\id REV  
\ide UTF8 
\h GWO JIN ’CEENU MO 
\toc1 Gwo jin ’Ceenu eya Yohaan mo 
\toc2 GWO JIN ’CEENU MO 
\mt1 Gwo jin ’Ceenu eya Yohaan mo 
\c 1  
\s1 Gwo jin ’Ceenu goma Yesus Ḵrisṯẖos mo 
\p  
\v 1 Gwo jin ’ceenu goma Yesus Ḵrisṯẖos mo, a’di jin c̱ikin ma Arumgimis a’di mo mmoṯor unim piti kun ta imanmii to mo gom to kun mini mii la bu’th embul mo mo. Dhali a’di karki a’di eya tente/ mo mmohashkina a’di aman’doyu gwom piti mo eya manmii tom piti jin ta’da Yohaan mo,  
\v 2 a’di jin ta’da manḵal gwo o mo gom gwo ma Arumgimis mo dhali gwonṯor jin ṯora a’di goma Yesus Ḵrisṯẖos mo, isi kani ma eya ris to ’baar mo kun p̱arkina a’di e mo be.  
\v 3 Mom’bor mii gom a’di jin deŋki gwo yansan e mo jin onu is ki ’twa/ jin caaca mo dhali mom’bor mii gom uni gwansan kun ciḵki a’di mo dhali uni gun dhuki a’di jin ’kwarkunu nycine/ mo haali/ mo ’disha’dish mo be. 
\s1 Monthe Me’d goma Ḵaniisa kun ’Koni Pesu/ mo 
\p  
\v 4 Yohaan eya ḵaniisa kun ’koni pesu/ mo e Pa Asiyya mo: 
\p A’the e um mo dhali moŋḵu’th is ’peni a’di jin di’d mo dhali a’di jin diki’d mo dhali a’di jin midi p̱u’du/ mo dhali ’peni shi/in kun ’koni pesu/ mo, uni gun doshkini bwambor ma ḵursi ma maliḵ piti mo be.  
\v 5 Dhali ’pena Yesus Ḵrisṯẖos, a’di jin ta isiŋ gana/ gi gwo jin onu mo, a’di jin ta’da bwanyara/ gi mowu mo dhali ta tap̱a ap̱o/ imaliḵ kun ’koni mony’cesh mo. 
\p E a’di, a’di jin enki ana mo dhali dhu ana ki ’kus mo ’peni miinthus bana mo ka bas piti mo,  
\v 6 dhali a’di ki nyoŋ ana ki ’peŋkuman pa mo, mmota igasiis goma Arumgimis piti mo dhali Ababa mo. Dhali e a’di mo tani monyca midi di mo dhali mo jin tanu tap̱a mo gom ki sule/ mo dhali ki sule/ ya ye ’ba/ mo. Amen.  
\v 7 Hili mo mo ma. A’di midi p̱u’du/ mo e bwaaraḵ mo dhali aris eŋ ’kwani ’baar ka ’deṯe/ ’deṯe/ mini p̱ar a’di e mo, dhali aris ’kwani ’baar ka ’deṯe/ ’deṯe/ kun su’k a’di mo tani, dhali arisa waḵ gi ’kwaniny’cesh mini wol ko mo gom gway piti mo. Isi kan si’dayi. Amen. 
\p  
\v 8 Aha/ tana ja Muŋ’kup̱ mo dhali jiŋ ’Ko’d mo. A’di ta gwo jin ona Tap̱a Arumgimis mo, a’di jin di’d mo dhali a’di jin diki’d mo dhali a’di jin midi p̱u’du/ mo, a’di jin ta a’di jin Eḵa/ Eḵ mo be. 
\s1 Tonyjan gi Ya/ gi ’Kwani mo 
\p  
\v 9 Aha/ jin tana Yohaan jin tana kam bum mo, aha/ jin pwaḵkina isa nyor nyaḵki um eya Yesus ki monṯo’c bwa mo dhali gom ’peŋkuman bampa/ mo dhali ki mo jin ’kuc̱u bwa ki ’kari’th mo mmo’dim ’kup̱ mo tani aha/ dikina eya uḵa ’cesh jin yuḵu gway ka Bathmus mo gom gway gi gwo ma Arumgimis mo dhali gom gwonṯor jin ṯorkika/ mo goma Yesus mo be.  
\v 10 Aha/ dikina e Shi/in mo ka tee gi Tap̱a mo dhali aha/ ciḵkina dhan ’twa/ ap̱o/ aha/ mmun me’d ko ma poome/ mo  
\v 11 mmo/o gwo mo ki: ’Kwari ma a’di jin p̱arkina /e e mo eya warka/ mo dhali hashki a’di ka ḵaniisa gun ’koni pesu/ mo e Pan Ep̱asus mo dhali e Pan Simirna mo dhali e Pam Bargaamus mo dhali e Pan Ṯẖiyatira mo dhali e Pan Sardis mo dhali e Pam P̱iladalp̱iya mo dhali e Pa Lawudikiyya mo. 
\p  
\v 12 Dhali yan’ko’d aha/ ṯu’kkina ’ban mo mmop̱ar ’twa/ yan jin oki aha/ gwo e mo, dhali ki aha/ ṯu’kkina mo tani aha/ p̱arkina ṯirkina/ ma lamba/ e mo kun ta ’dolkon gana/ mo kun ’koni pesu/ mo.  
\v 13 Dhali e bwaman gi ṯirkina/ ma lamba/ mo tani jan ṯal ’deŋ kamu/ wakina e ki Ya/ gi ’Kwani mo jin hi’thki burrinye/ jin ta gi tur mo dhali wac̱kan ’dolkon gana/ mo eya bor a’di mo.  
\v 14 ’Kup̱ piti dhala mur’kup̱ piti c̱a’b ki bany bany me’da mur ḵa’bal mo jin ta gi kush mo dhali ta gi kush me’da wasa/ mo. Dhali em piti wana e ka le’dan o’d mo.  
\v 15 Dhali sho’k piti wana e ka koroḵ jin kushi mo mo dhali dhel mo mo me’d mii jin ṯo’du a’di mo e shemen o’d jin toru a’di mo, dhali ’twam piti wana e ka dhan yi’de/ kun gwona is ka ris mo.  
\v 16 Dhali e me’da bim poros piti mo tani a’di bu’thki’da cul kun ’koni pesu/ mo. Dhali ’peni ’twam piti mo tani a’di gac̱ki gandala turga/ jin ka’d ka ’ban su/ mo dhali bwam/em piti ’twaḵki mo mo me’da tente/ mo mmo’tu’d mo ki mom’bi’th is mo be. 
\p  
\v 17 Ki aha/ p̱arkina a’di e mo tani aha/ biṯkina mo e sho’k piti mo, ma mmowa e ki wathi/ jin wuki’d mo. Hili a’di karki me’da bim poros piti ap̱o/ aha/ mo mmo/o gwo mo ki: Dhalku/ is ki ḵo/ mo. Aha/ tana ja muŋ’kup̱ mo dhali jiŋ ’ko’d mo be,  
\v 18 dhali aha/ tana jan ṯal ’de/ jin di’d ki e mo. Aha/ wukina mo dhali hili mo mo ma, aha/ dikina ki e mo gom ki sule/ sule/ ya ye ’ba/ mo dhali aha/ takina ga mup̱tha/ gi Mowu mo dhali Mo ma Haawiya mo be.  
\v 19 Shwane/ ’kwari a’di jin p̱arkina /e e mo, a’di jin di’d shwane/ mo dhali a’di jin midi bu’th mo mo i’ko’d mo be.  
\v 20 Gom gwo yansan jin c̱inu ki jim bag mo goma cul kun ’koni pesu/ mo jin p̱arkina /e e mo e me’da bim poros pem mo dhali ṯirkina/ ma lamba/ kun ’koni pesu/ mo kun ta ’dolkon gana/ mo dhali acul kun ’koni pesu/ mo tani uni ta iman’doyu gwo mo kun ’kona ḵaniisa kun ’koni pesu/ mo dhali gom ṯirkina/ ma lamba/ kun ’koni pesu/ mo goma ḵaniisa kun ’koni pesu/ mo be. 
\c 2  
\s1 Gwo jin Hashu goma Ḵaniisa gi Pan Ep̱asus mo 
\p  
\v 1 Eya man’doyu gwo ma ḵaniisa jin di’d e Pan Ep̱asus mo tani ’kwari gwo mo ki: Gwo ’peni a’di, a’di jin bu’thki’da cul kun ’koni pesu/ mo e me’da bim poros piti mo, a’di jin yaki’d e bwaman ṯirkina/ ma lamba/ kun ta ’dolkon gana/ mo kun ’koni pesu/ mo, mmo/o gwo mo ki: 
\p  
\v 2 Aha/ misha miim pini mo, dhali aṯu’c pini jin miina /e ki mii jin ’batha’ba’th mo dhali mo jin ’kuc̱a /e bwa ki ’kari’th mo mmo’dim ’kup̱ mo dhali mo jin mola /e bu’th ’kwani kun mii ton thus mo hili /e nyo/ki uni gwansan kun yuḵki is buni ki uni kun dhunu ki she/ mo tani hili uni yisa ta uniya, dhali gam uni ki uni ta thus ki thus mo.  
\v 3 Aha/ misha ki /e ’dimki ’kup̱ mo ki bwa jin ’kuc̱a /e ki ’kari’th mo dhali ḵal mo jin ’koshu is ka nyor mo gom gway pem mo dhali /e yisa cakin mo e mowu is eya.  
\v 4 Hili aha/ tana gi gwo yaase ap̱o/ /e mo haali/ /e dhalki mo/en jin ta jin ṯwa/a/ jin di’di /e ’pen mo.  
\v 5 Kayi gwo e mo ’peni a’diyin jin biṯkina /e mo dhali rici /e adu is mo dhali miiyi to jin miina /e nṯwa/a/ mo. Waḵki/ /e diki mii mo tani heeyy, aha/ mina p̱u’dku/ i /e mo dhali joc̱ ṯirkina/ ma lambam pini mo ’peni mom piti mo, isi ciki/ waḵki/ /e diki rica du is mo be.  
\v 6 Naskina/ toŋ kamu/ jin tana /e a’dihe/. /E shi/ki mii jin miina ’Kwani Nugulawiyiin i e mo, mii jin shi/kika/ i e si’da/ mo.  
\v 7 A’diyin jin ta’d gi gu’ban’ce mo tani dhalki a’di ciḵ gwo jin ona Shi/in eya ḵaniisa gwansan mo. E a’di jin p̱iki mii e mo tani aha/ mina c̱i a’di tonṯe/ mmoshwa mo ’peni cwa gi mondiki/e mo, a’di jin diki’d e monyjaro/ ma Arumgimis mo be. 
\s1 Gwo jin Hashu goma Ḵaniisa gi Pan Simirna mo 
\p  
\v 8 Dhali eya man’doyu gwo ma ḵaniisa gi Pan Simirna mo tani ’kwari gwo mo ki: Gwo gwansan ta ku gi a’di jin ṯwa/a/ mo dhali jiŋ ’ko’d mo gom a’di jin wuki’d mo dhali a’di jin p̱u’dki’d mo mmodi ki e mo, mmo/o gwo mo ki: 
\p  
\v 9 Aha/ misha monṯo’c bwam pini mo dhali aha’th’ko’d pini mo tani (hili /e ta pa ki pa mo) dhali uni gwansan kun thu’thkina thu’th ’pen mo kun oki uni ta ’Kwani Yahuuda/ mo tani dhali uni yisa ta uniya, hili uni tan gi gu’b gi montul is ma Seṯaan mo be.  
\v 10 Dhalku/ is ki ḵo/ mo gom to kun mura /e i’kosh is ka nyor nycine/ mo. Hili mo mo ma, tap̱a ma ruma ’cesh ona bwa ki ṯa’k uma tiya eya sijin mo ki um minu ’taki nyo/ mo dhali ka tee kun ’koni ’kume’d mo tani um mini gam monṯo’c bwa mo. Tayi /e a’di jin ta/a isiŋ gana/ mo mmowu mo dhali aha/ mina c̱i /e toŋ’kup̱ gi mondiki/e mo be.  
\v 11 A’diyin jin ta’d gi gu’ban’ce mo tani dhalki a’di ciḵ gwo jin ona Shi/in eya ḵaniisa gwansan mo. A’di jin p̱iki mii e mo tani a’di iminu ’koki shi/ ki wu jin ’kon ma p̱o/i su/ mo be. 
\s1 Gwo jin Hashu goma Ḵaniisa gi Pam Bargaamus mo 
\p  
\v 12 Dhali eya man’doyu gwo ma ḵaniisa gi Pam Bargaamus mo tani ’kwari gwo mo ki: Gwo gi a’di jin ta’d gi gandala turga/ jin ka’d ka ’ban su/ mo, mmo/o gwo mo ki: 
\p  
\v 13 Aha/ misha mom pini jin c̱a’ba /e mo, e mo jin c̱a’b ma ḵursi ma Seṯaan mo. /E ṯelki sho’k mo e gway pem mo dhali /e diki waṯ gwom pem jin gamu is mo isi kani ka tee ma Antibas mo, a’di jin ta’da man/o gwom pem mo, a’dim pem jin di’d ’de/ mo jin ta isiŋ gana/ mo, a’di jin ’koshkunu mo mbwam um mo, e mo jin c̱a’bkin ma Seṯaan mo be.  
\v 14 Hili aha/ tana gi ushi gwon tiya idaḵa/ mmo/o ap̱o/ /e mo. /E tan gi ’kwanin tiya imun, uni kun bu’th gwo jin ṯor ma Balaam mo jin ṯorki’da Baalaag gwo mo mmokar mo jin koluwa kol mo mbwambori iya/ gi ’Kwani ma Israyiil mo, ki uni mini ’taki shwa to jin ’ciṯẖu/ ’kus mo gom tomp̱inycon mo dhali mmoboṯki mii jin miinu miinyc̱al mo.  
\v 15 Wakan si’da/ /e tan gi ’kwanin tiya kun bu’thki gwo jin ṯora ’Kwani Nugulawiyiin mo.  
\v 16 Kan mo tani rici /e adu is mo. Waḵki/ /e diki rica du is mo tani heeyy, aha/ mina yaku/ i /e ki jahanne/ mo dhali mii mo/as ap̱o/ uni ki gandala turga/ jin ta ’twam pem mo.  
\v 17 A’di yin jin ta’d gi gu’ban’ce mo tani dhalki a’di ciḵ gwo jin ona Shi/in eya ḵaniisa gwansan mo. E a’di jin p̱iki mii e mo tani aha/ mina c̱i a’di amanna jin bagu mo, dhali aha/ mina c̱i a’di wosh dhel jin ta jiŋ kush mo ki gway this nycine/ mo jin ’kwaru ap̱o/ wosh mo, a’di jin mola jan ṯal ’deŋ kamu/ mo, isi ciki/ jasi a’di jin bu’thki a’di mo. 
\s1 Gwo jin Hashu goma Ḵaniisa gi Pan Ṯẖiyatira mo 
\p  
\v 18 Dhali eya man’doyu gwo ma ḵaniisa gi Pan Ṯẖiyatira mo tani ’kwari gwo mo ki: Gwo jin ta ji gi Ya/ ma Arumgimis mo, a’di jin ta gi e jin shwa’d ka le’dan o’d ki bar bar mo dhali a’di jin wana ’basho’k ka koroḵ mo. 
\p  
\v 19 Aha/ misha miim pini mo dhali mo/en pini mo dhali moŋgam gwo is pini mo dhali miin tom pini kun miina /e mo dhali bwam pini jin ’kuc̱a /e ki ’kari’th mo mmo’dim ’kup̱ mo dhali miin tom pini kun ta kuŋ ’ko’d mo mmobol kun ṯwa/a/ e mo.  
\v 20 Hili aha/ tana gi to yaase ap̱o/ /e mo ki /e dhalkina ’bom jin ta’da Isabal mmodi e /e mo, ayim jin yuḵki is piti ka manc̱i gwo mo dhali a’di ṯorki gwo mo dhali mmosus c̱iŋkinam pem mmoper mo mmoboṯki mii jin miinu miinyc̱al mo dhali mmoshwa to jin ’ciṯẖu/ ’kus mo mmothe tomp̱inycon mo.  
\v 21 Aha/ c̱ikina yima tee mo mmorica du is mo tani hili ayim ushki’d mo mmorica du is ’peni miinyc̱al ma yim mo.  
\v 22 Hili mo mo ma, aha/ mina ’daŋkala yim ’ko’da ci mo, aci jin isha a’di ki ’ba’th mo dhali uni gwansan kun mii miinyc̱al nyaḵka yim mo tani aha/ mina biṯ uni e monṯo’c bwa jin caaca mo, isi ciki/ waḵki/ uni ’koki rica du is ’peni mii ma yim mo.  
\v 23 Dhali aha/ mina ’kosh uc̱i ma yim jwa mo. Dhali arisa ḵaniisa gwansan mini mish mo mo ki aha/ tana a’di jin ŋap̱ki bwaŋ ’kwani ki bur bur mo dhali aduŋ ’kwani mo, dhali aha/ mina c̱i aris umi ’baar mo to ka ’deṯe/ ’deṯe/ mo, to kun wana e ki miin to kun miina um mo.  
\v 24 Hili gom uma tiya kun ’kon e Pan Ṯẖiyatira mo kun ’koki bu’th gwo yansan jin ṯoru mo, um kun ’koki da/ar gwo mo kun yuḵa ’kwanin tiya ki toŋ’kulga/ ma Seṯaan mo, e um mo tani aha/ mina o um gwo mo ki aha/ dinaki ’thi toŋ kamu/ jin diṯadiṯ ap̱o/ um mo a’di jin dina e ki she/ jin mina umi ḵal mo.  
\v 25 Hili ṯeli sho’k mo e a’di jin tana um mo ntagi aha/ mina p̱u’dku/ mo.  
\v 26 A’di jin p̱iki mii e mo tani dhali dhu miin tom pem mo ntagi ’pemen mo tani aha/ mina c̱i a’di mom’bi’th mo ap̱owa ris kal gi ’kwaniny’cesh mo  
\v 27 dhali a’di midi ji uni ki cwaŋ kol ’kus jin ta toŋḵuthu’d mo, me’d jin ’kon ma anos kun uḵu ’pena je mo tani uni ’ce’dki bwa mo ki ’ci’cimi’th mo, wakan isi kani aha/ ki is pem si’da/ bu’thkina mom’bi’th mo ’peni Ababam pem mo  
\v 28 dhali aha/ mina c̱i a’di acul gi mon’thamo/ mo.  
\v 29 A’di yin jin ta’d gi gu’ban’ce mo tani dhalki a’di ciḵ gwo jin ona Shi/in eya ḵaniisa gwansan mo. 
\c 3  
\s1 Gwo jin Hashu goma Ḵaniisa gi Pan Sardis mo 
\p  
\v 1 Dhali eya man’doyu gwo ma ḵaniisa gi Pan Sardis mo tani ’kwari gwo mo ki: Gwo gi a’di jin ta’d gi shi/in ma Arumgimis kun ’koni pesu/ mo dhali acul kun ’koni pesu/ mo be, mmo/o gwo mo ki: 
\p Aha/ misha miin tom pini mo. /E takin gi gway gi a’di jin di ki e mo dhali /e ki is pini a’di iwuni.  
\v 2 Meri e mo, dhali ’bithi is mo, a’di jin boc̱ki’d e /e mo dhali a’di jin ’dishkina ’twa/ mmowu mo, haali/ aha/ dinaki gam miiŋ kamu/ jin ’boro’d e miim pini jin ’boro’d jin ha me’d mo ibwambori jis/e ma Arumgimis pem mo.  
\v 3 Kayi gwo e mo ma, a’di jin bu’thkina /e mo dhali a’di jin ciḵkina /e mo. Kari a’di jan ma dhali rici /e adu is mo ma. Waḵki/ /e mini diki mer e mo tani aha/ mina yaku/ me’d wathin ’di/ mo dhali /e mini mol mo mo, mo jin miga/ p̱u’dku/ ap̱o/ /e mo be.  
\v 4 /E takin ush’ceenne/ naskina/ mo kun ta ’kwani gi Pan Sardis mo, uni kun ’koki nyo/ burrinyem buni mo. Dhali uni mini nyaḵ ii ki aha/ e burrinyeŋ kush mo haali/ uni ha me’d mo be.  
\v 5 A’di jin p̱iki mii e mo tani a’di minu shum isi kan ki burrinyeŋ kush mo, dhali aha/ mina diki ’kosh gway piti mo ’pena warka/ gi mondiki/e mo. Aha/ mina pi gway piti ibwambor ma Babam pem mo dhali ibwambori iman’doyu gwom piti mo.  
\v 6 A’diyin jin ta’d gi gu’ban’ce mo tani dhalki a’di ciḵ gwo jin ona Shi/in goma ḵaniisa gwansan mo. 
\s1 Gwo jin Hashu goma Ḵaniisa gi Pam P̱iladalp̱iya mo 
\p  
\v 7 Dhali eya man’doyu gwo ma ḵaniisa gi Pam P̱iladalp̱iya mo tani ’kwari gwo mo ki: Gwo gi a’din ’de/ jin ḵogu mo, a’din ’de/ jin ta jiŋ gana/ mo, dhali a’di jin ta’d ga mup̱tha/ ma Dawuu’d mo, a’di jin midi ḵa’d ’twaŋkal mo dhali jan ṯal ’deŋ kamu/ p̱iyi’d jin midi mu’th a’di mo, a’di jin mu’thki a’di mo tani dhali jan ṯal ’deŋ kamu/ mol a’di ḵa’d mo be, mmo/o gwo mo ki: 
\p  
\v 8 Aha/ misha miin tom pini mo. Hili mo mo ma, aha/ karkina acampur ki ḵany ibwambori /e mo, a’di jin mola jan ṯal ’deŋ kamu/ mu’th mo. Aha/ misha ki /e tan gi jasi ari mom’bi’th jin gwa’dagwa’d mo dhali /e dini mmodhu gwom pem naskina/ mo dhali /e diki waṯ gway pem mo be.  
\v 9 Hili mo mo ma, aha/ mina dhu uni gwansan kun ta ku gi montul is ma Seṯaan mo, uni gun oki uni ta ku gi ’Kwani Yahuuda/ mo dhali uni ta uni yisa, hili uni tana ṯor mo – hili mo mo ma, aha/ mina dhu uni mmop̱u’dku/ mo dhali luŋ ki jiŋ ’kup̱a’dup̱uni bwambori sho’k pini mo, dhali da/ar gwo mo ki aha/ enkina /e mo be.  
\v 10 Haali/ /e dhuki gwom pem mo ki bwa jin ’kuc̱a /e ki ’kari’th mo ki mon’dim ’kup̱ mo tani aha/ mina non /e ’peni mompal mo, a’di jin midi p̱u’du/ ap̱o/ mony’ceshi ’baar mo, mmopal uni gwansan kun ’kokin mo e mony’cesh mo be.  
\v 11 Aha/ mina p̱u’dku/ ki ’dishe/ mo. Ṯeli sho’k mo e a’di jin tana /e mo, wakan ki jan ṯal ’deŋ kamu/ midi ’taki diki bu’th toŋ ’kup̱ pini mo be.  
\v 12 A’di jin p̱iki mii e mo tani aha/ mina kar a’di mmota akaḵ gi gu’b gi mondheleladhelel ma Arumgimis pem mo. A’di midi mol ya ka pije/ ki sule/ sule/ ’peni a’di mo, dhali aha/ mina ’kwar gwo ap̱o/ a’di jin ta gway ma Arumgimis pem mo, dhali gway gi ’peŋkuman Bampa/ ma Arumgimis pem mo, a’di jin ta Pa Urushaliim jin ta jin this mo jin midi p̱u’dku/ ka ’cesh mo ’peni Arumgimis pem mo ’peni momis mo, dhali gway this pem gana/ mo be.  
\v 13 A’diyin jin ta’d gi gu’ban’ce mo tani dhalki a’di ciḵ gwo jin ona Shi/in mo goma ḵaniisa gwansan mo. 
\s1 Gwo jin Hashu goma Ḵaniisa gi Pa Lawudikiyya mo 
\p  
\v 14 Dhali eya man’doyu gwo ma ḵaniisa gi Pa Lawudikiyya mo tani ’kwari gwo mo ki: Gwo gi a’di ma Amen mo, a’di jin ta isiŋ gana/ mo dhali jin ta’da man/o gwo jin ta jiŋ gana/ mo, jin ta mo ma muŋ’kup̱ me’d jin uḵkin ma Arumgimis aris to mo be, mmo/o gwo mo ki: 
\p  
\v 15 Aha/ misha miin tom pini mo. /E ŋala/ wani ’thup̱a walla moŋkamu/ ŋala/ ’batha /eya. Ki /e ḵara ba/ imini ’taki ’thup̱a’thup̱ mo walla ’batha’ba’th moyi.  
\v 16 Wakan, haali/ /e maŋgalamaŋgal mo dhali /e ŋala/ wani ’thup̱a walla moŋkamu/ ’batha /eya, aha/ mina ya/ /e ka pije/ ’peni ’twam pem mo be.  
\v 17 Haali/ /e o gwo ki, aha/ tana pa ki pa mo dhali aha/ wara ki pa mo dhali aha/ mina mii ta gi toŋ kamu/ yisa, mmomola /e mo mo ki /e ṯocu ’kus mo dhali ḵoju e i is mo dhali hatha’ko’d ki ha’th mo dhali ta ja’da/ mo dhali di is ’te/ mo.  
\v 18 Wakan aha/ malaskina /e mo mmoyol ’dolkon gana/ ’peni aha/ mo, a’di jin minu tash e ki o’d mo, ki /e mini ’taki ta pa ki pa mo dhali ta gi burrinyeŋ kush mo mmohi’th /e i is mo dhali ’taki kar /e ’peni mo ma ’the is pini jin yana /e is ’te/ mo, ’peni mo jin mishu /e mo dhali /e mini ’taki ta gi ḵwalany mmogwa’c em pini mo, ki /e mini ’taki mish mo mo.  
\v 19 Uni gwansan kun enka/ mo tani aha/ ṯo’kkina uni mo dhali aha/ dorkina uni mo. Wakan shwayi miiya nyor mo ki thiṯẖ mo dhali rici /e adu is mo.  
\v 20 Hili mo mo ma, aha/ doshkina ishan’tamo/ mo dhali nagkana campura p̱o/ ki me’d mo. Waḵki/ jan ṯal ’deŋ kamu/ midi ciḵ ’twam pem mo dhali ḵa’dki aha/ acampur mo tani aha/ mina seku/ ibwamani a’di mo dhali nyaḵ to shwa ki a’di mo dhali a’di nyaḵki aha/ mo be.  
\v 21 A’di jin midi p̱i mii e mo tani aha/ mina c̱i a’di ’ban mo jin mina a’di c̱a’b nyaḵki aha/ ka ḵursi ma maliḵ pem mo, me’d aha/ ki is pem mo mmop̱ikika/ mii e mo dhali aha/ c̱a’bkina nyaḵka Babam pem eya ḵursim piti mo be.  
\v 22 A’diyin jin ta’d gi gu’ban’ce mo tani dhalki a’di ciḵ gwo jin ona Shi/in goma ḵaniisa gwansan mo. 
\c 4  
\s1 Mo ma Luŋ jin Ta ji gi Momis mo 
\p  
\v 1 ’Ko’di mii gwansan mo tani aha/ hilkina mo mo dhali hili mo mo ma, e momis mo tani acampur ḵa’dkunu mo. Dhali ’twa/ jin ṯwa/a/ gwoyi’d mo. A’di jin ciḵka/ jin oki gwo mo e aha/ mo jin wana e ka poome/ jin o gwo mo ki: Yayu/ ’kup̱ ki moho/ mo dhali aha/ mina ṯor /e to mo, a’di jin midi bu’th mo mo i’ko’di mii yaase mo be.  
\v 2 Dhali ki jahanne/ aha/ dikina e Shi/in mo dhali hili mo mo ma, aḵursi ma maliḵ doshki’d mo e momis mo nyaḵki a’din ’de/ jin c̱a’bki’da p̱o/ ḵursi ma maliḵ mo.  
\v 3 Dhali a’di jin c̱a’bki’di maṯṯaan mo tani jamas piti jin piyina a’di mo tani wana e ki wosha wasin dhela/ ki e ka ris mo dhali wosha wasin dhela/ jin ta jim ’per mo dhali ap̱e’do/ mo a’di ’kamki’da ḵursi ma maliḵ is mo jin wana e ki wosha wasin dhela/ jin ta jin dhii/ mo.  
\v 4 Dhali aḵursi ma maliḵ ’kokini iss\f + \fr 4:4 \ft arba wa ishriin\f* ’kwanimpa ’de/ i’ce’dka doŋon kun ’kamkina ḵursi ma maliḵ is mo dhali uni gun ’kokina p̱owa ḵursi ma maliḵ gwansan mo tani ta ’kwaniŋ gwanyjaḵa/ kun ’kon ka iss ’kwanimpa ’de/ i’ce’dka doŋon mo kun shumkin ki burrinyeŋ kush mo nyaḵki toŋ’kup̱ ’dolkon gana/ e ’kup̱i uni mo be.  
\v 5 ’Pena ḵursi ma maliḵ mo tani moŋkush ’pena wara sho’k a’di dhwa/a’dki mo mo dhali ’twa/ mo dhali mondor ma sho’k gwoki’da gur gur mo, dhali e buŋ’kus ma ḵursi ma maliḵ mo tani dhantho/ ’koni pesu/ kun ḵanykunu o’d mo, uni kun ’koni pesu/ mo tani uni kun ta shi/in ma Arumgimis mo.  
\v 6 Dhali mbwambor ma ḵursi ma maliḵ mo tani ḵumma/ yi’de/ diki’d jin wana e ka gasaas jin miiki’d ki ’bera/ ’bera/ mo. 
\p Dhali to/e kun ’kon ki e kun ’koni doŋon mo, uni ’kamkina ḵursi ma maliḵ is mo mmo’kama ḵursi ma maliḵ ’kup̱ ki eŋgwari lu/ mo, dhali mmosulkina e uni ka pije/ e ki bwambor mo dhali e kun ’ka uni ka bisaŋ’ko’d mo.  
\v 7 To/e jin ṯwa/a/ jin di’d ki e mo tani wana e ka dhop̱ mo dhali to/e jin ta jiŋ ’ko’d mo jin di’d ki e mo tani wana e ka morbip̱ mo dhali to/e jin ’kon ma p̱o/i kwara mo jin di’d ki e mo tani wana jis/em piti ki wathi/ mo dhali to/e jin ’kon ma p̱o/i doŋon mo jin di’d ki e mo tani a’di wana e ka wulu/ jin p̱e’di mis mo.  
\v 8 Dhali to/e kun ’kon ma p̱o/i doŋon mo kun ’kon ki e mo, uni ’baar ka ’deṯe/ ’deṯe/ mo tani ’kan ma biny jeshem buni ipe’de/ mo dhali uni gun sula e ka pije/ ki ṯẖorony ṯẖorony mo, aris uni ’baar mo kun ’kon ki jiŋ ’kam mo dhali e bwaman mo dhali montee dhali mon’thiny mo tani uni ’koki daḵ mo mmoyuḵ gway mo mmo/o gwo mo ki: 
\q1 A’di jin ḵogu mo, a’di jin ḵogu mo, a’di jin ḵogu mo, a’di jin ta Tap̱a Arumgimis jin ta a’di jin Eḵa/ Eḵ mo, 
\q1 a’di jin diki’d mo dhali a’di jin di’d mo dhali a’di jin midi yayu/ mo be. 
\m  
\v 9 Dhali ma me’d jin ’kona to/e gwahan kun ’kon ki e mo mmoc̱i monyca ka Arumgimis mo dhali montaḵ mo dhali mo jin ’boruwa ’bor bwa i is mo e a’di jin c̱a’bki’da p̱owa ḵursi ma maliḵ mo, a’di jin c̱a’bki’d ki sule/ ki sule/ mo dhali ki sule/ mo tani  
\v 10 jwahaŋ ’kwani kun ’kon iss ’kwanimpa ’de/ i’ce’dka doŋon mo tani ṯa’kkina ’ceshi bwambori a’di mo, e a’di jin c̱a’bki’da p̱owa ḵursi ma maliḵ mo dhali luŋ a’di jin c̱a’bki’d ki e ki sule/ mo dhali ki sule/ mo tani uni ṯa’kki toŋ’kup̱ buni me’d mo mbwambor ma ḵursi ma maliḵ mo mmoyuḵ gway mo ki: 
\q1  
\v 11 /E a’di ha me’d mo, Tap̱am bam mo dhali Arumgimis bam mo 
\q1 mmobu’th monyca mo dhali montaḵ mo dhali mom’bi’th mo 
\q1 haali/ /e uḵkina ris to ’baar mo 
\q1 dhali ki bwam pini mo tani uni ’kokin mo dhali uni ’konu mmo/uḵ mo be. 
\c 5  
\s1 Yiṯ jin ’Kuc̱u Is mo dhali Ari Ḵa’bal mo 
\p  
\v 1 Dhali aha/ mishkina ki me’da bim poros gi a’di jin c̱a’bki’da p̱owa ḵursi ma maliḵ mo tani a’di ta’d gi yiṯ jin ’kuc̱kunu is mo jin ’kwarkunu gwo nycine/ mo dhali ap̱om piti mo si’da/, a’di jin ’dap̱kunu ’twa/ ka ’diŋkila/ kun ’dap̱ a’di ’twa/ kun ’koni pesu/ mo.  
\v 2 Dhali aha/ p̱arkina man’doyu gwo e mo jin ’bitha’bi’th mo jin bahki gwo mo ki ’twa/ jin caaca mo jin o gwo mo ki: Aja a’di jin ha me’d ki haŋ gana/ mo mmobene’d gwo jin ’kwaru ap̱o/ yiṯ yansan mo dhali ḵaca ’diŋkilam piti mo?  
\v 3 Dhali jan ṯal ’deŋ kamu/ yisa di’di momis mo walla ap̱o/ mony’cesh mo walla e bwaŋ’kwariny mony’cesh mo jin midi mish a’di ḵa’d mo, yiṯ yansan jin ’kuc̱u is mo walla mmohil gwo jin ’kwaru e bwaman a’di mo be.  
\v 4 Dhali aha/ gwokina kagahara mo haali/ ṯal ’deŋ kamu/ yisa gamkunu mo jin ha me’d mo mmoḵa’d gwo yansan jin ’kuc̱kunu is mo walla mmohil gwo kun ’kwarkunu ibwaman a’di mo be.  
\v 5 Dhali yan’ko’d wathin ṯal ’de/ ’peni ’kwaniŋ gwanyjaḵa/ oki aha/ gwo mo ki: Dhalku/ ki ko mo ma. Hili mo mo ma, Adhop ma waḵ ma Yahuuda/ dhali Abirman ma Dawuu’d, a’di p̱iki mii e mo be. Wakan a’di, a’di imidi mish yiṯ yansan jin ’kuc̱u is ḵa’d ’twa/ mo dhala ’diŋkila/ kun ’koni pesu/ kun ’dap̱kunu a’di ’twa/ mo. 
\p  
\v 6 Dhali mbwaman ma ḵursi ma maliḵ mo dhali to/e kun ’koni doŋon kun ’kon ki e mo dhali ibwaman ’kwaniŋ gwanyjaḵa/ mo tani aha/ p̱arkina Ari Ḵa’bal e mo mmodosh mo. A’di wana e ki a’di jin ’koshkunu mo, ki ce kun ’koni pesu/ ime’d mo dhali ka pinya/ e kun ’koni pesu/ mo, uni gun ta shi/in ma Arumgimis kun ’koni pesu/ mo, uni gun hashkunu mo eya ris mony’ceshi ’baar mo.  
\v 7 Dhali a’di yaki’d mo dhali bu’thki yiṯ yansan jin ’kuc̱kunu is mo ’peni me’da bim poros gi a’di jin c̱a’bki’d eya ḵursi ma maliḵ mo.  
\v 8 Dhali ki a’di bu’thki yiṯ yansan jin ’kuc̱u is mo tani to/e kun ’kon ma p̱o/i doŋon kun ’kon ki e mo dhali ’kwaniŋ gwanyjaḵa/ kun ’koni iss ’kwanimpa ’de/ i’ce’dka doŋon mo tani ṯa’kkina ’ceshi bwambori Ari Ḵa’bal mo. Uni ’baar ka ’deṯe/ ’deṯe/ bu’thkina dheŋdhenye/ mo dhali toŋ’kul bwa kun tana sahan ’dolkon gana/ mo kun ’tu’dkunu mo ka ’bicajwahar mo jin ta mon’tho gi uni kun dhunu ki she/ ki dhelel dhelel mo.  
\v 9 Dhali uni yuḵki gway this mo mmo/o gwo mo ki: 
\q1 /E a’di ta a’di jin ha me’d mo mmobu’th yiṯ yansan jin ’kuc̱u is mo dhali mmoḵa’da ’diŋkilam piti jin ’dap̱u a’di ’twa/ mo, 
\q1 haali/ /e ’koshkunu jwa mo, dhali ka bas pini mo tani /e wanki ’kwani ’ba/ mo goma Arumgimis mo 
\q1 ’peni arisa waḵ kun ’ko ’kwani e ki she/ ki 
\q1 she/ mo dhali ’peni aris ’twa/ kun wala ’kwani ki she/ ki she/ mo dhali ’peni ’kwani kun ’kona e ki she/ ’peni tiya mo dhali ’peni kal gi ’kwaniny’cesh/ mo 
\q1  
\v 10 dhali /e ki nyoŋ uni ki ’peŋkuman bampa/ mo dhali /e ki dhu uni ki igasiis goma Arumgimis bana mo 
\q1 dhali uni mini ta tap̱a mo e mony’cesh yansan mo. 
\m  
\v 11 Yan’ko’d aha/ ki hil mo mo dhali aha/ ciḵkina rakin jin rayunu/ mo ka kul is ’pena ḵursi ma maliḵ mo dhali to/e kun ’kon ki e mo dhali gwanyjaḵaŋ ’kwani mo tani ’twa/ gi iman’doyu gwo ka ris dhali ka ris uni ka ris kun molu deŋ e mo dhali ’twaŋ ’kwani alip̱ alip̱ mo,  
\v 12 mmo/o gwo ka dhan ’twa/ kun caaca mo ki: A’di ta a’di jin ha me’d mo. A’di jin ta Ari Ḵa’bal jin ’koshkunu mo mmobu’th mom’bi’th mo dhali pa mo dhali moyuḵ mo dhali mo jin eḵa/ eḵ mo dhali montaḵ mo dhali monyca mo dhali mom’bor mii mo.  
\v 13 Dhali aha/ ciḵkina ris to ’baar mo ka ’deṯe/ ’deṯe/ kun uḵkunu mo kun ’kon e momis mo dhali kun ’kon e mony’cesh mo dhali kun ’kon e bwaŋ’kwariny mony’cesh mo dhali e bwaŋ ḵumma/ yi’de/ mo dhali aris uni ’baar mo kun ’koni bwaman mo tani o gwo mo ki: E a’di jin c̱a’bki’da p̱owa ḵursi ma maliḵ mo dhali e Ari Ḵa’bal mo ki mom’bor mii midi di mo dhali montaḵ mo dhali monyca mo dhali mo/eḵ mo gom ki sule/ mo dhali ki sule/ mo.  
\v 14 Dhali to/e kun ’kon ma p̱o/i doŋon mo kun ’kon ki e mo tani o gwo mo ki: Amen, dhali ’kwaniŋ gwanyjaḵa/ ṯa’kkin mo dhali luŋ a’di mo be. 
\c 6  
\s1 Arisa ’Diŋkila/ mo 
\p  
\v 1 Dhali aha/ mishkina mo ki Ari Ḵa’bal ’ceeki yiṯ yansan jin ’kuc̱u is ’twa/ mo a’di jin ta jin ’de/ ’peni tiyan pesu/ mo kun ’dap̱kunu ’twa/ mo ka ’diŋkila/ mo, dhali aha/ ciḵkina ’twan ’de/ ’peni to/e kun ’kon ma p̱o/i doŋon kun ’kon ki e mo, mmo/o gwo mo me’d ’twa/ ma sho’k jin dorki’d mo ki: Yayu/ mo.  
\v 2 Dhali aha/ p̱arkina mo e mo dhali hili mo mo ma, shumarum kush mo dhali a’di jin merki a’di ap̱o/ mo tani ta’d ga abwa mme’d mo. Dhali toŋ’kup̱ c̱ikunu a’di mo, dhali a’di yaki’d ka pije/ mo mmop̱i mii e mo dhali di gwo ibwa mo mmop̱i mii e mo be. 
\p  
\v 3 Dhali ki a’di ’ceeki’da ’diŋkila/ ’twa/ mo jin ’kon ma p̱o/i su/ mo tani aha/ ciḵkina ’twa/ ’peni to/e kun ’kon ki e mo kun ’kon ma p̱o/i su/ mo jin o gwo mo ki: Yayu/ mo.  
\v 4 Dhali shumaruma kamu/ p̱u’dki’d ka pije/ mo jin c̱a’bki ’tiḵil ’tiḵil mo dhali dhir dhir mo. Dhali a’di jin merki a’di ap̱o/ mo tani a’di dhalkunu bway mo mmobu’th moŋḵu’th is ’peni ’kwaniny’cesh mo, wakan ki ’kwani mini ’kosh jwa ka rem ’kup̱ mo, dhali a’di c̱ikunu dhan gandala turga/ jin caaca mo. 
\p  
\v 5 Ki a’di ’ceeki’da ’diŋkila/ ’twa/ mo jin ’kon ma p̱o/i kwara mo tani aha/ ciḵkina to/eŋ kamu/ jin ’kon ma p̱o/i kwara jin di ki e mo jin o gwo mo ki: Yayu/ mo. Dhali aha/ p̱arkina mo e mo dhali hili mo mo ma, shumaruma kamu/ p̱u’dki’d mo jin ta’da dhisal mo, dhali a’di jin merki a’di ap̱o/ mo tani ta’d gi to jin baru to mo mme’d piti mo be.  
\v 6 Dhali aha/ ciḵkina ’twa/ jin wana e ki a’di jin doshki’di bwaman to/e kun ’koni doŋon kun ’kon ki e mo mmo/o gwo mo ki: Pos bunyan jin baru ka gada mo ki nasa guurush mo dhali pos bunyana kamu/ jin baru ka gada karka ba’de/ ap̱o/ mo ki nasa guurush mo. Hili dhalku/ ki shi/a yin is mo dhali yimana mura’th jin ḵa/u ki ŋah ŋah mo. 
\p  
\v 7 Ki a’di ’ceeki’da ’diŋkila/ jin ’kon ma po/i doŋon ’twa/ mo tani aha/ ciḵkina ’twa/ ’peni to/e kun ’kon ki e mo kun ’kon ma p̱o/i doŋon mo kun o gwo mo ki: Yayu/ mo.  
\v 8 Dhali aha/ p̱arkina mo e mo dhali hili mo mo ma, shumaruma kamu/ jin ta’da mandup̱any p̱u’dki’d mo, dhali a’di jin merki a’di ap̱o/ mo tani gway piti yuḵu ki Mowu mo, dhali Mo ma Haawiya mo, a’di baṯẖki a’di isho’k mo. Dhali uni c̱ikunu mom’bi’th mo ap̱o/ mony’cesh mo ntagi bwanu’ba kamu/ gi mony’cesh mo mmo’kosh uni ki gandala turga/ mo dhali ki ṯe/ mo dhali ki mo/isa nyor ’peni to kun shi/kin mo dhali ki tombwaasho kun ’kokin e mony’cesh mo. 
\p  
\v 9 Dhali ki a’di ’ceeki’da ’diŋkila/ ’twa/ mo jin ’kon ma p̱o/i mudhe’d mo tani aha/ p̱arkina mo e mo e bwaŋ’kwariny mo ma gwaṯa/ jin miikunuwa basa ’cesh mo aḵashira/ gi uni gwansan kun ’koshkunu jwa mo gom gwo ma Arumgimis mo dhali gom gwo jin ḵala uni mmoṯor mo.  
\v 10 Uni cuukin ki dhan ’twa/ kun caaca mo mmo/o gwo mo ki: Ayy, Tap̱a jin di’da Liṯgany mo, /e ḵogu mo dhali /e ta a’diŋ gana/ mo. Kakasja sa/? imina /e dwall gwo mo dhali ri/a ri’c mo goma bas bam mo ap̱o/ uni gwansan kun ’kokin ap̱o/ mony’cesh mo?  
\v 11 Yan’ko’d uni ’baar ka ’deṯe/ ’deṯe/ c̱ikunu burrinyeŋ kush mo dhali ṯorkunu gwo mo mmosi/is ari’ceenne/ mo ntagi mondeŋ gi igarr buni kun nyaḵkina ṯu’c mii mo dhali iwaḵ buni mo minu ’taki thim mo, uni gun minu ’taki ’kosh jwa mo me’d uni, uni ki is buni mmomiikunu uni kan mo. 
\p  
\v 12 Dhali ki a’di ’ceeki’da ’diŋkila/ ’twa/ mo jin ’kon ma po/i pe’de/ mo tani aha/ hilkina mo mo dhali hili mo mo ma, adhan mony’cesh yiḵinki is mo dhali atente/ warki’d ki ’thi/ mo me’da shawaal ’thi/ mo dhali appe jin ta’da kunn is mo tani warki’d ka bas mo  
\v 13 dhala risa cul ’peni momis uni ṯa’kkina ’cesh mo me’d cwamp̱u/ mo me’d jin raskina a’di maman kun ’koki is mo e mondiṯ mo ki a’di yiḵinkin ma p̱unthar ’tham is mo.  
\v 14 Momis a’di p̱uuki’d mo mmowa e ki yiṯ jin ’kuc̱kunu is mo, dhala ris wosha turga/ mo dhali a/uḵa ’cesh mo uni joc̱kunu mo ’peni mom buni mo be.  
\v 15 Dhali yan’ko’d imaliḵ kun ’kon e mony’cesh mo dhali ’kwani kun caaca mo dhali uni gun ta gummp̱a/ gom ’kwani ma mee mo dhali uni gun ta pa ki pa mo dhali uni kun ’bitha’bi’th mo dhali ’kwani ’baar ka ’deṯe/ ’deṯe/ mo dhali uni gun ta c̱iŋkina/ kun yolu mo dhali uni kun ’kon ki ’kus mo tani uni bagkin e jurum wosh mo dhali e bwamana ris wosh mo e ’kuwosha turga/ mo tani  
\v 16 uni yuḵki wosha turga/ mo dhali aris wosh mo mmo/o gwo mo ki: Ṯaki ap̱o/ aman mo dhali bagi aman mo ’peni jis/e gi a’di jin c̱a’bki’d eya ḵursi ma maliḵ mo dhali ’pena nyor gi Ari Ḵa’bal mo  
\v 17 haali/ adhana tee ma nyor buni jin caaca a’di p̱u’dki’d mo dhali kaja a’di imidi mish doshi bwambori a’di mo? 
\c 7  
\s1 Uc̱i ma Israyiil kun ’Koni Alaap̱i Iss ’Kwanimpa Ipesu/ mo I’ce’dka Doŋon Ap̱o/ mo kun ’Dap̱u ka ’Diŋkila/ mo 
\p  
\v 1 ’Ko’di mii yansan mo tani aha/ p̱arkina iman’doyu gwo e mo kun ’koni doŋon mo mmodosh eya rukun gi mony’cesh kun ’koni doŋon mo mmobu’th ’tham kun poshkin me’d mo ’peni mony’cesh kun ’kona shem ’pena bi idoŋon mo, ki ’thama kamu/ midi ’taki diki poshu ap̱o/ mony’cesh mo, walla e ḵumma/ yi’de/ mo walla ap̱o/ cwaŋ kamu/ mo.  
\v 2 Yan’ko’d aha/ p̱arkina man’doyu gwoŋ kamu/ e mo jin shinkunu mo ’peni mo jin sul ma tente/ mo ka ’diŋkila/ ma Arumgimis jin di ki e mme’d mo, dhali a’di yuḵki’da yuḵ ki dhan ’twa/ jin caaca kagahara mo e iman’doyu gwo kun ’koni doŋon mo, uni kun c̱ikunu mom’bi’th mo mmoshi/ mony’cesh mo dhali ḵumma/ yi’de/ mo  
\v 3 mmo/o gwo mo ki: Dhalku/ mony’cesh ki shi/ is mo walla ḵumma/ yi’de/ mo walla aris cwa mo, ntagi ana mina ’dap̱a ’diŋkila/ ap̱o/ imanmii to ma Arumgimis bana mo e buyem buni mo.  
\v 4 Dhali aha/ ciḵkina dhan mondeŋ gi uni gun ’dap̱kunuwa ’diŋkila/ mo mmota alaap̱i\f + \fr 7:4 \ft miyya wa arba wa arba/iin alip̱\f* iss ’kwanimpa ipesu/ mo i’ce’dka doŋon ap̱o/ mo, uni gun ’dap̱kunuwa ’diŋkila/ mo ’peni arisa waḵ kun ’kona e ki she/ ki she/ mo ’peni iya/ ma Israyiil mo,  
\v 5 alaap̱i ’kume’d i’ce’dka su/ ap̱o/ mo, uni gun ’dap̱kunuwa ’diŋkila/ ’pena waḵ ma Yahuuda/ mo, dhali alaap̱i ’kume’d i’ce’dka su/ ap̱o/ mo, ’pena waḵ ma Ra/ubiin mo, dhali alaap̱i ’kume’d i’ce’dka su/ ap̱o/ mo, ’pena waḵ ma Jaad mo,  
\v 6 dhali alaap̱i ’kume’d i’ce’dka su/ ap̱o/ mo, ’pena waḵ ma Ashiir mo, dhali alaap̱i ’kume’d i’ce’dka su/ ap̱o/ mo, ’pena waḵ ma Nap̱taali mo, dhali alaap̱i ’kume’d i’ce’dka su/ ap̱o/ mo, ’pena waḵ ma Manassa mo,  
\v 7 dhali alaap̱i ’kume’d i’ce’dka su/ ap̱o/ mo, ’pena waḵ ma Shamuun mo, dhali alaap̱i ’kume’d i’ce’dka su/ ap̱o/ mo, ’pena waḵ ma Lawi mo, dhali alaap̱i ’kume’d i’ce’dka su/ ap̱o/ mo, ’pena waḵ ma Yassaakar mo,  
\v 8 dhali alaap̱i ’kume’d i’ce’dka su/ ap̱o/ mo, ’pena waḵ ma Sabuluun mo, dhali alaap̱i ’kume’d i’ce’dka su/ ap̱o/ mo, ’pena waḵ ma Yuusup̱ mo, dhali alaap̱i ’kume’d i’ce’dka su/ ap̱o/ mo, gun ’dap̱kunu ’twa/ ka ’diŋkila/ ’pena waḵ ma Benyamiin mo. 
\s1 Abuhany ’Kwani ’Pena Ris Kal gi ’Kwaniny’cesh mo 
\p  
\v 9 ’Ko’di mii yansan mo tani aha/ hilkina mo mo dhali hili mo mo ma, adhana buhany wathimpa caaca mo jin mina wathin ṯal ’deŋ kamu/ mol deŋ e mo, ’peni aris kal gi ’kwaniny’ceshi ’baar mo, dhali ’peni arisa waḵ gi ’kwani ki she/ ki she/ mo, dhali ’peni ’kwani kun ’kona e ki she/ ki she/ mo, dhali ’peni ’kwanin tiya kun wal ’twa/ ki she/ mo, mmodoshkina uni mbwambor ma ḵursi ma maliḵ mo dhali mbwambori Ari Ḵa’bal mo, mmohi’th burrinyen turga/ kun ta kuŋ kush mo, dhali abiny jeṯẖkum e me’d buni mo be.  
\v 10 Dhali uni cuun ki dhan ’twa/ kun caaca mo mmo/o gwo mo ki: Mowoṯẖ ta ji ma Arumgimis bana mo, a’di jin c̱a’bki’d eya p̱o/ ḵursi ma maliḵ mo dhali e Ari Ḵa’bal mo.  
\v 11 Dhali aris iman’doyu gwo ’baar mo doshkin ki mis mo mmo’kam a’di is mo, ḵursi ma maliḵ mo, dhali mmo’kam ’kwaniŋ gwanyjaḵa/ is mo dhali to/e kun ’koni doŋon kun ’kon ki e mo, dhali uni ṯa’kki bwam/em buni ibwambor ma ḵursi ma maliḵ mo dhali luŋa Arumgimis mo  
\v 12 mmo/o gwo mo ki: Amen. Mom’bor mii mo dhali monyca mo dhali moyuḵ mo dhali mo jin ’boruwa ’bor bwa i is mo dhali montaḵ mo dhali mom’bi’th mo dhali mo/eḵ mo eya Arumgimis bana mo gom ki sule/ mo dhali ki sule/ mo. Amen. 
\p  
\v 13 Dhali yan’ko’d jan ṯal ’deŋ kamu/ ’peni ’kwaniŋ gwanyjaḵa/ ’ka’daa/ gwo me’di is mo, mmo/o gwo mo ki: Ki ija anahannee kun shumkunu ki burrinyen turga/ kun ta kuŋ kush mo dhali ’peni mana ip̱u’dkina uni mo?  
\v 14 Aha/ ki o a’di gwo mo ki: Gana, /e a’di imishki uni mo be. Dhali a’di ki oyaa/ gwo mo ki: Uni gwansani, ita uni gun piyin mo ’pena dhan monṯo’c bwa mo. Uni lamki burrinyen tur buni mo dhali mii uni ki bany bany ka bas gi Ari Ḵa’bal mo. 
\q1  
\v 15 Wakan uni ’kokini bwambor ma ḵursi ma maliḵ ma Arumgimis mo 
\q1 dhali mii a’di to ki montee ilu/ mo dhali ki mon’thiny ilu/ mo e gu’b gi mondheleladhelel piti mo be, 
\q1 dhali a’di jin c̱a’bki’da po/ ḵursi ma maliḵ mo tani a’di midi p̱a’d ki uni adarha’da/ jin ta buŋ’kus piti mo be. 
\q1  
\v 16 Uni mina ṯe/ mol ’kosh ki sule/ mo, walla mina yi’de/ ’koki bu’th ki sule/ mo. 
\q1 Atente/ si’da/ midi diki ’kosh uni mo, walla midi diki c̱i’th uni is ki mom’batha’d piti mo. 
\q1  
\v 17 Haali/ Ari Ḵa’bal, a’di doshki’di bwaman ma ḵursi ma maliḵ mo, a’di jin ta’da Amanhil uni mo, 
\q1 dhali a’di midi shu uni bway mo e mo jin kasha yi’de/ jin di ki e e mo 
\q1 dhali Arumgimis midi shumuṯa ris jabudhi ’baar mo ’peni em buni mo be. 
\c 8  
\s1 A’diŋkila/ jin ’Kon ma P̱o/i Pesu/ mo dhali Toŋ’kul Bwa jin Ta ’Dolkon Gana/ mo jin Duḵkunuwa ’Bicajwahar mo 
\p  
\v 1 Ki Ari Ḵa’bal ’ceeki’da ’diŋkila/ ’twa/ mo jin ’kon ma p̱o/i pesu/ mo tani mo doshki’d ki biyuu e momis mo ki ari mo mo jin wana e ka nusa saa mo.  
\v 2 Dhali yan’ko’d aha/ p̱arkina iman’doyu gwo kun ’koni pesu/ e mo, uni gun doshkini bwambor ma Arumgimis mo, dhali apoome/ ’koni pesu/ c̱ikunu uni mo.  
\v 3 Dhala man’doyu gwoŋ kamu/ p̱u’dki’d mo dhali doshki’d mo e mo ma gwaṯa/ jin duḵkunuwa ’bicajwahar mo ki toŋ’kul bwa jin ta ’dolkon gana/ mo jin duḵkunuwa ’bicajwahar ime’d mo. Dhali a’di c̱ikunuwa ’bicajwahar kagahara mo mmoce e ki mon’tho ma ris uni gun dhunu ki she/ ki dhelel dhelel mo ap̱o/ mo ma gwaṯan to jin ta toŋ’kul bwa mo jin ta ’dolkon gana/ mo mbwambor ma ḵursi ma maliḵ mo,  
\v 4 dhali aku’d ma ’bicajwahar a’di cuki mis mo nyaḵki mon’tho gi uni gun dhunu ki she/ ki dhelel dhelel mo ’peni me’d ma man’doyu gwo jin doshki’di bwambor ma Arumgimis mo be.  
\v 5 Dhali yan’ko’d aman’doyu gwo bu’thki toŋ’kul bwa jin duḵkunuwa ’bicajwahar mo dhali a’di ki ’tu’d a’di ka kap̱any o’d mo ’peni mo ma gwaṯa/ mo dhali a’di ki yeḵ a’di ap̱o/ mony’cesh mo, dhali kontor ma sho’k gwoki’d ki gur gur mo dhali dhan rakin caaca mo dhali awar dhwa/a’dki’d ki dhwa/a’d dhwa/a’d mo dhali adhan mony’cesh yiḵinki is mo be. 
\s1 Arisa Poome/ mo 
\p  
\v 6 Dhali iman’doyu gwo kun ’koni pesu/ kun tan ga poome/ kun ’koni pesu/ mo tani uni thosonki is mo mmodhal uni me’d mo be. 
\p  
\v 7 Dhala man’doyu gwo jin ṯwa/a/ a’di dhalki’da poomem piti me’d mo dhala wasa/ dhali o’d baṯẖki a’di isho’k mo mmo’cur e ka bas mo, uni kun ṯa’kkina p̱o/ mony’cesh mo be. Dhali ’ban gi mony’cesh jin ’kon ma p̱o/i kwara mo tani a’di kop̱kunu ki o’d mo be dhali ’ban gi bwanycwaŋ kamu/ jin ’kon ma p̱o/i kwara mo tani a’di kop̱kunu ki o’d mo be dhali arisa shon dhii/ini ’baar mo tani uni celkunu ki o’d mo. 
\p  
\v 8 Dhala man’doyu gwo jin ’kon ma p̱o/i su/ mo tani dhalki’da poomem piti me’d mo be dhali dhan toŋ kamu/ caaca kagahara mo, wana e ka dhan wosha turga/ mo jin c̱i’thkunu ki o’d mo, dhali a’di biṯkunu e bwaŋ ḵumma/ yi’de/ mo  
\v 9 dhali ’ban gi ḵumma/ yi’de/ jin ’kon ma p̱o/i kwara mo tani warki’d ka bas mo dhali ’ban gi to/e kun ’kon ma p̱o/i kwara kun ’kon ki e mo tani uni wukin mo e yi’de/ mo dhali ’ban ma ḵur kun ’kona ’bani kwara mo tani uni ’ce’dkunu sho’k mo be. 
\p  
\v 10 Dhala man’doyu gwo jin ’kon ma p̱o/i kwara mo tani dhalki’da poomem piti me’d mo dhali adhana cul biṯki’d ’peni momis mo mmodhel mo mo me’d dhantho/ mo be dhali a’di biṯki’d eya ’ban yi’de/ kun ’kon ma p̱o/i kwara mo dhali ap̱o/ yi’de/ jin kasha e ki kash mo be.  
\v 11 Dhali gway ma cul yansan mo tani a’di yuḵkunu gway ka ṯap̱ mo. Dhali ’ban gi yi’de/ jin ’kon ma p̱o/i kwara mo tani warki’d ka ṯap̱ mo dhali ’kwani ka ris wukin mo ’peni yi’de/ yan mo be haali/ yi’de/ c̱a’bki ḵa/ ḵa/ mo. 
\p  
\v 12 Dhala man’doyu gwo jin ’kon ma p̱o/i doŋon mo tani dhalki’da poomem piti me’d mo, dhali ’ban ma tente/ jin ’koni kwara mo tani a’di pwaṯẖkunu ’ban mo dhali ’ban ma ppe jin ’kon ma p̱o/i kwara mo dhali ’ban ma cul jin ’kon ma p̱o/i kwara mo, wakan ki ’ban gi moŋkush buni jin ’kon ma p̱o/i kwara mo tani warki’d ki mondhurumi’d mo. Dhali ’ban gi montee jin ’kon ma p̱o/i kwara mo tani a’di nonu mo ’peni mo jin ’twaḵki mo mo dhali wakan si’da/ ’ban gi mon’thiny jin ’kon ma p̱o/i kwara mo be. 
\p  
\v 13 Dhali yan’ko’d aha/ hilkina mo mo dhali aha/ ciḵkina wulu/ jin ’therki ko mo ka dhan ’twa/ jin caaca kagahara mo me’d jin p̱ekina a’di isi bwaman momis mo ki: Wayyi, wayyi, wayyi e uni gwansan kun ’koni mony’cesh mo ka poomen tiya ’konu mo mmodhal me’d mo, a’di jin mura iman’doyu gwo kun ’koni kwara mmop̱i mo be. 
\c 9  
\p  
\v 1 Dhala man’doyu gwo jin ’kon ma p̱o/i mudhe’d mo tani dhalki’da poomem piti me’d mo, dhali aha/ p̱arkina cul e mo mmobiṯu/ ’peni momis a’cesh mo, dhali a’di c̱ikunuwa mup̱tha/ ki jis jin shu’d jin dar gi ’pemen mo.  
\v 2 Dhali a’di ki ḵa’d moshu’d gi jis jin dar gi ’pemen mo, dhali ’peni moshu’d gi jis yan mo tani aku’d cuki mis mo me’d dhana ku’d jin caaca ’peni mo jin ’thanu o’d ki wur wur mo, dhali atente/ dhali bul mis ’kokin mo mmodhuruma dhurum mo ka ku’d ’peni jis shu’d yan mo be.  
\v 3 Dhali ’pena ku’d yan mo tani ameeŋkuuyu/ p̱u’dkin ap̱o/ mony’cesh mo dhali uni c̱ikunu mom’bi’th mo mmowa e ki mom’bi’th ma ’daḵ mo e mony’cesh mo.  
\v 4 Uni ṯorkunu gwo mo mmo’koki shi/ asho e mony’cesh mo, walla aris mo gunn kun dhii/in mo, walla cwa gunn mo, hili jasi ’kwani gwansan kun ’koki ta ga ’diŋkila/ ma Arumgimis e buyem buni mo tani  
\v 5 uni idhalkunu uni bway mo mmoc̱i isa nyor ki me’d mo ka ppe ’kup̱i mudhe’d mo, hili yisa mmo’kosh uni jwa mo, dhali thulany buni wana e ki thulany ma ’daḵ mo ki a’di wo’cki ’kwani mo be.  
\v 6 Dhali ka cim gwansan mo tani ’kwani mini ŋap̱ wu mo tani dhali uni yisa mini gam a’diya. Uni mina bwa o kagahara mmowu mo dhali wu midi gus ’peni uni mo be. 
\p  
\v 7 Dhali jamas ma kuuyu/ gwansan mo tani uni wana e ki shumarum kun thosonkunu is mo gom mo ma mee mo. E ’kup̱ buni mo tani uni takin gi toŋ’kup̱ kun wana e ki toŋ’kup̱ ’dolkon gana/ mo. Jis/em buni wana e ki jis/eŋ ’kwanim pa mo,  
\v 8 amur is buni wana e ka amur’kup̱ gi up̱ mo dhali shem buni wana e ki she/ ma dhop̱ mo.  
\v 9 Uni takin gi nyahara/ kun wana e ka rac̱pa/ kun ta toŋḵuthu’d mo, dhali is ma bim buni alki is mo me’da risa arabiya kun dirkina shumarum mo mmoya ŋwac̱a/ e mo ma mee mo be.  
\v 10 Uni takin gi thin kun wana e ka ’daḵ mo dhali wo’c buni mo, dhali mom’bi’th buni mmoshi/ ’kwani mo ka ppe ’kup̱i mudhe’d mo ishki’d e thin buni mo be.  
\v 11 Uni takin ga maliḵ ap̱o/ uni mo a’di jin ta’da man’doyu gwo gi jis jin dar gi ’pemen mo. Gway piti yuḵu ki ’twaŋ ’Kwani Ibraniyiin ka Abadduun mo, dhali ki ’twaŋ ’Kwaniŋ Griḵi a’di yuḵu ka Abulliyyuun mo. 
\p  
\v 12 Dhali awayyi jin ta jin ṯwa/a/ peki’d mo. Hili mo mo ma, awayyi jin ’kon ma p̱o/i su/ mo a’di diyi’d mmomii p̱u’du/ mo. 
\p  
\v 13 Dhali yan’ko’d aman’doyu gwo jin ’kon ma p̱o/i pe’de/ mo dhalki’da poomem piti me’d mo, dhali aha/ ciḵkina ’twa/ ’peni ce kun ’koni doŋon ’pena gwaṯa/ jin ta ’dolkon gana/ jin di’di bwambor ma Arumgimis mo  
\v 14 mmo/o gwo mo eya man’doyu gwo jin ’kon ma p̱o/i pe’de/ mo, a’di jin ta’d ga poome/ mo ki: ’Cuḵi iman’doyu gwo kun ’koni doŋon mo, uni gun deḵkunu mo eya dhan ḵumma/ yi’de/ jin yuḵu gway ka Elp̱uraat mo.  
\v 15 Wakan iman’doyu gwo kun ’koni doŋon mo tani uni ’cuḵkunu mo, uni gun bu’thkunu me’d mo mmothoson is mo goma saa mo dhali goma tee mo dhali goma ppe mo, dhali gom yil mo, mmo’kosh ’ban gi ’kwani kun ’kon ma p̱o/i kwara a’cesh mo.  
\v 16 Dhan mondeŋ ma thuruḵ ma mee kun mer shumarum ap̱o/ mo tani ’koni alaap̱i ’kume’d mar is doḵ/e ka alaap̱i ’kume’d mo dhali doḵ/e mar is ka alaap̱i ’kume’d mo. Dhali aha/ ciḵkina dhan mondeŋ buni e mo.  
\v 17 Dhali tonyjan pem jin p̱arkika/ e mo tani shumarum wana e ciki/ mo. Dhali uni gun mer shumarum ap̱o/ mo tani uni hi’thkina rac̱pa/ mo ki jamas gi mo/o’d mo dhali jamas gi wosh jin ta ’pinyamaṯẖ mo dhali jamas gi wosh jin si’da ’kwani mo jin c̱a’bki go’d go’d mo, dhali ’kup̱ shumarum wana e gi ’kup̱ ma dhop̱ mo, dhali o’d dhali aku’d dhali wosh jin si’da ’kwani mo gac̱ki’d ’peni ’twam buni mo be.  
\v 18 Ki to gwansani kwara kun ’koshi ’kwani is ka nyor mo tani ’ban gi ’kwani kun ’kon ma p̱o/i kwara kun ’kon e mony’cesh mo tani uni ’koshkunu ki o’d mo dhali ka ku’d mo dhali ki wosh jin si’da ’kwani mo jin gac̱ki’d ’peni ’twam buni mo be.  
\v 19 Haali/ mom’bi’th gi shumarum mo a’di diki’d e ’twam buni mo dhali e thin buni mo. Thin buni waki tasha/ mo kun takin gi ’kup̱ mo, dhali ki uni mo tani uni ki dhu ’kwani jama/ i is mo. 
\p  
\v 20 Dhali ’ban gi ’kwaniŋ kamu/ mo, uni gun ’konuki ’kosh mo naskina/ ki isa nyor yan jin woci ’kwani is she/ mo tani uni ’koki rica du is mo ’peni mii gi me’d buni mo walla dhala ruma ’cesh luŋ ’pen mo dhali tomp̱inycon kun uḵu ’peni ’dolkon gana/ mo dhali ’dolkon kush mo dhali akoroḵ mo dhali wosh dhel mo dhali cwa mo, uni kun mol mo p̱ar e mo walla ciḵ gwo mo walla ii ki sho’k mo.  
\v 21 Walla uni si’da/ ’koki rica du is mo ’peni mo ma meem buni kun ’kosha uni mo walla mii ma rum buni kun miina uni mo walla miinyc̱al buni kun miina uni mo walla mii ma ’dim buni kun miina uni mo. 
\c 10  
\s1 Aman’doyu Gwo dhali Ari Yiṯ jin ’Kuc̱u Is mo 
\p  
\v 1 Yan’ko’d aha/ p̱arkina man’doyu gwoŋ kamu/ e mo a’di jin ta gi mom’bi’th mo mmothulu/ ka ’cesh ’peni momis mo, koṯẖu is ka raḵ mo dhali ka p̱e’do/ i’kup̱i a’di mo, dhali bwam/em piti wana e ka tente/ mo dhali ’basho’k piti wana e ka kaḵ o’d mo.  
\v 2 A’di ta’d gi ari yiṯ jin ’kuc̱u is mo mmodi ’twa/ ḵany mo e me’d piti mo. Dhali a’di ki kar shoka bim poros piti ap̱o/ ḵumma/ yi’de/ mo dhali shoka biny cam piti ap̱o/ mony’cesh mo,  
\v 3 dhali a’di ki yuḵa yuḵ ki dhan ’twa/ jin caaca mo, mmowa e ka dhop̱ jin aŋkarki ko mo. Ki a’di yuḵki’da yuḵ mo tani mondor ma sho’k kun ’koni pesu/ mo tani alki is mo.  
\v 4 Dhali ki mondor ma sho’k kun ’koni pesu/ mo alki is mo tani aha/ ’disha ’twa/ mo mmo’kwar a’di mo, hili aha/ ciḵkina ’twa/ ’peni momis mo mmo/o gwo mo ki: ’Dap̱i a’di ka ’diŋkila/ mo, a’di jin ona montor ma sho’k kun ’koni pesu/ mo, dhali dhalku/ a’di ki ’kwar mo ka jes is mo.  
\v 5 Dhali aman’doyu gwo, a’di jin p̱arkika/ e mo tani doshki’da p̱o/ ḵumma/ yi’de/ mo dhali mony’cesh mo mmo’de’k me’da bim poros piti ’kup̱ ki momis mo  
\v 6 mmothul gwo me’da p̱o/ mo ki a’di jin diki’d goma sule/ mo dhali ki sule/ mo, a’di jin uḵki momis mo dhali to kun ’koni bwaman a’di mo dhali mony’cesh mo dhali to kun ’koni bwaman a’di mo dhali ḵumma/ yi’de/ mo dhali to kun ’koni bwaman a’di mo ki miiŋ kamu/ minu ’taki ’koki mii miiyu/ ka diiṯe/ mo,  
\v 7 hili ka tee gi ko ma poome/ jin yuḵuwa yuḵ mo jin minu ḵum cuuwa/ ka man’doyu gwo jin ’kon ma p̱o/i pesu/ mo gom gwo ma Arumgimis jin c̱inu ki jim bag mo me’d jin mina a’di baḵ a’di e c̱iŋkinam piti mo, uni gun ta imanc̱i gwom piti mo, ki a’di minu ’taki thim mo be. 
\p  
\v 8 Dhali yan’ko’d ’twa/ jin ciḵka/ ’peni momis o aha/ gwo mo doḵ/e ki: Yaku/ mo, dhali budhi yiṯ jin ’kuc̱u is mo, a’di jin di ’twa/ ḵany mo e me’d ma man’doyu gwo mo, a’di jin doshki’da p̱o/ ḵumma/ yi’de/ mo dhali ap̱o/ mony’cesh mo be.  
\v 9 Wakan aha/ yakina mo eya man’doyu gwo mo dhali ṯor a’di gwo mo mmoc̱i aha/ ari yiṯ jin ’kuc̱u is mo. Dhali a’di ki o aha/ gwo mo ki: Budhi a’di ma dhali ’kayi a’di ma. A’di midi ḵa/aḵa/ gom bwam pini mo, hili a’di midi c̱a’bki dhel dhel me’da dham mo e ’twam pini mo be.  
\v 10 Dhali aha/ bu’thkina ari yiṯ jin ’kuc̱u is mo ’peni me’d ma man’doyu gwo mo dhali ’ka a’di mo. A’di c̱a’bki’d ki dhel dhel me’da dham mo e ’twam pem mo. Hili ki aha/ ’kakina a’di mo tani bwam pem c̱a’bki’d ki ŋah ŋah mo.  
\v 11 Dhali aha/ ṯorkunu gwo mo ki: /E mini mii c̱i gwo is mo gom ’kwani ka ris mo dhali gom kal gi ’kwaniny’cesh mo dhali gom ’kwani kun ’kona ’twa/ ki she/ ki she/ mo dhali gom imaliḵ mo be. 
\c 11  
\s1 ’Kwani Su/ kun Ta Iman/o Gwo mo 
\p  
\v 1 Dhali yan’ko’d aha/ c̱ikunuwa cwahan mo jin wana e ki cwaŋ kol ’kus mo mmobar to mo, dhali aha/ ṯorkunu gwo mo ki: Cuyi mis mo dhali bari gu’b gi mondheleladhelel ma Arumgimis mo dhali mo ma gwaṯa/ jin miinuwa basa ’cesh mo dhali uni gwansan kun luŋkini cine/ mo.  
\v 2 Hili dhalku/ ki bar mo ma goŋ jin di’d ka pije/ mo ’peni gu’b gi mondheleladhelel mo. Dhalki a’di ’pen mo, haali/ a’di c̱ikunu ’kwaniŋ kal gi mony’cesh mo, dhali uni mini yap̱ mom’peŋkuman bampa/ yan jin ḵogu mo ki sho’k mo ka ppe iss\f + \fr 11:2 \ft iṯneen wa arba/iin\f* ’kwanimpa su/ i’ce’dka su/ mo.  
\v 3 Dhali aha/ mina c̱i uni kun ’koni su/, uni gun ta iman/o gwom pem, mom’bi’th mo mmoc̱i gwo is mo goma tee kun ’kon ma alip̱i\f + \fr 11:3 \ft alip̱ wa miyyaṯeen wa siṯṯiin\f* ’de/ mo jin ’ce’dki’d ka iss ’kwanimpa ka ’kume’d ’dap̱ ’twa/ ka kwara mo, mmohi’th burrinye/ ma shawaal kun ta kun ’thi/ mo. 
\p  
\v 4 Uni gwansan ta cwa seṯuun isu/ mo dhali alamba/ kun ta ṯirkina/ isu/ mo, uni gun doshkini bwambori Tap̱a gi mony’cesh mo.  
\v 5 Dhali waḵki/ jan ṯal ’deŋ kamu/ midi ’taki shi/ uni mo tani o’d minu wolu/ ’peni ’twam buni mo dhali shwa uni gun ta ’kup̱ buni ki ’ci’d’da/ mo. Waḵki/ jan ṯal ’deŋ kamu/ midi shi/ uni is mo tani a’di ’dap̱a’dap̱ kan ki a’di minu ’kosh mo.  
\v 6 Uni ta gi mom’bi’th mmomu’th momis ’twa/ mo ka shoka kamu/ midi diki p̱ir ari yi’de/ a’cesh ki me’da tee gwansan jin ’kona uni mmoc̱i gwom buni is mo, dhali uni ta gi mom’bi’th ap̱o/ yi’de/ mo mmowar uni mmota abas mo dhali mmodor mony’cesh mo ka ris isa nyor kun woci ’kwani is she/ mo me’d ka ris me’d jin mina bwa o uni mo mmomii kan mo.  
\v 7 Dhali ki uni mini ’baar gwom buni jin ona uni is mo tani adhan to/e yan jin midi shinu ’peni jis jin dar gi ’pemen mo tani midi mii mo/as ap̱o/ uni mo dhali p̱i uni e mo dhali ’kosh uni mo be.  
\v 8 Dhali buŋgwar is buni kun wukin mo tani mini ishi bway tur kun iinu mo e dhan ’peŋkuman bampa/ mo a’di jin yuḵu gway ki, a’di jin ’be’dki gwo ki ’pemena kamu/ mo, ki a’di jin ta Pan Saduum mo dhali Pam Masir mo e mo jin ’koshkunu Tap̱am buni ki cwany’ciṯẖan dhul mo.  
\v 9 Haali/ ka cim kwara dhali ka nusa p̱o/ mo tani ’kwaniŋ gwas ’peni ’kwanin tiya mo dhali ’peni awaḵa tiya mo dhali ’peni ’kwani kun ’kona ’twa/ ki she/ ki she/ mo dhali ’peni kala tiya mo uni hilkina hil ka ’thime/ mo gom buŋgwar is buni kun wukin mo dhali ush ki ’tash mo mmodhal uni bway mo ki uni minu kan ijis jwa mo.  
\v 10 Dhali uni gwansan kun ’kon e mony’cesh mo tani uni mina bwa i’kunya’kuny ap̱o/ uni mo dhali mii miim ’penkap̱an mo dhali c̱i to ki me’d ka rem ’kup̱ mo haali/ imanc̱i gwo su/ gwansan, uni ’koshki ’kwani is ka nyor ki to jin wo’cki ’kwani is she/ mo, uni kun ’kon e mony’cesh mo.  
\v 11 Hili ’ko’da cim kwara dhali ka nus mo tani shi/ir jin di ki e ’peni Arumgimis cic̱ki’d e uni mo dhali uni doshkin ki sho’k buni mo, dhali adhan moŋḵo/ is biṯkin ap̱o/ uni gwansan kun p̱arki uni e mo be.  
\v 12 Dhali yan’ko’d uni ciḵki dhan ’twa/ jin caaca ’peni momis mo mmo/o uni gwo mo ki: Iiyu/ ise mo. Dhali e jis/e gi unim buni kun ta ’kup̱ gi uni mo tani uni iiki bway momis mo e bwaaraḵ mo.  
\v 13 Dhali ka tente/ c̱aan mo tani adhan mony’cesh yiḵinki is mo dhali ’ban gi ’peŋkuman bampa/ jin ’kon ma p̱o/i ’kume’d mo tani ṯa’kkin mo be. Dhali ’kwani alaap̱i pesu/ mo uni ’koshkunu ki mony’cesh jin yiḵinki is mo, dhali kun tiya uni deekin ki dee jin shiyi’d mo dhali c̱i monyca ka Arumgimis jin ta ji gi momis mo be. 
\p  
\v 14 Dhali awayyi jin ’kon ma p̱o/i su/ mo tani peki’d mo be. Dhali hili mo mo ma, awayyi jin ’kon ma p̱o/i kwara mo tani ’dishkina ’twa/ mmop̱u’du/ mo be. 
\s1 Apoome/ jin ’Kon ma P̱o/i Pesu/ mo 
\p  
\v 15 Dhali yan’ko’d aman’doyu gwo jin ’kon ma p̱o/i pesu/ mo tani dhalki’da poomem piti me’d mo be, dhala dhan ’twa/ kun caaca gwoyunu/ mo ’peni momis mo mmo/oyu/ gwo mo ki: ’Peŋkuman bampa/ gi mony’cesh mo tani a’di warki’d ki ’peŋkuman bampa/ gi Tap̱am bana mo dhala Ḵrisṯẖos jin ta jim piti mo, dhali a’di midi ta Tap̱a gom ki sule/ mo dhali ki sule/ mo be.  
\v 16 Dhali ’kwaniŋ gwanyjaḵa/ kun ’koni iss ’de/ mo mmo’ce’dka doŋon mo uni kun ’koki ’pena ḵursim buni ibwambor ma Arumgimis mo tani ṯa’kki jis/em buni a’cesh mo dhali luŋa Arumgimis mo  
\v 17 mmo/o gwo mo ki: 
\q1 Aman c̱ikina /e mom’bor bwa i is mo, Tap̱a Arumgimis jin Eḵa/ Eḵ mo, /e jin din mo dhali /e jin dikin mo 
\q1 haali/ /e bu’thki dhan mom’bi’th pini mo dhali ṯel mii ’pen mo mmota tap̱a mo. 
\q1  
\v 18 Dhan kal gi ’kwaniny’cesh burushkina mo isho’k mo, hili anyor pini jin toru gwon dwall ’twa/a ’cesh mo tani a’di p̱u’dki’d mo 
\q1 dhali mo gom uni kun wukin mo ki uni minu dwall gwo mo 
\q1 dhali mo jin mina /e c̱i c̱iŋkinam pini to mo kun ish ḵumma/ mo, uni gun ta imanc̱i 
\q1 gwo mo dhali uni kun dhunu ki she/ ki dhelel dhelel mo, 
\q1 dhali uni gwansan kun ḵo/ki gway pini mo, nyaḵki uni kun gwa’dan mo dhali uni kun cakin mo, 
\q1 dhali mo jin ’ce’duwa ’ce’d sho’k gom uni kun ta iman’ce’d mony’cesh sho’k mo be. 
\p  
\v 19 Dhali yan’ko’d gu’b gi mondheleladhelel ma Arumgimis e momis mo tani a’di ḵa’dkunu ’twa/ mo dhala Sanduuḵ jin karu gwom piti jin gamu me’d mo tani a’di p̱arkunu e mo e gu’b gi mondheleladhelel piti mo. Dhali awara sho’k su’kki’d ki dhwa/a’d dhwa/a’d mo dhali mo alki is mo dhali agur gur ma sho’k mo dhali mony’cesh yiḵinki is mo dhali adhan kuluny ma wasa/ ṯa’kkin mo. 
\c 12  
\s1 A’bom dhali Tasha/ mo 
\p  
\v 1 Dhali adhan toŋ kamu/ jin ta to mer piki’d mo e momis mo jin ta jamas ma ’bom jin hi’thki’da tente/ mo dhali appe e ’basho’k ma yim mo dhali e ’kup̱ ma yim mo tani toŋ’kup̱ hi’thkin ma yim jin ’kon ma culi ’kume’d i’ce’dka su/ mo.  
\v 2 Dhali ayim bwaaki’da ’ci mo dhali ayim ki ’ther cuuwa/ mo gom isa nyora dho’th ma yim mo mmo’pe’dkina a’di she/ mo goma dho’th jin mina a’di idho’th mo.  
\v 3 Dhali adhan to mera kamu/ doḵ/e piki’d mo e momis mo. Hili mo mo ma, adhan tasham ’per taki’d gi ’kup̱i pesu/ mo dhali jin ḵalki ce ’kup̱i ’kume’d mo dhali toŋ’kup̱ ma maliḵ kun ’koni pesu/ kun ’tamkunu mo e ’kup̱ piti mo.  
\v 4 Dhali thin piti ’cwarki ’ban ma cul jin ’kon ma p̱o/i kwara mo ’peni momis mo dhali ras uni ka ’cesh mo. Dhali tasha/ doshki’di bwambor ma ’bom mo a’di jin ’disha ’twa/ mo mmodhodha ’ci mo ki a’di midi ’taki losa ’ci ma yim mo ka yim midi ’taki dho’th a’di mo.  
\v 5 Dhali ayim dho’thki’da ’ci jin ta’da gwas mo, a’din ’de/ yan jin midi ta tap̱a ap̱o/ aris kal gi ’kwaniny’cesh mo ki cwaŋ kol ’kus jin ta toŋḵuthu’d mo, hili a’ci ma yim a’di bu’thkunu mo eya Arumgimis mo dhali eya ḵursim piti mo.  
\v 6 Dhali a’bom yaki’da ŋwac̱a/ mo e mombwaasho mo, e mo jin thosonkin ma Arumgimis goma yim mo, e mo jin minu thip̱ a’di goma tee ma alip̱i ’de/ mo jin ’ce’dki’d ka iss ’kwanimpa ka ’kume’d mo ny’ce’dka kwara mo. 
\p  
\v 7 Dhali mo/as cuki mis mo e momis mo. Miḵa/iil dhali iman’doyu gwom piti askin ap̱o/ tasha/ mo dhali tasha/ si’da/ nyaḵki/ iman’doyu gwonthus piti mo askina as mo.  
\v 8 Hili uni p̱ikunu e mo dhali moŋkamu/ di’d gom uni e momisa?  
\v 9 Dhali adhan tasha/ a’di biṯkunu ka ’cesh mo, dhan tashan dhamo/ yin mo, a’di jin yuḵkunu gway ki Tap̱a ma Ruma ’Cesh mo dhali ka Seṯaan mo, a’di jin ta’da manhe’k ’kwaniny’cesh e ’baar mo – a’di biṯkunu mo ka ’cesh mo dhali iman’doyu gwonthus piti si’da/ mo, uni ṯa’kkunu ka ’cesh nyaḵki a’di mo.  
\v 10 Dhali aha/ ciḵkina dhan ’twa/ ’peni momis mo mmo/o gwo mo ki: Shwane/ mowoṯẖ dhali mom’bi’th dhali ’peŋkuman bampa/ ma Arumgimis bana mo dhali moshirr jin ta ji ma Ḵrisṯẖos piti mo tani p̱u’dkin mo, haali/ amanyera waḵ bana is ki gway mo, a’di biṯkunu ka ’cesh mo, a’di jin yerki uni is ki gway mo isa yempa/ ki montee ilu/ mo dhali ki mon’thiny ilu/ mo ibwambor ma Arumgimis bana mo.  
\v 11 Dhali uni p̱iki a’di e mo ka bas gi Ari Ḵa’bal mo dhali ki gwonṯor buni kun ṯora uni mo, haali/ uni yisa enki moŋ’koki/em buniya. Isi kani uni c̱i uni mmowu mo.  
\v 12 ’Kunyi bwa mo ma, ayy um ’kwani kun ’koni momis mo dhali um gwaṯṯan kun ’kokin e a’di mo. Hili wayyi e um mo, ayy mony’cesh dhali ḵumma/ yi’de/ mo haali/ tap̱a ma ruma ’cesh p̱u’dki’d e um mo ka dhana nyor jin shi/ashi/ mo haali/ a’di mishki’da tentem piti ’disha’dish mo. 
\p  
\v 13 Dhali ki tasha/ p̱arki mii yan e mo ki a’di biṯkunu ka ’cesh mo tani a’di ŋalki’da ’bom mo, a’di jin dho’thki’da ’ciŋgwaṯẖ mo be.  
\v 14 Hili a’bom c̱ikunuwa biny jeshe/ isu/ mo, uni kun ta ku ma dhana wulu/ mo ka yim midi ’taki p̱e mo ’peni tasha/ mo e mombwaasho mo e mo jin minu thip̱a yim mo ki mo mo dhali ki mo me’d ka ris mo dhali ki mo ka nus mo.  
\v 15 Dhali tasha/ gac̱ki yi’de/ ’peni ’twam piti me’d ḵumma/ yi’de/ mo ’ko’da ’bom mo mmodhidha yim sho’k ka dhana gannu/ yi’de/ mo.  
\v 16 Hili mony’cesh p̱u’dki’d mo dhali woṯẖa yim mo dhali mony’cesh ḵa’dki ’twam piti mo dhali los yi’de/ jin gac̱kina tasha/ ’peni ’twam piti mo be.  
\v 17 Yan’ko’d doḵ/e tasha/ shin ma nyori me’d mo goma ’bom mo dhali yaki’d mo mmomii mo/as ap̱o/ ushi uc̱i ma yim mo kun ’kokin mo, uni gwansan kun dhuki gwoŋḵan ma Arumgimis kun ’kwarkunu mo dhali kun ta iman/o gwo goma Yesus mo. Dhali a’di doshki’d ap̱owa si’b gi ḵumma/ yi’de/ mo be. 
\c 13  
\s1 To/e kun ’Koni Su/ mo 
\p  
\v 1 Dhali aha/ p̱arkina to/e e mo jin cuki’d ’peni ḵumma/ yi’de/ mo jin ’kana ce ’kup̱i ’kume’d mo dhali ta gi ’kup̱i pesu/ mo dhali hi’th toŋ’kup̱ ma maliḵ kun ’koni ’kume’d kun ’tamkunuwa p̱o/ cem piti mo dhali gway jin ta gi ’pemen jin walu gwo sor mo karkunu mo ap̱o/ ’kup̱ piti mo.  
\v 2 Dhali to/e c̱aan jin p̱arkika/ e mo tani a’di wana e ka kwa mo, dhali sho’k piti wana e ki jin tombwaasho mo jin waka mann mo, dhali ’twam piti waki ’twa/ ma dhop̱ mo. Dhali e a’di mo tani tasha/ c̱iki mom’bi’th ki a’di mo dhali aḵursim piti mo dhali adhan moshirr mo be.  
\v 3 ’Kup̱ pitiŋ kamu/ ’de/ wana e ki ’kup̱ jin ta’da wambor mo jin ta jama/ mo, hili ’kup̱ piti jin ta’da wambor jin ta jama/ mo tani wac̱kunu mo dhali aris ’kwani gi mony’ceshi ’baar mo baṯẖki dhan to/e yan isho’k mo mmomer mo.  
\v 4 ’Kwaniny’cesh luŋki tasha/ mo haali/ a’di c̱iki moshirr piti e to/e mo dhali uni luŋki to/e mo mmo/o gwo mo ki: Kaja a’di iwaki /Eeyyee, /e jin ta to/e mo, dhali aja a’di imidi mish asa p̱o/ a’di mo? 
\p  
\v 5 Dhali to/e a’di c̱ikunu ’twa/ mo mmobah dhan gwo jin eḵa/ eḵ mo dhali gwo jin waluwa sor mo, dhali a’di dhalkunu bway mo mmop̱i moshirr piti ka ppe ’kup̱i issu/ i’ce’dka su/ mo.  
\v 6 A’di ḵa’dki ’twam piti mo mmobah gwo sora p̱owa Arumgimis mo dhali mmowal gwo sor mo gom gway piti mo dhali gom monyc̱a’b piti mo, a’di jin ta uni gwansan kun ’kokin e momis mo.  
\v 7 A’di si’da/ dhalkunu bway mo mmomii mo/as ap̱o/ uni kun dhunu ki she/ ki dhelel dhelel mo dhali p̱i uni e mo. Dhali moshirr c̱ikunu a’di ap̱o/ ’kwani kun ’kon ma waḵ e ki she/ ki she/ mo dhali ap̱o/ ’kwani mo dhali ’kwani kun wal ’twa/ ki she/ ki she/ mo dhali kal gi ’kwaniny’cesh mo,  
\v 8 dhali aris uni gun ’koni mony’cesh yan mo tani uni mini luŋ a’di mo, aris uni ka ’deṯe/ ’deṯe/ mo kun ’konuki ’kwar gway buni nṯwa/a/ ki mony’cesh yansan ’konuki ḵa’b mo eya warka/ gi mondiki/e gi Ari Ḵa’bal jin ’koshkunu mo.  
\v 9 Waḵki/ a’diyin jin ta’d gi gu’ban’ce mo mmociḵ gwo mo tani dhalki a’di ciḵ gwo mo: 
\q1  
\v 10 Waḵki/ jan ṯal ’deŋ kamu/ minu bu’th mmota c̱iŋkina/ mo tani e mo jin budhu a’di mo mmota c̱iŋkina/ mo tani a’di iyakina a’di nycine/ mo be. 
\q1 Waḵki/ jan ṯal ’deŋ kamu/ ’koshki’da ’kosh ki gandala turga/ mo tani ki gandala turga/ mo tani a’di iminu mii ’kosh ki a’di mo be. 
\m Hili ayuḵ jin yuḵu mmo’dim ’kup̱ a’dihe/ mo dhali moŋgam gwo is mo jin ta ji gi uni gun dhunu ki she/ ki dhelel dhelel mo. 
\p  
\v 11 Dhali yan’ko’d aha/ p̱arkina to/eŋ kamu/ e mo, a’di jin cuki mis mo ’peni mony’cesh mo. A’di ta’d gi ce isu/ mo jin wana e ki ji ari ḵa’bal mo dhali a’di oki gwo me’d tasha/ mo.  
\v 12 A’di p̱iki mii gi moshirri ’baar mo jin ta jin to/en ṯwa/a/ mo e buŋ’kus piti mo, dhali a’di ki ṯu’c mony’cesh mo dhali ’kwani kun ’koni a’di mo mmoluŋ to/e jin ṯwa/a/ mo, a’di jin takina ’kup̱a wambor gom jama/ jin wac̱kunu a’di mo.  
\v 13 A’di miiki dhan jamas mii mo, isi kani a’di uḵki o’d mo mmothulu/ ka ’cesh ’peni momis mo ap̱o/ mony’cesh mo e bwambori jis/eŋ ’kwani mo be.  
\v 14 Dhali ki dhan jamas mii jin dhalkunu a’di bway mo mmomii mo e buŋ’kus to/e yansan mo tani a’di he’kki ’kwani gwansan e mo, uni kun ’kokin ap̱o/ mony’cesh mo. A’di ki us uni is ki mii mo mmo/uḵ jamas gi to/e mo, a’di jin takina ’kup̱a wambor ki gandala turga/ mo jin ’koshki a’di mo dhali a’di di’d ki e mo naskina/.  
\v 15 Dhali a’di dhalkunu bway mo mmoc̱i shi/ir ki jamas gi to/e jin uḵu mo, wakan ki jamas to/e jin uḵu mo midi ’taki mish isi ’twa/ wali, dhali mmoraḵ uni gwansan kun ’koki luŋ jamas to/e jin uḵu mo ki uni minu ’kosh mo be.  
\v 16 A’di si’da/ raḵki’da ris ’kwani ’baar mo ’peni uni gun gwa’dan mo dhali uni kun cakin mo, ’peni uni gun ta pa ki pa mo dhali uni kun hatha’ko’d ki ha’th mo, ’peni uni kun ’kon ki ’kus mo dhali uni gun yolu mo ki yol c̱iŋkina/ mo, mmo’kwar jamas buni e me’da bim poros mo walla e buyem buni mo,  
\v 17 wakan ki wathin ṯal ’deŋ kamu/ midi mol yol mo walla yol to mo isi ciki/ a’di midi mii ta gi jamas mo, a’di jin ta gway gi to/e mo walla mondeŋ gi gway piti e mo be.  
\v 18 Mii yansan a’di ’theḵu gwo mo gom moyuḵ mo. Dhali dhalki a’di jin mishi gwo ’ban mo tani nyiṯẖ mondeŋ gi gway gi to/e yan mo haali/ a’di ta mondeŋ gi gway gi wathi/ en’thi/ mo. Mondeŋ piti ta’da iss\f + \fr 13:18 \ft suṯṯumiyya wa siṯṯa wa siṯṯiin\f* ’kwanimpa i/iss ’de/ i’ce’dki iss ’kwanimpa i’kume’d i’ce’dki issi kwara i’ce’dka pe’de/ ap̱o/ mo. 
\c 14  
\s1 Gway jin Yuḵa ’Kwani kun ’Koni Alaap̱i Iss ’Kwanimpa Ipesu/ mo I’ce’dka Doŋon Ap̱o/ mo 
\p  
\v 1 Yan’ko’d aha/ p̱arkina mo e mo dhali hili mo mo ma, e ’Kuwosh ma Sihyuun mo tani Ari Ḵa’bal doshki’d mo dhali nyaḵki a’di mo ka alaap̱i iss ’kwanimpa ipesu/ mo i’ce’dka doŋon mo, uni gun tan gi gway piti mo dhali gway ma Babam piti jin ’kwarkunu e buyem buni mo be.  
\v 2 Dhali aha/ ciḵkina ’twa/ ’peni momis mo mmowa e ka dhan yi’de/ jin gwokina is ka ris mo dhali mmowa e ki montor ma sho’k jin alki is mo. Dhali ’twa/ jin ciḵka/ mo tani wana e ki ko ma dheŋdhenye/ mo kun p̱ikina imanp̱i uni mo.  
\v 3 Dhali uni yuḵki gway jin ta gway this mo ibwambor ma ḵursi ma Arumgimis mo dhali ibwambori to/e kun ’koni doŋon kun ’kon ki e mo dhali ibwambori ’kwaniŋ gwanyjaḵa/ mo. Wathin ṯal ’deŋ kamu/ yisa midi mish gway yansan da/ar yisa, hili isi ciki/ uni gun tana alaap̱i iss ’kwanimpa ipesu/ mo i’ce’dka doŋon mo, uni gun wankunu ’ba/ mo ’peni mony’cesh yansan mo be.  
\v 4 A’di ta mii a’dihe/ mo uni gun ’koki nyo/ buŋgwar is buni ki up̱ mo, haali/ uni ’kokin kan ’pena bwanyara/ ma dho’th jin dhodhu uni mo. A’di ta mii a’dihe/ mo uni gun baṯẖki Ari Ḵa’bal mo e mo yin jin yakina a’di mo. Uni gwansan iwankunu ’ba/ mo ’peni aris mii kun miina ’kwaniny’cesh mo mmota maman kun ṯwa/a/ goma Arumgimis mo dhali gom Ari Ḵa’bal mo.  
\v 5 Dhali e ’twam buni mo tani gwo ma ṯora kamu/ ’konuki gam mo haali/ uni dar gi monyo/o’d mo be. 
\s1 Gwo jin Hashina Iman’doyu Gwo kun ’Koni Kwara mo 
\p  
\v 6 Yan’ko’d aha/ p̱arkina man’doyu gwoŋ kamu/ e mo, a’di jin p̱eki’d isi bwaman momis mo, a’di jin ta gi gwom ’borga/ jin di’d ki e ki sule/ mo mmobah a’di mo e uni gwansan kun ’kon e mony’cesh mo, eya ris kal gi ’kwaniny’ceshi ’baar mo dhali e ’kwani kun ’kon ma waḵ e ki she/ mo dhali e ’kwani kun wal ’twan tiya mo dhali e ’kwani kun ta ’kwanin tiya mo.  
\v 7 Dhali a’di ki o gwo ka dhan ’twa/ jin caaca mo ki: Ḵoki Arumgimis mo dhali c̱i a’di monyca mo haali/ mo p̱u’dki’d mo gom gwon dwall piti jin toru gwo ’twa/a ’cesh mo, dhali luŋi a’di mo, a’di jin uḵki momis mo dhali mony’cesh mo dhali ḵumma/ yi’de/ mo dhali yi’de/ kun kasha e ki kash mo. 
\p  
\v 8 Dhali aman’doyu gwoŋ kamu/ mo, a’di jin ’kon ma po/i su/ mo, baṯẖki a’di isho’k mo mmo/o gwo mo ki: Pam Baabil biṯi’doo. Pam Baabil biṯi’doo. A’di jin caaca mo. Ayim a’di jin raḵki aris kal gi ’kwaniny’cesh mmop̱i yimana mura’th jin ḵa/u ki ŋah ŋah mo jin ta e ma yim jin karkina a’di ki ’thir ’thir mo goma ḵanthi/ jin ’kakin ma yim mo. 
\p  
\v 9 Dhali aman’doyu gwoŋ kamu/ mo, a’di jin ’kon ma p̱o/i kwara mo, baṯẖki a’di isho’k mo mmo/o gwo ka dhan ’twa/ jin caaca mo ki: Waḵki/ wathin ṯal ’deŋ kamu/ midi luŋ to/e yan mo dhali jamas piti jin uḵu mo, dhali bu’th moŋ’kwar jin c̱inu jamas e buyem piti mo walla e me’d piti mo tani  
\v 10 a’di si’da/ midi p̱i yimana mura’th jin ḵa/u ki ŋah ŋah jin ta’da nyor ma Arumgimis mo jin minu wolu/ jin ’konuki ce e ka ḵubbaaya ma nyor piti mo, dhali a’di minu c̱i isa nyor ki me’d mo jin midi wo’c a’di is she/ mo ki o’d mo dhali to jin si’du mo si’da/, a’di jin di’di buŋ’kus gi iman’doyu gwom piti kun ḵogu mo dhali e buŋ’kus gi Ari Ḵa’bal mo.  
\v 11 Dhali aku’d gi moŋ’kosh is buni ka nyor jin midi wo’c is she/ mo tani uluc̱ki’d ki uluc̱ uluc̱ mo ki sule/ sule/ mo dhali ki sule/ mo, dhali kun mini dar gi mosi/is mo ki montee ilu/ mo dhali ki mon’thiny ilu/ mo, uni gwansan uni ta uni gun luŋki to/e yan mo dhali jamas piti jin uḵu mo dhali a’diyin jin midi bu’th moŋ’kwar gi gway piti mo. 
\p  
\v 12 Hili ayuḵ jin yuḵu mmo’dim ’kup̱ a’dihe/ mo gom uni kun dhunu ki she/ ki dhelel dhelel mo, uni gwansan kun dhuki gwoŋḵan ma Arumgimis jin ’kwarkunu mo dhali moŋgam gwo is ma Yesus mo be. 
\p  
\v 13 Dhali aha/ ciḵkina ’twa/ ’peni momis mo mmo/o gwo mo ki: ’Kwari gwo yansan mo ma. Mom’bor mii gom uni kun wukin mo, uni gun wun e Tap̱a mo ’peni shwane/ ki sule/ mo. Mom’bor mii ka jiŋ gana/ mo, me’d gwo jin ona Shi/in mo, ki uni mini ’taki si/is mo ’peni mii ma ṯu’c buni mo haali/ miin tom buni baṯẖki uni isho’k mo be. 
\s1 Bwam Mondhe’d gi Mony’cesh mo 
\p  
\v 14 Dhali yan’ko’d aha/ p̱arkina mo e mo, dhali hili mo mo ma, araḵ jin ta gi kush ki bany bany mo dhali a’di jin c̱a’bki’da p̱owa raḵ mo tani wana e ki ya/ gi ’kwani mo, mmota gi toŋ’kup̱ ’dolkon gana/ mo e ’kup̱ piti mo dhali anyerṯẖa/ jin c̱a’bki ŋar ŋar e me’d piti mo.  
\v 15 Dhali aman’doyu gwoŋ kamu/ p̱u’dki’d ka pije/ doḵ/e mo ’peni gu’b gi mondheleladhelel mo mmoyuḵa yuḵ ki dhan ’twa/ jin caaca e a’di jin c̱a’bki’da p̱owa raḵ mo mmo/o gwo mo ki: Kari anyerṯẖam pini mme’d mo dhali ’ciṯẖi/ to mo haali/ mo p̱u’dki’d jin minu ’ciṯẖ to mo, haali/ bwam mondhe’d gi ’kwaniny’cesh yansan mo tani a’di iski’d mo ki is gana/ mo.  
\v 16 Wakan a’di jin c̱a’bki’d eya p̱owa raḵ mo tani a’di ishki’da bor ga ’cesh ka nyerṯẖam piti ap̱o/ mony’cesh mo dhali mony’cesh a’di ’ciṯẖkunu to mo be. 
\p  
\v 17 Dhali aman’doyu gwoŋ kamu/ p̱u’dki’d ka pije/ mo ’peni gu’b gi mondheleladhelel e momis mo, dhali a’di si’da/ ta’d ga nyerṯẖa/ jin c̱a’bki ŋar ŋar mo.  
\v 18 Dhali yan’ko’d aman’doyu gwoŋ kamu/ p̱u’dki’d ka pije/ mo ’peni mo ma gwaṯa/ jin miinuwa bas mo, a’di jin ta’da man’doyu gwo jin ta gi mom’bi’th ap̱o/ o’d mo, dhali a’di yuḵki’da yuḵ ki dhan ’twa/ jin caaca mo e a’di jin ta’d ga nyerṯẖa/ jin c̱a’bki ŋar ŋar mo mmo/o gwo mo ki: Kari anyerṯẖam pini mo dhali gori maman ’peni cwalman gi mony’cesh mo haali/ amura’th piti iskin ki is gana/ mo.  
\v 19 Wakan aman’doyu gwo a’di ishki’da bor ga ’cesh ka nyerṯẖam piti mo ap̱o/ mony’cesh mo dhali gor maman to ma ’cesh mo dhali ṯa’k a’di eya dhan to jin nyu/u yimana mura’th mo, a’di jin ta’da nyor ma Arumgimis jin ’batha’ba’th mo.  
\v 20 Dhali mo jin nyu/u amurathi cine/ mo tani yap̱kunu ki sho’k mo ka pije/ ’peni ’peŋkuman bampa/ mo dhali abas guski’d ’peni mo jin nyu/u yimana mura’th mo dhali ’kul ma bas caki’d mo mmogama lijaam gi ’twa/ gi shumarum mo, gom ’kus piti jin karkina a’di mo mmogus mo ta’da amyaal iss ’kwanimpa i’kume’d mo be. 
\c 15  
\s1 Iman’doyu Gwo kun Ta gi Mo gi Isa Nyor kun Wo’cki ’Kwani Is She/ mo kun Ta kuŋ ’Ko’d mo 
\p  
\v 1 Dhali yan’ko’d aha/ p̱arkina to mera kamu/ e mo e momis mo, dhan to mer jin caaca mo, iman’doyu gwo kun ’koni pesu/ mo nyaḵki isa nyor jin woci ’kwani is she/ mo kun ’koni pesu/ mo, uni kun ta kuŋ ’ko’d mo, haali/ ki uni mo tani anyor ma Arumgimis jin ’batha’ba’th mo tani a’di daḵkunu ’kup̱ mo be. 
\p  
\v 2 Dhali aha/ p̱arkina toŋ kamu/ e mo jin piki’d e ḵumma/ yi’de/ mo jin mii’d ki ’bera/ ’bera/ mo me’da gasaas mo jin cenu e ki o’d mo, dhali uni gwansan kun p̱iki to/e e mo jin uḵu mo dhali jamas piti mo dhali mondeŋ gi gway piti mo tani doshkin i’ko’d gwar gi ḵumma/ yi’de/ jin mii’d ki ’bera/ ’bera/ mo me’da gasaas mo ka dheŋdhenye/ ma Arumgimis ime’d buni mo be.  
\v 3 Dhali uni yuḵki gway ma Musa mo, a’di jin ta c̱iŋkina/ ma Arumgimis mo, dhali gway gi Ari Ḵa’bal mo mmo/o gwo mo ki: 
\q1 Miin tom pini uni caaca mo dhali to mer mo, 
\q1 ayy, Tap̱a Arumgimis jin Eḵa/ Eḵ mo. 
\q1 Miim pini ta kuŋ ḵar/e mo dhali kuŋ gana/ mo, 
\q1 ayy, Maliḵ jin ta ji gi she/ yil mo. 
\q1  
\v 4 Kaja a’di imidi diki ḵo/ /e mo dhali kar gway pini ki ca mo, ayy Tap̱a? 
\q1 Haali/ /e ’deŋ gana/ mo tani ita a’di jin ḵogu mo. 
\q1 Aris kal gi ’kwaniny’ceshi ’baar mo mini iiyu/ mo dhali luŋ /e mo 
\q1 haali/ gwon dwall pini jin toru gwo ’twa/a ’cesh mo tani a’di ṯorkunu eya tente/ mo. 
\p  
\v 5 ’Ko’di mii yansan mo tani aha/ hilkina mo mo dhali gu’b gi mondheleladhelel jin ta gu’b burrinye/ jin onu gwo mo e momis mo tani a’di ḵa’dkunu ’twa/ mo,  
\v 6 dhali ’peni gu’b gi mondheleladhelel mo tani iman’doyu gwo ’koni pesu/ mo, uni p̱u’dkin mo ki ’ba’th kun ’koni pesu/ ime’d mo kun wo’cki ’kwani is she/ mo mmoshumki burrinyen tur kun dheleladhelel mo, kun kushakush kun dhinya/ e ki dhiny mo dhali uni ki hi’th wac̱kan ’dolkon gana/ mo e empa’d buni mo.  
\v 7 Dhali to/e kun ’ko ki e mo, jan ’de/ ’peni tiyan doŋon gwansan mo tani c̱iki iman’doyu gwo kun ’koni pesu/ toŋ’kul bwan ’dolkon gana/ mo kun ’tu’dkunu mo ki piny piny ka nyor ma Arumgimis jin ’batha’ba’th mo, a’di jin di’d ki e ki sule/ mo dhali ki sule/ mo  
\v 8 dhali gu’b gi mondheleladhelel mo a’di ’tu’dkunu mo ki piny piny ka ku’d gi monyca ’peni Arumgimis mo dhali ’peni mom’bi’th piti mo, dhali jan ṯal ’deŋ kamu/ yisa mishi cic̱ gu’b gi mondheleladhelel mo ntagi ’ba’th kun ’kon ma p̱o/i pesu/ kun woci ’kwani is she/ mo mina iman’doyu gwo gwansan kun ’koni pesu/ idaḵ ’kup̱ mo be. 
\c 16  
\s1 Aris Toŋ’kul Bwa ma Nyor mo kun ’Batha’ba’th mo 
\p  
\v 1 Dhali yan’ko’d aha/ ciḵkina dhan ’twa/ jin caaca mo ’peni gu’b gi mondheleladhelel mo mmoṯor iman’doyu gwo kun ’koni pesu/ gwo mo ki: Iiku/ mo dhali gac̱a nyor ma Arumgimis jin ’batha’ba’th ki sheŋ ’kup̱ mo e mony’cesh mo ’peni toŋ’kul bwa kun ’koni pesu/ mo. 
\p  
\v 2 Wakan aman’doyu gwo jin di’di ṯwa/a/ mo tani a’di yaki’d mo dhali gac̱a nyor piti ’peni toŋ’kul bwa mo ap̱o/ mony’cesh mo, dhali jama/ kun ’then mo ki ’then mo dhali kun bulabul mo p̱u’dkina p̱o/ ’kwani mo uni gun ḵalki gway gi to/e yan mo dhali kun luŋki jamas piti jin uḵu mo be. 
\p  
\v 3 Dhali aman’doyu gwo jin ’kon ma p̱o/i su/ mo gac̱ki’da nyor piti ’peni toŋ’kul bwa mo ap̱o/ ḵumma/ yi’de/ mo dhali mo wakina e ka bas gi wathi/ jin wuki’d mo, dhali aris to ’baar mo kun ’kon ki e mo tani wukin mo, uni gun ’kokin e ḵumma/ yi’de/ mo be. 
\p  
\v 4 Dhali aman’doyu gwo jin ’kon ma p̱o/i kwara mo tani gac̱ki’da nyor piti ’peni toŋ’kul bwa mo ap̱o/ yi’de/ kun sokin mo dhali ap̱o/ yi’de/ kun kasha e ki kash mo, dhali uni warkin ka bas mo be.  
\v 5 Dhali aha/ ciḵkina man’doyu gwo gi yi’de/ mmo/o gwo mo ki: 
\q1 Gwon dwall pini gwansan kun torkina /e gwo ’twa/a ’cesh mo tani uni ta kuŋ ḵar/e mo, 
\q1 /e jin ta a’di jin din mo dhali jin diki’d mo, ayy /En ’De/ jin Ḵogu mo. 
\q1  
\v 6 Haali/ ’kwani gac̱kina bas gi unim pini kun dhunu ki she/ ki dhelel dhelel mo dhali imanc̱i gwo mo, 
\q1 dhali /e c̱iki uni abas mmop̱i mo. 
\q1 A’di ta tom buni jin ’dap̱a ’dap̱ mo be. 
\m  
\v 7 Dhali aha/ ciḵkina gwaṯa/ gi mo ma bas ’therki ko mo mmo/o gwo mo ki: 
\q1 Nye, Tap̱a Arumgimis jin Eḵa/ Eḵ mo, 
\q1 gwon dwall pini kun torkina /e gwo ’twa/a ’cesh mo tani uni ta uniŋ gana/ mo dhali kuŋ ḵar/e mo. 
\p  
\v 8 Dhali aman’doyu gwo jin ’kon ma p̱o/i doŋon mo tani gac̱ki’da nyor piti ’peni toŋ’kul bwa mo ap̱owa tente/ mo dhali a’di dhalkunu bway mo mmoshil ’kwani is ki o’d jin ’batha’ba’th mo.  
\v 9 ’Kwani uni shilkunu is ki mom’batha’d jin c̱a’bki wur wur mo dhali uni jeeki gway ma Arumgimis mo, a’di jin ta gi mom’bi’th mo ap̱o/ mom’ba’th gwansan kun wo’cki ’kwani is she/ mo, dhali uni ’koki rica du is mo dhali c̱i a’di monyca mo. 
\p  
\v 10 Dhali aman’doyu gwo jin ’kon ma p̱o/i mudhe’d mo tani gac̱ki’da nyor piti ’peni toŋ’kul bwa mo ap̱owa ḵursi gi to/e mo dhali ’peŋkuman bampam piti taki mondhurumi’d mo. Dhali ’kwani ’kali’thkina le’d buni ki she/ mo e isa nyor buni jin ’pe’dkina uni she/ mo,  
\v 11 dhali jee Arumgimis jin ta ji gi momis mo gom isa nyor buni mo dhali jamam buni mo dhali uni ’koki rica du is ’peni miim buni mo be. 
\p  
\v 12 Dhali aman’doyu gwo jin ’kon ma p̱o/i pe’de/ mo tani gac̱ki’da nyor piti ’peni toŋ’kul bwa mo ap̱o/ dhan ḵumma/ yi’de/ jin yuḵu gway ka Elp̱uraat mo, dhali yi’dem piti ḵu’thkunu mo mmothoson bway mo goma ris imaliḵ kun ’koni mom’pesho’k mo.  
\v 13 Dhali aha/ p̱arkina to jin gac̱ki’d ’peni ’twan tasha/ e mo dhali ’peni ’twa/ gi to/e mo dhali ’peni ’twa/ ma manc̱i gwonthus mo, to kun ’kona e ikwara mo kun ’thena’then mo dhali kun bulabul mo ’peni shi/in piti jin wana e ki ji ma ’dwa/ mo  
\v 14 haali/ uni tan ga ruma ’cesh mo, mmo’kup̱ momer mo, uni gun hakaski mo ka bor mo e imaliḵ mo kun ’koni mony’ceshi ’baar mo, mmotul uni ’kup̱ mo goma dhana mee ka tee jin caaca ma Arumgimis jin Eḵa/ Eḵ mo.  
\v 15 (Hili mo mo ma. Aha/ mina p̱u’dku/ mo mmowa e ki wathin ’di/ mo. Mom’bor mii gom a’di jin di’d ki e i’kup̱ mo mmokar burrinyem piti mo ki a’di midi ’taki diki ya is ’te/ mo dhali ki a’di minu ’koki hil ki laŋ laŋ mo.)  
\v 16 Dhali uni tulki uni is mo mmonṯal ’de/ mo e mo jin yuḵu gway ki ’twaŋ ’Kwani Ibraniyiin ka Harmajadduun mo. 
\p  
\v 17 Dhali aman’doyu gwo jin ’kon ma p̱o/i pesu/ mo tani gac̱ki’da nyor piti mo ’peni toŋ’kul bwa mo e embul gi momis mo, dhali adhan ’twa/ p̱u’dki’d ka pije/ mo ’peni gu’b gi mondheleladhelel mo dhali ’pena ḵursi ma maliḵ mo mmo/o gwo mo ki: A’di miikunu mo be.  
\v 18 Dhali awara sho’k su’kki’d ki dhwa/a’d dhwa/a’d mo dhali dhan mo alki is mo dhali kontor ma sho’k miiki’da gur gur mo dhali adhan mony’cesh yiḵinki is mo, ji gi wakansan yisa mishkunu yisa ’thissa/ me’d jin ’kokina ’kwani e mony’cesh mo. Dhan mony’cesh c̱aan jin yiḵinki is mo tani wa’di caa.  
\v 19 Adhan ’peŋkuman bampa/ a’di dherki bwa mo ki she/i kwara mo dhali aris ’peŋkuman bampa/ gi kal gi ’kwaniny’ceshi ’baar mo tani ṯa’kkin mo, dhali Arumgimis kaki dhan Pam Baabil e mo mmoṯuca yim mmop̱iya ḵubbaaya iḵu’th mo, a’di jin ta ji ma nyor piti jin ’batha’ba’th ki wap̱ wap̱ mo.  
\v 20 Dhali arisa uḵa ’ceshi ’baar mo sokin mo dhali dhan wosha turga/ yisa gamkunuwa.  
\v 21 Dhali adhan kuluny ma wasa/ ṯa’kkin mo. Diṯ buni ka ’deṯe/ ’deṯe/ ḵalki’da raṯul iss ’kwanimpa ka mudhe’d mo kun ṯa’kkina p̱o/ ’kwani ’peni momis mo ntagi ’kwani jeekina Arumgimis mo gom isa nyor kun wo’cki uni is she/ mo goma wasa/ mo, haali/ gom isa nyor jin wo’c uni is she/ kagahara kan mo. 
\c 17  
\s1 Gwo jin Toru Gwo ’Twa/a ’Cesh goma Dhana ’Bom C̱al mo 
\p  
\v 1 Dhali yan’ko’d jan ṯal ’deŋ kamu/ ’peni iman’doyu gwo jin ’kon ma p̱o/i pesu/ mo, a’di jin taki’d gi toŋ’kul bwa kun ’kon ma p̱o/i pesu/ mo tani p̱u’dki’di aha/ mo dhali o aha/ gwo mo ki: Yayu/ mo. Aha/ mina ṯor /e adhan gwon dwall jin toru gwo ’twa/a ’cesh jin caaca mo goma dhana ’bom jin mii miinyc̱al mo, a’di jin c̱a’bki’da p̱o/ yi’de/ ka ris mo.  
\v 2 A’di jin miikina imaliḵ kun ’kon e mony’cesh gwansan miinyc̱ala p̱o/ mo dhali uni ki p̱i yimana mura’th jin ḵa/u ki ŋah ŋah mo ki uni gwansan kun miiki miinyc̱al kun ’kokina p̱o/ mony’cesh mo, dhali uni warkin ki uni gun ’koshkin ma su mo.  
\v 3 Dhali a’di ki sus aha/ ki Shi/in mo e mombwaasho mo dhali aha/ p̱arkina ’bom e mo mmoc̱a’b ap̱o/ to/eŋ kamu/ jin ta’da duḵ is mo, a’di jin ’tu’du/ is ki gway jin walu gwo sor mo, dhali a’di ta gi ’kup̱i pesu/ mo dhali ce i’kume’d mo be.  
\v 4 Dhali a’bom a’di hi’thkunu is ki burrinyem buhe/ mo dhali jin ta’da duḵ is mo dhali ayim nyoŋkunu is ki ’dolkon gana/ mo dhali wosh kun ta kun dhel mo dhali dhema/ mo, dhali ayim bu’thki’da ḵubbaaya jin ta ’dolkon gana/ mo e me’d piti mo jin ’tu’dkunu ki mii kun bulabul mo dhali mii kun ’kan ma yima ḵanthi/ mo gom mo jin miin ma yim miinyc̱al mo.  
\v 5 Dhali e buye/ ma yim mo tani a’di ’kwarkunu gway ki gwo jin bagu mo ki: Pam Baabil jin caaca mo, a’di jin ta’da ata’da gi uni kun cila c̱al mo dhali uni kun cila mii kun bulabul mo e mony’cesh mo.  
\v 6 Dhali aha/ p̱arkina ’bom e mo mmo’koshkin ma bas gi uni kun dhunu ki she/ ki dhelel dhelel mo dhali abas gi uni kun ’ciṯẖu/ ’kup̱ mo goma Yesus mo be. 
\p Ki aha/ hilkina yim mo tani aha/ merkina ki dhan mer jin shiyi’d mo.  
\v 7 Hili aman’doyu gwo ki o aha/ gwo mo ki: Katinta mera eye? Aha/ mina ṯor /e gwo jin c̱inu ki jim bag mo goma ’bom yan mo dhali gom to/e jin ’kona ’kup̱i pesu/ mo dhali jin ’kona ce i’kume’d mo jin ḵalki’da yim ka pije/ mo.  
\v 8 Dhali to/e c̱aan jin p̱arkina /e e jin piki’d mo tani a’di diki di mo dhali a’di minu shinu/ ’peni jis jin dar gi ’pemen mo dhali ya mo e mo jin minu daḵ gwo me’d mo. Dhali uni gwansan kun ’kon e mony’cesh mo uni kun ’konuki ’kwar gway buni eya warka/ gi mondiki/e mo ’peni mo ma muŋ’kup̱ ki mony’cesh yansan ’konuki ḵa’b mo tani uni mini mer ki mer jin shiyi’d mo mmohil to/e mo haali/ a’di diki’d mo dhali midi diki di mo dhali a’di midi p̱u’du/ mo.  
\v 9 Mii yaase a’di minu mii kor e ki kor nycine/ mo ki moyuḵ mo. ’Kup̱ kun ’koni pesu/ mo tani a’di ta dhan ’kuwosh kun turatur mo kun ’koni pesu/ mo, e mo jin c̱a’b ma ’bom mo.  
\v 10 Dhali uni si’da/ ita imaliḵ kun ’koni pesu/ mo dhali kun ’koni mudhe’d mo tani ṯa’kkin mo, jan ṯal ’de/ a’di doshki’d mo, dhali jaŋ kamu/ yisa p̱u’dki’da naskina/ mo, dhali ki a’di midi p̱u’du/ mo tani a’di midi mii c̱a’b mo ki jasi ari mo mo.  
\v 11 Dhali gom to/e yansan jin diki’d mo dhali diki di mo tani a’di i’kon ma p̱o/i pekwara mo, hili a’di icila uni gun ’koni pesu/ mo dhali a’di yaki’d mo e mo jin daḵu gwo me’d mo be.  
\v 12 Dhali ce gwansan kun ’koni ’kume’d kun p̱arkina /e e mo tani uni ita imaliḵ kun ’koni ’kume’d mo, uni gun ’koki bu’th mom’bi’th gi miin tap̱a naskina/ mo, hili uni mini bu’th moshirr mo me’d imaliḵ ka tenten ’de/ mo, mmonyaḵki to/e mo.  
\v 13 Uni gwansan mina bwa ṯal ’de/ mo dhali c̱i mom’bi’th buni mo dhali moshirr buni ki to/e mo.  
\v 14 Uni mini mii mo/as ap̱o/ Ari Ḵa’bal mo, dhali Ari Ḵa’bal midi p̱i uni e mo haali/ a’di ta Tap̱a jin di’da p̱owa ris itap̱a mo dhali a’di ta’da Maliḵ jin di’da p̱owa ris imaliḵ mo dhali uni gwansan kun nyaḵ ’ko ki a’di mo tani uni yuḵkunu mo dhali kwanykunu mo dhali ta uni kun ta isiŋ gana/ mo. 
\p  
\v 15 Dhali a’di ki o aha/ gwo mo ki: Yi’de/ kun p̱arkina /e e mo e mo jin c̱a’b ma ’bom c̱al mo tani uni tana ris ’kwani mo dhali adhana buhany wathimpa mo dhali aris kal gi ’kwaniny’cesh mo dhali ’kwani kun wal ’twa/ ki she/ ki she/ mo.  
\v 16 Dhali ce gwansan kun ’koni ’kume’d kun p̱arkina /e e mo tani uni dhali to/e mo tani uni mini shi/a ’bom c̱ali e mo. Uni mini c̱iya ’bom ṯinya/ mo dhali mii a’di mmodi is ’te/ mo dhali los buŋgwar is ma yim ki ’kolo’c mo dhali c̱itha yim ki o’d mo,  
\v 17 haali/ Arumgimis ki kar a’di eya dum buni mo mmomii bwam piti jin dina a’di gwo ibwa mo gom bwan ṯal ’de/ jin tana uni mo dhali c̱i mom’bi’th buni jin miina uni miin tap̱a ki to/e mo ntagi gwo ma Arumgimis minu thim mo be.  
\v 18 Dhali a’bom c̱aan jin p̱arkina /e e mo tani a’di ta’da dhan ’peŋkuman bampa/ jin caaca mo, a’di ita gi mo yan jin miinu tap̱a mo ap̱o/ imaliḵ kun ’koni mony’cesh mo be. 
\c 18  
\s1 Pam Baabil jin Biṯki’doo 
\p  
\v 1 Dhali yan’ko’d aha/ p̱arkina man’doyu gwoŋ kamu/ e mo mmothulu/ ka ’cesh ’peni momis mo. A’di ta gi dhan moshirr mo dhali mony’cesh ’twaḵki mo mo ki mo ma ra/ ra/ piti mo be.  
\v 2 Dhali a’di yuḵki’da yuḵ ki ’twa/ jin eḵa/ eḵ mo mmo/o gwo mo ki: 
\q1 Pam Baabil biṯi’doo. Pam Baabil biṯi’doo. A’di jin caaca mo. 
\q1 A’di jin warki’d ki mo jin ’kon ma ruma ’cesh nycine/ mo, 
\q1 mo ma alanyjoro’c gom shi/ini ’baar ka ’deṯe/ ’deṯe/ mo kun ’thena’then mo, 
\q1 mo ma alanyjoro’c gom ’dii ’baar ka ’deṯe/ ’deṯe/ mo, kun ’thena’then mo dhali kun bulabul mo. 
\q1  
\v 3 Haali/ aris kal gi ’kwaniny’ceshi ’baar mo p̱iki yimana mura’th jin ḵa/u mo ki ŋah ŋah mo ’peni e ma yim jin karkina a’di ki ’thir ’thir mo goma ḵanthi/ jin ’kan ma yim mo. 
\q1 Dhali aris imaliḵ kun ’koni mony’cesh mo tani uni miiki miinyc̱al ap̱owa yim mo 
\q1 dhali aris uni gun yoli to e mony’cesh mo tani uni sekina ’pen ka pije/ mo gom pam buni jin tana uni mo ’peni mii ma yim kun cana bwa en’dap̱ a’di mo. 
\m  
\v 4 Yan’ko’d aha/ ciḵkina ’twaŋ kamu/ ’peni momis mo mmo/o gwo mo ki: 
\q1 Iiyu/ ka pije/ ’pena yim mo, um gun ta ’kwanim pem mo, 
\q1 isi ciki/ ki um mini ’koki bu’th miinthus ma yim mo, 
\q1 isi ciki/ ki um mini ’koki pwaḵ isa nyor ma yim kun mini wo’c ’kwani is she/ mo. 
\q1  
\v 5 Haali/ miinthus ma yim uni su’kkin ka maḵamp̱o/ ntagi momis mo, 
\q1 dhali Arumgimis kaki mii ma yim kun ’koki ta kuŋ ḵar/e e mo. 
\q1  
\v 6 Raḵa yim to ibway mo me’da yim ki is piti raḵki to ibway mo 
\q1 dhali raḵa yim to ibway mo ka ’buḵum ’ban mo gom miin to ma yim mo. 
\q1 P̱oka yim to jin cena a’di e ka ’buḵum ’ban nṯwa/a/ mo ka ḵubbaaya jin cen ma yim to e mo. 
\q1  
\v 7 Me’da yim mmokarkina a’di ’baki ca ki is piti mo dhali lo’b e mii gi bwa en’dap̱ mo tani 
\q1 wakan c̱ika yim isa nyor jin midi wo’c a’di is she/ mo dhali koki kony jabu’th mo ki mii jin nyaḵa e ki ji gi bar ma yim mii mo. 
\q1 Haali/ eya du ma yim mo tani ayim o gwo ki is piti mo ki: Ahayi itana maliḵ jin ta’da yim mo, 
\q1 aha/ yisa tana adhalla, dhali ko jin gwonu ki jabu’th mo tani miga/ p̱ar eya? 
\q1  
\v 8 Wakan to ma yim jin midi wo’c a’di is she/ mo tani midi p̱u’du/ ka tenteŋ gana/ mo, 
\q1 mo/isa nyor ’peni to kun shi/kin mo, dhali ko jin gwonu ki kony jabu’th mo dhali ṯe/ jin midi ’kosha ’kosh mo, 
\q1 dhali ayim minu c̱i’th ki o’d mo 
\q1 haali/ Tap̱a Arumgimis jin dorki’da yim gwon dwall ’twa/a ’cesh mo tani a’di eḵa/ eḵ mo be. 
\p  
\v 9 Dhali aris imaliḵ kun ’koni mony’cesh mo, uni gun miiki miinyc̱al ap̱o/ a’di mo dhali uni gun mii mii kun ta bwa en’dap̱ nyaḵka yim mo tani uni mini ko mo dhali wol kony jwa mo goma yim mo ki uni mini p̱ara ku’d e mo mmo’kuṯa p̱owa yim mo be.  
\v 10 Uni mini dosh isa dhana/ nnii mo mmoḵo/ isa nyor ma yim jin midi wo’c a’di is she/ mo dhali o gwo mo ki: 
\q1 Ayy/ayy/ayy, ayy/ayy/ayy. /E jin ta dhan ’peŋkuman bampa/ mo, 
\q1 /e jin ta dhan ’peŋkuman bampa/ gi Pam Baabil jin eḵa/ eḵ mo. 
\q1 Ka tenten ’de/ mo tani gwon dwall jin toru gwo ’twa/a ’cesh ap̱o/ /e p̱u’dki’d mo. 
\p  
\v 11 Dhali uni kun yoli to e mony’cesh mo gwokin mo dhali koki kony jabu’th goma yim mo, haali/ wathin ṯal ’deŋ kamu/ yisa di’da jin midi yol tom buni kun suka uni ki sule/ sule/ mo.  
\v 12 To kun suka uni mo kun ta ’dolkon gana/ mo dhali ’dolkon kush mo, dhali wosh dhel mo dhali dhema/ mo, dhali burrinyen dhiny e mo dhali burrinyem buhe/ mo dhali burrinye/ jin na’bulana’bul mo dhali burrinyen duḵ is mo dhali aris cwa kun ’kona e ki she/ ki she/ mo kun ’kon ma kulus nycine/ mo dhali aris to kun uḵu ’peni sheny je kun ’kona e ki she/ ki she/ mo, dhali aris to kun p̱a/u ’peni cwa kun ’bitha yol she/ ki ’bi’th mo, dhala koroḵ mo dhali toŋḵuthu’da ’bi’thga/ mo dhali dhan wosh jaro/ jin miina e ki wa’c wa’c mo,  
\v 13 dhali aḵur cwa jin wana e ka kwaṯṯan jin ḵuyi mo mo, dhali cwa jin uḵuwa p̱i’dna/ ’peni cine/ mo dhali a’bicajwahar mo dhali cwa jin yuḵu gway ka murr mo dhali a’bicajwahar jin cenu e ki to jin ḵuyi mo mo, dhali yimana mura’th jin ḵa/u ki ŋah ŋah mo dhali ayin mo dhali adip̱anya ’tiga/ mo dhali pos bunyan mo dhali bip̱ mo dhali ḵa’bal mo, dhali aris shumarum mo dhali arisa arabiya kun dira shumarum mo dhali ’kwani kun ta c̱iŋkina/ kun yolu mo, uni gwansan kun tana ḵashira/ gi ’kwanimpa en’thi/ mo. 
\q1  
\v 14 Dhali maman to jin ’kosh ma ḵashiram pini ṯe/ mo tani a’di yaki’d ’peni /e mo, 
\q1 dhali aris tom pini kun ṯawusaṯawus mo dhali mo ma wa’c wa’c pini mo, uni thiski /e e mo, dhali minu gam doḵ/eya? 
\m  
\v 15 Dhali uni gun yolki to gwansan kun sugu mo, uni gun gamki mii adu is ki pa jin tana uni ’pena yim mo tani, uni mini dosh isa dhana/ mo e moŋḵo/ is mo gom isa nyor ma yim mo jin midi wo’c a’di is she/ mo, dhali wol ko mo dhali koki kony jabu’th kagahara mo, mmo/o gwo mo ki: 
\q1  
\v 16 Ayy/ayy/ayy, ayy/ayy/ayy, gom dhan ’peŋkuman bampa/ mo 
\q1 a’di c̱aan jin hi’thkunu is ki burrinyen dhiny e mo dhali burrinyem buhe/ mo dhali burrinyen duḵ is mo, 
\q1 dhali nyoŋkunu is ki ’dolkon gana/ mo dhali ki wosh dhel mo dhali ki dhema/ mo. 
\q1  
\v 17 Ka tenten ’deŋ gana/ mo tani aris to gwansan kun ta pa ki pa mo tani shi/kunu is mo be. 
\p Dhali aris uni gwahan kun ta tap̱a ma ḵur yi’de/ mo dhali aris ’kwani kun ’ceṯẖkina ḵur yi’de/ mo dhali uni kun ta imanbora ḵur mo dhali aris uni gwansan kun yolki to mo ap̱o/ ḵumma/ yi’de/ mo tani, uni doshkin isa dhana/ mo  
\v 18 dhali ḵum cuuwa/ mo me’d jin p̱arkina uni aku’d e mo mmo’kuṯa p̱owa yim mo, mmo/o gwo mo ki: 
\q1 Ki ’peŋkuman bampa/ jana sa/ wana e gi dhan ’peŋkuman bampa/ yan mo? 
\m  
\v 19 Dhali uni yeḵki bu’da ’ceshi ’kup̱ buni mo me’d jin gwokina uni mo, dhali koki kony jabu’th mo, mmoḵum cuuwa/ mo ki: 
\q1 Ayy/ayy/ayy, ayy/ayy/ayy, gom dhan ’peŋkuman bampa/ mo, 
\q1 e mo jin ’kona uni ’baar kun tan ga ḵur mo kun ishkin ki kana’d kana’d mo gom pa jin tan ma yim mo. 
\q1 Ka tenten ’deŋ gana/ mo tani ayim shi/kunu is mo be. 
\q1  
\v 20 ’Kunyi bwa mo ma, ap̱owa yim mo, ayy um ’kwani kun ’koni momis mo, 
\q1 ayy um kun dhunu ki she/ ki dhelel dhelel mo dhali um kun dhunu ki she/ mo dhali imanc̱i gwo mo, 
\q1 haali/ Arumgimis c̱iki um gwon dwall jin minu tor gwo ’twa/a ’cesha p̱owa yim mo. 
\p  
\v 21 Dhali yan’ko’d aman’doyu gwo jin eḵa/ eḵ mo bu’thki wosh jin wana e ki dhan wosh jin yoru to mo dhali biṯ a’di e ḵumma/ yi’de/ mo mmo/o gwo mo ki: 
\q1 Wakan Pam Baabil jin ta dhan ’peŋkuman bampa/ mo tani minu biṯ ka ’cesh ki mombujur mo, 
\q1 dhali a’di minu gam doḵ/e yisa. 
\q1  
\v 22 Dhali ko ma dheŋdhenye/ jin buḵa imanbuḵ uni mo dhali uni kun tana ’twa/ gwocon ki gwocon gom gway jin yuḵu mo dhali uni kun mishkina ṯẖaṯẖar p̱i mo dhali uni kun mishkina apoome/ p̱i mo tani uni minu ciḵ doḵ/e yisa e /e ki sule/ sule/ mo. 
\q1 Dhali ’kwani kun ta iman/uḵ to ’peni ton tiya gunn kun uḵu mo tani 
\q1 uni minu gam doḵ/e yisa e /e ki sule/ sule/ mo. 
\q1 Dhali ko ma yo jin yoru to mo tani minu ciḵ doḵ/e yisa e /e ki sule/ sule/ mo. 
\q1  
\v 23 Dhali moŋkush ma lamba/ mo tani 
\q1 midi diki doḵ/e kush mo mo e /e ki sule/ sule/ mo. 
\q1 Dhali ’twa/ gi wathinyaŋa’b dhali nyaranyaŋa’b mo tani minu ciḵ doḵ/e yisa e /e ki sule/ sule/ mo. 
\q1 Haali/ ’kwani kun yoli to e /e mo tani uni ta ’kwani kun caaca e mony’cesh mo 
\q1 dhali aris kal gi ’kwani gi mony’ceshi ’baar mo tani uni he’kkunu e mo ki mii ma rum pini kun miina /e mo. 
\q1  
\v 24 Dhali eya yim mo tani abas gamkunu mo, a’di jin ta’da bas gi imanc̱i gwo mo dhali imandhunu ki she/ ki dhelel dhelel mo dhali aris uni gwansan gun ’koshkunu ap̱o/ mony’cesh mo be. 
\c 19  
\p  
\v 1 Yan’ko’d aha/ ciḵkina ’twa/ jin waki dhan ’twa/ ma waambuhany ’kwani kun eḵa/ eḵ e momis mo mmoḵum cuuwa/ mo ki: 
\q1 Halleluya. Mowoṯẖ dhali monyca dhali mom’bi’th cil ma Arumgimis bana mo be, 
\q1  
\v 2 haali/ gwom piti jin toru gwon dwall ’twa/a ’cesh mo tani uni ta kuŋ gana/ mo dhali kuŋ ḵar/e mo. 
\q1 Haali/ a’di dwallki’da dhana yim jin ta c̱al gwo mo, a’di jin p̱u/ki ’kwaniny’cesh ki miinyc̱al ma yim mo. 
\q1 Dhali a’di ri’cki’da yim mo goma bas gi unim piti kun ta c̱iŋkinam piti mo. 
\q1  
\v 3 Dhali doḵ/e uni ḵumki cuuwa/ mo ki: 
\q1 Halleluya. Dhala ku’d ’pena yim yaki mis mo ki sule/ dhali ki sule/ mo. 
\m  
\v 4 Dhali ’kwaniŋ gwanyjaḵa/ kun ’koni iss ’de/ i’ce’dka doŋon mo dhali to/e kun ’koni doŋon kun ’kon ki e mo tani uni ṯa’kkina ’cesh mo dhali luŋa Arumgimis mo, a’di jin c̱a’bki’da p̱owa ḵursi ma maliḵ piti mo mmo/o gwo mo ki: Amen, dhali Halleluya.  
\v 5 Dhali ’pena ḵursi ma maliḵ mo tani ’twa/ p̱u’dki’d jin gwoyi’d mo ki: 
\q1 Maŋi Arumgimis bana mo, aris umi ’baar mo kun ta c̱iŋkinam piti mo, 
\q1 um kun ḵo/ki a’di mo, ’peni uni gun gwa’dan mo dhali uni kun cakin mo. 
\s1 Tonṯe/ ma Yuḵ gi Momiimash gi Ari Ḵa’bal mo 
\p  
\v 6 Dhali yan’ko’d aha/ ciḵkina ’twa/ jin waki dhan ’twa/ ma waambuhany ’kwani mo, dhali jin wana e ki dhan yi’de/ jin gwona is ka ris mo dhali jin wana e ka dhan montor ma sho’k jin eḵa/ eḵ mo jin mii’da gur gur mo, mmoḵum cuuwa/ mo ki: 
\q1 Halleluya. Haali/ Tap̱a Arumgimis gana mo, a’di jin ta a’di jin Eḵa/ Eḵ mo tani a’di ta Tap̱a mo. 
\q1  
\v 7 Dhalki ana ’kunya bwa mo dhali kar a’di ki ca mo dhali c̱i a’di monyca mo, 
\q1 haali/ momiimash gi Ari Ḵa’bal a’di p̱u’dki’d mo, 
\q1 dhali Nyaranyaŋa’b piti mo, ayim ki is piti a’di thosonki is mo. 
\q1  
\v 8 Ayim taḵkunu ki burrinye/ jin dhinya/ e ki dhiny mo dhali jin c̱a’bki c̱aw c̱aw mo dhali jin dheleladhelel mo – 
\m haali/ burrinyen dhiny e yansan mo tani a’di ta mii ma ḵar/e gi uni kun dhunu ki she/ ki dhelel dhelel mo be. 
\p  
\v 9 Dhala man’doyu gwo ki o aha/ gwo mo ki: ’Kwari gwo yansan mo ma: Mom’bor mii gom uni gwansan kun c̱inu ayuḵ mo mmo/iiyu/ mo mmoshwa tonṯe/ gi momiimash gi Ari Ḵa’bal mo. Dhali a’di ki o aha/ gwo mo ki: Gwo gwansan uni ta gwoŋ gana/ ma Arumgimis mo.  
\v 10 Dhali yan’ko’d aha/ biṯkina ’cesh e sho’k piti mo dhali luŋ a’di mo, hili a’di ki o aha/ gwo mo ki: /E yisa mini mii mii kana. Aha/ tana garr jin nyaḵki’da ṯu’c mii ki /e mo dhali awaḵ pini mo, uni gun ṯelki gwonṯor goma Yesus mo. Luŋi /e Arumgimis mo. Haali/ gwonṯor ma Yesus mo tani a’di ta shi/in gi gwo jin c̱inu is mo be. 
\s1 Amanmer Shumarum jin Ta jiŋ Kusha P̱o/ mo 
\p  
\v 11 Dhali yan’ko’d aha/ p̱arkina momis e mo mmoḵa’dkunu a’di ’twa/ mo, dhali hili mo mo ma, aha/ mishkina shumarum kush mo. Dhali a’di yansan jin c̱a’bki’da p̱o/ a’di mo tani gway piti yuḵu ki: A’di jin ta Isiŋ Gana/ mo dhali a’diŋ Gana/ mo, dhali e momii mii ma ḵar/e mo tani a’di dwallki gwo mo dhali kar mo/as mo be.  
\v 12 Em piti wana e ka le’dan o’d mo dhali e ’kup̱ piti mo tani aris toŋ’kup̱ ma maliḵ ’tamkunu e ’kup̱ piti mo. Dhali a’di yuḵkunu gway ka nyi’da/ nyi’da/ mo, a’di jin mola wathin ṯal ’deŋ kamu/ mo, hili a’di ki is piti imishki’d mo be.  
\v 13 A’di hi’thkunu is ki burrinyen turga/ mo jin ’thup̱kunu is ka bas mo dhali gway gi a’di jin yuḵkunu a’di mo tani a’di ita Gwo ma Arumgimis mo be.  
\v 14 Dhali aris ’kwani ma mee gi momis mo tani uni thosonkunu is ki burrinyen dhiny e mo dhali kun ta kuŋ kush mo dhali kun dheleladhelel mo, mmobaṯẖ a’di isho’k mo ki shumarum buni kun ta gi kush mo.  
\v 15 Dhali ’peni ’twam piti mo tani a’di gac̱ki gandala turga/ jin kaaka mo, a’di jin mina a’di ’kosh aris kal gi ’kwaniny’cesh mo dhali a’di midi ta tap̱a ap̱o/ uni ki cwa jin ta toŋḵuthu’d mo. Dhali a’di midi yap̱ mo jin nyu/u yimana mura’th ki sho’k mo, a’di jin ta’da nyor ma Arumgimis jin Eḵa/ Eḵ mo, anyor jin ’batha’ba’th mo.  
\v 16 E burrinyen turgam piti mo dhali e wum piti mo tani a’di c̱inu gway ka nyi’da/ nyi’da/ mo jin o ki: Amaliḵ jin ta tap̱a ap̱o/ imaliḵ mo dhali Tap̱a jin ta tap̱a ap̱o/ itap̱a mo. 
\p  
\v 17 Dhali yan’ko’d aha/ p̱arkina man’doyu gwoŋ kamu/ e mo mmodosh atente/ jin shwa’d mo dhali ki dhan ’twa/ jin caaca mo tani a’di yuḵki’da yuḵ mo goma ris ’dii ’baar mo kun p̱en isi bwaman momis mo ki: P̱eyu/ mo, dhali tulu/ is mo goma dhan tonṯe/ ma Arumgimis mo,  
\v 18 mmo’ka buŋgwar is gi imaliḵ mo, dhali buŋgwar is gi uni gun ta gummp̱a/ ki gummp̱a/ mo gom ’kwani ma mee mo, dhali buŋgwar is gi ’kwani kun eḵa/ eḵ mo, dhali buŋgwar is ma ris shumarum mo dhali imanmer uni ap̱o/ mo, dhali buŋgwar is ma ris ’kwani ’baar mo, uni gun ’kon ki ’kus mo dhali uni gun yolu ki yol c̱iŋkina/ mo, ’peni uni gun gwa’da is mo dhali uni kun cakin mo.  
\v 19 Dhali aha/ p̱arkina to/e e mo dhali imaliḵ gi mony’cesh mo nyaḵki ’kwani ma meem buni mo mmotul is mmonṯal ’de/ mo mmomii mo/as ap̱o/ a’di jin c̱a’bki’da p̱o/ shumarum mo dhali ap̱o/ ’kwani ma meem piti mo.  
\v 20 Dhali to/e a’di bu’thkunu mo dhali nyaḵka manc̱i gwonthus piti mo, a’di jin diki’d e buŋ’kus a’di mo dhali mmomii dhan jamas mii mo ki mii jin he’kkina a’di uni gwansan e mo, uni gun bu’thki jamas gi to/e mo dhali uni gwansan kun luŋki jamas piti jin uḵu mo. Dhali uni su/ gwansan mo tani uni iṯa’kkunu eya al o’d ki e mo, e mo jin mina isi pur uni ki to jin si’du ilu/ mo.  
\v 21 Dhali kun tiya ’kokunu mo mmo’kosh ki gandala turga/ mo ki a’di jin c̱a’bki’da p̱o/ shumarum mo, gandala turga/ jin gac̱ki’d ’peni ’twam piti mo, dhali aris ’dii ’baar mo komki ’pen mo gom buŋgwar is buni mo be. 
\c 20  
\s1 Yil jin ’Koni Alip̱i ’De/ mo 
\p  
\v 1 Dhali yan’ko’d aha/ p̱arkina man’doyu gwo e mo mmothulu/ ka ’cesh ’peni momis mo, mmota ga mup̱tha/ e me’da bim poros piti mo gom dhan jis jin dar gi ’pemen mo dhala jindhiir mo.  
\v 2 Dhali a’di ki ’dap̱ dhan tasha/ yan ka nyoḵ mo, dhan tashan dhamo/ yin, jin yuḵkunu gway ki Tap̱a ma Ruma ’Cesh mo dhali ka Seṯaan mo dhali a’di ki deḵ a’di mo gom yil alip̱ mo.  
\v 3 Dhali a’di ki biṯ a’di mo e mo jin ’kula’kul mo, dhali a’di ki mu’th a’di ’twa/ mo dhali a’di ki ’dap̱ a’di ka ’diŋkila/ ap̱o/ mo ki a’di midi ’taki diki heka ris kal gi ’kwaniny’cesh e doḵ/e mo ntagi yil alip̱ midi di ’kup̱ mo. Dhali ’ko’di mii c̱aan mo tani a’di minu mii dhalu me’d mo gom ari mo mo. 
\p  
\v 4 Dhali yan’ko’d aha/ p̱arkina risa ḵursi ma maliḵ e mo, dhali uni gun ’kokina p̱o/ uni mo tani uni ta uni gun c̱ikunu gwon dwall jin toru gwo ’twa/a ’cesh mo. Dhali aha/ si’da/ p̱arkina ḵashira/ gi uni gwansan kun ’ciṯẖkunu ’kup̱ mo gom gwom buni kun ṯora uni goma Yesus mo dhali gom gwo ma Arumgimis mo, dhali uni gun ’koki luŋ to/e yan mo walla jamas piti jin uḵu mo, dhali uni gun ’koki bu’th jamas piti e buyem buni mo walla e me’d buni mo. Uni p̱u’dkin ki e mo doḵ/e dhali nyaḵ tap̱a ta ka Ḵrisṯẖos ki yil alip̱ mo be.  
\v 5 Dhali unin tiya kun wukin mo tani ’koki p̱u’du/ mmo’ko ki e mo naskina/ mo tani ntagi yil alip̱ midi di ’kup̱ mo. A’di yansan ita mo jin pinu jin ta jin ṯwa/a/ mo be.  
\v 6 Mom’bor mii mo dhali a’di jin ḵogu mo tani ta a’di mo a’di jin pwaḵki mompinu jin ta jin ṯwa/a/ mo. Ap̱o/ uni kun wakan mo tani mowu jin ’kon ma p̱o/i su/ mo tani a’di dar gi mom’bi’th ap̱o/ uni mo, hili uni mini ta igasiis ma Arumgimis mo dhali goma Ḵrisṯẖos mo, dhali uni mini nyaḵ tap̱a ta ki a’di ki yil alip̱ mo be. 
\p  
\v 7 Dhali ki yil alip̱ midi di ’kup̱ mo tani aSeṯaan a’di minu dhalu me’d mo ’pena sijin piti mo  
\v 8 dhali a’di midi p̱u’du/ ka pije/ mo mmoheka ris kal gi ’kwaniny’cesh e mo, uni gun ’kon ki ’ban gi mony’cesh kun ’kona shem ’penabi idoŋon mo, a’di jin ta Pany Juuj mo dhali Pam Majuuj mo, mmotul uni is mo gom mo ma mee mo. Mondeŋ buni uni wana e ka si’b gi bwam ma gap̱ gi ḵumma/ yi’de/ mo.  
\v 9 Dhali uni yakina ye’th ye’th mo mmohakar mony’cesh ka bor mo dhali mmo’kama ris gu’ba’ku/ gi uni kun dhunu ki she/ ki dhelel dhelel mo dhali ’peŋkuman bampam buni jin enu mo. Hili o’d p̱u’dki’d ka ’cesh ’peni momis mo dhali shwa uni ki ’ci’d’da/ mo.  
\v 10 dhali tap̱a ma ruma ’cesh jin he’k uni e mo tani a’di biṯkunu mo eya al o’d mo dhali e bwam to jin si’du mo, e mo jin dina to/e mo dhali amanc̱i gwonthus mo, dhali uni minu ’kosh ki isa nyor jin midi wo’c is she/ mo montee dhali ki mon’thiny ilu/ mo ki sule/ dhali ki sule/ mo. 
\s1 Gwo jin Toru Gwo ’Twa/a ’Cesh ’Pena Dhana Ḵursi ma Maliḵ jin Ta jiŋ Kush mo 
\p  
\v 11 Dhali yan’ko’d aha/ p̱arkina dhana ḵursi ma maliḵ jin ta gi kush e mo dhali a’di jin c̱a’bki’da p̱o/ a’di mo. ’Peni buŋ’kus piti mo tani mony’cesh dhali momis uni yakina ŋwac̱a/ mo, dhali mo yisa gamu gom uniya.  
\v 12 Dhali aha/ p̱arkina uni gun wukin e mo, uni kun cakin mo dhali kun gwa’dkin mo, mmodosh mo mbwambor ma ḵursi ma maliḵ mo, dhali arisa warka/ ḵa’dkunu mo be. Dhali awarkaŋ kamu/ si’da/ ḵa’dkunu mo, a’di jin ta’da warka/ gi mondiki/e mo. Dhali uni gun wukin mo tani uni dwallkunu gwo mo me’d gwo jin ’kwarkunu mo e bwam ma risa warka/ mo ki mii kun miikina uni mo be.  
\v 13 Dhali ḵumma/ yi’de/ c̱iyi ’kwani ka nyaŋ’ko’d kun wukin e a’di mo. Mowu dhali Mo ma Haawiya c̱iyi ’kwani kun wukin e uni mo, dhali aris uni ’baar mo dwallkunu gwo mo ki mii kun miikina uni mo be.  
\v 14 Dhali yan’ko’d Mowu dhali Mo ma Haawiya uni ṯa’kkunu mo eya al o’d mo. A’di yansan ita wu jin ’kon ma p̱o/i su/ mo, a’di jin ta’da al o’d mo.  
\v 15 Dhali waḵki/ jan ṯal ’deŋ kamu/ ’konuki gam gway piti jin ’kwarkunu mo eya warka/ gi mondiki/e yan mo tani a’di si’da/ minu biṯ mo eya al o’d mo be. 
\c 21  
\s1 Momis jin Ta jin This mo dhali Mony’cesh jin Ta jin This mo 
\p  
\v 1 Dhali yan’ko’d aha/ p̱arkina momis jin ta jin this e mo dhali mony’cesh jin ta jin this mo. Haali/ momis jin ta jin ṯwa/a/ mo dhali mony’cesh jin ta jin ṯwa/a/ mo tani uni pekin mo be, dhali ḵumma/ yi’de/ yisa di’d doḵ/e.  
\v 2 Dhali aha/ p̱arkina ’peŋkuman bampa/ jin ḵogu e mo, a’di jin ta Pa Urushaliim jin ta jin this mo, mmothulu/ ka ’cesh ’peni momis ’peni Arumgimis mo, mmothosonkunu a’di is mo me’d nyaranyaŋa’b jin nyoŋkunu is ki to mo goma kaṯẖim piti mo be.  
\v 3 Dhali aha/ ciḵkina dhan ’twa/ ’pena ḵursi ma maliḵ mo mmo/o gwo mo ki: Hili mo mo ma, monyc̱a’b ma Arumgimis diki’d nyaḵki ’kwani mo. A’di midi nyaḵ c̱a’b ki uni mo dhali uni mini ta ’kwanim piti mo, dhali Arumgimis ki is piti, a’di midi nyaḵ di e uni mo dhali a’di midi ta uni Arumgimis buni mo.  
\v 4 Dhali a’di midi shumuṯ jabu’th ’pena ris em buni ka ’deṯe/ ’deṯe/ mo, dhali wuŋ kamu/ midi doḵ/e diya, walla kony jabudha kamu/ minu kowa, walla cuuwaŋ kamu/ minu cuuwa, walla isa nyora kamu/ midi diya? haali/ aris ton dhamo/ gwansan mo tani uni pekin mo be. 
\p  
\v 5 Dhali a’di jin c̱a’bki’da p̱owa ḵursi mo tani oki gwo mo ki: Hili mo mo ma, aha/ miikina ris to mmota kun this mo. A’di si’da/ ki o gwo mo ki: ’Kwari a’di yansan mo ma, haali/ gwo gwansan mo tani uni ta ku isiŋ gana/ mo dhali kuŋ gana/ mo.  
\v 6 Dhali a’di ki o aha/ gwo mo ki: A’di miikunu mo. Aha/ tana ji ma Muŋ’kup̱ mo dhali jiŋ ’Ko’d mo, aha/ tana ji gi mo jin ṯelkunu ’pen mo dhali mo jin midi di ’kup̱ mo be. E uni kun butha yi’de/ gom miiŋḵar/e mo tani aha/ mina c̱i uni yi’de/ ki dar gi yol mo ’peni yi’de/ jin kashkina e ki kash mo jin ta mondiki/e mo be.  
\v 7 A’di jin p̱iki mii e mo tani a’di midi ta gi mal yansan mo, dhali aha/ mina ta Arumgimis piti mo dhali a’di midi ta aha/ ya/um mo.  
\v 8 Hili gom uni gun tana shi/iny jwa mo dhali uni gun dar gi moŋgam gwo is mo, dhali uni gun wali gwo sor mo, dhali uni gun ta iman’kosha mee mo, dhali uni gun ta imanha’k ’pen c̱eŋ gwas mo, dhali uni gun ta imanmii mii ma rum mo, dhali imanluŋ tomp̱inycon mo, dhali aris uni gun tana ṯor mo tani tom buni di’d jin midi ’bag uni e mo eya al o’d mo jin purki’d ki o’d mo dhali to jin si’du mo si’da/, a’di jin ta wu jin ’kon ma p̱o/i su/ mo be. 
\s1 Pa Urushaliim jin Ta jin This mo 
\p  
\v 9 Dhali yan’ko’d aman’doyu gwoŋ kamu/ ’de/ ’peni bwam uni gun ’koni pesu/ mo, a’di jin ta’d gi toŋ’kul bwa mo jin ’tu’dkunu ki mom’ba’th kun ’koni pesu/ kun woci ’kwani is she/ mo kun ta kuŋ ’ko’d mo tani p̱u’dki’d mo dhali o aha/ gwo mo ki: Yayu/ mo. Aha/ mina ṯor /e Nyaranyaŋa’b mo, a’di jin ta’da ’bom gi Ari Ḵa’bal mo.  
\v 10 Dhali e Shi/in mo tani a’di ḵalki aha/ mo eya dhan wosh jin turatur mo, dhali ṯor aha/ ’peŋkuman bampa/ jin ḵogu mo jin ta Pa Urushaliim mo, mmothulu/ ka ’cesh mo ’peni momis mo ’peni Arumgimis mo,  
\v 11 mmotakina a’di gi monyca ma Arumgimis mo, dhali dhel piti bolki wosh dhel jin ta’da aane/ e mo, mmowa e ki wosh dhel jin ta’da wasin dhela/ mo jin di’d eya tente/ jin mii’d ki wa’c wa’c mo.  
\v 12 A’di ta’d ga dhana goŋ jin turatur mo jin ’kona ’twaŋkali ’kume’d i’ce’dka su/ mo dhali iman’doyu gwo ’koni ’kume’d i’ce’dka su/ mo e ’twaŋkal piti mo, dhali e ’twaŋkal piti mo tani gway ’koni ’kume’d i’ce’dka su/ mo kun tana waḵ gi iya/ ma Israyiil mo kun c̱ikunuwa nyi’da/ nyi’da/ mo.  
\v 13 E mom’pesho’k mo tani ’twaŋkal ’koni kwara mo dhali e moŋ’ko’d gwar ma bim poros mo tani ’twaŋkal ’koni kwara mo, dhali e moŋ’ko’d gwar ma biny cam mo tani ’twaŋkal ’koni kwara mo, dhali eya bora luŋgu’b mo tani ’twaŋkal ’koni kwara mo.  
\v 14 Dhali agoŋ gi ’peŋkuman bampa/ mo tani ta’d gi moŋḵa’b kun ’koni ’kume’d i’ce’dka su/ mo, dhali ap̱o/ uni mo tani gway ’koni ’kume’d i’ce’dka su/ mo uni gun ta gway gi imandhunu ki she/ gi Ari Ḵa’bal mo kun ’koni ’kume’d i’ce’dka su/ mo be. 
\p  
\v 15 Dhali a’di jin ṯorki’da ṯor ki aha/ mo tani ta’d gi cwan ’dolkon gana/ mo jin baru to mo mmobar ’peŋkuman bampa/ mo dhali ’twaŋkal piti mo dhali agaŋgaram piti mo.  
\v 16 Dhali ’peŋkuman bampa/ mo nyaḵkina isi bwa mo dhali aluc̱ piti nyaḵki’d ki bem piti mo. Dhali a’di barki ’peŋkuman bampa/ ki cwam piti mo, ka amyaal alip̱i\f + \fr 21:16 \ft alip̱ wa ḵumsumiyya\f* ’de/ mo jin ’ce’dki’d ka iss ’kwanimpa i/iss ’de/ i’ce’dki iss ’kwanimpa imudhe’d mo. Aluc̱ piti dhali bem piti dhali tur piti, uni nyaḵkan ki ’doḵo/ ’doḵo/ mo.  
\v 17 Dhali a’di si’da/ barki’da agaŋgaram piti mo, ki gula/ iss\f + \fr 21:17 \ft miyya wa arba wa arba/iin\f* ’kwanimpa ipesu/ mo i’ce’dka doŋon mo. A’di ta mombar jin baru ’kwani mo, a’di jin ta ji gi iman’doyu gwo mo.  
\v 18 Agoŋ a’di inyaŋkunu ki wosh dhel jin ta’da wasin dhela/ mo, dhali ’peŋkuman bampa/ miiki’d ki ’be’d ’be’d mo gom ’dolkon gana/ mo dhali di eya tente/ me’da gasaas mo.  
\v 19 Dhali moŋḵa’b ma gaŋgara/ gi ’peŋkuman bampa/ mo tani a’di nyoŋkunu ka ris wosh dheli ’baar mo ki she/ ki she/ mo. A’di jin ta jin ṯwa/a/ mo ta wosh dhel jin ta’da wasin dhela/ mo ki e ka ris mo, dhali jiŋ ’ko’d mo a’di ta wosh dhel jin ta ’pinyamaṯẖ mo, dhali a’di jin ’kon ma p̱o/i kwara mo a’di jin ta wosh dhel jin ta jin dhii/ mo, dhali jin ’kon ma p̱o/i doŋon mo a’di jin ta wosha wasin dhela/ jin ta jin dhii/ mo,  
\v 20 dhali jin ’kon ma p̱o/i mudhe’d mo a’di jin ta wosh dhel jin ta gi kush mo, dhali jin ’kon ma p̱o/i pe’de/ mo a’di jin ta wosh dhel jin ta jim ’per mo, dhali jin ’kon ma p̱o/i pesu/ mo a’di jin ta wosh dhel jin ta’da go’d go’d mo, dhali jin ’kon ma p̱o/i pekwara mo a’di jin ta wosh dhel jin miina is ki go’de/ go’de/ mo, dhali jin ’kon ma p̱o/i pedoŋon mo a’di jin ta wosh dhel jin miina is ki dhii/e dhii/e mo dhali jin ’kon ma p̱o/i ’kume’d mo a’di jin ta wosh dhel jin tana jamasa tortukul mo, dhali jin ’kon ma p̱o/i ’kume’d i’ce’dka ’de/ mo a’di jin ta wosh dhel jin tana isa mandup̱any mo, dhali jin ’kon ma p̱o/i ’kume’d i’ce’dka su/ mo a’di jin ta wosh dhel jin ta’da duḵ is mo.  
\v 21 Dhali ’twaŋkal kun ’koni ’kume’d i’ce’dka su/ mo tani uni ta dhema/ kun ’koni ’kume’d i’ce’dka su/ mo, dhali ’twaŋkala goŋ ka ’deṯe/ ’deṯe/ mo uni uḵkunu ki dhema/ en ’de/ mo, dhali bway tur jin iinu ii ’peŋkuman bampa/ mo tani ta jasi ’dolkon gana/ ’baar mo, jin minu hil ’pena pije/ itor ḵarash me’da gasaas mo. 
\p  
\v 22 Dhali aha/ p̱arkina gu’b gi mondheleladhelela kamu/ e yisa e ’peŋkuman bampa/ mo, haali/ gu’b gi mondheleladhelel piti mo tani a’di ta Tap̱a Arumgimis mo, a’di jin Eḵa/ Eḵ mo dhali Ari Ḵa’bal mo be.  
\v 23 Dhali ’peŋkuman bampa/ yansan yisa midi mii ta ga tente/ mo walla appe mo mmo’twaḵ mo ap̱o/ a’di mo, haali/ monyca ma Arumgimis mo tani a’di ta moŋkush piti mo dhali alambam piti mo tani a’di ta Ari Ḵa’bal mo.  
\v 24 Ki moŋkush piti mo tani a’di min ma ris kal gi ’kwaniny’ceshi ii mo dhali aris imaliḵ kun ’koni mony’cesh mo tani mini c̱i monycam buni mo gom a’di mo be,  
\v 25 dhali ’twaŋkal piti mo tani mini ’ko kan ki ḵany ki sule/ montee mo – dhali mon’thinya kamu/ midi diya e mun mowa?  
\v 26 Uni mini c̱iki a’di monyca mo dhali montaḵ mo goma ris kal gi ’kwaniny’ceshi ’baar mo.  
\v 27 Hili to nyo/o’da kamu/ yisa midi diya jin midi cic̱ e a’di mo, walla jan ṯal ’de/ jin midi boṯki miinthus jin shi/ashi/ mo walla ta manc̱i gwonthus mo, hili jasi uni gwansan kun ’kwarkunu gway eya warka/ gi Ari Ḵa’bal gi mondiki/e mo tani, uni a’di imini ’ko mo be. 
\c 22  
\p  
\v 1 Dhali yan’ko’d a’di ṯorki aha/ yi’de/ jin guski’d mo jin ta yi’de/ jin di ki e mo, jin kushakush jin mii’d ki wa’c wa’c mo, mmoyayaa ŋwac̱a/ mo ’pena ḵursi ma Arumgimis mo dhali Ari Ḵa’bal mo,  
\v 2 ki tur mo isi bwaman bway tur gi ’peŋkuman bampa/ mo. Dhali si’da/ e ’ban kuku/ mo gi yi’de/ jin guski’d mo tani cwa gi mondiki/e mo nyaḵki maman pitiŋ gana/ kun ’kona e i’kume’d i’ce’dka su/ mo gwono’dki maman piti mo ka ppe ki she/ ki she/ mo. Dhali ’cemen gi cwa a’di karkunu mo mmowac̱a ris kal gi ’kwaniny’cesh mo.  
\v 3 Moŋkamu/ midi di yisa jin min ma manjeeya jee idi mo, hili jasa ḵursi ma maliḵ ma Arumgimis mo dhali ji gi Ari Ḵa’bal mo a’di midi di nycine/ mo, dhali c̱iŋkinam piti mo uni imini luŋ a’di mo.  
\v 4 Dhali uni mini p̱ar jis/em piti e mo dhali gway piti midi c̱a’ba p̱o/ buyem buni mo.  
\v 5 Dhali mon’thiny midi di yisa. Uni mini mii ta gi moŋkush ma lamba/ mo yisa walla atente/ mo yisa haali/ Tap̱a Arumgimis a’di midi ta moŋkush buni mo, dhali uni mini nyaḵ tap̱a ta ki a’di ki sule/ mo dhali ki sule/ mo be. 
\s1 Yesus Midi P̱u’du/ ki ’Dishe/ mo 
\p  
\v 6 Dhali a’di ki o aha/ gwo mo ki: Gwo gwansan uni ta ku isiŋ gana/ mo dhali kuŋ gana/ mo. Dhali Tap̱a, jin ta’da Arumgimis mo gom shi/in gi imanc̱i gwo mo tani a’di hashki’da man’doyu gwom piti mo mmoṯor c̱iŋkinam piti to mo kun mini bu’th mo ki ’dishe/ mo.  
\v 7 Dhali hili mo mo ma, aha/ mina p̱u’dku/ ki ’dishe/ mo. 
\p Mom’bor mii gom a’di jin dhuki gwo kun onu is eya warka/ yansan mo. 
\p  
\v 8 Aha/ jin tana Yohaan mo tani aha/ tana a’di jin ciḵki to gwansan mo dhali p̱ar to gwansan e mo be. Dhali ki aha/ ciḵkina uni mo dhali p̱ar uni e mo tani aha/ biṯkina ’cesh mo mmoluŋ e sho’k ma man’doyu gwo mo, a’di jin ṯorki aha/ to gwansan mo.  
\v 9 Hili a’di ki o aha/ gwo mo ki: /E mini diki mii mii kan mo. Aha/ tana garr jin nyaḵki’da ṯu’c mii nyaḵki /e mo dhali awaḵ pini mo uni kun ta imanc̱i gwo mo, dhali nyaḵki uni gwansan kun dhuki gwo kun ’kwarkunu mo eya warka/ yansan mo. Luŋi /e Arumgimis mo. 
\p  
\v 10 Dhali a’di ki o aha/ gwo mo ki: Dhalku/ gwo ki ’dap̱ ’twa/ ka ’diŋkila/ mo, gwo yansan jin onu is eya warka/ yansan mo, haali/ mo ’disha’dish mo be.  
\v 11 Dhalki a’dinthus yin di’d naskina/ mo mmomii tonthus mo dhali dhalki a’di jin mii mii kun nyo/anyo/ mo di’d naskina/ mo mmomii mii kun nyo/anyo/ mo, dhali uni kun mii miiŋḵar/e mo tani dhalki uni ’kon naskina/ mo mmomii miiŋḵar/e mo dhali uni kun tana gayiin mo tani dhalki uni ’kon naskina/ mo mmomii mii ma gayiin mo. 
\p  
\v 12 Hili mo mo ma, aha/ mina p̱u’dku/ ki ’dishe/ mo, mmoḵalku/ tom pem mme’d mo, mmoraḵa ris ’kwani ’baar mo to mbway mo ka ’deṯe/ ’deṯe/ mo me’d mii jin miikina uni mo.  
\v 13 Aha/ tana ja Muŋ’kup̱ mo dhali jiŋ ’Ko’d mo, aha/ cila mo jin ṯwa/a/ mo dhali mo jiŋ ’ko’d mo, dhali aha/ cilkina mo jin ṯelkunu ’pen mo dhali mo jin di ’kup̱ mo. 
\p  
\v 14 Mom’bor mii gom uni gwansan kun wuski burrinyen tur buni mo dhali kun mii gwoŋḵan piti mo, ki uni mini ta gi moshirr mo gom cwa gi mondiki/e mo, dhali ki uni mini ’taki cic̱ ’peŋkuman bampa/ ki ’twaŋkal ma goŋ mo be.  
\v 15 Apije/ mo tani arisa ’ka ’kokin mo dhali uni kun mii mii ma rum mo dhali uni gun ha’k ’pen c̱eŋ gwas mo dhali iman’kosha mee mo dhali imanluŋ tomp̱inycon mo dhali aris ’kwani ’baar ka ’deṯe/ ’deṯe/ mo, uni kun enina en thus mo dhali boṯki mii gi imanc̱i gwonthus mo. 
\p  
\v 16 Aha/ jin tana Yesus hashkina man’doyu gwom pem e /e mo ki gwo yansan jin onu mo goma risa ḵaniisa mo. Aha/ tana birman mo dhali emen ma Dawuu’d mo, jin ta’da cul gi mon’thamo/ mo jin ’twaḵki mo mo. 
\p  
\v 17 Shi/in dhali Nyaranyaŋa’b o gwo mo ki: Iiyu/ mo. Dhali dhalki a’di jin ciḵ a’di mo o gwo mo ki: Iiyu/ mo. Dhali dhalki a’di jin budha yi’de/ gom miiŋḵar/e mo yayi’d mo. Dhali dhalki a’di jin ona bwa ki bu’th yi’de/ gi mondiki/e ki dar gi moyol mo tani iyayi’d si’da/ mo. 
\p  
\v 18 Aha/ rumkina aris ’kwani ’baar ka ’deṯe/ ’deṯe/ ki gwo mo uni kun ciḵki gwo gwansan jin onu is eya warka/ yansan mo. Dhali waḵki/ jan ṯal ’deŋ kamu/ midi mar uni is mo tani Arumgimis si’da/ midi mar a’di mo/isa nyor is mo jin midi wo’c a’di is she/ mo, uni kun ṯorkunu mo eya warka/ yansan mo.  
\v 19 Dhali waḵki/ jan ṯal ’deŋ kamu/ midi bu’th gwo ’pena warka/ yansan jin onu gwo is mo tani Arumgimis si’da/ midi bu’th miim piti jin pwaḵkina a’di cwa gi mondiki/e mo dhali e ’peŋkuman bampa/ jin ḵogu mo, uni kun ṯorkunu eya warka/ yansan mo. 
\p  
\v 20 A’di jin ṯeki gwo gwansan mo mmo/o mo tani o gwo mo ki: Ka jiŋ gana/ aha/ mina p̱u’dku/ ki ’dishe/ mo be. Amen. Yayu/ ma, Tap̱a Yesus mo. 
\p  
\v 21 A’the gi Tap̱a Yesus midi di e uni kun dhunu ki she/ ki dhelel dheleli ’baar mo. Amen.