\id COL  
\ide UTF8 
\h KULUUSI 
\toc1 Gwo jin ’Kwar ma Buulus gom ’Kwani gi Paŋ KULUUSI mo 
\toc2 KULUSSI 
\mt1 Gwo jin ’Kwar ma Buulus gom ’Kwani gi Paŋ KULUUSI mo 
\c 1  
\s1 Monthe Me’d mo 
\p  
\v 1 ABuulus, a’di jin karu ki she/ mo goma Ḵrisṯẖos jin ta’da Yesus mo ki bwa ma Arumgimis mo dhala Ṯimuṯẖawuus jin ta’da kam bana mo. 
\p  
\v 2 E uni kun dhunu ki she/ ki dhelel dhelel mo dhali iwaḵ kun ta ku isiŋ gana/ mo eya Ḵrisṯẖos mo, uni kun ’kokin mo e Paŋ Kuluusi mo. 
\p A’the e um mo dhali moŋḵu’th is ’peni Arumgimis jin ta’da Babam bana mo be. 
\s1 Mon’tho ma Buulus mo gom ’Kwani kun Gami Gwo Is mo e Paŋ Kuluusi mo 
\p  
\v 3 Aman isa yempa/ ’bora Arumgimis bwa i is mo, a’di jin ta’da Baba gi Tap̱a Yesus Ḵrisṯẖos bana mo, me’d jin ’thokina aman mo gom um mo,  
\v 4 haali/ aman ciḵkina gwo gom moŋgam gwo is bum eya Ḵrisṯẖos jin ta’da Yesus mo dhali mo/en jin takina um mo goma ris uni ’baar mo kun dhunu ki she/ ki dhelel dhelel mo,  
\v 5 haali/ mo ma ’teŋ kap̱e/ a’di karkunu mo gom um e momis mo. Gom a’di yansan mo tani um ciḵki gwo nṯwa/a/ mo e gwo jin ta gwoŋ gana/ mo, a’di jin ta gwom ’borga/ mo,  
\v 6 a’di jin p̱u’dki’d e um mo, me’d a’di ka jiŋ gana/ diki’d e mony’ceshi ’baar mo mmodho’thkina a’di maman mo dhali mmo’twaḵkina a’diya ’twaḵ mo – wakan e bwam um ki is bum mo ’pena tee jin ciḵkina um a’di mo dhali mish a’di ’ban mo, a’di jin ta’da ’the ma Arumgimis mo e gwoŋ gana/ mo,  
\v 7 me’d jin da/arkina um a’di mo ’pena Abap̱raas mo, a’di jin ta’da garr bam jin enu jin mii to mo. A’di ta a’di isiŋ gana/ mo jin mii to goma Ḵrisṯẖos mo gom gway bam mo  
\v 8 dhali a’di ṯorki a’di aman mo gom mo/en bum e Shi/in mo be. 
\p  
\v 9 Dhali wakan ’pena tee jin ciḵkina aman a’di mo tani aman yisa daḵkina ’tho mo mmo’tho mo gom um mo, mmodoṯa/ doṯ mo ki um minu ’taki ’tu’d mo ki monyiṯẖ bwam piti mo eya ris miin to gi shi/in gi moyuḵ mo dhali momish gwo ’ban mo,  
\v 10 mmosusa sus e bway mii kun mini ha me’d gom Tap̱a mo, mmo’tu’d mo ki mii kun mini ’bor a’di bwa i is mo mmoḵal mamana dho’th mo goma ris miim ’borga/ mo dhali mmomara mar is mo ki monyiṯẖa/ Arumgimis mo be.  
\v 11 Dhalki um ’bitha is mo eya ris mom’bithi ’baar mo isi ki monycam piti jin c̱a’bki dem dem mo goma ris mo jin ’dimuwa ’dim ’kup̱ mo dhali bwa jin ’kuc̱u ki ’kari’th mo ki moŋ’kuny bwa mo,  
\v 12 mmoc̱iya Baba bwam ’boro’di is mo, a’di jin thumki ana mo mmonyaḵ mal pwaḵ ki uni kun dhunu ki she/ ki dhelel dhelel mo e moŋkush mo be.  
\v 13 A’di ’cuḵki ana mo ’peni mom’bi’th gi mondhurumi’d mo, mmo’ciṯẖ ana agap̱ mo e bampa/ gi Ya/m piti jin ena a’di mo,  
\v 14 e a’di jin takina ana mo jin wanuwa wan ’ba/ mo dhali amure/ gi miinthus jin dhalkunu ana ’pen mo be. 
\s1 Mon’tu’d ma Arumgimis jin ’Tu’dki’d mo 
\p  
\v 15 A’di jin bu’thki jamas ma Arumgimis mo, a’di jin molu mish ki e ga ’cesh mo, a’di jin ta’da bwa nyara/ jin ṯwa/a/ ka ris to ’baar mo kun uḵu mo be.  
\v 16 Haali/ e a’di mo tani aris to ’baar mo ’kokunu mo mmo/uḵ mo e momis mo dhali e mony’cesh mo, uni gun mishu ki e ga ’cesh mo, dhali uni kun molu p̱ar e ki e ga ’cesh mo, waḵki/ adhana ḵursi ma maliḵ mo walla mo jin tanu tap̱a mo, walla mom’bi’th kun molu gadhir mo walla moshirr mo tani – aris to ’baar mo ’kokunu mo mmo/uḵ mo e a’di mo dhali gom a’di mo be.  
\v 17 A’di diki’di ṯwa/a/ ka ris to ’baar mo, dhali e a’di mo tani aris to ’baar mo tulkunu ’twa/ ’kup̱ mo e a’di mo mmonṯal ’de/ mo be.  
\v 18 A’di ta’da ’kaŋ’kup̱ gom buŋgwar is mo a’di jin ta’da ḵaniisa mo. A’di ta monṯel ’pen mo, a’di ta’da bwa nyara/ ’peni mowu mo, ki a’di eya ris to ’baar mo tani midi ’taki ta isa ’cilman gana/ mo be.  
\v 19 Haali/ e a’di mo tani arisa ’tu’d kun ta ku ma Arumgimis mo tani ’borkina bwa mo mmota gi moŋ’ko mo be.  
\v 20 Dhali e a’di mo tani a’di gwamki’da gwam ki is pitiŋ gana/ mo eya ris to ’baar mo, waḵki/ to gun ’kon e mony’cesh mo walla e momis mo tani a’di karki mo ma ḵu’th is ka bas piti ki cwany’ciṯẖan dhul mo be. 
\p  
\v 21 Dhali um kun ’thissa/ ’kokin ka pije/ ’peni a’di mo dhali kun ta ’kup̱ ki ’kup̱ eya dum bum mo mmomii to kun ta thus ki thus mo tani  
\v 22 a’di shwane/ gwamki’da gwam mo ki is piti mo jin ta shuman is ki jwam piti mo, ki mii gi wakan mo tani a’di midi ṯor um eya tente/ mo me’d ku gun dhelelkin mo dhali kun dar gi thalkin mo dhali ku gun mini dar gi mo ma waḵ ibwambori a’di mo,  
\v 23 ba shi/ mii a’dan ’te/ ba/, waḵki/ um mini ṯikir ’ko mo e moŋgam gwo is mo, ki moŋḵa’b mo dhali ṯel sho’k mo, yisa mmoṯi’k mo ’peni mo ma ’teŋ kap̱e/ gi gwom ’borga/ jin ciḵkina um mo, a’di jin c̱ikunu aris ’kwani ’baar mo kun uḵkunu mo e bwaŋ’kwariny momis mo, dhali gom a’di mo tani aha/ jin tana Buulus warkina ka manmii a’di mo be. 
\s1 ABuulus Miiki To mo goma Ḵaniisa mo 
\p  
\v 24 Dhali shwane/ aha/ ’kunykina bwa mo e is pem mo jin ’koshki aha/ ka nyor mo gom gway bum mo, dhali e shuman is pem mo tani aha/ thimkina a’di jin harkunu mo e mo jin ṯocuwa Ḵrisṯẖos bwa mo gom gway gi buŋgwar is piti mo, a’di jin ta’da ḵaniisa mo.  
\v 25 A’di jin warkika/ ka manmii to mo isi ki gwo jin piyi’d ’peni Arumgimis mo gom mo jin taka/ amandhu gwo mo, a’di jin c̱ikunu aha/ mo gom um mo mmokar gwo ma Arumgimis ki a’di minu mish eya tente/ mo,  
\v 26 a’di jin ta gwo ma Arumgimis jin bagu mo, a’di jin ba’kkunu ki she/ yil ka ris mo dhali mo ma nyaḵum yil gun tanu mo, dhali hili shwane/ a’di ṯorkunu eya tente/ ki kum piti kun dhunu ki she/ ki dhelel dhelel mo.  
\v 27 E uni mo tani Arumgimis ki kar bwa mo mmoṯor eya tente/ mo ka dhan mii kun wani caa e ’kwani kun ’koki ta ’Kwani Yahuuda/ mo ki monyca jin ta pa ki pa mo e gwo yansan jin c̱inu ki jim bag mo, a’di jin ta’da Ḵrisṯẖos jin di’d e um mo, jin ta mo ma ’teŋ kap̱e/ gi monyca mo be.  
\v 28 A’di jin bahkina aman gwo mo mmoruma ris ’kwani ’baar ka ’deṯe/ ’deṯe/ ki gwo mo dhali ṯora ris ’kwani ’baar ka ’deṯe/ ’deṯe/ gwo mo eya ris moyuḵ mo ki aman mina ’taki dhuwa ris ’kwani ’baar ka ’deṯe/ ’deṯe/ mo ki ku gun isin mo eya Ḵrisṯẖos mo be.  
\v 29 Haali/ gom mii yan mo tani aha/ miikina mii jin ’batha’ba’th mo, mmo/uṯẖ mo ki is jin umu’di ’baar mo, a’di jin ṯẖi’thki’da ṯẖi’th mo e aha/ mo. 
\c 2  
\p  
\v 1 Haali/ aha/ ona bwa ki um mini mish mo mo ka dhan mii jin picirkika/ mo gom um mo dhali uni gwansan kun ’kon mo e Pa Lawudikiyya mo dhali goma ris uni ’baar mo kun ’koki p̱ar jis/em pem e mo  
\v 2 ka dum buni minu ’taki ’bi’th is mo me’d jin re’dkunu uni mo mmonṯal ’de/ mo e mo/en mo, mmota ga ris mo kun tanu pa ki pa mo gi momish mo mo ’pena duŋ gana/ mo dhali monyiṯẖa/ Arumgimis gwom bag yan mo a’di jin ta’da Ḵrisṯẖos mo.  
\v 3 E a’di mo tani aris moyuḵ kun ishki ḵumma/ mo dhali mo jin nyiṯẖuwa nyiṯẖ mo be.  
\v 4 Aha/ ona gwo yansan mo wakan ki wathin ṯal ’deŋ kamu/ midi ’taki diki he’k um e mo ki gwo ma maḵ jin onu mo.  
\v 5 Ba aha/ p̱ina e buŋgwar is mo tani hili aha/ dina e um ki shi/in mo, mmo’kuny bwa mo mmop̱ar miim ’boron bum kun miina um ka p̱ara p̱o/ e mo dhali mom bum jin ṯela um sho’k mo ki moŋgam gwo is bum eya Ḵrisṯẖos mo be. 
\p  
\v 6 Wakan, me’d jin bu’thkina uma Ḵrisṯẖos jin ta’da Yesus jin ta Tap̱a mo tani wakan ’koyi e a’di mo,  
\v 7 mmotana um ka birman mo e a’di mo dhali mmonyaŋa um is mo e a’di mo dhali mmoṯela um sho’k mo e moŋgam gwo is mo, jasi me’d gwo jin ṯorkunu um mo, mmoso ki sho’k bum e mo jin ’boruwa ’bor bwa i is mo be. 
\s1 Mon’tu’d jin ’Tu’dki’d jin Ta Mondiki/e eya Ḵrisṯẖos mo 
\p  
\v 8 Jiyi mo ki e ki ’bore/ mo ki wathin ṯal ’deŋ kamu/ midi diki ’kwar um ka gwap̱i/ mo ki gwoŋ ’kwaniŋ gaŋgasha/ mo dhali ki gwo kun hekuwa he’k e kun ’ko bwa ’te/ mo, isi ki gwoŋ ’kwani en’thin dhamo/ mo kun luḵu mo, isi ki gwo ma bwa nyara/ gom gwoŋḵan gi mony’cesh yan mo, dhali yisa isi ki gwo ma Ḵrisṯẖos mo.  
\v 9 Haali/ e a’di mo tani mon’tu’d ka ’bimpil mo jin ta ji ma Arumgimis mo mmotana a’di Arumgimis mo tani c̱a’bki’d e buŋgwar is piti mo.  
\v 10 Dhali um p̱u’dkin mo mmo’tu’da/ ’tu’d mo e mondiki/em piti mo, a’di jin ta’da ’kaŋ’kup̱ goma ris montap̱a kun tanu mo dhala ris moshirr mo be.  
\v 11 Dhali e a’di mo si’da/ um ’kokunu mo mmo’ciṯẖa/ munyjal yis mo ka munyjal yis jin ’ciṯẖu/ ki dar gi me’d mo, ki mii jin dhalu buŋgwar is gi shuman is ’pen mo e mo ma munyjal yis jin ’ciṯẖu/ jin ta ji ma Ḵrisṯẖos mo.  
\v 12 Dhali um ’kokunu mo mmokan mo nyaḵki a’di mo e mo jin cuc̱uwa cuc̱ mo dhali e mii jin ’kokunu mmocu um mis mo si’da/ nyaḵki a’di e moŋgam gwo is mo e mo/um ma Arumgimis mo, a’di jin ’de’kki a’di mo ’peni mowu mo be.  
\v 13 Dhali um, um kun ’kokin mo mmowu mo e gwon dhaŋ mo dhali e mo ma munyjal yis bum jin ’konuki ’ciṯẖ um mo e shuman is bum mo tani Arumgimis a’di ki dhu ki e mmonṯal ’de/ nyaḵki a’di mo, mmodhalkina a’di ana aris gwon dhaŋ bana ’pen mo,  
\v 14 mmo’koshkina a’di gwo jin ’kwarkunu mo jin diki’da p̱o/ ana mo, a’di jin theke’thki’da theke’th mo gom gwoŋḵan mo be. A’di yansan idhalkina a’di ka p̱o/ mo, mmoṯelkina a’di a’di ka musmaar mo ap̱o/ cwany’ciṯẖan dhul mo.  
\v 15 A’di dininki mom’bi’th kun molu gadhir she/ mo dhali mom’bi’th mo, dhali a’di ki ṯor uni eya tente/ mo jin mina uni ta she/mm mo mmop̱ikina a’di uni e ki mii mo be. 
\s1 Simmi To E mo kun Ta ku gi Momis mo 
\p  
\v 16 Wakan dhalki wathin ṯal ’deŋ kamu/ ki dhal bway mo mmokar gwo waḵ ap̱o/ um mo e gwo jin doṯuwa doṯ mo gom tonṯe/ mo dhali tomp̱i mo walla gom mo ma yuḵ jin yuḵu ka tul ’kup̱ mo walla goma appen this mo walla goma cim ma pesu/ mo.  
\v 17 Uni gwansan ta jasa ḵashira/ gom to kun mini p̱u’du/ mo, hili buŋgwar is gi mii mo tani uni ta ku ma Ḵrisṯẖos mo be.  
\v 18 Dhalku/ ki dhal wathin ’deŋ kamu/ bway mo mmoṯẖu’th um thum mo, mmodi’b um is mo mmowu is ka ’cesh mo dhali luŋ iman’doyu gwo mo, mmodoshkina a’di ap̱o/ tonyjan piti mo, mmose mo ki ’pura/ ’pura/ ki dar gi ’kup̱ mii mo ki bwa gi buŋgwar is ’te/ mo.  
\v 19 Dhali yisa mmoṯela a’di e a’di jin ta’da ’Kaŋ’kup̱ mo. ’Peni a’di mo tani buŋgwar is ka ’bimpil thip̱ki’da thip̱ mo dhali re’di monṯal ’de/ ki mom piti gun gamu is mo dhala billa/ mo mmo’twaḵ mo ki mon’twaḵ jin di’d ’peni Arumgimis mo be. 
\p  
\v 20 Waḵki/ um wukin mo nyaḵka Ḵrisṯẖos mo gom gwo ma bwa nyara/ gom gwoŋḵan gi mony’cesh yan mo tani gomatinta ’kokina um ki moŋ’ko mo jin cila ’kwaniny’cesh mo? Atinta ’dap̱kina um ’twa/ mo ki gwoŋḵan jin ’tashuwa ’tash bway mo?  
\v 21 Uni gun o gwo mo ki: Dhalku/ to ki bu’th is ki me’d mo. Dhali, Dhalku/ to ki nyoḵ mo. Dhali, Dhalku/ to ki ta is ki me’d mo.  
\v 22 (Uni ta to gwansani ’baar mo kun minu ’ce’d sho’k mo mmomii uni mo), isi ki gwoŋḵan gi ’kwani en’thi/ mo dhali gwo kun ṯoru mo?  
\v 23 Uni gwansan ka jiŋ gana/ miikunu ’pena p̱or ma pije/ mo mmoshusha du mo gom mii ma gayiin jin ta’da teṯeŋ gana/ mo dhali mo jin wunu is ka ’cesh mo dhali diki ’tash buŋgwar is ’twa/ mo, hili uni ’koki ta to gun ’bitha she/ ki ’bi’th mo mmonona non mo ’peni mii gi buŋgwar is jin din ma du ki ’thup̱ mo. 
\c 3  
\p  
\v 1 Waḵki/ um ’deku mo nyaḵka Ḵrisṯẖos mo tani simmi mii e mo gom to gun ta ku gi momis mo, e mo jin din ma Ḵrisṯẖos mo, e mo jin c̱a’bkina a’di ka bim poros ma Arumgimis mo be.  
\v 2 Dhuyi adum bum gom to gun ’kon e momis mo, yisa gom to gun ’kon e mony’cesh mo.  
\v 3 Haali/ um wukin mo dhali moŋ’koki/em bum a’di bagkunu mo nyaḵka Ḵrisṯẖos eya Arumgimis mo be.  
\v 4 Ka Ḵrisṯẖos, a’di jin ta moŋ’koki/em bana minu piyu/ mo tani um si’da/ minu piyu/ mo nyaḵki a’di mo e monyca mo be. 
\s1 Miin Dhamo/ mo dhali Miin This mo 
\p  
\v 5 Wakan, ’koshi mii ga ’cesh jwa mo kun ’kon e um mo, kun ta mo gun miinu miinyc̱al mo dhali mo gun ’dap̱u e mo dhali e kun dhunu ki ’thir ’thir mo dhali bwan thus kun pishu is mo dhali mo jin ’thoṯẖu/ bwa mo, a’di jin ta mii jin luŋu tomp̱inycon mo be.  
\v 6 Gom mii gwansan mo tani a’di ip̱u’dkin ma nyor ma Arumgimis ap̱o/ iya/ gi ’kwani kun ushi gwo ha e mo.  
\v 7 E mii gwansan ’thissa/ mo tani um iikin e uni mo me’d jin ’kokina um mo e bwam uni mo be.  
\v 8 Hili shwane/ dhuyi uni ’baar mo ’pen ka pije/ mo, mii ma nyor mo, dhali anyor jin deḵki’da deḵ mo, dhali mii gun dup̱a dup̱i e mo dhali mo ma thu’th ’pen jin thudhu ka sor gun walu mo dhali gwo nyogga/ ’peni ’twam bum mo.  
\v 9 Dhalku/ ki ta aṯor ka rem ’kup̱ mo, mmomisha um ki um dhalki mii gi buyempan dhamo/ ’pen mo ki miim piti kun boṯkina um mo.  
\v 10 Dhali um ki hi’th miim buyempan this mo, a’di jin uḵkunu mo doḵ/e e monyiṯẖa/ nyiṯẖ mo ’ko’di jamas gi a’di jin uḵki’da uḵ mo.  
\v 11 Mmahan mo tani Wathiŋ Griḵi dhali Wathi/ Yahuuda/ mini mol ’ko ki she/ mo, dhali mo ma munyjal yis jin ’ciṯẖu/ mo dhali mo ma munyjal yis jin ’konuki ’ciṯẖ mo, dhali wathi/ jin diki wal ’twaŋ Griḵi mo dhali jin mii mii kun ḵaŋkama ḵaŋkam mo, dhali c̱iŋkina/ jin yolu mo dhali wathi/ jin di ki ’kus mo, hili aḴrisṯẖos a’di ta to ’baar mo dhali e ana ’baar mo be. 
\p  
\v 12 Wakan, hithi ma mii gwansan mo, me’d uniŋ gana/ kun kwanykin ma Arumgimis mo, um kun dhelelkin mo dhali kun enu mo, mii gi wakansan mo kun ta mii kun ḵwojuwa ḵwo’c e i is mo dhali mii kun miinu ki bwaŋkush mo dhali mii gun dhunu is ki gwa’d mo dhali mii kun miinu ka ’thup̱ e mo dhali mii kun ’kuc̱u bwa ki ’kari’th mo,  
\v 13 mmothona thon me’di ’ko’d ka rem ’kup̱ mo dhali, waḵki/ wathin ’deŋ kamu/ ta gi gwo walla/ ap̱owa kamuŋ kamu/ mo tani dhali adhal gi miinthus ’pen ka rem ’kup̱ mo ma. Me’d mii jin dhalkina Tap̱a uma mure/ miinthus bum ’pen mo tani um si’da/ mini mii dhalka mure/ miinthus ’pen mo.  
\v 14 Dhali ap̱owa ris mii gwansani ’baar mo tani hithi mo/en mo, a’di jin deḵki’da ris to ’baar mo mmonṯal ’de/ mo ki ’bor gana/ mo ki dar gi mo ma dhadharmu’th mo.  
\v 15 Dhali dhalki moŋḵu’th is ma Ḵrisṯẖos bway mo mmojiya dum bum mo e a’di ka jiŋ gana/ jin yuḵkunu um mo e buŋgwar isa ’de/ mo, dhali mmoc̱i mo jin ’boruwa ’bor bwa i is mo.  
\v 16 Dhalki gwo ma Ḵrisṯẖos c̱a’ba’d e um ki c̱a’b ’pempaŋ gana/ mo me’d mii jin ṯorkina um gwo mo dhali mmorogom gwo ka rem ’kup̱ mo ka ris moyuḵ mo, dhali me’d jin yuḵkina um gway mo mmoka mo jin miinuwa mii e mo dhali gway jin maŋuwa maŋ mo dhali gway jin yuḵu gom to gi shi/in mo ki mii jin ’boruwa ’bor bwa i is eya dum bum goma Arumgimis mo be.  
\v 17 Dhali ma eya ris to gunn kun mina um imii mo tani e gwo gun ona um mo walla mii gun miina um mo tani miiyi aris to ’baar mo ki gway gi Tap̱a Yesus mo mmoc̱i mo jin ’boruwa ’bor bwa i is ka Arumgimis mo, a’di jin ta’da Baba e a’di mo be. 
\s1 Mo jin Nyaḵu To Mii mo e Moŋ’ko ’Kwani gi Moŋ’koki/en This mo 
\p  
\v 18 Up̱ ’dap̱i ki me’d ki gwo gi ikaṯẖim bum mo me’d gwo jin ha me’d e Tap̱a mo.  
\v 19 ’Kwaniŋ gwas, eni up̱ bum mo ma, dhali dhalki uni ki ’cwar mo.  
\v 20 Uc̱iya, hayi gwo gi icim e mo dhali gwo gi ikwan e mo goma ris to ’baar mo, haali/ mii yansan mo tani a’di ki ’bor Tap̱a bwa mo.  
\v 21 Ibaba, dhalku/ ki rukuny uc̱im bum ka nyor mo, isi ciki/ uni mini ’koki ’bitha du is mo.  
\v 22 C̱iŋkina/ kun yoluwa, hayi gwo e eya ris to ’baar mo gi uni gwansan kun ta tap̱am bum mo e mony’cesh mo, yisa ki mii kun miinu e jis/eŋ ’kwani mo mmo’bor ’kwani bwa mo ’te/ yisa, hili ka dun ṯal ’de/ mo mmoḵo/ Tap̱a mo be.  
\v 23 Ma eya risa ṯu’c bum gunn kun miina um mo tani miiyi a’di ki bwaŋ gana/ mo me’d jin miina um Tap̱a to mo, dhali yisa gom ’kwaniya,  
\v 24 mmomishkina um ’peni Tap̱a mo ki um mini bu’th mal mo me’d tom bum jin ish ḵumma/ mo. Um miiki Tap̱a Ḵrisṯẖos to mo be.  
\v 25 Haali/ amanṯẖu’th to mii mo tani a’di minu doḵu/ tonthus ap̱o/ a’di jin miikina a’di mo dhali mii jin miinu ka gwar ’de/ yisa di’da. 
\c 4  
\p  
\v 1 Itap̱a, miiyi c̱iŋkinam bum kun yola um ki mii ma ḵar/e mo dhali ki dar gi mii ma gwar ’de/ mo, mmomisha um si’da/ ki um ta gi Tap̱am bum e momis mo. 
\p  
\v 2 Ṯikiri mosho’k ṯel mo e mon’tho mo mmotimkina uma tim mo gom a’di ki mo jin ’boruwa ’bor bwa i is mo  
\v 3 dhali ’thoyi mo gom am si’da/ ka Arumgimis midi ’taki ḵa’d amana campur gom gwo mo, mmobah gwo ma Ḵrisṯẖos jin c̱inu ki jim bag mo gom gway gi a’di jin dikika/ eya sijin mo  
\v 4 ki aha/ mina ’taki ṯor a’di eya tente/ me’d jin miga/ ’taki ṯor a’di ḵa ba/. 
\p  
\v 5 Boṯi ki mii ki is bum gana/ ki yuḵ yuḵ mo ’kup̱ki uni gwansan kun ’kona pije/ mo mmowara tee is mo.  
\v 6 Dhalki gwom bum kun ona um isa yempa/ mo ta gwo ma ’the mo dhali kun c̱emesa c̱emes ka ’doŋkoro/ mo, wakan ki um mini mish mo mo gwo kun mina um ḵa ba/ ithoḵ ’kwani ’baar ka ’deṯe/ ’deṯe/ mo. 
\s1 Ḵwalany ’Te/ Ba/. Monthe Me’d mo 
\p  
\v 7 Tiḵikus a’di midi ṯor uma ris to ’baar mo kun miika/ mo. A’di ta’da kam bana jin enu mo dhali ta a’di isiŋ gana/ mmomii to mo dhali agarr jin ta’da manmii to e Tap̱a mo be.  
\v 8 Aha/ hashkina a’di i um mo gom isi gwoŋ ’kup̱ gwo yan gana/ mo ki um mini mish mo mo gom ’kom bam jin ’kona am mo dhali ki a’di midi ’taki ’bi’th uma dum bum is mo,  
\v 9 dhali nyaḵki a’di mo si’da/ a’di jin ta’da Unisiimus mo, a’di jin ta isiŋ gana/ mo, dhali jin ta’da kam bana jin enu mo, a’di jin ta jan ’de/ gi is bum gana/ mo. Uni mini ṯor uma ris to ’baar mo kun buthi mo mo e mo yan mo. 
\p  
\v 10 Aristarḵus jin ta’da agarr pem jin nyaḵkaa/ c̱a’b eya sijin mo tani theki um me’d mo dhala Markus jin ta nam ma Barnaaba mo (isi gwo gom a’di jin bu’thkina um mmoye’thkunu um sho’k ki gwo mo – waḵki/ a’di midi p̱u’dku/ i um mo tani buthi a’di mo ma),  
\v 11 dhala Yesuu/ a’di jin yuḵkunu gway ka Yusthus mo. ’Kwani gwansan uni ta jasi uni kun ’ciṯẖkunuwa munyjal yis mo e bwaman uni kun nyaḵkaa/ ṯu’c mii mo gom Bampa/ ma Arumgimis mo, dhali uni ita momalas pem mo be.  
\v 12 Abap̱raas, a’di jin ta jan ṯal ’de/ ki is bum mo, jin ta’da manmii to goma Ḵrisṯẖos jin ta’da Yesus mo tani theki um me’d mo, isa yempa/ mmoka um e mo ka dun dara’d mo e mon’thom piti mo, ki um mini ’taki dosh mo me’d ku gi isin mo dhali mmomish mo ki isi mish gana/ ’baar mo a’di jin ta bwa ma Arumgimis mo be.  
\v 13 Haali/ aha/ tana aman/o gwo gom a’di mo haali/ a’di miiki’da ṯu’c jin ’batha’ba’th mo gom um mo dhali gom uni gwansan kun ’kon e Pa Lawudikiyya mo dhali e Pa Hiyarabulis mo be.  
\v 14 ALuuka, a’di jin ta’da hakiim jin enu mo dhala Dimas mo theki um me’d mo.  
\v 15 C̱iki monthe me’d pem eya waḵ kun ’kon e Pa Lawudikiyya mo dhali eya Nimp̱aas mo dhala ḵaniisa jin di’d e gu’b ma yim mo.  
\v 16 Dhali ki gwo yansan deŋkunu e mo e bwam um mo tani dhalki a’di si’da/ deŋu e mo eya ḵaniisa gi Pa Lawudikiyya mo be dhali hili ki ’bore/ ki um ki deŋ gwo yan e si’da/ gwo ’peni Pa Lawudikiyya mo.  
\v 17 Dhali oya Arḵibbus gwo mo ki: Hili ki ’bore/ ki /e mini thim to mii mo a’di jin bu’thkina /e ’peni Tap̱a mo. 
\p  
\v 18 Aha/ Buulus i’kwarkina gwo monthe me’d yan ki me’d pem gana/ mo. Kayi amaḵḵiyam pem e jin deḵkunu aha/ mo. A’the midi di gom um mo.