\id 1TH — URI N. Sampson \h 1 TESALONAIKA \toc1 Midi umpang Pol wari Tesalonaika amingga' tim munumung yokiamgu' \toc2 1 TESALONAIKA \toc3 1 TESALONAIKA \mt1 Midi umpang Pol wari Tesalonaika amingga' tim munumung yokiamgu' \c 1 \p \v 1 Pol naga a Sailas a Timoti famineng indi Tesalonaika yongni naktangka aming ka sibeng Anutu a girii Kasira Aming Jisas ganang sini' yorafanga iking sidita' midi umpang i yoksamem. \p Anutu wari ai'dap tanga kafakafa tasaminga adining kaba kugurang kareng guk ira gi' ikanting. \s1 Pol wari Tesalonaika aming wari naktangka tiging waraga' kaba karengsa' naknga togu' \p \v 2 Fikifiki indi sidi naktangka aming ira indining kuyane ning iking waraga' sura kabakni' karengsa' naknga Anutuga' mesisiringa fatem. Ning tanga Anutu wari yotangkasap titi waraga' ibang fikifiki fatosamem. \v 3 Fikifiki indi indining sibeng Anutuga' ibang tounga wa sidi kadapmang karesi kuni' kuni' ka Anutuga' naktangka tanga adining midi ninaksa' tanga yaranga iik, a aming famga' kabaksi' guk naknga yotangkayap titining kane girii titi, a sasuk tangkunang ka girii Jisas wari inga' tubobu abanga manggaknip waraga' suktangka sini' tanga iik waraga' sura kabakni' kareng naknga mesisiringa sa' fatem. \v 4 Ka kuyane indi kuma'sa' nakedem Anutu wari sidita' siamo' naknga ananing arantagim ganang iikga' kuma' sifikasiranagu'. \p \v 5 Ka wara'ning wa ning, tim indi Anutuning midi kareng u anga ituasamgum wa midi sigesa' mo' kadofigu', mokngang, wa Anutuning mini unggo wari tanga aming wari midi beng guk waraga' kabaksi' guk sini' kufara tugu ning ning tanga ituasaming kigineng guk naking. Ning tanga indi Tesalonaika yong u anga sidigok yagum wa indi sidi yotangkasap ga'sa' sura kadapmang karengsa' tugum undu' sidi kuma'sa' nipking. \p \v 6 Ning tanga sidi kadapmang kareng ka tim girii Jisas wari tanga yagu' wara'ning ka indibu anga tugum u kanga yarasa' tanga tiging. Ning tinga aming fam wari sidi girii ning midi ga' naking waraga' tanga sidita' bibi' naknga mamareng siamo' samging. Ka sidi kabaksi' mamareng guk mo' naking, mokngang, sidi Anutuning mini unggo wari yotangkasama kaba kugurang saminga mesisiringa sa' tanga midi ka indi sanggum waraga'sa' naking. \v 7 Ning tinga naktangka aming ka kama tubo Masedonia a Grik tara' u ira yareging wari sidining kadapmang kareng wara'ning midi ne u naknga yaranga adindu' kadapmang kareng u tanga iking. \v 8 Beng sini' midi ne ka sidi girii ning midi kareng yaranga tiging wara'ning wa kama tubo Masedonia a Grik tara' warisa' mo' naking, mokngang, wa kama yong yong fam undu' mugoinga sidi naktangka tang tiging wara'ning midi undu' kuma' naksasu'neging, wara' indi waraga' nua'bu anga inonga, mokngang. \v 9 Ka midi ka indi sidiganang u auinga sidi indining midi u naknim sa' tiging wara'ning wa aming ka midi ne u naking ana undu' kuma' tuguinga nakem. Abanga adi sidita' wa ning undu' kuma' tuguting, sidi muraksi' mandaga' u ibinga Anutu beng guk ka' iyak tita' waraga' naktangka tanga adining kadapmang sa' ubu yaranga tanga iking. \v 10 Ning tanga sidi Anutuning mindingni Jisas ka Anutu wari tubobu tipmarakinga Anutuning kagaya girii ka inga' kagadofi wara'ning wari mo' indifikadaga ning, wari tubobu abubu waraga' sura kabaksi' kareng guk kapmera iking waraga' undu' fatuguting. Wara' indi u naknga ning toyam, o Anutu wari adining arantagim ganang iikga' beng sini' ifikasiregu' wara' adi kadapmang kareng u ting wang. \c 2 \s1 Pol wari Anutuning midi kane ka tim Tesalonaika yong u anga tugu' waraga' togu' \p \v 1 Ka kuyane sidindu' kuma'sa' nipking, kane ka indi sidiganang u anga tasamgum wa sigesa' mo' bigu', mokngang, wa beng guk kuma' sifikadofigu'. \v 2 Abanga sidindu' kuma'sa' naknga iking, tim indi sidining yongganang u ko mo' kadofigum ganang u indi Filipai yong u anga ikinga aming wari indita' bibi' naknga indifi tanga ma midi kadagang nina ning tanga mamareng kabi'mo' nimging. Ka indi waraga' sura mutu tanga sisibi titiga' guk mo' sukum, mokngang, indi sidiganang u ausa' tugum. Anga kadofiinga aming kabi'mo' ka sidining yong wara'ni wari indita' bibi' naking de, ka indining Anutu girii wari yotangkanim tinga indi adining midi kareng u tangkunangsa' adenga ituasamgum. \v 3 Ka beng sini' midi ka u ituatam wa mani' papenga tutugu a aming ifikadaga a mandaga' iramaronga sige tutugu ning wara'ning mo'. \v 4 Mokngang, indi kane aming arantagim ka Anutu wari adining midi kareng ning kane u girisa' titining ning kuma' nipma indipmigu' wara'ning ning ira wa u tugutam wang. Abanga indi nasi' midi karesi tuguinga aming wari karengsa' naknimting ning mo' sura tugutam, mokngang. Anutu ka indining sasuk kuma'sa' nipkedata' wari indining kane u kanga mesisiringa titi waraga'sa' sura fatem. \v 5 Abanga indi kabakni' mang ganang wa sasuk ka sidining mambong karesi saromanggakna waraga' tanga usingsa' sanggagare ning ningda'ning mo' tugum, mokngang, wa sidindu' kuma'sa' nipking a Anutu girii adindu' kuma'sa' nibita' indining midi wa beng guksa'. \v 6 Abanga indi sidi a aming fam wari aming karesi ning nipma indining wap bema ara waraga' mo' sura fasanggekiagum. \v 7 Beng sini' indi sidiganang u agum wa indi wap girii ka Kasira Aming ning aposel wara'guk ira agum, wara' indi napa'niga' wa girisa' sanonga tugum. Ka mokngang, indi mamareng ni ma kabiamnam ning tonga kafakafa tubosa' ka mamangse wari sababi'ga' urang tiamiting ningda'ning tasama napa'ni kura'bu tinim waraga' guk mo' katisamgum. \v 8 Beng sini' idni sidita' siamo' nakum waraga' tanga indi sidi yotangkasap waraga' sura ning togum, o indi Anutuning midi kareng ya adisita' undu' yamtam. Ning tanga mamareng ka aming fam wari adi yotangkayap ning kane tantam waraga' tanga udep indifinting undu' girisa' ning tonga sasuk kigineng ka wari indining kabakni'ganang ikinga tugum. \p \v 9 Ka kuyane sidi indining kane ka tim sidiganang u anga tanga ikinga nipking waraga' sukanting. Indi Anutuning midi ituasam ning kane u tanga wa indi nana sidisa' ninim wa sidita' mamareng ma samnam ning tonga nana yaptua ning kane undu' titi ning tanga kane girii sini' tanga tiim sidii fikifiki kanesa' tanga yagum. \p \v 10 O Tesalonaika aming ka indining midi naknga naktangka tiging sidi indining kadapmang a iikni' kuni' nua'ni sini' a didimeng kareng ka sidigok u ira tugum wa kuma'sa' nipking, ka wa Anutu girii adindu' kuma'sa' nipku'. \v 11 Beng sini' indi sidining babangse ningda'ning ira kafakafa sini' ka aming wari sabase ga' urang tiamiting ningda'ning tanga yotangkasapsasu'negum. \v 12 Ning tanga indi sidining kabaksi' sifimarara a sidining mamareng u ifikurasam a midi ka Anutuning kadapmang kareng ka aming idni yaranga tanga iikning u yara waraga' sana ning tasamgum. Ning tanga ning fasaniagum, sidi Anutu wari adining bining ganang abanga ira adigok wap girii u bema iik waraga' fakatisanara' wara' sidi waraga' sura kadapmang didimeng kareng u tanga ikanting, ning fasaniagum. \s1 Tesalonaika aming wari naktangka tang tanga mamareng bemging wara'ning midi \p \v 13 Ka napa' nua'ni ka indi waraga' kabakni' kareng naknga Anutuga' mesisiringa fatem wa ning, tim indi sidiganang u anga Anutuning midi munumung sini' u ituasamgum ganang wa sidi midi beng ka Anutu anasa' tipkadofi ning ning kanga urapsa' bema o midi ka wa amingning mo', Anutu ananing sa' ning tonga naktangka tiging. Ning tinga midi ka wari naktangka aming sidining kabaksi'ganang u ko ira kane tangkunang ningsa' fatara'. \v 14 Ka beng sini' kuyane mamareng ka sidi fabeming wa tim naktangka aming arantagim bak ka kama tubo Judia tara' ira yareting adindu' ningsa' bemging. Adi girii Jisas ga' naktangka tinga anasining amise Juda fam wari bibi' naknga mamareng yamging wara' sidita' undu' inga' amise wari ningsa' samging. \v 15 Ka Juda arantagim kadagasi ka wa tim girii Jisas ugomoging. Abanga profet arantagim undu' fidipmiaging. Ning tanga aposel arantagim indindu' indifikadaga tanga indibusura yara fatiting. Beng sini' aming arantagim ka wa Anutuning kadapmang kareng ka Anutu wari aming titiga' nakita' u tarakayonga ning tanga aming aming ning digirap sini' ikiting. \v 16 Adi kadapmang kadagang ka u tanga ababanga inga' kadagang girii sini' nua'ni ka indi Anutuning midi kareng u bema anga aming arantagim nua'ni ka Juda mo' sidita' u ituasaminga Anutu wari yotangkasap tinga kareng gi' giri iik wara'ning kadapmang u udanim waraga' kane tangkunang fatiting. Ning tinga adisining kadagang wari girii sini' giragata'. Ka adi kagaya girii ka Anutu wari adisining kadagang waraga' kaba kagaya nakiamita' wara'ning wari kuma' arakadofiamara'. \s1 Pol wari Tesalonaika aming u anga yap ga'sa' naku' waraga' togu' \p \v 17 O kuyane indi tim sidigok u iya' sibinga kama nua'niga' agum ganang wa kamani yagum de ka indining sasuk wari sidi mo' sibigum, mokngang, indi kabi'sini' iya' sidita' wa saba meng wari sabase'ga' siamo' urang nakiting ningsa' fanakem. Ning tanga indi sasukni' wari sidita'sa' sura nua'bu anga sap wara'ning kadapmang ga' wenanga kane girii tanga yagum. \v 18 Beng sini' indi sidi anga sap ga'sa' sura Pol nandu' sidita'sa' sura sidi anga sap wara'ning kadapmang ga' wena kabi'mo' tanga abuguk, ka mokngang, aming kadagang Setan wari kadapmang faisefinimarugu'. \v 19 Ka sidi indining mambong tangkunang ningda'ning beng sini' iking waraga' tanga wa indi sidita'sa' nakum wang. Ka inga' girii Kasira Aming Jisas wari tubobu abuinga adining de ganang adenam ganang wa indi dani' danga kabakni' karengsa' ninak a wap girii bimbem wa ki kubanik ka sidi sifikadofigum waraga'sa' tanga tanamga'. \v 20 Beng sini' u ning torik, sidining iiksi' kareng warisa' wa indi girii ning de ganang kabakni' kareng naknga mesisiringa tantam. \c 3 \s1 Pol wari Timoti u Tesalonaikani aming ifitangka waraga' anigaregu' \p \v 1 Ka indi sidi anga sap ga' sasuk mimeng sini' tanga anganga inga' ning togum, o indi sasuk ka wara'guk fafong sini' ma iknam wara' Atens yong ingging wa Sailas guk indipmo' ikantamuk. \v 2-3 A Timoti gusa' aya'. Ning tonga indi kuyani' Timoti ka Anutuning kane ka Kasira Aming Jisas ning midi kareng tokadofi wara'ning titam u anigaregumuk. Ning tonga anigaregumuk, indi urap anga sasuksi' mo' ina ifitangkantam wa adi mamareng ka naktangka aming indiganang kadofira' yara'ganang ma kadani'. Ning tonga sidining naktangka u anga sifitangka waraga' tanga anigareinga agu'. Ka kuyane sidindu' kuma'sa' naking, mamareng ka u bemitam wa sige anasa' mo' kadofinimita', mokngang, Anutu adi kuma'sa' sura kabiinga kadofinimita'. \v 4 Ka midi ka mamareng wari inga' kagadofi wara'ning wa tim indi sidigok unggung anga yagum u tanga sareng kuma'sa' sangnatamgum, wara' wara'ganang didimeng kadofira' wa sidindu' kuma'sa' kanga nakeding. \v 5 Wara' na sidi mamareng ganang yaging waraga' sura a aming kadagang yanggagare tuang Setan wari mamareng wari kadofira' ning ganang yanggagareinga mangfu tinga kane kareng ka indi anga tugum wari beng guk mo' ma kadofo' ning tonga sasuk mimeng sini' tanga anganga sidining naktangka u sapdidima waraga' Timoti urapsa' anigareguk wang. \s1 Pol wari Tesalonaika aming ning midi ne kareng u naknga kaba karengsa' naknga togu' \p \v 6 Ka na Timoti u anigareguk wa adi sidigok u kuma' anga iya' sidining kadapmang kareng u kasasu'nanga sara sa' tubobu abugu'. Abanga kadofinga ning ninggu', girisa' iking. Adi kadapmang ka naktangka tang tanga amise fam ga' siamo' naknga yotangkayap titi wara'ning u fikifiki ningsa' ko tanga iking. Abanga ning ninggu', adi sidita' kabaksi' karengsa' naknga fikifiki sidining nondaksi' nua'bu sasp ga'sa' sasuk ka sidi adisining nondaksi' iyap ga'sa' naknga ikiamu' ningsa' tanga iking. \v 7 Wara' kuyane indi sidining midi ne kareng ka sidi naktangka tang ningsa' ko tanga iking wara'ning u nakem wari indifitangkainga kagaya kabi'mo' ka aming wari taniming wara'ning wa tangkunangsa' adenga bimbem sa' tem. \v 8 Sidi girii ning midi u naknga tangkunang ningsa' surotangkanga iking wara' indindu' dani' danga ka'sa' ningda'ning ira tanga ausa' tem. \v 9 Beng sini' indi sidining kadapmang kareng waraga' kabakni' kareng siamo' fanakem wari tanga indining kabakni'ganang wa mesisiringa girii tipkadofiinga indi waraga' Anutuga' mesisiringa titam. \v 10 Ning tanga indi sasuk kigineng ka sidi nua'bu anga sapma sidi sasuk kareng niga' nafek tanga iik u yotangkasaming girisa' tanga iik waraga' wa sasuk kigineng ningsa' ko tanga ira tiim sidii fikifiki Anutuga' ibang tangkunang fatoyam. \s1 Pol wari Anutu wari kadapmang tangaminga Tesalonaika aming u anga yap waraga' ibang togu' \p \v 11 Ka na u nua'bu anga sap waraga' wa ning fatorik, indining sibeng Anutu a girini' Jisas warisa' kadapmang tinim ga' nakarik. \v 12 Indi sidita' siamo' fanakem wara' Anutu wari sidining kabaksi' u sifimarakinga sidindu' naktangka aming kuyase a aming fam ga' kabaksi' guk naknga kafakafa sa' tiap waraga' undu' ibang fatoyam. \v 13 Anutu wari ning u tasama sidining kabaksi' u sifitangkainga sidi kadapmang karengsa' tanga ikanting. Ning tinga girii Jisas wari tubobu abanga adining naktangka aming u bak dabik fabanga kuknibo' ganang wa sibeng Anutu wari sidining kadapmang wa didimeng karengsa' kawa', ning fatoyam. \c 4 \s1 Pol wari kadapmang kareng ka Anutu wari aming wari tanga iikga' nakita' u titi waraga' togu' \p \v 1 O kuyane indi girii Jisas ning wap ganang midi kigineng ari' ning sangtam, tim indi sidigok u ira wa kadapmang karesi ka sidi yaranga tanga ikinga Anutu wari kareng kanga kaba karengsa' naksam wara'ning waraga' wa kuma'sa' saninga tanga iking. Ka umpang yara'ganang wa nua'bu ning sangtam, kadapmang kareng ka u ting wa tangkunang ningsa' tanga ira auinga kabi'mo' kadofota'. \p \v 2 Ka waraga' wa tim girii Jisas wari ananing wap ganang ningkareinga anga midi tangkunasi fam sanggum undu' kuma'sa' naknga iking. \v 3 Ka kadapmang ka Anutu wari sidi tanga iikga' nakita' wa ning, sidi kadapmang ka taming a ami fam guk sansaramik titi u wadigi' sini' kabisasu'nanga ning tanga fafandangesi karesi kuni' nua'ni sini' ikanting. \v 4-5 Ning tanga sidi taming saniap ga' sura wa sidi kadapmang ka aming arantagim ka Anutu u kabi'guk mo' nakedating wari kabaksi' marara titisa' titing ning mo' tinting, mokngang, sidi kadapmang didimeng karengsa' ka Anutu wari titiga' nakita' wara'ganangsa' yaranga titi waraga'sa' sukanting. \v 6 Abanga naktangka aming kuyase fam ning tamse undu' napa' ka sidining dabiksa' ning yapma a indi kabi'ning girisa' iramikantam ning guk mo' sura tinting, mokngang sini', sidi kadapmang ka u tanga wa kuyase ga' kadagang tiamting. Ka aming ka ningwara' titing wa inga' girii wari kagaya girii kabiamo'ga'. Ka indi midi ka wara'ning undu' midi kigineng tim sarengsa' kuma' sanggum. \v 7 Beng sini' kuyane, Anutu wari katininggu' wa adi kadapmang mumungguk kadagang u abanga tanga iik waraga' mo' katininggu', mokngang, adi indi adiganang abanga kadapmang didimeng kareng kuni' nua'ni sini' unggungsa' tanga iik waraga'sa' katininggu'. \v 8 Ka Anutu warisa' ananing mini unggo kareng u nimita' wara' aming ka midi tangkunang ka i sanarik yaraga' bibi' nakota' wa adi bibi' wa aming nagata'sa' mo' naknamting, mokngang, wa Anutuga' guk nakngamting. \p \v 9 Ka indi kadapmang kareng ka naktangka aming kuyase fam ga' siamo' naknga yotangkayap titi wara'ning wa tim kuma' sanggum. Ning tinga Anutu anasa' sanggekinga kafakafa sa' kuma' tanga iking wara' indi midi ka waraga' wa mimeng sini' nua'bu mo' sangtam. \v 10 Ka kadapmang kareng ka u titing wa sidining yongganang unggungsa' mo' tanga iking, mokngang, wa naktangka aming kuyase fam ka sidining kama tubo Masedonia tara' dabiksa' waraga' undu' tiamiting wara'ning wa kuma'sa' nakem. Ka kuyane waraga' wa nua'bu ning sangtam, sidi kadapmang kareng ka wa tangkunang ningsa' tanga ira auinga kabi'mo' kadofota'. \v 11 Ning tanga sidi kafakafa sa' iik wara'ning midi ka tim urang sanggum waraga' sura ning tanga arok guk mo' tanga kusubang karengsa' ira kuyase fam ning iiksi' u yapma toyangak a nana a mambong ga' undu' kuyase fam wari sansam ga'sa' katiang ning wa mo' tinting, mokngang, sidi sidining iik u kafakafa katatoranga ning tanga napa' sidaning tangkunang ganang kane sa' tanga manggakna waraga'sa' sukanting. \v 12 Sidi kadapmang kareng ka ning u tanga didimengsa' ikanting wa aming arantagim ka Anutuga' kabi'guk mo' sukiting wari sidining iik a kadapmang kareng u kanga o adi karengsa' ting ning tonting. Ning tanga sidi nana a mambong wa girisa' tanga ira napa'niga' nafek tanga aming nua'ni wari sansam ga' guk mo' tonting. \s1 Pol wari girii Jisas wari tubobu abanga manggaknip wara'ning kadapmang waraga' togu' \p \v 13 Ka kuyane sidi kadapmang ka aming kungkumosi wari tubobu mamarak wara'ning wa sidi nafek sa' tanga aming ka Anutuga' naktangka guk mo' titing wari wadigi'sa' kuma' kumaking ning tonga kabaksi' mamarengsa' urang naknga ikiting ningda'ning ma tini', wara' indi waraga' undu' sangnatam tantam. \v 14 Ka wara'ning wa naktangka aming indi suktangka tang ka ning titam, Jisas adi kungkumak tanga tubobu maragu' waraga' tanga wa indi ning fatoyam, aming ka Jisas ga' naktangka tanga ira kumakanting adindu' inga' Anutu wari tubobu ifimarara Jisas ganang bak fonga kukyapma inagira abo'. \p \v 15 Ka wara'ning midi nua'ni ka tim girii wari togu' u sangtam wa ning, kama ka girii wari abo' wara'ganang wa aming ka ka' ko ikantam indi tim auinga kuyane ka kuma' kumakiting adi mandang, ning mo' tanamga', mokngang, \v 16 wa Jisas wari afonga tinga tim munumung ka girii wari midi bang towa'. Ning tanga naknam wa adining kunung aming ensel ning tim iyak wari ku katiinga Anutuning be girii wari towa'. Ning tanga ari' wa girii Jisas wari kunim kuta kabinga arafo' u kanamga'. Ning tinga aming indi Jisas ganang au wara'ning wa tim munumung ka aming ka tim Jisas ga' naktangka tanga ira kumakiting wari marara Jisas kaunga arani'. \v 17 Ning tinga naktangka aming ka ka' ko ikantam indindu' Anutu wari indagira fonga mungkong ganang bining u Jisas guk bak dabik kuknibinga kura' katuang tanga girii u kainga wari indagira aro'. Ning tanga faranga kuknipma girii anagok ka' fikifiki ningsa' ira anam. \v 18 Ka kuyane sidi midi ka i sanem i naknga kuyase fam undu' ina ning tanga sidasa' kabaksi' kura' tiptangkangam tanga mesisiringa sa' tanga ikanting. \c 5 \s1 Naktangka aming indi iikni' tipdidimanga girii wari abubu waraga' kapmekantam \p \v 1-2 Ka kuyane indi kama ka girii wari tubobu abubu wara'ning wa nasi'ganang sini' kadofo' wara'ning wa kafakafa sini' mo' nakdidimem. Ka sidindu' kuma'sa' naknga iking, adi kapmo' ka kubu aming da'ning midi guk mo' tonga kagadofi sa' to', wara' indi waraga' wa sangdidima sini' titining guk mokngang. \v 3 Beng sini' kama ka girii wari abubu wara'ning wa aming ka wara'ganang ikni' wari o kugurang karengsa' giri kuma' ikem ning tonga suknakube sa' kuma' tanga ikni' wara'ganangsa' napa' mamareng girii ka ifikadaga titining wari taming wari saba ibeunga kagaya urapsa' urang kadofiaminga nakiting ningda'ning kaga'sa' kadofiaminga nakni'ga', wara' adi mamareng ka u tatarafik ning kadapmang guk mokngang, bimbem sa' tini'ga'. \v 4 Ka kuyane sidi aming ka sasuk ka girii wari tubobu abubu ning u kapmek wara'guk mokngang kangkam sa' ikiting ningwara' mo' iking, mokngang, sidi sasuk guk kuma' ira kapmek ting wara' girii wari tubobu abanga kubu aming da'ning urapsa' kadofiinga wa sidi yuguk mo' arani', sidi kuma' nakedanga kusubang gi'sa' adeni'. \v 5 Beng sini' naktangka aming indi gaa' kangkam ning mo', indi diok a mayam ganang sangang sareng iik wara'ning. \v 6-7 Ka indi kuma'sa' yabitam, aming ka dama dek ga'sa' nakiting wa tiim ganangsa' dekiting. Abanga aming ka ama kagaya topnanga papenga fatiangating undu' adi kangam ganangsa' titing. Wara' indi adisining kadapmang waraga' sura sasuk guk mokngang ka dama dekiting ningda'ning mo' ikantam, mokngang, indi sasuk guk ka ka'sa' ningda'ning ikantam. \v 8 Beng sini' naktangka aming indi arantagim ka diok sangang ganang ningda'ning kuma' ikem wara' indi tugunung ningda'ning tanga sasuk ka kane a kadapmang karesi fam u titi wara'ning sasuk guksa' ira antam. Ning tanga ami'ning aming soldia wari suguk wari mo' idefi waraga' bapmasi' tasase tangkunasi ka siot kapa urang ipmating ningda'ning wa indi napa' tangkunasi ka Anutuga' naktangka titi a kabakni' ka kuyane fam ga' siamo' naknga yotangkayap titi wara'ning u tanga ikantam. Ning tanga soldia wari kisi' mungkup tangkunasi ain urang ipma saseting ningda'ning wa indi sasuk tangkunang ka inga' girii wari yotangkayabinga kareng gi' giri iik wara'ning wara'guk ningsa' ikantam. Ning tinga kadagang wari indifikadaga kabi'guk mo' tota'. \v 9 Beng sini' kuyane Anutu wari indifikasira tugu' wa adi indi adining kaba kagaya wara'ning kagaya bimbem waraga' mo' sura indifikasiregu', mokngang, adi girini' Kasira Aming Jisas ning kane ganangsa' wa yotangkanip tinga kareng gi' giri iik waraga'sa' sura indifikasirinagu'. \v 10 Jisas adi inga' indi adigok ka ningsa' iik waraga' sura kumogu', wara' adi tubobu abo'ganang wa indi adita' naktangka tanga ka' ko iik wa ma kuma' kungkumak undu' adigok ka' ningsa' kuma' marara iknam. \v 11 Ka kuyane sidi midi ka waraga' sura ning tanga kadapmang kareng ka sidasa' kabaksi' kura' tiptangkangam ka u tanga iking wa mo' kabinting, mokngang, sidi tangkunang ningsa' surotangkanga tanga ira anting. \s1 Pol ning midi ari' \p \v 12 Ka kuyane indi midi kigineng nua'bu ning sangtam, naktangka aming girisi ka girii wari sidi yotangkasap waraga' ipminga kane girii ka kadapmang didimeng yaranga iik waraga' fasanggeking wara'sining kapmik ganangsa' ikanting. \v 13 Ning tanga sidi adisining kane ka sidi yotangkasap ga' titing waraga' sura adisita' siamo' naknga adisining midi u nakiam sa' tinting. Ning tanga naktangka aming dabiksa' sidi kabaksi' kubaniksa' kufara ikanting. \p \v 14 Abanga midi nua'ni ka ning sangtam, naktangka aming kuyase fam ka kane titiga' baratarak da' titing wa adisining kadapmang u tipdidima waraga' midi fam ina ifididima tinting. A aming ka sasuksi' tangkunang guk mokngang mutu titisi wa midi kareng ina ifitangka tinga mutu u kabinting. A aming ka naktangkasi' tangkunang guk mokngang undu' adisining kabaksi' ifitangkanga yotangkayap tinting. Ning tanga kuyasi' ka ni wari kadapmang didimeng ning bang fam u fe' kabi' tinga wa sidi kusubang gi'sa' ira yanggekanting. \p \v 15 A napa' girii nua'ni ka undu' ning sangtam, aming wari kadagang saramikinga wa sidi kura'bu guk mo' tiamting, mokngang, sidi fikifiki sasuk ka naktangka aming kuyase ning bining ganang a aming fam dabiksa' wara'siga' kadapmang karengsa' tiam waraga'sa' suktangkanga ira tinting. \p \v 16 Ning tanga sidi fikifiki kabaksi' karengsa' naknga ararangengsa' ikanting. \v 17 Ning tanga Anutuga' ibang fikifiki tonting. \v 18 Abanga nasi' nasi' kareng a mamareng ka sidining iiksi'ganang kadofisamita' waraga' undu' Anutuga' asekna ning aninga mesisiringa sa' tinting. Kadapmang kareng ka ningwara' wa Anutu wari Kasira Aming Jisas ning naktangka aming sidi titiga' nakita'. \p \v 19 Ning tanga sidi kadapmang kareng titi wara'ning sasuk ning ki ka Anutuning mini unggo wari kabaksi'ganang tipkadofisamita' u mo' usugumakanting. \v 20 Abanga sidi Anutuning midi karesi ka aming fam wari tokadofisamiting waraga' wa sidi a midi ka wa kamaganangnisa' nakem ning tonga waraga' bibi' mo' nakanting, mokngang. \v 21 Sidi midi a napa'napa' wa kafakafa yapdidimanga ning tanga karesi yapma wa surotangka ning tinting. \v 22 Ning tanga midi a kadapmang ka kadagasi ning yapma wa wadigi' sini' ibinting. \p \v 23 Ka na sidita' sura Anutu girii ka kaba kugurang nimita' wara'ning waraga' ibang fatorik. Anutu ka wari sidining kadapmang kareng a iiksi' u didimeng kareng kuni' nua'ni sini' tipkadofisaminga titi waraga' fatorik. Ning tanga sasuksi' a urisi' a fuksi' dabiksa' wari kadagang ni guk mokngang fafandangeng kareng ningsa' ira anganga inga' girini' Kasira Aming Jisas wari tubobu abo'ganang wa karesi ningsa' sabo'. \v 24 Beng sini' Anutu adi indi didimengsa' iikga' sura katininita'. Ka adi sasuk ka tim titi u kabinga inga' nua'bu tipkadofi ning guk mo' sini' tita', wara' adi sasuk ka adi kuma' tanga katisanggu' wa unggungsa' yaranga tasaminga karengsa' ira anting. \p \v 25 O kuyane sidi indita' sura Anutu wari indi yotangkanip ga' ibang undu' tonimting. \p \v 26 Ning tanga sidi indi sidita' kabakni' kareng nakem waraga' sura sidindu' kabaksi' karengsa' naknga naktangka aming sidasa' kafasi' kura' wengam tanga midi kareng kura' aning tanga yaranting. \p \v 27 Pol naga girii Jisas ning wap ganang midi tangkunang ning sanotik, sidi umpang ka i yoksamem i bema indangira ning tanga kuyase fam ga' undu' indangikiama yareinga dabiksa' naksasu'nanga ikanting. \p \v 28 Indining girini' Kasira Aming Jisas wari adining ai'dap girii u kabisaminga kugurang kareng gi'sa' ikanting, beng.