\id PSA  
\ide UTF8 
\h GWAY GI IDAWUU’D 
\toc1 Gway gi iDawuu’d 
\toc2 GWAY GI IDAWUU’D 
\mt1 Gway gi iDawuu’d 
\c 1  
\ms1 AWARKA/ JIN ṮWA/A/ MO 
\q1  
\v 1 Mom’bor mii gom wathi/ a’di jin diki ya e bway jin 
\q1 logoma ’kwanin thus gwo mo, 
\q1 walla dosh e bway gi imanmii miinthus mo, 
\q1 walla c̱a’b mo e moŋ’ko gi uni gun ’theḵ shushi mis mo, 
\q1  
\v 2 hili mom’bor bwam piti mo tani di’d e gwoŋḵan gi Tap̱a Arumgimis jin c̱inu mo, 
\q1 dhali e gwoŋḵan piti jin c̱inu mo tani a’di ki c̱i is ki a’di montee mo dhali mon’thiny mo be. 
\q1  
\v 3 A’di wana e ki cwa 
\q1 jin c̱u’thkunu e shemen yi’de/ jin guski’d mo, 
\q1 a’di jin gwono’dki maman ki yil piti mo, 
\q1 dhali ’cemen piti diki ḵu’th mo. 
\q1 Eya ris to ’baar kun miina a’di mo tani a’di rusa/ rus mo. 
\b  
\q1  
\v 4 Imanmii tonthus mo tani yisa wakana, 
\q1 hili uni wana e ka ’pi’b jin ’dashkina ’tham mo be. 
\q1  
\v 5 Wakan imanmii tonthus mo tani mini ’koki dosh mo ka tee gi gwon dwall jin toru gwo ’twa/a ’cesh mo 
\q1 walla imanmii miinthus si’da/ e dhan mo ma tul ’kup̱ gi ’kwani ma ḵar/e mo, 
\q1  
\v 6 haali/ Tap̱a Arumgimis mishki bway gi a’diŋ ḵar/e mo, 
\q1 hili bway gi uni gun mii tonthus mo tani ta mony’ce’d sho’k mo be. 
\c 2  
\q1  
\v 1 Ata miina ’kwani gi kala tiya adulaṯṯ mo, 
\q1 dhali ’kwani gam ’twa/ ’kup̱ ki p̱e’th kan mo? 
\q1  
\v 2 Imaliḵ gi ’kwaniny’cesh doshkin ki is buni ki ’dishe/ mo, 
\q1 dhali itap̱a tuli isi monṯal ’de/ mo 
\q1 ap̱o/ Tap̱a dhali ap̱o/ a’din ’de/ jin ’koshkunu ki monyca mo, mmo/o gwo mo ki: 
\q1  
\v 3 Dhalki ana ’ce’da mondeḵ buni mo 
\q1 dhali ṯaka nyoḵ buni ’peni ana mo. 
\q1  
\v 4 A’di jin c̱a’bki’d eya ris momis mo tani p̱e’thki’d mo, 
\q1 Tap̱a miiki uni ka mudhiny’cere/ mo. 
\q1  
\v 5 Yan’ko’d a’di midi ṯor uni gwo eya nyor piti mo 
\q1 dhali dher uni is bwa ka nyor piti jin c̱ithirac̱ithir mo mmo/o gwo mo ki: 
\q1  
\v 6 Aha/ karkina maliḵ pem mo ap̱owa Sihyuun, 
\q1 a’di jin ta wosh pem jin ḵogu mo. 
\b  
\q1  
\v 7 Aha/ mina ṯor gwoŋḵan gi Tap̱a mo: 
\q1 A’di ta gwo jin ona a’di aha/ mo ki: /E ta Ya/m pem mo, 
\q1 shwane/ aha/ dho’thkina /e mo. 
\q1  
\v 8 Doṯi aha/ ma, dhali aha/ mina c̱i /eya ris kal gi ’kwaniny’cesh mo mmota mal pini mo, 
\q1 dhali ’pemen gi mony’cesh mo tani uni mini ta kum pini mo. 
\q1  
\v 9 /E mini ’ce’d uni bwa mo ki cwan kol ’kus jin ta toŋḵuthu’d mo, 
\q1 dhali mu/ uni ’twa/a ’cesh mo ka ’ci’cimi’th mo me’d toŋ’kul bwa jin uḵu ’pena je mo. 
\b  
\q1  
\v 10 Dhali wakan shwane/, ayy imaliḵ, yuḵi is mo ma, 
\q1 muri is mo, ayy um itap̱a gi mony’cesh mo. 
\q1  
\v 11 Miiyi Tap̱a to ki moŋḵo/ is mo 
\q1 dhali ki mondee is mo,  
\v 12 p̱iyi sho’k piti ’twa/ mo, 
\q1 isi ciki/ ki a’di midi diki shwaa nyor mo, dhali um minu ’ce’d sho’k ibway mo, 
\q1 haali/ anyor piti ’thakunu hila/ ki jahanne/ mo. 
\q1 Mom’bor mii goma ris uni gun bu’thki mo jin huru jwa e a’di mo. 
\c 3  
\s1 Gway jin yuḵu mo mmoka mo jin miinuwa mii e mo jin ta jim ma Dawuu’d mo me’d jin guskina a’di mo ’peni ya/m piti ka Abshaluum mo. 
\q1  
\v 1 Ayy Tap̱a, ’kwani kun ta ’kup̱ gi aha/ wana risa! 
\q1 Uni tana ris ka ris kun cuna p̱o/ aha/ mo. 
\q1  
\v 2 Uni tana ris o gwo gom aha/ mo ki: 
\q1 mowoṯẖa/ kamu/ midi di gom a’di eya Arumgimis yisa. \qs Doshi ma dhali ’cunycuri yan mo. \qs* 
\b  
\q1  
\v 3 Hili /e, ayy Tap̱a, itana goŋgoro/ gom aha/ mo, 
\b  
\q1 dhali monycam pem mo dhali aman’de’k ’kup̱ pem ki mis mo. 
\q1  
\v 4 Aha/ ’thera cuuwa/ ki nyanye/ e Tap̱a mo, 
\q1 dhali a’di thoḵki aha/ ’twa/ ’peni ’kuwosh piti jin ḵogu mo. \qs Doshi ma dhali ’cunycuri yan mo. \qs* 
\b  
\q1  
\v 5 Aha/ isha ’ko’da ’cesh dhali ish e mo. 
\q1 Aha/ mera e doḵ/e mo, haali/ Tap̱a a’di ṯeki aha/ mo. 
\q1  
\v 6 Aha/ dinaki ḵo/ is gom ’kwani kun ’koni alaap̱i ’kume’d mo 
\q1 uni gun doshkin ki is buni ap̱o/ mo mmo’kama ’kam mo. 
\b  
\q1  
\v 7 Cuyi mis mo ma, ayy Tap̱a. 
\q1 ’Cuḵi aha/ mo ma, ayy Arumgimis pem. 
\q1 Haali/ /e dorkina ris uni gun ta ’kup̱ ki aha/ e peshe/ mo, 
\q1 dhali /e ki ’ce’d she/ gi uni gun ta thus ki thus mo. 
\q1  
\v 8 Mo jin ’cuḵuwa ’cuḵ mo tani a’di ta ji gi Tap̱a mo, 
\q1 mom’bor miim pini a’di midi di ap̱o/ ’kwanim pini mo. \qs Doshi ma dhali ’cunycuri yan mo. \qs* 
\c 4  
\s1 Eya manyuḵ gway mo nyaḵka risa dheŋdhenye/. Gway jin yuḵu mo mmoka mo jin miinuwa mii e mo. Gway ma Dawuu’d. 
\q1  
\v 1 Thoḵi aha/ ’twa/ mo ma ki aha/ yuḵa yuḵ mo, ayy Arumgimis pem jin ta’da ḵar/e mo. 
\q1 /E c̱iki aha/ mo mo ki aha/ dina ka c̱is mo. 
\q1 Miiyi mii ma ’the ap̱o/ aha/ ma, dhali ciḵi mo ma ’thom pem mo. 
\b  
\q1  
\v 2 Ayy ’kwani kakasja imina montaḵ pem jin ’koshu is is ka nyor idi ki mo ma ’the is kan mo? 
\q1 Kakasja imina /e dhal mo/en gi gwo jin di’d bwa ’te/ ’pen mo dhali simm jasi gwo ma ṯor e kan mo? \qs Doshi ma dhali ’cunycuri yan mo.\qs* 
\b  
\q1  
\v 3 Hili mishi gwo ’ban ki Tap̱a a’di dhuki uniŋ gayiin ki she/ mo gom is piti mo. 
\q1 Tap̱a ciḵki aha/ gwo mo ki aha/ gwona ’twa/ e a’di mo. 
\q1  
\v 4 Ka nyor di’d mo tani hili dhalku/ miinthus ki mii mo. 
\q1 Wali ’twa/ ka dum bum mo ap̱owa cim bum mo dhali ’koyi um ki shwamm mo. \qs Doshi ma dhali ’cunycuri yan mo.\qs* 
\q1  
\v 5 C̱iyi to kun ’ciṯẖu/ ’kus kun tana ḵar/eŋ gana/ mo 
\q1 dhali dhuyi moŋgam gwo is bum e Tap̱a mo. 
\b  
\q1  
\v 6 Kwani tana ris kun o gwo mo ki: Ayy, ki ana mina mish tom ’boro’da kamuyi. 
\q1 ’Deki moŋkush gi jis/em pini ap̱o/ aman mo, ayy Tap̱a. 
\q1  
\v 7 /E karki moŋkuny bwa ki nyanye/ eya dum pem mo 
\q1 mmobol uni gwansan e mo kun takin gi pos buni dhali yimana mura’th jin ḵa/u ki ŋah ŋah kun ishkin mo. 
\q1  
\v 8 E mo ma ḵu’th is mo tani aha/ mina ish ’ko’da ’cesh mo dhali ish e mo, 
\q1 haali/ /e ’de/ mo tani ayy Tap̱a, kar aha/ mmoc̱a’b ki ’dantar mo. 
\c 5  
\s1 Eya manyuḵ gway mo gom imanp̱iya ṯẖaṯẖar mo. Gway ma Dawuu’d. 
\q1  
\v 1 C̱iyi ’cem pini ka ris gwom pem mo ma, ayy Tap̱a, 
\q1 yip̱i /e ’kup̱ mo gom ohon pem jin ohonkika/ mo. 
\q1  
\v 2 Ciḵi kony cuuwam pem jin gwoka/ mo ma, 
\q1 aMaliḵ pem dhali Arumgimis pem, 
\q1 gom e /e mo tani aha/ ’thona mo. 
\q1  
\v 3 Ayy Tap̱a, e mon’thamo/ mo tani /e ciḵki ’twam pem mo, 
\q1 e mon’thamo/ mo tani aha/ ’ciṯẖa to ’kus gom /e mo dhali tima tim mo. 
\b  
\q1  
\v 4 Haali/ /e diki ta Arumgimis jin ’kunya bwa mo e tonthus jin miikunu mo. 
\q1 tonthus midi diki nyaḵ di ki /e mo. 
\q1  
\v 5 Iman’theḵ ’ba/i mis mo mini ’koki doshi bwambori jis/em pini mo, 
\q1 /e shi/kina ris imanmii tonthusi e mo. 
\q1  
\v 6 /E ’ce’dki uni gwansan sho’k mo kun oki gwo ma ṯor mo. 
\q1 Tap̱a shi/i uni gwansani e kun budha ṯe/ jasi goma bas mo dhali ’kwani kun tana he’k e ka he’k e mo. 
\q1  
\v 7 Hili aha/ ki mo/en pini jin ṯelu sho’k mo jin ishki’d ka enthus mo tani aha/ mina cic̱ gu’b pini mo, 
\q1 dhali aha/ mina luŋa luŋ ka ḵarambuye/ gi gu’b gi mondheleladhelel pini mo ki moŋḵo/ /e mo. 
\b  
\q1  
\v 8 Shuyi aha/ bway mo ma, ayy Tap̱a, e mii ma ḵar/em pini mo 
\q1 haali/ gom ’kup̱ pem tana ris mo, 
\q1 kari bway pini ka ji sho’k mo ibwambori aha/ mo. 
\q1  
\v 9 Haali/ gwoŋ gana/ yisa di’da e ’twam buni mo, 
\q1 adum buni ’ce’dkunu sho’k mo, 
\q1 ’kus buni wana e ki moŋ’kup̱aje jin ḵa’du ’twa/ mo, 
\q1 dhali uni ko ’kus ka le’d buni mo. 
\q1  
\v 10 Dhuyi uni mmoḵal tom buni kun ’ko uni i’ba/ mo, ayy Arumgimis, 
\q1 dhalki uni biṯkin ki gwom buniŋ gana/ gun ’ko uni ibwa mo, 
\q1 haali/ goma dhiŋ gwom buni ka ris mo tani ṯaki uni ka pije/ mo, 
\q1 haali/ uni walkin ki ṯas ṯas ap̱o/ /e mo. 
\b  
\q1  
\v 11 Hili dhalka ris uni gwansan kun huri jwa mo e /e mo tani ’kunya bwa mo. 
\q1 Dhalki uni yuḵ gway ki sule/ gom moŋ’kuny bwa mo, 
\q1 dhali /e a’di imina uni jeṯṯ me’di cine/ mo, 
\q1 ki uni gwansan kun en gway pini mo tani mina bwa i/ii imis gom /e mo. 
\q1  
\v 12 Haali/ /e ’borki uniŋ ḵar/e mii mo, ayy Tap̱a, 
\q1 /e kumki uni ki mo ma ’them pini me’da goŋgoro/ mo. 
\c 6  
\s1 Eya manyuḵ gway mo nyaḵki dheŋdhenye/ isi ki koŋ ko jin ’kula ’kus ki ’kul mo. Gway ma Dawuu’d. 
\q1  
\v 1 Ayy Tap̱a, dhalku/ ki ḵucur aha/ ka nyor pini mo, 
\q1 walla dor aha/ ka nyor pini jin ’batha’ba’th mo. 
\q1  
\v 2 Miiyi mii ma ’the gom aha/ mo, ayy Tap̱a, haali/ aha/ ’dushura ki ’dushur mo. 
\q1 Ayy Tap̱a, wac̱i/ aha/ mo, haali/ arisa simam pem ṯocu bwa mo. 
\q1  
\v 3 Aḵashiram pem si’da/ a’di puru/ ki monṯo’c bwa mo. 
\q1 Hili /e, ayy Tap̱a – kakasja sa/? 
\q1  
\v 4 Ṯuki mo, ayy Tap̱a, tayi mondiki/em pem is ki me’d mo, 
\q1 ’cuḵi aha/ mo gom gway gi mo/en pini jin ṯelki sho’k mo. 
\q1  
\v 5 Haali/ e mowu mo tani moŋkamu/ yisa di’da jin kanu /e e mo. 
\q1 E mo ma Haawiya mo tani aja si’da/ imidi c̱i /e momaŋ mo? 
\b  
\q1  
\v 6 Aha/ ’thabula is mo gom is pem jin shunki aha/ mo, 
\q1 aris mon’thinyi ’baar mo aha/ up̱a cim pem ki jabu’th mo. 
\q1 Aha/ c̱orosa/ ki c̱oros ap̱owa cim pem mo ki jabu’th pem jin gwoka/ mo. 
\q1  
\v 7 Em pem c̱a’bki reŋ reŋ mo gom monyjwakaṯ pem mo, 
\q1 a’di warki’d ki moŋ’ka’d is mo haala ris ’kup̱ pem tana ris ka ris mo. 
\b  
\q1  
\v 8 Iiku/ ’peni aha/ mo, aris um gun miiki tonthus mo, 
\q1 haali/ Tap̱a a’di ciḵki cuuwa/ gi kom pem mo. 
\q1  
\v 9 Tap̱a ciḵki aha/ ko gom mo ma di’b is mo. 
\q1 Tap̱a bu’thki mo ma ’thom pem mo be. 
\q1  
\v 10 Aris uni gun ta ’kup̱ pem minu dhu ki mo ma ’the is mo dhali pura du ki monṯo’c bwa mo, 
\q1 uni mini doḵ ka nyaŋ’ko’d mo dhali minu dhu ki mo ma ’the is ki e ’kamu’thki’d hila/ mo. 
\c 7  
\s1 Ko ma Dawuu’d mo a’di jin yuḵkina a’di gway e Tap̱a mo isi ki gwo goma Kuush mo jin ta’da waḵ ma Benyamiin mo. 
\q1  
\v 1 Ayy Tap̱a Arumgimis pem, e /e mo tani aha/ budha mo jin huru jwa mo, 
\q1 tayi aha/ is ki me’d ’pena ris unim pem kun uri aha/ isho’k mo, dhali ’cuḵi aha/ mo ma, 
\q1  
\v 2 isi ciki/ ki uni mini ’koki dher aha/ bwa me’da dhop̱ mo, 
\q1 mmodir aha/ mo mmodar gi jan ṯal ’de/ mmowoṯẖ aha/ mo. 
\b  
\q1  
\v 3 Ayy Tap̱a Arumgimis pem waḵki/ aha/ miina yansankan mo, 
\q1 dhali waḵki/ toŋ kamu/ di’d jin miiga/ ki me’d pem jin shiyi’d mo tani 
\q1  
\v 4 dhali waḵki/ aha/ ri/a amugum pem ki tonthus mo tani 
\q1 walla dil a’di jin ta ’kup̱ pem to ka wuny is mo tani 
\q1  
\v 5 dhalki a’di jin ta ’kup̱ gi aha/ uri aha/ mo dhali bu’th mo, 
\q1 dhali dhalki a’di pucur mondiki/em pem ’twa/a ’cesh mo, 
\q1 dhali ’thi/a ḵashiram pem e bwam bu’d mo. \qs Doshi ma dhali ’cunycuri yan mo.\qs* 
\b  
\q1  
\v 6 Cuyi mis mo ma, ayy Tap̱a, eya nyor pini mo, 
\q1 ’deki is pini ki mis ap̱o/ uni gwansan kun ta ’kup̱ pem kun puri mii ki o’d mo, 
\q1 meri is mo, ayy Arumgimis pem, /e ṯorki gwon dwall jin toru gwo ’twa/a ’cesh mo. 
\q1  
\v 7 Dhalki montul is gom ’kwani uni itul is gom /e mo, 
\q1 dhali ap̱o/ a’di mo tani budhi monyc̱a’b pini jin eḵa/ eḵ mo. 
\q1  
\v 8 Tap̱a dwalli ’kwani gwo mo, 
\q1 dwalli aha/ gwo mo ayy Tap̱a, isi ki mii ma ḵar/em pem mo 
\q1 dhali isi ki gwo jin di’di aha/ jin dika/ ki mii ki ŋadhum mo. 
\b  
\q1  
\v 9 Ayy dhalki tonthus gi imanmii miinthus daḵu ka bwa i’ba/ mo ma, 
\q1 hili ṯeli /e imanmii ka ḵar/e sho’k mo, 
\q1 /e jin nyo/ki bwaŋ ’kwani mo dhali aduŋ ’kwani mo, 
\q1 /e jin tana Arumgimis jin ta’da ḵar/e mo. 
\q1  
\v 10 Agoŋgorom pem a’di di’d eya Arumgimis mo, 
\q1 a’di jin ta uni is ki me’d mo, uni kun dhelel ma du mo. 
\q1  
\v 11 Arumgimis ta’da ḵar/e jin dwalli gwo mo, 
\q1 dhali Arumgimis jin deḵ ma nyor mo isa yempa/ mo. 
\b  
\q1  
\v 12 Waḵki/ wathi/ diki rica du is mo tani 
\q1 Arumgimis midi cil gandal piti ki ŋar ŋar mo. 
\q1 A’di ric̱ki’da shum bwam piti mo. 
\q1  
\v 13 A’di thosonki to gi mo/as piti gom mo gi ’koshuwa ’kosh mo, 
\q1 mmodhala thop̱a/ o’d piti me’d mo jin c̱a’bki wur wur mo. 
\q1  
\v 14 Hili mo mo ma, amanmii tonthus mo tani a’di bwaaki’da ris tonthus mo, 
\q1 dhali di’d ka ’ci ibwa mo jin ta’da pibi ka pibi mo, 
\q1 dhali a’di ki ḵala ṯor ka pije/ mo. 
\q1  
\v 15 A’di ki c̱wany jis mo tani dhali tor a’di ḵarash ka pije/ mo, 
\q1 dhali biṯi jis piti jin c̱wanykina a’di mo be. 
\q1  
\v 16 Mo ma pibim piti ṯu’kki’d e ’kup̱ pitiŋ gana/ mo, 
\q1 dhali mombujur piti thulu’d e bwaŋ ’kup̱ pitiŋ gana/ mo. 
\b  
\q1  
\v 17 Aha/ mina c̱i Tap̱a mo jin ’boruwa ’bor bwa i is mo jin ha me’d ki mo ma ḵar/em pitiŋ gana/ mo 
\q1 dhali aha/ mina yuḵ gway mmomaŋ gway gi Tap̱a mo, a’di jin Caa e ki Ca mo. 
\c 8  
\s1 Eya manyuḵ gway, isi ki gway jin yuḵu ka jattiyya mo. Gway ma Dawuu’d. 
\q1  
\v 1 Ayy Tap̱a, jin ta Tap̱am bam, gway pini wa’di eḵa/ e mony’ceshi ’baar mo! 
\q1 /E jin ta gi monyca ap̱o/ momisi ’baar mo jin nani’da nana/ mo. 
\q1  
\v 2 Ki ’twa/ gi usha ŋa/ mo dhali uni gun tana ’pereny mo tani 
\q1 /e ṯelkina cur sho’k mo haali/ gom uni gun ta ’kup̱ gi /e mo, 
\q1 mmodosh a’di jin ta ’kup̱ gi /e mo dhali a’di jin ri’cki’da ri’c mo. 
\b  
\q1  
\v 3 Ki aha/ p̱arkina momis pini e mo, jin ta’da ṯu’c gi me’d pini mo tani 
\q1 mmop̱ara ppe e mo dhala risa cul kun ṯelkina /e sho’k mo, 
\q1  
\v 4 wathi/ gi wakata mo, jin mina /e i/o bwa ki a’di mo, 
\q1 walla ya/ gi wathi/ mo ki /e mini hil a’di i e mo? 
\q1  
\v 5 Naskin /e ki kar a’di mmota ari jin gwa’da’d ka Arumgimis mo 
\q1 dhali shum a’di ki monyca mo dhali mii montaḵ mo. 
\q1  
\v 6 /E c̱iki a’di mo jin tanu tap̱a ap̱owa risa ṯu’c gi me’d pini mo 
\q1 dhali /e dhukina ris to ’baar mo e bwaŋ’kwariny sho’k piti mo 
\q1  
\v 7 aris ḵa’bal dhala morbip̱ mo, 
\q1 dhali si’da/ aris tombwaasho mo, 
\q1  
\v 8 dhali aris ’dii kun p̱eni mis mo, dhala ris wa’c e bwaŋ ḵumma/ yi’de/ mo 
\q1 dhala ris to gunn kun dhu bway e bwaŋ ḵumma/ yi’de/ mo. 
\b  
\q1  
\v 9 Ayy Tap̱a, jin ta Tap̱am bam mo, 
\q1 gway pini wa’di eḵa/ e mony’ceshi ’baar mo! 
\c 9  
\s1 Eya manyuḵ gway mo isi ki gwo mowu gi ya/m piti mo. Gway ma Dawuu’d. 
\q1  
\v 1 Aha/ mina c̱i mo jin ’boruwa ’bor bwa i is e Tap̱a ka dum pemi ’baar mo. 
\q1 Dhali aha/ mina ṯora ris to kun miikina /e ki jaro/ jaro/ mo. 
\q1  
\v 2 Aha/ mina bwa ’kuny mo dhali ya i mis gom /e mo. 
\q1 Dhali aha/ mina yuḵ gway mmomaŋ gway pini mo, ayy /e jin Caa e ki Ca. 
\b  
\q1  
\v 3 Ka ris uni kun ta ’kup̱ gi aha/ doḵkin ka nyaŋ’ko’d mo 
\q1 dhali uni golkinki is mo dhali ’ce’d sho’k ibwambori /e mo. 
\q1  
\v 4 Haali/ /e halki mom pem jin raḵu jin ta jiŋ ḵar/e mo. 
\q1 /E c̱a’bkina p̱o/ ḵursi ma maliḵ mo mmoc̱i mo ma ḵar/e mo dhali gwon dwall jin toru gwo ’twa/a ’cesh mo. 
\b  
\q1  
\v 5 /E ḵucurkina ris kal gi ’kwaniny’cesh mo, /e ’ce’dki uni gun ta thus ki thus sho’k mo, 
\q1 /e ’koshki gway buni ki sule/ dhali ki sule/ mo. 
\q1  
\v 6 Uni gun ta ’kup̱ mo tani uni torki sho’k ka pupush mo e mo jin mu/u ’twa/a ’ceshi ’baar mo, 
\q1 aris ’peŋkuman bampam buni mo tani yu’dkina /e mo, 
\q1 dhali mom buni jin kanu uni e mo tani a’di i’ce’dkunu sho’k mo be. 
\b  
\q1  
\v 7 Hili Tap̱a a’di ic̱a’bki’d i mo ma ḵursi ma maliḵ ki sule/ mo. 
\q1 A’di ṯelki’da ḵursi ma maliḵ piti mo gom gwon dwall jin toru gwo ’twa/a ’cesh mo, 
\q1  
\v 8 dhali a’di dwallki ’kwaniny’cesh gwo ki mii ma ḵar/e mo. 
\q1 A’di midi dwall ’kwani gwo ki dar gi mii ma gwar ’de/ mo. 
\q1  
\v 9 Tap̱a a’di ’bitha’bi’th me’da cur gom uni gun yap̱kunu mo, 
\q1 a’di ta’da cur jin ’bitha’bi’th ka tee jin ṯojuwa ṯo’c bwa mo. 
\q1  
\v 10 Dhali uni gwansan kun mishki gway piti mo tani dhuki moŋgam gwo is buni e /e mo, 
\q1 haali/ gom /e mo tani ayy Tap̱a /e diki dhal uni gwansan ’pen mo gun simmki /e e mo. 
\b  
\q1  
\v 11 Yuḵi gway ki maŋi Tap̱a mo a’di jin di’d eya Sihyuun mo. 
\q1 Ṯori miin tom piti e bwaman ma ris ’kwani mo. 
\q1  
\v 12 Haali/ a’di jin ri’cki’da bas mo tani a’di diki this uni e mo 
\q1 dhali a’di diki this ko e mo, ko gi a’di jin wo’ckunu is she/ mo. 
\b  
\q1  
\v 13 Miiyi mii ma ’the gom aha/ mo ma, ayy Tap̱a. 
\q1 Hili mo mo ma to jin ’koshi aha/ is ka nyor mo tani a’di ta to ’peni uni gwansan kun shi/ki aha/ i e mo, 
\q1 Ayy /e jin ’de’kki aha/ mo ’peni ’twaŋkal gi mowu mo, 
\q1  
\v 14 ki aha/ mina rasha ris momaŋ pini e mo, 
\q1 ki eya ris ’twaŋkal ma goŋ gi ’bwa/ ma Sihyuun mo 
\q1 ki aha/ mina bwa ’kuny mo e mony’cuḵ pini mo. 
\b  
\q1  
\v 15 Aris kal gi ’kwaniny’cesh cic̱kin ’teki jorom mo e jis kun c̱wanykina uni mo, 
\q1 eya nyoḵ kun bagkina uni mo tani a’di bu’thki uni isho’k buniŋ gana/ mo. 
\q1  
\v 16 Tap̱a dhalki is piti ki a’di minu mish mo, a’di torki gwon dwall ’twa/a ’cesh mo, 
\q1 uni gun ta thus ki thus mo tani bu’thkin ma gumem buni kun uḵkina uni ki me’d buniŋ gana/ mo. \qs Higgaion. Doshi ma dhali ’cunycuri yan mo.\qs* 
\b  
\q1  
\v 17 Uni gun ta thus ki thus mo tani uni mini c̱eker bwa mo eya Haawiya mo, 
\q1 aris kal gi ’kwaniny’ceshi ’baar mo kun thiskina Arumgimis e mo. 
\q1  
\v 18 Haali/ uni kun mini mii ta gi to mo tani uni minu mii ’koki this e isa yempa/ mo, 
\q1 dhali mo ma ’teŋ kap̱e/ gi uni gun hatha’ko’d mo tani uni minu ’koki ’ce’d sho’k ki sule/ mo be. 
\q1  
\v 19 Cuyi mis mo, ayy Tap̱a. Dhalku/ ki dhal ’kwani mmop̱i gwo jip̱i/ mo. 
\q1 Dhalka ris kal gi ’kwaniny’ceshi ’baar mo dwallu gwo mo ibwambori jis/em pini mo. 
\q1  
\v 20 Dhuyi uni ki mo ma ḵo/ is mo, ayy Tap̱a. 
\q1 Dhalka ris kal gi ’kwaniny’cesh ki mish uni mo ki uni tana ta, uni ta ’kwaniny’cesh mo! \qs Doshi ma dhali ’cunycuri yan mo.\qs* 
\c 10  
\q1  
\v 1 Katinta doshkina /e isa dhana/ kan mo, ayy Tap̱a? 
\q1 Katinta bagkina /e is pini ’pena tee jin ṯocu bwa mo? 
\q1  
\v 2 E mo jin dhuna uni kun ta thus ki thus is ki ca mo tani uni ki ur uni kun hatha’ko’d isho’k mo. 
\q1 Dhalki uni budhu mo e mom buni kun p̱ishinkina uni ki ’pen mo kun kulumkina uni gwo ibwa mo. 
\q1  
\v 3 Haali/ uni kun ta thus ki thus mo tani dhuki ’ba/ ki ca mo gom to kun gop̱ uni bwam buni mo, 
\q1 dhali wathi/ jin pura bwa ki pur gom nyunykina/ mo tani a’di midi jeeya je mo dhali ruḵ Tap̱a mo. 
\q1  
\v 4 E bwam/em piti jin kara a’di ’ba/ ki ca mo tani a’di jin ta thus ki thus mo tani diki ŋap̱ a’di mo. 
\q1 Dhali aris gwom piti kun kuluma a’di ibwa mo tani ta ku kun wa cikise/ mo mmo/o ki: Arumgimis p̱iyi’d mo be. 
\q1  
\v 5 Bway piti ruski’d ki rus isa yempa/ mo, 
\q1 gwon dwall pini a’di c̱a’bki’d e mo jin eḵa/ eḵ mo, jin di’di bwamp̱o/ gi jis/em piti mo: 
\q1 dhali goma ris ’kup̱ piti mo tani a’di ki ’taḵ uni manya/ i’kup̱ mo. 
\q1  
\v 6 A’di kulumki gwo eya dum piti mo ki: Aha/ mina mol joc̱ mo, 
\q1 eya risa nyaḵum yil gi ’kwani mo tani aha/ mina diki gam a’di jin ta mo jin ’konu ki ’twa/ jin ’bushura/ ’bushur ’kup̱ mo. 
\q1  
\v 7 ’Twam piti ’tu’dkunu mo ki mo ma jee mo dhali ki mo ma he’k e mo dhali mmoyap̱a yap̱ mo, 
\q1 dhali ’ko’da le’d piti mo tani a’di taki’da pibi mo dhali miinthus jin shi/ashi/ mo. 
\q1  
\v 8 A’di c̱a’bki’d mo mmobag mo eya ris bampa/ mo, 
\q1 e mom piti jin bagkina a’di is mo tani a’di jin ta’da man’kosha mee gom uni gun ’kon ka p̱o/ mo. 
\q1 Em piti mii’d ki jir jir mmotim uni gun hatha’ko’d mo 
\q1  
\v 9 a’di ki wup̱a ’cesh ka ḵwal is me’da dhop̱ e bwaŋ gu’b piti mo, 
\q1 a’di ki wup̱a ’cesh ki a’di midi bu’th uni gun hatha’ko’d mo, 
\q1 a’di ki bu’th uni gun hatha’ko’d mo ki a’di di’d mmodir uni ka nyoḵ bway bwaman mo. 
\q1  
\v 10 Uni gun hatha’ko’d mo tani uni nyu/kunu mo, mmocic̱ ka ’cesh mo, 
\q1 dhali ṯa’k mo e mom’bi’th piti mo. 
\q1  
\v 11 A’di kulumki gwo eya dum piti mo ki: Arumgimis dhalki’da dhal ’pen mo, 
\q1 a’di bagki jis/em piti mo, a’di midi mol a’di p̱ar e mo. 
\b  
\q1  
\v 12 Cuyi mis mo ma ayy Tap̱a, ayy Arumgimis. ’Deki me’d pini mo, 
\q1 dhalku/ ki dhal uni gun woca is is she/ ’pen mo. 
\q1  
\v 13 Katinta iruḵkina wathi/ jin ta thus ki thus Arumgimis mo, 
\q1 dhali o gwo eya dum piti mo ki: /E mini diki yuḵ a’di mmoc̱i mondeŋ piti e mo? 
\q1  
\v 14 /E mishkin mo, nye, /e nyiṯẖki mo jin ṯocu bwa mo dhali mo jin jwakaṯkunuwa jwakaṯ mo 
\q1 ki /e mini ’taki ḵal a’di e me’d pini mo, 
\q1 a’di jin hatha’ko’d mo tani a’di c̱iki is piti ki /e mo, 
\q1 haali/ /e jin tana manwoṯẖ gom a’di jin dar gi com mo. 
\b  
\q1  
\v 15 ’Ce’dki /e a’di abi mo a’di jin ta thus ki thus mo dhali a’di jin ta’da manmii tonthus mo, 
\q1 simmi miin tonthus piti e naskin mo ntagi /e mini diki gam toŋ kamu/ mo. 
\q1  
\v 16 Tap̱a a’di ta’da maliḵ gom ki sule/ mo dhali ki sule/ mo. 
\q1 Kal gi ’kwaniny’ceshi ’baar mo mini ’ce’d sho’k ’peni mony’cesh mo. 
\q1  
\v 17 Ayy Tap̱a /e mini ciḵ to gi a’di jin ’ka’d ma du ki ’ka’d gom to jin o a’di bwa mo, 
\q1 /e mini ’bi’th uni adum buni is mo dhali /e mini ḵa’d ’cem pini mo, 
\q1  
\v 18 mmodhuwa dhu ka p̱o/ mo gom uni gun dar gi icom mo dhali uni gun yap̱kunu mo be, 
\q1 wakan ki wathi/ gi mony’cesh midi diki dhu uni ki moŋḵo/ is doḵ/e mo be. 
\c 11  
\s1 Eya manyuḵ gway mo. Gway ma Dawuu’d. 
\q1  
\v 1 E Tap̱a mo tani aha/ bu’thkina mom pem jin hurkika/ jwa mo, dhali /e mini oyaa/ gwo kata mo ki: 
\q1 P̱eyi me’d ’dii mo e ’kuwosha turga/ mo, 
\q1  
\v 2 haali/ hili mo mo ma, haali/ uni gun ta thus ki thus mo tani gwana’dkina bwa mo, 
\q1 uni ḵa’bkina thop̱am buni eya shu/ mo 
\q1 mmoshin e mondhurumi’d mo ap̱o/ uni kun dhelel ma du mo. 
\q1  
\v 3 Dhali waḵki/ mo kun ḵa’bkunu ’ce’dkunu sho’k mo tani 
\q1 imanmii ka ḵar/e mini miiya ta mo? 
\b  
\q1  
\v 4 Tap̱a a’di di’d e gu’b gi mondheleladhelel piti jin ḵogu mo, 
\q1 dhali aḵursi gi Tap̱a a’di di’d e momis mo, 
\q1 dhali em piti hilki mo mo, dhali aḵwarma’c em piti a’di nyo/ki uc̱i gi ’kwaniny’cesh mo be. 
\q1  
\v 5 Tap̱a a’di nyo/ki uni gun miin ka ḵar/e mo dhali uni gun ta thus ki thus mo, 
\q1 dhali aḵashiram piti shi/ki a’di i e mo a’di jin enki mo jin bujuruwa bujur mo. 
\q1  
\v 6 Ap̱o/ a’di jin ta thus ki thus kan mo tani a’di midi hetha p̱o/ a’di akap̱any o’d mo dhali to jin si’du/ mo, 
\q1 dhali ’tham jin shi’bil to mo tani a’di midi ta tom buni kun pwaḵkunu uni bwa ka ’to’d ’to’d mo be. 
\q1  
\v 7 Haali/ Tap̱a a’di ta’da ḵar/e mo dhali a’di eni mii gun miinu ka ḵar/e mo. 
\q1 Uni gun dhelel ma du mo tani mini hil bwam/em piti mo be. 
\c 12  
\s1 Eya manyuḵ gway mo: isi ki gwo ma sheminith mo. Gway ma Dawuu’d. 
\q1  
\v 1 Woṯẖi/ awoṯẖ mo ma, Tap̱a. Haali/ jaŋ kamu/ yisa di’da naskina/ jin ta’da gayiin mo, 
\q1 haali/ uni kun ta ku isiŋ gana/ mo tani torki sho’k ka pupush mo ’peni bwaman gi ya/ gi ’kwaniny’cesh mo be. 
\q1  
\v 2 Aris ’kwaniny’ceshi ’baar mo ka ’deṯe/ ’deṯe/ mo tani takina ṯor ka ṯor ap̱o/ imannyaḵ ’dish gu’b buni is mo, 
\q1 ki gwo maŋ buni ’pena le’d buni ka maḵ mo dhali ka du kun ’koni su/ mo tani uni ki ṯor gwo mo. 
\q1  
\v 3 Dhalki Tap̱a a’di ’ciṯẖki’da risa maŋ kun maŋu ka maḵ ’peni ’twa/ mo, 
\q1 dhala le’d kun dhu dhan ’ba/ ki ca mo, 
\q1  
\v 4 uni gwansan kun o gwo mo ki: Ka le’d bana mo tani ana mina p̱i gwo jip̱i/ mo, 
\q1 ale’d bana ’kon nyaḵki ana mo, kaja a’di ita tap̱am bana mo? 
\b  
\q1  
\v 5 Haali/ uni gun hatha’ko’d mo tani uni yap̱kunu mo, haali/ uni gun mini mii ta gi to mo tani uni ohonkin mo, 
\q1 aha/ mina cu mis shwane/ mo, a’di ta gwo jin ona Tap̱a mo, 
\q1 dhali aha/ mina kar a’di ki ’dantar e mo jin o a’di bwa mo. 
\q1  
\v 6 Aris gwo kun ona Tap̱a is mo tani uni ta gwo kun onu is mo kun dhelelkin mo, 
\q1 ’dolkon kush uni iṯo’dkunu ki o’d jin c̱a’b ki wur wur mo ’pena ’cesh mo, 
\q1 uni dhukunu i o’d me’di pesu/ mmodhelel a’di mo. 
\b  
\q1  
\v 7 Ayy Tap̱a, miiyi mii mmocesh am ka p̱o/ mo ma, 
\q1 jiyi aman ’pena nyaḵum yil gi ’kwani gwansan mo ma ki sule/ mo. 
\q1  
\v 8 Eya ris ’twaŋkal kuku/ mo uni kun ta thus ki thus mo tani ’kaḵarki mo mo, 
\q1 me’d miim bulga/ a’di ikaru ki ca e bwaman iya/ gi ’kwaniny’cesh mo. 
\c 13  
\s1 Eya manyuḵ gway mo. Gway ma Dawuu’d. 
\q1  
\v 1 Kakasja, ayy Tap̱a? A/e mini dhal aha/ ’pen ki sule/ sule/ kan mowa? 
\q1 Dhali /e mini bag jis/em pini ’peni aha/ ki mo gi wakata mo? 
\q1  
\v 2 Dhali ki mo gi wakatinta imiga/ mii ḵal mom’pe’d shem pem eya ḵashiram pem mo, 
\q1 dhali ta gi mondiṯ bwa eya dum pem iyula tente/ kan mo? 
\q1 Ki mo gi wakatinta imina a’di jin ta ’kup̱ gi aha/ ica ap̱o/ aha/ mo? 
\b  
\q1  
\v 3 Nyiṯẖi ma dhali thoḵ aha/ gwo mo, ayy Tap̱a, Arumgimis pem mo. 
\q1 Kushi em pem mo isi ciki/ ki aha/ mina ish e mo e a’di jin ta mo/ish e gi mowu mo, 
\q1  
\v 4 isi ciki/ ki a’di jin ta ’kup̱ ki aha/ midi o gwo mo ki: Aha/ p̱ina a’di e mo be, 
\q1 isi ciki/ ki uni kun ta ’kup̱ ki aha/ mina bwa ’kuny mo haali/ aha/ yiḵinkunu is mo be. 
\b  
\q1  
\v 5 Hili aha/ gamkina gwo is mo e mo/en pini jin ṯelkunu sho’k mo, 
\q1 adum pem mina bwa ’kuny mo e bway mowoṯẖ pini mo. 
\q1  
\v 6 Aha/ mina yuḵ gway e Tap̱a mo, 
\q1 haali/ a’di mii aha/ ki ’bore/ ki miin to kun ishkin ka enthus mo. 
\c 14  
\s1 Eya manyuḵ gway mo. Gway ma Dawuu’d. 
\q1  
\v 1 A’di jin ta p̱us mo tani o gwo eya dum piti mo ki: Arumgimis p̱iyi’d mo. 
\q1 Uni p̱u/kin mo, dhali uni mii mii kun bulabul mo. 
\q1 Jaŋ kamu/ jin mii’d ka ḵar/e yisa di’da. 
\q1  
\v 2 Tap̱a hilki mo ka luŋgu’b ’peni mis ap̱o/ uc̱i gi ’kwaniny’cesh mo 
\q1 mmop̱ar mo e mo waḵki/ jan ṯal ’deŋ kamu/ mii mii ki yuḵ yuḵ mo, 
\q1 mmosimm jasi Arumgimis e mo. 
\q1  
\v 3 Uni ’baar mo iikini dheres mo, uni ’baar mo wakina e ki to gun p̱u/kin mo, 
\q1 jan ṯal ’deŋ kamu/ yisa di’da jin mii mii jin ’boro’d mo, ṯal ’de/ p̱iyi’d mo be. 
\b  
\q1  
\v 4 ’Kona uni ki nyiṯẖa/, aris imanmii tonthus mowa, 
\q1 uni kun shwa ’kwanim pem me’d tonṯe/ kun shwana uni mo, 
\q1 dhali uni ’koki yuḵ Tap̱a mo. 
\q1  
\v 5 Uni minu dhu ki dhan moŋḵo/ is mo, 
\q1 haali/ Arumgimis nyaḵ di ki ’kwani ma nyaḵum yil kun mii miiŋḵar/e mo. 
\q1  
\v 6 Um mini ’taki non mo jin thosona wathi/ jin hatha’ko’d ’twa/ mo tani, 
\q1 hili Tap̱a a’di ita jim piti jin hura a’di jwa nycine/ mo be. 
\q1  
\v 7 Ayy mony’cuḵ midi ’taki p̱u’d gom ’Kwani ma Israyiil moyi ’peni Sihyuun mo! 
\q1 Ki Tap̱a midi wara shamaneṯṯan ki ’kwanim piti is mo tani 
\q1 Yakuub mina bwa ’kuny mo dhali Israyiil mina bwa ’bor mo. 
\c 15  
\s1 Gway ma Dawuu’d 
\q1  
\v 1 Ayy Tap̱a, aja a’di imidi c̱a’b ki c̱a’b yilkina/ e gu’b burrinyem pini mo? 
\q1 Dhali aja a’di imidi c̱a’b e ’kuwosh pini jin ḵogu mo? 
\q1  
\v 2 A’di jin ya’d ki dar gi mii ’ba/ mo, dhali mii miim ’boro’d mo, 
\q1 dhali ṯor gwoŋ gana/ ’pena dum piti mo, 
\q1  
\v 3 a’di jin diki thutha thu’th ’pen ka le’d piti mo, 
\q1 dhali diki mii tonthus ka kam piti mo, 
\q1 walla ḵal mo jin waḵuwa waḵ ap̱owa mannyaḵ c̱a’b piti jin ’dish a’di is mo, 
\q1  
\v 4 dhali e jis/em piti mo tani aman/ush gwo gam is mo tani waḵkina a’di mo, 
\q1 hili a’di taḵ uni gwansan kun ḵo/ki Tap̱a mo, 
\q1 dhali a’di jin thulki gwom piti me’da p̱o/ mo ki to jin shi/ki a’di mo tani dhali diki aḵ gwom piti e mo be, 
\q1  
\v 5 a’di jin diki kara guurush piti e mo jin nyunyu/ to mo, 
\q1 dhali a’di diki bu’th mo jin wanu is ap̱o/ a’di jin di’d ka po/ mo be. 
\q1 A’di jin mii to gwansan mo tani minu mol joc̱ ki sule/ mo be. 
\c 16  
\s1 Ko ma Dawuu’da dhamo/ jin kanu e mo. 
\q1  
\v 1 ’Tashi aha/ ’twa/ mo ma, ayy Arumgimis, haali/ e /e mo tani aha/ bu’thkina mo jin huru jwa mo. 
\q1  
\v 2 Aha/ ki o Tap̱a gwo mo ki: /E ta Tap̱am pem mo. 
\q1 Ki dar gi /e mo tani aha/ mina mol tom ’boro’d gam mo. 
\q1  
\v 3 Me’d uni gun dhunu ki she/ ki dhelel dhelel e mony’cesh mo tani uni a’di ita kun bol tiya e ki ’bor mo, 
\q1 dhali e uni mo tani a’di ’kunyka/ bwam pemi ’baar mo. 
\q1  
\v 4 Uni gwansan kun kwanykina ruma tiya mo tani uni marki mondiṯ bwam buni is mo, 
\q1 mon tom buni gun c̱ina uni mmo’ciṯẖa basa ’cesh mo tani aha/ mina diki c̱i mo 
\q1 walla aha/ mina diki ḵal gway buni e ’twam pem mo. 
\b  
\q1  
\v 5 Tap̱a a’di ta tom pem jin kwanyka/ mmobu’th mo dhala ḵubbaayam pem mo 
\q1 dhali /e ko’dki mal pem is mo. 
\q1  
\v 6 Jil uni dirkini bwambori aha/ mo e mo jin ’kunyka/ bwa mo, 
\q1 nye, aha/ tana gi mala ’borga/ mo. 
\b  
\q1  
\v 7 Aha/ ’bora Tap̱a mii mo a’di jin c̱iki aha/ gwo logom mo, 
\q1 e mon’thiny si’da/ mo tani adum pem ye’thki aha/ sho’k ki gwo mo. 
\q1  
\v 8 Aha/ karkina Tap̱a isa yempa/ ibwambori jis/em pem mo, 
\q1 haali/ a’di di’d ki me’da bim poros pem mo ki aha/ minu ’koki joc̱ mo be. 
\q1  
\v 9 Wakan adum pem a’di ’borkunu bwa mo dhala ḵashiram pem a’di ’kunykina bwa mo. 
\q1 Buŋgwar is pem a’di c̱a’bki’d ki c̱a’b ’pempaŋ gana/ mo. 
\q1  
\v 10 Haali/ /e diki c̱i aha/ eya Haawiya mo, 
\q1 walla /e diki dhal a’din ’de/ jin ta’da gayiin pini bway mo mmop̱ar jisa ’kulga/ e mo. 
\q1  
\v 11 /E ṯorki aha/ bway tur gi mondiki/e mo, 
\q1 e buŋ’kus pini mo tani a’di isha mo jin ’tu’du ki moŋ’kuny bwa mo, 
\q1 eya bim poros pini mo tani a’di ’kona mo jin ’boru bwa ki sule/ sule/ ya ye ’ba/ mo. 
\c 17  
\s1 Mon’tho ma Dawuu’d 
\q1  
\v 1 Ciḵi gwoŋ ḵar/e mo ma, ayy Tap̱a. Kari ’ce gom kom pem mo. 
\q1 C̱iyi ’cem pini gom mon’thom pem ’pena le’d pem jin di’d ki ’kus ’pena he’k e mo. 
\q1  
\v 2 ’Peni /e mo tani dhalki mom pem jin yenu p̱u’du’d mo. 
\q1 Dhalki em pini a’di hili jim ’boro’d mo. 
\q1  
\v 3 Waḵki/ /e mini pala dum pem mo, dhali waḵki/ /e mini yayu/ mmobuṯi aha/ mon’thiny mo, 
\q1 dhali waḵki/ /e mini nyo/ aha/ mo tani /e mini diki gam tonthusa kamu/ e aha/ mo. 
\q1 ’Twam pem diki dhaŋ gwo mo. 
\q1  
\v 4 Me’d mii gun miina ’kwani mo tani ki gwo gi ’twam pini mo tani 
\q1 aha/ gaskina mo ’peni bway gi uni kun bujurkina bujur mo. 
\q1  
\v 5 Ŋaṯgin pem ṯelki sho’k mo e bway tur pini mo, 
\q1 sho’k pem diki yeres mo. 
\b  
\q1  
\v 6 Aha/ yuḵkina /e mo haali/ /e mini thoḵ aha/ ’twa/ mo, ayy Arumgimis. 
\q1 Kari /e ’cem pini gom aha/ mo, ciḵi /e gwom pem mo ma. 
\q1  
\v 7 Ṯori monṯel sho’k gi mo/en pini ki jaro/ jaro/ mo, 
\q1 ayy amanwoṯẖ gi uni gwansan kun simmki mo jin huru jwa e mo 
\q1 ’peni uni kun ta ’kup̱ gi uni ki me’da bim poros pini mo. 
\q1  
\v 8 Kari aha/ me’da pinya/ e e mo. 
\q1 Bagi aha/ eya la ma bim pini mo, 
\q1  
\v 9 ’peni uni kun ta thus kun dilki aha/ to mo, 
\q1 kun ta ’kup̱ pem kun shi/in ki shiŋ gana/ mo kun ’kamki aha/ mo. 
\q1  
\v 10 Uni mu’thkina dum buni ’peni bwa jin hilu ki e ma ’thime/ mo. 
\q1 Dhali ki ’twam buni mo tani uni oki gwo ki ’ba/ kun dhuna uni ki ca mo. 
\q1  
\v 11 Uni thuḵki aha/ ki ’the’b ’the’b mo, dhali shwane/ uni ’kamki aha/ mo. 
\q1 Uni dhuki em buni mo mmo’tuḵ aha/ ka ’cesh mo. 
\q1  
\v 12 Uni wana e ka dhop̱ jin gananki ’ba/ mo mmodher to bwa ka gwap̱i/ mo, 
\q1 me’d ari dhuru’c ma dhop̱ jin wup̱ki’da ’cesh mmobag mo. 
\q1  
\v 13 Cuyi mis mo, ayy Tap̱a, jemi uni ’kup̱ mo, dhali p̱iyi uni e mo. 
\q1 Dhali ’cuḵi mondiki/em pem ’peni uni kun ta thus ki thus ki gandal pini mo, 
\q1  
\v 14 ’peni ’kwani ki me’d pini mo, ayy Tap̱a, 
\q1 ’peni ’kwani gwansan kun bu’th to jin ta moŋ’ko gi mony’cesh mo. 
\q1 Dhalki bwam buni ’tu’du/ mo ki to kun dhukina /e gom uni mo. 
\q1 Dhalki uc̱im buni uni tan gi to ki nyanye/ mo jin midi bol ji gi ca’d e mo. 
\q1 Dhali dhalki uni ur ton tiya ’kup̱ gom usha ŋam buni mo. 
\q1  
\v 15 Dhali gom aha/ mo tani aha/ mina hil bwam/em pini mo e mo ma ḵar/e mo. 
\q1 Ki aha/ mina mer e mo tani aha/ minu kap̱ mo mmohila yir em pini mo be. 
\c 18  
\s1 Eya manyuḵ gway mo. Gway ma Dawuu’d, a’di jin ta c̱iŋkina/ gi Tap̱a mo, a’di jin dhalki’da ris gwo me’d mo ki gway jin yuḵa a’di e Tap̱a mo ka tee jin ’cuḵkina Tap̱a a’di mo ’peni me’d ma ris unim piti kun ta ’kup̱ ki a’di mo dhali me’d ma Shawuul mo tani a’di ki o gwo mo ki: 
\q1  
\v 1 Aha/ ena /e mo, ayy Tap̱a, jin ta mom’bi’th pem mo. 
\q1  
\v 2 Tap̱a a’di ta wosh pem mo, dhali acur pem mo, dhali aman’cuḵ aha/ mo, 
\q1 dhali Arumgimis pem mo, dhali wosh pem mo, e a’di jin bu’thkika/ mo jin hurga/ jwa mo, 
\q1 a’di jin ta’da goŋgorom pem mo, dhali ce gi bway gi mowoṯẖ pem mo, dhali mo ma cur pem jin ṯenu gwo mo. 
\q1  
\v 3 Aha/ yuḵkina Tap̱a mo, a’di jin haki me’d mo jin minu maŋ mo, 
\q1 dhali aha/ takunu is ki me’d mo ’pena ris unim pem kun ta ’kup̱ ki aha/ mo. 
\q1  
\v 4 Atomm gi mowu a’di ’tamkunu aha/ is mo, 
\q1 mii jin kar ’kus me’d yi’de/ ’peni mo jin daḵu/ gwo me’d mo a’di tiḵ aha/ e mo, 
\q1  
\v 5 dhali atomm ma Haawiya a’di koṯẖki aha/ is mo, 
\q1 dhali agume/ gi mowu a’di jemki aha/ ’kup̱ mo. 
\q1  
\v 6 E mo ma c̱is pem mo tani aha/ yuḵkina Tap̱a mo, 
\q1 eya Arumgimis pem mo tani aha/ gwokina ’twa/i a’di gom mowoṯẖ mo. 
\q1 ’Peni gu’b gi mondheleladhelel piti mo tani a’di ciḵki ’twam pem mo, 
\q1 dhali kom pem a’di jidhirki’d mo e bwany’cem piti mo. 
\q1  
\v 7 Dhali mony’cesh a’di yaki’d ka kul is mo dhali ṯu’k ’ban ki washar washar mo, 
\q1 dhali moŋḵa’b ma ris wosha turga/ si’da/ uni deekin ki bir bir mo, 
\q1 dhali yiḵinki is mo haali/ a’di shwaki’da nyor mo. 
\q1  
\v 8 Aku’d yaki’d ka pije/ ’peni shush piti mo 
\q1 dhali o’d jin midi kup̱a kup̱ ’peni ’twam piti mo, 
\q1 akap̱any o’d jin ḵakaca ḵaka’c gac̱ki’d ka pije/ ’peni a’di mo. 
\q1  
\v 9 A’di goŋki momis is mo dhali thulu/ ka ’cesh mo 
\q1 dhala raḵ jin ’ceṯẖki’da ’tum a’di di’d e bwaŋ’kwariny sho’k piti mo. 
\q1  
\v 10 A’di merki’da p̱owa man’doyu gwo mo dhali p̱e mo, 
\q1 a’di p̱u’dki’d ki ’ta’b ap̱owa bi gi ’tham mo. 
\q1  
\v 11 A’di karki mondhurumi’d mmota tom piti jin ’kamki a’di is mo, 
\q1 adarha’dam piti a’di ta’da raḵ jin ’ceṯẖki’da ’tum gom yi’de/ mo. 
\q1  
\v 12 ’Peni moŋkush jin kushi mo kagahara e bwambori a’di mo tani 
\q1 to p̱u’dki’d ’pena raḵ piti mo jin ta’da wasa/ mo dhali akap̱any o’d mo. 
\q1  
\v 13 Dhali Tap̱a si’da/ a’di gwoki’da gur gur e momis mo 
\q1 dhali a’di jin Caa e ki Ca a’di bahki ’twam piti mo, 
\q1 awasa/ mo dhali akap̱any o’d mo. 
\q1  
\v 14 Dhali a’di shinki’da thop̱am piti mo dhali c̱e uni bwa mo 
\q1 dhali a’di ki dhi’th mo ka war mo dhali ṯi’k uni ’pen mo. 
\q1  
\v 15 Dhali bway tur e ḵumma/ yi’de/ mo tani uni ’kokunu mo mmomish mo, 
\q1 dhali moŋḵa’b gi mony’cesh uni mishkunu mo be, 
\q1 gom miiŋ ḵucur pini mo jin ḵucurkina /eya ḵucur mo, ayy Tap̱a, 
\q1 gom du’d gi shi/in ’peni shush pini mo. 
\b  
\q1  
\v 16 A’di jidhirki’d ’peni mo jin eḵa/ eḵ mo, dhali a’di bu’thki aha/ mo, 
\q1 a’di ki dir aha/ ka pije/ ’pena ris yi’de/ mo. 
\q1  
\v 17 A’di ki ’cuḵ aha/ mo ’peni a’di jin ta ’kup̱ ki aha/ jin ’bitha’bi’th mo, 
\q1 dhali ’peni uni gwansan kun shi/ki aha/ i e mo, 
\q1 haali/ uni ’kona isi ’bitha gom aha/ mo. 
\q1  
\v 18 Uni p̱u’dkina p̱o/ aha/ ka teem pem jin ta joḵ ki joḵ mo, 
\q1 hili Tap̱a a’di ta mohal pem mo, 
\q1  
\v 19 A’di ki buḵ aha/ ka pije/ e mo jin ḵwashara/ ḵwashar mo 
\q1 dhali a’di ’cuḵki aha/ mo, haali/ a’di ’borkina bwa ki ’bor ki aha/ mo. 
\b  
\q1  
\v 20 Tap̱a a’di c̱iki aha/ adum pem jin ish ḵumma/ mo me’d isi mii ma ḵar/em pem mo, 
\q1 dhali me’d isi mii jin dhelelkika/ me’d pem mo tani a’di raḵki aha/ to ibway mo. 
\q1  
\v 21 Haali/ aha/ dhukina bway gi Tap̱a mo 
\q1 dhali aha/ dinaki mii tonthus mmoper mo ’peni bway ma Arumgimis pem mo. 
\q1  
\v 22 Haali/ aris gwoŋḵan piti kun onu mo tani uni ’koni bwambori aha/ mo, 
\q1 dhali gwoŋḵan piti kun bahu mo tani aha/ dinaki dhu uni ’pen ka pije/ ’peni aha/ mo. 
\q1  
\v 23 Aha/ dara gi mii ’ba/ ibwambori a’di mo, 
\q1 dhali aha/ karkina is pem ’peni mo jin ’konu ki mii ’ba/ mo. 
\q1  
\v 24 Gom gwo gi wakan mo tani Tap̱a a’di iraḵki aha/ to ibway mo isi ki mii ma ḵar/em pem mo, 
\q1 dhali isi ki me’d pem jin dhelelkika/ mo e jis/em piti mo be. 
\b  
\q1  
\v 25 Gom uni kun ta ku isiŋ gana/ mo tani /e ki ṯor is pini jin tana /e a/isiŋ gana/ e uni mo, 
\q1 dhali ki wathi/ jin dar gi mii ’ba/ mo tani /e ki ṯor is pini jin dara /e ki mii ’ba/ e wathi/ mo. 
\q1  
\v 26 Dhali gom uni kun dhelelkin mo tani /e ki ṯor is pini jin dhelelkina /e e uni mo, 
\q1 dhali ki uni kun wanycarkina ii ki wanyjar mo tani /e ki ṯor is pini e uni ki c̱a’ckon mo. 
\q1  
\v 27 Haali/ /e ’cuḵki ’kwani kun dhu is ki gwa’d mo, 
\q1 hili uni kun dhu ’bam buni ki ca ki e ma waḵ mo tani /e mini thul uni ka ’cesh mo be. 
\q1  
\v 28 Nye, /e ḵanyki moŋkush ma lambam pem mo. 
\q1 Tap̱a Arumgimis pem a’di ’twaḵki mondhurumi’d pem ki moŋkush mo. 
\q1  
\v 29 Nye, ki /e mo tani aha/ misha sirica risa thuruḵ ma mee ki sho’k mo 
\q1 dhali ka Arumgimis pem mo tani aha/ mina mish nyalla/ ap̱o/ ’kup̱a gaŋgara/ mo. 
\b  
\q1  
\v 30 Arumgimis yansan mo tani bway piti ’boro’d ki ’bor gana/ mo. 
\q1 Dhali gwo jin ona Tap̱a is mo tani a’di nyo/ki gwoŋ gana/ mo. 
\q1 A’di ta’da goŋgoro/ goma ris uni gwansan kun bu’thki mo jin huru jwa e a’di mo be. 
\q1  
\v 31 Haali/ aja a’di ta’da Arumgimis mo? hili a’di jin ta Tap̱a mo. 
\q1 Dhali aja a’di ita wosh? isi ciki/ Arumgimis bana mo. 
\q1  
\v 32 Arumgimis jin deḵki aha/ ki mom’bi’th is mo, 
\q1 dhali kar bway pem ki ’dantar mo. 
\q1  
\v 33 A’di ki kar sho’k pem mmowa e ki sho’k ma buyymo mo, 
\q1 dhali a’di ki kar aha/ ki kar ’pempaŋ gana/ mo e mo jin turatur mo. 
\q1  
\v 34 A’di ṯorki me’d pem gwo mo gom mo ma mee mo, 
\q1 wakan ka bim pem mini mish gwana’da bwa me’da koroḵ mo. 
\q1  
\v 35 /E c̱iki aha/ agoŋgoro/ gi bway mowoṯẖ pini mo, 
\q1 dhali ki me’da bim poros pini mo tani /e thip̱ki aha/ mo, 
\q1 dhali ki mowoṯẖ pini mo tani a’di ki kar aha/ mmocaaca mo. 
\q1  
\v 36 /E ki c̱i aha/ mo jin waŋgala/ waŋgal gom ŋaṯgin pem kun dhuka/ e bwaŋ’kwariny pem mo, 
\q1 dhali sho’k pem diki yeres mo. 
\b  
\q1  
\v 37 Aha/ urkina ris uni kun ta ’kup̱ gi aha/ isho’k mo, dhali bu’th uni mo 
\q1 dhali aha/ dinaki doḵ ka nyaŋ’ko’d mo ntagi uni kup̱kunu mo be. 
\q1  
\v 38 Aha/ p̱uṯulkina uni i e mo, wakan ki uni molki cu mis mo. 
\q1 Uni ṯa’kkin e bwaŋ’kwariny sho’k pem mo. 
\q1  
\v 39 Haali/ /e deḵki aha/ ki mom’bith mo gom mo ma mee mo. 
\q1 /E ki dhu uni kun tiḵki aha/ e mo mmocic̱ ki jorom mo ibwaŋ’kwariny aha/ mo. 
\q1  
\v 40 /E ki dhu aris unim pem kun ta ’kup̱ ki aha/ mmoṯu’k aha/ ’ko’d buni i is mo 
\q1 dhali uni gwansan kun shi/ki aha/ i e mo tani aha/ ’ce’dkina uni sho’k mo be. 
\q1  
\v 41 Uni cuukin gom mowoṯẖ mo hili jaŋ kamu/ p̱iyi’d mmota uni is ki me’d mo. 
\q1 Uni cuukin ’twa/ e Tap̱a mo tani hili a’di diki thoḵ uni gwo mo be. 
\q1  
\v 42 Aha/ dorkina uni mmota agarisa/ ibwambori ’tham mo. 
\q1 Aha/ ṯa’kkina uni ka pije/ me’da je e bway tur kun iinu mo. 
\b  
\q1  
\v 43 /E ’cuḵki aha/ mo ’peni mo jin bira ’kwani abir mo, 
\q1 /E ki kar aha/ mmota a’kaŋ’kup̱ ki kal gi ’kwaniny’cesh mo. 
\q1 Ki ’kwani kun dika/ ki mish mo tani uni miiki aha/ to mo. 
\q1  
\v 44 Haali/ me’d jin ciḵkina uni gwo gom aha/ mo tani uni haki aha/ gwo e mo. 
\q1 ’Kwani kun wal ’twan tiya mo tani uni p̱u’dkin mo mmopar ki jiŋ ’kup̱a’dup̱un ’kup̱ ki aha/ mo. 
\q1  
\v 45 ’Kwani kun wal ’twan tiya mo tani uni thiskin ma du e mo, 
\q1 dhali p̱u’du/ mo mmodee kagahara ’peni mo ma cur buni mo. 
\b  
\q1  
\v 46 Tap̱a di ki e mo dhali mom’bor mii midi di gom wosh pem mo, 
\q1 dhali mo/eḵ midi di goma Arumgimis pem jin ta bway mowoṯẖ pem mo. 
\q1  
\v 47 Arumgimis jin c̱iki aha/ mori’c mo 
\q1 dhali aris ’kwani mmo’dap̱ ’twa/a ’cesh i bwaŋ’kwariny sho’k pem mo. 
\q1  
\v 48 A’di jin ’cuḵki aha/ mo ’pena ris ’kup̱ pem mo, 
\q1 nye, /e karki aha/ ki ca mo mmoboloc̱a ris uni kun ta ’kup̱ ki aha/ e mo, 
\q1 dhali /e ’cuḵki aha/ mo ’peni ’kwani kun bujurkina bujur mo. 
\q1  
\v 49 Haali/ gom mii yan kan mo tani aha/ mina c̱i /e montaḵ gi gwo maŋ mo, ayy Tap̱a ibwaman kal gi ’kwaniny’cesh mo, 
\q1 dhali yuḵ gway mmomaŋ gway pini mo be. 
\q1  
\v 50 Adhan mo jin p̱inu mii e mo tani a’di c̱ikina a’di goma maliḵ piti mo, 
\q1 dhali a’di ki ṯor mo jin ṯelu mo/en piti sho’k mo ki a’dim piti jin ’koshkina a’di ki monyca mo, 
\q1 eya Dawuu’d mo dhali e emen piti ki sule/ sule/ mo. 
\c 19  
\s1 Eya manyuḵ gway mo. Gway ma Dawuu’d. 
\q1  
\v 1 Aris momis uni ṯorki monyca ma Arumgimis mo, dhala balany bahki miin tom piti ki me’d mo. 
\q1  
\v 2 Ka yempa/ ka yempa/ mo a’di ki gac̱ gwonṯor piti mo, 
\q1 dhali mon’thiny ka yempa/ mon’thiny mo tani a’di ki ṯor monyiṯẖ piti mo, 
\q1  
\v 3 Mowal ’twa/ p̱iyi’d mo walla gwo p̱iyin mo, 
\q1 dhali ’twam buni si’da/ ’konuki ciḵ mo tani 
\q1  
\v 4 hili ’twam buni a’di yaki’d ka pije/ e mony’ceshi ’baar mo, 
\q1 dhali gwom buni a’di yaki’d ki ’pemen gi mony’ceshi ’baar mo. 
\q1 E uni mo a’di ki kar gu’ba’ku/ goma tente/ mmodi mo, 
\q1  
\v 5 a’di jin sulki’d ka pije/ me’d wathinyaŋa’b jin dhalki gu’b jin isha a’di ’pen mo 
\q1 dhali wa e ki wathi/ jin ’bitha’bi’th jin guski’d mmo’baar bway piti ki moŋ’kuny bwa mo. 
\q1  
\v 6 Mosul piti a’di ’peni ’pemen ma ris momis mo, 
\q1 dhali mo ma kul is piti a’di taki’d gi ’pemen e uni mo, 
\q1 dhali toŋ kamu/ yisa di’da jin mishu bag mo ’peni mo ma wur wur piti mo. 
\q1  
\v 7 Gwoŋḵan jin c̱inu gi Tap̱a mo tani a’di ’boro’d ki isi ’bor gana/ mo, 
\q1 a’di jin warki’da ḵashira/ is mo, 
\q1 dhali gwonyc̱i gi Tap̱a a’di doshki’d mo, 
\q1 mmodhu uni gun ’ka’da mii ’ba/ ki moyuḵ mo, 
\q1  
\v 8 gwoŋḵan gi ’twa/ gi Tap̱a mo tani uni yisa shiyina, 
\q1 hili uni ’kunykina du mo be. 
\q1 Dhali gwoŋḵan gi Tap̱a jin ’kwarkunu mo tani a’di dheleladhelel mo, 
\q1 a’di jin kushki e gi ’kwani mo. 
\q1  
\v 9 Moŋḵo/ jin ḵogu Tap̱a mo tani uni dheleladhelel mo, 
\q1 kun minu ’dim ’kup̱ ki sule/ sule/ ya ye ’ba/ mo. 
\q1 Dhali gwoŋḵan gi Tap̱a kun onu mo tani uni ta uniŋ gana/ mo 
\q1 dhali tana ḵar/e mmonṯal ’de/ mo be. 
\q1  
\v 10 Kun minu o bwa ki nyanye/ mmobol ’dolkon gana/ e mo 
\q1 isi kan si’dayi me’d ’dolkon gana/ jin tashkunu e ki o’d mo, 
\q1 dhali a’di jin c̱a’bki dhel dhel si’da/ mmobola dham e mo 
\q1 dhali jin yuki’d ki haw haw me’d mamana dham mo. 
\b  
\q1  
\v 11 Bahili ki uni mo tani c̱iŋkinam pini a’di rumkunu mo 
\q1 dhali mmodhu uni mo tani adhan to jin ish ḵumma/ jin caaca mo tani a’di c̱ikunu mo. 
\q1  
\v 12 Hili aja a’di imidi theke’th tom piti kun thama a’di mii mo? 
\q1 Dheleli /e aha/ ’peni mombag gi mii kun thamka/ mii mo. 
\q1  
\v 13 ’Tashi c̱iŋkinam pini ’twa/ mo ’peni miinthus kun miina a’di ka daran du mo. 
\q1 Dhali dhalku/ ki dhal uni bway mo mmota tap̱a ap̱o/ aha/ mo. 
\q1 Dhali yan’ko’d aha/ mina di ki dar gi mii ’ba/ mo 
\q1 dhali di ka p̱o/ ’pena dhan gwon dhaŋ mo. 
\q1  
\v 14 Dhalki gwo gi ’twam pem 
\q1 dhali gwo kun kulum aha/ eya du mo 
\q1 mishu bu’th mo e jis/em pini mo, 
\q1 ayy Tap̱a jin ta wosh pem mo dhali amanwan aha/ ’ba/ mo. 
\c 20  
\s1 Eya manyuḵ gway mo. Gway ma Dawuu’d. 
\q1  
\v 1 Tap̱a midi thoḵ /e ’twa/ mo ka tee jin ṯoju /e bwa mo. 
\q1 Dhali gway ma Arumgimis ma Yakuub mo tani a’di midi cesh /e ka p̱o/ mo. 
\q1  
\v 2 Dhalki a’di hashki /e mowoṯẖ ’peni mo jin ḵogu mo 
\q1 dhali c̱i /e mo ma thip̱ ’pena Sihyuun mo. 
\q1  
\v 3 Dhalki a’di ka’da ris tom pini kun c̱ina /e ki me’d e mo mmo’ciṯẖ ’kus mo, 
\q1 dhali kar /e ki mo ma ’the mo gom to kun ’ciṯẖkina /e ’kus mo mmomiiya bas mo. \qs Doshi ma dhali ’cunycuri yan mo.\qs* 
\b  
\q1  
\v 4 Dhalki a’di c̱i /e a’di jin gwon ma dum pini mo 
\q1 dhali thima ris tom pini kun thosonkina /e is mo. 
\q1  
\v 5 Dhalki aman wola cuuwa/ mo gom bwaŋ ’kunyka/ ap̱o/ mom pini jin p̱ina /e mii e mo 
\q1 dhali ki gway ma Arumgimis bana mo tani dhalki ana thuma bereḵ bana mo. 
\q1 Dhalki Tap̱a a’di thimi’da ris mo ma ’thom pini mo. 
\q1  
\v 6 Dhali aha/ misha ki Tap̱a a’di midi woṯẖ jim piti jin ’koshkunu ki monyca mo. 
\q1 A’di midi thoḵ a’di ’twa/ mo ’peni momis piti jin ḵogu mo 
\q1 ki dhan mo ma dem dem jin p̱inu mii e mo ki me’da bim poros piti mo be. 
\q1  
\v 7 Kun tiya dhu ’ba/ ki ca mo goma risa arabiyya kun dira shumarum mo, dhali goma ris shumarum mo. 
\q1 Hili ana dhuna ’ba/ ki ca gom gway gi Tap̱a Arumgimis bana mo. 
\q1  
\v 8 Uni mini ’tuḵ mo dhali ṯa’k mo 
\q1 hili ana mina cu mis mo dhali dosh ki bimbir mo. 
\q1  
\v 9 C̱iyi mo jin p̱inu mii e ka maliḵ mo, ayy Tap̱a, 
\q1 thoḵi aman ’twa/ mo ma ki aman yuḵkina yuḵ mo. 
\c 21  
\s1 Eya manyuḵ gway mo. Gway ma Dawuu’d. 
\q1  
\v 1 E mom’bi’th is pini mo tani amaliḵ a’di ’kunykina bwa mo, ayy Tap̱a, 
\q1 dhali e mowoṯẖ pini mo tani adhan momaŋ mmoyuḵ gway wa’d e a’diya! 
\q1  
\v 2 /E c̱iki a’di to jin gwon ma dum piti mo, 
\q1 dhali /e diki non to jin ’theḵa a’di gwo ki ’twam piti mo. \qs Doshi ma dhali ’cunycuri yan mo.\qs* 
\b  
\q1  
\v 3 Haali/ /e gamki a’di ’kup̱ ki mom’bor miim ’borga/ mo, 
\q1 dhali /e ki kar a’di toŋ’kup̱ ki ’dolkon gana/ jin tashu e ki o’d i’kup̱i a’di mo. 
\q1  
\v 4 A’di doṯki mondiki/e ’peni /e mo tani dhali /e c̱iki a’di a’di mo, 
\q1 a’di jin ta’da luc̱ ma tee gom ki sule/ dhali ki sule/ mo. 
\q1  
\v 5 Monycam piti caaca gom mowoṯẖ pini mo, 
\q1 dhali mo ma ra/ ra/ mo dhali mo/eḵ mo tani karkina /e ap̱o/ a’di mo be. 
\q1  
\v 6 Nye, /e karki a’di mmota a’di jin midi ’bora ’bor mii ki sule/ mo 
\q1 dhali /e ki kar a’di mmota aman’bor bwa mo ki moŋ’kuny bwa gi buŋ’kus pini mo. 
\q1  
\v 7 Haala maliḵ gamki gwo is e Tap̱a mo 
\q1 dhali e monṯel sho’k gi mo/en gi a’di jin Caa e ki Ca mo tani a’di midi diki joc̱ sho’k mo. 
\b  
\q1  
\v 8 Me’d pini a’di midi gama ris unim pini ’baar kun ta ’kup̱ ki /e mo. 
\q1 Me’da bim poros pini midi gam uni gwansan gun shi/ki /e i e mo. 
\q1  
\v 9 /E mini dhu uni mmota ’cepesa ’cepes me’d to kun cesuwa gwaṯa/ mo 
\q1 ki /e mini pi is ka pije/ mo. 
\q1 Tap̱a a’di midi los uni ki ’kolo’c ka nyor piti mo, 
\q1 dhali o’d midi shwa uni ki ’ci’d’da/ mo. 
\q1  
\v 10 /E mini ’ce’da ’pereny buni sho’k ’peni mony’cesh mo 
\q1 dhali uc̱im buni ’peni bwaman iya/ gi ’kwani mo. 
\q1  
\v 11 Waḵki/ uni thoson tonthus ap̱o/ /e mo, 
\q1 dhali waḵki/ uni mini mum tonthus mmota pibi icine/ mo tani uni mini mol a’di pi ’ba/ ka pije/ mo. 
\q1  
\v 12 Haali/ /e mini dhu uni mmoso mo. 
\q1 Haali/ /e mini ṯur uni jis/em buni ka bwam pini mo. 
\q1  
\v 13 Dhalki /e karu ki ca mo, ayy Tap̱a, e mom’bi’th is pini mo. 
\q1 Aman mina yuḵ gway mo dhali maŋ mom’bi’th pini mo be. 
\c 22  
\s1 Eya manyuḵ gway mo, isi ki mii ma buyymo mo jin ḵala e kush mo. Gway ma Dawuu’d. 
\q1  
\v 1 Arumgimis pem, Arumgimis pem, atinta idhalkina /e aha/ ’pen kan mo? 
\q1 Dhali ki ton ta’da ta isi’da/ /e ki si’d ’peni mowoṯẖ aha/ kan mo? ’peni gwo gi kom pem jin ohonkika/ mo? 
\q1  
\v 2 Ayy Arumgimis pem aha/ gwokina montee ka yempa/ mo, dhali hili /e diki thoḵ aha/ ’twa/ mo. 
\q1 Dhali mon’thiny si’da/ aha/ gwokina mo, dhali hili mosi/isa kamu/ gamkaa/? 
\q1  
\v 3 Naskin mo tani /e dheleladhelel mo, 
\q1 /e karuwa ḵursin tap̱a jin ta momaŋ gi ’Kwani ma Israyiil mo. 
\q1  
\v 4 E /e mo tani ibaba gamki gwo is mo. 
\q1 Uni gamki gwo is mo, dhali /e ’cuḵki uni mo. 
\q1  
\v 5 E /e mo tani uni gwokin mo dhali ’kokunu mo mmota is ki me’d mo. 
\q1 E /e mo tani uni gamki gwo is mo, dhali uni ’konuki this dhu mo. 
\b  
\q1  
\v 6 Hili aha/ tana yiish mo, dhali aha/ tana wathi/ yisa, 
\q1 haali/ aha/ c̱inu gurra/ ki ’kwani mo, dhali jin waḵkunu ki ’kwani mo. 
\q1  
\v 7 Aris uni gwansan gun p̱arki aha/ e mo tani uni miiki aha/ ka maḵ mo, 
\q1 uni ṯẖuny aha/ ’twa/ i is mo, dhali uni pirki ’kup̱ buni mo be. 
\q1  
\v 8 A’di c̱iki miim piti jin raḵa’d e Tap̱a mo. Dhalki a’di ’cuḵ a’di mo. 
\q1 Dhalki a’di ’cwam a’di mo, haali/ a’di ’kunya bwa e a’di mo. 
\b  
\q1  
\v 9 Hili /e ta a’di jin bu’thki aha/ ’peni bwa ma dho’th ma ta’da mo. 
\q1 Dhali /e karki aha/ ki ’dantar mo abora ko ma ta’dam pem mo. 
\q1  
\v 10 Apo/ /e mo tani aha/ biṯkunu ’peni mondho’th pem mo, 
\q1 dhali me’d jin ḵal ma ta’dam pem aha/ e bwa mo tani /e tana Arumgimis pem mo be. 
\q1  
\v 11 Dhalku/ ki si’d ’peni aha/ kan mo ma, 
\q1 haali/ monṯo’c bwa uni ’disha’dish mo 
\q1 dhali wathiŋ kamu/ p̱iyi’d mmowoṯẖa woṯẖ mo be. 
\q1  
\v 12 Aris gwaṯẖim bip̱ uni ’kamki aha/ mo, 
\q1 gwaṯẖim bip̱ gun ’bitha’bi’th ’peni Pam Bashan mo tani uni ’kamki aha/ mo. 
\q1  
\v 13 Uni c̱eeki aha/ ’twam buni i is mo 
\q1 mmowa e ka dhop̱ kun pithilki to ki she/ mo dhali ko mo. 
\b  
\q1  
\v 14 Aha/ wana ’baar mo me’d yi’de/, 
\q1 dhala risa simam pemi ’baar raḵkin mo ’peni gwocor mo. 
\q1 Adum pem ta walmish ki walmish mo, 
\q1 a’di ṯo’do’d mo eya bor pem mo. 
\q1  
\v 15 Mom’bi’th pem a’di ḵu’thki’d me’da ’pish mo, 
\q1 dhala le’d pem a’di ’dap̱ki’d e bwaŋ ḵa’dkim pem mo. 
\q1 /E ’thiki aha/ ’ko’d e bu’da ’cesh ki mowu mo. 
\q1  
\v 16 Nye, arisa ’ka uni ’kamki aha/ mo. 
\q1 Imanŋali ’pen kun mii tonthus mo tani uni hamki aha/ mo. 
\q1 Uni su’kki me’d pem dhali sho’k pem mo. 
\q1  
\v 17 Aha/ misha deŋa risa simam pem e mo – 
\q1 Uni hilki aha/ ka ’thime/ mmoḵo’c e i is mo dhali p̱e’th ki ḵuss ḵuss ap̱o/ aha/ mo. 
\q1  
\v 18 Uni pwaḵki burrinyem pem bwa mo e bwaman is buni mo, 
\q1 dhali gom burrinyem bwaman pem mo tani uni biṯki to gom aha/ mo. 
\q1  
\v 19 Hili /e, ayy Tap̱a, dhalku/ ki si’d mo ma. 
\q1 Ayy /e jin ta mowoṯẖ pem mo, huru/ ki jahanne/ gom mowoṯẖ pem mo. 
\q1  
\v 20 ’Cuḵa ḵashiram pem ’pena ris gandal gun kaaka mo ma, 
\q1 dhali mondiki/em pem ’peni mom’bi’th ma ’ka mo. 
\q1  
\v 21 Tayi aha/ is ki me’d ’peni ’twa/ ma dhop̱ mo ma, 
\q1 aḵashiram pem wa’thkunu i e ki ce ma morbip̱ gun shwana nyor ka nyor mo. 
\b  
\q1  
\v 22 Aha/ mina ṯor gway pini e iwaḵ pem mo. 
\q1 E bwaman ma dhana tul ’kup̱ ’kwani mo tani aha/ mina maŋ /e mo be. 
\q1  
\v 23 Um gun ḵo/ki Tap̱a mo tani maŋi a’di mo ma, 
\q1 aris um gun ta iya/ ma Yakuub mo tani kari a’di ki ca mo ma, 
\q1 dhali doshi ki moŋḵo/ is gom a’di mo, aris um gun ta iya/ ma Israyiil mo. 
\q1  
\v 24 Haali/ a’di diki waḵa waḵ mo dhali shi/a shi/ i e mo 
\q1 gom monṯo’c bwa jin ṯoci wathi/ bwa mo. 
\q1 Dhali a’di diki bag jis/em piti ’peni wathi/ mo, 
\q1 hili a’di ciḵki ko mo me’d jin gwokina wathi/ ’twa/ i a’di mo. 
\q1  
\v 25 ’Peni /e mo tani a’di p̱u’dkina mom pem jin maŋka/ /e eya dhana tul ’kup̱ ki ’kwani mo, 
\q1 aris gwom pem kun oka/ is mo tani aha/ mina c̱i uni ibwambori uni gwansan kun ḵo/ki a’di mo. 
\q1  
\v 26 Wathi/ jin ṯo’ckunu bwa mo tani a’di midi shwa tonṯe/ mo tani dhali minu kap̱ mo, 
\q1 Dhali uni gwansan kun simmki a’di e mo tani uni mini maŋ Tap̱a mo. 
\q1 Dhalka dum bum ’kon ki sule/ sule/ ya ye ’ba/ mo. 
\q1  
\v 27 Aris uni kun ’kokin isi ’pemen gi mony’ceshi ’baar mo tani uni a’di imini ka a’di e mo 
\q1 dhali ṯu’k e Tap̱a mo, 
\q1 dhala risa waḵ gi kal gi ’kwaniny’cesh mini luŋ ibwambori a’di mo. 
\q1  
\v 28 Haali/ mo jin tanu tap̱a a’di cila Tap̱a mo, 
\q1 dhali a’di ki jiya ris kal gi ’kwaniny’cesh mo. 
\q1  
\v 29 Nye, e a’di aris ’kwani kun dhu ’ba/ ki ca e mony’cesh mo tani mini dhu shush ka luŋgu’b mo. 
\q1 Ibwambori a’di mo tani uni mini luŋ mo, uni gun mini ii ka ’cesh mmowa e ki bu’da ’cesh mo, 
\q1 dhali a’di jin mol is piti kar ki e mo. 
\q1  
\v 30 Aris uni gun mini iiyu/ i’ko’d mo tani uni a’di imini mii a’di to mo. 
\q1 Dhali ’kwani mini ṯor gwo gom Tap̱a goma nyaḵum yil gi uc̱i gun mini p̱u’du/ i’ko’d mo. 
\q1  
\v 31 dhali bah gwo gom mony’cuḵ piti mo gom uni gun ’konuki dho’th naskina/ mo, 
\q1 ki a’di a’di iwagaski a’di mo. 
\c 23  
\s1 Gway ma Dawuu’d. 
\q1  
\v 1 Tap̱a a’di ta’da Manhil aha/ mo. 
\q1 Aha/ mina diki har to mo. 
\q1  
\v 2 A’di karki aha/ mmo/ish ’ko’da shon dhii/i’d mo. 
\q1 A’di suski aha/ e shemen yi’de/ jin doshki’d mo. 
\q1  
\v 3 A’di warki aha/ aḵashiram pem is mo. 
\q1 A’di suski aha/ e bway mii ma ḵar/e mo 
\q1 gom gway gi gway piti mo. 
\q1  
\v 4 Ba isi waḵki/ aha/ mina ya e embul wosh ma la gi mowu mo tani 
\q1 aha/ yisa mina ḵo/ tonthus yisa, 
\q1 haali/ /e nyaḵki di ki aha/ mo. 
\q1 Ajap̱p̱am pini dhali cwam pini uni malaski aha/ mo be. 
\q1  
\v 5 /E thosonki tonṯe/ ibwambori aha/ mo 
\q1 e buŋ’kus ma ris uni gun ta ’kup̱ ki aha/ mo. 
\q1 /E ’koshki aha/ ’kup̱ pem ka yin mo. 
\q1 Aḵubbaayam pem a’di ’tu’dki’d iwol ’kup̱a sho mo. 
\q1  
\v 6 Ka jiŋ gana/ miim ’boron dhali momiimii mo tani uni mini baṯẖ aha/ nsho’k mo 
\q1 ka teem pemi ’baar mo jin dika/ ki e mo, 
\q1 dhali aha/ mina c̱a’b e gu’b gi Tap̱a ki sule/ sule/ ya ye ’ba/ mo. 
\c 24  
\s1 Gway ma Dawuu’d. 
\q1  
\v 1 Mony’cesh a’di ta jin Tap̱a mo dhali mon’tu’d piti mo, 
\q1 mony’cesh dhali uni gwansan gun ’koni bwaman a’di mo. 
\q1  
\v 2 Haali/ a’di nyaŋki a’diya p̱owa ris ḵumma/ yi’de/ mo 
\q1 dhali ṯel a’di sho’k mo ap̱owa ris yi’de/ kun son mo. 
\b  
\q1  
\v 3 Kaja a’di imidi shin ’kuwosh gi Tap̱a mo? 
\q1 Dhali kaja a’di imidi doshi mom piti jin ḵogu mo? 
\q1  
\v 4 A’di ta a’di jin mina me’di dheleladhelel mo dhali adu jin dheleladhelel mo, 
\q1 a’di jin diki ’deka ḵashiram piti ’kup̱ ki gwo jin ’ce’du/ ’te/ ka ṯor mo 
\q1 dhali jin diki thul gwo me’da p̱o/ ka he’k e mo. 
\q1  
\v 5 A’di midi bu’th mom’bor mii ’peni Tap̱a mo, 
\q1 dhali mo gi yeyunum piti ’peni Arumgimis gi bway gi mowoṯẖ piti mo. 
\q1  
\v 6 Me’d uni ma nyaḵum yil gwansan kun simmki a’di e mo, 
\q1 uni gun simmki jis/e ma Arumgimis ma Yakuub e mo. \qs Doshi ma dhali ’cunycuri yan mo.\qs* 
\b  
\q1  
\v 7 ’Deki ’kup̱ bum ki mis mo ma, ayy aris ’twaŋkala goŋ mo, 
\q1 dhali um minu ’de’k mo, ayy arisa campur kun tana dhamo/ mo, 
\q1 jin min ma Maliḵ gi monyca yayu/ bway bwaman mo. 
\q1  
\v 8 Kaja a’di ita’da Maliḵ gi monyca mo? 
\q1 Tap̱a a’di jin ta gi mom’bi’th mo dhali mo ma dem dem mo. 
\q1 Tap̱a a’di jin ta gi mo ma dem dem e mo ma mee mo. 
\q1  
\v 9 ’Deki ’kup̱ bum ki mis mo ma, ayy aris ’twaŋkala goŋ mo 
\q1 dhali um minu ’de’k mo, ayy arisa campur kun tana dhamo/ mo, 
\q1 jin min ma Maliḵ gi monyca yayu/ bway bwaman mo. 
\q1  
\v 10 Kaja a’di yansan ita’da Maliḵ gi monyca mo? 
\q1 Tap̱a gi momis mo, 
\q1 a’di ita’da Maliḵ gi monyca mo be. \qs Doshi ma dhali ’cunycuri yan mo.\qs* 
\c 25  
\s1 Gway ma Dawuu’d. 
\q1  
\v 1 E /e mo tani ayy Tap̱a, aha/ ’de’kkina ḵashiram pem mo. 
\q1  
\v 2 Ayy Arumgimis pem e /e mo tani aha/ gamkina gwo is mo. 
\q1 Dhalku/ ki dhal aha/ ki aha/ minu kar ki mo ma ’the is mo. 
\q1 Dhalku/ ki dhal ris uni kun ta ’kup̱ ki aha/ mmoyuḵ gway ki moŋ’kuny bwa ap̱o/ aha/ mo. 
\q1  
\v 3 Nye, dhalki jan ṯal ’de/ jin c̱or /e ki kar ki mo ma ’the is mo ma. 
\q1 Dhalki uni dhunu ki mo ma ’the is mo, uni gwansan gun ’dap̱a e ki mii ma ’bar ’bar mo. 
\q1  
\v 4 Kari aha/ mmomish bway pini mo ma, ayy Tap̱a. 
\q1 Ṯori /e aha/ bway tur pini mo. 
\q1  
\v 5 Shuyi aha/ bway e gwoŋ ganam pini mo, dhali ṯori aha/ gwo mo, 
\q1 haali/ /e tana Arumgimis gi bway gi mowoṯẖ pem mo, 
\q1 haali/ aha/ c̱orkina /e ka tee ’baar mo isa yempa/ mo. 
\q1  
\v 6 Kayi momiimiim pini e mo, ayy Tap̱a, dhali mo/en pini jin ṯelu sho’k mo, 
\q1 haali/ uni ’kokin ’peni kadhamo/ mo. 
\q1  
\v 7 Dhalku/ ki ka miinthus pem e kun miiga/ ki aha/ tana dhuru’c mo, walla ris gwon dhaŋ pem mo, 
\q1 isi ki gwo ki mo/en pini jin ṯelu sho’k mo tani kayi aha/ e mo, 
\q1 gom gway gi miim ’borgam pini mo, ayy Tap̱a. 
\b  
\q1  
\v 8 Tap̱a a’di ’boro’d dhali ta jaŋ ḵar/e mo. 
\q1 Dhali gom gwo gi wakan mo tani a’di ki ye’th imanmii miinthus sho’k e bway ’boro’d mo. 
\q1  
\v 9 A’di ki shuwa shu/um bway gom uni gun dhu is ki gwa’d e a’di jin ’boro’d mo, 
\q1 dhali ṯor imandhu is ki gwa’d bway piti mo. 
\q1  
\v 10 Aris bway tur gi Tap̱a mo tani uni ṯelu sho’k e mo/en mo dhala ris mii ma isiŋ gana/ mo, 
\q1 gom uni gwansan gun dhu gwom piti kun gamu me’d mo dhali gwonyc̱im piti gun c̱ina a’di mo. 
\q1  
\v 11 Gom gway gi gway pini mo tani ayy Tap̱a, 
\q1 dhalki miim pem jin dika/ i’ba/ ’pen mo ma, haali/ a’di caaca mo. 
\q1  
\v 12 Ki wathi/ ja iḵo/ki Tap̱a mo? 
\q1 A’di imina a’di ye’th sho’k mo i bway jin mina a’di ikwany mo. 
\q1  
\v 13 A’di ki is piti midi c̱a’b e mo jin isha to ka enthus mo, 
\q1 dhali uc̱im piti mini gam mal gi mony’cesh mo be. 
\q1  
\v 14 Mo jin nyaḵu to mii ki Tap̱a mo tani a’di gom uni gwansan gun ḵo/ki a’di mo, 
\q1 dhali a’di ṯorki’d eya tente/ e uni gwom piti jin gamu me’d mo. 
\q1  
\v 15 Em pem isa yempa/ c̱u’thki ’kup̱ki Tap̱a mo, 
\q1 haali/ a’di midi buḵ sho’k pem ’pena gume/ mo. 
\b  
\q1  
\v 16 Ṯuki /e e aha/ mo dhali miiyi mii ma ’the e aha/ mo, 
\q1 haali/ aha/ dina aha/ ’de/ dhali ṯocu bwa mo. 
\q1  
\v 17 ’Cuḵi aha/ ’peni mo ma ṯo’c bwa ma dum pem mo ma, 
\q1 dhali susi aha/ ka pije/ ’peni mo ma c̱is pem mo. 
\q1  
\v 18 Hili isi gwo e gom monṯo’c bwam pem mo dhali gom mo ma du mur pem mo, 
\q1 dhali gwami aha/ ’pena ris miinthus pemi ’baar mo. 
\q1  
\v 19 Hili isi gwo e ma haali/ ’kup̱ pem ŋala/ wana risa! 
\q1 Dhali ki mombujur jin shinuwa shi/i e mo tani uni shi/ki aha/ i e mo be. 
\q1  
\v 20 Ayy jiyi mondiki/em pem mo dhali ’cuḵi aha/ mo. 
\q1 Dhalku/ ki dhal aha/ bway ki aha/ minu kar ki mo ma ’the is mo, haali/ aha/ budha mo jin hurga/ jwa e /e mo. 
\q1  
\v 21 Dhalki mii jin miinu ki dar gi ŋadhum dhali miiŋḵar/e uni ’tash aha/ ’twa/ mo, 
\q1 haali/ aha/ c̱orkina c̱or gom /e mo. 
\q1  
\v 22 Wani ’Kwani ma Israyiil ’ba/ mo ma, ayy Arumgimis, 
\q1 ’pena ris monṯo’c bwam buni mo. 
\c 26  
\s1 Gway ma Dawuu’d. 
\q1  
\v 1 Yeyi aha/ mo ma, ayy Tap̱a, 
\q1 haali/ aha/ yana e yam pem ki ya jin dar gi ŋadhum mo, 
\q1 dhali aha/ gamkina gwo is e Tap̱a ki dar gi bwa jin shinu ’kup̱ mo. 
\q1  
\v 2 Nyo/i aha/ mo ma, ayy Tap̱a dhali pali aha/ mo. 
\q1 ’Cunycuri adum pem mo dhali bwam pem mo. 
\q1  
\v 3 Haali/ mo/en pini iṯeli sho’k ibwambori em pem mo. 
\q1 Dhali aha/ yana e ya ma isiŋ gana/ e /e mo. 
\q1  
\v 4 Aha/ dinaki nyaḵ c̱a’b ki ’kwani kun ta imanṯor gwonthus mo, 
\q1 walla aha/ dinaki ce e ki ’kwani kun ḵal mii ka bor mo. 
\q1  
\v 5 Aha/ shi/a mo jin cenu e ki imanmii tonthusi e mo, 
\q1 dhali aha/ mina diki nyaḵ c̱a’b ki a’di jin ta thus ki thus mo. 
\q1  
\v 6 Aha/ mina ’thur me’d pem mo gom aha/ dina ka p̱o/ mo, 
\q1 dhali ya mo e mo ma gwaṯam pini jin ’ciṯẖu/ to ’kus mo, ayy Tap̱a, 
\q1  
\v 7 mmoyuḵ gway ki ’kall ’kall mo, gway jin ’boruwa ’bor bwa i is mo, 
\q1 dhali mmoṯora ris miiny jarom pini kun miina /e mo. 
\q1  
\v 8 Ayy Tap̱a, aha/ ena mo kun ’konu e gu’b pini mo, 
\q1 dhali e mo jin dina monycam pini mo. 
\q1  
\v 9 Dhalku/ ki tor aha/ sho’k ka pupush nyaḵki imanmii miinthus mo, 
\q1 walla mondiki/em pem nyaḵki ’kwani kun ’kosha ṯe/ ma nyor mmowol ’kwani abasa ’cesh mo, 
\q1  
\v 10 ’kwani uni gun nyo/a me’d ki nyo/ gom tonthus kun p̱ishinkina uni ki mii mo 
\q1 dhali me’da bim poros buni uni ’tu’dkunu ki mowan ’kwani is mo. 
\q1  
\v 11 Hili gom aha/ mo tani aha/ yana ki yam pem ki ya jin dar ki ŋadhum mo. 
\q1 Wani aha/ ’ba/ mo dhali miiyi mii ma ’the e aha/ mo. 
\q1  
\v 12 Sho’k pem doshki’d e mo ma ’cesh jin ba’da/ ba’d mo. 
\q1 Eya dhana buhany ’kwani mo tani aha/ mina ’bor Tap̱a mii mo be. 
\c 27  
\s1 Gway ma Dawuu’d. 
\q1  
\v 1 Tap̱a a’di ta moŋkush pem mo dhali bway gi mowoṯẖ pem mo, 
\q1 kaja a’di imiga/ ḵo/ mo? 
\q1 Tap̱a a’di ta’da cur jin ṯelu gwo sho’k mo gom mondiki/em pem mo, 
\q1 dhali kaja a’di imiga/ ḵo/ is mo? 
\q1  
\v 2 Ki imanmii tonthus tiḵki aha/ e mo tani 
\q1 uni thu’thkina thu’th ’pen kagahara ap̱o/ aha/ mo, 
\q1 uni gun ta ’kup̱ ki aha/ mo dhali kun ’kwarkina ’kwar ka gwap̱i/ mo tani 
\q1 uni mini ḵal ’bar mo dhali ṯa’k mo be. 
\q1  
\v 3 Ba aris uni kun ’kamkina ’kam ap̱o/ aha/ mo tani 
\q1 adum pem yisa ḵo/ is yisa. 
\q1 Ba ki mo ma mee cuu’da p̱o/ aha/ mo tani 
\q1 hili aha/ mina wu is ka ’cesh mo. 
\b  
\q1  
\v 4 Ton ṯal ’de/ doṯkika/ ’peni Tap̱a mo, 
\q1 a’di jin miga/ simm e mo mmobaṯẖi ’ko’d mo, 
\q1 ki aha/ mina c̱a’b e gu’b gi Tap̱a mo 
\q1 ka risa cim pemi ’baar mo ki mondiki/em pem mo, 
\q1 mmohil monyjaro/ gi Tap̱a mo, 
\q1 dhali mmohil isi gwo i e mo gom gu’b gi mondheleladhelel piti mo be. 
\q1  
\v 5 Haali/ a’di midi bag aha/ eya darha’dam piti mo 
\q1 ka tee jin ṯocu aha/ bwa mo. 
\q1 A’di midi bag aha/ e bwaŋ’kwariny gi gu’b burrinyem piti mo. 
\q1 Dhali a’di midi kar aha/ i’kuwosh jin turatur mo. 
\q1  
\v 6 Dhali shwane/ ’kup̱ pem minu ’de’k ki mis mo ap̱owa ris uni gun ta ’kup̱ ki aha/ mo kun ’kamki aha/ is mo be. 
\q1 Dhali aha/ mina c̱i to jin ’ciṯẖu/ ’kus mmomiiya bas e gu’b burrinyem piti mo ki cuuwa/ gi moŋ’kuny bwa mo. 
\q1 Dhali aha/ mina yuḵ gway mo dhali mii ko gom Tap̱a mo. 
\b  
\q1  
\v 7 Ciḵi ko mo ma, ayy Tap̱a, ki aha/ ’thera cuuwa/ kagahara mo. 
\q1 Miiyi mii ka ’the gom aha/ mo dhali thoḵi aha/ ’twa/ mo. 
\q1  
\v 8 /E oki gwo mo ki: Simmi um bwam/em pem e mo. 
\q1 Adum pem o gwo gom /e mo ki: 
\q1 Bwam/em pini Tap̱a, a’di isimmkika/ e mo be. 
\q1  
\v 9 Dhalku/ ki bag bwam/em pini ’peni aha/ mo. 
\q1 Dhalku/ ki ṯu’k c̱iŋkinam pini jin mii /e to ka nyor mo, 
\q1 /e jin tana manwoṯẖ pem ’thissa/ mo. 
\q1 Dhalku/ ki biṯ aha/ asho mo, dhali dhalku/ ki dhal aha/ ’pen mo, 
\q1 ayy Arumgimis gi mowoṯẖ pem mo. 
\q1  
\v 10 Haala babam pem dhali ata’dam pem uni dhalki aha/ ’pen mo, 
\q1 hili Tap̱a a’di imidi hil aha/ i e mo. 
\q1  
\v 11 Ṯori aha/ bway pini mo ma, ayy Tap̱a, 
\q1 dhali susi aha/ e bway tur jin ba’da/ ba’d mo 
\q1 haali/ goma ris uni kun ta ’kup̱ ki aha/ mo. 
\q1  
\v 12 Dhalku/ ki c̱i aha/ ki bwa gi uni kun ta ’kup̱ ki aha/ mo, 
\q1 goma ris iman/o gwonthus cukina p̱o/ aha/ mo 
\q1 dhali uni wukina shure/ gom mombujur mo. 
\q1  
\v 13 Aha/ gama gwo is ki aha/ mina p̱ar miim ’boro’d gi Tap̱a e mo 
\q1 e mo jin ’kona ’kwani ki e mo. 
\q1  
\v 14 C̱ori Tap̱a mo ma, 
\q1 dhali ’bithi is mo dhali dhalka dum pini bu’th mo jin roc̱u sho’k mo. 
\q1 Nye, c̱ori Tap̱a mo ma. 
\c 28  
\s1 Gway ma Dawuu’d. 
\q1  
\v 1 E /e mo tani, ayy Tap̱a, aha/ yuḵkina /e mo. 
\q1 /E jin ta wosh pem mo, dhalku/ ki ta a’diye/ gom aha/ mo, 
\q1 isi ciki/ waḵki/ /e mini ’taki c̱a’b ki shwamm gom aha/ mo tani 
\q1 aha/ mina e waki uni gwansan gun iin ka luŋgu’b e jisa ’kulga/ mo. 
\q1  
\v 2 Ciḵi ’twam pem jin oka/ gwo gom mo ma di’b is pem jin di’bka/ mo ma, 
\q1 me’d jin gwoka/ ’twa/ i /e gom mowoṯẖ mo, 
\q1 me’d jin ’de’kkika/ me’d pem ki mis mo 
\q1 ’kup̱ ki mom pini jin miinu to jin ḵogu mo jin bol tiya e mo. 
\q1  
\v 3 Dhalku/ ki nu’th aha/ ’ban nyaḵki imanmii tonthus mo, 
\q1 nyaḵki uni gwansan kun ta imanmii to kun ta thus ki thus mo, 
\q1 uni gun ṯorkina ṯor gom moŋḵu’th is nyaḵki imannyaḵ ’kom buni mo, 
\q1 ki mo ma pibi ’kokin eya dum buni mo. 
\q1  
\v 4 Raḵi uni to ibway isi ki tom buni kun miina uni mo, 
\q1 dhali isi ki tonthus buni kun miikina uni mo. 
\q1 Raḵi uni to ibway isi ki miin to kun miina uni ki me’d buni mo. 
\q1 Garki uni to ’kusi ’twa/ kun mina uni gam mo. 
\q1  
\v 5 Haali/ uni ’koki dhu miin to gi Tap̱a mo, 
\q1 walla miin to ki me’d piti mo. 
\q1 A’di midi ’ce’d uni ka ’cesh mo dhali midi diki nyaŋ uni ki mis doḵ/e mo. 
\q1  
\v 6 Mom’bor mii midi di gom Tap̱a mo! 
\q1 Haali/ a’di ciḵki ’twam pem goma di’b is jin di’bkika/ is mo. 
\q1  
\v 7 Tap̱a a’di ita mom’bi’th pem mo dhali agoŋgorom pem mo. 
\q1 E a’di mo tani adum pem gamki gwo is mo be. 
\q1 Wakan aha/ woṯẖkunu mo dhali adum pem midi ya i mis mo, 
\q1 dhali ki gway pem jin miga/ yuḵ mo tani aha/ mina c̱i a’di mo jin ’boruwa ’bor bwa i is mo. 
\q1  
\v 8 Tap̱a a’di ita mom’bi’th gom ’kwanim piti mo. 
\q1 A’di ta mo jin huru jwa jin tanu is ki me’d mo gom a’dim piti jin ’koshu ki monyca mo. 
\q1  
\v 9 Ayy tayi ’kwanim pini is ki me’d mo ma, dhali ’bori mal pini mii mo. 
\q1 Tayi /e Amanhil uni mo dhali ḵali uni ki sule/ sule/ mo. 
\c 29  
\s1 Gway ma Dawuu’d. 
\q1  
\v 1 C̱iyi Tap̱a monyca mo, ayy um gun ’koni momis mo, 
\q1 C̱iyi Tap̱a monyca mo dhali mom’bi’th mo. 
\q1  
\v 2 C̱iyi Tap̱a monyca ki gway piti mo 
\q1 dhali luŋi Tap̱a e monyjarom piti jin ḵogu mo. 
\b  
\q1  
\v 3 ’Twa/ gi Tap̱a a’di diki’da p̱owa ris yi’de/ mo. 
\q1 Dhali Arumgimis ki monyca a’di ta ’twan tor ma sho’k mo, 
\q1 Tap̱a jin di’da p̱owa ris yi’de/ ’baar mo. 
\q1  
\v 4 ’Twa/ gi Tap̱a a’di ta gi mom’bi’th caaca mo, 
\q1 dhali ’twa/ gi Tap̱a a’di ’tu’dkunu mo ki mo/eḵ mo. 
\q1  
\v 5 ’Twa/ gi Tap̱a a’di ’ce’dki cwa kun wana e ka bwanyayiis bwa mo, 
\q1 Tap̱a a’di ’ce’dki cwa kun wana e ka bwanyayiis bwa mo kun ta cwa gi Pan Lubnaan bwa mo. 
\q1  
\v 6 A’di ki kar cwa yan e Pan Lubnaan mmop̱eya ŋalbothoŋ mo me’d ari bip̱ mo, 
\q1 dhali ’Kuwosh Siryuun me’d dhuru’c ari morbip̱ mo jin shwa’da nyor ka nyor mo. 
\q1  
\v 7 ’Twa/ gi Tap̱a a’di dhi’thki mo ka le’dan o’d ki ’bala’c ’bala’c mo. 
\q1  
\v 8 ’Twa/ gi Tap̱a a’di yiḵinki mombwaasho is mo, 
\q1 Tap̱a a’di yiḵinki mombwaasho is ki Paŋ Kaadish mo. 
\q1  
\v 9 ’Twa/ gi Tap̱a a’di ki dhu abuyymo mmodho’th ushan mo 
\q1 dhali mmo’cwar ’cemen gi bwanycwa mo. 
\q1 Dhali e gu’b gi mondheleladhelel piti mo tani aris ’kwani ’baar mo cuun ki: Monyca mo. 
\b  
\q1  
\v 10 Tap̱a a’di c̱a’bki’da p̱owa ḵursi ap̱owa gannu/ yi’de/ mo, 
\q1 Tap̱a a’di c̱a’bki’da p̱owa ḵursi ma maliḵ ki sule/ sule/ mo. 
\q1  
\v 11 Dhalki Tap̱a c̱i mom’bi’th piti ki ’kwanim piti mo. 
\q1 Dhalki Tap̱a ’bor ’kwanim piti mii ki moŋḵu’th is mo. 
\c 30  
\s1 Gway ma Dawuu’d. Gway jin yuḵu mmoc̱i gu’b gi mondheleladhelel ka Arumgimis mo. 
\q1  
\v 1 Aha/ mina kar /e ki ca mo, ayy Tap̱a, haali/ /e ’de’kki aha/ ki mis mo, 
\q1 dhali /e diki dhal uni gwansan bway mo kun ta ’kup̱ ki aha/ mo mmo’kuny bwa ap̱o/ aha/ mo. 
\q1  
\v 2 Ayy Tap̱a Arumgimis pem, aha/ gwona ’twa/ e /e gom mowoṯẖ mo, 
\q1 dhali /e wac̱ki aha/ mo be. 
\q1  
\v 3 Ayy Tap̱a, /e ’cwamkina aḵashiram pem ’pena Haawiya mo, 
\q1 dhali war aha/ mondiki/em pem is mo ’peni bwaman uni gwansan kun iikin ka luŋgu’b e jisa ’kulga/ mo. 
\q1  
\v 4 Yuḵi gway mmomaŋ Tap̱a mo, ayy um piti kun dhunu ki she/ ki dhelel dhelel mo, 
\q1 dhali c̱iyi a’borim bwa i is gom gway piti jin ḵogu mo, 
\q1  
\v 5 Haali/ anyor piti di’d mo hili jasi gom ari mo mo, 
\q1 dhali mii ma ’them piti a’di di’d ki sule/ sule/ mo. 
\q1 Ko jin gwonu a’di midi di gom mon’thiny mo tani 
\q1 hili moŋ’kuny bwa a’di p̱u’dki’d mon’thamo/ mo be. 
\b  
\q1  
\v 6 Haali/ me’d aha/ mo tani aha/ ona gwo e mom pem jin isha to ka enthus mo ki: 
\q1 Aha/ minu ’koki joc̱ ki sule/ mo. 
\q1  
\v 7 Ki mii ma ’them pini mo, ayy Tap̱a, 
\q1 /e ṯelki aha/ sho’k mo me’d ’kuwosha turga/ jin ’bitha’bi’th mo. 
\q1 /E bagki jis/em pini mo tani dhali aha/ merkina mo. 
\q1  
\v 8 E /e mo tani ayy Tap̱a, aha/ gwokina mo 
\q1 dhali e Tap̱a mo tani aha/ karkina mo jin di’buwa di’b is mo. 
\q1  
\v 9 To wakata midi ’dap̱ e mowum pem mo 
\q1 waḵki/ aha/ yana ka ’cesh e jisa ’kulga/ mo? 
\q1 A/dhali mina bu’da ’ceshi maŋ /eya? 
\q1 A/dhali mina a’di iṯor mom pini jin tana /e a/isiŋ gana/ mowa? 
\b  
\q1  
\v 10 Ciḵi gwo mo ma, ayy Tap̱a, dhali miiyi mii ma ’the gom aha/ mo. 
\q1 Ayy Tap̱a, wari /e ka manwoṯẖ aha/ mo ma. 
\q1  
\v 11 /E ṯu’kki moŋkom pem ki mo jin p̱eka/ imis mo. 
\q1 Dhali /e ’cuḵki aha/ burrinyen shawaal mo 
\q1 dhali ’kam aha/ ki moŋ’kuny bwa mo, 
\q1  
\v 12 ka ḵashiram pem midi maŋ /e mo dhali diki di ki shwamm mo. 
\q1 Ayy Tap̱a Arumgimis pem mo, aha/ mina c̱i /e mo jin ’boruwa ’bor bwa i is ki sule/ sule/ mo. 
\c 31  
\s1 Eya manyuḵ gway mo. Gway ma Dawuu’d. 
\q1  
\v 1 E /e mo tani ayy Tap̱a, aha/ simmkina mom pem jin huru jwa e mo. 
\q1 Dhalku/ ki dhal aha/ bway ki aha/ minu kar ki mo ma ’the is mo. 
\q1 E mo ma ḵar/em pini mo tani ’cuḵi aha/ mo. 
\q1  
\v 2 Kari ’cem pini gom aha/ mo ma. 
\q1 ’Cwami aha/ ki ’ta’b mo. 
\q1 Wari /e ki wosh jin miga/ hur jwa mo, 
\q1 dhali mmota acur jin ’bitha’bi’th jin midi ta aha/ is ki me’d mo. 
\q1  
\v 3 Nye, /e ta wosh pem mo dhali acur pem mo, 
\q1 gom gway gi gway pini mo tani susi aha/ mo ma dhali shuyi aha/ bway mo. 
\q1  
\v 4 Susi aha/ ka pije/ ’pena gume/ jin bagkunu gom aha/ mo, 
\q1 haali/ /e ta jim pem jin hurga/ jwa mo. 
\q1  
\v 5 E me’d pini mo tani aha/ c̱ikina shi/in pem mo. 
\q1 /E wanki aha/ ’ba/ mo, ayy Tap̱a, Arumgimis jin ta isiŋ gana/ mo. 
\b  
\q1  
\v 6 /E shi/ki uni gwansan i e mo uni gun c̱ina hirdhe/ ki p̱e’th ki tomp̱inycon kun luŋu mo. 
\q1 Bahili aha/ gamkina gwo is e Tap̱a mo. 
\q1  
\v 7 Aha/ mina bwa ’kuny mo dhali ’bor mo gom mo/en pini jin ṯelu sho’k mo, 
\q1 haali/ /e hilki mom pem jin ṯocu aha/ bwa mo, 
\q1 dhali /e yip̱ki ’kup̱ mo goma ris uni kun ta ’kup̱ gi aha/ mo, 
\q1  
\v 8 dhali /e diki c̱i aha/ e me’d gi uni kun ta ’kup̱ gi aha/ mo. 
\q1 /E dhuki sho’k pem e mo ma ’cesh jin beeyabee mo. 
\b  
\q1  
\v 9 Miiyi mii ma ’the gom aha/ mo, ayy Tap̱a, haali/ aha/ dina e mo ma c̱is mo. 
\q1 Em pem shi/ki is mo gom jwakaṯ jin jwakaṯki’d mo, 
\q1 eya ḵashiram pem mo dhali buŋgwar is pem si’da/ mo. 
\q1  
\v 10 Haali/ mondiki/em pem ’baaru mo jasi ki mondiṯ bwa mo, 
\q1 dhali yil pem ki jasi mowuwa shure/ mo. 
\q1 Mom’bi’th pem ushki me’d mo gom mondim pem jin ’bushura/ ’bushur mo, 
\q1 dhala simam buŋgwar is pem tana ’kala/ ’kala/ mo. 
\q1  
\v 11 Aha/ tana jin ṯẖunyu/ ’twa/ i is ka ris uni kun ta ’kup̱ ki aha/ mo, 
\q1 dhali aha/ shi/u i e ki uni gun nyaḵ ’ko ki aha/ mo, 
\q1 dhali aha/ tana to jin guna uni ki e mo ki moŋḵo/ is mo, unim pem kun mishi aha/ mo, 
\q1 dhali uni gwansan kun p̱arki aha/ e mo e bway tur mo tani uni ’cuḵki aha/ i ’kup̱ mo. 
\q1  
\v 12 Aha/ ŋakunu me’d jan ’de/ jin wuki’d mo. 
\q1 Dhali aha/ wakina e ki toŋ’kul bwa jin waki’d mo. 
\q1  
\v 13 Nye, aha/ ciḵkina ris ’kwani ’baar mo shilki gwalish mo 
\q1 mmo’dowa ŋur ŋur ’twaŋkal kuku/ mo, 
\q1 me’d jin ’tuntulkina uni isi monṯal ’de/ ap̱o/ aha/ mo, 
\q1 me’d jin wu’thkina uni awu’th mmobu’th mondiki/em pem mo. 
\q1  
\v 14 Hili aha/ gamkina gwo is e /e mo, ayy Tap̱a. 
\q1 Aha/ ona gwo mo ki: /E tana Arumgimis pem mo. 
\q1  
\v 15 Mom pem uni ’kon e me’d pini mo. 
\q1 ’Cuḵi aha/ mo ’peni me’d ma ris uni gun ta ’kup̱ ki aha/ mo dhali uni kun ṯo’cki aha/ bwa mo. 
\q1  
\v 16 Dhalki bwam/em pini a’di kushu mo mo e c̱iŋkinam pini mo. 
\q1 Tayi aha/ is ki me’d mo e mo/en pini jin ṯelu sho’k mo. 
\q1  
\v 17 Dhalku/ ki dhal aha/ mo mmodi ki mo ma ’the is mo, ayy Tap̱a mo, 
\q1 haali/ aha/ yuḵkina /e mo. 
\q1 Dhalki uni kun mii tonthus idhukunu ’te/ ki mo ma ’the is mo 
\q1 dhali dhalki uni ii ’ce us kan e mo ma Haawiya mo. 
\q1  
\v 18 Dhalka le’d kun tana ṯor tana ’diye/ mo, 
\q1 uni oki gwo sor ap̱o/ uniŋ ḵar/e mo 
\q1 e mo jin dhuna uni ’ba/ ki ca mo dhali mo ma bujur mo. 
\b  
\q1  
\v 19 Ayy mom’boro’d pini wa’di ish ka enthusa! 
\q1 A’di jin karkina /e gom uni gwansan kun ḵo/ki /e mo 
\q1 dhali wagas mo gom uni gwansan kun bu’thki mo jin huru jwa e /e mo, 
\q1 e jis/e gi iya/ gi ’kwani mo. 
\q1  
\v 20 Dhali buŋ’kus pini mo tani a’di ibagki uni mo 
\q1 ’pena risa wu’th gi ’kwani mo. 
\q1 /E dhuki uni ki ’dantar e bwaŋ’kwariny ma darha’dam pini mo 
\q1 ’pena risa le’d jin biruwa bir mo. 
\q1  
\v 21 Mom’bor mii midi di gom Tap̱a mo, 
\q1 haali/ a’di wa’di ’bora mmoṯor mo/en piti jin ṯelu sho’k e aha/ mo 
\q1 ki aha/ karu mo mmohem me’d ’peŋkuman bampa/ mo. 
\q1  
\v 22 Aha/ okina gwo e mo ma ayy/ayy/ayy pem mo ki: 
\q1 Aha/ borkunu ki ’bal ’bal itaga dhana/ mo ’peni jis/em pini mo. 
\q1 Hili /e ciḵki mom pem jin di’bkika/ di’b is mo 
\q1 ki aha/ gwokina ’twa/i /e gom mowoṯẖ mo. 
\b  
\q1  
\v 23 Eni Tap̱a mo, aris umi ’baar mo kun ta kum piti kun dhunu ki she/ ki dhelel dhelel mo. 
\q1 Arumgimis dhuki uni kun ta ku isiŋ gana/ mo, 
\q1 hili tom piti kun mina a’di iraḵ ’kwani to ibway ishki’d ka enthus mo gom uni kun ḵalki mii mo mmo’theḵ ’ba/ imis mo. 
\q1  
\v 24 ’Bithi is mo dhali dhalka dum pini bu’th mo jin roc̱u sho’k mo, 
\q1 aris umi ’baar mo kun c̱orki Tap̱a mo. 
\c 32  
\s1 Gway ma Dawuu’d. Gway jin yuḵu mo mmoyetha ye’th sho’k ki gwo mo. 
\q1  
\v 1 Mom’bor mii gom a’di jin gwamkunu gwon dhaŋ piti mo, 
\q1 a’di jin ta miinthus piti jin kumkunu ’kup̱ mo. 
\q1  
\v 2 Mom’bor mii gom wathi/ jin dina Tap̱a ki yer is ki gway gom miinthusa kamu/ mo, 
\q1 dhali e shi/in piti mo tani mo ma he’k e p̱iyi’d mo. 
\q1  
\v 3 Ki aha/ dinaki ṯor gwo miinthus pem mo tani buŋgwar is pem a’di muṯṯi’di ’baar mo 
\q1 e mo/ohon pem ka tee ’baar mo. 
\q1  
\v 4 Haali/ montee dhali mon’thiny mo tani me’d pini diṯadiṯ ap̱o/ aha/ mo. 
\q1 Mom’bi’th pem a’di ḵu’thki’d mo me’d mom’batha’d jin ’koshki to moyurantee mo. \qs Doshi ma dhali ’cunycuri yan mo.\qs* 
\b  
\q1  
\v 5 Aha/ nyiṯẖkina miinthus pem e /e mo 
\q1 dhali aha/ dinaki bag miinthus pem mo. 
\q1 Aha/ ona gwo mo ki: Aha/ mina pi gwon dhaŋ pem ki Tap̱a mo. 
\q1 Dhali yan’ko’d /e gwamki aha/ gom miinthus jin di aha/ i’ba/ mo. \qs Doshi ma dhali ’cunycuri yan mo.\qs* 
\b  
\q1  
\v 6 Wakan dhalka ris ’kwani ’baar mo kun tana gayiin ’thon e /e mo. 
\q1 Ka tee ma c̱is mo, dhali ka tente/ kun sona dhan yi’de/ mo tani uni mol a’di gam mo. 
\q1  
\v 7 /E ta mombag gom aha/ mo 
\q1 dhali /e ’tashki aha/ ’twa/ mo ’peni monṯo’c bwa mo. 
\q1 Dhali /e ’kamki aha/ ki mony’cuḵ mo. \qs Doshi ma dhali ’cunycuri yan mo.\qs* 
\b  
\q1  
\v 8 Aha/ mina ye’th /e sho’k mo dhali ṯor /e bway jin mina /e iya mo be. 
\q1 Aha/ mina logom /e ki gwo mo ki em pem jin midi di ap̱o/ /e mo. 
\q1  
\v 9 Dhalku/ ki wa e ki shumarum walla bagal kun mol ’twa/ wal mo, 
\q1 uni kun minu ’kali’th is mo dhali ’kamu’th ’twa/ ka lijaam mo 
\q1 isi ciki/ ki uni mini ’koki so ’peni /e mo. 
\q1  
\v 10 To kun diṯ bwa gom ’kwani kun ta thus ki thus mo tani uni tana ris mo, 
\q1 hili mo/en jin ṯeli sho’k mo a’di ’kam a’di is mo a’di jin gamki gwo is e Tap̱a mo. 
\q1  
\v 11 ’Bori bwa e Tap̱a mo dhali ’kunyi bwa mo ayy um ’kwani kun tana ḵar/e mo, 
\q1 dhali ḵumi cuuwa/ gom moŋ’kuny bwa mo, aris um kun dhelel ma du mo. 
\c 33  
\q1  
\v 1 ’Kunyi bwa mo ma e Tap̱a, ayy um ’kwani kun tana ḵar/e mo. 
\q1 Maŋa maŋ jin ’dap̱a’d gom uni kun dhelel ma du mo. 
\q1  
\v 2 Maŋi Tap̱a ka dheŋdhenye/ jin buḵu/ mo, 
\q1 dhali yuḵi gway gom a’di ka dheŋdhenye/ jin ’kon ma shu/i ’kume’d mo. 
\q1  
\v 3 Yuḵi gway gom a’di, gway jin ta jin this mo, 
\q1 buḵa shu/ ki me’d jin ta gwocon mo, ki ’kus jin caaca mo. 
\q1  
\v 4 Haali/ gwo gi Tap̱a mo tani uni ha me’d mo. 
\q1 Dhali aris miim piti uni miikunu ki mii ma isiŋ gana/ mo. 
\q1  
\v 5 A’di enki momii ma ḵar/e mo dhali mo jin miinu ki dar gi mo ma gwar ’de/ mo. 
\q1 Mony’cesh a’di ’tu’du/ mo ki mo/en gi Tap̱a jin ṯeli sho’k mo. 
\q1  
\v 6 Ki gwo gi Tap̱a mo tani momis uḵkunu mo 
\q1 dhali aris to kun ’koni bwaman uni ki shi/in jin shi/ini’d ’peni ’twam piti mo. 
\q1  
\v 7 A’di ki tula ris yi’de/ is mo dhali ḵumma/ yi’de/ mo me’d jin ’thuṯẖu/ uni ibwaman ma gasaas mo. 
\q1 A’di ki dhu yi’deŋ ’kulga/ e mo kun dhunu to mo. 
\q1  
\v 8 Dhalki aris ’kwani ’baar kun ’kon e mony’cesh ḵo/ Tap̱a mo. 
\q1 Dhalki aris ’kwani ’baar kun ’kon e mony’cesh doshon ki moŋḵo/ is gom a’di mo. 
\q1  
\v 9 Haali/ a’di ṯorki gwo mo tani dhali a’di p̱u’dki’d kan mo. 
\q1 Dhali a’di ḵanki gwo mo tani dhali gwo doshki’d mo. 
\q1  
\v 10 Tap̱a ki ḵal gwo kun logoma kal gi ’kwaniny’cesh mo mmota gwo jin di bwa ’te/ mo. 
\q1 A’di ki non mo jin thosona ’kwani ’kup̱ ’twa/ mo. 
\q1  
\v 11 Gwo logom gi Tap̱a mo tani a’di doshki’d ki sule/ mo. 
\q1 Gwoŋ kulum eya dum piti mo tani a’di diki’d ki sule/ goma risa nyaḵum yil gi ’kwani mo. 
\q1  
\v 12 Mom’bor mii gom kal gi ’kwani jin tan ma Arumgimis Tap̱a mo, 
\q1 ’kwani kun kwanykina a’di mo mmota mal piti mo. 
\b  
\q1  
\v 13 Tap̱a hilki mo ka luŋgu’b ’peni momis 
\q1 mmop̱ara ris iya/ gi ’kwaniny’cesh e mo. 
\q1  
\v 14 ’Peni mo jin c̱a’bkina a’di eya ḵursi ma maliḵ mo tani a’di ki hil mo mo 
\q1 ap̱owa ris ’kwani gi mony’cesh mo. 
\q1  
\v 15 A’di ta a’di jin aḵki’da dum buni e ’baar mo, 
\q1 dhali a’di ki hila ris miim buni kun miina uni mo. 
\q1  
\v 16 Amaliḵ a’di ’konuki ta is ki me’d ki dhan ’kwani ma meem piti mo. 
\q1 Wathi/ gom mo ma mee mo tani a’di ’konuki ’cuḵ ki dhan mom’bi’th piti mo. 
\q1  
\v 17 Shumarum gi mo ma mee mo tani a’di ta tom p̱e’th gi mo ma ’teŋ kap̱e/ gi mo jin p̱inu mii e mo. 
\q1 Dhali ki dhan mo ma ’bi’th ma dem dem piti mo tani a’di molu ta is ki me’d mo. 
\b  
\q1  
\v 18 Hili mo mo ma, e gi Tap̱a a’di di’d ap̱o/ uni gwansan kun ḵo/ki a’di mo, 
\q1 ap̱o/ uni gwansan kun takin gi mo ma ’teŋ kap̱e/ gi mo/en piti jin ṯelkunu sho’k mo, 
\q1  
\v 19 ki a’di midi ’cuḵa ḵashiram buni ’peni mowu mo, 
\q1 dhali dhu uni ki e mo e yil jin ’kosha ṯe/ mo. 
\q1  
\v 20 Aḵashiram bana a’di c̱orki Tap̱a mo. 
\q1 A’di ta’da Manwoṯẖ gom ana mo dhali agoŋgorom bana mo. 
\q1  
\v 21 Nye, adum bana ’kunykina bwa mo e a’di mo 
\q1 haali/ ana gamkina gwo is e gway piti jin ḵogu mo. 
\q1  
\v 22 Dhalki mo/en pini jin ṯelu sho’k, ayy Tap̱a, di’d eya p̱o/ aman mo, 
\q1 isi kani, me’d jin tana aman ka ’teŋ kap̱e/ e /e mo. 
\c 34  
\s1 Gway ma Dawuu’d, ki a’di ki mii me’d wathi/ jin gus ma du mo ibwambor ma Abimaalik mo. Wakan a’di urki a’di ka pije/ mo dhali a’di ki ’kosh ya mo. 
\q1  
\v 1 Aha/ ’bora Tap̱a mii isa yempa/ mo. 
\q1 Momaŋ midi di isa yempa/ e ’twam pem mo. 
\q1  
\v 2 Aḵashiram pem kar is ki ca e Tap̱a mo. 
\q1 Dhalki uni gwansan kun ’koshu ki isa nyor ciḵ a’di mo dhali ’bor bwa mo. 
\q1  
\v 3 Ayy kari Tap̱a ki ca nyaḵki aha/ mo, 
\q1 dhali dhalki ana kara gway piti ki ca imonṯal ’de/ mo. 
\q1  
\v 4 Aha/ ŋap̱kina Tap̱a mo dhali a’di thoḵki aha/ ’twa/ mo, 
\q1 dhali ’cuḵ aha/ mo ’pena ris moŋḵo/ is pem mo. 
\q1  
\v 5 Hili ’kup ki a’di mo dhali kushi mo mo 
\q1 wakan ki bwam/em bum mini ’koki ’ko ki mo ma ’the is mo. 
\q1  
\v 6 Wathi/ ha’th’ko’d yan gwoki’d mo dhali Tap̱a ciḵki a’di mo 
\q1 dhali ta a’di is ki me’d mo ’pena ris monṯo’c bwam piti mo. 
\q1  
\v 7 Aman’doyu gwo gi Tap̱a ’kamki’da ’kam ka kul is gom uni gwansan kun ḵo/ki a’di mo, 
\q1 dhali ’cuḵ uni mo. 
\q1  
\v 8 Ayy nyoḵi ma dhali p̱ar e ki Tap̱a ’boro’d mo. 
\q1 Mom’bor bwa gom wathi/ jin bu’thki mo jin huru jwa e a’di mo. 
\q1  
\v 9 Ayy ḵoki Tap̱a mo um piti kun dhunu ki she/ ki dhelel dhelel mo, 
\q1 haali/ uni gwansan kun ḵo/ki a’di mo tani ’kona ton tiya ki har mo. 
\q1  
\v 10 Ushi dhuruca dhop̱ uni hari to mo haali/ uni ’kosha ṯe/ mo 
\q1 hili uni gwansan kun simmki Tap̱a e mo tani uni ’koki har tom ’boro’da kamu/ mo. 
\b  
\q1  
\v 11 Iiyu/ ma, ayy iya/ mo, ciḵi gwo ’peni aha/ mo. 
\q1 Aha/ mina ṯor um gwo gom moŋḵo/ is gom Tap̱a mo. 
\q1  
\v 12 Wathi/ jana i/ona bwa ki mondiki/e mo, 
\q1 dhali ’thoṯẖ bwa ka yempa/ ki a’di mina bwa ’kuny ka yempa/ gom tom ’boro’d mo? 
\q1  
\v 13 Nona le’d pini ’twa/ ’peni gwon thus mo 
\q1 dhali ’twam pini mmo/o gwo ka he’k e mo. 
\q1  
\v 14 Ḵwa/i bwa mo ’peni tonthus mo dhali miiyi ki ’bore/ mo. 
\q1 Simmi moŋḵu’th is e mo dhali uri a’di isho’k mo. 
\b  
\q1  
\v 15 E gi Tap̱a a’di di’da p̱o/ uni kun miin ka ḵar/e mo 
\q1 dhali ’cem piti ’kup̱ ki kom buni mo. 
\q1  
\v 16 Bwam/e gi Tap̱a di’da p̱o/ imanmii tonthus mo, 
\q1 ki uni minu ’ciṯẖ ’twa/ mo ki uni minu ’koki doḵ/e ka e e mony’cesh mo. 
\q1  
\v 17 Ki uni kun mii miiŋḵar/e gwokin gom mowoṯẖ mo tani Tap̱a ciḵki uni mo 
\q1 dhali ’cuḵ uni mo ’peni aris monṯo’c bwam buni mo. 
\q1  
\v 18 Tap̱a ’disha’dish ka yempa/ e uni kun ’ce’dkunuwa du mo 
\q1 dhali ta uni is ki me’d mo uni kun siri’ckunu shi/in ki sho’k mo. 
\b  
\q1  
\v 19 Monṯo’c bwa tana ris gom a’di jin mii miiŋḵar/e mo, 
\q1 hili Tap̱a ’cuḵki a’di ’peni uni ’baar mo. 
\q1  
\v 20 A’di ki dhuwa risa simam piti ’baar mo. 
\q1 Simam pitiŋ kamu/ yisa ’ce’dkunuwa. 
\q1  
\v 21 Tonthus jin miinu midi ’kosha manmii tonthus mo, 
\q1 dhali uni gwansan kun shi/ki ’kwani kun mii miiŋḵar/e i e mo tani minu waḵ mo be. 
\q1  
\v 22 Tap̱a a’di wanki mondiki/e gi c̱iŋkinam piti ’ba/ mo. 
\q1 Jan ṯal ’deŋ kamu/ ’peni uni gwansan kun bu’thki mo jin huru jwa e a’di mo tani minu ’koki waḵ mo be. 
\c 35  
\s1 Gway ma Dawuu’d. 
\q1  
\v 1 Jemi ajem ’kup̱ mo ma, ayy Tap̱a, nyaḵki uni gwansan kun jemki aha/ ’kup̱ mo. 
\q1 Asi ap̱o/ uni gwansan kun askin ap̱o/ aha/ mo ma. 
\q1  
\v 2 Bu’thka goŋgoro/ ki me’d mo dhali to mmocesh is mo 
\q1 dhali cuyi mis gom mowoṯẖ pem mo. 
\q1  
\v 3 ’Deka mee she mis mo dhali ameeny ’ciṯẖ is mo 
\q1 apo/ uni kun urki aha/ isho’k mo. 
\q1 Oyi gwo goma ḵashiram pem mo ki: 
\q1 Aha/ tana man’cuḵ pini mo. 
\q1  
\v 4 Dhalki uni dhukunu ’te/ ki mo ma ’the is mo dhali ush taḵ mo 
\q1 uni gwansan kun simmki mondiki/em pem e mo. 
\q1 Dhalki uni ṯu’kkunu ka nyaŋ’ko’d mo dhali non ’twa/ mo 
\q1 uni kun p̱ishinki mo gi ’pen mo mmomii tonthus ap̱o/ aha/ mo. 
\q1  
\v 5 Dhalki uni wana e ka ’pi’b ibwambori ’tham mo 
\q1 ka man’doyu gwo gi Tap̱a ki ur uni ki sule/ sule/ mo. 
\q1  
\v 6 Dhalki bway buni ta’da ’tum mo dhali dheresa dheres mo, 
\q1 ka man’doyu gwo gi Tap̱a ki ur uni isho’k mo. 
\q1  
\v 7 Ki dar gi ’kup̱ mii mo tani uni bagkina gumem buni gom aha/ mo. 
\q1 Dhali ki dar gi ’kup̱ mii mo tani uni c̱wanyki jis gom mondiki/em pem mo. 
\q1  
\v 8 Dhalki mo kun toru sho’k ka pupush p̱u’du’d ap̱o/ uni ki e ka wu mo. 
\q1 Dhalka gumem buni kun baga uni mo tani bu’th uni mo. 
\q1 Dhalki uni ṯa’kkin ibwaman uni mmo’ce’d sho’k ka pupush mo. 
\q1  
\v 9 Dhali yan’ko’d aḵashiram pem ’kunya bwa e Tap̱a mo 
\q1 mmoyuḵ gway mmomaŋa maŋ gom mony’cuḵ piti mo. 
\q1  
\v 10 Arisa simam pem mini o gwo mo ki: 
\q1 Ayy Tap̱a, kaja a’di jin waki /e mo, 
\q1 /e jin ’cuḵ a’di jin ’ka’da is ki ’ka’d mo 
\q1 ’peni a’di jin ’bitha’bi’th gom a’di mo, 
\q1 dhali a’di jin ’ka’da is dhali a’di jin midi mii ta gi to mo ’peni a’di jin shi/ki a’di is mo. 
\b  
\q1  
\v 11 Iman/o gwo kun dup̱una dup̱i e mo tani uni cuki mis ap̱o/ aha/ mo. 
\q1 Uni doṯki aha/ to kun ’koka/ ki mish ’ban mo. 
\q1  
\v 12 Uni ki c̱i aha/ tonthus ka nyaŋ’ko’d gom tom ’borga/ kun miiga/ gom uni mo. 
\q1 Aḵashiram pem a’di ’bushura/ ’bushur mo. 
\q1  
\v 13 Hili aha/, ki uni ’ba’thkin mo tani – 
\q1 aha/ hi’thkina burrinyen shawaal mo, 
\q1 aha/ shi/kina is pem ki moŋga/ to mo. 
\q1 Aha/ ’thokina ki ’kup̱ pem jin karka/ ka luŋgu’b abor pem mo 
\q1  
\v 14 me’d jin jwakaṯkunu aha/ adu goma mugum pem mo dhala kam pem mo. 
\q1 Aha/ yakina ka kul is me’d jan ṯal ’de/ jin gwoki’d goma ta’dam piti mo, 
\q1 mmobiṯ ’kup̱ ka luŋgu’b dhali ko ki gwony jabu’th mo. 
\q1  
\v 15 Hili e mombiṯ pem mo tani uni tulki is mo mmop̱e’th ki ḵuss ḵuss mo, 
\q1 uni tulki is mmonṯal ’de/ ap̱o/ aha/ mo. 
\q1 Uni kun ta ŋwol kun molka/ mo tani thu’thki aha/ ’pen ki dar gi mondaḵ mo. 
\q1  
\v 16 Uni c̱i aha/ ṯinya/ ka maḵ mo ki nyanye/ dhali ki nyanye/ mo. 
\q1 Uni ’pe’dki aha/ shem buni i is mo. 
\q1  
\v 17 Kakasja, ayy Tap̱a, mina /e c̱a’bi gu is mo kan? 
\q1 ’Cwami aha/ mo ’peni mo ma bujur buni kun ’ce’du sho’k mo, 
\q1 mondiki/em pem ’pena risa dhop̱ mo. 
\q1  
\v 18 Dhali yan’ko’d aha/ mina c̱i /e mom’bor bwa i is e bwaman ma waambuhany ’kwani mo. 
\q1 Dhali e mom’bi’th ma waambuhany ’kwani mo tani aha/ mina maŋ /e mo. 
\q1  
\v 19 Dhalku/ ki dhal uni gwansan bway mo mmo’kuny bwa ap̱o/ aha/ mo 
\q1 uni kun mii aha/ ki shi/ kun ta ’kup̱ ki aha/ mo, 
\q1 dhali dhalku/ ki dhal uni gwansan bway mo mmoshi’b e 
\q1 kun shi/ aha/ i e ki dar gi miiŋ kamu/ mo. 
\q1  
\v 20 Haali/ uni ’koki o gwo gom moŋḵu’th is mo, 
\q1 hili ap̱o/ uni gwansan kun ’kon ki biyuu e mony’cesh mo tani 
\q1 uni bwaaki gwo kun hekuwa he’k e mo. 
\q1  
\v 21 Uni ḵa’dki ’twam buni kun beeyabee ap̱o/ aha/ mo. 
\q1 Uni oki gwo mo ki: Soso soso. 
\q1 Em bana p̱arki a’di e mo. 
\q1  
\v 22 /E mishkin mo, ayy Tap̱a. Dhalku/ ki c̱a’b ki shwamm mo ma, 
\q1 ayy Tap̱a, dhalku/ ki si’d ’peni aha/ mo. 
\q1  
\v 23 Muri is pini mo ma, dhali meri is gom tom pem jin raḵ aha/ mo, 
\q1 dhali tom pem jin p̱u’du’d mo. Arumgimis pem mo dhali Tap̱am pem mo. 
\q1  
\v 24 Yeyaa/ mo, ayy Tap̱a, Arumgimis pem, isi ki mii ma ḵar/em pini mo, 
\q1 dhali dhalku/ ki dhal uni bway mo mmo’kuny bwa ap̱o/ aha/ mo. 
\q1  
\v 25 Dhalku/ uni ki dhal bway mo mmo/o gwo e is buni mo ki: 
\q1 Soo, ana tana gi to kun on ma dum bana mo. 
\q1 Dhalku/ uni ki dhal bway mo mmo/o gwo mo ki: Ana loskina a’di ki ’kolo’c mo. 
\q1  
\v 26 Dhalki uni dhunu ki mo ma ’the is mo dhali duŋguru/ ka du isi monṯal ’de/ mo 
\q1 uni kun ’kunykina bwa mo ap̱owa c̱is pem mo. 
\q1 Dhalki uni kumu is ki mo ma ’the is mo dhali ki mo jin ushuwa taḵ taḵ mo, 
\q1 uni kun dhu is buni ki ca ap̱o/ aha/ mo. 
\b  
\q1  
\v 27 Dhalki uni gwansan kun ’kona gwo i bwa gom moyem pem 
\q1 ḵum cuuwa/ mo gom moŋ’kuny bwa mo dhali mom’bor bwa mo, 
\q1 dhali o gwo ki sule/ sule/ mo ki: 
\q1 Tap̱a a’di caaca mo, 
\q1 a’di jin ’kunya bwa e miin to gi c̱iŋkinam piti jin gama a’di adu is mo. 
\q1  
\v 28 Dhali yan’ko’d ’twa/ pem midi ṯor gwo gom mii ma ḵar/em pini mo 
\q1 dhali momaŋ pini isa yempa/ isa yempa/ mo. 
\c 36  
\s1 Eya manyuḵ gway mo. Gway ma Dawuu’d, a’di jin ta c̱iŋkina/ gi Tap̱a mo. 
\q1  
\v 1 Gwon dhaŋ oki a’di jin ta thus ki thus gwo mo ki ’kula’kul eya dum piti mo. 
\q1 Moŋḵo/ isa kamu/ yisa di’da goma Arumgimis e bwambor jis/em piti mo. 
\q1  
\v 2 Haali/ a’di o gwo maŋ ka maḵ gom is piti mo e em pitiŋ gana/ mo 
\q1 ki miinthus piti minu ’koki gam mo dhali shi/i e mo. 
\q1  
\v 3 Gwo ’peni ’twam piti mo tani uni tana pibi mo dhali mo jin hekuwa he’k e mo. 
\q1 A’di daḵki’d mo ’peni mo jin miina a’di ki yuḵ yuḵ mo dhali mii ki ’bore/ mo. 
\q1  
\v 4 A’di c̱i is piti ki gwo ma pibi ma wu’th mo ki a’di di’d mmo/isha aŋkar piti mo. 
\q1 A’di ki kar is piti e bway jin diki ’bor mo. 
\q1 A’di diki ush tonthus mo. 
\q1  
\v 5 Mo/en pini jin ṯeli sho’k mo tani, ayy Tap̱a, a’di jithirki’d e momis mo, 
\q1 dhali mii gi isiŋ ganam pini eya raḵ mo. 
\q1  
\v 6 Mii ma ḵar/em pini a’di wana e ki wosh kun turatur kun ta ku ma Arumgimis mo, 
\q1 gwon dwall pini kun toru gwo ’twa/a ’cesh mo uni wana e ki dhan ’kul yi’de/ mo. 
\q1 ’Kwani dhali tombwaasho takina /e is ki me’d mo, ayy Tap̱a. 
\q1  
\v 7 Mo/en pini jin ṯeli sho’k mo tani wa’di yinthowa, ayy Arumgimis. 
\q1 Uc̱i gi ’kwaniny’cesh uni bu’thki mo jin huru jwa eya ḵashira/ ma bim pini mo. 
\q1  
\v 8 Uni yuḵkina yuḵ e gu’b pini jin isha to ka enthus mo, 
\q1 dhali /e c̱iki uni to mmop̱i mo ’peni yi’de/ jin ’kunykina /e bwa mo. 
\q1  
\v 9 Haali/ e /e mo tani /e a’di ta mondiki/e jin kashki’d mo. 
\q1 E moŋkush pini mo tani am p̱arkina moŋkush e mo. 
\b  
\q1  
\v 10 Ayy ṯikiri mo/en pini jin ṯeli sho’k ki sule/ gom uni gwansan kun mishki /e mo, 
\q1 dhali bway gi mowoṯẖ pini gom uni kun dhelel ma du ki dhelel mo. 
\q1  
\v 11 Dhalku/ ki dhal sho’k gi a’di jin kar ’ba/ ki ca mmop̱u’da p̱o/ aha/ mo, 
\q1 walla me’d gi a’di jin ta thus ki thus mmobor aha/ mmosi’da/ si’d mo. 
\q1  
\v 12 ’Kwani kun ta imanmii tonthus ishkin ki rap̱ rap̱ mo, 
\q1 uni kun torkunu ’ko’da ’cesh mo, mmomol cu mo. 
\c 37  
\s1 Gway ma Dawuu’d. 
\q1  
\v 1 Dhalku/ is pini ki anan mo goma manṯẖu’th to mii mo, 
\q1 dhalku/ dhap̱an ki mii ta gom imanṯẖu’th to mii mo. 
\q1  
\v 2 Haali/ uni mini la us ki jog me’da sho mo, 
\q1 dhali ḵu’th mo me’da sho mo. 
\q1  
\v 3 Gami gwo is e Tap̱a mo, dhali miiyi ki ’bore/ mo. 
\q1 Wakan ki /e mini c̱a’b eya ’cesh mo, dhali ’kuny bwa mo gom mo jin mina /e c̱a’b ki ’dantar mo. 
\q1  
\v 4 Budhi mo jin ’kunyu bwa e Tap̱a mo, 
\q1 dhali a’di midi c̱i /e to kun gwon ma dum pini mo. 
\q1  
\v 5 C̱uthi bway pini ’kup̱ ki Tap̱a mo. 
\q1 Dhali gami gwo is e a’di mo, dhali a’di midi ḵal mii mo be. 
\q1  
\v 6 Dhali a’di midi ḵal mom pini jin minu ye /e mo e moŋkush mo 
\q1 dhali tom ’boro’d pini mina e waki montee mo. 
\b  
\q1  
\v 7 Doshi naskina/ e bwambor gi Tap̱a mo dhali c̱oriya c̱or ki bwa jin ’kuc̱u/ ki ’kari’th gom a’di mo. 
\q1 Dhalku/ is ki anan ap̱o/ a’di jin gam mii adu is e bway piti mo, 
\q1 ap̱o/ wathi/ jin ḵali tonthus ka pije/ ki mii jin p̱ishina a’di ki ’pen mo. 
\q1  
\v 8 Daḵi ’pena nyor mo dhali dhalka nyor jin shwanu ’pen mo. 
\q1 Dhalku/ is pini ki anan mo, a’di jin ḵuthi is jasi gom tonthus mo. 
\q1  
\v 9 Haali/ amanmii tonthus mo tani a’di minu la ’ciṯẖ mo, 
\q1 hili uni gwansan kun c̱orki Tap̱a mo tani uni a’di imini gam mony’cesh mo. 
\q1  
\v 10 C̱ori naskina/ ari’ceenne/ mo dhali amanmii tonthus midi di doḵ/e yisa. 
\q1 Ba me’d jin hila um a’di ki a’di di’d e mom piti ki ’bore/ mo tani a’di midi di yisa. 
\q1  
\v 11 Hili uni kun ’thup̱ ma du mini gam mony’cesh mo 
\q1 dhali ’kuny bwa e is buni mo e mo jin isha to ka enthus ki mii jin gama uni adu is mo. 
\b  
\q1  
\v 12 Amanmii tonthus a’di mii’da wu’th ap̱o/ a’diŋ ḵar/e mo 
\q1 dhali ’pe’d shem piti ap̱o/ a’di mo, 
\q1  
\v 13 hili Tap̱a p̱e’thki a’di jin mii tonthus mo 
\q1 haali/ a’di mishki’d ka teem piti p̱u’dki’d mo be. 
\q1  
\v 14 Imanmii tonthus uni buḵi gandal buni mo dhali gwana’da bwam buni mo, 
\q1 mmoḵal ka ’cesh uni kun hatha’ko’d mo dhali kun mini mii ta gi to mo. 
\q1 dhali ’kosh uni gwansan kun iin ki iin dhelelga/ mo. 
\q1  
\v 15 Gandal buni mini cic̱a dum buniŋ gana/ mo, 
\q1 dhali abwam buni minu ’ce’d bwa mo be. 
\q1  
\v 16 To kun tana a’diŋ ḵar/e ush’ceenne/ mo tani a’di ’boro’d mo 
\q1 mmobol to jin ishi’d ka enthus ma ris uni kun mii tonthus e mo. 
\q1  
\v 17 Haala bi gi imanmii tonthus mo tani uni minu ’ce’d mo, 
\q1 hili Tap̱a a’di dhuki imanmii miiŋḵar/e mo. 
\q1  
\v 18 Tap̱a a’di mishki’da tee gi uni kun ’kon ki dar gi mii ’ba/ mo, 
\q1 dhali mal buni c̱a’bki’d ki sule/ sule/ mo. 
\q1  
\v 19 Uni minu ’koki dhu ki mo ma ’the is ka tee kun ta thus ki thus mo, 
\q1 dhali ka tee jin mina ṯe/ ’kosh mo tani uni mini ta gi to jin ish ka enthus mo. 
\q1  
\v 20 Hili imanmii tonthus mo tani uni ’ce’dki sho’k mo. 
\q1 Aris uni kun ta ’kup̱ gi Tap̱a mo tani uni wana e ki monyca ma shon dhii/i’d mo, 
\q1 uni kun la p̱uu mo – dhali uni kun wana e ka ku’d kun la p̱uu mo. 
\q1  
\v 21 Amanmii tonthus barki to ḵal ’peni ’kwani mo tani, dhali mol c̱iya murem piti ka nyaŋ’ko’d mo, 
\q1 hili a’diŋ ḵar/e ta’da ’the mo dhali c̱i’da c̱i mo. 
\q1  
\v 22 Haali/ uni gwansan kun ’boru mii ki Tap̱a mo tani uni mini gam mony’cesh mo, 
\q1 hili uni gwansan kun jeenu ki a’di mo tani uni minu ’ciṯẖ ’twa/ mo be. 
\b  
\q1  
\v 23 Ŋaṯgin jin tana wathi/ mo tani a’di ’peni Tap̱a mo, 
\q1 dhali a’di ṯelki a’di sho’k mo e bway jin mina bwa ’kuny a’di mo. 
\q1  
\v 24 Ba ki a’di midi biṯ mo tani a’di minu ’koki biṯa sho ’kup̱ ka luŋgu’b mo, 
\q1 haali/ Tap̱a a’di ta mondim gom me’d piti mo. 
\q1  
\v 25 Aha/ tana dhuru’c ’thissa/ mo dhali shwane/ aha/ tana dhan mo. 
\q1 Hili naskina/ aha/ dinaki p̱ar a’diŋ ḵar/e e dhalkunu ’pen mo 
\q1 walla uc̱im piti mmo’tho tonṯe/ mo. 
\q1  
\v 26 A’di c̱iki to ka ’ka’d me’di is mo ka yempa/ mo dhali c̱i to mo, 
\q1 dhali uc̱im piti warkin ki uni kun ’bor mii mo. 
\q1  
\v 27 Ḵwa/i bwa mo ’peni tonthus mo dhali miiyi ki ’bore/ mo, 
\q1 wakan ki /e mini di ki sule/ sule/ mo. 
\q1  
\v 28 Haali/ Tap̱a a’di enki mo jin ’konuki miiya mii ka gwar ’de/ mo. 
\q1 A’di midi diki dhal unim piti kun dhunu ki she/ ki dhelel dhelel ’pen mo. 
\q1 Imanmii miiŋḵar/e minu dhu ki sule/ sule/ mo. 
\q1 Hili uc̱i gi imanmii tonthus mo tani uni minu ’ciṯẖ ’twa/ mo. 
\q1  
\v 29 Imanmii miiŋḵar/e mini gam mony’cesh mo 
\q1 dhali c̱a’ba p̱o/ a’di ki sule/ sule/ mo. 
\q1  
\v 30 ’Twa/ ma manmii miiŋḵar/e mo tani a’di bahki gwo gom moyuḵ mo 
\q1 dhali ale’d oki gwo ki dar gi mii ma gwar ’de/ mo. 
\q1  
\v 31 Dhali gwoŋḵan ma Arumgimis piti jin c̱inu mo tani a’di di’da dum piti mo. 
\q1 Dhali ŋaṯgin piti ’koki yeresa/ yeres mo. 
\q1  
\v 32 Amanmii tonthus a’di timki a’diŋ ḵar/e mo 
\q1 dhali simm a’di e mo mmo’kosh mo. 
\q1  
\v 33 Tap̱a a’di midi diki dhal a’di ’pen e mom’bi’th piti mo, 
\q1 walla dhal a’di ki a’di minu waḵ mo me’d jin minu sus a’di e mondwall gwo mo. 
\q1  
\v 34 C̱ori Tap̱a mo dhali kari bway piti mo 
\q1 dhali a’di midi kar /e ki ca mo mmogam mal gi mony’cesh mo. 
\q1 /E mini hil mony’ce’d sho’k ma manmii tonthus mo. 
\b  
\q1  
\v 35 Aha/ hilkina manmii tonthus mo mmomii mii gi ’ba/ mo, 
\q1 dhali mmotura tur me’da bwanyayiis gi Pan Lubnaan mo. 
\q1  
\v 36 Doḵ/e aha/ yakina ki yam pe mo dhali hili a’di diki di doḵ/e mo. 
\q1 Ba aha/ ŋap̱kina a’di mo tani a’di ’konuki gam mo be. 
\q1  
\v 37 ’Cunycuri wathi/ jin dar gi mii ’ba/ mo dhali hili mo mo ma a’di jin dhelel ma du mo, 
\q1 haali/ emen ’kon gom wathi/ gi moŋḵu’th is mo. 
\q1  
\v 38 Hili imandhaŋ gwo mo tani uni minu ’ce’d sho’k imonṯal ’de/ mo. 
\q1 Dhali emen gi imanmii tonthus mo tani uni minu ’ciṯẖ mo be. 
\q1  
\v 39 Bway gi mowoṯẖ gom wathiŋ ḵar/e mo tani a’di ’peni Tap̱a mo be. 
\q1 A’di ita jim buni jin hura uni jwa ka tee gi monṯo’c bwa mo. 
\q1  
\v 40 Tap̱a woṯẖki uni mo dhali ’cuḵki uni mo. 
\q1 A’di ’cuḵki uni mo ’peni imanmii tonthus mo dhali ta uni is ki me’d mo 
\q1 haali/ uni bu’thki mo jin huru jwa e a’di mo be. 
\c 38  
\s1 Gway ma Dawuu’d mmoka to e jin c̱inuwa Arumgimis ki me’d mo. 
\q1  
\v 1 Ayy Tap̱a, dhalku/ ki ḵucur aha/ ka nyor pini mo 
\q1 walla dhalku/ ki dor aha/ ka nyor pini jin shwana /e mo! 
\q1  
\v 2 Haala thop̱am pini ḵarana dum ’per pem ’kup̱ mo, 
\q1 dhali me’d pini p̱u’dkina p̱om pem mo be. 
\q1  
\v 3 Dhali moŋkamu/ mura shuman buŋgwar is pem is mowa? 
\q1 haala nyor pini jin shwana /e caaca mo. 
\q1 Dhali mowac̱a kamu/ di’d goma simam pema? 
\q1 gom miinthus pem mo be. 
\q1  
\v 4 Haali/ miinthus pem loski aha/ ki ’kup̱i lu/ mo, 
\q1 dhali uni ’thiraa/ diṯ mmoḵal mo be. 
\q1  
\v 5 Jamam pem ’kakin mo dhali bulabul mo dhali taga ’bi/ nycine/ mo 
\q1 gom miim p̱us pem mo. 
\q1  
\v 6 Aha/ kumkunu ’twa/a ’cesh mo dhali ’dac̱al ’ko’da ’cesh mo. 
\q1 Isa yempa/ yula tente/ mo tani aha/ yakina gwolu/ mo. 
\q1  
\v 7 Haali/ empa’d pem a’di ’tu’dkunu ki mo jin ’batha’ba’th mo, 
\q1 dhali moŋkamu/ mura shuman buŋgwar is pem is mowa? 
\q1  
\v 8 Aha/ kumkunu ’twa/a ’ceshi ’baar mo dhali sirica p̱o/ ki sho’k mo. 
\q1 Aha/ ohonkina mo goma dulaṯṯ ma nyor ma dum pem mo. 
\q1  
\v 9 Tap̱a, aris mom pem kun gwon ma du mo tani mishu ki /e mo. 
\q1 Dhali ashurem pem jin wuka/ mo tani ’konuki bag ’peni /e mo be. 
\q1  
\v 10 Adum pem shwa’d ki ju’k ju’k mo dhali mom’bi’th pem ushi me’d mo e aha/ mo 
\q1 dhali apinya/ em pem jin shwa’d ki o’d mo tani, uni si’da/ uskin ’peni aha/ mo be. 
\q1  
\v 11 Imugum pem dhali uni gun nyaḵ aha/ ii ka yempa/ mo tani uni doshkin ki moŋḵo/ is ’peni isa nyor pem kun wo’cki aha/ she/ mo, 
\q1 dhala bas pem si’da/ uni doshkin isa dhana/ mo. 
\q1  
\v 12 Uni gwansan kun simmki mondiki/em pem e mo tani ’thikina gumem buni mo. 
\q1 Uni gwansan kun simmki mo e jin mina uni shi/ aha/ is mo tani oki gwo kun minu kup̱ mo 
\q1 dhali kulum gwo ibwa mmo’ce’da ’ce’d me’di isi yula tente/ mo. 
\b  
\q1  
\v 13 Hili aha/ wana e ki wathin ’diye/ mo, aha/ dinaki ciḵ toŋ kamu/ mo. 
\q1 Aha/ wana e ki wathi/ jin mol ’twa/ wal mo jin mol ’twam piti ḵa’d mo. 
\q1  
\v 14 Nye, aha/ wana e ki wathi/ jin mol gwo ciḵ mo, 
\q1 dhali e ’twa/ mo tani aha/ dara gi gwoŋ ḵucur mo. 
\q1  
\v 15 Hili e /e mo tani ayy Tap̱a, /e be ic̱orkaa/ mo be. 
\q1 A’di ta /e be, ayy Tap̱a Arumgimis pem, /e jin mini thoḵa thoḵ ’twa/ mo be. 
\q1  
\v 16 Haali/ aha/ ’thona mo ki: Uni mini dhalki bwa ki ’kuny ap̱o/ aha/ mo. 
\q1 uni gun dhu ’ba/ ki ca ap̱o/ aha/ mo ki sho’k pem yereski’d mo. 
\b  
\q1  
\v 17 Aha/ ’dishkina mmobiṯ mo, 
\q1 dhali mo jin woca is aha/ she/ mo tani a’di di’da bori aha/ ki sule/ sule/ mo. 
\q1  
\v 18 Aha/ pikina gwo gom tonthus pem jin miika/ mo, 
\q1 aha/ ḵala bwan diṯi’d gom miinthus pem mo. 
\q1  
\v 19 Uni gwansan kun ta ’kup̱ pem mo tani dar gi ’ko mo uni ’bitha’bi’th mo, 
\q1 dhali uni gwansan kun shi/i aha/ i e ki shi/ thus mo tani uni tana ris mo. 
\q1  
\v 20 Dhali uni gwansan kun raḵki aha/ tonthusi bway gom tom ’boro’d mo tani 
\q1 uni ita ’kup̱ pem kun tana ris mo haali/ aha/ baṯẖa jasi tom ’boroni ’ko’d mo. 
\q1  
\v 21 Dhalku/ ki dhal aha/ ’pen mo ma, ayy Tap̱a, 
\q1 ayy Arumgimis pem, dhalku/ ki si’d ’peni aha/ mo! 
\q1  
\v 22 Huru/ ki jahanne/ mmowoṯẖ aha/ mo, 
\q1 ayy Tap̱a, gi bway mowoṯẖ pem mo. 
\c 39  
\s1 Eya manyuḵ gway mo: goma Yaduṯẖuun. Gway ma Dawuu’d. 
\q1  
\v 1 Aha/ ona gwo mo ki: Aha/ mina ji bway pem ki e mo, 
\q1 ki aha/ mina diki mii miinthus ka le’d pem mo. 
\q1 Aha/ mina ’kali’th ’twam pem mo, 
\q1 wakan me’d jin mina ’kwanin thusi ’kowa bori aha/ mo. 
\q1  
\v 2 Aha/ usha ’twa/ wal mo dhali c̱a’bki shwamm mo, 
\q1 aha/ bu’thkina moŋḵu’th is pem mo tani toŋ kamu/ gamkaa/? 
\q1 mo ma c̱is pem thissi’di ca mo ’teki shi/ shi/ mo. 
\q1  
\v 3 Adum pem c̱a’bki ’ba’th ’ba’th e aha/ mo. 
\q1 Me’d jin tashu aha/ ki gwo kun kulumkaa/ e bwa mo tani o’d jin ’batha’ba’th shwaki’d mo, 
\q1 dhali yan’ko’d aha/ ki o gwo ka le’d pem mo ki: 
\q1  
\v 4 Tap̱a, dhalki aha/ misha ’pemen pem jin midi di ’kup̱ mo 
\q1 dhali ateem bar pem wakata mo? 
\q1 Dhalki aha/ misha mo mo, ma mondiki/em pem midi gus kata mo? 
\q1  
\v 5 Hili /e ki kara teem pem mmokuṯa/ kuṯ me’d bwam me’d ki daḵa/ mo 
\q1 dhali mondiki/em pem jin dika/ ki e mo tani ta toŋ kamu/ ibwambori jis/em pini yisa. 
\q1 Ka jiŋ gana/ aris ’kwani ’baar mo ’kokin ’twa/i ’kup̱ ’te/ mo. \qs Doshi ma dhali ’cunycuri yan mo.\qs* 
\b  
\q1  
\v 6 Ka jiŋ gana/ ’kwani iikin ki jasa ḵashira/ ma la ’te/ mo. 
\q1 Ka jiŋ gana/ uni ’koshki jis mo ki dar gi mii kun ḵala uni mii ’kup̱ pa ka pije/ mo. 
\q1 ’Kwani sugki to mo dhali mol mo mo a’di jin midi tul a’di is mo. 
\b  
\q1  
\v 7 Dhali shwane/ Tap̱a, ki to jin ta’da ta ic̱orkika/ mo? 
\q1 Mo ma ’teŋ kap̱em pem di’d e /e mo. 
\q1  
\v 8 ’Cuḵi aha/ mo ’pena ris gwom pem kun dhaŋka/ mo. 
\q1 Dhalku/ ki kar aha/ jin mina imanmii miim p̱us iwaḵ aha/ mo. 
\q1  
\v 9 Aha/ usha ’twa/ wal mo, aha/ dinaki ḵa’d ’twam pem mo, 
\q1 haali/ a’di ta /e jin miiki a’di mo. 
\q1  
\v 10 Joc̱ki mondor pini ’peni aha/ mo. 
\q1 Aha/ ’baarkina mo ki mondor ki me’d pini mo. 
\q1  
\v 11 Ki /e ki dor wathi/ dhali ḵucur a’di gom miinthus mo tani 
\q1 /e ki ’cum to jin ena a’di me’da dhurany jin shwa to jin ’ka’d a’di ’twa/ ki ’ka’da bor mo. 
\q1 Ka jiŋ gana/ aris ’kwani ’baar mo ’ko ki e ’twa/i ’kup̱ ’te/ mo. \qs Doshi ma dhali ’cunycuri yan mo.\qs* 
\b  
\q1  
\v 12 Ciḵi mon’thom pem mo ma, ayy Tap̱a, 
\q1 dhali ḵa’di ’cem pini gom moŋkom pem mo. 
\q1 Dhalku/ ki bu’th moŋḵu’th is pini ’peni jabu’th em pem mo. 
\q1 Haali/ aha/ takina yilkinam pini jin yaki’d ki yam pe mo, 
\q1 a’di jin tani pa mo, mmowa e ki ibabam pemi ’baar kadhamo/ mo. 
\q1  
\v 13 Hilki /e mo ka c̱iŋ’ko’d mo ’peni aha/ mo, ki aha/ mina gam bwaŋ ’kunyu’d mo 
\q1 nṯwa/a/ ki aha/ mina ya mo dhali diki di doḵ/e mo. 
\c 40  
\s1 Eya manyuḵ gway mo. Gway ma Dawuu’d. 
\q1  
\v 1 Aha/ c̱ora/ c̱or ki bwa jin ’kuc̱u/ ki ’kari’th gom Tap̱a mo. 
\q1 A’di ḵa’dki ’cem piti mo dhali ciḵ aha/ kom pem mo. 
\q1  
\v 2 A’di dirki aha/ ka pije/ ’peni jis jin miga/ ’taki tor sho’k ka pupush mo, 
\q1 ’peni boro’th jin c̱a’bki c̱o’do/ c̱o’do/ mo. 
\q1 A’di ki dhu sho’k pem ap̱o/ wosh mo 
\q1 dhali dhu ŋaṯgin pem mmo’ko ki ’dantar mo. 
\q1  
\v 3 A’di ki kar gway this e ’twam pem mo, 
\q1 gway jin maŋka/ Arumgimis bana mo. 
\q1 ’Kwani ka ris mini p̱ar e mo tani dhali ḵoka ḵo/ mo 
\q1 dhali dhu moŋgam gwo is buni e Tap̱a mo. 
\b  
\q1  
\v 4 Mom’bor mii gom wathi/ jin kar Tap̱a ki jim piti jin gama a’di gwo is mo, 
\q1 a’di jin diki ṯu’k mo e mo jin karu is ki ca mo, 
\q1 ki uni gwansan kun iikini per mo mmobaṯẖ gwo ma rum p̱inyconi sho’k mo. 
\q1  
\v 5 /E marki momiin tom pini kun ta momer is mo 
\q1 dhali gwom pini kun kulumkina /e ibwa ’kup̱ki am mo, ayy Tap̱a Arumgimis pem mo. 
\q1 Jamu/ p̱iyi’d jin minu kar ka p̱ar nyaḵki /e mo. 
\q1 Waḵki/ aha/ mina ’taki bah gwo mo dhali ṯor uni mo tani 
\q1 uni mini ’taki bol uni kun minu ’taki deŋ e e ka ris mo. 
\q1  
\v 6 To jin ’ciṯẖu/ ’kus mmomiiya bas mo dhali to jin c̱inu ki me’d mo tani bwam pini diki o mo. 
\q1 Hili /e ki tup̱ aha/ ’cem pem mmoshuwa shu mo. 
\q1 To jin c̱ithu/ ki o’d jin c̱inu ki me’d mo dhali jin c̱inu gom miinthus mo tani 
\q1 /e yisa ’theḵki gwo gom uni yisa. 
\q1  
\v 7 Yan’ko’d aha/ ki o gwo mo ki: Hili mo mo ma, aha/ p̱u’dkina mo. 
\q1 Eya warka/ jin ’kuc̱u/ is jin ’kwarkunu gwo ap̱o/ gom aha/ mo. 
\q1  
\v 8 Aha/ ’kunya bwa mo mmomii bwam pini mo, ayy Arumgimis pem. 
\q1 Gwoŋḵan pini jin c̱inu mo a’di di’d eya dum pem mo. 
\b  
\q1  
\v 9 Aha/ ṯorkina gwoŋ ’kunyga/ jin c̱inu gom mo jin ’cuḵuwa ’cuḵ mo 
\q1 eya dhana tul ’kup̱ mo. 
\q1 Dhali hili mo mo ma, aha/ dinaki mu’th ’twam pem mo, 
\q1 me’d jin mishkina /e aha/ mo, ayy Tap̱a. 
\q1  
\v 10 Aha/ dinaki bag mom pini jin tana /e aha/ is ki me’d mmowoṯẖ aha/ eya dum pem mo. 
\q1 Aha/ ṯorkina gwo mo goma isiŋ ganam pini jin tana /e mo dhali gom bway gi mowoṯẖ pini mo. 
\q1 Aha/ dinaki us mo/en pini jin ṯelu sho’k mo dhali mo ma isiŋ ganam pini jin tana /e mo. 
\q1 ’pena dhana tul ’kup̱ ’kwani mo. 
\q1  
\v 11 Dhalku/ ki bu’th momiimiim pini ’peni aha/ mo, ayy Tap̱a. 
\q1 Dhalki mo/en pini jin ṯelu sho’k mo dhali mo ma isiŋ ganam pini jin tana /e mo tani ’tash aha/ ’twa/ ki sule/ sule/ mo. 
\q1  
\v 12 Haali/ tonthus uni ’kamki aha/ mo dhali uni molu deŋ e mo. 
\q1 Miinthus pem uni ḵalki aha/ ka ’cesh mo ntagi aha/ mola mo mo. 
\q1 Uni tana ris ka ris kun bolina mur ’kup̱ pem e mo. 
\q1 Adum pem ush aha/ me’di e mo. 
\b  
\q1  
\v 13 Ba miiyi ki ’bore/ bala, ayy Tap̱a, mmo’cuḵ aha/ mo. 
\q1 Ayy Tap̱a, huru/ ki jahanne/ ma mmowoṯẖ aha/ mo. 
\q1  
\v 14 Dhalki uni dhunu mo ma ki mo ma ’the is mo dhali duŋkuru/ ’kup̱ isi monṯal ’de/ mo 
\q1 uni gwansan kun simmki mii e mo tani mmo/uṯẖ mondiki/em pem mo. 
\q1 Dhalki uni ṯu’kkunu ka nyaŋ’ko’d mo dhali ’doyu/ e mo jin ushuwa taḵ taḵ mo 
\q1 uni gun ona bwa ki shi/ aha/ is mo. 
\q1  
\v 15 Dhalki uni meren kagahara gom mon’the is buni mo 
\q1 uni gun o aha/ gwo mo ki: Soso, soso. 
\q1  
\v 16 Hili dhalki uni gwansani ’baar mo kun simmki /e e mo tani 
\q1 ’kunya bwa mo dhali ’bor bwa mo e /e mo. 
\q1 Dhalki uni gwansan kun eni bway gi mowoṯẖ pini mo tani 
\q1 ṯikir gwo o mo ki: Tap̱a a’di i/eḵa/ eḵ mo. 
\q1  
\v 17 Gom aha/ mo tani aha/ hatha’ko’d ki ha’th mo dhali mina mii ta gi to mo, 
\q1 hili Tap̱a a’di kulumki gwo ibwa gom aha/ mo. 
\q1 /E ta a’dim pem jin woṯẖki aha/ mo dhali a’dim pem jin ’cuḵki aha/ mo. 
\q1 Dhalku/ ki ta adiiṯe/, ayy Arumgimis pem! 
\c 41  
\s1 Eya manyuḵ gway mo. Gway ma Dawuu’d. 
\q1  
\v 1 Mom’bor mii gom a’di jin hili uni gun hatha’ko’di e mo. 
\q1 Tap̱a ’cuḵki a’di ka tee jin ṯoju a’di aṯo’c bwa mo. 
\q1  
\v 2 Tap̱a woṯẖki a’di mo dhali kar a’di ki e mo. 
\q1 A’di yuḵu gway ka man’boru mii e mony’cesh mo. 
\q1 /E diki c̱i a’di e bwa gi uni gun ta ’kup̱ ki a’di mo. 
\q1  
\v 3 Tap̱a a’di thip̱ a’di ’ko’da cim piti jin isha a’di mmo’ba’th mo. 
\q1 E mom’ba’th piti mo tani a’di ki wac̱ a’di ’pena ris isa nyor kun ’koshki a’di mo. 
\q1  
\v 4 Gom aha/ mo tani, aha/ ona gwo mo ki: Ayy Tap̱a, miiyi mii ma ’the gom aha/ mo ma. 
\q1 Dhali wac̱i aha/ mo, haali/ aha/ miikina miinthusa p̱o/ /e mo be. 
\q1  
\v 5 Uni gun ta ’kup̱ ki aha/ mo o gwo e aha/ eya adun dup̱ buni mo ki: 
\q1 Kakasja imina a’di iwu mo? dhali gway piti ki ’ce’d sho’k mo? 
\q1  
\v 6 Dhali ki jan ṯal ’deŋ kamu/ p̱u’dki’d mmop̱ar aha/ e mo tani a’di ki bah gwo kun ’kon isi bwa ’te/ mo, 
\q1 ka yiha/ ka dum piti tulu’da ris mii ma pibi is mo. 
\q1 Ki a’di ya’d ka pije/ mo tani a’di ki wagar gwo mo. 
\q1  
\v 7 Aris uni gwansan kun shi/ki aha/ i e mo tani ṯorkina ṯor ki ḵako/ mmonṯal ’de/ gom aha/ mo. 
\q1 Uni ki gwalal buni mo tani uni kulumki gwo shi/in ibwa gom aha/ mo, kun bol tiya e mo. 
\q1  
\v 8 Uni ki o gwo mo ki, To jin wunu ḵara biṯi’da p̱o/ a’di ba/. 
\q1 A’di midi cu mis doḵ/eya? ma ’peni mo jin isha a’di mo. 
\q1  
\v 9 Isi kani amugum pem gana/ jin di’da bori aha/ jin gamka/ gwo is mo tani 
\q1 a’di jin shwaki tonṯem pem mo tani a’di ’de’kki ’penaṯiŋkilam piti ap̱o/ aha/ mo. 
\q1  
\v 10 Hili /e ayy Tap̱a, miiyi mii ma ’the ap̱o/ aha/ mo, 
\q1 dhali ’deki aha/ ki mis mo ki aha/ mina ’taki mu’th uni ’twa/ mo. 
\b  
\q1  
\v 11 Gom mii yansan mo tani aha/ misha ki /e ’bora bwa ki aha/ mo, 
\q1 ki a’di jin ta ’kup̱ ki aha/ mo tani diki p̱i aha/ e mo be. 
\q1  
\v 12 Hili /e bu’thki aha/ mo gom miim pem jin dar gi ŋadhum mo, 
\q1 dhali /e ki kar aha/ e buŋ’kus pini ki sule/ sule/ mo. 
\b  
\q1  
\v 13 Mom’bor mii midi di gom Tap̱a mo, a’di jin ta Arumgimis gi ’Kwani ma Israyiil mo, 
\q1 ’peni mo jin ’konuki/e ki sule/ sule/ ya ye ’ba/ mo ntagi mo jin ’konuki/e ki sule/ sule/ ya ye ’ba/ mo. 
\q1 Amen dhali doḵ/e Amen mo. 
\c 42  
\ms1 AWARKA/ JIN ’KONA ’BANI SU/ MO. 
\s1 Eya manyuḵ gway mo. Gway gom iya/ ma Guurah mo jin yethu sho’k mo. 
\q1  
\v 1 Me’da sheṯ jin ḵara ce jin ta yoll mo a’di jin ona bwa ki yi’de/ jin kasha e ki kash mo tani 
\q1 wakan si’da/ aḵashiram pem c̱orki’da c̱or gom /e mo, ayy Tap̱a Arumgimis. 
\q1  
\v 2 Aḵashiram pem budha ṯe/ miiŋḵar/e goma Arumgimis mo, 
\q1 goma Arumgimis jin di ki e mo. 
\q1 Ki aha/ mina p̱u’d kakasja dhali hil bwam/e ma Arumgimis mo? 
\q1  
\v 3 Jabu’th em pem a’di warki’d ki tonṯem pem gi montee mo 
\q1 dhali mon’thiny mo, 
\q1 ka yiha/ ki ’kwani ’kon mmorash aha/ gwo o mo ki: 
\q1 Mane Arumgimis pini mane? 
\q1  
\v 4 To gwansan mo tani uni kakika/ e mo, 
\q1 me’d jin wolkika/ ḵashiram pem ka pije/ mo: 
\q1 me’d jin yaka/ nyaḵka buhany ’kwani mo 
\q1 dhali shu uni bway ka jintura/ e gu’b ma Arumgimis mo, 
\q1 ki bwam ’boro’d kun ḵumu cuuwa/ mo dhali yuḵ gway kun ’boruwa ’bor bwa i is mo, 
\q1 me’d jin dhukin ma waambuhany ’kwani kun ḵogu acim mo. 
\b  
\q1  
\v 5 Katinta ibiṯu/ /e eya ’cesh mo, ayy aḵashiram pem mo, 
\q1 dhali atinta i/usha /e me’d kan e aha/ mo? 
\q1 Tayi ka ’teŋ kap̱e/ eya Arumgimis mo. Haali/ aha/ mina doḵ/e maŋ a’di mo, 
\q1 a’di jin ta’da manwoṯẖ pem dhali Arumgimis pem mo. 
\q1  
\v 6 Aḵashiram pem a’di biṯu/ ’ko’da ’cesh e aha/ mo. 
\q1 Wakan aha/ kakina /e e mo 
\q1 ’pena ’cesh gi Pan Uurdun mo dhali gi Pan Harmuun mo 
\q1 dhali ’peni ’Kuwosh ma Misar mo. 
\q1  
\v 7 Moŋ’kulga/ jin yuḵu ki moŋ’kulgaŋ kamu/ mo 
\q1 me’d jin dora yi’deŋ ḵuku/ ḵukum pini mo. 
\q1 Aris yi’dem pini kun bir bakal mo dhali aris eŋ ḵuthar yi’dem pini 
\q1 uni ḵalki aha/ ka ’cesh mo. 
\q1  
\v 8 Ki montee isa yempa/ mo tani Tap̱a a’di ḵanki mo/en piti jin ṯelu sho’k mo 
\q1 dhali mon’thiny mo tani gway piti di’d nyaḵki aha/ mo, 
\q1 mmo’thowa Arumgimis gi mondiki/em pem mo. 
\b  
\q1  
\v 9 Aha/ ona gwo eya Arumgimis jin ta wosh pem mo ki: 
\q1 Atinta iŋana /e aha/ kan mo? 
\q1 Katinta gara/ imiga/ c̱a’b jasi gwolu/ kan mo 
\q1 gom mosiri’c gi uni kun ta ’kup̱ ki aha/ kan mo. 
\q1  
\v 10 Me’d wathi/ jin ’disha ’twa/ mmowu mo ’peni jama/ jin doruwa dor e buŋgwar is pem mo tani 
\q1 uni kun ta ’kup̱ ki aha/ mo sorki aha/ mo, 
\q1 dhali ka yiha/ mo tani uni ’kon mmorash aha/ gwo o mo ki: 
\q1 Mane Arumgimis pini mane? 
\q1  
\v 11 Katinta ibiṯu/ /e eya ’cesh mo, ayy aḵashiram pem mo, 
\q1 dhali atinta i/usha /e me’d kan e aha/ mo? 
\q1 Tayi ka ’teŋ kap̱e/ eya Arumgimis mo. Haali/ aha/ mina doḵ/e maŋ a’di mo, 
\q1 a’di jin ta’da manwoṯẖ pem dhali Arumgimis pem mo. 
\c 43  
\q1  
\v 1 Yeyi aha/ mo, ayy Arumgimis dhali ’ce’di gwo she/ gom to jin raḵi aha/ mo 
\q1 ap̱o/ ’kwani kun ’koki mii miiŋḵar/e mo, 
\q1 dhali ’peni ’kwani kun ta imanhe’k e mo, 
\q1 dhali ’peni ’kwani kun ’konuki dhu ki mo ma ḵar/e mo tani ’cuḵi aha/ mo. 
\q1  
\v 2 Haali/ /e tana Arumgimis a’di jin bu’thka/ mom pem jin hurga/ jwa mo be. 
\q1 Katinta biṯa /e aha/ asho kan mo? 
\q1 Dhali tonta imiga/ c̱a’b jasi gwolu/ kan mo 
\q1 gom uni kun siri’c aha/ ki sho’k mo kun ta ’kup̱ pem mo? 
\b  
\q1  
\v 3 Ayy, hashi moŋkush pini mo dhali gwoŋ ganam pini mo. 
\q1 Dhalki uni shu aha/ bway mo. 
\q1 Dhalki uni sus aha/ mo e ’kuwosh pini jin ḵogu mo 
\q1 dhali mom pini jin c̱a’ba /e mo. 
\q1  
\v 4 Dhali yan’ko’d aha/ mina ya mo e mo ma gwaṯa/ jin ’ciṯẖu/ to ’kus goma Arumgimis mo, 
\q1 eya Arumgimis jin ’kunyka/ bwa ki ’kuny icine/ kagahara mo. 
\q1 Dhali aha/ mina maŋ /e ka dheŋdhenye/ jin ’kon ma shu/i pesu/ mo, 
\q1 ayy Arumgimis jin ta Arumgimis pem mo. 
\q1  
\v 5 Katinta ibiṯu/ /e eya ’cesh mo, ayy aḵashiram pem mo, 
\q1 dhali atinta i/usha /e me’d kan e aha/ mo? 
\q1 Tayi ka ’teŋ kap̱e/ eya Arumgimis mo. Haali/ aha/ mina doḵ/e maŋ a’di mo, 
\q1 a’di jin ta’da manwoṯẖ pem dhali Arumgimis pem mo. 
\c 44  
\s1 Eya Manyuḵ gway mo. Gway gom iya/ ma Guurah jin yedhu sho’k mo. 
\q1  
\v 1 Aman ciḵkina gwo ki ’cem bam mo, ayy Arumgimis mo, 
\q1 ibabam bam ṯorki aman gwo mo, 
\q1 gom miim pini kun miikina /e mmothim ka teem buni mo, 
\q1 ka tee ’peni kadhamo/ mo. 
\q1  
\v 2 /E ki me’d piniŋ gana/ mo tani /e ki ura ris kala tiya ka pije/ mo 
\q1 dhali hili uni mo tani /e ki c̱u’th uni mo. 
\q1 /E ki dor ’kwani ka ris mo, 
\q1 dhali hili uni mo tani /e ki dhu uni ki ’kus mo. 
\q1  
\v 3 Haali/ a’di ki gandal buni yisa igamkina uniya ’cesh yan adu is mo yisa, 
\q1 walla si’da/ abim buni diki c̱i uni mom’bi’th mo, 
\q1 hili me’da bim poros pini mo dhali abim pini mo, 
\q1 dhali moŋkush ’peni bwam/em pini jin kushki mo mo, 
\q1 haali/ /e ’kunykina bwa e uni mo be. 
\b  
\q1  
\v 4 /E tana Maliḵ pem mo dhali Arumgimis pem mo, 
\q1 a’di jin ’kawurki’da ’kawur mo gom momp̱inu mii e ma Yakuub mo. 
\q1  
\v 5 Ki /e mo tani am ki ṯan uni kun ta ’kup̱ bam ka bor mo. 
\q1 Dhali ki gway pini mo tani am ki yap̱ uni gwahan ki sho’k mo kun gam am ’kup̱ mmo/as mo. 
\q1  
\v 6 Haali/ bwam pem mo tani aha/ dinaki gam gwo is gom a’di mo, 
\q1 walla gandal pem si’da/ diki ta aha/ is ki me’d mo. 
\q1  
\v 7 Hili /e woṯẖki aman mo ’peni uni kun ta ’kup̱ ki am mo, 
\q1 dhali kar to ibwaman uni kun shi/i aman i e mo jin midi duŋgur uni ’kup̱ ’kup̱ is mo. 
\q1  
\v 8 Eya Arumgimis mo tani aman dhukina ’ba/ ki ca ki ṯikir ṯikir mo, 
\q1 dhali aman mina c̱i /e momaŋ gom gway pini ki sule/ sule/ mo. \qs Doshi ma dhali ’cunycuri yan mo.\qs* 
\b  
\q1  
\v 9 Hili /e ki ṯa’k am ka pije/ mo dhali dhu am ki mondhu is ki gwa’d mo, 
\q1 dhali /e diki ya ka pije/ nyaḵki ’kwani ma meem bam mo. 
\q1  
\v 10 /E ki dhu am mmodoḵ ka nyaŋ’ko’d mo ’peni uni gun ’kwar am ka gwap̱i/ mo. 
\q1 Dhali uni kun ta ’kup̱ ki am mo tani dilki aman to mo. 
\q1  
\v 11 /E ki dhu am me’d ḵa’bal kun minu ’ciṯẖ ’kus mo, 
\q1 dhali /e ki c̱eker aman bwa mo e bwaman kal gi ’kwaniny’ceshi ’baar mo. 
\q1  
\v 12 /E ki yol ’kwanim pini ka maliim gana/ mo, 
\q1 /e ki ḵan gwo ki uni minu ’koki yol ka thaman kun caaca mo. 
\q1  
\v 13 /E ki dhu am ki uni gun nyaḵ ’ko ki am mmoc̱i aman gura/ mo, 
\q1 dhali aman dup̱u i e dhali ṯẖuny ’twa/ i is ki uni gwansan kun ’kamki am is mo. 
\q1  
\v 14 Dhali /e ki dhu am ki ku gun miinu mii ka maḵ mo e bwaman kal gi ’kwaniny’cesh mo. 
\q1 dhali aman p̱e’thkunu mmopir ’kup̱i is e bwaman ’kwaniny’cesh mo. 
\q1  
\v 15 Ka cim ’baar mo mom pem jin darka/ ka ’the mo di’di bwambori aha/ mo, 
\q1 dhali mon’the is a’di kumki aha/ bwam/em pem mo, 
\q1  
\v 16 gom gwo gi uni kun c̱iki aman gura/ mo dhali imansor aman mo tani 
\q1 dhali e bwambor uni gun ta ’kup̱ mo dhali a’di jin ŋap̱a’d mmori/a ri’c mo. 
\b  
\q1  
\v 17 Aris to gwansan p̱u’dki’d ap̱o/ aman mo, 
\q1 ba aman ’konaki ŋa /e mo, 
\q1 walla aman ’konaki ta thus gom gwom pini jin gamu me’d mo. 
\q1  
\v 18 Adum bam ’koki doḵ ka nyaŋ’ko’d mo, 
\q1 walla ŋaṯgin bam ’koki dheres ’peni bway pini mo 
\q1  
\v 19 ki /e mini ’taki ’ce’d am mo ’peni mo jin ’kon ma jala/ nycine/ mo, 
\q1 dhali kum am ’kup̱ ki mondhurumi’d jin ’kula’kul mo. 
\b  
\q1  
\v 20 Waḵki/ aman ŋakina gway ma Arumgimis bam mo tani, 
\q1 walla he’th me’d bam goma rum p̱inycon mo tani, 
\q1  
\v 21 min ma Arumgimis ’taki diki gam mii yansana? 
\q1 Haali/ a’di mishki to kun ’kona duŋ ’kwani ka ḵwal is mo. 
\q1  
\v 22 Yisa, gom gway pini mo tani aman ’koshkunu yula tente/ mo, 
\q1 dhali aman dhukunu mo me’d ḵa’bal kun dhunu mmo’ciṯẖ ’kus mo be. 
\q1  
\v 23 Muri is pini mo. Ata isha /e e kan mo, ayy Tap̱a? 
\q1 Meri /e e mo. Dhalku/ ki ṯa’k am asho ki sule/ sule/ mo. 
\q1  
\v 24 Katinta ibaga /e jis/em pini mo? 
\q1 Katinta iŋana /e mom bam jin woja is am she/ mo dhali mo jin siri’ckunu am ki sho’k mo? 
\q1  
\v 25 Haala ḵashiram bam a’di kumkunu ’twa/a ’cesh e bwam bu’d mo, 
\q1 dhali buŋgwar is bam ishkina ’cesh ki rap̱ rap̱ mo. 
\q1  
\v 26 Cuyi mis mo dhali yayu/ mmowoṯẖ aman mo. 
\q1 ’Cuḵi aman mo gom gway gi mo/en pini jin ṯelu sho’k mo. 
\c 45  
\s1 Eya manyuḵ gway mo, isi ki gwo gi jandin to mo. Gway jin yuḵu mmoye’th iya/ ma Guurah sho’k mo. Gway gi mo/en mo. 
\q1  
\v 1 Adum pem a’di ’tu’du/ mo ki tom ’borga/ jin di’di bwaman mo mmo/o mo. 
\q1 Aha/ bahkina gwom pem eya maliḵ mo. 
\q1 Ale’d pem a’di wana e ka galama riisha/ jin thoson ma man’kwar to is hila/ mo. 
\q1  
\v 2 /E ta a’di jin onu bwa ki nyanye/ ki iya/ gi ’kwani mo. 
\q1 A’the a’di wolkunuwa p̱owa le’d pini mo. 
\q1 Wakan Arumgimis ’borki /e mii ki sule/ sule/ mo. 
\q1  
\v 3 Deḵi gandal pini ap̱owa wum pini mo, ayy /en ’de/ jin c̱a’bki dem dem mo 
\q1 e monycam pini mo dhali e mo/eḵ pini mo. 
\q1  
\v 4 E mo/eḵ pini mo tani meri mo e mo jin p̱inu mii e mo 
\q1 gom gway gi gwoŋ gana/ mo dhali gom mo jin minu cesh she/ mo 
\q1 gom mo jin minu dhu bwa ki gwa’d ki miiŋḵar/e mo. 
\q1 Dhalki me’da bim poros pini ṯorki /e gwo gom dhan mii jin caaca mo. 
\q1  
\v 5 Athop̱am pini uni kaaka mo eya du uni kun ta ’kup̱ ma maliḵ mo. 
\q1 Dhali ’kwani ṯa’kkin e bwaŋ’kwariny pini mo. 
\b  
\q1  
\v 6 Ḵursim pini a’di ta ji ma Arumgimis jin di’d ki sule/ sule/ mo. 
\q1 Cwa ma maliḵ pini a’di ta cwa jin ’konuki mii mii ka gwar ’de/ mo. 
\q1  
\v 7 /E eni mo jin miinu miiŋḵar/e mo dhali shi/ mo jin miinu to gun ’coḵa’coḵ i e mo. 
\q1 Wakan Arumgimis jin ta’da Arumgimis pini mo tani a’di ’koshki /e ki monyca mo 
\q1 ka yin gi mom’bor bwa ap̱o/ uni gun ta cim pini mo. 
\q1  
\v 8 Burrinye/ ma p̱om pini a’di ter mo kagahara mo gom yiman cwaŋ ḵuyu’d ’pena murr dhali yiman gi cwa jin wana e ka ’kwaṯan mo dhali yiman cwa jin yuḵu gway ka saliiḵa mo. 
\q1 ’Peni mo ma maliḵ pini jin ta sheny je mo tani ashun dheŋdhenye/ uni buḵkunu mo mmo’kuny /e bwa mo. 
\q1  
\v 9 I’bwa/ gi imaliḵ mo uni ’koni bwaman up̱ pini kun taḵu mo. 
\q1 E me’da bim poros pini mo tani ayim jin ta asha maliḵ a’di doshki’d ki ’dolkon ’peni Pa Up̱ir jin hidhu i/is ma yim mo. 
\q1  
\v 10 Ciḵi gwo mo ma, ayy ’bwa/um, dhali mishi isi gwo dhali ḵa’di ’cem pini mo. 
\q1 Dhalki ’kwanim pini ’pen mo dhali gu’b gi icim mo. 
\q1  
\v 11 Dhala maliḵ mina bwa o gom jarom pini mo. 
\q1 Me’d jin tana a’di tap̱am pini mo tani luŋi a’di mo. 
\q1  
\v 12 ’Kwani gi Pan Sur uni mini sus mo ma ’them pini ki to kun c̱inu ki me’d mo, 
\q1 uni ’peni ’kwani kun ta pa ki pa mo,  
\v 13 ’pena ris to gun ’kona e ki she/ ki she/ kun tanu mo. 
\q1 ’Bwa/ ma Maliḵ a’di shumkunu ki burrinye/ jin shonu ka ce e ki ’dolkoni e mo. 
\q1  
\v 14 Ka ris jamas burrinye/ ki she/ ki she/ mo tani ayim suskunu amaliḵ mo 
\q1 nyaḵki nyaranyaŋa’b ma yim jin suski a’di mo, uni gun iiyin nyaḵka yim mo. 
\q1  
\v 15 Ki bwaŋ ’kunyu’d dhali ki bwaŋ ’kunyka/ mo tani uni sus uni mmonṯal ’de/ mo 
\q1 me’d jin cic̱kina uni gu’b ma maliḵ mo be. 
\b  
\q1  
\v 16 Mmodhal mii yansan e i is gom ibabam bum mo tani a’di midi ta iya/m bum mo. 
\q1 Dhali /e mini dhu uni mmota iya/ gi mony’ceshi ’baar mo be. 
\q1  
\v 17 Aha/ mina kar gway pini ki a’di midi ’ciṯẖa cim bwa mo jin minu taḵ a’di mo eya risa nyaḵum yil gi ’kwani mo. 
\q1 Wakan ’kwani ’baar mo mini maŋ /e mo gom ki sule/ mo dhali ki sule/ mo. 
\c 46  
\s1 Eya manyuḵ gway mo. Gway gom iya/ ma Guurah mo. Isi gi gwo gom a’di jin di’d ki nyaraŋ gana/ mo. Gway jin yuḵu mo. 
\q1  
\v 1 Arumgimis ta a’dim bana jin hura ana jwa icine/ mo dhali mom’bi’th mo, 
\q1 a’di jin ’dishi’d ka yempa/ mmowoṯẖa woṯẖ ’peni monṯo’c bwa mo. 
\q1  
\v 2 Wakan ana mina ’koki ḵo/ is mo, ma waḵki/ mony’cesh midi aḵ jamas e mo, 
\q1 ma dhali waḵka ris wosh kun turatur si’da/ mini ’taki yiḵin is mo e bwaman ma duŋ ḵumma/ yi’de/ mo, 
\q1  
\v 3 ba yi’de/ a’di gwokina is mo dhali seya gabusha/ mo, 
\q1 ba dhan wosha turga/ uni deekin mo ka dulaṯṯ piti mo. \qs Doshi ma dhali ’cunycuri yan mo.\qs* 
\b  
\q1  
\v 4 Yi’de/ jin kasha e jin gusu’d a’di jin kar ’peŋkuman Bampa/ ma Arumgimis ki bwaŋ ’kunyka/ mo, 
\q1 dhali mo jin ḵogu jin ta mo gi a’di jin Eḵa/ Eḵ mo. 
\q1  
\v 5 Arumgimis a’di di’di bwaman ma yim mo. Ayim minu mol joc̱ mo. 
\q1 Arumgimis midi woṯẖa yim ki ’dishe/ shunsan mo. 
\q1  
\v 6 Kal gi ’kwaniny’cesh uni shwakina bumburush mo. Dhala risa hakuuma kun ’kona ’cesh mo uni yaki yil mo mmoḵala mo uni mo. 
\q1 A’di bahki gwo ki ’twam piti mo tani mony’cesh waki’d mo be. 
\q1  
\v 7 Tap̱a gi momis mo tani a’di nyaḵki di ki ana mo. 
\q1 Arumgimis ma Yakuub a’di ta jim bana jin hura ana jwa icine/ mo. \qs Doshi ma dhali ’cunycuri yan mo.\qs* 
\b  
\q1  
\v 8 Iiyu/ ma, hili mo mo ma, mii kun miina Tap̱a mo, 
\q1 a’di jin wagaski mo jin ’ce’du/ sho’k e mony’cesh mo. 
\q1  
\v 9 A’di doshki mo ma mee kun asu mo e ’pemen gi mony’ceshi ’baar mo. 
\q1 A’di ’ce’dki’da bwaa mo dhali ṯosha mee mo. 
\q1 A’di ki c̱itha arabiyya kun dira shumarum ki o’d mo. 
\q1  
\v 10 Doshi ka ḵu’th is naskina/ mo dhali mishi gwo ’ban ki aha/ tana Arumgimis mo. 
\q1 Aha/ karu ki ca e kal gi ’kwaniny’cesh mo. 
\q1 Dhali aha/ karu ki ca e mony’cesh mo be. 
\q1  
\v 11 Tap̱a gi momis mo tani a’di nyaḵki di ki ana mo. 
\q1 Arumgimis ma Yakuub a’di ta jim bana jin hura ana jwa icine/ mo. \qs Doshi ma dhali ’cunycuri yan mo.\qs* 
\c 47  
\s1 Eya manyuḵ gway mo. Gway gom iya/ ma Guurah mo. 
\q1  
\v 1 Tori me’d bum mo, aris ’kwani ’baar mo. 
\q1 Ḵumi cuuwa/ mo goma Arumgimis mo ki gway jin eḵu/ ki nyanye/ gom bwaŋ ’kunyka/ mo. 
\q1  
\v 2 Haali/ Tap̱a, a’di jin Caa e ki Ca mo tani a’di ḵa/aḵa/ mo, 
\q1 a’di jin ta dhana Maliḵ ap̱o/ mony’ceshi ’baar mo. 
\q1  
\v 3 A’di ki dhuwa ris ’kwani e bwaŋ’kwariny ana mo 
\q1 dhali aris ’kwani e bwaŋ’kwariny sho’k bana mo. 
\q1  
\v 4 A’di ki kwany mal bana gom ana mo, 
\q1 ’ba/ jin kar ma Yakuub ki ca a’di jin ena a’di mo be. \qs Doshi ma dhali ’cunycuri yan mo.\qs* 
\b  
\q1  
\v 5 Arumgimis shinki bway momis cuuwa/ ilu/ mo be, 
\q1 dhali Tap̱a ki ko ma poome/ mo. 
\q1  
\v 6 Yuḵi gway mmomaŋ Arumgimis mo, yuḵi gway mmomaŋa maŋ mo. 
\q1 Yuḵi gway mmomaŋa Maliḵ bana mo, yuḵi gway mmomaŋa maŋ mo. 
\q1  
\v 7 Haali/ Arumgimis a’di ta’da Maliḵ gom mony’ceshi ’baar mo. 
\q1 Yuḵi gway mmomaŋa maŋ ki gway jin yedhuwa ye’th sho’k mo. 
\b  
\q1  
\v 8 Arumgimis miiki miin tap̱a ap̱owa ris kal gi ’kwaniny’cesh mo. 
\q1 Arumgimis c̱a’bki’da p̱owa ḵursim piti jin ḵogu mo. 
\q1  
\v 9 Iya/ gi ’kwani mo tani uni tulki isi monṯal ’de/ mo 
\q1 me’d ’kwani ma Arumgimis ma Ibrahiim mo. 
\q1 Haala goŋgoro/ jin ta ji gi mony’cesh mo tani a’di cil ma Arumgimis mo be. 
\q1 A’di karu ki ca jin eḵa/ eḵ mo. 
\c 48  
\s1 Gway jin yuḵu gom iya/ ma Guurah mo. 
\q1  
\v 1 Tap̱a a’di ta a’di jin ca’d mo dhali ta a’di jin ca’d jin minu maŋ mo 
\q1 e ’peŋkuman bampa/ ma Arumgimis bana mo. 
\q1  
\v 2 Dhali e ’kuwosha turgam piti jin turatur jin ḵogu mo, dhali jarom piti ki tur mo, 
\q1 a’di ta moŋ’kunyka/ gom ’kwaniny’ceshi ’baar mo. 
\q1 A’di jin ta Wosh ma Sihyuun mo jin di’d isa dhana/ ki ’ban ma bim poros mo, 
\q1 a’di jin ta ’peŋkuman bampa/ ma dhana Maliḵ mo. 
\q1  
\v 3 E bwaman gi gu’b mo gom montur piti mo tani 
\q1 Arumgimis ki ṯor is piti eya tente/ ki a’di ta a’di jin ’ce’de’da ’ce’d she/ mo. 
\b  
\q1  
\v 4 Bahili, imaliḵ uni tulki ’kup̱ mo, 
\q1 uni p̱u’dkini monṯal ’de/ mo be. 
\q1  
\v 5 Isi me’d jin p̱arkina uni a’di e mo tani uni merkin kagahara mo. 
\q1 Uni ’kokunu mmoduŋgur ’kup̱ is mo dhali uni sokin mo be. 
\q1  
\v 6 Mo jin deenu is ki bir bir mo tani a’di bu’thki uni mo, 
\q1 dhali uni ’pe’dki she/ me’da ’bom jin shwan ma ’ci mmomuri dho’th mo. 
\q1  
\v 7 Ki ’tham ki mom’pesho’k poshki’d mo tani /e ki p̱or uni bwa mo 
\q1 uni gun tana ḵur yi’de/ gi Pan Tarshiish mo. 
\q1  
\v 8 Me’d jin ciḵkina ana gwo mo tani wakan si’da/ p̱arkina ana e mo, 
\q1 e ’peŋkuman bampa/ gi Tap̱a gi momis mo, 
\q1 dhali e ’peŋkuman bampa/ ma Arumgimis bana mo, 
\q1 a’di jin ṯel ma Arumgimis sho’k ki sule/ sule/ mo. \qs Doshi ma dhali ’cunycuri yan mo.\qs* 
\b  
\q1  
\v 9 Aman kulumkina gwo ibwa gom mo/en pini jin ṯelu sho’k mo, ayy Arumgimis, 
\q1 e bwaman gu’b gi mondheleladhelel pini mo. 
\q1  
\v 10 Me’d gway pini mo tani, ayy Arumgimis mo, 
\q1 wakan momaŋ pini a’di jidhirki’d e ’pemen gi mony’cesh mo. 
\q1 Me’da bim poros pini mo tani a’di ’tu’dkunu ki momp̱i mii e mo. 
\q1  
\v 11 Dhalki Wosh ma Sihyuun a’di ’kunya bwa mo. 
\q1 Dhali dhalki i’bwa/ gi ’Kwani Yahuuda/ uni ’kunya bwa mo gom mondwall gwom pini mo. 
\b  
\q1  
\v 12 Iiyi mmo’kara Sihyuun mo, dhali iiyi ka kul is mmo’kama yim is mo, 
\q1 deŋi aris gu’b ma yim kun turatur e mo, 
\q1  
\v 13 hili isi gwo i e ki ’bore/ goma cur ma yim mo, 
\q1 iiyi e bwaman mo ma, e mo ma yim kun turatur mo 
\q1 ki um mini mii ṯora nyaḵum yil ’kwani gwo i’ko’d mo, 
\q1  
\v 14 ki a’di yansan ta’da Arumgimis mo, 
\q1 a’di jin ta’da Arumgimis bana mo gom ki sule/ dhali ki sule/ mo. 
\q1 A’di midi ta jim bana jin midi shu ana bway ki sule/ sule/ mo. 
\c 49  
\s1 Eya manyuḵ gway mo. Gway jin yuḵu gom iya/ ma Guurah mo. 
\q1  
\v 1 Ciḵi gwo yansan mo ma, aris ’kwani ’baar mo. 
\q1 Dhali c̱iyi ’cem bum mo, aris um gun ’kokin e mony’cesh mo, 
\q1  
\v 2 um gun gwa’da is mo dhali um gun ’bap̱kin mo, 
\q1 dhali kun ta pa ki pa mo dhali kun hatha’do’d si’da/ mmonṯal ’de/ mo. 
\q1  
\v 3 ’Twa/ pem midi ṯor gwo gom moyuḵ mo. 
\q1 Dhali gwom pem jin kulumka/ eya du mo tani minu mish ’ban mo be. 
\q1  
\v 4 Aha/ mina ḵa’d ’cem pem ki gwom ’bi’th/e mo. 
\q1 Aha/ mina gam gwom pem jin ’ce’dka/ agagala/ mo ki ko ma dheŋdhenye/ jin ’kon ma shu/i pesu/ mo. 
\q1  
\v 5 Ki gomatinta imiga/ ḵo/ is goma risa tente/ kun ṯoju aha/ bwa mo, 
\q1 ki imanmii tonthus kun ṯoci aha/ ’kus mo tani ’kamki aha/ mo? 
\q1  
\v 6 Uni gun ta ’kwaniŋ gwaṯẖ kun ’ko ki ’kus gom tom buni kun tana uni mo 
\q1 dhali dhu ’ba/ ki ca gom tom buni kun tana uni kun ishkin ka enthus ki pa jin tana uni mo? 
\q1  
\v 7 Ka jiŋ gana/ wathiŋ kamu/ p̱iyi’d jin midi wan is piti ’ba/ mo, 
\q1 walla c̱iya Arumgimis she/ yol gom mondiki/em piti mo, 
\q1  
\v 8 haali/ mo jin wanu ’ba/ gom mondiki/em piti mo tani a’di ’bitha yol she/ ki ’bi’th mo, 
\q1 dhali midi mol gam ki sule/ sule/ mo, 
\q1  
\v 9 ki a’di midi ’taki ṯikir di ki e ki sule/ sule/ mo, 
\q1 dhali mol jisa ’kulga/ p̱ar e mo. 
\q1  
\v 10 Nye, a’di midi p̱ar e ka jiŋ gana/ ki isi ’kwani kun yuḵayuḵ wukin mo, 
\q1 uni gun ta p̱us dhali uni gun dar gi bwaŋ’kup̱ mo tani uni mini mii inyaḵ ’ce’d sho’k imonṯal ’de/ mo 
\q1 dhali dhal tom buni kun tana uni pa ki pa ki unin tiya mo be. 
\q1  
\v 11 Jis jwam buni mo tani a’di ta pam buni jin mina uni ’ko ki sule/ sule/ mo, 
\q1 a’di jin ta mo jin mina uni i’ko nyaḵka ris ’kwani ma nyaḵum yil buni mo, 
\q1 ba uni ṯoshki yuḵa ’cesh gway ki jim buni mo. 
\q1  
\v 12 Wathi/ mol c̱a’b ki e e ’penkap̱an piti jin tana a’di mo, 
\q1 a’di wana e ki tonycuḵ kun ’ce’dki sho’k mo. 
\q1  
\v 13 A’di yansan ta ’pemen gi uni gwansan kun ta p̱us mo kun wuna wuny jwa i is mo, 
\q1 a’di ta ’pemen gi uni gwansan kun ’bora bwa gom tom buni gun pwaḵkunu uni mo. \qs Doshi ma dhali ’cunycuri yan mo.\qs* 
\b  
\q1  
\v 14 Me’d ḵa’bal mo tani uni dhukunu ’pen ka pije/ goma Haawiya mo. 
\q1 Wu a’di midi ta amanhil uni mo, 
\q1 ka ji sho’k gana/ bway jis jwa mo tani uni thulkunu mo be, 
\q1 dhala yi’c buni midi shi/ is mo. 
\q1 AHaawiya a’di midi ta pam buni mo be. 
\q1  
\v 15 Hili Arumgimis midi wana ḵashiram pem ’ba/ mo ’peni mom’bi’th ma Haawiya mo, 
\q1 haali/ a’di midi bu’th aha/ mo be. \qs Doshi ma dhali ’cunycuri yan mo.\qs* 
\b  
\q1  
\v 16 Dhalki is ki ḵo/ mo waḵki/ jan ṯal ’deŋ kamu/ ta pa ki pa mo, 
\q1 ki monyca gi gu’b piti maru is mo. 
\q1  
\v 17 Haali/ ki a’di midi wu mo tani toŋ kamu/ mina a’di ḵal ime’da? 
\q1 Monycam piti midi diki ya ka luŋgu’b baṯẖ a’di nsho’k mo. 
\q1  
\v 18 Ba, me’dyin dina a’di ki e mo tani a’di ki p̱ar is piti e ki a’di ’bora bwa ki ’bor mo, 
\q1 dhali ba wathi/ maŋu mo ki a’di ki mii to ki ’bore/ gom is piti mo tani 
\q1  
\v 19 a’di midi ya nyaḵki ’kwani ma nyaḵum yil gi icom mo, 
\q1 uni gun mini mol moŋkush p̱ar e ki sule/ sule/ mo. 
\q1  
\v 20 Wathi/ mol c̱a’bki e e ’penkap̱an piti jin tana a’di mo, 
\q1 a’di wana e ki tonycuḵ kun ’ce’dki sho’k mo. 
\c 50  
\s1 Gway ma Asap̱. 
\q1  
\v 1 A’din ’De/ jin c̱a’bki dem dem mo, Arumgimis jin ta Tap̱a mo, 
\q1 ki a’di ki o gwo mo dhali mony’cesh yuḵkunu mo 
\q1 ’peni mo jin sul ma tente/ mo ntagi mo jin yul ma tente/ mo be. 
\q1  
\v 2 ’Pena Sihyuun mo tani ’bor piti shina jaro/ ime’d mo, 
\q1 Arumgimis ’twaḵki mo mo. 
\q1  
\v 3 Arumgimis bana p̱u’dki’d mo a’di diki c̱a’bki shwamm mo, 
\q1 e bwambori a’di mo tani a’di ta o’d jin loski’da los mo, 
\q1 dhali mo ’kam a’di is mo a’di jin ta’da dem dem mo tani a’di ta ’thama p̱unthar mo. 
\q1  
\v 4 A’di yuḵki’da yuḵ gom momis jin di’da p̱o/ momis mo, 
\q1 dhali mony’cesh mo, ki a’di midi dwall ’kwanim piti gwo mo be. 
\q1  
\v 5 Tuli aha/ kum pem is mo kun ta ku isiŋ gana/ mo, 
\q1 uni gun gamki gwo me’d nyaḵki aha/ ki to kun ’ciṯẖu/ ’kus mo. 
\q1  
\v 6 Momis bahki gwo gom mo ma ḵar/em piti mo. 
\q1 haali/ Arumgimis ki is piti mo tani a’di ta’da mandwall gwo mo. \qs Doshi ma dhali ’cunycuri yan mo.\qs* 
\b  
\q1  
\v 7 Ciḵi gwo, ayy ’kwanim pem mo, dhali aha/ mina ṯor gwo mo, 
\q1 ayy Israyiila, aha/ mina ṯe gwo ap̱o/ um mo. 
\q1 Aha/ tana Arumgimis jin ta’da Arumgimis bum mo. 
\q1  
\v 8 Dhali aha/ dinaki ḵucur um gom tom bum gun ’ciṯẖa/ um ’kus mmomiiya bas mo, 
\q1 walla tom bum kun c̱ina um ki me’d mo mmoc̱i’th ki o’d mo ki ṯikir ṯikir ibwambori aha/ mo. 
\q1  
\v 9 Aha/ mina mola rasim bip̱ bu’th ’peni gu’b bum mo, 
\q1 walla rasi mi ’peni kal bum mo. 
\q1  
\v 10 Haala ris tonycuḵ kun ’kon e bwaasho mo tani uni ta kum pem mo, 
\q1 dhali bip̱ kun ’koni ’kuwosha alip̱ mo. 
\q1  
\v 11 Aha/ misha ris ’dii kun p̱en e momisi ’baar mo, 
\q1 dhali aris to gwansan kun joc̱kin e bwam bunto mo tani uni ta kum pem mo. 
\q1  
\v 12 Waḵki/ aha/ mina ṯe/ ’taki ’kosh mo tani aha/ mina ’taki diki ṯor um gwoyi, 
\q1 haali/ mony’cesh dhali aris to gwansan kun ’koni bwaman a’di mo tani uni ta kum pem mo be. 
\q1  
\v 13 A/aha/ ’kana shum gi gwaṯẖim bip̱ mo? 
\q1 walla a/aha/ p̱ina bas mi mo? 
\q1  
\v 14 C̱iyi Arumgimis to jin c̱inu ki me’d mmo’ciṯẖ ’kus ki bwa jin ’boruwa ’bor i is mo, 
\q1 dhali c̱iyi gwom bum kun onu is ki a’di jin Eḵa/ Eḵ mo, 
\q1  
\v 15 dhali yuḵi aha/ ka tee jin ṯoju um bwa mo, 
\q1 dhali aha/ mina ’cuḵ um mo dhali um mini kar aha/ ki ca mo be. 
\q1  
\v 16 Hili gom a’di jin ta thus ki thus mo tani Arumgimis ki o gwo mo ki: 
\q1 Kaja c̱i /e shi/ mii mmorash gwoŋḵan pem kun bahu e mo, 
\q1 walla bu’th gwoŋḵan pem jin gamu me’d eya le’d pini mo? 
\q1  
\v 17 Haali/ /e shi/i mo jin dilu ’kwani abora ’ceshi e mo 
\q1 dhali /e ki biṯ gwom pem ki nyanygon mo. 
\q1  
\v 18 Waḵki/ /e ki p̱ar wathin ’di/ e mo tani /e tana mugum piti mo be 
\q1 dhali /e ki ta amanŋali ’pen gom uni gun buthi miinyc̱al me’d mo. 
\q1  
\v 19 /E ki c̱i ’twam pini bway ki ḵany mo gom tonthus mo, 
\q1 dhali ale’d pini ki uḵ mo jin hekuwa he’k e mo. 
\q1  
\v 20 /E ki c̱a’b dhali ṯor gwo ap̱owa kam pini mo. 
\q1 /E ki thutha ’ci ki kwan ’pen mo. 
\q1  
\v 21 To gwansan miikina um mo dhali aha/ c̱a’ba ki shwamm mo. 
\q1 Dhali /e ṯoshkin ki aha/ nyaḵa is ki /e mo. 
\q1 Dhali hili shwane/ aha/ ḵucurkina /e mo, dhali kar gwoŋḵan ibwambori /e mo. 
\q1  
\v 22 Nyiṯẖi gwo yansan mo ma, um gun ŋakina Arumgimis mo, 
\q1 isi ciki/ ki aha/ mina bwa p̱u’d ka pije/ mo dhali yan’ko’d jaŋ kamu/ midi diki di mmo’cuḵ um mo be. 
\q1  
\v 23 A’di yansan jin ’doyu to ki bwa jin ’boruwa ’bor i is mo me’d to jin ’ciṯẖu/ ’kus jin ta jim piti mo tani a’di taḵ aha/ mo be. 
\q1 E a’di jin karki bway piti ki ’bore/ mo tani 
\q1 aha/ mina ṯor bway gi mowoṯẖ ma Arumgimis mo be. 
\c 51  
\s1 Eya manyuḵ gway mo. Gway ma Dawuu’d, me’d jin p̱u’dkin ma Naṯẖan jin ta’da manc̱i gwo i a’di mo i’ko’di yam piti jin yakina a’di a Baṯẖshaba/. 
\q1  
\v 1 Miiyi mii ap̱o/ aha/ mo ma, ayy Arumgimis, isi ki gwo gi mo/en pini jin ṯelu sho’k mo, 
\q1 isi ki gwo gi mii ma ’them pini jin ishki’d ka enthus mo tani ’koshi aris gwon dhaŋ pem mo ma. 
\q1  
\v 2 Lami aha/ ’pena taŋkara/ ’peni miinthus pem mo, 
\q1 dhali dheleli aha/ mo ’peni miinthus pem mo. 
\q1  
\v 3 Haali/ aha/ misha gwon dhaŋ pem mo, 
\q1 dhali miinthus pem di’d ka yempa/ e bwambori aha/ mo. 
\q1  
\v 4 Ap̱o/ /e, /e ’de/ mo tani a’di imiikika/ miinthus mo, 
\q1 dhali mii a’din thus yin jin shi/a shi/ e bwambori jis/em pini mo, 
\q1 wakan /e karu ki mo ma ḵar/e e gwom pini jin tora /e ’twa/a ’cesh mo, 
\q1 dhali dar gi mii ’ba/ e gwon dwall pini mo. 
\b  
\q1  
\v 5 Hili mo mo ma, aha/ ḵalunu ka pije/ e miinthus mo, 
\q1 dhali e miinthus mo tani ata’dam pem bwaaki aha/ mo be. 
\q1  
\v 6 Hili mo mo ma /e ona bwa ki gwoŋ gana/ e isi bwaman ma dum ’per mo. 
\q1 Dhali gom gwo gi wakan mo tani ṯori aha/ gwo gom moyuḵ mo eya dum pem ki kup̱ mo. 
\q1  
\v 7 Dhagami aha/ mo ki cwa jin wana e ka ’tasha jalbip̱ mo, dhali aha/ mina dheleladhelel mo. 
\q1 Lami aha/ mo dhali aha/ mina c̱a’bki bany bany mmobola wasa/ e mo. 
\q1  
\v 8 ’Tu’di aha/ ki bwam ’borga/ mo dhali ki bwaŋ ’kunyga/ mo. 
\q1 Dhalka sima/ jin ’ce’da /e mo ’kunya bwa mo si’da/. 
\q1  
\v 9 Bagi jis/em pini ’peni miinthus pem mo 
\q1 dhali ’koshi aris miinthus pemi ’baar mo. 
\b  
\q1  
\v 10 Uḵi e aha/ adun dhelelga/ mo, ayy Arumgimis, 
\q1 dhali kar jin this dhali jin ’boro’d e bwaman shi/in pem mo. 
\q1  
\v 11 Dhalku/ ki biṯ aha/ asho ’peni buŋ’kus pini mo, 
\q1 dhali dhalku/ ki bu’th Shi/in dhelel dhelel pini ’peni aha/ mo. 
\q1  
\v 12 Wari bwaŋ ’kunyga/ is e aha/ mo e bway gi mowoṯẖ pini mo, 
\q1 dhali buthi aha/ me’d ki bwa gi shi/in mo. 
\q1  
\v 13 Dhali yan’ko’d aha/ mina ṯor imandhaŋ gwo bway pini mo, 
\q1 dhali imanmii miinthus mo mini ṯu’k mo e /e mo be. 
\q1  
\v 14 ’Cuḵi aha/ mo ’pena bas gi aha/ jin dina mii i’ba/ mo, ayy Arumgimis, 
\q1 /e jin tana Arumgimis mo tani ita bway gi mowoṯẖ pem mo be, 
\q1 dhali ale’d pem midi yuḵ gway ki ’kal ’kal gom mony’cuḵ pini mo be. 
\q1  
\v 15 Ayy Tap̱a, ḵa’di /e ’twa/ pem mo ma, 
\q1 dhali ’twa/ pem midi ṯor momaŋ pini mo. 
\q1  
\v 16 Haali/ /e dina bwa ki ’kuny mo e mo jin ’ciṯẖu/ to ’kus mmomiiya bas mo. 
\q1 Waḵki/ aha/ mina ’taki c̱i to ki me’d mmoc̱i’th ki o’d mo tani /e mini ’taki diki ’bor bwa mo be. 
\q1  
\v 17 To jin ’ciṯẖu/ ’kus mmomiiya bas jin mish ma Arumgimis bu’th mo tani a’di ta shi/in jin ’ce’dkunu mo. 
\q1 Dhali mo ma du jin ’ce’du mo dhali adu jin waki’d mo tani, ayy Arumgimis, /e mini diki usha ush mo. 
\q1  
\v 18 Miiyi ki ’bore/ gom Sihyuun mo e bwaŋ ’kunygam pini mo. 
\q1 Nyaŋi doḵ/e agoŋ gi Pa Urushaliim mo. 
\q1  
\v 19 Dhali yan’ko’d /e mina bwa ’kuny mo e to jin c̱inu ki me’d mo mmo’ciṯẖ ’kus jin ’boro’d mo, 
\q1 dhali e to jin c̱inu ki me’d mo mmoc̱i’th ki o’d mo dhali kun c̱ithu/ ki o’d ka ’bimpil mo, 
\q1 dhali yan’ko’d gwasimbip̱ uni minu ’ciṯẖ ’kus eya gwaṯam pini mo. 
\c 52  
\s1 Eya manyuḵ gway mo. Gway jin yuḵ ma Dawuu’d mmoyetha ye’th sho’k mo me’d jin p̱u’dkin ma Duwaag jin ta Wathi/ gi Pan Aduum, dhali ṯora Shawuul gwo mo ka: Dawuu’d p̱u’dki’d mo e gu’b ma Aḵimaalik mo. 
\q1  
\v 1 Atinta kara /e ’ba/ ki ca mo, ayy wathi/ jin c̱a’bki dem dem mo? 
\q1 mmota pibi ap̱o/ ’kwani kun tana gayiin mo. 
\q1 Isa yempa/ /e kar gwo shiyi’d e ilu/ mo mmo’ce’da ’ce’d sho’k mo. 
\q1  
\v 2 ’Twam pini kaaka me’da nyer mo, 
\q1 /e jin tana manmii mii jin hekuwa he’k e mo. 
\q1  
\v 3 /E ki en tonthus mmobol jin ’boro’d e mo 
\q1 dhali /e ki o gwo ka ṯor mmobol gwoŋ gana/ e mo. \qs Doshi ma dhali ’cunycuri yan mo.\qs* 
\b  
\q1  
\v 4 /E ki en aris gwo kun losina los mo, 
\q1 ayy /e jin tan ma le’d pini ahe’k e ka he’k e mo. 
\q1  
\v 5 Hili Arumgimis midi ’ce’d /e bwa ka ’cesh ki sule/ mo. 
\q1 A’di midi bor /e mo dhali dher /e bwa mo ’peni gu’b burrinyem pini mo. 
\q1 Dhali /e minu yu’d mo ’peni mo jin ’kona ’kwani mo. \qs Doshi ma dhali ’cunycuri yan mo.\qs* 
\b  
\q1  
\v 6 Uniŋ ḵar/e mini p̱ar e mo dhali ḵo/ is mo 
\q1 dhali p̱e’th a’di mo mmo/o gwo mo ki: 
\q1  
\v 7 Hili wathi/ yan jin ’tena bwa mmokara Arumgimis ki a’dim piti jin hura a’di jwa icine/ mo, 
\q1 hili a’di ki gam gwo is e tom piti jin ishin ka enthus jin tana a’di pa ki pa mo, 
\q1 dhali a’di ki ŋap̱ mo jin huru jwa e ’penkap̱an piti jin tana a’di mo. 
\q1  
\v 8 Hili aha/ wana e ki cwa seṯuun jin c̱a’bki go’d go’d 
\q1 e gu’b ma Arumgimis mo. 
\q1 Aha/ gamkina gwo is e mo/en ma Arumgimis jin ṯelu sho’k 
\q1 ki sule/ ki sule/ mo. 
\q1  
\v 9 Aha/ mina c̱i /e bwam ’boro’di is ki sule/ ki sule/ mo, 
\q1 haali/ /e miiki a’di mo. 
\q1 Aha/ mina bah gway pini haali/ a’di ’boro’d mo be, 
\q1 e buŋ’kus uni kun tana gayiin mo be. 
\c 53  
\s1 Eya manyuḵ gway mo, isi ki koŋ gway jin gwonu gom bwan diṯi’d mo. Gway jin yuḵ ma Dawuu’d mmoyetha ye’th sho’k mo. 
\q1  
\v 1 A’di jin ta p̱us mo tani o gwo eya dum piti mo ki: Arumgimis p̱iyi’d mo. 
\q1 Uni p̱u/kin mo, dhali uni mii mii kun bulabul mo. 
\q1 Jaŋ kamu/ jin mii’d ka ḵar/e yisa di’da. 
\q1  
\v 2 Tap̱a hilki mo ka luŋgu’b ’peni mis 
\q1 ap̱o/ uc̱i gi ’kwaniny’cesh mo 
\q1 mmop̱ar e mo waḵki/ jan ṯal ’deŋ kamu/ mii mii ki yuḵ yuḵ mo, 
\q1 mmosimm jasi Arumgimis e mo. 
\q1  
\v 3 Uni ’baar mo iikini dheres mo, 
\q1 uni ’baar mo wakina e ki to kun p̱u/kin mo. 
\q1 Jan ṯal ’deŋ kamu/ yisa di’da jin mii mii jin ’boro’d mo, 
\q1 ṯal ’de/ p̱iyi’d mo be. 
\q1  
\v 4 ’Kona uni ki nyiṯẖa, aris uni gwansan kun mii tonthus mo, 
\q1 uni kun shwa ’kwanim pem me’d tonṯe/ mo 
\q1 dhali uni ’koki yuḵa Arumgimis mo? 
\q1  
\v 5 Uni nanni kun ’kon e dhan mo kun ḵogu is mo, 
\q1 mo jin ḵogu is wakan diki di ’peni kadhamo/ mo. 
\q1 Haali/ Arumgimis midi rasa sima/ gi ’kwani kun ushuna Arumgimis mo. 
\q1 Uni minu dhu ki mo ma ’the is mo haali/ Arumgimis waḵki uni mo be. 
\q1  
\v 6 Ayy mo jin ’cuḵuwa ’cuḵ gom ’Kwani ma Israyiil mo tani a’di midi ’taki p̱u’du/ ’pena Sihyuun moyi. 
\q1 Ka Arumgimis midi wara shamaneṯṯan ki ’kwanim piti is mo tani 
\q1 Yakuub mina bwa ’kuny mo dhali Israyiil mina bwa ’bor mo be. 
\c 54  
\s1 Eya manyuḵ gway mo ka shu/ kun buḵu gway mo. Gway ma Dawuu’d jin yetha a’diya ye’th sho’k mo me’d jin p̱u’dkina ’Kwani gi Pan Siip̱ mmoṯora Shawuul gwo mo ka Dawuu’d bagki’d e bwam am mo. 
\q1  
\v 1 Tayi aha/ is ki me’d mo ma, ayy Arumgimis mo, ki gway pini mo, 
\q1 dhali yeyi aha/ mo ki mo ma dem dem pini mo. 
\q1  
\v 2 Ciḵi mon’thom pem mo ma, ayy Arumgimis. 
\q1 C̱iyi ’cem pini ki gwo gi ’twa/ pem mo. 
\q1  
\v 3 Haali/ iman/ush ’kwani ga/ mo tani uni cu mis ap̱o/ aha/ mo, 
\q1 dhali imangora bwa ki gor mo tani uni ŋap̱ki mondiki/em pem mo. 
\q1 Dhali uni ’koki kara Arumgimis ibwambori jis/em buni mo. \qs Doshi ma dhali ’cunycuri yan mo.\qs* 
\b  
\q1  
\v 4 Hili mo mo ma, Arumgimis ta’da manwoṯẖ pem mo, 
\q1 dhali Tap̱a a’di ta’da manṯel aha/ mondiki/em pem sho’k mo. 
\q1  
\v 5 A’di midi ri’c ’kwani kun ta ’kup̱ ki aha/ ki tonthus mo. 
\q1 Dhali e mii ma isiŋ ganam pini mo tani /e mini daḵ uni ’pemen buni ’kup̱ mo be. 
\q1  
\v 6 Ki bwam pem jin di ’baḵany mo tani aha/ c̱ina to jin ’ciṯẖu/ ’kus mmomiiya bas ki /e mo. 
\q1 Dhali aha/ mina c̱i mo jin ’boruwa ’bor bwa i is ki gway pini mo, ayy Tap̱a, haali/ mii yan a’di ’boro’d mo be. 
\q1  
\v 7 Haali/ /e ’cuḵki aha/ mo ’pena ris monṯo’c bwam pem mo, 
\q1 dhali em pem hilki mo jin p̱inu mii e ap̱o/ ’kwani gun ta ’kup̱ ki aha/ mo be. 
\c 55  
\s1 Eya manyuḵ gway mo ka shu/ kun buḵu mo. Gway ma Dawuu’d jin yetha a’diya ye’th sho’k mo. 
\q1  
\v 1 C̱iyi ’cem pini ki mon’thom pem, ayy Arumgimis. 
\q1 Dhali dhalki is pini ki ba’k mo ’peni tom pem jin doṯka/ ka di’b is mo. 
\q1  
\v 2 Ḵuthi is gom aha/ mo, dhali thoḵi aha/ gwo mo. 
\q1 Aha/ kumu ’twa/a ’cesh ki monṯo’c bwam pem mo. 
\q1  
\v 3 Dhali aha/ guskina du mo gom cuuwa/ gi ’kwani kun ta ’kup̱ mo, 
\q1 haali/ ’kwani kun ta thus ki thus mo tani uni siri’ckina siri’c ki sho’k mo. 
\q1 Haali/ uni ḵali mo jin ṯoju bwa ap̱o/ aha/ mo 
\q1 dhali ka nyor mo tani uni ki thip̱ mo ma dup̱e/ ap̱o/ aha/ mo. 
\b  
\q1  
\v 4 Dhali adum pem ’pe’di she/ e bwaman is pem mo, 
\q1 dhala pure/ gom mowu biṯki’da p̱o/ aha/ mo. 
\q1  
\v 5 Moŋḵo/ is dhali mondee is p̱u’dkina p̱o/ aha/ mo, 
\q1 dhali to jin ḵo/ki aha/ is mo tani uni kumki aha/ ’twa/a ’cesh mo. 
\q1  
\v 6 Dhali aha/ ona gwo mo ki: Ayy waḵki/ aha/ mina ’taki ta ga bi me’d gurko/ mo tani 
\q1 aha/ mina ’taki p̱e mo dhali si/ is mo be. 
\q1  
\v 7 Nye, aha/ mina ya si’dasi’d moyi 
\q1 Aha/ mina ya c̱a’b e mombwaasho moyi. \qs Doshi ma dhali ’cunycuri yan mo.\qs* 
\b  
\q1  
\v 8 Aha/ mina lala ki jahanneyi dhali gama darha’dam pem 
\q1 ’peni mo ma bumburush ’tham mo dhali ’thama p̱unthar mo. 
\q1  
\v 9 ’Ce’di tom buni jin thosona uni sho’k sho’k mo ma, ayy Tap̱a. C̱umbulki uni ale’d buni mo, 
\q1 haali/ aha/ hilkina mo jin bujura bujur mo dhali mo jin biruwa bir e ’peŋkuman bampa/ mo. 
\q1  
\v 10 Montee dhali mon’thiny uni iikin ka kul is e yana gaŋgaram piti mo, 
\q1 dhali mo jin tanuwa pibi dhali mo jin ṯoju bwa mo tani ’kon e uni mo. 
\q1  
\v 11 Mo jin doru sho’k ka pupush mo tani a’di di’d e bwaman a’di mo, 
\q1 dhali mo jin sirijuwa siri’c ki sho’k mo dhali mo jin hekuwa he’k e mo tani 
\q1 uni ’koki ii mo ’peni mo ma suug piti mo. 
\b  
\q1  
\v 12 A’di diki ta a’di jin ta ’kup̱ ki aha/ jin ’bakaa e mo – 
\q1 ki aha/ mina ’taki mish a’di ḵal mo. 
\q1 A’di diki ta a’di jin ta ’kup̱ ki aha/ jin ṯu/ul mo jin gora bwa ki gor ap̱o/ aha/ mo, 
\q1 ki aha/ mina ’taki bag ’peni a’di mo. 
\q1  
\v 13 Hili /e be, jin wa e ki aha/ ki is pem mo, 
\q1 /e jin nyaḵ ya ki aha/ mo, dhali /e jin tana waḵ pem mo. 
\q1  
\v 14 Me’dyin mo ana nyaḵa ṯor ṯori monṯal ’de/ mo jin ’kunya’kuny mo. 
\q1 E gu’b ma Arumgimis mo tani ana iina mmonyaḵ to mii mo. 
\q1  
\v 15 Dhalki mowu p̱u’du’d ap̱o/ uni mo. 
\q1 Dhali dhalki uni ’donu ki e eya Haawiya mo. 
\q1 Dhali dhalki uni iin e bwaya pure/ gi moŋ’kup̱ajem buni mo. 
\q1  
\v 16 Hili aha/ yuḵkina Arumgimis mo. 
\q1 Dhali Tap̱a midi ta aha/ is is ki me’d mo. 
\q1  
\v 17 Mom’pimpili/ dhali mon’thamo/ dhali montee mo tani 
\q1 aha/ bahkina gwo ma ’thup̱in ’twam pem mo dhali ko mo, 
\q1 dhali a’di midi ciḵ ’twam pem mo. 
\q1  
\v 18 A’di midi ’cuḵa ḵashiram pem ki ’dantar mo 
\q1 ’peni mo ma mee jin miga/ ’taki as mo, 
\q1 haali/ ’kwani tana ris miina bumburusha p̱o/ aha/ mo. 
\q1  
\v 19 Arumgimis midi c̱i ’cem piti mo dhali dhu uni ki gwa’d mo, 
\q1 a’di jin diki’d eya ḵursi ma maliḵ kadhamo/ mo. 
\q1 Haali/ uni ’koki dhu gwoŋḵan jin c̱inu mo 
\q1 dhali uni ’koki ḵo/ Arumgimis mo. \qs Doshi ma dhali ’cunycuri yan mo.\qs* 
\b  
\q1  
\v 20 Amannyaḵ yam pem a’di he’thki’da bim piti mo ap̱owa mugum piti mo, 
\q1 a’di ’ce’dki gwom piti jin gama a’di me’d mo. 
\q1  
\v 21 Gwom piti jin ona a’di mo tani a’di na’bulana’bul mmobola yina ko e mo, 
\q1 hili anyor di’d eya dum piti mo. 
\q1 Dhali gwom piti ’capuṯa/ ’capuṯ mmobola yin e mo, 
\q1 hili uni wana e ki gandal kun ’de’kkunu she ki mis mo. 
\b  
\q1  
\v 22 Ṯaki to jin diṯi’d pini ap̱o/ Tap̱a mo 
\q1 dhali a’di midi ḵal gom /e mo. 
\q1 A’di midi diki dhal jaŋ kamu/ jin ta’da ḵar/e mmojoc̱ mo. 
\b  
\q1  
\v 23 Hili /e ayy Arumgimis mini ṯa’k uni ka luŋgu’b mo 
\q1 e jis jin ’kula’kul mo. 
\q1 ’Kwani kun wol tiya bas mo dhali kun wa’thkina wathi/ e mo tani 
\q1 uni mini ’koki ’ko ki e mo ka teem bunin ’de/ i’tu’d mo. 
\q1 Hili aha/ mina gam gwo is e /e mo be. 
\c 56  
\s1 Eya manyuḵ gway mo, isi ki koŋ gurko/ kun ’kon e cwa kun si’dasi’d kun wana e ka c̱iss mo. Gway jin karu ki kup̱ jin ta jima Dawuu’d mo me’d jin bu’thkina ’Kwani P̱ilisthiin a’di mo e Pany Jatt mo. 
\q1  
\v 1 Miiyi mii ka ’the gom aha/ mo ma, ayy Arumgimis, haali/ ’kwani yap̱ki aha/ ki sho’k mo. 
\q1 Yula tente/ mo ’kwani kun ta ’kup̱ ki aha/ uni siri’cki aha/ ap̱o/ ki sho’k mo. 
\q1  
\v 2 Uni gun ta ’kup̱ ki aha/ mo tani uni yap̱ki aha/ ki sho’k mo yula tente/ mo, 
\q1 haali/ ’kwani tana ris kun askina p̱o/ aha/ ki ’ba/ gun dhuna uni ki ca mo. 
\q1  
\v 3 Ki aha/ ḵo/kina is mo tani 
\q1 aha/ karkina moŋgam gwo is pem e /e mo be. 
\q1  
\v 4 Eya Arumgimis mo, a’di jin maŋka/ gwom piti mo, 
\q1 eya Arumgimis mo tani aha/ gama gwo is ki dar gi moŋḵo/ is mo. 
\q1 Buŋgwar is midi miiya tinta ki aha/ mo? 
\q1  
\v 5 Yula tente/ mo tani uni simmki mii e mo mmotaḵ aha/ jama/ gom tom pem jin raḵki aha/ mo. 
\q1 Aris gwom buni ’baar mo kun kulumkina uni ibwa ap̱o/ aha/ mo tani uni ta thus ki thus mo. 
\q1  
\v 6 Uni ’tuntulki is buni imonṯal ’de/ mo, dhali uni wup̱kina ’cesh mo. 
\q1 Uni c̱orki ŋaṯgin pem mo. 
\q1 Me’d jin c̱orkina uni mondiki/em pem mo, 
\q1  
\v 7 wakan raḵi uni to ibway mo gom tonthus buni mo kun miikina uni mo, 
\q1 ka nyor pini mo tani Arumgimisa, ṯaki ’kwani gwan ka ’cesh mo, ayy. 
\b  
\q1  
\v 8 /E deŋki yam pem jin wuŋkulkika/ e mo. 
\q1 Ṯe’di jabu’th em pem eya gasaas pini mo. 
\q1 ’Kona uni ki ’ko eya warkam pini mowa? 
\q1  
\v 9 Dhali yan’ko’d mo tani uni kun ta ’kup̱ ki aha/ mo tani minu ṯu’k ka nyaŋ’ko’d mo 
\q1 ka tee jin miga/ yuḵa yuḵ mo. 
\q1 Dhali aha/ misha ka jiŋ gana/ ka Arumgimis ta a’di gom aha/ mo be. 
\q1  
\v 10 Eya Arumgimis mo, a’di jin maŋka/ gwom piti mo, 
\q1 e Tap̱a, a’di jin maŋka/ gwom piti mo, 
\q1  
\v 11 Eya Arumgimis mo tani aha/ gama gwo is ki dar gi moŋḵo/ is mo. 
\q1 Ton tinta a’di imina ’kwani mii gom aha/ mo? 
\q1  
\v 12 Gwom pem kun oka/ is e /e mo tani aha/ mina thim uni mo, ayy Arumgimis. 
\q1 Aha/ mina c̱i mo jin ’boruwa ’bor bwa i is ki to jin c̱inu mmo’ciṯẖ ’kus gom /e mo. 
\q1  
\v 13 Haali/ /e ’cuḵkina ḵashiram pem mo ’peni mowu mo, 
\q1 nye, sho’k pem ’tasha /e ’twa/ ’peni mombiṯ mo, 
\q1 ki aha/ mina ya ibwambor ma Arumgimis mo, 
\q1 e moŋkush gi mondiki/e mo. 
\c 57  
\s1 Eya manyuḵ gway mo, isi ki gwo jin minu ’koki ’ce’d sho’k mo. Gway jin karu ki kup̱ jin ta jima Dawuu’d mo me’d jin guskina a’di mo ’pena Shawuul mo e jurum wosh mo. 
\q1  
\v 1 Miiyi mii e aha/ mo, ayy Arumgimis, dhali miiyi mii e aha/ mo, 
\q1 haali/ e /e mo tani aḵashiram pem bu’thki mo jin huru jwa mo. 
\q1 Dhali eya la ma bim pini mo tani aha/ bu’thkina mo jin hurga/ jwa mo, 
\q1 ntagi ’thama p̱unthar jin ’ce’di’da ’ce’d sho’k peki’d mo be. 
\q1  
\v 2 Aha/ gwokina ’twa/ Arumgimis jin Caa e ki Ca mo, 
\q1 eya Arumgimis jin thimki ’kup̱ miim ’boro’d piti gom aha/ mo. 
\q1  
\v 3 A’di midi hasha hash ’peni momis dhali ta aha/ is ki me’d mo, 
\q1 dhali a’di midi dhu uni gwansan ki mon’the is mo, uni gun yap̱ki aha/ ki sho’k mo. \qs Doshi ma dhali ’cunycuri yan mo.\qs* 
\b  
\q1 Arumgimis midi hashi mo/en piti jin ṯelu sho’k mo dhali mii ma isiŋ ganam piti mo. 
\b  
\q1  
\v 4 Aha/ isha e bwaman ma risa dhop̱ mo 
\q1 uni gun pitilki iya/ gi ’kwani bwa ki she/ mo. 
\q1 Shem buni waka mee mo dhala thop̱a/ mo, 
\q1 dhali ale’d buni kaaka me’d gandal mo be. 
\q1  
\v 5 Dhalki /e karu ki ca mo, ayy Arumgimis, ap̱owa ris momisi ’baar mo. 
\q1 Dhalki monycam pini a’di di’da p̱o/ mony’ceshi ’baar mo. 
\b  
\q1  
\v 6 Uni karkina kume/ gom ŋaṯgin sho’k pem kun dhuka/ mo, 
\q1 aḵashiram pem a’di di ki ’kup̱ ka luŋgu’b mo. 
\q1 Dhali uni c̱wanyki jis e bway pem jin yaka/ mo, 
\q1 hili uni ki is buni uni iṯa’kkin e jis buni jin c̱wanya uni mo. \qs Doshi ma dhali ’cunycuri yan mo.\qs* 
\b  
\q1  
\v 7 Adum pem ṯelkunu sho’k mo, ayy Arumgimis, 
\q1 adum pem ka jiŋ gana/ a’di ṯelkunu sho’k mo. 
\q1 Aha/ mina yuḵ gway mo dhali nann gway mo. 
\q1  
\v 8 Meri e mo ma, aḵashiram pem. 
\q1 Meri e mo ma, ayy adheŋdhenye/ dhali adheŋdhenye/ jin ’kon ma shu/i pesu/ mo. 
\q1 Aha/ mina mer mo gi mon’thamo/ e mo. 
\q1  
\v 9 Aha/ mina c̱i mo jin ’boruwa ’bor bwa i is ki /e mo, ayy Tap̱a, e bwaman ma ris ’kwani mo. 
\q1 Aha/ mina yuḵ gway mo dhali maŋ /e mo e bwaman ma ris kal gi ’kwaniny’cesh mo. 
\q1  
\v 10 Haali/ mo/en pini jin ṯelu sho’k mo tani a’di caaca kagahara e momis mo, 
\q1 dhali mo ma isiŋ ganam pini jin tana /e mo e bwaman ma risa raḵ mo. 
\q1  
\v 11 Dhalki /e karu ki ca mo, ayy Arumgimis mo, ap̱owa ris momisi ’baar mo. 
\q1 Dhalki monycam pini a’di di’da p̱o/ mony’ceshi ’baar mo. 
\c 58  
\s1 Eya manyuḵ gway mo, isi ki gwo jin minu ’koki ’ce’d sho’k mo. Gway jin karu ki kup̱ jin ta jima Dawuu’d mo. 
\q1  
\v 1 A/um ka jiŋ gana/ ḵani gwo ki isi ḵan gana/, um kun ta ’kwani ma tul ’kup̱a? 
\q1 A/um dwalli iya/ gi ’kwani gwo ki dwall gana/ mowa? 
\q1  
\v 2 Yisa, eya dum bum mo tani um usha ’ce ’kol mo eya dum bum gom tonthus mo. 
\q1 Me’d bum ṯu/ul mo jin bujura bujur e mony’cesh mo. 
\q1  
\v 3 Imanmii tonthus mo iikini dheres mo ’peni bwa gi ikum mo, 
\q1 uni thamki mii ’pena cim gun dhodhu uni mo tani uni thamki gwo o ka ṯor mo. 
\q1  
\v 4 Uni tan ga ṯi’d me’da ṯi’d tasha/ mo, 
\q1 me’d tashan ’thi/ jin ta’da ’diye/ mo jin ’dap̱ki bwany’cem piti ’twa/ mo, 
\q1  
\v 5 wakan jin mina a’di diki ciḵ gwalish gi wathi/ mo 
\q1 walla laṯ jin laṯu/ a’di mo. 
\q1  
\v 6 Ayy Arumgimis, ’ce’dki uni she/ e bwan ’twam buni mo. 
\q1 Buḵki uni sheŋ gwoliŋgwoṯẖa/ mo ’peni ushi dhuru’c ma dhop̱ mo, ayy Tap̱a. 
\q1  
\v 7 Dhalki uni p̱ikin ki jahanne/ me’d yi’de/ jin gusu’di ’ciṯẖ ’pen mo, 
\q1 dhali wa e ka sho si’da/ jin tora moŋḵuthu’d ’ko’da ’cesh mo dhali ḵu’th mo. 
\q1  
\v 8 Dhalki uni wana e ka homo’th jin yu moros mo, 
\q1 dhali me’da ’ci jin ṯagu ka dho’th piti jin molo’da tente/ p̱ar e mo be. 
\q1  
\v 9 Ki ’dishe/ tani anos bum mina ’ko’d gwari ’batha’ba’th me’da ’de/ jin shwana o’d mo, 
\q1 waḵki/ ta’da go’d go’d walla diki’d mo/o’d mo tani dhalki a’di dhi’th uni sho’k ki jahanne/ mo. 
\b  
\q1  
\v 10 Amanmii miiŋḵar/e mo tani a’di mina bwa ’kuny mo haali/ a’di midi p̱ar mo jin ri/uwa ri’c e mo be. 
\q1 Dhali a’di midi lam sho’k piti ka bas gi ’kwani kun ta thus ki thus mo. 
\q1  
\v 11 ’Kwani mini o gwo mo ki: Ka jiŋ gana/ to jin ish ḵumma/ mo tani di’d gom ’kwaniŋ ḵar/e mo. 
\q1 Ka jiŋ gana/ Arumgimis di’d mmodwall gwo ap̱o/ mony’cesh mo be. 
\c 59  
\s1 Eya manyuḵ gway mo, isi ki gwo jin minu ’koki ’ce’d sho’k mo. Gway jin karu ki kup̱ jin ta jima Dawuu’d mo me’d jin hashkin ma Shawuul ’kwani mo mmotim gu’b piti mmo’taki ’kosh a’di jwa mo be. 
\q1  
\v 1 ’Cuḵi aha/ mo ma ’peni ’kwaniŋ ’kup̱ pem mo, ayy Arumgimis pem, 
\q1 ceshi aha/ ’peni uni gwansan kun cuuna p̱o/ aha/ mo. 
\q1  
\v 2 ’Cuḵi aha/ mo ’peni uni gwansan kun mii tonthus mo, 
\q1 dhali tayi aha/ is ki me’d mo ’peni ’kwani gwansan kun ’kosha ṯe/ mmowol ’kwaniya bas mo. 
\q1  
\v 3 Haali/, hili mo mo ma, uni ishkin mmoc̱or mondiki/em pem mo, 
\q1 ’kwani kun ’cithira/ ’cithir mo tani uni ’tuntulki is buni imonṯal ’de/ ap̱o/ aha/ mo. 
\q1 Gom gwon dhaŋ pem walla miinthus pem yisa, ayy Tap̱a, 
\q1  
\v 4 walla gom miim pem jin thamka/ yisa, uni urkina uri sho’k mo dhali thoson is mo. 
\q1 Muri is pini mo, dhali p̱u’du/ mo dhali woṯẖ aha/ mo, dhali p̱ari mii yan e mo. 
\q1  
\v 5 /E, jin ta Tap̱a Arumgimis gi momis mo tani, /e tana Arumgimis ma Israyiil mo be. 
\q1 Meri is mo dhali c̱iya ris kal gi ’kwaniny’cesh to kun wana e ki miim buni mo. 
\q1 Dhalku/ ki dhal jan ṯal ’deŋ kamu/ bway mo ’peni uni gwansan kun ’dap̱a e ki mii ma wu’th gi tonthus mo. \qs Doshi ma dhali ’cunycuri yan mo.\qs* 
\b  
\q1  
\v 6 Mom’pimpili/ isa yempa/ mo tani uni p̱u’dkin ka nyaŋ’ko’d mo 
\q1 mmobuḵ me’da ’ka ka ris mo dhali ’thil is buni e ’peŋkuman bampa/ mo. 
\q1  
\v 7 Uni anann be, gwona bomboḵ ki ’twam buni mo, 
\q1 dhali ḵaa ’twa/ i is ki ’twam buni mo – 
\q1 haali/ kaja ikuluma uni gwo ibwa mo mmo/o gwo mo ki: Kaja imidi ciḵ ana mo? 
\q1  
\v 8 Hili /e, ayy Tap̱a, /e p̱e’thki uni mo, 
\q1 dhali /e dhukina ris kal gi ’kwaniny’cesh mmota uni gun waḵu mo. 
\q1  
\v 9 Ayy Mom’bi’th pem mo tani aha/ mina yuḵ gway mo mmomaŋ /e mo, 
\q1 haali/ /e, ayy Arumgimis, tana cur pem jin ṯenu gwo mo. 
\q1  
\v 10 Arumgimis pem jin di’d e mo/en piti jin ṯelu sho’k mo tani a’di midi gam aha/ ’kup̱ mo. 
\q1 Dhali Arumgimis pem a’di midi dhal aha/ bway mo mmop̱ar mo jin p̱inu mii e mo ap̱o/ uni gun ta ’kup̱ ki aha/ mo. 
\q1  
\v 11 Dhalku/ uni ki ’kosh jwa mo, isi ciki/ tagi ’kwanim pem mini this uni e mo. 
\q1 Dhuyi uni mmomol dosh shoka ’cesh mo ki mom’bi’th pini mo, dhali ’doku/ uni ka luŋgu’b mo, 
\q1 ayy Tap̱a, jin ta jim bam jin ta’da goŋgoro/ mo. 
\q1  
\v 12 Haali/ gom miinthus kun miikina uni ki ’twam buni mo, dhali ki gwo ma le’d buni mo, 
\q1 dhalki uni bu’th ma kume/ gi ’bam buni kun dhuna uni ki ca mo. 
\q1 Gom gwo ma jee dhali gwo ma ṯor kun baha uni mo tani 
\q1  
\v 13 shwayi uni ki ’ci’d’da/ ka nyor pini mo, 
\q1 shwayi uni ki ’ci’d’da/ ntagi uni mini ’koki ’ko doḵ/e mo, ki ’kwani mini mish ki /e tana Arumgimis jin ji ’kwani ma Yakuub mo 
\q1 ntagi ’pemen gi mony’cesh mo be. \qs Doshi ma dhali ’cunycuri yan mo.\qs* 
\b  
\q1  
\v 14 Mom’pimpili/ isa yempa/ mo tani uni p̱u’dkin ka nyaŋ’ko’d mo 
\q1 mmobuḵ me’da ’ka ka ris mo 
\q1 dhali ’thil is buni e ’peŋkuman bampa/ mo. 
\q1  
\v 15 Uni tani mo ki tantan gom tonṯe/ mo, 
\q1 dhali cesh mo ki ŋarŋash mo waḵki/ uni ’koki kap̱a dum buni mo. 
\q1  
\v 16 Hili aha/ mina yuḵ gway gom mo ma dem dem pini mo. 
\q1 Dhali aha/ mina yuḵ gway ki ’kal ’kal gom mo/en pini jin ṯelu sho’k mo e mon’thamo/ mo. 
\q1 Haali/ /e takina cur jin ṯenu gwo gom aha/ mo 
\q1 dhali /e ta jim pem jin hurga/ jwa icine/ mo ka teem pem jin dika/ ka c̱is mo. 
\q1  
\v 17 Ayy Mom’bi’th pem mo tani aha/ mina yuḵ gway mo mmomaŋ /e mo, 
\q1 haali/ /e, ayy Arumgimis, tana cur pem jin ṯenu gwo mo, 
\q1 /e jin tana Arumgimis jin ṯorki aha/ mo/en pini jin ṯelu sho’k mo. 
\c 60  
\s1 Eya manyuḵ gway mo, isi ki koŋ gway jin yuḵu gom jandin to mo. Gway ma Dawuu’d jin yedhu sho’k mo dhali gwo ma ye’th sho’k jin yedhu me’d jin ḵalkina a’diya shir shir uni ka Araam Nahreen mo dhala Araam Suba mo dhali me’d jin p̱u’d ma Yuwab e kul piti jin doḵkina a’di me’d jin ’koshkina a’di ’Kwani gi Pa Aduum kun ’koni alaap̱i ’kume’d i’ce’dka su/ mo e embul Wosh ma ’Doŋkoro/ mo. 
\q1  
\v 1 Ayy Arumgimis, /e waḵki aman mo, dhali ’ce’d mom bam jin ’ce’du/ gwo she/ mo. 
\q1 /E miikina nyor mo. Ayy, waru/ aman is mo ma. 
\q1  
\v 2 /E karki mony’cesh mmoyiḵin is mo. Dhali /e ki ’twaḵ a’di bwa mmotheḵ she/ mo. 
\q1 Nyaŋi a’di ka nyaŋ’ko’d mo e mom piti jin shi/ki’d mo, haali/ a’di mol dosh shoka ’cesh mo. 
\q1  
\v 3 /E ki dhal ’kwanim pini mmo’kosh is ka nyor ki to kun ’batha’ba’th mo, 
\q1 /e ki dhu am me’d ’kwani kun sona du mo gom to kun diṯadiṯ kun ’kosh am mo. 
\q1  
\v 4 /E ki kar mom pini jin ta’da berag gom uni gwansan kun ḵo/ki /e mo, 
\q1 mmocuna uni ki bimbir ’peni a’di jin ta jiŋ gana/ mo. \qs Doshi ma dhali ’cunycuri yan mo.\qs* 
\b  
\q1  
\v 5 Wakan ki unim pini gun ena /e mo minu ’cuḵ mo, 
\q1 c̱iyi mo jin p̱inu mii e ki me’da bim poros pini mo dhali thoḵ am gwo mo. 
\q1  
\v 6 Arumgimis oki gwo e mom piti jin ḵogu mo. 
\q1 Nyaḵki gway jin yuḵu ki moŋ’kuny bwa mo tani aha/ mina ḵwa/ Pan Shakiim bwa mo 
\q1 dhali dhu uni ka bwanykin ’peni embul ma Sukkuut mo. 
\q1  
\v 7 Dhala Jil/aad, a’di ta jim pem mo. Dhala Manassa a’di ta jim pem mo. 
\q1 Dhala Ep̱rayim a’di ta toŋ’kup̱ pem mo. 
\q1 Dhala Yahuuda/ a’di ta cwa ma maliḵ pem mo. 
\q1  
\v 8 Muwab a’di ta mom pem jin ’thurka/ me’d mo. 
\q1 Dhali ap̱o/ Pan Aduum mo tani aha/ yip̱a p̱p̱am pema p̱o/ mo. 
\q1 Dhali ap̱o/ Pam P̱alasthiin mo aha/ mina ’ther cuuwa/ gom mo jin p̱inu mii e mo be. 
\q1  
\v 9 Kaja a’di imidi sus aha/ e ’peŋkuman bampa/ jin ṯenu gwo mo? 
\q1 Dhali kaja a’di imidi shu aha/ bway mo e Pan Aduum mo? 
\q1  
\v 10 /E a’di idiki waḵ amana, ayy Arumgimis? 
\q1 /E diki ḵal ya ka bor mo, ayy Arumgimis, nyaḵki ’kwani ma meem bam mo. 
\q1  
\v 11 Ayy ṯuka bor ma, woṯẖ am mo ’pena p̱o/ ’kwani kun ta ’kup̱ ki am mo, 
\q1 haali/ mowoṯẖ jin ta gi wathi/ mo tani a’di ta jim p̱e’th mo be. 
\q1  
\v 12 Nyaḵka Arumgimis mo tani ana p̱ina mii e mo 
\q1 haali/ a’di ta a’di jin siri’cki uni gun ta ’kup̱ bana ki sho’k mo. 
\c 61  
\s1 Eya manyuḵ gway mo ka shu/ kun buḵu mo. A’di jin ta gway ma Dawuu’d. 
\q1  
\v 1 Ciḵi gwom pem mo ma, ayy Arumgimis, kari ’ce gom mon’thom pem mo, 
\q1  
\v 2 ’peni ’pemen gi mony’cesh mo tani aha/ yuḵkina /e mo me’d jin ’thin ma dum pem buye/ mo be. 
\q1 Susi /e aha/ mo e wosh c̱aan jin turatur mmobol aha/ e mo, 
\q1  
\v 3 haali/ /e ta jim pem jin hurga/ jwa mo, 
\q1 /e ta a’di jin waki gu’ba turga/ jin ’bitha’bi’th ap̱o/ ’kwani kun ta ’kup̱ ki aha/ mo. 
\q1  
\v 4 Dhalki aha/ c̱a’ba e gu’b burrinyem pini ki sule/ sule/ mo. 
\q1 Ayy mmodi ki ’dantar e bwaŋ’kwariny ma darha’dam pini jin ta’da bi mo. \qs Doshi ma dhali ’cunycuri yan mo.\qs* 
\b  
\q1  
\v 5 Haali/ /e, ayy Arumgimis, ciḵki gwom pem jin oka/ is mo, 
\q1 /e c̱iki aha/ mal gi uni gwansan kun ḵo/ki gway pini mo. 
\q1  
\v 6 Galali mondiki/e ma maliḵ mo. 
\q1 Dhali dhalki yil piti ’dim ’kup̱ ntaga risa nyaḵum yil gi ’kwaniny’cesh mo. 
\q1  
\v 7 Dhalki a’di karuwa ḵursi ma maliḵ ki sule/ sule/ ibwambor ma Arumgimis mo. 
\q1 Dhalku/ ki non mo/en jin ṯelu sho’k mo dhali mii ma isiŋ gana/ mmotim a’di ap̱o/ mo. 
\q1  
\v 8 Dhali aha/ mina yuḵ gway mo mmomaŋ gway pini mo, 
\q1 me’d jin c̱ikika/ gwom pem jin oka/ is ’ko’da tee ’ko’da tee mo. 
\c 62  
\s1 Eya manyuḵ gway mo, isi ki gwo ma Yaduṯẖuun mo. Gway ma Dawuu’d. 
\q1  
\v 1 Goma Arumgimis ’de/ mo tani a’di ic̱or ma ḵashiram pem ki shwamm mo. 
\q1 ’Peni a’di mo tani mowoṯẖ pem p̱u’dki’d mo. 
\q1  
\v 2 A’din ’deŋ gana/ ita wosh pem mo dhali bway gi mowoṯẖ pem mo 
\q1 dhali acur pem jin ṯenu gwo mo. Ki aha/ minu ’koki joc̱ mo ki joc̱ jin shiyi’d mo. 
\q1  
\v 3 Um mini daḵ mo kakasja mmo’ko ap̱o/ ’kwani mo mmo’ce’d uni bwa mo, aris umi ’baar mo, 
\q1 kun wana e ka goŋ kun ishki gal mo, agoŋ jin dar gi mo jin kar shoka ’cesh mo? 
\q1  
\v 4 Uni i’kona gwo ibwa mo mmoyap̱ a’di ki sho’k ’pena ris ’kup̱ piti mo. 
\q1 Uni ’kunykina bwa ki ’kuny gom gwon thus mo. 
\q1 Uni ’borki ’twam buni mii mo, 
\q1 dhali hili e bwaman ma dum buni mo tani uni jeekina jee mo. \qs Doshi ma dhali ’cunycuri yan mo.\qs* 
\b  
\q1  
\v 5 Goma Arumgimis a’di ’de/ mo tani a’di ic̱or ma ḵashiram pem ki shwamm mo. 
\q1 Haali/ mo ma ’teŋ kap̱em pem mo tani a’di ’peni a’di mo be. 
\q1  
\v 6 A’din ’deŋ gana/ ita wosh pem mo dhali bway gi mowoṯẖ pem mo 
\q1 dhali acur pem jin ṯenu gwo mo. Aha/ minu mol yiḵin is mo be. 
\q1  
\v 7 Eya Arumgimis mo tani mom pem jin sika/ is gom mony’cuḵ mo dhali montaḵ mo tani ’kon e a’dim pem 
\q1 jin ta wosh jin eḵa/ eḵ mo, dhali a’dim pem jin hurga/ jwa mo tani a’di ita’da Arumgimis mo be. 
\q1  
\v 8 Gami gwo is e a’di ka tee i’baar mo, ayy ’kwani. 
\q1 Woli adum bum ibwambori a’di mo. 
\q1 Haali/ Arumgimis ta a’di jin mina ana hur jwa icine/ mo. \qs Doshi ma dhali ’cunycuri yan mo.\qs* 
\b  
\q1  
\v 9 ’Kwani kun hatha moŋ’ko ’ko’d ki ha’th mo tani hili ’kon jasi ari’ceenne/ mo. 
\q1 ’Kwani kun ’kon e mo jin kap̱a ’penkap̱an mo tani suskunu this e mo eya dum buni mo. 
\q1 Dhali mombar buni ’deke’thki’d isi mis mo. 
\q1 Uni tawasha tawash mo mmobola wulp̱e/ e mo. 
\q1  
\v 10 Dhalku/ ki dhu mo jin wunu awuny jwa i is e mo jin dilu to mo. 
\q1 Dhalku/ ki dhu mo ma ’te/ ma kap̱em bum ki p̱e’th e mo jin ḵwalu to mo. 
\q1 Waḵki/ mo jin tanu pa ki pa mar is mo tani dhalku/ ki dhu adum bum ’ko’di uni mo. 
\b  
\q1  
\v 11 Me’d ’de/ Arumgimis oki gwo mo. 
\q1 Me’di su/ mo tani aha/ ciḵkina gwo yansan mo 
\q1 ki mom’bi’th ta jima Arumgimis mo 
\q1  
\v 12 dhali e /e mo tani ayy Tap̱a, mo/en jin ṯelu sho’k mo cila /e mo. 
\q1 Haali/ /e ki raḵ wathi/ to ibway mo isi ki miin to jin miina a’di mo be. 
\c 63  
\s1 Gway ma Dawuu’d me’d jin dikina a’di e bwaasho gi ’Kwani Yahuuda/ mo. 
\q1  
\v 1 Ayy Arumgimis, /e tana Arumgimis pem mo, dhali aha/ simmkina /e e mo. 
\q1 Aḵashiram pem ’kosha ṯe/ /e mo. 
\q1 Buŋgwar is pem ’thina buye/ gom /e mo 
\q1 me’d mo jin ḵuthaḵu’th mo dhali mony’cesh jin ta toŋkor jin dina yi’de/ ki di mo be. 
\q1  
\v 2 Wakan aha/ hilkina ap̱o/ /e e mo jin ḵogu mo 
\q1 mmohil mom’bi’th pini mo dhali monyca mo. 
\q1  
\v 3 Haali/ mo/en pini jin ṯelu sho’k mo tani a’di ’borki’d mo mmobol mondiki/e e mo, 
\q1 ’twa/ pem midi maŋ /e mo be. 
\q1  
\v 4 Wakan aha/ mina ’bor /e mii mo isi me’d jin miga/ di ki e mo. 
\q1 Aha/ mina ’de’k me’d pem ’kup̱ ki mis mo dhali yuḵa yuḵ ap̱o/ gway pini mo. 
\b  
\q1  
\v 5 Aḵashiram pem a’di ’kunykina bwa mo me’d ki monoro’d mo dhali c̱a’bki momoṯ momoṯ mo 
\q1 dhali ’twa/ pem a’di maŋki /e ki moŋ’kuny bwa jin ta ’twa/ mo. 
\q1  
\v 6 Ki aha/ kulumkina gwo ibwa gom /e ap̱owa cim pem jin ishka/ mo 
\q1 dhali kulum gwo ibwa gom /e mon’thiny kun timka/ tim mo. 
\q1  
\v 7 Haali/ /e tana manwoṯẖ aha/ mo, 
\q1 dhali eya la ma bim pini mo tani aha/ yuḵkina gway gom moŋ’kuny bwa mo be. 
\q1  
\v 8 Aḵashiram pem koṯẖki /e me’d mo. 
\q1 Dhali me’da bim poros pini bu’thki aha/ mo. 
\q1  
\v 9 Hili uni gwansan kun simmki mondiki/em pem e mo mmo’ce’d a’di sho’k mo tani 
\q1 uni mini ii ka luŋgu’b e mony’cesh jin ’kula’kul mo. 
\q1  
\v 10 Uni mini c̱iku/ e mom’bi’th gi gandal jin kaaka mo. 
\q1 Uni min ma jala/ i’kwar ka gwap̱i/ mo. 
\q1  
\v 11 Hili amaliḵ mina bwa ’kuny eya Arumgimis mo. 
\q1 Aris uni gun thulkunu me’da p̱o/ ki a’di mo tani uni mini ca mo, 
\q1 haali/ ’twa/ gi uni kun tana ṯor ka ṯor mo tani minu ’dap̱ ’twa/ mo be. 
\c 64  
\s1 Eya manyuḵ gway mo. Gway ma Dawuu’d. 
\q1  
\v 1 Ciḵi ’twa/ pem ma, ayy Arumgimis, goma ’thup̱in ’twam pem mo. 
\q1 ’Tashi mondiki/em pem ’twa/ mo ’peni mo jin kar aha/ ki mo ma ḵo/ is gom uni kun ta ’kup̱ gi aha/ mo. 
\q1  
\v 2 Bagi aha/ mo ’peni ’kwanin thus kun miina wu’th ka ḵwal is mo, 
\q1 ’peni mo jin ’konu gwo ibwa mo mmomii to jin ta thus ki thus mo. 
\q1  
\v 3 Uni gun cilkina le’d buni me’d gandal kun kaaka mo, 
\q1 kun ṯurki gwo kun kaaka me’da thop̱a/ kun ṯuru/ to mo, 
\q1  
\v 4 mmo’kosha ’kosh ’peni mo jin isha uni ki jim bag ap̱o/ wathi/ jin dar gi mii ’ba/ mo, 
\q1 mmo’kosh a’di ki jahanne/ mo dhali dar gi moŋḵo/ is mo. 
\q1  
\v 5 Uni buthi tonthus buni me’d mo, 
\q1 dhali uni ṯorkina ṯor goma gume/ kun ’thina uniya ’cesh ka ḵwal is mo 
\q1 mmokulum gwo ibwa mo mmo/o ki: Kaja mini p̱ar ana e mo? 
\q1  
\v 6 Dhali kaja a’di imidi ŋap̱ ana ki bur bur gom miim bana kun ’ko ana i’ba/ mo? 
\q1 Ana kulumkina gwo ibwa ki e kun korakor mo mmobwaa wu’th mo. 
\q1 Haali/ isi bwaman bwa wathi/ mo dhali adu mo tani a’di ’kula’kul mo. 
\b  
\q1  
\v 7 Hili Arumgimis a’di midi shinka thop̱a/ ka luŋgu’b e uni imun mo, 
\q1 uni mini ta jama/ ki jahanne/ mo. 
\q1  
\v 8 Haali/ goma le’d buni mo tani a’di midi ’doyi uni e mo jin kup̱u/ mo. 
\q1 Aris ’kwani kun mini p̱ar uni e mo tani mini bir ’kup̱ buni mo be. 
\q1  
\v 9 Dhali yan’ko’d aris ’kwani ’baar mo mini ḵo/ is mo 
\q1 dhali uni mini ṯor to jin wagaskin ma Arumgimis mo, 
\q1 dhali kulum gwo ibwa mo gom to kun miikina a’di mo. 
\q1  
\v 10 Dhalki a’di jin mii miiŋḵar/e ’kunya bwa mo e Tap̱a mo 
\q1 dhali bu’th mo jin huru jwa e a’di mo. 
\q1 Dhalki uni gwansan kun dhelel ma du mo tani can mo. 
\c 65  
\s1 Eya manyuḵ gway mo. Gway ma Dawuu’d. Gway jin yuḵu mo. 
\q1  
\v 1 Momaŋ a’di ’dap̱a’d ki /e mo, ayy Arumgimis, eya Sihyuun mo, 
\q1 dhali e /e mo tani gwo jin onu is minu mii thim mo, 
\q1  
\v 2 ayy /e jin ciḵki mon’tho mo. 
\q1 Haali/ e i /e mo tani a’di ipiyina ris buŋgwar is mo 
\q1  
\v 3 haali/ gom gway gi miinthus mo. 
\q1 Ki gwondhaŋ bana p̱iki ana e mo, 
\q1 /e gwamki uni mo. 
\q1  
\v 4 Mom’bor mii gom a’di jin kwanykina /e mo dhali guyu/ mmo’dish mo is mo, 
\q1 dhali mmoc̱a’b e bwaagoŋ pini mo. 
\q1 Am minu kap̱ mo ki miim ’borgam pini mo e gu’b pini mo 
\q1 jin ta gu’b pini gi mondheleladhelel mo be. 
\b  
\q1  
\v 5 Ki dhan miim pini kun miikina /e kun caaca mmothoḵ am ’twa/ ki mony’cuḵ mo, 
\q1 ayy Arumgimis bam jin ta bway mowoṯẖ mo, 
\q1 /e jin ta mo ma ’teŋ kap̱e/ goma ris ’kwani kun ’kokin e ’pemen gi mony’ceshi ’baar mo, 
\q1 dhali uni kun si’dkin mo e bwamp̱owa ris ḵumma/ yi’de/ mo. 
\q1  
\v 6 /E ki mom’bi’th is pini mo tani /e ṯelki dhan wosh kun turatur sho’k mo, 
\q1 mmoc̱u’th gi mo ma dem dem mo. 
\q1  
\v 7 /E jin doshki yi’de/ jin mii’da ḵuku/ ḵuku/ mo, 
\q1 dhala ḵuku/ ḵukum buni jin birkina uni bakal mo, 
\q1 dhala dulaṯṯ gi ’kwani mo, 
\q1  
\v 8 wakan uni gwansan gun ’kokin e mony’cesh jin si’dasi’d mo tani, 
\q1 uni ḵo/ki is gom jamas miim pini mo. 
\q1 /E ki dhal mo jin yana ya gi mon’thamo/ mo dhali mom’pimpili/ mo mmoḵum cuuwa/ 
\q1 gom bwaŋ ’kunyka/ mo. 
\q1  
\v 9 /E buṯkin e mony’cesh mo dhali wol a’di yi’de/ mo, 
\q1 dhali /e ’kummki a’di ki ’kumm jin caaca kagahara mo. 
\q1 Yi’de/ ma Arumgimis kun son a’di ’tu’dki mo mo. 
\q1 /E ki ’twaḵ emen buni mo, 
\q1 haali/ wakan /e thosonki a’di mo be. 
\q1  
\v 10 /E wolki a’di yi’de/ ka ceŋjal kun ishkin ka enthus mo, 
\q1 dhali thoson a’di jil piti mo, 
\q1 mmodhal a’di ki c̱o’do/ mo ’pena p̱iriny ma sho’k mo 
\q1 dhali /e ki ’bor a’di mii mo gom ca jin cana a’di mo. 
\q1  
\v 11 /E shumki yil gi mo jin isha to ka enthus kun ta kum pini mo. 
\q1 Jil jin dir ma arabiyyam pini mo tani uni wolki ’twa/ mo ki momoṯ jin momoṯkina uni mo. 
\q1  
\v 12 Mo ma shon dhii/i’d gi mombwaasho mo tani wolki ’twa/ mo, 
\q1 dhali aris woshi ’baar mo uni ’kamki is buni ki moŋ’kuny bwa mo. 
\q1  
\v 13 Ashom bip̱ uni hi’thki is buni ki mo ma ma’diny mo, 
\q1 dhali embul wosh uni hi’thki is buni ki pos mo, 
\q1 uni ḵumki cuuwa/ mo dhali yuḵ gway mmonṯal ’de/ ki moŋ’kuny bwa mo. 
\c 66  
\s1 Eya manyuḵ gway mo. Gway jin yuḵu jin ta gway mo. 
\q1  
\v 1 Yuḵi gway ki moŋ’kuny bwa ki ’kal ’kal goma Arumgimis 
\q1 aris um kun ’koni mony’cesh mo. 
\q1  
\v 2 Yuḵi gway ki monyca gom gway piti mo. 
\q1 Dhali c̱i a’di monyca ki momaŋ mo. 
\q1  
\v 3 Dhali oyi Arumgimis gwo mo ki: Dhan miim pini ’ka’da mii ca kagahara. 
\q1 Wakan dhan monycam pini ’kuc̱ki uni gun ta ’kup̱ ki /e ibwambori /e mo. 
\q1  
\v 4 Aris ’kwani gi mony’ceshi ’baar mo luŋki /e mo. 
\q1 Uni yuḵki gway mmomaŋ /e mo, 
\q1 uni yuḵki gway gom gway pini mo. \qs Doshi ma dhali ’cunycuri yan mo.\qs* 
\b  
\q1  
\v 5 Iiyu/ mo dhali p̱ar to jin miikin ma Arumgimis e mo. 
\q1 A’di miiki’da dhan to kun caaca kagahara e bwaŋ ’kwani gi mony’cesh mo. 
\q1  
\v 6 A’di ṯu’kki ḵumma/ yi’de/ mo mmota a’cesh jin ḵuthaḵu’th mo. 
\q1 Dhali ’kwani iikin ki sho’k e bwam yi’de/ jin ḵu’thki’d mo. 
\q1 Dhali e mun mo tani aman ’kunykina bwa mo e a’di mo, 
\q1  
\v 7 a’di jin jiki’da ji ki mo ma dem dem piti ki sule/ sule/ mo, 
\q1 a’di jin timki kal gi mony’cesh gi ’kwani ki em piti mo, 
\q1 dhalku/ ki dhal uni gwansan bway mo uni kun pishi is buni ka le’d mo mmodhu is buni ki ca mo. \qs Doshi ma dhali ’cunycuri yan mo.\qs* 
\b  
\q1  
\v 8 Mom’bor mii goma Arumgimis bana mo, ayy ’kwani, 
\q1 dhalki cuuwa/ jin minu maŋ a’di dhalki a’di ciḵu mo, 
\q1  
\v 9 a’di jin dhuki ana e bwaman ’kwani kun ’kon ki e mo, 
\q1 dhali diki dhal sho’k bana bway mmoyeres mo. 
\q1  
\v 10 Haali/ /e, ayy Arumgimis, /e nyo/ki aman mo. 
\q1 Dhali /e palki aman me’d ’dolkon kush jin palu ki o’d mo. 
\q1  
\v 11 /E ki sus am eya gume/ mo. 
\q1 /E ki ’thi monṯo’c bwa e empa’d bam mo. 
\q1  
\v 12 /E ki dhal ’kwani bway mo mmomeri ’kup̱i aman mo. 
\q1 Aman iikina e mo/o’d mo dhali e yi’de/ kun shwana nyor mo, 
\q1 hili /e din mmosus am e embul mo kun beeyabee mo. 
\b  
\q1  
\v 13 Aha/ mina ya e gu’b pini mmoc̱i to jin ’ciṯẖu/ ’kus mmo’tha ki o’d mo. 
\q1 Aha/ mina c̱i /e gwo jin oka/ is mo, 
\q1  
\v 14 a’di jin bahkina ’twam pem mo 
\q1 dhali ’twam pem oki gwo is mo me’d jin dika/ e monṯo’c bwa mo. 
\q1  
\v 15 Aha/ mina c̱i /e to jin c̱inu mmo’ciṯẖ ’kus jin ta guŋkulus ḵa’bal mo, 
\q1 nyaḵka ku’d ma rasiŋ ḵa’bal mo kun ’ciṯẖu/ ’kus mmo’tha ki o’d mo. 
\q1 Aha/ mina c̱i to jin ’ciṯẖu/ ’kus kun ta gwaṯẖim bip̱ dhali mi mo. \qs Doshi ma dhali ’cunycuri yan mo.\qs* 
\b  
\q1  
\v 16 Iiyu/ mo dhali ciḵ gwo mo, aris umi ’baar mo kun ḵo/kina Arumgimis mo, 
\q1 dhali aha/ mina ṯor a’di jin miikunu gom aha/ mo. 
\q1  
\v 17 Aha/ ’therkina cuuwa/ kagahara gom a’di mo, 
\q1 dhali a’di karkunu ki ca ki ’twa/ pem mo. 
\q1  
\v 18 Waḵki/ aha/ mina ’taki thip̱ tonthus eya dum pem mo tani 
\q1 Tap̱a a’di midi ’taki diki ciḵ aha/ ’twa/ mo. 
\q1  
\v 19 Hili ka jiŋ gana/ Arumgimis a’di iciḵki’da ciḵ mo. 
\q1 A’di c̱iki’da hirdhe/ ki ’twa/ pem jin ’thoka/ mo. 
\q1  
\v 20 Mom’bor mii goma Arumgimis mo, 
\q1 haali/ a’di diki waḵ mon’thom pem mo, 
\q1 walla joc̱ mo/en piti jin ṯelu sho’k ’peni aha/ mo. 
\c 67  
\s1 Eya manyuḵ gway mo ka shu/ kun buḵu mo. Gway jin yuḵu mo jin ta gway mo. 
\q1  
\v 1 Dhalka Arumgimis mii mii ma ’the gom am mo dhali ’bor am mii mo 
\q1 dhali kar bwam/em piti mmokush mo ap̱o/ aman mo, \qs Doshi ma dhali ’cunycuri yan mo.\qs* 
\b  
\q1  
\v 2 ki bway pini minu mish mo ap̱o/ mony’cesh mo, 
\q1 dhali mom’bi’th pini jin tana /e ata is ki me’d mo e bwaman kal gi ’kwaniny’cesh mo. 
\q1  
\v 3 Dhalki ’kwani maŋ /e mo, ayy Arumgimis. 
\q1 Dhalka ris ’kwani ’baar mo maŋ /e mo. 
\b  
\q1  
\v 4 Dhalki kal gi ’kwaniny’cesh yuḵ gway ki mom’bor bwa mo dhali ki moŋ’kuny bwa mo, 
\q1 haali/ /e dwallki ’kwani gwo ki dar gi mii ma gwar ’de/ mo, 
\q1 dhali shu kal gi ’kwaniny’cesh bway ap̱o/ mony’cesh mo. \qs Doshi ma dhali ’cunycuri yan mo.\qs* 
\b  
\q1  
\v 5 Dhalki ’kwani maŋ /e mo, ayy Arumgimis. 
\q1 Dhalka ris ’kwani ’baar mo maŋ /e mo. 
\b  
\q1  
\v 6 Mony’cesh gwono’dki maman piti jin markina a’di is mo. 
\q1 Arumgimis jin ta’da Arumgimis bam mo, a’di ’borki am mii mo. 
\b  
\q1  
\v 7 Arumgimis ’borki am mii mo. 
\q1 Dhalka ris ’kwani kun ’kon e ’pemen gi mony’cesh mo ḵo/ a’di mo. 
\c 68  
\s1 Eya manyuḵ gway mo. Gway ma Dawuu’d. Gway jin yuḵu mo. 
\q1  
\v 1 Dhalka Arumgimis cu mis mo dhali dhalki uni kun ta ’kup̱ ki a’di c̱ekerkunu bwa mo. 
\q1 Dhalki uni gwansan kun shi/ a’di i e mo tani son mo ’peni bwambori a’di mo. 
\q1  
\v 2 Dhalki uni wana e ka ku’d kun borkunu mo, wakan borki uni mo. 
\q1 Dhali me’d mamana dham jin ṯo’dki’d ibwambori o’d mo tani 
\q1 dhalki a’di jin ta thus ’ce’du/ sho’k mo si’da/ e bwambor ma Arumgimis mo. 
\q1  
\v 3 Hili dhalki a’di jin ta’da ḵar/e ’kunya bwa mo. 
\q1 Dhalki uni yuḵ gway ki moŋ’kuny bwa mo ibwambor ma Arumgimis mo. 
\q1 Dhalki uni tashu ki moŋ’kuny bwa mo. 
\q1  
\v 4 Yuḵi gway eya Arumgimis mo. Yuḵi gway jin maŋu gway piti mo. 
\q1 ’Deki gway isi mis ap̱o/ a’di jin merki’da p̱owa raḵ mo. 
\q1 Gway piti ta Tap̱a mo. Yuḵi gway ki moŋ’kuny bwa mo ibwambori a’di mo. 
\b  
\q1  
\v 5 Ababa gi uni kun daran ki icom mo, dhali amanhil up̱ gun wuna ikaṯẖ mo tani, 
\q1 a’di ta’da Arumgimis jin di’d e mom piti jin ḵogu mo. 
\q1  
\v 6 Arumgimis ki c̱i uni kun dar gi gu’b mo mo mmo’ko icine/ mo. 
\q1 A’di ki sus ’kwani gun dhunu eya sijin e mo jin rusa/ rus mo, 
\q1 hili uni gun pish is ka le’d mo tani uni ’kokin e mo jin ta’da burṯa/ o’d ka burṯa/ o’d mo. 
\b  
\q1  
\v 7 Ayy Arumgimis, me’d jin yana /e ka pije/ nyaḵki ’kwanim pini mo tani 
\q1 dhali me’d jin yana /eya ye’th ye’th nyaḵki ’kwanim pini mo e mombwaasho mo tani, \qs Doshi ma dhali ’cunycuri yan mo.\qs* 
\b  
\q1  
\v 8 mony’cesh yiḵinki is mo dhali momis wolki’da shoka ’cesh ’peni icine/ mo, 
\q1 e buŋ’kus ma Arumgimis mo. 
\q1 Wosh Sinaa/ c̱aan mo tani a’di yiḵinki is mo e buŋ’kus ma Arumgimis mo, 
\q1 a’di jin ta’da Arumgimis ma Israyiil mo. 
\q1  
\v 9 Ayy Arumgimis, /e dhalkina sho’k mmohe’th kagahara mo, 
\q1 /e jin wari mal pini is ka nyaŋ’ko’d mo me’d jin wuyina is a’di e mo. 
\q1  
\v 10 Ama’diny ḵa’bal pini uni gamki mo jin ’konu icine/ mo. 
\q1 E mo mii miiŋ ganam pini mo tani, ayy Arumgimis, /e ki thoson mii gom ’kwani kun dar gi to mo. 
\b  
\q1  
\v 11 Tap̱a ḵanki gwo mo. 
\q1 Uni gwansan tana ris kagahara kun ḵalki gwom ’borga/ yan mo. 
\q1  
\v 12 Imaliḵ gi ’kwani ma mee mo tani uni son mo, hili uni sokin mo. 
\q1 Up̱ kun ’koni pa mo tani uni ḵwa/ki to jin dilu bwa mo, 
\q1  
\v 13 ba uni nyaḵ ’ko ki ḵa’bal e bwam ma goŋ mo, 
\q1 dhala biŋ gurko/ uni ’koshkunu is ki ’dolkon kush mo 
\q1 dhali jeshem piti c̱a’b ki go’d go’d me’d ’dolkona go’d go’d mo. 
\q1  
\v 14 Ki a’di jin ta gi Mom’bi’th ma Dem Dem c̱ekerki imaliḵ bwa mo tani 
\q1 awasa/ p̱u’dki’d ap̱o/ Wosha Salmuun mo. 
\b  
\q1  
\v 15 Ayy, wosh jin turatur jin c̱a’bki dem dem mo, jin ta wosha turga/ gi Pam Bashan mo. 
\q1 Ayy wosha turga/ jin ’kana ’kup̱ ki bidhi/ bidhi/ ka ris mo, jin ta wosha turga/ gi Pam Bashan mo. 
\q1  
\v 16 Ata hila /e mo ki en dhap̱an kan mo, ayy, wosha turga/ jin ’kana ’kup̱ ki bidhi/ bidhi/ ka ris mo, 
\q1 e ’kuwosh jin on ma Arumgimis bwa mo mmota mom piti mmoc̱a’bi cine/ mo? 
\q1 Nye, mo jin mina Tap̱a c̱a’b ki sule/ sule/ mo. 
\q1  
\v 17 Ki mom’bi’th ma ris shumarum kun tana dem dem mo kun ta iss ’kwanimpa ka iss ’de/ ka alip̱ mo, 
\q1 dhala alaap̱a p̱owa alaap̱ mo, 
\q1 Tap̱a pu’dki’d ’peni ’kuwosha Sinaa/ e mo jin ḵogu mo. 
\q1  
\v 18 /E ki poḵ wosh jin turatur mo, 
\q1 dhali /e ki shu uni bway uni gun bu’thkunu mo e bway pini jin yana /e mo, 
\q1 dhali bu’th to kun c̱inu ki me’d e bwaŋ ’kwani mo, 
\q1 isi kan e bwaŋ ’kwani kun pishi is ka le’d mo, wakan ki Tap̱a Arumgimis midi di e mo yan mo be. 
\q1  
\v 19 Mom’bor mii midi di gom Tap̱a mo, 
\q1 a’di jin ’de’kki ana abor ki mis isa yempa/ mo. 
\q1 Arumgimis a’di ta bway gi mowoṯẖ bana mo. \qs Doshi ma dhali ’cunycuri yan mo.\qs* 
\b  
\q1  
\v 20 Arumgimis bana a’di ta’da Arumgimis gi bway gi mowoṯẖ mo. 
\q1 Dhali eya Arumgimis mo tani, a’di ta Tap̱a jin cila mo jin yenu ’peni mowu mo. 
\q1  
\v 21 Hili Arumgimis midi pwaṯẖ ’kup̱ gi uni kun ta ’kup̱ ki a’di mo, 
\q1 dhali ayinyjwa gi ’kup̱ gi a’di jin ya’d e bway piti jin dina mii a’di i’ba/ mo. 
\q1  
\v 22 Tap̱a o gwo mo ki: 
\q1 Aha/ mina doḵ uni ka nyaŋ’ko’d ’peni Pam Bashan mo, 
\q1 dhali aha/ mina doḵ uni ka nyaŋ’ko’d ’peni ḵumma/ yi’de/ jin ’kula’kul mo 
\q1  
\v 23 ki um mini lam sho’k bum ka bas mo, 
\q1 dhali ka le’d ma ’kam bum mo tani uni mini ta gi tonṯe/ ’peni ’kwani gi ’kup̱ bum mo. 
\b  
\q1  
\v 24 Yam pini kun ḵogu kun yana /e mo tani mishu mo, ayy Arumgimis, 
\q1 a’di jin ta ya ma Arumgimis pem mo, a’di jin ta’da Maliḵ pem mo, e mo jin ḵogu mo, 
\q1  
\v 25 imanyuḵ gway kun iina bori a’di mo, dhali uni kun buḵina dheŋdhenye/ iini ’ko’d mo 
\q1 dhali bwaman uni mo tani nyara/ p̱ina dheŋdhenyem buni ki me’d mo. 
\q1  
\v 26 ’Bori Arumgimis mii e dhana tul ’kup̱ gi ’kwani mo, 
\q1 Tap̱a, ayy um ’kwani kun ta uc̱i ma Israyiil kun kasha e mo. 
\q1  
\v 27 ’Pena waḵ ma Benyamiin, a’di jin p̱iski’d e bwaman uni, jin shu’da shu/um bway mo, 
\q1 e bwaman gi iya/ gi ’Kwani Yahuuda/ eya waambuhany buni mo, 
\q1 dhali e iya/ gi ’Kwani gi Pan Sabulun mo, dhali e iya/ gi ’Kwani gi Pa Nap̱taali mo. 
\q1  
\v 28 Tilu mom’bi’th ma dem dem pini is mo, ayy Arumgimis. 
\q1 Ṯori mom’bi’th pini mo, ayy Arumgimis, /e jin wagaski a’di gom am mo. 
\q1  
\v 29 Gom gu’b gi mondheleladhelel pini jin di’d e Pa Urushaliim mo tani 
\q1 imaliḵ ḵalki to kun c̱inu ki me’d mmoc̱i /e mo. 
\q1  
\v 30 Ḵucuri to/e gwansan kun ’kon e bwaman ma pil mo, 
\q1 dhali e bwaman ma ma’diny gwaṯẖim bip̱ nyaḵki ushi bip̱ gi ’kwani mo. 
\q1 Yap̱ uni ki sho’k uni gwansan kun ’dap̱kina e goma thulp̱a/ mo, 
\q1 dhali c̱ekerki ’kwani bwa mo uni gun ’kunyi bwa e mo ma mee mo. 
\q1  
\v 31 Dhalka koroḵ ḵalu ’peni Pam Masir mo. 
\q1 Dhalki ’Kwaniŋ Gale/ soyin ki jahanne/ mo dhali he’th me’d buni goma Arumgimis mo. 
\q1  
\v 32 Yuḵi gway eya Arumgimis mo, ayy aris ’peŋkuman bampa/ gi mony’cesh mo. 
\q1 Yuḵi gway mmomaŋ Tap̱a mo. \qs Doshi ma dhali ’cunycuri yan mo.\qs* 
\b  
\q1  
\v 33 E a’di jin merki’d eya p̱owa ris momis mo, a’di jin ta gi momisa dhamo/ mo. 
\q1 Hili mo mo ma, a’di hashki ’twam piti ’peni mun mo, ’twam piti jin c̱a’bki dem dem mo. 
\q1  
\v 34 C̱ika Arumgimis mom’bi’th mo, 
\q1 mom’bi’th piti jin miikina a’di miin tap̱a ap̱o/ ’kwani ma Israyiil mo, 
\q1 dhali mom’bi’th piti a’di diki’d e bwaman momis mo. 
\q1  
\v 35 Arumgimis a’di ḵa/aḵa/ e mom piti jin ḵogu mo, 
\q1 a’di jin ta’da Arumgimis gi ’Kwani ma Israyiil mo, 
\q1 a’di ki c̱i mom’bi’th mo dhali ’bi’th ’kwanim piti is mo. 
\q1 Mom’bor mii midi di goma Arumgimis mo. 
\c 69  
\s1 Eya manyuḵ gway mo, isi ki gwo gom jandin to mo. Gway ma Dawuu’d. 
\q1  
\v 1 Tayi aha/ is is ki me’d mo ma, ayy Arumgimis. 
\q1 Haali/ yi’de/ loski aha/ ki ’ba/ ilu/ mo. 
\q1  
\v 2 Aha/ cic̱kina ka ’cesh e bwam boro’th jin ’kula’kul mo, 
\q1 e mo jin dar gi mo jin miga/ jeṯṯ shoki cine/ mo. 
\q1 Aha/ p̱u’dkina e yi’de/ jin ’kula’kul mo, 
\q1 dhali agannu/ yi’de/ a’di kac̱ki’da p̱o/ aha/ mo. 
\q1  
\v 3 Aha/ wukina is e gom kom pem mo, 
\q1 dhali ’kus pem dhere’di ’baar mo. 
\q1 Dhali em pem ’ceṯẖki’da ’tum kagahara mo 
\q1 mmowu e ’kup̱ mmoc̱ora Arumgimis mo. 
\q1  
\v 4 Mmobola mur ’kup̱ pem e mo tani 
\q1 uni ta uni gwansan kun shi/ki aha/ e mo ki dar gi miiŋ kamu/ mo. 
\q1 Uni gwansan c̱a’bki dem dem mo kun mini ’ce’d aha/ sho’k moyi, 
\q1 uni gwansan kun mini bu’th aha/ ki gwo ma ṯor mo. 
\q1 A’di jin dika/ ki ḵwal naskina/ mo tani 
\q1 aha/ mina mii doḵ a’di ka nyaŋ’ko’d mowa? 
\q1  
\v 5 Ayy Arumgimis, /e mishki mii ma p̱alim pem mo. 
\q1 Mii gun ṯẖu’thka/ mii mo tani ’konuki bag ’peni /e mo be. 
\q1  
\v 6 Dhalku/ ki dhal uni gwansan bway kun tan gi mo ma ’teŋ kap̱e/ e /e mo dhunu ki mo ma ’the is gom aha/ mo, 
\q1 ayy Tap̱a Arumgimis gi momis mo. 
\q1 Dhalku/ ki dhal uni gwansan bway kun simmki /e e mo jin minu ’doyu/ uni e mo jin minu this uni taḵ gom aha/ mo, 
\q1 ayy Arumgimis ma Israyiil mo. 
\q1  
\v 7 Haali/ a’di gom gway pini mo tani aha/ ḵalkina mo jin waḵuwa waḵ mo, 
\q1 dhali mon’the is a’di kumki aha/ bwam/em pem mo. 
\q1  
\v 8 Aha/ wara ki wathi/ gi bampaŋ kamu/ e bwaman ’kwani ma waḵ pem mo, 
\q1 mmota a’di gi paŋ kamu/ e bwaman iya/ ma ta’da mo. 
\q1  
\v 9 Haala nyor gom gu’b pini a’di shwakaa/ mo, 
\q1 dhali asor gi uni gwansan kun sorki /e mo tani ṯa’kkina p̱o/ aha/ mo. 
\q1  
\v 10 Ki aha/ karkina is pem ki gwa’d mo eya ḵashiram pem ki moŋga/ to mo tani 
\q1 a’di warki’d ki mowaḵ pem mo. 
\q1  
\v 11 Ki aha/ hi’thkina burrinye/ ma shawaal e is mmota burrinye/ gom is pem mo tani, 
\q1 aha/ warkina ki a’di jin miikina uni ka maḵ mo. 
\q1  
\v 12 Aha/ tana a’di jin ṯora uni gwansana ṯor kun ’kon e ’twaŋkala goŋ mo 
\q1 dhali uni kun ’koshkin ma su mo tani yuḵki gway gom aha/ mo. 
\q1  
\v 13 Hili gom aha/ mo a’thom pem jin ’thoka/ mo tani e /e mo be, ayy Tap̱a. 
\q1 Eya tente/ jin mishuwa bu’th bu’th mo, ayy Arumgimis, 
\q1 dhali e mo/ish jin isha mo/en pini jin ṯelu sho’k mo tani /e ’thoḵki aha/ ’twa/ mo. 
\q1  
\v 14 Ki mowoṯẖ pini jin ta isiŋ gana/ mo tani ’cwami aha/ mo 
\q1 ’peni boro’th jin loski aha/ mo. 
\q1 Dhalki aha/ ’cuḵu mo ’peni ’kwani kun ta ’kup̱ ki aha/ mo 
\q1 dhali ’peni yi’de/ kun ’kula’kul kun shwana nyor mo. 
\q1  
\v 15 Dhalku/ ki dhala gannu/ yi’de/ bway mo mmodhi’th aha/ sho’k mo, 
\q1 walla moŋ’kul piti mmolos aha/ mo, 
\q1 walla jisa ’kulga/ mmomu’th ’twa/ ap̱o/ aha/ mo. 
\b  
\q1  
\v 16 ’Thoḵi aha/ ’twa/ mo ma ayy Tap̱a, haali/ mo/en pini jin ṯelu sho’k mo a’di ’bora’bor mo be. 
\q1 Isi ki gwo gi momiimiim pini jin ishki’d ka enthus mo tani ṯu’kki/ aha/ is mo. 
\q1  
\v 17 Dhalku/ ki bag jis/em pini ’peni c̱iŋkinam pini mo. 
\q1 Haali/ aha/ dina e mo ma c̱is mo tani huru/ ki jahanne/ mo mmo’thoḵ aha/ ’twa/ mo. 
\q1  
\v 18 ’Dishi aha/ is mo dhali wani aha/ ’ba/ mo, 
\q1 dhali kari aha/ ki ’kus ’peni ’kwani kun ta ’kup̱ ki aha/ mo. 
\b  
\q1  
\v 19 /E mishi mowaḵ pem jin waḵu aha/ mo, 
\q1 dhali mo ma ’the is pem mo dhali mo jin ’konuki taḵ aha/ mo. 
\q1 Aris uni gun ta ’kup̱ ki aha/ misha /e mo. 
\q1  
\v 20 Asor ’ce’dkina dum pem bwa mo, 
\q1 wakan a’di itaka/ buṯkan ki buṯkan mo. 
\q1 Aha/ ŋap̱a mo jin minu ’taki hil aha/ ki mo ma ’thime/ ki mo/en mo tani hili aha/ gama wathiŋ kamu/ yisa. 
\q1 Dhali aha/ ŋap̱a ’kwani mmo’taki malas aha/ mo tani, hili aha/ dinaki gam jaŋ kamu/ mo. 
\q1  
\v 21 Uni c̱iki aha/ aṯi’d tonthus e tonṯe/ mo, 
\q1 dhali gom yi’de/ jin bu’thki aha/ mo tani uni c̱iki aha/ yiman tom’pac̱a’d mmop̱i mo be. 
\q1  
\v 22 Dhalki tonṯem buni jin shwana uni atharabeesa mo warki’d ka gume/ ibwambori uni mo. 
\q1 Dhalki tom buni kun ’ciṯẖu/ ’kus mmomiiya bas goma yuḵ jin yuḵu ka tul ’kup̱ mo warki’d ka gume/ mo. 
\q1  
\v 23 Dhalki em buni a’di dhurumkunu mo mo, wakan ki uni mini ’koki p̱ar mo e mo 
\q1 dhali dhu ki uni empa’d buni mmodee ki sule/ sule/ mo. 
\q1  
\v 24 Woli anyor pini jin deḵkina /e ap̱o/ uni mo, 
\q1 dhali dhalka nyor buni jin pura /e ki o’d kumki uni ’twa/a ’cesh mo. 
\q1  
\v 25 Dhalki gu’ba’kum buni taki bwam ma’du/ mo. 
\q1 Dhalku/ ki dhal jan ṯal ’deŋ kamu/ bway mo mmoc̱a’b e gu’b burrinyem buni mo. 
\q1  
\v 26 Haali/ uni ṯo’cki a’di bwa mo a’di jin dorkina /e mo, 
\q1 dhali a’di jin taḵkina /e jama/ mo tani uni ’kon naskina/ mmoṯo’c a’di bwa ki nyanye/ mo. 
\q1  
\v 27 Dhuki uni ajisa i is mo. 
\q1 Dhalku/ ki dhu uni mmodhu ka p̱o/ ’peni /e mo. 
\q1  
\v 28 Dhalki uni ’koshu gway buni ’pena warka/ gi mondiki/e mo, 
\q1 dhali uni minu ’koki ’kwar gway buni e bwamana warka/ nyaḵki ’kwani kun tana ḵar/e mo. 
\b  
\q1  
\v 29 Hili aha/ wo’ckunuwa du she/ mo dhali ’kaa du she/ mo, 
\q1 Dhalki bwaya ḵar/em pini, ayy Tap̱a Arumgimis, kar aha/ e mo jin ḵa’dama/ ḵa’dam mo. 
\q1  
\v 30 Aha/ mina maŋ gway ma Arumgimis ki gway jin yuḵu mo. 
\q1 Aha/ mina eḵ a’di ki bwa jin ’boruwa ’bor i is mo. 
\q1  
\v 31 Mii yansan a’di imidi ’bor Tap̱a bwa kagahara mmobola morbip̱ e mo, 
\q1 walla rasim bip̱ jin ’kana je mo dhala cuḵ mo. 
\q1  
\v 32 Dhalki uni gwansan kun siriju/ ki sho’k p̱ar mii e mo dhali ’kuny bwa mo. 
\q1 Dhali um gwansan gun simmkina Arumgimis e mo tani dhalka dum bum tashu e mo doḵ/e. 
\q1  
\v 33 Haali/ Tap̱a a’di ciḵki gwo mo ’peni uni gun mini mii ta gi to mo, 
\q1 dhali a’di diki waḵ uni gun ta unim piti kun deḵkunu mo. 
\q1  
\v 34 Dhalki momis dhali mony’cesh maŋ a’di mo, 
\q1 dhali dhan ḵumma/ yi’de/ dhali aris to ’baar mo kun ḵalki ya e bwaman a’di mo. 
\q1  
\v 35 Haali/ Arumgimis midi ta Sihyuun is is ki me’d mo 
\q1 dhali nyaŋ ka Yahuuda/ ’peŋkuman bampam piti doḵ/e mo. 
\q1 Dhali uni gun ta c̱iŋkinam piti mo tani mini ’ko e mo yan mo dhali bu’th a’di mo 
\q1  
\v 36 dhali uc̱i gi c̱iŋkinam piti mo tani midi ta mal piti mo, 
\q1 dhali uni gwansan gun eni gway piti mo tani mini ’ko e bwaman a’di mo. 
\c 70  
\s1 Eya manyuḵ gway. Gway ma Dawuu’d, gom mo jin kanu to e jin c̱inu ki me’d mo. 
\q1  
\v 1 Tayi ki bwam ’boro’d ma, ayy Arumgimis mmo’cuḵ aha/ mo. 
\q1 Ayy Tap̱a, huru/ ki jahanne/ mmowoṯẖ aha/ mo. 
\q1  
\v 2 Dhalki uni dhunu ki mon’the is mo dhali duŋkurki ’kup̱ is mo 
\q1 uni gwansan kun ŋap̱ mondiki/em pem mo. 
\q1 Dhalki uni doḵkunu to ka nyaŋ’ko’da bor mo dhali dhalki uni ’doyunu mo e mo jin ushu uni taḵ mo 
\q1 uni gwansan kun ona bwa ki aha/ minu shi/ mo. 
\q1  
\v 3 Dhalki uni ḵo/ is ki ḵo/ jin shiyi’d mo gom mo ma ’the is buni mo 
\q1 uni gun o gwo mo ki: ’Thor ki ’thor. 
\q1  
\v 4 Dhalki aris uni ’baar kun simmi /e e mo tani 
\q1 ’bora bwa mo dhali ’kuny bwa mo e /e mo. 
\q1 Dhalki uni gwansan kun en bway gi mowoṯẖ pini mo 
\q1 o gwo mo kagahara mo ki: Arumgimis a’di caaca mo. 
\q1  
\v 5 Hili aha/ hatha’ko’d mo dhali aha/ mina mii ta gi to mo. 
\q1 Huru/ ki jahanne/ gom aha/ mo, ayy Arumgimis. 
\q1 /E tana manwoṯẖ pem mo dhali aman’cuḵ pem mo. 
\q1 Ayy Tap̱a, dhalku/ ki tayaa diiṯe/ mo. 
\c 71  
\q1  
\v 1 E /e mo tani, ayy Tap̱a, aha/ bu’thkina mom pem jin hurga/ jwa e /e mo. 
\q1 Dhalku/ ki dhal aha/ bway ki aha/ minu kar ki mo ma ’the is mo. 
\q1  
\v 2 E momii ma ḵar/em pini mo tani ’cuḵi aha/ mo dhali ’cwami aha/ mo. 
\q1 Ḵa’di ’cem pini gom aha/ mo dhali tayi aha/ is is ki me’d mo. 
\q1  
\v 3 Wari /e ki wosh jin miga/ hur jwa icine/ mo, 
\q1 mmota acur jin ṯenu gwo mo mmota aha/ is is ki me’d mo, 
\q1 haali/ /e ta wosh pem mo dhali acur pem jin ṯenu gwo mo. 
\q1  
\v 4 ’Cwami aha/ mo, ayy Arumgimis pem, ’peni me’d gi a’di jin ta thus ki thus mo, 
\q1 dhali ’peni a’di jin bu’thki’da bu’th ki ḵwap̱ mo, a’di jin diki ta ḵar/e mo dhali wathi/ jin ta maṯṯ ki maṯṯ mo. 
\q1  
\v 5 Haali/ /e, ayy Tap̱a, /e tana ’teŋ kap̱em pem mo, 
\q1 dhali ’pena cim pem jin gamka/ /e gwo is mo, ayy Tap̱a, ’peni dhuru’c pem jin taka/ mo. 
\q1  
\v 6 Ap̱o/ /e mo tani aha/ dikina ka linthiṯẖ ’peni mondho’th pem mo. 
\q1 /E ta a’di be jin bu’thki aha/ ’peni bwa ma dho’th ma ta’dam pem mo. 
\q1 Momaŋ pem ṯikirki di gom /e mo. 
\b  
\q1  
\v 7 Aha/ mera ’kwani ka ris ka yempa/ mo. 
\q1 Hili /e ta jim pem jin ’bitha’bi’th jin hurga/ jwa icine/ mo. 
\q1  
\v 8 ’Twa/ pem a’di ’tu’du/ mo ki piny piny ki momaŋ /e mo 
\q1 dhali ki monycam pini i’baara tee mo. 
\q1  
\v 9 Dhalku/ ki biṯ aha/ asho ka tee jin miga/ ta adhan mo. 
\q1 Dhalku/ ki dhal aha/ ’pen mo waḵki/ aha/ mina mom’bi’th pemi ’baar mo. 
\q1  
\v 10 Haali/ ’kwani tana ris kun ta ’kup̱ ki aha/ mo kun oki isi gwo gom aha/ mo, 
\q1 uni gwansan kun c̱orki mondiki/em pem mo tani uni logomki gwo mo mmonṯal ’de/ gom aha/ mo 
\q1  
\v 11 dhali o gwo mo ki: Arumgimis, mola /e, dhalki a’di ’pen mowa? 
\q1 Uri a’di isho’k mo dhali bu’th a’di mo 
\q1 haali/ jaŋ kamu/ di’da jin midi ’cuḵ a’di mo? 
\b  
\q1  
\v 12 Ayy Arumgimis, dhalku/ ki si’d ’peni aha/ kagahara mo. 
\q1 Ayy Arumgimis pem, huru/ ki jahanne/ dhali woṯẖ aha/ mo. 
\q1  
\v 13 Dhalki unim pem gwahan kun yeri aha/ is ki gway dhunu ki mo ma ’the is mo dhali shwa ki o’d ki ’ci’d’da/ mo. 
\q1 Dhalki uni tashu ki mo jin waḵuwa waḵ mo dhali mo jin thisuwa taḵ taḵ mo, 
\q1 uni gwansan kun simmki mo e jin midi shi/ aha/ is mo. 
\q1  
\v 14 Hili aha/ mina ta gi mo ma ’teŋ kap̱e/ ki sule/ sule/ mo, 
\q1 dhali aha/ mina maŋ /e naskina/ ki sule/ dhali ki sule/ sule/ mo. 
\q1  
\v 15 ’Twam pem midi ṯor gwo gom mo ma ḵar/em pini jin ḵalkina /e mo 
\q1 dhali miim pini jin miina /e gom bway gi mowoṯẖ goma tee ’baar mo, 
\q1 haali/ mondeŋ buni a’di peki monyiṯẖ pem jin nyiṯẖka/ uni mo. 
\q1  
\v 16 Ki dhan mii ma dem dem gi Tap̱a Arumgimis mo tani aha/ mina p̱u’dku/ mo, 
\q1 aha/ mina maŋ mii ma ḵar/em pini mo, a’di jin ta jim pini /e ’de/ mo. 
\b  
\q1  
\v 17 Ayy Arumgimis, ’peni dhuru’c pem jin taka/ mo tani /e ṯorki aha/ gwo mo, 
\q1 dhali aha/ mina bah dhan momer pini jin miina /e to mo. 
\q1  
\v 18 Wakan, isi kani, e mo jin canu ki yil mo dhali mo jin ’kan ma wuu ’kwani mo 
\q1 ayy Arumgimis, dhalku/ ki dhal aha/ ’pen mo, 
\q1 ntagi aha/ mina bah mo ma dem dem pini mo 
\q1 eya risa nyaḵum yil gi ’kwani kun mini p̱u’du/ mo. 
\q1  
\v 19 Mom’bi’th pini dhali mo ma ḵar/em pini mo tani, ayy Arumgimis, 
\q1 uni jidhirkin e momis jin ḵa’dama/ ḵa’dam mo. 
\q1 /E jin miikina dhan to kun caaca mo, 
\q1 ayy Arumgimis, kaja a’di iwaki /e mo? 
\q1  
\v 20 /E jin karki aha/ mo mmop̱ara ris monṯo’c bwa e kun surkun mo tani 
\q1 /e mini tash aha/ e mo doḵ/e. 
\q1 ’Peni moŋ’kul gi mony’cesh mo tani 
\q1 /e mini ’de’k aha/ abor gi mis doḵ/e mo. 
\q1  
\v 21 /E mini mar aha/ montaḵ pem is is mo 
\q1 dhali malas aha/ doḵ/e mo. 
\q1  
\v 22 Dhali aha/ si’da/ mina maŋ /e ka dheŋdhenyem pem jin buḵka/ mo 
\q1 gom mo ma isiŋ ganam pini jin tana /e mo tani, ayy Arumgimis pem, 
\q1 aha/ mina yuḵ gway mmomaŋ /e ka dheŋdhenye/ jin ’kon ma shu/i pesu/ mo, 
\q1 ayy /En ’De/ jin ta jima Israyiil jin Ḵogu mo. 
\q1  
\v 23 ’Twa/ pem midi ’ther cuuwa/ gom bwaŋ ’kunyka/ mo, 
\q1 ma me’d jin miga/ yuḵ gway mmomaŋ /e mo, 
\q1 nyaḵka ḵashiram pem si’da/ ilu/ mo a’di jin ’cwamkina /e mo. 
\q1  
\v 24 Dhali ale’d pem midi ṯor gwo gom mii ma ḵar/em pini jin woṯẖkina /eya woṯẖ 
\q1 ka tee ’baar mo 
\q1 haali/ uni dhukunu ki mo ma ’the is mo dhali mo jin thisuwa taḵ taḵ e mo, 
\q1 uni gwansan kun ŋap̱ki bway ki bur bur mo mmo’taki shi/ aha/ is mo. 
\c 72  
\s1 Gway ma Sulemaan. 
\q1  
\v 1 C̱iya maliḵ mo ma ḵar/em pini mo, Ayy Arumgimis, 
\q1 dhali mo ma ḵar/em pini gom ya/ ma maliḵ mo. 
\q1  
\v 2 Dhalki a’di dwall ’kwanim pini gwo ki mii ma ḵar/e mo 
\q1 dhali unim pini kun hatha’ko’d ki mo ma ḵar/e mo. 
\q1  
\v 3 Dhalki dhan wosha turga/ ḵali mo jin rusu ki rus gom ’kwani mo, 
\q1 dhali aris wosh si’da/ ḵali mo ma ḵar/e mo. 
\q1  
\v 4 Dhalki a’di ’ce’d gwo she/ gom to jin raḵi ’kwani kun hatha’ko’d mo. 
\q1 C̱iyi mo jin ’cuḵuwa ’cuḵ gom ’kwani kun mini mii ta gi to mo, 
\q1 dhali yap̱i uni gwansan kun siri’ckina siri’c ki sho’k mo. 
\b  
\q1  
\v 5 Dhalki a’di di’d ki e mo ka tente/ di’di motim ’kup̱ naskina/ mo, 
\q1 dhali me’d jin din ma ppe naskina/ gara/ mo, eya risa nyaḵum yil gi ’kwani mo. 
\q1  
\v 6 Dhalki a’di wana e ka sho’k jin wolki yi’dem piti asho jin ’punyu/ mo, 
\q1 me’da sho’k jin mii yi’de/ ki puya/ puya/ ap̱owa ’cesh mo. 
\q1  
\v 7 Eya teem piti jin dina a’di ki e mo tani dhalki mo ma ḵar/e ’twaḵa’d mo, 
\q1 dhali moŋḵu’th is mmo/ish mo ntaga ppe midi diki di doḵ/e mo. 
\b  
\q1  
\v 8 Dhalki a’di ta gi mom’bi’th ’peni ḵumma/ yi’de/ mo ntagi ḵumma/ yi’den tiya mo, 
\q1 dhali ’peni yi’de/ kun sokin mo ita gi ’pemen gi mony’cesh mo. 
\q1  
\v 9 Dhalki uni gun ta ’kup̱ ki a’di luŋkini bwambori a’di mo, 
\q1 dhali ’kwani kun ta ’kup̱ ki a’di mini ’biṯṯ bu’da’cesh mo. 
\q1  
\v 10 Dhalki imaliḵ gi Pan Tarshiish dhali kum pa uḵa ’cesh mo 
\q1 c̱i a’diya thulp̱a/ mo, 
\q1 dhali imaliḵ gi Pan Shaba mo dhali Pan Saba mo 
\q1 ḵal to kun c̱inu ki me’d gom a’di mo. 
\q1  
\v 11 Dhalki aris imaliḵi ’baar mo ṯagkina ’cesh ki jiŋ ’kup̱a’dup̱uni bwambori a’di mo, 
\q1 dhali dhalka ris kal gi ’kwaniny’cesh si’da/ mii a’di to mo. 
\b  
\q1  
\v 12 Haali/ a’di ’cuḵki uni gun mini mii ta gi to mo, ki a’di yuḵki’da yuḵ mo, 
\q1 a’di jin hatha’ko’d mo dhali a’di jin dar gi wathi/ mmowoṯẖ a’di mo. 
\q1  
\v 13 A’di ki hila hil ki e ma ’thime/ ki mo/en ap̱o/ uni gun ’ka’da is mo dhali ap̱o/ uni gun mini mii ta gi to mo, 
\q1 dhali ta moŋ’koki/em buni is ki me’d mo gom uni gun mini mii ta gi to mo. 
\q1  
\v 14 ’Peni mo jin sirijuwa siri’c ki sho’k mo dhali abujur jin bujuru mo tani a’di wanki moŋ’koki/em buni ’ba/ mo, 
\q1 dhala bas buni ta yinthoŋ gana/ e jis/em piti mo. 
\b  
\q1  
\v 15 Dhalki a’di di’d ki e ki sule/ sule/ mo. 
\q1 Dhalki ’dolkon gana/ jin ta gi Pan Shaba c̱inu a’di mo. 
\q1 Dhalki mon’tho minu ṯikir ’tho gom a’di ki ṯikir ṯikir mo 
\q1 dhali mom’bor mii minu ’tho gom a’di ka tee ’baar mo. 
\q1  
\v 16 Dhalki emen tonṯe/ ishin ka enthus e bampa/ mo, 
\q1 ap̱owa ris ’kuwosha turga/ mo me’d jin yiḵinkina ’tham uni is mo. 
\q1 Dhalki maman cwam piti wana e ki ji gi Pan Lubnaan mo 
\q1 dhali dhalki ’kwani ’tu’dina ’tu’d mo ’peni aris ’peŋkuman bampa/ mo 
\q1 me’da sho gi bwam bunto mo. 
\q1  
\v 17 Dhalki gway piti ’dim ’kup̱ ki sule/ sule/ mo. 
\q1 Dhalki yir piti di’d ki sule/ sule/ me’da tente/ mo. 
\q1 Dhalki ’kwani ’bori is buni mii ki a’di mo, 
\q1 dhali aris kal gi ’kwaniny’cesh yuḵi a’di mo ki a’di jin ’boru mii mo. 
\b  
\q1  
\v 18 Mom’bor mii midi di gom Tap̱a mo a’di jin ta’da Arumgimis gom ’Kwani ma Israyiil mo, 
\q1 A’din ’deŋ gana/ imii’da dhan to gi momer mo. 
\q1  
\v 19 Mom’bor mii midi di gom gway gi monycam piti ki sule/ sule/ mo. 
\q1 Dhalki monycam piti ’tu’d mony’ceshi ’baar mo. Amen dhali Amen. 
\b  
\q1  
\v 20 Mon’tho ma Dawuu’d mo a’di jin ta ya/ ma Yassa mo a’di ’baarkunu mo. 
\c 73  
\ms1 AWARKA/ JIN ’KONA ’BANI KWARA MO 
\s1 Gway ma Asap̱ mo. 
\q1  
\v 1 Ka jiŋ gana/ Arumgimis ta a’di jin ’boro’d gom uni kun dhelel ma du mo, 
\q1 gom uni gwansan kun dhelelkin eya du mo. 
\q1  
\v 2 Bahili gom aha/ mo tani sho’k pem ’dishi ’twa/ ’taki dheres mo, 
\q1 ŋaṯgin pem ’disha’dish ’taki yeres mo. 
\q1  
\v 3 Haali/ aha/ tana dhap̱an gom uni kun dhu is ki ca mo, 
\q1 ki aha/ p̱arkina mo jin rusa to ki rus gom uni kun ta thus ki thus e mo. 
\q1  
\v 4 Haali/ uni dar gi mo jin su’k uniya du ka war mo. 
\q1 Buŋgwar is buni c̱a’b ki c̱ur c̱ur mo dhali c̱a’b ki ’thiḵil ’thiḵil mo. 
\q1  
\v 5 Uni ṯocu ’kus me’d ’kwanin tiyaa? 
\q1 Dhali uni doru ki to jin woci is she/ me’d ’kwanin tiyaa? 
\q1  
\v 6 Wakan uni dhu is ki ca gom neram buni kun hitha uni i’ba/ mo, 
\q1 dhali mo ma bujur jin bujurkina uni mo tani a’di ’kamki uni is mo me’d burrinye/ mo. 
\q1  
\v 7 Em buni dhethadhe’th gom momoṯ buni mo, 
\q1 adum buni a’di kumkunu ’twa/a ’cesh ki mii ma p̱ali mo. 
\q1  
\v 8 Uni ’theḵ shushi mis mo dhali o gwo ki mo jin dup̱uwa dup̱ i e mo. 
\q1 Mmodhuna uni is buni eya tente/ ki ṯẖorony mo tani uni ki ruma rum gom mo jin miinu sirica siri’c ki sho’k mo. 
\q1  
\v 9 Uni ki ḵa’d ’twam buni mmosor momis mo 
\q1 dhala le’d buni a’di ḵalki ’pen ḵany e mony’cesh mo. 
\q1  
\v 10 Dhali gom gwo gi wakan mo tani ’kwani ṯu’kkin mo dhali maŋ uni mo 
\q1 dhali gam to shiyi’da kamu/ e uni yisa. 
\q1  
\v 11 Dhali uni o gwo mo ki: Ki tonta si’da/ imish ma Arumgimis mo? 
\q1 A/a’di jin Caa e ki Ca nyiṯẖki toŋ kamuwa? 
\q1  
\v 12 Hili mo mo ma, uni gwansan ita thus ki thus mo. 
\q1 Isa yempa/ uni ’koni mo jin ’ka’da mii ’ba/ ki ’ka’d mo 
\q1 dhali uni mara to kun tana uni pa ki pa is mo. 
\q1  
\v 13 Dhali aha/ ki p̱e’th mo tani aha/ karkina dum pem ki dhelel dhelel mo 
\q1 dhali lam me’d pem e mo jin ’konu ka p̱o/ mo. 
\q1  
\v 14 Haali/ ka tee ’baar mo tani aha/ dherkunu is bwa mo, 
\q1 dhali dorkunu isa yempa/ mon’thamo/ mo. 
\b  
\q1  
\v 15 Waḵki/ aha/ mina ’taki o gwo mo ki: Aha/ mina o gwo wakan mo tani 
\q1 aha/ mina ’taki diki ta a’diŋ gana/ goma nyaḵum yil gi uc̱im pini mo. 
\q1  
\v 16 Hili ki aha/ kulumkina gwo ibwa mmomish gwo yansan ’ban mo tani 
\q1 a’di midi ’taki wayaa/ e ki to jin midi wu is e mmomii mo, 
\q1  
\v 17 ntagi aha/ yakina e mo ma Arumgimis jin ḵogu mo, 
\q1 dhali yan’ko’d aha/ ki nyiṯẖ ’pemen gi ’ko’d ’buni mo. 
\q1  
\v 18 Ka jiŋ gana/ /e ki dhu uni e mo jin yeresa/ yeres mo. 
\q1 /E ki dhal uni bway mo mmoṯa’k e mo jin kup̱u/ mo. 
\q1  
\v 19 Uni ’ce’dki sho’k kadhamowa? 
\q1 Uni dhidhu sho’k ka pupush ka dhan mii jin ta’da pure/ ka pure/ mo. 
\q1  
\v 20 Uni wana e ki jan jin shu’bu/ mo me’d jin merkina jan ’deŋ kamu/ e mo. 
\q1 ’Peni momer e mo tani um ki waḵ to munn buni mo. 
\q1  
\v 21 Ka ḵashiram pem ḵa/ki’d ki ḵa/ mo tani 
\q1 dhali ki aha/ su’kkunu eya du mo, 
\q1  
\v 22 aha/ takina dholgon mo dhali ta p̱us mo tani 
\q1 aha/ wana e ki tombwaasho ’kup̱ ki /e mo. 
\q1  
\v 23 Bahili aha/ dina mmoṯikir c̱a’b nyaḵki /e mo. 
\q1 /E bu’thki me’da bim poros pem mo. 
\q1  
\v 24 /E ki shu aha/ bway ki gwom pini jin logomkina /e mo 
\q1 dhali yan’ko’d /e mini bu’th aha/ mmotaḵ mo. 
\q1  
\v 25 Kaja a’di itaka/ e momis mo? Hili diki ta jasi /eya? 
\q1 Dhali to p̱iyi’d e mony’cesh yan mo mmo/oka/ bwa mo mmodhal /e ka p̱o/ mo. 
\q1  
\v 26 Buŋgwar is pem dhala dum pem mini ’taki ush me’d mo tani 
\q1 hili Arumgimis a’di ta’da Man’bitha dum pem is mo dhali Amanpwaḵ ki aha/ to jin miga/ ta ki sule/ sule/ mo. 
\q1  
\v 27 Haali/ hili mo mo ma, uni gwansan kun si’dkin ’peni /e mo tani minu ’ce’d sho’k mo be. 
\q1 /E ki kar mo jin daḵu gwo ’kup̱ mo gom uni gwansan kun ṯori gwon thus ap̱o/ /e mo. 
\q1  
\v 28 Hili gom aha/ mo tani a’di ’boro’d jin miga/ ’disha Arumgimis is mo. 
\q1 Aha/ karkina Tap̱a Arumgimis mo mmota a’di jin hurga/ jwa icine/ mo, 
\q1 ki aha/ mina ṯora ris miim pini mo. 
\c 74  
\s1 Gway jin yedhu sho’k goma Asap̱ mo. 
\q1  
\v 1 Ayy Arumgimis, ki to jin ta’da ta iṯa’kkina /e amana sho ki sule/ sule/ kan mo? 
\q1 Ki to jin ta’da ta idhala /eya nyor pini i ya ku’d ap̱o/ ḵa’bal pini kun tana shon dhii/i’d mo? 
\q1  
\v 2 Kayi dhana tul ’kup̱ ’kwanim pini e mo, uni gun takina /e ’peni kadhamo/ mo, 
\q1 uni kun wankina /e ’ba/ mo mmota waḵ gom mal pini mo. 
\q1 Kayi ’Kuwosh ma Sihyuun e mo e mo yan jin c̱a’bkina /e mo. 
\q1  
\v 3 C̱uthi /e ŋaṯgin pini e mo jin ’tuḵkunu ki sule/ sule/ mo. 
\q1 Uni gun ta ’kup̱ ki ’kup̱ mo tani ’ce’dkina ris to sho’k mo e mo jin ḵogu mo. 
\q1  
\v 4 Uni gun ta ’kup̱ ki /e mo tani aŋkarkin e bwaman mom pini jin ḵogu mo. 
\q1 Uni thumkina bereḵ buniŋ gana/ mo mmota jamas mo. 
\q1  
\v 5 Dhali e ’twaŋkal gu’b isi mis mo tani uni ki jep̱ 
\q1 cwandher bwa ka thurmany mo. 
\q1  
\v 6 Dhali yan’ko’d aris cwa kun ’cimudhu bwa mo tani 
\q1 uni ’ce’d uni ka ’cesh ka thurmanya ba’d’ban mo dhali ki ’dorro/ mo. 
\q1  
\v 7 Uni ki c̱i’th mom pini jin ḵogu ki o’d mo. 
\q1 Uni ki shi/a ’cesh pini jin c̱a’ba /e ki gway pini mo. 
\q1  
\v 8 Uni ki o gwo e is buni mo ki: Ana mina uṯẖ uni ’baar mo. 
\q1 Uni ki c̱itha ris mo jin tulu is goma Arumgimis e mo yan mo. 
\b  
\q1  
\v 9 Ana ’konaki p̱ar jamas bana e mo. 
\q1 Dhala manc̱i gwoŋ kamu/ di’da? 
\q1 Dhali jaŋ kamu/ di’di bwam ana jin mishi gwo ki mii yan midi ta ata? 
\q1  
\v 10 Ayy Arumgimisa, /e mini dhal ’kwani kun ta ’kup̱ bway mo mmo’theḵ shushi mis ki rash rash kan ntagi mo gi wakata mo? 
\q1 A/’kwani kun ta ’kup̱ ki /e mini sor gway pini ki sule/ sule/ kan mo? 
\q1  
\v 11 Ki to jin ta’da ta si’da/ igukina /e me’d pini ka nyaŋ’ko’d mo? 
\q1 Ki to jin ta’da ta ikarkina /e me’d pini e bwambor pini mo? 
\b  
\q1  
\v 12 Hili Arumgimis jin ta’da maliḵ pem mo a’di jin diki’d ’peni kadhamo/ mo, 
\q1 jin miiki bway gi mowoṯẖ e bwaman gi mony’cesh mo. 
\q1  
\v 13 /E ki ḵwa/ dhan yi’de/ bwa ki mii ma dem dem pini mo. 
\q1 /E ki ’ce’d ’kup̱ ma dhan tasha/ ki bwam yi’de/ mo. 
\q1  
\v 14 /E ki pwaṯẖ ’kup̱ gi dhan to yi’de/ mo, 
\q1 dhali /e ki c̱i a’di mmota tonṯe/ gom uni kun uḵu kun ’kon e bwaasho mo. 
\q1  
\v 15 /E ki tirki wosh mo dhali ḵa’d a’di ’twa/ mo dhali du’d yi’de/ mo dhali yi’de/ ki ’thonthor mo. 
\q1 /E ki ḵu’thki yi’de/ jin sokin e bwam ma gap̱ mo. 
\q1  
\v 16 Atee ta jim pini mo. Mon’thiny si’da/ ta jim pini mo. 
\q1 /E ṯelki moŋkush gi momis sho’k mo dhala tente/ mo. 
\q1  
\v 17 /E thosonkina ris gwayu/ gi mony’cesh mo. 
\q1 /E karki moyurantee mo dhali mondiṯ mo. 
\q1  
\v 18 Kayi gwo yan e mo ma, ayy Tap̱a, ’kwani kun ta ’kup̱ ’theḵki shushi mis kata sa/ mo? 
\q1 dhali ’kwani kun ’koki dhu mii gun ḵogu mo tani waḵki gway pini mo be. 
\q1  
\v 19 Dhalku/ ki c̱iya ḵashira/ gi gurkom pini ki tom bwaasho mo. 
\q1 Dhalku/ ki ŋa mondiki/e gi a’dim pini jin hatha’ko’d ki sule/ sule/ mo. 
\q1  
\v 20 Kari gwom pini jin gamu me’d mo. 
\q1 Haali/ mo gi mondhurumi’d gi mony’cesh mo tani a’di ’tu’dkunu mo ki ’kwani gwahan kun bujurkina bujur mo. 
\q1  
\v 21 Dhalku/ ki dhal uni gwansan bway mo kun yap̱kunu ki sho’k mo mmodhu ki mo ma ’the is mo. 
\q1 Dhalki uni kun hatha’ko’d dhali kun mini mii ta gi to mo maŋ gway pini mo. 
\b  
\q1  
\v 22 Cuyi mis mo, ayy Arumgimis, dhali muri is mo gom mii jin midi raḵ /e mo. 
\q1 Kayi gwo e ki uni gwahan kun ushi gwo kun ḵogu dhu ’theḵi /e shushi is ka tee ’baar mo. 
\q1  
\v 23 Dhalku/ ki ŋa cuuwa/ jin cuuna ’kwani kun ta ’kup̱ ki /e mo, 
\q1 abomboḵ ’peni ’kwani kun ta ’kup̱ ki /e ka ris mo, a’di jin yaki’d ka ’kulam ’pen mo. 
\c 75  
\s1 Eya manyuḵ gway mo, isi ki gwo jin onu ki: Dhalki sho’k ki ’ce’d mo. Gway ma Asap̱. A’di jin ta gway mo. 
\q1  
\v 1 Am c̱ina /e mo jin ’boru /e bwa i is mo, ayy Arumgimis, 
\q1 bwa jin ’boruwa ’bor bwa i is c̱ina aman /e mo. 
\q1 Aman yuḵkina yuḵ ap̱o/ gway pini mo dhali deŋ dhan momer pini e mo kun miikina /e mo. 
\q1  
\v 2 Ka tee jin karka/ ’pen ka pije/ mo tani 
\q1 aha/ mina dwall gwo ki dar gi mii ma gwar ’de/ mo. 
\q1  
\v 3 Ka ’cesh midi wuŋkul mo dhali aris ’kwani kun ’kon e a’di mo tani 
\q1 a’di ta aha/ be jin ṯelki mom piti jin tana a’di akaḵ mo. \qs Doshi ma dhali ’cunycuri yan mo.\qs* 
\b  
\q1  
\v 4 Aha/ mina o uni gwansan kun dhu ’ba/ ki ca gwo mo ki: Dhalku/ ’ba/ ki dhu ki ca mo 
\q1 dhali aha/ mina o a’di jin ta thus ki thus gwo mo ki: Dhalku/ cem pini ki ’de’k ki mis mo. 
\q1  
\v 5 Dhalku/ cem pini ki ’de’k ’kup̱ ki mis jin ḵa’dama/ ḵa’dam mo 
\q1 walla o gwo mmo’theḵ ’ba/ imis mmo/ush ’kwani ga/ mo. 
\b  
\q1  
\v 6 Haali/ yisa ’peni mom’pesho’k walla bora luŋgu’b mo 
\q1 dhali yisa ’peni mombwaasho mo ip̱u’dkina mo jin ’deku is ki mis mo. 
\q1  
\v 7 Hili a’di ta’da Arumgimis jin torki gwon dwall ’twa/a ’cesh mo 
\q1 mmo’thi jan ’de/ ’ko’da ’cesh mo dhali cuwa kamuŋ kamu/ mis mo. 
\q1  
\v 8 Haali/ e me’d gi Tap̱a mo tani aḵubbaaya diki’d mo 
\q1 jin sekina yimana mura’th jin ḵa/u ki ŋah ŋah ki ’tha’da/ ’tha’da/ mo, jin ’koshu is ki ’bore/ mo. 
\q1 Dhali a’di midi wol a’di ’peni jin p̱inu mo, 
\q1 dhali aris ’kwani kun ta thus ki thus e mony’cesh mo 
\q1 uni mini p̱i a’di ḵu’th mo ki ṯer ntaga ’cummam piti ilu/ mo. 
\q1  
\v 9 Hili aha/ mina bwa ’kuny ki sule/ sule/ mo. 
\q1 Aha/ mina yuḵ gway mmomaŋ Arumgimis ma Yakuub mo. 
\q1  
\v 10 Aris ce gi uni kun ta thus ki thus mo tani mina a’di wa’b bwa mo 
\q1 hili ce gi uni kun tana ḵar/e minu dhu ki ca mo. 
\c 76  
\s1 Eya manyuḵ gway ka shu/ jin buḵu mo. Gway ma Asap̱. A’di jin ta gway mo. 
\q1  
\v 1 Eya Yahuuda/ mo tani a’di imish ma Arumgimis mo, 
\q1 gway piti jin eḵa/ eḵ mo e bwaman ma Israyiil mo. 
\q1  
\v 2 Monyc̱a’b piti a’di ṯelkunu sho’k mo e Pan Saliim mo, 
\q1 mo jin c̱a’ba a’di mo tani a’di di’d eya Sihyuun mo. 
\q1  
\v 3 E mun mo tani a’di ki ’ce’da thop̱a/ kun shinunu ki o’d ki yuwar yuwar bwa mo, 
\q1 dhali agoŋgoro/ gi mo/as mo dhali gandal gi mo/as mo dhali aris toŋkan gi mo/as mo. \qs Doshi ma dhali ’cunycuri yan mo.\qs* 
\b  
\q1  
\v 4 Monyca ta jim pini mo, dhali mo jin eḵu 
\q1 mmobol dhan wosha turga/ e kun ’kon ki sule/ sule/ mo. 
\q1  
\v 5 ’Kwani kun ’kon ma du ki dhethadhe’th mo tani uni dilkunu tom buni kun dilina uni mo. 
\q1 Uni cic̱kin e mo jin ishu e mo. 
\q1 Aris ’kwani gi mo/as mo tani 
\q1 uni mol me’d buni bu’th mmomii to mo. 
\q1  
\v 6 E mo ma ḵucur pini mo ayy Arumgimis ma Yakuub mo tani 
\q1 a’di jin mer shumaruma p̱o/ mo dhali shumarum mo uni su/ miikina buye/ ka yiŋkira/ mo. 
\b  
\q1  
\v 7 Hili /e, /e tana pure/ mo. 
\q1 Kaja a’di imidi mish doshi bwambori /e mo 
\q1 me’d jin min ma nyor pini ’tulu/ ka pije/ mo? 
\q1  
\v 8 ’Peni momis mo tani /e ki bah gwo gom gwon dwall jin toru ’twa/a ’cesh mo. 
\q1 Mony’cesh ḵo/ki is mo dhali dosh shoka ’cesh mo 
\q1  
\v 9 ka Arumgimis cuki mis mo dhali ṯel gwon dwall piti jin toru ’twa/a ’cesh mo 
\q1 mmota ris ’kwani gwansan is ki me’d mo kun ’cwarkunu e mony’cesh mo. \qs Doshi ma dhali ’cunycuri yan mo.\qs* 
\b  
\q1  
\v 10 Ka jiŋ gana/ anyor gi ’kwani midi maŋ /e mo. 
\q1 Dhali anyor jin boc̱ki’d mina /e non ’twa/ ’pena p̱o/ /e mo. 
\q1  
\v 11 Oyi um gwo is e Tap̱a Arumgimis bum mo dhali thimi uni mo. 
\q1 Dhalki aris uni ’baar mo kun ’kam a’di is mo tani ’doyu to kun c̱inu ki me’d mo 
\q1 e a’di jin minu mii ḵo/ mo 
\q1  
\v 12 dhali a’di jin ’ciṯẖki mondiki/e gi iya/ ma maliḵ mo, 
\q1 a’di jin taki’da pure/ ka pure/ ap̱o/ imaliḵ gi mony’cesh mo. 
\c 77  
\s1 Eya manyuḵ gway, isi ki gwo gi a’di jin ’cemki gway jin yuḵu ka Yaduṯẖuun mo. Gway ma Asap̱. 
\q1  
\v 1 Aha/ gwokina ’twa/ Arumgimis ki nyanye/ mo, 
\q1 mmoko ’twa/ Arumgimis ki nyanye/ ki a’di midi ciḵ aha/ ’twa/ mo. 
\q1  
\v 2 Ka tee jin ṯocu aha/ bwa mo tani aha/ simmkina Tap̱a e mo, 
\q1 e mon’thiny me’d pem a’di he’thki’d mo ki dar gi mo jin wuna is a’di e mo. 
\q1 Aḵashiram pem a’di ushki’d mo ki a’di minu malas mo. 
\q1  
\v 3 Aha/ kulumkina gwo ibwa goma Arumgimis mo, dhali aha/ gwokina mo mmo/anan is mo. 
\q1 Dhali aha/ kulumkina gwo ibwa mo dhali shi/in pem ’thikina buye/ mo. \qs Doshi ma dhali ’cunycuri yan mo.\qs* 
\b  
\q1  
\v 4 /E ki bu’th ’ko’d em pem me’d mo ’peni mo jin ’kamutha a’di e mo. 
\q1 Aha/ ṯocu bwa kagahara mo dhali aha/ mola gwo o mo. 
\q1  
\v 5 Aha/ hila isi gwo i e goma teen dhamo/ gunn mo, 
\q1 dhali aha/ kakina yil gunn e kadhamo/ mo. 
\q1  
\v 6 Aha/ ṯorkina ṯor eya dum pem mon’thiny ka ḵar/e mo. 
\q1 Dhali aha/ kulumkina gwo ibwa mo dhali aha/ ŋap̱kina shi/in pem mo. 
\q1  
\v 7 Mina Tap̱a usha ush ki sule/ mo 
\q1 dhali diki mii mii ma ’the doḵ/e ’taa? 
\q1  
\v 8 Mo/en piti jin ṯelu sho’k daḵki’d mo ’taa? 
\q1 Dhali aris gwom piti kun onu is ’kokin ntagi ’pemen ma risa tee ’baar mo ’taa? 
\q1  
\v 9 Arumgimis thiski mii ma ’them piti e mo ’taa? 
\q1 Dhala nyor piti jin shwakina a’di mo tani a’di daḵki’da hil hil ki e ma ’thime/ ki mo/en mo ’taa? \qs Doshi ma dhali ’cunycuri yan mo.\qs* 
\b  
\q1  
\v 10 Dhali aha/ ona gwo mo ki: A’di ta aha/ jin jwakaṯkunuwa du mo 
\q1 ki me’d gi a’di jin Caa e ki Ca aḵki mii e mo. 
\b  
\q1  
\v 11 Aha/ mina ka mii gi Tap̱a e mo. 
\q1 Nye, aha/ mina ka momer piti e ’peni kun dhamo/ mo. 
\q1  
\v 12 Aha/ mina kulum gwo ibwa goma ris miin tom pini mo 
\q1 dhali ṯikir gwo kulum ibwa gom mii ma dem dem pini mo. 
\q1  
\v 13 Bway pini, ayy Arumgimis, a’di ḵogu mo. 
\q1 Ka rum jana caaca me’da Arumgimis banaŋ gana/ mo? 
\q1  
\v 14 /E tana Arumgimis jin miiki momer mo, 
\q1 /e jin piki mo ma dem dem pini ibwaman ’kwani mo. 
\q1  
\v 15 /E ki me’da bim pini mo tani /e ki wan ’kwanim pini ’ba/ mo, 
\q1 uni gun ta iya/ ma Yakuub mo dhali ku ma Yuusup̱ mo. \qs Doshi ma dhali ’cunycuri yan mo.\qs* 
\b  
\q1  
\v 16 Ka ris yi’de/ p̱arki /e e mo tani ayy Arumgimis, 
\q1 ka ris yi’de/ p̱arki /e e mo tani uni ḵo/kina ḵo/ is mo, 
\q1 nye, uni gun ’kula’kul mo tani deekina is ki bir bir gom moŋḵo/ is mo. 
\q1  
\v 17 Dhali araḵ kun ’kani mis wolki yi’de/ mo, 
\q1 dhali momis si’da/ dhalki mondor ma sho’k me’d mo. 
\q1 Dhali athop̱am pini a’di dhwa/a’dki’d ki dhwa/a’d dhwa/a’d mo eya ris ’twaŋkal kuku/ mo. 
\q1  
\v 18 Dhali mom pini jin ’twaḵa mondor ma sho’k mo tani a’di diki’d e ’tham kun ’theḵkin mo. 
\q1 Awara sho’k pini a’di kushki mony’cesh mo, 
\q1 dhali mony’cesh deeki’d ki bir bir mo dhali yiḵin is mo. 
\q1  
\v 19 Bway pini diki’d e bwam ḵumma/ yi’de/ mo 
\q1 dhali bway tur pini diki’d eya dhan yi’de/ mo. 
\q1 Dhala dum bwam sho’k pini jin yana /e mo tani mishuwa? 
\q1  
\v 20 /E ki sus ’kwanim pini me’da ma’diny ḵa’bal mo, 
\q1 ki me’d ma Musa mo dhala Haruun mo. 
\c 78  
\s1 Gway jin yedhu sho’k goma Asap̱ mo. 
\q1  
\v 1 Dhuyi ’ce, ayy ’kwanim pem, ki gwo jin ṯorka/ mo. 
\q1 Ḵa’di bwany’cem bum mo ki gwo ki ’twam pem mo. 
\q1  
\v 2 Haali/ aha/ mina ḵa’d ’twam pem ki gwom ’bi’th e mo. 
\q1 Aha/ mina bah gwo mmo/o gwo kun mini ’koki ’ko eya tente/ ’peni gwon dhamo/ mo, 
\q1  
\v 3 ’peni to gwansan kun ciḵkina ana gwo mo dhali mish mo, 
\q1 uni gun ṯorkina ibabam bana ana mo. 
\q1  
\v 4 Ki ana mina ’koki bag uni ’peni uc̱im buni mo, 
\q1 hili a’di minu ṯor ka nyaḵum yil jin mini yayu/ i’ko’d mo 
\q1 mii gi monyca gi Tap̱a mo dhali mo ma dem dem piti mo 
\q1 dhali momer jin wagaskina a’di mo. 
\b  
\q1  
\v 5 A’di ṯelki gwonyc̱i sho’k eya Yakuub mo, 
\q1 dhali kar gwoŋḵan ’pen ka pije/ jin c̱inu eya Israyiil mo, 
\q1 a’di jin ḵankina a’di ibabam bana mo 
\q1 mmoṯor uc̱im buni gwo mo 
\q1  
\v 6 ki uc̱i ma nyaḵum yil kun min ma p̱o/i ’ko isu/ ki uni mini mish uni mo 
\q1 dhali uc̱i kun ’konuki dho’th naskina/ mo, 
\q1 dhali cu mis mo dhali ṯor uc̱i kun ta uc̱im buni mo 
\q1  
\v 7 wakan ki uni mini dhu mo ma ’teŋ kap̱em buni eya Arumgimis mo 
\q1 dhali ’koki this mii ma Arumgimis e mo, 
\q1 hili mmodhu gwoŋḵan piti kun ’kwarkunu mo 
\q1  
\v 8 dhali ki uni mini ’taki ’koki waki ibabam buni mo, 
\q1 mmota ga du jin tana wa’ba/ mo dhali ta anyaḵum yil kun mini pish is ka le’d mo, 
\q1 uni gun mini ta anyaḵum yil kun min ma du ṯel shoka ’cesh mo, 
\q1 uni gun mini ta ga ḵashira/ kun mini ’koki ta ku isiŋ gana/ goma Arumgimis mo. 
\b  
\q1  
\v 9 ’Kwani ma Ep̱rayim uni takin ka bwaa gi mo/as mo, 
\q1 dhali uni doḵkin ka nyaŋ’ko’d mo ka tee jin asuwa mee mo. 
\q1  
\v 10 Uni ’koki dhu Gwo ma Arumgimis jin gamu me’d mo, 
\q1 hili uni ushkin ki ’tash mo mmo/ii isi ki gwoŋḵan piti jin c̱inu mo. 
\q1  
\v 11 Uni ŋaki mii kun miikina Tap̱a mo 
\q1 dhali miimer jin ṯorkina a’di uni mo. 
\q1  
\v 12 E jis/e gi ibabam buni mo tani a’di wagaski momer mo 
\q1 dhali e Pam Masir mo dhali e bwam bunto ma Suu/an mo. 
\q1  
\v 13 A’di ki ḵwa/ dhan ḵumma/ yi’de/ bwa mo dhali dhal uni bway mo mmo/ii icine/ mo 
\q1 dhali a’di ki kar yi’de/ mmodosh me’da gap̱ mo. 
\q1  
\v 14 Dhali montee mo tani a’di ki shu uni bway ka raḵ mo, 
\q1 dhali mon’thiny isa yempa/ mo tani a’di ki shu uni bway ka dhan o’d jin kushi mo mo. 
\q1  
\v 15 A’di ki tawan wosh e ki cwa e mombwaasho mo 
\q1 dhali a’di ki c̱i uni yi’de/ jin kasha e ki kash mmop̱i mo me’d mo jin ’kula’kul mo. 
\q1  
\v 16 A’di ki dhal yi’de/ bway mmo’thonthoru/ ’peni ’kuwosh mo, 
\q1 dhali a’di ki raḵ yi’de/ mmogac̱u/ ka ’cesh me’d a’di jin guski’d e bwaagap̱ mo. 
\b  
\q1  
\v 17 Naskina/ uni ’kon mmomii miinthus ap̱o/ a’di mo, 
\q1 mmopish is ka le’d ap̱o/ a’di jin Caa e ki Ca mo e bwam ma si’b mo. 
\q1  
\v 18 Uni ki pal Arumgimis ka dum buni mo 
\q1 ki gwom buni jin ’theḵkina uni gom tonṯe/ mo ka dum buni kun purki uni mo. 
\q1  
\v 19 Uni ki o gwo ap̱owa Arumgimis mo mmo/o gwo mo ki: A/Arumgimis mishi c̱i ana tonṯe/ mmoshwa e bwaashowa? 
\q1  
\v 20 A’di ki mush wosh ki cwa mo, wakan yi’de/ kolki ’kus mo, 
\q1 dhali yi’de/ ’thonthorki’d kagahara mo. 
\q1 Gara/ mina a’di diki c̱i tonṯe/ 
\q1 walla dina a’di gara/ ki c̱i shum ki ’kwanim piti mo? 
\b  
\q1  
\v 21 Wakan ki Tap̱a ciḵki gwo mo tani, a’di ’tu’dkunu ka nyor mo. 
\q1 O’d a’di ’thakunu ap̱owa Yakuub mo, 
\q1 anyor piti a’di caki’da p̱owa Israyiil mo 
\q1  
\v 22 haali/ uni dar gi moŋgam gwo is eya Arumgimis mo 
\q1 dhali ’koki gam gwo is gom mom’bi’th piti jin tana a’di ata is ki me’d mo. 
\q1  
\v 23 Naskina/ a’di ki ḵan momis jin di’di mis mo, 
\q1 dhali a’di ki ḵa’c acampur gi momis mo 
\q1  
\v 24 dhali a’di ki hethu a’cesh ap̱o/ uni amanna mmoshwa mo, 
\q1 dhali a’di ki c̱i uni pos ’peni momis mo. 
\q1  
\v 25 ’Kwani shwaki tonṯe/ gi iman’doyu gwo mo. 
\q1 A’di hashki uni tonṯe/ ka enthus mo. 
\q1  
\v 26 A’di ki raḵ ’tham gi mom’pesho’k mmoposhu e momis mo, 
\q1 dhali ki mom’bi’th piti mo tani a’di ki shu ’tham ma biny cam bway mo. 
\q1  
\v 27 A’di ki he’th shum ap̱o/ uni me’d bu’da ’cesh mo, 
\q1 dhali ’dii kun ’kan ma bi me’d emena si’b kun ’kon e bwaman ma gap̱ mo. 
\q1  
\v 28 A’di ki dhal uni bway mo mmoṯa’k e bwaman gu’b c̱iŋŋam buni mo, 
\q1 mmo’kama ris mom buni kun ’kona uni is mo. 
\q1  
\v 29 Dhali uni ’kaki uni mo ntagi uni kap̱kin ki kap̱ gana/ mo, 
\q1 haali/ a’di c̱iki uni to jin ’thona bwa uni ki gor gor mo. 
\q1  
\v 30 Hili nṯwa/a/ ki uni dhu to kun gora bwa uni mo tani, 
\q1 ki tonṯe/ di’d e ’twam buni mo tani, 
\q1  
\v 31 anyor ma Arumgimis cuki mis ap̱o/ uni mo 
\q1 dhali a’di ki ’kosh uni gun ’bitha’bi’th ’peni bwam uni mo 
\q1 dhali a’di ki ’thi uni gwahan a’cesh uni gun dhunu ’pen ka pije/ gom mom’bor buni ’peni ’Kwani ma Israyiil mo. 
\b  
\q1  
\v 32 Bahili ap̱owa ris to gwansan kun miinu mo tani uni ’kon naskina/ mmomii miinthus mo. 
\q1 Dhali bahili ki a’di mii momer piti mo tani uni ’koki gam a’di gwo is mo. 
\q1  
\v 33 Wakan a’di dhalki’da teem buni mmop̱uu mo me’da wulp̱e/ mo 
\q1 dhali yil buni ta’da pure/ ka pure/ mo. 
\q1  
\v 34 Ki a’di ’koshki uni mo tani uni ŋap̱ki a’di mo. 
\q1 Uni ri’ckina du is mo dhali ŋap̱a Arumgimis ka duŋ gana/ mo. 
\q1  
\v 35 Uni kaki gwo e ka Arumgimis a’di ta wosh buni mo, 
\q1 a’di jin ta’da Arumgimis buni jin Caa e ki Ca jin wanki’da wan ’ba/ mo. 
\q1  
\v 36 Hili uni ṯorkina ṯor ki a’di ki ’twany jarom buni ka maḵ mo. 
\q1 Uni takina ṯor ka ṯor gom a’di ka le’d buni mo. 
\q1  
\v 37 Adum buni yisa ṯelu shoka ’kup̱ ki a’di mo. 
\q1 Uni ’koki ha me’d gom gwoŋ ganam piti jin gamu me’d mo. 
\q1  
\v 38 Hili a’di di’d naskina/ mmohila hil ki e ma ’thime/ ki mo/en mo, 
\q1 dhali gwam uni ’peni tonthus buni kun miikina uni mo, 
\q1 dhali diki ’ce’d uni sho’k mo. 
\q1 A’di ’tumki’da nyor piti is ka nyaŋ’ko’d me’d ka ris mo, 
\q1 dhali a’di diki mura nyor piti ’baar mo mmoshwa a’cesh ki sho’k mo. 
\q1  
\v 39 A’di kaki gwo e mo ki uni ta jasi shuman is gi buŋgwar is mo, 
\q1 me’d ’tham yin jin poshki’d mo dhali diki wuṯulu/ ka nyaŋ’ko’d mo. 
\b  
\q1  
\v 40 Me’d wana risa kun pisha uni is ka le’da p̱o/ a’di e mombwaasho mo 
\q1 dhali jwakaṯ a’di adum piti e bwam ma si’b mo. 
\q1  
\v 41 Uni palki a’di doḵ/e dhali doḵ/e mo 
\q1 dhali rukuny A’din ’De/ jin Ḵogu jin ta jima Israyiil mo. 
\q1  
\v 42 Dhali uni yisa dhu mom’bi’th piti eya dum buni yisa, 
\q1 walla atee yin si’da/ me’d jin wankina a’di uni ’ba/ ’peni ’kup̱ buni mo, 
\q1  
\v 43 me’d jin wagaskina a’di jamas miim piti e Pam Masir mo, 
\q1 dhali miimer piti e bunto ma Suu/an mo. 
\q1  
\v 44 A’di ki ṯu’k yi’dem buni mmota abas mo, 
\q1 wakan ki uni mini ’koki p̱i yi’dem buni kun sokin mo. 
\q1  
\v 45 A’di ki hash dhana buhanya ḵanthi/ e bwaman uni mo a’di jin loski uni mo, 
\q1 dhali adhana buhanya ’dwa/ jin ’ce’dki uni sho’k mo. 
\q1  
\v 46 A’di ki c̱i tonṯem buni kun sina uni ka jirsaŋ mmoshwa mo, 
\q1 dhali maman buni jin miina uniya ṯu’c mo tani shwan ma kuyu/ mo. 
\q1  
\v 47 Dhali a’di ki ’ce’d cwalman tom buni sho’k ka wasa/ mo 
\q1 dhali cwamp̱u/ buni ki jap̱e/ jin wuna uni me’d manyandhe/ mo. 
\q1  
\v 48 Dhali a’di ki c̱i bip̱ buni cwa ki me’d ka wasa/ mo, 
\q1 dhali ma’diny ḵa’bal buni uni dorkunu ki dhan o’d jin dhwa/a’dki’d mo ’pena wara sho’k mo. 
\q1  
\v 49 A’di ki ’cuḵa nyor piti jin c̱a’bki wur wur ap̱o/ uni mo, 
\q1 anyor jin ta’da nyor piti jin deḵ a’di mo dhali mo ma c̱is mo, 
\q1 uni gun ’doyina iman’doyu gwo kun ’ce’dkina ’ce’d sho’k mo. 
\q1  
\v 50 A’di ki kar bway tur goma nyor piti mo. 
\q1 A’di ’tash uni ’twa/ ’peni mowuwa? 
\q1 Hili a’di ki kar ’kup̱ki ṯa’kki moŋ’koki/em buni ki mom’ba’th jin wo’cki uni is she/ mo. 
\q1  
\v 51 A’di ki musha risa bwanyara/ gi ’Kwani gi Pam Masir ki cwa mo, 
\q1 mom’bi’th jin ta jim buni jin gac̱ki’d e gu’ba’ku/ ma Haam mo. 
\q1  
\v 52 Dhali yan’ko’d a’di ki shu ’kwanim piti bway ka pije/ me’d ḵa’bal mo, 
\q1 dhali a’di ki shu uni bway e mombwaasho me’da ma’diny ḵa’bal mo. 
\q1  
\v 53 A’di ki sus uni ki ’dantar mo, wakan uni ’koki ḵo/ is mo. 
\q1 Hili dhan ḵumma/ yi’de/ a’di ’ce’dki ’kup̱ buni sho’k mo. 
\q1  
\v 54 Dhali a’di ki sus uni ka pije/ e mony’cesh piti jin ḵogu mo, 
\q1 dhali e ’kuwosha turga/ jin ta’da bim poros piti mo jin gamkina a’di adu is mo. 
\q1  
\v 55 A’di ki ura ris kal gi ’kwani ka pije/ ibwambori uni mo. 
\q1 A’di ki dhu mo ki she/ gom uni jin mina uni mii bu’th mo, 
\q1 dhali thoson mo kun minu ’ko goma waḵ ma Israyiil e gu’ba’kum buni mo. 
\b  
\q1  
\v 56 Naskina/ uni ’kon mmopal a’di mo dhali pish is ka le’da p̱o/ a’di jin Caa e ki Ca jin ta’da Arumgimis mo, 
\q1 dhali ’koki dhu gwonyc̱im piti mo, 
\q1  
\v 57 hili uni ṯu’kkin mo dhali ’dap̱ e ki miiny dac̱ara/ mo me’d ibabam buni mo. 
\q1 Uni ṯoshkin me’da bwaa jin he’kki’da he’k e mo. 
\q1  
\v 58 Haali/ uni rukunyki a’di mo mmomii anyor mo ki mom buni kun eḵa/ eḵ mo. 
\q1 Uni ki raḵ a’di joc̱u/ ki mo jin ’thoṯẖu/ bwa ki miin dhap̱an mo gom tomp̱inycon buni kun uḵa uni mmoluŋ mo. 
\q1  
\v 59 Ka Arumgimis ciḵki gwo mo tani a’di ’tu’du ka nyor mo, 
\q1 dhali a’di ki waḵa Israyiil ka bor ’deŋ gana/ mo. 
\q1  
\v 60 A’di ki dhal mom piti ’pen jin c̱a’bkina a’di jin ta Pan Shilu mo, 
\q1 e gu’ba’ku/ jin c̱a’bkina a’di e bwaŋ ’kwani mo, 
\q1  
\v 61 dhali a’di ki ’cuḵ mom’bi’th piti ap̱o/ uni gun bu’thkunu mo mmota c̱iŋkina/ mo, 
\q1 dhali monyca gi me’d piti ap̱o/ ’kwani kun ta ’kup̱ mo. 
\q1  
\v 62 A’di ki c̱i ’kwanim piti e me’d gi uni kun ḵal gandal mo, 
\q1 dhali kuma nyor piti mo ap̱o/ uni kun ta mal piti mo. 
\q1  
\v 63 O’d shwaki ’kwani kun ta dhuru’c buni mo, 
\q1 dhali nyaram buni uni dar gi gway gi momash mo. 
\q1  
\v 64 Igasiis buni ṯa’kkina ’cesh gom shemen gandal mo, 
\q1 dhali up̱a dhalla/ gi igasiis mo, moŋkamu/ gwona uniya? 
\b  
\q1  
\v 65 Dhali yan’ko’d Tap̱a merki e mo ’peni mo jin wana e ki mo jin ishkina a’di e mo, 
\q1 me’d wathi/ jin ’bitha’bi’th jin ’therki cuuwa/ gom yimana mura’th jin p̱ina a’di jin ḵa/u ki ŋah ŋah mo. 
\q1  
\v 66 Dhali a’di ki dhu ’kup̱ piti mmoḵwa/ bwa mo. 
\q1 A’di ki dhu uni e mo ma ’the is ki sule/ sule/ mo. 
\q1  
\v 67 A’di ki waḵ gu’ba’ku/ ma Yuusup̱ mo, 
\q1 dhali a’di diki kwanya waḵ ma Ep̱rayim mo. 
\q1  
\v 68 Hili a’di ki kwany awaḵ ma Yahuuda/ mo, 
\q1 a’di jin ta ’Kuwosha Sihyuun, a’di jin ena a’di mo. 
\q1  
\v 69 A’di ki nyaŋ mom piti jin ḵogu mo me’d mo jin eḵa/ eḵ e momis mo, 
\q1 dhali me’d mony’cesh jin ṯelkina a’di sho’k ki sule/ sule/ mo. 
\q1  
\v 70 Dhali a’di ki kwanya Dawuu’d jin ta c̱iŋkinam piti mo, 
\q1 dhali sus a’di mo ’peni mo jin hila a’di ḵa’bal mo, 
\q1  
\v 71 ’peni mo jin hila a’di ushi nas ḵa’bal kun bwan mo tani 
\q1 a’di ki sus a’di mo mmota amanhil ḵa’bal gom ’Kwani ma Yakuub mo, 
\q1 a’di jin ta’da Israyiil jin ta mal piti mo. 
\q1  
\v 72 Ka du jin ta a’di pa ki pa mo tani a’di ki hil uni mo, 
\q1 dhali a’di ki shu uni bway ki me’d piti jin ta gwocon mo. 
\c 79  
\s1 Gway ma Asap̱. 
\q1  
\v 1 Ayy Arumgimis, ’kwani kun ’kon ki ’kus ’peni ji gi luŋu mo tani uni p̱u’dkun e mo gi mal pini mo. 
\q1 Uni ki shi/ gu’b gi mondheleladhelel pini mo. 
\q1 Uni ki shi/ Pa Urushaliim mo mmokup̱ a’di mo. 
\q1  
\v 2 Uni ki c̱i buŋgwar is gi c̱iŋkinam pini ki ’dii kun p̱en e momis mmota tonṯe/ gom uni ki ’ka mo, 
\q1 buŋgwar is gi unim pini kun dhunu mo ki she/ ki dhelel dhelel mo tani ’kakina toŋgwap̱i/ gi mony’cesh mo. 
\q1  
\v 3 Uni wolkina bas buni me’d yi’de/ mo 
\q1 mmo’kam Pa Urushaliim is mo 
\q1 dhali jaŋkamu/ di’d jin kan uniya? 
\q1  
\v 4 Ana warkina ki uni gun c̱inu gura/ ki imannyaḵ ’kom bana mo, 
\q1 dhali miikunu ka maḵ mo dhali p̱e’th ki p̱etha sor ki uni gwansan kun ’kamki ana is mo. 
\b  
\q1  
\v 5 Ayy Tap̱a, kakasja imina /e di mo mmomiiya nyor mo? 
\q1 Min ma nyor pini ’peni bwan ṯa’c pini diki pur me’d o’da? 
\q1  
\v 6 Woli /e anyor pini ap̱o/ kal gi ’kwaniny’cesh mo 
\q1 uni kun ’koki mish /e mo, 
\q1 dhali eya dhan bampa/ mo 
\q1 uni kun ’koki yuḵ gway pini mo. 
\q1  
\v 7 Haali/ uni loskina Yakuub mo, 
\q1 dhali shi/ mom piti is mo. 
\b  
\q1  
\v 8 Dhalku/ ki doḵ/e ka gwo e ap̱o/ am gom miinthus kun miikina ibabam bam kadhamo/ mo. 
\q1 Dhalki mo ma ’thimem pini jin hilu ki mo/en p̱u’du’d ki jahanne/ gam am ’kup̱ mo, 
\q1 haali/ aman dhukunu e mo jin ’the am is ki ’the ka luŋgu’b mo. 
\q1  
\v 9 Woṯẖi/ aman mo, ayy Arumgimis, jin ta bway mowoṯẖ bam mo, 
\q1 ki gway gi monycam pini mo. 
\q1 ’Cuḵi aman mo dhali gwami aman ’peni miinthus bam mo, 
\q1 gom gway gi gway pini mo. 
\q1  
\v 10 Ki to jin ta’da ta imina kal gi ’kwaniny’cesh i/o gwo mo ki: 
\q1 Mane Arumgimis buni mane? 
\q1 Dhalki mori’c pini goma bas gi c̱iŋkinam pini jin gac̱kunuwa ’cesh mo, 
\q1 dhalki a’di mishu mo e bwaman kal gi ’kwaniny’cesh e bwambori jis/em bam mo. 
\q1  
\v 11 Dhalki mo/ohon gi uni gun dhunuwa sijin p̱u’dkini bwambori /e mo, 
\q1 ki isi ki dhan mom’bi’th pini mo ki /e mini ’tash uni ’twa/ mo uni gwansan kun ’disha ’twa/ mmowu mo. 
\q1  
\v 12 ’Tu’dki uni to me’di pesu/ ibwambor mo uni gwahan kun ta imannyaḵ ’kom bam mo, 
\q1 gom gura/ jin c̱ikina uni /e mo, ayy Tap̱a. 
\q1  
\v 13 Dhali yan’ko’d aman kun tana ’kwanim pini mo, uni gun tana ma’diny ḵa’bal pini goma shon dhii/i’d pini mo 
\q1 aman mina c̱i /e mo jin ’boruwa ’bor bwa i is ki sule/ sule/ mo, 
\q1 ’pena nyaḵum yil jin tanu mo ntaga nyaḵum yil jiŋ ’ko’d mo, aman mina p̱e’d momaŋ pini mo be. 
\c 80  
\s1 Eya manyuḵ gway, isi ki gwo gom jandin to mo. Gom gwo jin c̱inu goma Asap̱ mo. A’di jin ta gway mo. 
\q1  
\v 1 C̱iyi ’ce mo ma, ayy Amanhil Ḵa’bal ma Israyiil mo, /e jin shukina Yuusup̱ bway ka pije/ me’da ma’diny ḵa’bal mo. 
\q1 /E jin karkunu mo mmoc̱a’ba p̱o/ ḵursi ma maliḵ mo ap̱owa c̱arabiim kun ’thup̱a ḵursi is ka bim buni mo tani, kushi mo mo 
\q1  
\v 2 ibwambor ma Ep̱rayim mo dhali bwambor ma Benyamiin mo dhala Manassa mo. 
\q1 Piri mo ma dem dem pini is mo 
\q1 dhali yayu/ mo mmota am is ki me’d mo. 
\b  
\q1  
\v 3 Waru/ am is mo, ayy Arumgimis. 
\q1 Dhalki bwam/em pini kushu mo mo, ki am minu ta is ki me’d mo. 
\b  
\q1  
\v 4 Ayy Tap̱a Arumgimis gi momis mo, 
\q1 anyor pini midi di p̱u’d kakasja gom mon’tho gi ’kwanim pini mo? 
\q1  
\v 5 /E ki c̱i uni tonṯe/ jin shwana uni jin ta jabu’th mo, 
\q1 dhali /e ki c̱i uni jabu’th mmop̱i mo ki sheŋ kwa jin ’tu’du’d mo. 
\q1  
\v 6 /E ki dhu am ki imannyaḵ ’kom bam mmoc̱i am gura/ mo, 
\q1 dhali uni gun ta ’kup̱ ki am mmop̱e’th e bwaman is buni mo. 
\q1  
\v 7 Waru/ am is mo, ayy Arumgimis gi momis mo. 
\q1 Dhalki bwam/em pini kushu mo mo, ki am minu ta is ki me’d mo. 
\q1  
\v 8 /E ki ḵal cwalman ka pije/ ’peni Pam Masir mo, 
\q1 dhali /e ki ura ris kal gi ’kwaniny’cesh ka pije/ mo dhali c̱u’th a’di mo. 
\q1  
\v 9 /E ki kara ’cesh eya tente/ gom a’di mo. 
\q1 A’di ki guwa birman piti ka luŋgu’b e mo jin ’kula’kul mo dhali a’di ki ’tu’d mony’cesh mo. 
\q1  
\v 10 Dhali ’kuwosha turga/ uni ’tu’dkunu mo ka lam piti mo, 
\q1 cwa kun wana e ka bwanyayiis kun c̱a’bki dem dem nyaḵka bim piti mo. 
\q1  
\v 11 A’di ki hash ka bim piti ntagi ḵumma/ yi’de/ mo 
\q1 dhala birman piti mmoya gam yi’de/ a’cesh mo. 
\q1  
\v 12 Goma tinta sa/ i’ce’dkina /e agaŋgaram piti ka ’cesh mo 
\q1 wakan ka ris uni gun iikin ki iimpe e bway piti mo tani hoki maman piti mo? 
\q1  
\v 13 Abogo’b gi bwaasho a’di ha’thki a’di ki ’twa/ mo, 
\q1 dhali aris to gwansan kun ’kon mmoḵal ya e bwam bunto mo tani shwaki a’di mo. 
\q1  
\v 14 Ṯuku mo doḵ/e, ayy Arumgimis gi momis mo. 
\q1 Hili mo ka luŋgu’b ’peni momis mo dhali p̱ar mo e mo. 
\q1 Hili cwalman ma mura’th yan mo ma, 
\q1  
\v 15 a’di jin koṯẖki’d jin sikina /e ka bim poros pini mo. 
\q1  
\v 16 Uni c̱i’thki a’di ki o’d mo dhali uni ki jep̱ uni ka ’cesh mo. 
\q1 Dhalki uni ’ce’d sho’k mo e mo jin ḵucura ḵucur mo jin ta jis/em pini mo. 
\q1  
\v 17 Hili dhalki me’d pini a’di di’da p̱o/ wathi/ jin ta me’da bim poros pini mo, 
\q1 a’di jin ta ya/ gi wathi/ jin karkina /e mmo’bitha’bi’th gom is pini mo. 
\q1  
\v 18 Dhali yan’ko’d am mina mol doḵ ka nyaŋ’ko’d ’peni /e ki sule/ mo. 
\q1 C̱i am moŋ’koki/e mo dhali am mina yer gway pini mo. 
\q1  
\v 19 Waru/ am is mo, ayy Tap̱a Arumgimis gi momis mo. 
\q1 Dhalki bwam/em pini kushu mo mo, ki am minu ta is ki me’d mo. 
\c 81  
\s1 Eya manyuḵ gway mo, isi ki gwo ma dheŋdhenye/ gi ’Kwani gi Pany Jatt mo. Gway ma Asap̱. 
\q1  
\v 1 Yuḵi um gway ki ’kal ’kal eya Arumgimis jin ta mom’bi’th bana mo. 
\q1 Ḵumi cuuwa/ mo gom bwaŋ ’kunyka/ eya Arumgimis ma Yakuub mo. 
\q1  
\v 2 ’Deki gway abor ki mis mo ki ko ma dheŋdhenye/ jin p̱inu ki me’d mo, 
\q1 adheŋdhenye/ jin ’kon ma shu/i pesu/ mo jin ’kunya’kuny mo dhali adheŋdhenye/ mo. 
\q1  
\v 3 P̱iyi apoome/ ka ppen this mo, 
\q1 dhali ka ppe jin ta’da kunn is mo, ka cim jin yuḵuwa yuḵ ka tul ’kup̱ bana mo. 
\q1  
\v 4 Haali/ a’di ta gwoŋḵan jin bahu gom ’Kwani ma Israyiil mo, 
\q1 dhali gwoŋḵan ma Arumgimis jin onu ki ’twa/ goma Yakuub mo. 
\q1  
\v 5 A’di ki kar gwoŋḵan goma Yuusup̱ mo, 
\q1 me’d jin yakina a’di ka pije/ e Pam Masir mo. 
\q1 Aha/ ciḵkina ’twa/ mo a’di jin molkika/ mo. 
\q1  
\v 6 Aha/ soroṯẖkina /e ’kup̱a bim pini ’peni ton diṯi’d mo. 
\q1 Me’d pini karu ki ’kus ’pena nura/ mo. 
\q1  
\v 7 E mo ma c̱is pini mo tani /e yuḵkina yuḵ mo dhali aha/ ’cuḵkina /e mo. 
\q1 Aha/ thoḵkina /e ’twa/ ka ḵwal is e mo jin dor ma shoka dor mo. 
\q1 Aha/ palkina /e mo e yi’de/ ma Mariiba mo. \qs Doshi ma dhali ’cunycuri yan mo.\qs* 
\b  
\q1  
\v 8 Ciḵi gwo mo ma, ayy ’kwanim pem, dhali aha/ mina ḵucur um mo ki ḵucur pa mo. 
\q1 Ayy Israyiil, waḵki/ /e mina bwa ’taki oyi, hili dhali ciḵ aha/ gwo mo. 
\q1  
\v 9 Wakan ka rum p̱inycon kun luŋa ’kwanin tiya midi diki di e bwam um mo. 
\q1 Wakan ki um mini ’koki luŋ ka jiŋ ’kup̱a’dup̱un gom tomp̱inycon jin luŋa ’kwanin tiya mo. 
\q1  
\v 10 Aha/ tana Tap̱a Arumgimis bum mo, 
\q1 a’di jin suski um ka pije/ ’peni Pam Masir mo. 
\q1 Ḵa’di ’twam bum ki waŋgal mo dhali aha/ mina ’tu’d a’di ki piny piny mo. 
\q1  
\v 11 Hili ’kwanim pem ’koki ciḵ ’twam pem mo, 
\q1 Israyiil midi ’taki ta gi jim pema kamuwa? 
\q1  
\v 12 Wakan aha/ c̱ikina uni bway mo eya dum buni kun miin ki wa’th wa’th mo, 
\q1 mmobaṯẖ gwom buni kun logoma bwam buniŋ gana/ uni mo. 
\q1  
\v 13 Ayy, ki ’kwanim pem mini ’taki ’koki ciḵ aha/ gwo mo sa/? 
\q1 Ka Israyiil midi ’taki ya e bway pem moyi. 
\q1  
\v 14 Aha/ ’disha ’twa/ ba/ mmo’ce’d ’kup̱ buni sho’k mo, 
\q1 dhali ṯu’k me’d pem ap̱o/ uni gun ta ’kup̱ ki uni mo. 
\q1  
\v 15 Uni gwansan kun shi/ki Tap̱a i e mo tani uni mini ’taki koc̱ki ṯil ṯil ’kup̱ ki a’di mo, 
\q1 dhali tom buni jin ’baki uni e mo tani midi diyi bwambori uni ki sule/ sule/ mo. 
\q1  
\v 16 Aha/ mina ’taki thip̱ um ki pos bunyan gana/ mo 
\q1 dhali ka dham ’peni wosh jin midi ’taki kap̱ um moyi. 
\c 82  
\s1 Gway ma Asap̱. 
\q1  
\v 1 Arumgimis bu’thki mom piti e mo ma tul ’kup̱ jin ta jim piti mo, 
\q1 eya ris bwaman gi ’kwani ma hakuumam piti a’di ki kar mo jin dwallu gwo jin toru gwo ’twa/a ’cesh mo. 
\q1  
\v 2 /E mini daḵ gwo dwall ki shi/ shi/ kakasja mo 
\q1 dhali ṯor mo ma gwar ’de/ gom uni gun ta thus ki thus mo? \qs Doshi ma dhali ’cunycuri yan mo.\qs* 
\b  
\q1  
\v 3 C̱iyi mii ma ḵar/e ki uni gun ’ka’da is mo dhali uni gun daran gi icom mo. 
\q1 Hali mo ma ḵar/e gom uni gun dorkunuwa du mo dhali gom uni kun mini mii ta gi to mo. 
\q1  
\v 4 ’Cwamu/ uni gun ’ka’da is mo dhali uni kun mini mii ta gi to mo. 
\q1 ’Cuḵi uni mo ’peni me’d gi uni gun ta thus ki thus mo. 
\b  
\q1  
\v 5 Uni mish toŋ kamu/ nyiṯẖ yisa walla gwoŋ kamu/ misha uni ’bana? 
\q1 Uni iikin e mondhurumi’d mo. 
\q1 Aris mo gun ḵa’bu mony’cesh mo tani uni yiḵinki is mo. 
\q1  
\v 6 Aha/ ona gwo mo ki: Um a’di itana hakuuma mo, 
\q1 dhali um ta iya/ gi a’di jin Caa e ki Ca mo, aris umi ’baar mo. 
\q1  
\v 7 Bahili um ’baar mo mini wu mo me’d ’kwani mo 
\q1 dhali ṯa’k ’ko’da ’cesh me’d iya/ ma maliḵ mo. 
\q1  
\v 8 Cuyi mis mo, ayy Arumgimis, dhali dwalli mony’cesh gwo mo 
\q1 haala ris kal gi ’kwaniny’ceshi ’baar mo tani ta kum pini mo be. 
\c 83  
\s1 Gway jin yuḵu mo. A’di jin ta gway ma Asap̱. 
\q1  
\v 1 Ayy Arumgimis, dhalku/ ki c̱a’b ki shwamm mo. 
\q1 Dhalku/ ki c̱a’bi bu’th moŋḵu’th is pini mo walla di ki shwamm mo, ayy Arumgimis. 
\q1  
\v 2 Haali/ hili mo mo ma, ’kwaniŋ ’kup̱ pini uni miikina dulaṯṯ mo. 
\q1 Uni gwansan kun shi/ki /e i e mo tani uni ’deki ’kup̱ buni ki mis mo. 
\q1  
\v 3 Uni ’thiki gwonthus ’cesh ap̱o/ ’kwanim pini mmocesh uni mo. 
\q1 Uni ṯorkina ṯor mmonṯal ’de/ ap̱o/ unim pini gun ceshkina /e ka p̱o/ mo. 
\q1  
\v 4 Uni o gwo mo ki: Iiyu/ mo, dhalki ana dhidha uni sho’k ka pupush ’peni kal jin tana uni mo. 
\q1 Dhalku/ ki dhal gway ma Israyiil ki a’di minu ka e doḵ/e mo. 
\q1  
\v 5 Nye, uni ’dap̱an ki me’d ki gwom buni ka rem ’kup̱ mo. 
\q1 Ap̱o/ /e mo tani uni ki gam gwo me’d mo. 
\q1  
\v 6 Gu’ba’ku/ gi ’Kwani Pa Aduum dhali ’Kwani ma Isma/iil 
\q1 dhali ’Kwani gi Pa Muwab dhali ’Kwani gi Pa Haajar mo, 
\q1  
\v 7 dhali ’Kwani gi Pany Jibaal dhali ’Kwani gi Pa Ammuun dhali ’Kwani gi Pa Amalik, 
\q1 dhali ’Kwani gi Pam P̱alasthiin nyaḵka ris ’Kwani gi Pan Sur mo. 
\q1  
\v 8 Dhali ’Kwani gi Pan Ashshuur si’da/ uni gamki gwo me’d ki uni mo. 
\q1 Uni ta ’kwani kun ’bi’th ma bi ki ’bi’th kun ta uc̱i ma Luuth mo. \qs Doshi ma dhali ’cunycuri yan mo.\qs* 
\b  
\q1  
\v 9 Wakan /e mini mii miim pini ap̱o/ uni me’d jin miikina /e ap̱oŋ ’Kwani gi Pam Midyaan mo, 
\q1 dhali me’da Sisara dhala Yabin mo e Yi’de/ ma Kishun mo, 
\q1  
\v 10 uni gun ’ce’dkunu sho’k mo e Pan Endor mo, 
\q1 uni gun warkin ki gure/ gom mony’cesh mo. 
\q1  
\v 11 Dhuyi mom buni kun tana uni ’penkap̱an mmowa e ka Guraab dhala Diib mo 
\q1 dhali aris iya/ ma maliḵ buni mo me’da Sabah dhala Salmunnaa/ mo. 
\q1  
\v 12 Uni gun o gwo mo ki: Dhalki ana budha to gom is bana mo 
\q1 ’pena shon dhii/i’d ma Arumgimis mo. 
\q1  
\v 13 Ayy Arumgimis pem, dhuyi uni mmowa e ki ’tham jin ’theḵi bu’da’cesh ki ji wuṯul mo, 
\q1 me’da ’pi’b jin ’dashu ibwambori ’tham mo. 
\q1  
\v 14 Me’d o’d jin shwaki bwanycwa mo, 
\q1 dhali me’da le’dan o’d jin shwaki’d ka le’d eya ris ’kuwosha turga/ mo tani 
\q1  
\v 15 wakan /e mini ŋal uni ka c̱unthar pini mo, 
\q1 dhali p̱or uni bwa ka p̱unthar pini mo. 
\q1  
\v 16 ’Tu’dki uni bwam/em buni ki mo ma ’the is mo, 
\q1 ki uni mini ’taki ŋap̱ gway pini mo, ayy Tap̱a. 
\q1  
\v 17 Dhalki uni dhunu ki mo ma ’the is mo dhali ’koku ki ’ko ma c̱is ki sule/ sule/ mo. 
\q1 Dhalki uni ’ce’dki sho’k mo ki mii jin thiskunu mii ’ko’d e ki dar ka ’the mo. 
\q1  
\v 18 Dhalki uni mish gwo ’ban mo ki /e a’di iṯal ’de/ mo jin tana gway pini Tap̱a mo, 
\q1 /e jin Caa e ki Ca ap̱o/ mony’ceshi ’baar mo. 
\c 84  
\s1 Eya manyuḵ gway mo, isi ki gwo ma dheŋdhenye/ gi ’Kwani gi Pany Jatt mo. Gway gom iya/ ma Guurah mo. 
\q1  
\v 1 Mom pini jin c̱a’ba /e mo tani wanu ena, 
\q1 ayy Tap̱a gi momis mo. 
\q1  
\v 2 Aḵashiram pem c̱orki’da c̱or mo, nye a’di ’thikina buye/ mo 
\q1 gom mo ki monyc̱a’b gi Tap̱a mo. 
\q1 Adum pem dhali buŋgwar is pem yuḵi gway ki bwaŋ ’kunyga/ 
\q1 goma Arumgimis jin di ki e mo. 
\q1  
\v 3 Isi kan si’da/ ara ganya/ a’di gamki gu’b mo 
\q1 dhala gwajayilil taki’d gi gu’b gom is piti mo, 
\q1 e mo jin mina a’di dho’th ushan piti mo, 
\q1 e mo ma gwaṯam pini jin miinu to mo, ayy Tap̱a gi momis mo, 
\q1 /e jin tana Maliḵ pem mo dhali Arumgimis pem mo. 
\q1  
\v 4 Mom’bor mii gom uni gwansan kun ’kokin e gu’b pini mo, 
\q1 uni gun yuḵki gway mmomaŋ /e ki sule/ sule/ mo. \qs Doshi ma dhali ’cunycuri yan mo.\qs* 
\b  
\q1  
\v 5 Mom’bor mii gom ’kwani gwahan kun ’kona mom’bi’th is e /e mo, 
\q1 dhali uni gun ḵwasharr ma du ki ḵwasharr e bway ma Sihyuun mo. 
\q1  
\v 6 Me’d jin iikina uni ka luŋgu’b e embul wosh ma Buka mo tani 
\q1 uni ki war a’di mmota mo jin kasha yi’de/ e ki kash mo, 
\q1 dhala shoka ’ce’dc̱ipiny tashki a’di ’kup̱ ki usha al piti mo. 
\q1  
\v 7 Uni iikin ki mo jin ’bithu is mo itagi mo jin ’bithu is mo. 
\q1 Arumgimis jin bol tiya e ki ’bor mo tani a’di iminu mish mo eya Sihyuun mo. 
\q1  
\v 8 Ayy Tap̱a Arumgimis gi momis mo, ciḵi mon’thom pem mo ma. 
\q1 Dhali c̱iyi /e ’ce mo, ayy Arumgimis ma Yakuub mo. \qs Doshi ma dhali ’cunycuri yan mo.\qs* 
\b  
\q1  
\v 9 Hila goŋgoro/ me’d bam mo ma, ayy Arumgimis. 
\q1 Hili ’kup̱ ki jis/e gi a’dim pini jin ’koshu ki monyca mo. 
\q1  
\v 10 Haali/ atee gi mo ki monyc̱a’b pini mo tani a’di ’boro’d mo, 
\q1 mmobola alip̱ gi mo gunn e mo. 
\q1 Aha/ mina ’taki dhal mii gunn e i is ’te/ sayi mmota manhil ’twaŋkal gu’b ma Arumgimis pem mo 
\q1 mmobol mo jin ’konu e gu’ba’ku/ gi ’kwani kun ta thus ki thus e mo. 
\q1  
\v 11 Haali/ Tap̱a Arumgimis a’di ta’da tente/ dhali agoŋgoro/ mo. 
\q1 A’di c̱iki mo ma ’the dhali montaḵ mo. 
\q1 Tom ’boro’da kamu/ mina Tap̱a non yisa 
\q1 ’peni uni gwansan kun iikin ki iiŋ gana/ mo. 
\q1  
\v 12 Ayy Tap̱a gi momis mo, 
\q1 mom’bor mii gom wathi/ jin gamki gwo is e /e mo. 
\c 85  
\s1 Eya manyuḵ gway mo. Gway gom iya/ ma Guurah mo. 
\q1  
\v 1 Tap̱a, /e miiki isi mii gi bwa goma ’cesh pini mo. 
\q1 /E ki waru/ shamaneṯṯan ma Yakuub is mo. 
\q1  
\v 2 /E ki gwamki miinthus gi ’kwanim pini mo. 
\q1 /E ki dhal ka ris miinthus buni ’pen mo. \qs Doshi ma dhali ’cunycuri yan mo.\qs* 
\b  
\q1  
\v 3 /E doḵkina nyor pini bway bwa ’baar mo. 
\q1 /E ṯu’kkin mo ’pena nyor pini jin ’batha’ba’th mo. 
\b  
\q1  
\v 4 Waru/ aman is ka nyaŋ’ko’d mo doḵ/e ayy Arumgimis jin ta bway mowoṯẖ bam mo 
\q1 dhali dhu ka nyor pini gunn ’pen ka pije/ kun deḵkina /e ap̱o/ aman mo. 
\q1  
\v 5 A/e mini miiya nyor ap̱o/ aman ki sule/ sule/ kan mo? 
\q1 A/e mini dhala nyor pini mmoya ki tur ap̱o/ ma risa nyaḵum yil gi ’kwani kana? 
\q1  
\v 6 Mina /e bunya/ diki tash am e mo doḵ/e? 
\q1 ki ’kwanim pini mina bwa ’kuny mo e /e? 
\q1  
\v 7 Ṯori aman mo/en pini jin ṯelu sho’k mo ma, ayy Tap̱a, 
\q1 dhali dhalki aman bway gi mowoṯẖ pini me’d mo. 
\b  
\q1  
\v 8 Dhalki aha/ ciḵa gwo mo ma, gwo jin min ma Arumgimis jin ta Tap̱a o mo, 
\q1 haali/ a’di midi o gwo gom moŋḵu’th is ki ’kwanim piti mo, 
\q1 dhali unim piti gwansan kun dhunu mo ki she/ ki dhelel dhelel mo, dhali uni gwansan kun ṯu’kkun e a’di mo eya dum buni mo. 
\q1  
\v 9 Ka jiŋ gana/ bway mowoṯẖ piti a’di diki’d e me’d mo gom uni gwansan kun ḵo/ki a’di mo 
\q1 ki monyca midi di e bampam bana mo. 
\b  
\q1  
\v 10 Mo/en jin ṯelu sho’k mo dhali mii jin ta ji ma isiŋ gana/ mo tani uni mini sho ki me’d mo. 
\q1 Mii ma ḵar/e dhali moŋḵu’th is uni mini p̱i ’twa/ ka rem ’kup̱ mo. 
\q1  
\v 11 Mo ma isiŋ gana/ midi kash e me’d yi’de/ ’peni mony’cesh mo, 
\q1 dhali mii ma ḵar/e midi hil ka luŋgu’b ’peni momis mo. 
\q1  
\v 12 Nye, Tap̱a a’di midi c̱i a’di jin ’boro’d mo, 
\q1 dhali bampam bana a’di midi gwono’d a’di jin midi mara mar is mo. 
\q1  
\v 13 Mii ma ḵar/e midi ya ibwambori a’di mo 
\q1 dhali kar ŋaṯgin piti mmota bway mo be. 
\c 86  
\s1 Mon’tho ma Dawuu’d. 
\q1  
\v 1 Ḵa’di ’cem pini mo, ayy Tap̱a, dhali ciḵ aha/ gwo mo, 
\q1 haali/ aha/ hatha’ko’d mo dhali mina mii ta gi to mo. 
\q1  
\v 2 ’Tashi mondiki/em pem ’twa/ mo, haali/ aha/ tana wathiŋ gayiin mo. 
\q1 Tayi c̱iŋkinam pini is ki me’d mo, a’di jin gami gwo is e /e mo. 
\q1  
\v 3 /E tana Arumgimis pem mo. 
\q1 Miiyi mii ka ’the gom aha/ mo, ayy Tap̱a, 
\q1 haali/ e /e mo tani aha/ gwokina ’twa/ i /e iyula tente/ mo. 
\q1  
\v 4 ’Kunyi aḵashira/ gi c̱iŋkinam pini mo, 
\q1 haali/ e /e, ayy Tap̱a, aḵashiram pem ’de’kka/ ’kup̱ ’kup̱ ki mis mo. 
\q1  
\v 5 Haali/ /e, ayy Tap̱a, ta a’di jin ’boro’d mo dhali jin gwamki’da gwam mo, 
\q1 ki mo/en pini jin ṯelu sho’k mo jin ishki’d ka enthus mo gom uni ’baar mo kun mini yuḵ /e mo be. 
\q1  
\v 6 C̱iyi ’cem pini, ayy Tap̱a, ka ’thom pem mo. 
\q1 Ciḵi gwo gom ko jin gwoka/ ka di’b me’di is mo. 
\q1  
\v 7 Ka tee jin ṯocu aha/ bwa mo tani aha/ yuḵkina /e mo, 
\q1 haali/ /e thoḵki aha/ ’twa/ mo. 
\b  
\q1  
\v 8 Jaŋkamu/ yisa di’da e bwam ma rum thus gwahan jin waki /e, ayy Tap̱a, 
\q1 walla jaŋ kamu/ yisa di’da jin mii to me’d /e mo. 
\q1  
\v 9 Aris kal ma ris ’kwaniny’ceshi ’baar mo kun uḵa /e mo tani mini p̱u’du/ mo 
\q1 dhali luŋ ki jiŋ ’kup̱a’dup̱uni bwambori /e mo, ayy Tap̱a, 
\q1 dhali kar gway pini ki ca mo. 
\q1  
\v 10 Haali/ /e caaca mo dhali miina dhan to gi momer mo, 
\q1 dhali /e ’de/ itana Arumgimis mo. 
\q1  
\v 11 Ṯori aha/ gwo gom bway pini mo, ayy Tap̱a, 
\q1 ki aha/ mina ya e bway ganam pini mo. 
\q1 Kara dum pem mmoṯal ’de/ mo ki aha/ mina ḵo/ gway pini mo. 
\q1  
\v 12 Aha/ c̱ina mo jin ’boruwa ’bor bwa i is ki /e mo, ayy Tap̱a Arumgimis pem mo, ka dum pemi ’baar mo, 
\q1 dhali aha/ mina kar gway pini ki ca ki sule/ sule/ mo. 
\q1  
\v 13 Haali/ mo/en jin ṯelu sho’k mo tani a’di caaca ’kup̱ ki aha/ mo. 
\q1 /E ’cuḵkina ḵashiram pem ’peni moŋ’kulga/ ma Haawiya mo. 
\b  
\q1  
\v 14 Ayy Arumgimis, ’kwani kun ushi ’kwani ga/ uni cukin ap̱o/ aha/ mo, 
\q1 dhana tul ’kup̱ ’kwani kun maṯẖamaṯẖ mo tani simmki mondiki/em pem e mo, 
\q1 dhali uni ’koki kar /e ibwambori jis/em buni mo. 
\q1  
\v 15 Hili /e, ayy Tap̱a, /e tana Arumgimis jin miimii mo dhali mii mii ka ’the mo, 
\q1 /e maŋgala she/ ki maŋgal goma nyor mo, dhali mo/en pini jin ṯelu sho’k mo tani ishki’d mo dhali mii ma isiŋ gana/ si’da/ mo. 
\q1  
\v 16 Ṯuku/ mo e aha/ mo dhali bu’th mo jin hiluwa hil ka ’thime/ ki mo/en ap̱o/ aha/ mo. 
\q1 C̱iyu/ mo jin ’bidhu/ e is pini ki c̱iŋkinam pini mo, 
\q1 dhali tayi ya/ gi nyaranyc̱iŋkinam pini is ki me’d mo. 
\q1  
\v 17 Ṯori aha/ jamas mii ma ’them pini mo, 
\q1 ki uni gwansan kun shi/ki aha/ i e mo mini p̱ar mii e mo tani dhali minu dhu ki mo ma ’the is mo 
\q1 haali/ /e, Tap̱a, woṯẖki aha/ mo dhali malas aha/ mo be. 
\c 87  
\s1 Gway gi iya/ ma Guurah. A’di ta gway jin yuḵu mo. 
\q1  
\v 1 E ’kuwosha turga/ jin ḵogu mo jin doshki’d mo jin ta ’peŋkuman bampam piti jin ḵa’bki’d mo. 
\q1  
\v 2 Tap̱a a’di enki ’twaŋkala goŋ ma Sihyuun mo, 
\q1 mmobola ris mo jin ’konu e pa ma Yakuub e mo. 
\q1  
\v 3 To gi monyca a’di ṯorkunuwa ṯor gom /e mo, 
\q1 ayy ’peŋkuman bampa/ ma Arumgimis mo. \qs Doshi ma dhali ’cunycuri yan mo.\qs* 
\q1  
\v 4 E bwaman uni gwansan kun mishki aha/ mo tani aha/ ṯorkina aRahab eya tente/ mo dhali Pam Baabil mo. 
\q1 Hili mo mo ma, ’Kwani gi Pam P̱alasthiin dhali ’Kwani gi Pan Sur nyaḵki ’Kwani gi Paŋ Gale/ mo. 
\q1 Uni o gwo mo ki: Jan ’de/ yan dho’thkunu e mun mo. 
\q1  
\v 5 Dhali goma Sihyuun mo tani a’di minu o gwo ciki: 
\q1 Jan ’de/ yan dhali jan ’de/ c̱aan dho’thkunu eya yim mo. 
\q1 Haali/ a’di jin Caa e ki Ca ki is piti midi ṯela yim sho’k mo. 
\q1  
\v 6 Tap̱a midi deŋa deŋ e mo me’d jin ’kwarkina a’di gway gi ’kwani mo ki: 
\q1 A’di ’de/ yan dho’thkunu imun mo. \qs Doshi ma dhali ’cunycuri yan mo.\qs* 
\q1  
\v 7 Imanyuḵ gway dhali imansa gara/ o gwo mo ki: 
\q1 Aris mo jin kasha yi’dem pem e mo tani uni ’kon e /e mo. 
\c 88  
\s1 Gway jin yuḵu mo. Gway gom iya/ ma Guurah mo. Eya manyuḵ gway mo, isi ki gway jin gwonu gom bwan diṯi’d mo. A’di ta gway mmoyetha Hemaan jin ta Wathi/ ma Asraah sho’k mo. 
\q1  
\v 1 Ayy Tap̱a, Arumgimis pem, aha/ yuḵkina /e mmowoṯẖ aha/ montee mo. 
\q1 Aha/ gwokina mon’thiny ibwambori /e mo. 
\q1  
\v 2 Dhalki mon’thom pem p̱u’dki’d ibwambori /e mo, 
\q1 ḵa’di ’cem pini mmociḵ kom pem mo. 
\q1  
\v 3 Haali/ aḵashiram pem a’di ’tu’du/ mo ki monṯo’c bwa mo, 
\q1 dhali mondiki/em pem a’di ḵalkina mo mo mmo’disha Haawiya is mo. 
\q1  
\v 4 Aha/ deŋu e nyaḵki uni gwansan kun iikin ka luŋgu’b e jisa ’kulga/ mo. 
\q1 Aha/ tana wathi/ jin dar gi mom’bi’th mo, 
\q1  
\v 5 dhali mmowa e ki a’di jin dhalkunu ’pen e bwaman jwa mo, 
\q1 dhali wa e ki wathi/ jin ’koshkunu mmo/ish e jis jwa mo, 
\q1 dhali wa e ki uni gwansan kun dina /e ki ka e doḵ/e mo, 
\q1 haali/ uni ’ciṯẖkunu ’twa/ mo ’peni me’d pini mo. 
\q1  
\v 6 /E karki aha/ e jisa ’kulga/ mo, 
\q1 dhali e pa gi mondhurumi’d dhali moŋ’kulga/ mo. 
\q1  
\v 7 Anyor pini ishki’da p̱o/ aha/ ki diṯ diṯ mo, 
\q1 dhali /e kumki aha/ ’twa/a ’cesh ka ris mii gi lanthinem pini mo. \qs Doshi ma dhali ’cunycuri yan mo.\qs* 
\q1  
\v 8 /E ki raḵ uni gun nyaḵ ii ki aha/ mmogas aha/ mo. 
\q1 /E ki kar aha/ mmota to jin bulabul gom uni mo. 
\q1 Aha/ mu’thkunu ’twaŋkal e bwaman mo wakan ki aha/ mina mol ye mo. 
\q1  
\v 9 Em pem caki’d mo mmoḵala ’tum gom bwan diṯi’d mo. 
\q1 Isa yempa/ aha/ yuḵkina /e mo, ayy Tap̱a. 
\q1 Aha/ ṯe’dkina me’d pem gom /e mo. 
\q1  
\v 10 A/e mii miimer gom uni gun wukina? 
\q1 A/dhali kun iikin mo mini cu mis mo mmomaŋ /eya? \qs Doshi ma dhali ’cunycuri yan mo.\qs* 
\q1  
\v 11 A/mo/en pini jin ṯelu sho’k bahu e jis jwa mowa? 
\q1 Walla dhali mo ma isiŋ ganam pini e mo jin kup̱u mowa? 
\q1  
\v 12 A/momer pini mishu e mondhurumi’d mowa? 
\q1 Walla a/mo jin tana /e is ki me’d mmowoṯẖ ’kwani e mony’cesh jin dhaluwa dhal ’pen mishu mowa? 
\b  
\q1  
\v 13 Hili aha/, ayy Tap̱a, gwokina ’twa/ e /e mo. 
\q1 E mon’thamo/ a’thom pem yaki’di bwambori /e mo. 
\q1  
\v 14 Ayy Tap̱a, atinta ibiṯa /e aha/ asho kan mo? 
\q1 Atinta baga /e jis/em pini ’peni aha/ mo? 
\q1  
\v 15 Mo jin jwakaṯkunuwa du mo dhali mowu ’dishki aha/ is mo ’pena tee jin taka/ dhuru’c mo, 
\q1 aha/ ’koshu is ka nyor goma purem pini mo. Aha/ dara gi mowoṯẖ mo. 
\q1  
\v 16 Anyor pini a’di dhi’thki aha/ sho’k mo. 
\q1 To jin ḵo/ka/ is ’peni /e uni bu’thkina bu’th mmo’ce’d aha/ sho’k mo. 
\q1  
\v 17 Uni ’kamki aha/ is me’da gannu/ yi’de/ jin guski’d ka tee ’baar mo. 
\q1 Uni ’kamki aha/ ’kup̱ ki deḵi monṯal ’de/ mo. 
\q1  
\v 18 /E ki raḵ uni gun eni aha/ dhali imugum pem mmogas aha/ mo. 
\q1 Imannyaḵ ’kom pem uni ’kon e mondhurumi’d mo. 
\c 89  
\s1 Gway jin yedhu a/Eṯẖaan sho’k jin ta Wathi/ ma Asraah mo. 
\q1  
\v 1 Aha/ mina yuḵ gway gom mo/en pini jin ṯelu sho’k mo, ayy Tap̱a, ki sule/ sule/ mo. 
\q1 Ki ’twa/ pem mo tani aha/ mina bah gwo gom mo ma isiŋ ganam pini eya risa nyaḵum yil gi ’kwaniny’cesh mo. 
\q1  
\v 2 Haali/ mo/en pini jin ṯelu sho’k mo tani a’di ṯelkunu ki sule/ sule/ mo. 
\q1 Mo ma isiŋ ganam pini a’di rwa’ckunu mo me’d momis mo. 
\q1  
\v 3 /E ki o gwo mo ki: Aha/ gamkina gwo me’d ki jin ’dem pem jin kwanyka/ mo. 
\q1 Aha/ thulkina gwo me’da p̱o/ goma Dawuu’d jin ta c̱iŋkinam pem mo. 
\q1  
\v 4 Aha/ mina ṯel emen pini sho’k ki sule/ sule/ mo, 
\q1 dhali nyaŋa ḵursi ma maliḵ pini goma risa nyaḵum yil gi ’kwani mo. \qs Doshi ma dhali ’cunycuri yan mo.\qs* 
\q1  
\v 5 Dhalki momis maŋ momer pini mo, ayy Tap̱a, 
\q1 dhali mo ma isiŋ ganam pini e dhana tul ’kup̱ gi ’kwani kun ḵogu mo. 
\q1  
\v 6 Haali/ kaja a’di jin di’d e momis gunn kun uḵu jin minu kar ka p̱ar nyaḵki Tap̱a mo? 
\q1 Kaja ibwaman uni gi momis jin wakina e ki Tap̱a mo? 
\q1  
\v 7 Arumgimis a’di jin ḵo/kunu eya dhana tul ’kup̱ gi ’kwanim piti kun ḵogu mo, 
\q1 a’di jin caaca mo dhali jin ta’da pure/ mo ap̱owa ris uni ’baar mo kun ’kamki a’di is mo. 
\q1  
\v 8 Ayy Tap̱a Arumgimis gi momis mo, 
\q1 kaja a’di jin ta jima dem dem me’d /e mo? ayy Tap̱a, 
\q1 nyaḵki mo ma isiŋ ganam pini jin ’kamki /e is mo. 
\q1  
\v 9 /E jikina ji ap̱o/ yi’de/ jin birki bakal mo. 
\q1 Ki lanthinem pini jin cukina a’di mis mo tani /e doshki uni mo. 
\q1  
\v 10 /E siri’ckina Rahab ap̱o/ ki sho’k mo me’d buŋgwar isa goŋgoro/ mo. 
\q1 /E ḵwa/ki ’kwani kun ta ’kup̱ ki /e ’twa/ mo ka bim pini jin c̱a’bki dem dem mo. 
\q1  
\v 11 Momis ta kum pini mo dhali mony’cesh si’da/ ta jim pini mo. 
\q1 Mony’cesh dhala ris to ’baar kun ’kon e a’di mo tani, /e ḵa’bki uni mo be. 
\q1  
\v 12 Abora bim poros dhali abora biny cam /e uḵki uni mo. 
\q1 Wosh ma Tabur dhali Wosh ma Harmuun uni ’kunykina bwa gom gway pini mo. 
\q1  
\v 13 /E takin ga bim pini jin c̱a’bki dem dem mo. 
\q1 Me’d pini ’bitha’bi’th mo, me’da bim poros pini turatur mo. 
\q1  
\v 14 Mo ma ḵar/e dhali mo jin dhunuwa dhu ka p̱o/ uni ḵa’bkina ḵursi ma maliḵ pini mo 
\q1 dhali mo/en jin ṯelu sho’k mo dhali mii ma isiŋ ganam pini mo uni iikini bwambori /e mo. 
\q1  
\v 15 Mom’bor mii gom ’kwani kun mishi cuu mo e mo ma tul ’kup̱ jin yuḵuwa yuḵ mo, 
\q1 uni gun iikin mo, ayy Tap̱a, e moŋkush gi jis/em pini mo, 
\q1  
\v 16 uni gun ’de’k gway isi mis gom gway pini ka tee ’baar mo, 
\q1 dhali kar mo ma ḵar/em pini ki ca mo. 
\q1  
\v 17 Haali/ /e ta monyca gom mom’bi’th is buni mo. 
\q1 Ki mii ma ’them pini mo tani cem bam karkunu ki ca mo. 
\q1  
\v 18 Haali/ agoŋgoro/ gi me’d bana mo tani a’di ta ji gi Tap̱a mo, 
\q1 amaliḵ bana mo tani a’di ta ji gi A’din ’De/ jin Ḵogu jin ta jima Israyiil mo. 
\b  
\q1  
\v 19 Haali/ ’pena dhamo/ mo tani /e ṯorki gwo ki tonyjan mo 
\q1 ki a’dim pinin ’de/ jin ta isiŋ gana/ mo dhali o a’di gwo mo ki: 
\q1 Aha/ karkina toŋ’kup̱ ’dolkon ap̱o/ jan ’de/ a’di jin c̱a’bki dem dem mo, 
\q1 dhali aha/ karkina a’di ki ca, a’din ṯal ’de/ yan jin kwanyu/ mo ’peni ’kwani mo. 
\q1  
\v 20 Aha/ gamkina Dawuu’d mo a’di jin ta c̱iŋkinam pem mo. 
\q1 Ka yin pem jin ḵogu mo tani aha/ ki ’koshki a’di mo. 
\q1  
\v 21 Wakan me’d pem midi diya p̱o/ a’di ki sule/ sule/ mo. 
\q1 Abim pem si’da/ midi ’bi’th a’di is mo. 
\q1  
\v 22 Uni gun ta ’kup̱ ki a’di mo tani uni mini ’koki p̱i a’di e ki yuḵ mo. 
\q1 Uni gun ta thus ki thus mini ’koki kar a’di mo mmokar is ki gwa’d mo. 
\q1  
\v 23 Aha/ mina siri’c uni gun ta ’kup̱ ki a’di ki sho’k ibwambori a’di mo. 
\q1 dhali dher uni gwahan is bwa ka ’cesh mo uni gun shi/ki a’di i e mo. 
\q1  
\v 24 Mii ma isiŋ ganam pem dhali mo/en pem jin ṯelu sho’k mo tani uni mini nyaḵ ’ko ki a’di mo be, 
\q1 dhali ki gway pem mo tani cem piti minu kar ki ca mo. 
\q1  
\v 25 Aha/ mina kar me’d piti ap̱o/ ḵumma/ yi’de/ mo 
\q1 dhali me’da bim poros piti ap̱o/ yi’de/ kun son mo. 
\q1  
\v 26 A’di midi ’ther ko e aha/ mo dhali o gwo mo ki: /E tana Ababam pem mo, 
\q1 jin ta’da Arumgimis pem mo, dhali Wosh jin ta bway mowoṯẖ pem mo. 
\q1  
\v 27 Dhali aha/ mina kar a’di mmota abwanyara/ mo, 
\q1 a’di jin eḵa/ eḵ mmobol imaliḵ gi mony’cesh e mo. 
\q1  
\v 28 Mo/en pem jin ṯelu sho’k mo tani aha/ mina karki a’di gom a’di ki sule/ sule/ mo. 
\q1 Dhali gwom pem jin gamka/ me’d mo midi dosh mmorwa’ckunu a’di gom a’di mo. 
\q1  
\v 29 Aha/ mina ṯel jil piti sho’k ki sule/ sule/ mo 
\q1 dhali aḵursi ma maliḵ piti mina e wa ka tee gi momis mo. 
\q1  
\v 30 Waḵki/ uc̱im piti mini dhal gwoŋḵan pem jin c̱inu ’pen mo 
\q1 dhali ’koki ii isi me’d gwoŋḵan kun onu mo tani, 
\q1  
\v 31 dhali waḵki/ uni ki p̱uu gwoŋḵan pem kun bahu mo 
\q1 dhali ’koki dhu gwoŋḵan pem kun ’kwarkunu mo tani 
\q1  
\v 32 yan’ko’d aha/ mina c̱i uni ajisa gom gwondhaŋ buni ki cwam pem mo 
\q1 dhali miinthus buni ki gulu’c jin miga/ dor uni mo. 
\q1  
\v 33 Hili aha/ mina joc̱ mo/en pem jin ṯelu sho’k ’peni a’di yisa, 
\q1 walla aha/ mina ta thus gom mii ma isiŋ ganam pem yisa. 
\q1  
\v 34 Aha/ mina diki p̱uu gwo jin gamka/ me’d mo 
\q1 walla aḵ gwo e mo jin piyi’d ’peni ’twam pem mo. 
\q1  
\v 35 Me’d ’de/ ki sule/ aha/ okina gwo isi ’baar mo mmothul gwo me’da p̱o/ gom mondhelel pem mo. 
\q1 Dhali aha/ mina diki ta aṯor goma Dawuu’d mo. 
\q1  
\v 36 Jil piti midi ’dim ’kup̱ ki sule/ sule/ mo, 
\q1 dhali aḵursi ma maliḵ piti midi di ki sule/ me’da tente/ ibwambori jis/em pem mo. 
\q1  
\v 37 Me’da ppe mo tani a’di midi ṯel sho’k ki sule/ sule/ mo. 
\q1 A’di midi dosh ki morwa’c is mo ki momis ’kon mmo’dim ’kup̱ mo. \qs Doshi ma dhali ’cunycuri yan mo.\qs* 
\q1  
\v 38 Hili shwane/ /e biṯkina biṯa sho mo dhali ruḵa/ ruḵ mo. 
\q1 /E ’tu’dkunu mo ka nyor ap̱o/ a’dim pini jin ’koshkunu ki monyca mo. 
\q1  
\v 39 /E waṯki gwom pini jin gamu me’d mo gi c̱iŋkinam pini mo. 
\q1 /E ki shi/ toŋ’kup̱ piti is e bu’da’cesh mo. 
\q1  
\v 40 /E ki yu’d agoŋ piti mo. 
\q1 /E ki kar mom piti jin ṯenu gwo mmokup̱ mo. 
\q1  
\v 41 Aris uni gwansan kun pekin mo uni dilki a’di to mo. 
\q1 A’di c̱ikunu gura/ ki imannyaḵ ’kom piti mo. 
\q1  
\v 42 /E ki kar me’da bim poros gi a’di jin ta ’kup̱ ki a’di ki ca mo. 
\q1 /E ki dhuwa ris uni gun ta ’kup̱ ki a’di mmo’kuny bwa mo. 
\q1  
\v 43 Nye, /e ki doḵ shemen gandal piti jin kaaka ka nyaŋ’ko’d mo. 
\q1 Dhali /e diki kar a’di mmodosh mo e mo ma mee mo. 
\q1  
\v 44 /E ki joc̱ cwa ma maliḵ ’peni me’d piti mo 
\q1 dhali /e ki biṯa ḵursi ma maliḵ piti a’cesh mo. 
\q1  
\v 45 /E ki kara teem piti ki kuṯ kuṯ mo ateem piti jin tana a’di dhuru’c mo. 
\q1 /E ki tash a’di is ki mo ma ’the is mo. \qs Doshi ma dhali ’cunycuri yan mo.\qs* 
\q1  
\v 46 Ki mo gi wakata, ayy Tap̱a, imina /e bag is pini ki sule/ sule/ kan mo? 
\q1 Ki mo gi wakata, imin ma nyor pini pur me’d o’d kan mo? 
\q1  
\v 47 Kayi gwo e mo ma, ayy Tap̱a, mondiki/e wana bar piti kata mo? 
\q1 Dina /e ki p̱ar e mom pini jin uḵa /e to di bwa ’te/ goma ris iya/ gi ’kwani mo? 
\q1  
\v 48 Wathi/ jana sa/ imidi di ki e mmodiki p̱ar wu e mo? 
\q1 Dhali kaja si’da/ imidi misha ḵashiram piti woṯẖ ’peni mom’bi’th ma Haawiya mo? \qs Doshi ma dhali ’cunycuri yan mo.\qs* 
\q1  
\v 49 Tap̱a, mane mo/en pinin dhamo/ yin jin ṯelu sho’k mo, 
\q1 a’di jin tana /e isiŋ gana/ a’di jin thulkina /e aDawuu’d gwo me’da p̱o/ mo? 
\q1  
\v 50 Kayi gwo e mo ma, ayy Tap̱a, c̱iŋkinam pini c̱inu gura/ mo be. 
\q1 Kayi gwo e mo ma, ki aha/ ḵalkina asor gi ’kwani gwansan eya bor pem mo, 
\q1  
\v 51 a’di jin ṯẖunykina ’kwani kun ta ’kup̱ ki /e ’twa/ is mo, ayy Tap̱a, 
\q1 a’di jin miikina uni ka maḵ mo, ŋaṯgin gi a’di jin ’koshkina /e ki monyca mo. 
\q1  
\v 52 Mom’bor mii gom Tap̱a ki sule/ sule/ mo. \qs Amen dhali Amen.\qs* 
\c 90  
\ms1 AWARKA/ JIN ’KONA ’BANI DOŊON MO 
\s1 Mon’tho ma Musa, a’di jin ta Wathi/ ma Arumgimis mo. 
\q1  
\v 1 Tap̱a, /e taki jim bam jin ’kona am ’twa/i cine/ mo eya risa nyaḵum yil gi ’kwani mo. 
\q1  
\v 2 Nṯwa/a/ ka dhan wosha turga/ ’kokunu mmo’doyu/ ka pije/ mo, 
\q1 walla isi me’dyini jin uḵa /eya ’cesh dhali mony’cesh mo, 
\q1 ’peni mo jin ’konuki/e ki sule/ sule/ ya ye ’ba/ mo itan mo jin ’konuki/ e ki sule/ sule/ ya ye ’ba/ mo tani /e tana Arumgimis mo. 
\b  
\q1  
\v 3 /E ki ṯu’k wathi/ mmowar ki bu’da’cesh ka nyaŋ’ko’d doḵ/e mo 
\q1 dhali /e ki o gwo mo ki: Doḵku/ ka nyaŋ’ko’d mo, ayy uc̱i gi ’kwaniny’cesh mo. 
\q1  
\v 4 Haali/ yila alip̱ e jis/em pini mo tani ta toŋ kamuwa? 
\q1 Hili a’di wana e katili/ jin peki’d mo, 
\q1 walla a’di wana e ki mon’thiny jin timkunu mo mo. 
\q1  
\v 5 /E ki dhi’th ’kwani sho’k mo dhali uni wakina e ki jan jin shu’bu/ mo, 
\q1 dhali wa e ka sho jin lu/kin mon’thamo/ mo. 
\q1  
\v 6 E mon’thamo/ me’d jin lu/a a’di ki ṯup̱ ṯup̱ mo dhali a’di lu/u mo 
\q1 dhali mom’pimpili/ mo tani a’di uski’d ki jog mo dhali ḵu’th mo. 
\b  
\q1  
\v 7 Haali/ aman kup̱kunu ki ’ci’d’da/ ka nyor pini mo. 
\q1 Ka nyor pini mo tani aman kumkunu ’twa/a ’cesh ki kum jin ’boro’da? 
\q1  
\v 8 /E ki kar tom bam jin ’coḵa’coḵ ibwambori /e mo. 
\q1 Miinthus bam kun miikina am ka ḵwal is mo dhukina /e e moŋkush gi bwam/em pini mo. 
\q1  
\v 9 Haala risa teem bami ’baar mo pekin mo e bwaŋ’kwariny ma nyor pini mo. 
\q1 Yil bam p̱u’dkin itagi ’pemen mo me’da shure/ jin daḵ ’kup̱ mo. 
\q1  
\v 10 Yil gi moŋ’koki/em bam a’di ta iss ’kwanimpa kwara i’ce’dka ’kume’d ap̱o/ mo, 
\q1 walla isi kani waḵki/ ’kup̱ gwo gom mom’bi’th is itagi iss ’kwanimpa doŋon mo tani 
\q1 hili naskina/ sur buni a’di di’di mmo’kosha ’kosh ki mii mo dhali monṯo’c bwa mo, 
\q1 dhali ki ’dishe/ mo tani uni pekin mo dhali aman p̱ekina mo. 
\b  
\q1  
\v 11 Kaja si’da/ imidi hil isi gwo i e goma nyor pini mo, 
\q1 dhali ka nyor pini isi ki gwo jin minu ḵo/ /e mo? 
\q1  
\v 12 Wakan ṯori aman gwo mo mmodeŋa teem bam e mo 
\q1 ki aman mina gama dum bam gi moyuḵ mo. 
\b  
\q1  
\v 13 Doḵu/ mo, ayy Tap̱a! Ki mo jin wakata imina /e idi mo? 
\q1 Hili ahil ki e ma ’thime/ gom c̱iŋkinam pini mo. 
\q1  
\v 14 Kap̱i amana dum bam ki mon’thamo/ ki mo/en pini jin ṯelu sho’k mo 
\q1 ki aman mina bwa ’kuny mo dhali ’bor bwa mo ka teem bam ’baar mo. 
\q1  
\v 15 Dhuyi aman mmo’kuny bwa mo me’da tee ka ris mo me’da cim gunn kun dorkina /e aman mo 
\q1 dhali me’d yil ka ris me’d jin p̱arkina aman tonthus e mo. 
\q1  
\v 16 Dhalka ṯu’c pini a’di ṯoru eya tente/ e c̱iŋkinam pini mo, 
\q1 dhali monyca gi mom’bi’th pini e uc̱im buni mo. 
\q1  
\v 17 Dhalki mii ma ’the gi Tap̱a Arumgimis bam di’da p̱o/ aman mo, 
\q1 dhali ṯeli /e aṯu’c bam sho’k mo jin miina aman ki me’d bam mo, 
\q1 nye, aṯu’c jin miina aman ki me’d bam mo tani ṯeli /e a’di sho’k mo. 
\c 91  
\q1  
\v 1 A’di jin c̱a’bki’d eya darha’da/ gi a’di jin Caa e ki Ca mo, 
\q1 a’di jin c̱a’bki’d eya la gi a’di jin c̱a’bki dem dem mo, 
\q1  
\v 2 midi o Tap̱a gwo mo ki: /E a’di ihurga/ jwa icine/ mo dhali /e tana cur pem jin ṯenu gwo mo, 
\q1 Arumgimis pem, e /e mo tani aha/ gamkina gwo is mo. 
\q1  
\v 3 Haali/ a’di midi ’cuḵ /e mo ’pena gume/ jin cesh ma mancesh to to mo 
\q1 dhali ’peni to jin wo’cki ’kwani is she/ mmowu mo. 
\q1  
\v 4 A’di midi kum /e ’kup̱ ki thulas piti mo, 
\q1 dhali e bwaŋ’kwariny ma bim piti mo tani /e mini gam mo jin huru jwa mo. 
\q1 Mii ma isiŋ ganam piti a’di ta’da goŋgoro/ mo dhali p̱a’dal mo. 
\q1  
\v 5 /E mini diki ḵo/ is gom mon’thiny jin midi miiya pure/ mo, 
\q1 walla athop̱a/ jin p̱eki’d montee mo, 
\q1  
\v 6 walla to jin wo’cki is she/ jin parki’d mon’thiny mo, 
\q1 walla mo jin ’ce’du/ sho’k jin shi/ki’da shi/ is montee mo. 
\q1  
\v 7 Alip̱ ’kwani mini rasu/ e ’ko’d gwar pini mo, 
\q1 dhali alaap̱i ’kume’d mini rasu/ ka bim poros pini mo, 
\q1 hili a’di midi diki p̱u’du/ mmo’dish /e is mo. 
\q1  
\v 8 /E mini hil ki jasi em pini mo 
\q1 dhali hil mo jin minu ri’c a’di jin ta thus ki thus mo. 
\q1  
\v 9 Haali/ /e ki kar Tap̱a mmota jim pini jin hura /e jwa mo, 
\q1 a’di jin Caa e ki Ca mo jin ta mom pini jin c̱a’ba /e icine/ mo tani 
\q1  
\v 10 tonthusa kamu/ midi diya mmop̱u’da p̱o/ /eya? 
\q1 walla mo jin doruwa dor midi ’dish /e is e gu’b burrinyem pini jin c̱a’ba /eya? 
\q1  
\v 11 Haali/ a’di midi hash iman’doyu gwom piti mo mmoḵan gwo gom /e mo 
\q1 dhali mmoji /e mo eya ris bway pini ’baar mo. 
\q1  
\v 12 E me’d buni mo tani uni mini ’de’k /e mo, 
\q1 isi ciki/ ki /e mina sho’k pini diki ṯorosh ap̱o/ wosh mo be. 
\q1  
\v 13 /E mini yap̱a dhop̱a p̱o/ ki sho’k mo dhali tasha/ jin ta ga ṯi’di cine/ mo, 
\q1 dhali adhop̱ jin ta dhuru’c mo dhali tasha/ mo /e mini yap̱ uni ki sho’k mo. 
\b  
\q1  
\v 14 Haali/ a’di koṯẖki aha/ me’d ki mo/en mo tani aha/ mina ’cuḵ a’di mo. 
\q1 Dhali aha/ mina cesh a’di ka p̱o/ mo haali/ a’di mishki gway pem mo be. 
\q1  
\v 15 Ki a’di midi yuḵ aha/ mo tani aha/ mina yuḵ a’di ’twa/ mo, 
\q1 aha/ mina nyaḵ di ki a’di e mo jin ṯoju a’di bwa mo. 
\q1 Aha/ mina ’cwam a’di mo dhali taḵ a’di mo. 
\q1  
\v 16 Ki mondiki/e jin tura ’ba/ ki tur mo tani aha/ mina kap̱ a’diya du mo, 
\q1 dhali ṯor a’di bway gi mowoṯẖ pem mo. 
\c 92  
\s1 Gway. Gway jin yuḵu goma cim ma pesu/ mo. 
\q1  
\v 1 A’di ’boro’d mmoc̱i mo jin ’boruwa ’bor bwa i is ki Tap̱a mo, 
\q1 mmoyuḵ gway mmomaŋ gway pini mo, ayy /e jin Caa e ki Ca mo, 
\q1  
\v 2 mmobah gwo gom mo/en pini jin ṯelu sho’k mo mon’thamo/ mo, 
\q1 dhali mo ma isiŋ ganam pini mon’thiny mo, 
\q1  
\v 3 dhali ki koŋ gway ma dheŋdhenye/ jin ’kon ma shu/i ’kume’d mo jin buḵu ki dar ga yi’c mo dhala dheŋdhenye/ mo, 
\q1 dhali ko jin lukum ma dheŋdhenye/ jin ’kon ma shu/i pesu/ mo be. 
\q1  
\v 4 Haali/ /e, ayy Tap̱a, /e karki aha/ mmo’kuny bwa ki ’kuny gom miim pini mo. 
\q1 Ki miin to ki me’d pini mo tani aha/ yuḵkina gway ki moŋ’kuny bwa mo. 
\b  
\q1  
\v 5 Dhan miim pini ’ka’da miiya, ayy Tap̱a. 
\q1 Gwom pini kun kuluma /e ibwa mo tani uni ’kula’kul mo. 
\q1  
\v 6 Wathi/ jin ta dholgon mo tani mol a’di mish ’ban mo, 
\q1 wathi/ jin ’kan ma ’kama janya/ mo tani a’di mol mish gwo yansan ’ban mo be. 
\q1  
\v 7 Ki ba a’di jin ta thus mo tani a’di ’ka’da le/ me’da sho mo 
\q1 dhali imanmii tonthusi ’baar mo lugkin ki ṯup̱ ṯup̱ mo tani 
\q1 uni ’birki ’kup̱ ki mo jin ’ce’du/ sho’k ki sule/ sule/ mo, 
\q1  
\v 8 hili /e, ayy Tap̱a, /e a’di idikin e mo jin ḵapaṯa/ ḵapaṯ ki sule/ sule/ mo. 
\q1  
\v 9 Haali/, hili mo mo ma, ’kwani kun ta ’kup̱ ki /e mo, ayy Tap̱a, 
\q1 haali/, hili mo mo ma, ’kwani kun ta ’kup̱ ki /e mo tani uni minu ’ce’d sho’k mo. 
\q1 Aris imanmii tonthus mo tani minu c̱eker bwa mo be. 
\b  
\q1  
\v 10 Hili /e eḵki cem pem mo mmowa e ki ce ma almaŋa’th mo. 
\q1 /E ki wol aha/ ayin jin ta this ki this i is mo. 
\q1  
\v 11 Em pem p̱arki uni kun ta ’kup̱ ki aha/ e mo mmoṯa’k ka luŋgu’b mo. 
\q1 ’Cem pem ciḵki gwo gom mom’bir ’kup̱ ki ’kwani kun ta thus ki thus kun ṯẖa’th aha/ ki is mo. 
\b  
\q1  
\v 12 Uniŋ ḵar/e uni lugkin me’d cwanyjeṯẖkum mo 
\q1 dhali ca me’da bwanyayiis e Pan Lubnaan mo. 
\q1  
\v 13 Uni c̱u’thkunu mo e gu’b gi Tap̱a mo. 
\q1 Uni lugkin ki ṯup̱ ṯup̱ e gu’b ma pije/ jin di ’kup̱ ḵany ma Arumgimis bana mo. 
\q1  
\v 14 Uni ’kon naskina/ mmodho’th maman ka dhan buni kun tana uni mo. 
\q1 Uni ’tu’du/ mo ki sule/ ki yiman ki is buni mo dhali ishki dhii/ mo 
\q1  
\v 15 mmoṯor eya tente/ ki Tap̱a a’di ta a’di jin ta’da ḵar/e mo, 
\q1 a’di jin ta wosh pem mo, dhali miiŋ kamu/ di’d e a’di yisa jin ush me’d mmonon a’di mmota ḵar/e mo. 
\c 93  
\q1  
\v 1 Tap̱a a’di jiki’da ji mo. A’di hi’thkunu ki burrinye/ ma maliḵ mo. 
\q1 Tap̱a a’di hi’thkunu is ki burrinye/ mo. A’di ’kamkunu is ki mom’bi’th mo. 
\q1 Nye, mony’cesh a’di ṯelkunu sho’k mo. A’di molu joc̱ ki sule/ sule/ mo be. 
\q1  
\v 2 Ḵursi ma maliḵ pini a’di ṯelkunu sho’k mo ’peni kadhamo/ mo. 
\q1 /E idikin ’peni kadhamo/ ki sule/ sule/ mo. 
\q1  
\v 3 Agannu/ yi’de/ uni uluc̱kin ki mis mo, ayy Tap̱a, 
\q1 agannu/ yi’de/ uni uluc̱kin ki mis ki ’twam buni mo, 
\q1 agannu/ yi’de/ uni uluc̱kin ki mis ki ’twam buni jin gwokina uni aḵuku/ ḵuku/ mo. 
\q1  
\v 4 Mo ta gi mom’bi’th kagahara mmobol yi’de/ e jin alki is is ka ris mo, 
\q1 dhali mo ta gi mom’bi’th mmobol yi’de/ jin birki bakal e mo. 
\q1 Tap̱a jin diki’d e mo jin ḵa’dama/ ḵa’dam mo tani a’di c̱a’bki dem dem mo. 
\q1  
\v 5 Gwoŋḵan pini kun ’kawurkunu mo tani uni ’kon eya tente/ ki ’koŋ gana/ mo. 
\q1 Moŋḵo/ piti a’di gama gam gom gu’b pini mo, 
\q1 ayy Tap̱a, gom ki sule/ sule/ mo. 
\c 94  
\q1  
\v 1 Ayy Tap̱a, /e tana Arumgimis jin ri’cki’da ri’c mo. 
\q1 /E tana Arumgimis jin ri’cki’da ri’c mo tani dhalki /e kushki mo mo. 
\q1  
\v 2 Cuyi mis mo, ayy /e jin tana Amandwall mony’cesh gwo mo. 
\q1 C̱iki uni gwahan kun dhu is ki ca tom buni kun ’dap̱a uni ki ’dap̱ mo. 
\q1  
\v 3 Ayy Tap̱a, ki mo gi wakata imina uni kun ta thus ki thus i’ko mo? 
\q1 Ki mo gi wakata imina uni kun ta thus ki thus ’ko mo mmop̱e ki bwaŋ ’kunyu’d mo? 
\q1  
\v 4 Uni wolki gwom p̱us buni kun dhunu uni ’ba/ ki ca ka pije/ mo, 
\q1 uni dhu ’ba/ ki ca mo, aris uni ’baar mo kun miiki tonthus mo. 
\q1  
\v 5 Uni siri’cki ’kwanim pini ap̱o/ ki sho’k mo, ayy Tap̱a, 
\q1 dhali wa’th mal pini i e mo. 
\q1  
\v 6 Uni ki ’kosh up̱a dhalla/ mo dhali uni kun ii ii yilkina/ mo, 
\q1 dhali ta iman’kosha mee ki ’kwani kun dar gi icom mo. 
\q1  
\v 7 Dhali uni ki o gwo mo ki: Tap̱a mishki toŋ kamu/ p̱ar eya? 
\q1 Arumgimis ma Yakuub a’di mish toŋ kamu/ nyiṯẖa/? 
\q1  
\v 8 Mishi gwo ’ban ma, ayy ’kwani kun ta dholgon ki dholgon mo. 
\q1 Um kun tana rwa/e/, ki um mini yuḵ kakasja mo? 
\q1  
\v 9 A’di jin uḵki gu’ban’ce mo tani mina a’di diki ciḵ gwo mowa? 
\q1 A’di jin uḵki e mo tani mina a’di diki p̱ar mo e mowa? 
\q1  
\v 10 A’di jin dorki kal gi ’kwaniny’cesh mo tani mina a’di diki dora dor garaa? 
\q1 A’di jin ṯorki ’kwani gwo mmonyiṯẖ to mo tani, 
\q1  
\v 11 Tap̱a a’di mishki to kun kuluma ’kwani ibwa mo, 
\q1 ki uni ta toŋ kamuwa? ayy jasa wulp̱e/ ’te/ mo. 
\b  
\q1  
\v 12 Mom’bor mii gom wathi/ a’di jin dorkina /e mo, ayy Tap̱a, 
\q1 dhali a’di jin ṯorkina /e gwo ’peni gwoŋḵan pini jin c̱inu mo, 
\q1  
\v 13 mmoc̱i a’di isa haju/ ’pena teem piti jin ṯoju a’di bwa mo, 
\q1 ntagi jisa ’kulga/ minu c̱wany mo gom a’di jin ta thus ki thus mo. 
\q1  
\v 14 Haali/ Tap̱a midi diki dhal ’kwanim piti ’pen mo. 
\q1 A’di midi diki dhal mal piti ’pen mo. 
\q1  
\v 15 Mo jin dhunuwa dhu ka p̱o/ midi doḵu/ mo e mo jin ta’da ḵar/e mo, 
\q1 dhali aris uni ’baar mo kun dhelel ma du mo tani uni mini baṯẖ a’di isho’k mo be. 
\q1  
\v 16 Kaja a’di jin cu mis gom aha/ ap̱o/ uni kun ta thus ki thus mo? 
\q1 Kaja a’di jin doshki’d gom aha/ ap̱o/ imanmii tonthus mo? 
\q1  
\v 17 Waḵki/ Tap̱a midi diki ta manwoṯẖ pem mo tani 
\q1 aḵashiram pem ishunsan gana/ moyi midi c̱a’b ki shwamm e mony’cesh jin ’konu ki shwamm mo. 
\q1  
\v 18 Ki aha/ kulumkina gwo ibwa mo ki: Sho’k pem yereski’d mo tani 
\q1 mo/en pini jin ṯelu sho’k mo, ayy Tap̱a, a’di ibu’thki aha/ mmodosh mo be. 
\q1  
\v 19 Ki mo ma teṯe/ ma dum pem tana ris mo tani 
\q1 momalas pini uni ’kunykina ḵashiram pem bwa mo be. 
\q1  
\v 20 Mina itap̱a kun ta thus ki thus mish gwo gam me’d nyaḵki /e mo, 
\q1 uni kun thosonki gwoŋḵan kun bahu kun tanuwa pibi ka pibi mo? 
\q1  
\v 21 Uni ’tuntulki isi monṯal ’de/ ap̱o/ mondiki/e gi wathiŋ ḵar/e mo, 
\q1 dhali waḵ a’di jin di’d ka p̱o/ mmokar a’di mmowu mo. 
\q1  
\v 22 Hili Tap̱a a’di warki’d ka cur pem jin ṯenu gwo mo, 
\q1 dhali Arumgimis pem ta wosh pem jin hurga/ jwa mo. 
\q1  
\v 23 A’di midi doḵki uni to i is mo gom miiny ’coḵgam buni mo 
\q1 dhali dhi’th uni sho’k ka pupush ’peni miim buni kun tana uni thus ki thus mo. 
\q1 Tap̱a Arumgimis bana midi dhi’th uni sho’k ka je’desh mo. 
\c 95  
\q1  
\v 1 Ayy iiyu/ mo, dhalki ana yuḵa gway gom Tap̱a mo. 
\q1 Dhalki ana ’kunya bwa kagahara mmowol cuuwa/ gom wosh jin ta bway mowoṯẖ bana mo. 
\q1  
\v 2 Dhalki ana iiyina mo e buŋ’kus piti mo mmoc̱i mo jin ’boruwa ’bor bwa i is mo. 
\q1 Dhalki ana ’kunya bwa kagahara mmowol cuuwa/ nyaḵki gway jin maŋuwa maŋ mo. 
\q1  
\v 3 Haali/ Tap̱a a’di ta’da Arumgimis jin caaca mo, 
\q1 dhali a’di ita’da Maliḵ jin caaca ap̱owa risa rum p̱inycon mo. 
\q1  
\v 4 E me’d piti mo tani moŋ’kulga/ gi mony’cesh ’kokin mo, 
\q1 dhali mo jin ḵa’dama/ ḵa’dam kun ta wosha turga/ si’da/ uni ta kum piti mo. 
\q1  
\v 5 Ḵumma/ yi’de/ uni ta kum piti mo, haali/ a’di i/uḵki uni mo, 
\q1 haali/ me’d piti a’di uḵki mony’cesh jin ḵuthaḵu’th mo. 
\b  
\q1  
\v 6 Ayy iiyu/ mo, dhalki ana luŋa luŋ mo, dhali ’ko ki jiŋ ’kup̱a’dup̱un mo, 
\q1 dhalki ana raḵa is ka ’cesh ibwambori Tap̱a jin uḵki ana mo. 
\q1  
\v 7 Haali/ a’di ta’da Arumgimis bana mo, 
\q1 dhali ana tana ’kwani ma shon dhii/i’d piti mo, dhali ḵa’bal gi me’d piti mo. 
\b  
\q1 Ayy ka tee yan shwane/ mo ki um mini ’taki ciḵ ’twam piti moyi. 
\q1  
\v 8 Dhalka dum bum ki ’bi’th mo me’d mo jin yuḵu gway ka Mariiba\f + \fr 95:8 \ft Mo e mombwaasho jin doru wosh ki cwa gom yi’de/ mo.\f* mo 
\q1 me’da tee yan jin ta’da tee ma Massa e bwaasho mo, 
\q1  
\v 9 ki ibabam bum palki aha/ mo 
\q1 dhali kar aha/ mmonyo/ mo, ba uni mishki miim pem mo be. 
\q1  
\v 10 Ki yila issu/ mo tani aha/ jwakaṯkunuwa du mo gom ’kwani ma nyaḵum yil gwan mo, 
\q1 dhali o gwo mo ki: Uni ’kwani gwansan uni tan ma dum buni ṯẖuthu/ ki ṯẖuthu/ mo, 
\q1 dhali uni ’koki dhu gwo ki bway pem mo. 
\q1  
\v 11 Wakan aha/ thulkina gwo me’da p̱o/ ka nyor pem mo 
\q1 ki uni mini ’taki ’koki cic̱ mo e mo jin sinu is mo be. 
\c 96  
\q1  
\v 1 Ayy, yuḵi gway e Tap̱a gway jin ta jin this mo, 
\q1 yuḵi gway e Tap̱a mo aris ’kwaniny’ceshi ’baar mo. 
\q1  
\v 2 Yuḵi gway e Tap̱a mo, dhali ’bori gway piti mii mo, 
\q1 ṯori gwo gom bway mowoṯẖ piti ’pena tee itana tee mo. 
\q1  
\v 3 Bahi monycam piti e bwaman kal gi ’kwaniny’cesh mo, 
\q1 dhali miim piti kun miina a’di ki momer e bwaman ma ris ’kwani mo. 
\q1  
\v 4 Haali/ Tap̱a a’di caaca mo, dhali ki nyanye/ mo tani a’di iminu taḵ mo. 
\q1 A’di iminu ḵo/ mo ap̱owa risa rum p̱inyconi ’baar mo. 
\q1  
\v 5 Haali/ arisa rum p̱inycon gi ’kwani mo tani uni ta tomp̱inycon kun luŋa ’kwani mo. 
\q1 Hili Tap̱a a’di uḵki momis mo. 
\q1  
\v 6 Montaḵ dhali mo jin eḵa/ eḵ uni ’koni bwambori a’di mo, 
\q1 mom’bi’th dhali monyjarom piti uni ’kon e mom piti jin ḵogu mo. 
\b  
\q1  
\v 7 C̱iki Tap̱a monyca mo, ayy um uc̱i gi ’kwani mo, 
\q1 c̱iki Tap̱a monyca mo dhali mom’bi’th is mo. 
\q1  
\v 8 C̱iki Tap̱a monyca mo, a’di jin ’dap̱a gway piti ki ’dap̱ mo. 
\q1 Guyi to jin c̱inu mmo’ciṯẖ ’kus mo dhali iiyi e mom piti jin di ’kup̱ ḵany mo. 
\q1  
\v 9 Luŋi Tap̱a ki burrinye/ ma du jin hidhu ki hitha dhelelga/ mo. 
\q1 Dhali deeyi ki bir bir ibwambori a’di mo, aris ’kwani ’baar gi mony’cesh mo. 
\b  
\q1  
\v 10 Oyi gwo e bwaman kal gi ’kwaniny’cesh mo ki: Tap̱a a’di ijiki’da ji mo. 
\q1 Nye, mony’cesh a’di ṯelkunu sho’k mo, dhali a’di molu joc̱ ki sule/ sule/ mo be. 
\q1 A’di midi dwall ’kwani gwo ki dar gi mii ma gwar ’de/ mo. 
\q1  
\v 11 Dhalki momis ’kunya bwa mo dhali dhalki mony’cesh si’da/ ’kunyu bwa mo, 
\q1 dhali dhalki ḵumma/ yi’de/ si’da/ bir bakal mo dhali aris to gwansani ’baar mo kun ’tu’d a’di bwaman mo. 
\q1  
\v 12 Dhalki bwam mondhe’d yuḵ gway ki moŋ’kuny bwa mo dhali aris to ’baar mo kun ’kon e bwaman a’di mo. 
\q1 Yan’ko’d aris cwa ’baar mo gi bwanycwa mini yuḵ gway ki moŋ’kuny bwa mo 
\q1  
\v 13 ibwambor gi Tap̱a mo, haali/ a’di p̱u’dki’d mo, 
\q1 haali/ a’di p̱u’dki’d mo mmodwall mony’cesh gwo mo. 
\q1 A’di midi dwall mony’cesh gwo ki mii ma ḵar/e mo 
\q1 dhali ’kwaniny’cesh ki gwoŋ ganam piti mo. 
\c 97  
\q1  
\v 1 Tap̱a a’di ijiki’da ji mo. Dhalki mony’cesh ’kunya bwa mo. 
\q1 Dhalka ris ’kwani kun ’kon e mony’cesh ki yanagap̱ ’kunya bwa mo. 
\q1  
\v 2 Araḵ dhali araḵ kun ’ceṯẖina ku’dum ki mondhurumi’d mo tani a’di ’kamki a’di is mo. 
\q1 Mo ma ḵar/e dhali mii ma ḵar/e uni ita moŋḵa’b ma ḵursi ma maliḵ piti mo. 
\q1  
\v 3 O’d yayi’di bwambori a’di mo, 
\q1 dhali shwa jin minu shwa ’kup̱ piti ki o’d mo tani ’kamki a’di is mo. 
\q1  
\v 4 Awara sho’k piti a’di kushki mony’cesh mo mo. 
\q1 Mony’cesh p̱arki a’di e mo dhali dee ki bir bir mo. 
\q1  
\v 5 Dhan wosha turga/ uni wakin me’d mandha/ dham mo ibwambori Tap̱a mo, 
\q1 ibwambori Tap̱a gi mony’ceshi ’baar mo. 
\b  
\q1  
\v 6 Momis a’di bahki mo ma ḵar/em piti mo, 
\q1 dhali aris ’kwani ’baar mo p̱arki monycam piti e mo be. 
\q1  
\v 7 Aris uni ’baar mo kun luŋki tomp̱inycon mo tani uni dhunu ki mo ma ’the is mo, 
\q1 uni kun dhu ’bam buni ki ca mo gom to jin mol ha me’d jin ta tomp̱inycon mo. 
\q1 Arisa rum p̱inycon mini luŋ ki jiŋ ’kup̱a’dup̱uni bwambori a’di mo. 
\q1  
\v 8 Sihyuun ciḵki gwo mo tani dhali a’di ’kunya bwa mo, 
\q1 dhali i’bwa/ gi ’Kwani Yahuuda/ uni ’kunya bwa mo, 
\q1 haali/ gom gwon dwall pini jin toru gwo ’twa/a ’cesh mo, ayy Arumgimis. 
\q1  
\v 9 Haali/ /e, ayy Tap̱a, /e a’di icaaca ap̱o/ mony’ceshi ’baar mo, 
\q1 /e a’di ikarkunu ki ca ap̱owa risa rum p̱inyconi ’baar mo. 
\b  
\q1  
\v 10 Tap̱a a’di enki uni gwansan kun shi/ki tonthusi e mo. 
\q1 A’di ’tashki mondiki/e gi unim piti kun dhunu ki she/ ki dhelel dhelel ’twa/ ’peni tonthus mo. 
\q1 A’di ’cuḵki uni ’peni me’d gi uni kun ta thus ki thus mo. 
\q1  
\v 11 Moŋkush kushki mo mo gom uni kun miin ka ḵar/e mo, 
\q1 dhali moŋ’kuny bwa gom uni kun dhelel ma du mo. 
\q1  
\v 12 ’Kunyi bwa e Tap̱a mo, ayy uma ḵar/e mo, 
\q1 dhali c̱i a’di mo jin ’boruwa ’bor bwa i is gom a’di jin ḵogu mo. 
\c 98  
\s1 Gway 
\q1  
\v 1 Ayy, yuḵi gway e Tap̱a gway jin ta jin this mo, haali/ a’di miiki dhan to ki momer mo. 
\q1 Me’da bim poros piti dhala bim piti jin ḵogu mo tani 
\q1 gamki a’di mo jin p̱inu mii e mo. 
\q1  
\v 2 Tap̱a a’di iṯorki mom piti jin p̱inu mii e eya tente/ mo, 
\q1 a’di ki pi mom piti jin yenuwa ye mo e jis/e gi kal gi ’kwaniny’cesh mo. 
\q1  
\v 3 A’di ki ka mo/en piti jin ṯelu sho’k e mo dhali mii ma isiŋ ganam piti mo 
\q1 e gu’b ma Israyiil mo. 
\q1 Aris ’pemen gi mony’ceshi ’baar mo tani p̱arki a’di e mo, 
\q1 a’di jin ta mo jin p̱inu mii e ma Arumgimis bana mo. 
\q1  
\v 4 Ḵumi cuuwa/ gom bwaŋ ’kunyka/ e Tap̱a mo, aris ’kwaniny’ceshi ’baar mo. 
\q1 Ḵwaku/ ’twaŋkal gom moŋ’kuny bwa ki gway mo dhali yuḵi gway jin maŋuwa maŋ mo. 
\q1  
\v 5 Yuḵi gway jin maŋuwa maŋ e Tap̱a ka dheŋdhenye/ jin ’kon ma shu/i pesu/ mo, 
\q1 dhali ka dheŋdhenye/ jin ’kon ma shu/i pesu/ mo dhali ki koŋ gway jin lukumu mo. 
\q1  
\v 6 Ka risa poome/ jin p̱inu mo dhali ki kony ce jin p̱inu mo, 
\q1 ḵumi cuuwa/ gom bwaŋ ’kunyka/ ibwambor ma Maliḵ mo, a’di jin ta Tap̱a mo. 
\b  
\q1  
\v 7 Dhalki ḵumma/ yi’de/ bir bakal mo, dhali aris to gwansan kun ’tu’dki a’di bwaman mo, 
\q1 mony’cesh dhali uni gwansan kun ’kokin e a’di mo. 
\q1  
\v 8 Dhalka gannu/ yi’de/ tor me’d buni mo. 
\q1 Dhalka ris wosh yuḵ gway moŋ’kuny bwa imonṯal ’de/ mo 
\q1  
\v 9 ibwambori Tap̱a mo, haali/ a’di midi p̱u’du/ mo 
\q1 mmoji mony’cesh mo be. 
\q1 A’di midi dwall ’kwaniny’cesh gwo ki mii ma ḵar/e mo 
\q1 dhali ’kwani ki dar gi mii ma gwar ’de/ mo be. 
\c 99  
\q1  
\v 1 Tap̱a a’di ijiki’da ji mo. Dhalki ’kwani deen ki bir bir mo. 
\q1 A’di c̱a’bki’d eya ḵursi ma Maliḵ eya p̱owa c̱arabiim mo. Dhalki mony’cesh theḵ she/ mo. 
\q1  
\v 2 Tap̱a a’di caaca eya Sihyuun mo. 
\q1 A’di ikarkunu ki ca ap̱owa ris ’kwani ’baar mo. 
\q1  
\v 3 Dhalki ’kwani maŋ gway pini mo jin caaca mo dhala purem pini mo. 
\q1 A’di iḵogu mo. 
\q1  
\v 4 Maliḵ a’di c̱a’bki dem dem mo, a’di jin enki mo ma ḵar/e mo. 
\q1 /E ṯelki mo jin daru gi mii ma dehe/ sho’k mo. 
\q1 /E ki tor gwowa bora ’cesh gom mii ma ḵar/e mo 
\q1 dhali mo ma ḵar/e goma Yakuub mo. 
\q1  
\v 5 Kari Tap̱a Arumgimis bana ki ca mo. 
\q1 Luŋi a’di e cwam piti jin dhuna a’di sho’k mo. 
\q1 A’di iḵogu mo. 
\b  
\q1  
\v 6 Musa dhala Haruun uni ita kum piti ibwaman ma gasiis mo. 
\q1 Samu/iil si’da/ a’di ita jim piti e bwaman uni gwansan kun yuḵki gway piti mo. 
\q1 Uni ki ko ’twa/i Tap̱a mo tani dhali a’di ithoḵki uni gwo mo be. 
\q1  
\v 7 A’di ṯorki uni gwo ka raḵ jin wana e ka ḵa’dum ki jamas piti mo. 
\q1 Uni dhuki gwonyc̱im piti mo, 
\q1 dhali gwoŋḵan piti kun bahu mo kun c̱ikina a’di uni mo. 
\q1  
\v 8 Ayy Tap̱a Arumgimis bam /e thoḵki uni ’twa/ mo. 
\q1 /E tana Arumgimis jin gwamki uni mo, 
\q1 hili /e ki ri’c uni gom tonthus buni jin thama uni mii mo. 
\q1  
\v 9 Kari Tap̱a Arumgimis bana ki ca mo, 
\q1 dhali luŋi a’di e ’kuwosha turgam piti jin ḵogu mo, 
\q1 haali/ Tap̱a Arumgimis bana mo tani a’di ḵogu mo. 
\c 100  
\s1 Gway jin yuḵu mo gom mo jin ’boruwa ’borim bwa i is gom to jin ’ciṯẖu/ ’kus mo. 
\q1  
\v 1 Ḵumi cuuwa/ ki moŋ’kuny bwa e Tap̱a mo, aris um ’kwaniny’cesh mo. 
\q1  
\v 2 Miiyi Tap̱a to ki bwaŋ ’kunyka/ mo. 
\q1 Iiyu/ i buŋ’kusi a’di ki gway ilu/ mo. 
\q1  
\v 3 Mishi mo mo ki a’di ta Tap̱a jin ta’da Arumgimis mo. 
\q1 A’di ta a’di jin uḵki ana mo dhali ana tana kum piti mo be. 
\q1 Ana tana ’kwanim piti mo dhali ana tana ḵa’bal ma shon dhii/i’d piti mo. 
\q1  
\v 4 Cic̱i e ’twaŋkal ma goŋ piti ki mo jin ’boruwa ’bor bwa i is mo, 
\q1 dhali e mom piti jin di ’kup̱ ḵany nyaḵki mo jin maŋuwa maŋ mo. 
\q1 C̱iyi a’di mo jin ’boruwa ’bor bwa i is mo, dhali ’bori gway piti mii mo. 
\q1  
\v 5 Haali/ Tap̱a a’di ’bora’bor mo. 
\q1 Mo/en piti jin ṯelu sho’k mo tani a’di ’dimki ’kup̱ ki sule/ sule/ mo, 
\q1 dhali mo ma isiŋ ganam piti eya risa nyaḵum yil ki ’kwani mo. 
\c 101  
\s1 Gway ma Dawuu’d 
\q1  
\v 1 Aha/ mina yuḵ gway ki yuḵa gayiin mo dhali ki mo ma ḵar/e mo. 
\q1 E /e mo tani ayy Tap̱a, aha/ mina yuḵ gway mo. 
\q1  
\v 2 Aha/ mina yip̱ ’kup̱ ki bway kun ’konu ki dar gi mii ’ba/ mo. 
\q1 Ayy, kakasja imina /e p̱u’du/ i aha/ mo? 
\q1 Aha/ mina ya ki dar gi ŋadhum eya dum pem 
\q1 e gu’b pem mo. 
\q1  
\v 3 Aha/ mina diki kar e bwambor jis/em pem mo, 
\q1 ma toŋ kamu/ jin ’coḵa’coḵ mo. 
\q1 Aha/ shina mii gi uni gwansani e mo kun ṯa’kkin ’peni bway gana/ mo. 
\q1 Uni mini ’koki thal aha/ mo. 
\q1  
\v 4 Mo jin iinu ki c̱a’ckon eya du mo tani midi si’d ’peni aha/ mo. 
\q1 Tonthus miga/ mol mo be. 
\q1  
\v 5 A’di jin thuthi’da mannyaḵ ’dish gu’b piti ’pen ka ḵwal is mo tani 
\q1 aha/ mina ’ce’d a’di sho’k mo. 
\q1 Wathi/ jin ’theḵ ’ba/ mmis dhali jin kar ’ba/ ki ca mo eya dum piti mo tani 
\q1 aha/ mina mish a’di ’dim ’kup̱ yisa. 
\b  
\q1  
\v 6 Aha/ mina hila hil ki mo/en ap̱o/ uni kun ta ku isiŋ gana/ e mony’cesh mo, 
\q1 ki uni mini nyaḵ ’ko ki aha/ mo be. 
\q1 A’di jin yaki’d e bway jin ’konu ki dar gi mii ’ba/ mo tani 
\q1 a’di imidi mii aha/ to mo be. 
\q1  
\v 7 Wathiŋ kamu/ jin boṯo’d ki mo ma he’k e isa yempa/ mo tani 
\q1 a’di midi c̱a’bi gu’b pem yisa. 
\q1 Wathiŋ kamu/ jin baha’da ṯor ka yempa/ mo tani 
\q1 a’di mol ṯikir c̱a’b e buŋ’kus pem mo be. 
\q1  
\v 8 Mon’thamo/ itan mon’thamo/ mo tani aha/ mina ’ce’d uni sho’k mo, 
\q1 aris uni kun ta thus ki thus kun ’kon e mony’cesh mo, 
\q1 mmo’ciṯẖa ris tonthusi ’baar mo kun miina imanmii uni mo 
\q1 ’peni ’peŋkuman bampa/ gi Tap̱a mo. 
\c 102  
\s1 A’tho ’peni jan ’de/ jin jwakaṯkunuwa du mo, ki a’di ’thikina buye/ mo dhali wola gumgum piti ibwambori Tap̱a mo. 
\q1  
\v 1 Ciḵi mon’thom pem mo ma, ayy Tap̱a. 
\q1 Dhalki kom pem p̱u’dki’di /e mo. 
\q1  
\v 2 Dhalku/ ki bag jis/em pini ’peni aha/ mo 
\q1 ka teem pem jin ta’da c̱is ki c̱is mo. 
\q1 Ḵa’di ’cem pini ki aha/ mo. 
\q1 Thoḵi aha/ ’twa/ ishunsan gana/ ka tee jin yuḵkika/ /e mo. 
\q1  
\v 3 Haala teem pem a’di peki’d mo me’da ku’d jin ’ciṯẖki ’pen mo 
\q1 dhala simam pem burkin mmowa e ki mo ma gwaṯa/ jin ’thanu o’d jin ’batha’ba’th mo. 
\q1  
\v 4 Adum pem dorkunu mmowa e ka sho mo dhali ḵu’thki’d mo. 
\q1 Aha/ ŋakina tonṯem pem mmoshwa mo. 
\q1  
\v 5 Haali/ gom dhan mo/ohon pem caaca mo tani 
\q1 asimam pem thalkina buŋgwar is pem mo. 
\q1  
\v 6 Aha/ wakina e ki koro/ gi mombwaasho mo, 
\q1 aha/ wana e ka kunu/ jin diki’d e bwam ma’du/ mo. 
\q1  
\v 7 Aha/ isha ki e i’kup̱ ki walwal mo, 
\q1 aha/ wana e ki ’dii jin di a’din ’deŋ gana/ ap̱o/ ’kuŋgu’b mo. 
\q1  
\v 8 Ka tee ’baar mo ’kwani kun ta ’kup̱ ki aha/ ṯẖunyki aha/ ’twa/ i is 
\q1 ki uni gwansan kun p̱e’th aha/ ki p̱etha sor mmokar gway pem ki mo jin jeenuwa jee mo. 
\q1  
\v 9 Aha/ shwakina jasi ’piny me’d tonṯe/ mo, 
\q1 dhali ce jabu’th pem e ki to jin p̱ika/ mo 
\q1  
\v 10 goma nyor jin deḵkina /e mo dhala nyor pini mo. 
\q1 Haali/ /e ḵalki aha/ imis mo dhali biṯ aha/ asho mo. 
\q1  
\v 11 Ateem pem wana e ka ḵashira/ ma tente/ gi mom’pimpili/ mo. 
\q1 Aha/ ḵu’thkina me’da sho mo. 
\b  
\q1  
\v 12 Hili /e, ayy Tap̱a, dikin e ḵursi ma maliḵ ki sule/ sule/ mo. 
\q1 Gway pini a’di ’dim ’kup̱ eya risa nyaḵum yil gi ’kwaniny’cesh mo. 
\q1  
\v 13 /E mini cu mis mo dhali tayi gi mo/en ma ’thime/ ap̱owa Sihyuun mo. 
\q1 A’di ta’da tente/ jin minu mii mii ka ’the goma yim mo. 
\q1 Atente/ jin karu ’pen ka pije/ a’di p̱u’dki’d mo. 
\q1  
\v 14 Haali/ c̱iŋkinam pini uni bu’thki wosh ma yim ji gi ŋa/u mo, 
\q1 dhali hila hil ki mo/en ap̱o/ bu’da’cesh ma yim mo. 
\q1  
\v 15 Kal gi ’kwaniny’cesh uni mini ḵo/ gway gi Tap̱a mo, 
\q1 dhali aris imaliḵ gi mony’cesh mo uni mini ḵo/ monycam pini mo. 
\q1  
\v 16 Haali/ Tap̱a midi nyaŋa Sihyuun ki mis ka nyaŋ’ko’d mo, 
\q1 a’di midi piyu/ ki monycam piti mo. 
\q1  
\v 17 A’di midi c̱iya hirdhe/ ki mon’tho gi uni kun dhalkunu ’pen mo, 
\q1 dhali a’di midi diki waḵ uni gom tom buni kun ’thona uni ka di’b is mo. 
\b  
\q1  
\v 18 Dhalki gwo yansan a’di ’kwarkunu isa ’cesh goma nyaḵum yil gi ’kwani kun mini iiyu/ i’ko’d mo, 
\q1 wakan ki ’kwani kun ’konuki dho’th naskina/ mo uni a’di imini maŋ Tap̱a mo, 
\q1  
\v 19 haali/ a’di hilki mo ka luŋgu’b ’peni mom piti jin ḵogu mo jin ḵa’dama/ ḵa’dam mo, 
\q1 ’peni momis mo tani Tap̱a hilki mo ap̱owa ’cesh mo 
\q1  
\v 20 mmociḵ ohon gi uni kun tana habuus mo, 
\q1 mmo’cuḵ uni gwansan kun ’birki ’kup̱ ki jwa mo, 
\q1  
\v 21 ki ’kwani mini bah gwo eya tente/ eya Sihyuun mo a’di jin ta gway gi Tap̱a mo, 
\q1 dhali e Pa Urushaliim mo tani uni mini bah gwo maŋ piti mo, 
\q1  
\v 22 ki ’kwani mini tul isi monṯal ’de/ mo 
\q1 dhali aris ’peŋkuman bampa/ mo mmoluŋ Tap̱a mo. 
\b  
\q1  
\v 23 A’di ’ce’dki mom’bi’th pem bwa mo e bwaman yam pem mo. 
\q1 A’di karki’da teem pem mmokuṯa/ kuṯ mo. 
\q1  
\v 24 Ayy Arumgimis pem, aha/ ona gwo mo ki: Dhalku/ ki bu’th aha/ ’peni mahan mo 
\q1 e bwaman ma teem pem mo, 
\q1 /e jin ’dimkina yil ’kup̱ mo 
\q1 eya risa nyaḵum yil gi ’kwaniny’ceshi ’baar mo. 
\q1  
\v 25 ’Peni kadhamo/ mo tani /e ’thiki moŋḵa’b gi mony’cesh mo, 
\q1 dhali momis a’di ta mii ki me’d pini mo. 
\q1  
\v 26 Uni mini ’ce’d sho’k mo tani hili /e a’di imini ’dim ’kup̱ mo, 
\q1 uni ’baar mo mini wuwa dhagale/ mo me’d burrinye/ jin hidhu i is mo. 
\q1 /E aḵ uni e me’d burrinye/ jin hidhu i is mo dhali uni pekin mo, 
\q1  
\v 27 hili /e ta a’di ma ’de/ mo, dhali yil pini mol di ’kup̱ mo. 
\q1  
\v 28 Uc̱i gi c̱iŋkinam pini uni mini ’ko ki ’dantar mo. 
\q1 Nyemes gi uc̱im buni ki uni mini dho’th i’ko’d mo tani uni iminu ṯel shoki bwambori /e mo be. 
\c 103  
\s1 Gway ma Dawuu’d 
\q1  
\v 1 ’Bori Tap̱a mii mo, ayy ḵashiram pem, 
\q1 dhali aris to gwan ’baar mo kun ’kon e aha/ mo, ’bori gway piti mii jin ḵogu mo. 
\q1  
\v 2 ’Bori Tap̱a mii mo, ayy ḵashiram pem mo, 
\q1 dhali dhalku/ ki ŋa a’dim piti jin ’dap̱a ’dap̱ mo, 
\q1  
\v 3 a’di jin gwamki /e ’pena ris miim pini kun ’coḵa’coḵ mo, 
\q1 a’di jin wac̱ki /e ’pena ris ’ba’th pini mo, 
\q1  
\v 4 a’di jin wanki /e ’ba/ ’peni jisa ’kulga/ mo, 
\q1 a’di jin shumki /e ki toŋ’kup̱ ki mo/en jin ṯelu sho’k mo dhali ki momiimii mo, 
\q1  
\v 5 a’di jin kap̱ki /eya du mo ki tom ’boron me’d jin dikina /e ki e mo, 
\q1 wakan dhuru’c pini jin tana /e midi ’ka gura/ me’da biny jeshe/ ma wulu/ mo. 
\q1  
\v 6 Tap̱a a’di miiki mii jin yenuwa ye mo 
\q1 dhali mo ma ḵar/e goma ris uni gwansan kun siri’ckunu ap̱o/ ki sho’k mo. 
\q1  
\v 7 Bway piti ṯora a’di eya tente/ ka Musa mo, 
\q1 dhali miim piti jin ḵala a’di e ’Kwani ma Israyiil mo. 
\q1  
\v 8 Tap̱a a’di ta’da manmiimii mo dhali mii jin miinu ka ’the mo, 
\q1 anyor piti maŋgala she/ mo dhali mo/en jin ṯelu sho’k ishki’d ka enthus mo. 
\q1  
\v 9 A’di isa yempa/ diki ḵucura ḵucur mo, 
\q1 walla a’di diki kara nyor piti ki sule/ sule/ mo. 
\q1  
\v 10 A’di diki ṯu/ul ana isi ki gwo gi miinthus bana mo, 
\q1 walla ri’c ana isi ki gwo gom tony ’coḵgam bana kun miina ana mo. 
\q1  
\v 11 Haali/ me’d momis jin ḵa’dama/ ḵa’dam ap̱o/ mony’cesh mo tani 
\q1 wakan dhan mo/en piti jin ṯelu sho’k caaca mo ’kup̱ki uni gwansan kun ḵo/ki a’di mo be. 
\q1  
\v 12 Me’d jin si’da mom’pesho’k ki si’d ’pena bora luŋgu’b mo tani 
\q1 isa dhana/ kan si’da/ a’di ki joc̱ gwondhaŋ bana ’peni ana mo. 
\q1  
\v 13 Me’da baba jin hilki ya/ ki mo/en mo tani 
\q1 wakan si’da/ Tap̱a ki hil uni gwansan kun ḵo/ki a’di ki mo/en mo. 
\q1  
\v 14 Haali/ a’di mishki’da yi’c bana mo, 
\q1 dhali a’di kaki gwo e ki ana tana bu’da’cesh mo. 
\b  
\q1  
\v 15 Wathi/, ateem piti a’di wana e ka sho mo. 
\q1 A’di lugki’d ki ṯup̱ ṯup̱ mo me’d jandin to e bwam bunto mo, 
\q1  
\v 16 haali/ ’tham poshki’d ap̱o/ a’di mo dhali a’di ki ’cwar a’di mo, 
\q1 dhali mom piti mishi a’di doḵ/e yisa. 
\q1  
\v 17 Hili mo/en gi Tap̱a a’di ṯelkunu sho’k mo ’peni mo jin ’konuki/e ki sule/ ya ye ’ba/ mo itan mo jin ’konuki/e ki sule/ ya ye ’ba/ mo 
\q1 ap̱o/ uni gwansan kun ḵo/ki a’di mo, 
\q1 dhali mo ma ḵar/em piti e uc̱i gi uc̱im buni mo, 
\q1  
\v 18 e uni gwansan kun dhuki gwom piti jin gamu me’d mo, 
\q1 dhali ka uni e mo mmomii gwoŋḵan piti kun ’kwarkunu mo. 
\q1  
\v 19 Tap̱a a’di ṯelki’da ḵursi ma maliḵ piti sho’k e momis mo, 
\q1 dhali ’peŋkuman bampam piti jiki’da ji ap̱owa ris to ’baar mo. 
\q1  
\v 20 ’Bori Tap̱a mii mo, ayy um iman’doyu gwom piti mo, 
\q1 um kun c̱a’bki dem dem mo kun mii gwom piti mo, 
\q1 mmociḵ ’twa/ gi gwom piti mo. 
\q1  
\v 21 ’Bori Tap̱a mii mo, aris umi ’baar mo kun ta kum piti kun ’kon e momis mo, 
\q1 imanmii tom piti mo kun mii bwam piti mo. 
\q1  
\v 22 ’Bori Tap̱a mii mo, aris to kun miina a’di mo, 
\q1 eya ris mo ’baar mo kun ta mom piti kun tana a’di tap̱a mo. ’Bori Tap̱a mii mo, ayy ḵashiram pem mo. 
\c 104  
\q1  
\v 1 ’Bori Tap̱a mii mo, ayy ḵashiram pem mo, ayy Tap̱a Arumgimis pem, /e a’di icaaca kagahara mo. 
\q1 /E hi’thkunu ki montaḵ mo dhali mo/eḵ mo, 
\q1  
\v 2 /e jin ’kamki is pini ki moŋkush me’d burrinye/ jin ’kamu is mo, 
\q1 /e jin bele’thki momis me’d gu’b burrinye/ mo, 
\q1  
\v 3 /e jin ’thikina ḵa’dum gi gu’b pini ap̱owa ris yi’de/ ’baar mo, 
\q1 /e jin dhukina raḵ me’d arabiyya jin dira shumarum pini mo, 
\q1 /e jin merkina p̱owa bi gi ’tham mo, 
\q1  
\v 4 /e jin dhuki ’tham ka ris mmota iman/ii gom /e mo, 
\q1 o’d dhala le’dan o’d jin shwa’d ki bar bar mo tani uni mii /e to mo. 
\b  
\q1  
\v 5 /E ki kar mony’cesh e moŋḵa’b piti mo, 
\q1 wakan ki a’di minu ’koki yiḵin is ki sule/ sule/ mo. 
\q1  
\v 6 /E ki kum a’di ’kup̱ ki moŋ’kulga/ me’d burrinye/ jin kumu to ’kup̱ mo. 
\q1 Dhali yi’de/ doshki’da p̱owa ris wosha turga/ mo. 
\q1  
\v 7 Ki gwom pini jin ḵucurkina /e uni mo tani uni sokin mo. 
\q1 Dhali ki kon dor ma sho’k pini mo tani uni yakina ŋwac̱a/ mo. 
\q1  
\v 8 Aris wosha turga/ cuki mis mo, dhali embul wosh mo tani uni cic̱kin ka ’cesh mo 
\q1 e mo jin karkina /e ’pen ka pije/ gom uni mo. 
\q1  
\v 9 /E ki kar gwayu/ mo ki uni mini ’koki pe mo, 
\q1 wakan ki uni mini ’taki ’koki halas mony’cesh doḵ/e mo. 
\q1  
\v 10 /E ki dhu yi’de/ kun ’du’dun mmogac̱ ka pije/ e embul wosh mo. 
\q1 Uni yakina ŋwac̱a/ e embul ma ris wosh mo. 
\q1  
\v 11 Dhali uni ’baar mo p̱ikina to/e ’baar mo kun ’kon e bwaasho mo. 
\q1 Thuluny bwaasho si’da/ uni kap̱kin ’peni mo jin budha yi’de/ uni mo. 
\q1  
\v 12 Ki uni mo tani ’dii kun p̱eni momis mo tani gamki moŋ’kom buni mo. 
\q1 Uni wolki gway e bwaman ma risa biny cwa mo. 
\q1  
\v 13 ’Peni monyc̱a’b pini jin dina /eya ’ta’dama mo tani /e wolki yi’de/ ap̱o/ wosha turga/ mo. 
\q1 Mony’cesh a’di kap̱kunuwa du ki maman miin to ki me’d pini mo. 
\q1  
\v 14 /E raḵkina sho ca’d gom to/e mo, 
\q1 dhali dhu emen to jin mina ’kwani si mo, 
\q1 ki a’di midi dho’th maman tonṯe/ ’peni mony’cesh mo, 
\q1  
\v 15 dhali yimana mura’th jin ḵa/u ki ŋah ŋah mmo’kunya duŋ ’kwani mo, 
\q1 dhala yin mmokar bwam/em piti ki ’tikil ’tikil mo, 
\q1 dhali tonṯe/ mmo’bi’th ’kwani adu mo. 
\q1  
\v 16 Aris cwa gi Tap̱a uni wolu yi’de/ ka enthus mo, 
\q1 dhali arisa bwanyayiis gi Pan Lubnaan jin sikina a’di mo. 
\q1  
\v 17 E uni mo tani ’dii nyaŋki gu’b buni mo, 
\q1 dhala gwamp̱i/ taki’d ki gu’b piti ap̱o/ cwa jin wana e ka ṯup̱ mo. 
\q1  
\v 18 Dhali aris wosha turga/ mo tani uni gom mi kun ’koni bwaasho mo, 
\q1 dhali wosh uni ta mo jin hur ma warriny jwa icine/ mo. 
\q1  
\v 19 /E ki kara ppe mmoya yil mo, 
\q1 dhali atente/ mishi mom piti jin mina a’di iyul mo. 
\q1  
\v 20 /E ki kar mondhurumi’d mo dhali a’di ta ji mon’thiny mo, 
\q1 ka ris to/e ’baar mo kun ’kon e mombwaasho mo tani parkina ’cesh mo. 
\q1  
\v 21 Ushi dhuruca dhop̱ uni aŋkarki ko mo gom tom buni kun ’kwarkina uni ka gwap̱i/ mo, 
\q1 mmosimm tonṯem buni e mo ’peni Arumgimis mo. 
\q1  
\v 22 Ka tente/ sulki’d mo tani uni sokin ’pena tente/ mo 
\q1 dhali bag is buni e jurum wosh mo. 
\q1  
\v 23 Dhali wathi/ yaki’d mmomiiya ṯu’c mo 
\q1 dhali a’di ki miiya ṯu’c piti ntagi mom’pimpili/ mo. 
\q1  
\v 24 Ayy Tap̱a, mii gi me’d pini wan ma p̱o/ e diṯa/. 
\q1 E moyuḵ mo tani /e uḵki uni ’baar mo. 
\q1 Aris mony’cesh ’tu’dkunu ki tom pini kun uḵkina /e mo. 
\q1  
\v 25 Bwamp̱o/ ḵumma/ yi’deŋ ’kulga/ mo kun caaca mo dhali kun beena bwa ki bee mo, 
\q1 a’di jin ishkina to/e ki mus mus ibwaman kun uḵu mo kun molu deŋ e mo, 
\q1 kun ’kon ki e mo nyaḵki kun gwa’da is mo dhali kun caaca mo. 
\q1  
\v 26 Dhali arisa ḵur yi’de/ si’da/ hashkina p̱o/ a’di mo 
\q1 dhala dhan to yi’de/ a’di jin uḵkina /e mmoguwa ŋalbothoŋ ibwaman a’di mo. 
\q1  
\v 27 Aris to gwansani ’baar mo hil ’kup̱ki /e mo, 
\q1 dhali /e c̱iki uni tonṯem buni mmoshwa ka tentem buni ki she/ ki she/ mo. 
\q1  
\v 28 Ki /e ki c̱iki uni to mo tani uni tulki a’di isi monṯal ’de/ mo. 
\q1 Ki /e ḵa’dki me’d pini mo tani uni ’tu’dkunu ki tom ’borga/ mo. 
\q1  
\v 29 Ki /e bagki jis/em pini mo tani uni biṯkina bwa ka luŋgu’b mo. 
\q1 Ki /e ki bu’th shi/in buni mo tani uni wukin mo 
\q1 dhali doḵ ka nyaŋ’ko’d e bu’da’cesh buni mo. 
\q1  
\v 30 Ki /e hashki Shi/in pini mo tani uni uḵkunu mo be 
\q1 dhali /e ki ta bwam/e gi mony’cesh this mo doḵ/e mo. 
\b  
\q1  
\v 31 Dhalki monyca gi Tap̱a a’di i’dim ’kup̱ ki sule/ sule/ mo. 
\q1 Dhalki Tap̱a ’kunya bwa e miim piti mo, 
\q1  
\v 32 a’di jin hilki mo ap̱o/ mony’cesh mo dhali a’di deeki’d ki bir bir mo, 
\q1 a’di jin taki wosha turga/ is ki me’d mo dhali uni yakina ku’d mo. 
\q1  
\v 33 Aha/ mina yuḵ gway e Tap̱a mo me’d jin dika/ ki e mo. 
\q1 Aha/ mina yuḵ gway mmomaŋa Arumgimis pem mo me’d jin kusha buye/ aha/ mo. 
\q1  
\v 34 Dhalki gwom pem jin kulum aha/ ibwa mo tani ’bor a’di bwa mo, 
\q1 haali/ aha/ ’kunya bwa e Tap̱a mo. 
\q1  
\v 35 Dhalki imanmii miinthus ṯushunkunu ki o’d ’peni mony’cesh mo, 
\q1 dhali dhalki imanmii to kun ’coḵa’coḵ mini mii dhalku/ ki ’ko mo doḵ/e. 
\q1 ’Bori Tap̱a mii mo ma, ayy ḵashiram pem. 
\q1 Maŋi Tap̱a mo. 
\c 105  
\q1  
\v 1 Ayy c̱iyi mo jin ’boruwa ’bor bwa i is ki Tap̱a mo, dhali yuḵi gway piti mo. 
\q1 Kari eya tente/ mii gi tom piti e bwaman ’kwani mo. 
\q1  
\v 2 Yuḵi gway e a’di mo, yuḵi gway mmomaŋ a’di mo, 
\q1 ṯori aris to kun miina a’di ki momer mo. 
\q1  
\v 3 Cayi mo e gway piti jin ḵogu mo. 
\q1 Dhalka du gi uni gwansan kun simmki Tap̱a e mo tani ’kunya bwa mo. 
\q1  
\v 4 Simmi Tap̱a e mo dhali mom’bi’th piti mo, 
\q1 simmi buŋ’kus piti e ki ṯikir ṯikir mo. 
\q1  
\v 5 Kayi momer piti e jin miikina a’di mo, 
\q1 a’di jin ta miimer piti mo dhali gwon dwall kun toru ’twa/a ’cesh jin bahkina a’di mo, 
\q1  
\v 6 ayy emen ma Ibrahiim jin ta c̱iŋkinam piti mo, 
\q1 um kun ta iya/ ma Yakuub mo, kun ta kum piti kun kwanykina a’di mo. 
\q1  
\v 7 A’di ta Tap̱a ma Arumgimis bana mo. 
\q1 Gwon dwall piti kun toru gwo ’twa/a ’cesh mo tani a’di idiki’da p̱owa ris mony’ceshi ’baar mo. 
\b  
\q1  
\v 8 A’di tana bwam piti pa ki pa gom gwom piti jin gama a’di me’d ki sule/ sule/ mo, 
\q1 gom gwom piti jin ḵankina a’diya ḵan goma alip̱ ma risa nyaḵum yil ’kwani mo, 
\q1  
\v 9 gwo jin gamkina a’di me’d nyaḵka Ibrahiim mo, 
\q1 dhali gwom piti jin thulkina a’di me’da p̱o/ mmo/o is goma Is/hak mo, 
\q1  
\v 10 a’di jin rwa’ckina a’di eya Yakuub mo me’d gwoŋḵan jin bahu mo, 
\q1 dhali eya Israyiil me’d gwoŋḵan yan jin gamu me’d mo jin midi di ki sule/ sule/ mo, 
\q1  
\v 11 mmo/o gwo mo ki: E um mo tani aha/ mina c̱i um mony’cesh gi Paŋ Kanaan mo 
\q1 mmota a’di jin mina umi ’tuntul bwa ime’d mo mmota mal bum mo. 
\q1  
\v 12 Ki uni ’kon ki daḵa/ ka ris buni mo, 
\q1 ki uni ta jasi ara ushalaŋ gana/ mo, ki iimpem buni e a’di mo, 
\q1  
\v 13 mmo/iikina uni ki ii ma c̱a/ ’peni kal gi ’kwaniny’cesh mmotan kal gi ’kwaniny’cesh mo, 
\q1 ’peni bampa/ gi ’peŋkuman bampaŋ kamu/ itagi ’kwanin tiya mo, 
\q1  
\v 14 a’di diki dhal jan ’deŋ kamu/ bway mo mmosiri’c uni ap̱o/ ki sho’k mo. 
\q1 A’di ḵucurki imaliḵ gom gway buni mo 
\q1  
\v 15 mmo/o gwo mo ki: Dhalku/ ki ta unim pem kun kwanyka/ is ki me’d mo, 
\q1 dhalku/ ki mii to shi/ka/ ap̱o/ imanc̱i gwom pem mo. 
\b  
\q1  
\v 16 Ki a’di yuḵki ṯe/ ap̱o/ mony’cesh mo, 
\q1 dhali ’ce’da ris tonṯe/ ’baar mo kun miinu ime’d mo, 
\q1  
\v 17 a’di ki hash wathi/ mmoya iṯwa/a/ ki uni mo, 
\q1 a’di jin ta’da Yuusup̱ mo, a’di jin yolkunu mmota c̱iŋkina/ mo. 
\q1  
\v 18 ’Basho’k piti a’di shi/kunu ka maḵḵiyya mo, 
\q1 dhali ’ba/ piti a’di re’dkunu ka dhan neran toŋḵuthu’d mo 
\q1  
\v 19 ntagi gwo jin ona a’di mo p̱u’dki’d mo ki jim pe mo 
\q1 dhali gwo gi Tap̱a nyo/ki a’di mo. 
\q1  
\v 20 Dhala maliḵ hashki’da hash mo dhali ’cuḵ a’di mo be, 
\q1 dhali tap̱a gi ’kwani mo tani karki a’di ki ’kus mo, 
\q1  
\v 21 dhali a’di ki kar a’di ki ari tap̱a ap̱o/ gu’b piti mo, 
\q1 dhali kar a’di ki tap̱a ap̱owa ris tom piti ’baar kun tana a’di mo, 
\q1  
\v 22 mmoye’th uni kun ta iya/ ma maliḵ piti sho’k ki bwam ’boro’d piti mo, 
\q1 dhali mmoṯor ’kwani gwanyjaḵam piti gwo ki moyuḵ mo. 
\q1  
\v 23 Dhali yan’ko’d Israyiil p̱u’dki’d e Pam Masir mo, 
\q1 dhala Yakuub p̱u’dki’d ki yaŋ’kus eya ’cesh ma Haam mo. 
\q1  
\v 24 Dhali Tap̱a ki dhu ’kwanim piti mmota uni kun dho’th maman gi dho’th gana/ mo, 
\q1 dhali mmodhu uni mmota ’kwani kun ’bitha’bi’th mo mmobol ’kwaniŋ ’kup̱ buni e mo. 
\b  
\q1  
\v 25 A’di ki ṯuka dum buni mmoshi/ ’kwanim piti i e mo, 
\q1 mmoṯu/ul nyaḵki uni mmoheka ris c̱iŋkinam piti e mo. 
\q1  
\v 26 A’di ki hasha Musa jin ta c̱iŋkinam piti mo, 
\q1 dhala Haruun jin kwanykina a’di mo. 
\q1  
\v 27 Uni wagaskunu jamas miim piti e bwam uni mo, 
\q1 dhali miimer kun miikunu e bampa/ ma Haam mo. 
\q1  
\v 28 A’di hashki mondhurumi’d mo, dhali ’ceṯẖ bampa/ ’tum mo. 
\q1 Dhali uni pishki is ka le’da p̱o/ gwom piti mo. 
\q1  
\v 29 A’di ṯu’kki ḵumma/ yi’dem buni mmota bas mo, 
\q1 dhali raḵ wa’c buni isi jwa mo. 
\q1  
\v 30 Bampam buni tashkunu ka buhany ma ’dwa/ mo, 
\q1 wakan si’da/ e gu’b gi imaliḵ buni mo. 
\q1  
\v 31 A’di oki gwo mo dhali abuhanya ḵanthi/ p̱u’dki’d mo, 
\q1 dhali arisa shokom ṯẖa’thkin e bampam buni ’baar mo. 
\q1  
\v 32 A’di c̱i uni dhana wasa/ mmohe’th me’da sho’k mo, 
\q1 dhala wara/ sho’k yan jin dhwa/a’dki mo ki dhwa/a’d dhwa/a’d e bampam buni ’baar mo. 
\q1  
\v 33 A’di ’koshki cwalman ma mura’th buni mo dhala ris cwam p̱u/ mo, 
\q1 dhali a’di ḵwa/ki cwa gi bampam buni ’baar mo. 
\q1  
\v 34 A’di oki gwo mo dhala kuyu/ p̱u’dkin mo, 
\q1 dhali ushi emena kuyu/ kun molu deŋ e mo, 
\q1  
\v 35 uni kun loskina ris to kun sinu ki ’kolo’c e bampam buni mo, 
\q1 dhali uni ki shwa maman cwam buni ’pena ’cesh mo. 
\q1  
\v 36 A’di ki ’kosha ris bwanyaram buni ’peni bampam buni mo, 
\q1 a’di jin gac̱ki’di ṯwa/a/ ’peni mom’bi’th buni mo. 
\q1  
\v 37 Yan’ko’d a’di ki shuwa Israyiil bway ki ’dolkon kush mo dhali ’dolkon gana/ mo, 
\q1 dhali jan ṯal ’deŋ kamu/ p̱iyi’d e bwaman ma waḵ piti mo jin kolkunu mo. 
\q1  
\v 38 ’Kwani gi Pam Masir ’bora bwa ki ’bor ki uni iikin mo, 
\q1 haali/ dhan to jin ḵo/ uni is ’peni ’Kwani ma Israyiil mo tani p̱u’dki’da p̱o/ uni mo. 
\q1  
\v 39 A’di ki p̱a’da raḵ mmokuma kum ’kup̱ mo, 
\q1 dhali o’d mmoc̱i moŋkush mon’thiny mo. 
\q1  
\v 40 Uni doṯki to mo dhali Arumgimis ki c̱i uni aris ḵusskun mo, 
\q1 dhali a’di ki c̱i uni tonṯe/ ’peni momis jin ishki’d ka enthus mo. 
\q1  
\v 41 A’di ḵa’dki wosh ’twa/ mo dhali yi’de/ gac̱ki’d ka pije/ mo. 
\q1 A’di guski’d e bwam ma si’b me’d yi’de/ jin guski’d e bwam wor mo. 
\q1  
\v 42 Haali/ a’di kaki gwom piti e jin ona a’di is jin ḵogu mo, 
\q1 dhala Ibrahiim jin ta c̱iŋkinam piti mo. 
\b  
\q1  
\v 43 Wakan a’di suski ’kwanim piti ka pije/ ki moŋ’kuny bwa mo, 
\q1 unim piti kun kwanykina a’di mmo/ii gwayi lu/ mo. 
\q1  
\v 44 A’di ki c̱i uni kal gi bampa/ gi ’kwanin tiya mo, 
\q1 dhali uni bu’thki to gi ’kwanin tiya kun tana uni gi maman buni kun miikina uni to mo, 
\q1  
\v 45 tagi ’kup̱ gwo yan mo ki uni mini ’taki dhu gwoŋḵan piti kun bahu mo, 
\q1 dhali mii gwoŋḵan piti kun c̱ikunu mo. 
\q1 Maŋi Tap̱a mo. 
\c 106  
\q1  
\v 1 Maŋi Tap̱a mo. 
\q1 Ayy c̱iyi mo jin ’boruwa ’bor bwa i is gi Tap̱a mo, haali/ a’di ’bora’bor mo, 
\q1 haali/ mo/en piti jin ṯelu sho’k mo tani a’di i’dimki ’kup̱ ki sule/ sule/ mo. 
\q1  
\v 2 Kaja a’di jin midi mish bah gwo gom miin to ma dem dem gi Tap̱a mo, 
\q1 walla ṯora ris momaŋ piti mo? 
\q1  
\v 3 Mom’bor mii gom uni gwansan kun miiki mii ma ḵar/e mo, 
\q1 uni kun mii miiŋḵar/e isa yempa/ mo. 
\b  
\q1  
\v 4 Kayi aha/ e mo, ayy Tap̱a, ki /e din mmoṯor mii ma ’them pini e ’kwanim pini mo. 
\q1 Woṯẖi/ aha/ mo me’d jin mina /e ’cuḵ uni mo, 
\q1  
\v 5 ki aha/ mina p̱ar mo jin rusa/ rus gi unim pini kun kwanya /e e mo, 
\q1 ki aha/ mina bwa ’kuny mo e mo jin ’kunya bwaŋ ’kwani gi kal pini mo, 
\q1 ki aha/ mina ca mo e mal pini mo. 
\q1  
\v 6 Am dhali ibabam bam mo, ’thissa/ niin mo tani miikina miinthus mo. 
\q1 Aman miikina mii kun ’coḵa’coḵ mo, am miikina to kun ta thus ki thus mo. 
\q1  
\v 7 Ibabam bam, ki uni ’kokin e Pam Masir mo tani, 
\q1 uni ’koki hil gwo i e gom tom pini kun miina /e ki momer mo. 
\q1 Uni ’koki ka mo/en pini e jin ṯelu sho’k jin ishki’d ka enthus mo, 
\q1 hili uni pishki is ka le’d ap̱o/ a’di jin Caa e ki Ca e Ḵumma/ Yi’de/ jin ta gi ’Per mo. 
\q1  
\v 8 Naskina/ a’di ki ta uni is ki me’d gom gway gi gway piti mo, 
\q1 ki a’di midi ṯor mom’bi’th ma dem dem piti mo. 
\q1  
\v 9 A’di ḵucurki Ḵumma/ Yi’de/ jin ta gi ’Per mo dhali a’di warki’d ki mo jin ḵuthaḵu’th mo. 
\q1 Dhali a’di suski uni e bwaman moŋ’kulga/ mo me’d jin miikina a’di e bwaman ma si’b mo. 
\q1  
\v 10 Wakan a’di taki uni is ki me’d mo ’peni ’kwaniŋ ’kup̱ buni mo, 
\q1 dhali ’cuḵ uni mo ’peni mom’bi’th gi ’kwaniŋ ’kup̱ buni mo. 
\q1  
\v 11 Dhali yi’de/ kumki uniŋ ’kup̱ buni ’twa/a ’cesh mo. 
\q1 Jaŋkamu/ di’d jin boc̱o’d ’peni uniya? 
\q1  
\v 12 Dhali yan’ko’d uni gamki gwom piti is mo. 
\q1 Uni yuḵki gway gom momaŋ piti mo. 
\b  
\q1  
\v 13 Hili ki jahanne/ uni ŋaki miim piti mo. 
\q1 Uni ’koki c̱or gwom piti jin logoma a’di mo. 
\q1  
\v 14 Hili uni cana bwa en’dap̱ mo mmogora bwa ki gor e mombwaasho mo, 
\q1 dhali kara Arumgimis mo mmonyo/ a’di e bwam ma si’b mo. 
\q1  
\v 15 A’di c̱i uni to jin doṯkina uni mo, 
\q1 hili a’di ki hash ’ba’th jin shi/ uni is e bwaman uni mo. 
\b  
\q1  
\v 16 Ki ’kwaniŋ gwas kun ’kon e mo ma yuukam buni mmoṯa’c bwa ki ṯa’c ap̱owa Musa mo 
\q1 dhala Haruun, a’di jin ta jan ’de/ gi Tap̱a jin ḵogu mo tani 
\q1  
\v 17 mony’cesh ḵa’dki ’twa/ mo dhali losa waḵ ma Daṯẖan mo 
\q1 dhali kum ’kwani kun nyaḵ ii ka Abiram ’twa/a ’cesh mo. 
\q1  
\v 18 O’d si’da/ du’dushki’da p̱o/ imannyaḵ iim buni mo 
\q1 dhala le’dan o’d shwaki ’kwani kun ta thus ki thus mo. 
\q1  
\v 19 Uni uḵki ari bip̱ e ’kuwosh ma Hurib mo 
\q1 dhali uni ki luŋ tomp̱inycon jin ṯo’du/ mmo/uḵ a’di jin ta p̱inycon mo. 
\q1  
\v 20 Uni aḵki monyca ma Arumgimis e mo 
\q1 gom jamas to jin uḵu mo me’da morbip̱ jin shwa’da sho mo. 
\q1  
\v 21 Uni ŋakina Arumgimis mo, a’di jin ta’da Manwoṯẖ uni mo 
\q1 a’di jin miiki dhan to jin caaca e Pam Masir mo, 
\q1  
\v 22 ki mii gi momer mo e bampa/ ma Haam mo, 
\q1 dhali dhana puren to e Ḵumma/ Yi’de/ jin ta gi ’Per mo. 
\q1  
\v 23 Wakan a’di oki gwo mo ki: A’di midi ’ce’d uni sho’k moyi, 
\q1 dhala Musan ’dem piti jin kwanya a’di mo tani 
\q1 dina a’di ki doshi bwambori a’di mo 
\q1 ntagi a’di doḵki’da nyor piti jin midi ’taki ’ce’d uni sho’k mowa? 
\q1  
\v 24 Yan’ko’d uni ki waḵ mony’cesh jin ’bora’bor mo, 
\q1 dhali dar gi moŋgam gwo is gom gwom piti jin ona a’di is mo. 
\q1  
\v 25 Uni miikina gumgum e bwaŋ gu’b burrinyem buni mo, 
\q1 dhali ush gwo gi ’twa/ gi Tap̱a ha e mo. 
\q1  
\v 26 Wakan a’di ’de’kki me’d piti mo dhali thul gwo me’da p̱o/ gom uni mo 
\q1 mmo/o ki a’di midi dhu uni mo mmoṯa’k mo e mombwaashoyi, 
\q1  
\v 27 dhali ḵwa/ emen gi uc̱im buni bwa mo e bwaman kal gi ’kwaniny’cesh mo, 
\q1 mmoc̱ekerki uni bwa mo e bampany ’ceshi ’baar mo. 
\b  
\q1  
\v 28 Wakan uni ’tampalki is buni ka rum ma Baal jin ta ji Pam P̱aguur mo, 
\q1 dhali ’ka to jin ’ciṯẖu/ ’kus mmothe tomp̱inycon gom jwa gi ’kwani kun wun mo. 
\q1  
\v 29 Uni rukunyki Tap̱a mmomiiya nyor mo gom miim buni mo, 
\q1 dhali ’ba’th jin wo’cki ’kwani is she/ du’dushki’d e bwaman uni mo. 
\q1  
\v 30 Dhali yan’ko’d P̱inahaas doshki’d ki mis mo dhali woṯẖ gwo is mo, 
\q1 dhali ’ba’th jin wo’cki ’kwani is she/ c̱a’bki’d mo. 
\q1  
\v 31 Dhali a’di ikarkunu a’di ki mo ma ḵar/e mo 
\q1 ’pena nyaḵum yil jin tanu mo mmotana nyaḵum yil ki sule/ sule/ mo. 
\q1  
\v 32 Uni raḵ a’di isa nyor mo gom gwo yi’de/ e mo ma Mariiba mo, 
\q1 dhala Musa c̱inu isi jwa mo gom gway buni mo, 
\q1  
\v 33 haali/ uni ki raḵa ḵashiram piti c̱a’bki ŋah ŋah mo, 
\q1 dhali a’di ki o gwo ki mony’cwar mo. 
\b  
\q1  
\v 34 Uni ’koki ’ce’d ’kwani sho’k mo 
\q1 me’d gwo jin ḵankina Tap̱a uni mo, 
\q1  
\v 35 hili uni ceki e ki kal gi ’kwanin tiya mo 
\q1 dhali da/ar mii kun miina uni mo. 
\q1  
\v 36 Uni ki mii to gom tomp̱inycon buni mo, 
\q1 a’di jin warki’d ka gume/ gom uni mo. 
\q1  
\v 37 Uni ki c̱i iya/m buni mmo’ciṯẖ ’kus mmomiiya bas mo 
\q1 dhali i’bwa/ buni si’da/ ka rum thus kun nyo/anyo/ mo. 
\q1  
\v 38 Uni ki wol tiya bas kun ’kon ma bas ka p̱o/ mo, 
\q1 uni kun tana bas gi iya/m buni mo dhali i’bwa/ mo, 
\q1 uni kun c̱ikina uni mmo’ciṯẖ ’kus gom tomp̱inycon kun luŋu gi Paŋ Kanaan mo, 
\q1 dhali bampa/ shi/kunu is ka bas ’kwanimpa mo. 
\q1  
\v 39 Wakan uni taki ’kwani kun nyo/anyo/ ki miim buni mo, 
\q1 dhali lo’bi gwonyc̱al ki miim buni mo. 
\b  
\q1  
\v 40 Dhali yan’ko’d anyor gi Tap̱a a’di ’thakunu ki ligi/ ligi/ ap̱o/ ’kwanim piti mo 
\q1 dhali a’di ki shi/ mal piti i e mo. 
\q1  
\v 41 A’di ki c̱iki uni mo e me’d gi kal gi ’kwanin tiya mo, 
\q1 wakan ki uni gwansan kun shi/ki uni i e mo tani mii miin tap̱a ap̱o/ uni mo. 
\q1  
\v 42 ’Kwaniŋ ’kup̱ buni siri’cki uni ap̱o/ ki sho’k mo, 
\q1 dhali uni ’doyunu mo mmodila bora ’cesh e bwaŋ’kwariny mom’bi’th buni mo. 
\q1  
\v 43 Me’d ka ris a’di ki ’cuḵ uni mo, 
\q1 hili uni pishki is ka le’d ki ṯas ṯas gom ’kup̱ gwom buni mo 
\q1 dhali uni ’doyunu ka luŋgu’b e miim buni kun ’coḵa’coḵ mo. 
\q1  
\v 44 Bahili a’di ki c̱iya hirdhe/ ki mo ma c̱is buni mo, 
\q1 ki a’di ciḵki kom buni mo. 
\q1  
\v 45 A’di ki ka gwo e gom gway buni gom gwom piti jin gama a’di me’d mo, 
\q1 dhali a’di ki biṯ bwam piti me’d mo isi ki gwo gi mo/en piti jin ṯelu sho’k mo jin ishki’d ka enthus mo. 
\q1  
\v 46 A’di ki raḵ uni gwahan mmohila hil ki e ma ’thime/ ki mo/en mo 
\q1 ki uni gwansan kun bu’th uni mmota habuus mo. 
\q1  
\v 47 Tayi aman is ki me’d mo, ayy Tap̱a Arumgimis bam mo, 
\q1 dhali tulu/ aman is mo ’pena ris bwaman gi kal gi ’kwaniny’cesh mo, 
\q1 ki am mina c̱i mo jin ’boruwa ’bor bwa i is ki gway pini jin ḵogu mo, 
\q1 dhali ca mo e momaŋ pini mo. 
\q1  
\v 48 Mom’bor mii gom Tap̱a mo, a’di jin ta’da Arumgimis ma Israyiil mo, 
\q1 ’peni mo jin ’konuki/e ki sule/ sule/ ya ye ’ba/ mo itan mo jin ’konuki/e ki sule/ sule/ ya ye ’ba/ mo. 
\q1 Dhali dhalka ris ’kwani ’baar mo o gwo mo ki: Amen. 
\q1 Maŋi Tap̱a mo. 
\c 107  
\ms1 AWARKA/ JIN ’KONA ’BANI MUDHE’D MO 
\q1  
\v 1 Ayy, c̱iyi mo jin ’boruwa ’bor bwa i is ki Tap̱a mo, haali/ a’di ’bora’bor mo, 
\q1 haali/ mo/en piti jin ṯelu sho’k mo a’di ’dimki ’kup̱ ki sule/ sule/ mo. 
\q1  
\v 2 Dhalki ’kwani gwahan kun wanu ’ba/ mo i/o gwo wakan mo, 
\q1 uni kun wankina a’di ’ba/ ’peni mo jin ṯoju bwa mo, 
\q1  
\v 3 dhali tul uni is ’peni mony’cesh mo 
\q1 ’peni mom’pesho’k mo dhali ’pena bora luŋgu’b mo, 
\q1 dhali ’peni moŋ’ko’d gwar ma bim poros mo dhali ’peni moŋ’ko’d gwar ma biny cam mo. 
\b  
\q1  
\v 4 Unin tiya kun iikin ki iinyc̱a/ e bwam ma si’b mo jin shinu is mo, 
\q1 uni gam bwaya kamu/ e ’peŋkuman bampa/ mmo’ko icine/ mowa? 
\q1  
\v 5 Uni ’kosha ṯe/ mo dhali budha yi’de/ mo, 
\q1 dhali aḵashiram buni ’thikina buye/ e bwaman uni mo. 
\q1  
\v 6 Dhali yan’ko’d uni ki ko ’twa/i Tap̱a mo gom monṯo’c bwam buni mo, 
\q1 dhali a’di ’cuḵki uni ’peni mo ma c̱is buni mo, 
\q1  
\v 7 dhali a’di ki shu uni bway ki bwaya ji sho’k mo, 
\q1 ntagi uni bumburkin mo e ’peŋkuman bampa/ mmo’ko icine/ mo. 
\q1  
\v 8 Dhalki uni c̱i mo jin ’boruwa ’bor bwa i is gom Tap̱a mo gom mo/en piti jin ṯelu sho’k mo, 
\q1 gom miin to gi momer piti e iya/ gi ’kwani mo. 
\q1  
\v 9 Haali/ a’di ki kap̱ a’diya du mo, a’di jin budha yi’de/ mo, 
\q1 dhali a’di jin ’kosha ṯe/ mo tani a’di ki ’tu’d a’diya du ki tom ’borga/ mo. 
\b  
\q1  
\v 10 Kun tiya ’kokin e mondhurumi’da ’tum mo dhali e mo jin molu pi ’kup̱ ka pije/ mo 
\q1 kun tana habuus mo gom uni doru ki isa nyor mo dhali remu ’basho’k ki toŋḵuthu’d mo, 
\q1  
\v 11 haali/ uni pishki is ka le’da p̱o/ gwo ma Arumgimis mo, 
\q1 dhali bel gwo jin logoma a’di jin Caa e ki Ca mo. 
\q1  
\v 12 Adum buni a’di luŋku’d gom to jin diṯadiṯ kun miina uni mo, 
\q1 dhali ki uni ṯa’kki ’ko’da ’cesh mo tani jaŋkamu/ p̱iyi’d mmowoṯẖ uni mo. 
\q1  
\v 13 Yan’ko’d uni ki ko ’twa/i Tap̱a mo gom monṯo’c bwam buni mo 
\q1 dhali a’di ’cuḵki uni ’peni mo ma c̱is buni mo. 
\q1  
\v 14 Dhali a’di ki ’doyu/ uni ka pije/ ’peni mondhurumi’d mo dhali mo jin molu pi ’kup̱ ka pije/ mo 
\q1 dhali a’di ki ’ce’d mondeḵ buni mmoshaṯ uni ka ’ceshi ’baar mo. 
\q1  
\v 15 Dhalki uni c̱i mo jin ’boruwa ’bor bwa i is gom Tap̱a mo gom mo/en piti jin ṯelu sho’k mo, 
\q1 gom miin to gi momer piti e iya/ gi ’kwani mo. 
\q1  
\v 16 Haali/ a’di shaṯki’da risa campur ma koroḵ ka ’cesh mo, 
\q1 dhali a’di ki pwaṯẖ dhana bem’ban toŋḵuthu’d bwa mo. 
\b  
\q1  
\v 17 Kun tiya ’ba’thkin mo e bway miinthus buni mo, 
\q1 dhali gom miiny’coḵam buni mo tani uni ’koshkunu is ka nyor gom to jin wo’cki is she/ mo. 
\q1  
\v 18 Uni ushki tonṯen tiya kun ’kona e ki she/ mo, 
\q1 uni ’dishki ’twaŋkal gi mowu is mo. 
\q1  
\v 19 Dhali yan’ko’d uni ki ko ’twa/i Tap̱a mo gom monṯo’c bwam buni mo 
\q1 dhali a’di ’cuḵki uni ’peni mo ma c̱is buni mo. 
\q1  
\v 20 A’di hashki gwom piti mo dhali wac̱ uni mo, 
\q1 dhali a’di ’cuḵki uni mo ’peni mo jin ’ce’du sho’k mo. 
\q1  
\v 21 Dhalki uni c̱i mo jin ’boruwa ’bor bwa i is gom Tap̱a mo gom mo/en piti jin ṯelu sho’k mo, 
\q1 gom miin to gi momer piti e iya/ gi ’kwani mo. 
\q1  
\v 22 Dhali dhalki uni c̱i to jin c̱inu mmo’ciṯẖ ’kus ki bwa jin ’boruwa ’bor i is mo 
\q1 dhali ṯor miim piti ki gway mo ki bwaŋ ’kunyka/ mo. 
\b  
\q1  
\v 23 Kun tiya iikin ka ’cesh e bwaman ḵumma/ yi’de/ e bwaa ḵur mo, 
\q1 mmomiiya ṯu’c yol jin caaca e dhan yi’de/ mo. 
\q1  
\v 24 Uni p̱arki mii gi Tap̱a e mo, 
\q1 momer piti kun miikina a’di e moŋ’kulga/ mo. 
\q1  
\v 25 Haali/ a’di ḵanki gwo mo dhali cu ’tham jin ta’da p̱unthar mo, 
\q1 a’di jin ’de’kki yi’de/ abor ki mis mmobir bakal ap̱o/ ḵumma/ yi’de/ mo. 
\q1  
\v 26 Uni uluc̱ki ’kup̱ki mis mo tani dhali uni iikin ka ’cesh e moŋ’kulga/ mo. 
\q1 Mo ma dum buni jin ’bitha uni is waki’d mo gom mo ma c̱inthar buni kun ta thus ki thus mo. 
\q1  
\v 27 Uni iikin ki dho’do/ dho’do/ mo dhali wuŋgul ii mo me’d ’kwani kun ’koshkin ma su mo, 
\q1 dhali uni deekina miim buni ki tash tash mo. 
\q1  
\v 28 Dhali yan’ko’d uni ki ko ’twa/i Tap̱a mo gom monṯo’c bwam buni mo 
\q1 dhali a’di ’cuḵki uni ’peni mo ma c̱is buni mo. 
\q1  
\v 29 A’di karki’da p̱unthar ’tham mmodi ka ḵu’th is mo, 
\q1 dhali bakal ḵumma/ yi’de/ a’di doshkunu ki biyuu mo. 
\q1  
\v 30 Dhali yan’ko’d uni ’kunya bwa mo haali/ uni gam mo jin ’konu ki shwamm mo, 
\q1 dhali a’di ki sus uni e mom buni jin ’kana uni ki she/ jin ona bwa uni mo. 
\q1  
\v 31 Dhalki uni c̱i mo jin ’boruwa ’bor bwa i is gom Tap̱a mo gom mo/en piti jin ṯelu sho’k mo, 
\q1 gom miin to gi momer piti e iya/ gi ’kwani mo. 
\q1  
\v 32 Dhalki uni kar a’di ki ca mo e bwaman ma tul ’kup̱ ’kwani mo, 
\q1 dhali maŋ a’di e bwaman ma tul ’kup̱ gi ’kwaniŋ gwanyjaḵa/ mo. 
\q1  
\v 33 A’di ki ṯu’k yi’de/ e bwaman ma si’b mo, 
\q1 yi’de/ jin kasha e e mony’cesh jin budha yi’de/ ’kwani mo. 
\q1  
\v 34 Mony’cesh jin dhotha to a’di ki ṯu’k a’di mo mmota a’cesh jin ’balatha’bala’th jin shiyi’d mo, 
\q1 gom miim buni kun ta thus ki thus kun ’kokin e a’di mo. 
\q1  
\v 35 A’di ki ṯu’k bwaa si’b mmowar ka al yi’de/ mo, 
\q1 dhali mony’cesh jin ta’da burta/ o’d mo tani a’di ki kar a’di mmokash yi’de/ e mo. 
\q1  
\v 36 Dhali imaṯṯaan a’di ki dhal uni kun ’kosha ṯe/ mmo’ko mo, 
\q1 dhali uni ṯelki ’peŋkuman bampa/ sho’k mo mmo’ko icine/ mo. 
\q1  
\v 37 Uni siki bunto mo dhali nyaŋa goŋ mmosiya mura’th mo, 
\q1 dhali gam maman cwa kun gwono’dkin mo. 
\q1  
\v 38 Ki mom’bor miim piti mo tani uni markina mar is ki caaca mo, 
\q1 dhali a’di diki dhal bip̱ buni bway mo mmo’koki ’ko mmodhodhi mar is mo. 
\b  
\q1  
\v 39 Ki uni ’kon ki daḵa/ mo dhali warkunu ki ’kwani kun aṯẖa she/ ki aṯẖ mo 
\q1 e mo jin siri’ckunu uniya siri’c ki sho’k mo dhali monṯo’c bwa mo dhali bwan diṯi’d mo tani 
\q1  
\v 40 a’di ki wol mowaḵa p̱o/ iya/ gi imaliḵ mo 
\q1 dhali a’di ki dhu uni mmo/ii ka c̱a/ e mo jin p̱ina sho’k ’kwani mo dhali tonycuḵ mo. 
\q1  
\v 41 Hili a’di ki cu uni mis uni kun mini mii ta gi to ’peni mo jin ṯojuwa ṯo’c bwa mo, 
\q1 dhali dhuwa waḵ buni mmowa e ka ma’diny ḵa’bal mo. 
\q1  
\v 42 ’Kwani kun dhelel ma du mo tani p̱arki a’di e mo dhali ’kuny bwa mo 
\q1 dhali aris uni kun ta thus ki thus mo tani ’dap̱kunu ’twam buni mo. 
\q1  
\v 43 A’diyin jin yuḵayuḵ mo tani dhalki a’di c̱iyi’da hirdhe/ ki to gwansan mo. 
\q1 Dhalki ’kwani hil isi gwo i e mo gom mo/en gi Tap̱a mo jin ṯelu sho’k mo. 
\c 108  
\s1 Gway. Gway jin ta gway ma Dawuu’d. 
\q1  
\v 1 Adum pem thosonki is mo, ayy Arumgimis. Adum pem thosonki is mo. 
\q1 Aha/ mina yuḵ gway mo, aha/ mina yuḵ gway mmomaŋa maŋ mo. 
\q1 Meri e mo, aḵashiram pem. 
\q1  
\v 2 Meri e mo, ayy adheŋdhenye/ dhala dheŋdhenye/ jin ’kon ma shu/i pesu/ mo. 
\q1 Aha/ mina mer mon’twash/e e mo. 
\q1  
\v 3 Aha/ mina c̱i mo jin ’boruwa ’bor bwa i is ki /e mo, ayy Tap̱a, e bwaman ma ris ’kwani mo. 
\q1 Aha/ mina yuḵ gway mmomaŋ /e e bwaman kal gi ’kwaniny’cesh mo. 
\q1  
\v 4 Gom mo/en pini jin ṯelu sho’k mo ap̱owa dhan momis mo, 
\q1 mo ma isiŋ ganam pini a’di jithirki’d e bwaman ma raḵ mo. 
\q1  
\v 5 Kari is pini ki ca mo, ayy Arumgimis, ap̱o/ momisi ’baar mo. 
\q1 Dhalki monycam pini a’di di’da p̱o/ mony’ceshi ’baar mo. 
\q1  
\v 6 Ki a’dim pini jin enu minu ’cuḵ mo tani 
\q1 /e ki c̱i mowoṯẖ ka bim poros pini mo, dhali thoḵ aha/ ’twa/ mo. 
\b  
\q1  
\v 7 Arumgimis oki gwo is e mom piti jin ḵogu mo mmo/o gwo mo ki: 
\q1 Aha/ mina ya i mis ki moŋ’kuny bwa mo dhali ḵwa/ Pan Shakiim bwa mo 
\q1 dhali ’to/ to bwa ime’d mo e embul Wosh ma Sukkuut mo. 
\q1  
\v 8 Jil/aad a’di ta jim pem mo, dhala Manassa a’di ta jim pem mo, 
\q1 dhala Ep̱rayim a’di ta toŋ’kup̱ pem mo. 
\q1 Yahuuda/ a’di ta cwa ma maliḵ pem mo. 
\q1  
\v 9 Muwab a’di ta’da ḵwalal pem jin ’thurka/ me’d mo 
\q1 dhali e Pan Aduum mo tani aha/ mina biṯa p̱p̱a/ pem mo, 
\q1 dhali ap̱o/ e Pam P̱alasthiin mo tani aha/ mina ’ther cuuwa/ ki mo jin p̱inu mii e mo. 
\b  
\q1  
\v 10 Kaja a’di imidi shu aha/ bway e ’peŋkuman bampa/ jin ṯenu gwo mo? 
\q1 Dhali kaja a’di jin midi shu aha/ bway e Pan Aduum mo? 
\q1  
\v 11 Ki diki ta /e iwaḵki aman mo, ayy Arumgimis? 
\q1 /E diki nyaḵ ya ki aman mo, ayy Arumgimis, nyaḵki ’kwani ma meem bam mo. 
\q1  
\v 12 Ayy c̱iyi aman mowoṯẖ ’peni ’kup̱ bam mo ma, 
\q1 haali/ mowoṯẖ ’peni ’kwani mo tani ta jim p̱e’th mo. 
\q1  
\v 13 Ka Arumgimis mo tani ana mina mii mii kun c̱a’bki koŋ koŋ mo. 
\q1 Haali/ a’di ta a’di jin midi ṯan bway gom ’kwaniŋ ’kup̱ bana mo be. 
\c 109  
\s1 Eya manyuḵ gway mo. Gway ma Dawuu’d. 
\q1  
\v 1 Dhalku/ ki c̱a’b ki shwamm mo, ayy Arumgimis gom momaŋ pem mo. 
\q1  
\v 2 Haali/ ’twa/ gi ’kwani kun ta thus ki thus mo dhali kun he’kkina he’k e mo ḵa’dkina uni ap̱o/ aha/ mo, 
\q1 mmo/o gwo ap̱o/ aha/ ki ’twa/ ma ṯor mo. 
\q1  
\v 3 Uni ṯu’bki aha/ ki gwo jin shinuwa shi/ i e mo 
\q1 dhali bu’th aha/ ki dar gi mii mo. 
\q1  
\v 4 To kun doḵkina uni aha/ ’peni mo/en pem mo tani uni ki thisi yer aha/ is ki gway mo, 
\q1 isi kani me’d jin dika/ mmo’tho gom uni mo. 
\q1  
\v 5 Wakan uni ki c̱i aha/ to jin ta thus gom tom ’boro’d mo 
\q1 dhali mo jin shinuwa shi/ i e mo gom mo/en pem mo. 
\q1  
\v 6 Kari wathi/ jin ta thus ki thus ’pen ka pije/ ap̱o/ a’di mo 
\q1 dhali dhalka manyer a’di is ki gway susi a’di e mo jin dwallu gwo mo. 
\q1  
\v 7 Ki a’di dwallkunu gwo mo tani dhalki a’di dikina mii i’ba/ mo. 
\q1 Dhalki mon’thom piti a’di deŋu e ki ta ji miinthus mo. 
\q1  
\v 8 Dhalka teem piti karu ki kuṯ kuṯ mo. 
\q1 Dhalki wathiŋ kamu/ bu’th mal piti mo. 
\q1  
\v 9 Dhalki uc̱im piti ’kon ki dar gi com mo, 
\q1 dhali dhalki ashim piti ta’da dhalla/ mo. 
\q1  
\v 10 Dhalki uc̱im piti ii iinyc̱a/ dhali ’tho to mo. 
\q1 Dhalki uni uru ka pije/ ’peni mo jin kup̱a uni kun ’kona uni mo. 
\q1  
\v 11 Dhalki wathi/ jin dina a’di ka mure/ i’ba/ bu’th tom piti ’baar mo. 
\q1 Dhalki ’kwanin tiya si’da/ shi/ maman cwam piti is mo jin ’koshkina a’diya ṯu’c ki mii mo. 
\q1  
\v 12 Dhali dhalki wathi/ p̱iyi’d jin midi mii kar bwa jin kushakush gom a’di mo, 
\q1 walla hil uc̱im piti jin dar gi com ki mii ma ’thime/ gi mo/en mo. 
\q1  
\v 13 Dhalki emen piti kun mini yayu/ i’ko’d ’ciṯẖkunu ’twa/ mo. 
\q1 Dhalki gway piti si’da/ minu ’kosh ’peni ’kwani ma nyaḵum yil kun min ma p̱o/i ’ko/i su/ mo. 
\q1  
\v 14 Dhalki mii kun ’coḵa’coḵ gi icom kanu e ibwambori Tap̱a mo, 
\q1 dhali dhalki miinthus gi kum minu ’koki ’kosh ka pije/ mo. 
\q1  
\v 15 Dhalki uni ’koni bwambori Tap̱a ki ṯikir ṯikir mo 
\q1 dhali dhalki a’di jin dhunu ibwa minu ’ciṯẖ ’twa/ ’peni mony’cesh mo. 
\q1  
\v 16 Haali/ a’di diki ka mii e mo mmoṯor mii gi bwaŋ kush mo 
\q1 hili a’di ki ur ’kwani kun hatha’ko’di sho’k mo 
\q1 dhali uni gun mini mii ta gi to mo dhali uni gun ’ce’dkin ma dum buni gom jwam buni mo. 
\q1  
\v 17 A’di en mo jin jeenuwa jee kagahara mo, dhali dhalki mo ma jee p̱u’dki’da p̱o/ a’di mo. 
\q1 A’di diki en mo jin ’boruwa ’bor mii mo, dhali dhalki a’di si’dasi’d ’peni a’di mo. 
\q1  
\v 18 A’di shumki is piti ki mo ma jee me’d burrinyem p̱om piti jin hitha a’di mo. 
\q1 Dhalki a’di ’thoḵ buŋgwar is piti me’d yi’de/ mo, 
\q1 dhali me’da yin eya simam piti mo. 
\q1  
\v 19 Dhalki a’di wana e ki burrinye/ jin ’tampalkina a’di i is mo, 
\q1 dhali me’d wac̱kan jin hi’thkina a’di e empa’d piti ka yempa/ mo. 
\b  
\q1  
\v 20 Dhalki a’di yansan ita to jin gam ma manyer aha/ is ki gway ’peni Tap̱a mo 
\q1 gom uni gwansan kun oki tonthusa p̱o/ mondiki/em pem mo. 
\q1  
\v 21 Hili, /e, ayy Arumgimis jin ta Tap̱am pem mo, 
\q1 ṯu/uli mii yan mo ma gom gway pem mo dhali gom gway gi gway pini mo 
\q1 haali/ mo/en pini jin ṯelu sho’k mo a’di ’boro’d mo mmo’cuḵ aha/ mo. 
\q1  
\v 22 Haali/ aha/ hatha di ’ko’d ki ha’th mo dhali mina mii ta gi to mo, 
\q1 dhala dum pem a’di ta jama/ ki jama/ e isi aha/ mo. 
\q1  
\v 23 Aha/ ’baara mo, dhali aha/ wana e ka ḵashira/ ma la gi mom’pimpili/ mo. 
\q1 Aha/ yiḵinkunu is me’da kuyu/ mo. 
\q1  
\v 24 ’Kup̱a’dup̱un pem ’ka’da’ka’d mo gom ga/ jin ga/ka/ to mo. 
\q1 Buŋgwar is pem lulki’d mo. 
\q1  
\v 25 Aha/ tana kuṯ jin ṯẖunya imanyer aha/ is ki gway ’twa/i is mo. 
\q1 Ki uni p̱arki aha/ e mo tani uni birki ’kup̱ buni mo be. 
\b  
\q1  
\v 26 Woṯẖi/ aha/ mo ma, ayy Tap̱a Arumgimis pem mo. 
\q1 Tayi aha/ is is ki me’d mo isi ki mo/en pini jin ṯelu sho’k mo. 
\q1  
\v 27 Dhalki uni mishi mo mo ki mii yansan a’di ita mii gi me’d pini mo, 
\q1 ki /e, ayy Tap̱a, imiiki a’di mo be. 
\q1  
\v 28 Dhalki uni jeena jee mo, hili /e mini mii mo jin ’boru mii mo. 
\q1 Dhalki uni gwansan kun ṯẖa’th aha/ ki is dhunu ki mo ma ’the is mo. Dhalki c̱iŋkinam pini ’kunya bwa mo. 
\q1  
\v 29 Dhalki imanyer aha/ is ki gway shumu ki mii jin thisuwa taḵ ush taḵ mo. 
\q1 Dhalki uni i’tampalkina mo ma ’the is buniŋ gana/ e is mo me’d burrinye/ mo. 
\b  
\q1  
\v 30 Ki ’twam pem mo tani aha/ mina c̱i mo jin ’boruwa ’bor bwa i is ki Tap̱a mo. 
\q1 Aha/ mina maŋ a’di e bwaman ma waambuhany ’kwani mo. 
\q1  
\v 31 Haali/ a’di doshki’d ki me’da bim poros mo gom a’di jin midi mii ta gi to mo, 
\q1 mmota a’di is ki me’d mo ’peni uni gwansan kun waḵki a’di mmowu mo be. 
\c 110  
\s1 Gway ma Dawuu’d. 
\q1  
\v 1 Tap̱a ki o tap̱am pem gwo mo ki: 
\q1 C̱a’bi /e aha/ ki me’da bim poros pem mo ma 
\q1 ntagi aha/ mina dhu uni gun ta ’kup̱ ki /e mmota cwa jin mina /e dhu sho’k mo. 
\q1  
\v 2 Tap̱a ki hash ’pena Sihyuun cwa ma maliḵ pini jin ta gi mo ma dem dem mo. 
\q1 Jiyiya ji e bwaman ’kwani kun ta ’kup̱ pini mo. 
\q1  
\v 3 ’Kwanim pini mini c̱i is buni ’baḵany mo 
\q1 ka tee jin mina /e susa waambuhany pini 
\q1 ap̱o/ ’kuwosh kun turatur kun ḵogu mo. 
\q1 ’Peni bwa ma dho’th gi mon’thamo/ mo tani 
\q1 dhuru’c pini jin tana /e midi p̱u’du/ i /e me’d jap̱e/ mo be. 
\q1  
\v 4 Tap̱a thulki gwo me’da p̱o/ mo 
\q1 dhali a’di midi diki aḵ bwam piti e mo: 
\q1 /E tana gasiis ki sule/ sule/ mo 
\q1 mmobaṯẖa cuḵ ma Malkisaadag isho’k mo be. 
\b  
\q1  
\v 5 Tap̱a a’di diki’d ki me’da bim poros pini mo be. 
\q1 A’di midi shaṯ imaliḵ ka ’cesh mo ka tee ma nyor piti mo. 
\q1  
\v 6 A’di midi tor gwon dwall ’twa/a ’cesh e bwaman kal gi ’kwaniny’cesh mo, 
\q1 mmo’tu’d uni ki buŋgwar is jwa mo. 
\q1 A’di midi shaṯ itap̱a ka ’cesh mo 
\q1 ap̱o/ mony’cesh jin beeyabee mo. 
\q1  
\v 7 A’di midi p̱i ’peni jis yi’de/ jin kasha e jin di’di shemen bway mo. 
\q1 Wakan a’di midi ’de’k ’kup̱ piti ki mis mo be. 
\c 111  
\q1  
\v 1 Maŋi Tap̱a mo. 
\q1 Aha/ mina c̱i mo jin ’boruwa ’bor bwa i is ki Tap̱a mo ka dum pemi ’baar mo, 
\q1 ki dhan ya ma tul ’kup̱ gi kwani kun dhelel ma du mo e bwaman ma tul ’kup̱ yan mo. 
\q1  
\v 2 Mii gi Tap̱a a’di caaca mo, 
\q1 dhali a’di thuḵkin ma ris ’kwani ’baar ka ’deṯe/ ’deṯe/ ki e mo, uni kun ’borkina bwa e uni mo. 
\q1  
\v 3 A’di ’tu’du/ ki montaḵ mo dhali mo/eḵ mo e miin tom piti mo, 
\q1 dhali miiŋḵar/em piti ’dimki ’kup̱ ki sule/ sule/ mo. 
\q1  
\v 4 A’di ki raḵ miin tom piti jin miina a’di ki momer kanu e mo. 
\q1 Tap̱a a’di ta’da ’the ka ’the mo dhali amanmiimii mo. 
\q1  
\v 5 A’di ki thoson tonṯe/ gom uni gwansan kun ḵo/ki a’di mo. 
\q1 A’di dina bwam piti ki ush mmota pa gom gwo jin gama a’di me’d mo. 
\q1  
\v 6 A’di ki ṯor ’kwanim piti mom’bi’th gi miin tom piti mo, 
\q1 dhali c̱i uni mal gi kal gi ’kwaniny’cesha tiya mo. 
\q1  
\v 7 Miin to gi me’d piti mo tani uni ta ku isiŋ gana/ mo dhali kuŋ ḵar/e mo. 
\q1 Aris gwoŋḵan gi ’twam piti uni ta ku gun minu gam is mo. 
\q1  
\v 8 Uni ṯelkunu sho’k ki sule/ sule/ mo dhali ki sule/ sule/ mo, 
\q1 mmothim uni ki mii ma isiŋ gana/ mo dhali ki mii ma ḵar/e mo. 
\q1  
\v 9 A’di ki hash mo jin wanu ’ba/ ki ’kwanim piti mo. 
\q1 A’di ki ḵan gwoŋḵan piti jin gamu me’d mmodi ki sule/ sule/ mo. 
\q1 Gway piti ḵogu mo dhali mii ma purem piti mo. 
\q1  
\v 10 Moŋḵo/ gom Tap̱a mo tani a’di ta monṯel ’pen gi moyuḵ mo. 
\q1 Mo jin mishu gwo ’ban jin ’boro’d goma ris uni ’baar mo kun boṯkin ki a’di mo. 
\q1 Momaŋ piti a’di i’dimki ’kup̱ ki sule/ sule/ mo. 
\c 112  
\q1  
\v 1 Maŋi Tap̱a mo. 
\q1 Mom’bor mii gom wathi/ jin ḵo/ki Tap̱a mo, 
\q1 a’di jin ’kunykina bwa ki ’kuny kagahara e gwoŋḵan piti kun ’kwarkunu mo. 
\q1  
\v 2 Emen piti mini c̱a’bki dem dem e mony’cesh mo, 
\q1 dhala nyaḵum yil gi ’kwani kun dhelel ma du mo tani uni minu ’bor mii mo. 
\q1  
\v 3 Pa jin tanu dhali pa jin tana a’di e gu’b piti mo 
\q1 dhali mo ma ḵar/em piti ’dimki ’kup̱ ki sule/ sule/ mo. 
\q1  
\v 4 Moŋkush cuki mis e bwaman mondhurumi’d gom uni kun dhelel ma du mo. 
\q1 Tap̱a a’di ta’da ’the mo dhali ta’da manmiimii mo dhali ta’da ḵar/e mo. 
\q1  
\v 5 A’di ’boro’di gom wathi/ jin ṯu/ulki mii ki mii ma ’the mo dhali c̱i to ka ’ka’d me’di is mo, 
\q1 a’di jin mishi is piti ninn gom tom piti ki mii ma ḵar/e mo. 
\q1  
\v 6 Haali/ wathiŋ ḵar/e a’di molu joc̱ ki sule/ sule/ mo. 
\q1 A’di minu ka e ki sule/ sule/ ya ye ’ba/ mo. 
\q1  
\v 7 Dhali a’di midi diki ḵo/ is gom tonthus jin minu ḵal mo. 
\q1 Adum piti rwa’ckunu mo, mmogamkina a’di gwo is e Tap̱a mo. 
\q1  
\v 8 Adum piti shurki’d mo, a’di midi diki ḵo/ is mo 
\q1 ntagi a’di midi p̱ar to jin ona bwa a’di e ap̱o/ uni kun ta ’kup̱ ki a’di mo. 
\q1  
\v 9 A’di ki pwaḵ to bwa ’baḵany mo, a’di c̱iki to gom ’kwani kun hatha’ko’d mo, 
\q1 mii ma ḵar/em piti a’di ’dimki ’kup̱ ki sule/ sule/ ya ye ’ba/ mo. 
\q1 Cem piti a’di karkunu ki ca ki montaḵ mo. 
\q1  
\v 10 Wathi/ jin ta thus ki thus mo tani a’di p̱arki a’di e mo dhali a’di shwa’da nyor mo. 
\q1 A’di ki ’pe’d shem piti mo dhali wa mo. 
\q1 To jin ona bwa wathi/ jin ta thus ki thus mo tani warki’d ka munyjal mo. 
\c 113  
\q1  
\v 1 Maŋi Tap̱a mo. 
\q1 Maŋi amaŋ mo, ayy um c̱iŋkina/ gi Tap̱a mo, 
\q1 maŋi gway gi Tap̱a mo. 
\q1  
\v 2 Mom’bor mii midi di mo gom gway gi Tap̱a mo 
\q1 ’pena tee yansan mo dhali ki sule/ sule/ mo dhali ki sule/ sule/ mo. 
\q1  
\v 3 ’Peni mo jin sul ma tente/ mo tani dhali mo jin yula a’di mo tani 
\q1 gway gi Tap̱a a’di iminu maŋ mo. 
\q1  
\v 4 Tap̱a a’di iḵa’damaḵa’dam ap̱owa ris kal gi ’kwaniny’cesh mo, 
\q1 dhali monycam piti a’di diki’da p̱o/ momis mo. 
\q1  
\v 5 Kaja a’di iwakina e ki Tap̱a Arumgimis bana mo, 
\q1 a’di jin c̱a’bki’d e mo jin ḵa’dama/ ḵa’dam mo, 
\q1  
\v 6 a’di jin hilki mo ka luŋgu’b 
\q1 ’pena p̱o/ momis mo dhali mony’cesh mo? 
\q1  
\v 7 A’di ki ’de’k ’kwani kun hatha’ko’d ki ha’th ’peni bu’da’cesh mo 
\q1 dhali a’di ki ’de’k uni kun mini mii ta gi to mo ’pena duhal ’piny mo, 
\q1  
\v 8 mmodhu uni mmonyaḵ ’ko ki iya/ gi imaliḵ mo, 
\q1 dhali nyaḵki iya/ gi imaliḵ gi ’kwanim piti mo. 
\q1  
\v 9 A’di ki c̱iya ’boma burum pa mo mmoc̱a’b mo, 
\q1 mmokara yim mmo’kuny bwa ki ’kuny jin shiyi’d mo me’d kum gi uc̱i mo. 
\q1 Maŋi Tap̱a mo. 
\c 114  
\q1  
\v 1 Me’d jin yakin ma Israyiil ka pije/ ’peni Pam Masir mo tani 
\q1 gu’b ma Yakuub ’peni ’kwani kun wal ’twan tiya mo tani 
\q1  
\v 2 Yahuuda/ warki’d ki mom piti jin ḵogu mo, 
\q1 dhala Israyiil a’di ta mo jin tanu tap̱a ki sule/ sule/ mo. 
\q1  
\v 3 Dhan ḵumma/ yi’de/ hilki mo mo dhali ya ŋwac̱a/ mo. 
\q1 Dhali Ḵumma/ Yi’de/ Uurdun doḵki’d ka nyaŋ’ko’d mo. 
\q1  
\v 4 ’Kuwosha turga/ p̱ekina ŋalbothoŋ ki ’thir ’thir mo me’d gwasiŋ ḵa’bal mo, 
\q1 dhali ushi wosha gwa’dga/ wana e ki ushi ḵa’bal mo. 
\q1  
\v 5 Ata mii /eye, ayy ḵumma/ yi’de/, ki /e guskin kan mo? 
\q1 Ayy Uurdun, katinta doḵkina /e ka nyaŋ’ko’d mo? 
\q1  
\v 6 Ayy ’kuwosha turga/, ata p̱ekina um ki ’thir ’thir me’d gwasiŋ ḵa’bal kan mo? 
\q1 Dhali um ushi wosha gwa’dga/ kun wana e ki ushi ḵa’bal mo? 
\b  
\q1  
\v 7 Deeyi ma ki bir bir mo, ayy mony’cesh, e buŋ’kus gi Tap̱a mo, 
\q1 e buŋ’kus ma Arumgimis ma Yakuub mo, 
\q1  
\v 8 a’di jin ṯu’kki wosh mo mmota a/al gom yi’de/ mo 
\q1 dhali wosh jin biliṯki o’d mo tani warki’d ki yi’de/ jin kasha e mo. 
\c 115  
\q1  
\v 1 Yisa e am, ayy Tap̱a, yisa e am, 
\q1 hili gom gway pini mo tani c̱iyi monyca mo, 
\q1 gom gway gi mo/en pini jin ṯelu sho’k mo dhali mii ma isiŋ ganam pini mo. 
\q1  
\v 2 Ki ton ta’da tinta imina kal gi ’kwaniny’cesh i/o gwo mo ki: 
\q1 Mane Arumgimis buni mane? 
\q1  
\v 3 Arumgimis bana a’di diki’d e momis mo. 
\q1 A’di ki mii a’diyin jin ’bora bwa a’di mo. 
\q1  
\v 4 Tomp̱inycon buni kun luŋa uni mo tani ta ’dolkon kush mo dhali ’dolkon gana/ mo 
\q1 kun uḵu ki me’d gi ’kwani mo be. 
\q1  
\v 5 Uni ta gi ’twa/ mo, hili uni o gwoŋ kamuwa? 
\q1 Dhali uni ta gi e mo, hili uni p̱arki toŋ kamu/ eya? 
\q1  
\v 6 Uni ta gi ’ce mo, hili uni ciḵ toŋ kamuwa? 
\q1 dhali uni ta gi shush mo, hili uni cic̱kina shim toŋ kamuwa? 
\q1  
\v 7 Uni tan gi me’d mo, hili uni ta toŋ kamu/ is ki me’da? 
\q1 Uni tan gi sho’k mo, hili uni mishi ii ki shoka? 
\q1 Dhali uni misha isa kamu/ mur e ’kus buniya? 
\q1  
\v 8 Uni gwansan kun uḵ uni mo tani uni wana e ki uni mo. 
\q1 Wakan si’da/ aris uni gwahan kun gamki gwo is e tomp̱inycon buni mo. 
\q1  
\v 9 Ayy Israyiil, gami gwo is e Tap̱a mo. 
\q1 Haali/ a’di ita mowoṯẖ buni mo dhali agoŋgorom buni mo. 
\q1  
\v 10 Ayy gu’b ma Haruun, kari moŋgam gwo is e Tap̱a mo. 
\q1 Haali/ a’di ita mowoṯẖ buni mo dhali agoŋgorom buni mo. 
\q1  
\v 11 Um kun ḵo/ki Tap̱a mo tani gamki gwo is e Tap̱a mo. 
\q1 Haali/ a’di ita mowoṯẖ buni mo dhali agoŋgorom buni mo. 
\q1  
\v 12 Tap̱a tana bwa pa ki pa gom ana mo. A’di midi ’bor ana mii mo. 
\q1 A’di midi ’bor gu’b ma Israyiil mii mo. 
\q1 Dhali a’di midi ’bor gu’b ma Haruun mii mo. 
\q1  
\v 13 A’di midi ’bor uni gwansan mii kun ḵo/ki Tap̱a mo 
\q1 ’peni uni kun gwa’da is mo dhali uni kun cakin mo. 
\q1  
\v 14 Dhalki Tap̱a c̱i um mo jin maruwa mar is mo, 
\q1 um dhali uc̱im bum mo. 
\q1  
\v 15 Dhalki um ’boru mii ki Tap̱a mo, 
\q1 a’di jin uḵki momis mo dhali mony’cesh mo. 
\b  
\q1  
\v 16 Momis uni ta momis gi Tap̱a mo, 
\q1 hili mony’cesh c̱ikina a’di ki iya/ gi ’kwani mo. 
\q1  
\v 17 Uni kun wukin mo tani mishi Tap̱a maŋ yisa, 
\q1 walla uni gwansan kun iikin ka luŋgu’b e mo ma shwamm mo. 
\q1  
\v 18 Hili ana mina ’bor Tap̱a mii mo 
\q1 ’pena tee yansan shwane/ mo dhali ki sule/ sule/ ya ye ’ba/ mo. 
\q1 Maŋi Tap̱a mo. 
\c 116  
\q1  
\v 1 Aha/ mina en Tap̱a mo haali/ a’di ciḵki ko gi 
\q1 ’twam pem mo jin ’thoka/ ka di’b me’di is mo. 
\q1  
\v 2 Haali/ a’di ḵa’dki bwany’cem piti ki aha/ mo 
\q1 wakan aha/ mina yuḵ a’di isi ki me’d jin dika/ ki e mo. 
\q1  
\v 3 Agume/ gi mowu uni ’kamki aha/ is mo, 
\q1 anyoḵ ma Haawiya uni bu’thki aha/ mo. 
\q1 Aha/ ’kosha is ka nyor mo eya c̱is pem mo dhali ’pe’d she/ mo. 
\q1  
\v 4 Yan’ko’d aha/ ki yuḵ gway gi Tap̱a mo mmo/o gwo mo ki: 
\q1 Ayy Tap̱a, aha/ yuḵa /e mo, tayi mondiki/em pem is ki me’d mo. 
\q1  
\v 5 Tap̱a a’di ta’da ’the ka ’the mo dhali ta’da ḵar/e mo, 
\q1 Arumgimis bana jin miimii mo. 
\q1  
\v 6 Tap̱a a’di ’tashki uni ’twa/ mo uni kun wana she/ is is kan mo, 
\q1 ki aha/ guyunu ka luŋgu’b e moŋgwa’dga/ mo tani a’di taki aha/ is ki me’d mo. 
\q1  
\v 7 Doḵi ka nyaŋ’ko’d, ayy ḵashiram pem, e mosi/is pini mo, 
\q1 haali/ Tap̱a a’di ṯu/ulki’d nyaḵki /e ki mii jin isha to ka enthus gom /e mo. 
\q1  
\v 8 Haali/ /e ’cuḵkina ḵashiram pem ’peni mowu mo, 
\q1 dhali em pem ’peni jabu’th jin wolki’d mo, 
\q1 dhali sho’k pem ’peni mo jin gwoluwa gol mo. 
\q1  
\v 9 Aha/ yakina e bwambori Tap̱a mo 
\q1 e mony’cesh jin ’konuki/e mo. 
\q1  
\v 10 Aha/ karkina moŋgam gwo is pem mo, isi kani me’d jin okika/ gwo mo ki: 
\q1 Aha/ tashu ka dhan mo jin jwakaṯkunuwa jwakaṯ jin shiyi’d mo. 
\q1  
\v 11 Aha/ ona gwo e mom pem jin dumbulkika/ bway mo ki: 
\q1 ’Kwani ’baar mo tan ga ’teŋ kap̱e/ jin ta jim ma p̱e’th mo. 
\q1  
\v 12 Ata a’di jin miga/ c̱i ki Tap̱a mo 
\q1 goma ris tom piti ’baar kun ishkin ka enthus gom aha/ mo? 
\q1  
\v 13 Aha/ mina ’deka ḵubbaaya gi mowoṯẖ ma Arumgimis ki mis mo 
\q1 dhali yuḵ gway gi Tap̱a mo. 
\q1  
\v 14 Aha/ mina c̱i gwom pem jin oka/ is ki Tap̱a mo 
\q1 e buŋ’kus ma ris ’kwanim piti ’baar mo. 
\q1  
\v 15 Yinthoŋ gana/ e jis/e gi Tap̱a mo, 
\q1 a’di ita wu ki unim piti kun dhunu ki she/ ki dhelel dhelel mo. 
\q1  
\v 16 Ayy Tap̱a, aha/ tana c̱iŋkinam pini mo. 
\q1 Aha/ tana c̱iŋkinam pini mo, a’di jin ta ya/ gi nyaranyc̱iŋkinam pini mo be. 
\q1 /E ki ’cuḵ mondeḵ pem mo. 
\q1  
\v 17 Aha/ mina c̱i to jin ’ciṯẖu/ ’kus ki bwa jin ’boruwa ’bor i is mo 
\q1 dhali yuḵ gway gi Tap̱a mo. 
\q1  
\v 18 Aha/ mina c̱i gwom pem jin oka/ is ki Tap̱a mo 
\q1 e buŋ’kus ma ris ’kwanim piti ’baar mo, 
\q1  
\v 19 eya pije/ gi gu’b gi ’kup̱ ḵany gi Tap̱a mo, 
\q1 e bwaman um mo tani, ayy Urushaliim. 
\q1 Maŋi Tap̱a mo. 
\c 117  
\q1  
\v 1 Maŋi Tap̱a mo, aris um kal gi ’kwaniny’cesh mo. 
\q1 Yuḵi gway ki moŋ’kuny bwa gom a’di mo, aris um ’kwani mo. 
\q1  
\v 2 Haali/ mo/en piti jin ṯelu sho’k mo tani a’di caaca ’kup̱ki ana mo 
\q1 dhali mo ma isiŋ gana/ gi Tap̱a mo a’di ’dimki ’kup̱ ki sule/ sule/ ya ye ’ba/ mo. 
\q1 Maŋi Tap̱a mo. 
\c 118  
\q1  
\v 1 Ayy c̱iyi mo jin ’boruwa ’bor bwa i is gom Tap̱a mo, haali/ a’di i’boro’d mo. 
\q1 Mo/en piti jin ṯelu sho’k mo tani a’di ’dimki ’kup̱ ki sule/ sule/ mo. 
\q1  
\v 2 Dhalka Israyiil o gwo mo ki: 
\q1 Mo/en piti jin ṯelu sho’k mo tani a’di ’dimki ’kup̱ ki sule/ sule/ mo be. 
\q1  
\v 3 Dhalki gu’b ma Haruun o gwo mo ki: 
\q1 Mo/en piti jin ṯelu sho’k mo tani a’di ’dimki ’kup̱ ki sule/ sule/ mo be. 
\q1  
\v 4 Dhalki uni gwansan kun ḵo/ Tap̱a mo tani o gwo mo ki: 
\q1 Mo/en piti jin ṯelu sho’k mo tani a’di ’dimki ’kup̱ ki sule/ sule/ mo be. 
\b  
\q1  
\v 5 ’Peni mo ma c̱is pem mo tani aha/ yuḵkina Tap̱a mo. 
\q1 Dhali Tap̱a thoḵki aha/ ’twa/ mo dhali kar aha/ ki ’kus mo. 
\q1  
\v 6 Ki Tap̱a nyaḵ di ki aha/ mo tani aha/ mina ḵo/ toŋ kamu/ yisa. 
\q1 To gi wakatinta imina ’kwani imii aha/ mo? 
\q1  
\v 7 Tap̱a a’di diki’d e ’ko’d gwar pem mo mmowoṯẖ aha/ mo. 
\q1 Aha/ mina hil mo ki e jin p̱inu mii e mo ap̱o/ uni gwansan kun shi/ki aha/ i e mo. 
\q1  
\v 8 A’di ’boro’d mmobu’th mo jin huru jwa e Tap̱a mo 
\q1 mmo’koki dhu mo jin wunuwa wuny jwa i is e ’kwani mo. 
\q1  
\v 9 A’di ’boro’d mmobu’th mo jin huru jwa e Tap̱a mo 
\q1 mmo’koki dhu mo jin wunuwa wuny jwa i is e iya/ ma maliḵ mo. 
\q1  
\v 10 Aris kal gi ’kwaniny’cesh uni ’kamki aha/ ’kup̱ ki deḵ mo. 
\q1 Ki gway gi Tap̱a mo tani aha/ ’ciṯẖkina uni ’twa/ mo. 
\q1  
\v 11 Uni ’kamki aha/ ’kup̱ ki deḵ mo, mmo’kam aha/ ’kup̱ ka ris ’twaŋkal kuku/ mo. 
\q1 Ki gway gi Tap̱a mo tani aha/ ’ciṯẖkina uni ’twa/ mo. 
\q1  
\v 12 Uni ’kamki aha/ ’kup̱ ki deḵ me’da dham mo. 
\q1 Uni shwan ki bar bar me’d o’d cwan ’de/ mo. 
\q1 Ki gway gi Tap̱a mo tani aha/ ’ciṯẖkina uni ’twa/ mo. 
\q1  
\v 13 Aha/ gac̱u/ ki gac̱ jin shi/ashi/ mo. Wakan aha/ ’barkina mo 
\q1 hili Tap̱a woṯẖki aha/ mo be. 
\q1  
\v 14 Tap̱a a’di ta mom’bi’th pem dhali gway pem mo. 
\q1 A’di warki’d ki bway gi mowoṯẖ pem mo. 
\b  
\q1  
\v 15 Ciḵi gwo mo ma, gom gwaya ’kunyka/ kun p̱inu mii e mo 
\q1 e gu’b burrinye/ gi ’kwani gi miiŋḵar/e mo. 
\q1 Me’da bim poros gi Tap̱a a’di miiki mii ki dar gi monyju/ mo. 
\q1  
\v 16 Me’da bim poros gi Tap̱a a’di karkunu ki ca mo. 
\q1 Me’da bim poros gi Tap̱a a’di miiki mii ki dar gi monyju/ mo. 
\q1  
\v 17 Aha/ mina wu yisa, hili aha/ mina di ki e mo, 
\q1 dhali tash miin to deŋ e kun miina Tap̱a mo. 
\q1  
\v 18 Tap̱a a’di dorki aha/ ntagi aha/ bura is ki wap̱ wap̱ mo, 
\q1 hili a’di yisa c̱iki aha/ mmowu mo yisa. 
\b  
\q1  
\v 19 Ḵa’di aha/ ’twaŋkal ma goŋ ki mii ma ḵar/e mo 
\q1 ki aha/ mina cic̱ e uni mo 
\q1 dhali c̱i mo jin ’boruwa ’bor bwa i is ki Tap̱a mo. 
\q1  
\v 20 Yansan a’di ta ’twaŋkala goŋ gi Tap̱a mo 
\q1 jin mina ’kwaniŋ ḵar/e cic̱i cine/ mo. 
\b  
\q1  
\v 21 Aha/ ’borkina /e bwa i is mo haali/ /e ciḵki aha/ ’twa/ mo 
\q1 dhali war ki bway gi mowoṯẖ pem mo. 
\q1  
\v 22 Wosh gana/ yansan jin waḵkina imannyaŋ gu’b mo tani 
\q1 a’di warki’d ka dhana ’kaŋ’kup̱ wosh gi ’penabi mo. 
\q1  
\v 23 Mii yansan a’di ita mii jin miikina Tap̱a mo, 
\q1 dhali a’di ta mii jin meru em bana mo be. 
\q1  
\v 24 Yansan a’di ita’da tee jin karkina Tap̱a mo. 
\q1 Dhalki ana ’kunya bwa mo dhali ’bor bwa e a’di mo. 
\q1  
\v 25 Tayi am is ki me’d mo, am kun yuḵkina /e mo, ayy Tap̱a. 
\q1 Ayy Tap̱a, am yuḵkina /e mo, c̱iyi aman mo jin diluwa bora ’cesh mo. 
\q1  
\v 26 Mom’bor mii gom a’di jin cic̱ki’d mo e gway gi Tap̱a mo. 
\q1 Am ’bora /e mii mo ’peni gu’b gi Tap̱a mo. 
\q1  
\v 27 Tap̱a a’di ita’da Arumgimis mo, 
\q1 dhali a’di c̱iki ana moŋkush mo. 
\q1 Nyoŋi mo jin ḵalu ya goma yuḵ ma tul ’kup̱ ka biny cwa mo 
\q1 ntagi ce jin thumu e ’kup̱a gwaṯa/ jin miinuwa bas mo. 
\q1  
\v 28 /E tana Arumgimis pem mo dhali aha/ mina c̱i mo jin ’boruwa ’bor bwa i is ki /e mo. 
\q1 /E tana Arumgimis pem mo dhali aha/ mina kar /e ki ca mo. 
\q1  
\v 29 Ayy c̱iyi mo jin ’boruwa ’bor bwa i is gom Tap̱a mo, haali/ a’di i’boro’d mo, 
\q1 haali/ mo/en piti jin ṯelu sho’k mo tani a’di i’dimki ’kup̱ ki sule/ sule/ mo. 
\c 119  
\q1  
\v 1 Mom’bor mii gom uni gwansan kun ’kona bway buni ki dar gi mii i’ba/ mo 
\q1 uni kun iiyin e gwoŋḵan jin c̱inu gi Tap̱a mo. 
\q1  
\v 2 Mom’bor mii gom uni gwansan kun dhuki gwonyc̱im piti mo, 
\q1 uni kun simmki a’di e ka dum buni ’baar mo, 
\q1  
\v 3 uni si’da/ kun ’koki ṯẖu’th to mii mo, 
\q1 hili mmo/ii e bway piti mo be. 
\q1  
\v 4 /E ḵanki gwoŋḵan gi ’twam pini mo 
\q1 ki uni minu dhu ka duŋ gana/ mo. 
\q1  
\v 5 Ayy ki bway pem minu ṯel sho’k mo 
\q1 mmodhu gwoŋḵan pini kun bahu mo. 
\q1  
\v 6 Wakan ki aha/ minu ’koki kar ki mo ma ’the is mo, 
\q1 mmothoson em pem mmoḵo’c eya ris gwoŋḵan pini ’baar mo kun ’kwarkunu mo. 
\q1  
\v 7 Aha/ mina maŋ /e ka du jin dheleladhelel mo, 
\q1 ki aha/ mina da/ar gwo gom mii ma ḵar/em pini ’peni gwoŋḵan kun onu mo. 
\q1  
\v 8 Aha/ mina mii gwoŋḵan pini kun bahu mo. 
\q1 Ayy dhalki aha/ ki dhal ’pen mo ka dun ṯẖorony mo. 
\q1  
\v 9 A’di jin ta dhuru’c midi kar bway piti ki dhelel dhelel kata mo? 
\q1 mmoji a’di isi ki gwom pini mo. 
\q1  
\v 10 Ka dum pemi ’baar mo tani aha/ simmkina /e e mo. 
\q1 Dhalku/ ki dhal aha/ mmoc̱aca/ mo ’peni gwoŋḵan pini kun ’kwarkunu mo. 
\q1  
\v 11 Aha/ dhukina gwom pini eya dum pem mo, 
\q1 ki aha/ mina diki mii miinthusa p̱o/ /e mo. 
\q1  
\v 12 Mom’bor mii gom /e mo, ayy Tap̱a. 
\q1 Ṯori aha/ gwoŋḵan pini kun bahu mo. 
\q1  
\v 13 Ki ’twam pem mo tani aha/ bahkina aris gwoŋḵan pini 
\q1 kun onu ki ’twam pini mo. 
\q1  
\v 14 E bway gi gwonyc̱im pini mo tani aha/ ’kunya bwa mo 
\q1 me’d jin miga/ ’kuny bwa eya ris mo jin tanu pa ki pa mo. 
\q1  
\v 15 Aha/ mina kulum gwo ibwa gom gwoŋḵan gi ’twam pini mo 
\q1 dhali ḵo’c em pem e bway pini mo. 
\q1  
\v 16 Aha/ mina bwa ’kuny mo e gwoŋḵan pini kun bahu mo. 
\q1 Aha/ mina diki ŋa gwom pini mo. 
\b  
\q1  
\v 17 Ṯu/uli nyaḵki c̱iŋkinam pini ki mo jin isha to ka enthus mo, 
\q1 ki aha/ mina di ki e mo dhali mii gwom pini mo be. 
\q1  
\v 18 Ḵa’di em pem mo ma ki aha/ mina p̱ar momer e 
\q1 kun ’kon e gwoŋḵan pini jin c̱inu mo. 
\q1  
\v 19 Aha/ tana yilkina/ ki yilkina/ e mony’cesh mo. 
\q1 Dhalku/ ki bag gwoŋḵan pini kun ’kwarkunu ’peni aha/ mo. 
\q1  
\v 20 Aḵashiram pem a’di ’cumkunu ki mo jin c̱ora/ c̱or mo 
\q1 goma ris gwoŋḵan pini ’baar kun onu ka yempa/ mo. 
\q1  
\v 21 /E ki ḵucur uni gwansan kun ush ’kwani ga/ mo, dhali uni kun jeenu mo, 
\q1 uni kun c̱a’ckin mo ’peni bway gi gwoŋḵan pini kun ’kwarkunu mo. 
\q1  
\v 22 Ḵali ’peni aha/ mon’twam buni kun ṯẖunya uni aha/ i is mo dhali mo ma waḵ mo, 
\q1 haali/ aha/ dhukina gwonyc̱im pini mo. 
\q1  
\v 23 Isi kani ba iya/ ma maliḵ uni ’kokin mo dhali miiya wutha p̱o/ aha/ mo tani 
\q1 c̱iŋkinam pini a’di midi kulum gwo ibwa gom gwoŋḵan pini kun bahu mo. 
\q1  
\v 24 Gwonyc̱im pini uni a’di i’kunykika/ bwa mo 
\q1 haali/ uni itana manlogom aha/ ki gwo mo. 
\q1  
\v 25 Aḵashiram pem thalkina bu’da’cesh mo. 
\q1 Tashi aha/ e mo isi ki gwom pini mo. 
\q1  
\v 26 Ki aha/ ṯorkina bway pem mo tani /e thoḵki aha/ ’twa/ mo. 
\q1 Ṯori aha/ gwoŋḵan pini kun bahu mo. 
\q1  
\v 27 Kari aha/ mmomish gwo ’ban gom bway gi gwoŋḵan gi ’twam pini mo, 
\q1 dhali aha/ mina kulum gwo ibwa gom miim pini jin miina /e to ki momer mo. 
\q1  
\v 28 Aḵashiram pem a’di waki’d gom bwan diṯi’d mo. 
\q1 ’Bithi aha/ is mo isi ki gwom pini mo. 
\q1  
\v 29 Kari bway jin ta thus ki thus mmosi’d ’peni aha/ mo. 
\q1 Dhali ka ’the mo tani ṯori /e aha/ gwoŋḵan pini jin c̱inu mo. 
\q1  
\v 30 Aha/ kwanykina bway gi mii ma isiŋ ganam pini mo. 
\q1 Aha/ karkina gwoŋḵan pini kun onu ibwambori jis/em pem mo. 
\q1  
\v 31 Aha/ thalkina gwonyc̱im pini mo, ayy Tap̱a. 
\q1 Dhalku/ ki dhal aha/ bway ki aha/ minu kar ki mo ma ’the is mo. 
\q1  
\v 32 Aha/ mina gus e bway gi gwoŋḵan pini kun ’kwarkunu mo 
\q1 ki /e mini lala’th mom pem jin mishka/ gwo ’ban is mo. 
\q1  
\v 33 Ṯori aha/ gwo mo ma, ayy Tap̱a, gom bway gi gwoŋḵan pini kun bahu mo 
\q1 dhali aha/ mina dhu uni ntagi ’pemen mo be. 
\q1  
\v 34 C̱iyi aha/ mo jin mishu gwo ’ban mo ki aha/ mina dhu gwoŋḵan pini jin c̱inu mo 
\q1 dhali mii a’di ka dum pemi ’baar mo. 
\q1  
\v 35 Susi aha/ e bway gi gwoŋḵan pini kun ’kwarkunu mo 
\q1 haali/ aha/ ’kunya bwa e a’di mo. 
\q1  
\v 36 Ḵa’da dum pem ki gwonyc̱im pini mo 
\q1 yisa mmota miiya du is ki me’d mo. 
\q1  
\v 37 Ṯuki em pem ’peni mo jin hiluwa hil kun ’kon bwa ’te/ mo 
\q1 dhali c̱iyi aha/ mondiki/e e bway pini mo. 
\q1  
\v 38 Rwaci gwom pini jin ona /e is e c̱iŋkinam pini mo, 
\q1 a’di jin ona /e gom uni gwansan kun ḵo/ki /e mo. 
\q1  
\v 39 Ḵali ’peni aha/ mowaḵ jin ḵalki aha/ ’ko’da ’cesh mo, 
\q1 haali/ gwoŋḵan pini kun onu mo tani uni ’bora’bor mo. 
\q1  
\v 40 Hili mo mo ma, aha/ c̱orkina gwoŋḵan gi ’twam pini mo 
\q1 e mii ma ḵar/em pini mo tani /e c̱iyi aha/ mondiki/e mo. 
\b  
\q1  
\v 41 Dhalki mo/en pini jin ṯelu sho’k p̱u’dki’d e aha/ mo, ayy Tap̱a, 
\q1 isi ki bway gi mowoṯẖ pini jin ona /e gwo is mo. 
\q1  
\v 42 Dhali yan’ko’d aha/ mina ta gi gwonthoḵ gom uni gwansan kun ṯẖunyki aha/ ’twa/i is mo 
\q1 haali/ aha/ gamkina gwo is e gwom pini mo. 
\q1  
\v 43 Dhali dhalku/ ki bu’th gwoŋ gana/ ’peni ’twa/ pem ka dun ṯẖorony mo, 
\q1 haali/ mo ma ’teŋ kap̱em pem a’di di’d e gwoŋḵan pini kun onu mo. 
\q1  
\v 44 Aha/ mina dhu gwoŋḵan pini jin c̱inu ki ṯikir ṯikir mo 
\q1 gom ki sule/ sule/ mo dhali ki sule/ sule/ mo. 
\q1  
\v 45 Dhali aha/ mina ya ’baḵany gana/ mo 
\q1 haali/ aha/ ŋap̱kina gwoŋḵan gi ’twam pini mo. 
\q1  
\v 46 Aha/ si’da/ mina o gwo gom gwonyc̱im pini ibwambori imaliḵ mo 
\q1 dhali aha/ minu ’koki kar ki mo ma ’the is mo 
\q1  
\v 47 haali/ aha/ gamkina mom pem jin ’kunyka/ bwa mo e gwoŋḵan pini kun ’kwarkunu mo, 
\q1 a’di jin enka/ mo. 
\q1  
\v 48 Aha/ taḵa gwoŋḵan pini kun ’kwarkunu mo, a’di jin enka/ mo, 
\q1 dhali aha/ mina kulum gwoŋḵan pini kun bahu mo eya du mo. 
\b  
\q1  
\v 49 Kayi gwom pini e e c̱iŋkinam pini mo, 
\q1 e a’di jin karkina /e aha/ mmota ga ’teŋ kap̱e/ mo. 
\q1  
\v 50 Yansan ta momalas pem mo e monṯo’c bwa mo 
\q1 ki gwom pini jin ona /e is c̱i aha/ mondiki/e mo. 
\q1  
\v 51 ’Kwani kun dar gi mii ma gayiin mo tani uni p̱e’th aha/ ki p̱etha sor mo, 
\q1 hili aha/ dinaki ṯu’k mo ’peni gwoŋḵan pini jin c̱inu mo. 
\q1  
\v 52 Ki aha/ kulumkina gwoŋḵan pini kun onu mo ibwa mo ’peni kadhamo/ mo tani 
\q1 aha/ bu’thkina momalas mo, ayy Tap̱a. 
\q1  
\v 53 Anyor jin deḵu jin ’batha’ba’th mo tani bu’thki aha/ mo gom ’kwani kun ta thus ki thus mo, 
\q1 uni kun dhalki gwoŋḵan pini jin c̱inu ’pen mo. 
\q1  
\v 54 Gwoŋḵan pini kun bahu mo tani uni warkin ki gway pem jin yuḵka/ mo 
\q1 e gu’b pem gi moyam pem jin yaka/ luŋ mo be. 
\q1  
\v 55 Aha/ kakina gway pini e mon’thiny mo, ayy Tap̱a, 
\q1 dhali dhu gwoŋḵan pini jin c̱inu mo. 
\q1  
\v 56 Mom’bor mii yansan a’di biṯki’da p̱o/ aha/ mo 
\q1 ki aha/ dhukina gwoŋḵan gi ’twam pini mo. 
\b  
\q1  
\v 57 Tap̱a a’di ita tom pem jin ’tuntulka/ bwa ime’d mo. 
\q1 Aha/ ona gwo is mmodhu gwom pini mo. 
\q1  
\v 58 Aha/ ’thona mii ma ’them pini ka dum pemi ’baar mo. 
\q1 Miiyi mii ka ’the gom aha/ isi gi gwom pini jin ona /e is mo. 
\q1  
\v 59 Ki aha/ kulumkina gwo ibwa gom bway pini mo tani 
\q1 aha/ woṯẖkina sho’k pem ’ba/ e gwonyc̱im pini mo. 
\q1  
\v 60 Aha/ hurkina ki ’ta’b mo dhali diki ta adiiṯe/ mo 
\q1 mmodhu gwoŋḵan pini kun ’kwarkunu mo. 
\q1  
\v 61 Ba anyoḵ gi ’kwani kun ta thus ki thus mo tani uni bu’thki aha/ ka gume/ mo 
\q1 dhali aha/ dinaki this gwoŋḵan pini jin c̱inu e mo. 
\q1  
\v 62 E mombwam/e mo tani aha/ cukina mis mmomaŋ /e mo, 
\q1 haali/ gom mii ma ḵar/em pini gi gwoŋḵan pini kun onu mo. 
\q1  
\v 63 Aha/ nyaḵkina ya ka ris uni gwansan kun ḵo/ki /e mo, 
\q1 uni gwansan kun dhuki gwoŋḵan gi ’twam pini mo. 
\q1  
\v 64 Mony’cesh, ayy Tap̱a, a’di ’tu’dkunu mo ki mo/en pini jin ṯelu sho’k mo. 
\q1 Ṯori aha/ gwoŋḵan pini kun bahu mo. 
\b  
\q1  
\v 65 /E ṯu/ulkina ṯu/ul ki ’bore/ gom c̱iŋkinam pini mo, 
\q1 ayy Tap̱a, isi ki gwom pini mo. 
\q1  
\v 66 Ṯori aha/ gwo isi ki ṯor gana/ mo mmonyiṯẖ to mo dhali moyuḵ mo, 
\q1 haali/ aha/ gamkina gwo is e gwoŋḵan pini kun ’kwarkunu mo. 
\q1  
\v 67 Nṯwa/a/ ki aha/ wo’ckunu is she/ mo tani aha/ yakina yam per mo, 
\q1 hili shwane/ aha/ dhukina gwom pini mo. 
\q1  
\v 68 /E ’bora’bor mo dhali mii mii kun ’bora’bor mo. 
\q1 Ṯori aha/ gwoŋḵan pini kun bahu mo. 
\q1  
\v 69 ’Kwani kun ushina ga/ ga/ mo tani uni ’thoḵki aha/ ka ṯor mo, 
\q1 hili ka dum pemi ’baar mo aha/ dhukina gwoŋḵan gi ’twam pini mo. 
\q1  
\v 70 Adum buni momaṯa/ momaṯ me’d ḵwalany mo, 
\q1 hili aha/ ’kunykina bwa mo e gwoŋḵan pini jin c̱inu mo. 
\q1  
\v 71 A’di ’boro’d gom aha/ ki aha/ jwakaṯkunuwa du mo 
\q1 ki aha/ mina da/ar gwoŋḵan pini kun bahu mo. 
\q1  
\v 72 Gwoŋḵan jin c̱inu ki ’twam pini mo tani a’di ’boro’d gom aha/ mo, 
\q1 mmobol ’dolkon gana/ ma alip̱ e mo dhali ’ku’kus ’dolkon kush mo. 
\b  
\q1  
\v 73 Me’d pini a’di uḵki’da uḵ mo dhali /e c̱iki aha/ jamas mo. 
\q1 C̱iyi aha/ mo jin mishu gwo ’ban mo ki aha/ mina da/ar gwoŋḵan pini kun ’kwarkunu mo. 
\q1  
\v 74 Uni gwansan kun ḵo/ki /e mo tani mini p̱ar aha/ e mo dhali ’kuny bwa mo 
\q1 haali/ aha/ tana gi mo ma ’teŋ kap̱e/ e gwom pini mo. 
\q1  
\v 75 Aha/ misha, ayy Tap̱a, ki gwon dwall pini kun toru gwon dwall ’twa/a ’cesh mo tani uni tana ḵar/e mo 
\q1 dhali /e dorki aha/ ki isa nyor ki mii ma isiŋ ganam pini mo. 
\q1  
\v 76 Dhalki mo/en pini jin ṯelu sho’k mo thoson is mo mmomalas aha/ mo 
\q1 isi ki gwom pini jin ona /e is gom c̱iŋkinam pini mo. 
\q1  
\v 77 Dhalki momiimiim pini p̱u’du’d e aha/ mo ki aha/ mina di ki e mo, 
\q1 haali/ gwoŋḵan pini jin c̱inu mo tani a’di ta jim pem jin ’kunyka/ bwa mo. 
\q1  
\v 78 Dhalki uni kun ushina ga/ ga/ mo tani idhunu ki mo ma ’the is mo 
\q1 haali/ uni ceshki aha/ ki gwo ma maḵ mo. 
\q1 Gom aha/ mo tani aha/ mina kulum gwo ibwa gom gwoŋḵan gi ’twam pini mo. 
\q1  
\v 79 Dhalki uni gwansan kun ḵo/ /e mo tani ṯu’kkina bor ki aha/ mo, 
\q1 ki uni mini mish gwonyc̱im pini mo. 
\q1  
\v 80 Dhalka dum pem a’di dar gi mii ’ba/ e gwoŋḵan pini kun bahu mo 
\q1 ki aha/ minu ’koki kar ki mo ma ’the is mo. 
\q1  
\v 81 Aḵashiram pem a’di gananki ’ba/ mo gom bway gi mowoṯẖ pini mo. 
\q1 Aha/ tana ga ’teŋ kap̱e/ gom gwom pini mo. 
\q1  
\v 82 Em pem ushi me’d mo mmoc̱or /e gom gwom pini jin ona /e is mo. 
\q1 Aha/ doṯa gwo mo ki: Kakasja sa/ imina /e imalas aha/ mo? 
\q1  
\v 83 Haali/ aha/ warkina ki ḵucaŋ gi yimana mura’th jin ’koshkin ma ku’d mo, 
\q1 hili aha/ dinaki ŋa gwoŋḵan pini kun bahu mo. 
\q1  
\v 84 Ki mo gi wakatinta imina c̱iŋkinam pini i’dim ’kup̱ mo? 
\q1 Kakasja imina /e idwall uni gwansan gwo mo uni kun ṯo’c aha/ bwa mo? 
\q1  
\v 85 ’Kwani kun ushkina ga/ ga/ mo tani uni c̱wanyki jisa ’kulga/ gom aha/ mo jin miga/ biṯi cine/ mo, 
\q1 ’kwani kun ’konuki dosh shoka ’cesh gom gwoŋḵan pini jin c̱inu mo. 
\q1  
\v 86 Aris gwoŋḵan pini kun ’kwarkunu mo tani uni shurkin mo. 
\q1 Uni ṯo’cki aha/ bwa ki gwo ma ṯor mo. Woṯẖi/ aha/ mo ma. 
\q1  
\v 87 Uni ’dishi ’twa/ mo mmo’baar aha/ ’peni mony’cesh yan mo 
\q1 hili aha/ dinaki ŋa gwoŋḵan gi ’twam pini mo. 
\q1  
\v 88 E mo/en pini jin ṯelu sho’k mo tani ’tashi mondiki/em pem ’twa/ mo 
\q1 ki aha/ mina dhu gwonyc̱im pini gi ’twam pini mo. 
\b  
\q1  
\v 89 Gom ki sule/ sule/ mo tani, ayy Tap̱a, gwom pini 
\q1 a’di irwa’ckunu mo mmothosonkunu uni mo e momis mo. 
\q1  
\v 90 Mii ma isiŋ ganam pini i’dimki ’kup̱ ki sule/ sule/ eya risa nyaḵum yil gi ’kwani mo. 
\q1 /E ṯelki mony’cesh sho’k mo dhali a’di doshki’d ki sho’k piti mo. 
\q1  
\v 91 Ki miim pini kun dhukina /e uni ’pen ka pije/ mo tani uni doshkin shwane/ mo. 
\q1 Haali/ aris to ’baar mo tani uni ta c̱iŋkinam pini mo. 
\q1  
\v 92 Waḵki/ gwoŋḵan pini jin c̱inu midi ’taki diki ta jim pem jin ’kunyka/ bwa mo tani, 
\q1 aha/ minu ’taki ’ce’d sho’k e tom pem jin ṯocaa/ bwa mo. 
\q1  
\v 93 Aha/ mina mol ŋa gwoŋḵan gi ’twam pini ki sule/ sule/ mo, 
\q1 haali/ ki uni mo tani /e c̱iki aha/ mondiki/e mo. 
\q1  
\v 94 Aha/ tana jim pini mo. Tayi aha/ is ki me’d mo 
\q1 haali/ aha/ ŋap̱kina gwoŋḵan gi ’twam pini mo. 
\q1  
\v 95 Imanmii tonthus ishkin mo dhali c̱ora/ c̱or mmo’ce’d aha/ sho’k mo, 
\q1 hili aha/ hila isi gwonyc̱im pini i e mo. 
\q1  
\v 96 Aha/ hilkina gwayu/ gom a’di jin ha me’d ki isi haŋ gana/ ’baar mo, 
\q1 hili gwoŋḵan pini jin ’kwarkunu mo tani a’di ibeeyabee kagahara mo. 
\b  
\q1  
\v 97 Ayy, gwoŋḵan pini jin c̱inu mo tani enka/ kata mo sa/. 
\q1 A’di ta gwom pem jin kulumka/ ibwa isa yempa/ mo. 
\q1  
\v 98 Gwoŋḵan pini jin ’kwarkunu mo ikar aha/ mmoyuḵayuḵ kagahara mmobol ’kwani kun ta ’kup̱ ki aha/ e mo, 
\q1 haali/ a’di di’d nyaḵki aha/ isa yempa/ mo be. 
\q1  
\v 99 Aha/ misha gwo ’ban kagahara mmobola ris uni kun ṯorki aha/ gwo e mo, 
\q1 haali/ gwonyc̱im pini a’di ta jim pem jin kulumka/ ibwa mo. 
\q1  
\v 100 Aha/ mishkina gwo ’ban mo mmobol ’kwani kun cakin e mo, 
\q1 haali/ aha/ dhukina gwoŋḵan gi ’twam pini mo. 
\q1  
\v 101 Aha/ woṯẖa sho’k pem ’ba/ mo ’pena ris bway thus mo, 
\q1 gom mii gi wakan mo tani mmodhu gwom pini mo be. 
\q1  
\v 102 Aha/ dinaki ṯu’k mo ’peni gwoŋḵan pini kun onu mo, 
\q1 haali/ /e ṯorki aha/ gwo mo be. 
\q1  
\v 103 Gwom pini wana ’kuny kata si’da/ mmonyoḵka/ a’di mo. 
\q1 A’di c̱a’bki dhel dhel mmobola dham e e ’twam pem mo. 
\q1  
\v 104 E gwoŋḵan gi ’twam pini mo tani a’di ibu’thkika/ mo jin mishu gwo ’ban mo. 
\q1 A’di ishi/kika/ aris bway thusi e wakan mo. 
\q1  
\v 105 Gwom pini a’di ta’da lamba/ gom sho’k pem mo 
\q1 dhali moŋkush gom bway tur pem mo. 
\q1  
\v 106 Aha/ thulkina gwo me’da p̱o/ mo dhali o gwo is mo dhali rwa’c a’di mo 
\q1 mmomii gwoŋḵan pini kun onu mo kun tana ḵar/e mo be. 
\q1  
\v 107 Aha/ wo’ckunu is she/ mo mmobur is ki wap̱ wap̱ mo. 
\q1 C̱iyi aha/ mondiki/e mo, ayy Tap̱a, isi ki gwom pini mo. 
\q1  
\v 108 Budhi tom pem jin c̱ika/ ki me’d ki momaŋ mo, ayy Tap̱a, 
\q1 dhali ṯori aha/ gwo gom gwoŋḵan pini kun onu mo. 
\q1  
\v 109 Aha/ butha mondiki/em pem e me’d pem ki sule/ sule/ mo, 
\q1 hili aha/ dinaki ŋa gwoŋḵan pini jin c̱inu mo. 
\q1  
\v 110 ’Kwani kun ta thus ki thus mo tani uni ’thikina gume/ gom aha/ mo. 
\q1 hili aha/ dinaki per mo ’peni gwoŋḵan gi ’twam pini mo. 
\q1  
\v 111 Gwonyc̱im pini uni ta mal pem ki sule/ sule/ mo. 
\q1 Nye, uni ita mom’bor bwa goma dum pem mo. 
\q1  
\v 112 Aha/ ḵa’dkina dum pem mo mmothim gwoŋḵan pini kun bahu 
\q1 ki sule/ sule/ mo ntagi ’pemen gi mony’cesh mo. 
\b  
\q1  
\v 113 Aha/ shi/kina ’kwani kun ’kona bwa ka susu/ i e mo, 
\q1 hili aha/ enkina gwoŋḵan pini jin c̱inu mo. 
\q1  
\v 114 /E ta mo jin bagka/ mo dhali agoŋgorom pem mo. 
\q1 Aha/ takina ga ’teŋ kap̱e/ e gwom pini mo. 
\q1  
\v 115 Iiku/ mo ’peni aha/ mo um kun mii to kun ta thus ki thus mo, 
\q1 ki aha/ mina ’taki dhu gwoŋḵan ma Arumgimis pem kun ’kwarkunu mo. 
\q1  
\v 116 Budhi aha/ mo isi ki gwom pini jin ona /e is mo ki aha/ mina di ki e mo, 
\q1 dhali dhalku/ ki dhal aha/ bway mo ki aha/ minu kar ki mo ma ’the is mo gom mom pem jin taka/ ga ’teŋ kap̱e/ mo. 
\q1  
\v 117 ’Deki aha/ ki mis mo ki aha/ mina ’taki di ki ’dantar mo 
\q1 dhali mii gwoŋḵan pini kun bahu ki sule/ sule/ mo. 
\q1  
\v 118 /E waḵkina ris uni kun perkin mo ’peni gwoŋḵan pini kun bahu mo, 
\q1 nye, mo jin laṯa/ uniya laṯ e mo tani a’di di bwa ’te/ mo. 
\q1  
\v 119 Aris imanmii tonthus gi mony’cesh mo tani /e ki deŋ uni e me’d wushulan to mo. 
\q1 Wakan aha/ ena gwonyc̱im pini mo. 
\q1  
\v 120 Buŋgwar is dee’d ki bir bir gom moŋḵo/ is jin ḵo/ka/ /e mo, 
\q1 dhali aha/ ḵo/kina is kagahara gom gwon dwall pini kun toru gwon dwall ’twa/a ’cesh mo. 
\q1  
\v 121 Aha/ miikina a’di jin ta’da ḵar/e mo dhali jin ’boro’d mo. 
\q1 Dhali dhalku/ ki dhal aha/ bway mo jin mina uni gwansan kun siri’c aha/ ap̱o/ ki sho’k mo ’koki siri’c aha/ ap̱o/ ki sho’k mo. 
\q1  
\v 122 Tayi ki bwa ma ’dantar gom c̱iŋkinam pini mo, gom mom’bor piti mo. 
\q1 Dhalku/ ki dhal ’kwani kun molina gayiin ga/ bway mo mmosiri’c aha/ ap̱o/ ki sho’k mo. 
\q1  
\v 123 Em pem ushki me’d mo mmotim bway mowoṯẖ pini mo, 
\q1 dhali gom gwom pini jin minu thim jin ona /e is ki o ma ḵar/e mo. 
\q1  
\v 124 Ṯu/uli nyaḵki c̱iŋkinam pini mo isi ki gwo gi mo/en pini jin ṯelu sho’k mo, 
\q1 dhali ṯori aha/ gwo gom gwoŋḵan pini kun bahu mo. 
\q1  
\v 125 Aha/ tana c̱iŋkinam pini mo. C̱iyi aha/ mo jin mishu gwo ’ban mo 
\q1 ki aha/ mina ’taki mish gwonyc̱im pini mo. 
\q1  
\v 126 A’di ta’da tee gi Tap̱a jin mina a’di ḵal mii mo, 
\q1 haali/ gwoŋḵan pini jin c̱inu mo tani a’di ’ce’dkunu bwa mo. 
\q1  
\v 127 Wakan aha/ enkina gwoŋḵan pini kun ’kwarkunu mo 
\q1 mmobol ’dolkon e mo, dhali ’dolkon gana/ jin tashu e ki o’d ki tash gana/ mo. 
\q1  
\v 128 Wakan aha/ c̱u’thkina bway pem ’twa/ ’kup̱ ka ris gwoŋḵan gi ’twam pini mo, 
\q1 dhali aha/ shi/kina ris bway thusi e mo. 
\b  
\q1  
\v 129 Gwonyc̱im pini uni ita jaro/ ki jaro/ mo. 
\q1 Wakan aḵashiram pem idhuki uni mo be. 
\q1  
\v 130 Gwom pini kun ’ceenu mo tani uni c̱iki moŋkush mo. 
\q1 A’di c̱iki mo jin mishu gwo ’ban ki ’kwani kun tekela/ tekel mo. 
\q1  
\v 131 Ki ’twa/ jin ḵa’du/ mo tani aha/ miikina shir shir mo, 
\q1 haali/ aha/ ’koshkina ṯe/ gom gwoŋḵan pini kun ’kwarkunu mo. 
\q1  
\v 132 Ṯuki /e ’kup̱ki aha/ mo dhali miiyi mii ka ’the gom aha/ mo, 
\q1 me’d jin boṯa /e ki miim pini ’kup̱ ki uni gwansan kun enki gway pini mo be. 
\q1  
\v 133 Dhuyi sho’k pem dhali ŋaṯgin pem mmodosh ki seele/ mo isi ki gwom pini jin ona /e is mo, 
\q1 dhali dhalku/ ki dhal toŋ kamu/ jin ’coḵa’coḵ bway mo mmota tap̱a ap̱o/ aha/ mo. 
\q1  
\v 134 Wani aha/ ’ba/ mo ’peni mo jin sirica ’kwani aha/ ap̱o/ ki sho’k mo, 
\q1 ki aha/ mina ’taki dhu gwoŋḵan gi ’twam pini mo. 
\q1  
\v 135 Kari bwam/em pini mmokush mo mo ap̱o/ c̱iŋkinam pini mo, 
\q1 dhali ṯori aha/ gwo gom gwoŋḵan pini kun bahu mo. 
\q1  
\v 136 Em pem yuki jabu’th ki haw haw mo 
\q1 haali/ ’kwani ’koki dhu gwoŋḵan pini jin c̱inu mo be. 
\b  
\q1  
\v 137 Aḵar/e itana /e mo, ayy Tap̱a, 
\q1 dhali /e tana ḵar/e ki gwon dwall pini jin toru gwon dwall ’twa/a ’cesh mo. 
\q1  
\v 138 /E dhuki gwonyc̱im pini ’pen ka pije/ mo e mii ma ḵar/e mo 
\q1 dhali eya ris mii ma isiŋ ganam pini mo. 
\q1  
\v 139 Anyor pem shwaki aha/ mo 
\q1 haali/ uni kun ta ’kup̱ ki aha/ mo tani uni ŋaki gwom pini mo. 
\q1  
\v 140 Gwom pini jin ona /e is mo tani a’di nyo/u ki nyo/ gana/ mo, 
\q1 dhali c̱iŋkinam pini enki a’di mo be. 
\q1  
\v 141 Aha/ gwa’da ki gwa’d mo dhali waḵkunu mo, 
\q1 hili aha/ dinaki ŋa gwoŋḵan gi ’twam pini mo. 
\q1  
\v 142 Mii ma ḵar/em pini uni itana ḵar/e ki sule/ sule/ mo, 
\q1 dhali gwoŋḵan pini jin c̱inu mo tani a’di ita jiŋ gana/ mo. 
\q1  
\v 143 Monṯo’c bwa dhali mo jin ’pe’du/ she/ mo uni p̱u’dkina p̱o/ aha/ mo, 
\q1 hili gwoŋḵan pini kun ’kwarkunu mo tani uni ita kum pem kun ’kunyka/ bwa mo. 
\q1  
\v 144 Gwonyc̱im pini uni tana ḵar/e ki sule/ sule/ mo. 
\q1 C̱iyi aha/ mo jin mishu gwo ’ban mo ki aha/ mina di ki e mo. 
\q1  
\v 145 Ka dum pemi ’baar mo tani aha/ gwokina mo. Thoḵi aha/ ’twa/ mo ma, ayy Tap̱a mo. 
\q1 Aha/ mina dhu gwoŋḵan pini kun bahu mo. 
\q1  
\v 146 Aha/ gwona ’twa/ i /e mo. Tayi aha/ is ki me’d mo 
\q1 ki aha/ mina ’taki mii gwonyc̱im pini mo. 
\q1  
\v 147 Aha/ cukina mis mmosul mon’twash/e bway mo dhali ko gom mowoṯẖ mo. 
\q1 Aha/ tana gi mo ma ’teŋ kap̱e/ e gwom pini mo. 
\q1  
\v 148 Em pem di’d ki e ki wal wal mo mmotim mo gi mon’thiny ki mombwam/e mo 
\q1 ki aha/ mina ’taki kulum gwo ibwa gom gwom pini jin ona /e is mo. 
\q1  
\v 149 Ciḵi ’twa/ pem mo e mo/en pini jin ṯelu sho’k mo, 
\q1 ayy Tap̱a, e mii ma ḵar/em pini mo tani ’tashi mondiki/em pem ’twa/ mo. 
\q1  
\v 150 Uni pamki mo ki is ki ’dish ’dish mo uni gun ṯo’cki aha/ bwa mo ki to kun ta thus ki thus ’te/ ka kar ’kup̱ mo. 
\q1 Uni si’dasi’d ’peni gwoŋḵan pini jin c̱inu mo. 
\q1  
\v 151 Hili /e a’di i’disha’dish mo, ayy Tap̱a, 
\q1 dhali aris gwoŋḵan pini ’baar kun ’kwarkunu mo tani uni ta kuŋ gana/ mo be. 
\q1  
\v 152 ’Peni kadhamoonnii mo tani aha/ mishkina gwonyc̱im pini mo 
\q1 ki /e ḵa’bki uni ki sule/ sule/ mo. 
\q1  
\v 153 Hili monṯo’c bwam pem mo dhali ’cuḵ aha/ mo 
\q1 haali/ aha/ dinaki ŋa gwoŋḵan pini jin c̱inu mo. 
\q1  
\v 154 Woṯẖi/ gwo is gom tom pem jin raḵaa/ mo dhali wani aha/ ’ba/ mo. 
\q1 C̱iyi aha/ mondiki/e isi ki gwom pini jin ona /e is mo. 
\q1  
\v 155 Bway gi mowoṯẖ a’di si’dasi’d ’peni a’di jin ta thus ki thus mo be 
\q1 haali/ uni ’koki simm gwoŋḵan pini kun bahu e mo. 
\q1  
\v 156 Dhan momiimiim pini a’di caaca mo, ayy Tap̱a. 
\q1 C̱iyi aha/ mondiki/e isi ki gwo gi mii ma ḵar/em pini mo. 
\q1  
\v 157 ’Kwani tana ris ka ris kun ta imanṯo’c aha/ bwa mo dhali ta imanta ’kup̱ ki aha/ mo, 
\q1 hili aha/ dinaki gu is mo ’peni gwonyc̱im pini mo. 
\q1  
\v 158 Aha/ hila mo ki hil ap̱o/ uni kun dar gi gwo jin gamu is mo dhali o gwo waḵ mo, 
\q1 haali/ uni ’koki dhu gwoŋḵan pini jin ḵana /eya ḵan mo. 
\q1  
\v 159 Hili isi gwo i e mo ma. Gwoŋḵan gi ’twam pini si’da/ enka/ kata mo. 
\q1 ’Tashi mondiki/em pem ’twa/ mo isi ki gwo gi mo/en pini jin ṯelu sho’k mo. 
\q1  
\v 160 Gumm gwom pini a’di ita gwoŋ gana/ mo 
\q1 dhali aris gwoŋḵan pini kun onu ’baar ka ’deṯe/ ’deṯe/ mo tani uni ita kuŋ ḵar/e mo dhali uni ’dimki ’kup̱ ki sule/ sule/ mo. 
\q1  
\v 161 Iya/ ma maliḵ uni ṯo’cki aha/ bwa ka wuny is kan mo, 
\q1 hili adum pem doshki’d ki moŋḵo/ is gom gwom pini mo. 
\q1  
\v 162 Aha/ ’kunykina bwa e gwom pini mo 
\q1 mmowa e ki jan ’de/ jin gamki dhan to jin caaca jin dilu mo. 
\q1  
\v 163 Aha/ shina shi/ i e mo dhali ’te bwa ki gwon thus mo, 
\q1 hili aha/ ena gwoŋḵan pini jin c̱inu mo. 
\q1  
\v 164 Me’di pesu/ ka tee mo tani aha/ maŋkina /e mo 
\q1 goma ḵar/em pini jin tana /e gom gwoŋḵan pini kun onu mo. 
\q1  
\v 165 Dhan moŋḵu’th is jin caaca tana uni gwansan kun enki gwoŋḵan pini jin c̱inu mo. 
\q1 To p̱iyi’d jin midi kol uni mo. 
\q1  
\v 166 Aha/ tana gi mo ma ’teŋ kap̱e/ gom bway gi mowoṯẖ pini mo, ayy Tap̱a, 
\q1 dhali aha/ miina gwoŋḵan pini kun ’kwarkunu mo. 
\q1  
\v 167 Aḵashiram pem dhu gwonyc̱im pini mo. 
\q1 Aha/ ena uni ki en jin shi/ashi/ mo. 
\q1  
\v 168 Aha/ dhuna gwoŋḵan gi ’twam pini mo dhali gwonyc̱im pini mo, 
\q1 haali/ aris bway pemi ’baar mo tani uni ’koni bwambori /e mo be. 
\b  
\q1  
\v 169 Dhalki gwom pem p̱u’dki’di bwambori /e mo, ayy Tap̱a. 
\q1 C̱iyi aha/ mo jin mishu gwo ’ban isi ki gwom pini mo. 
\q1  
\v 170 Dhalki tom pem jin ’thoka/ ka di’b is p̱u’dki’di bwambori /e mo. 
\q1 ’Cuḵi aha/ mo isi ki gwom pini mo. 
\q1  
\v 171 ’Twa/ pem midi wol mo jin maŋuwa maŋ mo 
\q1 ki /e ṯorki aha/ gwoŋḵan pini kun baha /e mo. 
\q1  
\v 172 Ale’d pem midi yuḵ gway gom gwom pini mo 
\q1 haali/ aris gwoŋḵan pini ’baar kun ’kwarkunu mo tani uni ta kuŋ gana/ mo. 
\q1  
\v 173 Dhalki me’d pini thoson is mo mmowoṯẖ aha/ mo 
\q1 haali/ aha/ kwanykina gwoŋḵan gi ’twam pini mo. 
\q1  
\v 174 Aha/ ’koshkina ṯe/ gom bway gi mowoṯẖ pini mo, ayy Tap̱a, 
\q1 dhali gwoŋḵan pini jin c̱inu mo tani a’di ta jim pem jin ’kunyka/ bwa mo. 
\q1  
\v 175 Dhalki aha/ dina ki e mo ki aha/ mina maŋ /e mo 
\q1 dhali dhalki gwoŋḵan pini kun onu woṯẖ aha/ mo. 
\q1  
\v 176 Aha/ yakina per mo me’d ḵa’bal jin thiski e mo. Simmi c̱iŋkinam pini e mo, 
\q1 haali/ aha/ dinaki ŋa gwoŋḵan pini kun ’kwarkunu mo. 
\c 120  
\s1 Gway jin yuḵu mmo/ii ka gagamis mo. 
\q1  
\v 1 E mo ma c̱is mo tani aha/ gwokina ’twa/i Tap̱a mo, 
\q1 ki a’di midi ’taki thoḵ aha/ ’twa/ mo. 
\q1  
\v 2 ’Cuḵi aha/ mo, ayy Tap̱a, 
\q1 ’peni ’twa/ pem jin ta’da ṯor mo, 
\q1 dhali ’pena le’d pem jin he’kki’da he’k e mo. 
\q1  
\v 3 Ata a’di iminu c̱i /e mo? 
\q1 Dhali tonta a’di iminu mii gom /e mo, 
\q1 /e jin tana le’d jin he’kki’da he’k e mo? 
\q1  
\v 4 Athop̱a/ jin kaaka jin ḵala wathi/ ma mee 
\q1 nyaḵka ’cila’th o’d jin shwa’d ki bar bar mo ’peni cwa jin wana e ka shilgwalish mo. 
\b  
\q1  
\v 5 Wayyi e aha/ ki aha/ yakina yanyc̱a/ e Pam Maashik mo, 
\q1 ki aha/ c̱a’bkina e bwaman gu’b burrinye/ ma Gidar mo. 
\q1  
\v 6 Ki rash rash mo tani aha/ c̱a’bkina 
\q1 e bwaman uni gwansan kun shi/ki moŋḵu’th isi e mo. 
\q1  
\v 7 Aha/ tana gom moŋḵu’th is mo, 
\q1 hili ki aha/ okina gwo mo tani 
\q1 uni ŋap̱kina nyor mo. 
\c 121  
\s1 Gway jin yuḵu mmo/ii ka gagamis mo. 
\q1  
\v 1 Aha/ ’deka em pem ’kup̱ ki wosh kun turatur mo. 
\q1 ’Peni mana imina woṯẖ pem ip̱u’du/ mo? 
\q1  
\v 2 Mowoṯẖ pem p̱u’dki’d ’peni Tap̱a mo, 
\q1 a’di jin uḵki momis dhali mony’cesh mo. 
\q1  
\v 3 A’di midi diki dhal sho’k pini bway ki a’di minu joc̱ mo, 
\q1 a’di yan jin kar /e mo tani mina e diki ’ce’d mo. 
\q1  
\v 4 Hili mo mo ma, a’di jin dhu ’Kwani ma Israyiil mo tani 
\q1 a’di mina e diki ’ce’d mo walla midi diki ish e mo. 
\q1  
\v 5 Tap̱a a’di ita’da mankar /e mo. 
\q1 Tap̱a a’di ita’da la goma bim poros pini mo. 
\q1  
\v 6 Atente/ midi diki ’kosh /e montee mo 
\q1 walla appe midi diki ’kosh /e mon’thiny mo. 
\q1  
\v 7 Tap̱a midi kar /e ’pena ris tonthusi ’baar mo. 
\q1 A’di midi kar mondiki/em pini mo. 
\q1  
\v 8 Tap̱a a’di imidi kara kar mo gom yam pini jin mina /e ya ka pije/ mo dhali kul pini jin mina /e kulu/ ka nyaŋ’ko’d mo, 
\q1 ’pena tee yansan mo dhali ki sule/ sule/ ya ye ’ba/ mo. 
\c 122  
\s1 Gway ma Dawuu’d jin ta gway jin yuḵu mmo/ii ka gagamis mo. 
\q1  
\v 1 Aha/ ’bora bwa ki ’bor mo mmo/ona uni aha/ gwo mo ki: 
\q1 Dhalki ana iina gu’b gi Tap̱a mo. 
\q1  
\v 2 Sho’k bam uni doshkin mo 
\q1 e bwaman ma goŋ pini mo, ayy Urushaliim. 
\q1  
\v 3 Urushaliim, a’di nyaŋkunu mo mmota ’peŋkuman bampa/ mo 
\q1 a’di jin shokunu ki me’di monṯal ’de/ mo, 
\q1  
\v 4 e mo jin iikin ma waḵ gi ’kwani ’kup̱ ki mis mo, 
\q1 uni kun tana waḵ gi ’kwani gi Tap̱a mo, 
\q1 me’d gi gwoŋḵan jin ’kawurkunu mo goma Israyiil mo 
\q1 mmoc̱i mo jin ’boruwa ’bor bwa i is ki gway gi Tap̱a mo. 
\q1  
\v 5 Aḵursi ma maliḵ gom gwon dwall jin toru gwo ’twa/a ’cesh mo tani uni dhukunu imun mo, 
\q1 aḵursi ma maliḵ gom gu’b ma Dawuu’d mo. 
\b  
\q1  
\v 6 ’Thoyi gom moŋḵu’th is gi Pa Urushaliim mo. 
\q1 Dhalki uni rusa/ rus mo, uni kun enki /e mo. 
\q1  
\v 7 Dhalki mo ma ḵu’th is di’d eya goŋ ma gaŋgaram pini mo 
\q1 dhali mo ma ’dantar e bwaman mom pini kun tura e ki tur mo. 
\q1  
\v 8 Gom gway gi iwaḵ pem mo dhali uni kun nyaḵ ii ki aha/ mo tani 
\q1 aha/ mina o gwo mo ki: Moŋḵu’th is midi di e bwam um mo. 
\q1  
\v 9 Gom gway gi gu’b gi Tap̱a Arumgimis bana mo, 
\q1 aha/ mina simm tom ’boro’d pini e mo. 
\c 123  
\s1 Gway jin yuḵu mmo/ii ka gagamis mo. 
\q1  
\v 1 E /e mo tani aha/ ’deka em pem ’kup̱ ki mis mo, 
\q1 ayy /e jin dikin eya ḵursi ma maliḵ e momis mo. 
\q1  
\v 2 Hili mo mo ma, me’d jin hila e gi c̱iŋkina/ me’d gi tap̱am buni mo, 
\q1 dhali me’d jin hila e gi nyara/ me’d ma yim jin karu mmohil c̱iŋkina/ nyara/ mo tani 
\q1 wakan em bana si’da/ hil ’kup̱ ki Tap̱a Arumgimis bana mo, 
\q1 ntagi a’di midi miimii ap̱o/ ana mo. 
\b  
\q1  
\v 3 Miiyi mii ap̱o/ aman mo ma, ayy Tap̱a, miiyi mii ap̱o/ aman mo 
\q1 haali/ aman tana ga dhana waḵ jin uri ’kup̱ mo ba/. 
\q1  
\v 4 Ki rash rash mo tani aḵashiram bam ’tu’dkunu mo 
\q1 ki mo jin ṯẖunyu aman ’twa/ i is mo ki uni gwansan kun ’ko ki ’ko ’penkap̱an mo, 
\q1 ka waḵ buni uni gun dhu is buni ki ca mo. 
\c 124  
\s1 Gway ma Dawuu’d jin ta gway jin yuḵu mmo/ii ka gagamis mo. 
\q1  
\v 1 Waḵki/ a’di midi diki ’taki ta Tap̱a jin di’di ’ko’d gwar bana mo tani, 
\q1 dhalka Israyiil o gwo mo shwane/ – 
\q1  
\v 2 waḵki/ a’di midi diki ’taki ta Tap̱a jin di’di ’ko’d gwar bana mo shwane/ 
\q1 ki ’kwani ’kon mmocu mis ap̱o/ ana mo, 
\q1  
\v 3 dhali yan’ko’d uni mini ’taki los ana ki ’kolo’c ki e mo, 
\q1 ka nyor buni jin ’thakina uni ap̱o/ ana mo. 
\q1  
\v 4 Dhali yan’ko’d agannu/ yi’de/ midi ’taki dhi’th ana sho’k ka pupush mo, 
\q1 dhali yi’de/ jin mishi’da ŋwac̱a/ midi ’taki kum ana ’twa/a ’cesh mo, 
\q1  
\v 5 dhali yan’ko’da p̱o/ ana mo tani yi’de/ jin wuluski eŋ ḵuthar mo. 
\b  
\q1  
\v 6 Mom’bor mii gom Tap̱a mo, 
\q1 a’di jin diki c̱i ana 
\q1 ki shem buni mmo’kwar mo. 
\q1  
\v 7 Ana yekina me’d ’dii 
\q1 ’pena gume/ ma mancesh to jin cesha a’di to mo, 
\q1 dhala gume/ ’ce’dki bwa mo 
\q1 dhali ana yekina mo. 
\q1  
\v 8 Mowoṯẖ bana a’di diki’d e gway gi Tap̱a mo, 
\q1 a’di jin uḵki momis dhali mony’cesh mo. 
\c 125  
\s1 Gway jin yuḵu mmo/ii ka gagamis mo. 
\q1  
\v 1 Uni gwansan kun gami gwo is e Tap̱a mo tani uni wana e ki ’Kuwosh ma Sihyuun mo, 
\q1 a’di jin molu joc̱ mo, hili a’di c̱a’bki’d ki sule/ sule/ ya ye ’ba/ mo. 
\q1  
\v 2 Me’da ris wosha turga/ kun ’kamki Pa Urushaliim is mo, 
\q1 wakan si’da/ Tap̱a midi ’kam ’kwanim piti is mo, 
\q1 ’pena tee yansan gana/ mo dhali ki sule/ sule/ mo. 
\q1  
\v 3 Dhali cwa ma maliḵ gom uni kun ta thus ki thus mo tani midi diki di mo 
\q1 ap̱o/ mony’cesh jin karu gom ’kwani kun tana ḵar/e mo, 
\q1 isi ciki/ uni gun dhunu ka ḵar/e mini dhu me’d buni mmotham to mii mo. 
\q1  
\v 4 Miiyi ki ’bore/ mo, ayy Tap̱a, gom uni gwansan kun ’bora’bor mo, 
\q1 dhali gom uni gwansan kun dhelel ma dum buni ki dhelel mo. 
\q1  
\v 5 Hili uni gwansan kun ṯu’kkin mo e bway buni kun wanycara/ wanycar mo tani 
\q1 Tap̱a midi shu uni bway nyaḵki uni gun mii to kun ta thus ki thus mo. 
\q1 Moŋḵu’th is midi di goma Israyiil mo. 
\c 126  
\s1 Gway jin yuḵu mmo/ii ka gagamis mo. 
\q1  
\v 1 Ki Tap̱a warki’da shamaneṯṯan ma Sihyuun is mo tani 
\q1 ana wana e ki uni gwansan kun shu’bki jan mo. 
\q1  
\v 2 Yan’ko’d ’twam bana ’tu’dkunu ki piny piny ki momp̱e’th mo, 
\q1 dhali ale’d bana a’di ḵumki cuuwa/ gom moŋ’kuny bwa mo. 
\q1 Dhali yan’ko’d uni oki gwo e bwaman kal gi ’kwanin tiya mo ki: 
\q1 Tap̱a miiki dhan to jin caaca gom uni mo be. 
\q1  
\v 3 Tap̱a miiki dhan to jin caaca gom ana mo be. 
\q1 Ana ’borkina bwa mo. 
\b  
\q1  
\v 4 Wara shamaneṯṯan bam is mo ma, ayy Tap̱a, 
\q1 mmowa e ki boṯan yi’de/ e mo ma Januub mo. 
\q1  
\v 5 Dhalki uni gwansan kun si to ki kony jabu’th mo tani 
\q1 dhalki uni ’ciṯẖ to ki cuuwa/ jin ḵumu/ ki bwaŋ ’kunyka/ mo. 
\q1  
\v 6 A’diyin jin yaki gwolu/ 
\q1 mmoḵal emen to mmosi mo tani 
\q1 midi kulu/ bway pa ki cuuwa/ jin ’thera a’di ki bwaŋ ’kunyka/ mo, 
\q1 mmoḵali cwalman maman to jin sina a’di mo. 
\c 127  
\s1 Gway jin yuḵu mmo/ii ka gagamis mo. Gway ma Sulemaan. 
\q1  
\v 1 Isi ciki/ waḵki/ Tap̱a midi nyaŋ gu’b yan mo tani uni gwansan kun nyaŋ a’di mo tani uni miikina ṯu’c ki p̱e’th mo. 
\q1 Isi ciki/ waḵki/ Tap̱a ki tima p̱o/ ’peŋkuman bampa/ mo tani 
\q1 amantim mo mo tani diki’d ki e ki p̱e’th mo. 
\q1  
\v 2 A’di ta miim p̱e’th be ki /e mini cu mis ki jahanne/ mon’thamo/ mo, dhali c̱a’b mmota adiiṯe/ mmosi/is mo, 
\q1 dhali mmoshwa tonṯe/ mo ’peni mii jin miinu a’di ki mo/anan is mo, 
\q1 haali/ a’di c̱iki unim piti kun ena a’di mo tani mo/ish e mo. 
\b  
\q1  
\v 3 Hili mo mo ma, iya/ gi ’kwani uni ta mal ’peni Tap̱a mo, 
\q1 maman ’peni bwa ma dho’th mo tani a’di i/ishki ḵumma/ mo. 
\q1  
\v 4 Me’da thop̱a/ e me’d ma man/as mo tani 
\q1 a’di wana e ki iya/ gi uni gun ta dhuru’c ki dhuru’c mo. 
\q1  
\v 5 Mom’bor mii gom wathi/ jin ’tu’dki’da kulp̱em piti ki uni mo. 
\q1 A’di minu ’koki kar ki mo ma ’the is mo 
\q1 ki a’di midi ṯora ṯor ka ris ’kwaniŋ ’kup̱ piti mo e ’twaŋkala goŋ mo. 
\c 128  
\s1 Gway jin yuḵu mmo/ii ka gagamis mo. 
\q1  
\v 1 Mom’bor mii goma ris uni ’baar ka ’deṯe/ ’deṯe/ kun ḵo/ki Tap̱a mo, 
\q1 a’di jin yaki’d e bway piti mo. 
\q1  
\v 2 /E mini shwa maman cwa ma ṯu’c ki me’d pini mo, 
\q1 dhali /e mina bwa ’bor mo, dhali a’di midi ha me’d gom /e mo. 
\q1  
\v 3 Ashim pini a’di mina e waki cwa jin dho’th maman mo 
\q1 e bwaŋ gu’b pini mo. 
\q1 Uc̱im pini uni mina e waki cwa seṯuun kun ’kan ki biṯẖi/ biṯẖi/ 
\q1 mmo’kama tharabeesam pini is mo. 
\q1  
\v 4 Hili mo mo ma, wakan wathi/ minu ’bor mii mo, 
\q1 a’di jin ḵo/ki Tap̱a mo. 
\b  
\q1  
\v 5 Tap̱a ’borki /e mii mo ’pena Sihyuun mo. 
\q1 Dhalki /e p̱ari mo jin midi rusa/ rus e gom Pa Urushaliim mo 
\q1 ka risa tee gi mondiki/em pini ’baar mo. 
\q1  
\v 6 Dhalki /e hili uc̱i gi uc̱im pini mo. 
\q1 Moŋḵu’th is midi di ap̱owa Israyiil mo. 
\c 129  
\s1 Gway jin yuḵu mmo/ii ka gagamis mo. 
\q1  
\v 1 Ka daran duŋ gana/ mo tani uni wo’cki aha/ is she/ mo ’peni dhuru’c pem jin taka/ mo, 
\q1 dhalka Israyiil o gwo wakan shwane/ mo – 
\q1  
\v 2 Ka daran duŋ gana/ mo tani uni wo’cki aha/ is she/ mo ’peni dhuru’c pem jin taka/ mo, 
\q1 hili uni ’koki p̱i gwo jip̱i/ ap̱o/ aha/ mo. 
\q1  
\v 3 Imangora ’cesh uni gorkina ’cesha p̱owa p̱om pem mo. 
\q1 Dhali uni dherki gwan’thim buni ki tur tur mo. 
\q1  
\v 4 Tap̱a a’di ta’da ḵar/e mo. 
\q1 A’di ’ciṯẖki’da shi/ gi ’kwani kun ta thus ki thus bwa mo. 
\q1  
\v 5 Dhalki uni gwansan kun shi/kina Sihyuuni e mo tani 
\q1 dhunu ki mo ma ’the is mo dhali dhuwa bor ki tar mo. 
\q1  
\v 6 Dhalki uni wana e ka shoŋ ’kuŋgu’b mo 
\q1 kun ḵu’thkin mo iṯwa/a/ ki uni ’koki ca mo, 
\q1  
\v 7 a’di jin din ma man’ciṯẖ to ki ’tu’d me’d piti mo, 
\q1 walla aman’de’k cwalman maman to ki ḵala bor piti mo, 
\q1  
\v 8 ki ’kwani gwansan kun iin mo mmope a’di mo tani ’koki o gwo mo ki: 
\q1 Mom’bor mii gi Tap̱a midi di ap̱o/ /e mo. 
\q1 Aman ’bora /e mii ki gway gi Tap̱a mo. 
\c 130  
\s1 Gway jin yuḵu mmo/ii ka gagamis mo. 
\q1  
\v 1 ’Peni mo jin ’kula’kul mo tani aha/ gwokina ’twa/ e /e mo, ayy Tap̱a. 
\q1  
\v 2 Tap̱a, ciḵi ’twa/ pem mo ma. 
\q1 Dhalki ’cem pini c̱i’da hirdhe/ mo 
\q1 ki ’twa/ pem jin ’thoka/ to ka di’b me’di is mo. 
\q1  
\v 3 Ayy Tap̱a, waḵki/ /e mini ’taki nyiṯẖa ris mony’coḵka/ mo tani 
\q1 Tap̱a, kaja a’di imidi dosh mo? 
\q1  
\v 4 Hili mo jin gwamkina /eya gwam mo tani di’d e /e mo, 
\q1 ki /e a’di minu ’taki ḵo/ moyi. 
\b  
\q1  
\v 5 Aha/ c̱orkina Tap̱a mo, aḵashiram pem c̱orki’da c̱or mo 
\q1 dhali e gwom pini mo tani aha/ tana ga ’teŋ kap̱e/ mo. 
\q1  
\v 6 Aḵashiram pem c̱orki Tap̱a mo 
\q1 mmobola ris ’kwani kun thimki mon’thamo/ e mo, 
\q1 mmobola ris ’kwani kun thimki mon’thamo/ e mo. 
\q1  
\v 7 Ayy Israyiil, tayi gi mo ma ’teŋ kap̱e/ e Tap̱a mo. 
\q1 Haali/ gom Tap̱a mo tani mo/en jin ṯelu sho’k diki’d mo 
\q1 dhali e a’di mo tani mo ma enthus jin wanuwa wan ’ba/ ishki’d mo. 
\q1  
\v 8 Dhali a’di midi wana Israyiil ’ba/ mo 
\q1 ’pena ris miim piti kun ’coḵa’coḵ mo. 
\c 131  
\s1 Gway jin yuḵu mmo/ii ka gagamis mo. Gway ma Dawuu’d. 
\q1  
\v 1 Ayy Tap̱a, adum pem ’konuki ’de’k ki mis mo dhali em pem ’konuki ’de’k ’kup̱ ki mo jin ḵa’dama/ ḵa’dam gara/ be. 
\q1 Buŋgwar is pem diki jar e ki dhan to kun caaca gara/ mo 
\q1 dhali ki to kun ta to mer gom aha/ gara/ mo. 
\q1  
\v 2 Hili aha/ c̱a’bkina ki dwam mo dhali kara ḵashiram pem ki shwamm mo, 
\q1 me’da ’ci jin karkina kum ki shwamm mmoc̱iya ko eya bor piti mo. 
\q1 Me’da ’ci jin karkunu ki shwamm mo tani aha/ kara ḵashiram pem ki shwamm mo be. 
\q1  
\v 3 Ayy Israyiil, tayi gi mo ma ’teŋ kap̱e/ e Tap̱a mo 
\q1 ’peni mo yansan shwane/ mo dhali ki sule/ sule/ mo. 
\c 132  
\s1 Gway jin yuḵu mmo/ii ka gagamis mo. 
\q1  
\v 1 Kayi gwo e mo ma, ayy Tap̱a, goma ’the goma Dawuu’d mo, 
\q1 aris to ’baar mo kun ’batha’ba’th kun ’dimkina a’di ’kup̱ mo, 
\q1  
\v 2 ba a’di thulki gwo me’da p̱o/ e Tap̱a mo 
\q1 dhali o gwo is ki A’di ma Dem Dem ma Yakuub mo, mmo/o gwo mo ki: 
\q1  
\v 3 Aha/ mina mol cic̱ gu’b pem mo, 
\q1 walla ish eya p̱owa cim pem mo, 
\q1  
\v 4 dhali aha/ mina diki c̱i is pem ki e mmo/ish mo, 
\q1 walla dhal moŋ’ko’d em pem bway mmo’ce’d e mo, 
\q1  
\v 5 ntagi aha/ mina gam mo gom Tap̱a mo, 
\q1 mo jin mina A’di ma Dem Dem ma Yakuub ic̱a’b mo. 
\b  
\q1  
\v 6 Hili mo mo ma, aman ciḵkina gwo mo ’pena Ap̱raatah, 
\q1 dhali aman gamkina a’di mo e bwam bunto ma Waar mo. 
\q1  
\v 7 Dhalki ana iina mo e mom piti jin c̱a’ba a’di mo. 
\q1 Dhalki ana luŋa a’di e cwam piti jin dhuna a’di sho’k mo. 
\q1  
\v 8 Cuyi mis mo ma, ayy Tap̱a, dhali yayi mo e mom pini jin mina /e ishi/ is mo, 
\q1 /e dhali Sanduuḵ gi mo ma dem dem pini mo. 
\q1  
\v 9 Dhalki igasiis pini uni shumkunu ki mo ma ḵar/e mo, 
\q1 dhali dhalki unim pini kun dhunu ki she/ ki dhelel dhelel ḵum cuuwa/ gom bwaŋ ’kunyka/ mo. 
\q1  
\v 10 Gom gway ma Dawuu’d jin ta c̱iŋkinam pini mo tani 
\q1 dhalku/ ki ṯu’k bwam/em pini ’peni a’dim pini jin ’koshkina /e ki monyca mo. 
\b  
\q1  
\v 11 Tap̱a a’di thulki’da Dawuu’d gwo me’da p̱o/ ki isi oŋ gana/ mo, 
\q1 ’peni gwo jin mina a’di diki doḵ ka nyaŋ’ko’d mo, mmo/o gwo mo ki: 
\q1 Jan ṯal ’de/ ’peni iya/m pini gi buŋgwar is pini mo tani 
\q1 a’di miga/ kara p̱o/ ḵursi ma maliḵ pini mo. 
\q1  
\v 12 Waḵki/ iya/m pini mini dhu gwom pem jin gamu me’d mo 
\q1 dhali gwonyc̱im pem kun miga/ ṯor uni mo tani 
\q1 iya/m buni si’da/ ki sule/ sule/ mo mini ’kowa p̱o/ ḵursi ma maliḵ pini mo. 
\b  
\q1  
\v 13 Haali/ Tap̱a a’di kwanyki’da Sihyuun mo. 
\q1 Dhali a’di ona bwa ki a’di ki o jin shiyi’d mo gom mom piti mo be. 
\q1  
\v 14 Mo yansan a’di ta mom pem jin miga/ si/ is ki sule/ sule/ mo. 
\q1 Mmahan imiga/ c̱a’b mo haali/ aha/ ona bwa ki a’di mo be. 
\q1  
\v 15 Dhali aha/ mina ’bor mo ma yim mii ka enthus gom to kun minu c̱i a’di mo. 
\q1 Aha/ mina kap̱ ’kwani ma ha’th’ko’d ma yima du ki tonṯe/ mo. 
\q1  
\v 16 Igasiis ma yim mo tani aha/ mina hi’th uni ki bway mowoṯẖ mo 
\q1 dhali uni ma yim kun dhunu ki she/ ki dhelel dhelel mo tani mini ḵum cuuwa/ ki moŋ’kuny bwa mo. 
\q1  
\v 17 Imun mo tani aha/ mina dhal ce ma Dawuu’d mmo’ka ale/ gom a’di mo. 
\q1 Aha/ thosonkina lamba/ gom a’dim pem jin ’koshka/ ki monyca mo. 
\q1  
\v 18 Kwaniŋ ’kup̱ piti mo tani aha/ mina shum uni ki mo ma ’the is mo 
\q1 hili ap̱o/ is piti mo tani toŋ’kup̱ piti a’di midi dhel mo ki ra/ ra/ mo. 
\c 133  
\s1 Gway jin yuḵu mmo/ii ka gagamis mo. 
\q1  
\v 1 Hili mo mo ma, wa’di ’bora dhali bwaŋ ’kunyu’d wakata sa/ 
\q1 ki ’kwani kun ta ikam mmonyaḵ ’ko ki isa ṯal ’de/ mo. 
\q1  
\v 2 A’di wana e ka yin jin ta yinthoŋ gana/ jin wolu i’kup̱ mo, 
\q1 mmogus ka ’cesh mmothul ka halan’twa/ mo, 
\q1 ap̱owa halan’twa/ ma Haruun mo, 
\q1 dhali mmogus ka ’cesh mmothul ka yup̱en ’twaman burrinyem p̱om piti mo. 
\q1  
\v 3 Dhali a’di wana e ki jap̱e/ gi Pan Harmuun mo, 
\q1 a’di jin ṯa’kki’da p̱o/ ’Kuwosha turga/ ma Sihyuun mo. 
\q1 Haali/ Tap̱a ḵanki mo jin ’boru mii e maṯṯaan mo, 
\q1 gom mondiki/e ki sule/ sule/ ya ye ’ba/ mo. 
\c 134  
\s1 Gway jin yuḵu mmo/ii ka gagamis mo. 
\q1  
\v 1 Iiyu/ mo, ’bori Tap̱a mii mo, 
\q1 aris um ’baar mo kun ta c̱iŋkina/ gi Tap̱a mo, 
\q1 um kun doshkin mon’thiny e gu’b gi Tap̱a mo. 
\q1  
\v 2 ’Deki me’d bum ’kup̱ ki mis ki mo jin ḵogu mo, 
\q1 dhali ’bori Tap̱a mii mo. 
\q1  
\v 3 Dhalki Tap̱a ’bor um mii ’pena Sihyuun mo, 
\q1 a’di jin uḵki momis dhali mony’cesh mo. 
\c 135  
\q1  
\v 1 Maŋi Tap̱a mo. 
\q1 Maŋi gway gi Tap̱a mo, 
\q1 c̱iyi momaŋ mo, ayy um c̱iŋkina/ gi Tap̱a mo, 
\q1  
\v 2 um kun doshkin e gu’b gi Tap̱a mo, 
\q1 dhali e gu’b ma pije/ jin di ’kup̱ ḵany ma Arumgimis bana mo. 
\q1  
\v 3 Maŋi Tap̱a mo, haali/ Tap̱a a’di i’bora’bor mo. 
\q1 Yuḵi gway gom gway piti mo, haali/ a’di ita’da manmii mii ga ’the mo. 
\q1  
\v 4 Haali/ Tap̱a kwanyki’da Yakuub gom is piti mo, 
\q1 Israyiil ita jim pitiŋ gana/ jin cila a’di mo. 
\q1  
\v 5 Haali/ aha/ misha Tap̱a ki a’di caaca mo 
\q1 dhali Tap̱am bana a’di di’da p̱owa risa rumi ’baar mo. 
\q1  
\v 6 Aris to gunn kun ’bori Tap̱a bwa mo tani uni miina a’di mo, 
\q1 e momis mo dhali e mony’cesh mo, 
\q1 dhali eya ris ḵumma/ yi’de/ mo dhali aris moŋ’kulga/ mo. 
\q1  
\v 7 A’di jin dhuki’da raḵ mmocu mo e mo jin dina mony’cesh ’kup̱ mo, 
\q1 a’di jin uḵki’da wara sho’k goma sho’k mo 
\q1 dhali a’di jin ḵalki ’tham ’peni moŋgu’b piti jin dhuna a’di uni mo. 
\b  
\q1  
\v 8 A’di ta a’di jin ’koshki’da bwanyara/ gi ’Kwani gi Pam Masir mo, 
\q1 kun tana bwanyara/ gi ’kwaniny’cesh dhali to/e mo, 
\q1  
\v 9 a’di jin diki’di bwaman /e mo, ayy Masir, 
\q1 jin hashki jamas mii mo dhali momer mo 
\q1 ap̱owa P̱irawn dhali aris c̱iŋkinam piti mo, 
\q1  
\v 10 a’di jin ’koshki’da ris kal gi ’kwaniny’cesh mo, 
\q1 dhali ’kosh imaliḵ kun c̱a’bki dem dem mo, 
\q1  
\v 11 Siihuun jin ta’da maliḵ gi ’Kwani Amuur 
\q1 dhala Uuj jin ta’da maliḵ gi Pam Bashan mo, 
\q1 dhala ris ’peŋkuman bampa/ gi Paŋ Kanaan mo, 
\q1  
\v 12 dhali c̱i mony’cesh buni mmota mal, 
\q1 mmota mal gi ’kwanim piti kun ta ku ma Israyiil mo. 
\b  
\q1  
\v 13 Gway pini, ayy Tap̱a i’dimki ’kup̱ ki sule/ sule/ mo, 
\q1 /e mishu maŋ mo, ayy Tap̱a, ka ris ’kwani ma nyaḵum yil mo. 
\q1  
\v 14 Haali/ Tap̱a a’di midi ye ’kwanim piti mo 
\q1 dhali hila hil ki e ma ’thime/ ki mo/en ap̱o/ c̱iŋkinam piti mo. 
\q1  
\v 15 Tomp̱inycon kun luŋa kal gi ’kwanin tiya mo tani ta ’dolkon kush mo dhali ’dolkon gana/ mo, 
\q1 uni kun ta mii ki me’d gi ’kwani mo. 
\q1  
\v 16 Uni ta gi ’twa/ mo tani hili uni mol gwo o mo, 
\q1 uni ta gi e mo tani hili uni mol to p̱ar e mo, 
\q1  
\v 17 uni ta gi ’ce mo tani hili uni mol to ciḵ mo, 
\q1 walla shi/ina kamu/ di’d e ’twam buniya? 
\q1  
\v 18 Uni wana e ki uni gwansan kun uḵki uni mo – 
\q1 nye, aris uni gwansan kun gamki gwo is e uni mo. 
\q1  
\v 19 Ayy gu’b ma Israyiil, ’bori Tap̱a mii mo ma. 
\q1 Ayy gu’b ma Haruun, ’bori Tap̱a mii mo ma. 
\q1  
\v 20 Ayy, gu’b ma Lawi, ’bori Tap̱a mii mo ma. 
\q1 Um kun ḵo/ki Tap̱a mo tani ’bori Tap̱a mii mo ma. 
\q1  
\v 21 Mom’bor mii midi di gom Tap̱a ’pena Sihyuun mo, 
\q1 a’di jin c̱a’bki’d e Pa Urushaliim mo. 
\q1 Maŋi Tap̱a mo. 
\c 136  
\q1  
\v 1 Ayy c̱iyi mo jin ’boruwa ’bor bwa i is ki Tap̱a mo, haali/ a’di ’bora’bor mo, 
\q1 haali/ mo/en piti jin ṯelu sho’k mo tani a’di ’dimki ’kup̱ ki sule/ sule/ mo. 
\q1  
\v 2 Ayy c̱iyi mo jin ’boruwa ’bor bwa i is ka Arumgimis jin bolki’da risa rum e mo, 
\q1 haali/ mo/en piti jin ṯelu sho’k mo tani a’di ’dimki ’kup̱ ki sule/ sule/ mo. 
\q1  
\v 3 Ayy c̱iyi mo jin ’boruwa ’bor bwa i is gom Tap̱a jin bolki’da ris tap̱a e mo, 
\q1 haali/ mo/en piti jin ṯelu sho’k mo tani a’di ’dimki ’kup̱ ki sule/ sule/ mo. 
\q1  
\v 4 E a’di, a’din ’deŋ gana/ mo jin miiki dhan momer kun caaca mo, 
\q1 haali/ mo/en piti jin ṯelu sho’k mo tani a’di ’dimki ’kup̱ ki sule/ sule/ mo. 
\q1  
\v 5 E a’di jin uḵki momis ki gwo jin mishu ’ban mo, 
\q1 haali/ mo/en piti jin ṯelu sho’k mo tani a’di ’dimki ’kup̱ ki sule/ sule/ mo. 
\q1  
\v 6 E a’di jin peperki mony’cesh ap̱o/ yi’de/ mo, 
\q1 haali/ mo/en piti jin ṯelu sho’k mo tani a’di ’dimki ’kup̱ ki sule/ sule/ mo. 
\q1  
\v 7 E a’di jin uḵki dhan moŋkush kun caaca mo, 
\q1 haali/ mo/en piti jin ṯelu sho’k mo tani a’di ’dimki ’kup̱ ki sule/ sule/ mo. 
\q1  
\v 8 Atente/ mmoji ap̱o/ montee mo, 
\q1 haali/ mo/en piti jin ṯelu sho’k mo tani a’di ’dimki ’kup̱ ki sule/ sule/ mo, 
\q1  
\v 9 Appe dhala risa cul mmojiya p̱o/ mon’thiny mo, 
\q1 haali/ mo/en piti jin ṯelu sho’k mo tani a’di ’dimki ’kup̱ ki sule/ sule/ mo. 
\q1  
\v 10 E a’di jin ’koshki’da bwanyara/ gi ’Kwani Masir mo, 
\q1 haali/ mo/en piti jin ṯelu sho’k mo tani a’di ’dimki ’kup̱ ki sule/ sule/ mo. 
\q1  
\v 11 Dhali suski’da Israyiil ka pije/ ’peni bwaman uni mo, 
\q1 haali/ mo/en piti jin ṯelu sho’k mo tani a’di ’dimki ’kup̱ ki sule/ sule/ mo. 
\q1  
\v 12 Ki me’da bim ’bi’thgam piti mo dhali ki me’d piti jin he’thkina a’di mo, 
\q1 haali/ mo/en piti jin ṯelu sho’k mo tani a’di ’dimki ’kup̱ ki sule/ sule/ mo. 
\q1  
\v 13 E a’di jin ḵwa/ki dhan Ḵumma/ Yi’de/ jin ta gi ’Per bwa ki buuw mo, 
\q1 haali/ mo/en piti jin ṯelu sho’k mo tani a’di ’dimki ’kup̱ ki sule/ sule/ mo. 
\q1  
\v 14 Dhali a’di ki dhala Israyiil bway mo mmoya bwaman a’di mo, 
\q1 haali/ mo/en piti jin ṯelu sho’k mo tani a’di ’dimki ’kup̱ ki sule/ sule/ mo. 
\q1  
\v 15 Hili a’di ki kuma P̱irawn ’twa/a ’cesh e bwam Ḵumma/ Yi’de/ jin ta gi ’Per mo, 
\q1 haali/ mo/en piti jin ṯelu sho’k mo tani a’di ’dimki ’kup̱ ki sule/ sule/ mo. 
\q1  
\v 16 E a’di jin suski ’kwanim piti ka pije/ e mombwaasho mo, 
\q1 haali/ mo/en piti jin ṯelu sho’k mo tani a’di ’dimki ’kup̱ ki sule/ sule/ mo. 
\q1  
\v 17 E a’di jin ’koshki dhan imaliḵ mo, 
\q1 haali/ mo/en piti jin ṯelu sho’k mo tani a’di ’dimki ’kup̱ ki sule/ sule/ mo. 
\q1  
\v 18 Dhali a’di jin ’koshki imaliḵ kun gwonu ’kus mo, 
\q1 haali/ mo/en piti jin ṯelu sho’k mo tani a’di ’dimki ’kup̱ ki sule/ sule/ mo. 
\q1  
\v 19 Siihuun jin ta’da maliḵ gi ’Kwani Amuur mo, 
\q1 haali/ mo/en piti jin ṯelu sho’k mo tani a’di ’dimki ’kup̱ ki sule/ sule/ mo. 
\q1  
\v 20 Dhali Maliḵ Uuj gi Pam Bashan mo, 
\q1 haali/ mo/en piti jin ṯelu sho’k mo tani a’di ’dimki ’kup̱ ki sule/ sule/ mo. 
\q1  
\v 21 Dhali a’di ki c̱i mony’cesh buni mmota mal mo, 
\q1 haali/ mo/en piti jin ṯelu sho’k mo tani a’di ’dimki ’kup̱ ki sule/ sule/ mo. 
\q1  
\v 22 Mmota mal goma Israyiil jin ta c̱iŋkinam piti mo, 
\q1 haali/ mo/en piti jin ṯelu sho’k mo tani a’di ’dimki ’kup̱ ki sule/ sule/ mo. 
\q1  
\v 23 A’diyi ita a’di jin kayi ana e mo e mom bana jin ’koyina ana e mo jin hatha ’ko ’ko’d ki ha’th mo, 
\q1 haali/ mo/en piti jin ṯelu sho’k mo tani a’di ’dimki ’kup̱ ki sule/ sule/ mo. 
\q1  
\v 24 Dhali ’cwam ana mo ’peni ’kwaniŋ ’kup̱ bana mo, 
\q1 haali/ mo/en piti jin ṯelu sho’k mo tani a’di ’dimki ’kup̱ ki sule/ sule/ mo. 
\q1  
\v 25 A’di jin c̱iki tonṯe/ goma ris buŋgwar isi ’baar mo, 
\q1 haali/ mo/en piti jin ṯelu sho’k mo tani a’di ’dimki ’kup̱ ki sule/ sule/ mo. 
\q1  
\v 26 Ayy c̱iyi mo jin ’boruwa ’bor bwa i is ka Arumgimis gi momis mo, 
\q1 haali/ mo/en piti jin ṯelu sho’k mo tani a’di ’dimki ’kup̱ ki sule/ sule/ mo. 
\c 137  
\q1  
\v 1 E yana gap̱ gi yi’deŋ ḵumma/ gi Pam Baabil mo tani ana ’kokina a’cesh mo dhali ko mo 
\q1 ki ana kakina Sihyuun e mo. 
\q1  
\v 2 E cwa jin wana e ka gwap̱indhop̱ mo tani 
\q1 ana shirkina adheŋdhenyem bana kun ’kon ma shu/i pesu/ mo. 
\q1  
\v 3 Haali/ uni kun bu’thki ana mo tani 
\q1 ’theḵki gwo mo ki ana mina yuḵ gway bana mo, 
\q1 dhali uni gun ’koshki ana is ka nyor kagahara mo, uni ’theḵki gwo mo ki ana mina isi c̱a’b ki c̱ur c̱ur mo, mmo/o gwo mo ki: 
\q1 Yuḵi aman gwaya kamu/ ’de/ ’peni gway ma Sihyuun mo. 
\b  
\q1  
\v 4 A/ana mina yuḵ gway gi Tap̱a kata mo e bampa/ 
\q1 gi ’kwanin tiya mo? 
\q1  
\v 5 Waḵki/ aha/ ŋana /e mo tani ayy Urushaliim, 
\q1 dhalki me’da bim poros pem ḵu’thki’d mo. 
\q1  
\v 6 Dhalka le’d pem ’dap̱a’di bwaŋḵa’dki/ gi ’twam pem mo 
\q1 waḵki/ aha/ dinaki ka /e e mo, 
\q1 waḵki/ aha/ dinaki kar Pa Urushaliim 
\q1 ap̱o/ mom pem jin eḵa/ eḵ jin ’kunyka/ bwa mo. 
\b  
\q1  
\v 7 Kayi gwo e mo, ayy Tap̱a, ap̱o/ ’Kwani Aduum 
\q1 goma tee gi Pa Urushaliim mo, 
\q1 me’d jin ona uni gwo mo ki: Ka ’cesh gana/. Ka ’cesh gana/. 
\q1 Ntagi moŋḵa’b piti mo. 
\q1  
\v 8 Ayy ’bwa/ gi ’Kwani gi Pam Baabil, /e jin ’ce’d mo sho’k ki tash tash mo. 
\q1 Mom’bor bwayi gom a’di jin midi raḵ /e to ibway mo 
\q1 gom to jin miikina /e gom aman mo. 
\q1  
\v 9 Mom’bor bwa gom a’di jin bu’thki ushi uc̱im pini mo 
\q1 dhali wa uni ’ko’di wosh mo. 
\c 138  
\s1 Gway ma Dawuu’d. 
\q1  
\v 1 Aha/ c̱ina /e mo jin ’boruwa ’bor bwa i is mo, ayy Tap̱a, ka dum pemi ’baar mo. 
\q1 Ibwambora risa rum p̱inycon mo tani aha/ yuḵkina gway mmomaŋ /e mo. 
\q1  
\v 2 Aha/ c̱a’bkina ka jiŋ ’kup̱a’dup̱un mmoluŋ ’kup̱ki gu’b gi mondheleladhelel pini mo 
\q1 dhali c̱i mo jin ’boruwa ’bor bwa i is ki gway pini mo 
\q1 gom mo/en pini jin ṯelu sho’k mo dhali mii ma isiŋ ganam pini mo 
\q1 haali/ /e a’di i/eḵkin ki eḵ ap̱owa ris to ’baar mo 
\q1 ki gway pini mo dhali ki gwom pini mo. 
\q1  
\v 3 Ka tee jin yuḵka/ /e mo tani /e thoḵki aha/ ’twa/ mo, 
\q1 dhali mom’bi’th is ma ḵashiram pem mo tani markina /e is mo. 
\b  
\q1  
\v 4 Aris imaliḵ gi mony’cesh mo tani uni mini maŋ /e mo, ayy Tap̱a, 
\q1 haali/ uni ciḵki gwo gi ’twam pini mo. 
\q1  
\v 5 Dhali uni mini yuḵ gway ki bway gi Tap̱a mo, 
\q1 haali/ monyca gi Tap̱a a’di icaaca mo. 
\q1  
\v 6 Ba haali/ Tap̱a a’di i/eḵa/ eḵ mo tani a’di ki c̱iya hirdhe/ ki uni kun hatha ’ko ’ko’d ki ha’th mo, 
\q1 hili uni kun ’theḵ ’ba/ imis mo tani mishkina a’di ’pena dhana/ mo. 
\q1  
\v 7 Ba aha/ yana e bwaman mo jin ṯoju bwa mo tani 
\q1 /e ’tashki aha/ mondiki/em pem ’twa/ mo. 
\q1 /E ki he’th me’d pini ap̱owa nyor gi ’kwani kun ta ’kup̱ ki aha/ mo, 
\q1 dhali me’da bim poros pini mo tani /e ’cuḵki aha/ mo. 
\q1  
\v 8 Tap̱a a’di midi thim bwam piti yin jin ’boro’d gom aha/ mo. 
\q1 Mo/en pini jin ṯelu sho’k mo tani, ayy Tap̱a, a’di ’dimki ’kup̱ ki sule/ sule/ mo. 
\q1 Dhalku/ ki dhal miin to ki me’d pini ’pen mo. 
\c 139  
\s1 Eya manyuḵ gway mo. Gway ma Dawuu’d. 
\q1  
\v 1 Ayy Tap̱a, /e ŋap̱ki aha/ ki bur bur mo dhali mish aha/ mo. 
\q1  
\v 2 /E mishkina mish mo ki aha/ c̱a’bkina ’cesh mo dhali ki aha/ cuna mis mo. 
\q1 /E nyiṯẖki gwom pem kun kulumka/ ibwa ’pena dhana/ mo. 
\q1  
\v 3 /E ŋap̱ki bway pem ki bur bur mo jin yaka/ ka pije/ mo dhali mom pem jin ishka/ ’ko’da ’cesh mo, 
\q1 dhali miim pem mishkina /e ’baar mo. 
\q1  
\v 4 Isi kan si’dayi /e mishki gwo kun ’koni ’twam pemi ṯwa/a/ mo, 
\q1 hili mo mo ma, ayy Tap̱a, /e mishki uni ’baar mo imonṯal ’de/ mo. 
\q1  
\v 5 /E ṯu’bki aha/ ibwamp̱o/ mo dhali ibwambor mo, 
\q1 dhali /e kari me’d pini ap̱o/ aha/ mo. 
\q1  
\v 6 Dhan mo jin mishu gwo ’ban a’di ita jaro/ gom aha/ mo. 
\q1 A’di ḵa’dama/ ḵa’dam mo. Aha/ mola a’di gamm mo. 
\b  
\q1  
\v 7 Ki mana imiga/ ya ’peni /e ki dar gi Shi/in pini mo? 
\q1 Walla ki mana imiga/ gus ’peni /e ki dar gi buŋ’kus pini mo? 
\q1  
\v 8 Waḵki/ aha/ shinkunu bway momis mo tani /e dikin imun mo. 
\q1 Waḵki/ aha/ mina ta ga ci e mo jin ’kona ’kwani kun wun mo tani /e dikin imun mo. 
\q1  
\v 9 Waḵki/ aha/ mina bu’th ya ma bi ma tente/ mon’thamo/ mo 
\q1 dhali e mo gi bwaagap̱ gi ḵumma/ yi’de/ ’baar mo 
\q1  
\v 10 isi kani me’d pini shuki aha/ bway mo 
\q1 dhali me’da bim poros pini bu’thki aha/ mo. 
\q1  
\v 11 Waḵki/ aha/ mina o gwo mo ki: Dhalki mondhurumi’d ’kam aha/ is mo 
\q1 dhali dhalki moŋkush wara’d ki mon’thiny gom aha/ mo, 
\q1  
\v 12 isi kan mondhurumi’d diki ta mondhurumi’d gom /e mo. 
\q1 Mon’thiny a’di c̱a’bki bany bany me’d montee mo 
\q1 haali/ mondhurumi’d a’di wara’d ki moŋkush gom /e mo. 
\q1  
\v 13 Haali/ /e uḵkina aris to gi bwaman is pem mo, 
\q1 /e shoki aha/ ki ’be’b ’be’b e bwama dho’th ma ta’dam pem mo. 
\q1  
\v 14 Aha/ maŋkina /e mo haali/ /e a’di ḵogu mo dhali /e tana manmii to mer mo. 
\q1 To mer uni ta miim pini mo. 
\q1 /E mishki aha/ ki mish gana/ mo. 
\q1  
\v 15 Ayica yir pem a’di molu bag ’peni /e mo, 
\q1 ki aha/ ’konu mmo/uḵ ki kup̱ mo, 
\q1 ki koṯẖ jin wagaskunu a’di e mony’cesha ’kulga/ mo. 
\q1  
\v 16 Em pini mishki bul pem nṯwa/a/ gom uḵ pem ki aha/ tana ari ’dii mo. 
\q1 Ka tee kun ’kawurkunu gom aha/ mo tani 
\q1 a’di ’kwarkunu eya warkam pini mo, aris uni ’baar mo, 
\q1 me’d jin ’kona uni ki ’ko mo naskina/ mo. 
\b  
\q1  
\v 17 Gwom pini kun kuluma /e bwa gom aha/ mo wani yinthowa, ayy Arumgimis. 
\q1 Ḵwashar buni ’ka’da miiya? 
\q1  
\v 18 Waḵki/ aha/ mina deŋ uni e mo tani uni bolkina si’b gi bwaagap̱ e ka ris mo. 
\q1 Ki aha/ merkina e mo tani aha/ dina nyaḵki /e mo naskina/. 
\b  
\q1  
\v 19 Ayy /e jin mini ’taki ’kosh uni kun mii tonthus moyi, ayy Arumgimis, 
\q1 dhali ki ’kwani kun wol ’kwaniya bas mo mini ’taki ḵwa/ is buni bwa ’peni aha/ mo, 
\q1  
\v 20 ki ’kwani kun dup̱i /e i e mmo/ush /e gwo ki ’tash mo, 
\q1 uni kun cukin ki is buni imonṯal ’de/ ap̱o/ /e gom tonthus mo. 
\q1  
\v 21 Dika/ ki shi/ uni i e uni gun shi/ki /e i e mo, ayy Tap̱a? 
\q1 Dhali dika/ ki ’te bwa ki uni gwansan kun cukina ap̱o/ /e mo? 
\q1  
\v 22 Aha/ shi/kina uni i e ki isi shi/ ma shiŋ gana/ i e mo. 
\q1 Aha/ deŋkina uni e moyi mmota ’kup̱ ki aha/ mo. 
\q1  
\v 23 Ŋap̱i aha/ ki bur bur mo, ayy Arumgimis, dhali misha dum pem mo. 
\q1 Nyo/i aha/ mo dhali mish gwom pem kun kulumka/ ibwa mo. 
\q1  
\v 24 Dhali p̱ari mo e mo waḵki/ tonthusa kamu/ di’d e aha/ mo, 
\q1 dhali shuyi aha/ bway e bway jin ’konuki/e ki sule/ sule/ mo. 
\c 140  
\s1 Eya manyuḵ gway mo. Gway ma Dawuu’d. 
\q1  
\v 1 ’Cuḵi aha/ mo, ayy Tap̱a, ’peni ’kwani kun ta thus ki thus mo. 
\q1 ’Tashi aha/ ’twa/ mo ’peni ’kwani kun bujurkina bujur mo, 
\q1  
\v 2 uni kun thosonki tonthus is eya dum buni mo, 
\q1 dhali bir ’kwani mmo/asa mee ka yempa/ yempa/ mo. 
\q1  
\v 3 Uni dhuna le’d buni mmokaaka me’d tasha/ mo, 
\q1 dhali ’twa/ buni ’tu’dkin ka ṯi’d tashan ’thi/ mo. \qs Doshi ma dhali ’cunycuri yan mo.\qs* 
\q1  
\v 4 Jiyi aha/ mo, ayy Tap̱a, ’peni me’d gi ’kwani kun ta thus ki thus mo. 
\q1 ’Tashi aha/ ’twa/ mo ’peni ’kwani kun bujurkina bujur mo, 
\q1 uni kun thosonki is mo mmoṯa’b aha/ ki sho’k mo. 
\q1  
\v 5 ’Kwani kun dhu is ki ca mo mmo/ush gwoŋḵan mii mo tani uni bagkina gume/ gom aha/ mo, 
\q1 nyaḵka nyoḵa gume/ jin bere’thkina uni mo, 
\q1 e ’ko’d gwar bway mo tani uni ḵa’bkina gume/ gom aha/ mo. \qs Doshi ma dhali ’cunycuri yan mo.\qs* 
\q1  
\v 6 Aha/ ona gwo e Tap̱a mo ki: /E tana Arumgimis pem mo. 
\q1 C̱iyi ’ce ki ’twa/ ki tom pem jin ’thoka/ ka di’b me’di is mo, ayy Tap̱a. 
\q1  
\v 7 Ayy Tap̱a, /e jin ta Tap̱am pem mo, dhali /e jin ta jim pem jin ’bitha’bi’th jin ’cuḵki aha/ mo, 
\q1 /e kumki aha/ ’kup̱ pem mo ka tee gi mo ma mee mo. 
\q1  
\v 8 Dhalku/ ki c̱i amanta thus ki thus to jin on ma dum piti a’di mo, ayy Tap̱a. 
\q1 Dhalku/ ki thoṯẖ tonthus piti jin miina a’diya wu’th ap̱o/ mo. \qs Doshi ma dhali ’cunycuri yan mo.\qs* 
\q1  
\v 9 Uni gwansan kun ’kamki aha/ ki deḵ mo tani uni ’de’kki ’kup̱ buni mo. 
\q1 Dhalki ’twa/ buni kun tana pibi kumki uni ’twa/a ’cesh mo. 
\q1  
\v 10 Dhalki o’d jin ’thanu ka ’cila’th ṯa’kki’da p̱o/ uni mo. 
\q1 Dhalki uni ṯa’kkunu e jis jin ’kula’kul mo jin mina uni mol cuyu/ mis doḵ/e mo. 
\q1  
\v 11 Dhalku/ ki dhala manthutha thu’th ’pen bway mo mmoṯel mii sho’k e mony’cesh mo. 
\q1 Dhalki tonthus wa’di wathi/ jin bujurki’da bujur ki jahanne/ mo. 
\q1  
\v 12 Aha/ misha Tap̱a halki mo jin wo’cki is she/ jin raḵki’d mo, 
\q1 dhali tor gwon dwall ’twa/a ’cesh ki mii ma ḵar/e gom uni gun mini mii ta gi to mo. 
\q1  
\v 13 Ka jiŋ gana/ uni gun tana ḵar/e mini c̱i mo jin ’boruwa ’bor bwa i is ki gway pini mo. 
\q1 Dhali uni gun dhelel ma du mini ’ko e buŋ’kus pini mo be. 
\c 141  
\s1 Gway ma Dawuu’d. 
\q1  
\v 1 Aha/ yuḵkina /e mo, ayy Tap̱a. Layu/ ki jahanne/ e aha/ mo. 
\q1 C̱iyi ’cem pini ki ’twam pem mo, ki aha/ yuḵkina /e mo. 
\q1  
\v 2 Dhalki mon’thom pem a’di deŋu e me’da ku’da ’bicajwahar ibwambori /e mo, 
\q1 dhali mo jin ’de’kka/ me’d pemi mis mo me’d to jin ’ciṯẖu/ ’kus mom’pimpili/ mmomiiya bas mo. 
\q1  
\v 3 Kari mo jin jinuwa ji ap̱o/ ’twam pem mo, ayy Tap̱a, 
\q1 doshi mmotima campur gi ’twam pem mo. 
\q1  
\v 4 Dhalku/ ki ḵa’da dum pem ki ma tonthusa kamu/ mo, 
\q1 mmoshwa pibi/ anyor ki is pem gom tonthus mmomii mo 
\q1 mmonyaḵ ya ki ’kwani kun mii to kun ’coḵa’coḵ mo, 
\q1 dhali dhalku/ ki dhal aha/ bway mo mmoshwa tonṯem buni kun ṯawusaṯawus mo. 
\q1  
\v 5 Dhalki wathi/ jin ’boro’d idor aha/ mo walla ḵucur aha/ ki bwaŋkush mo, 
\q1 hili dhalku/ ki dhala yin gi ’kwanin thus ki a’di minu ’kosh ’kup̱ pem ki sule/ sule/ mo. 
\q1 Haali/ mon’thom pem ṯikirkika/ ap̱o/ tonthus buni kun miina uni mo. 
\q1  
\v 6 Me’d jin c̱ikunu uni e me’d gi uni gwansan kun mini waḵ uni mo tani 
\q1 dhali yan’ko’d uni mini da/ar gwo ki gwon Tap̱a a’di ita gwoŋ gana/ mo. 
\q1  
\v 7 Me’d wosh jin koṯẖkina jan ṯal ’de/ me’d mo dhali shaṯ uni ap̱owa ’cesh mo tani 
\q1 wakan asimam buni minu ’kwaḵar bwa mo e ’twa/ ma Haawiya mo. 
\b  
\q1  
\v 8 Hili em pem di’d ’kup̱ ki /e mo, ayy Tap̱a Arumgimis. 
\q1 E /e mo tani aha/ simmkina mo jin hurga/ jwa e mo. 
\q1 Dhalku/ ki dhal aha/ me’d wathi/ jin dar gi mo jin ceshuwa cesh ka p̱o/ mo. 
\q1  
\v 9 Noni aha/ ’twa/ mo ’pena gume/ jin ’thikina uniya ’cesh gom aha/ mo, 
\q1 dhali agume/ gi uni kun mii tonthus mo. 
\q1  
\v 10 Dhalki imanmii tonthus ṯa’kkini monṯal ’de/ agumem buni mo 
\q1 ki aha/ dina mmoye mo. 
\c 142  
\s1 Gway jin yedhuwa Dawuu’d sho’k mo ki a’di diki’d e jurum wosh mo. Mon’tho mo. 
\q1  
\v 1 Aha/ gwokina ki ’twam pem e Tap̱a mo, 
\q1 ki ’twam pem mo tani aha/ ’thokina to ka di’b me’di is e Tap̱a mo. 
\q1  
\v 2 Aha/ gac̱a mom pem jin walka/ a’thup̱uny ’twa/ e bwambori a’di mo. 
\q1 Aha/ ṯora tom pem kun ṯoci aha/ bwa ibwambori a’di mo. 
\q1  
\v 3 Ki shi/in pem ’thikina buye/ mo tani 
\q1 /e mishki bway pem mo. 
\q1 E bway tur jin yaka/ mo tani 
\q1 uni bagkina gume/ gom aha/ mo. 
\q1  
\v 4 Aha/ hilkina mo ki ’bana bim poros mo dhali tim mo mo, 
\q1 hili jaŋkamu/ yisa di’da jin tor aha/ ki e mo. 
\q1 Mo jin huru jwa yisa di’d gom aha/ mo. 
\q1 Wathi/ p̱iyi’d jin hilki’da hil gom aha/ mo. 
\b  
\q1  
\v 5 Aha/ gwona ’twa/ e /e mo, ayy Tap̱a. 
\q1 Aha/ ona gwo mo ki: /E ta jim pem jin hurga/ jwa icine/ mo, 
\q1 tom pem jin ’tuntulka/ bwa ime’d mo, a’di jin di’d nyaḵki ’kwani kun ’kon ki e e mony’cesh mo. 
\q1  
\v 6 C̱iyi ahirdhe/ ki gwom pem mo, 
\q1 haali/ aha/ gunu ka luŋgu’b gana/ mo. 
\q1 ’Cuḵi aha/ mo ’peni imanṯo’c aha/ bwa mo, 
\q1 haali/ uni ’bitha’bi’th gom aha/ mo mmobol aha/ e mo. 
\q1  
\v 7 Susi aha/ ka pije/ ’pena sijin mo, 
\q1 ki aha/ mina ’taki c̱i mo jin ’boruwa ’bor bwa i is ki gway pini mo. 
\q1 ’Kwani kun tana ḵar/e mini ’kam aha/ mo 
\q1 haali/ /e mini ṯu/ul dhan mo jin isha to ka enthus gom aha/ mo. 
\c 143  
\s1 Gway ma Dawuu’d. 
\q1  
\v 1 Ciḵi mon’thom pem mo, ayy Tap̱a. 
\q1 Dhali c̱iyi ’cem pini ki tom pem kun ’thoka/ ka di’b me’di is mo. 
\q1 E mii ma isiŋ ganam pini mo tani thoḵi aha/ ’twa/ mo, e mo ma ḵar/em pini mo. 
\q1  
\v 2 Dhalku/ ki cic̱ mo e mo jin dwallu gwo nyaḵki c̱iŋkinam pini mo 
\q1 haali/ wathiŋ kamu/ yisa di’da jin di’d ki e jin ta’da ḵar/e ibwambori /e mo. 
\q1  
\v 3 Haali/ wathi/ jin ta ’kup̱ mo tani a’di urki aha/ isho’k mo. 
\q1 A’di yap̱ki mondiki/em pem ki sho’k itaga ’cesh mo. 
\q1 A’di ki kar aha/ mmoc̱a’b e mondhurumi’d mo me’d uni gwansan kun wukin ki wuŋ gana/ mo. 
\q1  
\v 4 Gom gwo gi wakan mo tani shi/in pem ’thikina buye/ e isi aha/ mo, 
\q1 dhali adum pem e isi aha/ mo tani a’di tintira/ tintir mo. 
\b  
\q1  
\v 5 Aha/ kakina teen dhamo/ gunn e mo. 
\q1 Aha/ kulumkina gwo ibwa goma ris to kun miikina /e mo. 
\q1 Dhali aha/ ṯikirk ina gwo kulumi bwa gom miin to ki me’d pini kun wagaskina /e mo. 
\q1  
\v 6 Aha/ he’thkina me’d pem gom /e mo. 
\q1 Aḵashiram pem ḵu’thkina ’kus guŋkuru/ mo me’d mo ma burṯa/ o’d mo. \qs Doshi ma dhali ’cunycuri yan mo.\qs* 
\b  
\q1  
\v 7 Huru/ ki jahanne/ mo dhali thoḵ aha/ ’twa/ mo, ayy Tap̱a. 
\q1 Shi/in pem ushi me’d mo. 
\q1 Dhalku/ ki bag jis/em pini ’peni aha/ mo, 
\q1 isi ciki/ ki aha/ mina e wa ki uni gwansan kun iikin ka luŋgu’b e jisa ’kulga/ mo. 
\q1  
\v 8 Dhalki aha/ ciḵa gwo mon’thamo/ gom mo/en pini jin ṯelu sho’k mo, 
\q1 haali/ e /e mo tani aha/ kara mom pem jin gamka/ gwo is mo. 
\q1 Ṯori aha/ bway jin miga/ ’taki ya mo, 
\q1 haali/ e /e mo tani aha/ ’de’kkina aḵashiram pem ’kup̱ ki mis mo. 
\b  
\q1  
\v 9 ’Cuḵi aha/ mo, ayy Tap̱a, ’peni aris ’kwani kun ta ’kup̱ ki aha/ mo. 
\q1 Aha/ guskina mmohur jwa e /e mo. 
\q1  
\v 10 Ṯori aha/ gwo mmomii bwam pini mo, 
\q1 haali/ /e tana Arumgimis pem mo. 
\q1 Dhalki shi/in pini jin ’boro’d shu aha/ bway mo 
\q1 e bway jin ba’daba’d mo. 
\b  
\q1  
\v 11 Gom gway gi gway pini mo tani, ayy Tap̱a, ’tashi mondiki/em pem ’twa/ mo. 
\q1 E mii ma ḵar/em pini mo tani susi aha/ ka pije/ ’peni monṯo’c bwa mo. 
\q1  
\v 12 Dhali e mo/en pini jin ṯelu sho’k mo tani ’ciṯẖi/ ’kwani kun ta ’kup̱ ki aha/ ’twa/ mo 
\q1 dhali ’ce’d uni kun ta ’kup̱ ki aha/ shoki ’baar mo 
\q1 haali/ aha/ tana c̱iŋkinam pini mo. 
\c 144  
\s1 Gway ma Dawuu’d. 
\q1  
\v 1 Mom’bor mii midi di gom Tap̱a mo, a’di jin ta wosh pem mo, 
\q1 a’di jin ṯo’kki me’d pem gom mo ma mee mo, 
\q1 dhali ŋwal me’d pem mmo/asa as mo, 
\q1  
\v 2 a’di jin ta wosh pem dhali acur pem mo, 
\q1 dhali acur pem jin ṯenu gwo mo dhali aman’cuḵ aha/ mo, 
\q1 dhala goŋgorom pem mo dhali a’di jin bu’thka/ mo jin hurga/ jwa mo, 
\q1 a’di jin ’dap̱ki’da ris ’kwani e bwaŋ’kwariny piti mo. 
\q1  
\v 3 Ayy Tap̱a, ki wathiny’cesh jana sa/ imina bwa o /e ki a’di mo, 
\q1 walla ya/ gi wathiny’cesh jana imina /e kulum gwo ibwa gom a’di mo? 
\q1  
\v 4 Wathiny’cesh wana e ka wulp̱e/ mo, 
\q1 ateem piti wana e ka ḵashira la jin peki’d mo. 
\b  
\q1  
\v 5 Goŋi momis pini is ka ’cesh mo, ayy Tap̱a, dhali p̱u’du/ ka ’cesh mo. 
\q1 Tayi wosha turga/ is ki me’d mo ki uni mini iiya ku’d mo. 
\q1  
\v 6 Biliṯi/ uni mmoshwayi mo mmomiiya war mo dhali c̱eker uni bwa mo. 
\q1 Dhali peper ka risa thop̱am pini bwa mo dhali miiya ’bala’c ’bala’c dhan mo yin mo. 
\q1  
\v 7 Hethi me’d pini ’peni mo jin ḵa’dama/ ḵa’dam mo, 
\q1 ’cwami aha/ mo dhali ’cuḵi aha/ mo ’pena ris yi’de/ mo, 
\q1 dhali ’peni me’d gi ’kwani gi bampan tiya mo, 
\q1  
\v 8 uni kun tana ’twa/ buni aṯor ka ṯor mmo/o gwo mo, 
\q1 dhali uni gun tana me’da bim poros buni abim poros jin ta thus ki thus mo. 
\b  
\q1  
\v 9 Aha/ mina yuḵ gway jin ta gway this gom /e mo, ayy Arumgimis, 
\q1 ap̱owa dheŋdhenye/ jin ’kon ma shu/i ’kume’d mo aha/ mina p̱i a’di gom /e mo, 
\q1  
\v 10 a’di jin c̱iki mo jin p̱inu mii e ki imaliḵ mo, 
\q1 a’di jin ’cwamki c̱iŋkinam pini ka Dawuu’d mo. 
\q1  
\v 11 ’Cwami aha/ ’peni gandal gi ’kwani kun ta maṯṯ ki maṯṯ mo 
\q1 dhali ’cuḵi aha/ mo ’peni me’d gi ’kwani kun ta ’kwani gi bampan tiya mo, 
\q1 uni kun tana ’twa/ buni aṯor ka ṯor mmo/o gwo mo, 
\q1 dhali uni gun tana me’da bim poros buni abim poros jin ta thus ki thus mo. 
\b  
\q1  
\v 12 Dhalki iya/m bam e dhuru’c buni mo 
\q1 wana e ki cwalman kun dhethadhe’th mo, 
\q1 walla i’bwa/m bam mmowa e ka ḵa’dum gu’b mo 
\q1 kun jep̱kunu mo mmonyaŋ gu’b ma maliḵ mo. 
\q1  
\v 13 Dhalki themes bam ’tu’du/ ki piny piny mo 
\q1 mmo’tu’da risa lakaŋ gu’b kun dhuna am to mo. 
\q1 Dhalki ḵa’bal bam dhodhon ka alip̱ mo 
\q1 dhali ka alaap̱i ’kume’d mo e buntom bam mo. 
\q1  
\v 14 Dhalki bip̱ bam ’tu’d mo ki ushan mo, 
\q1 jin mina is ’koki ’kosh uni ka nyor gom ’ba’th mo walla ta a/ulul is mmodho’th ushan mo. 
\q1 Dhalku/ ki mii dhal ko jin gwonu ki ko ma c̱is bway mo mmodi e bway tur bam mo. 
\q1  
\v 15 ’Kwani kun biṯa mo jin ’boru mii wakana p̱o/ mo tani uni i’bora bwa mo. 
\q1 ’Kwani kun tan ga Arumgimis jin ta Tap̱a mo tani uni i’bora bwa mo. 
\c 145  
\s1 Gway jin yuḵ ma Dawuu’d mmomaŋa maŋ mo. 
\q1  
\v 1 Aha/ mina kar /e ki ca mo, /e jin tana Arumgimis pem mo dhali aMaliḵ pem mo, 
\q1 dhali ’bori gway pini mii ki sule/ sule/ mo dhali ki sule/ sule/ mo. 
\q1  
\v 2 Isa yempa/ aha/ mina ’bor /e mii mo, 
\q1 dhali maŋ gway pini ki sule/ sule/ mo dhali ki sule/ sule/ mo. 
\q1  
\v 3 Tap̱a a’di icaaca mo dhali a’di ica’d jin minu maŋ mo, 
\q1 dhali dhan cam piti minu ’koki gu’d ’kup̱ mmodoṯ mo. 
\q1  
\v 4 Anyaḵum yil gi ’kwanin ’deŋ kamu/ mini maŋ miim pini ka nyaḵum ’kwani yilan tiya mo, 
\q1 dhali uni mini bah dhan mii ma dem dem pini jin ḵala /e ki mii mo. 
\q1  
\v 5 Gom monyca ma ra/ ra/ pini mo dhali mo/eḵ pini mo 
\q1 dhali aris to kun miina /e ki momer mo tani aha/ mina kulum uni ibwa mo be. 
\q1  
\v 6 ’Kwani mini bah dhan mo ma dem dem ma purem pini jin ḵala /e ki mii mo, 
\q1 dhali aha/ mina bah dhan monycam pini mo. 
\q1  
\v 7 Uni mini gac̱ miin tom pini jin ishi’d ka enthus ki gway pini jin tor /e ḵarash gom tom ’boron mo 
\q1 dhali yuḵ gway ki ’kal ’kal gom mo ma ḵar/em pini mo. 
\q1  
\v 8 Tap̱a a’di ta’da manmii mii ka ’the mo dhali amanmiimii mo, 
\q1 anyor piti maŋgala she/ mo dhali mo/en ishki’d jin ṯelu sho’k mo. 
\q1  
\v 9 Tap̱a a’di ’bora’bor gom ’kwani ’baar mo, 
\q1 dhali bwam ma ’thimem piti ki mo/en diki’da p̱owa ris ’kwani ’baar mo kun uḵkina a’di mo. 
\q1  
\v 10 Aris miin tom pini mini c̱i /e bwa jin ’boruwa ’bori is mo, ayy Tap̱a, 
\q1 dhali aris unim pini kun dhunu ki she/ ki dhelel dhelel mo tani uni mini ’bor /e mii mo. 
\q1  
\v 11 Uni mini o gwo gom monyca gi bampam pini mo, 
\q1 dhali uni mini ṯor gwo gom mom’bi’th pini mo, 
\q1  
\v 12 mmoṯor eya tente/ e iya/ gi ’kwani mo miin to ma dem dem pini mo, 
\q1 dhali monyca jin mii’d ki ra/ ra/ jin ta ji gi bampam pini mo. 
\q1  
\v 13 Bampam pini a’di ta bampa/ jin midi di ki sule/ sule/ mo 
\q1 dhali mo jin tanu tap̱am pini ’dimki ’kup̱ ki sule/ sule/ mo eya risa nyaḵum yil gi ’kwaniny’cesh mo. 
\q1 Tap̱a a’di ita a’di ma isiŋ gana/ eya ris gwom piti mo, 
\q1 dhali ta ’the ka ’the eya ris miin tom piti mo. 
\q1  
\v 14 Tap̱a a’di bu’thki uni gwansan kun ṯa’kkin mo, 
\q1 dhali ’deka ris uni imis mo uni gun ’kokin ki goŋgo/ mo. 
\q1  
\v 15 Aris e gi ’kwani ’baar mo hilki /e mo 
\q1 dhali /e ki c̱iki uni tonṯem buni ki yil ka ḵar/e mo. 
\q1  
\v 16 /E ḵa’dki me’d pini mo 
\q1 dhali /e kap̱kina ris to kun ’ko ki e adu mo ka ris to gun o uni bwa mo. 
\q1  
\v 17 Tap̱a a’di ita’da ḵar/e eya ris bway piti ’baar mo 
\q1 dhali kush bwa ki kush goma ris miim piti mo. 
\q1  
\v 18 Tap̱a a’di ’disha’dish goma ris uni gwansan kun yuḵki a’di mo, 
\q1 eya ris uni gun yuḵki a’di gom miiŋ gana/ mo, 
\q1  
\v 19 A’di ki thim to jin ona a’di bwa mo a’di jin ḵo/ki a’di mo. 
\q1 A’di si’da/ ciḵki gwom buni mo dhali ta uni is ki me’d mo. 
\q1  
\v 20 Tap̱a a’di ki ’tasha ris uni ’baar ’twa/ mo uni gun enki a’di mo, 
\q1 hili aris uni gun ta thus ki thus mo tani mina a’di i’ce’d sho’k mo. 
\q1  
\v 21 ’Twa/ pem midi o gwo mmomaŋ Tap̱a mo, 
\q1 dhali dhalka ris shuman isi ’baar mo ’bor gway piti jin ḵogu mii mo ki sule/ sule/ mo. 
\c 146  
\q1  
\v 1 Maŋi Tap̱a mo. 
\q1 Maŋi Tap̱a mo ma, ayy ḵashiram pem. 
\q1  
\v 2 Aha/ mina maŋ Tap̱a ki aha/ dina mmodi ki e mo. 
\q1 Aha/ mina yuḵ gway mmomaŋa Arumgimis pem mo ka yiha/ ki aha/ dina ki e mo. 
\b  
\q1  
\v 3 Dhalku/ ki dhu mom bum jin gamu gwo is e iya/ gi imaliḵ mo, 
\q1 e ya/ gi ’kwani mo, e a’di jin dar gi mowoṯẖ mo. 
\q1  
\v 4 Ki shi/in piti ’baarki’d mo tani a’di doḵki’d ki bu’da’cesh ka nyaŋ’ko’d mo, 
\q1 Dhali ka tenteŋ gana/ yan mo tani to jin thosona a’di mo tani nyaḵ sho’k ’ce’d ki a’di mo. 
\b  
\q1  
\v 5 Bwam ’boro’d gom a’di jin ta gi mowoṯẖ ’pena Arumgimis ma Yakuub mo, 
\q1 a’di jin ta’d ga ’teŋ kap̱e/ e Tap̱a Arumgimis piti mo, 
\q1  
\v 6 a’di jin uḵki momis dhali mony’cesh mo, 
\q1 dhali ḵumma/ yi’de/ mo dhali aris to kun ’kon e bwaman uni mo, 
\q1 a’di jin dhu’da dhu ka dhu ma isiŋ gana/ ki sule/ sule/ mo, 
\q1  
\v 7 a’di jin torki gwon dwall ’twa/a ’cesh ki tora ḵar/e mo, gom uni gun siri’ckunuwa p̱o/ ki sho’k mo, 
\q1 a’di jin c̱iki tonṯe/ ki ’kwani kun ’kosha ṯe/ mo. 
\b  
\q1 Tap̱a dhuki uni kun tana habuus ki ’kus mo. 
\q1  
\v 8 Tap̱a ḵa’dki e gi ’kwani kun tana ja’da/ mo. 
\q1 Tap̱a ’de’kki uni gwansan kun ’kokin ki goŋgo/ mo. 
\q1 Tap̱a enki ’kwani kun miin ka ḵar/e mo. 
\q1  
\v 9 Tap̱a timki’da p̱owa ris ’kwani kun iiki iiŋ ’kus mo. 
\q1 A’di ki ta up̱ kun wuna ikaṯẖ is ki me’d mo dhali uni gun dar gi icom mo, 
\q1 hili bway jin iina ’kwani kun ta thus ki thus mo tani mina a’di guyu/ e mo jin mina uni kup̱ mo. 
\q1  
\v 10 Tap̱a a’di midi ta tap̱a ki sule/ sule/ mo, 
\q1 ayy Sihyuun, a’di jin ta’da Arumgimis pini mo, eya risa nyaḵum yil gi ’kwani mo. 
\q1 Maŋi Tap̱a mo. 
\c 147  
\q1  
\v 1 Maŋi Tap̱a mo. 
\q1 Haali/ a’di ’boro’d mmoyuḵ gway mmomaŋa Arumgimis bana mo, 
\q1 haali/ a’di ta’da ’the mo dhali gway jin minu maŋ a’di mo a’di ha me’d mo. 
\q1  
\v 2 Tap̱a nyaŋi Pa Urushaliim mo. 
\q1 A’di ki tul uc̱i ma Israyiil is kun ṯa’kkunuwa sho mo. 
\q1  
\v 3 A’di ki wac̱ uni gun ’ce’dkunuwa du mo 
\q1 dhali is jamam buni kun ’koshkunu uni mo. 
\q1  
\v 4 A’di ki kar gwo mmota ŋulla/ mo gom gwo mmodeŋa cul e mo. 
\q1 A’di ki c̱iya cul gway buni ki she/ ki she/ mo. 
\q1  
\v 5 Tap̱am bana a’di icaaca mo dhali mom’bi’th piti ishi’d ka enthus mo. 
\q1 Mo jin mishu gwo ’ban jin ta jim piti mo tani a’di idiki’d ibwamp̱o/ mo jin molu bar a’di mo. 
\q1  
\v 6 Tap̱a a’di ki ’de’k uni gun yap̱kunu ki sho’k mo. 
\q1 A’di ki tor uni ’ko’da ’cesh uni gun ta thus ki thus mo. 
\q1  
\v 7 Yuḵi gway e Tap̱a mo jin ’boruwa ’bor bwa i is mo. 
\q1 Lugumi gway eya Arumgimis bana ka dheŋdhenye/ jin ’kon ma shu/i pesu/ mo. 
\q1  
\v 8 A’di ki kum momis ka raḵ mo, 
\q1 dhali a’di ki thosona sho’k mmohetha p̱o/ mony’cesh mo, 
\q1 dhali a’di ki raḵa sho mmoca mo ap̱owa ris wosh mo. 
\q1  
\v 9 A’di ki c̱i to/e tonṯem buni mmoshwa mo 
\q1 dhali ki usha waraŋgwaḵ kun gwokin mo. 
\q1  
\v 10 Bwaŋ ’kunyu’d piti yisa di’d e shumarum kun ’bitha’bi’th mo, 
\q1 walla bwaŋ ’kunyu’d piti yisa di’d e ’basho’k gi wathi/ mo. 
\q1  
\v 11 Hili Tap̱a a’di ki bu’th mo jin ’boru bwa mo e uni gwansan kun ḵo/ki a’di mo, 
\q1 dhali e uni gwansan kun tan ga ’teŋ kap̱e/ e mo/en piti jin ṯelu sho’k mo. 
\q1  
\v 12 Maŋi Tap̱a mo, ayy Urushaliim. 
\q1 Maŋi Arumgimis pini mo, ayy Sihyuun. 
\q1  
\v 13 Haali/ a’di ’bi’thki’da bem’ban gi toŋḵuthu’d jin miinu ’twaŋkala goŋ pini mo. 
\q1 A’di ’borki iya/m bum mii e bwaman um mo. 
\q1  
\v 14 A’di karki moŋḵu’th is e bwaŋgwayum bum mo. 
\q1 A’di ’tu’dki um bwa ka dip̱any pos bunyan jin thebera/ e ki theber mo. 
\q1  
\v 15 A’di hashki gwo jin ḵana a’diya ḵan e mony’cesh mo. 
\q1 Gwom piti guski’d ki shaw shaw mo. 
\q1  
\v 16 A’di ki c̱iya wasa/ mmo/isha ’cesh me’da mur ḵa’bala bany bany mo. 
\q1 A’di ki ḵwa/a wasanyjap̱e/ bwa me’d ’piny mo. 
\q1  
\v 17 A’di ki ṯaka wasam piti ka ’cesh me’d ushi ḵuluny to mo. 
\q1 Kaja a’di imidi doshi bwambor mon’thup̱ piti jin ’thup̱a a’di mo? 
\q1  
\v 18 A’di hashki gwom piti mo dhali wa uni mo. 
\q1 A’di ki kar ’tham piti mo mmoposh mo dhali yi’de/ yakina ŋwac̱a/ mo. 
\q1  
\v 19 A’di ki bah gwom piti eya Yakuub mo 
\q1 a’di jin ta gwoŋḵan piti kun bahu mo dhali gwoŋḵan kun onu eya Israyiil mo. 
\q1  
\v 20 Kal gi ’kwanin tiya dina a’di ki ṯu/ul ki mii gi wakan mo. 
\q1 Uni ’koki mish gwoŋḵan piti kun onu mo. 
\q1 Maŋi Tap̱a mo. 
\c 148  
\q1  
\v 1 Maŋi Tap̱a mo. 
\q1 Maŋi Tap̱a mo ’peni momis mo. 
\q1 Maŋi a’di e mo jin ḵa’dama/ ḵa’dam mo. 
\q1  
\v 2 Maŋi a’di mo, aris iman’doyu gwom piti mo. 
\q1 Maŋi a’di mo, aris unim piti kun ’kon e momis mo. 
\q1  
\v 3 Atente/ dhala ppe, maŋi a’di mo, 
\q1 maŋi a’di mo, aris uma cul kun kushki mo mo. 
\q1  
\v 4 Maŋi a’di mo, um momis kun ḵa’dama/ ḵa’dam mo, 
\q1 dhali um yi’de/ kun ’kona p̱o/ momis mo. 
\q1  
\v 5 Dhalki uni bway mo mmomaŋ gway gi Tap̱a mo. 
\q1 Haali/ a’di ḵanki’da ḵan mo dhali uni ’kokunu mo mmo/uḵ mo. 
\q1  
\v 6 Dhali a’di ṯelki uni sho’k ki sule/ sule/ mo dhali ki sule/ sule/ mo. 
\q1 A’di ki thoson gwayum buni jin mina uni mol pe mo. 
\b  
\q1  
\v 7 Maŋi Tap̱a ’peni mony’cesh mo, 
\q1 um kun ta dhan to yi’de/ gi ḵumma/ yi’de/ mo dhali aris moŋ’kulga/ mo, 
\q1  
\v 8 o’d dhala dhana wasa/ wosh dhala wasa/ kun ṯelkin mo dhala wasanyjap̱e/ mo, 
\q1 dhali ’tham jin mii’da p̱unthar uni thimki gwom piti jin ḵana a’diya ḵan mo. 
\q1  
\v 9 ’Kuwosha turga/ mo dhala ris wosh mo, 
\q1 cwa kun dho’th maman mo dhali arisa bwanyayiis mo. 
\q1  
\v 10 Aris tombwaasho dhali aris to/e mo, 
\q1 dhali to kun parana ’cesh mo dhali ’dii kun p̱eni mis mo. 
\q1  
\v 11 Imaliḵ kun ’kon e mony’cesh mo dhali aris ’kwani mo, 
\q1 dhali iya/ gi imaliḵ mo dhali aris tap̱a gi mony’cesh mo. 
\q1  
\v 12 ’Kwani kun ta dhuru’c mo dhali aris nyara/ mmonṯal ’de/ mo, 
\q1 dhali ’kwani kun tana dhan mo dhali uc̱i mo. 
\q1  
\v 13 Dhalki uni maŋ gway gi Tap̱a mo, 
\q1 haali/ gway piti a’di ’de/ ikaru ki ca mo. 
\q1 Monycam piti a’di idiki’da p̱o/ mony’cesh mo dhali momis mo. 
\q1  
\v 14 A’di ki ’de’k ce gi mowoṯẖ gom ’kwanim piti mo, 
\q1 maŋa maŋ goma ris unim piti kun dhunu ki she/ ki dhelel dhelel mo, 
\q1 haali/ ’Kwani ma Israyiil mo tani uni i’dishki a’di is mo. 
\q1 Maŋi Tap̱a mo. 
\c 149  
\q1  
\v 1 Maŋi Tap̱a mo. 
\q1 Yuḵi gway gi Tap̱a mo gway jin ta gway this mo, 
\q1 momaŋ piti eya dhana tul ’kup̱ gom ’kwani kun ta ku isiŋ gana/ mo. 
\q1  
\v 2 Dhalka Israyiil ’bora bwa mo eya Man/uḵ a’di mo, 
\q1 dhalki iya/ ma Sihyuun ’kunya bwa eya Maliḵ buni mo. 
\q1  
\v 3 Dhalki uni maŋ gway piti ki p̱e jin p̱ena uni imis mo, 
\q1 mmolugum gway gom a’di ka dheŋdhenye/ jin p̱inu ki me’d mo dhala dheŋdhenye/ jin ’kon ma shu/i pesu/ mo. 
\q1  
\v 4 Haali/ Tap̱a bu’thki mo jin ’boru bwa e ’kwanim piti mo. 
\q1 A’di nyoŋki a’di jin kar is ki gwa’d mo ki mo jin p̱inu mii e mo. 
\q1  
\v 5 Dhalki uni gun ta ku isiŋ gana/ iini mis gom bwam ’boro’d e monyca mo. 
\q1 Dhalki uni yuḵi gway gom bwaŋ ’kunyu’d eya cim buni mo. 
\q1  
\v 6 Dhalki mo jin eḵa/ eḵ jin minu maŋ Tap̱a di’d e ’kus buni mo, 
\q1 dhali dhan gandal kun kaaka ka ’ban su/ ’kon e me’d buni mo, 
\q1  
\v 7 mmori/a ri’c jin ricu ap̱o/ kal gi ’kwanin tiya mo 
\q1 dhali mmodora dora p̱o/ ’kwani mo, 
\q1  
\v 8 mmodeḵ imaliḵ buni ka jindhiir mo 
\q1 dhali unim buni kun sena ’penkap̱an ka maḵḵiyyan toŋḵuthu’d mo, 
\q1  
\v 9 mmotor uni gwon dwall ’twa/a ’cesh, gwon dwall jin ’kwarkunu mo. 
\q1 Yan ta monyca goma ris unim piti kun ta ku isiŋ gana/ mo. 
\q1 Maŋi Tap̱a mo. 
\c 150  
\q1  
\v 1 Maŋi Tap̱a mo. 
\q1 Maŋi Arumgimis e mom piti jin ḵogu mo. 
\q1 Maŋi a’di e mo ma balany piti mo jin c̱a’bki dem dem mo. 
\q1  
\v 2 Maŋi a’di gom miin to ma dem dem piti mo. 
\q1 Maŋi a’di isi ki dhan miiny cam piti jin cana a’di mo. 
\q1  
\v 3 Maŋi a’di ki ko ma poome/ jin dhalu me’d mo. 
\q1 Maŋi a’di ka dheŋdhenye/ jin ’kon ma shu/i ’kume’d mo jin buḵu ki dar ga yi’c mo dhala dheŋdhenye/ mo. 
\q1  
\v 4 Maŋi a’di ka dheŋdhenye/ jin p̱inu ki me’d mo dhali iiyi imis mo. 
\q1 Maŋi a’di ka shun dheŋdhenye/ mo dhala bargum mo. 
\q1  
\v 5 Maŋi a’di ki ko ma sahana shu e mo. 
\q1 Maŋi a’di ki ’kal ’kal ki ko ma sahana shu e mo jin tirkunu mo. 
\q1  
\v 6 Dhalka ris to ’baar mo kun shi/irrkin mo maŋi Tap̱a mo. 
\q1 Maŋi Tap̱a mo.