\id 1JN — URI N. Sampson \h 1 JON \toc1 Midi umpang Jon wari tim munumung yoku' \toc2 1 JON \toc3 1 JON \mt1 Midi umpang Jon wari tim munumung yoku' \c 1 \s1 Jisas wa Anutuning midi ka' iik guk \p \v 1 Midi ka Jon naga i yotik yara'ning kini wa aming ka wap Anutuning midi ka ka' iik kareng fikifiki ningsa' iik wara'ning waraga' toutik. Aming ka wa timinggi'sini' kama kunim wari ko mo' kadofigu'ganang ningsa' ira abugu'. Adi kamaganang ingging sareng kuma' kadofigu'. Ning tinga aming fam indi anagok kubap unggung sini' ira yangara aming beng u dani' wari sini' kanga a adining midi tutuguni u maani' wari naknga ning tanga adining fuguni undu' indining kafani' wari sini' kuma' suronga nakum. \v 2 Adi indining bining ganang sini' kadofinga ikinga indi adining iikni wa sarengsa' kuma' kagum wara' indi midi ka adining ka' fikifiki ningsa' iik wara'ning u ituatam. Ka adining iik kareng ka u kagum wa tim beni Anutu guk yagumu' u tipkadofiniminga kagum. \v 3 Ka indi adining ka' iik kareng u kanga a midini u naknga ning tanga sidita' ituasaminga naking wara'ning ki wa sidi midi ka u naknga Anutuning naktangka aming ira indigok kabakni' kubaniksa' kufara ikantam. Ning tanga sidi a indi dabik indi sibeng Anutu guk ka mindingni Kasira Aming Jisas guk dabik wara'siga' kabakni' kubaniksa' guk kufura ikantam. \v 4 Ka indi iik ka wara'ganang ira karengsa' kuma' ira nakitam, wara' sidi a indi dabik indi iik kareng ka wara'ganang ira mesisiringa siamo' tanga iik waraga' sura wa i yotik yang. \s1 Indi Anutuning kadapmang kareng ka diok sangang da'ning wara'ganangsa' ikantam \p \v 5 Ka na midi fam ka aming ka wari tuguinga nakum u ituasamotik wa ning, Anutu girii adi iik kareng ka diok sangang da'ning wara'ning ki sini'. Adining iik ka wa kadagang kabi'sini' ka kama kangkam da'ning wara'guk mokngang sini'. \v 6 Ka indi iik didimeng mo' ka kama kangkam da'ning wara'ganang ko ira o indi Anutu guk kubap kuma' ikem ning u sige tontam wa indi adining iik kareng wara'ganang sini' mo' ira toyam wara' indi mandaga' giknem, beng guk mokngang. \v 7 A indi iik didimeng kareng ka diok sangang ningda'ning ka Anutu ana tanga ikita' wara'ganang sini' ikantam wa indi kuyane fam guk kabakni' kubaniksa' kufara iik wara'ning kadapmang beng guk tantam. Ning tinga mindingni Jisas adining kungkumak ning amani wara'ning kigineng indi nasi' kadagang titam u yotiknimsasu'neinga indi fafandangeng kareng ning ikitam. \p \v 8 Ka indi kafakafa guk mo' sura midi ka a na kadagang guk mokngang ning u tontam wa indining sasuk ka wa beng guk mokngang. Abanga Anutuning kadapmang didimeng ka midi beng guk ning wari undu' indining kabakni'ganang guk mo' ita'. \v 9 Beng sini' Anutu adi ananing kadapmang didimeng ka yotangkanip titiga' timinggi' kuma' totangkagu' u kuma'sa' yaranga tinim ning, wara' indi kadagang tanga wa Anutuganang anga o indi kadagang ka ning tem ning u sarengsa' ituangamtam wa Anutu adi indining kadagang ka u suknakubenima ning tanga indining kabakni' u ifagadibaniminga fafandangeng inga'ni kareng sini' ubu ikantam. \v 10 Wara' aming ka midi ka a na kadagang guk mokngang ning tuguting adi Anutuning midi wari adisining kabaksi'ganang guk mo' ikita' wara' adi midi ka Anutu wari aming indining kadagang ga' tuguta' u sigening ning tipigiting. \c 2 \s1 Kasira Aming wa indining yotangkanip aming \p \v 1 O sabane karesi na midi ka umpang ganang i yotik ya sidi kadagang kabi'guk mo' titi waraga' sura yoksamirik. Ka waraga' wa ning sanotik, sibeng Anutu wari indi yotangkanima indining kadagang u tangkayonim waraga' wa aming didimeng Kasira Aming Jisas u kuma' kamaniminga ita', wara' sidi kadagang ni tanga wa tangkayosam titiga' wa yotanganip aming kubanik unggungsa' aninting. \v 2 Aming ka wara'ning kane ganangsa' wa Anutu wari kagaya girii ka indi indining kadagang ga' wa Anutu wari kagaya girii ka indi indining kadagang ga' tanga bimbem ning u udanga ning tanga indining kadagang u suknakubenimgu'. Ka kane kigineng ka Kasira Aming Jisas wari u tugu' wa adi aming ka naktangka kuma' tem indining kadagang ga'sa' mo' tugu', mokngang, adi aming kamaganangni kabi'mo' wara'guk dabik indining kadagang ning kagaya u udanim wara'ning kadapmang tinimgu'. \v 3 Ka indi Anutuning midi u ninaksa' tanga yaranga ikantam wa indining kabakni'ganang wa indi Anutuning sasuk kareng u kigeda sini' kuma' titining ningda'ning nakedanga ikantam. \v 4 A aming ka Anutuning sasuk kareng wa kuma'sa' kanga itik ning touta', ka adi Anutuning midi kadapmang wara'guk mo' yarota', aming ka wara'ning kabaganang wa midi beng guk wara'guk mo' ikita' wara' adi mandaga' sini' giknara'. \v 5 A aming ka Anutuning midi ninaksa' tota' wa adi Anutuga' siamo' ninak wara'ning kadapmang guk beng sini'. \v 6 Beng sini' aming ka midi ka na Anutu guk ikiamuk ning touta' wa adi kadapmang kareng sini' ka tim Kasira Aming Jisas wari afanga tugu' ungungsa' yaranga tanga irota'. Indi kadapmang kareng ka ning u tantam wa indi indining kabakni'ganang wa Anutugananag beng sini' ikem, ning u nakedantam. \s1 Diok sangang ganang ningda'ning iik wara'ning ki sini' \p \v 7 O amine karesi na midi ka kadapmang kareng titiga' u sanarik wa sidi kamisa' mo' naking, mokngang, sidi timinggi' midi kadapmang ka wara'guk ningsa' ikiting. Wa ning, tim sidi naktangka munumung sini' tiging ganang wa indi midi ka undu' kuma'sa' saninga naking. \v 8 Ka midi ka wa kuma' mo' bigu', mokngang, wa kami yara'ganang undu' kigineng guk ko' ita'. Wa ning, kadapmang kareng ka kuyase famga' ninak ning wa Kasira Aming ganang ikita' wara' Kasira Aming warisa' tipkadofisaminga kayam. Beng sini' torik, kadapmang timini ka kama kangkam da'ning wari biinga iik inga'ni kareng ka mayam de ning diok kareng da'ning wari ubu kuma' kadofiniminga ikem. \p \v 9 Ka aming ka ni a na iik sangang wara'ganang kuma' itik ning touta', ka adi kuyangni ga' kaba kadagang guk naknga irota' wa adi mandaga' giknara', gaa' kangkam ganang ko ita'. \v 10 A aming ka kaba ka kuyane famga' siamo' ninak wara'guk irota' wa giri adi iik sangang ganang beng sini' tita'. Beng sini' aming ka iik sangang wara'ganang irota' wa adi napa' kadagang ni wari nua'bu guk mo' tipkadauta'. \v 11 A aming ka kuyane famga' kadagang guk naknga ikita' adi adining kaba kadagang wari tanga kama kangkam sini' ganang ningda'ning ira deyoyangak sa' tanga Anutuning kadapmang kareng wara'guk mo' kanga irota'. \p \v 12 O naktangka aming inga'ni ka sabane kababi' ningda'ning na kane ka Kasira Aming Jisas wari tugu' wara'ganangsa' Anutu wari sidining kadagang u kuma' tangkayosamgu' waraga' sura wa na sidita' umpang i yoksamarik. \v 13 O naktangka aming timini ka babangse da'ning iking ka girii Jisas ka fikifiki ningsa' ira abuta' u kuma' naknga ikiting sidita' umpang i yoksamarik. A naktangka aming ka sasuksi' tangkunang sini' mo' ka saba uyamang da'ning iking ka naktangka tanga aming kadagang Setan ning tangkunang tarafiking sidita' umpang i yoksamarik. \p \v 14 O naktangka aming sabane sidi sibeng Anutuganang sini' ira adining kadapmang kuma'sa' kasasu'nanga iking wara' na sidita' umpang i yoksamarik. A naktangka aming babangse sidi girii Jisas ka timinggi' timinggi' ningsa' ira abuta' u kuma' naknga iking wara' na sidita' umpang i yoksamarik. A naktangka aming uyamang ka Anutuning midi wari sidining kabaksi'ganang ira tangkunang saminga aming kadagang Setan guk ami' tanga sidi kuma' tarafiking wara' na sidita' umpang i yoksamarik. \p \v 15 Ka kuyane sidi kabaksi' ka kadapmang kamaganangi waraga'sa' mo' nakanting. Aming ka kaba ka napa' kamaganangi waraga'sa' nakota' adi sibeng Anutuga' kaba guk sini' mo' kufara nakota', mokngang sini'. \v 16 Beng sini' indi kuma'sa' nakem kamaganangni kadapmang kadagang wara'ning fam ka napa' kadagang ni titiga' kabaka siamo' mamarak, a napa'ni ka daga wari kanga kadagang titiga'sa' sasuk, a ganing kabaka ganang tangkunang guk ning sura naknga ganing fuka bema ara ning kadapmang sa' titi ningwara' u titing wa sibeng Anutu wari mo' ifimarakinga titing, mokngang sini', kadapmang ka ningwara' wa kamaganangni beng guk mokngang unggungsa' yaranga titing. \v 17 Ka kama ya kuma' biwa'ga', ning tinga kadapmang kadagasi ka aming wari waraga'sa' u naknga titing undu' wadigi' kuma' biwa'ga'. A aming ka Anutuning midi naknga yara tanga irota' adi bibi' titining guk mokngang, adi Anutu guk tangkunang ko fikifiki ningsa' ira awa'. \s1 Kasira Aming ning digirap wari kadofigu' wara'ning midi \p \v 18 O naktangka aming sabane kama ka kamaganang i ikem ya wadigi' kuma' biwanga tara'. Ka sidi midi nua'ni' ka inga' aming ka wap Kasira Aming ning digirap wari abubu wara'ning undu' kuma'sa' nakiting. Ka ning sanotik, aming ka ningwara' kabi'mo' wa ingging kuma' kadofing, wara' indi u kanga ning sura nakedantam, kama ka kamaganang i ikitam tanga abutam ya wadigi' kuma' biwanga tara'. \v 19 Ka mandaga' aming ka ningwara' wa tim indigok kubap undu' kuma' yagum. Ka adi indining arantagim sini' mo' waraga' tanga adi kuma' indibanga anga naro' ubu iking. A adi indining arantagim sini' ganang wa adi indigok ingging kubap ko ikianam. Ka adi indibi tiging wara' indi a adi indining arantagim sini' mo' ning u sarengsa' kuma' yapkedem. \v 20 Ka naktangka aming sidi wa ningwara' mo', sidi Kasira Aming Jisas wari adining mini unggo u saminga sidi dabiksa' sidi sasuk kareng guksa' kuma' iking. \v 21 Ka na umpang i yoksamarik wa na sidi midi beng gukga' nafek ting wara' umpang yari sangtintingnota' ning tonga mo' yoksamarik, mokngang. Sidi midi beng guk u kuma' naknga ira kadapmang ka aming ka mandaga' saramikiting wara'ning midi u naknga mandaga' wa ma beng guk ning u nakdidima wara'ning u kuma' tanga iking ning u kuma'sa' naknga yoksamarik. \p \v 22 Ka mandaga' aming ka u torik wa aming ka a Jisas wa Anutuning Kasira Aming mo' wa aming sige, ning fatoing wang. Aming ka ningwara' adi sibeng Anutu guk ka mindingni guk adisita' manda guk ukyamiting wara' adi Kasira Aming ning digirap. \v 23 Beng sini' aming ka Anutuning mindingni ga' manda ukngamota' wa beni Anutuga' manda ukngamara'. A aming ka mindingni ga' naktangka tota' wa beni Anutuga' undu' naktangkara'. \p \v 24 Ka sidi midi beng guk kareng ka tim saninga naking wa kafakafa ningsa' surotangkanga ira anting. Midi ka u naking wari sidining kabaksi'ganang sini' ningsa' ira auta' wa sidi mindingni a beni Anutu guk ikanting. \v 25 Ning tanga sidi napa' tangkunang ka tim Kasira Aming Jisas wari Anutu guk ka' fikifiki ningsa' iikga' u ninim waraga' kuma' totangkagu' u saminga ikanting. \p \v 26 Ka midi ka i yoksamarik wa aming ka mandaga' saramikonga titi wara'sining kadapmang nakeda waraga' yoksamarik. \v 27 Ka sidi Kasira Aming Jisas wari ananing mini unggo u saminga wari sidining kabaksi'ganang unggung ko ita'. Ning tinga sidi sasuk guksa' kuma' iking wara' sidi aming ka kamaganangnisa' wari mo' sanggekanting, mokngang, sidi Anutuning mini unggo warisa' nasi' nasi' u kuma'sa' sanggeksasu'neinga sidi sasuk kareng ga' nafek kabi'guk mo' ting. Ka nasi' nasi' ka adi u sanggekita' wa mandaga' guk mokngang, beng guksa' wara' sidi sasuk ka unggungsa' yaranga tanga Kasira Aming Jisas ganang sini' ikanting. \p \v 28 Beng sini' naktangka aming sabane sidi Kasira Aming Jisas ganang sini' ningsa' ira anting. Wara' adi tubobu afuinga kanam ganang wa sidi kabaksi'ganang wa mamareng guk mo' naknga tangkunangsa' adeni'. \v 29 Sidi kuma'sa' naking Anutu wa didimeng sini' wara' sidi aming ka kadapmang didimeng tota' u kanga wa ning sura nakedanting, o beng sini' adi Anutu warisa' tipmarakinga tara' wara' adi adining mindingni sini' ka Kasira Aming Jisas ningwara' ita', ning tonting. \c 3 \s1 Naktangka aming indi Anutuning mindine arantagim ningsa' ikitam \p \v 1 O amine beng guk sini' sidi napa' girii sini' ka Anutu wari indita' tanimita' waraga' sukanting. Adi indita' siamo' naknga wap adining mindine ning u nimita'. Ka adi wap ka u nimita' wara' beng sini' indi adining mindine ning kuma' ikem. Ka aming ka napa' kamaganangni ga'sa' sukiting adi Anutuning iik wara'ning ki kabi'sini' guk mo' kating wara' adi indi Anutuning mindine ikitam undu' mo' nipkedating. \v 2 Beng sini' amane karesi kami yara'ganang indi Anutuning mindine ning ikem, ka inga' indining iikni' wa indining sini' kadofinimo' wara'ning wa kafakafa ko mo' nakem. Ka indi napa' ka inga' Kasira Aming Jisas wari tubobu abo'ganang wa adigok dabik ningsa' igira adenam ga', ning tanga adining iikning ki u sareng sini' kigedasasu'nanam ga' wara'ningsa' wa giri naknga ikem. \v 3 Ka aming ka Kasira Aming Jisas ning iik wa napa' beng guk ning sura ikiting adi Jisas wa aming didimeng sini' kadagang kabi'guk mokngang, ning sura iting anasining kabaksi' undu' tipgidaba tanga didimengsa' ikiting. \p \v 4 Beng sini' kadagang wa kadapmang ka midi tapni u tarakayoting wara'ganangsa' kadofita', wara' aming ka kadagang titing wa Anutuning kadapmang tapni u udagating. \v 5 Ka kuyane sidi kuma'sa' naking Kasira Aming Jisas adi kadagang kabi'guk mokngang, ka adi aming indining kadagang u udaga waraga'sa' tanga kadofinga yagu'. \v 6 Wara' aming ka Kasira Aming Jisas ganang sini' irota' adi kaba ka kadagang titiga' tipmarak ning wara'guk mo' ita'. A aming ka kaba ka kadapmang kadagang titining wari adining kaba ganang irota' wa adi Kasira Aming Jisas ning ki a adining iik kabi'sini' guk mo' kata', mokngang sini'. \p \v 7 O naktangka aming sabane sidi aming fam wari kadapmang nua'ni ubu ma sanggekni' wara' na sareng ning sanotik, Kasira Aming ning iik wa didimeng sini' wara' aming ka kadapmang didimeng sini' tinting unggungsa' wa Anutu wari aming didimesi ning yabita'. \v 8 Beng sini' kadagang munumung sini' wa timinggi' aming kadagang Setan wari tugu' wari kadofigu', wara' aming ka kadagang u tanga abuting wa Setan ning arantagim. Ka Anutuning mindingni adi kamaganang i afugu' wara'ning ki kubaniksa' wa Setan ning kane kadagang u udangama tipmirisasu'na waraga'sa' tanga afugu'. \v 9 Ka aming ka Anutuning mindingni ning kuma' kadofinga ikita' adi kadagang titining kadapmang guk mo' yareta', mokngang. Adi Anutu wari aming inga'ni nua'bu tipkadofiinga adi kaba kareng ka Anutu ana ikita' wara'guk kuma' ita' wara' adi kadagang titiga' guk mo' sukita'. \v 10 Ka Anutuning mindine arantagim wa nua'ni sini', a Setan ning mindine arantagim undu' nua'ni sini' kadapmang naro' naro'sa' tanga ikiting. Wara' aming ka kadapmang didimeng mo' titing a aming ka kuyase fam ga' naknga kafakafa guk mo' tiamiting wa indi Anutuning mindine mo' ning u sarengsa' yapkedantam. \s1 Kadapmang ka kuyane famga' siamo' ninak wara'ning midi \p \v 11 Beng sini' midi ka tangkunang sini' ka tim Anutuning midi munumung saninga naking wa ning, indi kuyane famga' kabakni' guk siamo' nakantam, ning saninga naking. \v 12 Ka midi ka wa beng guksa'. Wa ning, indi kadapmang kadagang ka tim Adam ning mindingni Ken wari tugu' ningwara' mo' tantam. Ken adi aming kadagang Setan adining arantagim sini' wara' adi adining kuyang kabasi' Abel u ugumogu'. Ka adi ananing kuyangni sini' u ugumogu' wara'ning kini wa ning nakedantam, Ken adining kadapmang wa kadagang, a kuyangni ning kadapmang wa kareng waraga'sa' tanga wa Ken adi kaba kadagang naknga u ugumogu' wang. \p \v 13 Beng sini' kuyane kadapmang ka aming wari kuyase ga' bibi' ninakning wa timinggi' ningsa' kuma' tanga ira abuting wara' aming kamaganangnisa' ka Anutuga' guk mo' sukiting wari sidita' bibi' naknga kadagang saramikinga wa sidi kadapmang kuni' ni ning kanga kabaksi' mamareng mo nakanting. \v 14 Ka aming ka kuyane fam ga' guk mo' nakita' adi kadagang guk wara' adi kungkumak titining ko ita'. A aming ka naktangka tanga ikem indi ningwara' mo', mokngang. Indi kuyane famga' siamo' naknga ikem wara' indi ning nakem, tim indi kungkumak titining bingi sa' tanga yagum ka kami yara'ganang wa indi ka' ningsa' iik wara'ning ning ubu kuma' ikem. \v 15 Aming ka kuyane famga' kabaksi' kadagang guk naknga ikiting wa adi kadagang ka aming wari aming nua'ni urasep ning ningda'ning tanga ikiting. Ka indi midi ka aming ka aming dipmiting wara'ning undu' kuma'sa' nakitam. Wa ning, aming ka kadagang ningwara' titing wa adi Anutu guk ka' fikifiki ningsa' iikning guk mokngang. \v 16 Beng sini' Kasira Aming Jisas adi indi yotangkanip waraga' sura iibisa' tinga ananing fugu ning ka' iyak u tipmiriging. Ka indi u kanga ning nakedantam, kadapmang ka u tugu' warisa' wa indi kuyane famga' siamo' ninak waraga' ningtintingnara'. Wara' indindu' waraga' sura kabakni' ka kuyane famga' siamo' naknga adi yotangkayap waraga' tanga mamareng ka Jisas adi bemgu' ningsa' bemtam undu' girisa'. \v 17 Ka aming nua'ni ka mambong kamaganangni kangasi tanga ira ka adi kuyangni nua'ni wari napa'ga' nafek tanga mamareng guk irota' u kanga kabubure tanga yotangkangam guk mo' tota' wa adi midi ka na Anutuga' siamo' nakitik ning tuguta' wa beng guk mokngang, mandaga' gikneta'. \v 18 O beng sini' naktangka aming sabane indi kadapmang ka kuyane ga' siamo' ninak ning wa mani' warisa' sige mo' tontam, mokngang sini', indi indining kabakni'ganang sini' naknga bibiri' yapma yotangkayap tanga beng guksa' tontam. \s1 Naktangka aming indi Anutuning de ganang wa mutu guk mokngang \p \v 19-20 Ka indi kadapmang ka beng guksa' ka ningwara' u tantam wa indi o Anutu adi u bemnabo' wa ma mo' unda' bemnabo'ga' ning sukantam ganang wa kadapmang didimeng kuma' tantam wara' indi kabakni' tiptangkanga o Anutu adi napa'napa' mang sini' u yapkedata' wara'ning ki sini' wara' adi naning kabakna undu' kuma'sa' kara' ning tonga kabakni' kugurangsa' naknga ikantam. \v 21 Ka beng sini' kuyane karesi midi ka wa beng guksa', indi indining kadapmang wa didimengsa' giri kuma' tem ning u sura naknga Anutuning de ganang adenga napa'niga' anonga wa indi mutu guk mo' tanga tangkunangsa' adenga anintam. \v 22 Ka indi adining midi kadapmang sa' yaranga kadapmang didimeng ka adi titiga' nakita' u titam wara' indi napa'ni ninim ga' sura anitam wa adi naknim sa' tanga nimita'. \v 23 Ka Anutuning midi kadapmang wara'ning ki sini' wa ning, indi adining mindingni Kasira Aming Jisas waraga' naktangka sini' tanga Jisas ning midi ka indi kuyane famga' siamo' ninak waraga' ninita' u yaranga tanga ning tantam. \v 24 Ka indi Anutuning midi kadapmang unggungsa' yaranga tantam wa indi Anutuganang sini' ikinga adindu' indiganang sini' irota'. Beng sini' Anutu wari adining mini unggo wa indining kabakni'ganang kuma' kaminimgu' wara' indi o warisa' tanga wa adiganang beng sini' ikem ning sura nakedatam. \c 4 \s1 Anutuning mini unggo guk ka mini unggo kamaganangni guk wara'ning midi \p \v 1 O amine karesi kami yara'ganang wa midi tokadofi aming profet mandaga' kabi'mo' wari kama kama kuma' anga yangaking, wara' aming ka ningwara' wari sidiganang kadofinga na Anutuning mini unggo guk ning saninga wa sidi o beng guk ning wa urapsa' mo' tonting, mokngang. Sidi tim ka adisining kadapmang u yapkedanga ning tanga adi Anutuning mini unggo sini' wa ma mini unggo kamaganangni nua'ni wari u tora' ning wa inga' kigedanting. \v 2 Ka sidi midi ka wa Anutuning mini unggo wari sini' ba tora' ning u kigeda wara'ning wa aming ka Kasira Aming Jisas adi aming sini' fugu guk beng kadofinga yagu' ning tonting wa Anutuning mini unggo guk wari toing. Wara' aming ka midi ka ning guk tuguting wari tonting wa beng guksa' tonting. \v 3 A aming ka Jisas wari fugu sini' guk kadofinga yagu' waraga' guk mo' tonga tonting wa sidi ning nakedanting, adi Anutuning mini unggo wari mo' ininga toing, mokngang. Wa mini unggo kadagang ka Kasira Aming ning digirap ka tim kagadofi titiga' urang sangguk warisa' kamaganang yara'ganang kuma' kadofinga ininga wa midi ka u tonting wang. \p \v 4 O naktangka aming sabane sidi Anutu wari adining arantagim ning sifikadofinga ananing mini unggo u saminga tangkunang guk kuma' iking. Ka Anutuning mini unggo wara'ning tangkunang wa mini unggo ka aming ka napa' kamaganangniga'sa' sukiting adisining kabaksi'ganang ikita' wara'ning tangkunang u tarafita'. Wara' sidi tangkunang guk ira aming ka midi mandaga' i tonga ifaring wara'sining midi u karangkayoima ning tanga sidisa' iirafikisi ning kuma' iking. \v 5 Aming ka midi mandaga' u tuguting wa adi aming ka napa' kamaganangni ga'sa' sukiting wara' midi ka adi tuguting undu' kamaganangnisa'. Ka aming napa' kamaganangni ga'sa' sukiting fam ka ana ningwara' wari adisining midi u naknga o beng guk ningsa' tuguting. \v 6 A naktangka aming indi wa aming kamaganangnisa' mo', mokngang. Indi Anutu wari indifikadofiinga ikem wara' aming ka Anutuning iikning ki guk kuma' nakedating adi indining midi u naknga kuma' nakedanga beng guk ningsa' tuguting. A aming ka Anutuning arantagim mo' adi indining midi ninak ga' bibi' nakiting. Indi kadapmang ka fama' ka Anutuning mini unggo kareng a mini unggo kadagang u yapkeda wara'ning wa aming fam ka indining midi beng guk ga' nakanting, a fam ka mini unggo kadagang ning midi ga' nakanting u yapma wa mini unggo kareng guk ka kadagang guk waraga' nakedantam. \s1 Anutu wa kadapmang ka aming famga' ninak wara'ning ki sini' \p \v 7 Ka amine karesi indi kuyane famga' kabakni' kura' nakngam siamo' tanga ikantam. Beng sini' kadapmang ka kuyane famga' ninak wara'ning wa Anutu warisa' tipkadofita', wara' aming ka kuyane famga' kaba guk siamo' naknga tiamota' adi Anutu warisa' tipkadofiinga adining mindingni ning ira Anutuning ki wa kuma'sa' nakedanga tara'. \v 8 Beng sini' Anutu adi kadpmang ka aming famga' siamo' ninak wara'ning ki sini' kuma' ita', wara' aming ka kuyase famga' guk mo' nakiting adi Anutu undu' nakeda guk mo' titing. \v 9 Ka Anutu adi indita' siamo' ninak wara'ning wa napa' girii ka ananing mindingni kubaniksa' unggung anigareinga afanga kane girii tinga indi adining kane wara'ganangsa' ka' iik kareng bema ikem u tinimgu' u kuma' kagum. \v 10 Beng sini' kadapmang ka indi kuyane famga' siamo' ninak wara'ning ki wa tim ka indi Anutuga' nakinga Anutu wari inga' indita' ninak ning mo' wara' indi a indi kadapmang ka wara'ning tuang ning guk mo tontam, mokngang sini'. Wa Anutu warisa' indita' siamo' naknga kagaya girii ka indi indining kadagang waraga' tanga bimbem wara'ning u tipmirinim waraga' sura wa adining mindingni u anigaregu'. \p \v 11 Ka amine indi kadapmang ka Anutu wari indita' siamo' naknga tinimgu' u kanga indindu' kuyane famga' wa kabakni' guk siamo' ka ningsa' naknga tamtam. \v 12 Ka beng sini' indi Anutuning nonda guk mo' katam, ka indi kabakni' ka kuyane famga' siamo' ninak wara'guk ikantam wa Anutu warisa' indining kabakni'ganang ira tangkunang niminga indi kadapmang ka kuyane famga' siamo' ninak ka Anutu ana tita' ningsa' tantam. \p \v 13 Ka Anutu adi ananing mini unggo u nimita' warisa' tanga wa indi adiganang sini' ikinga adindu' indiganang beng sini' ita' ning nakedem. \v 14 Ka sibeng Anutu wari aming kamaganangni dabiksa' indi yotangkanipma indining kadagang ning mamareng u tangkayoniminga kareng gi' giri iik waraga' sura mindingni u anigareinga afugu' wa indi kuma'sa' kanga wara'ning midi u ituanga fiaretam. \v 15 Ka aming ka Jisas wa Anutuning mindingni beng guk sini' ning u sarengsa' tokadofota' wa Anutu wari adiganang sini' ikinga adi Anutuganang sini' kuma' ita'. \v 16 Ka indi kadapmang ka Anutu wari u tinimita' u tonga yararik u kanga ning naktangkatam, o indi kuma' kayam Anutu adi indita' siamo' nakita'. Beng sini' Anutu adi kadapmang ka aming famga' siamo' ninak wara'ning ki sini' ning ikita', wara' aming ka kadapmang ka u beng sini' yaranga irota' adi Anutuganang sini' ikinga Anutu wari adiganang sini' kuma' ita'. \v 17 Ka Jisas wari amingga' siamo' nakita', ka naktangka aming indi kamaganang i ira kuyane famga' siamo' ninak ning kadapmang kareng sini' ka Kasira Aming Jisas wari aming indita' nakita' ningsa' tantam. Indi ning tantam wa inga' kama girii ka Anutu wari aming midiganang kukyapma tagagareyap wara'ning wari kadofo'ganang wa indi mutu guk mo' tanga tangkunangsa' adenam. \v 18 Beng sini' aming ka kadapmang ka kuyase ga' siamo' ninak ning u tanga ikiting adi wara'ning bining ganang wa adi Anutuganang kagaya bimbem waraga' mutu kabi'guk mo' titing, mokngang. Adi kadapmang kareng ka wari adisining kabaksi'ganang wa girii sini' ira ning tanga kadapmang ka mutu titining u wadigi' kuma' udagata'. A aming ka kaba ka aming famga' siamo' ninak ning wara'guk mo' irota' wa adi inga' Anutu wari amingga' kagaya iyam waraga' sura mutu guk tanga ita'. Wara' indi aming ka ningwara' u kanga wa kigeda sa' tanga ning tontam, o adi Anutuning kadapmang didimeng ka aming famga' siamo' ninak ning wari adining kaba ganang mo' ita'. \p \v 19 Ka kadapmang ka indi kuyane famga' siamo' nakitam wara'ning wa indisa' mo' titam, mokngang, wa Anutu warisa' indita' siamo' naknga tinimita' u kanga indibu kuyane ga' tiamitam. \v 20 Ka aming ka ni kuyane famga' kaba kadagang guk naknga irota' ka adi o na Anutuga' siamo' nakitik ning touta' wa adining midi wa beng guk mokngang, naga' tanga indi Anutu wa sareng guk mo' katam, a sareng wa kuyane fam wari iking wara' adi kuyane fam waraga' naknga kafakafa guk mo' tiamota' wa adi midi ka o na Anutuga' siamo' naknga kafakafa tangamarik ning wa nasi'ga' tora'. Mokngang, wa mandaga' giknara'. \v 21 Beng sini' Kasira Aming Jisas adi kadapmang ka waraga' sura midi tangkunang sini' ka ning kuma' togu', aming ka Anutuga' nakota' wa adi kadapmang ka kuyane famga' siamo' naknga kafakafa tiam undu' tota'. \c 5 \s1 Aming ka Kasira Aming ga' naktangka titing adi kadagang tarakayo wara'ning tangkunang guk \p \v 1 Ka beng sini' aming ka Jisas adi Anutuning Kasira Aming beng guk sini' ning naktangkating adi Anutuning mindine ning ikiting. Ka sidi kuma'sa' naking, aming ka aming nua'niga' nakota' wa adining mindine arantagim ga' undu' nakita'. \v 2 Ka Anutuning arantagim ganang wa kadapmang ka u titing waraga' nakedantam. Wa ning, indi midi ka o indi kuyane fam ka Anutuning mindine arantagim waraga' nakitam ning tontam wa indi sibeng Anutuga' naknga ning tanga adining midi undu' ninaksa' tanga yaranga tantam wa indining midi ka kuyane famga' nakitam ning toyam wa beng guksa'. \v 3 Beng sini' midi ka aming wari Anutuga' ninak wara'ning ki sini' wa adi Anutuning midi kadapmang u ninaksa' tanga yarota'. Ka Anutuning midi wa mamareng mo' ararangeng karengsa'. \v 4 Beng sini' aming ka Anutu wari ananing arantagim ning indifikadofita' indi adining tangkunang guk ira tangkunang kamaganangni sasuk kadagasi kuni' kuni' u tarakayonga tarafira ikitam. Ka indi tangkunang guk u ikitam wara'ning ki wa ning, indi Kasira Aming Jisas ga' naktangka titam wara' indi tangkunang guk ira kadagang u tarakayotam. \v 5 Beng sini' kuyane aming wari kamaganangning kadagang u tipmikurata wara'ning ki wa ning, aming ka Jisas adi Anutuning mindingni beng guk sini' ning tonga naktangkating warisa' wa tangkunang guk ira kamaganangning kadagang u tarakayonga tarafikiting. \s1 Anutu wari mindingni ning ki sarengsa' ninita' \p \v 6 Kasira Aming Jisas wari kamaganang i afanga kane tugu' wara'ning wa kadapmang ka ama ingamging a ugumak tinga adining amani kwasinegu'. Adi kadapmang ka ama ingam ning unggungsa' yaranga tanga kungkumak wa kagabi titining mo' tugu', mokngang, adi fama' guk dabiksa' yaranga tugu'. Ka Anutuning mini unggo ka midi beng guk tuang adi kadapmang ka wara'ning u kuma' kigedanga sarengsa' nininga nakitam. \v 7-8 Beng sini' Kasira Aming ning ki u nakeda wara'ning wa napa' ka famineng ka mini unggo a ama ingamging a Jisas ananing amaa kwasinegu' ning wari kuma' ningtintingeinga katam. Ka napa' famineng wara'ning kini wa kubaniksa' ka Jisas wa Anutuning mindingni wara'ga'sa' tuguta'. \v 9 Ka aming indi midi ka aming fam wari napa'ni kanga abanga niniting u naknga o beng guk ning tugutam. Ka Anutu adi kigineng guk wara' adining midi wa beng guksa' ning nakantam. Ka midi ka adi u ninita' wa ananing mindingni ning ki waraga' tuguta'. \v 10 Aming ka Anutuning mindingni ga' naktangka tanga ikitam indi indining kabakni'ganang wa midi ka Anutu wari adining mindingni u ninita' u kuma'sa' sura nakedatam. A aming ka Anutu wari adining mindingni ning ki u ininga naknga waraga' naktangka guk mo' titing adi kadapmang ka midi tarakayo tanga Anutu wa midi mandaga' tuang ning tutugu ning da'ning titing. \v 11 Ka midi beng guk kareng ka Anutu wari u ituanimita' wa napa' girii sini' ka naktangka aming indita' ka' fikifiki ningsa' iik u kuma' niminga ikitam. Ka ka' iik ka u nimita' wa ananing mindingni ganangsa' ikita' u nimita'. \v 12 Wara' aming ka Anutuning mindingni wari adiganang irota' wa adi ka' iik ka wara'guk kuma' ita'. A aming ka Anutuning mindingni wari adiganang mo' irota' wa adi ka' iik kareng ka wara'guk mo' ita'. \s1 Naktangka aming indi ka' iik kareng ka fikifiki ningsa' iikning wara'guk ikem \p \v 13 O kuyane sidi Anutuning mindingni waraga' naktangka tanga adining wap u kuma' tuguting. Ka na sidi Anutu wari ka' iik kareng ningsa' iik u kuma' samara' wara'ning wa sidi sidining kabaksi'ganang sini' u sura nakeda waraga' sura wa na sidita' umpang i yoksamarik. \v 14-15 Ka beng sini' Anutu adi kafakafa tinimita'. Indi ibang tugutam ganang wa nasi' kadapmang ka Anutu wari kareng giri ning kuma' kata' wara'ganang didimengsa' anitam wa indi kuma'sa' nimota' ningsa' suktangkanga tugutam. Ka wa beng sini' indi kuma'sa' katam adi sige ningsa' mo' naknga kabinimita', mokngang, adi napa' beng guk sini' kuma'sa' tipkadofinimita' katam. Wara' indi waraga' sura Anutu anonga wa indi sasuk fama' guk mo' tanga anitam, mokngang, indi suktangka tanga tangkunangsa' adenga anitam. \p \v 16 Ka napa' nua'ni ka Anutuga' ibang tutugu wara'ning waraga' wa ning sanotik, kuyani' nua'ni adi kadapmang kadagang tanga kadapmang ka ka' iik kareng ning u kabonga tinga wa indi Anutuga' ibang tontam. Ka adi kadagang ka kudip kadagang ganang mo' mugoning u tota' wa adi yotangkangam tanga kadapmang kareng ka ka' iikning wara'ganang tubobu bema kamiinga irota'. Kadagang ka kuyani' wari u tota' ka u torik wa kadapmang kadagang sini' ka kudip kadagang mugoning waraga' mo' torik. Beng sini' kadapmang kadagang ka kudip kadagang ganang mugoning undu' titingsa', ka na ibang wa aming ka kadagang ka u titing u yotangkayap waraga' tutugu ga' mo' torik, mokngang. \v 17 Ka beng sini' kadapmang ka didimeng mo' titam u defata' dabiksa' wa wap Anutuning de ganang wa kadagang ningsa' ikita'. Ka kadagang ka Kasira Aming ga' manda ukngam wara'ning wa kigineng sini' aming u kudip kadagang ganang inagira au wara'ning. A kadagang fam wa mokngang wara' indi Anutu aniinga Anutu wari indining kadagang u tangkayonima suknakube tota'. \p \v 18 Ka indi kuma'sa' nakem aming ka Anutu wari inga'ni ning indifikadofiinga adining mindine arantagim ning ikitam indi kadapmang ka kadagang titining wara'ganang guk mo' ikitam, mokngang. Anutu ananing mindingni warisa' tangkunang sini' niptatoreinga aming kadagang Setan wari kadagang titiga' kabi'sini' guk mo' indiramikita'. \p \v 19 Abanga indi kuma'sa' nakem fam indisa' Anutuning mindine arantagim ning ikem, a aming kabi'mo' beng wa kamaganangnisa' ko ikiinga aming kadagang Setan wari yaptatoreta'. \p \v 20 Abanga indi kuma'sa' nakem, Anutuning mindingni wari afanga indita' sasuk nimiinga Anutu beng guk u kuma'sa' nakedanga ikem. Ning tanga ira indi adining mindingni Kasira Aming Jisas ganang sini' yorafanga ikem wa indi Anutu beng guk adiganang sini' ikitam. Anutu ka wa anapmo' kubaniksa' beng guk sini'. A iik kareng ka Anutu wari naktangka aming indita' niminga ikem wa bibi' titining guk mokngang, fikifiki ningsa' iik wara'ning. \p \v 21 O sabane ning sanotik, sidi sidining iiksi' kareng wa kafakafa katatoranga ira anting. Sidi Anutu mandaga' kamaganangni kuni' kuni' dabiksa' waraga' manda sini' ukngamting, beng.