\id 2TI  
\ide UTF8 
\h ṮIMUṮH̱AWUUS SU/ 
\toc1 Gwo jiŋ ’Ko’d jin ’Kwar ma Buulus goma ṮIMUṮH̱AWUUS mo 
\toc2 ṮIMUṮH̱AWUUS SU/ 
\mt1 Gwo jiŋ ’Ko’d jin ’Kwar ma Buulus goma ṮIMUṮH̱AWUUS mo 
\c 1  
\s1 Monthe Me’d mo 
\p  
\v 1 ABuulus, a’di jin karu ki she/ mo goma Ḵrisṯẖos jin ta’da Yesus mo ki bwa ma Arumgimis mo isi ki gwo jin onu is mo gom mondiki/e jin di’d eya Ḵrisṯẖos jin ta’da Yesus mo be. 
\p  
\v 2 Eya Ṯimuṯẖawuus jin ta ya/m pem jin enka/ mo. 
\p A’the dhali momiimii dhali moŋḵu’th is ’peni Arumgimis jin ta’da Baba mo dhala Ḵrisṯẖos jin ta’da Yesus mo jin ta Tap̱am bana mo. 
\s1 Dhalku/ Is ki ’The mo 
\p  
\v 3 Aha/ ’bora Arumgimis bwa i is mo, a’di jin miiga/ to mo ki ’twa/ ma dum pem jin dheleladhelel mo, me’d mii jin miikina ibabam pem mo, ki aha/ kakina /e e ki ṯikir ṯikir mo e mon’thom pem mo.  
\v 4 Me’d jin kakika/ jabu’th pini e mo tani aha/ ’koshkina ṯe/ /e ki mon’thiny ilu/ mo dhali montee ilu/ mo mmop̱ar /e e mo, ki aha/ minu ’taki ’tu’d mo ki moŋ’kuny bwa mo be.  
\v 5 Aha/ rogomkunu ki gwo mo gom moŋgam gwo is pini mo jin dar ki washila/ mo, moŋgam gwo is yan jin c̱a’bki’di ṯwa/a/ mo eya ṯiŋkwan pini jin ta’da Lo/iis mo dhali ata’dam pini jin ta’da Ap̱niiki mo, dhali shwane/ aha/ misha ki isa duŋ gana/ mo ki a’di c̱a’bki’d e /e mo.  
\v 6 Me’d jin rogomkika/ /e ki gwo mo mmoṯi’k to jin c̱in ma Arumgimis ki me’d mo, a’di jin di’d e /e mo ki mo jin thulka/ /e me’d pema p̱o/ mo.  
\v 7 Haali/ Arumgimis diki c̱i ana shi/in ma shi/iny jwa mo, hili a’di ki c̱i ana shi/in gi mom’bi’th mo dhali mo/en mo dhali mmomisha du ’tim mo. 
\p  
\v 8 Dhalku/ ki mii ’the is mo mmoc̱i gwo mo gom Tap̱am bana mo, walla gom aha/ mmotaka/ habuus mo, hili budhi isa nyor pini jin pwaḵu /e mo gom gwom ’borga/ mo e mom’bi’th ma Arumgimis mo,  
\v 9 a’di jin woṯẖki ana mo dhali yuḵ ana mo ka yuḵ jin ḵogu mo, yisa gom miim bana jin ha me’d mo, hili ki miim piti kun ha me’d mo e ’kup̱ miim pitiŋ gana/ yan mo dhali a’the jin c̱ikina a’di ana mo tani eya Ḵrisṯẖos jin ta’da Yesus mo ki yil ka risi ṯwa/a/ mo,  
\v 10 dhali shwane/ a’di ṯoru eya tente/ mo gom is jin piyin ma Manwoṯẖ bana ka pije/ mo a’di jin ta’da Ḵrisṯẖos jin ta’da Yesus mo, a’di jin p̱uuki wu mo dhali ḵalu mondiki/e mo dhali mo jin molu wu mo e moŋkush mo ki gwom ’borga/ mo be.  
\v 11 Haali/ gom gwom ’borga/ yansan mo tani aha/ karkunu ’pen ka pije/ mo mmota amanc̱i gwo mo dhali ta a’di jin karu ki she/ mo dhali ta a’di jin ta’da manṯor gwo mo.  
\v 12 Dhali wakan aha/ ’koshkina is ka nyor mo me’d jin ’kosha is aha/ ka nyor mo. Hili aha/ dina is ki ’the mo haali/ aha/ misha a’di jin gamka/ gwo is mo dhali aha/ misha ki isa duŋ gana/ ki a’di mishi ji ki ’bore/ ntaga Tee c̱aan mo a’di jin c̱ikika/ a’di mmodhu mo be.  
\v 13 Baṯẖi bway pem mo gom gwoŋ ganam pem kun ṯorka/ mo, uni kun ciḵkina /e ’peni aha/ mo e moŋgam gwo is mo dhali e mo/en mo, uni gun ’kon eya Ḵrisṯẖos jin ta’da Yesus mo.  
\v 14 Jiyi gwoŋ gana/ mo a’di jin c̱ikunu /e mo mmodhu mo ki Shi/in Dheleladhelel mo a’di jin c̱a’bki’d e bwaman ana mo. 
\p  
\v 15 /E mishki gwo hila/ mo ka ris uni gwansan kun ’kokin mo e Pa Asiyya mo tani ṯu’kkin mo ’peni aha/ mo dhali e bwam uni gwansan mo tani ta iPijallus mo dhala Harmujanis mo, uni ’kokin mo.  
\v 16 Dhalki Tap̱a a’di c̱i momiimii gom kuŋ gu’b ma Unisip̱urus mo haali/ a’di me’d ka ris yeki aha/ ’ba/ mo. A’di yisa ’thena is mo gom mondeḵ pem jin deḵu aha/ ka jindhiir mo,  
\v 17 hili ki a’di merki’d mo e Pa Ruumiya mo tani a’di ŋap̱ki’da ŋap̱ mo gom aha/ ki bur bur ka daran du mo dhali a’di gamki aha/ mo be. –  
\v 18 Dhalki Tap̱a c̱i a’di mo jin mina a’di gam momiimii mo ’peni Tap̱a mo ’pena Tee c̱aan mo – dhali /e mishkin ki ’bore/ mo aris to kun ḵalkina a’di ki mii mo e Pan Ep̱asus mo be. 
\c 2  
\s1 Athuruḵ Gana/ ma Yesus Ḵrisṯẖos mo 
\p  
\v 1 /E si’da/ jin ta ya/m pem mo, ’bithi /e is mo eya ’the jin di’d eya Ḵrisṯẖos jin ta’da Yesus mo,  
\v 2 dhali a’di jin ciḵkina /e ’peni aha/ nṯwa/a/ mo ka ma’diny iman/o gwo mo tani c̱iki uni ’kwani kun ta ku isiŋ gana/ mo mmodhu mo, uni kun mini mish tiyan tiya gwo ṯor si’da/ mo be.  
\v 3 Budhi isa nyor pini jin pwaḵu /e mo me’da thuruḵ gana/ ma Ḵrisṯẖos jin ta’da Yesus mo be.  
\v 4 Athuruḵa kamu/ yisa di’da jin midi re’d is piti ki to gi monyc̱a’b piti mo me’d jin dina a’di mmomii to ma thuruḵ mo, haali/ tom piti jin guna a’di ki e mo tani ta mii jin mina a’di mii mo mmokap̱ a’di adu mo, a’di jin kar a’di aṯu’c ma thuruḵ mo be.  
\v 5 Wathiŋ kamu/ jin ishki’da bor ka ’cesh mo e mo ma lo’b mo tani minu ’koki shum ki toŋ’kup̱ mo isi ciki/ a’di midi mii thim isi gwo jin ḵanuwa ḵan mo gom mo ma lo’b yansan mo be.  
\v 6 A’di ta’da mansi to jin mii’da ṯu’c jin ’batha’ba’th mo, a’di ḵa ba/ iminu pwaḵki ’kup̱ to jin ’ciṯẖu/ nṯwa/a/ mo.  
\v 7 Kulumi gwo ibwa mo gom gwo kun oka/ mo haali/ Tap̱a a’di midi c̱i /e mo jin mishu gwo ’ban mo goma ris to ’baar mo be. 
\p  
\v 8 Kayi aYesus Ḵrisṯẖos e mo a’di jin pikunu mo ’peni mowu mo, a’di jin ta emen ’pena Dawuu’d mo, me’d gwom pem jin c̱ikika/ e gwom ’borga/ mo,  
\v 9 a’di jin ta gwom ’borga/ a’di jin ’koshka/ is ka nyor mo dhali rash mo ka maḵḵiya m’bame’d mo me’da manṯẖu’th to mii mo. Hili Gwo ma Arumgimis mo tani a’di yisa ta gwo jin deḵu mowa.  
\v 10 Wakan aha/ ’dimkina ’kup̱ mo eya ris to ’baar mo gom gway gi uni kun kwanykunu mo, ki uni si’da/ mini ’taki bu’th bway mowoṯẖ yan jin diki’d eya Ḵrisṯẖos jin ta’da Yesus mo jin midi nyaḵ ya ki monyca ki sule/ sule/ ya ye ’ba/ mo.  
\v 11 Gwo yan jin onu mo tani ta gwo jin ta isiŋ gana/ mo be ki: 
\q1 Waḵki/ ana wuna mo nyaḵki a’di mo tani ana si’da/ mina ’ko ki e nyaḵki a’di mo be. 
\q1  
\v 12 Waḵki/ ana ’dima ’kup̱ mo tani ana si’da/ mina nyaḵ tap̱a ta ki a’di mo be. 
\q1 Waḵki/ ana mina waṯ a’di gway mo tani a’di si’da/ midi waṯ ana gway mo be. 
\q1  
\v 13 Waḵki/ ana dara gi moŋgam gwo is mo tani a’di di’d kan mmota ji gi isiŋ gana/ mo be – 
\q1 haali/ a’di midi mol is piti waṯ mo be. 
\s1 Wathi/ jin Mii To jin Nyo/u ki Nyo/ Gana/ mo 
\p  
\v 14 Rogomi uni ki gwo yan mo dhali ḵan uni gwo mo ibwambori Tap̱a mo mmotheṯẖ gwo jin sugu mo gom gwo mo, a’di jin diki ḵal miiŋ kamu/ ’kup̱ pa mo, hili a’di jasi ’ce’d uni sho’k mo, uni kun ciḵ a’di mo.  
\v 15 Miiyi miim pini ki dher mo mmoc̱i buŋgwar is pini ka Arumgimis mo me’d a’din ’de/ jin ṯesu mo, mmota wathi/ ma ṯu’c mo, a’di jin mina isi mii diki ’the mo, a’di jin midi dher bway ka ḵar/e mo e gwoŋ gana/ mo, mmoṯor a’di ki ’twaŋ gwocon mo.  
\v 16 Theṯẖi/ mo ’peni gwo kun ’kon ki p̱e’th mo haali/ a’di midi sus ’kwani ka ris mo e mo jin ushuwa Arumgimis ki nyanye/ mo dhali ki nyanye/ mo  
\v 17 dhali gwom buni mini shwa bway mo me’d jama/ mo. E bwam uni gwansan mo tani ta iHiminayus mo dhala P̱ilitus mo,  
\v 18 uni kun wanykin mo ’peni gwoŋ gana/ mo mmobu’th gwo ki wup̱ mo mmo/o ki mompinu a’di peki’d mo hila/. Uni ki kum moŋgam gwo is gi ’kwanin tiya ’twa/a ’cesh mo.  
\v 19 Hili moŋḵa’b ma Arumgimis ṯelkunu sho’k mo mmodosh mo, mmoḵal mo jin dina gwo yan ka ’dan’dap̱ mo ki: Tap̱a mishi uni gwansan kun ta kum piti mo, dhali, Dhalka ris ’kwani ’baar ka ’deṯe/ ’deṯe/ mo uni kun yeri gway gi Tap̱a mo, ḵwa/ is buni bwa mo ’peni miinthus kun shi/ashi/ mo. 
\p  
\v 20 Dhali eya dhan gu’ba caaga/ mo tani toŋ’kul bwa ’kon si’da/ mo, kun ’koki ta jasi ’dolkon gana/ mo dhali ’dolkon kush mo, hili si’da/ toŋ’kul bwany cwa si’da/ mo dhali toŋ’kul bwa ma je kun ’thosu mo si’da/ dhali kun tiya kun tana ajji kun dhunu ki she/ ki dhuŋ gana/ mo dhali kun tiya si’da/ kun dhunu mmota abar mo.  
\v 21 Waḵki/ wathin ṯal ’deŋ kamu/ midi dhelel is piti mo ’peni mii kun waḵu mo tani a’di midi ta toŋ’kul bwa mo jin karu ki she/ ki kar gana/ mo goma ṯu’c gi montaḵ mo, mmota ji gi karu ki she/ mo dhali mishi to mii mo gom tap̱a gi gu’b mo, mmonyoŋkina a’di is mo goma risa ṯuca ’borga/ gunn mo.  
\v 22 Wakan ship̱iṯi/a ŋwac̱a/ mo ’peni miin dhuru’c pini jin karkina /e e ki ’thir ’thir mo dhali guyi mo ma ḵar/e ki e mo, dhali moŋgam gwo is mo, dhali mo/en mo dhali moŋḵu’th is mo nyaḵki uni gwansan kun yuḵki gway gi Tap̱a ’pena dum buni kun dheleladhelel mo.  
\v 23 Dhalka hirdhe/ ki c̱i mo gom mo jin doṯu/ gwowa doṯ mo kun ta gwom p̱us mo dhali gwo kun ’konuki ye’th sho’k mo. /E mishin ki uni c̱isina le’d jin walu ki ṯas ṯas mo.  
\v 24 Dhali amanmii to gom Tap̱a mo tani a’di midi mii diki mii ta amanwala le’d ki ṯas ṯas mo, hili a’di mina bwa mii ta gi kush gom ’kwani ’baar ka ’deṯe/ ’deṯe/ mo, dhali jin midi mish ta amanṯor gwo ki ’twaŋ gwocon mo, mmothona thon me’di ’ko’d mo,  
\v 25 mmoḵucur unim piti gwahan ki gwo mo kun cesh a’di mo ki thiṯẖ mo, ki mii jin ’thup̱u e ki ’thup̱ mo. Arumgimis wari midi ’taki c̱i uni mo jin rijuwa du is mo dhali p̱u’du/ mo mmomish gwoŋ gana/ mo,  
\v 26 dhali uni mini ’taki ye mo ’pena gume/ gi tap̱a ma ruma ’cesh mo ’ko’di mom piti jin bu’thkina a’di uni mo mmomii bwam piti mo be. 
\c 3  
\s1 Buye/ Mii jin Mina ’Kwani Ta mo ka Tee jiŋ ’Ko’d mo 
\p  
\v 1 Hili mishi gwo yansan ’ban mo, ki, ka tee kuŋ ’ko’d mo tani mo midi p̱u’du/ mo jin min ma wukura/ di mo.  
\v 2 Haali/ ’kwani mini en is buni mo dhali ena guurush mo dhali dhu ’ba/ ki ca mo dhali ’theḵ ’bam buni imis mo, dhali wal gwo sor mo, dhali ush gwo gi icom buni ha e mo dhali ikum mo, dhali uni mini ta iman/usha ’borim bwa c̱i mo, dhali uni mini ta uni gun ’koki dhelel mo,  
\v 3 dhali uni mini dar gi mo/en jin di’d eya du wathi/ en’thi/ mo, dhali uni mini ta iman/ush gwo gwam mo, dhali uni mini ta imanthutha thu’th ’pen mo, dhali uni mini ta imandar ga du kun ’timu mo gom e kun dhuna uni ki ’thir ’thir mo, dhali uni mini ta imanmii mii kun ḵaŋkama ḵaŋkam mo, dhali uni mini ta imanshi/ miim ’boro’di e mo,  
\v 4 dhali uni mini ta iman’ciṯẖ is ki gwo mo, dhali uni mini ta imanbujura bujur mo, dhali uni mini se ki ’pura/ ’pura/ mo mmodhu ’ba/ oki uni imishi mo mo, dhali uni mini ta iman/en ’kom ’peŋkap̱an buni mo mmodhal mo/en ma Arumgimis e i is mo,  
\v 5 mmodhu jasa warma’c mii gom ji gi luŋu mo, hili uni ki waṯ gway gi mom’bi’th piti mo. Theṯẖi/ mo ’peni ’kwani kun wakan mo.  
\v 6 Haali/ ibwaman uni gwansan mo tani uni ta uni kun kuli bway buni mo e gu’b gi ’kwanin tiya mo mmobu’th up̱ kun ta ’thalkina/ ki ’thalkina/ mo kun bur ma du mo ki wap̱ wap̱ ki miinthus mo dhali thap̱ miinthus kun ’kona e ki she/ ki she/ mo,  
\v 7 uni kun ta imanha ’kwani gunn gwo e mo, dhali yisa bumburkin ki sule/ e mo jin nyiṯẖu/ gwoŋ gana/ mo.  
\v 8 Me’da Yanniis dhala Yambiriis, uni ceshkina Musa mo mo, wakan si’da/ ’kwani gwansan uni ceshki mo mo gom gwoŋ gana/ mo, uni kun ta ’kwani kun p̱u/kin mo e bwam buni mo dhali kun ta gi moŋgam gwo is kun waḵu mo.  
\v 9 Hili uni mini thoṯẖ isa dhanaa? Haali/ mii ma p̱alim buni midi di eya tente/ mo gom ’kwani ’baar mo, me’d mii gi ’kwani su/ gwansan mo be. 
\s1 Gwo ma Buulus jin Ta jiŋ ’Ko’d mo jin Ḵankina A’diya Ṯimuṯẖawuus mo 
\p  
\v 10 Shwane/ /e mishki gwom pem kun ṯorka/ mo dhali miim pem kun miika/ mo dhali tom pem jin guka/ ki e mo e mondiki/e mo dhali moŋgam gwo is pem mo, dhali bwam pem jin ’kuc̱ka/ ki ’kari’th mo, dhali mo/en pem mo, dhali sho’k pem jin ṯelka/ mo,  
\v 11 dhali monṯo’c bwam pem mo, dhali isa nyor pem jin ’koshki aha/ mo, dhali a’di jin p̱u’dki’di aha/ e Pa Anthaakiya mo, dhali e Pa Ikuniyya mo, dhali e Pa Listra mo, dhali monṯo’c bwa wana, kun ’dimka/ ’kup̱ mo. Hili ’peni uni gwansani ’baar mo tani Tap̱a a’di yeki aha/ ’ba/ mo be.  
\v 12 Ka jiŋ gana/ aris uni gwansan kun ’kona gwo ibwa mo mmo’ko isi ’ko ma gayiin mo e moŋ’koki/e mo eya Ḵrisṯẖos jin ta’da Yesus mo tani uni minu ṯo’c bwa mo be,  
\v 13 ki ’kwani gun mii tonthus mo dhali imanheka he’k e mo mini ṯẖi’th mii gun shiyin mo ntagi mii shigga/ kagahara mo, uni kun ta imanheka he’k e mo dhali uni kun he’kkunu e mo be.  
\v 14 Hili gom /e mo tani ṯikiri /e di mo e gwo jin da/arkina /e mo dhali e gwo jin gamkina /e is ki gam gana/ eya du mo, mmomishkina /e ’peni a’di jin da/arkina /e a’di mo  
\v 15 dhali mish ’ban ’peni mo jin tana /eya ’ci mo tani /e mishki gwo gwansan kun ’kwarkunu mo dhali kun ḵogu mo, uni gun mini mish /e sho’k ye’th mo gom bway gi mowoṯẖ ki moŋgam gwo is eya Ḵrisṯẖos jin ta’da Yesus mo.  
\v 16 Aris Gwo ma Arumgimisi ’baar ka ’deṯe/ ’deṯe/ mo kun ’kwarkunu mo tani uni shi/irrkin ma Arumgimis mo dhali ha me’d mo gom gwo mmoṯor mo dhali gom ḵucur jin minu ḵucura ḵucur mo dhali gom ṯo’k jin minu ṯoka ṯo’k mo dhali goma nyoŋ is jin minu nyoŋ mo gom mii ma ḵar/e mo  
\v 17 ki wathi/ ma Arumgimis minu ’taki thim mo, mmota ka ris to ’baar mo kun minu mii ta mo goma risa ṯuca ’borga/ ’baar ka ’deṯe/ ’deṯe/ mo be. 
\c 4  
\p  
\v 1 Aha/ ḵana /e gwo mo ibuŋ’kus ma Arumgimis mo dhala Ḵrisṯẖos jin ta’da Yesus mo, a’di jin midi dwall gwo mo gom uni kun ’kon ki e mo dhali kun wukin mo, dhali ki pim piti jin mina a’di piyu/ is ka pije/ mo dhali bampam piti mo be.  
\v 2 C̱iyi gwo mo, hayi me’d ki embul mo mo, dhali hayi me’d ki embul mo jin diki ’bor mo, dhali ṯokiya ṯo’k mo dhali ḵucuriya ḵucur mo, dhali malasiya malas mo, dhali dhalku/ buye/ ki ’thi mo e bwa jin ’kuc̱u ki ’kari’th mo dhali e gwo jin ṯoru mo.  
\v 3 Haali/ mo midi p̱u’du/ mo ki ’kwani mini ’koki ’dim ’kup̱ mo e gwom ’borga/ jin ṯoru mo, hili mmotana uni gi bwany’ce kun ḵasaḵas mo tani uni mini tul imanṯor gwo ’kup̱ mo gom is buni mo mmogam bwam buni kun ona uni ’kup̱ mo,  
\v 4 dhali uni mini ṯu’k mo ’peni gway gi gwoŋ gana/ jin ciḵu mo dhali ta c̱a/ ka c̱a/ e gwo lolop̱ jin ta ja maḵ mo.  
\v 5 Dhali gom /e mo tani isa yempa/ ṯeli /e sho’k mo, dhali ’dimi ’kup̱ mo e mo jin ’koshu is ka nyor mo, dhali miiya ṯu’c gi imanṯor gwom ’borga/ mo, dhali thimi miin tom pini mo. 
\p  
\v 6 Haali/ aha/ hila/ dikina e shushan mo jin minu mii aha/ abas mo. Dhali mom pem jin miga/ ḵwa/ is pem bwa mo tani a’di p̱u’dki’d mo be.  
\v 7 Aha/ askina ki as gana/ mo. Aha/ ’baarkina bway tur gi miiŋ gana/ mo. Aha/ karkina moŋgam gwo is mo.  
\v 8 ’Peni shwane/ mo to karkunu mo gom aha/ mo, a’di jin ta toŋ’kup̱ gi mo ma ḵar/e mo, a’di jin mina Tap̱a, jin ta’da amandwall gwo mo jin ta’da ḵar/e mo c̱i aha/ mo ka Tee c̱aan mo. Dhali yisa jasi e aha/ ’de/ mowa, hili si’da/ gom uni ’baar mo kun enki miim piti jin minu piyu/ a’di is ka pije/ mo be. 
\s1 Gwo jin Yedhuwa Ye’th Sho’k gom ’Kwani ka ’Deṯe/ ’Deṯe/ mo 
\p  
\v 9 Miiyi ki is pini ki dher mo mmoyayu/ i aha/ ki jahanne/ mo.  
\v 10 Haala Dimas, a’di jin enki mony’cesh yan jin di’d shwane/ mo tani, a’di dhalki aha/ ’pen mo dhali yaki’d mo e Pan Tasaluniiki mo, dhala Kiriskis a’di yaki’d mo e Paŋ Galathiyya mo dhala Tiithus e Pan Dalmathiyya mo.  
\v 11 Luuka a’di di’d a’di ’de/ nyaḵki aha/ mo. Gama Markus mo dhali susi a’di mo nyaḵki /e mo, haali/ a’di ta a’dim paŋ gana/ jin mii to gom aha/ mo.  
\v 12 Tiḵikus, aha/ hashkina a’di e Pan Ep̱asus mo be.  
\v 13 Ki /e mini p̱u’du/ mo tani guyu/ burrinyem p̱om pem mo, a’di jin dhalkika/ nyaḵka Karbus mo e Pan Taruwaas mo, dhala warka/ si’da/ mo, dhali isi ki ji mum mo ayi’c kun ’kwaru gwo ap̱o/ mo.  
\v 14 Iskandar jin ta’da mantor to mo tani a’di miiki aha/ dhan to jin shi/ashi/ mo, dhali Tap̱a midi raḵ a’di to ibway mo gom miim piti jin miina a’di mo.  
\v 15 Jiyi a’di ki e mo, /e ki is pini mo, haali/ a’di ’bitha’bi’th mo mmocesh mo mo gom gwom bam jin ṯora aman mo be.  
\v 16 E gwom pem jin ta jin ṯwa/a/ jin ’ce’dka/ she/ mo tani wathin ṯal ’deŋ kamu/ yisa di’da jin bu’thki ’ban gwom pem mo. Uni ’baar mo dhalki aha/ ’pen mo. Hili mii yan a’di minu mii dhalku/ ki dhu ap̱o/ uni mo.  
\v 17 Hili Tap̱a a’di doshki’d nyaḵki aha/ mo dhali c̱i aha/ mom’bi’th is mo mmobah gwo ki bah gana/ ’baar mo, ki aris ’kwani kun ’koki ta ’Kwani Yahuuda/ mo mini ’taki ciḵ a’di mo be. Wakan aha/ yekunu mo ’peni ’twa/ ma dhop̱ mo be.  
\v 18 Tap̱a a’di midi ye aha/ ’ba/ mo ’pena ris tonthus mo dhali ta aha/ is ki me’d mo gom bampa/ jin ta ji momis piti mo be. E a’di mo tani monyca midi di mo gom ki sule/ mo dhali ki sule/ ya ye ’ba/ mo be. Amen. 
\s1 Ḵwalany ’Te/ Ba/. Monthe Me’d mo 
\p  
\v 19 Theka P̱iriska me’d mo dhala Akiila mo, dhali kuŋ gu’b ma Unisip̱urus mo be.  
\v 20 Araastus diki’d mo e Paŋ Kurinṯẖuus mo. Dhala Ṯurup̱iimus a’di dhalkika/ mo e Pam Miliiṯus mo haali/ a’di ’ba’thki’d mo be.  
\v 21 Miiyi is pini ki dher mo mmoyayu/ nṯwa/a/ ki mo diki ta mondiṯ mo. Abuulus hashki monthe me’d gom /e mo. Kan si’da/ miikin ma Budis mo dhala Linus mo dhala Kalap̱idiyya mo dhala risa waḵi ’baar mo be. 
\p  
\v 22 Tap̱a midi di e shi/in pini mo. A’the midi di gom /e mo.