\id PHP  
\ide UTF8 
\h P̱ILIBBI 
\toc1 Gwo jin ’Kwar ma Buulus gom ’Kwani gi Pam P̱ILIBBI mo 
\toc2 P̱ILIBBI 
\mt1 Gwo jin ’Kwar ma Buulus gom ’Kwani gi Pam P̱ILIBBI mo 
\c 1  
\s1 Monthe Me’d 
\p  
\v 1 ABuulus dhala Ṯimuṯẖawuus kun ta c̱iŋkina/ goma Ḵrisṯẖos jin ta’da Yesus mo. 
\p E uni ’baar mo kun dhunu mo ki she/ ki dhelel dhelel eya Ḵrisṯẖos jin ta’da Yesus mo, e uni gun ’kon mo e Pam P̱ilibbi nyaḵki ’kwaniŋ gwanyjaḵa/ ma ḵaniisa dhali uni gun cila to hil mo. 
\p  
\v 2 A’the e um mo dhali moŋḵu’th is ’peni Arumgimis jin ta’da Babam bana dhali Tap̱a Yesus Ḵrisṯẖos mo. 
\s1 Mon’tho ma Buulus gom ’Kwani gi Pam P̱ilibbi kun Ta Imangam Gwo Is mo 
\p  
\v 3 Aha/ ’bora Arumgimis pem bwa i is mo ap̱owa ris mom pem jin kaka/ um e mo be.  
\v 4 Isa yampa/ eya ’thom pem mo gom umi ’baar mo mmomii mon’thom pem ki bwaŋ ’kunyga/ mo.  
\v 5 Mmo’bora ’bor bwa i is mo gom gwom ’borga/ jin nyaḵu um pwaḵ ki aha/ ’pena tee jin ṯwa/a/ ntagi shwane/ mo be.  
\v 6 Dhali aha/ misha ka jiŋ gana/ ki a’di jin ṯelki’da ṯu’c jin ’boro’d ’pen e um mo tani midi ’baar a’di mo ka tee ma Yesus Ḵrisṯẖos mo be.  
\v 7 A’di ’boro’d ki ’bor gana/ mo gom aha/ mmokulum gwo i bwa mo gom umi ’baar mo kansan mo haali/ aha/ dhuna um eya dum pem mo haali/ aris umi ’baar mo nyaḵu/ a’the pwaḵ ki aha/ mo me’d jin dika/ eya sijin mo dhali mmo’ce’d gwo she/ mo dhali mmoṯel gwom ’borga/ sho’k mo.  
\v 8 Haali/ Arumgimis ta’da man/o gwo gom aha/ mo mmo’kosha ṯe/ aha/ mo gom umi ’baar mo ka du ma Ḵrisṯẖos jin gama gam mo jin ta’da Yesus mo.  
\v 9 Dhali a’di ita mon’thom pem ki mo/en bum mini ish ki nyanye/ ki nyanye/ mo nyaḵki yuḵ ilu/ mo dhali mmonyiṯẖa ris to ’baar mo.  
\v 10 Wakan ki um mini ṯes to kun ’boron ki ’bor gana/ mo dhali mmota kun dhelelin mo dhali kun dar gi mii m’ba/ mo goma tee ma Ḵrisṯẖos mo be.  
\v 11 Mmo’tu’d mo ki maman gi mo ma ḵar/e jin p̱u’du’d ’pena Yesus Ḵrisṯẖos mo mmota monyca mo dhali momaŋ ma Arumgimis mo be. 
\s1 Gom Aha/ Mmodi mo tani A’di Ta’da Ḵrisṯẖos mo 
\p  
\v 12 Aha/ ŋap̱a um mmomish mo mo, iwaḵ, gom to gun mii aha/ mo ka jiŋ gana/ tani a’di ta ’pemen mmop̱al gwom ’borga/ mo be.  
\v 13 Dhali wakan mondeḵ pem goma Ḵrisṯẖos a’di wara’d ki mo jin mishu mo isi ki tur mo e uni gun dhunu mo mmohil gu’b ma mudhiir e mo jin jin ma askar ma Ithaaliya aji mo dhala ris unin tiya si’da/ mo.  
\v 14 Dhali awaḵa tiya ka ris bu’thkina du mo e Tap̱a gom mondim pem eya sijin mo dhali uni dar ma du mo ki nyanye/ mmoṯor gwo ma Arumgimis ki dar gi moŋḵo/ is mo be. 
\p  
\v 15 Kun tiya ka jiŋ gana/ c̱i gwo goma Ḵrisṯẖos ’peni bwa shigga/ mo dhali mmobira bir si’da/ mo hili kun tiya si’da/ ki bwaŋ gana mo be.  
\v 16 Ku gi ’ban yansan mii a’di ki mo/en mmomisha uni ki aha/ karkunu mo gom gwo mmo’ce’d she/ mo gom gwom ’borga/ mo.  
\v 17 Ku gi ṯwa/a/ c̱i gwo goma Ḵrisṯẖos ’peni bwa jin ḵwa/u mo tani yisa ki bwaŋ gana/ mo hili uni kulumki gwo ibwa mo mmoṯo’c aha/ ’kus mo e mondim pem eya sijin mo be.  
\v 18 Gomata ’te/. Jasi eya ris mii ’baar mo waḵki/ mii jin p̱wanu/ ’te/ mo walla e gwoŋ gana/ mo tani aḴrisṯẖos c̱ikunu ’twa/ maŋ mo dhali e a’di yan kantan mo tani aha/ ’kunykina bwa mo be. 
\p  
\v 19 Nye, dhali aha/ mina bwa ’kuny mo. Haali/ aha/ misha ka ’thom bum jin ’thokina um mo dhali mowoṯẖ gi Shi/in ma Yesus Ḵrisṯẖos kan mo tani a’di ṯu’kki mii is mo mmo’cuḵ aha/ mo be.  
\v 20 Me’d jin tana a’di moŋganan ’bam pem mo dhali mo ma ’teŋ kap̱e/ mo ki aha/ mina isi diki ’theya ’the ki sule/ mo tani hili ka du jin roc̱u sho’k isi bwaman mo shwane/ me’d isa yempa/ mo tani aḴrisṯẖos minu eh mo e buŋgwar is pem mo waḵki/ a’di ta mondiki/e walla mowu mo.  
\v 21 Haali/ gom aha/ mmodi mo tani a’di ta’da Ḵrisṯẖos mo dhali mmowu mo tani a’di ta nyunycina/ mo be.  
\v 22 Waḵki/ a’di ta mo gi ’konu ki e e buŋgwar is mo tani a’di ta ’pemen mmoḵal maman goma ṯu’c pem mo. Hili aha/ mola ṯor naskina/ a’di jin miga/ kwany mo.  
\v 23 Aha/ budha bwa ka yissa/ mo. Bwa oyaa/ ki ḵwa/ is mo dhali mmonyaḵ di eya Ḵrisṯẖos mo haali/ a’di ’boro’d ki ’bor gana/ mo be.  
\v 24 Hili mmodi mo ki buŋgwar is mo tani a’di minu mii mii mo gom gway bum mo be.  
\v 25 Dhali mmomishga/ yan ki isa duŋ gana/ mo tani aha/ misha ki aha/ mina di mo dhali rash c̱a’b mo e umi ’baar mo gom moŋḵal iim bum mo dhali bwaŋ’kunygam bum mo e moŋgam gwo is mo.  
\v 26 Wakan e aha/ mo tani ki um mini ta gi ’kup̱ mii mo kun mini ish ka enthus mo mmodhu ’ba/ eya Ḵrisṯẖos jin ta’da Yesus mo gom mmomiga/ p̱u’dku/ doḵ/e e um mo be. 
\p  
\v 27 Jasi a’di imina umi mii mo: Dhali dhalki um ta kum paŋ gana/ mo kun mini ha me’d mo gom gwom ’borga/ ma Ḵrisṯẖos mo. Wakan waḵki/ aha/ mina yaku/ mo dhali p̱ar um e mo walla aha/ mina p̱i mo tani aha/ mina ’taki ciḵ gwo gom um mo ki um ṯelki sho’k mo e shi/ina ’de/ mo ka dun ṯal ’de/ mo mmobira bir ki ’ban kuku/ mo gom moŋgam gwo is gi gwom ’borga/ mo be.  
\v 28 Dhali mmo’koki ḵo/ is gom toŋ kamu/ ṯal ’de/ mo ’peni uni gun asa uma p̱o/ mo. A’di ta to jin ṯoru eya tente/ mo gom uni mo mmo’kol e ki me’d mo gom mony’ce’d sho’k buni mo hili gom bway mowoṯẖ bum mo tani dhali a’di yan ’peni Arumgimis mo be.  
\v 29 Haali/ a’di c̱ikunu um mo gom gway ma Ḵrisṯẖos mo tani ki um mini ’taki ’koki gam a’di gwo is jasi ’te/ mo hili um si’da/ mina isi ’kosh ka nyor gom gway piti mo be.  
\v 30 Mmomal e e moŋ’kosh mii yan a’di jin p̱arkina um e mo dhali jin ciḵkina um jin di’d e aha/ shwane/ mo be. 
\c 2  
\s1 Ḵrisṯẖos Mmokarkina A’di Is ki Gwa’d mo tani A’di Karkunu ki Ca mo 
\p  
\v 1 Wakan waḵki/ mo jin roc̱uwa du sho’k mo eya Ḵrisṯẖos di’d mo dhali mo gi lalu sho’k mo ki gwo gi mo/en mo dhali mo gi nyaḵu to mii ka dun ’de/ gi Shi/in mo dhali waḵki/ adu jin gama gam mo dhali mii jin miinu ki mo/en mo tani  
\v 2 ’tu’daa/ mo ki mom’bor bwa mo mmota ga du jin nyaḵka’d mo mmo’tu’d ki mo/en ’de/ mo dhali mmo’tu’d ki bwan ’de/ mo dhali ka dun ’de/ mo be.  
\v 3 Dhalka aŋkirre/ ki mii mo mmota ham ’kus mo walla mmodhu is ki ’kwanim pa mo. Hili mmodhu is ki gwa’d mo mmohil ci i e ki ’bore/ mmobol is bumi e mo.  
\v 4 Dhalka ris um ka ’deṯe/ ’deṯe/ hil to gi cin tiya i e mo mmo’koki hil jasi tom bum gana/ i e mo.  
\v 5 Tayi gi bwa yan e bwaman is bum um ’cena mo ma, a’di jin takina um eya Ḵrisṯẖos jin ta’da Yesus mo,  
\v 6 a’di ba/ a’di jin ta jamas ma Arumgimis mo tani a’di diki o ki mo gi nyaḵa nyaḵ ka Arumgimis midi ta to jin minu bu’th ki wup̱ mo.  
\v 7 Hili a’di karki is piti bwa ’te/ mo mmobu’th jamas gi c̱iŋkina/ mo mmodhodhu a’di ki dho’th jin dho’thkunu ’kwani kansan mo be.  
\v 8 Dhali mmogamu a’di kan ki is gi wathiny’cesh mo tani a’di karki isi is piti ki gwa’d mo dhali mmowar ka manha gwo e mo mmowu mo isi wu gi cwany’ciṯẖan dhul mo be.  
\v 9 Wakan Arumgimis karki a’di ki caŋ gana/ mo dhali c̱i a’di gway jin di’d eya p̱owa ris gwayi ’baar mo.  
\v 10 Dhali ki gway ma Yesus mo tani aris ’kup̱a’dup̱uni ’baar mo mini mii luŋ mo ki ’beles e momis mo dhali e mony’cesh mo dhali e bwaŋ’kwariny mony’cesh mo  
\v 11 dhala risa le’di ’baar mo mini pi gwo mo ka Yesus Ḵrisṯẖos ta Tap̱a mo gom monyca ma Arumgimis jin ta Com mo be. 
\s1 Kushi Um Mo mo Me’d Moŋkush e Mony’cesh mo 
\p  
\v 12 Dhali wakan, um pem gun enka/ mo, me’d jin hana um gwo e isa yempa/ mo tani wakan shwane/, yisa jasi mmodika/ um e buŋ’kus mo hili ki nyanye/ mmop̱ika/ mo, miiyi mowoṯẖ bum gana/ mo ki moŋko/ is mo dhali ki mondee mo.  
\v 13 Haali/ Arumgimis umki mii mo e um mo dhali ki bwa jin ta bwa mo dhali ki bwa ma ṯu’c jin ta bwam pitiŋ gana/ mo be. 
\p  
\v 14 Miiyi aris to ’baar mo ki dar ga gumgum mo ma walla ki gwo jin doṯuwa doṯ mo.  
\v 15 Ki um mini dar gi mii ’ba/ mo dhali dar ga maḵ mo mmota uc̱i ma Arumgimis mo mmodar gi thalkin mo e bwaman ’kwani ma nyaḵum yil mo kun burusha ii ki burush mo dhali kun c̱aca ii ki c̱aca mo e bwam uni mo, uni kun kusha um mo me’d moŋkush eya ’cesh mo.  
\v 16 Mmolana um gwo gi mondiki/e bu’th mo wakan ka tee ma Ḵrisṯẖos mo tani aha/ mina kar is ki ca mo ki aha/ dinaki gus mo ka wuny is walla miiya ṯu’c ka wuny is mo be.  
\v 17 Me’d waḵki/ aha/ ’thinu mo e mo jin miinuwa basa ’cesh mo gom moŋgam gwo is bum mo tani aha/ ’bora bwa mo dhali ’kunya bwa mo nyaḵki umi ’baar mo be.  
\v 18 Wakan si’da/ um mina bwa ’bor mo dhali ’kuny bwa mo nyaḵki aha/ mo be. 
\s1 Ṯimuṯẖawuus dhala Abap̱rudiṯus mo 
\p  
\v 19 Aha/ ṯosha e Tap̱a Yesus mo mmohashka/ Ṯimuṯẖawuus e um mo ki ’dishe/ mo. Wakan ki aha/ minu malas mo ki gwo ’peni um mo.  
\v 20 Aha/ dara gi jan ’de/ jin waki a’di mo jin midi ta gi bwaŋ gana/ mo mmo/anan is gom mmo’kona um ki ’kom pa mo.  
\v 21 Uni ’baar mo hili jasi ’kup̱ki tom buni mo, yisa gom to ma Yesus Ḵrisṯẖos mo.  
\v 22 Hili Ṯimuṯẖawuus ta a’dim pa jin misha um mo mmomii to me’d ya/ jin mii to gom com mo tani a’di miiki to nyaḵki aha/ mo gom gwom ’borga/ mo be.  
\v 23 Aha/ ṯosha wakan mmohashki a’di i um mo ki ’dishe/ me’d jin miga/ mish ki a’di midi ya kata gom aha/ mo.  
\v 24 Dhali aha/ gama gwo is e Tap̱a mo ki aha/ ki ’dishe/ ki is pem mina yaku/ si’da/ mo be. 
\p  
\v 25 Aha/ kuluma gwo ibwa ki kulum gana/ mo ki a’di minu mii mii mmohash ki uma Abap̱rudiṯus a’di jin ta’da kam pem mo dhali agarr jin nyaḵa’da ṯu’c mii mo dhali agarr jin ta’da askar mo dhali amanyam bum mo dhali amanmii to jin miga/ mii ta mo.  
\v 26 Haali/ a’di ’kosha ṯe/ umi ’baar kagahara mo dhali a’di butha ’tham mo haali/ um ciḵ gwo mo gom a’di ki a’di ’ba’thki’d mo be.  
\v 27 Ka jiŋ gana/ a’di ’ba’thki’d mo mmo’dish ’twa/ mmowu mo be. Hili Arumgimis miimii ap̱o/ a’di mo dhali yisa jasi e a’di, hili ap̱o/ aha/ si’da/ isi ciki/ aha/ mina ’taki ta gi bwan diṯi’d jin ta jin diṯadiṯ mo.  
\v 28 Aha/ tup̱a bwa kagahara mo mmohash ki um a’di wakan mo ki um mina bwa ’kuny mo mmop̱ar a’di e mo doḵ/e dhali kan mo ki aha/ mina mo/anan is pem idinin is mo be.  
\v 29 Wakan buthi a’di e Tap̱a ki bwaŋ ’kunyga/ ’baar mo ma dhali taḵi ’kwani kun wakan mo.  
\v 30 Haali/ a’di muru’di wu mo goma ṯu’c ma Ḵrisṯẖos mo, a’di c̱i mondiki/em piti mmothima ṯu’c bum gom aha/ mo be. 
\c 3  
\s1 Gwoŋ Gana/ gi Mii ma Ḵar/e mo 
\p  
\v 1 Gom gwo jin boc̱o’d mo gom um, iwaḵ pem mo. ’Bori bwa mo ma, e Tap̱a mo. Mmo’kwar um gwo kun nyaḵkan mo tani a’di diki ṯocaa/ bwa mo haali/ a’di ta’da teṯe/ gom um mo be. 
\p  
\v 2 Jiyi a’ka ki e ki ’bore/ mo ma. Dhali jiyi uni gun mii tonthus ki e ki ’bore/ mo ma. Jiyi uni gwansan ki e ki ’bore/ mo ma kun ’ciṯẖi/ buŋgwar is is mo.  
\v 3 Haali/ ana tana uni gun ’ciṯẖuwa munyjal yis gana/ mo ana gun luŋa Arumgimis ki shi/in mo dhali monyca eya Ḵrisṯẖos jin ta’da Yesus mo dhali mmo’koki dhu buŋgwar is e buŋgwar is mo.  
\v 4 Ba aha/ ki is pem tana gi ’kup̱ gwo mo gom buŋgwar is jin ta buŋgwar is mo si’da/. Waḵki/ wathiŋ kamu/ midi kulum gwo ibwa ki a’di ta gi ’kup̱ gwo e buŋgwar is mo tani aha/ tana ki nyanye/ ki nyanye/ mo be.  
\v 5 Aha/ ’ciṯẖkunuwa munyjal yis mo ka cim pekwara mo dhali aha/ tana wathi/ ’peni ’Kwani ma Israyiil mo dhali aha/ tana ja waḵ ma Benyamiin mo, dhali aha/ tana ji Ibraniyiin mo jin dhodhu e ’Kwani ma Ibraniyiin mo be. Me’d gwo gi gwoŋḵan jin c̱inu ki ’Kwani P̱arisiyiin mo tani  
\v 6 aha/ shwakina anyor mo mmoṯoca ḵaniisa bwa mo, me’d gwo gi mo ma ḵar/e jin baṯẖ gwoŋḵan jin c̱inu i’ko’d mo tani aha/ dina ka p̱o/ mo be.  
\v 7 Hili waḵki/ nyunycinaŋ kamu/ di’d jin taka/ mo tani a’di karka/ me’d to jin thisu e mo gom gway ma Ḵrisṯẖos mo be.  
\v 8 Ka jiŋ gana/ aha/ dhuna ris to me’d to kun thisu e mo gom to jin bolo’da ris to ’baar mo e ki ’bor mo jin ta mmomisha Ḵrisṯẖos jin ta’da Yesus Tap̱am pem mo be. Dhali gom gway piti mo tani aha/ wana gwo kan e bwa mo mmodhala ris to ’peni ’baar mo dhali aha/ dhuna uni me’d to gun pishu mo ki mii gi wakan ki aha/ mina gama Ḵrisṯẖosa du is mo be.  
\v 9 Dhali ki aha/ minu this mo i is e a’di mo, yisa mmota gi mo ma ḵar/e ki is pem mo yisa, mmo’dap̱ ’ko’di gwoŋḵan jin c̱inu mo. Hili a’di jin ta mo gi gamu gwo is eya Ḵrisṯẖos mo. Mo ma ḵar/e yan ’peni Arumgimis mo a’di jin di ’ko’d e mo jin gamu gwo is mo be.  
\v 10 Ki aha/ mina mish a’di mo dhali mom’bi’th gi mompim piti mo dhali aha/ mina pash mo gi isa nyor piti mo mmowar waki a’di e jwam piti mo be.  
\v 11 Wakan waḵki/ a’di mishu mii mo gom aha/ ki aha/ mina bumbur mo e mo jin pinu mo ’peni mowu mo be. 
\s1 Yana ’Kup̱ ki ’Kup̱a Ŋwa mo 
\p  
\v 12 Yisa mmobu’thkika/ to yansan mo hila/ walla mmowarki jim ’borgaŋ gana/ mo hila/, hili aha/ dina mmo/ur a’di mo mmomiga/ bu’th a’di jin bu’thkin ma Ḵrisṯẖos jin ta’da Yesus aha/ mo, mmokar aha/ mo mmota jim piti mo be.  
\v 13 Iwaḵa, aha/ dinaki kar is pem ki jim bu’th to mo hila/. Hili ton ṯal ’de/ miiga/ mo mmodhalka ris to gunn ŋ’ko’d mo dhali mmogoŋ is ka ḵarambuye/ ki to gun ’koni buŋ’kup̱ mo tani  
\v 14 aha/ gusa ur to i’ko’d mo e mo jin tanu gi ’kup̱ to mo mmogam ’kup̱a ŋwa ’pena yuḵ ma Arumgimis ’peni momis mo eya Ḵrisṯẖos jin ta’da Yesus mo be.  
\v 15 Dhalki ana gwansan gun isa mo tani tana gi bwa ki wakan mo ma. Dhali waḵki/ um ’kona bwa ka bwanycin mo, ma e ton tiya mo tani Arumgimis midi ṯor a’di yan eya tente/ e um si’da/ mo be.  
\v 16 Isi kan dhalki ana iina iiŋ gana/ mo e mo jin bumburkina ana mo. 
\p  
\v 17 Iwaḵa, ’thoḵaa/ mii mo ma dhali ḵuthi uni gwansan ki e mo ma uni gun ’kokin mo mmomii kan me’d jin p̱ara um she/mm e e aman mo.  
\v 18 Haali/ uni ka ris ṯorkika/ um mo me’d ka ris mo dhali shwane/ aha/ ṯora um gwo ki jabu’th mo uni gun ’kokin mo mmomii waki uni gun ta ’kup̱ gi cwany’ciṯẖan dhul ma Ḵrisṯẖos mo be.  
\v 19 ’Pemen buni ta mony’ce’d sho’k mo dhali arum buni jin luŋa uni mo tani ta bwa mo dhali uni caki can thus e mon’the is buni mo ki bwa jin dhuna uni ki to ga ’cesh mo be.  
\v 20 Hili ’peŋkuman pam bana a’di ta momis mo be dhali ’peni a’di mo tani ana c̱orkina Amanwoṯẖ mo jin ta Tap̱a Yesus Ḵrisṯẖos mo be,  
\v 21 a’di jin midi aḵ buŋgwara ha’th’ko’d bana yan e mo mmowa e ki buŋgwar is piti mo e monyca mo ki mom’bi’th jin ’bitha a’di e mo mmomisha ris to dhu ’baar mo mmobaṯẖ a’di i’ko’d me’d is pitiŋ gana/ mo be. 
\c 4  
\s1 ’Kunyi Bwa mo ma e Tap̱a mo 
\p  
\v 1 Wakan iwaḵ pem, um gun enka/ mo dhali kun ’kosha ṯe/ aha/ mo dhali kun ta bwaŋ ’kunygam pem mo dhali kun ta toŋ’kup̱ pem mo tani ṯeli sho’k wakan e Tap̱a mo ma um gun enka/ ki mo/en gana/ mo. 
\p  
\v 2 Aha/ malaskina Ap̱uudiya mo dhali aha/ malaskina Sinṯiiḵi mo mmogam gwo me’d mo e Tap̱a.  
\v 3 Dhali aha/ doṯkina /e si’da/ amannyaḵ dhaŋḵa’b ganam pem bu’th mo ki woṯẖi/ up̱ gwansan mo ma, haali/ uni nyaḵkina ṯu’c mii ki ’ban kuku/ nyaḵki aha/ mo e gwom ’borga/ nyaḵka Aḵlimandus mo dhali kun tiya kun nyaḵkana ṯu’c mii ki aha/ mo uni gun ’kona gway eya warka/ gi mondiki/e mo be. 
\p  
\v 4 ’Kunyi bwa mo ma, e Tap̱a, isa yempa/ mo. Doḵ/e aha/ mina o um gwo mo ki: ’Kunyi bwa mo ma.  
\v 5 Dhalka ris ’kwani ’baar mo mishi mo mo ma, mo ma dum bum jin ’tima um mo. Haali/ Tap̱a a’di ’disha ’twa/ mo hila/.  
\v 6 Dhalka anan ki anan mo gom ton ’deŋ kamu/ mo ma hili eya ris to ’baar mo ki mon’tho mo dhali ka thip̱ jin thip̱u mo ki mom’bor bwa i is mo tani dhalki ton doṯ bum minu mish mo eya Arumgimis mo.  
\v 7 Dhali moŋḵu’th is ma Arumgimis a’di jin peki’d eya ris mo jin mishu gwo ’ban mo tani a’di midi jiya dum bum mo dhali bwam bum eya Ḵrisṯẖos jin ta’da Yesus mo be. 
\s1 Kulumi Gwo gi To Gwansani Bwa mo 
\p  
\v 8 Gom gwo jin boc̱o’d mo gom um, iwaḵ mo tani aris to gun ta kuŋ gana/ mo, aris to gun ta kun taḵu mo, aris to gun ta kuŋ ḵar/e mo, aris to gun ta kun dhelelin mo, aris to gun ta kun ŋa/u mo, aris to gun ta kuny jaro/ mo, waḵki/ akamu/ midi ’taki di jin bol tiya e ki ’bor gana/ mo tani waḵki/ ṯal ’deŋ kamu/ midi ’taki di jin ta jin ha me’d mo ki momaŋ mo tani kulumi gwo gwansani bwa mo ma.  
\v 9 To gun da/ara um mo dhali kun budha um mo dhali kun ciḵa um mo dhali kun p̱arkina um e mo e aha/ mo tani to gwansan miiyi uni mo ma dhali Arumgimis gi moŋḵu’th is midi di e um mo be. 
\s1 Gwo Ṯoru gom To jin C̱ina ’Kwani gi Pam P̱ilibbi ki Me’d mo 
\p  
\v 10 Hili aha/ ’bora bwa mo e Tap̱a ki canye haali/ me’d doḵ/e hila/ um ṯuju bwam bum ki cu mo mmokayaa/ e mo. Ka jiŋ gana/ um kaka/ e mo hili um dar gi bway ’boro’d mo mmomii to mo.  
\v 11 Yisa mmo/oka/ gwo gom mo gi hara to mo haali/ aha/ mishkina mo ki is pem mo ki mo yin jin dika/ nycine/ mo tani aha/ c̱a’bkina mo ka this mo i e mo be.  
\v 12 Aha/ misha mmokar is ki jiŋ gwa’d mo dhali aha/ misha si’da/ mmo/isha to ka enthus mo. Eya ris to ’baar mo dhali gom to ’baar mo tani aha/ mishkina ka malimbu’da/ mmokap̱ mo dhali mmo’kosha ṯe/ mo, mmo/isha to ka enthus mo dhali mmohara to mo.  
\v 13 Aha/ misha aris to ’baar mo mii mo e a’di jin ’bi’thki aha/ is mo be. 
\p  
\v 14 Bahili um miikin ki ’bore/ mo mmoc̱ina um to gom aha/ gom monṯo’c is pem mo be.  
\v 15 Dhali um ki is bum si’da/ mishin um gi Pam P̱ilibbi ki me’d ka muŋ’kup̱ ’peni gwom ’borga/ ki aha/ dhalkina Pam Makiduniyya ’pen mo tani aḵaniisaŋ kamu/ yisa nyaḵ to mii ki aha/ yisa e momii jin c̱inu to ki me’d mo dhali e mo jin budhu to mo hili isi ciki/ um ’cena mo be.  
\v 16 Gom me’dyin e Pan Tasaluniiki tani um hashki jan ’de/ mo dhali doḵ/e gom to jin miga/ mii ta mo.  
\v 17 Yisa mmosimmka/ to jin c̱inu ki me’d e mo yisa, hili aha/ simma maman e mo ki a’di midi mar is mo mmoḵam gom um mo be.  
\v 18 Hili aha/ bu’thkina to ’baar mo ki nyanye/ mo. Aha/ ’tu’dkunu mo mmobu’thkika/ to mo ’pena Abap̱rudiṯus mo, to gun p̱u’dkin mo ’peni um jin ta’da shim jin c̱inu jin ḵuyi mo ki ḵuy jin ta mo jin miikunuwa bas mo jin mishu bu’th mo mmo’bora Arumgimis bwa i is mo be.  
\v 19 Dhali Arumgimis pem midi thip̱ um ka ris to gun mina umi mii ta mo isi to gun waki kun tana a’di pam piti mo e monyca eya Ḵrisṯẖos jin ta’da Yesus mo be.  
\v 20 Shwane/ dhalki monyca a’di di’d eya Arumgimis bana jin ta’da Babam bana ki sule/ sule/ ya ye ’ba/ moonnii. Amen. 
\s1 Ḵwalany Monthe Me’d jiŋ ’Ko’d mo 
\p  
\v 21 Theka ris uni ’baar mo me’d kun dhunu ki she/ ki dhelel dhelel eya Ḵrisṯẖos jin ta’da Yesus mo ma. Dhala waḵ kun ’kon nyaḵki aha/ mo tani theki um me’d mo si’da/.  
\v 22 Aris uni kun dhunu ki she/ ki dhelel dhelel mo tani theki um me’d mo uni gun mumki ’ko mo e gu’b ma Kaysar mo be. 
\p  
\v 23 A’the ’peni Tap̱a Yesus Ḵrisṯẖos midi di e shi/in bum mo be.