\id EPH — URI N. Sampson \h EFESAS \toc1 Midi umpang Pol wari Efesas amingga' yokiamgu' \toc2 EFESAS \toc3 EFESAS \mt1 Midi umpang Pol wari Efesas amingga' yokiamgu' \c 1 \p \v 1 Ka Pol na Anutu ana tuguinga Kasira Aming Jisas wari nipmiinga adining aposel kane u tanga itik, wara' na Efesas yongni aming arantagim ka Kasira Aming Jisas ga' naktangka tanga adining kadapmang didimeng yaranga iking sidita' umpang i yoksamarik. \p \v 2 Anutu ka indining babangni' girii guk ka girii Kasira Aming Jisas guk wari ai'dap tanga kafakafa tasabinga sidi kabaksi' kugurang guk gi' ikanting. \s1 Kasira Aming Jisas ganang wa Anutu wari kadapmang kuni' kuni' ganang kafakafa yotangkanibita' \p \v 3 Indi Jisas ga' naktangka tinga Anutu wari ai'dap kareng tinima indining urani ifitangka waraga' adining yong kareng ning tangkunang kuni' kuni' u kuma' nimsasu'neinga ikem wara' indi waraga' kabakni' kareng naknga Anutu girii ka girini' Kasira Aming Jisas ning beni adita' mesisiringa tantam. \v 4 Ka kadapmang kareng ka Anutu wari u tinimgu' wa timinggi' adi kama kunim u ko mo' tugu' ganang wa adi naktangka aming indi kamaganang ning kadapmang kadagang u kabisasu'nanga Kasira Aming Jisas ganang sini' garanga ira kadapmang didimengsa' tanga fafandangeng kareng sini' garanga ira kadapmang didimengsa' tanga fafandangeng kareng sini' iik waraga' kuma' sura indifikasiregu'. \v 5 Ning tanga adi indita' siamo' naknga ananing sasuk ganangsa' ning kuma' suku', Kasira Aming Jisas wari inagira fabanga bak kukyabinga adi naganing sabane arantagim ning kadofinga ikni', ning suku'. \v 6 Anutu adi ning kuma' sura kabigu' wara' adi indi nipbuburenga yotangkanip titiga' wa adining mindingni kareng ka adita' siamo' nakita' u kabanimgu'. Ka indi adining ai'dap girii waraga' sura adining wap bema aranga mesisiringa sa' tantam. \p \v 7-8 Tim indi kadapmang kamaganangnisa' yaranga kadagang tanga yagum wara' kadagang wari tofaniptangkainga indi kadagang wara'ning kapmik ganangsa' yagum. Ka inga' yara'ganang wa Kasira Aming Jisas wari indita' siamo' naknga yotangkanip titiga' tanga kumogu' wari indining kadagang ka u tofanipku' u kuma' udanga kayoniminga Anutu wari suknakubenim kuma' tugu'. Ka Anutu wari ai'dap ka indita' u tinimgu' wa kabasi' mo', girii sini'. \v 9 Ka Anutu wari Kasira Aming Jisas ning kane ganang u tanga yotangkanipku' wa adi indi yotangkanip ning kadapmang ka u tugu' u tinim waraga' wa timinggi' kuma' sura kabigu'. Ka inga' Jisas wari kane ka u tinga wa Anutu wari adining sasuk kigineng ka kapmo' fidegu' u ningtintingneinga sarengsa' ubu kasasu'nanga ikem. \v 10 Ka Anutuning sasuk mang ka wa ning, Anutu adi aming a napa'napa' u indifididimanga anganga kama ari' ka inga' adi kuma' sura kabigu' wara'ganang wa adi aming kamaganangni dabik a kunim aming u fabanga bak dabiksa' kuknipma indining niptatora aming girini' ka Kasira Aming Jisas u kaminiminga niptatoro'ga'. \p \v 11 Ka napa' ka kuma' kadofiging a napa' fam ka inga' ko kadofini' wa anasining sasuk ganangsa' mo' kadofiting, mokngang, wa Anutuning sasuk ganangsa' kadofiting. Indi Kasira Aming Jisas ga' naktangka tinga adi manggara bak gi' kuknibara' wara'ning ki wa ning, timinggi' sini' Anutu adi indi adining arantagim ganang iik waraga' kuma' sura indifakasiranagu' wara' wara'ganangsa' yaranga tinga kadofinga ikem. \v 12 Ka Juda aming fam ka girii Jisas ning midi tim munumung naknga naktangkagum indi Anutu wari indita' kafakafa sini' tinimgu' u kanga adining wap bema aranga mesisiringa sa' tanga ikantam. \p \v 13 Ka aming ka Juda mo' arantagim nua'nini sidi inga' indi anga midi beng guk kareng ka Anutu wari sidi yotangkasap ga' tugu' wara'ning u kuma' ituasaminga naknga naktangka ting sidindu' ningsa', sidi adita' naktangka tinga adi manggara gi' kuksapma wap Anutuning arantagim ning iik waraga' sura adining mini unggo kareng ka timinggi' sidita' sansam ga' kuma' totangkagu' u saminga sidi adining arantagim ning kuma' iking. \v 14 Ka Anutu adi kafakafa tinip ga' kuma' totangkagu' wara' adi kafakafa tinipma adining mini unggo u nimita'. Ka adining mini unggo kareng ka wa napa' kareng ka adi inga' ninim ga' togu' wara'ning dibing u nimara', ka indi u kanga ning nakedanga tontam, o beng sini' inga' Anutu adi aming ka adining arantagim u yotangkanibinga napa' nua'ni wari nua'bu mo' tofanibinga indi kareng gi'sa' iknamga', wara' indi waraga' sura Anutuga' mesisiringa tanga adining wap girii u bema areinga aming wari adining kigineng u kanting. \s1 Pol wari Anutu wari Efesas aming ga' sasuk kareng iyam waraga' ibang toimgu' \p \v 15-16 Ka Pol na Anutu wari sidita' kafakafa tasaminga kareng sini' iking, abanga sidi girii Jisdas ga' naktangka tanga naktangka aming kuyase fam ga' siamo' naknga kafakafa tiabiting wara'ning midi u naknga kabakna karengsa' naknga Anutuga' mesisiringa sa' tanga ikitik. Na Anutuga' ibang tugutik ganang wa sidi mo' sibitik, mokngang, na sidita' sura sidi yotangkasap ga' undu' kuma'sa' tugutik. \v 17 Ka Anutu ka naga ibang fatongamarik wa kareng sini' girini' Kasira Aming Jisas ning beni kigineng girii guk waraga' fatongamarik. Ka na Anutu ka wari adining sasuk kareng u saminga sidi sasuk ka u bema adining iik ning ki a adining midi kareng wara'ning ki u nakedasasu'na waraga' fatongamarik. \v 18 Ka na Anutu wari sidining kabaksi' u tipsangandainga sidi Anutuning kadapmang ganang iik wara'ning u sura nakeda waraga' tanga fatorik. Anutu adi inga' aming ka adining arantagim ikem indita' kafakafa sini' tinim waraga' kuma' totangkagu' wara' sidi adining sasuk u bema ira kabaksi' kareng guk ira nasi' ka adi inga' tinim ga' togu' wara'ning u sura nakedanting. \v 19 Abanga sidi sasuk ka wara'guk ira Anutuning tangkunang ning kigineng girii sini' ka naktangka aming indi yotangkanip waraga' tita' wara'ning undu' sura nakedanting. \v 20 Ka tangkunang girii ka naktangka aming indiganang u tinimita' wari'sa' wa tim Anutu wari Kasira Aming Jisas ka kuma' kumogu' u tubobu tipmaragu'. Tipmarara ning tanga nagira taranga kunimganang kuta ananing kafong kareng ganang kamiinga anagok napa'napa' u niptatora ning girii dabik ikiamu'. \v 21-22 Ka beng sini' Anutu wari napa'napa' u yaptatora ning girii sini' ning kamigu', aming girisi king a aming wap guk wa ma aming tangkunang girii guk a aming girisi ka tim kuma' ira abiging a inga' yara'ganang iking a inga' ikni', kamaganang a kunimganang dabiksa' u defata' wa adisa' yaptatoreinga adining kapmik ganangsa' iik wara'ning girii beng sini' kamigu'. Abanga adi Anutu wari naktangka aming arantagim dabiksa' u fonga kuknipma niptatora wara'ning aming girii tim iyak sini' ning kamigu'. \v 23 Ka naktangka aming indi Kasira Aming ning fugu ning ikem. A Kasira Jisas wa napa'napa' dabik wara'ning ki tim iyak sini'. Ka naktangka aming indi adining fugu, wara' indi adiganang yorafanga aming fugu kunik kigineng guk ning ikem. Ka na midi ka u torik waraga' sura Anutu wari yotangkasap waraga' ibang fatosamarik. \c 2 \s1 Anutu wari tubobu indifimarakinga Kasira Aming guk ka' kareng ikem \p \v 1 Ka tim wa aming ka Juda mo' sidi kadapmang kadagang sa' tanga ira Anutuning kadapmang kareng waraga' sasuk wara'ning tangkunang kabi'guk mo' yaging aming kungkumosi ningda'ning yaging, ka Anutu wari tubobu sifimaragu'. \v 2 Sidi kamaganang yara'ning kadapmang kadagang unggungsa' yaranga ira mini unggo kadagasi ning girisi' Setan adining kapmik ganang yaging. Ka Setan adi aming ka Anutuning midi guk mo' nakiting u ko yaptatoranga ita'. \v 3 Ka aming arantagim nua'ni sidisa' mo', tim Juda aming indindu' ningsa', indi aming arantagim ka Anutuning midi guk mo' naknga iikning ning yagum. Ira ning tanga kabakni'ganang wa sasuk kamaganangnisa' tanga yagum. Kadapmang kadagang ka wara'ganang yagum wa aming ka kadapmang kadagangsa' urang tanga ikiting wara'siguk dabik ningsa' kuma' yagum wara' Anutu adi adisigok dabik kagaya girisa' ninim ning. \v 4-5 Ka mokngang Anutu ka aming indita' siamo' naknga nipbubure tita' wara' indi kadagang ko tanga ira Anutuning midi guk mo' naknga aming kungkumosi ningda'ning ko yagum ganang wa Anutu adi indi yotangkanip ga' sura Kasira Aming Jisas u anigareinga afanga tubobu indifimarara manggaknipku'. Ning tinga indi adining tangkunang ganang ka' tubobu marara ikem. Ka wa indi aming karesi ning nipma mo' yotangkanipku', mokngang, wa Anutu ananing sasuk a ai'dap girii wara'ganangsa' u tinimgu'. \v 6 Ka aming arantagim ka Kasira Aming Jisas ga' naktangka tanga ikem indi Anutu wari Kasira Aming Jisas u tubobu tipmarainga ka' iik tita' wa adi indigok dabik kuma' indifimarak ning ningda'ning tugu'. Adi mindingni u tipmarara nagira taranga napa'napa' ning girii kuma' kamiinga ita', ningsa' wa inga' indindu' adigok dabik ira napa'napa' u yaptatoranam ga'. \v 7 Ka Anutu wari kadapmang kareng ka u tinimgu' wara'ning ki wa aming kamaganangni ka i ikem a inga' ko ikni' wara'guk dabik indi ai'dap girii ka Anutu wari Kasira Aming Jisas u anigareinga afanga indi yotangkanip ga' tanga kumogu' u kanga o beng sini' Anutu adi indi yotangkanip ga' bibiri' beng sini' naknga yotangkanipku' ning tutugu waraga' tanga tinimgu'. \v 8 Beng sini' indi gi' ikem wara'ning kini wa nanasa' kane tangkunang tanga iikning mo', mokngang, wa indi Anutuning midi kareng u naknga Kasira Aming ga' naktangka tinga Anutu anasa' indi yotangkanibonga ananing sasuk kareng a ai'dap girii ganangsa' kadapmang kareng ka u tiniminga ikem. \v 9 Abanga nanasa' Anutuning kadapmang didimeng u yareinga Anutu wari u nipma waraga' tanga tinim ning mo', wara' indi indining wap bema aronga mokngang. \v 10 Ka beng sini' kadapmang kareng ka inga' indi i yaranga ikem ya Anutu anasa' kuma' kamanimgu' ganangsa' tiniminga ikem. Indi Kasira Aming Jisas ganang sini' yorafanga aming inga'ni ning kuma' kadofigum wara' indi adining kadapmang kareng ka u kabanimgu' u tantam. \s1 Kasira Aming wari arantagim fama' ka Juda guk ka aming arantagim nua'ni guk u fabanga bak kuknipku' \p \v 11 Ka Efesas aming sidi iiksi' kadagang ka tim tanga yaging waraga' tubobu sura nakedanting, sidi Juda aming mo' aming arantagim nua'nining, ka naganing amine Juda adi fuksi' giknim guk dobiting wara' adi sidi kadagasi ningda'ning sapma wap ka aming fuksi' giknim mo' dudobisi ning saniting. Adi wap ka wa Anutuning arantagim ganang iikning mo' ning tuguting. \v 12 Tim sidi naro' ira Kasira Aming Jisas ning kane kigineng wari yotangkasap ning guk mokngang ning yaging. Abanga sidi arantagim ka Juda ka Anutu wari anata' ifakasiranga fonga kuknata' wara'ning wap ganang kabi'guk mo' yaging. Abanga tim Anutu wari Juda aming u kafakafa tiap ga' midi totangka tugu' wa adi aming arantagim nua'ni sidiganang mo' totangkagu', mokngang, wara' sidi nafek sini' tanga ira aming ka Anutu guk ira yotangkayap titining kadapmang kabi'guk mo' ning yaging. \v 13 Ka inga' yara'ganang wa sidi aming arantagim nua'ni ka naro'sa' tim yaging ning nua' mo' iking, mokngang. Kasira Aming Jisas wari kungkumak tanga tubobu manggaksabinga sidi adining tangkunang ganangsa' wa adiganang sini' ira Juda arantagim guk kabaksi' kubaniksa' ubu kuma' iking. \v 14 Tim Juda aming indi aming arantagim nua'ni sidigok digirap beng sini' tanga yagum warisa' tanga wa sidi a indiganang bagi girii fidegu'. Ka Jisas wari indi sidita' dabik sura kumogu' wari indining kabakni' kadagang ka sinim bagi da'ning fiderugu' u wadigi' kuma' udagagu'. Ning tanga kayoniminga sidigok dabik kabakni' kugurang sa' ubu kuma' ikem. \v 15 Abanga Juda indining kadapmang tapni ka aming arantagim nua'ni sidigok bak guk mo' kuguk wara'ning, abanga tapni fam undu' dabiksa' kuma' udasasu'negu'. Ka adi u udagagu' wa adi aming arantagim fama' sidi a indi u manggara bak kubaniksa' kuknibinga indi dabik adining arantagim kubaniksa' ubu kadofinga ikantam. Ning tanga indi kabakni' kadagang ka bagi titining u kabinga kabakni' kubaniksa' ubu kufara ikantam. \v 16 Ka Kasira Aming Jisas wari firi ugari ganang kumogu' wa adi Juda aming indi a aming arantagim nua'ni sidining bining ganang digirap kigineng fidegu' u udanga manggara fonga Anutuganang bak kubaniksa' kuknip waraga' kumogu'. \v 17 Tim aming ka arantagim nua'ni sidi Anutuning kamani beng sini' yaging a aming ka Juda indi Anutuning du' kabi'guk yagum, ka inga' Kasira Aming Jisas wari afanga adining midi kareng ka ning ituanimgu', Juda aming guk ka aming arantagim nua'ni guk sidi kami kabaksi' kubaniksa' iik wara'ning kadapmang tasamarik. Ning tinga kadapmang ka naro' naro' iikning wa wadigi' kuma' bigu'. \v 18 Ka beng sini' akne ka Kasira Aming Jisas wari tugu' wa arantagim fama' indi sibeng Anutuganang kagadofi wara'ning kadapmang tinim waraga' adining mini unggo kubaniksa' u kabanimgu'. \s1 Naktangka aming arantagim indi Anutuning yak kareng ning ikem \p \v 19 Wara' kami yara'ganang aming ka arantagim nua'ni sidi aming arantagim ka Juda indiganang naro' a miririp ningda'ning nua'bu mo' iking, mokngang, indi dabik Anutuning arantagim sa' ikem. \v 20 Ka sidi a indi wa Anutuning yak ningda'ning ikem. Yak wara'ning mangkap girii tim iyak kigineng kubaniksa' wa girini' Kasira Aming Jisas a yak u tiptangka wara'ning kuyang girisi fam wa aposel arantagim guk ka profet ka tim tanga ikiaging wara'guk wari iking. A yak u tiptangka ning kuyang kababi' fam ningda'ning wa aming sige ka Kasira Aming Jisas ga' naktangka ting wari iking wang. \v 21 Girii Kasira Aming Jisas adi yak wara'ning ki sini', ana sa' yak u tiptangkainga beni Anutu adi yak u nua'bu yorafanga anganga tipgiranga ananing yak tangkunang kareng sini' ning ikngam waraga' sura fatara'. \v 22 Ka aming arantagim nua'ni sidi a naktangka aming fam indi Kasira Aming Jisas ganang ira kabakni' kubaniksa' kufara ikem wa yak wari kareng sini' kadofiinga Anutuning mini unggo wari yak ka wara'ning tuang ning irota'. \c 3 \s1 Pol wari adining kane ka aming arantagim nua'niganang tugu' waraga' togu' \p \v 1 Ka Pol naga iyung bema dasanabinga kalabus kane kagaya i tanga itik ya ki ka na aming ka Juda mo', arantagim nua'ni sidi yotangkasap waraga' sura sidiganang u anga Kasira Aming Jisas ning midi kareng ituasamitik waraga'sa' tanga wa iyung bema dasanapking yang. Ka na iyung kane ganang ingging ko ira Anutu wari sidi yotangkasap waraga' sura ibang fatosamirik. \v 2 Ka sidindu' kuma'sa' naking Anutu wari nagata' ai'dap tanama sidi yotangkasap waraga' nipmigu' wara' na sidita' midi kareng u ituasaminga nakiting. \v 3 Abanga tim Anutu wari aming arantagim kuni' kuni' u manggara bak kubaniksa' kukyap waraga' sura kabigu' wara'ning kadapmang wa kapmo' ko fidegu', ka inga' yara'ganang wa Anutu ana kadapmang ka waraga' nangnatama nipmiinga wara'ning kane ubu tanga itik undu' kuma'sa' naking. Ka na umpang yara'ganang wa midi ka tim kuma' urang tonga yaranga waraga' torik. \v 4 Ka sidi umpang i indangara wa sidi Kasira Aming Jisas ning ki ka tim kapmo' fiderugu' ka inga' naga kuma' naksasu'narik waraga' nakedanting. \v 5 Aming aming ka timinggi' ira abiging adi Jisas ning ki ka tim ananing sasuk ganangsa' kapmo' fiderugu' ka i kanga nakem i kabi'guk mo' nakedaging, mokngang sini'. Ka inga' yara'ganangsa' wa Anutuning mini unggo wari Anutuning kane aming fam ka aposel a profet arantagim indi ningnataminga indi adining midi ki u nakem. \v 6 Ka adining midi wara'ning ki wa ning, tim Anutu adi kafakafa wa arantagim ka Juda aming unggungsa' tiamarugu', a kami yara'ganang wa aming arantagim fam ka Juda mo' sidita' undu' Anutu wari adining midi kareng saminga sidi u naknga Juda aming indigok bak dabik kura arantagim kubaniksa' ning ira adining arantagim ka Kasira Aming Jisas ganang ikinga adining napa' karesi ka indita' ninim ga' tim kuma' totangkagu' u ninim wara'ning ubu kuma' ikem. \p \v 7 Ka na Anutu wari adining midi kareng ka u itua wara'ning kane aming nipmigu'. Ning tanga adisa' kane u titi wara'ning tangkunang wa adining ai'dap ganangsa' namgu'. \v 8 Ka na ning toutik, na kadapmang kadagang ka naga tim tanga yaguk waraga' sukitik wa na aming ka Anutuning arantagim ganang yaging wara'ning wap guk mokngang beng sini' yaguk. Ka Anutu adi naga adining sasuk kareng ga' nafek sini' tanga yaguk u bibiri' napma tangkunang naminga tangkunang ka wara'ganangsa' kane i tanga itik. Ka kane ka i tanga itik ya aming arantagim nua'ni ka Juda mo' sidi Kasira Aming Jisas ning ai'dap kareng ka aming wari midi wara'ning ari'ni u kaga ning guk mokngang waraga' saninga ninak wara'ning tanga itik. \v 9 Ka Anutu wari aming yotangkayap ning kadapmang kareng ka wa tim ana kama i munumung sini' tugu' ganang wa adi sasuk girii ka wara'guk kuma' yagu'. Ka adi sasuk girii ka wa urap mo' tipsarendagu', kapmo' ningsa' ira ababanga inga'sa' tipkadofigu'. Ning tanga adi sasuk ka u ituanga yara waraga' wa naga nipmiinga tanga itik yang. \v 10 Tim Anutuning sasuk ka wa kapmo' yagu', ka inga' Juda indigok ka aming arantagim nua'ni sidigok dabik indi Kasira Aming ga' naktangka tinga naktangka aming arantagim kubaniksa' ikem wa kunim aming arantagim a adisining aming girisi wari u kanga ning toing, o napa' girii sini' kayam Anutu adi kadapmang kareng kuni' kuni' wara'ning ki beng sini' wara' adisa' tiaminga arantagim kubaniksa' beng sini' kadofinga iking. Ka Pol na midi ka u sareng tipkadofi waraga'sa' sura fatirik. \v 11 Ka napa' kareng ka Anutu wari u tinimgu' wa adi timinggi' timinggi' sini' sasuk ka wara'guk kuma'sa' ira abugu'. Ababanga inga' yara'ganangsa' wa girini' Kasira Aming Jisas u anigareinga bneni Anutuning sasuksa' yaranga tinimgu'. \v 12 Wara' indi Kasira Aming Jisas ga' naktangka tanga adiganang sini' kuma' ikem wa indi Anutu u napa'niga' girisa' anini ning kadapmang guk kuma' ikem. Wara' indi Anutu anonga wa mo' ba naknimota' ning tonga mutu guk mo' tanga anintam, mokngang, indi kabakni' tiptangkanga anini sa' tantam. \v 13 Ka naga sidi yotangkasap ning kane tinga waraga' tanga iyung bema dasinabinga itik yaraga' nua'bu ning sanotik, sidi naga mamareng bemarik yaraga' sura nagata' kabaksi' mamareng mimeng mo' nakanting, mokngang. Mamareng ka i bemarik ya sidi yotangkasap titining napa' kareng ning kanga mesisiringa sa' tinting. \s1 Pol wari Kasira Aming ning ai'dap kareng waraga' ituagu' \p \v 14 Ka na kadapmang kareng ka sibeng Anutu wari arantagim fama' indi bak kubaniksa' kuknip ka waraga' sura Anutu wari sidi yotangkasap ga' ibang tangkunang fatorik. \v 15 Beng sini' wap ka sibeng u torik wa aming arantagim ka kunimganang ikiting a kamaganang ikitam indigok dabiksa' wa Anutu girii warisa' indifikadofiinga arantagim nua'ni nua'ni ikitam. \v 16 Ka na ibang ka ning fatugutik, Anutu ka tangkunang girii ning ki sini' adining mini unggo kareng u sidining kabaksi'ganang dasitonasama sifatangka tinga sidi tangkunang guk ikanting. \v 17 Ning tanga sidi Kasira Aming Jisas ga' nakgangka sini' tanga sidining kabaksi' wa adining yong sini' ning irota'. Ning tanga Anutu wari kadapmang ka sidi aming fam ga' siamo' ninak ning u kamisaminga wara'ning kigineng guk ikanting. \v 18-19 Abanga sidi a naktangka aming fam ka kama indeng ira yaring wara'guk dabik sidi Kasira Aming Jisas adi kabakni' ka aming fam ga' siamo' ninak wara'ning ki sini' wara' adi indita' siamo' nakita' waraga' sura nakedanting. Beng sini' adining tangkunangni ka indita' siamo' nakita' wa kabasi' mo', girii sini' ka ari'ni guk mokngang wara' aming kamaganangni indi wara'ning kini u nakedasasu'na ning guk mokngang. Ka tangkunang ka wa Anutu ana ganang tona sini' tanga ikita' wara' na Anutu wari tangkunang ka u saminga tona sini' tanga iik waraga' ibang fatorik. \v 20 Ka Anutuning tangkunang girii ka wari indining kabakni'ganang ira kane siamo' tanga nasi' ka indi Anutu wari tinim ga' sukitam u tarafira napa' girii sini' ka indi wara'guk mo' sukitam udi girisa' tinim ning. \v 21 Wara' naktangka aming arantagim ka indeng ira yaring dabiksa' indi Kasira Aming Jisas ganang sini' garinga kadapmang didimeng kareng sini' sa' tantam wari Anutuning wap girii u bema aranga ira antam, beng. \c 4 \s1 Naktangka aming dabiksa' indi Kasira Aming ning fugu kubaniksa' ning kadofinga ikem \p \v 1 Pol na girii ning kane tinga aming fam wari nagata' bibi' naknga bema iyung dasinabinga kalabus kane tanga itik, ka na kadapmang didimeng ka Anutu wari sidi yaranga iikga' sura katisanara' wara'ganang beng sini' ira didimengsa' iik waraga' sidining sasuksi' sifimararonga midi tangkunang torik. \v 2 Ka sidi kadapmang ka u titi wara'ning wa ning, sidi sasuksi' bema afanga naktangka aming amise fma ning kapmik ganang kabaksi' kareng guk ira kugurang sa' tiapmanting. Ning tanga kuyase fam wari kadapmang didimeng mo' tinga wa sidi ararok mo' tiamting, mokngang, sidi adisita' naknga kafakafasa' tiapmanting. \v 3 Anutu wari adining mini unggo kareng indining kabakni'ganang kamanimita' wa aya wari naktangka aming dabik tofanibinga kabakni' kubaniksa' iik wara'ning tinimita'. Wara' sidi sasuk ka arok tanga tubo kidaga da' titi wara'ning u wadigi' kabinga kadapmang kareng ka kabaksi' kubaniksa' iikning unggungsa' katatoranga tinting. \v 4 Ka wara'ning wa ning naktangka aming dabiksa' indi arantagim kubaniksa' kuma' kadofinga ikem. Ka indining bining ganang wa mini unggo undu' kubaniksa' ka Anutuning mini unggo warisa' tofinibinga ikem. Abanga iik kareng ka inga' Anutu wari indita' tinim waraga' sura mesisiringa tanga ikem undu' kubaniksa'. \v 5 Abanga girini' undu' kubaniksa' ka Kasira Aming Jisas, a indining naktangka ning ki undu' kubaniksa', a ama iyam ning ki undu' kubaniksa'. \v 6 Abanga indining Anutu wa kubaniksa' ka naktangka aming dabik indining babangni' girii adisa' indining bining ira mungkupninipma ning tanga indining kabakni'ganang mang undu' ikita'. \p \v 7 Ka aming indining tangkunang ning ki wa kubaniksa' beng sini', ka indi tangkunang kuni' kuni' guk ikitam. Tangkunang kuni' kuni' ka wa girini' Kasira Aming Jisas warisa' ai'dap girii tanga sabaranimita'. \v 8 Ka Kasira Aming Jisas wari indita' tangkunang kuni' kuni' sabaranimita' wara'ning midi ka tim umpang ganang yoking wa ning, adi aming arantagim girii ka kane kagaya kalabus ganang kukyapking u tubobu manggakyapma inagiknanga marara'. Aranga kadofinga aming adisita' tangkunang kareng kuni' kuni' u sabaraimara', ning yoking. \v 9 Ka midi wap ka marara' ning yoking wara'ning kini wa tim adi furo'ning sini' kuta yagu'. Ka u kabinga kamaganang kaing sini' yara'ga' ubu afugu'. Afanga iya' kama i kabinga tubobu aregu' waraga' togu'. \v 10 Adi furo'ning kuta undu' kuma' yagu' a kamaganang indu' kuma' yagu' wara' adi kama kama i katatora ning wap guk beng sini' ikita'. \v 11 A midi wap ka adi arantagim ni ga' tangkunang sabaraimara' ning tuguinga yoking wa aming ka warisa' naktangka aming indita' tangkunang ka kane kuni' kuni' titi waraga' nimita' waraga' yoking. Ka kane kuni' kuni' ka u nimita' wa ning, fam indita' wa aposel kane ka Jisas ning mini sanom bema ituaim wara'ning tangkunang ka u nimita', a fam ga' wa profet midi togadofi aming iik wara'ning u imita', a aming fam ga' wa kama yong fam ganang anga Anutuning midi kareng itua wara'ning evanselis kane tanga iik waraga' imita', a fam ga' wa aming kafakafa yaptatora ning kane ka pastor u titi wara'ning tangkunang u imita' a fam ga' wa tangkunang ka Anutuning midi yanggek kane u titi wara'ning u imita'. \v 12 Ka Kasira Aming Jisas wari kane kuni' kuni' u sabaranimita' wa Anutuning kane girii kamaganang i dabiksa' tipmirisasu'na waraga' sura nima yareta'. Ning tinga Anutuning arantagim ning kadapmang kareng wari yorafa yorafa tanga anganga kura' yotangkangam tanga arantagim kareng kubaniksa' ka ananing fugu kubaniksa' ning iik waraga' tinimita'. \v 13-14 Ning tanga indining sasukni' wari kubaniksa' ka naktangka wara'ganang kadofinga ira girini' Kasira Aming Jisas ka Anutuning mindingni wara'ning ki u nakeda sini' tantam. Ning tanga indi sasuk guk mokngang ka sababi' ningda'ning nua'bu mo' ikantam, mokngang, indi sasuk guk ira kadapmang didimeng tanga ira anganga aming sini' sasuk girii guk ka Kasira Aming Jisas anagok ningsa' iik waraga'sa' tanga ira antam. Ning tanga indi tangkunang guk ira aming fam ka Anutuning midi ki toyam ning tonga mandaga' iramironga midi kuni' kuni' tuguting wari indiramikni'. Ning tinga indi adisining midi u naknga sasuk didimeng guk mokngang ka tutufuru ni ka gugubik wari figira manggakyapma yangainga upara sa' urang tanga yangating ningda'ning ma tanga iknam. Wara' indi aming ka sasuksi' usap titing ka ningwara' mo' ikantam. \v 15 Mokngang, indi sasukni' tiptangkanga nasi' midi u tounga wa kuyane ga' siamo' naknga yotangkayap waraga' sura beng guk sa' tontam. Ning tanga Kasira Aming Jisas ning fugu indi giraga giraga tanga auinga adigok dabiksa' ikinga adi indining fukni'ning ki ning ira niptatorota'. \v 16 Ka beng sini' naktangka aming dabik indi Jisas ning kayong kafong a fugu ningda'ning ikem, a Jisas ana wa bupmo wara'ning ki. Wara' adi adining fugu indi u kafakafa niptatoreinga fugu wara'ning dibing fam ka kayong kafong mung wari kafakafasa' yorafanga ira kanesi' karengsa' fatinga Jisas ning fugu wari karengsa' irota'. Ikinga sasuk ka kuyane fam ga' siamo' ninak ning wari undu' fugu wara'ning mang ganang ira yotangkainga Jisas ning fugu wari girii giranga auta'. \s1 Naktangka aming indi Kasira Aming ning iik inga'ni kareng unggungsa' yaranga ikantam \p \v 17 Ka na girii Jisas wari sidi sanggek ga' nipmigu' wara' na midi tangkunang sini' ning sanotik, sidi iik kangkam ning kadapmang kadagang ka tim aming arantagim nua'ni sa' ira urang tanga yaging wa nua' mo' tinting, adisining sasuk wa didimeng guk mokngang. \v 18 Anutu adi sasuk a iik kareng u imita' ka aming ka ningwara' adi bibi' nakiting wa kadapmang kareng ning kadapmang u udanga sasuk kareng ga' nafek sini' tanga ikiting. \v 19 Ning tanga adisining sasuksi' kadagang ka kadapmang kadagang titiga' marakyabita' u yaranga kadapmang mumungguk kadagang kuni' kuni' kabi'mo' u tanga fiareting. Ning tanga o kadagang ba tirik ning tonga kadapmang kareng ga' tubobu kabi'guk mo' sini' sukiting, mokngang sini'. \p \v 20-21 Ka na ning sutik ka aming wari Kasira Aming Jisas ning midi kareng sanggeking wa kadapmang ka ningwara'ning mo' sanggeking, mokngang, adi midi beng guk ka Kasira Aming ganang ikita' unggungsa' sanggekinga naking. \v 22 Wara' sidining sasuk kadagang ka tim tanga yainga wari saninga u yaranga tinga sidining iiksi' wari kadaga sini' tugu' u wadigi' sini' kabisasu'ninting. \v 23-24 Ning tanga sidining kabaksi'ganang wa sasuk kareng inga'ni warisa' ikinga sidi aming wari fuksi' tasase timini tanga yuguksasu'nanga inga'ni sini' sa' ubu urang ipmating ningda'ning bema kaminga ikanting. Kabaksi' inga'ni ka wa Anutu wari ananing kaba ningwara' wara'guk dabiksa' iik waraga' sura tasamara'. Tasaminga sidi wara'guk ira kadapmang kadagang titiga' bibi' sini' naknga kadapmang karengsa' tanga yaranga ikanting. \p \v 25 Ka beng sini' indi Kasira Aming Jisas ning fugu ningda'ning ikem wara' kuyane fam wa indigok dabik fugu kubaniksa' ning yorafanga iik wara'ning. Wara' sidi waraga' sura kuyase fam u napa' midi fam inonga wa midi mandaga' u wadigi' sini' kabisasu'nanga midi beng guk kareng unggungsa' yanting. \v 26 Ka sidi kabaksi' kagaya kabi' naknga wa kaga' urapsa' tonga tipdidimanting. Sidi ko da' tinting wa kabaksi' kagaya wari girii giranga kadagang ma tini', wara' sidi kama sidii kubanik wara'ganangsa' urapsa' tipdidimanting. \v 27 Sidi urapsa' ning tipdidiminting wa Setan wari sansaramik titining kadapmang u usefanting. \v 28 A aming ka tim kuyane fam ning napa' iromkubaniabita' ka adi inga' naktangka aming ubu ita' wa adi sasuk ka wa kagabi tanga sasuk inga'ni kareng ka kane tangkunang ana sini' tanga mambong u manggara kuyane fam yotangkayap waraga' ubu surota'. \v 29 Ka sidining masi'ganang wa midi kadagang ka kuyase fam ning kabaksi' ifakadaga ning wara'guk mo' tonting, mokngang, sidi midi karengsa' yangting wara' adi mamareng guk ikanting wa ma sasuk ga' nafek u tanga ikanting wa adi midi u naknga wari yotangkaiminga karengsa' nakanting. \v 30 Sidi Anutuning mini unggo kareng wari sidi kubanik kubanikning kabaksi'ganang ita' waraga' sura kadapmang didimeng mo' ka mini unggo ning kadapmang isefangam wara'ning wara'guk mo' tinting, mokngang. Mini unggo kareng ka wari sidining kabaksi' ganang u ira sasuk ka inga' Kasira Aming Jisas wari yotangkanipma indining kadagang u udanga manggara kareng gi' kuknibinga iik wara'ning kama sini' u kapmera iik waraga' ninita' wara'ning. \v 31 Ning tanga kadapmang kadagasi ka kuyase fam ga' kabaksi' kadagang naknga kabaksi' kagaya sini' ninak a midi kadagang tutugu a midi sige yangbe a kadagasi fam ka kuyase fam ifakadaga ning ka u defata' ningwara' wa wadigi' sini' kabisasu'nanting. \v 32 Ning tanga kadapmang kadagang ka u kabinting wara'ning gapmam wa kadapmang karesi ka kuyase fam ga'sa' sura kafakafa tiapma yotangkayap titi wara'ning ubu dasitangkanga sura ikanting. Ning tanga kuyase fam wari sidiganang kadagang tinga wa sidi sasuk ka Anutu wari sidining kadagang u suknakubesam waraga' ka Kasira Aming Jisas ganang kane girii tugu' waraga' sura kuyase fam ning kadagang undu' ningsa' suknakubeyamting. \c 5 \s1 Naktangka aming indi kadapmang karengsa' tanga diok ganang ningda'ning ikantam \p \v 1 Ka Anutu wari sidita' ai'dap tanga kafakafa tasaminga sidi adining mindine ka sidita' siamo' nakita' ning iking, wara' sidi kadapmang didimeng ka babangsi' Anutu wari tanga ikita' ningsa' tanga ikanting. \v 2 Ning tanga sidi kadapmang ka sidi kuyase fam ga' naknga tim girini' Kasira Aming Jisas wari indita' siamo' naknga yotangkayap titi wara'ning u tinting. Tim Kasira Aming Jisas wari aming dabik indita' siamo' naknga yotangkanip ga' aigaim sa' tinga uking wa kadapmang ka aming wari Anutuga' sura nana sauripmam kafakafa sini' tinga Anutu wari adisita'sa' urang nakarugu' ningda'ning tinimgu' wara' sidindu' kuyase fam ga' siamo' naknga kafakafa tiap ka ningsa' tinting. \p \v 3 Ka sidi kadapmang kadagang sini' ka taming a ami nua'ni guk sansaramik titi a aming nua'nining tamni wa ma napa'ni u kamamarenga iromkadakna ning wa mo' sini' tinting, mokngang. Aming ka wap Anutuning arantagim ning kuma' iik indi kadapmang kadagang ka ning u titining guk mokngang sini'. \v 4 Abanga sidi midi mumungguk kadagasi a midi fifiring kadagasi tutugu a midi kadagasi ka kadapmang kareng u tipkadaga ga' tutugu ning undu' kabi'sini' guk mo' tinting, mokngang, sidi midi ka u kabinga midi karesi ka Anutuning kadapmang karesi ning a Anutuga' mesisiringa tanga iik wara'ning unggungsa' tonga ikanting. \v 5 Beng sini' ning sanotik, aming ka napa' mumungguk kadagang titi a sasuk a midi kadagang a kamamare ningwara' waraga' siamo' naknga titing wari Anutu girii a Kasira Aming Jisas adisigok anga iikning guk mokngang sini'. Ka aming ka napa' kamamarenga bemna titiga'sa' sukiting wa aming ka Anutu mandaga'sa' siamo' urang nakiting wara'sining kabaksi' guk dabik ningsa' ikiting wara' adi Anutu beng guk wara'guk iikning guk mokngang. \p \v 6-7 Beng sini' aming ka kadapmang ka ningwara' tanga ira Anutuning midi ga' ukngamiting wa Anutu wari inga' kadapmang kadagang wara'ning toni wa kagaya girii sini' kabiamo'ga'. Wara' sidi aming ka ningwara' wari a kadagang sini' mo' girisa' titining, ning saninga wa mo' sini' nakyamting, sidi naro'sa' ikanting. \v 8 Tim sidi kadagang guk ira kangkam ganang sini' yaging, ka inga' Anutu wari fabanga kuksabinga wa aming ka girii Jisas ning diok ganang iikning ning ubu kuma' iking, wara' sidi kadapmang didimengsa' tanga aming ka diok sangang ganang iikning ningda'ning ikanting. \v 9 Beng sini' aming ka diok sangang ganang kuma' kadofinga ikiting adi kadapmang kadagang u kabisasu'nanga ning tanga kadapmang didimengsa' ubu tanga ira midi beng guksa' tonga ikiting. \v 10 Ka sidi napa'napa' u tonga wa sidi titisa' mo' tinting, mokngang, sidi sasuk ka o napa' ka ya Anutu wari naga titiga' u nakara' wa ma mokngang ning sura naknga inga' tinting. \v 11 Aming ka kadapmang kadagasi tanga kangkam ganang ningda'ning ira kadapmang ka aming yotangkayap ning guk mokngang u titing wara'guk bak mo' kukanting, mokngang, sidi naro'sa' ira kadapmang karesi tinga adi adisining kadapmang waraga' sura nakedanga o beng sini' indi kadagang ba tanga ikem ning tonting. \v 12 Ka kadapmang kadagasi fam ka mang sini' kapmo' titing wa umpang yara'ganang iyok ga' bibi' nakarik wara' mo' yotik. \v 13 Ka Anutuning kadapmang didimeng wa diok sangang ningda'ning, wara' aming adi diok sangang u kanga adisining kadapmang kadagang ka kama kangkam da'ning u wara'ganang kigedanting. \v 14 Ka indi kadapmang ka waraga' sura midi kareng nua'ni yoking u tugutam wa ning, aming ka dama ka kungkumak titining da'ning detang gu mamarak te'. Marakinga Kasira Aming Jisas wari guning kadapmang u dasangandagaminga gu adining diok sangang ganangsa' denga tanga ira autang, ning yoking. \p \v 15 Ka sidi waraga' sura aming masi' papesi ningda'ning mo' ikanting, mokngang, sidi aming Anutuning midi naksasu'nesi aming sasuk guk ning ira kadapmang karesi unggungsa' yaranga tanga ikanting. \v 16 Kami i ikem yara'ganang wa aming arantagim girii wari kadapmang kadagasi kabi'mo' tanga iking wara' sidi napa' kareng titining kadapmang kabi'guk kuma' kanga wa ko da' mo' tinting, kaga'sa' tinting. \v 17 Ka sidi napa'ni tonga wa aming masi' papesi da'ning titisa' mo' tinting, mokngang, sidi nasi' kadapmang kareng ka Anutu wari titiga' nakita' u kafakafa sura nakedanga wara'ganangsa' yaranga tinting. \p \v 18 Ka sidi kadapmang ka aming fam wari ama kagaya mimeng sini' topnanga nibera kabaksi' karengsa' sige nakiting ning mo' tinting. Adi kabaksi' kareng ka wa napa' ka ifakadaga titining waraga' nakiting. A sidi wa napa' kareng nua'ni ka Anutuning mini unggo wari sidining kabaksi'ganang amanga tanga saptatorota'. \v 19 Ning tinga sidi kabaksi' kareng beng guk nakanting. Ning tanga naktangka aming sidasa' kura' tiptangkang tanga kabaksi' kareng naknga mesisiringa tonga wa siring kareng ka tim papani' Devit wari yoku' ka Sam a siring karesi fam ka Anutuning mini unggo wari inga' ifakadofiinga tuguting u tonga kabaksi' guk sini' naknga girii Jisas ga' mesisiringa tangamting. \v 20 Ning tanga ira sidi nasi iik kuni' kuni' wara'ganang ira wa fikifiki Kasira Aming Jisas ning wap tonga babangni' Anutu girii waraga' mesisiringa tangamting, beng. \s1 Imaraming wari kabaksi' kubaniksa' kufara iik wara'ning midi \p \v 21 Ka naktangka ami taming sidi kafakafa nakanting, sidi girisi' Kasira Aming Jisas wara'ning kapmik ganangsa' iking, wara' sidi sasuk ka girii ira kuyase fam yaptatora waraga' mo' sukanting, mokngang, sidi adisining midi undu' nakiam ning guk tinting. \p \v 22 Ka naktangka tamse sidita' wa ning toutik, sidi girii Jisas ning kapmik ira adining midi ninak sa' titing ningsa' ka ufase ning midi undu' ninak sa' tanga adisining kapmik ikanting. \v 23 Wa ning, Anutu wari ami wa tamni u katatora waraga' kamigu' wara' taming adi ufini ning midi ninak sa' tanga adining kapmik irota'. Tim girini' Kasira Aming Jisas wari naktangka aming aramtagim kabi'mo' ka ananing fugu ningda'ning indita' sura yotangkanip tanga manggara gi' kuknipma niptatoreta' ningsa' ka ufase wari saptatoreinga ikanting. \v 24 Ka naktangka aming arantagim dabik indi Kasira Aming ning kapmik ganangsa' beng sini' ikem, wara' fikifiki taming sidindu' nasi' nasi' u tonga ufase ning kapmik ira adisining midi sa' yaranga tanga ikanting. \p \v 25 Ka naktangka aming ka tamse guk sidita' undu' ningsa' sanirik, Kasira Aming Jisas wari ananing naktangka aming ga' siamo' naknga yotangkayap titiga' napa' girii ka kungkumak tugu' ningsa' ka ami sidindu' tamse u bibiri' yapma kafakafa tiapma yotangkayap tinting. \v 26 Ka girini' Jisas adi naktangka aming arantagim indi adining midi naknga kabakni' faranga kadagang u kabiinga ama iniminga fafandangesi karesisa' ka aming wari fuksi' kafakafa sini' yotira geng kabi'guk mo', karesisa' urang ikiting ningda'ning kuni' nua'ni naro'sa' iik waraga' sura tanga kumogu'. \v 27 Abanga aming wari taming sababa kareng ka fugu udi a kayong kafong ginggebingesi guk mokngang karengsa' urang saniabiting ningda'ning ka Kasira Aming Jisas wari adining naktangka aming arantagim indi kadagang kabi'guk mokngang karesisa' ikinga indita' siamo' naknga manggaknip waraga' sura kumogu'. \v 28 Ka Jisas wari naktangka aming dabiksa' indita' u nakita' ningsa' ka ami sidi tamse wa sidining fuksi' ning yapma adisita'sa' naknga yotangkayap tinting. Ka aming ka taming sanota' wa adi fuksi' kubaniksa' ning kuma' ikiamu' wara' ami wari tamni ga' bibiri' naknga kafakafa tota' wa ananing fugu ga' nakara'. \v 29-30 Beng sini' aming ka ni ananing fugu ga' bibi' guk mo' nakita', mokngang, adi ananing fugu ga' naknga nana aminga kafakafa sini' tanga katatoreta'. Ka Kasira Aming Jisas adindu' adining naktangka aming arantagim indi adining fugu a fugu wara'ning dibing ka kayong kafong ningda'ning ikem indita' undu' kafakafa sini' ka aming wari anasining fuksi' ga' u titing ningsa' tinimita'. \v 31 Ka tim midi ka waraga' Anutu wari ning kuma' tuguinga yoking, aming ka mengbe kabinga anga tamni guk ikantamu' wa fuksi' kubaniksa' ning ubu kuma' ikiamu', ning yoking. \v 32 Ka na u yoking waraga' sura napa' ki girii nua'ni ka Kasira Aming Jisas guk ka ananing naktangka aming indigok adining fugu kubaniksa' ning kadofinga iik waraga'sa' sura yoking ning sutik. \v 33 Ka wa aming ka imaraming tanga iking sidita' undu' yoking, wara' sidi waraga' sura kadapmang ka aming wari ananing fugu kafakafa sini' tita' ningsa' ka ami wari ananing tamni undu' kafakafa sini' yotangkangamota'. Ning tinga taming adindu' ufini ning kapmik ira adining midi ninak sa' tanga tota'. \c 6 \s1 Naktangka aming ning sabase wari mamangse babangse ning kapmik gi' iik a mamangse babangse wari kadapmang kareng ganangsa' ifadidima wara'ning midi \p \v 1 Ka naktangka aming ning sabase sidindu' nasi' midi ka mamangse babangse wari sangting wa ninak sa' tanga wara'ning kapmik sa' ikanting. Girii Jisas ning iik ganang kadapmang ka wa kareng. \v 2-3 Ka midi ka wara'ning wa tim Anutu wari Moses aniinga Moses wari ning kuma' yoku', mamangse babangse ning midi nakiam sa' tinting wa ka' ningsa' ikanting. Midi ka wa Anutu wari yotangkanip titiga' totangka guk kuma' tugu'. Ka midi ka wa ning togu', sidi mamangse babangse ning midi nakiam sa' tinting wa kamaganang i kafakafa ira kama paramu'sini' ira anting, ning guk togu' wara' midi ka wa kareng beng guk sini'. \v 4 Ka mamangse babangse sidi sabase ifadidimonga wa kadapmang didimeng ganangsa' tanga ifadidiminting. Ifadidima tem ning tonga sansaramik sa' tinting wa sidi banaksi' ifigiptainga kadasam ma' tini'. Wara' sidi kadapmang didimeng yaranga tanga girii Jisas ning midi kareng u yanggera ning tanga kadagang tinga wara'ganang didimengsa' dipminting. Ning tinga adi kadapmang kareng guk giranga aranting. \s1 Naktangka aming ka slev wara'guk ka adisining girisisi' ka kane tiamiaging wara'guk wara'sining midi \p \v 5 Ka naktangka aming ka kane aming sige slev sidita' wa ning toutik, sidining girisi' wa aming ka kane tangaming unggungsa' mo', mokngang, sidi girisi' fama' guk nua'ni ka Anutu a nua'ni wa aming ka kane tangaming wang. Wara' sidi girisi' wari kane saminga wa sidi girii Jisas ga' naktangka ting waraga' sura adisining kane wa kabaksi' guk kufura beng guk sa' tiamting. \v 6-7 Sidi kane kafakafa wa adi sapma o adi aming kareng ba ning tutugu waraga'sa' mo' sura tinting, mokngang, sidi Anutuning sasuk yaranga kane didimeng beng guksa' tiama ning tanga ning sukanting, indi naktangka aming dabiksa' indi girii Jisas ning kane aming sige slev sa' ikem wara' kane i tem ya aming kamaganangni wara'ningsa' mo' tangamem, mokngang, indi girini' Jisas ning kane guk tem ning tonga kabaksi' karengsa' naknga tanga ikanting. \v 8 Beng sini' Anutuning kadapmang wa ning, adi aming ning kadapmang using unggungsa' mo' yabita'. Abanga adi aming ka kane aming sige slev wa naro' tagagareyap a aming sige undu' kadapmang nua'niganang tagagareyap ning guk mo' tita', mokngang, adi aming dabiksa' u yapma nisi' wari kane didimeng tota' wa adining kane u kanga kafakafa tubobu kura' undu' wara'ganangsa' tiamita'. \p \v 9 A naktangka aming ka kane aming sige slev adisining girisi sidindu' ningsa', kane amingsi'ga' kane ima wa kadapmang ka mamareng iyam ning wara'guk mo' tiamting. Sidi kafakafa nakanting, sidi a sidining kane aming slev wara'guk dabiksa' sidining girisi' wa Anutu girii kubaniksa'. Abanga Anutu adi aming indi aming sige a kane aming slev a slev ning girisi' ning guk mo' indangiknibita', mokngang, adi indi dabiksa' wa aming ningsa' nibita', wara' sidi waraga' sura kane amingsi' slev wa kane ning kadapmang didimeng ganangsa' yaranga tiamting. \s1 Naktangka aming indining iik wa ami'ning aming soldia ningda'ning \p \v 10 Na naktangka aming sidita' midi fam ari' wa ning sanotik, sidi ning nakanting, naktangka aming indi mini unggo kadagang Setan wara'ning digirap sini' ikem wa aming ami'ning ningda'ning ikem waraga' toutik wa ning, Anutu adi tangkunang a kigineng ning ki wara' sidi adiganang sini' ikinga adi adining tangkunang kigineng u saminga sidi ami' girii wara'ganang tangkunangsa' adenting. \v 11 Ka kadapmang ka aming ami'ning soldia wari suguk wari fuksi' mo' manggakyap ga' wa fuksi' tasase napa'napa' tangkunasi sin warisa' urang tatangkanga adeting ningda'ning ka Anutu wari adining tangkunang u saminga sidi u ipmanga tangkunang sa' adenting. Ning tinga Setan wari adining kadapmang kadagasi fam waraga' mandaga' saramikonga tota' wa sidi kigineng sa' adenga tarakayo tinting. \v 12 Ka ami' ka naktangka aming indi titiga' u torik wa aming sini' aming sareng wara'guk ami' wara'ning waraga' mo' torik, mokngang. Ami' ka wa mini unggo kadagang Setan wara'ning arantagim ka mini unggo kadagasi fam a murak kadagasi girisi ka kunimganang ikiting a kamaganang i ira kama kangkam u katatoreting wara'ning kigineng guk ami' waraga' torik. \v 13 Ka sidi wari saramikinga adiogk ami' titi wara'ning kama wa mo' nakeding, wara' sidi aming ami'ning wari fuksi' tasase napa' tangkunasi warisa' urang tanga adeting ning wa Anutuning midi kareng a adining napa' karesi warisa' tatangkanga adenting. Sidi napa'napa' u kuma' tatangkanga adenting wara' adi saramirota' ganang wa sidi adigok ami' u tanga adi mo' sarafirota', mokngang, sidisa' tarafira tipmikurata tinting. \p \v 14 Ka napa' tangkunasi ami' titining ka sidi mamanggak ga' u torik wa ning, sidi Anutuning midi yaranga kadapmang didimeng guk unggungsa' sa' titi wa let girisi urang tamtangkating ningda'ning bemtangkanting. Abanga Anutuning kadapmang kareng u bemting wa siot ain wari mamamsi' urang kamasaseting ningda'ning tinting. \v 15 Abanga sidi Anutuning midi kareng itua kane u tangkunang sa' tinting wa ami'ning aming wari su tangkunasi ipmanga ami' kadofiinga kigineng sa' urang aradeting ningda'ning tinting. \v 16 Sidi Anutuga' naktangka tangkunang tanga ikanting, wa naktangka ka wa aming ami'ning wari kure urang tanga adeting ningda'ning tanga senga adeinga Setan ning tagataga ka suguk kadagang kudip da'ning wari sidining fuksi' guk mo' bemota'. \v 17 Ning tanga sidi sasuk tangkunang ka Anutu wari yotangkanip tanga tubobu manggara gi' kuknibinga ikem wara'ning u tinting wa ami'ning aming wari mungkup ain tangkunasi urang ipmanga aradeting ningda'ning tatangkanga aradenting. Ka Anutuning mini unggo wari midi kareng u sidining kabaksi'ganang tipkadofisaminga waraga' suktangka sini' ikanting wa aming wari bainat fasi' mini adi' urang suronga tangkanga aradeting ningda'ning tinting. \v 18 Ka sidi Anutuning mini unggo wari yotangkasaminga ira fikifiki Anutuga' ibang tangkunang tonting. Ning tanga sidi Anutuga' ibang ka kadapmang kuni' kuni' wara'ganang tongama katingangting. Ning tanga sidi digirapsi' wari kadofisam waraga' wa suknakube da'ning guk mo' tinting, mokngang, sidi fikifiki sasuk guk ningsa' ira ibang sa' tonga ira anting. Abanga sidi Anutu wari naktangka aming ka kama yong fam dabik ka indeng ira yaring u yotangkayap waraga' undu' ibang fikifiki toimting. \v 19 Ka sidi Anutu wari naga yotangkanap waraga' undu' ibang tonamting. Ning tinga Anutu wari adining midi kareng ka tim kapmo' fiderugu' u naminga u itua ning kadapmang guk kanga wa na mutu guk mo' totik, na itua sa' totik. \v 20 Ka Anutu wari naganing kane wa naga adining midi kareng u arantagim fam ga' yangara ituayam waraga' nipmigu'. Nipmiinga na kane u tanga abuguk, ka adi nagata' bibi' naknama iyung bema dasinabinga iyung kane ubu tanga itik. Ka na kane wadigi' mo' kabarik, nua'bu kuma'sa' titining, ka na mamareng yari udanaminga wadigi' ma kabok wara' sidi naga kane u nua'bu titi waraga' yotangkanapma Anutu wari kadapmang tanam waraga' ibang tonamting. \s1 Pol wari midi fam ari' togu' \p \v 21-22 Ka Pol na naktangka aming nua'ni ka indining kuyani' kareng nua'ni ka wapni Tikikas adi indigok girii ning kane aming sini' ning dabik ira kane kubap titam u anigarasamarik. Adi naganing iik ka yong ka yara'ganang wa indining da'ning itik wara'ning wa adi kuma' anga saninga naknga a sidining kuyase fam ka kubap dabik ikem wara'sining iiksi' wara'ning undu' anga saninga naknga sidining naktangka u sifatangka waraga' sura wa Tikikas u anigarasamarik wang. \p \v 23 Sibeng Anutu guk ka girii Kasira Aming Jisas guk wari sifatangkainga sidi adita' naktangka tangkunang tanga kugurang kareng gi' ira kabaksi' ka naktangka aming kuyase fam ga' siamo' naknga kafakafa tiap wara'guk ikanting. \v 24 Ka aming arantagim ka girii Kasira Aming Jisas ga' fikifiki siamo' ningsa' naknga ira au ning sidi Anutu wari adining ai'dap kareng u saminga wara'guk ningsa' ira anting, beng.