\id 1TH -WAGHRI
\ide UTF-8
\toc3 1 ಥೆಸ
\toc2 1 ಥೆಸ
\toc1 ಪೌಲನೆ ಥೆಸಲೋನಿಕವಾಳಾನ ಲೀಖ್ಯೋತೆ ಪಹಿಲಿ ಚಿಟ್ಟಿ
\mt2 ಪೌಲನು ಥೆಸಲೋನಿಕದವರಿಗೆ ಬರೆದ ಮೊದಲನೆಯ ಪತ್ರಿಕೆ
\mt1 ಪೌಲನೆ ಥೆಸಲೋನಿಕವಾಳಾನ ಲೀಖ್ಯೋತೆ ಪಹಿಲಿ ಚಿಟ್ಟಿ
\imt ಮಾಲುಮ್ ಕರಾನು
\ip ಅಪೊಸ್ತಲ ಹುಯಿರೋತೆ ಪೌಲನೆ ಲೀಖಿರಾಖ್ಯೊಸ್. \xt 1:1\xt* ಆ ಚಿಟ್ಟಿ ಧರ್ಮಶಾಸ್ತ್ರನಿ ಏಕ್‌ ಭಾಗ್‌ ಹುವಾನ ಪೌಲನೆ ಲೀಖ್ಯೋತೆ ಪಹಿಲಿ ಚಿಟ್ಟಿ ಹುಯಿರ‍್ಹೇವ್ಣುಕರಿ ದೇಖವಸ್. ಅಜು಼ ಆ ಚಿಟ್ಟಿ ಘಣೇಥಿ ಯೇಸುಕ್ರಿಸ್ತ ಪೈದಹುಯಿನ್ 51 ವರಖ್ಹ್‌ನಿ ಬಾದ್ಮ ಲೀಖಾಯು. ಪೌಲನೆ ಥೆಸಲೋನಿಕ ಸಬೆನ ಆ ಚಿಟ್ಟಿ ಲೀಖಾನಿ ವಖ್ಹ್‌ತೆ ಕೊರಿಂಥಮ ಥೊ, ಆ ಇನು ಬೇನು ಸುವಾರ್ತೆನ ಜಾ಼ವಾನಿ ವಖ್ಹ್‌ತೆ ಸಬೆನ ಭಾಂದಿರಾಖ್ಯುಸ್. \xt ಅಪೊ 17:1-10\xt* ಆ ಸಬೆ ಥೋಡ ಯೆಹೂದ್ಯರ್‌ನ ಅಜು಼ ಕೈಏಕ್ ಗ್ರೀಕ್‍ವಾಳಾನ ಲೀನ್ ಭಾಂದಿರಾಖ್ಯುಸ್ ಕರಿ ಅಪೊಸ್ತಲನು ಕಾಮ್ನ ಪುಸ್ತಕ್‌ಮ ಬೋಲೈರ‍್ಹುಸ್.
\ip ಆ ಸಬೆ ಭಂದೈಹುಯುತೆ ತದೆ ಘಣಾದನ್ ಥೆಸಲೋನಿಕಮ ರ‍್ಹವಾನ ಪೌಲನ ಕೋ ಹುಯುನಿ. ಇನಖ್ಹಾಜೆ ಇನೆ ಹಿಜ್ಜಾ಼ ರ‍್ಹೆಯಿತೆ ವಿಶ್ವಾಸಿಖ್ಹಾರನ ಹುಮ್ಮಖ್ಹ್‌ ದ್ಯವಾನಖ್ಹಾಜೆ ಆ ಚಿಟ್ಟಿನ ಲೀಖಿನ್ ಮೋಕ್‌ಲ್ಯೊ. ಆ ಚಿಟ್ಟೀಮ ವಿಶ್ವಾಸಿಖ್ಹಾರು ಕಿಮ್ ಜಿವ್ಣುಕರ‍್ನು ಕರಿ ಕೈಏಕ್ ವಿಚಾರ‍್ನ ಮಾಮೂಲಿ ಸಬೆ ಅಖ್ಖು ಛಾ಼. ಇಮ್ಮಸ್ ಪೌಲನೆ ಕ್ರಿಸ್ತನಿ ಬೇನಿ ಆವಾನಿ ಬಾರೇಮ ಘಣಿ ನಜ಼ರ್ ಕರಿರಾಖ್ಯೊಸ್ ಶನಖ್ಹಾಜೆಕತೊ ಥೆಸಲೋನಿಕ ಸಬೇನು ಅದ್ಮಿಖ್ಹಾರು ಆ ವಿಚಾರ‍್ನಿ ಬಾರೇಮ ಘಣಿ ಮನ್‍ಲಗಾಡಿನ್ ಥು. ಪೌಲನೆ ಕ್ರಿಸ್ತನು ಬೇನಿ ಆವಾನಿ ಬಾರೇಮ ದೇವ್ನ ಖ್ಹಾಜಾ಼ನು ಜಿವ್ಣು ಜಿವಾನಖ್ಹಾಜೆ ಹುಮ್ಮಖ್ಹ್‌ ದೇಸ್. \xt 5:6-8\xt*
\iot ಕಾಡಿದೇಖೊ
\io1 1 ಪೌಲನೆ ಆ ಚಿಟ್ಟಿ ಸಬೆನ ತೋಬ ಕರಾನಖ್ಹಾಜೆ ಅಜು಼ ಇವ್ಣಖ್ಹಾಜೆ ದೇವ್ನ ಧನ್ಯವಾದ್ ಬೋಲ್ತೊ ಹುಯಿನ್ ಶುರುಕರಸ್.\ior 1:1\ior*
\io1 2 ಯೊ ಕರುಕರಾತೆ ಕಾಮ್‌ಖ್ಹಾರು ಅಜು಼ ತಿಮೊಥೆನ ಲಾಯೊತೆ ಖಬರ್‌ನಿ ಬಾರೇಮ ಬೋಲಸ್. \ior 2:1—3:13\ior*
\io1 3 ಇನಕೇಡೆಥು ಪೌಲನು ವಿಶ್ವಾಸಿಖ್ಹಾರು ಯೇಸುನಿ ಬೇನು ಆವಾನು ದೆಖಾವ್‌ಶೇತೆ ಉಜಾ಼ಳಾಮ ಜಿವ್ಣುಕರ‍್ನುಕರಿ ಬೋಲಾನಿ ಬಾರೇಮ ಖ್ಹೂಜ಼್‌ ದೇಸ್. \ior 4:1—5:15\ior*
\io1 4 ಪೌಲನೆ ಬಿಜೇಕ್‍ಹಲ್ಲ ಆ ಚಿಟ್ಟಿನ ಸಬೆನ ಹರೇಕ್‌ನಾಬಿ ಪೂರ ಧನ್ಯವಾದ್ ಬೋಲ್ತೊಹುಯಿನ್, ಚಿಟ್ಟಿನ ಖ್ಹರ್ತಿ ಕರಸ್.ಅಜು಼ ಸಬೆಮ ಫಡೀನ್ ಬೋಲ್ನುಕರಿ ಬೋಲ್ತೊಹುಯಿನ್ ಚಿಟ್ಟಿನ ಖ್ಹತಮ್ ಕರಸ್. \ior 5:16-28\ior*
\c 1
\p
\v 1 ಬಾ ದೇವ್‍ಮಾಬಿ ಅಜು಼ ಪ್ರಭು ಹುಯಿರ‍್ಹೋತೆ ಯೇಸು ಕ್ರಿಸ್ತಮಾಬಿ ಛಾ಼ತೆ ಥೆಸಲೋನಿಕ ಸಬೆನ ಅದ್ಮಿವೋನ ಪೌಲ, ಸಿಲ್ವಾನಾಬಿ ಅಜು಼ ತಿಮೊಥೆ ಹುಯಿರ‍್ಹಾತೆ ಹಮೆ,ಲೀಖಾನು ಶಾತ್‍ಕತೊ ತುಮೂನ ವಾರ್‌ಖ್ಹೊಬಿ ಅಜು಼ ಶಾಂತಿ ಮಳಾದೆ.
\s ಥೆಸಲೋನಿಕವಾಳನಿ ವಿಶ್ವಾಸ್ ಅಜು಼ ಜಿ಼ಂದ್‌ಗಿ
\p
\v 2 ಹಮೆ ಕದೇಬಿ ಪ್ರಾರ್ಥನೆ ಕರಾನಿ ವಖ್ಹತ್‌ಮ, ತುಮೂನ ಯಾದ್‌ಕರಿನ್, ತುಮಾರಖ್ಹಾಜೆ ದೇವ್ನ ಧನ್ಯವಾದ್ ಕರಿಯೇಸ್. 
\v 3 ಅಜು಼ ವಿಶ್ವಾಸ್‍ಥಿ ತುಮೆ ಕರ‍್ಯಾತೆ ಕಠಣ್ ಕಾಮ್ನಾಬಿ, ಪ್ಯಾರ್‌ಥಿ ತುಮೆ ಕರ‍್ಯಾತೆ ಮ್ಹಿನತ್‌ನಾಬಿ, ಅಪ್ಣೊ ಪ್ರಭು ಯೇಸು ಕ್ರಿಸ್ತಪರ್‌ನಿ ತುಮಾರಿ ಭರೋಖ್ಹಾನಖ್ಹಾಜೆ ಅಪ್ಣೊ ಬಾ ಹುಯಿರ‍್ಹೋತೆ ದೇವ್ನ ಖ್ಹಾಮ್ಣೆ ಹಮೆ ಹಮೇಶ ಯಾದ್ ಕರಿಯೇಸ್. 
\v 4 ಹಮಾರ ಭೈ ಭೇನೊ, ದೇವ್ ತುಮೂನ ಪ್ಯಾರ್ ಕರಾಸ್ ಅಜು಼ ಇನು ಶೊಂತ್ ಅದ್ಮಿಹುಯಿನ್ ರ‍್ಹವಾನಟೇಕೆ ಇನೆ ತುಮೂನ ಚೂ಼ಣಿರಾಖ್ಯೊಸ್ ಕರಿ ಬೋಲಾನು ತುಮೂನ ಮಾಲುಮ್ ಛಾ಼. 
\v 5 ಶನಕತೊ, ಹಮೆ ಸುವಾರ್ತೆನ ಖಲಿ ವಾತೇಥಿಸ್ ಕಾಹೆ ಪಣ್ಕಿ, ಶಕತ್‌ಥೀಬಿ, ಪವಿತ್ರಾತ್ಮಥಿಬಿ ಅಜು಼ ಯೋ ಖ್ಹಾಚಸ್ ಕರಿ ಹಮೆ ಪರ್ಖಿನ್ ತುಮಾರಕನ ಲೈರಾಖ್ಯಸ್. ಹಮೆ ತುಮಾರ ಜೋ಼ಡೆ ಥಾತೆ ತದೆ, ತುಮಾರ ನಫ್ಫಾನಖ್ಹಾಜೆ ಕಿಮ್ ಜಿವ್ಣುಕರುಕರ್ತಥ. 
\v 6 ಪ್ರಭುನೆ ಅಜು಼ ಹಮೆ ಚಾ಼ಲಿಲಿದಾತೆ ಇಮ್ಮಸ್, ತುಮೇಬಿ ಚಾ಼ಲ್ಯಾ; ಎತ್ರೆಸ್ ಕಾಹೆತೆ ತುಮೆ ಘಣು ಲತಾಡ ಖ್ಹಮಾಳ್ಯಾತೋಬಿ, ಹಮೆ ಬೋಲ್ಯಾತೆ ಉಪದೇಶ್‍ನ ಪವಿತ್ರಾತ್ಮಥಿ ಪೈದಾಹುವಾಸ್ತೆ ಖ್ಹುಶಿಥಿ ಮಾನಿನ್ ಹಮಾರಿ ಸುವಾರ್ತೆನ ಖ್ಹಮ್‍ಜಿಲಿದ. 
\v 7 ಅನೇಥಿ ಮೆಕೆದೋನ್ಯಮ ಅಜು಼ ಅಖಾಯಮ ಕ್ರಿಸ್ತನ ವಿಶ್ವಾಸ್‌ ಕರಾವಾಳು ಖ್ಹಾರು ತುಮೂನ ದೇಖಿನ್ ಶಿಕಾನಿಘೋಣಿ ಹುಯು. 
\v 8 ಪ್ರಭುನಿ ವಚನ್ ತುಮಾರೇಥೀಸ್ ಮೆಕೆದೋನ್ಯ ಅಜು಼ ಅಖಾಯಮಾಬಿ ಫೈಲಿಗಯು. ಅತ್ರೇಸ್ ಕಾಹೆತೆ ತುಮೆ ದೇವ್‌ಪರ್‌ ರಾಖಿಮ್ಹೇಲ್ಯಾತೆ ವಿಶ್ವಾಸ್‌ ಖ್ಹಾರಿಸ್ ಬಾಜೂ಼ಮಬಿ ಫೈಲಿಗಯು. ಅನೇಥಿ ತುಮಾರಿ ವಿಶ್ವಾಸ್‌ನಿ ಬಾರೇಮ ಬಿಜು಼ ಶಾತ್ಬಿ ಬೋಲಾನಿ ಜ಼ರೂರತ್ ಕೊಯ್ನಿ. 
\v 9 ತದೆ ಹಮೆ ತುಮಾರಕನ ಆಯಾತೆ ತದೆ ತುಮೆ ಹಮೂನ ಖಿವಿ ತರಿಕಾಥಿ ಬುಲೈಲಿದಾಕರಿ ಆ ಅದ್ಮಿಖ್ಹಾರು ಬೋಲುಕರಸ್. ಅಜು಼ ತುಮೆ ಮೂರತ್ನ ಪೂಜಾ಼ಥು ದೇವ್‌ಭಣಿ ಕಿಮ್‌ಫರ‍್ಯ ಅಜು಼ ಜಿವ್‌ತಜಾನ್ನ ದೇವ್ನ ಕಿಮ್ ಸೇವೆ ಕರ‍್ಯಾ, ಕರಿ ಬೋಲಸ್.\f + \fr 1:9 \fr*\ft ಮೂರತ್ನ ಕರಿ ಮತ್‌ಲಬ್.\ft*\f* 
\v 10 ದೇವ್ನೆ ಮರ‍್ಯಾಹುಯಾಮಾಥು ಉಠಾಡ್ಯೋತೆ ಅಜು಼ ಸೊರ್ಗಮಾಥೊ ಆವ್‌ಶೇತೆ ಇನ ಛಿಯ್ಯಾನಖ್ಹಾಜೆ ತುಮೆ ಟಿವವ್‍ಕರಸ್ ಕರೀಬಿ ಆ ಅದ್ಮಿಸ್ ಬೋಲಾಸ್. ಆ ಯೇಸು ಖ್ಹಾಮ್ಣೆ ಉಳ್ಯಾವತೆ ದೇವ್ನ ಇರಾದಾಥಿ ಅಪ್ಣುನ ಬಚಾ಼ಡವಾಳೊ ಹುಯಿರೋಸ್.
\c 2
\s ಥೆಸಲೋನಿಕಮ ಪೌಲನು ಕಾಮ್
\p
\v 1 ಹಮಾರ ಭೈ ಭೇನೊ, ಹಮೆ ತುಮಾರಕನ ಆಯತೆ ತುಮೂನ ಫಾಯಿದೊಕೊಂತೆ ಕೊಹುಯುನಿ ಕರಿ ಮಾಲುಮ್‌ ಛಾ಼. 
\v 2 ಹಮೆ ತುಮಾರಕನ ಥೆಸಲೋನಿಕಮ ಆವಾನ ಅಗಾಡಿಸ್, ಫಿಲಿಪ್ಪಿ ಖ್ಹಯೇರ್‌ಮ ಹಮೂನ ಕೆತ್ರೆ ಖ್ಹತಾಯು ಅಜು಼ ಖ್ಹರಮ್‌ ಕಾಡ್ಯು ಕರಿ ತುಮೂನ ಮಾಲುಮ್ ಛಾ಼. ಹಿಜ್ಜಾ಼ ಎತ್ರೆ ವಿರೋದ್ ಕರ‍್ಯುತೋಬಿ ತುಮೂನ ಸುವಾರ್ತೆನ ಬೋಲಾನಟೇಕೆ ಅಪ್ಣೊ ದೇವ್ನೆ ಹಮೂನ ಭಾಲಿದಿದೊ. 
\v 3 ಹಮಾರಿ ಸಮಾಚಾರ್ ಹುಮ್ಮಖ್ಹ್‌ನು ಹುಯಿರ‍್ಹುಸ್. ಮೈಲುಬಿ ಕಾಹೆ, ಅಜು಼ ತುಮೂನ ಠಗಾವ಼್ಣು ಕರಿ ಕಾಹೆ. 
\v 4 ಅನಬದಲ್ ದೇವ್ ಕದೇಬಿ ಶನ ಲ್ಹಾಯಕ್ ಕರಸ್ಕಿ ಇನಾಸ್ ಅಪ್ಣೆ ಬೋಲಿಯೇಸ್. ಶನಕತೊ ಯೋ ಅಪ್ಣುನ ತರೀಪ್‌ಶ ಕರೀನ್ ಹಮೆ ಯೋಗ್ಯಹುಯಿರಾತೆ ಅದ್ಮಿಕರಿ ಇನಿ ಅಛ್ಛಿ ಸಂದೇಶ್ನ ಇನೆ ಅಪ್ಣುನ ದೀರಾಖ್ಯೊಸ್. ಹಮೆ,ದಿಲ್ನ ತರೀಪ್ಷ ಕರಾವಾಳ ದೇವ್ನ ಖ್ಹಾಜ಼ನುಸ್ ಕರಿಯೇಸ್. 
\v 5 ತುಮೂನ ಮಾಲುಮ್‌ಛಾ಼ತೆ ತಿಮ್ ಹಮೆ ಕದೇಬಿ ಕಿನ ಖ್ಹರಾಯಬಿ ಕೊಯ್ನಿ ಅಜು಼ ಲಾಲಚ್‌ನ ಲಪಾಡನಖ್ಹಾಜೆ ವೇಷ ಫೇರ‍್ಯಕೊಯ್ನಿ. ಇನ ದೇವಸ್ ಸಾಕ್ಷಿ. 
\v 6 ಎತ್ರೆಸ್ ಕಾಹೆತೆ ಹಮೆ ಕ್ರಿಸ್ತನು ಅಪೊಸ್ತಲರ್ ಹುಯಿರ‍್ಹಾತೆ ಇನಖ್ಹಾಜೆ, ಹಮೂನ ಮಾನ್-ಮರ್ಯಾದಿನ ವತಾಳ್ಣು ಕರಿ ಬೋಲೆಜಾ಼ಯಿಥು. ತೋಬಿ ಹಮೆ ಅದ್ಮಿಥಿ ಮಳಾಸ್ತೆ ಮಾನ್-ಮರ‍್ಯಾದಿನ ತುಮಾರೇಥಿ ರ‍್ಹವೊ, ಬಿಜಾ಼ಥಿ ರ‍್ಹವೊ ಮಳಾದೆಕರಿ ಆಖ್ಹ್ ಕರ‍್ಯಾಕೊಯ್ನಿ. 
\v 7 ಕತೋಬಿ ಕ್ರಿಸ್ತಮ ಅಪೊಸ್ತಲಹುಯಿನ್ ಆಯ ಇನ ಲಡ್ಕಾನ ಖ್ಹದರ್ ಕರಾತೆ ಇಮ್‌ ತುಮಾರಿ ಜೋ಼ಡ್ಮ ರ‍್ಹೇತ ಲಾಡ್‌ಥಿ ಚಾ಼ಲಿಲಿದಾ. 
\v 8 ಶನಕತೊ ಹಮೆ ತುಮೂನ ಜಾ಼ಖ್ಹತ್ ಪ್ಯಾರ್ ಕರ‍್ಯಾತೆ ಇನಖ್ಹಾಜೆ ದೇವ್ನಿ ಅಛ್ಛಿ ಸಂದೇಶ್ ಖಲಿ ಬೋಲಾನಟೇಕೆ ಕಾಹೆತೆ ತುಮಾರಖ್ಹಾಜೆ ಜಾನ್ನ ದ್ಯವಾನಾಬಿ ಹಮೆ ತಯಾರ್ ಹುಯಿರಾಸ್. 
\v 9 ಭೈ ಭೇನೊ ಹಮೆ ತುಮಾರಾಮ ಕಿನಾಪರ್‌ಬಿ ಭಾರೊ ನಾ ನಾಕ್ಣು ಕರಿ ರಾತ್-ದನ್ ಕಾಮ್ ಕರೀನ್, ಜಿವ್ಣು ಚ಼ಲಾವ್ತಹುಯಿನ್, ದೇವ್ನಿ ಸುವಾರ್ತೆನ ತುಮೂನ ಬೋಲಿವತಾಳ್ಯ, ಯೋ ಹಮಾರಿ ಲತಾಡಬಿ ಮ್ಹಿನತ್ ಖ್ಹಾರು ತುಮಾರಿ ಯಾದ್ಮ ರ‍್ಹವಾದೆ. 
\v 10 ನಂಬವಾಳ ಹುಯಿರ‍್ಹಾತೆ ತುಮಾರ ಜೋ಼ಡೆ ಹಮಾರಿ ಚಾ಼ಲ್‍ಚ಼ಲಣ್‍ಮ ಖ್ಹಾಚಿಥಿಬಿ ಪರಿಶುದ್ಧಬಿ, ನೀತಿವಾಳಬಿ ಅಜು಼ ನಿರ್ದೋಷಿ ಥಾ, ಕರಿ ಬೋಲಾನ ತುಮೇಬಿ ಸಾಕ್ಷಿ ಅಜು಼ ದೇವ್‌ಬಿ ಸಾಕ್ಷಿ ಹುಯಿರ‍್ಹಾಸ್. 
\v 11 ಬಾ ಇನ ಶೊಂತ್ ಲಡ್ಕಾನ ಜೋ಼ಡೆ ಕಿಮ್ ಚಾ಼ಲಿಲೇಸ್ಕಿ ಇಮ್ಮಸ್, ಹಮೆ ತುಮಾರ ಜೋ಼ಡೆ ಚಾ಼ಲಿಲಿದಾ. 
\v 12 ಇನಿ ರಾಜ್ಯ ಅಜು಼ ಮಹಿಮೆಮ ವಾಟೊಲ್ಯವಾನಖ್ಹಾಜೆ ಬುಲೈರಾಖ್ಯೊಸ್ತೆ ದೇವ್ನಖ್ಹಾಮ್ಣೆ ಬರೋಬರ್‌ಥಿ ಜಿವ್ಣು ಕರ‍್ನುಕರಿ ಬೋಲಿದಿದಾ. ಆ ಅಖ್ಖು ತುಮುನ ಮಾಲುಮ್. 
\v 13 ಅಜು಼ ತುಮೆ ಹಮಾರೇಥಿ ದೇವ್ನಿ ವಚನ್ನ ಖ್ಹಮ್‍ಜ್ಯಾತೆ ತದೆ, ಅದ್ಮಿನಿ ವಚನ್ ಕರಿ ಸೋಚ್ನುನಾತೆ, ದೇವ್‍ನೀಸ್ ಕರಿ ಮಾನೀನ್ ಇನಖ್ಹಾಜೇಬಿ ಹಮೆ ಲಗತ್ತರ್ ದೇವ್ನ ಧನ್ಯವಾದ್ ಕರಿಯೇಸ್. ಯೋ ಖ್ಹಾಚ಼ಮಾಬಿ ದೇವ್‍ನೀಸ್ ವಚನ್. ಯೊ ವಚನ್ ನಂಬವಾಳ ತುಮಾರಾಮ ಶಕಥ್ಥಿ ಕಾಮ್ ಚ಼ಲಾವಸ್. 
\v 14 ಹಮಾರ ಭೈಯೇ ಭೇನೆವೊ, ತುಮೆ ಯೂದಾಯಮ ಕ್ರಿಸ್ತ ಯೇಸುಮ ಛಾ಼ತೆ ದೇವ್ನಿ ಖ್ಹಾಚಿ ಸಬೇನಿಮತ್‌ ಚಾ಼ಲಿರಾಖ್ಯಾಸ್‌. ಇವ್ಣೆ ಯೆಹೂದ್ಯರ್‌ಥಿ ಖ್ಹಮಾಳ್ಯುತೆ ಖ್ಹತಾಪ್ಣಿನ, ತುಮೆ ತುಮಾರ ಶೊಂತ್‌ ಅದ್ಮಿಥಿ ಖ್ಹಮಾಳಿರಾಖ್ಯಾಸ್‌. 
\v 15 ಇವ್ಣೆ ಪ್ರಭು ಹುಯಿರ‍್ಹೋತೆ ಯೇಸುನಾಬಿ, ಖ್ಹಾರ ಪ್ರವಾದಿನಾಬಿ ಮರೈನಾಖ್ಯು ಅಜು಼ ಹಮುನಾಬಿ ನಖ್ಹಾಡಿದಿದು. ಇವ್ಣೆ ದೇವ್ನ ಖ್ಹಾಜಾ಼ತೆ ಇಮ್‌ ಕರಾವಾಳು ಕಾಹೆ! ಅಜು಼ ಇವ್ಣೆ ತಮಾಮ್‌ ಅದ್ಮಿನ ಖೂಮ್ನ ದುಶ್‌ಮನ್‌ ಹುಯಿರ‍್ಹಾಸ್! 
\v 16 ಯೆಹೂದ್ಯರ್‌ಕಾಹೆತೆ ಅದ್ಮಿನ ರಕ್ಷಣೆ ಮಳಾದೆ ಕರಿ ಸುವಾರ್ತೆನ ಬೋಲ್‍ಯೇಸ್ತೆ ಹಮುನಾಬಿ ಭೀರಾಕ್‌ಣು ಕರಿ ಕರ‍್ಯು. ಅಮ್ ಕರಾಥಿ ಇವ್ಣು ಪಾಪ್ನು ಕಾಮ್‌ಖ್ಹಾರು ಭರೈನ್ ಉಛ಼್‌ಳಾಯು. ಕತೋಬಿ ದೇವ್‌ನೊ ಇರಾದೊ ಇವ್ಣಾಪರ್ ಪೂರ ಹೋತುಹುಯಿನ್ ಆಯೊ!
\s ಪೌಲನೆ ಥೆಸಲೋನಿಕವಾಳಾನ ದೇಖಾನ ಆಖ್ಹ್ ಕರ‍್ಯುತೆ
\p
\v 17 ಮಾರ ಭೈಯೇ ಭೇನೆವೊ, ಹಮೆ ಥೋಡದನ್ ತುಮಾರೇಥಿ ದೂರ್ ರ‍್ಹಿಯತೋಬಿ ಮನ್‌ಮ ದೂರ್ ಕರ‍್ಯಕೊಂತೆ ತುಮೂನ ಆಮಖ್ಹಾಮೆ ದೇಕ್ಣು ಕರಿ ಹರ್‌ಖ್ಹೀನ್ ಘಣು ಕೋಶಿಶ್ ಕರ‍್ಯಾ. 
\v 18 ಶನಕತೊ ಆವಾನ ಹಮೂನ ಮನ್ ಥೂ, ಪೌಲ ಹುಯಿರ‍್ಹೋತೆ ಮೇಸ್ ಕೆತ್ರೇಕಿಹಲ್ಲ ಪಾಛು಼ ತುಮಾರಕನ ಆವ್ಣುಕರಿ ಕರ‍್ಯೊ, ಕತೋಬಿ ಶೈತಾನ್ನೆ ಆವಾನ ಮ್ಹೇಲ್ಯೊಕೊಯ್ನಿ. 
\v 19 ಅಪ್ಣೊ ಪ್ರಭು ಹುಯಿರ‍್ಹೋತೆ ಯೇಸು ಆವಾನಿ ವಖ್ಹತ್‌ಮ, ಇನಖ್ಹಾಮ್ಣೆ ಹಮಾರಿ ಭರೋಖ್ಹೊ, ಲ್ಹಾಯಕ್, ಖ್ಹುಶಿ, ಅಜು಼ ಹಮೆ ಖ್ಹರಾವನಿ ಕಿರೀಟ್‌ಬಿ ಕೋಣ್? ತುಮೇಸ್ ಕಾಹೆಕಿ ಶು. 
\v 20 ಖ್ಹಾಚಮಾಬಿ ತುಮೇಸ್ ಹಮಾರಿ ಇಜ಼್ಜತ್‌ಬಿ, ಖ್ಹುಶಿಬಿ ಹುಯಿರ‍್ಹಾಸ್‌.
\c 3
\p
\v 1 ಕಡೇಶಿಮ ಹಮೆ ಬಿಜು಼ ಜಾ಼ಖ್ಹತ್ ದನ್ ಟಿವಾವನ ಕೋಹೂಕರಾನಿ ಕರಿ, ಇನಖ್ಹಾಜೆ ಮೇ ಎಕ್ಲೋಸ್ ಅಥೇನ್ಸ್‌ಮ ರ‍್ಹವಾನು ಅಛ್ಛು಼ಕರಿ ಸೋಚ್ಯೊ. 
\v 2 ಹಮೆ ಹಮಾರ ವಿಶ್ವಾಸ್‌ಮ ಅಜು಼ ದೇವ್ನಖ್ಹಾಜೆ ಕ್ರಿಸ್ತನಿ ಸುವಾರ್ತೆನ ಬೋಧನೆಮ ಮಾರ ಜೋ಼ಡ್ಮ ರ‍್ಹವಾಳೊ ತಿಮೊಥೆನ, ತುಮೂನ ಹುಮ್ಮಖ್ಹ್ ದ್ಯವಾನ ಅಜು಼ ವಿಶ್ವಾಸ್ಮ ಹುಮ್ಮಖ್ಹ್‌ ಕರಾನಖ್ಹಾಜೆ ತುಮಾರಕನ ಮೋಕ್‍ಲ್ಯಾಥ. 
\v 3 ತುಮೂನ ಮಾಲುಮ್‌ ಛಾ಼ಕಿ, ದೇವ್ನ ನಾಮ್ಹೆಲ್ನುತೆ ತಿಮ್ ಖ್ಹತಾಪ್ಣಿ ಖ್ಹಮಾಳಿಲ್ಯವಾನು, ಐರ‍್ಹೂತೆ ದೇವ್ನಿ ಮರ್ಜಿ ಹುಯಿರ‍್ಹೀಸ್. 
\v 4 ಶನಕತೊ ತುಮಾರಕನ ಥಾತೆ ತದೆ, ಖ್ಹತಾಪ್ಣಿನ ಖ್ಹಮಾಳ್‌ನುಸ್‌ಪಡ್ಯು ಕರಿ ಪಹಿಲೇಸ್ ಬೋಲ್ಯಾಥಾನಿ. ಇಮ್ಮಸ್‌ಹುಯು ಕರಿ ತುಮೂನ ಅಛ್ಛಿನಿತರ ಮಾಲುಮ್‌ ಪಡಿರ‍್ಹುಸ್. 
\v 5 ತಿಮೊಥೆನ ತುಮಾರಿ ವಿಶ್ವಾಸ್‌ನಿ ಬಾರೇಮ ಮಾಲುಮ್ ಕರಿಲ್ಯವಾನಖ್ಹಾಜೆ ಮೇ ತುಮಾರಕನ ಮೋಕ್‌ಲ್ಯೊತೆ. ಬಿಜು಼ ಜಾ಼ಖ್ಹತ್ ಥಾಮಾನ ಕೋ ಉಶೇನಿ ಕರಿ ಸೋಚಿನ್, ಮೇ ಇನ ಮೋಕ್‌ಲ್ಯೊತೆ. ಶನಕತೊ ಶೈತಾನ್ನೆ ತುಮೂನ ಶೋದನೆ ಕರ‍್ಯೊತೆ ಇನೇಥಿ ಹಮಾರಿ ಮ್ಹಿನತ್ ಬಿಣ್‌ಫಾಯಿದಾನು ಹುಯಿಜಾ಼ಶೆ ಕರಿ ಮನ ಧಡೂಕೊ ಥೊ. 
\v 6 ಕತೋಬಿ ತಿಮೊಥೆ ಹಮ್ಕೇಸ್ ತುಮಾರಕಂಥು ಹಮಾರಕನ ಆಯೊ. ಅಜು಼ ತುಮಾರಿ ವಿಶ್ವಾಸ್‍ಬಿ ಪ್ಯಾರ್‌ನಿ ಬಾರೇಮ ಅಛ್ಛಿ ಖಬರ್‌ನ ಇನೆ ಹಮೂನ ಬೋಲಿನ್, ಕದೆಕದೇಬಿ ಲಾಡ್‌ಥಿ ಖ್ಹಯಾಲ್ ಕರಿನ್ ಹಮೆ ಕಿಮ್ಕಿ ತಿಮ್ಮಸ್ ತುಮೇಬಿ ಹಮೂನ ದೇಖಾನ ಹರ್‌ಖ್ಹುಕರ್ತಥ ಕರಿ ಬೋಲಿರಾಖ್ಯೊಸ್. 
\v 7 ಹಮಾರ ಭೈಯೆ ಭೇನೆವೊ, ಹಮಾರಿ ಅಖ್ಖಿ ಅಜಾ಼ಮಾಬಿ, ಖ್ಹತಾಪ್ಣಿಮಾಬಿ ತುಮಾರಿ ವಿಶ್ವಾಸ್‍ಥಿ ಹಮೂನ ಭಾಲಿಹುಯು. 
\v 8 ತುಮೆ ಪ್ರಭುಮ ಘಟ್‍ಥಿ ಜಿವ್‌ಕರಾಸ್ತೆ ಹಮೆ ಖ್ಹಮ್‍ಜ್ಯಾಕಿ ಹಮೆ ಪಾಛು಼ ಹುಮ್ಮಖ್ಹ್‌ಹುಯ. 
\v 9 ತುಮಾರ ದೇಶೆಥಿ ಹಮುನ ಮಳಿರ‍್ಹುಸ್ತೆ ಶಂತೋಖ್ಹ್‌ನಖ್ಹಾಜೆ ಕೆತ್ರು ದೇವ್ನ ಧನ್ಯವಾದ್ ಕರ‍್ಯುತೋಬಿ ಬಶ್‌ ಕೋಹುವಾನಿ. 
\v 10 ತಮುನ ಡೋಳೊಖ್ಹು ದೇಖಿನ್ ತುಮಾರಿ ವಿಶ್ವಾಸ್‌ನ ಜ಼ರೂರತ್‌ನ ಪೂರಕರ‍್ನುಕರಿ ಹಮೆ ರಾತ್-ದನ್ ಇನಾಮಸ್ ದೇವ್ನ ಪ್ರಾರ್ಥನೆ ಕರುಕರೆಸ್. 
\v 11 ಅಪ್ಣೊ ಬಾ ದೇವ್ ಅಜು಼ ಅಪ್ಣೊ ಪ್ರಭು ಹುಯಿರ‍್ಹೋತೆ ಯೇಸು ಹಮೂನ ತುಮಾರಕನ ಆವಾನಟೇಕೆ ಮಾರಗ್‌ನ ಖ್ಹೂದು ಕರಾದೆ. 
\v 12 ತುಮಾರಪರ್ ಹಮಾರಿ ಪ್ಯಾರ್ ಕಿಮ್ಕಿ ಇಮ್ಮಸ್ ತುಮಾರಿ ಪ್ಯಾರ್ ಬಿಜಾ಼ಪರ್‌ಬಿ ಭಢ್ವಾದೆ ಇಮ್ಮಸ್ ತುಮಾರಟೇಕೆ ಹಮಾರಿ ಪ್ಯಾರ್‌ಬಿ ಜಾ಼ಖ್ಹತ್ ಹುಯಿರ‍್ಹವಾನಿಘೊಣಿ ಪ್ರಭು ಆಶೀರ್ವಾದ್‌ ಕರ‍್ವಾದೆ. 
\v 13 ಅಪ್ಣೊ ಪ್ರಭು ಹುಯಿರ‍್ಹೋತೆ ಯೇಸು ಕ್ರಿಸ್ತ ಇನು ಪರಿಶುದ್ದ ಪರಿವಾರ್‌ನಿ ಖ್ಹಮೇದ್ ಆವಾನಿ ವಖ್ಹತ್‌ಮ, ಬಾ ದೇವ್ನ ಖ್ಹಾಮ್ಣೆ ತುಮೆ ಪವಿತ್ರಥಿ ಅಜು಼ ಗಲ್ತಿಕೊಂತೆ ಇಮ್‌ ರ‍್ಹವಾನಿಮತ್ ತುಮಾರ ದಿಲ್ನ ಖ್ಹಾರು ಘಟ್ ಕರಾದೆ.
\c 4
\s ದೇವ್ನ ಖ್ಹಾಜಾ಼ತೆ ಜಿವ್ಣು
\p
\v 1 ಖ್ಹರ್ತಿನಿ ವಾತ್ ಶಾತ್‌ಕತೊ, ಹಮಾರ ಭೈಯೇ ಭೇನೆವೊ ಯೇಸು ಪ್ರಭುನ ಅದಿಕಾರ್‌ಥಿ ತುಮೂನ ಶಾತ್ ಹುಕುಮ್ ದಿದಾಥ ಕರಿ ತುಮೂನ ಮಾಲುಮ್ ಛಾ಼. ತುಮೂನ ಬಿಜು಼ ಥೋಡಿ ವಾತೆ ಬೋಲಾನು ಛಾ಼. 
\v 2 ಇನಖ್ಹಾಜೆ ದೇವ್ನ ಖ್ಹಾಜಾ಼ನಟೇಕೆ ಕಿಮ್ ಜಿವ್ಣು ಕರಿ ಹಮಾರೆಥಿ ಶಿಕಿನ್ ಯೋಸ್ ತರಿಕಾಥಿ ಜಿವ್‌ಕರಾಸ್. ತುಮೆ ಬಿಜೂ಼ಬಿ ಜಾ಼ಖ್ಹತ್ ಚಾ಼ಲ್ನುಕರಿ ಪ್ರಭು ಯೇಸುಮ ಬಿಂತಿ ಕರಿಯೇಸ್. 
\v 3 ದೇವ್ನಿ ಮರ್ಜಿ ಶಾತ್‌ಕತೊ ತುಮೆ ಪವಿತ್ರ ರ‍್ಹೇಣುಸ್ ಕರಿ. ಇನಖ್ಹಾಜೆ ವ್ಯಬಿಚಾರ್‌ಥಿ ದೂರ್ ರ‍್ಹವೊ. 
\v 4-5 ದೇವ್ನ ಮಾಲುಮ್‌ಕರ‍್ಯುಕೊಂತೆ ಅಲಕ್‌ ಅದ್ಮಿವೋನಿಘೊಣಿ ಶರೀರ್‌ನಿ ಭೋಗ್‌ಮ ನಾಪಡ್ನುತೆ ತುಮಾರಮ ಹರೇಕ್ ಜ಼ಣು ಪವಿತ್ರ ದಿಲ್‌ಥೀಬಿ ಮರ‍್ಯಾದಿಥೀಬಿ ಬಾವಣ್ಣಿಜೋ಼ಡ್ಮ ಕಿಮ್ ಜಿವ್ಣು ಕರ್ನುಕರಿ ಶಿಕಿಲೇವ್ಣು. 
\v 6 ಅಜು಼ ಆ ಬಾರೇಮ ಜಿನುಕು ಕೋಣ್‌ಬಿ ಕ್ರಿಸ್ತನ ಮಹಿ ಇವ್ಣ ಭೈಯೇ ಹುಯಿರ‍್ಹಾತೆ ಅದ್ಮಿನ ಠಗಾವ್ಣುಕರಿ ಝೇತೈನ್‌, ಖರಾಬ್ ನಾ ಕರ‍್ನು. ಆ ಖ್ಹಾರಿ ಬಾರೇಮ ಪ್ರಭು ನಿಶತ್ ದಿಶೆಕರಿ ಹಮೆ ತುಮುನ ಬೋಲಿರಾಖ್ಯಾಸ್. 
\v 7 ದೇವ್ನೆ ಅಪ್ಣುನ ಮೈಲುಹುವಾನಖ್ಹಾಜೆ ಬುಲಾಯೊಕೊಯ್ನಿ, ಪರಿಶುದ್ ಜಿವ್ಣುಕರಾನಖ್ಹಾಜೆ ಬುಲಾಯೋತೆ. 
\v 8 ಅನಖ್ಹಾಜೆಸ್ ಆ ವಾತೇನ ಝಿಟ್ಕಾರವಾಳು ಅದ್ಮಿನಾಸ್ ಕಾಹೆತೆ ಪವಿತ್ರಾತ್ಮನ ದಿದೋತೆ ದೇವ್‍ನಾಬಿ ಝಿಟ್ಕಾರವಾಳು ಹುಯಿರ‍್ಹೂಸ್. 
\v 9 ಕ್ರಿಸ್ತನ ಮಹಿ ಭಯ್ಯೆ ಅಜು಼ ಭೇನೇನ ಕಿಮ್ ಪ್ಯಾರ್ ಕರ‍್ನು ಕರಿ ಬೋಲಾನಿ ಬಾರೇಮ ತುಮೂನ ಲೀಖಾನಿ ಜ಼ರೂರತ್ ಕೊಯ್ನಿ. ಏಕ್‌ಥಿಏಕ್‌ ಪ್ಯಾರ್ ಕರ‍್ನು ಕರಿ ಬೋಲಾನಿ ಬಾರೇಮ ತುಮಾರು ತುಮೇಸ್ ದೇವ್‌ಥಿಶಿಕಿರಾಖ್ಯಸ್. 
\v 10 ಅಜು಼ ಇಮ್ಮಸ್ ಮೆಕೆದೋನ್ಯಮ ಛಾ಼ತೆ ತಮಾಮ್‌ ಭೈಯೆ ಭೇನೇನ ಜೋ಼ಡೆ ಪ್ಯಾರ್‌ಥಿ ಚಾ಼ಲಿರಾಖ್ಯಾಸ್‌. ಕತೋಬಿ ಹಮಾರ ಭೈಯೆ ಭೇನೇವೊ ತುಮೆ ಪ್ಯಾರ್ ಕರಾಮ ಬಿಜೂ಼ಬಿ ಭಡ್ನುಕರಿ ಬೋಲಿಲಿಯೆಸ್. 
\v 11 ಹಮೆ ಬೋಲ್ಯಾತೆ ತಿಮ್ ತು ಬಿಜೇಕ್‌ಜ಼ಣಾನ ಬಾರೇಮ ಮುಡ್‌ಕ್ಯು ನಕೊಘಾಲ್‌ತೆ ತುಮಾರು ಕಾಮ್ ತುಮೆ ದೇಖಿಲಿನ್ ಖ್ಹೊಪೇಥಿ ಜಿವ್ಣು ಕರೊಕರಿ ಅಗಾಡಿಸ್ ಬೋಲಿರಾಖ್ಯೊಸ್. 
\v 12 ಅಮ್ ಕರ‍್ಯಾತೊ ತುಮೂನ ವಿಶ್ವಾಸ್‌ಮಕೊಂತೆ ಅದ್ಮಿಥಿ ಮರ್ಯಾದಿ ಮಳ್‌ಶೆ ಕಾಹೆತೆ ತುಮೆ ಕಿನಾಪರ್‌ಬಿ ವಜ಼ನ್ ಕೊ ರ‍್ಹಿಶುನಿ.
\s ಕ್ರಿಸ್ತಯೇಸು ಪಾಛು಼ ಆವ್‌ಶೇತೆ
\p
\v 13 ಹಮಾರ ಭೈಯೇ ಭೇನೇವೊ, ಮರಿಗಯೂತೆ ಅದ್ಮಿನಿ ಬಾರೇಮಾನಿ ಖ್ಹಾಚಿನ ತುಮೆ ಮಾಲುಮ್ ಕರಿರಾಕ್ಣುಕರಿ ಹಮಾರಿ ಆಖ್ಹ್. ಅನೇಥಿ ಕೋಣ್‌ಬಿ ಭರೋಖ್ಹಾಮಕೊಂತೆ ಅಲಕ್‌ನಿಘೋಣಿ ತುಮೆ ದುಖ್‌ಮ ನಾರ‍್ಹೇವ್ಣು. 
\v 14 ಯೇಸು ಮರೀನ್ ಜಿವ್ತೊ ಹುಯೊ ಕರಿ ಅಪ್ಣೆ ಮಾನೇಸ್, ಇಮ್ಮಸ್ ಯೇಸುಪರ್ ವಿಶ್ವಾಸ್ ಕರೀನ್ ಮರಿಗಯೂತೆ ಇವ್ಣುನ ದೇವ್ ಯೇಸುನ ಜೋ಼ಡೆ ಉಠಾಡ್‍ಶೆ ಕರಿ ವಿಶ್ವಾಸ್ ಕರ‍್ನು. 
\v 15 ಹಮ್ಕೆ ಹಮೆ ಶಿಕಾಡುಕರೇತೆ ಆ ವಾತೆ ಪ್ರಭೂನೀಸ್ ಉಪದೇಶ್ ಹುಯಿರ‍್ಹೀಸ್. ಪ್ರಭು ಪಾಛೊ಼ ಆವ್‌ಶೇತೆ ವಖ್ಹತ್‌ಮ, ಜಿವ್ತಾ ಛಿಯ್ಯೇತೆ ಅಪ್ಣೆ ಮರಿಗಯೂತೆ ಇವ್ಣೇಥಿ ಪಹಿಲೆ ಕೋ ಜಾ಼ಶುನಿ. 
\v 16 ಶನಕತೊ ಪ್ರಭು ಇನುಯೋಸ್ ಹುಕುಮ್‌ನಿ ಆವಾಜ಼್‌ಥೀಬಿ, ಗಲ್‌ಢೊ ದೂತಾನೊ ಆವಾಜ಼್‌ಥೀಬಿ, ಅಜು಼ ದೇವ್ನಿ ತುತ್ತೂರಿನ ಆವಾಜ಼್‌ಥೀಬಿ ಪರ್‌ಲೋಕ್‌ಥು ಉತ್ರಿನ್ ಆವ್‌ಶೆ. ತದೆ ಯೇಸು ಕ್ರಿಸ್ತನಿ ವಿಶ್ವಾಸ್ಮ, ಮರಿಗಯೂತೆ ಇವ್ಣೆ ಪಹಿಲೆ ಉಠಿ ಆವ್‌ಶೆ. 
\v 17 ಅನ ಬಾದ್‌ಮ ಜಿವ್ತಾ ಛಿಯೇತೆ ಅಪ್ಣೆ ಪ್ರಭುನ ವಾದ್‍ಳಾನ ವಹಿರಾಮ ಮಳಾನಖ್ಹಾಜೆ ಇವ್ಣಿ ಜೋ಼ಡೆಸ್ ಏಕ್‌ದಮ್ ವಾದ್‍ಳಾಮ ಪಡೈಜಾ಼ಶು. ಅಮ್ ಹುಯಿನ್ ಅಪ್ಣೆ ಹಮೇಶಾನಖ್ಹಾಜೆ ಪ್ರಭುನ ಜೋ಼ಡೆ ರ‍್ಹಿಶು. 
\v 18 ಇನಖ್ಹಾಜೆ ಆ ಖ್ಹಾರಿ ವಾತೆಥಿ ಏಕ್‌ನ ಏಕ್‌ ಭಾಲಿ ದೆವೊ.
\c 5
\s ಕ್ರಿಸ್ತ ವಳ್ಯಾವತೆ ಇನಖ್ಹಾಜೆ ಖ್ಹವಾರಿ ರ‍್ಹವೊ
\p
\v 1 ಹಮಾರ ಭೈಯೇ ಭೇನೇವೊ, ಆ ಖ್ಹಾರು ಚಾ಼ಲ್‌ಶೇತೆ ದನ್ ಅಜು಼ ವಖ್ಹತ್‌ನಿ ಬಾರೇಮ ಹಮೆ ತುಮೂನ ಲೀಖಾನಿ ಜ಼ರೂರತ್ ಕೊಯ್ನಿ. 
\v 2 ಶನಕತೊ ರಾತ್ನಿ ವಖ್ಹತ್‌ಮ ಚೋ಼ರ್ ಕಿಮ್ ಆವಸ್ಕಿ, ಇಮ್ಮಸ್ ಪ್ರಭುನೊ ದನ್ ಆವ್‍ಶೆಕರಿ ತುಮುನಾಸ್ ಅಛ್ಛಿನಿತರ ಮಾಲುಮ್ ಛಾ಼. 
\v 3 ಹಮೆ ಶಾಂತಿಥಿ ಛಿಯ್ಯೆ, ಜ಼ತನ್‌ಥಿ ಛಿಯ್ಯೆ ಕರಿ ಅದ್ಮಿಖ್ಹಾರು ಬೋಲುಕರಾನಿ ವಖ್ಹತ್‌ಮಾಸ್‌, ಬೇಜೂನಿನ ಏಕ್‌ದಮ್ ಪೈದಾಹುವ್ವಾನಿ ಅಜ಼ ಆವಾಸ್ತೆ ಇಮ್ಮಸ್, ಇವ್ಣಾಪರ್ ನಾಶ್ ಆವ್‌ಶೆ. ಅಜು಼ ಇವ್ಣೆ ಇನ ಮಹಿಥು ಛು಼ಕಿಜಾ಼ವನ ಕೋ ಉಶೇನಿ. 
\v 4 ಕತೋಬಿ ಹಮಾರ ಭೈಯೇ, ಯೋ ದನ್ ಚೋ಼ರ್ ಆವಾನಿಘೋಣಿ ತುಮಾರಪರ್ ಕೋ ಆವ್‌ಶೇನಿ, ಶನಕತೊ ತುಮೆ ಅಂಧಾರಾಮ\f + \fr 5:4 \fr*\ft ಕತೊ ತುಮೆ ಪಾಪ್‌ಮ ಕೋ ಜಿವ್‌ಕರಾನಿ ಕರಿ ಮತ್‌ಲಬ್.\ft*\f* ಕೋ ಜಿವ್‌ಕರಾನಿ. 
\v 5 ತುಮೆಖ್ಹಾರು ಉಜಾ಼ಳ ಭಣಿವಾಳ ಅಜು಼ ದನ್ ಭಣಿವಾಳ ಹುಯಿರ‍್ಹಾಸ್. ಅಪ್ಣೆ ರಾತ್ ಭಣಿವಾಳ ಕಾಹೆ, ಅಂಧಾರ ಭಣಿವಾಳಬಿ ಕಾಹೆ. 
\v 6 ಇನಖ್ಹಾಜೆ ಅಪ್ಣೆ ಬಿಜಾ಼ನಿಮತ್ ನಿಂದರ್‌ ನಾಲೇವ್ಣುತೆ, ಹೊಷಾರಿ ರ‍್ಹಿಯೆ ಅಜು಼ ಅಪ್ಣು ಅಪ್ಣೆ ದಾಬುಕ್ಮ ರ‍್ಹಿಯೆ. 
\v 7 ಖ್ಹುವ್ವಾಳು ಖ್ಹಾರು ರಾತ್ಮ ಖ್ಹುವ್ವಾಸ್. ಕಯೇಪ್ ಚ಼ಢೈಲೆವಾಳು ಖ್ಹಾರು ರಾತ್ಮ, ಕಯೇಪ್ ಚ಼ಢೈಲೇಸ್. 
\v 8 ಕತೋಬಿ ಅಪ್ಣೇತೊ ದನ್ ಭಣಿವಾಳ ಹುಯಿರ‍್ಹಾಸ್. ಇನಖ್ಹಾಜೆ ಅಪ್ಣು ಅಪ್ಣೆ ದಾಬುಕ್ಮ ರ‍್ಹಿಯೆ. ಅಪ್ಣೆ ಪ್ಯಾರ್ ಅಜು಼ ವಿಶ್ವಾಸ್‌ನಿ ಕವಚ್‌ನ\f + \fr 5:8 \fr*\ft ಕತೊ ಲಡೈಭಿಡಾನಿ ವಖ್ಹತ್ ಛಾ಼ತಿಪರ್ ಭಾಂದಾನೊ ಪಟೊ \ft*\f* ಛಾ಼ತಿಪರ್ ಪೇರ‍್ಹಿಲೇವ್ಣು ಅಜು಼ ರಕ್ಷಣೆನಿ ವಿಶ್ವಾಸ್‌ಕರಿ ರ‍್ಹವಾನು ಮುಡ್‌ಕ್ಯಾನ ಕವಚ್‌ನ ಫೇರಿಲೇವೊ, 
\v 9 ಶನಕತೊ ದೇವ್ನೆ ಅಪ್ಣುನ ಚೂ಼ಣ್ಯೋತೆ ಇನ ಇರಾದಮ ಖ್ಹಪಡ್ನುಕರಿ ಕಾಹೆ ಪಣ್ಕಿ, ಅಪ್ಣೊ ಪ್ರಭು ಯೇಸು ಕ್ರಿಸ್ತಥಿ ಮಳ್ಯುತೆ ರಕ್ಷಣೆನ ಲೀಲೆವ್ಣು ಕರಿ ಚೂ಼ಣ್ಯೋತೆ. 
\v 10 ಅಪ್ಣೆ ಜಿವ್ತ ರ‍್ಹಯಾತೋಬಿ ನತರ್ ಮರಿಗಯಾತೋಬಿ ಇನ ಜೋ಼ಡೆಸ್ ಜಿವ್ಣು ಕರಿ ಬೋಲಿನ್, ಯೇಸುನೆ ಅಪ್ಣಖ್ಹಾಜೆ ಇನ ಜಾನ್ನ ದಿದೊ. 
\v 11 ಇನಖ್ಹಾಜೆ ತುಮೆ ಹಮ್ಕೆ ಕರುಕರಸ್ತೆ ಇಮ್ಮಸ್, ಏಕ್‌ನ ಏಕ್‌ ಭಾಲಿ ದೇವೊ. ಅಜು಼ ಹುಮ್ಮಖ್ಹ್‌ ದೇತಹುಯಿನ್ ಏಕ್‌ನ ಭಕ್ತಿನ ಬಿಜೇಕ್‌ ಜ಼ಣು ಭಡಾವ್ತರ‍್ಹೆವೊ. 
\v 12 ಮಾರ ಭೈಯೆ ಭೇನೇವೊ ಕ್ರಿಸ್ತಮ ಮೆ ತುಮುನ ಬಿಂತಿ ಕರುಸ್, ಖಿವು ಅದ್ಮಿ ಪ್ರಭುನ ಕಾಮ್ಮ ತುಮಾರಖ್ಹಾಜೆ ಮ್ಹಿನತ್ ಕರವಾಳು ಹುಯಿನ್ ತುಮೂನ ಅಕ್ಕಲ್ ಬೋಲಸ್ಕಿ, 
\v 13 ಇವ್ಣುನ ಪರ್ಖಿನ್ ಇವ್ಣ ಕಾಮ್ನಖ್ಹಾಜೆ ಘಣು ಮರ್ಯಾದಿ ಅಜು಼ ಪ್ಯಾರ್ ವತಾಳ್ಣು ಕರಿ ತುಮೂನ ಗಿಂಗೈಲಿಯೇಸ್. ತುಮಾರ ತುಮಾರಸ್‍ಮ ಸಮಾಧಾನ್‌ಥಿ ರ‍್ಹವೊ. 
\v 14 ಹಮಾರ ಭೈಯೆ ಭೇನೇವೊ, ಶೊಂಬೇರಿನ ಝೇತಾವೊ, ದಿಲ್ಮ ಹೇಬತ್ ರ‍್ಹವಾಳನ ಭಾಲಿದೇವೊ, ಕಮ್‌ಜೋ಼ರಿ ರ‍್ಹವಾಳನ ಆಧಾರ್ ರ‍್ಹವೊ, ಖ್ಹಾರಾನ ಜೋ಼ಡೆ ಘಣಿ ಸಮಾಧಾನ್‌ಥಿ ರ‍್ಹವೊ ಕರಿ ತುಮುನ ಉಪದೇಶ್ ಕರುಸ್. 
\v 15 ಕೋಣ್‌ಬಿ ಖರಾಬ್‌ನ ಬದಲ್ ಖರಾಬ್ ನಾ ಕರ್ನುತೆ ಇಮ್‌ ದೇಖಿಲೆವೊ. ಕತೋಬಿ ತುಮೆ ಏಕ್‌ಥಿಏಕ್ ಅಜು಼ ಹರೇಕ್ ಅದ್ಮಿನಾಬಿ ಅಛ಼್ಛುಕರೊ. 
\v 16 ಹಮೇಶ ಖ್ಹುಶೀಥಿ ರ‍್ಹವೊ, 
\v 17 ಹರ್‌ ವಖ್ಹತ್‌ಮ ಪ್ರಾರ್ಥನೆ ಕರೊ, 
\v 18 ಹರ್‌ಹಾಲ್‌ಮ ದೇವ್ನ ಧನ್ಯವಾದ್ ಕರೊ. ಆಸ್ ತುಮಾರಿ ಬಾರೇಮ ಕ್ರಿಸ್ತ ಯೇಸುಮ ದೇವ್‌ಮ ಹೋಣುತೆ ಮರ್ಜಿ ಹುಯಿರ‍್ಹುಸ್. 
\v 19 ಪವಿತ್ರಾತ್ಮನ ಕಾಮ್ನ ಉಝಾ಼ವೊ ನಕೊ, 
\v 20 ಪ್ರವಾದ್‌ನೇನ ಝಿಟ್ಕಾರೊ ನಕೊ. 
\v 21 ಅಖ್ಖಾಸ್ನ ತರೀಪ್‌ಶ ಕರಿನ್, ಅಛ್ಛಾ಼ನ ಘಟ್ ಧರಿಲೆವೊ. 
\v 22 ಖ್ಹಾರಿಸ್ ತರ‍್ಹಾನು ಖರಾಬ್‌ಥಿ ದೂರ್ ರ‍್ಹವೊ. 
\v 23 ಶಾಂತಿ ದೆವಾಳೊ ದೇವಸ್ ತುಮೂನ ಪೂರಿ ತರಿಕಾಥಿ ಪವಿತ್ರ ಕರಾದೆ. ತುಮಾರು ಆತ್ಮ, ಜಾನ್‌ ಅಜು಼ ಶರೀರ್ ಖ್ಹಾರು ಅಪ್ಣೊ ಪ್ರಭು ಹುಯಿರ‍್ಹೋತೆ ಯೇಸು ಕ್ರಿಸ್ತ ದೆಖಾವಾನಿ ವಖ್ಹತ್‌ಲಗು ಪೂರ ದೋಷ್‌ಕೊಂತೆ ರಾಖಿಮ್ಹೇಲೊ. 
\v 24 ಯೋ ಇನ ಕಾಮ್ನ ಪೂರ ಕರ್ಶೆ. ಶನಕತೊ ತುಮೂನ ಬುಲಾಯೋತೆ ಯೋ ವಿಶ್ವಾಸ್‌ವಾಳೊ ಹುಯಿರ‍್ಹೋಸ್. 
\v 25 ಭೇನೆ ಭೈಯೇವೊ, ಹಮಾರಖ್ಹಾಜೆ ಪ್ರಾರ್ಥನೆ ಕರೊ. 
\v 26 ಭೇನೆ ಭೈಯೇನ ಮಳಾನಿ ವಖ್ಹತ್‌ಮ ಪವಿತ್ರಥಿ ಹಾತ್‍ಮಳೈನ್ ಖ್ಹಲಾಮ್ ಕರೊ. 
\v 27 ಆ ಚಿಟ್ಟಿನ ಭೈಯೆಖ್ಹಾರನ ಪಢೀನ್‌ ಬೋಲ್ನುಕರಿ ಪ್ರಭುಮ ಬಿಂತಿಕರಿನ್ ತುಮೂನ ಬೋಲುಕರುಸ್. 
\v 28 ಅಪ್ಣೊ ಪ್ರಭು ಹುಯಿರ‍್ಹೋತೆ ಯೇಸು ಕ್ರಿಸ್ತನಿ ವಾರ್‌ಖ್ಹೊ ತುಮಾರ ಜೋ಼ಡೆ ರ‍್ಹವಾದೆ.