\id 1JN  
\ide UTF8 
\h YOHAAN ’DE/ 
\toc1 Gwo jin Ṯwa/a/ jin ’Kwar ma YOHAAN mo 
\toc2 YOHAAN ’DE/ 
\mt1 Gwo jin Ṯwa/a/ jin ’Kwar ma YOHAAN mo 
\c 1  
\s1 Gwo gi Mondiki/e mo 
\p  
\v 1 A’di c̱aan jin diki’d ’peni ka muŋ’kup̱ mo dhali a’di c̱aan jin ciḵa aman mo dhali a’di c̱aan jin misha aman mo ki em bam mo dhali a’di c̱aan jin hila aman mo dhali jin tana aman is ki me’d bam mo isi gwo gi mondiki/e mo be,  
\v 2 dhali mondiki/e yan ṯoru eya tente/ mo dhali a’di hilkina aman mo dhali aman itana iman/o gwo gom a’di mo dhali mondiki/e yan ṯora aman um eya tente/ mo, mondiki/e yan jin di’d ki sule/ sule/ ya ye ’ba/ mo, jin di’d eya Baba mo tani dhali a’di ṯorkunu aman eya tente/ mo be,  
\v 3 a’di c̱aan jin misha aman mo dhali ciḵ mo tani ṯora aman um eya tente/ si’da/ mo ki um si’da/ mini nyaḵ to mii ki aman mo dhali tom bana jin nyaḵa ana mii mo tani nyaḵka Baba mo dhali nyaḵki Ya/m piti jin ta’da Yesus Ḵrisṯẖos mo be.  
\v 4 Dhali to gwansan ’kwarkina aman mo, ki moŋ’kuny bwam bana minu thim mo be. 
\s1 Arumgimis Ta Moŋkush mo be 
\p  
\v 5 Yan ta gwo be jin ciḵa aman ’peni a’di mo dhali jin c̱ina aman e um mo, ka Arumgimis ta moŋkush mo dhali e a’di mo tani mondhurumi’d p̱iyi’di ’baar mo be.  
\v 6 Waḵki/ ana ona gwo ki ana nyaḵa to mii ki a’di mo dhali ii ka yiha/ mo e mondhurumi’d mo tani ana tana ṯor mo dhali gwoŋ gana/ ’kona ana ki mii mo be.  
\v 7 Hili waḵki/ ana iina mo e moŋkush mo tani me’d a’di jin di’d e moŋkush mo tani ana nyaḵa to mii ka rem ’kup̱ mo dhali abas ma Yesus jin ta Ya/m piti mo tani a’di pucumki ana aris miinthusi ’baar mo be.  
\v 8 Waḵki/ ana ona gwo ki ana dara gi miinthus mo tani ana heka is banaŋ gana/ e mo dhali gwoŋ gana/ yisa di’d e ana mo.  
\v 9 Waḵki/ ana pina gwo miinthus bana mo tani a’di ta a’diŋ gana/ mo jin mii’d ka ḵar/e mo jin midi dhal ana miinthus bana ’pen mo dhali p̱ucum ana ’pena ris mii kun ’koki ta kuŋ ḵar/e mo be.  
\v 10 Waḵki/ ana ona gwo ki ana dara gi miinthus mo tani ana kara a’di mo mmota aṯor mo dhali gwom piti diki di e ana mo be. 
\c 2  
\s1 AḴrisṯẖos Ta’da Manmalas Bana mo 
\p  
\v 1 Ushi uc̱im pema, aha/ ’kwarkina um gwo yansan mo ki um mini ’koki mii miinthus mo be. Hili waḵki/ wathiŋ kamu/ mii miinthus mo tani ana tana ka Manmalas mo nyaḵka Baba mo, aYesus Ḵrisṯẖos jin ta’da ḵar/e mo,  
\v 2 dhali a’di ita moŋgwam gom miinthus bana mo, dhali yisa jasi gom kum bana yisa, hili si’da/ gom miinthus gi ’kwaniny’ceshi ’baar mo be.  
\v 3 Dhali gom a’di yan kan mo tani ana mina mish mo mo ki ana misha a’di mo waḵki/ ana dhuna gwoŋḵan piti kun ’kwarkunu mo be.  
\v 4 A’di c̱aan jin o gwo mo ki: Aha/ misha a’di mo, ihili ush gwoŋḵan piti kun ’kwarkunu ha e mo tani a’di ta’da ṯor mo be dhali gwoŋ gana/ yisa di’da e a’di mo.  
\v 5 Hili a’diyin jin dhu gwom piti mo tani e a’di mo ka jiŋ gana/ mo/en goma Arumgimis thimu ki ’bore/ mo be. Ki a’di gi wakan mo tani ana mina mish mo mo ki ana ’kona e a’di mo be.  
\v 6 A’di jin o gwo mo ki a’di c̱a’bki’d e a’di mo tani ḵa ya’d e bwaya ’de/ jin yana a’di mo ba/. 
\s1 Gwoŋḵan jin ’Kwaru jin Ta jin This mo 
\p  
\v 7 Um gun enu mo, aha/ dinaki ’kwar um gwoŋḵan jin ’kwarkunu mo jin ta jin this mo hili gwoŋḵana dhamo/ jin ’kwarkunu mo a’di jin takina um ’peni ka muŋ’kup̱ mo, gwoŋḵana dhamo/ jin ’kwarkunu mo jin ta gwo jin ciḵkina um mo be.  
\v 8 Doḵ/e aha/ ’kwarkina um gwoŋḵan jin ta jin this jin ’kwarkunu mo, a’di jin ta jiŋ gana/ e a’di mo dhali e um mo, haali/ mondhurumi’d peki’d mo dhali moŋkush gana/ a’di ’twaḵki mo mo hila/ mo be.  
\v 9 A’di jin o gwo ki a’di di’d e moŋkush mo dhali shi/a kam piti i e mo tani a’di di’d e mondhurumi’d naskina/ mo be.  
\v 10 A’di jin ene’da kam piti mo tani c̱a’bki’d e moŋkush mo be dhali e a’di mo tani mo jin gwoluwa gol p̱iyi’d mo be.  
\v 11 Hili a’di jin shi/ki’da kam piti i e mo tani a’di di’d e mondhurumi’d mo dhali ya e mondhurumi’d mo be dhali diki mish mo mo, mo jin yakina a’di iya mo haali/ mondhurumi’d dha’bki a’di em piti mo be. 
\p  
\v 12 Aha/ ’kwarkina um gwo yan mo, ushi uc̱i, haali/ miinthus bum dhalkunu um ’pen mo gom gway piti mo be.  
\v 13 Aha/ ’kwarkina um gwo yan mo, ibaba, haali/ um mishi a’di mo, a’di jin di’d ’peni ka muŋ’kup̱ mo. Dhali aha/ ’kwarkina um gwo yan mo, um kun ta ’kwanin dhuru’c mo, haali/ um p̱iki a’dinthus ’de/ yin e mo. Aha/ ’kwarkina um gwo yan mo, um kun ta uc̱i mo, haali/ um mishkina Baba mo be.  
\v 14 Aha/ ’kwarkina um gwo yan mo, ibaba, haali/ um mishi a’di jin diki’d ’peni ka muŋ’kup̱ mo. Dhali aha/ ’kwarkina um gwo yan mo, um kun ta ’kwanin dhuru’c mo, haali/ um ’bitha’bi’th mo dhali gwo ma Arumgimis c̱a’bki’d e um mo dhali um p̱iki a’dinthus ’de/ yin e mo be. 
\p  
\v 15 Dhalku/ ki en mony’cesh mo ma walla to kun ’kon e mony’cesh mo. Waḵki/ wathiŋ kamu/ eni mony’cesh mo tani mo/en goma Baba diki di e a’di mo be.  
\v 16 Haali/ aris to ’baar mo kun ’kon e mony’cesh mo kun ta mon’dap̱ e gi buŋgwar is mo dhali mon’dap̱ e gi e mo dhali mii mmodhu is ki ca mo tani a’di diki di ’pena Baba mo hili a’di ta jany ’cesh mo be.  
\v 17 Dhali mony’cesh peki’d mo dhali mon’dap̱ em piti mo, hili a’di jin mii’d ki bwa ma Arumgimis mo tani a’di c̱a’bki’d ki sule/ sule/ ya ye ’ba/ mo be. 
\s1 AḴrisṯẖos jin Diki Ta jiŋ Gana/ 
\p  
\v 18 Uc̱iya, a’di ta mo jiŋ ’ko’d mo dhali me’d jin ciḵa um gwo ka ḵrisṯẖosthus p̱u’dki’d mo tani wakan shwane/ arisa ḵrisṯẖos kun ’koki ta kuŋ gana/ p̱u’dkin mo. Dhali gom gwo gi wakan mo tani ana ki mish mo mo ki a’di ta’da cim jiŋ ’ko’d mo be.  
\v 19 Uni iikin ka pije/ ’peni ana mo hili uni ’koki ’ko ’peni ana mo haali/ waḵki/ uni mini ’taki ta kum bana mo tani uni mini ’taki rash ’ko e ana mo. Hili uni iikin ka pije/ mo ki a’di minu ṯor eya tente/ mo ki uni ’baar mo ’koki ’ko ’peni ana mo be.  
\v 20 Hili um ’koshu ki a’din ’de/ jin ḵogu mo dhali umi ’baar mo mishi a’di mo be.  
\v 21 Aha/ ’kwarkina um gwo yan mo, yisa haali/ um ’koki mish gwoŋ gana/ mo yisa, hili haali/ um mishi a’di mo dhali mish yan mo ka ṯora kamu/ yisa di’d e gwoŋ gana/ yan mo be.  
\v 22 Kaja a’di jin ta’da ṯor mo hili a’di jin waṯki gwo mo ka Yesus ta’da Ḵrisṯẖos mo. Yan ta’da ḵrisṯẖos jin diki ta jiŋ gana/ mo a’di jin waṯki’da Baba gwo mo dhali Ya/ mo.  
\v 23 A’din ’deŋ kamu/ jin waṯki Ya/ mo tani a’di diki ta ga Ababa mo. A’di jin piki gwo gom Ya/ mo tani a’di ta’d ga Ababa mo si’da/.  
\v 24 Dhalki a’di jin ciḵa um ’peni ka muŋ’kup̱ mo c̱a’ba’d e um mo. Waḵki/ a’di jin ciḵa um ’peni ka muŋ’kup̱ mo c̱a’ba’d e um mo tani yan’ko’d um mini ’ko e Ya/ mo dhali eya Baba mo be.  
\v 25 Dhali a’di ta gwo yansan jin okina a’di ana is mo jin ta mondiki/e ki sule/ sule/ ya ye ’ba/ mo. 
\p  
\v 26 Aha/ ’kwarkina um gwo yansan mo gom uni gwansan kun mini ’taki he’k um e mo be.  
\v 27 Hili moŋ’kosh jin bu’thkina um mo ’peni a’di mo tani c̱a’bki’d e um mo dhali um mini mii ’koki mii ta gi jan ’deŋ kamu/ jin midi ’taki ṯor um gwo mo, haali/ me’d moŋ’kosh piti ṯorki um gwo mo goma ris to ’baar mo dhali a’di ta gwoŋ gana/ mo dhali aṯor p̱iyi’d e a’di mo be. Me’d jin ṯora a’di um gwo mo tani wakan ’koyi e a’di mo ma. 
\p  
\v 28 Dhali shwane/ ushi uc̱iya, ’koyi e a’di mo ma, wakan ki a’di midi piyu/ mo tani ana mina ’taki ’koki ju/ mo dhali ’koki ḵo/ is ki mon’the is mo ibwambori a’di mo ki mom piti jin mina a’di p̱u’du/ mo be.  
\v 29 Waḵki/ um mishi mo mo ki a’di ta’da ḵar/e mo tani um mini mish mo mo ka ris uni ’baar ka ’deṯe/ ’deṯe/ kun miin ki ’bore/ mo tani dho’thkunu ’peni a’di mo be. 
\c 3  
\s1 Uc̱i ma Arumgimis mo 
\p  
\v 1 Hili mo/en ma Baba jin c̱ikunu ana mo ki ana minu yuḵ ki uc̱i ma Arumgimis mo. Dhali wakan ana tana uni mo be. A’di ta ’kup̱ gwo jin ’kona ’kwaniny’cesh ki mish ana mo haali/ uni ’koki mish a’di mo be.  
\v 2 Um gun enu mo, ana tana uc̱i ma Arumgimis shwane/ mo, a’di dinuki ṯor eya tente/ naskina/ mo a’di jin mina ana wa e mo, hili ana misha a’di ki a’di midi piyu mo tani ana mina e waki a’di mo haali/ ana mina p̱ar a’di e ki a’di wakan mo be.  
\v 3 Dhali aris ’kwani ’baar ka ’deṯe/ ’deṯe/ kun ’kon ka ’teŋ kap̱e/ e a’di mo tani dhelelki is buni mo me’d a’di mmodhelelkina a’di mo be. 
\p  
\v 4 Aris ’kwani ’baar ka ’deṯe/ ’deṯe/ kun miiki miinthus mo tani uni ’kona mii i’ba/ mo mmo’ce’d gwoŋḵan jin c̱inu mo. Miinthus a’di ita to jin ’ce’d gwoŋḵan jin c̱inu mo be.  
\v 5 Um mishin ki a’di ṯoru eya tente/ mo mmoḵal miinthus mo be dhali e a’di mo tani miinthus p̱iyi’d mo be.  
\v 6 Wathin ’de/ jin c̱a’bki’d e a’di mo tani a’di diki di mo mmomii miinthus mo. Dhali wathin ’de/ jin di’d mo mmomii miinthus mo tani a’di diki p̱ar a’di e mo walla diki mish a’di mo be.  
\v 7 Ushi uc̱iya, dhalku/ ki dhal wathin ’de/ bway mo mmohe’k um e mo. A’di jin mii’d ki ’bore/ mo tani ta’da ḵar/e mo me’d a’di mmotana a’diya ḵar/e mo be.  
\v 8 A’di jin di’d mo mmomii miinthus mo tani a’di ta ji gi tap̱a ma ruma ’cesh mo, haali/ tap̱a ma ruma ’cesh a’di miiki miinthus ’peni ka muŋ’kup̱ mo. A’di ta ’kup̱ gwo jin ṯoru Ya/ ma Arumgimis eya tente/ mo mmo’ce’d mii gi tap̱a ma ruma ’cesh sho’k mo be.  
\v 9 Wathin ’de/ jin dhodhu ’peni Arumgimis mo tani a’di diki di mo mmomii miinthus mo, haali/ buyempa ma Arumgimis c̱a’bki’d e a’di mo, dhali a’di mol di mo mmomii miinthus mo haali/ a’di dho’thkunu ’peni Arumgimis mo be.  
\v 10 Gom mii yan kan mo tani a’di iminu mish mo mo eya tente/ mo gom uni gun ta uc̱i ma Arumgimis mo be dhali gom uni gun ta uc̱i gi Tap̱a ma ruma ’cesh mo: A’diyin jin diki di mo mmomii miim ’boro’d mo tani a’di ’peni Arumgimis yisa walla a’di jin diki ena kam piti mo. 
\s1 Eni ka Rem ’Kup̱ mo 
\p  
\v 11 Haali/ a’di yansan ita gwo jin ciḵkina um ’peni ka muŋ’kup̱ mo ki ana mina en ka rem ’kup̱ mo be  
\v 12 dhali yisa mmowa e ka Kayiin mo a’di jin ta a’di ’peni a’dinthus ’de/ yin mo dhali ’kosha kam piti jwa mo. Dhali kata ’koshkina a’di a’di mo? Haali/ miim pitiŋ gana/ mo tani ta jin thus mo dhali mii ma kam piti ta jaŋ ḵar/e mo be.  
\v 13 Dhalku/ ki mer mo ma, iwaḵ pem, ki um shina ’kwaniny’ceshi e mo.  
\v 14 Ana misha ki ana pekina mo ’peni mowu mo e moŋ’koki/e mo haali/ ana ena awaḵ mo. A’di jin diki ena en mo tani a’di c̱a’bki’d e mowu mo be.  
\v 15 Macin ’de/ yin jin shi/ki’da kam piti i e mo tani ta’da man’kosha mee mo be dhali um mishin ki wathi/ jin ’koshki’da mee mo tani diki ta gi mondiki/e ki sule/ ya ye ’ba/ mo jin c̱a’bki’d e a’di mo.  
\v 16 Gom a’di yan kan mo tani ana misha mo/en mo ki a’di karki mondiki/em piti a’cesh mo gom ana mo dhali ana ḵa ba/ imina mii dhu moŋ’koki/em bana mo gom iwaḵ mo ba/.  
\v 17 Hili waḵki/ macin ’de/ yin jin ta gi to ga ’cesh mo dhali hila kam piti ki e mo e to jin mina a’di mii ta mo tani hili a’di ki mutha dum piti ap̱o/ a’di mo tani mo/en ma Arumgimis midi c̱a’bi a’di kata mo?  
\v 18 Ushi uc̱iya, dhalkina ki en ki gwo mo walla ka le’d mo hili ki mii mo dhali ki gwoŋ gana/ mo be. 
\s1 Ana Dara ki Monyju/ Ibwambor ma Arumgimis mo 
\p  
\v 19 Gom gwo gi wakan mo tani ana mina mish mo mo ki ana tana ’kwani ’peni gwoŋ gana/ mo dhali mmomisha dum bana ibwambori a’di mo be  
\v 20 waḵka dum bana waḵ ana mo. Haali/ Arumgimis a’di ca’d ka dum bana mo dhali a’di mishki’da ris to ’baar mo be.  
\v 21 Um gun enu mo, waḵka dum bana diki waḵ ana mo tani ana dara gi monyju/ mo ibwambor ma Arumgimis mo be.  
\v 22 Dhali ana bu’thkina ’peni a’di mo, ma to yin jin doṯkina ana a’di mo, haali/ ana ’kokina mo mmodhu gwoŋḵan piti kun ’kwarkunu mo dhali mmomii to jin ’bor a’di bwa mo be.  
\v 23 Dhali yan ta gwoŋḵan piti jin ’kwarkunu mo ki ana mina gam gway gi Ya/ is mo jin ta’da Yesus Ḵrisṯẖos mo dhali mmo/en ka rem ’kup̱ mo me’d jin ḵankina a’di ana gwo mo be.  
\v 24 Dhali aris uni gun dhu gwoŋḵan piti kun ’kwarkunu mo tani ’ko e a’di mo dhali a’di e uni mo. Dhali gom gwo gi wakan mo tani ana misha mo mo ki a’di c̱a’bki’d e ana mo ki Shi/in piti jin c̱ikina a’di ana mo be. 
\c 4  
\s1 Shi/in ma Arumgimis dhali Shi/in ma Ḵrisṯẖos jin Diki Ta jiŋ Gana/ mo 
\p  
\v 1 Um gun enu mo tani dhalku/ ki gam gwo is eya ris shi/in mo hili nyo/i aris shi/in mo mmop̱ar e waḵki/ uni ta ku ma Arumgimis mo, haali/ imanc̱i gwonthus uni iikin ka pije/ e mony’cesh mo.  
\v 2 Gom gwo gi wakan mo tani um mini mish mo mo ki Shi/in ma Arumgimis mo: Aris shi/in ’baar mo ka ’deṯe/ ’deṯe/ kun pi gwo ka Yesus Ḵrisṯẖos p̱u’dki’d mo ki buŋgwar is mo tani uni ’peni Arumgimis mo be,  
\v 3 dhali aris shi/in ’baar ka ’deṯe/ ’deṯe/ kun ’koki pi gwo ka Yesus mo tani uni ’peni Arumgimis yisa. A’di yan ta shi/in ma ḵrisṯẖos jin diki ta jiŋ gana/ mo, a’di jin ciḵkina um gwo mo ki a’di midi p̱u’du/ mo dhali shwane/ a’di diki’d e mony’cesh hila/ mo be.  
\v 4 Ushi uc̱iya, um ’peni Arumgimis mo dhali um p̱iki uni e ki mii mo. Haali/ a’di jin di’d e um mo tani a’di eḵki’d mo mmobol a’di jin di’d e mony’cesh yan e mo be.  
\v 5 Uni ta ku ga ’cesh mo, dhali kan mo tani gwo jin ona uni mo tani ta ku ga ’cesh mo dhali ’kwaniny’cesh ciḵki uni gwo mo be.  
\v 6 Ana tana ku ma Arumgimis mo. A’diyin jin mishki’da Arumgimis mo tani ciḵki ana gwo mo dhali a’di jin diki di ’peni Arumgimis mo tani diki ciḵ ana gwo mo be. Gom gwo gi wakan mo tani ana misha mo mo gom shi/in gana/ mo dhali gom shi/in jin thamu o mo be. 
\s1 Arumgimis Ta Mo/en be 
\p  
\v 7 Um gun enu mo, dhalki ana ena ka rem ’kup̱ mo ma, haali/ mo/en ta ji ma Arumgimis mo dhali a’di jin ene’da en mo tani dho’thkunu ’peni Arumgimis mo dhali a’di mishki’da Arumgimis mo be.  
\v 8 Dhali a’di jin diki di mo mmo/ena en mo tani a’di molki’da Arumgimis mo haali/ Arumgimis ta mo/en mo be.  
\v 9 Dhali e mii yan kan mo tani mo/en ma Arumgimis a’di ṯorkunu eya tente/ e bwam ana mo, ka Arumgimis hashki Ya/m pitin ’de/ mo e mony’cesh mo, wakan ki ana mina ’ko e a’di mo be.  
\v 10 Dhali mo/en a’dan be, yisa mmo/enkina ana Arumgimis mo hili mmo/enkina a’di ana mo dhali mmohashkina a’di Ya/m piti mo mmota mo jin gwamuwa gwam mo gom miinthus bana mo be.  
\v 11 Um gun enu mo tani waḵki/ Arumgimis ki en ana wakan mo tani ana ḵa ba/ imina mii en ka rem ’kup̱ si’da/ mo.  
\v 12 Wathimpan ’deŋ kamu/ yisa p̱arki’da Arumgimis e mo yisa. Waḵki/ ana ena ka rem ’kup̱ mo tani Arumgimis c̱a’bki’d e ana mo dhali mo/en piti thimkunu e ana mo be. 
\p  
\v 13 Gom gwo gi wakan mo tani ana misha mo mo ki ana ’kona e a’di mo dhali a’di e ana mo haali/ a’di c̱iki ana Shi/in pitiŋ gana/ mo be.  
\v 14 Dhali ana mishkina mo mo dhali ta iman/o gwo mo goma Baba mo mmohashkina a’di Ya/m piti mo mmota Amanwoṯẖ gom ’kwaniny’cesh mo be.  
\v 15 A’diyin jin pi gwo ka Yesus ta Ya/ ma Arumgimis mo tani Arumgimis c̱a’bki’d e a’di mo dhali a’di eya Arumgimis mo be.  
\v 16 Wakan ana misha mo mo dhali gam gwo is mo gom mo/en jin takin ma Arumgimis gom ana mo. Arumgimis ta ji gi mo/en mo dhali a’di jin c̱a’bki’d e mo/en mo tani c̱a’bki’d eya Arumgimis mo dhali Arumgimis c̱a’bki’d e a’di mo be.  
\v 17 Dhali mo/en a’dan be jin thimkunu e ana mo ki ana mina ’koki ta gi monyju/ mo goma cim jin dwallu gwo mo haali/ me’d jin wana a’di kan mo tani ana ’kokina mo e mony’cesh yansan mo be.  
\v 18 Moŋḵo/ isa kamu/ yisa di’da e mo/en mo hili mo/ena ’borgaŋ gana/ mo a’di ṯa’kki moŋḵo/ is ka pije/ mo. Haali/ moŋḵo/ is a’di gamkunuwa jisa mo dhali a’di jin ḵo/ki’da ḵo/ is mo tani diki thim mo/en mo be.  
\v 19 Ana ena en mo haali/ a’di nṯwa/a/ enki ana mo be.  
\v 20 Waḵka ciŋ kamu/ jin midi o gwo mo ki: Aha/ ena Arumgimis mo, dhali shi/a kam piti i e mo tani a’di ta’da ṯor mo, haali/ a’di jin diki ena kam piti mo tani a’di jin p̱arkina a’di e mo tani a’di mol ena Arumgimis mo ki a’di jin dina a’di ki p̱ar e mo be.  
\v 21 Dhali gwoŋḵan jin ’kwaru a’dan be jin takina ana ’peni a’di mo, ki a’di jin enki’da Arumgimis mo tani midi mii ena kam piti si’da/ mo be. 
\c 5  
\s1 Moŋgam Gwo Is A’di Ip̱iki Mii E mo e Mony’cesh mo 
\p  
\v 1 Aris ’kwani ’baar ka ’deṯe/ ’deṯe/ kun gamki gwo is mo ka Yesus ta’da Ḵrisṯẖos mo tani uni ita uc̱i ma Arumgimis mo dhali aris ’kwani ’baar ka ’deṯe/ ’deṯe/ kun enki a’di jin dho’thki’d mo tani enki a’di jin dho’thkunu si’da/ mo be.  
\v 2 Gom gwo gi wakan mo tani ana misha mo mo ki ana ena uc̱i ma Arumgimis mo, ki ana ena Arumgimis mo dhali mmoha gwoŋḵan piti e kun ’kwarkunu mo be.  
\v 3 Haali/ mo/en ma Arumgimis a’dan be ki ana mina dhu gwoŋḵan piti kun ’kwarkunu mo. Gwoŋḵan piti kun ’kwarkunu mo diki ta ton diṯi’d mo.  
\v 4 Haali/ a’diyin jin dho’thkunu ’peni Arumgimis mo tani p̱iki mony’cesh e ki mii mo. Dhali momp̱i mii e a’dan be jin p̱i mony’cesh e ki mii mo jin ta moŋgam gwo is bana mo be.  
\v 5 Kaja a’di ip̱iki mony’cesh e ki mii mo hili a’di jin gamki gwo is ka Yesus ta Ya/ ma Arumgimis mo be. 
\s1 Gwo jin Onu Isi gom Ya/ mo 
\p  
\v 6 Dhali yan ta a’di jin p̱u’dki’d ki yi’de/ mo dhali ka bas mo jin ta’da Yesus Ḵrisṯẖos mo, yisa jasi ki yi’de/ ’teya, hili ki yi’de/ mo dhali ka bas mo be.  
\v 7 Dhali Shi/in a’di ta’da aman/o gwo mo haali/ Shi/in a’di ta gwoŋ gana/ mo be.  
\v 8 Gwo kun onu mo tani uni ’koni kwara mo, Shi/in, dhali yi’de/, dhala bas. Uni kwara gwansan igami me’d mo be.  
\v 9 Waḵki/ ana budha gwo kun ona ’kwani mo tani gwo jin on ma Arumgimis mo tani a’di eḵki’d mo be. Haali/ gwo jin on ma Arumgimis a’dan be, ki a’di ta’da aman/o gwo gom Ya/m piti mo be.  
\v 10 A’di jin gamki gwo is e Ya/ ma Arumgimis mo tani a’di ta’da aman/o gwo e is piti mo. A’di jin diki gam Arumgimis gwo is mo tani kar a’di mo mmota aṯor mo haali/ a’di diki gam gwo jin on ma Arumgimis is mo gom gwo gi Ya/m piti mo be.  
\v 11 Dhali gwo jin onu a’dan be, ka Arumgimis c̱iki ana moŋ’koki/e ki sule/ ya ye ’ba/ mo dhali moŋ’koki/e yan e Ya/m piti mo be.  
\v 12 A’di jin ta gi Ya/ mo tani a’di ta gi mondiki/e mo be, dhali a’di jin diki ta gi Ya/ mo tani a’di dar gi mondiki/e mo be. 
\s1 Mishi Gwo ki Um Ta gi Moŋ’koki/e ki Sule/ Ya Ye ’Ba/ mo 
\p  
\v 13 Aha/ ’kwarkina um gwo yansan e um kun gam gwo is e gway gi Ya/ ma Arumgimis mo, ki um mini mish mo mo ki um ta gi moŋ’koki/e ki sule/ sule/ ya ye ’ba/ mo be.  
\v 14 Dhali yan ta mo jin ’kona ana ki ju/ mo jin takina ana e a’di mo, waḵki/ ana mina doṯ toŋ kamu/ isi ki bwam piti mo tani a’di ciḵki ana gwo mo be.  
\v 15 Dhali waḵki/ ana misha mo mo ki a’di ciḵki ana gwo mo e to yin jin doṯkina ana a’di mo tani ana misha mo mo ki ana mina bu’th a’di yin jin doṯkina ana a’di mo be.  
\v 16 Waḵki/ wathin ’deŋ kamu/ p̱arki’da kam piti e mo mmomii miinthus jin diki ta ji gi wunu mo tani a’di midi doṯa/ doṯ mo dhali Arumgimis midi c̱i a’di mondiki/e mo gom uni gwansan kun ta gi miinthus kun ’koki ta ku gi wunu mo. Miinthus ’kon kun gamu mo kun wunu mo. Aha/ dinaki o ki jaŋ kamu/ midi ’tho mo gom gwo yansan mo.  
\v 17 Aris mii kun thamu mii mo tani ta miinthus mo hili miinthus di’d jin diki ta ji gi wunu mo be. 
\p  
\v 18 Ana misha mo mo ki a’din ’de/ jin dhodhu ’peni Arumgimis mo tani diki di mo mmomii miinthus mo, hili a’di jin dho’thkunu ’peni Arumgimis mo tani karki a’di mo, dhali a’dinthus ’de/ yin diki ta a’di is ki me’d mo be. 
\p  
\v 19 Ana misha mo mo ki ana tana ku ma Arumgimis mo, dhali aris ’kwani gi mony’ceshi ’baar mo uni ’kon e mom’bi’th gi a’dinthus ’de/ yin mo be. 
\p  
\v 20 Dhali ana misha mo mo ki Ya/ ma Arumgimis p̱u’dki’d mo dhali c̱iki ana gwo mo mmomish ’ban mo, mmomish a’di jin ta jiŋ gana/ mo. Dhali ana e a’di mo a’di jin ta jiŋ gana/ mo, e Ya/m piti jin ta’da Yesus Ḵrisṯẖos mo. Yan a’di ita’da Arumgimis gana/ mo dhali moŋ’koki/e ki sule/ ya ye ’ba/ mo.  
\v 21 Ushi uc̱iya, dhuyi is bum ’peni tomp̱inycon mo ma.