\id MRK Draft material - not consultant checked 
\h Mareko 
\toc2 Mareko 
\toc1 Mareko 
\mt1 Mareko  
\ip The Gospel of Mark was prepared by members of the Summer Institute of Linguistics together with members of the Meriam Mir language community. It was published by the Summer Institute of Linguistics June, 1994 with a print run of 50 copies (ISBN 0 86892 3583). The text never went through final translation checking procedures but has been digitised to preserve its historical and community value.  
\c 1  
\s1 Zonera Bapataisora Marauarem  
\p
\v 1 Able debe mir peike Iesu Kerisora, Adira Werem.  
\v 2 Able ad ge bagrareta mokakalam ge Isaia peropetade ditari: Ma asor; Ka yaka kikem kara miraisisle amariklu marim gab wadirsir.  
\v 3 E ya erer wekrier muige sogipurge, Wa wabu barsirawem Opleem; gair lu ikerewem barkak ober.   
\p
\v 4 Able miraisisle, Zone Bapataiso, batomerdari muige sogipurge. E le bapataiso darapaitlare a leem marauermer: “Adem tabatarare wabi witlam a bapataiso bapaitare ya waiakai Adide waba wit adem waitkir.”   
\p
\v 5 Le tabakeslare Ierusalemalam a pako kemerkemer Iudaialam bakeslare bauser Zonei wasorda. Na legize ge tabara wit detautlare ege yabi bapataiso darapaitlare muige Ioridanoge.   
\p
\v 6 Zonera walige kamela muslam dikereder a ege amier kelarkelar lager abi gemge dimrireder. Abra lewer ge pirn nagriweretlare a pako isawira ni.  
\v 7 Ege le natomeretlare, “Able le penoko kari keubu ikaseredi e au sasrimsasrim karim dali; ka nole abkorep ko abra teter gab adem daogilu.  
\v 8 Kaka wabi bapataiso nige depaiteda, e ya wabi bapataiso wadikerlare Lamar Zogoge.  
\s1 Iesura Bapataiso A Mirem  
\d MRK 1.9-11   
\p
\v 9 Keubu, Iesu tabakiamuda Nazaretlam muige Galiiaiage a Zonede abi baptaiso dikailu muige Ioridano keperge.  
\v 10 Nade e nilam tegimeda, aududumge Iesude dasmeri kotor ekesmuda a ege Lamar Zogo dibadiba noge abim tabi.  
\v 11 Ege kodomir teosmeda kotorlam, “Mama kara nasnas Werem nali. Kaka mari sererge nali.”  
\d MRK 1.12-13   
\p
\v 12 Au dudumge able Lamar Zogode Iesui emarikda sogipurem.  
\v 13 E ge sogipurge dawer Satanade abi mirem ikerer 40 gerger. Aregareg ebur ge urder ege angela no tabatweri abi aseseredlare.  
\s1 Iesude Dirmisida Mirarem  
\d MRK 1.14-15   
\p
\v 14 Keubu wader luge, Zonei didbarda itimedarda, Iesuge bakiamuda Galilaiaem Adira Debe Mir ermer.  
\v 15 “Able barkak kerker pedikeredi,” e atkarti. “Adira basalaia maike ikeredi! Wa tabatarare wabi adud tonarlam a wage Debe Mir irmirare.”  
\d MRK 1.16-20   
\p
\v 16 Nadege Iesu digmer Galilaia Keper tawerge, ege nardari neis lar-asaperle Saimona a abra barada Andru, wige lar esaperlei larasaperlugu.  
\v 17 Iesude yabi daratagri, “Wa tabakiamulam karidoge kai wabi derwere le asaper.”  
\v 18 Wige keko tabara larasaperlu darakareta a abi irmirei.   
\p
\v 19 E kebikebi ko bakiamuda ege nardari tabara neis barada, Zemis a Zone, Zebediia werem. Wi taba narge darawedei tabara larasaperlu dirsirlei.  
\v 20 Nadege Iesude yabi nardari ege keko yabi darabgeri; wige tabara bab Zebedi a abra dorgele narge darakairtiei wige Iesui irmirei.  
\d MRK 1.21-28   
\p
\v 21 Iesu a abra memegle tabakiamuda able utebge abra nei dikereder Kapanaum. Nerut Sabatge Iesu bakiamuda sunagoge akaida marauermer.  
\v 22 Able le ge turder bazigmurati ableglam e barkakle nerwerlare sasrimge, aukaise Aotarleem.  
\v 23 Keserkeser ege kimiar tabakiamuda sunagoge. Demoni abidoge dawer e ererekrier,  
\v 24 “Mara nole nalu peike, Iesu Nazaretle! Ka umele ma taba kerbi detko. Ka umele mama Zogole Adira naii.”   
\p
\v 25 Iesude aukaise dimoni detagri, “Ma mir baimi mage adem able kimiarlam teosmer!”  
\v 26 Able dimonide able kimiar aukaise deskerdi, aukaka mir etkarti a adem teosmeda.   
\p
\v 27 Ege le bazigmuarti. Wige tabara bautmerlare, “Nalu peike? Able erwer nerut korep ike. Able le pe barkakle dali. E aukaise dimoni detagri a wipe irmirda.”  
\v 28 Ablegira mir dudumdudum ebrerdi kemerkemer Galilaiage.  
\s1 Iesude Mitkar Le Nadgilare  
\d MRK 1.29-34   
\p
\v 29 Wige sunago dikaireta a bakiauda natkak Saimonyabim metaem Andruei. Zemis iba Zone yabidoge bakiamudariei.  
\v 30 Saimonara neiwet ama auka ziruziru gimgim sike ipereder. Au dudumge wi Iesui detagerda abi gimlam.  
\v 31 Ege bakiamuda abidoge tekweida abi tage erpeida a abi upiditida abi ikaida imridari. Able zirude abi dikairti ege siklam adem eupamada a akaida yabim ga lewer dirsirer.   
\p
\v 32 Able kige nade lim baraigida legize Iesuim taraislare gair gimgimle a wader le ge yaba dimoni urder.  
\v 33 Gair le able gedlam etami adge tege.  
\v 34 Iesude mitkar le nadgilare gair korep gimlam a dimoni adem nauslare. Able dimoni nole mirkak ableglam Iesu laglag dawer. E able lu ikaida ableglam wi umele urder e nete dali.  
\s1 Iesu Erkepasameida Lekak Utebge  
\d MRK 1.35-39   
\p
\v 35 Nerut idimge keubu ga lim teupumada Iesu siklam adem eupumada a meta dikairti. E adem bakiamuda able uteblam lekak utebem, a ege eudi erkepasameida.  
\v 36 Ege Saimona a wader no bakiauda abi daraimerda.  
\v 37 Nadege wi abi erdarda, wi abi detagerda, “Gair legize mari naraimreda.”   
\p
\v 38 Ege Iesude yabi daratagerda, “E debele dikeredi mi nabakiaware wader utebem pe naridwerteda ya waiakai ka umele koka yabim mir arme. Ableglam kaka tabakiamuda.”  
\v 39 Ege digmer muige gair utebge Galilaiage marauermer sunagoge a adud lamar adem nauslare.  
\d MRK 1.40-45   
\p
\v 40 Netat kimiar gegur-bad gimgim dawer tabakiamuda Iesui opem taba kokmamu emrida a abi upiatidarem bagwi. E etkarlu kega, “Ese ma laglag nali, ma umele kari nakai ogkak nabailu.”   
\p
\v 41 Ege Iesura nas barki, tabara tag itrimurikda a able le erpeida. Iesude able kimiar detagri, “Ka laglag nali. Ma akai ogkak bai.”  
\v 42 Keko able gimide able le dikairti a ege akaida ogkak baidari Mosei Gelar pekge.  
\v 43 Iesude eudi abi aburker adem emarikda, kikem e abi barkak esereser detagri,  
\v 44 “Ma nole netat le able luglam detager. Ma no barkak bakiamu a mabu tabatomer merkemem a zegu lewer mara agimu ge Mosede Gelar idagi able tonar gimlam, ya waiakai gair le umele ober ma emetu akaida ogkak baidari Gelar peke.”   
\p
\v 45 Ege able le no bakiamudari gair le daratagelare, able mir ebrerder gair utebge. Able luglam Iesu nole paretkak leem eosmerer e no lekak utebge dawer a ege le mena tabakeslare abra ardar gair uteblam.   
\c 2  
\s1 Iesude Atmutatmut Le Idgiri  
\d MRK 2.1-12  
\p
\v 1 Kepkep gerger barukdarda Iesu ko akomeda Kapanaumem, ege legize asorda e ko takomeda taba metaem.  
\v 2 Au kub lera etami wige meta damida mitkar barki mena adge tege derapeiri.  
\p Nawer ge Iesude marauermer mitkar leem,  
\v 3 wader le bosi, neis a neis legizege atmutatmut le tigardidere.  
\v 4 Wi umerkak able kimiar waigareda Iesuim ableglam yaba gab aomaom ikereder able mitkarlelam, wige ao dirbidere totge lesui natkak. Wige able le ditimdidere taba papekge able nebge.   
\p
\v 5 Nade Iesude yaba au owatur dasmeri ege able atmutatmut le detagri, “Kara werem, mara wit pe bamaidereda.”   
\p
\v 6 Wader Aotarle ge emreder. Wige dikepwarlare,  
\v 7 “E seksek dikeredi able leem e ke waditauter. Nole le ko dali e wit uwadimaidered, no Adide wit wadimaidered.”   
\p
\v 8 Iesu keko umelebaidari wi nako dikepwarlare, ege eudige daratagerda, “Wa nole ke dikepwararwem.  
\v 9 Wage ke dikepwararwem: nalu sikak dikeredi, able atmutatmut le obatager, “Ma wit bamaiderdi” a “Ma ekwei, papek mara etaruk, mage nagem”?  
\v 10 Pe irdi ka yaka wabi datomertare able Le Wermira sasrim dikeredi able gesepge ko wit waimaidered.” E eudige atmutatmut le detagri,  
\v 11 “Ka mari aukaise natagri, ma eti, mara papek etaruk, mage bakiamu gedim.”   
\p
\v 12 Ege legize abi lidkarem dasmerlare nade ge e ekweilu, tabara papek etarukda a bakiamuda. Wige bazigmuarti a wi Adi dispilare. Wi tabara batagelare, “Mi nole able orwairorwair lu kikem dasmerda.”  
\s1 Iesude Livai Dabgeri  
\d MRK 2.13-17   
\p
\v 13 Iesu akomeda bakiamuda Galilaia keperge wege. Lera kub abim tabakiauda ege eudige akaida yabi nerwerda.  
\v 14 Nadege e digmer, ege bodom bakir atkimed le erdari, abra nei dikereder Libai, Alpiasira werem. Libai ge imireder taba dorge utebge. Iesu akaida abi dabgeri, “Ma kari tararmir.” Libai ekweidari a abi irmiri.   
\p
\v 15 Keubu, Iesude lewer erwer Libai metage. Wader bodom bakir atkimed le a adud le ko ge turder.   
\p
\v 16 Wader Aotarle ge Parisaio urder Iesui erdarda lewer erwer able lekem, wige abra kaimegiz darautmerda, “E naluglam lewer eroli adud lege?”  
\v 17 Iesude yaba autmer mir asri, ege eudige akaida, “No gimgimle pe lukuple iaglag uridli, gimkakle pe nole lakak. Kaka tabakiamuda adud le darabgerare, nole debele.”  
\s1 Bautmere Nole Lewer Arokaklam  
\d MRK 2.18-22   
\p
\v 18 Netat gergerge, Zonera a Parisaiora kaimegiz nole lewer arokak urder. Wader le tabakiauda Iesuim a abi itmerda, “Zonera a Parisaiora kaimegiz lewer arokak uridli. Naluglam mara kaimegiz nole ko lewer arokak waurder?”   
\p
\v 19 Iesude detauti, “Wa nalu dikepwareda? Nako le paipu lewerge oba werer ge obakerer? Nole. Nade paipule yabidoge wadawer wi lewer wairolare.  
\v 20 Able kerker ya watabaruk nade paipule ya yabialam obakiamu. Able gergerge wi ya lewer arokak waurder.   
\p
\v 21 Nole netat lelut kerkar walimog etketi emeret walige. Nalu ya wakai? Able kerkar walimog ya obazrare emeret walilge.   
\p
\v 22 A nole netat lelut kerkar waina epaiterdi muige emeret tarporge. Nalu ya wakai? Able kerkar wainade ya able emeret tarpor wadiskimer, a able waina a pako tarpor ya obatkowam. Nole, pardarlegize kerkar waina waipaiterdare muige kekar tarporge.”  
\s1 Bautmerer Nalu Sabad Gerger Irdiredi  
\d MRK 2.23-28   
\p
\v 23 Sabadge, Iesu a abra kaimegiz wi daragemda bakiauda kon gedubge. Abra kaimegiz bakiauda wader kon etoperda.  
\v 24 Ableluglam Parisaio bakeri Iesui ikaidarda, “Ma yabi darasmerare! Wi keriba geiar erapeda wi able lu ikereda Sabadge.”   
\p
\v 25 Iesu yabi daratagerda, “Agekar wawa etageda Dawitara mir, nade e a abra armirle wige wererge bakeri.  
\v 26 Ege bakiamuda Adi metage badari a arito irwi pe no Adim wagimuaretlare. Able lu ge akaida nadege Abiata Kirim Merkemle dawer. Muige kerbi Gelarge, no merkemide tebteb arito wairwer; Dawitade irwi a wader ge tabara armirle naiswerda.”   
\p
\v 27 A e yabi daratagerda, “Sabadge barsirda leem, nole le barsirda Sabadem.  
\v 28 Pirdiredi, Lera Werem pe Ople dali gair lugira, Sabad ko irdiredi.   
\c 3  
\s1 Able Le Ge Tag Auserauser Dawer  
\d MRK 3.1-6  
\p
\v 1 Iesu ge ko bakiamuda sunagoge badari, ege le ge tadawer abra netat tag auserauser.  
\v 2 Wader le ge turder wi laglag urder Iesui ikelare e seksek ikeli, wige abi lidem dasmerlare ya waiakaida wi wadasmerda ese e able le waidgiri Sabadge.   
\p
\v 3 Iesude able tag auserauser le ikaidari, “Ma ekwei a kei taragem kikemem.”  
\v 4 Ege Iesude le nautmerda, “Nalu debeiu ikeredi merbi Gelarge pe merbi dikereda ma Sabadge ikerer? A nalu adudlu? Nako e debele ikeredi ma lera idid daseserder? A debele ikeredi ma abi ipit?” Wige nole abi mir ikwarda.   
\p
\v 5 Iesude yabi lidem darasmerlare urkerurker, e eudi akaida okasosoksosok baidari ableglam wi nole umerkak urder. Ege eudige able le ikaida, “Ma mara auserauser tag itrimurik.” Ege abra tag dakaida sikak baidari.   
\p
\v 6 Nade Parasaio gize sunago dikaireta, wige baka dudumdudum obapita wader Erodi lekem, a wige mir ipulare nako wi Iesu waipita.  
\s1 Lera Kub Iesui Irmilare  
\d MRK 3.7-12   
\p
\v 7-8 Iesu a abra memegle adem bakiauda Galailia keperem ege auka mitkar legize yabi narmirlare. Wi tabakiauda Galilaialam, Iudaialam, Ierusalemalam, Idumialam, able gedlam Ioridanoge apekge a able gedlam pe Taia a Saidon ge naridwerteda. Able au kub lera tabakiauda Iesuim ableglam wi wasolare e able lu waikere.  
\v 9 Iesude tabara memegle daratagerda wi kebi nar wadirsirda abim ya waiakaida legize umerkak abi waitmagda.   
\p
\v 10 E mitkar le ge nadgilare, a gair gimgim le mena tabakeslare abim ya waiakaida wi abi waitutirda.  
\v 11 A gair kerkerge na lera ge dimoni urder yabidoge abi erdarlare, wi kokmamu bamrer abi opem ererbakrier, “Mamanali Adira Werem!”  
\v 12 Iesude dimoni aler daratagerlare, “Wa nole le daratagrawem kaka nete nali.”  
\s1 Iesude 12 Kaimegiz Natutidarda  
\d MRK 3.13-19   
\p
\v 13 Ege Iesu baka paserge ogi a tababim le darabgerda ge e laglag dawer, wi abim tabakiauda.  
\v 14-15 Egeyabialam 12 kaimegize natutidarda. E yabi daratagerda, “Ka wabi ditutidarda wa karidoge uridwa. Ka yako wabi damarkare adem marauarmem, a waba ya sasrim wanagri ko dimoni adem islare.”  
\v 16 Able 12 pe uridli ge Iesui natutidarda: Saimona (Iesude abi nei itkiri Peteru),  
\v 17 Zemis a abra barada Zone, Zebedaiora neis werem darali (Iesude yaba nei ditkiri Boanagiz, pe dikeredi Girgirira Werem).  
\v 18 Andru, Pilipo, Batolomu, Mataio, Tomas, Zemis (Alepaiara werem), Tadaio, Saimona able Zelotle,  
\v 19 a Iudas Iskariota, ge e keubu akaida Iesi dipi.  
\d MRK 3.20-30   
\p
\v 20 Iesu a pako abra memegle bakiauda metaem. Wi umerkak lewer wairoda ablelam au kub lera etami muige metage.  
\v 21 Legize able mir Iesura buai daratagerlare. Wi detautlare, “E akaida peimpeim baidari!” Ableluglam abra buai tabakiauda mirem abi wairpeirare a waigareda gedim.   
\p
\v 22 Able kerkerge wader Aotarle tabakiauda Ierusalemalam. Wi mir igiarlare, “Beelzebul pe Iesui doge dali. E dimoni adem daramaidere able dimoni kirimlera sasrim abidoge dikeredi.”   
\p
\v 23 Ableluglam Iesude yabi darabgerda tababim ege yabi daratagelare mir abisir miru. E yabi daratagelare, “Satanade umerkak Satana adem waimu ko ei umerkak mena kelarkelar wadawer.  
\v 24 Ese wader gedle obaskare mogmog ober a tabara obareslare, able gedle waiakai sasrimkak obai.  
\v 25 Ese wader netatbuai obaskerare mogmog ober a tabara obareslare able netatbuai waiakai sasrimkak obai.  
\v 26 Able tonarge, ese Satanade tabara le wanarsare, e waiakai sasrimkak obai a abi sasrimira mop wadikereder.   
\p
\v 27 Ese nale mirem aukelarkelar le metage obau ko abra lu erwamer wadais, e kikem able aukelarkelar le lageru wadidbar. No pe dikeredi e umele aukelarkelar lera lu erwamem wadais.   
\p
\v 28 Ka wabi agekar detagreda; Adide umele le omar ge waikai witlam a taba gair Adi opmir atagerlam.  
\v 29 Adide umerkak wit wadimaidered pe legize Lamar Zogoi opmir detagreda. Yaba witira bodomalam pe niaiem dikeredi.”  
\v 30 Iesude able mir detauti ableglam wi Lamar Zogoi dabgelare dimoni dali.  
\d MRK 3.31-35   
\p
\v 31 Ege Iesura ama a wader barada tabakiauda ga adge tikweider. Wi miraisisle emarikdarda muiem oba Iesui adem watismeda.  
\v 32 Able lera kub ge emreder Iesui dairumaretlare a wige abi detagerda, “Ma dasmer, mara ama a barada pema adge tikwedi a wi laglag mari mir wanatagrare.”   
\p
\v 33 Iesude eudim detauti, “Nete kara agekar ama dali? Nete kara agekar barada dali?”  
\v 34 Ege e le darasmerlare ge abidoge emreder ege detauti, “Wa dasmerare kara agekar ama a barada.  
\v 35 Netide Adi irmili e pe kara barada dali, kara sisi dali a kara ama dali.”   
\c 4  
\s1 Gedublera Mir Abisir Mir  
\d MRK 4.1-9  
\p
\v 1 Iesude ko dirmisidan le nerwerlare ni keper tawerge. E bakiamuda narge akawerti muige temrida ableglam lera nikidetreder taba abi deirumareta auka mitkar. Able nar gurge eper, a able lera ge nikidetreder ge wege ekweider maike gurge.  
\v 2 Ege gair lu nerwerlare mir abisir mirge. Nadege e yabi nerwerlare ege detainer,   
\p
\v 3 “Wa asrare! Geduble bakiamuda tabara luneg kep wairti.  
\v 4 Nade ga e kep diger muige gedubge, wader batwerer gabdege, ge ebur gize narolare.  
\v 5 Wader kep ge batwerer neidneid sepge, ge nade nole mamor sep imireder. Able kep aududumdudum baperigdarda ableglam neidneid sep imiredi.  
\v 6 Nage ga lim teupamada, able luneg natitida batrauda. Wi aududumdudum baumi ableglam yaba sip nole au muige daramarwerteda.  
\v 7 Wader kep batweri iukazge wige yabi daramisirda, a wige bomi nole agegkak.  
\v 8 Ege wader kep ge batweri debe sepge. Wi baperigdarda, a bomi a ageg bakerda; waderlera kepkep ageg daragriweretlare, waderlera kebi mitkarmitkar a waderlera aukamitkar.”   
\p
\v 9 A ege yabi daratagerda, “Able mir pe dikeredi gair legize wasrawem a mamor waikedrawem tabadoge.”  
\d MRK 4.10-12   
\p
\v 10 Nade ge Iesu tebteb dawer, wader abra armirle tabakiauda abim, kemem abra memegle a abi itmerda, “Ma sikak mir abisir mir ko detaut.”  
\v 11-12 Iesude yabi daratagerda, “Wabi ge gumik daiswerda Adira Basalaia. Nade pe wader adge turidli gair lu asreda muige mir abisir mirge. Able korepge, wi ya erkep waigreder a nole momor wadasmerlare; wi ya wasorlare a nole waikedilare. Ableglam ese wi ya barkak wadasmerlare a waikedilare wi ya ko watabatare Adim a e yabi ya wadaramaiderdare.  
\s1 Iesude Sikak Detauter Gedublera Mir Abisir Mir  
\d MRK 4.13-20   
\p
\v 13 Ege Iesu eudige akaidari yabi daratagerda, “Ese wa nole able mir abisir mir wabidoge ikedilare, wai umerkak gair abisir mir wabidoge idaglare.  
\v 14 Able gedublelut Adira Mir wadirit.  
\v 15 Wader kerkerge able kep batwerer gabdege; able legize pe mir asreda epe keko Satana tabakesli yabialam able mir adem aisli pe yabidoge barteda.  
\v 16 Wader kerkerge able kep batweri neidneid sepge; able legize pe mir asreda a keko irmireda sererserer.  
\v 17 Epe no omeili kelarkak sipsip yabidoge, a wi no waurid nole niaikak a yako obaum. Nade ya asiasi wanagri a nade ya yabi wanareslare abieglam wi able mir irmireda, wi aududumdudum obako able mir asorlam.   
\p
\v 18-19 Wader kerkerge able kep batwerer lukazge; able legize pe mir asreda epe gair akepwar able gesepira, bodom bakirlag a gair debelulag niki yabidoge detredi a daramisreda able mirlam, a wipe nole agegkak uridli.  
\v 20 Wader kerkerge able kep batweri debe sepge; able legize pe mir asreda a ikadareda a yaba ageg bakeri: wader kepkep, wader kebi mitkar a wader aumitkar.  
\s1 Lampa Lewer Kobar Atkamatkam  
\d MRK 4.21-25   
\p
\v 21 Iesude yabi daratagerda, “Nade wa lampa dirsirkare, nako wa sepge demargerare wa lewer kobarlugu etkamare? Nako wa sikge sepge demargerare? Nolekar, wai ikairare lampa agimur luge demargerare.  
\v 22 Nalu lu pe nasibwerteda ya wadaratkiare, a nalu lu atkamatkam nagriwerteda e ya wataraisare bige obos.  
\v 23 Abie mir pe dikeredi gair legize wasrawem a wige waikedrawem.”   
\p
\v 24 E ko yabi daratagerda, “Wa able mir dikepwararwem pe wawa asorda! Ese wa able mir dikepwalare, waba ya bodomalam waikereder able luglam a pako wader lu pa nagriwerteda.”  
\v 25 Na lera pe nalu nagriwerteda ya yabi aumitkar obaiswerare; na lera pe kebikebi nagriwerteda yaba kebikebi ya adem obais.”  
\s1 Mir Abisir Mir Able Kepira Ya Waomeirer  
\d MRK 4.26-29   
\p
\v 26 Iesude ko yabi daratagerda, “Adira Basalaia mokakalam ikeredi able le e tabara gedubge kep irti.  
\v 27 E mena kige ut ipereder ege idimge ekiamda, able idimge ge kep baperikdarda a bomi. E nole umerkak wi nako bomi.  
\v 28 Able sepide tababu ikeri kep bomi a ageg bakerda; kikem yaba wai bomi, lusik ga bakerda, ageg ga keubu bakerda.  
\v 29 Nade ageg neu bakerda, able gedublelut kemerkemer lu adem ismi a ageg adem etkori ableglam nur kerker itutidari.”  
\s1 Mir Abisir Mir Able Mastad Kepira  
\d MRK 4.30-34   
\p
\v 30 Iesude ko yabi daratagerda, “Mi nako Adira Basalaia sikak datautare? Nalu mir abisir mir mi akerare ei able Basalaia merbi waditomeretiare?  
\v 31 E dali mokakalam mastad keb pe kebi kep dali able gesepge.  
\v 32 Nade ma abi emor sepge, ei ya waiomei wakai aukaka lu obai muige gedubge. Abra au tarn obarmare, a ebur ya watabakeslare abi tarn mudge obagrier.”   
\p
\v 33 Iesude tabara able marauermer leem mir abisir mirge mokakalam pe nagriwerteda; e yabi daratagerlare able piripiri wi umele tabadoge waidaglare.  
\v 34 E no yabi daratagerlare mir abisir mirge; nade e ga tebteb dawer taba memeglekem ege yabi gair lu daratagerlare.  
\s1 Iesude Au Wag Demegri  
\d MRK 4.35-41   
\p
\v 35 Able kikem Iesu akaida tabara memegle daratagerda, “Mi nabakiaware ge mi nerut pek gurge.”  
\v 36 Wige bakiauda able narge batri ge nade Iesu ikawerteder a ga bakiauda atiem. Kep kep wader nar yabidoge bakiauda ege lera kub ge no dirgi.  
\v 37-38 Muige nar korge Iesu amazge utipereder. Ege aukaka wag bamrida, zeuber bakwer a baraplare nar etatkolare able nar akaida noga gur digmer. Ege memegle gize Iesui utlam itirda a abi detagerda, “Erwerle, ki nabaume. Ma kerbi upiditidarare ese ma kerbi omarge dikereda.”   
\p
\v 39 Ege Iesu ekweidari eudimge wagiba zeuberei daraisumdari, “Wa temrilam! Wa mapodan bailam!” Ege wag ekemuda a gur akaida mapodan baidari.   
\p
\v 40 Ege Iesu akaidari tabara memegle daratagerda, “Wawa geumge bakeli abielam waba owatur kebile ikeredi.”   
\p
\v 41 Wige bazigmuarti a tabara baotmerlare, “E nalu orwaiorwai le pedali? Wagiba zeuberei umerkak wader le wanasware wipe no abi asriei.”   
\c 5  
\s1 Iesude Able Le Idgiri Ge Abra Dimoni Dawer  
\d MRK 5.1-20  
\p
\v 1 Wi ge bakarki able utebge maike au uteb Gerasa, nerut pekge ni keperge.  
\v 2 Nawar ge Iesu adem narlam eupamada, ege le tabakiamuda able uteblam ge nade paier nagriweretlare abi ops wadipiti.  
\v 3-4 Ege dimoni able lege dawer, e ge dawer bakir paierge. Nole ko le dawer abi malili lageru wadidbari: mitkar kerkerge iegize abra tag a teter wadaraubareda, e gair kerkerge malili lager wadarboli a wadareskimreda taba teterge. E au kelerkelar wadali nole ko nerut lelut abi ikaida ei maiem wekepli.  
\v 5 Kige a pako gergerge e paierge a paserge weseseredli ei sasmir wadimeli a tababu bakiru obasakli.   
\p
\v 6 Able lelut Iesui terdari aumurislam ege abim korider temridari akaida tababu kokmamumamu emridari Iesui opem abi isorgiru ikaida.  
\v 7-8 Iesude eudige abi ikailu, “Dimoni, ma adem teosmer able lelam!” Ege sasmir dimridari, “Iesu able Au Adira Werem, “Ma nole nerut lu karim ikai! Mage Adi detager ma nole kari nares.”   
\p
\v 9 Iesude abi itmeri, “Mara nei nako dikeredi?”.  
\p Ege able lelut abi detagri, “Kara nei dikeredi Lera Kub ableglam ki mitkar uridli.”  
\v 10 Ege Iesuim bagwi yabi umerkak adem wanamarikdarda able utebiam.   
\p
\v 11 Au kub puakara ge lewer erolare maike paserdege.  
\v 12 Able dimoni Iesuim bagwi, “Ma kerbi kei demarkare puakaem mage kerbi dikerare ki naba yabidoge nabarte.”  
\v 13 Iesu eudige iaglag baida. Ege dimoni adem bausi able lelam bakiauda puakage tabarti. Able kemerkemer maike 2,000 puaka korider bamri deibge barkarki a batweri wege gurim baragda a guni baiterda.   
\p
\v 14 Able puaka aseseredle korider adem bamri mir lege ebreredlare muige utebge a gako yabidoge dorgele ge sumesge urder. Mitkar able le tabakiauda wadasmerda nalu lu ge akaida.  
\v 15 Wi tabakiauda ge Iesui doge wige able le erdarda ge abra aukaka mitkar dimoni abidoge urder. Wige geumge bakeri ableglam e ge irmireder abra wali damireder e nole ko urker ge dawer.   
\p
\v 16 Nalegize ge abi erdarda, wader le daratagerlare nalu ge akaida able leem a able dimoniem a able puakaem.  
\v 17 Wi eudige bakeri Iesui itmerda e yaba uteb odikairti.   
\p
\v 18 Nawar ga Iesu akawerter narge able le ya abra dimoni waduridli Iesuim bagwi e abidoge obakiamuda atiem.  
\v 19 Ege Iesu nole lagkak dawer abi waigardi taba doge. Ege able le detagri, “Ma bakiamu gedim mari buaiem yabi daratagrawem nalu marim Oplelut ikaida a e nalu debele marim dali.”   
\p
\v 20 Ege able le bakiamuda 10 Utebem ge wader le daratagelare nalu Iesude abim akaidari. Na iegize ge abi asorda wige bazigmuarti.  
\s1 Zairusira Neur, A Able Koskir Ge Iesura Wali Ditutida  
\d MRK 5.21-43   
\p
\v 21 Iesu ko akomedari narge bakiamuda nerut pekge ni keperge. Nade lera nikidetreder tabakiauda abi dairumareta maike ni keperge.  
\v 22-23 Netat sunago kirimle abra nei dikereder Zairus takabiamuda Iesuim. Nadege e Iesui erdari, Zairus tababu akaida kokmamu emridari aukelarkelar Iesuim bagwi, “Kara kebi neur no tididli e maike weteumi. Kape marim bagwi, ma taba mara tag abidoge tadakmerik ya waiakai abra gim wadesemu ei mena wadawer.”  
\v 24 Ege Iesu abidoge atabemeda, a lera ga nikidetreder abi irmirdlare a abi imuaretlare.   
\p
\v 25 Netat koskir ko ge dawer e asiasi wadigili abra aukaise mam wadipitli able niainiai 12 urut.  
\v 26 Able koskiret ya ko tabara asiasi wadigili gair lukuplelam, e tabara bodom bakir wadikrili lukuplege ya waiakaida wi abi upiwaditidarda. Ege nole akaida sikak baida yabi upiatidarlam, ege no akaida au gimgim baida.   
\p
\v 27 Able koskiret wasoli nako Iesude le wanadgireda, ege tabakiamuda keubu daraweida ge le nikidetreder Iesura wali paikai ditutida.  
\v 28 Able koskiret dikepwari, “Ese ka umele abra wall datutilu kara gim ya wesimu.”  
\v 29 Ege keko able dudumdudum abra mam ya abra wadipitli keko durwarti, ege umele baida abra gem dakaida sikak baidari able gimlam.   
\p
\v 30 Keko Iesu umele baida abra sasrim abialam adem deosmeda. Ege bataurikda able kubge ge nikidetreder a yabi nautmerda, “Netide pe kara wali mop itutida?”   
\p
\v 31 Abra memegle eudige bakeri abi ikaidarda, “Able le pema uridli mari naumarteda. Mape naluglam eutmeli, 'Netide kari natutidari?'”  
\v 32 Ege Iesu no mena ikweireder erkep ikereder able le wairdari ge netide abi itutidari.   
\p
\v 33 Abra koskiret ga keubu dikepwari nalu lu abim akaida ege geumgeum tabakiamuda akaida Iesuidoge kokmamu emridari a abi detagri ge e nalu ikaidari.   
\p
\v 34 Iesude abi detagri, “Kara neur, mara gim esemuda ableglam mara owatur ikeredi. Ma bakiamu mapodange sikak nawa nole able asiasi ko digiwa.”   
\p
\v 35 Nawar ga Iesude mena able mir detauter, wader miraisisle tabakiauda Zairusi metalam a Zairusi detagerda, “Mara neur teumida. Epe nole pa ko ikeredi ma mena able Erwerle damisrer.   
\p
\v 36 Iesude nole yabi mirem girip irdireder ge nalu wi detautlare. E akaida able sunago kirimle detagri, “Ma nole geumge akai, ma no kari narmirwa.”  
\v 37 Ege no yabi naisidare Peteru a Zemis a abra barada padali Zone bakiaudare kemem, nole nerut le ko dawer.  
\v 38 Wi bakiaudare ge able kirimle metage eosidare ge nade Iesude gair le nardarda ge wamisrer. Ege eudige i asri a ii sasmir.  
\v 39 Ege bakiamuda able metaem badari a akaida yabi daratagerda, “Wa naluglam pe wa bamisreda a wa naluglam i bazoli? Able kebi neur nole eumida - e no ut iperedi!”  
\v 40 Wige eudige bakeri abi ga desaredlare, ege yabi adem nausa metalam.  
\p Ege no kebi neurira apuiba babei daragardi a abra neis a netat memegle pa darale bakiaudare able kebi ut uteb ge bartidare nade ge able kebi neur ipereder.  
\v 41 Ege bakiamuda abra tag derpeidari a abi taba miru detagri, “Talita kum” - “Kebi neur, ka mari peka natagri, ma ekiam!”  
\v 42 Ege keko able kebi neur ekiamda a digmer muige metage. E 12 urut dawer.  
\p Wige no kemerkemer bazigmuarti.  
\v 43 Iesude yabi kelarkelar daratagerda, “Wa nole gair le daratagrawem.” A ga akaida yabi ko daratagerda, “Wa abi nalu ikwarare ei wairo.”   
\c 6  
\s1 Le Nole Iesui Lagkak Muige Nazaretge  
\d MRK 6.1-6  
\p
\v 1 Iesu able uteblam bakiamudari taba gedim. Abra memegle abi kemem bakiauda.  
\v 2 Sabadge ege akaida mitkar le nerwerlare sunagoge. Nade wi abra mir dasorlare wige bazigmuarter a abim mir dimwarlare. Wige tabara netatnetat bautmerlare, “Netilam able lelut able mir taisi? Netilam abra pardar dikeredi? E nako able au dorge ikeli?”   
\p
\v 3 E no kamda dali; e no Mariara werem dali; e no Zemisira barada dali, a lose a Iuda a Saimona; a pako abra sisi pa duridli!” A wige nole abi lagkak urder.  
\v 4 Iesude yabi daratagerda, “Muige wader gedge, legize peropeta wasreda. Epe legize nole abi asreda nade pe e taba gedge dali, taba buaige dali a taba metage dali.”  
\v 5 E umerkak ge mitkar au dorge waikeri. Ege no kepkep le nadgirlare ge e tabara tag dikmerker yabidoge.  
\v 6 E ezigmuada ableglam yaba nole owatur nagriweretlare.  
\s1 Iesude 12 Memegle Namarikdarda  
\d MRK 6.6-13  
\p Ege bakiamuda ge able gair utebge a le nerwerlare.  
\v 7-8 E tababim able 12 memegle darabgerda, ko yabi neisneis wanamarikdarda. E yabi sasrim nakwarda ko dimoni au kelarkelar wadaratagreda. E yabi au kelarkelar daratagerda, “Wa no koket aisawem nade wa dikasirwertawem. Wa nole lewer aisawem; wa nole epei aisawem; a wa nole bodom bakir aisawem wabi wakge.  
\v 9 Wa tetergab amiawem; a nole neis amiwali namiawem.  
\v 10 E yabi ko daratagerda, “Nade legize wabim mir watigrilare metaem, wage ge mena uridwa wa nole able uteb dikairetawem.  
\v 11 Ese wa taba able utebem ya nole legize wabi wadireplare, a wi nole wabi wadasorlare, wage waba pi wabi teterlam adem etkaperdawem nade wa able uteb dikairtawem, yaba ya atamilam waike.”   
\p
\v 12 Wige bakiauda bausi a maraueremlare le wi watabatarda yabi witlam.  
\v 13 Wige mitkar dimoni adem nauslare; a wi mitkar gimgimle wakaisoiu darasaulare wige bakerer sikak berer.  
\s1 Erodide Zone Baptaiso Ipiti  
\d MRK 6.14-29   
\p
\v 14 Erod able Gesep-Ople able lu asri, ableglam legize Iesura mir debreredlare gair utebge. Kepkep legize ge detautiare, “Zone Baptaiso ko akaida idid baidari! Abra sasrim pe Iesuidoge ikeredi.”  
\v 15 Wader legize ge detautlare, “E Elaiza dali”, a wader legize ge detautlare, “E peropeta dali mokakalam netat emeret peropeta dali.”  
\v 16 Nade Erodide able mir asri, ege detauti, “E Zone Baptaiso dali. Ka abra geka kirim dismida epe ko eudlam ekiamda.”   
\p
\v 17 Erodide tababu aresle namarikdarda Zone watirpeidarda a abi wadidbarda a obatawereda kupkpui utebge, ableglam Erodide taba baradara Pilipira koskir Erodias igardi,  
\v 18 a Zonede mena Erodi detagrer e seksek dikeredi e taba baradara koskir digardi.   
\p
\v 19-20 Erodiasira urker Zoneim barki e laglag abi waipiti, ege Erodide nole abi ipiti ableglam e geumge ikerer; e Zonei azimuarda ableglam e umele dawer Zone barkak le a zogo le dawer. Gair kerkerge Zonei miride Erodi waikeli okasosok ke wadali, Erod laglag wadali abi wasri Zonede mir waditautli.   
\p
\v 21 Erodiaside dasmeri abra kes bagida able Erodi ausmer lewerge. Erodide able lewer dirsiri taba gelar kirimieem, taba ares kirimleem a gair tarimleem Galilaialam.  
\v 22 Erodiasira neur taba badari a kaberi. Erod a able le ge abidoge emreder laglag urder abra kab. Erodide eudige abi detagri, “Ma kari nalu lugem namos, kai mari naiswere nalu lu ma laglag.”  
\v 23 Erodide able neur detagri, “Ka mari gair lu naiswere, mena obakedi netat pek kari basalaiage.”   
\p
\v 24 Able neur baka eosmeda tabara ama titmeri, “Ka nalu lugem tarautmerer?”  
\p Abi amade abi tiditagri, “Ma Zone Baptaiso kirimem teutmerwa.”   
\p
\v 25 Able neur dudumdudum sopkak ko akomeda Gesep Opleem abi tiditagri, “Ka laglag ma kari nakwar Zone Baptaisora kirim kobarge wadudawa.”   
\p
\v 26 Able Gesep Oplera au okasosok barki nade e able mir asri, e umerkak taba mir wadikarikda ableglam abi legize emetu asorda e detauti e able lu waikaida nalu lugem abi able neuret wadamsi.  
\v 27 Ege keko au dedumge aseseredle namarikdarda abim watikadarda Zonira kirim. Aseseredle bakiauda Zonira kirim tidismidarda,  
\v 28 wige eudi ikaidarda kobarge tadarda a akaidarda able neur ikwari, ege ikada tabara ama tikwari.   
\p
\v 29 Nade Zonei memeglegize able mir asorda, wige tabakiauda abra gem ikadarda paierge muige tirdidarda.  
\s1 Iesude 5,000 Le Darasisilare  
\d MRK 6.30-44   
\p
\v 30 Able kaimegiz ko tabakomerti Iesui opdipita. Wige abi detagerda gair lu ge wi ikerlare a nerwerlare.  
\v 31 Iesu a abra memegle nole ko yaba kes daragriweretlare wi lewer wairoda ableglam au mitkar le tabakeslare barter a ko bauser. Ege akaida tabara memegle daratagerda, “Wa no tabakiaure karidoge mi keimi nabakiaware sasmirkak utebem ge mi ner tarabaziei.”  
\v 32 Ege no wi bakiauda narge kei sasmirkak utebem.  
\v 33 Ege mitkar legize yabi darasmerlare wi bakiauda wige keko umele berda wi netiba darale. Wige gairle able gedlam ge naridweretlare kikem bakiauda koriderge wi gabge bakiauda able utebem kikem terpeidarda keubu ya Iesu taba memeglekem watabakarki.   
\p
\v 34 Nade Iesu narlam adem eupamadari, ege au kub lera dasmeri; abra au nas yabim barki ableglam wi urder mokakalam mamoi nole mamoi aseseredlekak. Ege eudige akaida yabi ga gair lu nerwerlare.   
\p
\v 35 Au kikem, abra memegle abim tabakiauda a abi detagerda, “Au kikem pe baida, a epe nole lekak uteb irdiredi.  
\v 36 Ma able le adem namarkare able utebem pe naridwerteda ya waiakai wi tabara lewer wairapare.”  
\v 37 Iesude yabi daratagerda, “Wa wabu yabi lewer arwem neiswerare.”  
\p Wige abi itmerda, “Nako ma laglag nali ki nabakiaware nabause bered tarapare able gair leem pe uridli? Able lewer nagriwerteda au bodom bakir bakir.”   
\p
\v 38 Iesude yabi nautmerda, “Waba naket bered nagriwerteda? Wa baka tadasmerare.”  
\p Nade wi bakiauda tadasmerda, wige abi detagerda, “Keriba no 5 bered nagriwerteda a neis lar pa nakeredi.”  
\v 39 Ege Iesude tabara memegle daratagerda wige le nakelare giringirin sogige namerda.  
\v 40 Ege le bamri ga emreder, able gair 100, able gair 50.   
\p
\v 41 Ege Iesu akaida neis bered natarukda a neis lar pa nakeredi; eudige kotor espasmuda Adi eswau ikaidari. E bered natrida a mog ikeri tabara memegle neiswerda, ya waiakai ya le ya wanaiswerda. E able korepge neis lar nakaidari le naiswerda.   
\p
\v 42 Gair legize lewer eroda mena yaba kem bosi.  
\v 43 Keubu ga, memeglegize bered a lar mog etakerda ge nade barida, wige ikerda 12 epei able mogu daramida.   
\p
\v 44 Wige 5,000 kimiar urder ge wi able bered eroda.  
\s1 Iesu Tumem Gurge Digmer  
\d MRK 6.45-52   
\p
\v 45 Iesude keko tabara memegle daratagerda wi obakiauda narge obatri a kikem obakiauda Betsaidaem ge nerut apekge tirdireder. Ege kemem emrida able lera kub wanamarikdarda.  
\v 46 E lera kub namarikdarda, ege adem bakiamuda paserem erkepwaiasameida.   
\p
\v 47 Nade ga ki asameida, able nar mena ge gurge eipuge eper, a Iesu ge tebteb ge dawer gesepge.  
\v 48 E tabara memegle darasmerlare nar ereblare wag desaredlare; keubu nedbi ipiti, e yabim maikem tidigmi tumem gurge tidigmer. E no yabimalam kei ikasereder,  
\v 49-50 wige abi erdarda e gurge tidigmer. Wige dikepwarlare e lamar dali; wige sasmir demerda ableglam wi aukaka geumge bakerer. Iesude keko yabi daratagerda, “Wa sererge uridwa. Kakanali. Wa nole geum!”  
\v 51-52 Ege eudi bakiamuda narge ogi akawerti, ege wag ekemuda. Able memegle bazigmuarti ableglam wi nole berwerda able beredlam nete Iesu agekar dawer. Yabi akepwaride nole paretkak dasmerer.  
\s1 Iesude Gimgim Le Nadgilare Genesaretge  
\d MRK 6.53-56   
\p
\v 53 Wige gur tadatupidarda tabakiauda ge wege Genesaretge, ge nade wi nar didbarda.  
\v 54 Nade ge wi narlam adem baupamarti, le ge urder abi erdarda a umele urder e nete dali.  
\v 55 Able le korider bamri gair utebge ge maike naridweretlare a gimgim le papekge erdeder wige taraislare able utebem ge nade wi asorlare Iesu dawer.  
\v 56 Gair utebem Iesu basker, kebi utebem a au utemem a gedub uteb ga nagriweretlare, legize tabara gimgimle taraislare able utebem ge nade tama nagriweretlare, wi Iesui ge damoslare e gimgim le wanakerda abi walira mop waditutirda; ege gair gimgim legize netiba ge abra wali ditutilare ege yaba gim basemrer.   
\c 7  
\s1 Lugizira Erwer  
\d MRK 7.1-13  
\p
\v 1 Wader Parisaio a Aotarle wi Ierusalemalam tabakiauda taba ge etami Iesui dairumareta.  
\v 2 Wi wader Iesura memegle nardarda taba lewer erolare wi nole tabara kikem tag N og natkirda' (able orwairorwair Parisaiogize waikereda).  
\v 3 Parisaio a gair Iudaiale wi able erwer wairmireda taba lugizlam: wi gair kerkerge tabara tag ogwaitkireda able barkak tonarge,  
\v 4 a gair kerkerge wi tababu og obatkirieda nade wi watabakomerti tamalam keubu wi lewer wairoda. A wi wairmireda mitkar wader erwer yabi lugizlam ablegise barkak tonar nako ma pankin og waitkiri, lewer akasirlu, a wader lewer arotlu a amrirlu pa nagriwerteda.   
\p
\v 5 Wige Parisaio a Aotarlegize Iesui itmerda, “Naluglam mari memeglegize nole able erwer irmireda pe merbi lugizlam nagriwerteda? Wi naluglam lewer erweda ogog tagtag?”   
\p
\v 6 Iesude yabi daratagerda, “Isaiade agekar detauti nade e wabialam detauter norgornorgor dorgelelam. Isaia ditari, “Adi detauti, Able legize no kari mirge nauspireda, wipe nole kari lagkak uridli.  
\v 7 Wi kari isorgiru epe nole karim abkorep ableglam wi tabara bar bar geiar ermeda a le nerwereda wipe nole Adira geiar le nerweredaf   
\p
\v 8 Wa Adira geiar ikereda netat pek idageda, wape no lera erwer irmireda.”  
\v 9 Iesude yabi daratagerda, “Waba erwam tonar nagriwerteda wa Adira geiar detwakeda ya waiakai wa waba erwer irmirlare.  
\v 10 Mosede aukaise detauti, “Wa wabi babiba amaei nasrawem” a “Wage gair le eudem nasrawem pe netiba tabara babiba amaei darasawersireda.”  
\v 11-12 Wape no wa le nerwereda ese yabi babiba amaei laglag wadaralei wader lu yabialam, wi yabi wadaratagerlare, “Wai babiba amaei, able lu pe 'Koban' ikeredi, e Adira lu ikeredi. Ka umerkak wabi dakware,” epe able kerkerlam pe ditimeda ma nole abi ikaidari e taba babem a amaem waikerer.  
\v 13 Able to narge pe dikeredi waba erwer, wa pewa ebrerdeda wabidoge, epe akaida Adira mir dikaidari derekak ya waikereder. A wape mitkar wader lu ko wa ikereda able orwairorwair.”  
\s1 Able Lugize Pe Le Nakereda Seksek Uridli.  
\d MRK 7.14-23   
\p
\v 14 Iesude ko lera kub darabgerda tababim a eudige yabi daratagerda, “Wa gair legize karim irispilare a wage mirem mamor wabi idonige ikedrare nalu yaka dataute.  
\v 15 Nole ko lu ikeredi e le waikai seksek obai nade able lu obakiamu abi gemge obau. Nolekar. Able le pe akaidari seksek baidari pe nalu abialam adem eosmeda.  
\v 16 Wa gair legize able mir erpeirare a wabidoge ikedrare!”   
\p
\v 17 Keubu Iesude lera kub darakaireta a bakiamuda metage badari, abi memeglegize abi itmerda able mir abisir mirlam.  
\v 18 Iesude yabi daratagerda, “Aise! Nako wako uridli able mir nole wabidoge ikeredi? Lu adlam bakiauda le gemge barti nole yabi nakerda seksek berda,  
\v 19 ableglam able lu nole barti bakiauda yabi idonige. Wi bakiauda kemge a mena bakiauda adem kemlam bausi.” (Nade Iesude able mir detauti, e yabi natomeretlare able gair lewer pe nagriweretlare legize umele wairolare).   
\p
\v 20 Iesude ga ko detauti, “Nalu lu pe lelam adem eosmeli abi ikeli seksek beli  
\v 21 ableglam muilam, le nerkeplam a idonilam pe eosmeli adud akepwar, a kogem, a erwamem, a le apit, erwamem nerut lera koskir a kimiar,  
\v 22 gair lu no mara wanagriwertawem, seksek idoni mara waikereder wader leem, besmir, adud mir, debelulag, besmir wader le daratautlare, baospirer, a paimpaim tonar.  
\v 23 Gair able au adud lu pe teosmeli le muilam yabi nakereda seksek beli.”  
\s1 Ponesia Koskirira Owatur  
\d MRK 7.24-30   
\p
\v 24 Ege Iesude able uteb dikairti a bakiamuda able utebem ge maike au utebge irdireder abra nei dikereder Taia. E bakiamuda metage badari a e nole lagkak dawer le umele oberda e ge dawer: e umerkak wadali wespili.  
\v 25-26 Koskir ge able utebge dawer Girisle: e ge eosmeda au utebge abra nei dikereder Ponesia pe Siriage irdiredi. E tabakiamuda Iesuim a abi opem kokmamu emrida e Iesuim bagwi ko dimoni adem waismeda abi neurlam.   
\p
\v 27 Ege Iesude abi ikaidari, “Ka omaskir kikem darasisiare. E seksek ikeredi ka omaskirira lewer adem takalu kai kei ka omaiem nabataweredlu.”  
\v 28 Ege able koskiride abi ikaidari, “Ople, able omai pe erdedi wi umele omaskira puipi lewer wairware.”   
\p
\v 29 Iesude able koskir detagri, “Ma barkak detautli; ma bakiamu gedim mara neur terdar ableglam dimoni emetu abialam eosmeda.”  
\v 30 Nadege able koskir bakiamuda gedge ege tabara neur terdari mapodan sikge ipereder dimoni ge emetu eosmeda.  
\s1 Iesude Asorkak A Mirkak Kimiar Idgiri  
\d MRK 7.31-37   
\p
\v 31 Ege Iesu adem bakiamuda able gedlam ge maike Taiage naridweretlare. E nerut au uteb gabem bakiamuda abra nei dikereder Saidon a no bakiamuda able ged gabem abra nei dikereder 10 Uteb mena Galilaia Nikeperge.  
\v 32 Ege kimiar ge dawer nole asorkak e umele no kebikebi mir waditauti. Kepkep legize able kimiar tigareda Iesuim a abim bagoda e tabara tag abidoge wadikmerikda.   
\p
\v 33 Iesude able kimiar erpeida ege abi adem datkimwarda yabialam ge le nikidetreder. Ge, ege tabara tagpim nakaidari ge able kimiar geripge namarikda. Ege eudige mos ikeida, a able kimiarira werut itutida.  
\v 34 Ege Iesu ga kotorem egremada, au ner batawerdi a eudige akaidari able kimiar ikaidari, “Epata”, able mir dikeredi, “Wa bauskilam.”  
\v 35 Ege keko able kimiarira girip bauskidariei a abra werut dakaidari sikak baidari: ege eudige mir detauti nole asikak.   
\p
\v 36 Iesude eudige aukaise gair le ge daratagerda wi nole able mir waibrereda wader leem, wige nole asorda. Nade e yabi aukaise daratagerlare, wige able mir mena ebreredlare.  
\v 37 Gair legize ge netiba able mir asorlare wi bazigmuarter a wi gair legize abi dispirlare. Wi detautlare, “Gair lu e ikeli epe au debele nagriwerteda. E asorkak le nadgireda ya waiakai wi umele wasorlare, a e mirkak le nadgireda ya waiakai wi umele mir waditautlare!”   
\c 8  
\s1 Iesude 4,000 Le Darasisida  
\d MRK 8.1-10  
\p
\v 1 Kebi niainiai, nerut au kub lera tababu tabakiauda etami nade Iesu dawer. Nade ga yaba nole ko nalu nagriweretlare arwem, Iesude tabara memegle tababim darabgerda a yabi daratagerda,  
\v 2 “Kara nas barukli able leem ableglam wi neis a netat gerger karidoge urdi a pe irdi yaba nole ko nalu nagriwerteda arwem.  
\v 3 Ese ka yabi gedim namarkare ka nole yabi kikem darasisiare wader yabiaiam ya gabge erkepnonor ge obaum ableglam wader yabiaiam tabakiuda au murisiam.”   
\p
\v 4 Abi memeglegize abi itmerda, “Nako lelut lewer wairdar e able le wadarasisiare able lekak uteb pe irdi?”   
\p
\v 5 Iesude yabi nautmerda, “Naket bered nagriwerteda?” Wige abi detagerda, “Keriba 7 bered nagriwerteda.”   
\p
\v 6 Ege eudi ge able lera kub daratagerda wi obakeri sepge obamri. Ege eudige 7 bered etakri, Adi eswau ikaiku, ege bered mogem itri a tabara memegle naiswerda ya waiakai wi ya lera kub wanaiswelare. Ege memeglegize ga le naiswelare.  
\v 7 Ege memegle ko urder yaba ko kepkep lar daragriweretlare. Iesude Adi eswau ikailu able larlam, a tabara memegle daratagerda wi able lar le wanaiswerare.   
\p
\v 8-9 Wige urder maike 4,000 le, yaba gair lera kem bosi nade yaba lewer aro esemuda. Nade memeglegize kaier etakerda wi dasmerda 7 epei kaier lewerlam bosi.  
\p Iesude able lera kub namarikdarda,  
\v 10 Ege keko bakiamuda taba memeglekem narge batri a bakiauda able utebem ge able gedge irdireder Dalmanutage.  
\s1 Parisaio Bautmerer Able Atamilam Kotorlam  
\d MRK 8.11-13   
\p
\v 11 Wader Parisyo tabakiauda Iesuim a abi ikaidarda ga abi desaredlare. Wi Iesui bautmerer atamilam kotorlam ableglam wi laglag abi wadamisirda.  
\v 12 Iesude eudige aukaka ner batawerdi a akiadari, “Naluglam le able kerkerge bautmeli nalu atamilam ikeredi? Ka wabi agekar detagreda, wi umerkak ya atamilam wairpeirare!”  
\v 13 Ege eudige darakaireta. E ko bakiamuda narge akawerti, wige ko bakomerti bakiauda nerut pekge nikeperira.  
\s1 Parisyora A Herodira Yis  
\d MRK 8.14-21   
\p
\v 14 Memeglegize no netat bered narge tikadarda: wi okataprike darakaireta ko wader wataisa.  
\v 15 Iesude yabi kikem daratagerda, “Wa okeoke uridwa! Wa okeoke uridwa Parisaio yislam a pako Erodi yislam.”   
\p
\v 16 Wige bakeli able mir ga ipulare tabadoge. Wi batagelare, “E able lu detautli ableglam keriba nole bered nagriwerteda.”   
\p
\v 17 Iesu umele dawer wi nalu mir batagelare ege eudige yabi nautmerda, “Wa nalu mir peua ipweda meriba nole bered kak? Wa nole peua umele uridli? Nako waba idoni au wapum dali?  
\v 18 Waba poni nagriwerteda wa nole dasmereda, waba girip nagriwerteda, wa umerkak asrare. Wa umerkak dikepwalare?  
\v 19 Nade ka 5 bered itri 5000em, wage naket epei daramida able leweru ge kaier barida?”  
\p Wige abi detagerda, “12 epei.”   
\p
\v 20 “A nade ka 7 bered itri 4000em, wage naket epei daramida able leweru ge kaier barida?” Wige abi detagerda, “7 epei.”  
\v 21 Iesude eudige yabi daratagerda, “Nako wa mena umerkak uridli?”  
\s1 Iesude Sadmerle Idgiri Betsaidage  
\d MRK 8.22-26   
\p
\v 22 Wi bakiauda Betsaiadage bakarki nade ge wader legize sadmerle tigareda Iesuim. Wi abim bagoda Iesude abi waitutida.  
\v 23 Iesu akaidari sadmerlera tag derpeidari a abi adem utebiam datkimuada. E sadmerlera poni mosu ditwi a tabara tag ikaida abidoge dikmerida. A eudige eutmeri, “Nako ma lu darasmereda?”  
\v 24 Able kimiar eudige egri a abi detagri, “Ka le darasmereda; wi uridli mokakalam lu wipe daragmeda!”   
\p
\v 25 Iesude ga tabara tag nakaidari able kimiarge namarikdari. Able kimiaride ga aukaise dasmeri; e umele wadasmeli gair lu paretkak. Abra poni ge badgirda.  
\v 26 Iesude able kimiar ko emarikda taba gedim. E able kimiar detagri, “Ma bakiamu gedim, mage nole ko bakiamu able utebem.”  
\s1 Peterude Natomereta Nete Iesu Dawer  
\d MRK 8.27-30   
\p
\v 27 Ege Iesu a abra memegle aden bakiauda gair utebem ge Sizaria-Pilipaige naridweretlare. Wi gabge nakasirweretlare ege Iesude yabi nautmerda, “Wa kari natagrare, nako legize detauteda kaka nete nali?”   
\p
\v 28 Wige abi detagerda, “Kepkep legize detauteda mama Zone Baptaiso nali: a wader legize pe ikereda mama Elaiza nali: a wader legize pe detauteda mako pema nali able netat le peropetalam.”   
\p
\v 29 Iesu yabi nautmerda, “Wawa uridli? Wape nako peua detauteda kaka nete nali?”  
\p Peterude abi detagri, “Mama Keriso nali!”   
\p
\v 30 Ege Iesude ge yabi kelarkelar daratagerda nole ko able mir waditauteda netat leem.  
\s1 Iesude Kikem Detauter Abra Asiasi A Abra Eud  
\d MRK 8.31—9.1   
\p
\v 31 Ege Iesu eudige akaidari tabara memegle ya wenerwereda, “Abie Lera Werem ya au asiasi wadigi. Aule, Kirim merkemle a Aotale ya abi wadituaklare. Abi ya waipitare, nade neis a netat gerger obarkare e ya ko idid waiakai.  
\v 32 E paretkak able lu yabim daratautlare.  
\p Peterude abi kebikebi wader lelam adem igardi eudige akaida abi tetaperti.  
\v 33 Iesu tabatawirikda taba memegle darasmerda, eudige Pererui ertaperti. E abi detagri, “Ma adem bakiamuda karialam, Satana! Mara akepwar no lera akepwar nagriwerteda. Wi nole Adira akepwar nagriwerteda!”   
\p
\v 34 Iesude eudige tabara memegle tababim dabgerda a wader le pa uridli. E yabi daratagerda, “Nale laglag karidoge watabakiamu e nole tababu obakepwarwa, tabara satauro watepwa a kari watararmirwa;  
\v 35 ableglam na lelut laglag tabara idid weper ei weumi: nale karim weumi a pako debe mirge e ya tabara idid watirpei.  
\v 36 Nako lelut agekar sikak wadawer ese abi kemerkemer able gesep obakwar ei weumi? Nolekar!  
\v 37 Lelut umerkak tabara idid ko wairapei.  
\v 38 Nale yabialam able mitkar witwit a seksek lelam kari wanatuak a pako kara mir, Lera Werem dali ei abi ya watidituak nade e watabakiamu muige taba Babi zoromge taba zogozogo angela kem.   
\c 9  
\p
\v 1 Ege Iesu akaidari yabi daratagerda, “Ka wabi agekar detagreda, wader le pe able gergerge ekedi ya mena idid waurder nade wi ya wadasmerare Adira Basalaia watabakiamu au kelarkelar.  
\s1 Iesu Epigemelu  
\d MRK 9.2-13   
\p
\v 2-3 6 gerger barukda, Iesude yabi natakridare Peteru, Zemis a Zone yabi a wige abi irmirdare au aremarem paserem ge nole lekak irdireder. Nade wi ga dasmele, ege Iesu epigemelu; abra wali akaidari zoromzorom zarzerzarzer baidari - nole netat le able gesepge tabara wali waikaidari able zarzerzarzer obaidari.  
\v 4 Wige dasmerdare Elaiza a Mose Iesui mir detagelei.   
\p
\v 5 Peterude akaidari Iesui detagri, “Erwerle, audebele ikeredi ki peki dale. Ki umele 3 mud dauridere - netat mara, netat Elaizara a netat Mosera.  
\v 6 Peteru a neis memegle yaba geum barkidare. Ableluglam Peteru e nole umerkak dawer e nalu mir waditauti.   
\p
\v 7 Baz tikada bakmerikda yaba mud. Bazlam kodomir teosmeda, “Kara nasnas werem pedali. Abi asrawem.”  
\v 8 Nade wi erkep etardare, wige dasmerdare Iesu tebteb ikeireder.   
\p
\v 9 Nade wi tabidare paserlam, Iesude yabi daratagerda, “Wa nole netat le detagridare nalu lu ge wawa dasmerdare.” No pe ikeredi nade ya Lera Werem eudlam wekiam wi umele ya le wadaratagerlare.  
\v 10 Wige abra mir dasorda, wige no tabara batagelare nalu agekar lu ikeredi 'eudlam ekiamda'.   
\p
\v 11 Wige eudige Iesui itmerda, “Naluglam Aotarlegize detauteda Elaiza kikem watatabakiamu?”   
\p
\v 12 Iesude yabi daratagerda, “Agekar Elaiza kikem tabakiamuda ko gair lu wadararsirare. A mipe nalu pemi etagada nako Lera Werem dali muige Zogoziawalige? Mi etageda e asiasi wadigi a abi wadituaklare!  
\v 13 Ka wabi detagreda, Elaiza emetu tabakiamuda, ege legize abim adud tonar ikelare nalu ge wi laglag urder, able mokakalam able orwairorwair pe mimi abra ad detagreda.”  
\s1 Iesude Demoni Able Weremlam Adem Ismeda  
\d MRK 9.14-29   
\p
\v 14 Nade wi takomertidare wader memegle nardarda, wige erdardare au kub lera yabi daramuareta, a wader Aotale memeglekem basaredlare.  
\v 15 Ege legize erdarda, wi bazigmuarti a korider abim bamri ko abi watigareda.  
\v 16 Iesude tabara memegle nautmerda, “Wa naluglam pewa tabasardeda?”   
\p
\v 17 Ege kimiar ge le kub ge dawer abi akaida abi detagri, “Erwerle, ka kara werem marim tigardi e umerkak mir waditaut ableglam abra dimoni abidoge dali.  
\v 18 Nade abi dimonide wairser, epe abi obatawerder sepem, epe abra sik tege obapaitlare, e tabara tirig waikupamater a abra gem lid obatrer. Ka mara memegle daramosa ko able dimoni waismerdarda, wi umerkak waikaidarda.”   
\p
\v 19 Iesude yabi daratagerda, “Wa owaturkak le uridli! Ka na niainiai yaka wabidoge nawar? Ka na niainiai yaka okasosok wabialam digier? Wa able werem kei karim tigardare.”   
\p
\v 20 Wige able werem tagareda Iesui ikwarda. Nade able dimonide Iesui erdari, ege able le deskerder kei itimder a kei itimder, a eudi sepge abi, sepge epitrer a sik abra tege bapaitlare.”   
\p
\v 21 Iesude able lera bab itmeri, “E na niainiai able orwairorwair wadawer?”  
\p Ege abi ikaidari, “Able kerkerlam nade e kebi werem wadali.  
\v 22 Mitkar kerkerge dimonide abi waiker ko abi waipiti e abi obatawerder urem a niem. Ma kerbi omarge; mai umele kerbi upiditidarare?”   
\p
\v 23 Iesude eudige abi detagri, “Ma umele iker! Na lera pe owatur daragriwerteda e umele gair lu waiker.”   
\p
\v 24 Ege keko able wermira bab erer ekri, “Kara owatur ikeredi, epe no kebile ikeredi. Ma kari upinati ya waiakai kara owatur waiakai aule obai!”   
\p
\v 25 Iesude dasmeri lera kub etamier; ege au kelarkelar dimoni detagri, “Asorkak a mirkaka dimoni, ka mari kelarkelar detagri ma adem teosmer able kebilelam a mage nole ko bakiamu abidoge bau!”   
\p
\v 26 Ege dimonide sasmir dimri, eudige able kebile aler deskerdi, a adem teosmeda. Gaie le ge urder eudige natkareta, “E eumida!” ableglam able kebile mokakalam dali eudle.  
\v 27 Ege Iesude able kebilera tag derpeida a abi agisida ege akaida ekeida.   
\p
\v 28 Keubu, nade Iesu tebteb bakiamuda badari able metage, abi memeglegize titmerda, “Ki naluglam nole ki able dimoni adem ismerdarda?”   
\p
\v 29 Iesude yabi daratagerda, “No erkepasamide umele able orwairorwair lu adem waismer.”  
\s1 Iesude Tabara Eud Ko Detauter  
\d MRK 9.30-32   
\p
\v 30 Wi able uteb dikaireta wige nakasir Galilaiage. Iesu nole lagkak dawer umerkak nerut le umele obaida e nade dawer,  
\v 31 ableglam e tabara memegle nerwerlare. Iesu yabi daratagerda, “Able Lera Werem ya waiperare a waigardare able le wanakwarare ya wi abi waipitare. Neis a netat gerger ya obakare e ko ya eudlam wekiam.”  
\v 32 Wige nole akmerkak urder e nalu detauter, wige geumge bakerer abi waitmerda.  
\s1 Nete Aukakale Dali?  
\d MRK 9.33-37   
\p
\v 33 Wi taba Kapanamge bakarki. Nade wi bakiauda metage barti, ege yabi nautmerdi, “Wa naluglam pewa gabge tabasardeda?”  
\v 34 Wige nole mir natkareta ableglam nade wi gabge tarakasir wige tabasaredlare nete aukakale dali.   
\p
\v 35 Iesu akaida emrida a 12 memegle tababim darabgerda. E yabi daratagerda, “Nete laglag kikem wadawer e tababu obakai keubu watadawer gair lege a e wadawer gair lera memegle.”   
\p
\v 36 Iesude eudige netat kebi omaskir erpeidari a ikaidari eipuge ikeidari taba memeglege. Ege eudige akaidari abi gasu erpeidari a yabi daratagerda,  
\v 37 “Ese netide karim able netat kebiwerem waseserder pe able kebiomaskir uridli, e kari ko naseseredli a pako able Le ge kari taramarikda.”  
\s1 Netide Pe Dorge Ikeli Merbi Asaredkak E Merbim Dorge Ikeli  
\d MRK 9.38-41   
\p
\v 38 Zonede abi detagri, “Erwerle, ki kimiar dasmerlare e mari neige dimoni adem iser. Ki abi detagerda, “Ma ge ekwei ma nole able lu ko iker” ableglam e nole merbidoge ikase.”   
\p
\v 39 Iesude yabi daratagerda, “Wa nole ko abi daisumdarawem e ge wekweiwa able lu akerkak. Na lelut nadgireda kari neige umerkaka waditaut adud mir karim.  
\v 40 Netide Pe Dorge Ikeli Merbi Asaredkak E Merbim Dorge Ikeli.  
\v 41 Netide mari gebgeb ni nakwarli ariem ableglam wa Kerisora uridli e ya tabara bodomalam watirpei.  
\s1 Mirem Wader Le Nakelare Wit Waikelare  
\d MRK 9.42-50   
\p
\v 42 E ya aukaka seksek lu waikerider ese netide waditager netat able kebilelam e wit waikai pe abra owatur karidoge dikeredi. E ya audebele waikereder ese idid bakir obamri able le taboge a abi gurem obatimed.  
\v 43 Ese mari tagide mari wanakai ma wit ikai mage abi adem ismi. E debele ikeredi ma idid ge bau no netat tagtag. Ese mara neis tag wanakereder mai bakiamu Urasamkak.  
\v 44 [Pe nade, “Yaba uk umerkak obaum a ur umerkak obasamare.”]  
\v 45 Ese mari teteride mari wanakai ma wit ikai mage abi adem ismi. E debele ikeredi ma idid ge bau no netat teterteter. Ese mara neis teter wanakereder mai bakiamu Urasamkak.  
\v 46 [Pe nade, “Yaba uk umerkak obaum a ur umerkak obasamare.”]  
\v 47 Ese mari ponide mari wanakai ma wit ikai mage abi adem bataured. E debele ikeredi ma Adi Basalaiage bau no netat poniponi. Ese mara neis poni wanakereder mai bakiamu Urasamkak.  
\v 48 Pe nade, “Yaba uk umerkak obaum a ur umerkak obasamare.”   
\p
\v 49 Gair le ya solsol waturder urger watabatitilare.   
\p
\v 50 Sol pe debelu dali. Ese waiakai lagkak obai, netat lelut ya umerkak waikai solsol ko obai. Wa mokakalm uridwa solise pe debe solsol lewer waikereder; wa mapodan uridwa wader lekem.”   
\c 10  
\s1 Iesude Le Nerwerlare Nalu Lu Dikeredi Wa Batwakam  
\d MRK 10.1-12  
\p
\v 1 Iesude able uteb dikairti ege bakiamuda Iudaiage a bakiamuda Ioridanoi datupida. Au kub lera ko taba etami abidoge a ege yabi nerwerlare mokakalam ge e able lu gair kerkerge ikerer.   
\p
\v 2 Wader Parisaiole tabakiauda abim ko abi taba miru wadamisirda. Wi eudige abi itmerda, “Ma kerbi detagrare, muige kerbi gelarge, aka kimiargize umele tabara koskir wadaratuakare?”  
\v 3 Iesude ge yabi nautmerda, “Wabi Mosede nako wabi waditagreda?”   
\p
\v 4 Wige abi detagerda, “Mosede kerbi detagerda kimiargize umele tabara atwak-ziawali waditalare a wi tabara koskir adem wanamiklare.”   
\p
\v 5 Iesude yabi daratagerda, “Mosede able kelarkelar mir ditari wabim ableglam wabi umerkak waderwerlare.  
\v 6 Nadege bagrarti, nadege gesep batagmer able kerkerge, Adide ge yabi daratagmi kimiar iba koskirei.  
\v 7 Ableluglam pa ikeredi, kimiargize tabara baba iba apuei wadarakairetlare wi obaker taba koskirge obakep,  
\v 8 a able rieisya waiakailam netat obailam. Wi nole neis wadaralei, wi netat wadaralei.  
\v 9 Pa dikeredi, lelut nole laglag wadaratakemu nalu ge Adide okasise daratkaprikda.”   
\p
\v 10 Nade wi bakomerti bakiauda metage barti, ege able memeglegize Iesui titmerda able iuglam.  
\v 11 Ege yabi tadaratagerda, “Na kimiargize pe tabara koskir daratwakeda ei nerut koskir waispi wipe taba koskirem adud tonar ikereda.  
\v 12 Able orwairorwair, na koskirgize pe tabara kimiar daratwakeda ei nerut kimiar ge espi wipe taba kimiarem adud tonar ikereda.”  
\s1 Iesude Kebiomaskir Obdarapita  
\d MRK 10.13-16   
\p
\v 13 Wader legize omaskir taraisa Iesuim ko e yabi wanatutirda ege memeglegize le natapereta.   
\p
\v 14 Nadege Iesude able lu dasmeri, ege abra lidbagebda. E akaida tabara memegle daratagerda, “Wa omaskir nakerare wi karim watabakiauare. Wa nole yabi taramrare ableglam Adira basalaia pe ikeredi leem mokakalam wi uridli.  
\v 15 Ka wabi agekar detagreda, netide nole Adi basalaiaiem wadabger able korepkorep pe kebiwerem dali ei umerkak ya obau.”  
\v 16 Ege tabara tag nakaida gasu able omaskir narepda, a nakaida yabidoge darakmerikda a werkab yabi nakwarda.  
\s1 Kirgir Lugizkemle  
\d MRK 10.17-31   
\p
\v 17 Nawer Iesu ga marbamarker obakiamuda, ege le abim korider temrida a kokni erapeida abi opem. E eudige Iesui itmeri, “Debe erwerle, ka nalu lu akere ya waiakai ka niai idid tarpeilu?”   
\p
\v 18 Iesude abi itmeri, “Ma naluglam kari nabgeli debele? No pe Ad dali debele.  
\v 19 Ma umele nali 10 geiar:' ma nole ipitwa; ma nole kog derevwa; ma nole erwamem; ma nole besdiridwa; ma nole okaderdar; ma mara bab a ama narmirwa?”   
\p
\v 20 Able kimiaride abi detagri, “Erwerle, ka able gair lu narmireda able kerkerlam nade kaka kebiwerem watarali.”   
\p
\v 21 Iesu egremada abi barkak omaromar dasmeri a abi detagri, “Ma no netat lu laglag nali. Bakiamu mage mara gair lu iker wi wairapare, mage mara gair bakir ais lukak le naiswerare. Mara ya mamor kotorge wataragri. A tabakiamu kari narmir.”   
\p
\v 22 Nade kimiaride able mir asri, abra op depigemeda akaidari okasosoksosok erkep ga ikereder. E adem bakiamudari auka okasosoksosok ableglam abra mitkar bakir nagriweretlare.   
\p
\v 23 Iesu akaida tabara memegle darasmerda a eudige yabi daratagerda, “Lugizkem leem au sagimsagim ikeredi wi obarot Adi basalaiage!”  
\v 24 Ege memegle bazigmuarti able mirlam. Ege Iesude mena detauter, “Kara omaskir, e au sagimsagim ikeredi le obarot Adi basalaiage!  
\v 25 Lugizkem lera aukaka sagim daragriwerteda wi obarot Adi basalaiage pe kamela dali e obakiamu obau wali atketlu nebge.   
\p
\v 26 Wige aukaise ga bazigmuarti nade wi able mir asorda. Wi tabara bautmerlare, “Pe irdiredi, nete ya idid watakai?”   
\p
\v 27 Iesude ga yabim barkak darasmerda a yabi daratagerda, “Legize tebteb umerkak able lu waikerare ei Adide umele waiker. Adide umele gair lu waiker.”   
\p
\v 28 Ege Peterude eudige abi ikaidari, “Ma dasmer, kiki emetu gair lu dikrida a paki mari namireda.”   
\p
\v 29 Iesude eudige abi tikaidari, “Kaka mari agekar natagerli, na legize pe tabara uteb, barada, sisi, ama, bab, omaskir a gedub darakareta karim a debe mirge  
\v 30 ya wairpare aukakale able kerker pe irdiredi. E 100 uteb, barada, sisi, ama, bab, omaskir a gedub ya watirep - a asiasi pa nagriwerteda. A able kerker pe irdi ya obaruk e ya niai idid watirpei.  
\v 31 A netiba mitkar pe kikem uridli wi ya keubu waturder, a netiba pe keubu uridli wi ya kikem waturder.  
\s1 Iesude Tabara Eud Ko Detauti  
\d MRK 10.32-34   
\p
\v 32 Wige gabge nakasirweretlare kei Ierusalemaem; Iesu ge kikem ikasereder memeglege. Ege memegle bazigmuarti, a legize ga abi keubu irmirlare wige geumge bakerer. Iesude ko tabara memegle naisa netat pekge nakoda a no yabi daratagerda able lu ya abim watabakerare.   
\p
\v 33 E yabi daratagerda, “Wa asrare, mi pemi dikasir Ierusalemaem ya nade Lera Werem wairpeirare a waigardare Kebi Kirim Merkem a Aotarle wanakwarare. Wi ya waditautlare e seksek le dali, a wi ya waditautlare abra bodomalam pe dikeredi end. Wi ya abi waipeirare a waigardare nogleem.  
\v 34 Noglegize ya abi neg wadigalare, abi mosu waitulare, abi wadamrikare a abi waipitare. Neis a netat gerger ya obarkare, e ya ko wekiam idid wakai.  
\s1 Zemis A Zone Iesui Itmerlei  
\d MRK 10.35-45   
\p
\v 35 Ege Zemisiba Zonei, Zebidaiora werem, wi tabakiamudariei Iesuim. Wi taba abi ikaidariei, “Erwerle, ki laglag ma kerbim nerut lu ikai.”   
\p
\v 36 Iesude ge yabi nautmeri, “Wa nalu lu laglag dali ka wabim akailu?”   
\p
\v 37 Wige abi detagriei, “Nade ma ya temri mabi zoromzorom basalaiage, ki laglag kiko taramrile maridoge; netat mari narbit pekge a netat mari ber pekge.”  
\v 38 Iesude eudige yabi daratagri, “Wa nole umerkak dali wa nalugem eutmereiei. Nako wa umele able asiasi iriam mokakalam able asiasi ya kaka arie? Nako wa umele bapataiso bapaiteredlam okasosokge mokakalam ya kaka nabapaiteredlu okasosokge?”   
\p
\v 39 Wige abi ikaidariei, “Wao, ki umele akailei.”  
\p Ege Iesude yabi daratagri, “Wa ya iriam nalu ya kaka arie, a wa ya bapataiso bapaiteredlam mokakalam ya kaka bapataiso nabapaiteredlu.  
\v 40 Ka nole ka able le nali kaka itutilu nete ya kari narbit pekge wetemri a kari ber pekge. Able uteb ge barsirlare barkak leem, a able uteb ya no able le watabaiswer.”   
\p
\v 41 Nadege wader 10 memeglegize able mir asorda ege yaba lid bagebda Zemisibim Zoneei.  
\v 42 Iesude yabi gair darabgerda tababim a eudige yabi daratagerda, “Wa umele uridli pe noglege tike yabi kirim le sasrimge turidli, a able legize pa wader le aukelarkelar sirdarameda.  
\v 43 Epe wabidoge pe ikeredi, waba tonar ya tabara wanagri. No able tonar pe dikeredi ese netat wabialam aukaka le wadawer e kikem wakai memegle obai waba kemerkemer lera.  
\v 44 No able gab pe ikeredi ese netat wabialam waiakai kikem obai e kikem wakai au akekerakeker memegle obai;  
\v 45 ableglam Lera Werem ko tabakiamuda leem dorge waikerer, nole legize abim dorge waikelare. E tabakiamuda tabara idid waikwar bodomalamise gair leem.”  
\s1 Iesude Batimasi Able Sadmer Le Idgiri  
\d MRK 10.46-52   
\p
\v 46 Wi tabakiauda Zerikoge. Nawerge Iesuiba taba memeglekem a lera kub pa ikeredi Zerikolam nakasirweretlare, able sadmer kimiar abra nei dikereder Batimas (e Timaiasirs werem) gabge imireder a leem bakirem bagwer.  
\v 47 Nade legize abi detagerda Iesu Nazaret Le pe ikasiredi, ege eudige ererekri a barbori, “Iesu! Dawitara werem! Ma kari omarge nakai!”  
\v 48 Ege gair legize etapereta a abi detagerda, “Ma mirkak emri.” Ege auka aler ko babori, “Dawita weem! Ma kari omarge nakai!”   
\p
\v 49 Iesu ekeidari a abi mir detauti, “Wa abi kei dabgerare.”  
\p Ege able le ge urder sadmer le dabgerda. Wi abi detagerda, “Ma sererge akai, a ekei! E mari tarabgeli.”  
\v 50 Ege tabara gemwali adem igida, aududumdudum ekweida, a Iesuim bakiamuda.  
\v 51 Iesude eudige abi itmerda, “Ma nalu laglag nali kaka marim akerer?”  
\p Ege abi sadmer kimiaride detagri, “Erwerle, ka laglag nali lea koka dameri.”   
\p
\v 52 Iesude abi detagri, “Mari owaturide mari nakaidari sikak baidari. Ma umele bakiamu.”  
\p Ege keko able kimiaret umele wadasmeri, ege eudige Iesuidoge atabemeda ga bakiauda.   
\c 11  
\s1 Iesu Ierusalemage Balu  
\d MRK 11.1-11  
\p
\v 1 Wige tabakiauda maike Ierusalemage. Wi taba kikem ge able utebge Betpeiz a Betenia ge Oliwa Paserge. Iesude tabara kikem neis memegle namarikda.  
\v 2 Iesude yabi daratagri, “Wa bakiamulam able utebge pe noko kikem irdiredi. Pe noko muige able utebge wa asinara werem ya erdaram pe noko tidimriredi. Nole le abidoge egimudari. Wage tidituimerlam a kei tigaredlam.  
\v 3 Ese nalelut wabi waditmerwa, “Wa naluglam able ikereiei?” wage abi detagerwam, “Ople laglag dali. E ya abi kei dudumge watimarik.””   
\p
\v 4 Wige bakiamudariei a able asina erdariei metage adge ekweireder, tege dimrireder. Nawer ga wi ditwimeretlei,  
\v 5 wader le ge urder yabi nautmerlei, “Wa nalugem wa asina ditwimerteiei?”  
\v 6 Wige yabi daratagerda nako ge yabi Iesude tadaratagri, ege le laglag berda.   
\p
\v 7 Wige able asina tigardi Iesuim. Wige tabara amiwali tumem asinage isigirda, a Iesu ge akarikda tumem emrida.  
\v 8 Mitkar legize tabara amiwali gabge isigerlare, a wader legize lutam isimlare gedublam a gabge isigerlare.   
\p
\v 9 Lege kikem Iesuidoge nakasirweretlare a keubu ga tarakasirweretlare ererbakrier, “Mi Adi daospirlare! Adira werkab able lege ikeredi ge tabakiamuda Ople neige!  
\v 10 Adira werkab pe merbi bab Dawitai basalaiage ikeredi! Able basalaia pe tikase! Gair aospir Adim!”  
\v 11 Iesu Ierusalema balu. E bakiamuda au zogometa badari a erkep ikereder gair lu ge darasmerlare. Ege bakiamuda eosmeda ko akomeda Beteniem taba 12 memeglekem ableglam au kikem irdireder.  
\s1 Iesude Turumkak Lu Ikaida Ekemuda  
\d MRK 11.12-14   
\p
\v 12 Nerut gergerge wi Benenialam tabakomerti. Ege Iesura werer barki.  
\v 13 Ege egremada aukaka lulam iulam lu murisge taraireder nole agegkak ege bakiamuda able luge agegem watadasmeri nako abra ageg tadaramer. Ege no lam tidiwereder ableglam abra nole kerker dirdireder abra ageg obakerda.  
\v 14 Iesude eudi able turumkak lu detagri, “Lelut umerkak ya marialam kurup ko wairo.” Abi memeglegize asorlare e able mir detauter.  
\s1 Iesu Bakiamudari Au Zogometaem  
\d MRK 11.15-19   
\p
\v 15 Nade wi tabakiauda Ierusalemage bosi, Iesu bakiamudari au zogometage badari a eudige gair le adem taramuda ge wi lu baraplare a salem ikelare. E able lera yaba zorom bakir apigerlera laulau irpi adem dikri didbi a eraskiri a pako amrir bao able lera daragri ge wi dibadiba salem ikelare.  
\v 16 E le daramagerda, “Wa nole lu ko aisare zogometa gabem.”  
\v 17 Ege le ga nerwerda. E yabi daratagerda, “Able mir bautarda zogoziawalige: Kara metaya ivadabgerlare erkepasam meta able legize gair gedlam wape no pewa detauirikdarda akaidari erwamlera kur baidari!”  
\v 18 Kebi Kirim Merkem legize a Aotalegize able mir tasorda, wige bakeri mir ipulare nalu korepkorep wi Iesui waipita. Wi abi geumge bakerer ableglam kemerkemer lege bazigmuarti able erwerlam.   
\p
\v 19 Nade kupkupi kega atraper Iesu a abra memegle pa duridli adem bakiauda able au uteblam.  
\s1 Turumkak Lu Ekemuda  
\d MRK 11.20-26   
\p
\v 20 Nerut idim kakarge, nade wi gabge nakasirweretlare, wige able turumkak lu erdarda. Able lu sipkem ikemuda.  
\v 21 Peterude dikepwali nalu ge tabakerda ege akaida Iesui ikaidari, “Erwerle ma kei egremar! Able lu ge mama detagri e eumida!”   
\p
\v 22 Iesude eudige yabi daratagerda, “Waba owatur Adidoge waikedawa.  
\v 23 Ka wabi agekar detagerda, ese na lelut able paser waditager, “Ma mabu bataruk a mabu batimed gurem,” a nole abra nerkepge wadimarik, ese no wairmirer nalu e waditaut ya watabakerlare, e ya abim ya obakerlare.  
\v 24 Abieluglam kaka wabi detagreda, nade wa erkepbasamwa a bamsawem nerut lugem, oetrawem wa ya ereplare, a wa ya ereplare nalu lu wa ya damoslare.   
\p
\v 25 A nade wa erkepasamwa, ese waba lidobageblare wader leem, wa nole yabim ipitawem nalu ge wi wabim ikerda, ya waikakai waba Bab kotorge wabi wadimaiderdare wabi witlam.”  
\v 26 [Ese wa umerkak wader le daramaideredlare, waba Bab kotorge umerkak wabi wadimaiderdare wabi witlam.]  
\s1 Iesura Sasrim  
\d MRK 11.27-33   
\p
\v 27 Wi tabakomerti Ierusalemage. Nade Iesu ga tidigmer tabakiamuda Au zogometage, ege Kebi Kirim Merkem Le a Aule pa uridii abim tabakiauda  
\v 28 a abi itmerda, “Mara nalu sasrim ikeredi mape able lu ikeli? A netide mari able sasrim nakwari?”   
\p
\v 29 Iesude yabi daratagerda, “Ka ko wabi kara netat lu dautmerare. Ese wa kari natagrare kai wabi yaka detagrare nalu sasrimge kaka peka able lu ikeli.  
\v 30 Wa kari natagrare, nako Zonera sasrim dikeredi le baptaiso wadarapaitlare tabakiamuda Adilam? Ese nole, nako e lelam ikeredi?”   
\p
\v 31 Wige eudige bakeri ga tabara basarediare, “Mi nalu mi detautlare? Ese mi nabatkarte, “Adilam ikeredi”, e merbi ya waditagrare, “Wage naluglam nole Zone asorlare?”  
\v 32 Ese mi datautare, “No lelam ikeredi -". (Wi le geumge bakerer ableglam gair le umele urder Zone ge agekar peropeta dawer.)   
\p
\v 33 Ableluglam, yaba mir Iesuim ikereder, “Ki nole umerkak.” Iesude ge yabi daratagerda, “Kai umerkak wabi detagrare nalu sasrimge kaka able lu ikeli.”   
\c 12  
\s1 Waina Gedub A Asesared Le  
\d MRK 12.1-12  
\p
\v 1 Ege Iesude yabi daratagerlare mir abisir miru: “Kimiaret tabara luneg waina gedubge irti. Ege kar irki abi deraweidari, e awak dirbi waina agmem a meta dimri muige gedubge. Ege wader asesered le namarikdarda bakiauda gedubge urder ya waiakai wi abi wader lewer waiswereda. Ege bakiamudari muris gedim.   
\p
\v 2 Nade ga nur kerker itutidari, ege tabara dorge le emarikda able asesered leem ko yabiaiam abra arapergair wataisa able nur kerkerlam.  
\v 3 Ege asesered legize able dorge le erpeidarda a eparsirda a abi emarikdarda nole lukak.   
\p
\v 4 Ege able kimiaride nerut dorge le emarikda; ege able asesered legize able dorge le kirimge eresa a abi aiselare.  
\v 5 Ege nerut dorge ga emarikda, wige abi ipita. Ege able lelut wader mitkar dorge le ga emarki; asesered legize yabi nareslare a wader ge eudem naresa.   
\p
\v 6 Ege able kimiarira no netat le barikda ko waimarikda - abra nasnas werem. Ege keubu ga emarik abra werem bakiamuda asesered leem. E dikepwarer, “Wi ya sikak kara werem wairpeirare.”   
\p
\v 7 Nadege able asesered legize abi erdarda, wige tabara batagelare, “Able lukem lera werem pe ikase. Tabakiaware, mi abi apitare, able gedub ya wakai meriba obai!”  
\v 8 Wige abi erpeidarda a ipita, a abra gem adem gedublam bataweredarda.   
\p
\v 9 Iesude yabi nautmerda, “Aka wa nako dikepwareda able gedub kemlelut nalu ya nerut lu waikai? E ya watakomer a yabi asesered le ya wanarsare, a wader kerkar asesered le ya waiker gedubge wanamrare.  
\v 10 Wa dikepwarare able mog zogoziawalilam wawa emetu etageda: 'Able bakir, amer le detuakda e akaidari agekar bakir baidari.  
\v 11 Oplede able lu ikeri e merbi poniem sikak ikeredi”'   
\p
\v 12 Wige laglag urder Iesui gelar pekge wairpeidarda ableglam wi umele urder able mir abisir miride yaba gem ermer. Wige no geumge bakerer ableglam lera nikidetreder. Wige abi ge dikaireta wige adem bakiauda.  
\s1 Kaisai Bodomalam Aiswer  
\d MRK 12.13-17   
\p
\v 13 Wi wader Parisaio le a Erodira le lesuim taramirikdarda ko abi tabara miru wadamisirda.  
\v 14 Wi tabakiauda ge abidoge a abi detagerda, “Erwerle, ki umele uridli ma gair kerkerge agekar waditauter a ma nole le geumge wekerer. Ki umele uridli ma nole girip wairdirer able leem e nete dali; ma le agekar wanerwerlare Adira gab. Ma kerbi detagrare, pe keriba geiar ikeredi, nako e agekar ikeredi mi Kaisai bodomalam aiswelare? Nako nolekar?”   
\p
\v 15 Ege Iesude umele wadasmeli yaba mir amisir. Ege yabi nautmerda, “Wa naluglam mokakalam ikereda kari namisreda? Wa zorom bakir tikadarare ya waiakai ka dasmere.”   
\p
\v 16 Wige bodom bakir abim tikadarda ege eutmeri, “Netira nei iba opei pe nauperedi?”  
\p Wige abi detagerda, “Kaisara.”   
\p
\v 17 Ege Iesude yabi daratagerda, “Wa Kaisai aiswerawem nalu lu pe Kaisara nagriwerteda, a Adi aisweawem nalu lu pe Adira nagriwerteda.” Wige abi miriam bazigmuarti.  
\s1 Sadusaiora Bautmerer, “Mai Nako Eudlam Ekiam?”  
\d MRK 12.18-27   
\p
\v 18 Wader Sadusaio tabakiauda Iesuim (wipe waditautlare le ya umerkak eudlam obakiam).   
\p
\v 19 Wige Iesui detagerlare, “Erwerle, Mosede kerbi gelarge ditari ese kimiar nole omaskirkak weieumi able kimiar baradade ya abra maik wadispi ya waiakai able omaskir ya obos abi baradaem.  
\v 20 7 barada urder. Narbit baradade koskir ispida ege no eumida nole omaskirkak.  
\v 21 Ege nerut baradade ga abra maik dispida, a ega eumida nole omaskirkak. Able lu ko akaida nerut baradaem,  
\v 22 a able lu gako akaidari gair able barada ge urder. Gair able 7 barada baumi nole omaskirkak. Keubu ga koskir ko eumida.  
\v 23 Able kerker watabaruk nade ya eudle obakiamu ididem, ei netira koskir ya wadawer? Ege gair 7 baradage ispida.”   
\p
\v 24 Iesude yabi daratagerda, “Wawa seksek le uridli ableglam wa nole umerkak zogoziawali a waba nole Adira sasrim ikeredi.  
\v 25 Nade eud le obakiamu ididem wi ya waurder angelaise waturder kotorge; kimiar koskirkem ya umerkak ko tabara watabasiblare.  
\v 26 Agekar, eud le ya obakiamu. Ese wawa emetu etagda able ziawali ge Mosede ditari, muige able adge ge ur edger luneg ititier wa emetu pewa waitaglare Adide Mosei detagri, “Kaka peka abra Ad nali Isakara a Iakobara.  
\v 27 Ei idid lera Ad dali, e nole eud lera dali. Wawa aukaka seksek dikepwareda!”  
\s1 Aukaka Gelar  
\d MRK 12.28-34   
\p
\v 28 Netat le Autarlelam ge dawer able mir asri ge wi miripulare. E asri Iesude barkak mir Sadusaio daratagerda. Ege tabakiamuda lesuim ko abi waitmeri, “Nalu gelar pe aukakale ikeredi?”   
\p
\v 29 Iesude abi detagri, “Able aukaka gelar pe ikeredi, 'Israla le, wa asrare! Ople meriba Ad E Ople tebteb dali.  
\v 30 Wa omar waba Ople waba Ad kemerkemer waba nerkepu a kemerkemer waba lamaru a kemerkemer waba idoniu a kemerkemer waba kelaru!  
\v 31 Maike pe able aukaka gelarge ikeredi, \it Wa able le omarge nakerawem pe wabidoge maikes uridli able orwairorwairpe wawa wabu omarge bakereda \it* Nole ko nerut gelar ikeredi aukakale yabim pe able neis gelar nakeredi.”  
\v 32 Aotarlelut Iesui detagri, “Erwerle, mama agekar detautli. E agekar dikeredi, E no netat Ad dalia nole ko nerut Ad dali.   
\p
\v 33 Ese legize Adi omarge waikelare kemerkemer taba nerkepu kemerkemer taba idoniu a kemerkemer taba kelaru, a ese legize tabara maikes le omarge wanakelare, able lu ya sikak waikereder yabim able ieem pe ebur a wader lu wagimuaretlare Adim zogozogo lauiauge.   
\p
\v 34 Iesude ge abi detagri, “Mama au maike nali Adi basalaiage!”, ableglam e abi asri able lera mir au pardarpardar ikereder. Keubu, gair le ge urder yaba geum barukda abi wader lugem ko waitmerda.  
\s1 Keriso Pe Netira Werem Dali?  
\d MRK 12.35-37   
\p
\v 35 Nade Iesude yabi au zogometage nerwerlare, ege le ge carautmerda, “Aotarlegize nalugem detauteda Keriso ya Dawitara werem wadawer?  
\v 36 Lamar Zogode Dawitai detagrer e waditauti, Oplede kara Ople detagri 'Ma ge emri kari narbit pekge nade ka mara kurab le akere mari tetergab aodage!  
\v 37 Dawitade Kerisoi dabgerer Ople. Pa dikeredi, Keriso ya naluglam Dawita werem wadawer?”  
\p Ege able au kub lera ge nikidetreder Iesu sererserer asorlare.  
\s1 Iesu Aotarle Nakerda Wi seksek le Uridli  
\d MRK 12.38-40   
\p
\v 38 Muige abi erwerge, Iesude lera kub daratagerda, “Wa okeoke uridwa Aotarleem wi laglag wadaragemlare piripiri wali obatkirer a yabi tamage wanareplare.  
\v 39 Wi tabara auka debe uteb waitutilare sunagoge a lewer aroge.  
\v 40 Wi koskir maikera meta erwamem wadaraislare, a tababu pa obakelare wi zogozogo le uridli pe auka piripiri erkep obasamer. Wi able tonar pe ikereda yaba asiasi bodomalam waiakai aukaise obai!”  
\d MRK 12.41-44   
\p
\v 41 Iesu ga irmireder maike au zogometara bodom bakir akri bokesge, a le darasmelare bodom bakir abidoge arotlare. Gair lugizkemle kimiar aukaka bodom bakir arotlare.  
\v 42 Ege lukak koskir maik tabakiamuda badari a eudige neis kebi bodom bakir natimeda, wi okakise nakereder no neisneis bodom bakir.  
\v 43 Iesude tabara memegle okakise darabgerda a eudige daratagerda, “Ka wabi agekar detagreda, able lukak koskir maik pe dali e aukaise arti bodom bakir bokesge pe wader legize arteda.  
\v 44 Ege wader legize tabara kaier bodom bakir arotlare, ege e arti nalu lu ge abra daragriweretlare. E lukak le dawer, a able bodom bakir e dikri ge no abra able bodom bakir daragriwertelare.   
\c 13  
\s1 Iesude Detauti Au Zogometa Ya Obatkoare  
\d MRK 13.1-2  
\p
\v 1 Nade ga Iesu au zogometalam eosmerer, netat le abi memeglelam akaida abi ikaidari, “Erwerle, ma able aukaka bakir darasmerare! Ma able debe aukaka meta darasmerare!”   
\p
\v 2 Iesude abi ikaidari, “Wao able gergerge mama able aukaka meta pema darasmerda, e nole ya netat bakir obariare tumem nerut lege ableglam yabi gair ya adem obakriare.”  
\s1 Adud Ya Wanagri A Atkoatko  
\d MRK 13.3-13   
\p
\v 3 Nadege Iesu imireder Oliwa Paserge, Peteru, Zemis, Zone a Andru no wi tebteb abim tabakiaudare.  
\v 4 Wi taba abi itmerdare, “Ma kerbi detagridare, na kekerge ya able lu obakerare, a ma kerbi detagridare nalu ya atamilam obakerare le wanatomertare gair able lugira ya mop maike wanagri.”   
\p
\v 5 Iesude yabi daratagridare, “Wa okeoke uridwa ableglam le ya laglag waurder wabi okawadirdarlare.  
\v 6 Le ya kari neige watabakeslare waditautlare, “Kaka peka Keriso nali,” a wi gair le okawadarardalare.   
\p
\v 7 Wa nole bazigmuaretwa nade wa ares mir asrawem a nade wa au gedira mirpuipi asrawem wi tabara barseda. Able lu ya obakelare wi nole atamilam wanagriwerteda able gair lugira mop maike wanagri.  
\v 8 Au ged gize ya wader au ged wanareslare, a balsaia gize ya wader basalaia wanareslare. Gesep ya obaskered wader utebge. Wader au gedle ya nole lewerkak waurder. Able lu ya obakerare mokakalam pe kikem kebi asiasi waike werem pa keubu weosmer.   
\p
\v 9 Wawa uridli wa okeoke uridwa. Wabi ya wadireplare a tag waimariklare a wadaislare kotem. A wabi ya sunagoge wadamriklare. Legize ya wabim tag waimariklare siramile a gesep ople opem ableglam wawa kari narmireda, a wabi ya wadikelare wa yabi Debe Mir daratagerlare.  
\v 10 Debe Mir ya kikem wairemlare able leem pe gair gedge uridli.   
\p
\v 11 Nade wabi wadireplare a tag waimariklare kotge, waba nole okasosok obarkawem keubu ya kerker watabaruk wa nalu ya detautlare. Nade ya kerker watabaruk, wa detautawem nalu mir wabi Lamar Zogode wadaiswelare, ableglam able mir wa ya detautlare nole wabialam; wi ya wanagriweretlare Lamar Zogolam.   
\p
\v 12 Legize ya tabara barada wanaislare yabim apitem, a bab gize ko, tabara omaskir wanaislare yabim apitem. Omaskir ya nole taba bab a apu sasrim lagkak waurder, a wi tabara bab apukem wanaislare apitem.  
\v 13 Gair le ya nole lagkak waurder ableglam wawa kari namireda, na le wabialam ya mena wadawer mena mop watabaruk ei idid watakai.”  
\s1 Aukaka Adud Lu Detkoidemaiserti  
\d MRK 13.14-23   
\p
\v 14 “Pe dikeredi, nade wa dasmerawem able Aukaka Adud Lu Obatkoare Obamaisertare waikwereder pe nole sikak ikeredi e waikwei,” (wa umele uridwa e nalu detauli)  
\v 15 ege able le ge Iudaiage urder wi laglag sikak waurder ya adem obakiauare paserem.  
\v 16 Kimiar ya taba meta totge waigereder abra umerkak kerker waikereder ese e adem obakiamu oba taba metage tabara amiwali (watikau).  
\v 17 Able koskir pe kemkem uridli ya waurder able kerkerge, a able koskir ya kebi omaskir omaskir waurder wi aukaka asiasi wadigilare.  
\v 18 Adim erkepasamwa able lu ya umerkak obakerare nade ya gebgeb kerker wairdireder,  
\v 19 ableglam able kerkerira le ya asiasi wadigilare aukaise ya wader legize wadigilare, able kerkerlam ge nade Adide gesep detagmi mena able kerker pe irdiredi. Keub kerkerge nole ya nerut lu ko able orwairorwair waikereder.   
\p
\v 20 Ege Adide no able gerger ikeri teopai baida mokakalam tuprik. Ese e nole able waikeri, le ya umerkak idid wauridli. E able tuprik ikaida teopai baida able leem ge e natutirda.  
\v 21 Nade able kerker ya watabaruk, ese legize wabi waditagerlare, “Kei bager Keriso pedali!” a “Kei bager e itadali!”, wi ya besle waurder.  
\v 22 Bes Keriso a bes peropeta ya waurder wi ya atamilam waikelare a wader lu ya waikelare le wanakelare wi obazigmuarter, ya waiakai wi umele able le okawadaradalare ge Adide itutri, ese wi umele able lu waikelare.  
\v 23 Wa okeoke uridwa! Ka wabi gair mir peka detagreda keubu ya kerker watabaruk.”  
\s1 Nade Ya Lera Werem Watabakiamu  
\d MRK 13.24-27   
\p
\v 24 “Keubu able gair okasosok ke, able kerker watabaruk lim ya waiakai kupkupi kupkupi obai, meb ya wakai bikak obai,  
\v 25 wer ya watabatwer milam, a able au kelarkelar lu kotorge ya watabaskered.   
\p
\v 26 Keubu, legize ya Lera Werem wadasmerare ei bazge watabakiamu au sasrimsasrim a zoromzorom.  
\v 27 E angeia ya wanamarkare kemerkemer gespge able le wanatkimdare ge Adide itutri gair gedlam.”  
\s1 Wa Utkak Uridwa! Erkepeskawem!  
\d MRK 13.28-31   
\p
\v 28 “Wa Omilam berwerawem. Nade abra tarn obaker gebgeb ober a abra lulam obatiare, wa umele uridwa Koki kerker ya maike obaruk.  
\v 29 Able orwairorwair, nade wa dasmerawem able lu ga obakelare, wage umele uridwa kerker pe maike dikeredi.  
\v 30 Kaka wabi agekar detagreda, able lu ya kikem obakelare keubu ya able le obaum.  
\v 31 Kotor iba gesepei ya obasmauare, kara mir ya umerkak obasmauare.  
\d MRK 13.32-37   
\p
\v 32 Le nole umerkak uridli na gergerge ya able lu obakerare. Angela muige kotorge a Werem pa dali wi nole umerkak, no Bab tebteb umele dali.  
\v 33 Wa utkak uridwa! Erkepeskawem! Ableglam wa nole umerkak na kerkerge ya able lu obakerare.  
\v 34 Able paikai pe dikeredi mokakalam kimiar obakiamu au muris gedim. E kikem tabara memegle sasrim wanaiswerare ko tabara dorge waikelare, a e asesered le waditager e mena utkak wadawer a erkep waisker.  
\v 35 Wage eskepeskawem ableglam wa nole umerkak uridli na kerkerge lukem le ya ko metaem watakomer - kiki limge, eipkige, idim kakarge, lim aupamaretge.  
\v 36 Ese e keserkeser watakomer nade ma ya ut naoperider e ya mari wanardar.  
\v 37 Ka wabim peka able mir detautli a gair le pa uridli: Wa erkepaskawem!”   
\c 14  
\s1 Kebi Kirim Merkem A Aotarle Laglag Iesui Waipita  
\d MRK 14.1-2  
\p
\v 1 Neis gerger barkiei keubu ya Yiskak Beredira Aro Gerger watabarki, Kebi Kirim Merkem a Aotarle Iesuim dasmerlare ko abi wairpeidarda a waipita.  
\v 2 Wige no tabara batagerda, “Mi nole able lu akairare able lewer aro kerkerge ableglam le ya waturder yaba urker obarkare.  
\s1 Koskiret Iesui Turper Depaiterdi Betenige  
\d MRK 14.3-9   
\p
\v 3 Nade Iesude lewer erwer muige metage able kimiarira meta abra nei dikereder Saimona Lepera Le, ege koskir tabakiamuda au bodombodom debe laglag wakaiso teper au bodombodom taporge tigmeder. E tapor mop daratrumda a debe laglag wakaiso epaiterdi Iesui kirimge.  
\v 4 Wader le ge urder yaba lid bageblare a tabara batagelare, “E nalugiam debe laglag wakaiso pe no ikiaii?  
\v 5 Legize merbi bodom bakir wadaiswerda mokakalam netat urut bodomalam able wakaisolam. Mi umele able bodom bakir lukak le wanaiswerda!” Wige au kelarkelar etapereta.   
\p
\v 6 Ege Iesude yabi daratagerda, “Noiekar, wa able koskir dikairtare! Wa nalugiam abi okasosok ikereda? E karim debe lu ikaidari.  
\v 7 Lukak le ya mena wabidoge waurder, wa umele yabi ya upidaratidaiare na kerker ya wa laglag urder. Ka umerkak yaka ika nawar.  
\v 8 Able koskiride ikeri nalu gair lu e karim ikeri; e kari gemge debe laglag wakaiso epaiterdi e kara gem dirsiri ya waiakai e apkorep wadawer wetkobei.  
\v 9 Kaka wabi agekar detagreda, nade ga legize able debe mir marau wairmawem kemerkemer gesepge, legize ya able mir wasolare pe able koskiret ikeri. Gair le ya abi umele waurder.  
\s1 Iudade Laglag Iesui Wadipi  
\d MRK 14.10-11   
\p
\v 10 Ege netat le 12 memegielam abra nei dikereder Iuda Isakariota bakiamuda Kebi Kirim Merkemleem ya waiakaida e Iusui yabi wanakwarda.  
\v 11 Nade wi abi asorda yaba au serer barukdarda, wige detauta wi ya abi bodomalam waikwarda. Iuda ga daraimrer nalu korepkorep e Iesui wadipi.  
\s1 Iesude Paseka Erwer Taba Memeglekem  
\d MRK 14.12-21   
\p
\v 12 Kikem gergerge irdireder Yiskak Beredira Aro Gerger wi aresa arenio Paseka Lewer Arwem, a Iesui memeglegize eudige abi itmerda, “Ma laglag nali ki nabakiaware nade mara Paseka Lewer darsirare?”   
\p
\v 13 Iesude neis yabiaiam namarikdarda, e kikem yabi daratagri, “Wa bakiamulam au utebge. Kimiaret ya ni tarpor weper ya wabi opwadidipit. Wage abi irmiram.  
\v 14 Nade e obakiamu metaem obau, wako balam. Wa able metara lukemle detagerwam, “Erwerle laglag dali ma kerbi kes natometare nade e a taba memeglekem ya Paseko Lewer wairware.”  
\v 15 E wabi ya able au kes watiditomer penoko aremge ikeredi. Gair lu wawa laglag dali able lewerem ya i wataragi. Wage merbim gair lu ge tidirsirwam.”   
\p
\v 16 Able memeglegize abi dikairtiei wige bakiamudariei au utebge nade wi dasmelei gair lu mokakalam nagriweretlare ge e yabi tadaratagrer, wige Paseka Lewer tidirsiriei.   
\p
\v 17 Keubu ga lim baraigida, Iesu ge tabakiamuda 12 memeglekem able utebge bosi.  
\v 18 Nade ga wi laulau lewer erolare Iesua akaida ge yabi daratagerda, “Kaka wabi agekar detagreda, netat wabialam pe kari kemem lewer eroli ya kari wanaup.”   
\p
\v 19 Ege memeglera okasosok barukdarda wige bakeri abi netat itmerlare, “Agekar, nole kakanali?”   
\p
\v 20 Iesude yabi daratagerda, “Netat wabialam 12 lelam e able le wadawer, netat le ya kiki keriba bered okakise kobarge naitelei.  
\v 21 Lera Werem ya weumi able korepkorep ge bautarda Zogoziawalige. Epe able le dali ya e Lera Werem wadip ya au asiasi wadigi! E wadikeper, “Ka naluglam osmeda?””  
\s1 Iesude Lewer Erwer Taba Memeglekem Keubu Ya Eumida  
\d MRK 14.22-26   
\p
\v 22 Nawer ge wi mena lewer erolare, Iesude bered eturuklu ege Adi ableluglam dispiri. Ege bered itri a ikaida tabara memegle nakwarda. Ege yabi daratagerda, “Wa able lu ikadarare, e kara gem peikeredi.”   
\p
\v 23 Keubu ga akaida pankin etaruklu ge waina egmeder Adi ga ableluglam eswao ikaida. E ga ikaida yabi nakwarda, a wige netatnetat ga tep diskilare.  
\v 24 Iesude eudige yabi daratagerda, “Kara mam peikeredi ya wabim weiapaitered mitkar leem wabi le waditomertare Adira lag pedike.  
\v 25 Kaka agekar mir detautli, Ka umerkak yaka waina koka arie mena yaka kerkar tonar waina tarie Adi baselaiage.”  
\v 26 Wi eudige eswao wed Adim dikrida a bakiauda Oliwa Paserem.  
\s1 Iesude Kikem Detauter Peterura Mir  
\d MRK 14.27-31   
\p
\v 27 Iesude yabi gair le daratagerda, “Wa ya kemerkemer bakesmer wabi owaturge mokakaiam ge mir bautarda emeretge pe kiki detauteda, 'Adide ya mamoe aseseredle waipit ei mamoe ya adem obatrakrare.'  
\v 28 Keubu yaka koka idid nakailu, kai kikem nabakiamu Galilaiaem wai keubu ya taba.”   
\p
\v 29 Peterude abi detager, “Able wader le umele taba owaturge obakesmer nole kakanali!”   
\p
\v 30 Iesude eudige Peterui detager, “Kaka agekar mir detautli; ma ya neis a netat gaber detaut ma nole kari umerkak nali, able kige keubu ya kimiar paul neis gaber ererwekri.”   
\p
\v 31 Peteru eudige esereser akaida, “Kai umerkak yaka dataute ka nole mari umerkak nali! Ese wi kari wanarsare a maridoge wanapitare kai mena yaka nawar ka umerkak able mir detaute.”  
\p Gair memeglegize able orwairorwair detautlare.  
\s1 Iesu Getsemanige Erkepasameirer  
\d MRK 14.32-42   
\p
\v 32 Wi bakiaudare able utebge abra nei dike Getsemani ge nade Iesude tabara memegle daratagridare, “Wa mena ge dawidarwem nawar ka naba erkeptarasameirer.”   
\p
\v 33 Ege yabi neisidare Peteru, Zemis a Zone nerut utebge ge nade e au muimui okasosoke dawer.  
\v 34 Ege yabi daratagridare, “Kara lamar okasosok ke dali maike eud paikaige. Wa ge dawedarwem a wage idid dawedarwem.”   
\p
\v 35 Ege yabiaiam kebikebi kikemem bakiamuda a akaida sepge etkobeilu erkepasameida a Adim bagwi e umerkak asiasi wadigi nako Adide abim able lu waikaida.  
\v 36 E erkepasameirer, “Baba, kara Bab! Ma umele gair lu iker; Ma karialam able asiasi adem ikau. Ma nole kara lag ikerwa mage mabara lag ikerwa.”   
\p
\v 37 E eudige ko akomeda bakiamuda tabara neis a netat memegle nardardare wige ut nardeder. E akaida Peterui ikailu, “Saimona, ma naluglam ut nauperedi? Mai umerkak idid wanali kebikebi wadikaili?”  
\v 38 A ga akaida yabi daratagridare, “Wa idid dawiderwem a erkepasamiderwem ya waiakai wabi umerkak mirem wadikerdare. Waba lamar laglag darale epe waba gem pe auka erarerar nagri.”   
\p
\v 39 Ege ko akomeda yabiaiam bakiamuda erkepasameida able mirmir ge kikem tasameirer.  
\v 40 E eudige ko akomeda bakiamuda tabara neis a netat memegle nardardare wige ut nadeder. Yaba poni yaba au beberbeber utide darasapelare. Wi nole umerkak wi abi nalu mir waditagerda.   
\p
\v 41 E nade ge ko takomeda neis a netat kerkerge, ege yabi daratagridare, “Wa naluglam mena ut derdedi? Wage no ge ut eididare waba gem dirsirdare; a nole! Able kerker pe itutida! Wa kei egridare! Abie le pema ikase ya Lera Werem wairpei wide wanakwarare.  
\v 42 Wa ekwidare mi nabakiaudare. Wa kei egidare, able le pedali ge kariaiam badmirikda akaida kara kurable baida.  
\s1 Iesui Erpeidarda  
\d MRK 14.43-52   
\p
\v 43 Nawer ge Iesude mena mir detauter, Iuda, netatle Iesui memeglelam, tabakiamuda lekem wi teibur ausos tulik a gabagaba taislare. Wi yabi Kebi Kirim Merkemgize, Aotale a Aulegize taramarikdarda.  
\v 44 Ege Iudade able le daratagerda, “Ka wabim yaka umerem atutilu able le yaka uma dakailu, e able le pedali wawa abim dasmereda. Abi erpeiarwem a abi igardawem le ge wauridwa abi waseserdawem.   
\p
\v 45 Nade Iuda tabakiamuda able utebge ege keko bakiamuda Iesui erdari a abi ikaiada, “Erwerle!”, a abi uma dikaida.  
\v 46 Wige Iesui erpeidarda mena abi erpeilare.   
\p
\v 47 Ege netat able lelam ge ikweireder tabara teibur ausos tulik iseda Kirim Merkemira Memegle laip dismida.   
\p
\v 48 Ege Iesude yabi daratagerda, “Ka nole erwamle peka nali; wa pe karim tabakiauda gabagaba kem a teibur ausos tulik kem.  
\v 49 Gair gergerge ka le wanerwerlare muige au zogometa utebge, wa nole kari gewa narpeidarda. Epe sikak dikeredi; able Zogoziawali ya obatomer nalu lu agekar ikeredi.”   
\p
\v 50 Ege gair abi memegiegize abi dikaireta wige korider bamre adem bakiauda.  
\v 51-52 Netat kirgir kebilelut ge Iesui irmirer e dawer no netat wali abra damireder. Wige laglag abi wairpeidarda e tabara wali dikairti ege korider emrida nesurkak.  
\s1 Iesu Kirim Merkemle Opem Ikweireder  
\d MRK 14.53-65   
\p
\v 53 Wige Iesui igareda Kirim Merkemle metaem ge nade Kebi Kirim Merkemle, Aule a Aotale tabakiauda tababu ge etami.  
\v 54 Peterude yabi lagdaratmida baka ge espirer murisge a bakiamuda able utebge badari maike Kirim Merkemle metage, ge e nade no ge able utebge emrilu maike urge aseseredlekem ya waiakai e geb obaugli.   
\p
\v 55 Ege Kebi Kirim Mekemle a kemerkemer Iudaia gelarle laglag urder nalu barkak lu wairdarda wi Iesuim ya tag waimarkeda ya waiakai wi abi waipita; wige nole nerut lu erdarda.  
\v 56 Mitkar legize Iudaia gelarle bes dararidlare Iesui detaudare, wige able le ge netatnetat urder yabidoge nole able mir bakedrer.  
\v 57-58 Wader le ga bakwer able besmir detautlare Iesui ikelare; “Ki abi wasorlare e ke waditauter, 'Ka yaka able au zogometa arape ge legize demerda, a neis a netat gergerge ka yaka koka nerut au zogometa damre ya umerkak legize wadimrare.'”  
\v 59 Ege wi ko able le urder yabidoge nole netatnetat bakedrer.   
\p
\v 60 Able Kirim Merkemle yabi gair le opem ekweida a Iesui itmeri, “Mai umele mamor detaut nalu pe bamisreda? Ma ge detaut.”  
\v 61 Ege Iesu mena mirkak ekweireder, e nole yabim nerut mir detauti. Ege Kirim Merkem Lelut nerut orwairorwair ga abi itmeri, “Nako mama Keriso nali?, able Werkabwerkab Adira Werem?”   
\p
\v 62 Iesu eudige akaida, “Kaka nali, wa ya dasmerare Lera Werem watigireder Au Sasrimsasrim Adi tuter tag pekge a ya abi dasmerare e ya watabakiamu kotor bazkem.”   
\p
\v 63-64 Nade wi able mir asorda, ege Kirim Merkem Lelut urkerge tabara wali etwati a akaidari yabi daratagerda, “Mi nole laglag uridli wader legize merbi waditagrare nalu e ikeli; mi abra bes dasorda e Adi opmir detagri! Mi nalu abim akairare?” Wige gair legize detauta abi no apitare.   
\p
\v 65 Wader no bakeri Iesui mosu ituda, a wi abra waliu op damisilare a ereslare. Wi abi detagelare, “Ese mama peropeta nali, ma kerbi detagrare nete kerbialam pedali mari naresli. Aseseredle ko urder abra op detapilare a ereslare.  
\s1 Peterude Le Daratagelare E Nole Iesui Umerkak  
\d MRK 14.66-72   
\p
\v 66 Peteru mena ge sepgr tadawer able utebge maike metage nade ge memegle neur tabakiamuda abim.  
\v 67 E Peterui erdari ege geb bauger; e abi natkak lidem dasmeri a eudige abi ikaidari, “Mako gema tarawer Iesui doge pe Nazaretlam dali.”   
\p
\v 68 Ege Peterude desardi able mir. E eudige akaida, “Ka nole umerkak nali, ka nole able mir irmili pe mama detauti,” a ege eudige digmi bakamuda nerut pekge able utebge maike metage. Ege keko kimiar paol ererekri.   
\p
\v 69 Able memegle neuret ge abi terdari a ko akaida able le daratagerda ge ekweder ur dairumaretlare, “E netat pe able lelam dali!”   
\p
\v 70 Peterude ko able mir desardi.  
\p Ege kebikebi ga ko ikereder, able le ge ekweder eudige bakeri abi ikaidarda, “Agekar, mama netat pema yabialam nali, ableglam mako nali Galilaia le.”  
\v 71 Ege yabi kelarkelar daratagerda, “Kaka agekar detautii; ese ka bes darder, Adide ya kari bodomalam wanakai asiasi dagie. Ka nole able le umerkak nali pe wawa detauteda.”   
\p
\v 72 Ege keko kimiar paol ko ererekri. Peterude eudige dikepwari Iesude ge abi detagri, “Ma ya neis a netat gaber detaut ma nole kari umerkak nali ka nete nali keubu ya kimiar paol neis gaber ererwekri.” A e akaida au okasosoksosok baida, eudige i ditimeda.   
\c 15  
\s1 Pilatode Iesui Itmerer  
\d MRK 15.1-5  
\p
\v 1 Nedbi ipiter nerut idimge, able Kebi Kirim Merkemle tabakiauda op bapita Aulekem, Autale a kemekemer Iudaiara gelarle ya waiakaida wi mir waipuda nalu wi waikaidarda. Wi Iesui didbarda a edomedarda bakiauda Pilatoim.   
\p
\v 2 Pilatode abi itmeri, “Nako ma Mamus Iudaia lera nali?  
\p Iesu ge atkarti, “Mama agekar detautii kaka nali.”   
\p
\v 3-4 Kebi Kirim Merkemlegize abim tag emariklare ge gair lu bamisilare. Ege Pilatode abi ko itmeri, “Ma naluglam nole nerut mir detaut? Wi marim tag emarkeda able gair lu bamisreda.”   
\p
\v 5 Iesu mena mirkak dawer, ege Pilato ezigmuada.  
\s1 Pilatode Barabasi Adem Ditwi  
\d MRK 15.6-15   
\p
\v 6 Gair Datupir Lewer kerkerge, Pilatode yabi wanauseda audbarlam able le ya le abim obagweda.  
\v 7 Able kerkerge able le ya wadali abi wadaggereda Barabas, e audbaraudbar wadali. E netat le able lelam ge wi basaredlare a le ga eudem naresa.   
\p
\v 8-9 Nade ge lera nikidetreder taba etami a bakeri Pilatoim bagoda e yabim waikaida nalu e yabim waikerer able Datupir Lewer kererge, ege yabi nautmerda, “Nako wa laglag ka Mamus Iudaia Lera adem datwie?”  
\v 10 E umele dawer able Kebi Kirim Merkemlegize Iesui abim tigareda wi abim kurabkurab urder.   
\p
\v 11 Ege Kebi Kirim Merkemlegize mir mitwarlare ge le nikidetreder wi obamusa Barabasim e adem wausmeda nole Iesu.  
\v 12 Pilatode ko yabi daratagerda ge le nikidetreder, “Wa nako a laglag uridli ka nalu akailu able leem wabi dabgereda Mamus Iudaia Lera?”   
\p
\v 13 Wige abim baborda, “Abim nilaru sataoroge detagrare!”   
\p
\v 14 Pilatode yabi nautmerda, “E nalu adud lu ikeri?”   
\p
\v 15 Piiatode Barabasi ditwi yabim, ableglam e laglag dawer e yabidoge waisisimuda. A ga akaidari tabara sariksarikle au kelarkelar miru daratagerda ko Iesui odamrikdarda, a ya abi adem waigareda nilaru satauroge waditagerda.  
\s1 Sariksarik Legize Iesui Adud Merwarem Ikelare  
\d MRK 15.16-20   
\p
\v 16 Ege sariksarik legize Iesui igareda muige able utebge maike au gelarle metage a ege eudige kemerkemer okakise aseseredle darabgerda.  
\v 17 Wi eudige papol wali Iesui doge; wi sikersiker aper daradara tamlam dirsirda a ikaidarda abi kirimge amida.  
\v 18 A wi bakeri abim ererbakrier, “Ei, Iudaia lera Mamus!”  
\v 19 Wi abi kirimge abi lugu areslare a abim mosu ituiare. Wi kokmamuamu bamrer abi opem a abi isorgiru ikelare.   
\p
\v 20 Nade wi basemri ge emetu abi adud merwaru ikereda, wige abi tabara wali ko itkirda, a abi igareda adem ismedarda ko abi satauroge nilaru waditagerda.  
\s1 Ares Legize Iesui Nilaru Satauroge Detagerda  
\d MRK 15.21-32   
\p
\v 21 Wi gabge nakasirweretlare wige kimiar erdarda abra nei dikereder Saimona e able uteblam tabakiamuda ge nade gedub naridweretlare e kei ikasereder au utebem. E Sirini le dawer, a e Alezanda iba bab dawer Rupas ei. Ege abi ares legize aukaise detagerda e Iesura satauro wadepli.   
\p
\v 22 Wige Iesui datkimuareta able utebem abra nei dikereder Golgota (able nei merbi mirge dikeredi Kirim Lidira Uteb).  
\v 23 Wige laglag ge urder Iesui waina waikwarda ataperet ataperet lukup able lukup muro, ege nole iri.   
\p
\v 24 Wige eudige abi satauroge detagerda. Wige luglug segur batker ya waiakaida wi wadasmerda netide yabialam ya wairpeida nalu mog abi walilam.  
\v 25 Wi idimge ga 9 koloke abi nilaru detagerda satauroge.  
\v 26 Wige able mir ditarda tag emariklare, “E Iudaia lera gesep ople dali”.  
\v 27 Able utebge ge Iusui satauroge detagerda, wi neis erwam le ko daratagerda taba satauroge, netat Iesui narbit pekge emerider a nerut ge abi keimer pekge emereder.  
\v 28 [Able tonartonar zogoziawalira mir pe barmisreda pe ke detautii, Abige ikedidarda able lege wi nole gelar waimireda.]   
\p
\v 29 Le ke nakasirweretlare a ke nakasirweretlare kirim deskeredlare a abi aiselare. Wi erer bakrier, “Mama sikak ikeri! Ma yama obakiamuda able au zogometa wairapi a koma wadimri neis a netat gergerge!  
\v 30 Pe irdiredi ma mabu adem tetugered a mage sataurolam sepem tarabu!”   
\p
\v 31 Able tonartonar Kebi Kirim Merkem Le a Aotarle abi merwarem ikelare. Wi tabara batagelare, “E wader le nakerda sikak berda, e umerkak tababu obakai sikak obai!  
\v 32 Ei! Keriso mamanali, mamanali Isralara gesep ople, able kerker pe irdi ma sataurolam sepem tarabu ya waiakai ki umele mari nasmerare mama able lu ikeli, a ki umele mari narmirlare!” A neis le ga taba nerut satauroge namereder wi ko abi aiserlei.  
\s1 Iesura Eud  
\d MRK 15.33-41   
\p
\v 33 Kikem lim baida kemerkemer ged akaida kupkupi kupkupi baidari e kupkupi kupkupi irdireder mena neis a netat awa erpeida.  
\v 34 Neis a netat kolokge Iesu aler ererekri, “Eloi, Eloi lema sabaktani?” Able mir pe merbi mir dikeredi, “Kara Ad! Kara Ad! Ma nalugiam ma kari nakairti?”   
\p
\v 35 Wader le ge urder abra erer dasorda a wige natkareta, “Wa asrare, e Elaizaem ererekrili!”  
\v 36 Netat able lelam korider emridari span tikada kerkar wainage titri, ikaida luge dasrida. E ikaidari Iesu ikwari ya waiakaida e wairi. Able lelut eudige detauti, “Mena, mi yami dasmerare ese Eiaiza watabakiamu abi adem sataurolam sepem watitugered.”  
\v 37 Iesu aler ererekri keubu ga eumida.   
\p
\v 38 Wali au zogometage waitrerdedi eipuge aremlam batwata mena sepge.   
\p
\v 39 Ares lera kirimle ge Iesui opem ikweireder abra ererdasri a e Iesui erdari eumida. Ege eudige atkarti, “Agekar, able le e Adira werem dali!”   
\p
\v 40 Wader koskir ge urder murislam erkep tegreder. Wader le yabialam ge Maria Magdalalam, Maria (Zemis Able Kebile a lose yaba ama), a Salomi.  
\v 41 Muige Galilaiage able koskir gize Iesui wairmireda a abi upiwaditidareda. A wader gair koskir ko ge urder ge wi Iesuipkem tabakiauda Ierusalemaem.  
\s1 Iesura Atkobeir  
\d MRK 15.42-47   
\p
\v 42-43 Iosepa Arimatia Le akarikda. E agekar le dawer yabialam Iudaia Opapit Lelam. E wadali wadikaili Adira basalaia ko watabakiamuda. E bakiamuda Pilatoim a abi tadamsi Iesui gemem, ableglam au kikem irdireder a able gerger ge irdireder Arsir Gerger (able gerger keubu ya Iudaia Sabad obarki).   
\p
\v 44 Nadege Pilatode asri Iesu emetu eumida, ege abra serer barki. Ege ares kinmle dabgeri a abi itmeri nako Iesu emetu eumida.  
\v 45 Ege ares leem girip irdirer ge e abi detagri e agekar dikeredi. Pilotode Iosepai detagri e abra gem wadikada.   
\p
\v 46 Iosepade marmar wali terapeidari ege gem titugerdi sataurolam, able waliu abi damisri, a ikaidari paierge ikedidari. A ga akaidari aukaka bakir terparki paier gab tege daterti.  
\v 47 Maria Magdalalam a Maria (Iosera ama) abi dasmele e abi nade irdidari.   
\c 16  
\s1 Nasor Paier  
\d MRK 16.1-8  
\p
\v 1 Nade Sabad gerger emetu barki, Maria Magdalalam, Maria (Zemisira ama) a Salomi pas laglag lu terapidare ya waiakaida wi Iesura gem waditimuardare.  
\v 2 Sabad idim kakarge keubu ya lim wateupamada, wi bakiaudari paierge.  
\v 3-4 Nade wi gabge barukle wige tabara bautmele, “Netide ya adem bakir watirparik merbim able paier gabtelam?” ableglam able bakir aukakale ikereder. Wige egridere a erdardare able bakir emetu barparki.   
\p
\v 5 Wige paierge bartidare a terdardere kirgir kebi le ke timireder narbit pekge ege abra zazerzazer wali damireder. Able koskirira au geum barkidare a azigmuartidare.   
\p
\v 6 Ege yabi able kimiaride daratagridare, “Wa nole geumge ekerdare. Ka umele nali wa pewa Iesui Nazeret Le daraimele ge abi satauroge nilaru detagerda. E nole pedali, abi Adide ko ekiamda! Wa dasmerdare, able uteb pe irdiredi ge nade wi abi ikedidarda.  
\v 7 Bakiauare a abra memegle daratagrare, Peteru penoko dali, “E kikem bakiamuda Galilaiaem wa keubu ya bakiauare. Abi ya terdarare able orwairorwair e wabi waditagreda.   
\p
\v 8 Wige bakiaudare paierlam eosidare a adem korider emridare ableglam yaba durdur a geum, a wi nole umerkak wi nalu waikaidare. Wi nole le mir daratagelare ableglam wi geumge ikele.  
\s1 Iesu Tababu Batomeda Maria Magdalaleem  
\d MRK 16.9-11   
\p
\v 9 [Keubu Iesu idim kakarge eudlam ekiamdari able kikem gergerge irdireder, e tababu kikem batomeda Maria Magdalaleem, (able koskir ge dawer Iesude 7 dimoni adem abialam isi.)  
\v 10 Maria bakiamudari able le daratagelare ge wi Iesuipkem urder. Able le wi budge urder a i bazwer,  
\v 11 a nadege Mariade yabi daratagelare Iusu idid akaida wi nole abi asolare.  
\s1 Iesu Tababu Neis Leem Batomeda  
\d MRK 16.12-13   
\p
\v 12 Keubu, Iesu tababu batomeda nerut noge yabim neis leem nadege wi gabge nakasireder kei gedub utebem.  
\v 13 Wi akomedariei wader le daratagerda, wige nole yabi nasolare.  
\s1 Iesu Tababu Batomedari 11 Memegleem  
\d MRK 16.14-18   
\p
\v 14 Keubu ga Iesu tababu batomedari 11 memegleem nade wi lewer erolare, e yabi natapereta ableglam wi nole owaturkak urder a wi nole asolare nadege yabi wader legize daratagelare ge wi Iesui erdarda idid akaida.  
\v 15 E akaida yabi daratagerda, “Wa bakiauare gair gedim able gesepge a Debe Mir marauermawem gair leem.  
\v 16 Netiba ya wasolare a bapataiso obapaitlare wi ya sikak waurder. Netiba ya nole wasolare ya yaba ya adud bodomalam wanagri.  
\v 17 Abie legize wi ya wasolare yaba ya able atamilam wanagri: Wi yadimoni adem waislare muige kari neige. Wi ya kerkar mir wanagalare.  
\v 18 Ese wi tabo watakelare wi nole ya asikak waurder. Ese wi eudeud ni wairilare yabi umerkak gimide wanatutilare. Nade wi tabara tag wadikmiriklare gimgim lege able lera ya gim obasemrer.”  
\d MRK 16.19-20   
\p
\v 19 Nade yabi Oplelut emetu mir daratagerda, ege eudige abi Adide igardi kotorem ya waiakai e Adi tuter tag pekge waitimi.  
\v 20 Ege memegle adem bausi a marau eremlare gair utebge. Oplede dorge yabi kemem ikerer; e atamilam le natomeretlare Debe Mir ge memeglegize eremlare e agekar mir dikeredi.]