\id 2CO -WAGHRI
\ide UTF-8
\h 2 ಕೊರಿಂಥ
\toc3 2 ಕೊರಿಂಥ
\toc2 2 ಕೊರಿಂಥ
\toc1 ಪೌಲನೆ ಕೊರಿಂಥವಾಳಾನ ಲೀಖ್ಯೋತೆ ಬೇನಿ ಚಿಟ್ಟಿ
\mt2 ಕೊರಿಂಥದವರಿಗೆ ಬರೆದ ಎರಡನೆಯ ಪತ್ರಿಕೆ
\mt1 ಪೌಲನೆ ಕೊರಿಂಥವಾಳಾನ ಲೀಖ್ಯೋತೆ ಬೇನಿ ಚಿಟ್ಟಿ
\imt ಮಾಲುಮ್ ಕರಾನು
\ip ಕ್ರಿಸ್ತ ಪೈದಹುಯಿನ್ 55 ವರಖ್ಹ್‌ಥಿ ಧರೀನ್ 56 ವರಖ್ಹ್‌ನಿ ಬಾದ್‌ಮ ಆ ಚಿಟ್ಟಿ ಅಪೊಸ್ತಲ ಪೌಲನೆ ಕೊರಿಂಥ ಸಬೆವಾಳನ ಲೀಖಿಹುಯು ಹುಯಿರ‍್ಹುಸ್. \xt 1:1\xt* ಆ ಚಿಟ್ಟಿನ ಕೊರಿಂಥ ಸಬೆವಾಳನ ಪೌಲನೆ ಲೀಖಿಹುಯಿ ಬೇನಿ ಚಿಟ್ಟಿ ಹುಯಿರ‍್ಹುಸ್. ಪೌಲನು ಘಣು ಗಂಭೀರ್‌ಥಿ ಕೊರಿಂಥವಾಳಾನ ಪಾಛ಼ಳ್ ಲೀಖಿರಾಖ್ಯೊಥೋತೆ ಚಿಟ್ಟೀಮ ಲೀಖಿರಾಖ್ಯೊಥೊ ಕರಿ ಲೀಖಾಪಟ್‌ವಾಳು ನಂಬಸ್‍. \xt 2:3-4\xt* ವಚನ್‍ಮ ಲೀಖೈರುತೆ ತಿಮ್ ಆ ಚಿಟ್ಟಿನು ಖಿವೂಬಿ ಕಾಗತ್ಅಖ್ಖು ಅಪ್ಣಾಮ ಕೊಯ್ನಿ. 2 ಕೊರಿಂಥ ಚಿಟ್ಟಿ ಘಣೇಥಿ ಪೌಲನೆ ಮೆಸೆಡೋನಿಯಮ ರ‍್ಹವಾನಿವಖ್ಹ್‌ತೆ ಲೀಖಿರಾಖ್ಯೊಸ್ \xt 2:13.\xt*
\ip ಕೊರಿಂಥವಾಳಾನ ಲೀಖ್ಯುತೆ ಭೇನಿ ಚಿಟ್ಟಿ ಘಣು ವಿಶೇಷ್‍ನು ಹುಯಿರ‍್ಹುಸ್. ಅನಾಮ ಅಪ್ಣು ಶೊಂತ್‍ನು ಅಜು಼ ದಿಲ್ನ ಮಾಯ್ನೆಥಿ ಭರೈಹುಯಿ ಚಿಟ್ಟಿ ಹುಯಿರ‍್ಹಿಸ್. ಪೌಲನೆ ಕೊರಿಂಥ ಸಬೇನಿ ಬಾರೇಮ ಅನೇಥಿ ಲಿದಿಹುಯಿ ವಾತೆನಿ ಬಾರೇಮ ಘಣು ಖುಷಿನ ಒತಾಳಿದೇಸ್. ಆ ಚಿಟ್ಟೀಮ ಜೂ಼ನಿ ಒಪ್ಪಂದನ ಆಧಾರ್‌ಕರೀನ್ ನವೇಥಿ ಶಿಕಾನು ಘಣು ಛೋ಼ಡಿನ್ ಬೋಲಿರಾಖ್ಯುಸ್ತೆ ಅಪ್ಣೆ ದೇಕ್‍ಯೇಸ್. ವಿಶೇಷ್‌ಥಿ ಪೌಲನೆ ಯೆರೂಸಲೇಮ್‌ನ ವಿಶ್ವಾಸಿಖ್ಹಾರನ ಮದತ್ ಹುವಾನಖ್ಹಾಜೆ ಪೈಶ ಜ಼ಮಕರಾನಿ ಬಾರೇಮ ಪೌಲನೆ ವಾಟ್‌ ವತಾಳಾಮ ಬೋಲಿವತಾಳಸ್ \xt 8—9\xt* ಹಜ಼್ಜ ಥೋಡುಜ಼ಣು ಅಪೊಸ್ತಲ್‌ಖ್ಹಾರು ಸಬೆನ ಭಾರ್‌ ಖ್ಹುಮಾರ್‌ಜ಼ಣು ಅದ್ಮಿವೋನು ಉಪಚಾರ್‌ನ ಲೀನ್‍ ಇವ್ಣುನ ಪೌಲನು ವಿರೋದಿಕರಾನ ದೇಖುಕರ್ತುಥು. ಇವ್ಣೆ ಪೌಲನಿ ಅದಿಕಾರ್‌ನ ಉಪ್ಪರ್ ಕೈರಾಡೋಳೆ ದೇಖುಕರ್ತುಥು. ಬೇನಿ ಕೊರಿಂಥವಾಳಾನ ಲೀಖಿರಾಖ್ಯುತೆ ಚಿಟ್ಟಿನ ಖ್ಹರ್ತಿಮ ಇನೆ ಯೇಸುಕ್ರಿಸ್ತನೊ ಏಕ್‌ ಅಪೊಸ್ತಲನು ಅದಿಕಾರ್‌ನ ಲೀರಾಖ್ಯೊಥೊ ಕರಿ ಬೋಲಾನು ಆ ಹುಕುಮ್‌ ಘಣೇಥಿ ಘಣು ಖ್ಹಮಜ಼್‌ಮ ಆವಸ್.
\iot ಕಾಡಿದೇಖೊ
\io1 1. ಪೌಲನೆ ಸಬೆವಾಳನ ಚಿಟ್ಟಿನ ಫಡಿವತಾಳಾನ ಶುರುಕರಸ್ \ior 1:1-7—1:7\ior*
\io1 2. ಇನಕೇಡೆಥು ಪೌಲ ಇನಿ ನಿಕ್ಳಿಜಾ಼ವಾನಿ ಉದ್ಧೇಶ್‍ಮ ಇನೆ ಬದಲಾವ್‍ ಕರ‍್ಯೊತೆ ಇನಿ ಬಾರೇಮ ಅಜು಼ ಇನಿ ಪೀಛೆನಿ ಚಿಟ್ಟೀಮ ಇನ ಮಾಲುಮ್ ಹುಯುತೆ ಇನ ಫರೈನ್ ಬೋಲ್ಯೋತೆ. \ior 1:8—7:16\ior*
\io1 3. ಇನಕೇಡೆಥು ಯೊ ಯೆರೂಸಲೇಮ್‌ನ ವಿಶ್ವಾಸಿನಖ್ಹಾಜೆ ಪೈಶ ಜ಼ಮಕರಾನಿ ಬಾರೇಮ ಇಷಾರ್ಕೊ ದೇಸ್. \ior 8:1—9:15\ior*
\io1 4. ಖ್ಹರ್ತಿಮ ಪೌಲನೆ ಇನ ಅಪೊಸ್ತಲನಿ ಹಕ್ನಿ ಬಾರೇಮ ಹುಕುಮ್ ಕರ್ತೊಹುಯಿನ್, ಅಜು಼ ಇನಿ ಅಗ್ಲಿ ಚಿಟ್ಟಿನಿ ಬಾರೇಮ ಹೊಷಾರಿ ಕರಸ್. \ior 10:1—13:10\ior*
\c 1
\p
\v 1 ದೇವ್ನಿ ಮರ್ಜಿಥಿ ಕ್ರಿಸ್ತ ಯೇಸುನೊ ಏಕ್‍ಜ಼ಣೊ ಅಪೊಸ್ತಲ ಹುಯಿರ‍್ಹೋತೆ ಪೌಲನೆ ಅಜು಼ ಇನೊ ವಿಶ್ವಾಸಿ ಭೈ ಹುಯಿರೋತೆ ತಿಮೊಥೆಯ ಕೊರಿಂಥಮ ಛಾ಼ತೆ ದೇವ್ನಿ ಸಬೇನಾಬಿ, ಅಖಾಯ ತಬರ್‌ಖಾಮ ಛಾ಼ತೆ ದೇವ್ನಿ ಅದ್ಮಿಯೇವ್‍ನ ಲೀಖಾನು‌ ಶಾತ್‌ಕತೊ: 
\v 2 ಅಪ್ಣೊ ಬಾ ಹುಯಿರ‍್ಹೋತೆ ದೇವ್‍ಥೀಬಿ, ಪ್ರಭು ಹುಯಿರ‍್ಹೋತೆ ಯೇಸು ಕ್ರಿಸ್ತಥಿಬಿ ತುಮುನ ವಾರ್‌ಖ್ಹೊಬಿ ಶಾಂತಿಬಿ ಮಳಾದೆ.
\s ಪೌಲ ದೇವ್ನ ಕರ‍್ಯೊತೆ ಧನ್ಯವಾದ್ ಅಖ್ಖು
\p
\v 3 ಅಪ್ಣೊ ಪ್ರಭು ಹುಯಿರ‍್ಹೋತೆ ಯೇಸು ಕ್ರಿಸ್ತನೊ ಬಾಬಿ, ದೇವ್‌ಬಿ ಹುಯಿರ‍್ಹೋತೆ ಇನ ಧನ್ಯವಾದ್. ಯೋ ಗೋರ್‌ಥಿ ಭರೈರ‍್ಹಾವಾಳೊ ಬಾಬಿ. ಅಖ್ಖಿ ತರಾಥಿ ಭಾಲಿ ದ್ಯವಾಳೊ ದೇವ್ ಹುಯಿರೋಸ್. 
\v 4 ಅಪ್ಣುನ ಖ್ಹತಾಪ್ಣಿ ಹುವಾನಿ ವಖ್ಹತ್‌ಮ ಯೋ ಅಪ್ಣುನ ಸಮಾಧಾನ್‍ ಕರಸ್; ಖ್ಹತಾಪ್ಣಿಮ ರ‍್ಹೇಯ್ತೆ ಬಿಜ಼ ಅದ್ಮಿನ ಸಮಾಧಾನ್ ಕರಾನ ಅನೇಥಿ ಅಪ್ಣೆ ಜಿನುಬಿ ಶಕತ್‌ವಾಳ ಹುಯೆಸ್. ದೇವ್ ಅಪ್ಣುನ ಸಮಾಧಾನ್‍ ಕರಾತೆ ತಿಮ್ಮಸ್ ಅಪ್ಣೆ ಜಿನುಬಿ ಇವ್ಣುನ ಸಮಾಧಾನ್ ಕರಾವಾಳ ಹುಯಿರ‍್ಹಿಯೇಸ್. 
\v 5 ಅಪ್ಣೆ ಕ್ರಿಸ್ತನಿ ಕೈಯೇಕ್ ದರದ್ಮ ಭಾಗ್‌ಲ್ಯವಾಳ ಹುಯಿರ‍್ಹಿಯೇಸ್. ಅಮ್ನಿಸ್ ಪರಕ್ಮ ಕ್ರಿಸ್ತಥಿ ಜಾ಼ಖ್ಹತ್ ಭಾಲಿಮಾಬಿ ಅಪ್ಣೆ ಭಾಗ್‌ ಹುಯಿರ‍್ಹಿಯೆಸ್. 
\v 6 ಅಪ್ಣೆ ಖ್ಹತಾಪ್ಣಿ ಲಿಯೇಸ್ತೆ ಇನಖ್ಹಾಜೆ ತುಮುನ ಸಮಾಧಾನ್‍ಬಿ ರಕ್ಷಣೆಬಿ ಮಳ್‍ಶೆ, ಅಪ್ಣೆ ಸಮಾಧಾನ್‌ಥಿ ರ‍್ಹವಾಳ ಹುಯಿರ‍್ಹಾತೊ ಯೊ ತುಮೂನ ಸಮಾಧಾನ್ನಖ್ಹಾಜೆ ಹುಯಿರ‍್ಹುಸ್. ಮೇ ಲೀರಾಖ್ಯೊತೆ ದರದ್ಮ ತುಮೆ ಶಾಂತಿಥಿ ಖ್ಹಮಾಳಿಲ್ಯವಾನಿಘೊಣಿ ಯೊ ತುಮೂನ ಭಾಲಿದೇಸ್. 
\v 7 ತುಮಾರಿ ಬಾರೇಮ ಹಮೂನ ಛಾ಼ತೆ ಭರೋಖ್ಹೊ ಘಟ್‍ಛಾ಼ ಶನಕತೊ ತುಮೆ ಹಮಾರಿ ಭಾಲಿಮಾಬಿ ಭಾಗ್‌ಲ್ಯವಾಳ ಹುಯಿರಾಸ್ತೆ ತಿಮ್ಮಸ್ ಮದತ್‌ಲ್ಯಾವಮಾಬಿ ಭಾಗ್‌ಲ್ಯವಾಳ ಹುಯಿರಾಸ್‍ಕರಿ ಹಮೂನ ಖ್ಹಮಜ಼್‌ಮ ಆಯಿರ‍್ಹುಸ್. 
\v 8 ಭೇನೆ ಭೈಯೇವೊ, ಹಮೆ ಏಷ್ಯಾ ತಬರ್‌ಖಾಮ ಖ್ಹಮಾಳ್ಯಾತೆ ಖ್ಹತಾಪ್ಣಿನಿ ಬಾರೇಮ ತುಮೂನ ಮಾಲುಮ್‌ಪಡಾದೆ ಕರಿ ಹಮಾರಿ ಖ್ಹಯಾಲ್ ಹುಯಿರಿಸ್, ಹಿಜ್ಜಾ಼ ಹಮೂನ ಕೈಏಕ್ ಮೋಟಿ ಖ್ಹೂಜ಼್‍ಥಿ. ಯೋ ಖ್ಹೂಜ಼್‌ಖ್ಹಾರಿ ಹಮಾರಿ ಶೊಂತ್ ಶಕಥ್ಥಿಬಿ ಘಣುಥು. ಜಾನ್‍ಖ್ಹಮೇದ್ ಬಚಾ಼ನಿ ವಿಶ್ವಾಸ್‌ ಹಮೆ ಮ್ಹೆಲಿದಿದ. 
\v 9 ಅಪ್ಣೆ ಮರಿಜಾ಼ಶುಕರಿ ಅಪ್ಣೆ ಮಾಲುಮ್ ಕರಿರಾಖ್ಯಥ. ಅಪ್ಣೆ ಅಪ್ಣಪರ್ ಭರೋಖ್ಹೊ ನಾ ರಾಕ್ಣುತೆ ಮರ‍್ಯಾಹುಯಾನ ಉಠಾಡವಾಳೊ ದೇವ್ನ ಉಪ್ಪರಸ್ ಭರೋಖ್ಹೊ ರಾಕ್ಣುಕರಿ ಆ ಅಖ್ಖು ಹುಯುತೆ. 
\v 10 ಮರಣ್ಣಿ ಆ ಘಣ ಖತ್ರೇಥಿ ದೇವ್ನೆ ಹಮೂನ ರಕ್ಷಣೆ ಕರ‍್ಯೊ. ಅಜು಼ ಖ್ಹಾಮ್ಣೆಬಿ ರಕ್ಷಣೆ ಕರ್ಶೆ. ಹಮೆ ಇನಾಮ ಭರೋಖ್ಹೊ ರಾಖಿರಾಖ್ಯಾಸ್. ಯೋ ಹಮೂನ ಬಿಜು಼ ಖ್ಹಾಮ್ಣೆಬಿ ರಕ್ಷಣೆ ಕರ್ಶೆ 
\v 11 ಆ ನಾಹುಯಿನ್ ತುಮೆ ತುಮಾರಿ ಪ್ರಾರ್ಥನೆಥಿ ಹಮೂನ ಮದತ್ ಕರುಕರಸ್. ತದೆ ತುಮಾರಿ ಪ್ರಾರ್ಥನೆಥಿ ದೇವ್ ಹಮೂನ ಆಶೀರ್ವಾದ್‌ ಕರಿರಾಖ್ಯೋತೆ ದೇಖಿನ್ ಕೈಏಕ್ ಜ಼ಣು ಹಮಾರ ಭಣೀಥು ದೇವ್ನ ಧನ್ಯವಾದ್‍ನಿ ಸ್ತುತಿ ಕರ್ಶೆ.
\s ಪೌಲನಿ ಖ್ಹೂಜ಼್‌ಮ ಬದ್‍ಲಾವ್ಣಿ
\p
\v 12 ಹಮೆ ಆ ವಾತ್ನಿ ಬಾರೇಮ ಕಂಡಿ ಛ಼ಡೈಲಿಯೇಸ್ಕಿ, ಹಮೆ ಖಲಿ ಅದ್ಮಿವೋನಿ ಅಕ್ಕಲ್‍ನ ಲಿದಾಕೊಂತೆ ದೇವ್ನ ವಾರ್‌ಖ್ಹಾನ ಆಖ್ಹ್‌ರಾಮ ಪರಿಶುದ್ಧಬಿ ನಿಯತ್‍ವಾಳಾಬಿ ಹುಯಿನ್ ಆ ಜಗತ್ಮ ತುಮಾರಿ ಬಾರೇಮ ಚಾ಼ಲಿಲಿದಾಕರಿ ಹಮಾರು ದಿಲ್‌ ಹಮೂನ ಸಾಕ್ಷಿ ಬೋಲಸ್. 
\v 13 ತುಮೆ ಫಡ್ನು ಅಜು಼ ಪೂರ ಪರಕ್ಮ ಮಾಲುಮ್ ಕರಿಲೇವ್ಣುಕರಿ ಪಣ್ಕಿ ಮನ ಮಾಲುಮ್‌ ಛಾ಼. ಶನಖ್ಹಾಜೆಬಿ ಕಾಹೆ. ಖ್ಹರ್ತಿಲಗು ತುಮೂನ ಅರ್ಥ ಉಷೆಕರಿ ಭರೋಖ್ಹೊ ಕರೀನ್ ಮೇ ಮಾಲುಮ್ ಕರಿಲೇವುಸ್. 
\v 14 ತುಮೆ ಪಹಿಲೇಸ್ ಹಮೂನ ಮಾಲುಮ್ ಕರಿರಾಖ್ಯಸ್. ಹಮೆ ಪ್ರಭು ಯೇಸುಮ ಕಂಡಿಚ಼ಡೈಲ್ಯವಾನ ಕಾರಣ್ ಹುಯಿರ‍್ಹಿಯೇಸ್. ಅಪ್ಣೊ ಪ್ರಭು ಹುಯಿರೋತೆ ಯೇಸುಕ್ರಿಸ್ತ ಪಾಛೊ಼ ಆವಾನ ದನ್ಮ ತುಮೆ ಹಮಾರಿ ಭರೋಖ್ಹಾಮ ಛಾ಼ತೆ ತಿಮ್ ಹಮೆ ತುಮಾರಿ ಭರೋಖ್ಹಾಮ ರ‍್ಹಿಶುಕರಿ ತುಮೆ ಮಾನಿಲೇವೊಸ್. 
\v 15 ಮೇ ಆ ಅಖ್ಖೀಸ್ ವಾತೆನ ಘಣು ವಿಶ್ವಾಸ್ ಕರಿ ರಾಖ್ಯೋಥೊ. ಇನಾಖ್ಹಾಜೆ ತುಮೂನ ಪಹಿಲೆ ಮಳಾನ ಮೇ ಅಖ್ಖಿ ಖ್ಹೂಜ಼್ ಕರಿರಾಖ್ಯೋಥೊ. ತದೆ ತುಮೂನ ಬೇಪಟ್ ಆಶೀರ್ವಾದ್‌ ಹುವಾನುಥು. 
\v 16 ಮೇ ಮೆಕೆದೋನಿಯನ ಜಾ಼ವಾನಿ ವಖ್ಹತ್‍ಬಿ ಬಿಜು಼ ಹಿಜ್ಜಾ಼ಥೊ ಪಾಛೊ಼ ಫರಿ ಆವಾನಿ ವಖ್ಹತ್‍ಮಾಬಿ ತುಮಾರಕನ ಆವ್ಣುಕರಿ ಥೊ. ಬಿಜು಼ ಯೂದಾಯ ತಬರ್‌ಖಾಮ ಜಾ಼ವಾನ ತುಮಾರೇಥಿ ಮದತ್ ಮಾಂಗ್‍ಣು ಕರಿ ಥೊ. 
\v 17 ಅಮ್‍ ಸೋಚ್ಯೊತೆ ಇನಖ್ಹಾಜೆ ಮೇ ಘುಂಜ್‍ಳಾವ್ಣಿನೊ ಖ್ಹಯಾಲ್ನೊ ಥೋಕಿಶು? ಇವ್ಣೆತೊ ಜಗತ್ನಿ ಖ್ಹೂಜ಼್‌ಮ ಸೋಚಾನಿ ವಖ್ಹತ್‌ಮ “ಓಹೊ, ಓಹೊ” ಕರಿಬಿ ಯೋಸ್ ವಖ್ಹತ್‌ಮ “ಕೊಯ್ನಿ, ಕೊಯ್ನಿ” ಕರಿಬಿ ಬೋಲಸ್ ಕೊಯ್ನಿಕಿ ಶು? 
\v 18 ತುಮೆ ದೇವ್ನ ವಿಶ್ವಾಸ್ ಕರಾವಾಳ ರ‍್ಹಯಾತೊ, ಹಮೆ ತುಮುನ ಎಕ್ಕಸ್ ವಖ್ಹತ್‌ಮ “ಓಹೊ” ಬಿಜು಼ “ಕೊಯ್ನಿ” ಕರಿ ಬೋಲ್ಯ ಕೊಯ್ನಿಕರಿ ತುಮೆ ವಿಶ್ವಾಸ್ ಕರ್ಶು. 
\v 19 ಶನಕತೊ ಸಿಲ್ವಾನಾಬಿ, ತಿಮೊಥೆಬಿ ಬಿಜು಼ ಮೇ ತುಮುನ ಬೋಧನೆ ಕರ‍್ಯೊತೆ ದೇವ್‌ನೊ ಛಿಯ್ಯೊಹುಯಿರ‍್ಹೊತೊ ಯೇಸುಕ್ರಿಸ್ತ ಓಹೊ ಕರಿಬಿ ಕೊಯ್ನಿಕರಿಬಿ ಬೇ ತರ ಕೋಥೂನಿ. ಕ್ರಿಸ್ತಮ ಕದೇಬಿ ರ‍್ಹೇಸ್ತೆ “ಓಹೊ” ಕರೀಸ್. 
\v 20 ಶನಕತೊ ದೇವ್ನೆ ಕರ‍್ಯೊತೆ ವಾಗ್ದಾನ್ ಅಖ್ಖು “ಓಹೊ” ಕರಿ ಜ಼ವಾಬ್ ಹುಯಿರ‍್ಹುಸ್. ಇನಖ್ಹಾಜೇಸ್ ಕ್ರಿಸ್ತಥಿ ದೇವ್ನ ಮಹಿಮೆನಖ್ಹಾಜೆ ಅಪ್ಣೆ “ಆಮೆನ್” ಕರಿ ಬೋಲಿಯೇಸ್. 
\v 21 ದೇವ್ ತುಮುನಾಬಿ ಹಮೂನ ಏಕ್‍ಕರಿ ಮಳೈರಾಖ್ಯೊಸ್. ಅಜು಼ ಅಪ್ಣುನ ಅಬಿಷೇಕ್ ಕರೀನ್ ಕ್ರಿಸ್ತನಿ ಗಳ್‌ಜೋ಼ಡ್ಮ ಏಕ್‌ ಹುಯಿರಾಸ್. ಅನ ಖುದ್ ದೇವಸ್ ಕರಿರಾಖ್ಯೊಸ್. 
\v 22 ಹಮೆ ಇನವಾಳಕರಿ ವತಾಳನಖ್ಹಾಜೆ ಇನೆ ಹಮಾರಪರ್ ಮುದ್ರೊ ನಾಖಿರಾಖ್ಯೋಸ್. ಯೋ ಹಮೂನ ಕರ‍್ಯೊತೆ ವಾಗ್ದಾನ್ನ ಚ಼ಲಾವ್‌ಷೆ ಕರಿ ಬೋಲಾನ ಪವಿತ್ರಾತ್ಮನಾಸ್ ಅಪ್ಣ ದಿಲ್ಮ ದೀರಾಖ್ಯೊಸ್. 
\v 23 ತುಮಾರಕನ ಕೊರಿಂಥಮ ಆಯೊಕೊಯ್ನಿ. ಇನಖ್ಹಾಜೆ ಮೇ ದಿಲ್‌ ಭರೈನ್ ಬೋಲುಕರುಸ್, ಅನ ದೇವಸ್ ಸಾಕ್ಷಿ ಹುಯಿರ‍್ಹೊಸ್. 
\v 24 ತುಮಾರಿ ವಿಶ್ವಾಸ್‌ನ ಕಬ್‌ಜಾ಼ಮ ರಾಖಾನ ಹಮೆ ಕೋಶಿಶ್ ಕರುಕರೇಸ್ ಕರಿ ಮೇ ಬೋಲುಕರುಕೊಯ್ನಿ. ತುಮೆ ವಿಶ್ವಾಸ್‌ಮ ಘಟ್‍ಛಾ಼ ಕತೋಬಿ ಹಮೆ ತುಮಾರಿ ಖ್ಹುಶಿನಖ್ಹಾಜೆ ತುಮಾರಿ ಜೋ಼ಡ್ಮಕಾಮ್‍ ಕರಾವಾಳ ಹುಯಿರ‍್ಹಾಸ್.
\c 2
\p
\v 1 ಕತೋಬಿ ಮೇ ಪಾಛೊ಼ಫರಿ ತುಮಾರಕನ ದುಖ್‌ಥಿ ಆಯಿಶ್‌ಕೊಯ್ನಿ ಕರಿ ಮಾರಮ ಖ್ಹೂಜ಼್‌ ಕರೀಲಿದೊ. 
\v 2 ಮೇ ತುಮುನ ದುಖ್ ಕರಾಯೋತೊ, ಮನ ಖುಷಿ ಕರಾವವಾಳುಕೋಣ್‍? ಮಾರೇಥಿ ದುಖ್ ಪಡ್ಯಾತೆ ತುಮೆಖಾಯೆ ಶು.
\p
\v 3 ಅನೇಥಿ ಮೇ ಆ ಚಿಟ್ಟಿನ ಲಿಖ್ಯೋತೆ ಮನ ಖ್ಹುಶಿ ಕರಾವಾಳಸ್ ಮನ ದುಖ್‍ಮ ನಾ ನಾಖಿಲೇವ್ಣು ಕರಿ ಲಾಝು಼ಸ್. ಮಾರಿ ಖ್ಹುಶಿಸ್‍ ತುಮಾರಿ ಖ್ಹುಶೀಕರಿ ತುಮೆ ಲಾಝ಼ಸ್‍ ಕರಿ ಮೇ ವಿಶ್ವಾಸ್ ಕರುಸ್.
\s ಗಲತ್‌ ಕರವಾಳನ ಕ್ಷಮಾಕರಾನು
\p
\v 4 ಮೇ ಅಗಾಡಿ ಏಕ್‍ವಖ್ಹತ್‍ ತುಮುನ ಲೀಖಾನಿ ವಖ್ಹ್‌ತೆ, ಮಾರೊ ದಿಲ್‌ ಘಣು ಕಲಾವ್ಣಿ ಹುಯಿರ‍್ಹುಥು, ಬಿಜು಼ ದುಖ್‍ಥಿಥು. ಮೇ ಆಂಝು಼ನಾಕ್‍ತೊ ಹುಯಿನ್ ತುಮುನ ಲೀಖ್ಯೋತೆ, ತುಮುನ ದುಖ್ ಕರಾವ್ಣು ಕರಿ ಕಾಹೆ, ತುಮುನ ಕೆತ್ರೆ ಪ್ಯಾರ್‌ಕರೂಸ್ ಕರಿ ತುಮೆ ಮಾಲುಮ್ ಕರೀಲೆವ್ಣು ಕರಿ ಎತ್ರೇಸ್.
\p
\v 5 ತುಮಾರಿ ಸಬೇನೊ ಏಕ್‍ಜ಼ಣೊ ದುಖ್ ದಿದೋತೆ, ಮನ ಏಕ್‍ ಜ಼ಣನ ಕಾಹೆ ಏಕ್‌ ಕೊಂತೆ ಏಕ್‌ ಪರಕ್ಮ ಇನೆ ಘಣ ಅದ್ಮಿನ ದುಖ್ ದೀರಾಖ್ಯೊಸ್. ಯೋ ದುಖ್ ಖ್ಹಾರಾಸ್‌ಮ ಹುಯುಕರಿ ಮೇ ಬೋಲುಕೊಯ್ನಿ. 
\v 6 ತುಮೆ ಖ್ಹಾರು ಮಳೀನ್‍ ದಿದಾತೆ ನಿಶತಸ್‍ ಬಶ್‌. 
\v 7 ಹಮ್ಕೆ ತುಮೆ ಇನ ಮಾಪ್ ಕರಿನ್ ಭಾಲಿದೆವ್ಣು. ಕೊಯ್ನಿಕತೊ ಯೋ ಘಣ ದುಖ್‍ಮ ಡುಬಿಜಾ಼ಶೆ. 
\v 8 ಇನಾಖ್ಹಾಜೆ, ತುಮೆ ಇನ ಪ್ಯಾರ್ ಕರೋಸ್ ಕರಿ ಇನ ವತಾಳ್ಣು ಕರಿ ಮೇ ತುಮುನ ಬೋಲಿಲೆವುಸ್. 
\v 9 ಖ್ಹಾರೀಸ್‍ ವಾತ್ನಿ ಬಾರೇಮ ತುಮೆ ಮುಡ್‌ಕ್ಯು ಝು಼ಕಾವವಾಳ ಹುಯಿರ‍್ಹಾಸ್ಕಿ ಕೊಯ್ನಿ. ಕಾಯಿತೋಬಿ ತುಮುನ ತರೀಪ್ಷ ಕರಿನ್ ಮಾಲುಮ್ ಕರಿಲ್ಯಾವಾನ ಮೇ ತುಮುನ ಆ ಚಿಟ್ಟಿನ ಲಿಖ್ಯೋತೆ. 
\v 10 ತುಮೆ ಕಿನ ಮಾಪ್ ಕರೋಸ್ಕಿ ಮೇಬಿ ಇವ್ಣುನ ಕ್ಷಮಾಪಣ್ ಕರುಸ್. ತುಮಾರ ಖ್ಹಾಜೆಸ್ ಇನ ಕ್ರಿಸ್ತನ ಖ್ಹಾಮ್ಣೆ ಕ್ಷಮಾಪಣ್ ಕರುಸ್. 
\v 11 ಅಮ್‍ ಶೈತಾನ್‍ ಅಪ್ಣುನ ಠಗಾವ್ಣುನಾಕರಿ ಅಮ್‌ಕರ‍್ಯೊ. ಶನಕತೊ ಇನಿ ಖರಾಬ್‌ಖ್ಹೂಜ಼್‌ ಅಪ್ಣುನ ಮಾಲುಮ್ ಛಾ಼.
\s ತ್ರೋವ ಕರಿ ಗಾಮ್ಮ ಪೌಲನಿ ಚಾ಼ಲ್‍ಕುಚ಼್
\p
\v 12 ಮೇ ಕ್ರಿಸ್ತನಿ ಸುವಾರ್ತೆನ ಬೋಲಾನ ತ್ರೋವ ಖ್ಹಯೇರ‍್ನ ಜಾ಼ವಾನಖ್ಹಾಜೆ ಪ್ರಭುನೆ ಗೋರ್‌ಥಿ ಮನ ಬಾಕಲ್‌ಕಾಡಿನ್ ಅಛ್ಛು಼ ಮಾರಗ್ ವತಾಳ್ಯೊ, 
\v 13 ಕತೋಬಿ ಮಾರೊ ಭೈ ಹುಯಿರೋತೆ ತೀತನ ಮೇ ಹಿಜ್ಜಾ಼ ದೇಖ್ಯೊಕೊಂತೆ ಮಾರ ದಿಲ್ನ ಸಮಾಧಾನ್ ಕೋಥೂನಿ. ಇನಖ್ಹಾಜೆ ಮೇ ಇವ್ಣುನ ಧನ್ಯವಾದ್‌ ಬೋಲಿನ್ ಹಿಜ಼್ಜಾಥೊ ಮೆಕೆದೋನಿಯನ ನಿಕ್‍ಳ್ಯೊ.
\s ಕ್ರಿಸ್ತಥಿಸ್ ಜೀತ್
\p
\v 14 ಕತೋಬಿ ಮೇ ದೇವ್ನ ಧನ್ಯವಾದ್ ಕರುಸ್. ಯೋ ಹಮೂನ ಕ್ರಿಸ್ತನಿ ಗಳ್‌ಜೋ಼ಡ್ಮ ಕದೇಬಿ ಜೀತ್‍ನಿ ಜಯಭಣಿ ಚ಼ಲಾವ್ತೊ ಹುಯಿನ್ ಅಜು಼ ಇನಿ ಗ್ಯಾನ್ನಿ ಅಛ್ಛಿ ವಾಖ್ಹ್‌ನ ಅಖ್ಖಿಬಾಜು಼ ಹಮಾರೇಥಿ ಫೈಲಾವವಾಳ ದೇವ್ನ. 
\v 15 ರಕ್ಷಣೆನ ಮಾರಗ್‍ಮ ರ‍್ಹವಾಳಮಾಬಿ ಬಿಜು಼ ನಾಶನನ ಮಾರಗ್‍ಮ ರ‍್ಹವಾಳಮಾಬಿ ಹಮೆ ದೇವ್ನ ಖ್ಹಾಮ್ಣೆ ಕ್ರಿಸ್ತಮ ಮಹಿಕವ್‌ ಕರಿಯೇಸ್. 
\v 16 ನಾಶನನ ಮಾರಗ್‍ಮ ರ‍್ಹವಾಳ ಅದ್ಮಿವೋನ ಮರಣ್ಣು ವಾಖ್ಹ್‌ಹುಯಿರಾಸ್, ರಕ್ಷಣೆನ ಮಾರಗ್‍ಮ ರ‍್ಹವಾಳ ಅದ್ಮಿನ ಜಿವ್ತುಜಾನ್ನೊ ಮಾರಗ್ ಹುಯಿರ‍್ಹಾಸ್. ಅಮ್‍ರ‍್ಹವಾಪರ್ ಆ ಕಾಮ್‍ಕರ‍್ವಾನ ಕೋಣ್ ಯೋಗ್ಯ ಹುಯಿರುಸ್? 
\v 17 ಕೈಏಕ್ ಜ಼ಣು ದೇವ್ನಿವಚನ್ನ ಮಿಲಾವಟ್ ಕರಿ ಬೇಪಾರ್ ಕರಾಸ್. ಹಮೆತೋಬಿ ಇಮ್‌ಕಾಹೆ ದೇವ್‌ಮ ರ‍್ಹೀನ್, ದೇವ್ನಖ್ಹಾಮ್ಣೆ ಕ್ರಿಸ್ತಯೇಸುನಿ ಗಳ್‌ಜೋ಼ಡ್ಮ ಬರೋಬರ್ ಖೀವೂಕಿ ತೀನಸ್ ಹಮೆ ಬೋಧನೆ ಕರೇಸ್.
\c 3
\s ನವಿ ಒಪ್ಪಂದಾನು ಸೇವೆಕರವಾಳು
\p
\v 1 ಹಮೆ ಹಮಾರಿ ಬಾರೇಮ ಬಿಜು಼ಪಾಛ಼ ಖ್ಹರೈಲ್ಯಾವಾನ ಶುರು ಕರ‍್ಯಾಕಿಶು? ಕೊಯ್ನಿ, ಥೋಡ ಜ಼ಣನ ಹೋಣುತೆ ತಿಮ್ ತುಮಾರಕನ ಆವಾನ ಮನ ಯೋಗ್ಯತೆನು ಚಿಟ್ಟಿ ಮಾಂಗಿಲೆವ್ಣು ಕಿಶು? ಕೊಯ್ನಿ, ಬಿಜಿ ಆಡಿ ಜಾ಼ವಾನಿ ವಖ್ಹತ್‌ಮ ತುಮಾರೇಥಿ ಯೋಗ್ಯತೆನಿ ಚಿಟ್ಟಿ ಮಾಂಗಿಲೆವ್ಣುಕಿಶು? 
\v 2 ಶೊಂತ್ ತುಮೇಸ್ ಹಮೂನ ಯೋಗ್ಯತೆನಿ ಚಿಟ್ಟಿ ಹುಯಿರ‍್ಹಾಸ್. ಯೋ ಚಿಟ್ಟಿಖ್ಹಾರಿ ಹಮಾರ ದಿಲ್ಮ ಲಿಖೈರ‍್ಹುಸ್. ಯೋ ಚಿಟ್ಟಿ ಖ್ಹಾರಸ್ನ ಮಾಲುಮ್, ಖ್ಹಾರುಸ್ ಪಢಾಸ್. 
\v 3 ತುಮೆ ಹಮಾರಿ ಸೇವೆನ ಫಲ್‌ಥಿ, ಕ್ರಿಸ್ತನೆ ಹಮಾರ ಹಾತೇಥಿ ಲೀಖೈನ್ ದಿದೊತೆ ಚಿಟ್ಟಿಕರಿ ಮಾಲುಮ್‌ಕರಾಯ ಆ ಚಿಟ್ಟಿ ಲೀಖೈರ‍್ಹೂತೆ ಇಂಕ್‍ಥಿ ಕಾಹೆ,ಜಿವ್ತೊಜಾನ್ನೊ ದೇವ್ನ ಆತ್ಮಥಿ ಅನ ಬಂಡಾನ ಪಲ್ಗಾಪರ್‌ ಕಾಹೆ, ಅದ್ಮಿನ ದಿಲ್ನ ಪಲ್ಗಾಪರ್‌ ಲೀಖೈರಾಖ್ಯೊಸ್.\x - \xo 3:3 \xo*\xt ವಿಮೋಚನ 24:12;\xt* \xt ಯೆರೆಮೀಯ 31:33\xt*\x* 
\v 4 ಆಥ್ರಾನು ಭರೋಖ್ಹೊ ಕ್ರಿಸ್ತಮಥೂಸ್ ದೇವ್ನ ಖ್ಹಾಮ್ಣೆ ಹಮೂನ ಛಾ಼. 
\v 5 ಹಮಾರಿ ಶೊಂತ್ ಶಕತ್‌ಥೀಸ್‌ ಹಮೆ ಕೆಹುತೋಬಿ ಅಛ್ಛು಼ಕರ್‌ಶು ಕರಿ ಮೇ ಬೋಲುಕೊಯ್ನಿ. ಅಥ್ರಾನಿ ಶಕತ್‍ ಅಪ್ಣುನ ದೇವ್‍ಥೀಸ್‍ ಅಯಿರ‍್ಹೂಸ್. 
\v 6 ದೇವ್ ನವಿ ಒಪ್ಪಂದಾನನ ಸೇವೆಕರಾವಾಳ ಹುಯಿರಾವಾನಿ ತಾಖತ್ನ ದೇವ್ನೆಸ್ ಹಮೂನ ದಿದೊ. ಆ ನವಿ ಒಪ್ಪಂದಾನ ಲೀಖಾವನಿ ರೂಪ್‍ಮಛಾ಼ತೆ ಧರ್ಮಶಾಸ್ತ್ರ ಕಾಹೆ. ಆ ಹುಯಿರ‍್ಹುತೆ ಪವಿತ್ರಾತ್ಮ ಹುಯಿರುಸ್. ಲಿಖಾವಟ್‌ನ ರೂಪ್‍ಮಛಾ಼ತೆ ಧರ್ಮಶಾಸ್ತ್ರ ಮರಣ್ಣ ಲ್ಯಾವ್‌ಶೆ, ಕತೋಬಿ ಪವಿತ್ರಾತ್ಮ ಜಾನ್‌ ದ್ಯಾವಾಳೊ ಹುಯಿರೋಸ್. 
\v 7 \x - \xo 3:7 \xo*\xt ವಿಮೋಚನ 34:29\xt*\x*ಮರಣ್‍ದ್ಯವಾನು ನಿಯಮ್‌ನು ಸೇವೆ ಬಂಡಾನು ಪಲ್ಗಾನ ಉಪ್ಪರ್ ಲೀಖ್ಯಮ ಲೀಖೈರ‍್ಹೂಥು. ಯೋ ದೇವ್‌ನು ಮಹಿಮೆನ ಜೋ಼ಡ್ಮ ಆಯುಥು. ಮೋಶೇನು ಮ್ಹೋಡು ಉಜಾ಼ಖ್ಹ್‌ಥಿ ಚ಼ಮ್‍ಕುಕರ‍್ತೂಥುತೆ ಇನಾಖ್ಹಾಜೆ ಇಸ್ರಾಯೇಲ್‌ವಾಳು ಇನ ಮ್ಹೋಡಾನ ದೇಖಾನ ಹುಯುಕೋಯ್ನಿ. ಇನಪಾರ್ ಯೋ ಮಹಿಮೆ ಕಮ್ ಹುಯಿಗು. 
\v 8 ಅನಾಖ್ಹಾಜೆ ಪವಿತ್ರಾತ್ಮ ಸಂಬಂದನಿ ಸೇವೆ ಬಿಜೂ಼ಬಿ ಘಣು ಮಹಿಮೆನ ಲೀರಾಖ್ಯುಸ್. 
\v 9 ಅನಿ ಅರ್ಥ ಶಾತ್‍ಕತೊ; ಯೋ ಸೇವೆ ಅದ್ಮಿನ ಅಪರಾದಿಕರಿ ತೀರ್ಪ್‍ದಿದು, ಕತೋಬಿ ಯೋ ಮಹಿಮೆನ ಲೀರಾಖ್ಯುಥು. ಅನಖ್ಹಾಜೆ, ನೀತಿನ ಕಫ್ಫನ್ ಹುಯಿರ‍್ಹುತೆ ಸೇವೆ ಬಿಜೂ಼ಬಿ ಘಣು ಮಹಿಮೆನ ಉಬ್‍ಜಾ಼ವಾನು ಕೆತ್ರೇಕ್ಕಿ ಖ್ಹಾಚಹುಯಿರೂಸ್. 
\v 10 ಯೋ ಜೂ಼ನಿ ಸೇವೆ ಮಹಿಮೆನ ಲೀರಾಖ್ಯುಥು. ಕತೋಬಿ ನವಿ ಸೇವೆನ ಖ್ಹಾಮ್ಣೆ ಯೋ ಮಹಿಮೆಕೊಂತೆ ಹುಯಿಗಯು\x - \xo 3:10 \xo*\xt ವಿಮೋಚನ 34:29-30\xt*\x*. 
\v 11 ನೂಛೈ಼ಗಿತೆ ಯೋ ಸೇವೆ, ಮಹಿಮೆನಿ ಜೋ಼ಡ್ಮ ಐರ‍್ಹುಉಶೇತೊ, ಕದೆಕದೇಬಿ ಭಡ್ತಿ ಜಾ಼ವಾನಿ ಆ ಸೇವೆ ಬಿಜೂ಼ಬಿ ಘಣು ಮಹಿಮೆನ ಲೀರಾಖ್ಯುಸ್. 
\v 12 ಶನಕತೊ ಹಮೂನ ಆ ಭರೋಖ್ಹೊ ಛಾ಼ತೆ ಇನಾಖ್ಹಾಜೆ ಘಣು ಹಿಮ್ಮಥಿಛಿಯೆ. 
\v 13 ಕಂಬ್‍ಲೈಜಾ಼ಶೆತೆ ಮಹಿಮೆ ಉಜೈ಼ಜಾಯಿತೆ ಇನ ಇಸ್ರಾಯೇಲ್‌ವಾಳು ನಾ ದೇಕ್ಣುತೆ ತಿಮ್ ಮೋಶೆ ಇನ ಮ್ಹೋಡಾನಪರ್ ಘುಮ್‍ಟೊ ನಾಖಿಲೇತೋಥೊ. ಹಮೆ ಮೋಶೆನಿಘೊಣಿ ಕಾಹೆ. 
\v 14 ಕತೋಬಿ ಇವ್ಣಿ ಬುದ್ಧಿ ಮಂಕ್ ಹುಯಿರ‍್ಹಿಥೀತೆ ಇನಾಖ್ಹಾಜೆ ಇವ್ಣೆ ಮಾಲುಮ್ ಕರೀಲಿದುಕೊಯ್ನಿ. ಇವ್ಣೆ ಜೂ಼ನು ಒಪ್ಪಂದಾನನ ಪಢಾನಿ ವಖ್ಹ್‌ತೆ ಯೋಸ್ ಘುಮ್‍ಟೊ ಇವ್ಣ ದಿಲ್‌ಪರ್‌ ಢಪೈಜಾ಼ಸ್. ಶನಕತೊ ಖಲಿ ಕ್ರಿಸ್ತಥಿಸ್ ಯೋ ನಿಕ್‍ಳೈಜಾ಼ಶೆತೆ. 
\v 15 ಕತೋಬಿ ಹಮ್ಕೆಲಗೂಬಿ ಮೋಶೇನು ಧರ್ಮಶಾಸ್ತ್ರ ಪಢಾನಿ ವಖ್ಹ್‌ತೆ, ಇವ್ಣ ದಿಲ್‌ಪರ್‌ ಘುಮ್‍ಟೊ ನಖೈರ‍್ಹೇಸ್. 
\v 16 ಇನಾಖ್ಹಾಜೆ ಏಕ್‌ ಅದ್ಮಿ ಪ್ರಭುನ ಭಣಿ ಫರೀನ್, ಇನ ಪೀಠೆ ಚಾ಼ಲಾನಿ ವಖ್ಹತ್‌ಮ ಯೋ ಘುಮ್‍ಟೊ ನಿಕ್‍ಳೈಜಾ಼ಶೆ.\x - \xo 3:16 \xo*\xt ವಿಮೋಚನ 34:34;\xt* \xt ಯೆಶಾಯ 25:7\xt*\x* 
\v 17 ಯೋ ಪ್ರಭುಸ್ ದೇವ್ನುಆತ್ಮ, ಪ್ರಭುನು ಆತ್ಮ ರ‍್ಹೇಸ್ತೆ ಹಿಜ್ಜಾ಼ ಛುಟ್ಕಾರ್ ರ‍್ಹೇಸ್. 
\v 18 ಕತೋಬಿ ಅಪ್ಣೆಖ್ಹಾರು ಮುಚೈರ‍್ಹೇಯ್‌ಕೊಂತೆ ಮ್ಹೋಡೇಥಿ ಪ್ರಭುನಿ ಮಹಿಮೆನ ಐನಾಮ ದೆಖಾವನಿತರ ಇನ ದೆಕ್ತಹುಯಿನ್ ಅಪ್ಣೆಖ್ಹಾರು ಪ್ರಭುನಿ ಆತ್ಮನಿ ಮಹಿಮೆಥಿ ಜಾ಼ಖ್ಹತ್‌ಹುಯಿನ್ ಯೊ ಮಹಿಮೆನ ರೂಪ್ ಲ್ಯವಾಳ ಹುಯೆಸ್. ಆ ಆತ್ಮ ಹುಯಿರ‍್ಹೋತೆ ಪ್ರಭುನು ಕಾಮಸ್.
\c 4
\s ಮಾಟಿನ ಹಂಡ್ಕಾಮ ಆತ್ಮೀಕ್ ದೌಲತ್
\p
\v 1 ದೇವ್ನೆ ಇನಿ ಗೋರ್‌ಥಿ ಆ ಸೇವೆನ ಹಮೂನ ದಿದೋತೆ, ಇನಾಖ್ಹಾಜೆ ಹಮೆ ಹಿಮ್ಮತ್ ಮ್ಹೆಂದಿನ್‍ ಪಾಛ಼ ಫರೀಯೆ ಕೊಯ್ನಿ. 
\v 2 ಗಪ್ಲತ್‍ನು ಬಿಜು಼ ಖ್ಹರಮ್‌ ಕಡೈಲ್ಯಾವಾನ ಖ್ಹಾರ ಮಾರಗ್‍ಥಿ ಹಮೆ ದೂರ್ ಹುಯಿರಾಸ್‍. ಬಿಜು಼ ಹಮೆ ಮಶ್ಲತ್ ಭಂದೈಯೇ಼ ಕೊಯ್ನಿ. ದೇವ್ನಿ ವಚನ್‍ಮ ಮಿಲಾವಟ್ ಕರಿಯೆಕೊಯ್ನಿ. ಹಮೆ ಖ್ಹಾಚ಼ನ ಛೋ಼ಡಿನ್ ಬೋಲ್ಯೆಸ್‍. ಹಮೆ ನೀತಿವಾಳಕರಿ ಹರೇಕ್ ಅದ್ಮಿನಿ ದಿಲ್ನಿಸಾಕ್ಷಿ ದೇವ್ನ ಖ್ಹಾಮ್ಣೆ ಮಾನಿಲ್ಯವಾನಿ ಪರಕ್ಮ ಚಾ಼ಲೆಯೇಸ್. 
\v 3 ಹಮೆ ಬೋಲೇತೆ ಸುವಾರ್ತೆ ಥೋಡಜ಼ಣಾನ ಲಪಿರ‍್ಹೂಉಷೆತೊ ನಾಶನನ ಮಾರಗ್‍ಮ ರ‍್ಹವಾಳನ ಖಲಿ ಯೋ ಲಪಿರ‍್ಹೂಸ್. 
\v 4 ದೇವ್‌ನೊ ರೂಪ್ ಹುಯಿರೋತೆ ಕ್ರಿಸ್ತನಿ ಉಜಾ಼ಖ್ಹ್‌ನ ವತಾಳನು ಮಹಿಮೆನಿ ಸುವಾರ್ತೆ ಅವ್ಣಾಮ ಉಜಾ಼ಖ್ಹ್‌ ನಾಹೊಣುಕರಿ, ಆ ಜಗತ್‌ನು ದೇವ್‌ ವಿಶ್ವಾಸ್‌ಕೊಂತೆ ಇವ್ಣ ದಿಲ್ನ ಕಾಣು ಕರಿನಾಖ್ಯು. 
\v 5 ಅಪ್ಣುನ ಅಪ್ಣೆಸ್ ಪ್ರಚಾರ್ ನಾಕರ‍್ನುತೆ ಅಪ್ಣುನ ಯೇಸುನ ಖ್ಹಾಜೆ ತುಮಾರ ದಾಸಕರಿ ಬೋಲಿನ್ ಕ್ರಿಸ್ತ ಯೇಸುನಾಸ್ ಪ್ರಭುಕರಿ ಬೋಲೆಸ್. 
\v 6 “ಉಜಾ಼ಳು ಅಂಧಾರನ ಮಹಿಥು ಉಜಾ಼ಖ್ಹ್‌ ಮ್ಹೇಲಾದೆ” ಕರಿ ದೇವ್ನೆ ಏಕ್‌ ವಖ್ಹತ್ ಬೋಲಿರಾಖ್ಯೊಸ್. ಯೋ ದೇವಸ್ ಹಮಾರಿ ದಿಲ್ನ ಇನ ಉಜಾ಼ಳೇಥಿ ಉಜಾ಼ಖ್ಹ್‌ ಕರಿರಾಖ್ಯೋಸ್. ಕ್ರಿಸ್ತನ ಮ್ಹೋಡಪರ್ ಛಾ಼ತೆ ದೇವ್ನಿ ಮಹಿಮೆನ ಹಮೂನ ಖ್ಹಮ್‍ಜಾ಼ಡಾಥಿ ಇನೆ ಹಮೂನ ಉಜಾ಼ಳು ದೀರಾಖ್ಯೊಸ್. 
\v 7 ಮಾಟಿನ ಮಟ್ಕಾನಿ ತರ ಛಿಯೇತೆ ಅಪ್ಣಾಮ ಆ ನಿಧಿ ಮ್ಹೆಲಿರಾಖ್ಯುತೆ ಇನಖ್ಹಾಜೆ ಅಥ್ರಾನಿ ಮಹಾನ್ ಶಕತ್ ದೇವ್‍ನೀಸ್ ಪಣ್ಕಿ ಅಪ್ಣಾಮಾಥು ಆಯುಕೊಂತೆ ಖ್ಹಾಚಿಸ್. 
\v 8 ಅಖ್ಖಿಬಾಜು಼ ಅಪ್ಣುನ ಕಲಾವ್ಣಿ ರ‍್ಹಯುತೋಬಿ ದಿಲ್‍ದುಖೈಲಿಯೇ ಕೊಯ್ನಿ. ಅಪ್ಣುನ ರುಕ್‍ ನಾದೇಖಾಯುತೋಬಿ ಅಪ್ಣೆ ದುಖ್ ಕರಿಯೇಕೊಯ್ನಿ. 
\v 9 ಹಿಜ್ಜಾ಼ ಕೈಏಕ್ ವಹೇರ‍್ಯುರ‍್ಹಯುತೋಬಿ ಹಾತ್‌ ಮ್ಹೆಲೈಗಯ ಕೊಯ್ನಿ. ಕತೋಬಿ ಹೇಟ್‍ ಪಡಿಗಯಾತೋಬಿ ನಾಶ್‍ಹುವಾಳ ಕಾಹೆ. 
\v 10 ಹಮಾರ ಶರೀರ್‌ಮ ಯೇಸುನೊ ಜಾನ್‌ ಅಪ್ಣಾಮ ಛಾ಼ಕರಿ ವತಾಳನಖ್ಹಾಜೆ ಇನಿ ಮರಣ್ಣಿ ಖ್ಹತಾಪ್ಣಿನ ಅನುಭವ್‍ ಕರಿಯೇಸ್. 
\v 11 ಯೇಸುನೊ ಜಾನ್ನ ಅಪ್ಣೆ ಮರ‍್ಯಹುಯ ಶರೀರ್‌ಮ ಛಾ಼ಕರಿ ವತಾಳನಖ್ಹಾಜೆ ಜಿವ್ತಛಿಯೇತೆ ಅಪ್ಣೆ ಯೇಸುನಖ್ಹಾಜೆ ಕದೇಬಿ ಮರಣ್ಣ ದೇತಾ ಛಿಯೆ. 
\v 12 ಇನಾಖ್ಹಾಜೆ ಮರಣ್ ಹಮಾರಮ ಕಾಮ್ ಕರುಕರಸ್, ಕತೋಬಿ ತುಮಾರಮ ಜಾನ್‌ ಕಮ್ ಕರುಕರಸ್. 
\v 13 “ಮೇ ವಿಶ್ವಾಸ್ ಕರ‍್ಯೊತೆ ಇನಖ್ಹಾಜೇಸ್ ವಾತ್‍ಬೋಲ್ಯೊತೆ.” ಕರಿ ಪವಿತ್ರದಪ್ತರ್‌ಮ ಲಿಖೈರ‍್ಹುಸ್. ವಿಶ್ವಾಸ್‍ನು ಯೋಸ್ ಆತ್ಮ ಅಪ್ಣಾಮ ಛಾ಼ತೆ ಇನಖ್ಹಾಜೆ ಅಪ್ಣೆ ನಂಬವಾಳಹುಯಿನ್ ವಾತೆ ಬೋಲಿಯೇಸ್.\x - \xo 4:13 \xo*\xt ಕೀರ್ತನೆ 116:10\xt*\x* 
\v 14 ಪ್ರಭು ಹುಯಿರೋತೆ ಯೇಸುನ ಮರ‍್ಯಾಹುಯಾಮಾಥು ಉಠಾಡ್ಯೋತೆ ದೇವ್ ಹಮುನಾಬಿ ಕ್ರಿಸ್ತನಿ ಜೋ಼ಡ್ಮ ಉಠಾಡ್‍ಶೆ ಕರಿ ಬೋಲಾನು ಹಮೂನ ಮಾಲುಮ್‌ಛಾ಼. ದೇವ್ ಹಮೂನ ತುಮಾರಿ ಜೋ಼ಡ್ಮ ಇನಖ್ಹಾಮ್ಣೆ ಭೀರಾಕ್‌ಶೆ. 
\v 15 ಆ ಖ್ಹಾರು ತುಮಾರು ನಫ್ಪಾನ ಖ್ಹಾಜೆಸ್. ಅಮ್ ದೇವ್ನಿ ವಾರ್‌ಖ್ಹೊ ಜಾ಼ಖ್ಹತ್, ಜಾ಼ಖ್ಹತ್ ಅದ್ಮಿನ ದೆವಾವ್‌ಶೆ ಇನಾಖ್ಹಾಜೆಥಿ, ಘಣು ಘಣು ಅದ್ಮಿ ದೇವ್ನಿ ಮಹಿಮೆನಖ್ಹಾಜೆ ಧನ್ಯವಾದ್‍ನಿ ಸ್ತುತಿ ಕರ್ಶೆ.
\s ವಿಶ್ವಾಸ್‍ನು ಜಿವ್ಣು
\p
\v 16 ಅನಖ್ಹಾಜೆಥೀಸ್ ಹಮೆ ಕದೇಬಿ ಡರ್‌ಶುಕೊಯ್ನಿ. ಅಪ್ಣು ತನ್ ನಾಶ ಹುಯಿಗುತೋಬಿ ಅಪ್ಣು ದಿಲ್‌ ದನ್‍ಪರ್ ದನ್ ನವು ಹೋತುಆವ್‍ಶೇ. 
\v 17 ಥೋಡ ದನ್‌ಲಗು ಹಮೂನ ನ್ಹಾನಿಮೋಟಿ ಖ್ಹತಾಪ್ಣಿ ರ‍್ಹಿಶೆ. ಕತೋಬಿ ಹರ್‌ಹಮೇಶಾನಿ ಮಹಿಮೆನ ಲೀಲ್ಯಾವಾನ ಯೋ, ಅಪ್ಣುನ ಮದತ್ಉಶೇ. ಯೊ ಮಹಿಮೆ ಹಮ್ಕೇನಿ ಖ್ಹತಾಪ್ಣಿಥೀಬಿ ಮಹಾನ್ ಹುಯಿರ‍್ಹಿಶೆ. 
\v 18 ಅಪ್ಣೆ ದೆಖಾವತೆ ಇನಅಖ್ಖು ದೆಖ್ಯೆಕೊಂತೆ ಛಾ಼ತೆ ಇನ ದೇಖವಾಳ ಹುಯಿರಾಸ್. ಶನಕತೊ ದೆಖಾವತೆ ಅಖ್ಖು ಥೋಡಿ ವಖ್ಹತ್‌ಖಲಿ ರ‍್ಹೇಸ್. ದೆಖಾವಕೊಂತೆ ಯೋ ಹರ್‌ಹಮೇಶ ರ‍್ಹೇಸ್.
\c 5
\p
\v 1 ಧರ್ತಿಪರ್ ಅಪ್ಣೆ ಜಿವಿರ‍್ಹಾತೆ ಆ ಡೇರೊ ಕತೊ ಆ ಶರೀರ್ ನಾಶ ಉಷೆಕರಿ ಅಪ್ಣುನ ಮಾಲುಮ್‌ಛಾ಼. ಅಪ್ಣೆ ಜಿವಿರ‍್ಹಾವಾನ ಖ್ಹಾಜೆ ದೇವ್ ಅಪ್ಣುನ ಏಕ್‌ ಘರ್‌ದಿಶೆ. ಯೋ ಅದ್ಮಿನ ಹಾತೇಖ್ಹು ಕರ‍್ಯುಹುಯು ಘರ್‌ಕಾಹೆ. ಯೋ ಪರ್‌ಲೋಕ್‌ಮ ದೇವ್‍ಥಿ ಬಣಾಯುಹುಯು ಹರ್‌ಹಮೇಶ ರ‍್ಹವಾನು ಘರ್ ಹುಯಿರುಸ್. 
\v 2 ಅಪ್ಣೆ ಆ ಶರೀರ್‌ಮ ರ‍್ಹವಾಲಗೂಬಿ ಕುರ್ಲಾವ್‍ತಾ ಹುಯಿನ್ ರ‍್ಹಿಶು. ಪರ್‌ಲೋಕ್ಮ ಮಳ್‌ಶೇತೆ ಅಪ್ಣ ಘರ್‌ನ ಅಪ್ಣೆ ಕದೆ ಲೀಲಿಶುಕರಿ ಉತ್ವಾಳಿ ಕರಿಯೇಸ್. 
\v 3 ಅಪ್ಣೆ ಇನ ಫೇರಿಲಿದತೊ ಉಘಾಡ ಹುಯಿರ‍್ಹಿಶು ಕೊಯ್ನಿ. 
\v 4 ಆ ಧರ್ತಿನ ಡೇರಾಮ ರ‍್ಹಾವಾಲಗು ಅಪ್ಣುನ ವಜ಼ನ್ನೊ ಭೋಜೊ ಪಾಡಿಲೀನ್ ಥರ್‌ಪಡೇಸ್; ಆ ಶರೀರ್ ಉಘಾಡು ಹುಯಿರ‍್ಹೇವ್ಣುಕರಿ ಕಾಹೆ; ಇನ ಬದಲ್ ಅಪ್ಣೆ ಪರ್‌ಲೋಕ್‌ನು ಘರ್‌ನ ಫೇರಿಲ್ಯಾವಾನ ಆಖ್ಹ್‌ಕರಿಯೇಸ್. ಮರಿಜಾ಼ವಾನು ನೂಛೈ಼ಜಿನ್ ಹರ್‌ಹಮೇಶ ಜಿವ್ತು ರ‍್ಹವಾನಾಸ್ ಆಖ್ಹ್ ಕರಿಯೇಸ್. 
\v 5 ಅನಾಖ್ಹಾಜೆಥೀಸ್ ದೇವ್ ಅಪ್ಣುನ ಬದಲಾವ್‍ ಹುವಾನಖ್ಹಾಜೆ ತಯಾರ್ ಕರಿರಾಖ್ಯೋಸ್ ಬಿಜು಼ ಅನ ಸಾಬಿತ್ ಕರಾನ ಪವಿತ್ರಾತ್ಮನಾಸ್ ಅಪ್ಣುನ ದಿರಾಖ್ಯೊಸ್. 
\v 6 ಇನಾಖ್ಹಾಜೆ ಹಮೆ ಕದೇಬಿ ಭಾಲಿಥಿ ಛಿಯೆ ಬಿಜು಼ ಆ ಶರೀರ್‌ಮ ಜಿವ್ಣುಕರ‍್ವಾಲಗೂ ಪ್ರಭುಥಿ ದೂರ್ ಹುಯಿರ‍್ಹಿಶು ಕರಿ ಭರೋಖ್ಹೊ ಲೀರಾಖವಾಳ ಹುಯಿರ‍್ಹಾಸ್. 
\v 7 ಶನಕತೊ ಹಮೆ ಕಿನ ದೇಖು ಕರಿಯೇಸ್‍ಕಿ ಇನೇಥಿ ಜಿವ್‍ಕರಿಯೇಕೊಯ್ನಿ. ಕತೋಬಿ ಕೆವ್ಹಾನ ವಿಶ್ವಾಸ್ ಕರಿರಾಖ್ಯಾಸ್‌ಕಿ ಇನೇಥಿ ಜಿವ್‌ಕರಿಯೇಸ್ 
\v 8 ಇನಾಖ್ಹಾಜೆ ಹಮೆ ಭಾಲಿವಾಳ ಹುಯಿರ‍್ಹಿನ್ ಶರೀರ್‌ನ ಮ್ಹೇಲಿನ್ ಪ್ರಭುನಿ ಜೋ಼ಡ್ಮ ಜಾ಼ವಾನೂಸ್ ಅಛ್ಛು಼ಕರಿ ಆಖ್ಹ್ ಕರಿಯೇಸ್. 
\v 9 ದೇವ್ನ ಪಸಂದ್ ಕರಾವಾನೂಸ್ ಹಮೂನ ಛಾ಼ತೆ ಖ್ಹಯಾಲ್, ಹಮೆ ಹಮಾರ ಶರೀರ್‌ಮ ಹಜ್ಜಾ಼ ಜಿವಿರ‍್ಹಾವಾನಿ ವಖ್ಹತ್‍ಬಿ ಪ್ರಭುನಿ ಜೋ಼ಡ್ಮ ಹಿಜ್ಜಾ಼ ಜಿವಿರ‍್ಹಾವಾನಿ ವಖ್ಹತ್‍ಮಾಬಿ ದೇವ್ನ ಪಸಂದ್ ಕರಾವಾನೂಸ್ ಹಮಾರಿ ಹರಖ್ಹ್ ಹುಯಿರ‍್ಹೀಸ್. 
\v 10 ಅಪ್ಣೆಖ್ಹಾರು ನ್ಯಾವ್ನಖ್ಹಾಜೆ ಕ್ರಿಸ್ತನ ನ್ಯಾವ್ನಿಝಗೊನ ಖ್ಹಾಮ್ಣೆ ಭಿರೇವ್ಣುಸ್‍ ಭೀರೇವ್ಣು. ಹರೇಕ್ ಜ಼ಣು ಆಲೋಕ್‍ನ ಶರೀರ್‌ಮ ಜಿವಿರ‍್ಹಾವಾನಿ ವಖ್ಹತ್‌ಮ ಕರಿರಾಖ್ಯೊತೆ ಅಛ್ಛಾ಼ನಖ್ಹಾಜೆ ರ‍್ಹವೊ ಖರಾಬ್‍ನಖ್ಹಾಜೆ ರ‍್ಹವೊ ಹೋಣುತೆ ಪ್ರತಿಫಲ್ ಲಿಶೆ.
\s ಕ್ರಿಸ್ತಥಿ ದೇವ್‌ಭಣಿ ರಾಜಿ
\p
\v 11 ಪ್ರಭುನೊ ಡರ್‌ಕತೊ ಶಾತ್‌ಕರಿ ಹಮೂನ ಮಾಲುಮ್‌ಛಾ಼. ಇನಾಖ್ಹಾಜೆ ಅದ್ಮಿವೋನ ಮಾಲುಮ್ ಕರಿಯೇಸ್. ಕತೋಬಿ ಅಪ್ಣೆ ದೇವ್ನ ಮಾಲುಮ್‌ ಹುಯಿರುಸ್. ಯೊ ತುಮಾರಿ ದಿಲ್ನಿಸಾಕ್ಷಿನಾಬಿ ಮಾಲುಮ್ ಹುಯಿರ‍್ಹುಸ್‌ಕರಿ ಮೆ ವಿಶ್ವಾಸ್ ಕರಾವಾಳೊ ಹುಯಿರೊಸ್. 
\v 12 ಹಮಾರು ಹಮೇಸ್ ಪಾಛು಼, ಪಾಛು಼ ತುಮಾರ ಖ್ಹಾಮ್ಣೆ ಖ್ಹರೈಲಿಯೇ ಕೊಯ್ನಿ; ದಿಲ್ನ ಮಹಿನು ಮಾಲುಮ್ ಕರ‍್ಯುಕೊಂತೆ ಇನ ಭಾರ್‌ಲಿ ಶನ್‌ಗಾರ‍್ನ ದೇಖಿನ್ ಖುಷಿಕರವಾಳನಾಸ್ ಬರೋಬರ್‌ನಿ ಫೇಡ್‍ ದ್ಯವಾನ ತುಮೂನ ಉಷೆ. 
\v 13 ಶನಕತೊ ಹಮೆ ದಿವಾನ ಹುಯಿರ‍್ಹಉಶೇತೊ ಯೊ ದೇವ್ನ ಮಹಿಮೆನ ಖ್ಹಾಜೆಸ್. ಹಮೂನ ಅಛ್ಛಿ ಬುದ್ಧಿ ಉಶೇತೊ ಯೊ ತುಮಾರ ಫಾಯಿದಾನ ಖ್ಹಾಜೆಥೀಸ್. 
\v 14 ಕ್ರಿಸ್ತನಿ ಪ್ಯಾರ್‌ ಅಪ್ಣುನ ಖ್ಹೂಜ಼್‌ ಕರಾವಸ್, ಶನಕತೊ ಅಖ್ಖಾ ಅದ್ಮಿನಖ್ಹಾಜೆ ಏಕ್‌ ಅದ್ಮಿ ಮರ‍್ನುಕರಿ ಹಮೂನ ಮಾಲುಮ್‌ಛಾ಼. ಇನಾಖ್ಹಾಜೆ ಅಪ್ಣೆ ಅಖ್ಖುಜ಼ಣು ಮರಿಗಯಹುಯಾಮ ಭಾಗ್‌ ಹುಯಿರ‍್ಹಾಸ್. 
\v 15 ಜಿವಾವಾಳು ಅನಾಪರ್ ಇವ್ಣಖ್ಹಾಜೆ ನಾ ಜಿವ್ಣುಕರಿ ಕ್ರಿಸ್ತನೆ ಅಖ್ಖಾಸ್ ಅದ್ಮಿನಖ್ಹಾಜೆ ಮರ‍್ಯೊ. ಯೋ ಅದ್ಮಿಖ್ಹಾರು ಇನಖ್ಹಾಜೆ ಜಿವ್ಣುಕರಿ ಯೋ ಇವ್ಣಖ್ಹಾಜೆ ಮರ‍್ಯೊ. ಬಿಜು಼ ಮರ‍್ಯಾಹುಯಾಮಾಥು ಜಿವಿನ್ ಉಠಿ ಆಯೋ. 
\v 16 ಅಮ್‍ರ‍್ಹವಾಪರ್ ಲೋಕ್ ಅದ್ಮಿನಿ ಬಾರೇಮ ಸೋಚಾನಿತರ ಹಮ್ಕೆಥು ಹಮೆ ಕಿನಿ ಬಾರೇಮಾಬಿ ಸೋಚಿಯೆಕೊಯ್ನಿ. ಲೋಕ್ ಸೋಚಾನಿತರ ಅಗ್‍ಲ್ಯ ಹಗಾಮ್ಮ ಹಮೆ ಕ್ರಿಸ್ತನಿ ಬಾರೇಮ ಸೋಚಿಲಿದಾಥ. ಕತೋಬಿ ಹಮ್ಕೆಥು ಕಿನಾಬಿ ಯೋ ಪರಕ್ಮ ಸೋಚಿಯೆಕೊಯ್ನಿ. 
\v 17 ಇನಖ್ಹಾಜೆ ಕೋಣ್‌ತೋಬಿ ಕ್ರಿಸ್ತಮ ರ‍್ಹಯುತೊ, ಯೊ ನವೇಥಿ ಉಬ್ಜಿರ‍್ಹೋಸ್. ಹಂದೇಖೊ, ಜೂ಼ನು ಚಾ಼ಲ್ಯೂತೆ ಅಖ್ಖೂಸ್ ನೂಛೈ಼ಗಯು; ನವೇಥಿ ಜ಼ಲಮ್‍ಲಿದು. 
\v 18 \x - \xo 5:18 \xo*\xt ರೋಮ 5:10\xt*\x*ಆ ಅಖ್ಖು ದೇವ್‍ಥೀಸ್‍ ಹುಯೂತೆ. ದೇವ್ ಕ್ರಿಸ್ತಥಿಸ್ ಅಪ್ಣುನ ಹೇಳ್‌ಮೇಳ್ ಕರೈಲೀನ್, ಎಕ್ಟುಕರಾನಿ ಸೇವೆನ ಅಪ್ಣುನ ದೀರಾಖ್ಯೊಸ್. 
\v 19 ಕಿಮ್‌ಕತೊ ದೇವ್ ಕ್ರಿಸ್ತಮ ಹಿಡಿ ಜಗತ್‍ನಾಸ್ ಇನಿಜೋ಼ಡ್ಮ ಒಪ್ಪಂದ ಕರಿಲೆತೋಥೊ. ದೇವ್ ಕ್ರಿಸ್ತಮ ಅದ್ಮಿನ ಅಪರಾದ್‌ನ ಗಣ್ತಿಕರಾಕೊಯ್ನಿ. ಆ ಒಪ್ಪಂದಾನಿ ಸಂದೇಶ್ನ ಅದ್ಮಿನ ಖ್ಹಮ್‍ಜಾ಼ಡಾನು ಜಿಮ್ಮೆದಾರಿನ ದೇವ್ ಹಮೂನ ದೀರಾಖ್ಯೊಸ್. 
\v 20 ದೇವಸ್ ಹಮಾರೇಥಿ ತುಮೂನಾಬಿ ಗಿಂಗೈಲ್ಯವಾನಿಮತ್ ಹಮೆ ಹಮ್ಕೆ ಕ್ರಿಸ್ತ ಭಣೀಥು ವಾತೆ ಬೋಲವಾಳ ಹುಯಿರ‍್ಹಾಸ್ ದೇವ್ನಿಜೋ಼ಡೆ ಹಮೆ ರ‍್ಹೇವ್ಣುಕರಿ ಕ್ರಿಸ್ತನ ಬದಲ್ ಹಮೆ ತುಮೂನ ಗಿಂಗೈಲಿಯೇಸ್. 
\v 21 ಕ್ರಿಸ್ತಮ ಪಾಪಸ್ ಕೋಥೂನಿ. ಕತೋಬಿ ಹಮೆ ದೇವ್ನ ಸಮರ್ಪಣೆನಿ ಪರಕ್ಮ ನೀತಿಸ್ವರೂಪಿ ಹುಯಿರ‍್ಹಾವನಿತರ ದೇವ್ ಇನ ಪಾಪ ಸ್ವರೂಪಿಕರಿ ಬಣಾಯೊ.
\c 6
\p
\v 1 ಹಮೆ ದೇವ್ನಿ ಜೋ಼ಡ್ಮ ಕಾಮ್ ಕರಾವಾಳ ಹುಯಿರ‍್ಹಾಸ್.ಇನಾಖ್ಹಾಜೆ ತುಮೂನ ಶಾತ್ ಬೋಲಿಲಿಯೇಸ್ ಕತೊ,ತುಮೆ ದೇವ್‍ಥಿ ಲೀರಾಖ್ಯಾತೆ ವಾರ್‌ಖ್ಹಾನ ಗುಮೈನಕೊಲಿಶು ಕರಿ ಗಿಂಗೈಲಿಯೇಸ್ 
\v 2 ಪ್ರಸನ್ನತೆನ ಹಗಾಮ್ಮ ಮೇ ತುನ ಕಾನ್‍ದಿದೊ, ರಕ್ಷಣೆನ ದನ್ಮ ಮೆ ತುನ ಮದತ್ ಕರ‍್ಯೊ ಕರಿ ಬೋಲ್ತೊಹುಯಿನ್ ಹಂದೇಕ್ ಹಮ್ಕೇಸ್ ಯೋ ಸ್ವೀಕಾರ‍್ನೊ ದನ್, ಹಂದೇಕ್ ಯೋ ರಕ್ಷಣೆನಿ ವೇಳ್. 
\v 3 ಹಮಾರಿ ಚಾ಼ಕ್ರಿ ಕಿನ ಖ್ಹಾಮ್ಣೇಬಿ ಚಿಂಘಾವ್ಣಿಮ ನಾಪಡ್ನುತೆ, ಹಮೆ ಕಿನಾಬಿ ಖ್ಹತಾಯಕೊಯ್ನಿ 
\v 4 ಕತೋಬಿ ಹರೇಕ್ ಚಾ಼ಲ್‍ಮಾಬಿ ಹಮೆ ದೇವ್ನ ಸೇವೆಕರಾವಾಳ ಕರಿ ವತಾಳಿಲಿಯೆಸ್, ಹಮೆ ಖ್ಹತಾಪ್ಣಿಮಾಬಿ, ಶಾತ್‍ಕೊಂತೆ ತದೆಬಿ, ಝಂಝಟ್‍ಮಾಬಿ, ಮಾರೊಮಾರ್‌ಮಾಬಿ, 
\v 5 ಜೇಲ್‌ಮಾಬಿ, ಲಡೈಮಾಬಿ, ಖ್ಹತಾಪ್ಣಿನ ರಬೇಡ್‍ಮಾಬಿ, ನಿಂದರ್‌ ಖರಾಬ್ ಹುಯ್ಗಿತೋಬಿ, ಪಟ್ನಿರ‍್ಹಯೊತೋಬಿ, ಘಣಿ ಸಮಾಧಾನ್ನ ವತಾಳಿಲಿದ. 
\v 6 ಹಮೆ ದೇವ್ನ ಸೇವೆ ಕರಾವಾಳಕರಿ ಹಮಾರಿ‍‍ ಶುದ್ಧಮನ್‌ಥೀಬಿ, ಗ್ಯಾನ್‍ಥಿಬಿ, ಖ್ಹಮಾಳಿನ್‌ಚಾ಼ಲಥೀಬಿ, ಗೋರ್‌ಥೀಬಿ, ಬಿಜು಼ ಪರಿಶುದ್ ಜೀವಿತ್‍ಥಿಬಿ ವತಾಳಿಲಿದ. ಹಮೆ ಅನ ಪವಿತ್ರಾತ್ಮಥಿಬಿ, ಖ್ಹಾಚಿ ಪ್ಯಾರ್‌ಥೀಬಿ, 
\v 7 ಖ್ಹಾಚಿ ವಚನ್, ದೇವ್‍ಥಿ ನಿಕ್ಳಾತೆ ಶಕತ್ ಆ ಅಖ್ಖಾನ ಲೀಲಿನ್‌, ಖಾವಿಡಾವಿ ಬಾಜು಼ಮ ನೀತಿಕರಿ ಕಫ್ಫನ್ನ ಲೀರಾಖ್ಯಸ್. 
\v 8 ಥೋಡು ಜ಼ಣು ಹಮೂನ ಸನ್ಮಾನ್‍ಕರಸ್, ಬಿಜು಼ ಥೋಡು ಜ಼ಣು ಹಮೂನ ಖ್ಹರಮ್‍ಕಾಡಸ್, ಥೋಡುಜ಼ಣು ಖ್ಹರಾವ್ಣಿಕಾಡಸ್ ಬಿಜು಼ಥೋಡು ಜ಼ಣು ಹಮಾರಿ ಬಾರೇಮ ಖರಾಬ್ ವಾತೆ ಬೋಲಾಸ್, ಥೋಡುಜ಼ಣು ಹಮೂನ ಝೂ಼ಟ ಕರಿ ಬೋಲಸ್, ಕತೋಬಿ ಹಮೆ ಖ್ಹಾಚಿಸ್ ಬೊಲಿಯೇಸ್. 
\v 9 ಮಾಲುಮ್‌ ರ‍್ಹವಾಳು ಮರವಾಳುಹುಯಿನ್ ದೇಖಾಯುತೋಬಿ ಹಂದೇಖೊ ಹಮೆ ಬಚಿರ‍್ಹಿಶು. ಮಾರ್‌ಪೀಟ್ಮ ಪಡ್ಯತೋಬಿ ಮರಿಜಾ಼ಶುಕೊಂತೆ ರ‍್ಹಿಶು. 
\v 10 ದುಖ್‌ಲ್ಯವಾಳ ರ‍್ಹಿಯಾತೋಬಿ ಸೇವೆಮ ಕದೇಬಿ ಹಾಶಿಖ್ಹುಶಾಲಿಥಿ ರ‍್ಹವಾಳ ಹುಯಿರ‍್ಹಾಸ್, ಗರೀಬ್‍ರ‍್ಹಿಯತೋಬಿ ಕೈಏಕ್ ಜ಼ಣನ ವಿಶ್ವಾಸ್‌ಮ ಧನ್‍ದೌಲತ್‌ವಾಳ ಕರೀನ್ ಬಣೈರಾಖ್ಯಾಸ್; ಶಾತ್‍ಬಿಕೊಂತೆ ರ‍್ಹಿಯತೋಬಿ ಅಖ್ಖಾನ ಲೀರಾಖವಾಳ ಹುಯಿರ‍್ಹಾಸ್. 
\v 11 ಕೊರಿಂಥವಾಳಾವೊ, ತುಮಾರಿಜೋ಼ಡ್ಮ ಛು಼ಟ ಮನ್‌ಥೀಬಿ ಛು಼ಟ ದಿಲ್‌ಥೀಬಿ ವಾತೆ ಬೋಲಿರಾಖ್ಯಾಸ್. 
\v 12 ತುಮಾರಪರ್ ಹಮೂನ ಛಾತೆಪ್ಯಾರ್ ಭೀರಿಗೈಕೊಯ್ನಿ. ಕತೋಬಿ ಹಮಾರಪರ್‌ ತುಮೂನಛಾ಼ತೆ ಪ್ಯಾರ್ ಭೀರಿಗೈ. 
\v 13 ತುಮೆ ಮಾರ ಲಡ್ಕಾನಿ ಪರಕ್ಮ ಮೇ ತುಮಾರಿ ಜೋ಼ಡ್ಮ ವಾತೆ ಬೋಲುಕರುಸ್. ಹಮಾರಿನಿತರಸ್ ತುಮೇಬಿ ಹಮೂನ ಪೂರ ದಿಲ್‌ಥಿ ಪ್ಯಾರ್‌ಕರೊ.
\s ಬಿಜಾ಼ನಿ ಫೊಖ್ಹ್‌ಲಾವ್ಣಿನಿ ಬಾರೇಮ ಹೊಷಾರಿ
\p
\v 14 ಕ್ರಿಸ್ತನಿ ವಿಶ್ವಾಸ್‌ಕೊಂತೆ ಅದ್ಮಿಮಾಬಿ ತುಮಾರಮಾಬಿ ಪರಕ್‍ಛಾ಼. ಇನಖ್ಹಾಜೆ ತುಮೆ ಇವ್ಣಿ ಜೋ಼ಡ್ಮ ಭಾಗಿ ನಕೊಹುವೊ. ಅಛ್ಛು಼ ಬಿಜು಼ ಖರಾಬ್ ಎಕ್ಟುಹುವಾನ ಉಶೇಕಿ ಶು? ಉಜಾ಼ಳು ಅಂಧಾರನಿ ಜೋ಼ಡ್ಮ ಲಾಡ್‍ಥಿರ‍್ಹಾವಾನ ಉಶೇಕಿ ಶು? 
\v 15 ಕ್ರಿಸ್ತಬಿ, ಶೈತಾನ್‍ಬಿ ಲಾಡ್‍ಥಿರ‍್ಹಾವಾನ ಉಶೇಕಿ ಶು? ವಿಶ್ವಾಸಿಮಾಬಿ ಅವಿಶ್ವಾಸಿಮಾಬಿ ಭಾಗ್‌ ಶನುಛಾ಼? 
\v 16 ದೇವ್ನ ಮಂದಿರ್‌ನಾಬಿ ಮೂರತ್‌ನಾಬಿ ಏಕ್‍ಕರಾನ ಉಶೇಕಿ ಶು? ಅಪ್ಣೆ ದೇವಸ್ ಬೋಲಿರಾಖ್ಯುತೆ ತಿಮ್ ಜಿವ್ತಜಾನ್ನೊ ಮಂದಿರ್‌ ಹುಯಿರಾಸ್ನಿ. ಮಾರ ಅದ್ಮಿವೋಮ ಮೇಸ್ ಘರ್ ಕರೀಶ್, ಇವ್ಣಾಮ ಮೇಸ್ ಜಿವ್ಣು ಕರ್ತೊಹುಯಿನ್ ಇವ್ಣಿಜೋ಼ಡೆ ಫರ್ತೊರ‍್ಹಿಶ್, ಮೇಸ್ ಇವ್ಣೊ ದೇವ್ ಹುಯಿರ‍್ಹಿಶ್. ಇವ್ಣೆ ಮನ ಪ್ರಜೆಹುಯಿರ‍್ಹಿಶೆ ಕರಿ ಬೋಲ್ಯೊ. 
\v 17 “ಇನಾಖ್ಹಾಜೆ ಅಲ್ಹಾವ್‌ ಅದ್ಮಿವೋನಿ ಬೀಚ್ಮಾಥ ತುಮೆ ಭಾರ್‌ ಆಯಿನ್ ತನಿಯ ಜಿವ್ಣುಕರೊ, ಕಚಿಂಡ್‌ ರ‍್ಹೆಯಿತೆ ಇನ ಛೀಮ್‍ಶುನಕೊ ಕರಿ ಪ್ರಭು ಬೋಲಸ್, ತದೆ ತುಮೂನ ಮಳೈಲಿಶ್. 
\v 18 ಮೇ ತುಮಾರೊ ಬಾ ಹುಯಿರೊಸ್; ಅಜು಼ ತುಮೆ ಮಾರ ಛಿಯ್ಯಾ, ಛೋ಼ರಿಯೇ ಹುಯಿರಾಸ್ ಕರಿ ಬೋಲಸ್ ಸರ್ವಶಕತ್‍ವಾಳೊ ಹುಯಿರೋತೆ ಪ್ರಭು.”
\c 7
\p
\v 1 ಪ್ಯಾರ್‌ನ ದೋಸ್ತಿವೊ ಅಪ್ಣೆ ದೇವ್‍ಥಿ ವಾಗ್ದಾನ್ ಲೀರಾಖ್ಯಾತೆ ಇನಾಖ್ಹಾಜೆ ಶರೀರ್ ಆತ್ಮಮಾಥು ಗಲೀಜ಼್‌ನ ಕಾಡಿನಾಖಿನ್ ಅಪ್ಣುನ ಶುದ್ದ ಕರಿಲಿನ್ ಬಿಜು಼ ದೇವ್‍ಮಾ ಡರ್‌ಥಿ ರ‍್ಹೀನ್ ಪರಿಶುದ್ದ ಜಿವ್ಣು ಚ಼ಲಾವಾನ ಕೋಶಿಶ್ ಕರೀಯೆ.
\s ಪೌಲನಿ ಖ್ಹುಶಿ
\p
\v 2 ತುಮಾರ ದಿಲ್ಮ ಹಮೂನ ಝ಼ಗೊದೆವೋ; ಹಮೆ ತುಮಾರಮ ಕಿನಾಬಿ ಅನ್ಯಾಯ್‌ ಕರ‍್ಯಾಕೊಯ್ನಿ, ಕಿನಾಬಿ ಕೇಡ್ ಕರ‍್ಯಾಕೊಯ್ನಿ, ಕಿನಾಬಿ ಠಗಾಯಕೊಯ್ನಿ. 
\v 3 ತುಮಾರಪರ್ ಗಲ್ತಿನಾಕ್‍ನು ಕರಿ ಮೇ ಅನ ಬೋಲುಕರು ಕೊಯ್ನಿ ಶನಕತೊ ತುಮಾರಿ ಜೋ಼ಡ್ಮ ಮರಾನಬಿ ಜಿವಾನಬಿ ತುಮೆ ಮಾರ ದಿಲ್ಮಛಾ಼ ಕರಿ ಮೇ ಪಹಿಲೇಸ್ ಬೋಲ್ಯೊಥೋನಿ. 
\v 4 ತುಮಾರಿ ಜೋ಼ಡ್ಮ ವಾತ್‍ಬೋಲನ ಘಣು ಧಿಲ್‍ಪತ್‍ಬಿ ತುಮಾರಿ ಬಾರೇಮ ಮನ ಘಣು ಭರೋಖ್ಹೊ ಛಾ಼; ಮೇ ಧಿಲ್‌ಪತ್‌ಥಿ ಭರೈನ್ ಅಪ್ಣುನ ಉಶೆತೆ ಖ್ಹಾರೀಸ್‍ ಖ್ಹತಾಪ್ಣಿಮ ಘಣೇಥಿ ಘಣು ಖ್ಹುಶಿಮ ಛೂ಼. 
\v 5 ಹಮೆ ಮೆಕೆದೋನ್ಯನ ಆಯಾತೆ ತದೇಬಿ ಅಪ್ಣ ಶರೀರ್‌ನ ಅರಾಮಸ್‍ ಕೋಥೂನಿ. ಕತೋಬಿ ಖ್ಹಾರೀಸ್‍ ಬಾಜು಼ಮ ಹಮೂನ ಖ್ಹತಾಪ್ಣಿಥು. ಭಾರ್‌ಲಡೈ, ಮಹಿಡರ್ ಥು; 
\v 6 ಕತೋಬಿ ಕಮ್‍ಜೋ಼ರಿ ರ‍್ಹಾವಾಳನ ಸಮಾಧಾನ್‍ ದ್ಯವಾಳೂ ದೇವ್ ತೀತನ ಆವಾಖ್ಹರ್ಕು ಕರೀನ್ ಹಮೂನ ಸಮಾಧಾನ್‍ ಕರ‍್ಯೊ. 
\v 7 ಇನ ಬುಲಾವ್‍ಣೆಥಿ ಖಲಿಕಾಹೆತೆ, ತುಮಾರೇಥಿ ಯೋ ಜಾ಼ಖ್ಹತ್ ಸಮಾಧಾನ್‍ ಹುಯೋಕರೀಬಿ, ತುಮಾರಿ ಮಹಾನ್ ಪ್ಯಾರ್, ತುಮಾರಿ ದುಖ್, ಮಾರಪರ್ ಛಾ಼ತೆ ತುಮಾರಿ ಆಖ್ಹ್ ಆ ಅಖ್ಖು ಹಮುನ ಬೋಲಾಖ್ಹತರ್ ಮೇ ಬಿಜೂ಼ಬಿ ಜಾ಼ಖ್ಹತ್ ಖ್ಹುಶಿಕರ‍್ಯೊ. 
\v 8 ಮೇ ಲೀಖ್ಯೋತೆ ಚಿಟ್ಟಿ ತುಮುನ ದುಖ್‍ಕಾರಯು ಉಶೇತೋಬಿ ಮನ ವೇಚ಼್‌ಣೆ ಕೊಯ್ನಿ ಯೋ ಚಿಟ್ಟಿ ತುಮುನ ಏಕ್‌ ಘಡಿ ದುಖ್ ಕರಾಯು ಕರಿ ಉಶೇತೋಬಿ ಮೇ ಪಹಿಲೆ ಪಶ್‌ತಾಯೊತೋಬಿ, ಹಮ್ಕೆ ಮೇ ಖುಷಿಕರುಸ್. 
\v 9 ತುಮುನ ದುಖ್ ಕರಾಯೋತೆ ಇನಾಖ್ಹಾಜೆ, ಮೇ ಖುಷಿ ಕರ‍್ಯೊಕೊಯ್ನಿ, ತುಮೆ ದುಖ್ ಕರೀನ್ ದಿಲ್ನ ಫರಿಜ಼ವಾನ ಕರಿರಾಖ್ಯತೆ ಇನಾಖ್ಹಾಜೆ ಖ್ಹುಶಿಕರೂಸ್. ದೇವ್ನಿ ‘ಖ್ಹೂಜ಼್‌ನಿ’ ಘೋಣಿ ತುಮೆ ದುಖಿಹುಯ ಇನಾಖ್ಹಾಜೆ ಹಮಾರೇಥಿ ತುಮುನ ಕೆವ್ಹಿ ಪರಕ್‍ಮಾಬಿ ನಷ್ಟ್ ಹುಯುಕೋಯ್ನಿ. 
\v 10 ದೇವ್ನಿ ಖ್ಹೂಜ಼್‌ನಿತರ ಹುಯಿರುತೆ ದುಖ್ ದಿಲ್‌ನಾಬಿ, ಜೀವಿತ್‍ನಾಬಿ ಬದ್ಲಾವಸ್ ಆ ಬದ್‍ಲಾವ್ಣಿ ರಕ್ಷಣೆ ಭಣಿ ಚ಼ಲಾವಸ್. ಆ ಮನ್ ಫರಿಜಾ಼ವಾನಿ ಬಾರೇಮ ಅಪ್ಣೆ ಡರ‍್ವಾನು ಶಾತ್ಬಿ ಕೊಯ್ನಿ. ಕತೋಬಿ ಲೋಕ್‍ಥಿ ಆವಾತೆ ದುಖ್ ಮರಣ್ಣ ಬುಲಾವಸ್‌. 
\v 11 ತುಮೆ ದೇವ್ನಿ ಮನ್ನಿ ಅನುಸಾರ್ ಲಿದಾತೆ ದುಖ್ ತುಮಾರಮ ಕೆತ್ರುಕ್ಕಿ ಹುಮ್ಮಖ್ಹ್‌ನು ಹುಯಿರುಸ್. ಯೋ ದುಖ್ ತುಮಾರಮ ಘಣು ಮನ್‌ಲಗಾಡವಾಳ ಹುಯಿರ‍್ಹವಾನಿತರ ಕರಿರಾಖ್ಯುಸ್; ತುಮೆ ಗ್ರಿಸ್ತಿಥಿ ಚಾ಼ಲಾನ ಕೆತ್ರೇಕ್ಕಿ ಕೋಶಿಶ್‌ಕರ‍್ಯ, ಕೆತ್ರೇಕ್ಕಿ ಖ್ಹತಾಪ್ಣಿ ಪಡ್ಯ, ಕೆಥ್ರಾ಼ನುಕಿ ಡರ್‌ವತಾಳ್ಯ, ಮಾರಿ ಬಾರೇಮ ವೇಚ಼್‌ಣೆ ಕರಾಖ್ಹರ್ಕು ಕರ‍್ಯು; ಅಪರಾದಿಖ್ಹಾರನ ಖ್ಹತಾವ್ಣುಕರಿ ಆಖ್ಹ್ ಆವಾಖ್ಹರ್ಕು ಕರ‍್ಯು. ಯೊ ತಕ್ಲಿಬ್‍ನಿ ಕೆವ್ಹಿ ಬಾರೆಮಾಬಿ ತುಮೆ ಅಪರಾದಿ ಕೋ ಹುಯಿರ‍್ಹಾಥಾನಿ ಕರಿ ವತಾಳಿಲಿದ. 
\v 12 ಮೇ ಯೋ ಚಿಟ್ಟಿ ಲೀಖ್ಯೋತೆ ಗಲತ್‌ ಕರಿರಾಖವಾಳನಖ್ಹಾಜೆ ಕಾಹೆ, ಆ ಗಲತ್‌ಥಿ ದುಖ್‍ಮ ಪಡವಾಳನ ಖ್ಹಾಜೇಬಿ ಕಾಹೆ. ಕತೋಬಿ ಹಮಾರಿ ಬಾರೇಮ ತುಮುನ ಛಾ಼ತೆ ಮೋಟಿ ವೇಚ಼್‌ಣೆನ ತುಮೆ ದೇವ್ನ ಖ್ಹಾಮ್‌ಣೆದೇಖಾನಿತರ ಹೋಣುಕರಿ ಯೋ ಚಿಟ್ಟಿನ ಲೀಖ್ಯೋತೆ. 
\v 13 ಇನಖ್ಹಾಜೇಸ್ ಹಮೂನ ಭಾಲಿಮಳೀತೆ, ತುಮೆಅಖ್ಖು ತೀತನ ಮನ್ನ ಜಾ಼ಖ್ಹತ್ ಶಂತೋಖ್ಹ್‌ ಕರ‍್ಯಾತೆದೇಖಿನ್ ಹಮೂನ ಬಿಜೂ಼ಬಿ ಖ್ಹುಶಿಹುಯು, 
\v 14 ತೀತನ ಖ್ಹಾಮ್ಣೆ ಮೇ ತುಮುನ ಖ್ಹರಾಯೊ. ಯೋ ಖ್ಹಾಚಕರಿ ತುಮೆ ವತಾಳ್ಯ. ಹಮೆ ತುಮುನ ಬೋಲ್ಯಾತೆ ಹರೇಕ್ ಖ್ಹಾಚ ಹುಯಿರ‍್ಹುಥು. ಹಮೆ ತೀತನ ಖ್ಹಾಮ್ಣೆ ತುಮಾರಿ ಬಾರೇಮ ಬೋಲ್ಯಾತೆ ಖ್ಹರಾವ್ಣಿನಿವಾತೆ ಖ್ಹಾರಿ ಖ್ಹಾಚ ಕರಿ ದೆಖಾಯು. 
\v 15 ತುಮೆ ದಿಲ್ಮ ಡರಿನ್ ಕಾಪವಾಳ ಹುಯಿನ್ ಇನಿ ಜೋ಼ಡ್ಮ ಮಳಿಗಾತೆ ಇನಾಮ ತುಮಾರಿ ವಿಧೇಯತೆ ದೆಖಾಯು, ಯೊ ಇನ ಖ್ಹಯಾಲ್ ಕರಿಲ್ಯಾವಾನಿ ವಖ್ಹ್‌ತೆ ತುಮಾರಪರ್ ತೀತನಿ ಪ್ಯಾರ್ ಜಾ಼ಖ್ಹತ್ ಹುಯಿರ‍್ಹೀಸ್. 
\v 16 ಖ್ಹಾರೀಸ್‍ ವಾತ್ನಿ ಬಾರೇಮ ತುಮಾರಾಪರ್ ಮನ ಭರೋಖ್ಹೊ ಛಾ಼ತೆ ಇನಾಖ್ಹಾಜೆ ಖ್ಹುಶಿಕರೂಸ್.
\c 8
\s ಛು಼ಟ ದಿಲ್‌ಥಿ ದೆವೊ
\p
\v 1 ಭೈಯೇ ಭೇನೆವೊ ಮೆಕೆದೋನಿಯನಿ ಅಖ್ಖಿ ಸಬೆಮ ದೇವ್ನೆ ವತಾಳ್ಯೊತೆ ವಾರ್‌ಖ್ಹಾನಿ ಬಾರೇಮ ತುಮುನ ಖ್ಹಮ್‌ಜಾ಼ಡುಸ್. 
\v 2 ಯೋ ಸಬೆವಾಳು ಜಾ಼ಖ್ಹತ್ ಲತಾಡ ಖ್ಹಮಾಳವಾಳು ರ‍್ಹಯುತೋಬಿ ಬಿಜು಼ ಘಣು ಗರೀಬ್ ರ‍್ಹಯುತೋಬಿ ಘಣು ಖ್ಹುಶಿಥಿ ಭರೈರ‍್ಹೀನ್ ಛುಟಾದಿಲ್‍ಥಿ ದಿದು. 
\v 3 ಇವ್ಣೆ ಇವ್ಣ ತಾಖತ್‌ಯೆತ್ರೆ ಖಲಿ ದಿದುಕೊಂತೆ, ಇವ್ಣಿ ಇವ್ಣಿ ಶಕತ್ ಮೀರಿನ್ ದೀರಾಖ್ಯುಸ್‌. ಇವ್ಣು ಇವ್ಣೇಸ್ ದಿದು, ದೇವ್ಣುಕರಿ ಇವ್ಣುನ ಕಿನೇಬಿ ಬೋಲ್ಯುಕೊಯ್ನಿ. 
\v 4 ಯೆಹೂದಿ ಹುಯಿರ‍್ಹುತೆ ದೇವ್ನು ಅದ್ಮಿಖ್ಹಾರನ ಅಛ್ಛು಼ ಕಾಮ್ ಕರಾನಿ ಬಾರೇಮ ಹಮೂನ ಭಾಗಿಹುವಾನ ಏಕ್‌ ಮೋಕ ಹೋಣು ಕರಿ ಗಿಂಗೈಲಿದು. 
\v 5 ಹಮೆ ಸೋಚಾತೆ ಪರಕ್ಮ ದಿದೊಕೊಂತೆ. ಪಹಿಲೆ ಇನುಯೋಸ್ ಪ್ರಭುನಾಬಿ ಅಪ್ಣುನಾಬಿ ದಿನಾಖಿದಿದು. ದೇವ್ ಆಖ್ಹ್‌ ಕರಸ್ತೆ ಅನಾಸ್. 
\v 6 ಇನಾಖ್ಹಾಜೆ, ವಿಶೇಷ್‍ನು ಆ ದಯಾನಕಾಮ್‍ನ ಪೂರ ಕರಾನ ತುಮುನ ಮದತ್ ಕರ‍್ನು ಕರಿ ಹಮೆ ತೀತನ ಬೋಲಿಲಿದ. ಆ ಕಾಮ್ನ ಶುರು ಕರ‍್ಯೊತೆ ತೀತನೇಸ್. 
\v 7 ತುಮೆ ಹರೇಕ್‌ಮಾಬಿ ಕತೊ, ವಿಶ್ವಾಸ್ಮ ವಾತ್ ಬೋಲಾಮ, ಗ್ಯಾನ್‌ಮ, ಮದತ್‍ಕರ‍್ನು ಕರಿ ದಿಲ್‍ಲಗಾಡಮ, ಬಿಜು಼ ಹಮಾರಿ ಹುಮ್ಮಖ್ಹ್‌ಥಿ ತುಮಾರಮ ಆಯಿತೆ ಪ್ಯಾರ್‌ಮ ಶೌಕಾರ್ ಹುಯಿರ‍್ಹಾಸ್, ಇನಖ್ಹಾಜೆ ಆ ಕೃಪೆಮಾಬಿ ತುಮೆ ಶೌಕಾರ್ ಹುಯಿರ‍್ಹೇವ್ಣು ಕರಿ ಹಮೆ ಆಖ್ಹ್ ಕರಿಯೇಸ್. 
\v 8 ತುಮೆ ದೇವ್ಣುಕರಿ ಮೇ ಹುಕುಮ್‌ ಕರೂಕರು ಕೊಯ್ನಿ. ಕತೋಬಿ ತುಮಾರಿ ಪ್ಯಾರ್ ಕೆತ್ರಿ ಖ್ಹಾಚ಼ಪ್ಯಾರ್‌ಕರಿ ದಿಲ್‌ಛೋ಼ಡಿನ್ ತರೀಪ್‌ಶ ಕರಿಲೇವ್ಣುಕರಿ ಬೋಲುಸ್. 
\v 9 ಅಪ್ಣೊ ಪ್ರಭು ಹುಯಿರ‍್ಹೋತೆ ಯೇಸು ಕ್ರಿಸ್ತನಿ ವಾರ್‌ಖ್ಹಾನ ತುಮೆ ಮಾಲುಮ್ ಕರಿರಾಖ್ಯಸ್. ಕಿಮ್‌ಕತೊ ಯೋ ಧನ್‍ ದೌಲತ್‌ವಾಳೊ ರ‍್ಹಯೊತೋಬಿ ಯೋ ಗರೀಬ್ ಹುವಾಥೀಸ್ ತುಮೆ ಧನ್‌ ದೌಲತ್‌ವಾಳ ಬಣನಿತರ ಯೋ ತುಮಾರಖ್ಹಾಜೆ ಗರೀಬ್‍ಹುಯೊ. 
\v 10 ಆ ಕಾಮ್ನಿ ಬಾರೇಮ ಮಾರಿ ಖ್ಹೂಜ಼್‌ನ ತುಮುನ ಖ್ಹಮ್‌ಜಾ಼ಡುಸ್, ಆ ಕಾಮ್ನ ಏಕ್‌ ವರಖ್ಹ್‌ನ ಪಾಛ಼ಳ್ ಚ಼ಲಾವನಖ್ಹಾಜೆ ಶುರು ಕರಾಥಿಸ್ ಇನ ಚ಼ಲಾವ್ಣು ಕರಿ ಕರಮಾಬಿ ತುಮೆ ಖ್ಹಾಮೆ ಹುಯಿರ‍್ಹಾತೆ ಇನಖ್ಹಾಜೆ ಯೋ ತುಮುನ ಅಛ್ಛು಼ಹುಯಿರ‍್ಹುಸ್‍. 
\v 11 ಇನಾಖ್ಹಾಜೆ ತುಮೆ ಶುರುಕರ‍್ಯಾತೆ ಕಾಮ್ನ ಹಮ್ಕೆ ಪೂರಕರೊ, ತದೆ ತುಮಾರು ಕಾಮ್ ಬಿಜು಼ ತುಮಾರೊ ತಯಾರ್‌ನೊ ದಿಲ್‌ ಬರೋಬರ್ ಸಮಾನ್ ರ‍್ಹಿಶೆ. ತುಮಾರಿ ತುಮಾರಿ ಶಕತ್ನಿ ಘೋಣಿನಿತರ ಚ಼ಲಾವೊ. 
\v 12 ಏಕ್‍ಜ಼ಣೊ ದ್ಯವಾನೊ ದಿಲ್‍ರ‍್ಹಿನ್ ಯೋ ಇನ ದಿಲ್ನಿ ಅನುಸಾರ್ ದಿದೊತೊ ತುಮಾರು ದಾನ್ ಸ್ವೀಕಾರ್ ಹುಯಿರ‍್ಹಿಶೆ; ಇನ ದೇವ್‍ಥಿ ಲ್ಹಾಯೇಕ್ ಮಳ್‍ಶೆ. 
\v 13 ಅಲಕ್ ಅದ್ಮಿ ಶಂತೋಖ್ಹ್‌ಥಿ ರ‍್ಹಾವಾನಿ ವಖ್ಹತ್‌ಮ ತುಮೆ ದುಖ್‌ಮ ರ‍್ಹವಾನು ಹಮೂನ ಇಷ್ಟಕೊಯ್ನಿ. ಹರೇಕ್‍ಮಾಬಿ ಬರೋಬರ್ ರ‍್ಹವಾನು ಹಮಾರಿ ಆಖ್ಹ್. ಇವ್ಣೆ ಸಬೇನು ಸೇವಕರ್‌ಬಿ ಅಜು಼ ಕ್ರಿಸ್ತನು ಮಹಿಮೆಬಿ ಹುಯಿರ‍್ಹಾಸ್. 
\v 14 ಹಮ್ಕೆ ತುಮಾರಕನ ಹೋಣುತೆ ಎತ್ರು ಛಾ಼ ತುಮಾರಿ ಆ ಚೆಹೆಳ್ ಅಲಕ್ ಅದ್ಮಿನು ಕಮೀನ ಕಾಡಿನಾಕ್‌ಶೆ; ಅಮ್ ಅಖ್ಖೂಸ್‌ಜ಼ಣು ಸಮಾನ್ ರ‍್ಹಿಶೆ. 
\v 15 ಘಣು ಜ಼ಮ ಕರ‍್ಯಾಹುಯಾನ ಶಾತ್ಬಿ ಜಾ಼ಖ್ಹತ್ ಕೊಹುಯುನಿ, ಥೋಡು ಜ಼ಮಾಕರ‍್ಯಾ ಹುಯಾನ ಶಾತ್ಬಿ ಕಮ್‍ಕೋಹುಯುನಿ ಕರಿ ಧರ್ಮಶಾಸ್ತ್ರಮ ಲೀಖೈರ‍್ಹೂತೆ ಪರಕ್‍ ಹುಯಿರ‍್ಹಿಶೆ.\x - \xo 8:15 \xo*\xt ವಿಮೋಚನ 16:18\xt*\x*
\s ತೀತ ಬಿಜು಼ ಇನ ಜೋ಼ಡ್‍ವಾಳು
\p
\v 16 ತುಮಾರಪರ್ ಹಮೂನ ಛಾ಼ತೆ ಅಛ್ಛಿಸೋಚ್‌ನ ತೀತನ ದಿಲ್‌ಮಾಬಿ ದೀರಾಖ್ಯೋತೆ ಇನಖ್ಹಾಜೆ ದೇವ್ನ ಧನ್ಯವಾದ್ ಕರುಸ್. 
\v 17 ಹಮೆ ಬೋಲಿಲಿದಾತೆ ಕಾಮ್‍ಅಖ್ಖು ಕರಾನ ತೀತ ಮಾನಿಲಿದೊ. ಆ ಇನಿ ಶೊಂತ್ ತೀರ್ಮಾನ್‌ಥಿಸ್ ತುಮಾರಕನ ಆವಾನುಕರಿ ಯೋ ಘಣು ಹುಮ್ಮಖ್ಹ್‌ಥಿ ಥೊ. 
\v 18 ಅಖ್ಖೀಸ್ ಸಬೆವಾಳು ಖ್ಹರಾವಸ್‍ತೆ ಏಕ್‌ ಭೈನ ತೀತನಿ ಜೋ಼ಡ್ಮ ಹಮೆ ಮೋಕ್ಲು ಕರಿಯೇಸ್; ಆ ಭೈ ಸುವಾರ್ತೆನಿ ಬಾರೇಮ ಕೀರ್ತಿ ಲೀರಾಖ್ಯೋಸ್. 
\v 19 ಆ ನಾಹುಯಿನ್ ಪ್ರಭುನಿ ಮಹಿಮೆನಖ್ಹಾಜೆ ಅಜು಼ ಅಪ್ಣ ಅಛ್ಛು಼ ದಿಲ್ನ ವತಳಾನಖ್ಹಾಜೆ ಮದತ್‍ನ ರಪ್ಯಾನ ಲೀಜಾ಼ವನಿ ವಖ್ಹತ್‌ಮ ಹಮಾರಿ ಜೋ಼ಡ್ಮರ‍್ಹಾವಾನ ಆ ಭೈನ ಸಬೇಥು ಚೂ಼ಣಿರಾಖ್ಯುಸ್. ದೇವ್ನಿ ಮಹಿಮೆನ ಖ್ಹಾಜೇಬಿ ಬಿಜು಼ ಮದತ್ ಕರಾನ ಖ್ಹಾಚಾಮಸ್ ಆಖ್ಹ್‌ಕರಿಯೇಸ್ ಕರಿ ವತಾಳಿಲ್ಯಾವನಬಿ ಆ ಸೇವೆನುಕಾಮ್ನ ಕರುಕರಿಯೇಸ್. 
\v 20 ಆ ಘಣು ಮದತ್‍ನ ರಪ್ಯಾನ ಹಮೆ ದೇಖಿಲ್ಯಾವಾನಿ ಬಾರೇಮ ಕೋಣ್‌ಬಿ ಹಮಾರಪರ್ ಗಲತ್‌ ನಾನಾಕ್ಣು, ಕರಿ ಹೊಷಾರ್‌ಥಿ ಛಿಯೆ. 
\v 21 ಶನಕತೊ ಪ್ರಭುನಿ ನಜ಼ರ‍್ಮ ಖಲಿಖಾಯೆತೆ ಅದ್ಮಿನ ಖ್ಹಾರನಿ ನಜ಼ರ್‌ಮಾಬಿ ಮರ್ಯಾದೆ ರ‍್ಹವಾನು ಖಿವು ಬರೋಬರ್ ಕರಿ ಸ್ವಿಕಾರ್‌ಕರ‍ಸ್‍ಕಿ ಅಜು಼ ಅದ್ಮಿನಿ ಬಾರೇಮಾಬಿ ದೇವ್ನಿ ಬಾರೇಮಾಬಿ ಕೆಹು ಬರೋಬರ್ ಕರಿ ಖ್ಹಯಾಲ್ ಕರಸ್ಕಿ ಯೋಸ್ ಖ್ಹಾರಾನ ಹಮೆ ಕೋಶಿಶ್ ಕರುಕರಿಯೇಸ್. 
\v 22 ಅನಾಹುಯಿನ್ ಮದತ್ ಕರಾನ ಕದೇಬಿ ತಯಾರ್ ಹುಯಿರ‍್ಹವಾಳ ಅಪ್ಣ ಭೈನ ಇವ್ಣಿಜೋ಼ಡ್ಮ ಮೋಕ್ಲುಕರಿಯೇಸ್, ಯೋ ಕೈಯೇಕ್ ತರಾಮ ಇನುಯೋಸ್ ವತಾಳಿರಾಖ್ಯೊಸ್. ಹಮ್ಕೆ ಇನ ತುಮಾರಪರ್ ಘಣು ಭರೋಖ್ಹೊ ಛಾ಼ತೆ ಇನಾಖ್ಹಾಜೆ ಬಿಜೂ಼ಬಿ ಮದತ್ ಕರಾನ ಆಖ್ಹ್‌ಕರಸ್. 
\v 23 ಮೇ ತೀತನಿಬಾರೇಮ ಬೋಲಾನು ಶಾತ್‍ಕತೊ, ಯೋ ಮಾರಿ ಜೋ಼ಡ್ಮಕಾಮ್‍ ಕರಾವಾಳೊ ಹುಯಿರ‍್ಹೊಸ್, ತುಮುನ ಮದತ್ ಕರಾನ ಯೋ ಮಾರಿ ಜೋ಼ಡ್ಮಕಾಮ್‍ ಕರುಕರಸ್. ಅಲಕ್ ಭೈಯೇವ್ನಿ ಬಾರೇಮ ಮೇ ಶಾತ್‍ಬೋಲುಸ್‍ಕತೊ, ಇವ್ಣೆ ಸಬೆಮಾಥು ಮೋಕ್ಲಾಯಹುಯ ಹುಯಿರ‍್ಹಾಸ್. ಬಿಜು಼ ಕ್ರಿಸ್ತನ ಮಹಿಮೆ ಕರಾವಾಳ ಹುಯಿರ‍್ಹಾಸ್. 
\v 24 ಇನಖ್ಹಾಜೆ ತುಮಾರಾಮ ಖ್ಹಾಚಮಾಸ್ ಪ್ಯಾರ್‌ಛಾ಼ ಕರಿ ಆ ಅದ್ಮಿಖ್ಹಾರಾನ ವತಾಳೊ. ಹಮೆ ತುಮಾರಿ ಬಾರೇಮ ಶನ ಖ್ಹರೈಯೇಸ್‍ಕರಿ ಬೋಲಾನು ಅವ್ಣುನ ವತಾಳಿದೆವೊ. ತದೆ ಖ್ಹಾರಿ ಸಬೆವಾಳು ಇನ ದೆಖಾಖ್ಹರ್ಕು ಉಶೆ.
\c 9
\s ವಿಶ್ವಾಸ್‌ಮ ಛಾ಼ತೆ ಕ್ರೈಸ್ತರ್‌ನ ಮದತ್‌ಕರಾನು
\p
\v 1 ಯೂದಾಯಮ ಛಾ಼ತೆ ದೇವ್ನ ಅದ್ಮಿಯೇವ್‌ನು ಮದತ್ ಕರಾನಿ ಬಾರೇಮ ಮೇ ತುಮುನ ಚಿಟ್ಟಿಲೀಖಾನು ಜ಼ರೂರತ್ ಕೊಯ್ನಿ. 
\v 2 ಅಖಾಯಮ ಛಾ಼ತೆ ತುಮೆ ಗಯೋತೆ ಏಕ್‌ ವರಖ್ಹ್‌ಥು ಮೋಟ ದಿಲ್‌ಥಿ ದಾನ್ ಕರಾನ ತಯಾರ್ ಹುಯಿರ‍್ಹಾಸ್ ಕರಿ ಬೋಲನಿ ವಾತ್ನ ಮೇ ಮೆಕೆದೋನ್ಯನ ಭೈಯೇ ಭೇನೆವೊನ ಖ್ಹಾಮ್ಣೆ ಬೋಲಿನ್ ತುಮುನ ಖ್ಹರೈರಾಖ್ಯೋಸ್. ಇವ್ಣಮ ಕೆತ್ರೂಕಿಜ಼ಣು ಅನ ಖ್ಹಮ್‌ಜಿನ್‌ ದಾನ್ ದ್ಯಾವಾನ ದಿಲ್‍ಕರ‍್ಯು. 
\v 3 ಕತೋಬಿ ಹಮಾರಿ ಖ್ಹರಾವ್ಣಿ ಝೂ಼ಟಿ ನಾಹೊಣುಕರಿ ಆ ಭೈಯೆ ಭೇನೆವೊನ ತುಮಾರಕನ ಮೋಕ್ಲುಕರುಸ್. ತುಮೆ ಅನಾಖ್ಹಾಜೆ ತಯಾರ್ ಹುಯಿರ‍್ಹಾಸ್‍ಕರಿ ಮೇ ಖ್ಹಮ್‍ಜೂ಼ಸ್. 
\v 4 ಶನಕತೊ ಮೆಕೆದೋನಿಯವಾಳು ಕೋಣ್‌ತೋಬಿ ಹಮಾರಿ ಜೋ಼ಡ್ಮ ಆಯುತೊ. ತುಮೆ ತಯಾರ್ ಹುಯಕೊಯ್ನಿಕರಿ ದೇಖಿನ್ ಹಮೆ ತುಮಾರಪರ್ ಅಮ್ನು ಭರೋಖ್ಹೊ ರಾಖ್ಯಾತೆ ಇನ ಹಮೆ ಖ್ಹರ್‌ಮಿಂದ್ಯ ಹುವಾನುಪಡ್ಯು; ತುಮೂನಾಬಿ ಖ್ಹರಮ್‌ ಉಷೆಕರಿ ಮೆ ಅಮ್ ಬೋಲುಕರುಸ್. 
\v 5 ಇನಖ್ಹಾಜೇಥಿ ಭೈಯೆ ಭೇನೆವೊಖ್ಹಾರು ಫೈಲೇಸ್ ತುಮಾರಕನ ಆಯಿನ್ ತುಮೆ ಪಹಿಲೇಸ್ ವಾಗ್ದಾನ್ ಕರ‍್ಯೊತೆ ಮದತ್‍ನ ರಪ್ಯ ಜ಼ಮಕರಾನ ತುಮೂನ ಮದತ್‌ಕರಾನಖ್ಹಾಜೆ ಅವ್ಣುನ ಗಿಂಗೈಲ್ಯವಾನು ಅಛ್ಛು಼ಕರಿ ಮನ ಮಾಲುಮ್‍ಹುಯು. ಅಮ್‍ ಆ ದಾನ್ ಜು಼ಲಮ್‌ಥಿ ಕಾಹೆ ಛು಼ಟ ದಿಲ್‌ಥಿ ದೆವಾಯುಹುಯು ದಾನ್ ಹುಯಿರ‍್ಹುಸ್. 
\v 6 ಕಮ್ ಬಿತ್ನೆ ಕರಾವಾಳು ಕಮ್ಮಸ್ ವ್ಹಾಡ್‍ಶೆ. ಜಾ಼ಖ್ಹತ್ ಬಿತ್ನೆಕರಾವಾಳು ಜಾ಼ಖ್ಹತ್ ವ್ಹಾಡ್‍ಶೆ ಕರಿ ಬೋಲಾನಿ ವಾತೆ ಖ್ಹಯಾಲ್ಮ ರಾಖೊ.\x - \xo 9:6 \xo*\xt ಜ್ಞಾನೋಕ್ತಿ 11:24—22:9\xt*\x* 
\v 7 ಹರೇಕ್ ಜ಼ಣೋಬಿ ಇವ್ಣ ದಿಲ್ಮ ನಿರ್ಧಾರ್‌ಕರಾತೆ ಪರಕ್ಮ ದ್ಯವಾದೆ. ಕೋಣ್‌ಬಿ ದುಖ್‌ಥಿ ರ‍್ಹವೊ, ಜು಼ಲಮ್‌ಥಿ ರ‍್ಹವೊ ನಾದೇವ್ಣು ಎಥ್ರಾನವಾಳನ ದೇವ್ ಪ್ಯಾರ್‌ಕರಸ್.\x - \xo 9:7 \xo*\xt ಧರ್ಮೊ 18:10—22:9\xt*\x* 
\v 8 ದೇವ್ ಹರೇಕ್ ಥರಾನು ವಾರ್‌ಖ್ಹೊ ತುಮುನ ಚೆಹಳ್‌ಥಿ ದ್ಯಾವಾನ ಶಕತ್‌ವಾಳೊ ಹುಯಿರ‍್ಹೋತೆ ಇನಾಖ್ಹಾಜೆ ತುಮೆ ಕದೇಬಿ ಖ್ಹಾರೀಸ್‍ವಾತೆಮ ಭರ್‌ಪೂರ್‌ರ‍್ಹಿಶು. ಬಿಜು಼ ಹರೇಕ್ ಥರಾನು ಅಛ್ಛಾ಼ ಕಾಮ್‍ನ ಹೋಣುತೆತ್ರು ಕರಾವಾಳ ಹುಯಿರ‍್ಹೇಣು. 
\v 9 ಪವಿತ್ರ ದಪ್ತರ್‌ಮ ಬೋಲೈರ‍್ಹುತೆ ಪರಕ್ಮ “ಯೋ ಗರೀಬ್ ಖ್ಹಾರಾನ ಚೆಹೆಳ್‌ಥಿ ದಿಶೆ; ಇನಿ ನೀತಿ ಕದೇಬಿ ರ‍್ಹಿಶೆ.”\x - \xo 9:9 \xo*\xt ಕೀರ್ತನೆ 112:9\xt*\x* 
\v 10 ಬಿತ್ನೆ ಕರಾವಾಳನ ದಾಣನಾಬಿ ಖಾವಾಳನ ಖಾಣು. ದ್ಯಾವಾಳೊ ದೇವ್ ತುಮುನಾಬಿ ಬಿತ್‌ಕರವಾಳನ ದಾಣೊದೀನ್ ಘಣುಕರೀನ್ ತುಮಾರು ನೀತಿನ ಫಲ್ನ ಘಣು ಕರ್ಶೆ.\x - \xo 9:10 \xo*\xt ಯೆಶಾಯ 55:10;\xt* \xt ಹೋಶೇಯ 10:12\xt* \x* 
\v 11 ಅಮ್‍ ತುಮೆ ಅಖ್ಖಕಾಮ್ಮಬಿ ಶೌಕಾರಿ ರ‍್ಹೀನ್ ದಿಲ್‍ಛೋ಼ಡಿ ದ್ಯಾವಾನ ಶಕತ್‌ವಾಳ ಹುಯಿರ‍್ಹಿಶು. ತುಮಾರಿ ದಾನಅಖ್ಖು ಹಮಾರ ಹಾತೇಥಿ ಬಿಜೇಕ್‍ಜ಼ಣಾನ ಮಳ್ಯುತೊ ಯೊ ದೇವ್ನ ಧನ್ಯವಾದ್ನಿ ಸ್ತುತಿಹುವಸ್. 
\v 12 ಆ ತುಮಾರಿ ಚಾ಼ಕ್ರಿ ಖಲಿ ದೇವ್ನ ಅದ್ಮಿಖ್ಹಾರಾನಿ ಖ್ಹತಾಪ್ಣಿ ಕಾಡ್‍ಶೆಕೊಂತೆ, ಕೈಏಕ್ ಜ಼ಣಾಮ ದೇವ್ನ ಧನ್ಯವಾದ್‍ನಿ ಖ್ಹಲಾಮ್ ಕರಾನೊ ದಿಲ್‌ ಆವ್‌ಶೆ. 
\v 13 ಕ್ರಿಸ್ತನಿ ಸುವಾರ್ತೆನಿ ಸ್ವಿಕಾರ್‌ಥಿ, ತುಮೆ ಕೆತ್ರೆ ನಿಯ್ಯತ್‍ನ ಸೇವೆ ಕರಾವಾಳ ಹುಯಿರ‍್ಹಾಸ್, ಅಜು಼ ತುಮುನಾಬಿ ಬಿಜಾ಼ನಾಬಿ ಕೆತ್ರೆ ದಿಲ್‌ ಛೋ಼ಡಿದ್ಯಾವಾಳ ಹುಯಿರ‍್ಹಾಸ್ ಕರಿ ಬೋಲಾನು ಖ್ಹಮ್‌ಜಿನ್‌ ಕೈಏಕ್‍ಜ಼ಣು ದೇವ್ನ ಖ್ಹರಾವ್‌ಶೆ. 
\v 14 ಘಣು ಪ್ಯಾರ್‌ಥಿ ಇವ್ಣೆ ತುಮಾರಖ್ಹಾಜೆ ಪ್ರಾರ್ಥನೆ ಕರ್ಶೆ. ಆ ಕೊಂತೆ ತುಮಾರಮ ಛಾ಼ತೆ ದೇವ್ನಿ ಕೆತ್ರಿಕ್ಕಿ ವಾರ್‌ಖ್ಹಾನಖ್ಹಾಜೆ ತುಮಾರಖ್ಹಾಜೆ ತರ್ಖ್ಹುಕರಸ್. 
\v 15 ಖ್ಹರಾವಾನ ಹೋಯಿಕೊಂತೆ ಎತ್ರು ದೇವ್ನ ವಾರ್ಖ್ಹಾನಿ ವರನಖ್ಹಾಜೆ ಇನ ಧನ್ಯವಾದ್ ಹುವಾದೆ.
\c 10
\s ಪೌಲ ಇನಿ ಸೇವೆನಿ ಬಾರೇಮ ಬೋಲಿಲಿದೋತೆ
\p
\v 1 ಪೌಲ ಅಪ್ಣಕನ ರ‍್ಹಾವಾನಿ ವಖ್ಹತ್‌ಮ ಶೇದೆವ್‌ನಿತರ ಚಾ಼ಲಿಲ್ಯವಾಳೊಬಿ, ತುಮಾರೇಥಿ ದೂರ್‌ರ‍್ಹಾವಾನಿ ವಖ್ಹತ್‌ಮ ಕಠಣ್‌ಥಿಬಿ ಚಾ಼ಲಿಲ್ಯವಾಳೊ ಹುಯಿರ್‍ಹೊಸ್ ಕರಿ ಬೋಲೈಲ್ಯಾವಳೊ ಯೋ ಪೌಲ ಕರಿ ಮೇ ಕ್ರಿಸ್ತನಿ ಶಾಂತಿನದಿಲ್‍ನಾಬಿ ಗೋರ್‌ನಾಬಿ ಯಾದ್‍ಕರ‍್ಲಿನ್, 
\v 2 ತುಮುನ ಗಿಂಗೈಲ್ಯವಾನು ಶಾತ್‍ಕತೊ; ಮೇ ತುಮಾರಕನ ಆವಾನಿ ವಖ್ಹತ್‌ಮ ಕಠಣ್‍ಥಿ ಚಾ಼ಲಿಲ್ಯಾವನ ಮನ ವಖ್ಹತ್ ನಕೊದೆವೊ. ಹಮೆ ಜಗತ್‌ವಾಳನಿ ತರ ಜಿವಿಯೇಸ್‍ಕರಿ ಥೋಡು ಜ಼ಣು ಖ್ಹಮ್‍ಜ಼ಸ್ ಇವ್ಣ ಜೋ಼ಡೆ ಹಿಮ್ಮಥ್ಥಿ ರ‍್ಹೇವ್ಣುಕರಿ ಛೂ಼. 
\v 3 ಹಮೆ ಲೋಕ್ಮ ಜಿವವಾಳ ರ‍್ಹಯತೋಬಿ ಹಮಾರಿ ಲಡೈ, ಜಗತ್‌ವಾಳನಿ ಜಂಗ್‍ಭೀಡಾವಾಳ ಕಾಹೆ. 
\v 4 ಹಮೆ ಜಂಗ್ ಭಿಡಾನಿ ವಖ್ಹ್‌ತೆ ಉಪಯೋಗ್ ಕರ‍್ಯೇತೆ ಕಫ್ಫನ್‌ಖ್ಹಾರು ಆ ಲೋಕ್‍ನು ಕಾಹೆ. ಯೋ ದೇವ್ನಿ ಗಣ್ತಿಮ ತಾಖತ್‍ವಾಳು ಹುಯಿರ‍್ಹಿನ್, ಕೋಟೆವ್ನ ರಡ್‍ಕೈನಾಖವಾಳು ಹುಯಿರ‍್ಹೂಸ್. 
\v 5 ಅಪ್ಣಿ ದೇವ್ನಿ ಗ್ಯಾನ್ನ ವಿರೋದ್ ಉಠಾತೆ ಅಹಂಕಾರ್‌ನ ಅಪ್ಣೆ ನಾಶ್‍ಕರಿನ್, ಹರೇಕ್ ಖ್ಹೂಜ್‍ನಾಬಿ ಕ್ರಿಸ್ತನ ಸಮರ್ಪಣ್‌ ಹುವಾನಿತರ ಯೋ ಅಖ್ಖಾನ ಕೊಂಡಿಲಿಯೇ. 
\v 6 ತುಮಾರಿ ಹುಕುಮ್ನ ಮಾನಾನು ಪೂರಹುವಾನಿ ಬಾದ್ಮ ಅಖ್ಖುಸ್ ಹುಕುಮ್ನ ನಾ ಮಾನಾನು ದಾವ್‌ ಕಾಡನ ತಯಾರ್ ಹುಯಿರ‍್ಹಾಸ್. 
\v 7 ತುಮೆ ಖಲಿ ಭಾರ್‌ ದೆಖಾವನು ದೇಖೊಸ್‍, ಕೋಣ್ ತೋಬಿ ಇನ ಕ್ರಿಸ್ತವಾಳೋಕಿ ಇಮ್ಮಸ್ ಹಮೇಬಿ ಕ್ರಿಸ್ತವಾಳಕರಿ ಮಾಲುಮ್‌ ಕರಿಲ್ಯಾವಾದೆ. 
\v 8 ಹಮೂನ ಛಾ಼ತೆ ಅದಿಕಾರ್‌ನಿ ಬಾರೇಮ ಹಮೆ ಏಕ್‌ ಘಡಿ ಜಾ಼ಖ್ಹತ್ ಖ್ಹರೈಲಿದಾತೋಬಿ ಇಮ್‌ ಖ್ಹರೈಲ್ಯಾವಾಮ ಮೇ ಖ್ಹರ್‌ಮವ್‌ಕೊಯ್ನಿ. ಕತೋಬಿ ಯೋ, ತುಮುನ ರಡ್‍ಕೈನಾಕ್ಣುಕರಿ ಕಾಹೆ. ಭಾಂದ್‍ಣುಕರಿ ಪ್ರಭು ಆ ಅಧಿಕಾರ‍್ನ ಮನ ದೀರಾಖ್ಯೊಸ್. 
\v 9 ಮೇ ಚಿಟ್ಟಿಲೀಖಿನ್ ತುಮುನ ಡರವ್‌ಕರುಸ್ ಕರಿ ನಕೊ ಲಾಜ಼್‌ಶು. 
\v 10 “ಇನೇಥಿ ಆಯುತೆ ಚಿಟ್ಟಿ ಖ್ಹಾರು ಕಠಣ್‍ನುಬಿ ತಾಖತ್‍ವಾಳುಬಿ ಹುಯಿರ‍್ಹೂಸ್. ಕತೋಬಿ ಶರೀರ್‌ಥಿ ಯೊ ಕಮ್‌ಜೋ಼ರಿಹುಯಿನ್ ಇನಿ ವಾತೆ ಖ್ಹಾರಿ ಕಾಮ್ನಕೊಯ್ನಿತೇಬಿ ಹುಯಿರ‍್ಹಿಶೆ” ಕರಿ ಥೋಡು ಜ಼ಣು ಬೋಲಸ್. 
\v 11 ಅಥ್ರಾನವಾಳು, ಹಮೆ ದೂರ್ ರ‍್ಹಾವಾನಿ ವಖ್ಹತ್‌ಮ, ಚಿಟ್ಟಿಯೇಮ ಲೀಖೈರ‍್ಹಿತೆ ವಾತ್ಮ ಕಿಮ್ ಛಿಯೇಕಿ ಖನ್ನೆ ರ‍್ಹವಾನಿವಖ್ಹ್‌ತೆ, ಕಾಮ್ಮಾಬಿ ಎಥ್ರಾನಸ್‍ವಾಳಕರಿ ಮಾಲುಮ್‌ ಕರಿಲ್ಯಾವಾದೆ. 
\v 12 ಇವ್ಣು ಇವ್ಣೇಸ್ ಖ್ಹರೈಲ್ಯಾವಾಳನಿ ಜೋ಼ಡ್ಮ ಹಮೆ ಸಮಾನ್ ಕರಿಲ್ಯಾವಾನ ಕೋಶಿಶ್ ಕರುಕೊಯ್ನಿ. ಇವ್ಣಾಸ್‍ಮ ಇವ್ಣೆ ಆಳ್ತಿ ಕರೀನ್, ಇವ್ಣುನ ಇವ್ಣೇಸ್ ಸಮಾನ್ ಕರಿಲೇಸ್, ಇವ್ಣುನ ಶಾತ್ಬಿ ಮಾಲುಮ್ ಕೊಯ್ನಿಕರಿ, ಆಸ್ ಅಖ್ಖು ಓತಾಳಸ್‍. 
\v 13 ಹಮೇ ತೋಬಿ ಹಮಾರಿ ಯೋಗ್ಯತೆನ ಮ್ಹೇಲಿನ್, ಖ್ಹರೈ ಲಿಯೇಕೊಂತೆ ದೇವ್ ಹಮೂನ ದೀರಾಖ್ಯೋತೆ ಹುಕುಮ್ಮ ರ‍್ಹೀನ್ ಖ್ಹರೈಲಿಯೇಸ್. ಆ ಹುಕುಮ್ಮ ರ‍್ಹೀನ್ ತುಮಾರಲಗು ಐರ‍್ಹಾಸ್. 
\v 14 ಹಮೆ ಕ್ರಿಸ್ತನಿ ಸುವಾರ್ತೆನ ಬೊಲ್ತಹುಯಿನ್‍ ಅಖ್ಖೇಥಿ ಅಗಾಡಿ ತುಮಾರಕನ ಆಯಾತೆ ಇನಖ್ಹಾಜೆ ತುಮಾರಪರ್ ಅಧಿಕಾರ್‌ಕೊಂತೆ ತಿಮ್, ಹುಕುಮ್‌ನ ಮ್ಹೇಲಿನ್ ವಳ್ಯಾಜ಼ಯೇ ಕೊಯ್ನಿ. ಕ್ರಿಸ್ತನಿ ಸುವಾರ್ತೆನ ಬೋಲ್ತಾಹುಯಿನ್ ಹಮೆ ತುಮಾರಾಕನ ಐರ‍್ಹಾಸ್‍ನಿ. 
\v 15 ಹಮೆ ಮಿತ್‌ಮೀರಿನ್ ಬಿಜೇಕ್‍ಜ಼ಣಾನ ಮಿನ್ಹತ್‍ನ ಫಲ್ನ ಲೀಲಿನ್‌ ಆ ಹಮಾರು ಕರಿ ಬೋಲಿಲ್ಯಾವಾಳ ಕಾಹೆ. ಕತೋಬಿ ಹಮಾರಿ ವಿಶ್ವಾಸ್ ಜಾ಼ಖ್ಹತ್ ಹುವಾತೆ ತಿಮ್ ತುಮಾರೇಥಿ ಹಮಾರು ಕಾಮ್ ಬಿಜೂ಼ಬಿ ಭಡ್ತುಜಾ಼ಶೆ. 
\v 16 ಶನಕತೊ ತುಮಾರ ಖ್ಹಯೇರ್‌ಥಿ ದೂರ್ ರ‍್ಹೇಯ್ತೆ ತಬರ್‌ಖಾಮಾಬಿ ಸುವಾರ್ತೆನ ಖ್ಹಮ್‍ಜಾ಼ಡ್ನು ಕರಿ ಆಖ್ಹ್ ಹಮೂನ ಛಾ಼. ಕತೋಬಿ ಬಿಜು಼ ಜ಼ಣು ಕಾಮ್‍ಕರ‍್ಯಾಹುಯ ತಬರ್‌ಖಾಮ ಹಮೆ ಕಾಮ್‍ಕರಿನ್ ಮೋಟಕರಿ ಬೋಲಿಲ್ಯಾವಾನ ಹಮೂನ ಆಖ್ಹ್‌ಕೊಯ್ನಿ. 
\v 17 ಕತೋಬಿ ಭಡವಾಳೊ ಪ್ರಭುಮಾಸ್ ಭಡಾದೆ.\x - \xo 10:17 \xo*\xt ಯೆರೆಮೀಯ 9:24\xt*\x* 
\v 18 ತಿನುತ್ಯೋಸ್ ಖ್ಹರೈಲ್ಯಾವಾಳೊ ಯೋಗ್ಯಕಾಹೆ. ಪ್ರಭು ಕಿನ ಖ್ಹರಾವಸ್ಕಿ ಯೋಸ್ ಖ್ಹಾಚಾಮ ಯೋಗ್ಯ.
\c 11
\s ಪೌಲ ಅಜು಼ ಝೂ಼ಟ ಅಪೊಸ್ತಲರ್
\p
\v 1 ಮೇ ಪಗ್‍ಲ್ಯೊ ಹುಯಿರ‍್ಹವಾನಿ ವಖ್ಹತ್‍ಮಾಬಿ ತುಮೆ ದಯಕರಿನ್ ಜ಼ರ ಖ್ಹಮಾಳಿಲೆವ್ಣು ಕರಿ ಆಖ್ಹ್‌ಕರುಸ್. ಕತೋಬಿ ಇಂಥಿ ಅಗಾಡಿ ತುಮೆ ಇಮ್‌ ಕರಿರಾಕ್‍ಶು. 
\v 2 ಶನಕತೊ ದೇವ್‌ಮ ಛಾ಼ತೆ ಬಳಾಪಥೀಸ್ ಮೇ ತುಮಾರಿ ಬಾರೇಮ ವೆಚ಼್‌ಣೆಕರೂಸ್. ತುಮುನ ಕ್ರಿಸ್ತ ಕರಿ ಬೋಲೈರ‍್ಹೋತೆ ಎಕ್ಕಸ್ ಪರ್ಖ್ಹಾನ ಶುದ್ಧಕವಾರಿ ಬಣೈನ್ ತುಮುನ ಇನ ಹಾತ್ಮ ದೇವ್ಣುಕರಿ ತೀರ್ಮಾನ್ ಕರಿರಾಖ್ಯೊಸ್ನಿ. 
\v 3 ಕತೋಬಿ ಹವ್ವ ಖ್ಹಾಪ್‍ನ ಲಬುಜ಼್‌ನಿ ವಾತ್ಮ ಮೈಕಮ್‍ಹುಯಿನ್ ಧೋಕಹುಯಿತೆ ತಿಮ್ ತುಮಾರು ದಿಲ್‌ ಕ್ರಿಸ್ತನಿ ಬಾರೇಮ ರ‍್ಹೇವ್ಣುಥೂತೆ ಶುದ್ಧಮನ್‌ಥೀಬಿ ಪರಿಶುದ್ ಭಕ್ತಿನಾಬಿ ಮ್ಹೇಲಿನ್ ಖರಾಬ್ ಹುಯಿಜಾ಼ಶೆಕರಿ ಡರ್‌ ಮಾರಾಮ ಛಾ಼. 
\v 4 ಶನಕತೊ ಹಮೆ ಬೋಲು ಕರ್ತಥಾತೆ ಬಿಜೇಕ್‍ಜ಼ಣೊ ಯೇಸು ತುಮಾರಕನ ಆಯಿನ್ ತುಮುನ ಬೋಧನೆ ಕರಾನಿ ವಖ್ಹ್‌ತೆಬಿ. ತುಮೆ ಲೀರಾಖ್ಯಕೊಂತೆ ಬಿಜೇಕ್ ಆತ್ಮಾನ ಲಿಲ್ಯಾವನಿ ವಖ್ಹ್‌ತೆಬಿ ಸ್ವೀಕಾರ್ ಕರಕೊಂತೆ ಬಿಜೇಕ್ ಸುವಾರ್ತೆನ ಸ್ವಿಕಾರ್‌ಕರಿಲ್ಯಾವನಿ ವಖ್ಹ್‌ತೆ ತುಮೆ ಅಛ್ಛಿನಿತರ ಖ್ಹಮಾಳಿಲೆವೊಸ್. 
\v 5 ಮೋಟ ಅಪೊಸ್ತಲರ್‌ಕರಿ ಬೋಲೈಲ್ಯಾವಾಳ ಏಕ್‍ಥೀಬಿ, ಮೇ ಕಮ್ ಕಾಹೆ ಕರಿ ಲಾಝು಼ಸ್. 
\v 6 ಮೇ ವಾತ್ಮ ಚಾ಼ತುರ್‌ನಾರ‍್ಹಯೊ ತೋಬಿ ಗ್ಯಾನ್‌ಮ ಕಮ್ ಕಾಹೆ. ಅನ ಮೇ ಹರೇಕ್ ಹಾಲತ್ಮಾಬಿ ಛೋ಼ಡಿವತಾಳಿ ರಾಖುಸ್. 
\v 7 ತುಮುನ ಊಚ಼ ಪಡಾವ್ಣು ಕರಿ ಮಾರು ಮೇ ಹೇಟುಕರಿಲೀನ್ ದೇವ್ನಿ ಸುವಾರ್ತೆನ ಮೇ ಫುಗಟ್ ಬೋಲ್ಯೋತೆ ಮಾರಿ ಪಾಪ್‍ಕಿಶು? 
\v 8 ತುಮಾರಿ ಸೇವೆಕರಾನ ಖ್ಹಾಜೆ ಮೇ ಅಲಕ್ ಸಬೆಥೊ ಮದತ್‍ಲೀನ್ ಇವ್ಣುನ ಗುರ್‌ಕಾವ್‌ತೊ ಹುಯಿನ್ ಇವ್ಣ ಪೈಶಾನ ವಶೂಲ್ ಕರ್ತೊಥೊ. 
\v 9 ಮೇ ತುಮಾರಕನ ರ‍್ಹಾವಾನಿ ವಖ್ಹತ್‌ಮ ಮಾರಿ ಖೆವಿ ಜ಼ರೂರತ್‍ನಾಬಿ,ಮೇ ಖಿವಿ ಪರಕ್ಮ ತುಮಾರಾಪರ್ ವಜ಼ನ್ ಹುಯಿರ‍್ಹೊ ಕೊಯ್ನಿಕಿ ಖ್ಹಾಮ್ಣೆ ಮೆ ಭೋಜ಼್‌ ಕೊಹುಯಿಶ್ನಿ. ಶನಕತೊ ಮೆಕೆದೋನ್ಯಥಿ ಆಯಾತೆ ಭೇನೆ ಭೈಯೇನೆ ಮಾರಿ ಜ಼ರೂರತ್ ಪೂರಕರ‍್ಯಾ. 
\v 10 ಆ ಮಾರಿ ಖ್ಹರಾವ್ಣಿನ ಅಖಾಯ ತಬರ್‌ಖಾನು ಕೋಣ್‌ಬಿ ಆ ಮಾರಿ ಖ್ಹರಾವ್ಣಿನ ಕಮ್‌ಠೋಕಖ್ಹರ್ಕು ಕೊಯ್ನಿ ಕರಿ ಕ್ರಿಸ್ತ ಯೇಸುನ ಖ್ಹಾಮ್ಣೆ ಖ್ಹಾಚಾಮ ಬೋಲುಸ್. 
\v 11 ಮೆ ಬೋಲ್ನುಕತೊ ತುಮುನ ಪ್ಯಾರ್‌ಕರುಕೊಯ್ನಿ? ಶನಖ್ಹಾಜೆಕತೊ ಯೋ ದೇವ್ನಾಸ್ ಮಾಲುಮ್ ಛಾ಼. 
\v 12 ಥೋಡುಜ಼ಣು ಇವ್ಣೆ ಕರುಕರಾತೆ ಕಾಮ್, ಹಮೇ ಅಪೊಸ್ತಲರ್ ಹುಯಿನ್ ಕರುಕರೆತೆ ಕಾಮ್ನ ಬರೋಬರ್ ಕರಿ ಅಡ್‍ಫೇಡ್‍ಬೋಲಾನ ವಖ್ಹತ್ ಢೂಂಡುಕರಾಸ್. ಇವ್ಣುನ ಖಿವು ಭಾಣು ನಾಮಳ್‍ನುತೆ ಮೇ ಹಮ್ಕೆ ಕರುಕರುಸ್ತೆ ಇನಾಸ್ ಕರ್ತೊಜ಼ಯಿಶ್‍. 
\v 13 ಎಥ್ರಾನು ಅದ್ಮಿಖ್ಹಾರು ಝೂ಼ಟುಅಪೊಸ್ತಲರ್, ಧೋಕಕರವವಾಳು, ಕ್ರಿಸ್ತನು ಅಪೊಸ್ತಲರ್‌ಕರಿ ವೇಷಬದ್ಲವವಾಳು ಹುಯಿರ‍್ಹೂಸ್. 
\v 14 ಅನಾಮ ಆಶ್ಚರ್ಯ ಶಾತ್‌ಕೊಯ್ನಿ, ಶೈತಾನ್‍ಬಿ ಉಜಾ಼ಳನೊ ದೂತನಿತರ ದೆಖೈಲೇಸ್. 
\v 15 ಇನಾಖ್ಹಾಜೆ ಇನ ಸೇವಕರ್‌ಬಿ ನೀತಿನ ಸೇವಕರ‍್ನಿತರ ದೆಖೈಲ್ಯಾವಾನ ಇವ್ಣುನ ಬದ್‍ಲೈಲ್ಯಾವಾನು ಆಶ್ಚರ್ಯ ಶಾತ್‍ಬಿಕೊಯ್ನಿ. ಇವ್ಣ ಕಾಮ್ನ ತಕ್ಕಾದ್‍ನ ಇವ್ಣು ಖ್ಹರ್ತಿಬಿ ರ‍್ಹಿಶೆ.
\s ಪೌಲ ಅಪೊಸ್ತಲ ಹುಯೋತೆ ತದೆ ಇನ ಹುಯುತೆ ಖ್ಹತಾಪ್ಣಿ
\p
\v 16 ಮೇ ಪಗ್‍ಲ್ಯೊ ಕರಿ ಕೋಣ್‌ಬಿ ಮನ ನಾಲಾಝ಼್‌ಣುಕರಿ ಪಾಛೊ಼ಬೋಲುಸ್, ಇಮ್‌ ಲಾಝ್ಯಾತೋಬಿ ಮನ ಪಗ್‍ಲ್ಯೊಕರಿ ತೋಬಿ ಮಳೈಲೆವೊ; ಶನಕತೊ ಮೇಬಿ ಥೋಡುಭೋತ್ ಖ್ಹರೈಲೇವ್ಣು ಕರಿ ಛು಼. 
\v 17 ಮೇ ಆಖ್ಹಾರಿವಾತೆನ ಪ್ರಭುನಿ ವಾತೆನಿತರ ಬೋಲುಕೊಂತೆ ಶೊಂತ್ ಭರೋಖ್ಹಾಥಿ ಬಡೈ ಮಾರಿಲ್ಯಾವಾಳ ಪಗ್‍ಲ್ಯಾನಿತರ ಬೋಲುಸ್. 
\v 18 ಕತೋಬಿ ಕೈಏಕ್ ಜ಼ಣು ಜಗತ್ನಿ ಸಂಬಂದ್‌ನಿ ಬಾರೇಮ ಇವ್ಣೆ ಖ್ಹರೈಲೇಯಿತೆತಿಮ್ ಮೇಬಿ ಖ್ಹರೈಲೆವುಸ್. 
\v 19 ಅಕ್ಲಿ ಹುಯಿರಾತೆ ತುಮೆ ಪಗ್‍ಲ್ಯಾವ್‍ನ ಖುಷಿಥಿ ಖ್ಹಮಾಳಿಲೆವೊ. 
\v 20 ಖ್ಹಾಚ಼ಮ ಬೋಲ್ನುಕತೊ ಕೋಣ್‌ತೋಬಿ ತುಮುನ ಕಬ್‌ಜಾ಼ಮ ಕರ‍್ಯುತೋಬಿ, ತುಮುನ ಕಡ್‌ತೆಲ್ ದೇಖಸ್ ಇವ್ಣು ಫಾಯಿದೊ ಕರಿಲೇಸ್ ತೋಬಿ ತುಮಾರ ಕಲ್ಲಪರ್ ಮಾರ‍್ಯುತೋಬಿ ತುಮೆ ಖ್ಹಮಾಳಿ ಲೆವೋಸ್‍ನಿ. 
\v 21 ಅಮ್ ಅಖ್ಖುಕರಾನ ಮಾರೇಥಿ ಕಮ್‌ಜೋ಼ರಿಕರಿ ಮಾನಿಲ್ಯಾವಾನ ಮನ ಖ್ಹರಮ್‌ಲಾಗಸ್. ಖಿವು ಬಿಜು಼ ಜ಼ಣು ಖ್ಹರೈಲ್ಯಾವಾನ ಧಿಲ್‌ಪತ್‌ ಕರಸ್ಕಿ ಇನ ಮೇ ಪಗ್‍ಲ್ಯಾನಿತರ ಖ್ಹರೈಲ್ಯಾವಾನ ಹುಮ್ಮಖ್ಹ್‌ ಕರುಸ್. 
\v 22 ಇವ್ಣೆ ಹಿಬ್ರುವಾಳಕಿ ಶು? ಮೇಬಿ ಇವ್ಣಿನಿತರ ಹುಯಿರೋಸ್, ಇವ್ಣೆ ಇಸ್ರಾಯೇಲ್‌ವಾಳ? ಮೇಬಿ ಇವ್ಣಿನಿತರಸ್ ಹುಯಿರ‍್ಹೆವುಸ್‌; ಇವ್ಣೆ ಅಬ್ರಹಾಮ್‌ನಿ ಖೂಮ್‍ವಾಳ? ಮೇಬಿ ಇನಿ ಖೂಮ್‌ವಾಳೊ. 
\v 23 ಇವ್ಣೆ ಕ್ರಿಸ್ತನ ಸೇವಕರ್‌ಕಿಶು? ಇವ್ಣೇಥಿ ಜಾ಼ಖ್ಹತ್ ಮೇ ಸೇವೆ ಕರಾವಾಳೊ ಹುಯಿರೋಸ್. ಮೇ ಪಗ್‍ಲ್ಯಾನಿತರ ವಾತೆಬೋಲುಕರುಸ್, ಮೇ ಘಣು ಖ್ಹತಿರ‍್ಹೋಸ್ ಘಡಿಕೇಡೆ ಜೇಲ್‌ಮ ಘಲೈಲಿಧೋಥೊ. ಕಠಣ್ಣಿ ಪರಕ್ಮ ಮಾರ್‌ಖೈರಾಖ್ಯೋಸ್. ಕೈಯೇಕ್ ವಖ್ಹತ್ ಮರಣ್‍ಮ ಖ್ಹಪ್‍ಡಿಗಯೋಥೊ. 
\v 24 ಯೆಹೂದ್ಯರ್ ಹಾತೇಥಿ ಪಾಚ಼್ ವಖ್ಹತ್ ನೌ ಉಪ್ಪರ್ ಡೋಡಿಖ್ಹ್‌ ಕೊಲ್ಡಾನ ಮಾರ್ ಖೈರಾಖ್ಯೋಸ್. 
\v 25 ತೀನ್‍ಹಲ್ಲ ಕೊಲ್ಡಾನಿ ಮೂಟ್‍ಥಿ ಕೂಟೈಲಿಧೊ. ಏಕ್‌ ವಖ್ಹತ್ ಮನ ಮಾರಿನಾಖಾನ ಬಂಡೊಫೇಕ್ಯು. ತೀನ್‍ವಖ್ಹತ್ ಮೇ ವಳ್ಯೊಜಾ಼ತೊಥೋತೆ ಜ಼ಹಾಜ಼್ ಫುಟೀಗಿ. ಏಕ್‌ ರಾತ್ ಏಕ್‍ದನ್ ಮೇ ದರ‍್ಯಾವ್‌ಪರ್ ತೇಲ್‍ತೊಫಂಡ್ಯೊ. 
\v 26 ಗಾಮ್‌ಥಿ ಗಾಮ್‍ ಚಾ಼ಲ್ತೋಸ್ ರ‍್ಹಯೊ. ನದ್ದಿಯೇಥಿ ಖತ್ರ, ವಾಟ್‌ಪರ್ ಚೋ಼ರ್‌ಥಿ ಖತ್ರ, ಯೆಹೂದ್ಯರ್ ಅಜು಼ ಯೆಹೂದ್ಯರ್‌ಕಾಹೆತೆ ಅದ್ಮಿಥಿ ಖತ್ರ, ಖ್ಹಯೇರ್‌ಮ ಖತ್ರ, ಭಾರ್‌ಲ್ಯ ತಬರ್‌ಖಾವ್‍ಮ ಖತ್ರ, ದರ‍್ಯಾವ್‌ಮ ಖತ್ರ, ಅಜು಼ ಝೂ಼ಟ ಭಯೇಥಿ ಖತ್ರ ಅಖ್ಖಾಸ್‍ಮ ಮೇ ಖ್ಹಾಮೆ ಹುಯೊ. 
\v 27 ಮೇ ಖ್ಹತೀನ್ ರಾಬ್ಯೊ. ಕೆತ್ರಿಕ್ಕಿ ವಖ್ಹತ್ ನಿಂದರ್‌ಕೋಲಿದೋನಿ. ಭುಕ್ ಠೋಖ್ಹ್‌ ಶಾತ್‌ಕರಿ ಮಾಲುಮ್ ಕರಿಲಿದೊ. ಖಾಣುಕೊಂತೆ ಕೆತ್ರಿಕ್ಕಿ ವಖ್ಹತ್ ಪಟ್ನಿ ಪಡ್ಯೊರ‍್ಹಯೊ. ಬರೋಬರ್‌ನು ಲುಂಗ್ಡುಕೊಂತೆ ಠಣ್‍ಮ ಕಾಪ್ತೊ ರ‍್ಹಿಯೊ. 
\v 28 ಎತ್ರೇಸ್ ಕಾಹೆ, ಖ್ಹಾರೀಸ್‍ ಸಬೆಪರ್‌ನು ವೇಚ಼್‌ಣೆ ಮನ ದನ್‌ಪರ್‌ರೋಜ಼್ ಖ್ಹತವ್‍ಕರಸ್. 
\v 29 ಏಕ್‌ ಜ಼ಣೊ ಕಮ್‍ಜೋ಼ರಿ ಹುಯಿರೊತೊ, ಇನ ಜೋ಼ಡ್ಮ ಮೇಬಿ ಕಮ್‍ಜೋ಼ರಿನೋಸ್. ಏಕ್‌ ಜ಼ಣೊ ಪಾಪ್ನ ಬಲಿಹುಯೊತೊ ಮೇ ಪಶ್‍ತೈಶ್ ಕೊಯಿನ್ತೆ ರ‍್ಹಿಶ್‍ಕೊಯ್ನಿ. 
\v 30 ಮನ ಖ್ಹರೈಲ್ಯಾವಾನು ರ‍್ಹಯುತೊ ಮಾರಿ ಕಮ್‍ಜೋ಼ರಿನಿ ಬಾರೇಮಸ್ ಖ್ಹರೈಲೆವ್‍ಸ್. 
\v 31 ಕದೆ ಕದೇಬಿ ಸ್ತುತಿಹುವಾಳೊ ಪ್ರಭು ಯೇಸುನೊ ಬಾಬಿ, ದೇವ್‌ಬಿ ಹುಯಿರಾವಳೊ ಮೇ ಝೂ಼ಟಿ ಕೋಬೋಲುನಿ ಕರಿ ಮಾಲುಮ್ ಕರಿರಾಖ್ಯೋಸ್.
\p
\v 32 ದಮಸ್ಕಮ ರಾಜ಼ ಹುಯಿರೋತೆ ಅರೇತನಿ ಹುಕುಮ್‌ನಿತರ ಹಿಜ಼್ಜಾನೊ ರಾಜ್ಯಪಾಲ್ ಮನ ಧರೀನ್ ಕೊಂಡಿನಾಕ್ಣು ಕರಿ ದಮಸ್ಕ ಖ್ಹಯೇರ‍್ನ ಶಿಪಾಯಿಥಿ ಕಾವ್ಲಿ ಕರಾಯೊ. 
\v 33 ಕತೋಬಿ ಖ್ಹಯೇರ‍್ನ ಭೀತ್‌ನ ಕಿಟಕಿನ ಮಹಿಥು ಮನ ಏಕ್‌ ಟೋಕ್ರಾಮ ಬೆಖ್ಹಾಡಿನ್‌ ಹೇಟ್ ಉತ್ರಾಯು ಅಜು಼ ಇವ್ಣ ಹಾತ್ಮಥೊ ಮೇ ಛು಼ಕಿನ್ ನಾಶಿಗಯೊ.\fig ನಂಗರ‍್ನು ದರ‍್ವಾಜು಼|alt="Entrance to the city gate and wall" src="hk00238c.tif" size="col" copy="Horace Knowles ©" ref="11:32"\fig*
\c 12
\s ಪೌಲನು ದರ್ಶನ್‌ಖ್ಹಾರು ಅಜು಼ ಇನು ಪ್ರಕಟಣೆ
\p
\v 1 ಮೇ ಖ್ಹರೈಲ್ಯಾವಾನು ಅಛ್ಛು಼ ಕಾಹೆ, ಕತೋಬಿ ಖ್ಹರೈಲ್ಯಾವಾನು ಮನ ಜ಼ರೂರತ್ ಛಾ಼. ಇನಖ್ಹಾಜೆ ಪ್ರಭುನೆ ಮನ ದಿದೋತೆ ದರ್ಶನನಾಬಿ ಅಜು಼ ಮಾಲುಮ್‌ಕರಾಯೊತೆ ಪ್ರಕಟಣೆನಿ ಬಾರೇಮ ಬೋಲುಸ್. 
\v 2 ಕ್ರಿಸ್ತಮ ಛಾ಼ತೆ ಏಕ್‍ಜ಼ಣೊ ಮನ ಮಾಲುಮ್ ಚೌ಼ಧ ವರಖ್ಹ್‌ನ ಪೀಠೆ ಯೊ ತೀನ್ನೊ ಆಕಾಶ್‌ಪರ್ ಪಡೈಗಯೊ. ಯೋ ಶರೀರ್ ಖ್ಹಮ್‍ದೆ ಗಯೋಕಿ, ಶರೀರ್ ಕೊಯ್ನಿತೇಸ್ ಗಯೋಕಿ ಮನ ಮಾಲುಮ್‌ಕೊಯ್ನಿ ದೇವ್ನಾಸ್‍ಮಾಲುಮ್‌. 
\v 3 ಯೋ ಅದ್ಮಿ ಸೊರ್ಗಮ ಪಡೈಗಯೊ. ಶರೀರ್ ಖ್ಹಮ್‍ದೇಕಿ, ಶರೀರ್ ಕೊಯ್ನಿತೇಸ್ ಗಯೋಕಿ, ಯೋ ಮನ ಮಾಲುಮ್‌ ಕೊಯ್ನಿ. ಯೋ ಖಲಿ ದೇವ್ನ ಮಾಲುಮ್‌. 
\v 4 ಯೋ ಸೊರ್ಗಲಗು ಉಡಿಜೈ಼ನ್ ಅದ್ಮಿವೋಥಿ ಬೋಲ್ನುನಾತೆ ವಾತೆನ ಖ್ಹಮ್‌ಜ್ಯೊಕರಿ ಮಾಲುಮ್. ಯೋ ವೇಳ್ಮ ಇನೆ ಶರೀರ್‌ನ ಲೀರಾಖ್ಯೊಥೋಕಿ ಕೊಯ್ನಿ ಶರೀರ್ ಕೋಲಿರಾಖ್ಯೊಥೋನಿಕಿ ಮನ ಮಾಲುಮ್‌ಕೊಯ್ನಿ. ದೇವ್ನಾಸ್ ಮಾಲುಮ್‌. 
\v 5 ಯೋ ಅದ್ಮಿನಿ ಬಾರೇಮ ಮೇ ಖ್ಹರವುಸ್. ಕತೋಬಿ ಮಾರಿ ಬಾರೇಮ ಖ್ಹರವ್‍ಕೊಯ್ನಿ, ಮಾರಿ ಕಮ್‍ಜೋ಼ರಿನಿ ಬಾರೇಮ ಖ್ಹರೈಲೆವುಸ್. 
\v 6 ಏಕ್‌ ವಖ್ಹತ್ ಮೇ ಖ್ಹರೈಲ್ಯಾವಾನು ದಿಲ್‍ರ್ಹಯುತೋಬಿ ಇಮ್‌ ಖ್ಹರೈಲ್ಯಾವಾಮ ಮೇ ಬಿಣ್‍ ಅಕ್ಲಿ ಹುಯಿಶ್ ಕೊಯ್ನಿ, ಶನಕತೊ ಮೇ ಖ್ಹಾಚು಼ಸ್ ಬೋಲಿಶ್. ಕತೋಬಿ ಕೋಣ್‌ತೋಬಿ ಮಾರಾಮ ದೆಖಾವಾಥೀಬಿ ನತರ್ ಮಾರೇಥಿ ಖ್ಹಮ್‍ಜಾ಼ಥೀಬಿ ಜಾ಼ಖ್ಹತ್ ಮನ ಪರಖ್ಣುನಾ. 
\v 7 ಕತೋಬಿ ಮೇ ಅದ್ಮಿರ‍್ಹೀನ್ ಖ್ಹರೈನಾಲೇವ್ಣುಕರಿ ಮನ ಭಾಲೇಥಿ ಟೋಚ಼ನಖ್ಹಾಜೆ ಶೈತಾನ್ನ ದೂತನಿತರ ಮನ ಘುಖ್ಹ್‌ತೊ ಮಾರ‍್ಯೊ ಶನಕತೊ ಮೇ ಫುಲಿ ನಾಜಾ಼ವ್ಣು ಕರಿ ಅಮ್ ಹುಯುತೆ.\x - \xo 12:7 \xo*\xt ಗಲಾತ್ಯ 4:13;\xt* \xt ಯೋಬ 2:6\xt*\x* 
\v 8 ಆ ಅಜ಼ ಮನ ಮ್ಹೇಲಿ ನಿಕ್ಳಿಜಾ಼ವ್ಣು ಕರಿ ಪ್ರಭುನ ತೀನ್ ವಖ್ಹತ್ ಗಿಂಗೈಲಿದೊ.\x - \xo 12:8 \xo*\xt ಧರ್ಮೊ 19:15\xt*\x* 
\v 9 ಇನಖ್ಹಾಜೆ ಯೋ ಮನ, “ಮಾರಿ ವಾರ್‌ಖ್ಹೊ ತುನ ಬಶ್‌” ತಾರಿ ಕಮ್‍ಜೋ಼ರಿಮಾಸ್ ಮಾರಿ ಶಕತ್ ತಾರಾಮ ಪೂರ ಹುಯಿರ‍್ಹಿಶೆ ಕರಿ ಮನ ಬೋಲ್ಯೊ. ಇನಖ್ಹಾಜೇಥಿ ಕ್ರಿಸ್ತನಿ ತಾಖತ್ ಮಾರಪರ್ ಢಪೈರ‍್ಹೇವ್ಣುಕರಿ ಮನಹುಯಿತೆ ಕಮ್‍ಜೋ಼ರಿನಿ ಬಾರೇಮಸ್ ಜಾ಼ಖ್ಹತ್ ಖುಷಿಕರುಸ್. 
\v 10 ಇನಖ್ಹಾಜೇಥಿ ಕ್ರಿಸ್ತನಖ್ಹಾಜೆ ಮನ ಕಮ್‍ಜೋ಼ರಿಬಿ, ಝಿಟ್ಕಾರ್‌ನಬಿ, ಶಾತ್‍ಕೊಂತೇಬಿ, ಖ್ಹತಾಪ್ಣಿಬಿ, ವದೇಖ್ಹ್‌ಬಿ ಆಯೂತೆ ಖ್ಹುಶಿಕರೂಸ್. ಮೇ ಕೆದೆ ಕಮ್‍ಜೋ಼ರಿ ರ‍್ಹೆವುಸ್‍ಕಿ ತದೇಸ್‌ ತಾಖತ್‌ವಾಳೊ ಹುಯಿರ‍್ಹೇವುಸ್.
\s ಕೊರಿಂಥವಾಳಾನಿ ಬಾರೇಮ ಪೌಲನಿ ಖ್ಹದ್ದರ್‌
\p
\v 11 ಮೇ ಅಮ್‍ ಖ್ಹರಾವ್ಣಿ ಕಾಡಿಲ್ಯವಾಮ ದೀವಾನೊ ಹುಯಿರೋಸ್, ಇನ ತುಮೇಸ್ ಮನ ಜು಼ಲಮ್‌ ಕರ‍್ಯಾ. ತುಮಾರೇಥಿ ಮನ ಖ್ಹರಾವ್ಣಿ ಹೋಣುಪಡ್ಯುಥು. ಶನಕತೊ ಮೆ ಶಾತ್ಬಿ ರ‍್ಹಿಯೊನಾತೋಬಿ ಘಣೊ ಮಹಾನ್ ಹುಯಿರೋತೆ ಅಪೊಸ್ತಲರ್‌ಮಾಬಿ ಶನಾಮಬಿ ಮೇ ಕಮ್‍ಕೊಯ್ನಿ. 
\v 12 ಮೇ ಖ್ಹಾರಸ್ನ ಖ್ಹಮಾಳಿಲ್ಯವಾಮಾಬಿ, ಖ್ಹಣೇದ್‍ನು ಕಾಮ್ನಾಬಿ ಅದ್ಬುತ್‌ಕಾಮ್‌ನಾಬಿ, ಮಹಾನ್ ಕಾಮ್ನ, ಚ಼ಲಾವಮಾಬಿ, ಅಪೊಸ್ತಲನ ರ‍್ಹೇವ್ಣುತೆಲಖಣ್‌ ತುಮಾರ ಇಚ಼್‌ಮ ವತಾಳ್ಯೊ. 
\v 13 ಮನ ಜ಼ತನ್‍ಕರಾನ ವಜನ್ನ ಮೇ ತುಮಾರಪರ್ ನಾಖ್ಯೊಕೊಯ್ನಿಕರಿ ಎಕ್ಕಸ್‍ನಿ ಬಾರೇಮ ಪಣ್ಕಿ ಬಿಜು಼ ಖೆವಾನಿ ಬಾರೆಮಾಬಿ ತುಮುನ ಬಿಜಿ ಸಬೆವಾಳಾಥಿ ಕಮ್ ಕರ‍್ಯೊಕೊಯ್ನಿನಿ? ಆ ಮಾರಿ ಗಲತ್‌ನ ಮಾಪ್ ಕರೊ. 
\v 14 ಹಮ್ಕೆ ತುಮುನ ತೀನ್ನೆ ಹಲ್ಲಾ ಮಳಾನ ತಯಾರ್ ಹುಯಿರ‍್ಹೋಸ್ ಕತೋಬಿ ಮೇ ತುಮುನ ಭೋಜ಼್‌ ಕೊಹುಯಿರಿಷ್ನಿ. ತುಮಾರಿ ಶೊತ್‍ಮ ಖಿವೂಬಿ ಮನ ಹೋಣುಕೊಯ್ನಿ. ಮನ ಹೋಣುತೆ ತುಮೇಸ್. ಲಡ್ಕಾ ಆಯ ಬಾನ ಖ್ಹಾಜೆ ಪೈಶ ಜ಼ಮಾಕರೀನ್ ದೆವ್ಣು ಕೊಯ್ನಿ. ಆಯ ಬಾ ಲಡ್ಕನಖ್ಹಾಜೆ ಪೈಶ ಜ಼ಮಕರಿ ಮ್ಹೇಲಸ್. 
\v 15 ಇನಖ್ಹಾಜೆ ಮಾರಾಕನ ರ‍್ಹೇಸ್ತೆ ಅಖ್ಖು ತುಮುನ ದ್ಯವಾನು ಖುಷಿಕರುಸ್. ಮನಾಸ್ ತುಮುನ ದಿನಾಖುಸ್. ಮೇ ತುಮುನ ಘಣು ಪ್ಯಾರ್ ಕರ‍್ಯೋತೊ, ತುಮೆ ಮನ ಕಮ್ ಪ್ಯಾರ್ ಕರ್ಶುಕಿಶು? 
\v 16 ಕತೋಬಿ ಅಮ್‌ರ‍್ಹವಾಪರ್ ಮೇ ತುಮುನ ವಜ಼ನ್ ಕೊಹುಯಿರ‍್ಹೋನಿ ಕತೋಬಿ ಝೂ಼ಟಿ ಬೋಲಿನ್ ತುಮುನ ಜಾ಼ಳಾಮ ಫಖ್ಹಾಯೊಕರಿ ಬೋಲೊ. 
\v 17 ಮೇ ತುಮಾರಕನ ಮೋಕ್‍ಲ್ಯಹುಯಾಮ ಕಿನೇಥಿ ತೋಬಿ ತುಮುನ ಠಗೈನ್ ಶಾತ್‍ತೋಬಿ ಮಾಂಗಿಲಿದೊಕಿ ಶು? 
\v 18 ತುಮಾರಕನ ಜಾ಼ವ್ಣುಕರಿ ಮೇ ತೀತನ ಗಿಂಗೈನ್ ಇನಿ ಜೋ಼ಡ್ಮ ಹಮಾರ ಭೈನ ಮೋಕ್‌ಲ್ಯೊತೆ ಎತ್ರೇಸ್: ಇನೆ ತುಮುನ ಶಾತ್‍ತೋಬಿ ಠಗಾಯೋಕಿ ಶು? ಕೊಯ್ನಿನಿ, ಹಮೇ ಬೇಜ಼ಣ ಎಕ್ಕಸ್ ಆತ್ಮಥಿ ಭರೈನ್ ಎಕ್ಕಸ್ ಪರಕ್ಮ ಚಾ಼ಲಿಲಿದಥಾನಿ. 
\v 19 ಹಮೆ ಅವ್ಡಿ ವಖ್ಹತ್ ತುಮಾರ ಖ್ಹಾಮ್ಣೆ ಆಡ್‌ಫೇಡ್ ಬೋಲುಕರಿಯೇಸ್‍ಕರಿ ಲಾಝ್ಯಾಕಿ ಶು? ದೇವ್ನ ಖ್ಹಾಮ್ಣೇಸ್ ಹಮೆ ಕ್ರಿಸ್ತಮರ‍್ಹೀನ್, ವಾತ್ ಬೋಲಾವಾಳ ಹುಯಿರ‍್ಹಾಸ್. ಪ್ಯಾರ್‌ನ ದೋಸ್ತಿವೊ, ಹಮೆ ಕರಾನು ಅಖ್ಖೂಬಿ ತುಮಾರಿ ಭಕ್ತಿನ ಜಾ಼ಖ್ಹತ್ ಕರಾನಸ್‍ ಹುಯಿರ‍್ಹೂಸ್. 
\v 20 ಶನಕತೊ ಮೇ ಆವಾದಿನ್, ಏಕ್‌ ಘಡಿ ತುಮೆ ಮಾರಿ ಆಖ್ಹ್‌ನಿ ತರಸ್ ತುಮೆ ರ‍್ಹೇಸ್ಕಿ ಕೊಯ್ನಿಕಿ ಕರಿ ಮನ ಡರ್‌ ಛಾ಼. ಮೇ ತುಮಾರಿ ಆಖ್ಹ್‌ನಿ ಪರಕ್ ದೆಖಾವ್ಣುನಾತೆ ರ‍್ಹವೊ ತೋಬಿ, ಏಕ್‌ ಘಡಿ ತುಮಾರಾಮ, ಲಡೈ ಪೇಟ್ನೊ ಬಳಾಪೊ, ಇರಾದೊ, ಅಲ್ಹಾವ್‍ನಿತರ ಛಾ಼ಡ್ ಬೋಲಾನು ಮಶ್ಲ ಮಾರಾನು ಮೋಟೊಕರಿ ಬೋಲಿಲ್ಯಾವಾನು, ಲಡೈ ನಖಾವನು, ಆಖ್ಹಾರು ದೆಖಾವ್‍ಶೆಕಿ ಶುಕಿ ಕರಿ ಡರ್‌ ಮನ ಛಾ಼. 
\v 21 ಮೇ ತುಮಾರಕನ ಪಾಛೊ಼ ಫರಿ ಆವಾದಿನ್ ಮಾರು ದೇವ್ ಮನ ತುಮಾರ ಖ್ಹಾಮ್ಣೆ ಮನ ಝು಼ಕೈನಾಕ್‌ಶೆ ಕರಿ ಸೋಚುಸ್. ಅಗಾಡಿ ತುಮಾರಾಮ ಮೈಲು ಕಾಮ್, ಪಾಪೇಲುಕಾಮ್, ಪೋಕ್ರಿ ಕಾಮ್‍ಅಖ್ಖು ಚ಼ಲೈನ್ ಪಶ್ಚಾತ್ತಾಪ್‌ ಕರ‍್ಯುಕೊಂತೆ ಕೈಏಕ್ ಜ಼ಣಾನಿ ಬಾರೇಮ ಮೇ ದುಖ್ ಕರಾನು ಪಡ್‌ಶೆ ಕರಿ ಮನ ಡರ್‌ ಛಾ಼.
\c 13
\s ಖ್ಹರ್ತಿನು ಅಖ್ಖಿ ಝೇತಾವ್ಣಿ ಅಜು಼ ಖ್ಹಲಾಮ್
\p
\v 1 ಮೇ ತುಮಾರಕನ ಖ್ಹಲಾಮ್ ಕರಾನ ವಳ್ಯಾವ್‌ಸ್ತೆ ಆ ತೀನ್ನಿ ವಖ್ಹತ್. ಬೇ ತೀನ್ ಜ಼ಣ ಸಾಕ್ಷಿನ ಮ್ಹೋಡೆಥಿ ಹರೇಕ್ ವಾತ್‍ಬಿ ಬೋಲಾವ್ಣು ಕರಿ ಪವಿತ್ರ ದಪ್ತರ್‌ಮ ಲೀಖೈರ‍್ಹೂಸ್‍ನಿ.\x - \xo 13:1 \xo*\xt ಧರ್ಮೊ 19:15\xt*\x* 
\v 2 ಮೇ ಬೇನಿ ವಖ್ಹತ್ ತುಮಾರಕನ ಆಯೋತದೆ, ಪಾಛೊ಼ಫರಿನ್ ಆಯೋತೊ ತುಮುನ ಖ್ಹತೈಶ್‍ಕೊಂತೆ ಮ್ಹೇಲಿಶ್‍ಕೊಯ್ನಿ ಕರಿ ಕಿಮ್ ಬೋಲ್ಯೊಕಿ ಇಮ್ಮಸ್ ಗಯೋತೆ ದನ್‌ಮಾನು ಪಾಪ್ನಕಾಮ್ನ ಚ಼ಲಾವವಾಳಾನಬಿ ಅಜು಼ ಖ್ಹಾರಾನಾಬಿ ಮೇ ಬೋಲುಸ್. 
\v 3 ಕ್ರಿಸ್ತ ಮಾರಾಮ ರ‍್ಹೀನ್ ವಾತ್‍ಬೋಲಸ್‍ಕರಿ, ತುಮುನ ಹೋಣುತೆ ಸಾಕ್ಷಿನ ಢೂಂಢಾಥಿ ಯೋ ತುಮಾರಿ ಬಾರೇಮ ಕಮ್‍ಜೋ಼ರಿ ರ‍್ಹಯೋತೊಬಿ ತುಮಾರಮ ಶಕತ್‌ವಾಳೊ ಹುಯಿರ‍್ಹೊಸ್. 
\v 4 ಕ್ರಿಸ್ತ ಕಮ್‍ಜೋ಼ರಿಮ ಶಿಲ್‌ಬೇಪರ್ ಟಂಗೈಘೊ ಖ್ಹಾಚಿಸ್. ಕತೋಬಿ ಯೋ ದೇವ್ನಿ ತಾಖಥೀಸ್ ಬಚಾ಼ವಾಳೊ ಹುಯಿರ‍್ಹೊಸ್. ಹಮೇಬಿ ಇನೀನಿತರಸ್ ಕಮ್‌ಜೋ಼ರಿವಾಳ ಹುಯಿರ‍್ಹಾಸ್. ಕತೋಬಿ ಇನಿಜೋ಼ಡ್ಮ ದೇವ್ನಿ ಶಕಥ್ಥಿ ಜಿವವಾಳ ಹುಯಿನ್ ತುಮಾರಿ ಶಕಥ್ಥಿ ಜಿವಿಯೇಸ್. 
\v 5 ತುಮೆ ವಿಶ್ವಾಸ್‌ಮ ಛಾ಼ಕಿ ಕೊಯ್ನಿಕಿ ಕರಿ ತುಮಾರು ತುಮೇಸ್ ತರೀಪ್‌ಶ ಕರಿಲೆವೊ. ಕ್ರಿಸ್ತ ಯೇಸು ತುಮಾರಮ ಛಾ಼ಕರಿ ತುಮುನ ಮಾಲುಮ್‌ಛಾ಼: ಯೋ ತುಮಾರಮ ನಾರ‍್ಹಯೋತೊ ತುಮೆ ನಾಲಾಯಕ್‌ ಹುಯಿರ‍್ಹಾಸ್. 
\v 6 ಕತೋಬಿ ಹಮೆ ನಾಲಾಯಕ್‌ ಕಾಹೆ ಕರಿ ತುಮುನ ಮಾಲುಮ್‌ಪಡ್‍ಶೇಸ್ ಪಡ್‌ಶೆ ಕರಿ ಹಮೂನ ಭರೋಖ್ಹೊ ಛಾ಼. 
\v 7 ತುಮೆ ಖಿವೂಬಿ ಖರಾಬ್ ನಾಕರ‍್ನು ಕರಿ ಹಮೆ ದೇವ್ನ ಪ್ರಾರ್ಥನೆ ಕರಿಯೇಸ್. ಅನಾಮ ಹಮೇಸ್ ಯೋಗ್ಯ ಕರಿ ದೆಖಾವ್ಣು ಕರಿ ಹಮಾರಿ ಖ್ಹಯಾಲ್ ಕಾಹೆ. ಹಮೆ ನಾಲಾಯಕ್‌ ಹುಯಿನ್ ದೆಖಾಯಾತೋಬಿ ತುಮೆ ಅಛ್ಛು಼ಸ್ ಕರ್ನುಕರಿ ಹಮಾರಿ ಖ್ಹಯಾಲ್. 
\v 8 ಖ್ಹಾಚ಼ನ ವಿರೋದ್‌ ಹಮೆ ಶಾತ್ಬಿ ಕರಾನ ಕೊಹೊಯ್ನಿ. ಖ್ಹಾಚಾ಼ಭಣಿಥೂಸ್ ಅಖ್ಖು ಕರ್ಶು. 
\v 9 ಹಮೆ ಕಮ್‍ಜೋ಼ರಿ ರ‍್ಹಯಾತೋಬಿ ತುಮೆ ತಾಖತ್‌ವಾಳ ಹುಯಿರ‍್ಹಾತೊ ಹಮೆ ಖ್ಹುಶಿಕರ್‌ಶು. ಆ ನಾಹುಯಿನ್ ತುಮೆ ಪೂರಪರಕ್‍ಥಿ ಬರೋಬರ್ ರ‍್ಹೇವ್ಣುಕರಿ ಪ್ರಾರ್ಥನೆ ಕರಿಯೇಸ್. 
\v 10 ಅನಾಖ್ಹಾಜೇಸ್ ಮೇ ತುಮಾರಕನಕೊಂತೆ ವಖ್ಹತ್ ಆ ವಾತೆಖ್ಹಾರಿ ಲೀಖುಕರುಸ್. ತುಮುನ ರಡ್‍ಕೈನಾಖಾನ ಕಾಹೆ. ಭಾಂದಾನಖ್ಹಾಜೆ ಪ್ರಭು ಮನ ದೀರಾಖ್ಯೋತೆ ಅದಿಕಾರ್‌ಥಿ ತುಮೆ ಕಠಣ್‍ನ ವತಾಳನ ವಖ್ಹತ್‌ನ ರ‍್ಹೇವ್ಣುಕರಿ ಆಖ್ಹ್‌ಕರುಸ್. 
\v 11 ಖ್ಹರ್ತಿನಿ ವಾತೆ ಶಾತ್‍ಕತೊ ಭೈಯೇ ಭೇನೆವೊ ಖ್ಹುಶಿಕರೊ, ತುಮುನ ಬರೋಬರ್ ಕರಿಲೆವೊ; ಭಾಲಿವಾಳ ಹುಯಿ‍ರ‍್ಹೆವೊ, ಎಕ್ಕಸ್ ದಿಲ್‌ವಾಳ ಹುಯಿರ‍್ಹೇವೊ, ಸಮಾಧಾನ್‌ಥಿ ರ‍್ಹವೊ; ಪ್ಯಾರ್‌ನಾಬಿ ಶಾಂತಿಬಿ ದ್ಯವಾಳೊ ದೇವ್ ತುಮಾರಿ ಜೋ಼ಡ್ಮ ರ‍್ಹಿಶೆ. 
\v 12 ಪವಿತ್ರಥಿ ಏಕ್‌ಥಿಏಕ್ ಹಾತ್‍ಮಳೈನ್ ಖ್ಹಲಾಮ್ ಕರೊ. 
\v 13 ಪ್ರಭು ಯೇಸುಕ್ರಿಸ್ತನಿ ವಾರ್‌ಖ್ಹೇಥಿಬಿ, ದೇವ್ನ ಪ್ಯಾರ್‌ಬಿ ಅಜು಼ ದೇವ್ನುಆತ್ಮಥಿ ಮಳಿನ್ ರ‍್ಹವಾಳಖ್ಹಾರು ತುಮುನ ಖ್ಹಲಾಮ್ ಬೋಲ್‌ಶೆ. 
\v 14 ಅಪ್ಣೊ ಪ್ರಭು ಹುಯಿರೋತೆ ಯೇಸುಕ್ರಿಸ್ತನಿ ಕೃಪೆಬಿ ದೇವ್ನಿ ಪ್ಯಾರ್‌ಬಿ, ಪವಿತ್ರಾತ್ಮನಿ ಲಾಡ್‌ಬಿ ತುಮಾರ ಖ್ಹಾರಾಸ್‍ನಿ ಜೋ಼ಡ್ಮ ರ‍್ಹವಾದೆ.