\id 1TI  
\ide UTF8
\h 1 TIMOTHY 
\toc1 Metamol Babior We Yael Paulus Ngal TIMOTHY 
\toc2 1 Timothy 
\toc3 1 Ti 
\mt1 TIMOTHY  
\is1 Hamadefal  
\ip Timothy ila semal Kristiano le ye chil tarmal le ye budoh mo wol Asia Minor, le semal Jews mala sil ngo semal Greek mala temal. Ye loh ye sala mel bo choluwal mo re tipingiyel Paulus irel malekah kowe yal irel yal la foloy fedal. Mele \add Metamol babior we yael Paulus ngal\add* \bk Timothy\bk* ila suluw metmetael mekla ye kapta.  
\ip Babior le ila metamol ngo ye kapta kofael foloy ka yete katos irel eklesia le yarmat rebe llugu deper iyang. Foloy ka ila ye pedafengali yar Jews mo yar Gentiles luluwal, ngo ye chapdoh mo irel mala ye sor bo talop le ila ye ssogol molfid. Iwe ngo ye wol sor bo mala chog yebe yoh ngalir yarmat molow iyang, ila mala yebe yoh ngal semal repiy le tor le ye gola. Iwe ngo yor mongoy ka re towe ma mongoy. Iwe ngo yarmat re towe riri. Ye wol mel lal babior le kofael igegel yar be hadarlaho eklesia, iwe mo igegel yar bema mapel. Ye wa mel lal babior kofael tappel wegdeg kala meka metael eklesia mo rechokla re tipingiyer rebe dabey. Iwe ngo yela hartal loh, ngo Paulus yesa hamdefa ngal Timothy wululul mala semal yebe mel iyang ngo yesa fel bo yael Jesus Kristus boy, iwe mo igegel yal be yengang ngalir sibis mo sibis Kristiano.  
\is1 Palpal Meka Yadol Babior Le  
\io1 Hamadefal \ior 1:1–2\ior*  
\io1 Hamadefael kofael eklesia mo rechokla re mel bo tamolal \ior 1:3—3:16\ior*  
\io1 Hamadefael yengang la yael Timothy \ior 4:1—6:21\ior*  
\c 1  
\s1 Metamol Babior We Yael Paulus Ngal  
\p
\v 1 Babior le ila ye budoh mo irel Paulus we lol Kristus Jesus Apostel le Deus le yach Demer mo Kristus Jesus le si lugy depach ngali mele ye duwley —  
\v 2 Ngali Timothy, le yesa mel le spegil layi luwul tuwgul le yar Kristiano. Deus le Temach mo Kristus Jesus le yach Samol yebe holbuwah ngo ye hamomayi yal hagiyeg ngalug ngo ye fang ngalug hopos.\x - \xo 1:2 \xt Ac 16:1\x*   
\s1 Ha Llugu Dipmi Irel Foloy Kala Yete Katos  
\p
\v 3 Idipli bo ho bela mel wol Ephesus le yebe wochog molwe ikangalug bo hobe foru irel yodwe iloloh Macedonia. Yor tot yarmat lobosla le resa fofoloyu tot formel le yete katos. Ila idipli bo hobe mel woal Ephesus bo hobe hapolaho foloy kala yar.  
\v 4 Kangalur bo rebe ppoloh mo irel fiyong kala yete katos mo kaptael kofer mokwe chapdohoch muswe. Ikla mekla yema chapidoh fedgel hapatpat. Meka ila tor mele yebe tipingi ngal mala Deus yesa moll yal hatugulu bo yebe faor ngalgich luwul tugulul lal depach.  
\v 5 Fael mele isa kangalug ila mala yebe yoh ngalug hachangcheng le yema buyoy mo lal meka bulach yarmat mo irel luluwal ka ye taldag mo irel tugul la ye katos.  
\v 6 Tot yarmat resa ttagul tang meka ngo re tai wiri yalleper le fael hapatpat kala tor pelal.  
\v 7 Re dipli le rebe mel le chol folol hatobtob la yael Deus, ngo ligdi bo re tamedaf irel mekla re kekapta iwe mo mekla ir resa yitli le resa medaf iyang.   
\p
\v 8 Si gula le Hatobtob we ila ye momay igle si hadabe ngal mala faesul igegal.  
\v 9 Si towe maligili le hatobtob ka ila ye tugul le ye ffaor le te fal ngalir rechoka re momay, bo fal ngalir rechokla rema hatowas hatobtob, mo rechokla retema taelenga hatobtob kala yael Deus ngo rema faor tayikof, mo rechokla retema hasrowu Deus hare re hasrowu meka ye santus, mo rechokla rema llimeseloh spegil temer mo seler, iwe mo ikla rema lilimesloh yarmat,  
\v 10 iwe ngo wol fal ngalir mal ka rema faor fengali maltemay iwe mo fefel kala ye wol ila senger, ngo wol fal ngalir rechoka rema peraf lluyloh yarmat, mo rechoka rema sor ngo re hatugulu tot formel le yete katos hare rechoka rema kapta tot formel le ye tafel ngal meka folol eklesia.  
\v 11 Iye foloy la resa wiri mo irel ebangelium we le Deus yesa fang ngalyey bo ibe kapta ngalir yarmat. Iye iy Hapatpat Momay we ye budoh mo irel Deus la ye falmay ngo ye ssor.   
\s1 Momayel Hagiyeg La Yael Deus Ngal Paulus  
\p
\v 12 Ima kangalu Kristus Jesus le iy yach Samol yal hachigchig le iy mele ye fang kkeley irel yengang ka yai. Ima kangalu yal hachigchig bo fael yal foru bo yebe yor mmaley ngo ye duwleyey bo ibe ma hasrowu,  
\v 13 ila mwo muswe ngo ima hapatpat tayikofloh irel ngo ihafohoyu fedaley. Iwe ngo Deus ila ye momay yal hagiyeg ngalyey bo fael mala ted yor yai tugul ngo itugla mmekla ifoforu.\x - \xo 1:13 \xt Ac 8:3; 9:4–5\x*  
\v 14 Iwe ngo Samol la yach yesa fangdiy haradiya la yal uwoy ngo ye fang ngalyey tugul mo hachangcheng le yesa mel bo yach irel yach sa sew chog mo Kristus Jesus.  
\v 15 Hapatpat le ila ye katos le pangal yarmat ngo rebe taelenga ngo re chepar iyang: Kristus Jesus ye budoh lal faileng le bo yebe hadorar choto hamolfid. Ngang mele ihartael tayikof mo luwullur.  
\v 16 Ngo Deus ye ffaho depal ngalyey bo fael mala Kristus Jesus yebe kawraloh lepal momayel hagiyeg la yal, le iy yebe hadorayey, le ngang mele ye kkel yai hamolfid mo luwullur choto hamolfid, bo yebe kkewar ngalir panger rechokla rebe hamirdoh bo rebe chepar irel ngo ye yoh ngalir molow la tor siyal.  
\v 17 Ngal King la ye be mel le tor siyal ngo tor fael sew le yebe mes ngo si tema wiri, ngo iy chog Deus, sibe hasrowu ngo ye falmay le tor siyal! Amen.   
\p
\v 18 Timothy layi, isa ligdi kofael mele ngalug: le ye wochog molwe re kapta irel kofam rallakowe. Hobe teptap hapatpat kala le ila mala yam pitgil fedeg bo yebe fel yam fedeg ngal mekla ye tayikof.  
\v 19 Hobe hakkela depom ngo ho hatarma yam luluwal. Tot yarmat re tay dabey mekla ir re gula le ye bung, iwe re sala ha tayikofa yar tugul.  
\v 20 Rechoka iye senger ila ye mel Hymenaeus mo Alexander luwullur we ifangloh ir bo Satan ye bela fang yar hagerger; bo rebe gola bo rebe ppoloh mo irel yar hapatpat tayikofloh irel Deus.   
\c 2  
\s1 Igegel Mepel  
\p
\v 1 Metamol ngo ibe dongor ngalir yarmat rebe ma mepel ngo rebe ma dongor ngal Deus ngo re kangalu yal hachigchig bo yaglir pangal yarmat,  
\v 2 mo panger king mo panger rechokla yor kkeler bo be yoh le sibe mel luwul malulu mo hopos. Sibe mel le ye fel wegdegich ngo ye fel yach mel,  
\v 3 mele ila ye momway ngo ye fel depel Deus le yach Demer iyang.  
\v 4 Ye dipli bo panger yarmat ngo rebe daor ngo rebe gola mekla ye katos.  
\v 5 Bo ye hal semal Deus ngo ye hal semal Kristus Jesus le iy mele yema hasgich loh irel Deus.  
\v 6 Ye fangloh iy bo yebe demerir panger yarmat. Ila mala tugulul mala Deus ye dipli le panger yarmat ngo rebe daor, le ye llahloh irel sew yad le ye fel.  
\v 7 Ila fal le re fangloh ngang bo semal apostel, ngo yar Gentiles chol foloy bo ibe kapta hapatpat momay we kofael tiwgil mo katos. Ite kachapar; ikakapta makla ye katos!\x - \xo 2:7 \xt 2 Ti 1:11\x*   
\p
\v 8 Pangal yar mapel irel eklesia ngo idipli bo mal rebe ma mapel le mal ka resa fang ir ngal Samol. Rebe hallengadah payur resa mapel le tor mele re ssong iyang hare re fedgagel kaptal.  
\v 9 Iwol dipli bo fefel rebe hammale mekla mengagur bo yebe momay le yebe felel yar fefel ma mengag, ngo re towe hallimdi mekla yall chemer le yebe semat tang chemer yarmat cholop, hare re mermar meka yor hoal iyang le ye cchaw paliyal, hare re mengag irel mengag ka ye cchaw paliyal.\x - \xo 2:9 \xt 1 P 3:3\x*  
\v 10 Mekla ye fel le fefel rebe foru, ila wegdeg kala ye momay bo ila ngo yebe fel ngal mala ir re sor bo ye ssor Deus mo irer.  
\v 11 Fefel rebe kkay formel luwul yar malulu ngo re towe ma hapalili hapatpat.  
\v 12 Ite dipli le fefel rebe foloy, hare rebe hatagitar mo imor mal; rebe far ppoloh chog.  
\v 13 Adam mele ye moal subdoh ngo yesa moch Eva.\x - \xo 2:13 \xt Gn 2:7; Gn 2:21–22\x*  
\v 14 Te Adam mele re kachepra bo fefel we mele re kachepra, iwe sala hatawsi hatobtob we yael Deus.\x - \xo 2:14 \xt Gn 3:1–6\x*  
\v 15 Fefel ila rebe daor yigle rebe loloy ngo ye tugul chog lal deper irel Kristus, ngo re hachangir panger Kristiano, ngo ye fel wegdegir.   
\c 3  
\s1 Tamol Eklesia  
\p
\v 1 Hapatpat le ila ye katos: hare ye kkel depel semal bo yebe mel bo semal tamol eklesia, ila ngo sew yengang le ye hartael momay mala iy ye dipli.  
\v 2 Semal le yebe mel bo semal tamol eklesia, ila ngo yebe semal yarmat le towe yor derel ngo yebe semal chog ril, ngo yebe repiy ngo ye gola mele yebe foru, ngo ye momay wegdegel, ngo yebe yoh le yebe foloy, ngo yebe mwechael le rebe budoh wasola irel imal.\x - \xo 3:2 \xt 3:2–7; Titus 1:6–9\x*  
\v 3 Towe semal le yema toa habbelas hare semal le yema fedeg. Yebe malulu ngo yebe pos, ngo ye towe chahewal salpiy.  
\v 4 Ngo yebe yoh ngali le yebe hammaler chol imwol, ngo ye foru le mekla lol rebe ma talenga yalol ngo rebe ma hasrowu.  
\v 5 Hare semal mal le towe yoh ngali hammalel bugtal, ila ngo be ifa sengal ngo ye sala yoh le yebe hammale eklesia la yael Deus?  
\v 6 Towe semal le ye moch bulong fael Kristiano bo ye dela habos iyang resala fang yal hagerger le yebe wochog yar faor ngal moniyan.  
\v 7 Yebe iy semal yarmat le ye ssor mo irer rechokla te ir Kristiano bo ye dela tayikel loh depal sala yoh irel Moniyan.   
\s1 Chol Yengangel Eklesia  
\p
\v 8 Rechokla rebe ma yengang irel eklesia ila sibis yarmat le yebe wol momay wegdegir, ngo rebe ma katos, ngo re towe ma hacholopa lemer wine, ngo re towe ma chahewal salpiy.  
\v 9 Ye tugul le yebe kkel deper le rebe kapta mekla ye katos le kofael tugulul ladep, le ye towe ma yeyewal deper iyang.  
\v 10 Metamo ngo rebe haglar mwo, ngo hare yebe yoh ngalir ila ngo ye bele moch yoh le rebe yengang.  
\v 11 Mekla rir mwo ngo be wol momay wegdegir, ngo re towe ma lunglung irer yarmat ngo rebe ma katos irel pangal formel.  
\v 12 Semal le yebe mel bo semal chol yengangel eklesia, ila ye tugul le be semal chog ril, ngo yebe yoh hammalel mekla lol mo chol imwol irel.  
\v 13 Rechokla rema yengangel eklesia ila yebe momay yael semal ir yengang, ngo yebe fel depel yarmat ngali, ngo yebe yoh le yebe kapta kofael tugulul ladep la yar irel Kristus Jesus.   
\s1 Molwe Ye Palleng Pelal We Ye Llebag  
\p
\v 14 Irel yai tetefa babior le ngo iyalyal bo ibe buyoy lal seral ka bo ibe wurugmi.  
\v 15 Hare ibe te tirwey, ngo babior le yai ye bele kangalugmi wululul mele sibe foru bo sibe mel bo yarmetael imwla imwel Deus, le eklesia we yael Deus la ye molow le tor siyal. Ila mala hakkelal mo dayifel tugul le ye katos.  
\v 16 Tor semal le yebe yoh le yebe sor sew formel irel mele yesa tugul depach iyang:  
\q1 Ye llahdoh bo yarmat,  
\q2 ngo Espritu Santus mele ye kawraloh le ye bung, ngo angelus kowe mele re wiri.  
\q1 Re foloyu kofal ngalir chol sere mo sere lam,  
\q2 ngo yarmetael faileng le re chepar irel, iwe ngo rehasidah wol laeng.   
\c 4  
\s1 Rechoka Rema Forigirloh Le Ir Chol Foloy  
\p
\v 1 Ye medaf yael Espritu Santus kapta le tot yarmat re bele ttahchaloh yar tugul irel ralleka ye bele budoh, ngo re bele taelenga yalol yalus kala rema kachepar, ngo re taelenga yalol moniyan.  
\v 2 Foloy ka ila ye budoh mo irer rechokla rema kachepar, le luluwal kala yar ila yael monyan. Luluwal kala yar le rema gola meka ye momay mo meka tayikof mo iyang ila sa mesloh le wochog molwe sa fisngeg ngal sew parang le ye bichikar.  
\v 3 Tappel rechokla ila senger ila rema foloyu le ye tayikof la sibe riri, ngo ye wol tayikof la sibe mongoy kattot mongoy. Iwe ngo Deus ye foru mongoy kala bo rechokla resa chepar ngo resa gola mekla ye katos rebe hangi, le wol miril yar kangalu Deus yal hachigchig.  
\v 4 Pangal meka Deus ye foru ngo ye momay. Tor mele sibe te dipli mo iyang, iwe ngo pangal formel le yebe yoh ngalgich ngo sibe kangalu Deus yal hachigchig iyang.  
\v 5 Bo pedal mala yalol Deus mo mapel mele ye foru le yebe fel meka mo irel Deus.   
\s1 Semal Boy Momay Le Yael Kristus Jesus  
\p
\v 6 Hare ho kangalur mekla wol bisich hapatpat ka, ila ngo hobe mel bo semal boy le ye momay le yael Kristus Jesus irel yam kawraloh le hosa repiy dah mo luwul tugulul ladep le yach mo foloy la ye katos le ho dedabey.  
\v 7 Ligdi fiyong kala ye tafel le tor fal le rebe kapta. Hosa hafleh le hobe mel le semal Kristiano le ho momay.  
\v 8 Kokom ka sima foru bo yebe kkel holongoch iyang ila yor pelal. Iwe ngo mekla sima foru bo hakkelel nguluch, ila ye palleng fal bo yagel mala ye tugul le yebe fang molow igla mo wagey.  
\v 9 Hapatpat le ila ye katos, sibe taelenga ngo si chepar iyang.  
\v 10 Sibe yedamgel ngo ye kkel yach yengang bo fael mala yesa luglug depach ngal Deus la ye molow le tor siyal le iy mele ye demerir panger yarmat, ngo pallengel chog ila rechokla resa chepar.   
\p
\v 11 Hobe kangalur hapatpat ka mo foloy ka.  
\v 12 Ho towe foru bo semal yebe kaladiy uwom le fael mala ho chil tarmal. Hobe foru bo rechokla resa chepar rebe kkay mo irel yam hapatpat, mo irel wegdegem mo yam hachangcheng mo yam tugul mo yam taldag.  
\v 13 Tapeli yam time bo hobe ma yawli ngalir yarmat meka ye mel lal Babior we ye Santus, ngo hosa foloyur ngo ho hamdefar. Habe ma foru mele yee, yela hola yodla iy be buyoy iremi iyang.  
\v 14 Ho towe ttahchaloh kkefang we re fang ngalug irel yodwe profeta kowe re kaptapat, ngo mal kowe yami resa yetedah payur uwom.  
\v 15 Hobe foru meka ngo hosa itol depom iyang, bo pangal yarmat ngo rebe wiri le ye mmal ngalug.  
\v 16 Hobe hafalug ngo hosa hafle yam foloy. Hare hobe taboloh chog yam foru meka ila ngo te gel chog mele hobe daor, bo rechokla re rongrong mekla ho kapta ngo rebe wol daor.   
\c 5  
\s1 Yengang Kala Fal Ngalir Rechokla Resa Chepar  
\p
\v 1 Ho towe kkaftoroy ngal semal le yesa mal bo hobe far hamdefa le yebe wochog mala iy spegil tamom. Hammaler rechoka re yalwich mo yifam le yebe wochog bo ir spegil bisim.  
\v 2 Yebe wol ila sengal mele hobe faor ngalir rechoka resa fefel le yebe wochog bo ir spegil solom, mo fefel ka re yalwich mo yifam le yebe wochog bo ir spegil mengam.   
\p
\v 3 Hafalir fefel kala yesa mes rir le tor le ye kekammaler.  
\v 4 Hare ye mel semal fefel le yesa mes ril ngo yor lol hare yor lol mekla lol, ngo metamol ngo rebe foru yengang kala yar Kristiano mo lobugter. Be iye sengal mala rebe foru ila ngo yebe tefael payel hachigchig kowe mekla wulutugur mo wulutugul mekla wulutugur re foru ngalir, bo ila mele ye fel mo irel Deus.  
\v 5 Semal fefel le yesa mes ril ngo tor le yema hamale, ila yesa yetedah depal uwol Deus, ngo yema mapel lubong mo leral bo yebe hafalpechey Deus bo yebe tipingi.  
\v 6 Iwe ngo semal fefel le yesa mes ril ngo yesa tapeli holongol irel mekla ye tayikof ila yesa faesul mes, le ila mwo ye chil molow.  
\v 7 Hobe kangalur foloy ka bo ila ngo tor le yebe sor sew bo derer.  
\v 8 Iwe ngo hare semal le ye tema hammaler chol bugtal mo yal family, ila ngo yesa tahchaloh tugul la yar Kristiano ngo yesa kkel yal tayikof mo imor rechoka rete chepar.   
\p
\v 9 Ho towe tefadiy idel semal fefel le yesa mes ril lal babior la ye mel ider fefel kala yesa mes rir iyang igle ye ted ligdi weleg lepal ragel. Iwe ngo be hal fael sew chog yal riri,  
\v 10 ngo ye momay wegdegel: Be semal fefel le yebe ma hamaler mekla lol ngo yema mechal le yebe budoh wasola irel mala imwal, ngo yema faor yengang kala ye tottol bo yaglir Kristiano kala choluwal, ngo yema tipingir rechokla re hafohoy, ngo yema yedamgel bo yebe ma foru chog mekla ye momay.   
\p
\v 11 Ho towe yetolong ider fefel kala yesa mes rir ngo re chil lefechig lal babior, bo fael mala ye bela sew yad le yesa kkel deper le rebe riri ngo re bele ttagul tang Kristus.  
\v 12 Iwe ngo re bele tayikof bo resa hatawsi molwe re hatugulu ngali metamo.  
\v 13 Re bele wol kkay yar be hatolpaloh yar time irel yar loh irel sew mo sew imw, ngo te iye chog, bo re bele wol kkay le rebe toa lunglung ngo re hapilsedaw ngalir yarmat irel yar yengang le re kekapta tot formel le torloh pelal le ir rebe kapta.  
\v 14 Ila idipli le fefel kala yesa mes rir ngo re chil lefechig rebe riri, bo yebe yor layur ngo re hammale bugter. Ila ngo rechokla re ma hapaliyel ngalgich, ila tor hapatpat tayikof la rebe sor irech.  
\v 15 Bo tot fefel ka yesa mes rir ila resa tagul resa dabey mala depel Satan.  
\v 16 Te tugul semal fefel le ye Kristiano, ngo yor fefel kala sa mes rir irel imwal ngo be hammaler ngo towe ligdirloh bo eklesia be hammaler. Eklesia ila yebe hammaler fefel kala yesa mes rir igle tor le yebe hammaler.   
\p
\v 17 Rechokla resa mmal ngo ye momay yar yengang irel mekla hammalel eklesia ila rebe luluwaley hare rebe harwowa paliyer. Mele ila ngalir chog rechokla ye kkel yar yengang irel yar yengang mo hammedaf.  
\v 18 Bo Babior we ye Santus ye sor bo, “Ho towe hogoyu yewal semal karbow irel yodla ho teptap le ye susur fedaley faesol ire kowe” iwe ngo “Chol yengang ila ye tugul le yebe yor paliyer.”\x - \xo 5:18 \xt Dt 25:4; Mt 10:10; Lk 10:7\x*  
\v 19 Ho towe talenga mekla re sor le semal le yesa mal sa tayikof iyang, le hare yebe te rumal hare ye cholop tot le rebe mel bo tugul iyang.\x - \xo 5:19 \xt Dt 17:6; 19:15\x*  
\v 20 Hobe ma kaftoroy ngalir panger rechokla re molfid mo luwul yarmat, ila ngo ikla sibis rebe motog.   
\p
\v 21 Fael metael Deus mo Kristus Jesus mo angelus kala re santus ngo ibe kangalug le hobe taelenga pangal foloy ka, ngo ho towe hafobdirir sibis ngo ho hammaler sibis, bo hobe far haffidgirloh panger.  
\v 22 Ho towe nngat le hobe yetedah pom uwol semal hobe mapela bo yebe yangtali yengang la yael Samol. Ho towe dabey molfid kala yarmat rema foru. Hobe mel le hobe taldag.   
\p
\v 23 Ho towe ma yul chog chael. Hobe ma yulmi sugfed wine bo yebe hamomayi lal siyem bo ila homa toa tomayloh chog.   
\p
\v 24 Molfid kala yar tot yarmat ila ye mechrag yach gola, ngo yebe hamoloh mo imor irel tatelal hapatpat. Iwe ngo mekla molfidir ikla sibis ila bela wol miril loh ngo ye moch llah.  
\v 25 Wol ila sengal wegdeg ka ye momay bo ye mechrag le sibe gola. Ikla mwo ye weres la sibe gola ngo towe yoh le yebe mwol.   
\c 6  
\p
\v 1 Panger rechokla re mel le boy ngo rebe yetolong lal yar luluwal le ye palleng pelal le rebe hasrowu yar masta, bo fael mala tor le yebe hapatpat tayikof irel mala idel Deus mo foloy ka yach.  
\v 2 Boy kala ye Kristiano yar masta ila re towe tolpagilir bo ir resa mel le bisir. Ila rebe yengang ngalir le yebe momay tang rallakowe, bo fael mala rechokla yor mmaler mo irel yengang kala yar, ila rechokla resa chepar ngo ir boy kowe re hachangir.  
\s1 Foloy La Yete Katos Mo Mmal La Ye Katos  
\p Habe haskuna ngo ha foloyu meka.  
\v 3 Te tugul semal le yebe foloyu tot formel le yete haffedeg ngal foloy kala yael Samol le yach Jesus Kristus mo ikla sima faesul fofoloyu,  
\v 4 ila ye habos ngo tor mele ye gola. Ye dipli le yebe ma hachocho ngo ye fedgagil wululul foloy ka yach. Iye mele yema hasidoh loltemay mo yar ma hachocho fengal mo yar ma hapatpat tayikof mo luluwal tayikof,  
\v 5 iwe mo yal chocho yewer rechokla ye tayikof yar luluwal ngo re tay gola meka ye katos. Re luluwaley le taliw le yar Kristiano ila sew yalap le yebe budoh salpiy mo iyang le yebe cholop.   
\p
\v 6 Taliw le yar Kristiano ila yebe mmal semal iyang igle yesa fel depal irel mekla yesa yoh ngali.  
\v 7 Meda mele siya hasidoh lal faileng le? Tor! Meda mele yebe yoh le sibe hasi irel yodla sibe chuy tang faileng le? Tor!  
\v 8 Hare yor halach mo mengag le sibe yaya iyang ngo ikla chog ngo yesa lap ngalgich.  
\v 9 Iwe ngo rechokla re dipli bo rebe mmal irel pangal formel ila ye bele weg deper ngal molfid, ngo re bele yoh irel luluwal tayikof mo mekla sima tayikof gich yarmat iyang, le ila mekla yema hasirloh yarmat luwul tayikof.  
\v 10 Chahewal salpiy mele chapil pangal metmetael tayikof. Tot yarmat ila ye kkel yar dipli bo yebe yoh ngalir salpiy, iwe resa ligdaloh yar tugul ngo sa ir chog yar hasi ngalir weres mo tayikofel ladep.   
\s1 Folol Yar Memel Kristiano  
\p
\v 11 Iwe ngo gel Timothy le yael Deus boy, hobe hachuyah mo irel pangal meka. Yedamgili mekla ye bung ngo ye fel mo irel Deus, le yam tugul, hachangcheng, mo malulu mo yam momayel hagiyeg.  
\v 12 Yedamgel bo yebe kkel yam tugulul ladep le yebe wochog chol hagurum kowe rema harta yar yedamgel bo yebe yoh ngalug molow la tor siyal. Iye iy molow we Deus ye fesangugloh iyang irel yodwe ye fel yam hamdefa yam tugulul ladep mo fael meter yarmat cholop.  
\v 13 Fael metael Deus we ye fang molow ngal pangal formel, mo fael metael Kristus Jesus we ye kapta yal tugulul ladep mo fael metael Pontius Pilatus, ngo ibe kangalug bo\x - \xo 6:13 \xt Jn 18:37\x*  
\v 14 hobe taelenga meka isa kangalug bo hobe foru le towe yor derel yee, yela hola yodla yebe tefaeldoh Samol la yach Jesus Kristus iyang.  
\v 15 Yebe budoh irel yodla yesa faesul tugul mo irel Deus we ye falmay le iy chog lulap, le iy mele Kingel king ngo Samolol samol.  
\v 16 Iy chog mele ye molow le tor siyal, ngo ye mel luwul teram le tor semal le yebe yoh le yebe harpa. Tedyor mwo semal le yesa wiri; iwe ngo tor semal le yebe yoh le yebe wiri. Yebe ssor ngo ye kkel le tor siyal. Amen.   
\p
\v 17 Hobe kangalur rechokla resa mmal mo irel molow le bo re towe habos hare re itol chog yar luglug irel mmal kala ye tugul kofal. Rebe far luglug ngal Deus le iy mele ye fang ngalgich pangal formel bo yebe rraey depach iyang.  
\v 18 Kangalur bo rebe foru ikla ye momay bo rebe mmal mo irel yengang kala ye momay, ngo pangal yad ngo rebe fel le rebe tipingir yarmat ngal mekla yor irer.  
\v 19 Be iye sengal le rebe foru, ila ngo rebe hattey mmaler wagey. Ila ngo yebe yoh ngalir molow la ye katos le tor siyal.   
\p
\v 20 Timothy, hobe hafalliy meka resa lugu ngalug bo hobe hammaley. Ligdi hapatpat kala ye tayikof mo hapaliyel irel mekla yarmat re machey iyang re sala sor le ikla mekla “Repiy.”  
\v 21 Tot yarmat re sor bo yesa yoh ngalir repiy. La ila fal le resa tuwiriloh mala yalepal tugulul ladep iyang. Haradiya la yael Deus yebe mel iremi pangmiloh.