\id 1PE -WAGHRI
\ide UTF-8
\h 1 ಪೇತ್ರ
\toc3 1 ಪೇತ್ರ
\toc2 1 ಪೇತ್ರ
\toc1 ಪೇತ್ರನೆ ಲೀಖ್ಯೋತೆ ಪಹಿಲಿ ಚಿಟ್ಟಿ
\mt2 ಪೇತ್ರನು ಬರೆದ ಮೊದಲನೆಯ ಪತ್ರಿಕೆ
\mt1 ಪೇತ್ರನೆ ಲೀಖ್ಯೋತೆ ಪಹಿಲಿ ಚಿಟ್ಟಿ
\imt ಮಾಲುಮ್ ಕರಾನು
\ip ಪೇತ್ರನೆ ಲೀಖ್ಯೋತೆ ಪಹಿಲಿ ಚಿಟ್ಟಿನ ಅಪೊಸ್ತಲ ಪೇತ್ರನೆ ಲೀಖಿರಾಖ್ಯೊಸ್. ಪೇತ್ರ ಆ ಚಿಟ್ಟಿ ಶುರುಕರಾನಿ ವಖ್ಹ್‌ತೆ ಕಿನ ಲೀಖುಕರುಸ್ ಕರಿ ಬೋಲಸ್. ಯೊ ಕೊಯ್ನಿಕರಿ ವಖ್ಹ್‌ತೆ ಕ್ರಿಸ್ತ ವಿಶ್ವಾಸಿನ ಲೀಖ್ಯೊ \xt 1:1\xt*, \xt 1:17\xt*, \xt 2:11.\xt*
\ip ಇನೆ ಪಢಾವಳಾನ ಘಣಿ ವಖ್ಹತ್ ಅಮ್ ಲಿಖಸ್. ಶನಕತೊ ಇವ್ಣೆಖ್ಹಾರು ಅಲಕ್ ಅಲಕ್ ದೇಖ್ಹ್‌ಮ ಫೈಲಯ್‌ರ‍್ಹೂಥು. ಶನಕತೊ ಆ ಚಿಟ್ಟಿ ಪೌಲನೆ ಎಫೆಸವಾಳನ ಲೀಖ್ಯೋತೆ ಪರಕ್ಮಾಸ್ ಕೈಏಕ್ ವಾತೇವ್ನ ಮಾಲುಮ್ ಕರಾವಸ್. ಕೈಯೆಕ್‌ ಅದ್ಮಿ ಪೇತ್ರ ಲೀಖ್ಯೋತೆ ಪಹಿಲಿ ಚಿಟ್ಟಿ ಎಫೆಸವಾಳನ ಲೀಖ್ಯುತೆ ಚಿಟ್ಟಿನ ಪಾಛ಼ಳ್ ಕತೊ ಕ್ರಿಸ್ತನು ಪೈದಾಖ್ಹ್‌ನ ವಾರ್‌ ಖ್ಹುಮಾರ್ 65 ಮ ಲಿಖೈರ‍್ಹುಸ್ ಕರಿ ವಿಶ್ವಾಸ್ ಕರಾಸ್. ಪೇತ್ರನೆ ಆ ಚಿಟ್ಟಿನ ಇನೆ ಬಾಬಿಲೋನ್‌ನು ರೋಮ್ ಖ್ಹಯೇರ್‌ಮ ಲೀಖ್ಯೊ \xt 5:13.\xt*
\ip ಪೇತ್ರನೆ “ತುಮುನ ಹುಮ್ಮಖ್ಹ್‌ ದ್ಯವಾನ ಆ ಹೈರುತೆ ಖ್ಹಾಚ ದೇವ್ನಿ ಕೃಪೆ ದ್ಯವಾನ” ಕರಿ ಬೋಲಾಥಿ ಇನೆ ಲೀಖ್ಯೋತೆ ಚಿಟ್ಟಿನ ಖ್ಹೂಜ಼್‌ನ ವತಾಳಿ ರಾಖ್ಯೊಸ್‌ \xt 5:12\xt* \xt 1 ಪೇತ್ರ 2:11\xt*, \xt 3:7\xt*, \xt ಎಫೆಸ 5:18—6:9\xt* ಅಜು಼ \xt ಕೊಲೊಸ್ಸೆ 3:18—4:6\xt* ಅನ ಬೀಚ್ಮ ಕೈಏಕ್ ಪರಕ್ ಛಾ಼. ಆ ತೀನ್ ಭಾಗ್‌ ಕುಟುಂಬ್‌ನು ಸಂಬಂದ್ ಅದಿಕಾರಿನ ಖ್ಹಾಮ್ಣೆ ಹೇಟು ಹುವಾನಿ ಬಾರೇಮ ಖ್ಹಂಜ಼್‌ಕಾರ್‌ ದೇಸ್. ಯೊ ವಿಶ್ವಾಸಿಯೇವ್ನ ವದೇಖ್ಹ್‌ಮ ಮದತ್‌ಕರಿ ಚ಼ಲಾವ್‌ತು ಹುಯಿನ್ ಜಾ಼ವ್ಣು. ಶನಕತೊ ಕಡೆಷಿನ ದನ್ ಖನ್ನೆ ಐಗುಕರಿ ಬೋಲಾಥಿ ಹುಮ್ಮಖ್ಹ್‌ ಜಿನು ದೇಸ್. \xt 4:1\xt*
\iot ಕಾಡಿದೇಖೊ
\io1 1 ಪೇತ್ರನೆ ಇನ ಶೊಂತ್‌ ವಿಚಾರ‍್ನ ಬೋಲಿಲೆಸ್ ಅಜು಼ ಪಢವಾಳು ಕೋಣ್‌ಕರಿ ಬೋಲಿವತಾಳಸ್. \ior 1:1-2\ior*
\io1 2 ತದೆ ಇನೆ ಇವ್ಣೆ ಖ್ಹಾರು ಗಳ್‍ಜೋ಼ಡ್ ರಕ್ಷಣೆ ಅಜು಼ ಇವ್ಣ ಜಿವ್ಣಾನಖ್ಹಾಜೆ ಧನ್ಯವಾದ್ ಕರಸ್. \ior 1:3—2:10\ior*
\io1 3 ಅನಪಾರ್‌ ಇನೆ ಆ ಜಗತ್‌ಮ ವಿಶ್ವಾಸಿಖ್ಹಾರು ಕಿಮ್ ಜಿವ್ಣುಕರ‍್ನು ಅಜು಼ ಕೈಏಕ್ ಸಂಬಂಧಾನಿ ಬಾರೇಮ ಕತೊ ಬಾವಣ್‍ ಬಾವ್ರಿ, ಸೇವಕ್ ಯಜಮಾನ್ನಿಘೋಣಿನು ವಿಚಾರ‍್ನ ಬಾರೇಮ ಛಾ಼ತೆ ಇಮ್‌ ಖ್ಹಣೇದ್ ಕರಾವಸ್. \ior 2:11—4:11\ior*
\io1 4 ಇನಕೇಡೆಥು ಪೇತ್ರನೆ, ವದೇಖ್ಹ್‌ ಆಯುತೊ ಖ್ಹಮಾಳಿ ರ‍್ಹೇವ್ಣುಕರಿ ಹುಮ್ಮಖ್ಹ್‌ ದೇಸ್. \ior 4:12—5:11\ior*
\io1 5 ತದೆ ಇನೆ ಇನಿ ಚಿಟ್ಟಿನ ಖ್ಹತಮ್ ಕರಸ್. \ior 5:12-14\ior*
\c 1
\s ಖ್ಹಲಾಮ್
\p
\v 1 ಯೇಸು ಕ್ರಿಸ್ತನೊ ಅಪೊಸ್ತಲ ಹುಯಿರ‍್ಹೋತೆ ಪೇತ್ರನೆ ಪೊಂತ, ಗಲಾತ್ಯ, ಕಪ್ಪದೋಕ್ಯ ಏಷ್ಯಾ ಬಿಥೂನ್ಯ ಕರಿ ತಬರ್‌ಖಾಮ ಛಿಡ್‍ಕೈಗಾತೆ ಪರೈದೇಖ್ಹ್‌ಮ ಜಿವ್‌ಕರಾತೆ ದೇವ್ನ ಅದ್ಮಿವ್‍ನ ಕತೊ, 
\v 2 ಪವಿತ್ರಾತ್ಮಥಿ ಅಭಿಷೇಕ್ ಕರೈಲಿದಹುಯಿನ್ ವಿಧೇಯ ಹುವಾನಖ್ಹಾಜೆ, ಯೇಸು ಕ್ರಿಸ್ತನ ಲ್ಹೋಯಿಥಿ ಛಿಡ್‍ಕೈನ್, ಬಾ ಹುಯಿರ‍್ಹೋತೆ ದೇವ್ನಿ ಭವಿಶ್ಯನಿ ಗ್ಯಾನ್‌ಥಿ ಚೂ಼ಣೈಗಯಹುಯಾನ ಲೀಖಾನು ಶಾತ್‍ಕತೊ ತುಮುನ ವಾರ್‌ಖ್ಹೊಬಿ ಶಾಂತಿಬಿ ಘಣು ಮಳಾದೆ.
\s ಜಿವ್ತೊ ಭರೋಖ್ಹೊ
\p
\v 3 ಅಪ್ಣೊ ಪ್ರಭು ಯೇಸು ಕ್ರಿಸ್ತನೊ ಬಾಬಿ ದೇವ್‌ಬಿ ಹುಯಿರ‍್ಹವಾಳನ ಧನ್ಯವಾದ್ ಹುವಾದೆ! ಶನಕತೊ ಯೋ ಯೇಸು ಕ್ರಿಸ್ತನ ಮರ‍್ಯಾಹುಯಾಮಾಥು ಜಿವ್ತೊಕರಿನ್, ಇನಿ ಮೋಟಿ ಗೋರ್‌ಥೀಸ್ ಅಪ್ಣುನ ನವೊ ಜ಼ಲಮ್ ಅಜು಼ ಜಾನ್ನ ಭರೋಖ್ಹಾನ ದಿರಾಖ್ಯೊಸ್. 
\v 4 ಇಮ್ಮಸ್ ಅಪ್ಣುನ ಮಟಿಜಾ಼ಯಿಕೊಂತೆ ಧನ್‌ದೌಲತ್‌ನ ದ್ಯವಾನಖ್ಹಾಜೆ ಪರಲೋಕ್‌ಮ ಅಪ್ಣಖ್ಹಾಜೆ ಮ್ಹೇಲೈರ‍್ಹೂಸ್. ಯೋ ಕಂದ್‍ ಧರಾಕೊಯ್ನಿ ಅಜು಼ ನಾಶ್ ಹುಯಿಜಾ಼ಯ್‌ ಕೊಯ್ನಿ. 
\v 5 ಕಡ್‍ಶೀನ ದನ್ಮ ಮಾಲುಮ್‌ ಹುವಾನ ತಯ್ಯಾರ್‌ಹುಯಿರ‍್ಹುತೆ ರಕ್ಷಣೆ ವಿಶ್ವಾಸ್ ಕರಾವಾಳ ತುಮುನ ಮಳ್‌ಣುಕರಿ ದೇವ್ ತುಮುನ ಇನಿ ಶಕಥ್ಥಿ ಬಚಾ಼ಡಸ್. 
\v 6 ಇನಾಖ್ಹಾಜೆ ತುಮೆ ತಬ್‍ತೋಡಿ ಥೋಡದನ್ ಹೋಣು ಉಷೇತೊ ಕೈಯೇಕ್‌ ಥರಾನಿ ವದೇಖ್ಹ್‌ಮ ದುಖಿ ಹುವಾಳರ‍್ಹಯಾತೋಬಿ, ಖ್ಹುಶಿಕರಾವಾಳ ಹುಯಿರ‍್ಹಾಸ್. 
\v 7 ನಾಶಹುಯಿಜಾ಼ವಾನುಬಿ, ಆಗ್‌ಥಿ ಛ಼ಣೈನ್ ಹುಯಿರ‍್ಹುತೆ ಖ್ಹೋನ್ನೇಥಿಬಿ ಘಣು ಮೋಲ್ನು ಹುಯಿರ‍್ಹುತೆ ತುಮಾರಿ ವಿಶ್ವಾಸ್ ಆ ವದೇಖ್ಹ್‌ಥಿ ತರೀಪ್‌ಶ ಹುಯಿನ್ ಯೇಸುಕ್ರಿಸ್ತ ಆವಾನಿ ವಖ್ಹತ್ ತುಮುನ ಕೀರ್ತಿ, ಮಾನ್, ಮಹಿಮೆ ಅಖ್ಖು ಉಬ್ಜಿ ಆವಾನಿತರಾನು ಹುಯಿರ‍್ಹುಸ್. 
\v 8-9 ತುಮೆ ದೇವ್ನ ಡೋಳೇಥಿ ನಾ ದೇಖ್ಯಾತೋಬಿ ಇನ ಪ್ಯಾರ್ ಕರೋಸ್. ತುಮೆ ಹಮ್ಕೆ ಇನ ನಾದೇಖ್ಯಾತೊಬಿ ಇನಾಮ ವಿಶ್ವಾಸ್‍ಥಿ ಖ್ಹುಶಿ ಕರ್ಶು. ಶನಕತೊ ತುಮಾರು ವಿಶ್ವಾಸ್‍ನು ಫಲ್‍ಹುಯಿರ‍್ಹುತೆ ಆತ್ಮನು ರಕ್ಷಣೇನ ಲಿಲ್ಯಾವವಾಳ ಹುಯಿನ್ ಮಹಿಮೆನಿ ಖ್ಹುಶಿಕರ್‌ಶು. 
\v 10 ದೇವ್ನೆ ತುಮುನ ವತಾಳ್ಯೊತೆ ವಾರ್‌ಖ್ಹಾನಿ ಬಾರೇಮ ಪಹಿಲೇಸ್ ಖ್ಹಮ್‌ಜಾ಼ಡ್ಯೂತೆ ಪ್ರವಾದಿಖ್ಹಾರು ಆ ರಕ್ಷಣೆನಿ ಬಾರೇಮ ಬರೋಬರ್‌ಥಿ ಪುಛೈ಼ನ್ ಪರ್ಖಿನ್ ದೇಖ್ಯು. 
\v 11 ಇವ್ಣಾಮಥೂತೆ ಕ್ರಿಸ್ತನು ಆತ್ಮ ಕ್ರಿಸ್ತನ ಆವ್ಣುತೆ ವದೇಖ್ಹ್‌ ಅಖ್ಖಾನಾಬಿ, ಯೋ ಅಖ್ಖಾನವಾರ್ ಉಷೇತೆ ಮಹಿಮೆನಾಬಿ, ಪಹಿಲೇಸ್ ಖ್ಹಮ್‌ಜಾ಼ಡಾದೀನ್ ದೇವ್ ಖೆವ ಹಗಾಮ್ನ ನತರ್ ಕೆಥ್ರಾನ ಹಗಾಮ್ನ ವತಾಳ್‌ಶೇಕರಿ ಬೋಲಾನು ಇವ್ಣೆ ಪರ್ಖಿನ್ ದೇಖ್ಯು. 
\v 12 ಪರ್‌ಲೋಕ್‌ಥು ಮೋಕ್‍ಲೈರ‍್ಹುತೆ ಪರಿಶುದ್ದಆತ್ಮಥಿ ತುಮುನ ಸುವಾರ್ತೆನ ಬೋಲವಾಳು ಹಮ್ಕೆ ತುಮುನ ಖ್ಹಮ್‍ಜಾ಼ಡನಿತರ ಅಜು಼ ದೂತರ್ ಡೋಳಲಗಾಡಿನ್ ದೇಕ್ಣು ಕರಿ ಅಖ್ಹ್‌ಕರ‍್ಯುತೆತಿಮ್‍ ಅಖ್ಖಕಾಮ್ಮ ಇವ್ಣಖ್ಹಾಜೆ ಕಾಹೆ ಅಪ್ಣ ಖ್ಹಾಜೆಸ್ ಸೇವೆ ಕರಿರಾಖ್ಯುಸ್‌ಕರಿ ಇವ್ಣುನ ದೆಖಾಯು.
\s ಪರಿಶುದ್ ಜಿವ್ಣನ ಬುಲಾವ್ಣಿ
\p
\v 13 ಇನಾಖ್ಹಾಜೆ ತುಮೆ ತುಮಾರ ದಿಲ್ನ ಘಟ್‍ಕರಿಲೀನ್, ಅಛ್ಛಿ ಸೋಚ್‌ವಾಳ ಹುಯಿರ‍್ಹಿನ್, ಯೇಸು ಕ್ರಿಸ್ತ ಆವಾನಿ ವಖ್ಹ್‌ತೆ ತುಮುನ ಮಳ್‌ಶೇತೆ ವಾರ್‌ಖ್ಹಾನ ಉಪ್ಪರ್ ತುಮಾರಿ ಪೂರ ಭರೋಖ್ಹೊ ರ‍್ಹವಾದೆ. 
\v 14 ವಾತೆ ಖ್ಹಮ್‌ಜಾ಼ತೆ ಲಡ್ಕವ್ನಿತರ ಚಾ಼ಲೊ, ತುಮೆ ಅಗಾಡಿ ಬಿಣ್‍ಖ್ಹೈಲಿರ‍್ಹಾವಾನಿ ವಖ್ಹ್‌ತೆ ತುಮುನ ಥೂತೆ ನಿಕ್‌ಳ್ಯೊಜಾನ್ನಿ ತರಸ್ ಅಜೂ಼ಬಿ ಚಾ಼ಲಿಲ್ಯಾವಾಳ ನಾಹುಯಿರ‍್ಹೆವ್ಣುತೆ, 
\v 15 ತುಮುನ ಬುಲಾಯೋಹುಯೊ ಪರಿಶುದ್‌ಹುಯಿರ‍್ಹೋತೆ ಪರಕ್ಮಾಸ್ ತುಮೇಬಿ ವಿಧೇಯಹುಯಿ ರ‍್ಹೀನ್ ತುಮಾರಿ ಖ್ಹಾರಿ ಚಾ಼ಲ್‌ಮ ಇನಖ್ಹಾಜೆ ಪರಿಶುದ್ ಹುಯಿ‍ರ‍್ಹೆವೊ. 
\v 16 ಶನಕತೊ ಮೇ ಪರಿಶುದ್ ಹುಯಿರ‍್ಹೋತೆ ತಿಮ್ ತುಮೇಬಿ ಪರಿಶುದ್ ಹುಯಿರ‍್ಹೇವ್ಣು ಕರಿ ಪವಿತ್ರ ದಪ್ತರ್‌ಮ ಲೀಖೈರ‍್ಹೂಸ್‍ನಿ. 
\v 17 ಹರೇಕ್ ಜ಼ಣಾನಿ ಚಾ಼ಲ್‌ನ ದೇಖಿನ್ ಯೋ ಬೇದ್‌ಬಾವ್‌ಕೊಂತೆ ತೀರ್ಪ್‌ಕರಾವಾಳನ ತುಮೆ ಬಾಕರಿ ಪುಕಾರವಾಳ ಹುಯಿರ‍್ಹಾತೆ ಇನಾಖ್ಹಾಜೆ ಆ ಲೋಕ್ಮ ತುಮಾರು ಅರಾಮ್‌ನು ಜಿವ್ಣನ ದನ್ನ ಡರ್‌ಭಕ್ತಿಥಿ ಕಾಡೊ. 
\v 18 ತುಮಾರ ಗುರುಗುರಬ್‍ಲ್ಯಥಿ ಆಯೂತೆ ಕಾಮ್‌ಕೊಂತೆ ರೀತಿರಿವಾಜ್‍ಮ ಚಾ಼ಲ್‌ಚ಼ಲಣ್‌ಥಿ ತುಮುನ ಛುಟ್ಕಾರ್‌ ಕರ‍್ಯುತೆ, ರೂಪು, ಖ್ಹೊನ್ನನಿತರಾನು ಮಟಿಜಾ಼ವಾನು ರಾಛ಼ವ್‌ಥಿಕಾಹೆ. 
\v 19 ಯೇಸು ಕ್ರಿಸ್ತಕರಿ ಬೋಲಾನು ಶನು ದೋಷ್‍ಕೊಂತೆ, ಶುದ್ದ ಹುಯಿರ‍್ಹುತೆ ಮೇಂಢಾನ ಚೆಲ್ಕಾನು ಕಿಮ್ಮತ್ನ ಲ್ಹೋಯಿಥೀಸ್‍ಕರಿ ತುಮುನ ಮಾಲುಮ್‍ಛಾ಼ನಿ. 
\v 20 ಯೊ ಜಗತ್‌ ಉಬ್‌ಜಾ಼ನ ಅಗಾಡಿಸ್ ದೆವೈಜಾ಼ವಾಳೂ ಹುಯಿರ‍್ಹಿನ್, ಆ ಖ್ಹರ್ತಿನ ಹಗಾಮ್ಮ ತುಮಾರಖ್ಹಾಜೆ ದೆಖಾಯೊ. 
\v 21 ಇನ ಮರ‍್ಯಾಹುಯಾಮಾಥು ಉಠಾಡಿನ್ ಇನ ಮಹಿಮೆ ದಿದಾಹುಯಾ ದೇವ್‌ಮ ತುಮೆ ಇನೇಥಿ ವಿಶ್ವಾಸ್ ಕರಾವಾಳ ಹುಯಿರ‍್ಹಾಸ್. ಅಮ್‍ರ‍್ಹವಾಪರ್ ತುಮಾರಿ ವಿಶ್ವಾಸ್‍ಬಿ ಟಿವಾವ್ಣಿಬಿ ದೇವ್‍ಮಾಸ್‍ ಭೀಯುಸ್. 
\v 22 ತುಮೆ ಖ್ಹಾಚ ಉಪದೇಶ್‍ನ ವಿಧೇಯ ಹುಯಿರ‍್ಹಿನ್ ತುಮಾರ ಆತ್ಮಾನ ಪಾಕ್‍ ಕರಿಲಿದಾತೆ ಇನಾಖ್ಹಾಜೆ ಪಾಕ್‌ಮನ್‌ಥಿ ಭೈಯೆಭೇನೆನಿ ಪ್ಯಾರ್‌ವಾಳ ಹುಯಿರ‍್ಹೇವ್ಣು. ಅಮ್‍ರ‍್ಹವಾಪರ್, ಏಕ್‌ಥಿಏಕ್ ಪಾಕ್‍ದಿಲ್‍ಥೀಬಿ, ಛು಼ಟ ದಿಲ್‌ಥಿ ಪ್ಯಾರ್‌ಕರೊ. 
\v 23 ಶನಕತೊ ತುಮೆ ನವೇಥಿ ಪೈದಾ ಹುಯಿರ‍್ಹಾಸ್ತೆ ನಾಶ್ ಹುಯಿಜಾ಼ವಾನ ವಚನ್‍ಥಿಕಾಹೆ, ಕತೋಬಿ ನಾಶಹುವಾಕೊಂತೆ ವಚನ್‌ಥೀಸ್. ಯೋ ಕೆದೇಬಿ ಜಿವ್ತಜಾನ್‍ರ‍್ಹವಾಳ ದೇವ್ನಿ ವಚನ್‌ಥೀಸ್ ಉಬ್‌ಜ್ಯುತೆ. 
\v 24 ಶನಕತೊ ಪವಿತ್ರ ದಪ್ತರ್‌ಮ ಲೀಖೈರ‍್ಹುತಿಮ್; ಅದ್ಮಿ ಖ್ಹಾರೂಸ್ ಘಾಖ್ಹ್‌ನಿತರ ಛಾ಼. ಇನಿ ಮಹಿಮೆಖ್ಹಾರು ಘಾಖ್ಹ್‌ನು ಫೂಲ್ನಿತರ ಛಾ಼. ಘಾಖ್ಹ್‌ ಖ್ಹುಕೈಜಾ಼ಶೆ. ಇನು ಫೂಲ್ ಝ಼ಟ್‌ಕೈಜಾ಼ಶೆ. 
\v 25 ಕತೋಬಿ ಪ್ರಭುನಿ ವಾತ್‍ತೋಬಿ ಹಮೇಶಾಬಿ ರ‍್ಹಿಶೆ. ಯೋ ವಾತೆ ಖಿವಿಕತೊ ತುಮುನ ಬೋಲೈರ‍್ಹೀತೆ ಸುವಾರ್ತೆನಿ ವಚನಸ್\f + \fr 1:25 \fr*\ft ಯೆಶಾಯ 40;6;8\ft*\f*.
\c 2
\s ಜಿವ್‌ತಜಾನ್ನೊ ಬಂಡೊ ಅಜು಼ ಪವಿತ್ರ ದೇಖ್ಹ್‌
\p
\v 1 ಇನಾಖ್ಹಾಜೆ ಖ್ಹಾರು ಖರಾಬ್ ಫನೈಬಿ ಖ್ಹಾರು, ಠಗಾವನುಬಿ, ಚೋ಼ರ್ ಫನೈಬಿ. ಪೇಟ್ನೊ ಬಳಾಪೊಬಿ, ಖ್ಹಾರುಸ್ ಗಾಳೆದ್ಯವಾನುಬಿ ತುಮಾರಮಾಥು ಕಾಡಿನಾಖೊ. 
\v 2 ನವೇಥಿ ಪೈದಾಹುವಾತೆ ಲಡ್ಕನಿತರ ಛಾ಼ತೆತುಮೆ ಮೋಟ ಹುವಾನಿತರ ವಚನ್‍ಕರಿ ಆತ್ಮೀಕ್‌ದೂದ್ನ ತರ್ಖ್ಹೊ. ಯೊ ಪಿದಾತೊ ರಕ್ಷಣೆ ಲಿಶು. 
\v 3 ಶನಕತೊ ಪ್ರಭು ಅಛ್ಛೊ಼ಕರಿ ತುಮೆ ಲಜ಼ತ್‌ ದೇಖ್ಯಾನಿ ಕರಿ ಪವಿತ್ರ ದಪ್ತರ್‌ಮ ಬೋಲಸ್ನಿ. 
\v 4 ತುಮೆ ಜಿವ್ತುರ‍್ಹವಾನ ಬಂಡೊ ಹುಯಿರ‍್ಹಾವಾಳಕನ ಐರ‍್ಹಾಸ್. ಯೋ ಬಂಡೊ ಅದ್ಮೆವ್‍ಥಿ ಝಿಟ್ಕಾರ‍್ಯುತೋಬಿ ದೇವ್‍ಥಿ ಚೂ಼ಣೈಗಯಹುಯುಬಿ ಘಣ ಮೋಲ್‍ನೂಬಿ ಹುಯು. 
\v 5 ತುಮೆ ಜಿವ್ತುಜಾನ್‍ವಾಳೊ ಬಂಡೊಹುಯಿನ್ ಆತ್ಮನು ಸಂಬಂದ್‍ವಾಳು ಮಂದಿರ್‌ ಹುವಾನಖ್ಹಾಜೆ ಬಣಾವಟ್ ಹುವ್‍ಕರಸ್, ಯೇಸು ಕ್ರಿಸ್ತಥಿ ದೇವ್ನ ಸ್ವೀಕಾರ್ ಹುವಾನಿತರಾನು ಆತ್ಮೀಕ್ ಬಲಿನ ದ್ಯವಾನ ಪರಿಶುದ್ ಯಾಜಕ್‌ನ ಖೂಮ್‌ವಾಳ ಹುಯಿರ‍್ಹಾಸ್. 
\v 6 ಪವಿತ್ರ ದಪ್ತರ್‌ಮ ಶಾತ್‌ ಬೋಲಸ್‍ಕತೊ “ಹಂದೇಕ್, ಚೀಯೋನ್‌ಮ ಕೋಣಾನೊಬಂಡೊ ಮ್ಹೇಲುಸ್, ಯೊ ಚೂ಼ಣೈಗಯುಹುಯು, ಘಣ ಮೋಲ್ನು ಹುಯಿರುಸ್ ಇನಾಪರ್ ವಿಶ್ವಾಸ್ ರಾಖವಾಳೊ ಕದೇಬಿ ಆಖ್ಹ್ ತೋಡಿಲಿಶೆಕೊಯ್ನಿ” 
\v 7 ಹಮ್ಕೆ ವಿಶ್ವಾಸ್ ಕರವಾಳ ತುಮೂನ ಯೋ ಘಣ ಮೋಲ್ನೊ ಹುಯಿರ‍್ಹೊಸ್ ಕತೋಬಿ ವಿಶ್ವಾಸ್‌ಕರ‍್ಯುಕೊಂತೆ ಇವ್ಣುನ, “ಘರ್ ಭಾಂದಾವಾಳು ಝಿಟ್ಕಾರ‍್ಯೊಹುಯೊ ಬಂಡೊಸ್ ಘಣು ಮುಖ್ಯ ಕೋಣಾನೊ ಬಂಡೊ ಹುಯೊ”. 
\v 8 ಅಜು಼ ಪವಿತ್ರ ದಪ್ತರ್‌ಮ ಅಜೇ಼ಕ್ಆಡಿ ಶಾತ್‌ ಲಿಖಾಸ್‌ಕತೊ “ಅದ್ಮಿ ಧೊಕ್‌ಡೈನ್ ಇವ್ಣೆ ರಡ್ಕಾನೊ ಬಂಡೊ ಹುಯಿರೋಸ್” ಇವ್ಣೆ ದೇವ್ನಿ ವಚನ್ನ ಅವಿಧೇಯ ಹುವಾತೆ ಇನಖ್ಹಾಜೆ ಯೊ ಬಂಡಾನ ಠೋಕರ್ ಲಾಗಿನ್‍ಪಟ್ಕಸ್. ಇನಖ್ಹಾಜೇಸ್ ಇವ್ಣೆ ಚೂ಼ಣೈಗಯೂತೆ. 
\v 9 ಕತೋಬಿ ಅಂಧಾರಮ ಛಾ಼ತೆ ತುಮುನ ಬುಲೈನ್ ಇನ ಆಶ್ಚರ್ಯನ ಉಜಾ಼ಳಮ ಮಳೈಲಿದ ಹುಯಾನ ಅದ್ಭುತ್ ಕಾಮ್ನ ಕರಾವಳ ಹೋಣುಕರಿ ತುಮೆ ಚೂ಼ಣೈಗಯುಹುಯು ಜ಼ಗ್‌ಜಾ಼ತ್‌ಬಿ, ರಾಜಾ಼ನ ಖಾನ್‌ದಾನ್ನ ಯಾಜಕ್‍ಬಿ, ಪರಿಶುಧ್ ಅದ್ಮಿಬಿ, ದೇವ್ನ ಶೊಂತ್‌ ಅದ್ಮಿಬಿ ಹುಯಿರ‍್ಹಾಸ್. 
\v 10 ಏಕ್‌ ಹಲ್ಲ ತುಮೆ, ದೇವ್ನ ಅದ್ಮೆವ್‍ ಕೋಥಾನಿ. ಕತೋಬಿ ತುಮೆ ಹಮ್ಕೆ ದೇವ್ನ ಅದ್ಮಿಹುಯಿರಾಸ್; ಏಕ್‌ಹಲ್ಲ ದೇವ್ನ ಗೋರ್‌ನ ಮಾಲುಮ್ ಕರಿರಾಖ್ಯಥ ಕೊಯ್ನಿ. ಕತೋಬಿ ಹಮ್ಕೆ ದೇವ್ನ ಗೋರ್‌ನ ಲೀರಾಖವಾಳ ಹುಯಿರ‍್ಹಾಸ್.
\s ದೇವ್ನು ಸೇವಕ್ ಖ್ಹಾರು
\p
\v 11 ಪ್ಯಾರ್‌ನ ದೋಸ್ತಿವೊ ಆ ಜಗತ್ಮ ಪರದೇಖ್ಹ್‌ವಾಳಬಿ ತಮಾಖ್ಹೊ ದೆಖಾವಾಳುಬಿ ಹುಯಿರಾತೆ ತುಮೆ ತುಮಾರ ಆತ್ಮಾನ ವಿರೋದ್ ಹುಯಿನ್ ಜಂಗ್ ಭೀಡಾತೆ ಶರೀರ್‌ನು ನಿಕಳ್ಯ ಜಾನ್‌ಥಿ ದೂರ್ ರ‍್ಹೇವ್ಣುಕರಿ ಮೇ ತುಮುನ ಗಿಂಗೈಲೆವುಸ್. 
\v 12 ತುಮಾರಿ ಚಾ಼ಲ್‍ಚ಼ಲಣ್‍ ಅಲ್ಹಾವ್‌ ಅದ್ಮಿವ್‌ನ ಇಚ಼್‌ಮ ಯೋಗ್ಯಹುಯಿರ‍್ಹವಾದೆ, ತದೆ ಇವ್ಣೆ ಖೆವಿಸ್ ವಾತ್ನಿ ಬಾರೇಮ ತುಮುನ ಖರಾಬ್‍ಕರಿ ಚಾ಼ವ್‌ಣ್ಯ ಕರಾಸ್ಕಿ ಯೋಸ್ ತುಮಾರಿ ವಾತೆಮ ತುಮಾರಿ ಅಛ್ಛಿ ಚಾ಼ಲ್‍ಚ಼ಲಣ್ಣಾ ಡೋಳೆಖ್ಹು ದೇಖಿನ್, ದೇವ್ ಆವನ ದನೂಮ ಅಪ್ಣುನ ಇವ್ಣೆ ಖ್ಹರಾವ್‌ಶೆ. 
\v 13 ಆ ಜಗತ್‌ನು ಅದಿಕಾರಿ ನೇಮಕ್ ಕರ‍್ಯುತೆ ಹರೇಕ್ ಒಪ್ಪಂದನಾಬಿ ಪ್ರಭುನಖ್ಹಾಜೆ ತುಮೆ ಅಧೀನ್‍ಹುವೊ. ಅಖ್ಖಾಸ್‌ಪರ್ ಅದಿಕಾರಿ ಹುಯಿರೋತೆ ರಾಜ಼ನಾಬಿ ಅಧೀನ್‌ರ‍್ಹವೊ, 
\v 14 ಅಜು಼ ರಾಜ಼ ಮೋಕ್‌ಲಸ್ತೆ ಅಧಿಕಾರಿಯೇನ ಗಲತ್‌ ಕರಾವಾಳನ ನಿಶತ್‌ದ್ಯವಾನಬಿ ಅಛ್ಛು಼ಕರಾವಾಳನ ಹುಮ್ಮಖ್ಹ್ ದ್ಯವಾನ ಇವ್ಣೆ ಮೋಕ್‌ಲೈರಾಸ್ ಕರಿ ಖ್ಹಮ್‌ಜಿನ್‌ ಇವ್ಣುನ ಅಧೀನ್‍ಹುವೊ. 
\v 15 ತುಮೆ ಅಛ್ಛು಼ಕರಾನಿ ವಖ್ಹ್‌ತೆ ತುಮಾರಿ ಬಾರೇಮ ಖರಾಬ್ ವಾತೆಬೋಲಾನು ಬಿಣ್‍ಅಕ್ಲಿ ಅದ್ಮಿವ್‌ನ ಮ್ಹೋಡು ಮುಚಾ಼ನಿತರ ಕರಾನುಸ್ ದೇವ್ನಿ ಖ್ಹೂಜ಼್ ಹುಯಿರ‍್ಹಿಸ್. 
\v 16 ಛುಟ್ಕಾರ್ ಲೀಲೆವೊ, ಕತೋಬಿ ಖರಾಬ್ ಫನೈನ ಲಪಾಡನಖ್ಹಾಜೆ ತುಮಾರಿ ಛುಟ್ಕಾರ್‌ನ ನಕೊ ಉಪಯೋಗ್‍ಕರೊ. ಕತೋಬಿ ತುಮೆ ದೇವ್ನ ಸೇವಕ್‌ನಿತರ ಚಾ಼ಲಿಲೆವೊ. 
\v 17 ಖ್ಹಾರಸ್ನ ಮರ್ಯಾದಿ ಕರೊ ವಿಶ್ವಾಸಿ ಭೇನೆ ಭೈಯೇವೊನ ಪ್ಯಾರ್‌ಕರೊ. ದೇವ್ನ ಡರೊ. ಅಜು಼ ರಾಜಾ಼ನಬಿ ಮರ್ಯಾದಿ ದೆವೊ.
\s ಕ್ರಿಸ್ತನಿ ಖ್ಹತಾಪ್ಣಿನಿ ಬಾರೇಮ.
\p
\v 18 ಸೇವಕ್ ಹುಯಿರ‍್ಹಾತೆ, ತುಮೆ ತುಮಾರ ಯಜಮಾನ್ನ ಪೂರ ಮರ್ಯಾದಿಥಿ ಅಧೀನ್ ಹುಯಿರ‍್ಹೇವೊ. ಶೇದೇವ್ ರ‍್ಹವಾಳಾಬಿ ಅಛ್ಛಿ಼ಸೋಚ್‌ರ‍್ಹವಾಳನ ಖಲಿ ಕಾಹೆತೆ ಮೊಂಡಿ ಬುದ್ದಿವಾಳನಾಬಿ ವಿಧೇಯ ಹುಯಿರೇವೊ. 
\v 19 ಎಕ್‍ಜ಼ಣೊ ಅನ್ಯಾಮ್‍ಥಿ ಖ್ಹತಾವಾಳೊ ಹುಯಿರ‍್ಹಿನ್ ದೇವ್ ದೇಕ್‌ಶೆಕರಿ ಇನ ಖ್ಹಮಾಳಿಲಿದೋತೊ, ಯೋ ಖ್ಹರಾವ್ಣಿನ ಲ್ಹಾಯಕ್ ಹುಯಿರ‍್ಹೊಸ್. 
\v 20 ಗಲತ್‍ಕರೀನ್ ಘುಖ್ಹ್‌ತ ಖಾವಾಮ ತುಮೆ ಖ್ಹಮಾಳಿಲಿದಾತೊ ಇಂಥಿ ಶನಿ ಕೀರತ್ ಮಳ್ಯು? ಕತೋಬಿ ಅಛ್ಛು಼ಕರಿನ್ ಖ್ಹತ್‍ವಾಮ ತುಮೆ ಖ್ಹಮಾಳಿಲಿದಾತೊ ಆ, ದೇವ್ನ ಖುಷಿ ಕರಾವಸ್. ದೇವ್ ತುಮುನ ಪಸಂದ್‌ ಕರ್ಶೆ. 
\v 21 ಅನಖ್ಹಾಜೆಸ್ ತುಮೆ ಬುಲೈರ‍್ಹಾಸ್ತೆ.ಕ್ರಿಸ್ತ ಜಿನುಬಿ ತುಮಾರಖ್ಹಾಜೆ ಖ್ಹತಾಪ್ಣಿಪಡಿನ್, ತುಮೆ ಇನ ಖೋಜ಼್‌ನಿ ಖ್ಹಣೇದ್‍ಮ ಚಾ಼ಲ್‌ನುಕರಿ ತುಮುನ ಏಕ್‌ ಸಾಕ್ಷಿನ ವತಾಳಿನ್ ಜೈರ‍್ಹೊಸ್. 
\v 22 ಯೋ ಶನು ಪಾಪ್‌ಬಿ ಕರ‍್ಯೊಕೊಯ್ನಿ, ಇನ ಮ್ಹೋಡಾಮಾಥಿ ಖೆವಿ ಠಗಾವಾನಿ ವಾತ್‍ಬಿ ಮಳಿಕೊಯ್ನಿ. 
\v 23 ಗಾಳೆ ದ್ಯವಾಳನ ಪಾಛೊ಼ ಗಾಳೆದಿದೊಕೊಯ್ನಿ. ಯೊ ಖ್ಹತಾಪ್ಣಿ ಕರಾನಿ ವಖ್ಹ್‌ತೆ ಕಿನಾಬಿ ಡರಾಯೊಕೊಂತೆ, ನ್ಯಾವ್‌ಥಿ ತೀರ್ಪ್ ಕರಾವಾಳನ ಇನ ಕಾಮ್ನ ದಿನಾಖಿದಿದೊ. 
\v 24 ಅಪ್ಣೆ ಅಪ್ಣ ಪಾಪ್ನ ಭಾಗ್ನ ಮರೀನ್ ನೀತಿವಾಳ ಹುಯಿನ್ ಬಚಾ಼ನಿತರ ಅಪ್ಣ ಪಾಪ್ನ ಯೋಸ್ ಇನ ಶರೀರ್‌ಪರ್‌ ಢೊಯ್ಲಿನ್ ಶಿಲ್‌ಬೆಪರ್ ಮರಿಗೊ. ಇನ ಘಾವ್‍ಥಿ ತುಮುನ ಅಛ್ಛು಼ಹುಯು. 
\v 25 ಶನಕತೊ ತುಮೆ ವಾಟ್‌ ಭೈಕಿಗಾತೆ ಮೇಂಢಾನಿತರ ಹುಯಿರ‍್ಹಾಸ್ ಕತೋಬಿ ಹಮ್ಕೆ ತುಮೆ ಪಾಛ಼ ಫರೀನ್ ತುಮಾರ ಆತ್ಮಾನ ಪಾಳವಾಳಕನಾಬಿ ಕುರುಬ ಹುಯಿರ‍್ಹಾವಾಳಕನ ಆಯಿರ‍್ಹಾಸ್.
\c 3
\s ಬಾವಣ್‍ ಅಜು಼ ಬಾವ್ರಿ
\p
\v 1 ಇಮ್ನಿಸ್ ಪರಕ್ಮ ಬಾವ್ಣೆವೊ, ತುಮಾರ ಬಾವ್ರಿನಿ ದಾಬುಕ್ಮ ರ‍್ಹವೊ. ಇವ್ಣಾಮ ಥೋಡುಜ಼ಣು ದೇವ್ನಿ ವಚನ್ನ ಅವಿಧೇಯ ಹುಯಿರೂತೋಬಿ, ತುಮಾರ ಅಛ಼್ಛ ಕಾಮ್ನ ದೇಖಾಥೀಸ್ ಇವ್ಣೆ ವಿಶ್ವಾಸ್‌ಮ ಆವಾನಿತರ ಉಶೆ. ಇನಾಖ್ಹಾಜೆ ತುಮೆ ಏಕ್‌ ವಾತ್‍ಬಿ ಬೋಲ್ನುನಾತೆ ರ‍್ಹವಾನು ಜ಼ರೂರತ್ ಛಾ಼. 
\v 2 ಶನಕತೊ ಇವ್ಣೆ ತುಮಾರಿ ಪರಿಶುದ್ ಅಜು಼ ಇಜ಼್ಜತ್‌ನಿ ಚಾ಼ಲ್‌ಥೀಸ್ ಅಛ್ಛಿವಾಟ್‍ಪರ್ ಆವ್‌ಶೆ. 
\v 3 ಚೋ಼ಟಿ ಗೂಥಿಲ್ಯಾವಾನೂಬಿ ಖ್ಹೊನ್ನುಖ್ಹರಪ್‍ಬಿ ಅಜು಼ ಅಛ಼್ಛು ಲುಂಗ್‌ಡು ಫೇರಾನುಬಿ ಆ ಅಖ್ಖು ಭಾರ್‌ಲ್ಯು ಶನ್‍ಗಾರ್‌ಸ್ ಯೋ ತುಮಾರು ಪೇರ್‌ವಾಖ್ಹ್ ನಾ ಹುಯಿರ‍್ಹೇಣು ಎತ್ರೇಸ್. 
\v 4 ಕತೋಬಿ ಅನಬದಲ್ ದೇವ್ನ ಡೋಳಾಮ ಘಣ ಮೋಲ್ನುಬಿ ಅಜು಼ ಕದೇಬಿ ರ‍್ಹವಾನುಬಿ ಹುಯಿರ‍್ಹುತೆ ಶೇದೇವ್‍ಬಿ ಶಾಂತಿನೊ ಮನ್ ತುಮಾರ ಮಹಿನ ದಿಲ್‌ನು ಶನ್‌ಗಾರ್ ಹುಯಿರ‍್ಹವಾದೆ. 
\v 5 ಫಾಚ಼್‌ಲ್ಯಾ ಹಗಾಮ್ಮ ದೇವ್‌ಪರ್‌ ಭರೋಖ್ಹೊ ರಾಖಿಮ್ಹೆಲ್ಯುಥುತೆ ಭಕ್ತೆ ಹುಯಿರ‍್ಹಿಥಿತೆ ತಯೇಡಖ್ಹಾರು ಜಿನು ಅಮ್ಮಸ್ ಇವ್ಣು ಇವ್ಣೇಸ್ ಬಾವ್ರಿಯೇವ್‍ನಿ ದಾಬುಕ್ಮ ರ‍್ಹೀನ್ ಶನ್‌ಗಾರ್ ಕರಿಲಿದಿಯೆಥಿ. 
\v 6 ಸಾರ ಅಬ್ರಹಾಮ್‌ನ ವಿಧೇಯ ಹುಯಿರ‍್ಹಿನ್ ಇನ ಯಜಮಾನ್‍ಕರಿ ಬೋಲಿ. ತುಮೆ ಅಛ್ಛು಼ಕರಾವಾಳಿ ಹುಯಿರ‍್ಹಿನ್ ಶನಿ ಡರ್‌ ಝ಼ಪಕ್ಣಿಮ ನಾಪಡವಳಿ ರ‍್ಹೀಯೆತೊ ತುಮೆ ಸಾರನಿ ಛೋ಼ರಿಯೇ ಹುಯಿರ‍್ಹಿಶು, 
\v 7 ಅಮ್ನಿಸ್ ಪರಕ್ಮ ಬಾವ್ರಿವೊ, ತಯೇಡ ತುಮಾರೇಥೀಬಿ ಕಮ್‌ಜೋ಼ರಿಕರಿ ಮಾಲುಮ್‌ಕರಿನ್, ತುಮೆ ತುಮಾರಿ ಬಾವ್ಣೆನ ಜೋ಼ಡ್ಮ ಅಛ್ಛು಼ ಅಕ್ಕಲ್‍ಥಿ ಚಾ಼ಲಿಲೇವೊ, ಇವ್ಣೆ ಹಮೇಶಾನಿ ಜಿ಼ಂದ್‌ಗೀನಿ ವರಾನ ತುಮಾರಿ ಜೋ಼ಡ್ಮಾಸ್ ಲಿಶೆಕರಿ ಮಾಲುಮ್‌ ಕರಿಲೀನ್ ಇವ್ಣುನ ಮರ್ಯಾದಿಕರೊ. ಅಮ್ ಕರ‍್ಯತೊ ತುಮಾರಿ ಪ್ರಾರ್ಥನೆನ ಅಡ್ಡಿ ಉಶೆಕೊಯ್ನಿ.
\s ಅಛ್ಛಾ಼ನಖ್ಹಾಜೆ ಲ್ಯಾವನಿಖ್ಹತಾಪ್ಣಿ
\p
\v 8 ಇನಖ್ಹಾಜೆ ತುಮೆಖ್ಹಾರು ಏಕ್‌ ದಿಲ್‌ವಾಳ ಹುಯಿರ‍್ಹಿನ್ ಆರ್‌ಗೋರ್‌ ಕರಾವಾಳ ಹುಯಿನ್ ಜಿವೊ; ಏಕ್‌ಥಿ ಏಕ್‌ ಮಾಲುಮ್ ಕರಿಲ್ಯಾವಾನ ಕೊಶೀಷ್ ಕರೊ. ಏಕ್‌ಥಿ ಏಕ್‌ ಭೈಯೆ ಭೇನೆನಿತರ ಪ್ಯಾರ್‌ಕರೊ. ಅಜು಼ ಗೋರ್‌ ಕರವಾಳು ಶೇದೇವ್‍ಬಿ ಹುಯಿರ‍್ಹೇವೊ. 
\v 9 ಖರಾಬ್‌ನ ಖರಾಬ್, ಚಾ಼ವ್‍ಣ್ಯನ ಚಾ಼ವ್‌ಣ್ಯ ನಾಕರ‍್ನುತೆ ಆಶೀರ್ವಾದ್‌ ಕರೊ ಅನಖ್ಹಾಜೆಸ್ ದೇವ್ನೆ ತುಮುನ ಬುಲೈರಾಖ್ಯೋಸ್ನಿ. ಅಮ್ ಕರಾವಾಳ ಹುಯಿರ‍್ಹಾತೊ ತುಮೆ ಆಶೀರ್ವಾದ್‌ನ ಹಕ್‌ಥಿ ಲೀಲಿಶು. 
\v 10 ಶನಕತೊ ಪವಿತ್ರ ದಪ್ತರ್ ಶಾತ್ ಬೊಲಸ್‍ಕತೊ, “ಆ ಜಾನ್ನ ಪ್ಯಾರ್ ಕರ್ತೊಹುಯಿನ್ ಅಛ್ಛದನ್ನ ದೇಖಾನ ಆಖ್ಹ್ ಕರಾವಾಳೊ ಖರಾಬ್ ವಾತ್ ನಕೊ ಬೋಲಾದೆ ಝೂ಼ಟಿ ನಕೊ ಬೋಲಾದೆ. 
\v 11 ಇವ್ಣೆ ಯೊ ಖರಾಬ್‌ನ ಮ್ಹೇಲಿನ್ ಅಛ್ಛಾ಼ನ ಕರಾದೆ ಸಮಾಧಾನ್ನ ಢೂಂಡಿನ್ ಇನಾಖ್ಹಾಜೆ ಕೋಶಿಶ್ ಕರಾದೆ. 
\v 12 ಶನಕತೊ ನೀತಿವಾಳಪರ್ ಪ್ರಭುನಿ ನಿಘ್ಯ ಛಾ಼. ಅಜು಼ ಯೊ ಇವ್ಣಿ ಬಿಂತಿನ ಕಾನ್‍ದೇಸ್. ಕತೋಬಿ ಖರಾಬ್ ಕರವಾಳನ ಪ್ರಭು ಮ್ಹೋಡು ಫರೈಲೇಸ್. 
\v 13 ತುಮೆ ಕದೇಬಿ ಅಛ಼್ಛುಕರಾನ ದಿಲ್‌ಲಗಾಡವಾಳು ಹುಯಿರ‍್ಹಾತೊ ತುಮುನ ಕೇಡ್ ಕರಾವಾಳು ಕೋಣ್‍ರ‍್ಹಿಶೆ? 
\v 14 ಏಕ್‌ ವಖ್ಹತ್ ತುಮೆ ನೀತಿನ ಖ್ಹಾಜೆಸ್ ಖ್ಹತಾಪ್ಣಿ ಪಡ್ಯಾತೊ ತುಮೆ ಧನ್ಯ ಹುಯಿರ‍್ಹಾಸ್. ಖಿವಿ ಧಮ್ಕಿನ ತುಮೆ ಡರೊನಕೊ, ಅಜು಼ ವೇಚ಼್‌ಣೆ ನಕೊಕರೊ. 
\v 15 ಕತೋಬಿ ಕ್ರಿಸ್ತನ ಪ್ರಭುಕರಿ ತುಮಾರ ದಿಲ್ಮ ಜ಼ತನ್‌ಕರೊ. ತುಮಾರಮ ಛಾ಼ತೆ ಭರೋಖ್ಹಾನ ಆಧಾರಶಾತ್‍ಕರಿ ತುಮುನ ಪುಛಾ಼ವವಾಳ ಹರೇಕ್ ಜ಼ಣಾನ ಜ಼ವಾಬ್‍ದ್ಯವಾನ ಕದೇಬಿ ತಯಾರ್ ರ‍್ಹವೊ. ಕತೋಬಿ ಅನ ಶೇದೇವ್ ಹುಯಿರ‍್ಹಿನ್ ಮರ್ಯಾದಿಥಿ ಬೋಲೊ. 
\v 16 ಅಜು಼ ಅಛ಼್ಛು ದಿಲ್‌ನಿಸಾಕ್ಷಿವಾಳ ಹುಯಿ‍ರ‍್ಹೆವೊ. ತದೆ ತುಮೆ ಖರಾಬ್‌ನ ಕರಾವಾಳಕರಿ ತುಮಾರಿ ಬಾರೇಮ ಖರಾಬ್ ವಾತೆ ಬೋಲಿನ್ ಕ್ರಿಸ್ತಮಛಾ಼ತೆ ತುಮಾರಿ ಅಛ್ಛಿ಼ಚಾ಼ಲ್‍ನಿ ಬಾರೇಮ ಖರಾಬ್‍ವಾತ್‍ ಬೋಲಾವಾಳು ತುಮುನ ಚಾ಼ವ್‍ಣ್ಯ ಕಾಡಾನ ಖ್ಹರ್‌ಮೈಜಾ಼ಶೆ. 
\v 17 ಖರಾಬ್ ಕಾಮ್ ಕರಾಥೀಬಿ ದೇವ್ನಿ ಮರ್ಜಿನಿ ಘೋಣಿ ಅಛ಼್ಛಚಾ಼ಲ್ ಚಾ಼ಲವಾಳ ಹುಯಿರ‍್ಹಿನ್, ಖ್ಹತಾಪ್ಣಿ ಪಡಾನುಸ್ ಅಛ್ಛು಼. 
\v 18 ಕ್ರಿಸ್ತಬಿ ನೀತಿವಾಳೊ ಹುಯಿರ‍್ಹಿನ್, ಅನೀತಿವಾಳಾನ ಖ್ಹಾಜೆ ಜಾನ್‍ದೀನ್ ಅಪ್ಣುನ ದೇವ್‌ಕನ ಮಳಾವನಖ್ಹಾಜೆ ಎಕ್ಕಸ್ ವಖ್ಹತ್ ಪಾಪ್ನ ಮಟಾವನಖ್ಹಾಜೆ ಖ್ಹತಾಪ್ಣಿ ಪಡೀನ್ ಶರೀರ್‌ಮರ‍್ಹೀನ್ ಆತ್ಮಮ ಜಿವವಾಳೊ ಹುಯೊ. 
\v 19 ಆನಾಹುಯಿನ್ ಯೋ ಆತ್ಮನೊ ರೂಪ್‍ಲೀನ್ ಜೇಲ್‌ಮಥೂತೆ ಅಖ್ಖಾಆತ್ಮಕನ ಜೈ಼ನ್ ಸುವಾರ್ತೆನ ಬೋಲಿ ಖ್ಹಮ್‌ಜಾ಼ಡ್ಯೊ. 
\v 20 ಕತೊ ಅಗ್‍ಲ್ಯ ಹಗಾಮ್ಮ ನೋಹ ಜ಼ಹಾಜ಼್‌ ಭಾಂದಾನಿ ವಖ್ಹತ್‌ಮ ದೇವ್ ದೀರ್ಘಶಾಂತಿಥಿ ಟಿವೈರ‍್ಹವಾನಿ ವಖ್ಹತ್‌ಮ ಇವ್ಣೆ ಇನ ಅವಿಧೇಯ ಹುಯಿರ‍್ಹುಥು. ಯೋ ಜ಼ಹಾಜ಼್‍ಮ ಥೂತೆ ಆಟ್ ಅದ್ಮಿ ಖಲಿ ಪಾಣಿಮಾಥು ಬಚ್ಯು. 
\v 21 ಯೋ ಹಮ್ಕೆ ತುಮುನ ಬಚಾ಼ಡನು ಬ್ಯಾಪ್ತಿಸ್ಮನು ಏಕ್‌ ರೂಪ್ ಹುಯಿರ‍್ಹುಸ್. ಆ ಖಲಿ ಶರೀರ್‌ನು ಮೇಲೊ ಧೊವಾಕೊಯ್ನಿ. ಕತೋಬಿ ಆ ಅಛ಼್ಛು ದಿಲ್ನಿಸಾಕ್ಷಿಥಿ ದೇವ್ನಿ ಜೋ಼ಡ್ಮಕರಾನಿ ವಾಗ್ದಾನ್‌ ಹುಯಿರ‍್ಹೀಸ್. ಅಜು಼ ಯೇಸುಕ್ರಿಸ್ತ ಪಾಛು಼ಜಿವ್ತು ಉಠಾಥಿಸ್ ಹಮ್ಕೆ ಆ ಅಪ್ಣುನ ರಕ್ಷಣೆದಿಶೆ. 
\v 22 ಹಮ್ಕೆ ಯೇಸು ಪರ್‌ಲೋಕ್ನ ಜೈ಼ನ್ ದೇವ್ನ ಖಾವಿಬಾಜು಼ಮ ಬೇಠೋಸ್. ಖ್ಹಾರುಸ್ ದೇವ್‌ದೂತರ್‌ಬಿ ಪರಲೋಕ್ನು ಅದಿಕಾರಿಖ್ಹಾರು ಅಜು಼ ಶಕತ್‍ಖ್ಹಾರನ ಉಪ್ಪರ್ ಯೊ ರಾಜ಼್‌ಭಾರ್ ಚ಼ಲವ್‍ಕರಸ್.
\c 4
\s ಬದ್ಲಿಹುಯು ಜಿವ್ಣು
\p
\v 1 ಕ್ರಿಸ್ತನೆ ಅಪ್ಣಖ್ಹಾಜೆ ಇನ ಶರೀರ್‌ಮ ಲತಾಡ ಪಡ್ಯುತೆಖ್ಹಾಜೆ ತುಮೇಬಿ ಜಿನು ಯೋ ದಿಲ್‌ವಾಳ ಹುಯಿನ್ ಖ್ಹತಾಪ್ಣಿಲ್ಯವಾನ ತಯಾರ್‌ಹುವೋ. ಶನಕತೊ ಶರೀರ್‌ಮ ಖ್ಹತಾಪ್ಣಿ ಪಡ್ಯೊಹುಯೊ, ಪಾಪ್ ಕರಾನು ಭಿರಾಖವಾಳೊ ಹುಯಿರ‍್ಹೊಸ್. 
\v 2 ಇನಖ್ಹಾಜೆ ಛಾ಼ತೆ ಇನ ಜಿವ್ಣನ ಹಗಾಮ್ಮ ಬಿಜೂ಼ಬಿ ಅದ್ಮಿಯೇವ್‌ನಿ ತರಖ್ಹ್‌ನಿ ಪರಕ್ಮ ಜಿವ್ಣುನಾತೆ ದೇವ್ನಿ ಮರ್ಜಿನಿ ಪರಕ್ಮ ಜಿವ್ಣುಕರ‍್ನು. 
\v 3 ತುಮೆ ಖ್ಹರಮ್‌ಕೊಂತೆ ರ‍್ಹವಾನು, ನಿಕ್ಳಜಾನ್, ಪಿಯಾನು, ಜಾ಼ಖ್ಹತ್‍ಖರ್ಚ್, ಕಯೆಪ್‍ಛ಼ಡಾವನು, ಕಚಿಂಡ್‍ನಿತರನು ಮೂರತ್ನಿಫೂಜ಼. ಆಸ್ ಖ್ಹಾರು ಚ಼ಲಾವಮಾಬಿ ಯೆಹೂದ್ಯರ್‌ಕಾಹೆತೆ ಅದ್ಮಿನ ಲ್ಹಾಯಕ್‍ರ‍್ಹವಾನು ಖರಾಬ್‌ಕಾಮ್‍ಖ್ಹಾರು ಕರಮಾಬಿ, ವಖ್ಹತ್ ಕಾಡ್ಯತೆ ಬಶ್‌. 
\v 4 ಇವ್ಣೆ ಕರಾಸ್ತೆ ಹೋಯಿಕೊಂತೆಯೆತ್ರೆ ಜಿವ್ಣಮ ತುಮೆ ಮಳಕೊಂತೆ ಇನಖ್ಹಾಜೆ ಇವ್ಣೆ ಆಶ್ಚರ್ಯಪಡಿನ್ ತುಮುನ ಚಿಂಘಾವ್ಣಿ ಕಾಡಸ್‌. 
\v 5 ಇವ್ಣೆ ಬಚಿರ‍್ಹಾವಳನಬಿ ಮರ‍್ಯಹುಯಾನಬಿ ನ್ಯಾವ್‌ ಫೇಡಾನ ತಯಾರ್‌ರ‍್ಹಾವಳ ದೇವ್ನ ಜ಼ವಾಬ್ ದೇವ್ಣು. 
\v 6 ಮರಿರ‍್ಹಾವಳು ಅದ್ಮಿನಿಜಾತ್ಮ ಆವಾನು ಮರಣ್‌ಕರಿ ತೀರ್ಪ್‌ನ ಶರೀರ್‌ಮರ‍್ಹವಾನಿ ವಖ್ಹ್‌ತೆ ಲೀರಾಖ್ಯುಸ್. ಇವ್ಣೆ ಆತ್ಮಾನಿ ಸಂಬಂದನಿ ಪರಕ್ಮ ದೇವ್ನಿತರ ಜಿವ್ಣುಕರಿ ಇವ್ಣುನಾಬಿ ಸುವಾರ್ತೆ ಬೋಲಾಯು.
\s ದೇವ್ನ ವಾರ್ಖ್ಹಾನ ದೇಖಿಲ್ಯವಾಳೊ.
\p
\v 7 ಖ್ಹಾರಸ್‌ನು ಖ್ಹರ್ತಿನು ಹಗಾಮ್ ಖನ್ನೆ ಹುಯಿರ‍್ಹುಸ್. ಅನಖ್ಹಾಜೇಥಿ ತುಮಾರು ತುಮೆ ದಾಬುಕ್ಮ ರ‍್ಹವಾಳ ಹುಯಿನ್ ಪ್ರಾರ್ಥನೆ ಕರಾನ ತಾಖತ್‍ವಾಳ ಹುಯಿ‍ರ‍್ಹೆವೊ. 
\v 8 ಖ್ಹಾರೇಥಿ ಪಹಿಲೆ ತುಮಾರ ತುಮಾರಮ ಖ್ಹಾಚಿನಿತರಾನಿ ಪ್ಯಾರ್‌ರ‍್ಹವಾದೆ. ಪ್ಯಾರ್ ಘಣು ಪಾಪ್‌ಖ್ಹಾರು ಮೂಚಾ಼ಸ್. 
\v 9 ಏಕ್‌ಥಿ ಏಕ್‌ ಭಣಕ್ಣುನಾತೆ ಮ್ಹೇಮಾನ್ನ ಉಪಚಾರ್ ಕರೊ. 
\v 10 ತುಮೆ ಅಖ್ಖು ದೇವ್ನಿ ಅಲಕ್ ಅಲಕ್ ವರಾನಿ ಬಾರೇಮ ಅಛ್ಛೊ಼ ಸೇವಕ್‌ಹುಯಿನ್ ಹರೇಕ್‍ಜ಼ಣು ಇವ್ಣೆ ಲಿದಾತೆ ವಾರ್‌ಖ್ಹಾನಿ ವರಾನ ಅಖ್ಖಾಸ್ನಿ ಸೇವೆನಖ್ಹಾಜೆ ಉಪಯೋಗ್ ಕರಿಲ್ಯವಾದೆ. 
\v 11 ಏಕ್ಜ಼ಣೊ ಬೋಧನೆಕರಾವಳೊ ರ‍್ಹಯೊತೊ ದೇವ್ನಿ ವಚನ್ನ ಪಾಡಿಬೋಲವಾಳೊ ಹುಯಿನ್ ಬೋಧನೆ ಕರಾದೆ. ಏಕ್‍ಜ಼ಣೊ ಸೇವೆ ಕರಾವಾಳೊ ರ‍್ಹಯೋತೊ ದೇವ್ ದೇಸ್ತೆ ಶಕತ್ನಿಪರಕ್ಮ ಕರಾದೆ. ಆ ಅಖ್ಖೇಥಿಬಿ ಕ್ರಿಸ್ತಯೇಸುಥಿ ದೇವ್ನ ಧನ್ಯವಾದ್ ಹುವಾಸ್. ಕ್ರಿಸ್ತ ಯೇಸುನ ರಾಜ಼್‌ಭಾರ್‌ಬಿ ಮಹಿಮೆಬಿ, ಶಕತ್‌ಬಿ ಜ಼ಗ್‌ಜ಼ಮಾನಮಾಬಿ ಇನಾಸ್ ರ‍್ಹವಾದೆ ಆಮೆನ್.
\s ಕ್ರಿಸ್ತ ವಿಶ್ವಾಸಿನಿ ಘೋಣಿ ಖ್ಹತಾಪ್ಣಿ ಪಡಾನು
\p
\v 12 ಮಾರ ಪ್ಯಾರ್‌ನ ದೋಸ್ತಿವೊ, ತುಮುನ ಛಾ಼ಣನಖ್ಹಾಜೆ ಆವ್‌ಶೇತೆ ದುಖ್‌ನು ತರೀಪ್ಷ ದೇಖಿನ್ ತುಮೆ ಆಶ್ಚರ್ಯ ನಕೊ ಖಾವೊ. ಮಾಲುಮಸ್‍ಕೊಂತೆ ಶಾತ್ಕಿ ಚಾ಼ಲ್ಯು ಕರಿ ಸೋಚೊನಕೊ. 
\v 13 ಕತೋಬಿ ತುಮೆ ಕೆತ್ರೆಪರಕ್ಮ ಕ್ರಿಸ್ತನಿ ಖ್ಹತಾಪ್ಣಿವ್‌ಮ ಭಾಗ್‌ವಾಳ ಹುಯಿರಾಸ್ಕಿ ಎತ್ರಸ್‍ಪರಕ್ಮ ಖುಷಿ ಪಡೊ. ಇನಖ್ಹಾಜೆ ಯೋ ಮಹಿಮೆಥಿ ಆವಾದಿನ್ ತುಮೆ ದೇಖಿನ್ ಘಣಿ ಖುಷಿಥಿ ಭರೈಜಾಶು. 
\v 14 ತುಮೆ ಕ್ರಿಸ್ತನಿ ನಾಮ್ನಖ್ಹಾಜೆ ಚಿಂಘಾವ್ಣಿನ ಶುಶತ್ ಹುಯೂತೊ ಧನ್ಯ. ಮಹಿಮೆನು ಆತ್ಮ ಹುಯಿರ‍್ಹೋತೆ ದೇವ್ನು ಆತ್ಮ ತುಮಾರಮ ತಳ್‍ಗಾಠಿ ಛಾ಼ನಿ. 
\v 15 ತುಮಾರಮ ಕೋಣ್‌ತೋಬಿ ಖೂನಿ, ಚೋ಼ರ್, ಖರಾಬ್, ಬಿಜಾ಼ನ ಕಾಮ್ಮ ಮುಡ್‌ಕ್ಯು ಘಾಲವಾಳೊ ಹುಯಿನ್ ನಿಶತ್‍ಖಾವಳೊ ನಾಹುಯಿರ‍್ಹೇವ್ಣು. 
\v 16 ಕತೋಬಿ ಕ್ರಿಸ್ತವಾಳೊಹುಯಿನ್ ಖ್ಹತಾಪ್ಣಿ ಪಡ್ಯೊತೊ ಖ್ಹರಮ್‌ ನಾಖಾವ್ಣುತೆ ಯೋ ಕ್ರಿಸ್ತನ ನಾಮ್‍ಥೀಸ್ ದೇವ್ನ ಖ್ಹರಾವಾದೆ. 
\v 17 ಶನಕತೊ ನ್ಯಾವ್‍ನಿ ತೀರ್ಪ್‌ನಿ ವಖ್ಹತ್ ಐರ‍್ಹೀಸ್. ಅಜು಼ ಯೋ ಫೇಡ್‌ ದೇವ್‌ಮ ಘರ್‌ಮಾಸ್ ಶುರು ಹುಯಿರ‍್ಹುಸ್. ಶುರುಹುಯುತೊ, ದೇವ್ನಿ ಸುವಾರ್ತೆನ ನಂಬಾಕೊಂತೆ ಇನಿ ಜೋ಼ಡ್ಮ ಕಿಮ್ ಖ್ಹರ್ತಿಉಷೆ? 
\v 18 ನೀತಿನ ಅದ್ಮಿವೊ ರಕ್ಷಣೆ ಲ್ಯವಾನು ಲತಾಡ ಹುಯೂತೊ ಭಕ್ತಿಕೊಂತೆ ಇನಾಬಿ ಅಜು಼ ಪಾಪಿನ ರಕ್ಷಣೆ ಲ್ಯಾವಾನು ಕಿಮ್? ಕರಿ ವಚನ್‌ಮ ಲೀಖೈರ‍್ಹುಸ್. 
\v 19 ಅಮ್‍ರ‍್ಹವಾಪರ್ ದೇವ್ನಿ ಮರ್ಜಿನಿ ಘೋಣಿ ಖ್ಹತಾವಾಳು ಅಛ್ಛಾ಼ನ ಕರಾವಳುಹುಯಿನ್, ಇವ್ಣು ಇವ್ಣೇಸ್ ಆತ್ಮಾವ್‌ಮ ವಿಶ್ವಾಸ್ ಉಬ್‌ಜಾ಼ವವಾಳೊ ಪ್ರಭುನ ದಿನಾಖದೆ.
\c 5
\s ದೇವ್ನ ಮೇಂಢಾನ ಕಾವ್ಲಿಕರಾನು
\p
\v 1 ಸಭೆನ ಶಾಣವೊ, ಜೋಡ್ಮಶಾಣೊ ಹುಯಿರ‍್ಹೋತೆ ಮೇ ಕ್ರಿಸ್ತನು ಖ್ಹತಾಪ್ಣಿ ಡೋಳೇಥಿ ದೇಖೆಹುಯೊ. ಅಜು಼ ಆವ್‌ಶೇತೆ ಮಹಿಮೆಮ ಭಾಗ್‌ವಾಳೊ ಹುಯಿನ್ ತುಮುನ ಹುಮ್ಮಖ್ಹ್‌ದೀನ್ ಶಾತ್‌ ಬೋಲಿಲೆವುಸ್‌ಕತೊ, 
\v 2 ತುಮುನ ದೆವೈರ‍್ಹೂಸ್ತೆ ದೇವ್ನ ಮಂಧಾನ ಕಾವ್ಲಿಕರೊ. ಜು಼ಲಮ್‌ಥಿ ಕಾಹೆ ದೇವ್ನಿ ಮರ್ಜಿನಿತರ ಪಸಂದ್‍ನಿ ಘೋಣಿ, ರಪ್ಯಾನಿ ಖರಾಬ್ ಆಖ್ಹ್‌ಥಿ ಕಾಹೆ ಖ್ಹಾಚ ದಿಲ್‌ಥಿ ಕಾವ್ಲಿಕರೊ. 
\v 3 ತುಮಾರಿ ಚ಼ಪ್ಪಣ್‌ಮ ದೆವೈರ‍್ಹೂಸ್ತೆ ಇವ್ಣಪರ್ ರಾಜ಼್‌ಭಾರ್ ನಾಚ಼ಲಾವ್ಣುತೆ ಮಂಧಾನ ಜೋ಼ಡೆ ಉದಾಹರಣೆ ಹುಯಿನ್ ಚಾ಼ಲಿಲೆವೊ. 
\v 4 ಮೋಟೊ ಕುರುಬ ದೆಖಾವನಿ ವಖ್ಹ್‌ತೆ ತುಮೆ ಕದೇಬಿ ಮಹಿಮೆನಿ ಕಿರೀಟ್ನ ಲೀಲಿಶು. 
\v 5 ಇಮ್ಮಸ್ ಜಾ಼ನ್ಜ಼ಮಾನ್ ಅದ್ಮಿವೊ, ತುಮೆ ಶಾಣಾಥಿ ಹೇಟುಹುಯಿನ್ ಚಾ಼ಲಿಲೆವೊ ತುಮೆ ಅಖ್ಖೂಬಿ ಶೇದೇವ್ ದಿಲ್ನ ಲೀಲ್ಯಾವಾಳ ಹುಯಿನ್ ಏಕ್‌ಥಿಏಕ್ ಚಾ಼ಕ್ರಿಕರೊ. ಶನಕತೊ ದೇವ್ “ಹಂಕಾರಿನ ವಿರೋದ್‌ಕರಾಸ್. ಗೋರ್‌ ಗರಿಬ್‍ನತೋಬಿ ವಾರ್‌ಖ್ಹೊ ದ್ಯವಾಳೊ ಹುಯಿರ‍್ಹೊಸ್”. 
\v 6 ಅಮ್ ರ‍್ಹವಾಪರ್ ದೇವ್ನ ತಾಖತ್ನ ಹಾತ್‍ಹೇಟ್ ತುಮುನ ಝು಼ಕೈಲೆವೊ. ಯೋ ಬರೋಬರ‍್ನಿ ವಖ್ಹತ್‌ಮ ತುಮುನ ಉಪ್ಪರ್ ಪಾಡ್‍ಶೆ. 
\v 7 ತುಮಾರಿ ವೇಚ಼್‌ಣೆ ವಿಚಾರ‍್ನ ಇನಾಪರ್ ನಾಖೊ. ಯೋ ತುಮೂನ ಜ಼ತನ್ ಕರ್ಶೆ. 
\v 8 ಅಛ್ಛಿಖ್ಹೂಜ಼್‌ವಾಳನ ಹುಯಿ‍ರ‍್ಹೆವೊ ಅಜು಼ ಜ಼ತನ್‌ಥಿ ರ‍್ಹವೊ. ತುಮಾರೊ ವಿರೋದಿ ಹುಯಿರ‍್ಹೋತೆ ಶೈತಾನ್, ಘಲಾರತೆ ಶುಂಭಾನಿತರ ಕಿನ ಚೀರಿಖಾವ್ಣು ಕರಿ ಢೂಂಡ್ತೊ ಚಾ಼ಲ್ಯೊಫಂಡಾಸ್. 
\v 9 ತುಮೆ ವಿಶ್ವಾಸ್‌ಮ ಘಟ್‍ರ‍್ಹೀನ್ ಶೈತಾನ್ನ ಡರಾವೊ. ಜಗತ್‌ಮ ಛಾ಼ತೆ ತುಮಾರ ವಿಶ್ವಾಸಿಖ್ಹಾರು ಇಮ್ನು ಖ್ಹತಾಪ್ಣಿ ಪಡುಕರಸ್ಕರಿ ತುಮುನ ಮಾಲುಮ್ ಛಾ಼. 
\v 10 ಕ್ರಿಸ್ತ ಯೇಸುಮ ತುಮುನ ಹಮೇಶಾನಿ ಮಹಿಮೆನ ಬುಲಾಯೋತೆ ಭರ್‌ಪೂರ್‌ ವಾರ್‌ಖ್ಹಾನೊ ದೇವಸ್, ತುಮೆ ಥೋಡುವಖ್ಹತ್ ಖ್ಹತಾನ ಬಾದ್ಮ ತುಮುನ ಅಛ್ಛಿರ‍್ಹಾಮ ಲೀಅಯಿನ್ ತಳ್‌ಗಠೈನ್‌ ತಾಖತ್‍ದಿಷೆ. 
\v 11 ಯೋ ರಾಜ಼್‌ಭಾರ್ ಚ಼ಲಾವನು ಜ಼ಗ್‌ಜ಼ಮಾನಮಾಬಿ ರ‍್ಹವಾದೆ. ಆಮೆನ್.
\s ಖ್ಹರ್ತಿನಿ ಖ್ಹಲಾಮ್
\p
\v 12 ಮೇ ತುಮೂನ ಹುಮ್ಮಖ್ಹ್ ದೆವಾನಾಬಿ ಅಜು಼ ದೇವ್ನಿ ಖ್ಹಾಚಿಕೃಪೆ ಕರಿ ಸಾಕ್ಷಿ ಬೋಲಾನಾಬಿ ಮೇ ನ್ಹಾನೇಥಿ ಚಿಟ್ಟಿ ಲೀಖಿನ್, ವಿಶ್ವಾಸ್‌ನೊ ಭೈಕರಿ ಗಣ್ತಿಕರಿರಾಖ್ಯೊತೆ ಸಿಲ್ವಾನನ ಹಾತ್‌ಮ ಮೋಕ್ಲಿರಾಖ್ಯೊಸ್. ಆ ಖ್ಹಾಚಿ ಕೃಪೆಥಿ ಭೀರೆವೊ. 
\v 13 ದೇವ್ ತುಮಾರ ಜೋ಼ಡೆ ಚೂ಼ಣೈರ‍್ಹೊಥೋತೆ ಬ್ಯಾಬಿಲೋನ್ಮ ಛಾ಼ತೆ ಸಬೆವಾಳು ತುಮುನ ಖ್ಹಲಾಮ್‍ಕರಸ್. ಅಜು಼ ಮಾರ ಛಿಯ್ಯಾನಿಘೋಣಿ ಹುಯಿರ‍್ಹೋತೆ ಮಾರ್ಕಬಿ ತುಮುನ ಖ್ಹಲಾಮ್ ಬೋಲಾಸ್. 
\v 14 ಪ್ಯಾರ್‌ಥಿ ಏಕ್‌ಥಿ ಏಕ್‌ ಹಾತ್‍ದೀನ್‍ ಖ್ಹಲಾಮ್‍ಬೋಲೊ. ಕ್ರಿಸ್ತಮ ಛಾ಼ತೆ ತುಮುನ ಖ್ಹಾರಸ್ನ ಸಮಾಧಾನ್ ಹುವಾದೆ.