\id 2TI — URI N. Sampson 
\h 2 TIMOTI 
\toc1 Midi umpang Pol wari Timoti ga' inga' yokngamgu' 
\toc2 2 TIMOTI 
\toc3 2 TIMOTI 
\mt1 Midi umpang Pol wari Timoti ga' inga' yokngamgu'  
\c 1  
\p
\v 1 Ka Pol na Anutu anasa' kuma' sura Kasira Aming Jisas ning kane aming aposel nipmigu'. Ning tinga na midi kareng ka Anutu wari aming indi Kasira Aming Jisas ganang yorafainga ka' iik ninim ga' totangkagu' wara'ning u yangara ituanga yaretik.   
\p
\v 2 Ka na naganing sabana kareng Timoti guta' kudi umpang i yokamarik. Sibeng Anutu a girini' Kasira Aming Jisas wari begaga tanga kafakafa sini' tagapma adisining kaba kugurang u gaminga gi' irotang.   
\s1 Anutuning midi kareng itua waraga' wa megang ninak ning guk mokngang  
\p
\v 3 Ka na Anutu ka tim naganing papane wari adining kapmik ganang ira tangamiaging a inga' nandu' adining kane wa kadapkang didimeng ganangsa' tangamitik waraga' ibang tugutik ganang wa na fikifiki adi yotangkangaminga karengsa' tanga itang waraga' sura Anutuga'sa' mesisiringa siamo' fatirik.  
\v 4 Ka na sasuk ka tim naga gibinga mabu tinga bibiri' naknga mak kogung waraga' sura itik. Ning tanga tubobu nua' anga gapma kabakna karengsa' ninak waraga'sa' fanakarik.  
\v 5 Abanga na gu naktangka kareng beng sini' taranga waraga' undu' sura mesisiringa tirik. Naktangka ka ningwara' wa tim mamaga Lois wari tanga yagu' a mamangga Yunis undu' ningsa' tanga yagu'. Ka inga' yara'ganang wa gubu undu' ningsa' naktangkanga itang u gapma kabakna karengsa' naknga mesisiringa tirik.   
\p
\v 6 Wara' na guning kabaka gifitangka waraga' wa ning ganotik, tim na kane waraga' gipmonga kiga surogapma ibang togaminga Anutu wari tangkunang kuma' gamgu', ka inga' yara'ganang wa gu kafakafa mo' katatoreinga tangkunang ka wa kugura da' ma to' wara' gu tangkunang u nua'bu tipmarakinga kudip urang figikinga mimereting ningda'ning tota'.  
\v 7 Ka gu aming ka tangkunang guk mokngang a mutu titiing ningda'ning mo' irotang, mokngang. Tangkunang ka Anutu wari nimita' wa mutu titi wara'ning mo', adi tangkunang wa aming indi tang sa' arade a aming fam ga' kabakni' guk siamo' ninak a nananing iik u kafakafa katatora ningwaraga'sa' nimita'. Wara' gu waraga' sura kabaka tiptangkanga tangkunangsa' irotang.   
\p
\v 8 Ka gu Anutuning tangkunang guk ira midi ka indining girini' ning iik a midi kareng u itua waraga' wa a aming adi midi sige ningda'ning naknga bibi' ba nakanting ning sura mutu mo' totang. Abanga gu naga girii ning kane waraga' tanga kalabus iyung dasinabinga itik yaraga' wa ning mo' surotang, o aming adi Pol wari iyung kane tara' waraga' midi ningkige ba tinting ning tonga megang naknga Anutuning kane u mo' kabotang, mokngang. Gu Anutuning tang guk kuma' itang wara' gu tang sa' adenga mamareng ka naga girii ning midi kareng ga' tanga bemarik ningyara' wari kadofigaminga undu' bimbem sa' totang.  
\v 9 Ka Anutu girii wari naktangka aming indi gi' giri iikga' yotangkanipma ning tanga aming arantagim ka adining kane sa' titi wara'ning ning kuma' indipmiinga ikem. Ka u yotangkanipku' wa Anutu adi indi kadapmang kareng nananing tang ganangsa' kuma' tanga ikinga mo' nipma yotangkanipku', mokngang. Anutu adi timinggi' timinggi' sini' kama kunim ko mo' kadofigu' ganang ka kane kigineng ka inga' Kasira Aming Jisas wari indi yotangkanip ga' titi waraga' kuma' suktangkanga kabigu' wara' adi ananing sasuk a ai'dap kareng ka unggungsa' yaranga tinimgu'.  
\v 10 Ka inga' aming ka yotangkanip titining Kasira Aming Jisas wari kadofinga kungkumak ning kane u tugu' wa Anutu wari yotangkanip titi wara'ning kadapmang u sareng kuma' tipkadofanimgu'. Ning tinga kane ka u tugu' wara'ning kigineng wari kungkumak ning kigineng ka aming indifimiri wara'ning u udanga kayonimgu'. Ning tanga adining midi kareng wara'ganang wa kadapmang ka ka' fikifiki ningsa' iik wara'ning u sareng ningtintingnanga yareinga katam.   
\p
\v 11 Ka midi kareng ka wara'ning kane titi waraga'sa' tanga wa Anutu wari naga midi u itua wara'ning kane aming a aposel a yanggek aming ning u titi waraga' nipmigu'.  
\v 12 Ka na kalabus tanga itik yara'ning mamareng wa Anutuning kane ka waraga'sa' tanga bemitik. Ka na mamareng waraga' tanga naning sasuk kigineng ka Anutuga' naktangka ning wa kugura guk mo' tita', mokngang. Na ning suktangkanga ikitik, Anutu ka adita' naktangka titik adining kigineng wa girii sini' wara' adisa' kuma' yotangkanamota'. Ning tanga kane ka adi u kabinaminga titik undu' anasa' kuma' katatoreinga kadaga kabi'guk mo' tanga tangkunang ningsa' ira anganga inga' kama girii ari' ka girii Jisas wari abo' wara'ganangga'sa' ira auta'.   
\p
\v 13 Ka Timoti gu midi didimeng ka naga ganggekinga naktiang wa surotangka tang totang, midi ka wa aming fam yanggek wara'ning kadapmang kareng gangtintingna wara'ning. Ning tanga gu Kasira Aming Jisas ga' naktangka tanga adi yotangkagabinga gu kabaka ka adita' naktangka ningsa' tanga iik a aming fam ga' naknga yotangkayap titi wara'ning wara'guk irotang.  
\v 14 Ning tanga gu napa' ka midi a kadapmang didimeng kuni' nua'ni sini' ka Anutu wari gu katatora ga' gamgu' wa kafakafa katatorotang. Ning tinga Anutuning mini unggo ka indining kabakni'ganang ikita' wari undu' yotangkagam tinga Anutuning midi beng guk u didimengsa' yanggekotang.   
\p
\v 15 Ka Timoti gundu' kuma'sa' nakarang, kama tubo Esiani naktangka aming ka ni naga yotangkanap ga' guk mo' naku', mokngang, dabiksa' adi ninibi sa' tiging. Aming fama' ka Fiselas guk ka Hemosinis guk urang undu' kuma' nibugumu'.  
\v 16 Aming kubaniksa' ka Onesiforas warisa' yotangkanamgu' wara' na adining kadapmang kareng ga' sura girii wari Onesiforas kurene u kafakafa tiap waraga' ibang fatoimitik. Fikifiki adi kafakafa sa' yotangkanabinga na kabakna ararangeng kareng guk naknga yaguk. Abanga adi naga kalabus ganang ikitik wara'ning wap kadagang ga' mutu guk mo' tugu'.  
\v 17 Mokngang, adi yong girii Rom i abanga kadofinga wa adi naga naptua ga' urapsa' sura wenegu'. U wenanga anganga naptua sa' tugu'.  
\v 18 Ka Timoti gundu' kuma'sa' nakarang, Onesiforas wa tim na Efasas do yaguk u tanga undu' kabi'mo' yotangkanapku', wara' na adita' ibang ning tongamarik, adi inga' kama girii ari' ka girii Jisas wari tubobu abo'ganang wa Anutu wari kafakafa yotangkangaminga gi' giri iro'.   
\c 2  
\s1 Pol wari Timoti wari Kasira Aming Jisas ning midi kane waraga' ami'ning aming soldia ningda'ning iik waraga' anigu'  
\p
\v 1 Ka sabana kareng Timoti gu kane kagabi ning kadapmang ka aming fam wari ting ning guk mo' totang, gu tangkunang ka Kasira Aming Jisas wari ai'dap tanga nimita' wara'guk ira tangkunangsa' adeutang.  
\v 2 Ning tanga gu midi kareng ka naga aming kabi'mo'ga' urang ituaiminga fanakarugung u bema aming karesi fam ka kane ka ning u titiga' bibi' guk mo' ninak ning u yanggerotang. Ning tinga adibu aming fam yanggekanting.   
\p
\v 3 Ka aming fam indi Kasira Aming Jisas ning kane waraga' tanga wa kagaya guk bemitam. Ka gundu' girii Jisas ning kane u tonga wa adining ami'ning aming kigineng kareng ningda'ning indigok kane wara'ning kagaya a mamareng dabiksa' bemtam.  
\v 4 Ka wara'ning wa gundu' kuma'sa' yabitang, ami'ning aming adi ami'ning kane u titing ganang wa adi sasuk ka kane sige fam titining waraga' guk mo' titing, mokngang, adi nasi' midi ka girisi' wari initing unggungsa' yaranga titi waraga'sa' sukiting.  
\v 5 Abanga aming ka uunak resis titing undu' ningsa', adi kadapmang didimeng ka uunak titining unggungsa' yaranga unarota' wa giri napa' kareng guk amiinga bemnota'. A sansaramik da' tanga unarota' wa mokngang fakara tinga napa' kareng ni guk mo' aminting ning titing.  
\v 6 Abanga gu aming ka feng kane titing waraga' undu' surotang. Adi ning titing, aming ka feng kane tang fatota' wa adi sige ningsa' mo' fatota', mokngang, feng wara'ning beng u manggakna wara'ning tim munumung wa adi kuma'sa' manggaknota'. Ning tinga aming fam adi mandang sa' manggakninting.  
\v 7 Ka midi kadapmang ka u tonga yararik wa gu Anutuning kane tarang wara'ning kamaga u ganarik. Ka kamaga midi famineng ka u ganarik wa yotangkayap tinga kane ning kadapmang didimeng yara wara'ning napa' beng guk. Ka gu waraga' sukinga girii wari guning sasuka u kuma' tipsangandagaminga nakedasasu'notang.   
\p
\v 8 Ka gu midi kareng ka naga u ituatik wara'ning ki waraga' surotang. Wa ning, Kasira Aming Jisas ka kungkumak tanga tubobu maragu' wa aming sini' ka Devit ning arantagim ganang kadofigu' wari maragu'.  
\v 9 Ka na adining midi kareng u faituatik waraga'sa' tanga wa aming wari aming kadagang sini' ka aming dipming sep titiing ningda'ning napma tabanga iyung dasinapma ning tanga sen wari kafana kana tofinabinga itik. Ka beng sini' adi tofinapking de ka Anutuning midi wa tofitangka titi a udaga titining guk mokngang, wara' na kalabus iyung ganang ira undu' itua sa' fatirik.  
\v 10 Ka na mamareng ka i bema itik ningyara'ganang wa ning sukitik, Anutu adi ami taming fam ka anata' kuma' ifikasirinagu' u yotangkaiminga adindu' kadapmang ka Kasira Aming Jisas wari kuma' tinimgu' wara'ganang ikanting. Ira ning tanga Anutuning yong kareng ka fikifiki ningsa' iikning wara'ganang ikianting. Ning sura wa nasi' kagaya kuni' kuni' wari kadofinaminga wa na mutu guk mo' tanga kabakna tiptangkanga bimbem sa' titik.  
\v 11 Ka midi kadapmang nua'ni ka indi tugutam undu' beng guk sini'. Wa ning tugutam,  
\q1 “aming wari indi Jisas ga' naktangka tanga adining arantagim ning nipma adi uking ning indifinting wa indi tubobu undu' adi maragu' ningsa' maraknam ga'.  
\v 12 Abanga indi tangkunangsa' adenga mamareng bimbem sa' tantam wa indi mamareng u tarafira adigok girii dabik iknam ga'. A indi mamareng ga' mutu tanga Jisas u kabinga adining wap mo' ituantam wa inga' adindu' adining beni ning de ganang indining wap guk mo' towa'.  
\v 13 A aming indi napa'ni titiga' midi totangka wa giri tantam ka fikifiki nakube ubu tanga titi guk mo' titam. A girii ning kadapmang undu' naro', adi nasi' midi ka yotangkanip titiga' kuma' touta wa titisa' tita' wara' adi indining mandaga' waraga' sura mo' indibota', kuma'sa' tota'.”   
\s1 Pol wari kane aming kareng ka Anutu wari ningwaraga'sa' nakita' wara'ning kadapmang kareng waraga' togu'  
\p
\v 14 Ka Timoti gu fikifiki midi ka i gana yararik i ninak waraga' ami taming ning kabaksi' ifimarakinga ninak sa' tinting. Ning tanga gu Anutuning de ganang midi tangkunang ka adi Anutuning midi tounga wa adi midi bupmo'sa' waraga' arok mimeng mo' titi waraga' inotang. Arok ka ningwara' wa aming yotangkayap ning guk mokngang, wa aming ka u mera nak wara'sining kabaksi' u ifikadaga wara'ningsa'.   
\p
\v 15 Ka gu kane ka aming ga' Anutuning midi beng guk yanggek ning u tanga wa gu sasuk kigineng kubanik ka midi didimengsa' yanggekinga Anutu wari kane aming kareng sini' ning gagap waraga'sa' sura totang. Ning totang wa gu kabaka kugurang guk ira sasuk tangkunang ka o na naning kane u tanga wa na kadapmang kareng ka ni guk mo' kabarik didimengsa' tasasu'narik ningsa' sura naknga irotang.  
\v 16 Ning tanga gu midi kamaganangni using sige ning ka ki guk mokngang u manda sini' ukngamotang. Aming ka midi ka ningwara' tuguting wa sasuksi' ifikadagainga kadapmang ka Anutuga' manda ukngam ning u yaranga tanga auting.  
\v 17 Aming ka ningwara'ning midi wa udi kadagang ningda'ning, udi wari garaga tanga aming fugu kareng urang tipkadagating ningda'ning tinga aming kabi'mo' wara'sining kabaksi' ifikadagating. Ka aming arantagim ka midi kadagang ka ningwara' u yanggekiting wara'sining fama' wa Haimenias ya Failitas ya wang.  
\v 18 Aming fama' ka wa Anutuning kadapmang beng guk u kuma' kabinga midi ka girii Jisas wari kumara maragu' waraga' wa ning fatugutamu', aming indindu' adi maragu' u tanga wadigi'sa' kuma' maragum wara' nua'bu mo' maraknam. Ning tonga yareinga naktangka aming fam ning sasuk u ifikadagainga adindu' naktangka u kagabi tonga titing.   
\p
\v 19 Ka Anutu wari adining naktangka aming arantagim u tipmararonga wa naktangka aming arantagim ka tim munumung indifimarakinga fadeyam wa yak ning mangkap kigineng ka bataga titining guk mokngang ningda'ning unanga kamagu'. Ka mangkap wara'ning kaba ganang taara' wa midi kigineng nua'ni ka naktangka aming u indifitangka wara'ning ka midi nua'ni kudi iyok ning da'ning fadera' wa ning, girii adi aming arantagim ka anata' kuma' ifikasirinagu' wara'sining wapsi' wa adi kuma'sa' nakedanga ita'. A mangkap wara'ning fugu ganang wa midi nua'ni ka ningda'ning yoku', aming dabiksa' ka indi Anutuning arantagim ning tuguting wa adi kadapmang kadagang ga' manda sini' ukngamting, ningda'ning yoku'.   
\p
\v 20 Ka indi kuma'sa' yabitam, aming kangasi ning yak ganang wa gafa a kabak karesi inga'ni kuni' kuni' ikiting. Ka wara'sining kanesi' wa tangsana ka aming kangasi warisa' titining ganang fiking kubanik kubaniksa' tanga nating. A kabak fam ka firi a kama wari titing wara'ning undu' ikiamiting, ka wa kadagasi da'ning, ka wara'sining kanesi' wa fikifiki sansaramik sa' tangna wara'ning.  
\v 21 Ka aming indining kabakni' undu' ningsa', aming ka kadapmang sansaramik kadagang u kabisasu'nanga fafandangeng karengsa' irota' adi gafa a kabak karesi sini' ka nana kareng sini' tangna wara'ningsa' ningda'ning ka kuni' nua'ni sini naro'sa' irota'. Ning tanga adi nasi' kane kareng girii ka girini ka Anutu wari surota' u amiinga titi waraga' tugunung sa' tanga irota'.  
\v 22 Wara' Timoti gu kadapmang ka waraga' sura napa' sansaramik titining sasuk kadagang ka saba uyamang nng kabaksi'ganng kadofita' wa manda ukngamotang. Ning tanga gu kadapmang karesi ka didimengsa' tanga iik a naktangka tang titi a aming fam ga' siamo' naknga yotangkayap titi a kabaka kugurang sa' naknga iikning unggungsa' totang. Kadapmang ka ningwara' wa aming ka kabaksi' kareng guk wari titiga' naknga Anutu aniting wara'ning, wara' gu adisigok kadapmang kareng ka u tinting.  
\v 23 Ning tanga gu midi ka aming fam wari napa'napa' ning ki u sura nakeda waraga' wena tanga midi sigening ka anasining sasuksi'ganangsa' ifikadofinga fatoingating wara'siguk midi kabi'guk mo' tonting. Gundu' kuma'sa' nakarang midi ka ki guk mokngang ningwara' u tuguting wa arok tipkadofi wara'ningsa'.  
\v 24 A aming ka girii ning kane aming ning irota' adi kadapmang ka midi sigening ka arok titi wa mo' tota', mokngang, adi aming dabik ning bining ganang ira kadapmang karengsa' tiama ning tanga yanggek aming kusubang kareng ning ira  
\v 25 aming wari adigok arok ga' tonga tinga wa adi midi kugurangsa' ina ifididimota'. Wa adi ning surota', Anutu adi kabaksi' ififareinga adining midi beng guk udep nakanting,  
\v 26 ning tanga sasuksi' wari sanganda tanga sura nakeda sini' tanga kadapmang kadagang ka tim aming kadagang Setan wari bugap ningda'ning tanga manggakyapma adining sasuksa' yaranga ti ga' yangdideinga titing wa kagabi tinting, ning sura midi kugurangsa' ina ifididimota'.   
\c 3  
\s1 Inga' napa' kadagang siamo' kadofo' wara'ning midi  
\p
\v 1 Ka beng sini' Timoti gu napa' kadagang kabi'mo' ka naktangka aming ga' mamareng ninim ning ka inga' kama wari bibi' tonga tinga kadofo' wara'ning undu' kafakafa naknga irotang.  
\v 2 Kama ka wara'ganang wa aming wari kadapmang kadagasi kuni' kuni' ka ning tini'ga', adi anasita' sasuk a uningkim mambong girii manggakna ga'sa' sasuk, abanga anasining wap bema aranga dadareng titi a Anutuning wap anikige a mamangse babangse ning midi tarakayonga adisita' kabaksi' kareng guk mo' nakiamni'. Abanga kadapmang ka didimeng kareng tanga iikning u wadigi' sini' kagabi,  
\v 3 a anasining kuyase sini' waraga' bibiri' guk mo' ninak a barap sigini a aming sige yangbe a fuksi'ning sasuk kafakafa katatora guk mokngang, ning tanga aming sansaramik ifikadaingak a kadapmang kareng ning digirap sini' iik,  
\v 4 a anasining amise digirapsi'ganang ifikadofiaminga ifikadaga a napa'ni tonga kafakafa guk mo' sura titisa' titi, a adisa' tangkunang guk ning sura ninak, a Anutuga' kabi'guk mo' naknga napa'napa' karesi ka fuksi' ifimaranda ning waraga'sa' sukni'.  
\v 5 Abanga adi fikifiki Anutuning wap masi' wari udi giri futugu ka adi Anutuning kigineng beng guk waraga' wa bibi' ninak ning u tanga yarani'ga'. Ka Timoti gu aming ka kadapmang kadagang ka ningwara' titisi wara'sining du'ganang kabi'sini' guk mo' autang.   
\p
\v 6-7 Ka aming ka wa taming fam ka sasuksi' didimeng guk mokngang undu' iramikiting. Taming ka wa tim sansaramik tanga yaranga adisining kadagang wara'ning mamareng guk naknga ira ning tanga sasuksi' ka kadapmang kuni' kuni' titi wari kabaksi'ganang u kadofita'. Ning tanga adi midi ka aming fam wari iik kareng ning ki waraga' tuguting u ninak ga'sa' naknga kuma' nakiting de ka adi kabaksi'ganang wa Anutuning midi beng guk wara'guk mo' naktangkating. Ka aming kadagasi wari taming wara'sining yak ganang amanga yanggagare tanga kabaksi' ififareinga nasi' midi mandaga' iyang wa taming adi nakiam sa' tanga kadaga titing.  
\v 8 Ka timinggi' aming fama' ka Janis ya Jambris ya wari kadapmang kadagang ka ningwara' tanga Moses ning midi karangkang tugumu' ningsa' ka yara'ganang wa aming ka wari undu' sasuksi' wari kadaga sini' tanga naktangka beng guk titi wara'ning tang guk mo' ira kadapmang kareng wa usingsa' sige tanga ikiting.  
\v 9 Ka adi kadagang ka u titing wa aming karesi adi iibisa' tinga ko ningsa' tanga ira au ning guk mokngang. Adi adisining kadapmang sansaramik ka masi' papesi ningda'ning u kuma' yapma bibi' ka tim aming wari Janis ya Jambris ya ga' nakiamging ningsa' nakiama udaiminga adisining midi mandaga' wa sige ningsa' biwa'ga'.   
\s1 Pol wari Timoti wari Anutuning midi u tangkunang surotangka waraga' anigu'  
\p
\v 10 Ka Timoti gu aming ka u titing ningwara' mo', gu tim nagok dabik ira ning tanga naning midi ka aming yanggek ning a naning iikna a kadapmang ka naga tanga yaguk wara'ning ki sini' wa kuma'sa' kasasu'negung. Abanga na Anutuga' naktangka tang tanga iik a kabakna tiptangkanga kane u tanga ausa' titi a kabana ka aming fam ga' siamo' naknga yotangkayap titi wara'ning wara'guk iik ning tanga ikitik,  
\v 11 abanga mamareng a kagaya kuni' kuni' ka aming wari tanaam wa ma kadapmang fam ganang kadofinaminga wa kanena ganang tang ningsa' adenga bimbem sa' titi ning tanga ira abutik wa gundu' kuma'sa' kasasu'netang. Abanga naga Antiok yong a Aikoniam yong a Listra yong u aguk wa mamareng kabi'mo' namging undu' kuma'sa' naksasu'narang. Ka mamareng kabi'mo' dabiksa' ka u tonga yararik wara'ganang wa girii wari yotangkanam tinga gi' girisa' yaguk.  
\v 12 Ka beng sini' aming dabiksa' ka Kasira Aming Jisas ganang yorafanga kadapmang kareng ka Anutu wari titiga' nakita' u titining wa aming fam wari bibi' nakiama yapgurada tanga kadagang guksa' iiramik wara'ning.  
\v 13 Ning tanga aming ka kadagang titisi a aming ka aming karesi ning sige tuguting adi kanesi' kadagang wa mo' kabini', mokngang, adisining kadagang wa girii giranga ning tanga aming u mandaga' iiramik ning kane tinga Setan wari ana undu' mandaga' iramikinga kadaga tini'ga'.   
\p
\v 14 Ka Timoti guning kane wa nua'ni sini', Anutuning midi beng ka tim naknga naktangka tugung wa gu surotangkanga unggungsa' yarotang. Ka aming arantagim ka midi kareng u ganggekitam indining iik a kane ning kadapmang wa didimengsa' wa kuma'sa' nakarang wara' gu waraga' sura didimengsa' ningsa' totang.  
\v 15 Abanga tim gu kabasi'sini' ko yagung ganang wa Anutuning midi ka timinggi' umpang ganang yoking undu' kuma'sa' indangikinga nakung. Midi ka wa kigineng guk beng sini', aming wari u indangira sasuk bema Kasira Aming Jisas ga' naktangka tinga Anutu wari yotangkangam tanga bema kamiinga kareng gi' giri iik wara'ning.  
\v 16 Beng sini' midi karesi ka u yoking wa Anutuning mini unggo anasa' tipkadofiaminga yoking, wara' midi ka wa kaneni' kareng ka ning u titi waraga' indifimarakita', aming indita' kadapmang beng guk u ninggek a indining kadagang u ningtintingneinga kigeda a indining iikni' u indifididima a iik kareng ning kadapmang didimeng ki ki u ninggek ning u titi wara'ning.  
\v 17 Ning tinga ami taming ka Anutuning arantagim indi midi kareng ka wara'ning kigineng u bema tangkunang girii guk ira Anutuning kane karesi kuni' kuni' u tantam.   
\c 4  
\s1 Pol wari Timoti wari Anutuning midi u itua sa' tanga yara waraga' anigu'  
\p
\v 1 Ka beng sini' Timoti Anutu girii a Kasira Aming Jisas ka aming kuma' kumoging a aming ka ka' ko iik u nipdidimanga tagagarenibo' wara'sining dasi'ganang sareng midi tangkunang ning ganotik, inga' Kasira Aming Jisas adi tubobu kuma' abanga aming kabi'mo' ning girii ira yaptatoro'ga'.  
\v 2 Wara' gu sasuk ka aming wari kama girii ka wa sige ma kadofinimo' ning tonga kabaksi' faranga Jisas wa adisining girisi' ning kaga waraga' sura Anutuning midi u itua sa' tanga yarotang. Kama ka aming wari guning midi u ninak ga' aiga titi ganang wa ma aiga guk mo' tinga kama ka midi itua mo' ning kaga wa ma aming mimeng a aming fama'sa' wa gu a kureng inga' kuma' tok ning guk mo' surotang, mokngang, kama kadagang wa ma kareng wa gu midi itua ning kane sa' tanga autang. Gu midi kadapmang karesi kuni' kuni' ka aming ning sasuk kareng u ifitangkaim a kadagang tinga wa midi kigineng iyang a kadapmang kareng titi waraga' sasuksi' ifimarak ning tanga kabaka tiptangkanga kadapmang didimeng ganang yanggek sa' tanga autang.  
\v 3 Beng sini' inga' kama kadagang kadofo'ga'. Ka kama ka wara'ganang wa aming wari midi beng guk u ninak ga' bibi' nakni'ga'. Ning tanga adi gi' guk mo' mera yanggek aming kabi'mo' ka midi mandaga' ka adi ninak ga'sa' nakiting wara'ning u yanggekinga ninak waraga'sa' wenanga inagiknani'ga'.  
\v 4 Ning tanga midi beng guk ka kuma' naknga ikanting u kabinga midi sigening ki guk mokngang ka napa'napa' wari kadofiting wara'ning ki ning tonga tuguting unggungsa' nakni'ga'.  
\v 5 Ka Timoti gu sasuk sangang sa' tanga didimeng ningsa' irotang. Ning tanga mamareng wari kadofigaminga undu' bimbem sa' tanga ning tanga kane ka Jisas ning midi u yangara itua a nasi' kane fam ka Anutuning kane aming wari titining wa tasasu'na sa' totang.   
\s1 Pol wari adining kane wari ari' biunga tugu' waraga' togu'  
\p
\v 6 Ka na kabi'sini' sibinga biutik. Ka aming wari Anutuga' sura ofa tangama fiking ni alta ganang wain ama urang kwasineting ningda'ning tanga na kungkumak tinga naning amaa kwasanonga ting.  
\v 7 Ka na naktangka ning kadapmang u kagabi kabi'guk mo' tanga kane tangkunang ningsa' tanga ababanga ari' kuma' tipmironga tirik yang. Ka u tirik wa na kadapmang ka aming wari uunak resis tanga uunak tang tanga bagi ari'ganang do urang kadofiting ningda'ning kuma' tirik.  
\v 8 Ka kama ka aming wari bagi ari' wara'ganang kadofiinga uunak kareng wara'ning toni ka wap girii urang imiting ningda'ning wa girii wari naning naktangka a kane u kareng ning kanga napa' tangkunang ka wap aming didimeng ning ninang waraga' kuma' nipmefata'. Wara' girii ka aming indining iik nipkedanga didimengsa' tagagarenip wara'ning kigineng guk ikita' warisa' wa kama girii ari'ganang wap kareng ka u namo'ga'. Ka wap kareng ka wa nagata'sa' mo' namo', mokngang, adi aming ka adining kadapmang kareng yaranga adining nonda kaga ga'sa' sura naktangka tanga iik wara'siguk dabiksa' nimo'ga'.   
\s1 Midi ari'  
\p
\v 9 Ka Timoti na i itik ya yotangkanap titining aming guk mokngang wara' gu naga urapsa' abanga nap wara'ning kadapmang katua waraga' undu' surotang.  
\v 10 Yotangkanap titining aming ka Dimas adi napa' kamaganangni ga' siamo' naknga manda uknama Tesalonaika yongga' kuma' nibinga mugogu'. A Kresens adi kama tubo Galesia ga' kuma' mugogu'. Abanga Taitas wa kama tubo Dalmesia ga' mugogu'.  
\v 11 A nagok ingging wa Luk guksa' ikiamuk. Ka gu Mak undu' nagira ning tanga kubap abademu', adi kuma' katik nagok kane fam girisa' yotangkanapma titining.  
\v 12 A Tikikas wa na Efesas yongga' kuma' anigareinga agu'.   
\p
\v 13 Ka gu i abonga wa naganing saket ka Kapas ning yak ganang Troas yong unggung kabiguk wara'guk bemnama abe'. Abanga midi umpang wara'guk manggara abe'. Ka naganing kudi umpang tangkunang urang wa nakube mo' te', nakeda sini' tanga manggaknama abe'.   
\p
\v 14 Ka aming ka Aleksanda ka napa' diding bras kane urang fatita' wari napa' kadagang sini' naramiku'. Ka inga' girii wari adining kadagang waraga' kura'bu tangamo'ga'.  
\v 15 Aming ka wa midi ka indi faituatam wara'ning digirap sini' wara' gundu' adining kadapmang kadagang waraga' wa kafakafa suktangkanga irotang.   
\p
\v 16 Ka midiganang bema nipmiinga kot munumung tuguk ganang wa midi u yotangkanama tugu wara'ning aming ka ni guk mo' adegumuk, mokngang sini'. Adi kuma' nibinga mugosasu'neging wara' napmo'sa' adenga toguk. Ka adi nibisasu'neging waraga' wa ning torik, na Anutu adi waraga' kura'bu mo' ifikadaga waraga' ibang fatoimirik.  
\v 17 Ka beng sini' na aming ka ni yotangkanam titining guk mokngang, ka Anutu adi mo' nibugu'. Mokngang, adi adining midi wari aming arantagim nua'ni ka Juda mo' wara'ganang auinga naksasu'na wara'ning kadapmang wa naganing kane ganangsa' titi waraga' sura nagaganang ira yotangkanapku'. Ning tanga girii wari nagaganang ira mamareng wara'ning bining ganang kugwang kagaya laion wari napa'ni mini ganang kuma' muguringa kawasinga bemning ninda'ning tanga bemnabinga gi' giri yaguk.  
\v 18 Ka beng sini' inga' undu' ningsa', nasi' kadagang wari nua'bu nifikadaunga tinga wa girii wari yotangkanam tanga adining bining kareng ka kunimganang ikita' u ninagira taranga nipmiinga kareng gi' giri irok ga'. Wara' na girii ning wap u bema aranga ning torik, anapmo' kubaniksa' adi kigineng girii guk fikifiki ningsa' beng sini' ikita'.   
\p
\v 19 Na midi ari' ka ning ganotik, Akwila imaraming Prisila ya u ning inotik, na adisita' sura kabakna karengsa' naknga torik. A Onesiforas kurene ga' undu' kuma' sura torik.  
\v 20 A Irastas wa nagok mo' ikiagumuk, adi Korin yong donggung ko ita'. A Trofimas wa bagana tinga Mailitas yong donggung kabinga mabuguk.  
\v 21 Ka Timoti gu naga nabonga wa kama kareng kuma' adera' ning ganang urapsa' abotang. A gu ko da' totang wa kama ka gugubik kadagang wari kadofiinga waraga' tanga mo' ma abe'.  
\p Ka yara'ning kuyage fam ka Yubiulas a Piudens a Lainas a Klodia abanga naktangka aming fam dabiksa' adindu' guta' sura kabaksi' kareng naknga toing.   
\p
\v 22 Girii wari guning uraga u gifitangkainga tang sa' tanga irotang. Ning tanga Anutu wari naktangka aming fam guk dabik sidita' ai'dap tasaminga adining tangkunang wara'guk ikanting, beng.