಚ಼ಲೈನ್ ಪವಿತ್ರಾತ್ಮಥಿ ದೇವ್ನ ಸಮರ್ಪಣ್‌ಕರಾನ ಕೋಶಿಷ್ ಕರುಕರೂಸ್. 
\v 17 ಇನಖ್ಹಾಜೆ ಕ್ರಿಸ್ತಯೇಸುಮ, ದೇವ್ನ ಕಾಮ್ನಿ ಬಾರೇಮ ಮೇ ಖ್ಹರೈಲಿಯೇಜಾ಼ಯ್. 
\v 18 ಕ್ರಿಸ್ತಾನೆ ಯೆಹೂದ್ಯರ್‌ಕಾಹೆತೆ ಅದ್ಮಿಯೇವ್‍ನ ವಿಧೇಯ ಹುವಾನಖ್ಹಾಜೆ ಆಖ್ಹಾರಾನಿ ಬಾರೇಮ ಮೇಖಲಿ ಭಾಲ್‌ಥಿ ಬೋಲೆಜಾ಼ಯ್ ಅತ್ರೇಸ್ ಕಾಹೆತೆ ವಾತ್‍ಮಾಬಿ ಕಾಮ್‍ಥೀಬಿ, 
\v 19 ಅಜು಼ ಖ್ಹಣೇದ್ನ ಕಾಮ್‍ಥೀಬಿ, ಅದ್ಭುತ್‌ಕಾಮ್‌ನಿ ತಾಖತ್ತಿ ಅಜು಼ ದೇವ್ನುಆತ್ಮನ ಕಾಮ್‍ಥೀಬಿ ಕರಿರಾಖ್ಯೊಸ್. ಇನಖ್ಹಾಜೆ ಯೆರೂಸಲೇಮ್‍ಥೊ ಧರೀನ್ ಇಲ್ಲುರಿಕ ತಬರ್‌ಖಾಲಗು ಜಾ಼ವಾನಿ ವಖ್ಹ್‌ತೆ ಮೇ ಕ್ರಿಸ್ತನಿ ಸುವಾರ್ತೆನ ಅಖ್ಖಿ ಪೂರಫೈಲಾಯೊ. 
\v 20 ಮಾರಿ ಆಖ್ಹ್ ಶಾತ್‌ಕತೊ, ಕಿಜ್ಜಾ಼ ಕ್ರಿಸ್ತನು ನಾಮ್ನ ಖ್ಹಮ್‍ಜಾ಼ಡಿ ಕೊರಾಖ್ಯುನಿತೆ ಯೊ ಝ಼ಗೋಪರ್ ಸುವಾರ್ತೆನ ಬೋಲಾನು ಮಾರಿ ದಿಲ್ನಿ ಆಖ್ಹ್. ಇನಖ್ಹಾಜೆ ಬಿಜೇಕ್‍ಜ಼ಣು ನಾಖಿರಾಖ್ಯುತೆ ಹದಿಪಾಯನ ಉಪ್ಪರ್ ಮೇ ನಾಭಾಂದ್‍ಣು. 
\v 21 “ಕೋಣ್ ಇನಿ ಬಾರೇಮ ಮಾಲುಮ್ ಕರ‍್ಯುಕೊಯ್ನಿಕಿ ಇವ್ಣೆಸ್ ಇನ ದೇಕ್‌ಶೆ. ಕೋಣ್ ಇನಿ ಬಾರೇಮ ಖ್ಹಮ್‌ಜಿರಾಖ್ಯಕೊಯ್ನಿಕಿ ಇವ್ಣೆ ಪರ್‌ಖಿಲಿಶೆ. ಕರಿ ಪವಿತ್ರ ದಪ್ತರ್‌ಮ ಲೀಖೈರುತೆ ತಿಮ್ ಮಾರ ಕಾಮ್ನ ಚ಼ಲೈರಾಖ್ಯೊಸ್.\x - \xo 15:21 \xo*\xt ಯೆಶಾಯ 52:15\xt*\x*
\s ರೋಮ್‍ನ ಭೇಟಿಕರಾನ ಜಾ಼ವಾನಿ ಪೌಲಾನಿ ಖ್ಹೂಜ಼್
\p
\v 22 ಇನಖ್ಹಾಜೇಸ್, ತುಮಾರಕನ ಆವ್ಣುನಾತೆ ತಿಮ್ ಮನ ಕೈಏಕ್ ವಖ್ಹ್‌ತೆ ತಕಲೀಬ್ ಹುಯು. 
\v 23 ಕತೋಬಿ ಇನಾಪರ್ ಆ ತಬರ್‌ಖಾವ್‍ಮ ಮಾರು ಸೇವೆಕರಿ ಹುಯಿಗು. ಕೈಏಕ್ ವರಖ್ಹ್‌ಥು ತುಮೂನ ಮಳ್‌ಣುಕರಿ ಬೋಲಾನಿ ಆಖ್ಹ್‌ಥೀಬಿ 
\v 24 ಮೇ ಸ್ಪೇನ್ ಜಾ಼ವಾನಿ ವಖ್ಹ್‌ತೆ ತುಮೂನ ಮಳಾನಖ್ಹಾಜೆ ಟಿವೈರ‍್ಹೋಸ್. ದರ್ರಾಖ್ಹ ದನ್ ತುಮಾರಿ ಲಾಡ್‍ಮೋಹಬತ್ನಿ ಖುಷಿಮ ಮೇ ರ‍್ಹೀನ್, ಇನಕೇಡೆಥು ಯೋ ದೇಖ್ಹ್‌ನ ಜಾ಼ವಾನ ಮನ ತುಮಾರಿ ಮದತ್ ಮಳ್‌ಶೆಕರಿ ವಿಶ್ವಾಸ್‍ಕರುಸ್. 
\v 25 ಕತೋಬಿ ಹಮ್ಕೆ ಮೇ ದೇವ್ನ ಅದ್ಮಿವೊನ ಚಾ಼ಕ್ರಿಕರಾನಖ್ಹಾಜೆ ಯೆರೂಸಲೇಮ್ನ ವಳೆಜ಼ವುಸ್. 
\v 26 ಶನಕತೊ ಮೆಕೆದೋನ್ಯ ಅಜು಼ ಅಖಾಯ ತಬರ್‌ಖಾವಾಳು ವಿಶ್ವಾಸಿ ಯೆರೂಸಲೇಮ್ಮ ದೇವ್ನ ಅದ್ಮಿವೋನ ಮಳಿನ್ ರ‍್ಹವಾಳ ಗರೀಬ್ ವಿಶ್ವಾಸಿನ ಮದತ್ ಕರಾನಖ್ಹಾಜೆ ಖ್ಹಯಾಲ್ ಕರಿರಾಖ್ಯಸ್. 
\v 27 ಇವ್ಣೆ ಯೋ ಕರಾನ ಆಖ್ಹ್ ಕರಿರಾಖ್ಯುಸ್ ಏತ್ರೇಸ್ ಕಾಹೆತೆ, ಯೆಹೂದ್ಯರ್‌ಕಾಹೆತೆ ಅದ್ಮಿ ಯೆಹೂದ್ಯರ್‌ನ ಆತ್ಮೀಕ ಆಶೀರ್ವಾದ್‌ಮ ಭಾಗ್‌ ಲೀರಾಖ್ಯುತೆ ಇನಖ್ಹಾಜೆ ಇವ್ಣೆ ಜಗತ್ನ ಸಂಬಂಧನಿ ಕಾಮ್ಮ ಇವ್ಣುನ ಸೇವೆಕರಾನಿ ಫರಜ಼್‌ಮ ಛಾ಼. 
\v 28 ಇನಖ್ಹಾಜೆ ಆ ಕಾಮ್ನ ಖ್ಹತಮ್‍ಕರೀನ್ ಆ ಪ್ಯಾರ‍್ನಫಲ್ನ ಹಿಜ್ಜಾ಼ವಾಳನ ದೀನ್ ಭರ್‌ಪೂರ್‌ ಹುವಾನ ಬಾದ್ಮ ತುಮುನ ಮಳಿನ್ ಯೋಸ್ ಮಾರ್ಗೆ ಸ್ಪೇನ್ ದೇಖ್ಹ್‌ನ ಜೈ಼ಶ್. 
\v 29 ಆ ನಾಹುಯಿನ್ ತುಮಾರಕನ ಆವಾನಿ ವಖ್ಹ್‌ತೆ ಕ್ರಿಸ್ತಥಿ ಹುವಾನು ಘಣಿ ಆಶೀರ್ವಾದ್‌ನ ಮೇ ತುಮಾರಕನ ಲಾಯಿಶ್, ಕರಿ ಮಾಲುಮ್ ಛಾ಼. 
\v 30 ಭೇನ್ ಭೈಯೇವೊ, ಅಪ್ಣೊ ಪ್ರಭು ಹುಯಿರೋತೆ ಯೇಸುಕ್ರಿಸ್ತಬಿ, ಪವಿತ್ರಾತ್ಮನಿ ಪ್ಯಾರ್‌ಥೀಬಿ, ಮೇ ಗಿಂಗೈಲ್ಯವಾನು ಶಾತ್‍ಕತೊ, ಮಾರಖ್ಹಾಜೆ ದೇವ್‌ಮ ಪ್ರಾರ್ಥನೆಥಿ ಮಾರಿ ಜೋ಼ಡ್ಮರ‍್ಹವೊ. 
\v 31 ಮೇ ಯೂದಾಯಮ ಅವಿಶ್ವಾಸಿನ ಹಾತ್ಮಥು ಛೋ಼ಡಾವ್ಣುಕರೀಬಿ ಮಾರಿ ಸೇವೆ ಯೆರೂಸಲೇಮ್ಮ ಛಾ಼ತೆ ದೇವ್ನ ಅದ್ಮಿಯೇವ್‍ನ ಸ್ವೀಕಾರ್ ಹೋಣುಕರಿ ಪ್ರಾರ್ಥನೆ ಕರೊ. 
\v 32 ತದೆ ಯೋ ದೇವ್ನಿ ಮರ್ಜಿಥಿ ತುಮಾರಕನ ಖ್ಹುಶಿಥಿ ಆಯಿನ್ ತುಮಾರಿ ಜೋ಼ಡ್ಮ ರ‍್ಹೀನ್ ಅರಾಮ್ ಕರಾನು ಹುವಾದೆ. 
\v 33 ಸಮಾಧಾನ್ನೊ ದೇವ್ ತುಮಾರ ಖ್ಹಾರಾನಿ ಜೋ಼ಡ್ಮ ರ‍್ಹವಾದೆ. ಆಮೆನ್.
\c 16
\s ಶೊಂತ್ ಖ್ಹಲಾಮ್
\p
\v 1 ಅಪ್ಣಿ ಭೇನ್ ಹುಯಿರ‍್ಹೀತೆ ಕೆಂಖ್ರೆಯ ಖ್ಹಯೇರ‍್ನಿ ಸಬೇನಿ ಸೇವಕೀಬಿ ಹುಯಿರ‍್ಹೀತೆ ಪೊಯಿಬೆನಿ ಬಾರೇಮ ತುಮುನ ಖ್ಹಮ್‍ಜಾ಼ಡುಕರೂಸ್. 
\v 2 ಪ್ರಭುಮ ದೇವ್ನ ಅದ್ಮಿವ್‍ನ ಯೋಗ್ಯಹುಯಿರೂತೆ ಪರಕ್ಮ ಯೋ ಹೈರಿತೆ ಇನ ಸ್ವೀಕಾರ್‌ಕರೊ, ಶನಕತೊ ತುಮೂನ ಶನಿ ಜ಼ರೂರತ್ ರ‍್ಹಿತೋಬಿ ಇನ ಹೋಣುತೆತ್ಯೊ ದೇವೊ. ಹೈರಿತೆ ಯೋ ಕೈಏಕ್ ಜ಼ಣನಾಬಿ ಮನಾಬಿ ಘಣು ಮದತ್ ಕರೀರಾಖಿಸ್. 
\v 3 ಕ್ರಿಸ್ತಯೇಸುಮ ಮಾರಿ ಜೋ಼ಡ್ಮಕಾಮ್‍ ಕರಾವಾಳು ಹುಯಿರಾತೆ ಪ್ರಿಸ್ಕಿಲ್ಲನಾಬಿ ಅಕ್ವಿಲನಾಬಿ ಮಾರಿ ಖ್ಹಲಾಮ್ ಬೋಲಿದೆವೊ. 
\v 4 ಇವ್ಣೆ ಮಾರ ಜಾನ್ನಖ್ಹಾಜೆ ಇವ್ಣ ಜಾನ್ನ ಖತ್ರಾಮ ನಾಖ್ಯು. ಇವ್ಣುನ ಮೇಸ್ ಕಾಹೆತೆ ಯೆಹೂದ್ಯರ್‌ಕಾಹೆತೆ ಅದ್ಮಿಯೇವ್‌ನಿ ಸಬೆವಾಳೂಬಿ ಇವ್ಣುನ ಧನ್ಯವಾದ್‍ಕರಸ್. 
\v 5 ಅತ್ರೇಸ್‍ಕಾಹೆತೆ ಇವ್ಣ ಘರ್ಮ ಎಕ್ಟುಹುಯಿನ್ ಆವಾತೆ ಸಬೆವಾಳನಾಬಿ ಮಾರಿ ಖ್ಹಲಾಮ್ ಖ್ಹಮ್‍ಜಾ಼ಡೊ. ಏಷ್ಯಾ ತಬರ್‌ಖಾಮ ಕ್ರಿಸ್ತನ ಪೀಛೆಜಾ಼ವಾಳಮ ಫೈಲೆನೊ ಮಾರೊ ಪ್ಯಾರ್‌ನೊ ದೋಸ್ ಎಫೈನೆತನಾಬಿ ಮಾರಿ ಖ್ಹಲಾಮ್ ಖ್ಹಮ್‍ಜಾ಼ಡೊ. 
\v 6 ತುಮಾರಖ್ಹಾಜೆ ಘಣು ವಾಖ್ಯೊ ಪಡೀತೆ ಮರಿಯನ ಮಾರಿ ಖ್ಹಲಾಮ್. 
\v 7 ಮಾರು ಮಾಯಮಾತ್ರಾಬಿ ಮಾರಿ ಜೋ಼ಡ್ಮ ಜೇಲ್‌ಮಥಾತೆ ಅಂದ್ರೋನಿಕನಾಬಿ ಅಜು಼ ಯೂನ್ಯನ ಮಾರಿ ಖ್ಹಲಾಮ್. ಇವ್ಣೆ ಅಪೊಸ್ತಲರ್‌ಮ ನಾಮ್ ಕಮೈರಾಖ್ಯತೋಬಿ ಮಾರೇಥಿ ಅಗಾಡಿಸ್ ಕ್ರಿಸ್ತನ ವಿಶ್ವಾಸಿ ಹುಯಿರ‍್ಹಾಸ್. 
\v 8 ಮನ ಪ್ರಭುಮ ಪ್ಯಾರ್‌ನೊ ಹುಯಿರೋತೆ ದೋಸ್ತಿ ಅಂಪ್ಲಿಯಾನ ಖ್ಹಲಾಮ್. 
\v 9 ಕ್ರಿಸ್ತಮ ಮಾರಿ ಜೋಡ್ನಸೇವಕ ಹುಯಿರೋತೆ ಉರ್ಬಾನಾಬಿ ಮನ ಪ್ಯಾರ್‌ನೊ ದೋಸ್ತ್ ಸ್ತಾಖುಯನಾಬಿ ಖ್ಹಲಾಮ್. 
\v 10 ಕ್ರಿಸ್ತನಿ ಸೇವೆಮ ತರೀಪ್ಷ ಹುಯಿನ್ ಲ್ಹಾಯಕ್‌ ಹುಯಿನ್ ರ‍್ಹವಾಳೊ ಅಪೆಲ್ಲನ ಮಾರಿ ಖ್ಹಲಾಮ್ ಅರಿಸ್ತೊಬೂಲನ ಘರ್‌ವಾಳಾನ ಖ್ಹಲಾಮ್. 
\v 11 ಮಾರಿನಿತರಸ್ ಯಹೂದಿ ಭೈ ಹುಯಿರೋತೆ ಹೆರೋಡಿಯೋನಾನ ಖ್ಹಲಾಮ್. ಪ್ರಭುಮಛಾ಼ತೆ ನಾರ್ಕಿಸ್ಸನ ಕುಟಮ್‌ವಾಳನ ಖ್ಹಲಾಮ್. 
\v 12 ಪ್ರಭುನಿ ಸೇವೆಮ ಮ್ಹಿನತ್‍ಕರವಾಳಿಯೇ ಹುಯಿರ‍್ಹಿಯೇತೆ ತ್ರುಫೈನನಾಬಿ, ತ್ರುಫೋಸನಾಬಿ ಮಾರಿ ಖ್ಹಲಾಮ್. ಪ್ರಭುಮ ಘಣು ವದೇಖ್ಹ್‌ಕರೀನ್ ಮ್ಹಿನತ್ ಕರಿರಾಖಿತೆ ಪ್ಯಾರ್‌ನಿ ಪೆರ್ಸೀಸನ ಮಾರಿ ಖ್ಹಲಾಮ್. 
\v 13 ಪ್ರಭುಮ ಚೂ಼ಣೈರ‍್ಹೊತೆ ರೂಫನಾಬಿ ಮನಾಬಿ ಅಮ್ಮಾನಿ ಘೋಣಿಥೀತೆ ಇನಿ ಅಮ್ಮನಾಬಿ ಖ್ಹಲಾಮ್. 
\v 14 ಅಸುಂಕ್ರಿತ, ಫ್ಲೆಗೋನ, ಹೆರ್ಮೇಯನಾಬಿ, ಪತ್ರೋಬನಾಬಿ ಹೆರ್ಮಾನ ಅಜು಼ ಇನಿಜೋ಼ಡ್ಮ ರ‍್ಹವಾಳ ಉಭ್‌ರ‍್ಯಾತೆ ಮಾರಿ ಭೈಯೇ ಭೇನೇನ ಖ್ಹಲಾಮ್. 
\v 15 ಫಿಲೊಲೋಗ, ಯೂಲ್ಯ, ನೇರ್ಯ ಅಜು಼ ಇನಿ ಭೇನ್, ಒಲುಂಪ ಅಜು಼ ಇವ್ಣಿ ಜೋ಼ಡ್ಮ ರ‍್ಹವಾಳ ಖ್ಹಾರಾಸ್ ವಿಶ್ವಾಸಿಯೇವ್ನ ಖ್ಹಲಾಮ್. 
\v 16 ಪವಿತ್ರ ಪ್ಯಾರ್‌ಥಿ ಏಕ್‌ಥಿಏಕ್ ಹಾತ್‍ಮಳೈನ್ ಖ್ಹಲಾಮ್ ಕರೊ. ಕ್ರಿಸ್ತನಿ ಖ್ಹಾರೀಸ್‍ ಸಬೆವಾಳು ತುಮೂನ ಖ್ಹಲಾಮ್ ಬೋಲಿ ಮೋಕ್ಲಿರಾಖ್ಯುಸ್.
\s ಖ್ಹರ್ತಿನಿ ವಾತೆಖ್ಹಾರು
\p
\v 17 ಭೇನ್ ಭೈಯೇವೊ, ತುಮೆ ಶಿಕಿರಾಖ್ಯಾತೆ ಬೋಧನೆನ ವಿರೋದ್ ಹುವಾಳೂಬಿ ತುಮಾರಿ ಒಗ್ಗಟ್ ಫುಟಾಖ್ಹರ್ಕು ತುಮಾರಮ ಕಚ಼್ಚರ್‌ ಹುವಾನಿತರ ಕರವಾಳನಿ ಬಾರೇಮ ಹೊಷಾರ್‌ಥಿ ರ‍್ಹವೊ. ಎಥ್ರಾನವಾಳಥಿ ದೂರ್ ರ‍್ಹೇವೊಕರಿ ಗಿಂಗೈಲೆವುಸ್. 
\v 18 ಎಥ್ರಾನು ಅದ್ಮೆವ್‍ನ ಅಪ್ಣೊ ಪ್ರಭು ಕ್ರಿಸ್ತನಿ ಸೇವೆ ಕರಾನು ಮ್ಹೇಲಿನ್ ಇವ್ಣ ಪೇಟ್ನಿ ಸೇವೆಕರವಾಳ ಹುಯಿರ‍್ಹೇಸ್. ಮಿಠ್ಠಿ ಅಜು಼ ಕವ್ಳಿ ವಾತೇಥಿ ಶೇದೇವ್ ಅದ್ಮಿವ್‌ನ ದಿಲ್ನ ಠಗಾವವಾಳು ಹುಯಿರ‍್ಹುಸ್. 
\v 19 ತುಮಾರಿ ವಿಧೇಯತೆ, ಖ್ಹಾರಾಸ್ ಅದ್ಮಿವ್‌ನ ಮಾಲುಮ್ ಹುವಾನಿತರ ಹುಯು. ಇನಖ್ಹಾಜೆ ಮೇ ತುಮಾರಿ ಬಾರೇಮ ಖುಷಿಕರುಸ್. ಕತೋಬಿ ತುಮೆ ಅಛ್ಛಾ಼ನಿ ಬಾರೇಮ ಗ್ಯಾನಿ ಖ್ಹಾರಹುಯಿನ್ ಖಾರಾಬ್‌ನಿ ಬಾರೇಮ ಶನು ಕಳಂಕ್‌ಕೊಂತೆ ರ‍್ಹೇಣು ಕರಿ ಆಖ್ಹ್‌ಕರುಸ್. 
\v 20 ಅಜು಼ ಸಮಾಧಾನ್ನೊ ದೇವ್ ವಗ್ಗಿಸ್ ಶೈತಾನ್ನ ತುಮಾರ ಗೋಡ ಹೇಟ್‍ನಾಖಿನ್ ಚ಼ಗ್‌ದಿನಾಕ್‍ಶೆ. ಅಪ್ಣೊ ಪ್ರಭು ಹುಯಿರ‍್ಹೋತೆ ಯೇಸುನಿ ವಾರ್‌ಖ್ಹೊ ತುಮಾರ ಜೋ಼ಡ್ಮ ರ‍್ಹವಾದೆ.\f + \fr 16:20 \fr*\ft ಆ ವಚನ್ ಥೋಡು ಲಿಖಾವಟ್ಮ ಕೊಯ್ನಿ.\ft*\f* 
\v 21 ಮಾರಿ ಜೋ಼ಡ್ಮಕಾಮ್‍ ಕರಾವಾಳೊ ಹುಯಿರೋತೆ ತಿಮೊಥೆಯ ತುಮೂನ ಖ್ಹಲಾಮ್ ಬೋಲುಕರುಸ್. ಇಮ್ಮಸ್ ಲೂಕ್ಯಬಿ, ಯಾಸೋನಬಿ, ಸೋಸಿಪತ್ರಬಿ, ಅಜು಼ ಮಾರಿನಿತರ ಯೆಹೂದ್ಯರ್‌ಖ್ಹಾರು ಹುಯಿರ‍್ಹಾತೆ ಇವ್ಣೆ ತುಮೂನ ಖ್ಹಲಾಮ್ ಬೋಲುಕರಸ್. 
\v 22 ಆ ಚಿಟ್ಟಿನ ಲೀಖ್ಯೋತೆ ತೆರ್ತ್ಯಯ ಕರಿ ಮೇ ಪ್ರಭುನ ಅದ್ಮಿಯೇನ ಖ್ಹಲಾಮ್ ಕರುಸ್. 
\v 23 ಹಜ಼್ಜ ಮನಾಬಿ, ಹಿಡಿ ಸಬೇನಾಬಿ, ಮೆಹಮಾನ್ನಿ ಸತ್ಕಾರ್ ಕರುಕರಾತೆ ಗಾಯ ಇನಿ ಖ್ಹಲಾಮ್ ಬೋಲಸ್. ಆ ಖ್ಹಯೇರ‍್ನೊ ರಪ್ಯಾನಿ ಗಣ್ತಿ ದೇಖಿಲ್ಯವಾಳೊ ಹುಯಿರೋತೆ ಎರಸ್ತಬಿ ಅಜು಼ ಭೈ ಕ್ವರ್ತಬಿ ತುಮೂನ ಖ್ಹಲಾಮ್ ಬೋಲಸ್. 
\v 24 ಅಪ್ಣೊ ಪ್ರಭು ಯೇಸುಕ್ರಿಸ್ತನಿ ಕೃಪೆ ತುಮಾರ ಅಖ್ಖಾನಿ ಜೋ಼ಡ್ಮ ರ‍್ಹವಾದೆ. ಆಮೆನ್.\f + \fr 16:24 \fr*\ft ಥೋಡ ಲಿಖಾವಟ್ಮ ಆ ವಚನ್ 27 ವಚನ್ನ ಕೇಡೆಥು ಮಳೈರಾಖ್ಯೂಸ್.\ft*\f*
\s ಖ್ಹರ್ತಿನಿ ಸ್ತುತಿ ಪ್ರಾರ್ಥನೆ
\p
\v 25 ಅಪ್ಣೆ ದೇವ್ನ ಮಹಿಮೆ ಕರಿಯೆ ಮೆ ಯೇಸು ಕ್ರಿಸ್ತನಿ ಬಾರೇಮ ಬೋಲಿವತಾಳ್ಯೋತೆ ಸುವಾರ್ತೆನಿ ಘೋಣಿ ಅಜು಼ ಜ಼ಗ್‌ಜ಼ಮಾನೇಥಿ ಲಪಿರ‍್ಹೂಥೂತೆ ಹಮ್ಕೆ ದೆಖಾವನು ಗಪ್ಲತ್‌ನ ಖ್ಹಾಚಾ಼ನಿತರ ತುಮಾರಿ ವಿಶ್ವಾಸ್ಮ ತುಮುನ ಘಟ್ ಕರಾನ ಶಕತ್‌ವಾಳೊ ಹುಯಿರ‍್ಹೊಸ್. 
\v 26 ಹಮ್ಕೆ ಯೋ ಖ್ಹಾಚು಼ ಪ್ರವಾದ್‍ನೆನು ನಿಯಮ್‌ಥಿ ಹಮ್ಕೆ ಭಡ್‍ಕೈನ್ ಲೈರಾಖ್ಯುಸ್; ಅಜು಼ ಹರ್‌ಹಮೇಶ ರ‍್ಹವಾಳ ದೇವ್ನಿ ಹುಕುಮ್‌ನಿಮತ್ ಅಖ್ಖಾಸ್ ಜ಼ಗ್‌ಜಾ಼ತ್ನ ಅದ್ಮಿವೋನ ಮಾಲುಮ್‍ಪಡಾನಿ ಘೋಣಿ ಕರಿರಾಖ್ಯುಸ್, ಅಮ್ ವಿಧೇಯ ಹೋಣು ಅಜು಼ ವಿಶ್ವಾಸ್‌ ಕರ‍್ನು. 
\v 27 ತುಮೂನ ಭೀರಾಖಾನ ಶಕತ್‌ವಾಳೊ ಹುಯಿರೋತೆ, ಅಖ್ಖೂಸ್ ಮಾಲುಮ್ ಕರಿರಾಖ್ಯೊತೆ ಏಕ್‌ನೊಎಕ್ಕಸ್ ದೇವ್ನ ಯೇಸುಕ್ರಿಸ್ತಥಿ ಕದೆಕದೇಬಿ ಮಹಿಮೆ ಹುವಾದೆ! ಆಮೆನ್.