\id 2TH - Etulo
\ide UTF-8
\h 2 Emi iTesalonika
\toc1 Afɛ mgbi iPol ongwu fan mbi ama onoyɛyɛ Emi iTesalonika
\toc2 2 Emi iTesalonika
\toc3 2EiTe
\mt2 Afɛ mgbi iPol ongwu fan //  mbi ama onoyɛyɛ
\mt1 Emi iTesalonika
\c 1
\p
\v 1 Afɛ nɛ kyɛ mbi ani iPol, iSaila bɛyi iTimoti, le kɛ mbi emi odzimgbasho mi iTesalonika, ema nli mgbi Imgbasho Otseyi bɛyi Otsɛ iYesu iKrestu nani.
\p
\v 2 Ni elela bɛyi iyu mgbi Imgbasho Otseyi bɛyi Otsɛ iYesu iKrestu dzɛ yi ema.
\s1 Angba otaata bɛyi ibɔ
\p
\v 3 Dzɛ mbisɔ eyi ka ta Imgbasho angba alonɔ mi ikye mgbi ema, emi ongwuneyi, ma li ngha yɛyɛ, ikyesinɛ oyɛyɛ mgbi ema le sheeshe lu iyayi, okpitukwu mgbi ema mbi ewema kpaa le sheeshe. 
\v 4 Nghanɛ, mi idzidzɛ okwakye mgbi emi iKrestu duu eyi li tsaabɔ igɛgɛ ikye ema mi itukwu oshiishi bɛyi oyɛyɛ onuunu mi isɔ yi ali imbadi ngwi ema to le nyɛ mi ele duu.
\p
\v 5 Ungwɔ ntonɛ duu li ambɛ otso gbɛɛ ikwɔ ogbɔɔgbɔ mgbi Imgbasho li ayin, ikyenghanɛ ema ka mɛ okaka esutɔ mgbi Imgbasho, ongwu ema le gyadzɛ ikyen nɛni. 
\v 6 Mi ikwɔ mgbi Imgbasho ofwoofwo, o ka oyile mkpa adzɛ kpa ama nle nu ema adzɛ ntonani. 
\v 7 O dika nu ama a le nu ma isɔ nɛ tonya bɛyi eyi kpaa. Ungwɔnɛ ka kyɔ mi onɔ ngwi Otsɛ iYesu ka kyɛ esho yi angbodzi engyesɔ mgban mi amoola mani. 
\v 8 O ka kwo ama n ye Imgbasho ba di noyɛyɛ mi Esɔ Osuse mgbi Otsɛ mgbi eyi iYesu ba ntona adɔ. 
\v 9 A ka kwo ma adɔ yi odzili-dzili igyegwu, a dika ba inai Otsɛ bɛyi mfye mgban okwɔkwɔ ba 
\v 10 mi egbe ngwi o ka ba owa gbɛ okwɔkwɔ mbi inggisɛ mgban ama osaan bɛyi otsɛɛtsɛ mbi ama onoyɛyɛ duu mani. Ema kpaa ka wele yi ama, ikyesinɛ ema noyɛyɛ mi obwɛndɛ mgbi eyi mbi ema.
\p
\v 11 Ikyenghanɛ, eyi bibɔ tonya ba ikye ema, gbɛɛ ni Imgbasho nu ema mɛ ela okwuukwu mgban, odi nu ali oweka mgbi ema osuse duu bɛyi ali idɔ mgbi oyɛyɛ onuunu mbwumbwo mi mfye mgban. 
\v 12 Mi itɔ ofɛ nɛ iyi mgbi Otsɛ iYesu mgbi eyi ka tu okwɔkwɔ ikpewo ema, ongwu kpaa dika nu ema okwɔkwɔ, mi elela mgbi Imgbasho mgbi eyi bɛyi Otsɛ iYesu iKrestu.
\c 2
\s1 Inggisɛ imbaali
\p
\v 1 Mi ikye odzɛ oyɛɛyɛ mgbi Otsɛ mgbi eyi iYesu iKrestu, bɛyi owa gbe eyi kwakye mbonyi yan nɛ, ani tɛkyɛ nu ema emi ongwunani gbɛɛ, 
\v 2 ka wɛndɛ hona kye itukwu feesho ba na. Odzɛ ama ogbɛɛsɛ atsika gbɔ yi esɔ ema fwo hona afɛ ngwi a lɔ nu ema gbɛɛ, egbe mgbi Otsɛ teyi ba wa na, kyɛ mbi eyi ba. 
\v 3 Ka nu inggisɛ onyi kpaa kpagya ema wo mi ofɛ onyonyi ba, lubana egbe na ka ba ba sede inggisɛ ibyibyi ka kye afɔ twɛsɛ yi elodzimgbasho, a dika kye inggisɛ imbaali ongwu a kyon dzɛ ikye owa dzilin na tsɔɔnɔ se. 
\v 4 O ka fwa di kyile ewon esho ngha alungwɔ a li kwun di Imgbasho bɛyi ungwɔ a li sunu duu, jo o ka kye ewon tuo mi ozu okwukwo osunu Imgbasho mi iJerosalin, le tekpo gbɛɛ ongwu li Imgbasho.
\p
\v 5 Ema wɛ dafi onɔ ngwi ani ka dzɛ yi ema ma ani li nya ema ungwɔ ntonɛ baa? 
\v 6 Onɛnɛ ema di ye ungwɔ nkwu inggisɛ imbaali na kwulɛsɛ mani, ikye ni a wa kyon tso mi onɔ ma yɛyɛ. 
\v 7 Lubana mfye odaada mgbi inggisɛ imbaali na teyi le kyidɔ wa; kpaa ongwu nbwan kwulɛsɛ onɛnɛ nɛ ka kiyayi okyɔ ngha nghataa mbisɔ a kawa dulun tɔ mi ofɛ nani. 
\v 8 Ta a kawa kye ongwu nli ngyo ola ba na dɔ ododa, nghaduu Otsɛ iYesu ka kyi gbɛlun mfye mi mmyɛ ongwi ondu mgbi ongwu di dzilin mi okwɔkwɔ mgbi obaaba mgbi ongwu mani. 
\v 9 Ongwu nli ngyo ola ba na ka ba yi mfye mgbi iSatan di wa kyɔ ali ambɛ ikpaflo bɛyi ungwɔ ama okwulewo duu, 
\v 10 dika kye ali itɔ ofɛ ibwubwe duu okpagya ama nkawa dzili ma wo. A ka dzili ikyekyɛ a fwa ogbɛ Esɔ Osuse nɛ yi atsa adzi ni a dulu ma watɔ. 
\v 11 Ikyenghanɛ Imgbasho kye onodzi owɛndɛ ofyumfye nu ma ikyegbɛɛ nu ma noyɛyɛ mi atsika, 
\v 12 adzi ni ama nnoyɛyɛ mi otsitsi ba kpaa gbela yi imbaali ma gyobube.
\s1 Kwudzɛ kpɔklɔɔ
\p
\v 13 Nghaduu i tishi ngwi eyi kile ta Imgbasho angba alonɔ mi ikye ema, emi ongwuneyi ama nkpa Imgbasho itukwu, ikyesinɛ mi owita-wita ma Imgbasho sadu ema ikyegbɛɛ ni ema watɔ mi idɔ mgbi Onodzi Osaan ngwi a kyi salu ema bɛyi ikye oyɛyɛ onuunu mi otsitsi nani. 
\v 14 O kwu ema ela nyɛ mi Esɔ Osuse ngwi eyi le gbɔ nɛni, ikyegbɛɛ ni ema tu okwɔkwɔ mgbi Otsɛ mgbi eyi iYesu iKrestu. 
\v 15 Nghanɛ, emi ongwunani, kwudzɛ kpɔklɔɔ na di kye abɔ byi mi otsootso ngwi eyi tso ema nɛni, ki no li mi odzɛ ondu naadi mi afɛ olɔɔlɔ kpaa.
\p
\v 16 Ni Otsɛ mgbi eyi iYesu iKrestu abuon bɛyi Imgbasho Otseyi, ngwu eyi kpan itukwu bɛyi mi elela mgban nu eyi ɛwɛ okwuwo igyegwu bɛyi eka ogbe byiibyi osuse, 
\v 17 kwu ewema ɛwɛ wo di fyumfye mi itukwu na mi ali idɔ osuse bɛyi odzɛ ogbɔɔgbɔ duu.
\c 3
\s1 Bibɔ ikye eyi
\p
\v 1 Ongyɛɛngyɛ yɔ, emi ongwunani, bibɔ ikye eyi adzi ni esɔ mgbi Otsɛ gbɔfwɛ plɛ-plɛ di dzɛ yi mmwɛ, dafi i dzɛ yi ema nose mani. 
\v 2 Di bibɔ na gbɛɛ nu ma dulu eyi mi abɔ emi imbaali bɛyi emi ibwubwe, lubana li inggisɛ tsatsa dzɛ yi oyɛyɛ onuunu ba. 
\v 3 Nghaduu Otsɛ li ndu ba, o dika nu ema mfye di ngyo ema mi abɔ ibwubwe inggisɛ nani.\f + \fr 3:3 \fr*\fq Ibwubwe inggisɛ: \fq*\ft Na li iSatan.\ft*\f* 
\v 4 Eyi dzɛ yi abɔ otsigɛgɛ mbi Otsɛ gbɛɛ ema le ngyo dika kiyayi okyungwɔ ngwi eyi wo ema ola nani. 
\v 5 Ni Otsɛ kye ema itukwu byi okpitukwu mgbi Imgbasho bɛyi itukwu oshiishi mgbi iKrestu.
\s1 Adɔ okwookwo mi ikye emi ewewa
\p
\v 6 Mi iyi mgbi Otsɛ iYesu iKrestu, eyi wo ema emi ongwuneyi ola gbɛɛ, ni ema dzɛ mbombo yi ali emi ongwunema ama nli kyidɔ ba di dzɛ mi otsootso ngwi ema gbɛ mbi eyi ba duu. 
\v 7 Lubana ema abuema ye dafi ema ka kyɛdɔ ambɛ mgbi okyɔɔkyɔ mgbi eyi. Eyi li ama odzɛ abɔ ayayi mi onɔ ngwi eyi dzɛ yi ema ma ba, 
\v 8 hona eyi gye ungwogye mbi inggisɛ onyi mi ayayi ba. Mi ayɛ oka yɔ, eyi li kyidɔ otu yi onɔ, le gyadzɛ dile kwunewo ikyegbɛɛ ni eyi ka li okye mbi inggisɛ onyonyi ba. 
\v 9 Eyi kyungwɔnɛ, ikyegbɛɛ di eyi dzɛ yi ofɛ ngwi a ka ya eyi abɔ ba ba, nghaduu li ikye onu eyi li ambɛ ngwi ema ka kyɛdɔ. 
\v 10 Lubana onɔ ngwi eyi dzɛ yi ema ma kpaa, eyi wo ema ola nɛ gbɛɛ, <<Kini inggisɛ ka kyidɔ bayɔ, non ka gye ungwogye ba.>>
\p
\v 11 Eyi fwo gbɛɛ angbeka mi idzidzɛ ema li emi okwulo. A li gbela okyidɔ ba; sede okye ondu wo inggisɛ ewo. 
\v 12 Li itɔ inggisɛ ntona ngwi eyi le gbɔ yi ama dile wo ma ola mbi Otsɛ iYesu iKrestu gbɛɛ, nu ma yile igɛgɛ bɛsɛ di kyidɔ otu ungwogye ngwi a ka gye.
\p
\v 13 Nghaduu mbi ema, emi ongwunani yɔ, ka yama ndɛ okyɔ osuse ba.
\p
\v 14 Kini inggisɛ fwa ofwo odzɛ owɛɛwɛ ngwi eyi lɔ mi afɛ nɛ yɔ, kye ɛwɛ byin saan na, dzɛ enggengga yan, adzi ni ayiwi kwun. 
\v 15 Kpaa ka kyen dafi inggisɛ ikyili mgbi ema ba, nghaduu kwon adɔ dafi ongwunɔ mani.
\s1 Elodzɛ ongwi olɛlɛ
\p
\v 16 Ani bibɔ gbɛɛ ni Otsɛ Imgbasho mgbi iyu abuon nu ema iyu alonɔ bɛyi mi ali ofɛ duu. Otsɛ no dzɛ yi ema duu.
\p
\v 17 Ani, iPol, lɔ angba nɛ mi abɔ mgbi ani, nli ambɛ otso idzidza mi afɛ ngwi ani lɔ duu. Ikye otso gbɛɛ li ani iPol lɔ.
\p
\v 18 Elela mgbi Otsɛ mgbi eyi iYesu iKrestu no dzɛ yi ema duu. No dzɛ ngha.