\id 2TH  
\ide UTF8 
\h TASALUNIIKI SU/ 
\toc1 Gwo jiŋ ’Ko’d jin ’Kwar ma Buulus gom ’Kwani gi Pan TASALUNIIKI mo 
\toc2 TASALUNIIKI SU/ 
\mt1 Gwo jiŋ ’Ko’d jin ’Kwar ma Buulus gom ’Kwani gi Pan TASALUNIIKI mo 
\c 1  
\s1 Monthe Me’d mo 
\p  
\v 1 ABuulus dhala Silwaanus dhala Ṯimuṯẖawuus mo. 
\p Eya ḵaniisa gi Pan Tasaluniiki mo eya Arumgimis jin ta’da Babam bana mo dhali Tap̱a Yesus Ḵrisṯẖos mo be. 
\p  
\v 2 A’the e um mo dhali moŋḵu’th is eya Arumgimis a’di jin ta’da Baba mo dhali Tap̱a Yesus Ḵrisṯẖos mo be. 
\s1 Gwon Dwall ka Tee jin Min ma Ḵrisṯẖosi P̱u’du/ mo 
\p  
\v 3 Am ḵara ba/ mina c̱i mo jin ’boruwa Arumgimis bwa i is mo isa yempa/ mo gom um mo iwaḵ mo, me’d jin gama a’di ki gam mo, haali/ moŋgam gwo is bum ’twaḵki’d ka enthus mo dhali mo/en bum ka ’deṯe/ ’deṯe/ mo gom mo/en jin ena um ka rem ’kup̱ mo a’di markunu is mo be.  
\v 4 Wakan aman ki is bam dhuna ’ba/ ki ca mo gom um mo eya risa ḵaniisa ma Arumgimis mo gom sho’k bum jin ṯelkina um mo dhali moŋgam gwo is bum eya ris mom bum jin ’koshu um mo dhali e monṯo’c bwa jin ’kokina umi mo’dim ’kup̱ mo be. 
\p  
\v 5 Mii yansan a’di mishu mo eya tente/ mo ki gwon dwall ma Arumgimis jin ta’da ḵar/e mo ki um minu ’taki dhu ki uni gun ha me’d mo gom Bampa/ ma Arumgimis mo gom a’di jin ’koshkina um is ka nyor mo be.  
\v 6 Haali/ Arumgimis ka jiŋ gana/ karki a’di ki miiŋḵar/e mo mmoraḵ monṯo’c bwa ibway mo ki uni gwansan kun ṯo’cki um bwa mo be  
\v 7 dhali mmoc̱i um mo ma si/is mo, um kun tashkunu ki bwan diṯin mo nyaḵki am mo me’d jin mina Tap̱a Yesus ’ceeyu mo ’peni momis mo nyaḵki iman’doyu gwom piti kun ’bitha’bi’th mo e o’d jin shwa’d ka le’dan mo,  
\v 8 mmorica ri’c ap̱o/ uni gwansan kun ’koki misha Arumgimis mo dhali ap̱o/ uni gwansan kun ’koki ha gwom ’borga/ gi Tap̱a Yesus bana e mo mmomii mo.  
\v 9 Uni mina isi ’kosh ka nyor mo gom gwon dwall jin toru gwo ’twa/a ’cesh mo gom mii ma ḵar/e mo, a’di jin ta mo jin minu ’ce’d sho’k ki sule/ ya ye ’ba/ mo dhali mo jin dheru bwa ki sule/ mo ’peni buŋ’kus gi Tapa mo dhali ’peni monycam piti gi mom’bi’th mo  
\v 10 me’d jin mina a’di p̱u’du/ ka tee c̱aan mo ki a’di minu kar ki ca mo e kum piti kun dheleladhelel mo dhali a’di min ma ris ’kwani ’baar mo mer mo, uni kun gamki a’di gwo is mo, haali/ gwo jin ṯoru e um mo tani gamkunu is mo be.  
\v 11 Itagi ’pemen yan mo isa yempa/ mo tani aman ’thokina mo gom um mo ka Arumgimis bana midi dhu um ki uni kun ha me’d mo ka yuḵ piti mo dhali thima ris ’kup̱ mii ’baar mo kun ’boron mo dhali mii kun piyin mo ’peni mo jin gamu gwo is mo ki mom’bi’th piti mo.  
\v 12 Wakan ki gway gi Tap̱a Yesus bana mo minu kar ki ca mo e um mo dhali um e a’di mo isi me’d gwo ma ’the ma Arumgimis bana mo dhali Tap̱a Yesus Ḵrisṯẖos mo be. 
\c 2  
\s1 Wathin ’De/ Yin jin Ush Gwoŋḵan mo 
\p  
\v 1 Dhali shwane/ isi gom gwo jin mina Tap̱a Yesus Ḵrisṯẖos bana p̱u’du/ mo dhali goma dhana tul ’kup̱ bana jin mina ana gam a’di ’kup̱ mo tani aman yuḵkina um mo iwaḵ mo.  
\v 2 Dhalku/ ki ta uni gun mina isi la yiḵin ki jahanne/ mo eya du mo walla la dhal cuuwa/ me’d mo walla ki shi/in mo walla ki gwo mo, walla ki gwo jin ’kwarkunu mo mmo/o ki a’di ta jim bam mo mmoṯes gwo mo ka tee gi Tap̱a p̱u’dki’d mo.  
\v 3 Dhalku/ ki dhal wathin ’deŋ kamu/ bway mo mmomu’th um e ki bwaya kamu/ mo. Haala tee c̱aantan midi diki p̱u’du/ ciki/ mo isi ciki/ mo, mo jin dhalu gwo ’pen mo midi p̱u’du/ nṯwa/a/ mo dhali wathin ’de/ yin jin ush gwoŋḵan mo minu ṯor eya tente/ mo, a’di jin ta ya/ gi mo jin daḵu gwo me’d mo  
\v 4 a’di jin ceshki mo ki ŋarr mo dhali kar is piti ki ca mo ap̱owa risa rum kun yuḵu gway kan ka wuny is mo walla to jin luŋu mo, wakan a’di ki bu’th monyc̱a’b piti e gu’b gi mondheleladhelel ma Arumgimis mo mmobah gwo mo ki a’di ki is piti ta’da Arumgimis mo be.  
\v 5 ’Kona um ki ka gwo eya, ki me’d jin dikika/ e um naskina/ mo tani aha/ ṯorkina um gwo yansan mowa?  
\v 6 Dhali um mishki mo mo ki a’di jin ’tashki a’di ’twa/ mo shwane/ wakan mo ki a’di minu ṯor eya tente/ ka teem piti mo.  
\v 7 Haali/ mom’bi’th jin ta jiŋ kup̱ ’peni mo jin ushu gwoŋḵan mo di’d mo hila/ mmo/um mii mo. Hili jasi a’di jin ’tashi a’di ’twa/ mo shwane/ midi mii wakan ntaga tee jin minu bu’th a’di ’peni bway piti mo be.  
\v 8 Dhali yan’ko’d a’din ’de/ yin jin ush gwoŋḵan mo tani minu ṯor eya tente/ mo, dhali Tap̱a Yesus midi ’kosh a’di jwa mo ki shi/irr ki ’twam piti mo dhali ’ce’d a’di sho’k mo ki is piti mo jin mina a’di piyu/ mo dhali ki p̱u’d piti jin mina a’di p̱u’du/ mo be.  
\v 9 Momp̱u’d jin mina a’din ’de/ yin jin ushi gwoŋḵan ip̱u’du/ mo ki mo jin um ma Seṯaan mii mo tani midi di ka ris mom’bithi ’baar mo dhali ki jamas mii ma maḵ mo dhali momer kun ta ku ma maḵ mo,  
\v 10 dhali nyaḵka ris mo jin hekuwa he’k e mo kun ta kun thus mo gom uni gwansan kun ’kokini mo’ce’d sho’k mo haali/ uni ushki gwoŋ gana/ en mo dhali wakan ki uni minu ’taki woṯẖ mo.  
\v 11 Wakan Arumgimis a’di hashki’da p̱o/ uni adhan mo jin susuwa sus mmoper mo ’peni gwoŋ gana/ mo mmodhu uni mmogam a’di jin ta thus ki thus is mo.  
\v 12 Wakan ki uni ’baar mo minu waḵ mo, uni kun ’koki gam gwoŋ gana/ is mo, hili uni ’kola ’ce mo e momii mii kun ’koki ta kuŋ ḵar/e mo. 
\s1 Mo jin Kwanykunuwa Kwany mo gom Bway Mowoṯẖ mo 
\p  
\v 13 Hili am ḵara ba/ imina c̱i mo jin ’boruwa Arumgimis bwa i is mo isa yempa/ mo gom um mo iwaḵ mo, um gun enu ki Tap̱a mo, haali/ Arumgimis kwanyki um ’peni ka muŋ’kup̱ mo mmota ku gi minu woṯẖ mo e mii kun dhagamkunuwa dhagam ki Shi/in mo dhali mo jin gamkunu gwo is e gwoŋ gana/ mo.  
\v 14 E mii yan mo a’di yuḵkina a’di um mo e gwom ’borgam bam mo, wakan ki um mini bu’th monyca gi Tap̱a Yesus Ḵrisṯẖos bana mo be.  
\v 15 Wakan mo tani iwaḵ mo, doshi mo dhali ṯeli sho’k mo dhali budhi gwo kun luḵu um mo, a’di jin ṯorkunu um ki aman mo, wakan, ki gwo jin onu ki ’twa/ mo walla ki gwo jin ’kwaru mo be. 
\p  
\v 16 Dhali shwane/ dhalki Tap̱a Yesus Ḵrisṯẖos bana ki is piti mo dhali Arumgimis jin ta’da Babam bana mo, a’di jin enki ana mo dhali c̱i ana momalas jin midi di ki sule/ sule/ ya ye ’ba/ mo dhali mo ma ’teŋ kap̱eŋ gana/ ka ’the mo,  
\v 17 dhalki a’di malaski’da dum bum mo dhali ṯel uni sho’k mo eya risa ṯuca ’borga/ mo dhali gwo mo be. 
\c 3  
\s1 ’Thoyi gom Aman mo 
\p  
\v 1 Ḵwalany ’te/ be, iwaḵ mo, ’thoyi gom am mo, ki gwo gi Tap̱a midi p̱ala/ ki lala’th mo dhali p̱i mii e mo me’d mii jin miikina a’di e bwam um mo  
\v 2 dhali ki aman minu ’cuḵ mo ’peni ’kwani kun daran gi ’ce mo dhali kun ta thus ki thus mo. Haali/ ’kwani ’baar mo yisa ta gi gwo jin gamu is mo yisa.  
\v 3 Hili Tap̱a a’di ta a’di isiŋ gana/ mo. A’di midi ’bi’th um is mo dhali ji um ’peni a’dinthus ’de/ yin mo.  
\v 4 Dhali aman takina gi mo jin wukina aman Tap̱a jwa i is mo gom um mo ki um ’kon mmomii to shwanetan mo dhali ki um mini mii to kun ḵankina aman um gwo mo be.  
\v 5 Dhalki Tap̱a a’di c̱u’thki’da dum bum mo e mo/en mo goma Arumgimis mo dhali e sho’k jin ṯelu mo eya Ḵrisṯẖos mo be. 
\s1 Mii ma Mure/ jin ’Ko ’Kwani I’ba/ mo gom Mii jin Minu Imiiya Ṯu’c mo 
\p  
\v 6 Dhali shwane/ aman ḵankina um gwo mo iwaḵ mo, e gway gi Tap̱a Yesus Ḵrisṯẖos bana mo ki um mini non is bum mo ’peni ikana tiya mo, uni kun ’kokin mo e mo ma p̱iny is mo dhali yisa isi e gwo jin luḵu mo jin bu’thkina um ’peni aman mo.  
\v 7 Haali/ um ki is bum mishki mo mo gom um ḵa ba/ imini ta imanthoḵ aman mii mo. Aman ’konaki ta ap̱iny is mo me’d jin ’kokina aman e um mo.  
\v 8 Aman ’konaki shwa tonṯe/ gi wathin ṯal ’deŋ kamu/ mo ki dar gi to jin ro’du mo. Hili ka ṯu’c bam jin ’batha’ba’th mo dhali ki miin to jin miikina aman ki mon’thiny ilu/ mo dhali ki montee mo tani ki aman mina ’taki ’koki dhu ton diṯini ’ba/ aciŋkamu/ ’peni um mo.  
\v 9 A’di yisa wakana haali/ aman ’konuki dhal bway mo mmomii kan mo, hili mmoc̱i um e miim bam kun boṯa am mo mmota she/mm mo ki um mini ta imanthoḵ aman mii mo be.  
\v 10 Haali/ isi kani me’d jin ’kokina aman e um mo tani aman c̱ikina um gwoŋḵan yansan mo ki: Waḵki/ wathin ṯal ’deŋ kamu/ midi diki miiya ṯu’c mo tani dhalku/ ki dhal a’di bway mo mmoshwa tonṯe/ mo.  
\v 11 Haali/ aman ciḵkina gwo mo ki uma tiya ’kokin mo e mo ma p̱iny is mo, dhali ta imankul gu’b ’te/ mo, mmo’koki miiya ṯuca tiya mo ’te/.  
\v 12 Dhali ’kwani gi wakansan mo tani ḵankina aman um gwo mo dhali malas mo e Tap̱a Yesus Ḵrisṯẖos mo mmomii to ki me’d buni ki shwam mo dhali mmogam to ka ṯu’c buni jin mina uni mii ta mo.  
\v 13 Iwaḵa, dhalku/ is ki wu e mo mmomii miim ’borga/ mo. 
\p  
\v 14 Waḵki/ wathin ṯal ’deŋ kamu/ midi ush gwo ha e mo jin ona aman mo eya warka/ yansan mo tani buḵi wathi/ yan ka pije/ mo dhali dhalku/ a’di ki ’dish is mo mmonyaḵ to mii ki a’di mo ki a’di mina isi ’theya ’the mo.  
\v 15 Dhali dhalku/ ki hil a’di me’d a’di jin ta ’kup̱ ki um mo, hili rumi a’di ki gwo mo me’da kam bum mo. 
\s1 Mom’bor Mii jin Dhalu Me’da P̱o/ ’Kwani mo 
\p  
\v 16 Dhali shwane/ dhalki Tap̱a gi moŋḵu’th is ki is piti mo c̱i um moŋḵu’th is mo eya ris mo ’baar mo dhali ka ris ’twaŋkal kuku/ mo. Tap̱a midi di nyaḵki umi ’baar mo. 
\p  
\v 17 Aha/ Buulus ’kwarkina monthe me’d yansan ki me’d pem gana/ mo. A’di ta’da du’d mii kun ’kwarkika/ eya ris gwom pem mo. A’di ta miim pem jin ’kwarkika/ gwo mo.  
\v 18 Dhali a’the gi Tap̱a Yesus Ḵrisṯẖos bana midi di e umi ’baar mo be.