\id 1TI \ide UTF8 \h ṮIMUṮH̱AWUUS ’DE/ \toc1 Gwo jin Ṯwa/a/ jin ’Kwar ma Buulus goma ṮIMUṮH̱AWUUS mo \toc2 ṮIMUṮH̱AWUUS ’DE/ \mt1 Gwo jin Ṯwa/a/ jin ’Kwar ma Buulus goma ṮIMUṮH̱AWUUS mo \c 1 \s1 Monthe Me’d mo \p \v 1 ABuulus a’di jin karu ki she/ mo goma Ḵrisṯẖos jin ta’da Yesus mo ki gwoŋḵan ma Arumgimis mo jin ta’da Manwoṯẖ bana mo dhala Ḵrisṯẖos jin ta’da Yesus jin ta mo ma ’teŋ kap̱em bana mo be. \p \v 2 Eya Ṯimuṯẖawuus mo, a’di jin ta’da ’cim pem gana/ e moŋgam gwo is mo. \p A’the dhali momiimii dhali moŋḵu’th is ’peni Arumgimis jin ta’da Baba mo dhala Ḵrisṯẖos jin ta’da Yesus Tap̱am bana mo be. \s1 Arum jin Rumuwa P̱o/ Gwon Thus jin Ṯoru mo \p \v 3 Me’d jin ṯirrishkika/ /e ki gwo mo me’d jin yakika/ ya mo e Pam Makiduniyya mo mmoc̱a’b mo e Pan Ep̱asus mo ki /e mini ’taki ḵan ’kwanin tiya gwo mo mmo’koki ṯor gwonṯora kamu/ jin diki she/ mo \v 4 walla si’da/ mmo’koki c̱iya hirdhe/ ki is buni mo gom gwo lolop̱ jin ta ja maḵ buni mo dhali mo jin beledhu gwo mo jin dar ki ’pemen mo, a’di jin shushki’da du mo mmodoṯ gwo mo ’te/ mmodhal mii e i is mo gom gwo jin yedhu sho’k jin piyi’d ’peni Arumgimis mo, a’di jin ta gwo e moŋgam gwo is mo. \v 5 Hili tom bam jin ’dona am ki e mo mmoḵankina aman gwo mo tani ta mo/en be, a’di jin piyi’d ’pena du jin dheleli’d mo dhali ’peni ’twa/ ma dum ’borga/ mo dhali ’peni moŋgam gwo is jin dar ki washila/ mo. \v 6 ’Kwanin tiya mmogaskina uni mo ’peni to gwansan mo tani uni wanykin ki wanya/ wanya/ mo e gwo kun ’ko bwa ’te/ mo kun ’kokina uni mmoṯora ṯor mo, \v 7 mmo’kona uni gwo ibwa mo mmota uni kun ta imanṯor gwo mo gom gwoŋḵan jin c̱inu mo. Uni dar ki mo jin mishu gwo ’ban mo gom gwo kun ona uni mo walla gom to kun ona uni gwo mo ki gwo jin gwona uni ’kus mo be. \p \v 8 Dhali ana misha mo mo ki gwoŋḵan jin c̱inu mo, a’di ’boro’d mo, waḵki/ wathin ’deŋ kamu/ midi mii a’di mo me’d jin dhala gwoŋḵan a’di bway mo mmomii mo. \v 9 A’di midi mii mish gwo yansan ’ban mo, ki gwoŋḵan jin c̱inu mo yisa ’thikunuwa ’cesh mo gom uni kun ta kuŋ ḵar/e mo, hili gom iman/ush gwoŋḵan mii mo dhali iman/ush gwo ha e mo, dhali gom ku gi ushuna ush goma Arumgimis mo dhali imanmii miinthus mo, dhali gom ku gi ’koki dhelel mo dhali gom ku gi ’koki dhu mii kun ḵogu mo dhali gom iman’kosha mee mo ki icom mo dhali iman’kosha mee mo ki ikum mo dhali iman’kosha mee mo ki ’kwani mo, \v 10 dhali ’kwani kun mii miinyc̱al mo dhali imanha’k ’pen c̱eŋ gwas mo dhali imanḵwal ’kwani mo dhali imanta ṯor mo dhali imanthul me’da po/ gwo ka maḵ mo dhali ma to gunn kun miinu ki c̱a’ckon mo e gwoŋ gana/ jin ṯoru mo, \v 11 isi ki gwo gi monyca gi gwom ’borga/ mo jin ta ji ma Arumgimis jin ’boru mii mo, a’di jin c̱ikunu aha/ mo mmodhu mo be. \s1 Mii ma Buulus jin ’Bora A’di A’bor Bwa i Is mo gom Mo jin Miinuwa Mii mo \p \v 12 Aha/ ’borkina a’di bwa i is mo a’di jin c̱iki aha/ mom’bi’th mo gom a’di yan mo, a’di jin ta’da Ḵrisṯẖos jin ta’da Yesus mo jin ta Tap̱am bana mo, haali/ a’di mishki aha/ mo ki aha/ tana ji isiŋ gana/ mo mmokarkina a’di aha/ ’pen ka pije/ mo mmomii to mo gom a’di mo, \v 13 ba aha/ ’thissa/ walkina gwo sor mo dhali aha/ ’koshkina ’kwani mo dhali aha/ sorkina a’di mo. Hili aha/ bu’thkina momiimii mo haali/ aha/ miikina miim p̱us mo mmodika/ e mo jin daru ki gwo jin gamu is mo. \v 14 Dhali a’the gi Tap̱am bana guski’d ki sho’k piti gom aha/ mo nyaḵki moŋgam gwo is mo dhali mo/en mo kun ’kon eya Ḵrisṯẖos jin ta’da Yesus mo be. \v 15 Gwo yan jin onu mo ta gwoŋ gana/ mo dhali a’di ha me’d ki haŋ gana/ mo mmobu’th a’di ’baar mo ka Ḵrisṯẖos jin ta’da Yesus p̱u’dki’d mo e mony’cesh yan mo mmowoṯẖ uni kun miiki miinthus mo. Dhali aha/ tana ’kaŋ’kup̱ jin ta’da manmii miinthus mo. \v 16 Hili aha/ bu’thkina momiimii mo gom ’kup̱ mii yan mo, ki, e aha/ mo tani me’d jin taka/ ’kaŋ’kup̱ mo tani Yesus Ḵrisṯẖos midi ’taki ṯor eya tente/ bwa ma dum pitiŋ gana/ mo jin ’kuc̱a a’di ki ’kari’th mo mmota she/mm mo gom uni gwansan kun mini ’ko mo mmogam gwo is mo e a’di mo gom moŋ’koki/e ki sule/ sule/ ya ye ’ba/ mo. \v 17 Eya Maliḵ jin di’d ki she/ yil mo, jin midi mol wu mo, dhali jin molu mish ki e ga ’cesh mo, a’di jin ta’da Arumgimis mo jin di’d ’deŋ gana/ mo, a’di minu taḵ mo dhali kar ki ca mo goma sule/ mo dhali ki sule/ ya ye ’ba/ mo. Amen. \p \v 18 Gwoŋḵan yansan ḵankika/ /e mo, Ṯimuṯẖawuus, /e jin ta ya/m pem mo, isi ki gwo kun onu is mo kun bagu mo, uni kun ṯorkunu mo gom /e mo, ki /e mmoshi/irrkunu ki uni mo tani mini ’taki asa asa ’borga/ mo \v 19 mmoṯel moŋgam gwo is sho’k mo dhali ’twa/ ma duŋ gana/ mo. Mmo/ush gwo ’peni ’twa/ ma du mo tani ’kwanin tiya pwaṯẖki moŋgam gwo is buni mo. \v 20 E bwaman uni gwan mo tani ta iHiminayus mo dhala Iskandar mo, uni ’kon mo, uni kun c̱ikika/ ka Seṯaan mo ki uni mini da/ar mii mo mmo’koki wal gwo sor mo be. \c 2 \s1 Gwo jin Yedhuwa Ye’th Sho’k mo gom Isi Gwo Goma ’Tho mo jin Minu ’Tho mo \p \v 1 Gwo jin ta jin ṯwa/a/ ki gwo ’baar mo tani a’dihe/ be. Aha/ ṯirrishkina aṯirrish ki gwo mo ki mo jin di’buwa di’b is mo dhali mo ma ’tho mo jin ’thonu mo dhali gwo jin woṯẖu/ is mo dhali mo jin c̱inuwa ’borim bwa i is mo minu mii mo gom ’kwani ’baar mo, \v 2 gom imaliḵ mo dhali gom ’kwani ’baar mo kun ’ko ’kom ’penkap̱an mo, ki ana mina ’kowa lam bana ki shwam mo dhali ki moŋḵu’th is mo dhali ki mii ma gayiin mo dhali ki ana minu tul ’twa/ ’kup̱ mo ki momaŋ mo ka ris ’twaŋkal kuku/ mo be. \v 3 Mii yansan a’di ’boro’d mo dhali a’di mishkunu bu’th mo e jis/e ma Arumgimis jin ta’da Manwoṯẖ bana mo, \v 4 a’di jin dina gwo ibwa mo goma ris ’kwani ’baar mo ki uni minu woṯẖ mo dhali mmop̱u’du/ mo mmonyiṯẖ gwoŋ gana/ mo be. \v 5 Haali/ Arumgimis ṯal ’de/ mo be dhali jan ’de/ di’d si’da/ jin doshki’d e bwaman ma Arumgimis mo dhali ’kwani mo, a’di jin ta wathi/ jin ta’da Ḵrisṯẖos jin ta’da Yesus mo, \v 6 a’di jin c̱iki is piti mo mmota to jin wani ’kwani ’baar mo ’ba/ mo. Gwonṯor gom a’di mo tani a’di ṯorkunu mo ki embul ma teem piti mo. \v 7 Gom a’di yan mo tani aha/ karkunu ’pen ka pije/ mo mmota amanc̱i gwo mo dhali mmota a’di jin karu ki she/ mo (Aha/ ṯora gwo ki ṯor gana/ mo. Aha/ dinaki ta aṯor mo). Aha/ tana amanṯor ’kwani kun ’koki ta ’Kwani Yahuuda/ gwo mo e moŋgam gwo is mo dhali e gwoŋ gana/ mo be. \p \v 8 Aha/ dina gwo ibwa mo si’da/ eya ris mo ’baar mo ki ’kwani mini mii ’tho mo, mmo’de’k me’d kun dhelelini mis mo ki dar ka nyor mo walla dar gi wala jin walu mo ki ṯas ṯas mo. \v 9 Wakan si’da/ up̱ mini nyoŋ is buniŋ gana/ mo ki dar gi mo jin minu ṯera ṯer mo dhali mmohi’th burrinye/ i is mo kun gamana gam mo kun diṯ ma po/ e mo, yisa mmoṯo’da mur kagahara mo walla mmohi’th ’dolkon gana/ i is mo walla mmohi’th dhema/ i is mo walla mmohi’th burrinye/ kun ’bitha yol she/ ki ’bi’th mo. \v 10 hili uni mini nyoŋ is ki miim ’borga/ mo me’d jin mina a’di ha me’d mo gom up̱ kun o gwo ki ’twa/ mo ki uni tana gayiin mo gom ji gi luŋu mo. \v 11 Dhalka ’bom da/ar mii mo mmoc̱a’b ki shwam mo dhali c̱a’b ki c̱a’b ’ko’d me’di ’baar mo. \v 12 Aha/ dinaki dhala ’boma kamu/ bway mo mmota amanṯor gwo mo walla mmota gi moshirr ap̱o/ ’kwaniŋ gwas mo. Ayim midi mii c̱a’b ki shwam mo. \v 13 Haala Aadam a’di ta a’di jin uḵu nṯwa/a/ mo dhala Hawwa ŋ’ko’d mo. \v 14 Dhala Aadam yisa ihe’kkunu eya, hila ’bom a’di ihe’kkunu e mo dhala yim warki’d ka mandhaŋ gwo mo be. \v 15 Hila ’bom minu woṯẖ mo ki mo jin dhodhu uc̱i mo waḵki/ ayim midi rash di mo e moŋgam gwo is mo dhali e mo/ena en mo dhali mii kun dheleladhelel mo dhali mii kun miinu ki dar gi mii ma ṯer mo. \c 3 \s1 Monthum jin Thumkunu mo gom Jwahaŋ ’Kwaniŋ Ḵaniisa mo \p \v 1 A’di ta gwo jin ta isiŋ gana/ be jin onu ki: Waḵki/ wathin ’deŋ kamu/ dina gwo ibwa mo mmomiiya ṯu’c jin miina jwahaŋ ’kwani mo tani a’di ona bwa ka ṯuca ’borga/ mo be. \v 2 Wathi/ gwanyjaḵa/ midi mii diki mii ta gi mii ’ba/ mo, dhali a’di midi mii ta ga ’bom jasi ’de/ mo, dhali a’di midi mii ta wathi/ jin min ma du ’tim mo, dhali a’di midi mii ḵu’th is ki ’cese/ ’cese/ mo dhali a’di midi mii diki lo’b is piti nycine/ mo, dhali a’di minu mii ta gu’b piti ŋal mo, dhali a’di midi mii ta gwocon ki gwocon mo mmoṯor gwo mo, \v 3 dhali a’di midi mii diki ’dish mo ma su is mo, dhali a’di midi mii diki mii mii ki ra’b mo hili a’di mina e mii ’thup̱a’thup̱ mo, dhali a’di midi mii diki wala le’d ki ṯas ṯas mo, dhali a’di midi mii diki ta aman/ena guurush mo si’da/. \v 4 A’di midi mii mish kuŋ gu’b piti dhu ki ’bore/ mo, mmodhu uc̱im piti mmo’dap̱a bora ’cesh mo mmociḵ gwo mo dhali mmotaḵa taḵ mo ka ris ’twaŋkal kuku/ mo. \v 5 Haali/ waḵki/ wathi/ diki mish kuŋ gu’b piti dhu ki ’bore/ mo tani ba ki jin ta’da ta mmina a’di mish ’kwaniŋ ḵaniisa ma Arumgimis dhu mo? \v 6 A’di midi mii diki ta wathi/ jin ta jin this mo jin daḵa bu’th gwo jin gamu is mo haali/ a’di midi ’taki se ki ’pura/ ’pura/ mo ki ’ba/ jin kara a’di ki ca mo, dhali biṯ mo e mo jin waḵu tap̱a ma ruma ’cesh mo. \v 7 Bahili a’di minu mii maŋ mo ki ’kwani kun ’kon ka pije/ mo haali/ a’di midi ’taki biṯ mo e mo jin waḵuwa waḵ mo dhali eya gume/ gi tap̱a ma ruma ’cesh mo. \s1 Monthum jin Thumkunu mo gom Imanhila Hil mo goma Ḵaniisa mo \p \v 8 Wakan si’da/ ’kwani kun dhunu mo mmohil to ma ḵaniisa i e mo tani uni mini mii ḵa/aḵa/ mo, mmo’koki ta gi ’twa/ jin onu gwo isu/ mo, dhali mmo’koki jima su i ’twa/ mo, dhali mmo’koki pur bwa mo goma guurush mo. \v 9 Uni mini mii bu’th gwo jin c̱inu ki jim bag mo jin gamu is mo ki ’twa/ ma dun dhelelgam buni mo. \v 10 Dhali uni si’da/ minu mii nyo/i ṯwa/a/ mo. Dhali yan’ko’d waḵki/ uni nyo/u ki is buni mo ki uni ta uni kun dar gi mii ’ba/ mo tani dhalki uni mii to mo me’d uni kun cila to hil mo goma ḵaniisa mo. \v 11 Wakan si’da/ up̱ mini mii ḵa/aḵa/ mo, mmo’koki thutha thu’th ’pen mo, hili uni mini ta uni kun mini ’tima du mo, mmota uni isiŋ gana/ mo eya ris to ’baar mo be. \v 12 Dhalki uni kun cila to hil goma ḵaniisa mo ta gi up̱ jasi ’deṯe/ ’deṯe/ mo dhali dhalki uni mish uc̱im buni dhu mo dhali kuŋ gu’b buni ki ’bore/ mo. \v 13 Haali/ uni gwansan kun miiki to ki ’bore/ mo me’d uni gun cila to hil mo goma ḵaniisa mo tani uni gam ’twa/ maŋ mo gom miiŋ gana/ jin gama uniya du is mo gom is buni mo dhali si’da/ adhan mo jin wunu jwa i is mo e moŋgam gwo is mo, a’di jin diki’d eya Ḵrisṯẖos jin ta’da Yesus mo be. \s1 Gwo jin C̱inu ki jim Bag mo gom ji Luŋ Bana mo \p \v 14 Aha/ ṯosha mmop̱u’dku/ i um ki ’dishe/ mo, hili aha/ ’kwarkina um gwo gwansan mo mmoye’th um sho’k mo. \v 15 Wakan, waḵki/ aha/ takina diiṯe/ mo tani um mini ’taki mish mo mo ki um ḵa ba/ mini ’taki mii mii ki is bum mo me’d uni kun ta kuŋ gu’b ma Arumgimis mo, a’di jin ta’da ḵaniisa jin ta ji ma Arumgimis jin di ki e mo, a’di jin ta’da atiŋkiliŋ mo dhala cur gi gwoŋ gana/ mo be. \v 16 Ka jiŋ gana/ ana pikina gwo mo gom a’di yansan jin ta dhan gwo jin c̱inu ki jim bag mo jin ta jim bana jin luŋa ana aluŋ mo: \q1 A’di jin ṯorkunu eya tente/ mo e shuman is mo, \q1 dhali a’di jin karkunu ki mo ma ḵar/e e Shi/in mo \q1 dhali a’di jin p̱arkina iman’doyu gwo e mo \q1 dhali a’di jin c̱ikunu gwo mo e bwaman kal gi ’kwaniny’cesh mo \q1 dhali a’di jin gamkina ’kwani gwo is mo e mony’cesh mo \q1 dhali a’di jin bu’thkunu bway momis mo e monyca mo. \c 4 \s1 Gwo jin Ṯoru Iṯwa/a/ mo gom Mo jin Minu Dhal Gwo jin Gamu Is ’Pen mo \p \v 1 Dhali Shi/in a’di ṯorki gwo ki ji lugum mo mmo/o gwo mo ki, ka cim kuŋ ’ko’d mo tani kun tiya mini per mo ’peni moŋgam gwo is mo mmoc̱iya hirdhe/ ki gwo gi shi/in kun he’kkunuwa he’k e mo dhali ki gwo kun ṯoru goma ruma ’cesh mo \v 2 e gwo ma p̱or ma pije/ mo kun tanuwa ṯor ka ṯor mo ki ’kwani gwansan mo kun sula ’twa/ ma dum buni mo, \v 3 uni gun nonki mash jin mashu mo dhali uni kun shush mii mo mmoga/ tonṯen tiya mo, uni kun uḵ ma Arumgimis mo mmota to gun minu bu’th ki mo jin ’boruwa ’bor bwa i is mo ki uni gwansan kun gamki gwo is mo dhali mish gwoŋ gana/ mo be. \v 4 Haali/ aris to ’baar mo kun uḵ ma Arumgimis mo tani uni ta tom ’boron mo, dhali toŋ kamu/ minu waḵ mo gomata? waḵki/ a’di budhu ki mo jin ’boruwa ’bor bwa i is mo, \v 5 haali/ a’di karu ki she/ mo wakan ki gwo ma Arumgimis mo dhali ka ’tho jin ’thonu mo be. \s1 Amanmii To jin Ha Me’d mo goma Yesus Ḵrisṯẖos mo be. \p \v 6 Waḵki/ /e mini dhu gwo gwansan kun yedhuwa ye’th sho’k mo ibwambora waḵ mo tani /e mini ta a’dim ’borga/ mo mmomii to mo goma Ḵrisṯẖos jin ta’da Yesus mo, gom gura/ jin ’kana /e mo e gwo jin gamu is mo dhali gom gwom ’boro’d jin ṯoru /e mo a’di jin baṯẖkina /e mo be. \v 7 Dhalka hirdhe/ ki c̱i mo gom gwo lolop̱ jin ta ji ma maḵ mo jin diki ta ji ma gayiin mo dhali jin ta ji ma p̱ali/ mo. Nyoŋi is piniŋ gana/ mo e mii ma gayiin mo, \v 8 haali/ me’d jin hana a’di ari me’d mo mmonyoŋ buŋgwar is mo ’te/ mo tani mii ma gayiin a’di ha me’d mo eya ris ’twaŋkal kuku/ mo haali/ a’di gam mii adu is mo gom mondiki/e jin di’d shwane/ mo dhali si’da/ gom mondiki/e jin midi p̱u’du/ yilaŋ kamu/ mo be. \v 9 Gwo jin onu mo ta a’diŋ gana/ mo dhali ta a’di jin ha me’d mo mmobu’th ka ’bimpil mo. \v 10 Haali/ gom ’pemen yansan mo tani ana ’kona mo mmomiiya ṯu’c kun ’batha’ba’th mo dhali mmopicira picir mo haali/ ana takina ga ’teŋ kap̱em bana mo jin karkunuwa p̱o/ ma Arumgimis jin di ki e mo, a’di jin ta’da Amanwoṯẖ gom ’kwani ’baar mo, dhali ki ji mum mo gom uni gwansan kun gamki gwo is mo be. \p \v 11 Ḵani gwo gwansan mo ma dhali ṯori uni mo. \v 12 Dhalku/ ki dhal jan ’deŋ kamu/ bway mo mmowaḵ /e mo gom dhuru’c pini jin tana /e mo. Hili tayi she/mm mo gom uni mo uni kun gamki gwo is mo e gwom pini jin ṯora /e mo dhali e is pini jin thosona /e mo dhali e mo/en mo dhali e moŋgam gwo is mo, dhali e miin dhelelga/ mo. \v 13 Ntagi aha/ mina p̱u’dku/ mo tani ḵuthi is mo mmodeŋ Gwo ma Arumgimis jin ’kwarkunu e mo e bwaŋ ’kwani mo, dhali c̱iyi gwo mo dhali ṯori gwo mo. \v 14 Dhalku/ ki ta p̱iny is mo gom to jin c̱inu ki me’d mo jin tana /e mo, a’di jin c̱ikunu /e mo ki gwo jin onu is mo jin bahu mo me’d jin dhukina jwahaŋ ’kwani me’d buni ap̱o/ /e mo be. \v 15 Boṯi ki mii gwansan kun minu mii mii mo. /E ki is pini imini ta agayiin gom uni mo. Wakan uni ’baar mo mini p̱ar yam pini jin yana /e e mo. \v 16 Hili is piniŋ gana/ i e ki ’bore/ mo dhali gwom pini jin ṯora /e mo. Noni is pini ki ’koho/ ’koho/ mo. Ki miim pini jin mina /e mii kan mo tani /e mini woṯẖ is pini mo dhali uni kun mini ciḵ gwom pini mo be. \c 5 \s1 Mii kun Minu Mii Mii mo ka Ḵarambuye/ mo gom cin Tiya mo \p \v 1 Dhalku/ wathiny ca’d ki ḵucur mo, hili malasi a’di mo me’d mii jin mina /e mii cim mo. Usi ’kwanin dhuru’c is mo me’d ikam pini mo. \v 2 Wakan si’da/ up̱ kun tana ṯi/ mo me’d ita’dam pini mo, dhali up̱ kun ta dhuru’c mo me’d i’bwahan mo, eya ris mii ’baar mo kun dheleladhelel mo. \p \v 3 Taḵi up̱ kun wuna ikaṯẖ ki wuŋ gana/ mo. \v 4 Waḵka ’boma kamu/ jin wun ma kaṯẖ mo ta’d gi uc̱i mo walla uc̱i gi uc̱im piti mo tani dhalki uni nṯwa/a/ da/ar gwo mo gom ji gi luŋum buni mo gom mii jin minu mii mii mo goma waḵ buniŋ gana/ mo mmoc̱i ton tiya ka nyaŋ’ko’d mo gom ita’dam buni mo dhali icom mo. Haali/ mii yansan a’di mishu bu’th mo e jis/e ma Arumgimis mo. \v 5 Ayim jin wun ma kaṯẖ ki wuŋ gana/ mo dhali jin dhalu a’di ’de/ mo tani ayim karki mo ma ’teŋ kap̱em piti ap̱owa Arumgimis mo dhali ṯikirki mii mo mmodi’ba di’b is mo dhali ’tho mo ki mon’thiny ilu/ mo dhali montee mo. \v 6 Ayim jin momoṯki’da dum piti mo tani a’di di’di mowu mo isi kani me’d jin din ma yim ki e mo. \v 7 Ḵani gwo yansan mo wakan ki uni mini ’ko ki dar gi mii jin waḵuwa waḵ mo. \v 8 Waḵki/ jan ṯal ’deŋ kamu/ diki thip̱a waḵ pitiŋ gana/ mo tani a’di waṯki gwo jin gamu is mo, dhali a’di boli wathi/ jin diki gam gwo is e ki shi/ mo. \p \v 9 Dhalku/ ki dhal jan ’deŋ kamu/ bway mo mmonyaḵ gway ’kwar ki uni kun wuna ikaṯẖ mo kun aṯẖa yili issi\f + \fr 5:9 \ft siṯṯiin\f* kwara mo walla kun mashkunu mo ’thissa/ kagusha niin mo. \v 10 Dhala yim minu mii o gwo maŋ mo gom miim ’borga/ ma yim mo me’d jan ’de/ jin thip̱ki uc̱i mo mmoṯor mii jin minu ta gu’b piti ŋal mo, mmolam uni kun dhunu ki she/ ki dhelel dhelel sho’k mo, mmowoṯẖa/ woṯẖ mo gom uni kun ṯoju ’kus mo, dhali is ma yim jin kara a’di ka gayiin mo mmomii mii kun ’boron eya ris ’twaŋkal kuku/ mo. \v 11 Hili ushi uni gwansan gway ’kwar mo, uni kun ta dhuru’c kun wuna ikaṯẖ mo. Haali/ ki uni cana bwa en’dap̱ buni mo ap̱owa Ḵrisṯẖos mo tani uni ona bwa ki mash mo \v 12 dhali wakan uni tulki miiwaḵ is mo mmo’ce’dkina uni gwom buni kun ṯwa/a/ kun ona uni is mo. \v 13 Ki mii yan jin ’ce’de’da p̱o/ mo tani uni da/arki mii mo mmota p̱iny is mo dhali ta imanthap̱ gu’b ki sho’k mo dhali yisa mmotana uni jasa p̱iny is ’te/ yisa hili si’da/ uni tana le’d ka le’d mo dhali ta imankul gu’b ki kul kul mo mmoham gwo mo, mmo/o gwo mo kun mina uni ’taki ’koki o mo. \v 14 Wakan ba/ aha/ ona ki uni gun ta dhuru’c kun wuna ikaṯẖim buni mo tani dhalki uni mashan mo mmodho’th uc̱i mo, mmoji gu’b buni mo, dhali mmo’koki c̱i a’di jin ta ’kup̱ embula kamu/ mo mmosor ana mo. \v 15 Haali/ kun tiya uni hila/ perkin mo mmobaṯẖa Seṯaani sho’k mo be. \v 16 Waḵka ’boma kamu/ jin gami gwo is mo ta’d ga waḵ piti kun wuna ikaṯẖim buni mo tani dhalka yim woṯẖ uni mo jin mina ’kwaniŋ ḵaniisa ’koki ḵal mii kun diṯadiṯ mo, wakan ki uni mini woṯẖ uni gwansan kun wuna ikaṯẖ ki wuŋ gana/ mo. \p \v 17 Dhalki jwahaŋ ’kwaniŋ ḵaniisa uni kun ji mo ki ’bore/ mo, dhunu ki uni gun ha me’d mo ki montaḵ ka ’buḵum ’ban mo, ki nyanye/ gom uni gwansan kun mii to mo mmoc̱i gwo mo dhali mmoṯor gwo mo. \v 18 Haali/ Gwo ma Arumgimis jin kwarkunu mo o gwo mo ki: /E mini dhalka morbip̱ ki ’kamu’th ’twa/ mo ki a’di di’d mmotor pos ki sho’k mo, dhali, Amanmiiya ṯu’c minu mii c̱i to jin ha me’d ka ṯu’c piti mo. \v 19 Dhalku/ ki gam gwo me’d ap̱o/ wathiny jwahan ’deŋ kamu/ ki sule/ sule/ mo isi ciki/ mo gwo jin mishu eya tente/ mo ki ’twaŋ ’kwani su/ mo walla ki ’twaŋ ’kwaniŋ kwara mo be. \v 20 Gom uni gwansan kun ush miinthus daḵ mii mo tani ḵucuri uni mo ibwambora ris ’kwani ’baar mo, wakan ki unin tiya si’da/ mini ḵo/ is mo mmodosh mo. \v 21 E buŋ’kus ma Arumgimis mo dhali eya Ḵrisṯẖos jin ta’da Yesus mo dhali e iman’doyu gwom piti mo kun kwanykunu mo tani aha/ ḵana /e gwo mo mmodhuwa ris gwoŋḵan gwansan mo ki dar gi mii jin miinu ’peni gwo jin di’di bwa nṯwa/a/ mo walla ’peni mii jin miinu ka gwar ’de/ mo. \v 22 Dhalku/ ki la la mo e mo jin dhuna ’kwani me’da p̱o/ ’kup̱ wathi/ mo, walla mmonyaḵ miinthus mii jin miina wathiŋ kamu/ mo. Kari is pini ki dhelel dhelel mo. \p \v 23 Dhalku/ ki p̱i jasi yi’de/ mo naskina/, hili p̱iyi ari yiman amura’th mo gom gway gi bwam pini mo dhali gom ’ba’th pini jin ’kosh /e ki jahanne/ jahanne/ mo. \p \v 24 Miinthus gi ’kwanin tiya mo tani uni mishu eya tente/ mo, dhali uni dhunu eya tente/ mo gom gwon dwall mo, hili miinthus gi ’kwanin tiya mo tani uni minu piyu/ i’ko’d mo be. \v 25 Wakan si’da/ miim ’borga/ uni ṯoru eya tente/ mo, dhali isi kani me’d jin ’kona uni ki ’ko eya tente/ mo tani uni molu dhu ki ku gun bagu mo be. \c 6 \p \v 1 Dhalka ris uni ’baar mo kun ’kon mo e bwaŋ’kwariny dhaŋḵa’b ’bam buni kun tana uni c̱iŋkina/ kun yolu mo mmodhu uni kun ta tap̱am buni ki uni gun ha me’d mo eya ris montaḵ mo, wakan ki gway ma Arumgimis mo dhali gwo jin ṯoru mo minu ’koki wal gwo sora p̱o/ mo be. \v 2 Uni gwansan kun takin gi itap̱a kun gamki gwo is mo tani uni mini mii ’koki dhu uni ki mon’the is mo mmo/o gwo mo ki uni ta ikam mo ’te/. Hili uni mini mii dhal mii yan e i is mo mmomii aris to ’baar mo ki ’bore/ ki nyanye/ mo haali/ uni gwansan kun miina c̱iŋkinam buni to mo tani ta uni kun gamki gwo is mo dhali uni gun enu mo be. \s1 Mo jin Miinu Mii ma Gayiin mo Nyaḵki Mo jin ’Konu ka This Mo i E mo \p Ṯori gwo mo dhali ṯirrishi gwo mo goma ris to gwansan kun minu mii mii mo. \v 3 Waḵki/ wathin ṯal ’deŋ kamu/ midi ṯor gwoŋ kamu/ jin di ki she/ mo dhali diki gam gwo me’d mo ki gwom ’borga/ gi Tap̱a Yesus Ḵrisṯẖos bana mo tani dhali gwo jin ṯoru jin gamu me’d mo ki mii ma gayiin mo tani \v 4 a’di yin seki’d ki ’pura/ ’pura/ mo, ki ’ba/ jin karu ki ca mo. A’di diki mish toŋ kamu/ mo. A’di ta’d gi ’ba’th jin ’kosh a’di mo mmo’kosh ’daŋ gwo mo mmodoṯa/ doṯ mo dhali gom gwo jin sugu ki gwo mo, a’di jin wagaski miin dhap̱an mo, dhali mii kun biruwa bir mo, dhali mii kun thudhuwa thu’th ’pen mo dhali mmoṯosh gwon thus eya du ap̱o/ ’kwanin tiya mo \v 5 dhali mii gi gwo kun sugu e bwaman ’kwani mo ’peni bwam buni kun bulabul mo dhali kun dheru bwa mo ’peni gwoŋ gana/ mo, mmoṯoshkina uni ki mii ma gayiin jin luŋuwa luŋ mo ta ’pemen mmogam mii adu is mo. \v 6 Dhan mii ’kon kun gamuwa du is ki mii ma gayiin jin luŋuwa luŋ mo waḵki/ mo jin thisu is e di’d si’da/ mo, \v 7 haali/ ana ’konaki ’do miin tiya ’kup̱ pa mo e mony’cesh yan mo dhali a’di mishu ka jiŋ gana/ mo ki ana mola toŋ kamu/ bu’th mmoḵal ’peni mony’cesh mo. \v 8 Hili waḵki/ ana tana gi tonṯe/ mo dhali burrinye/ mo mmohi’th mo tani ana mina ’ko ka this mo i e mo gom uni gwansan mo. \v 9 Hili uni gwansan kun ’kona gwo ibwa mo mmota pa ki pa mo tani uni ṯa’kkin mo e mo jin paluwa pal mo dhali e mo ma gume/ jin bu’thki’da bu’th mo dhali eya ris miim p̱us mo dhali bwa jin onu gwo jin ta jama/ ki jama/ mo mmobul ’kwani ’kup̱ e mo jin daḵu gwo me’d mo dhali mo jin ’ce’duwa ’ce’d sho’k mo. \v 10 Haali/ mo jin enuwa guurush mo tani a’di ta’da birman goma ris tonthusi ’baar mo. Gom ’daŋ gwo yan jin ’kosho’d mo tani kun tiya perkin mo ’peni bway gi moŋgam gwo is mo dhali uni su’kkin ma dum buni ki la/a’d la/a’d ka ris mo. \s1 Mo/as Gana/ jin Asu ki Moŋgam Gwo Is mo \p \v 11 Hili gom /e jin ta wathi/ ma Arumgimis mo tani ship̱iṯi/a ŋwac̱a/ mo ’pena ris to gwansan mo. Guyi a’di ki e mo a’di jin ta mo ma ḵar/e mo dhali mii ma gayiin mo dhali moŋgam gwo is mo dhali mo/en mo dhali sho’k mmoṯel mo dhali mon’thup̱ e mo. \v 12 Asi ki as gana/ mo gom moŋgam gwo is mo. Budhi a’di ki nyeŋ mo, a’di jin ta mondiki/e ki sule/ ya ye ’ba/ mo, a’di jin yuḵkunu /e nycine/ mo me’d jin pikina /e gwom ’boro’d mo gom a’di mo e buŋ’kusi iman/o gwo ka ris mo. \v 13 Dhali e buŋ’kus ma Arumgimis mo, a’di jin c̱iki moŋ’koki/e mo goma ris to ’baar mo dhala Ḵrisṯẖos jin ta’da Yesus mo, a’di jin c̱iki gwom piti ibwambor ma Punthi Bilaaṯus mo, gwo jin pikina a’di ki piŋ gana/ mo tani \v 14 aha/ ḵana /e gwo mo mmodhu gwoŋḵan jin ’kwarkunu mo ki dar gi monyo/o’d mo dhali ki dar gi mo jin waḵuwa waḵ mo ntaga tee jin mina Tap̱a Yesus Ḵrisṯẖos bana piyu/ mo be. \v 15 Dhali a’di yansan minu ṯor eya tente/ mo, ka tente/ jin ta’da ḵar/e mo jin ta Liṯgany gana/ ’de/ ki lish mo, jin ’boru mii mo, dhali a’di jin ta’da Maliḵ jin doshki’da p̱o/ imaliḵi ’baar mo dhali a’di jin ta Tap̱a jin doshki’da p̱o/ itap̱a ’baar mo, \v 16 a’di jin ta a’di ki is piti a’di ’de/ mo jin dar gi mo jin wunu mo dhali jin c̱a’bki’d mo e moŋkush jin molu ii ’kup̱ki cine/ mo, jin dina wathiŋ kamu/ ṯal ’de/ ki p̱ar e mo ki sule/ sule/ mo walla jin mola wathiŋ kamu/ p̱ar e ki sule/ mo be. E a’di mo tani montaḵ midi di mo dhali mo jin tanu tap̱a midi di ki sule/ sule/ ya ye ’ba/ moonnii. Amen. \p \v 17 Dhali gom uni kun ta pa ki pa mo e mony’cesh yan mo tani ḵani uni gwo mo mmo’koki ’do bwam buni isi mis mo walla mmodhu mo ma ’teŋ kap̱em buni ap̱o/ pa jin tana uni jin mii uni e ki ’kala/ ’kala/ mo, hili ap̱owa Arumgimis mo jin c̱iki ana aris to ’baar mo ki moŋ’ka’d me’di is mo mmo’kuny bwa mo. \v 18 Uni mini mii to ki ’bore/ mo mmota pa ki pa mo ki miim ’borga/ mo dhali mmoc̱i to ki nyanye/ ka ’ka’d me’di is mo. \v 19 Wakan mmodhuna uni to mmo/ish ḵumma/ mo gom is buni mo mmota moŋḵa’b jin ’bora’bor mo gom yilaŋ kamu/ mo tani wakan ki uni mini bu’th mondiki/e ki nyeŋ mo, a’di jin ta mondiki/eŋ gana/ mo be. \p \v 20 Ayy Ṯimuṯẖawuus, kari a’di jin ḵankunu /e mo mmodhu mo. Theṯẖi/ mo ’peni gwo jin waluwa ṯor ka wuny is mo ki dar gi mii ma gayiin mo dhali ayiseŋ gwo kun ’kon ki c̱a’ckon mo gom gwom p̱us jin yuḵu ki gwo gi moyuḵ mo. \v 21 Haali/ ki mo jin baṯẖu/ a’di i’ko’d mo tani kun tiya ŋana/ du’d mii mo isi gwo jin gamu is mo be. \p A’the midi di e /e mo.