\id TIT - Etulo \ide UTF-8 \h iTaitusu \toc1 Afɛ mgbi iPol mbi iTaitusu \toc2 iTaitusu \toc3 iTai \mt2 Afɛ mgbi iPol mbi \mt1 iTaitusu \c 1 \p \v 1 Afɛ nɛ kyɛ mbi iPol, ongbidɔ mgbi Imgbasho ongye ogbikye iYesu iKrestu ikye oyɛyɛ onuunu mgbi ama Imgbasho sadu ma bɛyi oye-ye mgbi otsitsi nli nu inggisɛ yɛɛ inggisɛ Imgbasho, \v 2 oyɛyɛ onuunu bɛyi oye-ye nfyidzɛ mi ɛwɛ ogbe byiibyi mi oshishe ogyegwu, ngwi Imgbasho, nli gbatsika ba, zondu duuse owita-wita mgbi ɛsɛ, \v 3 ngwi onɔ ma wa gyɔ yɛyɛ nɛ, Imgbasho onagbɛ eyi wo ani ola ni ani gbeesɔ mgban ngwi o kyi wo ani abɔ nɛ tɔ mi ododa. \p \v 4 Ani lɔ afɛ nɛ kɛ mbi iTaitusu, ongwani otsitsi-otsitsi ngwu oyɛyɛ onuunu mgbi eyi li ungwonyi na gbɛɛ: \p Elela yi iyu mgbi Imgbasho Otseyi yi iYesu iKrestu ongye onagbɛ eyi no dzɛ yi abu. \s1 Idɔ mgbi iTaitusu mi iKrete \p \v 5 Itɔdzɛ nnu ani dzata abu mi iKrete yɔ, li onu abu yile ungwɔ nsisi ma dzɛkɛ yɛyɛ diyɛ sadu engyukwo mi ali igeli, dafi ani plɛ tso abu ofɛ nani. \v 6 Inggisɛ ngwu a sadun gbɛɛ no li ongyukwo yɔ, li kyɛmɛ-kyɛmɛ no li inggisɛ ngwu a ka du ongwufabɔ mbon ba, o ka li obongyaa onyi, ngwu emi ongwan noyɛyɛ, li nghaadɔ hona ga kyɛ wuu ba. \v 7 Ngwi a kye idɔ mgbi Imgbasho wo engyukwo ama okye okwakye mgbi emi iKrestu teyi abɔ nɛ, li kyɛmɛ ngwi o ka li inggisɛ ngwu a ka du ongwufabɔ mbon ba, o ka li inggisɛ okyile ewo esho ba, o ka li inggisɛ okyitingga plɛ-plɛ ba, o ka kye ewon nu ɛbyɛ owa fya ba, o ka li inggisɛ imoga ba, o ka li inggisɛ okyɔ nggwɔ mi udza ba. \v 8 Tatase no li inggisɛ ogbɛ ingyoga kyɛmɛ, inggisɛ ngwu ungwɔ osuse kpan, nli bwa ewon fyii, no li inggisɛ ogbɔ otsitsi, ka li inggisɛ osaan di nyɛ ewon mani. \v 9 No li inggisɛ nbyi esɔ otsitsi nɛ saan dafi a tso mani, ikyegbɛɛ no kwu inggisɛ angbeka ɛwɛ wo mi otsootso osuse di yile ama nkye afɔ twɛsɛ yi otsitsi ma dzɛ ofɛ. \p \v 10 Lubana ama ntangwɛ otsitsi mbwo, ama ogbɔdzɛ wɔɔ bɛyi ama okpagya inggisɛ wo, onghaangha duu yɔ mbi ama okyiikyɛ ntonɛni. \v 11 Ni a tukwu ma ondu kyɛmɛ, ikyekyɛ a le kyi bulu etɔ olɔlɔ duu mi otsungwɔ ndzɛ mbisɔ ngwi a kile tso ba, mi ikye ifu mgbi ama. \v 12 Inggisɛ oyodzɛ mgbi ama oka plɛ gbɛɛ, <> \v 13 Obwɛndɛ nɛ li otsitsi. Nghanɛ, kyɔkyɔ yi ama saan. Ta a ka kwulu afɔ esɛ mi oyɛyɛ onuunu mgbi ama. \v 14 A dika gbekabyi ayayi utsa mgbi emi iJuda hona ola mgbi ama nfwa otsitsi na ba. \v 15 Mbi emi osaan yɔ, ungwɔ duu le saan, kpaa mbi ama ngwu a kye ma itukwu kyi mbee di noyɛyɛ ba ma ungwɔ onyi kpaa le saan ba. Otsitsi, itukwu yi ela ongwi itukwu mgbi ama duu a kyi mbelu. \v 16 A li kye gbɛɛ di ama ye Imgbasho, kpaa a li tangwan mi okyɔɔkyɔ mgbi ama. A li ama okyile inggisɛ itukwu, a li ama onghaadɔ di mɛ okyɔ unkonyi osuse ba. \c 2 \s1 Otsootso nli ayin \p \v 1 ITaitusu, li ungwɔ ama ngbela yi otsootso osuse kyɛmɛ ma ngwi abu ka tso. \v 2 Le tso emyinɛ nu ma gbɛwɛbyi oshishe mgbi ama, nu ma sulu mmwɛ ewo, nu ma bwalu ewoma, kpɔklɔɔ mi oyɛyɛ onuunu, mi okpitukwu bɛyi itukwu oshiishi. \v 3 Mi itɔ ofɛ nɛ kpɔɔ, tso engyaa emyinɛ ni a li ama otsio Imgbasho, ni a li ama ogbaagya hona kye oshishe fadɔ ɛbyɛ kwuba ba, kpaa otsungwɔ ntishi. \v 4 Ikye nu ma tso engyaa ɛngbɛ odi obama yi engwɛ kpa ma itukwu, \v 5 obwalu ewoma di dzɛ nyaan, nu ma wa sɔɔsɔ mi udɛ ba, nu ma tishali, nu ma le fwoofwo yi obama, adzi ni inggisɛ ka kwu elodzɛ Imgbasho shanyɛ ba. \p \v 6 Di fyi mmafa kpaa mfye itukwu nu ma bwalu ewoma. \v 7 Mi alungwɔ duu tso ma ambɛ mi osuse okyɔɔkyɔ. Onɔ ngwi abu le tso ma yɔ byi otsitsi dika kyɔ asha ba. \v 8 Elodzɛ mgbi abu no menbwa gyɔ ni a ka kwushanyɛ ba mani, adzi ni ama ofwa ema gyayiwi ikyekyɛ a tu ungwɔ obube okye abɔ byi ele ba. \p \v 9 Tso ofyɛɛ nu ma yile ewoma esɛ mbi engyukwo mgbi ama mi alungwɔ duu, ni a kyungwɔ okpa ma, ni a ka datsondu yi ama ba. \v 10 Ni a ka yi ma mmyi ba, kpaa nu ma kyungwɔ ngwi a ka nu ma oyɛyɛ mani, adzi ni a nu otsootso mgbi Imgbasho ongye Onagbɛ eyi mmwɛ mi ali itɔ ofɛ duu mani. \p \v 11 Lubana elela mgbi Imgbasho nkye owatɔ-watɔ ba ma kaka tu ali inggisɛ duu. \v 12 I tso eyi odulu abɔ mi ungwɔ ama nli mgbi Imgbasho ba, bɛyi imina mgbi ɛsɛ, di bwa eweyi blii, dzɛ saan, ni eyi di dzɛ mi oshishe oye Imgbasho mi onɔ ngwi eyi woto ele nɛni, \v 13 dafi eyi kale fɛ ɛwɛ ogbe byiibyi osuse, oyɛɛyɛ okwɔkwɔ mgbi Imgbasho mgbi eyi odatu bɛyi onagbɛ, iYesu iKrestu, \v 14 ongwu nkye ewon nu ikye eyi, onagbɛ eyi mi ali imbaali di kyi salu eyi gbɛɛ ni eyi yɛɛ inggisɛ ama nli idzidza ikye ewon, di dzɛ yi oweka okyungwɔ osuse mani. \p \v 15 Nghanɛ, ungwɔ ntonɛ li ungwɔ ama ngbuo ni ema le tso joani. Le fyi inggisɛ mfye itukwu dile kyaka yi ali mfye duu. Ka yama nu inggisɛ onyi kwu abu shanyɛ ba. \c 3 \s1 Okyungwɔ ntishi \p \v 1 Wɛ inggisɛ nu ma siikyenu ama oteyi ɛsɛ bɛyi mfye, nu ma le siikyenu, di wewo okyɔ alungwɔ ntishi duu. \v 2 Ni a ka nya inggisɛ onyi odzagya ba, nu ma le ba yi iyu di fwo mgbi odo ma, nu ma tso ewo oyile esɛ mbi ali inggisɛ duu. \p \v 3 Onɔ nnyɛ ma eyi kpaa li ikwangha, nghaadɔ, oshɔ yi imina gya eyi ofyɛɛ di kpagya eyi wo. Eyi mbwo yi ikyili yi uwaba, ali inggisɛ di eyi lanyi eyi kpaa di ewee tanyi. \v 4 Nghaduu ngwi osuse okyɔɔkyɔ yi okpitukwu mgbi Imgbasho Onagbɛ mgbi eyi wa kaka nɛ, \v 5 o nagbɛ eyi, kpaa li mi osaan mgbi eyi okyɔɔkyɔ ba, li mi elela mgban odiidi. O nagbɛ eyi mi osa-sa mgbi oyile mba akpe fa bɛyi okyata yɛɛ ofufɛ mi Onodzi Osaan, \v 6 ongwu o kye nyɛ abɔ iYesu iKrestu onagbɛ mgbi eyi yawo eyi dzii nani, \v 7 ikyegbɛɛ, ngwi o nu eyi emyɛmyɛ mi elela mgban nɛ, ni eyi yɛɛ ama gyokwudɛ di sulu ɛwɛ ogbe byiibyi mgbi oshishe ogyegwu. \v 8 Elodzɛ nɛ li elodzɛ otsitsi. N mina gbɛɛ ni abu kwunewo ogbɔ ungwɔ ntonɛni, adzi ni ama nnoyɛyɛ mbi Imgbasho nɛ kyɔ dumɔɔ di kwunewo okyungwɔ osuse. Ungwɔntonɛ tishi di sulu abɔ oyaaya mbi ali inggisɛ duu. \v 9 Kpaa dulu abɔ mi angwodzɛ ikwangha yi odzɛ inyabyi ogbɔɔgbɔ yi angwɛ bɛyi onɔgbɛ mi odzɛ ola, ikyesinɛ ayayi ungwɔ ntonɛ sulu abɔ oyaaya ba. \v 10 Kwo inggisɛ ntoodzɛ adɔ akponyi, di kwon akpe ongwu fan. Non nya bayɔ, dulu abɔ mi odzan. \v 11 Difwi gbɛɛ itɔ inggisɛ na fashi iyikpa tsɛ otsitsi; alobube mgban abɔn dulun otse. \s1 Odzɛ ongwikpa \p \v 12 Ni ani dɔ Atemasi hona iTacikɔ ba mbi abu majo, fya mi ofyaafya mgbi abu ba mbon mi iNikopoli, ikyekyɛ n weka odzɛ mmana mi onova nɛni. \v 13 Fya mi ofyaafya mgbi abu duu otobyi iDzena inggisɛ oye ola bɛyi Apolo mi okyɛɛ mgbi ama di di gbɛɛ unka kwoma oba ba. \v 14 Emideyi nu ma kpayi okye ewoma nu mi ungwɔ osuse okyɔɔkyɔ kyɛmɛ, ikye nu ma sulu ungwɔ ngwi a kale kyɔ abɔ oyaaya ele alegbe-alegbe ni a ka li ama odiidi inɛ ba. \v 15 Ali inggisɛ ndzɛ yi ani duu le ta abu angba. Ta ama onoyɛyɛ ama eyi kpa ma itukwu ma duu angba. Elela mgbi Otsɛ no dzɛ yi ema duu. No dzɛ ngha.