\id 1JN - WAGHRI
\ide UTF-8
\h 1 ಯೋಹಾನ
\toc3 1 ಯೋಹಾನ
\toc2 1 ಯೋಹಾನ
\toc1 ಯೋಹಾನೆ ಲೀಖ್ಯೋತೆ ಪಹಿಲೆ ಚಿಟ್ಟಿ
\mt2 1 ಯೋಹಾನನು ಬರೆದ ಮೊದಲನೆಯ ಪತ್ರಿಕೆ
\mt1 ಯೋಹಾನನೆ ಲೀಖ್ಯೋತೆ ಪಹಿಲಿ ಚಿಟ್ಟಿ
\imt ಮಾಲುಮ್ ಕರಾನು
\ip ಯೋಹಾನನೆ ಲೀಖ್ಯೋತೆ ಪಹಿಲಿ ಚಿಟ್ಟಿ ಅಪೊಸ್ತಲ ಯೋಹಾನನೆ ಕ್ರಿಸ್ತನು ಪೈದಾಖ್ಹ್‌ನ ವಾರ್ 50 ಅಜು಼ 100 ವರಖ್ಹ್‌ನ ಬೀಚ್ಮ ಲೀಖಿರಾಖ್ಯೊಸ್. ಯೋಹಾನನೆ ಯೋಸ್ ಲೀಖವಾಳೊಕರಿ ವತಾಳಿರಾಖ್ಯೊ ಕೊಯ್ನಿ ಕತೋಬಿ ಪಹಿಲ ಅದ್ಯಾಯಮ ಯೋ ಯೇಸುನು ಜಿವ್ಣು ಅಜು಼ ಮರಿನ್‌ ಉಠ್ಯೊತೆ ಡೋಳೆಖ್ಹು ದೆಖ್ಯೊತೆ ಸಾಕ್ಷಿಹುಯಿರ‍್ಹೊಸ್ ಕರಿ ವತಾಳಿದೇಸ್. ಯೋಹಾನನೆ ಲೀಖ್ಯೋತೆ ಪಹಿಲಿ ಚಿಟ್ಟೀಮ ಲೀಖಿರಾಖನು ತರೀಕ ಯೋಹಾನನೆ ಲೀಖ್ಯೋತೆ ಸುವಾರ್ತೆನು ಲೀಖ್ಯಾನ ಘಣು ಖನ್ನೆಛಾ಼ ಯೋಹಾನನೆ ಲೀಖ್ಯೋತೆ ಸುವಾರ್ತೆ ಯೋಹಾನನೆಸ್ ಲೀಖಿರಾಖ್ಯೊಸ್ ಕರಿ ವಿಶ್ವಾಸ್ ಕರಸ್. ಅಜು಼ ಯೋಹಾನನೆ ಲೀಖ್ಯೋತೆ ಏಕ್‌ನಿ ಚಿಟ್ಟಿ, ಬೇನಿ ಚಿಟ್ಟಿ ಅಜು಼ ತೀನ್ನಿ ಚಿಟ್ಟಿಬಿ ಜಿನು ಇನೆ ಎಫೆಸಮ ಜಿವ್ಣುಕರುಕರಾನಿ ವಖ್ಹ್‌ತೆ ಲೀಖಿರಾಖ್ಯೊಸ್ ಕರಿ ವಿಶ್ವಾಸ್ ಕರಸ್.
\ip ಯೋಹಾನನೆ ದೇವ್‌ಮ ವಿಶ್ವಾಸ್‌ಕೊಂತೆ ಬೋಲಾವಸ್ತೆ ಕರಿ ಅದ್ಮಿನು ಝೂ಼ಂಡ್‌ಥಿ ತಕ್ಲಿಬ್‌ಮ ರ‍್ಹವಾನಿವಖ್ಹ್‌ತೆ ಅಖ್ಖಾಸ್ ಕ್ರಿಸ್ತ ವಿಶ್ವಾಸಿನಖ್ಹಾಜೆ ಆ ಚಿಟ್ಟಿ ಲೀಖ್ಯೊ. ಆ ಅದ್ಮಿ ಯೇಸು ಭರ್‌ಪೂರ್‌ಥಿ ದೇವ್ ಹುಯಿರ‍್ಹೊಸ್‌ಕರಿ ಕತೋಬಿ ಜ಼ಮೀನ್‌ಪರ್ ಯೋರ‍್ಹವಾನಿ ವಖ್ಹ್‌ತೆ ಲ್ಹೋಯಿಥಿ ಬೋಟೀಥಿ ಅದ್ಮಿನ ಶರೀರ್‌ನ ಲೀರಾಖ್ಯೊಸ್ತೆ ಖ್ಹಾಚ ಕಾಹೆಕರಿ ವಿಶ್ವಾಸ್‌ ಕರಿರಾಖ್ಯುಥು ಅನಖ್ಹಾಜೆ ಯೋಹಾನನೆ ಯೇಸುನು ಜಿವ್ಣು ಅಜು಼ ಇನ ಶೊಂತ್‌ ಹಾತೇಖ್ಹು ಇನ ಮೂಚಿರಾಖನು ಏಕ್‌ ಡೋಳೆಖ್ಹು ದೇಖಾನಿತರನು ಸಾಕ್ಷಿ ಹುಯಿರ‍್ಹಾವನಿ ಬಾರೇಮ ಲೀಖಸ್. \xt 1:1-3\xt* ಯೋಹಾನ ಆ ಚಿಟ್ಟಿ ಲೀಖಾನಿ ಉದ್ದೇಶ್ ಶಾತ್‌ಕತೊ ಇನು ಶಂತೋಖ್ಹ್‌ನ ಭರ್‌ಪೂರ್‌ ಕರಸ್. \xt 1 ಯೋಹಾನ\xt* 1:4 ವಿಶ್ವಾಸಿನ ಪಾಪ್‌ಕರಾಥಿ ದೂರ್‌ರಾಖಸ್‌. \xt 1 ಯೋಹಾನ 2:1\xt*, ಝೂ಼ಟಿ ಬೋಧನೆಥಿ ವಿಶ್ವಾಸಿಖ್ಹಾರನ ಬಚಾ಼ಡಸ್.\xt 1 ಯೋಹಾನ 2:26\xt* ಅಜು಼ ಇವ್ಣೆ ಬಚಿಗಯ ಕರಿ ವಿಶ್ವಾಸಿಯೇವ್ನ ಖ್ಹಯಾಲ್ಮ ಲ್ಯಾವಾನು ಹುಯಿರ‍್ಹುಥು \xt 5:13\xt*
\iot ಕಾಡಿದೇಖೊ
\io1 1. ಯೋಹಾನ ಇನು ಬಾರೇಮ ಬೋಲಿಲೆಸ್. ಅಜು಼ ಆ ಚಿಟ್ಟಿನ ಲೀಖಾನ ಏಕ್‌ ಉದ್ದೇಶ್ ಛಾ಼ಕರಿ ಬೋಲಸ್. \ior 1 ಯೋಹಾನ 1:4\ior*
\io1 2. ಇನಕೇಡೆಥು ಇನೆ ದೇವ್ ಕಿಮ್ ಉಜಾ಼ಳು ಹುಯಿರ‍್ಹೊಸ್. ಅಜು಼ ಅಪ್ಣೆ ಯೇಸುನೆ ಜಿವ್ಣು ಕರ‍್ಯೊತೆ ಇಮ್ಮಸ್ ಜಿವ್ಣು ಕರ‍್ನುಕರಿ ಬೋಲಾನು ಬಾರೇಮ ಬೋಲಿವತಾಳಸ್. \ior 1:5—3:10\ior*
\io1 3. ಇನಕೇಡೆಥು ಇನೆ ಏಕ್‌ಥಿ ಏಕ್‌ ಪ್ಯಾರ್ ಕರ್ನುಕರಿ ಹುಕುಮ್‌ನ ಯಾದ್ ಕರಾವಸ್. \ior 3:11—5:12 \ior*
\io1 4. ಇನೆ ಇನು ಬಾರೇಮ ಖತಮ್ ಕರಸ್.\ior 5:13-21\ior*
\c 1
\s ಜಾನ್ನಿ ವಚನ್
\p
\v 1 ತುಮೆ ಖ್ಹಮ್‌ಜು಼ಕರಸ್ತೆ ಜಾನ್ನಿ ವಚನ್ ಶುರುವಾಥೂಸ್ ಛಾ಼ತೆ. ಇನ ಕಾನ್‍ಥಿ ಖ್ಹಮ್‍ಜಿರಾಖ್ಯಸ್; ಡೋಳೆಖ್ಹು ದೇಖಿರಾಖ್ಯಸ್, ದಿಲ್‌ಥಿ ಮಾನಿರಾಖ್ಯಸ್, ಅಜು಼ ಹಾತೇಥಿ ಛಿಮಿರಾಖ್ಯಸ್. 
\v 2 ಯೋ ಜಾನ್‌ ಹಮೂನ ದೆಖಾಯು. ಹಮೆ ಇನ ದೇಖ್ಯಾತೆ ಇನಖ್ಹಾಜೇಸ್ ಇನಿ ಬಾರೇಮ ಸಾಕ್ಷಿ ಬೋಲಾನಿತರ ಹುಯು. ಯೋ ಬಾ ಜೋ಼ಡ್ಮ ರ‍್ಹೀನ್ ಹಮುನ ದೆಖಾಯುತೆ ಹರ್‌ಹಮೇಶಾನೊ ಜಾನ್‌ ತುಮುನ ಬೋಲಿವತಾಳೆಸ್‍. 
\v 3 ಬಾ ಹುಯಿರೋತೆ ದೇವ್ನ ಅಜು಼ ಇನೊ ಛಿಯ್ಯೊ ಹುಯಿರೋತೆ ಯೇಸುಕ್ರಿಸ್ತನಿ ಜೋಡ್ಮರ‍್ಹವಾನುಬಿ ಹಮುನ ಛಾ಼ತೆ ಗಳ್‌ಜೋ಼ಡ್ಮ ತುಮೆಜಿನು ಭಾಗ್‌ಲೀಲ್ಯವಾಳ ಹುಯಿರ‍್ಹೇವ್ಣುಕರಿ ಹಮೆ ದೇಖಿರಾಖ್ಯತೆ, ಖ್ಹಮ್‍ಜಿರಾಖ್ಯತೆ ತುಮೂನ ಬೋಲಿವತಾಳೆಸ್‍. 
\v 4 ಅಪ್ಣಿ ಶಂತೋಖ್ಹ್‌ ಪೂರ ಹುವಾದೆಕರಿ ಹಮೆ ಅನಿ ಬಾರೇಮ ಲೀಖುಕರಿಯೇಸ್.
\s ದೇವಸ್ ಉಜಾ಼ಳು
\p
\v 5 ಹಮೆ ದೇವ್ನ ಛಿಯ್ಯಾಥಿ ಖ್ಹಮ್‌ಜಿನ್‌ ತುಮುನ ಖ್ಹಮ್‍ಜಾ಼ಡಾನಿ ವಾತೆ ಶಾತ್‌ಕತೊ ದೇವ್ ಉಜಾ಼ಳು ಹುಯಿರ‍್ಹೋಸ್, ಇನಾಮ ಥೋಡುಬಿ ಅಂಧಾರುಕೊಯ್ನಿ. 
\v 6 ಇನಖ್ಹಾಜೇಥಿ ಅಪ್ಣೆ ಅಂಧಾರಮ ಜಿವ್ಣು ಕರ್ತಹುಯಿನ್‍ ದೇವ್ನಿ ಜೋ಼ಡ್ಮ ಗಳ್‍ಜೋ಼ಡ್‍ಥಿ ಛೀಯೆಕರಿ ಬೋಲ್ಯಾತೊ ಅಪ್ಣೆ ಝೂ಼ಟ ಹುಯಿರ‍್ಹಾಸ್ ನಿಯತ್ನು ಜಿವ್ಣು ಜಿವವಾಳ ಕಾಹೆ. 
\v 7 ಕತೋಬಿ ದೇವ್ ಉಜಾ಼ಳಮ ರ‍್ಹಾವನಿತರಸ್‍ ಅಪ್ಣೇಬಿ ಉಜಾ಼ಳಮ ಚಾ಼ಲ್ಯಾತೊ ಅಪ್ಣೆ ಏಕ್‌ಥಿಏಕ್ ಗಳ್‍ಜೋ಼ಡ್‍ಥಿ ರ‍್ಹಯೇಜಾ಼ಯ್ ತದೆ ಇನೊ ಎಕ್ಕಸ್ ದೇವ್‌ನೊ ಛಿಯ್ಯೊ ಯೇಸುನು ಲ್ಹೋಯಿ ಅಪ್ಣುನ ಅಖ್ಖಾ ಪಾಪ್‌ಥಿ ಛೋ಼ಡೈನ್ ಪಾಕ್‍ಕರಾಸ್. 
\v 8 ಅಪ್ಣಾಮ ಪಾಪ್‍ಕೊಯ್ನಿಕರಿ ಅಪ್ಣೆ ಬೋಲ್ಯಾತೊ ಅಪ್ಣುನ ಅಪ್ಣೆಸ್ ಠಗೈಲ್ಯವಾಳ ಹುಯಿರಾಸ್‍ ಅಜು಼ ಖ್ಹಾಚಿ ಕರಿ ಬೋಲಾನು ಅಪ್ಣಾಮ ಕೊಯ್ನಿ. 
\v 9 ಕತೋಬಿ ಅಪ್ಣೆ ಅಪ್ಣ ಪಾಪ್ನ ಮಾನೀನ್ ಬೋಲಿಲಿದತೊ ತದೆ ವಿಶ್ವಾಸ್‍ವಾಳೊಬಿ ನೀತಿವಾಳೊಬಿ ಹುಯಿರ‍್ಹೋತೆ ದೇವ್ ಅಪ್ಣಪಾಪ್ನ ಕ್ಷಮಾಪಣ್ ಕರಿನ್ ಅಖ್ಖಿ ನೀಚ್‌ಕಾಮ್‍ಥಿ ಅಪ್ಣುನ ಪಾಕ್‍ಕರಶೆ. 
\v 10 ಅಪ್ಣೆ ಪಾಪ್ ಕರ‍್ಯಾಕೊಯ್ನಿಕರಿ ಬೊಲ್ಯಾತೊ ದೇವ್ನ ಝೂ಼ಟೊ ಕರಾನಿತರ ಉಶೆ. ಅಜು಼ ಇನಿವಚನ್ ಅಪ್ಣಾಮ ಜ಼ಡ್‍ಗಾಠಿ ರ‍್ಹಿಶೆಕೊಯ್ನಿ.
\c 2
\s ಕ್ರಿಸ್ತ ಅಪ್ಣೊ ಮದತ್‌ಕರಾವಾಳು
\p
\v 1 ಮಾರ ಪ್ಯಾರ್‌ನ ಲಡ್ಕಾವೊ, ತುಮೆ ಪಾಪ್ ನಾಕರ‍್ನುತೆ ರ‍್ಹೇವ್ಣು ಮೇ ಆ ಅಖ್ಖು ತುಮೂನ ಲೀಖುಕರುಸ್. ಏಕ್‍ ವೇಳ್ಮ ಕೋಣ್‌ತೋಬಿ ಪಾಪ್ ಕರ‍್ಯುಸ್‍ಉಶೇತೊ ಅಪ್ಣ ಭಣೀಥು ಬಾಕನ ಬೋಲಿಲ್ಯವಾನ ಏಕ್‍ಜ಼ಣೊ ಛಾ಼. ಯೋಸ್ ನೀತಿವಾಳೊ ಯೇಸುಕ್ರಿಸ್ತ ಮದತ್‌ಕರಾವಾಳು ಹುಯಿರೋಸ್. 
\v 2 ಯೋ ಅಪ್ಣ ಪಾಪ್ನ ಕ್ಷಮಾಪಣ್‍ನಖ್ಹಾಜೆ ಪರಿಹಾರ‍್ನೊ ಬಲಿಹುಯಿರ‍್ಹೊಸ್. ಅಪ್ಣ ಪಾಪ್ನಕರಿ ಖಲಿಕಾಹೆ ಅಖ್ಖಾ ಜಗತ್ನ ಖ್ಹಾರ ಅದ್ಮಿನ ಪಾಪ್ನಖ್ಹಾಜೆಬಿ ಪರಿಹಾರ್ ಹುಯಿರ‍್ಹೊಸ್. 
\v 3 ಅಪ್ಣೆ ಇನಿ ಹುಕುಮ್‌ನ ವಿಧೇಯ ಹುಯಿನ್ ಚಾ಼ಲಿಲ್ಯವಾನುಸ್ ಅಪ್ಣೆ ಇನ ಮಾಲುಮ್ ಕರಿಲಿದಾಕರಿ ಖ್ಹಮ್‍ಜಿಲಿಯೇಸ್. 
\v 4 ಏಕ್‍ಜ಼ಣೊ, ಮನ ಯೊ ಮಾಲುಮ್ ಕರಿ ಬೋಲಿನ್ ಇನ ಹುಕುಮ್‍ನಿತರ ನಾ ಚಾ಼ಲಿಲೀದೊತೊ ಯೋ ಝೂ಼ಟೊ ಹುಯಿರ‍್ಹೊಸ್. ಖ್ಹಾಚು಼ಕರಿ ಬೋಲಾನು ಇನಾಮ ಕೊಯ್ನಿ. 
\v 5 ಕೋಣ್‍ತೋಬಿ ಇನಿ ವಚನ್ನ ಲೀನ್ ಚಾ಼ಲ್ಯೋತೊ ಇನಾಮ ಖ್ಹಚ಼ಂಬಿ ದೇವ್‌ಪರ್‌ನ ಪ್ಯಾರ್ ಭರ್‌ಪೂರ್‌ ಹುಯಿರ‍್ಹುಸ್. ಅಥ್ರಾನ ಕಾಮ್‍ಥಿ ಅಪ್ಣೆ ಇನಾಮ ಛಿಯೆಕರಿ ಮಾಲುಮ್ ಕರಿಲಿಯೇಸ್. 
\v 6 ದೇವ್‌ಮ ತಳ್‍ಗಾಠಿನ್ ಛೂ಼ಕರಿ ಬೋಲವಾಳೊ ಯೇಸು ಚಾ಼ಲಿಲಿದೋತೆ ತಿಮ್ಮಸ್ ಯೋಬಿ ಜಿವ್ಣು ಕರ‍್ನು.
\s ನವಿ ಹುಕುಮ್
\p
\v 7 ಮಾರ ಪ್ಯಾರ್‌ನ ಭೈಯೇ ಭೇನೆವೊ, ಮೇ ತುಮೂನ ಲೀಖುಕರುತೆ‍ ನವಿ ಹುಕುಮ್ ಕಾಹೆ, ಹೈರಿತೆ ಜೂ಼ನಿ ಹುಕುಮ್ ಹುಯಿರ‍್ಹಿಸ್. ಆ ಜೂ಼ನಿ ಹುಕುಮ್ ತುಮೆ ಖ್ಹಮ್‍ಜ್ಯಾತೆ ವಚನಸ್. 
\v 8 ಕತೋಬಿ ಮೇ ತುಮೂನ ಲೀಖುಕರುತೆ‍ ನವಿ ಹುಕುಮ್‍ನಿತರಾಸ್ ಛಾ಼. ಹೈರುತೆ ಇನಾಮಾಬಿ ತುಮಾರಮಾಬಿ ಖ್ಹಾಚು಼ಹುಯಿರ‍್ಹುಸ್. ಶನಕತೊ ಅಂಧಾರು ಚ಼ಲ್ಯುಜೈನ್‌, ಖ್ಹಾಚು಼ ಉಜಾ಼ಳು ಹಮ್ಕೆ ಉಜಾ಼ಖ್ಹ್‌ ಹೂಕರಸ್. 
\v 9 ಮೇ ಉಜಾ಼ಳಾಮ ಛೂ಼ ಕರಿ ಬೋಲಿಲೀನ್ ಇನ ಭೈಯೇ ಭೇನೇನ ವಹೇರ್‌ಕರವಾಳೊ ಹಮ್ಕೆಲಗೂಬಿ ಅಂಧಾರಮ ಛಾ಼. 
\v 10 ಇನ ಭೈಯೇ ಭೇನೆನ ಪ್ಯಾರ್ ಕರಾವಾಳೊ ಉಜಾ಼ಳಾಮ ಜಿವ್ಣುಕರವಾಳೊ ಹುಯಿರ‍್ಹೊಸ್ ಅಜು಼ ಪಾಪ್‌ಮ ಧೊಕ್‌ಡೈನ್ ಪಡಾನು ಶಾತ್ಬಿ ಇನಾಮ ಕೊಯ್ನಿ. 
\v 11 ಕತೋಬಿ ಇನ ಭೈಯೇ ಕೊಯಿನ್ತೊ ಭೇನೇನ ವಹೇರ್‌ಕರವಾಳೊ ಅಂಧಾರಮ ಛಾ಼ ಅಜು಼ ಅಂಧಾರಮ ಚಾ಼ಲವಾಳೊ ಹುಯಿರ‍್ಹೊಸ್. ಅಂಧಾರು ಇನ ಡೋಳಾನ ಕಾಣುಕರಿನಾಖಿದಿದುತೆ ಇನಖ್ಹಾಜೆ ಯೊ ಕಿಜ್ಜಾ಼ ವಳೆಜ಼ವುಸ್ ಕರಿ ಇನ ಮಾಲುಮ್‌ ಕೊಯ್ನಿ. 
\v 12 ಪ್ಯಾರ್‌ನ ಲಡ್ಕಾವೊ ಕ್ರಿಸ್ತನ ನಾಮ್‍ಪರ್ ತುಮಾರಿ ಪಾಪ್‍ಅಖ್ಖು ಕ್ಷಮಾಪಣ್ ಹುಯಿರ‍್ಹುಸ್ತೆ ಇನಖ್ಹಾಜೆ ಮೇ ತುಮೂನ ಲೀಖುಕರುಸ್. 
\v 13 ಬಾಖ್ಹಾರ ತುಮೆ ಶುರುವಾಥೂಸ್ ರ‍್ಹಾವಾಳನ ತುಮೆ ಮಾಲುಮ್‌ ಕರಿರಾಖ್ಯತೆ ಇನಖ್ಹಾಜೆ ಮೆ ತುಮೂನ ಲೀಖುಕರುಸ್. ಜಾ಼ನ್ಜ಼ಮಾನ್ ಹುಯಿರಾತೆ ತುಮೆ ವಹೇರ‍್ಯಾನ ಜೂತಿರಾಖ್ಯಸ್ ಇನಖ್ಹಾಜೆ ತುಮೂನ ಲೀಖುಕರುಸ್. 
\v 14 ಲಡ್ಕಾವೊ, ತುಮೆ ಬಾನ ಮಾಲುಮ್‌ ಕರಿರಾಖ್ಯತೆ ಇನಖ್ಹಾಜೆ ತುಮೂನ ಲೀಖುಕರುಸ್. ತುಮೆ ಶಕತ್‌ವಾಳ ಹುಯಿರಾತೆ ಇನಖ್ಹಾಜೇಬಿ ದೇವ್ನಿ ವಚನ್‍ ತುಮಾರಮ ಜಿವಿರ‍್ಹುಸ್ತೆ ಇನಖ್ಹಾಜೇಬಿ ಕೇಡ್‌ ಕರವಾಳನ ಹರೈರಾಖ್ಯಾತೆ ತುಮೂನ ಮೇ ಲೀಖುಕರುಸ್. 
\v 15 ಜಗತ್ನರ‍್ಹೇವೊ ಜಗತ್‌ಮರ‍್ಹೆಯಿತೆ ಇನರ‍್ಹವೊ ಪ್ಯಾರ್‌ನಕೊ ಕರೊ. ಕೋಣ್‌ತೋಬಿ ಜಗತ್ನ ಪ್ಯಾರ್‌ಕರ‍್ಯುತೊ ಬಾನ ಉಪ್ಪರ್‌ಛಾ಼ತೆ ಪ್ಯಾರ್ ಇನಾಮ ಕೊಯ್ನಿ. 
\v 16 ಜಗತ್‌ಮಛಾ಼ತೆ ಶರೀರ್‌ನಿ ಆಖ್ಹ್, ಡೋಳಾನಿಆಖ್ಹ್‌, ಜಿವ್ಣಮ ಚಾ಼ಲಾತೆ ಗಭ್ಭರ್, ಹೈರುತೆ ಬಾನ ಸಂಬಂದ್‌ನು ಕಾಹೆ. ಜಗತ್‌ನು ಹುಯಿರ‍್ಹುಸ್. 
\v 17 ಜಗತ್‍ಬಿ ಇನು ಹರಖ್ಹ್‌ಬಿ ಮಟಿಜಾ಼ಶೆ. ಕತೋಬಿ ದೇವ್ನು ಮರ್ಜಿನ ಚಾ಼ಲವವಾಳೊ ಕದೆಕದೇಬಿ ಜಿವಿರ‍್ಹಿಶೆ.
\s ಕ್ರಿಸ್ತನು ವಿರೋದಿ
\p
\v 18 ಪ್ಯಾರ್‌ನ ಲಡ್ಕಾವೊ, ಹೈರುತೆ ಖ್ಹರ್ತಿನು ಹಗಾಮ್ ಹುಯಿರ‍್ಹುಸ್. ಕ್ರಿಸ್ತ ವಿರೋದಿ ಆವ್‍ಶೆಕರಿ ತುಮೆ ಖ್ಹಮ್‌ಜಿರಾಖ್ಯಾಸ್‌. ಹಮ್ಕೇಸ್ ಕೆತ್ರೂಕಿ ಕ್ರಿಸ್ತವಿರೋದಿ ಛಾ಼. ಇನಖ್ಹಾಜೆ ಹಮ್ಕೆ ಖ್ಹರ್ತಿನ ಹಗಾಮ್ ಹುಯಿರ‍್ಹುಸ್‌ಕರಿ ಅಪ್ಣುನ ಮಾಲುಮ್ ಛಾ಼. 
\v 19 ಇವ್ಣೆಅಖ್ಖು ಅಪ್ಣ ಖನ್ನೆಥಿ ನಿಕ್ಳಿ ಚ಼ಲೀಗು. ಶನಕತೊ ಇವ್ಣೆ ಖ್ಹಾಚಮಾಬಿ ಅಪ್ಣವಾಳು ಕಾಹೆ. ಇವ್ಣೆ ಅಪ್ಣವಾಳು ರ‍್ಹಿಯುಹೊತ್ತೊ, ಅಪ್ಣಿಜೋಡ್ಮಾಸ್ ರ‍್ಹಿಯುಹೊತ್. ಕತೋಬಿ ಇವ್ಣೆ ಅಪ್ಣೇಥಿ ನಿಕ್ಳಿಗಯುತೆ ಇನಖ್ಹಾಜೆ ಇವ್ಣೆಅಖ್ಖು ಅಪ್ಣವಾಳು ಕಾಹೆಕರಿ ಖ್ಹಾಚೇಥಿ ಮಾಲುಮ್‍ಪಡಸ್. 
\v 20 ಕತೋಬಿ ತುಮೆ ಪವಿತ್ರ ಹುಯಿರೋತೆ ಇನೇಥಿ ಪವಿತ್ರಾತ್ಮನ ಅಭಿಷೇಕ್‌ನ ತುಮಾರಪರ್ ಲೀರಾಖವಾಳ ಹುಯಿರ‍್ಹಾಸ್, ಇನಖ್ಹಾಜೆ ತುಮೆಖ್ಹಾರು ಖ್ಹಾಚಿನ ಮಾಲುಮ್ ಕರಿರಾಖ್ಯಸ್. 
\v 21 ತುಮೆ ಖ್ಹಾಚಿ ಮಾಲುಮ್ ಕರಿರಾಖ್ಯಸ್, ಕತೋಬಿ ಕೊಯ್ನಿ ಕರಿ ಲಾಝಿನ್ ಮೆ ಅನ ಕೊಲೀಖುಕರುನಿ. ಕತೋಬಿ ಖ್ಹಾಚಿನ ಖ್ಹಮ್‍ಜಿರಾಖವಾಳ; ಖ್ಹಾಚೇಥಿ ಝೂ಼ಟಿ ಉಬ್‍ಜಾ಼ಕೊಯ್ನಿ ಕರಿ ಮಾಲುಮ್ ಕರಿರಾಖವಾಳ. ಅನಖ್ಹಾಜೇಥಿ ಮೇ ತುಮೂನ ಲೀಖಿರಾಖ್ಯೊಸ್. 
\v 22 ಝೂ಼ಟಿಖೋರ್ ಕೋಣ್? ಯೇಸುನ ಪ್ರಭು ಕಾಹೆಕರಿ ಕೋಣ್ ಝಿಟ್ಕಾರಸ್ಕಿ ಯೋಸ್‍ ಝೂ಼ಟಿಖೋರ್ ಹುಯಿರಾಸ್‍, ಯೋ ಕ್ರಿಸ್ತವಿರೋದಿ, ಯೊ ಬಾನಾಬಿ ಅಜು಼ ಛಿಯ್ಯಾನಾಬಿ ಝಿಟ್ಕಾರವಾಳೊ ಹುಯಿರ‍್ಹೊಸ್. 
\v 23 ಕೋಣ್ ದೇವ್ನ ಛಿಯ್ಯಾನ ಝಿಟ್ಕಾರವಾಳೊಕಿ ಯೋ ದೇವ್ನ ಮಳ್ಯೊಹುಯೊ ಕಾಹೆ. ಕೋಣ್ ಛಿಯ್ಯಾನ ಮಾನಿಲೇಸ್ಕಿ ಯೋ ಬಾಹುಯಿರೋತೆ ದೇವ್ನ ಮಳ್ಯೊಹುಯೊ ಹುಯಿರ‍್ಹೊಸ್. 
\v 24 ಪಹಿಲೆಥೂಬಿ ತುಮೆ ಖಿವಿ ಸುವಾರ್ತೆನ ಖ್ಹಮ್‍ಜ್ಯಾಕಿ ಯೊ ತುಮಾರಮ ರ‍್ಹಿಶೆ. ಇನಖ್ಹಾಜೆ ತುಮೇಬಿ ಪಹಿಲೆಥೀಬಿ ಖ್ಹಮ್‍ಜ್ಯಾತೆ ಅಛ್ಛಿ ಸಮಾಚಾರ್ ತುಮಾರಮ ರ‍್ಹಯುತೊ ಛಿಯ್ಯಾಮಾಬಿ ಬಾಹುಯಿರೋತೆ ದೇವ್‍ಮಾಬಿ ತುಮೆ ಘಟ್‍ಥಿ ರ‍್ಹಿಶು. 
\v 25 ಯೋ ಅಪ್ಣುನ ವಾಗ್ದಾನ್ ಕರಿರಾಖ್ಯೊಸ್ತೆ ಶಾತ್‍ಕತೊ ಹಮೇಶಾನು ಜಾನ್‌. 
\v 26 ತುಮುನ ಅಛ್ಛಿ ವಾಟ್‍ಮಾಥು ಛು಼ಕೈನ್ ಖರಾಬ್ ವಾಟ್‌ಪರ್ ಖೇಚಾ಼ವಾಳಾನಿ ಬಾರೇಮ ಮೇ ತುಮೂನ ಲೀಖಿರಾಖ್ಯೊಸ್. 
\v 27 ತುಮೆ ಪ್ರಭು ಯೇಸುಥಿ ಪವಿತ್ರಾತ್ಮನಿ ಅಭಿಷೇಕ್ ಲೀರಾಖವಾಳ ಹುಯಿರಾಸ್‍. ಯೊ ಪವಿತ್ರಾತ್ಮ ತುಮಾರಮ ಛೆ. ಅನಖ್ಹಾಜೇಥಿ ಕೋಣ್‌ಬಿ ತುಮುನ ಬೋಧನೆ ಕರಾನಿ ಜ಼ರೂರತ್ ಕೊಯ್ನಿ. ಇನೆ ತುಮುನ ಕರ‍್ಯೊತೆ ಪವಿತ್ರಾತ್ಮಸ್ ತುಮೂನ ಅಖ್ಖಿ ಸಮಚಾರ್‌ಮ ಬೋಧನೆ ಕರಾನು ಹುಯಿರುಸ್. ಯೋ ಝೂ಼ಟಿಕಾಹೆ ಖ್ಹಾಚಿ ಹುಯಿರ‍್ಹುಸ್‍. ಯೊ ತುಮೂನ ಬೋಧನೆ ಕರ‍್ಯುತೆ ಪರಕ್ಮಾಸ್ ಇನಾಮ ಘಟ್ ರ‍್ಹಿಶು. 
\v 28 ಪ್ಯಾರ್‌ನ ಲಡ್ಕಾವೊ, ಯೋ ದೆಖಾವನಿ ವಖ್ಹ್‌ತೆ. ಅಪ್ಣೆ ಇನಖ್ಹಾಮ್ಣೆ ಭಿರಾವನ ಖ್ಹರ್‌ಮಾವ್ಣುನಾತೆ ಭಾಲಿಥಿ ರ‍್ಹಾವನಿಘೋಣಿ ಇನಾಮ ತಳ್‍ಗಾಠಿನ್ ರ‍್ಹಿಯೆ. 
\v 29 ಕ್ರಿಸ್ತ ಯೇಸು ನೀತಿವಾಳೊ ಹುಯಿರ್‍ಹೊಸ್ ಕರಿ ತುಮೂನ ಮಾಲುಮ್‌ ರ‍್ಹಿಯುತೊ ನೀತಿನ ಮಾರಗ್‌ಪರ್ ಚಾ಼ಲವಾಳು ಹರೇಕ್‍ಜ಼ಣುಬಿ ಇನೇಥಿ ಪೈದಹುಯಿರ‍್ಹುಸ್‍ ಕರಿ ತುಮೆ ಮಾಲುಮ್‌ ಕರಿರಾಖವಾಳ ಹುಯಿರ‍್ಹಾಸ್.
\c 3
\s ದೇವ್ನ ಲಡ್ಕಾ
\p
\v 1 ಅಪ್ಣೆ ದೇವ್ನ ಲಡ್ಕಾ ಕರಿ ಬೋಲೈಲೇವ್ಣುಕತೊ ಬಾ ಅಪ್ಣುನ ಕೆಥ್ರಾನಿ ಪ್ಯಾರ್ ಕರಿರಾಖ್ಯೊಸ್ ದೇಖೊ; ಖ್ಹಚಂಬಿ ಅಪ್ಣೆ ದೇವ್ನ ಲಡ್ಕಾ ಹುಯಿರಾಸ್. ಆ ಜಗತ್‌ ಇನ ಮಾಲುಮ್‌ಕರ‍್ಲಿದುಕೊಂತೆ ಇನಾಖ್ಹಾಜೆ ಅಪ್ಣುನಾಬಿ ಮಾಲುಮ್‌ ಕರ‍್ಲೆಯ್‍ಕೊಯ್ನಿ. 
\v 2 ಪ್ಯಾರ್‌ನ ದೋಸ್ತಿವೊ ಅಪ್ಣೆ ಹಮ್ಕೆ ದೇವ್ನ ಲಡ್ಕಾ. ಅಜು಼ ಆಗಾಡಿ ಅಪ್ಣೆ ಶಾತ್‌ ಲಿಶುಕರಿ ಕೆಥ್ರಾನವಾಳ ಹುಯಿರ‍್ಹಿಯೆಸ್ ಕರಿ ಬಿಜೂ಼ಬಿ ಖ್ಹಮ್‍ಜ್ಯಕೊಯ್ನಿ. ಕತೋಬಿ ಕ್ರಿಸ್ತಯೇಸು ಆವನಿ ವಖ್ಹ್‌ತೆ ಅಪ್ಣೇಬಿ ಇನಿನಿತರಾಸ್ ರಿಶು ಕರಿ ಮಾಲುಮ್ ಕರಿರಾಖ್ಯಸ್. ಶನಕತೊ ಯೋ ರ‍್ಹಿಶೇತೆ ರೂಪ್‍ಮಸ್ ದೇಕ್‌ಶು. 
\v 3 ಕ್ರಿಸ್ತಯೇಸುಪರ್ ರಾಖಿಮ್ಹೆಲ್ಯಾತೆ ಆ ಭರೋಖ್ಹಾನ ಹರೇಕ್ ಜ಼ಣುಬಿ ಯೋ ಪವಿತ್ರ ಹುಯಿರಾವಾನಿ ಘೋಣಿಸ್ ಇನು ಯೋಸ್‍ ಪರಿಶುದ್ ಕರಿಲೇಸ್. 
\v 4 ಪಾಪ್ ಕರಾವಾಳೊ ಹರೇಕ್ ಜ಼ಣೋಬಿ ದೇವ್ನಿ ಹುಕುಮ್ಮ ಕೋರ‍್ಹೆಯ್ನಿ. ದೇವ್ನಿ ಹುಕುಮ್‌ನ ಮ್ಹೇಲ್‍ವಾನುಸ್‍ ಪಾಪ್. 
\v 5 ಪಾಪ್ ಖ್ಹಾರುಸ್ ಕಾಡ್ಣುಕರಿ ಕ್ರಿಸ್ತ ಆಯೊಕರಿ ಬೋಲಾನುಬಿ, ಅಜು಼ ಇನಾಮ ಪಾಪಸ್ ಕೊಯ್ನಿಕರಿಬಿ ತುಮೂನ ಮಾಲುಮ್ ಛಾ಼. 
\v 6 ಇನಾಮ ತಳ್‍ಗಾಠಿನ್ ರ‍್ಹೇವವಾಳೊ ಪಾಪ್ನಕರಕೊಯ್ನಿ; ಪಾಪ್‍ಕರವಾಳೊ ಇನ ದೇಖಿರಾಖ್ಯುಬಿ ಕೊಯ್ನಿ. ಮಾಲುಮ್ ಕರ‍್ಯುಬಿ ಕೊಯ್ನಿ; 
\v 7 ಪ್ಯಾರ್‌ನ ಲಡ್ಕಾವೊ, ಕೋಣ್‌ಬಿ ತುಮುನ ಠಗಾವ್ಣುನಾತೆ ತಿಮ್ ರ‍್ಹವೊ. ಕ್ರಿಸ್ತ ಕಿಮ್ ನೀತಿವಾಳೊ ಹುಯಿರೋಸ್ಕಿ ತಿಮ್‍ ನೀತಿಥಿ ಚಲಾವಾಳೊ ಹರೇಕ್‍ಜ಼ಣೋಬಿ ನೀತಿವಾಳೊ ಹುಯಿರ‍್ಹೋಸ್. 
\v 8 ಪಾಪ್ ಕರಾವಾಳೊ ಶೈತಾನ್‍ನಿ ಪಿಳ್ಗಿವಾಳೊ. ಶೈತಾನ್‍ ಜ಼ಮಾನೇಥುಬಿ ಪಾಪ್ ಕರವಾಳೋಸ್. ಇನಖ್ಹಾಜೆ ಇನು ಖರಾಬ್ ಕಾಮ್‍ಖ್ಹಾರಾನ ನಾಶ್ ಕರ್ನುಸ್ ಕರಿ, ದೇವ್‌ನೊ ಛಿಯ್ಯೊ ಆಯೋತೆ. 
\v 9 ದೇವ್‍ಥಿ ಪೈದ ಹುಯಿರ‍್ಹವವಾಳೊ ಕೋಣ್‌ಬಿ ಪಾಪ್ ಕರ್ಶೆ ಕೊಯ್ನಿ. ಶನಕತೊ ದೇವ್ನಿ ಸ್ವಭಾವ್ ಇನಾಮ ಛಾ಼. ಯೋ ದೇವ್‍ಥಿ ಪೈದ ಹುಯಿರ‍್ಹೊಸ್ತೆ ಇನಖ್ಹಾಜೆ ಪಾಪ್ ಕರಾನ ಕೋ ಉಶೇನಿ. 
\v 10 ಅಜು಼ ನೀತಿನ ವಾಟ್‌ಮ ನಾಚಾ಼ಲವಾಳೊ, ಇವ್ಣ ಭೈಯೇ ಅಜು಼ ಭೇನೇನ ಲಾಡ್‌ ನಾಕರವಾಳೊ ದೇವ್‍ಥಿ ಪೈದಹುಯೊ ಕೊಯ್ನಿ. ಅಮ್ ದೇವ್ನ ಲಡ್ಕಾ ಕೋಣ್ ಅಜು಼ ಶೈತಾನ್ನ ಲಡ್ಕಾ ಕೋಣ್‌ಕರಿ ಮಾಲುಮ್ ಕರಿಲೆಯೆಜಾ಼ಯ್‍.
\s ಏಕ್‌ಥಿ ಏಕ್‌ ಪ್ಯಾರ್‌ಕರೊ
\p
\v 11 ಅಪ್ಣೆ ಏಕ್‌ಥಿಏಕ್ ಪ್ಯಾರ್‌ಕರ‍್ನು ಕರಿ ಬೋಲಾನು ಸಂದೇಶ್‌ನಾಸ್‍ ತುಮೆ ಪಹಿಲೆಥು ಖ್ಹಮ್‍ಜಿರಾಖ್ಯಸ್ತೆ. 
\v 12 ಕೇಡ್‍ಕರವಾಳೊ ಹುಯಿರಿನ್ ಇನ ಭೈನಾಸ್‍ ಭೋಕಿ ಮಾರ‍್ಯೋತೆ ಕಾಯಿನನಿಘೋಣಿ ಅಪ್ಣೆ ನಾರ‍್ಹೇವ್ಣು. ಯೋ ಶನ ನ್ಹಾನಭೈನ ಮಾರಿನಾಖಿದಿದೊತೆ? ಇನು ಕಾಮ್‌ಖ್ಹಾರು ಖರಾಬ್ ಅಜು಼ ಇನ ಭೈನು ಕಾಮ್ ನೀತಿನು ಹುಯಿರ‍್ಹುಥೂತೆ ಇನಖ್ಹಾಜೇಸ್. 
\v 13 ಭೈಯೇ ಭೇನೆವೊ, ಜಗತ್‌ ತುಮೂನ ವಹೇರ್‌ ಕರ‍್ಯುತೊ ಆಶ್ಚರ್ಯ ನಕೊಕರೊ. 
\v 14 ಅಪ್ಣೆ ಅಪ್ಣ ಭೈಯೇ ಭೇನೆವೊನ ಪ್ಯಾರ್ ಕರಾಥಿ ಮರಣ್‍ಥಿ ನಿಕ್ಳಿನ್ ಕದೇಬಿ ರ‍್ಹವಾನ ಜಾನ್‌ಮ ಛಿಯೆ ಕರಿ ಅಪ್ಣುನ ಮಾಲುಮ್ ಛಾ಼. ಕೋಣ್ ಇವ್ಣ ಭೈಯೇ ಭೇನೇನ ಪ್ಯಾರ್ ಕರಾಕೊಯ್ನಿಕಿ ಇವ್ಣೆ ಮರಣ್‍ಮಾಸ್‍ ಛಾ಼. 
\v 15 ಕೋಣ್‌ಬಿ ಇವ್ಣ ಭೈಯೇ ಭೇನೇನ ವಹೇರ್‌ ಕರಾವಾಳೊ ಖೂನಿಹುಯಿರ‍್ಹೊಸ್. ಅಜು಼ ಖೆವ ಖೂನಿಮಾಬಿ ಕೆದೇಬಿ ರ‍್ಹವಾನು ಜಾನ್‌ ಕೋರ‍್ಹಿಶೇನಿ ಕರಿ ತುಮೂನ ಮಾಲುಮ್. 
\v 16 ಪ್ರಭು ಯೇಸು ಅಪ್ಣಖ್ಹಾಜೆ ಇನ ಜಾನ್ನಾಸ್ ಮ್ಹೇಲ್ಯೊ. ಅನೇಥಿ ಲಾಡ್‌ ಕೆಥ್ರಾನು ಕರಿ ಅಪ್ಣೆ ಖ್ಹಮ್‍ಜಿಲಿದ ಕಿಮ್‌ಕತೊ. ಅಪ್ಣೇಬಿ ಭೈಯೇ ಭೇನೇನಖ್ಹಾಜೆ ಜಾನ್‌ ದೇವವಾಳ ಹುಯಿರಾಸ್‍. 
\v 17 ಅಜು಼ ಆ ಲೋಕ್‌ನು ಧನ್‌ದೌಲತ್‌ ರ‍್ಹವಾಳೊ ಕೋಣ್‌ತೋಬಿ ವದೆಖ್ಹ್‌ಮರ‍್ಹಾವಳ ಇನ ಭೈನ ದೇಖಿನ್‍ ಗೋರ್‌ನ ಕರ‍್ಯತೊ ದೇವ್ನಿ ಪ್ಯಾರ್ ಇನಾಮ ರ‍್ಹಾವನ ಉಶೇಕಿ ಶು? 
\v 18 ಮಾರ ಲಾಡ್ನ ಲಡ್ಕಾವೊ, ತುಮೆಖಾಲಿ ವಾತೆಥೀಬಿ ರ‍್ಹವೊ, ಅಛ್ಛಿವಾತ್‍ ಬೋಲಾಥೀಬಿ ಪ್ಯಾರ್‌ಕರವಾಳ ನಾಹುಯಿರೇವ್ಣುತೆ ಕರ್ನಿಥಿಬಿ ಅಜು಼ ಖ್ಹಾಚಿ ಮೊಹೊಬಥ್ಥಿ ಪ್ಯಾರ್ ಕರಾವಾಳ ಹುಯಿರ‍್ಹೇಣು.
\s ದೇವ್‌ಮ ಧಿಲ್‌ಪತ್‌
\p
\v 19 ಅಮ್‍ ಅಪ್ಣೆ ಖ್ಹಾಚಿಮ ಮಳಿರ‍್ಹವಾಳ ಕರಿ ಅನೇಥಿಸ್‍ ಅಪ್ಣುನ ಮಾಲುಮ್ ಹುವಾಸ್, ತದೆ ಅಪ್ಣು ದಿಲ್‌ ದೇವ್ನ ಖ್ಹಾಮ್ಣೆ ಛುಟಾದಿಲ್‍ನೊ ಹುಯಿರ‍್ಹೇಸ್‍. 
\v 20 ಖಿವಿ ಬಾರೇಮತೋಬಿ ಅಪ್ಣೊ ದಿಲ್ನಿ ಸಾಕ್ಷಿ ಅಪ್ಣುನ ಗುರ್‌ಕಾಯುತೋಬಿ, ಅಖ್ಖುಸ್ ಮಾಲುಮ್ ರ‍್ಹವಾಳೊ ದೇವ್ ಅಪ್ಣ ದಿಲ್ನಿ ಸಾಕ್ಷಿಥೀಬಿ ಮೋಟೊಕರಿ ಅಪ್ಣುನ ಮಾಲುಮ್ ಛಾ಼. 
\v 21 ಪ್ಯಾರ್‌ನ ಭೈಯೇ ಭೇನೆವೊ ಅಪ್ಣ ದಿಲ್ನಿ ಸಾಕ್ಷಿ ಅಪ್ಣುನ ಗುರ್‌ಕಾಯುನಾತೊ, ಅಪ್ಣೆ ದೇವ್ನ ಖ್ಹಾಮ್ಣೆ ಹಿಮ್ಮಥಿರ‍್ಹವಾನ ಉಶೆ. 
\v 22 ಅಪ್ಣೆ ದೇವ್ನಿ ಹುಕುಮ್‌ನ ಅಖ್ಖುಲೀನ್ ಚಾ಼ಲ್ಯಾತೊ ಇನು ಪಸಂದ್‌ನು ಕಾಮ್‍ಕರವಾಳ ಹುಯಿರ‍್ಹಾತೊ ಅಪ್ಣೆ ಶಾತ್ಬಿ ಮಾಂಗಿ ಲಿಯೆಜಾ಼ಯ್‍. 
\v 23 ದೇವ್ನಿ ಹುಕುಮ್ ಶಾತ್‍ಕತೊ ಅಪ್ಣೆ ದೇವ್‌ನೊ ಛಿಯ್ಯೊ ಪ್ರಭು ಯೇಸುನ ನಾಮ್‍ಪರ್ ವಿಶ್ವಾಸ್‍ಕರೀನ್‍ ಇನೆ ಹುಕುಮ್ ಕರಿರಾಖ್ಯೊತೆ ಇಮ್ಮಸ್ ಏಕ್‌ಥಿಏಕ್ ಪ್ಯಾರ್‌ಕರ‍್ನು ಕರಿ ಬೋಲಾನುಸ್. 
\v 24 ದೇವ್ನಿ ಹುಕುಮ್‌ನ ಪಾಡಿಚಾ಼ಲವಾಳೊ ಇನಾಮ ತಳ್‍ಗಾಠಿನ್ ರ‍್ಹೇಸ್. ದೇವ್ ಇವ್ಣಾಮ ತಳ್‌ಗಾಠಿ ರ‍್ಹೇಸ್‍. ದೇವ್ ಅಪ್ಣಾಮ ತಳ್‍ಗಾಠಿ ಛಾ಼ಕರಿ ಯೋ ಅಪ್ಣುನ ಕೃಪೆಥಿ ದೀರಾಖ್ಯೋತೆ ಪವಿತ್ರಾತ್ಮಥೀಸ್ ಮಾಲುಮ್ ಕರಿಲಿಯೇಸ್.
\c 4
\s ಕ್ರಿಸ್ತನು ಆತ್ಮ ಅಜು಼ ಕ್ರಿಸ್ತ ವಿರೋದಿನು ಆತ್ಮ
\p
\v 1 ಪ್ಯಾರ್‌ನ ಅದ್ಮಿವೊ “ಅಪ್ಣಾಮ ಪವಿತ್ರಾತ್ಮ ಛಾ಼” ಕರಿ ಬೋಲಿಲ್ಯಾವಾಳ ಅಖ್ಖಾಸ್ನ ವಿಶ್ವಾಸ್ ನಾಕರ‍್ನು. ಯೊ ಹುಮ್ಮಖ್ಹ್‌ ದೇವ್‍ಥಿ ಆಯು ಕಿಶು ಕರಿ ತರೀಪ್‌ಶ ಕರಿನ್ ದೇಖೊ. ಶನಕತೊ ಜಗತ್‌ಮ ಕೆತ್ರುಕ್ಕಿ ಝೂ಼ಟು ದೇವ್ನಿ ಸಮಾಚಾರ್ ಬೋಲವಾಳು ಕಿಜ಼್ಜ ಕಿಜ್ಜಾ಼ಬಿ ಫೈಲೈಗು. 
\v 2 ದೇವ್ನ ಆತ್ಮಥು ಆಯುತೆ ಹುಮ್ಮಖ್ಹ್‌ನ ತುಮೆ ಕಿಮ್ ಖ್ಹಣೇದ್ ಕರೇಜಾ಼ಯ್‍ಕತೊ; ಅದ್ಮಿಹುಯಿನ್ ಆಯೊತೆ ಯೇಸುಕ್ರಿಸ್ತನ ಮಾನಿಲ್ಯವಾನು ಆತ್ಮ ದೇವ್‍ಥೀಸ್‍ ಆವಸ್ತೆ. 
\v 3 ಯೇಸುನ ಮಾನಿಲೇಯಿಕೊಂತೆ ಆತ್ಮ ದೇವ್‍ಥಿ ಆಯುತೆಕಾಹೆ. ಯೋ ಕ್ರಿಸ್ತವಿರೋದಿ ಆತ್ಮ ಹುಯಿರ‍್ಹುಸ್. ಯೋ ಆವ್‍ಶೆಕರಿ ತುಮೆ ಖ್ಹಮ್‍ಜಿರಾಖ್ಯಸ್‍ನಿ; ಹಮ್ಕೆ ತದೇಸ್‌ ಯೋ ಜಗತ್‌ಮ ಅಯಿಗು. 
\v 4 ಪ್ಯಾರ್‌ನ ಲಡ್ಕಾವೊ, ತುಮೆತೋಬಿ ದೇವ್‌ಮ ಮಳಿರ‍್ಹವಾಳ. ಅಜು಼ ಇನ ತುಮೆ ಜೂತಿರ‍್ಹವಾಳ ಹುಯಿರ‍್ಹಾಸ್ ಇವ್ಣೆ ಜಗತ್‌ಮ ಛಾ಼ತೆ ದುರಾತ್ಮಥೀಬಿ ತುಮಾರಮ ಛಾ಼ತೆ ಆತ್ಮ ಮಹಾನ್ ಹುಯಿರ‍್ಹೂಸ್ ಇನಖ್ಹಾಜೇಥಿಸ್ ಯೋ ಝೂ಼ಟ ಪ್ರವಾದಿಯೇವ್‍ನ ಆತ್ಮನ ಜೂತಿಗಯ. 
\v 5 ಇವ್ಣೆ ಜಗತ್‌ಮ ಮಳಾವಾಳು. ಅನಖ್ಹಾಜೇಥಿ ಇವ್ಣೆಖ್ಹಾರು ಆ ಜಗತ್ನಿ ವಾತೆನಾಸ್ ಬೋಲಾಸ್. ಇನಖ್ಹಾಜೆ ಆ ಜಗತ್‍ಬಿ ಇವ್ಣಿ ವಾತ್‍ಖ್ಹಮ್‍ಜ಼ಸ್‍. 
\v 6 ಅಪ್ಣೆತೋಬಿ ದೇವ್‌ಮ ಮಳ್ಯಹುಯ. ದೇವ್ನ ಮಾಲುಮ್‌ ಕರಿರಾಖವಾಳೊ ಅಪ್ಣಭಣಿ ಕಾನ್‍ದೇಸ್. ದೇವ್‌ಮ ಮಳಿರ‍್ಹೆಯಿಕೊಂತೆ ಅಪ್ಣುನ ಕಾನ್‍ದೇಯ್‍ ಕೊಯ್ನಿ. ಅನಖ್ಹಾಜೆಥೀಸ್ ಖ್ಹಾಚ಼ನ ಬೋಲಾನು ಆತ್ಮಖಿವು ಅಜು಼ ಝೂ಼ಟು ಬೋಲಾತೆ ಆತ್ಮ ಖಿವುಕರಿ ಅಪ್ಣುನ ಮಾಲುಮ್‌ ಹುವ್ವಾಸ್‌.
\s ದೇವ್ನಿ ಪ್ಯಾರ್
\p
\v 7 ಪ್ಯಾರ್‌ನ ದೋಸ್ತಿವೊ ಅಪ್ಣೆ ಏಕ್‌ಥಿಏಕ್ ಪ್ಯಾರ್ ಕರಿಯೆ ಶನಕತೊ ಪ್ಯಾರ್ ದೇವ್‍ಥಿ ಆಯುಹುಯು ಹುಯಿರ‍್ಹೂಸ್ ಅಜು಼ ಪ್ಯಾರ್ ಕರಾವಾಳೊ ಹರೇಕ್‍ಬಿ ದೇವ್‍ಥಿ ಪೈದ ಹುವವಾಳೊ ಹುಯಿರ‍್ಹೋಸ್ ಯೋ ದೇವ್ನ ಮಾಲುಮ್ ಕರಾಖವಾಳೊ ಹುಯಿರ‍್ಹೋಸ್. 
\v 8 ಪ್ಯಾರ್ ನಾಕರವಾಳೊ ದೇವ್ನ ಮಾಲುಮ್ ಕರಿರಾಖ್ಯಕೊಂತೆ ಹುಯಿರ‍್ಹೊಸ್. ಶನಕತೊ ದೇವ್ ಪ್ಯಾರ್‌ವಾಳೊ ಹುಯಿರ‍್ಹೊಸ್. 
\v 9 ಅಪ್ಣೆ ಇನೇಥಿ ಬಚಾ಼ನಖ್ಹಾಜೆ ಇನ ಎಕ್ಕಸ್ ಛಿಯ್ಯಾನ ಜಗತ್‌ಮ ಮೋಕ್ಲಮಸ್‍ ದೇವ್ನಿ ಪ್ಯಾರ್ ಅಪ್ಣಾಮ ಅಯಿರ‍್ಹೀಸ್‍. 
\v 10 ಅಪ್ಣೆ ದೇವ್ನ ಪ್ಯಾರ್ ಕರ‍್ಯಕೊಯ್ನಿ, ಕತೋಬಿ ಯೋ ಅಪ್ಣುನ ಪ್ಯಾರ್ ಕರೀನ್ ಅಜು಼ ಅಪ್ಣ ಪಾಪ್ನ ಪರಿಹಾರ‍್ನಖ್ಹಾಜೆ ಇನ ಛಿಯ್ಯಾನ ಮೋಕ್‍ಲ್ಯೊತೆ ಇನಾಮಸ್ ಪ್ಯಾರ್‌ನಿ ಖ್ಹಾಚಿಗುಣ್‍ ದೆಖೈಜಾ಼ಸ್. 
\v 11 ಪ್ಯಾರ್‌ನ ದೋಸ್ತಿವೊ, ದೇವ್ ಅಪ್ಣುನ ಅಮ್ ಪ್ಯಾರ್ ಕರಾಪರ್ ಅಪ್ಣೇಬಿ ಏಕ್‌ಥಿಏಕ್ ಪ್ಯಾರ್‌ಕರ‍್ನುಸ್‍ ಕರ‍್ನು. 
\v 12 ದೇವ್ನ ಕೋಣ್‌ಬಿ ಕದೇಬಿ ದೇಖ್ಯುಕೊಯ್ನಿ. ಅಪ್ಣೆ ಏಕ್‌ಥಿಏಕ್ ಪ್ಯಾರ್‌ಕರ‍್ಯತೊ ದೇವ್ ಅಪ್ಣಾಮ ರ‍್ಹೇಸ್, ಅಜು಼ ಇನಿ ಪ್ಯಾರ್ ಅಪ್ಣಾಮ ಭರ್‌ಪೂರ್‌ಥಿ ರ‍್ಹೇಸ್. 
\v 13 ದೇವ್ ಇನಿ ಆತ್ಮಾನ ಅಪ್ಣಾಮ ದೀರಾಖ್ಯೋತೆ ಇನಖ್ಹಾಜೇಸ್ ಅಪ್ಣೆ ಇನಾಮ ಛಿಯೆಕರಿ ಮಾಲುಮ್ ಕರಿಲಿಯೇಸ್. 
\v 14 ಬಾನೆ ಇನ ಛಿಯ್ಯಾನ ಜಗತ್ನೊ ರಕ್ಷಕ್ ಕರೀನ್ ಮೋಕ್ಲಿರಾಖ್ಯೊತೆ ಅಪ್ಣೆ ದೇಖಿರಾಖ್ಯಸ್. ಅಜು಼ ಇನಿ ಬಾರೇಮ ಅಪ್ಣೆ ಸಾಕ್ಷಿ ಬೋಲಿಯೇಸ್. 
\v 15 ಯೇಸುಕ್ರಿಸ್ತ ದೇವ್‌ನೊ ಛಿಯ್ಯೊಕರಿ ಕೋಣ್ ಮಾನಿಲೇಸ್ಕಿ ಇವ್ಣಾಮ ದೇವ್ ರ‍್ಹೇಸ್, ಅಜು಼ ಇವ್ಣೆ ದೇವ್‌ಮ ರ‍್ಹವಾಳ ಹುಯಿರಾಸ್. 
\v 16 ಅಮ್ಮಸ್ ದೇವ್ ಅಪ್ಣಾಮ ರಾಖಿರಾಖ್ಯೊತೆ ಪ್ಯಾರ್‌ನ ಅಪ್ಣೆ ಮಾಲುಮ್ ಕರಿರಾಖ್ಯಸ್. ಇನ ಅಪ್ಣೆ ವಿಶ್ವಾಸ್ ಕರಿಯೇಸ್. ದೇವ್ ಪ್ಯಾರ್‌ವಾಳೊ ಹುಯಿರ‍್ಹೊಸ್. ಪ್ಯಾರ್‌ಮ ರ‍್ಹವವಾಳೊ ದೇವ್‌ಮ ರ‍್ಹವಾಳೊ ಹುಯಿರೇಸ್‌. ದೇವ್ ಇವ್ಣಾಮ ರ‍್ಹವಾಳೊ ಹುಯಿರ‍್ಹೊಸ್ ದೇವ್ ಪ್ಯಾರ್ ಹುಯಿರ‍್ಹೊಸ್. 
\v 17 ನ್ಯಾವ್‌ತೀರ್ಪ್‌ನ ದನ್ಮ ಅಪ್ಣೆ ಹಿಮ್ಮಥ್ಥಿ ರ‍್ಹವಾನಖ್ಹಾಜೆ ಇನಿ ಪ್ಯಾರ್ ಅಪ್ಣಾಮ ಛಾ಼. ಆ ಜಗತ್‌ಮ ಅಪ್ಣು ಜಿವ್ಣು ಕ್ರಿಸ್ತಯೇಸುನ ಜಿವ್ಣನಿಘೊಣಿ ರ‍್ಹೇಸ್ತೆ ಇನಖ್ಹಾಜೇಸ್ ಆ ಭರೋಖ್ಹೊ ಅಪ್ಣಾಮ ಭರ್‌ಪೂರ್‌ಥಿ ರ‍್ಹೇಸ್ತೆ. 
\v 18 ಪ್ಯಾರ್ ರ‍್ಹೇಸ್ತೆ ಹಿಜ್ಜಾ಼ ಡರ್‌ಕೊರ‍್ಹೇಯಿನಿ. ಡರ್‌ರ‍್ಹೇಸ್ತೆ ಹಿಜ್ಜಾ಼ ನಿಶತ್‌ ರ‍್ಹೇಸ್. ಕತೋಬಿ ಭರ್‌ಪೂರ್‌ ಪ್ಯಾರ್ ಡರ‍್ನ ಮಾರಿನಖ್ಹಾಡಿದೇಸ್. ಡರವಾಳೊ ಪ್ಯಾರ್‌ಮ ಪೂರ ಹುಯಿರ‍್ಹವಾಳೊ ಕಾಹೆ. 
\v 19 ದೇವ್ ಅಪ್ಣುನ ಪಹಿಲೆ ಪ್ಯಾರ್ ಕರ‍್ಯೊತೆ ಇನಖ್ಹಾಜೆ ಅಪ್ಣೆ ಇನ ಪ್ಯಾರ್ ಕರಿಯೇಸ್. 
\v 20 ಏಕ್‍ಜ಼ಣೊ ಮೇ ದೇವ್ನ ಪ್ಯಾರ್‌ಕರುಸ್‍ಕರಿ ಬೋಲಿನ್ ಇನ ಭೈನ ವಹೇರ್‌ಕರ‍್ಯೊತೊ ಯೋ ಝೂ಼ಟೊ ಹುಯಿರ‍್ಹೊಸ್.‌ ಶನಕತೊ ಇನ ಜೋ಼ಡ್ಮ ರ‍್ಹವಾಳ ಭೈಯೆ ಭೇನೇನ ಪ್ಯಾರ್ ನಾಕರ‍್ಯೊತೊ ಯೋ ದೇಖಕೊಂತೆ ದೇವ್ನ ಕಿಮ್ ಪ್ಯಾರ್ ಕರ್ಶೆ? 
\v 21 ದೇವ್ನ ಪ್ಯಾರ್‌ಕರವಾಳೊ ಇನ ಭೈ ಭೇನೇನ ಪ್ಯಾರ್‌ಕರ‍್ನು ಕರಿ ಕ್ರಿಸ್ತಯೇಸು ಅಪ್ಣುನ ಹುಕುಮ್ ಕರ‍್ಯೊ.
\c 5
\s ಜಗತ್ನ ಉಪ್ಪರ್ ವಿಶ್ವಾಸ್‌ನಿ ಜೀತ್
\p
\v 1 ಯೇಸುಸ್ ಪ್ರಭು ಕರಿ ನಂಬವಾಳ ಹರೇಕ್ ಜ಼ಣಾಬಿ ದೇವ್ನ ಲಡ್ಕಾ ಹುಯಿರ‍್ಹಾಸ್. ಕೋಣ್ ಇನ ಪೈದಕರ‍್ಯೊತೆ ಬಾನ ಪ್ಯಾರ್ ಕರಸ್ಕಿ ಅಥ್ರಾನವಾಳು ಹರೇಕ್ ಜ಼ಣು ಇನ ಛಿಯ್ಯಾನ ಜಿನುಕು ಪ್ಯಾರ್‌ಕರಸ್‍. 
\v 2 ಅಪ್ಣೆ ದೇವ್ನ ಪ್ಯಾರ್‌ಕರೀನ್ ಇನಿ ಹುಕುಮ್‌ನ ಪಾಡಿಚಾ಼ಲಥೀಸ್‍ ದೇವ್ನ ಲಡ್ಕಾನ ಪ್ಯಾರ್‌ಕರ್‌ಶು ಕರಿ ಮಾಲುಮ್ ಕರಿಲಿಯೇಸ್. 
\v 3 ದೇವ್ನ ಪ್ಯಾರ್‌ಕರ‍್ವಾನು ಕರಿ ಬೋಲ್ಯುತೊ ಇನೆ ದಿದೊತೆ ಹುಕುಮ್‌ನ ಲೀನ್‍ ಚಾ಼ಲ್‍ವಾನುಸ್‍ ಹುಯಿರುಸ್. ಇನು ಹುಕುಮ್‍ಖ್ಹಾರು ಅಪ್ಣುನ ಕಠಣ್ ಶಾತ್ಬಿ ಕಾಹೆ. 
\v 4 ಶನಕತೊ ದೇವ್‍ಥಿ ಪೈದ ಹುಯೋತೆ ಹರೇಕ್ ಜ಼ಣುಬಿ ಜಗತ್ನ ಜುತಿಲೇಸ್. ಜಗತ್ನಜುತಾನು ಅಪ್ಣಿ ವಿಶ್ವಾಸ್‌ಥೀಸ್. 
\v 5 ಯೇಸುಸ್ ದೇವ್‌ನೊ ಛಿಯ್ಯೊ ಕರಿ ವಿಶ್ವಾಸ್ ಕರವಾಳೋಸ್ ಜಗತ್ನ ಜುತಾನ ಉಶೆಪಣ್ಕಿ ಜಗತ್ನ ಜುತಾನ ಅಜು಼ ಕಿನೇಥಿ ಉಶೆ?
\s ಛಿಯ್ಯಾನಿ ಬಾರೇಮ ಸಾಕ್ಷಿ
\p
\v 6 ಪ್ರಭು ಯೇಸುಸ್ ಪಾಣಿಥಿ ಅಜು಼ ಲ್ಹೋಯಿಥಿ ಆಯಿರ‍್ಹೋಸ್. ಖಾಲಿ ಪಾಣಿಥೀಸ್‍ ಕಾಹೆ, ಕತೋಬಿ ಪಾಣಿಥೀಬಿ ಲ್ಹೋಯಿಥಿಸ್‍ ಆಯಿರ‍್ಹೊಸ್ತೆ. ಅನ ಪವಿತ್ರಾತ್ಮಸ್ ಸಾಕ್ಷಿ. ಶನಕತೊ ಪವಿತ್ರಾತ್ಮಸ್ ಖ್ಹಾಚೊ಼ ಹುಯಿರೋಸ್. 
\v 7 ಶನಕತೊ ತೀನ್ ಸಾಕ್ಷಿ ಛಾ಼: 
\v 8 ಅಮ್‍ ಪವಿತ್ರಾತ್ಮ, ಪಾಣಿ ಅಜು಼ ಲ್ಹೋಯಿಕರಿ ತೀನ್ ಸಾಕ್ಷಿಖ್ಹಾರು ಛಾ಼. ಆ ತೀನ್ಹೇಬಿ ಎಕ್ಕಸ್ ಸಾಕ್ಷಿ ದೇಸ್. 
\v 9 ಅಪ್ಣೆ ಅದ್ಮೇವ್‌ನಿ ಸಾಕ್ಷಿನ ಮಾನಿಲಿಯೇಸ್‍ನಿ ಇಮ್ಮಸ್ ದೇವ್ನಿ ಸಾಕ್ಷಿ ಇನೇಥಿಬಿ ಘಣು ಮಹಾನ್ ಹುಯಿರ‍್ಹುಸ್‍. ಶನಕತೊ ದೇವ್ನೆ ದೀರಾಖ್ಯೋತೆ ಸಾಕ್ಷಿ ಇನ ಛಿಯ್ಯಾನಿ ಬಾರೇಮ ಹುಯಿರ‍್ಹುಸ್‍. 
\v 10 ದೇವ್ನ ಛಿಯ್ಯಾಮ ವಿಶ್ವಾಸ್ ಕರಾವಾಳೊ ಆ ಸಾಕ್ಷಿನ ಇನಾಮ ಲೀರಾಖಸ್. ದೇವ್ನ ನಂಬಕೊಂತೆ ಯೋ ಇನ ಝು಼ಟೊಕರಿ ಬಣೈರಾಖ್ಯೊಸ್. ಕಿಮ್‌ಕತೊ ದೇವ್ ಇನ ಛಿಯ್ಯಾನಿ ಬಾರೇಮ ದಿದೋತೆ ಸಾಕ್ಷಿಮ ಇನೆ ವಿಶ್ವಾಸ್ ಕರ‍್ಯೊಕೊಯ್ನಿ. 
\v 11 ಯೋ ಸಾಕ್ಷಿ ಖಿವಿಕತೊ ದೇವ್ ಅಪ್ಣುನ ಕೆದೇಬಿ ರ‍್ಹವಾನು ಜಾನ್ನ ದಿರಾಖ್ಯೊಸ್. ಯೊ ಜಾನ್‌ ಇನ ಛಿಯ್ಯಾಮ ಛಾ಼. 
\v 12 ಕಿನಾಮ ದೇವ್‌ನೊ ಛಿಯ್ಯೊ ಛಾ಼ಕಿ ಇನಾಮ ಜಾನ್‌ ರ‍್ಹೇಸ್. ಕಿನಾಮ ದೇವ್‌ನೊ ಛಿಯ್ಯೊ ಕೊ ರ‍್ಹೇಯ್ನಿಕಿ ಇನಾಮ ಜಾನ್‌ ಕೊರ‍್ಹೇಯಿನಿ.
\s ಕದೇಬಿ ರ‍್ಹಾವನೊ ಜಾನ್‌
\p
\v 13 ದೇವ್ನ ಛಿಯ್ಯಾನ ನಾಮ್‍ಪರ್ ವಿಶ್ವಾಸ್ ರಾಖವಾಳ ತುಮೆ ಕೆದೇಬಿ ರ‍್ಹವಾನ ಜಾನ್ನ ಲೀರಾಖವಾಳ ಕರಿ ಬೋಲವನಾಸ್‍ ಮೇ ತುಮೂನ ಆಖ್ಹಾರು ಲೀಖಿರಾಖ್ಯೊಸ್. 
\v 14 ಅಜು಼ ದೇವ್ನ ಖ್ಹೂಜ಼್‍ಥಿ ಶಾತ್ತೋಬಿ ಮಾಂಗಿಲಿದಾತೊ ಯೋ ಅಪ್ಣಿ ಬಿಂತಿನ ಖ್ಹಮಜ಼್‌ಶೆ ಕರಿ ಅಪ್ಣುನ ಭರೋಖ್ಹೊ ಛಾ಼. 
\v 15 ಅಪ್ಣೆ ಶಾತ್‍ ಬೋಲಿಲಿದಾತೋಬಿ ಅಪ್ಣಿ ಬಿಂತೀನಿವ್ಹಾರ್‌ನ ದೇವ್ ಖ್ಹಮ್‍ಜಾ಼ಸ್‍ಕರಿ ಅಪ್ಣುನ ಮಾಲುಮ್ ರ‍್ಹಯುತೋ ಅಪ್ಣೆ ಬಿಂತಿಕರ‍್ಯುಹುಯು ಇನೇಥಿ ಅಪ್ಣುನ ಮಳ್‌ಶೆಕರಿ ಅಪ್ಣಿ ಭರೋಖ್ಹಾಥಿ ಮಾಲುಮ್‌ಪಡಸ್‍. 
\v 16 ಕೋಣ್‌ತೋಬಿ ಇನೊ ಭೈ ಅಜು಼ ಭೇನ್ ಮರಣ್‍ಕೊಂತೆ ಪಾಪ್‍ಕರಾನು ದೇಖಾಯುತೊ ಯೊ ದೇವ್‌ಮ ಬಿಂತಿ ಕರಿಲ್ಯವಾದೆ. ತದೆ ದೇವ್ ಮರಣ್‍ಕೊಂತೆ ಪಾಪ್‍ಕರವಾಳಾನ ಜಾನ್ನ ದಿಶೆ. ಮರಣ್‍ಲ್ಯವಾನಿ ಪಾಪ್ ಛಾ಼. ಆ ಪಾಪ್ನಿಬಾರೇಮ ಯೋ ಬಿಂತಿ ಕರಿಲ್ಯವಾದೆಕರಿ ಮೇ ಬೋಲುಕೊಯ್ನಿ. 
\v 17 ಖರಾಬ್ ಕರಾನು ಅಖ್ಖೂಬಿ ಪಾಪ್‍ಹುಯಿರುಸ್‍, ತ್ಯೋಬಿ ಬಿಗರ್ ಮರಣ್ಣಿ ಪಾಪ್‌ಬಿ ಛಾ಼. 
\v 18 ದೇವ್‍ಥಿ ಉಬ್‍ಜಾ಼ವಾಳೊ ಪಾಪ್‍ಕರವಾಳೊ ಕಾಹೆ ಕರಿ ಅಪ್ಣುನ ಮಾಲುಮ್ ಛೆ. ದೇವ್‍ಥಿ ಪೈದಹುವವಾಳೊ ಇನುಯೋಸ್ ಬಚಾ಼ಡಿಲಿಶೆ. ಕೇಡ್‌ ಕರಾವಾಳೊ ಇನ ಛೀಮ್‍ಶೆ ಕೊಯ್ನಿ. 
\v 19 ಹಿಡಿ ಜಗತ್ತಸ್ ಕೇಡ್‌ ಕರವಾಳನ ಕಬ್‌ಜಾ಼ಮ ರ‍್ಹಯುತೋಬಿ ಅಪ್ಣೆ ದೇವ್ನ ಮಳಿರ‍್ಹವಾಳ ಕರಿ ಅಪ್ಣುನ ಮಾಲುಮ್ ಛಾ಼. 
\v 20 ದೇವ್‌ನೊ ಛಿಯ್ಯೊ ಆ ಜಗತ್‌ಮ ಅಯಿನ್ ಅಪ್ಣೆ ಖ್ಹಾಚೊ಼ ಹುಯಿರೋಸ್ತೆ ದೇವ್ನ ಮಾಲುಮ್‌ ಕರಿಲ್ಯವಾನಿಘೊಣಿ ಅಪ್ಣುನ ಖ್ಹಯಾಲ್ ದೀರಾಖ್ಯೊಸ್‍ಕರಿ ಅಪ್ಣುನ ಮಾಲುಮ್‌ಛಾ಼. ಅಪ್ಣೆ ದೇವ್‌ನೊ ಛಿಯ್ಯೊ ಹುಯಿರೋತೆ ಕ್ರಿಸ್ತಮ ರ‍್ಹಾವಾನ ಖ್ಹಾಚ ದೇವ್‌ಮ ರ‍್ಹಾವವಾಳ ಹುಯಿರ‍್ಹಾಸ್. ಯೋ ಕ್ರಿಸ್ತಸ್ ಕದೇಬಿ ರ‍್ಹವಾನು ಹರ್‌ಹಮೇಶಾನೊ ಜಾನ್‌ಬಿ ಹುಯಿರ‍್ಹೊಸ್. 
\v 21 ಪ್ಯಾರ್‌ನ ಲಡ್ಕಾವೊ ಮೂರತ್ ದೂರ್ ರ‍್ಹೀನ್ ತುಮುನ ಬಚಾ಼ಡಿಲೇವೊ.