\id 1TI - Ubir -Duncan Kasokason 27th March 1997 
\h 1 Timothy 
\toc1 1 TIMOTHY  PAUL AN FEF AINAUIN IGAYAM TIMOTHY AURIN 
\toc2 1 Timothy 
\mt1 1 TIMOTHY  
\mt2 PAUL AN FEF AINAUIN IGAYAM TIMOTHY AURIN  
\c 1  
\p
\v 1 Yau Paul on God ati Baiyawasotin a Keriso Iesu On dura bagai tamomousin on dura wawaninai iyoreu anat Keriso Iesu an baiyoyobotin amatar—  
\v 2 Timothy, yau fef agagayam om aurim, om on dura bag yau natu au nuabo ba, yabin om ebitutum on fasinai:  
\p Yau on God Tamat a Keriso Iesu ati Bada aurin ababayoi On an baibais, an kaber a an tuf on initem.   
\s1 Baisigogo Baibebeotis auris Abitainaya  
\p
\v 3 Yau agogoi om on Ephesus mafam gagaminai nan unama, yau ainau a’nan au Macedonia on nan awurem ato ari awurem men. Sabu fani nan on baisigogo baibebe ta ta on sabu sebibebeyis, on mes om on dura wawaninai osi sabu unawures on baibebe sinikirir.  
\v 4 Osi sabu unawures men asi wera sinisawarai ato osi dudur yabis wagas wat a osi wawas agiris asi dam warar wabis weromis siyaben senan, ato on bobo nanaba sefofour amonai on arimon gamo inmatar; osi on men God an gogoi nanaba sefofour on, atonio bobo on ati baitutumai nan tanabo.  
\v 5 Yau au dura atonio wawanin awurem onai om sabu uniyames sininuabo bonen, nuabo ato nunuas matafin emon innat, asi not on obinai wat sininonot sinsagob bobo sinafour, a dura bagai wat sinitutum.  
\v 6 Sabu fani on atonio yawas obin on sikirir ato dura yabis wagas wat auris sibikakafunen on nan asi eta sisararen.  
\v 7 Osi on segogoi God an baifafaro dura aurin on baibebeotis sinmatar mes, baise osi tous asi dura mamaba sinbikakafun on men sisagob on o mat osi tous on men sisagob dura mamaba sebikakafun on dura bag o ambin.   
\p
\v 8 Ot tasagob Baifafaro dura on obin, ato bobo an etai wat sinafour mamaba God egogoi nanaba on arimon obin.  
\v 9 Ot mat tasagob, dura bag baifafaro dura on sifouren, ato men sabu obis auris, baise baifafaro dura on sifouren sabu baifafaro astobenotis a bainauotis auris, sabu iyabon men God an yawas kakafaiinai semama a sebokomas auris, osi sabu men ayu an yawasai semama auris, osi sabu iyabon ayos tamas sasububunues auris, osi sabu iyabon sabu fani sebirabobis auris,  
\v 10 osi sabu iyabon kuke foro asi yawas ba sebiyayar auris, orot tous turas orot mat kuke foro asi yawas ba sebiyayar auris, osi sabu iyabon sabu seboes ato sabu touman auris agimai setotobonis agirotis mes auris, osi sabu iyabon sebisigogo a baisigogo dura on sebikakafunen auris a sabu iyabon God an dura maiauin sebiragitai yangan auris.  
\v 11 Atonio dura maiauin an baibebe on wasagobin amonai ungaturai, ato God on yau itutumeu an dura an kurereb mes, atonio Wasagobin on God an kudidirin a an baimomogin emon e’nat aurit.   
\s1 Baikakaiu God An Kaber aurin  
\p
\v 12 Yau on Keriso Iesu ati Bada aurin abikakaiwai, On an faiwar iteu bobo abobo aurin. Yau On abikakaiwai yabin On itutumeu ato irubineu On an bobo anabo mes,  
\v 13 basit ainau bag yau On aurin on baigigim dura aikakafun a baikokosar ekalesia yangan aites a On aurin dura komasis aikakafunen. Baise God on yau ikabereu yabin yau au baitutum ambin on mes yau bobo aifan afofour on men asagob on bobo komasis afofour.  
\v 14 Ato ati Bada an kaber gagamin auriu idebur isur ato baitutum a nuabo on iteu, on nuabo on ot sabu engon ebonanawaiit ato tanat Keriso Iesuai nan tabikaita on.  
\v 15 Atonio on dura bag abikakafun, om on am yawas tutufinai unboai a unitutum: Keriso Iesu inat au tafanam on sabu bokomasotis baiyawasis mes. Ato sabu sanasi yau on bokomasotiu bag,  
\v 16 baise on yabinai yau on God ikabereu, onai Keriso Iesu on nana yaterabobai imousiu ato auriu bobo ifour iyawasiu, yau on bokomasotiu bag sabu sanasi, baise yau on baiyoboen ba sabu engon tutufin auris, osi iyabon gibui On aurin sinbitutum a yawas mama wantoanin sinboboai auris on.  
\v 17 Ati Aiwab wantoan manin, On men arimon inarab a On men fofonin magin tanitai, God kaitamom wat—On tanifain taniduduranai au wantoan au wantoan! Dura bag.   
\p
\v 18 Timothy om on yau natu au nuabo ba, Yau on dura wawanin ato aubairuruotis ainau bag on dura om aurim sibikakafun on, on dura bainon min on awurem. Osi aubairuruotis asi dura si’yau, om on dura min on unboai am iyo mes on nan unigagam tiwag am ragit asi dura unbomerubes,  
\v 19 ato om am baitutum on nana unbokikin a aifan am bainonotai enonosin obin on nanaba unafour. Sabu fani on men asi bainonot obin aurin tainas sireben ato asi baitutum on sikomasai.  
\v 20 Osi sabu sanasi on Hymenaeus a Alexander, osi on ekalesia an kuayo emon on aboes sigat au koun nan Afaguban an faiwar babanai ayeinis sinama baimaki sinboai; atonio bobo on inibebeyes men gibui God aurin baigigim dura sinikakafun men.   
\c 2  
\s1 Tafaror Goa Amonai Kwafir An Eta  
\p
\v 1 Ainau on, yau abifefeyanim om am ekalesia mat on sabu engon tutufin auris wonbayoi, sabu asi gogoi aifan on God aurin wonbayoi a wonikakaiwai;  
\v 2 omi on aiwab auris wonbayoi a sabu iyabon baibad siboen semama, osi auris wonbayoi onai ot engon on sunubai a tuf an yawasai nan tanama, ot on God tankakafai a yawas obinai wat tuturat auris tanafour.  
\v 3 Atonio bayoi nanaba on arimon obin God ati Baiyawasotin taniyasisirai,  
\v 4 yabin On egogoi on sabu engon tutufin sinyawas ato sinnat dura maiauin on sinsagob.  
\v 5 Yabin God on kaitamom wat, ato On ekesin on basun an orot imatar God a sabu on iboes inat ebikaita on, Orot min Keriso Iesu,  
\v 6 On Toun ikutetai sabu engon tutufin asi bokomas auman simama on an baiyan gagaminai itobonis men. On Toun ikutetai on idura bag an werai bag God egogoi sabu engon tutufin yawas sinboai,  
\v 7 ato on fasinai God on yau iyafareu sabu men Jew yangan auris asi baiyoyobotin a asi baibebeotin mes amatar, onai baitutum an dura a dura maiauin aurin on dura atkurereb mes. Yau on men abisigo on; yau on dura bagai wat abikakafun!   
\p
\v 8 Yau agogoi orot efan menan menan semama on sinbayoi, orot iyabon asi yawas tutufinai God aurin sekutetai yangan wat on sinbayoi, ato osi imas sinbogagaien sinbabayoi on men yatatabai a gamo auman mes.  
\v 9 Mat yau agogoi jever on kakafai wat a asi not rubunaginai nan asi beber auris on sinmonag tiwag; osi men tefas sinyoai sinfinauen beberai sinout mes, o osi on men monag agim gold o wakek o beber asi baiyas gagamis on sinoten mes,  
\v 10 baise osi jever sau, osi God sekwakwafirai on bobo obis wat sinafour ato sabu osi sinites on sinidura bagis, jever asi monag ba min on bobo wat on sinafour.  
\v 11 jever on awas sinafot a kitumai nan God an dura sintatam mom.  
\v 12 Yau on jever men abibasites osi sinibebe o osi men orot auris sinibad mes; osi awas sinafot sunubai sinama mom.  
\v 13 Yabin Adam on ainau sifourai, weie gibui on Eve ba sifourai.  
\v 14 Ato men Adam sisigoai on; baise jever on sisigoai ato God an baifafaro dura on iyastob.  
\v 15 Baise jever inbififirig bobo nan on arimon inyawas, ato on nana inbitutum a inbinuabo, iniyamai kakafotin inmatar a toun inbitotorai yawas obin infofour on.   
\c 3  
\s1 Ekalesia Yangan asi Bainetewarotis  
\p
\v 1 Atonio dura abikakafun on dura bag: Orot iyafan egogoi ekalesia asi bainetewarotin inmatar on, egogoi bobo obin wat inafour.  
\v 2 Ekalesia asi bainetewarotin on men an komasin auman mes; on awan kaitamom wat, on an not on totorinai wat ininonot, on toun initotorai tiwag, on sabu sinkakafai; on sabu inikakaiwis inboes an goai iniwanis; on on fofonin sabu inibebeyes;  
\v 3 on men sareu wawanis intoman kwakwan inikokok mes, o on men baigagamotin mes, baise on rutanobin a tuf an orot; on men agim ininuaboai mes;  
\v 4 On toun awan nanatun on inkaifares tiwag a on iniyamai toun nanatun on tamas fonan sinboai sinkakafai.  
\v 5 Ato orot men isagob mamaba awan nanatun inkaifares on, ato on mamaba arimon God an ekalesia inkaifares?  
\v 6 On orot on men ato arimon inbosuruf inbitutum mes, on bobo nanaba infofour on arimon toun ingememenai ato God arimon on inimakiai ato Afaguban ibimakiai ba.  
\v 7 Sabu koun yangan men ekalesia amonai semama mat on ato orot sinkakafai, osi sabu men on bobo nanaba aurin sinfofour on arimon sinimamaiai ato siniyamai Afaguban an egirafai inafeu.   
\s1 Ekalesia asi Baibaisotis  
\p
\v 8 Ekalesia asi baibaisotis mat on eb asi bobo asi yawas on obinai wat sinafour a osi men baisigogo’otis mes; osi men sareu wine sintoman kwakwan mes a osi men asi faiwar siniyamai agim sawar auris sindadan kwakwan mes;  
\v 9 osi asi baitutum on nana sinbotan a asi not totorinai wat dura maiauin sinboai singat.  
\v 10 Osi ekalesia asi baibaisotis on ainau asi yawas unrutobonen uneit ato osi on rutobon sinsosowar on, osi asi bobo sinabo.  
\v 11 Osi ekalesia asi baibaisotis awawas mat on eb asi yawas obin wat sinafour a osi men sinyanu mes; osi asi not totorinai wat a asi boboai nan on sabu sinites sinitutum.  
\v 12 Ekalesia an baibaisotin awan on kaitamom wat, a on fofonin awan a nanatun on obinai wat inkaifares.  
\v 13 Osi ekalesia asi baibaisotis asi bobo obin wat sefofour on, ekalesia yangan on arimon osi wabis obin aurin on sinikakafunai a asi baitutum Keriso Iesuai sinyein on fofonin dura totor wat sinkurereb men sinaber mes.   
\s1 Yawas Buburin Gagamin  
\p
\v 14 Yau atonio fef om aurim agagayam on, yau anonosin kafakakai mom annat anitem.  
\v 15 Baise yau mamaba men gariwat annanat on, atonio fef on iniyoboem ot tout ati bobo on mamaba ekalesia an bobo tanabo God an dam warar auris on, ato osi dam warar min God yayawasin an ekalesia On wantoan emama, ekalesia yangan on God an dura maiauin on osi asi tutut a asi kufaiwar.  
\v 16 Ot ati baitutum buburin gagamin aurin on men iyafan tani inisosouf mes.  
\q1 Iesu Keriso on orot maiauin imatar usit ba ibo irobotet ato aurit igat iyoboet, ato On an Ayu iyoboet On an yawas on totorin wat, ato anea min On sit. Sabu sanasi nan On an dura on sikurereb, ato sabu tafanam engon tutufinai On situtumai ato On igai au safam God rus sininetewar.   
\c 4  
\s1 Baisigogo Baibebeotis  
\p
\v 1 Ayu rerebai iyau on ra gibui arimon sabu fani asi baitutum inafeu; osi arimon baisigogo ayu on auris sinifonabo ato dau asi baibebe on sinigibubunuai.  
\v 2 Osi baisigogo baibebe ato nanaba on sabu baisigogo’otis sibo segat, osi asi not on rabobin, sitau asi not on momot siyam isawar bait.  
\v 3 Sabu ato osi nanaba on sebibebe sau, tabin on komasin, men wontabin mes a bayu ta ta on men wonam mes. Baise God on ato osi bayu ifouren on tanam mes, ato osi sabu iyabon baitutumotis a osi iyabon sinat dura maiauin sisasagob on bayu aurin sinbayoi sinikakaiwai ato sinam.  
\v 4 God sawar engon tutufin ifofouren on obis wat; men sawar aifan tani tanisisiwei mes, baise sawar engon tutufin on bayoi baikakaiuai nan tanboai,  
\v 5 yabin God an dura a bayoi on ebiyamai baimomogin obin emamatar God aurin.   
\s1 Keriso Iesu An Agirotin Obin  
\p
\v 6 Om atonio osi dura taitaim tutuam unbibites on om arimon Keriso Iesu an agirotin obim unmatar, onai om uniyoboes atonio dura maiauin emon on am baitutum wawaninai erarat a dura maiauin ubo ubigibubunuai on.  
\v 7 Baise sabu ato wawat agirit asi baisigogo baibebe auris sebidudur on men amosi unar mes, om ekesim on nana Ayu an bobo wat aurin on unbisasagob tiwag God uniagirai aurin.  
\v 8 Usim aurin unkwakwarer on, arimon inibaisim usim obin wat inen aurin on, baise ayubim aurin unkwakwarer on eta au engonai on baimomogin gagamin bag unboai, yabin God unbiagirai on an baimomogin ari ra a ra gibui e’nat on unboai.  
\v 9 Atonio on dura bag wat abikakafun, om on yawas tutufinai unboai unitutum.  
\v 10 On fasinai ot nana tafeu tamisir a bobo taboen kwakwan yabin ot on God yayawasin dura bagai tamomousin inmatabir men innat inboet, On on sabu engon tutufin asi Baiyawasotin, gagamin bag on ato osi sabu iyabon On sebitutumai on.   
\p
\v 11 Om atonio dura wawanin a baibebe on unites.  
\v 12 Om men uniyamai sabu sinitem on om yabim ambin, yabin om jorei boboum wat, baise om on uniyamai baiyoboen ba baitutumotis auris, am dura unbikakafun, am bobo unbobo, am nuabo unbiyamai, am baitutumai, a yawas totorin wat unfofour on.  
\v 13 Om am wera unyein a unafourtobon wasai nan sabu auris God an dura unbibiyab, dura unkurereb a unbibebeyis, weie yau aurim annat.  
\v 14 Ayubit an siwar ato usimui yen on men unikirir inafeu mes, on siwar on ainau aubairuruotis sibikakafun, onai nan ekalesia asi sabu kwatus on imas unimui siyagai faiwar sitem.  
\v 15 Atonio osi bobo on unabo ato am yawas engon unkutetai osi bobo auris, onai om am bobo obin sabu engon sinitai om on am baitutumai on erarat.  
\v 16 Om toum uninateteim tiwag a om am baibebe mat unkaifarai tiwag. Om atonio osi bobo nana unbobo, yabin om osi bobo unbobo on arimon toum a sabu iyabon om am dura setatam on engon yawas wonboai.   
\c 5  
\s1 Baibad Baitutumotis auris  
\p
\v 1 Om men dura wawaninai nan orot kwatun unawur mes, baise sunubai unawur uniyamai on om tamam ba. Om jorig bobous uniyames on om taitaim tutuam ba.  
\v 2 Om jever kwatus uniyames on a’yom ba, a jeverig bobous uniyames on om rorobum ba, om ra fufur on yawas totorinai nan auris unafour.   
\p
\v 3 Om on kekena jever ato ekesis wat semama on unkakafes.  
\v 4 Baise kena jever ato nanatun auman o wawan auman on, uniyames osi fifirig asi bobo ainauin on ayubit an bobo on sinsagob ato sinboai singat a’yos auris ato on etaiai on osi fifirig on angaramin osi ba sinmisir a’yos tatamas a wa’was on sinkaifares, yabin on yawas nanaba on God osi auris iniyasisir.  
\v 5 Kena jever iyafan on ekesin mom emama, on men iyafan tani ekakaifarai, on dura bag God emomousin, ato on nana fom ra ebabayoi ebifefeyan God an baibais aurin.  
\v 6 Baise kena jever ato toun usin ikutetai usin an gogoiai nan toun ebiyasisirai on irabob nono, basit on yawasin emama min on.  
\v 7 On mes om on atonio dura wawaninai nan kekena jever unawures osi nana God aurin sinbabayoi onai ekalesia on men iyafan tani on kekena jever asi komasin tani ingaturai mes.  
\v 8 Baise iyafan men toun an dam warar inkakaifares, gagamin bag on ato toun an tara bag men ekakaifares on, on an baitutum ebisisiweiai ato on an yawas on ikomas kwakwan men ato orot men baitutumotin ba.   
\p
\v 9 Om am fef amonai kekena jever wabis ungagayamen on osi asi kwanda orot ton farat na igeg wat on unboes, men kena jever boboun tani unboai mes. On tefanai, on kena jever awan orot rus ra kaitamom wat sitatabin on unboai  
\v 10 a on kena jever on an bobo obis wat efofour on sabu engon sinsagobai: on kena jever on nanatun ibebeyes tiwag serarat, on sabu touman iboes an goai ebiwanis, on God an sabu ass esosouen, on sabu asi yababan segaturai on ebibaisis, a on toun ikutetai bobo obis ta ta on efofour.   
\p
\v 11 Baise om men kekena jever bobous wabis on am fef amonai ungayamen mes; yabin osi usis asi gogoi nanaba iniyames sintatabin on, osi arimon kous on Keriso aurin sinyein,  
\v 12 on mes osi arimon sinnos on asi aumatan ainau Keriso aurin si’yaumatan on siyastob.  
\v 13 Mat osi bobo siyamai sisagob goa goa segeg sesusur asi wera engon sebisawaren; baise komasin bag on, osi sisagob seyayanu a sabu fani asi yawas seiten on auris sebikakafunen sau, osi bobo on men nanaba sitafour.  
\v 14 On mes yau agogoi on kekena jever bobous on sintabin, fifirig sinarat, ato tous asi goa sinkaifaren, onai ot ati ragit on men arimon sinitet aurit dura komasis sinikakafunen on.  
\v 15 Yabin kekena jever fani on men ari asi baitutum sikirir ato Afaguban on sebigibubunuai.  
\v 16 Baise jever iyafan Keriso ebigibubunuai on an dam warar amonai kekena jever semama on, on toun on kekena jever inkaifares ato men bit ekalesia yangan inites mes, onai ekalesia yangan on kekena jever iyabon ekesis mom semama on wat sinkaifares.   
\p
\v 17 Sabu kwatus osi iyabon bobo obin sefofour ekalesia yangan sebinetewaris tiwag on osi siyobis nono asi baiyan ra ruam nanaba sinboai, gagamin bag on osi iyabon bobo wawanin sebobo dura sekurereb a sabu sebibebeyis on.  
\v 18 Yabin God an dura buk amonai sigayam siyau, “Foro ox annai nan ebobo sawareg efasfifinimen on men awan unyafotai mes a bobo’otin on fofonin an baiyan inboai.”  
\v 19 Iyai iyafan ubar ekalesia asi orot kwatun inbibitai on men on an dura untatam mes ab sabu ruam o ton sinibasit on asi dura unboai.  
\v 20 Sabu iyabon sebokomas on wasai nan unagam unawures, onai sabu fani on bobo nanaba sinitai on sinaber.   
\p
\v 21 God a Keriso Iesu a anea kakafotis nasi on atonio osi dura wawaninai awurem on auris unifonabo, ato om am bobo unbobo on men iyafan tani aurin om am gogoi on aurin unyein mes.  
\v 22 Om men gariwat orot tani aurin imam on tefanai unyagai unkutetai Bada an bobo inabo mes. Tuturam asi bokomas on men turin unboai mes; ekesim matafim wat unama.  
\v 23 Om men sareu wat untoman mes, baise wine kafakakai mat untotoman yam amom inbibaisin, onai om men ra fufur unsasawau mes.   
\p
\v 24 Sabu fani asi bokomas on rerebai taiten, ato osi asi bokomas on nasi ainau enan sinigurubabanai mes; baise sabu fani asi bokomas on gibui weie taniten.  
\v 25 On eta kaitamomai sabu asi bobo obis on rerebai taneit, a basit osi sabu fani asi bobo obis on men rerebai taneit, a men arimon nana bubuniai si’nen on arimon sinirereb.   
\c 6  
\p
\v 1 Osi sabu iyabon Keriso an baigibubunuotis agirotis on asi babadis auris on asi kakaf gagamin bag auris sinyein, onai babadis on men iyafan tani dura komasis ati God Wabin a ati baibebe aurin inikakafun mes.  
\v 2 Agirotis asi babadis on baitutumotis, on an yabin min osi engon on taitais tutuas wat Kerisoai, baise agirotis on men asi babadis sinisisiweiis mes. Ab osi on asi babadis siniagires tiwag, yabin osi agirotis iyabon asi bobo obin sefofour min baitutumotis sebibaisis yabin osi sebinuabois on mes.  
\s1 Baisigogo Baibebe a Dura Bag Sawarotim  
\p Om atonio osi bobo auris on sabu unibebeyis a auris dura unkurereb.  
\v 3 Iyai iyafan baibebe magin tani inbibebe a ot ati Bada Iesu Keriso an dura maiauin aurin men inbibasitai a men ot ati baitutum an baibebe inbiyamai on,  
\v 4 on toun ebifain ato men bobo aifan tani isagob on. On sawau ibo ato on an gogoi on sabu mat sinbibas a duraiai mat sinagam, ato on bobo arimon iniyamai baiboboar inmatar, on bobo komasin inafour, dura komasis inbikakafun, on tuturan auris komasinai inbinatutumures,  
\v 5 ato sabu on nanaba ra engon segagam on asi not men ebobo tiwag a osi auris dura maiauin on men tani yen on. Osi senonosin ato baitutum an eta iniyamai on nan unnat sawarotim unmatar.   
\p
\v 6 Dura bag, baitutum on orot jever ebiyamai enat sawarotin emamatar, on ato aifan eboai on ebifofonin on aurin.  
\v 7 Ot min sawar aifan tabo tanat au tafanam? Ambin bag! Ot min sawar aifan tafanam emon tanboai tangat? Ambin bag!  
\v 8 On mes ot aurit bayu a beber sen on basit on min ato fofonin ot aurit.  
\v 9 Baise osi sabu iyabon segogoi sawarotis sinmatar mes on, ato Afaguban an rutobon seboai on sefefeu, osi bobo yabis ambin a bobo komasis tous inbigawudes an bobo on iboes an egirafai sifeu ikomasis ato aunas aunas sigorosis isawar.  
\v 10 Yabin sabu agim sebinuaboai kwakwan on, ebiyames bobo komasis magis magis segaturen. Sabu fani on sigogoi agim sitboai mes, baise agim iyames on asi baitutum emon sifeu ato nunuasi on yababan sigaraba sen.   
\s1 Ekesim am Dura  
\p
\v 11 Baise om on God an orot, atonio osi bobo engon tutufin emon on unabaseir. Om unafourtobon yawas totorin on unboai, om God uniagirai, om am baitutum On aurin unyein, om sabu uninuabois, om bobo yaterabobai nan unfaskikin a nuataiai nan bobo unafour.  
\v 12 Om unafourtobon am baitutum on nana unbotan, ato orot ayaiotin efofurtobon yai tuturan mat sebigeg ba, ato yawas mama wantoanin on toum unsowarai unboai; yabin atonio yawas emon on God iyorem ato om am baitutum Kerisoai ubiyatet on sabu sigaraba sitatam.  
\v 13 God nanai sawar engon tutufin yawas ebites, a Keriso Iesu nanai on dura maiauin Pontius Pilate nanai nana itawar dura ikurereb, onai dura wawaninai awurem:  
\v 14 Om osi dura auris unifonabo a om nana baitutumai unama a om men bobo komasin tani unafour mes, om on nanaba unama weie ati Bada Iesu Keriso an Ra innat ingat inrobotet.  
\v 15 An werai bag God arimon Iesu Keriso infourai inrobotet, On on baimomogin a On ekesin Bainetewarotin, On on Aiwab, aiwab engon tefasi, a On Bada, babad engon tefasi.  
\v 16 On ekesin God yawas mama wantoanin; On ratafin gagaminai bag nan emama on men iyafan tani aurin inkufoforen on. Men iyafan tani toun matanai it; o men iyafan tani arimon toun matanai initai. On aurin wat tanifain taniduduranai a On an Faiwar on mama wantoanin! Dura bag.   
\p
\v 17 Sabu atonio tafanam an yawasai sebisawarotis on, dura wawaninai unawures men sintaseseir mes, baise asi baitutum sinyein, men ato sawarotim unmatar aurin on; baise osi asi baitutum on God aurin sinyein. On sawar engon nunuan tutufinai ebitet taniyasisir aurin.  
\v 18 Om dura wawaninai unawures bobo obin sinafour, osi bobo obis sinafour nan sawarotis sinmatar, osi on nunuas tutufinai sawar sabu sinites a sinbotitiwagis tuturas mat sinraram bonen.  
\v 19 On etaiai on osi arimon tous auris on sawar sintubabaren onai osi ass nan faiwarinai sinrou ra gibui enat aurin. Namon osi arimon yawas sinbokikin, on min yawas maiauin bag.   
\p
\v 20 Timothy, om God itutumem bobo engon tutufin ibitem on unkaifarai tiwag. Sabu ato dura yabis ambin sebikakafun a dura maiauin aurin sebiragitai segagamo on men amosi unar mes, sabu fani on fetag baisigogo dura aurin on sau, “Sagob.”  
\v 21 Sabu fani sau on sagob sibo on yabinai osi asi baitutum an eta on sisarar.  
\p God an kaber on omi engon tutufin aurim inama.