\id JAS  
\ide UTF8 
\h YAKUUB 
\toc1 Gwo jin ’Kwar ma YAKUUB mo 
\toc2 YAKUUB 
\mt1 Gwo jin ’Kwar ma YAKUUB mo 
\c 1  
\s1 Monthe Me’d mo 
\p  
\v 1 AYakuub jin ta c̱iŋkina/ ma Arumgimis mo dhali Tap̱a Yesus Ḵrisṯẖos mo be. 
\p E uni kun ’kon ma waḵi ’kume’d i’ce’dka su/ mo uni kun c̱ekerkunu bwa mo. 
\p Monthe me’d mo. 
\s1 Moŋgam Gwo Is dhali Mo jin Dhunu Is ki Gwa’d mo 
\p  
\v 2 Kari bwaŋ ’kunyga/ mo ma, iwaḵ pem, ki um jemki ’kup̱ ki mompal ki she/ ki she/ mo.  
\v 3 Haali/ um mishkin ki mompal gi moŋgam gwo is bum pucurki’d mo mmoṯel sho’k mo be.  
\v 4 Dhali dhalki mo jin ṯelu sho’k mo ’tu’da/ mo jin pucuru mo ki um mini ta kum ’borgaŋ gana/ mo dhali ta kun thimin mo mmo’koki har toŋ kamu/ mo. 
\p  
\v 5 Waḵki/ jan ṯal ’deŋ kamu/ ’peni bwam um hara moyuḵ mo tani dhalki a’di doṯo’da Arumgimis mo a’di jin c̱iki’da ris ’kwani ka duŋ gana/ mo ki dar gi ŋadhum mo dhali a’di minu c̱i a’di mo be.  
\v 6 Hili dhalki a’di doṯ a’di ki moŋgam gwo is mo ki dar gi bwa jin shinu ’kup̱ mo haali/ a’di jin shina bwa ’kup̱ mo tani wana e ki yi’deŋ ḵumma/ jin bir bakal mo jin boru mo dhali jin ’dasha ’tham mo be.  
\v 7 Haali/ wathi/ c̱aan midi mii diki mii ṯosh ki a’di midi bu’th toŋ kamu/ ’peni Tap̱a mo.  
\v 8 A’di jin ’kona bwa isu/ mo dhali a’di jin gwakalki ya mo e bway piti ’baar mo. 
\p  
\v 9 Hili dhalka kana ha’th’ko’d ki kar mo mmokar ’bam piti ki ca mo e mo jin karu a’di ki ca mo  
\v 10 dhali a’di jin ta pa ki pa mo e mo jin karu a’di ki gwa’d mo haali/ me’d jandi/ ma sho mo tani a’di midi la p̱e mo be.  
\v 11 Haala tente/ sulu’d mo ki mom’ba’th piti jin shi’bili to mo dhali a’di ki ḵutha sho mo dhali jandim piti raskin mo dhali jarom piti ’ce’dkunu sho’k mo. Wakan si’da/ wathi/ jin ta pa ki pa mo midi us mo ki jog e bway piti jin ura a’di to isho’k mo be. 
\s1 Mo jin Paluwa Pal mo 
\p  
\v 12 Mom’bor mii gom wathi/ jin ’dimki ’kup̱ mo e mompal mo haali/ ki a’di mishki mompal mo tani a’di midi bu’th toŋ’kup̱ gi mondiki/e mo a’di jin on ma Arumgimis gwo is gom uni gwansan kun eni a’di mo be.  
\v 13 Dhalku/ wathiŋ kamu/ ki dhal bway mo ki a’di palu mo mmo/o gwo mo ki: Aha/ pal ma Arumgimis mo. Haali/ Arumgimis molu pal ki tonthus mo dhali a’di ki is piti si’da/ diki pal jan ṯal ’de/ mo be.  
\v 14 Hila ris ’kwani ka ’deṯe/ ’deṯe/ palkunu mo ki a’di jin diri’da dir mo dhali cesha bwa en’dap̱ buni mo be.  
\v 15 Dhali yan’ko’d mon’dap̱ e ki a’di bwaakunu mo tani a’di dho’thki miinthus mo dhali miinthus ki a’di caki’d mo tani ḵalki mowu mo be. 
\p  
\v 16 Dhalku/ ki ta uni gun hegu e mo ma, iwaḵ pem kun enka/ mo.  
\v 17 Aris tom ’boron gun c̱inu ki me’d mo kun ta kum ’borgaŋ gana/ mo tani uni ’peni momis mo mmothulu/ mo ’pena Baba gi moŋkush mo. E a’di mo tani mo jin aḵuwa aḵ yisa di’da walla ala p̱iyi’d si’da/ ’peni mo jin ṯukuwa ṯu’k mo.  
\v 18 ’Peni bwam pitiŋ gana/ mo tani a’di ki dho’th ana mo ki gwoŋ gana/ mo ki ana mina ta maman kun ṯwa/a/ ’peni mo/uḵ piti mo be. 
\s1 Gwo jin Ciḵu dhali Mii Gwo mo 
\p  
\v 19 Mishi gwo yan mo ma, um iwaḵ pem kun enka/ mo. Dhalka ris ’kwani ’baar ka ’deṯe/ ’deṯe/ mer is mo ki jahanne/ mmociḵ gwo mo dhali c̱ori naskina/ mo dhali o gwo mo dhali c̱ori naskina/ mo dhali miiya nyor mo.  
\v 20 Haala nyor jin miina wathi/ mo tani a’di diki ta to jin mii mo ma ḵar/e goma Arumgimis mo.  
\v 21 Dhali ki mii gi wakan mo tani dhuyi aris tony nyogga/ ’pen ka pije/ mo dhali mii kun ’coḵa’coḵ kun ishin ka enthus mo dhali bu’thki mo jin dhunu is ki gwa’d mo gwo jin sinu mo a’di jin mishki’da ḵashiram bum woṯẖ mo. 
\p  
\v 22 Hili tayi imanmii gwo mo ma dhali dhalku/ ki ciḵ gwo jasi ’te/ mo mmohe’k is bum e mo.  
\v 23 Haali/ waḵki/ wathin ’de/ jin ciḵ jasi gwo ’te/ mo dhali diki mii a’di mo tani a’di wana e ki wathi/ jin hili jis/em piti jin dhodhu a’di mo eya hiljaro/ mo.  
\v 24 Haali/ ki a’di hilki is piti mo dhali ya mo tani dhali ki jahanne/ a’di ki this mohil jin wana a’di kan e mo be.  
\v 25 Hili a’di jin tu gwoŋḵan jin c̱inum ’borgaŋ gana/ mo tani a’di jin ta ji gi kara’da kar ki ’kus mo dhali a’di jin ’dim ’kup̱ mo mmodiki ciḵ jasi gwo ’te/ mo mmothis a’di e mo tani hili mii a’di yan jin miinu mo tani a’di iminu ’bor mii mo e a’di jin miikina a’di mo be. 
\p  
\v 26 Waḵki/ wathiŋ kamu/ kulum gwo ibwa ki a’di ta’da manluŋ to mo dhali diki ’kalitha le’d piti mo tani hili a’di he’kki’da dum piti e mo, mo jin luŋa wathi/ yan mo tani a’di ta mii jin miinu ki p̱e’th mo be.  
\v 27 Mo jin luŋu aluŋ jin dheleli’d mo dhali jin dinuki shi/ ki mii gi wakan mo ibwambor ma Arumgimis mo dhali Ababa a’di wa cikise/ mo be: mmohil gom uni gun tana thip̱a/ i e mo dhali uni gun wuna ikaṯẖ mo e monṯo’c bwam buni mo dhali mmokar is pitiŋ gana/ mo ki dar gi monyogga/ mo ’peni mony’cesh mo be. 
\c 2  
\s1 Gwo jin Rumu Ap̱o/ Mii gi Miinuwa Mii ka Gwar ’De/ mo 
\p  
\v 1 Iwaḵ pem, dhalku/ mii ki mii ka gwar ’de/ mo me’d jin bu’thkina um moŋgam gwo is mo e Tap̱a Yesus Ḵrisṯẖos bana mo, a’di jin ta Tap̱a gi monyca mo.  
\v 2 Haali/ waḵki/ wathiŋ kamu/ ta gi ’dolkon to me’d mo dhali hi’th burrinye/ jin bol tiya e ki ’bor i is mo mmoyayu/ e gu’b gi montul is bum mo tani dhali wathiŋ kamu/ jin hatha’ko’d hi’th burrinyem p̱orkin p̱u’dki’d mo si’da/ tani  
\v 3 dhali um c̱i a’di jin hithi burrinye/ jin bol tiya e ki ’bor ahirdhe/ mo dhali o gwo mo ki: C̱a’bi imahan mo ma gana, dhali um ka yiha/ ki o wathi/ jin hatha’ko’d gwo mo ki: Doshi mmaṯṯaan, walla, C̱a’bi e sho’k pem mmahan mo ma tani  
\v 4 ’kona um ki mii to ka ḵwam bwa wakan e bwam is bum mo dhali ta imandwall gwo gom gwonthus kun kulumkina um ibwa mo ’taa?  
\v 5 Dhuyi ’ce mo ma, uma waḵ pem gun enka/ mo. Din ma Arumgimis ki kwany uni gwansan kun hatha’ko’d e mony’cesh mo mmota pa ki pa mo e moŋgam gwo is mo dhali mmota imanḵal mal gi bampa/ gi momis jin okina a’di gwo is gom uni gwansan kun eni a’di mo ’taa?  
\v 6 Hili um this wathi/ jin hatha’ko’d mii mo. A’di diki ta unim pa kun ’cwar umma? A’di diki ta uni gun dir um e mo jin dwallu gwo mo ’taa?  
\v 7 A’di diki ta uni gun wal gwo sora p̱o/ gway yan ki a’di jin taḵu mo jin yuḵu um mo ’taa? 
\p  
\v 8 Waḵki/ um ka jiŋ gana/ thimki gwoŋḵan ma maliḵ mo isi me’d Gwo ma Arumgimis kun ’kwarkunu mo ki: /E mini en amannyaḵ c̱a’b pini me’d is piniŋ gana/ mo tani um miin ki ’bore/ mo be.  
\v 9 Hili waḵki/ um mii mii ka gwar ’de/ mo tani um miiki miinthus mo dhali um waḵa gwoŋḵan jin c̱inu mo me’d ’kwani gun dhaŋki gwo mo be.  
\v 10 Haali/ a’di yin jin dhuki gwoŋḵan jin c̱inu mo ka ’dan’dap̱ mo hili i/ush me’d mo gom jan ṯal ’de/ mo tani a’di wara’d ki wathi/ jin dina mii i’ba/ mo gom uni ’baar mo be.  
\v 11 Haali/ a’di jin o gwo mo ki: Dhalku/ c̱al ki mii mii mo ma, a’di si’da/ o gwo doḵ/e mo ki: Dhalka ’kosh ki mii ’kosh mo ma. Waḵki/ /e diki mii miinyc̱al mo hili i’kosha ’kosh mo tani /e waran ka mandhaŋ gwoŋḵan jin c̱inu mo be.  
\v 12 Wakan oyi um gwo mo dhali miiyi to mo wakan me’d uni gwansan gun minu dwall gwo mo ’ko’di gwoŋḵan jin dhu’da dhu ki ’kus mo.  
\v 13 Haali/ gwon dwall a’di dar gi mo jin minu miimii mo e a’di jin diki ṯor momiimii mo. Hili momiimii ta mo jin p̱inu mii e ap̱o/ gwon dwall mo be. 
\s1 Moŋgam Gwo Is ki Dar gi Mii mo tani A’di Wu’d mo be 
\p  
\v 14 Dhali gwo bala nyo/u kata mo, iwaḵ pem mo, waḵki/ wathi/ o gwo ki a’di ta’d gi moŋgam gwo is mo hili idiki mii to mo tani a/mina moŋgam gwo is piti ita a’di is ki me’d mo ’taa?  
\v 15 Waḵka kan walla ’bwahan hatha to hi’th ’ko’d mo dhali dar gi tonṯe/ mmoshwa mo tani  
\v 16 dhali jan ’de/ ’peni um o uni gwo mo ki: Iiku/ ki moŋḵu’th is mo ma, dhali, ’Bathi is ki ’ba’th mo, dhali, ’Tu’di/ mo, ki dar gi to jin c̱ina um uni mo mmota mo gom buŋgwar is buni mo tani a/dhali mii yan a’di nyo/u ki ’bore/ ’taa?  
\v 17 Wakan si’da/ moŋgam gwo is ki is piti mo waḵki/ a’di dinuki mii to mo tani a’di wu’d mo be. 
\p  
\v 18 Hili wathin ’deŋ kamu/ midi o gwo mo ki: /E tan gi moŋgam gwo is mo dhali aha/ tana gi mii mo. Ṯor aha/ moŋgam gwo is pini ki dar gi miim pini mo ma dhali aha/ ki miim pem mo tani mina ṯor /e moŋgam gwo is pem mo be.  
\v 19 /E gami gwo is ka Arumgimis ṯal ’de/ mo. /E miin ki ’bore/ mo be. Me’da rum thus kun nyo/on si’da/ gam gwo is mo dhali cuna is ki thunthur mo.  
\v 20 /E ona bwa ki to minu ṯora, /e cim p̱us yan, ki moŋgam gwo is ki dar gi mii mo tani a’di ta’da bush ’ko’d mo be.  
\v 21 Ibrahiim jin ta’da babam bana dinuki kar ki mo ma ḵar/e ki mii mo ki a’di c̱i ya/m piti ka Is/hak ap̱owa gwaṯa/ jin miinuwa basa ’cesh mo?  
\v 22 /E mishin ki moŋgam gwo is nyaḵ ya ki miim piti mo dhali moŋgam gwo is a’di thimkunu ki mii mo be.  
\v 23 Dhali Gwo ma Arumgimis jin ’kwarkunu mo thimki gwo jin onu mo ka: Ibrahiim gamki’da Arumgimis gwo is mo dhali a’di karu a’di ki mo ma ḵar/e mo, dhali a’di yuḵu ka mugu ma Arumgimis mo be.  
\v 24 /E mishin ki wathi/ a’di karu ka ḵar/e ki mii mo dhali yisa ki moŋgam gwo is a’di ’de/ yisa.  
\v 25 Dhali ki mii jin nyaḵa’d kan mo tani dinuki kara Rahab si’da/ jin mii miinyc̱al mo, ki mo ma ḵar/e ki mii mo me’d jin bu’thkina a’di igumbway mo dhali ṯu’c uni ki ii ka pije/ ki bwaya kamu/ mowa?  
\v 26 Haali/ me’d buŋgwar jin dar gi shi/in mo tani a’di wuki’d mo, wakan si’da/ moŋgam gwo is jin dar gi mii mo tani a’di wuki’d mo be. 
\c 3  
\s1 Ale’d 
\p  
\v 1 Um mini mii dhalku/ ki ta aris ka aris mo mmota imanṯor gwo mo, iwaḵ pem, haali/ um mishin ki ana gun ṯora gwo mo tani minu dwall gwo ki miiwaḵ jin ’bitha’bi’th ki nyanye/ mo be.  
\v 2 Haali/ ana ’baar mo tana iman’ciṯẖ mii ka ris e i’pen mo dhali waḵka cin ’deŋ kamu/ jin diki ’ciṯẖ mii e i’pen e gwo jin ona a’di mo tani a’di ta wathim ’borgaŋ gana/ mo jin mish ’kali’th buŋgwar isi ’baar mo si’da/.  
\v 3 Waḵki/ ana dhuna toŋ ’kali’th e ’twa/ shumarum mo jin mina uni ha ana gwo e mo tani ana susa buŋgwar is buni ’baar mo be.  
\v 4 Hili gwo goma ḵur yi’de/ mo ma si’da/, ba uni gun caaca kagahara mo tani dhali borkina ’tham kun ’bitha’bi’th mo tani uni shunu bway ki ushi cwam bum ’pen mo e mo yin jin ta bwa ma manbora ḵur mo be.  
\v 5 Wakan ale’d a’di ta ari tom buŋgwar is mo dhali kar ’ba/ ki ca mo gom to gun caaca mo. Bwany cwa wa’di caa jin karkunu mmoshwa ka le’d ga ara kap̱any o’d mo. 
\p  
\v 6 Dhali ale’d a’di ta o’d mo be. Ale’d a’di ta to gi ’kwaniny’cesh jin diki ta ḵar/e ibwaman tom buŋgwar is bana mo mmonyo/ buŋgwar isi ’baar mo mmoc̱i’th ki o’d ’peni buyem pa jin dhodhuwa dho’th jin dosh ’peni o’d mo dhali jin c̱idhu ki o’d ki mo/o’d mo.  
\v 7 Haali/ aris to gun ’kona sho’k do doŋon e ki she/ ki she/ mo tani dhali ’dii dhali to gun paarana ’cesh mo dhali to yi’de/ mo tani uni mishu non ’kup̱ mo mmo’te ’twa/ mo dhali uni nonu ’kup̱ mo mmo’te ’twa/ mo ki wathimpa en’thi/ mo be.  
\v 8 Hili wathimpa en’thiŋ kamu/ yisa mishuwa le’d non ’kup̱ mo mmo’te ’twa/ mo ki sule/ sule/ jin bir bakal ka yempa/ gom tonthus jin ’tu’du/ mo ka aṯi’d gi mowu mo be.  
\v 9 Ki a’di mo tani ana ’bora Tap̱a mii mo dhali Ababa mo dhali ki a’di mo tani ana jeekina ’kwani mo ana gun uḵkunu mo mmowa e ka Arumgimis mo.  
\v 10 ’Peni ’twa/ yan mo tani mom’bor mii p̱u’dki’d mo dhali monyjee mo. Iwaḵ pem, gwo yansan ḵa ba/ imidi ’taki diki di wakan mo.  
\v 11 A/yi’de/ yidhiṯẖga/ dhali jin ḵa/aḵa/ du’dun mo ’peni ’twan ’deya?  
\v 12 Cwamp̱u/ midi mish dho’th mamana seṯuuna, iwaḵ pem, walla cwalmana mura’th midi dhodha p̱u/ ’taa? Wakan si’da/ yi’dem ’bala’thga/ mol war ki yi’de/ jin yidhiṯẖi’d mo be. 
\s1 Moyuḵ ’Peni Momis mo 
\p  
\v 13 Kaja a’di iyuḵayuḵ mo dhali mish gwo ’ban mo ibwam um mo? Ki miim ’borgam piti mo tani dhalki a’di ṯor a’di ki miim piti jin kara a’di is ki gwa’d mo ki moyuḵ mo.  
\v 14 Hili waḵki/ um ḵa/ ma du ki ḵa/ mo mmoshi/ bwa mo dhali ta ham ’kus mo mmo’tula dum bum nycine/ mo tani dhalku/ ki dhu ’ba/ ki ca mo dhali mmota aṯor mo gom gwoŋ gana/ mo.  
\v 15 Moyuḵ yansan diki waki jin yayi’d ka ’cesh ’peni momis mo hili a’di ta jany ’cesh mo, dar gi to gi shi/in mo, ta ji ma rum thus kun nyo/on mo be.  
\v 16 Haali/ ki mo gi shinu bwa mo dhali mmota ham ’kus mo mmo’tula du mo ’kon mo tani a’di mina mo jin duŋkuru mii mo dhali mo jin boṯu ki miim bulga/ ’baar mo ’ko mo be.  
\v 17 Hili moyuḵ ’peni momis mo tani ta jin ṯwa/a/ jin dheleli’d mo, yan’ko’d mmota gi moŋḵu’th is mo dhali mmo’thup̱ e mo dhali mmoḵa’d bwa mo dhali mmo’tu’d ki momiimii mo dhali ki maman gana/ mo dhali mmodar gi mii ma gwar ’de/ mo walla mmodar ki washila/ mo be.  
\v 18 Dhali maman gi mo ma ḵar/e mo tani a’di sinu ki moŋḵu’th is mo ki uni gwansan kun dhukina dhu ki moŋḵu’th is mo be. 
\c 4  
\s1 Mmo’koki Ta Mugu gi ’Kwaniny’cesh mo 
\p  
\v 1 ’Peni mana yayin ma nyor mo dhali ’peni mana askina um ibwam um mo? A’di diki ta en’dap̱ bum ’taa? kun askin e tom buŋgwar is bum mo?  
\v 2 Um ’kona gwo ibwa mo tani dhali um ’koki gam a’di mo. Wakan um ki ’kosha ’kosh mo. Dhali um ’thoṯẖa bwa mo tani dhali um mol a’di bu’th mo. Wakan um askin mo dhali gama nyor mo. Um ’koki gam to mo haali/ um ’koki doṯ to mo be.  
\v 3 Um doṯki to mo tani dhali um ’koki bu’th a’di mo haali/ um doṯki to ki doṯ thus mo mmo’baar a’di jin ’dap̱a um e mo be.  
\v 4 Um ’kwaniny c̱al, ’kona um ki mish mo mo ki mmonyaḵ to mii ki ’kwaniny’cesh mo tani a’di ta ’kup̱ ka Arumgimis mo? Haali/ a’di wakan mo tani a’di yin jin ona bwa ki ta mugu gi ’kwaniny’cesh mo tani kar is piti mo mmota ’kup̱ ka Arumgimis mo be.  
\v 5 Walla a/ṯosha um ki Gwo ma Arumgimis jin ’kwarkunu mo o gwo ka wuny is mo mmo/o gwo mo ki: A’di jin shwana dhap̱ana nyor ap̱o/ shi/in jin kara a’di mo mmoc̱a’b e ana mo?  
\v 6 Hili a’di c̱iki’da ’the ki nyanye/ mo be. Dhali wakan a’di o gwo mo ki: Arumgimis ceshki mo mo gom uni gun dhu ’ba/ ki ca mo hili a’di ki c̱iya ’the gom uni gun dhu is buni ki gwa’d mo be.  
\v 7 C̱i is bum wakan ka Arumgimis mo ma. Roc̱i tap̱a ma ruma ’cesh mo ma dhali a’di midi gus mo ’peni um mo be.  
\v 8 ’Dishi Arumgimis is mo ma dhali a’di midi ’dish um is mo be. Lami me’d bum mo ma, um ’kwani kun ta imanmii miinthus mo dhali dheleli adum bum mo ma, um ’kwani kun ’kona bwa ka susu/ mo.  
\v 9 Tayi buyem pa mo ma dhali koyi mo dhali ki kony jabu’th mo. Dhalki momp̱e’th bum wara’d ki moŋko mo dhali dhalki bwaŋ ’kunyu’d bum wara’d ki mondiṯ bwa mo.  
\v 10 Dhuyi is bum ki gwa’d mo ibwambori Tap̱a Arumgimis mo ma dhali a’di midi dhu um ki ca mo be. 
\s1 Mmodwalla Kan Gwo mo 
\p  
\v 11 Dhalku/ gwonthus ki o ka rem ’kup̱ mo ma, iwaḵ pem. Haali/ a’di jin oki gwonthus ap̱owa kam piti mo walla dwalla kam piti gwo mo tani a’di oki gwo ap̱o/ gwoŋḵan jin c̱inu mo dhali dwall gwoŋḵan jin c̱inu gwo mo. Hili waḵki/ /e ki dwall gwoŋḵan jin c̱inu gwo mo tani /e tana manmii gwoŋḵan jin c̱inu mo yisa hili /e tana mandwall gwo mo be.  
\v 12 Amanc̱i gwoŋḵan jin c̱inu mo tani di’d ’de/ mo dhali amandwall gwo di’d ’de/ si’da/ mo, a’di jin mishi’da mish woṯẖ mo dhali mmo’ce’da/ ’ce’d sho’k mo. Hili ki /e ja dwallkina mannyaḵ c̱a’b pini gwo mo? 
\s1 Dhalku/ ’Baki ’Theḵi Mis goma ’Thamo/ mo 
\p  
\v 13 Iiyu/ shwane/ mo ma, um uni gun o gwo mo ki: Shwane/ walla ka’thamo/ ana mina ii mo e mo ciki/ dhali ciki/ e bampa/ mo dhali ’baar yil mo imun mo dhali yol to mo dhali gam nyunycina/ mo.  
\v 14 Hili um ’koki mish to gun mini mii ka’thamo/ mo. Moŋ’koki/em bum wakata mo? Haali/ um tana wulp̱e/ kun piyin ki ari mo mo dhali la p̱i mo be.  
\v 15 Gom kan ḵa ba/ gun o gwo mo ki: Waḵki/ Tap̱a ona bwa mo tani ana mina ’ko ki e mo dhali ana ki mii to yansan mo walla to c̱aan mo.  
\v 16 A’di ta a’di, um dhuki ’bam bum ki gwo jin baha um mo. Aris mo jin dhunu is ki ca mo tani uni ta tonthus mo.  
\v 17 A’di yin jin mish jim ’boro’d mo mmomii mo dhali diki mii a’di mo tani gom a’di mo a’di ita miinthus mo be. 
\c 5  
\s1 Gwo jin Rumu gom Uni gun Ta Pa ki Pa mo 
\p  
\v 1 Iiyu/ shwane/ um gun ta pa ki pa mo mmoko mo dhali mmowol cuuwa/ mo gom monṯo’c bwa gun p̱u’dkina p̱o/ um mo.  
\v 2 Tom bum kun tana um pa ki pa mo tani p̱u/kin mo dhali burrinyem bum shwan ma dhurany mo.  
\v 3 ’Dolkon ganam bum dhali ’dolkon kush bum wu gure/ mo dhali gurem buni kun wuna uni mo tani mini ta gwonṯor ap̱o/ um mo dhali a’di midi shwa buŋgwar is bum mo me’d o’d mo be. Um tul to gun ish ḵumma/ is mo goma cim kun ’koni ’ko’d mo be.  
\v 4 Hili to gi gama uni gun miina ṯu’c mo, uni gun ’ciṯẖi/ to mo e bwam buntom bum mo kun baga um ka wun mo tani gwokin kagahara mo. Dhali ko jin gwona iman’ciṯẖ to mo tani a’di jidhirki’d mo e bwany’ce gi Tap̱a Arumgimis gi momis mo be.  
\v 5 Um ’koni mony’cesh ki ’kom bum mo dhali ki bwam bum mo. Um momoṯkina dum bum mo eya tee jin ’ciṯẖu/ to ’kus mo.  
\v 6 Um ta imanwaḵa waḵ mo. Um ’koshki wathiŋ ḵar/e jwa mo. A’di diki roc̱ um mo be. 
\s1 ’Kuc̱i Bwa mo dhali Mo jin Paluwa Pal mo 
\p  
\v 7 ’Kuc̱i bwa mo ma ki ’kari’th wakan, iwaḵ pem, ntaga cim jin mina Tap̱a p̱u’du/ mo. Hili mo mo ma, amanḵor to c̱orki maman to jin tana aane/ e mony’cesh mo mmo’kuc̱a a’di bwa mo ki ’kari’th ap̱o/ a’di ntagi a’di bu’thki’da sho’k jin ṯwa/a/ dhala sho’k jiŋ ’ko’d mo be.  
\v 8 Um si’da/ ’kuc̱i bwa mo ma ki ’kari’th mo dhali ṯela dum bum sho’k mo gom ya gi mina Tap̱a p̱u’du/ e me’d hila/ mo.  
\v 9 Dhalku/ ki miiya gumgum mo, iwaḵ pem, ap̱o/ ka rem ’kup̱ mo ma, ki um minu ’koki dwall gwo mo. Hili mo mo ma, amandwall gwo a’di doshki’da p̱o/ campur mo be.  
\v 10 Me’d gi she/mm gi isa nyor mo dhali bwa jin ’kuc̱u mo ki ’kari’th mo tani iwaḵ pem, budhi imanc̱i gwo ma Arumgimis mo, uni gun c̱iki gwo gom gway gi Tap̱a Arumgimis mo.  
\v 11 Hili mo mo ma, ana yuḵa uni gwansan ki ku gi ’bora bwa mo, uni gun ’kokunu mo mmoṯel sho’k mo. Um ciḵki gwo mo goma Ayuub ṯelki sho’k mo dhali um p̱arki ’pemen jin di’di bwan Tap̱a e mo, bahili Tap̱a Arumgimis a’di jin hilki’da hil mo dhali mmomiimii mo be. 
\p  
\v 12 Hili ap̱owa ris to ’baar mo tani iwaḵ pem, dhalku/ ki o gwo is mmothul me’d mo walla gom momis mo walla gom mony’cesh mo walla ma e gwo jin onu isa tiya mo, hili dhalka nyem bum ta’da nye mo dhali hili dhalka yisam bum ta’da yisa mo, ki um mini ’koki ṯa’k mo e miiwaḵ mo be. 
\p  
\v 13 A/wathiŋ kamu/ ibwam um ’kosha is ka nyor mo ’taa? Dhalki a’di ’tho’d mo. Dhali a/wathiŋ kamu/ di’d jin ’bora bwa mo ’taa? Dhalki a’di yuḵ gway gi momaŋ mo.  
\v 14 A/wathiŋ kamu/ ibwam um ’ba’thki’d mo ’taa? Dhalki a’di yuḵ ’kwani gwanyjaḵa/ ma ḵaniisa mo dhali dhalki uni ’thon mo gom a’di mo dhali wol a’di ayini ’kup̱ ki gway gi Tap̱a mo  
\v 15 dhali ki mon’tho gi moŋgam gwo is mo tani a’di midi woṯẖ wathi/ jin ’batha’d mo dhali Tap̱a a’di midi cu a’di mis mo dhali waḵki/ a’di miiki miinthus mo tani a’di minu gwam mo be.  
\v 16 Dhali ki mii gi wakan mo tani piyi gwo miinthus bum ka rem ’kup̱ mo ma dhali ’thoyi ka rem ’kup̱ mo ma, ki um minu wac̱ mo be. Haali/ mon’tho gi wathiŋ ḵar/e mo tani ta gi mom’bi’th e a’di mmowagas mo be.  
\v 17 Iliyya a’di ta wathi/ jin nyaḵa e ’dap̱ ki ana mo dhali a’di ’thoki’d ka daran du mo jin min ma shoki diki he’th mo, dhali ki yili kwara mo tani dhali ka appe ’kona ’kup̱i pe’de/ mo tani asho’k diki he’th ap̱o/ mony’cesh mo be.  
\v 18 Dhali yan’ko’d a’di ’thoki’d mo doḵ/e dhali momis c̱iki’da sho’k mo dhali mony’cesh dho’thki maman tom piti mo be. 
\p  
\v 19 Iwaḵ pem, waḵki/ jan ṯal ’deŋ kamu/ ’peni bwam um dhereski’d mo ’peni gwoŋ gana/ mo tani dhali jamu/ ki sus a’di ka nyaŋ’ko’d mo tani  
\v 20 dhalki a’di mishi’d ki a’di yin jin susu’da manmii miinthus ka nyaŋ’ko’d ’peni bway dheres piti mo tani midi woṯẖ a’di aḵashiram piti ’peni mowu mo dhali midi kuma ma’diny miinthus ’kup̱ mo be.