\id 2TH -WAGHRI
\ide UTF-8
\h ಥೆಸಲೋನಿಕ
\toc3 2 ಥೆಸ
\toc2 2 ಥೆಸ
\toc1 ಪೌಲನೆ ಥೆಸಲೋನಿಕವಾಳಾನ ಲೀಖ್ಯೋತೆ ಬೇನಿ ಚಿಟ್ಟಿ
\mt2 ಪೌಲನು ಥೆಸಲೋನಿಕದವರಿಗೆ ಬರೆದ ಎರಡನೆಯ ಪತ್ರಿಕೆ
\mt1 ಪೌಲನೆ ಥೆಸಲೋನಿಕವಾಳಾನ ಲೀಖ್ಯೋತೆ ಬೇನಿ ಚಿಟ್ಟಿ
\imt ಮಾಲುಮ್ ಕರಾನು
\ip ಥೆಸಲೋನಿಕವಾಳನ ಪೌಲ ಲೀಖುಕರಸ್ತೆ ಬೇನು ಕಾಗತ್ \xt 1:1\xt*. ಥೆಸಲೋನಿಕವಾಳನ ಪಹಿಲು ಚಿಟ್ಟಿ ಲೀಖಿಹುಯ್ಗುತದೆ, ತುರಂತ್ ಯೋ ಆ ಚಿಟ್ಟಿನ ಲೀಖ್ಯೊ. ಯೇಸು ಪೈದಹುಯೊತೆ ಇನವಾರ್ ಖ್ಹುಮಾರ್ ಏಕ್‍ಉಪ್ಪರ್ ಐಡೈಖ್ಹ್‌ನ ವರಖ್ಹ್‌ನ ಪಾರ್ ಆ ಚಿಟ್ಟಿ ಲೀಖಾಯುತೆ. ಥೆಸಲೋನಿಕ ಸಬೆನ ಲೀಖಾನಿ ವಖ್ಹ್‌ತೆಬಿ ಯೋ ಕೊರಿಂಥಮಾಸ್ ಆ ಸಬೇವ್‌ನ ಇನ ಬೇನು ಶುಭಸಂದೇಶ್‍ನ ಬೋಲಾನಿ ಜಾ಼ವಾನಿವಖ್ಹತ್‍ಮ ಭಾಂದ್ಯೊ \xt ಅಪೊ 17:1-10\xt*. ಥೋಡು ಯೆಹೂದ್ಯ ಅದ್ಮಿ ಅಜು಼ ಖ್ಹುಮಾರ್ ಗ್ರೀಕ್‌ನು ಅದ್ಮಿ ಮಳಿನ್ ಆ ಸಬೆ ಭಂದೈರ‍್ಹುಥು ಕರಿ ಅಪೊಸ್ತಲರ‍್ನಿ ಪುಸ್ತಕ್‌ಮ ಬೋಲಸ್. ಥೆಸಲೋನಿಕಮಾನು ದೇವ್ನ ಅದ್ಮೆವ್‍ನ ಖ್ಹರ್ತಿನ ದನ್ನಿ ಬಾರೇಮ ಅಜು಼ ಕ್ರಿಸ್ತನು ಬೇನು ಆವಾನಿ ಬಾರೇಮ ಘಣು ಧ್ಯಾನ್ ಲೇವ್ಣು. ಶನಕತೊ ಪೌಲನೆ ಇನ ಲೀಖ್ಯೋತೆ ಬೇನಿ ಚಿಟ್ಟೀಮ ಅನಿ ಬಾರೇಮ ಘಣೇಥಿ ಲೀಖಿರಾಖ್ಯೊಸ್. ಆ ಬೇನು ಥೆಸಲೋನಿಕನು ಚಿಟ್ಟೀಮ ಖ್ಹುಮಾರ್ ಆಧುಭಾಗ್ ಖ್ಹತಮ್ ಹುವಾನ ವೇಳ್ಮ ಲೀಖಾಯು. ಪೌಲನೆ ಮೂರತ್‍ನಿ ಪೂಜಾ಼ನಿ ಬಾರೇಮಾಬಿ ಝೇತಾವಸ್. ಹರೇಕ್‍ಜ಼ಣು ಇನ ಖಾಣನಖ್ಹಾಜೆ ಕಾಮ್‌ಕರ‍್ನುಕರಿ ಬೋಲಸ್. \xt 3:6-10 \xt*
\iot ಕಾಡಿದೇಖೊ
\io1 1. ಪೌಲನೆ ಚಿಟ್ಟೀಮ ಇನು ಅಜು಼ ಇನ ಜೋ಼ಡೆ ರ‍್ಹವಾಳಾನ ವತಾಳ್‍ತೊ ಹುಯಿನ್ ಶುರುಕರಸ್. \ior 1:1-2\ior*
\io1 2. ಇನಕೇಡೆಥು ಯೊ ಥೆಸಲೋನಿಕನು ದೇವ್ನ ಅದ್ಮಿವೋನ ಝೂ಼ಂಡ್‌‍ನಖ್ಹಾಜೆ ದೇವ್ನ ಧನ್ಯವಾದ್ ಕರಸ್. ಅಜು಼ ಪ್ರಾರ್ಥನೆ ಕರಸ್. \ior 1:3-12 \ior*
\io1 3. ಪೌಲನೆ ಖ್ಹರ್ತಿನ ದನ್ನ ವಖ್ಹತ್‌ನಿ ಬಾರೇಮ ವಾತೆ ಬೋಲಸ್. \ior 2:1-17 \ior*
\io1 4. ಇನಕೇಡೆಥು ಯೋ ವಳ್‍ಶಿನಿ ಬಾರೇಮ ವಾತೆ ಬೋಲಸ್. ಅಜು಼ ಕಾಮ್ ಕರ್ನುಸ್ ಕರ‍್ನು ಕರಿ ಬಾರೇಮ ವಾತೆ ಬೋಲಸ್. \ior 3:1-15\ior*
\io1 5. ಪೌಲನೆ ಬಿಜೇಕ್ ಹಲ್ಲ ದೇವ್ನ ಅದ್ಮಿವ್‍ನ ಟೋಳ್ನ ಖ್ಹಲಾಮ್ ಕರ್ತೊಹುಯಿನ್ ಚಿಟ್ಟಿನ ಖ್ಹತಮ್ ಕರಸ್. \ior 3:16-18\ior*
\c 1
\p
\v 1 ಅಪ್ಣೊ ಬಾ ಹುಯಿರ‍್ಹೋತೆ ದೇವ್‌ಮ ಅಜು಼ ಪ್ರಭು ಹುಯಿರ‍್ಹೋತೆ ಯೇಸು ಕ್ರಿಸ್ತಮ ಛಾ಼ತೆ ಥೆಸಲೋನಿಕ ಸಬೆನ, ಪೌಲ, ಸಿಲ್ವಾನ ಅಜು಼ ತಿಮೊಥೆ ಕರಿ ಹಮೆ ಲೀಖುಕರೇಸ್ತೆ ಶಾತ್‌ಕತೊ, 
\v 2 ಅಪ್ಣೊ ಬಾ ದೇವ್‍ಥಿಬಿ ಅಜು಼ ಪ್ರಭು ಯೇಸು ಕ್ರಿಸ್ತಥಿ ತುಮೂನ ವಾರ್‌ಖ್ಹೊ ಅಜು಼ ಶಾಂತಿ ಮಳಾದೆ.
\s ಕ್ರಿಸ್ತ ಆವಾನಿವಖ್ಹ್‌ತೆ ತೀರ್ಪ್
\p
\v 3 ಹಮಾರ ಭೈಯೆ ಭೇನೊ, ತುಮಾರಿ ಬಾರೇಮ ಹಮೆ ಹಮೇಶ ದೇವ್ನ ಧನ್ಯವಾದ್ ಕರಿಯೇಸ್. ಅಮ್ ಕರಾನು ಹಮೂನ ಬರೊಬರಸ್‌ ದೆಖಾಯು, ಶನಕತೊ ತುಮಾರಿ ವಿಶ್ವಾಸ್ ಘಣು ಭಡುಕರಾಸ್ ಅಜು಼ ಏಕ್‌ಥಿಏಕ್‌ ತುಮಾರಿ ಪ್ಯಾರ್ ದನ್‌ಪರ್-ದನ್ ಭಡ್ತು ಜಾ಼ವಾದೆ. 
\v 4 ಶನಕತೊ ತುಮೆ ಖ್ಹಮಾಳಮಾಬಿ ಖ್ಹತಾಪ್ಣಿಮಾಬಿ ತುಮಾರಮ ದೆಖಾಯುತೆ ವಿಶ್ವಾಸ್ನಖ್ಹಾಜೆಥಿ ದೇವ್ನಿ ಅದ್ಮಿನಿ ಸಬೇಮ ಕಮ್‌ಠೋಕಿ ವಾತೆ ಬೋಲಿಯೇಸ್.
\p
\v 5 ದೇವ್ನಿ ನೀತಿನಿ ತೀರ್ಪ್‌ನ ಖ್ಹಾಚು಼ ಖಿವುಕತೊ, ತುಮೆ ಲತಾಡಪಡುಕರಾತೆ ದೇವ್ನಿ ರಾಜ್ಯನ ತುಮೆ ಲ್ಹಾಯಕ್ ಹುಯಿರ‍್ಹವಾನು. 
\v 6 ನ್ಯಾವ್ನು ಕೋಣ್ ಕರಸ್ಕಿ ಇವ್ಣುನ ದೇವ್ ಅಛ್ಛು಼ಸ್ ಕರಸ್. ತುಮೂನ ಕೋಣ್ ಖ್ಹತಾವಸ್ಕಿ ಇವ್ಣುನ ದೇವ್ ಖ್ಹತಾವಸ್, 
\v 7 ಅಜು಼ ವಾಖ್ಯೊ ಛಾ಼ತೆ ತುಮುನಾಬಿ ಹಮೂನ ಪರಿಹಾರ್ ಕರ್ಶೆ. ಪ್ರಭು ಹುಯಿರ‍್ಹೋತೆ ಯೇಸು ಮಹಾ ಶಕತ್‌ವಾಳೊ ದೇವ್‌ದೂತರ್‌ನ ಜೋ಼ಡೆ ಸೊರ್ಗಥೊ ದೆಖಾವಾನಿ ವಖ್ಹತ್‌ಮ, ಇನ ಸಮಾಧಾನ್ ದಿಶೆ. 
\v 8 ಯೊ ಆಗ್‍ನಿ ಝ಼ಲ್‌ಪಟ್‌ ಜೋ಼ಡ್ಮ ಕೋಣ್ ದೇವ್ನ ಠೊಕ್ರಾವಸ್ಕಿ ಅಜು಼ ಯೇಸು ಪ್ರಭುನಿ ಬಾರೇನಿ ಸುವಾರ್ತೆನ ಮಾನ್ಯುಕೊಯ್ನಿಕಿ ಇವ್ಣುನ ನಿಶತ್‌ ದ್ಯವಾನ ಆವ್‌ಶೆ. 
\v 9 ಪ್ರಭು ಇವ್ಣುನ ಇನಿ ಮಹಿಮೆನಿ ಶಕತ್ನ ಖ್ಹಾಮ್ಣೇಥು ಹಟೈನಾಖಿದಿನ್ ಇವ್ಣುನ ಹರ್‌ಹಮೇಶಾನು ನಿಶತ್‌ ದಿಶೆ. 
\v 10 ಇನೆ ಯೋ ದನ್ಮ ಇನ ಪರಿಶುದ್ ಅದ್ಮಿವ್‌ಥಿ ಮಹಿಮೆಬಿ ಅಜು಼ ವಿಶ್ವಾಸ್‌ಮ ರ‍್ಹೇಯ್ತೆ ಇವ್ಣೇಥಿ ಮರ‍್ಯಾದಿಲೀನ್ ಆವಾಸ್ಕಿ ಯೊ ಅದ್ಮಿನಿ ಬೀಚ್ಮ ತುಮೇಬಿ ರ‍್ಹಿಶು. ಶನಕತೊ ಹಮೆ ತುಮುನ ಬೋಲ್ಯಾತೆ ಸಾಕ್ಷಿನ ತುಮೆ ನಂಬಿರಾಖ್ಯಾಸ್. 
\v 11 ಅನಖ್ಹಾಜೆಸ್ ಹಮೆ ಕದೇಬಿ ತುಮಾರಖ್ಹಾಜೆ ಪ್ರಾರ್ಥನೆ ಕರಿಯೇಸ್. ಅಪ್ಣೊ ದೇವ್ ತುಮೂನ ಬುಲಾಯೋತೆ ಇನಖ್ಹಾಜೆ ಯೋಸ್ ತುಮುನ ಲ್ಹಾಯೇಕ್‌ನಿ ಗಣ್ತಿ ಕರಿರಾಖ್ಯೊಸ್. ತುಮಾರಿ ಶಕತ್ ವಿಶ್ವಾಸ್‍ಥೀಬಿ ತುಮಾರಿ ಆಖ್ಹ್‌ನ ಅಜು಼ ಅಛ್ಛಾ಼ನ ಪೂರ ಕರಾದೆಕರಿ ಬಿಂತಿ ಕರ್ಯೆಸ್. 
\v 12 ಅಮ್ಮಸ್ ಅಪ್ಣೊ ಪ್ರಭು ಹುಯಿರ‍್ಹೋತೆ ಯೇಸು ಕ್ರಿಸ್ತನು ನಾಮ್ ತುಮಾರೇಥಿ ಮಹಿಮೆ ಉಶೆ, ಅಜು಼ ಇಮ್ಮಸ್ ತುಮೇಬಿ ಇನಾಮ ಮಹಿಮೆ ಲಿಶು. ಯೋ ಮಹಿಮೆ ಅಪ್ಣೊ ದೇವ್ ಅಜು಼ ಪ್ರಭು ಹುಯಿರ‍್ಹವಾಳ ಯೇಸು ಕ್ರಿಸ್ತನಿ ವಾರ್‌ಖ್ಹೇಥಿ ಚಾ಼ಲಾದೆ.
\c 2
\s ಝೂ಼ಟೊ ಅದ್ಮಿನಿ ಬಾರೇಮ
\p
\v 1 ಭೈಯೆ ಭೇನೊ, ಅಪ್ಣೊ ಪ್ರಭು ಹುಯಿರ‍್ಹೋತೆ ಯೇಸು ಕ್ರಿಸ್ತ ಆವಾನಿ ಬಾರೇಮ ಅಜು಼ ಅಪ್ಣೆ ಖ್ಹಾರು ಎಕ್ಟು ಹುಯಿನ್ ಇನ ಮಳಾನಿ ಬಾರೇಮ ತುಮೂನ ಬೋಲಿಲಿಯೇಸ್. 
\v 2 ಪ್ರಭುನೊ ದನ್ ಐರ‍್ಹೋಸ್ ಕರಿ ತುಮೆ ಆತ್ಮಥಿರ‍್ಹಿಲೇವೊ ವಾತೆಮರ‍್ಹಿಲೇವೊ ಹಮಾರಿ ಚಿಟ್ಟಿರ‍್ಹಿಲೇವೊ ತುಮೆ ವಗ್ಗಿಸ್‌ಮ ಕಲಾವ್ಣಿ ನಕೊಹುವೊ. 
\v 3 ಕೋಣ್‌ಬಿ ಕೆವ್ಹಿ ತರಿಖಾಮಾಬಿ ಠಗಾವ್ಣುನಾತೆ ಇಮ್‌ ದೇಖಿಲೇವೊ. ಶನಕತೊ ಪಹಿಲೆ ವಿಶ್ವಾಸ್‌ನ ಕಾಡಿನಾಖಿನ್ ನಾಶಕರವಾಳೊ, ವಿರೋದಿ ಭಡ್ಕಲಗುಬಿ ಯೊ ದನ್ ಆವ್‌ಶೆ ಕೊಯ್ನಿ. 
\v 4 ಖಿವು ದೇವ್‌ನು ಹುಯಿರ‍್ಹುಸ್ ನತರ್ ಆರಾದನೆನ ಯೋಗ್ಯಹುಯಿರ‍್ಹಾವನು ಹುಯಿರ‍್ಹುಸ್ಕಿ, ಯೋ ಖ್ಹಾರಾನ ನಾಶ್ ಕರ್ಷೆ. ಇನು ಯೋಸ್ ಖ್ಹಾರೇಥಿಬಿ ಭಡೈಲೀನ್, ದೇವ್ನಿ ಮಂದಿರ್‌ಮ ಬೇಶಿನ್‌ ಯೋಸ್ ದೇವ್‌ಕರಿ ಬೋಲಿಲಿಶೆ. 
\v 5 ಮೇ ತುಮಾರಿ ಜೋ಼ಡ್ಮ ಥೋತೆ ತದೆ, ಆ ಖ್ಹಾರಿ ಬಾರೇಮ ಬೋಲ್ಯೊತೆ ತುಮೂನ ಯಾದ್ ಕೊಯ್ನಿಕಿ ಶು? 
\v 6 ಯೋ ಬರೋಬರ್‌ನಿ ವಖ್ಹತ್‌ಮ ದೆಖಾವ್ಣುನಾತೆ ಇಮ್ ಅನಿ ಬಾರೇಮ ಶಾತ್ ಅಡ್ಡಿ ಹುಯಿರ‍್ಹುಸ್‌ಕರಿ ತುಮೂನ ಮಾಲುಮ್ ಛಾ಼. 
\v 7 ಠಗಾವ್ಣು ಅಜೂ಼ಬಿ ಗಪ್ಲಥ್ಥಿ ಕಾಮ್ ಕರುಕರಸ್. ಕತೋಬಿ ಅನ ಠೇರೈರಾಖವಾಳೊ ವಾಟ್‌ ಮ್ಹೇಲಾಲಗುಬಿ ಯೋ ಗಪ್ಲಥ್ಥೀಸ್ ರ‍್ಹಿಶೆ. 
\v 8 ಯೋ ಅಧರ್ಮಿ\f + \fr 2:8 \fr*\ft ಅಛ್ಛಾ಼ನ ವಿರೋದ್‌ ಕರಾವಳೊ \ft*\f* ದೆಖಾವ್‌ಶೆ. ಪ್ರಭು ಯೇಸು ಇನ ಮ್ಹೋಡಾನು ದಮ್‌ಥೀಸ್ ಇನ ಮಾರಿನಾಕ್‌ಶೆ. ಅಜು಼ ಯೋ ಹಿಜ಼್ಜಾ ರ‍್ಹಿಶೇತೆ ಇನಖ್ಹಾಜೇಸ್ ಇನ ನಾಶ್ ಕರಿನಾಕ್‌ಶೆ. 
\v 9 ಯೋ ಅಧರ್ಮಿ ಶೈತಾನ್ನಿ ಶಕಥ್ಥಿ ಭರೈನ್ ಆವ್‌ಶೆ ಅಜು಼ ಕೈಯೆಕ್ಕಿಥರಾನು ಠಗಾವನು ಮೋಟುಕಾಮ್, ಅದ್ಭುತ್‌ಕಾಮ್, ಚಮತ್ಕಾಕರ್‌ನ ಕರ್ಶೆ. 
\v 10 ಇವ್ಣೆ ಖ್ಹಾಚಿನ ಪ್ಯಾರ್ ನಾಕರೀನ್‌, ರಕ್ಷಣೆ ಕೋಲೆಯಿಂತೆ ಝಿಟ್ಕಾರಿನ್ ನಾಶನ್ನ ಮಾರಗ್‍ಮ ರ‍್ಹವಾಳನ ಅಖ್ಖೀಸ್ ಥರಾನಿ ಖರಾಬ್‌ ದಿಮಾಕ್‌ಥಿ ಯೋ ಠಗಾವ್‌ಶೆ. 
\v 11 ಇನಖ್ಹಾಜೇಸ್ ದೇವ್ ಇವ್ಣುನ ಘಣಿ ಮೈಕಮ್ಮ ನಾಖಿನ್ ಇವ್ಣೆ ಯೋ ಝೂ಼ಟಿನ ನಂಬಾನಿಘೋಣಿ ಕರ್ಷೆ . 
\v 12 ಅನೇಥಿ ಖ್ಹಾಚಿನ ವಿಶ್ವಾಸ್‌ಕರ‍್ಯುಕೊಂತೆ, ಪಾಪ್ನು ಕಾಮ್ಮ ಖ್ಹುಶಿಕರಾವಾಳ ಹರೇಕ್ನ ತೀರ್ಪ್‌ ಉಶೆ.
\s ತುಮೆ ರಕ್ಷಣೇನ ಚು಼ಣಿಲಿದ
\p
\v 13 ಪ್ರಭು ಪ್ಯಾರ್ ಕರಾಸ್ತೆ ಭೈಯೆ ಭೇನೆವೊ, ಹಮೆ ತುಮಾರಿ ಬಾರೇಮ ಹಮೇಶ ದೇವ್ನ ಧನ್ಯವಾದ್ ಕರಾವಳ ಹುಯಿರ‍್ಹಾಸ್. ಶನಕತೊ ತುಮೆ ಪವಿತ್ರಾತ್ಮಾಥಿ ಪಾಕ್‌ ಹುಯಿನ್, ಖ್ಹಾಚಿಪರ್ ವಿಶ್ವಾಸ್‌ರಾಖಿನ್ ರಕ್ಷಣೆನ ಲೀಲ್ಯಾವದೆಕರಿ ದೇವ್ನೆ ತುಮೂನ ಶುರುವಾತ್‌ಮಾಸ್ ಚೂ಼ಣಿರಾಖ್ಯೊಸ್. 
\v 14 ತುಮೆ ಅಮ್ ರಕ್ಷಣೆಮ ಐನ್, ಅಪ್ಣೊ ಪ್ರಭು ಯೇಸು ಕ್ರಿಸ್ತನಿ ಮಹಿಮೆಮ ಪೇಖ್ಹ್‌ಣುಕರಿ, ಹಮೆ ಬೋಲ್ಯಾತೆ ಸುವಾರ್ತೆಥಿ ದೇವ್ನೆ ತುಮೂನ ಬುಲಾಯೊ. 
\v 15 ಇನಖ್ಹಾಜೇಸ್ ಹಮಾರ ಭೈಯೆ-ಭೇನೆವೊ, ಘಟ್ ಭೀರ‍್ಹೆವೊ, ಹಮೆ ವಾತೇಥಿರ‍್ಹವೊ ಅಜು಼ ಹಮೆ ಲೀಖ್ಯಾತೆ ಕಾಗತ್‌ಥ್ಥಿರ‍್ಹವೊ ತುಮೂನ ಮಾಲುಮ್ ಕರಾಯಾತೆ ಪದತ್ತಿನ ತುಮೆ ಘಟ್ ಧರಿಲೆವೊ. 
\v 16 ಅಪ್ಣುನ ಪ್ಯಾರ್ ಕರೀನ್, ಕೆದೇಬಿ ರ‍್ಹವಾನು ಹುಮ್ಮಖ್ಹ್‌ನಬಿ, ಅಛ಼್ಛು ಭರೋಖ್ಹಾನಬಿ ಇನಿ ವಾರ್‌ಖ್ಹೇಥಿ ದಿದೋತೆ ಅಪ್ಣೊ ಬಾ ಹುಯಿರ‍್ಹೋತೆ ದೇವ್‌ಬಿ ಅಪ್ಣೊ ಪ್ರಭು ಯೇಸು ಕ್ರಿಸ್ತ ಯೋಸ್ ತುಮಾರ ದಿಲ್‌ಮನ್ನ ಧಿಲ್‌ಪತ್‌ ದ್ಯವಾದೆ. 
\v 17 ಖ್ಹಾರಿಸ್ ತರ‍್ಹಾನು ಅಛ಼್ಛಕಾಮ್ಮಬಿ ಅಛ಼್ಛು ವಚನ್‌ಮಾಬಿ ತುಮುನ ಭಾಲಿದ್ಯವಾದೆ.
\c 3
\s ಹಮಾರಖ್ಹಾಜೆ ಪ್ರಾರ್ಥನೆ ಕರೊ
\p
\v 1 ಹಮಾರ ಭೈಯೆ ಭೇನೆವೊ, ಹಮಾರಖ್ಹಾಜೆ ಪ್ರಾರ್ಥನೆ ಕರೊ, ಪ್ರಭುನಿ ವಚನ್ ತುಮಾರಾಮ ಫೈಲೀತೆ ಇಮ್ಮಸ್, ಬಿಜಿಖ್ಹಾರಿ ಬಾಜು಼ಮಾಬಿ ವಗ್ಗಿಸ್ ಫೈಲೈನ್ ಮಹಿಮೆ ಹುವಾದೆ. 
\v 2 ಅಜು಼ ದೇವ್ ಹಮೂನ ಮೂರ್ಖ್‌ ಹುಯಿರ‍್ಹೂತೆ ಖರಾಬ್ ಅದ್ಮಿನ ಹಾತೇಥಿ ಬಚಾ಼ಡನಿ ಘೋಣಿಬಿ ಪ್ರಾರ್ಥನೆ ಕರೋಕಿ, ಕ್ರಿಸ್ತನು ವಿಶ್ವಾಸ್ ಅಖ್ಖಾಸ್‍ಮ ರ‍್ಹೆಯಿಕೊಯ್ನಿನಿ. 
\v 3 ಕತೋಬಿ ಪ್ರಭು ವಿಶ್ವಾಸ್‌ವಾಳೊ, ಯೋ ತುಮೂನ ಶಕತ್ ದೀನ್, ಖರಾಬ್‌ನ ಹಾತ್‌ಮ ಖ್ಹಪಡ್ನುನಾತೆ ಇಮ್‌ ಬಚಾ಼ಡ್‌ಶೆ. 
\v 4 ಹಮೆ ಬೋಲ್ಯಾತೆ ಇಮ್‌ ತುಮೆ ಕರುಕರಸ್ ಅಜು಼ ಖ್ಹಾಮ್ಣೇಬಿ ತುಮೆ ಕರ್ಷುಕರಿಬಿ ಪ್ರಭುನೆ ಹಮೂನ ಭರೋಖ್ಹೊ ದೀರಾಖ್ಯೊಸ್. 
\v 5 ತುಮೆ ದೇವ್ನಿ ಲಾಡ್‌ಮಾಬಿ ಕ್ರಿಸ್ತನು ಖ್ಹಮಾಳಿಲ್ಯಾವಾಮಾಬಿ ಮಳಾನಿಘೊಣಿ ಪ್ರಭುಸ್ ತುಮೂನ ಚಲಾವದೆ.
\s ಕಾಮ್ನು ಜಿಮ್ಮೆದಾರಿ
\p
\v 6 ಹಮಾರ ಭೈಯೆ ಭೇನೆವೊ, ಕಾಮ್ ಕರಾಕೊಂತೆ ಅಜು಼ ಹಮೆ ಬೋಲ್ಯಾತೆ ಪದತ್ತಿನ ಪಾಡಿನ್ ಚಾ಼ಲಕೊಂತೆ ವಿಶ್ವಾಸಿ ಖ್ಹಾರೇಥಿ ತುಮೆ ದೂರ್ ರ‍್ಹೇಣು. ಪ್ರಭು ಹುಯಿರ‍್ಹೋತೆ ಯೇಸು ಕ್ರಿಸ್ತನ ನಾಮ್‌ಪರ್‌ ತುಮೂನ ಹುಕುಮ್ ದಿಯೇಸ್. 
\v 7 ಹಮೆ ಜಿವ್ಯಾತೆ ಇಮ್ಮಸ್ ತುಮೇಬಿ ಜಿವ್ಣುಕರಿ ತುಮೂನ ಅಛ್ಛಿನಿತರ ಮಾಲುಮ್ ಛಾ಼. ಹಮೆ ತುಮಾರಕನ ಥಾತೆ ತದೆ ಶೋಂಬೇರಿ ಕೋಥಾನಿ. 
\v 8 ಫುಗಟ್‌ಥಿ ಹಮೆ ಕಿನಕನಾಬಿ ಖಾಣು ಖಾದಕೊಯ್ನಿ. ತುಮಾರಮ ಕಿನಾಪರ್‌ಬಿ ಹಮೆ ಭಾರೊ ನಾ ನಾಕ್ಣುಕರಿ ಹಮೆ ರಾತ್-ದನ್ ಕಾಮ್ ಅಜು಼ ಮ್ಹಿನತ್ ಕರೀನ್ ಜಿವ್ಣು ಚ಼ಲಾಯ. 
\v 9 ತುಮಾರೇಥಿ ದೇಕ್‌ಬಾಲ್ ಕರೈಲ್ಯವಾನ ಹಮೂನ ಹಕ್‍ಕೊಯ್ನಿಕರಿ ಕಾಹೆ, ತುಮೆ ಹಮಾರಿನಿತರ ಚಾ಼ಲಾದೆಕರಿಸ್ ತುಮೂನ ಇಮ್ ದೆಖೈಲಿದಾತೆ. 
\v 10 ಇನಖ್ಹಾಜೇಸ್ ಹಮೆ ತುಮಾರ ಜೋ಼ಡೆ ಥಾತೆ ತದೆ, “ಕಾಮ್ ಕರಾಕೊಂತೆ ಯೊ ಖಾಣು ನಾಖಾವ್ಣು” ಕರಿ ಹುಕುಮ್ ದಿದಾಥಾತೆ. 
\v 11 ಕತೋಬಿ ತುಮಾರಾಮ ಥೋಡುಜ಼ಣು ಖೆವು ಕಾಮ್‌ಬಿ ಕರುಕರಾಕೊಂತೆ, ಬಿಜಾ಼ನ ಕಾಮ್ಮ ಗೋಡೊ ಘಾಲ್ತುಹುಯಿನ್, ವಳ್‌ಶಿನು ಜಿವ್ಣು ಜಿವ್‌ಕರಾಸ್ ಕರಿ ಹಮೂನ ಖಬರ್‌ಪಡ್ಯು. 
\v 12 ಅಥ್ರಾನ ಅದ್ಮಿವ್‌ನ ಹಮೆ ಇವ್ಣು ಕಾಮ್ ಇವ್ಣೇಸ್ ಕರ್ತುಹುಯಿನ್, ಇವ್ಣ ಖಾಣಾನಖ್ಹಾಜೆ ಇವ್ಣೆಸ್ ಕಮಾವ್ಣುಕರಿ, ಹಮೆ ಪ್ರಭು ಯೇಸು ಕ್ರಿಸ್ತನ ನಾಮ್ಮ ಹುಕುಮ್ ದೀನ್ ಅಜು಼ ಬೋಲಿಲಿಯೆಸ್. 
\v 13 ಕತೋಬಿ ಹಮಾರ ಭೈಯೆ-ಭೇನೆವೊ, ತುಮೇತೊ, ಅಛ್ಛು಼ ಕರಾಮ ಕದೇಬಿ ಬೇಜಾರ್ ಕರ್ಶು ನಕೊ. 
\v 14 ಆ ಚಿಟ್ಟೀಮ ಹಮೆ ತುಮೂನ ಬೋಲುಕರೇತೆ ಕೋಣ್ ಇನ ಮಾನಕೊಯ್ನಿಕಿ, ಇಮ್‌ನಾನಿ ಖ್ಹಣೇದ್ ಕರೀನ್, ಇನ ಖ್ಹರಮ್‌ ಲಾಗಾನಿಘೋಣಿ ಕೋಣ್‌ಬಿ ಇನಿ ಖ್ಹಂಗ್ ನಕೊ ಕರೊ. 
\v 15 ಕತೋಬಿ ಇನ ದುಶ್‌ಮನ್ನಿಘೋಣಿ ನಕೊ ಸೋಚೊತೆ ಅನಬದಲ್ ಇನ ವಿಶ್ವಾಸಿ ಭೈ ಕರಿ ಸೋಚಿನ್ ಅಕ್ಕಲ್ ಬೋಲ್.
\s ಖ್ಹರ್ತಿನಿ ವಾತೆ
\p
\v 16 ಶಾಂತಿವಾಳೊ ಪ್ರಭು ಖ್ಹುದ್ ತುಮೂನ ಖ್ಹಾರಿಸ್ ವಖ್ಹತ್‌ಮ ಅಜು಼ ಖ್ಹಾರಿಸ್ ತರ‍್ಹಾಮ ಶಾಂತಿ ದ್ಯವಾದೆ. ಪ್ರಭು ತುಮಾರ ಖ್ಹಾರಸ್ನ ಜೋ಼ಡೆ ರ‍್ಹವಾದೆ. 
\v 17 ಪೌಲಕರಿ ಮೇ ಮಾರ ಹಾತೇಥಿಸ್ ತುಮುನ ಖ್ಹಲಾಮ್ನ ಲೀಖುಕರುಸ್. ಮೇ ಆಸ್ ಪರಕ್ ಚಿಟ್ಟೀಮ ಅಮ್ಮಸ್ ರುಜು ಕರುಸ್. ಮೇ ಲೀಖಾನು ತರೀಕ ಆಸ್‌ಹುಯಿರ‍್ಹುಸ್. 
\v 18 ಅಪ್ಣೊ ಪ್ರಭು ಯೇಸು ಕ್ರಿಸ್ತನಿ ವಾರ್‌ಖ್ಹೊ ತುಮಾರ ಅಖ್ಖಾಸ್ನಿ ಜೋ಼ಡ್ಮ ರ‍್ಹವಾದೆ.