\id REV -WAGHRI
\ide UTF-8
\h ಪ್ರಕಾಶಿತ್ ವಚನ್
\toc3 ಪ್ರಕಾಶಿತ್ ವಚನ್‌
\toc2 ಪ್ರಕಾಶಿತ್
\toc1 ಯೋಹಾನೆ ಲೀಖ್ಯೋತೆ ಪ್ರಕಾಶಿತ್‌ ವಚನ್‌
\mt2 ಯೋಹಾನನು ಬರೆದ ಪ್ರಕಟಣೆ
\mt1 ಯೋಹಾನನೆ ಲೀಖ್ಯೋತೆ ಪ್ರಕಾಶಿತ್ ವಚನ್‍
\imt ಮಾಲುಮ್ ಕರಾನು
\ip ಪ್ರಕಾಶಿತ್ ಪುಸ್ತಕ್ ನವಿ ಒಪ್ಪಂದಾನು ಪುಸ್ತಕ್ ಹುಯಿರುಸ್. ಆ ಪುಸ್ತಕ್ ಅಪೊಸ್ತಲ ಯೋಹಾನಥಿ ಲೀಖಾಯು. ಖ್ಹರ್ತಿಮ ಕ್ರಿಸ್ತನಿ ಪೈದಾಖ್ಹ್‌ನಿ ಖ್ಹುಮಾರ್ 95 ವರಖ್ಹ್‌ಮ ಲೀಖೈರುಸ್. \xt 1:1\xt* ಇನೆ ಯೋಹಾನ್ನಿ ಸುವಾರ್ತೆ ಅಜು಼ ತೀನ್ ಚಿಟ್ಟಿ ಹುಯಿರೀತೆ ಪಹಿಲಿ ಬೇನಿ ಅಜು಼ ತೀನ್ನಿ ಯೋಹಾನಬಿ ಲೀಖಿರಾಖ್ಯೊಸ್. “ಯೋಹಾನ ಯೇಸುನೊ ಪ್ಯಾರ್‌ನೊ” ಕರೀಬಿ ಬೊಲೈಲೇಸ್. \xt ಯೋಹಾನ 13:23.\xt*
\ip ಆ ಪ್ರಕಾಶಿತ್ ಪುಸ್ತಕ ಇನೆ ಯೇಸುಕ್ರಿಸ್ತನಿ ಸುವಾರ್ತೆ ಫೈಲಾವನಖ್ಹಾಜೆ ಪತ್ಮೋಸ್ ಕರಿ ಟಾಪನ ಕೊಂಡೈರ‍್ಹವಾನಿ ವಖ್ಹತ್‌ಮ \xt ಪ್ರಕಾಶಿತ್ 2:3.\xt*
\ip ಯೋಹಾನನೆ ಪ್ರಕಾಶಿತ್ ಪುಸ್ತಕ ಲೀಖ್ಯೋತೆ ಶನಕತೊ ಪಢಾವಾಳಾನ ಯೇಸುಕ್ರಿಸ್ತಮ ವಿಶ್ವಾಸಿ ಹುಯಿನ್ ರ‍್ಹವಾನಖ್ಹಾಜೆ ಅಜು಼ ಯೇಸು ಪಾಛು಼ ಆವ್‍ಶೆಕರಿ ಬೋಲಾನು ವೇಳ್ ಖನ್ನೆ ಅಯಿಗಿಕರಿ ಯೋ ಭರೋಖ್ಹೊ ದ್ಯವಾನಖ್ಹಾಜೆ ಹುಮ್ಮಖ್ಹ್ ದ್ಯವಾನು ಹುಯಿರುಸ್\xt 1:3—22:7\xt* ಇನೆ ಮ್ಹಾಮೂಲಿ ಅಖ್ಖಾ ಕ್ರಿಸ್ತ ವಿಶ್ವಾಸಿಯೊನ ಅಜು಼ 28.3 ವಚನ್‌ಮ ದೇಖ್ಯೆತೆ ತಿಮ್ ಬರೋಬರ್‌ನಿ 7 ಸಬೆನ ಲೀಖಸ್. ಯೋಹಾನನೆ ಇನೆ ಲೀಖ್ಯೋತೆ ಪ್ರವಾದನೆ ಹುಯಿರುಸ್ ಕರಿ ಬೋಲಸ್ \xt 1:3\xt* ಅಜು಼ ಇನೆ ದೇಖ್ಯೊತೆ ವಿಚಾರ‍್ನ ಬೋಲಾನಖ್ಹಾಜೆ ಆ ಪುಸ್ತಕ್‌ಮ ಅಖ್ಖು ಕೈಏಕ್ ಪೋಟನ ಲೀಖಿ ವತಾಳ್ಯೊ. ಆ ಪುಸ್ತಕ ಜೂ಼ನಿ ಒಪ್ಪಂದನಿ ಥೋಡಿ ಭಾಗ್‌ನಿಮತ್ ಛಾ಼. ಬರೋಬರ್‌ಥಿ ಬೋಲ್ನುಕತೊ \xt ಜೆಕರ್ಯ 6:1-8\xt* ಖ್ಹಾತ್ ತುತ್ತೂರಿ ಅಜು಼ ಖ್ಹಾತ್ ಕಟೋರೊ ಅಖ್ಖು ದೇವ್ನೆ ಈಜಿಪ್ಟ್‌ನ ನಿಶತ್ ದ್ಯವಾನ ಮೋಕ್ಲಾಯುತೆ ಖ್ಹಾತ್ ಖ್ಹತಾಪ್ಣಿನ ವತಳಾನಿತರ ಹುಯಿರುಸ್. \xt ವಿಮೋಚನ 7:9\xt* ಪ್ರಕಾಶಿತ್ ಪುಸ್ತಕ ಹಗಾಮ್ನ ಖ್ಹರ್ತಿನಿ ಬಾರೇಮ ವಾತೆಬೋಲಸ್. ಇನ ಯೇಸು ಜುತಿಲೇಸ್, ಅಜು಼ ಇನ ಉಪ್ಪರ್ ಕೋಣ್ ವಿಶ್ವಾಸ್ ರಾಖಸ್ಕಿ ಇವ್ಣೆ ಇನಿಜೋ಼ಡ್ಮ ಹರ್‌ಹಮೇಶ ಜಿವ್ಣುಕರ್ಶೆ.
\ip ಆ ಪುಸ್ತಕ ಯೇಸು ಒಗ್ಗಿಸ್ ವಳ್ಯಾವಸ್ ಕರಿ ಬೋಲಾನು ಅಪ್ಣುನ ಹೊಷಾರಿ ಕರಸ್ ಅಜು಼ ಭರೋಖ್ಹೊಬಿ ದ್ಯವಾದೆ.
\iot ಕಾಡಿದೇಖೊ
\io1 1. ಯೋಹಾನನೆ ಆ ಪ್ರವಾದನೇನಿ ದರ್ಶನ್ ಕಿನೇಥಿ ಲೀಲಿದೊ ಕರಿ ಬೋಲ್ತೊಹುಯಿನ್ ಶುರುಕರಸ್. \ior 1:1-20\ior*
\io1 2. ಯೋ ನೇರ್‌ಥಿ ಯೇಸುಭಣಿಥು ಆಯೂತೆ ಸಂದೇಶ್ನ 7 ಸಬೇವ್‌ನ ದೇಸ್. \ior 1:1—3:22\ior*
\io1 3. ಇನಕೇಡೆಥು ಯೋ ಖ್ಹಾತ್ ಮುದ್ರಾನಿ ಬಾರೇಮ ಬೋಲಿವತಾಳಸ್. \ior 4:1—8:5\ior* ಅಜು಼ 7 ತುತ್ತೂರಿನಿ ಬಾರೇಮ ಬೋಲ್ತೊಜಾ಼ಸ್. \ior 8:6—11:19\ior*
\io1 4. ಇನಕೇಡೆಥು ಯೋಹಾನ 7 ಮುಡ್‌ಕ್ಯಾನು ಮಹಾ ಅರ್ಝ಼ನ ವಿರೋದ್ ಪರ್ಖ್ಹೊಲಡ್ಕಾನಿ ಜಂಗ್‌ನಿ ಬಾರೇಮ ಬೋಲಸ್. \ior 12:1—14:20\ior*
\io1 5. ಇನಬಾದ್ಮ ಯೋ ಇಂಘಾಠಾಥಿ ಭರೈರುತೆ ರಾಛಾ಼ನ 7 ಸಮಾಚಾರ್‌ನಿ ಬಾರೇಮ ಲೀಖಸ್. \ior 15:1—16:18\ior*
\io1 6. ಇನಕೇಡೆಥು ಯೋಹಾನನೆ ಸೊರ್ಗನು ದೇವ್ ಇನ ವಹೇರ‍್ಯಾನ ವಿರೋದ್ ಕಿಮ್ ಜೂತಸ್ ಕರಿ ಬೋಲಾನು ಬೋಲಿವತಾಳಸ್. \ior 17:1—20:15\ior*
\io1 7. ಖ್ಹರ್ತಿಮ ಯೋ ಕಡೇಶಿಮ ಒಳಿಯಾವತೆ ನವಿ ಸೊರ್ಗ ಅಜು಼ ನವು ಜಗತ್‌ ಆವ್‌ಶೇತೆ ಇನಿ ಬಾರೇಮ ಬೋಲಿ ಓತಾಳಸ್‍. \ior 21:1—22:21\ior*
\c 1
\p
\v 1 ಯೇಸು ಕ್ರಿಸ್ತನಿ ಪ್ರಕಾಶಿತ್ ವಚನ್ ಒಗ್ಗಿಸ್‌ಮ ಚಾ಼ಲ್ನುತೆ ಬಾರೇಮ ಯೋ ಇನ ದಾಸಖ್ಹಾರನ ವತಾಳನಖ್ಹಾಜೆ ಆ ಖ್ಹಾರು ದೇವ್‍ಥಿ ದೆವಾಯುತೆ. ಯೇಸು ಇನ ದೂತನ ಮೋಕ್ಲಿನ್ ಇನೇಥಿ ಆ ಖ್ಹಾರಿವಾತ್ನ ಯೋಹಾನ ಮಾಲುಮ್‌ ಕರಾಯೊ. 
\v 2 ಯೋಹಾನನೆ ದೇವ್ನಿ ವಚನ್ನಿ ಬಾರೆಮಾಬಿ, ಯೇಸು ಕ್ರಿಸ್ತನೆ ಬೋಲ್ಯೊತೆ ಸಾಕ್ಷಿನಿ ಬಾರೆಮಾಬಿ,ಇನೆ ದೇಖ್ಯೋತೆ ಖ್ಹಾರು ಖ್ಹಮ್‌ಜಾಡವಾಳೊಹುಯಿನ್‌ ಸಾಕ್ಷಿ ಬೋಲ್ಯೊ. 
\v 3 ಆ ಪ್ರವಾದ್‌ನೆನಿ ವಚನ್‌ಖ್ಹಾರು ಫಡವಾಳೂಬಿ ಖ್ಹಮ್‌ಜವಾಳೂಬಿ ಅಜು಼ ಅನಾಮ ಲೀಖೈರುತೆ ಇನಲೀನ್ ಚಾ಼ಲವಾಳು ಕೆತ್ರೇಕ್ಕಿ ಧನ್ಯರ್ ಹುಯಿರ‍್ಹುಸ್‍, ಶನಕತೊ ಆ ಖ್ಹಾರು ಚಾ಼ಲನೊದನ್ ಖನ್ನೆ ಐಗು.
\s ಖ್ಹಾತ್ ಸಬೆನ ಖ್ಹಲಾಮ್
\p
\v 4 ಯೋಹಾನನೆ ಏಷ್ಯಾ ತಬರ್‌ಖಾಮ ರ‍್ಹವಾಳಿ ಖ್ಹಾತ್ ಸಬೆನ ಶಾತ್‌ ಲೀಖುಕರಾಸ್‌ಕತೊ, ರ‍್ಹವಾಳೊ ಅಜು಼ ಅಗ್ಗಳ್‌ಥೋತೆ, ಖ್ಹಾಮ್ಣೆ ಆವವಾಳೊ, ಇನೇಥಿ ಅಜು಼ ಇನು ಸಿಂಹಾಸನ್ನ ಖ್ಹಾಮ್ಣೆಛಾ಼ತೆ ಖ್ಹಾತ್ ಆತ್ಮಥಿ ಅಜು಼ ಯೇಸು ಕ್ರಿಸ್ತಥಿ ವಾರ್‌ಖ್ಹೊಬಿ ಸಮಾಧಾನ್‍ಬಿ ಮಳಾದೆ. 
\v 5 ಯೇಸು ವಿಶ್ವಾಸ್‌ನಿ ಸಾಕ್ಷಿ ಹುಯಿರ್‍ಹೊಸ್, ಮರ‍್ಯಹುಯಾಮಥು ಪಹಿಲೆ ಉಠ್ಯೊತೆ ಧರ್ತಿನ ರಾಜಾ಼ವ್ನೊ ಮಾಲಿಕ್ ಹುಯಿರ‍್ಹವವಾಳೊ ಯೇಸು ಕ್ರಿಸ್ತಥಿ ತುಮುನ ವಾರ್‌ಖ್ಹೊಬಿ ಶಾಂತಿಬಿ ಮಳಾದೆ. ಅಪ್ಣುನ ಪ್ಯಾರ್‌ಕರವಾಳೊ ಇನು ಪವಿತ್ರ ಲ್ಹೋಯಿಥಿ ಅಪ್ಣುನ ಪಾಪ್‌ಥಿ ಛೋ಼ಡಾಯೊ. 
\v 6 ಅಪ್ಣೆ ದೇವ್ನ ರಾಜ್ಯವಾಳಹುಯಿನ್‌ ಇನೊ ಬಾ ಹುಯಿರ‍್ಹೋತೆ, ದೇವ್ನಖ್ಹಾಜೆ ಯಾಜಕರ್‌ ಬಣಾಯೊತೆಯಿನ ಜ಼ಗ್‌ಜ಼ಮಾನಮಾಬಿ ಮಹಿಮೆ ಶಕತ್ ರ‍್ಹವಾದೆ ಆಮೆನ್. 
\v 7 “ದೇಖೊ ಯೋ ವಾದ್‍ಳಾನ ಜೋ಼ಡೆ ಆವಾಳೊ ಹುಯಿರೊಸ್, ಹರೇಕ್ನೊ ಡೋಳೊ ಇನ ದೇಕ್‍ಷೆ ಇನ ಭೋಕ್ಯುಹುಯುಬಿ ಇನ ದೇಕ್‍ಷೆ” ಆ ಜಗತ್‌ನು ಅಖ್ಖು ಖೂಮ್‌ವಾಳು ಅಂದ್ರೋಖ್ಹ್‌ ಕರ್ಶೆ. ಒಹೊ ಇಮ್ಮಸ್ ಉಷೆ ಆಮೆನ್. 
\v 8 “ಮೇಸ್ ಪಹಿಲೋಬಿ, ಖ್ಹರ್ತಿಬಿ” ರ‍್ಹವಾಳೊ ಅಜು಼ ಅಗ್ಗಳ್‌ಥೋತೆ ಖ್ಹಾಮ್ಣೆ ಆವವಾಳೊ, ಮಹಾನ್ ಶಕತ್‌ವಾಳೊ ಕರಿ ದೇವ್ ಹುಯಿರ‍್ಹೋತೆ ಪ್ರಭು ಬೋಲಾಸ್.
\s ಕ್ರಿಸ್ತನು ದರ್ಶನ
\m
\v 9 ಯೋಹಾನಕರಿ ಮೆ ಕ್ರಿಸ್ತಮ ತುಮಾರೊ ಭೈ ಹುಯಿರೋಸ್. ಅಪ್ಣೆ ಹಿಡಿಕ್ ಯೇಸುನಖ್ಹಾಜೆ ಖ್ಹತಾಪ್ಣಿಮಾಬಿ,ರಾಜ್ಯಮಾಬಿ, ಖ್ಹಮಾಳಮಾಬಿ ವಾಟೊಲೀರಾಖ್ಯಸ್, ಮೆ ದೇವ್ನಿ ಸಮಾಚಾರ್‌ನಾಬಿ ಯೇಸುನಿ ಬಾರೇಮ ಸಾಕ್ಷಿ ದ್ಯವಾನಖ್ಹಾಜೆ ಪತ್ಮೋಸ್ ಟಾಪಾಮ ಥೊ. 
\v 10 ಮೇ ಪ್ರಭುನ ದನ್ಮ ಪವಿತ್ರಾತ್ಮಥಿ ಭರೈನ್ ಮಾರ ಪೀಟ್ ಪಾಛ಼ಳ್ ಮೋಟಿ ಅವಾಜ಼್ ಏಕ್‌ ಖ್ಹಮಜ಼್ ಪಡ್ಯು,ಯೋ ತುತ್ತೂರಿನಿ ಆವಾಜ಼್‌ನಿಮತ್ ಥೂ. 
\v 11 ಯೋ ಅವಾಜ಼್‌ನೆ, ತೂ ದೇಖಾನು ಏಕ್‌ ಪುಸ್ತಕ್‌ಮ ಲೀಖಿನ್ ಎಫೆಸ, ಸ್ಮುರ್ನ, ಪೆರ್ಗಮ, ಥುವತೈರ, ಸಾರ್ದಿಸ್, ಫಿಲಿಡೇಲ್ಫಯ, ಲವೊದಿಕೀಯ, ಕರಿ ಖ್ಹಾತ್ ಸಬೆವ್‍ನ ಮೋಕಲ್ನುಕರಿ ಬೋಲ್ಯು.\fig ಏಷ್ಯಾನಿ ಖ್ಹಾತ್ ಸಬೆನ ಪತ್ತೋಕರಾನು|alt="Map of seven churches in Asia" src="hk00378c.tif" size="span" copy="Horace Knowles ©" ref="1:11"\fig*
\p
\v 12 ಮಾರ ಜೋ಼ಡೆ ವಾತೆ ಬೋಲುಕರ್ತುಥೂತೆ ಅವಾಜ಼್ ಕಿನುಕರಿ ದೇಖಾನ ಮೇ ಪೀಠೆ ಫರ‍್ಯೊ. ಫರಾನಿ ವಖ್ಹತ್‌ಮ ಖ್ಹಾತ್ ಖ್ಹೊನ್ನಾನು ದೀವೊ ಮ್ಹೇಲಾನುಖಮ್‌ ದೇಖ್ಯೊ. 
\v 13 ಯೋ ದಿವಳ್ಗಿನ ಇಚ಼್‌ಮ ಅದ್ಮಿನ ಛಿಯ್ಯಾನಿತರ ರ‍್ಹವಾಳನ ದೇಖ್ಯೊ ಇನೆ ಝ಼ಗ್ಗೊ ಫೆರಾಖಿನ್‍ ಖ್ಹೊನ್ನಾನ ಪಟಾನ ಛಾ಼ತಿಪರ್ ಭಾಂದಿರಾಖ್ಯೊಥೊ. 
\v 14 ಇನ ಮಾಥಾನು ಕೇಖ್ಹ್‌ ಧೋಳು ಖ್ಹುತ್ತರ್‌ನಿ ಘೋಣಿಬಿ ಬರಪ್‍ನಿ ಘೋಣಿಬಿ ಧೋಳುಫಟ್ ಥೂ.ಇನೊ ಡೋಳೊ ಆಗ್‍ನಿ ಝ಼ಲ್‌ಪಟ್‍ನಿತರ ಥೂ. 
\v 15 ಇನ ಭೇ ಪಂಜ಼ ಕೋಲ್‌ಮಿಮ ಬಳಿಹುಯು ತಾಂಬಾನಿ ಘೋಣಿಬಿ ಇನು ಅವಾಜ಼್ ರಂಚಾ಼ವತೆ ಪಾಣಿನ ಘೂಂಜ಼್‌ನಿ ಅವಾಜ಼್‌ನಿತರಬಿ ಥು. 
\v 16 ಇನ ಖಾವಹಾತ್ಮ ಖ್ಹಾತ್ ತಾರೊ ಧರೈರೂಥು. ಇನ ಬಾಕಮಾಥು ಬೇಮ್ಹೋಡಾನಿ ತಲ್ವಾರೆ ನಿಕ್ಳುಕರ್ತಿಥಿ ಇನು ಮ್ಹೋಡು ಧೊಪಾರ್‌ಮ ಶಕಥ್ಥಿ ಉಜಾ಼ಖ್ಹ್‌ ದೇಸ್ತೆ ಚಾ಼ಂದ್‍ನಿಘೋಣಿ ಥು. 
\v 17 ಮೇ ಇನ ದೇಖಾನಿವಖ್ಹ್‌ತೆ ಮರ‍್ಯಹುಯಾನಿಘೋಣಿ ಇನ ಗೋಡಾನ ಖ್ಹಾಮ್ಣೆ ಪಡ್ಯೊ.ಯೋ ಇನ ಖಾವಹಾತ್ನ ಮಾರಪರ್ ಮ್ಹೇಲಿನ್, ಡರ್‌ನಕೊ ಮೇಸ್ ಪಹಿಲೆನೊ ಖ್ಹರ್ತಿನೊಬಿ. 
\v 18 ಕೆದೇಬಿ ಜಿವ್ತುರ‍್ಹವಾಳೊ ಹುಯಿರೊಸ್,ಮರ‍್ಯೊಹುಯೊಥೊ.ಕತೋಬಿ ದೇಕ್ ಜ಼ಗ್‌ಜ಼ಮಾನಮಾಬಿ ಜಿವ್ತು ರ‍್ಹವಾಳೊ ಹುಯಿರೊಸ್. ಮರಣ್ ಅಜು಼ ಪಾತಾಳ್ನ ಬೀಗಾನು ಕೀಲಿ ಮಾರಕನ ಛಾ಼. 
\v 19 ಇನಖ್ಹಾಜೆ ತೂ ದೆಖಾವನು ಖ್ಹಾರುಸ್,ಹಮ್ಕೆ ಚಾ಼ಲುಕರಾತೆ ಖ್ಹಾರುಸ್ ಅಗ್ಗಳ್ ಚಾ಼ಲಾನು ಅಖ್ಖಾಸ್ನ ಲೀಖ್. 
\v 20 ಮಾರ ಖಾವಹಾತ್ಮ ತುನೆ ದೇಖ್ಯೊತೆ ಖ್ಹಾತ್ ತಾರವ್ನ ಅಜು಼ ಖ್ಹಾತ್ ಖ್ಹೊನ್ನಾನು ದಿವಳ್ಗಿನು ಖಂಬಾನು ಮತ್ಲಬ್ ಬೋಲಿವತಾಳುಸ್, ಯೋ ಖ್ಹಾತ್ ತಾರೊ ಕತೊ ಖ್ಹಾತ್ ಸಬೇನು ದೂತರ್, ಯೋ ಖ್ಹಾತ್ ದಿವಳ್ಗಿನು ಖಂಬಖ್ಹಾರು ಕತೊ ಯೋ ಖ್ಹಾತ್ ಸಬೆಖ್ಹಾರಿ ಹುಯಿರ‍್ಹೀಸ್.
\c 2
\s ಎಫೆಸ ಸಬೆವಾಳನ ಸಂದೇಶ್
\p
\v 1 ಎಫೆಸಮ ಛಾ಼ತೆ ಸಬೆನ ದೂತಾನ ಅಮ್‍ಲೀಕ್, ಖ್ಹಾತ್ ತಾರವ್ನ ಇನ ಖಾವಹಾತ್ಮ ಧರಿಲೀನ್ ಖ್ಹಾತ್ ಖ್ಹೊನ್ನಾನು ದಿವಳ್ಗಿನ ಖಂಬಾನ ಇಚ಼್‌ಮ ಚಾ಼ಲುಕರಾವಾಳೊ ಶಾತ್ ಬೋಲುಕರಾಸ್‌ ಕತೊ, 
\v 2 ತಾರು ಕಾಮ್‌ಖ್ಹಾರು ಅಜು಼ ಮಿನ್ಹತ್‌ಬಿ ಖ್ಹಮಾಳನುಬಿ ಮೇ ಮಾಲುಮ್ ಕರಿರಾಖ್ಯೋಸ್. ತೂ ಖರಾಬ್ ಅದ್ಮಿನ ಖ್ಹಮಾಳಿಷ್ ಕೊಯ್ನಿ. ಅಪೊಸ್ತಲರ್ ಕಾಹೆತೆಬಿ ಇವ್ಣುನ ಅಪೊಸ್ತಲರ್‌ಕರಿ ಬೋಲೈಲ್ಯವಾಳು ತೂ ಪರ್ಖಿನ್ ಇವ್ಣುನ ಝೂ಼ಟುಕರಿ ಮಾಲುಮ್‌ಕರಿಲಿದೊ. 
\v 3 ತೂ ಧೀರ್‌ವಾಳೊ ಹುಯಿನ್ ಮಾರ ನಾಮ್ನಖ್ಹಾಜೆ ಖ್ಹತಾಪ್ಣಿನ ಖ್ಹಮಾಳಿನ್ ಲಡ್‌ಕ್ಯೊಕೊಂತೆ ಥೋತೆ ಮನಮಾಲುಮ್‌. 
\v 4 ಕತೋಬಿ ತಾರಪರ್ ಅಪ್‌ರಾದ್‌ ಬೋಲಾನು ಛಾ಼ ಅಗ್ಗಳ್ ಮಾರಪರ್ ಥೀತೆ ಪ್ಯಾರ್ ಹಮ್ಕೆ ಕೊಯ್ನಿ. 
\v 5 ಇನಖ್ಹಾಜೆ ತೂ ಕಿಜ್ಜಾ಼ಥು ಲಡ್ಕಿರ‍್ಹೋಸ್‌ಕಿ, ಇನ ತಾರಿ ಖ್ಹಯಾಲ್ಮಲ್ಯಾವ್. ದೇವ್‌ಭಣಿ ಮನ್‌ಫರೈನ್ ತೂ ಅಗ್ಗಳ್ ಕರುಕರ್ತೊಥೋತೆ ಕಾಮ್‌ಖ್ಹಾರುಸ್‌ ಕರ್‌, ತೂ ನಾ ಮನ್ ಫರಾಯೊತೊ ಮೆ ಅಯಿನ್ ತಾರು ದಿವಳ್ಗಿನ ಖಂಬಾನ ಇನು ಝ಼ಗೊಕಂಥು ಕಾಡಿನಾಖಿಷ್. 
\v 6 ಕತೋಬಿ ಅಛ್ಛು಼ ಏಕ್‌ ತಾರಾಮ ಛಾ಼. ಯೋ ಶಾತ್‍ಕತೊ ಮೇ ವಹೇರ್‌ಕರಾನು ನಿಕೋಲಾಯನ ಕಾಮ್ನ ತೂಬಿ ಜಿನುಕು ವಹೇರ್‌ ಕರುಕರಸ್. 
\v 7 ದೇವ್ನುಆತ್ಮನೆ ಸಬೆಖ್ಹಾರಾನ ಬೋಲಾತೆ ಇನ ಕಾನ್‌ರ‍್ಹವಾಳು ಖ್ಹಮ್‌ಜಾ಼ದೆ. ಕೋಣ್ ಜೂತಾಸ್ಕಿ ಇನ ದೇವ್ನ ಸೊರ್ಗಾಮ ಛಾ಼ತೆ ಜಾನ್ನ ಝಾ಼ಡ್‌ಣ ಪಂಡಾನ ಖಾವಾನ ಹುಕುಮ್‌ ದಿಶ್.
\s ಸ್ಮುರ್ನ ಸಬೆವಾಳನ ಸಂದೇಶ್
\p
\v 8 ಸ್ಮುರ್ನಮ ಛಾ಼ತೆ ಸಬೆನ ದೂತಾನ ಅಮ್‍ಲೀಕ್, ಶುರುವಾತ್‍ಬಿ ಖ್ಹರ್ತಿಬಿ ಹುಯಿರ‍್ಹಾವಳೊ, ಮರಿಜೈನ್ ಪಾಛೊ಼ ಜಿವ್ತೊ ಉಠೀನ್ ಆಯೊಹುಯೊ ಬೋಲಾಸ್ ಶಾತ್‌ಕತೊ 
\v 9 ಮೇ ತಾರು ಖ್ಹತಾಪ್ಣಿ ಅಜು಼ ಗರೀಬ್‍ರ‍್ಹವಾನುಬಿ ಮಾಲುಮ್ ಕರಿರಾಖ್ಯೊಸ್, ಕತೋಬಿ ತೂ ಶೌಕಾರಸ್ ಹುಯಿರ‍್ಹೋಸ್. ಅತ್ರೇಸ್‍ಕಾಹೆತೆ ಯೆಹೂದ್ಯರ್ ಕರಿ ಬೋಲೈಲ್ಯವಾಳು ಇವ್ಣೆಸ್ ತಾರಿ ಬಾರೇಮ ದೂಷಣೆ ಬೋಲಾನು ಮಾಲುಮ್. ಇವ್ಣೆ ಯೆಹೂದ್ಯರ್ ಕಾಹೆ, ಶೈತಾನ್ನ ಸಬೆನಾ ಮಂದಿರ್‌ವಾಳು ಹುಯಿರ‍್ಹೂಸ್ 
\v 10 ತುನ ಹುವಾನು ಖ್ಹತಾಪ್ಣಿನಖ್ಹಾಜೆ ನಕೊ ಡರಿಶ್. ಹಂದೇಕ್ ತುಮುನ ತರೀಪ್ಷಕರಾನ ಶೈತಾನ್ನ ತುಮಾರಮ ಥೋಡಾನ ಜೇಲ್‌ಮ ಘಾಲ್ನು ಕರಿ ಛಾ಼ ಅಜು಼ ದಖ್ಹ್‌ ದನ್‌ಲಗು ತುಮುನ ಖ್ಹತಾಪ್ಣಿರಿಷೆ. ತು ಮರಾಲಗು ವಿಶ್ವಾಸ್‌ನ ಯೋಗ್ಯಹುಯಿರೆ, ಮೇ ತುನ ಜಾನ್ನು ಕಿರೀಟ್‍ನ ದೆವಾಳೊ ಛೂ಼. 
\v 11 ದೇವ್ನುಆತ್ಮನೆ ಸಬೆಖ್ಹಾರಾನ ಬೋಲಾತೆ ಇನ ಕಾನ್‌ರ‍್ಹವಾಳು ಖ್ಹಮ್‌ಜಾ಼ದೆ. ಜೂತವಾಳನ ಬೇನಿ ಮರಣ್‌ಥು ಶನು ಗಲತ್‌ ಕೋಉಷೇನಿ.
\s ಪೆರ್ಗಮಾನು ಸಬೆವಾಳನ ಸಂದೇಶ್
\p
\v 12 ಪೆರ್ಗಮಾನು ಸಬೆನ ದೂತನ ಅಮ್‍ಲೀಕ್; ಬೇ ಮ್ಹೋಡಾನು ಚಾ಼ಲ್ತಿ ತಲ್ವಾರ್‌ನ ಧರಿರಾಖವಾಳೊ ಶಾತ್‌ ಬೋಲಾಸ್‍ಕತೊ, 
\v 13 ತೂ ಜಿವ್ಣುಕರುಕರಾತೆ ಝ಼ಗೊ ಮಾಲುಮ್ ಕರಿರಾಖ್ಯೊಸ್, ಯೋ ಶೈತಾನ್ನು ಸಿಂಹಾಸನ್ನು ಝ಼ಗೊ ಹುಯಿರ‍್ಹುಸ್. ತೂ ಮಾರ ನಾಮ್ನ ಘಟ್‍ಥಿ ಧರಿರಾಖ್ಯೊಸ್. ಶೈತಾನ್ನು ಘರ್ ಹುಯಿರ‍್ಹೂತೆ ತಾರ ಖ್ಹಯೇರ್‌ಮ ಮನ ವಿಶ್ವಾಸ್‌ವಾಳೊ ಸಾಕ್ಷಿ ಹುಯಿರೊಥೋತೆ ಅಂತಿಪ ಮರೈಜಾ಼ವನಿ ವಖ್ಹ್‌ತೆಬಿ ಮಾರಾಮ ಮಿಛಾ಼ಣ್ಯೊಥೊತೆ ವಿಶ್ವಾಸ್ ಧಖೆಲ್ಯೊಕೊಯ್ನಿ. 
\v 14 ಥೋಡಿ ವಾತೆನಿ ಬಾರೇಮ ತಾರ ಭಣೀಥು ಮಾರಕನ ಅಪ್‌ರಾದ್‌ ಛಾ಼. ಮೂರತ್ನ ಬಲಿಕರಾತೆ ರಾಛಾ಼ನ ಖಾವಮಾಬಿ ವ್ಯಬಿಚಾರ್‌ಮಾಬಿ ಇಸ್ರಾಯೇಲ್‌ವಾಳು ಧೊಕ್‌ಡೈನ್ ಪಟ್ಕಾವ್‍ಣು ಕರಿ ಬಿಳಾಮನೆ ಬಾಲಾಕನ ಶಿಕಾಡ್ಯೊತೆ ಖರಾಬ್ ಬೋಧನೆನ ಧರಿಲ್ಯಾವಳು ತಾರಾಮ ಛಾ಼. 
\v 15 ಇಮ್ಮಸ್ ನಿಕೋಲಾಯನ ಶಿಕಾಡನಿಘೋಣಿ ಚಾ಼ಲವಾಳುಬಿ ತುಮಾರಮ ಛಾ಼. 
\v 16 ಇನಖ್ಹಾಜೆ ತೂ ಮನ್ ನಾ ಫರಾಯೊತೊ ಮೇ ಒಗ್ಗಿಸ್‌ಮ ತಾರಕನ ಐನ್‌ ಮಾರ ಮ್ಹೋಡಮಾಥು ಆವಾಳಿ ತಲ್ವಾರ್‌ಥಿ ಇವ್ಣಪರ್ ಜಂಗ್ ಭೀಡಿಷ್‌. 
\v 17 ದೇವ್ನುಆತ್ಮನೆ ಸಬೆಖ್ಹಾರಾನ ಬೋಲಾತೆ ಇನ ಕಾನ್‌ರ‍್ಹವಾಳು ಖ್ಹಮ್‌ಜಾ಼ದೆ. ಕೋಣ್ ಜೂತಾಸ್ಕಿ ಇನ ಲಪಾಡಿರಾಖ್ಯೊಸ್ತೆ ಮನ್ನ ಕರಿ ಖಾಣನ ದಿಶ್. ಅತ್ರೇಸ್ ಕಾಹೆತೆ ಮೆ ಇನ ಏಕ್‌ ಧೋಳ ಬಂಡಾನ ದಿಶ್, ಯೋ ಬಂಡಾಪರ್ ನವು ನಾಮ್ನ ಟಕೈನ್‌ಲೀಖೈಷ್‍ ಯೋ ನಾಮ್ ಲೀರಾಖವಾಳನ ಮಾಲುಮ್ ಪಡ್‌ಶೆ, ಪಣ್ಕಿ ಯೋ ಬಿಜು಼ ಕಿನಾಬಿ ಮಾಲುಮ್‍ ಕೋಪಡ್ಷೇನಿ.
\s ಥುವತೈರಾನು ಸಬೆವಾಳನ ಸಂದೇಶ್
\p
\v 18 ಥುವತೈರಾಮ ಛಾ಼ತೆ ಸಬೇನು ದೂತಾನ ಅಮ್‍ಲೀಕ್, ಆಗ್‍ನಿ ಝ಼ಲ್‌ಪಟ್‌ನಿತರನ ಡೋಳಾ, ಝ಼ಮ್ಕಾಸ್‌ತೆ ತಾಂಬಾನಿತರನೊ ಪಂಜ಼ ರ‍್ಹವಾಳೊ ದೇವ್‌ನೊ ಛಿಯ್ಯೊ ಶಾತ್‌ ಬೋಲಾಸ್‍ಕತೊ, 
\v 19 ತಾರ ಕಾಮ್ ಅಖ್ಖಾನಾಬಿ, ತಾರಿ ಪ್ಯಾರ್‌ನಾಬಿ, ವಿಶ್ವಾಸ್‍ನಾಬಿ, ಚಾ಼ಕ್ರಿನಾಬಿ ಅಜು಼ ಖ್ಹಮಾಳನುಬಿ ಮೇ ಮಾಲುಮ್ ಕರಿರಾಖ್ಯೋಸ್. ಅತ್ರೇಸ್ ಕಾಹೆತೆ ತಾರು ಹಮ್ಕೆನು ಕಾಮ್‌ಖ್ಹಾರು ತಾರ ಅಗ್‍ಲ್ಯ ಕಾಮ್ ಖ್ಹಾರಥಿಬಿ ಊಚು಼ ಹುಯಿರ‍್ಹುಸ್‌ಕರಿ ಮಾಲುಮ್. 
\v 20 ತಾರ ಭಣೀಥು ಮಾರಕನ ಅಪ್‌ರಾದ್‌ ಏಕ್‌ ಛಾ಼. ಯೆಜೆಬೇಲ್ ಕರಿ ಆ ತಯೇಡ ಇನುಯೋಸ್ ಪ್ರವಾದಿನಿಕರಿ ಬೋಲಿಲಿನ್, ವ್ಯಬಿಚಾರ್‌ ಕರೇಜಾ಼ಯ್‍ಕರೀಬಿ ಮೂರತ್ನ ಅರ್ಪಣ್ ಕರಾನ ರಾಛ಼ನ ಖಾಯೆಜಾ಼ಯ್ ಕರೀಬಿ ಮಾರ ದಾಸರ‍್ನ ಬೋಧನೆ ಕರೀನ್ ಯೋ ಇವ್ಣುನ ಝೂ಼ಟ ಮಾರಗ್‍ಮ ಚ಼ಲವ್‍ಕರಿತೋಬಿ ತೂ ಇನ ಭಿರಾಖ್ಯೊಕೊಂತೆ ಹುಕುಮ್ ದ್ಯವಾಳೊ ಹುಯಿರ‍್ಹೊಸ್. 
\v 21 ಯೊ ಹೈರಿತೆನ ವ್ಯಬಿಚಾರ್‌ನ ಮ್ಹೇಲಿನ್ ಮನ್‌ಫರೈನ್ ದೇವ್‌ಭಣಿ ಫರಾನ ಮೇ ಯೋ ತಯೇಡಾನ ಗಡುದಿದೊ ತೋಬಿ ದೇವ್‌ಭಣಿ ಫರಾನ ಇನ ಮನ್ ಕೊಆಯುನಿ. 
\v 22 ಹಂದೇಕ್ ಯೋ ಹುಯಿರ‍್ಹೀತೆ ಬಿಛಾ಼ವ್ಣಪರ್ ಪಡಿರ‍್ಹಾವನಿ ಘೋಣಿ ಕರೀಶ್, ಅಜು಼ ಇನಿ ಜೋ಼ಡ್ಮ ವ್ಯಬಿಚಾರ್ ಕರವಾಳು ಪಶ್ಚತ್ತಾಪ್ ಕರೀನ್ ದೇವ್‌ಭಣಿ ಫರಿನ್ ಮ್ಹೇಲ್ಯುನಾತೊ ಇವ್ಣುನ ಘಣು ಖ್ಹತಾಪ್ಣಿಮ ಪಡಾನಿಘೋಣಿ ಕರಿಶ್. 
\v 23 ಯೋ ಹುಯಿರೀತೆ ಇನ ಲಡ್ಕಾವ್‍ನ ಮಾರಿನಾಖಿಶ್‌. ತದೆ ಮೆ ಅದ್ಮಿ ಖ್ಹಾರನ ದಿಲ್ನ ಮಹಿ ತರೀಪ್ಷ ಕರಾವಾಳೊ ಕರಿ ಖ್ಹಾರಿ ಸಬೇವ್‌ನ ಮಾಲುಮ್‌ ಪಡ್‌ಶೆ. ತುಮಾರಮ ಹರೇಕ್‌ನಾಬಿ ಇವ್ಣ ಇವ್ಣ ಕಾಮ್ ಕಿಮ್ಕಿ ತಿಮ್ಮಸ್ ಪ್ರತಿಫಲ್ ದಿಶ್. 
\v 24 ಕತೋಬಿ ಥುವತೈರಾಮ ರ‍್ಹವಾಳ, ಬಿಜ಼ಖ್ಹಾರನ ಮೇ ಬೋಲಾನು ಶಾತ್‍ಕತೊ, ತುಮೆ ಇನು ಶಿಕಾಡನಿತರ ಚಾ಼ಲ್ಯಕೊಯ್ನಿ ಶೈತಾನ್ನು ಖ್ಹರ್ತಿನು ಗಪ್ಲತ್‍ಖ್ಹಾರು ಕೋಣ್ ಕೋಣ್ ಮಾಲುಮ್‌ ಕೋಕರ‍್ಯಾನಿತೆ ರ‍್ಹೇಸ್ಕಿ ಇವ್ಣುನ ಬೋಲಾನು ಶಾತ್‍ಕತೊ ಮೇ ಬಿಜೇಕ್ ವಜ಼ನ್ ತುಮಾರಪರ್ ಕೋನಾಖಿಷ್‌ನಿ. 
\v 25 ಕತೋಬಿ ತುಮೆ ಲೀರಾಖ್ಯಾಸ್ತೆ ಇನಾಸ್ ಮೇ ಆವಲಗು ಘಟ್‍ಥಿ ಧರಿರಾಖೊ. 
\v 26 ಕೋಣ್ ಜೂತಿನ್ ಆವಾಸ್ಕಿ ಅಜು಼ ಮನ ಪಸಂದ್‍ನು ಕಾಮ್‌ಖ್ಹಾರು ಖ್ಹರ್ತಿಲಗು ಚ಼ಲಾವಸ್ಕಿ, ಇನ ಮೇ ಮಾರ ಬಾಥಿ ಲಿದೋತೆ ಅದಿಕಾರ್‌ನಿ ಘೋಣಿಸ್ ಅದ್ಮಿಪರ್ ಅದಿಕಾರ್‌ನ ದಿಶೆ. 
\v 27 ಯೋ ಲ್ಹೋಡಾನ ಲಠ್ಠೇಥಿ ಇವ್ಣುನ ಚ಼ಲಾವ್‌ಷೆ, ಮಾಟಿನು ಮಟ್ಕಿ ಫುಟಿಜಾ಼ವಾನಿಮತ್ ಇವ್ಣು ತಾಖತ್ ಟುಟಿಜಾಷೆ. 
\v 28 ಮೆ ಇನ ಉಜಾ಼ಳು ದೆಖಾಡನ ಶುಕ್ಕರ‍್ನ ದಿಶ್. 
\v 29 ದೇವ್ನುಆತ್ಮನೆ ಸಬೆಖ್ಹಾರಾನ ಬೋಲಾತೆ ಇನ ಕಾನ್‌ರ‍್ಹವಾಳು ಖ್ಹಮ್‌ಜಾ಼ದೆ.
\c 3
\s ಸಾರ್ದಿಸ್‌ನ ಸಬೆವಾಳನ ಸಂದೇಶ್
\p
\v 1 ಸಾರ್ದಿಸ್‌ಮ ಛಾ಼ತೆ ಸಬೆನ ದೂತನ ಅಮ್‍ಲೀಕ್: ದೇವ್ನು ಖ್ಹಾತ್ ಆತ್ಮಾನ ಅಜು಼ ಖ್ಹಾತ್ ಶುಕ್ಕರ್‌ನ ಲೀರಾಖವಾಳು ಯೋ ಬೋಲಸ್ ಶಾತ್‌ಕತೊ, ತಾರು ಕಾಮ್‌ಖ್ಹಾರು ಮನ ಮಾಲುಮ್ ಛಾ಼. ಜಿವ್ತೊಕರಿ ನಾಮ್ ತುನ ರ‍್ಹಯುತೋಬಿ, ತೂ ಮರ‍್ಯೊಹುಯೊ ಹುಯಿರೊಸ್. 
\v 2 ಹೊಷಾರ್ ಹೂ ಮರಾನಿ ಹಾಲತ್ಮ ಛಾ಼ತೆಯಿನ ಧಿಲ್‌ಪತ್‌ ದೇ. ಶನಕತೊ ಮಾರ ದೇವ್ನಖ್ಹಾಮ್ಣೆ ತಾರ ಕಾಮ್‍ಖ್ಹಾರಾವ್ಮ ಏಕ್‍ತೋಬಿ, ಪೂರಹುಯುಕರಿ ಮನ ದೆಖಾಯುಕೊಯ್ನಿ. 
\v 3 ಇನಖ್ಹಾಜೆ ತೂ ಲೀರಾಖ್ಯೊಸ್ತೆ ಬೋಧನೆನ ಯೋ ಖ್ಹಮ್‍ಜ್ಯೊತೆ ಪರಕ್ನ ಖ್ಹಯಾಲ್ಮ ಲೈನ್‌ ಇನ ಬಚಾ಼ಡಿಲೆ, ಮನ್ ಫರಾವೊ, ದೇವ್‌ಭಣಿ ಫರಿಜಾ಼, ತೂ ಹೊಷಾರ್ ನಾಹುಯೋತೊ, ಚೋ಼ರ್ ಆವಾನಿಘೋಣಿ ಆಯಿಶ್. ಮೇ ಖಿವಿ ವಖ್ಹತ್‌ಮ ತಾರಕನ ಐಶ್‌ಕರಿ ಬೋಲಾನು ತುನ ಮಾಲುಮ್‌ಪಡ್‌ಶೇಸ್ ಕೊಯ್ನಿ. 
\v 4 “ತುಮಾರು ಸಬೆನ ಮಳಿರ‍್ಹುಸ್ತೆ ಥೋಡ ಜ಼ಣ ಸಾರ್ದಿಸ್‍ನು ಬೀಜೂಬಿ ಪವಿತ್ರ ಛಾ಼. ಅವ್ಣೆ ಇವ್ಣ ಲುಂಗ್ಡಾನ ಗಂಧು ಕೋಕರಿರಾಖ್ಯುನಿ. ಅವ್ಣೆ ಯೋಗ್ಯರ್ ಹುಯಿರ‍್ಹಿಷೇತೆ ಇನಖ್ಹಾಜೆ ಧೋಳು ಲುಂಗ್ಡಾನ ಫೇರಿನ್ ಮಾರ ಜೋ಼ಡ್ಮ ಚಾ಼ಲ್‍ಷೆ. 
\v 5 ಜೀತ್ ಲ್ಯವಾಳೊ ಧೋಳ ಲುಂಗ್ಡಾನ ಫೇರ್‌ಶೆ. ಜಾನ್ನ ಹಕ್‌ವಾಳಾನಿ ಪುಸ್ತಕಮಾಥು ಇನ ನಾಮ್ನ ಮೇ ನೂಛಿಶ್‍ಕೊಂತೆ ಯೋ ಮಾರೊ ಕರಿ ಮಾರ ಬಾನ ಖ್ಹಾಮ್ಣೇಬಿ ಇನ ದೂತವ್ನ ಖ್ಹಾಮ್ಣೆಬಿ ಮಾನವಾಳೊ ಹುಯಿರ‍್ಹೀಶ್, 
\v 6 ದೇವ್ನುಆತ್ಮನೆ ಸಬೆಖ್ಹಾರಾನ ಬೋಲಾತೆ ಇನ ಕಾನ್‌ರ‍್ಹವಾಳು ಖ್ಹಮ್‌ಜಾ಼ದೆ.
\s ಫಿಲಿಡೇಲ್ಪಿಯ ಸಬೆವಾಳನ ಸಂದೇಶ್
\p
\v 7 ಫಿಲಿಡೇಲ್ಫಿಯಾಮ ಛಾ಼ತೆ ಸಬೆನ ದೂತನ ಅಮ್‍ಲೀಕ್: ಪರಿಶುದ್ಧಬಿ, ಖ್ಹಾಚೊ಼ಹುಯಿರ‍್ಯವಾಳೊಬಿ, ದಾವೀದನು ಬೀಗಾನು ಕೀಲಿ ಲೀರಾಖವಾಳೋಬಿ, ಕಿನೇಥೀಬಿ ನಾ ಮೂಚ಼ನಹೋಣುತೆ ಇಮ್‌ ಕಾಡವಾಳೊ, ಖೆವಾಥೀಬಿ ಉಖ್ಡಾನ ನಾ ಹೋಣುತೆ ಇಮ್‌ ಮೂಚಾ಼ವಾಳೊ ಹುಯಿರೋತೆ ಶಾತ್‌ ಬೋಲಾಸ್‍ಕತೊ, 
\v 8 ತಾರು ಕಾಮ್‌ಖ್ಹಾರು ಮನ ಮಾಲುಮ್ ತುನ ಛಾ಼ತೆ ಶಕತ್ ಥೋಡು ರ‍್ಹಯುತೋಬಿ ತುನೆ ಮಾರ ನಾಮ್ನ ಧಕೇಲ್ಯೊಕೊಂತೆ ಮಾರಿ ವಚನ್ನ ಬಚಾ಼ಡ್ಯೊತೆ ಇನಖ್ಹಾಜೆ ಹಂದೇಕ್ ತಾರಖ್ಹಾಮ್ಣೆ ಏಕ್‌ ಬಾಕಲ್ನ ಉಖ್ಡಿರಾಖ್ಯೊಸ್. ಕೋಣ್‌ಬಿ ಇನ ಮೂಚ್‍ಷೆ ಕೊಯ್ನಿ. 
\v 9 ಖ್ಹಮಜ಼್! ಯೆಹೂದ್ಯರ್‌ಕರಿ ಝೂ಼ಟೊ ಬಡೈಮಾರಿನ್‍ ಥೋಡುಜ಼ಣು ಶೈತಾನ್ನ ಸಬೆನಾ ಮಂದಿರ್‌ಮ ರ‍್ಹವಾಳು ಹುಯಿರ‍್ಹುಸ್. ಯೋ ಅದ್ಮಿಖ್ಹಾರು ತಾರಖ್ಹಾಮ್ಣೆ ಆಯಿನ್ ತಾರ ಗೋಡಾಪರ್ ಆಡ್‍ಪಡಿನ್ ಖ್ಹಲಾಮ್ ಕರಾನಿಘೋಣಿ ಕರೀಶ್. ಮೇ ಪ್ಯಾರ್ ಕರ‍್ಯೊತೆ ಅದ್ಮಿ ತುಮೇಸ್‍ಕರಿ ಬೋಲಾನು ತದೆ ಇವ್ಣೆ ಮಾಲುಮ್ ಕರಿಲಿಶೆ. 
\v 10 ಮಾರಿ ವಚನ್ನ ತುನೆ ಚ಼ಲಾಯೊತೆ ಇನಖ್ಹಾಜೆ ಧರ್ತಿಮ ಜಿವ್ಣುಕರವಾಳ ಖ್ಹಾರಸ್ನ ತರೀಪ್ಷ ಕರಾನಖ್ಹಾಜೆ ಅಖ್ಖಾ ಜಗತ್ನಪರ್ ಆವಾನಯುತೆ ಕಠಣ್ ಶೋದನೆನ ದನ್ಮ ಮೇ ತುನ ಆಖ್ಹ್‌ರೊ ಕರಾವಾಳೊ ಹುಯಿನ್ ಬಚಾ಼ಡಿಶ್. 
\v 11 ಮೇ ಒಗ್ಗಿಸ್‌ಮ ವಳ್ಯಾವುಸ್. ತಾರಿ ಕಿರೀಟ್ನ ಕೋಣ್‌ಬಿ ನಾ ಛಿನಾವ್ಣುತೆ ಇಮ್‌ ತುನೆ ಲೀರಾಖ್ಯೊಸ್ತೆ ಇನ ಘಟ್ ಧರಿರಾಕ್. 
\v 12 ಖಿವೊ ಜೂತಾಸ್ಕಿ ಇನ ಮಾರ ದೇವ್ನ ಮಂದಿರ್‌ಮ ಆಧಾರ್‌ನು ಖಂಬುಕರಿನ್ ಭೀರಾಖಿಷ್. ಯೋ ಕದೇಬಿ ಹಿಜ್ಜಾ಼ಥು ಧಕ್‍ಷೇಸ್‍ ಕೊಯ್ನಿ. ಅತ್ರೇಸ್ ಕಾಹೆತೆ ಮಾರ ದೇವ್ನ ನಾಮ್ನ ಅಜು಼ ಮಾರ ದೇವ್ನ ಖ್ಹಯೇರ‍್ನು ನಾಮ್ ಇನಾಪರ್ ಲೀಖಿಶ್. ನವು ಯೆರೂಸಲೇಮಸ್ ಯೊ ನಂಗರ್. ಯೋ ಖ್ಹಯೇರ್ ಮಾರ ದೇವ್‌ಕಂಥು ಸೊರ್ಗಮಾಥು ಉತ್ರಿ ಆವ್‌ಶೆ. ಮಾರು ನವುನಾಮ್ ಇನಾಪರ್ ಲೀಖಿಶ್. 
\v 13 ದೇವ್ನುಆತ್ಮನೆ ಸಬೆಖ್ಹಾರಾನ ಬೋಲಾತೆ ಇನ ಕಾನ್‌ ರ‍್ಹವಾಳು ಖ್ಹಮ್‌ಜಾ಼ದೆ.
\s ಲವೊದಿಕೀಯನ ಸಬೆವಾಳನ ಸಂದೇಶ್
\p
\v 14 ಲವೊದಿಕೀಯಮ ಛಾ಼ತೆ ಸಬೆನ ದೂತನ ಲೀಕ್, ವಿಶ್ವಾಸ್ ಯೋಗ್ಯಬಿ, ಖ್ಹಾಚಿ ಸಾಕ್ಷಿಬಿ, ದೇವ್ನಿ ಬಣಾವಟ್ನ ರಾಜ಼ ಹುಯಿರೋತೆ ‘ಆಮೆನ್’ ಕರಿ ರ‍್ಹವಾಳೊ ಶಾತ್‌ ಬೋಲಸ್‍ಕತೊ, 
\v 15 ತು ಕರ‍್ಯೊತೆ ಕಾಮ್‌ಖ್ಹಾರು ಮನ ಮಾಲುಮ್ ಛಾ಼. ಮೇ ಶಾತ್‌ ಆಖ್ಹ್ ಕರುಸ್ ಕತೊ, ತೂ ಠಂಡು ಕಾಹೆ ನತರ್ ಗರಮ್‌ ಕಾಹೆ ತು ಠಂಡು ನತರ್ ಗರಮ್‌ ರ‍್ಹಯೋಹೊತ್ತೊ ಅಛ್ಛು಼ ಥು. 
\v 16 ಕತೋಬಿ ತೂ ಗರಂಬಿ ಕಾಹೆತೆ ಠಂಡೂಬಿ ಕಾಹೆತೆ ಅಂಡಚೇತು ರ‍್ಹಯೂತೊ ತುನ ಮಾರ ಬಾಕಮಾಥು ಥೂಕಿದಿಶ್. 
\v 17 ತೂ ತಾರಿ ಬಾರೇಮ ಮೇ ಶೌಕಾರ್ ಧನ್‍ದೌಲತ್ನೊ, ಶನಾಮಬಿ ಟುಸ್‌ಟಿನಾರ‍್ಹವಾಳೊ ಕರಿ ಬೋಲಿಲೇಸ್. ಕತೋಬಿ ತೂ ಖಲಿ ಖರಾಬ್ ಹಾಲತ್ಮ ಪಡಿರ‍್ಹವಾಳೊ. ಖರಾಬ್ ನಶೀಬ್‍ನೊ ಅನಾದಿ, ಅಂಧೊ ಉಘಾಡೊ ಹುಯಿರೋಸ್ ತು ಕರಿ ಮಾಲುಮ್‌ ಕೋಕರ‍್ಯೊಂತೆ ಛಾ಼. 
\v 18 ತೂ ಶೌಕಾರ್ ಹುವಾನ ಆಗ್‌ಮ ನಾಖಸ್ತೆ ಖ್ಹೊನ್ನಾನಾಬಿ ಖ್ಹರಮ್‌ನ ಕಾರಣ್ ಹುಯಿರ‍್ಹೂತೆ ತಾರು ಉಘಾಡಾನ ದೆಖಾವ್ಣುನಾತೆ ಫೆರಾನಖ್ಹಾಜೆ ಧೋಳ ಲುಂಗ್ಡಾವ್‍ನಾಬಿ ಡೋಳೊದೆಖಾವನಖ್ಹಾಜೆ ತುಮಾರ ಡೋಳಾವ್‌ನ ಲಗಾಡನಖ್ಹಾಜೆ ಅಂಜ಼ಣ್‍ನಾಬಿ ಮಾರೇಥಿ ಲೀಲೇವ್ಣುಕರಿ ಮೇ ತುಮೂನ ಅಕ್ಕಲ್ ಬೋಲುಕರುಸ್. 
\v 19 ಮೇ ಕಿನಕಿನ ಪ್ಯಾರ್ ಕರೂಸ್ಕಿ ಇವ್ಣುನ ಗುರ್‌ಕವುಸ್ ಅಜು಼ ನಿಶತ್‌ ದೆವುಸ್. ಇನಖ್ಹಾಜೆ ತೂ ಹೊಷಾರ್‌ಥಿ ರ‍್ಹೇ. ಮನ್ ಫರೈನ್ ದೇವ್‌ಭಣಿ ಫರಿಜಾ಼. 
\v 20 ಹಂದೇಕ್ ಖ್ಹಾಮ್ಣೆ ಭೀರಿನ್ ಬಾಕಲ್ ಖಟ್‍ಕಟಾವ್‌ ಕರುಸ್, ಕೋಣ್‌ತೋಬಿ ಮಾರಿ ಆವಾಜ಼್‌ನ ಖ್ಹಮ್‌ಜಿನ್‌ ದರ‍್ವಾಜು಼ ಕಾಡ್ಯತೊ, ಮೇ ಮಹಿ ಐನ್ ಇನ ಜೋ಼ಡೆ ಖಾಣು ಖೈಶ್‌. ಯೊ ಮಾರಿ ಜೋ಼ಡ್ಮ ಖಾಣು ಖಾಶೆ. 
\v 21 ಮೇ ಜೂತಿನ್ ಮಾರ ಬಾನಿ ಜೋ಼ಡ್ಮ ಸಿಂಹಾಸನ್‌ಮ ಬೆಠೂತೆ ತಿಮ್ಮಸ್ ಜೂತಹುಯಾನ ಮಾರ ಜೋ಼ಡೆ ಸಿಂಹಾಸನ್‌ಮ ಬೇಖ್ಹಾನಿ ಅಧಿಕಾರ‍್ನ ಮೇ ದಿಶ್. 
\v 22 ದೇವ್ನುಆತ್ಮನೆ ಸಬೆಖ್ಹಾರಾನ ಬೋಲಾತೆ ಇನ ಕಾನ್‌ ರ‍್ಹವಾಳು ಖ್ಹಮ್‌ಜಾ಼ದೆ.
\c 4
\s ಸೊರ್ಗಮ ಆರಾದನೆ
\p
\v 1 ಇನಪಾರ್ ಮೆ ದೇಖಾನಿವಖ್ಹ್‌ತೆ ಸೊರ್ಗಾಮ ನಿಕ್ಳಿರ‍್ಹೂತೆ ಏಕ್‌ ದರ‍್ವಾಜು಼ ದೆಖಾಯು. ಪಹಿಲೆ ವಾತೆ ಬೋಲ್ಯುಥೂತೆ ಅವಾಜ಼್ ಪಾಛು಼ ತುತ್ತೂರಿನಿತರ ಬೋಲಾನಿತರ ಮನ ಖ್ಹಮಜ್‍ಪಡ್ಯು. ಯೋ ಅವಾಜ಼್ “ಹಜ್ಜಾ಼ ಛ಼ಡಿಆವ್ ಅಗ್ಗಳ್ ಚಾ಼ಲ್‌ಶೇತೆ ಖ್ಹಾರು ತುನ ವತಾಳಿದೆವುಸ್‌” ಕರಿ ಬೋಲ್ಯು. 
\v 2 ತುರಂಥಿಸ್ ಮೇ ಆತ್ಮಾನ ಕಬ್‌ಜ಼ಮಾಥೊ, ತದೆ ಹಿಜ್ಜಾ಼ ಪರ್‌ಲೋಕ್‌ಮ ಏಕ್‌ ಸಿಂಹಾಸನ್ ಥೀ.ಯೋ ಸಿಂಹಾಸನ್‌ಪರ್ ಏಕ್‍ಜ಼ಣೊ ಬೆಠೋಥೊ. 
\v 3 ಬೆಠೊಹುಯೊ ಡೋಳಾವ್‌ಮ ಚಾ಼ಂದ್‌ನು ಉಜಾ಼ಖ್ಹ್‌ ಪದ್ಮರಾಗಮಣ್ಕನಿತರ ದೆಖವ್‍ಕರ್ತೋಥೊ.ಸಿಂಹಾಸನ್ನ ಅಶ್‌ಪಿಶ್ ಹರ‍್ಯಾನಿಮತ್ ದೆಖವ್‌ಕರ್ತುಥೂತೆ ಆಕಾಶ್ ಧೂಣ್‌ಥಿ. 
\v 4 ಅತ್ರೇಸ್ ಕಾಹೆತೆ ಸಿಂಹಾಸನ್ನ ಅಶ್‌ಪಿಶ್ ಚಾರ್‌ಉಪ್ಪರ್ ವೀಖ್ಹ್‌ ಸಿಂಹಾಸನ್‌ಖ್ಹಾರಿಥಿ. ಯೋ ಸಿಂಹಾಸನ್‌ಪರ್ ಧೋಳು ಪೆರ್ವಾಖ್ಹ್‌ ಫೇರುಹುಯು ಚಾರ್ ಉಪ್ಪರ್ ವೀಖ್ಹ್‌ಜ಼ಣು ಶಾಣು ಬೇಠೂಥು. ಇವ್ಣ ಮಾಥಪರ್‌ ಖ್ಹೊನ್ನಾನಿ ಕಿರೀಟ್ ಘಲೈರ‍್ಹೀಥಿ. 
\v 5 ಸಿಂಹಾಸನ್‌ಥು ವಿಜ಼್‌ಳಿ ಖಡ್ಕಾನು ಘಲಾರನು ಅವಾಜ಼್‌ ಭಾರ್‌ ಅವ್‌ಕರ್ತುಥು. ಯೋ ಸಿಂಹಾಸನ್ನ ಖ್ಹಾಮ್ಣೆ ಖ್ಹಾತ್ ದಿವಳ್ಗಿ ಲಾಗುಕರ್ತಿಥಿ, ಯೋ ದಿವಳ್ಗಿಖ್ಹಾರು ದೇವ್ನು ಖ್ಹಾತ್ ಆತ್ಮವ್ ಹುಯಿರುಥು. 
\v 6 ಅತ್ರೇಸ್ ಕಾಹೆತೆ ಸಿಂಹಾಸನ್ನ ಖ್ಹಾಮ್ಣೆ ಫಟಕ್ಡಿನಿತರ ದೆಖಾವನು ಶಿಖ್ಹಾನು ದರ‍್ಯಾವ್ ರ‍್ಹವಾನಿಘೋಣಿ ದೆಖಾಯು. ಸಿಂಹಾಸನ್ನ ಚಾರ್ ಬಾಜು಼ಮಾಬಿ ಚಾರ್ ಜೀವಿ ಥೂ. ಇನಖ್ಹಾಮ್ಣೆ ಪೀಠೆ ಕೈಯೆಕ್ಕಿ ಡೋಳಾಥ. 
\v 7 ಪಹಿಲು ಜೀವಿ ಶುಂಭಾನಿತರ ಥು, ಬೇನು ಜೀವಿ ಘುಳಿನಿತರ ಥೂ. ತೀನ್ನ ಜೀವಿನು ಮ್ಹೋಡು ಅದ್ಮಿನಿತರ ಥು, ಚಾರ‍್ನು ಜೀವಿ ಉಡಂತು ಗರದ್‌ನಿಘೋಣಿ ಥು. 
\v 8 ಯೋ ಚಾರ್ ಜೀವಿ ಎಕೇಕೆನ ಛೊ಼ಛೋ಼ ಫಾಕ್ಡಿ ಥು. ಅಶ್‌ಪಿಶ್‌ಬಿ ಮಹಿಬಿ ಘಣು ಡೋಳಖ್ಹಾರುಥು, ಆ ಜಿನಾವರ್‌ ಖ್ಹಾರು ರಾತ್‌ದನ್ ಆರಾಮ್‌ಕೊಂತೆ ದೇವ್ ಹುಯಿರ‍್ಹಾವಳೊ ಪ್ರಭು ಪರಿಶುದ್ಧ್, ಪರಿಶುದ್ಧ್, ಪರಿಶುದ್ಧ್, ಯೋ ಸರ್ವಶಕತ್‌ನೊ ಅಗ್ಗಳ್ ಥೋತೆ, ಹಮ್ಕೆ ಛಾ಼ತೆ, ಆವಾಳೊಛಾ಼ತೆ ಕರಿ ಬೋಲುಕರ್ತುಥು. 
\v 9 ಜ಼ಗ್‌ಜ಼ಮಾನಮಾಬಿ ಜಿವ್ತೊರ‍್ಹೀನ್ ಸಿಂಹಾಸನ್‌ಪರ್ ಬೆಠೊರ‍್ಹವಾಳಾನ ಯೋ ಜೀವಿ ಮಹಿಮ, ಮರ್ಯಾದಿ ಧನ್ಯವಾದ್ ಕರುಕರ್ತುಥು. 
\v 10 ಯೋ ಚಾರ್ ಉಪ್ಪರ್ ವೀಖ್ಹ್‌ ಜ಼ಣು ಶಾಣುಖ್ಹಾರು ಸಿಂಹಾಸನ್‌ಪರ್ ಬೆಠೊರ‍್ಹವಾಳಾನ ಗೋಡಾಪರ್ ಆಡ್‍ಪಡಿನ್, ಇವ್ಣ ಕಿರೀಟ್ನ ಸಿಂಹಾಸನ್ನ ಖ್ಹಾಮ್ಣೆ ನಾಖಿನ್, ಜಾನ್ನದೇವ್‌ನ ಕದೇಬಿ ಆರಾದನೆ ಕರ್ತುಹುಯಿನ್ 
\v 11 ಹಮಾರೊ ಪ್ರಭು ಹುಯಿರ‍್ಹೋತೆ ದೇವ್, ತೂ ಮಹಿಮೆನಾಬಿ ಮಾನ್ ಮರ‍್ಯಾದಿನಾಬಿ ಶಕತ್ನ ಲೀಲಾವನ ಯೋಗ್ಯಹುಯಿರೋಸ್, ಶನಕತೊ ಹರೇಕ್ನ ಉಬ್‌ಜಾ಼ಯೋತೆ ತೂಸ್, ಅಖ್ಖೂಬಿ ತಾರೀಸ್ ಖ್ಹೂಜ಼್‌ಥಿಥು.ಅಜು಼ ತಾರೀಸ್ ಖ್ಹಯಾಲ್‌ಥಿ ಬಣಾವಟ್ ಹುಯು ಕರಿ ಬೋಲ್ತುಹುಯಿನ್ ಆರಾದನೆ ಕರುಕರ್ತುಥು.
\c 5
\s ಪುಂಗ್‌ಳಿ ಅಜು಼ ಮೇಂಢು
\p
\v 1 ಮೇ ಸಿಂಹಾಸನ್‌ಪರ್ ಬೆಠಹುಯಾನ ಖಾವಹಾತ್ಮ ಏಕ್‌ ಪುಂಗ್‌ಳಿನ ದೇಖ್ಯೊ. ಇನ ಮಹಿನಿ ಬಾಜೂ಼ಮ ಅಜು಼ ಫಾದರ‍್ಲಿ ಬಾಜೂ಼ಮ ಲೀಖೈರೂಥು, ಯೋ ಖ್ಹಾತ್ ಮುದ್ರಾಥಿ ಮುದ್ರೊ ಮರೈರ‍್ಹೂಥು. 
\v 2 ಅತ್ರೇಸ್ ಕಾಹೆತೆ ಏಕ್‌ ಶಕತ್ನೊ ದೇವ್ನದೂತನೆ ಊಚಿ ಅವಾಜ಼್‌ಥಿ ಚಿಕ್ರಿನ್ “ಆ ಮುದ್ರಾವ್ನ ಫೋಡಿನ್, ಪುಂಗ್‌ಳಿನ ಛೋ಼ಡಾನ ಕೋಣ್ ಯೋಗ್ಯ?” ಕರಿ ಬೋಲಾವ್‌ಕರ್ತೊಥೊ. 
\v 3 ಕತೋಬಿ ಯೊ ಪುಂಗ್‌ಳಿನ ಛೋ಼ಡಾನರ‍್ಹವೊ ಇನಾಮ ದೇಖಾನರ‍್ಹವೊ ಪರ್‌ಲೋಕ್‌ಮ ರ‍್ಹವೊ ಧರ್ತಿಪರ್‌ರ‍್ಹವೊ ಪಾತಾಳ್ಮರ‍್ಹವೊ ಕಿನೇಥೀಬಿ ಕೊಹುಯುನಿ 
\v 4 ಪುಂಗ್‌ಳಿನ ಕಾಡನರ‍್ಹವೊ ದೇಖಾನರ‍್ಹವೊ ಯೋಗ್ಯ ಹುಯಿರ‍್ಹಾವಳೊ ಏಕ್‌ ಜ಼ಣುಬಿ ಕೊಮಳ್ಯುನಿಕರಿ ಮೇ ಘಣು ಕುಢಾಪಕರೀನ್‌ ರೋವ್‍ಕರ್ತೊಥೊ. 
\v 5 ಶಾಣಾವ್‌ಮ ಏಕ್‌ ಜ಼ಣಾನೆ ಮನ, “ರೊವ್‌ನಕೊ ಯೂದಖೂಮ್ಮ ಪೈದಹುಯೊತೆ ಶುಂಭಾ ದಾವೀದನೊ ಖಾನ್‌ದಾನ್‌ವಾಳೊ ಹುಯಿರೋತೆ ಏಕ್‌ ಜ಼ಣೊ ಜೂತಿರ‍್ಹಾವಾಳೊ ಛಾ಼. ಯೊ ಖ್ಹಾತ್ ಮುದ್ರಾವ್ನ ಫೋಡಿನ್ ಆ ಪುಂಗ್‌ಳಿನ ಛೋ಼ಡ್‌ಶೆ” ಕರಿ ಬೋಲ್ಯು. 
\v 6 ಸಿಂಹಾಸನ್‌ಬಿ ಚಾರ್ ಜೀವಿಬಿ ಥೂತೆ ಝಗೋಕನಾಬಿ ಅಜು಼ ಶಾಣುಖ್ಹಾರು ಥೂತೆ ಝ಼ಗೋನ ಇಚ಼್‌ಮ ಏಕ್‌ ಮೇಂಢಾನ ಭಿಯುರ‍್ಹವಾನು ದೇಖ್ಯೊ. ಯೋ ಹಮ್ಕೆ ತದೇಸ್‌ ಬಲೀನಖ್ಹಾಜೆ ರ‍್ಹೇಖ್ಹಯ್‌ ರ‍್ಹಾವನಿತರ ದೆಖವ್‌ಕರ್ತುಥು. ಯೋ ಮೆಂಢಾನ ಚೆಲ್ಕಾನ ಖ್ಹಾತ್ ಶಿಂಗ್ಡು ಖ್ಹಾತ್ ಡೋಳಾವ್‌ಥು. ಆಖ್ಹಾರು ಧರ್ತಿಪರ್ ಮೋಕ್‌ಲೈರ‍್ಹುಥೂತೆ ದೇವ್ನು ಖ್ಹಾತ್ ಆತ್ಮ ಹುಯಿರುಥು. 
\v 7 ಯೋ ಮೇಂಢಾನು ಚೆಲ್ಕುಅಯಿನ್ ಸಿಂಹಾಸನ್‌ಪರ್ ಬೆಠೊರ‍್ಹವಾಳಾನ ಖಾವಹಾತ್ಮಥು ಯೊ ಪುಂಗ್‌ಳಿನ ಮಾಂಗಿಲಿದೊ. 
\v 8 ಪುಂಗ್‌ಳಿನ ಮಾಂಗಿಲ್ಯವಾನಿ ವಖ್ಹ್‌ತೆ ಯೋ ಚಾರ್ ಜೀವಿ 24 ಜ಼ಣು ಶಾಣುಖ್ಹಾರು ಮೇಂಢಾನು ಚೆಲ್ಕು ಹುಯಿರ‍್ಹವಾಳನ ಪಗ್‍ಪರ್ ಆಡ್‌ಪಡ್ಯು. ಹರೇಕ್‌ಜ಼ಣಕನ ಹಾತ್ಮ ಖ್ಹಾರಂಗೊಬಿ ಖ್ಹಾಲರ‍್ಯಾನು ಢಪ್ಕಾರ್‌ಥಿ ಭರೈರ‍್ಹುಥೂತೆ ಖ್ಹೊನ್ನಾನಿ ಢಾಕ್ಣಿಬಿ ಥು. ಯೊ ದೇವ್ನು ಅದ್ಮಿನು ಪ್ರಾರ್ಥನೆ ಹುಯಿರ‍್ಹುಥು 
\v 9 ಇವ್ಣೆ ನವುಗೀದ್ ಬೋಲ್ತುಹುಯಿನ್ ಪುಂಗ್‌ಳಿನ ಮಾಂಗಾನ, ಇನ ಮುದ್ರಾನ ಫೋಡಾನ ತೂ ಯೋಗ್ಯ ಹುಯಿರೊಸ್ ತೂ ರ‍್ಹೇಖ್ಹಯ್‌ಜೈನ್ ಬಲಿದಾನ್‌ಹುಯಿನ್ ತಾರ ಲ್ಹೋಯಿಥಿ ಹರೇಕ್ ಖೂಮ್‌, ಬೋಲಿ, ದೇಖ್ಹ್‌ವಾಳಾನ,ಅಖ್ಖಾಸ್ ಜಾ಼ತ್ನ ಅದ್ಮಿಖ್ಹಾರಾನ ದೇವ್ನಖ್ಹಾಜೆ ಮೋಲ್‌ಲೀರಾಖ್ಯೋಸ್. 
\v 10 ಇವ್ಣುನ ಅಪ್ಣ ದೇವ್ನಖ್ಹಾಜೆ ರಾಜ್ಯಕರಿನ್ ಯಾಜಕರ್‌ ಕರಿನ್ ಬಣಾಯೊ, ಇವ್ಣೆ ಜ಼ಮೀನ್‌ಪರ್ ರಾಜ಼್ ಚ಼ಲಾವ್‌ಷೆ”. 
\v 11 ಇನಪಾರ್ ಇನು ಸಿಂಹಾಸನ್ನು ಚಾರ್ ಜೀವಿ ಅಜು಼ ಸಬೆನ ಶಾಣಾವ್ನ ಅಶ್‌ಪಿಶ್ ಭಿಯುಥೂತೆ, ಕೈಯೆಕ್ಕಿ ಜ಼ಣು ದೇವ್‌ದೂತರ‍್ನ ಅವಾಜ಼್‌ನ ಖ್ಹಮ್‌ಜೊ. ಇವ್ಣು ಗಣ್ತಿ ಲಾಖೋಲಾಕ್‌ಬಿ ಕರೋಡೊ ಕರೊಡೋಬಿ ಥು.ಬಿಜು಼ಪಾಛು಼ ದೇಖಾನಿ ವಖ್ಹ್‌ತೆ ದೇವ್ನ ದೂತರ್ ಭಿಯೂಥು. 
\v 12 ಆ ದೇವ್ನದೂತರ್‌ನೆ ಜೋ಼ರಾನಿ ಅವಾಜ಼್‌ಥಿ, “ಖೂನಿ ಹುಯಿಗೋತೆ ಮೇಂಢಾನು ಚೆಲ್ಕು ಅದಿಕಾರ್‌ನಾಬಿ, ಧನ್‌ದೌಲತ್ನಾಬಿ, ಅಕ್ಕಲ್‌ನಾಬಿ, ಶಕತ್‍ನಾಬಿ, ಮರ್ಯಾದಿನಾಬಿ, ಮಹಿಮೆನಾಬಿ, ಧನ್ಯವಾದ್‌ನ ಲ್ಯಾವಾನ ಯೋಗ್ಯ ಹುಯಿರೊಸ್” ಕರಿ ಗೀದ್‌ ಬೋಲ್ಯು. 
\v 13 ಅತ್ರೇಸ್ ಕಾಹೆತೆ ಆಬ್‌ಮಾಬಿ ಜಮೀನ್‌ಮಾಬಿ ಧರ್ತಿನ ಹೇಟ್‌ಬಿ ದಲ್‌ದರ‍್ಯಾವ್‌ಮಾಬಿ ಉಬ್‍ಜೂತೆ ಅಖ್ಖು ಅಮ್ ಬೋಲ್ಯುಕಿ, “ಸಿಂಹಾಸನ್‌ಪರ್ ಬೆಠೊರ‍್ಹಾವಳನಾಬಿ ಮೇಂಢಾನು ಚೆಲ್ಕು ಹುಯಿರ‍್ಹಾವಳನಬಿ, ಧನ್ಯವಾದ್, ಮರ್ಯಾದಿ, ಮಹಿಮೆ, ಖ್ಹಾರಿಅದಿಕಾರ್, ಜ಼ಗ್‌ಜ಼ಮಾನಮಾಬಿ ರ‍್ಹವಾದೆ.” ಕರಿ ಬೋಲಾನು ಮೆ ಖ್ಹಮ್‌ಜೊ. 
\v 14 ಯೋ ಚಾರ್ ಜೀವಿ “ಆಮೆನ್” ಕರಿ ಬೋಲ್ಯು. ಶಾಣುಖ್ಹಾರು, ಆಡ್‍ಪಡಿನ್ ಆರಾದನೆ ಕರ‍್ಯು.
\c 6
\s ಮುದ್ರೊಖ್ಹಾರು
\p
\v 1 ಮೇಂಢಾನು ಚೆಲ್ಕು ಹುಯಿರಾವಳೊ ಯೋ ಖ್ಹಾತ್ ಮುದ್ರಾನ ಫೋಡಾನಿವಖ್ಹ್‌ತೆ ಮೇ ದೇಖ್ಯೊ ಅಜು಼ ಯೋ ಚಾರ್ ಜೀವಿಮ ಏಕ್‌ ಜೀವಿ ಘಲಾರನಿತರಾನೊ ಗಳೇಥಿ “ಆವ್”! ಕರಿ ಬೋಲಾನು ಖ್ಹಮ್‌ಜೊ. 
\v 2 ಮೇ ಹಿಜ್ಜಾ಼ ದೆಖಾನಿವಖ್ಹ್‌ತೆ ಏಕ್‌ ಧೋಳೊ ಘೋಡೊ ದೆಖಾಯೊ. ಇನಾಪರ್ ಬೆಠೊಹುಯೊ ಹಾತ್ಮ ಏಕ್‌ ಧೂಣ್ ಧರಾಖ್ಯೊಥೊ.ಇನ ಏಕ್‌ ಕಿರೀಟ್‌ಬಿ ದೆವೈರ‍್ಹೂಥು. ಯೋ ವಹೇರ‍್ಯಾನ ಹರಾವವಾಳೊ ಹುಯಿನ್ ಜೂತಾನಖ್ಹಾಜೆ ನಿಕ್‌ಳ್ಯೊ. 
\v 3 ಮೇಂಢಾನು ಚೆಲ್ಕು ಹುಯಿರ‍್ಹಾವಳನೆ ಬೇನು ಮುದ್ರಾನ ಫೋಡಾಖ್ಹತರ್ ಬೇನು ಜೀವಿ “ಆವ್”! ಕರಿ ಬೋಲಾನು ಖ್ಹಮ್‌ಜೊ. 
\v 4 ತದೆ ಲಾಲ್‌ರಂಗ್‌ನೊ ಬಿಜೇಕ್ ಘೋಡೊ ನಿಕ್ಳಿ ಆಯೊ. ಇನಾಪರ್ ಸವಾರಿ ಕರವಾಳನ ಜ಼ಮೀನ್‍ಪರ್ಥು ಸಮಾಧಾನ್ನ ಕಾಡಿನಾಖನ ಅದಿಕಾರ್ ದೆವಾಯು. ಅನೇಥಿ ಅದ್ಮಿ ಏಕ್‌ಥಿಏಕ್ ಖೂನಿಕರಾವಳು ಹುಯು. ಅಜು಼ ಯೋ ಸವಾರಿನ ಮೋಟಿಖ್ಹಿ ಏಕ್‌ ತಲ್ವಾರ್‌ಬಿ ದೆವಾಯು. 
\v 5 ಮೇಂಢಾನು ಚೆಲ್ಕು ಹುಯಿರ‍್ಹವವಾಳೊ ತೀನ್ನ ಮುದ್ರಾನ ಫೋಡಾಖ್ಹತರ್, ತೀನ್ನು ಜೀವಿ ಆವ್‌ಕರಿ ಬೋಲಾನು ಖ್ಹಮ್‌ಜೊ. ತದೆ ಮೇ ದೇಖಾಖ್ಹತರ್ ಹಿಜ್ಜಾ಼ ಮನ ಕಾಳೊ ಘೋಡೊ ದೆಖಾಯೊ. ಇನಾಪರ್ ಬೆಠೊರ‍್ಹವಾಳಾನ ಹಾತ್ಮ ತರಾಜ಼್ ಥು. 
\v 6 ಇನಪಾರ್ ಚಾರ್ ಜೀವಿನ ಇಚ್ಮಾ಼ಥು ಏಕ್‌ ಜ಼ಣಾನಿ ಅವಾಜ಼್ ನಿಕ್ಳಾನಿಘೋಣಿ ಖ್ಹಮ್‌ಜೊ. ಏಕ್‌ ಪೈಶಾನ ಏಕ್‌ ಶೇರ್ ಘವ್‌, ಅಜು಼ ಏಕ್‌ ದನ್ನಿ ಕೂಲಿ ತೀನ್ ಶೇರ್ ಬಾಜ಼್ರೊ, ಕತೋಬಿ ತೇಲ್ನ ಅಜು಼ ದ್ರಾಕ್ಷಿನ ರಖ್ಹ್‌ನ ಖರಾಬ್‌ನಕೋಕರ್” ಕರಿ ಬೋಲ್ಯು. 
\v 7 ಮೇಂಢಾನು ಚೆಲ್ಕುಹುಯಿರ‍್ಹವಾಳನೆ ಚಾರ‍್ನ ಮುದ್ರಾನ ಫೋಡಾನಿವಖ್ಹ್‌ತೆ; ಚಾರ‍್ನು ಜೀವಿ “ಆವ್”! ಕರಿ ಬೋಲಾನು ಖ್ಹಮ್‌ಜೊ. 
\v 8 ತದೆ ಮೇ ದೇಖಾನಿವಖ್ಹ್‌ತೆ ಹಿಜ್ಜಾ಼ ಬೂದ ರಂಗ್‌ನೊ ಘೋಡೊ ರ‍್ಹವಾನು ದೇಖ್ಯೊ. ಯೋ ಘೋಡಾಪರ್‌ ಬೆಠೊರ‍್ಹಾವಳೊ ಸವಾರಿನು ನಾಮ್ ಮರಣ್. ಇನ ಪೀಠೆ ಪಾತಾಳ್‌ಕರಿ ಬೋಲವಾಳೊ ಆಯೊ. ಇವ್ಣುನ ಜ಼ಮೀನ್ನು ಚಾರ‍್ನು ಏಕ್‌ ಭಾಗ್‌ಪರ್‌ ಅದಿಕಾರ್ ದೆವಾಯು. ಜಂಗ್‌ಥಿಬಿ, ಕಾಳ್ದುಕಾಳ್ ದನ್‌ಥಿಬಿ, ರೋಗ್‌ಥಿ ಅಜು಼ ಜಗತ್‌ಪರ್‌ ಛಾ಼ತೆ ಝಾ಼ಡಿನ ಜಾನ್ವರ್‌ಥೀಬಿ ಅದ್ಮಿವ್‌ನ ಮಾರಾನ ಅದಿಕಾರ್ ದೆವಾಯು. 
\v 9 ಇನೆ ಪಾಚ಼್‌ನ ಮುದ್ರಾನ ಫೋಡಾನಿವಖ್ಹ್‌ತೆ; ದೇವ್ನ ವಚನ್ನಖ್ಹಾಜೇಥಿಬಿ, ಇವ್ಣುನ ರ‍್ಹವಾನು ಬರೋಬರ್‌ನಿ ಸಾಕ್ಷಿನ ಖ್ಹಾಜೇಥಿಬಿ, ಮರಾವಳನು ಆತ್ಮಖ್ಹಾರು, ಬಲಿಪೀಠ್‌ನ ಹೇಟ್ ರ‍್ಹವಾನು ದೇಖ್ಯೊ. 
\v 10 ಇವ್ಣೆ ತೂಸ್ ಪ್ರಭು, ಪರಿಶುದ್‌ಬಿ ಖ್ಹಾಚೋ಼ಬಿ ಹುಯಿರ‍್ಹವಾಳೊ. ಹಮಾರ ಲ್ಹೋಯಿನ ರಂಚ್ಯೂತೆ ಧರ್ತಿನು ಅದ್ಮಿಖ್ಹಾರಾನ ಬಿಜು಼ ಕಬ್ಲಗು ನ್ಯಾವ್‌ಫೇಡಾವ ಕೊಯ್ನಿತೇಬಿ, ನ್ಯಾವ್‌ನು ತೀರ್ಪ್ ಕರಾಕೊಂತೇಬಿ ನಿಶತ್‌ ದೇಸ್ ಕೊಂತೆ ರ‍್ಹೇಸ್? ಕರಿ ಮೋಟಿ ಅವಾಜ಼್‌ಥಿ ಚಿಕ್‌ರ‍್ಯು. 
\v 11 ತದೆ ಇವ್ಣಾಮ ಅಖ್ಖಾಸ್ ಜ಼ಣಾನ ಏಕೇಕ್‌ ಧೋಳೊ ಝ಼ಗ್ಗೊ ದೆವಾಯು. ಅಜು಼ ಥೋಡಿ ವಖ್ಹತ್ ಟಿವೈರ‍್ಹೇಣುಕರಿ ಯೋ ಆತ್ಮವ್‌ನ ಖ್ಹಮ್‌ಜಾ಼ಡ್ಯು. ತುಮಾರಿನಿತರ ಖೂನಿ ಹೋಣುತೆ ಭೈಯೇಮ ಥೋಡುಜ಼ಣು ಅಜು಼ ಜೋ಼ಡ್ನ ಚಾ಼ಕ್ರಿ ಕರಾವಳನಿ ಗಣ್ತಿ ಪೂರ ಹುವಾಲಗು ಅರಾಮ್‌ಥಿ ರ‍್ಹೇವ್ಣುಕರಿ ಇವ್ಣುನ ಬೋಲಾಯು. 
\v 12 ಯೋ ಮೇಂಢಾನು ಚೆಲ್ಕು ಛೋ಼ನು ಮುದ್ರಾನ ಫೋಡಾನು ಮೇ ದೇಖ್ಯೊ. ತದೆ ಮೋಟು ಭೂಕಂಪ್ ಹುಯು. ಚಾ಼ಂದ್ ಕಾಳು ಘುಂಗ್‌ಡಿನಿಮತ್ ಕಾಳೊಹುಯಿಗೊ. ಅಜು಼ ಅಖ್ಖೊಯೇಕ್ ಚ಼ಂದರ್‌ಮೊ ಲ್ಹೋಯಿನಿತರ ಲಾಲ್ ಹುಯಿಗೊ. 
\v 13 ಅಂಜೀರ್‌ನ ಝಾ಼ಡಾನ ತುಫಾನ್ನೊ ವ್ಹಾಯಿರಾನು ಮಾರ್ ಪಡಿನ್ ಇನು ಪಕಾವಕೊಂತೆ ಪಂಡುಖ್ಹಾರು ಝ಼ಟ್‌ಕಾವನಿ ಘೋಣಿ ಆಬ್‍ಥು ಶುಕ್ಕರ್‌ಖ್ಹಾರು ಜ಼ಮೀನ್‌ಪರ್ ಝ಼ಟ್‌ಕೈನ್ ಪಡ್ಯು. 
\v 14 ಆಕಾಶ್ ಪುಂಗ್‌ಳಿನಿತರ ಲಪ್‌ಟೈನ್‌ ಡೋಳೇಥಿ ಲಪಿಗಯು. ಹರೇಕ್ ಪಹಾಡ್ ಅಜು಼ ಟಾಪುಖ್ಹಾರು, ಇನಿ ಇನಿ ಝ಼ಗೋಥು ಖ್ಹರ್ಕಿಗಯು. 
\v 15 ತದೆ ಜ಼ಮೀನ್ನು ರಾಜ಼ವ್‌ಖ್ಹಾರು, ಅಖ್ಖೂಸ್ ಅದಿಕಾರಿ, ಡಂಡ್‌ನೊ ಘಲ್ಡೊಖ್ಹಾರು, ಶೌಕಾರ್‌ಖ್ಹಾರು, ಘಣು ಶಕತ್‌ವಾಳುಖ್ಹಾರು, ಬಿಜು಼ಖ್ಹಾರು ಅದ್ಮಿ ಗುಲಾಮ್‌ಖ್ಹಾರು, ಛುಟ್ಕಾರ್‌ನು ಅದ್ಮಿಖ್ಹಾರು ಪಹಾಡ್ನಿ ಘವಿಮಾಬಿ, ಬಂಡಾನಿ ಚಿಪಾಟ್ನಿಖೀಂಡಿಮ ಲಪಿಗಯು. 
\v 16 ಇವ್ಣೆ ಅಮ್ ಬೋಲ್ಯುಕಿ, ಪಹಾಡ್ನಾಬಿ ಬಂಡಾನಿ ಚಿಪಾಟ್‌ಬಿ ಹಮಾರಪರ್ ಲಡ್ಕಿಜಾವೊ, ಸಿಂಹಾಸನ್ನ ಉಪ್ಪರ್ ಬೆಠೊರ‍್ಹವಾಳಾನ ಮೇಂಢಾನಚೆಲ್ಕನ ಖೀಜ಼್‌ಮಾಥು ಹಮುನ ಛು಼ಕಾವ್‌! 
\v 17 ಶನಕತೊ ಇನೊ ಭಯಂಕರ್ ಇರಾದೊ ಐಗು. ಇನಖ್ಹಾಮ್ಣೆ ಭಿರಾವನ ಕಿನ ಹಾತ್ ಉಷೆ? ಕರಿ ಬೋಲ್ಯು.
\c 7
\s ಇಸ್ರಾಯೇಲ್‌ನು ಏಕ್‌ಲಾಕ್ ಚಾರ್‌ಉಪ್ಪರ್ ಚಾ಼ಳಿಖ್ಹ್ ಹಜಾ಼ರ್ ಅದ್ಮಿ
\p
\v 1 ಆ ಹುಯಿಜಾ಼ವದಿನ್ ಚಾರ್‌ಜ಼ಣ ದೇವ್ನು ದೂತರ್ ಜ಼ಮೀನ್ನು ಚಾರ್ ರುಕ್‍ಮ ಭೀರಿನ್ ಜ಼ಮೀನ್‌ಪರ್‌ರ‍್ಹವೊ, ದರ‍್ಯಾವ್‌ಪರ್‌ರ‍್ಹವೊ, ನತರ್ ಖೆವ ಝಾ಼ಡಪರ್‌ರ‍್ಹವೊ ವ್ಹಯಿರೊ ನಾವಾಗ್ಣುತೆ ತಿಮ್ ಜ಼ಮೀನ್ನು ಚಾರ್‌ದಿಕ್ನು ವ್ಹಾಯಿರಾನ ಭೀರಾಖಿರಾಖನು ದೇಖ್ಯೊ. 
\v 2 ಅತ್ರೇಸ್ ಕಾಹೆತೆ ಬಿಜೇಕ್ ದೇವ್‌ದೂತನೆ ಜಿವ್ತೊ ಜಾನ್ನೊ ಯೋ ದೇವ್ನ ಮುದ್ರಾನ ಧರಿಲೀನ್ ದನ್‌ನಿಕ್‌ಳಾ ಭಣೀಥು ಆವಾನು ದೇಖ್ಯೊ. ಅನೆ ಯೋ ಜ಼ಮೀನ್ನಾಬಿ ದರ‍್ಯಾವ್‌ನಾಬಿ ಖರಾಬ್ ಕರಾನಿ ಹುಕುಮ್‌ ಲೀರಾಖ್ಯಾತೆ ಯೋ ಚಾರ್‌ಜ಼ಣ ದೂತರ‍್ನ ಬುಲಾವ್ತೊ ಹುಯಿನ್ ಅಮ್ ಬೋಲ್ಯೊಕಿ; 
\v 3 “ಹಮೆ ಹಮಾರ ದೇವ್ನ ದಾಸರ‍್ನ ತಾಳ್ವಪರ್ ಮುದ್ರೊ ಮಾರ‍್ವಲಗೂಬಿ ಜ಼ಮೀನ್ನರ‍್ಹವೊ, ದರ‍್ಯಾವ್ನರ‍್ಹವೊ, ಝಾ಼ಡಾವ್ನರ‍್ಹವೊ, ನಾಶ್‌ ನಾಕರ‍್ನು ಕರಿಬೋಲ್ಯೊ. 
\v 4 ಮುದ್ರೊ ಮರೈಲಿದುತೆ ಇವ್ಣಿ ಗಣ್ತಿ ಮನ ಖ್ಹಮಜ಼್‌ಮ ಆಯುಕಿ ಏಕ್‌ಲಾಕ್ ಚಾರ್‌ಉಪ್ಪರ್ ಚಾ಼ಳೀಖ್ಹ್‌ಹಜಾ಼ರ್‌ ಇಸ್ರಾಯೇಲರ‍್ನು ಹರೇಕ್ ಖೂಮ್ನ ಮಳಿಹುಯು ಹುಯಿರ‍್ಹುಥು. 
\v 5 ಯೂದನಿ ಖೂಮ್ಮ ಮುದ್ರೊ ಮರೈರ‍್ಹವಾಳು ಭಾರಹಜಾ಼ರ್, ರೂಬೆನ್ನಾ ಖೂಮ್‌ವಾಳಮ ಭಾರಹಜಾ಼ರ್, ಗಾದ್‌ ಖೂಮ್‌ವಾಳಮ ಭಾರಹಜಾ಼ರ್, 
\v 6 ಅಸೇರನ ಖೂಮ್‌ಥು ಭಾರಹಜಾ಼ರ್, ನಫ್ತಾಲಿನ ಖೂಮ್‌ಥು ಭಾರಹಜಾ಼ರ್, ಮನಸ್ಸೆನ ಖೂಮ್‌ಥು ಭಾರಹಜಾ಼ರ್, 
\v 7 ಸಿಮೆಯೋನ್ನ ಖೂಮ್‌ಥು ಭಾರಹಜಾ಼ರ್,ಲೇವಿನ ಖೂಮ್‌ಥು ಭಾರಹಜಾ಼ರ್, ಇಸ್ಸಾಕಾರ‍್ನ ಖೂಮ್‌ಥು ಭಾರಹಜಾ಼ರ್, 
\v 8 ಜೆಬುಲೋನ್ನ ಖೂಮ್‌ಥು ಭಾರಹಜಾ಼ರ್, ಯೋಸೇಫ್‌ನ ಖೂಮ್‌ಥು ಭಾರಹಜಾ಼ರ್, ಬೆನ್ಯಾಮೀನ್ನ ಖೂಮ್ಮಥು ಮುದ್ರೊ ಮರಾಯುಹುಯು ಭಾರಹಜಾ಼ರ್‌ ಜ಼ಣುಥು.
\s ಹರೇಕ್ ಜ಼ಗ್‌ಜಾ಼ತ್‌ನು ಅದ್ಮಿನು ಮೋಟಿ ಭೀಡ್
\p
\v 9 ಆ ಹುವಾನ ವಾರ್, ಹಂದೇಕ್ ಕಿನೇಥೀಬಿ ಗಣ್ತಿಕರಾನ ಕೊಹುವಾನಿತೆ ಎತ್ರೆ ಅದ್ಮಿಯೇವ್‌ನು ಭೀಡ್ ಸಿಂಹಾಸನ್ನ ಖ್ಹಾಮ್ಣೆ ಅಜು಼ ಮೇಂಢಾನ ಖ್ಹಾಮ್ಣೆಬಿ ಭಿಯುರ‍್ಹವಾನು ದೇಖ್ಯೊ. ಇವ್ಣೆಖ್ಹಾರು ಹರೇಕ್ ಜ಼ಗ್‌ಜಾ಼ತ್‌ನುಬಿ,ಖೂಮ್‌, ಬೋಲಿ ಬೋಲಾವಳು ಹುಯಿರ‍್ಹುಥು. ಇವ್ಣೆ ಧೋಳ ಝ಼ಗ್ಗೊ ಫೇರಿಲಿನ್ ಇವ್ಣ ಹಾತ್ಮ ಖಜೂ಼ರ‍್ನಿ ಡಾಳಿ ಧರಿರಾಖ್ಯೂಥು. 
\v 10 “ಇವ್ಣೆ ರಕ್ಷಣೆ ಕರಿ ಬೋಲಾನು ಸಿಂಹಾಸನ್‌ಪರ್ ಬೆಠೊರ‍್ಹಾವಳೊ ಅಪ್ಣೊ ಪ್ರಭುನ ಅಜು಼ ಮೇಂಢಾನುಚೆಲ್ಕು ಹುಯಿರ‍್ಹವಾಳನ ಮಳಿಹುಯು ಕರಿ ಊಚಿ ಅವಾಜ಼್‌ಥಿ ಚಿಕ್‌ರ‍್ಯು. 
\v 11 ಇವ್ಣೆಖ್ಹಾರು ಸಿಂಹಾಸನ್ನ ಅಶ್‌ಪಿಶ್ ಭಿಯೂಥು. ಶಾಣುಖ್ಹಾರು ಅಜು಼ ಚಾರ್ ಜೀವಿಬಿ ಹಿಜ್ಜಾ಼ಥು. ದೇವ್ನು ದೂತರ್ ಸಿಂಹಾಸನ್ನ ಖ್ಹಾಮ್ಣೆ ಘುಡ್‌ಗ್ಯಾಟೇಕಿನ್‌ ಆರಾದನೆ ಕರ್ತುಹುಯಿನ್, 
\v 12 ಆಮೆನ್, ಧನ್ಯವಾದ್, ಮಹಿಮೆಬಿ, ಅಕ್ಕಲ್‌ಬಿ, ಗೌರವ್, ಮರ್ಯಾದಿ, ಶಕತ್ ಅಜು಼ ತಾಖತ್‌ಬಿ ಅಪ್ಣ ದೇವ್ನ ಜ಼ಗ್‌ಜ಼ಮಾನಮಾಬಿ ರ‍್ಹವಾದೆ, ಆಮೆನ್‌ಕರಿ ಬೋಲ್ಯು. 
\v 13 ತದೆ ಶಾಣಾವ್‌ಮ ಏಕ್‍ಜ಼ಣೊ, “ಧೋಳು ಝ಼ಗ್ಗೊಖ್ಹಾರು ಫೇರಿರಾಖ್ಯುತೆ ಆದ್ಮಿಖ್ಹಾರು ಕೋಣ್! ಅವ್ಣೆ ಕಿಜ್ಜಾ಼ಥು ಆಯುಕರಿ ಪುಛಾ಼ಯು. ತದೆ ಗುರೂಜಿ ಇವ್ಣೆ ಕೋಣ್‌ಕರಿ ತುನಾಸ್ ಮಾಲುಮ್‌ಕರಿ ಬೋಲ್ಯೊ. 
\v 14 ತದೆ ಏಕ್‌ ಪ್ರಭುನೆ, “ಆ ಅದ್ಮಿಖ್ಹಾರು ಘಣು ಮೋಟಿ ಖ್ಹತಾಪ್ಣಿ ಲೀನ್ ಆಯುಹುಯು.ಇವ್ಣೆ ಮೇಂಢಾನ ಚೆಲ್ಕಾನ ಲ್ಹೋಯಿಥಿ, ಇವ್ಣ ಝ಼ಗ್ಗಾನ ಧೊಯಿನ್ ಕೋರು ಹುಯಿರುಸ್. 
\v 15 ಇನಖ್ಹಾಜೆ ಇವ್ಣೆ ಹಮ್ಕೆ ದೇವ್ನ ಸಿಂಹಾಸನ್ನ ಖ್ಹಾಮ್ಣೆರ‍್ಹೀನ್, ಇನ ಮಂದಿರ್‌ಮ ರಾತ್‌ದನ್ ಆರಾದನೆ ಕರುಕರಸ್, ಸಿಂಹಾಸನ್‌ಪರ್ ಬೆಠೊರ‍್ಹವಾಳೋಸ್ ಇವ್ಣುನ ಆಖ್ಹ್‌ರೊ ಹುಯಿರ‍್ಹೊಸ್. 
\v 16 ಬಿಜು಼ ಕೆದೇಬಿ ಇವ್ಣುನ ಭುಕ್‌ರ‍್ಹವೊ, ಠೋಖ್ಹ್‌ರ‍್ಹವೊ ಕೋಉಷೇನಿ, 
\v 17 ಶನಕತೊ ಸಿಂಹಾಸನ್ನ ಇಚ಼್‌ಮ ಛಾ಼ತೆ ಬಲೀನ ಮೇಂಢಾನು ಚೆಲ್ಕು ಹುಯಿರ‍್ಹವಾಳೊ ಇವ್ಣುನ ಕುರುಬನಿತರ ರ‍್ಹೀನ್ ಜಾನ್ನು ಪಾಣಿನು ಚೆಜ಼್‌ಭಾರಕನ ಚ಼ಲೈಲಿಜಾಷೆ ಅಜು಼ ದೇವ್ ಇವ್ಣ ಡೋಳಾನು ಆಂಝು಼ಖ್ಹಾರು ನೂಛಿನಾಕ್ಷೆ ಕರಿ ಬೋಲ್ಯು.
\c 8
\s ಖ್ಹಾತ್‌ನೊ ಮುದ್ರೊ
\p
\v 1 ಮೇಂಢಾನುಚೆಲ್ಕು ಹುಯಿರ‍್ಹಾವಳನೆ ಖ್ಹಾತ್‌ನೊ ಮುದ್ರಾನ ಫೋಡಾನಿವಖ್ಹ್‌ತೆ; ಖ್ಹುಮಾರ್ ಆಧ ಘಂಟಾಲಗು ಸೊರ್ಗಾಮ ಶೊಪೊಹುಯ್ಗು. 
\v 2 ತದೆ ದೇವ್ನ ಖ್ಹಾಮ್ಣೆ ಭಿಯುತೆ ಖ್ಹಾತ್ ದೇವ್‌ದೂತರ್‌ನ ಮೇ ದೇಖ್ಯೊ. ಇವ್ಣುನ ಖ್ಹಾತ್ ತುತ್ತೂರಿಯೆ ದೆವಾಯು. 
\v 3 ಇನಪಾರ್ ಬಿಜೇಕ್ ದೇವ್‌ನೊ ದೂತ ಆಯೊ ಯೋ ಖ್ಹೊನ್ನಾನಿ ಖ್ಹಾಲರ‍್ಯಾನಿ ಢಾಕ್ಣಿ ಧರಿಲೀನ್ ಚಾ಼ಚ಼ರ್‌ಕನ ಆಯಿನ್ ಭೀಯೊ ಸಿಂಹಾಸನ್ನು ಮುದ್ರಾನು ಖ್ಹೊನ್ನಾನ ಚಾ಼ಚ಼ರ್‌ನ ಉಪ್ಪರ್ ಅದ್ಮಿಖ್ಹಾರು ಪ್ರಾರ್ಥನೆಥಿ ಸಮರ್ಪಣ್‌ ಕರಾನಖ್ಹಾಜೆ ಇನ ಘಣು ಢಪ್ಕಾರ್‌ ದೆವಾಯು. 
\v 4 ತದೆ ಖ್ಹಾಲರ‍್ಯಾನು ಧುವೊ ದೇವ್ನದೂತರ‍್ನ ಹಾತ್ಮಥು ನಿಕ್ಳಿನ್, ದೇವ್ನ ಅದ್ಮಿವ್‌ನು ಪ್ರಾರ್ಥನೆನಿ ಜೋ಼ಡ್ಮ ಮಳಿನ್ ದೇವ್‌ಕನ ಉಡಿಗಯು.
\p
\v 5 ಆ ನಾಹುಯಿನ್ ಯೋ ದೇವ್‌ನೊ ದೂತ ಢಾಕ್ಣಿನ ಲೀನ್ ಚಾ಼ಚ಼ರ್‌ನಿ ಆಗ್‍ಥಿಯಿನ ಭರಿನ್ ಜ಼ಮೀನ್ನ ಉಪ್ಪರ್ ಫೇಕ್ಯೊ. ತದೆ ಘಲಾರಿನ್ ಘೂಂಜಿನ್, ಮೋಟಿಅವಾಜ್‌, ವಿಜ಼್‌ಳಿ ಖಡ್‌ಕಿ, ಭೂಕಂಪ್ ಹುಯು.
\s ತುತ್ತೂರಿ ಖ್ಹಾರು
\p
\v 6 ಖ್ಹಾತ್ ತುತ್ತೂರಿಯೇವ್ನ ಧರಿರಾಖ್ಯುತೆ ಖ್ಹಾತ್ಜ಼ಣು ದೇವ್‌ನೊ ದೂತರ್ ಫೂಕಾನ ತಯಾರ್‌ಹುಯು. 
\v 7 ಪಹಿಲೊ ದೇವ್ನು ದೂತಾನೆ ಇನು ತುತ್ತೂರಿನ ಫೂಕಾನಿವಖ್ಹ್‌ತೆ ಲ್ಹೋಯಿ ಮಳಿಹುಯು ಗಾರಾನೊ ಪಾಣಿಬಿ, ಆಗ್‌ಬಿ,ಜ಼ಮೀನ್‌ಪರ್ ರಂಚಾ಼ಯು. ಜ಼ಮೀನ್ನು ತೀನ್‌ಮಾನು ಏಕ್‌ಭಾಗ್ ಬಳಿಗಯು. ಝಾ಼ಡವ್‌ಮ ತೀನ್‌ಮಾನು ಏಕ್‌ಭಾಗ್ ಬಳಿಗಯು. ಹರ‍್ಯು ಘಾಖ್ಹ್‌ಅಖ್ಖು ಬಳಿಗಯು. 
\v 8 ಬೇನೊ ದೇವ್ನದೂತನೆ ಇನು ತುತ್ತೂರಿನ ಫೂಕ್ಯೊ. ತದೆ ಆಗ್‌ಥಿಲಾಗುಕರಾತೆ ಮೋಟೊ ಪಹಾಡ್‌ನಿತರನು ಏಕ್‌ ರಾಛು಼ ದರ‍್ಯಾವ್‌ಮ ಫೇಕೈಗಯು.ತದೆ ದರ‍್ಯಾವ್‌ಮ ತೀನ್‌ಮಾನು ಏಕ್‌ಭಾಗ್ ಲ್ಹೋಯಿ ಹುಯಿಗು. 
\v 9 ದರ‍್ಯಾವ್‌ಮಾನು ಜೀವಿಮ ತೀನ್‌ಮಾನು ಏಕ್‌ಭಾಗ್ ಮರಿಗಯು ಬಿಜು಼ ಜ಼ಹಾಜ಼್‌ಮಾನು ತೀನ್‌ಮಾನು ಏಕ್‌ಭಾಗ್ ನಾಶ್‌ಹುಯಿಗಯು. 
\v 10 ತೀನ್ನೊ ದೇವ್ನ ದೂತನೆ ಇನಿ ತುತ್ತೂರಿನ ಫೂಕ್ಯೊ; ತದೆ ಢಿಟಂಬನಿತರ ಬಳುಕರಾನು ಏಕ್‌ ಮೋಟೊ ಶುಕ್ಕರ್ ಆಬ್‌ಪರ್ ಅಜು಼ ನದ್ದಿನು ಅಜು಼ ಪಾಣಿನು ಝೀಲ್‌ನು ತೀನ್‌ಮಾನು ಏಕ್‌ಭಾಗ್ ಪರ್ ಪಡ್ಯು. 
\v 11 ಆ ಶುಕ್ಕರ್‌ನು ನಾಮ್ ಝಾ಼ರೇಲಿ. ತದೆ ಪಾಣಿನು ತೀನ್‌ಮಾನು ಏಕ್‌ಭಾಗ್ ಝಾರ್‌ಹುಯಿಗು. ಬಿಜು಼ ಯೊ ಪಾಣಿ ಪೀದೂತೆ ಕೈಏಕ್ ಜ಼ಣು ಮರಿಗಯು, ಶನಕತೊ ಯೊ ಝಾರ್‌ ಹುಯಿರುಥು. 
\v 12 ಚಾರ‍್ನೊ ದೇವ್‌ನೊ ದೂತನೆ ತುತ್ತೂರಿನ ಫೂಕ್ಯೊ, ತದೆ ಚಾ಼ಂದ್‌ನು ತೀನ್‌ಮ ಏಕ್‌ಭಾಗ್, ಇಮ್ಮಸ್ ಚ಼ಂದರ್‌ಮಾನು ಅಜು಼ ಶುಕ್ಕರ್‌ಮಾನು ತೀನ್‌ಮಾನು ಏಕ್‌ಭಾಗ್‌ನ ಖರಾಬ್‌ಹುಯಿನ್‌ ಅಂಧಾರು ಹುಯಿಗು. ಇನಖ್ಹಾಜೆ ದನ್ಮ ತೀನ್‌ಮಾನು ಎಕ್‌ಭಾಗ್ ಉಜಾ಼ಳುಕೊಂತೆ ಅಂಧಾರು ಹುಯಿನ್, ರಾತ್ನಿ ಘೋಣಿಸ್ ಹುಯಿಗು\f + \fr 8:12 \fr*\ft ಚಾಂದ್‌ಮನು ತೀನ್‌ಮ ಏಕ್‌ಭಾಗ್\ft*\f*. 
\v 13 ಇನಪಾರ್ ಮೆ ದೇಖ್ಯೊತೊ ಏಕ್‌ ಗರದ್ ಆಸ್ಮಾನ್ನ ಇಚ಼್‌ಮ ಉಡ್ತುಫಂಡ್‌ತೂಥು. ಯೊ ಅವಾಜ಼್ ಮನ ಖ್ಹಮಜ್‍ಪಡ್ಯು. ಅಜೂ಼ಬಿ ಥೂತೆ ತೀನ್‍ಜ಼ಣು ದೇವ್‌ದೂತರ್‌ ತುತ್ತೂರಿನ ಫೂಕಾಖ್ಹತರ್‌ ಜ಼ಮೀನ್‌ಪರ್ ಜಿವ್ಣುಕರವಾಳ ಅಖ್ಖಾನ ಖರಾಬ್, ಖರಾಬ್, ಖರಾಬ್‌ಕರಿ ಊಚಿ ಅವಾಜ಼್‌ಥಿ ಚಿಕ್ರಾನು ಖ್ಹಮ್‌ಜ್ಯೊ.
\c 9
\p
\v 1 ಪಾಚ್ನೊ಼ ದೇವ್ನ ದೂತನೆ ತುತ್ತೂರಿನ ಫೂಕಾನಿವಖ್ಹ್‌ತೆ; ಆಬ್‍ಥು ಜ಼ಮೀನ್‌ಪರ್ ಪಡ್ಯೂತೆ ಏಕ್‌ ಶುಕ್ಕರ‍್ನ ದೇಖ್ಯೊ. ಇನ \f + \fr 9:1 \fr*\ft ಖರಾಬ್ ಆತ್ಮವ್‌ನ ಖ್ಹರ್ತಿನ ತೀರ್ಪ್‌ನ ದನ್‌ಲಗು ರಾಖನ ಭಾಂದಿಹುಯಿ ಝ಼ಗೊ \ft*\f*ಪಾತಾಳ್ನು ಬಾವ್ಡಿನು ಬೀಗಾನು ಕೀಲಿ ದೆವಾಯು. 
\v 2 ಇನೆ ನರಕ್‌ನಿ ಬಾವ್ಡಿನ ಕಾಡಾದಿನ್ ಬಾವ್ಡಿಮಾಥು ಆಯುತೆ ಧುವೊ ಮೋಟಿ ಕೋಲ್‌ಮಿನು ಧುವಾನಿತರ ಉಪ್ಪರ್ ಆಯು. ಬಾವ್ಡಿನ ಧುವ್ವಾಥಿ ಚಾ಼ಂದ್‌ಬಿ, ಆಸ್‌ಮಾನ್‌ಬಿ, ಕಾಳುರೈಟ್‌ ಹುಯಿಗು. 
\v 3 ಧುವ್ವಾಮಾಥು ಚಿಡ್ಡೊಖ್ಹಾರು ಜ಼ಮೀನ್‌ಪರ್ ನಿಕ್ಳಿಆಯು. ಜ಼ಮೀನ್‌ಪರ್ ಛಾ಼ತೆ ವಿಛ್ಛಿಯೇನಿ ಪರಕ್ ಇನ ತಾಖತ್ ದೆವಾಯು. 
\v 4 ಜ಼ಮೀನ್‌ಪರ್ ಛಾ಼ತೆ ಘಾಖ್ಹ್‌ನ ರ‍್ಹವೊ ಪಂಡು ಫಲ್ನ ರ‍್ಹವೊ, ಝಾ಼ಡನ ರ‍್ಹವೊ, ನಾಶ್‌ನಾಕರ‍್ನುತೆ, ತಾಳ್ವಪರ್ ದೇವ್‌ನೊ ಮುದ್ರೊಕೊಂತೆ ಅದ್ಮಿವ್‌ನಖಲಿ ನಾಶ್‌ಕರ್ನುಕರಿ ಯೊ ಚಿಡ್ಡಾವ್ನ ಹುಕುಮ್‌ಹುಯು. 
\v 5 ಇವ್ಣುನ ನಾ ಮಾರ‍್ನುತೆ ಪಾಚ಼್ ಮಹಿನ ಲಗೂಬಿ ಖ್ಹತಾವ್ಣುಕರಿ ಅದಿಕಾರ್ ಮಳ್ಯು. ಯೋ ಅದ್ಮಿಖ್ಹಾರನ ಹುಯೂತೆ ಅಜ಼ ವಿಛ್ಛಿ ಅದ್ಮಿನ ಕಲ್ಡಾನಿತರಾಸ್ ಥು. 
\v 6 ಯೊ ಪಾಚ಼್ ಮಹಿನಾಮ ಅದ್ಮಿಖ್ಹಾರು ಮರ್‌ವಾನ ಹರಖ್ಹ್‌ಷೆ ಕತೋಬಿ ಯೋ ಪೂರ ಕೊಉಷೇನಿ.ಅದ್ಮಿ ಮರಾನಿ ವಾಟ್‌ ಢೂಂಡ್‌ಷೆ, ಕತೋಬಿ ಮರಣ್ ಇವ್ಣೇಥಿ ಲಪಿಜಾ಼ಷೆ. 
\v 7 ಯೋ ಚಿಡ್ಡಾವ್ನು ರೂಪ್ ಜಂಗ್‌ನ ತಯಾರ್ ಕರಾಖನು ಘೋಡಾವ್‌ನು ರೂಪ್‌ನಿತರ ಥು.ಇವ್ಣ ಮುಡ್‌ಕ್ಯಾವ್‌ಪರ್ ಖ್ಹೊನ್ನಾನಿ ಕಿರೀಟ್‌ನಿತರಾಬಿ, ಇನು ಮ್ಹೋಡುಖ್ಹಾರು ಅದ್ಮಿವ್‌ನ ಮ್ಹೊಡಾನಿತರಾಬಿ ಥು. 
\v 8 ಇನು ಕೇಖ್ಹ್‌ ತಯೇಡಾನ ಕೇಖ್ಹ್‌ನಿತರಾಬಿ ದಾತ್‌ ಶುಂಭಾನ ದಾತ್‌ನಿತರಾಬಿ ಥು. 
\v 9 ಯೋ ಅಖ್ಖಾನಿ ಶರೀರ್‌ನ ಖ್ಹಾರ್ನು ಕವಚ್‌ಥು.ಇವ್ಣು ಫಾಕ್ಡಿಯೇನು ಅವಾಜ಼್ ಜಂಗ್‌ನ ನಾಖ್ಹಾತೆ ರಥ್‌ನ ಘೋಡಾನ ಅವಾಜ಼್‌ನಿತರ ಥು. 
\v 10 ವಿಛ್ಛಿಯೇನ ರ‍್ಹೇಸ್ತೆತಿಮ್ ಇವ್ಣುನ ಡೊಂಡೋಬಿ, ಕಾಟೋಬಿ ಥು. ಅದ್ಮಿವ್‌ನ ಪಾಚ಼್ ಮಹಿನಲಗೂಬಿ ಖರಾಬ್ ತಾಖತ್ ಇವ್ಣ ಡೋಂಡವ್‌ಮಸ್ ರ‍್ಹಿಶೆ. 
\v 11 ಪಾತಾಳ್‌ನೊ ಮುಖ್ಯ ಹುಯಿರ‍್ಹೋತೆ ದೂತಾಸ್ ಯೋ ಚಿಡ್ಡಾವ್ನ ರಾಜ಼ ಹುಯಿರೋಥೊ. ಇನ ಹಿಬ್ರು ವಾತೇಮ ಅಬದ್ದೋನ್‌ ಕರೀಬಿ, ಗ್ರೀಕ್ ಬೋಲಿಮ ಅಪೊಲ್ಲುವೋನ ಕರೀಬಿ ನಾಮ್‌ಥು. 
\v 12 ಪಹಿಲು ಖತ್ರ ಖತಮ್‌ಹುಯಿಗು. ದೇಕ್ ಬಿಜೂ಼ ಬೇನು ವದೇಖ್ಹ್‌ಖ್ಹಾರು ಇನ ಪೀಠೇಸ್ ಆಯು.
\p
\v 13 ಛೋ಼ನೆ ದೇವ್‌ನೊ ದೂತನೆ ತುತ್ತೂರಿನ ವಜಾ಼ಡನಿ ವಖ್ಹ್‌ತೆ ದೇವ್‌ಕನ ಥೂತೆ ಖ್ಹೊನ್ನಾನು ಚಾ಼ಚ಼ರ್‌ನ ಶಿಂಗ್ಡಾವ್‌ಥು ನಿಕ್‌ಳ್ಯೂತೆ ಏಕ್‌ ಅವಾಜ಼್‌ನ ಖ್ಹಮ್‌ಜೊ. 
\v 14 ಛೋ಼ನೆ ದೇವದೂತ ಯೊ ತುತ್ತೂರಿನ ಧರಿರಾಖ್ಯುಥೂತೆ ದೇವ್ನ ದೂತಾನ, “ಯೂಫ್ರಟಿಸ್ ಕರಿ ಮೋಟಿ ನದ್ದಿಕನ ಭಾಂದಿರಾಖ್ಯೋತೆ ಚಾರ್‌ಜ಼ಣ ದೇವ್ನ ದೂತರ‍್ನ ಛೋ಼ಡಿನಾಕ್‌” ಕರಿ ಬೋಲ್ಯು. 
\v 15 ತದೆ ಅದಮ್‌ಜ಼ಮಾನಮ ತೀನ್‌ಮಾನು ಏಕ್‌ಭಾಗ್ ಅದ್ಮಿನ ಸಂಹಾರ್ ಕರಾನಖ್ಹಾಜೆ ಯೋಸ್‌ ವರಖ್ಹ್, ಯೋಸ್ ಮಹಿನೊ, ಯೋಸ್ ದನ್, ಯೋ ವಖ್ಹತ್‌ನಖ್ಹಾಜೆ ತಯಾರ್‌ಥಾತೆ ಯೊ ಚಾರ್‌ಜ಼ಣ ದೇವ್ನ ದೂತರ‍್ನ ಛುಟ್ಕಾರ್ ಕರಾಯು. 
\v 16 ಇನು ಘೋಡಾನು ಶಿಪಾಯ್ನಿ ಗಣ್ತಿ ವೀಖ್ಹ್‌ ಕರೋಡ್‌ಕರಿ ಮನ ಖ್ಹಮಜ್‍ಪಡ್ಯು. 
\v 17 ಮೇ ದರ್ಶನ್‍ಮ ದೇಖ್ಯೊತೆ ಘೋಡಾವ್‌ಬಿ ಅಜು಼ ಇನಪರ್‌ಲ್ಯ ಸವಾರಿನ ಬಾರೇಮ ಬೋಲಾನು ಕಿಮ್‌ಥು ಕತೊ, ಸವಾರಿವ್‌ನು ಕವಚ್‌ನು ರಂಗ್ ಆಗ್‍ನಿತರ ಲಾಲ್, ಧುವ್ವನಿತರಾನು ನೀಲು, ರಂಜ಼ಕ್‌ನಿತರ ಪೀಳು ಥು. ಘೋಡಾವ್‌ನು ಮುಡ್‌ಕ್ಯು ಖ್ಹಾರು ಶುಂಭಾವ್‌ನ ಮುಡ್‌ಕ್ಯಾನಿ ಘೋಣಿ ಥು. ಅಜು಼ ಇನ ಮ್ಹೋಡೇಖ್ಹು ಆಗ್ ರಂಜ಼ಕ್‌ ಧುವ್ವೊ ನಿಕ್‌ಳ್ಯು. 
\v 18 ಯೋ ಅಖ್ಖಾನ ಮ್ಹೊಡಾಮಾಥು ನಿಕ್‌ಳ್ಯೂತೆ ಯೊ ಆಗ್, ಧುವ್ವೊ, ರಂಜ಼ಕ್‌, ಕರಿ ಬೋಲಾನು ತೀನ್ ಖ್ಹತಾಪ್ಣಿಥಿ ಜ಼ಮೀನ್‌ಪರ್‌ನು ಅದ್ಮಿನು ತೀನ್‌ಮಾನು ಏಕ್‌ಭಾಗ್ ಮರೈಗಯು. 
\v 19 ಯೊ ಅಖ್ಖಾ ಘೋಡಾನಿ ತಾಖತ್ ಯೋಅಖ್ಖಾನ ಮ್ಹೊಡಾಮಾಬಿ, ಡೋಂಡಾಮಾಬಿ ಥು. ಇನು ಡೋಂಡೊಅಖ್ಖು ಮುಡ್‌ಕ್ಯು ರ‍್ಹವಾಳು ಹುಯಿನ್ ಖ್ಹಾಪ್‌ನಿತರ ಥು. ಇನೇಥಿಸ್ ಖರಾಬ್ ಉಷೆ. 
\v 20 ಆ ಖ್ಹತಾಪ್ಣಿಥಿ ಮರ‍್ಯುಕೊಂತೆ ಬಚಿರ‍್ಹಾವಳು ಅದ್ಮಿಖ್ಹಾರು ಇವ್ಣೇಸ್ ಕರಿಲಿದುಥೂತೆ ಮೂರತ್‌ಅಖ್ಖಾನ ಮ್ಹೇಲಿನ್ ದೇವ್‌ಭಣಿ ಫರ‍್ಯುಕೊಯ್ನಿ. ಇವ್ಣೆ ಭೂತ್ ಪಿಶಾಚಿಖ್ಹಾರಾನು ಆರಾದನೆನಾಬಿ ಬಿಜು಼ ಖ್ಹೊನ್ನು, ರೂಪು, ತಾಂಬು, ಬಂಡೊ, ಝಾ಼ಡ್‌ ಆಸ್ ಅಖ್ಖಾಥಿ ಬಣಾವಟ್ ಹುಯಿನ್ ದೇಖಕೊಂತೆ, ಖ್ಹಮ್‌ಜಾ಼ಕೊಂತೆ, ಚಾ಼ಲಕೊಂತೆ ರ‍್ಹವಾನ ಮೂರತ್‌ನ ಪೂಜಾ಼ನ ಕೊಮ್ಹೆಲ್ಯೂನಿ. 
\v 21 ಆನಾಹುಯಿನ್ ಇವ್ಣೆ ಚ಼ಲಾವ್ತುಥೂತೆ ರ‍್ಹೇ಼ಖ್ಹಾನು, ಜಾ಼ದುಜ಼ಮ್‌ಕರ್‌, ಪಾಪೇಲು ಕಾಮ್, ವ್ಯಬಿಚಾರ್‌ನ, ಚೋ಼ರ್‌ಚ಼ಖಾಟ್ ಆ ಅಖ್ಖಮಾಥು ಏಕ್‌ಬಿ ಮ್ಹೇಲಿನ್ ದೇವ್‌ಭಣಿ ಫರ‍್ಯುಕೊಯ್ನಿ.
\c 10
\s ತಾಖತ್ನೊ ದೇವ್ನೊದೂತ ಅಜು಼ ಪುಂಗ್‌ಳಿ
\p
\v 1 ಅನಪಾರ್ ತಾಖತ್‌ವಾಳೊ ಹುಯಿರೋತೆ ಬಿಜೇಕ್‌ ದೇವ್‌ನೊ ದೂತ ಸೊರ್ಗಾಥು ಉತ್ರಿನ್ ಆವಾನು ಮೇ ದೇಖ್ಯೊ.ಇನೆ ವಾದ್‍ಳಾನ ಫೇರಿರಾಖ್ಯೊಥೊ. ಇನ ಮುಡ್‌ಕ್ಯಾನ ಉಪ್ಪರ್ ವಾದ್‌ಳಾನಿಧೂಣ್‌ ಥು. ಇನು ಮ್ಹೋಡು ಚಾ಼ಂದ್‌ನಿತರ ಇನ ಗೋಡ ಆಗ್ನ ಖಮ್‌ನಿತರ ಥಾ. 
\v 2 ಅಜು಼ ಇನ ಹಾತ್ಮ ಉಧ್‌ಢಿಹುಯಿ ಏಕ್‌ ಪುಂಗ್‌ಳಿಥಿ. ಇನೆ ಖಾವಗೋಡಾನ ದರ‍್ಯಾವ್ನ ಉಪ್ಪರ್‌ಬಿ ಡಾವಗೋಡಾನ ಜ಼ಮೀನ್‌ಪರ್‌ಬಿ ಮ್ಹೇಲಿನ್, 
\v 3 ಶುಂಭಾ ಘಲಾರಸ್ತೆ ತಿಮ್ ಮೋಟಿ ಆವಾಜ಼್‌ಥಿ ಚಿಕ್‌ರ‍್ಯೊ. ಚಿಕ್ರಾನಿ ವಖ್ಹ್‌ತೆ ಖ್ಹಾತ್ ಘಲಾರ್‌ಬಿ ಏಕ್‌ಏಕ್‌ಥರ ಅವಾಜ಼್ ದಿದು. 
\v 4 ಯೋ ಘಲಾರ್‌ಖ್ಹಾರು ಬೋಲಾನು ಮೆ ಲೀಖ್ಣುಕರಿ ಥೊ. ಕತೋಬಿ, “ಯೋ ಖ್ಹಾತ್ ಘಲಾರ್‌ಖ್ಹಾರು ಬೋಲ್ಯುತೆಯಿನ ತೂ ನಾಲೀಖ್ಣುತೆ ಗಪ್ಲತ್‌ ರಾಕ್‌ಕರಿ ಬೋಲಾನು ಸೊರ್ಗಾನ ಟಹು಼ಕಾನ ಖ್ಹಮ್‌ಜೊ”. 
\v 5 ಇನಪಾರ್ ಜ಼ಮೀನ್‌ಪರ್‌ಬಿ, ದರ‍್ಯಾವ್‍ನ ಉಪ್ಪರ್‌ಬಿ ಭಿಯಹುಯನಿತರ ಮನ ದೆಖಾಯೊತೆ ದೇವ್ನದೂತನೆ ಇನೊ ಖಾವಹಾತ್ನ ಸೊರ್ಗಭಣಿ ಪಾಡಿನ್, 
\v 6 ಸೊರ್ಗನಾಬಿ ಇನಾಮಛಾ಼ತೆ ಖ್ಹಾರಸ್ನ, ಜ಼ಮೀನ್ನಾಬಿ ಇನಾಮಛಾ಼ತೆ ಖ್ಹಾರಸ್ನ ದರ‍್ಯಾವ್‍ನಬಿ ಇನಾಮಛಾ಼ತೆ ಖ್ಹಾರಸ್ನ ಉಬ್‍ಜೈ಼ನ್‍ ಜ಼ಗ್‌ಜ಼ಮಾನಲಗು ಜಿವ್ತೊರ‍್ಹವಳಾನ ಉಪ್ಪರ್ ಆಣ್ ಕರೀನ್ “ಬಿಜೂ಼ಬಿ ಟಿವವಾನಿ ಜ಼ರೂರತ್ ಕೊಯ್ನಿ. 
\v 7 ಖ್ಹಾತ್‌ನೊ ದೇವ್ನದೂತನೆ ಇನಿ ತುತ್ತೂರಿನ ವಜಾ಼ಡನ ತಯಾರ್‌ಹುವಾನ ದನೂಮ ದೇವ್ನಿ ಗಪ್ಲಥ್ಥಿ ಛಾ಼ತೆ ಖ್ಹೂಜ಼್‌ನ ಚ಼ಲಾವ್‌ಷೆ. ದೇವ್ ಇನು ದಾಸ ಹುಯಿರ‍್ಹುತೆ ಪ್ರವಾದಿ ಖ್ಹಾರನ ಸುವಾರ್ತೆ ಖ್ಹಮ್‍ಜಾ಼ಡಿರಾಖ್ಯೊಥೊತೆ ಪರಕ್ಮ ಚ಼ಲೈಶ್‌” ಕರಿ ಬೋಲ್ಯೊ. 
\v 8 ತದೆ ಪರಲೋಕ್‌ಥು ಫಾಛು಼ ಯೋಸ್ ಅವಾಜ಼್ ಮೆ ಖ್ಹಮ್‌ಜ್ಯೊ. ಯೋ ಗಳು ಮನ, “ತೂ ಜಾ಼ ದರ‍್ಯಾವ್‌ನಪರ್‌ಬಿ ಜ಼ಮೀನ್‌ಪರ್‌ಬಿ ಭಿಯೋತೆ ದೇವ್‌ದೂತರ್‌ನ ಹಾತ್ಮನಿ ಉಧ್‌ಢಿರ‍್ಹೀತೆ ಪುಂಗ್‌ಳಿನ ಲೀಲೆ” ಕರಿ ಬೋಲ್ಯು. 
\v 9 ಮೆ ಯೊ ದೂತಕನ ಜೈ಼ನ್, ನ್ಹಾನಿ ಪುಂಗ್‌ಳಿನ ದೇ ಕರಿ ಬೋಲಾಖ್ಹತರ್ ಇನೆ ಮನ, ತೂ ಪುಂಗ್‌ಳಿನ ಲೀನ್‌ ಖೈಲೆ, ಯೊ ತಾರ ಪೇಟ್‌ಮ ಕಡೂ ಉಷೆ, ಕತೋಬಿ ತಾರ ಮ್ಹೋಡಾಮ ಯೋ ಶೇತ್‌ನಿತರ ಮಿಠ್ಠು ಹುಯಿರ‍್ಹಿಶೆ” ಕರಿ ಬೋಲ್ಯೊ. 
\v 10 ತದೆ ಮೆ ಯೊ ನ್ಹಾನಿ ಪುಂಗ್‌ಳಿನ ದೂತನ ಹಾತ್ಮಥು ಲೀನ್ ಖೈಲಿದೊ. ಯೊ ಮಾರ ಮ್ಹೋಡಾಮ ಶೇತ್‌ನಿತರ ಮಿಠ್ಠುಥು,ಇನ ಖೈಲಾವದಿನ್ ಮಾರು ಪೇಟ್ ಕಡುಹುಯ್ಗು. 
\v 11 ಇನಪಾರ್ ಯೊ ದೂತನೆ ಮನ, “ತೂ ಬಿಜೂ಼ಬಿ ಕೈಯೆಕ್‌ ಅದ್ಮಿವೋನ, ಬೋಲಿನ ಅಜು಼ ಖಾನ್‌ದಾನ್‌ ರಾಜಾ಼ವ್‌ನಿ ಬಾರೇಮ ಪ್ರವಾದ್‌ನೆ ಬೋಲ್‌ನು” ಕರಿ ಹುಕುಮ್‌ ಕರ‍್ಯೊ.
\c 11
\s ಬೇ ಸಾಕ್ಷಿ
\p
\v 1 ಇನಪಾರ್ ಆಳ್ತಿ ಕರಾನಿಘೋಣಿನೊ ಏಕ್‌ ಲಠ್ಠಾನ ದೀನ್ ಅಮ್ ಖ್ಹಮ್‌ಜಾ಼ಡ್ಯು, “ತೂ ಉಠೀನ್ ದೇವ್ನ ಮಂದಿರ್‌ನಾಬಿ ಚಾ಼ಚ಼ರ್‌ನ ಆಳ್ತಿ ಕರ್‌ ಅಜು಼ ಹಿಜ಼್ಜಾ ಆರಾದನೆ ಕರಾವಾಳಾನಾಬಿ ಗಣ್ತಿಕರ್. 
\v 2 ಕತೋಬಿ ಮಂದಿರ್‌ನ ಭಾರ್‌ಛಾ಼ತೆ ಝ಼ಗೋನ ಆಳ್ತಿ ನಾಕರ‍್ನುತೆ ಮ್ಹೇಲಿದೆ, ಯೊ ಪರೈ ಅದ್ಮಿನಖ್ಹಾಜೆ ದೆವೈರ‍್ಹೂಸ್. ಇವ್ಣೆ ಪರಿಶುದ್ ಖ್ಹಯೇರ‍್ನ ಬೇಉಪ್ಪರ್‌ ಚಾ಼ಳಿಖ್ಹ್ ಮಹಿನಲಗು ಖುಂದಲ್ತುಫಂಡ್‌ಷೆ. 
\v 3 ಅತ್ರೇಸ್ ಕಾಹೆತೆ ಮಾರ ಬೇ ಸಾಕ್ಷಿವಾಳ ಛೈ಼ನಕೋಥ್‌ಳಾನ ಹೋಡಿಲಿನ್ ಏಕ್‌ ಹಜಾ಼ರ್ ಬೇಖ್ಹೊ ತೀನಿಖ್ಹ್‌ ದನ್‌ಲಗು ಪ್ರವಾದ್‌ನೆ ಕರಾನಿತರ ಇವ್ಣುನ ಅದಿಕಾರ್ ದಿಶ್. 
\v 4 ಧರ್ತಿನ ಪ್ರಭುನ ಖ್ಹಾಮ್ಣೆ ಭಿಯುತೆ ಬೇ ತೇಲ್ನಝಾ಼ಡಾವ್‌ಬಿ ಅಜು಼ ಬೇ ದಿವಳ್ಗಿಬಿ ಅವ್ಣೇಸ್. 
\v 5 ಅವ್ಣುನ ಕೋಣ್‌ತೋಬಿ ಖರಾಬ್ ಕರ್ನುಕರಿ ಉಷೇತೊ ಇವ್ಣ ಮ್ಹೋಡಾಮಾಥಿ ಆಗ್‌ನಿಕ್ಳಿನ್ ಇನ ವಹೇರ‍್ಯಾನ ಬಾಳಿನಾಕ್‌ಷೆ. ಅವ್ಣುನ ಖರಾಬ್ ಕರ್ನುಕರಿ ಹರ್ಖ್ಹಾವಳು ಅಮ್ನಿಸ್ ಪರಕ್ಮ ಮರ‍್ನು. 
\v 6 ಇವ್ಣೆ ಪ್ರವಾದನೆ ಕರಾನ ದನ್ಮ ವರ್ಖ್ಹಾತ್‌ ನಾಪಡ್ನುತೆ ಆಬ್‌ನ ಮೂಚಾ಼ನಿ ಅದಿಕಾರ್ ಇವ್ಣುನ ಥು. ಅಜು಼ ಪಾಣಿನ ಲ್ಹೋಯಿ ಕರಾನಿತರಾಬಿ,ಖ್ಹಾರಿ ಥರಾನು ಖ್ಹತಾಪ್ಣಿಥಿ ಜ಼ಮೀನ್ನ ಖ್ಹತಾವನ ಅದಿಕಾರ್‌ಛಾ಼. 
\v 7 ಕತೋಬಿ ಆ ಬೇಜ಼ಣ ಇವ್ಣಿ ಸಾಕ್ಷಿಯೆವ್‌ನ ಬೋಲಿ ಖತಮ್ ಕರಾದಿನ್,ಪಾತಾಳ್‌ಥೊ ಆವ್‌ಶೇತೆ ಜಾನ್ವರ್‌ ಅವ್ಣುನ ಜಂಗ್‌ಮ ಹರೈನ್ ಮಾರಿನಾಕ್‌ಶೆ. 
\v 8 ಆ ಸಾಕ್ಷಿನು ಬೇ ಮಖ್ಹಾಣ್ಯು ಮಹಾ ನಂಗರ‍್ನ ಗಲ್ಲೀಮ ಪಡ್ಯುರ‍್ಹಿಶೆ. ಆ ಖ್ಹಯೇರ‍್ನ ಖ್ಹಣೇದ್‌ಹುಯಿನ್ ಸೊದೋಮ್ ಕರಿಬಿ, ಈಜಿಪ್ಟ್ ಕರಿಬಿ ನಾಮ್ ಛಾ಼. ಇವ್ಣೊ ಪ್ರಭು ಜಿನುಕು ಹಿಜ್ಜಾ಼ಸ್ ಶಿಲ್‌ಬೇಪರ್ ಮಾರಾಯೊಥೊ. 
\v 9 ಅಖ್ಖೂಸ್ ಅದ್ಮಿ, ಖೂಮ್‌, ಬೋಲಿ, ಜ಼ಗ್‌ಜಾತ್‌ಮ ಮಳಿಹುಯು ಆ ಭೇಜ಼ಣ ಸಾಕ್ಷಿನ ಮುರ್ದಾವ್ನ ಖ್ಹಡ್‌ತೀನ್ ದನ್‍ಲಗೂಬಿ ದೇಕ್‍ಷೆ ಅಜು಼ ಇವ್ಣ ಮುರ್ದಾವ್ನ ಮಖ್ಹಾಣ್ಯು ಕರಾನ ಕೊ ಮ್ಹೇಲ್‌ಶೇನಿ. 
\v 10 ಆ ಭೇಜ಼ಣ ಪ್ರವಾದಿವ್ನೆ ಧರ್ತಿನ ಲೋಗ್ನ ಖ್ಹತಾಪ್ಣಿ ಕರ‍್ಯುಥೂತೆಖ್ಹಾಜೆ ಅವ್ಣೆ ಮರ‍್ಯುತೆ ದೇಖಿನ್ ಜ಼ಮೀನ್‌ಪರ್‌ನು ಅದ್ಮಿ ಖುಷಿಕರ್ಷೆ ಅಜು಼ ಹಾಶಿಖುಶಾಲಿ ಕರಿನ್ ಏಕ್‌ಥಿಏಕ್‌ ಇನಾಮ್‌ ಮೋಕಲ್‌ಶೆ. 
\v 11 ಕತೋಬಿ ಖ್ಹಡ್‌ತೀನ್ ದನ್ನಪಾರ್ ದೇವ್‍ಥಿ ಜಾನ್ನೊ ವಹಿರೊ ಯೊ ಮುರ್ದಾಮ ಪೇಶ್ಯೂತೊ, ಇವ್ಣೆ ಗೋಡಟೇಕಿ ಭೀರಿಜಾಶೆ. ಇವ್ಣುನ ದೇಖ್ಯುಹುಯು ಖ್ಹಾರು ಡರ್‌ಥಿ ಕಾಪ್‌ಶೆ. 
\v 12 ಇನಪಾರ್ ಇವ್ಣುನ, “ಹಜ್ಜಾ಼ ಉಪ್ಪರ್ ಛ಼ಡಿನ್ ಆವೊ” ಕರಿ ಆಬ್‍ಥು ಮೋಟ ಅವಾಜ಼್‌ನೆ ಬೋಲ್ಯು. ಇನ ಖ್ಹಮ್‌ಜುತೆ ಇವ್ಣೆ ವಾದ್ಳಮಾಕರಿ ಸೊರ್ಗನ ಛ಼ಡೀಗು. ಇವ್ಣೆ ಜಾ಼ವನು ಇವ್ಣ ವಹೇರ‍್ಯಖ್ಹಾರು ದೇಖುಸ್‌ಕರ್ತಥು. 
\v 13 ಯೋಸ್ ವೇಳ್ಮ ಮೋಟು ಭೂಕಂಪ್ ಹುಯಿನ್ ಯೊ ಖ್ಹಯೇರ‍್ನು ದಖ್ಹ್‌ಮ ಏಕ್‌ಭಾಗ್ ನಾಶ್‌ಹುಯಿಗು. ಆ ಭೂಕಂಪ್‌ಥಿ ಖ್ಹಾತ್‍ಹಜಾ಼ರ್‌ ಜ಼ಣು ಮರಿಗು. ಇನಾಮ ಬಚ್ಯೂತೆ ಅದ್ಮಿಖ್ಹಾರು ಘಣು ಡರಿನ್ ಸೊರ್ಗಾನ ದೇವ್ನ ಮಹಿಮೆ ಕರ‍್ಯು. 
\v 14 ಬೇನು ಖತ್ರ ನಿಕ್ಳಿಗಯು.ಹಂದೇಕ್, ತೀನ್ನು ವದೇಖ್ಹ್‌ ಒಗ್ಗಿಸ್‌ ವಳ್ಯುಆವಸ್.
\s ಖ್ಹಾತ್‍ನಿ ತುತ್ತೂರಿ
\p
\v 15 ಖ್ಹಾತ್‌ನೊ ದೇವ್ನದೂತನೆ ಇನಿ ತುತ್ತೂರಿನ ವಜಾ಼ಡ್ಯೊ. ತದೆ ಪರ್‌ಲೋಕ್‌ಮ ಮೋಟು ಅವಾಜ಼್ ಹುಯಿನ್, “ಆ ಜಗತ್ನ ರಾಜ್ಯನಿ ಅದಿಕಾರ್ ಅಪ್ಣೊ ಪ್ರಭುನಾಬಿ ಇನ ಕ್ರಿಸ್ತನಾಬಿ ಐರ‍್ಹೂಸ್.ಯೊ ಜ಼ಗ್‌ಜ಼ಮಾನಲಗೂಬಿ ಇನ ರಾಜ಼್‌ನ ಚ಼ಲಾವ್‌ಷೆ.” ಕರಿ ಬೋಲ್ಯು. 
\v 16 ಅನವಾರ್ ದೇವ್ನ ಜೋ಼ಡ್ಮ ಇವ್ಣ ಇವ್ಣ ಸಿಂಹಾಸನ್‌ಪರ್ ಬೇಠುಥೂತೆ ಚಾರ್‌ಉಪ್ಪರ್‌ವೀಖ್ಹ್‌ ಜ಼ಣು ಶಾಣು ಇನ ಆಡ್‍ಪಡಿನ್ ಆರಾದನೆ ಕರ‍್ಯು ಅಜು಼, 
\v 17 “ಪ್ರಭು, ಸರ್ವಶಕ್ತನೊ ದೇವ್, ರ‍್ಹವಾಳೊ ತೂ ತಾರಿ ಮೋಟಿ ಅದಿಕಾರ್‌ನ ಲೀಲಿನ್‌ ಚ಼ಲಾಯೊತೆ ಇನಖ್ಹಾಜೆ ತುನ ಧನ್ಯವಾದ್ ಕರ್ಯೆಸ್. 
\v 18 ಜಗತ್‌ನು ಅದ್ಮಿಖ್ಹಾರು ಇರಾದೊ ಕರ‍್ಯು. ತಾರಿ ಖೀಜ಼್ ಪ್ರಕಟ್‌ಹುಯಿ. ಮರ‍್ಯಹುಯಾನ ತೀರ್ಪ್‌ ಮಳಾನಿ ವಖ್ಹತ್ಆಯಿ. ತೂ ತಾರ ದಾಸ ಹುಯಿರ‍್ಹೋತೆ ಪ್ರವಾದಿವ್‌ನಾಬಿ, ದೇವ್ನ ಅದ್ಮಿನಾಬಿ, ತಾರ ನಾಮ್ನ ಡರಾವಾಳ ಶಾಣವ್‌ನಾಬಿ, ಅಡ್ಡಾಣಿನಾಬಿ ಪ್ರತಿಫಲ್ ದ್ಯವಾನಿ ವಖ್ಹತ್ ಆ ಜಗತ್ನ ನಾಶ್‌ಕರಾವಳನ ವಿನಾಶ್‌ಕರಾನಿ ವಖ್ಹತ್ ಐಗು”. ಕರಿ ಬೋಲಿನ್ ಇನ ಆರಾದನೆ ಕರ‍್ಯು. 
\v 19 ತದೆ ಸೊರ್ಗಾಮ ಥೂತೆ ಮಂದಿರ್‌ ನಿಕ್‌ಳ್ಯು. ದೇವ್ನ ಮಂದಿರ್‌ಮ ಇನು ಒಪ್ಪಂದನೊ ಡಾಬೊದೆಖಾಯು. ಆಸ್‌ಕಾಹೆತೆ, ಘಲಾರನು, ಘೂಂಜಾ಼ನು, ವಿಜ಼್‌ಳಿ ಖಡ್ಕಿನ್‌ ಭೂಕಂಪ್‌ಹುಯು. ಅಜು಼ ಮೋಟ ಗಾರಾನೊ ವರ್ಖ್ಹಾತ್ ಹುಯು.
\c 12
\s ಅರ್ಝ಼ ಅಜು಼ ತಯೇಡ
\p
\v 1 ಸೊರ್ಗಾಮ ಏಕ್‌ ಮೋಟು ಅದ್ಭುತ್ ದೆಖಾಯು. ತಯೇಡ ಏಕ್ಜ಼ಣಿ ಚಾ಼ಂದ್ ಫೇರಿರಾಖಿಥಿ. ಹೈರೀತೆನ ಗೋಡಾನ ಚ಼ಂದರ್‌ಮೊ ಥೊ.ಇನ ಮುಡ್‌ಕ್ಯಪರ್ ಭಾರ ತಾರವ್ನಿ ಕಿರೀಟ್ ಥು. 
\v 2 ಯೊ ಬೇಜೂನಿ ಹುಯಿರ‍್ಹಿನ್ ಯೋ ಜ಼ಣತ್ನ ದರದ್‌ಥಿ ಖ್ಹತೀನ್ ರೊವ್‍ಕರ್ತೀಥಿ. 
\v 3 ತದೆ ಆಕಾಶ್‌ಮ ಬಿಜೇಕ್ ಅದ್ಭುತ್ ದೆಖಾಯು; ಹಿಜ್ಜಾ಼ ಏಕ್‌ ಅರ್ಝ಼ ಥು. ಇನ ಖ್ಹಾತ್ ಮುಡ್‌ಕ್ಯಾಬಿ ದಖ್ಹ್‌ ಶಿಂಗ್ಡಾ ಥು. ಇನ ಮುಡ್‌ಕ್ಯಾವ್‌ಪರ್ ಖ್ಹಾತ್ ಕಿರೀಟ್‌ಖ್ಹಾರು ಥು. 
\v 4 ಇನ ಡೋಂಡೇಥಿ ಆಬ್‌ನ ತಾರವ್‌ಮಾನು ತೀನ್‌ಮಾನು ಏಕ್‌ಭಾಗ್‌ನ ಖೇಚಿನ್ ಜ಼ಮೀನ್‌ಪರ್ ಫೇಖ್ಯು. ಜ಼ಣುಕರಾತೆ ಯೊ ತಯೇಡ ಜ಼ಣ್‌ತಾಸ್ನ ಇನ ಲಡ್ಕಾನ ಗಳಿಲೇವ್ಣುಕರಿ ಯೊ ಅರ್ಝ಼ ಇನ ಖ್ಹಾಮ್ಣೆಸ್ ಟಿವೈರ‍್ಹೂಥು. 
\v 5 ಇನೆ ಜ಼ಗ್‌ಜಾ಼ತ್ನ ಲ್ಹೋಡಾನ ಲಠ್ಠೇಥಿ ಚ಼ಲಾವ್‌ಣೂತೆ ಏಕ್‌ ಪರ್ಖ್ಹಾ ಲಡ್ಕಾನ ಜ಼ಣಿ. ಯೋ ಲಡ್ಕು ತದೇಸ್‌ ದೇವ್‌ಕನಾಬಿ ಇನ ಸಿಂಹಾಸನ್‌ಕನಬಿ ಪಡೈಗಯು. 
\v 6 ಅಜು಼ ಯೊ ತಯೇಡ ಜ಼ಂಗಳ್‌ಮ ನಾಶಿಚ಼ಲಿಗೈ. ಹಿಜ್ಜಾ಼ ಇನ ಏಕ್‌ ಹಜಾ಼ರ್ ಬೇಖ್ಹೊ ತೀನಿಖ್ಹ್‌ ದನ್‌ಲಗು ಪಳಾನಖ್ಹಾಜೆ ದೇವ್ನೆ ತಯಾರ್ ಕರಿರಾಖ್ಯೋಥೊತೆ ಝ಼ಗೋನ ಇನೆ ದೇಖಿ. 
\v 7 ಸೊರ್ಗಾಮ ಜಂಗ್ ಹುಯು. ಮೀಕಾಯೇಲಾಬಿ ಇನು ದೂತರ್‌ಬಿ ಅರ್ಝ಼ನ ವಿರೋದ್ ಜಂಗ್‌ಭೀಡ್ಯು. ಇಮ್ಮಸ್ ಅರ್ಝ಼ಬಿ ದೂತರ್‌ಬಿ ಜಂಗ್ ಭೀಡಾಲಗ್ಯು. 
\v 8 ಕತೋಬಿ ಯೊ ಅರ್ಝ಼ನ ತಾಖತ್‌ಕೊಂತೆ ಹರಿಗಯು. ಅಮ್ ಸೊರ್ಗಾಮ ಇವ್ಣುನಾಬಿ ಝ಼ಗೊ ಮಳ್ಯುಕೊಯ್ನಿ. 
\v 9 ಯೋ ಅರ್ಝ಼ ಕತೊ ಪಿಶಾಚಿಕರಿಬಿ ಶೈತಾನ್ ಕರೀಬಿ ನಾಮ್‌ರ‍್ಹವಾಳ ಯೊ ಜೂ಼ನೊ ಖ್ಹಾಪ್ ಧರ್ತಿಪರ್ ಧಕೆಲಾಯೊ ಇನೊ ದೂತಬಿ ಇನ ಜೋ಼ಡ್ಮ ಜ಼ಮೀನ್‌ಪರ್ ಫೇಕೈಗಯು. 
\v 10 ತದೆ ಮೆ ಸೊರ್ಗಾಮ ಏಕ್‌ ಮೋಟೊ ಅವಾಜ಼್ ಖ್ಹಮ್‌ಜ್ಯೊ; ಯೊ “ಜೀತ್‌ಬಿ, ಶಕತ್‌ಬಿ, ರಾಜ್ಯಬಿ ಹಮಾರ ದೇವ್ನು ಹುಯು, ಯೊ ಅಬಿಷೇಕ್ ಕರ‍್ಯೊತೆ ಕ್ರಿಸ್ತನು ಅದಿಕಾರ್ ಹಮ್ಕೆ ಶುರುಹುಯಿರ‍್ಹೂಸ್. ರಾತ್‌ದನ್ ಹಮಾರ ಭೇನೆ ಭೈಯೇವ್ನಿ ಬಾರೇಮ ದೇವ್ನ ಖ್ಹಾಮ್ಣೆ ಕೆದೇಬಿ ಛಾ಼ಡಿ ಬೋಲುಕರ್ತೊಥೋತೆ ಛಾ಼ಡಿಖೋರ್ ಸೊರ್ಗಥು ಧಕೆಲೈಗಯೊ. 
\v 11 ಇವ್ಣೆ ಮರಣ್‌ಲಗೂಬಿ ಭೈಯೇ ಭೇನೆನ ಇವ್ಣ ಜಾನ್ನ ಪ್ಯಾರ್ ಕರ‍್ಯಕೊಂತೆ, ಮೇಂಢಾನ ಚೆಲ್ಕುಹುಯಿರ‍್ಹವಾಳನ ಲ್ಹೋಯಿಥಿಬಿ ಇನು ಸಾಕ್ಷಿನು ಅಜು಼ ಬೋಲಾಯುತೆ ವಚನ್‌ಥಿಬಿ ಇನ ಜೂತಿಲಿದು. 
\v 12 ಇನಖ್ಹಾಜೆ ಸೊರ್ಗ, ಇನಾಮ ಜಿವ್ಣುಕರವಾಳಾವೊ಼, ಖುಷಿಕರೊ. ಕತೋಬಿ ಜ಼ಮೀನ್ ದರ‍್ಯಾವ್ ತುಮಾರಿ ಖರಾಬ್ ಹಾಲ್ನ ಶಾತ್‌ಕರಿ ಬೋಲು ಶನಕತೊ ಶೈತಾನ್ ಇನಛಾ಼ತೆ ವಖ್ಹತ್ ಕಮ್‌ಕರಿ ಮಾಲುಮ್‌ ಕರಿಲಿನ್ ಘಣು ಚ಼ಂಢಾಳ್‌ವಾಳೊ ಹುಯಿನ್ ತುಮಾರಭಣಿ ಉತ್ರಿನ್ ಐರ‍್ಹೋಸ್” ಕರಿ ಬೋಲ್ಯು. 
\v 13 ಅರ್ಝ಼ ಇನುಯೋ ಜ಼ಮೀನ್‌ಪರ್ ಧಕೈಲೈನ್‌ ಪಡಿರ‍್ಹಾವನು ಪರ್ಖಿಲಿನ್, ಪರ್ಖ್ಹೊ ಲಡ್ಕು ಜ಼ಣೀತೆ ತಯೇಡನ ಖ್ಹತಾವನಖ್ಹಾಜೆ ರಪೇಟಿನ್‌ ಗಯು. 
\v 14 ಕತೋಬಿ ಯೊ ತಯೇಡ ಜ಼ಂಗಳ್‌ಮ ಥೂತೆ ಇನಿ ಝ಼ಗೋನ ಉಡಿಜಾ಼ವನಖ್ಹಾಜೆ ಇನ ಮೋಟಿಖ್ಹಿ ಗರದ್ನಿ ಬೇ ಫಾಕ್ಡಿಖ್ಹಾರು ದೆವಾಯು. ಹಿಜ್ಜಾ಼ ಯೊ ಖ್ಹಡ್‌ತೀನ್ ವರಖ್ಹ್ ದನ್ ಅರ್ಝ಼ನ ಖ್ಹಪಡ್ನುನಾತೆ ತಿಮ್ ಪಳಿ. 
\v 15 ಅರ್ಝ಼ ಯೊ ತಯೇಡಾನ ವ್ಹವಾಡಿಲಿನ್ ಜಾ಼ವ್ಣುಕರಿ ಇನ ಪೀಠೆ ನದ್ದಿನಿತರ ಬಾಕಾಮಾಥು ಪಾಣಿನ ಉಡಾಯು. 
\v 16 ಕತೋಬಿ ಜ಼ಮೀನ್ನೆ ಯೊ ತಯೇಡಾನ ಮದತ್ ಕರ‍್ಯು. ಯೋ ಇನ ಬಾಕಾನ ಪಖ್ಹಾರಿನ್ ಅರ್ಝ಼ನ ಇನ ಬಾಕೇಥಿ ಮ್ಹೇಲ್ಯೋತೆ ನದ್ದೀನ ಗಳಿಲಿದು. 
\v 17 ತದೆ ಅರ್ಝ಼ನ ಯೊ ತಯೇಡಾಪರ್ ಘಣು ಖಿಜೈ಼ನ್, ಇನಿ ಪಿಳ್ಗಿಮ ಥೂತೆ ಇವ್ಣಾಪರ್ ಕತೊ, ದೇವ್ನಿ ಹುಕುಮ್‌ನ ಪಾಡಿ ಚಾ಼ಲಿನ್ ಯೇಸುನಿ ಬಾರೇನಿ ಸಾಕ್ಷಿ ಹುಯಿರ‍್ಹವಾಳನಪರ್ ಜಂಗ್ ಭೀಡಿನ್, 
\v 18 ದರ‍್ಯಾವ್ನ ಕನಾರಿನ ರೇತ್‌ಪರ್ ಭೀರಿಗಯೊ.
\c 13
\s ಬೇ ಜಾನ್ವರ್‌
\p
\v 1 ತದೆ ದರ‍್ಯಾವ್‌ಮಾಥು ಏಕ್‌ ಜಾನ್ವರ್‌ ನಿಕಳ್ತು ಆವನು ಮೆ ದೇಖ್ಯೊ. ಇನ ಖ್ಹಾತ್ ಮುಡ್‌ಕ್ಯಾಬಿ ದಖ್ಹ್‌ ಶಿಂಗ್ಡ ಥು. ಯೊ ಶಿಂಗ್ಡಾವ್‌ಪರ್ ದಖ್ಹ್‌ ಕಿರೀಟ್‌ಬಿ, ತಾಳ್ವಪರ್ ದೇವ್ನ ಗಾಳೆದ್ಯವಾನು ನಾಮ್‌ಅಖ್ಖು ಲೀಖೈರ‍್ಹೂಥು. 
\v 2 ಮೇ ದೇಖ್ಯೋತೆ ಜಾನ್ವರ್‌ ಅದೋಗಾನಿತರಾಬಿ ಇನ ಗೋಡ ರೀಚ಼್‌ನ ಗೋಡಾನಿಘೋಣಿಬಿ ಥು. ಇನು ಬಾಕು ಶುಂಭಾನ ಡಾಚ಼ನಿತರಾಬಿ ಥು. ಅರ್ಝ಼ನ ಇನ ಶಕತ್‌ಬಿ, ಸಿಂಹಾಸನ್‌ಬಿ, ಮೋಟಿ ಅದಿಕಾರ್‌ನ ದಿದು. 
\v 3 ಜಾನ್ವರ್‌ನ ಏಕ್‌ ಮುಡ್‌ಕ್ಯು ಘಾವ್‌ಹುಯಿನ್ ಮರ‍್ವನಿತರ ದೆಖವ್‌ಕರ್ತುಥು. ಯೊ ಮರಣ್ಣೊ ಘಾವ್ ಅಛ್ಛು಼ ಹುಯಿಗು, ಧರ್ತಿನ ಜಗತ್‌ನು ಅದ್ಮಿಖ್ಹಾರು ಯೊ ಜಾನ್ವರ್‌ನ ದೇಖಿನ್ ಆಶ್ಚರ್ಯ ಕರ‍್ಯು. 
\v 4 ಅರ್ಝ಼ನ ಯೊ ಜಾನ್ವರ್‌ನ ಅದಿಕಾರ್ ದಿರಾಖ್ಯೊತೆಖ್ಹಾಜೆ ಇವ್ಣೆ ಯೊ ಅರ್ಝ಼ನ ಆರಾದನೆಕರ‍್ಯು. ಅಜು಼ ಇವ್ಣೆ “ಯೋ ಜಾನ್ವರ್‌ನಾಬಿ ಅರಾದನೆ ಕರೀನ್, ಆ ಜಾನ್ವರ್‌ನ ಬರೋಬರಿ ಕೋಣ್ ಛಾ಼? ಅನ ವಿರೋದ್ ಜಂಗ್ ಭಿಡಾನ ಕೋಣ್ ಶಕತ್‌ವಾಳು? ಕರಿ ಬೋಲ್ಯು. 
\v 5 ಯೊ ಜಾನ್ವರ್‌ನೆ ಬಡೈನಿ ವಾತೆಥೀಬಿ ಗಾಳೆಥೀಬಿ ಬೋಲಾನ ಮ್ಹೋಡು ದೆವೈರ‍್ಹುಥು. ಅಜು಼ ಬೇಉಪ್ಪರ್ ಚಾ಼ಳಿಖ್ಹ್ ಮಹಿನಲಗು ಇನು ಕಾಮ್‌ಖ್ಹಾರು ಚ಼ಲಾವನಿ ಅದಿಕಾರ್‌ಬಿ ಇನ ದೆವೈರ‍್ಹುಥು. 
\v 6 ತದೆ ಯೊ ಜಾನ್ವರ್‌ನೆ ದೇವ್ನ ಗಾಳೆದಿದು ಕಾಹೆತೆ ಇನ ನಾಮ್ನಾಬಿ, ಯೊ ರ‍್ಹವಾನ ಮಂದಿರ್‌ನಾಬಿ, ಸೊರ್ಗಾಮ ರ‍್ಹವಾಳಖ್ಹಾರಾನ ಗಾಳೆದಿದು. 
\v 7 ಆ ನಾಹುಯಿನ್ ದೇವ್ನ ಪರಿಶುದ್ಧ ಅದ್ಮಿವ್‌ಪರ್ ಜಂಗ್ ಭೀಡಿನ್ ಇವ್ಣುನ ಹರಾವನಿ ಅದಿಕಾರ್ ದೆವಾಯು ಅಜು಼ ಅಖ್ಖೀಸ್ ಖೂಮ್‌, ಬೋಲಿ, ಲೋಗ್, ಜ಼ಗ್‌ಜಾ಼ತ್‌ಪರ್ ಇನ ಅದಿಕಾರ್ ದೆವಾಯು. 
\v 8 ಜಗತ್‌ ಉಬ್‌ಜಾ಼ನ ಪಹಿಲೆಸ್ ರ‍್ಹೇಖ್ಹಾಯೊತೆ ಮೇಂಢಾನ ಚೆಲ್ಕು ಹುಯಿರ‍್ಹವಾಳನ ಛಾ಼ತೆ ಜಾನ್ನ ಹಕ್‌ವಾಳಾನಿ ಪುಸ್ತಕ್‌ಮ ಕಿನುಕಿನು ನಾಮ್‌ಖ್ಹಾರು ಲೀಖೈರ‍್ಹುಕೊಯ್ನಿಕಿ ಜ಼ಮೀನ್ನು ಯೊ ಅದ್ಮಿಖ್ಹಾರೂಸ್ ಯೊ ಭಯಂಕರ್ ಜಾನ್ವರ್‌ನ ಆರಾದನೆ ಕರ್ಶೆ. 
\v 9 ಕಾನ್‌ರ‍್ಹವಾಳು ಖ್ಹಮ್‌ಜಾ಼ದೆ; 
\v 10 ಕೋಂಡಿಘಾಲವಳೊ, ಇನುಯೋಸ್ ಜೇಲ್‌ಮ ಜಾ಼ಶೆ, ತಲ್ವಾರ್‌ಥಿ ಮಾರವಳು ತಲ್ವಾರ್‌ಥೀಸ್ ಮರ್ಶೆ. ಅನಾಮ ದೇವ್ನು ಅದ್ಮಿಖ್ಹಾರು ಖ್ಹಮಾಳಿನ್ ವಿಶ್ವಾಸ್‌ಥಿ ರ‍್ಹೇವ್ಣು. 
\v 11 ಅಜೇಕ್ ಜಾನ್ವರ್‌ ಜ಼ಮೀನ್‌ಮಾಥು ಆವನು ದೇಖ್ಯೊ. ಅನ ಮೇಂಢಾನಿತರ ಬೇ ಶಿಂಗ್ಡು ಥು, ಯೊ ಅರ್ಝ಼ನಿತರ ವಾತೆ ಬೋಲ್ಯು. 
\v 12 ಆ ಜಾನ್ವರ್‌ ಪಹಿಲ ಜಾನ್ವರ್‌ನ ಖ್ಹಾಮ್ಣೆ ಇನಿ ಅಖ್ಖೀಸ್ ಅದಿಕಾರ್‌ನ ಚ಼ಲೈನ್, ಮರಣ್ಣೊಘಾವ್ ಗುಣ್‌ಹುಯುತೆ ಪಹಿಲ ಜಾನ್ವರ್‌ನ ಜ಼ಮೀನ್‌ಪರ್ ರ‍್ಹವಾಳು ಇನ ಆರಾದನೆ ಕರಾನಿಘೋಣಿ ಕರ‍್ಯು. 
\v 13 ಹೈರುತೆ ಅದ್ಮಿನ ಖ್ಹಾಮ್ಣೆ ಆಬ್‍ಥು ಆಗ್ ಜ಼ಮೀನ್‌ಪರ್ ರಂಚಾ಼ವನಿತರನು ಅದ್ಭುತ್‌ಖ್ಹಾರು ಕರ್ತುಹುಯಿನ್, 
\v 14 ಯೊ ಪಹಿಲ ಜಾನ್ವರ್‌ನ ಖ್ಹಾಮ್ಣೆ ಅದ್ಭುತ್‌ಖ್ಹಾರು ಕರಾನು ಅದಿಕಾರ್ ಛಾ಼ತೆ ಇನಖ್ಹಾಜೆ ಧರ್ತಿನ ಅದ್ಮಿಖ್ಹಾರನ ಖ್ಹೈಲು ಕರ‍್ಯು. ಇವ್ಣುನ ತಲ್ವಾರ್‌ಥಿ ಘಾವ್‌ಹುಯಿನ್ ಮರ‍್ಯುಕೊಂತೆ ಬಚಿರ‍್ಹುತೆ ಜಾನ್ವರ್‌ನ ಮರ್ಯಾದಿ ದ್ಯವಾನಖ್ಹಾಜೆ ಮೂರತ್ ಬಣಾವ್ಣುಕರಿ ಹುಕುಮ್ ಕರ‍್ಯು. 
\v 15 ಆ ನಾಹುಯಿನ್ ಆ ಬೇನು ಜಾನ್ವರ್‌ನ ಮೂರತ್ನ ಜಾನ್‌ ದ್ಯವಾನಿ ತಾಖತ್‌ಬಿ ಮಳ್ಯು. ಇನ ಖ್ಹಲಾಮ್ ಕರಾಕೊಂತೆ ಖ್ಹಾರಸ್ನ ಮರ್‌ನಾಖನಿ ಶಕತ್ ಇನಥು. 
\v 16 ಆ ಬೇನು ಜಾನ್ವರ್‌ಬಿ, ಶಾಣು, ಅಡ್ಡಾಣಿ, ಶೌಕಾರ್, ಗರೀಬ್, ಛುಟ್ಕಾರ್‌ರ‍್ಹವಾಳು, ಗುಲಾಮ್‌ಖ್ಹಾರು ಅಖ್ಖೂಬಿ ಇವ್ಣ ಇವ್ಣ ಖಾವಹಾತ್ಪರ್ ರ‍್ಹವೊ, ತಾಳ್ವಪರ್ ರ‍್ಹವೊ ಖ್ಹಣೇದ್ ನಖಾವ್ಣು ಕರಿ ಜು಼ಲಮ್‌ ಕರ‍್ಯು. 
\v 17 ಯೊ ಖ್ಹಣೇದ್ ಕಿನ ಕೊಯ್ನಿಕಿ ಇವ್ಣೆ ಲ್ಯಾವಾನ ಕೊಹುಯುನಿ ಅಜು಼ ವೇಚಾ಼ನಬಿ ಹುಯುಸ್ ಕೊಯ್ನಿ. ಯೊ ಖ್ಹಣೇದ್ ಖಿವುಕತೊ ಪಹಿಲ ಜಾನ್ವರ್‌ನು ನಾಮ್ ನತರ್ ಇನ ನಾಮ್ನ ವತಾಳನು ಗಣ್ತೀನು ಲೀಖ್ಯು. 
\v 18 ಅನ ಮಾಲುಮ್ ಕರಿಲ್ಯಾವಾನ ಗ್ಯಾನ್‌ಬಿ ಜ಼ರೂರತ್ ಛಾ಼. ಅಕ್ಲಿ ಯೊ ಜಾನ್ವರ್‌ನ ಗಣ್ತಿನ ಲೀಖ್ಯಾನ ಗಣಾದೆ, ಯೊ ಏಕ್‌ ಅದ್ಮಿನ ವತಾಳನು ಗಣ್ತೀನು ಲೀಖ್ಯು ಹುಯಿರ‍್ಹೂಸ್. ಇನು ಗಣ್ತೀನು ಲೀಖ್ಯು ಛೊ಼ಖ್ಹೊ ಛೋ಼ಪರ್ ತೀನಿಖ್ಹ್‌.
\c 14
\s ಮೇಂಢಾನು ಚೆಲ್ಕು ಅಜು಼ ಇನು ಅದ್ಮಿಖ್ಹಾರು
\p
\v 1 ಅನಪಾರ್ ಮೆ ದೇಖಾಮ ಬಲಿ ಮೇಂಢಾನ ಚೆಲ್ಕುಹುಯಿರ‍್ಹವಾಳೊ ಚೀಯೋನ್ ಪರ್ಭತ್‌ಪರ್‌ ಭಿಯುರ‍್ಹವಾನು ದೇಖ್ಯೊ. ಇನ ಜೋ಼ಡ್ಮ ಏಕ್‌ ಲಾಕ್ ಚಾರ್‌ಉಪ್ಪರ್ ಚಾ಼ಳಿಖ್ಹ್ ಹಜಾ಼ರ್‌ಜ಼ಣು ಥು. ಇವ್ಣ ತಾಳ್ವಪರ್ ಇನು ನಾಮ್‌ಬಿ ಇನ ಬಾನು ನಾಮ್‌ಬಿ ಲೀಖೈರ‍್ಹೂಥು. 
\v 2 ಆನಾಹುಯಿನ್ ಪರಲೋಕ್‌ಥು ಪಾಣಿನ ತೋಫಾನ್ನಿತರಾಬಿ, ಘಲಾರನ ಅವಾಜ಼್‌ನಿತರಾನೊ ಏಕ್‌ ಮೋಟ ಅವಾಜ಼್‌ನ ಖ್ಹಮ್‌ಜೊ. ಮೆ ಖ್ಹಮ್‌ಜೋತೆ ಯೊ ಅವಾಜ಼್ ಖ್ಹಾರಂಗೊ ವಜಾ಼ಡಿನ್ ಗೀದ್‌ ಬೋಲಾವಾಳಾವ್ನು ಅವಾಜ಼್‌ನಿತರಥು. 
\v 3 ಇವ್ಣೆ ಸಿಂಹಾಸನ್ನ ಖ್ಹಾಮ್ಣೆಬಿ ಯೊ ಚಾರ್ ಜೀವಿನ ಅಜು಼ ಶಾಣವ್ನ ಖ್ಹಾಮ್ಣೇಬಿ ನವು ಗೀದ್‌ ಬೋಲ್ಯು. ಆ ಧರ್ತಿಥು ಮೋಲ್ ಲೀರಾಖ್ಯುಥೂತೆ ಏಕ್‌ ಲಾಕ್ ಚಾರ್‌ಉಪ್ಪರ್ ಚಾ಼ಳಿಖ್ಹ್ ಹಜಾ಼ರ್ ಅದ್ಮಿನ ಪಣ್ಕಿ ಬಿಜು಼ ಕೋಣ್‌ಬಿ ಯೊ ಗೀದ್‌ನ ಶಿಕಾನ ಕೊಉಷೇನಿ. 
\v 4 ಇಮ್ಮಸ್ ತಯೇಡಾನಿ ಶವಾಶಿಥಿ ಮೈಲು ಹುಯುಕೊಂತೆ ಕವಾರಿನಿತರ ಥೂತೆ ಅವ್ಣೇಸ್. ಬಲೀನ ಮೇಂಢಾನು ಚೆಲ್ಕು ಹುಯಿರ‍್ಹಾವಳೊ ಕಿಜ್ಜಾ಼ ಗಯೊತೋಬಿ ಇವ್ಣೆ ಅನ ಪೀಠೆ ಜಾ಼ಸ್. ಅವ್ಣೆ ಅದ್ಮಿವ್‌ಮಾಥು ಶೊಂತ್ ಅದ್ಮಿಹುಯಿನ್ ಮೋಲ್ ಲೆವೈಜೈ಼ನ್ ದೇವ್‍ನಾಬಿ ಮೇಂಢೊ ಹುಯಿರ‍್ಹಾವಳನಬಿ ಪಹಿಲ ಫಲ್ನಿತರಹುಯ. 
\v 5 ಅವ್ಣ ಮ್ಹೋಡಾಮ ಝೂ಼ಟಿ ಕೋಸ್‌ಥೂನಿ. ಅವ್ಣೆ ನಿರ್ದೋಷ್ ಹುಯಿರ‍್ಹಾಸ್.
\s ತೀನ್ ದೇವ್ನ ದೂತರ್
\p
\v 6 ಬಿಜೇಕ್ ದೇವ್‌ನೊ ದೂತ ಆಬ್‌ನ ಇಚ಼್‌ಮ ಉಡುಕರಾನು ದೇಖ್ಯೊ. ಜ಼ಮೀನ್‌ಪರ್ ಜಿವ್‌ಕರಾತೆ ಹರೇಕ್ ಜ಼ಗ್‌ಜಾ಼ತ್‌, ಖೂಮ್‌, ಬೋಲಿ, ಅದ್ಮಿಖ್ಹಾರನ ಬೋಲಿವತಾಳಾನ ಖ್ಹಾಜೆ ಹರ್‌ಹಮೇಶಾನು ಅಛ್ಛಿ ಸಂದೇಶ್ ಇನಾಕನ ಥು. 
\v 7 ಯೊ ದೇವ್ನದೂತನೆ ಜೋ಼ರೇಥಿ, “ದೇವ್‍ಥಿ ಡರೊ ಇನ ಮಹಿಮೆಕರೊ. ಶನಕತೊ ಯೊ ಅದ್ಮಿಖ್ಹಾರನ ತೀರ್ಪ್ ದ್ಯವಾನಿ ವಖ್ಹತ್ ಐಗಿ. ಇನ ಆರಾದನೆ ಕರೊ ಸೊರ್ಗನಾಬಿ, ಜ಼ಮೀನ್ನಾಬಿ, ದರ‍್ಯಾವ್ನಾಬಿ, ಪಾಣಿನ ಚೇಜ಼್‌ಭಾರನಾಬಿ ಬಣಾವವಾಳನ ಆರಾದನೆ ಕರೊಕರಿ ಬೋಲ್ಯೊ. 
\v 8 ಇನ ಪೀಠೆ ಬೇನೊ ದೇವ್ನದೂತನೆ ಐನ್, “ರಡ್ಕಿಗೈ, ರಡ್ಕಿಗೈ, ಬಾಬೆಲ್‌ಕರಿ ಹುಯಿರಿತೆ ಮೋಟಿ ನಂಗ್ರಿ ರಡ್ಕಿಗೈ! ಹೈರಿತೆ ಹರೇಕ್ ಜ಼ಗ್‌ಜಾ಼ತ್‌ವಾಳಾನ ವ್ಯಬಿಚಾರ್‌ಕರಿ ಬೋಲಾನ ದ್ರಾಕ್ಷಿನ ರಖ್ಹ್‌ನ ಪಿಡೈದಿದಿ” ಕರಿ ಬೋಲ್ಯೊ. 
\v 9 ಇನ ಪೀಠೆ ತೀನ್ನೊ ದೇವ್ನದೂತನೆ ಅಯಿನ್, “ಕೋಣ್‌ತೋಬಿ ಖೆವತೋಬಿ ಜಾನ್ವರ್‌ನಾಬಿ ಇನು ಮೂರತ್‌ನಾಬಿ ಆರಾದನೆಕರಿನ್‌ ಇವ್ಣ ತಾಳ್ವಪರ್‌ರ‍್ಹವೊ ಹಾತ್‌ಪರ್‌ರ‍್ಹವೊ ಇನು ಖ್ಹಣೇದ್ನ ನಖೈರಾಖ್ಯೂತೊ, 
\v 10 ಯೋಬಿ ಜಿನುಕು ದೇವ್‌ನೊ ಇರಾದೊಕರಿ ಬೋಲಾನ ಕಟೋರಮ ಶಾತ್ಬಿ ಮಳಾಯುಕೊಂತೆ ನಾಖಿಹುಯು ದೇವ್ನು ಇರಾದೊಕರಿ ದ್ರಾಕ್ಷಿನ ರಖ್ಹ್‌ನ ಪೀಶೆ. ಪರಿಶುದ್ ದೇವ್ನ ದೂತರ‍್ನ ಖ್ಹಾಮ್ಣೇಬಿ, ಬಲೀನ ಮೇಂಢಾನ ಚೆಲ್ಕಾನ ಖ್ಹಾಮ್ಣೆ ಅಗ್‌ಥೀಬಿ, ರಂಜ಼ಕ್‌ಥಿ, ಖ್ಹತಾಪ್ಣಿ ಪಡ್‌ಶೆ. 
\v 11 ಎಥ್ರಾನವಾಳನೆ ಖ್ಹತಾಪ್ಣಿನೊ ಧುವೊ ಜ಼ಗ್‌ಜ಼ಮಾನಮಾಬಿ ಛ಼ಡುಕರ್ಷೆ, ಜಾನ್ವರ್‌ನ ಅಜು಼ ಇನ ಮೂರತ್ನ ಖ್ಹಲಾಮ್ ಕರವಾಳು ರ‍್ಹವೊ, ಇನ ನಾಮ್ನ ಖ್ಹಣೇದ್ನ ನಖೈರಾಖವಳೊ ರ‍್ಹವೊ ರಾತ್‌ಬಿ ದನ್ ಅರಾಮ್‌ಕೊಂತೆ ರ‍್ಹಿಶೆ ಕರಿ ಮೋಟಿ ಅವಾಜ಼್‌ಥಿ ಬೋಲ್ಯೊ. 
\v 12 ಅನಾಮ ದೇವ್ನಿ ಹುಕುಮ್‌ನಾಬಿ, ಯೇಸುನಿ ಬಾರೇನಿ ವಿಶ್ವಾಸ್‌ನ ಪಾಡಿನ್ ಚಾ಼ಲುಕರಾವಳ ದೇವ್ನ ಅದ್ಮಿಖ್ಹಾರನ ಖ್ಹಮಾಳಿರ‍್ಹವಾನು ಹಜ್ಜಾ಼ ವತಾಳ್ಣು ಪಡಾಸ್‌. 
\v 13 ಪರಲೋಕ್‌ಥು ಏಕ್‌ ಅವಾಜ಼್ ಮನ ಖ್ಹಮಜ್‍ಪಡ್ಯು. ಇನೆ ಹಂಕೇಥು ಪ್ರಭುನ ಭಕ್ತರ್‌ಹುಯಿನ್ ಮರಾವಳು ಧನ್ಯಕರಿ ಲೀಖ್‌ಕರಿ ಮನ ಬೋಲ್ಯು. ಇನ ಆತ್ಮನೆ, ಒಹೊ ಇವ್ಣೆ ಧನ್ಯರಸ್. ಇವ್ಣೆ ಇವ್ಣ ಮ್ಹಿನತ್‌ನ ಖತಮ್‌ಕರಿನ್ ಅರಾಮ್ ಕರ್ಶೆ ಅಜು಼ ಇವ್ಣು ಅಛ್ಛು಼ ಕಾಮ್‌ಖ್ಹಾರು ಇವ್ಣ ಜೋ಼ಡ್ಮ ಚಾ಼ಲ್‌ಷೆ ಕರಿ ಬೋಲ್ಯೊ.
\s ಜ಼ಮೀನ್ನು ಖ್ಹುಗ್ಗೀನ ದನ್ನಿ ಬಾರೇಮ
\p
\v 14 ತದೆ ಮೇ ದೇಖಾದಿನ್ ಮಾರಖ್ಹಾಮ್ಣೆ ಅದ್ಮಿನೊ ಛಿಯ್ಯಾನಿತರ ದೆಖವ್‍ಕರಾತೆ ಏಕ್ಜ಼ಣೊ ಧೋಳ ವಾದ್‍ಳಾನ ಉಪ್ಪರ್ ಬೆಠೋಥೊ. ಇನ ಮುಡ್‌ಕ್ಯಪರ್ ಖ್ಹೊನ್ನಾನಿ ಕಿರೀಟ್‌ಥಿ. ಅಜು಼ ಇನ ಹಾತ್ಮ ಚಾ಼ಲ್ತಿ ದರಾತಿಥಿ. 
\v 15 ತದೆ ಬಿಜೇಕ್ ದೂತನೆ ಮಂದಿರ್‌ಮಾಥು ಭಾರ್‌ ಆಯಿನ್ ವಾದ್ಳಪರ್ ಬೆಠೂತೆ ಇನ, “ಜ಼ಮೀನ್‌ಮಾನು ಅನಾಜ಼್ ಪಕೈಗಯು, ವಢಾವ್ಣಿನ ದನ್ ಅಯಿಗ. ತಾರಿ ದರಾತಿನ ಪಾಡಿನ್ ಅನಾಜ಼್‌ನ ವ್ಹಾಡ್‌” ಕರಿ ಜೋ಼ರೇಖ್ಹು ಬೋಲ್ಯೊ. 
\v 16 ಇಮ್ಮಸ್ ವಾದ್ಳಪರ್ ಬೆಠೋಥೋತೆ ಯೊ ಇನಿ ಚಾ಼ಲ್ತಿ ದರಾತಿನ ಜ಼ಮೀನ್‌ಪರ್ ನಾಖ್ಯೊ. ತದೆ ಜ಼ಮೀನ್‌ಪರ್‌ನು ಅನಾಜ಼್ ವ್ಹಡೈಗು. 
\v 17 ಇನಪಾರ್ ಬಿಜೇಕ್ ದೇವ್‌ನೊ ದೂತ ಪರ್‌ಲೋಕ್‌ನು ಮಂದಿರ್‌ಮಾಥೊ ಭಾರ್‌ಆಯೊ. ಇನಕನಾಬಿ ಏಕ್‌ ಚಾ಼ಲ್ತಿ ದರಾತಿ ಥಿ. 
\v 18 ಅನವಾರ್ ಬಿಜೇಕ್ ದೇವ್‌ನೊ ದೂತ ಚಾ಼ಚ಼ರ್‌ಕನಥೊ ಆಯೊ. ಇನ ಆಗ್ನ ಉಪ್ಪರ್ ಅದಿಕಾರ್ ಥು. ಯೊ ಚಾ಼ಲ್ತಿ ದರಾತಿವಾಳನ, “ತಾರಿ ಚಾ಼ಲ್ತಿ ದರಾತಿನ ಪಾಡಿಲೀನ್, ಜ಼ಮೀನ್‌ಪರ್‌ನು ಬಾಗ್‌ನು ದ್ರಾಕ್ಷಿನ ಗುಚ್ಚಾ಼ವ್ನ ವ್ಹಾಡ್‌. ಇನು ಪಂಡುಖ್ಹಾರು ಅಖ್ಖೂಸ್ ಪಕೈಗಯು ಕರಿ ಊಚ಼ ಅವಾಜ಼್‌ಥಿ ಚಿಕ್‌ರ‍್ಯೊ. 
\v 19 ತದೆ ಯೋ ದೇವ್‌ನೊ ದೂತನೆ ಇನಿ ದರಾತಿ ಥಿ. ಜ಼ಮೀನ್‌ಪರ್‌ಲ್ಯು ದ್ರಾಕ್ಷಿನ ವೇಲಮಾನು ದ್ರಾಕ್ಷಿನ ಪಂಡಾನ ವ್ಹಾಡಿಎಕ್ಟುಕರಿನ್, ದೇವ್‌ನೊ ಇರಾದೊಕರಿ ಬೋಲಾನು ಮೋಟಿ ಬಾನೇಮ ಫೇಕ್ಯೊ. 
\v 20 ತದೆ ಯೊ ದ್ರಾಕ್ಷಿನ, ಬಾನೇನ ಖ್ಹಯೇರ‍್ನ ಭಾರ್‌ ಲೀಜೈ಼ನ್ ಖುಂದ್‌ಲ್ಯು. ಯೊ ಬಾನೆಮಾಥು ಲ್ಹೋಯಿ ನಿಕ್ಳಿನ್ ಘೋಡಾವ್‌ನು ಲಗಾಮೇನ ಛಿಮಾವಯೆತ್ರೆ ಊಚು಼ ಛ಼ಡಿನ್ ಬೇಖ್ಹೊ ಮೈಲ್ಎತ್ರೆ ದೂರ್ ಪಾಚ಼್ ಅಡಿ ಗಧಾರ್ ವ್ಹಯು.
\c 15
\s ಖ್ಹರ್ತಿನಿ ಖ್ಹತಾಪ್ಣಿನ ಜೋ಼ಡ್ಮ ದೇವ್ನದೂತರ್
\p
\v 1 ಪರ್‌ಲೋಕ್‌ಮ ಮೇ ಘಣು ಆಶ್ಚರ್ಯ ಹುಯಿರ‍್ಹಾವನು ಬಿಜೇಕ್ ಅದ್ಭುತ್‌ನ ದೇಖ್ಯೊ. ತದೆ ಖ್ಹಾತ್‌ಜ಼ಣ ದೇವ್‌ದೂತರ್‌ನ ಹಾತ್ಮ ಖ್ಹಾತ್ ಖ್ಹತಾಪ್ಣಿ ಥು, ಆ ಖ್ಹರ್ತಿನಿ ಖ್ಹತಾಪ್ಣಿಖ್ಹಾರಿ. ಆ ಅಖ್ಖಾನ ಜೋ಼ಡೆ ದೇವ್‌ನೊ ಇರಾದೊ ಪೂರ ಉಷೆ. 
\v 2 ಮೇ ದೇಖಾನಿವಖ್ಹ್‌ತೆ ಆಗ್ ಮಳಿರ‍್ಹೂತೆ ಶಿಖ್ಹಾನ ದರ‍್ಯಾವ್‍ನಿ ಘೋಣಿ ಶಾತ್ಕಿ ಏಕ್‌ ಮನ ದೆಖಾಯು. ತದೆ ಜಾನ್ವರ್‌ಬಿ ಅಜು಼ ಇನ ಮೂರತ್ನ ಖ್ಹಲಾಮ್ ನಾಕರ‍್ನುತೇಬಿ ಇನ ನಾಮ್ನ ಖ್ಹಣೇದ್‍ನು ಲೀಖ್ಯಾನು ಮುದ್ರೊ ನಾನಖಾವ್ಣುತೇಬಿ ಜೈಕಾರ್ ಲೀರಾಖವಾಳು, ದೇವ್‍ಥಿ ದೆವಾಯುತೆ ಖ್ಹಾರಂಗಾವ್ನ ಇವ್ಣ ಹಾತ್ಮ ಧರಿಲೀನ್ ಶಿಖ್ಹಾನ ದರ‍್ಯಾವ್‌ಕನ ಭಿಯಾಥ. 
\v 3 ಇವ್ಣೆ ದೇವ್‌ನೊ ಸೇವಕ್ ಹುಯಿರೋತೆ ಮೋಶೆನ ಗೀದ್‌ನ ಮೇಂಢಾನು ಚೆಲ್ಕಾನು ಗೀದ್‌ನ ಬೋಲ್ತೊಹುಯಿನ್, ಪ್ರಭು ಹುಯಿರೋತೆ ದೇವ್ ತೂ ಸರ್ವಶಕತ್‌ನೊ, ತಾರು ಕಾಮ್‌ಖ್ಹಾರು ಮಹಿಮೆನಾಬಿ, ಆಶ್ಚರ್ಯನೂಬಿ ಹುಯಿರುಸ್.ಅಖ್ಖೀಸ್ ಜ಼ಗ್‌ಜಾ಼ತ್‌ನೊ ರಾಜ಼. ತಾರೊ ಮಾರಗ್‌ಖ್ಹಾರು ನ್ಯಾವ್ನುಬಿ ಖ್ಹಾಚೂ಼ಬಿ ಹುಯಿರುಸ್ ಕರಿ ಮಾಲುಮ್ ಕರಾವಸ್. 
\v 4 ಪ್ರಭು, ತುನ ಡರಾಕೊಂತೆ ಅಜು಼ ಅದ್ಮಿಖ್ಹಾರು ತಾರ ನಾಮ್ನ ಮಹಿಮೆ ಕರಾಕೊಂತೆ ಕೋಣ್‌ತೋಬಿ ಛಾ಼ಕಿಶು? ತೂ ಎಕ್ಕಸ್ ಜ಼ಣೊ ಪರಿಶುದ್. ತಾರು ನೀತಿನು ನ್ಯಾವ್‌ನು ತೀರ್ಪ್ ಉಜಾ಼ಳಮ ಆಯೂತೆ ಖ್ಹಾಜೆ ಹರೇಕ್ ಜ಼ಗ್‌ಜಾ಼ತ್‌ಖ್ಹಾರು ತಾರ ಖ್ಹಾಮ್ಣೆ ಅಯಿನ್ ತುನ ಆರಾದನೆ ಕರ್ಶೆ. 
\v 5 ಆಹುವಾದೀನ್ ಮೆ ದೇಖಖ್ಹತರ್ ಪರಲೋಕ್‌ಮಾಥು ದೇವ್ನ ದರ್ಶನ್ನು ಡೇರಾನು ಪವಿತ್ರಝ಼ಗೊ ನಿಕ್ಳಿರ‍್ಹೂಥು. 
\v 6 ಯೋ ಮಂದಿರ್‌ಮಾಥು ಖ್ಹಾತ್ ಖ್ಹತಾಪ್ಣಿನ ಧರಿರಾಖವಾಳ ಯೊ ಖ್ಹಾತ್‌ಜ಼ಣ ದೇವ್‌ದೂತರ್‌ ಆಯು. ಇವ್ಣೆ ಶುದ್ದಥೀಬಿ, ಉಜಾ಼ಖ್ಹ್‌ನುಬಿ, ಕೋರುಲುಂಗ್ಡಾನ ಫೇರಿರಾಖ್ಯುಥು. ಅಜು಼ ಇವ್ಣ ಛಾ಼ತಿಪರ್ ಖ್ಹೊನ್ನಾನ ಪಟಾನ ಭಾಂದಿರಾಖ್ಯುಥು. 
\v 7 ಯೊ ಚಾರ್ ಜೀವಿಮ ಏಕ್‌ನೆ ಯೊ ಖ್ಹಾತ್‌ಜ಼ಣ ದೇವ್‌ದೂತವ್ನ ಖ್ಹಾತ್ ಖ್ಹೊನ್ನಾನ ಕಟೋರಾವ್ನ ದಿದು. ಯೊ ಕಟೋರಮ ಜ಼ಗ್‌ಜ಼ಮಾನಥೂಬಿ ಜಿವ್ತೊರ‍್ಹವಾಳೊ ದೇವ್ನು ಚ಼ಂಢಾಳ್ ಭರೈರ‍್ಹೂಥು. 
\v 8 ದೇವ್ನ ಮಹಿಮೆಥೀಬಿ, ಇನಿ ಶಕಥ್ಥಿಬಿ ಹುಯೂತೆ ಧುವ್ವಾಥಿ ಯೊ ಮಂದಿರ್‌ ಭರೈರ‍್ಹೂಥು. ಯೊ ಖ್ಹಾತ್‌ಜ಼ಣ ದೇವ್‌ದೂತರ‍್ನ ಹಾತ್ಮಥೂತೆ ಖ್ಹತಾಪ್ಣಿಖ್ಹಾರು ಖತಮ್ ಹುವಾಲಗೂಬಿ ಯೊ ಮಂದಿರ‍್ನ ಮಹಿ ಜಾ಼ವನ ಕಿನೇಥೀಬಿ ಕೊಹುಯುನಿ.
\c 16
\s ದೇವ್ನ ಇರಾದನೊ ಕಟೋರೊ
\p
\v 1 ತದೆ ಮಂದಿರ್‌ಮಾಥು ಆಯೂತೆ ಮೋಟ ಅವಾಜ಼್‌ನ ಖ್ಹಮ್‌ಜ್ಯೊ. ಯೊ ಅವಾಜ಼್‌ನೆ ಯೊ ಖ್ಹಾತ್‌ಜ಼ಣ ದೇವ್‌ದೂತರ‍್ನ ತುಮೆ ಜೈ಼ನ್ ಯೊ ಕಟೋರಮಾಬಿ ದೇವ್ನ ಇರಾದನ ಧರ್ತಿಪರ್ ರಂಚೋ಼ಕರಿ ಬೋಲ್ಯು. 
\v 2 ತದೆ ಫೈಲೊ ದೇವ್‌ದೂತನೆ ಜೈ಼ನ್ ಯೊ ಇನ ಕಟೋರಮಥೂತೆ ಇನ ಜ಼ಮೀನ್‌ಪರ್ ರಂಚಾ಼ಖ್ಹತರ್ ಜಾನ್ವರ್‌ನ ಖ್ಹಣೇದ್ನ ನಖೈರಾಖವಳು, ಇನ ಮೂರತ್ನ ಖ್ಹಲಾಮ್‌ಕರಾಸ್ತೆ ಅಖ್ಖಾಸ್ನ ಉಪ್ಪರ್ ಗಲೀಜ಼್‌ಥಿ ರ‍್ಹವಾನು ಘಣು ದರದ್ನ ಫೋಡ ಉಠ್ಯ. 
\v 3 ಬೇನೊ ದೇವ್ನದೂತನೆ ಇನ ಕಟೋರಮ ಥೂತೆ ಇನ ದರ‍್ಯಾವ್‌ಪರ್ ರಂಚ್ಯೊ. ತದೆ ದರ‍್ಯಾವ್ನು ಪಾಣಿ ಮರ‍್ಯಹುಯಾನ ಲ್ಹೋಯಿನಿತರ ಹುಯಿಗು. ಅಜು಼ ದರ‍್ಯಾವ್‌ಮಾನು ಹರೇಕ್ ಜಿವ್ತು ಜೀವಿಬಿ ಮರಿಗು. 
\v 4 ತೀನ್ನ ದೇವ್ನದೂತಾನೆ ಇನ ಕಟೋರಮ ಥೂತೆ ಇನ ನದ್ದೀವ್‌ಪರ್‌ಬಿ ಪಾಣಿನ ಚೆಜ಼್‌ಭಾರ ಪರ್ಬಿ ರಂಚ್ಯೊ. ತದೆ ಯೊ ಅಖ್ಖು ಪಾಣಿ ಲ್ಹೋಯಿ ಹುಯಿಗು. 
\v 5 ಇನಪಾರ್ ಪಾಣಿನ ಅಧಿಕಾರ‍್ನ ದೂತನೆ ಅಮ್ ಬೋಲ್ಯೋಕಿ, “ತೂಸ್ ಕೆದೇಬಿ ರ‍್ಹವವಾಳೊಬಿ, ಥೋತೆ ಪರಿಶುದ್ ದೇವ್. ಶನಕತೊ ತೂ ದೆವ್‌ಕರಾಸ್ತೆ ತೀರ್ಪ್ ಅಖ್ಖು ನ್ಯಾವ್‌ನು ಹುಯಿರ‍್ಹುಸ್. 
\v 6 ಯೊ ಅದ್ಮಿಖ್ಹಾರು ದೇವ್ನು ಅದ್ಮಿವ್‌ನು ಅಜು಼ ಪ್ರವಾದಿ ಖ್ಹಾರಾನು ಲ್ಹೋಯಿನ ರಂಚ್ಯೂತೆಖ್ಹಾಜೆ ತುನೆ ಇವ್ಣುನ ಯೋ ಲ್ಹೋಯಿನ ಪಿಯಾನ ದಿದೊ. ಇವ್ಣುನ ಯೋಸ್ ಬರೊಬರ‍್ನು ಕಿಮ್ಮತ್ ಕರಿ ಬೋಲಾನು ಮೆ ಖ್ಹಮ್‌ಜ್ಯೊ. 
\v 7 ಅನಪಾರ್‌ ಚಾ಼ಚ಼ರ್‌ಥಿ ಆವಾತ್ ಖ್ಹಮಜ್‍ಪಡ್ಯು, ‘ದೇವ್ ಹುಯಿರ‍್ಹೋತೆ ಪ್ರಭು ತು ಸರ್ವಶಕತ್‌ನೊ, ತಾರು ನ್ಯಾವ್‌ನು ತೀರ್ಪ್ ಅಖ್ಖು ಖ್ಹಾಚೂ಼ಬಿ ನ್ಯಾವ್‍ನೂಬಿ ಹುಯಿರ‍್ಹುಸ್’ ಕರಿ ಬೋಲ್ಯು. 
\v 8 ಅನಕೇಡೆಥು ಚಾರ‍್ನ ದೇವ್ನದೂತನೆ ಇನ ಕಟೋರಮಥೂತೆ ಇನ ಚಾ಼ಂದ್‌ಪರ್ ರಂಚ್ಯೊ. ತದೆ ಚಾ಼ಂದ್‍ನ, ಆಗ್‍ನಿತರನು ತಡ್ಕೇಥಿ ಅದ್ಮಿನ ಭುಂಜಾ಼ನು ಹುಕುಮ್ ದೆವಾಯು. 
\v 9 ಅದ್ಮಿಖ್ಹಾರು ಜಾ಼ಖ್ಹತ್ ತಡ್ಕೇಥಿ ಬಳ್ಯುತೋಬಿ ಇವ್ಣೆ ಯೊ‍ ಖ್ಹತಾಪ್ಣಿ ಅಖ್ಖಾಪರ್ ಅದಿಕಾರ್ ಲೀರಾಖ್ಯೋಥೋತೆ ದೇವ್ನ ನಾಮ್ನ ಗಾಳೆದಿದು ಕಾಹೆತೆ, ಇವ್ಣೆ ಪಶ್ಚತ್ತಾಪ್ ಕರೀನ್ ದೇವ್‌ಭಣಿ ಫರ‍್ಯುಕೊಯ್ನಿ ಇನ ಮಹಿಮೆ ಕೋಕರ‍್ಯುನಿ. 
\v 10 ಪಾಚ಼್ನೊ ದೇವ್ನ ದೂತಾನೆ ಇನ ಕಟೋರಮ ಥೂತೆಯಿನ ಜಾನ್ವರ್‌ನಿ ಸಿಂಹಾಸನ್‌ಪರ್ ರಂಚಾ಼ಖ್ಹತರ್ ಇನು ರಾಜ್ಯ ಅಖ್ಖು ಅಂಧಾರುಹುಯು. ಅದ್ಮಿಖ್ಹಾರು ಅಜಾ಼ಥಿ ದಾತ್ಮ ಜೀಬ್ ಧರಿಲೀನ್, 
\v 11 ಇವ್ಣ ಅಜಾ಼ನ ಖ್ಹಾಜೇಬಿ ಫೋಡಾನ ಖ್ಹಾಜೇಥಿಬಿ ಸೊರ್ಗಾನ ದೇವ್ನ ಗಾಳೆದ್ಯವಾನು ಕಾಹೆತೆ ಇವ್ಣೆ ಇವ್ಣು ಕರ‍್ಯುತೆ ಖರಾಬ್ ಕಾಮ್‍ಥಿ ದೇವ್‌ಭಣಿ ಫರ‍್ಯುಕೊಯ್ನಿ. 
\v 12 ಛೋ಼ನ ದೇವ್ನದೂತಾನೆ ಇನ ಕಟೋರಮ ಥೂತೆಯಿನ ಯೂಫ್ರಟಿಸ್ ಕರಿ ಮೋಟಿ ನದ್ದೀಮ ರಂಚಾ಼ಖ್ಹತರ್ ಯೋ ಪಾಣಿ ಖ್ಹರೀನ್ ಪೂರಬ್ನು ಬಾಜು಼ಥು ಆವಾಳ ರಾಜಾ಼ವ್‌ನ ಮಾರಗ್ ತೈಯಾರ್‌ಹುಯು. 
\v 13 ತದೆ ಅರ್ಝ಼ನ ಮ್ಹೋಡಾಮಾಥುಬಿ ಜಾನ್ವರ್‌ನ ಮ್ಹೋಡಾಮಾಥು ಅಜು಼ ಝೂ಼ಟುಪ್ರವಾದಿನ ಮ್ಹೋಡಾಮಾಥು ಮೇಂಡುಕ್‌ನಿತರನು ತೀನ್ ಗಲೀಜ಼್ ಆತ್ಮಖ್ಹಾರು ಆವನು ದೇಖ್ಯೊ. 
\v 14 ಆ ಖ್ಹಣೇದ್‌ನುಕಾಮ್‌ ಕರವಾಳು ಭೂತ್‌ನು ಆತ್ಮ ಹುಯಿರ‍್ಹಿನ್ ಧರ್ತಿಪರ್‌ಲ್ಯ ಅಖ್ಖಾಸ್ ರಾಜ಼ವ್‌ಕನ ಜೈ಼ನ್ ಸರ್ವಶಕತ್‌ನೊ ದೇವ್ನ ಮಹಿಮೆನ ದನ್ನ ಜಂಗ್‌ನಖ್ಹಾಜೆ ಇವ್ಣುನ ಎಕ್ಟು ಕರುಕರ್ತುಥು. 
\v 15 “ಹಂದೇಕ್ ಚೋ಼ರ್ ಆವಾನಿಘೋಣಿ ವಳ್ಯಾವುಸ್. ಇನುಯೋ ಉಘಾಡೊ ಹುಯಿನ್ ಅದ್ಮಿಥಿ ಖ್ಹರಮ್‌ ನಾಕಡೈಲೇವ್ಣುತೆ ಹೊಷಾರ್‌ಥಿ ರ‍್ಹೀನ್ ಇನ ಲುಂಗ್ಡಾನ ಜ಼ತನ್‌ಥಿ ಬಚಾ಼ಡೈಲ್ಯವಾಳೊ ಧನ್ಯ ಹುಯಿರೋಸ್.” 
\v 16 ತದೆ ಯೊ ಜ಼ಮೀನ್ನ ರಾಜಾ಼ವ್‌ನ ಇಬ್ರಿಯ ಬೋಲಿಮ ಅರ್ಮಗೆದ್ದೋನ್ ಕರಿ ಬೋಲಾನ ಝ಼ಗೋಕನ ಮಳಾಯು. 
\v 17 ಖ್ಹಾತ್ನ ದೇವ್ನದೂತನೆ ಇನ ಕಟೋರಮ ಥೂತೆಯಿನ ವಹಿರಾನ ಗೋಳಪರ್ ನಾಖ್ಯೊ. ತದೆ ಮಂದಿರ್‌ನು ಸಿಂಹಾಸನ್‌ಥು ಮೋಟು ಅವಾಜ಼್ ಹುಯಿನ್, “ಖತಮ್ ಹುಯಿಗು” ಕರಿ ಬೋಲ್ಯು. 
\v 18 ತದೆ ವಿಜ಼್‌ಳಿಬಿ, ಘಲಾರನೂಬಿ ಹುಯು ಅತ್ರೇಸ್ ಕಾಹೆತೆ ಮೋಟು ಭೂಕಂಪ್ ಹುಯು. ಅದ್ಮಿಖ್ಹಾರು ಜ಼ಮೀನ್‌ಪರ್ ಥೂತೆ ತಪ್‌ಥೂಬಿ ಇಮ್ನು ಮೋಟು ಭೂಕಂಪ್ ಕೊಹುಯಿರ‍್ಹುಥೂನಿ. 
\v 19 ಮೋಟು ನಂಗರ್ ತೀನ್ ಭಾಗ್‌ ಹುಯಿನ್ ಚೀರೈಗು ಅಜು಼ ಜ಼ಗ್‌ಜಾ಼ತ್‌ನು ನಂಗ್ರಿಖ್ಹಾರು ಪಡೀಗು. ತದೆ ದೇವ್ನೆ ಬಾಬೆಲ್‌ನ ಖ್ಹಯಾಲ್ ಕರೀನ್ ಇನು ಘಣು ಇರಾದೊ ಕರಿ ಬೋಲಾನು ದ್ರಾಕ್ಷಿನ ರಖ್ಹ್‌ಥಿ ಭರಾಯುಹುಯು ಕಟೋರಾನ ಯೊ ನಂಗರ‍್ನ ದಿದೊ. 
\v 20 ತದೆ ಹರೇಕ್ ಟಾಪು ನಾಖ್ಹಿಜೈ಼ನ್ ಛ಼ಪಿಗು ಪಹಾಡ್‌ಖ್ಹಾರು ಡೋಳೇಥಿ ಲಪಿಗಯು. 
\v 21 ಅಜು಼ ಆಬ್‍ಥು ಗಾರಾನೊ ಬಂಡಾನೊ ಪಾಣಿ ರಂಚಾ಼ಯೊ. ಏಕೇಕ್‌ ಗಾರಾನೊ ಬಂಡೊ ಅಡೈವಿಖ್ಹ್‌ ಕಿಲೊಯೆತ್ರೆ ವಜ಼ನ್ ಥು. ಯೊ ಗಾರಾನ ಬಂಡಾನ ವರ್ಖ್ಹಾತ್ನಿ ಖ್ಹತಾಪ್ಣಿ ಜಾ಼ಖ್ಹತ್ ಹುಯೂತೆಖ್ಹಾಜೆ ಯೊ ವರ್ಖ್ಹಾತ್‌ಮ ಖ್ಹಪ್‌ಡ್ಯೂತೆ ಅದ್ಮಿಖ್ಹಾರು ದೇವ್ನ ಗಾಳೆದಿದು.
\c 17
\s ವ್ಯಬಿಚಾರ್ ಕರಾವಾಳಿ ತಯೇಡ
\p
\v 1 ಖ್ಹಾತ್ ಕಟೋರಾವ್ನ ಧರಿರಾಖ್ಯುಥೂತೆ ಖ್ಹಾತ್‌ಜ಼ಣ ದೇವ್‌ದೂತರ್‌ಮ ಏಕ್ಜ಼ಣೊ ಐನ್ ಮನ ಬೋಲ್ಯೊ, “ಹಜ್ಜಾ಼ ಆವ್, ಘಣ ಪಾಣಿಪರ್‌ ಬೆಠೀತೆ ಮೋಟಿ ವ್ಯಭಿಚಾರಿಣಿನ ಹುವಾನು ನ್ಯಾವ್‌ನ ತೀರ್ಪ್‌ನ ತುನ ವತಾಳುಸ್‌. 
\v 2 ಪಾಪೇಲು ಸಂಬಂದ್ ಕತೊ ಧರ್ತಿನ ರಾಜ಼ವ್‌ಬಿ ಇನಿ ಜೋ಼ಡ್ಮ ವ್ಯಬಿಚಾರ್ ಕರ‍್ಯು ಅಜು಼ ಜಗತ್‌ನು ಅದ್ಮಿಖ್ಹಾರು ಇನ ವ್ಯಬಿಚಾರ್‌ಕರಿ ದ್ರಾಕ್ಷಿನೊರಖ್ಹ್‌ನ ಪೀನ್ ಮೈಕಮ್‌ ಹುಯಿಗು” ಕರಿ ಬೋಲ್ಯೊ. 
\v 3 ತದೆ ಇನೆ ದೇವ್ನಿ ಆತ್ಮಾಥಿ ಭರೈರ‍್ಹೊಥೋತೆ ಮನ ಪಾಡಿಲೀನ್ ಜ಼ಂಗಳ್‌ಮ ಗಯೊ. ಹಿಜ್ಜಾ಼ ಮೆ ಲಲೇಲಾಲ್ ರಂಗ್‌ನ ಜಾನ್ವರ್‌ಪರ್ ಬೆಠಿಥೀತೆ ಏಕ್‌ ತಯೇಡಾನ ದೇಖ್ಯೊ. ಯೋ ಜಾನ್ವರ್‌ನು ಆಂಗ್‌ತನ್‌ ಅಖ್ಖು ಗಾಳೆ ದ್ಯವಾನು ನಾಮ್‌ಅಖ್ಖು ಭರೈರ‍್ಹೂಥು. ಇನ ಖ್ಹಾತ್ ಮುಡ್‌ಕ್ಯಾಬಿ ದಖ್ಹ್‌ ಶಿಂಗ್ಡಾಬಿ ಥು. 
\v 4 ಯೊ ತಯೇಡ ರಾಯ್‌ಜಾ಼ಮಣ್ಣ ರಂಗ್‌ನ ಪೇರ್ವಾಖ್ಹ್‌ನಾಬಿ ಲಾಲ್‌ಲುಂಗ್ಡಾನ ಫೇರಿರಾಖಿಥಿ; ಖ್ಹೊನ್ನುಖ್ಹರಪ್, ಹಿರಾವ್‌ಥಿ, ಶನ್‌ಗಾರ್ ಹುಯಿರ‍್ಹಿಥಿ. ಅಜು಼ ಯೊ ಇನು ವ್ಯಬಿಚಾರ‍್ನು ಕಚಿಂಡ್‌ಥೀಬಿ ಭರೈರ‍್ಹಾವನು ಖ್ಹೊನ್ನಾನು ಕಟೋರೊ ಧರಿರಾಖಿಥಿ. 
\v 5 ಇನ ತಾಳ್ವಪರ್, “ಬಾಬೆಲ್‌ಕರಿ ಜ಼ಮೀನ್‌ಪರ್ ಛಾ಼ತೆ ವ್ಯಬಿಚಾರಿಣಿವ್ನಿ ಗಲೀಜ಼್ ಕಾಮ್‌ಕರಾವಾಳಿ ಆಯ” ಕರಿ ನಾಮ್ ಲೀಖೈರ‍್ಹೂಥು. 
\v 6 ಯೋ ತಯೇಡ ನೀತಿವಾಳನ ಲ್ಹೋಯಿನ ಅಜು಼ ಯೇಸುನ ಖ್ಹಾಜೆ ಸಾಕ್ಷಿದೀನ್ ಮರ‍್ಯಹುಯಾನ ಲ್ಹೋಯಿನ ಪೀನ್ ಕಯೇಪ್ ಹುಯಿರ‍್ಹವಾಳಿನ ದೇಖ್ಯೊ. ಮೇ ಇನ ದೇಖಿನ್ ಘಣು ಆಶ್ಚರ್ಯ ಹುಯೊ. 
\v 7 ಕತೋಬಿ ಯೋ ದೇವ್‌ದೂತನೆ ಮಾರಿ ಬಾರೇಮ ಬೋಲ್ಯೊ ಶಾತ್‌ಕತೊ ತು ಶನ ಆಶ್ಚರ್ಯ ಕರುಕರಸ್? ಯೋ ತಯೇಡಾನಿ ಬಾರೇಮಾಬಿ, ಇನು ಸವಾರಿ ಕರಾನು ಜಾನ್ವರ್‌ನಿ ಬಾರೇಮಾಬಿ, ಖ್ಹಾತ್ ಮುಡ್‌ಕ್ಯಾ ದಖ್ಹ್‌ ಶಿಂಗ್ಡ ರ‍್ಹವಾನು ಜಾನ್ವರ್‌ನ ಛಾ಼ತೆ ಗಪ್ಲತ್‌ನಿ ವಾತೇನ ಬೋಲಿ ವತಾಳುಸ್‌. 
\v 8 ಯೋ ಜಾನ್ವರ್‌ ಪಹಿಲಿ ಹಲ್ಲ ಜಿವ್ತುಥು. ಕತೋಬಿ ಹಮ್ಕೆ ಘಣು ವಖ್ಹತ್ ಜಿವ್ತು ಕೊರ‍್ಹಿಶೇನಿ, ಯೊ ಪಾತಾಳ್ನಿ ಗಧಾರ್‌ಮಾಥು ಛ಼ಡಿ ಅಯಿನ್ ನಾಶ್‌ಭಣಿ ಒಳ್ಯುಜಾ಼ಸ್. ಅಜು಼ ಆ ಜಗತ್‌ ಉಬ್‌ಜ್ಯುತೆ ತಪ್‌ಥೂಬಿ ಕಿನು ನಾಮ್ ಜಾನ್ನ ಹಕ್‌ವಾಳಾನಿ ಪುಸ್ತಕ್‌ಮ ಲೀಖೈರ‍್ಹುಕೊಯ್ನೀಕಿ, ಇವ್ಣೆ ಯೊ ಜಾನ್ವರ್‌ನ ದೇಖಿನ್ ಆ ಪಹಿಲೆ ಥು, ಹಮ್ಕೆ ಕೊಯ್ನಿ, ಕತೋಬಿ ಅಜು಼ ಖ್ಹಾಮ್ಣೆ ಆವಳು ಛಾ಼ಕ್ರಿ ಆಶ್ಚರ್ಯಕರ‍್ಯು. ಅಜು಼ ಎಕ್ಕಸ್ ಹಲ್ಲ ಜಿವ್ತು ಉಷೆ. ಹಮ್ಕೆ ಯೋ ಜಾ಼ಖ್ಹತ್ ವಖ್ಹತ್ ಜಿವ್ತು ಕೊರ‍್ಹಿಶೇನಿ, ಕತೋಬಿ ಬಿಜೂ಼ಬಿ ಖ್ಹಾಮ್ಣೆ ವಳ್ಯುಆವಸ್. 
\v 9 ಅನ ಮಾಲುಮ್‌ ಕರಿಲ್ಯಾವಾನ ಗ್ಯಾನ್‌ಬಿ, ಅಕ್ಕಲ್‌ಬಿ ಹೋಣು. ಯೋ ಖ್ಹಾತ್ ಮುಡ್‌ಕ್ಯಾ ಯೊ ತಯೇಡ ಬೆಠೀತೆ ಖ್ಹಾತ್ ಪಹಾಡ್ ಹುಯಿರ‍್ಹೂಸ್. ಯೊ ಖ್ಹಾತ್ ರಾಜ಼ಖ್ಹಾರು ಹುಯಿರ‍್ಹಾಸ್. 
\v 10 ಅತ್ರೇಸ್ ಕಾಹೆತೆ ಇವ್ಣಾಮ ಪಾಚ಼್ ರಾಜ಼ ಪಡಿಗಯ. ಏಕ್‌ ರಾಜ಼ ಹಮ್ಕೆ ಚ಼ಲವ್‍ಕರಸ್. ಅಜೇಕ್‌ಜ಼ಣೊ ಬಿಜೂ಼ಬಿ ಆಯೊಕೊಯ್ನಿ. ಯೊ ಆಯೋತೊ ಥೋಡ ಹಗಾಮ್ ಖಲಿ ರಾಜ಼್ ಚ಼ಲಾವ್‌ಷೆ. 
\v 11 ಆನಾಹುಯಿನ್ ಪಹಿಲೆ ರ‍್ಹೀನ್ ಹಮ್ಕೆ ಕೊಂತೆ ಯೊ ಜಾನ್ವರ್‌ ಯೋಸ್ ಆಟ್ನೊ ರಾಜ಼. ಕತೋಬಿ ಯೊ ಹುಯಿರ‍್ಹೋತೆ ಯೋ ಖ್ಹಾತ್ ರಾಜಾ಼ವ್ಮ ಏಕ್ಜ಼ಣೊ ಹುಯಿರ‍್ಹೋಸ್, ಯೊ ನಾಶ್‌ಭಣಿ ಜಾ಼ಶೆ. 
\v 12 ತುಮೆ ದೇಖ್ಯಾತೆ ಯೋ ದಖ್ಹ್‌ ಶಿಂಗ್ಡಾಖ್ಹಾರು ಬಿಜೂ಼ಬಿ ರಾಜ಼್ ಲೀರಾಖ್ಯುಕೊಂತೆ ದಖ್ಹ್‌ ರಾಜ಼ವ್‌ಖ್ಹಾರು ಹುಯಿರಾಸ್. ಕತೋಬಿ ಯೋ ಖ್ಹಾರು ಜಾನ್ವರ್‌ನಿ ಜೋ಼ಡ್ಮ ಏಕ್‌ ಘಂಟಾಲಗು ರಾಜ್ಯ ಚ಼ಲಾವನ ಇವ್ಣೆ ಅದಿಕಾರ್ ಲಿಶೆ. 
\v 13 ಇವ್ಣೆ ಎಕ್ಕಸ್ ದಿಲ್‌ವಾಳ ಹುಯಿನ್ ಇವ್ಣಿ ತಾಖತ್ನಾಬಿ ಅದಿಕಾರ್‌ನ ಜಾನ್ವರ್‌ನ ದಿಶೆ. 
\v 14 ಇವ್ಣೆ ಮೇಂಢಾನು ಚೆಲ್ಕುಹುಯಿರ‍್ಹವಾಳನ ವಿರೋದ್‌ಥಿ ಜಂಗ್ ಭೀಡ್‌ಷೆ. ಕತೋಬಿ ಯೋ ಪ್ರಭುನೊ ಪ್ರಭು ರಾಜಾ಼ನೊ ರಾಜಾ಼ಬಿ ಹುಯಿರ‍್ಹಿಷೇತೆ ಇನಖ್ಹಾಜೆ ಮೇಂಢಾನು ಚೆಲ್ಕು ಇವ್ಣೇಥಿ ಜೈಕಾರ್ ಉಷೆ ಅಜು಼ ದೇವ್ನೆ ಬುಲೈರಾಖವಳುಬಿ ದೇವ್ನೆ ಚೂ಼ಣಿರಾಖ್ಯೋತೆಬಿ, ಅಜು಼ ವಿಶ್ವಾಸ್‌ವಾಳ ಹುಯಿರ‍್ಹೂತೆ ಇನವಾಳು ಮೇಂಢಾನ ಚೆಲ್ಕಾನ ಜೋ಼ಡ್ಮ ವಾಟೊವಾಳು ಹುಯಿರ‍್ಹಿಷೆ. 
\v 15 ಬಿಜೂ಼ಬಿ ಯೊ ದೇವ್ನದೂತನೆ ಮನ ಶಾತ್ ಬೋಲ್ಯೊಕತೊ,ಯೋ ವ್ಯಬಿಚಾರಿಣಿ ಬೆಠಿಥೀತೆ ಪಾಣಿನ ತುನೆ ದೆಖ್ಯೋನಿ, ಯೊ ಅಖ್ಖು ಜ಼ಗ್‌ಜಾ಼ತ್ನ, ಅದ್ಮಿವ್‌ನ ಟೋಳ್ನ, ದೇಖ್ಹ್‌ನ, ಬೋಲಿಯೇವ್ನ ವತಾಳಸ್‍. 
\v 16 ಆ ನಾಹುಯಿನ್ ತುನೆ ದೇಖ್ಯೋತೆ ದಖ್ಹ್‌ ಶಿಂಗ್ಡಾಖ್ಹಾರು ಅಜು಼ ಜಾನ್ವರ್‌ನ ದೇಖ್ಯೋನಿ? ಯೋ ಖ್ಹಾರುಸ್ ವ್ಯಭಿಚಾರಿಣಿನ ವಹೇರ್‌ ಕರೀನ್, ಇನ ಖ್ಹದ್ದರ್‌ಕೊಂತೆ ರ‍್ಹವಾಳಿನಿ ಘೋಣಿಬಿ ಲುಂಗ್ಡು ನಾರ‍್ಹವಾಳಿನಿ ಘೋಣಿಬಿ ಕರೀನ್ ಇನಿ ಬೋಟಿನ ಖೈನ್, ಹೈರಿತೆನ ಆಗ್‌ಮ ಬಾಳಿನಾಕ್‌ಷೆ. 
\v 17 ಶನಕತೊ ದೇವ್ನೆ ಇನಿ ವಚನ್ನ ಚ಼ಲಾವ್ಣು ಕರೀಬಿ, ಇನಿ ಮರ್ಜಿನ ಇವ್ಣೆ ಚ಼ಲಾವನಿ ಘೋಣಿಬಿ ಎಕ್ಕಸ್ ದಿಲ್‌ವಾಳಹುಯಿನ್ ಇವ್ಣಿ ಅದಿಕಾರ್‌ನ ಜಾನ್ವರ್‌ನ ದ್ಯವಾನಾಬಿ ಯೋ ಅಖ್ಖಾನ ಮನ್‌ಮ ಮಿಛಾ಼ಣ್ಯೊಥೊ. 
\v 18 “ಅಜು಼ ತುನೆ ಯೊ ತಯೇಡಾನಿ ಘೋಣಿ ದೇಖ್ಯೋತೆ ಆ ಮೋಟಿ ನಂಗ್ರಿ ಹುಯಿರ‍್ಹೀಸ್ ಯೊ ಜ಼ಮೀನ್ನ ರಾಜಾ಼ವ್‌ನ ಚ಼ಲಾವನ ಅದಿಕಾರ್‌ ಲೀರಾಖಿಸ್”.
\c 18
\s ಬಾಬೆಲ್ ರಡ್ಕಿಜಾ಼ಶೆ
\p
\v 1 ಆ ಅಖ್ಖುಹುವಾನ ವಾರ್ ವಿಶೇಷ್ ಅದಿಕಾರ್‌ನೊ ಬಿಜೇಕ್ ದೇವ್‌ನೊ ದೂತ ಸೊರ್ಗಾಥು ಉತ್ರಿನ್‌ ಆವಾನು ಮೇ ದೇಖ್ಯೊ. ಇನಿ ಉಜಾ಼ಖ್ಹ್‌ನಿ ಶಕಥ್ಥಿ ಜ಼ಮೀನ್ನ ಉಜಾ಼ಳು ಮಳ್ಯು. 
\v 2 ಇನೆ ಜೋ಼ರಾನಿ ಅವಾಜ಼್‌ಥಿ ಚಿಕರ್ತೊಹುಯಿನ್, “ರಡ್ಕಿಗೈ, ರಡ್ಕಿಗೈ, ಬಾಬೆಲ್‌ಕರಿ ಮೋಟಿ ನಂಗ್ರಿ ರಡ್ಕಿಗೈ! ಯೊ ಹುಯಿರ‍್ಹೀತೆ ಭೂತ್‌ನ ರ‍್ಹವಾನಿ ಝ಼ಗೋಬಿ, ಖರಾಬ್ ಆತ್ಮಾವ್‌ನಾಬಿ, ಮೈಲು ಅಜು಼ ಹರೇಕ್ ಥರಾನು ಗಲೀಜ಼್ ಜಿನಾವರ್‌ನಾಬಿ ಮ್ಹಾಳೊ ಹುಯಿರ‍್ಹೀಥಿ. 
\v 3 ಅಖ್ಖಾಸ್ ದೇಖ್ಹ್‌ನು ತಾಖತ್ತಿ ಇನು ವ್ಯಬಿಚಾರ್ ಕರಿ ಬೋಲಾನು ಖಾರಕ್ನು ದ್ರಾಕ್ಷಿನ ರಖ್ಹ್‌ನ ಪೀದು. ಜ಼ಮೀನ್ನ ರಾಜ಼ವ್‌ಖ್ಹಾರು ಇನಿಜೋ಼ಡೆ ವ್ಯಬಿಚಾರ್‌ ಕರ‍್ಯು. ಇನು ಭೋಗ್‌ನು ಖುಷಿಥಿ ಜ಼ಮೀನ್ನು ಬೇಪಾರಿ ಖ್ಹಾರು ಶೌಕಾರ್ ಹುಯಿಗು ಕರಿ ಬೋಲ್ಯೊ. 
\v 4 ಸೊರ್ಗಾಥು ಬೋಲಾನು ಅಜೇಕ್ ಅವಾಜ಼್‌ನ ಮೆ ಖ್ಹಮ್‌ಜ್ಯೊ, ಮಾರ ಅದ್ಮಿವೊ ಯೊ ನಂಗ್ರಿನ ಮ್ಹೇಲಿನ್ ಫಾದರ್ ಆವೊ, ಶನಕತೊ ಇನ ಪಾಪ್‌ಮ ವಾಟೊ ಕೊಉಷೂನಿ. ಇನ ಹುವಾನು ನಿಶತ್‌ ತುಮುನ ಕೊಉಷೇನಿ. 
\v 5 ಇನು ಪಾಪ್‌ಖ್ಹಾರು ಏಕ್‌ಥಿಏಕ್ ಮಳಿನ್ ಆಕಾಶ್ ಛೀಮಯೆತ್ರೆ ಊಚು಼ ಹುಯಿರ‍್ಹುಸ್. ದೇವ್ನೆ ಇನು ಖರಾಬ್‌ಕಾಮ್‌ ಖ್ಹಾರನ ಖ್ಹಯಾಲ್ ಕರಿರಾಖ್ಯೋಸ್. 
\v 6 ಯೋ ನಂಗ್ರಿ ಬಿಜಾ಼ವ್ನ ದಿದೀತೆ ತಿಮ್ಮಸ್ ತುಮೇಬಿ ಇನ ಪಾಛು಼ ದೆವೊ. ಇನ ಕಾಮ್‍ಖ್ಹಾರಾನ ಬರಬ್ಬರ್‌ಥಿ ಇನ ಬೇಪಟ್ ದೆವೊ. ಇನೆ ಕಲೈದಿದೀತೆ ರಾಛಾ಼ಮ ಇನ ಬೇಪಟ್ ಕಲೈನ್ ದೆವೊ. 
\v 7 ಯೋ ಇನುಯೋಸ್ ಖ್ಹರೈಲಿನ್ ಭೋಗ್‌ನು ಜಿವ್ಣು ಕರೀಕಿ ಎತ್ರೇಸ್ ತುಮೆ ಇನ ಖ್ಹತಾಪ್ಣಿನ ದುಖ್‌ನ ಇನಾಪರ್ ಲ್ಯಾವೊ. ಕತೋಬಿ ಇನ ದಿಲ್ಮ ಕರಿಲಿದಿಕಿ ಮೇ ರಾಣಿ ಹುಯಿನ್ ಬೇಠಿಸ್, ಮೇ ಮುಂಡಚ್ಚಿ ಕಾಹೆ, ದುಖ್‌ನ ಕದೇಬಿ ಮೆ ದೇಖಿಷಸ್ ಕೊಯ್ನಿಕರಿ ಇನುಯೋಸ್ ಬೋಲಿಲಿದಿ. 
\v 8 ಇನಖ್ಹಾಜೆ ಖ್ಹತಾಪ್ಣಿ, ಮರಣ್, ಮೋಟೊ ರೋಗ್, ಎಕ್ಕಸ್ ದನ್ಮ ಆವ್‌ಶೆ. ಇನ ತೀರ್ಪ್‌ ದ್ಯವಾಳೊ ಪ್ರಭು ದೇವ್ ಶಕತ್‌ವಾಳೊ ಹುಯಿರ‍್ಹೋಸ್ತೆ ಇನಖ್ಹಾಜೆ ಯೊ ಹೈರ‍್ಹಿತೆ ಆಗ್‌ಥಿ ನಾಶ್‌ ಹುಯಿಜಾ಼ಶೆ 
\v 9 ಇನಿ ಜೋ಼ಡೆ ವ್ಯಬಿಚಾರ‍್ನು ಪಾಪ್ ಕರೀನ್ ಇನ ವೈಭೋಗ್‌ಮ ವಾಟೊ ಹುಯಿರ‍್ಹಾತೆ ಜ಼ಮೀನ್ನ ರಾಜ಼ವ್‌ಖ್ಹಾರು ಯೊ ಬಳಾನು ಶೇಜ಼್‌ಥಿ ಉಪ್ಪರ್ ಛ಼ಡಾನ ಧುವ್ವಾನ ದೇಕ್‍ಷೆ. ಯೊ ಮರಾನು ದೇಖಿನ್ ರದನ್ ರ‍್ಹೋಜ಼್‌ನ್ಯಾಬಿ ದುಖ್ ಕರ್ಶೆ. 
\v 10 ಯೋ ಹಾಲ್ನ ದೇಖಿನ್ ರಾಜ಼ವ್‌ಖ್ಹಾರು ಡರಿನ್ ದೂರ್ ಭೀರಿನ್ “ಅಲಿ ಮೋಟಿ ನಂಗ್ರಿ ಬಾಬೆಲ್ ಖ್ಹಯೇರ್ ತುನ ದೆವಾಯುತೆ ತೀರ್ಪ್ ಎಕ್ಕಸ್ ಘಡೀಮ ಅಯಿಗೂನಿ” ಕರಿ ಪಸ್ತಾವ್‌ಷೆ. 
\v 11 ಆ ನಾಹುಯಿನ್ ಧರ್ತಿನ ಬೆಪಾರಿಖ್ಹಾರ ಬಾಬೆಲ್‌ನಖ್ಹಾಜೆ ದುಖ್‌ಥಿ ರದನ್ ಕರೀನ್, 
\v 12 ಅವ್ಣೆ ಖ್ಹೊನ್ನು, ರೂಪು, ಹೀರೊ, ಮುತ್ತ್‌, ಕೋರು ಲುಂಗ್ಡು, ರಾಯಿಜಾ಼ಮಣ್ಣ ರಂಗ್ನು ಲುಂಗ್ಡು, ರೇಖ್ಹಮ್‌ನುಲುಂಗ್ಡು ಅಜು಼ ಲಲೇಲಾಲ್ ಪೇರ್ವಾಖ್ಹ್‌ನಾಬಿ ಅಖ್ಖೀಸ್ ಥರಾನು ಲಾಕ್ಡಾನು ರಾಛು಼, ಅಜು಼ ಹತ್ತಿನದಾತ್ನು ಜಿನಖ್ಹ್‌, ಘಣ ಮೋಲ್ನುಝಾ಼ಡ್, ತಾಂಬು, ಲ್ಹೋಡು, ಅಮೃತಶಿಲೆ ವೇಚು಼ಕರ್ತುಥು. 
\v 13 ಅಜು಼ ಲೋಂಗ್‌ಪಟು, ಮಖ್ಹಾಲೊ, ಖ್ಹಾಲರ‍್ಯೊ, ರಕ್ತಬೋಳ, ವಾನುತೇಲ್, ದ್ರಾಕ್ಷಿನೊ ರಖ್ಹ್‌, ತೇಲ್, ಕವ್‌ಳೊ ಆಟೊ, ಘವ್‌, ಢಾಂಡು, ಮೇಂಢು, ಘೋಡೊ, ರಥ್, ಗುಲಾಮ್, ಅದ್ಮಿ ಜಾನ್‌ ಅಖ್ಖು, ಆ ಖ್ಹಾರು ಅಪ್ಣ ಜಿನಖ್ಹ್‌ನಲ್ಯಾವಳು ಕೊಯ್ನಿಕರಿ ಬೋಲ್ತುಹುಯಿನ್ ದುಖ್ ಕರ್ಶೆ. 
\v 14 “ತುನೆ ತರ್‌ಖ್ಹ್ಯೊತೆ ಫಲ್‌ಖ್ಹಾರು ತುನ ಮ್ಹೇಲಿನ್ ಚ಼ಲಿಗಯು. ತಾರು ಅಖ್ಖೂಸ್ ವೈಭೋಗ್‌ಖ್ಹಾರು ಬಿಜು಼ ಖುಷೀನ ಜಿವ್ಣಾನಿ ಶನ್‌ಗಾರ್ ಖ್ಹಾರು ತಾರೇಥಿ ನಾಶ್‌ಹುಯಿಗು. ಯೋ ತುನ ಪಾಛು಼ ಕೆದೇಬಿ ಮಳ್‌ಶೇಸ್ ಕೊಯ್ನಿ”. 
\v 15 ಯೋ ಖ್ಹಾರು ಜಿನಖ್ಹ್‌ ವೇಚಿನ್ ಇನೇಥಿ ಶೌಕಾರ್ ಹುಯೂಥೂತೆ ಬೇಪಾರಿ ಖ್ಹಾರು ದೂರ್‌ಮ ಭೀರಿನ್ ಯೊ ಹುಯಿರಿತೆನ ಅಜಾ಼ನಿ ಕುರ್‌ಲ್ಹಾಟಿನ ಖ್ಹಾಜೆ ಡರಿನ್ ದುಖ್‌ಥಿ ರದನ್ಯ ಕರ್ತೊಹುಯಿನ್; 
\v 16 ‘ಹಾಯ್! ಹಾಯ್! ಮೋಟಿ ನಂಗ್ರಿ ತುನ ಕೆಥ್ರಾನಿ ಖರಾಬ್ ಹಾಲತ್! ರಾಯ್‌ಜಾ಼ಮಣ್ಣ ರಂಗ್ನು ಅಜು಼ ಲಲೇಲಾಲ್ ರಂಗ್ನು ಪೆರ್ವಾಖ್ಹ್‌ನ ಫೇರಿಲಿನ್, ಖ್ಹೊನ್ನು, ಹೀರೊ, ಮುತ್ತ್, ಆ ಅಖ್ಖಾಥಿ ಶನ್‌ಗಾರ್ ಹುಯಿರ‍್ಹಿಥೀತೆ ಇನ ಕಿಮ್ಕಿ ಖರಾಬ್ ಹಾಲ್‌ ಚಾ಼ಲಿಗಿ. 
\v 17 ಎತ್ರು ಧನ್‌ದೌಲತ್‌ಬಿ ಎಕ್ಕಸ್ ಘಡೀಮ ನಾಶ್ ಹುಯಿಗೀನಿ ಕರಿ ಪಶ್ತಾವ್‌ಷೆ. ಅತ್ರೇಸ್ ಕಾಹೆತೆ ಜ಼ಹಾಜ಼್‌ನೊ ಮಾಲಿಕ್ ಖ್ಹಾರು ಅಜು಼ ಇನಾಮ ಜಾ಼ವಾಳೂಬಿ, ಚ಼ಲಾವಾಳುಬಿ, ದರ‍್ಯಾವ್‌ಮ ರಾಬಿನ್ ಜಿವ್ಣು ಕರವಾಳು ಖ್ಹಾರುಸ್ ದೂರ್ ಭೀರಿನ್, 
\v 18 ಯೊ ಹುಯಿರ‍್ಹೀತೆ ಭುಂಜಾ಼ವನು ಧುವ್ವಾನ ದೇಖಿನ್ ಆ ಮೋಟಿ ನಂಗ್ರಿನ ಸಮಾನ್ ಖಿವು? ಕರಿ ಅವಾಗ್‌ಮಾಂಡ್‌ಷೆ. 
\v 19 ತದೆ ಇವ್ಣೆ ಮಾಥಪರ್‌ ಮಾಟಿನ ರಂಚಿಲಿನ್ ಚಿಕರ್ತುಹುಯಿನ್, ಹಾಯ್, ಹಾಯ್, ದರ‍್ಯಾವ್‌ಪರ್ ಜಾ಼ವಾಳು ಜ಼ಹಾಜ಼್‌ವಾಳು ಅಖ್ಖೂಬಿ ಇನ ಮೋಲ್ನು ಧನ್‌ ದೌಲತ್‌ಥೀಸ್ ಶೌಕಾರ್ ಹುಯುಥೂನಿ, ಆ ಹೈರ‍್ಹಿತೆ ಎಕ್ಕಸ್ ಘಡೀಮ ನಾಶ್‌ ಹುಯ್ಗೀನಿ’ ಕರಿ ದುಖ್‌ಥಿ ರದನ್‌ಕರ‍್ಯು. 
\v 20 ಸೊರ್ಗಾಮ ರ‍್ಹವಾಳ ಅದ್ಮಿವೊ, ಅಪೊಸ್ತಲ ಖ್ಹಾರಾವೊ಼, ಪ್ರವಾದಿಖ್ಹಾರವೊ಼, ಯೊ ಹುಯಿರ‍್ಹೀತೆನ ಇನಖ್ಹಾಜೆ ಖುಷಿ ಕರೊ. ಶನಕತೊ ಆ ಹೈರಿತೆ ತುಮುನ ಠಗಾಯ್ತೆ ಇನಖ್ಹಾಜೆ ದೇವ್ನೆ ಇನ ಬರೋಬರ್‌ಥೀಸ್‌ ತೀರ್ಪ್‌ ಕರ‍್ಯೊ. 
\v 21 ತದೆ ಘಣಿ ಶಕತ್ನ ಏಕ್‌ ದೇವ್‌ದೂತನೆ ದಳಾನಿ ಘಟ್ಟಿನಿತರಾನು ಏಕ್‌ ಮೋಟ ಬಂಡಾನ ಪಾಡಿಲೀನ್ ದರ‍್ಯಾವ್‌ಮ ಫೇಕಿನ್ ಅಮ್‌ಬೋಲ್ಯೊ; ಮೋಟಿ ನಂಗ್ರೀನು ಬಾಬೆಲ್ ಆ ವದೇಖ್ಹ್‌ಥಿ ಫೇಕ್ಶೇಕಿ ಬಿಜು಼ ಕೆದೇಬಿ ದೆಖಾವ್‌ಶೇಸ್‌ ಕೊಯ್ನಿ. 
\v 22 ಬಾಬೆಲ್ ತಾರಾಮ ಖ್ಹಾರಂಗ ವಾಳುಬಿ, ವಾಜ಼ವಜ಼ಂತ್ರಿ ವಾಳೂಬಿ, ವಾಖ್ಹ್‌ಳಿ ವಜಾ಼ಡವಾಳುಬಿ, ತುತ್ತೂರಿವಾಳು ಆ ಅಖ್ಖಾನು ಅವಾಜ಼್ ಬಿಜು಼ ಕೆದೇಬಿ ಖ್ಹಮಜ಼್‌ಪಡ್‌ಶೆ ಕೊಯ್ನಿ. ಖೆವೀಬಿ ಥರಾನು ಬೇಪಾರಿಬಿ ತಾರಮ ಬಿಜು಼ ಕೆದೇಬಿ ದೆಖಾವ್‌ಶೆ ಕೊಯ್ನಿ. ದಳಾನಿ ಘಟ್ಟೀನು ಅವಾಜ಼್ ತಾರಮ ಅಜು಼ ಕೆದೇಬಿ ಕೊ ಖ್ಹಮಜ಼್‌ಪಡ್‌ಶೇನಿ. 
\v 23 ದೀವಾನು ಉಜಾ಼ಳು ತಾರಮ ಅಜು಼ ಕೆದೇಬಿ ಉಜಾ಼ಖ್ಹ್‌ ದಿಶೆಕೊಯ್ನಿ. ವ್ಯತುಲ್ಡೊ ವ್ಯತುಲ್ಡೀನು ಗಳು ತಾರಮ ಅಜು಼ ಕೆದೇಬಿ ಖ್ಹಮಜ಼್‌ಮ ಕೊಆವ್‌ಶೇನಿ. ತಾರು ಬೇಪಾರಿ ಖ್ಹಾರು ಜ಼ಮೀನ್‌ಪರ್ ದೌಲತ್‌ವಾಳು ಹುಯಿರ‍್ಹುಥೂನಿ. ತಾರಿ ಜಾ಼ದೂನಿ ಶಕಥ್ಥಿ ಅಖ್ಖಾಸ್ ದೇಖ್ಹ್‌ವಾಳು ಠೈಗೈಗಯು. 
\v 24 ಪ್ರವಾದಿಖ್ಹಾರಾನು, ದೇವ್ನ ಅದ್ಮಿವ್‌ನು ಲ್ಹೋಯಿ ಅಜು಼ ಜ಼ಮೀನ್‌ಪರ್ ಮರೈಗಯ ಹುಯಾನು ಲ್ಹೋಯಿಬಿ ಇನಮಾಸ್ ಮಳ್ಯುನಿ ಕರಿ ಬೋಲ್ಯೊ.
\c 19
\p
\v 1 ಆ ಹುಯಿಜಾ಼ವನ ಪರ್ ಸೊರ್ಗಾಮ ಮೋಟಿಭೀಡ್‌ಣು ಟ್ಹೌಕಾನಿತರ ಏಕ್‌ ಮೋಟಿ ಅವಾಜ಼್ ಖ್ಹಮ್‌ಜೊ. ಇವ್ಣೆ “ಹಲ್ಲೆಲೂಯ! ಆಖ್ಹ್‌ರೋಬಿ, ಮಹಿಮೆಬಿ, ಶಕತ್‌ಬಿ ಹಮಾರ ದೇವ್‌ಮ ಛಾ಼. 
\v 2 ಇನು ನ್ಯಾವ್‌ನು ತೀರ್ಪ್‌ಖ್ಹಾರು ಖ್ಹಾಚು಼ಬಿ ನ್ಯಾವ್ನುಬಿ ಹುಯಿರುಸ್.ಅಪ್ಣ ದೇವ್ನೆ ವ್ಯಬಿಚಾರ‍್ನಿ ತಯೇಡಾನ ದಂಡನೆದಿದೊ, ಯೋ ಮೋಟಿ ವ್ಯಬಿಚಾರ‍್ನಿ,ಇನ ಪಾಪೇಲ ಕಾಮ್‍ಥಿ ಧರ್ತಿನ ಗಂಧು ಕರುಕರ್ತಿಥಿ. ಆ ಹೈರಿತೆ ಇನ ಸೇವಕರ್‌ನ ಮರೈನಾಖಿ ದಿದೀತೆ ಇನಖ್ಹಾಜೆ ದೇವ್ನೆಯಿನ ಬದಲ್ ತೀರ್ಪ್‌ದಿದೊ”. ಕರಿ ಬೋಲ್ತೊಹುಯಿನ್, 
\v 3 ಭೇನೆಹಲ್ಲ, ಹಲ್ಲೆಲೂಯ ಕರಿ ಘಣು ಚಿಕ್ರಿನ್ ಯೋ ಬಳುಕರಸ್ತೆ ಧುವೊ ಜ಼ಗ್‌ಜ಼ಮಾನಮಾಬಿ ಉಪ್ಪರ್ ಅವುಸ್‌ಕರ್‌ಷೆ ಕರಿ ಬೋಲ್ಯು. 
\v 4 ತದೆ ಸಿಂಹಾಸನ್‌ಪರ್ ಬೆಠೂತೆ ದೇವ್ನ ಚಾರ್‌ ಉಪ್ಪರ್‌ವೀಖ್ಹ್‌ ಜ಼ಣು ಶಾಣೂಬಿ, ಯೋ ಚಾರ್ ಜೀವಿಬಿ ಆಡ್‍ಪಡಿನ್ ಆರಾದನೆ ಕರ್ತುಹುಯಿನ್, ಆಮೆನ್, ಹಲ್ಲೇಲೂಯಕರಿ ಬೋಲ್ಯು.
\s ಮೇಂಢಾನ ಚೆಲ್ಕಾನು ವ್ಯಹಾನು ಮಿಝ಼್‌ವಾನ್
\p
\v 5 ಇನಪಾರ್ ಸಿಂಹಾಸನ್ ಭಣೀಥು ಏಕ್‌ ಟಹುಕೊ ಆಯು. ಯೋ ಅವಾಜ಼್‌ನೆ, “ಅಪ್ಣ ದೇವ್ನು ಚಾ಼ಕ್ರಿಕರಾವಾಳ ಅದ್ಮಿವೊ ದೇವ್ನ ಧನ್ಯವಾದ್ ಕರ‍್ಯು. ಇನೇಥಿ ಡರಾವಾಳ ನ್ಹಾನ, ಮೋಟಾವೊ ಇನ ಧನ್ಯವಾದ್ ಕರೊ”. ಕರಿ ಬೋಲ್ಯು. 
\v 6 ಇನಾವಾರ್‌ ಮನ ಬಿಜೇಕ್ ಅವಾಜ಼್ ಖ್ಹಮಜ್‍ಪಡ್ಯು ಯೋ ಘಣುಮೋಟು ಅದ್ಮಿನ ಭೀಡ್‌ಣು ಅವಾಜ಼್ ಮೋಟ ಪಾಣಿನು ಕಹಾರ್‌ನಿ ತರಾಬಿ ಜಾ಼ಖ್ಹತ್ ಘಲಾರನ ಅವಾಜ಼್‌ನಿತರ ಥೂತೆ ಏಕ್‍ ಅವಾಜ಼್‌ನ ಖ್ಹಮ್‌ಜೊ ಯೋ, ಹಲ್ಲೆಲೂಯ, ಮಹಾನ್ ಶಕತ್‌ವಾಳೊ ದೇವ್ ಹುಯಿರೋತೆ ಅಪ್ಣೊ ಪ್ರಭು ಆಳ್‌ಷೆ. 
\v 7 ಮೇಂಢಾನು ಚೆಲ್ಕು ಹುಯಿರ‍್ಹವಾಳನು ವ್ಯಹಾನಿ ವಖ್ಹತ್ ಐಗಿಕರಿ ಶಂತೋಖ್ಹ್‌ ಕರಿಯೆ; ಖುಷಿ ಕರಿಯೆ ಇನ ಮಹಿಮೆಕರಿಯೆ, ಶನಕತೊ ಇನ ವ್ಯಹಾ ಕರಾವಳಿ ಕವಾರಿ ಇನುಯೋಸ್ ಖ್ಹವಾರಿರಾಖಿಸ್‌ಕರಿ ಬೋಲ್ಯು. 
\v 8 ಉಜಾ಼ಖ್ಹ್‌ನುಬಿ ಶುದ್ದಬಿ ಕವ್‌ಳು ಕೋರುಲುಂಗ್ಡು ಫೇರಾನಯಿನ ವಾರ್‌ಖ್ಹೊ ಮಳ್ಯು. ಯೋ ಕೋರುಲುಂಗ್ಡು ಕತೊ ದೇವ್ನು ಅದ್ಮಿವ್‌ನು ನ್ಯಾವ್‌ನು ಕಾಮ್‌ಖ್ಹಾರುಸ್‌ ಹುಯಿರುಸ್. 
\v 9 ಅತ್ರೇಸ್ ಕಾಹೆತೆ ಇನೆ ಮಾರೇಥಿ ವಾತೆ ಬೋಲ್ತೊಹುಯಿನ್ ಮೇಂಢಾನು ಚೆಲ್ಕು ಹುಯಿರ‍್ಹವಾಳನ ವ್ಯಹಾನ ಮಿಝ಼್‌ವಾನ್‌ಮ ಬುಲೈರ‍್ಹಾವಳು ಧನ್ಯರ್ ಕರಿ ಬೋಲಾನು ಲೀಖ್‌ಕರಿ ಬೋಲಿನ್, “ಆ ಖ್ಹಾರಿವಾತೆ ದೇವ್ನು ಖ್ಹಾಚು಼ ವಚನ್ ಹುಯಿರುಸ್.” ಕರಿ ಬೋಲ್ಯೊ. 
\v 10 ತದೆ ಮೇ ಇನ ಆರಾದನೆ ಕರ್ನುಕರಿ ಇನ ಪಗ್‍ಪರ್ ಅಡ್‌ಪಡ್ಯೊ. ಕತೋಬಿ ದೇವ್ನ ದೂತಾನೆ, ಮನ ಅಮ್ ಆರಾದನೆ ನಕೊಕರ್. ಯೇಸುನ ಖ್ಹಾಚ಼ನ ಲೀರಾಖ್ಯಾಸ್ತೆ ತಾರಿನಿತರಾಬಿ ತಾರ ಭೈಯೇನಿತರಬಿ ಮೇಬಿ ಏಕ್‌ ಚಾ಼ಕ್ರಿವಾಳೊ. ಇನಖ್ಹಾಜೆ ದೇವ್ನ ಆರಾದನೆಕರ್, ಯೇಸುನಿ ಸಾಕ್ಷಿಸ್‌ ಪ್ರವಾದನೆನು ಆತ್ಮಕರಿ ಬೋಲ್ಯೊ.
\s ಧೋಳ ಘೋಡಾಪರ್ ಏಕ್‌ ಸವಾರಿ
\p
\v 11 ಇನಪಾರ್ ಪರ್‌ಲೋಕ್ ನಿಕ್ಳಿರ‍್ಹಾವನು ಮೇ ದೇಖ್ಯೊ. ತದೆ ದೇಕ್, ಧೋಳೊ ಘೋಡೊ ಮನ ದೆಖಾಯು. ಇನಾಪರ್‌ ಬೆಠೊರ‍್ಹವಾಳಾನ ವಿಶ್ವಾಸ್‌ವಾಳೊ, ಖ್ಹಾಚೊ಼ಕರಿ ನಾಮ್. ಯೊ ನೀತಿಥಿ ನ್ಯಾವ್‌ನ ಫೇಡವಾಳೊ, ನೀತಿಥಿ ಜಂಗ್‌ಭೀಡವಾಳೊ ಹುಯಿರೊಸ್. 
\v 12 ಇನ ಭೇ ಡೋಳ ಆಗ್‍ನಿ ಝ಼ಲ್‌ಪಟ್‍ನಿತರ ಛಾ಼. ಇನ ಮಾಥಾಪರ್ ಕೈಯೆಕ್ಕಿ ಕಿರೀಟ್‌ಖ್ಹಾರು ಛಾ಼, ಇನ ಏಕ್‌ ನಾಮ್ ಲೀಖೈದೆವೈರ‍್ಹೂಸ್, ಯೊ ಇನ ಪಣ್ಕಿ ಬಿಜು಼ ಕಿನಾಬಿ ಮಾಲುಮ್‌ ಕೊರಿಷೇನಿ. 
\v 13 ಯೋ ಲ್ಹೋಯಿಮ ಭಿಗೈರ‍್ಹವಾನು ಲುಂಗ್ಡಾನ ಫೇರಿರಾಖ್ಯೊಥೊ. ಇನು ನಾಮ್ ದೇವ್ನು ವಚನ್‍ಕರಿ. 
\v 14 ಸೊರ್ಗಾನು ಸಿಪಾಯಿಖ್ಹಾರು ಧೋಳ ಘೋಡಾಪರ್ ಬೇಶಿನ್ ಇನ ಪೀಠೆ ವಳ್ಯಾವ್ತುಥು. ಇವ್ಣೆ ಶುದ್ದ ಪೇರ್‌ವಾಖ್ಹ್‌ಬಿ, ಖ್ಹಾಜ಼್‌ನುಥೂತೆ ಕವ್‌ಳು ಕೋರುಲುಂಗ್ಡು ಫೇರಿರಾಖ್ಯುಥು. 
\v 15 ಜ಼ಗ್‌ಜಾ಼ತ್ನ ಕತ್ರಾನಖ್ಹಾಜೆ ಇನ ಮ್ಹೋಡೇಖ್ಹು ಚಾ಼ಲ್ತಿ ತಲ್ವಾರ್‌ ನಿಕ್ಳಿಆವಾಸ್. ಯೊ ಇವ್ಣುನ ಲ್ಹೋಡಾನ ಡಂಡೇಥಿ ಆಳ್‌ಷೆ. ಸರ್ವಶಕತ್‌ನೊ ಹುಯಿರೋತೆ ದೇವ್ನಿ ಘಣಿ ಮೋಟಿ ಖೀಜ಼್‌ಕರಿ ಬೋಲಾನ ದ್ರಾಕ್ಷಿನ ಬಾನೇಮ ರ‍್ಹವಾಳನ ಖುಂದ್ಲಿನಾಕ್ಷೆ. 
\v 16 ಇನ ಲುಂಗ್ಡಾಪರ್‌ಬಿ, ಟಾಂಗ್‌ಪರ್ಬಿ, “ರಾಜಾ಼ನೊ ರಾಜಾ಼ಬಿ ಪ್ರಭುನೊ ಪ್ರಭು” ಕರಿ ನಾಮ್ ಲಿಖೈರ‍್ಹುಸ್. 
\v 17 ಇನಪಾರ್ ಏಕ್‌ ದೇವ್‌ದೂತನೆ ಚಾ಼ಂದ್‌ಪರ್ ಭಿಯುರ‍್ಹವಾನು ದೇಖ್ಯೊ. ಯೊ ಊಚ಼ ಗಳೇಥಿ ಚಿಕ್ರಿನ್ ಆಕಾಶ್‌ಮ ಉಡಾವಳ ಅಖ್ಖಾಸ್ ಜಿನಾವರ್‌ನ, ಆವೊ, “ದೇವ್ ಕರವ್‌ಕರಾಸ್ತೆ ಮೋಟಿ ಮಿಝ಼್‌ವಾನ್ನ ಖಾಣನ ಮಳಿನ್ ಖಾವೊಕರಿ ಬೋಲುಕರ್ತೊಥೊ. 
\v 18 ರಾಜ಼ವ್ನಿ ಬೋಟಿನಾಬಿ, ಶಿಪಾಯ್ನ ಮೋಟಾನಿ ಬೋಟಿನಾಬಿ, ಅಜು಼ ಶಿಪಾಯ್ನ ಬೋಟೀನ, ಘೋಡಾವ್ನಿ ಬೋಟೀನ, ಘೋಡಾನು ಸವಾರಿವ್ನ ಬೋಟೀನ, ಛುಟ್ಕಾರ್ ಹುಯಿರ‍್ಹವಾಳನು, ಗುಲಾಮ್‌ಖ್ಹಾರನು, ನ್ಹಾನಾವ್ನು ಅಜು಼ ಮೋಟಾವ್ನು ಬೋಟೀನ ಖಾವನ ಆವೊ” ಕರಿ ಬೋಲ್ಯೊ. 
\v 19 ತದೆ ಯೊ ಜಾನ್ವರ್‌ಬಿ, ಜ಼ಮೀನ್ನ ರಾಜ಼ವ್‌ಬಿ, ಇವ್ಣ ಶಿಪಾಯಿಖ್ಹಾರೂಬಿ ಯೊ ಘೋಡಾಪರ್ ಬೆಠೊರ‍್ಹವಾಳನಪರ್ ಅಜು಼ ಇನ ಶಿಪಾಯ್ನ ಉಪ್ಪರ್‌ಬಿ ಜಂಗ್ ಭೀಡಾನಖ್ಹಾಜೆ ಮಳಿನ್ ಐರ‍್ಹಾವನು ದೇಖ್ಯೊ. 
\v 20 ತದೆ ಯೊ ಜಾನ್ವರ್‌ನು ಧರಿಲಿದು. ಅತ್ರೇಸ್ ಕಾಹೆತೆ ಜಾನ್ವರ್‌ ಭಣೀಥು ಅದ್ಭುತ್ ಕಾಮ್‌ಖ್ಹಾರು ಕರೀನ್, ಜಾನ್ವರ್‌ನು ಖ್ಹಣೇದ್ ನಖಾಯಹುಯನ, ಅಜು಼ ಇನ ಮೂರತ್ನ ಆರಾದನೆ ಕರವಾಳನ ಪೊಖ್ಹ್‌ಲೈರಾಖ್ಯೊಥೊತೆ ಯೊ ಝೂ಼ಟುಪ್ರವಾದಿಬಿ ಇನ ಜೋ಼ಡೆ ಧರೈಗಯೊ. ಯೋ ಭೇಜ಼ಣಾನ ಜಾನ್ನಖ್ಹಮೇದ್‌ ರಂಜ಼ಕ್‌ಥಿ ಬಳಾನು ಆಗ್ನ ತಲಾವ್ಮ ಫೇಕ್ಯು. 
\v 21 ಇವ್ಣು ಶಿಪಾಯಿಖ್ಹಾರನ, ಘೋಡಾಪರ್ ಬೆಠೊರ‍್ಹವಾಳಾನ ಬಾಕೇಥಿ ಆಯೂತೆ ಬೇಮ್ಹೋಡಾನಿ ತಲ್ವಾರ್‌ಥಿ ಮರೈಗಯು, ಅಜು಼ ಜಿನಾವರ್‌ಖ್ಹಾರು ಇವ್ಣು ಬೋಟಿನ ಪೇಟ್‌ಭರಿನ್ ಖಾದು.
\c 20
\s ಹಜಾ಼ರ್ ವರಖ್ಹ್
\p
\v 1 ತದೆ ದೇವ್‌ದೂತನೆ ಪಾತಾಳ್ನ ಬೀಗಾನು ಕೀಲಿನ ಅಜು಼ ಮೋಟಿಖ್ಹಿ ಖ್ಹಂಕಳ್‌ನ ಹಾತ್ಮ ಧರಿಲೀನ್ ಸೊರ್ಗಾಥು ಉತ್ರಿನ್ ಆವಾನು ದೇಖ್ಯೊ. 
\v 2 ಯೋ ದೇವ್ನ ದೂತಾನೆ ಕುಟ್‌ಣ್ಯೊಬಿ ಶೈತಾನ್‍ಬಿ, ಹುಯಿರೋತೆ ಜೂ಼ನೊ ಖ್ಹಾಪ್ ಕತೊ ಅರ್ಝ಼ನ ಧರೀನ್ ಹಜಾ಼ರ್ ವರಖ್ಹ್‌ಲಗು ಕೋಂಡಿರಾಖ್ಯೋಥೊ. 
\v 3 ಯೋ ಹಜಾ಼ರ್ ವರಖ್ಹ್ ಖತಮ್ ಹುವಾಲಗು ಬಿಜೂ಼ಬಿ ಅದ್ಮಿವ್‌ನ ಠಗಾವ್ಣುನಾತೆಯಿಮ್ ದೇವ್ನ ದೂತಾನೆ ಇನ ಪಾತಾಳ್ಮ ಧಕೇಲಿನ್ ದರ‍್ವಾಜು಼ ಲಗಾಡಿನ್ ಇನ ಮುದ್ರೊಮಾರ‍್ಯೊ ಯೋ ಹಜಾ಼ರ್ ವರಖ್ಹ್ ನಿಕ್ಳಾದಿನ್, ಥೋಡ ಹಗಾಮ್‌ ಇನಛುಟ್ಕಾರ್ ಮಳ್‌ಶೆ. 
\v 4 ಇನಪಾರ್ ಸಿಂಹಾಸನ್‌ಖ್ಹಾರು ದೇಖ್ಯೊ. ಯೋ ಖ್ಹಾರಪರ್ ಬೆಠೊರ‍್ಹವಾಳಾನ ತೀರ್ಪ್‌ಕರಾನಿ ಅದಿಕಾರ್ ದೆವಾಯು. ಅತ್ರೇಸ್ ಕಾಹೆತೆ ಯೇಸುನಿ ಸಾಕ್ಷಿನ ಖ್ಹಾಜೇಥಿಬಿ,ದೇವ್ನ ವಚನ್ನಖ್ಹಾಜೇಥಿಬಿ ಮುಂಡ್ ರ‍್ಹೇಖ್ಹಾವವಳಾನು ಆತ್ಮವ್‌ನಾಬಿ, ಜಾನ್ವರ್‌ಬಿ, ಇನ ಮೂರತ್ನ ಆರಾದನೆ ಕೋಕರ‍್ಯುಂತೆ ಇವ್ಣ ತಾಳ್ವಪರ್ ಅಜು಼ ಹಾತ್‌ಪರ್ ಇನು ಖ್ಹಣೇದ್ ನಖಾಯುಕೊಂತೆ ಇವ್ಣುನ ದೇಖ್ಯೊ.ಇವ್ಣೆ ಪಾಛು಼ ಜಿವ್ತು ಉಠೀನ್ ಹಜಾ಼ರ್ ವರಖ್ಹ್ ಕ್ರಿಸ್ತನ ಜೋ಼ಡ್ಮ ಆಳ್‌ಷೆ. 
\v 5 ಮರ‍್ಯುಥೂತೆ ಬಿಜು಼ಖ್ಹಾರು ಯೋ ಹಜಾ಼ರ್ ವರಖ್ಹ್ ಖತಮ್ ಹುವಾಲಗು ಜಿವ್ತು ಕೋಹುಯೂನಿ ಆಸ್ ಪಹಿಲು ಪಾಛು಼ ಜಿವ್ತುಹುವಾನು. 
\v 6 ಪಹಿಲ ಪಾಛು಼ ಜಿವ್ತುಹುಯಿನ್ ಉಠಾಮ ಮಳಿಹುಯು ಧನ್ಯರ್‌ಬಿ ಅಜು಼ ಘಣು ಆಶೀರ್ವಾದ್‌ಬಿ ಹುಯಿರ‍್ಹೂಸ್. ಅಥ್ರಾನವಾಳಪರ್ ಬೇನಿ ಮರಣ್ಣ ಅದಿಕಾರ್ ಕೊಯ್ನಿ. ಕತೋಬಿ ಇವ್ಣೆ ದೇವ್‍ನಾಬಿ ಕ್ರಿಸ್ತನಾಬಿ,ಯಾಜಕವ್‌ಹುಯಿನ್,ಕ್ರಿಸ್ತನಿ ಜೋ಼ಡ್ಮ ಯೋ ಹಜಾ಼ರ್ ವರಖ್ಹ್ ಆಳ್‌ಷೆ.
\s ಶೈತಾನ್ನಿ ಹಾರ್
\p
\v 7 ಯೋ ಹಜಾ಼ರ್‌ ವರಖ್ಹ್ ಖತಮ್ ಹುಯಿಜಾ಼ವದಿನ್ ಶೈತಾನ್ನ ಜೇಲ್‌ಮಾಥು ಛುಟ್ಕಾರ್‌ವುಶೆ. 
\v 8 ಯೋ ಭಾರ್‌ ಐನ್ ಜ಼ಮೀನ್ನ ಚಾರ‍್ಹೆ ಆಡಿಮ ಛಾ಼ತೆ ಅಖ್ಖಾಸ್ ದೇಖ್ಹ್‌ನ ಠಗೈನ್ ಗೋಗ್ ಅಜು಼ ಮಾಗೋಗ್ ಕರಿ ಅದ್ಮಿನ ಝೂ಼ಂಡ್‌ನ ಪೊಖ್ಹ್‌ಲೈಲೀನ್ ಜಂಗ್‌ನ ಮಳಾವ್‌ಷೆ. ಇವ್ಣು ಗಣ್ತಿ ದರ‍್ಯಾವ್ನು ರೇತ್ನಿತರ ರಿಶೆ. 
\v 9 ಇವ್ಣೆ ಜ಼ಮೀನ್‌ಖ್ಹಾರು ಫೈಲೈಜೈ಼ನ್ ದೇವ್ನು ಅದ್ಮಿನ ಟಾಂಡಾನಾಬಿ ಪ್ಯಾರ್‌ನ ನಂಗರ್‌ನಾಬಿ ಕೋಂಡಿಲಿಷೆ. ಕತೋಬಿ ಸೊರ್ಗಾಥು ಆಗ್ ಉತ್ರಿಅಯಿನ್ ಇವ್ಣುನ ಬಾಳಿನಾಕ್‌ಷೆ. 
\v 10 ಅತ್ರೇಸ್ ಕಾಹೆತೆ ಇವ್ಣುನ ಠಗಾಯೊತೆ ಶೈತಾನ್ ಆಗ್ ರಂಜ಼ಕ್‌ಖ್ಹಾರು ಲಾಗುಕರಾನ ತಲಾವ್ಮ ನಾಖಿದಿದು ಹಿಜ್ಜಾ಼ ಜಾನ್ವರ್‌ಬಿ ಝೂ಼ಟುಪ್ರವಾದಿ ಖ್ಹಾರೂಬಿ ಹಿಜ್ಜಾ಼ ಥು. ಇವ್ಣೆ ರಾತ್‌ದನ್ ಜ಼ಗ್‌ಜ಼ಮಾನಮಾಬಿ ಖ್ಹತಾಪ್ಣಿ ಪಡುಕರ್ಷೆ.
\s ಖ್ಹರ್ತಿನು ತೀರ್ಪ್
\p
\v 11 ಇನಪಾರ್ ಧೋಳುಫಟ್ ಥೂತೆ ಮೋಟಿ ಸಿಂಹಾಸನ್‌ಬಿ ಇನಪರ್ ಬೆಠೊರ‍್ಹಾವಳನಾಬಿ ದೇಖ್ಯೊ.ಇನಖ್ಹಾಮ್ಣೇಥು ಸೊರ್ಗ ಧರ್ತಿ ನಾಶಿಗಯು. ಕತೋಬಿ ಇವ್ಣುನ ಜಾ಼ವನ ಝಗೋಕೋಥೂನಿ. 
\v 12 ಅತ್ರೇಸ್ ಕಾಹೆತೆ ಮರ‍್ಯುಹುಯು ನ್ಹಾನು ಮೋಟು ಖ್ಹಾರುಸ್ ಸಿಂಹಾಸನ್ನ ಖ್ಹಾಮ್ಣೆ ಬೆಠುರಾವನು ದೇಖ್ಯೊ. ತದೆ ಪುಸ್ತಕ್ ಅಖ್ಖೂಸ್ ಛೋ಼ಡಾಯು. ಜಾನ್ನ ಹಕ್‌ವಾಳಾನಿ ಪಟ್ಟಿ ಕರಿ ಅಜೇಕ್ ಪುಸ್ತಕ್‍ಬಿ ಛೋ಼ಡಾಯು.ಆ ಪುಸ್ತಕ್‌ಮ ಲೀಖೈರ‍್ಹೂಸ್ತೆ ಪರಕ್ಮ ಯೋ ಮರ‍್ಯುಹುಯು ಖ್ಹಾರನ ಇವ್ಣು ಇವ್ಣು ಕಾಮ್ ಕಿಮ್ಕಿ ತಿಮ್ಮಸ್ ತೀರ್ಪ್‌ಹುಯು. 
\v 13 ದರ‍್ಯಾವ್ ಇನಾಮ ಮರ‍್ಯುಥೂತೆ ಅದ್ಮಿನ ದಿದು. ಮರಣ್‌ಬಿ ಪಾತಾಳ್‌ನೆ ಇನಾಮ ಮರ‍್ಯುಥೂತೆ ಅದ್ಮಿಖ್ಹಾರನ ದಿದು. ಹರೇಕ್ ಜ಼ಣಾನಾಬಿ ಇವ್ಣು ಕಾಮ್ನಿ ಪರಕ್ಮಾಸ್ ತೀರ್ಪ್‌ಹುಯು. 
\v 14 ಇನಪಾರ್ ಮರಣ್‌ಬಿ ಪಾತಾಳ್‌ನಾಬಿ ಆಗ್ನ ತಲಾವ್ಮ ಭಿರ್ಕಾಯು. ಯೊ ಆಗ್ನು ತಲಾವಸ್ ಬೇನಿ ಮರಣ್. 
\v 15 ಯೋ ಜಾನ್ನ ಹಕ್‌ವಾಳಾನಿ ಪುಸ್ತಕ್‌ಮ ಕಿನುನಾಮ್‍ ಲೀಖೈರ‍್ಹಾವನು ದೆಖಾಯು ಕೊಯ್ನಿಕಿ ಇನ ಆಗ್ನ ತಲಾವ್ಮ ಭಿರ್ಕಾಯು.
\c 21
\s ನವು ಸೊರ್ಗ ಅಜು಼ ನವಿ ಧರ್ತಿ
\p
\v 1 ಇನ ಪಾಛ಼ಳ್ ಮೆ ನವು ಸೊರ್ಗ ಅಜು಼ ಜ಼ಮೀನ್ನ ದೇಖ್ಯೊ. ಪಹಿಲೇನು ಆಕಾಶ್ ಅಜು಼ ಪಹಿಲೇನು ಜ಼ಮೀನ್‌ಕೊಂತೆ ಹುಯಿಗಯು. ಹಿಜ್ಜಾ಼ ದರ‍್ಯಾವ್‍ಬಿ ಕೋಥೂನಿ. 
\v 2 ಅತ್ರೇಸ್ ಕಾಹೆತೆ ಸೊರ್ಗಾಥು ಪರಿಶುದ್ ನಂಗರ್ ಯೆರೂಸಲೇಮ್ ದೇವ್‌ಕಂಥು ಉತ್ರಿ ಆವನು ಮೇ ದೇಖ್ಯೊ. ಯೋ ಇನ ಬಾವ್ರಿನಖ್ಹಾಜೆ ತಯಾರ್ ಹುಯಿರ‍್ಹವಾಳಿ ವ್ಯತುಲ್ಡಿನಿ ಘೋಣಿ ಶನ್‌ಗಾರ್ ಹುಯಿರ‍್ಹುಥು. 
\v 3 ಆ ನಾಹುಯಿನ್ ಸಿಂಹಾಸನ್‌ಥು ಏಕ್‌ ಮೋಟು ಅವಾಜ಼್ ಮೆ ಖ್ಹಮ್‌ಜೊ. ಯೊ ಅವಾಜ಼್ ದೇಖೊ, ದೇವ್ನು ಘರ್‌ ಅದ್ಮಿನಿ ಜೋ಼ಡ್ಮ ಛಾ಼. ಯೊ ಇವ್ಣಿ ಜೋ಼ಡ್‌ಮರ‍್ಹಿಷೆ. ಇವ್ಣೆ ಇನವಾಳ ಹುಯಿರ‍್ಹಿಷೆ ಅಜು಼ ಯೊ ಇವ್ಣೊ ದೇವ್ ಹುಯಿರ‍್ಹಿಷೆ. 
\v 4 ಯೊ ಇವ್ಣ ಆಂಝಾ಼ನ ನೂಛಿನಾಕ್ಷೆ. ಹಿಜ್ಜಾ಼ ಪಾಛು಼ ಮರಣ್ ರ‍್ಹಿಶೆಕೊಯ್ನಿ, ಪಾಛು಼ ದುಖ್ ರ‍್ಹಿಶೆಕೊಯ್ನಿ, ಖ್ಹರಪ್‌ಗೋಳ್‌ ಕೊರ‍್ಹಿಶೇನಿ, ಅಜು಼ ವದೇಖ್ಹೊ ಕೊರ‍್ಹಿಶೇನಿ ಜೂ಼ನೊ ಮಾರಗ್‌ಖ್ಹಾರು ಚ಼ಲಿಗಯು” ಕರಿ ಬೋಲ್ಯು. 
\v 5 ತದೆ ಸಿಂಹಾಸನ್‌ಪರ್ ಬೆಠೊಥೋತೆ ಇನೆ, “ದೇಖ್ ಮೇ ಖ್ಹಾರುಸ್ ನವೇಥಿ ಉಬ್‌ಜಾ಼ವುಸ್‌” ಕರಿ ಬೋಲ್ಯೊ. ಅಜು಼ ಏಕ್‌ ಜ಼ಣಾನೆ ಮನ, ತೂ ಅನ ಲೀಕ್. ಶನಕತೊ ಆ ವಚನ್‌ಖ್ಹಾರು ಖ್ಹಾಚು಼ಬಿ ವಿಶ್ವಾಸ್‌ ಕರಖ್ಹರ್ಕೂಬಿ ಹುಯಿರ‍್ಹುಸ್” ಕರಿ ಬೋಲ್ಯೊ. 
\v 6 ತದೆ ಸಿಂಹಾಸನ್‌ಪರ್ ಬೆಠೊಥೋತೆ ಇನೆ, “ಅಖ್ಖೂಸ್ ಕರಿಹುಯ್ಗು; ಮೇಸ್ ಪಹಿಲೋಬಿ, ಖ್ಹರ್ತಿಬಿ, ಶುರುವಾತ್‍ಬಿ, ಖತಮ್‌ಬಿ ಹುಯಿರ‍್ಹೋಸ್. ತರ್ಖ್ಹವಾಳನ ಜಾನ್ನು ಪಾಣಿನೊ ಚೇಜ಼್‌ಭಾರನ ಮೋಲ್‌ಕೊಂತೆ ಫುಗಟ್‍ಥಿ ಪಿಯಾನ ದಿಶ್. 
\v 7 ಜೂತವಾಳನ ಆ ಖ್ಹಾರುಸ್ ಮಳ್‌ಶೆ. ಮೇ ಇನ ದೇವ್ ಹುಯಿರ‍್ಹಿಶ್. ಯೊ ಮನ ಛಿಯ್ಯೊ ಹುಯಿರ‍್ಹಿಶೆ. 
\v 8 ಕತೋಬಿ ಡರ್‌ಪೋಕ್‌ಖ್ಹಾರು, ವಿಶ್ವಾಸ್‌ಕೊಂತೆ ಖ್ಹಾರು, ಗಲೀಜ಼್ ಕಾಮ್ ಕರವಾಳು, ಖೂನಿಖ್ಹಾರು, ವ್ಯಬಿಚಾರ್ ಕರವಾಳು, ಜಾ಼ದುಕರಾವಳು, ಮೂರತ್ನ ಆರಾದನೆ ಕರವಾಳು, ಅಖ್ಖೂಸ್ ಜ್ಹೂ಼ಟು ಬೋಲವಾಳು ಅವ್ಣುನ ಮಳ್‌ಶೇತೆ ವಾಟೊ ಆಗ್ ರಂಜ಼ಕ್‌ಥಿ ಬಳ್ವಾನು ತಲಾವಸ್; ಯೋ ಬೇನು ಮರಣ್” ಕರಿ ಮನ ಬೋಲ್ಯೊ.
\s ನವು ಯೆರೂಸಲೇಮ್‌
\p
\v 9 ಖ್ಹರ್ತಿನು ಖ್ಹಾತ್ ಖ್ಹತಾಪ್ಣಿಥಿ ಭರೈರುತೆ ಖ್ಹಾತ್ ಕಟೋರವ್ನ ಧರಿರಾಖ್ಯುತೆ ಖ್ಹಾತ್‌ಜ಼ಣ ದೇವ್‌ದೂತರ್‌ಮ ಏಕ್‍ಜ಼ಣೊ ಐನ್ ವಾತೆ ಬೋಲ್ತೊಹುಯಿನ್, “ಮಾರಿ ಜೋ಼ಡ್ಮ ಆವ್, ಮೇಂಢಾನ ಚೆಲ್ಕಾನ ಬಾವಣ್‍ ಹುವಾಳಿ ವ್ಯತುಲ್ಡಿನ ತುನ ವತಾಳುಸ್‌” ಕರಿ ಬೋಲ್ಯೊ. 
\v 10 ಯೊ ದೇವ್ನದೂತನೆ ಪವಿತ್ರಾತ್ಮಾಥಿ ದಾಬುಕ್ಮ ಥೋತೆ ಮನ, ಘಣೊಮೋಟೊ ಅಜು಼ ಊಚೊ಼ ಪಹಡ್‌ಕನ ಲೀಜೈ಼ನ್, ಪರಿಶುದ್ ಖ್ಹಯೇರ್ ಯೆರೂಸಲೇಮ್, ಸೊರ್ಗಮಾಥು ದೇವ್‌ಕಂಥು ಉತ್ರಿ ಉಳ್ಯಾವತೆ ಯೊ ಮನ ವತಾಳ್ಯೊ. 
\v 11 ಯೋ ಖ್ಹಯೇರ್ ದೇವ್ನಿ ಶಕಥ್ಥಿ ಉಜಾ಼ಖ್ಹ್‌ ದೆವ್‌ಕರ್ತೋಥೊ. ಅಜು಼ ಝ಼ಗೇಗುಕರಾತೆ ವಜ್ರನಿತರ ಉಜಾ಼ಖ್ಹ್‌ ದೆವ್‌ಕರ್ತೋಥೊ. ಘಣ ಮೋಲ್ನ ಐರಾನಿತರ ಜ಼ಮ್ಕು ಕರ್ತುಥು. 
\v 12 ಯೋ ಖ್ಹಯೇರ‍್ನ ಊಚು಼ ಭೀತ್ ತು. ಯೋ ಅಖ್ಖಾ ಬಾಕಲ್‍ಕನ ದೇವ್‌ದೂತರ್‌ ಥಾ. ಅಖ್ಖಾನ ಬಾಕಲ್‌ನ ಉಪ್ಪರ್ ಇಸ್ರಾಯೇಲ್‌ನು ಭಾರ ಖೂಮ್ನು ನಾಮ್ ಲೀಖೈರ‍್ಹೂಥು. 
\v 13 ಪೂರಬ್ ದಿಕ್ಮ ತೀನ್ ಬಾಕಲ್, ಉತ್ತರ್ ದಿಕ್ಮ ತೀನ್ ಬಾಕಲ್, ದಕ್ಷಿಣ್ ದಿಕ್ಮ ತೀನ್ ಬಾಕಲ್, ಪಶ್ಚಿಮ್ ದಿಕ್ಮ ತೀನ್ ಬಾಕಲ್‌ಥು. 
\v 14 ಯೋ ಖ್ಹಯೇರ‍್ನು ಭೀತ್‌ನ ಭಾರ ಹದಿಪಾಯನುಬಂಡೊ ಥು. ಇನಪರ್ ಮೇಂಢಾನು ಚೆಲ್ಕಾನು ಭಾರಜ಼ಣ ಅಪೊಸ್ತಲರ‍್ನು ನಾಮ್ ಥು. 
\v 15 ಮಾರೇಥಿ ವಾತೆ ಬೋಲು ಕರ್ತೊಥೋತೆ ದೂತನೆ ಯೊ ಖ್ಹಯೇರ್‌ನಾಬಿ ಇನ ಬಾಕಲ್ನಾಬಿ ಅಜು಼ ಇನು ಭೀತ್‌ನ ಆಳ್ತಿಕರಾನಖ್ಹಾಜೆ ಇನ ಹಾತ್ಮ ಖ್ಹೊನ್ನಾನೊ ಆಳ್ತಿನೊಲಠ್ಠೊ ಧರಿರಾಖ್ಯೋಥೊ. 
\v 16 ಯೋ ಖ್ಹಯೇರ್ ಚಾರ್‌ಕೂಠಿ ಥು. ಯೊ ಕೆವ್ಡು ಲಾಂಬುಕಿ ಎತ್ರೇಸ್ ಚೌ಼ಡುಥು. ದೇವ್ನದೂತನೆ ಖ್ಹಯೇರ‍್ನ ಇನ ಆಳ್ತಿನಲಠ್ಠೇಥಿ ಗಣ್ಯೊ. ಯೊ ಖ್ಹಯೇರ್ ಏಕ್‌ ಹಜಾ಼ರ್ ಪಾಚ಼್‌ಖ್ಹೊ ಮೈಲ್ ಲಾಂಬು, ಏಕ್‌ ಹಜಾ಼ರ್ ಪಾಚ಼್‌ಖ್ಹೊ ಮೈಲ್ ಚೌ಼ಡು, ಬಿಜು಼ ಏಕ್‌ ಹಜಾ಼ರ್ ಪಾಚ಼್‌ಖ್ಹೊ ಮೈಲ್ ಊಚು಼ಥು. 
\v 17 ದೇವ್‌ದೂತನೆ ಯೋ ಭೀತ್‌ನ ಆಳ್ತಿಕರ‍್ಯೊ, ಯೊ ಬೇಖ್ಹೊ ಖ್ಹೋಳ ಅಡಿಯೆತ್ರೆ ಆಳ್ತಿ ಥು. ಆ ಗಣ್ತಿಮ ಅದ್ಮಿನು ಹಾತ್‌ಯೆತ್ರೆ ಕತೊ ದೇವ್ನದೂತಾನ ಹಾತ್‌ಯೆತ್ರೇಸ್. 
\v 18 ಯೋ ಭೀತ್ ವಜ್ರಾನಬಂಡೇಥಿ ಭಂದೈರ‍್ಹುಥು ಯೊ ನಂಗರ್ ಐರಾನಿತರನು ಅಶ್ಲಿ ಖ್ಹೊನ್ನು ಹುಯಿರ‍್ಹುಥು. 
\v 19 ಖ್ಹಯೇರ‍್ನ ಭೀತ್‌ನು ಹದಿಪಾಯನ ಕೈಯೇಕ್ ಥರಾನು ಮುತ್ನೊ ಕಾಕ್ರೊಖ್ಹಾರೊಥೊ, ಫೈಲೊ ಕೋಣಾನೊ ಬಂಡೊ ವಜ್ರಾಥಿ, ಬೇನೊಬಂಡೊ ವೈಡೂರ‍್ಯ, ತೀನ್ನೊ ಪಚ್ಚೆ. ಚಾರ‍್ನು ಪದ್ಮರಾಗ್, 
\v 20 ಪಾಚ಼್‌ನು ಗೋಮೇಧಿಕ, ಛೋ಼ನು ಮಾಣಿಕ್ಯ, ಖ್ಹಾತ್ನು ಪೀತರತ್ನ, ಆಟ್ನು ಬೆರುಲ್ಲ, ನೌನು ಪುಷ್ಯರಾಗ್, ದಖ್ಹ್‌ನೊ ಗರುಡಪಚ್ಚೆ, ಘ್ಯಾರಾನೊ ಇಂದ್ರನೀಲ, ಬಿಜು಼ ಭಾರಾನೊ ಬಂಡೊ ನೀಲಸ್ಪಟಿಕ. 
\v 21 ಭಾರ ಬಾಕಲ್‍ಖ್ಹಾರು ಭಾರ ಮುತ್ತ್ ಹುಯಿರ‍್ಹುಥು. ಹರೇಕ್ ಬಾಕಲ್ನಾಬಿ ಏಕೇಕ್‌ ಮುತ್ತ್‌ಥಿ ಬಣೈರಾಖ್ಯುಥು. ನಂಗರ‍್ನು ಗಲ್ಲಿ ಪಾಕ್‌ಥಿ ರ‍್ಹವಾನ ಶಿಖ್ಹಾನಿತರನು ಅಶ್ಲಿ ಖ್ಹೊನ್ನೇಥಿ ಬಣೈರ‍್ಹೂಥು. 
\v 22 ಮೆ ಖ್ಹಯೇರ್‌ಮ ಮಂದಿರ್‌ಬಿ ದೇಖ್ಯೊ ಕೊಯ್ನಿ. ಶನಕತೊ ಸರ್ವಶಕತ್‌ನೊ ದೇವ್‌ಹುಯಿರ‍್ಹೋತೆ ಪ್ರಭು ಅಜು಼ ಮೇಂಢಾನು ಚೆಲ್ಕುಹುಯಿರ‍್ಹವಾಳೊ ಯೊ ಇನು ಮಂದಿರ್‌ ಹುಯಿರ‍್ಹೂಸ್. 
\v 23 ಖ್ಹಯೇರ‍್ನ ಉಜಾ಼ಳು ದ್ಯವಾನ ಚಾ಼ಂದ್‌ರ‍್ಹವೊ ಚ಼ಂದರ್‌ಮೊರ‍್ಹವೊ ಹೋಣುಥುಕೊಯ್ನಿ ಶನಕತೊ ದೇವ್ನಿ ಮಹಿಮೆಸ್ ಉಜಾ಼ಖ್ಹ್‌ ದೆವ್‌ಕರ್ತೋಥೊ. ಮೇಂಢಾನು ಚೆಲ್ಕುಸ್ ನಂಗರ‍್ನ ದೀವೊ ಹುಯಿರ‍್ಹೋಥೊ. 
\v 24 ಇನ ಉಜಾ಼ಖ್ಹ್‌ಮಾಸ್ ಹರೇಕ್ ಜ಼ಗ್‌ಜಾ಼ತ್‌ ಚಾ಼ಲ್‌ಷೆ. ಜ಼ಮೀನ್ನ ರಾಜ಼ವ್‌ಖ್ಹಾರು ಇವ್ಣ ಧನ್‌ದೌಲತ್ನ ಖ್ಹಯೇರ್‌ಕನ ಲೀನ್ ಆವ್‌ಶೆ. 
\v 25 ಖ್ಹಯೇರ‍್ನು ದರ‍್ವಾಜು಼ಖ್ಹಾರು ದನ್ಮ ಮುಚಾ಼ವ್‌ಶೇಸ್ ಕೊಯ್ನಿ. ಹಿಜ್ಜಾ಼ ರಾತ್‌ಕತೊ ಕೊಯ್ನಿಸಸ್ ಕೊಯ್ನಿ. 
\v 26 ಜ಼ಗ್‌ಜಾ಼ತ್‌ನು ಧನ್‌ದೌಲತ್‌ಬಿ ಮರ್ಯಾದೀಬಿ ಹಿಜ್ಜಾ಼ ಲೀನ್‌ಆವ್‌ಶೆ. 
\v 27 ಕತೋಬಿ ಅಶುದ್ದ ರ‍್ಹವಾನು ಖಿವು ಏಕ್‌ಬಿ ಕೊಪೇಖ್ಹ್‌ಶೇನಿ. ಇಮ್ಮಸ್ ಕಚಿಂಡ್‌ಕಾಮ್‌ ಕರಾವಳೊಬಿ ಠಗಾವವಾಳೋಬಿ ಇನಾಮ ಪೇಖ್ಹ್‌ಶೆ ಕೊಯ್ನಿ. ಕತೋಬಿ ಮೇಂಢಾನು ಚೆಲ್ಕು ಹುಯಿರ‍್ಹವಾಳನ ಜಾನ್ನ ಹಕ್‌ವಾಳಾನಿ ಪುಸ್ತಕ್‌ಮ ಕಿನುಕಿನು ನಾಮ್‌ಖ್ಹಾರು ಲೀಖೈರ‍್ಹೇಸ್ಕಿ ಇವ್ಣೆಖಲಿ ಯೊ ಖ್ಹಯೇರ್‌ಮ ಪೇಖ್ಹ್‌ಶೆ.
\c 22
\p
\v 1 ಅನಕೇಡೆಥು ದೇವ್ನದೂತನೆ ಫಟಕ್‌ಡಿನಿಘೋಣಿ ಉಜಾ಼ಖ್ಹ್‌ ದ್ಯವಾನು ಜಾನ್ನು ಪಾಣಿನ ನದ್ದೀನ ಮನ ವತಾಳ್ಯೊ. ಯೊ ನದ್ದಿ ದೇವ್ ಬಿಜು಼ ಮೇಂಢಾನ ಚೆಲ್ಕಾನು ಸಿಂಹಾಸನ್‌ಕಂಥು ಉಬ್ಜಿನ್, 
\v 2 ಖ್ಹಯೇರ‍್ನಿ ಮೋಟಿ ಗಲ್ಲೀನ ಇಚ಼್‌ಮ ವ್ಹವ್‌ಕರ‍್ತುಥು. ಯೊ ನದ್ದೀನು ಭೇ ಕನಾರಿಪರ್ ಜಾನ್ನು ಝಾ಼ಡುಖ್ಹಾರು ಥು. ಯೊ ವರಖ್ಹ್‌ನ ಭಾರ ಮಹಿನಾಬಿ ಫಲ್ ದೇತುಹುಯಿನ್ ಭಾರ ಮಹಿನಾಬಿ ಭಾರ ಥರಾನು ಪಂಡುಖ್ಹಾರು ದೇಸ್. ಯೊ ಝಾ಼ಡನ ಪಾಂದ್ಡಾನ ದವೈಥಿ ಖ್ಹಾರ ಜ಼ಗ್‌ಜಾ಼ತ್‌ವಾಳಾನ ಖ್ಹುದ್ರಾವಸ್. 
\v 3 ದೇವ್‍ಥಿ ಶಾಪ್ ಲಿದುಹುಯು ಖಿವೂಬಿ ಯೊ ಖ್ಹಯೇರ್‌ಮ ಕೊರ‍್ಹಿಶೇನಿ. ಹಿಜ್ಜಾ಼ ದೇವ್ನು ಅಜು಼ ಬಲೀನ ಮೇಂಢಾನ ಚೆಲ್ಕಾನು ಸಿಂಹಾಸನ್ ರ‍್ಹಿಶೆ.ಇನ ಸೇವಕರ್‌ಯಿನ ಆರಾದನೆ ಕರ್ಶೆ. 
\v 4 ಇವ್ಣೆ ಇನು ಮ್ಹೋಡು ದೇಕ್‌ಶೆ ಇವ್ಣ ಮುಡ್‌ಕ್ಯಪರ್ ಇನು ನಾಮ್ ಲೀಖೈರ‍್ಹಿಶೆ. 
\v 5 ಅಜು಼ ರಾತ್ ಬೋಲಾನುಸ್ ಕೊರ‍್ಹಿಶೇನಿ. ಇವ್ಣುನ ದೀವೊನು ಉಜಾ಼ಳುಬಿ ಚಾ಼ಂದ್‌ನು ಉಜಾ಼ಳುಬಿ ಹೋಣುಕೊಯ್ನಿ. ಪ್ರಭುಹುಯಿರ‍್ಹೋತೆ ದೇವಸ್ ಇವ್ಣುನ ಉಜಾ಼ಳು ಹುಯಿರ‍್ಹಿಶೆ.ಇವ್ಣೆ ಜ಼ಗ್‌ಜ಼ಮಾನಮಾಬಿ ಜಿವಿರ‍್ಹಿಶೆ.
\s ಯೇಸು ಬಿಜು಼ಪಾಛು಼ ಆವಾನು
\p
\v 6 ಇನಪರ್ ದೇವ್ನದೂತನೆ ಮನ, ಆ ವಾತೆಖ್ಹಾರು ವಿಶ್ವಾಸ್ ಕರಖ್ಹರ್ಕೂಬಿ ಖ್ಹಾಚೂ಼ಬಿ ಹುಯಿರ‍್ಹುಸ್. ಪ್ರವಾದಿ ಖ್ಹಾರನ ಆತ್ಮಾನ ಪ್ರಭುಸ್ ದೇವ್ ಹುಯಿರೊಸ್. ಒಗ್ಗಿಸ್‌ಮ ಚಾ಼ಲನಯೂತೆ ವಾತೆಖ್ಹಾರಿ ಇನ ಸೇವಕರ್‌ನ ವತಾಳನ ದೇವ್ನೆಯಿನ ದೂತನ ಮೋಕ್ಲಿರಾಖ್ಯೊಸ್. 
\v 7 ಖ್ಹಮ್‌ಜೊ಼, ಮೆ ಘಣು ಜ಼ಲ್‌ದಿ ಆವುಸ್! ಆ ಪುಸ್ತಕ್‌ಮ ಲೀಖೈರ‍್ಹೂತೆ ಖ್ಹಾರಿ ವಚನ್ನ ಪಾಡಿಚಾ಼ಲವಾಳೊ ಧನ್ಯ ಹುಯಿರ‍್ಹೊಸ್ ಕರಿ ಬೋಲ್ಯೊ. 
\v 8 ಯೋಹಾನಕರಿ ಮೇಸ್ ಆ ಅಖ್ಖಿ ವಾತೆನ ಖ್ಹಮ್‌ಜೊಹುಯೊಬಿ ದೇಖ್ಯೊಹುಯೋಬಿ ಹುಯಿರ‍್ಹೋಸ್. ಮೆ ಅಖ್ಖೀಸ್ ವಾತೆವ್‌ನ ಖ್ಹಮ್‌ಜಿನ್‌ ದೇಖಾಮ, ಆ ಬಾರೆವ್‌ಮ ಮನ ವತಾಳ್ಯೊತೆ ದೇವ್‌ದೂತನ ಖ್ಹಲಾಮ್ ಕರ್ನುಕರಿ ಇನ ಪಗ್‍ಪರ್ ಪಡ್ಯೊ. 
\v 9 ಕತೋಬಿ ಯೋ ದೇವ್ನದೂತನೆ, “ಮನ ಖ್ಹಲಾಮ್ ನಕೊಕರ್. ಮೇಬಿ ತಾರಿನಿತರಾಸ್ ಆ ಪುಸ್ತಕ್‌ಮ ಛಾ಼ತೆ ಅಖ್ಖಿ ವಚನ್ನ ಪಾಡಿ ಚಾ಼ಲ್ಯಹುಯ ಅದ್ಮಿನಿತರಸ್. ಅಜು಼ ತಾರ ಭೈಯೇ ಹುಯಿರ‍್ಹಾತೆ ಪ್ರವಾದಿನಿ ಘೋಣಿ ಮೇಬಿ ಖಲಿ ಏಕ್‌ ಸೇವಕ್ ಹುಯಿರ‍್ಹೊಸ್. ತೂ ದೇವ್ನ ಖ್ಹಲಾಮ್ ಕರ್‌” ಕರಿ ಬೋಲ್ಯೊ. 
\v 10 ಆನಾಹುಯಿನ್ ದೇವ್ನದೂತನೆ ಮನ, “ಆ ಪುಸ್ತಕ್‌ಮ ಛಾ಼ತೆ ದೇವ್‍ಥಿ ಆವಾನು ವಚನ್ ಅಖ್ಖಾನ ಗಪ್ಲತ್ ನಕೊಕರ್. ಶನಕತೊ ಆ ಅಖ್ಖು ಚಾ಼ಲಾನ ದನ್ ಖನ್ನೆ ಐಗು. 
\v 11 ಠಗಾವವಾಳೊ ಅಜೂ಼ಬಿ ಠಗಾವ್ತೊಸ್ ರ‍್ಹವಾದೆ. ಮೈಲು ರ‍್ಹವಾಳೊ ಇನ ಬಿಜೂ಼ಬಿ ಮೈಲು ಕರಿಲಾವದೆ, ನೀತಿವಾಳೊ ಬಿಜೂ಼ಬಿ ನೀತಿವಾಳೊ ಹುವಾದೆ ಅಜು಼ ಪರಿಶುದ್ ಹುಯಿರ‍್ಹಾವಳೊ ಇನ ಅಜೂ಼ಬಿ ಪರಿಶುದ್ ಕರಿಲ್ಯವಾದೆ. 
\v 12 ‘ದೇಖ್ ಮೇ ಜ಼ಲ್ದೀಸ್ ವಳ್ಯಾವ್‌ಸ್. ಮೆ ಹರೇಕ್ ಜ಼ಣಾನ ಇವ್ಣ ಇವ್ಣ ಚಾ಼ಲ್‌ನಿತರಸ್ ದ್ಯವಾನಿತರಾನು ಪ್ರತಿಫಲ್ ಮಾರಕನ ಛಾ಼. 
\v 13 ಮೇಸ್ ಪಹಿಲೋಬಿ ಖ್ಹರ್ತಿಬಿ, ಪಹಿಲೋಬಿ ಕಡ್‌ಶಿನೋಬಿ, ಶುರುವಾತ್‍ಬಿ, ಖತಮ್‌ಬಿ ಹುಯಿರ‍್ಹೊಸ್. 
\v 14 ಇವ್ಣ ಝ಼ಗ್ಗಾವ್‍ನ ದೊಹಿಲಿನ್ ಶುದ್‍ ಹುಯಿರ‍್ಹವಾಳು ಧನ್ಯರ್. ಇವ್ಣೆ ಜಾನ್ನ ಝಾ಼ಡ್‌ನು ಪಂಡು ಖಾವನ ಹಕ್‍ದಾರ್ ಹುಯಿರ‍್ಹಿಶೆ. ಇವ್ಣೆ ಬಾಕಲ್ನ ವಾಟೆಕರಿ ಯೋ ಖ್ಹಯೇರ‍್ನ ಮಹಿ ಜಾ಼ವಳು ಹುಯಿರ‍್ಹಿಶೆ. 
\v 15 ಕತೋಬಿ ಕುತ್‌ರ‍್ಯಾವ್‌ನಿತರ ರ‍್ಹವಾಳುಬಿ, ಜಾ಼ದು ಕರವಾಳುಬಿ, ವ್ಯಬಿಚಾರ್ ಕರವಾಳುಬಿ, ಖೂನಿಖ್ಹಾರುಬಿ, ಮೂರತ್ನ ಖ್ಹಲಾಮ್ ಕರಾವಳುಬಿ, ಝೂ಼ಟಾನ ಪ್ಯಾರ್‌ಕರೀನ್ ಚಾ಼ಲವಾಳು ಅಜು಼ ಬೋಲವಾಳು ಯೊ ಖ್ಹಯೇರ‍್ನ ಭಾರ್‌ ರ‍್ಹಿಶೆಕರಿ ಬೋಲ್ಯೊ. 
\v 16 “ಯೇಸು ಕರಿ ಮೇಸ್ ಮಾರು ಖ್ಹಾರ ಸಬೇವ್ನಿ ಬಾರೇಮ ತುಮುನ ಸಾಕ್ಷಿ ಬೋಲಾನಖ್ಹಾಜೆ ಮಾರ ದೂತನ ಮೋಕ್ಲಿರಾಖ್ಯೊಸ್. ಮೇ ದಾವೀದನು ಖೂಮ್‌ ಕರಿ ಬೋಲಾನು ಬಡ್ಡೇಥು ನಿಕ್‌ಳ್ಯುತೆ ಚಿಗುರ್‌ಬಿ, ಇನಿ ಸಂತಾನ್‌ಬಿ ಉಜಾ಼ಖ್ಹ್‌ಥಿ ನಿಕ್ಳಾನೊ ಶುಕ್ಕರ್‌ಬಿ ಹುಯಿರೊಸ್. 
\v 17 ಆತ್ಮ ಅಜು಼ ವ್ಯತುಲ್ಡೀಬಿ, ಆವ್ಣುಕರಿ ಬೋಲ್‌ಶೆ. ಖ್ಹಮ್‌ಜಾ಼ವಾಳೊ, ಆವ್‌ಕರಿ ಬೋಲಾದೆ. ಠೋಖ್ಹ್‌ ರ‍್ಹವಾಳೊ ಆವಾದೆ, ಆಖ್ಹ್ ರ‍್ಹವಾಳೊ ಜಾನ್ನಪಾಣಿನ ಮೋಲ್‌ಕೊಂತೆ ಫುಗಟ್‍ಥಿ ಲಿಲ್ಯಾವದೆ.
\s ಖತಮ್
\p
\v 18 ಆ ಪುಸ್ತಕ್‌ಮ ಲೀಖೈರ‍್ಹೂತೆ ಪ್ರವಾದನೆನು ವಚನ್‌ಖ್ಹಾರು ಖ್ಹಮ್‌ಜಾ಼ತೆ ಹರೇಕ್ ಜ಼ಣಾನಾಬಿ ಮೇ ಬೋಲಾನಿ ಸಾಕ್ಷಿ ಶಾತ್‌ಕತೊ, “ಕೋಣ್‌ತೋಬಿ ಅನಾಮ ಶಾತ್ತೋಬಿ ಮಳಾಯೊತೊ, ದೇವ್ ಇವ್ಣಪರ್ ಆ ಪುಸ್ತಕ್‌ಮ ಲೀಖೈರ‍್ಹುತೆ ಖ್ಹತಾಪ್ಣಿಖ್ಹಾರು ಆವಾನಿತರ ಕರ್ಶೆ. 
\v 19 ಖಿವೊತೋಬಿ ಆ ಪ್ರವಾದನೆನು ವಚನ್‌ಮ ಏಕ್ನತೋಬಿ ಕಾಡಿನಾಖ್ಯೊತೊ, ಆ ಪುಸ್ತಕ್‌ಮ ಬೋಲೈರ‍್ಹುಸ್ತೆ ಜಾನ್ನ ಝಾ಼ಡಮಾಬಿ ಪರಿಶುದ್ಧ ಖ್ಹಯೇರ್‌ಮಾಬಿ ಇನಛಾ಼ತೆ ವಾಟಾನ ದೇವ್ ಕಾಡಿನಾಕ್‌ಶೆ. 
\v 20 ಆ ಬಾರೇಮ ಸಾಕ್ಷಿ ಬೋಲವಾಳೊ, “ಒಹೊ, ಮೇ ಖ್ಹಾಚಮಾಸ್ ವಗ್ಗಿಸ್ ಆವುಸ್” ಕರಿ ಬೋಲಾಸ್. ಆಮೆನ್. ಪ್ರಭು ಹುಯಿರ‍್ಹೋತೆ ಯೇಸು, ಆವ್. 
\v 21 ಪ್ರಭು ಹುಯಿರ‍್ಹೋತೆ ಯೇಸುನಿ ವಾರ್‌ಖ್ಹೊ ಅಖ್ಖಾಸ್ನಿ ಜೋ಼ಡ್ಮ ರ‍್ಹವಾದೆ. ಆಮೆನ್!