\id JAS -WAGHRI
\ide UTF-8
\h ಯಾಕೋಬ
\toc3 ಯಾಕೋಬ
\toc2 ಯಾಕೋಬ
\toc1 ಯಾಕೋಬನೆ ಲೀಖ್ಯೋತೆ ಚಿಟ್ಟಿ
\mt2 ಯಾಕೋಬನು ಬರೆದ ಪತ್ರಿಕೆ
\mt1 ಯಾಕೋಬನೆ ಲೀಖ್ಯೋತೆ ಚಿಟ್ಟಿ
\imt ಮಾಲುಮ್ ಕರಾನು
\ip ಯಾಕೋಬಕರಿ ಬೋಲಾನು ಆ ಚಿಟ್ಟಿ ಯಾಕೋಬಕರಿ ಬೋಲೈಲ್ಯಾವಾಳೊ ಖೆವಾಕಿ ಏಕ್‌ಜ಼ಣಾನ ಲೀಖೈರುಸ್. ಘಣೇಥಿ ಯೋ ಯೇಸುನ ಭೈ ಯಾಕೋಬ ಹುಯಿರೇಣು. ಯೊ ಸಬೇನೊ ಘಲ್ಡೊ ಹುಯಿರೋಥೊ ಅಜು಼ ಯೋ ಯೆರೂಸಲೇಮ್‌ನ ಸಬೆಮ ಭಾಗ್‌ಲೀರಾಖವಾಳೊ ಹುಯಿರೋಥೊ. \xt ಅಪೊ 15:13\xt* ಅಪೊಸ್ತಲ ಪೌಲಾಬಿ ಗಲಾತ್ಯವಾಳಾನಿ ಚಿಟ್ಟಿ 2:9 ಮ ಆ ಏಕ್‌ ಸಬೇನೊ ಖಮ್‌ಕರಿ ಬೊಲೈಲೇಸ್. ಲೀಖಾಪಟ್‍ವಾಳೊ ಯಾಕೋಬನೆ ಲೀಖ್ಯೋತೆ ಆ ಚಿಟ್ಟಿ ಕ್ರಿಸ್ತನಿ ಪೈದಾಖ್ಹ್‌ನ ವಾರ್ ಘಣೇಥಿ ಘಣು 50 ವರಖ್ಹ್‌ಮ ಲೀಖೈರುಸ್ಕರಿ ವಿಶ್ವಾಸ್‍ಕರಸ್. ಯಾಕೋಬ ಯೇರೂಸಲೇಮ್ಮ ಸಬೇನೊ ಏಕ್‌ ಘಲ್ಡೊಹುಯಿರೊಥೊ. ಯೋ ಹಿಜ್ಜಾ಼ ಜಿವ್ಣುಕರುಕರ ತದೆ ಆ ಚಿಟ್ಟಿನ ಲೀಖಿರಾಖ್ಯೊಉಷೆ. ಯಾಕೋಬನೆ ಆ ಚಿಟ್ಟಿನ ಅಲಕ್ ಅಲಕ್ ದೇಖ್ಹ್‌ಮ ಛಿದ್‍ರೈಗಯುತೆ ಭಾರ ಖೂಮ್‍ವಾಳನ ಖ್ಹಣೇದ್ ಕರಿನ್ ಲೀಖಿರಾಖ್ಯೊಸ್. \xt 1:1\xt* ಯಾಕೋಬನಿ ಚಿಟ್ಟೀಮ ಛಾ಼ತೆ ಅಖ್ಖು ಕವಿಖ್ಹಾರು ಅಖ್ಖಾ ಕ್ರೈಸ್ತನಿ ಬಾರೇಮಸ್ ಕತೋಬಿ 12 ಖೂಮ್‌ಕರಿ ಬೋಲಾನು ಉಪಯೋಗ್ ಯಾಕೋಬನೆ ಯೆಹೂದಿ ವಿಶ್ವಾಸಿಯೋನ ಲೀಖಿರಾಖ್ಯೊಸ್ ಕರಿ ವತಾಳಿದೇಸ್. ಶನಕತೊ ಆ ಪುಸ್ತಕ ಘಣೇಥಿ ಘಣು ಪಢಾವಾಳಾನ ಛಿಮಾವಾನಿಮತ್ ಹುಯಿರುಸ್. ಅನಾಮ ಕೈಏಕ್ ವಿಚಾರ್ ಛಾ಼. ಯಾಕೋಬನೆ ವಿಶ್ವಾಸ್ ಅಜು಼ ಕಾಮ್ನಿ ಬೀಚ್ನಿ ಸಂಬಂದ್‌ನಿ ಬಾರೇಮ ಘಣಿ ನಜ಼ರ್ ಕರಸ್. ಖ್ಹಾಚಿ ವಿಶ್ವಾಸ್ ಕಾಮ್‍ಥಿ ವತಾಳೈಲೇಸ್.\xt 2:17\xt* ಯೋ ಶೌಕಾರಿ ಅದ್ಮಿಖ್ಹಾರು ಅಛ್ಛಿ ಗುಣ್ಣಾ ವತಾಳಿಲ್ಯಾವಾನಿ ಪರಕ್ಮ ಹೊಷಾರಿ ಕರಸ್. \xt 2:1-4\xt* ಅಜು಼ ಅಪ್ಣೆ ವಾತೆಬೋಲಿಲಿಯೆಸ್ತೆ ಇನ ಹೊಷಾರಿಥಿ ರ‍್ಹೇಣು ಕರಿ ಅಪ್ಣುನ ಬೋಲಿ ವತಾಳಸ್‍. \xt 3:1-12\xt*
\iot ಕಾಡಿದೇಖೊ
\io1 1. ಯಾಕೋಬ ಪಢವಾಳಾನ ಖ್ಹಲಾಮ್‍ಕರಸ್. \ior 1:1\ior*
\io1 2. ಇನಕೇಡೆಥು ಯೋ ತಕಲೀಬ್ ಆಯೂತೆ ಖ್ಹಮಾಳಿಲ್ಯವಾನ ಕ್ರಿಸ್ತನ ವಿಶ್ವಾಸಿಯೋನ ಹುಮ್ಮಖ್ಹ್‌ಕರಸ್.\ior 1:2-27\ior*
\io1 3. ಇನ ಬಾದ್‌ಮ ಕಾಮ್‍ಥಿ ವಿಶ್ವಾಸ್ ವತಾಳನು ಕೆತ್ರು ಜ಼ರೂರತ್‌ಕರಿ ಬೋಲಸ್.\ior 2:1-26\ior*
\io1 4. ಇನಕೇಡೆಥು ವಾತೆಖ್ಹಾರಿ ಕೆತ್ರೆ ತಾಖತ್ನಿ ಹುಯಿರೀಸ್ ಕರಿ ವತಾಳಸ್‍. \ior 3:1-12\ior*
\io1 5. ತದೆ ಯಾಕೋಬ ಜಗತ್‌ನು ಅಕ್ಕಲ್ ದೇವ್ನಿ ಗ್ಯಾನ್‌ಥಿ ಕೆತ್ರೆ ಪರಕ್‌ಪಡಸ್ ಕರಿ ಛೋ಼ಡಿ ವತಾಳಸ್‍. \ior 3:13—4:10\ior*
\io1 6. ಇನಕೇಡೆಥು ಇನೆ ಬಡಯ್ ಮಾರಿಲ್ಯಾವಳಾನಿ ವಿರೋದ್ ಪಢವಾಳಾನ ಹೊಷಾರಿ ರ‍್ಹವಾನ ಬೋಲಸ್. \ior 4:1—5:6\ior*
\io1 7. ಯಾಕೋಬನೆ \ior 5:7-20\ior* ವಚನ್‌ಮ ಥೋಡು ಮಾಮೂಲಿ ಸಮಾಚಾರ‍್ನ ಬೋಲ್ತೊಹುಯಿನ್ ಚಿಟ್ಟಿನ ಖ್ಹತಮ್‌ಕರಸ್.
\c 1
\p
\v 1 ದೇವ್‍ನಾಬಿ ಪ್ರಭುಹುಯಿರೋತೆ ಯೇಸು ಕ್ರಿಸ್ತನಾಬಿ ದಾಸ ಹುಯಿರೋತೆ ಯಾಕೋಬ ಅಲಕ್‍ ದೇಖ್ಹ್‌ಮ ಛಿಡ್‍ಕೈರ‍್ಹುತೆ ಭಾರ ಖೂಮ್‍ವಾಳನ ಲಿಖಾನು ಶಾತ್‍ಕತೊ, ತುಮೂನ ಅಛ್ಛು಼ ಹುವಾದೆ.
\s ವಿಶ್ವಾಸ್ ಅಜು಼ ಗ್ಯಾನ್
\p
\v 2 ಮಾರ ಭೈಯೇ ಭೇನೆವೊ, ತುಮೆ ಥರಥರಾನು ವದೇಖ್ಹ್‌ ಝೇಲಾನಿ ವಖ್ಹ್‌ತೆ ಇನ ತುಮೆ ಹೈರುತೆ ಖಲಿ ಖ್ಹುಶಿಕರಿ ಬೋಲಿನ್ ಖ್ಹಮಾಳಿಲೇವೊ. 
\v 3 ಶನಖ್ಹಾಜೆಕತೊ ಯೊ ಖ್ಹತಾಪ್ಣಿ ತುಮಾರಿ ವಿಶ್ವಾಸ್‌ನ ತರೀಪ್‌ಶ ಕರಾನಖ್ಹಾಜೆ ಐರ‍್ಹೂಸ್. ಯೊ ತುಮುನ ಸಮಾಧಾನ್ ಮಳಾನಿತರ ಕರ್ಶೆ. 
\v 4 ಯೋ ಖ್ಹಮಾಳಾನು ತುಮಾರಮ ಭರ್‌ಪೂರ್‌ ಹುವಾದೆ. ತದೆತುಮೆ ಮೈಲಾ ಕಾಹೆತೇಬಿ, ಖ್ಹಾರಿ ಅಛ್ಛಿಗುಣ್‍ಮ ಪೂರಾಬಿ, ಅಜು಼ ಶನಾಮಬಿ ಕಮ್ ನಾರ‍್ಹವಾಳು ಹುಯಿರ‍್ಹಿಶು. 
\v 5 ಕತೋಬಿ ತುಮಾರಮ ಕಿನಾತೋಬಿ ಗ್ಯಾನ್‍ಕಮ್ ರ‍್ಹಯೂತೊ ಯೋ ದೇವ್ನ ಗಿಂಗೈಲ್ಯವಾದೆ, ದೇವ್ ಚಿಂಘಾವ್‍ಶೆಕೊಂತೆ ಖ್ಹಾರಸ್ನ ದಿಲ್‌ ಛೋ಼ಡಿನ್ ದಿಶೆ. 
\v 6 ಕತೋಬಿ ದೇವ್‌ಕನ ಬೋಲಿಲ್ಯಾವಾಳೊ ಜ಼ರಾಬಿ ಗುಮಾನಿ ನಾ ಕರ್ನುತೆ ವಿಶ್ವಾಸ್‍ಥಿ ಬೋಲಿಲ್ಯಾವಾದೆ. ಶನಕತೊ ಶಕ್ ಕರಾವಾಳು ವಹಿರಾಮ ಮಾರ್‌ಖೈಜಾಯಿತೆ ದರ‍್ಯಾವ್‍ನ ಝೋ಼ಕಾಳ್ಯಾನಿತರ ವನ್‍ವನ್‍ತೊಫಂಡ್‍ಶೆ. 
\v 7 ಎಥ್ರಾನವಾಳೊ ಯೋ ಪ್ರಭುಥಿ ಗಿಂಗೈಲಿದೋತೆ ಖ್ಹಾರುಸ್ ಲೀಲಿಶ್ಕರಿ ನಕೊಲಾಝಾ಼ದೆ. 
\v 8 ಶನಕತೊ ಯೋ ಬೇ ದಿಲ್‌ವಾಳೊ, ಇನ ಚಾ಼ಲ್‌ಮ ಚ಼ಲ್‍ಪ್ಲಾಟಿನೊ ಹುಯಿರ‍್ಹೊಸ್.
\s ಗರೀಬ್ ಅಜು಼ ದೌಲತಿ
\p
\v 9 ಕ್ರಿಸ್ತಮ ಖರಾಬ್ ಹಾಲತ್ಮರ‍್ಹವಾಳೊ ಭೈಯೇ,ಭೇನೆವೊ ಯೋ ಅಛ್ಛಿಹಾಲತ್‍ಮ ಆಯೋಕರಿ ಖುಷಿಕರಾದೆ. 
\v 10 ಕ್ರಿಸ್ತಮ ಶೌಕಾರ್ ಹುಯಿರೋತೆ ಭೈಯೇ,ಭೇನೆವೊ ಯೋ ಗರೀಬ್‍ಹಾಲತ್‍ಮ ಆಯೋಕರಿ ಖ್ಹುಶಿಕರಾದೆ. ಕತೋಬಿ ಶೌಕಾರ್ ಘಾಖ್ಹ್‌ನಿ ಫೂಲ್‍ನಿತರ ಮಟಿಜಾ಼ಶೆ. 
\v 11 ಶನಕತೊ ಚಾ಼ಂದ್ ನಿಕ್‍ಳ್ಯುತೆ ತದೆ ಇನ ಅಂಚ಼್‌ಥಿ ಘಾಖ್ಹ್‌ ಕರ್‌ಮರೈನ್ ಯೋ ಘಾಖ್ಹ್‌ನು ಫೂಲ್ ಲಡ್ಕಿಪಡೀನ್, ಇನು ಶನ್‌ಗಾರ್ ನಾಶ್ ಹುಯಿಜಾ಼ಸ್‍. ಇಮ್ಮಸ್ ಶೌಕಾರ್ ಇನಿ ಕೋಶಿಶ್‍ಥಿ ಹೇಟ್ ಪಡಿಜಾ಼ಸ್‌.
\s ತರೀಪ್ಷ ಅಜು಼ ವದೇಖ್ಹ್‌
\p
\v 12 ಕೋಣ್ ತರೀಪ್ಷನ ಖ್ಹಮಾಳಿಲೇಸ್ಕಿ ಯೋ ಧನ್ಯ. ಯೋ ಇನಿ ಶೋದನೆನ ಜುತಿಲಿದೊತೊ ಪ್ರಭು ಇನ ಪ್ಯಾರ್‌ಕರಾವಾಳನ ವಾಗ್ದಾನ್ ಕರ‍್ಯೊತೆ, ಜಾನ್ನು ಕಿರೀಟ್‍ನ ಲೀಲಿಶೆ. 
\v 13 ಕೋಣ್‌ತೋಬಿ ಶೋದನೆಮ ಪಡಾನಿ ಖ್ಹಯಾಲ್‍ಹುಯುತೊ ಆ ಖ್ಹಯಾಲ್ ಮನ ದೇವ್‍ಥಿ ಆಯುಕರಿ ನಾ ಬೋಲ್‌ನು. ಶನಕತೊ ದೇವ್ ಖರಾಬ್‍ಕರಾನ ಹುಮ್ಮಖ್ಹ್ ಕೊದೇಯ್ನಿ. ಯೋ ಕಿನಾಬಿ ಶೋದನೆ ಕರಾಬಿಕೊಯ್ನಿ. 
\v 14 ಕತೋಬಿ ಹರೇಕ್‍ಜ಼ಣುಬಿ ಇನಿ ಶೊಂತ್ ನಿಕ್‍ಳ್ಯಜಾನ್‍ಮ ಪಡೀನ್ ಶೋದನೆ ಲೀಲೆಸ್. 
\v 15 ಇನಪಾರ್ ನಿಕ್‍ಳ್ಯಜಾನ್ ಬೇಜೂನುಹುಯಿನ್ ಪಾಪ್ನ ಜ಼ಣಸ್. ಪಾಪ್ ಪೂರಹುಯಿನ್ ಭಡೀನ್ ಇನಪಾರ್ ಮರಣ್‍ಲ್ಯವಾಸ್.
\p
\v 16 ಮಾರ ಪ್ಯಾರ್‌ನ ಭೈಯೇ ಬೇನೆವೋ, ಆ ವಿಚಾರ‍್ನಿ ಬಾರೇಮ ಧೋಕ ನಕೊ ಖಾವೊ. 
\v 17 ಖ್ಹಾರೂಸ್ ಅಛ಼್ಛು ತೋಫಬಿ, ಪೂರಹುಯುತೆ ಖ್ಹಾರೂಸ್ ವರಾಬಿ ಉಪ್ಪರ್‌ಥು ಆಯು ಹುಯುಸ್, ಯೋಖ್ಹಾರು ಪರಲೋಕನೊ ಉಜಾ಼ಳನೊ ಬಾಥೀಸ್ ಉತ್ರಿಆವಸ್. ದೇವ್ ಛಾ಼ಳನಿತರ ಬದ್ಲಿಜಾವಾಳೊಬಿ ಕಾಹೆ, ಚ಼ಲ್‍ಪ್ಲಾಟಿನೊ ಖ್ಹಾಯಲ್‍ನೋಬಿ ಕಾಹೆ. 
\v 18 ದೇವ್ ಇನಿ ಅಛ್ಛಿ ಖ್ಹೂಜ಼್‌ನಿ ಪರಕ್ಮ ಖ್ಹಾಚಿವಚನ್‍ಥಿ ಅಪ್ಣುನ ಜಾನ್‍ದೀರಾಖ್ಯೊತೆ ಇನಖ್ಹಾಜೆ ಅಪ್ಣೆ ಇನಿ ಖ್ಹಾರಿಸ್ ಉಬ್‌ಜಾ಼ವ್ಣಿಮ ಫಹಿಲಫಲ್‍ ಹುಯಿರ‍್ಹಾಸ್.
\s ವಚನ್ನಿತರ ಖ್ಹಮ್‍ಜಾ಼ನು ಅಜು಼ ಕರಾನು
\p
\v 19 ಮಾರ ಪ್ಯಾರ್‌ನ ಭೈಯೇ ಭೇನೆವೊ ತುಮೆ ಅನ ಅಛ್ಛಿನಿತರ ಮಾಲುಮ್ ಕರ‍್ಲೆವೊ, ಹರೇಕ್‍ಜ಼ಣುಬಿ ಖ್ಹಮ್‍ಜಾ಼ಮ ಚಾ಼ತುರ್‌ರ‍್ಹೀನ್, ವಾತ್‍ಬೋಲಾಮ ಅಜು಼ ಇರಾದೊ ಕರಾಮ ಖ್ಹಮಾಳಿರ‍್ಹೆವೊ. 
\v 20 ಶನಕತೊ ಅದ್ಮಿನೊ ಇರಾದೊ ದೇವ್ ಆಖ್ಹ್‌ಕರಸ್ತೆ ನೀತಿನು ಕಾಮ್‌ಖ್ಹಾರು ಕರಾನ ಹೋಯಿಕೊಯ್ನಿ. 
\v 21 ಇನಾಖ್ಹಾಜೆ ಖ್ಹಾರೂಸ್ ಗಲೀಜ್‍಼ಕಾಮ್‍ನಾಬಿ ಅಖ್ಖು ಖರಾಬ್ ಫನೈನಾಬಿ ಕಾಡಿನಾಖಿನ್ ತುಮಾರಮ ಜ಼ಡ್‍ಗಾಠಿರಾಖ್ಯುತೆ ವಚನ್ನ ಮುಡ್‌ಕ್ಯು ಝು಼ಕೈನ್‌ ಸ್ವಿಕಾರ್‌ಕರೊ. ಯೋ ತುಮಾರ ಆತ್ಮನ ರಕ್ಷಣೆಕರಾನ ಶಕತ್‌ವಾಳು ಹುಯಿರ‍್ಹಿಶೆ. 
\v 22 ತುಮೆ ವಚನ್ನಿ ಪರಕ್‍ ಚಾ಼ಲಿಲ್ಯಾವಾಳ ಹುಯಿ‍ರ‍್ಹೆವೊ. ಇನ ಖಲಿ ಖ್ಹಮ್‍ಜಾ಼ವಾಳ ಹುಯಿರ‍್ಹಿನ್ ತುಮಾರು ತುಮೇಸ್ ಧೋಕ ಕರಿಲೇವೊನಕೊ. 
\v 23 ಶನಕತೊ ಕೋಣ್‌ತೋಬಿ ವಚನ್‍ ಖ್ಹಮ್‌ಜಾ಼ವಾಳು ಹುಯಿರ‍್ಹಿನ್ ಇನಿಪರಕ್ ಚಾ಼ಲ್ಯುನಾತೊ ಯೋ ಐನಾಮ ಇನು ಪೈದಾಖ್ಹ್‌ನು ಮ್ಹೋಡು ದೇಖಾವಾಳ ಅದ್ಮಿನಿತರ ಹುಯಿರ‍್ಹಿಶೆ. 
\v 24 ಶನಕತೊ ಆ, ಇನ ದೇಖಿಲಿನ್ ಜೈ಼ನ್ ಮೇ ಅಮ್ ಛೂ಼ಕರಿ ಬೋಲಾನು ಯೋಸ್‍ ಘಡೀಮ ಬೈಕಿಜಾ಼ಸ್. 
\v 25 ಕತೋಬಿ ಛುಟ್ಕಾರ್ ದ್ಯಾವಾಳು ಅಖ್ಖುಪೂರ ಹುಯಿರ‍್ಹುತೆ, ಧರ್ಮಶಾಸ್ತ್ರನ ದಿಮಾಕ್‍ಲಗಾಡಿ ಫಡೀನ್ ಬಿಜೂ಼ಬಿ ಖ್ಹಯಾಲ್ ಕರಿನ್ ಇನಿನಿತರ ಚಾ಼ಲವಾಳೊ ವಚನ್ನ ಖ್ಹಮ್‌ಜಿನ್‌ ಭೈಕಿ ನಾ ಜಾ಼ವ್ಣುತೆ ಯೋ ಪರಕ್ಮ ಇನ ಕಾಮ್‍ಥಿ ಧನ್ಯಹುಯಿರ‍್ಹಿಶೆ. 
\v 26 ತುಮಾರಮ ಮೆ ಅಛ್ಛೊ಼ಭಕ್ತಕರಿ ಬೋಲಿಲ್ಯಾವಾಳೊ ಕೋಣ್‌ತೋಬಿ ಇನಿ ಜೀಬ್‌ನ ಲಗಾಮ್‌ ನಾ ಘಾಲಿನ್ ಇನ ದಿಲ್ನ ಧೋಕ ಕರವಾಳೊರ‍್ಹಿಯೋತೊ ಇನಿ ಭಕ್ತಿ ಬಿಣ್‌ಫಾಯಿದಾನು ಹುಯಿರ್‍ಹೊಸ್. 
\v 27 ವದೇಖ್ಹ್‌ಮ ಪಡ್ಯುರ‍್ಹಿನ್ ದಿಕ್‍ಕೊಂತೆ ಇವ್ಣುನಾಬಿ ಮುಂಡಚ್ಚಿಯೇನಾಬಿ ಬಚಾ಼ಡಿನ್ ಇನ ಜಗತ್‌ನು ದೋಷ್‍ ನಾಲಗ್ನುತೆ ಇನುಯೋಸ್ ಬಚಾ಼ಡಿಲ್ಯಾವನುಸ್ ಬಾ ಹುಯಿರೋತೆ ದೇವ್‌ಕನ ಶುದ್ಧಬಿ ಪಾಕ್‍ಬಿ ಹುಯಿರ‍್ಹವಾನಿ ಭಕ್ತಿ.
\c 2
\s ಪಕ್ಷಪಾತನಿ ವಿರೋದ್‌ ಝೇತಾವ್ಣಿ
\p
\v 1 ಮಾರ ಭೇನೆ ಭೈಯೇವೊ ಮಹಿಮೆಮ ರ‍್ಹವಾಳೊ ಅಪ್ಣೊ ಪ್ರಭು ಹುಯಿರೋತೆ ಯೇಸುಕ್ರಿಸ್ತಮ ವಿಶ್ವಾಸಿ ಹುಯಿರಾತೆ ತುಮಾರಮ ಬೇದ್‌ಭಾವ್‌ ನಾರ‍್ಹೇವ್ಣು. 
\v 2 ಏಕ್‌ ವೇಳ್ಮ ಶೌಕಾರ್ ಅದ್ಮಿ ಖ್ಹೊನ್ನಾನಿ ಅಂಗುಠಿನಾಬಿ ಶನ್‍ಗಾರ‍್ನು ಲುಂಗ್ಡು ಫೇರಿಲಿನ್ ತುಮಾರಿ ಸಬೆಮ ಆಯುತೊ ಅಜು಼ ಏಕ್‍ಗರೀಬ್ ಅದ್ಮಿ ಫಾಟು ಲುಂಗ್ಡು ಪೇರ‍್ಹಿಲಿನ್ ಆಯೂತೆ, 
\v 3 ತುಮೆ ಅಛ಼್ಛ ಲುಂಗ್ಡು ಪೇರ‍್ಹಿರಾಖವಾಳನ ಮರ್ಯಾದಿ ಕರೀನ್ ಇನ “ತೂ ಹಿಜ್ಜಾ಼ನಿ ಆ ಅಛ್ಛಿ ಝ಼ಗೋಪರ್ ಬೇಖ್ಹ್‌” ಕರೀಬಿ, ಯೋ ಗರೀಬ್‌ನ, “ತು ಹಿಜ಼್ಜ ಭೀರೆ ನತರ್ ಹಜ಼್ಜ ಮಾರ ಗೋಡ ಮ್ಹೇಲಾನ ರಚ್ಚಾ಼ಕನ ಬೇಖ್ಹ್‌” ಕರೀಬಿ ಬೋಲ್ಯುತೊ, 
\v 4 ತುಮೆ ತುಮಾರಮಸ್ ಗುಮಾನಿ ಕರೋಸ್ ಆ ನಾಹುಯಿನ್ ತುಮೆ ಕರಸ್ತೆ ನ್ಯಾವ್‍ನಿ ತೀರ್ಪ್ ಗಲತ್‌ ಖ್ಹಯಾಲ್ನು ಹುಯಿರ‍್ಹುಸ್. 
\v 5 ಮಾರ ಪ್ಯಾರ್‌ನ ಭೈಯೇ ಭೇನೆವೊ ಖ್ಹಮ್‍ಜೊ ದೇವ್ ಆ ಜಗತ್‌ನು ಗರೀಬ್‌ನ ವಿಶ್ವಾಸ್‌ಮ ಶೌಕಾರ್ ಬಣೈನ್‍ಬಿ ಇನ ಪ್ಯಾರ್ ಕರಾವಾಳನ ದೇವ್ನೆ ವಾಗ್ದಾನ್ ಕರ‍್ಯೊತೆ ರಾಜ್ಯನ ಭಾದ್ಯ ಬಣೈನ್‍ಬಿ ರ‍್ಹೇವ್ಣುಕರಿ ಚೂ಼ಣಿಲಿದೊ ಕೊಯ್ನಿಕಿಶು? 
\v 6 ಕತೋಬಿ ತುಮೆತೋ ಗರೀಬ್‌ನ ಖ್ಹರಮ್‌ ಕಾಡಿನಾಖಿದಿದ. ತುಮುನ ಖ್ಹತೈನ್ ನ್ಯಾವ್‍ನಿ ಝ಼ಗೋನ ಖ್ಹಾಮ್ಣೆ ಖೇಚಿಲೀಜಾ಼ವಾಳ ಶೌಕಾರ್ ಕಾಹೆಕಿಶು? 
\v 7 ತುಮೆ ಬೋಲಸ್ತೆ, ಯೋ ಮಹಾನ್ ನಾಮ್ನ ದೂಷಣೆ ಕರಾವಾಳು ಇವ್ಣೆಸ್ ಕಾಹೇಕಿಶು? 
\v 8 ಕತೋಬಿ ಧರ್ಮಶಾಸ್ತ್ರಮ ಛಾ಼ತೆ, “ತಾರ ಭೀಡೆವಾಳನ ತಾರಿನಿತರಸ್‍ ಪ್ಯಾರ್ ಕರ‍್ನು!” ಕರಿ ಬೋಲಾನು ರಾಜ಼ನಿ ಹುಕುಮ್‌ನ ಚ಼ಲಾವವಾಳ ಹುಯಿರ‍್ಹಾತೊ ತುಮೆ ಅಛ಼್ಛು ಕರಾವಾಳ ಹುಯಿರ‍್ಹಿಶು. 
\v 9 ತುಮೆ ಅಶಿಲ್‌ಕಮ್‌ಶಿಲ್‌ಕರಿ ಬೋಲವಾಳ ಹುಯಿರ‍್ಹಾತೊ ಪಾಪ್ ಕರಾವಾಳ ಹುಯಿರ‍್ಹಿನ್ ಅಪರಾದಿಕರಿ ಧರ್ಮಶಾಸ್ತ್ರನಿ ಪರಕ್ಮ ಫೇಡ್‍ ಲೀಲಿಶು. 
\v 10 ಶನಕತೊ ಕೋಣ್‍ತೋಬಿ ಧರ್ಮಶಾಸ್ತ್ರನಸ್ ಪಾಡಿಚಾ಼ಲಿನ್ ಏಕ್‍ನು ಎಕ್ಕಸ್ ವಾತ್ಮ ಗಲತ್‌ ಹುಯಿಗಯುತೊ ಅಥ್ರಾನವಾಳು ಅಖ್ಖೀಸ್ ಬಾರೆಮಾಬಿ ಅಪರಾದಿ ಹುಯಿರ‍್ಹೆಸ್. 
\v 11 ಶನಕತೊ ವ್ಯಬಿಚಾರ್ ನಕೊಕರ್ ಕರಿ ಬೋಲ್ಯೊ ಹುಯೊ ದೇವಸ್ ಅದ್ಮಿನ ಖೂನಿ ನಕೊಹು ಕರೀಬಿ ಬೋಲ್ಯೊ. ಇನಖ್ಹಾಜೆ ತೂ ವ್ಯಬಿಚಾರ್ ನಾ ಕರ‍್ಯೊತೋಬಿ ಖೂನ್ ಕರಿನಾಖ್ಯೊತೊ ಧರ್ಮಶಾಸ್ತ್ರನ ಮೀರಿನ್ ಚಾ಼ಲವಾಳೊ ಹುಯೊ. 
\v 12 ಛುಟ್ಕಾರ್ ದ್ಯಾವಾಳು ಧರ್ಮಶಾಸ್ತ್ರನಿ ಪರಕ್ಮ ತುಮೆ ತೀರ್ಪ್‌ ಲೀಲ್ಯಾವಾಳನ ಬರೊಬರ್‌ಥಿ ವಾತ್‍ಬೋಲೊ ಅಜು಼ ವಿಧೇಯ ಹುವೊ 
\v 13 ಶನಕತೊ ಗೋರ್‌ಕರಾಕೊಂತೆ ರ‍್ಹವಾಳಾನ ನ್ಯಾವ್‍ನಿ ತೀರ್ಪ್‌ಮ ಗೋರ್‌ ವತಾಳ್‌ಶೆ ಕೊಯ್ನಿ. ಗೋರ್‌ ನ್ಯಾವ್‍ನಿ ತೀರ್ಪ್‌ನಾಸ್‌ ಜಿತಿಲಿಶೆ.
\s ವಿಶ್ವಾಸ್ ಅಜು಼ ಕಾಮ್
\p
\v 14 ಮಾರ ಭೈಯೇ ಭೇನೆವೊ. ಏಕ್‍ಜ಼ಣೊ ಮನ ವಿಶ್ವಾಸ್‍ಛಾ಼ ಕರಿ ಬೋಲಿನ್ ಕಾಮ್ಮ ನಾರ‍್ಹಯೊತೊ ಶನೊ ಫಾಯಿದೊ? ಎಥ್ರಾನಿ ವಿಶ್ವಾಸ್ ಇನ ಬಚಾ಼ಡ್‌ಶೆ ಕಿಶು? 
\v 15 ಏಕ್‌ ವೇಳ್ ತುಮಾರೊ ಏಕ್‍ ಭೈ ನತರ್ ಏಕ್‍ ಭೇನ್ನ ಫೇರಾನ ಲುಂಗ್ಡು ಅಜು಼ ಯೋ ದನ್ನು ಖಾಣುಬಿ ನಾರ‍್ಹವಾಪರ್; 
\v 16 ತುಮಾರಮ ಎಕ್‍ಜ಼ಣೊ ಇವ್ಣುನ ಶರೀರ್‌ನ ಹೋಣುತೆ ಯೋ ನಾದೀನ್‍, “ಸಮಾಧಾನ್‌ಥಿ ಜಾ಼ವೊ, ಆಗ್ ಶೇಕಿಲೆವೊ, ಪೇಟ್‍ಭರಿಖಾವೊ” ಕರಿ ಬೋಲ್ಯುತೊ ಶನೊ ಫಾಯಿದೊ? 
\v 17 ಇಮ್ಮಸ್ ಕಾಮ್ಮಕೊಂತೆ ವಿಶ್ವಾಸ್ ಜಾನ್‌ ಕೊಂತೆ ಹುಯಿರ‍್ಹುಸ್.
\p
\v 18 ಕತೋಬಿ ಥೋಡು ಜ಼ಣು, “ತುನ ವಿಶ್ವಾಸ್ ಛಾ಼, ಅಜು಼ ಮಾರಮ ಕಾಮ್ ಛಾ಼ ತೂ ಕಾಮ್ಮ ಕೊಂತೆ ತಾರಿ ವಿಶ್ವಾಸ್‌ನ ಮನ ವತಾಳ್. ಮೇ ಮಾರ ಕಾಮ್‍ಥಿ ಮಾರ ವಿಶ್ವಾಸ್‌ನ ವತಾಳುಸ್‌!” ಕರಿ ಬೋಲೆಜಾ಼ಯ್ನಿ. 
\v 19 ದೇವ್ ಎಕ್ಕಸ್‍ಜ಼ಣೊ ಕರಿ ಯೋ ವಿಶ್ವಾಸ್ ಕರಸ್, ಯೋ ಅಛ್ಛು಼ಸ್‍. ಕತೋಬಿ ಶೈತಾನ್‍ಬಿ ಇಮ್ಮಸ್ ವಿಶ್ವಾಸ್ ಕರೀನ್ ಡರ್‌ಥಿ ಕಾಪಸ್. 
\v 20 ಅಲಾ ಬಿಣ್‍ಅಕ್ಲಿ! ಕಾಮ್‍ಕೊಂತೆ ವಿಶ್ವಾಸ್ ಫಾಯಿದೊಕೊಂತೆ ಕರಿ ತುನ ವತಾಳ್‍ನುಕಿ ಶು? 
\v 21 ಅಪ್ಣೊ ಗುರುಗುರುಬ್‍ಲ್ಯೊ ಹುಯಿರೋತೆ ಅಬ್ರಹಾಮ್‌ನೊ ಛೀಯ್ಯೊ ಇಸಾಕನ ಬಲಿಪೀಠ್‌ನ ಉಪ್ಪರ್ ಛ಼ಡಾವಾನಿ ವಖ್ಹ್‌ತೆ ನೀತಿನು ತೀರ್ಪ್‌ನ ಲೀಲಿದೋತೆ ವಿಶ್ವಾಸ್‌ನ ಕಾಮ್‌ಥೀಸ್‌ ಕಾಹೆಕಿ ಶು? 
\v 22 ಇನಿ ವಿಶ್ವಾಸ್ ಕಾಮ್ನಿಜೋ಼ಡ್ಮ ಚಾ಼ಲ್ಯು ಅಜು಼ ಯೋ ಕಾಮ್‌ಥಿಸ್ ಇನಿ ವಿಶ್ವಾಸ್‌ನಿ ಖ್ಹಯಾಲ್ ಚಾ಼ಲಿಗಿ ಕರಿ ದೇಖೆಸ್‍ನಿ? 
\v 23 ಇನಖ್ಹಾಜೇಸ್ ಅಬ್ರಹಾಮ್‌ನೆ ದೇವ್ನ ವಿಶ್ವಾಸ್ ಕರ‍್ಯೊ ಅಜು಼ ಯೋ ವಿಶ್ವಾಸ್ ಇನಿ ಗಣ್ತಿಮ ನೀತಿಕರಿ ಚೂ಼ಣೈಗು ಕರಿ ಬೋಲನಿ ಧರ್ಮಶಾಸ್ತ್ರನಿ ವಾತ್ ಅಮ್‍ ಪೂರಹುಯು ಇನಖ್ಹಾಜೆ ಅಬ್ರಹಾಮ್ ದೇವ್‌ನೊ ದೋಸ್ತಿಕರಿ ಬೋಲೈಲಿದೊ. 
\v 24 ಅಮ್‍ ಅದ್ಮಿ ಚಾ಼ಲ್‌ಥಿ, ಕಾಮ್‍ಥಿ ನೀತಿವಾಳೊಕರಿ ಖ್ಹಣೇದ್‍ಮ ಆವಸ್ ಪಣ್ಕಿ ಖಲಿ ವಿಶ್ವಾಸ್‍ಥಿ ಕಾಹೆ ಕರಿ ದೇಖೊಸ್‍. 
\v 25 ಇಮ್ನಿಸ್ ಪರಕ್ಮ ವ್ಯಬಿಚಾರಿಣಿ ರಾಹಾಬ ಜಿನು ಇನ ಘರ್‌ಮ ಹಾಲಿಹುಮಾಲಿಯೆವ್ನ ಮಳೈಲೀನ್‍ ಅಲಕ್‍ ವಾಟ್‍ಥಿ ಇವ್ಣುನ ಮೋಕ್ಲಿತೆ ಕಾಮ್‌ಥೀಸ್‌ ನೀತಿವಾಳಿ ಕರಿ ತೀರ್ಮಾನ್ ಲೀಲಿದಿ ಕೊಯ್ನಿಕಿಶು? 
\v 26 ಆತ್ಮಕೊಂತೆ ಶರೀರ್ ಮರಿಹುಯು ಹುಯಿರ‍್ಹವಾನಿ ಪರಕ್ಮಸ್ ಕಾಮ್‍ಕೊಂತೆ ವಿಶ್ವಾಸ್‍ಬಿ ಮರ‍್ಯುಹುಯುಸ್‌.
\c 3
\s ಜೀಬ್
\p
\v 1 ಮಾರ ಭೈಯೇ ಭೇನೆವೊ. ಖ್ಹಾರುಸ್ಜ಼ಣು ಶಿಕಾಡನ ಉತ್ವಾಳಿ ನಕೊಕರೊ, ಶಿಕಾಡವಾಳ ಹುಯಿರ‍್ಹಾತೆ ಅಪ್ಣೆ ಅಲಕ್‍ ಜ಼ಣೆಥೀಬಿ ಘಣಿ ನ್ಯಾಯತೀರ್ಪ್‌ನ ಶುಶತ್ಉಶು. 
\v 2 ಶನಕತೊ ಕೈಯೇಕ್ ವಾತೇಮ ಅಪ್ಣೆ ಖ್ಹಾರೂಸ್ ಗಲತ್‌ಹುಯಿ ಜೈ಼ಯೇಸ್‍. ಏಕ್‍ಜ಼ಣೊ ವಾತ್ಮ ಗಲತ್‌ ನಾಹುಯೋತೊ ಯೊ ಇನ ಪೂರ ಶರೀರ್‌ಮ ಚ಼ಪ್ಪಣ್‌ಮ ರಾಖನ ಯೊ ಶಕತ್‌ವಾಳೊ ಹುಯಿರ್‍ಹೊಸ್. 
\v 3 ಹಂದೇಖೊ ಘೋಡೊಖ್ಹಾರು ಅಪ್ಣಿ ಚ಼ಪ್ಪಣ್‌ಮ ಚಾ಼ಲನಿತರ ಯೋ ಅಖ್ಖಾನ ಮ್ಹೋಡಾನ ಲಗಾಮ್‌ ಘಾಲಿಯೆಸ್, ತದೆ ಇನ ಅಖ್ಖಯೇಕ್‌ ಶರೀರ್‌ನಾಸ್‍ ಅಪ್ಣುನ ಹೋಣುತೆ ಬಾಜು಼ ಫರಾಯೆಜಾ಼ಯ್. 
\v 4 ಜ಼ಹಾಜ಼್‌ನ ಜಿನು ದೇಖೊ. ಯೋಖ್ಹಾರು ಘಣು ಮೋಟು ರ‍್ಹಯುತೋಬಿ ತೋಫಾನ್ ವ್ಹಯಿರೆಥಿ ರುಕ್‍ ಬದ್ಲಿಜಾ಼ಸ್. ಕತೋಬಿ ಚ಼ಲಾವವಾಳೊ ಘಣು ನ್ಹಾನು ಚುಕ್ಕಾಣಿಥಿ ಯೋಖ್ಹಾರಾನ ಯೋ ಜಾ಼ವ್ಣುತೆ ಬಾಜು಼ ಫರೈಲೇಸ್. 
\v 5 ಇಮ್ಮಸ್ ಜೀಬ್‍ ಜಿನುಬಿ ನ್ಹಾನು ಖ್ಹಂದೊ ರ‍್ಹಯುತೋಬಿ ಮೋಟ ಕಾಮ್ನು ಬಡೈಮಾರಿನ್‍ ಕಂಡಿ ಚ಼ಢೈಲೇಸ್‍. ಆಗ್‍ನಿ ನ್ಹಾನಿ ಚಿನ್‍ಗಾರಿ ಮೋಟಿ ಝಾ಼ಡಿನಸ್ ಬಾಳಿನಾಖಸ್. 
\v 6 ಜೀಬ್‍ಬಿ, ಆಗ್‍ನಿ ಚಿನ್‍ಗಾರಿನಿತರಾಸ್‌. ಯೋ ಖರಾಬ್ ಜಗತ್‌ನು ಖ್ಹಣೇದ್ ಹುಯಿನ್ ಅಪ್ಣ ಖ್ಹಂದಾವ್‌ನ ಇಚ಼್‌ಮ ರ‍್ಹೀನ್ ಅಖ್ಖಾಏಕ್ ಶರೀರ್‌ನ‍ ಮೈಲು ಕರಸ್. ಇನು ಯೋಸ್ ನರಕನಿ ಆಗ್ನಲಗಾಡಿಲಿನ್ ಯೋ ಅಖ್ಖಿ ಜಿ಼ಂದಗೀನಸ್ ಆಗ್‍ಲಗಾಡಸ್. 
\v 7 ಹರೇಕ್ ಜಾ಼ತ್ನು ಜೀನ್ ಜಿನಾವರ್‌ನಾಬಿ ವ್ಹವವಾಳು ಕೀಡ್‌ಕಮ್ಟನಾಬಿ, ಪಾಣಿನುಜಾನ್ವಾರ್‌ನಾಬಿ ಅದ್ಮಿ ಚ಼ಪ್ಪಣೆಮ ಲಾಯೆಜಾ಼ಯಿ ಅಜು಼ ಲೈರಾಖ್ಯೂಸ್‍ಬಿ. 
\v 8 ಕತೋಬಿ ಜೀಬ್‌ನ ಕೆಹೊ ಅದಮ್‍ಜ಼ಮಾನೋಬಿ ಚ಼ಪ್ಪಣೆಮ ಲ್ಯಾವಕೊಯ್ನಿ. ಯೋ ಚ಼ಪ್ಪಣ್‌ಮ ಆವಾಕೊಂತೆ ಕೇಡ್‍ಹುಯಿರ‍್ಹೂಸ್‍ ಮರಣ್ಣ ಝಾರ್‌ಥಿ ಭರೈರ‍್ಹೂಸ್. 
\v 9 ಯೋಸ್ ಜೀಬ್‍ಥಿ ಪ್ರಭು ಬಾಹುಯಿರೋತೆ ದೇವ್ನ ಧನ್ಯವಾದ್ ಕರಿಯೇಸ್, ಇನೀನಿಘೋಣಿನಿತರಸ್‍ ಉಬ್ಜಿಗಯುತೆ ಅದ್ಮೆವ್‍ನ ಅಪ್ಣೆ ಶಾಪ್‍ದಿಯೇಸ್. 
\v 10 ಯೋಸ್‍ ಮ್ಹೋಡೇಥಿ ಧನ್ಯವಾದ್ ಅಜು಼ ಗಾಳೆ ಭೇಬಿ ಆವಸ್. ಮಾರ ಭೈಯೇ ಭೇನೆವೊ, ಅಮ್‍ ನಾರ‍್ಹೇವ್ಣು. 
\v 11 ಎಕ್ಕಸ್ ಚೇಜ಼್‌ಭಾರೇಥಿ ಮಿಠ್ಠು ಪಾಣಿ ಅಜು಼ ಕಡುಪಾಣಿ ಭೇಬಿ ನಿಕಳ್‍ಶೆಕಿ ಶು? 
\v 12 ಮಾರ ಭೈಯೇ ಭೇನೆವೊ, ಅಂಜೀರ್‌ನು ಝಾ಼ಡು ಓಲಿವ್ ಝಾ಼ಡಾನು ಪಂಡು ಮ್ಹೇಲ್‌ಶೇಕಿ ಶು? ದ್ರಾಕ್ಷಿನ ವೇಲಮ ಅಂಜೀರ್‌ ಮಳ್‍ಶೆಕಿ ಶು? ಇಮ್ಮಸ್ ಕೆಹೊ ಚೇಜ಼್‌ಭಾರೋಬಿ ಖಾರುಪಾಣಿನಾಬಿ ಮಿಠ್ಠು ಪಾಣಿನಾಬಿ ಕೋದಿಶೇನಿ.\fig ಘೊಡಪರ‍್ನೊ ಸವಾರಿ|alt="Rider on a horse" src="lb00035c.tif" size="col" copy="Horace Knowles ©" ref="3:3"\fig*
\s ಉಪ್ಪರ್‌ಥಿ ಆಯುತೆ ಅಕ್ಕಲ್
\p
\v 13 ತುಮಾರಮ ಗ್ಯಾನೀಬಿ ಅಕ್ಲೀಬಿ ಕೋಣ್? ಅಥ್ರಾನವಾಳು ಅಛ್ಛಿ ಚಾ಼ಲ್‌ಥಿ ಸಮಾಧನ್ನಾ ಕಾಮ್‍ಥಿ ಜಿವಿನ್ ವತಾಳದೆ. 
\v 14 ಕತೋಬಿ ತುಮಾರ ದಿಲ್ಮ ಬಳಾಪೊ, ಕಡ್‍ವೈ ಅಜು಼ ನಿಕ್‍ಳ್ಯೊಜಾನ್ ರಾಖಿನ್ ಅಕ್ಲಿಕರಿ ಖ್ಹಾಚ಼ನ ವಿರೋದ್‌ ಝೂ಼ಟಿ ಬೋಲಿನ್ ಕಂಡಿಛ಼ಡಾವೊ ನಕೊ. 
\v 15 ಯೋ ಉಪ್ಪರ್‌ಥು ಆಯಾತೆ ಗ್ಯಾನ್‍ಕಾಹೆ. ಯೋ ಜ಼ಮೀನ್‍ನಸಂಬಂದ್‍ ಪಡ್ಯುಹುಯು, ಲೋಕ್ನಿಖ್ಹಯೆಲ್ನು ಅಜು಼ ಭೂತ್‌ನ ಸಂಬಂದ್ ಪಡ್ಯುಹುಯು. 
\v 16 ಶನಕತೊ ಪೇಟ್ನೊ ಬಳಾಪೊಬಿ ವಹೇರ್‌ಬಿ ರ‍್ಹೆಯಿತೆ ಬಾಜು಼ ಕಲಾವ್ಣಿಬಿ ಖ್ಹಾರೀಸ್‍ ಥರಾನು ಖರಾಬ್ ಕಾಮ್‍ಬಿ ರ‍್ಹೇಸ್. 
\v 17 ಕತೋಬಿ ದೇವ್‍ಥಿ ಆವಾನಿ ಗ್ಯಾನ್ ಪಹಿಲೆ ಪರಿಶುದ್ ಹುಯಿರ‍್ಹವಾಳು ಇನಪಾರ್ ಸಮಾಧಾನ್‍ವಾಳು, ಶೇದೇವ್‌ ಹುಯಿರ‍್ಹವಾಳು, ವಿಧೇಯ ರ‍್ಹವಾಳುಬಿ, ಗೋರ್‌ಥೀಬಿ ಅಜು಼ ಅಛ್ಛಿ಼ಫಲ್‍ಥೀಬಿ ಭರೈರ‍್ಹವಾಳು, ಶುದ್ಧಮನ್‌ಥಿ ಬೋಲವಾಳು, ಖ್ಹಾಚು಼ ಬೋಲವಾಳುಕರಿ ಖುಷಿಥಿ ಮಾನಿಲ್ಯಾವನು ಹುಯಿರ‍್ಹುಸ್. 
\v 18 ಸಮಾಧಾನ್‍ ಕರಾವಾಳು ಸಮಾಧಾನ್‍ಕರಿ ಬೋಲಾನು ದಾಣಾನ ಗಾಡಿನ್ ನೀತಿಕರಿ ಬೋಲಾನು ಫಲ್ನ ವ್ಹಾಡಸ್.
\c 4
\s ಜಗತ್ನ ಜೋ಼ಡೆ ದೋಸ್ತಿ
\p
\v 1 ತುಮಾರಮ ಲಡೈ ಝ಼ಗ್‌ಡೊಖ್ಹಾರು ಕಿಜ್ಜಾ಼ಥು ಆವಸ್? ತುಮಾರ ದಿಲ್‌ದಿಮಾಕ್‍ಮ ಲಡಾತೆ ಲಾಲ್‍ಛಿಥೀಸ್‍ ಕಾಹೇಕಿಶು? 
\v 2 ತುಮೆ ಹರಖ್ಹ್‌ಯತೋಬಿ ಲೀದಾಕೊಯ್ನಿತೇಸ್ ಛಾ಼. ತುಮೆ ಖೂನಿ ಕರ‍್ಯತೋಬಿ. ಪೇಟ್ನ ಬಳಾಪೊ ಕರ‍್ಯತೋಬಿ ಅಖ್ಹ್‌ಕರ‍್ಯಹುಯನ ಕಮೈಲೆಯಿಕೊಯ್ನಿ; ತುಮೆ ಲಡೈ ಪಡೋಸ್‍, ಜಂಗ್ ಭಿಡೋಸ್‍. ಕತೋಬಿ ತುಮೆ ದೇವ್ನ ಬಿಂತಿ ಕರೆಲೇಯಿಕೊಂತೆ ಇನಟೇಕೆ ತುಮುನ ಶಾತ್ಬಿ ಮಳಕೊಯ್ನಿ. 
\v 3 ಬಿಂತಿ ಕರಿಲಿದತೋಬಿ ಯೋ ತುಮುನ ಮಳಕೊಯ್ನಿ. ಶನಕತೊ ತುಮಾರಿ ಬಿಂತಿ ಖರಾಬ್ ಖ್ಹೂಜ್‍ನು ಹುಯಿರ‍್ಹೆಸ್. ಭೋಗ್ನಿ ಆಖ್ಹ್‌ನ ಚ಼ಲೈಲ್ಯಾವನು ತುಮಾರಿ ಶುಶತ್ ಹುಯಿರ‍್ಹೆಸ್. 
\v 4 ವಿಶ್ವಾಸ್‌ಕೊಂತೆ ಅದ್ಮಿವೊ, ಜಗತ್ನಿ ಜೋ಼ಡ್ಮ ದೋಸ್ತಿಕರಾನು ದೇವ್ನ ವಹೇರ್‌ ಕರಾನು ಕರಿ ತುಮುನ ಮಾಲುಮ್ ಕೊಯ್ನಿಕಿ ಶು? ಇನಖ್ಹಾಜೆ ಜಗತ್ನ ದೋಸ್ತಿಹುಯಿರ‍್ಹೆವುಸ್‌ ಕರಿ ಬೋಲಿಲ್ಯಾವಾಳೊ ಇನುಯೋಸ್ ದೇವ್ನ ವಿರೋದಿ ಬಣೈಲೆಸ್. 
\v 5 ಆನಾಹುಯಿನ್ ಹಮಾರಮ ಜಿವ್‌ಕರಾಸ್ತೆ ಆತ್ಮನ “ಘಣಿ ಆಖ್ಹ್‌ಥಿ ಹೋಣುಕರಿ ಹರ್‌ಖ್ಹುಕರುಸ್ ಕರಿ ಬೋಲಾನು ವಚನ್ನಿ ಖಾಲಿ ವಾತ್‍ಕರಿ ಲಾಝೊ಼ಸ್‍ಕಿ ಶು? 
\v 6 ಯೋ ಅಪ್ಣುನ ಘಣೇಥಿ ವಾರ್ಖ್ಹಾನ ದೇಸ್. ಇನಖ್ಹಾಜೇಥಿ, ದೇವ್ ಹಂಕಾರಿಯೆವ್‍ನ ವಹೇರ್‌ಕರಸ್. ಗೋರ್‌ ಗರಿಬ್‍ನತೋಬಿ ವಾರ್‌ಖ್ಹೊ ದೇಸ್‌ಕರಿ ಪವಿತ್ರ ದಪ್ತರ್‌ಮ ಬೋಲಸ್. 
\v 7 ಅಮ್‌ರ‍್ಹವಾಪರ್ ದೇವ್ನ ಅಧೀನ್‌ಹುಯಿನ್ ಶೈತಾನ್ನ ಡರಾವೊ ತದೆ ಯೋ ತುಮುನ ಮ್ಹೇಲಿನ್ ಮಿಲೈನ್‌ ಜಾ಼ಶೆ. 
\v 8 ದೇವ್ನ ಖನ್ನೆಆವೊ, ತದೆ ಯೋ ತುಮಾರ ಖನ್ನೆ ಆವ್‌ಶೆ. ಪಾಪಿವೊ, ತುಮಾರ ಹಾತ್ನ ಧೊಯ್‍ಲೆವೊ ಬೇ ದಿಲ್‌ವಾಳವೊ ತುಮಾರ ದಿಲ್ನ ಪಾಕ್‌ಕರ‍್ಲೆವೊ 
\v 9 ದುಖ್‌ಕರೊ ರದ್‍ನ್ಯಕರೊ ಆಂಝು಼ ನಾಖೊ. ಹಾಖ್ಹಾನು ಮ್ಹೇಲಿನ್ ಅಂದ್ರೋಖ್ಹ್‌ ಕರೊ; ಖ್ಹುಶಿನ ಮ್ಹೇಲಿನ್ ದಿಲ್‌ ದುಖೈಲ್ಯವಾಳ ಹುಯಿ‍ರ‍್ಹೆವೊ. 
\v 10 ಪ್ರಭುನ ಖ್ಹಾಮ್ಣೆ ತುಮುನ ಝು಼ಕೈಲೆವೊ ತದೆ ಯೋ ತುಮುನ ಉಪ್ಪರ್ ಪಾಡ್‍ಶೆ.
\s ವಿಶ್ವಾಸಿ ಅದ್ಮಿನಿ ವಿರೋದ್ ನ್ಯಾವ್‍ನಿ ತೀರ್ಪ್‌ಕರಾನಿ ಬಾರೇಮ ಝೇತಾವ್ಣಿ
\p
\v 11 ಮಾರ ಭೈಯೇ ಭೇನೆವೊ ಏಕ್‌ನ ಏಕ್‌ ದುಖ್‍ನಕೊ ದೆವೊ. ಕೋಣ್‌ತೋಬಿ ಇನ ಭೈನ ಚಿಂಘಾಯತೊ ನತರ್ ಇನಿ ಭೇಜ಼ಣಾನಿ ಬಾರೇಮ ತೀರ್ಪ್‍ಕರ‍್ಯಾತೊ ಯೋ ಧರ್ಮಶಾಸ್ತ್ರನ ಚಿಂಘೈನ್‍ ಧರ್ಮಶಾಸ್ತ್ರನಿ ಬಾರೇಮ ತೀರ್ಪ್‌ಕರಾನಿತರ ಉಶೆ. ಕತೋಬಿ ತೂ ಧರ್ಮಶಾಸ್ತ್ರನಿ ಬಾರೇಮ ತೀರ್ಪ್ ಕರ‍್ಯೊತೊ ತೂ ನ್ಯಾಯಾಧಿಪತಿ ಕರಿ ಬೋಲೈಲಿಶ್ ಪಣ್ಕಿ ಇನ ಪಾಡಿಚಾ಼ಲವಾಳೊ ಕಾಹೆ. 
\v 12 ಧರ್ಮಶಾಸ್ತ್ರನ ದಿದೊಹುಯೊ ನ್ಯಾಯಾಧಿಪತಿ ದೇವ್ ಎಕ್ಕಸ್ ಜ಼ಣೊ; ಯೋಸ್‍ ಬಚಾ಼ಡನಾಬಿ ನಾಶಕರನಾಬಿ ಶಕತ್‌ವಾಳೊ ಹುಯಿರ‍್ಹೊಸ್. ಅಮ್‍ರ‍್ಯವಾಪರ್‌ ತಾರ ಭೀಡೆವಾಳಾನಿ ಬಾರೇಮ ತೀರ್ಪ್‌ಕರವಾಳೊ ತೂ ಕೋಣ್?
\s ಬಡೈಮಾರವಾಳಾನಿ ವಿರೋದ್ ಝೇತಾವ್ಣಿ
\p
\v 13 “ಆಜ಼್‌ನೊ ದನ್ ನತರ್ ಕಾಲ್ ಅಪ್ಣೆ ಅಥ್ರಾನ ಖ್ಹಯೇರ‍್ನ ಜೈ಼ನ್ ಹಿಜ್ಜಾ಼ ಏಕ್‍ವರಖ್ಹ್‌ರ‍್ಹೀನ್ ಬೇಪಾರ್‌ಕರೀನ್ ನಫ್ಫೊ ಕಮೈಲಿಯೇಸ್” ಕರಿ ಬೋಲವಾಳ ಖ್ಹಮ್‍ಜೊ. 
\v 14 ಕಾಲ್‍ಶಾತ್‍ ಉಶೇಕಿ ತುಮೂನ ಮಾಲುಮ್‌ ಕೊಯ್ನಿ, ತುಮಾರು ಜಿ಼ಂದ್‌ಗಿ ಕಿಮ್ಕಿ? ಯೋ ಥೋಡಿಘಡಿ ದೆಖೈನ್ ಇನಪಾರ್ ದೆಖಾವಕೊಂತೆ ಧುವರ್‌ನಿತರ ತುಮೆ ಛಾ಼. 
\v 15 ಇನಖ್ಹಾಜೆ ತುಮೆ ಅಥ್ರಾನಿ ವಾತ್ನ ಮ್ಹೆಂದಿನ್ “ಪ್ರಭುನಿ ಖ್ಹೂಜ಼಼್ ಉಷೇತೊ ಅಪ್ಣೆ ಬಚಿರ‍್ಹಿಶು ಅಜು಼ ಆ ಕಾಮ್‍ರ‍್ಹೆವೊ ಯೋ ಕಾಮ್‍ರ‍್ಹೆವೊ ಕರ್ಶು” ಕರಿ ಬೋಲ್‌ಶು ಕರಿ ತುಮೆ ಬೋಲಿಲೇವ್ಣು. 
\v 16 ಕತೋಬಿ ತುಮೆ ತುಮಾರಿ ಅಹಂಕಾರ್‌ಥಿ ತುಮಾರಿ ಬಾರೇಮ ಬಡೈಮಾರಿಲೇವೋಸ್. ಎಥ್ರಾನಿ ಖ್ಹರಾವ್ಣಿ ದೇವ್ನಖ್ಹಾಮ್ಣೆ ಗಲ್ತೀಸ್. \fig ಬೇಪಾರಿ ಅಜು಼ ಖ್ಹಾಮನ್‌ ಲ್ಯಾವಾಳೊ|alt="Customer, merchant with his wares" src="hk00172c.tif" size="col" copy="Horace Knowles ©" ref="4:13"\fig*
\p
\v 17 ಅಮ್‍ರ‍್ಯವಾಪರ್‌ ಅಛ್ಛಾ಼ನ ಕರ್ನುಕರಿ ಮಾಲುಮ್ ರ‍್ಹೀನ್‌ಬಿ ಕೋ ಕರಾಂತೆ ಯೊ ಪಾಪ್ ಕರಾವಾಳೊ ಹುಯಿರ‍್ಹೊಸ್.
\c 5
\s ಶೌಕಾರ್‌ನ ಝೇತಾವ್ಣಿ
\p
\v 1 ಶೌಕಾರ್‌ವಾಳೊ, ತುಮೂನ ಆವ್‌ಶೇತೆ ಖ್ಹತಾಪ್ಣಿನಖ್ಹಾಜೆ ಆಂಝು಼ನಾಖೊ, ರದನ್ ಕರೊ. 
\v 2 ತುಮಾರಿ ಧನ್‍ ದೌಲತ್‍ ನಾಶ್‍ಹುಯಿಗು. ತುಮಾರ ಲುಂಗ್ಡಾನ ಕಂದ್‌ ಧರಿಲಿದು. 
\v 3 ತುಮಾರು ಖ್ಹೊನ್ನು, ರೂಪು ಕಿಲಪ್‍ ಧರಿನ್‍ ಮಾಟಿನ ಬರೋಬರ್ ಹುಯಿರ‍್ಹುಸ್‍. ಯೋ ಖ್ಹಾರಾನು ಕಿಲಪ್‍ ತುಮೂನ ವಿರೋದ್. ಸಾಕ್ಷಿ ಹುಯಿರ‍್ಹಿನ್ ಆಗ್‍ನಿತರ ತುಮಾರಿ ಬೋಟಿನ ಭುಂಜಿನಾಕ್‍ಶೆ. ಖ್ಹರ್ತಿನ ದನ್ಮ ಆಯಿಗುತೋಬಿ ದೌಲತ್ ಜ಼ಮಾಕರೀನ್ ತುಮೆ ಮ್ಹೇಲಿರಾಖ್ಯಸ್. 
\v 4 ದೇಖೊ ತುಮಾರ ಖೇತರ್‌ಮಾನು ಅನಾಜ಼್ ವ್ಹಾಡ್ಯಹುಯಾನಿ ಕೂಲಿ ದಿದಾಕೊಂತೆ ತುಮೆ ಠಗೈಲಿದಾ. ಯೋ ಕೂಲಿವಾಳನಿ ಕೂಘಾಟಿ ಅಜು಼ ವ್ಹಾಡವಾಳಾನಿ ಚಿಕ್ರಾಣ್ ಆ ಅಖ್ಖಾನ ಕರಾವಾಳೊ ಸೊರ್ಗನು ಡಂಡ್ನೊ ಸರ್ವಶಕ್ತ ದೇವ್ ಪ್ರಭುನ ಕಾನ್ಮ ಟಹುಕೊ ಪಡಿರ‍್ಹುಸ್, 
\v 5 ಧರ್ತಿಪರ್ ತುಮೆ ಸುಕ್‍ಭೋಗ್‍ವಾಳ ಹುಯಿನ್ ತುಮಾರಿ ಆಖ್ಹ್‌ನ ಪೂರಕರೈಲ್ಯವಾಳ ಹುಯಿನ್ ಜಿವಿರ‍್ಹಾಸ್‍. ಬಲಿನ ದನ್ನ ಖ್ಹಾಜೆಕಿಶುಕಿ ಕರಿ ತುಮಾರು ದಿಲ್ನ ಫುಲೈಲಿದಾತೆ. 
\v 6 ತುಮೆ ನೀತಿವಾಳಾನ ಗಾಳೆದೀನ್ ಖೂನ್‌ಕರಿನಾಖ್ಯ, ಯೊತೋಬಿ ತುಮುನ ವಿರೋದ್ ಕರುಕರಕೊಯ್ನಿ.
\s ಪ್ರಾರ್ಥನೆ ಅಜು಼ ಖ್ಹಮಾಳಾನು
\p
\v 7 ಭೇನೆ ಭೈಯೇವೊ, ಪ್ರಭು ಆವಾಲಗು ಖ್ಹಮಾಳಿರ‍್ಹವೊ. ಪಿಕಾವವಾಳಾನ ದೇಖೊ, ಯೋ ಜ಼ಮೀನ್ನು ಮೋಲ್ನ ಜಾ಼ವಾನು ಫಲ್ನಖ್ಹಾಜೆ ಟಿವೈರ‍್ಹೀನ್ ಮುಂಗಾರ‍್ನೊ. ಹಿಂಗಾರ‍್ನೊ ಪಾಣಿಅಖ್ಖು ಆವಾಲಗು ಖ್ಹಮಾಳಿನ್ ರ‍್ಹೇಸ್. 
\v 8 ತುಮೇಬಿ ಖ್ಹಮಾಳಿರ‍್ಹವೊ, ತುಮಾರ ದಿಲ್ನ ಘಟ್‍ಕರಿಲೆವೊ. ಶನಕತೊ ಪ್ರಭು ಆವಾನದನ್‍ ಖನ್ನೆ ಹುಯಿಗು. 
\v 9 ಭೈಯೇ ಭೇನೆವೊ, ತುಮೆ ಏಕ್‌ನ ಉಪ್ಪರ್ ಏಕ್‍ ಗಲತ್‌ ನಕೊಬೋಲೊ; ಅನೇಥಿ ನ್ಯಾವ್‌ನಿ ತೀರ್ಪ್‌ಮ ಪಡಿಜಾ಼ಶು. ಹಂದೇಖೊ ನ್ಯಾವ್‍ನೊ ಅದಿಪತಿ ಬಾಕಲ್‌ನ ಖ್ಹಾಮ್ಣೇಸ್ ಭೀಯೊಸ್‍. 
\v 10 ಭೈಯೇ ಭೇನೆವೊ, ವದೇಖ್ಹಾನ ಖ್ಹಮಾಳಿಲ್ಯಾವಾನಿ ಬಾರೇಮ ಪ್ರಭುನ ನಾಮ್‍ಥಿ ವಾತ್ ಬೋಲ್ಯಾತೆ ಪ್ರವಾದಿ ಖ್ಹಾರನಾಸ್ ಯಾದ್ ಕರಿಲೆವೊ. 
\v 11 ಹಂದೇಖೊ, ಖ್ಹಮಾಳಿಲ್ಯಾವಾಳನ ಧನ್ಯಕರಿ ಅಪ್ಣೆ ಗಣ್ತಿ ಕರಿಯೇಸ್ ಕೊಯ್ನಿಕಿಶು, ತುಮೆ ಯೋಬಮ ಥೂತೆ ಖ್ಹಮಾಳಿಲ್ಯವಾನಿ ಬಾರೇಮ ಖ್ಹಮ್‍ಜೊ, ಪ್ರಭು ಇನ ಖ್ಹರ್ತಿಮ ಕರ‍್ಯೊತೆ ದೇಖೊ. ಪ್ರಭು ಗೋರ್‌ವಾಳೋಬಿ ಅಜು಼ ದಯಾಕರವಾಳೊಬಿ ಹುಯಿರ್‍ಹೊಸ್ ಕರಿ ಖ್ಹಮ್‌ಜಿರಾಖ್ಯಾಸ್‌.
\p
\v 12 ಮುಖ್ಯಥಿ ಮಾರೆ ಭೈಯೇ ಭೇನೆವೊ, ಆಣ್ ಕರೋಸ್ ನಕೊ ಆಬ್‌ಪರ್‌ ರ‍್ಹವೊ. ಧರ್ತಿಪರ್ ರ‍್ಹವೊ. ಬಿಜ಼಼ ಶನಾಪರ್‌ಬಿ ರ‍್ಹವೊ ಆಣ್ ಕರೋನಕೊ ಒಹೊ ಕರಿ ಬೋಲಾನು ರ‍್ಹಯಾತೊ ಒಹೊಕರಿ ಬೋಲೊ; ಕೊಯ್ನಿಕರಿ ಬೋಲಾನು ರ‍್ಹಯಾತೊ ಕೊಯ್ನಿಕರಿ ಬೋಲೊ; ಅಮ್‍ರ‍್ಹಯಾತೊ ತುಮೆ ನ್ಯಾವ್‍ನಿ ಖ್ಹಣೇದ್ ಉಶುಕೊಯ್ನಿ. 
\v 13 ತುಮಾರಮ ಕೋಣ್‌ತೋಬಿ ಖ್ಹತಾವಾಳ ಛಾ಼ಕಿ? ಯೋ ದೇವ್ನ ವಿಶ್ವಾಸ್‍ಥಿ ಪ್ರಾರ್ಥನೆ ಕರಾದೆ. ತುಮಾರಮ ಕೋಣ್‌ತೋಬಿ ಖ್ಹುಶಿ ಕರಾವಾಳೊ ಛಾ಼ಕಿ? ಇವ್ಣೆ ದೇವ್ನ ಸ್ತುತಿನು ಗೀದ್‌ ಬೋಲಾದೆ. 
\v 14 ತುಮಾರಮ ಕೋಣ್‌ತೋಬಿ ಜಾನ್ನ ಅಛ್ಛು಼ ನಾ ರ‍್ಹವಾಳು ಛಾ಼ಕಿ? ಯೋ ಸಬೇನು ಶಾಣವ್ನ ಬುಲೈನ್ ಪ್ರಾರ್ಥನೆ ಕರಾನ ಬಿಂತಿ ಕರಾದೆ. ಇವ್ಣೆ ಪ್ರಭುನ ನಾಮ್‍ಥಿ ಇನ ತೇಲ್ ಲಗಾಡಿನ್ ಇನದೇಶೆ ದೇವ್ನ ಪ್ರಾರ್ಥನೆ ಕರಾದೆ. 
\v 15 ವಿಶ್ವಾಸ್‍ಥಿ ಕರಾತೆ ಪ್ರಾರ್ಥನೆ ರೋಗ್‌ವಾಳನ ಗುಣ್‌ಕರಸ್‌. ಅಜು಼ ಪ್ರಭು ಇನ ಉಠಾಡಸ್, ಯೋ ಪಾಪ್ ಕರಿರಾಖವಾಳೊ ಉಷೇತೊ, ದೇವ್ ಯೋ ಪಾಪ್ ಅಖ್ಖಾನ ಕ್ಷಮಾಕರ್‌ಶೆ. 
\v 16 ಅಮ್‍ರ‍್ಹವಾಪರ್ ತುಮೆ ಗುಣ್ ಹೋಣುಕತೊ ತುಮಾರಿ ಪಾಪ್ನಅಖ್ಖಾನ ಏಕ್‌ಥಿಏಕ್ ಹರ್‌ಕೆ ಕರಿನ್ ಏಕ್‍ ಜ಼ಣಾನಖ್ಹಾಜೆ ಏಕ್‍ಜ಼ಣು ಪ್ರಾರ್ಥನೆಕರೊ. ನೀತಿವಂತಾನು ಪ್ರಾರ್ಥನೆ ಘಣು ಶಕತ್ನು ಹುಯಿರ‍್ಹುಸ್. 
\v 17 ಎಲೀಯ ಅಪ್ಣಿ ಥರಾನಿ ಖ್ಹಯಾಲ್‍ವಾಳೊ ಹುಯಿರ‍್ಹೋಥೊ. ಯೋ ಪಾಣಿ ನಾ ವರಖ್ಹ್‌ಣುಕರಿ ಭಕ್ತಿಥಿ ಪ್ರಾರ್ಥನೆ ಕರಾದಿನ್‍ ತೀನ್ ವರಖ್ಹ್‌ ಛೋ಼ ಮಹಿನಲಗೂಬಿ ಧರ್ತಿಪರ್ ಪಾಣಿ ವರ್‌ಶ್ಯೊಕೊಯ್ನಿ 
\v 18 ಪಾಛೊ಼ ಯೊ ಪ್ರಾರ್ಥನೆ ಕರಾದಿನ್ ಆಕಾಶ್ ಪಾಣಿವರ್‌ಖ್ಹಾಯು. ಜ಼ಮೀನ್ ಫಲ್‍ದಿದು. 
\v 19 ಮಾರ ಭೈಯೇಭೇನೆವೊ, ತುಮಾರಮ ಕೋಣ್‌ತೋಬಿ ಖ್ಹಾಚ ಮಾರಗ್‌ನ ಮ್ಹೆಂದಿನ್ ಗಲ್ತಿಥಿ ಚಾ಼ಲುಕರ್ತು ಉಷೇತೊ ಬಿಜೇಕ್ ಜ಼ಣು ಇನ ಅಛ್ಛಮಾರಗ್‍ಪರ್ ಲಾಯುತೊ; 
\v 20 ಏಕ್‌ ಪಾಪಿನ ಗಲತ್‌ ಮಾರಗ್‍ಪರ್‌ಥು ಛು಼ಕೈನ್, ಬದ್‍ಲೈನ್ ಇನ ಆತ್ಮಾನ ಮರಣ್‌ಥು ಬಚಾ಼ಡೀನ್ ಘಣ ಪಾಪ್ನ ಯೋ ಕ್ಷಮಾ ದ್ಯವಾಡವಾಳೊಕರಿ ಮಾಲುಮ್‌ ಕರಿಲ್ಯಾವಾದೆ.